MATTHEW

MATTHEW

¹ Hih in Zeisu Khazih khang ciamtehna ahi hi. Amah in David tapa hi a, David in Abraham tapa ahi hi. ² Abraham tapa Isaac, Isaac tapa Jacob, Jacob tapa Judah le a sanggam pasal teng ahi hi. ³ Judah in a zi Tamar tawh a neih a tapa Perez le Zerah, Perez tapa Hezron, Hezron tapa Ram, ⁴ Ram tapa Amminadab, Amminadab tapa Nahshon, Nahshon tapa Salmon, ⁵ Salmon in a zi Rahab tawh a neih a tapa Boaz, Boaz in a zi Ruth tawh a neih a tapa Obed, Obed tapa Jesse, ⁶ Jesse tapa kumpipa David ahi hi. David in Uriah zi tawh a neih a tapa Solomon, ⁷ Solomon tapa Rehoboam, Rehoboam tapa Abijah, Abijah tapa Asa, ⁸ Asa tapa Jehoshaphat, Jehoshaphat tapa Joram, Joram tapa Uzziah, ⁹ Uzziah tapa Jotham, Jotham tapa Ahaz, Ahaz tapa Hezekiah, ¹⁰ Hezekiah tapa Manasseh, Manasseh tapa Amon, Amon tapa Josiah ahi hi. ¹¹ Jeconiah le a sanggam pasal tengin Babylon gamah sala a kipaipih madeuh in a suak Josiah tate ahi uh hi. ¹² Babylon gama saltan khit ciangin Jeconiah in a neih a tapa Shealtiel, Shealtiel tapa Zerubbabel, ¹³ Zerubbabel tapa Abiud, Abiud tapa Eliakim, Eliakim tapa Azor, ¹⁴ Azor tapa Zadok, Zadok tapa Achim, Achim tapa Eliud, ¹⁵ Eliud tapa Eleazar, Eleazar tapa Matthan, Matthan tapa Jacob, ¹⁶ Jacob tapa Joseph hi a, Joseph in Khazih a kici Zeisu a hong suahna Mary pasal ahi hi. ¹⁷ Tua hi a, Abraham khang panin David khang ciang a vekin khang sawm le khang li, David khang panin Babylon gama saltang dinga a kimat hun ciang khang sawm le khang li, Babylon gama saltan hun pan Khazih khang ciang khang sawm le khang li mah ahi hi. ¹⁸ Zeisu Khazih a suahzia hih bang ahi hi. A nu Mary pen Joseph zi dingin zuthawl kipiasa hi a, a kiteenma un Kha Siangtho hangin gai hi ci in kithei hi. ¹⁹ A lawmpa Joseph in mi lungsim hoih hi a, a lawmnu Mary min daisak nuamlo ahih manin maksim dingin a ngaihsun hi. ²⁰ Tua banga a ngaihsut laitak in Topa vantungmi khat a mang sungah kilang a, “David tapa Joseph aw, na lawmnu Mary na teenpih ding lauthawng kei in. Banghang hiam cihleh a sunga a paai nau pen Kha Siangtho hangin nau a paai ahi hi. ²¹ Amah in tapa khat nei dinga, tua tapa in ama mite a mawhna panun honkhia ding ahih manin a min ZEISU na phuak ding hi,” a ci hi. ²² Topa in kamsangpa tunga a gensa thu a tangtun nadingin hih thu khempeuh a piang ahi hi. ²³ Kamsangpa in, “Ngai un, nungak siangtho khat gaai in Tapa khat nei dinga, ama min Immanuel kici ding hi,” a ci hi. Immanuel a khiatna in, “Eite tawh Pasian hong omkhawm hi,” a cihna ahi hi. ²⁴ Joseph a ihmutna panin khanglo a, Topa vantungmi thupiakna bangin a lawmnu a teenpih hi. ²⁵ Ahi zongin tua a tacil a suah khit mateng in a lawmnu luppih lo a, a suah ciangin a min dingin ZEISU a phuak hi.

¹ Kumpipa Herod a maan laitak in Judea gam Bethlehem khua ah Zeisu a suak hi. A suah khit ciangin en in, nisuahna lam panin a hong pai mipilte Jerusalem khuapi a hong tung uh hi. ² Amaute in, “Judah mite Kumpi dinga hong suakpa koi ah om ahi hiam? Nisuahna lam panin ama aksi ka muh uh ciangin amah bia dingin kong pai uh hi,” a ci uh hi. ³ Kumpipa Herod in tua thu a zak ciangin Jerusalem khua mi khempeuh tawh a patau mahmah uh hi. ⁴ Herod in siampi liante le thukhamhilh siate khempeuh kaikhawm in Khazih suah nading mun a dong hi. ⁵ Amaute in, “Judea gam Bethlehem khua ah a suak ding hi. Banghang hiam cihleh kamsangpa in, ⁶ ‘Judah gam Bethlehem khua aw, Judah gam ukpite lakah khuaneu khua ginalo pen na hi kei hi. Banghang hiam cihleh keima mi Israelte a cing ding Ukpa khat nangma sung panin a piang ding hi,’ ci in a gelh khinzo hi,” a ci uh hi. ⁷ Tua khit ciangin Herod in mipilte samsim a, aksi kilat hun teltak in a dong hi. ⁸ Amah in Bethlehem khua ah amaute sawl a, “Pai unla, tua naupangno va mukhia hamtang un. Kei zong pai in ka va biak theih nadingin na muh khit uh ciangin ka kiangah hong zasakkik un,” a ci hi. ⁹ Amaute in kumpipa vaikhakna a zak khit uh ciangin, a paikhia uh hi. Tua ciangin nisuahna lama a muhsa uh aksi in naupangno omna tung a tun masiah amaute mai ah a pai hi. ¹⁰ Aksi a muh uh ciangin a lungdam mahmah uh hi. ¹¹ Inn sungah a lut uh ciangin naupangno le a nu Mary mu uh a, bokin amah a bia uh hi. A van manphate uh suahkhia in kham, paknamtui le paknamtui kha‑teɠ letsong in a pia uh hi. ¹² Herod kiangah a paikik nawnloh nadingun Pasian in amaute mang sungah hilh ahih manin lampi dang tawnin amaute gamah a ciahkik uh hi. ¹³ Mipilte a ciah khit uh ciangin Topa vantungmi khat Joseph mang sungah va kilang a, “Tho inla, naupangno le a nu Egypt gamah taipih in. Herod in naupangno that nuam in zong ding ahih manin thu kong zaksakkik mateng tualai ah va om phot un,” a ci hi. ¹⁴ Joseph zong tho in naupangno le a nu zankimpi mahin Egypt gamah a paikhiatpih hi. ¹⁵ Herod a sih mateng tualai ah a va om uh hi. Hih in, “Egypt gam panin ka Tapa ka samkhia hi,” ci a, kamsangpa tungtawn in Topa gensa thu a tangtun nading ahi hi. ¹⁶ Herod in mipilte khemna a theih ciangin heh mahmah 2:11 paknamtui: Greek ah “libanos” kici a, zatui leh biakpiakna a kizang khawm paknamtui nam khat ahi hi. hi. Tua ahih manin mipilte a dotna panin a hun ding seh a, Bethlehem khua le a kim gam sunga om pasalno kum nih le a nuaisiah khempeuh a thatsak hi. ¹⁷ Kamsangpa Jeremiah in a gensa thu hihlai ah a tangtung hi. Amah in, ¹⁸ “Ramah khua ah, Tamlawhna, kahna le nakpi in thumna aw kiza hi. Rachel in a tate kahkah a, Amaute om nawnlo ahih manin, A kihehnep ding a ut kei hi,” a ci hi. ¹⁹ Herod a sih khit ciangin, en in, Egypt gama om Joseph mang sungah Topa vantungmi khat a va kilang hi. ²⁰ Amah in, “Naupangno a that nuamte si khinzo ahih manin tho inla naupangno le a nu Israel gamah ciahpih in,” a ci hi. ²¹ Amah zong tho a, naupangno le a nu tawh Israel gam hong zuan uh hi. ²² Archelaus in a pa Herod za luahin Judea gam uk hi cih thu a zak ciangin tua gamah pai ngamlo a, Pasian in a mang sunga a hilhkholh mah bangin Galilee gamah a pai hi. ²³ “Amah Nazareth mi kici ding hi,” ci a, kamsangte gensa thu a tangtun nadingin Nazareth kici khua ah hong pai in tualai ah a teeng hi.

¹ Tua hun in Judea gam gamlak ah Tuiphumpa John thuhilh in hong pai a, ² “Vantung kumpigam hong nai zo ahih manin na mawhna uh kisikkik un!” ci in a tangko hi. ³ Kamsangpa Isaiah in, “Gamlak a kikopa awging in, ‘Topa pai nading lam na sial unla, Ama lampite na tangsak un,’ ci hi,” ci a, a genpa in hih John ahi hi. ⁴ John in kala‑oh mul tawh a kigan puan silhin savun kawnggak tawh a kawng gak a, kauphe le gamlak khuaizu an in a nei hi. ⁵ Tua hun sungin Jerusalem a kipan Judea gam sung khempeuh le Jordan gunkuam mun khempeuh panin John kiangah mite a va pai uh hi. ⁶ Amaute in a mawhnate uh pulak in John in Jordan gunah a tuiphum hi. ⁷ Pharisee pawlte le Sadducee pawlte tampi tui kiphum dinga hong pai John in a muh ciangin amaute kiangah, “A gupha gul suante aw, a hong tung ding Pasian hehna panin a kihemkhia dingin kua in hong hilhkhol ahi hiam? ⁸ Tua ahih manin kisikkikna tawh a kilawm gah na gah un. ⁹ Note lungsim sungah, ‘Ka pa uh Abraham hi,’ ci in kimuang kha kei un. Banghang hiam cihleh ken kong cih in ah Pasian in hih suangte nangawn Abraham tate a suaksak thei hi. ¹⁰ Tu mahmah in zong singphung tengah hei kinga zo hi. Tua ahih manin gah hoih a gahlo singkung khempeuh kiphuk in meikuang sungah kikhul ding hi. ¹¹ “Kisikkikna tungtawn in note tui kong phum hi. Ahi zongin keima khit ciangin a hong pai ding pa in kei sangin vanglian zaw a, ama khedap tawi dingin zong ka kilawm kei hi. Amah in note Kha Siangtho le mei tawh hong phum ding hi. ¹² Amah in a buhcilna tual hahsiang dingin a khutah ansi zapna a tawi hi. Antak teng a ansal sungah sung dinga, ansite ahih leh a mit ngeilo meikuang sungah a khul ding hi,” a ci hi. ¹³ Tua ciangin John tui kiphumsak dingin Galilee gam panin Jordan gunah Zeisu a hong pai hi. ¹⁴ Ahih hangin John in, “Nangmah in kei nong tuiphum ding hi zaw napi in banghang in kei kiangah hong pai zawsop na hi hiam?” ci in a mang nuam kei hi. ¹⁵ Tua ciangin Zeisu in, “Thuman khempeuh i tangtungsak ding kilawm ahih manin tu in hong mang in,” a cih ciangin John in zong a mang hi. ¹⁶ Zeisu tui a kiphum khit ciangin tui sung panin a dingto pah hi. Tua laitak in, en in, vantung kihong a, Pasian Kha in vakhu bangin hong kumsuk in Zeisu tungah a khawl, John in a mu hi. ¹⁷ Vantung pan thakhat in aw khat hong gingkhia a, “Hihpa in a hong lungdamsak mahmah ka it ka Tapa ahi hi,” a ci hi.

¹ Tua khit ciangin Dawimangpa ze‑etna thuak dingin Kha in gamlak ah Zeisu a paipih hi. ² Zeisu in sun 40 le zan 40 an a tan khit ciangin a gil a kial hi. ³ Tua ciangin a ze‑et ding pa ama kiangah va pai a, “Pasian Tapa na hih leh hih suangte anlum a suah nadingin thu pia in,” a ci hi. ⁴ Ahih hangin Zeisu in, “ ‘Mihing in an bek tawh a nungta hilo in Pasian kam panin a pusuak thu khempeuh tawh a nungta ding hi zaw hi,’ zci in Lai Siangtho sungah kigelh hi,” ci in a dawng hi. ⁵ Tua khit ciangin Dawimangpa in khuapi siangtho sungah Zeisu lutpih in biakinnpi khumdawn ah a koih hi. ⁶ Tua ciangin ama kiangah, “Pasian Tapa na hih leh lengkhiasuk in. Banghang hiam cihleh, ‘Amah in nang hong kem dingin, Ama vantungmite thupia dinga, Na khe le suang a kitah khakloh nadingin, A khut uh tawh nang hong dom ding uh hi,’ ci in Lai Siangtho sungah kigelh hi,” a ci hi. ⁷ Zeisu in ama kiangah, “ ‘Topa na Pasian na ze‑et kei ding hi,’ ci in Lai Siangtho sungah kigelh hi,” a ci hi. ⁸ Dawimangpa in mualsang mahmah khat dawn ah Zeisu paitohpih a, leitung gam khempeuh le tuate thupina teng a vekpi in a lak hi. ⁹ Tua ciangin ama kiangah, “Bokin hong bia leteh hih na khempeuh kong pia ding hi,” a ci hi. ¹⁰ Zeisu in ama kiangah, “Satan aw, ka nungah kihemkhia in! ‘Topa na Pasian na bia dinga, ama na bek na sem ding hi,’ ci in Lai Siangtho sungah kigelh hi,” a ci hi. ¹¹ Tua ciangin Dawimangpa in amah nusia a, en in, vantungmite hong pai in amah a kem uh hi. ¹² Thong sungah John a kikhiatna thu Zeisu in a zak ciangin Galilee gamah a pai hi. ¹³ Nazareth khua nusia in Zebulun le Naphtali gamnawl, tuilipi gei‑a om Capernaum khua ah a teeng hi. ¹⁴ Tua in kamsangpa Isaiah gensa thu a tangtun nading ahi hi. Amah in, ¹⁵ “Zebulun gam le Naphtali gamke‑te in, Jordan gungal tuili zuatna lampidung ah om a, Gentile‑te teenna, Galilee gamhuam ahi hi. ¹⁶ Khuamial sunga om tua mite in, A tang mahmah khuavak mu uh a, Sihna gam sung le sihna lim nuai‑a om, Tua mite tungah, Khuavak a tang ta hi,” a ci hi. ¹⁷ Tua hun a kipan Zeisu thuhilh kipan a, “Vantung kumpigam hong nai zo ahih manin na mawhna uh kisikkik un,” a ci hi. ¹⁸ Galilee tuilipi gei ah Zeisu a pai laitak in unau nih mu a, Peter a kici Simon le a sanggampa Andrew‑te ahi hi. Amaute ngabeng mi ahih manun tuili ah ngen khuh in a om uh hi. ¹⁹ Tua ciangin amah in, “Ka nung hong zui un, mi mante kong suaksak ding hi,” a ci hi. ²⁰ Amaute in a ngen uh nusia in Zeisu nung a zui pah uh hi. ²¹ Tua mun pan a paikhiat ciangin a dang unau nihte a mu hi. Amaute in Zebedee tapa James le a sanggampa John hi a, a pa uh Zebedee tawh gunkuang sungah ngen khui in a om uh hi. Amah in amaute a sap ciangin, ²² thakhat in a gunkuang le a pa uh nusia in amah a zui uh hi. ²³ Galilee gam sungteng ah Zeisu vak kawikawi a, kikhopna innte ah thuhilh in vantung kumpigam tawh kipawl lungdamna thu a tangko hi. Amaute laka cinate le natna tuamtuam a nei khempeuh zong a damsak hi. ²⁴ Syria gam sung khempeuh ah a minthanna kizel in natna le zawngkhalna a tuamtuam a nei cina khempeuh le dawilutte, a sibuptheite, pumzawte hong paipih uh a, amah in a damsak hi. ²⁵ Galilee gam, Decapolis gam, Jerusalem a kipan Judea gam le Jordan gungal panin hong pai mihonpi in amah a zui uh hi.

