SAN MARCOS

Jesúsdꞌebemata Marcoba bꞌʉdꞌa

Juan Burukꞌoemiã miã ũrãgꞌadꞌa

(Mateo 3:1-12; Lucas 3:1-9, 15-17; Juan 1:19-28)

¹Jesucristodꞌebemata bedꞌea biata mʉãrã jẽdeba bꞌʉya, izhira Daizeze Warra. ²Izhi na zokꞌadꞌaira zhi bꞌʉmata Daizezeba bedꞌeata jarabibariba Isaíaba mawũãsia:

Mʉ bedꞌeata jarabarita mʉã bʉ na zokꞌaya, maʉ̃bara bia ẽãrã idu bꞌʉdꞌaita bꞌeabiya bʉ uru na.

³Maʉ̃ nemi jĩgua bedꞌeabʉrʉta drua drudrua tabꞌʉ maẽ mawũãña: Bia ẽãrã ãmabʉdaba araa obʉdakꞌaudua Nokꞌo zei ota, jipa obʉdakꞌaudua izhi zei ota. (Malaquías 3:1; Isaías 40:3)

⁴Mawũã jaradꞌadꞌe Juanbara drua drudrua tabꞌʉ maẽ zhãrã buru kꞌoekua nʉmasia, maʉ̃nerã jarakꞌa nʉmasia buru kꞌoebʉdaba kꞌazhiruara ãmape Daizezeta pẽwãnamarẽã, bedꞌea ne ẽã duanebimarẽã kꞌazhiruata biodꞌeba. ⁵Izhima ze nʉmasia Judea druadꞌe bꞌeta, Jerusalénne bꞌeta. Jordán dodꞌe Juanʉã zhi buru kꞌoebisidꞌa ãzhi kꞌazhiruata jara. ⁶Juanbara jʉ̃ bꞌasia camello kꞌara omata, ne e omaba kʉrrʉ tãjʉ̃ bꞌasia, kꞌo bꞌasia adꞌichichita, do bꞌasia urrajõta. ⁷Maʉ̃nerã mawũã bazhia: Mʉ tẽã urua mʉ audre zhi zromata, nezokꞌaba obari kĩrãkꞌara mʉãrã bꞌarrupe ẽnaĩne bꞌʉ ẽã maʉ̃ba jẽrũne jʉ̃ bꞌʉra. ⁸Mʉãrã wãrãnebai marã baniãba buru kꞌoe bꞌʉa, mawũãmina marã izhara Jawurebiata diaya.

Jesús buru kꞌoedꞌa

(Mateo 3:13-17; Lucas 3:21-22)

⁹Jari ewadera pʉwʉrʉ Galilea druadꞌebema Nazaret abada maẽba Jesús zebʉrʉdꞌera Juanba buru kꞌoesia Jordán dodꞌe. ¹⁰Maʉ̃ne doedꞌauba drua wãta taidꞌe, bãjã ewa dogꞌota ũdubʉrʉdꞌera Jawurebia Daizezedꞌeta ũdusia pusirã kĩrãkꞌa izhi ʉ̃rʉ̃ uruta. ¹¹Maʉ̃ne Daizezeta bãjãneba bedꞌeabʉrʉta mawũãsia: Bʉra mʉ Warra mʉãrã kʉãgꞌa, mʉrã bʉ kꞌarea sobia bꞌʉa.

Ãtõmiãba Jesús wãẽãbiya nʉmana

(Mateo 4:1-11; Lucas 4:1-13)

¹²Jesús mobebʉrʉ Jawurebia Daizezedꞌeba drua drudrua tabꞌʉidꞌu edesia. ¹³Mama drua drudrua tabꞌʉ maẽ bꞌasia ewari cuarenta, maʉ̃ne ãtõmiãba wãẽãbiya nʉmasia. Maʉ̃nerã nendʉwʉrʉ meãbema meũsiata bꞌe bawara bꞌʉdꞌe ángelerãba kꞌareba eruduanasia.

Jesús miã ũrãgꞌa jʉ̃drʉdꞌa

(Mateo 4:12-17; Lucas 4:14-15)

¹⁴Juan cárceldꞌe bꞌʉdꞌapeadꞌa tẽãne Jesús Galilea druaedꞌa wãsia bedꞌea biata jaradꞌe Daizezeta Nokꞌodꞌebemata. ¹⁵Maʉ̃nerã mawũãsia: Ewarira arabata Daizezeta Nokꞌodꞌebema kꞌaita basia. Mawũẽ kꞌazhiruara ãmape Daizezeta pẽwãũdua, izhidꞌebemata ĩjãũdua bedꞌea biata.

Jesúsba kĩmarẽ jʉrʉdꞌa bꞌeda beamiãrãta

(Mateo 4:18-22; Lucas 5:1-11)

¹⁶Galileadꞌebemata do jedꞌea õbꞌʉ doya Jesús taidꞌe ũdusia Simónta, zhi mebea Andrésta. Do jedꞌea õbꞌʉ maẽ atarraya bꞌari panasia bꞌeda beamiãta panasi baera. ¹⁷Maʉ̃ne Jesúsbara mawũãsia: Mʉ kꞌaidꞌu panadua, mʉnebemata ĩjãnamarẽã mʉã marã zhãrã ũrãgꞌabarita panabiya.

¹⁸Mawũãĩ ãzhara audre ẽãne atarraya kenabꞌaridꞌape kꞌaidꞌu jʉ̃drʉsidꞌa.

¹⁹Mamaʉ̃ba Jesús arana wãbʉrʉdꞌera ũdusia Jacobota, zhi mebea Juanta Zebedeo warrarãta. Jãbadꞌe panʉta atarraya tʉdꞌʉzoadꞌata araa jʉ̃kua panasia. ²⁰Jesúsbara maʉ̃ne jʉrʉkuasia. Mawũẽ ãzhi zeze Zebedeota izha zokꞌa jʉre bꞌʉ bawara jãbadꞌe ãmaẽbʉdata kꞌaidꞌu jʉ̃drʉsidꞌa.

Jaita abꞌadꞌa

(Lucas 4:31-37)

²¹Jesús izha jʉrʉkuadꞌa bawara Capernaúm pʉwʉrʉedꞌa wãnape ẽnaʉ̃bada ewade de zhi jʉrebada maẽ edꞌa wãpe miã ũrãgꞌasia. ²²Mawũã miã ũrãgꞌabʉrʉdꞌera bia akʉdruasidꞌa ãzhita ũrãgꞌabʉrʉ baera miã ũrãgꞌai zareata erubꞌʉdꞌeba, aramaʉ̃nerã ũrãgꞌa Moisédꞌe jarabada kĩrãkꞌa ẽbasia. ²³Maʉ̃nerã de zhi jʉrebada maẽ ũmakĩrãta kꞌobꞌasia jai abꞌʉta, maʉ̃ jaidꞌeba bꞌia mawũãsia: ²⁴¿Bʉra dai bawara kꞌãrẽta sãwũã bꞌʉ Jesús Nazaredꞌebema? ¿Bʉra zebʉrʉka dai ãrĩĩta? Bʉra kꞌaita mʉã kꞌawua bꞌʉa, bʉra Daizezedꞌea.

²⁵Mawũãĩ Jesúsbara kẽã mawũãsia: ¡Chupearua, kꞌãʉ̃nebara ãĩ wãrũã!

²⁶Mawũãĩ jaibara abꞌaedꞌa urebipe kꞌãbãẽã bꞌiape ãĩ wãsia maʉ̃nebara. ²⁷Mawũẽ jõma perabʉdaba ãzhirãĩnu mawũãsidꞌa: ¿Naʉ̃ kꞌãrẽ zhi zromape? ¿Naʉ̃ ũrãgꞌara zhiwidꞌita kꞌãrẽ zhi zromape? Jaira zarea bara jʉrekua bꞌʉba izhi bedꞌeara aribꞌae panʉã. ²⁸Maʉ̃neba Jesús ĩñabasia trʉ̃poasia Galilea drua jõma.

Jesúsba bꞌebidꞌa Simón pakꞌõrẽta

(Mateo 8:14-17; Lucas 4:38-41)

²⁹De zhi jʉrebada maẽba Jesús ãĩ zepe Simónta, Andrésta panʉ dedꞌa wãsidꞌa Jacobo bawara, Juan bawara. ³⁰Maʉ̃ne Simón pakꞌõrẽta tabꞌasia kʉwamiãba, mawũẽ aramaʉ̃ta Jesúa jarasidꞌa. ³¹Mawũẽ Jesúsbara orrape juwuadꞌe jidape piradrʉbisia. Mawũẽ kʉwamiãbara aramaʉ̃ta kenabꞌaribʉrʉba izhara ne jigasia

Jesúsba bꞌebikuadꞌa kꞌayarãta bio

³²Keubʉrʉta ʉ̃madau bꞌaebʉrʉdꞌera Jesúsma wesidꞌa jõma kꞌayarãta, jai abꞌeta. ³³Pʉwʉrʉdꞌebema jõma bʉredrʉsidꞌa puerta maẽ. ³⁴Maʉ̃nerã bio bꞌebikuasia ne kĩrãtõnoãba kꞌaya bꞌeta, zhãrãnebara jaira bio ãĩ jʉrekuasia. Jaira bedꞌeabiga ẽbasia izhira kꞌaita kꞌawua bꞌe baera.

Jesús Galileadꞌe pʉrrʉa miã ũrãgꞌadꞌa

(Lucas 4:42-44)

³⁵Daujawedꞌa wadꞌi pãrĩgua kꞌobꞌʉdꞌe Jesús piradrʉpe miõ ne ẽã maẽ wãpe mama zhiwidꞌisia. ³⁶Simónbara jʉrʉsia izhi bawara bꞌe bawarauba.

³⁷Ũdudꞌape mawũãsidꞌa: Bʉra jõmaʉ̃ba jʉrʉ panʉã.

³⁸Mawũãnaĩ izhara mawũãsia: Pʉwʉrʉ arakꞌaita tabꞌe maẽ wãnaña. Daizeze bedꞌeara mʉãrã mamabidꞌa jaraibara, mʉrã maʉ̃ kꞌarea zesi baera.

³⁹Aramaʉ̃ne de zhi jʉrebada nʉme maẽ miã ũrãgꞌasia Galilea drua jõma, ãĩ jʉrekua bꞌasia jaisidꞌa.

Jesúsba bꞌebidꞌa aidꞌaba kꞌaya bꞌʉta

(Mateo 8:1-4; Lucas 5:12-16)

⁴⁰Jesúsma zesia aidꞌaba kꞌaya bꞌʉta, mobe zuburia bedꞌea sãkꞌokꞌodꞌe kꞌobꞌepe mawũãsia: Bʉa krĩñabʉrʉ mʉrã nene ẽã bꞌebirua.

⁴¹Mawũãĩ Jesúsbara izhira sozuburiape tõbꞌari mawũãsia: ¡Mʉãrã krĩña bꞌʉa, mawũẽ bʉra nene ẽã bꞌidꞌa!

⁴²Mawũãbʉrʉdꞌera audre ẽãne ũmakĩrãnebara aidꞌara nebasia, mawũẽ nene ẽã bꞌesia. ⁴³Mobebʉrʉ maʉ̃ta jara ẽbamarẽã jarape wãbibʉrʉta, ⁴⁴mawũãsia: Bʉ kꞌãwũã bꞌebʉrʉta miõã jararãrũã, awuarabʉrʉ wãpe sacerdotea ũdubirua, mobe bʉzhi nene ẽã bꞌedꞌabari nendʉwʉrʉta babuedꞌamarẽã diadua, Moiséba jaradꞌa kĩrãkꞌa odua bʉ bꞌebʉrʉta ãzha kꞌawuadꞌamarẽã.

⁴⁵Mawũãmina izhira wãpe izhi sãwũã bꞌebʉrʉta jõmaʉ̃ã jarasia. Mawũẽ Jesús ya baridu pʉwʉrʉdꞌe dajada edꞌa wã bꞌe ẽbasia, maʉ̃neba ãĩ miõ ne ẽã maẽ chubꞌe bꞌasia. Mawũãsiidꞌu baridu maẽba zhãrã izhima ze nʉmasia.

Jesúsba bꞌebidꞌa kꞌakua pira ẽã kꞌaya bꞌʉta

(Mateo 9:1-8; Lucas 5:17-26)

¹Ewari dããrã ẽãne Jesús wakusa Capernaúm pʉwʉrʉdꞌe edꞌa wãbʉrʉba dedꞌa bꞌʉta ũrĩsidꞌa. ²Aramaʉ̃ta bio bʉredrʉsidꞌa, mawũẽ aradꞌa ẽbasia miã puerta ãĩ bidꞌa. Maʉ̃nerã Daizeze bedꞌeata jarakꞌasia. ³Maʉ̃ne ʉ̃kʉrʉba izhima wesidꞌa kꞌakua pira ẽã kꞌaya bꞌʉta, akꞌopanasia miõ kĩmarẽba. ⁴Kꞌabana nʉmʉba izhira orra bꞌedꞌa ẽbaera de ʉ̃rʉ̃bemata izhi kꞌobꞌʉ maẽ ewadꞌape izhi tabꞌʉ jirabꞌadꞌe maʉ̃ uriadꞌe ʉra bꞌaebisidꞌa kꞌakua pira ẽã kꞌaya bꞌʉra. ⁵Ãzhi soidꞌu kꞌobꞌeta Jesúsba ũdui kꞌakua pira ẽã kꞌaya bꞌʉa mawũãsia: Bʉra kꞌazhiruata biodꞌebara mʉãrã bedꞌea ne ẽã bꞌidꞌapʉa.

⁶Maʉ̃ne ũrãgꞌa Moisédꞌe jarabadata ʉ̃kʉrʉ mama jewedꞌa kꞌobꞌebara ãzhi bitabai krĩcha mawũãsidꞌa: ⁷¿Naʉ̃ kꞌãrẽã mawũã bedꞌeabʉrʉ? Mawũãrã Daizezema mitia bedꞌeabʉrʉa. ¿Kꞌazhiruata biodꞌebara zhãrã kꞌaiba bedꞌea ne ẽã bꞌʉ bꞌeipe? Awuarabʉrʉ bꞌeya Daizezebʉrʉ.

⁸Jesúsbara kꞌawuasia ãzhi bitabai mawũã krĩcha kꞌobꞌeta, mawũẽ mawũãsia: ¿Kꞌãrẽã kꞌãwũã krĩcha kꞌobꞌe marã sodꞌera? ⁹¿Kꞌãrẽta audre borekea jaraidꞌe bꞌʉ kꞌakua pira ẽã kꞌaya bꞌʉaara: Kꞌazhiruata biodꞌebara bedꞌea ne ẽã bꞌidꞌapʉa aita, o piradrʉpe bʉzhi jirabꞌa jiraedape nimibarua aita? ¹⁰Kꞌawuaudua, mʉ Beubari Bape bꞌʉbara naʉ̃ druadꞌera zareata erubꞌʉa kꞌazhiruata biodꞌebara zhãrã bedꞌea ne ẽã bꞌʉita. Mobebʉrʉ kꞌakua pira ẽã kꞌaya bꞌʉa mawũãsia: ¹¹Mʉã bʉaa jaraya: Piradrʉrua, bʉzhi jirabꞌa jiraedarua, mobe dedꞌaa wãrũã.

¹²Mawũãĩ izhira piradrʉpe izhi jirabꞌa jiraedape jõmaʉ̃ daidꞌu wãsia, jõmaʉ̃ba bia akʉdrua Daizeze ibia jara mawũãsidꞌa: Kꞌãwũãrã ũdudꞌakꞌa.

Jesúsba jʉrʉdꞌa Leví

(Mateo 9:9-13; Lucas 5:27-32)

¹³Maʉ̃ tẽã do jedꞌea õbꞌʉidꞌu Jesús wakusa wãpe zhãrã izhima zebʉsita ũrãgꞌasia. ¹⁴Mawũã wãbʉrʉdꞌera ũdusia Leví Alfeo warrata, impuesto widꞌi jewedꞌa bꞌʉta rey Romanebemaĩta impuesto diabada maẽ bꞌasia, maʉ̃ne mawũãsia: Mʉ kꞌaidꞌu bꞌadua.

Mawũãĩ izhira piradrʉpe kꞌaidꞌu bꞌesia.

¹⁵Leví dedꞌa Jesús nekꞌobʉrʉdꞌera impuesto widꞌibadata bio, dewaraurã kꞌazhirua omiãrã bawara ãba nekꞌosidꞌa Jesús bawara, izha jʉrʉkuadꞌa bawara, maʉ̃rãbara bioba pẽwã erjiranasia. ¹⁶Ũrãgꞌa Moisédꞌe jarabadaba fariseorã bawarauba ũdusidꞌa mawũã nekꞌobʉrʉta impuesto widꞌibada bawara, dewaraurã kꞌazhirua omiãrã bawara, mawũẽ izha jʉrʉkuadꞌaa mawũãsidꞌa: ¿Kꞌãrẽta kꞌãwũã izhira nekꞌo bꞌʉ impuesto widꞌibada bawara, dewaraurã kꞌazhirua omiãrã bawara?

¹⁷Maʉ̃ta ũrĩpe Jesúsbara mawũãsia: Bika bꞌebara nesidꞌa duanu ẽã zhãrã bꞌebi bꞌʉra, awuarabʉrʉ nesidꞌa bꞌea kꞌayarãbʉrʉ. Aramaʉ̃ kĩrãkꞌa mʉãrã jʉrʉdꞌe ze ẽbasia ãzhikusa biata bꞌeta, awuarabʉrʉ Ẽdrʉbigaita jʉrʉdꞌe zesia kꞌazhirua omiãrãta.

Widꞌidꞌapeadꞌa nekꞌo ẽã zhiwidꞌi bꞌedꞌebemata

(Mateo 9:14-17; Lucas 5:33-34)

¹⁸Juanba jʉrʉkuadꞌata, fariseorãba jʉrʉkuadꞌata nekꞌo ẽã zhiwidꞌi bꞌeasia. Maʉ̃ne zhãrã ʉ̃kʉrʉ wãpe Jesúa widꞌi mawũãsidꞌa: ¿Kꞌãrẽneba Juanba jʉrʉkuadꞌara, fariseorãba jʉrʉkuadꞌara nekꞌo ẽã zhiwidꞌi bꞌedꞌe, bʉa jʉrʉkuadꞌara nekꞌo ẽã zhiwidꞌi duanu ẽpe?

¹⁹Mawũãnaĩ Jesúsbara mawũãsia: ¿Zhãrã juwua jida nʉmʉne kꞌobꞌera nekꞌo ẽã duanaĩne bꞌʉka wadꞌi ãzhi bawara kꞌobꞌʉdꞌera zhũmakĩrãta? Wadꞌi kꞌobꞌʉdꞌera nekꞌo ẽã duanaĩne bꞌʉ ẽã. ²⁰Mawũãmina ewarita zeya zhũmakĩrã ãzhi maẽbara ededꞌaita, maʉ̃ ewadebʉrʉ nekꞌo ẽã zhiwidꞌi bꞌeaya. (Aramaʉ̃ kĩrãkꞌa mʉta edebʉdadꞌebʉrʉ mʉã jʉrʉkuadꞌara nekꞌo ẽã zhiwidꞌi bꞌeaya.)

²¹Miõba wuata zhiwidꞌibara remenda ẽã wua soreta. Mawũã ora wua zhiwidꞌira bagubʉrʉba wuaabʉrʉ kꞌõãbiya. ²²Miõba vino zhiwidꞌi oma tʉdꞌa ẽã ne e omata zhi sorerãnerã. Mawũã ora vino zhiwidꞌi omabara ne e oma kꞌõgꞌozoabʉrʉba vino wea wãña, aramaʉ̃ne ne e oma ãrĩkuaya. Mawũãmina vino zhiwidꞌi oma ne e oma zhiwidꞌirãnerã tʉsia bꞌʉa. (Maʉ̃bara Jesúsbara jara krĩñasia izhi ũrãgꞌara zõrãrãwedꞌabema krĩcha ũme ãba jara ẽãta ãrĩ ẽbaita.)

Trigota zhi kʉ̃mʉne ẽnapeadꞌa

(Mateo 12:1-8; Lucas 6:1-5)

²³Trigota u tabꞌʉ maẽ Jesús berabꞌarisia ẽnaʉ̃bada ewade, maʉ̃ne izha jʉrʉkuadꞌabara erjiranuba trigota zhi kʉ̃mʉne ẽsidꞌa. ²⁴Mawũẽ fariseorãbara mawũãsidꞌa: ¿Akʉdua, ẽnaʉ̃bada ewadera kꞌãrẽã okꞌopanʉ kꞌãrẽ oidꞌe bꞌʉ ẽãrã?

²⁵Mawũãnaĩ Jesúsbara mawũãsia: ¿Marãbara ledꞌakꞌa kĩrãkꞌa duanu ẽka rey Davidba odꞌara izhi jarrasidꞌe izhi ũme duanu bawara? ²⁶Daizeze dedꞌa edꞌa wãsia Abiatar sacerdote wagꞌauta bꞌasidꞌe, mobe kꞌosia pan Daizezeita bꞌʉbadata, maʉ̃ kꞌoidꞌe bꞌa ẽbasia, awuarabʉrʉ kꞌoidꞌe bꞌasia sacerdoterãbʉrʉ, maʉ̃ta diasia izhi bawara bꞌea.

²⁷Mawũãpe dewara mawũãsia: Ewari ẽnaʉ̃badara osidꞌa zhãrã biaitabemata, zhãrã odꞌa ẽbasia ewari ẽnaʉ̃badata aribꞌae nʉmaĩta. ²⁸Maʉ̃ẽnabema mʉ Beubari Bape bꞌʉra ewari ẽnaʉ̃bada Nokꞌoa.

Juwua bagu bꞌadꞌa

(Mateo 12:9-14; Lucas 6:6-11)

¹Wakusa Jesús edꞌa wãsia de zhi jʉrebada maẽ, mama bꞌasia ũmakĩrã juwua abꞌa bagu bꞌʉta. ²Maʉ̃nerã kĩrãkuitasidꞌa ẽnaʉ̃bada ewade bꞌebii kꞌawuaita, aramaʉ̃ne jidꞌaita. ³Maʉ̃ne Jesúsbara juwua bagu bꞌʉa mawũãsia: Piradrʉpe ẽsadra nʉmedua.

⁴Mawũãpe mawũãsia: ¿Biara osia bꞌʉka ẽnaʉ̃bada ewadera, o bia ẽãta osia bꞌʉ? ¿Zhãrã kꞌarebasia bꞌʉka, o beubiita bia bꞌʉ?

