KILAAKNA

KILAAKNA

¹ Hih in Zeisu Khazih kilakna, Pasian in a nasemte tunga a lah dinga amah a piak, a sawtlo in pello a a hong piang ding thute ahi hi. Zeisu Khazih in ama vantungmi sawlin a nasempa John tungah tua thute a lak hi. ² John in Pasian thu, Zeisu Khazih teci panna le a muhsa thu khempeuh teci a pang hi. ³ Hih genkholhna thute a sim a za mi le hih laibu sunga kigelh thute a zui mi in mihampha ahi hi. Banghang hiam cihleh a hun hong nai zo hi. ⁴ Keimah John in Asia gama om pawlpi sagihte lai kong khak hi. A om ngei khin, a om laitak, hong pailai ding pa amah le ama kumpi tokhom mai‑a om Kha sagihte kiang pana hehpihna thupha le lungnopna note tungah hong om tahen. ⁵ Zeisu Khazih in a muanhuai teci, misite lak pana a thokik masapa le leitung kumpite a ukpa ahi hi. Amah in eite hong it in i mawhnate ama sisan tawh hong sawpsiangsak a, ⁶ Pasian le a Pa aa dingin kumpite le siampite a hong suaksakpa ahi hi. Amah in minthanna le vangliatna nei tawntung tahen. Amen. ⁷ En un, meii tung tuangin amah hong pai ding hi. Mittang khempeuh le amah a dawtlum mite in zong mu ding uh a, ama hangin leitung minam khempeuh a kap ding uh hi. Tua bangin piang tahen, Amen. ⁸ Topa in, “A om ngei khin, a om laitak le hong pailai ding, Vanglianpenpa, Alpha le Omegaɠ, a Kipatna le a Tawpna ka hi hi,” a ci hi. ⁹ Keimah John in haksatna, kumpigam, le Zeisu Khazih sikdona ah note tawh a kipawlkhawm na sanggampa uh ka hi hi. Pasian thu le Zeisu Khazih thu teci ka panna hangin Patmos a kici tuikulh ah ka om hi. ¹⁰ Topa Ni in keimah in Kha sungah ka om a, tua laitak in ka nunglam panin pengkul ging tawh a kibang awging lianpi khat ka za hi. ¹¹ Tua awging in, “Keimah in Alpha le Omega, a Masapen le a Nunungpen ka hi hi. Na muh khempeuh laibu sungah gelh inla, Asia gama om pawlpi sagihte ahi Ephesus khua pawlpi, Smyrna khua pawlpi, Pergamos khua pawlpi, Thyatira khua pawlpi, Sardis khua pawlpi, Philadelphia khua pawlpi, le Laodicea khua pawlpi‑te khak in,” a hong ci hi. ¹² Tua ciangin kei a hong hopih awging en dingin ka kihei hi. Tua bangin ka kihei leh kham tawh a kibawl meivak tunna sagih ka mu hi. ¹³ Tua meivak tunna sagihte laizang ah Mihing Tapa tawh a kibang mi khat ka mu hi. Amah in a khepek dong a ban puantualpi silhin a awmah kham awmgak a gak hi. ¹⁴ A lutang le a samte tuumul bangin kang a, vuk bangin pakin a mittangte meikuang tawh a kibang hi. ¹⁵ A khepekte in meikhuk sunga a kihalsiang khin sumngo hoih mahmah tawh kibang a, a awging pen tui tampi luang zaizai bangin a ging hi. ¹⁶ A taklam khutah aksi sagih tawi in a kam sung panin langnih a hiam namsau khat a pusuakkhia hi. A maitang in a tangpha mahmah nitang tawh kibang hi. ¹⁷ Amah ka muh ciangin a si bangin a khe phungah ka puksuk a, ahih hangin amah in ka tungah a taklam khut hong nga in, “Lau kei in, a Masapen le a Nunungpen ka hi hi. ¹⁸ Kei in a nungtapa ka hi hi. Ka sihngei hangin tu in a tawntung in ka nungta hi. Amen. Hadesɠ le Sihna tawhtang zong ka kem hi. ¹⁹ Na muhsa thute, tu laitak a piang thute le tuate khit cianga a hong pianglai ding thute laibu sungah gelh in. ²⁰ Ka taklam khut sunga na muh aksi sagihte le kham tawh kibawl meivak tunna sagihte tawh kisai thusimte in hih bang ahi hi. Aksi sagihte in pawlpi a kem vantungmi sagihte hi in, na muh meivak tunna sagihte in pawlpi sagihte ahi uh hi.

¹ “Ephesus khua pawlpi a kempa tungah hih bangin lai khak in. ‘A taklam khutah aksi sagih tawi in kham tawh kibawl meivak tunna sagihte laizang ah a vak kawikawipa in kong gen inah, ² “Na gamtatna, na hanciamna, na thuakzawhna le mihoihlote na koihkhong lohna kong thei hi. Sawltak hilo napi amau le amau sawltak a kici mite sittel in a zuau genna teng uh na mukhia hi. ³ Kuhkalna le thuakzawhna na nei a, ka min hangin bah loin na hanciamna zong ka thei hi. ⁴ “Ahih hangin nong itna masa nusia khin na hih manin hih thu ah kong mawhsak hi. ⁵ Tua ahih manin na kiatma a na dinmun phawk in. Na mawhna kisikkik inla, a cil lai a na nasepte semkik in. Na kisik kei leh manlangtak in kong pai dinga, na meivak tunna ka hemkhia ding hi. ⁶ Ahih hangin hoihna khat na nei a, tua in ka muhdah Nicolas pawlte gamtatna na muhdahna ahi hi. ⁷ “Kha in pawlpite tunga a gen thu, bil nei mi in za tahen. A gualzo mipa in Pasian Paradise laizang a nuntakna singkung pan a nek theih nading thu ka pia ding hi.” ’ ⁸ “Smyrna khua pawlpi a kempa tungah hih bangin lai khak in. ‘A Masapen le a Nunungpen ahi ka sihngei hangin tu in a nungtapa in kong gen inah, ⁹ “Na gamtatnate, haksatna lianpi na thuaknate le na zawnna ka thei hi. (Ahih hangin na hau hi.) Judah minam a kicih uh hangin Judah mi a hilo Satan pawlte in hong gensiatna zong ka thei hi. ¹⁰ A sawtlo a na thuak dingte lau peuhmah kei in. Note hong ze‑et dingin Dawimangpa in pawlkhat thongah hong khia dinga, ni sawm sung gentheihna na thuak ding uh hi. Sihna na thuak dongin citak in. Tua hi leh nuntakna lukhu kong pia ding hi. ¹¹ “Kha in pawlpite tunga a gen thu, bil nei mi in za tahen. A gualzo mipa in nihvei sihna a thuak peuhmah kei ding hi.” ’ ¹² “Pergamos khua pawlpi a kempa tungah hih bangin lai khak in. ‘Langnih a hiam namsau a tawipa in kong gen inah, ¹³ “Na gamtatna le Satan tokhom a omna muna a teeng na hih lam ka thei hi. Satan a teenna note lakah, keima aa dingin citak in sihna tawh teci a pangpa Antipas a kithah lai nangawn in ka min na lenkip a, kong piak upna zong na nial kei hi. ¹⁴ “Ahi zongin kong mawhsak nading thu tawm ka nei hi. Israel tate in milim biakna sa ne in, numei pasal thangtatna a bawl nadingun Balak tunga thu a hilhpa ahi Balaam thuhilhna a zui mi na om uh hi. ¹⁵ Tua bangin ka muhdah Nicolas pawlte thuhilhna a len mi pawlkhat zong na nei hi. ¹⁶ Na mawhna kisikkik in. Na kisikkik kei leh na kiangah manlangtak in kong pai dinga, ka kam sung panin a pusuak namsau tawh tua mite ka vat ding hi. ¹⁷ “Kha in pawlpite tunga a gen thu, bil neimi in za tahen. A gualzo mipa in a kisel manna pawlkhat a nek theih nadingin ka pia ding hi. Tua ciangin a ngah mi simloh kuamah in a theihloh min thak a kigelhna suangpak zong ka pia ding hi.” ’ ¹⁸ “Thyatira khua pawlpi a kempa tungah hih bangin lai khak in. ‘A mittangte meikuang tawh kibang in a khepekte a kinawt kilkel sumngo tawh a kibang Pasian Tapa in kong gen inah, ¹⁹ “Na gamtatna, na itna, na nasepna, na upna le na thuakzawhnate ka thei hi. A nunung lama na gamtatnate in a masalai sangin hoih zaw hi cih zong ka thei hi. ²⁰ “Ahi zongin, kong mawhsak nading thu tawm ka nei hi. Amah le amah kamsangnu ka hi hi a kici Jezebel na awizam kha hi. Tua nu in ka nasemte khemin numei pasal thangtat ding le milim biakna sa ne dingin a hilh hi. ²¹ Numei pasal a thangtatna a kisikkik nadingin hun ka piak hangin a kisikkik tuan kei hi. ²² Tua ahih manin amah cina in lupna ka ngaksak dinga, amah tawh ang kikawm in mawhna a bawl mite zong a gamtatna uh a kisik kik kei uh leh gimna lianpi ka thuaksak ding hi. ²³ Tua numeinu tate ka thatmang dinga, tua ciangin pawlpi khempeuh in kei pen lungsim tawng a zongtelpa ka hihna a thei ding uh hi. Na gamtatna uh tawh kizui in note khat ciat kong thuk ding hi. ²⁴ “Ahih hangin hih thuhilhna a sanglo Satan thu thukpi a cihte uh a theilo nang le hih Thyatira khua sunga om midangte tungah kong gen in ah note tungah vangik dang kong suan kei ding hi. ²⁵ Tua ahih ciangin kong pai dongin na neihsa teng uh na lenkip un. ²⁶ A gualzo mipa le keima gamtatnate a tawp dongin a zui mi tungah minamte uk nading thuneihna ka pia ding hi. ²⁷ Keimah in ka Pa kiang panin ukna thu ka ngah bangin, ‘Amah in sik ciangkhut tawh minamte uk dinga, Belsekpa belte bangin a kitamzan ding uh hi.’ ²⁸ “Zingsol zong amah ka pia ding hi. ²⁹ “Kha in pawlpite tunga a gen thu, bil nei mi in za tahen.” ’

