ROMANOS

Pabloba kꞌarta bꞌʉdꞌa mebẽrã Roma bidꞌarãĩta

Saludo diabuedꞌa

¹Mʉrã Pabloa, mʉrã Jesucristo nezokꞌa, mʉrã izha jʉrʉpe zokꞌasia bedꞌea biata jaramarẽã Daizezedꞌeta. ²Maʉ̃ẽnabema izha bedꞌeata jarabibari bꞌeadꞌadꞌeba na wedꞌauba jaradꞌata bꞌʉ tabꞌea: ³Maʉ̃ bedꞌea biabara jara bꞌʉa zhi Warrata dazhirã Nokꞌo Jesucristota, izhira rey Davidꞌeba uruta bꞌasia dazhi kꞌãwũnerã. ⁴Izhira Daizeze Warrata zarea bara bꞌʉta Jawurebiaba kꞌawuabisia, mawũã kꞌawuabisia beudꞌata piradrʉdꞌadꞌeba.

⁵Jesucristobara mʉrã izhi biaba jʉrʉpe zokꞌasia, aramaʉ̃ne drua jõmaʉ̃nebemaba ĩjãnamarẽã izhidꞌebemata kʉãgꞌa. ⁶Marã maʉ̃rãnebemata bꞌea, marã jʉrʉkuasia bꞌeamarẽã Jesucristodꞌeta. ⁷Jõma marã Roma pʉwʉrʉdꞌebemata bꞌera Daizezeba kʉãgꞌata bꞌea, marã jʉrʉkuasia izhidꞌeta bꞌeamarẽã: Mawũẽ izhi biaba marã adu-a bꞌeabiya dazhi Zhibari dazhirã Zezeba dewara Nokꞌo Jesucristoba.

Pablo wã krĩña bꞌadꞌa Romaĩnu

⁸Mʉã naara jaraira Jesucristodꞌeba mʉãrã Daizezea zhibia ji bꞌʉa marã jõmaʉ̃bari, marãba Jesúsdꞌebema ĩjã bꞌeta trʉ̃poa nʉmʉbari ẽjũã jõmaʉ̃ne. ⁹Mʉãrã Daizezera soidꞌu aribꞌae bꞌʉba bedꞌea biata jara bꞌʉa zhi Warradꞌeta, izhara kꞌawua bꞌʉa mʉã marã ewariza jara tau ẽãta mʉ zhiwidꞌibʉrʉdꞌera. ¹⁰Mʉrã zhiwidꞌi bꞌʉa Daizezeba krĩñabʉrʉ wãbimarẽã marãma. ¹¹Mʉã marã ũdu krĩña bꞌʉa Jawurebiadꞌebemata jaraita, aramaʉ̃ne jipa nʉmeãmarẽã. ¹²Aramaʉ̃nerã zhiya zareabi nʉmeãña Jesúsdꞌebema ĩjã bꞌedꞌeba marãbidꞌa mʉãbidꞌa.

¹³Mebẽrã, mʉã marãba kꞌawuadꞌaita krĩñata kꞌawuaudua mʉrã biodꞌe marãma wãza bꞌʉa, aramaʉ̃ne marãnebemabidꞌa Jesúsdꞌebemata ĩjãnamarẽã dewaraurã judíorã ẽãba ĩjãnapeadꞌa kĩrãkꞌa, mawũãmina idꞌi basiidꞌu wã bꞌe ẽã nʉmʉã. ¹⁴Estudiadꞌata bꞌea, estudiadꞌa ẽãta bꞌea, krĩcha erubꞌea, krĩcha ne ẽã bꞌea mʉãrã jaraibara bedꞌea biara. ¹⁵Mawũẽ mʉãrã Jesúsdꞌe bedꞌea biara marããbidꞌa kꞌadrʉabai jaraya marã bꞌea Romane.

Zareata bedꞌea biadꞌebema

¹⁶Mʉrã pera ẽã Jesúsdꞌebema bedꞌea biata jaraira, maʉ̃ Daizeze zareata jõma zhi ĩjãbʉdata ẽdrʉidꞌebema judíorãta judíorã ẽãta. ¹⁷Maʉ̃ bedꞌea biadꞌeba Daizezebara kꞌawuabi bꞌʉa izhara bedꞌea ne ẽã bꞌʉbarita ĩjãbʉrʉdꞌeba. Maʉ̃ẽnabemata zhi bꞌʉmata mawũã bꞌʉa: Daizezema bedꞌea ne ẽã bꞌʉra ĩjã bꞌʉdꞌeba izhi ũme bꞌai jõ ẽã bꞌaya.

Bedꞌea bara bꞌea beubari bꞌera

¹⁸Daizezebara izhi kĩrũbira ʉ̃treba kꞌawuabi bꞌʉta zhãrã pua kꞌawua obꞌʉa bia ẽãta obꞌeta, bia ẽãta obꞌeba idu kꞌawuabidꞌa ẽã bꞌeta bedꞌea izhidꞌe wãrãta. ¹⁹Daizezedꞌebemata kꞌawuadꞌai bꞌʉra bia kꞌawua bꞌea izha kꞌawuabi bꞌʉba. ²⁰Izhidꞌebemata ũdudꞌakꞌara, izhi zareata jõkꞌara, izhira Daizezeta bꞌʉra dajada ũdu nʉmʉã ẽjũã osi wedꞌauba, maʉ̃ta kꞌawuaidꞌe bꞌʉa izha kꞌãrẽ obꞌʉdꞌeba, mawũẽ bia ẽãta obꞌebara kꞌawuadꞌa ẽã abꞌedꞌa ẽã. ²¹Daizezedꞌebema kꞌawua bꞌeta Daizezera ibia jaradꞌa ẽã, miã zhibia jida ẽã, aramaʉ̃ne sãwũãta kꞌawuadꞌa ẽã, aramaʉ̃ne sodꞌebara kꞌawuadꞌa ẽkĩrãkꞌa bꞌeba so pãrĩgu bꞌea. ²²Krĩcha banane bꞌedꞌe krĩcha ne ẽã bꞌea. ²³Daizeze beukꞌata zhi zromane edadꞌaikꞌadꞌe, zhi zromarãne erubꞌea ne dazhi zadꞌe nʉme jõbarita, ibanarã zata, nendʉwʉrʉ jẽrũ kĩmarẽ bꞌe zata, nendʉwʉrʉ jãne wã bꞌe zata mawũã erubꞌea.

²⁴Maʉ̃ba Daizezebara idaribisia ãzhikꞌawua ne mitiata odꞌamarẽã, ãzhi soba krĩñata odꞌamarẽã, mawũẽ ãzhirãĩnu dazhi perata obꞌea. ²⁵Daizezedꞌebemata wãrãnebemane nʉmeãĩkꞌadꞌe sewadꞌebemane nʉmeã, aramaʉ̃ne Daizezeba ne okuadꞌa zata zhi zromane ibia jara erubꞌea Daizeze zhi okuadꞌa kꞌãñabara, maʉ̃ne izhitrʉ ibia jaradꞌaidꞌe bꞌʉa ewari nʉmʉ jõma. Amén.

²⁶Maʉ̃ba Daizezebara idaribisia ãzhi kꞌawua odꞌamarẽã dazhi perata. Mawũẽ wũẽrãrã ãzhidꞌera abꞌari wũẽrã ũme dazhi perata obꞌea. ²⁷Zhũmakĩrãrãsidꞌa abꞌarika bꞌeta wũẽrã tõbꞌari ẽã idaribipe abꞌari makĩrã ũme dazhi perata obꞌea. Aramaʉ̃ne abꞌari makĩrã ũme dazhi perata obꞌeba ãzhikusa Daizezea zuburia obi bꞌea jãpe nʉmeba.

²⁸Mawũã bꞌebara Daizezedꞌebema kꞌawua krĩñana ẽãba Daizezebara chãbꞌarikuasia ãzhi krĩchara bia ẽãta nʉmeã, ãzhi kꞌawua odꞌamarẽã kꞌãrẽ o ẽbai bꞌʉta. ²⁹Ne jõmaʉ̃ bia ẽãta obꞌeba kĩma ẽãta erukꞌãĩbada, ne mitiata obada, ne wuaabʉrʉ krĩñabada, bia ẽãta obada, zhãrãba ne erubꞌʉ kꞌarea bĩ ẽãbada, miã beabada, kꞌaikꞌaiabada, zhãrã sewabada, bedꞌeata obada. ³⁰Zhãrã jarabada, Daizezera juradea, zhãrãma mitia bedꞌeabada, zhi zromane bꞌea, bigaudꞌe bꞌea, krĩcha jʉrʉbada bia ẽãta oita, ũrĩna ẽã ãzhi zhibarirã bedꞌeara. ³¹Krĩchadꞌe duanu ẽã, ãzhi bedꞌeara aribꞌaedꞌa ẽã, zhãrã kʉãgꞌa edadꞌa ẽã, ãzhi bĩ ẽã odꞌara bedꞌea ne ẽãne edadꞌa ẽã, zhãrã sozuburiadꞌa ẽã. ³²Mawũã bꞌebara kꞌawua bꞌea Daizezebara pua kꞌawua oita, aramaʉ̃nerã maʉ̃ kꞌaudꞌa bꞌera aduaita beuya. Mawũãsiidꞌu maʉ̃ kꞌaudꞌa bꞌea, aramaʉ̃ne sobia bꞌea maʉ̃ kꞌaudꞌa bꞌe bawara.

Daizezeba kꞌawua oidꞌebema

¹Maʉ̃ba bʉ zhãrã jara bꞌʉra bedꞌea ne ẽãne bꞌarãrũã, bʉa awʉrʉta jarabʉrʉdꞌera bʉzhikusa jarabʉrʉa, bʉa zhãrã jara bꞌʉta abꞌaʉta obꞌʉdꞌeba. ²Kꞌawua bꞌea bia ẽãta obꞌera Daizezebara pua kꞌawua obaria kꞌãrẽ odꞌa wãrãneba. ³Bia ẽãta obada bꞌeta bʉa jara bꞌʉta bʉara abꞌaʉta obꞌʉra, ¿bʉ krĩchama bʉra ẽdrʉika Daizezeba pua kꞌawua oidꞌebara? ⁴¿O bʉma seri ẽka izha kꞌãbãẽã sozuburia nʉmʉba zrogꞌa bꞌʉra, bʉara kꞌawua ẽã nʉmʉ ẽka izhara sozuburia bꞌʉta kꞌazhiruara ãmape izhita pẽwãmarẽã? ⁵Mawũãmina bʉ sora zarea nʉmʉã kꞌazhiruata ãmape izhi pẽwãĩrã, mawũẽ izhi kĩrũbita bʉzhikusaita bira wã kĩrũ zuburia oi ewariedꞌa. Maʉ̃nerã kꞌawuabiya sãwũã pua kꞌawua oi bꞌʉdꞌe obʉrʉta Daizezebara. ⁶Izhara abꞌa abꞌaʉa kꞌãrẽ diaya ãzha kꞌãrẽ odꞌabari. ⁷Izhi ũme bꞌai jõ ẽãta diaya biata obꞌeba jʉrʉ bꞌea izha bia jaramarẽã, beukꞌata bꞌʉmarẽã. ⁸Mawũãmina kĩrũ pua kꞌawua oya ãzha krĩñata obꞌeba aribꞌaedꞌa ẽãrã bedꞌea izhidꞌe wãrãta, awuarabʉrʉ obꞌera bia ẽãta. ⁹Izha pua kꞌawua obʉrʉdꞌera zuburia bꞌeaya, sopua bꞌeaya bia ẽãta obꞌera judíorãta judíorã ẽãta. ¹⁰Mawũãmina izhima bia nʉmeba bia jaraya adu-a bꞌeabiya biata obꞌera judíorãta judíorã ẽãta. ¹¹Aramaʉ̃ne Daizezebara zhãrã awuara eda ẽã.

¹²Moisé ũrãgꞌa ne ẽã bꞌeta kꞌazhiruata obꞌera maʉ̃ ũrãgꞌa ne ẽã aduadꞌaya, Moisé ũrãgꞌa erubꞌeta kꞌazhiruata obꞌera maʉ̃ ũrãgꞌadꞌeba pua kꞌawua okuaya. ¹³Moisé ũrãgꞌa bari ũrĩ bꞌeba biata duanu ẽã Daizeze kĩrãbitara, awuarabʉrʉ maʉ̃ ũrãgꞌa aribꞌae bꞌeta izhima biata bꞌea. ¹⁴Judíorã ẽãba Moisé ũrãgꞌa ne ẽãta maʉ̃ ũrãgꞌadꞌebemata obꞌera ũrãgꞌa ne ẽmina ũrãgꞌata bꞌea ari ãzhita. ¹⁵Aramaʉ̃ne ũrãgꞌadꞌebema obꞌeta ũdubi bꞌera zhi bꞌʉma ãzhi sodꞌe, krĩchabara kꞌawua bꞌea kꞌãrẽ obʉdara biata o bia ẽãta, bedꞌea bara bꞌeta o bedꞌea ne ẽã bꞌeta. ¹⁶Daizezeba kꞌawua obʉrʉ ewadera zhãrãnebema kꞌawuadꞌa ẽãrã Jesucristodꞌeba kꞌawua oya bedꞌea biata mʉã jara bꞌʉdꞌe.

Judíorãbara aribꞌaedꞌa ẽã ũrãgꞌara

¹⁷Marãbara marã judío abꞌeta Moisé ũrãgꞌadꞌeba Daizeze ũme bedꞌea ne ẽãne bꞌea. ¹⁸Izha kꞌãrẽ krĩñata kꞌawua bꞌeta ũrãgꞌabara jaradia bꞌʉa kꞌãrẽta biata. ¹⁹Jipa edebadadꞌe bꞌea Daizezedꞌebema kꞌawuadꞌa ẽãba daʉbꞌerrea bꞌe kĩrãkꞌa bꞌeta, mazhima ʉ̃nata bꞌea pãrĩguadꞌe bꞌerãĩta. ²⁰Zhi kꞌawua ẽã bꞌeta wũãwũã kĩrãkꞌa bꞌeta ũrãgꞌabadadꞌe bꞌea, Moisé ũrãgꞌata erubꞌedꞌeba kꞌãrẽ kꞌawua bꞌedꞌe bꞌea, kꞌawua bꞌedꞌe bꞌea wãrãta. ²¹Bʉa awʉrʉ ũrãgꞌa bꞌʉta, ¿kꞌãrẽã zhi ũrãgꞌa ẽpe bʉzhikusara? Nezrʉga ẽbaita jara bꞌʉta, ¿kꞌãrẽã nezrʉga bꞌʉ? ²²Kĩma ẽãta erukꞌãĩ ẽbaita jara bꞌʉta, ¿kꞌãrẽã kĩma ẽãta erukꞌãĩ bꞌʉ? Ne zhi zromarãne erubꞌera ũduama bꞌʉta, ¿kꞌãrẽã ne biara maʉ̃rã dedꞌabema zrʉgabari? ²³Bʉma bʉara Moisé ũrãgꞌara biodꞌe kꞌawua bꞌʉta, ¿maʉ̃ ũrãgꞌa aribꞌae ẽãba kꞌãrẽã bĩ ẽã jarabi bꞌʉ Daizezera? ²⁴Maʉ̃ẽnabemata zhi bꞌʉmata mawũã bꞌʉa: Judíorã ẽãta bꞌebara Daizezera bĩ ẽã jara bꞌea marãneba.

