PHILIPPI-TE
11 Zeisu Khazih sila keimah Paul le Timothy in Philippi khua‑a om Khazih Zeisu sunga misiangtho khempeuh le pawlpi siate le pawlpi upate lai kong khak uh hi. 2 I Pa Pasian le i Topa Zeisu Khazih kiang pan hehpihna thupha le lungnopna note tungah om tahen. 3 Note kong phawksim in ka Pasian tungah lungdam ka ko hi. 4 Thu ka ngetsim in note khempeuh aa dingin lungdamtak in kong ngetsak hi. 5 Banghang hiam cihleh a kipat a kipan tuni dongin lungdamna thu ka hilhna ah nong panpih uh hi. 6 Note sungah nasep hoih hong pankhiapa in Zeisu Khazih ni dongin kicingtak in hong zomsuak ding hi ci in ka lungmuang hi. 7 Ka lungsim sungah om den na hih manun na vekpi un tua banga kong ngaihsut ding mah na hi uh hi. Banghang hiam cihleh mat le hen ka thuakna le lungdamna thu ka hutna le ka kipsaknate ah kei tawh kibang in hehpihna thupha a ngahkhawm na hi uh hi. 8 Banghang hiam cihleh Zeisu Khazih in hong it mah bangin kei zong note kong it mahmahna Pasian in ka teci ahi hi. 9 Note itna in thu theihna le thu khentel theihna khempeuh ah a khan semsem nading, 10 Khazih ni dongin a hoihpen nate muhtel theih nading, a siangtho le kawkbanglo a na om nading, 11 Zeisu Khazih tungtawn a dikna gahte tawh na kidim theih nading uh le Pasian vangliatna a kiphat theih nadingin thu kong ngetsak hi. 12 Ahih hangin sanggamte aw, ka tunga thupiangte in lungdamna thu kizelsak zaw hi cih na theih ding uh ka deih hi. 13 Khazih hanga mat le hen ka thuakna kumpi inncing galkapte khempeuh le midangte in zong a theitel uh hi. 14 Mat le hen ka thuak manin Topa sunga sanggamte a tam zaw in zong thangahna in nei uh a, Pasian thu gen ding lau loin a hang semsem uh hi. 15 Mi pawlkhat in midangte eenna le dem nopna tawh Khazih thu hilh uh a, pawlkhat in lungsim maan tawh a hilh uh hi. 16 Hih a masate pawlin lungsim takpi tawh hilo angsungkhualna bek tawh ka thuak gimnate a kibehlap nading ngimna tawh Khazih thu a hilh uh hi. 17 Ahih hangin a nunungte pawlin lungdamna thu a hu dingin kei hong kiseh ahihlam thei uh ahih manin itna tawh Khazih thu a hilh uh hi. 18 A phatmawhna bang om ahi hiam? Kineih tawmna tawh ahi a, lungsim taktak tawh ahi zongin lam khatpeuh tawh Khazih thu a kihilh nak leh ka lungdam veve a, ka lungdam lailai ding hi. 19 Banghang hiam cihleh nong thungetsakna uh le Zeisu Khazih Kha in a hong huhna hangin tua thute in keima suahtak nading hong suak ding hi cih ka thei hi. 20 Maizumna bangmah nei loin ka hansan ngei bangin ka hangsan lai dinga, ka si a ka hing zongin ka pumpi tawh Khazih minthansak ding lunggulh in ka lamen hi. 21 Banghang hiam cihleh nungta hi leng Khazih aa ding hi a, si hi leng a met zaw ka hi hi. 22 Ahih hangin ka pumpi nungta lai leh na tampi sem thei ding ka hih manin ka teel zawk ding ka thei kei hi. 23 Banghang hiam cihleh hih thu nihte kikal ah ka cih nading ka thei kei hi. Khazih tawh omkhop ding ka ut a, tua in kei aa dingin a hoih zaw hi. 24 Ahi zongin hih pumpi tawh ka nuntak lai ding note aa dingin a kisam zaw hi. 25 Tua ahih manin upna sunga na khantoh nading uh le na kipah nadingun ka dam lai dinga, note khempeuh tawh ka omkhawm lai ding hi ci in ka lungmuang hi. 26 Tua ahih manin note kiangah kong paikik ciangin Zeisu Khazih sunga na lungdamna uh keima hangin a hong tam zaw ding hi. 27 Khazih lungdamna thu tawh kilawm kituak in na nungta un. Tua hi leh note kiangah hong pai in kong mu a, na thu uh ka galzak ahi zongin lungsim khat bekah dingkip in, lungdamna thu tawh kipawl upna thu ah ngaihsutna kikhat in na hanciamkhopna uh ka za thei ding hi. 28 Note hong langpan mite hangin na lau peuhmah kei un. Note laulohna in amaute kisiatna lahna hi a, ahih hangin note aa dingin Pasian kiang pana hong pai hotkhiatna lahna ahi hi. 29 Khazih a um dingte bek hilo in ama hanga a thuak dingin zong Khazih min tawh note tungah thu hong kipia hi. 30 Tua ahih manin na muh khitsa uh le tu laitak in na zak uh keima thuak bangbang a thuak na hi uh hi.
