MARK

MARK

¹ Pasian Tapa Zeisu Khazih lungdamna thu a kipatna in hih bang ahi hi. ² Kamsangte laibu sungah, “En in, nangma lampi a sialkhol dingin, Na mai ah ka kamtaipa ka sawl hi. ³ Gamlak a kikopa awging in, ‘Topa pai nading lam na sial unla, Ama lampite na tangsak un,’ a ci hi,” ci in a kigelh hi. ⁴ John in gamlak ah mite tuiphum a, mawhmaisak nadingin kisikkikna thu tawh kisai tuiphumna thu a hilh hi. ⁵ Tua ciangin Jerusalem khua mite a kipan Judea gama om mi khempeuh ama kiangah hong pai in a mawhnate uh pulak uh a, John in Jordan gunah amaute tui a phum hi. ⁶ Tu in John in kala‑oh mul kigan puan silhin, savun kawnggak tawh a kawng gak a, kauphe le gamlak khuaizu tawh a kivak hi. ⁷ Amah in, “Kei sanga a vanglian zaw khat hong pai lai ding hi. Kunsuk a a khedapkhau sut ding nangawn in ka kilawm kei hi. ⁸ En in keimah in note tui ah kong phum a, ahih hangin amah in note Kha Siangtho tawh a hong phum ding hi,” ci in a hilh hi. ⁹ Tua hun laitak in Galilee gam Nazareth khua panin Zeisu hong pai a, John in Jordan gun sungah a tuiphum hi. ¹⁰ Tuisung pan a hong paikhiat phetin van kihong a, Kha in vakhu bangin ama tungah hong kumsuk John in a mu hi. ¹¹ Tua ciangin van panin aw khat hong ging a, “Nangmah in hong lungdamsak mahmah ka it ka Tapa na hi hi,” a ci hi. ¹² Tua khit phetin Kha in gamlak ah Zeisu a sawlkhia pah hi. ¹³ Gamlak ah ni 40 sung Zeisu omin Satan ze‑etna thuak a, gamsate tawh a omkhawm hi. Tua khit ciangin vantungmite in amah a kem uh hi. ¹⁴ Thong sungah John a kikhum khit ciangin Galilee gamah Zeisu pai in Pasian kumpigam tawh kisai lungdamna thu a tangko inah, ¹⁵ “A hun hong tungzo a, Pasian kumpigam hong tungta hi. Na mawhna uh kisikkik unla lungdamna thu um un,” ci in a gen hi. ¹⁶ Galilee tuili gei ah Zeisu a pai laitak in Simon le a sanggampa Andrew tuili sungah ngen khuh a om a mu hi. Amaute ngabeng mi ahi uh hi. ¹⁷ Tua ciangin Zeisu in amaute kiangah, “Ka nung hong zui un. Mi a mante kong suaksak ding hi,” a ci hi. ¹⁸ Amaute in thakhat in a ngen uh nusia in Zeisu nung a zui pah uh hi. ¹⁹ Tua mun pan tawmvei sung a pai khit uh ciangin Zebedee tate ahi James le a sanggampa John zong a mu hi. Amaute gunkuang sungah ngen khui a om a mu hi. ²⁰ Tua ciangin Zeisu in amaute a sam pah hi. Amaute in a cial uh nasemte le a pa uh Zebedee gunkuang sungah nusia in Zeisu nung a zui uh hi. ²¹ Tua khit ciangin amaute Capernaum khua ah pai uh a, Sabbath ni ciangin kikhopna inn ah Zeisu lut pahin thu a hilh hi. ²² Amah in thukhamhilh siate hilh bangin hilh loin thuneipa bangin hilh ahih manin a thuhilhna lamdang a sa mahmah uh hi. ²³ Tu in amaute kikhopna inn sungah dawigilo a vei mi khat a om hi. ²⁴ Amah kiko in, “Nazareth khua mi Zeisu aw, komau thuthu in hong omsak in. Ko le nang bang kisai i hi hiam? Kote susia dinga hong pai na hi hiam? Nang kua na hi hiam cih kong thei uh a, Pasian mi Siangthopa na hi hi,” a ci hi. ²⁵ Tua ciangin Zeisu in, “Pau kei in, ama sung pan paikhia in!” ci in a tai hi. ²⁶ Dawigilo in zong tua pa kongkawsak a, tua khit ciangin nakpitak in kiko a, tua pa sung pan a paikhia hi. ²⁷ Tua ciangin amaute khempeuh in lamdangsa mahmah uh a, “Bang thu bang la hi zawzen hiam? Hih thuhilhna thak a bangci thu hi peuhmah hiam? Thuneihna tawh amah in dawigilote thu a piak ciangin ama thuthu a mang uh hi,” ci in khat le khat a kidong uh hi. ²⁸ Tua khit ciangin Galilee gam kim le pam tengah ama thu a kizel pah hi. ²⁹ Tu in kikhopna inn pan a paikhiat khit phetun Simon le Andrew‑te inn sungah James le John tawh Zeisu a lut hi. ³⁰ Simon sunghnu nattun in lum ahih manin Zeisu kiangah a ko pah uh hi. ³¹ Tua ciangin amah hong pai in tua nu a khut lenin a phot leh a cisa bei pahin tua nu in amaute zin a do hi. ³² Nitak lam ni a tum khit ciangin cina khempeuh le dawilut mite Zeisu kiangah a hong puak uh hi. ³³ Tua khit ciangin a khuazang un kongpi gei ah hong kikhawm ngeingai uh a, ³⁴ Zeisu in natna tuamtuam a vei mi tampi damsak in dawi tampi a hawlkhia hi. Dawite in Zeisu thei uh ahih manin amah in amaute kam khat beek a pausak kei hi. ³⁵ Zingsang khua a vakma in Zeisu tho a, gamdaihna mun khatah pai in thu a ngen hi. ³⁶ Tua kalin Simon le a lawmte in amah a zong uh hi. ³⁷ Amaute in Zeisu a muh uh ciangin ama kiangah, “Mi khempeuh in nang hong zong uh hi,” a ci uh hi. ³⁸ Ahih hangin Zeisu in amaute kiangah, “Thu ka hilh theih nadingin hih kima om khua dangdangte ah zong pai ni. Banghang hiam cihleh hih na sem ding maha hong pai ka hi hi,” a ci hi. ³⁹ Tua bangin Galilee gam kikhopna inn khempeuh ah thu hilhin dawite a hawlkhia hi. ⁴⁰ Tua laitak in miphak khat Zeisu kiangah hong pai a, Zeisu mai ah khukdin in, “Hong damsak nuam lecin nong damsak thei hi,” ci in a thum hi. ⁴¹ Tua ciangin Zeisu in tua pa hehpihhuai sa ahih manin a khut zanin lawng a, “Kong damsak nuam hi. Damta in,” a ci hi. ⁴² Tua bang a cih khit phetin thakhat in tua pa tung panin phaknatna paikhia in a dam pah hi. ⁴³ Zeisu in tua pa khauhtak in thu a piak khit ciangin ciahsak pah a, ⁴⁴ “Hih thu kuama kiangah gen peuhmah kei in. Ahi zongin, pai inla siampipa kiangah va kilak in. Damna ngah na hih manin Moses hong thupiak bangin biakna va pia in. Tua in amaute tunga teci panna a suak ding hi,” a ci hi. ⁴⁵ Ahih hangin tua pa paikhia in tua thu genthang in a kizelsak mang hi. Tua ahih manin Zeisu a kilang in khua sungah lut thei nawnlo a, khuanawl gamlak peuh ah om hi napi mun khempeuh panin mite in ama kiang hong zuan veve uh hi.

¹ Tua khit a sawtlo in Capernaum khua ah Zeisu paikik a, amah inn sungah om hi cih thu mite in a za uh hi. ² Kongkhak gei dong nangawn ah om nading omlo zahdong in mi tampi thakhat in hong kikhawm uh a, Zeisu in amaute thu a hilh hi. ³ Tua laitak in mi li in pumzaw mi khat hong pua uha ama kiangah hong paipih uh hi. ⁴ Mihonpi hangin amaute in Zeisu kiang naih theilo uh ahih manin ama omna tungsan innkhum phelkhia in tua panin pumzawpa a lupna tawh a khaisuk uh hi. ⁵ Zeisu in amaute upna a muh ciangin pumzawpa kiangah, “Ka ta aw, na mawhnate hong kimaisak zo hi,” a ci hi. ⁶ Tua laitak a tu thukhamhilh siate pawlkhat in amaute lungsim sungah, ⁷ “Banghang in hihpa in hih bangin Pasian tungah pausia ahi hiam? Pasian longal kua in mawhna maisak thei ahi hiam?” a ci uh hi. ⁸ Ahih hangin tua banga a ngaihsut lam uh Zeisu in a lungsim sungah thei pah a, “Banghang in tua bangin note lungsim sungah ngaihsun na hi uh hiam? ⁹ Pumzawpa kiangah, ‘Na mawhnate hong kimaisak zo hi,’ cih ding leh, ‘Tho in, na lupna pua inla kalsuan in,’ cih ding koi baih zaw ahi hiam? ¹⁰ Ahi zongin Mihing Tapa in leitung ah mawhmaisak theihna thuneihna a neih lam na theih nading uh ahi hi,” a cih khit ciangin pumzawpa kiangah, ¹¹ “Tho in, na lupna pua inla na inn ah ciah in kong ci hi,” ci in a sawl hi. ¹² Tua pa thakhat in tho a, a lupna pua in amaute khempeuh muhin a paikhia hi. Tua mite khempeuh in lamdangsa mahmah uh a, “Hih bang mahmah khatvei beek i mu ngei kei hi!” ci in Pasian a phat uh hi. ¹³ Tua khit ciangin tuili gei ah Zeisu paikhiakik in ama kiangah mipi khempeuh hong kikhawm uh a, amah in amaute thu a hilh hi. ¹⁴ Amah lam a pai laitak in Alphaeus tapa Levi siahdonna buuk sungah tu‑a om a muh ciangin, “Hong zui in,” a ci hi. Tua ciangin Levi zong dingto in a zui hi. ¹⁵ Tu in, Levi inn ah an ne dingin Zeisu a tut laitak in, siahdongte le mawhneite tampitak in zong Zeisu le a nungzuite tawh ankuang a umkhawm uh hi. Banghang hiam cihleh tualai ah tua bang mi tampi in amah a zui uh hi. ¹⁶ Pharisee pawlte le thukhamhilh siate in siahdongte le mawhneite tawh an nekhawm in a om Zeisu a muh uh ciangin a nungzuite kiangah, “Banghang in amah in siahdongte le mawhneite tawh an nekhawm ahi hiam?” a ci uh hi. ¹⁷ Zeisu in tua thu a zak ciangin amaute kiangah, “Cidamte in siavuan kisam lo uh a, cinate bekin kisam uh hi. Midikte sam dinga hong pai ka hi kei a, mawhneite a kisikkik nadingun a sam dingin hong pai ka hi hi,” a ci hi. ¹⁸ John nungzuite le Pharisee‑te nungzuite in an a tang uh hi. Tua khit ciangin amaute Zeisu kiangah pai uh a, “John nungzuite le Pharisee‑te nungzuite in antang napi uh banghang in na nungzuite in antang lo uh ahi hiam?” ci in a dong uh hi. ¹⁹ Zeisu in amaute kiangah, “Zipipa in a lawm a gualte a ompih laitak in amaute in antang thei ding uh ahi hiam? A ompih laiteng an a tang thei kei ding uh hi. ²⁰ Ahih hangin zipipa a kilakkhiat hun hong tung dinga, tua hun ciangin amaute in an a tang ding uh hi. ²¹ “Kuamah in puan lui kek puan thak tawh a phop kei hi. Tua bangin phop leh puan thak in puan lui kaikek in, a kekna a zai semsem ding hi. ²² Kuamah in savun um lui sungah lenggahtui thak a thun kei uh hi. Tua bangin kithun leh lenggahtui thakin savun um lui phukham in lenggahtui teng buakhia dinga, savun um lui zong a kisia ding hi. Lenggahtui thak pen savun um thak sunga thun ding ahi hi,” a ci hi. ²³ Tu in Sabbath ni in buhlei sung tawnin Zeisu a pai laitak in a nungzuite in buhvuite a zut uh hi. ²⁴ Tua ciangin Pharisee‑te in ama kiangah, “En in, banghang in Sabbath ni in amaute in thukham tawh kituak loin gamta uh ahi hiam?” a ci uh hi. ²⁵ Ahih hangin Zeisu in amaute kiangah, “Siampi Abiathar a khanlai in, David le a lawmte gilkial in a cimawh ngei uh hi. ²⁶ Tua ciangin amah Pasian inn sungah lutin siampite longal midangte nek theih ding a hilo Ompihna Anlumte ne in, a lawmte zong a piak thu sim ngeilo na hi uh hiam?” a ci hi. ²⁷ Tua ciangin amah in amaute kiangah, “Sabbath ni pen mite aa dinga kibawl hi a, mite pen Sabbath ni aa dinga kibawl hilo hi. ²⁸ Tua ahih manin Mihing Tapa in Sabbath Ukpa zong ahi hi,” a ci hi.

