1 CORINTIOS
11Pablojon quic’ot la quermano Sóstenes, pʌybilon ti apóstol i cha’an Jesucristo che’ bajche’ yom Dios. 2Wolic ts’ijbubeñetla ili jun, xñopt’añet bʌ la i cha’an Dios ya’ ti Corinto. Tsa’ix ajq’uiyetla ti’ wenta Dios. Pʌybiletla cha’an mi la’ wochel ti Cristo Jesús la’ wic’ot pejtel mu’ bʌ i pejcañob lac Yum Jesucristo ti’ c’aba’, baqui jach añob. Jini lac Yum i yumʌch ja’el. 3La’ aq’uentiquetla i yutslel i pusic’al Dios yic’ot i ñʌch’tʌlel la’ pusic’al ch’oyol bʌ ti Dios lac Tat yic’ot ti lac Yum Jesucristo.
Wocolix i yʌlʌ Dios
4Ti pejtelel ora mic suben c Dios wocolix i yʌlʌ cha’añetla, come aq’uebiletla i yutslel i pusic’al Dios ti Cristo Jesús. 5Ti Cristo tsa’ p’ojli la’ wenlel ti pejtelel chuqui tac uts’at. Jini cha’an wen la’ wujil t’an, wen an la’ ña’tʌbal. 6Come woli’ tsictiyel i ye’tel Cristo ti la’ tojlel che’ bajche’ tsac subeyetla. 7Che’ jini ma’anic chuqui anto yom la’ cha’an, come wen chajpʌbiletla woli la’ pijtan lac Yum Jesucristo mu’ bʌ caj i tsictiyel. 8Mi caj i chʌn xuc’chocoñetla c’ʌlʌl ti’ jilibal cha’an ma’anic la’ mul che’ ti’ q’uiñilel lac Yum Jesucristo. 9Xuc’ul Dios tsa’ bʌ i pʌyʌyetla cha’an mi la’ tem ajñel yic’ot i Yalobil, jiñʌch Jesucristo lac Yum.
¿T’oxol ba Cristo?
10Hermanojob, mic subeñetla ti wocol t’an ti’ c’aba’ lac Yum Jesucristo, yom junlajal mi la’ cha’len t’an. Mach mi la’ t’ox la’ bʌ ti leto. Tem ajñenla ti uts’at ti jump’ejl la’ pusic’al ti jump’ejl la’ ña’tʌbal. 11Come jini año’ bʌ ti’ yotot Cloé tsi’ subeyoñob woli la’ wʌ’len la’ bʌ, quermanojob. 12Mi cʌl isujm, come ti chajp ti chajp mi la’ cha’len t’an ti jujuntiquiletla. Juntiquil mi’ yʌl: Joñon i cha’añon Pablo. Yambʌ mi’ yʌl: Joñon i cha’añon Apolos. Yambʌ mi’ yʌl: Joñon i cha’añon Cefas. Yambʌ mi’ yʌl: Joñon i cha’añon Cristo. Che’ʌch mi la’ cha’len t’an. 13¿T’oxol ba Cristo? ¿Tsa’ ba ch’ijle ti cruz Pablo cha’añetla? ¿Tsa’ ba la’ ch’ʌmʌ ja’ ti’ c’aba’ Pablo? 14Mic suben Dios wocolix i yʌlʌ come ma’anic tsa cʌq’ueyetla ch’ʌmja’. Cojach tsa cʌq’ueyob ch’ʌmja’ Crispo yic’ot Gayo, 15ame anic majch mi’ lon al tsa’ aq’uentiyetla ch’ʌmja’ tij c’aba’. 16Tsa cʌq’ue ch’ʌmja’ Estéfanas ja’el yic’ot jini año’ bʌ ti’ yotot. Mach cujilic mi tsa cʌq’ue ch’ʌmja’ yambʌ. 17Come Cristo ma’anic tsi’ chocoyon majlel cha’an mi cʌc’ ch’ʌmja’. Tsi’ chocoyon majlel cha’an mic sub jini wen t’an. Mach ti’ ña’tʌbalic jini pañimil mic sub ame sajtic i sujmlel i cruz Cristo.
Cristo, i p’ʌtʌlel yic’ot i ña’tʌbal Dios
18Jini sajtemo’ bʌ mi’ yʌlob tonto jax i sujmlel jini cruz. Pero joñonla coltʌbilon bʌ la, la cujil jiñʌch i p’ʌtʌlel Dios. 19Come ts’ijbubil: “Mi caj c jisʌbeñob i ña’tʌbal jini cabʌl bʌ i ña’tʌbal. Mi caj c socbeñob i pusic’al jini año’ bʌ cabʌl i pusic’al”, che’en Dios. 20¿Bacan jini cabʌl bʌ i ña’tʌbal? ¿Bacan jini sts’ijbaya? ¿Bacan jini mu’ bʌ i ña’tan i sujmlel jini pañimil am bʌ wʌle? Dios tsa’ix i pʌsʌ sojquem jax i ña’tʌbal jini pañimil. 21Che’ bajche’ tsi’ wʌn ña’ta Dios, jini año’ bʌ ti pañimil ma’anic mi’ cʌñob Dios cha’an ti’ bajñel ña’tʌbal, come Dios mi’ c’ʌn jini t’an mu’ bʌ i yʌjlel ti tonto cha’an mi’ coltan jini mu’ bʌ i ñopob, come che’ yom i pusic’al. 22Jini judíojob mi’ wersa c’ajtibeñob i yejtal tac i p’ʌtʌlel. Jini griegojob mi’ sajcañob i ña’tʌbal pañimil. 23Pero joñonla mi lac sub Cristo tsa’ bʌ ch’ijle ti cruz. Jini t’an mi’ yʌc’ ti yajlel judíojob. Tonto jax jini t’an mi’ yʌlob gentilob. 24Pero jini pʌybilo’ bʌ, mi judíojob, mi griegojob, mi’ ña’tañob jini Cristo i p’ʌtʌlelʌch Dios, i ña’tʌbalʌch Dios ja’el. 25I ña’tʌbal Dios mu’ bʌ i yʌjlel ti tonto mach sojquemic che’ bajche’ i ña’tʌbal winicob. I melbal Dios mach bʌ anic i p’ʌtʌlel mi’ lon q’uelob winicob, ñumen p’ʌtʌlʌch bajche’ i p’ʌtʌlel winicob.
26Come ña’tanla, hermanojob, bajche’ tsa’ pʌjyiyetla. Ma’anic cabʌl ñuco’ bʌ am bʌ cabʌl i ña’tʌbal ti la’ tojlel. Ma’anic cabʌl p’ʌtʌlo’ bʌ, mi cabʌl yumʌlob. 27Jini mu’ bʌ i q’uejlel ti tonto wʌ’ ti pañimil Dios tsi’ yajca cha’an mi’ yʌc’ ti quisin jini cabʌl bʌ i ña’tʌbal. Tsi’ yajca jini mach bʌ p’ʌtʌlic ti pañimil cha’an mi’ yʌc’ ti quisin jini p’ʌtʌlo’ bʌ. 28Dios tsi’ yajca jini mach bʌ ñuquic ti pañimil yic’ot jini ts’a’lebil bʌ yic’ot jini mach bʌ anic i c’ʌjñibal cha’an mi’ jisan jini am bʌ i c’ʌjñibal ti’ tojlel winicob. 29Che’ jini ma’anic majqui mi mejlel i chañ’esan i bʌ ti’ tojlel Dios. 30Come Dios tsi’ yʌq’ueyetla la’ wajñel ti Cristo Jesús. Dios tsi’ yʌq’ueyonla Cristo. Jiñʌch lac ña’tʌbal tilem bʌ ti Dios. Jiñʌch tsa’ bʌ i yʌc’ʌyonla ti’ wenta Dios, tsa’ bʌ i q’ueleyonla ti toj. Jiñʌch tsa’ bʌ i yʌc’onla ti libre. 31Jini cha’an, che’ bajche’ ts’ijbubil: “Jini yom bʌ i sub chuqui ñuc, la’ i tsictesan i ñuclel lac Yum”.
2Cristo tsa’ bʌ ch’ijle ti cruz
1Hermanojob, che’ bʌ tsa’ c’otiyon ba’ añetla ma’anic tsac pejcayetla ti to’ol ch’ejl jach bʌ t’an yic’ot c bajñel ña’tʌbal che’ bʌ tsac subeyetla i t’an Dios. 2Come tsa cʌlʌ tic pusic’al ma’anic chuqui mi caj c ña’tan ti la’ tojlel, cojach Jesucristo tsa’ bʌ ch’ijle ti cruz. 3Che’ bʌ ya’ añon quic’otetla wen c’uñon, cabʌl c bʌq’uen, tsiltsilñayon. 4Che’ bʌ tsac pejcayetla, che’ bʌ tsac cha’le sub t’an cha’an mic xiq’uetla, tsiquil mach tilemic c t’an tic bajñel pusic’al pero tilem ti’ p’ʌtʌlel Espíritu, 5cha’an wen xuc’ul mi la’ ñop. Come jiñʌch i ye’tel Dios yic’ot i p’ʌtʌlel, mach i ye’telic winicob cabʌl bʌ i ña’tʌbal.
I tsictesʌbal i yEspíritu Dios
6Mic sub lojon i ña’tʌbal Dios ti’ tojlel jini xuc’ul bʌ xñopt’añob. Ma’anic mic sub lojon i ña’tʌbal pañimil, mi i ña’tʌbal yumʌlob mu’ bʌ i jilelob. 7Mic sub lojon i ña’tʌbal Dios mach bʌ tsictiyemic ti yambʌ ora, jini mucul bʌ i ña’tʌbal tsa’ bʌ i wʌn wa’choco Dios che’ bʌ maxto anic pañimil, cha’an mi’ yʌq’ueñonla lac ñuclel. 8Jini yumʌlob ti pañimil ma’anic tsi’ cʌñʌyob i ña’tʌbal Dios mi juntiquilic. Tsa’ic i cʌñʌyob, ma’anic tsi’ ch’ijiyob ti cruz lac Yum am bʌ i yumʌntel ti chan. 9Come ts’ijbubil: “Jini mach bʌ q’uelbilic ti’ wut winicob, jini mach bʌ ubibilic ti’ chiquin winicob, jini mach bʌ anic tsi’ ña’tayob winicob ti’ pusic’al, jiñʌch tsa’ bʌ i chajpa Dios cha’an mi’ yʌq’ueñob jini mu’ bʌ i c’uxbiñob Dios”, che’en.
10Dios tsi’ laj tsictesʌbeyonla ti’ p’ʌtʌlel jini Espíritu, come jini Espíritu mi’ ch’ʌmben isujm pejtelel chuqui tac an yic’ot i sujmlel Dios wocol bʌ ti cʌñol. 11¿Am ba juntiquil winic mu’ bʌ mejlel i cʌmben i pusic’al yambʌ winic? Ma’anic. Cojach i ch’ujlel jini winic mi’ ña’tan chuqui an ti’ bajñel pusic’al. Che’ ja’el ma’anic majch mi’ cʌmben i ña’tʌbal Dios, cojach i yEspíritu Dios. 12Ma’anic tsa’ aq’uentiyonla i ña’tʌbal pañimil. Tsa’ aq’uentiyonla jini Espíritu ch’oyol bʌ ti Dios cha’an mi laj cʌn chuqui woli’ yʌq’ueñonla Dios. 13Jiñʌch mu’ bʌ c sub lojon. Jini t’an mu’ bʌ c sub lojon mach tilemic ti winicob cabʌl bʌ i pusic’al ti pañimil, pero jini Espíritu tsi’ cʌntesayon lojon. Mi’ yʌq’ueñon lojon jini t’an cha’an mic tsictesʌbeñob jini mu’ bʌ i jac’beñob jini Espíritu.
14Jini mach bʌ anic Espíritu yic’ot, ma’anic mi’ ch’ʌmben isujm jini ch’oyol bʌ ti’ yEspíritu Dios, come mi’ yʌl tonto jax. Mach mejlic i ch’ʌmben isujm, come cojach jini Espíritu mi’ yʌq’ueñonla lac ch’ʌmben isujm. 15Jini am bʌ i cha’an jini Espíritu mux i mejlel i laj ch’ʌmben isujm. Ma’anic majch mi’ cʌmben i pusic’al jini winic. 16Come ¿majqui tsi’ cʌmbe i pusic’al lac Yum? ¿Majqui tsi’ cʌntesa? Pero an lac cha’an i ña’tʌbal Cristo.
3X’e’telonla yic’ot Dios
1Che’ jini hermanojob, ma’anic tsa’ mejli c pejcañetla che’ bajche’ mic pejcan jini mu’ bʌ i jac’ob i yEspíritu Dios, come mi la’ jac’ben jini tsucul bʌ la’ pusic’al, come alʌlet to la ti Cristo. 2Tsa cʌq’ueyetla la’ jap leche. Ma’anic tsa cʌq’ueyetla we’elʌl, come maxto mejlic la’ c’ux. C’ʌlʌl wʌle mach mejliquetla. 3Come woli to la’ jac’ben i tsuculel la’ pusic’al. Woli la’ tsʌjyuben la’ bʌ la’ wenlel. Woliyetla ti leto. Woli la’ t’ox la’ bʌ ti t’an. Che’ jini ¿mach ba wolic la’ jac’ben i tsuculel la’ pusic’al? ¿Mach ba lajalic woli la’ cha’len che’ bajche’ i cha’año’ bʌ pañimil? 4Come juntiquil mi’ yʌl: Ti isujm i cha’añon Pablo, che’en. Yambʌ mi’ yʌl: I cha’añon Apolos, che’en. ¿Mach ba wolic la’ jac’ben i tsuculel la’ pusic’al?