²⁵Wãrãnebai kꞌakua eta kꞌõ bꞌʉra biga Moisé ũrãgꞌata aribꞌae bꞌʉbʉrʉ, mawũãmina maʉ̃ ũrãgꞌata aribꞌae ẽbʉrʉ bʉ kꞌakua eta kꞌõpe bꞌʉra kꞌakua e kꞌõ ẽkĩrãkꞌa bꞌʉa. ²⁶Aramaʉ̃nerã kꞌakua eta kꞌõ ẽã bꞌʉba Moisé ũrãgꞌata aribꞌae bꞌʉbʉrʉ, ¿kꞌakua e kꞌõ ẽã bꞌʉra kꞌakua e kꞌõpe bꞌʉ kĩrãkꞌa bꞌʉ ẽka? ²⁷Kꞌakua e kꞌõ ẽã bꞌʉba Moisé ũrãgꞌata kĩrãẽpa aribꞌae bꞌʉbara kꞌawuabiya bʉara Moisé ũrãgꞌara kꞌawua bꞌʉta, kꞌakua eta kꞌõpe bꞌʉta aribꞌae ẽãta maʉ̃ ũrãgꞌara. ²⁸Judío arata bꞌʉ ẽã bari ʉ̃rʉ̃ba bꞌʉra, miã kꞌakua e kꞌõpe bꞌʉ ẽã bari ʉ̃rʉ̃ kꞌõ bꞌʉra zharadꞌe. ²⁹Awuarabʉrʉ judío arata bꞌʉa soidꞌu bꞌʉta, kꞌakua e kꞌõpe bꞌʉa soidꞌu bꞌʉta, mawũã bꞌʉa Jawurebiadꞌeba soidꞌu bꞌʉta, aramaʉ̃nerã bari ũrãgꞌata kꞌawua bꞌʉdꞌeba mawũã bꞌʉ ẽã. Mawũã soidꞌu bꞌʉra zhãrãbara ibia jaradꞌa ẽã, awuarabʉrʉ ibia jaraya Daizezeba.

¹¿Kꞌãrẽ biata bꞌʉ judíota bꞌaira? ¿Kꞌãrẽ biata bꞌʉ kꞌakua eta kꞌõpe bꞌaira? ²Ne biodꞌeba biata bꞌʉa. Mawũã bꞌʉa wãrãnebai naara judíorãã dedꞌekadꞌaba izhi bedꞌeara Daizezebara. ³¿Kꞌõbe sãwũãĩpe ʉ̃kʉrʉ ãzhidꞌebemaba ĩjãna ẽãrã? ¿Mawũã ĩjãna ẽãba izha jaradꞌara aribꞌae ẽka Daizezebara? ⁴¡Mawũã ẽã! Baribʉrʉ Daizezera wãrĩnu bedꞌea bꞌʉa, maʉ̃ne zhãrã bꞌera jõma sewa nebʉrʉmiã. Maʉ̃ẽnabemata zhi bꞌʉmata mawũã bꞌʉa:

Wãrĩnuã adꞌaya bʉa jarabʉrʉ bedꞌeara, aramaʉ̃ne kiaweya bʉta jibʉrʉra. (Salmos 51:4)

⁵Dazha bia ẽãta obꞌʉba Daizezera biata ũdubi bꞌʉbʉrʉ, ¿kꞌãrẽta jaradꞌaipe? ¿Daizezera bia ẽka bia ẽãta obʉrʉ kꞌarea zuburia obʉrʉdꞌera? Mʉrã bedꞌea kꞌobꞌʉa zhãrã mawũã bedꞌea bꞌedꞌe. ⁶¡Mawũã ẽã! Daizezeta biata bꞌʉ ẽbʉrʉ, ¿sãwũã kꞌawua oipe ẽjũãne zhãrã bꞌera? ⁷Ʉ̃kʉrʉba jarabada kĩrãkꞌa dazhi sewa nebʉrʉ bꞌʉba Daizezera wãrĩnu bedꞌea bꞌʉta kꞌawuabi bꞌʉbʉrʉ, ¿kꞌãrẽã jara bꞌʉ dazhira kꞌazhirua omiãta? ⁸¿Jaraidꞌe bꞌʉ ẽka daira ewaradꞌe jara panʉta, ʉ̃kʉrʉba dai mawũã jara bꞌera Daizezebara zuburia oidꞌe bꞌʉ ẽka? Daibara mawũã badabidꞌa: ¿Bia ẽãta odꞌaya biata zemarẽã?

Ne ẽã biata bꞌʉra

⁹¿Mawũẽ sãwũãpe? ¿Dazhirã judíorãta audre biarãkꞌa awʉrʉrã kꞌãñabara? ¡Mawũã ẽã! Daibara kꞌawuabisidꞌa jõma judíorãta judíorã ẽãta kꞌazhirua edre bꞌeta. ¹⁰Maʉ̃ẽnabemata zhi bꞌʉmata mawũã bꞌʉa:

Biata bꞌʉra ne ẽã miã abꞌabidꞌa.

¹¹Miõba kꞌawua ẽã kꞌãrẽ sãwũãta, miõba jʉrʉ ẽã Daizezera.

¹²Izhi maẽbara jõma jãpe nʉmeã, aramaʉ̃ne izhima biata nʉme ẽã. Ne ẽã biata obꞌʉra, ne ẽã miã abꞌabidꞌa. (Salmos 14:1-3; 53:1-3; Eclesiastés 7:20)

¹³Mitia bedꞌea bꞌeba beudꞌa jou tabꞌʉ uriata mitiata ewa nʉmʉ kĩrãkꞌa bꞌʉa ãzhi nemirã, ãzhi kĩrãmerã sewa nebʉrʉmiã. Zhãrã bĩ ẽã obꞌe bedꞌeara dãma neãrã kĩrãkꞌa bꞌʉa ãzhi i edre. (Salmos 5:9; 140:3)

¹⁴Ãzhi ibara zhãrã ikꞌazhirua jara bĩ ẽã bꞌea. (Salmos 10:7)

¹⁵Jẽrũ zokea wãẽba bꞌea zhãrã beaita.

¹⁶Ne ãrĩkua zhãrã zuburia okua bꞌea ãzhi wã maẽ.

¹⁷Aramaʉ̃ne kꞌawua ẽã bꞌea zhãrã bawara adu-a bꞌaira. (Isaías 59:7-8)

¹⁸Daizeze wawiaira ne ẽã ãzhi krĩchadꞌera. (Salmos 36:1)

¹⁹Kꞌawua bꞌea jõma Daizeze ũrãgꞌaba jara bꞌʉra jara bꞌʉa judíorã maʉ̃ ũrãgꞌa edre bꞌea, aramaʉ̃ne jõma chupea kꞌobꞌedꞌe zhãrã jõma kꞌawua okuaya Daizezebara. ²⁰Daizezeba ũrãgꞌa Moiséa diadꞌata aribꞌae nʉmʉbara beubarira miõta bedꞌea ne ẽã bꞌʉ ẽã Daizeze kĩrãbitara. Awuarabʉrʉ maʉ̃ ũrãgꞌabara kꞌawuabi bꞌʉa dazhira kꞌazhirua omiãta.

Bedꞌea ne ẽã bꞌʉya ĩjãbʉrʉdꞌeba

²¹Mawũãmina idꞌira Moisé ũrãgꞌa aribꞌaedꞌa ẽãne sãwũã bedꞌea ne ẽã bꞌʉira kꞌawuabisia Daizezebara, maʉ̃ zhi jarama Moisé ũrãgꞌaba, Daizezeba bedꞌeata jarabibarirã bꞌeadꞌaba. ²²Zhi jarama Daizezebara bedꞌea ne ẽã bꞌʉita Jesucristodꞌebemata ĩjãbʉrʉdꞌeba, maʉ̃ta izhidꞌebemata ĩjãbʉda jõmaʉ̃ĩtabema, mawũẽ miõta awuara eda ẽã. ²³Jõmaʉ̃ba kꞌazhiruara obada, mawũẽ ãĩ bꞌea Daizezeta kĩrãwãrẽãnebara. ²⁴Mawũãmina izhi biaba bari bedꞌea ne ẽã okua bꞌʉa ẽdrʉira nʉmʉba Jesucristodꞌeba. ²⁵Daizezeba dazhi bedꞌea ne ẽã bꞌʉira Jesucristota bꞌʉdꞌata dazhibari wa erezoadꞌata ĩjãbʉrʉdꞌeba nʉmʉã, aramaʉ̃ne izhara sãwũã bedꞌea ne ẽã bꞌʉita kꞌawuabi bꞌʉba zrogꞌa bedꞌea ne ẽã okua bꞌʉa kꞌazhiruata odꞌapeadꞌara nawedꞌa. ²⁶Mawũẽ idꞌi ewadera izha sãwũã bedꞌea ne ẽã bꞌʉita kꞌawuabi nʉmʉrã izhira biata bꞌʉba bedꞌea ne ẽã obꞌʉa zhi ĩjãbʉrʉra Jesúsdꞌebemata.

²⁷¿Aramaʉ̃nerã arakꞌãwũãrã bia nʉmaĩka? ¡Arakꞌãwũãrã ãĩ bꞌʉya! ¿Bia nʉmaĩka Moisé ũrãgꞌadꞌebara? ¿Bia nʉmaĩka maʉ̃ ũrãgꞌata aribꞌae bꞌʉdꞌebara? Mawũã ẽã, awuarabʉrʉ bia nʉmaña Jesúsdꞌebema ũrãgꞌata ĩjã bꞌʉba. ²⁸Mawũẽ kꞌawuaidꞌera Daizezebara dazhira bedꞌea ne ẽã obꞌʉa Jesúsdꞌebemata ĩjãbʉrʉdꞌeba, mawũã o ẽã Moisé ũrãgꞌata aribꞌae nʉmʉba.

²⁹¿Daizezera bari judíorãneka? ¿Izhabꞌa Daizezera judíorã ẽãta bꞌedꞌe ẽka? Wãrãnebai izhabꞌa judíorã ẽãta bꞌedꞌea. ³⁰Maʉ̃ẽnabema Daizezera abꞌabai bꞌʉa. Mawũẽ izhara Jesúsdꞌebema ĩjãbʉrʉdꞌeba bedꞌea ne ẽã bꞌʉya kꞌakua eta kꞌõ bꞌera, Jesúsdꞌebema ĩjãbʉrʉdꞌeba bedꞌea ne ẽã bꞌʉya kꞌakua eta kꞌõ ẽã bꞌera. ³¹¿Mawũã Jesúsdꞌebema ĩjãbʉrʉdꞌeba seribidꞌa ẽbaika Moisé ũrãgꞌara? ¡Mawũã ẽã! Awuarabʉrʉ mawũãrã aribꞌae bꞌea maʉ̃ ũrãgꞌata.

Ĩjãĩne bꞌʉa Abrahamne kĩrãkꞌa

¹¿Kꞌãrẽta jaradꞌaipe dazhirã zeze Abrahamnebema? ²Izha kꞌãrẽ obꞌʉba Daizezeba Abraham bedꞌea ne ẽã bꞌʉsibʉrʉ, bꞌakꞌausia kꞌãrẽneba sobia bꞌaira, mawũãmina Daizeze kĩrãbita ẽã. ³Maʉ̃ẽnabemata zhi bꞌʉmata mawũã bꞌʉa: Daizezeba jarabʉrʉra Abrahambara ĩjãbʉrʉba bedꞌea ne ẽã bꞌʉsia. ⁴Iabꞌa trajadꞌata pagꞌabʉdadꞌera bari diabada ẽã, awuarabʉrʉ diabada izhi trajadꞌabari. ⁵Mawũãmina kꞌãrẽ o ẽãne bia ẽãta bꞌʉra Daizezebara bedꞌea ne ẽã bꞌʉbarita ĩjãrã, mawũã ĩjãbʉrʉdꞌeba bedꞌea ne ẽã bꞌʉya. ⁶Aramaʉ̃ kĩrãkꞌa rey Davidbidꞌa sobia bꞌaita jarasia Daizezeba bedꞌea ne ẽã bꞌʉbʉrʉra kꞌãrẽ o ẽãne. ⁷Maʉ̃ta mawũãsia:

¡Sobia bꞌeaya bia ẽãta odꞌapeadꞌata Daizezeba bedꞌea ne ẽã bꞌʉkuabʉrʉra, kꞌazhiruata biodꞌeba bedꞌea ne ẽã bꞌʉkuabʉrʉra!

⁸¡Sobia bꞌaya Daizezeba bedꞌea ne ẽã bꞌʉbʉrʉra kꞌazhiruadꞌeba! (Salmos 32:1-2)

⁹¿Mawũã sobia bꞌaira bari kꞌakua e kꞌõ bꞌeitabemakꞌa, kꞌakua eta kꞌõ ẽã bꞌeitabidꞌa nʉmʉ ẽka? Daibara jara bꞌea Daizezeba jarabʉrʉta Abrahamba ĩjãbʉrʉdꞌeba bedꞌea ne ẽã bꞌʉdꞌata. ¹⁰¿Sãwũã bedꞌea ne ẽã bꞌʉsi? ¿Kꞌakua eta kꞌõpe bꞌʉdꞌe o kꞌakua eta kꞌõ ẽã bꞌʉdꞌe? Mawũã bꞌʉ ẽbasia kꞌakua eta kꞌõpe bꞌʉdꞌe, awuarabʉrʉ mawũã bꞌʉsia kꞌakua eta kꞌõ ẽã bꞌʉdꞌe. ¹¹Abraham kꞌakua eta kꞌõnabara kꞌawuabi bꞌʉa Daizezeba bedꞌea ne ẽã bꞌʉdꞌata izha jarabʉrʉta ĩjãbʉrʉba wadꞌi kꞌakua eta kꞌõ ẽã bꞌʉdꞌe. Aramaʉ̃nerã kꞌakua eta kꞌõ ẽã bꞌeba Daizezedꞌebema ĩjã bꞌe zezea, abꞌarika ĩjã bꞌeba bedꞌea ne ẽã duanukꞌãrĩã. ¹²Kꞌakua eta kꞌõpe bꞌe zezeta bari kꞌakua eta kꞌõpe bꞌeitabema ẽã, awuarabʉrʉ abꞌarika ĩjã bꞌeitabema dazhirã zeze Abrahamba ĩjãna kĩrãkꞌa kꞌakua eta kꞌõ ẽwedꞌa.

Daizezeba jaradꞌara aribꞌae bꞌʉa ĩjãbʉdadꞌeba

¹³Daizezeba naʉ̃ ẽjũãta Abrahanʉã diaya adꞌara o izhidꞌeba zedꞌairãã diaya adꞌara mawũã ẽbasia ũrãgꞌata aribꞌaebʉrʉba, awuarabʉrʉ mawũãsia bedꞌea ne ẽã bꞌidꞌapʉba izha jarabʉrʉta ĩjãbʉrʉdꞌeba. ¹⁴Moisé ũrãgꞌa aribꞌae bꞌeba Daizezeba diaita jaradꞌata jidadꞌaibʉrʉ, ĩjãĩnebema nʉmʉrã seri ẽãneba kꞌãrẽ ẽã Daizezeba diaya adꞌara. ¹⁵Moisé ũrãgꞌara aribꞌaedꞌa ẽãba Daizezera kĩrũbi bꞌea. Mawũãmina maʉ̃ ũrãgꞌata ne ẽã maẽrã maʉ̃ ũrãgꞌadꞌe wãẽãnaĩ ne ẽã.

