1 TESALONICENSES

1 TESALONICENSES

¹Pablojon quic’ot Silvano, quic’ot Timoteo. Wolic ts’ijbubeñet lojon ili jun xñopt’añet bʌ la mu’ bʌ la’ tempan la’ bʌ ya’ ti Tesalónica, ochemet bʌ la ti Dios lac Tat yic’ot ti lac Yum Jesucristo. La’ aq’uentiquetla i yutslel yic’ot i ñʌch’tʌlel la’ pusic’al ch’oyol bʌ ti Dios lac Tat yic’ot ti lac Yum Jesucristo.

Xpʌsoñelob jini año’ bʌ ti Tesalónica

²Wolic chʌn suben lojon wocolix i yʌlʌ Dios cha’añetla ti la’ pejtelel. Wolic tajet lojon ti oración. ³Ti’ tojlel Dios lac Tat wolic chʌn ña’tan lojon bajche’ tsa’ la’ ñopo Dios, yic’ot bajche’ woli la’ c’uxbin, yic’ot bajche’ woli la’ pijtan lac Yum Jesucristo. Wen tsiquil la’ xuc’tilel ti la’ melbal, come woli la’ wen cha’liben i ye’tel cha’an c’ux mi la’ wubin.

⁴Cujil lojon, hermanojob, c’uxbibiletla i cha’an Dios tsa’ bʌ i yajcayetla. ⁵Come mach to’ol t’anic jach jini wen t’an tsa’ bʌ c subeyet lojon. Tsa’ tili ba’ añetla yic’ot i p’ʌtʌlel Dios yic’ot i p’ʌtʌlel jini Ch’ujul bʌ Espíritu. Tsa’ wen tsictesʌbentiyetla ti isujm. La’ wujil bajche’ tsa’ ajniyon lojon ti la’ tojlel cha’an la’ wenlel. ⁶Tsa’ caji la’ tsajcan lac Yum che’ bajche’ tsa’ la’ tsajcayon lojon. Anquese cabʌl tsa’ la’ taja la’ tic’lʌntel, tsa’ la’ ñopo jini t’an yic’ot i tijicñʌyel la’ pusic’al ch’oyol bʌ ti Ch’ujul bʌ Espíritu. ⁷Che’ʌch woli la’ pʌs bajche’ yom mi’ melob pejtelel xñopt’añob ti Macedonia yic’ot ti Acaya. ⁸Come mach jinic jach año’ bʌ ti Macedonia yic’ot ti Acaya tsi’ yubibeyob i t’an lac Yum tsa’ bʌ la’ pucu. Pero ti jujumpejt lum tsa’ix ubinti bajche’ tsa’ la’ ñopo Dios. Ti pejtelel yujilob, jini cha’an mach wersajic mic sub lojon. ⁹Come woli’ subob bajche’ tsa’ la’ pʌyʌyon lojon ochel ba’ añetla yic’ot bajche’ tsa’ la’ cʌyʌ dios tac cha’an mi la’ ñop jini mero Dios, cha’an mi la’ cha’liben i ye’tel jini cuxul bʌ Dios, ¹⁰cha’an ja’el mi la’ pijtan i Yalobil Dios mu’ bʌ caj i tilel ti panchan. Jiñʌch Jesús tsa’ bʌ tejchi ch’ojyel ba’an chʌmeño’ bʌ, mu’ bʌ i coltañonla cha’an ma’anic mi’ tajonla i mich’ajel Dios mu’ bʌ caj i tilel.

I ye’tel Pablo ya’ ti Tesalónica

¹Come la’ wujil hermanojob, mach lolomic jach tsac jula’tayet lojon. ²Anquese tsac ñaxan ubi lojon wocol yic’ot c tic’lʌntel ya’ ti Filipos, ch’ejlon lojon ti Dios, tsac subeyetla i wen t’an Dios anquese an cabʌl j contrajintel lojon. ³Che’ bʌ tsac xic’beyet lojon, mach sojquemic c t’an lojon, mach bibi’ic, mach c lotic lojon. ⁴Dios uts’at tsi’ q’ueleyon lojon che’ bʌ tsi’ yʌq’ueyon lojon que’tel cha’an jini wen t’an. Jini cha’an mic sub lojon. Ma’anic wolic sʌclan lojon j c’uxbintel ti’ tojlel winicob, pero ti’ tojlel Dios, come jiñʌch mu’ bʌ i q’uelbeñon lojon c pusic’al. ⁵Come ña’tʌbil la’ cha’an ma’anic tsac pejcayetla ti’ t’ojol bʌ t’an cha’an mic taj lojon c wenlel ti la’ tojlel. Ma’anic tsac wis tsʌjyu lojon chubʌ’añʌl. Testigojʌch Dios tsa’ bʌ i q’uelbeyon c melbal lojon. ⁶Ma’anic tsac sʌcla lojon i subentel c ñuclel ti winicob, mi ti la’ tojlel, mi ti’ tojlel yaño’ bʌ, anquese muc’ʌch mejlel j c’ajtin lojon chuqui com lojon, come apóstolon lojon chocbilon lojon majlel ti subt’an i cha’an Cristo.

