ROME-TE

ROME-TE

¹ Pasian lungdamna thu tangko dinga kisehkhia, sawltakpi dinga kisam keimah Zeisu Khazih sila Paul in, ² Pasian in a kamsangte tungtawn in Lai Siangtho sunga hong kamciamsa lungdamna thu, ³ ci le sa lam panin David suan ahi ama Tapa, ⁴ i Topa Zeisu Khazih in sianthona Kha hangin misite lak pan a thawhkikna in Pasian Tapa hi ci in thuneihna tawh a pulakkhia ahi hi. ⁵ Minamte khempeuh lakah ama min hangin upna thu a kizuih theih nadingin kote in ama tungtawn le ama min hangin hehpihna thupha le sawltakpi za ka ngah uh hi. ⁶ Note zong Zeisu Khazih aa dingin a kisamte lakah a kihel mite na hi uh hi. ⁷ Pasian it le misiangthote ci a, kisam Rome khua‑a om khempeuh tungah lai kong khak hi. I Pa Pasian le Topa Zeisu Khazih kiang panin a hehpihna thupha le lungnopna note tungah om tahen. ⁸ Na thu upna uh leitung mun khempeuh ah thang ahih manin note khempeuh hanga ka lungdamna ka Pasian tungah Zeisu Khazih tungtawn in ka ko masa hi. ⁹ Thu ka ngetsim in note aa ding tatsat loin ka hel den a, ka lungsim khempeuh tawh ama Tapa lungdamna thu ka hilhna a na ka sepsak Pasian in hong thei hi. ¹⁰ Pasian in hoih a sak hun khatpeuh ciangin note kiangah lam khatpeuh tawh kong pai theih nadingin zong thu ka ngen den hi. ¹¹ Note thahat in na kip theih nadingun Kha Siangtho letsong pawlkhat hong hawmsawn nuam ka hih manin a hong mu nuam mahmah ka hi hi. ¹² Tua bang ka cih ciangin upna tawh khat le khat tha i kipiaktuah theih nading ka cihna ahi hi. ¹³ Tu in sanggamte aw, Gentile dangte lakah gah ka neih bangin note lakah zong gah pawlkhat ka neih theih nadingin note kiangah pai kong sawm zel hangin tuciang dong mah hong khaktan om den hi cih thu na theih loh ding uh ka deih kei hi. ¹⁴ Greek mite le Greek mi a hilote tungah leiba ka neih bangin a pilte le a haite tungah zong ka nei hi. ¹⁵ Tua hi a, Rome khuapi sunga om note kiangah zong lungdamna thu kong tangko ding ka lawp mahmah hi. ¹⁶ Khazih lungdamna thu ka maizumpih kei hi. Banghang hiam cihleh tua thu in a um mi khempeuh a masa pen in Judah mite le tua khit ciangin Greek mite in hotkhiatna a ngah nadingun Pasian vangliatna ahi hi. ¹⁷ Banghang hiam cihleh tua lungdamna thu sungah Pasian dikna hong kilang hi. “Midik in upna tawh a nungta ding hi,” ci in Lai Siangtho sungah a kigelh mah bangin tua dikna pen upna tawh kingah a, upna mah tawh a kizomsuak ahi hi. ¹⁸ Pasian thusimlote le a thumanlo mite in thumanlohna tawh thuman a netcip manun amaute khempeuh tungah Pasian thangpaihna vantung panin a hong kilang hi. ¹⁹ Banghang hiam cihleh Pasian in amah tawh kisai thute theih ding amaute tungah lak khinzo ahih manin amaute aa dingin a kitel mahmah hi. ²⁰ Bangci bang hiam cihleh a kimu theilo Pasian hihnate ama bawlsa nate panin kitheithei a, leitung a piansak cil a kipan teltak in ama neih tawntung vangliatna le Pasian pianzia kimu thei ahih manin paulap a zong thei kei ding uh hi. ²¹ Amaute in Pasian a theih uh hangin Pasian ahihna zahin pahtawi loin a tungah zong a lungdam kei uh hi. Tua sangsik in thu ginalo vive ngaihsun uha a lungsimte uh a mialcip hi. ²² Mipil ka hi hi a kicih uh hangin mihai suak uh a, ²³ a sia theilo Pasian vangliatna pen a kisia thei mihing lim, vasa lim, khe li nei ganhingte lim le a bokvak ganhing lim peuh tawh a khek uh hi. ²⁴ Tua ahih manin amaute lunggulhna zui in a pumpi uh a zumhuai pipi in zang uh a, Pasian in zong amaute siangtho lohna ah a khahkhong vet hi. ²⁵ Amaute in Pasian thuman thutak pen zuauthu tawh khek uh a, a Piangsakpa sangin ama piansak nate bia in a na a sem zaw uh hi. Tua Pasian in thupha a ngah tawntungpa ahi hi. Amen. ²⁶ Banghang hiam cihleh hih thu hangin a zumhuai theithei a lunggulh dingin Pasian in amaute khahkhong a, a numeite nangawn un pasal tawh omkhop ding ngeina tawh kilehbulh in a gamta uh hi. ²⁷ Tuamah bangin pasalte in zong numei tawh omkhop ding ngeina nusia in pasal le pasal peuh kilunggulh in a zumhuai pipi in a mawh uh hi. Tua ahih manin a lehtatna uh tawh kituak in daan a thuak ciat uh hi. ²⁸ Pasian a theihna nangawn uh zomsuak nuamlo uh ahih manin a kilawmlo le a kihhuai pipi a gamta dingin Pasian in siat theihtawp a sia lungsim guanin a khahkhong hi. ²⁹ Amaute in siatna namkim bawl uh a, numei pasal thangtatna, gitlohna, huaihamna, midangte siatsak nopna, hazatna, mithahna, kiselna, khemna, thusia ngaihsutna tawh kidim uh hi. Amaute in mi sutuah nuamte, ³⁰ mi a gensiate, Pasian a mudahte, a ngongtatte, a kiphasakte, a kisialte, thusia a piangsakte le nu le pate thu a manglote, ³¹ bangmah a thei theilote, mi muanhuailote, itna a neilote, midang khual lote le hehpihna a neilote ahi uh hi. ³² Tua bangin a gamta mite a si dingin Pasian in maantak in thu a khen lam thei napi, a gamtat ngei un gamta veve uh a, tua banga a gamta mite zong a pakta lai uh hi.

¹ Tua ahih manin midangte a mawhsak mi aw, midangte na mawhsakna teng linlian mah nang zong sem na hih manin midangte na mawhsak ciangin nangma tunga thu a kikhen na hi hi. Tua ahih manin na suakta thei kei ding hi. ² Tua banga a gamta mite tungah Pasian in thumanna tawh thukhen hi cih i thei hi. ³ Tua banga a gamta mite mawhsak napi tua mawhnate mah a bawl veve mi aw, Pasian thukhenna tawh kipelh ding kisa na hi hiam? ⁴ Ahih keileh na kisikkik theihtheih nadinga hong mapi Pasian migitna thei theilo in nangma tunga hong migit mahmahna hong lungduai mahmahna le hong thuak keikainate thusim lo na hi hiam? ⁵ Tua banga na lungkhauhna le na kisik nop lohna hangin Pasian thangpaihna le thumantak in a thukhenna a hong kilat ni ciangin na thuak ding Pasian thangpaihna a kholkhol na hi hi. ⁶ Amah in milip tungah ama gamtatna zui in thaman a pia ding hi. ⁷ Lungduaitak in a hoih sep tentanna tawh minthanna, pahtawina le sihtheih lohna a zong mite tungah nuntak tawntungna a pia ding hi. ⁸ Ahi zongin angsungthei a, thuman nialin siatna lampi a zui mite tungah Pasian thangpaihna le hehna a om ding hi. ⁹ A sia in a gamta mi peuhmah in buaina le lunggimna thuak dinga, Judah mite in thuak masa in, Greek mite in zong a thuak ding uh hi. ¹⁰ Ahih hangin a hoih in a gamta mi peuhmah in minthanna, pahtawina le nopna ngah dinga, Judah mite in ngah masa in Greek mite in zong a ngah ding uh hi. ¹¹ Banghang hiam cihleh Pasian in deidan tuam a nei kei hi. ¹² Thukham neilo‑a a mawh khempeuh thukham neilosa mahin kisia ding uh hi. Thukham nuai‑a a mawh khempeuh lah thukham tawh kizui in thukhenna a thuak ding uh hi. ¹³ Banghang hiam cihleh thukham zakna hang hilo in thukham zuihna bekin Pasian mai ah dik a hong tangsak hi. ¹⁴ Banghang hiam cihleh thukham a neilo Gentile‑te in thukham kalhna amau theih tawmna tawh a sep uh ciangin amau aa dingin thukham a suak hi. Amaute in thukham a neih loh uh hangin ¹⁵ tua banga a sepnate panun thukham kalhnate amaute lungsim sungah kigelh hi cih hong lak hi. Tua thu amaute lungsim tawngin tecipang ahih manin a ngaihsutna un amaute mawhsak zel, diksak zel in a om hi. ¹⁶ Pasian in thu a khen ni ciangin mihingte thusimte keima hilh lungdamna thu tawh kizui in Zeisu Khazih tungtawn in thu a khen ding hi. ¹⁷ “Kei Judah mi ka hi hi,” ci in thukham a suang le Pasian a kisialhpihpa aw, ¹⁸ thukham hong kihilh ahih manin Pasian deihna na thei a, a hoihpente mah zong hoih na sa hi. ¹⁹ Mittawte lamhilhpa ka hi a, khuamial sunga om mite aa dingin khuavak ka hi a, ²⁰ mihaite a pantahpa le naungekte aa dingin siapa ka hi hi na kici a, thukham sunga om thutakte a thei takpi bangin na kimuang hi. ²¹ Tua ahih leh midangte thu a hilhpa aw, nang le nang zong thu kihilh lo na hi hiam? “Guta kei in,” ci a, midangte thu a hilhpa aw, nang zong guta hilo na hi hiam? ²² “Angkawm kei in,” a cipa aw nang zong angkawm hilo na hi hiam? Milimte lipkhaphuai a sapa aw, milim biakna innpite a luh hilo na hi hiam? ²³ Thukham a kisialhpihpa aw, thukham na palsat manin Pasian min daisak hilo na hi hiam? ²⁴ Banghang hiam cihleh, “Note hangin Gentile‑te lakah Pasian min a kigensia hi,” ci in Lai Siangtho sungah a kigelh hi. ²⁵ Thukham na zuih leh na vunatna in man a nei ding hi. Ahih hangin thukham na palsat leh vun na at hangin a atlo mah tawh na kibang hi. ²⁶ Tua ahih manin vunat lopa in thukham a zuih leh tua vunat lopa pen vunat bangin kisim ding hilo ahi hiam? ²⁷ Lai tunga kigelh thukham nei in vun zong at napi in, thukham na palsat leh ci le sa ah vun a at loh hangin thukham a zui mi in nang hong mawhsak ding hilo ahi hiam? ²⁸ Banghang hiam cihleh a puatham a Judah mi ahite Judah mi taktak ahi kei hi. A pualam pumpi a vunatna zong vunatna taktak ahi kei hi. ²⁹ A sunglam a Judah mi ahite Judah mi taktak ahi hi. Vunatna zong lai tawh a kigelh thukham hang hilo in Kha hanga lungsim vunatna ahi hi. Mite in tua bang mite a pahtak loh uh hangin Pasian in a pakta hi.