¹ Tua khit ciangin kikhopna inn sungah Zeisu lutkik a, tualai ah khut langkhat a si mi khat a om hi. ² Tua ciangin amaute in Zeisu a mawhmat theih nadingun Sabbath ni in tua mipa a damsak peuhmah hiam ci in a en gige uh hi. ³ Zeisu in khutsi mipa kiangah, “Ding inla, hong pai in,” a ci hi. ⁴ Tua khit ciangin Zeisu in amaute kiangah, “Sabbath ni in a pha bawlhuai hiam a sia bawlhuai hiam? Nuntakna khat hotkhiathuai hiam thahhuai hiam?” ci in a dong hi. Ahih hangin amaute pau loin a dai khipkhep uh hi. ⁵ Amaute lungkhauhna hangin Zeisu in heh le dah thuah a, a kim a pam teng a ban et khit ciangin tua mipa kiangah, “Na khut zan in,” ci in a sawl hi. Amah in a zankhiat leh a lang khat lam mah bangin a dam hi. ⁶ Tua ciangin Pharisee pawlte paikhia in Herod pawlte tawh amah a suksiat theih nading uh thakhat in a vaihawm uh hi. ⁷ Ahih hangin Zeisu a nungzuite tawh tuili lamah kihemkhia a, Galilee gam le Judea gam pana hong pai mi tampite in amah a zui uh hi. ⁸ Jerusalem khuapi, Idumia gam Jordan gungal khat pan le Tyre le Sidon khuakim panin mi tampite in Zeisu nasep tampite a zak uh ciangin ama kiangah a hong pai uh hi. ⁹ Tua ciangin mihonpite in amah a phut khakloh nadingin gunkuang neu khat ama aa dingin a koihkholh nadingun a nungzuite a sawl hi. ¹⁰ Banghang hiam cihleh amah in mi tampi damsak ahih manin cina luna a om zahzah amah lawng kha nuamin a kiphu gawp uh hi. ¹¹ Dawigilote in amah a muh uh ciangin, a mai ah pukin, “Nang in Pasian Tapa na hi hi,” ci in a kiko uh hi. ¹² Ahi zongin, Zeisu in ama thu kuamah a theihsak loh nading uh khauhtak in a kham hi. ¹³ Zeisu in mualtung ah kahto in ama mi deihteng sam a, amaute zong ama kiangah a hong pai uh hi. ¹⁴ Tua khit ciangin amah in amah tawh a omkhawm ding le thuhilh a a sawlkhiat theih ding mi sawm le nih a seh hi. ¹⁵ Natna a damsak theih nading uh le dawite a hawlkhiat theih nadingun thuneihna a pia hi. ¹⁶ Tua mite in, Zeisu in Peter ci a, min thak a phuahsakpa Simon, ¹⁷ Zebedee tapa James, le ama min thak dingin “Vanging Tate” cih khiatna a nei Boanerges cih min a phuah Zebedee tapa James sanggampa John, ¹⁸ Andrew, Philip, Bartholomew, Matthew, Thomas, Alphaeus tapa James, Thaddaeus, Cana khua mi Simon, le ¹⁹ amah a lehhekpa Judas Iscariot‑te ahi uh hi. (19) Tua khit ciangin amaute inn khatah a lut uh hi. ²⁰ Tua ciangin mihonpite khatvei hong kikhawmkik uh ahih manin amaute in an nangawn ne manlo uh hi. ²¹ Ahih hangin ama innkuanpihte in hih thu a zak uh ciangin mihai tawh kibang sa uh ahih manin a pummat dingin a kuan uh hi. ²² Jerusalem khuapi pana hong paisuk thukhamhilh siate in, “Ama sungah Beelzebubɠ lut a, tua dawi mangpipa min suangin dawite a hawlkhia ahi hi,” a cihsan uh hi. ²³ Tua ciangin Zeisu in amaute samin thugentehna tawh thu a hilh in ah, “Satan in bangci bangin Satan hawlkhia thei ding ahi hiam? ²⁴ Gam khat peuhmah kiphelkhap leh tua gam ding zolo ding hi. ²⁵ Innkuan khat a kiphelkhap leh zong tua innkuan ding zolo ding hi. ²⁶ Satan amah le amah kido in kiphelkhap leh ding zolo dinga beimang ding hi. ²⁷ Mi thahatpa hencip masa loin kuamah in ama inn sungah lutin a neihsate a laksak zo kei ding hi. Amah a kihencip khit ciang bekin a inn a kiluh zo pan ding hi. ²⁸ Aman takpi kong cih in ah, mihingte mawhna khempeuh le Pasian tunga pausiatnate a kimaisak ding hi. ²⁹ Ahih hangin Kha Siangtho tunga a pausiate cikmah hunin kimaisak lo dinga, tawntung gimna a thuak ding uh hi,” ci in a gen hi. ³⁰ “Ama sungah dawigilo lut hi,” ci in ngawh uh ahih manin amah in hih thugentehna tawh a hilh ahi hi. ³¹ Tua laitak in a nu le a naute ama kiangah hong pai uh a, amah a sam ding mi sawlin inn pualam ah a ngak uh hi. ³² Ama kim ah mihonpite a tu uh hi. Amah a samte in, “En in, na nu le na naute in innpua lamah omin nang hong zong uh hi,” ci in a gen uh hi. ³³ Ahih hangin Zeisu in, “Ka nu le ka naute kua ahi uh hiam?” ci in a dawng hi. ³⁴ Amah in a kianga tu mite gualet a, “En un, hih mite in ka nu le ka naute ahi uh hi. ³⁵ Banghang hiam cihleh Pasian deihna banga a gamtate peuhmah ka sanggampa, ka sanggamnu le ka nu ahi uh hi,” ci in a dawng hi.

¹ Tua khit ciangin Zeisu in tuili gei ah thu a hilhkik hi. Mipi khempeuh ama kiangah hong kikhawm uh ahih manin tui tunga om gunkuang sungah a tu hi. Mihonpite in tuili lam nga in lei lakah a om uh hi. ² Amah in thugentehna tawh thu tampi a hilh in ah, ³ “Ngai un! Khaici vawhpa khat khaici vawh dingin a kuankhia hi. ⁴ Khaici a vawh ciangin khaici pawlkhat lam gei ah tu a, vana vasate hong lengin a nemang uh hi. ⁵ Pawlkhatte leitang a tam lohna mun suang tungah tu a, lei a dai hangin a po pah hi. ⁶ Ahih hangin zungkha zolo ahih manin ni hong suakin nisa in a kat ciangin a keumang uh hi. ⁷ Khaici pawlkhatte ling lakah tu a, lingkungte hong khangin depgawp ahih manin a gah zo kei uh hi. ⁸ Ahi zongin khaici pawlkhatte leihoihna ah a tu hi. Tuate po in hong khanga a zah 30, a zah 60, a zah 100 a gah uh hi,” a ci hi. ⁹ Tua ciangin amah in amaute kiangah, “Zak nading bil a nei mi in za tahen!” a ci hi. ¹⁰ Zeisu amah guak a om laitak, sawm le nihte le a kim a pam a om mite in tua thugentehna thu a dong uh hi. ¹¹ Amah in amaute kiangah, “A kiselsim Pasian kumpigam thu note kong theisak hi. Ahih hangin a pualam mite tungah thu khempeuh thugentehna tawh ka hilh hi. ¹² “Tua in, ‘Amaute in enen napi a muh theih loh nading, Ngaingai napi a tel theih loh nading uh ahi hi. Tua hi kei leh amaute hong kihei kha ding uh a, A mawhnate uh kimaisak ding hi,’ a cih thu a tangtun nading ahi hi,” ci in a dawng hi. ¹³ Tua khit ciangin Zeisu in amaute kiangah, “Note in hih thugentehna tel zolo na hih uh leh thugentehna khempeuh koici tel zawh ding na hi uh hiam? ¹⁴ Khaici vawhpa in Pasian thu a vawh hi. ¹⁵ Mi pawlkhatte lamgei a a tu khaici tawh kibang uh hi. Amaute in thu a zak uh ciangin thakhat in Satan hong pai in amaute lungsim sunga kivawhsa thu a lakkhiatsak hi. ¹⁶ Tua mah bangin pawlkhatte suang laka a tu khaici tawh kibang uh hi. Amaute in thu a zak uh ciangin lungdamtak in sang pah uh a, ¹⁷ zungkha lo uh ahih manin tawlkhat sung bek thuak zo uh a, Pasian thu hangin haksatna le bawlsiatna a tun ciangin a lungkia pah uh hi. ¹⁸ Tu in hihte in ling laka a tu khaicite ahi uh hi. Amaute in thu a za mite hi uh a, ¹⁹ leitung nuntak nading lunghimawh in khemna tawh kidim na dang tuamtuamte a lunggulh mite ahi uh hi. Tua nate in a zaksa uh thu depgawp ahih manin a gah zo kei uh hi. ²⁰ Ahi zongin hihte in leihoihna ah a tu khaici ahi uh hi. Amaute in thu a zak uh ciangin sang uh a, pawlkhatte a zah 30, pawlkhatte a zah 60, pawlkhatte a zah 100 a gah uh hi,” a ci hi. ²¹ Amah in amaute kiangah a genbeh in ah, “Note in lawh a khuh ding le lupna nuai‑a koih ding peuhin meivak vak ngei na hi uh hiam? Meivak tunna tungah koih zaw hilo na hi uh hiam? ²² Banghang hiam cihleh a kilanglo dinga a kiselsim thei bangmah om lo a, khuavak ah a kilanglo dingin a kiselcip thei bangmah om lo hi. ²³ Zak nading bil a nei mi in za tahen!” a ci hi. ²⁴ Tua ciangin amah in amaute tungah a gen in ah, “Na thu zak uh limtak in ngaihsun un. Note zat seeng mah tawh no aa dingin hong kitehsakkik ding hi. Hih thu a za note tungah a tam zaw in a hong kipia ding hi. ²⁵ Banghang hiam cihleh a neite kipiak beh dinga, a neilote a neih sunsun nangawn a kilakkhiatsak ding hi,” a ci hi. ²⁶ Tua ciangin amah in, “Pasian kumpigam in lei lakah khaici a vawh mipa tawh kibang hi. ²⁷ Tua pa, sun tawh zan tawh ihmu zel, tho zel a, ama theih loh kalin khaici poin a khang hi. ²⁸ Leitang in ama thu in gah a gahsak hi. A masa in hong ngum a, tua khit ciangin hong vui in a vui sungah a tak hong dim hi. ²⁹ A min ciangin at hunta ahih manin a phiaukawi tawh a at pah hi,” a ci hi. ³⁰ Tua ciangin amah in, “Pasian kumpigam bang tawh kibang a, bang tawh genteh ding i hi hiam? ³¹ Pasian kumpigam in ankamtang tawh kibang hi. Ankamtang in lei ah a kivawh laitak in leitung a khaici khempeuh lakah a tang neupen hi a, ³² ahih hangin a kivawh khit ciangin a kung hong po in, khai kung khempeuh sangin golzaw a, a mengkhia a hiangte golpipi hong pha hi. Tua ciangin vana leng vasate in a hiang kawm ah bu a tom thei uh hi,” a ci hi. ³³ Amah in amaute theih zawh dingin tua bang thugentehna tampi tawh a hilh hi. ³⁴ Amaute kiangah thugentehna loin thu a gen kei hi. Ahih hangin ama nungzuite bek tawh a om ciangin thu khempeuh teltak in a hilh hi. ³⁵ Tua ni nitak lamin amah in a nungzuite kiangah, “Galkhat lamah pai ni,” a ci hi. ³⁶ Tu in amaute in mihonpite a nusiat khit uh ciangin Zeisu a na tuanna sa gunkuang tawh amah a paipih uh hi. Gunkuangneu dangte zong amaute tawh a paikhawm uh hi. ³⁷ Tua laitak in huihpi nakpi in hong nung a, tuihual in gunkuang vatgawp ahih manin gunkuang tui sungah a tum dekdek hi. ³⁸ Ahih hangin Zeisu in gunkuang taw lamah lukham khat kham in a ihmu hi. Tua ciangin a nungzuite in amah phong uh a, “Sia aw, simang khin le ung phamawh salo na hi hiam?” a ci uh hi. ³⁹ Tua ciangin amah tho in huihpi taii a, tuipi kiangah, “Dai inla om hithiat in,” ci in thu a pia hi. Tua ciangin huihpi khawl in a dai dide pah hi. ⁴⁰ Amah in amaute kiangah, “Banghang in hi zahtak in lau zawzen na hi uh hiam? Banghang in upna nei lo na hi uh hiam?” a ci hi. ⁴¹ Amaute lau mahmah uh a, “Hihpa bangci bang mi hi peuhmah ahi hiam? Huihpi le tuipite nangawn in a thu a mang tazen uh hi,” ci in khat le khat a kiho uh hi.

¹ Amaute in tuili gal khat a om Gadara mite teenna kuam a tung uh hi. ² Gunkuang tung pan Zeisu a tuahkhiat ciangin dawigilo a vei mi khat han panin hong paikhia in thakhat in Zeisu a na dawntuah hi. ³ Tua pa han lakah teeng a, sikkhau nangawn tawh kuamah in a hen zo kei hi. ⁴ Banghang hiam cihleh sikkhau tawh tam veipi khih in kol a kibulh hangin a sikkhau bottat in a kol zong peksat a, kuamah in a zozo kei hi. ⁵ Han lak le mualtung ah sun le zanin om tawntung a, kiko niloh in amah le amah suang tawh a kikuiliam gawp hi. ⁶ Tua pa in Zeisu a galmuh ciangin ama kiangah tai in a bia hi. ⁷ Amah nakpi in kiko a, “A Sangbel Pasian Tapa Zeisu aw, nang tawh ka kisaina bang om ahi hiam? Kei nong bawlsiat loh nadingin Pasian minin kong thum hi,” a ci hi. ⁸ Banghang hiam cihleh Zeisu in, “Nang dawigilo aw, ama sung pan paikhia in,” ci in thu a pia zo hi. ⁹ Zeisu in ama kiangah, “Na min bang ahi hiam?” ci a, a dot ciangin amah in, “Kote tampi ka hih manun ka min Legionɠ ahi hi,” a ci hi. ¹⁰ Zeisu in tua gam panin amah a hawlkhiat loh nadingin tua pa in nakpitak in a thum hi. ¹¹ Tu in tua mun tawh a kinai mualte tungah vok honpi khat kicing in a om hi. ¹² Tua ciangin dawigilote in Zeisu kiangah, “Vok honte sungah ka lut theih nadingun hong sawl in,” ci in a thum uh hi. ¹³ Tua ciangin Zeisu in a phal pah hi. Dawigilote paikhia in vokte sungah a lut uh hi. Tua ciangin vok honte ken lakah taisuk gawp uha tui sung kidenna in a si khin uh hi. Tua vok honte 2,000 bang a pha hi. ¹⁴ Tua ciangin vokcingte tai pah vingveng uh a, khuasung le gam sungteng ah hih thu a va gen uh ciangin tua thupiang en dingin khua mite a hong paikhia uh hi. ¹⁵ Zeisu kiangah a tun uh ciangin dawigilo legionɠ khat a lutna mipa, puansilh in lungsim maan pua in tu hithiat a om a mu uh hi. Tua ciangin amaute a lau uh hi. ¹⁶ Dawi a lutna mipa le vokte tunga thupiang a mu mite in tua khua mite kiangah a gensawn uh hi. ¹⁷ Tua khit ciangin tua gam panin Zeisu a paikhiat nadingin tua mite in a ngen uh hi. ¹⁸ Gunkuang sungah Zeisu a kah ciangin dawi a lutna mipa in Zeisu zui nuamin a kun hi. ¹⁹ Ahih hangin Zeisu in sang loin ama kiangah, “Na inn ah ciah inla Topa in na lianpi hong bawlnate le hong hehpihnate na lawmte kiangah va gen in,” ci in a sawl hi. ²⁰ Tua pa pai in Zeisu in ama tunga a bawl na lianpite Decapolis gam sungteng ah kizelsak a, mi khempeuh in lamdang a sa uh hi. ²¹ Tu in gunkuang tungah Zeisu tuangin a gal khatah a galkahkik khit ciangin mihonpite a hong kikhawm uh hi. ²² Amah tuili gei ah a om laitak in en in, kikhopna inn ukte lakah Jairus kici mi khat hong pai a, Zeisu a muh ciangin a khe phungah bokin ²³ nakpitak thum a, “Ka tanuno si dekdek hi. Amah cidam a hong nuntak theih nadingin hong pai inla a tungah na khut hong ngaksak in,” a ci hi. ²⁴ Tua ciangin Zeisu in amah zui a, mihonpi in zong Zeisu paina zui uh ahih manin a phu kha gawp uh hi. ²⁵ Tualai ah kum sawm le kum nih sung siluang natna a vei numei khat a om hi. ²⁶ Gimna tampi thuakin siavuan tampi zong kibawlsak a, a neihsa teng nangawn a beita hi. Ahih hangin noptuam cih thadah a gim zaw semsem hi. ²⁷ Tua nu in Zeisu thu a zak ciangin mihonpi lakah hong lut a, a nunglam panin Zeisu puan a lawng hi. ²⁸ Banghang hiam cihleh tua nu in, “A puan va lawng beek leng zong ka dam ding hi,” a ci hi. ²⁹ A lawn khit phetin tua nu a siluang kang pah a, a natna a dam lam ama sungah a kithei hi. ³⁰ Tua ciangin Zeisu in ama sung pan vangliatna paikhia hi cih thei in mihonpi lamah thakhat in kihei a, “Kua in ka puan hong lawng ahi hiam?” a ci hi. ³¹ Ahih hangin Zeisu nungzuite in ama kiangah, “Mihonpi in nang hong sukphut hong tophut cih thei napi cin, ‘Banghang in kua in hong lawng hiam?’ cimawk na hi hiam?” a ci uh hi. ³² Zeisu in amah a lawng numeinu a muh nadingin a kim a pam teng a en kawikawi hi. ³³ Tua nu in ama tunga thupiang khempeuh thei ahih manin laulua in a ling hi. Tua khit ciangin Zeisu kiangah hong pai in ama mai ah bok a, thupiang khempeuh ahi bangbang in a genkhia hi. ³⁴ Tua ciangin Zeisu in ama kiangah, “Ka tanu aw, na upna in hong damsak zo hi. Lungnuamtak in ciah inla na natna dam tahen,” a ci hi. ³⁵ Amah a paupau laitak in kikhopna inn ukpa inn pana hong paite hong tung uh a, “Na tanu sizo hi. Banghang in Siapa buaisak lai ding na hiam?” a ci uh hi. ³⁶ Zeisu in tua thu a zak phetin kikhopna inn ukpa kiangah, “Patau kei inla um in,” a ci hi. ³⁷ Zeisu in Peter, James, le a sanggampa John longal kuamah dang a kizuisak kei hi. ³⁸ Tua ciangin kikhopna inn ukpa inn ah Zeisu a tun ciangin mite kap le mau‑a om ngeingai a mu hi. ³⁹ Zeisu inn sungah luta amaute kiangah, “Banghang in mau in kap ngeingai na hi uh hiam? Numeino a si hilo in a ihmu ahi hi,” a ci hi. ⁴⁰ Tua ciangin tua mite in amah zahpih in a nuihsan uh hi. Ahih hangin Zeisu in amaute a vekpi un pusuaksak a, numeino nu le pa le ama tonpih mite a sap khit ciangin numeino lupna inndei sungah a lut uh hi. ⁴¹ Tua ciangin amah in numeino khut len in, “Talitha, cumi,” a ci hi. A khiatna in, “Numeino aw, tho in kong ci hi,” a cihna ahi hi. ⁴² Tua ciangin numeino thakhat in tho in lam a pai hi. Amah in kum sawm le kum nih a pha numeino ahi hi. Amaute in lamdang a sa mahmah uh hi. ⁴³ Ahih hangin tua thu kuamah a theihsak loh nadingun Zeisu in khauhtak in a kham hi. Tua khit ciangin numeino nek theih khatpeuh a piak nadingun a sawl hi.