⁷Pero uts tsa’ ajniyon lojon ti la’ tojlel che’ bajche’ x’ixic mu’ bʌ i c’uxbin i yalobilob. ⁸Che’ʌch tsac wen c’uxbiyet lojon che’ bʌ tsac subeyet lojon i wen t’an Dios. Mach cojic jach jini, pero chajpʌbilon lojon cha’an mic tsʌnsʌntel lojon cha’añetla, come wen c’uxbibiletla c cha’an lojon. ⁹C’ajal to la’ cha’an, hermanojob, tsac cha’le lojon wocol e’tel ti q’uiñil ti ac’ʌlel, cha’an ma’anic mi’ c’ojyel la’ mʌc’lañon lojon che’ bʌ tsac subeyet lojon i wen t’an Dios.

¹⁰Testigojetla bajche’ tsac mele lojon. Testigojʌch Dios ja’el. Xuc’ul c melbal lojon, toj ja’el. Ma’anic c mul lojon ti la’ tojlel mu’ bʌ la’ ñop. ¹¹La’ wujil tsa’ ajniyon lojon ti la’ tojlel che’ bajche’ la’ tat mu’ bʌ i cʌntan i yalobilob. Tsac xic’beyet lojon. Tsac ñuq’uesʌbeyetla la’ pusic’al ti jujuntiquiletla. ¹²Tsac subeyet lojon ti mandar cha’an mi la’ wajñel ti uts’at che’ bajche’ yom Dios tsa’ bʌ i pʌyʌyetla ochel ti’ yumʌntel ti panchan.

¹³Jini cha’an joñon lojon ja’el wolic chʌn suben lojon Dios wocolix i yʌlʌ. Come che’ bʌ tsa’ la’ ñopo i t’an Dios, tsa’ bʌ la’ wubi tic tojlel lojon, tsa’ la’ ñopo mach i t’anic winicob, pero i t’añʌch Dios woli bʌ i mel i ye’tel ti la’ pusic’al xñopt’añet bʌ la. ¹⁴Jatetla, hermanojob, tsa’ caji la’ tsajcan jini xñopt’añob ti Cristo Jesús, i cha’año’ bʌ Dios, mu’ bʌ i tempañob i bʌ ti Judea. Come lajal tsa’ la’ wubi wocol ti’ c’ʌb la’ pi’ʌlob che’ bajche’ jini hermanojob ti Judea ti’ c’ʌbob judíojob ¹⁵tsa’ bʌ i tsʌnsayob lac Yum Jesús yic’ot x’alt’añob i cha’an. Tsi’ chocoyoñob loq’uel. Ma’anic mi’ melob mu’ bʌ i mulan Dios. Woli’ contrajiñob pejtelel winicob. ¹⁶Jini judíojob woli’ tic’on lojon ti subt’an ti’ tojlel jini gentilob ame coltʌnticob. Tsa’ix ñumi ti p’is i mulob. Jini cha’an wolix i yubiñob i mich’ajel Dios mach bʌ yujilic lajmel.

Pablo yom i q’uel jini tesalónicajob

¹⁷Hermanojob, mach jalix mi caj lac cha’ q’uel lac bʌ. Anquese mach ya’ic añon lojon quic’otetla, pero añetla tic pusic’al lojon. Tsa cʌlʌ lojon tilel, come wersa com j q’ueletla. ¹⁸Jini cha’an com lojon majlel ba’ añetla. Joñon Pablojon, isujm junyajl cha’yajl tsac ñopo tilel ba’ añetla, pero Satanás tsi’ mʌctayon lojon. ¹⁹Come ¿chuqui c pijt lojon? ¿Chuqui jini c tijicñʌyel lojon? ¿Chuqui jini c ñuclel lojon? ¿Mach ba jateticla ti’ tojlel lac Yum Jesucristo che’ mi’ tilel? ²⁰Come c ñuclelet lojon, c tijicñʌyelet lojon.