5¿Majqui jini Pablo che’ jini? ¿Majqui jini Apolos? X’e’telon lojon tsa’ bʌ cʌq’ueyet la’ ñop Dios cha’an ti’ p’ʌtʌlel lac Yum tsa’ bʌ i yʌq’ueyon lojon ti jujuntiquilon lojon. 6Joñon tsac cha’le pac’. Apolos tsi’ mulu. Dios tsi’ yʌc’ʌ ti colel. 7Che’ jini mach ñuquic jini mu’ bʌ i cha’len pac’ yic’ot jini mu’ bʌ i mul. Cojach ñuc Dios mu’ bʌ i yʌc’ ti colel. 8Jini mu’ bʌ i cha’len pac’ yic’ot jini mu’ bʌ i mul junlajalob. Ti jujuntiquil mi caj i yʌq’uentelob i chobejtʌbal che’ bajche’ an i ye’tel. 9Come joñon lojon x’e’telon lojon yic’ot Dios. Jatetla i choletla Dios, i yototetla Dios.
10Joñon che’ bajche’ tsa’ aq’uentiyon i yutslel i pusic’al Dios, tsac ts’ajquibe i c’ʌclib otot che’ bajche’ juntiquil wen yujil bʌ i wa’chocontel otot. Yambʌ mi’ wa’chocon i ye’tel ti’ pam i c’ʌclib. Ti jujuntiquil la’ i q’uel bajche’ mi’ wa’chocon i ye’tel ti’ pam. 11Come ma’anic majqui mi mejlel i yʌq’uen yambʌ i c’ʌclib otot. Jini laj c’ʌclib jiñʌch Jesucristo. 12Mi an majch mi’ c’ʌn oro, mi tsucul taq’uin, mi c’ax wen bʌ xajlel, mi te’, mi jam, mi tiquin pimel cha’an mi’ wa’chocon otot ti’ pam jini c’ʌclib, 13mi caj i tsictiyel bajche’ yilal i ye’tel jujuntiquil winic ti jini q’uin che’ mi’ yʌjq’uel ti tsictiyel. Mi caj i tsictiyel ti c’ajc mi weñʌch i ye’tel jujuntiquil winic. 14Mi ma’anic tsa’ jili ti c’ajc i ye’tel tsa’ bʌ i wa’choco ti’ pam, mi caj i yʌq’uentel i chobejtʌbal. 15Mi tsa’ puli i ye’tel ma’anix i chobejtʌbal, come sajtem i ye’tel, pero mi caj i coltʌntel jini winic che’ bajche’ juntiquil tsa’ bʌ i yʌlʌ pulel ti c’ajc.
16¿Mach ba la’ wujilic? Jatetla i templojetla Dios. I yEspíritu Dios mi’ chumtʌl la’ wic’ot. 17Mi an majch mi’ jisʌben i templo Dios, Dios mi caj i jisan jini winic, come ch’ujul i Templo Dios. Jatetla i templojetla.
18Mach a jac’ a lotintel. Mi an majch mi lon al ti’ pusic’al an cabʌl i ña’tʌbal ti jini pañimil, la’ i q’uel i bʌ ti tonto cha’an mi mejlel i taj wen bʌ i ña’tʌbal. 19Come Dios mi’ q’uel ti tonto i ña’tʌbal jini pañimil che’ bajche’ ts’ijbubil: “Dios mi’ tsictesan lolom jach jini año’ bʌ cabʌl i ña’tʌbal che’ maya jax woli’ melob”, che’en. 20Ts’ijbubil ja’el: “Lac Yum yujil lolom jach chuqui mi’ yʌlob ti’ bajñel pusic’al jini año’ bʌ cabʌl i ña’tʌbal”, che’en. 21Jini cha’an mach yomix mi la’ t’ox la’ bʌ cha’an mi la’ tsajcan winicob. Come la’ cha’añʌch pejtelel chuqui tac an, 22yic’ot pejtel winicob, mi Pablo, mi Apolos, mi Pedro, mi jini pañimil yic’ot chuqui woli’ yujtel wʌle yic’ot chuqui mi’ caj ti ujtel che’ cuxuletla yic’ot che’ mi la’ chʌmel. 23Jatetla i cha’añetla Cristo. Cristo i cha’añʌch Dios.
4Apóstolob i cha’an Cristo
1La’ i ña’tañob winicob x’e’telon lojon i cha’an Cristo. Xcʌntayajon lojon cha’an i sujmlel Dios mach bʌ tsictiyemic ti yambʌ ora. 2Jini xcʌntaya wersa yom xuc’ul mi’ pʌs i bʌ ti’ ye’tel i yum. 3Ma’anic mic mel c pusic’al cha’an chuqui mi’ yʌlob winicob, mi jatetla mi yaño’ bʌ, mi woli la’ wʌl uts’aton o mach uts’atonic. 4Anquese ma’anic woli ti t’an c pusic’al, ma’anic mic sub c bʌ ti uts’at. Jini mu’ bʌ i q’uelon, mu’ bʌ caj i melon, jiñʌch lac Yum. 5Jini cha’an mach mi la’ sub mi uts’at o mi mach uts’atobic winicob x’ixicob che’ maxto i yorajlelic, che’ maxto tilemic lac Yum. Come lac Yum mi caj i tsictesan jini mucul tac bʌ mach bʌ tsictiyemic. Mi caj i yʌc’ ti tsictiyel chuqui woli lac ña’tan ti lac pusic’al. Che’ jini Dios mi caj i tsictesʌbeñob i ñuclel winicob ti jujuntiquil.
6C’ux mi cubiñetla hermanojob. Jini cha’an tsa’ix c tajbe i c’aba’ Apolos yic’ot j c’aba’ cha’an mij cʌntesañetla bajche’ yom mi la’ cha’len. Com mi la’ q’uel ti joñon lojon bajche’ yom mi la’ wajñel che’ bajche’ ts’ijbubil. Mach mi la’ sub ti ñuc juntiquil cha’an mi la’ ts’a’len yambʌ. 7Come ¿majqui tsi’ yʌq’ueyetla la’ c’ʌjñibal ti chajp ti chajp? ¿Mach ba aq’uebileticla ti la’ majtan jach? Mi tsa’ aq’uentiyetla, ¿chucoch ñuc mi la’ q’uel la’ bʌ che’ bajche’ mach aq’uebiletic la ti la’ majtan?
8Mi la’ lon al jasʌlix la’ cʌntesʌntel ti Dios, cabʌlix la’ ña’tʌbal. Che’ mach ya’ic añon lojon la’ wic’ot mi la’ lon mel la’ bʌ che’ bajche’ reyetla. Uts’at, aja reyeticla cha’an temel mi lac cha’len rey. 9Apóstolon lojon. Mi cʌl Dios tsi’ yʌc’ʌyon lojon ti q’uejlel ti wi’il pat che’ bajche’ chucbil bʌ winicob mu’ bʌ caj i tsʌnsʌntelob, come tsi’ yʌc’ʌyon lojon ti pañimil ba’ mi’ q’ueloñob jini ángelob yic’ot winicob x’ixicob. 10Tonto mij q’uejlel lojon cha’an c’ux mi cubin lojon Cristo, pero cabʌl la’ ña’tʌbal ti Cristo. C’uñon lojon, pero p’ʌtʌletla. An la’ ñuclel, pero ts’a’lebilon lojon. 11C’ʌlʌl wʌle mi cubin lojon wi’ñal yic’ot tiquin ti’. Pits’ilon lojon, lojwemon lojon ti asiyal. Ma’anic cotot lojon ba’ mic chumtʌl. 12Mic cha’len lojon wersa e’tel tij c’ʌb. Che’ mi’ p’ajoñob mic pejcañob ti wen bʌ t’an. Che’ mi’ tic’lañoñob, mij cuchben lojon. 13Che’ mi’ yu’yajiñoñob, mic pejcañob ti uts bʌ t’an. Mij q’uejlel lojon c’ʌlʌl wʌle che’ bajche’ misujelʌl, che’ bajche’ i bibi’lel pejtel chuqui mi’ chojquel.
14Mach cha’anic mij quisnitesañetla wolic ts’ijban jini t’an, pero cha’an mic xic’beñetla ti uts’at come c’uxbibil bʌ calobiletla. 15Anic la’ cha’an lujump’ejl mil xcʌntesajob ti Cristo, juntiquil jach la’ tat. Come ti Cristo Jesús joñon tsac techeyetla ti jini wen t’an. 16Jini cha’an la’ wocolic mic subeñetla, melela che’ bajche’ mic mel. 17Jini cha’an tsac choco majlel Timoteo ba’ añetla. Jiñʌch c’uxbibil bʌ calobil. Xuc’ul i pusic’al ti lac Yum. Mi caj i yʌq’ueñetla la’ cha’ ña’tan chuqui mic cha’len ti Cristo. Che’ bajche’ mij cʌntesan xñopt’añob ti pejtelel pañimil baqui jach mi’ tempañob i bʌ, che’ʌch mic mel ja’el. 18Lamitaletla ñuc mi la’ q’uel la’ bʌ cha’an woli la’ lon al ma’anix mic chʌn tilel ba’ añetla. 19Pero mach jalix mi caj j c’otel ba’ añetla mi yom lac Yum. Mi caj j q’uel mi an i p’ʌtʌlel jini mu’ bʌ i lon q’uelob i bʌ ti ñuc o mi to’ol t’an jach woliyob. 20Come mach to’ol t’anic jach i yumʌntel Dios pero an cabʌl i p’ʌtʌlel. 21¿Chuqui la’ wom? ¿La’ wom ba mic ch’ʌm tilel asiyal ba’ añetla o la’ wom ba mic tilel ti c’uxbiya yic’ot i yutslel c pusic’al?
5Juntiquil tsa’ bʌ i taja i ts’i’lel
1Isujm woli’ yʌlob an juntiquil ti la’ tojlel woli bʌ i taj i ts’i’lel, ñumen leco bajche’ mi’ melob jini sajtemo’ bʌ, come jini winic wolix i yajñel yic’ot i majaña’. 2Jatetla chan mi la’ lon mel la’ bʌ. ¿Mach ba yomic mi la’ wuc’tʌben i mul? ¿Mach ba yomic mi la’ choc loq’uel ti la’ tojlel jini tsa’ bʌ i mele bajche’ jini?
3Isujm mach ya’ic añon la’ wic’ot tic bʌc’tal, pero ya’ añon ti espíritu. Tsa’ix c ña’ta bajche’ yom mi’ mejlel jini am bʌ i mul. 4Che’ temel añetla ya’ʌch añon quic’otetla yubil, come ya’an i p’ʌtʌlel lac Yum Jesucristo. Ti’ c’aba’ lac Yum Jesucristo mic subeñetla, 5la’ poj chojquic loq’uel ti la’ tojlel jini winic cha’an mi’ yajñel ti’ wenta Satanás, cha’an mi’ yubin wocol, cha’an mi’ jisʌntel i tsucul pusic’al, cha’an mi’ coltʌntel i ch’ujlel ti’ q’uiñilel lac Yum.
6Mach wenic mi la’ q’uel la’ bʌ ti ñuc. ¿Mach ba la’ wujilic mi’ p’ojlel majlel mulil che’ bajche’ ts’ita’ jach levadura mi’ laj xaxan ti’ junc’ojlel caxlan waj? 7Chocola loq’uel jini tsucul bʌ la’ melbal come tsijib melbiletix la. Come jini lac Tiñʌme’ cha’an Pascua jiñʌch Cristo tsa’ bʌ ajq’ui ti chʌmel cha’añonla. 8Jini cha’an la’ lac mel q’uin ti uts’at. Mach yomic tsucul bʌ levadura, jiñʌch jontolil yic’ot mulil. Yom jini isujm bʌ waj mach bʌ anic i levadurajlel, jiñʌch i sʌclel lac pusic’al.
9Tsac ts’ijbubeyetla tic jun cha’an mach yomic mi la’ wajñel yic’ot jini mu’ bʌ i tajob i ts’i’lel. 10Isujm, mach mejlic la’ junyajlel loq’uel ti’ tojlel i cha’año’ bʌ pañimil mu’ bʌ i tajob i ts’i’lel, mu’ bʌ i chʌcleñob i chubʌ’an, mu’ bʌ i cha’leñob xujch’, mu’ bʌ i c’uxbiñob dioste’ tac. Muq’uic la’ junyajlel loq’uel ti’ tojlelob, actan che’ jini, ma’añetixla ti pañimil. 11Mic ts’ijbubeñetla wʌle, mach mi la’ ñochtan mi juntiquilic, anquese mi’ sub i bʌ ti hermano, mi woli’ taj i ts’i’lel, mi an i chʌclel, mi woli’ c’uxbin dioste’ tac, mi woli’ cha’len p’ajoñel, mi woli ti yʌc’ʌjel, mi woli ti xujch’. Mach mi la’ cha’len we’el yic’ot. 12¿Am ba que’tel cha’an mic mel jini mach bʌ ochemobic? ¿Mach ba la’ wentajic mi la’ mel jini ochemo’ bʌ? 13Come Dios mi caj i mel jini mach bʌ ochemobic. Chocola loq’uel ti la’ tojlel jini xjontolil.
