Jesúsdꞌebemata Juanba bꞌʉdꞌa
1Cristora Bedꞌeata Beubari Bape bꞌadꞌa
1Jẽdebara bꞌasia Bedꞌeata, maʉ̃ Bedꞌeara Daizeze ũme bꞌasia, Bedꞌeara Daizeze basia.
2Izhira jẽde wedꞌauba Daizeze ũme bꞌasia.
3Izhikꞌareuba Daizezebara ne jõma osia, izhikꞌareuba obʉrʉ ẽãrã miã kꞌãrẽsidꞌa o ẽbasia.
4Izhira dazhi bꞌʉ kꞌarra, mawũã dazhi bꞌʉ kꞌarrata Daizezedꞌebema kꞌawuabiga bꞌʉba zhãrãĩta ʉ̃nata bꞌʉa.
5Izhira ʉ̃nata pãrĩguadꞌe ʉ̃na bꞌʉa, izhira pãrĩguabara kia ẽã.
6Iabꞌa bꞌasia Daizezeba zokꞌadꞌata, maʉ̃ Juan Burukꞌoemiã abazhidꞌa. 7Maʉ̃ zesia ʉ̃nanebemata jarakꞌaita, aramaʉ̃ne jõmaʉ̃ba ĩjãnamarẽã izhidꞌeba. 8Juan ʉ̃nata bꞌa ẽbasia, awuarabʉrʉ bꞌasia ʉ̃nanebemata jarakꞌaita.
9Wãrĩnu ʉ̃nabara Daizezedꞌebema kꞌawuabiga bꞌʉba zhãrã jõma ʉ̃nabi bꞌʉra zeita bꞌasia naʉ̃ ẽjũãẽna.
10Maʉ̃ ʉ̃narã naʉ̃ ẽjũãne bꞌasia, ẽjũãrã Daizezebara izhikꞌareuba osia, mawũãmina ẽjũãne bꞌebara ũdukꞌawadꞌa ẽbasia.
11Izhidꞌerãma zesia, mawũãmina izhidꞌerãbara bia edadꞌa ẽbasia.
12Mawũãmina izhita bia edadꞌapeadꞌara, izhidꞌebemata ĩjãnapeadꞌara Daizeze warrarãta duanebisia.
13Mawũã Daizeze warrarãta duanebi ẽbasia beubari bꞌeba todꞌadꞌeba, awuarabʉrʉ zhi warrarãta duanebisia Daizezeba.
14Bedꞌeara Beubari Bape dazhirãne edꞌa bꞌasia, kʉãgꞌaba bira bꞌʉba kꞌawuabiga bꞌasia Daizezedꞌebema wãrãta. Daibara ũdusidꞌa izhira zhi zromata, zhi Warra abꞌa bꞌʉta zhi zroma basia zhi Zezedꞌeba.
15Juanbara izhidꞌebemata mawũãsia: Naʉ̃ jarabʉrʉta mʉãrã mawũãsia: Mʉ tẽã urura mʉ audre zhi zroma mʉ nawedꞌa bꞌadꞌaba.
16Izhi bꞌʉdꞌebema biaba dazhirã jõma bia erunʉmʉã, aramaʉ̃ne bia erunʉma tau ẽã.
17Daizezebara izhi ũrãgꞌara diasia Moisédꞌeba, mawũãmina izha zhãrã kʉãgꞌa bꞌʉra izhidꞌebemata wãrĩnurã dajada nʉmesia Jesucristodꞌeba.
18Daizezera miõba ũdukꞌa, mawũãmina zhi Warra abꞌa bꞌʉta zhi Zeze ũme bꞌʉba dazhirãã kꞌawuabisia sãwũã bꞌʉta.
Jesúsdꞌebemata jaradꞌa Juan Burukꞌoemiãba
(Mateo 3:11-12; Marcos 1:7-8; Lucas 3:15-17)
19Jesúsdꞌebemata Juanba jarasidꞌera, nokꞌorã judíorãba Jerusalénneba sacerdoterãta levitarã bawara zokꞌasidꞌa widꞌi mawũãnamarẽã: ¿Bʉra kꞌaipe?
20Mawũãnaĩ merã ẽã jarabʉrʉta mawũãsia: Mʉ ẽã zhãrã Ẽdrʉbiira.
21Mawũãĩ widꞌi mawũãsidꞌa: ¿Mobera bʉra kꞌaipe? ¿Bʉra Elíakꞌa?
Mawũãnaĩ mawũãsia: Mʉrã maʉ̃ ẽã.
Mawũãĩ mawũãsidꞌa: ¿Mobera bʉra Daizezeba bedꞌeata jarabibarita zeita bꞌadꞌakꞌa?
Mawũãnaĩ panaʉ̃ mawũãsia: Mʉrã maʉ̃ ẽã.
22Mawũãĩ mawũãsidꞌa: ¿Mobera bʉra kꞌaipe? Dai zokꞌadꞌapeadꞌarãã daibara jaradꞌaibara bʉra kꞌaita. ¿Bʉdꞌebema bʉara daia kꞌãrẽta jaraipe?
23Mawũãnaĩ Juanbara mawũãsia:
Mʉrã iabꞌa nemi jĩgua bedꞌeaidꞌebemata drua drudrua tabꞌʉ maẽ mawũãĩnebema: Bia ẽãrã ãmabʉdaba jipa obʉdakꞌaudua Nokꞌo zei ota. (Isaías 40:3)
Mawũãĩnebema Daizezeba bedꞌeata jarabibariba Isaíaba jaradꞌa kĩrãkꞌa.
24Juanma zokꞌakuadꞌapeadꞌara fariseorãnebema basia. 25Maʉ̃rãbara widꞌi mawũãsidꞌa: ¿Bʉara kꞌai bedꞌeadꞌeba zhãrã buru kꞌoe bꞌʉ, zhãrã Ẽdrʉbiita bʉ ẽbʉrʉ, miã Elía ẽbʉrʉ, miã Daizezeba bedꞌeata jarabibari ẽbʉrʉ?
26Mawũãnaĩ Juanbara panaʉ̃ mawũãsia: Mʉãrã zhãrã buru kꞌoe bꞌʉa baniãba. Mawũãmina iabꞌa marãne edꞌa bꞌʉa marãba ũdukꞌawadꞌa ẽãta. 27Maʉ̃ mʉ tẽã urua, izhira mʉ audre zhi zroma, nezokꞌaba obari kĩrãkꞌara mʉãrã ẽnaĩne bꞌʉ ẽã izha jẽrũne jʉ̃ bꞌʉra.
28Maʉ̃ Betania pʉwʉrʉdꞌe mawũã berabꞌarisia, do Jordán kĩrãrẽ Juanba zhãrã buru kꞌoekua nʉmana maẽ.
Jesúra Oveja zake Daizezedꞌea
29Nrũẽma Juanbara Jesús izhima uruta ũdupe mawũãsia: Akaudua, kꞌãʉ̃ta Oveja zake Daizezedꞌea, naʉ̃bara kꞌazhirua ne ẽã oya ẽjũãne zhãrã bꞌeta. 30Naʉ̃ta jarabʉrʉta mʉãrã mawũãsia: Mʉ tẽã urura mʉ audre zhi zroma mʉ nawedꞌa bꞌadꞌaba. 31Jesús kꞌaira mʉãrã kꞌawua ẽbasia, mawũãmina Israel bꞌeba ũdukꞌawadꞌamarẽã mʉãrã zhãrãta buru kꞌoe zebʉrʉa baniãba.
32Juanbara dewara mawũãsia: Jawurebia Daizezedꞌeta mʉã ũdusia ʉ̃treba pusirã kĩrãkꞌa uruta, maʉ̃ bꞌarisia Jesú ʉ̃rʉ̃. 33Jesús kꞌaira mʉãrã kꞌawua ẽbasia, mawũãmina baniãba zhãrã buru kꞌoemarẽã Daizezeba mʉta zokꞌadꞌabara mʉãã mawũãsia: Iabꞌaʉ ʉ̃rʉ̃ Jawurebia uruta bʉa ũdubʉrʉdꞌera izhi ʉ̃rʉ̃ bꞌariya, maʉ̃bara Jawurebiata diaya Daizezedꞌeta. 34Mawũã jaradꞌata mʉãrã izhira ũdubʉrʉa, mawũẽ mʉãrã jarabʉrʉa naʉ̃ Daizeze Warrata.
Jesúsba naara jʉrʉkuadꞌa
(Mateo 4:18-22; Marcos 1:16-20; Lucas 5:2-11)
35Nrũẽma Juan wakusa mama bꞌasia izha jʉrʉkuadꞌata ũme bawara. 36Maʉ̃ne Jesústa mama taita ũdui mawũãsia: ¡Akaudua, naʉ̃ta Oveja zake Daizezedꞌea! 37Juanba jʉrʉkuadꞌata ũmebara mawũãbʉrʉta ũrĩnape Jesús kꞌaidꞌu wãsidꞌa. 38Maʉ̃ne Jesúsbara jẽrũya akʉbʉrʉdꞌe kꞌaidꞌu taidꞌata ũdui mawũãsia: ¿Marã kꞌãrẽta jʉrʉ panʉ?
Mawũãĩ ãzhara mawũãsidꞌa: Rabí, bʉra ¿sãma bꞌʉ? Rabí bedꞌeabara jara krĩña bꞌʉa Miã Ũrãgꞌabarita.
39Mawũãnaĩ mawũãsia: Akʉdꞌe zeudua.
Mawũãĩ wãnape sãma bꞌʉta akʉsidꞌa, mobe maʉ̃ ewadera izhi ũme panesia kewara a las cuatro basi baera. 40Andrés basia, Simón Pedro mebeara, ũmenebema abꞌa Andrés basia Juanba jarabʉrʉta ũrĩnape wãnapeadꞌara Jesús kꞌaidꞌu. 41Andrésbara naara zhi mebea Simónta jʉrʉ wãpe ũdui mawũãsia: Daibara ũdusidꞌa zhãrã Ẽdrʉbira.
42Aramaʉ̃ne wesia Jesúsma. Jesúsbara ũdui mawũãsia: Bʉra Simón Jonás warra, bʉ trʉ̃rã Cefa baya. Maʉ̃ trʉ̃bara jara krĩña bꞌʉa Pedrota o Peñata.
Jesúsba jʉrʉdꞌa Felipeta Natanaelta
43Nrũẽma Jesús Galilea druaedꞌa wãĩta babʉrʉdꞌera, Felipeta ũdupe mawũãsia: Mʉ kꞌaidꞌu bꞌadua.
44Felipera Betsaidadꞌebema basia, dewara maʉ̃ pʉwʉrʉdꞌebema basia Andrésta Pedrota. 45Felipebara Natanael jʉrʉ wãpe ũdui mawũãsia: Daibara ũdusidꞌa jari Moiséba ũrãgꞌadꞌe bꞌʉdꞌara, jari Daizezeba bedꞌeata jarabibarirãba jara bꞌʉdꞌapeadꞌara. Izhira Jesúa, José warra Nazaredꞌebema.
46Mawũãĩ Natanaelbara mawũãsia: ¿Nazaredꞌebara biara ʉ̃tʉ zeita bꞌʉka?
Mawũãĩ Felipebara mawũãsia: Zerua akʉdꞌe.
47Jesúsbara Natanael izhi kꞌaita zebʉrʉta ũdui mawũãsia: Akaudua, naʉ̃ wãrĩnu israelitarãã, zhãrã izhara sewa ẽã.
48Mawũãĩ Natanaelbara mawũãsia: ¿Bʉara mʉnebema sãwũã kꞌawua bꞌʉ?
Mawũãĩ Jesúsbara panaʉ̃ mawũãsia: Felipeba bʉ trʉ̃ĩ nawedꞌa bʉra higuera bakuru edre bꞌʉta mʉã bʉra ũdusia.
49Mawũãĩ Natanaelbara mawũãsia: Miã Ũrãgꞌabari, bʉra Daizeze Warra, bʉra Israel duanu Rey.
50Mawũãĩ Jesúsbara mawũãsia: ¿Mʉrã maʉ̃ta bʉara ĩjãbʉrʉka mʉã bʉra higuera bakuru edre bꞌʉta ũdusia abʉrʉdꞌeba? Maʉ̃ kꞌãñabara bʉara kꞌãrẽ audre waibꞌʉata bio ũduya.
51Mawũãpe mawũãsia: Mʉã wãrĩnu marãã jaraya, idꞌidꞌeba marãbara ũdudꞌaya bãjã ewa nʉmʉta, ũdudꞌaya ángelerã Daizezedꞌeta wãrĩze bꞌeta udꞌubꞌae bꞌeta mʉ Beubari Bape bꞌʉma.
2Iabꞌa juwua jidadꞌa Caná pʉwʉrʉdꞌe
1Ewari ũbeadꞌe iabꞌa juwua jidabʉrʉdꞌe fiesta osidꞌa Caná pʉwʉrʉdꞌe, maʉ̃ pʉwʉrʉra Galilea druadꞌebema. Mama bꞌasia Jesús papata. 2Mawũã iabꞌa juwua jidabʉrʉdꞌera trʉ̃sidꞌa Jesústa izha jʉrʉkuadꞌa bawara. 3Maʉ̃ne vino jõbʉrʉdꞌe zhi papaba Jesúa mawũãsia: Ya vino ne ẽã duaĩna.
4Mawũãĩ Jesúsbara mawũãsia: ¿Papa, dazhira maʉ̃ne nʉmʉ ẽãta bʉara kꞌãrẽã maʉ̃ta mʉãã jarabʉrʉ? Mʉã kꞌãrẽ oira wadꞌi araba ẽã.
5Zhi papabara vino jedꞌekabadarãã mawũãsia: Izha jarabʉrʉra jõma oudua.
6Mama zokꞌo seis bꞌasia mongꞌara omata baniã tʉbadata, Daizeze kĩrãbita bia bꞌeaita judíorãbara ne sʉgʉira baniã maʉ̃ zokꞌodꞌeba jue bazhidꞌa. Maʉ̃ zokꞌodꞌera abꞌa abꞌaʉdꞌe baniã balde diez ara bꞌasia. 7Jesúsbara vino jedꞌekabadarãã mawũãsia: Zokꞌo za nʉmeta baniãba biraudua.
Mawũãĩ birakuasidꞌa. 8Mawũẽ Jesúsbara mawũãsia: Kꞌõbebʉrʉ wĩka jue edadꞌape vino jedꞌekabi nʉmʉma edeudua.
Mawũãĩ edesidꞌa. 9Mawũẽ vino jedꞌekabi nʉmʉbara baniãta vino babʉrʉra do akʉsia sãmaʉ̃ba ʉ̃tʉ zebʉrʉta kꞌawua ẽãta, baniãta ãzha juesidꞌa baera vino jedꞌekabadabʉrʉ kꞌawua kꞌopanasia, aramaʉ̃ne vino jedꞌekabi nʉmʉbara juwua jida nʉmʉta trʉ̃pe, 10mawũãsia: Jõmaʉ̃ba naara vino zhi biata dedꞌekabada, mawũẽ bio dobʉdadꞌera vino zhi bia ẽãta dedꞌekabada. Mawũãmina bʉara vino zhi biara wuagꞌasia tẽã dedꞌekaita.
11Maʉ̃ ũdudꞌakꞌata naarabemata obʉrʉra Jesúsbara osia Caná pʉwʉrʉdꞌe Galilea druadꞌe, aramaʉ̃ne ũdubigasia izhira zhi zromata, mawũẽ izha jʉrʉkuadꞌabara wuaabʉrʉ ĩjãsidꞌa izhidꞌebemata. 12Maʉ̃ tẽã Capernaúm pʉwʉrʉedꞌa wãsidꞌa izhita, zhi papata, zhi mebẽrãta, izha jʉrʉkuadꞌata. Mobe mama bꞌeasia ewari kꞌakutua.
Jesúsba miti ẽã odꞌa Daizeze deta
(Mateo 21:12-13; Marcos 11:15-18; Lucas 19:45-46)
13Ewari araa zebodꞌo basia Egiptodꞌeba ẽzoadꞌata krĩcha judíorãba fiesta obadata, mawũẽ Jesús wãrĩzesia Jerusalén pʉwʉrʉedꞌa. 14Maʉ̃ne Daizeze dedꞌa ewara maẽ ũdukuasia Daizezeita babueidꞌebemata nendo bꞌeta pakꞌata, ovejata, palomata, plata kꞌãbiabadasidꞌa ũdusia mama jewedꞌa bꞌeta. 15Mawũẽ lasota bio baratʉ edape Daizeze dedꞌa ewara maẽbara jõma ãĩ jʉrekuasia ãzhi oveja bawara, ãzhi pakꞌa bawara, monedara kuekuasia plata kꞌãbiabadadꞌera, burekuasia mesara. 16Mobe paloma nendobadaa mawũãsia: Ãĩ edeudua naʉ̃ namaʉ̃bara, mʉ Zeze deta kꞌãwũã orãũdua ne nendobada deta.
17Mobebʉrʉ izha jʉrʉkuadꞌabara bude basidꞌa maʉ̃ẽnabemata zhi bꞌʉmata mawũã bꞌʉta: Mʉã bʉ dera kꞌãbãẽã jiwa bꞌʉa. 18Maʉ̃nerã judíorãba mawũãsidꞌa: ¿Sãwũãta daia kꞌawuabirua Daizezeba kꞌãwũã obi nʉmʉbʉrʉ?
19Mawũãnaĩ Jesúsbara panaʉ̃ mawũãsia: Naʉ̃ Daizeze dera ãrĩũdua, mʉã ewari ũbeadꞌe wakusa pãrãña.
20Mawũãĩ judíorãbara mawũãsidꞌa: Naʉ̃ Daizeze dera cuarenta y seis añone pãrãsidꞌa, ¿maʉ̃ta bʉara ewari ũbeadꞌe pãrãĩka?
21Mawũã Daizeze deta jarabʉrʉra Jesúsbara jarasia izhi kꞌakuata. 22Maʉ̃neba beudꞌata piradrʉbʉrʉdꞌera izha jʉrʉkuadꞌabara bude basidꞌa maʉ̃ta jaradꞌata, mawũẽ ĩjãsidꞌa maʉ̃ẽnabemata zhi bꞌʉmata, aramaʉ̃ne ĩjãsidꞌa bedꞌeata Jesúsba jaradꞌara.
Jesúsbara kꞌaua zhãrãnebema jõma
23Jesús Jerusalénne bꞌʉta, Egiptodꞌeba ẽzoadꞌata krĩcha fiesta obadadꞌe bꞌʉdꞌe, izhidꞌebemata bioba ĩjãsidꞌa ũdudꞌakꞌata bio onʉmʉta ũdubʉdaba. 24Mawũãmina Jesúsbara kꞌawuasia ãzhara wãrĩnu ĩjãbʉda ẽãta, zhãrãnebema jõma kꞌau baera. 25Aramaʉ̃ne zhãrãnebema jaradꞌaira nesidꞌa ẽbasia, aramaʉ̃ne izhara kꞌau basia sodꞌera zhãrã sãwũã bꞌeta.
3Jesúsma zedꞌa Nicodemo
1Fariseorãnebemata bꞌasia Nicodemo abadata, nokꞌota bꞌasia judíorãnebemata. 2Maʉ̃ta diamase Jesúsma zepe mawũãsia: Miã Ũrãgꞌabari, daibara kꞌawua panʉã bʉra Daizezeba zokꞌadꞌata miã ũrãgꞌamarẽã, ũdudꞌakꞌata bʉa kꞌãwũã obꞌʉra miõba obꞌe ẽã Daizezeta izhi ũme bꞌʉ ẽbʉrʉ.
3Mawũãĩ Jesúsbara panaʉ̃ mawũãsia: Mʉã wãrĩnu bʉaa jaraya, iabꞌa wakusa tobʉrʉ ẽãrã Daizezeta Nokꞌodꞌebema ẽã.
4Mawũãĩ Nicodemobara mawũãsia: ¿Dazhira zõrãta sãwũã wakusa toipe? ¿Mobera wakusa zhi papa bꞌitaedꞌa wã bꞌeika wakusa toita?
5Mawũãĩ Jesúsbara panaʉ̃ mawũãsia: Mʉã wãrĩnu bʉaa jaraya, iabꞌa baniãneba Jawurebiadꞌeba tobʉrʉ ẽãrã edꞌa wã bꞌe ẽã Daizezeta Nokꞌo maẽrã. 6Beubaridꞌeba tobʉrʉra zharadꞌebema. Mawũãmina Jawurebiadꞌeba tobʉrʉra Jawurebiadꞌebema. 7Kꞌawua ẽã krĩcharãrũã mʉã jarabʉrʉ kꞌarea zhãrã wakusa todꞌai barata. 8Pʉ̃ãdrʉra pʉ̃ãdrʉbaria izha krĩña maẽba, zhi ugara bʉara ũrĩbaria, mawũãmina bʉara kꞌawua ẽã sãmaʉ̃ba uruta miã sãmaã wãta. Aramaʉ̃ kĩrãkꞌa sãwũãta kꞌawua ẽmina dajada awuara bꞌebaria Jawurebiadꞌeba tobʉrʉra.
9Mawũãĩ Nicodemobara mawũãsia: ¿Maʉ̃ mawũãrã sãwũãpe?
10Mawũãĩ Jesúsbara panaʉ̃ mawũãsia: ¿Bʉra Israel bꞌeta ũrãgꞌabarita maʉ̃ sãwũãta kꞌawua ẽka? 11Mʉã wãrĩnu bʉaa jaraya, daibara kꞌãrẽ kꞌawua bꞌeta jarabada, kꞌãrẽ ũdudꞌata jarabada, mawũãmina marãbara ĩjãna ẽã daiba jara bꞌera. 12Ne udꞌabemata mʉã marãã jarabʉrʉta ĩjãna ẽbʉrʉ, ¿sãwũã ĩjãnaĩpe mʉã marãã jarara ne ʉ̃trebemata? 13Maʉ̃ kꞌawuaira miõta ʉ̃tre wãrĩzekꞌa, awuarabʉrʉ ʉ̃treba zedꞌaba kꞌawua bꞌʉta mʉ Beubari Bape bꞌʉba kꞌawua bꞌʉa ne ʉ̃trebemarã. 14Drua drudrua tabꞌʉ maẽ Moiséba dãma ʉ̃tʉ jirabꞌʉdꞌa kĩrãkꞌa, mʉ Beubari Bape bꞌʉra ʉ̃tʉ jirabꞌʉdꞌaya. 15Aramaʉ̃ne mʉnebemata ĩjãbʉrʉra adua ẽbamarẽã, awuarabʉrʉ erubꞌamarẽã Daizeze ũme bꞌai jõ ẽãta.
Daizezebara kʉãgꞌa ẽjũãne bꞌera
16Daizezebara ẽjũãne bꞌera kꞌãbãẽã kʉãgꞌaba diasia zhi Warra abꞌa bꞌʉta, izhidꞌebemata ĩjãbʉrʉra adua ẽbamarẽã, awuarabʉrʉ erubꞌamarẽã Daizeze ũme bꞌai jõ ẽãta. 17Daizezebara zhi Warra naʉ̃ ẽjũãẽna zokꞌa ẽbasia aduabimarẽã ẽjũãne bꞌeta, awuarabʉrʉ zokꞌasia ẽjũãne bꞌera ẽdrʉdꞌamarẽã izhidꞌeba. 18Izhidꞌebemata ĩjãbʉrʉra adua ẽã, mawũãmina zhi ĩjã ẽãrã aduaya, ĩjã ẽãba Daizeze Warra abꞌa bꞌʉdꞌebemata. 19Kꞌãrẽneba aduaita mʉã jaraya: Ʉ̃nata bꞌʉra zesia ẽjũãne bꞌema, mawũãmina zhãrãbara pãrĩguata audre kʉãgꞌasidꞌa ʉ̃na kꞌãñabara, bia ẽãta obꞌeba. 20Bia ẽãta obꞌebara ʉ̃nata bꞌʉra krĩñana ẽã, aramaʉ̃ne ʉ̃nata bꞌʉma zedꞌa ẽã, ãzha obꞌeta kꞌawuadꞌa ẽbamarẽã. 21Mawũãmina Daizezedꞌebema wãrãta aribꞌae bꞌʉra ze bꞌʉa ʉ̃nata bꞌʉma, aramaʉ̃ne kꞌawuadꞌamarẽã izhara obꞌʉta Daizezedꞌebemata.
Juanba jaradꞌa Jesúsdꞌebemata
22Maʉ̃ tẽã Jesús zesia izha jʉrʉkuadꞌa bawara Judea druaedꞌa, ãzhi bawara mama bꞌasia zhãrã buru kꞌoekua. 23Juanbidꞌa zhãrã buru kꞌoekua nʉmasia Enón pʉwʉrʉdꞌe Salin kꞌaita, mama tadrʉ bꞌasi baera dota kꞌãbãẽã. Mawũẽ zhãrã zepe buru kꞌoe nʉmeãsia. 24Maʉ̃nerã wadꞌi cárceldꞌe bꞌʉdꞌa ẽbasia Juan.
25Maʉ̃ne Juanba jʉrʉkuadꞌata judíorã ʉ̃kʉrʉ bawara kꞌaikꞌaiasidꞌa Daizeze kĩrãbita bia bꞌeaita ne sʉgʉ badadꞌebema kꞌarea. 26Maʉ̃rãta Juanma zedꞌape mawũãsidꞌa: Miã Ũrãgꞌabari, Jordán kĩrãrẽ bʉ ũme kꞌobꞌadꞌadꞌebemata bʉa daia jaradꞌabara zhãrã buru kꞌoekua nʉmʉã, mawũẽ jõma izhima ze nʉmʉã.
27Mawũãnaĩ Juanbara panaʉ̃ mawũãsia: Miõba mawũã jʉre nʉma bꞌe ẽã Daizezeba dia ẽbʉrʉ. 28Mʉã jaradꞌara marãbara kꞌawua bꞌeta mʉãrã mawũãsia: Mʉ ẽã zhãrã Ẽdrʉbira, awuarabʉrʉ izhi zeita jarakꞌamarẽã mʉrã izhi na zokꞌadꞌapeadꞌa. 29Juwua jidaidꞌera wũẽrã zhũmakĩrãba erunʉmʉã, izhi ũme zhi biata kꞌaita bꞌʉra izhi nemita ũrĩ bꞌʉba kꞌãbãẽã sobia bꞌidꞌabaria. Jesúsdꞌebema ũrĩ bꞌʉba aramaʉ̃ kĩrãkꞌa mʉrã kꞌãbãẽã sobia bꞌʉa. 30Jesúra wuaabʉrʉ zhi zromata bꞌeya, mawũãmina mʉrã zhi zroma ẽãta bꞌeya.
Ʉ̃treba zedꞌadꞌebema
31Jesús ʉ̃treba zebʉrʉra jõmaʉ̃ audre zhi zroma, druadꞌebemata bꞌʉra druadꞌebemata bꞌʉba ne druadꞌebemata jara bedꞌea bꞌʉa, mawũãmina ʉ̃treba zebʉrʉra jõmaʉ̃ audre zhi zroma. 32Mawũẽ ʉ̃tre izha ũdudꞌata izha ũrĩnata jara bꞌʉa, mawũãmina miõba ĩjãna ẽã izha jara bꞌʉra. 33Izha jara bꞌʉta iabꞌaʉba ĩjãrã maʉ̃ĩtara Daizezera wãrĩnu bedꞌea bꞌʉa. 34Daizezeba zokꞌadꞌabara Daizeze bedꞌeata jara bꞌʉa Daizezeba Jawurebiata diadꞌaba. 35Zhi Zezebara zhi Warra kʉãgꞌa, mawũẽ ne jõma chãbꞌarisia izhi juwuadꞌe.
36Zhi Warradꞌebemata ĩjã bꞌʉbara erubꞌʉa Daizeze ũme bꞌai jõ ẽãta, mawũãmina zhi Warradꞌebemata ĩjã ẽãbara erubꞌa ẽã Daizeze ũme bꞌai jõ ẽãrã, awuarabʉrʉ Daizezeba kĩrũbiba pua kꞌawua oya.