21 Tua ahih ciangin Khazih sungah tha kipiakna, itna tawh kihehnepna, Kha tawh kilawmtakna, lungnemna le lainatnate khat peuhpeuh na neih uh leh, 2 ka lungdamna a kicin nadingin na ngaihsutna uh kituaksak unla, a kibang itna nei in lungsim kihual le tupna kibang in om un. 3 Angsungkhualna le kisialh nopna tawh bangmah hih kei un. Na lungsim uh niamkhiat unla, no sangin midangte a thupi zaw in ngaihsun un. 4 No met nading bek ngaihsun loin midangte aa ding zong ngaihsutsak un. 5 Khazih Zeisu lungsim puak bang note sungah om tahen. 6 Amah in Pasian taktak hi napi Pasian tawh kikimna let tentan dingin ngaihsun loin, 7 bangmah lo bangin a hong kikoih hi. Sila bangin hong om a, mihing bangin a hong pai hi. 8 Mihing mel hong pua in hong kiniamkhiat a, sih dongin thumang in singlamteh tungah sihna a hong thuak hi. 9 Tua ahih manin Pasian in amah a sangpen munah lamto a, min khempeuh sangin a thupi zaw min a pia hi. 10 Tua ahih manin vantung, leitung le leinuai‑a om mi khempeuh in Zeisu min pahtawi in khukdin ding uh a, 11 Zeisu Khazih in Topa ahi hi ci in leii khempeuh in pulak in Pa Pasian min a thangsak ding uh hi. 12 Tua ahih manin kong itte aw, note kianga ka omlai a thu na man tawntung mah bangun tu a kong om loh ciangin zong thu na mang zaw kan unla, na ngahsa uh hotkhiatna lau le lingkawm in na lakkhia un. 13 Banghang hiam cihleh Pasian a lungdamsak nate na sepnop nading uh le na sep theih nadingun note sunga na a hong sempa in Pasian ahi hi. 14 Na khempeuh phun lo kisel loin sem un. 15 Tua hi leh a kawkbanglo a siangtho khialhna a neilo Pasian tate na suak ding uh hi. Lungsim kawi in lam a khial tulai khang mite sungah note in leitung ah khuavak bangin na tang ding uh hi. 16 A mawknapi a a taii le a mawknapi a nasem hilo in Khazih ni ciangin ka lungdam theih nadingin nuntakna thu ka lenkip hi. 17 Hi hi, note in upna tawh na nasepna hangun tuibuah biakpiakna banga ka nuntakna a kibuak hangin note khempeuh tawh kipak in ka lung a dam veve hi. 18 Tuamah bangin note zong nuamin kei tawh lungdamkhawm un. 19 Ahih hangin note omdan teng thei a, tha ka ngah nadingin note kiangah Timothy hong paisak thei pah ning ci in Topa Zeisu sungah lametna ka nei hi. 20 Banghang hiam cihleh keima hong deihsak banga note hong deihsak taktak ding amah longal midang kuamah ka nei kei hi. 21 Banghang hiam cihleh mi khempeuh in Khazih Zeisu tawh kisai nate zong loin amau angsung ding bek a zong uh hi. 22 Ahi zongin Timothy mihoih ahihlam na theihsa uh hi a, lungdamna thu ah kei tawh pata banga nasemkhawm mi ahi hi. 23 Tua ahih manin ka vai ding khat peuhpeuh a kitel ciangin amah hong sawlthei pah dingin ka kilamen hi. 24 Ahi zongin kei mahmah zong a sawtlo in hong paithei dingin Topa sungah khamuanna ka nei hi. 25 Note kamtai le kei hong huh dinga nong sawl uh kei tawh na a semkhawm gal a hong dopih ka sanggampa Epaphroditus, note kiangah kong ciahsakkik ding kisam ka sazaw hi. 26 Banghang hiam cihleh a cinatna na zak uh ciangin amah in note hong lunggulh in a lunghimawh mahmah hi. 27 Amah si dektak in a cinat hangin Pasian in a hehpih hi. Amah bek hehpih hilo in ka dahna a kibehlap loh nadingin kei mahmah zong hong hehpih ahi hi. 28 Tua ahih manin amah na muhkik uh ciangin na lung uh dam dinga, keima dahna a noptuam theih nadingin amah kong paisak pah ding hi. 29 Tua ahih manin Topa min tawh lungdamtak in amah na sang unla, tua bang mite na thupibawl un. 30 Banghang hiam cihleh kei aa dingin nong sepsak theihloh tenguh aman hong sepsak in sih ding zong phamawh salo in Khazih na a sep manin a si dektak ahi hi.