¹ “Sardis khua pawlpi a kempa tungah hih bangin lai khak in. ‘Pasian kha sagihte le aksi sagihte a neipa in kong gen in ah, “Na gamtatnate ka thei hi. A hing min na puak hangin a si na hihlam ka thei hi. ² Kigingsa in om inla, a si dekdek a kiplai teng tha khauhsak in. Banghang hiam cihleh na gamtatnate Pasian mai ah cingtak zolo hi cih ka mu hi. ³ Tua ahih manin na zaksa le na sansa thute lungngaikik in lenkip inla na mawhna kisik in. Kigingsa in na om kei leh guta bangin kong pai dinga, na kianga kong tun ding hun na thei kei ding hi. ⁴ A puansilh uh a buahbangsaklo mi tawmkha Sardis khua pawlpi sungah na nei hi. Amaute in puanpak silhin kei tawh a kithuah ding uh hi. Banghang hiam cihleh tua bang dingin amaute a kilawm uh hi. ⁵ A gualzo mipa puanpak ka silhsak dinga, a min zong Nuntakna Laibupi sung pan ka phiat ngei kei ding hi. Ka Pa mai le ama vantungmite mai ah ama min ka pulak ding hi. ⁶ “Kha in pawlpite tunga a gen thu, bil nei mi in za tahen.” ’ ⁷ “Philadelphia khua pawlpi a kempa tungah hih bangin lai khak in. ‘ “David tawhtang a kempa, ama honte kuamah in a khak zawhloh, a khakte zong kuamah in a hon zawhloh,” a siangtho a thumanpa in kong gen inah, ⁸ “Na gamtatnate ka thei hi. En in, na mai ah kongvang khat kong honsak a, kuamah in a khak zo kei ding hi. Banghang hiam cihleh thahatna tawmkha na nei a, ka thu mangin ka min na nial kei hi. ⁹ Judah mi hilo napi Judah mi ka hi hi ci a, zuauthu a gen, Satan pawlte kong paisak dinga nang kong itna a theih nadingun na khephung ah kong biasak ding hi. ¹⁰ Banghang hiam cihleh thuak kenkan in ci a, kong thupiakna zui na hih manin leitang tunga teeng mite sittel nadingin leitung bup ah a hong tung ding haksatna hun panin nang kong kem ding hi. ¹¹ En in, kong pai pah ding hi! Na ngah ding pahtawina lukhu kuamah in hong suh loh nadingin na neihsa teng uh lenkip un. ¹² A gualzo mipa ka Pasian biakinnpi khuampi khatin ka bawl dinga, tua mun panin a paikhia nawn kei ding hi. Ama tungah ka Pasian min le ka Pasian khuapi min ka gelh ding hi. Tua khuapi in ka Pasian omna vantung pana hong paisuk Jerusalem Khua Thak ahi hi. Keima min thak zong tua mi tungah ka gelh ding hi. ¹³ “Kha in pawlpite tunga a gen thu, bil nei mi in za tahen.” ’ ¹⁴ “Laodicea khua pawlpi a kempa tungah hih bangin lai khak in. ‘A Muanhuai le a Thuman Teci, Pasian piansak khempeuh a Pankhiapa ahi Amen in kong gen inah, ¹⁵ “Na gamtatnate ka thei hi. Sa lah salo, votlah votlo in na om a, na vot leh votvet, na sat leh sa vet lecin kong deih hi. ¹⁶ Tu in ahih leh sa lah salo, vot lah vot lo, lum milmial bek na hih manin ka kam sung panin kong siakhia ding hi. ¹⁷ Nangmah in, ‘Mihau ka hi a, cithei mahmah ka hih manin bangmah ka kisam kei hi,’ na ci hi. A genthei, a hehpihhuai, a zawng, a mittaw le guaktang a om na hih lam na kithei kei hi. ¹⁸ Tua ahih manin na hauh theih nadingin mei tawh a kihalsiang sa kham, kei kiang pan hong lei in. A zumhuai guaktangpi a na om loh nadingin na silh ding puanpak hong lei inla, khua na muh theih nadingin na mit zong mitza hong nuh in. ¹⁹ Keimah in ka itte khempeuh taii in daan zong ka pia thei hi. Tua ahih manin na lungsim kiciansak inla na mawhna kisik kik in. ²⁰ Ngai in, kongkhak gei ah dingin kong ka kiu hi. Mi khatpeuh in ka aw za a, kong a hong hon leh ama sungah ka lut dinga, amah tawh an nekhawm in amah in zong kei tawh an a nekhawm ding hi. ²¹ Keimah gualzo in ka Pa tawh ama tokhom ah ka tutkhop bangun a gualzo mi zong keimah tawh ka tokhom ah a tutkhop theih nading thu ka pia ding hi. ²² “Kha in pawlpite tunga a gen thu, bil nei mi in za tahen.” ’ ”

¹ Hihteng khit ciangin ka en a, en in, vantung ah kongkhak khat a kihongsa in a om ka mu hi. Ka zak masak awging in kei a hong hopih pengkul ging tawh kibang a, “Hih lamah hong paito in. Hihteng khit ciangin pello in a hong piang ding thute kong lak ding hi,” hong ci hi. ² Tua ciangin thakhat in Kha sungah ka om a, en in, vantung ah kumpi tokhom khat kikoih in tua tungah a tu Khat a om ka mu hi. ³ Tua kumpi tokhom tunga a tupa a mel jasper suangmanpha le sardius suangmanpha tawh a kibang hi. Tokhom kimkot ah sakhi tuihup khat om a, emerald suangmanpha tawh a kibang hi. ⁴ Tua kumpi tokhom kimah tokhom 24 om a, tuate tungah upa 24te tu in a om uh ka mu hi. Amaute in puanpak tualpi silhin kham tawh kibawl kumpi lukhu a khu uh hi. ⁵ Kumpi tokhom panin khuaphialep hong tangkhia a, van nakpi in hong gingin a gamlum henhan hi. Kumpi tokhom mai ah meivak sagih a kuangsa in om a, tuate in Pasian Kha sagihte ahi uh hi. ⁶ Kumpi tokhom mai ah crystal suangmanpha banga a siang limlang tuipi a om hi. Kumpi tokhom laizang le a kimkot ah ganhing li om a, amaute mailam le nunglam ah mittang bekbek a dim hi. ⁷ Ganhing a khatna in humpi nelkai tawh kibang a, a nihna pen bawngno tawh a kibang hi. A thumna ganhing maitang in mihing mai tawh kibang a, a lina pen muvanlai leng tawh kibang hi. ⁸ Tua ganhing lite in kha gukciat nei uh a, a khate uh a kimkot leh a sung lamah mittang bekbek a dim hi. Amaute in sun le zan tatsat loin, “A om ngei khin, a om laitak le hong pailai ding, Vanglianpen Topa Pasian in, Siangtho hi, siangtho hi, siangtho hi!” a ci uh hi. ⁹ Ganhing lite in kumpi tokhom tunga a tu, a nungta tawntungpa tungah minthanna le pahtawina pia in lungdamna a koh sial un, ¹⁰ upa 24te in kumpi tokhom tunga a tupa mai ah boksuk in, a nungta tawntungpa bia uh a, amaute pahtawina lukhute kumpi tokhom mai ah ngasuk in, ¹¹ “Topa aw, minthanna, pahtawina le vangliatna a ngah dingin na kilawm hi. Banghang hiam cihleh na khempeuh nangma piansak hi a, Tuate nangma deih bangin a kipiangsak le nangma deih banga a om ahi hi,” a ci uh hi.

¹ Kumpi tokhom tunga tupa in a taklam khutin a tawi laizial khat ka mu hi. Tua laizial a sunglam le a pualam ah kigelh a, ciaptehna sagih tawh a kiciamteh hi. ² Tua ciangin a thahat vantungmi khat ka mu a, amah in, “Ciaptehnate phelkhia in laizial a hong dingin kua kilawm ahi hiam?” ci in a ngaih mahmah aw tawh a kiko hi. ³ Tua laizial a hong zo ding le a enthei ding mi, leitung leinuai le vantung ah kuamah a om kei hi. ⁴ Tua laizial hongkhia in a sim ding le a en dingin a kilawm kuamah om lo ahih manin nakpi in ka kap hi. ⁵ Tua ciangin upate khat in, “Kap kei in. En in, Judah nam panin a piang, Humpi Nelkai ahi David Zung in tua ciaptehna sagihte phelkhia in tua laizial a hongkhia dingin a gualzo khin hi,” hong ci hi. ⁶ Tua ciangin ka et leh, en in, thahna a thuakngei tawh a kibang Tuuno khat ka mu hi. Tua Tuuno in kumpi tokhom, ganhing lite le upate laizang ah dingin a om hi. Amah in kii sagih le mittang sagih nei a, tuate in leitung buppi ah a kisawlkhia Pasian Kha sagihte ahi uh hi. ⁷ Tua khit ciangin Tuuno hong pai in kumpi tokhom tunga a tupa taklam khuta om laizial a la hi. ⁸ Tu in amah in tua laizial a lak khit ciangin ganhing lite le upa 24te in harp lasakna khat ciat le paknamtui tawh a kidim khamhai khat ciat tawi in Tuuno mai ah a bok uh hi. Tua paknamtuite in misiangthote thungetna ahi hi. ⁹ Amaute in la thak khat sa uh a, “Nang in laizial a la ding le, Ciaptehnate a phelkhia dingin na kilawm hi. Banghang hiam cihleh thahna na thuak ngei zo a, Minam khempeuh, paunam khempeuh, Mi khempeuh le gam khempeuh lak panin, Pasian aa dingin nangma sisan tawh kote nong tan khin hi. ¹⁰ Kote, Pasian aa dingin kumpite le siampite, Hong suaksak zo na hih manin leitung ka uk ding uh hi,” a ci uh hi. ¹¹ Tua khit ciangin ka et leh kumpi tokhom, ganhing lite le upate kimkot a om vantungmite awging ka za hi. Amaute a tultul, a thenthen in om ziahzuah uh hi. ¹² Amaute in, “Thahna a thuak Tuuno in Vangliatna, hauhna, pilna, hatna, Pahtawina, minthanna le Thupha ngah dingin a kilawm hi!” ci in ngaihtak in a kiko uh hi. ¹³ Tua ciangin vantung, leitung, leinuai, tuipi sung le tuate sunga om Pasian piansak khempeuhte awging zong ka za hi. Amaute in, “Kumpi tokhom tunga tupa le Tuuno in Thupha, pahtawina, minthanna, Vangliatna ngah tawntung tahen!” a ci uh hi. ¹⁴ Tua ciangin ganhing lite in zong, “Amen!” a ci uh hi. Upa 24te zong boksuk in a nungta tawntungpa a bia uh hi.