4Jesús bedꞌeadꞌa wũẽrã Samariadꞌebemaa
1Nokꞌo Jesúsbara kꞌawuasia fariseorãbara ũrĩsidꞌata zhãrãba mawũãbʉdata: Jesúsbara zhãrã audre jʉre buru kꞌoekua nʉmʉã Juan kꞌãñabara. 2Mawũãsidꞌa Jesúsbara zhãrã buru kꞌoekua nʉmʉ ẽãta, awuarabʉrʉ zhãrã buru kꞌoe duanasia izha jʉrʉkuadꞌabʉrʉ. 3Fariseorã bĩ ẽã bꞌeta kꞌawuape Judea druadꞌebara wãbʉrʉta, wakusa wãsia Galilea druaedꞌa. 4Maʉ̃nerã berabꞌariita bara basia Samaria druadꞌe. 5Aramaʉ̃ne zesia pʉwʉrʉ Samaria druadꞌebemata Sicar abadaidꞌu, mama kꞌaita bꞌasia Jacobo bꞌadꞌaba druata diadꞌata zhi warra Joséa. 6Mama bꞌasia poso Jacobodꞌeta. Mawũẽ Jesúra odꞌe mapoea zebʉrʉba jewedꞌasia poso kꞌaita. Maʉ̃nerã nʉmasia ʉ̃matipa badea.
7Maʉ̃ne wũẽrãta Samariadꞌebemata zesia baniã juedꞌe, mawũẽ Jesúsbara mawũãsia: Baniã mʉã doita diadua. 8Maʉ̃ẽna izha jʉrʉkuadꞌara pʉwʉrʉedꞌa wãsidꞌa kꞌãrẽ kꞌoita edadꞌe.
9Mawũãĩ wũẽrã Samariadꞌebemabara mawũãsia: ¿Bʉra judíota sãwũã baniã doita mʉãã widꞌibʉrʉ, maʉ̃ne mʉrã wũẽrã Samariadꞌebemata bꞌʉ ẽka? Mawũãsia judíorã Samariadꞌebema bawara zhi biata duanu ẽbaera.
10Mawũãĩ Jesúsbara panaʉ̃ mawũãsia: Daizezeba dia bꞌʉdꞌebemata sãwũãta bʉa kꞌawuara, kꞌaiba baniã mʉã doita diadua abʉrʉta bʉa kꞌawuara, bʉara baniã widꞌikꞌausia, mobedꞌeba mʉãrã diakꞌausia baniã dazhi bꞌabi bꞌʉta.
11Mawũãĩ wũẽrãbara mawũãsia: Nokꞌó, bʉara kꞌãrẽba jueira ne ẽã, maʉ̃ne posora eidꞌua. ¿Mawũẽ bʉara sãmabemata erubꞌʉ baniã dazhi bꞌabi bꞌʉra? 12¿Mobera bʉra audre zhi zromakꞌa zõrã dazhirãta Jacobo kꞌãñabara? Naʉ̃ posora izhara daiita ãmaẽsia, naʉ̃ta do bazhidꞌa izha, zhi warrarãba, izhi pakꞌarãba.
13Mawũãĩ Jesúsbara panaʉ̃ mawũãsia: Naʉ̃ baniãta dobʉrʉra wakusa obisiaya. 14Mawũãmina baniã mʉã diabʉrʉta dobʉrʉra obisiakꞌa baya, awuarabʉrʉ baniã mʉã diabʉrʉra izhidꞌe drʉ nʉmaña Daizeze ũme bꞌai jõ ẽãta.
15Mawũãĩ wũẽrãbara mawũãsia: Nokꞌó, mʉãã diadua maʉ̃ baniãta, mʉ obisia ẽbaita, miã nama juedꞌe ze ẽbaita.
16Mawũãĩ Jesúsbara mawũãsia: Bʉzhi kĩmata trʉ̃ne wãrũã, mobe zeudua naĩnu.
17Mawũãĩ wũẽrãbara panaʉ̃ mawũãsia: Mʉrã kĩma ne ẽã.
Mawũãĩ Jesúsbara mawũãsia: Bʉara bia jarabʉrʉa bʉra kĩma ne ẽã abʉrʉbara. 18Bʉara kĩma edama juesoma bꞌʉa, idꞌi erubꞌʉsidꞌa bʉ kĩma ẽã, mawũẽ bʉa mawũã jarabʉrʉra wãrĩnuã.
19Mawũãĩ wũẽrãbara mawũãsia: Nokꞌó, mʉma bʉra Daizezeba bedꞌeata jarabibaria. 20Dai zhibarirãbara Daizezera ibia jara bꞌeasia naʉ̃ kꞌatumane, maʉ̃ne marãbara jara bꞌea Daizezera Jerusalénnebʉrʉ ibia jaradꞌai barata.
21Mawũãĩ Jesúsbara mawũãsia: Mʉã za jaraita ĩjãrũã, ewarita zeya, maʉ̃nerã marãbara naʉ̃ kꞌatumane miã Jerusalénne ibia jaradꞌa ẽã Daizezera. 22Marãbara Daizezera ibia jara bꞌeta izhidꞌebema sãwũãta kꞌawuadꞌa ẽã, daibara Daizezera ibia jara bꞌea izhidꞌebema sãwũãta kꞌawua bꞌeta, zhãrã Ẽdrʉbigaira uruba judíorãneba. 23Mawũãmina ewarita zeya, maʉ̃ ewarira ya arabasia, mawũẽ Daizeze wãrĩnu ibia jara bꞌebara Jawurebiadꞌeba wãrĩnu ibia jaradꞌaya, Daizezebara krĩña bꞌʉa izhira mawũã ibia jaradꞌaita. 24Daizezera Jawurea, mawũẽ izhita ibia jara bꞌebara Jawurebiadꞌeba wãrĩnu ibia jaradꞌaidꞌe bꞌʉa.
25Mawũãĩ wũẽrãbara mawũãsia: Mʉã kꞌawua bꞌʉa zhãrã Ẽdrʉbiira zeita, izhi zebʉrʉdꞌera daia bia jarakꞌaya ne jõma.
26Mawũãĩ Jesúsbara mawũãsia: Mʉta izhia, mʉãta bʉ ũme bedꞌea kꞌobꞌʉa.
27Maʉ̃ne izha jʉrʉkuadꞌara zesidꞌa, mawũẽ bia akʉdruasidꞌa wũẽrã ũme bedꞌea kꞌobꞌʉba, mawũãmina miõba widꞌidꞌa ẽbasia kꞌãrẽta widꞌi bꞌʉra, o maʉ̃ wũẽrã ũme kꞌãrẽ ʉ̃rʉ̃ bedꞌea kꞌobꞌʉra. 28Wũẽrãbara zokꞌo izhidꞌera ãmaẽpe wãsia pʉwʉrʉedꞌa, mobe zhãrã bꞌea mawũãsia: 29Ũmakĩrãta akʉdꞌe zeudua, jõma jarabʉrʉa mʉã kꞌãrẽ odꞌata. ¿Kꞌãgʉra zhãrã Ẽdrʉbii ẽka?
30Mawũãĩ pʉwʉrʉdꞌebara wãsidꞌa, aramaʉ̃ne zesidꞌa Jesúsma.
31Maʉ̃ẽna izha jʉrʉkuadꞌabara ibiadꞌe jara mawũãsidꞌa: Miã Ũrãgꞌabari, nekꞌorua.
32Mawũãnaĩ izhara mawũãsia: Mʉãrã zhikota kꞌoita erubꞌʉa marãba kꞌawuadꞌa ẽãta.
33Mawũãĩ izha jʉrʉkuadꞌabara ãzhirãĩnu mawũãsidꞌa: ¿Iabꞌaʉba zhikota wesi ẽka?
34Maʉ̃ne Jesúsbara mawũãsia: Mʉ zhikora mʉãrã mʉ zokꞌadꞌaba krĩñata oibara, aramaʉ̃ne izha kꞌãrẽ obi nʉmʉkꞌãrĩta jõbiibara. 35¿Ne udꞌapeadꞌata bꞌʉaira marãbara jedꞌekꞌo kĩmarẽ wãẽã nʉmʉã abada ẽka? Mawũãmina mʉã marãã jaraya: Ne bꞌʉaita akʉdꞌai kĩrãkꞌa akaudua druadꞌe zhãrã bꞌeta, ya mʉnebemata ĩjãĩta nʉmeã. 36Ne bꞌʉa nʉmʉbara ne jida bꞌʉa, aramaʉ̃ kĩrãkꞌa nʉmʉbara jara bꞌʉa mʉnebemata ĩjãnamarẽã Daizeze ũme bꞌai jõ ẽãnebemata, mawũẽ ne ubarita ne bꞌʉabari ũme sobiabada kĩrãkꞌa bꞌʉa. 37Maʉ̃ẽnabemata jarabadara wãrĩnuta mawũã bꞌʉa: Abꞌara zhi ubaria, waya dewarabemata zhi bꞌʉabaria. 38Aramaʉ̃ kĩrãkꞌa mʉã marã zokꞌasia awʉrʉrãba jaradꞌapeadꞌa maẽ marãneba ĩjãnamarẽã, aramaʉ̃ne awʉrʉrãba jaradꞌapeadꞌa maẽ marãneba ĩjã tupudꞌea.
39Samaria bidꞌarã maʉ̃ pʉwʉrʉdꞌe bꞌebara bioba Jesúsdꞌebema ĩjãsidꞌa, maʉ̃ẽnabema wũẽrãba mawũãsia: Kꞌãʉ̃bara mʉãã jarasia mʉã kꞌãrẽ odꞌata jõma. 40Maʉ̃neba Samaria bidꞌarã Jesúsma zedꞌape zuburia bedꞌeasidꞌa ãzhi bawara bꞌemarẽã, mawũẽ mama bꞌesia ewari ũme. 41Aramaʉ̃ne ãmaña bioba ĩjãsidꞌa bedꞌeata izha jarabʉrʉta ũrĩbʉdaba. 42Maʉ̃nerã wũẽrãã mawũãsidꞌa: Daibara ĩjã kꞌopanʉ ẽã bari bʉa jarabʉrʉdꞌeba, awuarabʉrʉ izhi bedꞌeara jipa daiba ũrĩbʉda, mawũẽ kꞌawuabʉda naʉ̃ wãrĩnu ẽjũãne zhãrã bꞌeta Ẽdrʉbiita.
Jesúsba bꞌebidꞌa nokꞌo warrata
43Mawũã ewari ũme bꞌape Samaria druadꞌebara Jesús wãsia Galilea druaedꞌa. 44Izhi Jesúsba jaradꞌa kĩrãkꞌa Daizezeba bedꞌeata jarabibarira izhi druadꞌebʉrʉ bia edadꞌa ẽã. 45Galilea druaedꞌa zebʉrʉdꞌera Galilea bidꞌarãbara bia edasidꞌa, maʉ̃ẽnabema ãzhara ũdusidꞌa Jerusalénne kꞌãrẽ odꞌata jõma, Egiptodꞌeba ẽzoadꞌata krĩcha fiesta odꞌapeadꞌa maẽ mawũã ũdusidꞌa, ãzhisidꞌa wãsi baera maʉ̃ fiestaidꞌura.
46Jesús wakusa zesia Caná pʉwʉrʉedꞌa, maʉ̃ pʉwʉrʉra Galilea druadꞌebema, mama baniãta vino babidꞌa basia. Maʉ̃ne Capernaúm pʉwʉrʉdꞌe bꞌasia reyba nokꞌota bꞌʉkꞌãrĩta, maʉ̃ warrata kꞌaya nʉmasia. 47Maʉ̃ne izha ũrĩsia Jesús zebʉrʉta Judea druadꞌeba Galilea druaedꞌa, mawũẽ izhima zepe zuburia bedꞌeasia zhi warrata bꞌebidꞌe wãmarẽã beubodꞌota. 48Mawũẽ Jesúsbara mawũãsia: Ũdudꞌakꞌata mʉã obʉrʉta ũdubʉda ẽãrã marãbara mʉnebema ĩjãna ẽã.
49Mawũãĩ reyba nokꞌota bꞌʉkꞌãrĩbara mawũãsia: Nokꞌó, zerua mʉ warra beui nawedꞌa.
50Mawũãĩ Jesúsbara mawũãsia: Dedꞌaa wãrũã, bʉ warrara bꞌidꞌa.
Maʉ̃bara ĩjãsia Jesúsba mawũãbʉrʉra, mawũẽ wãsia. 51Odꞌe wãne izhi nezokꞌarãba kĩrãzhu zedꞌape mawũãsidꞌa: Bʉ warrara bꞌidꞌa.
52Mawũãnaĩ izhara widꞌisia kꞌãrẽ ʉ̃madaudꞌe arigu basita. Mawũẽ mawũãsidꞌa: Nuwuedꞌa ʉ̃madau pʉrra a la una kenabꞌarisia kʉwamiãbara.
53Mawũẽ zhi zezebara kꞌawuasia maʉ̃ ʉ̃madaudꞌe Jesúsba bʉ warrara bꞌidꞌa adꞌata. Mawũẽ izhara Jesúsdꞌebema ĩjãbʉrʉba ĩjãsidꞌa zhi kĩmaba zhi warrarãba. 54Jesúsbara maʉ̃ta ũdudꞌakꞌata zhi ũmeta osia, Judea druadꞌeba Galilea druaedꞌa wãpe.
5Kꞌakua pira ẽã bꞌadꞌa Betesdadꞌe
1Maʉ̃ tẽã judíorãbara fiesta osidꞌa, mawũẽ Jesús wãrĩzesia Jerusalén pʉwʉrʉedꞌa. 2Jerusalénne edꞌa wãbarita puerta ovejarãneã abada kꞌaita bꞌʉa posota, maʉ̃ta hebreo bedꞌeadꞌera Betesda abada, mamarã juesoma bꞌʉa de zaketa. 3Maʉ̃za kꞌayarãta bio nʉmasia, daʉbꞌerrea bꞌeta, wã bꞌe ẽã bꞌeta, kꞌakua pira ẽã kꞌaya bꞌeta nʉmasia, maʉ̃rãbara jʉ̃ã bꞌeasia poso õbꞌʉta pirayeedꞌa. 4Maʉ̃ẽnabema edꞌaudꞌe ángelta zepe maʉ̃ poso õbꞌʉta pirabi bꞌasia, mawũẽ pirabʉrʉdꞌe naara doedꞌa õbꞌebʉrʉta bꞌe bꞌasia ne bariduba kꞌaya bꞌʉta. 5Maʉ̃ne ũmakĩrãta mama bꞌasia treinta y ocho año bata kꞌaya bꞌʉta. 6Maʉ̃ tabꞌʉta Jesúsba ũdubʉrʉdꞌera, mawũã bꞌʉta ewari dããrã bata kꞌawuape mawũãsia: ¿Bʉra bꞌe krĩña bꞌʉka?
7Mawũãĩ kꞌayabara panaʉ̃ mawũãsia: Nokꞌó, mʉrã bꞌe krĩña bꞌʉa, mawũãmina poso pirabʉrʉdꞌera mʉrã kꞌaiba doedꞌa õbꞌʉdꞌaita ne ẽã, mawũẽ mʉ wãbʉrʉedꞌa awʉrʉta edꞌa wã bꞌʉa mʉ nawedꞌa.
8Mawũãĩ Jesúsbara mawũãsia: Piradrʉrua, bʉzhi ertõ jiraedape tebarua.
9Audre ẽãne maʉ̃ bꞌesia, mawũẽ izhi ertõ jiraedape tebadꞌewasia. Ẽnaʉ̃bada ewari basia maʉ̃ ewadera.
10Mawũẽ judíorãbara mawũã bꞌebʉrʉa mawũãsidꞌa: Idꞌira ẽnaʉ̃bada ewaria, mawũẽ bʉzhi ertõ anʉma bꞌe ẽã.
11Mawũãnaĩ izhara panaʉ̃ mawũãsia: Mʉta bꞌebidꞌabara ertõ jiraedape tebarua asia.
12Mawũãĩ widꞌi mawũãsidꞌa: ¿Kꞌaiba bʉaa mawũã bʉzhi ertõ jiraedape tebarua asi?
13Mawũãbʉdadꞌera zhi bꞌedꞌabara kꞌawua ẽbasia kꞌaita, Jesús nebasi baera mama zhãrã kꞌabana nʉmanane edꞌa. 14Tẽã Jesúsbara ũdupe mawũãsia: Bʉra bꞌesia, mawũẽ wueta kꞌazhiruata orãrũã audre zuburia ẽbaita.
15Maʉ̃ wãpe judíorãã jarasia izhira Jesúsba bꞌebidꞌata. 16Maʉ̃ kꞌarea judíorã Jesús kꞌaidꞌu jirpanesia beadꞌaita, maʉ̃ta onʉmaẽrã ẽnaʉ̃bada ewade. 17Mawũẽ Jesúsbara mawũãsia: Mʉ Zezera ewariza kꞌãrẽ obꞌʉa, mawũẽ mʉsidꞌa kꞌãrẽ onʉmʉã.
18Mawũãbʉrʉ kꞌarea judíorãbara wuaabʉrʉ bea krĩñasidꞌa, ãzhima aramaʉ̃nerã bari ewari ẽnaʉ̃badadꞌebemata aribꞌae ẽã nʉma ẽbasia, awuarabʉrʉ Daizezesidꞌa zhi Zezeta jarasia, ãzhima aramaʉ̃nerã Daizeze ũme abꞌarikadꞌe nʉmasia.
Zhi Zezeba obꞌʉta obꞌʉa zhi Warrabara
19Maʉ̃ kꞌarea Jesúsbara mawũãsia: Mʉã wãrĩnu marãã jaraya: Mʉ zhi Warrabara mʉzhikusaubara miã kꞌãrẽta obꞌe ẽã, awuarabʉrʉ mʉ Zezeba obʉrʉta ũdubʉrʉta obꞌʉa, aramaʉ̃ne jõma mʉ Zezeba obꞌʉra mʉ zhi Warrabidꞌa obꞌʉa. 20Mʉ Zezebara zhi Warra mʉrã kʉãgꞌaba jõma ũdubi bꞌʉa izha obꞌʉra, mawũẽ kꞌãrẽ ãmaña audre waibꞌʉata bio ũdubiya, mawũẽ marãbara bia akʉdrua jirpaneña. 21Mʉ Zezebara beukuadꞌara piradrʉbipe zokꞌai bꞌʉbari kĩrãkꞌa, mʉ zhi Warrabidꞌa mawũã okrĩñabʉrʉrãta zokꞌai bꞌʉbaria. 22Mʉ Zezebara miõta kꞌawua o ẽã, awuarabʉrʉ zhãrã kꞌawua oidꞌebema jõma diasia mʉta zhi Warraa. 23Mawũãtrʉ jõmaʉ̃ba mʉ zhi Warrata wawiadꞌaya mʉ Zeze wawia panʉ kĩrãkꞌa. Mʉ zhi Warrata wawia ẽãbara wawia ẽã mʉ Zeze mʉ zokꞌadꞌata.
24Mʉã wãrĩnu marãã jaraya: Iabꞌaʉba mʉ bedꞌeata ũrĩ bꞌʉba mʉ zokꞌadꞌadꞌebemata ĩjã bꞌʉra erubꞌʉa Daizeze ũme bꞌai jõ ẽãta, mawũẽ Daizezebara pua kꞌawua o ẽbaya, awuarabʉrʉ aduaita bꞌadꞌata zhi berabꞌarima baya Daizeze ũme bꞌai jõ ẽãma. 25Mʉã wãrĩnu marãã jaraya: Ewarita zeya, maʉ̃ ewarira ya arabasia, mawũẽ aduaita bꞌebara ũrĩnaña mʉ Daizeze Warra nemita, mʉ bedꞌeata ũrĩbʉdara Daizeze ũme bꞌai jõ ẽã bꞌeaya. 26Mʉ Zezebara erubꞌʉa izhi ũme bꞌai jõ ẽãta, mawũẽ mʉ zhi Warraabidꞌa diasia erubꞌamarẽã izhi ũme bꞌai jõ ẽãta. 27Dewara zhãrã kꞌawua oi zareata diasia mʉrã Beubari Bape bꞌʉba. 28Mʉã maʉ̃ta jarabʉrʉ kꞌarea kꞌawua ẽã krĩcharãũdua, ewarita zeya, maʉ̃ ewadera beudꞌapeadꞌata jou nʉmebara ũrĩnaña mʉ nemirã. 29Mawũẽ biata odꞌapeadꞌara piradrʉdꞌaya Daizeze ũme bꞌai jõ ẽã bꞌaita, mawũãmina bia ẽãta odꞌapeadꞌara piradrʉdꞌaya aduaita.
Jara bꞌea Jesúra zhãrã Ẽdrʉbita
30Mʉãrã mʉzhikusaubara kꞌãrẽ o ẽã. Awuarabʉrʉ sãwũãta mʉ Zezeba mʉãã jarabʉrʉta ũrĩpe mʉãrã zhãrã kꞌawua obaria, aramaʉ̃ne obaria sãwũã oi bꞌʉdꞌe, mawũẽ mʉãrã onʉmʉ ẽã mʉã krĩñata, awuarabʉrʉ onʉmʉã mʉ Zeze mʉ zokꞌadꞌaba krĩñata. 31Mʉnebemata mʉã jarara mʉnebema zhãrãma wãrĩnu ẽã. 32Mawũãmina mʉ Zezeba mʉnebemata jara bꞌʉa, mʉã kꞌawua bꞌʉa mawũã mʉnebemata jara bꞌʉra wãrĩnuã. 33Mʉnebemata widꞌidꞌamarẽã marãbara zhãrãta zokꞌasidꞌa Juan Burukꞌoemiãma, mawũẽ izhara jarasia mʉnebema wãrãta. 34Mawũãmina mʉãrã zhãrãba mʉnebema mawũã jaraita nesidꞌa nʉmʉ ẽã, awuarabʉrʉ mʉãrã Juanba jaradꞌata jarabʉrʉa marãta ẽdrʉdꞌamarẽã. 35Juanbara mʉnebema kꞌawuabiga nʉmʉba pãrĩguadꞌe ĩbĩrã ʉ̃nabari kĩrãkꞌa bꞌasia, aramaʉ̃ne marã ewari kꞌakutua sobiasidꞌa izhi ʉ̃nane. 36Mawũãmina mʉã erubꞌʉa mʉnebema audre bia jara bꞌʉta Juanba jaradꞌa kꞌãñabara, kꞌãrẽ aribꞌaeita mʉ Zezeba mʉãã diadꞌata mʉã obꞌʉba mʉnebemata jara bꞌʉa mʉrã mʉ Zezeba zokꞌadꞌata. 37Mʉ Zeze mʉ zokꞌadꞌabidꞌa mʉnebemata jara bꞌʉa. Marãbara ũrĩnakꞌa izhi nemirã, miã ũdudꞌakꞌa izhira. 38Miã izhi bedꞌeara eruduanu ẽã marã sodꞌera, mʉta izha zokꞌadꞌara marãbara ĩjãna ẽãba. 39Daizeze bedꞌeata zhi bꞌʉmarã marãbara kĩrãkuita estudia bꞌea, mazhima maʉ̃neba erubꞌeba Daizeze ũme bꞌai jõ ẽãta, mawũã zhi bꞌʉmabara jara bꞌʉa mʉnebemata. 40Maʉ̃ne marã mʉma ze krĩñana ẽã aramaʉ̃ne erubꞌeaira Daizeze ũme bꞌai jõ ẽãta.
41Mʉãrã zhãrãba mʉta bia jaradꞌamarẽã nʉmʉ ẽã. 42Maʉ̃ẽnabema mʉã marã ũdukꞌawua bꞌʉa, marãbara Daizezera kʉãgꞌadꞌa ẽã. 43Mʉrã zesia mʉ Zezedꞌeba, maʉ̃ta marãbara mʉrã bia edadꞌa ẽã, awʉrʉta izhikusaudꞌeba zera maʉ̃ marãbara bia edadꞌaya. 44¿Marãbara mʉnebema sãwũã ĩjãnaĩpe kꞌãwũã mazhirãĩnubʉrʉ zhiya bia jara bꞌera? Kꞌãwũãrã Daizeze abꞌa bꞌʉba bia jaramarẽã duanu ẽã. 45Krĩcharãũdua kĩrãbita mʉã marã jikuaita mʉ Zezea, mawũãmina kꞌaiba marã jikuaira bꞌʉta Moiséa, maʉ̃ne marãbara izhita krĩcha bꞌea. 46Moiséba bꞌʉdꞌata marãba ĩjã bꞌebʉrʉ mʉnebemata ĩjãkꞌausidꞌa, izhara mʉnebemata bꞌʉdꞌaba. 47Mawũãmina izha bꞌʉdꞌata ĩjãna ẽãrã, ¿sãwũã ĩjãnaĩpe mʉ bedꞌeara?
6Nekꞌobigadꞌa cinco mil
(Mateo 14:13-21; Marcos 6:30-44; Lucas 9:10-17)
1Maʉ̃ tẽã Jesús kĩrãrã wãsia Galilea dota jedꞌea õbꞌʉdꞌe, maʉ̃ dora abꞌaʉta Tiberia abada. 2Kꞌabanata izhi kꞌaidꞌu wãsidꞌa ũdudꞌakꞌata ũdu bꞌeta bꞌebiga nʉmʉba kꞌayarãta. 3Mawũẽ Jesús wãrĩzesia kꞌatuma zakeidꞌu, mobe mama jewedꞌasia izha jʉrʉkuadꞌa bawara. 4Maʉ̃nerã ewari araa zebodꞌo basia Egiptodꞌeba ẽzoadꞌata krĩcha fiesta obadata judíorãba. 5Jesúsba akʉbʉrʉdꞌera ũdusia kꞌabanata izhi kꞌaidꞌu bꞌeta, mawũẽ Felipea mawũãsia: ¿Zhiko sãma edadꞌaipe naʉ̃rãta nekꞌodꞌamarẽãrã?
6Mawũã widꞌisia sãwũã panaʉ̃ĩ kꞌawuaita, izhara kꞌawua bꞌʉta kꞌãrẽ oira. 7Mawũãĩ Felipebara panaʉ̃ mawũãsia: Ewari dociento trajadꞌaba denario docientoba pan edabʉrʉsidꞌa arabꞌae ẽã naʉ̃rãta abꞌa abꞌakꞌa wĩkabidꞌa nekꞌobigaira.
8Izha jʉrʉkuadꞌaba abꞌaʉba, Andrés Pedro mebeaba mawũãsia: 9Kũrãta za bꞌʉba pan juesoma erubꞌʉta cebada omata erubꞌʉa, bꞌedasidꞌa ũme erubꞌʉa, mawũãmina ¿naʉ̃ sãwũãĩpe bioitara?
10Mawũãĩ Jesúsbara mawũãsia: Zhãrãta jewedꞌabigaudua.
Mamarã bio nʉmasia poajãrãta, aramaʉ̃ne cinco mil jewedꞌasidꞌa zhũmakĩrãrãta. 11Mobebʉrʉ Jesúsbara maʉ̃ pan jiraedape Daizezea zhibia jipe bꞌʉekuape diasia izha jʉrʉkuadꞌaa, mawũẽ izha jʉrʉkuadꞌabara jedꞌekasidꞌa jewedꞌa kꞌobꞌea, bꞌedasidꞌa abꞌarika osia ãzha kꞌobʉdadꞌe kꞌodꞌamarẽã. 12Jãwũã duanebʉdadꞌe izha jʉrʉkuadꞌaa mawũãsia: Adꞌubabʉdata zhi bꞌʉgʉzoamata jʉrepeudua, miã kꞌãrẽta adua ẽbamarẽã.
13Mawũãĩ jʉrepesidꞌa, aramaʉ̃ne zhi bꞌʉgʉzoamaba jamara doce birasidꞌa, pan juesomata cebada omata adꞌubadꞌapeadꞌata zhi kꞌodꞌapeadꞌaba. 14Mawũẽ zhãrãbara ũdudꞌakꞌata Jesúsba mawũã obʉrʉta ũdudꞌai mawũãsidꞌa: Naʉ̃ wãrĩnu Daizezeba bedꞌeata jarabibarita zeita bꞌadꞌa naʉ̃ ẽjũãẽna.
15Maʉ̃nerã Jesúsbara kꞌawuasia izhira zareadꞌe edeita kꞌopanʉta rey babidꞌaita, mawũẽ wakusa kꞌatumaẽna wãsia izhi dobꞌa.