Mawũãbʉrʉdꞌera ãzhira chupea kꞌobꞌeasia. ⁵Mawũẽ kĩrũ akʉkuasia, sozuburia ne ẽã so zarea bꞌeba sopuape juwua bagu bꞌʉa mawũãsia: Bʉzhi juwua jirabꞌaridua.

Mawũãĩ izhara jirabꞌarisia, aramaʉ̃ne izhi juwuara bika bꞌesia.

⁶Mawũẽ fariseorã wãnape Herode pẽwã bꞌe bawara krĩcha jʉrʉsidꞌa Jesús beadꞌaita.

Kꞌabana wãna do jedꞌea õbꞌʉidꞌu

⁷Maʉ̃ne Jesús do jedꞌea õbꞌʉidꞌu wãsia izha jʉrʉkuadꞌa bawara, maʉ̃nerã kꞌabana kꞌaidꞌu wãsidꞌa Galilea druadꞌeba, Judea druadꞌeba. ⁸Jerusalénneba, Idumea druadꞌeba, Jordán do kĩrãrẽba, Tiro druadꞌeba, Sidón druadꞌeba. Jesúsba ne bia zromata onʉmʉta ũrĩnape kꞌabana zesidꞌa izhima. ⁹Mawũẽ izha jʉrʉkuadꞌaa jarasia jãbata erukꞌopanamarẽã kꞌabanaba izhita pẽũsua edadꞌa ẽbamarẽã. ¹⁰Kꞌayarãta bio bꞌebikuasi baera kꞌaya bꞌebara izhira pẽũsua edabarisidꞌa tõbꞌaridꞌaita. ¹¹Jaiba Jesústa ũdudꞌai zhãrã kĩrãnema bꞌera izhi kĩrãbita sãkꞌokꞌodꞌe kꞌobꞌebidꞌape bꞌia mawũãsidꞌa: ¡Bʉra Daizeze Warra!

¹²Mawũãnaĩ Jesúsbara zarea kẽãkuasia mawũã dajada jaradꞌa ẽbamarẽã.

Docera jʉrʉkuape zokꞌakuadꞌa

(Mateo 10:1-4; Lucas 6:12-16)

¹³Maʉ̃ tẽã Jesús wãrĩzesia kꞌatumaĩnu, mobe izhima trʉ̃kuasia izha krĩñata, mawũẽ zesidꞌa izhima. ¹⁴Mobebʉrʉ docera jʉrʉkuasia izhi bawara duanebibʉrʉta zokꞌakuaita miã ũrãgꞌadꞌe. ¹⁵Zareata dedꞌekasia kꞌayarãta bꞌebidꞌamarẽã, jaita ãĩ jʉrekuadꞌamarẽã. ¹⁶Ãzhira naʉ̃rãã: Simón, Pedrota trʉ̃gadꞌata, ¹⁷Jacobo Zebedeo warrata, Juan Jacobo mebeata, maʉ̃rã ũmeta trʉ̃gasia Boanergerãta, maʉ̃ trʉ̃bara jara krĩña bꞌʉa Ba Warrarãta. ¹⁸Dewaraurã jʉrʉkuasia Andrésta, Felipe, Bartolomé, Mateo, Tomás, Jacobo Alfeo warrata, Tadeota, Simón Canaán bidꞌata. ¹⁹Juda Iscariote Jesús chupea chãbꞌaridꞌata.

Mitia bedꞌeadꞌapeadꞌa Jawurebiama

(Mateo 12:22-32; Lucas 11:14-23; 12:10)

²⁰Maʉ̃ tẽã ãzhira dedꞌaa zebʉrʉdꞌera zhãrãbara wakusa bʉredrʉsidꞌa, mawũẽ izha jʉrʉkuadꞌa bawara ãzhira miã nekꞌo bꞌedꞌa ẽbasia. ²¹Zhi mebẽrãba ũrĩbʉdadꞌera ededꞌaita zesidꞌa kĩrãne bꞌʉ ẽãta jara bꞌeba.

²²Waya ũrãgꞌa Moisédꞌe jarabadata Jerusalénneba zedꞌapeadꞌabara Beelzebúta erubꞌʉa asidꞌa, mawũẽ jai duanu nokꞌo zareadꞌeba jaira ãĩ jʉrekua bꞌʉa asidꞌa.

²³Mawũẽ Jesúsbara trʉ̃kuape ne jarakꞌa mawũãsia: ¿Ãtõmiãbara sãwũã ãĩ jʉrekuaipe jai izha jʉre nʉmʉrã? ²⁴Abꞌaʉ druadꞌebemata ãzhirãĩnu zhõ duanerã maʉ̃ druadꞌebema jõña. ²⁵Abꞌaʉ dedꞌabemata ãzhirãĩnu zhõ duanerã abꞌaʉ dedꞌabemata bꞌera jõña. ²⁶Aramaʉ̃ kĩrãkꞌa ãtõmiãta jai izha jʉre nʉmʉ bawara zhõ nʉmerã ari zarea nʉma ẽã awuarabʉrʉ jõña.

²⁷Ũmakĩrã mesẽrãta bꞌʉ dedꞌara izhi netata zrʉgaira miõta edꞌa wã bꞌe ẽã naara izhita jʉ̃ ẽbʉrʉ, jʉ̃bʉrʉtrʉ izhi dedꞌa ne nʉmʉrã zrʉga bꞌeya. (Aramaʉ̃ kĩrãkꞌa ãtõmiã mʉãrã edre nʉmʉkꞌãrĩba jaira ãĩ jʉrekua bꞌʉa.)

²⁸Mʉã wãrĩnu marãã jaraya, kꞌazhirua bio odꞌata ne baridudꞌe mitia bedꞌeadꞌata zuburia bedꞌeara Daizezebara bedꞌea ne ẽã bꞌʉya zhãrã bꞌera. ²⁹Mawũãmina Jawurebiaba otabeta ãtõmiãba osia abʉrʉdꞌeba Jawurebiama mitia bedꞌeabʉrʉra Daizezebara bedꞌea ne ẽã bꞌʉ ẽã, awuarabʉrʉ jipa bedꞌeata bara bꞌʉya.

³⁰Jesúsbara maʉ̃ta jarasia ũrãgꞌa Moisédꞌe jarabadabara jarasidꞌa baera izha jaita erubꞌʉta.

Kꞌobꞌeadꞌa Jesús papata zhi mebẽrãta

(Mateo 12:46-50; Marcos 3:21; Lucas 8:19-21)

³¹Maʉ̃ẽna zesidꞌa zhi mebẽrãta zhi papata, mobe ewaradꞌe kꞌopanepe trʉ̃ne zokꞌasidꞌa. ³²Mawũẽ zhãrã izhi bʉredrʉ jewedꞌa kꞌobꞌebara Jesúa mawũãsidꞌa: Bʉ papata bʉ mebẽrãta ãĩ kꞌopanʉã, bʉta jʉrʉ panʉã. ³³Mawũãnaĩ izhara mawũãsia: ¿Marãma kꞌaipe mʉ papa, kꞌairãpe mʉ mebẽrã?

³⁴Mawũãpe izhi bʉredrʉ jewedꞌa kꞌobꞌeta akʉpe mawũãsia: Za kꞌopanʉã mʉ papa, mʉ mebẽrã. ³⁵Daizezeba krĩñata obꞌeta maʉ̃ta mʉ mebea, mʉ nawekꞌaua, mʉ papaa.

Ne pobaridꞌebema

(Mateo 13:1-9; Lucas 8:4-8)

¹Jesús wakusa miã ũrãgꞌasia do jedꞌea õbꞌʉ maẽ doya. Izhira zhãrã bioba bʉredrʉsidꞌa, mawũẽ jãbadꞌe edꞌa wãpe do jedꞌea õbꞌʉ maẽ jãbadꞌe jewedꞌasia. Waya zhãrã kꞌobꞌera nʉmesia doya.

²Mawũẽ miã ũrãgꞌabʉrʉta ne bio jarakꞌasia, izhi miã ũrãgꞌabʉrʉra mawũãsia: ³Ũrĩũdua, ne ubarita ne podꞌe wãsia. ⁴Ne pobʉrʉdꞌera ʉ̃kʉrʉ odꞌe bꞌaesia, mawũẽ ibana zepe misidꞌa. ⁵Ʉ̃kʉrʉ mongꞌaradꞌe bꞌaesia egoro bio ne ẽã maẽ, mawũẽ ĩñabasia pĩwĩsia egorota eidꞌu ẽãba. ⁶Mawũãmina ʉ̃madau ʉ̃tʉ zebʉrʉba basia, aramaʉ̃ne kꞌarra ne ẽba bagusia. ⁷Ʉ̃kʉrʉ bꞌaesia ʉrʉdꞌe, mawũẽ ʉrʉ waribʉrʉba ãnatʉ beasia, mawũẽ zau ẽbasia. ⁸Mawũãmina ʉ̃kʉrʉ egoro biadꞌe bꞌaepe zausia, aramaʉ̃ne pĩwĩpe waribʉrʉba zausia ta treintadꞌe, ta sesentadꞌe, ta cienne abꞌa abꞌakꞌa.

⁹Maʉ̃ta jarape mawũãsia: Ne ũrĩ bꞌʉbara maʉ̃ta kĩrãkuita ũrĩdua.

Kꞌãrẽã ne bio jaradꞌa

(Mateo 13:10-17; Lucas 8:9-10)

¹⁰Zhãrã wãbʉdaba Jesús dobꞌa chubꞌei izhi kꞌaita kꞌobꞌebara izha jʉrʉkuadꞌata doce bawarauba widꞌisidꞌa ne jarakꞌabʉrʉra sãwũãta. ¹¹Mawũẽ mawũãsia: Daizezebara marãã kꞌawuabi nʉmʉã izhita Nokꞌodꞌebema kꞌawuabi ẽã bꞌadꞌata, mawũãmina izhidꞌebema ĩjã ẽã bꞌeara ne biodꞌeba jaraibara ne jõma. ¹²Akʉ bꞌeidꞌu sãwũãta kꞌawua ẽã akʉ bꞌeamarẽã, ũrĩ bꞌeidꞌu sãwũãta kꞌawua ẽã ũrĩ bꞌeamarẽã. Mawũã bꞌedꞌebara kꞌazhiruara ãmape Daizezera pẽwãna ẽã izha bedꞌea ne ẽã bꞌʉkuaira kꞌazhiruata biodꞌeba.

Jesúsba sãwũãta jaradꞌa ne pobaridꞌebemata

(Mateo 13:18-23; Lucas 8:11-15)

¹³Mawũãpe mawũãsia: ¿Marãbara sãwũãta kꞌawuadꞌa ẽka mʉã mawũã ne jarakꞌabʉrʉra? ¿Sãwũã jõma bia kꞌawuadꞌaipe mʉã ne bio jarakꞌabʉrʉra? ¹⁴Ne pobarira Daizeze bedꞌeata jarabarita maʉ̃ã. ¹⁵Ne ta pobʉrʉdꞌe odꞌe bꞌaedꞌara Daizeze bedꞌeata ũrĩbadata maʉ̃ã. Mawũãmina ũrĩpe duanebʉdadꞌera ãtõmiãta zepe bedꞌeata ãzha ũrĩnata ãĩ eda bꞌʉa ãzhi sodꞌeba. ¹⁶Ne ta pobʉrʉdꞌe mongꞌaradꞌe bꞌaedꞌara Daizeze bedꞌeata ũrĩbadata maʉ̃ã, aramaʉ̃tara sobia ũrĩbada. ¹⁷Mawũãmina bia kꞌarra jidadꞌa ẽãba dããrã zrogꞌadꞌa ẽã, mawũẽ zuburiabʉdadꞌera, o Daizeze bedꞌeata ĩjã bꞌʉ kꞌarea zuburia obʉdadꞌera ĩjã ẽã kenabꞌaribada. ¹⁸Ne ta pobʉrʉdꞌe ʉrʉdꞌe bꞌaedꞌara Daizeze bedꞌeata ũrĩbadata maʉ̃ã. ¹⁹Mawũãmina naʉ̃ ẽjũãnebemata krĩcha duane bꞌʉa, aramaʉ̃ne sãwũã ne bio erubꞌaita krĩcha nʉmʉbara sewa bꞌʉa, aramaʉ̃ne ne awʉrʉta bio erubꞌa krĩñaĩnebemata ãzhidꞌe edꞌa zekuabʉrʉba Daizeze bedꞌeara kenabꞌaribiga bꞌʉa, aramaʉ̃ne zau eaba ẽã. ²⁰Ne ta pobʉrʉdꞌe egoro biadꞌe bꞌaedꞌara Daizeze bedꞌeata ũrĩbadata maʉ̃ã, ĩjãbʉdaba zaubada, mawũẽ eaba bꞌʉa treintadꞌe, sesentadꞌe, cienne abꞌa abꞌakꞌa.

Ne jaradꞌa ĩbĩrãneba

(Mateo 5:15; Lucas 8:16-18)

²¹Dewara mawũãsia: ¿Ĩbĩrã kꞌoape baridu edre bꞌʉbadakꞌa o kꞌãĩbari maẽ edre bꞌʉbadakꞌa? ¿Awuarabʉrʉ ʉ̃tʉ bꞌʉbada ẽka? ²²Aramaʉ̃ kĩrãkꞌa Daizezedꞌebema kꞌawuadꞌa ẽã nʉmʉrã kꞌawuadꞌa ẽã nʉma ẽã, miã chupea nʉmʉrã kꞌawuadꞌa ẽã nʉma ẽã. ²³Ne ũrĩ bꞌʉbara maʉ̃ta kĩrãkuita ũrĩdua.

²⁴Dewara mawũãsia: Mʉã jara bꞌʉta kĩrãkuita ũrĩũdua. Marãba kĩrãkuita nʉme zadꞌe kꞌawuabigaya, baribʉrʉ marãã ãmaña kꞌawuabiya. ²⁵Zhi bude erubꞌʉaara audre kꞌawuabiya, mawũãmina zhi bude erubꞌʉ ẽãrã wĩka erubꞌʉsidꞌa jãrĩña.

Ne jaradꞌa ne ta waribaridꞌeba

²⁶Jesúsbara dewara mawũãsia: Daizezeta Nokꞌodꞌebemata wari bꞌʉra ũmakĩrãba druadꞌe ne ta pobari kĩrãkꞌa bꞌʉa. ²⁷Kꞌãĩ bꞌʉdꞌe, ʉ̃rʉ̃ma bꞌʉdꞌe, diamase, ewaridꞌe, ne tara pãwãrãpe wari bꞌʉa zhi podꞌabara sãwũãta kꞌawua ẽãne. ²⁸Egoroba izhi dobꞌa pãwãrãbaria, naara wikupe zhi kʉ̃mʉta zaubaria, mobebʉrʉ zhi kʉ̃mʉne zhi taba birabaria. ²⁹Aramaʉ̃ne zhi ta kuarabʉrʉdꞌera kucho zakeba bꞌʉabada bꞌʉaita arababʉrʉba.

Ne jaradꞌa mostaza tadꞌeba

(Mateo 13:31-32, 34-35; Lucas 13:18-19)

³⁰Dewara Jesúsbara mawũãsia: ¿Kꞌãrẽ kĩrãkꞌa jaradꞌaipe Daizezeta Nokꞌodꞌebemata wari bꞌʉra? ¿Kꞌãrẽ ũme abꞌarika jaradꞌaipe? ³¹Mostaza tadꞌebema kĩrãkꞌa bꞌʉa, ubada ne ta jõmaʉ̃ kꞌãñabara audre wĩka kiruta bꞌʉta druadꞌe. ³²Mawũãmina ubudadꞌera wari bꞌʉa, aramaʉ̃ne ne uta wuaabema kꞌãñabara audre zhi zromata nʉmebaria, tae jedꞌezoa nʉmebaria, mawũẽ ibanata zhi taeza de obada.

Jesúsba ne bio jaradꞌadꞌebema

(Mateo 13:34-35)

³³Jesúsbara bedꞌeara mawũã ne biodꞌeba jarakꞌasia ũrĩ bꞌedꞌai bꞌʉdꞌe. ³⁴Mawũã ne jarakꞌa ẽãrã bedꞌea ẽbasia, mawũãmina izha jʉrʉkuadꞌaa jõma bia jarakꞌa bꞌasia dobꞌaʉdꞌe.

Jesúsba taʉbidꞌa nanguta do bomatʉta

(Mateo 8:23-27; Lucas 8:22-25)

³⁵Jari ewade keubʉrʉdꞌera izha jʉrʉkuadꞌaa Jesúsbara mawũãsia: Do jedꞌea õbꞌʉdꞌe kĩrãrã wãdrʉ.

³⁶Kꞌabanata wãbidꞌape Jesús edesidꞌa jãba izhi kꞌobꞌadꞌadꞌe. Ãzhi daucha wãsia jãba awʉrʉrãsidꞌa. ³⁷Maʉ̃ne nanguba do bomatʉbʉrʉba jãbadꞌe weabꞌari nabiru bʉsadꞌewasia. ³⁸Maʉ̃ẽna Jesúra ãkidꞌaidꞌu burukꞌau kꞌãĩ nʉmasia. Mawũẽ ʉ̃rʉ̃manape mawũãsidꞌa: ¡Miã Ũrãgꞌabari! ¿bʉma kꞌãrẽ ẽka dazhirã tabodꞌora?

³⁹Mawũãnaĩ Jesús piradrʉpe nanguta kẽãpe do jedꞌea õbꞌʉa mawũãsia: Chupearua, taurua.

Mawũẽ nangura tausia, aramaʉ̃ne jipa taukua nʉmaẽdasia. ⁴⁰Mobebʉrʉ ãzhaa mawũãsia: ¿Kꞌãrẽã kꞌãwũã pera kꞌobꞌe? ¿Sãwũẽ soidꞌu kꞌopanʉ ẽpe?

⁴¹Ãzhira kꞌãbãẽã perabʉdaba ãzhirãĩnu mawũãsidꞌa: ¿Naʉ̃ kꞌaipe kꞌãwũã nanguba do jedꞌea õbꞌʉba izhi bedꞌeata aribꞌaebʉdara?

Kĩrãnema bꞌadꞌa Gadara bidꞌata

(Mateo 8:28-34; Lucas 8:26-39)

¹Jesús izha jʉrʉkuadꞌa bawara jũẽkuasia do jedꞌea õbꞌʉ kĩrãrẽ Gadara bidꞌarã druaidꞌu. ²Jesús jãbadꞌeba udꞌubꞌaebʉrʉdꞌera beuwãrã wuagꞌaita peña zobꞌeata nʉme maẽba izhima zesia jaiba ũmakĩrã kĩrãnema bꞌʉta. ³Beuwãrã maẽ bꞌʉta miõba jʉ̃ bꞌedꞌa ẽãta cadenabidꞌa jʉ̃ bꞌedꞌa ẽbasia. ⁴Izhira jʉ̃ma bio jʉ̃ bazhidꞌa cadenaba, mawũãmina cadena izhara tʉdꞌʉzoabi bꞌʉba miõba poeadꞌakꞌa basia. ⁵Baridua kꞌatumaza ewaridꞌe diamase jʉra nimita, beuwãrã wuagꞌaita peña zobꞌeata nʉmeza nimi basia izhikusa puo mongꞌaraba. ⁶Wawarauba Jesústa ũdubʉrʉdꞌera wãẽbape sãkꞌokꞌodꞌe kꞌobꞌesia izhi kĩrãbita.

⁷Izhidꞌeba jaibara nemi jĩgua mawũãsia: ¿Bʉra mʉ ũme kꞌãrẽta sãwũã bꞌʉ Jesús Daizeze Ʉ̃trebema Warra? Daizeze daidꞌu mʉã bʉaa jaraya, mʉta zuburia orãrũã.

⁸Izhi mawũã bedꞌeaira Jesúsbara mawũãsia: Kꞌãʉ̃nebara ãĩ wãrũã jai.

⁹Jesúsbara widꞌi mawũãsia: ¿Bʉ trʉ̃rã kꞌaipe?

Mawũãĩ jaibara panaʉ̃ mawũãsia: Mʉ trʉ̃rã Kꞌabana, daira bio baera.

¹⁰Biodꞌe zuburia bedꞌeasia ãzhita ãĩ jʉrekua ẽbamarẽã maʉ̃ druadꞌeba. ¹¹Maʉ̃ne mama kꞌatuma kꞌaita bio nekꞌo duanasia chĩnata. ¹²Mawũẽ jai jõma zuburia bedꞌeabʉdata mawũãsidꞌa: Daira chĩna duanuma zokꞌakuadua dai wãĩta ãzhidꞌe edꞌa.

¹³Jesúsbara aramaʉ̃ta idaribigasia. Mawũẽ jaira ẽzoape chĩnane edꞌa wãsidꞌa, chĩna duanasita bꞌʉa dos mil. Chĩna doedꞌaa peñane bʉrʉgʉzoa doedꞌa jogꞌakuasia.

¹⁴Mawũẽ chĩna akʉ bꞌera wãẽbasidꞌa, mobe maʉ̃ta jarasidꞌa pʉwʉrʉdꞌebidꞌa meãbidꞌa. Mawũẽ akʉdꞌe erbuesia mawũã berabꞌaribʉrʉta. ¹⁵Jesúidꞌu zebʉdadꞌera jaiba kĩrãnema bꞌadꞌara ũdusidꞌa, jai kꞌabanata abꞌadꞌata jewedꞌa bꞌʉta wua jʉ̃ bꞌasia kĩrãbape, mawũẽ perakuasia. ¹⁶Zhi ũdudꞌapeadꞌabara nebʉrʉsidꞌa sãwũã berabꞌaribʉrʉta jai abꞌadꞌata dewara chĩnarãta. ¹⁷Mawũẽ zuburia bedꞌeasidꞌa wãmarẽã ãzhi druadꞌebara.

¹⁸Jesús jãbadꞌe bꞌaribʉrʉdꞌera kĩrãnema bꞌadꞌara zuburia bedꞌeasia bꞌabimarẽã izhi ũme. ¹⁹Mawũãmina Jesúsbara idaribi ẽbasia, awuarabʉrʉ mawũãsia: Dedꞌaa wãrũã, bʉzhi mebẽrãma wãrũã, mobe jaradua Daizezeba bia zromata obʉrʉta bʉ bꞌebibʉrʉta, bʉ sãwũã sozuburia bꞌidꞌapʉta. ²⁰Mawũãĩ izhira wãpe Decápoli druadꞌe pʉwʉrʉ tabꞌeza jarakꞌasia bia zromata obʉrʉta Jesúsba izhi sãwũã bꞌebibʉrʉta. Mawũẽ jõma sobiasidꞌa.