¹ Tua ciangin tua mun pan Zeisu paikhia in ama khankhiatna gamah pai a, a nungzuite in a zui uh hi. ² Sabbath ni hong tun ciangin kikhopna inn sungah thu a hilh hi. Ama thuhilhna a za mi tampi in lamdangsa mahmah uh a, “Hihpa in hih thute koilai pana a ngah ahi hiam? A khut tawh hih bang nalamdang a bawl theih nadinga a kipia pilna in bangci bang pilna hi zawzen hiam? ³ Amah in Mary tapa, khutsiampa hilo ahi hiam? James, Joses, Judah, le Simon‑te sanggampa hi lello ahi hiam? A sanggam numeite zong i kiangah om uh hilo ahi hiam?” a ci uh hi. Tua hi a, amaute in amah a sang zo kei uh hi. ⁴ Ahih hangin Zeisu in amaute kiangah, “Kamsang kici peuhmah midangte in a pahtawi uh hangin ama khuapihte, ama tanaute le ama innkuanpihte in a pahtawi ngeiloh mah uh ahi hi,” a ci hi. ⁵ Cina tawmkhatte tungah a khut nga‑a a damsak simloh, tua munah nalamdang bangmah a bawl kei hi. ⁶ Amah in amaute uplohna uh lamdang a sa hi. (6) Tua ciangin khuaneute ah zong a banban in zin kawikawi in thu a hilh hi. ⁷ Tua khit ciangin sawm le nihte ama kiangah sam a, nihta nihta in a sawlkhia hi. Dawigilote tungah thuneihna a pia hi. ⁸ Amah in amaute kiangah khualzinna ah a zat ding uh ciangkhut simloh thungip ahi a, an ahi a, sumbawm sungah sum ahi zongin bangmah a ken loh nading uh le ⁹ khedap bulhin puanak a silhthuah loh nading uh thu a pia hi. ¹⁰ Tua ciangin amaute kiangah, “Inn khatpeuh ah na tun uh ciangin tua khua pan na paikhiat mateng un tua inn ah tamsuak un. ¹¹ Note hong sang nuamlo in na thugen uh zong a ngai nuamlo mite khua pan na paikhiat uh ciangin note khenuai‑a leivuite singkhia un. Tua leivuite in amaute langkhat ah teci a suak ding hi. Aman takpi kong cih in ah, thukhen ni ciangin Sodom le Gomorrah khua mite thuakna in tua khua mite thuakna sangin thuaknop zawlai ding hi,” a ci hi. ¹² Tua ciangin a nungzuite paikhia uh a, mite a kisikkik nading thu a hilh uh hi. ¹³ Dawi tampi hawlkhia in cina tampite sathau zutin a damsak uh hi. ¹⁴ Tu in, Zeisu minthang mahmah ahih manin Kumpipa Herod in ama thu a za hi. Tua ciangin amah in, “Tuiphumpa John misite lak pan hong thokik zo a, hih vangliatnate amah in a nei ahi hi,” a ci hi. ¹⁵ Mi pawlkhat in, “Hihpa Elijah ahi hi,” a ci uh hi. A dangte in, “Kamsangpa khat ahih keileh kamsangte khatpeuh tawh a kibang mi khat ahi hi,” a ci uh hi. ¹⁶ Ahih hangin Herod in a zak ciangin, “A ngawng ka tansa John mah misite lak pan hong thokik ahi hi,” a ci hi. ¹⁷ Herod in a sanggampa Philip zi Herodias a teenpihna thu tawh kisai in John in Herod a mawhsak ngei hi. Tua ahih manin Herod in John mansak a, sikkhau tawh khih in thongah a khum hi. ¹⁸ Banghang hiam cihleh John in Herod kiangah, “Na sanggampa zi na teenpih pen thukham tawh kituak lo hi,” ci a, a gen manin tua banga a khum ahi hi. ¹⁹ Tua ahih manin Herodias in John mudah in a that nuam hi. Ahih hangin tua numei in a that thei kei hi. ²⁰ Banghang hiam cihleh Herod in John kihta a, John pen midik misiangtho ahihlam Herod in thei ahih manin amah a hu hi. John thugente in Herod lungsim buaisak mahmah a, ahih hangin a thugente hoih a sa mahmah hi. ²¹ Tua ciangin Herod in ama suah ni in a uliante, a galkap mangte le Galilee gam miliante an a vak ciangin hun hoih khat a hong om hi. ²² Tua ciangin Herodias tanu hong lutin hong lam a, Herod le amah tawh a tukhawm mite a lungkimsak mahmah hi. Tua ciangin kumpipa in nungakno kiangah, “Na deih peuhpeuh hong ngen in kong pia ding hi. ²³ Ka gam phelkhat dongin nong nget peuhpeuh kong pia ding hi,” ci in kiciam in kamciam a pia hi. ²⁴ Tua ciangin nungakno paikhia in a nu kiangah, “Bang ngen ding ka hi hiam?” ci in a dong hi. A nu in, “Tuiphumpa John lutang va ngen in,” a ci hi. ²⁵ Nungakno zong hong kilehkik pah vingveng in kumpipa kiangah, “Tuiphumpa John lutang kuangdai sung khatah hong pia pah leteh ka ut hi,” a ci hi. ²⁶ Kumpipa a dah mahmah hangin, a kiciamna le ankuang a umpihte maitang zahtakna tawh nungakno ngetna a nial nuam kei hi. ²⁷ Tua ciangin kumpipa in mithah nasep a sempa kiangah, “John lutang hong paipih in,” ci in thu a pia pah hi. Tua pa zong pai in thong sunga John ngawng va tan a, ²⁸ kuangdai sungkhat ah koihin tua nungakno pia a, nungakno in a nu a piasawn hi. ²⁹ John nungzuite in tua thu a zak uh ciangin pai in a luang la uha hanah a vui uh hi. ³⁰ Tua ciangin sawltakte Zeisu kiangah hong kisutuahkik uh a, a nasepte uh le a thuhilhna teng uh a pulak uh hi. ³¹ Tua ciangin Zeisu in amaute kiangah, “Gamdaihna mun khatah pai unla, tawmvei sung tawlnga un,” a ci hi. Mi a ciah le a kuan kiphamat in annek hun ding nangawn ngah lo uh ahih manin tua banga a gen ahi hi. ³² Tua ciangin amaute gunkuang khat tawh gamdaihna mun khatah tuam paikhiat uh hi. ³³ Tu in amaute paikhiat mihonpi in mu uh a, mi tampi in Zeisu zong a kihel lam thei uh ahih manin khua khempeuh panin khe tawh hong tai ngeingai uh hi. Zeisu tunma in tua mun na tungkhol uh a, Zeisu hong tun ciangin a kiangah hong kikhawm uh hi. ³⁴ Gunkuang sung pan Zeisu hong tuahkhiat ciangin mihonpite mu a, a cing omlo tuute tawh kibang uh ahih manin hehpihhuai sa in tua munah amaute thu tampi a hilh hi. ³⁵ Ni tum kuan ciangin nungzuite ama kiangah hong pai uh a, “Hih mun in gamlakpi hi a, ni zong tum dekta hi. ³⁶ Hih mite in annek ding bangmah neilo uh ahih manin, an lei dingin hih kima om khuaneute ah paisak in,” a ci uh hi. ³⁷ Tua ciangin amah in, “Amaute nek theih khat peuhpeuh pia un,” a ci hi. Nungzuite in, “Kote pai in denariusɠ 200 man an lei in a nek ding uh pia ding ka hi uh hiam?” a ci uh hi. ³⁸ Amah in, “Anlum bangzah nei na uh hiam? Pai unla va en dih un,” a ci hi. Amaute in a omzah a theih khit uh ciangin, “Anlum nga le ngasa nih om hi,” a ci uh hi. ³⁹ Tua ciangin Zeisu in mi khempeuh lopa tungah a honhon in tusak un ci in a sawl hi. ⁴⁰ Tua ciangin amaute pawlkhat 100, pawlkhat 50 ta in a pawlpawl in a tu uh hi. ⁴¹ Zeisu in anlum nga le ngasa nihte a lak khit ciangin vantung lam ento in lungdam a ko hi. Tua khit ciangin anlumte balkham a, mite mai ah a lui dingin nungzuite a pia hi. Ngasa nihte zong mi khempeuh lakah a hawmsak hi. ⁴² Tua ciangin mi khempeuh in gilvahtak in a ne uh hi. ⁴³ Anlum le ngasa kikhamval teng a kaihkhop uh ciangin lawh sawm le lawh nih dim a ngah uh hi. ⁴⁴ Anlum a ne mi pasal 5,000 bang a pha uh hi. ⁴⁵ Zeisu in mihonpi a ciahsak kalin nungzuite gunkuang ah tuangsak pah a, gal khat a om Bethsaida khua ah a mapaisak hi. ⁴⁶ Amaute a ciahkhiatsak khit ciangin thungen dingin mualtung ah a paito hi. ⁴⁷ Tu in nitak hong tun ciangin tuili laizang ah gunkuang om a, tuili gei leitang tungah Zeisu bek a om hi. ⁴⁸ Tua ciangin huih lehnun ahih manin nungzuite in haksapi in gunkuang a hawh uh Zeisu in a mu hi. Zanvil lina hun pawlin amaute kiang zuanin Zeisu tui tungah hong pai a, amaute a kheng dektak hi. ⁴⁹ Amah tui tunga hong pai amaute in a muh uh ciangin, sikha sa in a kiko uh hi. ⁵⁰ Banghang hiam cihleh a vekpi un amah mu uh a, a patau uh hi. Ahi zongin Zeisu in, “Lungnuamtak in om un, keimah ka hi hi. Lau kei un,” a ci hi. ⁵¹ Tua ciangin amaute tuanna gunkuang ah Zeisu a kahtoh khit ciangin huih a dai hi. Amaute in gen zawhloh zahin lamdang a sa uh hi. ⁵² Banghang hiam cihleh a lungtang uh khauhlua ahih manin anlum tawh nalamdang a bawlna thu a ngaihsun kha kei uh hi. ⁵³ A galkah khit uh ciangin Gennesaret gam tung uh a, tuili gei ah gunkuang a khih uh hi. ⁵⁴ Gunkuang sung pan a paikhiat uh ciangin mi khempeuh in Zeisu ahihlam thei pah uh a, ⁵⁵ amaute tua kima om gam tengah tai uh a, a cinate uh tal tawh hong pua in amah om hi ci a, a kizakna munmun ah a hong delh uh hi. ⁵⁶ Khuapi khuata le gam sung ama tunna peuhpeuh ah mite in kongzing lakah cinate sialin a puanmongtep beek a lawnkhak theih nadingun a ngen tentan uh hi. Amah a lawng kha zahzah in damna a ngah uh hi.