¹ Zeisu in mihonpite a muh ciangin mualtung ah kahto in tu a, ama kiangah a nungzuite in hong naih uh hi. ² Tua ciangin amah in thu a hilh inah, ³ “A lunggim mite in mihampha ahi uh hi. Banghang hiam cihleh vantung kumpigam in amaute aa ahi hi. ⁴ A dah a kapte in mihampha ahi uh hi. Banghang hiam cihleh amaute in hehnepna a ngah ding uh hi. ⁵ A lungnemte in mihampha ahi uh hi. Banghang hiam cihleh amaute in leitung a luah ding uh hi. ⁶ Gilkial dangtak banga dikna thu a lunggulhte in mihampha ahi uh hi. Banghang hiam cihleh amaute a gilvah ding uh hi. ⁷ Midang a hehpih theite in mihampha ahi uh hi. Banghang hiam cihleh amaute in hehpihna a ngah ding uh hi. ⁸ Lungsim siangthote in mihampha ahi uh hi. Banghang hiam cihleh amaute in Pasian a mu ding uh hi. ⁹ Kilemna a bawlte in mihampha ahi uh hi. Banghang hiam cihleh amaute in Pasian tate cihna a ngah ding uh hi. ¹⁰ Dikna thu hanga bawlsiatna a thuakte in mihampha ahi uh hi. Banghang hiam cihleh vantung kumpigam in amaute aa ahi hi. ¹¹ “Keima hangin zahkona, bawlsiatna, a maanlopi a mawhsakna namkim na thuak uh ciangin mihampha na hi uh hi. ¹² Vantung ah thaman lianpi sang ding na hih manun kipak unla lungdam mahmah un. Note ma‑a kamsangte zong tua bangin a bawlsia zo uh hi. ¹³ “Note in leitung mite aa dingin ci na hi uh hi. Ahih hangin ci pen al nawn kei leh bangci bangin ki‑alkiksak thei ding ahi hiam? Paikhia a mite tuatcil gawp ding longal a kimanna om lo hi. ¹⁴ “Note in leitung mite aa dingin khuavak na hi uh hi. Mual dawna om khua kiliah theilo hi. ¹⁵ Kuamah in mei a vak khit ciangin seeng a khuh ngei kei hi. Inn sunga om mi khempeuh in khuavak a ngah theih nadingin meivak tunna tungah meivak a koih zaw uh hi. ¹⁶ Tuamah bangin mite in note gamtatphate mu a, vana om na Pa uh a phat theih nadingun mite mai ah na khuavak uh na tangsak un. ¹⁷ “Thukham ahi a, Kamsangte laibu‑te ahi zongin a beisak dinga hong pai hong sa kei un. A beisak dinga hong pai hilo in a kicingsak dinga hong pai ka hi zaw hi. ¹⁸ “Aman takpi kong cih in ah, van le lei a mangthang zongin thukham khempeuh a tangtun khit mateng laimal neu khat ahi a, laimal them khat nangawn ahi zongin a mangthang kei ding hi. ¹⁹ Tua ahih manin thupiakte lak panin a neupen khat nangawn palsat a, midangte zong a palsat dinga a hilh mi peuhmah vantung kumpigam sungah a neupen kici ding hi. Ahi zongin hih thupiaknate zui in midangte zong a zui dingin a hilh mi peuhmah vantung kumpigam sungah milian a kici ding hi. ²⁰ Tua hi a, ken kong cih in ah na dikna uh in thukhamhilh siate le Pharisee‑te dikna a khup zawh kei leh vantung kumpigam sungah na lutthei kei ding uh hi. ²¹ “ ‘Mi na that kei ding hi. Mithatte in thukhenna thuak ding uh hi,’ ci a, tanglai mite tunga a kigensa thu na zazo uh hi. ²² Ahih hangin ken kong cih in ah a sanggampa tungah a thu omlopi a a heh mi in thukhenna a thuak ding lauhuai hi. A sanggampa kiangah, ‘Nang, miginalo‡!’ a ci mi in zong thukhenteɠ thusitna a thuak ding lauhuai hi. A sanggampa kiangah, ‘Nang, mihai!’ a cite hellɠ meikuang sungah a kikhul ding lauhuai hi. ²³ “Biaknatau ah Pasian biak nading nate tawi‑a na om laitak in na sanggampa nang tungah lungkim lo hi ci a, na phawk leh, ²⁴ Pasian na biak nading nate pen biaknatau mai ah koihphot in ciahkik inla, na sanggampa tawh va kilem masa in. Tua khit ciangin paikik inla Pasian na biakna nate piapan in. ²⁵ “Na langpa tawh thukhen zum lam na zuat kawmkawm mahin kilem mengmeng in. Tua hi kei leh amah in thukhenpa tungah hong khia in thukhenpa in palikte tungah hong ap dinga, palikte in thong sungah a hong khum ding uh hi. ²⁶ “Aman takpi kong cih in ah, na liausum dangka na piak khit mateng in thong panin na suakta thei kei ding hi. ²⁷ “ ‘Ang na kawm kei ding hi,’ ci a, tanglai mite tunga a kigen thu na zazo uh hi. ²⁸ Ahih hangin ken kong cih in ah mawhnopna lungsim tawh numei khat a en mi peuhmah, tua numei tungah a lungsim mawh zo hi. ²⁹ “Tua ahih manin na taklam mitin hong khialhsak leh khelkhia inla pai in. Banghang hiam cihleh hellɠ sungah na pumpi bupin hong kikhiat sangin na pumpi nate khat kisia leh a hoih zaw hi. ³⁰ Na taklam khutin hong khialhsak leh sattan inla pai in. Na pumpi bupin hellɠ sungah hong kikhiat sangin na pumpi nate khat kisia leh a hoih zaw hi. ³¹ “Tua banah, ‘A zi a ma nuam mi peuhmah in, a zi tungah kikhenna lai pia tahen,’ a cihna thu na thei zo uh hi. ³² Ahih hangin ken kong cih in ah mi khatpeuh in pasal dang tawh a mawhna longal thu dang khatpeuh hangin a zi a mak leh a zi midang tawh a mawh dingin a bawl ahi hi. A kimasa numei a teenpih mi peuhmah zong mi zi tawh a mawh ahi hi. ³³ “Tua banah, ‘A manlopi in na kiciam kei dinga, ahi zongin Topa tunga na kamciamte tangtungsak in,’ ci in tanglai mite tunga a kigen thu na thei zo uh hi. ³⁴ Ahih hangin ken kong cih in ah na kiciam peuhmah kei un. Vantung in Pasian tokhom ahih manin vantung tawh kiciam kei un. ³⁵ Leitung in ama khengakna ahih manin leitung tawh kiciam kei un. A lian Kumpipa khuapi ahi Jerusalem min tawh kiciam kei un. ³⁶ Na lutang uh tawh zong kiciam kei in. Banghang hiam cihleh na samzang khat na kangsak, na vomsak thei kei hi. ³⁷ Ahi thute, ‘Hi mah hi,’ ci unla, a hilo thute, ‘Hilo hi,’ ci un. Hih zah val in a tam zawk leh gilopa kiang panin a hong piang ahi hi. ³⁸ “ ‘Mittang khat tangin mittang khat, hatang khat tangin hatang khat,’ a cihna thu na zazo uh hi. ³⁹ Ahih hangin ken kong cih in ah mi gilopa na dokik kei un. Mi khatpeuh in na pang taklam a hong bet leh a langkhat zong na dawh in. ⁴⁰ Mi khatpeuh in na puanak a hong suh nop manin zumah khiat a hong sawm leh na puan tungsilh zong na piak beh in. ⁴¹ Zawhthawh thu tawh taiɠ khat hong paipih nuamte, tai nih dong na zui in. ⁴² Hong ngente na pia in. Hong leitawi nuamte na nungngat kei in. ⁴³ “ ‘Na vengte it inla, na galte mudah in,’ cih thu na zazo uh hi. ⁴⁴ Ahi zongin ken kong cih in ah na galte na it un. Hong samsiate thupha na pia un. Hong mudahte tungah thupha na bawl un. A hong simmawh mite le hong bawlsia mite aa dingin thu na ngetsak un. ⁴⁵ Tua hi leh vana om na Pa uh tate na hi taktak ding uh hi. Banghang hiam cihleh amah in mihoihlote le mihoihte tungah a kibang in ama ni suaksak a, midikte le midiklote tungah guah zong a zusak tuak hi. ⁴⁶ Hong itte bek it le uh teh bang lemlawh tuam ding na hi uh hiam? Siahdongte nangawn in zong amau a itte it uh hilo ahi hiam? ⁴⁷ Na lawmte bek maitai le uh teh midangte sangin na hoih zawkna uh bang om tuan ding ahi hiam? Siahdongte nangawn in zong tua bangmah in hih uh hilo ahi hiam? ⁴⁸ Tua ahih ciangin vana om na Pa uh a hoihkim bangin note zong na hoihkim un,” a ci hi.

¹ “Na hoih na sep uh ciangin mite muh theihtheih dingin na hih khakloh nadingun kidawm un. Tua hi kei leh vantung a om na Pa un thaman a hong pia kei ding hi. ² “Tua ahih manin a kitangsam mite huhna na piak uh ciangin a kineihkhem mite piak bangin pia kei un. Amaute in midangte pahtak ding lametna tawh kongzing lak le kikhopna innte ah pengkul tumkawmsa in a pia uh hi. Aman takpi kong cih in ah, amaute in thaman a ngah zo uh hi. ³ Ahi zongin note in a kitangsam mite huhna na piak uh ciangin na taklam khut tawh na piakte uh na veilam khut theisak kei un. ⁴ Tua hi leh a kitangsam mite na huhnate uh kilangkhia lo dinga a kilanglote a mu na Pa un a kilangtang in thaman hong pia ding hi. ⁵ “Thu na nget uh ciangin zong a kineihkhem mite hih bangin hih kei un. Amaute in mite muh theihtheih dingin kikhopna innte le lamkabom khawng ah dinga, thunget ding a ut uh hi. Aman takpi kong cih in ah, amaute in thaman a ngah zo uh hi. ⁶ Note in thu na nget uh ciangin inndei sungah lut unla kong na khak khit uh ciangin a kilanglo a om na Pa uh kiangah ngen un. Tua hi leh a kilanglote a mu na Pa un a kilangtang in thaman hong pia ding hi. ⁷ Thu na nget uh ciangin lawkite bangin na gen sasa uh gen phapha kei un. Amaute in gen pha kikkik le uh a ngahdeuh ding kisa uh hi. ⁸ Tua ahih manin amaute bang hi kei un. Banghang hiam cihleh na Pa un na kisapnate uh na ngetma un a thei khinzo hi. ⁹ “Tua ahih manin hih bangin thu na ngen un, Vantung a om kote Pa aw, Na min siangtho kizahtak hen. ¹⁰ Na kumpigam hong piang tahen. Vantung ah na deihna a kisep mah bangin, Leitung ah zong kisem tahen. ¹¹ Tuni a ka nek ding uh an hong pia in. ¹² Ko tunga hong khialte ka maisak uh bangin, Kote khialhna zong hong maisak ta in. ¹³ Ze‑etna sungah hong lutsak kei inla, Gilopa kiang panin hong honkhia in. Banghang hiam cihleh ukzawhna, Vangliatna le minthanna, Nang aa ahi tawntung hi. Amen. ¹⁴ “Mite khialhnate na maisak uh leh vana om na Pa un zong note khialhnate hong maisak ding hi. ¹⁵ Mite khialhnate na maisak kei uh leh na Pa un zong note khialhna hong maisak lo ding hi. ¹⁶ “Tua banah an na tan uh ciangin, a kineihkhem mite bangin na mai uh vulsak kei un. Banghang hiam cihleh amaute in antang ahihna uh mite mai ah a kilat theih nadingin a maipuak uh a khel uh hi. Aman takpi kong cih in ah, amaute in thaman a ngah zo uh hi. ¹⁷ Ahi zongin note in an na tan uh ciangin na lu uh sathau nilh unla na mai uh phiat un. ¹⁸ Tua hi leh na antan lam uh mite mai ah kilang lo dinga, a kilanglo a om na Pa uh mai bekah a kilang ding hi. Tua ciangin a kilanglote a mu na Pa un a kilangtang in thaman a hong pia ding hi. ¹⁹ “Na sum na paite uh nget in a nek theihna, a kekseu theihna le gutate in luh in a guk theihna hih leitung ah khol kei un. ²⁰ Nget in a nek theih lohna, a kekseu theih lohna, gutate in luhin a guk theih lohna vantung ah khol zaw un. ²¹ Banghang hiam cihleh na sum a omna munah na lungsim zong a om ding hi. ²² “Mittang in pumpi aa dingin meivak ahi hi. Tua ahih manin na mit a ciim leh na pumpi bup a vak ding hi. ²³ Ahih hangin na mit a mial leh na pumpi bup a mial ding hi. Tua ahih manin na sunga om khuavak pen khuamial hi leh a nak mial mahmah ding hi. ²⁴ “Kuamah in to nih na semkhawm zolo hi. Banghang hiam cihleh khat mudah in khat a it ding hi. Ahih keileh khat tungah kipia in khat a simmawh ding hi. Note in Pasian aa ding le sum le pai aa dingin na na semkhawm zo kei ding uh hi. ²⁵ “Tua ahih manin note kianga kong cih in ah, bang ne in bang dawn ding ka hi hiam ci in nuntak nading lunghimawh kei un. Bang silh bang teeng ding ka hi hiam ci in pumpi aa ding lunghimawh kei un. Nek le dawn sangin nuntakna thupi zaw a, silh le teen sangin pumpi thupi zaw hilo ahi hiam? ²⁶ Vana leng vasate en dih un. Amaute in khaici tuh lo, an zong la loin bem le salah zong an a khol kei uh hi. Ahi zongin, vana om na Pa un amaute an a vak hi. Vasate sangin manpha zaw hilo na hi uh hiam? ²⁷ Na lunghimawh manun na tun uh tong khat nangawn a behlap thei kua om na hi uh hiam? ²⁸ “Tua ahih leh banghang in puansilh ding lunghimawh na hi uh hiam? Gamlak a unokpakte khankhiatzia ngaihsun dih un. Amaute in na sem loin khau zong khek lo uh hi. ²⁹ Ahih hangin ken kong cih in ah Solomon in a minthanna puan tawh kizem a a om laitak nangawn in hih pakte khat zahin hoih zo nailo hi. ³⁰ Upna neu mite aw, tuni in oma zingciang in meikhuk ah a kikhul ding gamlak a pakte nangawn Pasian in tua bangin puansilh guan ahih leh note hong limguat zawkan ding hilo ahi hiam? ³¹ Tua ahih manin, ‘Bang ka ne dinga, bang ka dawn ding hiam, bang silh dinga bang teeng ding ka hi hiam?’ ci in lunghimawh kei un. ³² Gentile‑te in hih thute khempeuh a zon pipen uh ahi hi. Vana om na Pa un hih na khempeuh na kisap lam uh a hong thei hi. ³³ Tua ahih manin Pasian kumpigam le ama dikna zong masa un. Tua hi leh amah in hih nate khempeuh a hong piak beh ding hi. ³⁴ Tua ahih manin zingciang aa dingin lunghimawh khol kei un. Banghang hiam cihleh zingciang vai ding zingciang mahin hong lunghimawh ding hi. Tuni a lungkhamna pen tuni aa dingin kicing khin hi.

¹ “Thukhenna na thuak loh nadingun midangte tungah thu na khen kei un. ² Banghang hiam cihleh midangte tunga thu na khen bangun no tungah zong thu hong kikhen ding hi. Note zat tehna tektek mah tawh note aa dingin a hong kitehsakkik ding hi. ³ “Nangma mita singluang phawk kha loin banghang in na sanggampa mita ninthem muhsak na hi hiam? ⁴ Ngaihsun dih in na mit ah singluang khat om napi banghang in na sanggampa kiangah, ‘Na mita ninthem hong lakkhiatsak ning,’ ci thei na hi hiam? ⁵ A kineihkhem mipa aw! Nangma mita singluang lakhia masa in. Tua hi leh na sanggampa mita ninthem telmuh in na lakkhiatsak thei pan ding hi. ⁶ “A siangtho nate uite pia kei un. Kepsuangmanphate zong vokpi mai ah lot kha kei un. Na lotkhak leh a khe tawh tuangawp in kihei in nang a hong petgawp ding hi. ⁷ “Ngen un, hong kipia ding hi. Zong un, na mu ding uh hi. Kiu un, hong kihon ding hi. ⁸ Banghang hiam cihleh a ngente in ngah a, a zongte in mu in, a kiute kong kihon hi. ⁹ “Note lakah a ta in anlum ngen leh suang a pia ding, ¹⁰ ngasa ngen leh gul a pia ding kua om na hi uh hiam? ¹¹ No mihoihlote nangawn in na tate uh na hoih piak ding thei na hih uh leh vana om na Pa un ama kianga a ngente na hoih hong pia zawthamlo ding ahi hiam! ¹² Tua ahih manin note tunga hong kibawl dinga na deih khempeuh uh midangte tungah zong na bawl un. Thukham le Kamsangte laibu‑te zong hih thu mah ahi hi. ¹³ “Kong kawcik ah lut un. Banghang hiam cihleh siatna mun tun nading kongpi zai a, lampi zong tanzau ahih manin mi tampi in tua lampi a tawn uh hi. ¹⁴ Nuntakna mun tun nading kong kawcik a, lampi zong neu ahih manin mi tawmcik bekin a zui uh hi. ¹⁵ “A lungsim tawng uh ngia bangin gilo napi tuuvun silh a, note kianga a hong pai kamsangzuaute na kidawm un. ¹⁶ Amaute bangci mi hiam cih a gah panun na thei ding uh hi. Lingkung panin lenggah kilo thei ahi hiam? Thangling kung panin theigah kilo thei ahi hiam? ¹⁷ Tua ahih manin singkung hoih leh a gah hoih in singkung hoih kei leh a gah zong a hoih kei hi. ¹⁸ Singkung hoih in gah hoihlo gah theilo a, singkung hoihlo in gah hoih a gah thei kei hi. ¹⁹ Gah hoih a gahlo singkung khempeuh kiphuk in meikuang sungah kikhul ding hi. ²⁰ Tua ahih manin amaute bangci mi hiam cih a gah panun na thei ding uh hi. ²¹ “ ‘Topa aw, Topa aw,’ hong ci peuhmah vantung kumpigam sungah a lutkim kei ding uh hi. Vana ka Pa deih banga a gamtate bek a lut ding uh hi. ²² Tua ni ciangin mi tampi in, ‘Topa aw, Topa aw, nangma min tawh kamsang in thugen hilo ka hi uh hiam? Nangma min tawh dawite hawlkhia in nangma min tawh nalamdang bawl hilo ka hi uh hiam?’ hong ci ding uh hi. ²³ Tua ciangin, ‘Note kong thei ngei kei hi. Siatna a bawl mite aw, ka kiang panin paikhia un!’ ka ci ding hi. ²⁴ “Tua ahih manin hih ka thugente za‑a a zui mi khatpeuh in suangpi tunga innlam mipilpa tawh kibang hi ci in ka gen ding hi. ²⁵ Guahzu in tui hong khang a, huihpi nungin tua inn a nawk hangin suangpi tungah kilam ahih manin a puk kei hi. ²⁶ Hih ka thugente za napi in a zuilo mi in, sehnel tunga innlam mihaipa tawh kibang hi ci in ka gen ding hi. ²⁷ Guahzu in tui hong khang a, huihpi nungin tua inn a nawk ciangin a puk hi. Tua pukna in a lian mahmah pukna ahi hi,” a ci hi. ²⁸ Zeisu in hih thute a gen khit ciangin mihonpite in a thuhilhna lamdang a sa mahmah uh hi. ²⁹ Banghang hiam cihleh thukhamhilh siate bangin hilh loin thuneipa bangin a hilh hi.