¹ Tua ahih leh Judah mite in bang hamphat tuamna nei a, vunat mi ahihna uh bang phattuamna nei ahi hiam? ² A phattuamna tampi a om hi! A masa pen in Pasian in ama kam tawh a gen thute amaute tungah a pia hi. ³ Ahi zongin amaute pawlkhat in um kei le uh bang a ci ding hiam? Amaute uplohna in Pasian thumanna a mawkna a suaksak ding hiam? ⁴ A mawkna a suaksak peuhmah kei ding hi! “Na thugente in na thutanna hong lak a, Thu hong kikhen ciangin zong na gualzawh theih nading ahi hi,” ci a, Lai Siangtho sungah a kigelh bangin Pasian mah thuman hi a, mi khempeuh a zuauthei hilo ahi hiam. ⁵ Eite diklohna in Pasian dikna kilangsak ahih leh bang i gen ding hiam? Mihingte thugen banga kong gen inah, eite tungah Pasian hehna a hong thuaksak ciangin amah a thuman lo ahi hiam? ⁶ Ahi peuhmah kei hi. Tua ahih leh Pasian in bangci bangin leitung mite thu khen thei ding ahi hiam? ⁷ Keima zuauphuahna in Pasian thumanna khangsak in ama minthangsak ahih leh banghang in mimawh hong kici zel ahi hiam? ⁸ Pawlkhat in a thukimpih bangun, “A hoih a pian nadingin a sia bawl ni,” ci in mi pawlkhat in kote kam ding hong phuahsak uh hi. Hi bangin thu a gen mite Pasian in maantak in thu a khen ding hi. ⁹ Tua ahih leh bang i gen ding hiam? Amaute sangin eite hoih zaw i hi hiam? I hoih zaw peuhmah kei hi. Tua ahih manin Judah mite le Greek mite a nih tuakun mawhna khut nuai ah om khin uh hi ci in a patna lamah kong gen khinzo uh hi. ¹⁰ Lai Siangtho sungah a kigelh bangin, “Midik khat beek a om kei hi. Khat nangawn a om kei hi. ¹¹ A theisiam mi kuamah a om kei hi. Pasian a zong mi kuamah a om kei hi. ¹² A vekpi un lampial khin uh a, Kimanna a nei kei uh hi. A hoih in a gamta kuamah om lo a, Khat nangawn a om kei hi. ¹³ A gawl uh a kihongsa hankhuk hi a, A leii uh mi khemna in a zang uh hi. Amaute mukah gulgu a om hi. ¹⁴ A kampau uh hamsiat le kamkha vive ahi hi. ¹⁵ Mi thah ding haksa a sa kei uh hi. ¹⁶ Amaute paina tengah siatna le gentheihna a om hi. ¹⁷ Lungmuanna lampi a thei kei uh hi. ¹⁸ Amaute mit ah Pasian kihtakna limlim om lo hi.” ¹⁹ Tu in thukham in a gen khempeuh thukham khutnuai mite tunga a gen ahi hi cih i thei hi. Thukham hangin kam khempeuh kikhakcip in leitung mi khempeuh in Pasian mai ah mawhsakna a thuak theih nading ahi hi. ²⁰ Tua ahih ciangin Pasian mai ah kuamah in diktansakna a ngah kei hi. Banghang hiam cihleh thukham zuihnate tungtawn in mawhna kilangkhia hi. ²¹ Ahih hangin Thukham le Kamsangte in teci a pan bangin Pasian in thukham loin a hong piak dikna tu in a hong kilang zo hi. ²² Pasian in Zeisu Khazih upna tungtawn in tua dikna mi khempeuh hong pia a, a um khempeuh in a ngah hi. Tua ahih manin kilamdanna a om kei hi. ²³ Banghang hiam cihleh mi khempeuh mawh khin uh a, Pasian minthanna cinzo nawnlo uh hi. ²⁴ Tua ahih manin Pasian in Khazih Zeisu hong tatkhiatna tungtawn in Pasian in ama hong hehpihna tawh manngen loin midik a hong tangsak hi. ²⁵ Pasian lungkim nadingin Zeisu sisan luanna tawh upna tungtawn in mawhna a mai theih nadingin Pasian in amah thoihna in a hong pia hi. Hih in a beisa huna kibawl mawhnate Pasian in iip keikai in daan a piak lohna in amah dik ahihna a kilatsak nading leh, ²⁶ tu hunin zong Zeisu a umte dik a tansakna ah amah thuman in thudik ahihlam a kilatsak nading ahi hi. ²⁷ Tua ahih leh kisialh nading thu koi ah om ahi hiam? Kisialh theih nading thu a kilakhia zo hi. Bang tawh kilakhia ahi hiam? Thukham zuihna tawh ahi hiam? Hilo hi. Upna tawh a kilakhia hi. ²⁸ Tua ahih manin mi khatin thukham zuihna tawh hilo in upna tawh diktansakna a ngah hi ci in thu i khum hi. ²⁹ Amah Judah mite Pasian bek ahi hiam? Gentile‑te Pasian zong hilo ahi hiam? Hi mah hi. Gentile‑te Pasian zong ahi hi. ³⁰ Vunat mite amau upna hangin diktangsak a, vunatlo mite zong upna hang mahin dik a tangsakpa in Pasian khat bek ahi hi. ³¹ Tua ahih leh upna thu hangin thukham in kimanna neilo a suaksak i hi hiam? I hi peuhmah kei hi. Thukham a kipsak i hi zaw hi.

¹ Tua ahih leh ci le sa a ka pupi uh Abraham in hih thu tawh kisai bang mukhia ahi hiam? ² Abraham in a gamtatna tawh diktansakna ngah hi leh kisial thei ding hi napi Pasian mai ah a kisialh theih nading a om kei hi. ³ Lai Siangtho in bang gen ahi hiam? “Abraham in Pasian um a, tua a upna pen ama dikna in kisimsak hi,” ci in kigelh hi. ⁴ Tu in nasempa in thaman a ngah ciangin hehpihna a ngah hi kici loin thaman a ngah hi kici hi. ⁵ Ahi zongin Pasian a zahtaklo mi khatin gamtatna suang loin, dik a tangsakpa a up leh ama upna pen dikna in a kisimsak hi. ⁶ Gamtatnate kihel loin Pasian in midik a a sim mipa in thupha a ngahna thu David in hih bangin a gen hi. ⁷ Amah in, “A tatkhialhnate uh kimaisak a, A mawhnate uh a kikhuhcipsak mite, Mihampha hi uh a, ⁸ Topa in mawhna a suatloh mi, Mihampha ahi hi,” a ci hi. ⁹ Hih thupha in vunat mite aa ding bek ahi hiam? Ahih keileh vunatlo mite aa ding zong ahi hiam? Abraham upna pen ama dikna in kisimsak hi i cih ciangin, ¹⁰ bang hunin kisimsak ahi hiam? A vunat khit ciang ahi hiam? Ahih keileh a vunatma ahi hiam? A vunat khit ciang hilo in a vunatma in a kisimsak ahi hi. ¹¹ Abraham in a vun a at ma in upna hangin dikna ngah takpi ahihna a kilat nadingin a vun a nung at hi zaw hi. Amah in vun ki‑atlo thu‑um mite khempeuh pa a suah nading leh tua mite tungah dikna in a kisimsak theih nading ahi hi. ¹² Ka pa uh Abraham in ngeina banga vunat bek hilo in amah in vun a ki‑atma a a neih upna khekhap a zui vunat taktakte pa ahi hi. ¹³ Banghang hiam cihleh leitung luah ding cih kamciam Abraham le a suan a khakte in thukham tungtawn a a ngah uh hilo in upna hanga dikna tawh a ngah uh ahi hi. ¹⁴ Thukham tawh a nungta mite in gamhluah ding uh ahih leh upna in man neilo dinga, kamciamna zong a mawkna suak ding hi. ¹⁵ Banghang hiam cihleh thukham in Pasian hehna a piangsak hi. Thukham om kei leh thukham palsatna zong a om kei ding hi. ¹⁶ Tua ahih ciangin tua kamciamna pen hehpihna hanga kipia a suah nadingin upna tungtawn in kingah hi. Tua in Abraham suante khempeuh le thukham tawh kisai mite bek hilo in eite khempeuh pa ahi Abraham banga a um mite in zong tua kamciamna a ngah takpi theih nading uh ahi hi. ¹⁷ Lai Siangtho sungah a kigelh bangin, “Minam tampite pa a suak dingin kong bawl khin hi,” a cihna tawh kituak in Abraham in ama uppa Pasian muhna ah eite khempeuh pa a suak hi. Tua Pasian in misite a hingkiksakpa le a om nailopi nangawn a omsa banga a genpa ahi hi. ¹⁸ Abraham tungah, “Na suan na khakte in hih bangin a piang ding hi,” ci a, a kigenna bangin Abraham in minam tampite pa a suah nadingin a lamethuai lopi mah lamen in a um veve hi. ¹⁹ Ama khan kum 100 bang pha zo a, a pumpi a si tawh kibang ahihna le Sarah zong tasel ahihna ngaihsut in nei loin amah in upna ah a thanem tuan kei hi. ²⁰ Uplahna tawh Pasian kamciam tungah lunghiang hetlo in a upna khauhsak a, Pasian min a thangsak hi. ²¹ Banghang hiam cihleh Pasian in a kamciamna bangin a tangtungsakpa hi ci in upna kician a nei hi. ²² Tua ahih manin, “Tua upna pen ama dikna in a kisimsak hi.” ²³ Tua banga a kisimsakna thu Lai Siangtho sungah ama aa ding bekin a kigelh ahi kei hi. ²⁴ Eite aa dinga kigelh zong hi a, misite lak panin i Topa Zeisu a thokiksakpa i up leh tua upna mah eite dikna in a hong simsak ding hi. ²⁵ Eite thu palsatnate hangin Zeisu hong kipiakhia a, diktansakna i ngah nadingin a thokik hi.