6Che’ mi’ melob i bʌ jini xñopt’añob
1Jixcu jatetla che’ mi la’ contrajin la’ bʌ ti meloñel, ¿yom ba mi la’ majlel la’ mel la’ bʌ ba’an jini am bʌ i ye’tel mach bʌ i cʌñʌyic Dios? ¿Mach ba yomic mi la’ mel la’ bʌ ti’ tojlel i cha’año’ bʌ Dios? 2¿Mach ba la’ wujilic? I cha’año’ bʌ Dios mi caj i melob i cha’año’ bʌ pañimil. Mi wersa mi caj la’ mel i cha’año’ bʌ pañimil, ¿mach ba mejlic la’ mel jini mu’ bʌ i cha’leñob leto ti la’ tojlel? 3¿Mach ba la’ wujilic mi caj lac mel ángelob? Jini cha’an ñumen mi mejlel lac mel winicob ila ti pañimil. 4Mi an ti la’ wenta cha’an mi la’ melob cha’an chuqui tac woli ti ujtel ti ili ora, ¿chucoch mi la’ chocob majlel ba’an winicob mach bʌ hermanojobic cha’an mi’ melob? 5Yom mi la’ cha’len quisin. ¿Mach ba anic mi juntiquilic hermano yujil bʌ meloñel ti la’ tojlel? 6Jini hermanojob mi’ contrajiñob i bʌ. Mi’ majlelob ti meloñel ti’ tojlel jini mach bʌ anic mi’ ñopob Dios.
7Anix la’ sajtemal che’ jini, come woli la’ contrajin la’ bʌ ti’ tojlel jini sajtemo’ bʌ. ¿Chucoch ma’anic mi la’ cuchben i mul la’ wermano che’ mi’ techbeñetla wocol? ¿Chucoch ma’anic mi la’ ñusʌben che’ mi’ chilbeñet la’ chubʌ’an? 8Jatetla mi la’ mel chuqui mach tojic. Mi la’ cha’len chiloñel, mi la’ contrajin la’ wermanojob.
9¿Mach ba la’ wujilic? Ma’anic mi caj i yochelob ti’ yumʌntel Dios jini mach bʌ tojobic. Mach mi la’ ñop lot. Ma’anic mi caj i yochelob ti’ yumʌntel Dios jini mu’ bʌ i tajob i ts’i’lel, mi jinic mu’ bʌ i c’uxbiñob dioste’ tac, mi jinic mu’ bʌ i tajob i yixic, mi jinic mach bʌ anic mi’ tic’ob i colosojlel i pusic’al, mi jinic winicob mu’ bʌ i wʌlʌc pi’leñob i bʌ. 10Jini xchiloñelob, jini xchʌclelob, jini xyʌc’ajelob, jini xp’ajoñelob, jini xujch’ob ma’anic mi caj i yochelob ti’ yumʌntel Dios. 11Lamitaletla che’ʌch tsa’ la’ mele, pero wʌle pocbiletixla ti’ c’aba’ lac Yum Jesucristo cha’an ti’ yEspíritu lac Dios. Tsa’ix ajq’uiyetla ti’ wenta Dios. Wolix la’ q’uejlel ti toj.
Tsictesanla i ñuclel Dios ti la’ bʌc’tal
12Mi mejlel c mel pejtel chuqui com, mach tic’bilonic, pero mach uts’atic mi tsac mele ti pejtelel. Chuqui jach com c mel, mi mejlel c mel, pero ma’anic mi caj c mel ame ñʌm’ac c pusic’al. 13Uts’at we’elʌl cha’an lac ñʌc’. Jini lac ñʌc’ i yajñibʌch we’elʌl. Pero Dios mi caj i jisan lac ñʌc’ yic’ot we’elʌl. Jini lac bʌc’tal mach cha’anic ts’i’lel, i cha’añʌch lac Yum. Lac Yum mi caj i coltan lac bʌc’tal. 14Dios tsa’ bʌ i teche ch’ojyel lac Yum mi caj i techonla ch’ojyel ja’el ti’ p’ʌtʌlel. 15¿Mach ba la’ wujilic i cha’añʌch Cristo la’ bʌc’tal? ¿Yom ba mij c’ʌn c bʌc’tal che’ i cha’anix Cristo, cha’an mi cʌq’uen ts’i’lel bʌ x’ixic? Mach yomic. 16¿Mach ba la’ wujilic? Jini mu’ bʌ i pi’len juntiquil moja, jump’ejl jach mi’ majlel i bʌc’tal yic’ot. Come Dios mi’ yʌl: “Jini cha’tiquil mi’ yochelob ti juntiquil jach”, che’en. 17Jini mu’ bʌ i yajñel yic’ot lac Yum mi’ yochel ti jump’ejl i pusic’al yic’ot lac Yum. 18Puts’tanla ts’i’lel. Jini mu’ bʌ i cha’len ts’i’lel ñumen mi’ tic’lan i bʌc’tal bajche’ jini mu’ bʌ i cha’len yan tac bʌ mulil. 19¿Mach ba la’ wujilic? La’ bʌc’tal i templojʌch jini Ch’ujul bʌ Espíritu tsa’ bʌ i yʌq’ueyetla Dios mu’ bʌ i yajñel ti la’ pusic’al. Mach la’ bajñel wentajic la’ bʌ. 20Come tsa’ mʌjñiyetla, tojbiletla. Tsictesanla i ñuclel Dios ti la’ bʌc’tal yic’ot ti la’ ch’ujlel, come i cha’añʌch Dios.
7Bajche’ yom mi’ yajñelob winicob x’ixicob
1Wolic ña’tan chuqui tsa’ la’ ts’ijbubeyon. Uts’at mi ma’anic mi’ pʌy x’ixic winic. 2Pero an cabʌl mu’ bʌ i tajob i yixic. Jini cha’an la’ i pʌy i yijñam jujuntiquil winic. La’ i taj i ñoxi’al jujuntiquil x’ixic. 3Jini winic la’ i pi’len i yijñam ti uts’at, che’ ja’el i yijñam la’ i pi’len i ñoxi’al ti uts’at. 4Jini x’ixic mach i bajñel cha’anic i bʌc’tal, come mi’ yuman i ñoxi’al. Che’ ja’el i ñoxi’al mach i bajñel cha’anic i bʌc’tal, come mi’ yuman i yijñam. 5Mach la’ cʌy la’ pi’len la’ bʌ, cojach mi la’ wom ti la’ cha’ticlel cha’an mi la’ wʌc’ la’ bʌ ti oración. Che’ mi’ yujtel oración yom mi la’ cha’ pi’len la’ bʌ ame i pʌyetla ti mulil Satanás che’ ma’anic i p’ʌtʌlel la’ pusic’al. 6Che’ʌch mic sub cha’an mij coltañetla. Mach ti madaric wolic sub. 7Come mi cʌl uts’at mi lajalob pejtel winicob che’ bajche’ joñon. Pero ti jujuntiquil an i c’ʌjñibal aq’uebil bʌ i cha’an Dios. Juntiquil an junchajp i c’ʌjñibal, yambʌ an yambʌ i c’ʌjñibal.
8Mic suben jini i bajñel jax to bʌ añob yic’ot ja’el jini xmeba ixicob cha’an uts’at mi’ chʌn ajñelob che’ bajche’ joñon. 9Mi mach mejlicob i bajñel ajñelob ti uts’at, la’ i cha’leñob ñujpuñel. Uts’at mi’ cha’leñob ñujpuñel. Mach uts’atic mi’ jac’ob i colosojlel i pusic’al.
10Mic subeñob jini ñujpuñemo’ bʌ, pero mach c mandaric wolic sub. I mandarʌch lac Yum: Jini x’ixic mach i lon cʌy i ñoxi’al. 11Mi tsi’ cʌyʌ i ñoxi’al x’ixic la’ ajnic ti’ bajñelil. Mi mach yomic ajñel ti’ bajñelil, la’ i mel i bʌ ti uts’at yic’ot i ñoxi’al. Che’ ja’el winic, mach i choc loq’uel i yijñam.
12Jiñʌch mu’ bʌ c sub joñon. Ma’anic tsi’ subu lac Yum: Mi ma’anic mi’ ñop lac Yum i yijñam juntiquil hermano, mach i choc loq’uel i yijñam che’ yom to ajñel jini x’ixic yic’ot. 13Mi ma’anic mi’ ñop lac Yum i ñoxi’al juntiquil hermana, mach i cʌy i ñoxi’al che’ yom to ajñel jini winic yic’ot. 14Come jini winic mach bʌ anic mi’ ñop lac Yum, mi’ poj q’uejlel ti sʌc ti Dios che’ woli’ yajñel yic’ot i yijñam mu’ bʌ i ñop lac Yum. Jini x’ixic mach bʌ anic mi’ ñop lac Yum, mi’ poj q’uejlel ti sʌc ti Dios che’ woli’ yajñel yic’ot i ñoxi’al mu’ bʌ i ñop. Mi mach che’iqui, mach sʌquic mi’ q’uejlel la’ walobilob. Wʌle ch’ujulob mi’ q’uejlelob. 15Mi yom loq’uel majlel jini mach bʌ anic mi’ ñop lac Yum, la’ loq’uic. Che’ jini juntiquil hermano mi winic mi x’ixic mach chʌn anix ti’ p’ʌtʌlel i pi’ʌl mi tsa’ loq’ui i pi’ʌl. Tsa’ix i pʌyʌyonla Dios cha’an ñʌch’ʌl mi la cajñel. 16Hermana, ¿mach ba a wujilic? Tic’ʌl mi mejlel a coltan a ñoxi’al cha’an mi’ ñop. Hermano, ¿mach ba a wujilic? Tic’ʌl mi mejlel a coltan a wijñam cha’an mi’ ñop.
17Ti jujuntiquil winic la’ ajnic che’ bajche’ tsa’ aq’uenti i c’ʌjñibal ti lac Yum che’ bajche’ Dios tsi’ pʌyʌ ti jujuntiquil. Che’i mij cʌntesan xñopt’añob baqui jach mi’ tempañob i bʌ. 18Mi an majch mi’ pʌjyel ti Dios che’ tsepbilix i pʌchʌlel, che’ʌch yom mi’ yajñel. Mi an majch mi’ pʌjyel che’ mach tsepbilic i pʌchʌlel, mach i yʌc’ ti tsepol. 19Come ma’anic chuqui mi’ cha’len mi tsepbil o mi mach tsepbilic lac pʌchʌlel. Pero yom Dios mi lac jac’ben i mandar. 20Ti jujuntiquil la’ ajnic che’ bajche’ tsi’ taja Dios che’ bʌ tsi’ pʌyʌ. 21¿Tsa’ ba pʌjyiyet che’ añet ti a yum? Mach a mel a pusic’al. Pero mi tsa’ mejliyet ti loq’uel ñumen uts’at. 22Come lac Yum tsa’ bʌ i pʌyʌ jini am bʌ ti’ yum, tsa’ix i yʌc’ʌ ti libre. Pero jini tsa’ bʌ pʌjyi che’ libre an, tsa’ix ochi ti’ wenta cha’an mi’ yuman Cristo. 23Tsa’ mʌjniyetla. Tojbiletla. Ña’tanla mach chʌn i cha’añetixla winicob. 24Hermanojob, bajche’ jach añetla che’ bʌ tsi’ pʌyʌyetla Dios, che’ʌch yom mi la’ wajñel ti Dios ti jujuntiquiletla.
25Ma’anic tsa’ aq’uentiyon mandar ti lac Yum cha’an mic subeñob xch’oc tacob. Cojach mic sub chuqui wolic ña’tan tic pusic’al, come lac Yum ti’ yutslel i pusic’al tsi’ yʌc’ʌyon ti ajñel ti xuc’ul. 26An cabʌl wocol ti ili ora. Jini cha’an mi cʌl uts’at mi che’ jach mi’ yajñelob winicob che’ bajche’ añob. 27Mi an a wijñam, mach a ñop a cʌy. Mi ma’anic a wijñam, mach a sajcan a wijñam. 28Mi tsa’ pʌyʌ a wijñam, mach mulilic. Che’ ja’el jini xch’oc mi tsi’ taja i ñoxi’al, mach mulilic. Pero jini mu’ bʌ i pʌyob i bʌ, wersa mi caj i yubiñob wocol ti pañimil. Mach comic mi la’ taj jini wocol. 29Mic subeñetla hermanojob, jumuc’ wʌ’ añonla. Jini año’ bʌ i yijñam la’ i melbeñob i ye’tel lac Yum che’ bajche’ jini mach bʌ añobic i yijñam. 30Jini mu’ bʌ i cha’leñob uq’uel che’ʌch mi caj i yajñelob bajche’ jini mach bʌ anic mi’ cha’leñob uq’uel. Jini tijicñayo’ bʌ che’ʌch mi caj i yajñelob bajche’ jini mach bʌ tijicñayobic. Jini mu’ bʌ i cha’leñob mʌñoñel che’ʌch mi caj i yajñelob bajche’ jini mach bʌ añobic i chubʌ’an. 31Jini mu’ bʌ i c’ʌñob chuqui tac an ti pañimil che’ʌch mi caj i yajñelob bajche’ jini mach bʌ anic mi’ c’ʌñob, come pejtel chuqui mi laj q’uel ti pañimil, jilel jach woli.