¹ Tua khit ciangin Jerusalem khuapi pana hong pai Pharisee‑te le thukhamhilh siate pawlkhat Zeisu kiangah hong paikhawm uh hi. ² Tu in a nungzuite kimkhat in khutninsa a an a nek uh amaute in a muh uh ciangin a mawhsak uh hi. Khutnin a cih ciangin khutsil lo cihna ahi hi. ³ Banghang hiam cihleh Pharisee‑te le Judah mi khempeuh in tanglai mite ngeina zui uha khutsil loin an ne lo uh hi. ⁴ Sumbuuk pan a ciah uh ciangin zong kisil loin an ne lo uh hi. Haite, belte, sumngo kuangte, le sabuaite sawpsiangna ngeina a kipan zuih ding a dang ngeina tampi zong neilai uh hi. ⁵ Tua ciangin Pharisee pawlte le thukhamhilh siate in ama kiangah, “Na nungzuite in tanglai mite ngeina zui loin banghang in khutsil lopi in an ne uh ahi hiam?” ci in a dong uh hi. ⁶ Amah in amaute kiangah, “A kineihkhem note thu, kamsangpa Isaiah in Lai Siangtho sunga a genkholhna thu a maan hi. Amah in, ‘Hih mite in a kam uh tawh a hong pahtawi uh hangin, A lungsim uh kei tawh kigamla hi. ⁷ Mihing bawltawm thukhamte thuhilhna in zang uh ahih manin, Kei a hong biakna uh a mawkna ahi hi,’ a ci hi. ⁸ “Banghang hiam cihleh Pasian thupiakte nawlkhin in tanglai ngeina ahi, bel le kuang sawpsiangna a kipan tua bang a dang ngeina tampi na zui uh hi,” a ci hi. ⁹ Amaute kiangah, “Tanglai ngeina na zuih theih nadingun Pasian thupiak na nawlkhin uh a, tua banga na hih uh ciangin hi na kisa mahmah uh hi. ¹⁰ Moses in, ‘Na nu le na pa zahtak in. A nu ahi a, a pa ahi zongin a samsia mi in thahna thuak tahen,’ ci in note thu hong pia hi. ¹¹ “Ahih hangin, ‘Note in mi khatin a nu le a pa kiangah, “Kei tung pana na ngah ding khempeuh Corban hita hi,” ci peuh leh bangmah a piak kul nawn kei hi,’ na ci uh hi. Corban a khiatna in Pasian kipia khin cihna ahi hi. ¹² Tua bang thu tawh a nu le a pa aa dingin tua pa in bangmah sep kul nawnlo hi na ci uh hi. ¹³ Note in na kihilh sawnsawn uh tanglai ngeinate zui in Pasian thu kimanna neilo na suaksak uh a, tua bang dan ngeina tampi na nei uh hi,” a ci hi. ¹⁴ Amah in mihonpite a sap khit ciangin amaute kiangah, “Na vekpi un ka thugen ngai unla thei un. ¹⁵ A pualam panin mihing sunga tumsuk na khat beekin mi a ninsak kei hi. Mihing sung pana a pusuakkhiate bekin mihing a ninsak hi. ¹⁶ Zak nading bil a nei mi in za tahen!” a ci hi. ¹⁷ Mihonpi lak pan amah paikhia a, inn sungah a lut khit ciangin a nungzuite in tua thugentehna thu a dong uh hi. ¹⁸ Tua ciangin amah in amaute kiangah, “Note in zong tel lo na hi uh hiam? A pualam pan mihing sunga a tumsuk peuhmah in mi a ninsak kei hi. ¹⁹ Banghang hiam cihleh lungsim sungah lut loin gilpi sungah lut a, a kine an khempeuh kithakhia in kisiangthosak hi,” a ci hi. ²⁰ Amah in, “Mihing sung pana pusuakte in tuami a ninsak hi. ²¹ Banghang hiam cihleh a sunglam a om mihingte lungsim panin ngaihsutna hoihlo, angkawmna, numei pasal mawhna, mithahna, ²² guktakna, duhhopna, gitlohna, khemna, numei pasal paktatna, etsatna, kosiatna, kiphatsakna, haitatnate a hong pusuak hi. ²³ Hih a hoihlo thute khempeuh sunglam pan hong pusuak in mihing a ninsak hi,” a ci hi. ²⁴ Tua khit ciangin tua mun pan amah paikhia a, Tyre le Sidon gam sungah pai in inn khatah a lut hi. Tualai ah a om lam kuama theih ding a ut loh hangin a kisel zo kei hi. ²⁵ Dawigilo a vei tanu a nei nupi khatin Zeisu thu a zak ciangin hong pai a, Zeisu khe phungah bokin ²⁶ a tanu sung pan dawigilo a hawlkhiatsak nadingin a ngen den hi. Tua nu pen Syro‑Phoenicia gama piang Greek numei khat ahi hi. ²⁷ Ahih hangin Zeisu in tua nu kiangah, “Tate annek ding la in uinote piak ding kilawm lo hi. Tua ahih manin tate ka gilvahsak masa phot ding hi,” a ci hi. ²⁸ Tua nu in, “Topa aw, hi mah hi. Ahi zongin sabuai nuai‑a om tate anneng kiate nangawn, uinote in ne kha sam uh hilo ahi hiam?” ci in a dawng hi. ²⁹ Tua ciangin Zeisu in, “Tua banga na cih manin na tanu sung pan dawigilo a taikhia zo hi. Ciahta in,” a ci hi. ³⁰ Tua nu ama inn a tun ciangin lupna tungah a tanu lum a, ama sung pan dawigilo paikhia khinzo cih a mu hi. ³¹ Tyre le Sidon khua panin Zeisu paikhia leuleu a, Decapolis gam kantan in Galilee tuili a tung hi. ³² Tua ciangin amaute in a bengngong, a pautheilo mi khat ama kiangah hong paipih uh a, tua pa tungah a khut a ngakh nadingin a ngen uh hi. ³³ Zeisu in mihonpi lak panin tua pa paikhiatpih a, a bil langnih sungah a khutme guangin a cil phiha, a lei a lawnsak hi. ³⁴ Tua khit ciangin vantung lam ento in khuisa a, ama kiangah, “Ephphatha,” a ci hi. A khiatna in, “Kihong in,” a cihna ahi hi. ³⁵ Tua pa thakhat in a bil kihong a, a leiigui zong kikhah in siangtak in a pau thei hi. ³⁶ Tua ciangin tua thu kuama kiangah a gen loh nadingun Zeisu in thu a pia hi. Ahih hangin nak kham semsem le tua mite in a nak gen semsem uh hi. ³⁷ Amaute in lamdangsa mahmah uh a, “Amah in na khempeuh a hoih in bawl a, bengngongte khuazasak in pautheilote a pautheisak hi,” a ci uh hi.

¹ Tua hun sungin mihonpite tamlua mahmah a, nek ding zong a nei kei uh hi. Tua ciangin Zeisu in a nungzuite sam a, ² “Hih mite ka kiangah ni thum hong om khin uh a, nek ding lah neilo uh ahih manin hehpihhuai ka sa hi. ³ Gilkialpi in ciahsak leng amaute pawlkhat gamlapi pana hong pai uh ahih manin lamkal ah a bah ding uh hi,” a ci hi. ⁴ Tua ciangin a nungzuite in, “Kua in mihing hi zahta hih gamlak ah an bangci vak zawh ding ahi hiam?” ci in a dawng uh hi. ⁵ Tua ciangin Zeisu in, “Anlum bangzah na nei uh hiam?” ci in a dong hi. Amaute in, “Sagih a om hi,” a ci uh hi. ⁶ Tua ciangin amah in mihonpite lei lakah tu dingin thu a piak khit ciangin anlum sagihte la in lungdam a ko hi. Tuate balkham in mipi lakah hawm dingin a nungzuite pia a, amaute in zong mihonpite lakah a hawm uh hi. ⁷ Amaute in ngasaneu tawmkha zong a nei uh hi. Amah in tuate thupha a piak khit ciangin mihonpite lakah hawm dingin thu a pia hi. ⁸ Tua ciangin amaute in a kham dong uh a nek khit uh ciangin a khamval uh a them a nengin kaikhawm uh a, lawh sagih a ngah uh hi. ⁹ Tu in an a ne mi 4,000 bang a pha uh hi. Tua khit ciangin amah in amaute ciahsak in, ¹⁰ thakhat thu in nungzuite tawh gunkuang tung tuangin Dalmanutha gamah a pai uh hi. ¹¹ Tua ciangin Pharisee pawlte hong pai in Zeisu thugen nial dingin a kipan uh hi. Amah a ze‑etna un, “Van panin limlamdang khat hong lak in,” ci in a ngen uh hi. ¹² Ahih hangin a lungsim sungah Zeisu nakpi in khuisa a, “Banghang in tulai khang mite in nalamdang mu nuam uh ahi hiam? Aman takpi kong cih in ah, tulai khang mite tungah limlamdang a kilak kei ding hi,” a ci hi. ¹³ Amah in amaute nusia in gunkuang tuangkik a, gal khat lamah a paikhia hi. ¹⁴ Tu in a nungzuite in anlum puak ding mangngilh uh a, gunkuang sungah anlum khat longal a dang bangmah a nei kei uh hi. ¹⁵ Tua ciangin Zeisu in amaute kiangah, “Pharisee pawlte silngo le Herod silngo kidawm unla pelh un,” ci in thu a pia hi. ¹⁶ Amaute in, “Anlum i neih loh manin hih banga hong ci ahi hi,” ci in a kikum uh hi. ¹⁷ Tua banga thu a kikup uh Zeisu in a theih ciangin, “Anlum na neih loh manun banghang in tua bangin kikum na hi uh hiam? Phawk thei nai lo, tel thei nailo na hi uh hiam? Na lungtang uh khauhsak lailai na hi uh hiam? ¹⁸ Mittang nei napi khuamu lo na hi uh hiam? Bil nei napi khuaza lo na hi uh hiam? Phawk thei mahmah lo na hi uh hiam? ¹⁹ “Mi 5,000 aa dingin anlum nga ka balkhap ciangin a kikhamval an lawh bangzah ngah na hi uh hiam?” ci in a dong hi. Amaute in, “Lawh sawm le lawh nih,” a ci uh hi. ²⁰ “Mi 4,000 aa dingin anlum sagih ka balkhap ciangin a kikhamval lawh bangzah ngah na hi uh hiam?” ci in a dong hi. Amaute in, “Lawh sagih,” a ci uh hi. ²¹ Tua ciangin Zeisu in amaute kiangah, “Tua ahih leh bang dinga hih thu thei lo na hi uh hiam?” a ci hi. ²² Tua ciangin amah Bethsaida khua ah hong tung a, mite in ama kiangah mittaw khat hong paipih in tua pa a lawn nadingin a thum uh hi. ²³ Tua ciangin amah in mittawpa a khut in kai a, khuanawl ah a paipih hi. Tua khit ciangin a mit cil phihsak in a tungah a khut a ngakh khit ciangin, “Na khatpeuh na mu theita hiam?” ci in a dong hi. ²⁴ Tua pa khuadak in, “Mite ka et ciangin singkung lampai bangin ka mu hi,” a ci hi. ²⁵ Tua ciangin Zeisu in tua pa mit tungah a khut khatvei ngakik a, tua khit ciangin a khuadaksak hi. A mit a ngei bangin hoihkik a, mi khempeuh teltak in a mu thei hi. ²⁶ Tua ciangin amah in tua pa a inn ah ciahsak a, ama kiangah, “Khua sungah lut kei inla, hih thu kuama kiangah gen kei in,” ci in thu a pia hi. ²⁷ Tu in Zeisu le a nungzuite Caesarea Philippi gam khuaneute ah a pai uh hi. Lam a paikawm un a nungzuite kiangah, “Mite in kei kua hi hong ci uh hiam?” ci in a dong hi. ²⁸ Amaute in, “Mi pawlkhat in Tuiphumpa John hi hong ci uh hi. Pawlkhat in Elijah hi hong ci uh hi. A dangte in kamsangte laka khat hi hong ci uh hi,” ci in a dawng uh hi. ²⁹ Tua ciangin amah in, “Tua ahih leh note in kei kua hi nong ci uh hiam?” a ci hi. Peter in, “Nang in Khazih na hi hi,” ci in a dawng hi. ³⁰ Tua ciangin amah in kuama kiangah ama thu a gen loh nadingun khauhtak in a kham hi. ³¹ Tua khit ciangin Zeisu in, “Mihing Tapa in gimna tampi thuak dinga, makaite, siampi liante le thukhamhilh siate in nialin a that ding uh hi. Ni thum khit ciangin a thokik ding hi,” ci in a nungzuite a hilhta hi. ³² Amah in hih thu siangtak in a gen ciangin Peter in amah samkhia in a taii hi. ³³ Ahih hangin amah kihei in a nungzuite en kawmsa in Peter lehtaii a, “Satan aw, ka nunglam ah kihemkhia in. Pasian nate ngaihsun loin mihing nate na ngaihsun hi,” a ci hi. ³⁴ Tua ciangin amah in mihonpite le a nungzuite samkhawm a, amaute kiangah, “Kei hong zui nuam mi peuhmah in ama pumpi deihna nial henla, a singlamteh kisuan in hong zui tahen. ³⁵ Banghang hiam cihleh ama nuntakna a hu nuam mi in a nuntakna a tanlawh ding hi. Keimah le lungdamna thu hanga a nuntakna a tanlawh mi in a nuntakna a honkhia ding hi. ³⁶ Banghang hiam cihleh mi khatin leitung buppi a ngah hangin ama nuntakna a suplawh leh bang phattuamna om ding ahi hiam? ³⁷ Ahih keileh ama nuntakna bang tawh khekkik thei ding ahi hiam? ³⁸ Angkawm hat le mawhna a bawl tulai khang mite lakah kei le ka thu a maizumpih mi peuhmah Mihing Tapa in ama Pa minthanna silh a, a siangtho vantungmite tawh a hong pai ciangin a maizumpih ding hi,” a ci hi.