¹ Tua hi a, upna hangin diktansakna ngah i hih manin i Topa Zeisu Khazih tungtawn in Pasian tawh i kilemkik hi. ² Ama tungtawn in hehpihna sungah upna hangin tu‑a i omna ah luttheihna i ngah a, Pasian minthanna lametna nei in i lung a dam hi. ³ Tua bek zong hilo in haksatna in thuakzawhhatna piangsak hi cih thei i hih manin haksatnate i tuah ciangin i kipak hi. ⁴ Thuakzawhhatna in gamtat hoihna, gamtat hoihna in lametna a piangsak hi cih i thei hi. ⁵ Tu in lametna in hong lungkiasak lo hi. Banghang hiam cihleh Pasian in ama hong piak Kha Siangtho tungtawn in eite lungsim sungah ama itna hong guanzo hi. ⁶ Banghang hiam cihleh eite thanem in i om laitak a hun a cin ciangin Pasian a thusimlo eite tangin Khazih hong si hi. ⁷ Midik khat tanga a singam ding mi haksa mahmah a, ahi zongin mihoih khat tanga a singam mi khatpeuh omthei khasam ding hi. ⁸ Ahi zongin mimawh i hih laitak mahin eite tanga Khazih hong sihna tawh Pasian in eite hong itna hong kilangsak hi. ⁹ Tu in ama sisan tawh diktansakna i ngah bekthamlo in ama tungtawn in Pasian hehna panin hong kihonkhia ding hi. ¹⁰ Banghang hiam cihleh eite in galte i hih laitak in ama Tapa sihna tawh Pasian in amah le eite hong kilemkiksak zo a, i kilemkik khit ciangin ama nuntakna tawh hotkhiatna i ngah lai ding hi. ¹¹ Tua bek zong hilo in kilemkikna hong ngahsak i Topa Zeisu Khazih hangin Pasian tungah i kipak hi. ¹² Tua ahih manin mi khat tungtawn in leitung ah mawhna hong lut a, mawhna hangin sihna a piang hi. Tua hi a, mi khempeuh mawh khinzo ahih manin mi khempeuh tungah sihna hong tung hi. ¹³ Thukham a omma in leitung ah mawhna a om khinzo hi. Ahih hangin thukham a om loh lai in mawhna pen mawhna in a kisim kei hi. ¹⁴ Tua hi napi Adam huna kipan Moses hun dongin sihna in mite uk veve a, Adam bangin thupiak palsat in a mawhlo mite nangawn zong sihna in a uk hi. Tua Adam in hong pailai ding pa lim a lakkhol ahi hi. ¹⁵ Ahi zongin letsong le thupalsatna a kibang kei hi. Mi khat thu palsatna hangin mi tampi a si hi. Ahi zongin Pasian hehpihna le mi khat ahi Zeisu Khazih hehpihna tawh i ngah letsong lian zawlai a, mi tampi aa dingin a kicing hi. ¹⁶ Mi khat mawhna hangin a piang thu le letsong a kibang kei hi. Mi khat mawhna hangin mawhsakna kingah a, ahi zongin manngenlo a hong kipia letsong in thu palsatna tampite a maisak hi. ¹⁷ Mi khat thupalsatna hangin tua mi khat tungtawn in sihna in mite uk ahih leh a dimlet hehpihna le dikna letsong a ngah mite in Zeisu Khazih ahi mi khat tungtawn in amaute nuntakna sungah a tam zawsem a uk ding uh hi. ¹⁸ Tua ahih manin mi khat thupalsatna hangin mi khempeuh tungah mawhsakna thukhenna a hong tung hi. Tuamah bangin mi khat diktatna hangin khawnkhong letsong mi khempeuh tungah tunga, tua in nuntakna tawh kipawl diktansakna a piangsak hi. ¹⁹ Banghang hiam cihleh mi khat thumanlohna in mi tampi mimawh a suahsak bangin mi khat thumanna in mi tampi midik a suaksak hi. ²⁰ Tua thamlo in thupalsatna a khan nadingin thukham hong lutbeh hi. Ahi zongin mawhna a khan ciangin hehpihna a khang zaw sem hi. ²¹ Tua hi a, mawhna in sihna a uk mah bangin, i Topa Zeisu Khazih tungtawn in tawntung nuntakna a tun dingin hehpihna in dikna tungtawn in a uk hi.

¹ Tua ahih leh bang i gen ding hiam? Hehpihna a khan nadingin mawhna i bawl behbeh ding hiam? ² I bawl behbeh peuhmah kei ding hi! Mawhna a sihsan khinsa eite tua mawhna sungah koici bangin bual thei lai ding i hi hiam? ³ Khazih Zeisu sunga hong kiphum eite khempeuh in ama sihna sungah zong hong kiphum ahihlam thei lo na hi uh hiam? ⁴ Ama sihna sungah hong kiphum ahih manin amah tawh hong kivuikhawm khinzo hi. Tua in misite lak pan Pa vangliatna tawh Khazih a thawhkik bangin eite zong nuntakna thakah i kalsuan theih nading ahi hi. ⁵ Banghang hiam cihleh ama sihna lim la in amah tawh sikhawm a i kipumkhat leh amah bangin i thokik pelmawh ding hi. ⁶ Mawhna pumpi kisusia in mawhna sila i suah nawnloh nadingin eite mi lui pen Khazih tawh kikhailum khawm zo hi cih i thei hi. ⁷ Banghang hiam cihleh a si khin mi peuhmah mawhna pan a suakta zo ahi hi. ⁸ Tu in Khazih tawh sikhawm khin i hih leh amah tawh i nungta khawm ding hi cih i um hi. ⁹ Misite lak pan Khazih a kithawhkiksak khit ciangin si nawnlo a, sihna in zong amah uk nawnlo hi cih i thei hi. ¹⁰ Khazih sihna in a kimangsuak dinga mawhna sihsanna hi a, nuntakna ahih leh Pasian aa dinga nuntakna ahi hi. ¹¹ Tuamah bangin note zong mawhna a sihsan khinzo le i Topa Khazih Zeisu sungah Pasian aa dingin a nungta khinzo in kingaihsun un. ¹² Tua ahih manin pumpi lunggulhnate a zui dingin a sithei na pumpi uh mawhna ki‑uksak kei un. ¹³ Tatsiatna hiamte bangin mawhna bawl nadingin na pumpi nate uh zang kei un. Misite lak panin a nungtakikte na hih manun na pumpi nate uh zong dikna hiamte bangin dikna bawl nadingin Pasian tungah pia un. ¹⁴ Thukham nuai ah om loin hehpihna nuai ah om na hih manun mawhna in note a hong uk kei ding hi. ¹⁵ Tua ahih leh bang i ci om ding hiam? Thukham nuai ah om loin hehpihna nuai ah om i hih leh mawhna i bawlbawl lel ding hiam? I bawlbawl peuhmah kei ding hi! ¹⁶ Mi khat thu mangin a sila dinga na kipiak uh ciangin a thu zong mang takpi in tua mipa sila na suak uh hi. Tua ahih ciangin sihna a hong tun ding mawhna sila maw ahih keileh dikna a hong tangsak ding thumanna sila maw, hihte gel lakah khat zawzaw na hih lam uh thei lo na hi uh hiam? ¹⁷ A beisa hunin mawhna sila na hih ngei uh hangin note hong kipia thuhilhna lungsim takpi tawh mang na hih manun Pasian tungah lungdam ka ko hi. ¹⁸ Mawhna pan hong kisuaktasak khinzo ahih manin dikna sila na suak uh hi. ¹⁹ Na ci le na sa uh thanem ahih manin mihing kammal zangin thu a gen ka hi hi. A siangtholo nate sila ding leh hong tatsiasak semsem tatsiatna sila dingin na pumpi nate uh na piak ngei bangun tu in na pumpi nate uh dikna sila bangin a siangtho dingin kipia un. ²⁰ Banghang hiam cihleh mawhna sila na hih lai un dikna tawh na kipelh uh hi. ²¹ Tu in zumhuai na sak uh tua mawhnate panin bang metlawh na hi uh hiam? Tua nate in a tawpna ah sihna a piangsak hi. ²² Ahi zongin tu in ahih leh mawhna pan suakta in Pasian silate na suak uh hi. Tua ahih manin tu in sianthona na ngah uh a, a tawpna ah nuntak tawntungna na ngah ding uh hi. ²³ Banghang hiam cihleh mawhna thaman in sihna ahi hi. Ahi zongin Pasian hong piakkhong letsong in eite Topa Zeisu Khazih tungtawn a kingah nuntak tawntungna ahi hi.