Jairo kꞌaudꞌebema

(Mateo 9:18-26; Lucas 8:40-56)

²¹Wakusa chãbʉrʉta Jesús jãbadꞌe ya kĩrãrẽ zebʉrʉdꞌera izhira bʉredrʉsidꞌa kꞌabanaba, mawũẽ izhira chubꞌesia doya. ²²Maʉ̃ne zesia de zhi jʉrebada maẽ nokꞌota Jairo abadata, Jesústa ũdui izhi jẽrũ kꞌaita sãkꞌokꞌodꞌe kꞌobꞌepe, ²³biodꞌe zuburia bedꞌeabʉrʉta mawũãsia: Mʉ kꞌauta beubodꞌoa, mawũẽ wãda, mobe bʉ juwuata izhi ʉ̃rʉ̃ bꞌʉdua, mawũãrã bꞌepe bꞌaya.

²⁴Mawũãĩ Jesús izhi ũme wãbʉrʉdꞌera kꞌabanata kꞌaidꞌu wãbʉdaba pẽũsua wãbisidꞌa. ²⁵Maʉ̃ne wũẽrã abꞌa waba kꞌaya bꞌʉta doce año bata bꞌasia. ²⁶Biodꞌe zuburiabisidꞌa zhãrã bibabadata bioba. Zhãrã jʉrʉkua bꞌʉdꞌe izha erubꞌadꞌara jõma gastabʉrʉdꞌera miã kꞌãrẽta kꞌareba ẽbasia, awuarabʉrʉ wuaabʉrʉ idrʉa wãsia. ²⁷Jesús jarabʉdata ũrĩbʉrʉdꞌera kꞌabanane edꞌa ãbʉdeba orrape tõbꞌarisia Jesús wuata. ²⁸Maʉ̃nerã izhikusa mawũãsia: Bari izhi wuata tõbꞌaribʉrʉba mʉrã bꞌeya. ²⁹Aramaʉ̃ta wa ze nʉmʉrã poasia. Mawũẽ kꞌawuasia kꞌakuara bꞌebʉrʉta mawũã kꞌaya bꞌadꞌara.

³⁰Maʉ̃ne Jesúsbara izhi bitabaiba kꞌawuasia zhãrã bꞌeidꞌebema zareata ãĩ wãbʉrʉta izhi maẽba, mawũẽ kꞌabanama pʉrʉwape mawũãsia: ¿Kꞌaiba tõbꞌarisi mʉ wuara?

³¹Mawũãĩ izha jʉrʉkuadꞌabara mawũãsidꞌa: Akʉdua kꞌabanaba bʉra sãwũã pẽũsua wãbidꞌata, maʉ̃ta bʉara ¿mʉrã kꞌaiba tõbꞌarisi abʉrʉka?

³²Mawũãsidꞌaidꞌu Jesúsbara ari pʉrʉwa akʉkua nʉmasia kꞌawuai kꞌarea kꞌaiba tõbꞌaridꞌata. ³³Mawũẽ wũẽrã peraba pidꞌidꞌia kꞌobꞌʉta, izhi sãwũã dogꞌota kꞌawua kꞌobꞌʉba zepe izhi kĩrãbita sãkꞌokꞌodꞌe kꞌobꞌepe jarasia wãrãta.

³⁴Mawũẽ Jesúsbara mawũãsia: Wũẽrã, bʉra bʉzhi soidꞌu kꞌobꞌʉba bꞌebʉrʉa. Adu-a wãrũã, bꞌe bꞌidꞌa bʉ kꞌaya bꞌadꞌara.

³⁵Jesús wadꞌi bedꞌea kꞌobꞌʉdꞌe zhãrã ʉ̃kʉrʉ zesidꞌa de zhi jʉrebada maẽ nokꞌo dedꞌauba, mobe mawũãsidꞌa: Bʉ kꞌaura beudogꞌoa, ¿mawũẽ kꞌãrẽã miãsẽã bedꞌea nʉmaĩpe Miã Ũrãgꞌabaria?

³⁶Mawũãmina Jesúsbara mawũãbʉdata ũrĩpe de zhi jʉrebada maẽ nokꞌoa mawũãsia: Sopuarãrũã, awuarabʉrʉ soidꞌu kꞌobꞌadua.

³⁷Mobe kꞌaidꞌu wãbiga ẽbasia miõta, awuarabʉrʉ wãbigasia Pedrota, Jacobota, Juan Jacobo mebeata. ³⁸Aramaʉ̃ne de zhi jʉrebada maẽ nokꞌota bꞌʉ dedꞌa zebʉrʉdꞌera ũdusia bꞌʉgadrʉ biodꞌe aubꞌari jẽga nʉmeta. ³⁹Edꞌa wãpe mawũãsia: ¿Kꞌãrẽã kꞌãwũã bꞌʉgadrʉ jẽga duanu? Wũẽrã zakera beu ẽã, awuarabʉrʉ kꞌãĩ bꞌʉa.

⁴⁰Mawũãĩ sewakꞌau bꞌʉa asidꞌa. Mawũãmina izhara jõma ãĩ wãbigape bari wũẽrã zake zezeta zhi papata edebʉrʉta, izha jʉrʉkuadꞌata ũbea izhi bawara kꞌopanʉta edebʉrʉta edꞌa wãsia wũẽrã zake beu tabꞌʉ maẽ. ⁴¹Mobe wũẽrã zakera juwuadꞌe jidape mawũãsia: ¡Talita cumi! Maʉ̃ bedꞌeabara mawũãsia: Wũẽrã zake, mʉã bʉaa jaraya piradrʉrua.

⁴²Aramaʉ̃ta wũẽrã zakera piradrʉpe tebadꞌewasia doce año bꞌʉta. Mawũẽ zhãrã kꞌobꞌera kꞌãbãẽã perakuasia. ⁴³Maʉ̃nerã Jesúsbara zarea jarakꞌasia maʉ̃ta miõã kꞌawuabidꞌa ẽbamarẽã, mobe jarasia zhiko diadꞌamarẽã wũẽrã zakera.

Jesús wãna Nazaret pʉwʉrʉedꞌa

(Mateo 13:53-58; Lucas 4:16-30)

¹Jesús mamaʉ̃bara wãsia izhi druaedꞌa, kꞌaidꞌu wãsidꞌa izha jʉrʉkuadꞌara. ²Ẽnaʉ̃bada ewarita araa zebʉrʉdꞌera miã ũrãgꞌasia de zhi jʉrebada maẽ, maʉ̃ta bioba ũrĩnaĩ bia akʉdrua mawũãsidꞌa: ¿Naʉ̃ sãmaʉ̃ba kꞌãwũã nʉmʉ? ¿Naʉ̃bara krĩchara sãmaʉ̃ba kꞌãwũã erubꞌʉ, sãwũã ũdudꞌakꞌata okua bꞌʉ? ³¿Naʉ̃ ẽka de obarita María waura? ¿Zhi mebẽrã Jacobota, Joséta, Judata, Simónta duanu ẽka? ¿Zhi nawekꞌaurãsidꞌa nama dazhirãne edꞌa duanu ẽka?

Aramaʉ̃ne Jesúsdꞌebema ĩjãna ẽbasia.

⁴Mawũẽ Jesúsbara mawũãsia: Daizezeba bedꞌeata jarabibarira baridu maẽ wawiabada, awuarabʉrʉ wawiadꞌa ẽã izhi druadꞌebʉrʉ, zhi mebẽrãne edꞌabʉrʉ, izhi dedꞌabʉrʉ.

⁵Mamarã ũdudꞌakꞌara o ẽbasia, awuarabʉrʉ kꞌayarãtrʉ ʉ̃kʉrʉ bꞌebikuasia juwua ãzhi ʉ̃rʉ̃ bꞌʉkua. ⁶Kꞌawua ẽã krĩcha bꞌesia izhidꞌebema ĩjãna ẽãba izhi ʉreta bꞌebara.

Kꞌãrẽ obigadꞌa doce jʉrʉkuadꞌata

(Mateo 10:5-15; Lucas 9:1-6)

Jesús pʉrrʉasia pʉwʉrʉ zake arakꞌaita tabꞌe maẽ miã ũrãgꞌa. ⁷Maʉ̃nerã ãba trʉ̃kuasia doceta, mobe zokꞌakuasia ũme ũmekꞌa, zareata dedꞌekasia jai bꞌe ʉ̃rʉ̃. ⁸Jarakꞌasia odꞌera miã kꞌãrẽta ededꞌa ẽbamarẽã, awuarabʉrʉ jarasia ededꞌamarẽã barrata. Miã ededꞌa ẽbamarẽã jarasia talegota, miã zhikota, miã platata. ⁹Awuarabʉrʉ jarasia jʉ̃namarẽã sandaliata, mobe ededꞌa ẽbamarẽã wua trokꞌa jʉ̃ĩta. ¹⁰Mobe mawũãsia: Baridu maẽ deidꞌu wãbʉdadꞌera mama kꞌãĩũdua mamaʉ̃ba wãnañeẽna. ¹¹Baridu maẽ marãta bia edadꞌa ẽbʉrʉ, miã marã bedꞌeata ũrĩna ẽbʉrʉ, mamaʉ̃bara ãĩ wãbʉdata egoro jarra marã jẽrũnebema niãweudua. Aramaʉ̃ne kꞌawuabidꞌaya ãzhira Daizezebara pua kꞌawua oita. Mʉã wãrĩnu marãã jaraya, Daizezeba kꞌawua obʉrʉ ewadera Sodoma pʉwʉrʉdꞌe, Gomorra pʉwʉrʉdꞌe bꞌeadꞌara yarebai zuburia bꞌeabiya maʉ̃ pʉwʉrʉdꞌe bꞌe kꞌãñabara.

¹²Jesúsba jʉrʉkuadꞌara wãnape zhãrã bꞌea jara jʉ̃drʉsidꞌa kꞌazhiruara ãmape Daizezeta pẽwãnamarẽã. ¹³Jaira bio ãĩ jʉrekuasidꞌa, nendragꞌaba bewatʉ kꞌayarã bio bꞌebikuasidꞌa.

Juan Burukꞌoemiã beabidꞌadꞌebema

(Mateo 14:1-12; Lucas 9:7-9)

¹⁴Rey Herodebara Jesús jarabʉdata ũrĩsia baridu maẽ trʉ̃poa nʉmʉba. Ʉ̃kʉrʉbara mawũãsidꞌa: Juan Burukꞌoemiã beudꞌata piradrʉbʉrʉa, maʉ̃neba ũdudꞌakꞌata okuaita zarea nʉmʉã.

¹⁵Waya ʉ̃kʉrʉbara mawũãsidꞌa: Kꞌãʉ̃rã Elía. Dewaraurãbara mawũãsidꞌa: Kꞌãʉ̃rã Daizezeba bedꞌeata jarabibaria, Daizezeba bedꞌeata jarabibarirã bꞌeadꞌa kĩrãkꞌa bꞌʉa.

¹⁶Maʉ̃ta ũrĩpe Herodebara mawũãsia: Maʉ̃ Juan mʉã otatubidꞌata beudꞌata piradrʉbʉrʉa.

¹⁷Mawũã jarasia Herodebara Juan jidadꞌe wãbipe cárceldꞌe cadenaba jʉ̃bidꞌaba, mawũã osia Herodía kꞌarea, maʉ̃ zhi mebea Felipe kĩmata izhi wũẽrã babisia. ¹⁸Maʉ̃neba Juanbara Herodea mawũã bazhia: Bʉzhi mebea kĩma bʉa erubꞌaira biga ẽã.

¹⁹Maʉ̃ kꞌarea Herodíabara juraba bea krĩña bꞌasimina bꞌe ẽbasia. ²⁰Herodebara Juan wawia bꞌasia izha kꞌawua bꞌʉba biata Daizezeita bꞌʉta, mawũẽ idaribi ẽbasia. Juan bedꞌeata ũrĩbʉrʉdꞌera sãwũãĩ kꞌawua ẽã bꞌasimina ũrĩ krĩña ũrĩ bꞌasia. ²¹Mawũãmina ewarita zesia Herodíaba sãwũã beaita. Herode año cumpli nʉmʉ fiestadꞌe nekꞌobiga nʉmasia nokꞌorã izhi edre bꞌeta, nokꞌorã soldaorãneta, nokꞌorã Galileadꞌebemata. ²²Maʉ̃ne Herodía kꞌauta edꞌa wãpe bairabʉrʉta Herodema bigata, biga basia izhi bawara nekꞌo kꞌobꞌeitabidꞌa. Mawũẽ reybara ãwũẽrãã mawũãsia: Bʉzha krĩñata mʉãã widꞌidua mʉãrã diaya.

²³Mawũãpe kꞌãrẽ wãrĩnu diaita jarabʉrʉta mawũãsia: Jõma bʉa mʉãã widꞌibʉrʉra mʉãrã diaya, mʉã erunʉmʉta ẽsadrabidꞌa diaya.

²⁴Mawũãĩ wãpe zhi papaa mawũãsia: ¿Mʉãrã kꞌãrẽta widꞌiipe?

Mawũãĩ zhi papabara mawũãsia: Widꞌidua Juan Burukꞌoemiã buruta.

²⁵Mawũãĩ reyma ĩñabasia edꞌa wãpe widꞌi mawũãsia: Mʉãrã krĩña bꞌʉa kꞌãwũãwedꞌa epedꞌekꞌodꞌe bʉa mʉãã diaita Juan Burukꞌoemiã buruta.

²⁶Mawũãĩ rey kꞌãbãẽã sopuasia, mawũãmina izhi bawara nekꞌo kꞌobꞌe kĩrãbita kꞌãrẽ wãrĩnu diaita jaradꞌaba dia krĩña ẽã nʉma ẽbasia. ²⁷Mawũẽ aramaʉ̃ta reybara soldao abꞌa zokꞌabʉrʉta jarasia wemarẽã Juan buruta. ²⁸Mawũãĩ soldao wãpe cárceldꞌe otatupe zhi buru epedꞌekꞌodꞌe wepe diasia ãwũẽrãã. Mawũẽ izhara diasia zhi papaa.

²⁹Juanba jʉrʉkuadꞌaba maʉ̃ta ũrĩnaĩ zedꞌape zhi kꞌakua jirabꞌaridꞌape wuagꞌasidꞌa.

Nekꞌobigadꞌa cinco mil

(Mateo 14:13-21; Lucas 9:10-17; Juan 6:1-4)

³⁰Jesúsba zokꞌakuadꞌara izhima ãba zekuape jõma nebʉrʉsidꞌa ãzha kꞌãrẽ odꞌata, ãzhi miã ũrãgꞌadꞌata.

³¹Jesúsbara mawũãsia: Zeudua, dazhirã bitabai miõ ne ẽãĩnu wãnaña, mobe wĩka ẽnaʉ̃ kꞌobꞌeaudua.

Mawũã jarasia zhãrã bio zepe wãpe nʉmʉba, maʉ̃ba ãzhira miã ewari ne ẽbasia nekꞌoisidꞌa. ³²Aramaʉ̃ne ãzhi bitabai jãbadꞌe wãsidꞌa miõ ne ẽãĩnu. ³³Mawũãmina wãnata bioba ũdubʉdadꞌera ãzhita kꞌawuasidꞌa, mawũẽ maĩnu bio jẽde wãsidꞌa pʉwʉrʉ tabꞌe maẽba, aramaʉ̃ne jũẽkuasia ãzhi jũẽĩ nawedꞌa, mawũẽ daucha zekuasia Jesús bawara. ³⁴Jesús jãbadꞌeba udꞌubꞌaebʉrʉdꞌe kꞌabanata ũdui ãzhira sozuburiasia ovejarã kĩrãkꞌa bꞌeba ãzhi akʉbari ne ẽã, mawũẽ ũrãgꞌakuasia ne bio jara. ³⁵Keudꞌe izha jʉrʉkuadꞌabara orradꞌape mawũãsidꞌa: Miõ ne ẽã maẽ kꞌobꞌedꞌe ewari ya keua. ³⁶Wãbigarua wãnamarẽã meã bꞌema, pʉwʉrʉ zake arakꞌaita tabꞌema, aramaʉ̃ne edadꞌamarẽã zhikota, kꞌãrẽ kꞌoi ne ẽã bꞌea.

³⁷Mawũãnaĩ Jesúsbara panaʉ̃ mawũãsia: Marãba nekꞌobigaudua.

Mawũãĩ ãzhara mawũãsidꞌa: ¿Daita wãnape denario docientoba pan edaira ewari dociento trajaidꞌe bꞌʉ ẽka aramaʉ̃ne nekꞌobigaira?

³⁸Mawũãnaĩ izhara mawũãsia: ¿Marãbara pan sõmbe erubꞌe? Akʉdꞌe wãũdua.

Mawũãĩ wãnape kꞌawuadꞌape mawũãsidꞌa: Daibara erubꞌea pan juesoma bꞌeda ũme.

³⁹Mawũãnaĩ jarasia biodꞌe jewedꞌabidꞌamarẽã poajãrã ʉ̃rʉ̃. ⁴⁰Mawũẽ awuara awuarakꞌa jewedꞌasidꞌa cienne, cincuentadꞌe. ⁴¹Mobebʉrʉ jiraedasia pan juesomata bꞌeda ũmeta, mobe ʉ̃taa akʉ zhiwidꞌipe pan bꞌʉekuape izha jʉrʉkuadꞌaa diasia jedꞌekadꞌamarẽã. Bꞌeda ũmesidꞌa ãzhi jõmaʉ̃ĩta ãzhiza bꞌʉekuasia jedꞌekadꞌamarẽã. ⁴²Aramaʉ̃ne jõma adꞌuba nekꞌosidꞌa. ⁴³Pan zhi bꞌʉgʉzoamata bꞌeda adꞌubadꞌapeadꞌata jʉrepesidꞌa jamara doce bira. ⁴⁴Zhi nekꞌodꞌapeadꞌara zhũmakĩrãrãta nʉmasia cinco mil.

Jesús tebadꞌa do ʉ̃rʉ̃

(Mateo 14:22-27; Juan 6:16-21)

⁴⁵Mobebʉrʉ Jesúsbara izha jʉrʉkuadꞌara jãbadꞌe bꞌaribigape izhi naa wãbigasia Betsaida pʉwʉrʉedꞌa kĩrãrã, maʉ̃ẽna izhira wãta jara tebasia kꞌabanata kꞌobꞌea. ⁴⁶Mawũã wãta jarakꞌa tebape kꞌatumaĩnu wãsia zhiwidꞌidꞌe. ⁴⁷Diamase nʉmebʉrʉdꞌera jãbara do ẽsadra babʉrʉdꞌe izhira dobꞌa drua bꞌasia. ⁴⁸Kꞌãbãẽã poea wigui barabꞌʉta ũdusia pʉ̃ãdrʉta ãzhi wãma nʉmʉ ẽãba, mawũẽ ʉ̃nadrʉ bodꞌodꞌe ãzhima zesia do ʉ̃rʉ̃ taidꞌe, aramaʉ̃ne jipa berabꞌarii basia. ⁴⁹Do ʉ̃rʉ̃ taita ãzha ũdudꞌai beuwãrãta krĩchadꞌape bꞌiasidꞌa. ⁵⁰Jõmaʉ̃ba ũdubʉdaba perasidꞌa. Mawũẽ aramaʉ̃ta ãzhi ũme bedꞌeabʉrʉta mawũãsia: ¡Wãniguaudua, mʉta taia, perarãũdua!

⁵¹Mawũãpe ãzhi bawara jãbadꞌe bꞌaribʉrʉdꞌera pʉ̃ãdrʉra tausia. Mawũẽ ãzhira kꞌãbãẽã perabʉdaba bia akʉdruasidꞌa. ⁵²Aramaʉ̃nerã zhi zromata wadꞌi kꞌawuadꞌa ẽbasia pan wĩkaba kꞌabanata nekꞌobigadꞌamina, maʉ̃ne krĩchadꞌaira zare basia ãzhi sora.

Jesúsba bꞌebidꞌa kꞌayarãta Genesaredꞌe

(Mateo 14:34-36)

⁵³Kĩrãrẽ chãbʉdadꞌera jũẽkuasia Genesaret druaidꞌu, jãbara jʉ̃ õbꞌʉsidꞌa doya. ⁵⁴Jãbadꞌeba ãzhi udꞌubꞌaebʉdadꞌera zhãrãbara Jesúta ũdukꞌawasidꞌa. ⁵⁵Mawũẽ wãẽbasidꞌa maʉ̃ drua jõmaʉ̃nebemata, baridu maẽba wesidꞌa kꞌaya bꞌeta jirabꞌadꞌe, izhi sãma bꞌʉta ũrĩbʉda maẽ. ⁵⁶Izhi wãbʉrʉ maẽrã pʉwʉrʉ zakedꞌe o pʉwʉrʉ zromanebidꞌa, meã bꞌe maẽbidꞌa odꞌe bꞌʉkua jirpanesia kꞌaya bꞌeta, mawũẽ zuburia bedꞌeasidꞌa arigu idu tõbaribimarẽã izhi wua ita. Jõma zhi tõbꞌaribʉdara bꞌe tupudꞌeasia.

Dazhi sãwũã mitiabaridꞌebema

(Mateo 15:1-20)

¹Jesús orrasidꞌa fariseorãba ũrãgꞌa Moisédꞌe jarabadata ʉ̃kʉrʉ bawarauba, ãzhira zekuasia Jerusalénneba. ²Maʉ̃rãbara ũdusidꞌa Jesúsba jʉrʉkuadꞌata ʉ̃kʉrʉ juwua mitia nekꞌo kꞌobꞌeta ãzha obꞌe kĩrãkꞌa juwua surrua odꞌa ẽãba, mawũẽ bĩ ẽã jarasidꞌa. ³Fariseorãbara judíorãbara jõmaʉ̃ba obꞌea zõrãrãba okꞌawa bꞌeadꞌata, mawũẽ sãwũã oi bꞌʉdꞌe juwuata surrua o ẽãrã nekꞌodꞌa ẽã. ⁴Ne edadꞌe jũẽnasidꞌa juwuata surrua o ẽãrã nekꞌodꞌa ẽã. Ne awʉrʉsidꞌa bio bꞌʉta mawũã aribꞌae bꞌeba surrua obꞌea vaso baniã dota, jiwadota, netata metal omata, camata. ⁵Mawũẽ fariseorãbara ũrãgꞌa Moisédꞌe jarabada bawarauba widꞌi mawũãsidꞌa: ¿Kꞌãrẽã bʉa jʉrʉkuadꞌabara aribꞌaedꞌa ẽpe zõrãrãba okꞌawa bꞌeadꞌara? Awuarabʉrʉ nekꞌo kꞌopanʉã juwua mitia.

⁶Mawũãnaĩ Jesúsbara panaʉ̃ mawũãsia: Marã sewa bibaʉta bꞌea. Bia marãẽnabemata Daizezedꞌeba Isaíaba jaradꞌata zhi bꞌʉmata mawũã bꞌʉa:

Za bꞌebara bari iba mʉrã wawidea, aramaʉ̃ne ãzhi sora wawara nʉmʉã mʉnebara.