32Mach comic mi la’ mel la’ pusic’al. Jini mach bʌ anic i yijñam mi’ chʌn ña’tan lac Yum cha’an mi’ mel chuqui mi’ mulan lac Yum. 33Jini am bʌ i yijñam mi’ chʌn ña’tan i ye’tel ti pañimil cha’an tijicña mi’ q’uel i yijñam. 34Che’ ja’el mach lajalic x’ixic am bʌ i ñoxi’al yic’ot xch’oc mach bʌ anic i ñoxi’al. Jini mach bʌ anic i ñoxi’al mi’ chʌn ña’tan lac Yum cha’an sʌc mi’ yajñel i bʌc’tal yic’ot i ch’ujlel. Jini x’ixic am bʌ i ñoxi’al mi’ ña’tan i ye’tel ti pañimil cha’an tijicña mi’ yubin i ñoxi’al. 35Mic sub jini t’an cha’an mij coltañetla, mach cha’anic mi la’ chujquel ti yac, pero cha’an mi la’ mel chuqui wen yic’ot chuqui toj, cha’an ma’anic chuqui mi’ mʌctañetla la’ wen tsajcan lac Yum.
36Mi an winic mu’ bʌ i ña’tan mach uts’atic woli’ cha’len che’ ma’anic mi’ sijin i yalobil c’ʌlʌl mi’ ñejp’an, mi wersa yom i sijin, la’ i yʌc’ ti ñujpuñel i yalobil che’ bajche’ yom i pusic’al. Mach mulilic. 37Pero jini xuc’ul bʌ i pusic’al mach bʌ yomic i sijin i yalobil, come tsi’ ña’ta i cʌntan i yalobil che’ mach wersajic mi’ sijin, uts’at mi’ mel che’ ma’anic mi’ yʌc’ ti ñujpuñel. 38Jini mu’ bʌ i sijin i yalobil uts’at mi’ mel. Jini mach bʌ anic mi’ sijin ñumen uts’at mi’ mel.
39Jini x’ixic an ti’ wenta i ñoxi’al che’ cuxul to i ñoxi’al. Mi tsa’ chʌmi i ñoxi’al mi mejlel i cha’ cha’len ñujpuñel mi yom, pero yom yic’ot winic ochem bʌ ti lac Yum. 40Mi cʌl, ñumen tijicña jini x’ixic mi che jach ti’ bajñelil mi’ yajñel. Cujil ja’el, añʌch quic’ot i yEspíritu Dios.
8We’elʌl aq’uebil bʌ dios te’ tac
1Wʌle, cha’an we’elʌl aq’uebil bʌ dioste’ tac ti’ majtan, la cujil an lac ña’tʌbal ti lac pejtelel. Lac ña’tʌbal mi’ yʌq’ueñonla lac lon q’uel lac bʌ ti ñuc, pero laj c’uxbiya mi’ ñijcañonla ti coltaya. 2Mi an majch mi’ lon ña’tan cabʌlʌch i pusic’al, maxto yujilic chuqui yom mi’ ña’tan. 3Mi an majch mi’ c’uxbin Dios, cʌmbil jini winic ti Dios.
4¿Yom ba mi laj c’ux we’elʌl aq’uebil bʌ dioste’ tac ti’ majtan? La cujil ma’anic i c’ʌjñibal dioste’ tac ti pañimil, come ma’anic yambʌ Dios, juntiquil jach. 5Mi’ lon alob an cabʌl dios ti panchan yic’ot ti pañimil, come an cabʌl i diosob che’ ja’el cabʌl yumʌlob, 6pero ti lac tojlel an juntiquil jach Dios, jiñʌch lac Tat. Ya’ ch’oyol pejtelel chuqui tac an. Tsi’ meleyonla cha’an mi lac ñuq’uesan. An juntiquil jach lac Yum, jiñʌch Jesucristo. Ti’ p’ʌtʌlel tsa’ mejli pejtel chuqui tac an. Joñonla ja’el añonla cha’an Cristo.
7Mach laj yujilobic i sujmlel jini t’an. Lamital mi’ chʌn ña’tañob dioste’ tac c’ʌlʌl wʌle che’ mi’ c’uxob we’elʌl aq’uebil bʌ dioste’ tac. Come tile bixelob i pusic’al, mi’ sojquelob che’ mi’ c’uxob. 8Mach cha’anic we’elʌl mi’ q’uelonla ti uts’at Dios. Mi woli lac tic’ lac bʌ ti’ c’uxol, o mi woli laj c’ux, ma’anic mi’ yʌq’ueñonla lac wenlel ti’ tojlel Dios. 9Chʌcʌ q’uele la’ bʌ ame la’ wʌc’ ti yajlel jini mach bʌ xuc’ulic i pusic’al che’ an chuqui mi la’ mel che’ libre añetla. 10Come mi tsi’ q’ueleyet jini mach bʌ xuc’ulic i pusic’al che’ buchulet ti mesa ya’ ti’ templo dioste’ tac, come a wujil uts’at jini we’elʌl, mi caj i ñijcʌyel i pusic’al jini mach bʌ xuc’ulic cha’an mi’ c’ux chuqui tac aq’uebil dioste’ tac, anquese mi’ lon ña’tan mach uts’atic. 11Che’ jini cha’an ti a ña’tʌbal mi caj i sajtel jini winic. Cristo tsa’ chʌmi cha’an jini winic. 12Che’ jini ma’ cha’len mulil ti’ contra jini hermanojob. Che’ ma’ wʌc’ ti asiyel i pusic’al jini mach bʌ xuc’ulic i pusic’al, ma’ cha’len mulil ti’ contra Cristo. 13Mi cha’an jach we’elʌl mi’ yʌjq’uel ti yajlel quermano, ma’anic mi caj j c’ux we’elʌl ti pejtelel ora ame mi cʌc’ ti yajlel quermano.
9Jini mu’ bʌ mejlel i c’ajtin apóstol
1¿Mach ba apóstolonic? ¿Mach ba librejonic? ¿Mach ba tsa’ic j q’uele Jesús lac Yum? ¿Mach ba jateticla que’tel ti lac Yum? 2Mi an majch mi’ yʌlob mach apóstolonic, mach che’ic jatetla come i sellojleletla que’tel ti lac Yum.
3Mic subeñob jini mu’ bʌ i c’ajtibeñoñob: 4¿Mach ba mejlic cʌq’uentel lojon chuqui mij c’ux lojon yic’ot chuqui mic jap lojon? 5Che’ an quijñam lojon, ¿mach ba mejlic c pʌy lojon majlel quic’ot che’ bajche’ mi’ melob yaño’ bʌ apóstolob yic’ot i yijts’iñob lac Yum yic’ot Pedro? 6Cojach joñon quic’ot Bernabé, ¿mach ba mejlic j cʌy lojon c mel yambʌ e’tel che’ woliyon lojon ti subt’an?
7¿Am ba juntiquil soldado mu’ bʌ i cha’len e’tel ti’ bajñel taq’uin? Jini mu’ bʌ i pʌc’ ts’usubil, ¿mach ba anic mi’ c’uxben i wut? Jini mu’ bʌ i cʌntan i yʌlac’, ¿mach ba anic mi’ japben i leche? 8¿Jim ba i t’an jach winicob mu’ bʌ c sub? ¿Mach ba che’ic mi’ yʌl jini mandar ja’el? 9Come ts’ijbubil ti’ mandar Moisés: “Mach a cʌchben i yej tat wacax mu’ bʌ i t’uchtʌben loq’uel i wut trigo”. ¿Cojach ba tat wacax mi’ cʌntan Dios? 10¿Mach ba wolic i cʌntañonla? Jini cha’an tsa’ ts’ijbubentiyonla ili t’an: “Jini mu’ bʌ i top’ lum, la’ i pijtan jini mu’ bʌ caj ti colel. Jini mu’ bʌ i jats’ loq’uel i wut trigo an i pijtaya cha’an mi caj i yʌq’uentel lamital i wut”.
11Mi tsa’ix j cʌntesayetla cha’an mi la’ p’ʌt’an, ¿mach ba yomic mi la’ wʌq’ueñon lojon ts’ita’ la’ chubʌ’an? 12Mi tsa’ la’ wʌq’ueyob yaño’ bʌ ¿mach ba ñumen la’ wentajic cha’an mi la’ wʌq’ueñon lojon? Ma’anic tsaj c’ajtibeyet lojon, come mij cuch lojon chuqui tac wocol ame mic mʌctʌben lojon i wen t’an Cristo.
13¿Mach ba la’ wujilic? Jini mu’ bʌ i cha’leñob e’tel ti templo mi’ c’uxob jini ac’bil bʌ ti templo. Jini mu’ bʌ i yʌq’ueñob i majtan Dios ya’ ti pulʌntib mi’ c’uxob chuqui ac’bil ya’i. 14Che’ ja’el tsi’ yʌc’ʌ mandar lac Yum cha’an mi’ yʌq’uentelob jini subt’añob pejtelel chuqui tac yom cha’an i bʌc’tal, come mi’ subob jini wen t’an. 15Pero ma’anic tsaj c’ajtibeyetla chuqui yom tic tojlel anquese an que’tel. Ma’anic mic ts’ijban jini jun cha’an mi la’ wʌq’ueñon chuqui yom cha’an c bʌc’tal, ame jilic c ñuclel ti jini wen t’an. Ñumen uts’at mi tsa’ chʌmiyon. 16Anquese mic sub jini wen t’an, mach mejlic c sub c bʌ ti ñuc, come wersa ñijcʌbil c pusic’al cha’an mic sub jini wen t’an. Mi caj c taj wocol mi ma’anic mic sub.
17Mi ti pejtelel c pusic’al mic sub, an c chobejtʌbal. Mi mach comic c sub jiñʌch c sajtemal, come tsa’ aq’uentiyon jini e’tel. 18¿Chuqui c chobejtʌbal che’ jini? Che’ mic sub jini wen t’an, jiñʌch c chobejtʌbal che’ mic sub i t’an Cristo ti chejachi. Jini cha’an ma’anic mij c’ajtin c tojol cha’an jini wen t’an.
19Jini cha’an ma’anic winic mu’ bʌ c yuman. Tic bajñel pusic’al tsa’ix cʌc’ʌ c bʌ ti x’e’tel i cha’an pejtelel winicob cha’an mi’ ñopob cabʌlob. 20Ti’ tojlel israelob lajal mic mel c bʌ bajche’ israelob cha’an mi’ ñopob. Ti’ tojlel gentilob mu’ bʌ i jac’ob mandar (anquese mach chʌn cʌchʌlonix ti jini mandar), lajal mic mel c bʌ bajche’ jini mu’ bʌ i jac’ob mandar, cha’an mi’ ñopob. 21Ti’ tojlel winicob mach bʌ anic mi’ cʌñob Dios lajal mic mel c bʌ bajche’ jini mach bʌ anic mi’ cʌñob Dios, cha’an mi’ ñopob. (Pero ti pejtelel c pusic’al wolic jac’ben i mandar Cristo.) 22Ti’ tojlel winicob mach bʌ xuc’ulic mi’ ñopob, mi cajñel bajche’ juntiquil mach bʌ p’ʌtʌlic cha’an mi’ ñopob jini mach bʌ añobic i p’ʌtʌlel. Lajal mic mel c bʌ bajche’ pejtelel winicob cha’an mij coltañob che’ bajche’ jaytiquil mi’ mejlel. 23Che’ʌch mic mel cha’an mi’ cʌñob jini wen t’an, cha’an mic taj c wenlel ja’el ti jini wen t’an quic’ot jini mu’ bʌ i ñopob.
24¿Mach ba la’ wujilic? Jini mu’ bʌ i cha’leñob ajñel ti’ tojlel xq’uelojelob mi’ cha’leñob ajñel ti pejtelelob, pero cojach juntiquil mi’ taj i majtan. Cha’lenla ajñel jatetla che’ bajche’ jini mu’ bʌ i taj i majtan. 25Pejtelel mu’ bʌ i cha’leñob ajñel mi’ bajñel cʌntañob i bʌ cha’an mi’ yʌq’uentelob i corona mu’ bʌ i jilel. Joñonla mi laj cʌntan lac bʌ cha’an mi la cʌq’uentel corona mach bʌ anic mi’ jilel. 26Jini cha’an mic cha’len ajñel che’ bajche’ juntiquil yujil bʌ baqui mi’ majlel. Ma’anic mic cha’len cujoñel che’ bajche’ winic t’uchlaw bexlaw i c’ʌb. 27Mic tic’ c bʌc’tal cha’an mi’ wersa jac’beñon, ame mic chilbentel j c’ʌjñibal che’ bʌ tsa’ix c subeyob winicob jini wen t’an.
10Tic’ojel cha’an i ch’ujutesʌntel dioste’
1Hermanojob, mach comic mi’ ñajʌyel ti la’ pusic’al bajche’ tsa’ ajniyob pejtelel lac ñojte’el che’ bʌ tsi’ toj’esayob majlel Dios ti tocal. Ti pejtelelob tsa’ ñumiyob majlel ti ojlil colem ñajb. 2Ti pejtelelob tsa’ aq’uentiyob ch’ʌmja’ yilal ti tocal yic’ot ti colem ñajb che’ bʌ tsi’ yʌc’ʌyob i bʌ ti’ wenta Moisés. 3-4Ti pejtelelob tsi’ c’uxuyob jini jach bʌ we’elʌl yic’ot ja’ aq’uebilo’ bʌ ti Dios. Tsa’ loq’ui i ya’al ti jini Xajlel ac’bil bʌ ti Dios. Jini Xajlel tsa’ bʌ i pi’leyob majlel jiñʌch Cristo. 5Pero cabʌl lac ñojte’el mach uts’atobic ti’ wut Dios. Jini cha’an tsa’ jisʌntiyob ti colem bʌ i tiquiñal pañimil.