¹ Thukham a thei mite tunga kong gen inah sanggamte aw, mi khat a nuntak laiteng thukham in amah uk hi cih theilo na hi uh hiam? ² Numei khat a pasal a nuntak laiteng thukham in a pasal tawh a khihkhawm hi. Ahi zongin a pasal a sih leh a pasal tawh kisai thukham pan a suakta hi. ³ Tua ahih manin a pasal nungta lai napi pasal dang a teenpih leh angkawmnu a kici ding hi. Ahih hangin a pasal a sih leh tua thukham pan suakta ahih manin pasal dang a teenpih zongin angkawmnu ahi nawn kei hi. ⁴ Tua ahih manin sanggamte aw, note zong Khazih pumpi hangin thukham a sihsan khin mite na hi uh hi. Hih in midang khat ahi misite lak pana a kithokiksakpa tawh kiteeng in Pasian aa dingin na gah theih nading uh ahi hi. ⁵ Eite i pianpih mawhna lungsim tawh i nuntak lai in thukham in mawhna lunggulhnate phonglo a, tua mawhna lunggulhnate in i pumpi sungah nasem in sihna hong tun hi. ⁶ Ahi zongin tu in laimal a kigelh ngeina lui bang hilo in Kha‑a nuntakna thak tawh na i sep theih nadingin eite hong khihcip ngei thukham sihsan khinta i hih manin tua thukham panin hong kisuaktasak khinzo hi. ⁷ Tua ahih leh bang i gen ding hiam? Thukham in mawhna ahi hiam? Ahi peuhmah kei hi! Tua cih thadah in, thukham om kei leh mawhna bang hiam cih ka thei kei ding hi. Thukham in, “Deihgawh kei in,” ci hi kei leh deihgawhna in bang hiam cih ka thei kei ding hi. ⁸ Ahi zongin thukham hangin mawhna in panmun ngahin keima sungah a hoihlo lunggulhna namkim a piangsak hi. Tua ahih manin thukham om kei leh mawhna zong a om kei hi. ⁹ Khatvei lai in thukham loin ka nungta hi. Ahih hangin thukham hong tun ciangin mawhna hong hingkik a, kei ka si hi. ¹⁰ Tua hi a, nuntakna a hong tun ding thukham in sihna a piangsak hi cih ka mu hi. ¹¹ Banghang hiam cihleh mawhna in thukham siksan in kei hong khem a, tua tawh hong that hi. ¹² Tua ahih manin thukham siangtho in, thupiakna zong siangtho a, thumaan in a hoih hi. ¹³ Tua ahih leh tua na hoih in kei aa dingin sihna suak ahi hiam? A suak peuhmah kei hi! Ahih hangin mawhna pen mawhna mahin a kilatkhiat theih nadingin tua na hoih tungtawn in kei sungah sihna a piangsak ahi hi. Tua in thupiakna tungtawn in mawhna pen mawhna ahih taktak lam a kilat nading ahi hi. ¹⁴ Banghang hiam cihleh thukham in khalam thu tawh kisai hi cih i thei hi. Ahih hangin kei ka hih leh ci le sa tawh a om mi ka hi a, tua in mawhna nuai ah kei hong zuak hi. ¹⁵ Ka sepnop teng sem loin ka muhdah teng peuh sem zawsop ka hih manin ka sepmel ka thei zo nawn kei hi. ¹⁶ Ka sep noploh teng mah sem ka hih leh thukham hoih hi ci in ka thukim hi. ¹⁷ Ahih hangin tua banga a semsem pen kei hi nawnlo in ka sunga a teeng mawhna ahi hi. ¹⁸ Tua ahih manin ci le sa ahi keima sungah a hoih bangmah a om kei hi cih ka thei hi. A hoih sepnopna lungsim ka neih hangin a hoih sepkhiat nadingzia ka thei zo kei hi. ¹⁹ Banghang hiam cihleh ka sepnop a hoih sem loin ka sep noploh a sia mah ka sem thapai hi. ²⁰ Tu in ka sep noploh teng sem ka hih leh tuate a sem pen kei hi nawnlo in ka sunga a teeng mawhna in a sem ahi hi. ²¹ Tua ahih manin a pha a bawl nuam keima sungah siatna om hi cih thu khat ka theikhia hi. ²² Banghang hiam cihleh ka sunglam mi in Pasian thukham sungah nuam a sa hi. ²³ Ahih hangin ka pumpi nate sungah a dang thukhat ka mu hi. Tua thu in ka lungsim a om thu tawh kido a, ka pumpi nate sunga om mawhna sila dingin hong mancip hi. ²⁴ Mi gentheipa ka hi taktak hi! A si ding hih pumpi panin kua in kei hong honkhia ding ahi hiam? ²⁵ I Topa Zeisu Khazih hangin Pasian tungah ka lungdam hi! Hih bang teng ahih manin ka lungsim tawngah Pasian thukham nuai ah sila ka hi a, ka ci ka sa panin lah mawhna thukham nuai‑a sila ka hi zel hi.

¹ Tua ahih manin tu in ci le sa deihna zui loin Kha deihna a zui, Khazih Zeisu sunga a om mite aa dingin mawhsakna a om nawn kei hi. ² Banghang hiam cihleh Khazih Zeisu sunga om nuntakna a piangsak Kha thu in mawhna le sihna thu panin kei a hong suaktasak zo hi. ³ Thukham in ci le sa hangin thanem ahih manin a sep zawhloh teng a sem dingin Pasian in ama Tapa mahmah mawhna a dim mihing bangin hong paisak a, tua ci le sa sungah mawhna thu a khen zo hi. ⁴ Hih in ci le sa deihna zui loin Kha deihna a zui eite sungah thukham in hong kalh dikna a tangtun nading ahi hi. ⁵ Ci le sa deihna banga a nungtate in ci le sa tawh kisai thute lunggulh uh a, Kha deihna banga a nungtate in Kha tawh kisai thute a lunggulh uh hi. ⁶ Ci le sa lungsim puakna in sihna piangsak a, ahi zongin kha lungsim puakna in nuntakna le lungmuanna a piangsak hi. ⁷ Ci le sa lungsim puakna in Pasian galbawlna ahi hi. Banghang hiam cihleh ci le sa lungsim in Pasian thukham a manglo bek hilo in a mang thei limlim kei hi. ⁸ Tua hi a, ci le sa deihna a zuite in Pasian a lungdamsak thei kei uh hi. ⁹ Ahi zongin note sungah Pasian Kha hong teen takpi leh ci le sa sungah omlo in Kha sungah a om na hi uh hi. Tu in Khazih Kha a neilo mi peuhmah Khazih mi ahi kei hi. ¹⁰ Note sungah Khazih Kha a hong om leh mawhna hangin na pumpi uh a si hi a, ahi zongin dikna hangin na kha uh a nungta hi. ¹¹ Misite lak pan Zeisu a thokiksak Pasian Kha note sungah hong teen leh misite lak pan Khazih a thokiksakpa in a sithei note pumpi zong note sunga a teeng ama Kha tungtawn in nuntakna a pia ding hi. ¹² Tua ahih manin sanggamte aw, ci le sa deihna zui in a nungta dingin ci le sa tungah leiba i nei kei hi. ¹³ Banghang hiam cihleh ci le sa deihna zui in na nuntak uh leh na si ding uh hi. Ahi zongin Kha hangin pumpi deihna na sihsak uh leh na nungta ding uh hi. ¹⁴ Banghang hiam cihleh Pasian Kha in a makaih mi peuhmah Pasian tate ahi uh hi. ¹⁵ Sila hong suakkiksak in a hong lausak ding kha a ngah na hi kei uh a, ta hong suaksak Kha na ngah uh hi. Tua Kha in, “Abbaɠ, Pa aw,” hong cisak hi. ¹⁶ Pasian tate i hih lam tua Kha in eite kha tawh teci a pangkhawm hi. ¹⁷ Tate i hih leh innluahte i hi a, Pasian innluahte le Khazih tawh innluahkhawmte i hi hi. Khazih tawh i thuakkhop takpi leh amah tawh minthanna i ngahkhawm ding hi. ¹⁸ Tu laitak a i thuak gimnate ka ngaihsut ciangin eite tungah a hong kilakkhia ding minthanna tawh tehkaktham ka sa kei hi. ¹⁹ A kipiangsak na khempeuh in Pasian tate a kilat ding hun a ngaklah mahmah uh hi. ²⁰ Banghang hiam cihleh a kipiangsak na khempeuh siattheihna nuai ah a om hi. Amaute utthu a om hilo in a koihpa in ama thu tawh a koih hi zaw a, ²¹ a kipiangsak nate in muattheihna kol panin kikhahkhia a, Pasian tate suahtakna thupi sungah kikoih ding hi cih lametna tawh a om uh hi. ²² Banghang hiam cihleh a kipiangsak na khempeuh in nupi nausuak ding a gim bangin tu dongin thum le tau in a om uh hi cih i thei hi. ²³ Amaute bek hilo in Kha gah masa a nei eite nangawn i pumpi hong tankhia a, tate hong suahsak ding hun ngaklah in i lungsim sungah khuisa in i om hi. ²⁴ Lametna sungah eite hotkhiat i hi hi. Ahi zongin i muh khitsa na khat lametna in lametna ahi kei hi. Kua in a muh khitsa na khat lamen theinawn ding ahi hiam? ²⁵ Ahi zongin i muh nailoh na khat i lamet ciangin thuak keikai in i ngak hi. ²⁶ Tuamah bangin Kha in zong eite thanemnate a hong huh hi. Banghang hiam cihleh eite in thungetzia ding nangawn i thei kei hi. Ahi zongin Kha mahmah in a kilokhia theilo tauna tawh thu hong ngetsak hi. ²⁷ Tu in lungsim sung a zongpa in Kha lungsim zong thei a, tua Kha in Pasian deihna tawh kituak in misiangthote aa dingin thu a hong ngetsak hi. ²⁸ Ama gelna bangin a sap Pasian a it mite aa dingin, amah in na khempeuh a hoih dingin a kituak in piangsak hi cih i thei hi. ²⁹ Banghang hiam cihleh a Tapa in sanggam tampite lakah ta upapen a suah theih nadingin Pasian in a theihkholhsa mite mah ama Tapa lim le mel a sun dingin a sehkhol hi. ³⁰ Tua banah a sehkholhsa mite a sam hi. A sapsa mite dik a tangsak hi. Dik a tansak mite minthanna a pia hi. ³¹ Hihteng banah bang i genlai ding hiam? Pasian ei lamah a pan nak leh eite langah kua pang zo ding ahi hiam? ³² A Tapa takpi itsik loin eite khempeuh aa dinga hong piakhiapa in na khempeuh zong manngen loin a Tapa tawh hong piakhawm loin om ding ahi hiam? ³³ Pasian teelsa mite dik a tangsakpa in Pasian ahih manin amaute kua in mawhsak zo ding ahi hiam? ³⁴ Mawhsakna thu a khen kua ahi hiam? Khazih in a sipa bek hilo in a thokikpa zong hi a, Pasian taklam ah omin eite aa dingin a hong thumsakpa zong ahi hi. ³⁵ Khazih hong itna tawh kua in eite hong kikhensak zo ding ahi hiam? Haksatna ahi a, gentheihna ahi a, bawlsiatna ahi a, kialpi ahi a, puan neihlohna ahi a, manthanna ahi a, namsaute ahi zongin tuate in a hong kikhensak zo kei ding hi. ³⁶ “Nangma hangin sun thapai in thahna ka thuak uh a, A kigo ding tuute bangin hong kingaihsun hi,” ci in Lai Siangtho sungah kigelh hi. ³⁷ Ahi zongin eite hong itpa hangin hihte khempeuh tungah a gualzopente i hi hi. ³⁸ Sihna, nuntakna, vantungmite, zalianpente, a vangliante, tu laitak a om nate le hong pianglai ding nate, ³⁹ a sang nate, a thuk nate le a kipiangsak nate khat beekin i Topa Khazih Zeisu sunga om Pasian hong itna tawh hong kikhensak zolo ding hi cih ka theitel hi.