⁷Mʉrã bari ibia jara bꞌeba mʉ ũrãgꞌa kĩrãkꞌa jaradia bꞌea aribꞌaemarẽã jara bꞌeta beubari bꞌeba. (Isaías 29:13)

⁸Aramaʉ̃ne Daizezeba aribꞌaemarẽã jara bꞌʉra kenabꞌaridꞌape aribꞌae bꞌea beubari bꞌeba okꞌawa bꞌeta, mawũẽ mazhima mitia ne ẽã obʉdata surrua obꞌea jiwadota, vaso baniã dota. Aramaʉ̃ne ne awʉrʉsidꞌa bio obꞌea abꞌarikata.

⁹Dewara mawũãsia: Daizezeba aribꞌaemarẽã jara bꞌʉra sãwũã seribidꞌa ẽbaita bia kꞌawua bꞌea, mazhidꞌeta aribꞌaedꞌai kꞌarea. ¹⁰Moisébara mawũãsia: Wawiarua bʉ zezera bʉ papara. Zezeta o papata ikꞌazhirua jarabʉrʉra beadꞌaibara. ¹¹Mawũãmina marãbara mawũãbada: Zhũmakĩrãbara zhi zezea o zhi papaa mawũãsia bꞌʉa: Mʉãrã jõma Daizezea diasia bʉ kꞌarebaita mʉã erubꞌadꞌara. ¹²Aramaʉ̃ne idaribidꞌa ẽã kꞌãrẽ dewara oira zhi zezeita o zhi papaita. ¹³Aramaʉ̃ne Daizeze bedꞌeara seribidꞌa ẽã mazhidꞌeta awʉrʉa kꞌawabi nʉmeba. Ne awʉrʉsidꞌa bio obꞌea aramaʉ̃ kĩrãkꞌa bꞌʉta.

¹⁴Maʉ̃ta jarape Jesúsbara kꞌabanata trʉ̃pe mawũãsia: Mʉã jaraita jõmaʉ̃ba ũrĩũdua, mobe sãwũãta kꞌawuaudua. ¹⁵Ãĩba zhikota edꞌa wãbʉrʉbara dazhira mitia o ẽã. Mawũãmina sodꞌeba zebʉrʉbara Daizeze kĩrãbitara dazhira mitia obꞌʉa. ¹⁶Ne ũrĩ bꞌʉbara maʉ̃ta kĩrãkuita ũrĩdua.

¹⁷Kꞌabanata ãmaẽpe Jesús deidꞌu wãbʉrʉdꞌera izha jʉrʉkuadꞌabara widꞌisidꞌa izha jarabʉrʉra sãwũãta. ¹⁸Mawũẽ izhara mawũãsia: ¿Marãbidꞌa sãwũãta kꞌawuadꞌa ẽka? ¿Kꞌawuadꞌa ẽka ãĩba zhikota edꞌa wãbʉrʉbara dazhira mitia o ẽãta? ¹⁹¿Mawũã bꞌʉ ẽka edꞌa wã ẽãba dazhi sodꞌe, awuarabʉrʉ bꞌitaedꞌa wãpe ãĩ wã bꞌʉ ẽka?

Mawũã jarabʉrʉbara jarasia jõma nene ẽãta zhikora. ²⁰Mawũãmina jarasia dazhi sodꞌeba zebʉrʉbara Daizeze kĩrãbitara dazhira mitia obꞌʉta. ²¹Dazhi sodꞌebara ze bꞌʉa krĩchata bia ẽãta, kĩma ẽãta erukꞌãĩta, miã beaita, ²²nezrʉgaita, ne wuaabʉrʉ krĩñaĩta, bia ẽãta oita, zhãrã sewaita, dazha krĩñata oita, zhãrãba ne erubꞌʉ kꞌarea bĩ ẽã nʉmaĩta, zhãrãnebema sewata jaraita, dazhitrʉ bigaudꞌe nʉmaĩta, krĩcha ne ẽkĩrãkꞌa nʉmaĩta. ²³Maʉ̃ jõma bia ẽãta sodꞌeba ze bꞌʉba Daizeze kĩrãbitara dazhira mitia obꞌʉa.

Soidꞌu kꞌobꞌadꞌa wũẽrã Sirofenicia bidꞌata

(Mateo 15:21-28)

²⁴Mamaʉ̃bara Jesús wãsia Tiro druaedꞌa Sidón druaedꞌa. Zhãrã maẽ deidꞌu wãbʉrʉta miõba kꞌawuadꞌaita krĩña ẽbasia, mawũãmina merũ bꞌe ẽbasia. ²⁵Wũẽrãneta kꞌauta jai abꞌasia, mawũẽ izhi ʉ̃rʉ̃ ũrĩĩ zepe ju kꞌobꞌesia izhi jẽrũ kꞌaita. ²⁶Maʉ̃ wũẽrã judía ẽbasia, awuarabʉrʉ Sirofenicia druadꞌebema basia. Zuburia bedꞌeasia izhi kꞌaudꞌeba ãĩ jʉretamarẽã jaita. ²⁷Mawũãmina Jesúsbara mawũãsia: Naara idu mʉãã kꞌarebabirua judíorãta, mʉã bʉta kꞌarebaira biga ẽã, mawũãrã zhiko warrarãneta jiraedape diabʉrʉkaya usarãã.

²⁸Mawũãĩ wũẽrãbara mawũãsia: Ããjã Nokꞌó, mawũãmina usarãbidꞌa mesa edre kꞌobada zhiko jarra warrarãne bꞌaedꞌata. Mawũẽ mʉrã judía ẽmina kꞌarebarua.

²⁹Mawũãĩ Jesúsbara mawũãsia: Bʉra bia bedꞌeabʉrʉba adu-a wãrũã. Jaira ãĩ wãsia bʉ kꞌaudꞌebara. ³⁰Aramaʉ̃ne wũẽrã izhi dedꞌa zebʉrʉdꞌera ũdusia zhi kꞌaura camane tabꞌʉta, jaira ãĩ wãsia izhidꞌebara.

Jesúsba bibadꞌa ne ũrĩ ẽã bedꞌea bꞌe ẽãta

(Mateo 15:29-31)

³¹Tiro druadꞌeba Jesús wakusa wãbʉrʉdꞌera, Sidón pʉwʉrʉdꞌe berabꞌari zesia Galileadꞌebema dota jedꞌea õbꞌʉidꞌu, aramaʉ̃ne berabꞌari zesia Decápoli druadꞌe. ³²Maʉ̃ne ne ũrĩ ẽã bedꞌea bꞌe ẽãta izhima wedꞌape zuburia bedꞌeasidꞌa juwuata ʉ̃rʉ̃ bꞌʉmarẽã. ³³Mawũãnaĩ zhãrã maẽbara ãĩ edepe juwua jĩwĩnita pẽũsia kʉwʉrʉza, mobe juwua jĩwĩnine idꞌope tõbꞌarisia kĩrãmeta. ³⁴Mobe ʉ̃taa akʉ ĩñabape mawũãsia: ¡Efata! Maʉ̃ bedꞌeabara mawũãsia: ¡Ewadua!

³⁵Audre ẽãne ewa totosia izhi ne ũrĩbarira, kĩrãmesidꞌa ogꞌadrʉbʉrʉba bia bedꞌeasia.

³⁶Jesúsbara jarasia maʉ̃ta miõã jaradꞌa ẽbamarẽã. Mawũãmina mawũã jarabʉrʉdꞌera wuaabʉrʉ nebʉrʉsidꞌa. ³⁷Mawũẽ kꞌãbãẽã sobia mawũã bazhidꞌa: Ne jõma bia obꞌʉa. Ne ũrĩ ẽã bꞌeta ne ũrĩbi bꞌʉa, bedꞌea bꞌe ẽã bꞌeta bedꞌeabi bꞌʉa.

Nekꞌobigadꞌa cuatro mil

(Mateo 15:32-39)

¹Maʉ̃ ewadera kꞌabanata kꞌãbãẽã nʉmʉta kꞌãrẽ kꞌodꞌai ne ẽãne Jesúsbara izha jʉrʉkuadꞌata trʉ̃pe mawũãsia: ²Mʉãrã zhãrã sozuburia kꞌobꞌʉa, mʉ bawara bꞌeta ewari ũbea babʉrʉta kꞌãrẽ kꞌodꞌaira ne ẽã. ³Nekꞌobiga ẽã dedꞌaa zokꞌakuara odꞌe nomadrʉdꞌaya, ãzhirãnebema ʉ̃kʉrʉ zesidꞌa wawarauba.

⁴Mawũãĩ izha jʉrʉkuadꞌabara panaʉ̃ mawũãsidꞌa: ¿Naʉ̃rãta nekꞌobigaira zhiko sãma ũduipe nama miõ ne ẽã maẽrã?

⁵Mawũãnaĩ Jesúsbara widꞌi mawũãsia: ¿Marãbara pan sõmbe erubꞌe?

Mawũãĩ ãzhara jarasidꞌa: Siete.

⁶Mobebʉrʉ kꞌabanata kꞌobꞌea jarasia jewedꞌa duanemarẽã egorodꞌe, mobe pan sieteta jiraedape Daizezea zhibia jipe bꞌʉekuape izha jʉrʉkuadꞌaa diasia jedꞌekadꞌamarẽã kꞌabanata kꞌobꞌea. ⁷Dewara bꞌeda zakerãta ʉ̃kʉrʉ erubꞌebari Daizezea zhibia jipe jarasia maʉ̃sidꞌa jedꞌekadꞌamarẽã. ⁸Jãwũã nekꞌosidꞌa, adꞌubadꞌapeadꞌa zhi bꞌʉgʉzoamata jʉrepesidꞌa jamara siete. ⁹Zhi nekꞌodꞌapeadꞌara nʉmasita bꞌʉa cuatro mil. Mobebʉrʉ Jesúsbara wãbigasia. ¹⁰Mobe izha jʉrʉkuadꞌa bawara jãbadꞌe bꞌaripe wãsia Dalmanuta druaedꞌa.

Jarasidꞌa ũdubimarẽã ũdudꞌakꞌata

(Mateo 16:1-4; Lucas 12:54-56)

¹¹Fariseorãta zekuape Jesús bawara bedꞌeabʉdata jarasidꞌa Daizezedꞌeba nʉmʉbʉrʉ ũdubimarẽã ũdudꞌakꞌata, mawũãsidꞌa wãẽãbidꞌaita. ¹²Mawũẽ ĩñabape Jesúsbara mawũãsia: ¿Kꞌãrẽã ũdudꞌakꞌata ũdubimarẽã jara duanu marã bꞌebara? Mʉã wãrĩnu marãã jaraya, mʉãrã ũdudꞌakꞌara ũdubiga ẽã marã bꞌeara. ¹³Mawũãpe ãmaẽkuabʉrʉta wakusa jãbadꞌe bꞌaripe wãsia kĩrãrã.

Ne oreguea fariseorãne

(Mateo 16:5-12)

¹⁴Jesúsba jʉrʉkuadꞌabara kĩrãduasidꞌa pan ededꞌaira, pan abꞌabʉrʉ erupanasia jãbadꞌera. ¹⁵Maʉ̃ne Jesúsbara mawũãsia: Kĩrãkuita bꞌeaudua ne oregueata fariseorãne kꞌarea, ne oregueata rey Herode bꞌʉdꞌe kꞌarea.

¹⁶Mawũãĩ ãzhirãĩnu bedꞌeabʉdata mawũãsidꞌa: Maʉ̃ta jarabʉrʉa pan wedꞌa ẽbasi baera.

¹⁷Jesúsbara maʉ̃ta kꞌawuape mawũãsia: ¿Kꞌãrẽã jara kꞌobꞌe pan ne ẽãta? ¿Sãwũãta kꞌawuadꞌa ẽka? ¿Sãwũãta kꞌawuaira zareka marã sora? ¹⁸¿Dabʉ erubꞌeta ũdudꞌa ẽka, ne ũrĩ bꞌeta ũrĩna ẽka? ¿Bude badꞌa ẽka? ¹⁹Pan juesomata cinco mil audre nʉmʉã mʉã jedꞌekasidꞌera, ¿zhi bꞌʉgʉzoamata jamara sõmbe bira jʉrepesidꞌa?

Mawũãĩ ãzhara jarasidꞌa: Doce. ²⁰Pan sieteta cuatro mil nʉmʉã mʉã jedꞌekasidꞌera, ¿zhi bꞌʉgʉzoamata jamara sõmbe bira jʉrepesidꞌa?

Mawũãĩ ãzhara jarasidꞌa: Siete.

²¹Mawũãnaĩ mawũãsia: ¿Mobe kꞌãrẽneba wadꞌi sãwũãta kꞌawuadꞌa ẽpe?

Daʉbꞌerrea bꞌʉta ne ũdubidꞌa

²²Betsaida pʉwʉrʉedꞌa zebʉrʉdꞌera daʉbꞌerrea bꞌʉta izhima wedꞌape zuburia bedꞌeasidꞌa tõbꞌarimarẽã. ²³Mawũãnaĩ Jesúsbara daʉbꞌerrea bꞌʉra juwuadꞌe jidape pʉwʉrʉdꞌebara ãĩ edesia. Mobe dabʉza idꞌope juwua ʉ̃rʉ̃ bꞌʉpe widꞌisia ne ũdu kꞌobꞌʉ kꞌawuaita. ²⁴Mawũãĩ izhara akʉ mawũãsia: Mʉãrã zhãrãta ũdukua kꞌobꞌʉa bakuru kĩrãkꞌa, mawũãmina ũdu kꞌobꞌʉa wã chubꞌeta.

²⁵Mawũãĩ wakusa juwuata dabʉza ʉ̃rʉ̃ bꞌʉbʉrʉba ne ũdubisia. Aramaʉ̃ne ne ũdu bꞌesia, mawũẽ wawarauba bi-ia ũdusia ne jõma. ²⁶Mobebʉrʉ dedꞌaa zokꞌabʉrʉta mawũãsia: Pʉwʉrʉdꞌera edꞌa wãrãrũã, miõã jararãrũã pʉwʉrʉdꞌera.

Jesús zhãrã Ẽdrʉbita jaradꞌa Pedroba

(Mateo 16:13-20; Lucas 9:18-21)

²⁷Jesús izha jʉrʉkuadꞌa bawara wãsidꞌa pʉwʉrʉ zake tabꞌeza Cesarea Filipo druadꞌe. Maʉ̃ne odꞌera izha jʉrʉkuadꞌaa widꞌi mawũãsia: ¿Zhãrãbara mʉrã kꞌaita jara panʉ?

²⁸Mawũãĩ ãzhara panaʉ̃ mawũãsidꞌa: Ʉ̃kʉrʉbara jarabada bʉra Juan Burukꞌoemiãta, ʉ̃kʉrʉbara jarabada bʉra Elíata, ʉ̃kʉrʉbara jarabada bʉra Daizezeba bedꞌeata jarabibari bꞌeadꞌata iabꞌaʉta. ²⁹Mawũãnaĩ izhara mawũãsia: ¿Kꞌõbe marãma mʉrã kꞌaipe?

Mawũãĩ Pedroba panaʉ̃ mawũãsia: Bʉra zhãrã Ẽdrʉbia.

³⁰Mawũãĩ izhara jarasia maʉ̃ta izhidꞌebemata jaradꞌa ẽbamarẽã miõã.

Jesúsba jaradꞌa izhi beadꞌaita

(Mateo 16:21-28; Lucas 9:22-27)

³¹Jesúsbara jarakꞌasia izhi Beubari Bape bꞌʉra biodꞌe zuburiai barata, seribidꞌa ẽbaita nokꞌorãba, sacerdoterã nokꞌorãba, ũrãgꞌa Moisédꞌe jarabadaba. Jarasia aramaʉ̃ne beadꞌaita, maʉ̃ta piradrʉita ewari ũbeadꞌe. ³²Maʉ̃ta jarabʉrʉra jipa jarasia. Mawũẽ Pedroba jãpe edepe kẽãsia. ³³Mawũãmina izhira pʉrʉwape izha jʉrʉkuadꞌata akʉkua Pedrota kẽãbʉrʉ kĩrãkꞌa mawũãsia: ¡Ãĩ wãrũã mʉ kĩrãbitaubara ãtõmiã! Bʉra krĩcha ẽã Daizeze kĩrãkꞌara, awuarabʉrʉ krĩcha bꞌʉa beubari bꞌe kĩrãkꞌa.

³⁴Mawũãpe zhãrãta izha jʉrʉkuadꞌa bawara trʉ̃pe mawũãsia: Iabꞌaʉba mʉta pẽwã krĩña bꞌʉbʉrʉ bʉzha krĩñata aribꞌaerãrũã, awuarabʉrʉ bebudꞌe basiidꞌu mʉrã pẽwãdua. ³⁵Mʉ kꞌarea beu krĩña ẽãrã aduaya, mawũãmina mʉ kꞌarea bedꞌea biata mʉrẽ kꞌarea beubʉrʉra ẽdrʉya. ³⁶¿Zhãrãĩtara kꞌãrẽ biata bꞌaipe ẽjũãne nʉmʉta jõma izhidꞌeta nʉmʉbʉrʉdꞌe izhi jawureta aduara? ³⁷¿O zhãrãbara kꞌãrẽta dia bꞌeipe izhi jawureta ẽdrʉbiira?

³⁸Iabꞌa mʉ kꞌarea mʉ bedꞌea kꞌarea pera bꞌʉta kꞌazhirua omiãrãta wawiaba mawũã bꞌaibʉrʉ, mʉ Beubari Bape bꞌadꞌabara maʉ̃ mʉrẽ ẽã aya mʉ zebʉrʉdꞌera mʉ Zeze zareaedꞌa izhi ángelerã bawara.

¹Dewara mawũãsia: Mʉã wãrĩnu marãã jaraya, ʉ̃kʉrʉ nama kꞌobꞌebara beudꞌai nawedꞌa ũdudꞌaya Daizezeta Nokꞌodꞌebema zesita zarea bara.

Jesús awuaradꞌa

(Mateo 17:1-13; Lucas 9:28-36)

²Maʉ̃ tẽã ewari seis babʉrʉdꞌera Jesúsbara edesia Pedrota, Jacobota, Juanta, maʉ̃rãta ãzhi dobꞌa jʉre edesia kꞌatuma ʉ̃tʉ nʉmʉĩnu. Mama awuarasia ãzhi kĩrãbita. ³Izhi wuara totroa ʉ̃nasia, druadꞌera wua tõbaribara mawũã totroa o bꞌe ẽã. ⁴Maʉ̃nerã ũdusidꞌa Moiséta, Elíata, bedꞌea kꞌopanasia Jesús bawara. ⁵Mawũẽ Pedrobara Jesúa mawũãsia: Miã Ũrãgꞌabari, biga dazhirã nama kꞌobꞌera, mawũẽ de kꞌãĩdeta ũbea odꞌaya abꞌa bʉita, abꞌa Moiséita, abꞌa Elíaita.

⁶Pedrobara sãwũãta kꞌawua ẽãta mawũã bedꞌeasia ãzhira pera kꞌobꞌeba. ⁷Maʉ̃ne ãzhi ʉ̃rʉ̃ zesia jãrãrãta, maʉ̃ jãrãrãneba Daizezeta bedꞌeabʉrʉta mawũãsia: Naʉ̃ mʉ Warra mʉãrã kʉãgꞌa, izhi bedꞌeara ũrĩũdua. ⁸Audre ẽãne akʉbʉdadꞌera ãzhi bawara miõta ũdudꞌa ẽbasia, awuarabʉrʉ ũdusidꞌa Jesústa abꞌabai.

⁹Kꞌatumaneba yedꞌa ãzhi urudꞌe Jesúsbara jarasia ãzha ũdubʉdara miõã jaradꞌa ẽbamarẽã, izhi Beubari Bape bꞌʉta beudꞌata piradrʉyeedꞌa. ¹⁰Mawũẽ maʉ̃ bedꞌeara ãzhi bitabai kꞌawua duanebʉdata bedꞌea duanesia sãwũã mawũã beudꞌata piradrʉita. ¹¹Mawũẽ widꞌi mawũãsidꞌa: ¿Ũrãgꞌa Moisédꞌe jarabadabara kꞌãrẽã jarabada zhãrã Ẽdrʉbiita zei nawedꞌa Elíata naara zeita?

¹²Mawũãnaĩ Jesúsbara panaʉ̃ mawũãsia: Elíara wãrĩnu naara zeya, mobe ne jõma araa oya. ¿Zhi bꞌʉma ẽka mʉ Beubari Bape bꞌʉra biodꞌe zuburiai barata, seribidꞌa ẽbaita? ¹³Mawũãmina mʉã marãã jaraya, Elíara ya zesia, maʉ̃ta ãzha krĩñane osidꞌa izhi sãwũã odꞌaita zhi bꞌʉmane.

Jesúsba bꞌebidꞌa kũrã wawa bꞌʉta

(Mateo 17:14-21; Lucas 9:37-43)

¹⁴Kꞌatumaneba Pedrota, Jacobota, Juanta Jesús bawara zebʉdata dewaraurã izha jʉrʉkuadꞌata kꞌobꞌe maẽ zebʉrʉdꞌera, ũdusia maʉ̃rã kꞌabanaba bʉredrʉ nʉmʉta, ũrãgꞌa Moisédꞌe jarabadata bĩ ẽã bedꞌea kꞌobꞌeasia ãzhi bawara. ¹⁵Zhãrã jõmaʉ̃ba ũdudꞌai bia akʉdrua izhima wãẽbadꞌape: ¡Kʉa! asidꞌa.

¹⁶Mawũẽ izhara widꞌi mawũãsia: ¿Marã kꞌãrẽta jara bĩ ẽã bedꞌea kꞌobꞌe ãzhi bawara?

¹⁷Mawũãĩ kꞌabananebemaba abꞌaʉba panaʉ̃ mawũãsia: Miã Ũrãgꞌabari, mʉãrã mʉ warrata bʉma wesia, jaita abꞌʉba bedꞌeabi ẽã. ¹⁸Maʉ̃ jaibara baridu maẽ jidabʉrʉdꞌera bꞌaebi bꞌʉa, ibꞌa kꞌopepeabaria, kidꞌa kꞌõseseabaria, ʉ̃bꞌʉa tabꞌebaria. Mʉãrã bʉa jʉrʉkuadꞌaa jarasia ãĩ jʉretadꞌamarẽã, mawũãmina bꞌedꞌa ẽbasia.

¹⁹Mawũãĩ Jesúsbara panaʉ̃ mawũãsia: ¡Marã soidꞌu duanu ẽã! ¿Mʉrã sõmbeedꞌa marã bawara bꞌaipe? ¿Mʉãrã sõmbeedꞌa zrogꞌa nʉmaĩpe? Kũrã yaya weudua.