Jesús tebadꞌa do ʉ̃rʉ̃
(Mateo 14:22-27; Marcos 6:45-52)
16Keubʉrʉdꞌera Jesúsba jʉrʉkuadꞌara zesidꞌa do jedꞌea õbꞌʉidꞌu. 17Mobe jãbadꞌe bꞌarikuape do jedꞌea õbꞌʉdꞌe kĩrãrã wãsidꞌa Capernaúm pʉwʉrʉedꞌa. Maʉ̃nerã ya paisosoa nʉmʉne Jesús wadꞌi ze ẽbasia ãzhima. 18Maʉ̃ne do jedꞌea õbꞌʉra bomatʉ bʉsadꞌewasia zarea pʉ̃ãdrʉ nʉmʉba. 19Wigui wãnata cinco o seis kilómetro babʉrʉdꞌe Jesús do ʉ̃rʉ̃ taita ũdubʉdadꞌera orra tebasia jãbata, mawũẽ perasidꞌa. 20Maʉ̃ne izhara mawũãsia: Mʉta taia, perarãũdua.
21Mawũãĩ ãzhara sobia jãbadꞌe edasidꞌa, aramaʉ̃ne dããrã ẽãne jũẽkuasia drua ãzhi wãma.
Zhãrãba jʉrʉdꞌapeadꞌa Jesús
22Do jedꞌea õbꞌʉ kĩrãrẽ zhãrã duanenabara nrũẽmane kꞌawuasidꞌa mama jãba abꞌabai bꞌadꞌata, izha jʉrʉkuadꞌa bawara Jesús maʉ̃ jãbadꞌera bꞌari ẽbasia, awuarabʉrʉ maʉ̃rã wãsidꞌa ãzhi dobꞌa. 23Maʉ̃ne jãba awʉrʉta Tiberia pʉwʉrʉdꞌeba zesidꞌa, Jesúsba Daizezea zhibia jipe pan kꞌodꞌapeadꞌa kꞌaita. 24Aramaʉ̃ne zhãrãbara kꞌawuasidꞌa Jesús mama ne ẽãta, miã izha jʉrʉkuadꞌasidꞌa ne ẽãta, mawũẽ maʉ̃ jãbadꞌe bꞌarikuape wãsidꞌa Capernaúm pʉwʉrʉedꞌa Jesús jʉrʉdꞌe.
Jesúra panta Daizeze ũme bꞌai jõ ẽãnebema
25Aramaʉ̃ne do jedꞌea õbꞌʉ kĩrãrẽ ũdudꞌape mawũãsidꞌa: Miã Ũrãgꞌabari, ¿bʉra sõmbewedꞌa naĩnu zesi?
26Mawũãnaĩ Jesúsbara panaʉ̃ mawũãsia: Mʉã wãrĩnu marãã jaraya, marãbara mʉrã jʉrʉ duanu ẽã sãwũãta kꞌawuasidꞌa baera mʉã odꞌata ũdudꞌakꞌata, awuarabʉrʉ mʉrã jʉrʉ duanuã panta jãwũã kꞌosidꞌa baera. 27Kꞌãrẽ obʉdata bari zhiko jõbari kꞌarea orãũdua, awuarabʉrʉ kꞌãrẽ oudua pan jõkꞌa kꞌarea, Daizeze ũme bꞌai jõ ẽã kꞌarea, mʉ Beubari Bape bꞌʉba maʉ̃ pan marãã diaya, mʉrã maʉ̃ kꞌarea bꞌʉsia mʉ Zhibari mʉ Zezeba.
28Mawũãĩ mawũãsidꞌa: ¿Daibara kꞌãrẽta odꞌaibarape kꞌãrẽ Daizezedꞌeta odꞌaira?
29Mawũãnaĩ Jesúsbara panaʉ̃ mawũãsia: Marãba kꞌãrẽ Daizezedꞌeta odꞌaira, ĩjãũdua mʉ izha zokꞌadꞌata.
30Mawũãĩ mawũãsidꞌa: ¿Bʉara kꞌãrẽta ũdudꞌakꞌata oipe daiba maʉ̃ta ũdudꞌape bʉdꞌebemata ĩjãnaĩrã? ¿Bʉara kꞌãrẽta oipe? 31Dai zhibarirã bꞌeadꞌabara pan maná abadata kꞌosidꞌa drua drudrua tabꞌʉ maẽ, maʉ̃ẽnabemata zhi bꞌʉmata mawũã bꞌʉa: Pan ʉ̃trebemata dedꞌekasia kꞌodꞌamarẽã.
32Mawũãnaĩ Jesúsbara mawũãsia: Mʉã wãrĩnu marãã jaraya: Maʉ̃ pan ʉ̃trebema Moiséba dedꞌeka ẽbasia, awuarabʉrʉ dedꞌekasia mʉ Zezeba. Aramaʉ̃ne mʉ Zezebara dedꞌeka bꞌʉa wãrĩnu pan ʉ̃trebemata. 33Pan Daizezedꞌea mʉta ʉ̃treba zedꞌata, mʉãrã Daizeze ũme bꞌai jõ ẽãta dia bꞌʉa ẽjũãne zhãrã bꞌea.
34Mawũãĩ mawũãsidꞌa: Nokꞌó, daia ewariza diadua maʉ̃ panta.
35Mawũãnaĩ Jesúsbara mawũãsia: Mʉta panta Daizeze ũme bꞌai jõ ẽãnebema, mʉma zebʉrʉra maʉ̃nebemanerã jarrakꞌa baya, mʉnebemata ĩjãbʉrʉra aramaʉ̃ne obisiakꞌa baya. 36Mawũãmina mʉã marãã jaradꞌa kĩrãkꞌa, marãbara mʉrã ũdu bꞌemina mʉnebema ĩjãna ẽã. 37Mʉ Zezeba mʉãã diabʉrʉra jõma mʉma zedꞌaya, mʉma zebʉrʉra mʉãrã ãĩ jʉreta ẽã. 38Mʉrã ʉ̃trebara ze ẽbasia mʉã krĩñata oita, awuarabʉrʉ zesia mʉ Zeze mʉ zokꞌadꞌaba krĩñata oita. 39Mʉ Zeze mʉ zokꞌadꞌabara krĩña bꞌʉa jõma izha mʉãã diabʉrʉra mʉrẽ miõta adua ẽbaita, awuarabʉrʉ krĩña bꞌʉa maʉ̃rãta beudꞌapeadꞌara mʉã piradrʉbigaita ewari nʉmʉta jõbʉrʉdꞌera. 40Mʉ Zeze mʉ zokꞌadꞌabara krĩña bꞌʉa zhi Warra mʉta krĩcha bꞌebara, mʉnebemata ĩjã bꞌebara jõmaʉ̃ba erubꞌeamarẽã Daizeze ũme bꞌai jõ ẽãta. Aramaʉ̃nerã maʉ̃rãta beudꞌapeadꞌara mʉã piradrʉbigaya ewari nʉmʉta jõbʉrʉdꞌera.
41Judíorãbara Jesús bĩ ẽã jarasidꞌa: Mʉrã pan ʉ̃treba zedꞌa, abʉrʉba. 42Maʉ̃nerã mawũãsidꞌa: ¿Naʉ̃ Jesúra José warra ẽka? Zhi Zezera, zhi papara dazhirãbara ũdukꞌawua bꞌea. ¿Maʉ̃ta sãwũã naʉ̃bara izhira ʉ̃treba zedꞌa abʉrʉ?
43Mawũãnaĩ Jesúsbara panaʉ̃ mawũãsia: Bĩ ẽã bedꞌearãũdua. 44Miõta mʉma ze bꞌe ẽã mʉ Zeze mʉ zokꞌadꞌaba webʉrʉ ẽbʉrʉ. Izha webʉrʉtrʉ beudꞌata mʉãrã piradrʉbiya ewari nʉmʉta jõbʉrʉdꞌera. 45Daizezeba bedꞌeata jarabibarirãba jaradꞌapeadꞌata zhi bꞌʉmata mawũã bꞌʉa: Daizezeba jõma ũrãgꞌaya. Aramaʉ̃nerã mʉ Zeze bedꞌeata ũrĩnape izhidꞌebemata kꞌawabʉdara jõma mʉma zedꞌaya. 46Mʉã maʉ̃ta jarabʉrʉ ẽã iabꞌaʉba mʉ Zezeta ũdudꞌaba, awuarabʉrʉ mʉta Daizeze maẽba zedꞌabʉrʉ mʉãbʉrʉ ũdubaria mʉ Zezera. 47Mʉã wãrĩnu marãã jaraya: Mʉnebemata ĩjã bꞌʉbara erubꞌʉa Daizeze ũme bꞌai jõ ẽãta. 48Mʉrã panta Daizeze ũme bꞌai jõ ẽãnebema. 49Marã zhibarirã bꞌeadꞌaba drua drudrua tabꞌʉ maẽ maná kꞌo bꞌeadꞌara bari zhiko basia, mawũẽ kꞌo bꞌeasimina beukuasia. 50Mʉrã pan ʉ̃treba zedꞌa, pan mʉta kꞌobʉrʉra adua ẽã. 51Mʉrã panta Daizeze ũme bꞌai jõ ẽãta ʉ̃treba zesia, iabꞌaʉba pan mʉta kꞌobʉrʉra Daizeze ũme bꞌai jõ ẽã bꞌaya. Pan mʉã diabʉrʉra mʉ zharata diaya. Maʉ̃ mʉãrã Daizeze ũme bꞌai jõ ẽãta diaya ẽjũãne zhãrã bꞌea.
52Mawũãĩ judíorã ãzhirãĩnu bĩ ẽã mawũãsidꞌa: ¿Naʉ̃bara sãwũã mawũã dazhirãã kꞌobigaipe izhi zharata?
53Mawũãnaĩ Jesúsbara mawũãsia: Mʉã wãrĩnu marãã jaraya: Mʉ Beubari Bape bꞌʉ zharata kꞌodꞌa ẽbʉrʉ, mʉ wata dodꞌa ẽbʉrʉ erubꞌea ẽã Daizeze ũme bꞌai jõ ẽãrã. 54Mʉ zharata kꞌo bꞌʉbara mʉ wata do bꞌʉbara erubꞌʉa Daizeze ũme bꞌai jõ ẽãrã, mawũẽ beudꞌata mʉã piradrʉbiya ewari nʉmʉta jõbʉrʉdꞌera. 55Mʉ zhara wãrĩnu zhikoa, mʉ wara wãrĩnu doyidꞌebema. 56Mʉ zharata kꞌo bꞌʉra mʉ wata do bꞌʉra mʉne bꞌʉa, mʉrã izhidꞌe bꞌʉa. 57Mʉ Zeze mʉ zokꞌadꞌata bꞌʉ kĩrãkꞌa, mʉrã bꞌʉa mʉ Zezedꞌeba, aramaʉ̃ kĩrãkꞌa mʉta kꞌo bꞌʉra bꞌaya mʉneba. 58Mʉta panta ʉ̃treba zedꞌa. Marã zhibarirã bꞌeadꞌaba maná kꞌodꞌapeadꞌa kĩrãkꞌa bꞌʉ ẽã, mawũã kꞌosidꞌamina beukuasia. Pan mʉta kꞌobʉrʉra Daizeze ũme bꞌai jõ ẽã bꞌaya.
59Jesúsbara Capernaúm pʉwʉrʉdꞌe maʉ̃ta jarasia miã ũrãgꞌa nʉmʉba de zhi jʉrebada maẽ.
Bedꞌeata Daizeze ũme bꞌai jõ ẽãnebema
60Maʉ̃ta ũrĩnape izhi pẽwã bꞌebara bioba mawũãsidꞌa: Maʉ̃ bedꞌeara zarea. ¿Mawũẽ kꞌaiba ũrĩ bꞌeipe?
61Jesúsbara kꞌawuasia izhi pẽwã bꞌe mawũã bĩ ẽã bedꞌea kꞌobꞌera, mawũẽ mawũãsia: ¿Maʉ̃ bedꞌeabara marã bĩ ẽãbʉdakꞌa? 62¿Mobera sãwũãnaĩpe mʉ Beubari Bape bꞌʉta ʉ̃taa wãbʉrʉta ũdudꞌara naara mʉ bꞌadꞌama? 63Jawurebiabʉrʉ dia bꞌʉa Daizeze ũme bꞌai jõ ẽãta, zharabara dia ẽã. Bedꞌeata mʉã marãã jara bꞌʉra Jawurebiadꞌebemata Daizeze ũme bꞌai jõ ẽãnebema. 64Mawũãmina marã ʉ̃kʉrʉbara ĩjãna ẽã. Jesúsbara mawũã jarasia jẽde wedꞌauba kꞌawua bꞌasi baera kꞌairãba ĩjãna ẽãta, aramaʉ̃ne kꞌawua bꞌasia izhira kꞌaiba chãbꞌariita.
65Maʉ̃nerã mawũãsia: Maʉ̃neba mʉã marãã jarasia miõta mʉma ze ẽãta mʉ Zezeba diabʉrʉ ẽãrã.
66Mamaʉ̃ba ʉ̃taara izhi pẽwã bꞌebara bioba izhira kenabꞌarisidꞌa, mawũẽ ya izhi bawara erjirana ẽbasia. 67Mawũẽ Jesúsbara izha jʉrʉkuadꞌata docea mawũãsia: ¿Marãsidꞌa wã krĩña panʉka?
68Mawũãĩ Simón Pedroba panaʉ̃ mawũãsia: Nokꞌó, ¿daira kꞌaima wãĩpe? Bʉabʉrʉ bedꞌeata erubꞌʉa Daizeze ũme bꞌai jõ ẽãta. 69Maʉ̃ daibara ĩjã bꞌea, aramaʉ̃ne daiba kꞌawua bꞌedꞌera bʉra zhãrã Ẽdrʉbita Daizeze zokꞌai bꞌʉ Warra.
70Mawũãĩ Jesúsbara mawũãsia: Mʉã marã doce jʉrʉkuasia, mawũãmina marãnebema abꞌa ãtõmiãba erunʉmʉã.
71Mawũã jarabʉrʉbara Juda Iscarioteta jarasia Simón warrata, izhira maʉ̃ba chãbꞌarii baera mawũã jarasia, maʉ̃ docedꞌebema basia.
7Jesús mebẽrãba izhidꞌebema ĩjã ẽã bꞌeadꞌa
1Maʉ̃ tẽã Jesús pʉrrʉasia Galilea druadꞌe, Judea druadꞌera pʉrrʉa krĩña ẽbasia judíorãba beaita jirpanʉba. 2Kꞌaita bata nʉmasia fiesta judíorãne de pãne duanebadata. 3Mawũẽ zhi mebẽrãbara Jesúa mawũãsidꞌa: Namaʉ̃bara wãrũã Judea druaedꞌa, maĩnu bʉ pẽwã bꞌebidꞌa ũdudꞌamarẽã bʉa obꞌʉta. 4Iabꞌaʉba izhita ũdukꞌawabiga krĩña bꞌʉbara kꞌãrẽ chupea o ẽã. Mawũẽ bʉara kꞌãwũã kꞌãrẽ onʉmaẽrã jõmaʉ̃ daidꞌu kꞌãrẽ odua.
5Mawũãsidꞌa miã zhi mebẽrãbidꞌa izhidꞌebema ĩjãna ẽãba. 6Mawũãnaĩ Jesúsbara mawũãsia: Mʉrã wadꞌi wãĩne bꞌʉ ẽã, mawũãmina marã baridu ʉ̃madaudꞌe wã bꞌeya. 7Naʉ̃ ẽjũãne bꞌebara marã ũduama ẽã, mawũãmina mʉrã ũduama bꞌea mʉã jara bꞌʉba ãzha obꞌera bia ẽãta. 8Marã wãrĩzeudua fiestaidꞌu, mʉrã wadꞌi wãrĩze ẽã maʉ̃ fiestaidꞌura, mʉ wãĩ ewarira wadꞌi araba ẽã.
9Maʉ̃ta jarakꞌape bꞌesia Galileadꞌe.
Jesús fiestadꞌe bꞌadꞌa de pãne duanu maẽ
10Zhi mebẽrã wãrĩzekuadꞌa tẽãne izhisidꞌa wãrĩzesia fiestaidꞌu, mawũãmina jõmaʉ̃ daidꞌu wã ẽbasia, awuarabʉrʉ wãsia chupea. 11Maʉ̃ne judíorãbara fiestadꞌe jʉrʉ bꞌeta mawũã duanasia: ¿Kꞌãʉ̃ sãma bꞌʉba?
12Kꞌabanane edꞌara izhi ʉ̃rʉ̃rã biodꞌe bedꞌea jirpanʉta ʉ̃kʉrʉbara biata bꞌʉa aduanasia. Waya ʉ̃kʉrʉbara mawũã duanasia: Mawũã ẽã, awuarabʉrʉ zhãrãta sewa bꞌʉa. 13Mawũãmina izhi ʉ̃rʉ̃rã miõta dajada bedꞌeadꞌa ẽbasia judíorã wawiaba.
14Fiestara ẽsadra babʉrʉdꞌera, Jesús Daizeze deidꞌu wãrĩzepe ewara maẽ miã ũrãgꞌasia. 15Mawũẽ judíorãbara bia akʉdrua mawũãsidꞌa: ¿Naʉ̃bara sãwũã kꞌawua bꞌʉ miã ũrãgꞌaidꞌebema estudia ẽbadꞌata?
16Maʉ̃ne Jesúsbara mawũãsia: Ũrãgꞌata mʉã jara bꞌʉra mʉrẽ ẽã, awuarabʉrʉ Daizeze mʉ zokꞌadꞌadꞌea. 17Daizezeba krĩñata okrĩña bꞌʉbara kꞌawuaya ũrãgꞌara Daizezedꞌeta, o kꞌawuaya mʉrã bedꞌea bꞌʉta mʉzhikusauba. 18Izhikusauba bedꞌea bꞌʉbara izhitrʉ bia jaradꞌamarẽã bꞌʉa, mawũãmina mʉãrã Daizeze mʉ zokꞌadꞌata bia jaradꞌamarẽã bꞌʉa, mawũẽ wãrĩnuta jara bꞌʉa, aramaʉ̃ne mʉãrã sewata jara ẽã. 19¿Moisébara ũrãgꞌara marãã diasi ẽka? Maʉ̃ta marãbara miõba aribꞌaedꞌa ẽã. ¿Maʉ̃ba mʉrã bea krĩña duanu ẽka?
20Mawũãĩ kꞌabanabara panaʉ̃ mawũãsidꞌa: Bʉra jaiba mawũã krĩchabi bꞌʉa, ¿bʉra kꞌaiba bea krĩña nʉmʉ?
21Mawũãnaĩ Jesúsbara panaʉ̃ mawũãsia: Ẽnaʉ̃bada ewade mʉã ne abꞌa obʉrʉba marã jõma kꞌawua ẽã krĩcha kꞌobꞌea. 22Mawũẽ mʉã jaraya, Moisébara marãã jarasia warra zakera kꞌakua eta kꞌõnamarẽã, mawũã oira Moisédꞌeba ze ẽbasia, awuarabʉrʉ marã zhibarirã bꞌeadꞌadꞌeba zesia, aramaʉ̃ne marãbara ẽnaʉ̃bada ewadebidꞌa warra zakera kꞌakua eta kꞌõbada. 23Mawũã ẽnaʉ̃bada ewadebidꞌa warra zakera kꞌakua eta kꞌõbada Daizezeba ũrãgꞌa Moiséa diadꞌata aribꞌaedꞌai kꞌarea, ¿maʉ̃ta marã mʉ bawara kĩrũ duanuka ẽnaʉ̃bada ewade mʉã jipa bꞌebibʉrʉba zhãrãta? 24Zhãrãba kꞌãrẽ obʉrʉta ũdudꞌape bĩ ẽã bedꞌearãũdua, awuarabʉrʉ kꞌãrẽ obʉrʉta bigara kĩrãẽpa biga audua.
¿Naʉ̃ka zhãrã Ẽdrʉbiira?
25Jerusalénne bꞌebara ʉ̃kʉrʉba mawũã duanasia: ¿Naʉ̃ ẽka beadꞌaita jʉrʉ bꞌera? 26Akaudua, jõmaʉ̃ daidꞌu bedꞌea nʉmʉta kꞌãrẽ jaradꞌa ẽã. ¿Nokꞌorãbara wãrĩnu krĩcha duanu ẽka naʉ̃ zhãrã Ẽdrʉbiita? 27Mawũãmina dazhirãbara kꞌawua bꞌea naʉ̃ sãmabemata, maʉ̃ne zhãrã Ẽdrʉbiita zebʉrʉdꞌera miõba kꞌawua ẽbaya sãmabemata.
28Mobebʉrʉ Jesúsbara Daizeze dedꞌa ewara maẽ miã ũrãgꞌa nʉmʉba nemi jĩgua mawũãsia: Marãbara mʉrã ũdukꞌawua bꞌeta kꞌawua bꞌea sãmabemata. Mawũãmina mʉrã mʉzhikusauba ze ẽbasia, awuarabʉrʉ mʉrã zokꞌasia Daizeze wãrĩnu bꞌʉba, izhidꞌebema marãbara kꞌawua duanu ẽã. 29Mawũãmina mʉãrã kꞌawua bꞌʉa mʉrã zesi baera izhi maẽba, mʉrã izha zokꞌasia.
30Mawũãbʉrʉ kꞌarea Jesús jida krĩñasidꞌa, mawũãmina miõba jida ẽbasia wadꞌi araba ẽãba izhi ewarita. 31Kꞌabanabara bioba izhidꞌebemata ĩjãnape mawũã duanasia: Zhãrã Ẽdrʉbiita zebʉrʉdꞌera, ¿ũdudꞌakꞌara audre oibʉka naʉ̃ba obꞌʉ kꞌãñabara?
Fariseorãba Jesús jida krĩñanapeadꞌa
32Fariseorãbara ũrĩsidꞌa zhãrã Jesú ʉ̃rʉ̃ mawũã bedꞌea jirpanʉta, mawũẽ sacerdoterã nokꞌorãbara, fariseorã bawarauba Daizeze de akʉbadata zokꞌasidꞌa jidadꞌamarẽã. 33Mawũẽ Jesúsbara mawũãsia: Mʉrã wadꞌi ewari kꞌakutua marã bawara bꞌape wãña mʉ zokꞌadꞌama. 34Marãbara mʉrã jʉrʉdꞌaya, mawũãmina mʉrã ũdudꞌa ẽbaya, aramaʉ̃ne mʉ bꞌaima marã wã bꞌedꞌa ẽã.
35Mawũãĩ judíorãbara ãzhirãĩnu mawũãsidꞌa: ¿Naʉ̃ sãmaã wãĩba dazhirãba mawũã ũdudꞌa ẽbaira? ¿Judíorã druaza griegorãne edꞌa bꞌema wãĩbʉka, aramaʉ̃ne griegorã ũrãgꞌaita? 36Izhara kꞌãrẽta jara krĩñaba mawũãbʉrʉ: Marãbara mʉrã jʉrʉdꞌaya, mawũãmina mʉrã ũdudꞌa ẽbaya, aramaʉ̃ne mʉ bꞌaima marã wã bꞌedꞌa ẽã.
Dota Daizeze ũme bꞌai jõ ẽãnebema
37Fiesta jõbʉrʉ ewarita zhi zroma ewade, Jesús edau nʉmepe nemi jĩgua mawũãsia:
Iabꞌa obisia bꞌʉbʉrʉ mʉma zerua, aramaʉ̃ne baniã dorua. 38Mʉnebemata ĩjã bꞌʉdꞌebara Daizeze bedꞌeata zhi bꞌʉmane jara bꞌʉ kĩrãkꞌa izhi sodꞌeba zhãrãma dota drʉya Daizeze ũme bꞌai jõ ẽãta.
39Mawũã dota jarabʉrʉra jarasia izhidꞌebemata ĩjãbʉdabara Jawurebiata jidadꞌaita, maʉ̃nerã wadꞌi ze ẽbasia Jawurebiara, wadꞌi Jesús ʉ̃taa wã ẽãba.
Krĩcha abꞌarika zedꞌa ẽbadꞌapeadꞌa
40Kꞌabanata ʉ̃kʉrʉbara maʉ̃ bedꞌeata ũrĩnape mawũãsidꞌa: Naʉ̃ wãrĩnu Daizezeba bedꞌeata jarabibaria. 41Waya ʉ̃kʉrʉbara mawũãsidꞌa: Naʉ̃ zhãrã Ẽdrʉbia. Mawũãmina ʉ̃kʉrʉbara mawũãsidꞌa: ¿Galileadꞌebara ʉ̃tʉ zeita bꞌʉka zhãrã Ẽdrʉbiira? 42¿Maʉ̃ẽnabemata zhi bꞌʉmanerã jara bꞌʉ ẽka rey Davidꞌeba ʉ̃tʉ zeita, aramaʉ̃nerã David Belén pʉwʉrʉdꞌebemata bꞌadꞌa maẽba ʉ̃tʉ zei ẽka zhãrã Ẽdrʉbiira? 43Aramaʉ̃ne zhãrã krĩcha abꞌarika zedꞌa ẽbasia Jesúsdꞌebemanerã. 44Ãzhara ʉ̃kʉrʉbara jida krĩñasidꞌa, mawũãmina miõba jidadꞌa ẽbasia.
¡Miõta bi-ia bedꞌea ẽã Jesús kĩrãkꞌara!
45Daizeze deta akʉbadara wakusa zesidꞌa sacerdoterã nokꞌorãma, fariseorãma, mawũẽ maʉ̃rãbara mawũãsidꞌa: ¿Sãwũẽ Jesús wedꞌa ẽpe?
46Mawũãnaĩ Daizeze deta akʉbadabara panaʉ̃ mawũãsidꞌa: ¡Miõta bi-ia bedꞌea ẽã kꞌãʉ̃ kĩrãkꞌara!
47Mawũãnaĩ fariseorãbara panaʉ̃ mawũãsidꞌa: ¿Marãsidꞌa kꞌãʉ̃ã zhi sewabi nʉmeka? 48¿Kꞌãʉ̃nebema ĩjã duanuka nokꞌorãbara, o fariseorãbara? 49Kꞌãʉ̃nebema ĩjã bꞌebara Moisé ũrãgꞌara kꞌawua ẽã bꞌea, mawũẽ Daizezebara kꞌawua okuaya.
50Mawũãnaĩ Nicodemo Jesúsma diamase zedꞌabara ãzhidꞌebemaba mawũãsia: 51¿Ũrãgꞌa dazhirãnebara jara bꞌʉ ẽka dazhirãbara zhãrã kꞌawua obꞌedꞌa ẽãta naara izhi bedꞌeata ũrĩbʉda ẽbʉrʉ kꞌawuaita kꞌãrẽ odꞌata?
52Mawũãĩ panaʉ̃ mawũãsidꞌa: ¿Bʉsidꞌa Galileadꞌebemakꞌa? Daizeze bedꞌeata bia estudiadua, mawũãrã kꞌawuaya Galileadꞌebara piradrʉkꞌata Daizezeba bedꞌeata jarabibarira.
53Maʉ̃ tẽã wãsidꞌa ãzhi deza.
8Wũẽrãba kĩma ẽãta erukꞌãĩna
1Waya Jesúra wãsia Olivo kꞌatumaĩnu. 2Nrũẽma diapedꞌa wakusa Daizeze dedꞌa ewara maẽ zebʉrʉdꞌera zhãrã jõma zesidꞌa izhima. Mawũẽ jewedꞌape maʉ̃rãta ũrãgꞌasia. 3Maʉ̃ne ũrãgꞌa Moisédꞌe jarabadaba fariseorã bawarauba wũẽrãta izhima wesidꞌa kĩma ẽãta erukꞌãĩ nʉmʉta burudꞌape, mobe miõ ẽsadra kꞌobꞌʉdꞌape, 4mawũãsidꞌa: Miã Ũrãgꞌabari, naʉ̃ wũẽrã kĩma ẽãta erukꞌãĩ nʉmʉta burusidꞌa. 5Ũrãgꞌadꞌera Moisébara daia jarasia wũẽrã kꞌãwũã bꞌera mongꞌaraba tabꞌari beadꞌamarẽã. ¿Mawũẽ bʉara kꞌasia aipe?
6Maʉ̃ta jarasidꞌa wãẽãbidꞌape nokꞌoa jidꞌai kꞌarea. Mawũãmina Jesús ju kꞌobꞌepe egorodꞌe ne bꞌʉsia juwua jĩwĩniba. 7Maʉ̃ne ãzhara pi widꞌi barabꞌʉba jipa kꞌobꞌepe mawũãsia: Marãnebema kꞌazhirua ne ẽãba maʉ̃ba naara mongꞌaraba tabꞌarirua kꞌãʉ̃ wũẽrã.