¹ Ka lungsimtawng in Kha Siangtho sungah teci a pan mah bangin zuaugen hetlo in Khazih sungah maantak a kong gen thu in, ² ka lungsim sungah dahna lianpi le lungsim gimna ka thuak niloh hi. ³ Banghang hiam cihleh ci le sa in ka sanggam ka mipih Israel mite tangin Khazih tawh kikhen in samsiatna a thuakthei ding hi leng ka ut hi. ⁴ Tate suahsakna, minthanna, thuciamnate le thukham piakna, Pasian nasepna le kamciamte amaute aa ahi hi. ⁵ Amaute in pu le pate suan le khakte hi uh a, ci le sa tawh kisai in Khazih zong amaute sung panin a piang ahi hi. Tua Khazih in na khempeuh tunga thunei a tawntung in a kiphat Pasian ahi hi. Amen. ⁶ Ahi zongin Pasian thu a kiplo ahi kei hi. Banghang hiam cihleh Israel suante khempeuh Israel mi taktak ahi kim kei uh hi. ⁷ Abraham panin a piang ahih hangun Abraham tate taktak ahi kim kei uh hi. Pasian in, “Isaac panin a piangte bek nangma suan le khak kici ding hi,” a ci hi. ⁸ Ci le sa panin a piang tate Pasian tate taktak hilo in kamciamna panin a piang tate bek suan le khakin a kisim hi. ⁹ Kamciamna in, “A kiseh hun hong tun ciangin kong pai dinga, Sarah in tapa khat a nei ding hi,” a ci hi. ¹⁰ Tua bek hilo in, Rebecca tate zong a pa uh a kibang hi a, ka pupi uh Isaac ahi hi. ¹¹ Ahi zongin, amaute a teelna tawh kisai in Pasian gelna le tupna pen mihing sepna hang hilo a sampa hangin a tangtung ahih theih nadingin amaute a suahma, a sia a pha bangmah a bawlma un, ¹² Pasian in Rebecca kiangah, “A uzaw pa in a nauzaw pa sila a suak ding hi,” a ci hi. ¹³ Hih in, “Jacob ka it a, Esau ka mudah hi,” ci in Lai Siangtho sunga a kigelhna tawh a kituak ahi hi. ¹⁴ Tua ahih leh bang gennawn ding i hi hiam? Pasian thumaanlo ahi hiam? Ahi peuhmah kei hi! ¹⁵ Amah in Moses kiangah, “Ka hehpih nopte ka hehpih dinga, ka lainat nopte ka lainat ding hi,” a ci hi. ¹⁶ Hih bang ahih manin mihing lunggulhna le mihing hanciamna tungah kinga loin Pasian hehpihna tung bekah a kinga hi. ¹⁷ Lai Siangtho in Pharaoh kiangah, “Ka vangliatna nang tungah kilang in leitung khempeuh ah ka min a kitangko theih nadingin nang kong lamto hi,” a ci hi. ¹⁸ Tua ahih manin amah in a hehpih nopte hehpih in a lungkhauhsak nopte a lungkhauhsak hi. ¹⁹ Tua ahih leh, “Banghang in Pasian in mite hong mawhsak thei veve ahi hiam? Kua in ama deihna nial zo ngei ahi hiam?” nong ci kha thei ding uh hi. ²⁰ Hi mah hi. Ahi zongin, Pasian kam a dawngngam mi aw, nang in kua na hi hiam? A kibawl na khatin a bawlpa tungah, “Banghang in hih banga kei hong bawl na hi hiam?” ci thei ding ahi hiam? ²¹ Belsekpa in tungman lomkhat panin bel hoih le bel hoihlo sek theih nading thu nei hilo ahi hiam? ²² Pasian in a hehna lakin a vangliatna a kitheih nading a deihna tawh suksiat dingin a koihkholhsa, ama hehna a ngah belte lungduaitak in thuak keikai ahih leh eite in bang awlmawh ding i hi hiam? ²³ Pasian in minthanna a piak dingin a koihkholhsa, ama hehpihna a ngah belte tungah ama vangliatna tawh kizui hauhna a theihsak theih nading ahi hi. ²⁴ Tua belte in Judah mite lak pan bek hilo in Gentile‑te lak panin zong hong sapkhiat eite mah hilo i hi hiam? ²⁵ Amah in Hosea Lai Siangtho sungah zong hih bangin a gen hi, “Ka mi a hilote, ‘ka mite’ ka ci dinga, Ka itloh mi zong, ‘ka it mi’ hi ka ci ding hi. ²⁶ Tua ciangin hih bang a hong hi ding hi. ‘Ka mite na hi kei uh hi,’ ka cihna munah, ‘A nungta Pasian tate na hi uh hi,’ ka ci ding hi,” a ci hi. ²⁷ Israel mite tawh kisai in Isaiah zong kiko a, “Israel tate a tamzia uh, Tuipi gei‑a sehnel zah a phak uh hangin, A omlai teng bekin, Hotkhiatna a ngah ding uh hi. ²⁸ Topa in ama thukhenna leitung ah Manlangtak le kicingtak in semkhia ding hi,” a ci hi. ²⁹ Hih thu a beisa huna Isaiah genna tawh a kituak hi. Amah in, “Vantung galkap honpite Topa in eite aa dingin, Suan le khak khat hong sitsak lo hileh Sodom khua mite i bang khinzo dinga, Gomorrah khua mite bangin hong kibawl khinzo ding hi,” a ci hi. ³⁰ Tua ahih leh bang gennawn ding i hi hiam? Dikna thu a delhlo Gentile‑te in upna hanga kingah dikna a ngah uh hi. ³¹ Ahi zongin dikna thukham a delh Israel mite in tua dikna a ngah kei uh hi. ³² Banghang in ngah lo uh ahi hiam? Upna tawh zong loin thukham zuihna tawh a zon man uh hi a, ³³ “En un, palkhak suangpi ahi, Pukna suangpi khat Zion ah ka koih a, Amah a um mi khempeuh Maizumna a kithuaksak kei ding hi,” ci in Lai Siangtho ah a kigelh mah bangin tua palkhak suangpi a pal kha uh ahi hi.

¹ Sanggamte aw, Israel mite in hotkhiatna a ngah ding uh deihsak mahmah in Pasian tungah thu ka ngetsak hi. ² Pasian aa dingin hanciam mahmah uh hi cih teci ka pang hi. Ahi zongin a hanciamna uh theihna tungah a kinga kei hi. ³ Banghang hiam cihleh Pasian dikna thei lo uh ahih manin amaute dikna bulphuh sawm uh a, Pasian dikna a mang kei uh hi. ⁴ Banghang hiam cihleh a um mi khempeuh in dikna a ngah theih nadingin Khazih in thukham tawpna ahi hi. ⁵ Moses in thukham hangin a piang dikna thu a gelhna ah, “Thukham a zuimi in tua thukham zuihna hangin a nungta ding hi,” a ci hi. ⁶ Ahih hangin upna tawh a kingah dikna in a gen in ah, “Na lungsim sungah, ‘Vantung ah kua kahto ding ahi hiam?’ ci kei in.” (Hih thu in Khazih lasuk ding cihna ahi hi.) ⁷ Ahih keileh, “ ‘A thukpi sungah kua kumsuk ding ahi hiam?’ ci kei in.” (Hih in misite lak pan Khazih lato ding cihna ahi hi.) ⁸ Ahi zongin Lai Siangtho in bangci gen ahi hiam? “Ama thu in note tawh kinai mahmah a, note kamsung le note lungsim sungah a om hi,” a ci hi. Tua thu in kote hong tangko upna thu ahi hi. ⁹ Zeisu in Topa ahi hi ci in na kam tawh pulak a, Pasian in misite lak panin amah thokiksak hi ci in na lungsim sungah na up leh hotkhiatna na ngah ding hi. ¹⁰ Banghang hiam cihleh lungsim a upna in dikna hong ngahsak a, kam tawh pulakna in hotkhiatna a piangsak hi. ¹¹ Lai Siangtho sungah, “Amah a um mi khempeuh in maizumna a kithuaksak kei ding hi,” ci in a kigelh hi. ¹² Banghang hiam cihleh Judah mite le Greek mite a kilamdanna a om kei hi. Topa pen mi khempeuh Topa mah hi a, amah a sam mi khempeuh tungah kicingtak in hehpihna a pia hi. ¹³ Banghang hiam cihleh, “Topa min tawh huhna a ngen mi khempeuh in hotkhiatna a ngah ding uh hi.” ¹⁴ Tua bang ahih leh a uploh mipa uh bangci bangin suang thei ding uh ahi hiam? A thu a zak ngeiloh mipa uh bangci bangin um thei ding uh ahi hiam? A hilh om kei leh bangci bangin za thei ding uh ahi hiam? ¹⁵ A sawl om kei leh bangci bangin hilh thei ding uh ahi hiam? “Nopna hong pia lungdamna thu hong tangko, Lungdamna thu hoih hong puak mite, A khe uh kilawm mahmah hi!” ci in Lai Siangtho sungah a kigelh hi. ¹⁶ Ahih hangin mi khempeuh in lungdamna thu a um kim kei uh hi. Isaiah in, “Topa aw, kote tangkona kua in um ahi hiam?” a ci hi. ¹⁷ Tua bangin upna in thu zakna panin hong piang a, thu zakna in Pasian kammal panin a hong piang hi. ¹⁸ Ahi zongin ken kong cih in ah amaute in za lo uh ahi hiam? A za khinzo taktak uh hi. “Amaute awging, Leitung bup ah kiza khinzo a, Amau thugente leimong dongah kizel khin hi.” ¹⁹ Ahih hangin ken kong cih in ah Israel mite in thei lo uh ahi hiam? A masa pen in Moses in, “Keima mipawl a hilo mite tungtawn in, Note sungah hazatna ka piangsak dinga, A theilo minamte tungtawn in, Note kong hehsak ding hi,” a ci hi. ²⁰ Isaiah in hangtak in a gen inah, “Kei hong zong lote in hong mu uh a, Kei hong kan lote tungah ka kilak hi,” a ci hi. ²¹ Ahih hangin amah in Israel mite tungah, “A thumanglo le A genhak minamte aa dingin Sun thapai in ka khut ka zan den hi,” a ci hi.