²⁰Mawũãĩ webʉdadꞌera jaiba Jesústa ũdui kũrã abꞌaedꞌa wawabibʉrʉba egorodꞌe bꞌaepe burabꞌarisia ibꞌa kꞌopepea. ²¹Jesúsbara zhi zezea widꞌi mawũãsia: ¿Dããrã babʉrʉka kꞌãwũã bꞌʉra?

Mawũãĩ izhara mawũãsia: Wĩña wedꞌauba kꞌãwũã bꞌʉa. ²²Jaibara bꞌaebima bio bꞌaebi bꞌʉa tebʉdꞌe o doedꞌa, aramaʉ̃ne beaita. Mawũãmina bʉa kꞌãrẽ oibʉrʉ daira sozuburiape kꞌarebarua.

²³Mawũãĩ Jesúsbara mawũãsia: Soidꞌu kꞌobꞌa bꞌeibʉrʉ soidꞌu kꞌobꞌʉitara jõma borekea.

²⁴Mawũãĩ aramaʉ̃ta kũrã zezebara nemi jĩgua mawũãsia: Mʉrã soidꞌu kꞌobꞌʉa. Mʉrã wuaabʉrʉ soidꞌu kꞌobꞌaita kꞌarebarua.

²⁵Kꞌabana bʉredrʉbʉdata Jesúsba ũdui jaira kẽãbʉrʉta mawũãsia: Jai zhãrã bedꞌeabi ẽãrã ne ũrĩbi ẽãrã mʉã bʉaa jaraya, kꞌãʉ̃nebara ãĩ wãrũã, mobe wueta edꞌa wãrãrũã kꞌãʉ̃ne.

²⁶Mawũãĩ jaira bꞌiape kũrã abꞌaedꞌa wawabipe ãĩ wãsia. Mawũẽ kũrã beudꞌa kĩrãkꞌa tabꞌebʉrʉba biobara beusia asidꞌa.

²⁷Mawũãmina Jesúsbara juwuadꞌe jidape jiraedabʉrʉba piradrʉsia. ²⁸Jesús deidꞌu zebʉrʉdꞌera izha jʉrʉkuadꞌabara dobꞌaʉa widꞌi mawũãsidꞌa: ¿Daibara kꞌãrẽneba ãĩ jʉreta bꞌedꞌa ẽbasi?

²⁹Mawũãnaĩ Jesúsbara mawũãsia: Jai kꞌãwũã bꞌʉra arakꞌãwũãrã ãĩ wã ẽã, awuarabʉrʉ ãĩ wã bꞌʉa nekꞌo ẽã zhiwidꞌi.

Jesúsba wakusa jaradꞌa izhi beadꞌaita

(Mateo 17:22-23; Lucas 9:44-45)

³⁰Mamaʉ̃ba wãbʉrʉdꞌera berabꞌari wãsidꞌa Galilea druadꞌe. Jesúsbara krĩña ẽbasia izhi sãma kꞌobꞌʉta zhãrãba kꞌawuadꞌaira. ³¹Maʉ̃ẽnabema izhara ũrãgꞌa nʉmasia izha jʉrʉkuadꞌata, maʉ̃nerã mawũãsia: Mʉ Beubari Bape bꞌʉra zhãrã juwuadꞌe chãbꞌaridꞌaya, maʉ̃nerã beadꞌaya. Mawũãmina beudꞌata piradrʉya ewari ũbeadꞌe.

³²Maʉ̃ta jarabʉrʉra ãzhara sãwũãta kꞌawuadꞌa ẽãta perasidꞌa widꞌidꞌaita.

¿Kꞌaita audre zhi zromape?

(Mateo 10:42; 18:1-9; Lucas 9:46-50; 17:1-2)

³³Capernaúm pʉwʉrʉedꞌa zepe dedꞌa kꞌobꞌʉdꞌe izha jʉrʉkuadꞌaa widꞌi mawũãsia: ¿Mazhirãĩnurã marã kꞌãrẽã bĩ ẽã bedꞌeasidꞌa odꞌera?

³⁴Mawũãĩ ãzhira chupeasidꞌa, odꞌe ãzhirãĩnu bĩ ẽã bedꞌeasidꞌa baera kꞌaita audre zhi zroma ʉ̃rʉ̃. ³⁵Mawũẽ Jesús jewedꞌape izha jʉrʉkuadꞌa doceta trʉ̃pe mawũãsia: Iabꞌa zhi zromata bꞌa krĩña bꞌʉbʉrʉ, jõmaʉ̃ kꞌãñabara zhi zroma ẽãne bꞌaibara, aramaʉ̃ne dewaraurãta jõma aribꞌaebarita bꞌaibara. ³⁶Mawũãpe wũãwũãta ãzhi ẽsadra kꞌobꞌʉpe juwuadꞌe edape mawũãsia: ³⁷Mʉnebemata ĩjã bꞌʉdꞌeba iabꞌaʉba naʉ̃ wũãwũã kĩrãkꞌa bꞌʉta bia edabʉrʉra mʉta bia edabʉrʉa, mʉta bia edabʉrʉra bari mʉta bia edabʉrʉ ẽã, awuarabʉrʉ bia edabʉrʉa mʉ zokꞌadꞌata.

Dazhi jura ẽãrã dazhi bawarabema

(Lucas 9:49-50)

³⁸Juanbara mawũãsia: Miã Ũrãgꞌabari, daibara iabꞌa ũdusidꞌa bʉ trʉ̃neba jai ãĩ jʉrekua nʉmʉta, mawũãmina izhara dazhirã pẽwã bꞌʉ ẽã, mawũẽ daibara jarasidꞌa maʉ̃ kꞌaudꞌa bꞌa ẽbamarẽã.

³⁹Mawũãĩ Jesúsbara mawũãsia: Maʉ̃ kꞌaudꞌa bꞌa ẽbamarẽã jararãũdua, mʉ trʉ̃neba ũdudꞌakꞌata obꞌʉbara tẽãne mʉrã bĩ ẽã jara ẽã. ⁴⁰Dazhi jura ẽãrã dazhi bawarabema. ⁴¹Bariduba marã baniã diabʉrʉta marã mʉrẽ baera mawũã diara, mʉã wãrĩnu marãã jaraya, Daizezebara maʉ̃barira kꞌãrẽ diaya.

Zhãrãta bꞌaebibʉrʉdꞌebema

(Mateo 18:6-9; Lucas 17:1-2)

⁴²Bariduba abꞌa kꞌazhiruadꞌe bꞌaebibʉrʉta za zhi zromarã ẽãta mʉnebema ĩjã bꞌeta mawũã ora, maʉ̃ Daizezebara pua kꞌawua oya. Mawũẽ biga bakꞌausia osidaudꞌe yuta tãjʉ̃nape bꞌaribuedꞌaita pusadꞌe. ⁴³Bʉ juwuaba bʉta kꞌazhiruadꞌe bꞌaebiidꞌebema orãrũã, aramaʉ̃ne bʉ juwuara bꞌʉatubʉrʉkarua. Audre biga Daizeze ũme bꞌai jõ ẽã maẽ edꞌa wãĩta juwua abꞌa bꞌʉta, juwua ũme bꞌʉta wãĩ kꞌãñabara tebʉ kikꞌadꞌe. ⁴⁴Mama bꞌeta zuburia onʉmʉrã kira beu ẽã, tebʉsidꞌa kikꞌata nʉmʉã. ⁴⁵Bʉ jẽrũba bʉta kꞌazhiruadꞌe bꞌaebiidꞌebema orãrũã, aramaʉ̃ne bʉ jẽrũrã bꞌʉatubʉrʉkarua. Audre biga Daizeze ũme bꞌai jõ ẽã maẽ edꞌa wãĩta jẽrũ abꞌa bꞌʉta, jẽrũ ũme bꞌʉta bꞌaribuedꞌai kꞌãñabara tebʉ kikꞌadꞌe. ⁴⁶Mama bꞌeta zuburia onʉmʉrã kira beu ẽã, tebʉsidꞌa kikꞌata nʉmʉã. ⁴⁷Bʉ dabʉba bʉta kꞌazhiruadꞌe bꞌaebiidꞌebema orãrũã, aramaʉ̃ne bʉ dabʉra ẽũtabʉrʉkarua. Audre biga Daizezeta Nokꞌota bꞌʉ maẽ edꞌa wãĩta dabʉ abꞌa bꞌʉta, dabʉ ũme bꞌʉta bꞌaribuedꞌai kꞌãñabara tebʉdꞌe. ⁴⁸Mama bꞌeta zuburia onʉmʉrã kira beu ẽã, tebʉsidꞌa kikꞌata nʉmʉã. ⁴⁹Marã Daizezebara jõma mitia ne ẽã okuaya. Aramaʉ̃nerã ne adua ẽbamarẽã ne jõma tebʉba ba bada kĩrãkꞌa tãba serabada kĩrãkꞌa okuaya. ⁵⁰Tãrã biga, mawũãmina kʉya ẽbʉrʉ, ¿kꞌãrẽba kʉyabidꞌaipe? Tã biga kĩrãkꞌa bꞌeba zhiya adu-a bꞌeaudua.

Jesúsba jaradꞌa kĩma ãmaĩrã kꞌazhiruata

(Mateo 19:1-12; Lucas 16:18)

¹Mama Capernaúm pʉwʉrʉdꞌebara Jesús wãbʉrʉta, Judea druaedꞌa wãsia do Jordán kĩrãrẽ. Mawũẽ zhãrãbara izhira wakusa bʉredrʉsidꞌa, mawũẽ wakusa miã ũrãgꞌasia izhi bꞌʉ kĩrãkꞌa. ²Maʉ̃ne fariseorãbara orradꞌape wãẽãbidꞌai kꞌarea widꞌisidꞌa zhũmakĩrãbara ãmasia bꞌʉ kꞌawuaita izhi wũẽrã. ³Mawũẽ Jesúsbara panaʉ̃ mawũãsia: ¿Moisébara sãwũã jarasi?

⁴Mawũãĩ ãzhara mawũãsidꞌa: Moisébara idaribisia ãmaĩnebemata kꞌarta diamarẽã aramaʉ̃ne ãmaĩta.

⁵Mawũãnaĩ Jesúsbara panaʉ̃ mawũãsia: Aribꞌaedꞌa ẽbaita marã sora zare baera mawũã bꞌʉsia. ⁶Mawũãmina jẽdeuba osidꞌera zhũmakĩrãta, wũẽrãta osia Daizezebara. ⁷Maʉ̃neba zhũmakĩrãbara ãmaẽ bꞌʉa zezera, papara, aramaʉ̃ne izhi wũẽrã ũme pane bꞌʉa. ⁸Aramaʉ̃ne ũmeta kꞌakua abꞌa pane bꞌʉa, mawũẽ ya ũme ẽã, awuarabʉrʉ kꞌakua abꞌabaia. ⁹Aramaʉ̃ne Daizezeba ãba bꞌʉdꞌara zhi ãmabiidꞌe bꞌʉ ẽã zhãrãbara.

¹⁰Izha jʉrʉkuadꞌabara dedꞌa maʉ̃ abꞌaʉta Jesúa widꞌisidꞌa. ¹¹Mawũẽ mawũãsia: Bariduba izhi wũẽrãta ãmape awʉrʉta kꞌãĩbʉrʉra kꞌazhiruata oya zhi kĩma bĩ ẽã obʉrʉba. ¹²Wũẽrãba zhi kĩmata ãmape awʉrʉta kꞌãĩbʉrʉra kꞌazhiruata oya.

Jesúsba ibia jaradꞌa wũãwũãrãta

(Mateo 19:13-15; Lucas 18:15-17)

¹³Wũãwũãrãta Jesúsma wesidꞌa ibia jara tõbꞌarimarẽã. Mawũãmina izha jʉrʉkuadꞌabara kẽãsidꞌa zhi webʉdata. ¹⁴Jesúsba maʉ̃ta ũdui bĩ ẽãpe mawũãsia: Wũãwũãrã mʉma idu zebiudua, bueamarãũdua, naʉ̃rãne kĩrãkꞌa izhi krĩcha bꞌetrʉ Daizezeta Nokꞌodꞌebema. ¹⁵Mʉã wãrĩnu marãã jaraya, iabꞌaʉba Daizezeta Nokꞌodꞌebemata wũãwũãne kĩrãkꞌa krĩcha ẽbʉrʉ maʉ̃nebemanerã edꞌa wã ẽã.

¹⁶Mawũãpe wũãwũãrã juwuadꞌe edape juwua ãzhi ʉ̃rʉ̃ bꞌʉpe ibia jarasia.

Kũrãta bara bꞌadꞌa

(Mateo 19:16-30; Lucas 18:18-30)

¹⁷Jesús wãne iabꞌa wãẽba zepe izhi kĩrãbita sãkꞌokꞌodꞌe kꞌobꞌepe widꞌi mawũãsia: Miã Ũrãgꞌabari, bʉra biata bꞌʉa, ¿mʉãrã kꞌãrẽta oi barape Daizeze ũme bꞌai jõ ẽãta jidaira?

¹⁸Mawũãĩ Jesúsbara mawũãsia: ¿Bʉara mʉrã kꞌãrẽã biata jarabʉrʉ? Miõta biata bꞌʉ ẽã, awuarabʉrʉ biara abꞌabai bꞌʉa Daizezeta. ¹⁹Daizezeba aribꞌaemarẽã jara bꞌʉra bʉara kꞌawua bꞌʉta mawũã bꞌʉa: Kĩma ẽãta erukꞌãĩrãrũã. Miã bearãrũã. Nezrʉgarãrũã. Zhãrã ʉ̃rʉ̃ sewa nebʉrʉrãrũã. Zhãrãta sewarãrũã. Wawiarua bʉ zezera bʉ papara. ²⁰Mawũãĩ kũrãbara mawũãsia: Miã Ũrãgꞌabari, mʉãrã maʉ̃ jõma aribꞌae bꞌʉa kũrã wedꞌauba. ²¹Mawũãĩ Jesúsbara ibiadꞌe akʉpe mawũãsia: Bʉara ne abꞌa aribꞌaeita wãẽã bꞌʉa. Mawũẽ wãpe, bʉzha ne erubꞌʉta jõma nendope, platara zuburia bꞌea diadua, mawũãrã ne biata erubꞌaya ʉ̃tre. Aramaʉ̃ne zepe mʉta pẽwãdua bebudꞌe basiidꞌu.

²²Kũrãbara maʉ̃ bedꞌeata ũrĩpe sopua wãsia kꞌãbãẽã bara bꞌʉ baera.

²³Mawũẽ Jesúsbara pʉrʉwa akʉpe izha jʉrʉkuadꞌaa mawũãsia: ¡Daizezeta Nokꞌodꞌebemane edꞌara borekea edꞌa wãna ẽã bara bꞌera!

²⁴Izha jʉrʉkuadꞌara kꞌawua ẽã krĩchasidꞌa maʉ̃ta jarabʉrʉba, mawũẽ Jesúsbara wakusa mawũãsia: ¡Daizezeta Nokꞌodꞌebemane edꞌara borekea edꞌa wãna ẽã ne biota krĩcha bꞌera! ²⁵Aguja uriadꞌe camellota audre bia berabꞌari bꞌeya bara bꞌʉta edꞌa wãĩ kꞌãñabara Daizezeta Nokꞌodꞌebemane.

²⁶Mawũãĩ ãzhira wuaabʉrʉ kꞌawua ẽã krĩcha ãzhirãĩnu mawũãsidꞌa: ¿Bara bꞌʉsidꞌa mawũãbʉrʉ kꞌaita ẽdrʉipe?

²⁷Maʉ̃ne Jesúsbara ãzhi akʉ mawũãsia: Ẽdrʉira zhãrãĩtara boreke ẽã, mawũãmina Daizezebara ẽdrʉbi bꞌeya, ne jõma boreke baera Daizezeitara.

²⁸Mawũãĩ Pedroba mawũãsia: Daibara ne jõma ãmaẽsidꞌa, mobe bʉta pẽwã bꞌea.

²⁹Mawũãĩ Jesúsbara panaʉ̃ mawũãsia: Mʉã wãrĩnu marãã jaraya, iabꞌaʉba deta ãmaẽrã, zhi mebẽrã zhũmakĩrãrãta, nawekꞌaurãta ãmaẽrã, zezeta, papata, wũẽrãta, warrarãta, druata, mʉ kꞌarea ãmaẽrã, bedꞌea biata mʉnebemata jarai kꞌarea ãmaẽrã, ³⁰idꞌi ewade ãmaña jidama cien jidaya deta, mebẽrã zhũmakĩrãrãta, nawekꞌaurãta, paparãta, warrarãta, druata. Baridua zuburia odꞌaimina mawũã jidaya, aramaʉ̃ne ewari tẽã nʉmaĩta zeidꞌera jidaya Daizeze ũme bꞌai jõ ẽãta. ³¹Mawũãmina bio zhi zromata bꞌera zhi zroma ẽãta duaneña, waya zhi zroma ẽãta bꞌeta zhi zromata duaneña.

Jesúsba jarama ũbeata jaradꞌa izhi beadꞌaita

(Mateo 20:17-19; Lucas 18:31-34)

³²Odꞌe wãsidꞌa wãrĩze wãta Jerusalén pʉwʉrʉedꞌa, Jesús na taidꞌe izha jʉrʉkuadꞌara pera kuatebasia, izhi kꞌaidꞌu wãbʉdara pera kuatebasia. Mawũẽ doce izha jʉrʉkuadꞌata wakusa awuara jʉre edape izhi sãwũã berabꞌariita jara mawũãsia: ³³Dazhirã wãrĩze wã Jerusalén pʉwʉrʉedꞌa, mʉ Beubari Bape bꞌʉra maĩnu chãbꞌaridꞌaya sacerdoterã nokꞌorãta bꞌea, ũrãgꞌa Moisédꞌe jarabadata bꞌea, maʉ̃rãbara jaradꞌaya mʉrã beadꞌamarẽã, aramaʉ̃ne mʉrã chãbꞌaridꞌaya judíorã ẽãta bꞌea. ³⁴Mʉrã ãzhima sewakꞌau bꞌʉdꞌeba udꞌaya, dau idꞌodꞌaya, aramaʉ̃ne beadꞌaya, mawũãmina ewari ũbeadꞌe beudꞌata piradrʉya.

Kꞌãrẽ widꞌidꞌapeadꞌa Jacoboba Juanba

(Mateo 20:20-28)

³⁵Jacobo, Juan, Zebedeo warrarãba Jesús orradꞌape mawũãsidꞌa: Miã Ũrãgꞌabari, daibara krĩña panʉã bʉa aribꞌaeita daiba widꞌibʉdata.

³⁶Mawũãnaĩ mawũãsia: ¿Mʉã kꞌãrẽta oita krĩña panʉ?

³⁷Mawũãĩ mawũãsidꞌa: Bʉta Nokꞌota bꞌebʉrʉ maẽ daita nokꞌo babi jewedꞌabigarua abꞌa bʉ juwua araare, abꞌa bʉ juwua ãkꞌaare.

³⁸Mawũãnaĩ Jesúsbara mawũãsia: Marãbara kꞌawuadꞌa ẽã kꞌãrẽ widꞌi panʉrã. ¿Marã zuburiaita panʉka mʉ zuburiai kĩrãkꞌara?

³⁹Mawũãĩ ãzhara mawũãsidꞌa: Daibara bꞌedꞌaya.

Mawũãnaĩ Jesúsbara mawũãsia: Marã wãrĩnu mʉ zuburiai kĩrãkꞌara zuburiadꞌaya. ⁴⁰Mawũãmina mʉ juwua araare, mʉ juwua ãkꞌaare jewedꞌabigaira mʉãrã diaidꞌe bꞌʉ ẽã, awuarabʉrʉ jewedꞌa paneña Daizezeba maʉ̃ĩta zhi aribꞌaemata.

⁴¹Zhi diezba maʉ̃ta ũrĩnaĩ kĩrũsidꞌa Jacoboa Juanʉã. ⁴²Mawũẽ Jesúsbara trʉ̃kuape mawũãsia: Marãbara kꞌawua bꞌea naʉ̃ ẽjũãne nokꞌota bꞌebara zhãrã ãzhi edre erunʉmeã, zhi zromata bꞌera aramaʉ̃ne zhãrã ʉ̃rʉ̃ zarea nʉmeã. ⁴³Mawũãmina marã mawũã duanaĩne bꞌʉ ẽã, awuarabʉrʉ marãnebema zhi zromata bꞌa krĩña bꞌʉra bꞌaibara dewaraurãta aribꞌaebarita. ⁴⁴Marãnebema zhi zromata bꞌa krĩña bꞌʉra bꞌaibara jõmaʉ̃ nezokꞌata. ⁴⁵Aramaʉ̃ kĩrãkꞌa mʉ Beubari Bape bꞌʉra ze ẽbasia zhãrãba aribꞌaedꞌamarẽã, awuarabʉrʉ zesia zhãrã aribꞌaeita, aramaʉ̃ne mʉ bebura diaya zhãrã jõmaʉ̃bari.

Bartimeo daʉbꞌerrea bꞌʉta ne ũdubidꞌa

(Mateo 20:29-34; Lucas 18:35-43)

⁴⁶Jericó pʉwʉrʉedꞌa zekuape Jericódꞌeba Jesús izha jʉrʉkuadꞌa bawara wãbʉrʉdꞌera kꞌabanata kꞌaidꞌu wãsidꞌa, maʉ̃ne Bartimeo daʉbꞌerrea bꞌʉta Timeo warrata o kꞌaita jewedꞌa bꞌʉta nebari widꞌi bꞌasia. ⁴⁷Maʉ̃ne Jesús Nazaredꞌebemata ũrĩĩ nemi jĩgua mawũãsia: ¡Jesús, bʉra rey Davidꞌeba uruta bꞌʉba mʉrã sozuburiarua!

⁴⁸Mawũãĩ bioba kẽãsidꞌa chupeamarẽã, mawũãmina izhara audre bꞌia mawũãsia: ¡Bʉra Davidꞌeba uruta bꞌʉba mʉrã sozuburiarua!

⁴⁹Mawũãĩ Jesús pi nʉmepe trʉ̃namarẽã jarabʉrʉba trʉ̃ mawũãsidꞌa: Wãniguarua, piradrʉrua, bʉra trʉ̃ kꞌobꞌʉa.

⁵⁰Mawũãnaĩ wua ãnebꞌari bꞌʉta bꞌaribuepe piradrʉpe zesia Jesúsma. ⁵¹Mawũẽ Jesúsbara mawũãsia: ¿Bʉara mʉã kꞌãrẽta oita krĩñape?

Mawũãĩ daʉbꞌerrea bꞌʉbara mawũãsia: Miã Ũrãgꞌabari, mʉta ne ũdubirua.