¹ Zeisu mualtung pan hong kumsuk khit ciangin mihonpite in amah a zui uh hi. ² Tua ciangin, en in, miphak khat hong pai in amah bia a, “Topa aw, hong damsak nuam lecin nong damsak thei hi,” a ci hi. ³ Zeisu in a khut zanin amah lawng a, “Kong damsak nuam hi, damta in,” ci a, thu a piak ciangin thakhat in a dam pah hi. ⁴ Tua ciangin Zeisu in ama kiangah, “Hih thu kuama kiangah gen kei in. Ahi zongin pai inla siampipa kiangah va kilak in. Amaute tungah teci ahi dingin Moses hong thupiakna bangin biakpiakna khat va pia in,” a ci hi. ⁵ Capernaum khua ah Zeisu a lut ciangin galkap 100 ukpa khat hong pai in, ⁶ “Topa aw, ka inn ah ka nasempa a pumzaw in lumcip a, genthei mahmah hi,” ci in a ko hi. ⁷ Zeisu in ama kiangah, “Hong pai in amah ka damsak ding hi,” a ci hi. ⁸ Tua ciangin galkap 100 ukpa in dawngkik a, “Topa aw, ka inn sunga nong lut ding ka kilawm kei hi. Thu pia ziau leteh ka nasempa a dam ding hi. ⁹ Banghang hiam cihleh kei zong mite khutnuai‑a om ka hi a, kei khut nuai ah zong galkapte a om hi. Khat kiangah, ‘Va pai in,’ ka cih ciangin a pai hi. A dang khat kiangah, ‘Hong pai in,’ ka cih ciangin a hong pai hi. Ka nasempa kiangah, ‘Hih sem in,’ ka cih ciangin a sem hi,” a ci hi. ¹⁰ Zeisu in tua thu a zak ciangin lamdangsa mahmah a, amah a zui mite kiangah, “Aman takpi kong cih in ah, Israel mite lak nangawn ah hi zahtak a lian upna a nei ka mu ngei kei hi! ¹¹ Ken kong cih in ah nisuahna le nitumna lam panin mi tampi hong pai in Abraham, Isaac le Jacob‑te tawh vantung kumpigam sungah a tukhawm ding uh hi. ¹² Ahi zongin tua kumpigam tate ahih leh a pualam khuamial lakah a lawnkhia ding hi. Tua munah kahna leh hagawina a om ding hi,” a ci hi. ¹³ Tua khit ciangin Zeisu in galkap 100 ukpa kiangah, “Ciahkik in. Na upna bangin nang aa dingin piang tahen,” a ci hi. Tua hun lian mahin a nasempa a dam hi. ¹⁴ Tua khit ciangin Peter inn ah Zeisu hong hawh in Peter sunghnu nattun in lupna tunga lum a mu hi. ¹⁵ Amah in tua nu khut a lawn ciangin a natna dam a, tho in amaute zin a do pah hi. ¹⁶ Nitak lam ciangin dawilut mi tampi Zeisu kiangah hong paipih uh a, tua dawite kam khat pauna bek tawh a hawlkhia ziau hi. Cina khempeuh zong a damsak hi. ¹⁷ Hih thu in, “Amah in i zawngkhalna teng lakhia in, I cinatna teng a pua hi,” ci a, kamsangpa Isaiah in a gensa thu a tangtunna ahi hi. ¹⁸ Zeisu in ama kima om mihonpite a muh ciangin gal khat lamah galkah dingin a nungzuite thu a pia hi. ¹⁹ Tua laitak in thukhamhilh siapa khat ama kiangah hong pai a, “Sia aw, na paina peuh ah kong zui ding hi,” a ci hi. ²⁰ Zeisu in ama kiangah, “Ngiate in kua nei uh a, vana leng vasate in zong bu a nei uh hi. Ahih hangin Mihing Tapa in a lutang ngakh nading mun a nei kei hi,” a ci hi. ²¹ Tua khit ciangin ama nungzuite khat in, “Topa aw, ka pa vui dingin hong paisak masa phot in,” a ci hi. ²² Ahih hangin Zeisu in ama kiangah, “Hong zui in. Misi pen misite mahin na vui uh hen,” a ci hi. ²³ Gunkuang sungah amah a kahtoh ciangin a nungzuite in zong a zui uh hi. ²⁴ Tua ciangin tuilipi tungah thakhat in huih khauh mahmah hong nung a, tuihual in gunkuang a tum dekdek hi. Zeisu ahih leh a ihmu hi. ²⁵ A nungzuite ama kiangah pai in phong uh a, “Topa aw, a simang ding ka hita uh hi, hong hon in!” a ci uh hi. ²⁶ Zeisu in, “Upna neu mite aw, banghang in hi zahtak in lau na hi uh hiam?” a cih khit ciangin tho a, huihpi le tuihual a taii leh a dai pah hi. ²⁷ Amaute in lamdangsa mahmah uh a, “Hihpa bangci bang mi hi zawzen ahi hiam? Huihpi le tuihualte nangawn in ama thu a mang tazen uh hi,” a ci uh hi. ²⁸ Zeisu tuilipi galkhat a om Gergesa mite teenna kuam a tun ciangin dawilut mi nih han pan hong paikhia uh a, amah a na dawntuah uh hi. Amaute gilo in gamhtat mahmah uh ahih manin kuamah in tua lampi a tawn ngam kei uh hi. ²⁹ Amaute thakhat in awng uh a, “Pasian Tapa Zeisu aw, nang tawh ka kisaina uh bang om ahi hiam? A hun tung nailopi in kote bawlsia dinga hong pai na hi hiam?” a ci uh hi. ³⁰ Amaute tawh a kigamla simsim ah vok honpi khat a om hi. ³¹ Dawite in ama kiangah, “Nong hawlkhiat leh hualai a vok honte sungah hong lutsak in,” ci in a thum uh hi. ³² Tua ciangin Zeisu in, “Pai un,” ci in thupia a, tua dawite paikhia in vok honte sungah a lut uh hi. Thakhat thu mahin vok hon khempeuh ken lakah taiphialsuk uh a, tuilipi sung kidenna in a si khin uh hi. ³³ Vokcingte tai pah vingveng uh a, dawilut mite tunga thupiang khempeuh khua sungah a va ko uh hi. ³⁴ Tua ciangin tua khua mite a khuazang un Zeisu en dingin hong paikhia uh a, a muh uh ciangin amau gam panin a paikhiat nading a thum uh hi.

¹ Tua ciangin Zeisu gunkuang tuangin galkah a, ama khua a tung hi. ² Tua leh, en in, pumzaw mi khat a lupna tawh zawng in ama kiangah a hong paipih uh hi. Zeisu in amaute upna a muh ciangin pumzawpa kiangah, “Ka ta aw, lungnuam in na mawhnate hong kimaisak zo hi,” a ci hi. ³ Tua thu a zak phetun thukhamhilh siate pawlkhat in a lungsim uh ah, “Hihpa Pasian tungah a pausia hi!” a ci pah uh hi. ⁴ Zeisu in amaute lungsim thei ahih manin, “Banghang in note lungsim sungah thusia ngaihsun na hi uh hiam? ⁵ ‘Na mawhnate hong kimaisak zo hi,’ cih ding le, ‘Tho inla lampai in,’ cih ding koi baih zaw ahi hiam? ⁶ Ahi zongin Mihing Tapa in leitung ah mawhmaisak theihna thu a neih lam na theih nadingun,” a cih khit ciangin pumzawpa kiangah, “Tho in, na lupna pua inla, na inn ah ciah in,” a ci hi. ⁷ Tua pa zong tho in a inn ah a ciah hi. ⁸ Mihonpite in hih thupiang a muh uh ciangin, lamdangsa mahmah uh a, mihingte tungah tua bang vangliatna a pia Pasian a phat uh hi. ⁹ Tua mun panin Zeisu paisuak a, siahdonna buuk sunga a tu Matthew kici mi khat a muh ciangin, “Hong zui in,” a ci hi. Matthew zong dingkhia in Zeisu a zui hi. ¹⁰ Inn sungah Zeisu an ne‑a a tut laitak in, en in, siahdongte le mawhneite tampitak hong pai in Zeisu le a nungzuite tawh ankuang a umkhawm uh hi. ¹¹ Pharisee pawlte in a muh uh ciangin a nungzuite kiangah, “Banghang in na siapa un siahdongte le mawhneite tawh an nekhawm ahi hiam?” a ci uh hi. ¹² Tua thu a zak ciangin Zeisu in amaute kiangah, “Mi cidamte aa dingin siavuan kisam lo a, mi cinate aa ding bekin kisam hi. ¹³ Ahih hangin va pai unla, ‘Gangawh biakna sangin hehpihna ka deih zaw hi,’ a cihna thu a khiatna va kantel phot un. Banghang hiam cihleh midikte sam dinga hong pai ka hi kei hi. Mawhneite a kisikkik theih nadingun a sam dinga hong pai ka hi hi,” a ci hi. ¹⁴ Tua khit ciangin John nungzuite a kiangah hong pai uh a, “Kote le Pharisee pawlte in an ka tang zelzel uh hi. Banghang in na nungzuite in antang lo uh ahi hiam?” a ci uh hi. ¹⁵ Tua ciangin Zeisu in, “Zineipa tawh a omkhop sungun a lawm a gualte thum le tau in ombuang ding uh ahi hiam? Ahih hangin amaute kiang pan zineipa a kilakkhiat hun hong tung dinga, tua ciangin bel an a tang ding uh hi. ¹⁶ “Puan lui a kiphop ciangin kuamah in a ton nailo puanbek a thak tawh a phop kei hi. Tua bangin phop leh a phopna puanbek a thak in puan lui kaikek in, a kekna a zai semsem ding hi. ¹⁷ Kuamah in savun um lui sungah lenggahtui thak a thun kei hi. Tua bangin kithun leh savun um puakkham in lenggahtui teng luangkhia dinga, savun um zong a kisia ding hi. Lenggahtui thakte savun um thak sung mahah a kithun hi. Tua hi leh a nih tuakin bitkhawm in sawtveipi kikoih thei hi,” a ci hi. ¹⁸ Hih thute a gengen laitak in, en in, makaipa khat hong pai in amah bia a, “Ka tanu tu mahmah in a si hi. Ahi zongin nang hong pai in a tungah na khut nga leteh a hing ding hi,” a ci hi. ¹⁹ Zeisu dingkhia in amah zui a, a nungzuite in zong a zui uh hi. ²⁰ Tua laitak in kum sawm le kum nih sung tawntung siluang natna a vei numei khatin Zeisu nunglam panin a puanmongtep thakhat in a va lawng hi. ²¹ Amah in a lungsim sungah, “A puan va lawng beek leng zong ka dam ding hi,” a ci hi. ²² Zeisu a nunglam ah kihei a, amah a muh ciangin, “Ka tanu aw, lungnuam in, na upna in a hong damsak zo hi,” a ci hi. Tua hun lian mahin tua numei a dam hi. ²³ Makaipa inn sungah Zeisu a lut ciangin tamngai tumte le kap a gamlum ngeingai mihonpi a mu hi. ²⁴ Tua ciangin amah in tua mite kiangah, “Na awn un. Numeino a si hilo in a ihmu ahi hi,” a cih leh amaute in zahpih in a nuihsan uh hi. ²⁵ Ahih hangin Zeisu in mihonpi a pusuahsak khit ciangin inn sungah lut a, numeino khut a let ciangin numeino a tho hi. ²⁶ Hih thu tua gam mun khempeuh ah a kizel hi. ²⁷ Tua mun pan Zeisu a paikhiat ciangin, mittaw nih in amah zui uh a, “David Tapa aw, kote hong hehpih in!” ci in a kiko uh hi. ²⁸ Inn sungah amah a lut ciangin, mittaw nihte in zong a zui uh hi. Tua ciangin Zeisu in, “Na mit uh a vaksak thei dingin nong um uh hiam?” ci in dong a, amaute in, “Kong um uh hi Topa aw,” a ci uh hi. ²⁹ Tua ciangin amah in a mit uh lawnsak a, “Na upna bangun, note tungah hong piang tahen,” a cih leh, ³⁰ a mit uh kihong pah hi. Zeisu in amaute kiangah, “Hih thu kuamah theisak peuhmah kei un,” ci in khauhtak in thu a pia hi. ³¹ Ahih hangin amaute paikhia uh a, tua gam sung khempeuh ah ama thu a kizelsak uh hi. ³² Tua mi nihte a paikhiat laitak mah un, en in, a pautheilo dawilut mi khat ama kiangah hong paipih uh hi. ³³ Amah in dawi a hawlkhiat ciangin, a pautheilo pa hong pauthei pah hi. Mihonpi in lamdangsa mahmah uh a, “Israel mite lakah hih bang i mu ngei kei hi!” a ci uh hi. ³⁴ Ahih hangin, Pharisee‑te in, “Amah in dawi mangpipa min suangin dawigilote a hawlkhia ahi hi,” a ci uh hi. ³⁵ Tua bangin khuapi khuata kici tengah Zeisu vak kawikawi in amaute kikhopna innte ah thu a hilh hi. Pasian kumpigam lungdamna thu tangko in cina le natna tuamtuam a nei mi khempeuh a damsak hi. ³⁶ Amah in mihonpite a et ciangin hehpihhuai a sa mahmah hi. Banghang hiam cihleh amaute a cing omlo, a thabei, a kithehthang zelzul tuute tawh kibang uh hi. ³⁷ Tua hi a, a nungzuite kiangah, “An lak ding tam mahmah napi nasemte a tawm hi. ³⁸ Tua ahih manin an la ding nasemte hong sawl nadingin an nei Topa kiangah ngen un,” a ci hi.

¹ Zeisu in a nungzui sawm le nihte sam a, dawigilote hawlkhiat theih nading le cinatna nam khempeuh le natna namkim a damsak theih nadingun thuneihna a pia hi. ² Tua sawltak sawm le nihte min in a khatna ah Peter kici Simon le a sanggampa Andrew, Zebedee tapa James le a sanggampa John, ³ Philip le Bartholomew, Thomas le siahdongpa Matthew, Alphaeus tapa James, Thaddaeus a kici Lebbaeus, ⁴ Canaan mi Simon le amah a lehhekpa Judas Iscariot‑te ahi uh hi. ⁵ Zeisu in tua sawm le nihte sawlkhia in amaute kiangah, “Gentile‑te kiangah pai kei unla, Samaria mite khua ah zong lut kei un. ⁶ Tuu banga a gammang Israel innkuante kiang bekah pai un. ⁷ Na pai ciangun, ‘Vantung kumpigam hong naita hi,’ ci in tangko un. ⁸ Cinate damsak unla, miphakte damsak un. Misite thosak in dawite hawlkhia un. Man piak loh a na ngah bangun manngen loin na pia un. ⁹ Kham, ngun le sumngote sumbawm sungah keng kei un. ¹⁰ Lampi a na zat ding uh thungip, puanak nih, khedap le ciangkhut cihte zong keng kei un. Banghang hiam cihleh nasempa in a nekkhop a ngah dingin a kilawm hi. ¹¹ “Khuapi khuata mun khatpeuh ah na lut uh ciangin, zintun nadingin a kilawm mi kan unla, na ciah mateng un tua inn ah tamsuak un. ¹² Inn khatpeuh ah na lut uh ciangun hopih un. ¹³ Tua innkuan in nopna ngah dinga a kilawm leh note piak nopna ngah henla, a kilawm kei leh note tungah tua nopna hong tungkik hen. ¹⁴ Note hong nolha na thu uh a ngai nuamlo mi khatpeuh a om leh tua inn hiam tua khua hiam pan na ciah uh ciangin note khe tunga leivuite singkhia un. ¹⁵ Aman takpi kong cih in ah, thukhen ni ciangin Sodom le Gomorrah khuate thuakna in tua khua thuakna sangin a thuaknop zaw lai ding hi! ¹⁶ “Ngai un, ngiahon laka a kikhah tuute bangin note kong sawlkhia hi. Tua ahih manin gul bangin pilvang unla, vakhu bangin migi un. ¹⁷ Mite in thukhente khut ah hong apin kikhopna innte ah hong sat ding uh ahih manin kidawm un. ¹⁸ Keima hangin kumpite le mangpite mai ah hong puak ding uh a, tua in amaute le Gentile‑te tungah teci na suah nading uh ahi hi. ¹⁹ Amaute in hong ap uh ciangin bang thu genin bangci gen ding cih lungkham khol kei un. Banghang hiam cihleh na thu gen ding uh a hun lianin hong kihilh ding hi. ²⁰ A gen ding note hilo in note sung panin na Pa uh Kha in a gen ding hi. ²¹ “Unau khat le khat a sih nadingun a kilehhek ding uh hi. Pa in a tate lehhek dinga, tate in a nu le a pa langpan in a si dingin a lehhek ding uh hi. ²² Keima min hangin mi khempeuh in note hong mudah ding uh hi. Ahi zongin a tawp donga a kipte in hotkhiatna a ngah ding uh hi. ²³ Hih khua ah hong kibawlsiat leh khua dang khat ah tai un. Aman takpi kong cih in ah, Israel gam khua khempeuh na khitma un Mihing Tapa a hong pai ding hi. ²⁴ “Nungzuipa in a siapa sangin lian zawlo a, nasempa in a topa sangin lian zawlo hi. ²⁵ Nungzuipa in a siapa tawh hong kibang a, nasempa in a topa tawh a kibat leh phazo hi. A inntekpipa Beelzebubɠ hi ci khin uh ahih teh a innkuanpih dangte bel nakcih zawkan lo ding uh ahi hiam! ²⁶ “Tua ahih manin amaute kihta kei un. Banghang hiam cihleh a kilang lo dinga a kisincip thei le a kithei lo dinga a ki‑iimcip thei bangmah a om kei hi. ²⁷ “Khuamial sunga kong gen thute khuavak ah gen un. Na zak thute uh innkhumzang panin tangkokhia un. ²⁸ Pumpi bek that thei‑a kha a that theilote kihta kei un. Ahi zongin kha le pumpi a nih in hellɠ sungah a khia theipa kihta un. ²⁹ Kawlgit nih ciangin dangkasanɠ tang khat tawh kizuak hilo ahi hiam? Tuate khat nangawn na Pa uh deihna om loin lei ah a mawkkiat kei hi. ³⁰ Note lutung a samzang khempeuh zong a kisim khinzo ahi hi. ³¹ Tua ahih manin lau kei un. Kawlgit tampi sangin na manpha zaw uh hi. ³² “Tua hi a, mite mai ah kei a hong pawlpih mi peuhmah vana ka Pa mai ah zong ka sang ding hi. ³³ Mite mai ah kei a hong nial mi peuhmah vana ka Pa mai ah zong ka nial ding hi. ³⁴ “Leitung ah kilemna bawl dinga hong pai hi ci in hong ngaihsun kei un. Ahi zongin kilemna bawl ding hilo in namsau khah dinga hong pai ka hi zaw hi. ³⁵ Tapa le a pa, tanu le a nu, monu le teknu a kilangpansak dinga hong pai ka hi hi. ³⁶ Mi khat galin ama innkuanpihte mah ahi ding hi. ³⁷ “Kei sangin a nu a pa, a tanu a tapa a it zawte kei tawh kipawl theilo hi. ³⁸ Ama singlamteh pua loin ka nung a hong zuite zong kei tawh kituak lo hi. ³⁹ A nuntakna a hu nuam mi in a nuntakna tan dinga, keima hanga a nuntakna a tan mi in nuntakna a ngah ding hi. ⁴⁰ “Note hong sang mi in kei hong sang hi a, kei hong sang mi in kei a hong sawlpa zong a sang ahi hi. ⁴¹ Kamsang khat pen kamsang ahih mana a sang mi in tua kamsangpa ngah bangbang thaman a ngah ding hi. Midik khat pen midik ahih mana a sang mi in tua midikpa ngah bangbang thaman a ngah ding hi. ⁴² Aman takpi kong cih in ah, hih naupangnote khat peuhpeuh keima nungzui ahih mana tuivot haikhat nangawn a suah mi peuhmah in thaman ngah loin a om kei ding hi,” a ci hi.