¹ Tu in Tuuno in ciaptehna sagihte lakah khat a hon ka mu hi. Tua ciangin ganhing lite lak a khat in, “Hong pai inla hong en in,” hong cihna vanging tawh a kibang aw khat ka za hi. ² Tua ciangin ka et leh, en in, sakol kang khat ka mu hi. A tunga tuangpa in thalpi khat tawi a, kumpi lukhu khat a kipia hi. Amah in a gualzo le a gualzo lai dingin a kuankhia hi. ³ Tuuno in ciaptehna nihna a hon ciangin ganhing lite a nihna pen in, “Hong pai inla hong en in,” hong cih ka za hi. ⁴ Tua ciangin sakol san mahmah khat hong paikhia hi. Tua sakol tunga tuangpa tungah leitung mite khat le khat a kithah theih nading leitung pan kilemna a lakkhiat theih nading thuneihna a kipia hi. Namsau lianpi khat zong amah a kipia hi. ⁵ Tuuno in ciaptehna thumna a hon ciangin, ganhing thumna in, “Hong pai inla hong en in,” hong cih ka za hi. Ka et leh, en in, sakol vom khat ka mu a, a tunga a tuangpa in tawikhaina khat a tawi hi. ⁶ Tua khit ciangin ganhing lite laizang pana hong gingkhia aw khatin, “Mangbuh haiɠ khatin denariusɠ khat man a, mangbuhham hai thum in zong denarius khat mah a man hi. Ahi zongin sathau le lenggahzute susia kei in,” a cih ka za hi. ⁷ Tuuno in ciaptehna lina a hon ciangin ganhing a lina in, “Hong pai inla hong en in,” hong cihna awging ka za hi. ⁸ Tua ciangin ka et leh, en in, sakol puang khat ka mu hi. A tunga tuangpa min Sihna hi a, Hadesɠ in a zui hi. Tua nihte in leitung mi sehli suah sehkhat namsau tawh, kialpi tawh, sihna tawh, gamsate tawh thah theih nading thu a ngah uh hi. ⁹ Tuuno in ciaptehna ngana a hon ciangin amaute in a letkip uh Pasian thu le a teci panna hangun thahna a thuak mite khate biaknatau nuai ah a om ka mu hi. ¹⁰ Amaute aw lianpi tawh kiko uh a, “A siangtho, a thuman Topa aw, leitung a a teeng mite tungah thu khen loin kote sisan phula loin bang tanvei sawtlai ding na hi hiam?” a ci uh hi. ¹¹ Tua ciangin amaute puantual kang khat ciat kisilhsak a, amaute mah bangin thahna a thuak lai ding na a sepkhoppihte uh le a sanggamte uh a kim khit dong, tawlkhat sung a ngaklai nadingun a kigen hi. ¹² Tuuno in ciaptehna gukna a hon ciangin ka en a, en in, nakpitak in zin a ling hi. Ni in samul tawh a kigan puan bangin vom a, kha zong sisan tawh a kibang hi. ¹³ Huihpi in theikung a mut cianga a sanghte a pulhkhiat bangin vana aksite lei ah a kia uh hi. ¹⁴ Tua khit ciangin laizial kizial bangin vantung kizialkhia a, mualte le tuikulh khempeuh zong a kikhinkhia uh hi. ¹⁵ Leitung kumpite, miliante, mihaute, galkap mangteɠ, mi thahatte, sila le sila a hilo a suakta mi khempeuh leihawm sung le mualtung a suanghawmte sungah a bu uh hi. ¹⁶ Amaute in mualte le suangte kiangah, “Kote tungah hong cim un. Kumpi tokhom tunga tupa maitang ka muh khakloh nading uh ahi zongin Tuuno hehna ka thuak loh nading uh ahi zongin hong vukmang un! ¹⁷ Banghang hiam cihleh ama hehna ni lianpi hong tungzo ahih manin kua in thuakzo ding ahi hiam?” a ci uh hi.

¹ Hihteng khit ciangin leitung, tui tung le singkung khat peuhpeuh tungah huih a nun loh nadingin leitung huihmong lite lenin leitung kiuli‑a a ding vantungmi lite ka mu hi. ² Tua khit ciangin a nungta Pasian na ciaptehna a tawi, a dang vantungmi khat nisuahna lampan hong kahto ka mu hi. Amah nakpitak kiko in leitung le tuipite suksiat theih nading thu a ngah vantungmi lite a gal hopih hi. ³ Amah in amaute kiangah, “Eite Pasian na a semte taltang ah ciaptehna ka khet khit mateng un leitung, tuipi le singkungte susia nai kei un,” a ci hi. ⁴ Ciaptehna a kikhen mite a phazah ka za a, Israel suan beh khempeuh lak panin mi 144,000 ahi hi. Tuate in, ⁵ Judah beh panin 12,000, Reuben beh panin 12,000, Gad beh panin 12,000, ⁶ Asher beh panin 12,000, Naphtali beh panin 12,000, Manasseh beh panin 12,000, ⁷ Simeon beh panin 12,000, Levi beh panin 12,000, Issachar beh panin 12,000, ⁸ Zebulun beh panin 12,000, Joseph beh panin 12,000, Benjamin beh panin 12,000‑te tungah ciaptehna a kikhen hi. ⁹ Hihteng khit ciangin ka et leh, en in, sim zawhloh ding zahin a tam mihonpi ka mu hi. Amaute gam tuamtuam, beh tuamtuam, minam tuamtuam le paunam tuamtuam pan ahi uh hi. Kumpi tokhom le Tuuno mai ah ding uh a, puanpak tualpi silhin nisuh hiang a tawi uh hi. ¹⁰ Aw lianpi tawh amaute kiko uh a, “Hotkhiatna in kumpi tokhom tunga a tu, eite Pasian le Tuuno aa ahi hi!” a ci uh hi. ¹¹ Tua khit ciangin kumpi tokhom, upate le ganhing lite kimkot ah a ding vantungmi khempeuh, kumpi tokhom mai ah bokin Pasian a bia uh hi. ¹² Amaute in, “Amen! Eite Pasian tungah Phatna, minthanna, pilna, lungdamkohna, pahtawina, Vangliatna le thahatnate om tawntung tahen. Amen,” a ci uh hi. ¹³ Tua ciangin upate khat in, “Puanpak tualpi tawh a kizem hualai a mite kuate hi a, koi pana hong pai uh ahi hiam?” ci in hong dong hi. ¹⁴ Tua ciangin kei zong, “Sia aw, nang na thei hi,” ka ci hi. Tua ciangin amah in, “Gimna lianpi sung panin a hong pai mite ahi uh a, a puan uh Tuuno sisan tawh sawpin a paksak mite ahi uh hi. ¹⁵ Tua ahih manin Pasian tokhom mai ah omin ama biakinnpi sungah sun le zanin amah a bia mite ahi uh hi. Kumpi tokhom tunga a tupa zong amaute tawh a teengkhawm ding hi. ¹⁶ Amaute gilkial ngei nawnlo ding uh a, a dangtak ngei nawn kei ding uh hi. Nitang in amaute kap kha ngei nawnlo dinga, a sa na khatpeuh zong a thuak ngei nawn kei ding uh hi. ¹⁷ Banghang hiam cihleh kumpi tokhom laizang a Tuuno in tuu bangin amaute cing dinga, nuntakna tuinak ah amaute a kha ding hi. Pasian in amaute mit panin khitui khempeuh a nulsak ding hi,” hong ci hi.

¹ Tuuno in ciaptehna sagihna a phel ciangin vantung ah nailang sung bang a dai khipkhep hi. ² Pasian mai‑a a ding vantungmi sagihte zong ka mu a, amaute tungah pengkul sagih a kipia hi. ³ Tua khit ciangin vantungmi a dang khat hong pai in biaknatau ah hong ding hi. Amah in kham tawh kibawl paknamtui halna kuang khat a tawi hi. Ama tungah paknamtui tampi a kipia hi. Tuate le misiangthote thungetnate kumpi tokhom mai‑a om kham tawh kibawl biaknatau ah a piakkhop ding ahi hi. ⁴ Tua paknamtui khu in misiangthote thungetna tawh vantungmi khut panin Pasian mai ah a kahto hi. ⁵ Tua khit ciangin vantungmi in paknamtui halna kuang la in, a sungah biaknatau pana mei a dimin a luah khit ciangin, leitung ah a lawnsuk hi. Tua ciangin gamlumna hong om a, van hong gingin khua hong phia a, zin a ling hi. ⁶ Tua ciangin pengkul sagih a tawi vantungmi sagihte in a pengkul uh mut dingin a kithawi uh hi. ⁷ A khatna vantungmi in a pengkul a mut ciangin sisan tawh a kihel gialpi le meikuangte leitung ah a kiasuk hi. Singkung sehthum suah sehkhat le lopa hing khempeuh a kangtum hi. ⁸ A nihna vantungmi in a pengkul a mut ciangin mual lianpi kuang zuahzuah tawh a kibang na khat tuipi sungah kilawnkhiasuk a, tuipi sehthum suah sehkhat sisan a suak hi. ⁹ Tuipi sunga om nuntakna a nei khempeuh sehthum suah sehkhat si uh a, tembaw zong sehthum suah sehkhat a kisia hi. ¹⁰ A thumna vantungmi in a pengkul a mut ciangin meilah kuang tawh a kibang aksi lianpi khat vantung pan hong kiasuk a, gunpite le tuinakte sehthum suah sehkhat tungah a kia hi. ¹¹ Tua aksi a min Gamsai ahi hi. Tui sehthum suah sehkhat gamsai tui suak a, kha mahmah ahih manin a dawn mi tampi a si uh hi. ¹² A lina vantungmi in a pengkul a mut ciangin ni sehthum suah sehkhat, kha sehthum suah sehkhat, aksi sehthum suah sehkhat su kha a, tuate sehthum suah sehkhat a mial hi. Sun hun sehthum suah sehkhat tang nawnlo a, zan hun zong tuamah bang ahi hi. ¹³ Tua khit ciangin ka et leh, van laizang ah a leng vantungmi khat ka mu hi. Amah in aw lianpi tawh kiko a, “Vantungmi thumte in a mutlai ding uh pengkulte hangin leitung mite tungah gimna, gimna, gimna a tung ding hi!” a ci hi.