⁵²Mawũãĩ Jesúsbara mawũãsia: Wãrũã, bʉra soidꞌu kꞌobꞌʉba ẽdrʉbʉrʉa.

Audre ẽãne ne ũdusia, mawũẽ Jesús kꞌaidꞌu tebasia odꞌe.

Jesús edꞌa wãna Jerusalénne

(Mateo 21:1-11; Lucas 19:28-40; Juan 12:12-19)

¹Jerusalén kꞌaita babʉdadꞌe, Betfagé pʉwʉrʉ kꞌaita Betania pʉwʉrʉ kꞌaita zebʉdata, Olivo kꞌatuma kĩrãbita zebʉdadꞌera, Jesúsbara izha jʉrʉkuadꞌata ũme zokꞌabʉrʉta, ²mawũãsia: Pʉwʉrʉ zakeidꞌu wãũdua jari mazhi kĩrãbita tabꞌʉidꞌu, kꞌãma edꞌa wãbʉdadꞌera ũdudꞌaya burro kũrãta jʉ̃ nʉmʉta, maʉ̃nerã miõta bꞌarikꞌa, maʉ̃ta ẽnape weudua. ³Iabꞌaʉba widꞌibʉrʉta: ¿Kꞌãrẽã kꞌãwũã obʉda ara? Nokꞌoba nesidꞌa adꞌape nane diabꞌariya audua.

⁴Mawũãĩ wãbʉdadꞌera ũdusidꞌa burro kũrãta jʉ̃ nʉmʉta ãĩ puertama, mawũẽ ẽnasidꞌa. ⁵Ʉ̃kʉrʉ mama kꞌobꞌebara mawũãsidꞌa: ¿Marãbara kꞌãrẽã ẽnabʉda kꞌãʉ̃ burrora?

⁶Mawũãnaĩ ãzhara jarasidꞌa sãwũã jaraita Jesúsba jaradꞌadꞌe, mawũẽ idaribisidꞌa. ⁷Aramaʉ̃ne burrora wesidꞌa Jesúsma, mobe ʉ̃rʉ̃ bꞌʉsidꞌa ãzhidꞌe wua ãnebꞌari panʉta, mobebʉrʉ Jesús jewedꞌasia ʉ̃rʉ̃. ⁸Biobara bia edabʉdata ãzhidꞌe wua ãnebꞌari bꞌeta odꞌe ewarazoasidꞌa, dewaraurãbara pãrãrã kiduata tʉdꞌape odꞌe tadꞌazoasidꞌa. ⁹Zhãrãbara na wãba tẽã uruba nemi jĩgua mawũãsidꞌa:

¡Bʉra ibia jaradꞌaya!

¡Ibia jaradꞌaya Daizezedꞌeba zebʉrʉra! (Salmos 118:25-26)

¹⁰¡Nokꞌora ibia jaradꞌaya zõrã dazhirãta bꞌadꞌadꞌeba rey Davidꞌeba zebʉrʉra! ¡Daizezera ibia jaraudua ʉ̃trera!

¹¹Aramaʉ̃ne Jesús Jerusalénne edꞌa wãbʉrʉdꞌera, Daizeze dedꞌa ewara maẽ wãpe ne jõma akʉkuape keu baera Betania pʉwʉrʉedꞌa wãsia izha jʉrʉkuadꞌata doce bawara.

Ikꞌazhirua jaradꞌa higuera ta ne ẽãta

(Mateo 21:18-19)

¹²Nrũẽma Betania pʉwʉrʉdꞌeba wãbʉdadꞌera jarrasia Jesús. ¹³Maʉ̃ne wawarauba ũdusia bakuru higuera kidua bara nʉmʉta, mawũẽ akʉdꞌe wãsia zhi ta bꞌʉ kꞌawuaita, mawũãmina maĩnu jũẽbʉrʉdꞌera zhi kiduatrʉ ũdusia higo zaubari ewari ẽbaera. ¹⁴Mawũẽ Jesúsbara higuera nʉmʉã mawũãsia: Bʉ tara miõba wueta kꞌo ẽã.

Maʉ̃ta ũrĩsidꞌa izha jʉrʉkuadꞌabara.

Jesúsba miti ẽã odꞌa Daizeze deta

(Mateo 21:12-17; Lucas 19:45-48; Juan 2:13-22)

¹⁵Jerusalén pʉwʉrʉedꞌa zebʉdadꞌera Jesús edꞌa wãsia Daizeze dedꞌa ewara maẽ, mobe ãĩ jʉrekuasia mama ne nendo bꞌeta ne eda bꞌeta. Mesara burekuasia plata kꞌãbiabadadꞌera, buguera burekuasia pusirã nendobadadꞌera. ¹⁶Mobe Daizeze dedꞌa ewara maẽ miõta idu berabꞌaribi ẽbasia ne edeira. ¹⁷Maʉ̃nerã miã ũrãgꞌabʉrʉta mawũãsia: ¿Naʉ̃ẽnabemata zhi bꞌʉmata mawũã bꞌʉ ẽka:

Mʉ dera zhiwidꞌibadata nʉmʉã adꞌaita jõmaʉ̃ĩtabemata nʉmaña abꞌʉ ẽka? Mawũã bꞌʉdꞌera marãbara nezrʉgamiãrã de babi nʉmʉkꞌãrĩna. (Isaías 56:7)

¹⁸Maʉ̃ta ũrĩnaĩ ũrãgꞌa Moisédꞌe jarabadabara sacerdoterã nokꞌorãbara krĩcha jʉrʉsidꞌa sãwũã beadꞌaita. Ãzhara wawia bꞌeasia jõmaʉ̃ba bia ũrĩ bꞌeba izhi ũrãgꞌata. ¹⁹Mawũãmina keubʉrʉdꞌera Jesús ãĩ wãsia Jerusalénnebara.

Higuera ikꞌazhirua jaradꞌata bagudꞌa

(Mateo 21:20-22)

²⁰Diapedꞌa berabꞌaribʉdadꞌera ũdusidꞌa bakuru higuera bagudꞌata kꞌarradꞌeba. ²¹Mawũẽ Pedrobara bude bape mawũãsia: Miã Ũrãgꞌabari, akʉdua, bakuru higuera bʉa ikꞌazhirua jaradꞌara bagusia.

²²Mawũãĩ Jesúsbara panaʉ̃ mawũãsia: Soidꞌu kꞌobꞌa bꞌeaudua Daizeze ũme. ²³Mʉã wãrĩnu marãã jaraya, bariduba kꞌatuma za nʉmʉã jarabʉrʉta: Ãĩ wãrũã, pusadꞌe doidꞌu wãrũã abʉrʉta, izhi soma bꞌe ẽãne kꞌobꞌʉ ẽbʉrʉ, awuarabʉrʉ soidꞌu kꞌobꞌʉba izha jara kꞌobꞌʉra aribꞌae nʉmaẽdaidꞌe kꞌobꞌʉra, izha jarabʉrʉra aribꞌae nʉmaẽdaya. ²⁴Maʉ̃ba mʉã marãã jaraya, jõma marãba widꞌibʉdara zhiwidꞌi soidꞌu kꞌobꞌeaudua jidadꞌaita, mawũãrã marãma zeya. ²⁵Marã zhiwidꞌi kꞌobꞌedꞌera bedꞌea ne ẽãne edaudua iabꞌaʉ bawara bĩ ẽã bꞌebʉrʉ, marã Zeze ʉ̃tre bꞌʉbidꞌa marã bedꞌea ne ẽã bꞌʉkuamarẽã marãba bia ẽãta odꞌapeadꞌata biodꞌeba. ²⁶Marã bĩ ẽã odꞌata marãba bedꞌea ne ẽãne edadꞌa ẽbʉrʉ, marã Zeze ʉ̃tre bꞌʉbidꞌa marã bedꞌea ne ẽã bꞌʉ ẽã marãba bia ẽãta odꞌapeadꞌata biodꞌebara.

Zareata Jesúsdꞌe

(Mateo 21:23-27; Lucas 20:1-8)

²⁷Wakusa Jerusalén pʉwʉrʉedꞌa zekuape Daizeze dedꞌa ewara maẽ Jesús taidꞌe, izhima zesidꞌa sacerdoterã nokꞌorãta, ũrãgꞌa Moisédꞌe jarabadata, nokꞌorãta. ²⁸Mobe mawũãsidꞌa: ¿Kꞌaiba obi bꞌʉ bʉa obꞌʉra? ¿Kꞌaiba diasi zareara bʉa obꞌʉta onʉmaĩrã?

²⁹Mawũãnaĩ Jesúsbara panaʉ̃ mawũãsia: Mʉãbidꞌa marãã widꞌiya. Panuũdua, mawũãrã mʉãrã marãã jaraya kꞌaiba obi bꞌʉta mʉã obꞌʉra. ³⁰Zhãrã buru kꞌoemarẽã Juan, ¿Ʉ̃trebemaba zokꞌasika o zhãrãba? Panuũdua.

³¹Mawũãĩ ãzhirãĩnu mawũãsidꞌa: Dazhirãba Ʉ̃trebemaba zokꞌasia adꞌara, ¿mobera kꞌãrẽã ĩjãna ẽbasi aya? ³²¿Maʉ̃ne dazhirãbara sãwũã zhãrãba zokꞌasia adꞌaipe? Ãzhara aramaʉ̃ne zhãrãta wawiasidꞌa, jõmaʉ̃ma Juan wãrĩnu Daizezeba bedꞌeata jarabibarita bꞌʉ baera. ³³Mawũẽ panaʉ̃bʉdata Jesúa mawũãsidꞌa: Daibara kꞌawuadꞌa ẽã.

Mawũãnaĩ Jesúsbara panaʉ̃ mawũãsia: Mʉãbidꞌa marãã jara ẽã kꞌaiba obi bꞌʉra mʉã obꞌʉra.

Uvadꞌe trajabadata bia ẽãta bꞌeadꞌa

(Mateo 21:33-46; Lucas 20:9-19)

¹Mobebʉrʉ Jesúsbara ne bio jarakꞌa mawũãsia: Ũmakĩrãba uvata upe serrape osia uva bꞌata piabarita. Mobe uva akʉita pãrãsia deta ʉ̃tʉ drasoa, mobe uvadꞌe trajabadaa arrendape wãsia wawara. ²Uva bꞌʉabada ewade nezokꞌata zokꞌasia uvadꞌe trajabadama, uva izhaa diabʉdata jidamarẽã. ³Mawũãmina maʉ̃rãbara jirtopota jirachisidꞌa, aramaʉ̃ne buesidꞌa juwuaawa. ⁴Wakusa nezokꞌa awʉrʉta ãzhima zokꞌabʉrʉra mongꞌaraba tabꞌari puosidꞌa buruta, mobe ikꞌazhirua jarasidꞌa. ⁵Wakusa awʉrʉta zokꞌabʉrʉra beasidꞌa. Dewara bio zokꞌabʉrʉra ʉ̃kʉrʉ jirachisidꞌa, ʉ̃kʉrʉ beasidꞌa.

⁶Wadꞌi abꞌa erubꞌʉta erubꞌasia zhi warra izha kʉãgꞌata. Maʉ̃sidꞌa maʉ̃rãma zokꞌabʉrʉta mawũãsia: Wawiadꞌaya mʉ warrara. ⁷Mawũãmina uvadꞌe trajabadara ãzhirãĩnu mawũãsidꞌa: Ne zhi zezedꞌera naʉ̃ba jidaya. Mawũẽ beadꞌaya, izha jidaita bꞌʉra aramaʉ̃ne dazhirãba jidadꞌaya. ⁸Aramaʉ̃ne jirtopota beasidꞌa, mobe ãĩ bꞌaribuesidꞌa uvadꞌebara.

⁹¿Aramaʉ̃nerã uva zhibaribara sãwũã oipe? Wãpe beakuaya uvadꞌe trajabadara, mobe uva izhidꞌera chãbꞌariya awʉrʉrãã.

¹⁰¿Aramaʉ̃ kĩrãkꞌa mʉ seribidꞌa ẽãnebemata zhi bꞌʉmarã marãbara ledꞌakꞌa kĩrãkꞌa duanu ẽka?:

¿Jara bꞌʉ ẽka de obadaba mongꞌara seri ẽãne bꞌʉdꞌapeadꞌara wagꞌauta bꞌesita.

¹¹Daizezeba mawũã osi baera dazhirãma ne bia abꞌʉ ẽka? (Salmos 118:22-23)

¹²Jida krĩñasidꞌa mawũã ne jarabʉrʉbara ãzhita jarabʉrʉta kꞌawuabʉdaba. Mawũãmina kꞌabanata wawiabʉdaba ãmaẽbʉdata wãsidꞌa.

Rey Romanebemaĩta plata diabadadꞌebema

(Mateo 22:15-22; Lucas 20:20-26)

¹³Fariseorãta ʉ̃kʉrʉ rey Herode pẽwã bꞌeta ʉ̃kʉrʉ Jesúsma zokꞌasidꞌa wãẽã bedꞌeabidꞌamarẽã. ¹⁴Mawũẽ maʉ̃rã zekuape mawũãsidꞌa: Miã Ũrãgꞌabari, daiba kꞌawua bꞌedꞌera bʉara jara bꞌʉa wãrãta, bʉra krĩcha zhãrãneã zhi edebi ẽã bʉara akʉ ẽbaera zhãrãnebemata. Awuarabʉrʉ wãrĩnuta jara bꞌʉa Daizeze ota. ¿Diasia bꞌʉka rey César plata diabadara, o dia bꞌe ẽ? ¿Diadꞌaidꞌe bꞌʉka o diadꞌaidꞌe bꞌʉ ẽ?

¹⁵Jesúsbara kꞌawuasia ãzhira sewa bibaʉta kꞌobꞌeta, mawũẽ mawũãsia: ¿Mʉrã kꞌãrẽã wãẽãbidꞌaita kꞌopanʉ? Denario abꞌa mʉma weudua mʉã akʉita.

¹⁶Ãzha wedꞌai Jesúsbara mawũãsia: ¿Naʉ̃nerã kꞌai zata nʉmʉ, kꞌai trʉ̃ta bꞌʉ nʉmʉ?

Mawũãĩ ãzhara mawũãsidꞌa: Césardꞌea.

¹⁷Mawũãnaĩ Jesúsbara panaʉ̃ mawũãsia: Césardꞌera César diaudua, Daizezedꞌera Daizezea diaudua.

Mawũãĩ bia akʉdruasidꞌa izhira.

Beudꞌata piradrʉdꞌaidꞌebema

(Mateo 22:23-33; Lucas 20:27-40)

¹⁸Maʉ̃ne saduceorãta zesidꞌa Jesúsma, maʉ̃rãbara jara bꞌea beudꞌara piradrʉ ẽãta, mawũẽ widꞌi mawũãsidꞌa: ¹⁹Miã Ũrãgꞌabari, Moisébara bedꞌeata bꞌʉdꞌata mawũãsia: Mebea iabꞌaʉdꞌeta beubʉrʉdꞌe zhi kĩma ãmaẽbʉrʉta warrata ãmaẽ ẽbʉrʉ zhi mebeaba edaibara, aramaʉ̃ne zhi mebea beudꞌata warra barabiya. ²⁰Ewari abꞌa mebẽrãta siete pãĩna bazhia, nabemata miã kꞌãĩpe beusia warra ne ẽã. ²¹Mawũẽ maʉ̃ wũẽrã zhi tẽãbemaba kꞌãĩpe maʉ̃sidꞌa beubʉrʉba warra ãmaẽ ẽbasia. Abꞌarika berabꞌarisia zhi ũbeasidꞌa. ²²Sietera jõma mawũã berabꞌaribʉrʉba miõba warrarã ãmaẽ ẽbasia. Nʉmʉne beusia wũẽrãsidꞌa. ²³Kꞌõbe beudꞌata piradrʉbʉdadꞌera, ¿ãzhirãnebemabara sãʉ̃ba izhi wũẽrã baipe mawũã sieteba ãzhi wũẽrã babidꞌapeadꞌara?

²⁴Mawũãnaĩ Jesúsbara panaʉ̃ mawũãsia: Marã wãẽã bꞌeba maʉ̃ẽnabemata zhi bꞌʉmarã sãwũãta kꞌawuadꞌa ẽã, miã Daizeze zareara sãwũãta kꞌawuadꞌa ẽã. ²⁵Beudꞌata piradrʉbʉdadꞌera miã kꞌãĩna ẽã, awuarabʉrʉ ángelerã ʉ̃tre bꞌe kĩrãkꞌa bꞌeaya. ²⁶Mawũãmina beudꞌata piradrʉdꞌaidꞌebema, ¿marãbara Moisé librodꞌera ledꞌakꞌa kĩrãkꞌa bꞌeta Daizezebara ʉrʉta nʉmʉ maẽba Moiséa mawũãsi ẽka?: ¿Mʉrã Abraham Zhibaria, Isaac Zhibaria, Jacobo Zhibaria asi ẽka? ²⁷Aramaʉ̃nerã Daizezera beukuadꞌa Zhibari ẽã, awuarabʉrʉ zokꞌai bꞌe Zhibaria. Mawũẽ marã biodꞌe wãẽã bꞌea.

Zhi zromata bꞌʉa aribꞌaedꞌai bꞌʉta

(Mateo 22:34-40)

²⁸Ũrãgꞌa Moisédꞌe jarabadaba abꞌaʉba Jesús orrasia, saduceorãba widꞌibʉdata bia panaʉ̃bʉrʉta ũrĩpe widꞌi mawũãsia: ¿Sãʉ̃ta zhi zromape Daizezeba aribꞌaemarẽã jara bꞌʉta jõmaʉ̃nebema?

²⁹Mawũãĩ Jesúsbara jarabʉrʉta panaʉ̃ mawũãsia: Jõmaʉ̃nebema zhi zromata Daizezeba aribꞌaemarẽã jara bꞌʉra mawũã bꞌʉa: Israel bꞌebara ũrĩũdua: Nokꞌo Daizezera abꞌa bꞌʉa. ³⁰Nokꞌo Daizezera soidꞌu kʉãgꞌarua, bʉzhi jawureidꞌuba, bʉzhi krĩchaidꞌuba, bʉzhi zareaidꞌuba. ³¹Maʉ̃ zhi ũmeta dewara mawũã bꞌʉa: Zhãrã kʉãgꞌarua bʉzhi kĩrãkꞌa. Daizezeba aribꞌaemarẽã jara bꞌʉra awʉrʉ audre zhi zroma ne ẽã maʉ̃rã kꞌãñabara.

³²Mobebʉrʉ ũrãgꞌa Moisédꞌe jarabaribara mawũãsia: Miã Ũrãgꞌabari, bʉa wãrĩnuta jarabʉrʉ kĩrãkꞌa Daizezera abꞌa bꞌʉta awʉrʉ izhi kĩrãkꞌara ne ẽã. ³³Mawũã Daizezeta soidꞌu kʉãgꞌaira, dazhi jawureidꞌuba, dazhi zareaidꞌuba kʉãgꞌaira, zhãrã dazhi kĩrãkꞌa kʉãgꞌaira audre biga nendʉwʉrʉta bio Daizezeita bai kꞌãñabara.

³⁴Mawũã krĩchadꞌe panaʉ̃bʉrʉba Jesúsbara mawũãsia: Bʉra Daizezeta Nokꞌodꞌebemane babodꞌoa.

Aramaʉ̃ne miõba wueta kꞌãrẽ widꞌidꞌa ẽbasia.

¿Kꞌaidꞌeba uru zhãrã Ẽdrʉbira?

(Mateo 22:41-46; Lucas 20:41-44)

³⁵Daizeze dedꞌa ewara maẽ Jesús miã ũrãgꞌa mawũãsia: ¿Ũrãgꞌa Moisédꞌe jarabadabara jara panʉka zhãrã Ẽdrʉbira rey Davidꞌeba uruta? ³⁶Davidbara Jawurebiadꞌeba mawũãsia:

Daizezebara mʉ Nokꞌoa mawũãsia: Mʉ juwua araare jewedꞌarua, bʉ jura bꞌeta jõma mʉã bʉ jẽrũ edre bꞌʉyeedꞌa. (Salmos 110:1)

³⁷Davidba mawũã izhi Nokꞌoa adꞌara, ¿sãwũã bari kꞌãwũta izhidꞌeba uruta bꞌaipe? Kꞌabanabara Jesús bedꞌeara ũrĩ bꞌeasia ũrĩ krĩña.

Ũrãgꞌa Moisédꞌe jarabadadꞌebema

(Mateo 23:1-36; Lucas 11:37-54; 20:45-47)

³⁸Jesús miã ũrãgꞌa nʉmʉnerã mawũãsia: Kĩrãkuita bꞌeaudua ũrãgꞌa Moisédꞌe jarabada kꞌarea, zhi zromane tebaita wua eidꞌu drasoa jʉ̃ teba krĩñadea, ãzhi wawia saludꞌaita krĩñadea pʉwʉrʉdꞌe kꞌabana maẽrã. ³⁹Nokꞌorãta jewedꞌabari maẽ jewedꞌa krĩñadea de zhi jʉrebadata nʉme maẽrã, nokꞌorãta jewedꞌabari maẽ jewedꞌa krĩñadea nekꞌodꞌe trʉ̃bʉdadꞌera. ⁴⁰Deta wũẽrãrã pẽdrarãneta jãrĩ bꞌea, mobe zhãrãma bia nʉmaĩta dããrã zhiwidꞌibada. Maʉ̃neba maʉ̃rã Daizezebara audre pua kꞌawua oya.

Ofrenda diadꞌa wũẽrã pẽdraba

(Lucas 21:1-4)

⁴¹Ofrenda edꞌa kenabꞌaribada maẽ kĩrãbita Jesús jewedꞌa kꞌobꞌʉdꞌe, akʉ kꞌobꞌasia zhãrãba plata edꞌa kenabꞌari kꞌopanʉta. Bara bꞌebidꞌa bioba plata bio edꞌa kenabꞌari kꞌopanasia. ⁴²Maʉ̃ne wũẽrã pẽdrata zuburia bꞌʉta zepe moneda zakerãta ũme edꞌa kenabꞌarisia bio vale ẽãta. ⁴³Mawũẽ Jesúsbara izha jʉrʉkuadꞌata trʉ̃pe mawũãsia: Mʉã wãrĩnu marãã jaraya, naʉ̃ wũẽrã pẽdrata zuburia bꞌʉbara jõmaʉ̃ kꞌãñabara plata audre edꞌa kenabꞌaribʉrʉa. ⁴⁴Wuaabemabara edꞌa kenabꞌaribʉda plata audꞌubemata, mawũãmina naʉ̃ wũẽrãbara zuburia bꞌʉdꞌe jõma edꞌa kenabꞌaribʉrʉa izhi nekꞌoita erubꞌadꞌata.

