PHILEMON
11 Khazih Zeisu hanga thongkiapa keimah Paul le i sanggampa Timothy in kong it uh sanggam le naseppih Philemon a kipan, 2 kong it uh Apphia, Khazih galkap ka seppih uh Archippus le na inn a om pawlpi mite lai kong khak uh hi. 3 I Pa Pasian le i Topa Zeisu Khazih kiang pana hehpihna thupha le lungnopna note tungah hong om tahen. 4 Thu ka nget ciangin kong phawk tawntung a, 5 misiangthote khempeuh na itna le Topa Zeisu na upna ka zak ciangin Pasian tungah lungdam ka ko hi. 6 Khazih Zeisu sunga na neih hoihna khempeuh mite in thei in midangte tawh na nasepkhopna a khan semsem nadingin thu kong ngetsak hi. 7 Banghang hiam cileh sanggam aw, na itna in misiangthote lungsim thaksuahsak ahih manin lungdam mahmah in ka lung uh a kim hi. 8 Tua ahih manin Khazih sungah a kilawm nate na hih nadingin hangtak in thu kong piak theih hangin, 9 tu in Zeisu Khazih hanga thongkia putekpa keimah Paul in itna tawh kong thum zaw hi. 10 Ka thongkiat sunga ka tapa a hong suak Onesimus aa dingin kong thumsak hi. 11 Amah in a beisa hunin nang aa dingin kimanna a neih loh hangin tu in nang aa ding le kei aa dingin a kimang thei mi khat hong suakzo hi. 12 Amah ka hong ciahsakkik hi. Tua ahih manin keima pumpi bangin na ngaihsun inla amah na sang in. 13 Lungdamna thu hangin ka thongkiat sungteng nangma tanga kei hong kem dingin ka kiangah om leh ka ut hi. 14 Ahi zongin nang thukimna omlopi in bangmah ka hih nuam kei hi. A pha nong bawl dingte nang lungsim pana suak hilo in kong sawl zawh thu ahih khak ding ka ut kei hi. 15 Banghang hiam cihleh amah tawh tawlkhat sung na kikhenna uh in a tawntung in amah na neih theih nading hi zaw kha ding hi. 16 Amah sila bangin ngaihsun nawnlo in sila sangin a thupi zaw in na ngaihsun in. A diakdiak in amah in ka it mahmah sanggampa ahi hi. Ahih hangin ci le sa ah ahi a, Topa sungah ahi zongin nang tungah hong ithuai zaw lai ding hi. 17 Nasep khoppih khat a nong ngaihsut leh kei nong san ding bangin amah na sang in. 18 Ahi zongin, nang tungah hong khialh a leiba khatpeuh a hong neih leh kei kong loh dingin na ciamteh in. 19 Na nuntakna bup mahmah kei tungah nong kibatna thu nangawn gen vet loin, kong lohkik ding hi ci in keimah Paul in ka khut mahmah tawh lai kong gelh hi. 20 Hi mah hi sanggam aw, nang kiang pana lungdamna Topa sungah hong neisak inla Topa sungah ka lungsim hong thaksuak sakkik in. 21 Na thumanna kong muanna tawh kei hong gen sanga a hoih zaw nangawn in hih ni teh ci in lai hong khak ka hi hi. 22 Nong thungetsaknate uh hangin note kiangah hong paithei dingin kilamen ka hih manin ka giah nading inndei khat tu kikal sungin na vaihawmsak in. 23 Khazih Zeisu hanga ka thongkiatpih Epaphras in hong hopih hi. 24 Tuamah bangin kei tawh na a semkhawm Mark, Aristarchus, Demas le Luke‑te in zong a hong hopih uh hi. 25 I Topa Zeisu Khazih hong hehpihna thupha in nang hong ompih tahen. Amen.