¹ Zeisu in nungzui sawm le nihte thu a piak khit ciangin khuapite ah thugen ding le thuhilh dingin tua mun panin a paikhia hi. ² John in thongsung panin Khazih nasepnate a zak ciangin a nungzuite nih sawl a, ³ “Hong pai ding pa mah na hi hiam, ahih keileh a dang khat lamen lai ding ka hi uh hiam?” ci in a dongsak hi. ⁴ Zeisu in amaute kiangah, “Pai unla, na muhsa na zaksa khempeuh uh John kiangah va gen un. ⁵ Mittawte in khuamu in khebaite lam a pai uh hi. Miphakte damsiang uh a, bengngongte in khua a za uh hi. Misite kithokiksak a, mizawngte tungah lungdamna thu a kihilh hi. ⁶ Keima hanga a puklo mi in mihampha ahi hi,” ci in a dawng hi. ⁷ Amaute a paikhiat khit uh ciangin John tawh kisai Zeisu in mihonpite kiangah a gen in ah, “Bang en dingin gamlak ah paikhia na hi uh hiam? Huihin a mut ciangin a kihuang diamdiam pumpeng kungte en dinga paikhia na hi uh hiam? ⁸ Ahih keileh bang en ding na hi uh hiam? Puansilh nel niknek tawh a kizem khatpeuh en dinga paikhia na hi uh hiam? En un, puannel niknek a silhte in kumpi inn sunga a teengte ahi uh hi. ⁹ Tua ahih leh bang en ding taktak a paikhia na hi uh hiam? Kamsangpa khat en dinga paikhia na hi uh hiam? Hi takpi hi. Note kong gen in ah, amah in kamsang mawkmawk khat ciang bek hilo hi. ¹⁰ Banghang hiam cihleh Lai Siangtho ah a kigelh mah bangin, ‘En in, nangma lampi a sialkhol dingin, Na mai ah ka kamtaipa ka sawl ding hi,’ a cihpa in amah ahi hi. ¹¹ “Aman takpi kong cih in ah, numei sung panin a suak mite lakah Tuiphumpa John sanga a lianzaw kuamah a om kei hi. Ahi zongin vantung kumpigam sunga a neupenpa nangawn amah sangin a lianzaw hi. ¹² Tuiphumpa John hun a kipan tuhun dong vantung kumpigam in zawhthawh bawlna thuak a, a zawhthawh bawlte in thagum suangin a la uh hi. ¹³ Banghang hiam cihleh thukham le kamsangte khempeuh in John hun donga a piang ding thute a genkhol hi. ¹⁴ Note in na sannop uh leh hong pai ding hi ci a, a kigenpa Elijah in amah ahi hi. ¹⁵ Zak nading bil a nei mi in za tahen! ¹⁶ “Hih khang mite bang tawh genteh ding ka hi hiam? Sumbuuk ah tu in a lawmte kiangah, ¹⁷ ‘Tamngai ka tumtum uh hangin, Na lam tuan kei uh a, Ka tamlawh uh hangin lah, Na kap tuan kei uh hi,’ a ci naupangte tawh kibang uh hi. ¹⁸ “Banghang hiam cihleh John hong pai in an ne lo, tuidawn lo‑a a om ciangin amaute in, ‘Dawilawm neipa hi,’ a ci uh hi. ¹⁹ Mihing Tapa hong pai a, anne tuidawn in a om ciangin lah, ‘En un, anhai, zuhaipa, siahdongte le mawhneite zawlpa,’ a ci zel uh hi. Ahih hangin ciimna in a gamtatnate panin hong kilangkhia hi,” a ci hi. ²⁰ Zeisu in nalamdang a tam pen a bawlna khuapite a mawhna uh kisikkik lo uh ahih manin, ²¹ mawhsak a a taii in ah, “Chorazin khua aw, gimna na thuak ding hi! Bethsaida khua aw, gimna na thuak ding hi! Banghang hiam cihleh no tunga hong kibawl nalamdangte Tyre khua le Sidon khuate ah a kibawl hi leh tanglai pekin amaute in ippi puan silhin vut kibuak in a mawhna uh kisikkik khinzo ding uh hi. ²² Tua ahih manin ken kong cih in ah thukhen ni ciangin Tyre khua le Sidon khuate thuakna in note thuakna sangin a thuaknop zaw ding hi. ²³ Vantung donga hong kilamto Capernaum khua aw, Hadesɠ dongah hong kikhiasuk ding hi. Banghang hiam cihleh nangma sunga hong kibawl nalamdangte Sodom khua ah a kibawl hi leh tuni dongin tua khua kiplai ding hi. ²⁴ Tua ahih manin ken kong cih in ah thukhen ni ciangin Sodom khuapi thuakna in nangma thuakna sangin a thuaknop zaw ding hi,” a ci hi. ²⁵ Tua laitak mahin Zeisu in, “Vantung le leitung a uk ka Pa aw, hih nate mipil misiamte kiang pan selin naungekte tungah lakkhia na hih manin nang tungah ka lungdam hi. ²⁶ Hi hi, Pa aw, tua banga a pian ding hoih na sak ahi hi. ²⁷ “Ka Pa in na khempeuh kei tungah a hong ap khinzo hi. Pa simloh kuamah in Tapa a thei kei hi. Tapa le Tapa in a kitheihsak nop mite simloh kuamah in Pa a thei kei hi. ²⁸ “Vangik pua‑a a gim mi khempeuhte aw, ka kiangah hong paita un, tawldamna kong pia ding hi. ²⁹ Keima hakkol kisuan unla, ka kiangah hong kisin un. Banghang hiam cihleh keimah in lungnem in a kiniamkhiat mi ka hi hi. Tua hi leh lungsim tawldamna na ngah ding uh hi. ³⁰ Banghang hiam cihleh keima hakkol puaknop a, ka van zong a zang hi,” a ci hi.

¹ Tua hun sung Sabbath ni khatin buhlei kantan in Zeisu a pai hi. A nungzuite gilkial uh a, buhvuite zutin a bak uh hi. ² Pharisee‑te in a muh uh ciangin, “En in, na nungzuite in Sabbath ni‑a sep dinga thukham in a phalloh na a sem uh hi!” a ci uh hi. ³ Ahih hangin Zeisu in amaute kiangah, “David le a pawlte a gilkial laitak un, ⁴ Pasian inn sungah lut uh a, amah le a pawlte nek theih ding a hilo, siampite bek nek theih ding Ompihna Anlumte ne uh hi cih thu sim ngeilo na hi uh hiam? ⁵ Ahih keileh Sabbath ni in siampite in biakinnpi sungah Sabbath ngeina a palsat uh hangin mawhna in kiciamteh lo ahihlam thukham laibu sungah sim ngeilo na hi uh hiam? ⁶ Ken kong cih in ah biakinnpi sangin a lianzawpa hi lai ah a om hi. ⁷ Ahih hangin, ‘Gangawh biakpiakna sangin hehpihna ka deih zaw hi,’ a cihna thu theitel hi le uh teh khialhna a neilo mipa na mawhsak kei ding uh hi. ⁸ Banghang hiam cihleh Mihing Tapa in Sabbath ni zong a Ukpa ahi hi,” a ci hi. ⁹ Tu in tua mun panin amah paikhia in amaute kikhopna inn sungah a lut hi. ¹⁰ En in, tua lai ah a khut langkhat a si mi khat a om hi. Amaute in Zeisu a mawhmat nop manun, “Sabbath ni in cina damsak ding thukham tawh a kituak hiam?” ci in a dong uh hi. ¹¹ Tua ciangin Zeisu in amaute kiangah, “Sabbath ni in tuu khat bek a neih guam sungah kia leh a lakhia lo ding note lakah kua om na hi uh hiam? ¹² Tuu khat sangin mihing khat manpha zaw mahmah hilo ahi hiam? Tua ahih manin Sabbath ni in a pha bawl ding thukham tawh kituak hi,” a ci hi. ¹³ Tua khit ciangin mipa kiangah, “Na khut zan in,” a ci hi. A zan ciangin a lang khat lam tawh a kibangkik hi. ¹⁴ Tua khit ciangin Pharisee‑te paikhia in amah thah theih nading thu a kikum uh hi. ¹⁵ Zeisu in tua thu a theih ciangin tua mun pan paikhia a, mihonpi in a zui uh hi. Amah in amaute khempeuh a damsak hi. ¹⁶ Ama thu kuama kiangah a gen loh nadingun a kham hi. ¹⁷ Hih in kamsangpa Isaiah gensa thu a tangtun nading ahi hi. ¹⁸ Isaiah in, “En un! hihin ka teelsa ka nasempa, Ka itpa le ka lung hong damsak mahmah pa ahi hi! Ama tungah ka Kha ka koih dinga, Gentile‑te tungah thuman a hilh ding hi. ¹⁹ Amah in thu sel loin, A aw sangkhai lo dinga, Kongzing lakah zong kuamah in, Ama aw a za kei ding hi. ²⁰ Thuman thutang a gualzawhsak mateng in, A kitamsa pumpeng kuaitan loin, A tanglai meivak a sumit kei ding hi. ²¹ Gentile‑te in ama min a muang ding uh hi,” a ci hi. ²² Tua khit ciangin a mittaw in a pautheilo dawilut mi khat Zeisu kiangah hong paipih uh hi. Zeisu in tua pa damsak ahih manin mittaw in a pautheilo pa pauthei in khua zong a mu thei hi. ²³ Tua ciangin mipi khempeuh in lamdangsa mahmah uh a, “Hihpa in David Tapa hi thei ding ahi hiam?” a ci uh hi. ²⁴ Tu in Pharisee‑te in hih thu a zak uh ciangin, “Hihpa in dawite mangpipa Beelzebubɠ min suangin dawite a hawlkhia ahi hi,” a cihsan uh hi. ²⁵ Zeisu in amaute ngaihsutnate thei ahih manin amaute kiangah, “Kumpigam khat peuhpeuh amah le amah kilangkhen a, a kido leh a mangthang lel ding hi. Khua sung khat ahi a, innkuan khat ahi zongin amau le amau a kilem kei uh leh ding zolo ding uh hi. ²⁶ Satan in Satan hawlkhia in amah le amah kilem kei leh ama kumpigam bangci in kip thei ding ahi hiam? ²⁷ Beelzebubɠ suangin dawite hawlkhia ka hih leh na tate un kua min suangin dawite hawlkhia uh ahi hiam? Tua ahih ciangin amaute in note tungah thu a hong khente a suak ding uh hi. ²⁸ Ahih hangin Pasian Kha tawh dawite hawlkhia ka hih manin note tungah Pasian kumpigam hong tung zo hi. ²⁹ Ahih keileh mi khatin mi thahat khat hencip masa lopi in a inn luhin a neih a lamte bangci laksak thei ding ahi hiam? A hencip khit ciang bekin a inn a luh zo pan ding hi. ³⁰ Kei tawh a hong pangkhawmlo peuhmah ka langpang hi a, a hong kaihkhoppihlo peuhmah a thehthang mi ahi hi. ³¹ “Tua hi a, ken kong cih in ah mawhna namkim le Pasian tunga pausiatna peuhmah a kimaisak ding hi. Ahi zongin Kha tunga pausiatnate a kimaisak kei ding hi. ³² Mihing Tapa langpanna kam a paute kimaisak dinga, Kha Siangtho langpanna kam a paute ahih leh tu khang le hong tung ding khang dongin a kimaisak kei ding hi. ³³ “Singkung a hoih leh a gah hoih a, singkung a hoih kei leh a gah hoih lo hi. Banghang hiam cihleh singkungte a gah panin a kithei hi. ³⁴ A gupha gul suante aw! Mi hoihlote na hih manun kamhoih bangci zat theih ding na hi uh hiam? Banghang hiam cihleh lungsim sunga a dimlet thute kam panin a hong phulkhia ahi hi. ³⁵ Mihoih in ama lungsim hoih sunga a khol thuhoihte genkhia a, mihoihlo in thusia khol in thusia mah a genkhia hi. ³⁶ Ken kong cih in ah mite in kimanna neilo, a mawkpauna kammalte uh hangin thukhen ni ciangin sittelna a thuak ding uh hi. ³⁷ Banghang hiam cihleh na kampauna zui in dik hong kitangsak dinga, na kampauna mah zui in hong kimawhsak ding hi,” a ci hi. ³⁸ Tua ciangin thukhamhilh siate le Pharisee‑te pawlkhat in, “Sia aw, limlamdang khat hong lak leteh ka mu nuam uh hi,” a ci uh hi. ³⁹ Tua ciangin Zeisu in dawngkik a, “A gilo le a paktat tulai khang mite in limlamdang a nget uh hangin kamsangpa Jonah tunga piang limlamdang longal a dang kilak lo ding hi. ⁴⁰ Jonah in ngapi gil sungah sun thum le zan thum a om bangin Mihing Tapa zong lei sungah sun thum le zan thum a om ding hi. ⁴¹ Thukhen ni ciangin Nineveh khua mite hong dingto in tulai khang mite a mawhsak ding uh hi. Banghang hiam cihleh Jonah tangkona hangin amaute mawhna a kisikkik uh hi. En un, Jonah sanga a lianzawpa hi lai ah a om hi. ⁴² Thukhen ni ciangin Khanglam gam kumpinu in tulai khang mite tawh dingkhawm in amaute a mawhsak ding hi. Banghang hiam cihleh Solomon pilna a ngai dingin leimong khat panin amah a hong pai hi. En un, Solomon sanga a lianzawpa hi lai ah a om hi. ⁴³ “Dawigilo in mi khat sung pan a paikhiat khit ciangin tawlngak nading zongin munkeuna tengah a vak kawikawi hangin a mu zo kei hi. ⁴⁴ Tua ciangin amah in, ‘Ka paikhiatna inn mahah ciahkik ning,’ a ci hi. A tun ciangin tua inn na awngin kiphiat kipuah sinsen a om a mu hi. ⁴⁵ Tua ciangin amah sanga a gilo zaw dawi sagih va zawn a, tua inn ah lutpih in a teeng uh hi. Tu‑a tua pa dinmun in a masa sangin a sia zaw hi. A gilo tulai khang mite tungah zong tua bangin a piang ding hi,” a ci hi. ⁴⁶ Zeisu in mihonpite thu a hilhhilh laitak in a nu le a sanggamte in amah hopih nuamin innpua ah a ding uh hi. ⁴⁷ Tua ciangin mi khat in, “En in, na nu le na sanggamte in nang hong hopih nuamin innpua ah a ding uh hi,” a ci hi. ⁴⁸ Ahih hangin Zeisu in tua mi kiangah, “Ka nu kua hi a, ka sanggamte kua ahi hiam?” ci in ⁴⁹ a nungzuite lamah a khut zan a, “En un, hih mite in ka nu le ka sanggamte ahi uh hi! ⁵⁰ Banghang hiam cihleh vantung a om ka Pa deihna bangin a gamta mi khat peuhpeuh ka sanggampa, ka sanggamnu le ka nu ahi uh hi,” a ci hi.