Jesúsba jaradꞌa Daizeze de ãrĩnaĩta

(Mateo 10:16-25; 24:1-28; Lucas 17:22-24; 21:5-24)

¹Daizeze dedꞌa ewara maẽba Jesús ãĩ zebʉrʉdꞌera izha jʉrʉkuadꞌabara abꞌaʉba mawũãsia: Miã Ũrãgꞌabari, akʉdua, mongꞌara bi-ia kedꞌea, dera bi-ia nʉmeã.

²Mawũãĩ Jesúsbara panaʉ̃ mawũãsia: ¿Bʉa akʉ kꞌobꞌʉra de zromata nʉme ẽka? Kꞌãwũã nʉmerã mongꞌara abꞌari mongꞌara ʉ̃rʉ̃bidꞌa kꞌobꞌa ẽbaya ãrĩbʉdaba.

Sãwũãĩnebema ẽjũã jõĩ nawedꞌa

(Mateo 24:3-28; Lucas 21:5-6)

³Olivo kꞌatumane Jesús jewedꞌasia Daizeze de kĩrãbita. Maʉ̃ne Pedroba, Jacoboba, Juanba, Andrésba dobꞌaʉa widꞌi mawũãsidꞌa: ⁴¿Daia jaradua, sõmbedꞌepe Daizeze deta mawũã ãrĩnaĩrã? ¿Sãwũãĩpe maʉ̃ta jõma arimaẽ berabꞌariira?

⁵Mawũãnaĩ Jesúsbara panaʉ̃ mawũãsia: Kĩrãkuita bꞌeaudua miõã zhi sewabidꞌa ẽbaita. ⁶Nʉmʉne bio sewata mʉneba zebʉdabara mawũãnaña: Mʉrã zhãrã Ẽdrʉbia. Aramaʉ̃ne bio sewadꞌaya. ⁷Marãbara zhõta ũrĩnaña namabidꞌa ãĩbidꞌa, maʉ̃nerã perarãũdua, mawũã berabꞌariibara, mawũãmina wadꞌi ẽbaya ewari nʉmʉta jõĩrã. ⁸Drua tabꞌeta drua awʉrʉta tabꞌe bawara zhõnaña, nokꞌorãta nokꞌorã awʉrʉ bawara zhõnaña. Baridu maẽ nʉmeña ẽjũã ureta, jarrabata. Maʉ̃ jõma puata jẽdeba nʉmeña.

⁹Mazhikusa kĩrãkuita bꞌeaudua, marã chãbꞌaridꞌaya nokꞌorã wagꞌaurãã, de zhi jʉrebada nʉme maẽ marã udꞌaya. Nokꞌorã kĩrãbita, reirã kĩrãbita marã ededꞌaya mʉ kꞌarea, aramaʉ̃ne marãbara mʉnebemata maʉ̃rãã jaradꞌaya. ¹⁰Bedꞌea biata mʉnebemata ewari nʉmʉ jõĩ nawedꞌa nokꞌorãã chãbꞌaridꞌaita edebʉdadꞌera jaradꞌaibara zhãrã jõmaʉ̃ã. ¹¹Marãta sopuarãũdua kꞌãrẽta jaradꞌai kꞌareara, miã krĩcharãũdua, awuarabʉrʉ maʉ̃nerã Jawurebiaba jarabibʉrʉta jaraudua, aramaʉ̃nerã marãta bedꞌea ẽã, awuarabʉrʉ bedꞌeaya Jawurebiata. ¹²Mebeabara beadꞌamarẽã chãbꞌariya zhi mebeata, zezebara zhi warrata. Warrarã bĩ ẽãdꞌaya ari ãzhi zhibarirã bawara, aramaʉ̃ne beakuabidꞌaya. ¹³Jõmaʉ̃ba marã juradꞌaya mʉ kꞌarea, mawũãmina mʉta pẽwã zuburiata jõñiĩnu nʉmʉrã ẽdrʉya.

¹⁴Jaidꞌebema ne mitiata nʉmʉbʉdata marãba ũdubʉdadꞌera, Daizezeba bedꞌeata jarabibariba Danielba jaradꞌata ũdudꞌaya. Daizeze dedꞌa nʉma ẽbai bꞌʉta nʉmʉnaña. Mawũẽ zhi naʉ̃ lebʉrʉbara maʉ̃ sãwũãta kꞌawuarua. Mobebaira Judeadꞌe bꞌera merũ wãẽbaudua kꞌatumaẽna. ¹⁵De ʉ̃rʉ̃ kꞌobꞌʉra udꞌubꞌaepe edꞌa wãrãrũã kꞌãrẽ bʉzhi dedꞌabema jiraedaira. ¹⁶Meã kꞌobꞌʉra deidꞌu zerãrũã bʉzhi wua jiraedaira. ¹⁷Bꞌiogꞌoa bꞌera, wũãwũã judꞌebema erubꞌera zuburiadꞌaya maʉ̃ ewadera. ¹⁸Mawũẽ zhiwidꞌiudua marã mawũã merũbʉdadꞌera nʉma ẽbamarẽã kue ewarita. ¹⁹Maʉ̃ ewadera zuburiatrʉ nʉmaña, Daizezeba ẽjũã osidꞌebemata idꞌibasiidꞌu mawũãrã ne ẽãta nʉmaña, miã tẽãbidꞌa mawũãrã nʉma ẽbaya. ²⁰Maʉ̃ ewarita Daizezeba kꞌakutua nʉmʉ ẽbʉrʉ miõta zokꞌai bꞌa ẽã. Mawũãmina izha zhi jʉrʉmata bꞌe kꞌarea kꞌakutua nʉmʉsia maʉ̃ ewarira.

²¹Mawũẽ iabꞌaʉba zhãrã Ẽdrʉbita za bꞌʉa abʉrʉdꞌera, o zawa bꞌʉa abʉrʉdꞌera ĩjãrãũdua. ²²Nʉmʉne zhãrã sewata zhãrã ẽdrʉbita bꞌeaya, sewata Daizezeba bedꞌeata jarabibaridꞌe bꞌeaya, ũdudꞌakꞌata odꞌaya zhãrã sewadꞌaita, sewaita obꞌedꞌara sewadꞌaya Daizezeba zhi jʉrʉmata bꞌesidꞌa. ²³Mawũẽ marã kĩrãkuita bꞌeaudua, mʉãrã maʉ̃ta jõma marãã jarabʉrʉa nawedꞌa.

Jesús zeidꞌebema

(Mateo 24:29-44; Lucas 21:25-36)

²⁴Jari ewadera mawũã zuburia nʉmana tẽãne ʉ̃madaura pãrĩguya, jedꞌekꞌora ʉ̃na ẽbaya. ²⁵Chĩdaura bãjãneba jurzoaya, ne zarea zromarãta bãjãnebema pʉrʉderreadꞌaya. ²⁶Mobebʉrʉ mʉ Beubari Bape bꞌadꞌara jãrãrãne uruta ũdudꞌaya kꞌãbãẽã zarea bara kĩrãwãrẽã. ²⁷Mobebʉrʉ mʉãrã ángelerã mʉrẽrãta zokꞌaya, aramaʉ̃ne ãba jʉredꞌaya mʉã zhi jʉrʉmata baridu maẽ bꞌeta wawara bꞌeta.

²⁸Bakuru higueradꞌeba sãwũãta kꞌawuaudua: Zhi jĩwĩnita wikubʉrʉdꞌera marãbara kꞌawuabada poagꞌa kꞌaita bata. ²⁹Aramaʉ̃ kĩrãkꞌa mʉã jara nʉmʉta arimaẽ berabꞌari bʉsadꞌewata marãba ũdubʉdadꞌera kꞌawuaudua mʉ zeira kꞌaita bata. ³⁰Mʉã wãrĩnu marãã jaraya, zhãrã bꞌera neba ẽwedꞌa mʉã jara nʉmʉrã jõma arimaẽ berabꞌariya. ³¹Bãjã, drua nebaya, mawũãmina mʉ bedꞌeara bari neba ẽã.

³²Mawũãmina kꞌãrẽ ewade kꞌãrẽ ʉ̃madaudꞌe mawũã berabꞌariira miõba kꞌawua ẽã, miã ángelerã ʉ̃tre bꞌebidꞌa kꞌawuadꞌa ẽã, miã mʉãbidꞌa kꞌawua ẽã, awuarabʉrʉ kꞌawua bꞌʉa mʉ Zezebʉrʉ. ³³Maʉ̃ba dauba bꞌeaudua, zhiwidꞌi bꞌeaudua, marãbara kꞌawuadꞌa ẽbaera mʉrã kꞌãrẽ ewade zeita. ³⁴Aramaʉ̃nerã ũmakĩrãta wawara wãna kĩrãkꞌa berabꞌariya, izhi dera ãmaẽbʉrʉta nezokꞌarã izhidꞌea chãbꞌarisia, abꞌa abꞌaʉa dedꞌekasia kꞌãrẽ oita, de akʉbaria jarasia dauba bꞌamarẽã. ³⁵Marãsidꞌa dauba bꞌeaudua, kꞌawuadꞌa ẽbaera mʉ sõmbedꞌe zeira, baʉcha zeya keubʉrʉdꞌe, o ewari ẽsadra, o eterre berubʉrʉdꞌe, o diapedꞌa. ³⁶Mobedꞌeba aritiaudꞌe zebʉrʉdꞌera ũdu ẽbaya marã kꞌãĩ nʉmeta. ³⁷Mʉã marãã jaraira jõmaʉ̃ã jaraya: Dauba bꞌeaudua.

Krĩcha jʉrʉdꞌapeadꞌa Jesús beadꞌaita

(Mateo 26:1-5; Lucas 22:1-2; Juan 11:45-53)

¹Ewari ũme wãẽã nʉmasia Egiptodꞌeba ẽzoadꞌata krĩcha fiesta obadata, maʉ̃nerã pan ne oreguea ne ẽã kꞌobada. Maʉ̃ne sacerdoterã nokꞌorãta ũrãgꞌa Moisédꞌe jarabada bawara krĩcha jʉrʉsidꞌa Jesús sãwũã sewadꞌape jidadꞌaita, aramaʉ̃ne beabidꞌaita. ²Mawũẽ mawũãsidꞌa: Fiestadꞌera beadꞌa ẽã zhãrãta kĩrũna ẽbamarẽã pʉwʉrʉdꞌe.

Jesús burudꞌe kerata weadꞌapeadꞌa

(Mateo 26:6-13; Juan 12:1-8)

³Jesús Betaniane bꞌʉta, Simónta aidꞌaba kꞌaya bꞌadꞌa dedꞌa bꞌʉdꞌe, nekꞌo nʉmʉne wũẽrãta zebʉrʉta kera nardo ne ʉ̃tʉta jiwado mongꞌara omane wepe obꞌʉetape kera Jesús burudꞌe ʉ̃rʉ̃ weasia.

⁴Maʉ̃ne ʉ̃kʉrʉ kĩrũbʉdata ãzhirãĩnu mawũãsidꞌa: ¿Kera kꞌãrẽã kꞌãwũã weabue? ⁵Ewari treciento trajadꞌabari nendoidꞌe bꞌasia denario trecientobari, mobedꞌeba maʉ̃ platara diakꞌausia zuburia bꞌea.

Aramaʉ̃ne bĩ ẽã jarasidꞌa maʉ̃ wũẽrã.

⁶Mawũẽ Jesúsbara mawũãsia: Idaribiudua, ¿kꞌãrẽã miãsẽã erukꞌopanʉ? Mʉ kꞌãwũã obʉrʉra biata obʉrʉa. ⁷Zuburia bꞌera marã bawara ewariza bꞌeaya, mawũẽ marãba kꞌareba krĩñabʉdadꞌera kꞌareba bꞌedꞌaya. Mawũãmina mʉrã marã bawara ewariza bꞌa ẽã. ⁸Naʉ̃ wũẽrãbara izha osia bꞌʉta obʉrʉa. Mʉ kꞌakuara nawedꞌa keraba tũã obʉrʉba aribꞌaebʉrʉa mʉ wuagꞌa bꞌʉdꞌaita. ⁹Mʉã wãrĩnu marãã jaraya, baridu maẽ ẽjũã jõmaʉ̃ne bedꞌea biata mʉnebemata jarabʉda maẽ naʉ̃ wũẽrãba kꞌãwũã obʉrʉsidꞌa nebʉrʉdꞌaya, izhira aramaʉ̃ne krĩchabadaya.

Juda wãna Jesús chãbꞌariita

(Mateo 26:14-16; Lucas 22:3-6)

¹⁰Juda Iscariote Jesúsba doce jʉrʉkuadꞌadꞌebemata sacerdoterã nokꞌorãma wãsia Jesús chãbꞌariita. ¹¹Ãzha maʉ̃ta ũrĩnaĩ sobiadꞌape plata diaita jarasidꞌa. Mawũẽ Judabara kĩrãkuita bꞌesia sãwũã chãbꞌariita.

Zhiko odꞌapeadꞌa Jesúita

(Mateo 26:17-29; Lucas 22:7-23; Juan 13:21-30)

¹²Fiesta obʉdata ewari nabemane pan ne oreguea ne ẽã kꞌobadadꞌe oveja zaketa beabadadꞌe izha jʉrʉkuadꞌabara Jesúa mawũãsidꞌa: ¿Bʉara sãma odꞌaita krĩñape Egiptodꞌeba ẽzoadꞌata krĩcha nekꞌobadara?

¹³Mawũãnaĩ izha jʉrʉkuadꞌata ũme zokꞌabʉrʉta mawũãsia: Wãũdua Jerusalén pʉwʉrʉedꞌa, maĩnu marãbara ũmakĩrãta daucha zeya zokꞌodꞌe baniã akꞌobꞌʉta, maʉ̃ kꞌaidꞌu wãũdua. ¹⁴Deidꞌu wãbʉrʉ maẽ de zhibaria mawũãũdua: Miã Ũrãgꞌabariba mawũãsia: ¿Kʉdꞌa sãma bꞌʉ Egiptodꞌeba ẽzoadꞌata krĩcha kꞌobadata mʉã mama kꞌoira mʉã jʉrʉkuadꞌa bawarauba? ¹⁵Izhara marãã ũdubigaya kʉdꞌa ʉ̃rʉ̃bema kʉdꞌa zromata zhi araa omata, mama zhiko oudua dazhirãĩta.

¹⁶Izha jʉrʉkuadꞌara wãnape Jerusalén pʉwʉrʉdꞌe edꞌa wãbʉdadꞌera ũdusidꞌa izha jaradꞌa kĩrãkꞌa. Zhikora aramaʉ̃ne osidꞌa Egiptodꞌeba ẽzoadꞌata krĩcha fiesta obadata.

¹⁷Keubʉrʉdꞌera Jesús zesia izha jʉrʉkuadꞌata doce bawara. ¹⁸Mobe jewedꞌa duanepe nekꞌobʉdadꞌera Jesúsbara mawũãsia: Mʉã wãrĩnu marãã jaraya, marãnebemata iabꞌa mʉ ũme nekꞌo kꞌobꞌʉba mʉrã chãbꞌariya.

¹⁹Mawũãĩ ãzhira sopuabʉdaba abꞌa abꞌaʉba mawũãsidꞌa: ¿Mawũã oira mʉka?

²⁰Mawũãnaĩ Jesúsbara panaʉ̃ mawũãsia: Mʉã doce jʉrʉkuadꞌaba abꞌaʉba mawũã chãbꞌariya, maʉ̃bara mʉrẽ kĩrãkꞌa panta sõmbera kꞌobꞌʉa epedꞌekꞌodꞌe. ²¹Wãrãnebai mʉ Beubari Bape bꞌʉra mʉnebemata bꞌʉ tabꞌʉdꞌe berabꞌari wã, ¡mawũãmina zuburiaya mʉ chãbꞌaribʉrʉra! Biga bakꞌausia maʉ̃ todꞌa ẽbaita.

²²Nekꞌo duanune Jesúsbara pan jiraedape maʉ̃bari Daizezea zhibia jipe bꞌʉape dedꞌekabʉrʉta mawũãsia: Jidaudua, naʉ̃ mʉ kꞌakua.

²³Mobebʉrʉ vino copadꞌe jiraedape maʉ̃bari Daizezea zhibia jipe dedꞌekasia, mawũẽ dosidꞌa jõmaʉ̃ba. ²⁴Mobebʉrʉ mawũãsia: Naʉ̃ mʉ wata Daizezeba zhãrã ẽdrʉbiidꞌebemata zhiwidꞌita nʉmeña, mʉrã biobari wa erezoaya. ²⁵Mʉã wãrĩnu marãã jaraya, mʉãrã vino wueta do ẽã, marã bawarauba jari ewade zhiwidꞌita doyeedꞌa Daizezeta Nokꞌo maẽ.

Jesúsba jaradꞌa Pedroba ũdukꞌa aita

(Mateo 26:30-35; Lucas 22:31-34; Juan 13:36-38)

²⁶Trʉ̃ãbi Salmota trʉ̃ãnape wãsidꞌa Olivo kꞌatumaĩnu.

²⁷Maʉ̃ne Jesúsbara mawũãsia: Marãbara mʉrã jõmaʉ̃ba ãmaẽnaña nane diamase. Maʉ̃ẽnabemata zhi bꞌʉmata mawũã bꞌʉa:

Mʉãrã ãzhi akʉbarita beaya, mawũẽ oveja jãrãzoaya. (Zacarías 13:7)

²⁸Mawũãmina mʉta beudꞌata piradrʉbʉrʉdꞌera mʉrã marã na wãña Galileaedꞌa.

²⁹Mawũãĩ Pedroba mawũãsia: Bʉra jõmaʉ̃ba ãmaẽbʉdaidꞌu mʉã bʉra ãmaẽ ẽã.

³⁰Mawũãĩ Jesúsbara mawũãsia: Mʉã wãrĩnu bʉaa jaraya: Nane diamase gallo beruma ũme berui nawedꞌa bʉa mʉrã ũdukꞌata jarama ũbea jaraya.

³¹Mawũãĩ Pedrobara wuaabʉrʉ mawũãsia: Bʉ ũme beuita babʉrʉsidꞌa mʉã bʉra ũdukꞌata jara ẽã.

Mawũãĩ jõmaʉ̃ba abꞌarika jarasidꞌa.

Jesús zhiwidꞌidꞌa Getsemaníne

(Mateo 26:36-46; Lucas 22:39-46)

³²Getsemaní abadaidꞌu zekuape Jesúsbara izha jʉrʉkuadꞌaa mawũãsia: Nama jewedꞌaudua, mʉta zhiwidꞌi kꞌobꞌʉedꞌa.

³³Mobe izhi bawara edesia Pedrota, Jacobota, Juanta, maʉ̃nerã kꞌãbãẽã sopua kꞌobꞌesia. ³⁴Mawũẽ mawũãsia: Mʉrã sopuaba beuita kꞌobꞌʉa, nama duanedua, ʉ̃rʉ̃ma kꞌopanadua.

³⁵Mobe arajĩga wãpe egoroma bꞌarru kꞌobꞌepe zhiwidꞌisia Daizezema bigabʉrʉ izhira zuburiabi ẽbamarẽã. ³⁶Izhara mawũãsia: Zeze, bʉitara ne jõma borekea, mawũẽ mʉrã zuburiabirãrũã, mawũãmina aribꞌaerãrũã mʉã krĩñata, awuarabʉrʉ aribꞌaedua bʉzha krĩñata.

³⁷Mobe zebʉrʉdꞌe kꞌãĩ nʉmeta ũdui Pedroa mawũãsia: ¿Simón, bʉra kꞌãĩ nʉmʉka? ¿Bʉra ʉ̃rʉ̃ma kꞌobꞌa bꞌe ẽka hora abꞌabidꞌa? ³⁸Ʉ̃rʉ̃ma kꞌopanadua, zhiwidꞌiudua wãẽãna ẽbaita. Marãbara wãrãne biata okrĩña bꞌea, mawũãmina kꞌakuabara bꞌe ẽã nʉmʉã.

³⁹Wakusa wãpe zhiwidꞌisia abꞌaʉ bedꞌeata jara. ⁴⁰Mobe wakusa zebʉrʉdꞌera wakusa ũdusia kꞌãĩ nʉmeta, dapeaba ãzhi dabʉra kꞌabꞌari erunʉmasia. Mawũẽ kꞌawuadꞌa ẽbasia kꞌãrẽta jara panaʉ̃naĩrã. ⁴¹Zema ũbeata zepe mawũãsia: Marã ya kꞌãĩbʉda, ya ẽnaʉ̃bʉda. Mʉ ewarira arababʉrʉa, mʉ Beubari Bape bꞌʉra chãbꞌaridꞌaya kꞌazhirua omiãrã juwuadꞌe.

⁴²Pirabꞌariudua, wãdrʉ. Kꞌaita ba mʉ chãbꞌariira.

Jesús jidadꞌapeadꞌa

(Mateo 26:47-56; Lucas 22:47-53; Juan 18:2-11)

⁴³Jesús wadꞌi bedꞌea kꞌobꞌʉdꞌe zesia Judata, maʉ̃ docedꞌebema basia, izhi bawara zhãrã bio zesidꞌa kuchoedꞌa bakuruedꞌa. Maʉ̃rã zokꞌasidꞌa sacerdoterã nokꞌorãba, ũrãgꞌa Moisédꞌe jarabadaba, nokꞌorãba. ⁴⁴Judabara sãwũã chãbꞌariita jaradꞌata mawũãsia: Mʉã kĩrãma nigabʉrʉta maʉ̃ta izhia, maʉ̃ta jidaudua, mobe bia jʉ̃ edeudua. ⁴⁵Aramaʉ̃ne zepe Jesús orrape mawũãsia: Miã Ũrãgꞌabari.

Mobe kĩrãma nigasia.

⁴⁶Aramaʉ̃ne Jesús jidasidꞌa. ⁴⁷Mawũẽ mama kꞌopanʉbara abꞌaʉba kuchota ẽpe tusia sacerdote wagꞌau nezokꞌata, mawũẽ ʉrawesia kʉwʉrʉta.

⁴⁸Maʉ̃nerã Jesúsbara mawũãsia: ¿Mʉrã nezrʉgamiã kĩrãkꞌa kuchoedꞌa bakuruedꞌa zebʉdakꞌa mʉ jidadꞌe? ⁴⁹Mʉrã ewariza marã bawara bꞌʉta Daizeze dedꞌa ewara maẽ miã ũrãgꞌa bꞌasidꞌera mʉrã jidadꞌa ẽbasia. Mawũãmina kꞌãwũã berabꞌariya, aranaʉ̃ne arimaẽ berabꞌariya naʉ̃ẽnabemata zhi bꞌʉmata.