¹ A ngana vantungmi in a pengkul a mut ciangin vantung pan leitung ah aksi khat hong kiasuk ka mu hi. Taw neilo kuahawmpi tawhtang tua vantungmi a kipia hi. ² Amah in taw neilo kuahawmpi a hon ciangin meiphualpi pana meikhu suak bangin tua sung panin meikhu a hong pusuakto hi. Tua kuahawmpi pana hong pusuak meikhu hangin ni le huih a mial hi. ³ Tua ciangin tua meikhu sung panin kauphete leitung ah hong pusuakkhia uh hi. Tua kauphete in thahatna nei uh a, leitung a om aikam thahatna tawh a kibang hi. ⁴ Amaute in lei a po lopate, lohingte le singkungte susia loin, amaute taltang ah Pasian ciaptehna a neilo mite suksiat nading thu a ngah uh hi. ⁵ Amaute in tua mite that loin kha nga sung bawlsiat theih nading thu a ngah uh hi. Amaute bawlsiatna pen aikam in mi a deh cianga a nat bangin a na hi. ⁶ Tua hun ciangin mite in sih theih nading a zon uh hangin a mu zo kei ding uh hi. Amaute a sihnop mahmah uh hangin sihna in amaute kiang panin a taikhia ding hi. ⁷ Tua kauphete lim le melin galsim dinga kithawi sakolte tawh kibang hi. Kham tawh a kibang lukhu khu uh a, a maitang uh mihing maitang tawh kibang hi. ⁸ A sam uh numeite sam tawh kibang a, a ha uh humpi nelkai ha tawh kibang hi. ⁹ Sik awmdal tawh a kibang awmdal bulh uh a, amaute kha zapna gingin galsim dinga a tai henhan sakolleng honpi ging tawh kibang hi. ¹⁰ A mei uh aikam mei tawh kibang a, a sungah gu a om hi. Amaute in kha nga sung mihingte bawlsiat theih nading thu a ngah uh hi. ¹¹ Taw neilo kuahawmpi a uk vantungmi in amaute kumpipa ahi hi. Ama min Hebrew pau in Abaddon kici a, Greek pau in Apollyon ahi hi. ¹² Gimna khatna a beizo hi. En in, hihteng khit ciangin gimna nih hong tung lai ding hi. ¹³ Tua khit ciangin a gukna vantungmi in a pengkul a mut ciangin kii li a nei Pasian mai‑a om kham biaknatau panin a hong gingkhia aw khat ka za hi. ¹⁴ Tua aw in pengkul a tawi a gukna vantungmi kiangah, “Euphrates gunpi‑a a kikhih vantungmi lite khahkhia in,” a ci hi. ¹⁵ Tua ciangin leitung mi sehthum suah sehkhat a thah nading uh a kum, a kha, a ni, a nai bek ngakin kigingsa a om tua vantungmi lite a khahkhia hi. ¹⁶ Tu in, sakol galkap honpi a phazah hong kigen ka za a, awn 200 ahi hi. ¹⁷ Sakolte le sakol tunga tuangte ka muhzia hih bang ahi hi. Sakol tunga tuangte in a sanciip, a dumciip le kaat banga a naipak awmdalte a bulh uh hi. Tua sakolte a lutang uh humpi nelkai lutang tawh kibang a, a kam sung panun meikuang, meikhu le kaat khute a pusuak hi. ¹⁸ Amaute kam sung panin a pusuak hih gimna thumte ahi meikuang, meikhu le kaat khute in leitungmi sehthum suah sehkhat a sisak hi. ¹⁹ Banghang hiam cihleh amaute kam sung le a mei sungah thahatna a om hi. A mei un gul bangin lutang nei a, tua lutang tawh mi a liamsak uh hi. ²⁰ Ahih hangin hih gimnate in a thah khakloh a omlai mite in amau khut tawh a bawlsa uh nate panin a kisikkik kei uh hi. Dawigilote le khua a mu theilo, khua a za theilo, lam a pai theilo kham, ngun, sumngo, sing, le suang milimte a biak uh zong a kisikkik tuan kei uh hi. ²¹ Mi a thahna uh, dawithu a zatna uh, numei pasal a thangtatna uh le a guktaknate uh zong a kisikkik tuan kei uh hi.

¹ Meiipi in tuamin vantung pan a hong kumsuk a thahat vantungmi khat zong ka mu hi. A lu tungah sakhi tuihup khat om a, a maitang ni tawh kibang in a khete mei khuampite tawh a kibang hi. ² Amah in a khut sungah laibu neu khat lemsa in a tawi hi. A taklam khe tuipi tungah nga in a veilam khe leitung ah a nga hi. ³ Humpi nelkai hawk bangin aw lianpi tawh kiko a, a kiko ciangin vanging sagihte gingin thu a gen uh hi. ⁴ Tu in vanging sagihte in a gen uh thute lai tawh gelh ka sawm leh vantung panin aw khat in, “Vanging sagihte thugente gelh kei inla iim in,” hong cih ka za hi. ⁵ Tuipi le leitang tunga a ding, ka muhsa vantungmi in vantung lamah a khut lamto in, ⁶ vantung le a sunga om nate, leitung le a sunga om nate, tuipi le a sunga om nate a bawl, a nungta tawntungpa min tawh kiciam a, “Hong zekai nawn peuhmah lo ding hi. ⁷ A sagihna vantungmi in pengkul mut dingin a kithawi laitak in, Pasian in ama nasem kamsangte tunga a gensa lungdamna thu tawh kipawl ama thusim a tangtungsak ding hi,” a ci hi. ⁸ Tua khit ciangin vantung panin a hong ging ka zaksa aw in hong hopihkik a, “Va pai inla, tuipi tung le leitunga a ding vantungmi khut sunga om a kizalsa laibu neu va la in,” hong ci hi. ⁹ Tua ciangin vantungmi kiangah va pai in, “Laibu neu hong pia in,” ka ci hi. Amah in, “La inla ne in. Na kam sungah khuaizu bangin khum dinga, na gil sungah a kha ding hi,” hong ci hi. ¹⁰ Tua khit ciangin vantungmi khut sunga laibu neu la in ka nek leh ka kam sungah khuaizu bangin khum a, ahi zongin ka nek khit phetin ka gil sungah a kha hi. ¹¹ Tua ciangin amah in, “Minam kim, gam tuamtuam, paunam kim le kumpite tawh kisai na genkhia lai ding hi,” hong ci hi.

¹ Tua khit ciangin vantungmi in tehna ciang tawh a kibang pumpeng tawn khat hong pia hi. A din kawmin hong gen in ah, “Pai in Pasian biakinnpi le biaknatau teh inla, tua muna Pasian a bia mite zong va sim in. ² Ahih hangin biakinnpi pualam huang pen Gentile‑te aa dinga kipiasa ahih manin teh kei inla hawi in. Amaute in kha 42 sung khuapi siangtho a tuancil ding uh hi. ³ Tua ciangin ka teci nihte vangliatna ka pia dinga, ippipuan silhin ni 1,260 sung kamsang in thu a gen ding uh hi.” ⁴ Hih mi nihte in leitung Pasian mai‑a a ding, tanluan kung nih le meivak tunna nihte ahi uh hi. ⁵ Mi khatpeuh in amaute suksiat a sawm leh a kam sung panun meikuang pusuakkhia in a galte uh a kangtum ding hi. Amaute a susia nuam mi khatpeuh a om leh tua bangin thahna a thuak ding hi. ⁶ Amaute in kamsang a thu a gen hun sungin guah a zuk loh nadingin vantung khakcip theih nading vangliatna a nei uh hi. Tua banah tui sisan suahsak theih nading le a ut hunhun un gimna nam tuamtuam tawh leitung suksiat theih nading vangliatna zong a nei uh hi. ⁷ Amaute in teci a pan khit uh ciangin taw neilo kuahawmpi sung pan a hong paikhia sapi in amaute do in zo dinga, a that ding hi. ⁸ A luanghawm uh khuapi lian sunga lampi tungah a kisial ding hi. Tua khuapi in kha thu tawh kisai in Sodom le Egypt hi a, i Topa a kikhailupna mun zong ahi hi. ⁹ Tua ciangin minam kim, behnam kim, paunam kim le gam tuamtuam pana mi khempeuhte in ni thum le a lang sung amaute luang en ding uh a, hanah vui ding a phal kei ding uh hi. ¹⁰ Hih kamsang nihte in leitung mite bawlsia uh ahih manin amaute sihna hangin leitung mite kipak ding uh a, lungdam in khat le khat letsong a kikhak ding uh hi. ¹¹ Tu in ni thum le a lang khit ciangin Pasian in nuntakna huu amaute guan dinga, a khe uh tawh a dingto ding uh hi. Amau a mu mite a lau mahmah ding uh hi. ¹² Tua ciangin amaute in vantung panin, “Hih lamah hong paito un,” a ci aw lianpi khat za uh a, a galte muh tangpi in vantung ah kahto in, meii lakah a tumto ding uh hi. ¹³ Tua hun sungin nakpitak zinling a, khuapi sehsawm suah sehkhat a cim hi. Tua zinling in mi 7,000 that a, a nungta lai mite lau mahmah in vantung Pasian min a phat uh hi. ¹⁴ Gimna nihna a beizo hi. En in, gimna thumna a manlang in hong tung ding hi. ¹⁵ Tua ciangin a sagihna vantungmi in ama pengkul a mut ciangin vantung panin aw ngaih mahmah khat hong ging a, “Hih leitung gamte in i Topa le ama Khazih gam suak khinzo a, amah in a tawntung in a uk ding hi!” a ci hi. ¹⁶ Tua ciangin Pasian mai‑a kumpi tokhomte tunga a tu upa 24te boksuk in Pasian bia uh a, ¹⁷ “A om ngei khin, a om laitak le hong pailai ding, Vanglianpen Topa Pasian aw, Nang tungah lungdam kong ko uh hi. Banghang hiam cihleh na vangliatna lianpi zangin na ukta hi. ¹⁸ Minam tuamtuamte heh uh ahih manin Nang na lungso ta hi. A sisa mite tungah thu na khen ding hun hong tungzo a, Na nasem ahi kamsangte, na misiangthote, Nangma min a zahtak a neu a lian, Amau thaman na piak ding hun le, Leitung a susia mite na suksiat ding hun, Hong tungzo hi,” a ci uh hi. ¹⁹ Tua khit ciangin vantung a om Pasian biakinnpi hong kihong a, ama biakinnpi sungah ama thuciamna singkuang a kimu hi. Tua khit ciangin khuaphia in, gamlum henhan a, vanging in gialpi kia a, zin a ling hi.

¹ Tu in vantung ah lim lianpi khat hong kilang a, numei khatin ni silh in a khe tawh khapi sik a, aksi sawm le nihte tawh a kizem lukhu khat a khu hi. ² Tua numei in naupaai a, nausuak nuam ahih manin nasa in a kiko hi. ³ Lim dang khat zong vantung ah hong kilang a, en in, lutang sagih le kii sawm a nei gulpisan khat ahi hi. Tua lutangte tungah kumpi lukhu sagih a om hi. ⁴ Tua gulpi in a mei tawh aksi sehthum suah sehkhat vatkhia in leitung ah a lawnsuk hi. Nau a suakkuan numei mai ah tua gulpi dingin nau a suahlian leh naungek a valhtum pah dingin kigingsa in a om hi. ⁵ Tua numei in minam khempeuh sik ciangkhut tawh a uk ding ta pasal khat a nei hi. Tua a tapa pen Pasian le ama kumpi tokhom ah a kilato hi. ⁶ Tua ciangin tua numei in Pasian bawlkholhsa gamlak mun khatah tai a, tualai ah amaute in amah an a vak theih nadingun ni 1,260 sung a kikem hi. ⁷ Tua ciangin vantung ah gal kidona om a, Michael le ama pawl vantungmite in gulpi a do uh hi. Tua ciangin gulpi le a pawlte in zong a lehdo uh hi. ⁸ Ahih hangin gulpi le ama pawlte in lel uh ahih manin vantung ah amaute om nading mun a om kei hi. ⁹ Tua ahih manin Dawimangpa le Satan a kici, leitung buppi a khem tanglai gulpi, a lian mahmah gulpi pen kilawnkhia hi. Leitung ah amah kikhiasuk a, a pawlte zong amah tawh kikhiasuk hi. ¹⁰ Tua ciangin vantung ah a ngaih mahmah aw khat ka za a, tua aw in, “Tu in, i Pasian hotkhiatna, ama hatna, ama ukna, ama Khazih thuneihna hong tungzo hi. Banghang hiam cihleh i Pasian mai ah sun le zanin i sanggamte a mawhsakpa a kikhiasuk zo hi. ¹¹ Amaute in Tuuno sisan le a teci panna uh tawh Satan zo uh a, a si ngam zah dongin a nuntakna uh a it kei uh hi. ¹² Tua ahih manin vantung le a sunga teengte aw, lungdam un! Leitung le tuipi tunga teengte aw, gimna na thuak ding uh hi! Banghang hiam cihleh note kiangah Dawimangpa hong tuaksuk hi. Amah in hun tomcik bek neilai ahihlam thei ahih manin lungsosa in a hong tuaksuk ahi hi,” a ci hi. ¹³ Tu in gulpi in amah leitung ah kikhiasuk zo hi cih a theih ciangin tapa a nei numei a bawlsia hi. ¹⁴ Ahih hangin tua numei ama om nading mun gamlak ah a len theih nadingin a lian mahmah muvanlai kha nih a kipia hi. Gulpi sukkhak theihlohna tua munah numeinu hun khat, hun nih le hun lang sung a kikem hi. ¹⁵ Tua ciangin gulpi in tua numei a taimang dingin a kam sung panin tua nu nungah tuikhang bangin tui a luangsak hi. ¹⁶ Ahih hangin leitang in numei huh a, leitang kikak in gulpi kam sung panin a luangkhia tua tuikhang a valhmang hi. ¹⁷ Tua ciangin numei tungah gulpi heh mahmah a, a omlai numei suan le khakte a sim dingin a kuankhia hi. Tua mite in Pasian thupiakte le Zeisu Khazih teci panna a zui mite ahi uh hi.