¹⁶Maʉ̃neba Daizezeba diaita jaradꞌara izhidꞌebemata ĩjã bꞌedꞌeba diaya, aramaʉ̃nerã izhi biaba diaya. Maʉ̃ta Abraham warrarãnebema jõmaʉ̃ĩta nʉmʉã. Bari Moisé ũrãgꞌadꞌe bꞌeitabema ẽã, awuarabʉrʉ Abrahamne kĩrãkꞌa ĩjãbʉdaitabema, aramaʉ̃ne izhira dazhirã jõmaʉ̃ zezea. ¹⁷Maʉ̃ẽnabemata zhi bꞌʉmata mawũã bꞌʉa: Mʉã bʉra bꞌidꞌapʉa zhãrã bio zezeta. Mawũãneba Daizeze kĩrãbitara zhãrã bio zezeta bꞌʉa, izhidꞌebemata Abrahamba ĩjãnarã Daizezebara beudꞌapeadꞌara piradrʉbibaria, kꞌãrẽ ne ẽbadꞌata obaria.

¹⁸Daizezeba warra barabiya abʉrʉra Abrahambara ĩjãsia zhi kĩmanebara warra baraidꞌe bꞌʉ ẽãta, aramaʉ̃ne bꞌesia zhãrã bio zezeta, maʉ̃ẽnabemata mawũãsia: Kꞌãwũã chĩdau bio kĩrãkꞌa nʉmaña bʉ warrarãnebemata. ¹⁹Maʉ̃ta ĩjãĩrã edꞌabꞌae ẽbasia, krĩcha nʉma ẽbasia izhira zhi zõrãta, maʉ̃ne ya beubodꞌo kĩrãkꞌa bꞌasia cien año badea bꞌʉba, mawũã ĩjãĩrã edꞌabꞌae ẽbasia tokꞌata bꞌʉbara zhi kĩma Sara. ²⁰Izhara ĩjã ẽã nʉma ẽbasia Daizezeba diaya abʉrʉra, awuarabʉrʉ soidꞌu ĩjãbʉrʉba ibia jarasia Daizezera. ²¹Jipa kꞌawuasia Daizezera zhi zromata izha jaradꞌa aribꞌaeira. ²²Mawũã ĩjãbʉrʉdꞌeba Daizezebara bedꞌea ne ẽã bꞌʉsia.

²³Bari Abraham ʉ̃rʉ̃ bꞌʉdꞌa ẽbasia mawũã bedꞌea ne ẽã bꞌʉdꞌara. ²⁴Awuarabʉrʉ dazhirãsidꞌa abꞌarika bedꞌea ne ẽã duanukꞌãrĩã dazhirãbara izhidꞌebema ĩjã bꞌeba beudꞌata piradrʉbidꞌata Jesús dazhirã Nokꞌota. ²⁵Daizezebara Jesús chãbꞌarisia beumarẽã dazhirã kꞌazhirua omiãta bꞌebari, beudꞌata piradrʉbisia dazhirã bedꞌea ne ẽã bꞌʉita.

Jesúsdꞌeba bedꞌea ne ẽã bꞌea

¹Ĩjã bꞌedꞌeba bedꞌea ne ẽã duanukꞌãrĩba dazhirã Daizeze bawara bedꞌea ne ẽã bꞌea dazhirã Nokꞌo Jesucristodꞌeba. ²Jesucristodꞌebemata ĩjã bꞌedꞌebemanerã dazhirã Daizezebara izhi biaba nʉmʉkꞌãrĩã, dazhirã maʉ̃ne jipa nʉmeã. Aramaʉ̃ne sobia krĩcha bꞌea Daizeze kĩrãwãrẽãnebemata jidadꞌaita. ³Bari maʉ̃ba ẽã, awuarabʉrʉ dazhira sobiaidꞌe bꞌʉa zuburia nʉmʉnerã, kꞌawuaidꞌera zuburia nʉmʉne zrogꞌa kꞌawaya. ⁴Mawũã zrogꞌa nʉmʉrã Daizezema bia nʉmʉã. Mawũã zrogꞌa nʉmʉrã Daizeze kĩrãwãrẽãnebemata jidaya. ⁵Mawũã jidaira dazhirãĩtara sewa ẽãta Daizezebara kʉãgꞌata izhidꞌeta dazhirã sodꞌe diasia Jawurebiata dazhirãã diadꞌaba.

⁶Dazhira ẽdrʉidꞌe bꞌʉ ẽãne ewarita arababʉrʉdꞌera Cristora beusia dazhi bia ẽãta bꞌebari. ⁷Wãrãnebai miõta zhi beabi ẽã biabarira, baʉcha iabꞌa zhi beabiya biabarira. ⁸Mawũãmina Daizezebara izha dazhira kʉãgꞌata kꞌawuabibʉrʉta wadꞌi kꞌazhirua omiãta bꞌedꞌe Cristota beubisia dazhibari. ⁹Mawũẽ Cristo wadꞌeba bedꞌea ne ẽã duanukꞌãrĩba ẽdrʉdꞌaya Daizezeba zhãrãta kĩrũ pua kꞌawua oidꞌebara. ¹⁰Izhi ũme zhi jurata bꞌedꞌe Daizezebara dazhira izhi bawara zhibiata bꞌʉsia zhi warra bebudꞌeba, mawũã zhibiata bꞌʉdꞌaba ẽdrʉdꞌaya Cristota bꞌʉdꞌeba. ¹¹Bari maʉ̃ba ẽã, awuarabʉrʉ Daizeze bawara sobia bꞌea dazhirã Nokꞌo Jesucristodꞌeba. Izhikꞌareuba idꞌira Daizeze bawara zhibiata bꞌea.

Adánnebema Cristodꞌebema

¹²Kꞌazhiruara naʉ̃ ẽjũãẽna zesia ũmakĩrã abꞌaʉdꞌeba, maʉ̃ kꞌazhiruadꞌeba nʉmesia bebuta. Aramaʉ̃ne jõma beu nʉmesia jõmaʉ̃ba obadaba kꞌazhiruata. ¹³Naara Moisé ũrãgꞌa ne ẽbasidꞌeuba kꞌazhiruara obꞌea ẽjũãnerã, mawũãmina ũrãgꞌata ne ẽãba bedꞌea bara bꞌea a ẽbasia kꞌazhiruata obꞌera. ¹⁴Mawũãmina kꞌazhiruata obꞌeba beu nʉmesia Adán ewaridꞌeba Moisé ewariidꞌu, Daizezeba jaradꞌata Adánba ũrĩ ẽbadꞌa kĩrãkꞌara kꞌazhiruara odꞌa ẽbasia. Adánneba jõma zuburia nʉmena kĩrãkꞌa jõma bia nʉmesia Cristo zeita bꞌadꞌadꞌeba.

¹⁵Mawũãmina Daizezeba bari diadꞌara Adánba kꞌazhiruata odꞌa kĩrãkꞌa ẽã, mawũã abꞌaʉba kꞌazhiruata odꞌadꞌeba bio beusidꞌa. Waya Daizezeba izhi biaba bari diadꞌara ẽdrʉita bioitabemata izhi biaba nʉmʉkꞌãrĩã ũmakĩrã abꞌaʉdꞌeba, Jesucristodꞌeba. ¹⁶Daizezeba izhi biaba bari diadꞌara Adánba kꞌazhiruata odꞌa kĩrãkꞌa ẽã. Wãrãnebai mawũã abꞌaʉba kꞌazhiruata odꞌadꞌeba Daizezebara aduabigaidꞌe nʉmʉsia, mawũãmina izha bari diadꞌata nʉmʉkꞌãrĩã zhãrãba kꞌazhiruata bio osidꞌamina bedꞌea ne ẽã bꞌʉkuaita. ¹⁷Abꞌaʉba kꞌazhiruata odꞌadꞌeba jõma beu nʉmʉbʉrʉ, audrebai Daizezebara izhi ũme bꞌai jõ ẽã bꞌeabiya abꞌaʉdꞌeba Jesucristodꞌeba, mawũã bꞌeabiya izhi biaba bari bedꞌea ne ẽã obʉrʉrãta.

¹⁸Abꞌaʉba kꞌazhiruata odꞌadꞌeba Daizezebara zhãrã jõma aduabigaidꞌe nʉmʉsia, aramaʉ̃ kĩrãkꞌa abꞌaʉba biata odꞌadꞌeba bedꞌea ne ẽã oira zhãrã jõmaʉ̃ĩtabemata izhi ũme bꞌai jõ ẽã bꞌabiya. ¹⁹Adánba Daizeze bedꞌeata aribꞌae ẽbadꞌaba zhãrã jõma kꞌazhirua omiãta nʉmʉsia. Aramaʉ̃ kĩrãkꞌa Jesúsba Daizeze bedꞌeata aribꞌaedꞌaba zhãrã bio bedꞌea ne ẽã bꞌʉya.

²⁰Moisé ũrãgꞌara nʉmʉsia kꞌawuabigaita kꞌazhiruata kꞌãbãẽã obadata. Kꞌazhiruata mawũã kꞌãbãẽã obadadꞌebara Daizezebara kꞌawuabisia izhi biaba kꞌãbãẽã sozuburia bꞌʉta. ²¹Kꞌazhiruata obadaba aduaita beubada, mawũãmina Daizezebara izhi biaba bedꞌea ne ẽã bꞌʉya izhi ũme bꞌai jõ ẽã bꞌabiita Jesucristo dazhirã Nokꞌodꞌeba.

Ya beusidꞌa kꞌazhiruaitara

¹¿Mawũẽ kꞌasia adꞌaipe? ¿Kꞌazhiruadꞌe bꞌeaika Daizezeba izhi biaba kꞌãbãẽã sozuburiamarẽã? ²¡Mawũã ẽã! Kꞌazhiruara odꞌa ẽãba dazhira ya beusia kꞌazhiruaitara. ¿Mawũẽ sãwũã wadꞌi kꞌazhiruadꞌe bꞌeaipe? ³¿Kꞌawuadꞌa ẽka buru kꞌoedꞌadꞌeba bꞌeta Jesucristodꞌebemata, aramaʉ̃ne duanu ẽka izhi ũme beudꞌata? ⁴Buru kꞌoedꞌadꞌeba dazhira izhi ũme jou kꞌobꞌadꞌe wãsia, mawũẽ Cristo beudꞌata zhi Zezeba izhi zareaba piradrʉbidꞌa kĩrãkꞌa dazhisidꞌa piradrʉbisia zokꞌai nimibamarẽã zhiwidꞌidꞌe.

⁵Dazhira Cristo ũme beudꞌaba izhi piradrʉdꞌa kĩrãkꞌa zokꞌai bꞌai zhiwidꞌidꞌe bꞌeaya. ⁶Maʉ̃ta kꞌawuaidꞌera dazhita na bꞌadꞌara izhi ũme cruzdꞌe kꞌachibʉrʉba kꞌakua kꞌazhiruadꞌebemata beasia. Mawũẽ dazhira wueta kꞌazhirua nezokꞌa ẽã. ⁷Mawũã beudꞌara ẽdrʉsia kꞌazhiruadꞌebara. ⁸Dazhira Cristo ũme beudꞌaba ĩjã bꞌea duanaĩta izhi ũme. ⁹Kꞌawua bꞌea Cristo beudꞌata piradrʉdꞌara ya beu ẽã, bebura wueta zarea ne ẽã izhi ʉ̃rʉ̃rã. ¹⁰Beuma abꞌa beudꞌaba kꞌazhiruara jõma edre bꞌʉsia. Idꞌidꞌe bꞌʉra Daizezeita bꞌʉa. ¹¹Marãsidꞌa aramaʉ̃ kĩrãkꞌa bꞌeta kꞌazhiruara odꞌa ẽãba ya beusita bꞌeaudua kꞌazhiruaitara, aramaʉ̃ne Daizezeita zokꞌai bꞌeaudua Jesucristo dazhirã Nokꞌodꞌeba.

¹²Kꞌazhiruaa idu kꞌabꞌaribirãũdua marã kꞌakua beubarita, aramaʉ̃ne orãũdua bia ẽãta obi krĩñabʉrʉra. ¹³Marã kꞌakuara idu kꞌazhiruaa chãbꞌarirãũdua bia ẽãta oita. Awuarabʉrʉ marã Daizezea chãbꞌariudua zokꞌai duaĩnaba kꞌazhiruadꞌe beu bꞌeadꞌata, aramaʉ̃ne marã kꞌakuara Daizezea chãbꞌariudua biata oita. ¹⁴Kꞌazhiruabara marã kꞌabꞌari nʉmaĩne bꞌʉ ẽã. Marã Moisé ũrãgꞌa edre nʉmeba ẽdrʉita nʉmʉ ẽã, awuarabʉrʉ ẽdrʉya Daizezeba izhi biaba ẽdrʉbidꞌa edre nʉmeba.

Duanena biata odꞌaita

¹⁵¿Mawũẽ sãwũãpe? ¿Kꞌazhiruara odꞌaika Moisé ũrãgꞌa edre duanu ẽbaera, mawũã odꞌaika Daizezeba izhi biaba ẽdrʉbidꞌa edre duanu baera? ¡Mawũã ẽã! ¹⁶¿Kꞌawuadꞌa ẽka marãta zhãrã edre nezokꞌata nʉmebʉrʉdꞌera maʉ̃ bedꞌeata aribꞌae nʉmebari ẽka, aramaʉ̃ kĩrãkꞌa nʉmʉ ẽka kꞌazhirua nezokꞌara aduaita beuita, waya Daizeze bedꞌeata aribꞌae bꞌʉra nʉmʉ ẽka bia nʉmaĩ kꞌarea? ¹⁷Mʉã Daizezea zhibia ji bꞌʉra kꞌazhirua nezokꞌata bꞌeasimina marãbara soidꞌu aribꞌae bꞌea Daizeze ũrãgꞌa jaradiadꞌapeadꞌata. ¹⁸Kꞌazhiruadꞌebara ẽdrʉdꞌape Daizeze nezokꞌarãta duanesia biata odꞌaita. ¹⁹Mʉãrã mawũã nezokꞌadꞌebemata jara nʉmʉã mʉã jara bꞌʉta marãbara sãwũãta kꞌawuadꞌa ẽãba. Nawedꞌara marã kꞌakuara bia ẽã chãbꞌarisidꞌa ne mitiata dazhi perata odꞌaita. Waya idꞌidꞌera marã kꞌakuara Daizezea chãbꞌariudua biata odꞌaita.

²⁰Marã kꞌazhirua nezokꞌata bꞌeasidꞌera kĩrãẽpa biata odꞌa ẽbasia. ²¹¿Bia ẽãta obꞌeadꞌadꞌebara kꞌãrẽ biata jidasidꞌa, maʉ̃nebara idꞌidꞌera marã pera duanu ẽka? Maʉ̃nebara aduaita beuya. ²²Mawũãmina idꞌidꞌera kꞌazhiruadꞌebara ẽdrʉdꞌape Daizeze nezokꞌata bꞌeba izhiita nʉmeã, mawũẽ izhi ũme bꞌai jõ ẽã bꞌeaya. ²³Kꞌazhiruata obꞌʉdꞌebara aduaita beuya. Mawũãneba Daizezebara izhi ũme bꞌai jõ ẽãta bari dia bꞌʉa Jesucristo dazhirã Nokꞌodꞌeba.