¹ Tua ahih leh Pasian in a mite nawlkhin ahi hiam ci in ka dong hi. A nawlkhin peuhmah kei hi! Keimah tektek zong Abraham suan, Benjamin phung sung panin a piang Israel mi ka hi hi. ² Pasian in a theihkholh khitsa a mite a nawlkhin kei hi. Elijah in Pasian tungah Israel mite a khiatna thu Lai Siangtho in a gen theilo na hi uh hiam? ³ Amah in, “Topa aw, amaute in na kamsangte that khin uh a, na biaknataute zong a susia khin uh hi. Kei bek ka omlai a, kei zong thah ding a hong sawmlai uh hi,” a ci hi. ⁴ Tua ciangin Pasian in bangci dawnkik ahi hiam? “Baal milim mai ah kunin a bialo mihing 7,000 kei aa dingin ka sit lai hi,” a ci hi. ⁵ Tuamah bangin tu in zong Pasian in a hehpihna tawh kizui in a teel a omlai mi pawlkhat a om hi. ⁶ Hehpihna hang ahih leh gamtatna hang ahi nawn kei hi. Tua hi kei leh hehpihna pen hehpihna a suak nawn kei hi. Gamtatna hang hi leh hehpihna ahi nawn kei hi. Tua hi kei leh nasepna zong nasepna a suak nawn kei hi. ⁷ Tua ahih leh i gen bang ahi hiam? Israel mite in a zonzon uh a ngah kei uh hi. Pasian teel mite bekin ngah uh a, a dangteng ahih leh a mit uh a taw hi. ⁸ Hih thu Lai Siangtho ah, “Pasian in thu a theitheilo lungsim, Khua a mu theilo mittang, Khua a za theilo bilte, Tuni dongin a neisak hi,” ci in a kigelh hi. ⁹ David in zong, “Amau ankuangte, amaute aa dingin, Thang le tehlop suak henla, A kipalkhakna uh suakin, Thuhkikna suak tahen. ¹⁰ Khua a muh theihloh nadingun, Pasian in a mit uh mialsak henla, A nung uh kulsak den tahen,” a ci hi. ¹¹ Tua ahih leh amaute a puk dingin kipal kha uh ahi hiam ci in ka dong hi. Ahi peuhmah kei hi! Amaute thupalsatna hangin Gentile‑te tungah hotkhiatna tung a, amaute in a een nadingun a piangsak hi. ¹² Tu in amaute pukna in leitung mite hauhna suak a, amaute supna in Gentile‑te aa dingin hauhna suak ahih leh amaute kicinna in bangzahtak in nasia zawlai ding ahi hiam! ¹³ Gentile‑te sawltakpa ka hihna tawh no Gentile‑te tunga kong gen inah, ¹⁴ ka mipihte lungsim sungah lamkhat peuhpeuh tawh eenna piangsak in amaute pawlkhat beek ka hotkhiat theih khak leh ka cih manin ka nasepna a hong thupi gen ka hi hi. ¹⁵ Amaute a kipampaihna hangin leitung mite tawh kilemkikna piangsak ahih leh amaute a kisankikna in sihna pan nuntakna longal thu dang bang hi ding ahi hiam? ¹⁶ Banghang hiam cihleh a gah masa pen a siantho leh a kungpi zong a siangtho hi. A zungpi a siantho leh a hiangte zong a siangtho hi. ¹⁷ A hiangte pawlkhat kisatkhia in tuate tungah gamlak tanluan sing ahi nang hong kipeh a, amaute tawh tanluan zung le tanluan kung panin an hoihte na ngahkhawm hi. ¹⁸ Tua ahih manin tua a hiangte tungah kisathei kha kei in. Ahi zongin na kisaktheih leh nang in a zung pua loin a zungin nang hong pua zaw hi cih phawk in. ¹⁹ “Kei hong kipeh theih nadingin a hiangte kisatkhia hi,” na cinuam kha ding hi. ²⁰ Hi mah hi. Amaute in a up loh manun a kisatkhia hi a, nang na hih leh upna tawh a kip na hih manin kiphasak kei inla lauthawng zaw in. ²¹ Banghang hiam cihleh Pasian in a hiang taktakte nangawn zah lo ahih leh nang zong a hong zah tuan kei ding hi. ²² Tua ahih manin Pasian migitna le a thukhauhna ngaihsun in. A puk mite tungah amah a thukhauh hi. Ahih hangin Pasian migitna sungah na omsuak leh nangma tungah a hong migi ding hi. Tua bang na hih kei leh amah in nang zong a hong satkhia ding hi. ²³ Amaute zong um loin a omsuak kei nak uh leh Pasian in pehkik thei ahih manin a pehkik ding hi. ²⁴ Banghang hiam cihleh Pasian in gamlak tanluan kung pan nang hong satkhia in nangma pianzia tawh kilehbulh in tanluan kungah nang hong peh hi. Tua ahih manin Pasian in tanluan hiang taktak ahi amaute a kung tungah pehkik zaw peuhmah ding hilo ahi hiam? ²⁵ Tua ahih manin sanggamte aw, no ngaihsuttawmna ah pil na kisak khakloh nadingun hih thusim thei lo a na om ding uh ka deih kei hi. Tua in, Gentile‑te kicinna hong tun mateng in Israel mite tungah tawlkhat sung mittawtna a om hi. ²⁶ Israel mite khempeuh in hotkhiatna a ngah ding uh hi. Lai Siangtho sungah, “Zion khuapi panin Honpa hong pai dinga, Jacob suan sung panin Pasian a uplohna uh A heikhiatsak ding hi. ²⁷ A mawhnate uh ka lakkhiatsak ciangin, Amaute tunga ka bawl ding thuciamna in hih thu mah ahi hi,” ci in a kigelh hi. ²⁸ Amaute in lungdamna thu tawh kisai in note hangin Pasian galte a suak uh hi. Ahih hangin teelna tawh kisai in a pute a pate uh hangin Pasian it mite ahi uh hi. ²⁹ Banghang hiam cihleh Pasian letsong le a sapna pen a kilaih thei kei hi. ³⁰ Banghang hiam cihleh nidang in Pasian thu a manglo note in amaute thumanlohna hangin tu in hehpihna na ngah uh hi. ³¹ Tuamah bangin note ngah hehpihna hangin amaute in hehpihna a ngah theih nadingun tu in amaute zong thumang loin a om uh ahi hi. ³² Banghang hiam cihleh Pasian in mi khempeuh a hehpih theih nadingin thumanlohna sungah amaute khempeuh a khum hi. ³³ Aw! Pasian pilna le a thu theihna thuk in kicing zen mah si ee! Ama thukhenzia theih khit zawh ding hilo a, ama sulnung kankhiat zawh ding hilo hi! ³⁴ Banghang hiam cihleh, “Kua in Topa lungsim thei a, Ahih keileh amah in kua tawh thu kikum ngei ahi hiam?” ³⁵ “Tua ahih keileh Pasian in a thuhkik dingin, Kua in amah pia masa ahi hiam?” ³⁶ Banghang hiam cihleh na khempeuh ama hang leh ama tungtawn in a piang hi a, ama aa ding vive ahi hi. Amah in pahtawina ngah tawntung tahen. Amen.