¹ Tua ciangin tuipi gei sehnel tungah ka dinga, tuipi sung pan hong paikhiato sapi khat ka mu hi. Tua sapi in lutang sagih le kii sawm nei a, a kiite tungah kumpi lukhu sawm khu in a lutangte tungah Pasian kosiatna min a om hi. ² Tu in ka muh tua sapi in kamkei tawh kibang a, a khete vompi khe tawh kibang in a kam pen humpi nelkai kam tawh a kibang hi. Gulpi in ama vangliatna, a kumpi tokhom, le ama thuneihna lianpi tua sapi a pia hi. ³ A lutangte khat pen sihpih ding zah a a liam khin bangin ka mu hi. Ahih hangin tu in sihzawh nading tua a liamma dam khin ahih manin leitung buppi in lamdangsa in tua sapi nung a zui uh hi. ⁴ Tua ciangin amaute in tua sapi tunga thuneihna a pia gulpi a bia uh hi. Sapi zong bia uh a, “Sapi tawh a kibang kua om ahi hiam? Amah a do zo ding kua om ahi hiam?” a ci uh hi. ⁵ Tua sapi tungah kiphatsakna kampau nading le kosiat nading kam khat kipia in, a thuneihna a zat hun ding kha 42 sung kipia hi. ⁶ Tua ciangin sapi in Pasian, ama min, ama biakbuuk le vantung a a teengte ahi zongin a kosia hi. ⁷ Misiangthote do in a zawh nadingin ama tungah thuneihna a kipia hi. Minam khempeuh, pau khempeuh le gam khempeuh zong a uk theih nading thuneihna a kipia hi. ⁸ Leitung piancil a thahna a thuak Tuuno Nuntakna Laibupi sunga min a kigelh lo, leitunga a teeng mi khempeuh in tua sapi a bia ding uh hi. ⁹ Bil nei mi in hih thu za tahen. ¹⁰ Mi khatpeuh salin a kaite sal mahin kikai dinga, namsau tawh mi a thatte namsau mah tawh kithatkik ding hi. Hih thu ah misiangte in upna le thuakzawhna a neih ding uh kisam hi. ¹¹ Tua khit ciangin leisung pana hong paikhiato a dang sapi khat ka mu hi. Tua sapi in tuuno kii tawh a kibang kii nih nei a, gulpi bangin kam a pau hi. ¹² Amah in a khatna sapi muhna ah tua sapi thuneihna khempeuh zangin leitung le leitang tunga a teeng mi khempeuh tua sapi a biasak hi. Tua sapi in a liamma a damkik sapi pen ahi hi. ¹³ Tua sapi in a lian mahmah na lamdangte bawl a, mite muhin van panin leitung ah meikuang a kiasak hi. ¹⁴ Amah in sapi mai‑a ama lah theih ding a ngah na lamdangte tawh leitunga a teeng mite khem a, tua mite tungah sapi lim a bawl nadingun zong a sawl hi. Tua sapi in namsau tawh a liam khit hangin tu in a nungta lai pen ahi hi. ¹⁵ Amah in tua sapi lim, nuntakna huu a piak theih nadingin vangliatna a ngah hi. Tua bangin sapi lim pauthei dinga, tua sapi lim a bialo khempeuh thah theih nading thu a ngah hi. ¹⁶ A neu a lian, a zawng a hau, sila le silalote a kipan mi khempeuh, a taklam khut, ahih keileh a taltang ah ciaptehna khat a neisak ding hi. ¹⁷ Tua hi a, ciaptehna, sapi min le ama min nambat a neilo peuhmah in bangmah lei theilo in zuak theilo ding uh hi. ¹⁸ Hih thu ah pilna a kisam hi. A ngaihsun thei mi in sapi nambat sim tahen. Hih in mihing nambat hi a, 666 ahi hi.

¹ Tua ciangin ka et leh, en in, Zion Mual tunga a ding Tuuno ka mu hi. A taltang tungah a Pa min a kigelh mi 144,000te zong tua Tuuno tawh a dingkhawm uh hi. ² Tuipi ging le a ngaih mahmah vanging tawh a kibang aw khat vantung ah a ging ka za hi. Harp lasakna tum in la a sa mite awging zong ka za hi. ³ Amaute in la thak tawh a kibang la khat kumpi tokhom, ganhing lite le upate mai ah a sa uh hi. Leitung panin a kitankhia 144,000te simloh kuamah in tua la a sa thei kei uh hi. ⁴ Tuate in numei tawh a thangtatlo misiangte hi uh a, Tuuno paina peuhpeuh ah a zui kawikawite, mihingte lak pan a kitankhiate, Pasian le Tuuno aa dingin a gah masate ahi uh hi. ⁵ Amaute kamsung panin zuauthu gingkhia ngeilo hi. Banghang hiam cihleh amaute in Pasian tokhom mai ah kawkban nading khat beek a neilote ahi uh hi. ⁶ Tua ciangin van laizang a a leng kawikawi, a dang vantungmi khat ka mu hi. Amah in leitunga a teeng gam khempeuh, minam kim, paunam kim le mi khempeuh tungah tawntung lungdamna thu a tangko ding ahi hi. ⁷ Amah in, “Pasian thukhenna hun hong tungzo hi. Tua ahih manin Pasian kihta unla amah phat un. Vantung, leitung, tuipi le tuinakte a bawlpa bia un,” ci in a kiko hi. ⁸ Tua ciangin a dang vantungmi khatin zui a, “Tua khuapi in ama angkawmna hangin hehna lenggahzu minam khempeuh dawnsak ahih manin a lian Babylon khuapi a pukzo hi, a pukzo hi,” a ci hi. ⁹ Tua khit ciangin a thumna vantungmi in amaute zui in aw lianpi tawh kiko a, “Mi khatpeuh in sapi le ama lim a bia, a taltang ah, ahih keileh a khutah sapi ciaptehna a ngah leh, ¹⁰ hai sunga kisung Pasian hehna, khauh theihtawp in a khauh, ama hehna lenggahzu amah kidawnsak ding hi. A siangtho vantungmite mai le Tuuno mai ah kaat le meikuang tawh amah in bawlsiatna a thuak ding hi. ¹¹ Sapi le ama lim bia a, ama min ciaptehna a ngah mite in sun le zan tawlngak hun neilo ding uh a, amaute a kibawlsiatna meikhu a tawntung in a khu den ding hi,” a ci hi. ¹² Hihlai ah Pasian thupiakte zui a, Zeisu upna a lenkip misiangte in a thuak zawh keikai ding uh kisam hi. ¹³ Tua ciangin vantung panin awging khatin ka kiangah, “ ‘Tu‑a kipan, Topa sunga a si mite mihampha ahi uh hi,’ ci in gelh in,” a hong ci hi. Kha in zong, “Hi mah hi, tua mite in a nasep gimna panin tawlnga ta ding uh a, amau nasepte in amaute a zui ding hi,” a ci hi. ¹⁴ Tua ciangin ka khuadak leh, en in, meiingo khat ka mu a, tua meii tungah Mihing Tapa tawh a kibang mi khat a tu hi. Amah in kham lukhu khat khu a, a hiam mahmah phiaukawi khat a tawi hi. ¹⁵ Tua ciangin a dang vantungmi khat biakinnpi sung pan hong pusuak a, meiipi tunga tupa kiangah, “Leitung ante min khin ta a, anlak ding hun hong tungzo ahih manin na phiaukawi khia inla at in,” ci in aw lianpi tawh kiko in a gen hi. ¹⁶ Tua ciangin meiipi tunga tupa in leitung ah a phiaukawi a khiat leh, leitung ante atsa a suak hi. ¹⁷ Tua ciangin vantung a om biakinnpi panin a dang vantungmi khat a hong paikhia leuleu hi. Amah in zong a hiam mahmah phiaukawi khat a tawi hi. ¹⁸ Tua ciangin meikuang tunga thu a nei a dang vantungmi khat biaknatau panin hong paikhia a, a hiam mahmah phiaukawi a tawipa kiangah, “Leitung a lenggahte min khin ahih manin a hiam na phiaukawi khia inla, leitung lenggah bawkte khawm in,” ci in aw lianpi tawh a kiko hi. ¹⁹ Tua ciangin vantungmi in a phiaukawi leitung ah khiasuk in leitung a lenggah teng khawm a, Pasian hehna lenggahcilna phualpi ah a lawn hi. ²⁰ Tua lenggahte khuapi pualam a om lenggahcilna phualpi sungah a kicil hi. Tua pana a luangkhia sisan in sakol kamkaih ciang banin tai 200 dong a luang hi.

¹ Tua ciangin a lian mahmah le a lamdang mahmah nalamdang khat vantung ah ka mu hi. Tua in a nunung pen gimna nam sagihte a tawi vantungmi sagihte ahi hi. Tua gimnate in Pasian hehna a tawpkhakna ahi hi. ² Tua ciangin meikuang tawh a kihel limlang tuipi tawh a kibang khat ka mu hi. Amaute in sapi tungah a gualzote, ama lim tungah a gualzote, ama kiciaptehna le ama min nambatte tungah a gualzo mite hi uh a, Pasian harp lasaknate tawi in tua limlang tuipi gei ah a ding uh hi. ³ Amaute in Pasian nasempa Moses le Tuuno la sa uh a, “Vanglianpen Topa Pasian aw, Na nasepte lianin, Lamdang mahmah hi! Misiangthote Kumpipa aw, Na gamtatnate thutang in a maan hi! ⁴ Topa aw, Kua in nang hong kihta loin, Na min phatlo thei ding ahi hiam? Banghang hiam cihleh, A siangtho nangmah bek na hih manin, Minam khempeuh hong pai in, Na mai ah hong bia ding uh hi. Banghang hiam cihleh, Na thukhennate na kilangkhiasak zo hi,” a ci uh hi. ⁵ Hihteng khit ciangin ka et leh, en in, vantung a teci panna buuk, biakinnpi honsa in a om ka mu hi. ⁶ Biakinnpi sung panin gimna nam sagih a tawi vantungmi sagih hong pusuakkhia a, a pak pha mahmah saihadial puan silhin kham kawnggak tawh a awm a gak uh hi. ⁷ Tua ciangin ganhing lite laka khatin vantungmi sagihte khamhai khat ciat a pia hi. Tua haite sungah a nungta tawntung Pasian lungsona a dimtak in a om hi. ⁸ Pasian minthanna le ama vangliatna hangin biakinnpi sungah meikhu a dim hi. Tua hi a, vantungmi sagihte tawi gimna nam sagihte a kibuak khit masiah biakinnpi sungah kuamah a lut thei kei hi.