8Mawũãpe wakusa ju kꞌobꞌepe ari ne bꞌʉ nʉmesia egorodꞌe. 9Mawũãmina ãzhara maʉ̃ta ũrĩnape kꞌazhirua bara bꞌeta kꞌawua bꞌeba abꞌa abꞌaʉdꞌe ãĩ wãsidꞌa, naara ãĩ wãsidꞌa zõrãrãta, maʉ̃are kũrãrãta. Aramaʉ̃ne Jesús dobꞌa kꞌobꞌesia, wũẽrãsidꞌa kꞌobꞌesia miõ ẽsadra kꞌobꞌedꞌata. 10Mawũẽ Jesús jipa kꞌobꞌebʉrʉdꞌe miõ ũdu ẽãne wũẽrãtrʉ ũdui mawũãsia: ¿Wũẽrã, bʉta ji kꞌopanana sãma kꞌopanʉ? ¿Bʉra miõba bea ẽka?
11Mawũãĩ wũẽrãbara mawũãsia: Nokꞌó, mʉrã miõba bea ẽã.
Mobebʉrʉ Jesúsbara mawũãsia: Bʉra miã mʉãbidꞌa bea ẽã, mawũẽ wãrũã, mobe wueta kꞌazhiruata orãrũã.
Jesúra ʉ̃nata bꞌʉa ẽjũãne bꞌerãĩta
12Wakusa Jesúsbara zhãrã kꞌobꞌea mawũãsia: Mʉrã ʉ̃nata bꞌʉa ẽjũãne bꞌerãĩta, mʉta pẽwã bꞌʉra pãrĩguadꞌe nimiba ẽã, awuarabʉrʉ ʉ̃nata erubꞌaya Daizeze ũme bꞌai jõ ẽãta.
13Mawũãĩ fariseorãbara mawũãsidꞌa: Bʉara bʉzhidꞌebemata jara bꞌʉa, mawũẽ bʉa jara bꞌʉra kꞌãrẽ ẽã.
14Mawũãnaĩ Jesúsbara panaʉ̃ mawũãsia: Mʉãrã mʉzhidꞌebemata jara bꞌʉmina mʉã jara bꞌʉra wãrĩnuã, mʉã kꞌawua bꞌʉba mʉ sãmaʉ̃ba zedꞌata, mʉ sãmaã wãĩta. Mawũãmina marãbara kꞌawuadꞌa ẽã mʉ sãmaʉ̃ba zedꞌata miã sãmaã wãĩta. 15Marãbara mʉrã jara bꞌea beubarita bedꞌea bꞌedꞌe, mawũãmina mʉã zhãrã mawũãrã jara ẽã. 16Mʉã zhãrãnebemata jarara mʉãrã wãrĩnuta jaraya mʉrã abꞌa nʉmʉ ẽbaera, awuarabʉrʉ daira panʉã mʉta mʉ Zeze mʉ zokꞌadꞌata. 17Marã ũrãgꞌadꞌera bꞌʉ tabꞌʉa zhãrã ũmeba bedꞌeata jarabʉdara wãrĩnuta. 18Aramaʉ̃ kĩrãkꞌa mʉãrã mʉnebemata jara bꞌʉa, mʉ Zeze mʉ zokꞌadꞌabidꞌa jara bꞌʉa mʉnebemata.
19Mawũãĩ ãzhara mawũãsidꞌa:
¿Sãma bꞌʉ bʉ Zezera? Mawũãnaĩ Jesúsbara panaʉ̃ mawũãsia: Marãbara mʉrã ũdukꞌawua duanu ẽã, miã mʉ Zezesidꞌa ũdukꞌawua duanu ẽã, mʉta ũdukꞌawua bꞌebʉrʉ mʉ Zezesidꞌa ũdukꞌawua bꞌea.
20Jesúsbara maʉ̃ bedꞌeata jarasia ofrenda bꞌʉbada maẽ Daizeze dedꞌa ewara maẽ miã ũrãgꞌa nʉmʉba. Maʉ̃nerã miõba jidadꞌa ẽbasia wadꞌi araba ẽãba izhi ewarita.
Mʉ wãĩma marã wã bꞌedꞌa ẽã
21Jesúsbara wakusa mawũãsia: Mʉta wãbʉrʉdꞌera marãbara mʉrã jʉrʉdꞌaya, mawũãmina marã mazhi kꞌazhiruadꞌe beukuaya, mawũẽ mʉ wãĩma marã wã bꞌedꞌa ẽã.
22Mawũãĩ judíorãbara mawũãsidꞌa: ¿Mobera izhikusa zhi beaika, sãwũã mawũã mʉ wãĩma marã wã bꞌedꞌa ẽã abʉrʉ?
23Maʉ̃ne Jesúsbara mawũãsia: Marã udꞌabema, mʉrã ʉ̃trebema, marã naʉ̃ ẽjũãnebema, mʉrã naʉ̃ ẽjũãnebema ẽã. 24Maʉ̃ba mʉã marãã jarabʉrʉa marã mazhi kꞌazhiruadꞌe beukuaita, Mʉrã Mʉta ĩjãna ẽbʉrʉ mazhi kꞌazhiruadꞌe beukuaya.
25Mawũãĩ mawũãsidꞌa: ¿Bʉra kꞌaipe?
Mawũãnaĩ Jesúsbara mawũãsia: Mʉnebema jẽde wedꞌauba mʉã marãã zhi jarama. 26Mʉãrã marãnebema ne bio jara kꞌawua oya, mʉ zokꞌadꞌabara wãrĩnuta jara bꞌʉa, mawũẽ mʉãrã izha jarabʉrʉta ũrĩbʉrʉta jara bꞌʉa ẽjũãne bꞌea.
27Mawũãbʉrʉdꞌera ãzhara kꞌawuadꞌa ẽbasia zhi Zezeta jarabʉrʉra.
28Mawũẽ Jesúsbara mawũãsia: Mʉ Beubari Bape bꞌʉta marãba cruzdꞌe jirabꞌʉdꞌai marãbara kꞌawuadꞌaya Mʉrã Mʉta, aramaʉ̃ne kꞌawuadꞌaya mʉã miã kꞌãrẽta o ẽãta mʉzhikusaubara, awuarabʉrʉ mʉrã mʉ Zezeba jaradiadꞌadꞌe bedꞌea bꞌʉa. 29Mʉ zokꞌadꞌara mʉ ũme bꞌʉa, aramaʉ̃ne mʉ Zezebara mʉrã dobꞌa kenabꞌari ẽã, mʉãrã ewariza obꞌʉba izha krĩñata.
30Jesúsba maʉ̃ta jarabʉrʉba bioba ĩjãsidꞌa izhidꞌebemata.
Wãrãbara ẽdrʉbigaya
31Mobebʉrʉ Jesúsbara judíorã izhidꞌebema ĩjãbʉdaa mawũãsia: Marãba mʉ bedꞌeata aribꞌae bꞌebʉrʉ wãrĩnu mʉta pẽwã bꞌea. 32Mawũãrã kꞌawuadꞌaya Daizezedꞌebema wãrãta, wãrãbara ẽdrʉbigaya.
33Mawũãĩ panaʉ̃ mawũãsidꞌa: Daira Abrahamneba uruta bꞌea, mawũẽ daira nezokꞌata duanu ẽã. ¿Sãwũã maʉ̃ta bʉara ẽdrʉdꞌaya abʉrʉ?
34Mawũãnaĩ Jesúsbara panaʉ̃ mawũãsia: Mʉã wãrĩnu marãã jaraya: Kꞌazhiruata obꞌera kꞌazhirua nezokꞌata bꞌea. 35Nezokꞌara zhidekʉ maẽ jipa dedꞌabema ẽã, mawũãmina zhi warrara jipa dedꞌabema. 36Mawũẽ mʉta Daizeze Warraba ẽdrʉbigara, wãrĩnu ẽdrʉdꞌaya. 37Mʉãrã kꞌawua bꞌʉa marã Abrahamneba uruta, mawũãmina marãbara mʉrã bea krĩña bꞌea, mʉ bedꞌeara ĩjãna ẽãba marãbara. 38Mʉãrã jara bꞌʉa mʉ Zezeba ũdubidꞌata, waya marãbara obꞌea mazhi zezeba ũrĩbidꞌata.
Marã mazhi zeze ãtõmiãneã
39Mawũãĩ panaʉ̃ mawũãsidꞌa: Dai zezea Abrahamta.
Mawũãnaĩ Jesúsbara mawũãsia: Marãta Abraham warrarãbʉrʉ, Abrahamba odꞌata okꞌausidꞌa. 40Mawũãmina marãbara mʉrã bea krĩña bꞌea, maʉ̃ne mʉãrã wãrãta jarakꞌa bꞌʉa Daizezedꞌeba ũrĩnata. Marã kĩrãkꞌa maʉ̃ kꞌaudꞌa bꞌa ẽbasia Abraham. 41Marãbara obꞌea mazhi zezeba obꞌʉta.
Mawũãĩ mawũãsidꞌa: Daira wũẽrã jõmaĩnu bꞌʉba todꞌata duanu ẽã. Daibara zeze abꞌa erubꞌea, izhira Daizezea.
42Mawũãnaĩ Jesúsbara mawũãsia: Marã zezeta Daizeze basibʉrʉ, marãbara mʉrã kʉãgꞌa kꞌausidꞌa. Mʉrã Daizeze maẽba zedꞌaba mʉzhikusaudꞌeba ze ẽbasia, awuarabʉrʉ mʉrã izha zokꞌasia. 43¿Marãbara kꞌãrẽneba sãwũãta kꞌawuadꞌa ẽpe mʉã jara bꞌʉra? Kꞌawua ẽã bꞌea mʉ bedꞌeara ũrĩ krĩña ẽã bꞌeba. 44Marã mazhi zeze ãtõmiãneã, mawũẽ mazhi zezeba krĩñata okrĩña bꞌea. Jẽde wedꞌauba izhira miã beamiãta bꞌʉa, wãrãnebemane bꞌʉ ẽãba wãrãta jarakꞌa. Sewata jara bedꞌeabʉrʉdꞌera izhi bꞌʉdꞌe bedꞌea bꞌʉa. Aramaʉ̃ne sewa nebʉrʉmiãba sewadꞌebema zezea. 45Mawũãmina mʉãrã wãrãta jara bꞌʉta ĩjãna ẽã. 46¿Marãnebemabara mʉrã kꞌaiba kꞌazhiruata osia aipe? Mʉã wãrãta jara bꞌʉbʉrʉ, ¿marãbara kꞌãrẽã ĩjãna ẽpe? 47Daizezedꞌeta bꞌʉbara Daizeze bedꞌeata ũrĩ bꞌʉa, mawũãmina marãbara ũrĩna ẽã Daizezedꞌeta duanu ẽãba.
Abraham nawedꞌa bꞌʉa zhãrã Ẽdrʉbira
48Mawũãĩ judíorãbara panaʉ̃ mawũãsidꞌa: ¿Kꞌãʉ̃neba bia daibara bʉra Samaria bidꞌata jara panʉta bʉra jaiba erunʉmʉ ẽka?
49Mawũãnaĩ Jesúsbara panaʉ̃ mawũãsia: Mʉrã jaiba erunʉmʉ ẽã. Awuarabʉrʉ mʉãrã wawia bꞌʉa mʉ Zezeta, maʉ̃ne marãbara mʉrã wawiadꞌa ẽã. 50Mʉãrã mʉta bia jaradꞌamarẽã bꞌʉ ẽã, mʉ Zezebʉrʉ mʉrã bia jaradꞌamarẽã bꞌʉa, mawũã bia jaradꞌa ẽbʉrʉ izhabʉrʉ kꞌawua oya. 51Mʉã wãrĩnu marãã jaraya: Mʉ bedꞌeata aribꞌae bꞌʉra beukꞌa baya.
52Mawũãĩ judíorãbara mawũãsidꞌa: Ya daibara kꞌawuabʉda bʉra jaiba erunʉmʉã. Abraham beusia, Daizezeba bedꞌeata jarabibarirãsidꞌa beukuasia, maʉ̃ne bʉara mawũãbʉrʉa: Mʉ bedꞌeata aribꞌae bꞌʉra beukꞌa baya. 53¿Mobera bʉra zhi zromakꞌa dai zeze Abraham kꞌãñabara? Izhira beusia, Daizezeba bedꞌeata jarabibarirãsidꞌa beukuasia. ¿Mawũẽ bʉra kꞌaipe mawũã bedꞌea nʉmaĩrã?
54Mawũãnaĩ Jesúsbara panaʉ̃ mawũãsia: Mʉta mʉzhikusa bia jara nʉmaĩbʉrʉ, mawũã mʉzhita bia jara nʉmʉrã kꞌãrẽ ẽã. Mawũãmina mʉrã mʉ Zezeba bia jara bꞌʉa, izhira marãbara Daizezea abꞌea. 55Mawũãmina marãbara izhira ũdukꞌawua duanu ẽã, maʉ̃ne mʉãrã ũdukꞌawua bꞌʉa, mʉã ũdukꞌawua bꞌʉ ẽã ara, sewa nebʉrʉmiã baya marã kĩrãkꞌa, mawũãmina mʉãrã ũdukꞌawua bꞌʉa, mawũẽ mʉãrã izhi bedꞌeara aribꞌae bꞌʉa. 56Marã zeze Abraham sobiasia mʉ zebʉrʉ ewarita ũdui baera, aramaʉ̃ne ũdusia, mawũẽ sobiasia.
57Mawũãĩ judíorãbara mawũãsidꞌa: Bʉra cincuenta añobidꞌa ne ẽãta, ¿bʉa ũdusika Abrahamta?
58Mawũãnaĩ Jesúsbara mawũãsia: Mʉã wãrĩnu marãã jaraya: Abraham nawedꞌa mʉrã bꞌʉa.
59Mawũãĩ mongꞌarata jirakua edasidꞌa tabꞌari beadꞌaita, mawũãmina Jesús merũpe ãĩ wãsia Daizeze dedꞌa ewara maẽbara. Aramaʉ̃ne ãzhi ẽsadra berabꞌari wãsia.
9Jesúsba ne ũdubidꞌa daʉbꞌerrea todꞌata
1Jesús wãbʉrʉdꞌera ũdusia ũmakĩrã daʉbꞌerrea todꞌata. 2Mawũẽ izha jʉrʉkuadꞌabara widꞌi mawũãsidꞌa: Miã Ũrãgꞌabari, ¿kꞌazhiruara kꞌaiba osi, naʉ̃ba o zhibarirãba osidꞌakꞌa kꞌãwũã daʉbꞌerrea toira?
3Mawũãnaĩ Jesúsbara panaʉ̃ mawũãsia: Izha kꞌazhiruata odꞌadꞌeba kꞌãwũã bꞌʉ ẽã, miã zhibarirãba kꞌazhiruata odꞌapeadꞌadꞌeba kꞌãwũã bꞌʉ ẽã, awuarabʉrʉ kꞌãwũã tosia Daizezeba kꞌãrẽ obꞌei bꞌʉta dajada nʉmemarẽã naʉ̃neba. 4Mʉ zokꞌadꞌaba obi nʉmʉrã mʉãrã oibara wadꞌi ãsapedꞌa nʉmʉ kĩrãkꞌa nʉmʉwedꞌa. Ewarita zeya diamase dogꞌo kĩrãkꞌa miõba Daizezedꞌebema obꞌe ẽãta. 5Mʉta naʉ̃ ẽjũãne bꞌʉwedꞌara mʉta ʉ̃nata bꞌʉa ẽjũãne bꞌerãĩta.
6Maʉ̃ta jarape egorodꞌe idꞌosia, aramaʉ̃ne egorora idꞌoba susua ope maʉ̃ egoro susuaba pãrĩkua kꞌobꞌʉsia daʉbꞌerrea bꞌʉ dabʉta. 7Mobe mawũãsia: Sʉgʉdꞌe wãrũã Siloé posoidꞌu. Maʉ̃ trʉ̃bara jara krĩña bꞌʉa Zokꞌabuedꞌata.
Mawũãĩ wãpe sʉgʉsia, mawũẽ jẽrũya zebʉrʉdꞌera ne ũdu zesia. 8Mawũẽ arakꞌaita bꞌebara naara daʉbꞌerrea bꞌʉta akʉ bꞌeadꞌabara mawũãsidꞌa: ¿Naʉ̃ ẽka jewedꞌape nebari widꞌi bꞌadꞌara?
9Ʉ̃kʉrʉbara mawũãsidꞌa: Kꞌãʉ̃ izhia. Waya awʉrʉrãbara mawũãsidꞌa: Izhi kĩrãkꞌa bꞌʉa. Maʉ̃ne izhara mawũãsia: Mʉrã izhia.
10Mawũãĩ mawũãsidꞌa: ¿Bʉra sãwũã ne ũdu bꞌidꞌa?
11Mawũãnaĩ izhara panaʉ̃ mawũãsia: Jesús abadaba egorota idꞌoba susua ope mʉ dabʉta pãrĩkua kꞌobꞌʉpe mawũãsia: Siloé posoidꞌu wãpe sʉgʉdua. Mawũãĩ mʉrã wãpe sʉgʉsia, aramaʉ̃ne mʉrã ne ũdusia.
12Mawũãĩ mawũãsidꞌa: ¿Maʉ̃ sãma bꞌʉ?
Mawũãnaĩ izhara mawũãsia: Mʉãrã kꞌawua ẽã.
Fariseorãba widꞌidꞌapeadꞌa daʉbꞌerrea bꞌʉta bꞌedꞌaa
13Fariseorã kĩrãbita edesidꞌa daʉbꞌerrea bꞌadꞌara. 14Ẽnaʉ̃bada ewari basia Jesúsba egorota idꞌoba susua ope ne ũdubisidꞌera. 15Mawũẽ fariseorãbidꞌa widꞌisidꞌa sãwũã ne ũdu bꞌidꞌata. Mawũẽ izhara mawũãsia: Egorota idꞌoba susua ope mʉ dabʉta pãrĩkua kꞌobꞌʉsia, maʉ̃ta mʉã sʉgʉbʉrʉdꞌera mʉrã ne ũdusia.
16Mawũãĩ fariseorã ʉ̃kʉrʉbara mawũãsidꞌa: Kꞌãʉ̃ Daizezedꞌeba nʉmʉ ẽã, mawũẽ aribꞌae ẽã ẽnaʉ̃bada ewarira.
Waya awʉrʉrãbara mawũãsidꞌa: ¿Kꞌazhirua omiãbara sãwũã mawũã ũdudꞌakꞌata oipe?
Ãzhira aramaʉ̃ne krĩcha abꞌarika ze ẽbasia. 17Mawũẽ daʉbꞌerrea bꞌadꞌaa wakusa mawũãsidꞌa: ¿Bʉara kꞌasia aipe bʉ daʉbꞌerrea bꞌʉta ne ũdubidꞌadꞌebema?
Mawũãnaĩ izhara mawũãsia: Mʉma kꞌãʉ̃ Daizezeba bedꞌeata jarabibaria.
18Judíorãbara ĩjãna ẽbasia izhira daʉbꞌerrea bꞌadꞌata ne ũdu bꞌidꞌara, mawũẽ zhibarirãta trʉ̃sidꞌa. 19Mobe widꞌi mawũãsidꞌa: ¿Marã naʉ̃ zhibarirãta panʉka, naʉ̃ka marãba jara panʉrã daʉbꞌerrea todꞌata? ¿Sãwũã kꞌãwũã ne ũdu bꞌidꞌa?
20Mawũãnaĩ zhibarirãbara panaʉ̃ mawũãsidꞌa: Daibara kꞌawua panʉã daira naʉ̃ zhibarirãta, naʉ̃ daʉbꞌerrea tosia. 21Mawũãmina sãwũã kꞌãwũã ne ũdu bꞌidꞌara daibara kꞌawuadꞌa ẽã, miã daʉbꞌerrea bꞌʉta kꞌaiba kꞌãwũã ne ũdubi bꞌidꞌapʉra daibara kꞌawuadꞌa ẽã. Ya zõrã baera izhaa widꞌiudua, ari izha nebʉrʉya.
22Zhibarirãbara mawũãsidꞌa judíorãta wawia panʉba, maʉ̃ẽnabemata judíorã ya krĩcha abꞌarika zekuasia Jesús zhãrã Ẽdrʉbia abʉrʉra de zhi jʉrebada maẽ edꞌa wãbidꞌa ẽbaita. 23Maʉ̃ kꞌarea zhibarirãbara mawũãsidꞌa: Ya zõrã baera izhaa widꞌiudua.
24Mawũẽ daʉbꞌerrea bꞌadꞌara wakusa trʉ̃nape mawũãsidꞌa: Daizeze kĩrãbita daia wãrãta jaradua. Daibara kꞌawua bꞌea kꞌãʉ̃ kꞌazhirua omiãta.
25Mawũãnaĩ izhara panaʉ̃ mawũãsia: Kꞌazhirua omiãbʉrʉ mʉãrã kꞌawua ẽã. Awuarabʉrʉ mʉã kꞌawua bꞌʉra mʉrã daʉbꞌerrea bꞌadꞌata ne ũdu bꞌidꞌa.
26Mawũãĩ wakusa mawũãsidꞌa: ¿Bʉra sãwũã osi? ¿Bʉra sãwũã ne ũdubi bꞌidꞌapʉ?
27Mawũãnaĩ izhara panaʉ̃ mawũãsia: Mʉãrã ya marãã jarasia, mawũãmina marãbara ũrĩna ẽã. ¿Kꞌãrẽã wakusa ũrĩ krĩña panʉ? ¿Marãbidꞌa pẽwã krĩña panʉka?
28Mawũãĩ ikꞌazhirua jaradꞌape mawũãsidꞌa: Bʉabʉrʉ pẽwã bꞌidꞌa, mawũãmina daibara pẽwã bꞌea Moiséta. 29Daibara kꞌawua bꞌea Daizezera bedꞌeasita Moiséa, mawũãmina kꞌãʉ̃ẽnabema daibara kꞌawuadꞌa ẽã sãmaʉ̃ba ʉ̃tʉ zedꞌara.
30Mawũãnaĩ maʉ̃bara panaʉ̃ mawũãsia: Sakua mawũã marãbara sãmaʉ̃ba ʉ̃tʉ zedꞌata kꞌawuadꞌa ẽpe, maʉ̃ne mʉrã ne ũdubi bꞌidꞌapʉa. 31Kꞌawua bꞌea Daizezebara ũrĩ ẽãta kꞌazhirua omiãrã bedꞌeara, mawũãmina iabꞌaʉba Daizezeta wawia bꞌʉra, aramaʉ̃ne izha krĩñata obꞌʉra, maʉ̃ bedꞌeara ũrĩ bꞌʉa. 32Ũrĩnakꞌa iabꞌaʉba ne ũdubisia abʉdara iabꞌa daʉbꞌerrea todꞌata. 33Naʉ̃ta Daizezedꞌeba ze ẽbasibʉrʉ miã kꞌãrẽta obꞌe ẽbakꞌausia.
34Mawũãĩ panaʉ̃ mawũãsidꞌa: Bʉra jipadꞌe kꞌazhiruadꞌe tosia. ¿Maʉ̃ta bʉabʉrʉ ũrãgꞌaika daita?
Mawũãnape jarasidꞌa de zhi jʉrebada maẽ wueta edꞌa wã ẽbamarẽã.
Daizezedꞌebema ũdu bꞌedꞌe bꞌebara ũdudꞌa ẽã
35Jesúsbara ũrĩsia aramaʉ̃ne ãĩ kenabꞌaribʉdata, mawũẽ ũdui mawũãsia: ¿Bʉara ĩjã bꞌʉka Daizeze Warradꞌebema?
36Mawũãĩ izhara panaʉ̃ mawũãsia: ¿Nokꞌó, maʉ̃ kꞌaipe mʉã ĩjãĩta izhidꞌebemata?
37Mawũãĩ Jesúsbara mawũãsia: Maʉ̃ bʉara ũdu kꞌobꞌʉta mʉ bʉ ũme bedꞌea kꞌobꞌʉta izhia.
38Mawũãĩ izhara mawũãsia: Nokꞌó, bʉdꞌebema mʉãrã ĩjãbʉrʉa. Mawũãpe ibia jarasia.
39Jesúsbara mawũãsia: Zhãrã kꞌawua oi kꞌarea mʉrã zesia naʉ̃ ẽjũãẽna. Aramaʉ̃ne Daizezedꞌebema ũdu ẽã bꞌebara ũdudꞌamarẽã, waya ũdu bꞌedꞌe bꞌebara ũdu ẽã bꞌeamarẽã.
40Fariseorãnebema ʉ̃kʉrʉ izhi bawara kꞌopanʉba maʉ̃ta ũrĩbʉdadꞌera mawũãsidꞌa: ¿Mobera daisidꞌa daʉbꞌerrea duanuka?
41Mawũãnaĩ Jesúsbara panaʉ̃ mawũãsia: Daizezedꞌebemata ũdu ẽã bꞌebʉrʉ kꞌazhirua ne ẽã bꞌeakꞌausia. Mawũãmina ũdu bꞌea abꞌeba marãne kꞌazhiruara ari nʉmʉã.
10Ne jaradꞌa ovejarã akʉbaridꞌeba
1Jesúsbara mawũãsia:
Mʉã wãrĩnu marãã jaraya: Ovejarãne kꞌorrata nʉmʉ maẽ puertadꞌe edꞌa wãbʉrʉ ẽãrã, awuarabʉrʉ jãpe wãrĩze edꞌa wãbʉrʉra nezrʉgamiã. 2Mawũãmina puertadꞌe edꞌa wãbʉrʉra ovejarã akʉbaria. 3Puerta jʉ̃ã bꞌʉbara maʉ̃ edꞌa wãmarẽã ewabaria, ovejarãbara izhi nemirã ũrĩkꞌawua bꞌea, izhi ovejarã trʉ̃ jara ãĩ jʉre edebaria. 4Aramaʉ̃ne izhi ovejarã jõma ãĩ zebigape ãzhi naa wãbaria, mawũẽ ovejarã izhi kꞌaidꞌu wãbada izhi nemita ũrĩkꞌawua bꞌeba. 5Mawũãmina ũdudꞌakꞌara pẽwãna ẽã, awuarabʉrʉ maʉ̃ kꞌareara merũ wãẽba panʉã ũdudꞌakꞌa nemirã ũrĩnakꞌaba.
6Jesúsbara mawũã ne jarakꞌasia, mawũãmina ãzhara kꞌawuadꞌa ẽbasia kꞌãrẽta jara krĩñabʉrʉra.
Jesúra bigaua izhidꞌerã akʉira
7Mawũẽ Jesúsbara wakusa mawũãsia: Mʉã wãrĩnu marãã jaraya: Mʉta puerta ovejarãneã. 8Jõma mʉ nawedꞌa zedꞌapeadꞌara nezrʉgamiãta bꞌea, mawũẽ ãzhi bedꞌeara ũrĩna ẽbasia mʉrẽta bꞌebara. 9Mʉta puerta. Mʉneba edꞌa wãbʉrʉra ẽdrʉya. Aramaʉ̃ne adu-a bꞌaya mʉã bia erunʉmʉba. 10Nezrʉgamiã zebaria nezrʉgaita, zhãrã beaita, zhãrã jõbiita. Mawũãmina mʉrã zesia Daizeze ũme bꞌai jõ ẽãta adꞌuba erubꞌeamarẽã.
11Mʉrã bigaua ovejarã akʉira. Ovejarã akʉita bigaura beubaria ovejarã kꞌarea. 12Mawũãmina pagꞌa bꞌʉkꞌãrĩnata ovejarã akʉbari ẽãbara ovejarã izhidꞌe ẽbaera usa pã zebʉrʉta ũdubʉrʉdꞌera ovejarã ãmaẽkua wãẽba wãbaria, mawũẽ usa pãbara ovejarã kꞌa jãrãzoabibaria. 13Pagꞌa bꞌʉkꞌãrĩnarã mawũã wãẽba wãbaria, plata kꞌarea nʉmʉ baera sopua ẽã ovejarã kꞌarea.