¹ Tua ni mahin inn pan Zeisu paikhia a, tuilipi gei ah a tu hi. ² Mihonpi hong kikhawm uh ahih manin gunkuang tungah kahto in tu a, mipi khempeuh ahih leh tuili gei ah a ding uh hi. ³ Amah in thugentehna tawh thu tampi a hilh in ah, “Ngai un, khaici vawhpa in khaici vawh dingin a kuankhia hi. ⁴ Amah in khaici a vawh laitak in pawlkhat lamdung ah kia a, vasate hong pai in tawmin a ne uh hi. ⁵ Pawlkhatte suang kitawphah lei tawmna munah kia in lei dai ahih manin thakhat in a po pah hi. ⁶ Ahih hangin ni hong sa in halvul a, zungkha zo loin, a keumang hi. ⁷ Pawlkhatte ling lakah kia a, lingkungte hong khangin tuate a depgawp hi. ⁸ Ahih hangin a dangte lei hoihna ah kia a, pawlkhatte a zah 100, pawlkhatte a zah 60, pawlkhatte a zah 30 a gah hi. ⁹ Zak nading bil a nei mi in za tahen!” a ci hi. ¹⁰ A nungzuite in va naih uh a, “Banghang in gentehna tawh amaute thu hilh na hi hiam?” ci in a dong uh hi. ¹¹ Amah in dawngkik a, “Vantung kumpigam tawh kisai a kisel thusimte theihtheihna note hong kipiak hangin amaute kipia lo hi. ¹² A neite kipiak beh in tampitak a nei ding uh hi. A neilote ahih leh a neih sunsun nangawn uh a kilakkhiatsak ding hi. ¹³ Amaute in enen napi mu theilo, ngaingai napi za theilo in a theih theihloh nadingun thugentehna tawh ka hilh ahi hi. ¹⁴ Tua mite tungah Isaiah genkholhna a tangtung hi. Amah in, ‘Note in zaza napi in, Na telthei kei ding uh hi. Mumu napi in na phawk thei kei ding uh hi. ¹⁵ Banghang hiam cihleh hih mite a lungsim uh mawl in, A bil un khuaza hak mahmah a, A mit uh zong a sicip uh hi. Tua hi kei leh a mit un khuamu in, A bil un khua a za ding hi. A lungsim un theitel in, Hong kiheikik ding uh a, Amaute ka damsak ding hi,’ a ci hi. ¹⁶ “Ahih hangin note na hih uh leh na mit un khuamu in na bil un khuaza ahih manin mihampha na hi uh hi. ¹⁷ Aman takpi kong cih in ah, kamsangte le midikte in note muhte a muhnop uh hangin a mu kha kei uh hi. Na zakte uh a zaknop uh hangin a za kha kei uh hi. ¹⁸ “Tua ahih ciangin khaici vawhpa tawh thugentehna na ngai un. ¹⁹ Mi khatin vantung kumpigam thu a zak ciangin theitel zolo ahih manin gilopa hong pai in ama lungsim sunga kivawhsa khaici a lakkhiatsak hi. Tua mi in lamdung a a kia khaici ahi hi. ²⁰ A nuai ah suang om a, a tungtham lei tawm a omna munah a kia khaici in thu a zak ciangin lungdamna tawh a sang pah mi ahi hi. ²¹ Ahih hangin ama sungah zungkha lo ahih manin tawlkhat sung bek a kip hi. Banghang hiam cihleh Pasian thu hanga haksatna ahih keileh bawlsiatna hong tun ciangin a lungkia pah hi. ²² Tu in ling laka a kia khaici in thu za napi leitung nuntakna aa ding lunghihmawhna le khemna tawh kidim hauhnopna in ama thu sansa depgawp ahih manin a gah zolo mi ahi hi. ²³ Ahi zongin lei hoihna muna a kia khaici in thu a zak ciangin theitel a, gahsuah in a pungsak mi ahi hi. Pawlkhatte a zah 100, pawlkhate a zah 60, pawlkhatte a zah 30 a gah uh hi,” a ci hi. ²⁴ Zeisu in thugentehna a dang khat a gen in ah, “Vantung kumpigam in lolai a khaici hoih a vawh mi tawh kibang hi. ²⁵ Ahih hangin mi khempeuh a ihmut kalin ama galpa hong pai in tang lakah tahum tang a vawh khit ciangin a paikhia hi. ²⁶ Tang tangte hong po in a vuih ciangin tahum kungte zong hong dawkkhia hi. ²⁷ Lo neipa nasemte hong pai in ama kiangah, ‘Pu aw, na lo‑a na vawh khaici hoih hilo ahi hiam? Tahum kungte koi pana hong piang himawk ahi hiam?’ a ci uh hi. ²⁸ “Amah in, ‘Galpa vawh ahi hi,’ a ci hi. “Nasemte in, ‘Tua ahih leh kote va pai in tahum kungte ka botkhiat ding uh na deih hiam?’ a ci uh hi. ²⁹ “Amah in, ‘Botkhia nai kei un tahum kung le tang kung na botkhawm kha ding uh hi. ³⁰ Anlak hun dong a nih in khangkhawmsak phot un. Anlak hun ciangin anlate kiangah, “Tahum teng bot masa unla, mei‑a khul dingin lomhen un. Tang ahih leh ka ansal ah hong sung un,” ci in ka vaikhak ding hi,’ ” a ci hi. ³¹ Amah in gentehna dang khat a gen in ah, “Vantung kumpigam in mi khatin lolai a a vawh ankamtang tawh kibang hi. ³² Ankamtang in khaici tang khempeuh lakah a neupen ahih hangin a khan khit ciangin anteh kung dangte sangin golzaw a, a kung lianpi khat hong suak hi. Vana leng vasate in zong a hiang lakah bu a tom thei uh hi,” a ci hi. ³³ Amah in thugentehna dang khat a gen in ah, “Vantung kumpigam in numei khatin annel lawhbeuɠ thum a tawk dinga a sawh silngo tawh kibang hi,” a ci hi. ³⁴ Zeisu in hih thute khempeuh thugentehna tawh mihonpite hilh a, thugentehna loin thu a hilh kei hi. ³⁵ Banghang hiam cihleh, “Thugentehna tawh thu ka hilh dinga, Leitung piancil a kipan a ki‑iimcip thute ka pulak ding hi,” ci a, kamsangpa gensa thu a tangtun nading ahi hi. ³⁶ Zeisu in mihonpi a ciahsak khit ciangin inn sungah a lut hi. A nungzuite in amah hong naih uh a, “Lolai a po tahum kung thugentehna a khiatna hong gen in,” a ci uh hi. ³⁷ Tua ciangin Zeisu in, “Khaici hoih vawhpa in Mihing Tapa ahi hi. ³⁸ Lo in leitung ahi hi. Khaici hoihte pen kumpigam sung mite hi uh a, tahum kungte pen gilopa mite ahi uh hi. ³⁹ Tahumtang a vawh galpa in Dawimangpa ahi hi. Anlak hun pen leitung hun beina hi a, tang late in vantungmite ahi uh hi. ⁴⁰ “Tahum kungte botkhia in mei sungah a kikhul bangin hih leitung hun a bei ciangin a piang ding hi. ⁴¹ Mihing Tapa in ama vantungmite sawl dinga, amaute in mi a puksak khempeuh le siatna a bawl mi khempeuh ama kumpigam sung panin a paikhia ding uh hi. ⁴² Meikhukpi sungah amaute khul dinga, tua munah kahna le hagawina a om ding hi. ⁴³ Tua ciangin midikte in a Pa uh kumpigam sungah ni bangin a tang ding uh hi. Zak nading bil a nei mi in za tahen! ⁴⁴ “Tua banah vantung kumpigam in lolai a kisel sum tawh kibang hi. Mi khatin tua sum a muh ciangin selkik in lungdam mahmah in ciah a, a neihsa khempeuh zuak in tua lo a lei hi. ⁴⁵ “Vantung kumpigam in a hoih mahmah kepsuangmanpha a zong sumbawlpa tawh kibang hi. ⁴⁶ Amah in a mantam mahmah kepsuangmanpha khat a muh ciangin ciah a, a neihsa khempeuh zuak in tua kepsuang a lei hi. ⁴⁷ “Vantung kumpigam in tuili sungah a kikhuh ciangin ngasa namkim a man ngenpi tawh kibang hi. ⁴⁸ Tua ngenpi ah ngasa a dimtak a awk ciangin tuili gei ah kaikhia in tu uh a, a hoih teng bawm sungah guangin a hoihlo teng a paikhia uh hi. ⁴⁹ Leitung hun a bei ciangin zong tuamah bangin a piang ding hi. Vantungmite hong pai ding uh a, midikte lak panin migilote a khenkhia ding uh hi. ⁵⁰ Meikhukpi sungah amaute khul ding uh a, tua munah kahna le hagawina a om ding hi,” a ci hi. ⁵¹ Zeisu in amaute kiangah, “Hih thute a vekpi in na theitel ta uh hiam?” ci a, a dot ciangin amaute in, “Topa aw, ka theitel ta uh hi,” a ci uh hi. ⁵² Tua ciangin amah in, “Vantung kumpigam thuhilhna a sang khin thukhamhilh sia peuhmah in ama sumkoihna sung panin a lui a thak a lakhia ziauziau thei innneipa tawh kibang hi,” a ci hi. ⁵³ Zeisu in hih thugentehna khempeuh a gen khit ciangin tua mun panin a paikhia hi. ⁵⁴ Ama khankhiatna khua a tun ciangin amaute kikhopna inn sungah thu a hilh hi. Amaute in lamdangsa mahmah uh a, “Hihpa in hih pilna le nalamdang pipi sep theihnate koipan ngah ahi hiam? ⁵⁵ Amah khutsiampa tapa hilo ahi hiam? A nu zong Mary a kici nu hi a, a sanggamte zong James, Joses, Simon le Judah‑te hilo uh ahi hiam? ⁵⁶ Ama sanggam numei khempeuh zong eite kiangah om hilo uh ahi hiam? Tua hi napi, hih mipa in hih thuteng koipan ngahkhia ahi hiam?” a ci uh hi. ⁵⁷ Tua ahih manin ama hangin a lungkia uh hi. Ahih hangin Zeisu in, “Kamsang kici peuhmah ama khua le ama innkuan sung simloh mundang khempeuh ah pahtawina ngah loin a om kei hi,” a ci hi. ⁵⁸ Amaute in um lo uh ahih manin tualai ah nalamdang tampi a bawl kei hi.

¹ Tua huna gam uk mangpa Herod in Zeisu thu a za hi. ² Tua ciangin a nasemte kiangah, “Hihpa in Tuiphumpa John hi a, misite lak pan hong thokik ahih manin hih nalamdangte a bawl ahi hi,” a ci hi. ³ Herod in a sanggampa Philip zi Herodias tawh kisai in John manin hen a, thong sungah a khum hi. ⁴ Banghang hiam cihleh John in ama kiangah, “Na sanggampa zi na teenpih pen thukham tawh kituak lo hi,” ci in a gen ngei hi. ⁵ Herod in John a thahnop hangin mipite a kihta hi. Banghang hiam cihleh mihonpite in kamsang khatin John ngaihsun uh hi. ⁶ Herod in ama suahpawi bawl a, amaute mai ah Herodias tanu a lam hi. Tua ciangin amah lungdam mahmah a, ⁷ “Nong nget peuhpeuh kong pia ding hi,” ci in kamciam a pia hi. ⁸ Tua nu in a nu sawlna bangin, “Tuiphumpa John lutang kuangdai sung khatah hong pia in,” a ci hi. ⁹ Kumpipa dah mahmah a, ahi zongin a kiciamna sa le amah tawh omkhawm mite hangin tua nu ngetna piak dingin thu a pia hi. ¹⁰ Tua bangin mi sawl pah a, thong sunga om John ngawng a tansak hi. ¹¹ Amaute in John lutang kuangdai tawh hong tawi in nungakno pia uh a, nungakno in a nu kiangah a puak hi. ¹² Tua ciangin John nungzuite hong pai in a luang la in vui uh a, tua khit ciangin Zeisu kiangah a va ko uh hi. ¹³ Tu in, hih thu Zeisu in a zak ciangin tua mun panin gamdaihna mun khatah gunkuang tuangin a kihemkhia hi. Ahih hangin mihonpi in hih thu a zak uh ciangin amau khua ciat pan khe tawh hong pai in amah a zuan uh hi. ¹⁴ Zeisu gamdaihna mun a hong tun ciangin mihonpi mu a, amaute hehpihhuai sa ahih manin cinate a damsak hi. ¹⁵ Nitak lam ciangin a nungzuite ama kiangah hong pai uh a, “Hih mun in gamlak ahih banah ni niamta ahih manin mihonte an lei dingin khua sungah paisak in,” a ci uh hi. ¹⁶ Zeisu in, “Amaute mundang a paikhiat ding uh kul lo hi. A nek ding uh bang khat peuhpeuh pia un,” a ci hi. ¹⁷ Amaute in, “Anlum nga le ngasa nih bek ka nei uh hi,” ci in dawng uh hi. ¹⁸ Amah in, “Tuate ka kiangah hong la un,” a ci hi. ¹⁹ Tua khit ciangin mihonpite lopa tungah a tusak hi. Anlum nga le ngasa nihte la in, vantung lam ento a thupha a piak khit ciangin anlumte balkham in nungzuite pia a, nungzuite in mihonpite lakah a hawm uh hi. ²⁰ A vekpi un gilvahtak in ne uh a, a kikhamval a themneng teng a khop uh ciangin lawh sawm le lawh nih dim a ngah uh hi. ²¹ Anne mi peuhmah numei le naupang simloh pasal bekbek 5,000 bang a pha uh hi. ²² Zeisu in mihonpite a ciahsak laitak in a nungzuite zong gunkuang tungah tuangsak mengmeng a, ama mai ah a galkahsak hi. ²³ Mihonpite a ciahkhiatsak khit ciangin thungen dingin mualtung ah amah bek a kahto hi. Khuamial ciangin tualai ah amah guak a om hi. ²⁴ Ahih hangin gunkuang pen tuili laizang ah om a, huihin lehmut ahih manin tuihual in a lokgawp hi. ²⁵ Zanvil lina ciangin amaute lam manawh in Zeisu tui tungah a khe tawh hong pai hi. ²⁶ Nungzuite in amah tui tunga pai a muh uh ciangin patau uh a, ‘Sikha hi!’ ci in lau in a kiko uh hi. ²⁷ Zeisu in zong, “Lungnuam un! Keimah ka hi hi. Lau kei un,” a ci hi. ²⁸ Peter in, “Topa aw, nangmah na hih leh tui tungtawn in nang kiangah kong pai theih nading thu hong pia in,” a ci hi. ²⁹ Zeisu in, “Hong pai in,” a cih ciangin gunkuang pan Peter kumkhia in, Zeisu kiang zuanin tui tungah a pai hi. ³⁰ Ahih hangin huihpi kizial a muh ciangin lau a, tui sungah tum dektak ahih manin, “Topa aw, hong hon in,” ci in a kiko hi. ³¹ Zeisu in thakhat in a khut zanin len a, “Upna neu mipa aw, banghang in muanglah na hi hiam?” a ci hi. ³² Amau gel gunkuang sung a tun uh ciangin huihpi a dai hi. ³³ Tua ciangin gunkuang sunga mite hong pai in, “Pasian Tapa taktak na hi hi,” ci in amah a bia uh hi. ³⁴ A gal khat ah a kah khit uh ciangin Gennesaret gamah a pai uh hi. ³⁵ Tua muna om mite in amah ahihlam a theih uh ciangin khuakim khuapam ah thu zasak uha cina khempeuh ama kiangah a hong paipih uh hi. ³⁶ Ama puanmongtep tawm a lawnziau theih nadingun ngen uh a, a lawng kha zahzah in damsiangthona a ngah uh hi.

¹ Tua khit ciangin Jerusalem khuapi a om thukhamhilh siate le Pharisee pawlte Zeisu kiangah hong pai uh a, ² “Na nungzuite in banghang in tanglai ngeina palsat in khutsil lopi in an ne uh ahi hiam?” a ci uh hi. ³ Zeisu in, “Banghang in note in zong tanglai ngeina paulam in Pasian thupiak palsat na hi uh hiam? ⁴ Banghang hiam cihleh Pasian in, ‘Na nu le na pa zahtak in. A nu ahi a, a pa ahi zongin a samsiate in thahna thuak tahen,’ ci in thu hong pia hi. ⁵ “Ahi zongin note in, ‘Mi khatin a nu le a pa kiangah, “Kei tung pana na ngah ding khempeuh uh Pasian ka pia khinzo hi,” ⁶ ci peuh leh a nu le a pa piak kul nawnlo hi,’ na ci uh hi. Tua bangin tanglai ngeina paulam in Pasian thupiakna a mawkna na suaksak uh hi. ⁷ A kineihkhem mite aw, Isaiah in note thu a genkholhna a maan mahmah hi. Amah in, ⁸ ‘Hih mite in a kam uh tawh kei hong zuanin, A kam uh tawh a hong pahtawi uh hangin, A lungsim uh kei tawh kigamla hi. ⁹ Mihing phuahtawm thupiakte kihilh uh ahih manin, Kei hong biak uh hangin a mawkna a suak hi,’ ci hi,” ci in a gen hi. ¹⁰ Amah in mihonpite ama kiangah a sap khit ciangin, “Hih thu ngai unla theitel un. ¹¹ Kam sunga a lutsukte in mihing ninsak lo a, kamsung pan a pusuakte bekin mihing a ninsak hi,” a ci hi. ¹² Tua khit ciangin a nungzuite ama kiangah pai uh a, “Pharisee‑te in hih na thugen zadah mahmah uh hi cih na thei hiam?” a ci uh hi. ¹³ Ahih hangin Zeisu in, “Vantung a ka Pa in a suanloh peuhmah kibotkhia ding hi. ¹⁴ Tua mite awlmawh kei un. Amaute in mittawte a makaih mittaw makaite ahi uh hi. Mittaw in mittaw makaih leh a nih un guam sungah kia ding uh hi,” a ci hi. ¹⁵ Tua ciangin Peter in, “Hih thugentehna a khiatna hong hilh in,” a ci hi. ¹⁶ Tua ciangin Zeisu in, “Note nangawn in hih thu tel zo nailo lailai na hi uh hiam? ¹⁷ Kam sunga a lutsuk peuhmah gilpi sung tung a, tua panin kithakhia hi cih thei lo na hi uh hiam? ¹⁸ Ahih hangin kam sung pana a pusuakte in lungsim pan hong paikhia ahih manin mihing a ninsak hi. ¹⁹ Banghang hiam cihleh ngaihsut hoihlote, mithahna, mi zi tawh mawhna, numei pasal mawhna, guktakna, a maanlopi a teci panna le kosiatnate lungsim sung panin a hong paikhia ahi hi. ²⁰ Hite in mi ninsak a, ahih hangin khutsil lo a annekna in mi a ninsak kei hi,” a ci hi. ²¹ Tua ciangin tua mun panin Zeisu paikhia in, Tyre le Sidon gamah a pai hi. ²² En un, tua gam pana hong pai Canaan numei khat in, “David Tapa, Topa aw, kei hong hehpih in. Ka tanu dawilut a, nasiatak in bawlsiatna a thuak hi,” ci in a kiko hi. ²³ Ahih hangin Zeisu in kam khat beek a dawng kei hi. A nungzuite zong hong pai in, “Eite nungah hih numei hong kiko niloh ahih manin hawlkhia in,” ci in a kun uh hi. ²⁴ Ahih hangin amah in, “Tuu banga a mangthang Israel minamte kiang longal ah kei hong kisawl lo hi,” ci in a dawng hi. ²⁵ Tua ciangin tua nu hong pai in, “Topa aw, hong huh in,” ci in a bia hi. ²⁶ Zeisu in, “Tate annek lai lakhia in uite piak ding kilawm lo hi,” ci in a dawng hi. ²⁷ Tua nu in, “Hi mah hi, Topa aw, ahi zongin uite in a pu sabuai pana anneng kiate ne khasam uh hilo ahi hiam,” a ci hi. ²⁸ Tua ciangin Zeisu in, “Numei aw, na upna a lian hi. Na lunggulhna bangin nang tungah piang tahen,” a ci hi. Tua hun lian mahin a tanu a dam pah hi. ²⁹ Zeisu in tua mun nusia in Galilee tuilipi lamah pai a, mualtung ah kahto in tualai ah a tu hi. ³⁰ Tua ciangin mihonpite ama kiangah hong pai uh a, khebai, mittaw, pautheilo le a poite a kipan a dang cina tampi hong paipih uh a, Zeisu khebul ah nga in amah in tuate khempeuh a damsak hi. ³¹ A pautheilote pau thei uh a, a poite damkik in, khebaite lampai thei uh a, mittawte in khua a mukik uh hi. Mihonpite in tuate a muh uh ciangin lamdangsa uh a, Israel Pasian a phat uh hi. ³² Tu in Zeisu in a nungzuite ama kiangah sam in, “Hih mihonpite ni thum tawntung kei tawh omkhawm uh a, nek ding bangmah neilo uh ahih manin hehpihhuai ka sa hi. Lamkal ah phukhong vei kha ding uh ahih manin gilkialsa in ka ciahsak nuam kei hi,” a ci hi. ³³ Tua ciangin a nungzuite in, “Mihon hi zah kham ding an hih gamlak ah koi pan ngah mawk ding i hi hiam?” a ci uh hi. ³⁴ Zeisu in, “Anlum bangzah na nei uh hiam?” ci in a dot ciangin amaute in, “Anlum sagih le ngasaneu tawmkha ka nei uh hi,” a ci uh hi. ³⁵ Tua ciangin Zeisu in mihonpite leilak ah a tusak hi. ³⁶ Tua ciangin anlum sagih le ngasa la in lungdam a koh khit ciangin balnen a, a nungzuite a pia hi. Nungzuite in mihonpite lakah a hawmkhia uh hi. ³⁷ Amaute khempeuh in khamtak in a nek khit uh ciangin nungzuite in a kikhamval a themneng teng kaikhawm uh a, lawhbeu gol sagih dim a ngah uh hi. ³⁸ Anne mi numei le naupang simloh pasal bekbek 4,000 a pha uh hi. ³⁹ Zeisu in mihonpite a ciahsak khit ciangin gunkuang tuangin Magdala gamah a pai hi.