¹ Tua ciangin Zeisu in amaute kiangah, “Aman takpi kong cih in ah, hih laitak a a ding mi pawlkhat in vangliatna tawh a hong tung Pasian kumpigam a muh mateng un sihna a ciam kha kei ding uh hi,” a ci hi. ² Tu in ni guk khit ciangin Zeisu in Peter, James le John‑te a tuam in samkhia a, mualsang tung khatah a kahtohpih hi. Tua khit ciangin amaute mai ah a mel a kikhel hi. ³ A puante tee deldel a, vuk bangin a pak sitset hi. Leitung a puansawpmi kuama peuh in tua zahin a paksak zo kei ding hi. ⁴ Tua ciangin Elijah le Moses hong kilang uh a, Zeisu tawh a kiho uh hi. ⁵ Tua ciangin Peter in Zeisu kiangah, “Rabbi aw, hihlai nuam ka sa uh hi. Nang aa ding buuk khat, Moses aa ding buuk khat, Elijah aa ding buuk khat, buuk thum kong lamsak ding uh hi,” a ci hi. ⁶ Amaute lau mahmah uh a, gen ding mel a theih loh man ahi hi. ⁷ Tua laitak in meiilom khatin amaute tuam a, tua meiilom sung panin, “Hihpa in ka it ka Tapa ahi hi. Ama thu na mang un!” ci in aw khat hong gingkhia hi. ⁸ Amaute in a kim a pam envat uh a, Zeisu longal kuamah dang a mu nawn kei uh hi. ⁹ Tu in mualtung pan amaute hong kumsuk uh a, Mihing Tapa misite lak pan a thawhkik khit mateng in hih a muh uh nate kuama kiangah a gen loh nadingun thu a pia hi. ¹⁰ Tua hi a, misite lak panin thokik a cih in bang a cihnopna ahi tam ci in kidong uh a, tua thu amauteng theih bekin a ciamteh uh hi. ¹¹ Amaute in, “Banghang in thukhamhilh siate in Elijah hong pai masa ding hi ci uh ahi hiam?” ci in a dong uh hi. ¹² Tua ciangin Zeisu in amaute kiangah, “Elijah hong pai masa in na khempeuh a ngeina bangsakkik ding hi. Tua ahih leh banghang in Mihing Tapa in zong gimna tampi thuak dinga, mite simmawh in om ding hi ci in kigelh ahi hiam? ¹³ Ahi zongin ken kong cih in ah Elijah hong pai khinzo a, ama thu a kigelhsa bangin amaute in a utut un a bawl khinzo uh hi,” a ci hi. ¹⁴ A nungzuite kiangah Zeisu hong pai ciangin amaute kimkot a om mihonpi a mu hi. Thukhamhilh siate zong amaute tawh thu kisel in na om uh hi. ¹⁵ Amaute khempeuh in Zeisu a muhvat uh ciangin lamdangsa mahmah uh a, ama kiangah tai in a hopih uh hi. ¹⁶ Amah in thukhamhilh siate kiangah, “Amaute tawh bang thu kikum na hi uh hiam?” ci in a dong hi. ¹⁷ Tua ciangin mihonpi lak pan mi khat in, “Sia aw, ka tapa sungah dawi lutin pau theilo ahih manin nang kiangah kong paipih uh hi. ¹⁸ Tua dawi in amah a mat ciangin a matna mun peuhpeuh ah leitang a denna hi. Tua ciangin a cilphuan kai in a hagawi a, a kongkawgawp hi. Tua hi a, hih dawi hong hawlkhiatsak dingin na nungzuite kiangah ka nget hangin a hawlkhia zo kei uh hi,” a ci hi. ¹⁹ Zeisu in, “Upna a neilo khang mite aw, bang tanvei hong ompih a, bang tanvei hong thuak lai ding ka hi hiam? Tua naupang ka kiangah hong paipih un,” ci in a dawng hi. ²⁰ Tua ciangin amaute in Zeisu kiangah tua pa hong paipih uh hi. Zeisu a muh ciangin dawi in tua pa thakhat in a kongkawsak hi. Tua khit ciangin lei ah tua pa pukin kipek a, a kam panin cilphuan a kai hi. ²¹ Zeisu in tua pasalno ii pa kiangah, “Ahi cih zawh bang tanvei sawt zo ahi hiam?” ci in a dong hi. A pa in, “A neutung a kipan ahi hi. ²² A sih nadingin tua dawi in tamveipi mei sungah puksak in tui sungah a kiasak hi. Ahi zongin nong hihsak theih a om leh hong hehpih inla hong huh in,” ci in a ngen hi. ²³ Zeisu in ama kiangah, “Na up nak leh a um mite aa dingin na khempeuh a piang thei hi,” a ci hi. ²⁴ Tua ciangin pasalno ii a pa kikokhia pah a, “Topa aw, ka um hi. Ka uplohna hong huh in!” ci in khitui luangin a ngen hi. ²⁵ Zeisu in mihonpite ama lamah hong tai a muh ciangin tua dawigilo kiangah, “Nang a pau theilo le a bengngong dawi aw, ama sung panin taikhia a, na lutkik nawnloh nadingin thu kong pia hi,” ci in a taii hi. ²⁶ Tua ciangin tua dawi kikokhia in, pasalno nakpitak kongkawsak a, tua khit ciangin ama sung panin a paikhia hi. Tua pa misi tawh kibang ahih manin mi tampi in, “Amah sita hi,” a ci uh hi. ²⁷ Ahih hangin Zeisu in ama khut lenin a phot ciangin a thoto hi. ²⁸ Inn sungah Zeisu a lut khit ciangin nungzuite in, “Kote in banghang in tua dawi hawlkhia zolo ka hi uh hiam?” ci in a dongsim uh hi. ²⁹ Zeisu in amaute kiangah, “Hih bang dawi namte thungetna le antannalo tawh paikhia lo hi,” a ci hi. ³⁰ Tua ciangin amaute tua mun pan paikhia in Galilee gam kantan uh a, Zeisu in tua thu kuama theih ding a deih kei hi. ³¹ Banghang hiam cihleh amah in a nungzuite kiangah, “Mite khutah Mihing Tapa kilehhek dinga, kithat ding hi. A kithah zawh ni thum khit ciangin a thokik ding hi,” ci in a hilh hi. ³² Ahih hangin amaute in a thugen tel lo uh a, zong a dong ngam tuan kei uh hi. ³³ Tua ciangin amaute Capernaum khua hong tung uh a, inn sung khatah a om laitak un amah in, “Lamkal ah bang thu kisel na hi uh hiam?” ci in a dong hi. ³⁴ Amaute lakah kua lianpen ding hiam cih thu lamkal ah kisel uh ahih manin pau loin a omtek uh hi. ³⁵ Tua ciangin amah tusuk in nungzui sawm le nihte sam a, amaute kiangah, “Mi khatpeuh a masa pen ding a ut leh a nunung pen hi dinga, mi khempeuh nasempa zong hi ding hi,” a ci hi. ³⁶ Tua khit ciangin naupangno khat samin amaute laizang ah a koih khit ciangin a ang ah tawi a, ³⁷ “Hih bang naupangno khat keima mina a sangmi in kei a hong sang ahi hi. Kei a hong sang mi in kei hong sang hilo in kei hong sawlpa a sang ahi hi,” a ci hi. ³⁸ Tu in John in, “Sia aw, eite hong zuilo mi khatin nangma min tawh dawite a hawlkhiat ka mu uh hi. Amah in eite hong zui lo ahih manin ka kham uh hi,” a ci hi. ³⁹ Ahih hangin Zeisu in, “Tua pa kham kei un. Keima min tawh nalamdang a bawl mi in kei hong gensia lo pah ding hi. ⁴⁰ Banghang hiam cihleh ei hong langpanlo peuhpeuh ei lam a pang hi pah hi. ⁴¹ Aman takpi kong cih in ah, Khazih mi na hih manun kei mina note tui haikhat a hong suah mi peuhmah in thaman ngah loin a om kei ding hi. ⁴² “Kei hong um hih naupangnote khat a puksak mi peuhmah a ngawngah angawina suang kikhih henla tuipi sungah kikhia leh ama aa dingin a hoih zaw ding hi. ⁴³ Na khutin hong khialhsak leh sattan in. Khut nih nei in hellɠ le a mit ngeilo meikuang sungah na lut sangin khut tawngsa in nuntakna munah lut leteh nang aa dingin a hoih zaw ding hi. ⁴⁴ “Tua hell sungah, ‘Amaute a ne thante si theilo in, Meikuang zong a mit ngei kei hi.’ ⁴⁵ “Na khe in hong khialhsak leh sattan in. Khe nih nei‑a hellɠ le a mit ngeilo meikuang sungah hong kipaih sangin khetawng sa in nuntakna munah lut leteh nang aa dingin hoih zaw ding hi. ⁴⁶ “Tua hell sungah, ‘A thante si thei loin, Meikuang zong a mit ngei kei hi.’ ⁴⁷ “Na mit in hong khialhsak leh khelkhia in. Mittang nih nei in hellɠ meikuang sungah hong kipaih sangin mittang khat guak tawh Pasian kumpigam sungah lut leteh nang aa dingin hoih zaw ding hi. ⁴⁸ “Tua hell sungah, ‘A thante si thei loin, Meikuang zong a mit ngei kei hi.’ ⁴⁹ “Banghang hiam cihleh biakpiakna a kigosa khempeuh ci a kisawh bangin mi khempeuh zong mei tawh kihahsiang ding hi. ⁵⁰ Ci a lim hangin al nawn kei leh bangci alkiksak thei ding na hi uh hiam? Ci bangin al ciat unla, khat le khat kilem in om un,” a ci hi.

¹ Tua ciangin tua mun panin Zeisu dingkhia a, Jordan gungal Judea gam a tung hi. Tua ciangin ama kiangah mihonpite hong kikhawmkik uha a hih ngei bangin amaute thu a hilhkik hi. ² Pharisee pawlte ama kiangah hong pai uh a, “Mi khatin a zi a mak ding thukham tawh a kituak hiam?” ci in ze‑et in a dong uh hi. ³ Amah in amaute dawngkik a, “Moses in bang thu hong pia ahi hiam?” a ci hi. ⁴ Amaute in, “Kimakna laigelh in a zi mak theih nading thu Moses in hong pia hi,” a ci uh hi. ⁵ Zeisu in, “Na lungtang uh khauhlua ahih manin Moses in hih thupiak a gelh ahi hi. ⁶ Ahih hangin lei a piansak cilin, ‘Pasian in pasal le numei a bawl hi.’ ⁷ ‘Tua ahih manin pasal in a nu le a pa nusia in a zi tawh kigawm dinga, ⁸ Amaute gel pumkhat sakhat a suak ding uh hi.’ Tua hi a, amaute nih hi nawnlo in sakhat ahi uh hi. ⁹ Tua ahih manin Pasian in a gawmsate mihing in khen kei tahen,” ci in a dawng hi. ¹⁰ A nungzuite in zong inn sungah hih thu mah a dongkik uh hi. ¹¹ Tua ciangin amah in amaute kiangah, “A zi ma a, numei dang tawh a kiteeng peuhmah in a zi a angkawmsan ahi hi. ¹² Numei in zong a pasal ciahsan a, pasal dang tawh a kiteen leh angkawm mah ahi hi,” a ci hi. ¹³ Tua khit ciangin Zeisu lawn dingin naupangnote ama kiangah hong paipih uh hi. Ahi zongin a nungzuite in tua mite na taii uh hi. ¹⁴ Zeisu in a muh ciangin lungkim lo a amaute a genah, “Naupangnote ka kiangah hong paisak unla kham kei un. Pasian kumpigam in naupangno tawh a kibangte aa ahi hi. ¹⁵ Aman takpi kong cih in ah, naupangnote san banga Pasian kumpigam a sanglo mi peuhmah tua kumpigam sungah a lutthei kei ding hi,” a ci hi. ¹⁶ Tua khit ciangin naupangnote a ang ah tawi in amaute tungah a khut nga in thupha a pia hi. ¹⁷ Amah lampi ah a pai laitak in mi khat hong tai in ama mai ah a khukdin khit ciangin, “Sia hoih aw, nuntak tawntungna ka luah nadingin bang hih ding ka hi hiam?” ci in a dong hi. ¹⁸ Tua ciangin Zeisu in, “Banghang in mihoih hong ci na hi hiam? Pasian Khat longal a hoih kuamah om lo hi. ¹⁹ ‘Angkawm kei in. Mi that kei in. Guta kei in. Thumaanlo in teci pang kei in. Thumaanlo pi in mi van laksak kei in. Na nu le na pa zahtak in,’ cih thukhamte na thei hi,” a ci hi. ²⁰ Tua ciangin tua pa in, “Sia aw, tuate khempeuh ka neutung a kipan ka zuih khitsa ahi hi,” a ci hi. ²¹ Tua ciangin Zeisu in tua pa en a, it ahih manin, “Na kisap khat om hi. Pai in na neihsa teng zuak inla, mizawngte pia in. Tua hi leh vantung ah sum na nei ding hi. Tua khit ciangin hong pai inla, singlamteh pua in hong zui in,” a ci hi. ²² Tua pa hau mahmah ahih manin hih thu hangin dah a, maikhingsa in a paikhia hi. ²³ Tua ciangin Zeisu in a kim a pam en a, a nungzuite kiangah, “Mihaute Pasian kumpigam sungah a lut ding uh haksa mah si in cia!” a ci hi. ²⁴ A nungzuite in ama thugen lamdangsa mahmah uh a, ahih hangin Zeisu in, “Tate aw, hauhna suanga Pasian kumpigam sung lut a sawmte aa dingin nak haksat zen si in cia! ²⁵ Mihau khat Pasian kumpigam sung a lut ding sangin kala‑oh khat phimbilvang a khum ding baih zaw hi!” a ci hi. ²⁶ Amaute in lamdangsa mahmah uh a, “Tua bang ahih leh kua in hotkhiatna ngah zo ding ahi hiam?” a kici uh hi. ²⁷ Zeisu in amaute en in a gen in ah, “Hih thu mihing tawh a pian theihloh hangin Pasian tawh tua bang ahi kei hi. Banghang hiam cihleh Pasian tawh na khempeuh a piang thei hi,” a ci hi. ²⁸ Tua ciangin Peter in, “En in, kote in ka neihsa khempeuh uh nusia in nang kong zui uh hi,” a ci hi. ²⁹ Tua ciangin Zeisu in, “Aman takpi kong cih in ah, mi khatpeuh in keima hang leh lungdamna thu hangin a inn a lo, a sanggampa a sanggamnu, a nu a pa, a zi a tate, khat peuhpeuh a nusiat leh, ³⁰ tuami in tuhun mahin innte, sanggam pasal le sanggam numei, nute, tate le lote a zah 100 a ngah ding hi. Amah in bawlsiatna zong thuak dinga, hong tung ding hunah nuntak tawntungna a ngah ding hi. ³¹ Ahih hangin a masa mi tampite nunung ding uh a, a nunung mi tampite masa ding uh hi,” a ci hi. ³² Tu in Jerusalem khuapi manawh in paito uh a, amaute mai ah Zeisu a pai hi. Nungzuite in lamdangsa mahmah uh a, amah a zui midangte a lau uh hi. Amah in sawm le nihte samkhiakik in ama tunga thupiang dingte a gen inah, ³³ “En un, Jerusalem khuapi ah i paito ding hi. Siampi liante le thukhamhilh siate tungah Mihing Tapa kilehhek dinga, amaute in thah dingin thukhen in Gentile‑te khutah a piakhia ding uh hi. ³⁴ Amaute in amah zahko in, sat in, cilphih in that ding uh a, ni thum khit ciangin a thokik ding hi,” a ci hi. ³⁵ Tua ciangin Zebedee tapate James le John hong pai uh a, ama kiangah, “Sia aw, kong nget peuhpeuh uh hong hihsak lecin ka ut uh hi,” a ci uh hi. ³⁶ Tua ciangin Zeisu in, “Note aa dingin bang hong hihsak leng ut na hi uh hiam?” a ci hi. ³⁷ Amaute in ama kiangah, “Na minthanna ah na tut ciangin na taklam ah khat, na veilam ah khat hong tusak in,” a ci uh hi. ³⁸ Ahih hangin Zeisu in amaute kiangah, “Nong nget uh bang thu hiam cih na thei kei uh hi. Ka dawn ding hai dawn zo ding na hi uh hiam, ka kibaptize nading ah kibaptize zo ding na hi uh hiam?” a ci hi. ³⁹ Amaute in, “Ka hih zo ding uh hi,” a ci uh hi. Tua ciangin Zeisu in amaute kiangah, “Ka dawn ding hai na dawn takpi ding uh a, ka kibaptize nading ah zong na kibaptize takpi ding uh hi. ⁴⁰ Ahih hangin ka taklam le ka veilam a tut ding pen kei hong piak theih hilo hi. A ngah ding a kisehkholsa mite aa ding ahi hi,” a ci hi. ⁴¹ Tua thu a dang sawmte in a zak uh ciangin James le John‑te tungah a lungkim kei uh hi. ⁴² Ahih hangin Zeisu in amaute ama kiangah sam a, “Gentile‑te sungah a uk dinga a kiseh mite in amaute ukcip uh a, a miliante un zong mipite tungah thuneihna a zang uh hi cih na thei uh hi. ⁴³ Ahih hangin note lakah tua bang ding hilo hi. Note lakah milian a suak nuam mi in note nasem ahi ding hi. ⁴⁴ Note lakah a lianpen a suak nuam mi peuhmah mi khempeuh sila ahi ding hi. ⁴⁵ Banghang hiam cihleh Mihing Tapa nangawn ama na a kisepsak dinga hong pai hilo hi. Midangte na a sepsak ding leh a nuntakna pia in mitampi a tankhia dinga hong pai ahi hi,” a ci hi. ⁴⁶ Tu in amaute Jericho khua hong tung uh hi. Zeisu le a nungzuite mihonpite tawh tonin Jericho khua pan a paikhiat laitak un Timaeus tapa Bartimaeus kici mittaw khat khutdawh ngenin lamgei ah na tu hi. ⁴⁷ Amah in Nazareth khua mi Zeisu hi cih a zak ciangin, “David Tapa, Zeisu aw, kei hong hehpih in!” ci in a kiko hi. ⁴⁸ Tua ciangin mi tampite in a daih nadingin a kham uh hangin amah kinak ko semsem a, “David Tapa aw, kei hong hehpih in!” a ci hi. ⁴⁹ Tua ciangin Zeisu dinkhawl a, “Amah sam un,” ci in thu a pia hi. Amaute in mittawpa kiangah, “Lungnuam inla dingto in. Amah in nang hong sam hi,” a ci uh hi. ⁵⁰ Mittawpa in a puan lawnkhia in dingto a, Zeisu kiangah a pai hi. ⁵¹ Zeisu in ama kiangah, “Nang aa dingin bang hong hihsak leng ut na hi hiam?” ci in a dong hi. Mittawpa in, “Rabboni aw, khua muthei leng ka ut hi,” a ci hi. ⁵² Zeisu in ama kiangah, “Ciah in, na upna in nang hong damsak zo hi,” a ci hi. Amah in thakhat in khuamu pah a, lamdung ah Zeisu a zui hi.