Miã ũrãgꞌadꞌa kĩma ãmaĩ ẽã bꞌʉdꞌeba

¹Mebẽrã, mʉrã marã Moisé ũrãgꞌa kꞌawua bꞌea bedꞌeaya, ¿marãba kꞌawua bꞌedꞌera dazhira Moisé ũrãgꞌadꞌe bꞌʉ ẽka wadꞌi zokꞌai bꞌʉdꞌera? ²Aramaʉ̃ kĩrãkꞌa wũẽrã miã kꞌãĩpe bꞌʉra Moisé ũrãgꞌadꞌebara zhi kĩma ũme bꞌaibara zhi kĩma wadꞌi zokꞌai bꞌʉdꞌera. Mawũãmina zhi kĩmata beura, maʉ̃ wũẽrã Moisé ũrãgꞌadꞌebara ẽdrʉbʉrʉa zhi kĩma ũme bꞌadꞌara. ³Zhi kĩma wadꞌi zokꞌai bꞌʉdꞌe wũẽrãba awʉrʉta edara kĩma ẽãta erukꞌãĩ bꞌʉa adꞌaya. Mawũãmina zhi kĩmata beura Moisé ũrãgꞌadꞌebara ẽdrʉbʉrʉa, mawũẽ awʉrʉta edara kĩma ẽãta erukꞌãĩ bꞌa ẽã.

⁴Mebẽrã, marã aramaʉ̃ kĩrãkꞌa Moisé ũrãgꞌaitara ya beusidꞌa Cristota beudꞌadꞌeba. Aramaʉ̃ne awʉrʉdꞌeta bꞌeta Cristo beudꞌata piradrʉdꞌadꞌeta bꞌeba biata odꞌaya Daizezeita. ⁵Kꞌazhiruadꞌe zharadꞌebemane bꞌeasidꞌera kꞌazhiruara wuaabʉrʉ okrĩñasidꞌa Moisé ũrãgꞌaba o ẽbaita jara bꞌʉta, aramaʉ̃ne dazhi kꞌakuaba obꞌʉbara dazhira aduaita beui basia. ⁶Mawũãmina idꞌira Moisé ũrãgꞌadꞌebara ẽdrʉsidꞌa, maʉ̃ ũrãgꞌa edre duanu ẽãba dazhira ya beusia maʉ̃ ũrãgꞌaitara. Mawũẽ Daizezeba jara bꞌʉta zhiwidꞌita Jawurebiadꞌeba aribꞌaedꞌaya, aramaʉ̃nerã Moisé ũrãgꞌata zhi zõrã edre duana ẽã.

Kꞌazhiruata bꞌʉdꞌebema mʉne

⁷¿Mawũẽ kꞌasia adꞌaipe? ¿Moisé ũrãgꞌara kꞌazhiruakꞌa? ¡Mawũã ẽã! Baribʉrʉ mʉãrã kꞌazhiruara sãwũãta kꞌawua ẽãta kꞌawuasia Moisé ũrãgꞌadꞌeba. Miã mʉãrã kꞌawua ẽbakꞌausia ne zhãrãne krĩña bꞌe ẽãrã, maʉ̃ne Moisé ũrãgꞌabara mawũã bꞌʉa: Ne zhãrãne krĩñarãrũã. ⁸Mawũãmina mawũã jaradꞌadꞌeba kꞌazhiruabara mʉãã wuaabʉrʉ ne jõma krĩñabisia. Moisé ũrãgꞌata ne ẽbasibʉrʉ kꞌazhiruara wuaabʉrʉ okrĩña nʉma ẽbakꞌausia.

⁹Mʉã Moisé ũrãgꞌa kꞌawua ẽã bꞌasidꞌera mʉrã adu-a bꞌasia. Mawũãmina kꞌawuabʉrʉdꞌera mʉãrã kꞌazhiruara wuaabʉrʉ okrĩñasia, mawũẽ mʉrã aduaita beui basia. ¹⁰Moisé ũrãgꞌabara mʉta Daizeze ũme bꞌai jõ ẽã bꞌabiita bꞌʉbara aramaʉ̃ne mʉãã kꞌawuabisia mʉrã aduaita beuita bꞌʉta. ¹¹Kꞌazhiruabara Moisé ũrãgꞌaba jara bꞌʉra obi ẽãba mʉrã sewasia, aramaʉ̃ne mʉrã aduabiita beai basia.

¹²Wãrãnebai Moisé ũrãgꞌara Daizezedꞌea, ũrãgꞌara biata biga. ¹³¿Mawũã biata mʉrã aduabiita beai basika? ¡Mawũã ẽã! Awuarabʉrʉ kꞌazhiruata obꞌʉdꞌebara mʉrã aduaita beuita maʉ̃ mawũã biadꞌeba kꞌawuasia, mawũẽ maʉ̃ ũrãgꞌadꞌebara dajada nʉmʉã kꞌazhiruara jipadꞌe kꞌazhiruata.

¹⁴Dazhirãbara kꞌawua bꞌea Moisé ũrãgꞌara Jawurebiadꞌebemata. Mawũãmina mʉrã zharadꞌebemane bꞌʉba kꞌazhiruaa zhi nendoma. ¹⁵Mʉã kꞌãrẽ obꞌʉra kꞌawua ẽã mʉã krĩñata okꞌaba, awuarabʉrʉ mʉã krĩña ẽãta obaria. ¹⁶Mʉã krĩña ẽãta obariba mʉãrã kꞌawua bꞌʉa Moisé ũrãgꞌara biata. ¹⁷Mawũẽ mʉ ẽã maʉ̃ mawũã obarira, awuarabʉrʉ obaria kꞌazhiruata bꞌʉba mʉne. ¹⁸Mʉãrã kꞌawua bꞌʉa mʉnerã mʉ zharadꞌera ne ẽã biara, biata okrĩñaĩrã mʉne bꞌʉa, mawũãmina o ẽã. ¹⁹O ẽã biata mʉã krĩñata, awuarabʉrʉ bia ẽãta mʉã krĩña ẽãta obaria. ²⁰Mʉã krĩña ẽãta obʉrʉra mʉã o ẽã, awuarabʉrʉ obaria kꞌazhiruata bꞌʉba mʉne.

²¹Mawũẽ mʉã biata okrĩña bꞌʉdꞌera bia ẽãta mʉne bꞌʉba idaribi ẽã. ²²Mʉne edꞌaubara mʉma biga Daizeze ũrãgꞌara. ²³Mawũãmina ne awʉrʉta mʉne bꞌʉa mʉ krĩchata idaribi ẽãta, maʉ̃bara obi edea kꞌazhiruata mʉne bꞌʉta.

²⁴¡Mʉrã zuburia bꞌʉa! ¿Mʉrã kꞌaiba ẽdrʉbiipe mʉ kꞌakuaba mʉ aduabiita beaita nʉmʉrã? ²⁵Mʉãrã Daizezea zhibia ji bꞌʉa izhabʉrʉ ẽdrʉbiya Jesucristo dazhirã Nokꞌodꞌeba. Mʉãrã krĩchabara aribꞌae krĩña Daizeze ũrãgꞌata, mawũãmina zharabara okrĩña kꞌazhiruata.

Nʉmeãĩnebema Jawurebiadꞌeba

¹Idꞌira Jesucristo ũme bꞌera bedꞌea bara duanu ẽã, mawũã duanu ẽã zharadꞌebemane duanu ẽãta, awuarabʉrʉ mawũã bꞌea Jawurebiadꞌeba bꞌeta. ²Bꞌai zhiwidꞌita Jawurebiaba Jesucristodꞌeba dia bꞌʉba dazhira kꞌazhiruadꞌeba ẽdrʉbisia aduaita beui badꞌata. ³Moisé ũrãgꞌabara ẽdrʉbi bꞌe ẽãba, zharabara ẽdrʉbi bꞌe ẽãba Daizezebara zhi warrata zokꞌasia dazhi kꞌãwũ zharadꞌe kꞌazhirua omiã zadꞌe. Mobe dazhi kꞌazhiruabari beubibʉrʉba kꞌazhiruadꞌebara ẽdrʉbisia, aramaʉ̃ne kꞌazhiruara beasia dazhi kꞌãwũ zharadꞌeba. ⁴Mawũã osia Moisé ũrãgꞌata dazhirãba aribꞌae bꞌedꞌamarẽã, mawũẽ zharadꞌebemane nʉme ẽã, awuarabʉrʉ nʉmeã Jawurebiadꞌeba.

⁵Zharadꞌebemane bꞌera krĩcha bꞌea zharadꞌebemane. Mawũãmina Jawurebiadꞌeba bꞌera krĩcha bꞌea Jawurebiadꞌebemata. ⁶Zharadꞌebemata krĩcha bꞌʉra aduaita beuya, mawũãmina Jawurebiadꞌebemata krĩcha bꞌʉra Daizeze ũme bꞌai jõ ẽã bꞌaya adu-a. ⁷Zharadꞌebemata krĩcha bꞌedꞌeba Daizezeba jurata bꞌebara Daizeze ũrãgꞌara aribꞌaedꞌa ẽã, miã bꞌedꞌa ẽã. ⁸Zharadꞌebemane nʉmerã Daizezeba krĩñane nʉme ẽã.

⁹Mawũãmina marã zharadꞌebemane nʉme ẽã, awuarabʉrʉ Jawurebiadꞌeba nʉmeã Jawurebia Daizezedꞌeta marãne edꞌa bꞌʉbʉrʉ. Iabꞌaʉta Jawurebia Cristodꞌeta ne ẽbʉrʉ izhidꞌe ẽã. ¹⁰Mawũãmina Cristota marãne edꞌa bꞌʉbʉrʉ, wãrãnebai kꞌakuara kꞌazhiruata odꞌadꞌeba beuimina jawurera zokꞌai bꞌʉa Daizezeba bedꞌea ne ẽã bꞌʉdꞌaba. ¹¹Jawurebiata Jesús beudꞌata piradrʉbidꞌadꞌeta marãne edꞌa bꞌʉbʉrʉ, Jesucristo beudꞌata piradrʉbidꞌabara marã kꞌakua beuita bꞌʉra izhabꞌa piradrʉbiya izhi Jawurebiata bꞌʉdꞌeba marãne edꞌa.

¹²Mawũẽ mebẽrã, Jawurebiadꞌeba nʉmeãña, zharadꞌebemane nʉmeã ẽã. ¹³Zharadꞌebemane nʉmeãĩbʉrʉ aduaita beudꞌaya. Mawũãmina Jawurebiadꞌeba beubibʉdata zharadꞌebemata odꞌa ẽãrã Daizeze ũme bꞌai jõ ẽã bꞌeaya.

¹⁴Jõma Daizeze Jawurebiadꞌeba nʉmerã Daizeze warrarã. ¹⁵Marãba Jawurebiata jidadꞌabara marã nezokꞌata bꞌʉ ẽbasia, mawũẽ nezokꞌata bꞌeadꞌa kĩrãkꞌa wakusa pera bꞌeaidꞌe bꞌʉ ẽã, awuarabʉrʉ Jawurebiara jidasidꞌa marã Daizeze warrarã babidꞌata. Izhidꞌeba dazhirãbara Daizezea ¡Zeze! abada. ¹⁶Abꞌaʉ Jawurebiaba dazhi jawurea kꞌawuabi bꞌʉa dazhira Daizeze warrarãta. ¹⁷Mawũã zhi warrarã baera Daizezeba ne erubꞌʉta jidadꞌaya Cristo bawarauba, izhi zuburiadꞌa kĩrãkꞌa zuburiadꞌara Daizezebara Cristo bawara bia bꞌʉya.

¹⁸Wãrãnebai zuburiata idꞌi ewadebema kꞌãrẽ ẽã, ewarita uruba Daizezeba dazhi bia bꞌʉita. ¹⁹Ne jõma izha okuadꞌabara maʉ̃ta krĩña bꞌeba jʉ̃ã bꞌea ũdubimarẽã zhi warrarã bia nʉminapʉta Daizezeba. ²⁰Izha ne jõma okuadꞌara bia nʉme ẽbasia, izhi dobꞌa mawũã nʉme ẽbasia, awuarabʉrʉ Adánta bedꞌeadꞌeba Daizezeba mawũã nʉmʉsia, mawũã nʉmʉnabara bia nʉmʉmarẽã jʉ̃ã bꞌea. ²¹Izha okuadꞌabara mawũã jʉ̃ã bꞌea bꞌerawakꞌata nʉmʉmarẽã zhi warrarãta bia nʉmʉĩ kĩrãkꞌa Daizezeba. ²²Kꞌawua bꞌea izha ne jõma okuadꞌara puaba ʉ̃ĩ-ʉ̃ĩã bꞌea, wũẽrã toi puabari kĩrãkꞌa pua bꞌea idꞌibasiidꞌu. ²³Bari maʉ̃rãtrʉ pua duanu ẽã, awuarabʉrʉ Jawurebiata naara jidadꞌapeadꞌata dazhirãsidꞌa puaba ʉ̃ĩ-ʉ̃ĩã bꞌedꞌe jʉ̃ã bꞌea Daizezeba zhi warrarã jʉre edemarẽã, aramaʉ̃ne beukꞌata bꞌʉmarẽã dazhi kꞌakuara. ²⁴Dazhira maʉ̃ta jʉ̃ãĩta ẽdrʉsia. Dazha maʉ̃ta ũdu bꞌʉbʉrʉ jʉ̃ã ẽã. Iabꞌaʉba ne ũdu bꞌʉra ¿kꞌãrẽã jʉ̃ãĩpe? ²⁵Mawũãmina dazha ũdu ẽãta jʉ̃ã bꞌʉra ũduyeedꞌa jʉ̃ãbada.

²⁶Aramaʉ̃ kĩrãkꞌa dazhira Jawurebiaba kꞌareba bꞌʉa dazha bꞌe ẽãnebemane. Daizezea kꞌãrẽ bigata widꞌiira dazhara kꞌawua ẽã. Mawũãmina Jawurebiata dazhibari ʉ̃ĩ-ʉ̃ĩã zhiwidꞌi bꞌʉa, maʉ̃ sãwũãta jaraidꞌe bꞌʉ ẽã. ²⁷Mawũãmina Daizezebara dazhi sora ũdu kꞌawua bꞌʉba kꞌawua bꞌʉa Jawurebiaba kꞌãrẽ widꞌi bꞌʉra, izhira Daizezeba krĩñane zhiwidꞌi bꞌʉa izhidꞌerãĩta.