14Mʉrã ovejarã akʉira bigaudꞌeba ũdukꞌawua bꞌʉa mʉ ovejarã, mʉrẽta bꞌebidꞌa mʉrã ũdukꞌawua bꞌea. 15Aramaʉ̃ kĩrãkꞌa mʉ Zezebara mʉrã ũdukꞌawua bꞌʉa, mʉ Zezera mʉãbidꞌa ũdukꞌawua bꞌʉa. Mʉrã beuya ovejarã kꞌarea. 16Mʉã dewara erubꞌʉa ovejarã naʉ̃ kꞌorradꞌebema ẽãta. Maʉ̃rãsidꞌa mʉãrã wei baraba maʉ̃rãbara mʉ bedꞌeara ũrĩnaña. Aramaʉ̃ne ãba duaneña, ãzhi akʉbarira abꞌa bꞌaya. 17Mʉ Zezebara mʉrã kʉãgꞌa mʉrã beui baera wakusa piradrʉita. 18Mʉrã miõba beadꞌa ẽã, awuarabʉrʉ mʉrã mʉzhi biaba beuya. Mʉãrã erubꞌʉa beui zareara, mʉãrã erubꞌʉa wakusa piradrʉi zareara. Maʉ̃ta omarẽã jarasia mʉ Zezeba.
19Judíorã wakusa krĩcha abꞌarika zedꞌa ẽbasia maʉ̃ bedꞌeaba. 20Ãzhirãnebema biobara mawũãsidꞌa: Jaiba erunʉmʉba kĩrãne bꞌʉ ẽã. ¿Maʉ̃ba izhi bedꞌeara kꞌãrẽã ũrĩnaĩpe?
21Waya awʉrʉrãbara mawũãsidꞌa:
Mawũãrã bedꞌea ẽã jaiba erunʉmʉrã. ¿Jaibara ne ũdubiga bꞌeika daʉbꞌerrea bꞌera?
Judíorãbara Jesús seribidꞌa ẽbasia
22Jerusalénne fiesta obʉdata Daizeze dedꞌebemata osidꞌa. Maʉ̃nerã kũrãsã ewari basia. 23Daizeze dedꞌa ewara maẽ Jesús tebasia Salomón abada maẽ. 24Maʉ̃ne judíorãba bʉredrʉdꞌape mawũãsidꞌa: ¿Bʉara daira sõmbeedꞌa bʉdꞌebema bia kꞌawuabiga ẽã erunʉmaĩpe? Bʉta zhãrã Ẽdrʉbibʉrʉ daia jipa jaradua.
25Mawũãnaĩ Jesúsbara panaʉ̃ mawũãsia: Mʉrã maʉ̃ta mʉã marãã jarasimina marãbara ĩjãna ẽã. Mʉ Zezedꞌeba mʉã kꞌãrẽ onʉmʉba jipa kꞌawuabi bꞌʉa mʉrã maʉ̃ta. 26Mawũãmina marãbara ĩjãna ẽã mʉrẽnebemata duanu ẽbaera mʉã marãã jaradꞌa kĩrãkꞌa. 27Mʉ ovejarãbara mʉ bedꞌeara ũrĩ bꞌea, mʉãrã ãzhira ũdukꞌawua bꞌʉa, mʉrã aramaʉ̃ne pẽwã bꞌea. 28Mʉãrã dedꞌekaya Daizeze ũme bꞌai jõ ẽãta, mawũẽ aduadꞌa ẽã, miõba jãrĩkua ẽã mʉ juwuadꞌebara. 29Mʉ Zezera ãzhita mʉãã diadꞌara jõmaʉ̃ audre zhi zroma, mawũẽ miõba jãrĩkua ẽã mʉ Zeze juwuadꞌebara. 30Mʉrã mʉ Zeze ũme abꞌaʉta panʉã.
31Mawũãbʉrʉ kꞌarea judíorãbara wakusa mongꞌarata jirakua edasidꞌa tabꞌari beadꞌaita. 32Mawũẽ Jesúsbara mawũãsia: Mʉãrã mʉ Zezedꞌeba biata bio onʉmʉta marãã ũdubiga nʉmʉã. ¿Mawũẽ maʉ̃rãnebema sãʉ̃ kꞌarea mʉrã mongꞌaraba tabꞌaridꞌaipe?
33Mawũãĩ judíorãbara panaʉ̃ mawũãsidꞌa: Bʉa biata obꞌʉ kꞌarea mongꞌaraba tabꞌaridꞌaita kꞌopanʉ ẽã, awuarabʉrʉ tabꞌaridꞌaya Daizezema mitia bedꞌea bꞌʉdꞌeba, aramaʉ̃ne bʉra beubari bꞌʉta Daizezea abꞌʉa.
34Mawũãnaĩ Jesúsbara panaʉ̃ mawũãsia: ¿Marã ũrãgꞌata bꞌʉ tabꞌʉdꞌera Daizezebara mawũãsi ẽka: Mʉã zhi jarama marã dai zezerãta? 35Mawũã dai zezerãta jarasia izha bedꞌeata jarakꞌadꞌata, maʉ̃ta zhi bꞌʉmarã mawũã ẽã abꞌedꞌa ẽã. 36¿Maʉ̃ne mʉrã mʉ Zezeba jʉrʉpe naʉ̃ ẽjũãẽna zokꞌadꞌata, marãbara bʉra Daizezema mitia bedꞌeabʉrʉa abʉda ẽka, bari mʉã jarabʉrʉdꞌeba mʉrã Daizeze Warrata? 37Mʉ Zezeba obꞌʉta mʉã o ẽbʉrʉ, mʉã jara nʉmʉrã ĩjãrãũdua. 38Mawũãmina mʉã onʉmʉbʉrʉ, mʉã jara nʉmʉta ĩjãna ẽãsidꞌa, maʉ̃ mʉã onʉmʉta ĩjãũdua, aramaʉ̃ne kꞌawuadꞌaya mʉ Zezera mʉne bꞌʉta, mʉrã mʉ Zezedꞌe bꞌʉta.
39Mawũãbʉrʉ kꞌarea wakusa jida krĩñasidꞌa, mawũãmina Jesús ẽdrʉsia ãzhi juwuadꞌebara.
40Mobe wakusa wãsia Jordán do kĩrãrẽ, naara Juanba zhãrã buru kꞌoe bꞌadꞌaidꞌu, mobe bꞌesia mama. 41Maʉ̃nerã bio izhima ze nʉmʉbara mawũã duanasia: Ũdudꞌakꞌara Juanbara o ẽbasia, mawũãmina naʉ̃ Jesúsdꞌebemata Juanba jaradꞌara jõma wãrĩnu basia.
42Aramaʉ̃ne Jesúsdꞌebema mama bioba ĩjãsidꞌa.
11Lázaro beudꞌa
1Lázaro abadata kꞌaya nʉmʉta Betania pʉwʉrʉdꞌebema basia, zhi nawekꞌaurãsidꞌa Maríata, Marta ũme maʉ̃ pʉwʉrʉdꞌebema basia. 2Maʉ̃ Maríara Lázaro kꞌaya nʉmʉ nawekꞌaubara tẽãne kerata Jesús jẽrũne ʉ̃rʉ̃ weape izhi budꞌaba põãsã jaresia. 3Zhi nawekꞌaurãbara bedꞌeata jarabuesidꞌa Jesúa mawũãnamarẽã: Nokꞌó, bʉa kʉãgꞌara kꞌaya nʉmʉã.
4Jesúsbara maʉ̃ta ũrĩpe mawũãsia: Maʉ̃ mawũã kꞌaya nʉmʉrã bari beuidꞌebema ẽã, awuarabʉrʉ Daizeze zhi zromata kꞌawuadꞌaidꞌebema, mʉ Daizeze Warrata zhi zromata kꞌawuadꞌaidꞌebema.
5Martara, Maríara, Lázarora Jesúsbara kʉãgꞌa basia. 6Lázaro kꞌaya nʉmʉta ũrĩbʉrʉdꞌera wadꞌi ewari ũme bꞌesia izhi bꞌadꞌa maẽ. 7Mobe maʉ̃ tẽã izha jʉrʉkuadꞌaa mawũãsia: Wakusa wãdrʉ Judea druaedꞌa.
8Mawũãĩ izha jʉrʉkuadꞌabara mawũãsidꞌa: Miã Ũrãgꞌabari, dããrã ba ẽã judíorãba bʉra mongꞌaraba tabꞌaridꞌai badꞌapeadꞌara. ¿Maʉ̃ta wakusa maĩnu wãĩka?
9Mawũãnaĩ Jesúsbara panaʉ̃ mawũãsia:
¿Ewarira doce hora ʉ̃na nʉmʉ ẽka? Ewaridꞌe nimirã tenedrʉ ẽã ẽjũã ʉ̃nata ũdu bꞌʉba. 10Mawũãmina diamase nimirã tenedrʉya ʉ̃na nʉmʉ ẽãba.
11Mawũãpe mawũãsia: Dazhirã bawara zhibiara Lázaro kꞌãĩ nʉmʉã, mawũãmina mʉrã wãña ʉ̃rʉ̃mane.
12Mawũãĩ izha jʉrʉkuadꞌabara mawũãsidꞌa: Nokꞌó, mawũã kꞌãĩ nʉmʉbʉrʉ bꞌeya.
13Mawũã jarabʉrʉbara Jesúsbara jara krĩñasia Lázaro beusita, mawũãmina ãzhara krĩchasidꞌa jarabʉrʉta ẽnaʉ̃ kꞌãĩ nʉmʉta. 14Mawũẽ Jesúsbara jipa jara mawũãsia: Lázaro beusia. 15Mʉrã marã kꞌarea sobia bꞌʉta mama bꞌa ẽbadꞌaba marãbara mʉnebema audre ĩjãnaña, mawũẽ wãnaña izhima.
16Mobebʉrʉ Tomás Memerã abadabara dewaraurã Jesúsba jʉrʉkuadꞌaa mawũãsia: Dazhirãsidꞌa wãnaña izhi bawara beudꞌe.
Jesúsbara beudꞌara piradrʉbiya
17Jesús zebʉrʉdꞌera Lázaro wuagꞌadꞌapeadꞌara ya ewari kĩmarẽ nʉmasia. 18Betania pʉwʉrʉra bꞌasia Jerusalén kꞌaita, zhi wawarata bꞌasia kilómetro ũbea. 19Judíorã bio zesidꞌa Martama, Maríama, aramaʉ̃ne kꞌopayadꞌaita ãzhi mebeata beusi baera. 20Martabara Jesús uruta ũrĩbʉrʉdꞌera kĩrãzhu wãsia, mawũãmina Maríara bꞌesia dedꞌa. 21Martabara Jesúa mawũãsia: Nokꞌó, bʉta nama bꞌasibʉrʉ mʉ nawewaura beu ẽbakꞌausia. 22Mawũãmina mʉãrã kꞌawua bꞌʉa jõma bʉa Daizezea widꞌibʉrʉra izhara aribꞌaeya.
23Mawũãĩ Jesúsbara mawũãsia: Bʉ nawewaura beudꞌata piradrʉya.
24Mawũãĩ Martabara mawũãsia: Mʉãrã kꞌawua bꞌʉa beudꞌata piradrʉita beudꞌapeadꞌata piradrʉbʉdadꞌe ewari jõbʉrʉdꞌe.
25Mawũãĩ Jesúsbara mawũãsia: Beudꞌara mʉã piradrʉbipe Daizeze ũme bꞌai jõ ẽã bꞌabiya. Mʉnebemata ĩjã bꞌʉra beubʉrʉsidꞌa zokꞌai bꞌaya. 26Zokꞌai bꞌeba mʉnebemata ĩjã bꞌera jipa beu ẽã. ¿Maʉ̃ bʉara ĩjãĩka?
27Mawũãĩ izhara mawũãsia: Ããjã Nokꞌó, mʉãrã ĩjã bꞌʉa bʉra zhãrã Ẽdrʉbita Daizeze Warrata zesia naʉ̃ ẽjũãẽna.
Jesús jẽgadꞌa Lázaro wuagꞌadꞌapeadꞌa maẽ
28Mawũãpe Martabara zhi mebea María trʉ̃ne wãpe chupea mawũãsia: Miã Ũrãgꞌabarira nama bꞌʉa, bʉta trʉ̃ kꞌobꞌʉa.
29Maríabara maʉ̃ta ũrĩpe ĩñabasia piradrʉpe zesia Jesúsma. 30Jesús wadꞌi pʉwʉrʉdꞌe edꞌa ze ẽbasia, awuarabʉrʉ bꞌasia Martaba ũdudꞌa maẽ. 31Dedꞌa judíorã María kꞌopaya bꞌebara María ĩñabasia piradrʉpe wãbʉrʉta ũdudꞌai, kꞌaidꞌu wãbʉdata mawũãsidꞌa: Zhi mebea wuagꞌadꞌapeadꞌaidꞌu jẽgadꞌe wã.
32María Jesús kꞌobꞌʉ maẽ zebʉrʉdꞌe ũdui, izhi jẽrũ kꞌaita sãkꞌokꞌodꞌe kꞌobꞌepe mawũãsia: Nokꞌó, bʉta nama bꞌasibʉrʉ mʉ nawewaura beu ẽbakꞌausia.
33Jesúsbara María jẽga bꞌʉta ũdubʉrʉdꞌe, judíorã izhi kꞌopaya bꞌesidꞌa jẽga kꞌobꞌeta ũdui kꞌãbãẽã sopuasia. 34Mawũẽ mawũãsia: ¿Sãma wuagꞌasidꞌa?
Mawũãĩ mawũãsidꞌa: Nokꞌó, akʉdꞌe zerua.
35Jesús jẽgasia. 36Mawũẽ judíorãbara mawũãsidꞌa: Akaudua sãwũã kʉãgꞌa basita.
37Maʉ̃rã ʉ̃kʉrʉbara mawũãsidꞌa: ¿Naʉ̃bara daʉbꞌerrea bꞌʉta ne ũdubidꞌara, Lázarosidꞌa beubi ẽbaidꞌe bꞌasi ẽka?
Beudꞌata piradrʉdꞌa Lázaro
38Jesús wakusa kꞌãbãẽã sopua zesia Lázaro wuagꞌadꞌapeadꞌa maẽ. Mama zobꞌeata nʉmʉta mongꞌara zromaba tapa nʉmasia. 39Mawũẽ Jesúsbara mawũãsia: Mongꞌara ãĩ edaudua.
Maʉ̃ne Marta zhi beudꞌa nawekꞌaubara mawũãsia: Nokꞌó, ya ʉ̃siasia ewari kĩmarẽ basi baera.
40Mawũãĩ Jesúsbara mawũãsia: ¿Mʉã bʉaa jarasi ẽka bʉa mʉnebemata ĩjãrã ũduita zarea Daizezedꞌera?
41Mobebʉrʉ beudꞌata bꞌʉdꞌapeadꞌa maẽbara mongꞌara ãĩ edasidꞌa. Mawũẽ Jesúsbara ʉ̃taa akʉ mawũãsia: Zeze, mʉã bʉaa zhibia jiya mʉã widꞌidꞌara bʉa ũrĩbʉrʉba. 42Mʉãrã kꞌawua bꞌʉa bʉara mʉ bedꞌeara baridua ũrĩ bꞌʉta, mawũãmina mʉrã mawũã bedꞌeabʉrʉa kꞌabanata za kꞌobꞌe kꞌarea, aramaʉ̃ne ĩjãnamarẽã mʉrã bʉa zokꞌadꞌata.
43Mawũãpe nemi jĩgua mawũãsia: ¡Lázaro ãĩ zerua!
44Mawũãĩ beudꞌara ãĩ zesia, juwuata jẽrũta bʉra chubꞌasia wuaba, kĩrãsidꞌa bʉra chubꞌasia pañueloba.
Mawũẽ Jesúsbara mawũãsia: Ẽnaʉ̃dua tebamarẽã.
Krĩcha jʉrʉdꞌapeadꞌa beadꞌaita Jesús
(Mateo 26:1-5; Marcos 14:1-2; Lucas 22:1-2)
45Mobebʉrʉ judíorã bio María kꞌopayadꞌaita zedꞌapeadꞌabara Jesúsba mawũã obʉrʉta ũdudꞌape ĩjãsidꞌa izhidꞌebemata. 46Mawũãmina maʉ̃rãnebema ʉ̃kʉrʉra fariseorãma wãpe jarasidꞌa Jesúsba mawũã obʉrʉta. 47Mawũẽ sacerdoterã nokꞌorãbara, fariseorãbara, nokꞌorã wagꞌaurãta ãba jʉredꞌape mawũãsidꞌa: ¿Kꞌãrẽta odꞌaipe? Jesúsbara bio onʉmʉã ũdudꞌakꞌata. 48Kꞌãwũã idaribidꞌara izhidꞌebemata jõmaʉ̃ba ĩjãnaña, kꞌãwũãrã Roma bidꞌarãta zedꞌape Daizeze de dazhirãnerã ãrĩnaña, dazhirãsidꞌa beakuadꞌaya.
49Mawũãnaĩ ãzhirãnebema abꞌa Caifás maʉ̃ añone sacerdote wagꞌauta bꞌʉba mawũãsia: Marãbara miã kꞌãrẽta kꞌawuadꞌa ẽã. 50Miã marãbara kꞌawuadꞌa ẽã ũmakĩrã abꞌa jõmaʉ̃bari beuita audre bigata, Roma bidꞌarãba judíorã jõma beadꞌai kꞌãñabara.
51Mawũãbʉrʉra izhikusauba mawũã ẽbasia, awuarabʉrʉ maʉ̃ añone izhita sacerdote wagꞌauta bꞌʉ baera Daizezedꞌeba mawũãsia Jesús beuita judíorã jõmaʉ̃bari. 52Bari judíorãbari beuita ẽã, awuarabʉrʉ beuita Daizeze warrarã abꞌa nʉmʉĩta druaza bꞌeta. 53Aramaʉ̃ne maʉ̃ ewadeba krĩchasidꞌa Jesús beadꞌaita.
54Maʉ̃ kꞌarea judíorãne edꞌara Jesús ya dajada nimiba ẽbasia, awuarabʉrʉ mamaʉ̃bara wãsia drua drudrua tabꞌʉ kꞌaita, pʉwʉrʉta Efraín abadaidꞌu wãsia, mobe mama bꞌesia izha jʉrʉkuadꞌa bawara.
55Kꞌaita bata nʉmasia Egiptodꞌeba ẽzoadꞌata krĩcha fiesta obadata judíorãba, mawũẽ fiesta nawedꞌa bio wãrĩzesidꞌa Jerusalén pʉwʉrʉedꞌa, Daizeze kĩrãbita nene ẽã kꞌobꞌaidꞌebemata odꞌai kꞌarea. 56Zhãrãbara Jesús jʉrʉ bꞌeta Daizeze dedꞌa ewara maẽ ãzhirãĩnu mawũãsidꞌa: ¿Marãma sãwũãpe? ¿Fiesta badꞌera zeibʉka?
57Sacerdoterã nokꞌorãbara, fariseorãbara jarasidꞌa iabꞌaʉba sãma bꞌʉta kꞌawuara jaramarẽã jidadꞌaita.
12Jesús jẽrũne kerata weadꞌapeadꞌa
(Mateo 26:6-13; Marcos 14:3-9)
1Egiptodꞌeba ẽzoadꞌata krĩcha fiesta obadata ewari seis wãẽã nʉmʉne, Jesús Betania pʉwʉrʉedꞌa zesia Lázaro bꞌʉ maẽ, maʉ̃ beudꞌata izha piradrʉbidꞌa basia. 2Mama Jesúita zhiko osidꞌa, Martaba ne jedꞌekasia, Lázaro jewedꞌa kꞌobꞌasia zhãrã Jesús bawara nekꞌo duanune edꞌa. 3Maríabara kera nardo izhiawa kiruta botelladꞌe nʉmʉta ne ʉ̃tʉta jiraedape weasia Jesús jẽrũne, mobe izhi budꞌaba põãsã jaresia, aramaʉ̃ne dera jõma tũã nʉmesia keraba. 4Maʉ̃ne Jesúsba jʉrʉkuadꞌata abꞌa Juda Iscariote Simón warraba Jesús chãbꞌariita bꞌʉba mawũãsia: 5¿Naʉ̃ kera kꞌãrẽã nendo ẽbasi, ewari treciento trajadꞌabari nendoidꞌe bꞌasi ẽka denario trecientobari, mobe platara diaidꞌe bꞌasi ẽka zuburia bꞌea?
6Judabara mawũã ẽbasia zuburia bꞌeta krĩcha bꞌʉba, awuarabʉrʉ mawũãsia nezrʉgamiãta bꞌʉ baera. Zũbita izha erubꞌʉba zrʉga bꞌasia ãzhi jõmaʉ̃ĩta plata edꞌa kenabꞌari panʉnebemata. 7Mawũẽ Jesúsbara mawũãsia: Idaribirua, Maríabara mʉ wuagꞌa bꞌʉdꞌai ewariita wuagꞌa erubꞌasia naʉ̃ kerara. 8Zuburia bꞌera marã bawara ewariza bꞌeaya, mawũãmina mʉrã marã bawara ewariza bꞌa ẽã.
Krĩcha jʉrʉdꞌapeadꞌa beadꞌaita Lázaro
9Judíorãbara kꞌabanaba kꞌawuasidꞌa Jesús Betania pʉwʉrʉdꞌe bꞌʉta, mawũẽ maĩnu zesidꞌa, bari Jesús akʉdꞌe zedꞌa ẽbasia, awuarabʉrʉ Lázarosidꞌa akʉdꞌe zesidꞌa, beudꞌata Jesúsba piradrʉbidꞌata. 10Mawũẽ sacerdoterã nokꞌorãbara krĩchasidꞌa beadꞌaita Lázarosidꞌa. 11Maʉ̃ẽnabema Lázarodꞌeba judíorã bioba ãzhira kenabꞌarisidꞌa, mobe ĩjãsidꞌa Jesúsdꞌebemata.
Jesús edꞌa wãna Jerusalénne
(Mateo 21:1-11; Marcos 11:1-11; Lucas 19:28-40)
12Jerusalén pʉwʉrʉedꞌa kꞌabanata fiesta badꞌe zedꞌapeadꞌabara nrũẽmane ũrĩsidꞌa Jesúsidꞌa uruta. 13Mawũẽ pãrãrã kiduata tʉdꞌape kĩrãzhu wãsidꞌa, maʉ̃nerã nemi jĩgua mawũãsidꞌa:
¡Daizezera ibia jaradꞌaya!
¡Ibia jaradꞌaya Daizezedꞌeba zebʉrʉra, izhira Rey Israel bꞌedꞌea! (Salmos 118:25-26)
14Jesúsbara burro kũrãta ũdupe ʉ̃rʉ̃ bꞌarisia, maʉ̃ẽnabemata zhi bꞌʉmata mawũã bꞌʉa:
15Perarãũdua marã Jerusalénne bꞌera, marã Reyra urua, burro kũrãne ʉ̃rʉ̃ bꞌari urua. (Zacarías 9:9)
16Izha jʉrʉkuadꞌabara maʉ̃ naarara sãwũãrã kꞌawuadꞌa ẽbasia, mawũãmina Jesús ʉ̃taa wãna tẽãne bude basidꞌa maʉ̃ izhi ʉ̃rʉ̃bemata bꞌʉ tabꞌedꞌe odꞌapeadꞌata. 17Zhãrã Jesús bawara kꞌobꞌeadꞌabara awʉrʉa nebʉrʉsidꞌa Lázaro trʉ̃bʉrʉdꞌera beudꞌata piradrʉbidꞌata. 18Maʉ̃ kꞌarea zhãrãbara Jesús kĩrãzhu zesidꞌa, ũrĩsidꞌa baera izha odꞌata maʉ̃ ũdudꞌakꞌata. 19Mawũãmina fariseorãbara ãzhirãĩnu mawũãsidꞌa: Marãba akʉ bꞌe kĩrãkꞌara dazhirãbara miã kꞌãrẽta obꞌedꞌa ẽã. Akaudua sãwũã jõmaʉ̃ba pẽwã duaĩnata.
Griegorã ʉ̃kʉrʉba jʉrʉdꞌapeadꞌa Jesús
20Ʉ̃kʉrʉ griegorãta duanasia Jerusalén pʉwʉrʉedꞌa wãrĩzekuadꞌara Daizeze ibia jaradꞌaita fiestadꞌe. 21Maʉ̃rãbara Felipeta orrasidꞌa, Felipera Betsaida pʉwʉrʉdꞌebema basia, maʉ̃ pʉwʉrʉra Galilea druadꞌebema, mawũã orradꞌape zuburia bedꞌea mawũãsidꞌa: Daibara ũdu krĩña panʉã Jesústa.
22Felipera wãpe jarasia Andrea, aramaʉ̃ne Andrésba Felipe ũmeba jarasidꞌa Jesúa. 23Mawũẽ Jesúsbara panaʉ̃ mawũãsia: Ewarira arabasia mʉ Beubari Bape bꞌʉra beudꞌata piradrʉpe ʉ̃taa wãĩta. 24Mʉã wãrĩnu marãã jaraya, trigo ta egorodꞌe ubudata pãwãrãĩta beu ẽbʉrʉ abꞌabai bꞌaya, mawũãmina pãwãrãĩta beura, waripe bio zauya. 25Bꞌa krĩñaba mʉ kꞌarea beu ẽãrã aduaya, mawũãmina naʉ̃ ẽjũãne bꞌa krĩña ẽkĩrãkꞌa mʉ kꞌarea beubʉrʉra Daizeze ũme bꞌai jõ ẽã bꞌaya. 26Iabꞌaʉba mʉ bedꞌeata aribꞌae nʉmʉbara mʉta pẽwãdua, mawũãrã mʉ bꞌʉ maẽ bꞌaya mʉ bedꞌeata aribꞌae bꞌʉra. Iabꞌaʉba mʉ bedꞌeata aribꞌae bꞌʉra mʉ Zezebara bia edaya.
Jesúsba jaradꞌa izhi beuita
27Mʉrã sopua kꞌobꞌʉa. ¿Mʉãrã kꞌasia aipe? ¿Zeze mʉrã kꞌarebarua, mʉrã zuburiabirãrũã aika? Mawũãmina mʉrã zesia maʉ̃ kꞌarea. 28Mawũẽ mʉãrã mawũãña: Zeze, bʉra zhi zromata ũdukꞌawabigarua.
Maʉ̃ne Daizeze ʉ̃treba bedꞌeabʉrʉta mawũãsia: Mʉrã zhi zromata ũdukꞌawabiga bꞌʉta mʉãrã wakusa ũdukꞌawabigaya. 29Kꞌabanata mama kꞌobꞌebara maʉ̃ bedꞌeata ũrĩbʉdadꞌera jarasidꞌa bata. Waya awʉrʉrãbara mawũãsidꞌa: Ángelta Jesúa bedꞌeabʉrʉa.
30Mawũãnaĩ Jesúsbara mawũãsia: Mawũã bedꞌeabʉrʉra mʉĩtabema ẽã, awuarabʉrʉ marãĩtabema. 31Arababʉrʉa Daizezebara kꞌawua okuaita naʉ̃ ẽjũãne bꞌera, arababʉrʉa ãtõmiã naʉ̃ ẽjũãne nokꞌota bꞌʉra Daizezebara ãĩ jʉretaita. 32Mʉta druadꞌe cruzdꞌe jirabꞌʉdꞌai mʉãrã jõmaʉ̃ã ĩjãbigaya mʉnebemata.
33Mawũã jarabʉrʉbara Jesúsbara jara krĩñasia sãwũã beuita. 34Zhãrãbara mawũãsidꞌa: Daiba ũrĩbadara ũrãgꞌadꞌera jara bꞌʉa zhãrã Ẽdrʉbira beukꞌata. ¿Maʉ̃ta bʉara sãwũã Beubari Bape bꞌʉra cruzdꞌe jirabꞌʉdꞌaya abʉrʉ? ¿Mobera kꞌaipe maʉ̃ Beubari Bape bꞌʉra?
35Mawũãnaĩ Jesúsbara mawũãsia: Wadꞌi ewari kꞌakutua mʉta ʉ̃nata marãne edꞌa bꞌʉa. Mʉ ũme nimibaudua wadꞌi eruduanuwedꞌa mʉta ʉ̃nata, mawũãrã marãĩtara keubʉrʉ kĩrãkꞌa toto ẽbaya, pãrĩguadꞌe nimibara kꞌawua ẽã sãmaã wãrã. 36Ʉ̃nata eruduanuwedꞌa ĩjãũdua ʉ̃nanebemata, aramaʉ̃ne bꞌeaita ʉ̃na warrarãta.