¹ Amaute Jerusalem khuapi tawh kinai Tanluan muala om Bethphage khua le Bethany khua hong tun uh ciangin Zeisu in a nungzuite nih sawl a, ² “Note mai‑a om khua ah va pai un. Khuasung na lut phetun kuama tuanngei nai lohna laano khat kikhih a om na mu ding uh hi. A khau sut unla hong kai un. ³ Mi khatpeuh in, ‘Banghang in sut na hi uh hiam?’ hong cih leh, ‘Topa in zang nuam hi,’ ci le uh cin, amah in hong phal pah ding hi,” a ci hi. ⁴ Amaute pai uh a, kongzing a inn pualam kongkhak gei ah a kikhih laano mu in a sut uh hi. ⁵ Tualai a a ding mi pawlkhat in, “Banghang in tua laano sut na hi uh hiam?” a ci uh hi. ⁶ Amaute in Zeisu thupiakna bangin a gen uh ciangin tua mite in a paisak uh hi. ⁷ Tua ciangin amaute in tua laano Zeisu kiangah hong paipih uh a, a tungah a puante uh a phah khit uh ciangin Zeisu a tuang hi. ⁸ Mi tampite in lampi ah a puante uh phah a, a dangte in nisuh hiangte khiak in a phah uh hi. ⁹ Ama mai‑a paite le a nung a zui mite kiko in a gen inah, “Hosannaɠ! Topa min tawh hong paipa in, Thupha ngah tahen! ¹⁰ Topa minin a hong tung ding, I pa David kumpigam in thupha ngah tahen! A sangbel munah Hosannaɠ!” a ci uh hi. ¹¹ Tua khit ciangin Jerusalem biakinnpi huang sungah Zeisu lutin na khempeuh a en kawikawi hi. Ni hong tumkuanta ahih manin sawm le nihte tawh Bethany khua ah a ciahkik uh hi. ¹² A zingciang in amaute Bethany khua pan paikhia uh a, Zeisu a gil a kial hi. ¹³ Gamlapi a om a teh a nim theikung khat a muh ciangin a gah hiam cih en dingin a va zuan hi. Theikung kianga tun ciangin thei min hun hilo ahih manin a teh longal bangmah mu lo hi. ¹⁴ Tua ciangin Zeisu in, “Tu‑a kipan kuamah in na gah ne nawn kei tahen,” a ci hi. Tua bang a cih a nungzuite in a za uh hi. ¹⁵ Amaute Jerusalem khuapi hong tun uh ciangin biakinnpi huang sungah Zeisu a lut hi. Biakinnpi huang sungah vanlei vanzuak a om mite hawlkhia a, sumkhekteɠ sabuaite le vakhu zuakte tutphahte a lumletsak hi. ¹⁶ Biakinnpi huang sungah kuamah in vanzuak ding khat peuhpeuh a puak loh nadingin zong a kham hi. ¹⁷ Tua khit ciangin hih bangin amaute thu hilh a, “ ‘Ka inn in minamte khempeuh thungetna inn kici ding hi,’ ci in Lai Siangtho sungah kigelh hilo ahi hiam? Ahih hangin note in ‘gutate phualpi,’ na suaksak uh hi,” a ci hi. ¹⁸ Thukhamhilh siate le siampi liante in tua thu a zak uh ciangin amah thah theih nading lampi a zong uh hi. Banghang hiam cihleh mi khempeuh in ama thuhilhna lamdangsa mahmah uh ahih manin amaute in amah kihta uh hi. ¹⁹ Nitak lam ciangin khuapi sung pan Zeisu a paikhia hi. ²⁰ A zingciang in amaute in theikung omna gei hong tung uh a, tua theikung a zung a kipan keugawcip in a om a mu uh hi. ²¹ Peter in Zeisu kammal phawkkik a, “Rabbi aw, en dih ve! Na samsiat theikung a keugaw hi,” a ci hi. ²² Zeisu in dawngkik in amaute kiangah, “Pasian um un. ²³ Aman takpi kong cih in ah, mi khatpeuh in hih mualpi kiangah, ‘Kikhinkhia inla tuipi sung kidenna in,’ ci in thupia in, ka cih bangin piang ding hi ci in lunghiang loin a up takpi leh a cih bangin a piang ding hi. ²⁴ Tua ahih manin ken kong cih in ah thu na nget uh ciangin ka nget khempeuh ka ngah hi ci a, na up uh leh na ngah ding uh hi. ²⁵ Thu na nget uh ciangin midang khat peuhpeuh tungah lungkim lohna na neih uh leh maisak masa un. Tua hi leh vantung a om na Pa un note mawhna zong hong maisak ding hi. ²⁶ Ahih hangin na maisak kei uh leh vantung a om na Pa un note mawhna zong hong maisak lo ding hi,” a ci hi. ²⁷ Tua ciangin amaute Jerusalem khuapi ah hong paikik uh hi. Biakinnpi huang sungah Zeisu a vak kawikawi laitak in siampi liante, thukhamhilh siate le makaite ama kiangah a hong pai uh hi. ²⁸ Amaute in ama kiangah, “Bang thuneihna tawh hih nate sem na hi hiam? Hih nate na sep nadingin thuneihna kua in hong pia ahi hiam?” ci in a dong uh hi. ²⁹ Zeisu in amaute dawng a, “Ken zong thu khat kong dong ding hi. Tua ciangin hong dawng un. Nong dawn theih uh leh bang thuneihna tawh hih nate sem ka hi hiam cih kong gen ding hi. ³⁰ John tuiphumna thu, vantung pana hong pai ahi hiam ahih keileh mihing tung pana hong pai ahi hiam? Hong dawng dih un,” a ci hi. ³¹ Tua ciangin amaute kikum uh a, “ ‘Vantung pana hong pai hi,’ ci lehang, ‘Banghang in amah um lo na hi uh hiam?’ hong ci ding hi. ³² ‘Mihing tung pana hong pai hi,’ ci lehang lah mite khempeuh in John pen kamsang taktak a a san uh ahih manin mite i kihta hi,” a kici uh hi. ³³ Tua ahih manin, “Ka thei kei uh hi,” ci in a dawng uh hi. Zeisu in, “Ken zong bang thuneihna tawh hih nate sem ka hi hiam cih kong gen kei ding hi,” ci in a dawng hi.

¹ Tua ciangin Zeisu in amaute kiangah thugentehna tawh thugen kipan a, “Mi khatin lenggah lo khat bawl a, suang tawh dai um in lenggah cil nading mun le tausang khat zong a dawh hi. Tua khit ciangin lokhawh thalawhte khosak in khual gamlapi khatah a zinsan hi. ² Lenggah lak hun ciangin lokhawh thalawhte kiangah a gah pawlkhat la dingin a nasemte khat a paisak hi. ³ Amaute in tua pa manin a vuak khit uh ciangin a guak ciahsak uh hi. ⁴ Tua ciangin loneipa in a dang nasem khat a sawlkik hi. Amaute in tua pa suang tawh dengin a lutang satliam uh a, a zumhuaipi in bawl in a ciahsak uh hi. ⁵ Loneipa in nasem dang khat sawlkik leuleu a, amaute in tua pa a that uh hi. Nasem dang tampi sawlbeh a, tuate zong pawlkhat vua in, pawlkhat a that uh hi. ⁶ “Tu in loneipa in a sawl theih ding a it mahmah a tapa khat bek omlai ahih manin amah in, ‘Ka tapa zahtak kha ding uh hi,’ ci in a tawpna ah a tapa a paisak hi. ⁷ “Ahih hangin tua lokhawh thalawhte in, ‘Hihpa a innluah ding pa ahi hi. Hong pai un, amah that ni. Tua hi leh ama luah ding teng eite aa hong suak ding hi,’ ci in a kikum uh hi. ⁸ “Tua hi a, tua pa manin a thah khit uh ciangin lenggah lo pua lamah a luang a pai uh hi. ⁹ “Tua ahih ciangin lenggah lo neipa in amaute bang a cih ding hiam? Amah hong pai in lokhawh thalawhte that dinga, lenggah lo zong midangte a pia ding hi. ¹⁰ Lai Siangtho sunga a kigelhna ah, ‘Innlamte in a nilkhiat uh suang, Innkiusuang bulpi a suak hi. ¹¹ Hih in Topa sep hi a, Eite muhna ah lamdang hi,’ a kici thu sim ngeilo na hi uh hiam?” a ci hi. ¹² Amaute a kawkna in hih thugentehna a genlam thei uh ahih manin amah a matsawm uh hi. Ahih hangin mipite lau uh ahih manin amah nusia in a paikhiamang uh hi. ¹³ Tua khit ciangin ama kammal tawh amah mawhmat dingin Pharisee pawlte le Herod pawlte sung panin mi pawlkhat Zeisu kiangah a sawl uh hi. ¹⁴ Tua mite Zeisu kianga tun uh ciangin ama kiangah, “Sia aw, nang na thuman a, maitang zahtak tuam zong na neih loh banah kuamah dawm loin Pasian thu maantak in na hilh hi cih kong thei uh hi. Caesar kumpipa tungah mimal siah piak ding thukham tawh kituak hiam kituak lo hiam? ¹⁵ Pia ding ka hi uh hiam pia lo ding ka hi uh hiam?” a ci uh hi. Zeisu in amaute a kineihkhem ahihlam uh thei ahih manin, “Banghang in hong ze‑et na hi uh hiam, denariusɠ tang khat hong la unla hong lak dih un,” a ci hi. ¹⁶ Tua ciangin amaute in denariusɠ tang khat hong paipih uh hi. Amah in, “Hih in kua lim le kua min ahi hiam?” a ci hi. Amaute in, “Caesar lim le min ahi hi,” a ci uh hi. ¹⁷ Tua ciangin Zeisu in, “Caesar neihsate Caesar pia unla Pasian neihsate Pasian pia un,” a cih ciangin amaute in lamdang a sa mahmah uh hi. ¹⁸ Tua khit ciangin misite thokik lo hi a ci Sadducee‑te pawlkhat ama kiangah hong pai in thu dong uh a, ¹⁹ “Sia aw, mi khatin ta nei loin a zi a sihsan leh a naupa in a zi luah henla, a upa tangin suan le khak tawi hen ci in Moses in a na gelh hi. ²⁰ Tu in unau pasal sagih a om uh hi. A upapen in zi nei a, suan le khak nei loin amah a si hi. ²¹ A nihnapa in tua nu teenpih a, suan le khak neilo mahin a si hi. A thumna pa zong tua bangmah ahi hi. ²² A sagih un tua nu teenpih uh a, suan le khak neilo vive in a si uh hi. A nunung pen in tua numei zong a si hi. ²³ Tua ahih teh thawhkik ni ciangin hong thokik le uh tua numei kuapen zi in om ding ahi hiam? Banghang hiam cihleh a sagih un tua numei a teenpih uh hi,” a ci uh hi. ²⁴ Zeisu in amaute kiangah, “Lai Siangtho ahi a, Pasian vangliatna ahi zongin thei lo na hih manun na sangkhial uh hi. ²⁵ Misite lak pan a thawhkik uh ciangin kuamah kipi kiteeng nawnlo ding uh a, vana om vantungmite a bang ding uh hi. ²⁶ Ahi zongin misite thawhkikna tawh kisai in Pasian in Moses kiangah, ‘Keimah in Abraham Pasian, Isaac Pasian, Jacob Pasian ka hi hi,’ ci in sawlbawk kuang sung panin a genna thu Moses laibu sungah sim ngeilo na hi uh hiam? ²⁷ “Pasian in misite Pasian hilo in a nungta mite Pasian ahi hi. Tua ahih manin na theikhial mahmah uh hi,” ci in a dawng hi. ²⁸ Tua khit ciangin thukhamhilh siate khat hong pai a, a thu kidotte uh hong za hi. Zeisu in thu kidongte kituak taka a dawnkik lianlian theih lam a zak ciangin Zeisu kiangah, “Thupiak teng lakah a lianpen bang ahi hiam?” ci in a dong hi. ²⁹ Zeisu in, “Thupiak teng lakah a lianpen in, ‘Israelte aw, ngai un. Topa i Pasian in, Topa khat bek ahi hi. ³⁰ Na lungsim khempeuh, na nuntakna khempeuh, na pilna khempeuh le na hatna khempeuh tawh Topa na Pasian it in.’ Hih in a lianpen thupiak ahi hi. ³¹ A nihna in a masa bang hi a, ‘Nang le nang na ki‑it bangin na vengpa na it in,’ cih thupiak ahi hi. Hih thupiakte sangin a lianzaw thupiak a om kei hi,” ci in a dawng hi. ³² Tua ciangin thukhamhilh siapa in, “Maan mahmah hi, Sia aw, thuman thutak na gen hi. Pasian khat bek om a, amah longal Pasian dang om lo hi. ³³ Mi khatin a lungsim khempeuh, a theihna khempeuh, a nuntakna khempeuh le a hatna khempeuh tawh Pasian it a, amah a ki‑it bangin a vengpa zong a it ding ahi hi. Hih in haltum biakpiakna le gangawh biakpiakna khempeuh sangin a thupi zaw hi,” ci in a gen hi. ³⁴ Tua pa in pilna tawh a dawn lam Zeisu in a theih ciangin ama kiangah, “Pasian kumpigam tawh na kigamla kei hi,” a ci hi. Tua hun a kipan kuamah in thu a dong ngam nawn kei uh hi. ³⁵ Tua khit ciangin Zeisu in biakinnpi huang sungah thu a hilh laitak in, “Banghang in thukhamhilh siate in, Khazih in David Tapa hi ci thei uh ahi hiam? ³⁶ David in Kha Siangtho theihsakna tawh a genna ah, ‘Topa in ka Topa kiangah, “Na galte na khengakna ka suahsak khit mateng in, Ka taklam ah na tu in,” ci hi,’ ci in a gen hi. ³⁷ “Tua hi a, David in amah Topa ci ahih leh bangci bangin ama tapa hi thei zel ding ahi hiam?” a ci hi. Mi honpite in lungdamtak in ama thugen a ngai uh hi. ³⁸ Tua ciangin Zeisu in amaute kiangah, “Thukhamhilh siate thuhilhna kidawm un. Amaute in puantualpi silhsa in vak kawikawi ding le sumbuuk khawng a zahtakna tawh hopih ding a ut uh hi. ³⁹ Kikhopna innte ah tutna thupi tata le pawi annekna munah munhoih tata a deih uh hi. ⁴⁰ Amaute in meigongte neihsa teng netum uh a, kineihtawmna tawh sawt pipi thu a ngen uh hi. Tua bang mite in a nasia zaw mawhsakna a thuak ding uh hi,” ci in thu a hilh hi. ⁴¹ Tu in sumpi khiatna kuang mai ah Zeisu tu in mite sumpi khiat a mu hi. Mihaute in sum tampipi a khia uh hi. ⁴² Tua ciangin a zawng meigongnu khat hong pai in dangka tang khat tawh kikim sumnenɠ tang nih a khia hi. ⁴³ Zeisu in a nungzuite sam a, amaute kiangah, “Aman takpi kong cih in ah, sumpi khiatna kuang sunga sumkhia khempeuh lakah hih a zawng meigongnu in tam a khia pen hi. ⁴⁴ Banghang hiam cihleh midangte in tampi a neih lak panin a khiat uh hi a, meigongnu ahih leh zawng napi in a kivak nading nangawn sit loin a neih khempeuh a khia hi,” a ci hi.