Zuburiara jõma edre bꞌaebibada

²⁸Kꞌawua bꞌea izhi kʉãgꞌa bꞌeta Daizezeba kꞌãrẽ berabꞌaribi bꞌʉra jõma kꞌarebata biaitabema, maʉ̃ta izha kꞌãrẽ kꞌaudꞌa bꞌeabiita trʉ̃kuadꞌaitabema. ²⁹Na wedꞌauba izha ũdu kꞌawua bꞌʉta bꞌera zhi jʉrʉma zhi Warra Jesús kĩrãkꞌa bꞌeabiita, aramaʉ̃ne izhita Warra nabemata bꞌamarẽã mebẽrã biodꞌe edꞌa. ³⁰Izha mawũã zhi jʉrʉmata bꞌera trʉ̃kua nʉmʉkꞌãrĩã. Mawũã trʉ̃kua nʉmʉkꞌãrĩrã bedꞌea ne ẽã nʉmʉkꞌãrĩã. Mawũã bedꞌea ne ẽã nʉmʉkꞌãrĩrã izhita zhi zromanebemata nʉmʉkꞌãrĩã.

³¹¿Mawũẽ maʉ̃ẽnabema kꞌasia adꞌaipe? Daizezeta dazhiaare bꞌʉra, ¿dazhira kꞌaiba sãwũãĩpe? ³²Daizezebara miã zhi Warrasidꞌa wããgꞌa ẽbasia, awuarabʉrʉ bebuidꞌu chãbꞌarisia dazhirã jõmaʉ̃bari. ¿Mawũẽ dazhirãã sãwũã ne jõma dia ẽbaipe zhi Warra bawaraua? ³³¿Kꞌaiba ji nʉma bꞌeipe Daizezeba jʉrʉkuadꞌara? Daizezebara izhabʉrʉ bedꞌea ne ẽã bꞌʉbaria. ³⁴¿Kꞌaiba bedꞌea bara bꞌʉa aipe? Miõba bedꞌea bara bꞌʉa a ẽã Cristota dazhibari beudꞌaba. Beudꞌata piradrʉpe Daizeze juwua araare bꞌʉa, zhiwidꞌi bꞌʉa dazhirãbari. ³⁵¿Dazhira kꞌaiba ãĩ tʉipe Cristoba kʉãgꞌata bꞌera? ¿Zuburia nʉmʉbara, sopua nʉmʉbara, bĩ ẽã odꞌaita pẽwã nʉmebara, jarrabadꞌe nʉmʉbara, wua ne ẽã nʉmʉbara, menajachadꞌe nʉmʉbara, kuchoba beaita nʉmebara ãĩ tʉika? ³⁶Maʉ̃ẽnabemata zhi bꞌʉmata mawũã bꞌʉa:

Daira bʉ kꞌarea ewariza bebudꞌe nʉmeã. Daira erunʉmeã oveja beai bara kĩrãkꞌa. (Salmos 44:22)

³⁷Maʉ̃ zuburiara dazhirãbara jõma edre bꞌaebibada Jesucristodꞌeba dazhirã kʉãgꞌadꞌeba. ³⁸Mawũẽ mʉã kꞌawuaidꞌera bebubara, zuburia nʉmʉbara, ángelerãbara, zhi zromarãbara, zareata jairãnebara, idꞌibemabara, nubemabara, ³⁹jaita ʉ̃tʉ, eidꞌu nʉmʉbara, miã ne awʉrʉbara dazhira ãĩ tʉ bꞌe ẽã Daizezeba kʉãgꞌata bꞌera Jesucristo dazhirã Nokꞌodꞌeba.

Daizezeba jʉrʉdꞌa Israel bꞌera

¹Cristodꞌeba mʉãrã wãrãta jaraya, mʉrã sewa nebʉrʉ ẽãta kꞌawua bꞌʉa Jawurebiadꞌeba. ²Israel bꞌe kꞌarea mʉrã baridua kꞌãbãẽã sopua bꞌʉa. ³Mʉ ãĩ bꞌebʉrʉba ĩjãnaĩta bꞌasibʉrʉ mʉrã Daizezea zuburia obibʉrʉta Cristodꞌebara ãĩ bꞌekꞌausia mʉ ʉrerã zharadꞌebemata kʉãgꞌaba. ⁴Ãzhira israelitarãta bꞌea, ãzhira Daizezeba zhi warrarã babigadꞌa, izhi kĩrãwãrẽãta ũdubigadꞌa, izha kꞌãrẽ oita jarakꞌadꞌa, izhi ũrãgꞌata Moisédꞌeba dedꞌekadꞌa, izhira sãwũã ibia jaradꞌaidꞌe bꞌʉta kꞌawuabigadꞌa, izha kꞌãrẽ diaita jarakꞌadꞌa. ⁵Ãzhira Abrahamneba, Isaacdꞌeba, Jacobodꞌeba uruta bꞌea, ãzhidꞌeba naʉ̃ zharadꞌe zesia Cristora, izhira Daizezeta ne jõmaʉ̃ ʉ̃rʉ̃ bꞌʉa, mawũẽ ewari nʉmʉ jõma ibia jaradꞌaya. Amén.

⁶Mʉãrã jara nʉmʉ ẽã izha jaradꞌara Daizezebara aribꞌae ẽãta. Awuarabʉrʉ jara nʉmʉã Israel bꞌedꞌeba urura Daizezema jõmarã israelitarã ẽãta. ⁷Abrahamneba urura Daizezema jõmarã Abraham warrarã ẽã, maʉ̃neba izhara mawũãsia: Bʉ warrarã nʉmaña Isaacdꞌeba. ⁸Aramaʉ̃nerã Abraham warrarã bari zharadꞌeba bꞌera Daizeze warrarã ẽã. Awuarabʉrʉ Abraham warrarã Daizezedꞌera warra izha jaradꞌadꞌebema. ⁹Izhara mawũãsia: Mʉrã año abꞌaʉdꞌe zeya, maʉ̃nerã Sara tokꞌara wau erubꞌaya

¹⁰Bari maʉ̃ ẽã, awuarabʉrʉ Rebecabidꞌa Isaacdꞌeta memerãta tosia zõrã dazhirãta bꞌadꞌadꞌeta. ¹¹Wadꞌi todꞌa ẽwedꞌa, wadꞌi bia ẽãta miã biata odꞌa ẽwedꞌa Daizezeba jʉrʉdꞌadꞌeba nʉmaĩrã, aramaʉ̃ne kꞌãrẽ odꞌadꞌeba nʉma ẽbaira awuarabʉrʉ izha jʉrʉdꞌadꞌeba nʉmaĩrã, ¹²Daizezebara Rebecaa mawũãsia: Nabemabara aribꞌaeya tẽãbemata. ¹³Maʉ̃ẽnabemata zhi bꞌʉmata mawũã bꞌʉa: Mʉãrã Jacobo kʉãgꞌasia, mawũãmina Esaú jurasia.

¹⁴¿Mawũẽ kꞌasia adꞌaipe? ¿Daizezebara bia ẽãta obꞌʉka? ¡Mawũã ẽã! ¹⁵Izhara Moiséa mawũãsia: Mʉãrã sozuburiaya mʉã sozuburia krĩñata. ¹⁶Aramaʉ̃nerã izhita jʉrʉbi krĩñaba kꞌãrẽ onʉmʉta jʉrʉ ẽã, awuarabʉrʉ Daizezebara jʉrʉbaria izha sozuburia krĩñata. ¹⁷Maʉ̃ẽnabemata zhi bꞌʉmata izhara Egiptodꞌebema nokꞌoa mawũãsia: Mʉã bʉra nokꞌota bꞌʉsia bʉdꞌeba mʉ zareata ũdukꞌawabigaita, aramaʉ̃ne mʉ zhi zromata jara bꞌeamarẽã drua jõmaʉ̃ne. ¹⁸Aramaʉ̃ne Daizezebara izha sozuburia krĩñata sozuburia bꞌʉa, bedꞌea ũrĩ ẽã zarea nʉmabi krĩñata zarea nʉmabi bꞌʉa.

¹⁹Maʉ̃neba iabꞌaʉba mʉãã mawũãĩ baya: ¿Mawũãta kꞌãrẽã dazhira bedꞌea bara bꞌea abꞌʉ? ¿Aramaʉ̃nerã kꞌaiba sãwũãĩpe izha krĩñane nʉmʉkꞌãrĩrã? ²⁰¿Bʉra kꞌaipe Daizezea mawũã bedꞌeaira? ¿Zokꞌobara zhi odꞌaa mawũãĩ bʉka?: ¿Mʉrã kꞌãrẽã kꞌãwũã osi? ²¹¿Zokꞌo obaribara egorora izha krĩñane oi ẽã bꞌʉka, abꞌaʉ egoroba oi ẽã bꞌʉka zokꞌo abꞌa ne biadꞌe zokꞌaita, abꞌa ne baridudꞌe zokꞌaita?

²²Aramaʉ̃ kĩrãkꞌa Daizezebara izha krĩñata obʉrʉta izhi kĩrũbita izhi zareata ũdukꞌawabiga krĩñane kꞌãbãẽã zrogꞌasia kꞌazhiruata obꞌeba kĩrũbiba aduabigai badꞌata. ²³Mawũã zrogꞌasia izhira kĩrãwãrẽã zromata izha sozuburiadꞌarãã kꞌawuabigai kꞌarea, nawedꞌa aribꞌaesia mawũã kĩrãwãrẽãnebemata bꞌeabiita. ²⁴Maʉ̃rãta izha trʉ̃kuadꞌara trʉ̃kuasia dazhirãta, bari judíorãnebemata trʉ̃ ẽbasia, awuarabʉrʉ trʉ̃sia judíorã ẽãnebemasidꞌa. ²⁵Maʉ̃ẽnabemata Daizezeba jaradꞌata Oseas librodꞌe mawũã bꞌʉa:

Mʉãrã mʉrẽrã aya mʉrẽrã ẽbadꞌata. Mʉã kʉãgꞌata duana ẽbadꞌata mʉã kʉãgꞌata bꞌea aya. (Oseas 2:23)

²⁶Maʉ̃ẽnabemata dewara mawũã bꞌʉa:

Mʉãrã marã mʉrẽrã ẽã adꞌata, Daizeze zokꞌai bꞌʉ warrarã aya. (Oseas 1:10)

²⁷Dewara Isaíaba Israel bꞌedꞌebemata mawũãsia:

Israel bꞌe warrarãnebemata pusa ibu kĩrãkꞌa nʉmaĩmina bari ʉ̃kʉrʉ ẽdrʉdꞌaya.

²⁸Maʉ̃ẽnabema Daizezebara druadꞌe bꞌera kꞌawua oya kꞌadrʉabai. (Isaías 10:22-23)

²⁹Dewara nawedꞌara Isaíabara mawũãsia:

Daizeze ne jõmaʉ̃ne zhi zromaba dazhirãta ʉ̃kʉrʉ zokꞌai bꞌʉ ẽbasibʉrʉ, dazhirã berabꞌarikꞌausia Sodoma jõna kĩrãkꞌa, Gomorra jõna kĩrãkꞌa. (Isaías 1:9)

Bedꞌea ne ẽbaya ĩjãbʉrʉdꞌeba

³⁰¿Mawũẽ kꞌasia adꞌaipe? Judíorã ẽãrã bedꞌea ne ẽbaidꞌebemane nʉme ẽãta, Daizezebara bedꞌea ne ẽã bꞌʉkua nʉmʉã Cristodꞌebemata ĩjãbʉdaba. ³¹Maʉ̃ne Israel bꞌera bedꞌea ne ẽbaidꞌebema ũrãgꞌadꞌe nʉmeta bedꞌea ne ẽã bꞌʉkua ẽã. ³²¿Kꞌãrẽneba mawũãpe? Mawũãta nʉmʉã maʉ̃ne nʉmeta Cristodꞌebemata ĩjãna ẽãba, awuarabʉrʉ kꞌãrẽ obꞌeba bedꞌea ne ẽbaidꞌe nʉmeã. Mawũã Cristodꞌebema ĩjãna ẽãba tẽnedrʉsidꞌa mongꞌarama tẽnedrʉi kĩrãkꞌa. ³³Maʉ̃ẽnabemata zhi bꞌʉmata mawũã bꞌʉa:

Mʉã Jerusalénne mongꞌarata bꞌʉya zhãrã tẽnedrʉbarita, izhidꞌebemata ĩjã bꞌʉra bariara ẽã. (Isaías 28:16)

¹Mebẽrã, wãrãnebai mʉã sodꞌeba krĩña bꞌʉra mʉrã Daizezea zhiwidꞌi bꞌʉa ẽdrʉdꞌamarẽã Israel bꞌeta. ²Mʉã kꞌawuaidꞌera Daizezeba krĩñane nʉma krĩña bꞌea, mawũãmina wãrĩnu sãwũãta kꞌawua duanu ẽã. ³Daizezeba sãwũã bedꞌea ne ẽã bꞌʉbarira kꞌawuadꞌa ẽã, mawũẽ ãzha kꞌãrẽ obꞌeba bedꞌea ne ẽã bꞌeaita krĩcha nʉmeba Daizezeba bedꞌea ne ẽã bꞌʉidꞌebemane duanu ẽã. ⁴Moisé ũrãgꞌara ma aribꞌaesia Cristoba, maʉ̃neba Daizezebara bedꞌea ne ẽã bꞌʉya izhidꞌebemata ĩjãbʉdara.

⁵Moisébara ũrãgꞌadꞌeba bedꞌea ne ẽbaidꞌebemata bꞌʉdꞌata mawũãsia: Ũrãgꞌata aribꞌae bꞌʉra maʉ̃neba bꞌaya. ⁶Mawũãmina Cristodꞌebemata ĩjãbʉrʉba bedꞌea ne ẽbaira mawũã bꞌʉa: Sodꞌeba mawũãrãrũã: ¿Kꞌaita wãrĩzeipe ʉ̃taara? Aramaʉ̃ne Cristo udꞌaa weira. ⁷Miã mawũãrãrũã: ¿Kꞌaita wãĩpe eidꞌu beudꞌa bꞌeidꞌura? Aramaʉ̃ne Cristo wãrĩzebiira beudꞌa bꞌe maẽba. ⁸¿Mawũãĩ kꞌãñabara Daizezebara kꞌãrẽta jara bꞌʉ? Mawũã bꞌʉa: Bedꞌeata Cristodꞌebema bʉara borekea ĩjã bꞌeya, bʉara bʉ iba jaraidꞌe bꞌʉa, sodꞌeba ĩjãĩne bꞌʉa. Daibara maʉ̃ bedꞌeata ĩjãĩnebemata jara panʉã. ⁹Bʉzhi iba Jesústa Nokꞌota jarara, Daizezeba beudꞌata piradrʉbidꞌata sodꞌeba ĩjãrã bʉra ẽdrʉya. ¹⁰Mawũã sodꞌeba ĩjãbʉrʉra bedꞌea ne ẽã bꞌʉya, mawũã dazhi iba jarabʉrʉra ẽdrʉbiya.

¹¹Maʉ̃ẽnabemata zhi bꞌʉmata mawũã bꞌʉa: Izhidꞌebemata ĩjã bꞌʉra bariara ẽã. ¹²Aramaʉ̃nerã izhara awuara eda ẽã judíorãta miã judíorã ẽãta, izhita jõmaʉ̃ Nokꞌobara biodꞌe kꞌareba bꞌʉa kꞌarebata widꞌibʉdara. ¹³Aramaʉ̃nerã Nokꞌoa kꞌarebata widꞌibʉdara ẽdrʉya.