6Che’ʌch tsa’ ujti cha’an lac tic’ol cha’an ma’anic mi lac mulan jontolil che’ bajche’ tsi’ mulayob. 7Mach la’ ch’ujutesan dioste’ tac che’ bajche’ yaño’ bʌ, come ts’ijbubil: “Jini winicob x’ixicob tsa’ buchleyob cha’an mi’ cha’leñob we’el uch’el. Tsa’ ch’ojyiyob ti son”, che’en. 8Mach yomic mi la’ cha’len ts’i’lel che’ bajche’ tsi’ cha’leyob lamital. Tsa’ chʌmiyob uxp’ejl i cha’c’al ti mil ti jump’ejl jach q’uin. 9Mach yomic mi la quilʌben i pusic’al lac Yum che’ bajche’ tsi’ cha’leyob lamital. Tsa’ jisʌntiyob ti lucum tac. 10Mach la’ cha’len wulwul t’an ti la’ pusic’al che’ bajche’ tsi’ cha’leyob jini tsa’ bʌ jisʌntiyob cha’an jini Angel yujil bʌ tsʌnsa.
11Che’ʌch tsa’ ujtiyob cha’an laj cʌntesʌntel. Tsa’ ts’ijbunti cha’an lac tic’ol joñonla cuxulonto bʌ la ti ili ora che’ lʌc’ʌlix i jilibal. 12Jini cha’an jini mu’ bʌ i q’uel i bʌ ti xuc’ul, la’ i cʌntan i bʌ ame yajlic. 13Ma’anic mi junchajpic la’ pʌyol ti mulil mach bʌ anic tsi’ yubiyob yaño’ bʌ. Xuc’ul i pusic’al Dios. Ma’anic mi’ yʌq’ueñetla la’ taj la’ pʌyol ti mulil mach bʌ mejlic la’ cuch. Che’ mi la’ pʌjyel ti mulil, Dios mi’ yʌq’ueñetla la’ p’ʌtʌlel cha’an mi la’ cuch. Che’ jini mi mejlel la’ loq’uel ba’ pʌybilet ti mulil.
Jini ch’ujul bʌ waj
14Jini cha’an c’uxbibilet bʌ la, mach yomic mi la’ ch’ujutesan dioste’ tac. 15Che’ʌch mic pejcañetla, come mi la’ ña’tan pañimil. Ña’tanla bajche’ yom mi la’ jac’. 16Che’ mi lac tem ch’ʌm jini vaso che’ mi lac suben Dios wocolix i yʌlʌ, ¿mach ba wolic lac tem taj lac wenlel ti’ ch’ich’el Cristo? Che’ mi lac tem c’ux jini waj mu’ bʌ lac xut’, ¿mach ba wolic lac tem taj lac wenlel ti’ bʌc’tal Cristo? 17Anquese cabʌlonla, lajalonla bajche’ junq’uejl waj. Jump’ejl i bʌc’talonla Cristo, come ti pejtelelonla mi laj c’ux jini junq’uejl waj.
18Ña’tanla bajche’ mi’ melob israelob. Jini mu’ bʌ i c’uxob jini we’elʌl mu’ bʌ i yʌq’ueñob Dios ti’ majtan, ¿mach ba muq’uic i tem tajob i wenlel ti’ tojlel pulʌntib? 19¿Chuqui i sujmlel c t’an, che’ jini? ¿Am ba i c’ʌjñibal dioste’ tac? ¿Am ba i c’ʌjñibal jini aq’uebil bʌ dioste’ tac? Ma’anic. 20Pero jini sajtemo’ bʌ, che’ mi’ yʌc’ob i majtan ti pulʌntib, woli’ yʌq’ueñob xibajob. Ma’anic mi’ yʌq’ueñob Dios. Mach comic mi la’ tem ajñel yic’ot xibajob. 21Mach mejlic mi la’ jap ti’ vaso lac Yum mi woli la’ jap ti’ vaso xibajob. Mach mejlic la’ c’ux waj ti’ mesa lac Yum mi woli la’ c’ux waj ti’ mesa xibajob. 22¿Mu’ ba lac techben i mich’ajel lac Yum? ¿Ñumen p’ʌtʌlon ba la bajche’ lac Yum?
Melela chuqui tac wen cha’an mi’ tsictiyel i ñuclel Dios
23Pejtelel jini la com bʌ lac mel mi mejlel lac mel, pero mach uts’atic mi tsa’ lac mele ti pejtelel. Come ma’anic i c’ʌjñibal ti pejtelel cha’an mi’ xuc’chocoñonla. 24Mach i lon sʌclan i bajñel wenlel mi juntiquilic. La’ i ña’tan i wenlel yaño’ bʌ. 25C’uxula jini mu’ bʌ i choñob ti choño’ we’elʌl. Mach la’ c’ajtibeñob mi aq’uebilix dioste’ tac ame tejchic t’an ti la’ pusic’al. 26Come i cha’an lac Yum jini lum yic’ot pejtelel i bʌl. 27Mi tsi’ pʌyʌyetla ti’ yotot jini mach bʌ wolic i ñop Dios, cucula mi la’ wom majlel. C’uxula chuqui tac mi’ yʌq’ueñetla. Mach la’ c’ajtiben mi aq’uebil dioste’ tac ame tejchic t’an ti la’ pusic’al. 28Mi an majch mi’ subeñetla: Tsa’ix aq’uenti dioste’ tac, mi che’en, mach mi la’ c’ux ame tejchic t’an ti’ pusic’al jini tsa’ bʌ i subeyetla, 29ame cajic ti t’an i pusic’al, mach a pusic’alic. ¿Chucoch mi’ q’uejlel ti mulil jini mu’ bʌ c mel ti jump’ejl c pusic’al che’ woli ti t’an i pusic’al yambʌ? 30Mi tsaj c’uxu ti’ yutslel c pusic’al, ¿chucoch mij q’uejlel ti xmulil cha’an jini tsa’ bʌ j c’uxu che’ bʌ tsac sube Dios wocolix i yʌlʌ?
31Mi an chuqui mi la’ c’ux, che’ jini, mi an chuqui mi la’ jap, mi an yambʌ chuqui mi la’ cha’len, cha’lenla ti pejtelel cha’an mi’ tsictiyel i ñuclel Dios. 32Mach mi la’ wʌc’ ti yajlel judíojob, mi gentilob, mi xñopt’añob i cha’año’ bʌ Dios. 33Joñon ja’el wolic ñop c mel chuqui uts’at ti’ wut pejtelel winicob ti pejtelel chuqui mic mel. Ma’anic mic sʌclan c bajñel wenlel. Mic sʌclan i wenlel yaño’ bʌ cha’an mi’ coltʌntelob cabʌlob.
11Uts’at bʌ ti’ tojlel x’ixicob
1Melela che’ bajche’on. Joñon ja’el mic mel che’ bajche’ Cristo. 2Hermanojob mic sub uts’at woli la’ mel, come c’ajalon la’ cha’an. Woli la’ chʌn jac’ jini cʌntesa che’ bajche’ tsaj cʌntesayetla.
3Com mi la’ ña’tan, i Yum pejtelel winicob jiñʌch Cristo. I yum x’ixic jiñʌch winic. I yum Cristo jiñʌch Dios. 4Mi mosol i jol winic che’ mi’ pejcan Dios o che’ mi’ cha’len subt’an, woli’ ts’a’len i yum. 5Che’ mach mosolic i jol x’ixic woli bʌ ti oración yic’ot subt’an mi’ ts’a’len i yum, come lajal yilal mi tsa’ jujchinti i jol. 6Mi ma’anic mi’ mos i jol x’ixic, la’ laj sejt’ic i jol. Mi quisintic mi’ yubin che’ set’bil i jol yic’ot che’ jujchibil, la’ i mos i jol. 7Mach wenic mi tsi’ moso i jol winic, come jiñʌch i yejtal Dios yic’ot i ñuclel Dios. Jini x’ixic i ñuclelʌch winic. 8Come mach loq’uemic winic ti x’ixic, pero loq’uem x’ixic ti winic. 9Come Dios ma’anic tsi’ mele winic cha’an i wenlel x’ixic. Tsi’ mele x’ixic cha’an i wenlel winic. 10Jini cha’an la’ tsictiyic ti’ jol x’ixic i yejtal i p’ʌtʌlel winic, come woli’ q’uelob jini ángelob.
11Ti lac Yum cʌyʌl x’ixic ti winic, cʌyʌl winic ti x’ixic. 12Come loq’uem x’ixic ti winic, che’ ja’el winic tilem ti x’ixic. Ti’ cha’ticlelob tilemob ti Dios. 13Ña’tanla jatetla bajche’ yom. ¿I t’ojol ba mi’ pejcan Dios x’ixic che’ mach mosolic i jol? 14¿Mach ba anic mi’ cʌntesañetla la’ bajñel pusic’al, mach i t’ojolic che’ tam i jol winic? 15Mach che’ic x’ixic. Mi tam i jol i t’ojol jax, come aq’uebil i tsutsel i jol cha’an i mosil. 16Mi an majch mi’ tech cabʌl t’an mach che’ic mic mel lojon. Mach che’ic mi’ melob xñopt’añob i cha’año’ bʌ Dios.
I Cena lac Yum
17Pero mic subeñetla mach wenic woli la’ mel. Ma’anic mij q’ueletla ti uts’at. Come che’ mi la’ tempan la’ bʌ ma’anic la’ wenlel, pero leco mi la’ wajñel. 18Ñaxan tsa cubi woli la’ t’ox la’ bʌ ti a’leya che’ mi la’ tempan la’ bʌ. Mi cʌl isujm. 19¿Yom ba mi la’ t’ox la’ bʌ ti a’leya cha’an mi’ tsictiyel majqui wen ti la’ tojlel? 20Che’ mi la’ tempan la’ bʌ, mach jinic i Cena lac Yum mu’ bʌ la’ c’ux. 21Come che’ mi la’ c’ux ti jujuntiquiletla, mi la’ se’ñun la’ bʌ cha’an mi la’ bajñel ch’ʌm la’ waj. Juntiquil an i wi’ñal, yambʌ yʌc. 22¿Mach ba anic la’ wotot cha’an ya’i mi la’ cha’len we’el uch’el? ¿Mu’ ba la’ ts’a’len jini xñopt’añob mu’ bʌ i tempañob i bʌ? ¿Mu’ ba la’ wʌc’ ti quisin jini mach bʌ añobic i bʌl i ñʌc’? ¿Chuqui yom mic subeñetla? ¿Yom ba mic sub uts’at woli la’ mel? Mach yomic. Mach uts’atic.
23Come tsa’ix aq’uentiyon c sub i sujmlel i Cena lac Yum che’ bajche’ tsaj cʌntesayetla. Lac Yum Jesús tsi’ ch’ʌmʌ waj ti jini jach bʌ ac’ʌlel che’ bʌ tsa’ ajq’ui ti’ c’ʌb i contra. 24Che’ bʌ tsa’ ujti i suben wocolix i yʌlʌ Dios, tsi’ xut’u. Tsi’ yʌlʌ: “Ch’ʌmʌla, c’uxula, jiñʌch c bʌc’tal mu’ bʌ i xujt’el cha’añetla. Che’ʌch yom mi la’ cha’len cha’an mi la’ ña’tañon”. Che’ tsi’ yʌlʌ. 25Che’ ja’el, tsi’ ch’ʌmʌ vaso che’ bʌ tsa’ ujti ti we’el. Tsi’ yʌlʌ: “Jini vaso jiñʌch i yejtal jini tsijib xuc’ul bʌ t’an wa’chocobil bʌ tic ch’ich’el. Che’ʌch yom mi la’ cha’len ti jujunyajl che’ mi la’ jap cha’an mi la’ ña’tañon”, che’en. 26Come ti jujunyajl che’ mi la’ c’ux jini waj, che’ mi la’ jap ti jini vaso, mi la’ wʌc’ ti tsictiyel bajche’ tsa’ chʌmi lac Yum c’ʌlʌl mi’ cha’ tilel.
27Jini cha’an jini mach bʌ wenic bajche’ mi’ c’ux jini waj yic’ot bajche’ mi’ jap ti’ vaso lac Yum, an i mul, come mi’ ts’a’len i bʌc’tal yic’ot i ch’ich’el lac Yum. 28Ti jujuntiquil la’ i bajñel ña’tan bajche’ an i pusic’al. Che’ jini, la’ i c’ux jini waj, la’ i jap ti jini vaso. 29Come jini mach bʌ wenic mi’ c’ux mi’ jap, woli’ pʌy i wocol come ma’anic mi’ ña’tan i bʌc’tal lac Yum che’ mi’ c’ux che’ mi’ jap. 30Jini cha’an an cabʌl c’amo’ bʌ ba’ añetla, cabʌl c’uño’ bʌ. Lamital chʌmeñob. 31Tsa’ic lac ñaxan mele lac bʌ, ma’anic tsa’ aq’uentiyonla wocol. 32Pero che’ mi la cʌq’uentel wocol, lac Yum woli’ ju’sʌbeñonla lac pusic’al cha’an ma’anic mi la cochel ti toj mulil yic’ot i cha’año’ bʌ pañimil.
33Jini cha’an quermanojob, che’ mi la’ tempan la’ bʌ cha’an mi la’ c’ux waj, pijtan la’ bʌ. 34Mi an i wi’ñal juntiquil, la’ i c’ux i waj ti’ yotot, cha’an ma’anic mi la’ wʌq’uentel wocol cha’an chuqui woli la’ mel che’ mi la’ tempan la’ bʌ. Mi an yambʌ wocol ti la’ tojlel mi caj c subeñetla bajche’ yom mi la’ toj’esan ba’ ora mij c’otel.