¹ Tua ciangin Sadducee‑te le Pharisee‑te hong pai uh a, amah a ze‑et nadingun, “Vantung pan theihsakna limkhat hong lak in,” ci in a ngen uh hi. ² Zeisu in, “Note in, ‘Nitak lam in meiisan hong suah leh khua pha ding hi,’ na ci uh hi. ³ Zingsang lam ahih leh, ‘Tuni in meiisan in khua nim ahih manin khuahun a sia ding hi,’ na ci uh hi. A kineihkhem mite aw, tua bangin van maitang khentel thei napi uh cin banghang in a hun zui a piang theihsakna limte khentel theilo na hi uh hiam! ⁴ A gilo le angkawm hat tulai khang mite in limlamdang a nget uh hangin kamsangpa Jonah tunga piang limlamdang bek a kipia ding hi,” a ci hi. Tua khit ciangin amaute nusia in a paikhia hi. ⁵ Tu in a nungzuite a gal khat hong tun uh ciangin anlum a puak ding uh a mangngilh lam a phawk uh hi. ⁶ Tua ciangin Zeisu in amaute kiangah, “Pharisee‑te le Sadducee‑te silngo kidawm un,” a ci hi. ⁷ Tua ciangin amaute in, “Anlum i puak loh manin hih bangin a hong gen hi ding hi,” ci in a kikum uh hi. ⁸ Ahih hangin Zeisu in tua thu a theih ciangin, “Upna neu mite aw, banghang in anlum na puak loh uh kikum na hi uh hiam? ⁹ Theitel nailo lailai na hi uh hiam? Mihing 5,000 in anlum nga a nek khit un ciangin a khamval lawh bangzah pha cih mangngilh ta na hi uh hiam? ¹⁰ Mihing 4,000 in anlum sagih a nek khit uh ciangin a khamval uh lawhbeu gol bangzah pha cih phawk nawnlo na hi uh hiam? ¹¹ Annek tawh kisai thu gen ka hi kei a, Pharisee‑te le Sadducee‑te silngo na kidop ding uh a gen ka hih lam banghang in tel zolo na hi uh hiam?” a ci hi. ¹² Tua ciangin annel laka kisawh silngo hilo in Pharisee‑te le Sadducee‑te thuhilhna kidawm un Zeisu in a cihna ahihlam amaute in a tel pan uh hi. ¹³ Tu in Caesarea Philippi gamah Zeisu a hong tun ciangin a nungzuite kiangah, “Mite in keimah, Mihing Tapa, kua hi hong ci uh hiam?” ci in a dong hi. ¹⁴ Amaute in a gen in ah, “Mi pawlkhat in, Tuiphumpa John, pawlkhat in Elijah, Jeremiah, ahih keileh kamsangte khat peuhpeuh hi hong ci uh hi,” ci in a dawng uh hi. ¹⁵ Amah in amaute kiangah, “Tua ahih leh note in kei kua hi nong ci uh hiam?” a ci hi. ¹⁶ Tua ciangin Simon Peter in, “Nang in a nungta Pasian Tapa, Khazih na hi hi,” ci in a dawng hi. ¹⁷ Zeisu in, “Jonah tapa Simon aw, mi hampha na hi hi. Banghang hiam cihleh hih thu ci le sa in a hong theihsak hilo in vana om ka Pa in a hong theihsak ahi hi. ¹⁸ Ken kong cih in ah nang in Peter na hi hi. Hih suangpi tungah ka pawlpi ka lam dinga, Hadesɠ kongpite in a zo kei ding uh hi. ¹⁹ Vantung kumpigam kong honna tawhtang nang kong pia ding hi. Leitung a na hen khempeuh vantung ah kihen dinga, leitung a na phel khempeuh zong vantung ah kiphel ding hi,” a ci hi. ²⁰ Tua ciangin amah Zeisu Khazih ahihlam a nungzuite in kuama kiangah a gen loh nadingun khauhtak in a kham hi. ²¹ Tua huna kipan Zeisu in Jerusalem khuapi ah pai in makaite, siampi liante le thukhamhilh siate tung panin gimna tampi a thuak nadingte le tua mite in amah thatin a ni thum ni ciangin a kithawhkiksak nading thute a nungzuite kiangah a sianggen hi. ²² Tua ciangin Peter in amah samkhia a, “Topa aw, hih thu nang tawh kipelh henla hih thu nang tungah piang kei tapeuh hen,” ci in a taii hi. ²³ Ahih hangin Peter lamah Zeisu kihei a, “Satan aw, ka nung lamah kihemkhia in. Pasian thu sangin mihing thu ngaihsut in nei zaw na hih manin keima suihkhak ding na na hi hi,” a ci hi. ²⁴ Tua ciangin a nungzuite kiangah, “Mi khatpeuh in kei a hong zuihnop leh ama pumpi nialin a singlamteh kisuan henla hong zui hen. ²⁵ Banghang hiam cihleh ama nuntakna a kemcing nuam mi in a nuntakna a tan ding hi. Keima hanga a nuntakna a tan mi in a nuntakna a kemcing ding hi. ²⁶ Mi khatin leitung buppi a ngah hangin ama nuntakna a tan leh bang phattuamna om ding ahi hiam? Ahih keileh mi khatpeuh in ama nuntakna bang tawh khekkik thei ding ahi hiam? ²⁷ A Pa minthanna le ama vantungmite tawh Mihing Tapa a hong pai ciangin mi khempeuh amau sepna ciat zui in thaman a pia ding hi. ²⁸ Aman takpi kong cih in ah, hihlai ah a ding mi pawlkhat in Mihing Tapa, ama kumpigam sungah hong pai a muh mateng un sihna a ciam kei ding uh hi,” a ci hi.

¹ Ni guk khit ciangin Zeisu in Peter, James le a sanggampa John‑te samin mualsang khat tungah amau teng bek a paipih hi. ² Amaute mai ah ama mel kikhel in a maitang ni bangin tanga a puante khuavak bangin a tee hi. ³ En in, amaute kiangah Moses le Elijah hong kilang in Zeisu tawh a kiho uh hi. ⁴ Tua ciangin Peter in Zeisu kiangah, “Topa aw, hihlai nuam ka sa uh hi. Hoih na sak leh nang aa ding buuk khat, Moses aa ding buuk khat, Elijah aa ding buuk khat, buuk thum kong lamsak ding uh hi,” a ci hi. ⁵ Amah a pau laitak in meiingo khatin amaute tuam a, tua meii sung panin, “Hihpa in hong lungdamsak mahmah ka it ka Tapa ahi hi. Ama thu na mang un!” ci in aw khat a hong gingkhia hi. ⁶ A nungzuite in tua awging a zak uh ciangin lau mahmah uha lei ah a bok uh hi. ⁷ Ahih hangin Zeisu hong pai in amaute lawng a, “Tho un. Lau kei un,” a ci hi. ⁸ Amaute a khuadaktoh uh ciangin Zeisu longal kuamah dang a mu nawn kei uh hi. ⁹ Mualtung pan a hong kumsuk uh ciangin Zeisu in amaute kiangah, “Mihing Tapa misite lak pan a kithawhkiksak mateng in hih na muhte uh kuama kiangah gen kei un,” ci in thu a pia hi. ¹⁰ A nungzuite in, “Tua ahih leh thukhamhilh siate in banghang in Elijah hong pai masa ding hi ci uh ahi hiam?” ci in a dong uh hi. ¹¹ Zeisu in, “Elijah hong pai masa takpi dinga na khempeuh a bawlthak ding hi. ¹² Ahih hangin ken kong cih in ah Elijah hong pai khin a, amaute in amah thei lo uh ahih manin a ut bangbang un a bawl uh hi. Tuamah bangin Mihing Tapa in zong tua mite khut sungah gimna a thuak ding hi,” ci in a dawng hi. ¹³ Tua ciangin a nungzuite in Tuiphumpa John a cihna ahihlam a thei uh hi. ¹⁴ Mihonpite kiang a tun uh ciangin mi khat hong pai in ama mai ah khukdin a, ¹⁵ “Topa aw, ka tapa hong hehpih in. Amah in sibup natna vei in nasia mahmah a, meikhuk sung khawng, tuisung khawng ah a tuk pahpah hi. ¹⁶ Na nungzuite kiangah ka paipih hangin a damsak zo kei uh hi,” a ci hi. ¹⁷ Tua ciangin Zeisu in, “Upna a neilo, a lehtat khang mite aw, bang tanvei hong ompih lai in bang tanvei hong thuak lai ding ka hi hiam? Tua naupang ka kiangah hong paipih un,” a ci hi. ¹⁸ Zeisu in tua dawi a taii ciangin naupangno sung pan taikhia a, thakhat in naupangno a dam hi. ¹⁹ Tua ciangin nungzuite amau guak Zeisu kiangah hong tuam pai uh a, “Banghang in kote in tua dawi hawlkhia zolo ka hi uh hiam?” ci in a dong uh hi. ²⁰ Zeisu in, “Na up loh man uh ahi hi. Aman takpi kong cih in ah, ankamtang cia upna nei le uh teh, ‘Hih mualpi kiangah hih mun panin hualai ah va kikhinkhia in,’ ci le uh teh zong kikhinkhia ding hi. Note aa dingin a piang theilo bangmah a om kei ding hi. ²¹ Ahi zongin hih bang dawi namte thungetna le antannalo tawh a paikhia kei hi,” a ci hi. ²² Galilee gamah a taam sungun Zeisu in amaute kiangah, “Mihing Tapa mite khut sungah hong kilehhek ding hita hi. ²³ Amaute in amah that ding uha a ni thum ni in a kithokiksak ding hi,” a cih ciangin amaute a dah mahmah uh hi. ²⁴ Capernaum khua a tun uh ciangin Peter kiangah biakinnpi siah a dongte va pai uh a, “Na siapa in biakinnpi siah pia lo ahi hiam?” ci a, a dot uh ciangin ²⁵ Peter in, “Pia mah hi,” a ci hi. Inn sungah Peter a lut phetin Zeisu in na hopih masa a, “Simon aw, bang na ci ngaihsut hiam? Leitung kumpite in mangmu ahi a, mimal siah ahi zongin a don uh ciangin a tate uh tung pan dong uh ahi hiam ahih keileh midangte tung pan dong zaw uh ahi hiam?” ci in a dong hi. ²⁶ Peter in, “Midangte tung panin dong zaw uh hi,” a cih ciangin Zeisu in, “Tua ahih leh a tate a kimap ahi hi. ²⁷ Ahi zongin amaute a puksak i suah khakloh nadingin tuili ah pai in ngakawi va siah in. A awk masa penpen a kam phen leteh shekel khat na mu ding hi. Tua shekel la inla, nang aa ding le kei aa dingin siah va pia in,” a ci hi.

¹ Tua laitak in Zeisu kiangah a nungzuite hong pai uh a, 17:24 biakinnpi siah: Greek in “didrachma” hi a, mi khatin kum khat sung aa dingin ni nih thaman ahi denarius nih siah in a pia hi. “Vantung kumpigam sungah kua lianpen ding ahi hiam?” ci in a dong uh hi. ² Zeisu in naupangno khat samin, amaute laizang ah dingsak a, ³ “Aman takpi kong cih in ah, kikhel a naupang note na bat kei uh leh vantung kumpigam sungah na lutthei ngei kei ding uh hi. ⁴ Tua ahih manin hih naupangno bang a, a kiniamkhiatte in vantung kumpigam sungah a lianpen ahi ding uh hi. ⁵ “Keima min hanga hih bang naupangno khat a sang mi in kei zong a hong sang ahi hi. ⁶ Ahi zongin, kei hong um hih naupangnote khat a khialsak mi khatpeuh in a ngawngah angawina suang khih henla tuipi sungah kikhia leh ama aa dingin a hoih zaw ding hi. ⁷ “Khialh theih nading thute hangin leitung in gimna a thuak ding hi! Banghang hiam cihleh khialh theih nading thute a om ding mah hi a, ahi zongin a khialsak mi in gimna a thuak ding hi! ⁸ Tua ahih manin na khut khat na khe khatin a hong khialhsak leh sattan inla pai in. Khutkim khekim tawh tawntung meikuangpi sungah hong kikhiat sangin khuttawng khetawng a poisa in nuntakna sungah lut leteh nang aa dingin a hoih zaw ding hi. ⁹ Tua ahih ciangin na mit in a hong khialhsak leh khelkhia inla pai in. Mittang nih tawh hellɠ meikuang sungah hong kikhiat sangin mittang khat bek tawh nuntakna sungah lut leteh nang aa dingin a hoih zaw hi. ¹⁰ “Hih naupangnote khatpeuh na simmawh khakloh nadingun kidawm un. Banghang hiam cihleh amau vantungmite in vana om ka Pa maitang a mu den uh hi. ¹¹ Banghang hiam cihleh Mihing Tapa in a mangthang mite hon dinga hong pai ahi hi. ¹² “Note in bangci ngaihsut na hi uh hiam? Mi khatin tuu 100 a neih lak panin khat gammang leh 99te nusia in tua a gammang zong dingin mualtung lamah kuankhia lo ding ahi hiam? ¹³ Aman takpi kong cih in ah, tua tuu mang khat a muh ciangin a lungdamna pen a gammanglo 99te hanga a lungdamna sangin a lianzaw ding hi. ¹⁴ Tuamah bangin hih naupangnote khat nangawn a kisiat ding vantung a om na Pa un a deih kei hi. ¹⁵ “Tua thamlo in mi khat nang tungah a hong khialh leh a kiangah pai inla note gel kia theih in a khialhna va gen in. Na thu a hong man leh tua pa a zo na hi hi. ¹⁶ Nangma thu a hong mannop kei leh, ‘thu khempeuh teci nih bang thum bang thugenna tawh a kip theih nadingin’ mi khat le nih tawh va pai in. ¹⁷ Tua mite thu a nial lai leh pawlpi tungah ko in. Pawlpi thu nangawn a nial leh lawki le siahdongte bangin omsak in. ¹⁸ “Aman takpi kong cih in ah, leitung a na hen khempeuh uh vantung ah kihen dinga, leitung a na phel khempeuh uh vantung ah kiphel ding hi. ¹⁹ “Khatvei kong genkik in ah leitung ah mi nih kilungtuak a thu a nget uh leh a nget peuhpeuh uh vantung a om ka Pa in a pia ding hi. ²⁰ Banghang hiam cihleh keima min tawh nih le thum bang a kikhop uh ciangin amaute laizang ah ka om hi,” ci in Zeisu in a gen hi. ²¹ Tua khit ciangin ama kiangah Peter hong pai a, “Topa aw, ka sanggampa in ka tungah hong khialh leh bangzah vei ka maisak ding hiam? Sagihvei dongin ka maisak ding hiam?” a ci hi. ²² Zeisu in, “Sagihvei dongin maisak in kong ci kei hi. 70 mun sagihvei dongin maisak in kong ci hi. ²³ Tua ahih manin vantung kumpigam in a nasemte sum sazian a sittel nuam kumpipa tawh kibang hi. ²⁴ Amah in sum sazian a sit laitak in talentɠ 10,000 a bapa khat ama kiangah a hong paipih uh hi. ²⁵ Amah in a leiba loh zolo ahih manin a pu in amah le a zi a tate a kipan a neihsa khempeuh zuak a, a leiba a loh nadingin thu a pia hi. ²⁶ “Tua ciangin tua nasempa zong kumpipa mai ah bokin, ‘Pu aw, hong ngak keikai lai in a vekpi in kong loh ding hi,’ a ci hi. ²⁷ A topa in tua nasempa khasiathuaisa ahih manin a leiba teng maisak in a khah hi. ²⁸ “Tua nasempa paikhia a, ama sum denariusɠ 100 a ba, a lawm nasem dang khat tawh a kituak hi. Amah in tua pa manin gawlmek a, ‘Nong sum bat hong loh in,’ a ci hi. ²⁹ “A lawm silapa zong a khe phungah bokin, ‘Hong ngak keikai lai in a vekpi in kong loh ding hi,’ ci in a thum hi. ³⁰ “Ahih hangin tua pa in mang zolo a, a leiba khempeuh a loh khit mateng a lawmpa thong sungah a khum hi. ³¹ A lawm nasem dangte in tua thupiang teng a theih uh ciangin lungnuam hetlo uha a pu uh kiangah pai in thupiang teng a ko uh hi. ³² “Tua ciangin a pu in tua pa samsak a, ‘Nang a gilo nasempa aw, nong thum manin na leiba khempeuh kong maisak hi. ³³ Nang kong hehpih bangin na lawm nasempa na hehpih ding kilawm hilo ahi hiam?’ a ci hi. ³⁴ A pu hehlua ahih manin a leiba khempeuh a loh khit mateng in mi bawlsiate khut sungah tua nasempa a pia hi. ³⁵ “Note in zong na sanggampa nang tunga a hong khialhnate na lungsim panin na maisak kei leh vantung a om ka Pa in tuamah bangin nang tungah a hong bawl ding hi,” a ci hi.