Jesúsbara maʉ̃ta jarape wãpe merũsia zhãrã kꞌarea.
Ĩjã ẽã nʉmeãna judíorãbara
37Jesúsbara ũdudꞌakꞌata ãzhi kĩrãbita okuasiidꞌu ĩjãna ẽbasia izhidꞌebema. 38Aramaʉ̃ne arimaẽ berabꞌarisia Daizezeba bedꞌeata jarabibariba Isaíaba mawũãnata:
Nokꞌó, ¿kꞌaiba ĩjãbʉrʉ bedꞌeata dazha jarabʉdara? ¿Kꞌaiba kꞌawuabʉrʉ bʉra zhi zromata? (Isaías 53:1)
39Maʉ̃neba ĩjã bꞌedꞌa ẽbasia, maʉ̃ẽnabemata Isaíabara dewara mawũãsia:
40Daizezebara mawũãsia: Ĩjãna ẽãba mʉãrã ãnatʉsia ãzhi dabʉra, zarea duanusia ãzhi sora, aramaʉ̃nerã ũdudꞌa ẽã dabʉbara, sãwũãta kꞌawuadꞌa ẽã sobara, miã kꞌazhiruara ãmape mʉ pẽwãna ẽã mʉã ẽdrʉbigaira. (Isaías 6:10)
41Isaíabara maʉ̃ta jarasia kꞌãĩmokꞌaradꞌe kĩrãkꞌa ũdudꞌaba Jesús zhi zromata bꞌaita, mawũẽ jarasia izhidꞌebemata.
42Isaíaba mawũã jarasimina judíorãta nokꞌorãbara bioba ĩjãsidꞌa Jesúsdꞌebema. Mawũãmina ĩjã bꞌea adꞌa ẽbasia wawia bꞌeba fariseorãta, aramaʉ̃ne edꞌa wãbi ẽã nʉmʉna ẽbamarẽã de zhi jʉrebada maẽ. 43Aramaʉ̃ne zhãrãba bia jaraita krĩña bꞌeasia Daizezea bia jarabidꞌai kꞌãñabara.
Jesús bedꞌeaba kꞌawua oya zhãrã bꞌera
44Jesúsbara nemi jĩgua mawũãsia: Mʉnebemata ĩjã bꞌʉra bari mʉnebemata ĩjã bꞌʉ ẽã, awuarabʉrʉ ĩjã bꞌʉa mʉ zokꞌadꞌadꞌebemata. 45Mʉta ũdu bꞌʉbara ũdu bꞌʉa mʉ zokꞌadꞌata. 46Mʉta ʉ̃nata zesia naʉ̃ ẽjũãẽna, mʉnebema ĩjãbʉdara pãrĩguadꞌe bꞌea ẽbamarẽã. 47Mʉ bedꞌeata ũrĩpe aribꞌae ẽãrã mʉãrã kꞌawua o ẽã, mʉrã zhãrã kꞌawua oita ze ẽbasi baera naʉ̃ ẽjũãẽna, awuarabʉrʉ mʉrã zesia zhãrã ẽdrʉbigaita ẽjũãne bꞌeta. 48Mʉta seribi ẽãba mʉ bedꞌeata ĩjã ẽãbara erubꞌʉa kꞌaiba pua kꞌawua oira, bedꞌeata mʉã jara nʉmʉba maʉ̃neba Daizezeba kꞌawua oya ewari jõbʉrʉdꞌe. 49Mʉrã bedꞌea nʉmʉ ẽã mʉzhikusauba, awuarabʉrʉ mʉ Zeze mʉ zokꞌadꞌaba jarasia kꞌãrẽ jarai bꞌʉra sãwũã jaraita. 50Mʉãrã kꞌawua bꞌʉa izha mʉãã jarabi nʉmʉrã izhi ũme bꞌai jõ ẽãnebema. Mawũẽ mʉã jara nʉmʉrã jara nʉmʉã mʉ Zezeba mʉãã jaradꞌadꞌe.
13Jesúsba jẽrũ sʉgʉkuadꞌa izha jʉrʉkuadꞌata
1Egiptodꞌeba ẽzoadꞌata krĩcha fiesta obada nawedꞌa, Jesúsbara kꞌawua bꞌasia ewari arabata naʉ̃ ẽjũãnebara zhi Zezema wãĩta, izhi pẽwã bꞌeta naʉ̃ ẽjũãne bꞌera kʉãgꞌaba kʉãgꞌasia druadꞌe bꞌʉ ewarita jõbʉrʉidꞌu. 2Dauja zhiko kꞌobʉdadꞌera ãtõmiãbara Simón warra Juda Iscariotera sodꞌera ya krĩchabisia Jesús chãbꞌaribiita. 3Jesúsbara kꞌawua bꞌasia zhi Zezebara ne jõma izhaa chãbꞌaridꞌata, kꞌawua bꞌasia izhira Daizeze maẽba zedꞌadꞌeba Daizezema wãĩta. 4Maʉ̃ba nekꞌo kꞌobꞌedꞌe Jesús piradrʉpe wua ãnebꞌari bꞌʉta wẽãpe toallata jiraedape tãjʉ̃ kꞌobꞌʉsia kʉrrʉdꞌe. 5Mobebʉrʉ poncheradꞌe baniãta weape izha jʉrʉkuadꞌata jẽrũ sʉgʉkua põãsã jaresia toalla kʉrrʉdꞌe tãjʉ̃naba. 6Aramaʉ̃ne Pedroidꞌu babʉrʉdꞌera maʉ̃bara mawũãsia: ¿Nokꞌó, bʉa sʉgʉika mʉ jẽrũta?
7Mawũãĩ Jesúsbara panaʉ̃ mawũãsia: Mʉã obʉrʉra kꞌãwũãwedꞌara bʉara sãwũãta kꞌawua ẽã, mawũãmina tẽãne kꞌawuaya.
8Mawũãĩ Pedrobara mawũãsia: Bʉara sʉgʉ ẽã mʉ jẽrũrã.
Mawũãĩ Jesúsbara panaʉ̃ mawũãsia: Mʉã bʉ jẽrũta sʉgʉ ẽbʉrʉ, bʉra mʉnebema ẽã.
9Mawũãĩ Simón Pedrobara mawũãsia: Mobera Nokꞌó, bari mʉ jẽrũta ẽã, awuarabʉrʉ mʉrã sʉgʉ bꞌʉdua juwuata buruta.
10Mawũãĩ Jesúsbara mawũãsia: Kuidꞌara jaigu ẽãba jẽrũtrʉ sʉgʉidꞌe bꞌʉa jõma nene ẽãba. Marã jaigu ẽã bꞌea, mawũãmina jõma ẽã.
11Jesúsbara kꞌawua bꞌasia izhira kꞌaiba chãbꞌariita, maʉ̃ba mawũãsia: Marã jõma nene ẽã duanu ẽã.
12Mawũã jẽrũ sʉgʉkuape wakusa izhi wuata ãnebꞌaripe wakusa jewedꞌasia mesa maẽ, mobe mawũãsia: ¿Marãbara sãwũãta kꞌawuabʉdakꞌa mʉã marã kꞌãwũã obʉrʉdꞌebema? 13Marãbara mʉrã jara bꞌea Miã Ũrãgꞌabarita, Nokꞌota, mawũã jaradꞌaira biga mʉrã maʉ̃ baera. 14Mʉta Nokꞌota Miã Ũrãgꞌabarita bꞌʉba marã jẽrũta sʉgʉbʉrʉba, marãsidꞌa abꞌarika jẽrũ sʉgʉdꞌaibara zhiya. 15Mʉãrã marã kꞌãwũã obʉrʉa marãbidꞌa abꞌarika odꞌamarẽã. 16Mʉã wãrĩnu marãã jaraya: Nezokꞌara audre zhi zroma ẽã izhi nokꞌo kꞌãñabara, miã zokꞌabuebʉdara audre zhi zroma ẽã izhi zokꞌabuebʉrʉ kꞌãñabara. 17Maʉ̃ta sãwũãta kꞌawuadꞌara Daizezebara sobia bꞌeabiya aribꞌaedꞌara.
18Mʉãrã marã jõma jara kꞌobꞌʉ ẽã, mʉãrã kꞌawua bꞌʉa kꞌairãta jʉrʉkuadꞌata. Mawũãmina arimaẽ berabꞌarii barata zhi bꞌʉmata mawũã bꞌʉa: Mʉ ũme nekꞌo bꞌʉra mʉ ʉ̃rʉ̃ baya. 19Mʉãrã maʉ̃ta nawedꞌa marãã jarabʉrʉa, mawũã berabꞌaribʉrʉdꞌera ĩjãnamarẽã Mʉrã Mʉta. 20Mʉã wãrĩnu marãã jaraya: Mʉã zokꞌabʉrʉta bia edabʉrʉra mʉta bia edabʉrʉa, mʉ Zeze mʉ zokꞌadꞌata bia edabʉrʉa.
Jesúsba jaradꞌa izhi chãbꞌariita Judaba
(Mateo 26:20-25; Marcos 14:17-21; Lucas 22:21-23)
21Jesúsbara maʉ̃ta jarape kꞌãbãẽã sopua mawũãsia: Mʉã wãrĩnu marãã jaraya, marãnebema abꞌaʉba mʉrã chãbꞌariya.
22Mawũãĩ izha jʉrʉkuadꞌara ãzhirãĩnu zhiya akʉsidꞌa kꞌaita jara kꞌobꞌʉta kꞌawuadꞌa ẽãba. 23Izha jʉrʉkuadꞌata abꞌa Jesúsba kʉãgꞌata kꞌobꞌasia Jesús kꞌaita. 24Mawũẽ Pedrobara maʉ̃ã juwuaba jarasia widꞌimarẽã kꞌaita jara kꞌobꞌʉta. 25Mawũẽ maʉ̃bara Jesústa audre kꞌaita orrape mawũãsia: Nokꞌó, ¿bʉ mawũã oira kꞌaipe?
26Mawũãĩ Jesúsbara panaʉ̃ mawũãsia: Mʉã panta sõmberape diataya, maʉ̃ta izhia. Mawũãpe pan sõmberape Juda Iscariotea diasia Simón warraa. 27Maʉ̃ta kꞌobʉrʉdꞌera ãtõmiã edꞌa izhidꞌe wãsia. Mawũẽ Jesúsbara mawũãsia: Bʉzha oira ĩñabasia odua.
28Mawũãmina nekꞌo duanubara miõba kꞌawuadꞌa ẽbasia kꞌãrẽã mawũãbʉrʉra. 29Ʉ̃kʉrʉbara krĩchasidꞌa Judabara zũbi plata atauta erubꞌʉba Jesúsbara mawũãsita: Edarua dazhirãba fiestadꞌe nesidꞌara, o mawũãsi ẽbʉrʉ jarasita kꞌãrẽ diamarẽã zuburia bꞌea. 30Judabara pan kꞌope aramaʉ̃ta wãsia. Maʉ̃nerã ya diamase nʉmasia.
Aribꞌaeita zhiwidꞌia
31Juda wãbʉrʉdꞌera Jesúsbara mawũãsia: Kꞌõbebʉrʉ Daizezebara zhi zromata ũdukꞌawabigaya mʉ Beubari Bape bꞌʉra, izhi Daizezesidꞌa zhi zromata ũdukꞌawabigaya mʉneba. 32Daizezeba izhira zhi zromata mʉneba ũdukꞌawabigabʉrʉdꞌera, Daizezebara abꞌarika ũdukꞌawabigaya mʉrã zhi zromata, dããrã ẽãne mawũã oya. 33Warrarã, mʉrã marã bawara kꞌobꞌaya aritiaedꞌa. Marãbara mʉrã jʉrʉdꞌaya, mawũãmina judíorãã mʉã jaradꞌa kĩrãkꞌa mʉã marãã jaraya: Mʉ wãĩma marã wã bꞌedꞌa ẽã. 34Aribꞌaeita zhiwidꞌita mʉã marãã jaraya: Zhiya kʉãgꞌaudua, mʉã marãta kʉãgꞌa bꞌʉ kĩrãkꞌa. 35Mawũãtrʉ jõmaʉ̃ba kꞌawuadꞌaya marã mʉ pẽwã bꞌeta, zhiya kʉãgꞌa bꞌebʉrʉ.
Jesúsba jaradꞌa Pedroba ũdukꞌa aita
(Mateo 26:31-35; Marcos 14:27-31; Lucas 22:31-34)
36Pedrobara Jesúa mawũãsia: Nokꞌó, ¿bʉra sãmaã wãĩpe?
Mawũãĩ Jesúsbara panaʉ̃ mawũãsia: Mʉ wãĩma kꞌãwũãwedꞌara bʉra mʉ kꞌaidꞌura wã bꞌe ẽã, mawũãmina mʉ kꞌaidꞌu zeya tẽã.
37Mawũãĩ Pedrobara mawũãsia: Nokꞌó, ¿mʉrã kꞌãrẽneba kꞌãwũãwedꞌara bʉ kꞌaidꞌu wã bꞌe ẽpe? Mʉrã bʉ kꞌarea beuya.
38Mawũãĩ Jesúsbara panaʉ̃ mawũãsia: ¿Bʉta beuika mʉ kꞌarea? Mʉã wãrĩnu bʉaa jaraya: Gallora beru ẽã bʉa mʉta ũdukꞌata jarama ũbea jara ẽwedꞌara.
14Jesústa oa wãĩta Daizezema
1Sopuarãũdua. Ĩjãũdua Daizezedꞌebemata, ĩjãũdua mʉnebemasidꞌa. 2Mʉ Zeze dedꞌara sãma bꞌaira bio bꞌʉa, mawũã bꞌʉ ẽbʉrʉ mʉã marãã jarakꞌausia. Mawũẽ mʉrã wãña sãma bꞌaita aribꞌaedꞌe marãĩta. 3Mʉrã mawũã wãpe sãma bꞌaita aribꞌaepe mʉrã wakusa zeya marã mʉzhi bawara jʉre edeita, aramaʉ̃ne mʉ bꞌʉ maẽ marãsidꞌa bꞌeamarẽã. 4Marãbara kꞌawua bꞌea mʉ sãmaã wãĩrã, kꞌawua bꞌea ora.
5Mawũãĩ Tomásba mawũãsia: Nokꞌó, daibara kꞌawuadꞌa ẽã bʉ sãmaã wãĩrã, ¿mawũẽ daibara sãwũã kꞌawuadꞌaipe ora?
6Mawũãĩ Jesúsbara mawũãsia: Mʉta oa, mʉta wãrã, mʉta bꞌai jõ ẽãnebema. Mawũẽ miõta mʉ Zezema jũẽ ẽã, awuarabʉrʉ jũẽña mʉneba. 7Marãba mʉta ũdukꞌawua bꞌeasibʉrʉ, mʉ Zezesidꞌa ũdukꞌawua bꞌeakꞌausia, nane wedꞌauba ũdukꞌawadꞌaya ũdu bꞌeba.
8Mawũãĩ Felipeba mawũãsia: Nokꞌó, daia ũdubigarua bʉ Zezeta, daira bari maʉ̃baa.
9Mawũãĩ Jesúsbara mawũãsia: ¿Mʉrã marã bawara bꞌʉta ewari bio bata, bʉa mʉrã ũdukꞌawa ẽka Felipe? Mʉta ũdu bꞌʉbara mʉ Zezeta ũdu bꞌʉa, ¿maʉ̃ta bʉara sãwũã mawũãbʉrʉ: Daia ũdubigarua bʉ Zezeta? 10¿Bʉara ĩjã ẽka mʉrã mʉ Zezedꞌe bꞌʉta, mʉ Zezera mʉne bꞌʉta? Mʉã bedꞌeata marãã jara nʉmʉrã mʉzhikusauba jara nʉmʉ ẽã, awuarabʉrʉ mʉ Zeze mʉne bꞌʉba mʉneba kꞌãrẽ onʉmʉã. 11Ĩjãrũã mʉrã mʉ Zezedꞌe bꞌʉta, mʉ Zezera mʉne bꞌʉta. Maʉ̃ta ĩjã ẽbʉrʉ, ĩjãrũã mʉã kꞌãrẽ onʉmʉneba.
12Mʉã wãrĩnu marãã jaraya:
Mʉnebemata ĩjã bꞌʉbara mʉã kꞌãrẽ onʉmʉta izhabidꞌa oya. Kꞌãrẽ audre oya mʉta wãĩ baera mʉ Zezema. 13Jõma kꞌãrẽ mʉ Zezea widꞌibʉdata mʉneba widꞌibʉdara mʉã aribꞌaeya, aramaʉ̃ne mʉ Zezeta zhi zromata ũdukꞌawadꞌamarẽã mʉ zhi Warradꞌeba. 14Mʉãã kꞌãrẽta widꞌidꞌara mʉãrã aribꞌaeya.
Jesúsba zokꞌaita jaradꞌa Jawurebiata
15Mʉta kʉãgꞌa bꞌebʉrʉ aribꞌaeudua mʉã jara bꞌʉta. 16Mawũãrã mʉta zuburia bedꞌeaya mʉ Zezea, mobedꞌeba marãã diaya awʉrʉ marã Kꞌarebata, aramaʉ̃ne marã bawara bꞌamarẽã ewariza. 17Jawurebiara wãrãnebemata bꞌʉa, mʉnebema ẽãta ẽjũãne bꞌebara izhira jidadꞌaidꞌe bꞌʉ ẽã ũdudꞌa ẽbaera, miã ũdukꞌawadꞌa ẽbaera. Mawũãmina marãbara ũdukꞌawua bꞌea marã bawara bꞌʉ baera, aramaʉ̃ne marãne bꞌaya.
18Mʉã marã dobꞌa ãmaẽkua ẽã jẽrãmarãta bꞌe kĩrãkꞌa, mʉrã marãma zeya. 19Mʉnebema ẽãta ẽjũãne bꞌebara dããrã ẽãne mʉrã wueta ũdudꞌa ẽã. Mawũãmina marãbara mʉrã ũdudꞌaya. Mʉta bꞌʉba marãsidꞌa bꞌeaya. 20Mawũã ũdubʉda ewadera marãbara kꞌawuadꞌaya mʉrã mʉ Zezedꞌe bꞌʉta, marãta mʉne bꞌeta, mʉta marãne bꞌʉta. 21Mʉã jara bꞌʉta aribꞌae bꞌʉbara mʉrã kʉãgꞌa bꞌʉa. Mʉta kʉãgꞌa bꞌʉra mʉ Zezeba kʉãgꞌa baya, mʉãbidꞌa kʉãgꞌa baya, mobe mʉnebemata kꞌawuabi nʉmaña.
22Mawũãĩ Juda awʉrʉba Iscariote ẽãba mawũãsia: Nokꞌó, ¿bʉara sãwũã daiaabʉrʉ bʉdꞌebemata kꞌawuabi nʉmaĩne kꞌawuabi nʉma ẽpe bʉdꞌebema ẽãta bꞌeara ẽjũãne?
23Mawũãĩ Jesúsbara panaʉ̃ mawũãsia: Mʉta kʉãgꞌa bꞌʉbara mʉ bedꞌeata aribꞌaeya, mobedꞌeba mʉ Zezebara kʉãgꞌa baya, aramaʉ̃ne daira izhima zedꞌape izhi bawara panaña. 24Mʉta kʉãgꞌa ẽãbara mʉ bedꞌeara aribꞌae ẽã. Mʉã jara nʉmʉ bedꞌeata ũrĩ bꞌera mʉrẽ ẽã, awuarabʉrʉ mʉ Zeze mʉ zokꞌadꞌadꞌea.
25Mʉã maʉ̃ jõma marãã jarabʉrʉa marã bawara bꞌʉwedꞌa. 26Mawũãmina marã Kꞌarebata Jawurebiata mʉ Zezeba mʉbari zokꞌaibara maʉ̃bara marãã ne jõma jaradedꞌekaya, bude babigaya jõma mʉã marãã jaradꞌata.
27Adu-a bꞌaidꞌebemata mʉã marãĩta ãmaẽña, adu-a bꞌaidꞌebemata mʉrẽta mʉã marãã diaya. Maʉ̃ mʉãrã dedꞌeka ẽã ẽjũãne bꞌeba aritiaedꞌa diabada kĩrãkꞌa. Mawũẽ sopuarãũdua, miã perarãũdua. 28Marãbara ũrĩsidꞌa mʉã marãã mawũãnata: Mʉrã wãpe marãma zeya. Mʉta kʉãgꞌa bꞌebʉrʉ marã sobiadꞌaidꞌe bꞌʉa mʉã jarasi baera mʉrã mʉ Zezema wãĩta, mʉ Zezera zhi zromaneba mʉ audre. 29Mʉã maʉ̃ta marãã jarabʉrʉa mawũã berabꞌarii nawedꞌa, mawũã berabꞌaribʉrʉdꞌera ĩjãnamarẽã. 30Ya mʉrã marã bawara bio bedꞌea ẽã ãtõmiãta uru baera naʉ̃ ẽjũãne nokꞌota, izhira zarea ne ẽã mʉ ʉ̃rʉ̃rã. 31Mawũãmina mʉãrã mʉ Zezera kʉãgꞌata ẽjũãne bꞌeba kꞌawuadꞌamarẽã, mʉãrã mʉ Zezeba jaradꞌa kĩrãkꞌa onʉmʉã. Pirabꞌariudua, wãdrʉ namaʉ̃bara.
15Jesús wãrĩnu uva kꞌarra
1Mʉrã wãrĩnu uva kꞌarra, waya mʉ Zezera zhi akʉbaria. 2Jʉ̃kꞌara mʉ kꞌarradꞌebema zhi zau ẽãrã izha tiaweya. Mawũãmina zhi zaubʉdara zhi tae seri ẽãtrʉ kꞌõkua araa oya audre zaumarẽã. 3Aramaʉ̃ kĩrãkꞌa marã ya zhi araa omata bꞌea, bedꞌeata mʉã marãã jara nʉmʉba. 4Mʉ ũme bꞌeaudua, mobedꞌeba mʉrã marãne bꞌʉa. Uva jʉ̃kꞌara izhikusara zau ẽã zhi kꞌarra maẽba nʉmʉ ẽbʉrʉ, aramaʉ̃ kĩrãkꞌa marãbara Daizezeba krĩñarã obꞌedꞌa ẽã mʉ ũme duanu ẽbʉrʉ.
5Mʉrã uva kꞌarra, waya marãta zhi jʉ̃kꞌara. Mʉ ũme bꞌʉra mʉrã izhidꞌe bꞌʉba maʉ̃bara Daizezeba krĩñata bio oya. Mʉ ũme duanu ẽbʉrʉ miã kꞌãrẽta obꞌedꞌa ẽã. 6Mʉ ũme bꞌʉ ẽãrã ãĩ bꞌʉdꞌaya uva jʉ̃kꞌara zau ẽã kĩrãkꞌa. Bagui jʉrepe tebʉdꞌe pepekuabada, mawũẽ eradrʉbaria. 7Mʉ ũme bꞌebʉrʉ, mʉ bedꞌeata aribꞌae bꞌebʉrʉ widꞌiudua jõma mazha krĩñata, mʉã marãã diaya. 8Mʉ Zezera zhi zromata nʉmabidꞌaya izha krĩñata bio obꞌeba, aramaʉ̃ne mʉã jʉrʉkuadꞌata bꞌeaya. 9Mʉ Zezeba mʉ kʉãgꞌa kĩrãkꞌa, mʉãbidꞌa marã kʉãgꞌa, mawũẽ mʉã kʉãgꞌata bꞌeaudua. 10Mʉã jara bꞌʉta aribꞌae bꞌebʉrʉ mʉã kʉãgꞌata bꞌeaya, aramaʉ̃ kĩrãkꞌa mʉãrã mʉ Zezeba jara bꞌʉta jõma aribꞌae bꞌʉa, mawũẽ mʉrã izha kʉãgꞌa.
11Mʉã maʉ̃ta marãã jarabʉrʉa marã mʉ kĩrãkꞌa jipadꞌe sobia bꞌeamarẽã.
12Mʉã jaraya kꞌãrẽ aribꞌaeita: Zhiya zhi kʉãgꞌaudua marãta mʉã kʉãgꞌa kĩrãkꞌa. 13Kʉãgꞌata kꞌãbãẽã erubꞌʉbara izhi bebuta diaya izhi bawara zhibiarãbari. 14Marã mʉ bawara zhibiata bꞌea mʉã jara bꞌʉta aribꞌaedꞌara. 15Mʉã ya marã mʉ nezokꞌarã a ẽã, nezokꞌabara kꞌawua ẽbaera izhi nokꞌoba kꞌãrẽ obꞌʉra. Awuarabʉrʉ mʉãrã mʉ bawara zhibiarã abꞌʉa, mʉ Zezedꞌeba kꞌãrẽ jõma mʉã ũrĩnarã mʉã marãã kꞌawuabiga bꞌʉba. 16Mʉta marãba jʉrʉdꞌa ẽbasia, awuarabʉrʉ mʉã marãta jʉrʉkuasia, aramaʉ̃ne mʉã marã duanusia wãnape mʉ Zezeba krĩñata obꞌeamarẽã, jipa maʉ̃trʉ obꞌeamarẽã. Mawũãrã jõma kꞌãrẽ mʉ Zezea mʉneba widꞌibʉdara izhara marãã diaya. 17Mʉã marãã jaraya: Zhiya zhi kʉãgꞌaudua.
Mʉnebema ẽãbara marã juradea
18Mʉnebema ẽãta ẽjũãne bꞌeba marãta juradebʉrʉ, kꞌawuaudua mʉta juradꞌapeadꞌata marã nawedꞌa. 19Marãta mʉnebema ẽãta ẽjũãne bꞌebʉrʉ, mʉnebema ẽãta ẽjũãne bꞌebara kʉãgꞌa kꞌausidꞌa ãzhirãrã. Mawũãmina marã mʉnebema ẽãta ẽjũãne duanu ẽã, awuarabʉrʉ mʉã marã jʉrʉkuasia mʉnebema ẽãta ẽjũãne bꞌeta. Maʉ̃ba mʉnebema ẽãta ẽjũãne bꞌebara marã juradea. 20Bedꞌeata bude baudua mʉã marãã mawũãnata: Nezokꞌara audre zhi zroma ẽã izhi nokꞌo kꞌãñabara. Mʉ zuburia oita pẽwã bꞌedꞌebara, marãsidꞌa zuburia oita pẽwãnaña. Mʉ bedꞌeata aribꞌae bꞌedꞌebara, marã bedꞌeasidꞌa aribꞌaedꞌaya. 21Marã mʉ kꞌarea mawũã zuburia odꞌaya, ũdukꞌawadꞌa ẽãba mʉ zokꞌadꞌata.
22Mʉta zepe zhãrãta ũrãgꞌa ẽbasibʉrʉ kꞌazhirua ne ẽã bꞌeakꞌausia, mawũãmina ũrĩkꞌawua nʉmeba kꞌazhirua ne ẽã bꞌea abꞌedꞌa ẽã. 23Mʉta jura bꞌʉbara mʉ Zezesidꞌa jura bꞌʉa. 24Mʉã ãzhidꞌe edꞌa awʉrʉba okꞌata osi ẽbʉrʉ kꞌazhirua ne ẽã bꞌeakꞌausia, mawũãmina akʉ bꞌeta juradea mʉta, mʉ Zezeta. 25Aramaʉ̃ne arimaẽ berabꞌari nʉmʉã bedꞌeata zhi bꞌʉmata ãzhi ũrãgꞌadꞌe mawũã bꞌʉta: Mʉrã kꞌãrẽã juradꞌai ne ẽãne juradea.
26Mawũãmina Kꞌarebata zebʉrʉdꞌera, mʉã maʉ̃ marãma mʉ Zezedꞌeba zokꞌabʉrʉra Jawurebia wãrãnebema, izhira zeya mʉ Zeze maẽba, izha jaraya mʉnebemata. 27Marãbidꞌa mʉnebemata jaradꞌaya, mʉ bawara bꞌeadꞌaba jẽde wedꞌauba.