¹⁴¿Mawũãmina kꞌarebara sãwũã widꞌidꞌaipe izhidꞌebemata ĩjãna ẽãrã? ¿Sãwũã ĩjãnaĩpe izhidꞌebemata ũrĩnakꞌara? ¿Sãwũã ũrĩnaĩpe kꞌaiba jaraita ne ẽbʉrʉ? ¹⁵¿Sãwũã jaradꞌaipe jaradꞌe zokꞌakuadꞌa ẽbʉrʉ? Maʉ̃ẽnabemata zhi bꞌʉmata mawũã bꞌʉa: ¡Kꞌãbãẽã kĩrãwãrẽã adu-a bꞌaidꞌebemata jara bꞌera bedꞌea biata!

¹⁶Mawũãmina judíorã jõmaʉ̃bara ĩjãna ẽbasia Cristodꞌebema bedꞌea biara. Maʉ̃ẽnabemata Isaíabara mawũãsia: ¿Nokꞌó, kꞌaiba ĩjãbʉrʉ daiba jarabʉdara? ¹⁷Aramaʉ̃nerã ũrĩbʉrʉba ĩjã bꞌʉa, Cristodꞌebemata mawũã ũrĩbʉrʉba Daizeze bedꞌeadꞌeba. ¹⁸Mawũãmina mʉã widꞌiya: ¿Maʉ̃ bedꞌeara judíorãbara ũrĩna ẽbasika? Wãrãnebai ũrĩsidꞌa. Maʉ̃ẽnabemata zhi bꞌʉmata mawũã bꞌʉa:

Izhidꞌebemata drua jõmaʉ̃ maẽ jarasidꞌa, drua wawaraidꞌu jarasidꞌa izhi bedꞌeara. (Salmos 19:4)

¹⁹Mʉã wakusa widꞌiya: ¿Maʉ̃ kꞌawuadꞌa ẽka Israel bꞌebara? Maʉ̃ẽnabemata Daizezebara naara Moisédꞌeba mawũãsia:

Mʉã marã bĩ ẽãbiya mʉrẽrã ẽãta bia edabʉrʉba, mʉnebema kꞌawua ẽã bꞌeadꞌata bia edabʉrʉba kĩrũbigaya. (Deuteronomio 32:21)

²⁰Dewara Daizezedꞌeba Isaíaba wãnigua mawũãsia:

Mʉrã ũdusidꞌa mʉ jʉrʉ ẽã bꞌeadꞌaba, mʉrã zhi ũdukꞌawabigasia mʉ widꞌi ẽã bꞌeadꞌaa. (Isaías 65:1)

²¹Mawũãmina Israel bꞌedꞌebema Daizezebara Isaíadꞌeba mawũãsia:

Mʉãrã ewariza kꞌareba krĩñasia bedꞌea aribꞌae ẽã bꞌeta, bedꞌea ũrĩ ẽã bꞌeta. (Isaías 65:2)

Daizezeba ʉ̃kʉrʉ jʉrʉkuasia Israel

¹Maʉ̃neba mʉã widꞌiya: ¿Daizezebara izhidꞌerã kenabꞌarisika? Mawũã ẽã. Mʉsidꞌa israelitarãta Abrahamneba uruta Benjamín warrarãnebema. ²Daizezebara izhidꞌerã kenabꞌari ẽã, ãzhira na wedꞌauba jʉrʉkuasia. ¿Kꞌawuadꞌa ẽka Elía ʉ̃rʉ̃ bꞌʉ tabꞌʉdꞌe jara bꞌʉra, Daizeze kĩrãbita Israel ʉ̃rʉ̃ bĩ ẽã bedꞌea mawũãsi ẽka? ³Nokꞌó, bʉa bedꞌeata jarabibarirã beakuabʉda, bʉita ne ba badata altar nʉmerã ãrĩkuabʉda. Mʉtrʉ abꞌabai bꞌidꞌata mʉrã beaita jirpanʉã. ⁴¿Mawũãĩ Daizezebara mawũãsi ẽka?: Mʉãrã mʉĩta nʉmʉkꞌãrĩã ũmakĩrãrã siete mil, ãzhira sãkꞌokꞌodꞌe kꞌopanekꞌa Baal ne zhi zromane erubꞌe kĩrãbitara. ⁵Aramaʉ̃ kĩrãkꞌa idꞌi ewadebidꞌa Daizezebara judíorã ʉ̃kʉrʉ jʉrʉkuasia izhi biaba. ⁶Izhi biaba jʉrʉbʉrʉra jʉrʉbʉrʉ ẽã kꞌãrẽ obʉrʉba. Kꞌãrẽ obʉrʉba jʉrʉra ya izhi biaba jʉrʉbʉrʉ ẽã.

⁷¿Aramaʉ̃nerã sãwũãpe? Israel bꞌera Daizezema bia nʉmeãĩta jʉrʉ bꞌeadꞌadꞌe duane ẽbasia. Mawũãmina izha jʉrʉkuadꞌara mawũã duanesia, waya wuaabema zarea duanesia. ⁸Maʉ̃ẽnabemata zhi bꞌʉmata mawũã bꞌʉa:

Daizezebara izhidꞌebema kꞌawua bꞌedꞌa ẽã nʉmʉnaba, dabʉbara ũdudꞌa ẽã, ne ũrĩbaribara ũrĩna ẽã idꞌi basiidꞌu. (Deuteronomio 29:4; Isaías 29:10)

⁹Rey Davidbara mawũãsia:

Bia nekꞌo bꞌeba krĩchabigarua bʉara kꞌawua o ẽãta, maʉ̃ta kidꞌabe kĩrãkꞌa nʉmʉdua ãzhi bꞌaeta, aramaʉ̃ne ãzhi pua kꞌawua oita.

¹⁰Daʉbꞌerrea bꞌe kĩrãkꞌa nʉmʉdua bʉdꞌebema ũdubʉdara ũdu bꞌedꞌa ẽbamarẽã, ĩjãna ẽãba zuburiabigarua ewariza. (Salmos 69:22-23)

Ẽdrʉbi nʉmʉã judíorã ẽãta

¹¹Maʉ̃neba mʉã widꞌiya: ¿Israelitarã Cristodꞌebema ĩjãna ẽãba tẽnedrʉbʉdara jipa bꞌaesidꞌakꞌa? ¡Mawũã ẽã! Baribʉrʉ aribꞌaedꞌa ẽãnebara Daizezebara judíorã ẽãta ẽdrʉbi nʉmʉã, aramaʉ̃ne Judíorãta bĩ ẽã bꞌeamarẽã. ¹²Aribꞌaedꞌa ẽãba judíorã bꞌaebʉdata mawũã ẽjũãne judíorã ẽãta bꞌe biaitabemabʉrʉ, ¿audre bia nʉmʉĩ ẽka Cristodꞌebemata judíorãba jipa ĩjãbʉdadꞌera?

¹³Mʉrã bedꞌeaya marã judíorã ẽãta bꞌea. Mʉrã Daizezeba marã judíorã ẽãma zokꞌadꞌaba mʉma biga mʉ miã ũrãgꞌa bꞌʉra. ¹⁴Mʉãrã krĩña bꞌʉa mʉrãta bꞌeba maʉ̃ta krĩñanamarẽã aramaʉ̃ne ẽdrʉdꞌamarẽã ʉ̃kʉrʉ ãzhirãnebemata. ¹⁵Daizezeba judíorã kenabꞌaridꞌata ẽjũãne nʉmʉ biaitabemabʉrʉ, ¿judíorãba Cristodꞌebemata ĩjãbʉdadꞌera Daizeze ũme bꞌai jõ ẽã bꞌeai ẽka beudꞌa kĩrãkꞌa bꞌeadꞌata?

¹⁶Pega waragꞌabʉrʉta naara Daizezea diabʉrʉdꞌera izhidꞌea wuaabemasidꞌa. Aramaʉ̃ kĩrãkꞌa judíorã zhi kꞌarrata izhidꞌeta bꞌeadꞌaba judíorã Daizezedꞌea. Aramaʉ̃nerã bakuru kꞌarrata Daizezedꞌeta nʉmʉnebara izhidꞌea zhi taerãsidꞌa. ¹⁷Bakuru olivo zhi ura judíorãã. Cristodꞌebemata ĩjãna ẽãba Daizezebara ʉ̃kʉrʉ bꞌʉatukuasia olivo zhi u taera, mobe marã judíorã ẽãta olivo meãbemata bꞌeta mama kꞌarakuasia, judíorã zhi kꞌarradꞌebemata erunʉmana kĩrãkꞌa aramaʉ̃ne marã Daizezebara bia erunʉmʉã olivo kꞌarra bꞌata biadꞌe kĩrãkꞌa. ¹⁸Mawũãmina marã audre biarãta krĩcharãũdua olivo zhi u taeta mawũã bꞌʉatukuadꞌa kꞌãñabara. Mawũã krĩchadꞌara budebaudua marãba anʉmʉ ẽãta zhi kꞌarrara, awuarabʉrʉ zhi kꞌarraba anʉmʉã marãta.

¹⁹Marã judíorã ẽãbara mawũãnaĩbaya: Daizezebara olivo zhi u taera mawũã bꞌʉatukuasia dazhirãta mama kꞌarakuaita. ²⁰Wãrĩnuã, Cristodꞌebemata ãzha ĩjãna ẽãba bꞌʉatukuasia, mawũãmina marãbara ĩjãbʉdaba mama kꞌarakuasia. Maʉ̃ba marã biarãta krĩcharãũdua ãzhi kꞌãñabara, awuarabʉrʉ Daizezeta wawiaudua. ²¹Daizezeba olivo zhi u taeta bꞌʉatukuasibʉrʉ marãsidꞌa bꞌʉatukua bꞌeya.

²²Kĩrãkuitaudua, Daizezera biata bꞌʉmina zhãrã jʉ̃ãkꞌaeabaria. Wãrãnebai jʉ̃ãkꞌaeasia judíorã zhi bꞌaekuadꞌata, mawũãmina marã bawarara biata nʉmʉã mawũã biata nʉmaĩnebemane nʉmebʉrʉ. Mawũã nʉme ẽbʉrʉ marãsidꞌa bꞌʉatukuaya. ²³Judíorã Cristodꞌebema ĩjãna ẽãba bꞌʉatukuadꞌaba ĩjãnarã arimaẽ kꞌarakuaya, Daizezera zhi zroma wakusa arimaẽ kꞌarakuaira. ²⁴Marãta olivo meãbema taeta bꞌʉatukuape olivo biata zhi uma kꞌarakuasibʉrʉ, ¿judíorã audrebai arimaẽ kꞌarakuai ẽka zhi olivoma?

Israel ẽdrʉdꞌaidꞌebema

²⁵Mebẽrã, Daizezeba kꞌawuabi ẽã bꞌadꞌata mʉãrã marãba kꞌawuadꞌaita krĩña bꞌʉa, mawũãtrʉ judíorã kꞌãñabara audre biarãta krĩchadꞌa ẽã: Israel ʉ̃kʉrʉba ĩjã ẽã zarea nʉmerã, mawũã nʉmeã Cristodꞌebema ĩjãĩ bꞌeta judíorã ẽãta edꞌa zedꞌayeedꞌa. ²⁶Mobebʉrʉ Israel ẽdrʉdꞌaya, maʉ̃ẽnabemata zhi bꞌʉmata mawũã bꞌʉa:

Jerusalénneba zeya zhãrã Ẽdrʉbita, maʉ̃bara Jacobodꞌeba uruta bꞌera bedꞌea ne ẽã bꞌʉya bia ẽãta odꞌapeadꞌara. (Isaías 59:20)

²⁷Mʉã mawũã jaradꞌara ãzhi bawara aribꞌaeya, mʉãrã aramaʉ̃ne bedꞌea ne ẽã bꞌʉya ãzhi kꞌazhiruata biodꞌebara. (Jeremías 31:33-34)

²⁸Jesúsdꞌebema bedꞌea biata judíorãba krĩñana ẽãba Daizeze bawara zhi jurata bꞌera marãta izhidꞌeta bꞌeaidꞌebema. Mawũãmina izha jʉrʉkuadꞌaba izha kʉãgꞌata bꞌea ãzhi zhibarirãneba. ²⁹Aramaʉ̃ne izha diadꞌara jãrĩ ẽã, miã izha trʉ̃narã ãĩ bꞌʉ ẽã Daizezebara.

³⁰Ewari nawedꞌara marãbidꞌa Daizezedꞌebema aribꞌaedꞌa ẽbasia, mawũãmina idꞌira marã sozuburia nʉmʉã judíorãba aribꞌaedꞌa ẽãba. ³¹Zhi mawũã idꞌidꞌe aribꞌaedꞌa ẽãrã marã sozuburia nʉmʉneba ãzhisidꞌa sozuburiaya. ³²Aramaʉ̃ne Daizezebara zhãrã jõma idaribisia izhidꞌebema aribꞌae ẽã bꞌeamarẽã, aramaʉ̃ne jõma sozuburiaita.

³³¡Daizezera biodꞌe kꞌãrẽ kꞌawua bꞌʉa, krĩcha kꞌawua bꞌʉa! ¡Miõba kꞌawua ẽã izha oita krĩcha bꞌʉra, dazha kꞌawua ẽã izha obꞌʉra!

³⁴¿Kꞌaiba kꞌawuaipe Daizeze krĩchara? ¿O izhira kꞌaiba ũrãgꞌaipe?

³⁵¿Kꞌaiba naara kꞌãrẽ diasi, izhabidꞌa kꞌãrẽ diamarẽãrã?

³⁶Izhidꞌeba nʉmʉba izhikꞌareuba izhiita nʉmʉã ne jõma.

Izhitrʉ ibia jaradꞌaya ewari nʉmʉ jõma. Amén.

Zhiwidꞌidꞌe bꞌeaidꞌebema

¹Mawũẽ mebẽrã, Daizezeba sozuburiadꞌaba mʉã marãã jaraya, marã kꞌakuara izhaa chãbꞌaribʉdata Daizezeba krĩñane bꞌeaudua, marã mawũãrã wãrãne izha krĩñane nʉmeãña. ²Naʉ̃ ẽjũãne bꞌedꞌe bꞌearãũdua, awuarabʉrʉ krĩcha zhiwidꞌidꞌe nʉmeba kĩrãẽpa bꞌeaudua, mawũãrã kꞌawuadꞌaya Daizezeba kꞌãrẽ krĩñata, jipa biata krĩñata.

³Daizezeba izhi biaba kꞌãrẽ jarabi nʉmʉba mʉã marãã jaraya, miõta izhikusa krĩchaidꞌe bꞌʉ ẽã izhira audre zhi zromata, awuarabʉrʉ izhikusara krĩchaidꞌe bꞌʉa soidꞌu kꞌobꞌʉba kꞌãrẽ oira Daizezebara diasita abꞌa abꞌaʉa. ⁴Dazhira kꞌakua abꞌaʉta ne bio bꞌʉa, mawũãmina ne biota jõmaʉ̃bara ne abꞌaʉta odꞌa ẽã. ⁵Dazhirãta aramaʉ̃ kĩrãkꞌa bꞌeta biota kꞌakua abꞌa bꞌea Cristodꞌeba, aramaʉ̃ne jõma zhiya abꞌaʉdꞌebemata bꞌea.