⁵⁰Izha jʉrʉkuadꞌabara jõmaʉ̃ba Jesús ãmaẽbʉdata merũ wãẽbasidꞌa.

Kũrãta merũ wãẽbadꞌa

⁵¹Maʉ̃ne kũrãta kꞌaidꞌu jʉ̃drʉbʉrʉta bari burubꞌaba kꞌakua bura bꞌʉta jidasidꞌa. ⁵²Mawũãmina izhara burubꞌa kenetape ẽkꞌadꞌa merũ wãẽbasia.

Jesús ededꞌapeadꞌa wagꞌaurã kĩrãbita

(Mateo 26:57-68; Lucas 22:54-71; Juan 18:12-24)

⁵³Jesús wesidꞌa sacerdote wagꞌauma, maʉ̃nerã zhi jʉresidꞌa sacerdoterã nokꞌorãta, dewara nokꞌorãta, ũrãgꞌa Moisédꞌe jarabadata. ⁵⁴Pedrora arajĩga kꞌaidꞌu wãsia sacerdote wagꞌau drogꞌoaidꞌu edꞌa. Mobe Daizeze de akʉbada bawara jewedꞌasia tebʉ kꞌã. ⁵⁵Maʉ̃ne sacerdoterã nokꞌorãba, nokꞌorã wagꞌaurã jõmaʉ̃ba krĩcha jʉrʉsidꞌa Jesú ʉ̃rʉ̃ zhãrã sewa nebʉrʉbidꞌaita, aramaʉ̃ne chãbꞌaridꞌaita beadꞌamarẽã, mawũãmina mawũã obꞌedꞌa ẽbasia. ⁵⁶Zhãrã bio Jesú ʉ̃rʉ̃ sewa nebʉrʉsidꞌa, mawũãmina ãzhi bedꞌeara abꞌarika ẽbasia. ⁵⁷Maʉ̃ne ʉ̃kʉrʉ piradrʉdꞌape Jesú ʉ̃rʉ̃ sewa nebʉrʉ mawũãsidꞌa: ⁵⁸Daiba ũrĩbʉdadꞌera naʉ̃bara mawũãsia: Mʉãrã ãrĩña naʉ̃ Daizeze de juwuaba odꞌapeadꞌara, mobe awʉrʉta ewari ũbeadꞌe pãrãña juwuaba obʉda ẽãta.

⁵⁹Maʉ̃nebidꞌa ãzhi bedꞌeara abꞌarika ẽbasia. ⁶⁰Mawũẽ sacerdote wagꞌauta ãzhi ẽsadra piradrʉpe Jesúa widꞌi mawũãsia: ¿Bʉara panaʉ̃ ẽka? ¿Wãrĩnuka naʉ̃rãba jarabʉdara bʉdꞌebemata?

⁶¹Mawũãĩ Jesús chupea kꞌobꞌʉba panaʉ̃ ẽbasia. Mawũẽ sacerdote wagꞌaubara wakusa widꞌi mawũãsia: ¿Bʉra zhãrã Ẽdrʉbita Daizeze Warrakꞌa?

⁶²Mawũãĩ Jesúsbara mawũãsia: Mʉrã izhia. Mawũẽ mʉ Beubari Bape bꞌadꞌara ũdudꞌaya Daizeze zhi zroma juwua araare jewedꞌa bꞌʉta, jãrãrãne uruta ʉ̃treba.

⁶³Mawũãĩ sacerdote wagꞌaubara kĩrũbiba izhikusa izhi wuata kꞌõẽtape mawũãsia: ¿Izhi ʉ̃rʉ̃ kꞌãrẽta ãmaña jaradꞌamarẽã nesidꞌa bꞌeaipe? ⁶⁴Marãbara ũrĩbʉda aramaʉ̃ne Daizezema mitia bedꞌeabʉrʉta. ¿Mawũẽ marãma sãwũãpe? Mawũãĩ ãzhi jõmaʉ̃ba jarasidꞌa bedꞌeata bara bꞌʉdꞌeba beadꞌai barata.

⁶⁵Aramaʉ̃ne ʉ̃kʉrʉbara dau idꞌo jirpanesia, kĩrã pãrĩnape jirachi jirpanʉta mawũãsidꞌa: Ari maẽ jaradua kꞌaiba jirachita.

Daizeze de akʉbadabidꞌa tachi jirpanesia kĩrãma.

Pedroba ũdukꞌa adꞌa Jesús

(Mateo 26:69-75; Lucas 22:56-62; Juan 18:15-18, 25-29)

⁶⁶Pedro udꞌa drogꞌoadꞌe bꞌʉdꞌe, wũẽrãrã nezokꞌarãta abꞌa zesia sacerdote wagꞌaudꞌeta. ⁶⁷Maʉ̃ne Pedro tebʉ kꞌã kꞌobꞌʉta ũdui akʉpe mawũãsia: Bʉsidꞌa bꞌasia Jesús Nazaredꞌebema bawara.

⁶⁸Mawũãĩ izhara merãbʉrʉta mawũãsia: Maʉ̃ mʉãrã ũdukꞌa, mʉãrã kꞌawua ẽã bʉa kꞌãrẽ jara kꞌobꞌʉra.

Mawũãpe edꞌa zebadaidꞌu wãbʉrʉdꞌera gallo berusia. ⁶⁹Nezokꞌa wũẽrãba wakusa ũdui mama kꞌobꞌea mawũãsia: Za naʉ̃ ãzhirãnebema.

⁷⁰Mawũãĩ izhara wakusa merãsia. Audre ẽãne mama kꞌobꞌebara wakusa Pedroa mawũãsidꞌa: Bʉra Galileadꞌebema baera wãrãne kꞌãʉ̃rãnebema, bʉ bedꞌeabʉrʉra bedꞌea bꞌʉa kꞌãʉ̃rã kĩrãkꞌa.

⁷¹Mawũãnaĩ izhita wãrĩnu bedꞌea ẽbʉrʉ Daizezebara izhikꞌawua zuburia oya ape mawũãsia: Mʉãrã maʉ̃ ũdukꞌa marãba jara kꞌopanʉrã.

⁷²Maʉ̃ daucha gallo berusia beruma ũmeta. Mobebʉrʉ Pedrobara bude basia Jesúsba mawũãnata: Gallota beruma ũme berui nawedꞌa bʉa mʉrã ũdukꞌata jarama ũbea jaraya. Maʉ̃ta krĩchape Pedro jẽgasia.

Jesús ededꞌapeadꞌa Pilato kĩrãbita

(Mateo 27:1-2, 11-14; Lucas 23:1-5; Juan 18:28-38)

¹Diapedꞌa bedꞌeasidꞌa sacerdoterã nokꞌorãta, dewara nokꞌorãta, ũrãgꞌa Moisédꞌe jarabadata, jõma nokꞌorã wagꞌaurãta, mobe Jesús juwua tãjʉ̃ ededꞌape Pilatoa chãbꞌarisidꞌa Roma bidꞌata nokꞌoa.

²Mawũẽ Pilatobara widꞌi mawũãsia: ¿Bʉra Rey judíorãneka?

Mawũãĩ Jesúsbara panaʉ̃ mawũãsia: Ara bʉzha jarabʉrʉa.

³Sacerdoterã nokꞌorãbara ne bio jara ji kꞌopanasia. ⁴Mawũẽ Pilatobara wakusa widꞌi mawũãsia: ¿Bʉara panaʉ̃ ẽka? Bʉra ne bio jara ji kꞌopanʉã.

⁵Mawũãsiidꞌu Jesúsbara panaʉ̃ ẽbaera Pilatora kꞌawua ẽã krĩchasia.

Jaradꞌapeadꞌa Jesús beabimarẽã

(Mateo 27:15-31; Lucas 23:13-25; Juan 18:38–19:16)

⁶Egiptodꞌeba ẽzoadꞌata krĩcha fiesta obada ewade Pilatobara cárceldꞌe bꞌeta abꞌa ẽdrʉbi bꞌasia zhãrãba ẽdrʉbimarẽã jarabʉdata. ⁷Maʉ̃ne bꞌasia abꞌa Barrabás abadata, awʉrʉrã izhi bawara zhãrã beakuadꞌa bawara cárceldꞌe bꞌʉta nokꞌo bawara zhõnata bꞌasia. ⁸Kꞌabanata zekuape Pilatoa jarasidꞌa izha okꞌawa bꞌʉ kĩrãkꞌa omarẽã. ⁹Mawũẽ Pilatobara panaʉ̃ mawũãsia: ¿Marãbara krĩñadeka mʉã ẽnaĩta Rey judíorãneta? ¹⁰Pilatobara kꞌawuasia sokꞌazhiruaba izhaa chãbꞌaribʉdata sacerdoterã nokꞌorãbara. ¹¹Sacerdoterã nokꞌorãbara kꞌabanata kꞌobꞌea jarasidꞌa ẽdrʉbiita jaradꞌamarẽã Barrabáta. ¹²Mawũẽ Pilatobara panaʉ̃ wakusa mawũãsia: ¿Mobera mʉã sãwũã oita krĩñadepe marãba Rey judíorãneã apanʉrã?

¹³Mawũãĩ ãzhara nemi jĩgua mawũãsidꞌa: Cruzdꞌe kꞌachibirua.

¹⁴Mawũãnaĩ Pilatobara mawũãsia: ¿Kꞌãrẽ bia ẽãta osi?

Mawũãĩ ãzhara wuaabʉrʉ nemi jĩgua mawũãsidꞌa: ¡Cruzdꞌe kꞌachibirua!

¹⁵Mawũãnaĩ Pilatora zhãrã bawara bia bꞌe krĩñaba ẽnasia Barrabáta, waya Jesúra ubigape chãbꞌarisia cruzdꞌe kꞌachidꞌamarẽã.

¹⁶Mawũẽ soldaorãbara Jesús edꞌa edesidꞌa nokꞌo dedꞌa soldaorã tabꞌʉidꞌu, mawũẽ bʉredrʉsidꞌa soldaorã jõmaʉ̃ba. ¹⁷Reyba jʉ̃bari kĩrãkꞌa jʉ̃bisidꞌa wua granateta, burudꞌe joatrʉsidꞌa corona jʉ̃kꞌara ʉrʉta pʉrradꞌape. ¹⁸Mobe mawũãsidꞌa: Kʉa, judíorã Rey.

¹⁹Bakuruba tawe jirpanesia buruma, dau idꞌo jirpanesia, sãkꞌokꞌodꞌe kꞌobꞌe jirpanesia wawiabʉda kĩrãkꞌa. ²⁰Ãzhima sewakꞌau bꞌʉdꞌeba mawũã jirpanape wua granatera wẽãsidꞌa, mobe wua izhidꞌeta jʉ̃bidꞌape edesidꞌa cruzdꞌe kꞌachidꞌaita.

Cruzdꞌe kꞌachi beudꞌa Jesús

(Mateo 27:32-44; Lucas 23:26-43; Juan 19:17-30)

²¹Maʉ̃ne Cirene pʉwʉrʉdꞌebemata Simónta Alejandroba, Rufoba ãzhi zezeta meã bꞌadꞌata taidꞌe zareadꞌe ataubisidꞌa Jesúsba cruz a wãta.

²²Aramaʉ̃ne Jesús edesidꞌa Gólgota abadaidꞌu, maʉ̃ bedꞌeabara jara krĩña bꞌʉa Buru Bꞌʉwʉrʉta. ²³Vino oregueata mirraedꞌa poera diasidꞌa puata nagꞌadrʉmarẽã, mawũãmina Jesúsbara do ẽbasia. ²⁴Cruzdꞌe kꞌachidꞌape soldaorãbara izha jʉ̃ bꞌadꞌara ãzhirãĩnu drasidꞌa, maʉ̃nerã sãwũã dradꞌaidꞌebemata osidꞌa kꞌawuadꞌaita sãʉ̃ta edeita abꞌa abꞌaʉba.

²⁵Diapedꞌa a las nueve nʉmasia Jesús cruzdꞌe kꞌachisidꞌadꞌera. ²⁶Kꞌãrẽã beadꞌaita bꞌʉ jirabꞌʉta mawũã bꞌasia: REY JUDÍORÃNEÃ.²⁷Izhi bawara nezrʉgamiãrã ũme cruzdꞌe kꞌachisidꞌa, abꞌa juwua araare, abꞌa juwua ãkꞌaare. ²⁸Aramaʉ̃ne arimaẽ berabꞌarisia zhi bꞌʉmata mawũã bꞌʉta: Kꞌazhirua omiãne edasidꞌa kꞌazhirua omiãrã bawara. ²⁹Arakꞌaita berabꞌaribʉdabara ijura jarabʉdata ãzhira ojĩãwe mawũãsidꞌa: ¡Ʉ̃kʉa! Bʉara Daizeze dera ãrĩpe ewari ũbeadꞌe wakusa pãrãĩta jarasi baera, ³⁰bʉzhikusa ẽdrʉrua, udꞌubꞌaedua cruzdꞌebara.

³¹Aramaʉ̃ kĩrãkꞌa sacerdoterã nokꞌorãbara, ũrãgꞌa Moisédꞌe jarabadabara ãzhima sewakꞌau bꞌʉdꞌeba ãzhirãĩnu mawũãsidꞌa: Awʉrʉrã kꞌarebape izhikusara zhi kꞌareba bꞌe ẽã. ³²Zhãrã Ẽdrʉbita Rey Israeldꞌebʉrʉ udꞌubꞌaeibara cruzdꞌebara, mawũãrã dazhirãbara maʉ̃ta ũdudꞌape ĩjãnaña izhidꞌebemata.

Aramaʉ̃ne izhi bawara cruzdꞌe kꞌachi jirapanʉbidꞌa ijura jarasidꞌa.

³³Ʉ̃matipauba drua jõma pãrĩgusia a las tres bayeedꞌa. ³⁴A las tres Jesúsbara nemi jĩgua mawũãsia: Eloi, Eloi, ¿lama sabactani? Maʉ̃ bedꞌeabara mawũãsia: Mʉ Zhibari, mʉ Zhibari, ¿mʉrã kꞌãrẽã kenabꞌaribʉrʉ?

³⁵Ʉ̃kʉrʉ mama kꞌobꞌebara maʉ̃ta ũrĩnape mawũãsidꞌa: Naʉ̃bara trʉ̃ kꞌobꞌʉa Elíata.

³⁶Aramaʉ̃ne abꞌa wãẽbape esponjata vino oregueadꞌe sõmbera edape bakurudꞌe tãjʉ̃pe domarẽã diabʉrʉta mawũãsia: Idaribiudua, akʉdꞌaya Elía zei kꞌawuaita udꞌubꞌaebidꞌe.

³⁷Maʉ̃ne Jesús kꞌãbãẽã bꞌiape beusia. ³⁸Maʉ̃ daucha Daizeze dedꞌa wua eubꞌari jirabꞌʉta dra kꞌõã totosia ʉ̃tʉba edꞌaa. ³⁹Soldaorã nokꞌota Jesús kĩrãbita kꞌobꞌʉba mawũã kꞌãbãẽã bꞌiape beubʉrʉta ũdui mawũãsia: Wãrãne ũmakĩrã naʉ̃ Daizeze Warra basia.

⁴⁰Wũẽrãrãsidꞌa ʉ̃kʉrʉ duanasia wawarauba akʉ bꞌeta. Maʉ̃rãnebema duanasia María Magdalenata, dewarabema María zhi wau tẽãbema Jacoboba, Joséba ãzhi papata bꞌasia, dewara bꞌasia Salométa. ⁴¹Maʉ̃rãbara Jesús Galileadꞌe bꞌasidꞌera pẽwã bꞌeba aribꞌae bꞌeasia. Dewara bio duanasia izhi bawara wãrĩzekuadꞌata Jerusalén pʉwʉrʉedꞌa.

Jesús wuagꞌadꞌapeadꞌa

(Mateo 27:57-61; Lucas 23:50-56; Juan 19:38-42)

⁴²Keubodꞌodꞌera aribꞌae jirpanasia nrũẽma sábadodꞌe ẽnaʉ̃bada ewari baera. ⁴³Mawũẽ José Arimatea pʉwʉrʉdꞌebemata, nokꞌorã wagꞌaurãnebemaba Daizezeta Nokꞌodꞌebemata jʉ̃ã bꞌadꞌata zepe wãnigua edꞌa wãsia Pilatoma. Mobe widꞌisia Jesús kꞌakuata. ⁴⁴Mawũẽ Pilatobara krĩchasia sãwũã mawũã ĩñabasia beuta. Maʉ̃neba soldaorã nokꞌota trʉ̃pe widꞌisia ya beusi kꞌawuaita. ⁴⁵Mawũẽ soldaorã nokꞌobara beusita jarabʉrʉba Jesús kꞌakuara diasia Joséa. ⁴⁶Mawũẽ Josébara burubꞌata edape cruzdꞌebara Jesús ãĩ edape burasia burubꞌaba, mobe edꞌa tabꞌʉsia peñata zobꞌea kꞌorubidꞌa maẽ. Mobe mongꞌara zromaba tapabigasia maʉ̃ zobꞌeadꞌe edꞌa wãbarira. ⁴⁷Maʉ̃ta María Magdalenaba, dewarabema María José papaba akʉ kꞌopanasia sãma kenabꞌaribʉdata.

Jesús beudꞌata piradrʉdꞌa

(Mateo 28:1-10; Lucas 24:1-12; Juan 20:1-10)

¹Sábado ẽnaʉ̃bada ewarita berabꞌaribʉrʉdꞌera, María Magdalenaba, dewarabema María Jacobo papaba, dewara Saloméba kerata edasidꞌa wãnaĩta Jesús kꞌakuata tũã odꞌaita. ²Diapedꞌa semana ewarita nabemane domingodꞌe Jesús wuagꞌadꞌapeadꞌaidꞌu zesidꞌa ʉ̃madau ʉ̃tʉ zebʉrʉdꞌe. ³Maʉ̃nerã ãzhirãĩnu mawũãsidꞌa: ¿Mongꞌara kꞌaiba ãña ʉratʉ dedꞌekaipe peña zobꞌeadꞌe edꞌa wãbari maẽ kꞌobꞌʉra?

⁴Mawũãmina akʉbʉdadꞌera mongꞌara ãña ʉratʉ kꞌobꞌʉta ũdusidꞌa jipadꞌe zhi zromata. ⁵Mawũẽ peña zobꞌeadꞌe edꞌa wãbʉdadꞌera, juwua araare kũrãta jewedꞌa bꞌʉta ũdusidꞌa, wua torrota eidꞌu ãnabꞌari jʉ̃ bꞌasia. Wũẽrãrã perasidꞌa. ⁶Mawũẽ maʉ̃bara mawũãsia: Perarãũdua, marãbara jʉrʉ panʉã Jesús Nazaredꞌebema cruzdꞌe kꞌachidꞌapeadꞌata. Beudꞌata piradrʉsia, nama ne ẽã. Akaudua izhi tabꞌʉdꞌapeadꞌata. ⁷Wãũdua, mobe izha jʉrʉkuadꞌaa, Pedroa jaraudua izhira marã na Galileaedꞌa wãta. Maĩnu ũdudꞌaya izha marãã jaradꞌa kĩrãkꞌa.

⁸Peña zobꞌeata nʉmʉ maẽbara wũẽrãrã wãẽbasidꞌa ure perabʉdaba. Mawũẽ miõã miã kꞌãrẽta jaradꞌa ẽbasia peraba.

Jesús zhi ũdubidꞌa María Magdalenaa

(Juan 20:11-18)

⁹Jesús beudꞌata diapedꞌa piradrʉbʉrʉra semana ewarita nabemata domingodꞌera naara zhi ũdubisia María Magdalenaa, maʉ̃ wũẽrãnebara jʉrekua bazhia jai siete. ¹⁰Maʉ̃ wũẽrã wãpe maʉ̃ta jarasia Jesús bawara bꞌeadꞌaa, ãzhira sopua bꞌeba jẽga duanasia. ¹¹Maʉ̃rãbara Jesús zokꞌai bꞌʉta ũrĩbʉdara, maʉ̃ wũẽrãba ũdudꞌara ĩjãna ẽbasia.

Jesús zhi ũdubidꞌa izha jʉrʉkuadꞌata ũmeã

(Lucas 24:13-35)

¹²Maʉ̃ tẽã Jesús zhi ũdubisia izha jʉrʉkuadꞌata ũmeã, maʉ̃rã odꞌe tebasidꞌa. ¹³Ãzhira wãnape dewaraurãã maʉ̃ta jarasidꞌa. Mawũãmina miã maʉ̃rãba jarabʉdasidꞌa ĩjãna ẽbasia.

Jesúsba jaradꞌa izha jʉrʉkuadꞌaba kꞌãrẽ odꞌaita

(Mateo 28:16-20; Lucas 24:36-44; Juan 20:19-23)

¹⁴Nʉmape izha jʉrʉkuadꞌata oncea Jesús zhi ũdubisia ãzhi jewedꞌa nekꞌo kꞌobꞌedꞌe. Mobe ĩjã ẽbaita sota zarea bꞌedꞌeba kẽãkuasia ĩjãna ẽãba zhi ũdudꞌapeadꞌaba jarabʉdata beudꞌata piradrʉdꞌata. ¹⁵Mobe mawũãsia: Ẽjũã jõmaʉ̃ maẽ wãũdua, aramaʉ̃ne bedꞌea biata mʉnebemata jõmaʉ̃ã jaraudua. ¹⁶Mʉnebemata ĩjãpe buru kꞌoebʉrʉra ẽdrʉya, mawũãmina zhi ĩjã ẽãrã aduaya. ¹⁷Mʉnebemata ĩjã bꞌebara ũdudꞌakꞌata bio odꞌaya: Mʉ trʉ̃neba jaita ãĩ jʉrekuadꞌaya, bedꞌeadꞌaya bedꞌeata zhiwidꞌita. ¹⁸Kꞌawua ẽãne dãmata tãbʉdasidꞌa, neãrãta dobibʉdasidꞌa maʉ̃bara nene ẽbaya. Kꞌayarã ʉ̃rʉ̃ juwuata bꞌʉbʉdadꞌera bꞌekuaya.

Jesús wãna ʉ̃taa

(Lucas 24:50-53)

¹⁹Nokꞌo Jesús ma bedꞌeabʉrʉdꞌera Daizezebara ʉ̃taa edesia, aramaʉ̃ne Nokꞌota bꞌaita jewedꞌasia Daizeze juwua araare. ²⁰Izha jʉrʉkuadꞌara wãnape izhidꞌebemata jarasidꞌa baridu maẽ. Nokꞌo Jesúsbara ãzhira kꞌareba nʉmʉneba bedꞌeara wãrãta jara panʉta kꞌawuabiga nʉmasia ũdudꞌakꞌata obiga nʉmʉneba. Amén.