31 A tawpna ah sanggamte aw, Topa sungah lungdam un. Hih thute kong gelh kikkik pen a cimtakhuai hilo in note kip nading hi zaw hi. 2 Uite na pel un, a hoihlo nasemte na pel unla, vunat ding a ci teitei mite na pel un! 3 Banghang hiam cihleh eite in Kha tawh Pasian a biate le ci le sa suang loin Khazih Zeisu sungah a lungdam vunatte i hi hi. 4 Ci le sa a suang nuam hi leng midangte sangin ka suan ding a tam zaw hi. 5 Ni giat ka phak ni in vun a ki‑atpa, Israel minam, Benjamin suan ka hi hi. Hebrew mite lak panin Hebrew mi khat ka hi a, thukham zuihna lamah Pharisee pawl ka hi hi. 6 Hanciamna lamah genleng pawlpi a bawlsiapa ka hi a, thukham tawh kisai dikna lamsang ah mawhsak nading a omlo mipa ka hi hi. 7 Ahi zongin keima metna khempeuh Khazih hangin supna in ka ngaihsun zaw hi. 8 Ka Topa ahi Khazih Zeisu ka theihna sanga thulian zaw om lo ahih manin thudang khempeuh supna hi ci in ka ngaihsun hi. Khazih a meta ka ngah theih nadingin na khempeuh ka tan zaw a, tua nate ninbulom bangin ka ngaihsun hi. 9 Tua Topa sunga ka om theih nadingin, thukham zuihna hangin dikna bangmah ka ngah kei a, Khazih upna tungtawn a kingah, Pasian in upna hanga hong piak dikna bek ka ngah hi. 10 Hih in Khazih mahmah le amah a thokiksak vangliatna ka theih theih nading, ama thuak banga gimna thuakin ama sih banga ka sih theih nading leh, 11 misite lak pan thawhkikna ka ngah hamtang theih nading ahi hi. 12 Tuate ngah khinzo ing, picing khinzo ing a ci ka hi kei hi. Khazih Zeisu in tuate a ngah dinga kei hong mat bangin kei zong tuate ka mat zawh nadingin a delhdelh ka hi hi. 13 Sanggamte aw, tuate a ngah khinzo in a kingaihsun ka hi kei hi. Ahi zongin ka hih khat om a, ka nunglam a om nate mangngilh in ka mailam a om nate ka zam hi. 14 Tunglam pana Pasian in Khazih Zeisu sunga hong sapna ahi pahtawina ka ngah nadingin kunglam ah ka tai hi. 15 Tua ahih ciangin a picing khinsa mi peuhmah in tua bang lungsim neiciat ni. Note ngaihsutna tawh a kituaklo thu a om leh Pasian in hong theitelsak ding hi. 16 Bangbang hi ta leh i ngah khitsa thute, zui in lungsim kituak in omciat ni. 17 Sanggamte aw, kei hong etteh un. Na etteh ding uh kote ka hih manun kote banga a nungta midangte zong na etteh un. 18 Banghang hiam cihleh Khazih singlamteh galin a do mi tampite gamtatzia kong gen ngei zel bangin tu in zong khitui luangin kong genkik hi. 19 Amaute in a tawpna ah siatna a thuak dingte ahi uh a, amaute pasian in a gilpi uh ahi hi. A maizum nading teng uh kisialhna in nei zawsop uh a, leitung nate bek a ngaihsunte ahi uh hi. 20 Banghang hiam cihleh eite in vantunggam mi i hi a, tua gam panin Honpa ahi Topa Zeisu Khazih hong pai ding lawptak in i ngak hi. 21 Amah in na khempeuh ama thuneihna nuai‑a a koih a vangliatna tawh kizui in a ginalo i pumpite a minthang ama pumpi bangin hong khelsak ding hi.