⁶Dazhirãbara kꞌãrẽ awuara oidꞌebemata erubꞌea Daizezeba izhi biaba diadꞌata. Mawũẽ izha bedꞌeata jarabibarita bꞌʉbara izha jarabibʉrʉra jaradua soidꞌu kꞌobꞌʉba. ⁷Zhãrã kꞌarebabi bꞌʉbara zhãrã kꞌarebarua. Miã ũrãgꞌabi bꞌʉra miã ũrãgꞌarua. ⁸Zhãrã soidꞌu nʉmabi bꞌʉra zhãrã soidꞌu nʉmabi bꞌadua. Zhãrã ne diabi bꞌʉbara sobia diadua. Mebẽrã nokꞌota nʉmʉkꞌãrĩrã kĩrãkuita nʉmadua. Zhãrã sozuburia kꞌarebabi bꞌʉbara kꞌarebarua sobia.

⁹Soidꞌu zhi kʉãgꞌa bꞌeaudua. Bia ẽãrã o ẽã ũduamaʉ̃dua, oudua biatrʉ. ¹⁰Mebẽrãne zhi kʉãgꞌa bꞌeaudua. Zhiya zhi wawiaitrʉ bꞌeaudua. ¹¹Kꞌãrẽ oita kꞌoa bꞌearãũdua. Jawurebiadꞌeba kꞌãrẽ oitrʉ bꞌeba Nokꞌo Jesúsba krĩñata oudua. ¹²Daizezedꞌeba kꞌãrẽ jidaita krĩcha jʉ̃ã bꞌeba sobia bꞌeaudua, zuburia nʉmʉrã zrogꞌaudua, baridua zhiwidꞌiudua. ¹³Kꞌãrẽ diaudua Daizezedꞌebema zuburia kꞌãrẽ nesidꞌa bꞌera. Bia edaudua deidꞌu zebʉdara. ¹⁴Ibia jaraudua marã bĩ ẽã oita pẽwã bꞌera. Ibia jaraudua ikꞌazhirua jararãũdua. ¹⁵Sobiaudua sobia bꞌe bawarara. Jẽgaudua jẽga bꞌe bawarara. ¹⁶Mazhirãĩnu bia bꞌeaudua, zhãrã kꞌãñabara zhi zromane bꞌearãũdua, awuarabʉrʉ zuburia bꞌe bawarara abꞌarikadꞌe bꞌeaudua. Krĩcha banane bꞌearãũdua mazhi krĩchaba.

¹⁷Iabꞌaʉba marãta bĩ ẽã ora abꞌarika bĩ ẽã orãũdua. Biata oudua jõmaʉ̃ kĩrãbita. ¹⁸Marãba osia bꞌʉra obʉdata adu-a bꞌeaudua jõmaʉ̃ bawara. ¹⁹Marã mʉã kʉãgꞌata bꞌea, iabꞌaʉba marãta bĩ ẽã ora abꞌarika orãũdua, awuarabʉrʉ idaribiudua Daizezeba kĩrũbiba pua kꞌawua omarẽã. Maʉ̃ẽnabemata zhi bꞌʉmata mawũã bꞌʉa:

Mʉrẽã zhãrã kꞌawua oira, kꞌãrẽ odꞌadꞌeba mʉãbʉrʉ kꞌawua oya, maʉ̃ta jarabʉrʉa Nokꞌoba. (Deuteronomio 32:35)

²⁰Maʉ̃ba bʉ jura bꞌʉta jarra kꞌobꞌʉra nekꞌobirua. Obisia kꞌobꞌʉra baniã dobirua. Mawũã obʉrʉbara bʉta bĩ ẽã odꞌaba peraya. (Proverbios 25:21-22)

²¹Abꞌarika o ẽãba bia ẽã edre bꞌaerãrũã, awuarabʉrʉ biata obʉrʉba edre bꞌaebirua bia ẽãta.

¹Zhãrã jõma nokꞌorã edre bꞌeaudua. Nokꞌora Daizezeba bꞌʉdꞌa ẽãrã ne ẽã, aramaʉ̃ne zhi bꞌʉra Daizezeba bꞌʉdꞌata bꞌʉa. ²Mawũẽ nokꞌoba jarabʉrʉta aribꞌae ẽãrã, Daizezeba bꞌʉdꞌata aribꞌae ẽã. Mawũã aribꞌaedꞌa ẽãrã ãzhi nokꞌoba kꞌawua oya. ³Nokꞌorã duanu ẽã biata obꞌʉ perabiita, awuarabʉrʉ bꞌea bia ẽãta obꞌʉ perabiita. ¿Nokꞌorã wawi ẽã bꞌa krĩña bꞌʉka? Mobera biata odua, mawũãrã bʉra bia jaradꞌaya ãzhara. ⁴Nokꞌorã Daizezebara izhi nezokꞌarã kĩrãkꞌa bꞌʉsia bʉ biaitabemata. Mawũãmina bʉa bia ẽãta ora wawiarua. Bari nokꞌota chubꞌe ẽã, Daizezebara izhi nezokꞌarã kĩrãkꞌa bꞌʉsia zhãrã sãwũã oi bꞌʉdꞌe odꞌamarẽã, pua kꞌawua odꞌamarẽã bia ẽãta obꞌʉra. ⁵Maʉ̃ba nokꞌorã edre bꞌaibara, pua kꞌawua odꞌa ẽbamarẽã mawũã bꞌaidꞌe bꞌʉ ẽã, awuarabʉrʉ mawũã bꞌaidꞌe bꞌʉa mawũãrã bigata kꞌawua bꞌʉba. ⁶Maʉ̃ba mazha ne erubꞌʉbari nokꞌorã plata diabadata dia bꞌea, aramaʉ̃ne nokꞌorã Daizezebara izhi nezokꞌarã kĩrãkꞌa bꞌʉdꞌaba baridua maʉ̃ne bꞌea.

⁷Jõmaʉ̃ã diaudua marãba diaita bꞌʉra: Ne erubꞌʉbari nokꞌorã plata diaita bꞌʉra diauduaa. Drua ãĩba ne webʉrʉbari nokꞌorã plata diaita bꞌʉra diaudua. Wawiaita bꞌʉra wawiaudua. Zhi zromane edaita bꞌʉra zhi zromane edaudua.

⁸Zhãrãã deweta bꞌearãũdua miã kꞌãrẽne. Awuarabʉrʉ dewedꞌe bꞌeaudua zhiya kʉãgꞌaita. Zhãrã kʉãgꞌa bꞌʉbara aribꞌae bꞌʉa Moisé ũrãgꞌata. ⁹Maʉ̃ẽnabemata mawũã bꞌʉa: Kĩma ẽãta erukꞌãĩrãrũã, miã bearãrũã, nezrʉgarãrũã, sewa nebʉrʉrãrũã, ne zhãrãne krĩñarãrũã. Maʉ̃ta, baridu ũrãgꞌa awʉrʉta jõma aribꞌaeidꞌebema mawũã bꞌʉa: Bʉzhi zhãrã kʉãgꞌarua bʉzhi kĩrãkꞌa. ¹⁰Kʉãgꞌabara zhãrã bĩ ẽã o ẽã. Mawũẽ Moisé ũrãgꞌara aribꞌae nʉmaña zhãrã kʉãgꞌa bꞌʉba.

¹¹Maʉ̃ta aribꞌae bꞌeaudua, ewari sãwũã nʉmʉta kꞌawua bꞌedꞌebara dazhirã ya piradrʉdꞌaibara kꞌãĩ bꞌera. Idꞌibai dazhirã ẽdrʉira audre kꞌaita basia Jesúsdꞌebema dazhirãba ĩjãnata nʉmʉnebara. ¹²Diamase nʉmʉta ʉ̃nadrʉ bodꞌo kĩrãkꞌa ẽdrʉi ewarira kꞌaita basia. Maʉ̃ba bia ẽãta pãrĩguadꞌebemata obadara idu bꞌʉdꞌaya, bia ẽã ũme zhõĩta soldaorã kĩrãkꞌa ne jʉ̃bʉdara biata oita jʉ̃naña ʉ̃nanebemata. ¹³Ewaridꞌe bꞌe kĩrãkꞌa kĩrãẽpa bꞌeaya. Fiestadꞌe beu bꞌea ẽã, kĩma ẽãta erukꞌãĩ bꞌea ẽã, dazha krĩñane bꞌea ẽã, zhõ bꞌea ẽã, zhãrãba ne erubꞌʉ kꞌarea bĩ ẽã bꞌea ẽã. ¹⁴Awuarabʉrʉ Nokꞌo Jesucristo kĩrãkꞌa bꞌeba orãũdua zharaba krĩñata.

Bia kꞌawua ẽã ĩjã bꞌedꞌebema

¹Bia edaidꞌe bꞌʉa bia kꞌawua ẽã ĩjã bꞌʉra, mawũãmina bĩ ẽã bedꞌeaidꞌe bꞌʉ ẽã izhi krĩcha ʉ̃rʉ̃rã. ²Iabꞌaʉma ne jõma kꞌosia bꞌʉa, waya dewaraubara bia kꞌawua ẽã ĩjã bꞌʉbara bari kꞌo bꞌʉa ne udꞌebemata. ³Ne jõma kꞌo bꞌʉbara bĩ ẽã jaraidꞌe bꞌʉ ẽã ne jõma kꞌo ẽãrã, ne jõma kꞌo ẽãbara ne jõma kꞌo bꞌʉra jara nʉmaĩne bꞌʉ ẽã Daizezeba jidadꞌaba. ⁴¿Bʉra kꞌaipe nezokꞌa awʉrʉdꞌeta jara nʉmaĩrã? Zhibaribʉrʉ jaraya bia nʉmʉta o bꞌaebʉrʉta. Mawũãmina jipa nʉmaña Nokꞌo Daizezera zhi zromaneba jipa nʉmabiita.

⁵Iabꞌaʉma ewari abꞌara biga dewarabema ewari kꞌãñabara, waya awʉrʉma abꞌarika ewari jõma. Abꞌa abꞌakꞌa bꞌeaudua mazha krĩcha bꞌʉdꞌe. ⁶Ewarita zhi wuagꞌa bꞌʉbara Daizezeita obꞌʉa. Ewarita zhi wuagꞌa ẽãbara Daizezeita o ẽã. Ne jõma kꞌo bꞌʉbara Daizezeita kꞌo bꞌʉa zhibia ji bꞌʉba Daizezea. Ne jõma kꞌo ẽãbara Daizezeita kꞌo ẽãta abꞌarika zhibia ji bꞌʉa Daizezea.

⁷Dazhira miõta dazhikusaita bꞌʉ ẽã, miõta dazhikusaita beu ẽã. ⁸Dazhita bꞌebʉrʉ Nokꞌoita bꞌea. Dazhita beukuara Nokꞌoita beukuaya. Mawũẽ bꞌeta o beukuata Nokꞌoita bꞌea. ⁹Cristora maʉ̃ kꞌarea beudꞌata piradrʉpe wakusa zokꞌai bꞌesia, aramaʉ̃ne bꞌesia beukuadꞌa Nokꞌota zokꞌai bꞌe Nokꞌota.

¹⁰Mawũẽ bʉara, ¿kꞌãrẽã jara nʉmaĩpe bʉ mebeara? O bʉara, ¿kꞌãrẽã bĩ ẽã jara nʉmaĩpe bʉ mebeara? Dazhira jõma kĩrãbita nʉmeãña Cristoba kꞌawua oi maẽ. ¹¹Maʉ̃ẽnabemata zhi bꞌʉmata mawũã bꞌʉa:

Mʉrã bꞌʉa, mʉrã Nokꞌoba wãrãta jaraya, mʉ kĩrãbita zhãrã jõma sãkꞌokꞌodꞌe kꞌobꞌeaya, jõmaʉ̃ba jaradꞌaya mʉrã Daizezeta. (Isaías 45:23)

¹²Aramaʉ̃ne dazhara abꞌa abꞌaʉba Daizezea jaradꞌaya dazhidꞌebemata.

¹³Maʉ̃ba ya wueta zhiya zhi jaradꞌa ẽã, awuarabʉrʉ krĩchaudua tẽnedrʉbidꞌa ẽbaita o bꞌaebidꞌa ẽbaita mebeata. ¹⁴Nokꞌo Jesúsdꞌeba mʉã kꞌawua bꞌʉra miã kꞌãrẽta ne mitiara ne ẽã izhikusara. Mawũãmina iabꞌaʉ krĩchama kꞌãrẽta ne mitiabʉrʉ izhima mawũã bꞌʉa. ¹⁵Mawũãmina zhikodꞌeba bʉ mebeata bʉa sopua ora, ya bʉra nimi ẽã zhãrã kʉãgꞌai bꞌʉdꞌe. Maʉ̃ba bʉ zhikoba jarita aduabirãrũã maʉ̃bari Cristo beudꞌata. ¹⁶Aramaʉ̃ne marãta bĩ ẽã jarabirãũdua kꞌãrẽ obʉdara marãma bigadꞌeba. ¹⁷Daizezeta Nokꞌodꞌebemata nʉmaĩrã zhikodꞌeba kꞌãrẽ dobadadꞌeba nʉma ẽã, awuarabʉrʉ maʉ̃ne nʉmaña kĩrãẽpa bꞌʉdꞌeba, adu-a bꞌʉdꞌeba, sobia bꞌʉdꞌeba Jawurebiadꞌeba. ¹⁸Aramaʉ̃ne Cristoba jara bꞌʉta aribꞌae bꞌʉra Daizezema biga, zhãrãma biga.

¹⁹Maʉ̃ba adu-a bꞌeaidꞌebemane nʉmeãña, zhiya zhi ũrãgꞌa soidꞌu nʉmeãña. ²⁰Daizezeba zhãrã bia erunʉmʉta ãrĩrãrũã zhikoba. Wãrãnebai ne jõma nene ẽã. Mawũãmina biga ẽã kꞌãrẽ kꞌobʉrʉba awʉrʉrãta bꞌaebiira. ²¹Audre biga nezhara kꞌo ẽbaita, miã vino do ẽbaita, miã kꞌãrẽta o ẽbaita bĩ ẽã obʉrʉba bꞌaebii kꞌãñabara bʉ mebeata. ²²¿Kꞌãrẽrã kꞌoidꞌe bꞌʉka o kꞌo ẽbaidꞌe bꞌʉka bʉ krĩchama? Mawũãbʉrʉ bʉzhibitabai nʉmadua Daizeze kĩrãbita. Sobia bꞌaya izhikusa bedꞌea bara ẽãrã izhima bigaba. ²³Mawũãmina iabꞌaʉba kꞌãrẽ izhima kꞌo bꞌe ẽãta kꞌora izhikusa bedꞌea baraya bigata o ẽãba izhi krĩchama. Jõma kꞌãrẽ dazhi krĩchama biga ẽãta obʉrʉra kꞌazhirua.