¹ Zeisu in hih thute a gen khit ciangin Galilee gam panin Jordan gungal khat a om Judea gamah a pai hi. ² Mi tampi in amah zui uha amah in amaute tua munah a damsak hi. ³ Pharisee pawlte zong hong pai uh a, “Mi khatin thu khatpeuh hangin a zi a mak ding thukham tawh a kituak hiam?” ci in a ze‑et uh hi. ⁴ Zeisu in dawngkik a, “Amaute a bawlpa in a kipat cilin numei le pasal a bawl hi. ⁵ ‘Tua ahih manin pasal in a nu le a pa nusia in a zi tawh kigawm dinga, Amaute gel pumkhat sakhat a suak ding uh hi,’ cih thu sim kha ngeilo na hi uh hiam? ⁶ Tua hi a, amaute nih hi nawnlo in pumkhat ahi uh hi. Tua ahih ciangin Pasian in a gawmsate mihing in khen kei tahen,” a ci hi. ⁷ Tua ciangin amaute in, “Tua ahih leh banghang in Moses in kikhenna lai pia‑a zi mak theih nading thu hong pia ahi hiam?” a ci uh hi. ⁸ Amah in, “Na lungtang uh khauhlua ahih manin zi na mak theih nadingun a hong phal ahi hi. Ahih hangin a kipat cilin tua bang ahi kei hi. ⁹ Ken kong cih in ah numei pasal mawhna hang longal thu dang hangin a zi ma‑a numei dang khat a teenpihpa in angkawm ahi hi. A kimasa numei a teenpihpa zong angkawm mah ahi hi,” a ci hi. ¹⁰ Tua ciangin a nungzuite in, “Nupa vai tua bang ding ahih leh zi neilo a om ding hoih zaw hi,” a ci uh hi. ¹¹ Tua ciangin amah in, “Mi khempeuh in hih thu a sangkim zo kei uh hi. Pasian in a tuam vilvel a a piakte bekin a sangzo uh hi. ¹² A nu gilsung panin gehsa banga a suak pawl a om hi. A kiget tawm pawl zong oma pawl khatte ahih leh vantung kumpigam thu hangin geh bangin a om uh hi. Hih thu a sang zote in sang un,” a ci hi. ¹³ Zeisu in naupangte tungah a khut nga‑a thu a ngetsak theih nadingin mite in naupangte hong paipih uh hi. Ahih hangin nungzuite in amaute na taiigawp uh hi. ¹⁴ Zeisu in, “Naupangte ka kiangah a hong pai ding kham kei unla hong paisak zaw un. Vantung kumpigam in naupang tawh a kibangte aa ahi hi,” a ci hi. ¹⁵ Tua khit ciangin naupangte tungah a khut nga‑a tua mun panin a paikhia hi. ¹⁶ Tu in, en in, ama kiangah mi khat hong pai a, “Sia hoih aw, nuntak tawntungna ka ngah theih nadingin a pha bang ka bawl ding hiam?” a ci hi. ¹⁷ Tua ciangin Zeisu in, “Banghang in mihoih hong ci na hi hiam? Pasian longal a hoih kuamah a om kei hi. Ahi zongin, nuntakna sungah na lutnop leh thupiakte na zui in,” a ci hi. ¹⁸ Amah in, “Bang thukham teng zui ding ka hi hiam?” a cih ciangin Zeisu in, “Mi that kei in. Angkawm kei in. Guta kei in. A maanlopi in teci pang kei in. ¹⁹ Na nu le na pa zahtak in. Nang le nang na ki‑it bangin na vengpa it in,” a ci hi. ²⁰ Tangvalpa in, “Tuate khempeuh ka neu tunga kipan ka zuihsa ahi hi. Bang kisam lai ka hi hiam?” a ci hi. ²¹ Zeisu in, “A hoihkim a ut taktak na hih leh pai inla na neihsa teng zuak in mizawngte pia leteh vantung ah sum na nei ding hi. Tua khit ciangin hong pai inla ka nung hong zui in,” a ci hi. ²² Tangvalpa in tua thu a zak ciangin maikhingsa in a paikhia hi. Banghang hiam cihleh amah mihau mahmah khat ahi hi. ²³ Tua khit ciangin Zeisu in a nungzuite kiangah, “Aman takpi kong cih in ah, mihaute vantung kumpigam sung a lut nading uh haksa mahmah hi. ²⁴ Khatvei kong cihkik in ah mihau khat Pasian kumpigam sungah a lut ding sangin kala‑oh khat phimbilvang sungah khum ding baih zaw hi,” a ci hi. ²⁵ A nungzuite in hih thu a zak uh ciangin lamdangsa mahmah uh a, “Tua bang ahih mawk leh kua in hotkhiatna ngah zo ding ahi hiam?” a ci uh hi. ²⁶ Zeisu in amaute en in a gen in ah, “Hih thu bel mihing tawh a piang theilo mah ahi hi. Ahi zongin Pasian tawh na khempeuh a piang thei hi,” a ci hi. ²⁷ Tua ciangin Peter in ama kiangah, “En in, kote in na khempeuh nusia in nang hong zui ka hih manun bang ngah ding ka hi uh hiam?” a ci hi. ²⁸ Zeisu in amaute kiangah, “Aman takpi kong cih in ah, bawlthak hun ah Mihing Tapa in ama minthanna kumpi tokhom tungah a hong tut hun ciangin kei hong zui note in kumpi tokhom sawm le nih tungah tu in Israel nam sawm le nam nihte tungah thu na khen ding uh hi. ²⁹ Keima min hangin a inn, a sanggampa, a sanggamnu, a pa, a nu, a zi, a tate le a lote khat peuhpeuh a nusia mi in a zah 100 ngah dinga, nuntak tawntungna zong a luah ding hi. ³⁰ Ahi zongin a masa mi tampite nunung ding uh a, a nunung mi tampite a masa ding uh hi,” a ci hi.

¹ “Banghang hiam cihleh vantung kumpigam in ama lenggah huan a nasem ding mi a cial dingin zingsang tunga a kuankhia loneipa tawh kibang hi. ² Tu in, nitha denariusɠ khat piak dingin nasemte tawh kithukim uha lenggah huanah amaute a kuansak hi. ³ “Nai thum pawl ciangin loneipa a paikhiat leh vanzuakna phual ah sepmel nei loin a mawk om mi pawlkhat a mu hi. ⁴ Amaute kiangah zong, ‘Ka lenggah huanah va kuan un. Thaman a kilawm zah kong pia ding hi,’ a cih ciangin amaute zong a kuan uh hi. ⁵ Nai guk le nai kua pawlin khatvei, paikhiakik a tuamah bangin a va cial hi. ⁶ Nai sawm le nai khat pawlin zong paikhia a, a mawk om mi pawlkhat a muh ciangin amaute kiangah, ‘Banghang in hihlai ah sun thapai in mawk om na hi uh hiam?’ a ci hi. ⁷ “Amaute in, ‘Kuamah in hong cial lo hi,’ a cih uh ciangin amah in, ‘Note zong ka lenggah huanah va kuan un. Thaman a kilawm zah kong pia ding hi,’ a ci hi. ⁸ “Nitak ciangin lenggah loneipa in nasem ukpa kiangah, ‘Nasemte sam inla, a kuan nunung pen pan a kuan masa pen dongin a thaman uh pia in,’ a ci hi. ⁹ “Tua ciangin nai sawm leh nai khat pawla a cialte hong pai uh a, denariusɠ khat ciat a ngah uh hi. ¹⁰ A kuan masate hong pai uh ciangin a tam zaw ngah dingin kilamen uha ahi zongin amaute in zong denariusɠ khat ciat bek mah a ngah uh hi. ¹¹ Tua banga a ngah uh ciangin loneipa phunsan uh a, ¹² ‘Hih a kuan nunungte in nai khat sung bek nasem man uh hi napi in sun thapai nisa thuakin a gim mahmah kote tawh thaman a kikim na ngahsak veve hi,’ a ci uh hi. ¹³ “Ahih hangin loneipa in amaute laka khatpa kiangah, ‘Lawm aw, nang tungah ka khial kei hi. Denariusɠ khat piak ding mah a thukim hilo na hi hiam? ¹⁴ Na thaman ding la inla ciah in. Hih a kuan nunung penpa zong nang aa zah mah ka pia nuam hi. ¹⁵ Keima neihsa ka ut bangbang a ka zek theih hi lello ahi hiam? Ka cit, ka siam manin nang heh laizang ding na hi hiam?’ a ci hi. ¹⁶ “Tua ahih manin a nunungte masa ding uh a, a masate a nunung ding uh hi. Banghang hiam cihleh a kisam mi a tam hangin a kiteel mi a tawm hi,” a ci hi. ¹⁷ Tu in Jerusalem khuapi ah Zeisu a paitoh kawmin lampi ah sawm le nihte tuam tonpih in thu a hilh hi. ¹⁸ Amah in, “En un, Jerusalem khuapi ah i paito ding hi. Siampi liante le thukhamhilh siate tungah Mihing Tapa kilehhek dinga, amaute in thah dingin thu a khen ding uh hi. ¹⁹ Amaute in Gentile‑te zahko ding, sat ding le khailup dingin amah pia ding uha a ni thum ni in a thokik ding hi,” a ci hi. ²⁰ Tua khit ciangin Zebedee tapate nu in ngetnop khat nei ahih manin a tapate tawh Zeisu kiangah pai in, a mai ah a khukdin uh hi. ²¹ Tua ciangin Zeisu in nupinu kiangah, “Bang deih na hi hiam?” ci in a dong hi. Tua nu in, “Na kumpigam sungah hih ka tapa nihte na taklam ah khat na veilam ah khat na tutsak ding ka deih hi,” a ci hi. ²² Ahih hangin Zeisu in, “Nong na nget uh bang hiam cih na thei kei uh hi. A sawtlo a ka dawn ding hai dawn zo ding na hi uh hiam? Ka kibaptize na ah kibaptize zo ding na hi uh hiam?” a cih ciangin amaute in, “Hi zo mah nung,” a ci uh hi. ²³ Tua ciangin amah in, “Ka dawn ding hai na dawn takpi ding uh a, ka kibaptize na ah zong na kibaptize takpi ding uh hi. Ahih hangin ka taklam le ka veilam a tut theih nading thu pen kei hong piak theih hilo in ka Pa in a sehkholhsa mite aa ding ahi hi,” a ci hi. ²⁴ A dang sawmte in tua thu a zak uh ciangin tua unau nihte tungah a lungkim kei uh hi. ²⁵ Ahi zongin Zeisu in amaute samkhawm a, “Gentile‑te sungah ukna neite in a mipite uh ukcip uh a, a miliante un a mipite tungah thuneihna zang uh hi cih na thei uh hi. ²⁶ Ahi zongin note sungah tua bang ding hilo hi. Note lakah a lian a suak nuam mite in note nasem hi tahen. ²⁷ Note lakah a masa pen a suak nuamte in note sila hi tahen. ²⁸ Mihing Tapa nangawn ama na a kisepsak dinga hong pai hilo hi. Midangte na a sepsak ding le a nuntakna pia in mi tampi a tankhia dinga hong pai ahi hi,” a ci hi. ²⁹ Jericho khua pan a paikhiat uh ciangin mihonpi in Zeisu nung a zui uh hi. ³⁰ Tua ciangin lamgei a tu mittaw nihin amaute lamah Zeisu hong pai hi cih a zak uh ciangin, “David Tapa, Topa aw, kote hong hehpih in,” ci in a kiko uh hi. ³¹ Amaute a daih nadingun mihonpi in a taiihuan uh hi. Ahih hangin amaute in, “David Tapa, Topa aw, kote hong hehpih in,” ci in nakpi in a kiko semsem uh hi. ³² Tua ciangin Zeisu a dinsa in khawla amaute sam in, “Bang kong hihsak ding ut na hi uh hiam?” a ci hi. ³³ Amaute in, “Topa aw, khua nong muhsak ding ka ut uh hi,” a ci uh hi. ³⁴ Zeisu in amaute hehpihhuai sa in a mit uh a lawnsak leh thakhat in khua mu pah uh a, ama nung a zui uh hi.

¹ Jerusalem khuapi tun kuan, Tanluan mual kianga om Bethphage khua a tun uh ciangin Zeisu in a nungzuite nih sawl a, ² “Note mai‑a khua ah va lut un. Laapi khat kikhih a om na mu pah ding uha a no zong a kiangah na om ding hi. Suut unla hong kai un. ³ Mi khatpeuh in hong paupih leh, ‘Topa in amaute zang nuam hi, hong puakkik pah ding hi,’ ci un,” a ci hi. ⁴ Hih thute khempeuh in kamsangpa gensa thute a tangtun nadinga piang ahi hi. ⁵ Amah in, “ ‘En in, laapi ta laano tungah tuangin, Na Kumpipa lungnemtak in, Nang kiangah hong pai hi,’ ci in, Zion tanu kiangah gen in,” a ci hi. ⁶ Tua ciangin nungzuite gel zong pai uh a, Zeisu thupiak bangin ahih uh hi. ⁷ Laapi le laano hong kai uha tuate tungah a puante uh phahin Zeisu a tuangsak uh hi. ⁸ Mihon tampitak in a puante uh lampi ah phah uh hi. Pawlkhatte in singhiangte satin phah uh hi. ⁹ A nung le a mai‑a a pai mihonpite kiko uh a, “David Tapa tungah Hosannaɠ! Topa min tawh a hong paipa in, Thupha ngah tahen! A sangbel munah Hosanna!” ci in a kiko uh hi. ¹⁰ Jerusalem khuapi sung a lut ciangin khuapi sunga om mi khempeuh ciak ngeingai uh a, “Hihpa kua ahi hiam?” ci in khat le khat a kidong uh hi. ¹¹ Mihonpi in, “Galilee gam Nazareth khua mi kamsangpa Zeisu ahi hi,” a ci uh hi. ¹² Tua khit ciangin Pasian biakinnpi huang sungah Zeisu lut a, biakinnpi huang sungah vanlei, vanzuak a om mi khempeuh a hawlkhia hi. Sumkhekteɠ sabuaite le vakhu zuakte tutphahte zong a lumletsak hi. ¹³ Tua khit ciangin amaute kiangah, “ ‘Ka inn in thungetna inn kici ding hi,’ ahih hangin note in ‘gutate phualpi’ na suaksak uh hi ci in Lai Siangtho sungah kigelh hi,” a ci hi. ¹⁴ Biakinnpi huang sunga a om laitak in ama kiangah mittawte le khebaite hong pai uh a, amah in amaute a damsak hi. ¹⁵ Siampi liante le thukhamhilh siate in ama bawl nalamdangte mu in, “David Tapa tungah Hosannaɠ!” ci in biakinnpi huang sunga a om naupangnote kikona aw a zak uh ciangin a heh mahmah uh hi. ¹⁶ Tua ciangin ama kiangah, “Hih naupangte kikona aw na za hiam?” a ci uh hi. Zeisu in amaute kiangah, “Ka za hi, ‘Naupangnote le nawine naungekte kam panin phatna kicing na gingkhiasak hi,’ a cihna thu sim ngeilo na hi uh hiam?” a ci hi. ¹⁷ Tua khit ciangin amaute nusia in khuapi sung pan Bethany khualam zuanin paikhia a, tua khua ah a giak hi. ¹⁸ Zingsang tungin khuapi lam zuanin Zeisu hong paikik a, lamkal ah a gilkial hi. ¹⁹ Lamgei ah theikung khat mu in a phungah a va pai leh a teh longal bangmah a mu kei hi. Tua ciangin Zeisu in, “Tu a kipan gah ngei nawn peuhmah kei in,” a cih ciangin tua theikung thakhat in a keugaw hi. ²⁰ Nungzuite in a muh uh ciangin, lamdangsa mahmah uh a, “Banghang in hih theikung keugaw pah zawzen ahi hiam?” a ci uh hi. ²¹ Zeisu in amaute kiangah, “Aman takpi kong cih in ah, lunghiang loin um taktak le uh teh hih theikung tunga thupiang bang bek hilo in hih mualpi kiangah zong, ‘Kihemkhia inla tuipi sung kidenna in,’ ci le uh cin tua bangin a piang ding hi. ²² Upna tawh na nget uh leh na nget peuhpeuh uh a vekpi in na ngah ding uh hi,” a ci hi. ²³ Biakinnpi huang sungah Zeisu lutin thu a hilh laitak in siampi liante le Judah mite makaite ama kiangah va pai uh a, “Hih bang nate na sep theih nadingin kua kiang panin thu ngah na hi hiam? Hih thuneihna kua in nang hong pia ahi hiam?” ci in a dong uh hi. ²⁴ Zeisu in, “Ken zong note thukhat kong dong ding hi. Nong dawn theih uh leh hih nate kua thuneihna tawh hih ka hi hiam cih kong gen pan ding hi. ²⁵ John tuiphumna thu vantung pana thuneihna tawh ahi hiam, mihing pana thuneihna tawh ahi hiam?” a ci hi. Tua ciangin amaute kikum uh a, “ ‘Vantung pana thuneihna tawh hi,’ ci lehang, ‘Tua ahih leh banghang in amah um lo na hi uh hiam?’ hong ci ding hi. ²⁶ ‘Mihing thuneihna tawh hi,’ ci lehang lah mi khempeuh in John pen kamsangpa a a san khitsa uh ahih manin mihonte kihtakhuai hi,” a kici uh hi. ²⁷ Tua ahih manin, “Ka thei kei uh hi,” ci in a dawng uh hi. Tua ciangin Zeisu in, “Ken zong hih nate kua thuneihna tawh sem ka hi hiam cih kong gen kei ding hi. ²⁸ “Ahi zongin hih kong gen ding thu bang na ci ngaihsut uh hiam? Mi khatin tapa nih a nei hi. A ta uzawpa kiangah va pai a, ‘Ka ta aw, tuni in ka lenggah lo ah va kuan in,’ a ci hi. ²⁹ “Tua a tapa in, ‘Ka kuan nuam kei hi,’ a cih hangin a nung ciangin kisikkik in a kuan hi. ³⁰ “Tua khit ciangin a nauzawpa kiangah pai a, tuamah bangin a gen hi. A tapa in, ‘Pa aw, ka kuan ding hi,’ ci in dawng napi a kuan kei hi. ³¹ “Tua ta nihte kua zaw in a pa deihna mang ahi hiam?” a cih ciangin amaute in, “A upapen in a mang zaw hi,” a ci uh hi. Zeisu in amaute kiangah, “Aman takpi kong cih in ah, siahdongte le numei kizuakte in Pasian kumpigam sungah note ma in a lut uh hi. ³² Banghang hiam cihleh John hong pai in thuman lampi hong lah hangin amah na um kei uh hi. Ahi zongin siahdongte le numei kizuakte in amah a um uh hi. Note in hih thu na muh khit nangawn un kisik in amah na um tuan kei uh hi. ³³ “A dang thugentehna khat na ngai un. Leitang neipa khatin lenggah lo khat bawl in a kim ah phung ciangin um a, lenggah cilna phual khat bawl in buuktau khat zong a dawh hi. Tua khit ciangin lenggah lo kho dingin mi cial a, khual gamlapi khatah a zinkhia hi. ³⁴ Tu in lenggah lak hun hong naita a, lenggahte a kaikhawm dingin lokhawh thalawhte kiangah a nasemte a sawl hi. ³⁵ “Lokhawh thalawhte in a nasemte man uh a, khat vuagawp in khat that uh a, a dang khat pen suang tawh a denglum uh hi. ³⁶ Tua ciangin loneipa in a sawl masakte sangin a tam zaw a nasemte pawlkhat sawlkik leuleu a, tuate zong a masate a bawl mah bangun a bawl veve uh hi. ³⁷ A tawpna ah loneipa in, ‘Ka tapa zahtak kha ding uh hi,’ ci in a tapa a paisak hi. ³⁸ “Ahih hangin lokhawh thalawhte in a tapa a muh uh ciangin kikum uh a, ‘Hihpa innluah ding pa ahi hi. Pai dih un, amah thatin a luah ding teng sut ni,’ a kici uh hi. ³⁹ Tua ciangin amah man uh a, lenggah lo pua lamah kaikhia in a that uh hi. ⁴⁰ “Tua hi a, lenggah loneipa a hong pai ciangin tua lokhawh thalawhte bang a ci bawl ding hiam?” a ci hi. ⁴¹ Amaute in, “Amah in tua migilote nasiatak in a susia ding hi. Lenggah lak hun ciangin loneipa tungah lenggah a ngah zah ding a pia ding a dang lokhawh thalawhte a khosak ding hi,” a ci uh hi. ⁴² Zeisu in amaute kiangah, “ ‘Innlamte in a nilkhiat suang, Innkiusuang bulpi a suak hi. Hih in Topa sep hi a, Eite muhna ah lamdang hi,’ ci in Lai Siangtho sunga a kigelh thu sim ngeilo na hi uh hiam? ⁴³ “Tua ahih manin note kianga kong gen in ah, note tung panin Pasian kumpigam kilakhia dinga, a gahsak ding minamdangte khat tungah kipia ding hi. ⁴⁴ Hih suang tungah mi khatpeuh a kiat leh kitamkham dinga, hih suangin mi khatpeuh a den leh a zanciim ding hi,” a ci hi. ⁴⁵ Tu in siampi liante le Pharisee pawlte in ama thugentehnate a zak uh ciangin amaute a cihna ahihlam a thei uh hi. ⁴⁶ Zeisu mat a sawm uh hangin mihonpi in kamsangpa hi ci in um khin uh ahih manin mihonpi a kihta zel uh hi.