161Mʉãrã maʉ̃ta marãã jarabʉrʉa kenabꞌaridꞌa ẽbamarẽã mʉnebema ĩjã bꞌeta. 2De zhi jʉrebadata nʉme maẽ marã edꞌa wãbidꞌa ẽbaya, ewarita zeya bariduba marã beabʉrʉdꞌera krĩchaita Daizezeba krĩñata obʉrʉta. 3Maʉ̃ta odꞌaya ũdukꞌawadꞌa ẽãba mʉ Zezeta miã mʉta. 4Mʉãrã maʉ̃ta marãã jarabʉrʉa maʉ̃ ewarita zebʉrʉdꞌera marãba bude badꞌamarẽã ya mʉãrã marãã zhi jaramata.
Jawurebiaba obꞌʉdꞌebema
Maʉ̃ mʉãrã jẽdeubara marãã jara ẽbasia, mʉrã bꞌʉ baera marã bawara. 5Mawũãmina kꞌõbebʉrʉ mʉrã wãña mʉ zokꞌadꞌama, maʉ̃ta marãnebemabara miõba widꞌi mawũã ẽã: ¿Bʉra sãmaã wãĩpe? 6Awuarabʉrʉ mʉã maʉ̃ta marãã jarabʉrʉ kꞌarea marã kꞌãbãẽã sopua kꞌobꞌea. 7Mawũãmina wãrĩnu mʉã marãã jaraya: Marãĩtara biga mʉrã wãĩta, mʉta wã ẽbʉrʉ Kꞌarebara marãma ze ẽã, mawũãmina mʉta wãrã mʉã marãma zokꞌaya 8Izhi zebʉrʉdꞌera ẽjũãne bꞌea kꞌawuabigaya kꞌazhiruadꞌe bꞌeta, waya mʉrã bedꞌea ne ẽã bꞌʉta, kꞌawuabigaya zhãrã Daizezebara kꞌawua oita. 9Kꞌawuabigaya kꞌazhirua bara bꞌeta ĩjãna ẽãba mʉnebemata. 10Kꞌawuabigaya mʉrã bedꞌea ne ẽã bꞌʉta mʉrã wãĩ baera mʉ Zezema, aramaʉ̃ne marãbara mʉrã wueta ũdudꞌa ẽbaya. 11Kꞌawuabigaya zhãrã Daizezebara kꞌawua oita, izhara ãtõmiã naʉ̃ ẽjũãne nokꞌora ya kꞌawua osi baera.
12Mʉãrã wadꞌi ne bio erubꞌʉa marãã jaraita, mawũãmina aritiara marãbara sãwũãta kꞌawuadꞌa ẽbaya. 13Mawũãmina Jawurebia wãrãnebemata zebʉrʉdꞌera, marã erunʉmaña Daizezedꞌebema wãrãne. Izhara jara ẽbaya izhikusaudꞌebemata, awuarabʉrʉ jõma jaraya mʉneba ũrĩbʉrʉta, aramaʉ̃ne jõma marãã kꞌawuabiya kꞌãrẽ berabꞌariita. 14Jawurebiabara kꞌawuabigaya mʉrã zhi zromata, mʉ bedꞌeata ũrĩpe marãã kꞌawuabigaya. 15Jõma mʉ Zezeba erubꞌʉra mʉrẽã. Maʉ̃ba mʉãrã jarabʉrʉa Jawurebiabara mʉ bedꞌeata ũrĩpe marãã kꞌawuabigaita.
Sopuara sobia baya
16Dããrã ẽãne marãbara mʉrã ũdudꞌa ẽbaya, mawũãmina dããrã ẽãne mʉrã wakusa ũdudꞌaya mʉrã wãĩ baera mʉ Zezema.
17Mawũãĩ izha jʉrʉkuadꞌata ʉ̃kʉrʉbara ãzhirãĩnu mawũãsidꞌa: ¿Kꞌãrẽta mawũã dazhirãã mawũãbʉrʉ: Dããrã ẽãne marãbara mʉrã ũdudꞌa ẽbaya, mawũãmina dããrã ẽãne wakusa ũdudꞌaya mʉrã wãĩ baera mʉ Zezema?
18¿Kꞌãrẽta jara krĩñabʉrʉ mawũã dããrã ẽãne abʉrʉbara? Sãwũãta kꞌawuadꞌa ẽã izha jarabʉrʉra.
19Jesúsbara kꞌawuasia widꞌi krĩña kꞌobꞌeta, mawũẽ mawũãsia: ¿Marãbara mazhirãĩnu widꞌi kꞌobꞌe ẽka mʉã mawũãnata: Dããrã ẽãne marãbara mʉrã ũdudꞌa ẽbaya, mawũãmina dããrã ẽãne mʉrã wakusa ũdudꞌaya? 20Mʉã wãrĩnu marãã jaraya, marã jẽgadꞌaya, sopuadꞌaya, waya mʉnebema ẽãta ẽjũãne bꞌera sobiadꞌaya. Mawũãmina marã sopuadꞌaimina marã sopuara sobia baya. 21Wũẽrã toira puabaria toi ewarita arababʉrʉba. Mawũãmina wũãwũã tobʉrʉdꞌera pua kꞌobꞌadꞌara sobiaba kĩrãduabaria wũãwũãta tobʉrʉba naʉ̃ ẽjũãne. 22Aramaʉ̃ kĩrãkꞌa marãsidꞌa kꞌãwũãwedꞌara sopua bꞌea. Mawũãmina mʉã marã wakusa ũdubʉrʉba sobiadꞌaya, mobebaira miõba jãrĩ ẽã marã sobiara. 23Maʉ̃ ewadera marãbara mʉãã widꞌidꞌa ẽã miã kꞌãrẽta. Mʉã wãrĩnu marãã jaraya, jõma kꞌãrẽ mʉ Zezea mʉneba widꞌibʉdara izha marãã diaya. 24Wadꞌi marãbara mʉnebara kꞌãrẽ widꞌidꞌa ẽã. Kꞌãrẽ widꞌiudua, mobedꞌeba jidadꞌaya, aramaʉ̃ne marã jipadꞌe sobia bꞌeaya.
Mʉã edre bꞌaebisia zareata ẽjũãnebema
25Maʉ̃ mʉãrã ne jarakꞌa jarabʉrʉa. Ewarita zeya mʉã jarabʉrʉra ne jarakꞌa jara ẽãta, awuarabʉrʉ marãã jipa jaraya mʉ Zezedꞌebemata. 26Maʉ̃ ewadera marãbara mʉneba kꞌãrẽ widꞌidꞌaya. Maʉ̃bara mʉãrã jara kꞌobꞌʉ ẽã mʉta mʉ Zezea zuburia bedꞌeaita marãbari. 27Mʉ Zezebara marã kʉãgꞌa bꞌʉa marãba mʉta kʉãgꞌa bꞌe baera, aramaʉ̃ne ĩjã bꞌea mʉrã zesita Daizeze maẽba. 28Mʉrã mʉ Zeze maẽba zesia naʉ̃ ẽjũãẽna, mʉãrã naʉ̃ ẽjũãrã ãmaẽña, mʉrã wakusa wãña mʉ Zezema.
29Mawũãĩ izha jʉrʉkuadꞌabara mawũãsidꞌa: Idꞌibʉrʉ bʉa jarabʉrʉra jipa jara kꞌobꞌʉa, ne jarakꞌa jara ẽã. 30Idꞌibʉrʉ daibara kꞌawuabʉda bʉara ne jõma kꞌawua bꞌʉta, mawũẽ miõba kꞌãrẽ widꞌidꞌaira nesidꞌa ẽã, kꞌãʉ̃ba daibara ĩjã bꞌea bʉra zesita Daizeze maẽba.
31Mawũãnaĩ Jesúsbara panaʉ̃ mawũãsia: ¿Idꞌibʉrʉ ĩjãbʉdakꞌa? 32Ewarita arabaidꞌebema ya arabasia, mawũẽ marã abꞌa abꞌakꞌa wãẽbadꞌaya mazhi wãbʉrʉma, aramaʉ̃ne mʉrã ãmaẽnaña dobꞌa. Mawũãmina mʉrã dobꞌa bꞌʉ ẽã mʉ Zezeta bꞌʉba mʉ ũme. 33Mʉã maʉ̃ta marãã jarabʉrʉa mʉneba adu-a bꞌeamarẽã. Naʉ̃ ẽjũãnerã marã zuburiaya, mawũãmina wãnigua bꞌeaudua, mʉã edre bꞌaebisia ãtõmiã zareata ẽjũãne nʉmʉrã.
17Jesús zhiwidꞌidꞌa izha jʉrʉkuadꞌabari
1Jesúsbara maʉ̃ta jarape ʉ̃taa akʉ zhiwidꞌi mawũãsia:
Zeze, ewarira arabasia, mawũẽ kꞌawuabigarua mʉ bʉ Warra zhi zromata, aramaʉ̃ne mʉ bʉ Warrabidꞌa kꞌawuabigaya bʉra zhi zromata. 2Zhãrã jõmaʉ̃ ʉ̃rʉ̃ bʉara mʉãã zareata diasia, aramaʉ̃ne bʉ ũme bꞌai jõ ẽãta diamarẽã bʉa mʉãã diadꞌata jõmaʉ̃ã. 3Bꞌai jõ ẽãrã, bʉta ũdukꞌawadꞌaidꞌe bꞌʉa Daizezera abꞌabai bꞌʉta wãrĩnuta, ũdukꞌawadꞌaidꞌe bꞌʉa mʉta Jesucristota bʉa zokꞌadꞌata.
4Mʉãrã bʉra zhi zromata kꞌawuabiga nʉmʉã naʉ̃ druadꞌe, aramaʉ̃ne mʉãrã jõbibʉrʉa kꞌãrẽ omarẽã bʉa mʉãã diadꞌata. 5Kꞌõbebʉrʉ Zeze, mʉrã bʉ kꞌaita zhi zromata bꞌʉdua, bʉ ũme zhi zromata bꞌadꞌa kĩrãkꞌa ẽjũã nʉmeĩ nawedꞌa.
6Ẽjũãne bꞌeta bʉa mʉãã diadꞌata bꞌea mʉãrã bʉdꞌebema kꞌawuabiga nʉmʉã, ãzhira bʉre basia, maʉ̃ta bʉa mʉãã dedꞌekasia, ãzhara aribꞌae bꞌea bʉ bedꞌeara. 7Idꞌibʉrʉ kꞌawuabʉda jõma kꞌãrẽ bʉa mʉãã diadꞌara bʉ maẽba zedꞌata. 8Bedꞌeata bʉa mʉãã diadꞌara mʉãrã jarakꞌasia, maʉ̃ ãzhara ĩjãsidꞌa. Aramaʉ̃ne kꞌawuasidꞌa mʉrã wãrĩnu bʉ maẽba zedꞌata, aramaʉ̃ne ĩjã bꞌea mʉrã bʉa zokꞌadꞌata.
9Mʉrã ãzhibari bʉaa zuburia bedꞌeaya. Mʉnebema ẽãta ẽjũãne bꞌebari mawũã zuburia bedꞌea ẽã, awuarabʉrʉ bʉa mʉãã diadꞌata bꞌebari zuburia bedꞌeaya bʉreta bꞌeba. 10Mʉrẽta bꞌera bʉrea, bʉreta bꞌera mʉrẽã. Aramaʉ̃ne mʉrã zhi zromata dajada nʉmʉã ãzhidꞌeba.
11Mʉrã ya naʉ̃ ẽjũãne bꞌa ẽã. Mawũãmina ãzhira naʉ̃ ẽjũãne bꞌeaya, maʉ̃ne mʉrã bʉma wãña. Zeze bʉra biata bꞌʉa, bʉa mʉãã diadꞌata bꞌera bʉzhi zareaba akʉ jʉre edarua, aramaʉ̃ne abꞌa bꞌeamarẽã dazhi abꞌaʉ kĩrãkꞌa. 12Naʉ̃ ẽjũãne ãzhi bawara bꞌasidꞌera mʉãrã bʉ zareadꞌeba akʉ jʉresia. Bʉa mʉãã diadꞌata bꞌera mʉãrã akʉ jʉresia, aramaʉ̃ne ãzhidꞌebema miõta adua ẽbasia, awuarabʉrʉ zhi aduaitrʉ aduaya. Aramaʉ̃ne maʉ̃ta zhi bꞌʉmata arimaẽ berabꞌariya.
13Kꞌõbebʉrʉ mʉrã bʉma wãña. Mawũẽ mʉãrã maʉ̃ta jarabʉrʉa wadꞌi naʉ̃ ẽjũãne bꞌʉwedꞌa, aramaʉ̃ne ãzhisidꞌa mʉ kĩrãkꞌa jipadꞌe sobia bꞌeamarẽã. 14Mʉãrã bʉ bedꞌeara jarakꞌasia, mawũẽ mʉnebema ẽãta ẽjũãne bꞌebara juradea, naʉ̃ ẽjũãnebemata duanu ẽãba mʉta naʉ̃ ẽjũãnebema ẽkĩrãkꞌa. 15Mʉãrã widꞌi ẽã bʉa naʉ̃ ẽjũãneba ãĩ jʉre edemarẽã, awuarabʉrʉ widꞌi bꞌʉa kꞌarebamarẽã ãtõmiã bia ẽã juwuadꞌeba. 16Ãzhira naʉ̃ ẽjũãnebema ẽã mʉta naʉ̃ ẽjũãnebema ẽkĩrãkꞌa. 17Wãrãneba bʉita bꞌeabirua, bʉ bedꞌeata wãrã. 18Bʉa mʉta ẽjũãne bꞌema zokꞌadꞌa kĩrãkꞌa, mʉãbidꞌa zokꞌakuabʉrʉa ẽjũãne bꞌema. 19Ãzhi kꞌarea bʉita bꞌidꞌa ari mʉzhita, ãzhisidꞌa bʉita bꞌeamarẽã bʉ bedꞌeata wãrãneba.
20Mʉrã bari naʉ̃rã kꞌarea bʉaa zuburia bedꞌea kꞌobꞌʉ ẽã, awuarabʉrʉ zuburia bedꞌeabʉrʉa mʉnebemata ĩjãnaĩ kꞌareabidꞌa ãzhi bedꞌeadꞌeba. 21Aramaʉ̃nerã jõma abꞌa bꞌeaya. Zeze, mawũãrã bʉta mʉne bꞌʉ kĩrãkꞌa, mʉta bʉdꞌe bꞌʉ kĩrãkꞌa, ãzhisidꞌa dazhi ũme abꞌa bꞌeaya. Aramaʉ̃ne ẽjũãne bꞌebara ĩjãnamarẽã mʉrã bʉa zokꞌadꞌata. 22Mʉãrã zhi zromata bꞌʉkuasia bʉa mʉta zhi zromata bꞌʉdꞌa kĩrãkꞌa, aramaʉ̃ne abꞌa bꞌeamarẽã dazhi abꞌa panʉ kĩrãkꞌa. 23Mʉta ãzhidꞌe bꞌʉa, bʉta mʉne bꞌʉa, aramaʉ̃ne jipadꞌe ãba bꞌea. Kꞌãwũãrã ẽjũãne bꞌebara kꞌawuadꞌaya mʉrã bʉa zokꞌadꞌata, kꞌawuadꞌaya mʉnebemata bꞌera bʉara kʉãgꞌata mʉta kʉãgꞌa kĩrãkꞌa.
24Zeze, bʉa mʉãã diadꞌata bꞌera mʉãrã krĩña bꞌʉa mʉta bꞌʉ maẽ ãzhisidꞌa mʉ bawara bꞌeaita, aramaʉ̃ne ãzha ũdudꞌamarẽã bʉa mʉrã zhi zromata bꞌʉdꞌata, bʉa mʉrã kʉãgꞌa ẽjũã oi nawedꞌa. 25Zeze, bʉra biata bꞌʉa, ẽjũãne bꞌebara bʉra ũdukꞌawadꞌa ẽã, mawũãmina mʉã bʉra ũdukꞌawua bꞌʉa, naʉ̃rã mʉnebemata bꞌebara kꞌawuasidꞌa mʉrã bʉa zokꞌadꞌata. 26Mʉãrã bʉdꞌebema kꞌawuabigadꞌata ãmaña kꞌawuabigaya. Aramaʉ̃ne bʉa mʉta kʉãgꞌa kĩrãkꞌa ãzhirãĩnu zhiya kʉãgꞌa bꞌeamarẽã, aramaʉ̃ne mʉrã ãzhidꞌe bꞌaya.
18Jesús jidadꞌapeadꞌa
(Mateo 26:47-56; Marcos 14:43-50; Lucas 22:47-53)
1Jesús mawũã zhiwidꞌipe izha jʉrʉkuadꞌa bawara wãsia do zake Cedrón kĩrãrẽ. Mama ne uta bꞌʉ maẽ edꞌa wãsia izha jʉrʉkuadꞌa bawara. 2Juda Jesús chãbꞌariita bꞌʉbara kꞌawua bꞌasia mawũã ne uta bꞌʉ maẽrã, Jesús mama ãba zema bio basi baera izha jʉrʉkuadꞌa bawara. 3Mawũẽ Judabara jʉre edesia soldaorãta, Daizeze de akʉbadata, maʉ̃rã zokꞌasidꞌa sacerdoterã nokꞌorãba, fariseorãba, aramaʉ̃ne mama erbuesia ĩbĩrãẽna, kuchoedꞌa. 4Mawũẽ Jesúsbara izhi sãwũã berabꞌariita kꞌawua kꞌobꞌʉba ãzhi orrape mawũãsia: ¿Kꞌaita jʉrʉ panʉ?
5Mawũãĩ panaʉ̃ mawũãsidꞌa: Jʉrʉ panʉã Jesús Nazaredꞌebemata.
Mawũãnaĩ Jesúsbara mawũãsia: Mʉta izhia.
Ãzhi bawara kꞌobꞌasia Judasidꞌa Jesús chãbꞌariita. 6Mawũã Mʉta izhia abʉrʉdꞌera, ãbudea bꞌaekuasidꞌa egorodꞌe. 7Jesúsbara wakusa widꞌi mawũãsia: ¿Kꞌaita jʉrʉ panʉ?
Mawũãĩ mawũãsidꞌa: Jʉrʉ panʉã Jesús Nazaredꞌebemata.
8Mawũãnaĩ Jesúsbara panaʉ̃ mawũãsia: Mʉã marãã jarabʉrʉa mʉta izhita. Mawũẽ mʉta jʉrʉ panʉbʉrʉ idu wãbiudua mʉã jʉrʉkuadꞌa za kꞌopanʉta.
9Aramaʉ̃ne arimaẽ berabꞌarisia izha mawũãnata: Zeze, bʉa mʉãã diadꞌata bꞌera adua ẽã miõta. 10Maʉ̃ne Simón Pedroba kucho abꞌʉta ẽpe tusia sacerdote wagꞌau nezokꞌata, mawũẽ ʉrawesia kʉwʉrʉ juwua araarebemata. Nezokꞌara Malco abazhidꞌa. 11Jesúsbara Pedroa mawũãsia: Bʉzhi kuchora edꞌa pẽũdua. Mʉ Zezeba mʉrã zuburiabiya nʉmʉba, ¿mʉrã zuburiaidꞌe bꞌʉ ẽka?
Jesús edesidꞌa sacerdote wagꞌau kĩrãbita
(Mateo 26:57-58; Marcos 14:53-54; Lucas 22:54)
12Mobebʉrʉ soldaorãbara ãzhi nokꞌo bawarauba Daizeze de akʉbadata judíorãne bawarauba Jesús jidadꞌape jʉ̃sidꞌa. 13Mobebʉrʉ naara edesidꞌa Anás bꞌʉma Caifás zãwũrẽ baera. Caifás sacerdote wagꞌauta bꞌasia maʉ̃ añone. 14Maʉ̃ Caifásba judíorãã jarasia ũmakĩrã abꞌa beuita bigata jõmaʉ̃bari.
Pedro chubꞌedꞌa Anás drogꞌoadꞌe
(Mateo 26:69-70; Marcos 14:66-68; Lucas 22:55-57)
15Jesús kꞌaidꞌu wãsidꞌa Simón Pedrota dewarabema Jesúsba jʉrʉdꞌata. Maʉ̃ Jesúsba jʉrʉdꞌara ũdukꞌawua bꞌasia sacerdote wagꞌauba, maʉ̃ta Jesú ũme edꞌa wãsia sacerdote wagꞌau drogꞌoadꞌe. 16Mawũãmina Pedrora drogꞌoadꞌe ãĩ bꞌesia puerta maẽ. Mawũẽ Jesúsba jʉrʉdꞌara sacerdote wagꞌauba ũdukꞌawua bꞌʉta wũẽrã puerta akʉbari ũme bedꞌeape edꞌa wãbisia Pedrora. 17Mawũẽ wũẽrã puerta akʉbaribara Pedroa mawũãsia: ¿Bʉsidꞌa kꞌãʉ̃ba jʉrʉkuadꞌadꞌebema ẽka?
Mawũãĩ izhara mawũãsia: Mʉrã izhi ẽã.
18Maʉ̃ne nezokꞌarãta Daizeze de akʉbada bawara edau nʉmeãsia tebʉta puadꞌape. Kũrãsãba tebʉ kꞌã nʉmeãsia. Ãzhi bawara Pedrosidꞌa edau nʉmasia tebʉ kꞌã.
Anásba widꞌidꞌa Jesúa
(Mateo 26:59-66; Marcos 14:55-64; Lucas 22:66-71)
19Sacerdote wagꞌaubara Jesúa widꞌisia izha jʉrʉkuadꞌadꞌebemata izhi ũrãgꞌadꞌebemata. 20Mawũẽ Jesúsbara panaʉ̃ mawũãsia: Mʉrã dajada bedꞌea bꞌasia zhãrã jõmaʉ̃ daidꞌu. Mʉrã baridua miã ũrãgꞌa bꞌasia de zhi jʉrebada maẽ, Daizeze dedꞌa ewara maẽ, judíorã jõma zhi jʉrebada maẽ, mʉãrã aramaʉ̃ne kꞌãrẽ chupea jara bꞌa ẽbasia. 21¿Kꞌãrẽã mʉãã widꞌibʉrʉ? Mʉ bedꞌeata ũrĩnapeadꞌaa widꞌidua mʉã kꞌãrẽta jarakꞌa bꞌadꞌata. Ãzha kꞌawua bꞌea mʉã kꞌãrẽta jaradꞌata.
22Jesúsba mawũãĩ Daizeze de akʉbadadꞌebemata abꞌa mama kꞌobꞌʉba kĩrãma tachipe mawũãsia: ¿Bʉara mawũã panaʉ̃bʉrʉka sacerdote wagꞌau bedꞌeara?
23Mawũãĩ Jesúsbara panaʉ̃ mawũãsia: Mʉta ãña bedꞌea tabebʉrʉ jaradua kꞌãrẽne ãña bedꞌea tabeta. Mawũãmina mʉta bia bedꞌea tabebʉrʉ, ¿mʉrã kꞌãrẽã tachibʉrʉ?
24Mobebʉrʉ Anás sacerdote wagꞌauta bꞌadꞌabara jʉ̃ diabuesia Caifás sacerdote wagꞌauma.
Pedroba ũdukꞌa adꞌa Jesús
(Mateo 26:71-75; Marcos 14:69-72; Lucas 22:58-62)
25Pedrora edau nʉmasia tebʉ kꞌã. Maʉ̃ne mawũãsidꞌa: ¿Bʉra Jesúsba jʉrʉkuadꞌadꞌebema ẽka?
Mawũãnaĩ izhara merãbʉrʉta mawũãsia: Mʉrã izhi ẽã.
26Maʉ̃ne sacerdote wagꞌau nezokꞌata abꞌa Pedroba kʉwʉrʉ ʉrawedꞌa mebẽrãba Pedroa mawũãsia: ¿Mʉã bʉra Jesú ũme ũdusi ẽka ne uta bꞌʉ maẽ?
27Mawũãĩ Pedrobara wakusa merãsia. Maʉ̃ daucha berusia gallora.
Jesús ededꞌapeadꞌa Pilato kĩrãbita
(Mateo 27:1-2, 11-31; Marcos 15:1-20; Lucas 23:1-5, 13-25)
28Caifás de maẽbara Jesús edesidꞌa nokꞌo dedꞌa soldaorã tabꞌʉidꞌu. Maʉ̃nerã diapedꞌa nʉmasia. Judíorã Jesús ededꞌapeadꞌara maʉ̃ dedꞌara edꞌa wãna ẽbasia. Ãzhima aramaʉ̃nerã Daizeze kĩrãbita mitia ẽãba kꞌo bꞌeidꞌe bꞌasia Egiptodꞌeba ẽzoadꞌata krĩcha kꞌobadara. 29Mawũẽ Pilato ãzhima zepe mawũãsia: ¿Naʉ̃ kꞌãrẽã ji kꞌopanʉ?
30Mawũãĩ panaʉ̃ mawũãsidꞌa: Naʉ̃ta bia ẽãta obari ẽbʉrʉ daibara bʉaa chãbꞌaridꞌa ẽbakꞌausia.
31Mawũãnaĩ Pilatobara mawũãsia: Mazhabʉrʉ ededꞌape kꞌawua oudua mazhi ũrãgꞌaba jara bꞌʉdꞌe.
Mawũãĩ judíorãbara mawũãsidꞌa: Marã Roma bidꞌarãbara daia idu beabidꞌa ẽã miõta.
32Aramaʉ̃ne arimaẽ berabꞌarisia Jesúsba jaradꞌata izhi sãwũã beuita.
33Pilato wakusa edꞌa wãsia izhita nokꞌota bꞌʉ dedꞌa, mobe Jesús trʉ̃pe mawũãsia: ¿Bʉra Rey judíorãneka?
34Mawũãĩ Jesúsbara panaʉ̃ mawũãsia: ¿Bʉzhikusauba mawũãbʉrʉka o mʉnebema awʉrʉba bʉaa mawũãsidꞌa?
35Mawũãĩ Pilatobara panaʉ̃ mawũãsia: ¿Mobera mʉrã judíokꞌa? Bʉzhirãta bꞌeba, sacerdoterã nokꞌorãba bʉra mʉãã chãbꞌarisidꞌa. ¿Bʉara kꞌãrẽta osi?
36Mawũãĩ Jesúsbara panaʉ̃ mawũãsia: Mʉrã naʉ̃ ẽjũãne Reyta bꞌaidꞌebema ẽã. Mʉta naʉ̃ ẽjũãne Reyta bꞌaidꞌebemabʉrʉ mʉta aribꞌae bꞌera zhõkꞌausidꞌa mʉta chãbꞌaridꞌa ẽbamarẽã judíorãã. Mawũãmina mʉrã nama Reyta bꞌaidꞌebema ẽã.
37Mawũãĩ Pilatobara mawũãsia: ¿Mobera bʉra Reyka?
Mawũãĩ Jesúsbara panaʉ̃ mawũãsia: Ara bʉzha jarabʉrʉa mʉrã Reyta. Mʉrã maʉ̃ kꞌarea tobʉdata naʉ̃ ẽjũãẽna zesia wãrãta jaraita. Wãrãnebemata bꞌebara ũrĩ bꞌea mʉ bedꞌeara.
38Mawũãĩ Pilatobara mawũãsia: ¿Kꞌãrẽpe wãrã?
Mawũãpe wakusa wãsia judíorãma, mobe mawũãsia: Mʉma naʉ̃ bedꞌea ne ẽã. 39Mawũãmina marã zhi kꞌawama cárceldꞌeba mʉã abꞌa ẽdrʉbi bꞌʉta Egiptodꞌeba ẽzoadꞌata krĩcha fiesta obada ewade. ¿Mawũẽ marãbara krĩñadeka mʉã ẽnaĩta Rey judíorãneta?
40Mawũãĩ jõmaʉ̃ba nemi jĩgua mawũãsidꞌa: ¡Kꞌãʉ̃ta ẽnarãrũã! Awuarabʉrʉ ẽnadua Barrabáta. Maʉ̃ Barrabára nezrʉgamiã basia.
191Mobebʉrʉ Pilatobara Jesús ubigasia. 2Soldaorãbara corona jʉ̃kꞌara ʉrʉta pʉrrasidꞌa, mobe burudꞌe joatrʉsidꞌa. Mobe ãnebꞌaribisidꞌa wua granateta. 3Mobe mawũãsidꞌa: ¡Kʉa, judíorã Rey! Mobe tachi jirpanesia kĩrãma.