¹Dazhi zarea nʉmebara kꞌarebadꞌaibara zarea nʉme ẽãrã, aramaʉ̃ne dazhiitabʉrʉ bia nʉmeã ẽã. ²Dazhirã abꞌa abꞌakꞌa zhãrãma bia nʉmeãña biadꞌebemane, aramaʉ̃ne soidꞌu bꞌeabidꞌaya. ³Miã Cristosidꞌa izhiitabʉrʉ bia nʉma ẽbasia. Awuarabʉrʉ maʉ̃ẽnabemata zhi bꞌʉmata mawũã bꞌʉa: Zeze, bʉta ikꞌazhirua jaradꞌapeadꞌara mʉ ʉ̃rʉ̃ bꞌaesia. ⁴Naara kꞌãrẽ bꞌʉdꞌapeadꞌara dazhi ũrãgꞌata bꞌʉsidꞌa, mawũã zhi bꞌʉmabara kꞌãrẽ zrogꞌa wãnigua nʉmabiga bꞌʉa Daizeze ũme bia nʉmeta kꞌawua bꞌeamarẽã. ⁵Daizezebara kꞌãrẽ zrogꞌa wãnigua nʉmabi bꞌʉbara marãã abꞌaʉ krĩchata diaya Jesucristoba krĩñane. ⁶Aramaʉ̃ne ãbaʉba nemi abꞌa Daizezeta ibia jaradꞌamarẽã dazhirã Nokꞌo Jesucristo Zezeta.

Bedꞌea biara izhabꞌa judíorã ẽãĩtabema

⁷Maʉ̃ba marã zhiya bia edaudua, Cristoba dazhirã bia edadꞌa kĩrãkꞌa bꞌeaudua Daizezeta ibia jaradꞌamarẽã. ⁸Mʉã marãã jaraya, Jesucristora zesia judíorã aribꞌaeita, aramaʉ̃ne kꞌawuabigasia Daizezedꞌebema wãrãta. Aramaʉ̃ne aribꞌaesia zhãrã Ẽdrʉbita Daizezeba zokꞌaya adꞌata ãzhi zhibarirãta bꞌeadꞌaa. ⁹Aramaʉ̃ne Daizezeta judíorã ẽãba ibia jaradꞌamarẽã izha sozuburia nʉmʉneba. Maʉ̃ẽnabemata zhi bꞌʉmata mawũã bꞌʉa:

Judíorã ẽãne edꞌa mʉã bʉra ibia jaraya, mʉã bʉra ibia jara trʉ̃ãña. (2 Samuel 22:50; Salmos 18:49)

¹⁰Dewara mawũã bʉa:

Judíorã ẽãrã sobiaudua judíorã Daizezedꞌe bawara. (Deuteronomio 32:43)

¹¹Dewara mawũã bꞌʉa:

Judíorã ẽãbara jõmaʉ̃ba Daizezera ibia jaraudua, aramaʉ̃ne zhi zromane edaudua zhãrã jõmaʉ̃ba. (Salmos 117:1)

¹²Dewara Isaíaba mawũãsia:

Iabꞌa Isaídꞌeba zeya, maʉ̃ pirabꞌariya judíorã ẽãta jʉreita, maʉ̃rãbara krĩchadꞌaya izhita. (Isaías 11:10)

¹³Daizezebara izhita krĩchabi bꞌʉa, mawũẽ marã kꞌãbãẽã sobia adu-a soidꞌu bꞌeabiya, aramaʉ̃ne jipa izhitrʉ krĩcha bꞌeamarẽã Jawurebia zareadꞌeba.

¹⁴Mebẽrã, marãnebemata mʉã kꞌawua bꞌʉra marã kꞌãbãẽã biata bꞌea, biodꞌe krĩcha kꞌawua bꞌeba zhiya zhi ũrãgꞌa bꞌedꞌaya. ¹⁵Mawũãmina mebẽrã, mʉã marãĩta bedꞌeata jipa jara bꞌʉsia marãba bude bꞌʉdꞌamarẽã, mawũã bꞌʉsia Daizezeba izhi biaba mʉãã chãbꞌaridꞌaba ¹⁶Jesucristo nezokꞌata bꞌamarẽã judíorã ẽãta bꞌerãĩta. Mawũẽ mʉãrã bedꞌea biata Daizezedꞌeta jarakꞌa bꞌʉa, sacerdoteba nendʉwʉrʉ Daizezeba krĩñata webari kĩrãkꞌa judíorã ẽãrã aramaʉ̃ne izhima we bꞌʉa izhiita bꞌeamarẽã Jawurebiadꞌeba.

¹⁷Mʉrã Jesucristodꞌeba sobia bꞌʉa Daizezedꞌebemata aribꞌae nʉmʉba. ¹⁸Mʉrã ne awʉrʉdꞌera bedꞌeaidꞌe bꞌʉ ẽã, awuarabʉrʉ jaraidꞌe bꞌʉa Cristoba mʉneba odꞌata, aramaʉ̃ne judíorã ẽãba Daizezedꞌebemata aribꞌaedꞌamarẽã mʉ ũrãgꞌadꞌeba mʉã kꞌãrẽ odꞌadꞌeba. ¹⁹Mʉãrã ũdudꞌakꞌa zromata okuasia Jawurebia Daizezedꞌe zareadꞌeba. Aramaʉ̃ne Jerusalénneba Ilírico druaidꞌu jõmaʉ̃ã jarasia bedꞌea biata Cristodꞌera. ²⁰Aramaʉ̃ne mʉãrã Cristodꞌebema bedꞌea biara jara krĩña bꞌʉa Cristodꞌebema jaradꞌakꞌa maẽ, aramaʉ̃ne jara ẽbaita zhãrãba jara bꞌʉ maẽ. ²¹Awuarabʉrʉ mʉã krĩña bꞌʉra zhi bꞌʉmata mawũã bꞌʉa:

Izhidꞌebemata jaradꞌakꞌa maẽrã kꞌawuadꞌaya. Izhidꞌebemata ũrĩnakꞌa maẽrã sãwũãta kꞌawuadꞌaya. (Isaías 52:15)

Pablo wãĩta krĩchadꞌa Romaĩnu

²²Maʉ̃ kꞌarea Cristodꞌebema bedꞌea biata jara bꞌʉba mʉrã tʉma bio ba marãma wãĩrã. ²³Mawũãmina idꞌibai sãma zhi jaragꞌaira ne ẽã naʉ̃ druadꞌera, mawũẽ marãma wã krĩña bꞌʉta año bio babʉrʉba, ²⁴mʉta España druaedꞌa wãbʉrʉdꞌera wãña marãma. Mʉ berabꞌari wãba mʉã marã ũdu krĩña bꞌʉa, aramaʉ̃ne baʉcha marãba kꞌarebadꞌaya mʉ maĩnu wãĩta bꞌʉsridꞌa kꞌobꞌape marã bawara. ²⁵Mawũãmina kꞌãwũãwedꞌara mʉrã Jerusalénʉẽna wãña, kꞌarebata edeya mebẽrãĩta. ²⁶Mebẽrã Macedonia druadꞌebemabara Acaya druadꞌebemabara bia obʉdata plata diabuebʉda mebẽrãnebema zuburia bꞌerãĩta Jerusalénne. ²⁷Mawũã odꞌaira ãzhima bigata judíorã mawũã kꞌarebadꞌaidꞌe bꞌasia. Judíorã ẽãba Daizezedꞌebema biata judíorãneba jidasidꞌabʉrʉ ãzhabidꞌa kꞌarebadꞌaidꞌe bꞌʉa dazhi kꞌãwũneta biadꞌeba. ²⁸Mawũẽ mʉãrã maʉ̃ta aribꞌaebʉrʉta maʉ̃ platara chãbꞌarikuape mʉrã marã maẽ berabꞌariya wãta España druaedꞌa. ²⁹Mʉã kꞌawua bꞌʉa mʉ marãma wãbʉrʉdꞌera mʉrã marãĩta ne biaba bira jũẽña bedꞌea biata Cristodꞌeba.

³⁰Mawũãmina mebẽrã, mʉrã marãã zuburia bedꞌeaya, dazhirã Nokꞌo Jesucristodꞌeba Jawurebiadꞌeba zhi kʉãgꞌa bꞌedꞌeba mʉrã kꞌarebaudua mʉbari zhiwidꞌi Daizezea. ³¹Mʉrã aramaʉ̃ne bĩ ẽã obi ẽbamarẽã Jesúsdꞌebema ĩjã ẽã bꞌeta Judeadꞌe bꞌea, aramaʉ̃ne plata mebẽrã Jerusalénne bꞌeirãĩta mʉã edeita bia jidadꞌamarẽã. ³²Aramaʉ̃ne Daizezeba krĩñabʉrʉ marãma sobia jũẽpe ẽnaʉ̃ña marã maẽ.

³³Daizeze dazhi adu-a bꞌabi bꞌʉra nʉmaña marã jõmaʉ̃ bawara. Amén.

Saludo diabuekuadꞌa

¹Mʉã marãã jaraya, wũẽrã Febe dazhirã mebeara bia nʉmʉã, izhira mebẽrã aribꞌaebarita bꞌʉa Cencrea pʉwʉrʉdꞌe. ²Nokꞌo Cristodꞌeba bia edaudua, Cristodꞌebemata bꞌera mawũã edadꞌai bꞌʉdꞌe edaudua. Ne baridudꞌe kꞌarebaudua kꞌãrẽ nesidꞌabʉrʉdꞌera, izhara kꞌarebasia biota, kꞌarebasia mʉsidꞌa.

³Saludo diaudua Priscila dewara Aquila, ãzhira mʉ kĩrãkꞌa Jesucristodꞌebema kꞌaudꞌa panʉã. ⁴Ãzhira mʉ kꞌarea bebudꞌe panasia, maʉ̃ kꞌarea ãzhaara bari mʉãbʉrʉ zhibia dia bꞌʉ ẽã, awuarabʉrʉ dewara zhibia ji panʉã mebẽrã jõmaʉ̃ba judíorã ẽãba. ⁵Dewara saludo diaudua mebẽrã ãzhi dedꞌa zhi jʉrebadata. Saludo diaudua Epeneto mʉ ne kʉãgꞌata, Acaya druadꞌera izhabʉrʉ naara ĩjãsia Cristodꞌebemata. ⁶Saludo diaudua María, izhira biodꞌe kꞌãrẽ obꞌʉa marãne edꞌa. ⁷Saludo diaudua Andrónico dewara Junia, ãzhira mʉ ʉrerãta panʉã, mʉ bawara panasia cárceldꞌe, ãzhira bia jara panʉã Jesúsba zokꞌakuadꞌabara. Ãzhara Cristodꞌebema ĩjãsidꞌa mʉ nawedꞌa. ⁸Saludo diaudua Amplia mʉ ne kʉãgꞌata Nokꞌo Cristodꞌeba. ⁹Saludo diaudua Urbano, izhira dazhirã kĩrãkꞌa Jesucristodꞌebema kꞌaudꞌa bꞌʉa. Dewara saludo diaudua Estaqui mʉ ne kʉãgꞌata. ¹⁰Saludo diaudua Apele, izhira bia nʉmʉã Cristodꞌebemane. Saludo diaudua Aristóbulo dedꞌa bꞌera. ¹¹Saludo diaudua Herodión, izhira mʉ ʉreta bꞌʉa. Saludo diaudua Narciso dedꞌa bꞌera, ãzhira Nokꞌo Cristodꞌebemane bꞌea. ¹²Saludo diaudua Trifena dewara Trifosa, ãzhira biodꞌe Nokꞌo Cristodꞌebema kꞌaudꞌa bꞌea. Saludo diaudua mʉ ne kʉãgꞌa mebea wũẽrã Pérsida, izhira biodꞌe Nokꞌo Cristodꞌebema kꞌaudꞌa bꞌʉa. ¹³Saludo diaudua Rufo Nokꞌo Cristoba jʉrʉdꞌara, saludo diaudua zhi papasidꞌa, mʉĩtabidꞌa izhira mʉ papa kĩrãkꞌa bꞌʉa. ¹⁴Saludo diaudua Asíncrito, Flegonte, Herma, Patroba, Herme, dewara saludo diaudua mebẽrã ãzhi bawara bꞌea. ¹⁵Saludo diaudua Filólogo, Julia, Nereo, saludo diaudua zhi nawekꞌaua, dewara Olimpaa, jõmaʉ̃ã saludo diaudua Cristodꞌebema ãzhi bawara bꞌea.

¹⁶Zhiya saludꞌaudua Daizezedꞌeba kʉãgꞌa. Jõmaʉ̃ba saludo diabuebʉda mebẽrã Cristodꞌebemabara.

¹⁷Mebẽrã, mʉã marãã jaraya, kĩrãkuitaudua zhãrãta awuara krĩchabi bꞌe kꞌareara, aramaʉ̃ne bꞌaebi bꞌeta ũrãgꞌata ãña jara bꞌea marãba kꞌawadꞌapeadꞌa kꞌãñabara. Ãzhi bawara arãũdua. ¹⁸Mawũã bꞌebara aribꞌae duanu ẽã dazhirã Nokꞌo Jesucristodꞌera, awuarabʉrʉ aribꞌae bꞌea ãzha krĩñata. Aramaʉ̃ne bedꞌea bia nʉmeba zhãrã sota sewa bꞌea borekea zhi sewabi bꞌeta. ¹⁹Cristodꞌe bedꞌea biara marãbara aribꞌae bꞌeta jõmaʉ̃ba kꞌawua bꞌeba mʉrã sobia bꞌʉa marã kꞌarea. Mawũãmina mʉã krĩña bꞌʉa marã krĩcha banata bꞌeaita biata oita, bia ẽãta o ẽbaita. ²⁰Daizeze dazhi adu-a bꞌabi bꞌʉbara dããrã ẽãne panchi kꞌobꞌʉya ãtõmiã marã jẽrũ edre. Izhi biadꞌebema dazhirã Nokꞌo Jesucristodꞌera nʉmaña marã bawara.

²¹Marãã saludo diabuea Timoteoba, izhira mʉ kĩrãkꞌa Cristodꞌebema kꞌaudꞌa bꞌʉa, mʉ ʉrerãbidꞌa saludo diabuebʉda Lucioba, Jasónba, Sosípaterba.

²²Mʉrã Tercioa, mʉrã naʉ̃ kꞌarta Pablodꞌeta bꞌʉ nʉmʉba marãã saludo diabuea Nokꞌo Jesucristodꞌeba.

²³Marãã saludo diabuea Gayoba, mʉrã izhi dedꞌa bꞌʉkꞌãrĩã, izhi dedꞌa zhi jʉrebibaria mebẽrãsidꞌa jõma. Marãã saludo diabuea Erastoba, izhira plata naʉ̃ pʉwʉrʉdꞌebema wuagꞌabaria, saludo diabuea mebea Cuartoba.

²⁴Izhi biadꞌebema dazhirã Nokꞌo Jesucristodꞌera nʉmaña marã jõmaʉ̃ bawara. Amén.

Daizeze ibia jara jõbidꞌa

²⁵Daizezebara marã jipa nʉmabi bꞌeya bedꞌea biata mʉã jaradꞌaba Jesucristodꞌebemata, mawũã nʉmabigaira izha kꞌawuabisia kꞌawuabi ẽã bꞌadꞌata ewari na wedꞌauba. ²⁶Mawũãmina idꞌibai kꞌawuabisia, aramaʉ̃ne izha bedꞌeata jarabibarirãba jaradꞌapeadꞌata zhi bꞌʉmaneba, izhi Daizeze bꞌai jõ ẽã bꞌʉ ũrãgꞌadꞌeba zhãrã jõmaʉ̃ã kꞌawuabi nʉmʉã aribꞌaedꞌamarẽã Jesucristodꞌebema ĩjãĩrã. ²⁷Daizeze abꞌabai bꞌʉbara ne jõma kꞌawua bꞌʉa, izhira Jesucristodꞌeba ibia jaradꞌaya ewariza. Amén.