TITUS

TITUS

¹ Zeisu Khazih nungzui Pasian sila ahi keimah Paul in Pasian mi hihna tawh kituak in thuman thutak theihna le Pasian teelte upna tawh kizui in, ² a zuau theilo Pasian in hun kipatma peka kipan a hong kamciamsa nuntak tawntungna lametna thu, ³ Pasian in a hun a tun ciangin keima thuhilhna tungtawn in ama kamciamsa tua thu hong kilangsak hi. Eite hong Honpa Pasian thupiakna tawh kizui in tua thuhilh nasepna keima tungah hong kipia zo hi. ⁴ I neihkhop a kibang upna sungah ka tapa taktak ahi Titus aw, Pa Pasian le eite hong Honpa Topa Zeisu Khazih kiang pan hehpihna thupha, hehpihna le lungnopnate nangma tungah hong om tahen. ⁵ Thu kong piaksa mah bangin nasep ding a kisam laiteng a sem ding le khua khempeuh ah pawlpi makai dingte a seh dingin Crete tuikulh ah kong nusia hi. ⁶ Pawlpi upa dinga na seh mite in paubanna a omlo mi, zi khat bek a nei mi, a tate in thumanglo ahih keileh phengtat uh hi ci in mawhsakna a ngahlo thu‑um mi hi ding uh hi. ⁷ Banghang hiam cihleh pawlpi kem siapa in Pasian neihsa kempa ahih manin paubanna a neih loh ding kisam hi. Ama thu bek thu salo in, a heh baihlo, zu a dawnlo, a ngonghtatlo, sum iplahlo mi, ⁸ zindo a hahkat mi, thuhoih a deih mi, lungsim navak mi, a thutang mi, a siangtho mi, ama pumpi a ki‑uk zo mi, ⁹ thuhilhna maantak tawh mite thapia in thu a nial mite zong a mawhna uh a kiphawksak theih nadingin a sinsa thuman a lenkip mi hi ding hi. ¹⁰ Banghang hiam cihleh a thumanglo, thu ginalo peuh a kawi gengen leh mi a khemthei tampitak om a, a diakdiak in vunat mite lakah a tampen hi. ¹¹ Amaute in thumanlo tawh a ngah theih nadingun gen dinga kilawmlo thute gen uh a, midangte innkuan sung susia thei uh ahih manin tua bang mite thu gensak peuhmah kei in. ¹² Amaute lak mahmah a kamsang khatin zong, “Crete mite zuautheite hi a, gamsa gilote tawh kibang in thadah le anhai a thuahte ahi uh hi,” a ci hi. ¹³ Hih teci panna a maan ahi hi. Tua ahih manin, amaute in upna thu ah a kip theih nadingun khauhtak in taii inla, ¹⁴ Judah mite phuahtawm tangthute le thuman thutak a zuilo mite thupiakte a man loh nadingun zong hilh in. ¹⁵ A siangtho mite aa dingin na khempeuh a siangtho hi. Ahih hangin a siangtholo mite le a umlo mite aa dingin a siangtho na khat beek a om kei hi. A ngaihsutna le a lungsimte nangawn uh zong a nin hi. ¹⁶ Pasian ka thei hi a cih uh hangin a gamtatna uh tawh amah a nial uh hi. Mi kihhuai, thumanglo, na hoih khatpeuh sem dinga kizang theilo mite ahi uh hi.