12Laj c’ʌjñibal mu’ bʌ i yʌq’ueñonla jini Espíritu
1Hermanojob, com mi la’ ña’tan i sujmlel laj c’ʌjñibal tsa’ bʌ aq’uentiyonla ti jini Espíritu. 2La’ wujil che’ sajtemetla tsa’ pʌjyiyetla majlel ba’an x’uma’ dios tac, bajche’ jach tsa’ ñijcʌntiyetla. 3Jini cha’an mic subeñetla mach cʌntesʌbilic ti’ yEspíritu Dios majqui jach mi’ yʌl chocol ti Dios jini Jesús. Cojach jini cʌntesʌbil bʌ ti Ch’ujul bʌ Espíritu mi mejlel i pejcan Jesús ti’ Yum.
4Ti chajp ti chajp an laj c’ʌjñibal tsa’ bʌ aq’uentiyonla, pero juntiquil jach Espíritu. 5Ti chajp ti chajp an la que’tel, pero juntiquil jach lac Yum. 6Ti chajp ti chajp an lac melbal, pero juntiquil jach Dios mu’ bʌ i ñijcañonla ti lac pejtelel. 7Ti jujuntiquilonla aq’uebilonla laj c’ʌjnibal ti jini Espíritu cha’an i wenlel pejtelelob. 8Come juntiquil mi’ yʌq’uentel cabʌl i ña’tʌbal cha’an jini Espíritu cha’an mi’ sub i sujmlel jini t’an. Yambʌ mi’ yʌq’uentel cabʌl i ña’tʌbal cha’an jini jach bʌ Espíritu cha’an mi’ cha’len cʌntesa. 9Yambʌ mi’ yʌq’uentel i ñop Dios ti wen xuc’ul cha’an jini jach bʌ Espíritu. Yambʌ mi’ yʌq’uentel i c’ʌjñibal ti lajmesaya cha’an jini jach bʌ Espíritu. 10Yambʌ mi’ yʌq’uentel i pʌs i yejtal i p’ʌtʌlel Dios. Yambʌ mi’ yʌq’uentel i c’ʌjñibal ti subt’an. Yambʌ mi’ yʌq’uentel i cʌn mi wen o mi jontol jini espíritujob. Yambʌ mi’ yʌq’uentel i cha’len t’an ti yan tac bʌ t’an. Yambʌ mi’ yʌq’uentel i ñusan i sujmlel yan tac bʌ t’an. 11Jini juntiquil jach bʌ Espíritu mi’ yʌq’ueñonla lac mel pejtelel ili tac. Ti chajp ti chajp mi’ yʌq’ueñob i c’ʌjñibal winicob x’ixicob ti jujuntiquil che’ bajche’ yom Dios.
I bʌc’tal Cristo
12An cabʌl chucbil tac bʌ ti lac bʌc’tal, pero jump’ejl jach lac bʌc’tal. Che’ʌch ja’el i bʌc’tal Cristo yic’ot xñopt’añob. 13Come juntiquil jach jini Espíritu. Che’ bajche’ ti ch’ʌmja’ tsi’ tem otsayonla ti jump’ejl jach i bʌc’tal Cristo, mi judío, mi griego, mi jini am bʌ ti’ yum, mi jini mach bʌ anic ti’ yum. Tsa’ aq’uentiyonla lac ch’ʌm jini jach bʌ Espíritu.
14Come jini lac bʌc’tal mach junchajpic jach chuqui chucbil pero cabʌlʌch. 15Jini la coc, mi tsi’ yʌlʌ mach i cha’anic lac bʌc’tal come mach c’ʌbʌlic, ¿mach ba i cha’anic lac bʌc’tal che’ jini? 16Jini lac chiquin, mi tsi’ yʌlʌ mach i cha’anic lac bʌc’tal come mach wutʌlic, ¿mach ba i cha’anic lac bʌc’tal che’ jini? 17Mi ti pejtelel lac bʌc’tal to’o lac wut jach an, ¿bajche’ mi la cubin t’an che’ jini? Mi ti pejtelel lac bʌc’tal to’o lac chiquin jach an, ¿bajche’ mi mejlel lac sic’? 18Ti chajp ti chajp tsi’ tempa Dios jini chucul tac bʌ ti lac bʌc’tal che’ bajche’ yom i pusic’al. 19Mi to’ol c’ʌbʌl jach pejtelel lac bʌc’tal, ¿bajche’ an lac bʌc’tal che’ jini? 20Pero isujm an cabʌl chucul tac bʌ ti lac bʌc’tal anquese jump’ejl jach lac bʌc’tal.
21Jini lac wut mach mejlic i suben laj c’ʌb ma’anic i c’ʌjñibal. Che’ ja’el lac jol mach mejlic i suben la coc ma’anic i c’ʌjñibal. 22Pero jini chucul tac bʌ ti lac bʌc’tal mach bʌ p’ʌtʌlic yilal, ñumen an i c’ʌjñibal. 23Jini chucul tac bʌ ti lac bʌc’tal mach bʌ yoque uts’atic mi laj q’uel, ñumen mi la cʌq’uen i t’ojlʌwib. Jini mach bʌ i t’ojolic ti q’uelol mi lac mos ti pisil. 24Jini i t’ojol bʌ ti q’uelol ma’anic chuqui yom mi’ yʌq’uentel. Che’ bʌ tsi’ tempa lac bʌc’tal Dios, tsi’ yʌq’ue ñumen i c’ʌjñibal jini mach bʌ ñuquic ti q’uelol. 25Che’ jini, ma’anic mi’ contrajiñob i bʌ jini chucul tac bʌ ti lac bʌc’tal. Mi’ tem cʌntañob i bʌ. 26Mi tsi’ taja wocol jump’ejl chucul bʌ ti lac bʌc’tal, mi la cubin ti pejtelel lac bʌc’tal. Mi tsi’ taja i ñuclel, tijicña mi la cubin ti pejtelel lac bʌc’tal.
27Jatetla i bʌc’taletla Cristo. Jatetla miembrojetla ti’ bʌc’tal Cristo. 28Dios tsi’ wa’chocoyonla ti’ tojlel xñopt’añob, ñaxan jini apóstolob, wi’il subt’añob, wi’il xcʌntesajob, wi’il jini mu’ bʌ i pʌsob i yejtal i p’ʌtʌlel Dios, yic’ot jini am bʌ i c’ʌjñibal ti ts’ʌcaya, yic’ot jini am bʌ i c’ʌjñibal ti coltaya, yic’ot jini am bʌ i ye’tel ti yumʌl, yic’ot jini mu’ bʌ i cha’leñob t’an ti yan tac bʌ t’an. 29¿Apóstolob ba ti pejtelel? ¿Subt’añob ba ti pejtelelob? ¿Xcʌntesajob ba ti pejtelelob? ¿Mu’ ba i pʌsob i yejtal i p’ʌtʌlel Dios ti pejtelelob? 30¿Am ba i c’ʌjñibal ti ts’ʌcaya ti pejtelelob? ¿Mu’ ba i cha’leñob t’an ti yan tac bʌ t’an ti pejtelelob? ¿Mu’ ba i ñusañob i sujmlel yan tac bʌ t’an ti pejtelelob? 31Pero cha’lenla wersa la’ taj jini ñumen wen bʌ la’ c’ʌjñibal. Mi caj c pʌsbeñetla wʌle chuqui ñumen uts’at.
13C’uxbiya
1Muq’uic c cha’len t’an ti’ t’an tac winicob yic’ot ti’ t’an ángelob, mi ma’anic j c’uxbiya, tsintsiñayon bajche’ tsucu taq’uin. Lajalon bajche’ tsucu taq’uin mu’ bʌ i cujtʌl. 2Anic j c’ʌjñibal ti subt’an yic’ot c ña’tʌbal ti pejtelel i sujmlel mach bʌ tsictiyemic ti yambʌ ora, yic’ot pejtelel chuqui tac ña’tʌbil ti pañimil, muq’uic c ñop Dios ti xuc’ul bʌ c pusic’al cha’an mic tʌts’ wits, pero mi ma’anic j c’uxbiya, ma’anic j c’ʌjñibal. 3Muq’uic c laj pucbeñob c chubʌ’an cha’an mic we’san jini mach bʌ añobic i bʌl i ñʌc’, muq’uic cʌc’ c bʌ ti pulel cha’an mij coltañob, mi ma’anic j c’uxbiya, ma’anic chuqui mic taj.
4Jini yujil bʌ c’uxbiya jal mi’ cuchben i mul yaño’ bʌ, wen uts i pusic’al. Jini yujil bʌ c’uxbiya mach tsʌytsʌyñayic i pusic’al che’ mi’ q’uel i wenlel i pi’ʌlob. Ma’anic mi’ sub i bʌ ti ñuc. Ma’anic mi’ mel i bʌ ti chan ti’ tojlel i pi’ʌlob. 5Jini yujil bʌ c’uxbiya mach lecojic i melbal. Ma’anic mi’ sajcan chuqui yom ti’ bajñel pusic’al. Ma’anic mi’ bʌc’ mich’an, ma’anic mi’ lot ti’ pusic’al i contrajintel. 6Mach tijicñayic mi’ yubin che’ mi’ tic’lʌntel jini toj bʌ. Tijicña mi’ yubin che’ uts’at mi’ loq’uel jini toj bʌ. 7Mi’ ñusan pejtel wocol, mi’ ñop pejtelel chuqui tac isujm, mi’ cha’len pijtaya ti’ xuc’tʌlel i pusic’al, mi’ ñusan ti uts’at pejtelel chuqui tac mi’ yujtel.
8Mach jilic i c’uxbiya ti pejtelel ora. Mi’ caj ti ujtel i c’ʌjñibal subt’an. Mi’ caj ti jilel yan tac bʌ t’an. Mi caj i jilel i ña’tʌbal pañimil. 9Come mach laj cʌmbilic lac cha’an. Mach ts’ʌcʌlic mi lac tsictesan ti subt’an. 10Che’ mi’ tilel jini ts’ʌcʌl bʌ, mi’ caj ti jilel jini mach bʌ ts’ʌcʌlic. 11Che’ alobon to tsac cha’le t’an che’ bajche’ alob. Tsac ña’ta che’ bajche’ alob. Tsac ch’ʌmbe isujm che’ bajche’ alob. Che’ bʌ tsa’ ochiyon ti winic, tsaj cʌyʌ c mel che’ bajche’ alob. 12Come wʌle mi lac yʌxña q’uel Cristo che’ bajche’ ti espejo. Pero che’ mi’ tilel mi caj laj q’uelben i wut. Wʌle wolic yʌxña cʌn, pero ti wi’il bʌ ora mi caj c wen cʌn che’ bajche’ Dios mi’ cʌñon. 13Wʌle anto lac cha’an uxchajp: lac ñopbal, lac pijtaya yic’ot laj c’uxbiya. Pero jini ñumen ñuc bʌ jiñʌch c’uxbiya.
14Jini mu’ bʌ i cha’len t’an ti yan tac bʌ t’an
1Chʌn cha’lenla c’uxbiya. Cha’lenla wersa cha’an mi la’ taj la’ c’ʌjñibal ti jini Espíritu. Jini ñumen uts’at bʌ jiñʌch la’ c’ʌjñibal ti subt’an. 2Come jini mu’ bʌ i cha’len t’an ti yan tac bʌ t’an ma’anic mi’ pejcan i pi’ʌlob, cojach mi’ pejcan Dios. Ma’anic mi’ ch’ʌmbeñob isujm winicob. Mi’ sub i sujmlel Dios ti yambʌ t’an ti Espíritu. 3Jini mu’ bʌ i cha’len subt’an mi’ xuc’chocobeñob i pusic’al winicob. Mi’ xic’ob ti’ melol chuqui uts’at. Mi’ ñuq’uesʌbeñob i pusic’al. 4Jini mu’ bʌ i cha’len t’an ti yan tac bʌ t’an mi’ bajñel xuc’chocon i pusic’al. Jini mu’ bʌ i cha’len subt’an mi’ xuc’chocobeñob i pusic’al xñopt’añob mu’ bʌ i tempañob i bʌ. 5Uts’at mi ti pejteletla an la’ c’ʌjñibal ti yan tac bʌ t’an. Pero ñumen uts’at mi la’ cha’len subt’an ti la’ bajñel t’an. Come lolom jach yan tac bʌ t’an mi ma’anic majch mi’ ñusʌbeñob i sujmlel cha’an mi’ xuc’chocobeñob i pusic’al xñopt’añob. Che’ jini ñumen an i c’ʌjñibal jini mu’ bʌ i cha’len subt’an bajche’ jini mu’ bʌ i cha’len t’an ti yan tac bʌ t’an.