¹ Tua ahih manin sanggamte aw, Pasian hehpihna hanga kong kut in ah na pumpi uh a hing biakpiakna, a siangtho le Pasian san theih dingin pia un. Hih in note sep dingin a kilawm biakna nasep ahi hi. ² Hih leitung mite gamtat bangin gamta kei unla, na lungsim uh thaksuaksak in na kikhel un. Tua hi leh a hoih, a sanhuai a kicing Pasian deihna bang ahi hiam cih na theitel ding uh hi. ³ Banghang hiam cihleh kei hong kipia hehpihna tungtawn in note khempeuh tunga kong gen in ah no le no ahi ding zahval in na kingaihsun kha kei un. Pasian in mikim tungah a hong piak upna zah tawh kizui in a kilawm a kituak in kingaihsun un. ⁴ Banghang hiam cihleh pumpi tungah na tampi i nei hi. Tua nate a vekpi un a nasep uh a kibang khin kei hi. ⁵ Tuamah bangin eite in mi tampi i hih hangin Khazih sungah pum khat i hi a, eite khat ciatin pumpi nate i hi hi. ⁶ Pasian in eite hong piak hehpihna tawh kizui in letsong a tuamtek i ngahte zatsiam ciat ni. Pasian thu genkhiat theihna i ngah leh upna tawh kituak in thu gen ni. ⁷ Nasepna za i ngah leh i ngah nasep sem ni. Thuhilh theihna a ngah mi in thuhilh nasep sem hen. ⁸ Hanthot theihna a ngah mi in hanthot nasep sem hen. A piakhia mi in cinghtak in pia hen. A makai mi in kuhkaltak in makaih hen. A hehpih thei mi in lungdamtak in hehpihna lak hen. ⁹ Lungsim takpi tawh ki‑it un. Thusia mudah unla, thuhoih lenkip un. ¹⁰ Unau banga ki‑itna tawh khat le khat ki‑it kingai mahmah un. Nang sangin midangte pahtawi zaw in. ¹¹ Nasep thadah loin lawpna lungsim tawh Topa na sem un. ¹² Lametna tawh kipak un. Haksat hun ciangin thuak keikai un. Thungetna ah citak un. ¹³ Mi siangthote kisapnate huh unla, zindo thanuam un. ¹⁴ Hong bawlsiate thupha pia un. Amaute hamsiat loin thupha pia zaw un. ¹⁵ A lungdamte lungdampih unla, a kapte kahpih un. ¹⁶ Khat leh khat na ngaihsutna uh kibangsak un. Kiphasak loin a dinmun uh a niam mite tawh kikhawl zaw un. Kipilsak kei un. ¹⁷ Thusia pen thusia mah tawh thukkik kei un. Mi khempeuh muhna ah thuman in gamtat ding ngaihsun un. ¹⁸ Ahih theih laiteng mi khempeuh tawh na kilem un. ¹⁹ Kong itte aw, phu na kila kei unla, thangpaihna pen Pasian aa hi sak zaw un. Banghang hiam cihleh, “Phulakna in keima aa hi a, keimah in ka thukkik ding hi,” Topa in ci hi ci in Lai Siangtho sungah a kigelh hi. ²⁰ Tua ahih manin, “Na galpa a gilkial leh an pia in. A dangtak leh dawn ding tui pia in. Tua bangin hih leteh a luzang ah mei‑am a koih na hi ding hi.” ²¹ Thusia kizosak kei inla, thusiate thupha tawh zo zaw in.

¹ Kuama peuh in kumpi thuneite thu mang uh hen. Banghang hiam cihleh Pasian piak loh in thuneihna om theilo ahih manin ukna thu a nei mite in Pasian koih ahi uh hi. ² Tua ahih manin ukna thu a nialte in Pasian thu sehna a nial ahi uh hi. Tua banga a nial mite in thukhenna a thuak ding uh hi. ³ A hoih in a gamtate aa dingin gam ukte kihtak nading thu om lo hi. A hoihlo a gamtate aa dingin a kihtakhuai ahi hi. Hong uk mite kihtakna panin na suakta nuam hiam? Na suahtak nop leh gamtat hoih lecin amaute in nang hong pahtawi ding uh hi. ⁴ Banghang hiam cihleh amah in nang hoih nadingin Pasian nasem ahi hi. Ahi zongin a hoihlo in na gamtat leh amah kihta in. Banghang hiam cihleh amah in namsau a mawk tawi hilo a, gamtat hoihlo mite tungah daanpia dingin Pasian nasem ahi hi. ⁵ Tua ahih manin ukna a nei mite a heh ding launa bek tawh hilo in lungsim a theihtawmna tawh ukna thu na man ding uh ahi hi. ⁶ Amaute in tua nasep a sem Pasian nasemte ahih manun phiangsiah zong na piak ding uh ahi hi. ⁷ Tua ahih manin mi khempeuh amaute ngah dinga kilawm bangin pia un. Siah ngah dinga kilawmte siah na pia unla, mangmu ngah dinga kilawmte mangmu na pia un. Kihtak dingte kihta unla, pahtawi dingte pahtawi un. ⁸ Khat le khat ki‑itna longal kuamah leii na kibasak kei un. Banghang hiam cihleh midang a itte in thukham a zui khin ahi hi. ⁹ “Angkawm kei in,” “Mi that kei in,” “Guta kei in,” “A maanlo teci pang kei in,” “Deihgawh kei in,” cih thupiakte a kipan a dang thupiak khempeuh, “Nang le nang na ki‑it bangin na vengpa na it in,” cih thupiakna in a huam khin hi. ¹⁰ Ki‑itna in a vengpa siat nading bangmah a bawl kei hi. Tua ahih manin ki‑itna in thukham kicinna ahi hi. ¹¹ Tuhun in bang hun hiam cih thei unla, ihmutna panin khanlawh hun mahmah ta ahihlam thei un. Banghang hiam cihleh i upcil lai sangin eite hotkhiatna tu in hong nai zawta hi. ¹² Zan hun saupi bei khinzo a, khua hong vak dekta hi. Tua ahih manin khuamial gamtatnate paikhia in khuavak galvante silh ni. ¹³ Sun hun sunga om bangin a kilawm a kituak in gamta ni. Uangtatna, zunek zukhamna, hukna lanna, kitot kiselna le kihazatnate omsak kei ni. ¹⁴ Ahih hangin ci le sa lunggulhnate tangtungsak dingin bangmah lunggel kei unla, Topa Zeisu Khazih na silh un.

¹ Upna thu ah a thanem mi na sang unla, upkhialh nading thute ah tua mi tawh na kikum kei un. ² Mi pawlkhat in an khat peuhpeuh nek theih ding hi ci in um uh a, pawlkhatte in ahih leh upna thu ah thanem uh ahih manin gah le teh bek a ne uh hi. ³ A ne mi in a nelo mi neumuh kei henla, a nelo mi in a ne mi tungah thukhen kei hen. Banghang hiam cihleh Pasian in a ne mi zong a sang veve hi. ⁴ Midang khat nasempa tungah thu a khen dingin nang kua na hi hiam? Amah a puk nading leh a kip nading ama topa tawh a kisai hi. A taktak in amah a kipsak theipa in Pasian ahih manin a kipsak ding hi. ⁵ Mi khatin ni khat sangin nidang khat thupi zaw hi ci in a ngaihsun hi. A dang khatin ni khempeuh a kibang hi ci in a ngaihsun hi. Mi khempeuh in ama lungsim ah limtak in theitel hen. ⁶ Ni a tang mi in Topa hangin a tang hi a, a tanglo mi in zong Topa hang mahin a tang lo ahi hi. A ne mi in Pasian tungah lungdam ko ahih manin Topa hangin a ne hi. A nelo mi in zong Pasian tungah lungdam ko ahih manin Topa hang mahin a ne kei hi. ⁷ Banghang hiam cihleh eite khat beek ei aa dingin a nungta i om kei a, ei aa dingin a si zong kuamah i om kei hi. ⁸ I nuntak leh Topa aa dingin a nungta i hi a, i sih leh zong Topa aa dingin a si i hi hi. Tua ahih manin i nungta a, i si zongin Topa aa mah i hi hi. ⁹ Banghang hiam cihleh Khazih in a si mite le a nungta mite Topa, a suah nadingin si a, thokik in a nungta hi. ¹⁰ Banghang in na sanggampa tungah thukhen na hi hiam? Ahih keileh banghang in na sanggampa neumuh na hi hiam? Banghang hiam cihleh eite khempeuh Khazih thukhenna tokhom mai ah i ding ciat ding hi. ¹¹ Lai Siangtho ah, “Keimah nungta ka hih manin Ka mai ah mi khempeuh khukdin ding uh a, Leii khempeuh in Pasian tungah Kiciamna a nei ding uh hi, Topa in ci hi,” ci in a kigelh hi. ¹² Tua ahih manin eite khempeuh in eima vaitek Pasian tungah i piaciat ding hi. ¹³ Tua ahih manin khat le khat thu kikhen nawn kei ni. Na sanggampa in a palkhak theih ding le amah a puksak thei ding lampi ah bangmah na koih loh nadingin na lungsim ah khentat zaw in. ¹⁴ Topa Zeisu sunga om mi khat ka hihna tawh kong gen in ah an khempeuh amau thu in a sianglo cih bang a om kei hi ci in ka tel mahmah hi. Ahi zongin mi khatin na khatpeuh a sianglo in a ngaihsut leh ama aa dingin a sianglo ahi hi. ¹⁵ Na annekna tawh na sanggam khat a lungsim na natsak leh itna tawh a gamta na hi nawn kei hi. Ama tangin Khazih in a sihlawh mi khat, na annekna tawh siasak kei in. ¹⁶ Tua ahih manin na hoihna a kigensiat ding phal kei in. ¹⁷ Banghang hiam cihleh Pasian kumpigam in nek le dawn thute hilo a, Kha Siangtho sunga dikna, lungmuanna le lungdamnate ahi hi. ¹⁸ Hih thute zui a Khazih na a sem mite in Pasian santak le mite in zong a thukimpih uh ahi hi. ¹⁹ Tua ahih manin kilem nading thute le khat le khat i kilamkip theih nading thute delh ni. ²⁰ Nek le dawn thu tawh Pasian nasepna siasak kei ni. An khempeuh a siangtho hi. Ahi zongin mi khat puk nadingin an a ne mi in a khial ahi hi. ²¹ Na sanggam khat a puksak, a hehsak, a thanemsak ding ahih leh sa nekna, lenggahzu dawnna, a dang na khat peuhpeuh ahi zongin na nek loh ding hoih hi. ²² Hih thute tawh kisai in na upna nangmah le Pasian kikal thu hi sak in. Amah in maan a sak thu hangin amah le amah a kimawhsaklo mi in mihampha ahi hi. ²³ Ahih hangin lunghei neipi in a nek leh amah le amah a kikhialsak hi a, upna tawh a ne hilo hi. Banghang hiam cihleh upna tawh a hilo na khat peuhpeuh hihna in mawhna ahi hi.