¹ Tua ciangin biakinnpi panin vantungmi sagihte kiangah, “Pai unla, Pasian hehna haite leitung ah va bua un,” ci in aw lianpi khat tawh a gen ka za hi. ² Tua ciangin a khatna vantungmi pai in ama hai leitung ah a bua hi. Tua ciangin sapi ciaptehna a nei mite le ama lim a bia mite tungah a nasia mahmah a kihhuai meima a piang hi. ³ A nihna vantungmi in tuipi tungah a hai a buak ciangin tuipi pen misite si tawh a kibang sisan suak a, tuipi sunga om nuntakna a nei khempeuh a si uh hi. ⁴ A thumna vantungmi in gunte le tuinakte tungah a hai a buak ciangin tui khempeuh sisan a suak hi. ⁵ Tua ciangin tui a uk vantungmi in, “A om laitak, a om ngei khin le, hong pailai ding, Topa aw, Hih bangin thu khen na hih manin, Nang na dik hi. ⁶ Amaute in misiangte le kamsangte sisan luangsak uh ahih manin, Amaute dawn dingin sisan na pia hi. Banghang hiam cihleh, sisan a dawn ding bek mah in, Amaute a kilawm uh hi,” ci in a gen ka za hi. ⁷ Biaknatau panin zong a dang awging khatin, “Vanglianpen Topa Pasian aw, hi mah hi, na thukhennate thuman in a dik hi,” a cih ka za hi. ⁸ A lina vantungmi in ama hai ni tungah bua a, tua ciangin ni in mihingte meikuang tawh hal theih nading thuneihna a nei hi. ⁹ Tua meikuang salua mahmah ahih manin mihingte kanggawp a, amaute in tua gimnate tunga thunei Pasian min a kosia uh hi. Amaute kisik nuamlo in Pasian zong a pahtawi kei uh hi. ¹⁰ A ngana vantungmi in sapi tokhom tungah a hai a buak ciangin, sapi gam sung khempeuh ah khua a mial hi. Amaute in nasalua in a kha uh a pet uh hi. ¹¹ A meimate uh nasalua uh ahih manin vantung Pasian kosia uh a, amaute gamtatnate a kisik kik tuan kei uh hi. ¹² A gukna vantungmi in Euphrates gunpi tungah ama hai a buak ciangin nisuahna lam kumpite hong pai nading lampi a kihon nadingin tua gunpi a kang hi. ¹³ Tua khit ciangin gulpi kam sung, sapi kam sung le kamsang zuaupa kam sung panin uiphuk tawh a kibang dawigilo thum a hong pusuakkhia ka mu hi. ¹⁴ Tua dawigilote in nalamdang a bawlthei kha gilote ahi uh hi. Tua dawite in leitung bupa om kumpite khempeuh kiangah va pai uh a, Vanglianpenpa ahi Pasian ni lianpi ni‑a galsim dingin gal kidona phual ah hong pai nadingun a va kaikhawm uh hi. ¹⁵ “En un, guta bangin kong pai ding hi. Guaktang in om a, maizumna a thuak loh nadingun kigingsa a puansilhsa in a om mi in mihampha ahi hi.” ¹⁶ Amaute in Hebrew pau in Armageddon a kici munah kumpite a kaikhawm uh hi. ¹⁷ A sagihna vantungmi in ama hai huih lakah a buak ciangin vantung biakinnpi a om kumpi tokhom panin aw lianpi khat hong gingkhia a, “Kiman khinzo hi!” a ci hi. ¹⁸ Tua ciangin gamlumna hong om a, khua hong phia in van zong ging a, zin nakpi in a ling hi. Leitung ah mihing a om zawh tua zah a a khauh le a nasia zinling a om ngei kei hi. ¹⁹ Tu in a lian mahmah khuapi phelthum kisuah a, minamte khuapite zong a cim hi. Tua ciangin Pasian in a lian mahmah Babylon mangngilh lo a, a lauhuai mahmah ama hehna lenggahzu a dawnsak hi. ²⁰ Tua ciangin tuikulh khempeuh lengmang a, mualte zong a kimu nawn kei hi. ²¹ Tua ciangin talentɠ khat bang a gik gialpite van panin mihingte tungah kia a, tua gialpi hanga gimna nasialua ahih manin mite in Pasian a kosia uh hi.

¹ Tua ciangin hai sagih a tawi vantungmi sagihte khat ka kiangah hong pai in hong hopih a, “Hihlai ah hong pai in. Tuipi tunga a tu a paktat mahmah numei kizuaknu tunga Pasian thukhenna kong lak ding hi. ² Leitung kumpite in tua numei KILAALNA tawh thangtat uh a, leitung a a teeng mite in tua nu thangtatna lenggahzu a kham uh hi,” a hong ci hi. ³ Tua ciangin amah in Kha tawh gamlak ah kei hong paipih hi. Tua ciangin lutang sagih le kii sawm a nei sapi san tungah a tuang numei khat ka mu hi. Tua sapi pum tungah Pasian kosiatna min a dimtak in a om hi. ⁴ Tua numei in a dupsan le a ausan puante silh a, kham, suangmanpha le kepsuangmanphate tawh a kizem hi. A khut ah khamhai khat tawi a, tua sungah ama bawl a kihhuai le numei pasal mawhna ninte a dimin a om hi. ⁵ A taltang tungah min khat kigelh a, tua min in, A KISEL THUSIM, A LIAN BABYLON, NUMEI KIZUAKTE NU LE, LEITUNG A OM A KIHHUAI NATE NU, ahi hi. ⁶ Tua numei in misiangthote sisan le Zeisu hanga thahna a thuak mite sisan dawnin a om ka muh ciangin lamdang ka sa hi. ⁷ Ahih hangin vantungmi in, “Banghang in lamdangsa na hi hiam? Hih numeinu tawh kisai thusim le lutang sagih le kii sawm a nei tua numeinu tuanna sapi tawh kisai thusim kong hilh ding hi. ⁸ Na muh sapi in a om khinsa, ahi zongin tu laitak a a omlo, taw neilo kuahawmpi panin a hong paikhiato ding le suksiatna a thuak ding pen ahi hi. Leitung piancil a kipan Nuntakna Laibupi sungah min kigelh lo, leitung a teeng mite in tua a om ngeizo, tu laitak a a omlo, a hong omkik ding tua sapi a muh uh ciangin lamdang a sa mahmah ding uh hi. ⁹ “Hih thu ah lungpilna kisam hi. Lutang sagih in numeinu tutna mual sagihte ahi hi. ¹⁰ Kumpi sagih zong hi a, kumpi nga bei khin in kumpi khat a om laitak ahi hi. A dang kumpi khat a hong piang nai kei hi. A hong pian ciangin tawlkhat sung bek a kip ding hi. ¹¹ A om ngeizo, tu laitak a a omlo sapi in a giatna kumpi zong hi a, kumpi sagihte lakah khat ahi hi. Amah in suksiatna a thuak ding hi. ¹² “Na muh kii sawmte in kumpigam a ngah nailo kumpi sawmte ahi hi. Amaute in sapi tawh kumpi suakkhawm ding uh a, nai khat sung thuneihna a ngahkhawm ding uh hi. ¹³ Tua kumpite a ngimna uh kibang dinga, sapi tungah amaute vangliatna le thuneihna a ap ding uh hi. ¹⁴ Tua kumpite in Tuuno tawh kido ding uh a, ahi zongin Tuuno in amaute a zo ding hi. Banghang hiam cihleh Tuuno in tote Topa, kumpite Kumpipa ahi hi. Amah tawh a omkhawm mite in a kisamte, a kiteelte le mi citakte ahi uh hi,” a hong ci hi. ¹⁵ Tua ciangin vantungmi in kei kiangah, “A kizuak numei tutna ahi na muh tuite in minam kim, mihonpi, gam khempeuh le paunam kimte ahi uh hi. ¹⁶ Sapi lu tunga na muh kii sawmte in a kizuak numei mudah ding uh a, hawmsuaksak in a guaktang in a koih ding uh hi. A sa ne in meikuang tawh a hal ding uh hi. ¹⁷ Banghang hiam cihleh Pasian gensa thute a tangtun khit mateng in ama ngimna a tangtun nadingin Pasian in amaute lungsim sungah guan a, kumpite lungsim kipumkhat in sapi khut sungah amau kumpigam a ap ding uh hi. ¹⁸ Na muh numei in leitung kumpite a uk, a lian khuapi ahi hi,” a hong ci hi.