6Wʌle hermanojob, mi woliyon ti t’an ti yan tac bʌ t’an che’ mic tilel ba’ añetla, ¿chuqui i c’ʌjñibal la’ cha’an? Cojach an i c’ʌjñibal mi tsac subeyetla ti la’ t’an jini tsa’ bʌ pʌsbentiyon, mi jini ña’tʌbil bʌ c cha’an, mi jini wen t’an, o mi cʌntesa. 7Jini música tac ja’el, che’ bajche’ amʌy yic’ot guitarra mach bʌ cuxulic, mi mach yʌñʌlic mi’ loq’uel i t’an, ¿bajche’ che’ jini, mi’ caj ti cʌjñel chuqui woli ti wustʌl ti amʌy yic’ot chuqui woli ti ñijcʌntel ti guitarra? 8Mi mach uts’atic mi’ loq’uel i t’an trompeta, ¿majqui mi caj i chajpan i bʌ cha’an guerra? 9Che’ ja’el jatetla, che’ mi la’ cha’len t’an ti yambʌ t’an mach bʌ anic mi’ ch’ʌmbeñob isujm, ¿bajche’ che’ jini mi caj i ña’tañob chuqui mi la’ wʌl? Che’ jini to’ol t’an jach woliyetla. 10Isujm an cabʌl yan tac bʌ t’an ti pañimil. Ti jujunchajp an i sujmlel. 11Mi ma’anic mic ch’ʌmben isujm junchajp t’an, che’ʌch mi’ q’uelon jini mu’ bʌ ti t’an bajche’ juntiquil ch’oyol bʌ ti yambʌ lum. Joñon ja’el mij q’uel jini winic mu’ bʌ ti t’an che’ bajche’ juntiquil ch’oyol bʌ ti yambʌ lum. 12Che’ ja’el jatetla, come la’ wom la’ c’ʌjñibal mu’ bʌ i yʌc’ jini Espíritu, cha’lenla wersa la’ taj cabʌl la’ c’ʌjñibal cha’an mi la’ xuc’chocon jini xñopt’añob mu’ bʌ i tempañob i bʌ.
13Jini cha’an jini mu’ bʌ i cha’len t’an ti yambʌ t’an la’ i c’ajtiben Dios i ña’tʌbal cha’an mi’ ñusan i sujmlel. 14Mi wolic pejcan Dios ti yambʌ t’an mach bʌ j cʌñʌyic, wolic pejcan tic ch’ujlel jach, mach tic ña’tʌbalic. 15¿Bajche’ yom che’ jini? Mi caj c pejcan Dios tic ch’ujlel, mi caj c pejcan tic ña’tʌbal ja’el. Mi caj c cha’len c’ay tic ch’ujlel, mi caj c cha’len c’ay tic ña’tʌbal ja’el. 16Come mi ti a ch’ujlel jach ma’ ch’ujutesan Dios ti’ tojlel jini mu’ bʌ i tilel i ñich’tan, ¿bajche’ mi caj i yʌl amén che’ ma’ suben Dios wocolix i yʌlʌ, mi ma’anic mi’ ch’ʌmben isujm chuqui wola’ wʌl? 17Isujm jatet ma’ suben Dios wocolix i yʌlʌ ti uts’at, pero ma’anic mi’ xuc’chocontel i pusic’al yambʌ. 18Mic suben Dios wocolix i yʌlʌ, come ñumen mic cha’len t’an ti yan tac bʌ t’an bajche’ jatetla. 19Uts’at mi cʌl che’ mic cha’len jo’p’ejl t’an yic’ot c ña’tʌbal cha’an mij cʌntesan yaño’ bʌ. Mach uts’atic lujump’ejl mil t’an ti yambʌ t’an mach bʌ yujilobic.
20Hermanojob, mach yomic lajal la’ ña’tʌbal bajche’ i ña’tʌbal alobob. Mach yomic jontoletla. Yom lajaletla bajche’ alʌlob. Yom lajal la’ ña’tʌbal bajche’ winicob año’ bʌ cabʌl i pusic’al. 21Ts’ijbubil: “Mi caj j c’ʌmben i yej yaño’ bʌ yic’ot yan tac bʌ t’an cha’an mic pejcan ili winicob x’ixicob. Pero anquese che’ʌch mic pejcañob mach yomobic i yubibeñon c t’an”, che’en lac Yum. 22Jini t’an tac mach bʌ cʌmbilic jiñʌch i yejtal i p’ʌtʌlel Dios ti’ tojlel jini mach bʌ anic mi’ ñopob Dios, mach ti’ tojlelic jini mu’ bʌ i ñopob. Pero che’ an majch mi’ cha’len alt’an, an i c’ʌjñibal i cha’an jini mu’ bʌ i ñopob. Ma’anic i c’ʌjñibal i cha’an jini mach bʌ anic mi’ ñopob. 23Che’ mi la’ tempan la’ bʌ xñopt’añet bʌ la, mi ti jujuntiquiletla mi la’ cha’len t’an ti yan tac bʌ t’an, ¿chuqui mi caj i yʌlob jini mach bʌ cʌntesʌbilobic yic’ot jini mach bʌ anic mi’ ñopob? ¿Mach ba muq’uic caj i yʌlob sojquem la’ jol? 24Che’ mi’ yochel juntiquil mach bʌ anic mi’ ñop, o mi juntiquil mach bʌ cʌntesʌbilic, mi ti pejteletla mi la’ cha’len subt’an, che’ jini mi’ jec’bentel i pusic’al cha’an la’ t’an ti la’ pejtelel. Mi caj i ña’tan xmulilʌch. 25Mi’ caj ti tsictiyel jini mucul tac bʌ ti’ pusic’al. Jini cha’an mi caj i pʌcchocon i bʌ cha’an mi’ ch’ujutesan Dios. Mi caj i yʌl: Ya’an Dios la’ wic’ot ti isujm, che’en.
Toj yom jini ch’ujutesaya
26¿Bajche’ yom, che’ jini, hermanojob? Che’ mi la’ tempan la’ bʌ, juntiquil an i salmo, yambʌ an i cʌntesʌbal, yambʌ mi’ cha’len t’an ti yambʌ t’an, yambʌ mi’ yʌq’uentel chuqui mi’ pʌs, yambʌ mi’ ñusan i sujmlel jini yan tac bʌ t’an. La’ mejlic ti pejtelel cha’an mi la’ xuc’chocon la’ bʌ. 27Mi an mu’ bʌ i cha’leñob t’an ti yan tac bʌ t’an jasʌl cha’tiquil uxtiquil. Mach yomic i ñumel ti uxtiquil. Belecña yom mi’ subob. La’ i ñusan i sujmlel juntiquil. 28Mi ma’anic majch mi mejlel i ñusan i sujmlel jini t’an, mach i cha’len t’an ti yambʌ t’an ba’ mi’ tempañob i bʌ. La’ i bajñel pejcan Dios.
29Che’ ja’el la’ i cha’leñob subt’an cha’tiquil uxtiquil jach. Jini yaño’ bʌ la’ i yubiñob mi toj. 30Mi an juntiquil buchul bʌ mu’ bʌ i yʌq’uentel chuqui mi caj i sub, la’ i cʌy i t’an jini ñaxan bʌ. 31Come ti pejteletla mi mejlel la’ q’uex la’ bʌ ti subt’an cha’an mi la’ cʌntesan la’ bʌ ti pejtelel yic’ot cha’an mi la’ xic’ la’ bʌ ti uts’at. 32Jini aq’uebil bʌ jump’ejl t’an ti Dios mi mejlel i yujtesan i sub, o mi mejlel i poj cʌy cha’an mi’ sub yambʌ. 33Come Dios ma’anic mi’ mulan jini ju’ucña bʌ, cojach ñʌch’ʌl bʌ baqui jach mi’ tempañob i bʌ i cha’año’ bʌ Dios. 34La’ ajnicob ti ñʌch’ʌl jini x’ixicob che’ mi’ tempañob i bʌ xñopt’añob. Come tic’bilob ti t’an. Yom mi’ jac’ob i cʌntesʌntel che’ bajche’ mi’ yʌl jini mandar. 35Mi an chuqui yomob i ñop jini x’ixicob, la’ i c’ajtibeñob i ñoxi’al ti’ yotot. Come quisintic jax che’ mi’ cha’leñob t’an x’ixicob ba’ mi’ tempañob i bʌ xñopt’añob. 36Cʌxti mi ya’ic tsa’ tejchi i t’an Dios ba’ añetla. Cʌxti mi ya’ic jach tsa’ c’oti i t’an ya’ ba’ añetla.
37Mi an majch mi’ sub i bʌ ti subt’an mu’ bʌ i jac’ben jini Espíritu, la’ i ña’tan jiñʌch i mandar lac Yum tsa’ bʌ c ts’ijbubeyetla. 38Mi an juntiquil mach bʌ yomic i jac’, mach la’ jac’ben i t’an ja’el. 39Jini cha’an hermanojob, cha’lenla wersa la’ taj la’ c’ʌjñibal ti subt’an. Mach la’ tic’ jini mu’ bʌ i cha’leñob t’an ti yan tac bʌ t’an. 40Ti pejtelel chuqui tac mi la’ cha’len, tem melela che’ bajche’ yom.
15Tsa’ tejchi ch’ojyel Cristo
1Mic subeñetla ja’el hermanojob, jiñʌch jini wen t’an tsa’ bʌ c subeyetla, tsa’ix bʌ la’ ñopo, woli bʌ la’ chʌn ñop. 2Mi woli la’ chʌn ña’tan jini t’an tsa’ bʌ c subeyetla, coltʌbiletixla, mi isujm tsa’ la’ ñopo che’ bʌ tsa’ la’ subu la’ bʌ ti hermano.
3Come tsaj cʌntesayetla jini jach bʌ t’an tsa’ bʌ aq’uentiyon. Tsa’ chʌmi Cristo cha’an lac mul, che’ bajche’ mi’ yʌl ti’ Ts’ijbujel Dios. 4Tsa’ mujqui. Ti yuxp’ejlel q’uin tsa’ cha’ ch’ojyi che’ bajche’ mi’ yʌl ti’ Ts’ijbujel Dios. 5Tsa’ tsictiyi ti’ wut Pedro, wi’il ti’ wut jini lajchʌntiquil. 6Wi’il tsa’ tsictiyi ti’ wut ñumen ti jo’c’al i cha’bajc’ hermanojob che’ temel añob. Cuxulob to cabʌl jini hermanojob, ojlil tsa’ chʌmiyob. 7Wi’il tsa’ tsictiyi ti’ wut Jacobo, wi’il ti’ wut pejtelel apóstolob. 8Wi’ilix tsa’ tsictiyi tic wut ja’el. Che’ʌch añon bajche’ juntiquil tsa’ bʌ i yila pañimil che’ ñumenix i yorajlel.
9Come joñon mach lajalic c ñuclel yic’ot yaño’ bʌ apóstolob. Mach uts’atonic che’ bʌ tsa’ pʌjyiyon ti apóstol, come tsac tic’la xñopt’añob i cha’an Dios. 10Pero wʌle apóstolon cha’an ti’ yutslel i pusic’al Dios. Mach lolomic jach tsa’ aq’uentiyon i yutslel i pusic’al Dios. Ñumen cabʌl tsac cha’le e’tel bajche’ pejtelel yaño’ bʌ, pero mach joñonic, jiñʌch i yutslel i pusic’al Dios am bʌ quic’ot. 11Tic pejtelel lojon, mi joñon o mi yaño’ bʌ, mic sub lojon jini wen t’an, jini jach bʌ tsa’ bʌ la’ ñopo.
Mi caj i tejchelob ch’ojyel chʌmeño’ bʌ
12Mi wolic sub lojon tsa’ix tejchi ch’ojyel Cristo, ¿chucoch mi’ lon alob cha’tiquil uxtiquil ya’ ba’ añetla ma’anic mi’ ch’ojyelob jini chʌmeño’ bʌ? 13Mi ma’anic mi’ cha’ ch’ojyel jini chʌmeño’ bʌ, che’ jini, ma’anic tsa’ ch’ojyi Cristo ja’el. 14Mi ma’anic tsa’ ch’ojyi Cristo lolom jach mic cha’len lojon subt’an. Lolom jach mi lac ñop ja’el. 15Che’ic jini, lot jach mu’ bʌ c sub lojon, come tsa’ix c subu lojon: Dios tsi’ teche ch’ojyel Cristo. Pero mach isujmic lac t’an mi ma’anic mi’ ch’ojyelob jini chʌmeño’ bʌ, come che’ jini, Dios ma’anic tsi’ teche ch’ojyel Cristo. 16Come mi ma’anic mi’ tejchelob ch’ojyel, ma’anic tsa’ tejchi Cristo ja’el. 17Mi ma’anic tsa’ tejchi ch’ojyel Cristo lolom jach mi la’ ñop. Che’ic jini, añet tola ti la’ mul. 18Sajtemob ja’el jini chʌmeño’ bʌ tsa’ bʌ i ñopoyob Cristo. 19Mi wʌ’ jach ti pañimil mi’ poj coltañonla Cristo, ñumen p’ump’uñonla bajche’ yaño’ bʌ winicob.
20Pero isujm tsa’ix tejchi ch’ojyel Cristo ba’an chʌmeño’ bʌ. Jiñʌch ñaxan bʌ tsa’ bʌ ch’ojyi. 21Come cha’an ti’ caj juntiquil winic mi’ chʌmelob pejtelel winicob, che’ ja’el cha’an ti’ caj juntiquil winic mi’ tejchelob ch’ojyel jini chʌmeño’ bʌ. 22Come che’ bajche’ mi’ chʌmelob pejtelel i p’olbal Adán, che’ ja’el mi caj i cha’ cuxtʌyelob pejtelel año’ bʌ ti’ Cristo. 23Ti jujuntiquil mi’ cha’ tejchelob che’ bajche’ yom. Ñaxan tsa’ ch’ojyi Cristo, ti wi’il mi’ cha’ ch’ojyel i cha’año’ bʌ Cristo che’ mi’ cha’ tilel. 24Wi’il talix i jilibal ba’ ora Cristo mi caj i yʌq’uen i yumʌntel Dios i Tat che’ mi’ yujtel i jisʌbeñob i yumʌntel yic’ot i p’ʌtʌlel pejtelel i contrajob. 25Come wersa mi’ cha’len yumʌl Cristo jinto mi’ t’uchtan pejtelel i contrajob. 26Mi caj i jisan ja’el jini cojix bʌ laj contra mu’ bʌ i yʌc’ ti chʌmel lac bʌc’tal. 27Come Dios tsi’ yʌc’ʌ ti’ wenta Jesús pejtelel chuqui tac an. Che’ mi’ yʌl aq’uebil ti’ wenta pejtelel chuqui tac an, tsiquilʌch ma’anic tsi’ yʌc’ʌ i bʌ Dios ti’ wenta Cristo che’ bʌ tsi’ yʌq’ue pejtelel chuqui tac an. 28Che’ mi’ yujtel i ch’ʌm ti’ wenta i Yalobil Dios, mi caj i yʌc’ i bʌ ti’ wenta Dios tsa’ bʌ i yʌc’ʌ ti’ wenta pejtelel chuqui tac an. Che’ jini Dios i ñuclelʌch pejtelel chuqui tac an.