¹ Tua ahih manin a thahat eite in eima nopsak bangin om loin a thanem mite zawngkhalnate i puakpih ding ahi hi. ² A kua maciat in i vengte hoih nading le a kilamkip nading uh semin amaute lungkimsak ni. ³ Banghang hiam cihleh Lai Siangtho sungah, “Nang hong zahko mite hong zahkonateng ka tungah hong tu hi,” ci in a kigelh mah bangin Khazih nangawn ama nopsak bangin a om kei hi. ⁴ A beisa huna kigelh thu khempeuh eite hong kithuhilh nadingin a kigelhkhol ahi hi. Hihin Lai Siangtho tungtawn a thuakzawhhatna le hehnepna tawh lametna i neih theih nading ahi hi. ⁵ Tu in thuakzawhhatna le hehnepna Pasian in Khazih Zeisu hangin khat le khat lungsim kituak dingin hong guan tahen. ⁶ Tua bangin lungsim khat, kampau khat tawh Topa Zeisu Khazih ii Pa, Pasian min hong phatsak thei tahen. ⁷ Tua ahih manin Pasian min a than theih nadingin Khazih in eite a hong san mah bangin note zong khat le khat na kisang un. ⁸ Tu in i pu i pate tunga a kamciamsate a kipsak dingin Pasian thumaanna hangin Zeisu Khazih in vunat mite nasempa a hong suahna thu a hong gen ka hi hi. ⁹ Hih in Gentile‑te in hehpihna hangin Pasian a phat theih nading uh ahi hi. Hih in Lai Siangtho sungah, “Hih thu hangin Gentile‑te lakah Na min ka pulak dinga, Na min phatin la ka sa ding hi,” ci a, a kigelhsa thu ahi hi. ¹⁰ Tua banah amah in, “No, Gentile‑te aw, Ama mite tawh lungdam khawm un!” a cikik hi. ¹¹ Tua banah, “No, Gentile‑te khempeuh aw, Topa phat un! No, mi khempeuh aw, Ama min phat un!” a cikik hi. ¹² Tua banah Isaiah in zong, “Jesse panin zung khat hong meng dinga, Gentile‑te a uk dingin Amah hong khangkhia ding hi. Gentile‑te in ama sungah lametna a nei ding uh hi,” a cikik hi. ¹³ Tu in, Kha Siangtho vangliatna hangin tua lametna tawh na kidim nadingun lametna Pasian in note upna tungtawn in kipahna le lungmuanna namkim tawh hong dim tahen. ¹⁴ Tu in ka sanggamte aw, note na hih uh leh, hoihna tawh kidim in thu theihna ah kicing in khat le khat thu a kihilh thei dingin kong muang hi. ¹⁵ Ahi zongin sanggamte aw, Pasian hong piak hehpihna hangin kong phawksak nop thu pawlkhat hangtak in kong gelh hi. ¹⁶ Gentile‑te aa dingin Zeisu Khazih nasempa khat ka suak a, Pasian lungdamna thu ka gen hi. Tua in Gentile‑te Kha Siangtho tawh kisiansuah a, Pasian mai ah a santak biakpiakna a suah theih nading uh ahi hi. ¹⁷ Tua ahih ciangin Pasian tawh kisai in Khazih Zeisu hangin ka kisialh theih nading thu khat ka nei hi. ¹⁸ Banghang hiam cihleh Gentile‑te in Pasian thu a man theih nadingun ka thugente le ka sepnate ah Khazih in kei tungtawn in a sepkhiat khit sate lobuang a dang bangmah ka genngam kei ding hi. ¹⁹ Amah in tua bangin Pasian Kha vangliatna tawh kei tungtawn in limlamdangte le nalamdang lianpite tawh na a sem hi. Tua ahih manin Jerusalem khuapi a kipan Illyricum gam tengah zinin Khazih lungdamna thu cingtak in ka hilh khinzo hi. ²⁰ Midangte phuhsa khuambul tungah ka lam khakloh nadingin Khazih min a kizak ngeinai lohna munte bekah lungdamna thu tangko ding ka tup ahi hi. ²¹ Hih tawh kisai Lai Siangtho sungah, “Ama thu a kihilh ngeinai lohna mite in mu ding uh a, Ama thu a za ngei nailo mite in theitel ding uh hi,” ci in kigelh hi. ²² Hih thu hangin note kianga kong pai ding tam veipi kikhaktan hi. ²³ Ahi zongin tu in hih lamah ka seplohna mun a om nawnloh banah note kong muhnop zong kum tampi sawtzo ahih manin, ²⁴ Spain gam ka zin peuhpeuh ciangin note kiang hong tawnin note tawh a kimu dingin ka kilamen hi. Note tawh tawmvei sung i omkhop khit ciangin note huhna tawh a zinsuak thei dingin zong ka kilamen hi. ²⁵ Ahi zongin tu tadih in Jerusalem khuapi a om misiangthote kiangah nasem dingin ka paiphot ding hi. ²⁶ Banghang hiam cihleh Macedonia gam le Achaia gam mite in Jerusalem khuapi a om misiangthote laka mi cimawhte huhna piak ding a lungkim uh hi. ²⁷ Macedonia gam le Achaia gam mite in amaute tungah leiba nei in kingaihsun uh a, a lungdam mahmah uh hi. Banghang hiam cihleh Gentile‑te in Judah mite in a ngah uh khalam thute sanpih uh ahih manin amaute in zong leitung thute tawh Judah mite a huhkik ding mah uh ahi hi. ²⁸ Tua ahih manin hih huhnate amaute khut sungah bittak in ka ap khit ciangin note kiang hong tawnin Spain gamah ka pai ding hi. ²⁹ Note kiang kong nawk ciangin Khazih lungdamna thupha a dimtak tawh kong tung ding hi cih ka thei hi. ³⁰ Ahi zongin sanggamte aw, Topa Zeisu Khazih le Kha tungtawn a ki‑itna tawh kong thumnop in ah Pasian kiangah kei aa dingin thu hong ngetsak in hong panpih un. ³¹ Judea gama thu‑umlo mite khut sung ka tun loh nading le Jerusalem a misiangthote in ka nasepna a hong san theih nading ahi zongin ³² Pasian deihna a om leh note kiangah lungdamtak in hong pai in note tawh tha thak ka ngahkhop theih nadingin thu hong ngetsak un. ³³ Tu in kilemna Pasian in note khempeuh hong ompih tahen. Amen.

¹ Cenchrea khua‑a pawlpi nasem i sanggamnu Phoebe mi hoih ahihlam kong theisak nuam hi. ² Mi siangthote hih dinga kilawm bangin Topa hangin amah na sang unla, huh ding a kisapna peuhpeuh ah na huh un. Banghang hiam cihleh amah in mi tampi huh a, kei zong a hong huh hi. ³ Khazih Zeisu sunga ka naseppih Priscilla le Aquila‑te na hopihsak un. ⁴ Amaute in ka nuntakna a hut nadingun a ngawng uh a dawh ngamte ahi uh hi. Kei bek hilo in Gentile pawlpite khempeuh zong amau tungah a lungdam uh hi. ⁵ Tuamah bangin amau inn a kikhawm pawlpi mite zong na hopihsak un. Ka it mahmah Epaenetus na hopihsak un. Amah in Achaia gam sungah Khazih aa dingin a gah masa pen ahi hi. ⁶ Kote aa dingin nakpitak in na a sem Mary na hopihsak un. ⁷ Ka mipihte le ka thongkiatpihte ahi Andronicus le Junia‑te zong na hopihsak un. Amaute in sawltakte lakah a min kidawkte hi uh a, kei sangin zong Khazih sungah a om masa zawte ahi uh hi. ⁸ Topa sunga ka it Amplias na hopihsak un. ⁹ Khazih sunga kote naseppih Urbanus le ka it Stachys na hopihsak un. ¹⁰ Pasian in Khazih sunga a sittel le a san khitsa Apelles na hopihsak un. Aristobulus le a innkuanpih teng zong na hopihsak un. ¹¹ Ka mipihpa Herodion na hopihsak un. Topa sunga om Narcissus le a innkuanpih teng zong na hopihsak un. ¹² Topa nasep a hahkat Tryphena le Tryphosa na hopihsak un. Topa nasep a hahkat mahmah ka it Persis zong na hopihsak un. ¹³ Topa sunga teel khitsa Rufus le nu banga ka neih ama nu zong na hopihsak un. ¹⁴ Asyncritus, Phlegon, Hermas, Patrobas, Hermes le amaute tawh a omkhawm sanggamte zong na hopihsak un. ¹⁵ Philologus, Julia, Nereus le a sanggamnu a kipan Olympas le amaute tawh a omkhawm misiangthote khempeuh na hopihsak un. ¹⁶ A siangtho kinapna tawh khat le khat na kihopih un. Khazih pawlpite in note a hong hopih uh hi. ¹⁷ Tu in sanggamte aw, na sansa uh thuhilhna tawh a kilehbulh thute hong hilh a, kikhenna le pukna a piangsak mite thei unla na pelh un, ci in kong hanthawn hi. ¹⁸ Banghang hiam cihleh tua bang mite in i Topa Zeisu Khazih na sem hilo uh a, amaute gilpi aa dingin nasemte ahi uh hi. Kamsiam le kamzol tawh lungsim hoih mite a khem uh hi. ¹⁹ Pasian thu na zuihna uh mun khempeuh ah thang ahih manin note hangin ka lungdam hi. Ahi zongin thu hoihte ah mipilte hi unla, thusiate ah mawhna bang loin na om ding uh kong deih hi. ²⁰ Nopna hong pia Pasian in a sawtlo in Satan tuancil in note khenuai ah a koih ding hi. Eite Topa Zeisu Khazih hong hehpihna thupha in note hong ompih tahen. Amen. ²¹ Ka naseppih Timothy, ka mipih Lucius, Jason le Sosipater‑te in note hong hopih uh hi. ²² Hih laikhak a gelh keimah Tertius in, Topa sunga om note khempeuh kong hopih hi. ²³ Ka zinpa le pawlpi buppi inntekpipa ahi Gaius in note a hong hopih hi. Khuapi sumkempa Erastus le i sanggampa khat mah ahi, Quartus‑te in zong note a hong hopih uh hi. ²⁴ Eite Topa Zeisu Khazih hong hehpihna thupha in note khempeuh hong ompih tahen. Amen. ²⁵ Tu in, kong hilh lungdamna thu, Zeisu Khazih thu tangkona ahi lei piancil a kipan a ki‑iimcip thusim kilakkhiatna tawh kizui in, note a hong kipsak zopa in Pasian ahi hi. ²⁶ Tu in tawntung Pasian thupiakna tawh kamsangte laigelhna tungtawn in minam khempeuh in upna tawh thu a man theih nadingun hih thu ki‑iimcip a hong kilang zo hi. ²⁷ Amah khat bek a pil ahi tua Pasian in Zeisu Khazih tungtawn in minthang tawntung tahen. Amen.