¹Cabʌl tsac mele c pusic’al cha’an com cubin bajche’ añetla. Jini cha’an tsac ña’ta j cʌytʌl tic bajñelil ya’ ti Atenas. ²Tsac choco majlel la quermano Timoteo, x’e’tel i cha’an Dios, c pi’ʌl lojon ti e’tel cha’an i wen t’an Cristo. Tsac choco majlel cha’an mi’ xic’beñetla, yic’ot cha’an mi’ xuc’chocoñetla ti jini tsa’ bʌ la’ ñopo, ³ame anic majqui mi’ cajel ti wulwul t’an ti’ pusic’al cha’an jini wocol woli bʌ la’ ñusan. Jatetla la’ wujil lac tilel mi la cubin wocol che’ bajche’ tsi’ wʌn ña’ta Dios. ⁴Che’ ya’ añon lojon la’ wic’ot tsac wʌn subeyet lojon wersa mi caj lac ñusan wocol. Che’ʌch tsa’ ujti bajche’ tsa cʌlʌ lojon. Ña’tʌbil la’ cha’an. ⁵Jini cha’an ma’anic tsa’ mejli c chʌn pijtan t’an. Tsac choco majlel juntiquil cha’an mi cubin mi xuc’ul woli la’ ñop, ame tsa’ic i xiq’uiyetla ti mulil jini xiba, ame lon sajtic que’tel lojon ti la’ tojlel.

I t’an Timoteo

⁶Che’ bʌ tsa’ cha’ juli Timoteo, che’ bʌ tsajni ba’ añetla, tsi’ subeyon lojon xuc’ul woli la’ ñop. Woli la’ c’uxbin la’ bʌ. Woli la’ chʌn ña’tañon lojon ti uts’at. La’ womix la’ cha’ q’uelon lojon che’ bajche’ com c cha’ q’uelet lojon ja’el. ⁷Jini cha’an, hermanojob, anquese an c wocol lojon yic’ot c tic’lʌntel lojon, tsa’ tili i ñuclel c pusic’al lojon che’ bʌ tsa cubi xuc’ul woli la’ ñop. ⁸Wʌle tijicñayon lojon come xuc’ul woli la’ wajñel ti lac Yum. ⁹Jini cha’an cabʌl mic suben lojon Dios wocolix i yʌlʌ cha’añetla, come tsa’ix ñumi ti p’is i tijicñʌyel lojon c pusic’al woli bʌ cubin lojon cha’añetla ti’ tojlel Dios. ¹⁰Wolic chʌn cha’len lojon oración ti q’uiñil yic’ot ti ac’ʌlel ti jump’ejl c pusic’al cha’an mi mejlel c cha’ tilel j q’uelet lojon, cha’an mij cʌntesañet lojon chuqui tac anto yom mi la’ ñop.

¹¹Wʌle la’ i chajpʌbeñon lojon c bijlel Dios lac Tat yic’ot lac Yum Jesucristo cha’an mic tilel lojon ba’ añetla. ¹²La’ i p’ojlesañetla lac Yum. La’ i p’ojlesʌbeñet la’ c’uxbiya cha’an mi la’ wen c’uxbin la’ bʌ yic’ot cha’an mi la’ c’uxbin yaño’ bʌ ja’el che’ bajche’ wolij c’uxbiñet lojon. ¹³Che’ jini, lac Yum mi caj i xuc’chocon la’ pusic’al cha’an ma’anic mi’ tajtʌl mulil ti la’ tojlel, cha’an ch’ujul mi la’ wajñel ti’ tojlel Dios lac Tat che’ mi’ tilel lac Yum Jesucristo yic’ot pejtelel i cha’año’ bʌ Dios.

Yom mi la’ wajñel che’ bajche’ yom Dios

¹Wʌle, hermanojob, mic subeñetla ti wocol t’an cha’an mi la’ wajñel che’ bajche’ tsaj cʌntesayetla che’ bajche’ yom Dios. Mic xic’beñetla ti lac Yum Jesús cha’an mi la’ chʌn cha’len wersa la’ mel che’ bajche’ woli la’ mel wʌle. ²Come la’ wujilix bajche’ yom mi la’ wajñel che’ bajche’ tsac subeyet lojon ti lac Yum Jesús.