¹ Tua ciangin biakinnpi huang sung pan Zeisu a paikhiat laitak in a nungzuite khat in, “Sia aw, en dih in hih suangte bangzahtak in gol a, hih innte bangzahtak in thupi ahi hiam!” a ci hi. ² Zeisu in, “Hih a lian mahmah innte mu hilo na hi uh hiam? Hih suangte khat tungah khat nangawn kiciang nawnlo in a kiphelkhia mang ding hi,” ci in a dawng hi. ³ Tua khit ciangin biakinnpi lam nga in Tanluan mualtung ah Zeisu a tu hi. Tua laitak in Peter, James, John le Andrew‑te in a tuam in thu a dong uh hi. ⁴ Amaute in, “Hih thute cik ciangin hong piang ding ahi hiam? Hih thu khempeuh a hong pian ding ciangin theihsakna lim bangbang a hong piang ding hiam? Hong hilh in,” a ci uh hi. ⁵ Tua ciangin Zeisu in amaute dawngin thu a gen in ah, “Kuamah in note hong khem zawhloh nadingin kikem un. ⁶ Mi tampi in, ‘Keimah in Khazih ka hi hi,’ ci in keima minin hong pai ding uh a, mi tampi a khem ding uh hi. ⁷ Gal kidona thu le gal hong piang ding hi cih kamdawnte na zak uh hangin patau kei un. Tua bang thute a piang ding mah hi a, ahih hangin beina a tung nai kei ding hi. ⁸ Banghang hiam cihleh minam khat le minam khat, kumpigam khat le kumpigam khat hong kido ding uh hi. Mun tuamtuam ah zin hong ling dinga, kialpi le buainate a hong tung ding hi. Tuate in nausuah natna tawh a kibang gimna kipatna ahi hi. ⁹ “Tua ahih manin na kikem un. Banghang hiam cihleh amaute in thukhente tungah note hong pia ding uh a, kikhopna innte ah a hong sat ding uh hi. Keima hangin mangpite le kumpite mai ah hong puak ding uh a, tua in amaute tungah teci na pan theih nading uh ahi hi. ¹⁰ Minam khempeuh tungah lungdamna thu a kitangko masa ding hi. ¹¹ Amaute in note hong manin zumah hong puak uh ciangin bang ka gen ding hiam ci in lunghimawh masa kei unla bangmah zong ngaihsun khol kei un. Banghang hiam cihleh a gen ding note hilo in Kha Siangtho ahih manin a hun liana hong piak bangbang in na gen un. ¹² “Tua ciangin unau khat le khat thah dingin a kilehhek ding uh hi. Pa in a ta lehhek dinga, tate in a nu le a pa langpan in thah a sawm ding uh hi. ¹³ Keima min hangin mi khempeuh in note hong mudah ding uh hi. Ahih hangin a tawp donga a kip mi in hotkhiatna a ngah ding hi. ¹⁴ “Lai Siangtho a sim mi in thei tahen. Kamsangpa Daniel in a gensa ahi gam sung a hawmsuaksak, a lipkhaphuai na, ama om nading mun hilopi a, a hong ding na muh uh ciangin Judea gama om mite mualtung ah tai uh hen. ¹⁵ Innkhum zanga om mi in na khatpeuh la dingin inn sungah kumsuk in lut nawn kei hen. ¹⁶ Lokuante zong puan la dingin ciahkik nawn kei uh hen. ¹⁷ Tua hun laitak a naupaai numeite le nawine lai naungek a nei nupite a genthei mahmah ding uh hi! ¹⁸ Na tai hun uh phalbi laitak ahih khakloh nadingin thungen un. ¹⁹ Banghang hiam cihleh Pasian in na khempeuh a piansak cil a kipan tuni ciangdong a piang ngei nailo, tunung ciangin zong a piang ngei nawnlo ding gimna, tua hun ciangin a piang ding hi. ²⁰ Topa in tua hun a tomsak kei leh kuamah a suakta zo kei ding hi. Ahi zongin a teelsa mite hangin tua hun a tomsak ding hi. ²¹ Tua hun ciangin mi khatpeuh in, ‘En un, hihlai ah Khazih om hi! En un, hualai ah Khazih om hi!’ a hong cih leh um kei un. ²² Banghang hiam cihleh Khazih maanlote le kamsangzuaute hong piang dinga, a teelsate nangawn a khem zawh uh leh a khem dingin limlamdangte le nalamdang lianpite a lak ding uh hi. ²³ Tua ahih ciangin kidawm un. En un, hih thute khempeuh a pianma in kong gen khinzo hi. ²⁴ “Tua gimna hun khit ciangin, ‘Ni hong mial dinga, Kha zong a tang nawn kei ding hi. ²⁵ Vantung a aksite hong kia dinga, Vantung nate kiling ding hi.’ ²⁶ “Tua ciangin Mihing Tapa in vangliatna le minthanna lianpi tawh meii lakah a hong pai amaute in a mu ding uh hi. ²⁷ Tua ciangin amah in a vantungmite sawl dinga, lei kiuli pan leimong khat pan vanmong khat donga om a teelsa mite a kaikhawmsak ding hi. ²⁸ “Tu in theikung thugentehna panin hih thu na sin un. Theikung a hiang meng a, a teh a no ciangin khuakhal hun hong naita hi ci in na thei uh hi. ²⁹ Tuamah bangin note in zong hih thute hong piang na muh uh ciangin tua hun kongbiang dongah hong tungta hi ci in na thei un. ³⁰ Aman takpi kong cih in ah, tulai khang mite a beima teitei in hih thu khempeuh a hong piang ding hi. ³¹ Van le lei a mangthang ding hi. Ahih hangin ka thute a mangthang ngei kei ding hi. ³² “Ahih hangin tua ni le tua hun kuamah in a thei kei hi. Vana om vantungmite nangawn in thei loin Tapa in zong thei lo hi. Ahi hangin Pa khat bekin a thei hi. ³³ A hun ding thei lo na hih manun kikem un. Pilvang unla thungen un. ³⁴ Hih thu in khual gamlapi a a zinkhia ding mipa tawh kibang hi. Amah in a inn nusia in a nasemte tungah a innvaiteng ap a, a nasep ding ciat uh zong a pia hi. Kong cingpa zong hoihtak a a cing dingin thu a pia hi. ³⁵ “Tua ahih ciangin inn neipa in nitak ahi a, zankim laitak ahi a, aak masa khuan le zingsang phalvak ahi zongin bang hunin hong tung ding cih thei lo na hih manun kiging den un. ³⁶ Tua hi kei leh amah thakhat in hong tung dinga, na ihmut laitak uh hong tuak ding hi. ³⁷ Note kiangah kiging den un kong cih mah bangin mi khempeuh tungah zong ka ci hi,” a ci hi.

¹ Ni nih khit ciangin Paisan Pawi le Silngo Sawhloh Anlum Pawikham hun a tung hi. Siampi liante le thukhamhilh siate in zuauthu tawh Zeisu mana a thah theih nadingun lampi a zong uh hi. ² Ahih hangin amaute in, “Mihonpi hong so kha ding ahih manin pawikham sungin hih kei ni,” a kici uh hi. ³ Bethany khua‑a miphak ngeipa ahi Simon inn sungah Zeisu an ne‑a a tut laitak in ama kiangah numei khat a hong pai hi. Tua nu in a manpha mahmah sathau namtui suangkang thawl khat hong paipih in a sukkhap khit ciangin Zeisu luzang ah a buak hi. ⁴ Tualai a om mi pawlkhatte lungkim lo uh a, “Banghang in hih numei in sathau namtui tuaci thangbawl ahi hiam? ⁵ Denariusɠ 300 val bangin zuak in mizawngte piakhuai hi,” ci in nakpi in a mawhsak uh hi. ⁶ Ahih hangin Zeisu in, “Tua ci omsak lel un. Banghang in amah nawngkaisak na hi uh hiam? Amah in keima tungah na hoih khat a hong bawl ahi hi. ⁷ Banghang hiam cihleh mizawngte note tawh om den a, na ut hunhun un amaute tungah thupha na bawlthei ding uh hi. Ahih hangin kei ka hih leh note tawh a omkhawm den ding ka hi kei hi. ⁸ Amah in ahih theih zahin a hih zo hi. A kivui ding ka pumpi sathau nuhin a hong pai ahi hi. ⁹ Aman takpi kong cih in ah, lungdamna thu a kitangkona hih leitung mun khempeuh ah hih numei thu a kiphawk nadingin kei tunga a hong bawlna a kigen ding hi,” a ci hi. ¹⁰ Tua ciangin sawm le nihte laka khat, Judas Iscariot in Zeisu lehhek dingin siampi liante kiangah a pai hi. ¹¹ Siampi liante in tua thu a zak uh ciangin lungdam uha sum piak dingin a kamciam uh hi. Judah in Zeisu a lehhek theih nading hunhoih a ngak hi. ¹² Tua ciangin Silngo Sawhloh Anlum Pawi kipat ni, Paisan tuuno a kigawh ni in a nungzuite in Zeisu kiangah, “Paisan Pawi an na nek nadingin koilai munah hong bawlkholhsak le ung na ut hiam?” ci in a dong uh hi. ¹³ Amah in a nungzuite nih sawl a, “Khua sungah pai le uh teh tuibel a pua pasal khat tawh na kituak ding uh hi. Amah zui un. ¹⁴ Ama lutna inntekpa kiangah, ‘Siapa in, “Ka nungzuite tawh Paisan Pawi an ka nek nading na zintunna inndei koilai ahi hiam?” ci un,’ a ci hi. ¹⁵ Tua ciangin amah in inndei tungnung ah a za mahmah a kipuah a kibawlkholsa inndei khat hong lak ding hi. Tua sungah na bawlkhol un,” ci in thu a pia hi. ¹⁶ Tua ciangin a nungzuite paikhia uh a, khua sungah lutin Zeisu gensa mah bangin mu uh a, Paisan Pawi an a bawlkhol uh hi. ¹⁷ Nitak ciangin sawm le nihte tawh amah a hong pai hi. ¹⁸ Tu in amaute tusuk in an a nek laitak un Zeisu in, “Aman takpi kong cih in ah, keimah tawh an a nekhawm note lakah khatin nong lehhek ding uh hi,” a ci hi. ¹⁹ A nungzuite khatem mahmah uha ama kiangah, “Kei ka hi hiam?” ci in khat khit khat a banban in a dong uh hi. Tua ciangin a dang khat in, “Kei ka hi hiam?” a ci hi. ²⁰ Amah in amaute kiangah, “Sawm le nihte lak panin kei tawh kuang sungah an a sawkkhawm mipa ahi hi. ²¹ Mihing Tapa in ama thu Lai Siangtho sunga a kigelhsa bangin a piang ding mah ahi hi. Ahi zongin Mihing Tapa a lehhekpa in gimna a thuak ding hi! Tua pa mihing in a piang vetlo hi leh ama aa dingin a hoih zaw ding hi,” ci in a dawng hi. ²² Amaute in an a nek laitak un Zeisu in anlum la a, lungdamna a koh khit ciangin balkham in amaute a pia hi. Amah in, “La unla ne un. Hih in ka pumpi ahi hi,” a ci hi. ²³ Tua khit ciangin hai la a, lungdam a koh khit ciangin amaute a pia hi. Amaute khempeuh in tua hai panin a dawn uh hi. ²⁴ Tua khit ciangin amah in amaute kiangah, “Hih in mi tampi aa dingin a luangkhia kiciamna thak ka sisan ahi hi. ²⁵ Aman takpi kong cih in ah, Pasian kumpigam sungah lenggahzu a thak ka dawn ni mateng in ka dawn nawn kei ding hi,” a ci hi. ²⁶ Amaute in biakna la khat a sak khit uh ciangin Tanluan mual zuanin a pai uh hi. ²⁷ Tua ciangin Zeisu in amaute kiangah, “ ‘Tuucingpa ka satliam dinga, Tuute a kithehthang ding uh hi,’ ci in Lai Siangtho sungah a kigelh mah bangin, tu zan ciangin na vekpi un keima hangin na puk ding uh hi. ²⁸ “Ahih hangin ka thawhkik khit ciangin Galilee gamah note ma in ka na paikhol ding hi,” a ci hi. ²⁹ Peter in, “Mi khempeuh a puk zongin kei ka puk kei ding hi,” a ci hi. ³⁰ Tua ciangin Zeisu in, “Aman takpi kong cih in ah, tuzan aak nihvei a khuanma in thumvei nong nial ding hi,” a ci hi. ³¹ Peter in, “Nang tawh sihkhawm nading ahi zongin kong nial peuhmah kei ding hi,” ci in a khauhzaw in a gen hi. A dangteng in zong tuamah bangin a ci ciat uh hi. ³² Tua ciangin Gethsemane a kici mun khat a tung uh hi. Zeisu in a nungzuite kiangah, “Ka thunget kalin hihlai ah na tu un,” a ci hi. ³³ Amah in Peter, James le John‑te tonpih a, tua lai ah a lungkham le a lungzin mahmah hun hong kipan hi. ³⁴ Tua khit ciangin amaute kiangah, “A si zo ding zah dongin ka lung a gim mahmah hi. Hih lai ah om unla hong ngak un,” ci in thu a pia hi. ³⁵ Amah a gamla zawdeuh ah pai a, lei ah bokin tua hun tawh a kipelh theih leh a kipelh nadingin thu a ngen hi. ³⁶ Amah in, “Abbaɠ, Pa aw, nang aa dingin na khempeuh piangthei ahih manin hih hai tawh hong kipelhsak in. Ahi zongin kei deihna bang hilo in nangma deihna bang hi zaw tahen,” a ci hi. ³⁷ Tua ciangin a nungzuite kiang a tun ciangin amaute ihmu in a om a mu hi. Amah in Peter kiangah, “Simon aw, ihmu na hi hiam? Nai khat sung nangawn hong ngak zolo na hi hiam? ³⁸ Ze‑etna sungah na lut khakloh nadingun thungen in kiging un. Lungsim a ut mahmah hangin pumpi a thanem hi,” a ci hi. ³⁹ Amah va paikhiakik in a nget ngeiteng mah a va ngen hi. ⁴⁰ Hong kilehkik ciangin hak zo mahmah lo uh ahih manin ihmukik in a om uh a mu hi. Amaute in amah a dawn nading mel a thei kei uh hi. ⁴¹ A thumveina hong pai ciangin Zeisu in amaute kiangah, “lhmumu lai in, tawlnga lailai ding na hi uh hiam? Pha zo hi. A hun hong tungta hi. En un, Mihing Tapa mawhneite khut sungah hong kilehhek ding hun hong tungzo hi. ⁴² Tho un. Pai ni. En un, kei hong lehhekpa hong tungta hi,” a ci hi. ⁴³ Amah tua banga a paupau laitak in sawm le nihte lakah khat ahi Judas le namsau le molhtum a tawi mihonpi thakhat in hong suak uh hi. Tua mite pen siampi liante, thukhamhilh siate le makaite sawl ahi uh hi. ⁴⁴ Tu in a lehhekpa in, “Ka nap mipa amah ahi hi. Man unla lencip in paikhiatpih un,” ci in amaute theihsakna limkhat a piaksa ahi hi. ⁴⁵ Amah a hong tun phetin Zeisu kiang naih a, “Rabbi, Rabbi,” ci in a nam hi. ⁴⁶ Tua ciangin amaute in Zeisu manin a paikhiatpih uh hi. ⁴⁷ Ama kianga a ding mi khatin a namsau dokin Siampi Ukpa nasempa a sat leh a bil a satkhia hi. ⁴⁸ Tua ciangin Zeisu in amaute kiangah, “Guta buluh khat man ding bangin namsau le molhtumte tawi in kei hong man dingin hong kuan na hi uh hiam? ⁴⁹ Nisim in biakinnpi huang sungah thu hilhin note tawh ka om a, nong man kei uh hi. Ahih hangin Lai Siangtho a tangtun loh phamawh hi,” a ci hi. ⁵⁰ Tua ciangin amaute khempeuh in amah nusia in a taikek uh hi. ⁵¹ Tu in dialkang khat bek a silh tangvalno khatin Zeisu nung a zui hi. Mihon laka tangval dangte in tua pa a mat uh ciangin, ⁵² tua pa in a dialkang nusia in a guaktang in a taikhia hi. ⁵³ Amaute in Siampi Ukpa kiangah Zeisu a paipih uh hi. Tua Siampi Ukpa kiangah siampi liante, makaite le thukhamhilh siate khempeuh a na kikaikhawm uh hi. ⁵⁴ Peter in Siampi Ukpa inntual dongin Zeisu galzuih a, tua munah biakinn cingte tawh tukhawm in mei a awi hi. ⁵⁵ Tu in siampi liante le thukhenteɠ khempeuh in Zeisu thah theih nading teci a zon uh hangin khat beek a mu zo kei uh hi. ⁵⁶ Banghang hiam cihleh mi tampi in Zeisu langah zuau teci a pan uh hangin a teci pannate uh khat le khat a kituak kei hi. ⁵⁷ Tua ciangin mi pawlkhat dingto in ama langah zuau teci a pang uh hi. ⁵⁸ Amaute in, “Hihpa in, ‘Khut tawh kibawl hih biakinnpi ka susia dinga, khut tawh kibawllo a dang biakinnpi khat ni thum sungin ka lamkik ding hi,’ a cih ka za uh hi,” a ci uh hi. ⁵⁹ Ahih hangin tua thu nangawn ah amaute teci panna a kituak kei hi. ⁶⁰ Tua ciangin amaute laizang ah Siampi Ukpa dingto in Zeisu kiangah, “Kam khat beek dawng lo ding na hi hiam? Na langa hih mite teci panna bang thu ahi hiam?” ci in a dong hi. ⁶¹ Ahih hangin Zeisu in bangmah dawng loin a sip dide hi. Siampi Ukpa in, “Phatna a Ngahpa Tapa, Khazih na hi hiam?” ci in a dongkik hi. ⁶² Zeisu in, “Ka hi hi. Mihing Tapa in Vangliatna taklam ah tu in vana meiipi tungah hong pai na mu ding uh hi,” a ci hi. ⁶³ Tua ciangin Siampi Ukpa in a puan balkek a, “Teci dang bang kisam nawn i hi hiam? ⁶⁴ Pasian tunga a pausiatna na za zo uh hi. Bangci ngaihsut na hi hiam?” a ci hi. Amaute khempeuh in, “Amah a si dingin kilawm hi,” ci in a mawhsak uh hi. ⁶⁵ Tua ciangin pawlkhat in amah cil a phih uh hi. A mai tunsak in tum uh a, “Kamsanna tawh hong gen in,” a ci uh hi. Biakinn cingte in zong a beng uh hi. ⁶⁶ Inntual ah Peter a om laitak in Siampi Ukpa nasem numei khat ama kiangah a hong pai hi. ⁶⁷ Tua nu in mei‑awi a om Peter a muh ciangin en a, “Nang zong Nazareth khua mi Zeisu pawl na hi hi,” a ci hi. ⁶⁸ Ahih hangin Peter in, “Na gen thu, ka thei kei a, zong ka tel kei hi,” ci in a nial hi. Tua ciangin amah inn pualam zuanin paikhia a, aak a khuang hi. ⁶⁹ Tua ciangin tua nasem numei in amah va mukik a, a kianga a ding mite kiangah, “Hih mipa in amaute lakah khat ahi hi,” a ci hi. ⁷⁰ Tua ciangin Peter in a nialkik hi. Tua zawh a sawtlo in ama kianga a ding mite in, “Nangin amaute lakah khat na hi takpi hi. Galilee mi na hih lam na awkaih tawh kithei hi,” a cikik uh hi. ⁷¹ Ahih hangin Peter in, “Na genpa uh ka thei kei hi,” ci in amah le amah kihamsiat in a kiciam hi. ⁷² Tua ciangin a nihveina aak a khuang hi. Zeisu in, “Aak nihvei a khuanma in thumvei na hong nial ding hi,” ci a, a gen thu Peter in phawkkik ahih manin a kapkhia hi.