¹ Hihteng khit ciangin vantung panin a hong kumsuk vantungmi a dang khat ka mu hi. Amah in thuneihna lianpi nei a, ama vangin leitung a tan hi. ² Amah in nakpi in aw lianpi tawh kiko a, “A lian Babylon khuapi a cimzo hi, a cimzo hi! Dawigilote teenna, a kihhuai kha khempeuh a kikhumna thonginn, a kihhuai le a muhdahhuai vasate a kikhumna mun a suakzo hi. ³ Banghang hiam cihleh ama angkawmna hangin hehna lenggahzu minam khempeuh in a kham uh hi. Leitung kumpite in amah tawh angkawm uh a, leitung a sumbawlte in zong ama noptat luatna teng a hauhlawh uh hi,” a ci hi. ⁴ Tua ciangin vantung panin awging dang khat ka za hi. Tua aw in, “Ka mite aw, ama mawhna bawlna kihel kha loin, ama thuak gimnate na thuak khakloh nadingun ama kiang panin hong paikhia un. ⁵ Banghang hiam cihleh ama mawhna in vantung dong tung khin a, ama tatsiatna teng Pasian in a ciamteh zo hi. ⁶ Amah in note a hong bawl bangin ama tungah bawl un. Ama gamtatna tawh kizui in a zah nih in thukkik unla, ama tawi hai sungah a zah nih in a khauh in helsak un. ⁷ Amah le amah a kipahtawina zah le a noptatna zahin bawlsiatna le gentheihna pia un. Banghang hiam cihleh a lungsim sungah, ‘Meigongnu hilo in kumpinu ka hi a, gentheihna ka phu kha kei ding hi,’ a ci hi. ⁸ Tua ahih manin ni khat thu in gimna thuak dinga, sihna, kahna le gilkialna a thuak ding hi. Ama tunga thu a khen Topa Pasian thahat ahih manin meikuang tawh amah a haltum ding hi. ⁹ “Tua numei tawh mawh in a noptat leitung kumpite in amah a kihalna meikhu a muh uh ciangin tamlo in a kap ding uh hi. ¹⁰ Tua numei a kibawlsiatna hangin lau ding uh a, a gamlapi panin, ‘Tazen aw, tazen aw, a vanglian Babylon khuapi aw! Nai khat sungin na kisiatna hong tungzen maw,’ ci in a kiko ding uh hi. ¹¹ “Leitung sumbawlte vante kuamah in lei nawnlo ahih manin amaute in khitui luangin tua khuapi a kah ding uh hi. ¹² Sumbawlte zuak vante in kham le ngun, suangmanpha le kepsuangmanpha, puanpak le puan dupsan, naipuan le puansan, sing manpha nam khempeuh, saiha tawh a kibawl van nam khempeuh, sing manphapente tawh a kibawl van nam khempeuh, sumngo le sik, suangpak tawh a kibawl van nam khempeuh, ¹³ thaksing le paknamtui, sathau namtui le libanos paknamtui, lenggahzu le sathau, mangbuhtang le mangbuhnel, tuu, bawng, sakol le sakollengte, mihingte pumpi le khate ahi hi. ¹⁴ Na lunggulh mahmah singgahte in nang hong nusia hi. Na hauhna le na vangneihna zong mangthang khin a, tuate na mu kha ngei nawn kei ding hi. ¹⁵ Hih nate zuak in tua numei hanga mihau a suak sumbawlte in tua khuapi a kibawlsiatna hangin lau in a gal panin tamlo in kap in a humham ding uh hi. ¹⁶ Amaute in, ‘Tazen aw, tazen aw, puanpak, puan dupsan le puan ausante silhin, kham, suangmanpha le kepsuangmanpha tawh a kizem a lian khuapi aw! ¹⁷ Hih zahtak a na hauhna teng nai khat sunga beimang tazen maw,’ a ci ding uh hi. “Tembaw hawlte, tembaw tawh khual a zinte, tembaw nasemte le tuipi tungah sumbawl a khualzin khempeuh zong gamlapi ah dingin, ¹⁸ amah a kihalna meikhu a muh uh ciangin, ‘Hih khuapi lian tawh a kibang 18:13 libanos paknamtui: Greek ah “libanos” kici a, zatui leh biakpiakna a kizang khawm paknamtui nam khat ahi hi. khuapi om ahi hiam?’ ci in a kiko uh hi. ¹⁹ Tua ciangin amaute lutung ah leivui kibuak in, ‘Tazen aw, tazen aw, ama hauhna tawh tembaw a neite khempeuh mihau a suaksak a lian khuapi! Nai khat sung bekin na hawmsuak tazen hi,’ ci in kapin humham in a kiko uh hi. ²⁰ “Tua ciangin Pasian in tua numeinu tungah phu hong laksak khin ahih manin vantung le a siangtho sawltakte a kipan kamsangte aw, tua numei hangin lungdam un!” a ci hi. ²¹ Tua ciangin a thahat vantungmi khatin a lian mahmah an gawina suang tawh a kibang suangtum khat la in tuipi sungah khiasuk a, “A lian Babylon khuapi, hih bangin kikhia dinga, a kimukik ngei nawn kei ding hi. ²² Na sungah harp tawh la a sate, tumtheih tuamtuam a tumte, tamngai tumte le pengkul a mutte awging a kiza ngei nawn kei ding hi. Khutsiam mi khat beek kimu ngei nawnlo dinga, an sukna sum ging zong a kiza nawn kei ding hi. ²³ Na sungah meivak kivak ngei nawnlo dinga, mopipa awging le mothaknu awging zong a kiza nawn kei ding hi. Banghang hiam cihleh na sumbawlpihte leitung miliante hi a, dawi aisanna tawh minam khempeuh na khem hi. ²⁴ Kamsangte, misiangthote le leitunga thahna a thuak khempeuh sisan zong hih khuapi sungah a kimu hi,” a ci hi.

¹ Hihteng khit ciangin vantung ah a ngaih mahmah mihonpi awging khat ka za a, tua aw in, “Hallelujah! Hotkhiatna, minthanna, pahtawina le vangliatna in Topa eite Pasian aa ahi hi! ² Banghang hiam cihleh numei pasal mawhna tawh leitung a susia a paktat mahmah numei kizuaknu tungah thu a khen zo hi. Ama thukhennate thuman in dika, Pasian nasemte sisan a luansakna hangin tua numei tungah phu a lazo hi,” a ci hi. ³ Tua ciangin amaute in, “Hallelujah! Tua numei a kihalna meikhu, a khu tawntung hi!” a cikik uh hi. ⁴ Tua ciangin upa 24te le ganhing lite boksuk in kumpi tokhom tunga a tu Pasian bia uh a, “Amen! Hallelujah!” a ci uh hi. ⁵ Tua khit ciangin kumpi tokhom panin aw khatin, “Amah a kihta a nasemte le a neu a lian khempeuh aw, i Pasian phat un!” a ci hi. ⁶ Tua khit ciangin mihonpi awging tawh a kibang tui tampi luang zuahzuah awging tawh a kibang le a ngaih mahmah vanging tawh a kibang awging khat ka za hi. Tua aw in, “Hallelujah! Banghang hiam cihleh Vanglianpen Topa Pasian a maangta hi! ⁷ Lungdam kipak in amah phat ni. Banghang hiam cihleh Tuuno zipi hun hong tungta a, a zi zong kigingsa in a omzo hi,” a ci hi. ⁸ A siangtho le a pak pha mahmah puankang Tuuno zi silh dingin a kipia hi. Banghang hiam cihleh puanpak in misiangthote gamtat hoihna ahi hi. ⁹ Tua ciangin vantungmi in, “ ‘Tuuno mopawi sim dinga sapna a ngah mite mihampha ahi uh hi!’ ci in gelh in,” hong ci hi. Tua banah amah in, “Hih thute Pasian hong gen taktak ahi hi,” a hong ci hi. ¹⁰ Tua ciangin amah bia dingin a khe phungah ka boksuk hi. Ahih hangin amah in, “Hong bia kei in! Kei pen Zeisu teci panna a lenkip na sanggamte le nangmah banga nasem khat ka hi hi. Pasian bia in! Kamsangte thugente in Zeisu thu teci panna ahi hi,” a hong ci hi. ¹¹ Tu in vantung hong kihong a, en in, sakol a kang khat ka mu hi. Tua sakol tunga tuangpa min in Muanhuai le Thuman ahi hi. Amah in thuman tawh thukhen in thuman tawh gal a do hi. ¹² A mittangte meikuang tawh kibang a, kumpi lukhu tampi a khu hi. Amah longal kuamah in a theihloh min khat ama tungah a kigelh hi. ¹³ Amah in sisan sunga a kidiahsa puantualpi silhin, ama min pen Pasian Thu ahi hi. ¹⁴ Vantung galkap honpite in zong sakol tung tuangin amah a zui uh hi. Amaute in a siangtho, a kang, puanpak a silh uh hi. ¹⁵ Tu in tua pa kam sung panin minamte a susia dingin a hiam mahmah namsau khat a pusuakkhia hi. Amah in sik ciangkhut tawh minamte a uk ding hi. Vanglianpen Pasian hehna lenggahcilna phual ah amah in lenggah a cil hi. ¹⁶ A puantualpi tung le a phei tungah, KUMPITE KUMPIPA LE TOTE TOPA, ci in min a kigelh hi. ¹⁷ Tua ciangin ni sungah dingin a om vantungmi khat ka mu hi. Amah in vana leng vasa khempeuh kiangah, “A lian Pasian nitak an a ne dingin hong kikhawm un. ¹⁸ Kumpite, galkap mangteɠ, mi thahatte, sakolte le sakol tung tuangte, sila le sila lote a kipan a neu a lian le mi khempeuhte sa hong ne un,” ci in aw lianpi tawh a kiko hi. ¹⁹ Tua ciangin sapi, leitung kumpite le amaute galkap honpite in sakol tunga tuangpa le ama galkap honpite sim dingin a kikaihkhop uh ka mu hi. ²⁰ Tua ciangin sapi le amah tawh a kithuah kamsang zuaupa a kiman hi. Hih kamsang zuaupa in sapi muhna ah nalamdangte bawl in sapi ciaptehna a sang ama lim a bia mite a khempa ahi hi. Amaute gel kaat le meilipi sungah a hingtang in a kikhiasuk hi. ²¹ A omlai teng ahih leh sakol tunga tuangpa in ama kamsung panin a pusuakkhia namsau tawh a that hi. Vasate khempeuh in amaute sa gilvahtak in a ne uh hi.

¹ Tua ciangin vantung panin a hong kumsuk vantungmi khat ka mu hi. Amah in taw neilo kuahawmpi tawhtang le sikkhau lianpi khat a tawi hi. ² Tua vantungmi in tanglai gulpi manin kum 1,000 sung a hencip hi. Tua gulpi in Dawimangpa hi a, Satan zong a kici hi. ³ Vantungmi in taw neilo kuahawmpi sungah amah khiasuk in kuahawmpi a kalh khit ciangin a tungah ciaptehna khat a khetnelh hi. Tua ahih manin kum 1,000 a cin masiah minamte a khem thei nawn kei hi. Ahih hangin kum 1,000 a cin ciangin tawmvei sung a kikhahkhia ding hi. ⁴ Tua ciangin kumpi tokhomte le a tunga tu mite ka mu hi. Amaute in thukhen theih nading thu a ngah uh hi. Zeisu thu teci panna le Pasian thu hanga ngawng tanna a thuak mite khate zong ka mu hi. Amaute in sapi hi ta leh ama lim hi ta leh bia loin amaute taltang ah ahi a, amaute khutah ahi zongin sapi ciaptehna a neilo mite ahi uh hi. Amaute nungta in Khazih tawh kum 1,000 sung a maangkhawm uh hi. ⁵ Ahih hangin misi dangte ahih leh kum 1,000 a cin mateng in a nungtakik nai kei uh hi. Hih in thawhkikna masa ahi hi. ⁶ Thawhkikna masa sunga a kihel mite in a siangtho le a hampha mite ahi uh hi. Nihvei sihna in tua mite tungah thu a nei kei hi. Ahih hangin amaute in Pasian le Khazih aa ding siampite suakin amah tawh kum 1,000 sung a mangkhawm ding uh hi. ⁷ Tu in kum 1,000 a cin khit ciangin Satan a kikhumna panin a kikhahkhia ding hi. ⁸ Amah kuankhia dinga, Gog le Magog ahi leitung kiuli a om mite khem in galsim dingin tua mite a kaikhawm ding hi. Tua mite tuipi gei‑a sehnel zahin a tam uh hi. ⁹ Amaute leitung maitang dimin hong kuan ding uh a, misiangthote omna, Pasian it khuapi a umcih ding uh hi. Tua ciangin vantung a om Pasian kiang panin meikuang hong kiasuk in amaute a valhtum ding hi. ¹⁰ Sapi le kamsang zuaupa omna kaat le meilipi sungah amaute a khem Dawimangpa zong a kikhiasuk hi. Amaute in sun le zan a tawntung in bawlsiatna a thuak ding uh hi. ¹¹ Tua ciangin a lian a kang tokhom khat le a tunga tupa ka mu hi. Ama mai panin lei le van lengmang in a kimu nawn kei hi. ¹² Tua ciangin a sisa milian mineute Pasian mai ah dingin a om uh ka mu hi. Laibute zong lemsa in om a, Nuntakna Laibupi ahi laibu dang khat zong a kilem hi. A sisa mite in laibute sunga a kigelh amaute gamtatna bangin thukhenna a thuak uh hi. ¹³ Tuipi in ama sunga om misite puak in Sihna le Hadesɠ in zong amaute sunga om misite a puak uh hi. Tua mite in amaute gamtatna tawh kizui in thukhenna a thuak uh hi. ¹⁴ Tua ciangin Sihna le Hadesɠ zong meilipi sungah a kikhiasuk hi. Hih in nihvei sihna ahi hi. ¹⁵ Nuntakna Laibupi sunga min kigelhlo mi peuhmah meilipi sungah a kikhiasuk hi.