29Mi ma’anic mi’ cha’ ch’ojyelob jini chʌmeño’ bʌ, ¿chuqui i ye’tel mi’ ch’ʌmob ja’ jini cuxulo’ bʌ ti’ wenta jini tsa’ix bʌ chʌmiyob? ¿Chucoch che’ jini mi’ ch’ʌmob ja’ cha’an jini chʌmeño’ bʌ? 30¿Chucoch che’ jini mi cʌc’ lojon c bʌ ti jujump’ejl q’uin ba’ bʌbʌq’uen mic chʌmel lojon? 31Mic subeñetla hermanojob, isujm ñuc c pusic’al mij q’ueletla ti lac Yum Jesucristo. Isujm ja’el bʌbʌq’uen mic chʌmel ti jujump’ejl q’uin. 32Machic tsac ña’ta mi’ cha’ ch’ojyelob chʌmeño’ bʌ, ¿chuqui to i ye’tel tsaj contraji jini jontolo’ bʌ ti Efeso? Mi ma’anic mi’ cha’ ch’ojyelob jini chʌmeño’ bʌ, la’ lac cha’len we’el uch’el, come mach jalix mi caj lac chʌmel. 33Mach yomic mi la’ jac’ la’ lotintel. Jini jontolo’ bʌ lac pi’ʌlob mi’ bib’esañob lac pusic’al. 34Yom yʌxʌl la’ wo bajche’ yom. Mach la’ cha’len mulil. Come an winicob x’ixicob mach bʌ anic mi’ cʌñob Dios. Jini mic sub cha’an mij quisñitesañetla.
Bajche’ yilal jini tsiji’ bʌ lac bʌc’tal
35Pero an majqui mi caj i yʌl: ¿Bajche’ mi’ tejchelob ch’ojyel jini chʌmeño’ bʌ? ¿Bajche’ yilal i cuctal? che’en. 36Tontojet mu’ bʌ a wʌl jini. Jini mu’ bʌ a pʌc’ ma’anic mi’ colel mi ma’anic mi’ ñaxan mujquel. 37Jini mu’ bʌ a pʌc’ mach lajalic ti q’uelol bajche’ jini mu’ bʌ i pasel. Jini mu’ bʌ a pʌc’ to’ol pac’ jach, mi trigo, o mi yambʌ. 38Dios mi’ yʌq’uen i wut jini pac’ bajche’ yom. Ti jujunchajp pac’ mi’ yʌq’uentel i wut ti chajp ti chajp. 39Che’ ja’el mach junlajalic bʌc’talʌl. Isujm junchajp i bʌc’tal winicob, yambʌ i bʌc’tal bʌte’el, yambʌ i bʌc’tal chʌy, yambʌ i bʌc’tal te’lemut. 40An junchajp i bʌc’tal jini año’ bʌ ti panchan, yambʌ i bʌc’tal jini año’ bʌ ti pañimil. Junchajp i ñuclel jini año’ bʌ ti panchan, yambʌ i ñuclel jini año’ bʌ ti pañimil. 41Junchajp i ñuclel jini q’uin, yambʌ i ñuclel jini uw, yambʌ i ñuclel jini ec’, come i ñuclel jump’ejl ec’ mach lajalic bajche’ i ñuclel yambʌ ec’.
42Che’ʌch ja’el che’ mi’ cha’ ch’ojyelob jini chʌmeño’ bʌ. Jini mu’ bʌ i mujquel mi’ yoc’mʌl. Jini mu’ bʌ i cha’ ch’ojyel mach yujilic oc’mʌl. 43Ma’anic i ñuclel che’ mi’ mujquel. An i ñuclel che’ mi’ cha’ ch’ojyel. Ma’anic i p’ʌtʌlel che’ mi’ mujquel. An i p’ʌtʌlel che’ mi’ cha’ ch’ojyel. 44Ch’oyol ti lum lac bʌc’tal mu’ bʌ i mujquel, ch’oyol ti Espíritu lac bʌc’tal mu’ bʌ i tejchel ch’ojyel.
An lac bʌc’tal ch’oyol bʌ ti lum, an lac bʌc’tal ch’oyol bʌ ti Espíritu. 45Che’ʌch ts’ijbubil: “Jini ñaxan bʌ winic, i c’aba’ Adán, tsa’ aq’uenti i ch’ujlel. Pero Cristo an i yEspíritu cha’an mi’ yʌq’ueñonla laj cuxtʌlel”. 46Ñaxan mi la cʌq’uentel lac bʌc’tal ch’oyol bʌ ti lum, wi’ilix lac bʌc’tal ch’oyol bʌ ti Espíritu. 47Jini ñaxan bʌ winic Adán melbil ti lum. Pero Cristo, i cha’ticlel bʌ winic, ch’oyol ti panchan. 48Jini año’ bʌ i bʌc’tal ch’oyol bʌ ti lum lajalob bajche’ Adán ch’oyol bʌ ti lum. Jini mu’ bʌ i yʌq’uentelob i bʌc’tal ch’oyol bʌ ti panchan lajalob bajche’ Cristo ch’oyol bʌ ti panchan. 49Wʌle lajalonla ti q’uelol bajche’ Adán. Pero lajal mi caj la cajñel che’ bajche’ Cristo. 50Mic subeñetla, hermanojob, lac bʌc’tal yic’ot lac ch’ich’el yujil bʌ oc’mʌl mach ochic ti’ yumʌntel Dios ba’ ma’anic chuqui yujil oc’mʌl.
51La’ wilan, mic subeñetla jini mach bʌ tsictiyemic ti yambʌ ora: Mach ti pejtelonicla mi caj lac chʌmel, pero ti pejtelonla mi caj lac yʌjñel. 52Che’ mi’ wustʌl jini cojix bʌ trompeta, ti ora jach mi caj lac yʌjñel che’ bajche’ ora jach mi’ mujts’el mi’ cajñel lac wut. Come mi’ caj ti wustʌl jini trompeta, mi caj i tejchelob ch’ojyel jini chʌmeño’ bʌ. Ma’anix mi’ chʌn chʌmelob. Joñonla ja’el mi caj lac yʌjñel. 53Come jini yujil bʌ oc’mʌl wersa mi caj i pʌntiyel ti jini mach bʌ yujilic oc’mʌl. Jini yujil bʌ chʌmel wersa mi caj i pʌntiyel ti jini mach bʌ yujilic chʌmel. 54Che’ bʌ tsa’ix pʌntiyi jini yujil bʌ oc’mʌl ti jini mach bʌ yujilic oc’mʌl, che’ bʌ tsa’ix pʌntiyi jini yujil bʌ chʌmel ti jini mach bʌ yujilic chʌmel, che’ jini mi caj i ts’ʌctiyel jini ts’ijbubil bʌ t’an mu’ bʌ i yʌl: “Lac Yum mi caj i junyajlel jisʌben i p’ʌtʌlel chʌmel. 55¿Bacan i c’uxel che’ mi lac chʌmel? ¿Bacan mi’ mʌjlel i cha’an jini mucoñibʌl?” che’en. 56Jini c’ux bʌ, jiñʌch mulil mu’ bʌ i yʌc’onla ti chʌmel. Jini mulil mi’ taj i p’ʌtʌlel cha’an jini mandar. 57Wocolix i yʌlʌ Dios mu’ bʌ i yʌq’ueñonla lac p’ʌtʌlel ti lac Yum Jesucristo cha’an mi’ mʌjlel lac cha’an.
58Jini cha’an, c’uxbibil bʌ quermanojob, chʌn ajñenla ti xuc’ul. Mach yomic tile bixel la’ pusic’al. Yom bʌxetla che’ mi la’ cha’liben i ye’tel lac Yum, come la’ wujil mach lolomic jach la’ we’tel ti lac Yum.
16Ofrenda cha’an i coltʌntel i cha’año’ bʌ Dios
1Cha’an ofrenda mu’ bʌ la’ tempan cha’an i coltʌntel i cha’año’ bʌ Dios, ac’ʌla jatetla che’ bajche’ tsac sube jini xñopt’añob mu’ bʌ i tempañob i bʌ ya’ ti Galacia. 2Ti jini ñaxan bʌ q’uin ti jujump’ejl semana, ti jujuntiquiletla, parte yom mi la’ wʌc’ lamital la’ taq’uin. Lotola bajche’ c’amel mi mejlel la’ wʌc’ cha’an tempʌbilix che’ mij c’otel ba’ añetla. 3Che’ c’otemon mi caj c choc majlel winicob año’ bʌ i cha’an carta ba’ mi’ tsictiyel yajcʌbilob cha’an mi’ ch’ʌmob majlel jini ofrenda ti Jerusalén. 4Mi yomʌch mic majlel ja’el, mi mejlel c pi’leñob majlel ti Jerusalén.
Baqui tsi’ ña’ta majlel jini Pablo
5Ya’ talon ba’ añetla che’ ñumeñonix ti Macedonia, come com ñumel ti Macedonia. 6Tic’ʌl ya’ mic poj cʌytʌl ba’ añetla cha’an mic ñusan i yorajlel tsʌñal ja’el, cha’an mi la’ pi’leñon majlel ya’ ba’ mic majlel. 7Come mach ñumelic jach com j q’ueletla. Com poj jalijel quic’otetla mi che’ yom lac Yum. 8Mi caj j cʌytʌl ti Efeso c’ʌlʌl ti’ yorajlel Pentecostés. 9Come tsa’ jambentiyon colem puerta ba’ mi mejlel c wen cha’len e’tel anquese cabʌlob j contra.
10Mi tsa’ c’oti Timoteo, q’uelela cha’an mi’ yajñel ti uts’at ba’ añetla, come mi’ cha’len i ye’tel lac Yum lajal bajche’on. 11Jini cha’an mach mi la’ ts’a’len mi juntiquileticla. Cha’ pi’lenla sujtel ti’ ñʌch’tilel la’ pusic’al cha’an mi mejlel i cha’ tilel ba’ añon, come wolic pijtan yic’ot yaño’ bʌ hermanojob. 12Jixcu la quermano Apolos, cabʌl tsac sube ti wocol t’an cha’an mi’ majlel yic’ot hermanojob ba’ añetla. Maxto yomic majlel. Che’ mi’ tajben i q’uiñilel mi caj i majlel ba’ añetla.
Cortesía tac
13Yom yʌxʌl la’ wo. Yom xuc’ul la’ pusic’al mi la’ ñop. Yom ch’ejletla. Yom p’ʌtʌletla. 14Ti pejtelel chuqui tac mi la’ mel, melela yic’ot c’uxbiya. 15La’ wujil hermanojob, jini ñaxaño’ bʌ tsa’ bʌ i ñopoyob Dios ya’ ti Acaya, jiñobʌch Estéfanas yic’ot jini año’ bʌ ti’ yotot, tsa’ix i yʌc’ʌyob i bʌ cha’an mi’ coltañob i cha’año’ bʌ Dios. 16Mic subeñetla ti wocol t’an, jac’benla hermanojob mu’ bʌ i melob che’ bajche’ jini, yic’ot pejtelob mu’ bʌ i cha’leñob e’tel cha’an mi’ coltañob i cha’año’ bʌ Dios. 17Tijicñayon cha’an tsa’ tili Estéfanas yic’ot Fortunato yic’ot Acaico, come uts’at che’ wʌ’ añob jini uxtiquil anquese mach wʌ’ic añetla. 18Come tsi’ ñuq’uesʌbeyoñob c pusic’al yic’ot la’ pusic’al ja’el. Q’uelela ti ñuc winicob mu’ bʌ i melob che’ bajche’ jini.
19Jini xñopt’añob mu’ bʌ i tempañob i bʌ ti Asia mi’ yʌq’ueñetla cortesía. Che’ ja’el Aquila yic’ot Priscila yic’ot jini xñopt’añob mu’ bʌ i tempañob i bʌ ti’ yotot, cabʌl mi’ yʌq’ueñetla cortesía ti lac Yum. 20Ti pejtelel jini hermanojob mi’ yʌq’ueñetla cortesía. Che’ mi la’ wʌq’uen la’ bʌ cortesía ts’ujts’un la’ bʌ ti c’uxbiya.
21Joñon Pablojon mic ts’ijbubeñetla cortesía tij c’ʌb. 22Jini mach bʌ anic mi’ c’uxbin lac Yum Jesucristo la’ chojquic ti Dios. Tal lac Yum. 23La’ ajñic i yutslel i pusic’al lac Yum Jesús la’ wic’ot. 24Mij c’uxbiñetla ti la’ pejtelel ti Cristo Jesús.