³Yom Dios mi la’ sʌq’uesʌntel. Mach yomic mi la’ taj la’ ts’i’lel. ⁴Ti jujuntiquiletla yom mi la’ ña’tan bajche’ yom mi la’ pʌy la’ wijñam ti’ sʌclel la’ pusic’al yic’ot c’uxbiya. ⁵Mach yomic i colosojlel la’ pusic’al che’ bajche’ jini sajtemo’ bʌ mach bʌ anic mi’ ñopob Dios. ⁶Mach yomic mi la’ lotin la’ pi’ʌl. Mach yomic mi la’ contrajin ti mulil, come lac Yum mi’ yʌq’ueñob i toj i mul pejtelel mu’ bʌ i melob bajche’ jini. Tsa’ix c subeyet lojon. ⁷Ma’anic tsi’ pʌyʌyonla Dios cha’an mi la cajñel ti lac bibi’lel. Tsi’ pʌyʌyonla cha’an mi lac sʌq’uesʌntel. ⁸Jini cha’an, majqui jach mi’ ñusan ili mandar mach winiquic woli’ ts’a’len. Woli’ ts’a’len Dios mu’ bʌ i yʌq’ueñonla Ch’ujul bʌ Espíritu.

⁹Mach wersajic mic ts’ijbubeñetla bajche’ yom mi la’ c’uxbin la’ bʌ, come cʌntesʌbiletla i cha’an Dios cha’an mi la’ c’uxbin la’ bʌ. ¹⁰Che’ʌch, woli la’ c’uxbin ja’el jini hermanojob ti pejtelel Macedonia. Pero ti wocol t’an mic subeñet lojon, hermanojob, la’ chʌn p’ojlic la’ c’uxbiya.

¹¹Cha’lenla wersa cha’an ñʌch’ʌl mi la’ wajñel. Yom bʌxetla ti la’ we’tel ti jujuntiquiletla. Cha’lenla e’tel ti la’ c’ʌb che’ bajche’ tsac subeyet lojon ¹²cha’an toj mi la’ wajñel ti’ wut yaño’ bʌ, cha’an ma’anic chuqui anto yom la’ cha’an.

Che’ mi’ cha’ tilel lac Yum

¹³Hermanojob, com lojon mi la’ ña’tan i sujmlel jini chʌmeño’ bʌ cha’an mach mi la’ mel la’ pusic’al che’ bajche’ yaño’ bʌ mach bʌ añobic i pijtaya. ¹⁴Come mi tsa’ix lac ñopo Jesús tsa’ bʌ chʌmi, tsa’ bʌ cha’ ch’ojyi, ña’tanla ja’el Dios mi caj i cha’ pʌy tilel yic’ot Jesús jini tsa’ bʌ chʌmiyob ti Jesús. ¹⁵Jini cha’an wolic subeñet lojon yic’ot i t’an lac Yum: Joñonla cuxulon to bʌ la, mi wʌ’to añonla che’ mi’ cha’ tilel lac Yum, mach ñaxañonicla mi caj lac letsel majlel ti’ tojel i wut jini chʌmeño’ bʌ. ¹⁶Come jini lac Yum mi caj i jubel tilel ti panchan. Mi caj i cha’len mandar. Jini ñuc bʌ ángel mi’ caj ti t’an yic’ot ja’el i trompeta Dios. Ñaxan mi’ cajelob ti ch’ojyel jini chʌmeño’ bʌ i cha’año’ bʌ Cristo. ¹⁷Ti wi’il joñonla cuxulon to bʌ la wʌ’ ti pañimil mi caj lac tem letsel majlel la quic’ot jini tsa’ bʌ chʌmiyob. Ya’ ti tocal ti panchan mi caj lac taj lac Yum. Che’ jini mi caj la cajñel yic’ot lac Yum ti pejtelel ora. ¹⁸Jini cha’an ñuq’uesʌben la’ bʌ la’ pusic’al yic’ot ili t’an.

¹Pero hermanojob, mach mejlic c ts’ijbubeñetla baqui bʌ ora, baqui bʌ q’uin mi’ caj ti ujtel. ²La’ wujil mi caj i tilel i q’uiñilel lac Yum che’ bajche’ xujch’ ti ac’ʌlel. ³Ba’ ora mi’ yʌlob ñʌch’ʌlix pañimil, ba’ ora mi’ yʌlob ma’anic tsiquil bʌbʌq’uen bʌ, che’ jini mi caj i bʌc’ jisʌntelob che’ bajche’ mi’ bʌc’ cajel ti bajq’uel x’ixic che’ mi’ yilan pañimil i yalobil. Mach mejlicob ti puts’el.