4Pilato wakusa ãĩ zepe mawũãsia: Akaudua, mʉãrã wakusa ãĩ webʉrʉa kꞌawuadꞌamarẽã mʉma naʉ̃ bedꞌea ne ẽãta.
5Jesús ãĩ webʉdadꞌera corona jʉ̃kꞌara ʉrʉta burudꞌe joatrʉ nʉmasia, ãnebꞌari bꞌasia wua granateta. Maʉ̃ne Pilatobara mawũãsia: ¡Naʉ̃ za bꞌidꞌa!
6Jesús ũdubʉdadꞌera sacerdoterã nokꞌorãbara, Daizeze de akʉbadabara nemi jĩgua mawũãsidꞌa: ¡Cruzdꞌe kꞌachibirua! ¡Cruzdꞌe kꞌachibirua!
Mawũãnaĩ Pilatobara mawũãsia: Mazhabʉrʉ cruzdꞌe kꞌachiudua. Mʉma naʉ̃ bedꞌea ne ẽã.
7Mawũãĩ judíorãbara panaʉ̃ mawũãsidꞌa: Daibara erubꞌea ũrãgꞌata, mawũẽ dai ũrãgꞌaba jara bꞌʉdꞌera beuibara izhikusa Daizeze Warradꞌe bꞌʉdꞌeba.
8Mawũãbʉdata Pilatoba ũrĩbʉrʉdꞌera audre perasia. 9Mawũẽ izhita nokꞌota bꞌʉ dedꞌa wakusa edꞌa wãsia, mobe Jesúa mawũãsia: ¿Bʉra sãmabema?
Mawũãmina Jesúsbara panaʉ̃ ẽbasia. 10Mawũẽ Pilatobara mawũãsia: ¿Bʉra mʉãã bedꞌea ẽka? ¿Bʉara kꞌawua ẽka mʉ zarea bꞌʉra bʉ cruzdꞌe kꞌachi beabiita o bʉ ẽnetaita?
11Mawũãĩ Jesúsbara panaʉ̃ mawũãsia: Bʉa mʉrã kꞌãrẽ sãwũã ẽbakꞌausia ʉ̃treba kꞌãwũã idaribi ẽbasibʉrʉ. Mawũẽ mʉta bʉ juwuadꞌe chãbꞌaridꞌatrʉ bʉ audre kꞌazhirua barasia.
12Mawũãĩ Pilatobara Jesús ẽna krĩñasia. Mawũãmina judíorãbara nemi jĩgua mawũãsidꞌa: Bʉa naʉ̃ta ẽnarã, César bawara bʉra zhibia ẽã. Iabꞌa izhitrʉ reydꞌe bꞌʉra César rey wagꞌau bawara zhi jura.
13Pilatobara maʉ̃ta ũrĩpe Jesús ãĩ edepe zhãrã kꞌawua obari maẽ jewedꞌasia dejã mongꞌara douga odꞌa abada maẽ, hebreo bedꞌeadꞌera Gábata abada. 14Maʉ̃nerã aribꞌae jirpanasia Egiptodꞌeba ẽzoadꞌata krĩcha fiesta obadadꞌebemata, maʉ̃nerã ʉ̃matipa nʉmasia. Maʉ̃ne Pilatobara judíorãã mawũãsia: ¡Za bꞌidꞌa mazhi Rey!
15Mawũãĩ nemi jĩgua mawũãsidꞌa: ¡Beabirua! ¡Beabirua! ¡Cruzdꞌe kꞌachibirua!
Mawũãnaĩ Pilatobara mawũãsia: ¿Marã Reyra mʉã cruzdꞌe kꞌachibiidꞌe bꞌʉka?
Mawũãĩ sacerdoterã nokꞌorãbara panaʉ̃ mawũãsidꞌa: Daibara rey ãmaña eruduanu ẽã rey César awuarara.
16Aramaʉ̃ne Pilatobara Jesús ãzhaa chãbꞌaribʉrʉta soldaorãã chãbꞌarisia cruzdꞌe kꞌachi beadꞌamarẽã. Mawũẽ Jesús edesidꞌa.
Cruzdꞌe kꞌachi beudꞌa Jesús
(Mateo 27:32-44; Marcos 15:21-32; Lucas 23:26-43)
17Jesúsbara izhi cruz ataupe wãsia Buru Bꞌʉwʉrʉ abadaidꞌu, hebreo bedꞌeadꞌera Gólgota abada. 18Mama cruzdꞌe kꞌachisidꞌa, izhi bawara awʉrʉta ũme kꞌachi jirapanʉsidꞌa abꞌa juwua araare abꞌa juwua ãkꞌaare, Jesús jirabꞌʉsidꞌa ẽsadra. 19Kꞌãrẽã beadꞌaita Pilatobara bꞌʉpe cruzdꞌe jirabꞌidꞌapʉta mawũã bꞌasia: JESÚS NAZAREDꞌEBEMA REY JUDÍORÃNEÃ. 20Judíorã bioba maʉ̃ta lesidꞌa Jesús cruzdꞌe kꞌachidꞌapeadꞌara pʉwʉrʉ kꞌaita baera. Maʉ̃ bedꞌeara bꞌʉ jirabꞌasia hebreo bedꞌeadꞌe, griego bedꞌeadꞌe, latin bedꞌeadꞌe. 21Sacerdoterã nokꞌorãta judíorãbara Pilatoa mawũãsidꞌa: Mawũã bꞌʉrãrũã: Rey judíorãneã arãrũã, awuarabʉrʉ mawũãdua: Naʉ̃bara mawũãsia: Mʉrã Rey judíorãneã.
22Mawũãnaĩ Pilatobara panaʉ̃ mawũãsia: Mʉã bꞌʉsibʉrʉ mʉã bꞌʉsia.
23Soldaorãbara Jesús cruzdꞌe kꞌachidꞌape izha jʉ̃ bꞌadꞌara jirakua edadꞌape kĩmarẽta abꞌaʉdꞌe drasidꞌa soldaoza. Wua ãnebꞌari jʉ̃ bꞌadꞌasidꞌa jidasidꞌa, maʉ̃ wuara kĩrã tẽũ kꞌasudꞌapeadꞌa ẽbasia, awuarabʉrʉ jipa abꞌa kꞌadꞌapeadꞌa basia ʉ̃tʉba edꞌaa. 24Mawũẽ ãzhirãĩnu mawũãsidꞌa: Naʉ̃ kꞌõãna ẽã, awuarabʉrʉ kꞌaidꞌe baita kꞌawuadꞌaidꞌebemata odꞌaya.
Aramaʉ̃ne arimaẽ berabꞌarisia zhi bꞌʉmata mawũã bꞌʉta:
Mʉã jʉ̃ bꞌadꞌara ãzhirãĩnu drasidꞌa sãwũã dradꞌaidꞌebemata odꞌape. (Salmos 22:18)
Mawũã jara bꞌʉdꞌe osidꞌa soldaorãbara. 25Jesús cruzdꞌe jirabꞌʉ kꞌaita panasia zhi papata, wũẽrã zhi papa mebeata, María Cleofas kĩmata, María Magdalenata. 26Jesúsba zhi papata ũdubʉrʉdꞌe izha jʉrʉdꞌata izha audre kʉãgꞌata mama kꞌobꞌʉdꞌe zhi papaa mawũãsia: Papa, kꞌãʉ̃ bʉ waua.
27Mobebʉrʉ maʉ̃ izha jʉrʉdꞌaa mawũãsia: Kꞌãʉ̃ bʉ papaa. Maʉ̃ ewadeba izha jʉrʉdꞌabara zhi papa kĩrãkꞌa erubꞌasia izhi dedꞌa.
28Mawũãpe Jesúsbara izha oita bꞌadꞌara jõma aribꞌaeta kꞌawuape maʉ̃ zhi bꞌʉmata arimaẽ berabꞌarimarẽã mawũãsia: Mʉrã obisia kꞌobꞌʉa.
29Maʉ̃ne zokꞌota mama nʉmasia uva bꞌa oregueaba bira nʉmʉta. Mawũẽ maʉ̃ oregueadꞌe sõmbera edasidꞌa esponjata, mobe hisopo bakurudꞌe tãjʉ̃nape Jesúsma tʉsidꞌa yedꞌa. 30Jesúsbara maʉ̃ oregueara dope mawũãsia: Mʉã oita bꞌadꞌara jõma aribꞌaea.
Mawũãpe buru jabꞌari izhi jawure Daizezea chãbꞌari beusia.
Jesús orrota miãsuba sudꞌapeadꞌa
31Maʉ̃ ewadera aribꞌae jirpanʉta Egiptodꞌeba ẽzoadꞌata krĩcha fiesta obadata odꞌaidꞌera nrũẽmarã ẽnaʉ̃bada ewari basia. Mawũẽ judíorãma biga ẽbasia zhãrã ari cruzdꞌe jizoa nʉmaĩrã ẽnaʉ̃bada ewade. Maʉ̃nerã ewari ẽnaʉ̃badara ne bia basia. Mawũẽ Pilatoa jarasidꞌa cruzdꞌe jizoa nʉmʉrã jẽrũ bꞌʉekuabipe mamaʉ̃bara ãĩ jirakuabimarẽã. 32Mawũẽ soldaorã zedꞌape abꞌa naara jẽrũ bꞌʉekuasidꞌa, dewarabemasidꞌa jẽrũ bꞌʉekuasidꞌa, mawũã okuasidꞌa Jesús bawara cruzdꞌe kꞌachidꞌapeadꞌara. 33Mawũãmina Jesús maẽ zebʉdadꞌera ya beusi baera jẽrũ bꞌʉekuadꞌa ẽbasia. 34Mawũãmina soldaorãnebema abꞌaʉba miãsuba orroma susia, mawũẽ aramaʉ̃ta drʉsia wata, baniãta. 35Maʉ̃ta zhi ũdudꞌaba jara bꞌʉa, maʉ̃ jara bꞌʉra wãrĩnuã. Izhara kꞌawua bꞌʉa wãrãta jara bꞌʉta marãbidꞌa ĩjãnamarẽã. 36Mawũã berabꞌarisia maʉ̃ zhi bꞌʉmata mawũã bꞌʉta: Bꞌʉekuadꞌa ẽbaya izhi bꞌʉwʉrʉra. 37Dewara zhi bꞌʉmata mawũã bꞌʉa: Akʉdꞌaya sudꞌapeadꞌara.
Jesús wuagꞌadꞌapeadꞌa
(Mateo 27:57-61; Marcos 15:42-47; Lucas 23:50-56)
38Maʉ̃ tẽã José Arimatea pʉwʉrʉdꞌebemata judíorã wawiaba Jesús chupea pẽwã bꞌʉta Pilatoa zuburia bedꞌeasia idu edebimarẽã Jesús kꞌakuata, mawũẽ Pilatobara idaribisia. Mawũẽ zepe edesia Jesús kꞌakuara. 39Nicodemosidꞌa zesia naara diamase Jesúsma zedꞌata, mirra kerata, áloe keraedꞌa poera wesia, maʉ̃ bꞌasia treinta kilo. 40Aramaʉ̃ne Jesús kꞌakuara jiraedadꞌape keraedꞌa burubꞌaba burasidꞌa. Mawũã osidꞌa judíorãba wuagꞌa kꞌawa bꞌedꞌe. 41Jesús cruzdꞌe kꞌachidꞌapeadꞌa kꞌaita bꞌasia ne uta, mawũã ne uta bꞌʉ maẽ bꞌasia peña zobꞌeata zhiwidꞌita. Mamarã beuwãrã wadꞌi bꞌʉdꞌa ẽbasia miõta. 42Egiptodꞌeba ẽzoadꞌata krĩcha judíorãba fiesta odꞌaita aribꞌae jirpanʉ baera mawũã beuwãrã wuagꞌaita arakꞌaita nʉmʉ maẽ edꞌa tabꞌʉsidꞌa Jesúra.
20Jesús beudꞌata piradrʉdꞌa
(Mateo 28:1-10; Marcos 16:1-8; Lucas 24:1-12)
1Semana ewarita nabemata domingodꞌe María Magdalena diapedꞌa wadꞌi pãrĩgua nʉmʉne wãsia Jesús wuagꞌadꞌapeadꞌaidꞌu. Maʉ̃nerã peña zobꞌeata tapa kꞌobꞌadꞌara mongꞌara ãña ʉratʉ kꞌobꞌʉta ũdusia. 2Mawũẽ wãẽba wãsia Simón Pedroma, dewarabema Jesúsba jʉrʉdꞌata Jesúsba kʉãgꞌama, mobe mawũãsia: Izhi wuagꞌadꞌapeadꞌa maẽbara edesidꞌa Nokꞌora, kꞌawuadꞌa ẽã sãma tabꞌʉsidꞌara.
3Mawũãĩ Pedrora dewarabema Jesúsba jʉrʉdꞌa ũme wãsidꞌa Jesús wuagꞌadꞌapeadꞌaidꞌu. 4Ũmewedꞌa wãẽba wãsidꞌa, mawũãmina dewarabema Jesúsba jʉrʉdꞌara audre wãẽba wãsia Pedro kꞌãñabara, mawũẽ naara jũẽsia Jesús wuagꞌadꞌapeadꞌaidꞌu. 5Bꞌarrupe edꞌa akʉbʉrʉdꞌera burubꞌata ũdusia, mawũãmina edꞌa wã ẽbasia. 6Tẽã zesia Simón Pedrora izhi kꞌaidꞌu, mobe peña zobꞌeadꞌe edꞌa wãbʉrʉdꞌera ũdusia burubꞌa kꞌobꞌʉta mama. 7Wua Jesús buruta buradꞌapeadꞌasidꞌa ũdubʉrʉdꞌera burubꞌa bawara kꞌobꞌa ẽbasia, awuarabʉrʉ ãĩ buratʉ kꞌobꞌasia. 8Mobebʉrʉ edꞌa wãsia dewarabema Jesúsba jʉrʉdꞌasidꞌa, izhira naara zesia peña zobꞌeata nʉmʉĩnu. Mawũã berabꞌaribʉrʉta ũdui ĩjãsia Jesús piradrʉdꞌata. 9Maʉ̃ẽnabema wadꞌi sãwũãta kꞌawuadꞌa ẽãrã zhi bꞌʉmata, Jesús mawũã beudꞌata piradrʉi bara basia. 10Mobebʉrʉ Jesúsba jʉrʉkuadꞌara wãsidꞌa ãzhi panʉma.
Jesús zhi ũdubidꞌa María Magdalenaa
11Mawũãmina María jẽga bꞌasia peña zobꞌeata nʉmʉ kꞌaita. Mawũã jẽga bꞌʉdꞌe bꞌarrusia edꞌa akʉi kꞌarea. 12Maʉ̃ne ũdusia ángelerã ũme wua torro jʉ̃ panʉta. Abꞌa buru bude, abꞌa jẽrũ bꞌadaudꞌe jewedꞌa kꞌopanasia Jesús kꞌakua tabꞌʉdꞌapeadꞌa maẽ. 13Maʉ̃rãbara mawũãsidꞌa: Wũẽrã, ¿bʉra kꞌãrẽã jẽga bꞌʉ?
Mawũãnaĩ mawũãsia: Mʉ Nokꞌota edesidꞌa, mʉã kꞌawua ẽã sãma tabꞌʉsidꞌara.
14Mawũãpe pʉrʉwabʉrʉdꞌera ũdusia Jesús mama kꞌobꞌʉta, mawũãmina kꞌawua ẽbasia Jesústa kꞌobꞌʉta. 15Maʉ̃ne Jesúsbara mawũãsia: Wũẽrã, ¿bʉra kꞌãrẽã jẽga bꞌʉ? ¿Kꞌaita jʉrʉ bꞌʉ?
Mawũãĩ izhara ne uta akʉbarita krĩchape mawũãsia: Jesús kꞌakuata bʉa edesibʉrʉ mʉãã jaradua sãma tabꞌʉsita, mobedꞌeba mʉã edeya.
16Mawũãĩ Jesúsbara mawũãsia: ¡María!
Mawũãĩ pʉrʉwape izhara mawũãsia: ¡Raboni! Maʉ̃bara jara krĩña bꞌʉa Miã Ũrãgꞌabarita.
17Maʉ̃ne Jesúsbara mawũãsia: Mʉta jiru nʉmerãrũã, mʉrã wadꞌi wãrĩze ẽã mʉ Zezema, mawũẽ mʉ mebẽrãma wãpe jaradua: Mʉrã wãrĩzeita mʉ Zezema, marã Zezema, mʉ Zhibarima, marã Zhibarima.
18Mawũãĩ María Magdalena wãsia Jesúsba jʉrʉkuadꞌaa jaraita Nokꞌo Jesús izha ũdudꞌata. Aramaʉ̃ne jarakꞌasia Jesúsba jaradꞌata.
Jesús zhi ũdubidꞌa izha jʉrʉkuadꞌaa
(Mateo 28:16-20; Marcos 16:14-18; Lucas 24:36-49)
19Keubʉrʉdꞌe maʉ̃ abꞌaʉ ewadera semana ewartia nabemata domingodꞌera Jesúsba jʉrʉkuadꞌara zhi jʉre ãzhi duanu maẽ puerta serrape duanasia. Judíorã wawiaba mawũã duanune Jesús zepe ãzhi ẽsadra edau nʉmepe mawũãsia: ¡Kʉa, marã adu-a bꞌeaudua!
20Mawũãpe ũdubigasia izhi juwuata, izhi orrota. Izha jʉrʉkuadꞌara sobiasidꞌa Nokꞌota ũdubʉdaba. 21Mawũẽ Jesúsbara wakusa mawũãsia: ¡Kʉa, marã adu-a bꞌeaudua! Mʉ Zezeba mʉta zokꞌadꞌa kĩrãkꞌa mʉãbidꞌa marãta zokꞌaya.
22Mawũãpe ãzhima jãrãpuape mawũãsia: Jidaudua Jawurebiata. 23Zhãrã kꞌazhirua odꞌata marãba Jawurebiadꞌeba bedꞌea ne ẽã edabʉdara maʉ̃ Daizezebara bedꞌea ne ẽã bꞌʉya. Mawũãmina marãba Jawurebiadꞌeba bedꞌea ne ẽã edabʉda ẽãrã maʉ̃ Daizezebidꞌa bedꞌea ne ẽã bꞌʉ ẽã.
Tomásbara ĩjã ẽã nʉmape ĩjãna
24Tomás Jesúsba doce jʉrʉkuadꞌadꞌebemata Memerã abadara ãzhi bawara ne ẽbasia Jesús zesidꞌera. 25Mawũẽ dewarabemarã Jesúsba jʉrʉkuadꞌabara mawũãsidꞌa: Nokꞌora daibara ũdusidꞌa.
Mawũãnaĩ mawũãsia: Izhi juwua clavoba kꞌachidꞌapeadꞌata mʉã ũdupe mʉ juwua jĩwĩnita edꞌa pẽũ ẽbʉrʉ, mʉ juwuata izhi orrodꞌe pẽũ ẽbʉrʉ, beudꞌata piradrʉdꞌara mʉãrã ĩjã ẽã.
26Ewari ocho babʉrʉdꞌe Jesúsba jʉrʉkuadꞌara wakusa edꞌa zhi jʉre bꞌedꞌera Tomás ãzhi bawara bꞌasia. Maʉ̃ne puerta serra nʉmʉne Jesús zepe ẽsadra edau nʉmepe mawũãsia: ¡Kʉa, marã adu-a bꞌeaudua!
27Mobe Tomás kꞌobꞌʉa mawũãsia: Nama pẽũdua bʉ juwua jĩwĩnita, akʉdua mʉ juwuata, bʉ juwuara pẽũdua mʉ orrodꞌe. Mobe ĩjã ẽã nʉmarãrũã, awuarabʉrʉ ĩjãrũã.
28Mawũãĩ Tomásbara panaʉ̃ mawũãsia: ¡Bʉra mʉ Nokꞌoa, mʉ Zhibaria!
29Mawũãĩ Jesúsbara mawũãsia: Mʉta ũdubʉrʉ baera Tomás bʉara ĩjãbʉrʉa. Sobiadꞌaidꞌe bꞌʉa ũdu ẽãta ĩjãbʉdara.
Kꞌãrẽã bꞌʉdꞌapeadꞌa naʉ̃ libro
30Jesúsbara dewara ũdudꞌakꞌata bio osia izha jʉrʉkuadꞌa daidꞌu, maʉ̃ zhi bꞌʉma ẽã naʉ̃ librodꞌera. 31Mawũãmina naʉ̃ bꞌʉsidꞌa ĩjãnamarẽã Jesúra zhãrã Ẽdrʉbita Daizeze Warrata. Maʉ̃ta ĩjãbʉdaba izhikꞌareuba erubꞌeamarẽã Daizeze ũme bꞌai jõ ẽãta.
21Jesús zhi ũdubidꞌa izha jʉrʉkuadꞌata sietea
1Maʉ̃ tẽã izha jʉrʉkuadꞌaa Jesús wakusa zhi ũdubisia do jedꞌea õbꞌʉta Tiberia abada doya. Maʉ̃nerã kꞌãwũã berabꞌarisia: 2Ãba duanasia Simón Pedrota, Tomás Memerã abadata, Natanael Caná pʉwʉrʉdꞌebemata, maʉ̃ pʉwʉrʉra Galilea druadꞌebema, dewara Zebedeo warrarãta, dewara ũme Jesúsba jʉrʉkuadꞌata. 3Maʉ̃ne Simón Pedrobara mawũãsia: Mʉrã wãña bꞌeda beadꞌe.
Mawũãĩ jarirãbara mawũãsidꞌa: Daisidꞌa wãnaña bʉ bawara.
Aramaʉ̃ne wãnape jãbadꞌe bꞌarisidꞌa, maʉ̃ diamasera bꞌeda beadꞌa ẽbasia miã kꞌãrẽta.
4Ʉ̃nadrʉ bʉsidꞌe Jesús zhi ũdubisia ibudꞌe, mawũãmina izha jʉrʉkuadꞌabara kꞌawuadꞌa ẽbasia Jesústa kꞌobꞌʉta. 5Maʉ̃ne Jesúsbara mawũãsia: Warrarã, ¿jidasidꞌakꞌa bꞌeda kꞌoira?
Mawũãĩ panaʉ̃ mawũãsidꞌa: Jidadꞌa ẽã.
6Mawũãnaĩ mawũãsia: Atarraya jãbadꞌeba juwua araare bꞌaribueudua mawũãrã jidadꞌaya. Mawũãĩ bꞌaribuesidꞌa, mawũẽ jirabꞌari bꞌedꞌa ẽbasia bꞌeda bioba. 7Maʉ̃ne izha jʉrʉdꞌata Jesúsba kʉãgꞌaba Pedroa mawũãsia: ¡Kꞌãʉ̃ Nokꞌoa!
Simón Pedroba mawũã Nokꞌota ũrĩbʉrʉdꞌera, wua ãnebꞌari jʉ̃ bꞌʉta wẽãnata jʉ̃pe doidꞌu tẽũsia. 8Dewaraurã izha jʉrʉkuadꞌara jãbadꞌe zesidꞌa ibuidꞌu, erbꞌari wesidꞌa atarraya bꞌedaedꞌa. Druadꞌebara wawara kꞌopana ẽbasia, awuarabʉrʉ kꞌopanasia cien metro.
9Drua wãbʉdadꞌera ũdusidꞌa tebʉ purea nʉmʉta, bꞌeda ba nʉmʉta, pan kꞌobꞌʉta. 10Maʉ̃ne Jesúsbara mawũãsia: Weudua bꞌeda aritia jidabʉdata.
11Mawũãĩ Simón Pedrora jãbadꞌe edꞌa wãpe atarraya drua webʉrʉta bꞌeda zromarãba bira wesia, bꞌedara bꞌasia ciento cincuenta y tres. Mawũã biomina atarraya tʉdꞌʉzoa ẽbasia. 12Mobebʉrʉ Jesúsbara mawũãsia: Zeudua, nekꞌoudua. Izha jʉrʉkuadꞌabara miõba bʉra kꞌaipe adꞌa ẽbasia kꞌawuasidꞌa baera Nokꞌota. 13Aramaʉ̃ne Jesúsbara pan jiraedape dedꞌekasia bꞌedasidꞌa dedꞌekasia. 14Maʉ̃ta zhi ũbea basia izha jʉrʉkuadꞌaa Jesús zhi ũdubi nʉmʉta beudꞌata piradrʉpe.
Jʉredua mʉ pẽwã bꞌeta
15Nekꞌodꞌa tẽã Jesúsbara Simón Pedroa mawũãsia: Simón Jonás warra, ¿bʉa mʉrã audre kʉãgꞌakꞌa naʉ̃rãne kꞌãñabara?
Mawũãĩ panaʉ̃ mawũãsia: Ããjã Nokꞌó, bʉa kꞌawua bꞌʉa mʉã bʉra kʉãgꞌata.
Mawũãĩ mawũãsia: Jʉredua mʉ pẽwã bꞌeta.
16Jarama ũmeta wakusa mawũãsia: Simón Jonás warra, ¿bʉa mʉrã kʉãgꞌakꞌa?
Mawũãĩ Pedrobara panaʉ̃ mawũãsia: Ããjã Nokꞌó, bʉa kꞌawua bꞌʉa mʉã bʉra kʉãgꞌata.
Mawũãĩ mawũãsia: Jʉredua mʉ pẽwã bꞌeta.
17Jarama ũbeata mawũãsia: Simón Jonás warra, ¿bʉa mʉrã kʉãgꞌakꞌa?
Pedrora sopuasia mawũã jarama ũbea, ¿bʉa mʉrã kʉãgꞌakꞌa abʉrʉba? Mawũẽ mawũãsia: Nokꞌó bʉara jõma kꞌawua bꞌʉa. Bʉa kꞌawua bꞌʉa mʉã bʉra kʉãgꞌata.
Mawũãĩ Jesúsbara mawũãsia: Jʉredua mʉ pẽwã bꞌeta. 18Mʉã wãrĩnu bʉaa jaraya: Bʉ kũrãta bꞌasidꞌera zhope wã bꞌasia bʉzha krĩñama, mawũãmina ya zõrãta bꞌebʉrʉdꞌera bʉra juwua jirabꞌariya, aramaʉ̃ne bʉra awʉrʉba zhobiya, mobe edeya bʉa krĩña ẽãma.
19Maʉ̃bara Jesúsbara jara krĩñasia Pedro sãwũã beuita, aramaʉ̃ne kꞌawuabigaita Daizeze zhi zromata. Maʉ̃ jarape mawũãsia: Mʉrã pẽwã bꞌadua.
Izha jʉrʉdꞌata kʉãgꞌadꞌebema
20Pedroba jẽrũya akʉbʉrʉdꞌera ũdusia kꞌaidꞌu taita Jesúsba jʉrʉdꞌa Jesúsba kʉãgꞌata, nekꞌo duanune maʉ̃ abꞌaʉta Jesús kꞌaita kꞌobꞌadꞌa basia, mawũã kꞌobꞌasidꞌera mawũãsia: Nokꞌó, ¿bʉra kꞌaiba chãbꞌariipe? 21Pedroba maʉ̃ta ũdui Jesúa mawũãsia: Nokꞌó, ¿naʉ̃ sãwũã berabꞌariipe?
22Mawũãĩ Jesúsbara mawũãsia: Naʉ̃ mʉ zeyeedꞌa bꞌaita mʉã krĩñabʉrʉ, ¿bʉa sãwũãĩpe? Bʉra mʉta pẽwã bꞌadua.
23Maʉ̃neba mebẽrãbara ãzhirãĩnu jara duanesia maʉ̃ Jesúsba jʉrʉdꞌara beu ẽãta. Mawũãmina Jesúsbara jara ẽbasia beu ẽãta, awuarabʉrʉ mawũãsia: Naʉ̃ mʉ zeyeedꞌa bꞌaita mʉã krĩñabʉrʉ, ¿bʉa sãwũãĩpe?
24Maʉ̃ Jesúsba jʉrʉdꞌaba naʉ̃ bedꞌeata jarakꞌa bꞌʉbʉrʉa. Kꞌawua panʉã izha jara bꞌʉra wãrĩnuta.
25Dewara ne bio bꞌʉa Jesúsba odꞌara. Maʉ̃ta abꞌa abꞌaʉdꞌe bꞌʉsidꞌabʉrʉ mʉma ẽjũãnerã ara ẽbakꞌausia libro bꞌʉkuadꞌara. Amén.