41 Tua ahih manin kong it kong ngaih mahmah sanggamte aw, note in ka lungdamna le ka kumpi lukhu na hi uh hi. Kong itte aw, Topa sungah kiptak in na ding un. 2 Euodia le Syntyche‑te aw, Topa sungah khat le khat lungsim kituak in na om nadingun kong thum hi. 3 Ka naseppih, ka lawm taktak nangmah in zong lungdamna thu ah kei tawh nakpi in na a semkhawm hih numeite na huh nadingin kong thum hi. Amaute in Clement a kipan Nuntakna Laibupi sunga a min uh a kigelh a dang ka naseppihte tawh zong a semkhawmte ahi uh hi. 4 Topa sungah lungdam tawntung un. Khatvei kong genkik in ah lungdam un! 5 Na lungnemna uh mi khempeuh tungah kilangsak un. Note kiangah Topa a om hi. 6 Bangmah thu ah lung himawh loin na khempeuh ah lungdam ko kawmsa in thungen unla, na kisapnate uh Pasian tungah pulak in na ngen un. 7 Tua hi leh mite tel zawhloh Pasian hong piak lungmuanna in Khazih Zeisu tungtawn in note lungsim le ngaihsutnate hong cin hong kepsak ding hi. 8 Sanggamte aw, a tawpkhakna a kong gen in ah thudik le a pahtawihuai thute, a thuman, a siangtho, a ithuai thu le thu hoihte, gamtat hoih le a phathuai thute ngaihsutpen in na nei un. 9 Keima kiang pana na sinsa, na ngahsa, na zaksa uh le na muhsa uh thute na zui un. Tua hi leh lungnopna Pasian in, note hong ompih ding hi. 10 Tu in a nunung pen in kei nong khualna uh hong kilangsakkik na hih manun Topa sungah ka lungdam mahmah hi. Nidanglai in zong nong khual mahmah uh a, ahi zongin na lahkhiat nading uh hun hoih a ngah lo na hi uh hi. 11 Huhna ka kisap manin hih thu a hong gen ka hi kei hi. Bangci bangin om taleng a lungkim dingin ka kisin khinzo hi. 12 Cihmawhna ka thei a, cihtheihna zong ka thei hi. Gilkialna le gilvahna, kicinna le kisapnate zong, mun khempeuh ah na khempeuh panin ka sinzo hi. 13 Kei hong thahatsakpa Khazih hangin na khempeuh ka hih thei hi. 14 Bangbang hi ta leh ka haksatna hong thuakpih na hih manun na nasepna uh hoih mahmah hi. 15 Lungdamna thu kong gencil lai in Macedonia gam pan ka ciah ciangin piakna le ngahna lamah note longal kei tawh a kizom pawlpi dang om lo hi cih thu tu in no Philippi khua mite in na theihsa uh ahi hi. 16 Thessalonica khua‑a ka omlai nangawn in ka kisapnate nong huhna uh khatvei bek hilo in nihveitak nong khak uh hi. 17 Hih bang ka cih ciangin letsong ka deihna hilo in, gahpha na gah semsem nading uh kong deihsakna hi zaw hi. 18 Na khempeuh kicingtak in ka nei taktak hi. Nong na khakte uh Epaphroditus tung pan ka ngah a, ka kisapna teng kicing ta hi. Tuate pen Pasian in a san theih amah a lungdamsak mahmah, a namtui biakpiakna ahi hi. 19 Ka Pasian in Khazih Zeisu sunga ama thupina tawh kituak hauhna tawh na kisapna khempeuh uh hong pia ding hi. 20 Tu in i Pa Pasian in minthanna ngah tawntung tahen. Amen. 21 Khazih Zeisu sunga misiangthote khempeuh na hopihsak un. Kei tawh a omkhawm sanggamte in zong note hong hopih uh hi. 22 Misiangtho khempeuh a diakdiak in Caesar kumpipa inn sunga omte in note hong hopih uh hi. 23 I Topa Zeisu Khazih hong hehpihna thupha in note khempeuh hong ompih tahen. Amen.