⁴Jatetla, hermanojob, ma’añetixla ti ac’ʌlel. Jini cha’an, mach mejlic i tajetla i q’uiñilel lac Yum che’ bajche’ xujch’. ⁵Come ti pejteletla añetla ti’ sʌclel pañimil, i cha’añetla i sʌclel. Ma’añetixla ti ac’ʌlel yic’ot ic’yoch’an bʌ pañimil. ⁶Jini cha’an, mach yomic mi la’ cha’len wʌyel che’ bajche’ yaño’ bʌ. Yom ch’ejlonla. Yom c’ajal la co. ⁷Come jini muc’o’ bʌ ti wʌyel mi’ cha’leñob wʌyel ti ac’ʌlel. Jini muc’o’ bʌ ti yʌc’ʌjel mi’ yʌc’añob ti ac’ʌlel. ⁸Pero ñumenix ac’ʌlel. Añonixla ti q’uiñil. Jini cha’an yom c’ajal la co. La’ lac xuc’chocon lac pusic’al ti jini woli bʌ lac ñop yic’ot c’uxbiya ame i tajonla laj contra. La’ lac p’is ti wenta laj coltʌntel woli bʌ lac pijtan ame cajiconla ti tsic pusic’al. ⁹Come Dios ma’anic tsi’ yajcayonla cha’an mi’ yotsañonla ti’ mich’ajel. Pero tsi’ yajcayonla cha’an mi’ yʌq’ueñonla laj coltʌntel ti lac Yum Jesucristo. ¹⁰Jesús tsa’ chʌmi cha’añonla cha’an mi lac tem ajñel yic’ot, mi cuxulon to la, o mi chʌmeñonixla. ¹¹Jini cha’an ñuq’uesʌben la’ bʌ la’ pusic’al. P’ʌtesʌben la’ bʌ la’ pusic’al ti uts’at che’ bajche’ woli la’ mel.

Mi’ subentelob chuqui yom mi’ melob

¹²Ti wocol t’an mic subeñet lojon hermanojob, q’uelela ti ñuc jini mu’ bʌ i cha’leñob i ye’tel lac Yum ti la’ tojlel, mu’ bʌ i cʌntañetla ti lac Yum, mu’ bʌ i tiq’uetla. ¹³Yom wen ñuc mi la’ chʌn q’uelob yic’ot la’ c’uxbiya, come woli’ cha’libeñob i ye’tel lac Yum. Ñʌch’ʌl yom mi la’ wajñel. ¹⁴Mic subeñet lojon ja’el, hermanojob, tiq’uila jini mu’ bʌ i to’ol ñusañob q’uin ti t’an. Ñuq’uesʌbeñob i pusic’al jini c’uño’ bʌ. Coltanla jini mach bʌ añobic i p’ʌtʌlel. Cuchbenla i sajtemal pejtelel winicob. ¹⁵Q’uele la’ bʌ cha’an ma’anic mi la’ q’uextan jontolil. Yom mi la’ chʌn mel chuqui uts’at yic’ot pejtelel la’ pi’ʌlob yic’ot pejtelel winicob.

¹⁶Chʌn tijicñesan la’ pusic’al. ¹⁷Chʌn cha’lenla oración. ¹⁸Subenla Dios wocolix i yʌlʌ ti pejtelel chuqui jach mi’ yujtel. Come che’ yom Dios ti Cristo Jesús. ¹⁹Mach la’ yʌp jini Espíritu. ²⁰Mach la’ ts’a’len chuqui mi’ subob jini x’alt’añob. ²¹Yom mi la’ wen ña’tan mi jiñʌch mero isujm bʌ woli bʌ ti sujbel. Ts’ijbanla cʌytʌl ti la’ pusic’al chuqui uts’at. ²²Mach la’ ñop jontolil mi junchajpic.

²³Jini Dios mu’ bʌ i yʌq’ueñonla i ñʌch’tilel lac pusic’al la’ i lu’ sʌq’uesañetla. La’ cʌntʌntic la’ ch’ujlel yic’ot la’ pusic’al yic’ot la’ bʌc’tal cha’an ma’anic la’ mul che’ mi’ tilel lac Yum Jesucristo. ²⁴Jini woli bʌ i pʌyetla xuc’ulʌch. Mi caj i mel che’ bajche’ mi’ yʌl.

²⁵Hermanojob, cha’lenla oración cha’añon lojon. ²⁶Aq’uenla cortesía pejtelel hermanojob. Ts’ujts’uñob ja’el ti sʌc bʌ la’ pusic’al. ²⁷Mic xic’beñetla ti lac Yum cha’an mi la’ pejcʌbeñob ili jun pejtelel hermanojob i cha’año’ bʌ Dios. ²⁸La’ ajnic la’ wic’ot i yutslel i pusic’al lac Yum Jesucristo.