¹ Zingsang tungin siampi liante in makaite, thukhamhilh siate le thukhenteɠ khempeuh tawh thakhat in thu kikupna khat a nei uh hi. Amaute in Zeisu henin, paikhiatpih uha Pilate khutah a pia uh hi. ² Tua ciangin Pilate mangpa in, “Nang Judah mite Kumpipa na hi hiam?” ci in a dong hi. Zeisu in, “Na cih bangin ka hi hi,” ci in a dawng hi. ³ Siampi liante in thu tampi tawh a mawhmat uh hangin Zeisu in kam khat beek a dawng kei hi. ⁴ Tua ciangin Pilate mangpa in, “Na langah hihzah taka hong kimawhmatna thu za khin na hih ciangin kam khat beek dawng lo ding na hi hiam?” ci in a dongkik hi. ⁵ Ahih hangin Zeisu in a dawn loh ciangin Pilate in lamdang a sa mahmah hi. ⁶ Tu in pawi hun ciangin Pilate in thongkiate lak pan in amaute nget penpen mi khat a khahsak zel pen ngeina khat ahi hi. ⁷ Tua laitak in Barabbas a kici mi khat, kumpi a langpanpih a lawmte tawh thong sungah kol kibulh in a om hi. Amaute in kumpi langpang in mi a thatte ahi uh hi. ⁸ Tua ciangin mihonpite nakpitak kiko in Pilate in ahih ngei banga mi khat a khahsak nadingin a ngen uh hi. ⁹ Ahih hangin Pilate in, “Judah mite Kumpipa hong khah leng na ut uh hiam?” ci in a dong hi. ¹⁰ Banghang hiam cihleh siampi liante in Zeisu a hazat manun ama kiangah a piakkhiat uh ahihlam Pilate in a thei gige hi. ¹¹ Ahih hangin siampi liante in mihonpite hansuah uh a, Pilate in Barabbas a khah zawk nading a ngensak uh hi. ¹² Tua ciangin Pilate in, “Tua ahih leh, Judah mite Kumpipa hi na cihpa uh bang kong cihsak ding deih na hi uh hiam?” a cikik hi. ¹³ Amaute in, “Amah khailum in!” ci in a kikokik uh hi. ¹⁴ Tua ciangin Pilate in amaute kiangah, “Banghang in khailum ding ka hi hiam? Amah in bang thusia bawl ahi hiam?” ci in a gen hi. Ahi zongin amaute in, “Amah khailum in!” ci in a kiko semsem uh hi. ¹⁵ Tua hi a, Pilate in mihonpi a lungkimsak nadingin Barabbas khahsak a, Zeisu ahih leh a satsak khit ciangin khailup dingin a pia hi. ¹⁶ Tua ciangin galkapte in mangpipa inn ah Zeisu paipih uha galkaphonɠ khempeuh zong a kaikhawm uh hi. ¹⁷ Amaute in puan dupsan khat silhsak uha linglukhu a khusak uh hi. ¹⁸ Tua khit ciangin, “Dam maw, Judah mite Kumpipa!” ci in a hopih uh hi. ¹⁹ Pumpeng tawh a lutang satin cilphih uh a, khukdin in a bia uh hi. ²⁰ A zahko khit uh ciangin puan dupsan pen suahkhiatsak in ama puan silhsakkik uh a, khailup dingin a paikhiatpih uh hi. ²¹ Tua laitak in Alexander le Rufus‑te pa Cyrene gam mi Simon khualzin hong ciah tawh a kituak uh hi. Amaute in zawhthawh thu tawh amah manin Zeisu singlamteh a puasak uh hi. ²² Lutangguh Mun cih khiatna nei, Golgotha kici mun ah amah a paipih uh hi. ²³ Tua ciangin paknamtui khaɠ tawh kihel lenggahzu dawn dingin a piak uh hangin Zeisu in a dawn kei hi. ²⁴ Amaute in Zeisu a khai khit uh ciangin a puante hawm uh a, amau tan ding ciat a theih nadingun lai‑ai a san uh hi. ²⁵ Tu in nai thum sat a, amaute in amah a khailum uh hi. ²⁶ A lu tung sanah, “JUDAH MITE KUMPIPA,” ci in mawhsakna lai khat a suang uh hi. ²⁷ Guta nih zong a taklam ah khat, a veilam ah khat, amah tawh a khaikhawm uh hi. ²⁸ Hih bangin, Lai Siangtho sunga kigelh ahi, “Thukham palsat mite tawh amah kisimkhawm hi,” a cihna thu a tangtung hi. ²⁹ Tua mun a tawn kha mite in, “Hei! Biakinnpi susia a ni thum sungin a lamkik ding pa aw, ³⁰ nangmah kihonkhia inla, singlamteh tung pan hong kumkhia in!” ci in a lu uh peisan in a zahko uh hi. ³¹ Tuamah bangin siampi liante le thukhamhilh siate in zong, “Hihpa in midangte hon zo napi amah le amah a kihon zo kei hi. ³² I mit mahmah tawh mu a, i up theih nadingin Israel Kumpipa Khazih singlamteh tung panin tu in hong kumkhia hen,” ci in a zahko uh hi. Amah tawh a kikhaikhawm mite in zong a zahko uh hi. ³³ Tu in nai guk a kipan nai kua ciangdong leitung bup ah khua a mial hi. ³⁴ Nai kua a sat laitak in Zeisu in, “Eloi, Eloi, lama sabachthani?” ci in nakpi in a kiko hi. A khiatna in, “Ka Pasian, ka Pasian aw, banghang in hong taisan na hi hiam?” a cihna ahi hi. ³⁵ A gei‑a a ding mite pawlkhat in a zak uh ciangin, “En un, amah in Elijah a sam ahi hi!” a ci uh hi. ³⁶ Tua ciangin mi khat va tai a, tuihupna khat la in lenggahtui thuk a dimtak in a diah khit ciangin, pumpeng dawn ah suangin a dawn dingin tah a, “Hi ci omsak tadih un. Amah lakhia dingin Elijah hong pai hiam, en dih ni,” a ci hi. ³⁷ Tua ciangin Zeisu nakpitak kiko in a huu tawpna a sangkhia hi. ³⁸ Tua laitak in biakinnpi sunga kideina puan kikek a, a lu panin a taw dong phelnih a suak hi. ³⁹ Zeisu mai ngata ding galkap 100 ukpa in amah tua bangin kiko a a huu tawpna a sankhiat a muh ciangin, “Hihpa in Pasian Tapa taktak ahi hi!” a ci hi. ⁴⁰ Numei pawlkhat in gamlapi pan galet uh a, tua numeite lakah Magdala khua mi Mary, James neuzaw le Joses‑te nu Mary le Salome‑te zong a kihel uh hi. ⁴¹ Amaute in Galilee gamah Zeisu a omlai in amah zui in a panpihte ahi uh hi. Jerusalem khuapi dong amah a zui numei dang tampi zong a om uh hi. ⁴² Tu in nitak hong hi a, tua ni in Sabbath a tunma Kigin Niɠ ahi hi. ⁴³ Tua ciangin Arimathea khua mi Joseph in Pilate kiangah hangtak in va pai a, Zeisu luang a va ngen hi. Amah pen upa vaihawmte lakah mi thupi khat hi a, Pasian kumpigam a lamen mi khat zong ahi hi. ⁴⁴ Zeisu si khin ahihlam Pilate in a zak ciangin lamdangsa mahmah a, galkap 100 ukpa samin a sihzawh bangtan sawtzo hiam ci in a dong hi. ⁴⁵ Zeisu si khin hi cih thu Pilate in galkap 100 ukpa kiang pan a theihtel ciangin Zeisu luang Joseph a pia hi. ⁴⁶ Tua ciangin Joseph in Zeisu luang lakhia a, a hoih mahmah puanpak khat lei in a tun khit ciangin suang kikhuak han sung khatah sial a, suangtumpi khat khuk in hankong a khak hi. ⁴⁷ Magdala khua mi Mary le Joses nu Mary‑te in a luang kisialna mun a en uh hi.

¹ Tu in Sabbath ni hong bei a, Magdala khua mi Mary, James nu Mary le Salome‑te in a luang zut nadingin sathau namtui a lei uh hi. ² Nipikal sunga ni masa pen ni zingsang nisuah tungin daihawh dingin hanah a hong pai uh hi. ³ “Hankong khakna suangtum kua in hong honsak ding ahi hiam?” ci in a kikum uh hi. ⁴ Ahih hangin amaute a khuadak uh leh tua suangtum a kikhukkhiasa a om a mu uh hi. Banghang hiam cihleh tua suangtum a lian mahmah khat ahi hi. ⁵ Han sungah lut uha puanpak tualpi a silh tangval khat taklam panga a tu a muh uh ciangin lamdang a sa uh hi. ⁶ Ahih hangin tua pa in, “Lamdangsa kei un. A kikhailum Nazareth khua mi Zeisu na zong uh hi. Amah thokik zo hi! Hihlai ah om nawnlo hi. A luang kisialna mun hong en un. ⁷ Tu in ciah unla Peter le a nungzuite kiangah, ‘Note paima in Galilee gamah na paikhol dinga, a hong gensa bangin tualai ah amah na mu ding uh hi,’ ci in va gen un,” a ci hi. ⁸ Amaute han sung panin manlangtak in hong paikhia uha a tai uh hi. Banghang hiam cihleh amaute lau uha lamdang a sa uh hi. Amaute lau uh ahih manin kuamah kiangah thu bangmah a gen kei uh hi. ⁹ Tu in nipikal khat sunga ni masa pen ni zingsang tungin Zeisu thokik a, dawi sagih a hawlkhiatna numei Magdala khua mi Mary kiangah a kilak masa pen hi. ¹⁰ Tua numei in Zeisu tawh a kithuah khawm ngei, dah le kap a om mite kiangah pai in tua thu a va gen hi. ¹¹ Amah thokik ahihna le Mary in a muhna thu amaute in a zak uh ciangin a um kei uh hi. ¹² Tua khit ciangin nungzuite nih gam sung khuaneu khatah a pai laitak un amaute kiangah a nam tuamkhat in Zeisu a va kilak hi. ¹³ Amaute in nungzui dangte a va koh uh hangin a um tuan kei uh hi. ¹⁴ Tua nungciang in nungzui sawm le khatte an ne a a om laitak un amaute kiangah Zeisu a kilak hi. Amah a thawhkik khit cianga a mu mite thugente um loin lungkhauh uh ahih manin Zeisu in amaute a taii hi. ¹⁵ Amah in amaute kiangah, “Leitung khempeuh ah pai unla a kipiangsak na khempeuh tungah lungdamna thu tangko un. ¹⁶ Thu um in tui a kiphum mi in hotkhiatna a ngah ding hi. Ahih hangin a umlo mi in mawhsakna a thuak ding hi. ¹⁷ Thu‑um mite tungah hih limlamdangte a piang ding hi. Keima min tawh dawite hawlkhia ding uha kampau thak tawh a pau ding uh hi. ¹⁸ Gulte man ding uh a, sih theihna gu a dawn uh hangin bangmah a ci kei ding uh hi. Cinate tungah khut a ngakh uh ciangin a dam ding uh hi,” a ci hi. ¹⁹ Tua bangin Topa in amaute kiangah thu a gen khit ciangin vantung ah amah kilato a, Pasian ziatlam ah a tu hi. ²⁰ A nungzuite kuankhia in mun khempeuh ah lungdamna thu a tangko uh hi. Topa in amaute tawh na semkhawm a, nalamdangte tawh ama kammal a kipsak hi. Amen.