¹ Ahi zongin nang in upna thuman tawh a kituak hih thute hilh in. ² Papi khanghamsate, a navak, a zahtakhuai, pumpi ki‑ukzo, upna maan a nei, itna le thuakzawhna a neite ahih nading, ³ tuamah bangin nupi khanghamte zong a gamtat hoih, a zahtakhuai, mi a gensialo, zu a hailo, thuhoih thupha a hilhte a suah nading, ⁴ amaute in a khanglai nupite tungah a pasal le a tate uh a itte, ⁵ a nuntakna a siangthote, a khuavallo mite, inn nupi hoihte, a migite, a pasalte uh thu a mangte a suah nading, Pasian thu a kigensiat loh nading uh ahi hi. ⁶ Tua mah bangin a khanglai pasalte zong a pilvang nadingin hanthawn inla, ⁷ nang na hih leh nasep hoih a kici khempeuh ah mite etteh theih dingin om in. Na thuhilhna ah ginatna zahtakbang in om inla, kam thanghuai zang loin kampau kilawm zang in. ⁸ Tua hi leh kuamah in a hong mawhsak nading a om kei ding hi. Nang hong langpang mite in zong hong gensiat nading uh mu loin a maizum ding uh hi. ⁹ Silate in a tote uh thu mangin na khempeuh ah a tote lungdamsak in a pau uh a dawnkik loh nadingun hilh in. ¹⁰ Guksim laksim nei loin a muanhuaina uh na khempeuh ah lak uh hen. Tua bangin om le uh amaute in a hong Honpa Pasian thu na khempeuh ah a kilangsak thei ding uh hi. ¹¹ Banghang hiam cihleh hotkhiatna hong puak Pasian hehpihna thupha, mi khempeuh tungah hong kilang zo a, ¹² Pasian deihna tawh kituaklo gamtatna le leitung lunggulhnate nialin a kilawm a kituak, a dik a maan le Pasian mi banga tu khang huna i nuntak nadingin hong hilh hi. ¹³ A lian eite Pasian le Honpa Zeisu Khazih minthanna tawh a hong kilat ding lametna thupha ngakin i om hi. ¹⁴ Amah in siatna khempeuh pan hong tankhia in ama neihtuam mite ding, ama aa dingin hong siangthosak a, na hoih sep ding i hanciam theih nadingin eite tangin amahmah hong kipia zo hi. ¹⁵ Hih thute genin hanthawn inla na thuneihna khempeuh tawh amaute taii in. Kuamah kisimmawhsak kei in.

¹ Ukna neite le thuneite thu a zui ding, thu a mang ding, na hoih khat peuhpeuh a sem dingin kigingsa in om ding, ² kuamah gensialo, midang tawh kihothei, thukhual le mi khempeuh tungah a kiniamkhiat dingin amaute phawksak in. ³ Banghang hiam cihleh eite mahmah zong nidanglai in bangmah theilo, thumanglo, khemna a thuak, a hoihlo lunggulhna le noptatna tuamtuamte a bawl, midangte a eeng le a siasak nuam, muhdah thuak le a mudahte i hi ngei hi. ⁴ Ahi zongin eite hong Honpa Pasian in a migitna le a hong itna mihingte tungah hong kilangsak hi. ⁵ Eite in a hoih a pha i bawlman hilo in suahthakna hanga silsiangna le Kha Siangtho hanga thaksuahsakna tungtawn in ama hehpihna tawh kizui in a hong honkhia ahi hi. ⁶ Amah in eite hong Honpa Zeisu Khazih tungtawn in tua Kha Siangtho a dimtak in eite tungah hong sungzo hi. ⁷ Tua in ama hehpihna thupha tawh dik hong tansak khit ciangin i lamet nuntak tawntungna a luahte i suah nading ahi hi. ⁸ Hih in a muanhuai thugenna ahi hi. Tua ahih manin Pasian a um khinsa mite in na hoih a sep tawntung nading uh a phawk nadingun na gen tawntung ding ka deih hi. Hih thute in mikim aa dingin hoih a, phattuamna zong a piangsak hi. ⁹ Ahi zongin a haihuai thu kinialnate, khangthute, thukham tawh kisai kiselna le kitotnate na pel in. Tuate in phattuamna bangmah hong pia lo a, kimanna zong bangmah neilo hi. ¹⁰ Khatvei nihvei thu na hilh khit ciangin kikhenna a piangsak mi na hemkhia in. ¹¹ Tua bang mite in lehtat in mawhna bawl teitei uh ahih manin amau le amau mawhna thukhenna a kithuaksak uh ahi hi cih na thei in. ¹² Artemas ahi a, Tychicus ahi zongin kong paisak ciangin ka omna Nicopolis khua ah nong pai nadingin hong hanciam in. Banghang hiam cihleh tualai ah phalbi sungteng taam dingin ka khentat hi. ¹³ Sitnipa Zenas le Apollos‑te kisapna bangmah om loin a zinkhiat theih nadingun na huh in. ¹⁴ I mite zong gah nei loin om loin huhna a kisamte a huh zawh nadingun na hoih sep ding a tawntung in kisin uh hen. ¹⁵ Ka ompih mi khempeuh in nang hong hopih uh hi. Upna sunga hong it mite na hopihsak in. Pasian hehpihna thupha in note khempeuh hong ompih tahen. Amen.