¹ Tu in, van thak le lei thak ka mu hi. A masa van le lei beimang khin a, tuipi zong a om nawn kei hi. ² Tua ciangin keimah John in Pasian kiang, vantung panin a hong kumsuk a siangtho Jerusalem Khua Thak ka mu hi. Tua in a pasal aa dingin kizemsa a om mothaknu tawh a kibang hi. ³ Tua ciangin vantung panin aw ngaih mahmah khat ka za a, tua aw in, “En in, Pasian biakbuuk mite lakah om dinga, Pasian zong mite tawh teengkhawm in amaute Pasian ahi ding hi. Amaute in zong Pasian mite ahi ding uh hi. ⁴ Pasian in amaute mit panin a khitui khempeuh uh a nulsak ding hi. A lui na khempeuh bei khinzo ahih manin sihna, dahna, kahna le natna thuakna khempeuh a om nawn kei ding hi,” a ci hi. ⁵ Tua ciangin tokhom tunga tupa in, “En in, na khempeuh a thakin ka bawl zo hi,” a ci hi. Tua banah amah in, “Hih thute thuman le a muanhuai thu ahih manin lai sungah gelh in,” a hong ci hi. ⁶ Tua ciangin amah in, “Kiman khinzo hi! Keimah in Alpha le Omegaɠ, a Kipatna le a Tawpna ka hi hi. A dangtak mi khempeuh, nuntakna tuinak pana tui, manngen loin ka pia ding hi. ⁷ A gualzo mi in na khempeuh luah dinga, ama Pasian ka hi ding hi. Amah zong keima tapa ahi ding hi. ⁸ Ahih hangin a meidawite, a umlote, a kihhuaite, mi a thatte, numei pasal tawh a thangtatte, dawi aisante, milim a biate le zuauthu a gente om nading mun in kaat le meilipi sung ahi hi. Hih in nihvei sihna ahi hi,” a ci hi. ⁹ Tua ciangin a nunung pen gimna nam sagihte a dimtak in a omna hai sagih a tawi vantungmi sagihte lakah khat ka kiangah hong pai in hong hopih a, “Hong pai in. Tuuno zi ahi, a kipi mo kong lak ding hi,” a hong ci hi. ¹⁰ Tua ciangin amah in a lian mahmah mualsangpi khat tungah Kha tawh hong paipih a, Pasian omna vantung panin a hong kumsuk a lian a siangtho Jerusalem khuapi a hong lak hi. ¹¹ Tua khuapi in Pasian vang tawh a tang hi. A manphapen jasper suangmanpha bangin tang a, limlang suang bangin a tedeldel hi. ¹² A kulhpi zong lianin a sang mahmah hi. Kulhpi ah kongpi sawm le nih om a, tua kongpite ah vantungmi sawm le nih a om hi. Tua kongpite tungah Israel suan minam sawm le nihte min a kigelh hi. ¹³ Nisuahna lamah kongpi thum, leilu lamah kongpi thum, leitaw lamah kongpi thum, nitumna lamah kongpi thum a om hi. ¹⁴ Tu in tua khuapi kulhpi in nuaiphah sawm le nih nei a, tuate tungah Tuuno sawltak sawm le nihte min a kigelh hi. ¹⁵ Kei a hong hopih vantungmi in khuapi kongpite le kulhpite a teh nadingin kham tawh kibawl tehna ciang khat a tawi hi. ¹⁶ Khuapi in kiuli nei in a dung a vai a kikim hi. Vantungmi in tua ciang tawh khuapi a teh ciangin tai 1,500 pha a, a dung, a vai le a sanna a kikim hi. ¹⁷ Tua ciangin kulhpi teha, pasalte tong tawh a kikim vantungmi tongin tong 144 a sang hi. ¹⁸ Tua kulhpi in jasper suangmanpha tawh a kibawl ahi hi. Khuapi zong kham taktak hi a, limlang bangin a te deldel hi. ¹⁹ Khuapi kulhpi tawphah zong suangmanpha nam tuamtuam tawh a kizem hi. A masa pen jasper suangmanpha, a nihna sapphire suangmanpha, a thumna chalcedony suangmanpha, a lina emerald suangmanpha, ²⁰ a ngana sardonyx suangmanpha, a gukna sardius suangmanpha, a sagihna chrysolite suangmanpha, a giatna beryl suangmanpha, a kuana topaz suangmanpha, a sawmna chrysoprase suangmanpha, a sawm le khatna jacinth suangmanpha, a sawm le nihna amethyst suangmanpha‑te ahi hi. ²¹ Kongpi sawm le nihte in kepsuang pekpi sawm le nih hi a, kongpi khat ciangin kepsuang pekpi khat tek ahi hi. Khuapi kongzingte kham taktak hi a, a pailet a kimu limlang tawh a kibang hi. ²² Ahi zongin tua khuapi sungah biakinn ka mu kei hi. Banghang hiam cihleh a Vanglianpen Topa Pasian le Tuuno in tua khuapi biakinnpi ahi hi. ²³ Pasian vangin tua khuapi tan a, Tuuno in tua khuapi meivak ahih manin nitang le khatang a kisam kei hi. ²⁴ Hotkhiatna a ngah minamte tua khuapi vangtang sungah vak ding uh a, leitung kumpite in amaute minthanna le a ngah uh pahtawinate tua khuapi ah a paipih ding uh hi. ²⁵ Khuapi kongpite sunlai in kikhak lo ding hi. Zan khuamial zong a om kei ding hi. ²⁶ Amaute in minamte minthanna le a ngah uh pahtawinate tua khuapi ah a paipih ding uh hi. ²⁷ Ahih hangin tua khuapi sungah a siangtholo mi, a kihhuai mi, zuauthu a gen mi khat beek lut theilo dinga, Tuuno Nuntakna Laibupi sunga a min a kigelhte bek a lut thei ding uh hi.

¹ Tua ciangin vantungmi in a siang silsel nuntakna tui a luanna gunpi khat a hong lak hi. Tua tui in Pasian le Tuuno tokhom pana hong luangkhia hi a, limlang suang bangin a tedeldel hi. ² Lam lianpi laizang le gunpang tuakah nuntakna singkung po a, khasim in gah ahih manin sawm le nihvei a gah hi. Tua singkung a tehte zong minamte cidam nading ahi hi. ³ Tua munah hamsiatna a om nawn kei ding hi. Pasian le Tuuno tokhom om dinga, ama nasemte in ama na a sem ding uh hi. ⁴ Amaute in ama maitang mu ding uh a, amaute taltang ah ama min a kigelh ding hi. ⁵ Tua munah zan khuamial a om kei ding hi. Topa Pasian vangin tan ding ahih manin meivak ahi a, nitang ahi zongin a kisam kei ding hi. Amaute in a tawntung in a maang ding uh hi. ⁶ Tua ciangin vantungmi in, “Hih thute thuman in muanhuai hi,” a hong ci hi. A siangtho kamsangte Topa Pasian in ama vantungmi sawlin a sawtlo in a hong piang pelmawh ding hih thute ama nasemte a hilhsak hi. ⁷ Amah in, “En in, kong pai pah ding hi! Hih laibu sunga genkholhna thute a zui mi in mihampha ahi hi,” a hong ci hi. ⁸ Tu in keimah John in hih nate mu in a za pa ka hi hi. Ka muh khit ka zak khit ciangin hih thute a hong lak vantungmi a bia dingin a khe phungah ka boksuk hi. ⁹ Tua ciangin amah in, “Hong bia kei in. Keimah in na sanggam kamsangte, hih laibu sunga a kigen thute a zui mite le nangma naseppihpa ka hi hi. Pasian bia in,” a hong ci hi. ¹⁰ Tua ciangin amah in, “A hun hong naita ahih manin hih laibu sunga a kigelh genkholhna thute iimcip kei in. ¹¹ A thumanlo mi, thumanlo in omsuak tahen. A gamtatsia mi, gamtatsia in omsuak tahen. A dik mi in a dik in omsuak tahen. A siangtho mi in a siangtho in omsuak tahen,” a hong ci hi. ¹² “En in, a manlang in kong pai dinga, mi khempeuh a gamtatna uh tawh kizui in ka piak ding thaman kong pua ding hi. ¹³ Keimah in Alpha le Omegaɠ, a Kipatna le a Tawpna, a Masapen le a Nunungpen ka hi hi,” a ci hi. ¹⁴ Ama thupiakte a zui mite in mihampha ahi uh hi. Amaute in nuntakna singkung pan nek theih nading le kongpite tawnin khuapi sungah lut theih nading thu a ngah ding uh hi. ¹⁵ Ahi zongin, a pualam ah uite, dawi aisante, numei pasal a thangtatte, mithatte, milim biate, zuauthu gen nuam a sate a om uh hi. ¹⁶ “Pawlpite tungah hih thute teci a pang dingin keimah Zeisu in ka vantungmi kong paisak zo hi. Keimah in David Zung le ama Suan a Tang Zingsol ka hi hi,” a ci hi. ¹⁷ Kha le monu in zong, “Hong paita in!” a ci uh hi. A za mi in zong, “Hong paita in!” ci tahen. A dangtak mi hong pai henla, a dawnnuam mi in nuntakna tui man pia loin hong dawn tahen. ¹⁸ Hih laibu sunga genkholhna thu a za mi khempeuh tunga hilhkholh nop in ah, mi khatpeuh in hih thute a behlap leh hih laibu sunga a kigelh gimnate, Pasian in ama tungah a tungsak ding hi. ¹⁹ Mi khatpeuh in hih laibu sunga genkholhna thute a lakkhiat leh Pasian in hih laibu sunga kigen Nuntakna Singkung le khuapi siangtho panin ama ngah ding khempeuh a lakkhiatsak ding hi. ²⁰ Hih thute teci a pangpa in, “Kong paibaih taktak ding hi,” a ci hi. Amen. Tua bang hi tahen. Topa Zeisu aw, hong pai ta in! ²¹ Eite Topa Zeisu Khazih hong hehpihna thupha note khempeuh tungah hong om tahen. Amen.