¹ Zeisu in amaute dawngin thugentehna tawh thu a gen inah, ² “Vantung kumpigam in a tapa aa ding mopawi a bawl kumpipa tawh kibang hi. ³ Amah in mopawi sim dinga a khohsate sam dingin a nasemte a sawl ciangin tua a khohsate a pai nuam kei uh hi. ⁴ “Amah in nasem dangte sawl leuleu a, ‘Ka khohsate kiangah hih bangin va gen un. “En un, nitak an min khin ta hi. Bawngtalte le ganthaute kigo zo a, na khempeuh a baihsa in om khin hi. Mopawi ah hong paita un,” va ci un,’ a ci hi. ⁵ “Ahih hangin amaute in thusim loin, amau utna ciat ah a pai uh hi. Khat in lo kuansan a, a dang khatin sum bawl dingin a zinkhiatsan hi. ⁶ A dangte in a nasemte manin bawlsia in a that uh hi. ⁷ Kumpipa in tua thu a zak ciangin heh mahmah a, a galkapte kuansak in tua mi thatte a thahsak khit ciangin a khua uh zong a haltumsak hi. ⁸ “Tua khit ciangin a nasemte kiangah, ‘Mopawi ankuang kilui khinzo hi. Ahih hangin ka khohsate tua pawi an ne dingin a kilawm kei uh hi. ⁹ Tua ahih ciangin lam lianpite ah va pai kawikawi unla mi na muh peuhpeuh uh mopawi ah hong sam un,’ a ci hi. ¹⁰ Tua ciangin nasemte zong lam lianpite ah va pai in mi a muh khempeuh uh misia, mipha a kaihkhop uh ciangin mopawi inn sungah mi a dim hi. ¹¹ “Tua pawisimte en dingin kumpipa a lut ciangin mopuan a silhlo mi khat a mu hi. ¹² Tua ciangin amah in, ‘Lawm aw, mopuan silh lopi in banghang in hih mun hong tung thei na hi hiam?’ a cih ciangin tua pa in a dawng thei kei hi. ¹³ “Tua ciangin kumpipa in a nasemte kiangah, ‘Hihpa a khut le a khe hen unla kaikhia in pualam khuamial lakah lawnkhia un. Tualai ah kahna le hagawina a om ding hi.’ ¹⁴ “A kisam mi a tam hangin a kiteel mi a tawm hi,” a ci hi. ¹⁵ Tua khit ciangin Pharisee pawlte paikhia uh a, ama kampau mah tawh Zeisu a awksak theih nadingun a kikum uh hi. ¹⁶ Tua khit ciangin amau nungzuite le Herod pawlte Zeisu kiangah a sawl uh hi. Amaute in, “Sia aw, nang mi thuman khat na hi hi. Maitang zahtak tuam neilo na hih manin angvan tuam zong na nei kei‑a a maantak in Pasian thu na hilh hi cih kong thei uh hi. ¹⁷ Tua ahih ciangin Caesar kumpipa tungah mimal siah piakhuai hiam piakhuai lo hiam na ngaihsutna hong gen in,” a ci uh hi. ¹⁸ Ahih hangin, Zeisu in amaute gitloh gelna thei ahih manin, “A kineihkhem mite aw, banghang in hong ze‑et na hi uh hiam? ¹⁹ Mimal siah dinga na piak uh dangkatang khat hong lak un,” a cih ciangin denariusɠ tang khat a pia uh hi. ²⁰ Amah in, “Hih in kua lim le kua min ahi hiam?” a ci hi. ²¹ Amaute in, “Caesar kumpipa min le lim ahi hi,” a ci uh hi. Tua ciangin Zeisu in, “Caesar kumpipa neihsate Caesar kumpipa pia unla Pasian neihsate Pasian pia un,” a ci hi. ²² Amaute in hih thu a zak uh ciangin lamdangsa mahmah uha amah nusia in a paikhia uh hi. ²³ Tua ni mahin thawhkikna om lo hi a ci Sadducee pawlte hong pai in thu a dong uh hi. ²⁴ Amaute in, “Sia aw, mi khatin ta nei loin a sih leh a naupa in a zi luah henla, a upa aa dingin suan leh khak tawisak hen ci in Moses in thu hong pia hi. ²⁵ Tu in ko kiangah unau pasal sagih a om hi. A upapen in zi nei a, ta nei loin a si hi. Tua ciangin a naupa in a zi a luah hi. ²⁶ A nihna le a thumna pa a kipan a sagihna dongin tua bangin a piang hi. ²⁷ A tawpna ah tua numei zong a si hi. ²⁸ Tua ahih teh thawhkik ni ciangin tua numei in unau pasal sagihte sung panin kua pen zi in a om ding hiam? Banghang hiam cihleh a vekpi un tua numei a teenpih khin uh hi,” a ci uh hi. ²⁹ Zeisu in amaute kiangah, “Lai Siangtho ahi a, Pasian vangliatna ahi zongin thei lo na hih manun na sangkhial uh hi. ³⁰ Thawhkik ni ciangin kipi kiteenna om nawnlo dinga, vana om Pasian vantungmite tawh a kibang ding uh hi. ³¹ Misite thawhkikna thu Pasian hong genna sim ngeilo na hi uh hiam? ³² Amah in, ‘Keimah in Abraham Pasian, Isaac Pasian, Jacob Pasian ka hi hi,’ a ci hi. Pasian in misite Pasian hilo in, a nungta mite Pasian ahi hi,” ci in a dawng hi. ³³ Mihonpi in hih thu a zak uh ciangin ama thuhilhna lamdang a sa mahmah uh hi. ³⁴ Zeisu in Sadducee pawlte cih nading thei loin a koih lam Pharisee pawlte in a zak uh ciangin a kikhawm uh hi. ³⁵ Amaute lak panin thukhamhilh sia khatin, Zeisu a ze‑etna in thu dong a, ³⁶ “Sia aw, thukham sung panin a lianpen thupiak bang ahi hiam?” a ci hi. ³⁷ Zeisu in, “ ‘Na lungsim khempeuh, na nuntakna khempeuh, le na ngaihsutna khempeuh tawh Topa na Pasian it in.’ ³⁸ Hih in a masa le a lianpen thupiak ahi hi. ³⁹ A nihna in a masa mah tawh a kibang hi a, ‘Nang le nang na ki‑it bangin na vengpa na it in,’ cih thu ahi hi. ⁴⁰ “Thukham le Kamsangte laibu‑te khempeuh in hih thupiak nihte pana a hong mengkhia ahi hi,” a ci hi. ⁴¹ Pharisee‑te a kikaihkhop laitak un Zeisu in, ⁴² “Khazih bang na cih ngaihsut uh hiam? Amah kua tapa ahi hiam?” ci in a dong hi. Amaute in, “David Tapa ahi hi,” a ci uh hi. ⁴³ Zeisu in, “Tua ahih leh banghang in David in Kha theihsakna tawh amah Topa ci thei ahi hiam? ⁴⁴ David in a genna ah, ‘Topa in ka Topa kiangah, “Na galte na khengakna ka suahsak khit mateng in, Ka taklam ah na tu in,” ci hi,’ a ci hi. ⁴⁵ “David in amah Topa ci ahih leh banghang in ama tapa hi thei zel ding ahi hiam?” a ci hi. ⁴⁶ Kuamah in kam khat beek dawng theilo uh ahih manin tua ni a kipan kuamah in thu a dong ngam nawn kei uh hi.

¹ Tua khit ciangin Zeisu in mihonpite le a nungzuite thu a hilh hi. ² Amah in, “Thukhamhilh siate le Pharisee pawlte in Moses tutna a luah uh hi. ³ Tua ahih manin zuih dinga hong gen khempeuh uh zui unla sem un. Ahi zongin amaute in a gen bangun gamta lo uh ahih manin amaute gamtat bangin gamta kei un. ⁴ Banghang hiam cihleh amaute in midangte liangko tungah a puak hak theithei ding vangik suan napi uh amaute in tuate a khutme dawn nangawn uh tawh a lawng nuam kei uh hi. ⁵ “A sep a bawl khempeuh uh mite muh theihtheih dingin ahih uh hi. Thunget cianga a zat uh talsuante le banbulhteɠ a gol theithei zangin a puanmongtepte uh a sau theithei in a bawl uh hi. ⁶ Pawi annekna ah mun hoih penpen ngah nuam uha kikhopna innte ah tutna thupi tata a deih uh hi. ⁷ Sumbuuk ah mite in, ‘Rabbi aw, Rabbi aw,’ ci in a hopih ding uh a ut uh hi. ⁸ “Khazih khat bek note Siapa hi a, note khempeuh unau khat na hih manun kuamah ‘Rabbi,’ kicisak kei un. ⁹ Vantung a om Pa khat bek nei na hih manun leitung ah kuamah pa ci kei un. ¹⁰ Khazih khat bek na Siapa uh ahih manin kuamah sia kicisak kei un. ¹¹ Note laka a lianpenpa in note nasem ahi ding hi. ¹² Amah le amah a kilamsang mi peuhmah in niamkhiatna thuak dinga a kiniamkhiat mi peuhmah a kilamsang ding hi. ¹³ “A kineih thukhamhilh siate le Pharisee pawlte aw, gimna na thuak ding uh hi! Banghang hiam cihleh vantung kumpigam kong na khak uh a, note lah lut loin a lut nuamte zong na lutsak kei uh hi. ¹⁴ A kineih thukhamhilh siate le Pharisee pawlte aw, gimna na thuak ding uh hi! Meigongte neihsa teng na nektumsak uh a, kineih tawmin thu sau pipi ngen na hih manun a nasia zaw thukhenna na thuak ding uh hi. ¹⁵ “A kineih thukhamhilh siate le Pharisee pawlte aw, gimna na thuak ding uh hi! Banghang hiam cihleh mi khat na ngah nadingun leitung tuitung tengah na zin kawikawi uh a, na ngah khit uh ciangin note sanga a zah nihin a sia zaw hellɠ tapa na suaksak uh hi. ¹⁶ “Lamhilh mittawte aw, gimna na thuak ding uh hi! ‘Mi khatpeuh biakinnpi tawh a kiciam leh phamawh loin a sunga kham tawh a kiciam leh a kiciamna in a khih hi,’ na ci uh hi. ¹⁷ Mihai le mittawte aw! Tua kham le tua kham a siangthosak biakinnpi, koi thupi zaw ahi hiam? ¹⁸ ‘Mi khatpeuh biaknatau tawh a kiciam leh phamawh loin tua tau tunga Pasian a kipia nate tawh a kiciam leh a kiciamna in a khih hi,’ na ci uh hi. ¹⁹ Mihai le 23:15 mi khat na ngah: Upna hanga Judah mi a kisuaksakte genna ahi hi. mittawte aw! Pasian a kipia na le tua nate a siangthosak biaknatau koi thupi zaw ahi hiam? ²⁰ Tua ahih ciangin biaknatau tawh a kiciam mi in, biaknatau le a tunga om na khempeuh tawh a kiciam ahi hi. ²¹ Biakinnpi tawh a kiciam mi in biakinnpi le a sunga a teengpa tawh a kiciam ahi hi. ²² Vantung tawh a kiciam mi in Pasian tokhom le tua tunga a tupa tawh a kiciam ahi hi. ²³ “A kineih thukhamhilh siate le Pharisee pawlte aw, gimna na thuak ding uh hi! Banghang hiam cihleh lengmasel, samong sapa teh le cummin‑te sawm a khat na piak uh hangin thukham sunga a thupi zaw ahi maantak a thukhenna, hehpihna le upnate na thudon kei uh hi. A dangte thudon lo tuanlo in hih nate na hih veve ding uh ahi hi. ²⁴ Lamhilh mittawte aw, thosi thovaite na valh khakloh nadingun tui na khaih uh hangin kala‑oh na nawmvalh zel uh hi! ²⁵ A kineih thukhamhilh siate le Pharisee pawlte aw, gimna na thuak ding uh hi! Banghang hiam cihleh hai le kuangte a pualam na silsiang uh a, ahi zongin a sunglam huaihamna le uangtat nopna lungsim tawh a kidim hi. ²⁶ Mittaw Pharisee pawlte aw! Hai le kuangte a pualam a sian theih nadingin a sunglam silsiang masa un. ²⁷ “A kineih thukhamhilh siate le Pharisee pawlte aw, gimna na thuak ding uh hi! Banghang hiam cihleh a pualam leikang a kizut han tawh na kibang uh hi. Tua hante a pualam a etlawm hangin a sungah misi guh le a kihhuai na khempeuh a dim hi. ²⁸ Tuamah bangin note zong na puatham uh midik tawh na kibat uh hangin note sungah kineihna le siatna a dimtak in a om hi. ²⁹ “A kineih thukhamhilh siate le Pharisee pawlte aw, gimna na thuak ding uh hi! Banghang hiam cihleh kamsangte hante na bawl uh a, midikte hante na zem uh hi. ³⁰ Tua ciangin, ‘I pu i pate khanlai in a om kha hi lehang, kamsangte a thatte lakah i kihel kei ding hi,’ na ci tazen uh hi. ³¹ Tua ahih ciangin kamsangte a that mite tu le tate na hihlam uh no le no in teci na pang uh hi. ³² Tua hi in, na pu na pate uh mawhna zah mah no zong mawhvet un. ³³ “A gupha gul suante le gul hangsante aw! Hellɠ thukhenna tawh bangci kipelh theih ding na hi uh hiam? ³⁴ Note kiangah kamsangte, mipilte le thukhamhilh siate kong sawl hi. Tuate pawlkhat thatin pawlkhat na khailum ding uh hi. Pawlkhatte na kikhopna innte uhah na sat ding uh a, khua khat pan khua khatah na bawlsia ding uh hi. ³⁵ Tua banga na bawl manun midikpa Abel sisan a kipan biakinnpi le biaknatau kikal a na thah uh Berechiah tapa Zechariah sisan dongin leitung a na luansak uh midikte sisan khempeuh note tungah hong kisik ding hi. ³⁶ Aman takpi kong cih in ah, hih thu khempeuh tulai khang mite tungah a hong tung ding hi. ³⁷ “Kamsangte that a, no kianga hong kisawl mite a denglum den Jerusalem khuapi, Jerusalem khuapi aw, aakpi in a note a khanuai ah a huai bangin na tate ka huainop hangin na ut kei hi. ³⁸ En un, na innte uh kilawi dinga, gamkhing a suak ding hi. ³⁹ Aman takpi kong cih in ah, ‘Topa min tawh hong paipa in thupha ngah tahen,’ na cih mateng in tu a kipan in kei nong mu nawn kei ding hi,” a ci hi.

¹ Tua ciangin biakinnpi huang sung pan Zeisu a paikhiat laitak biakinnpi innte a lak dingin a nungzuite a hong pai uh hi. ² Tua ciangin Zeisu in amaute kiangah, “Hih na khempeuh mu hilo na hi uh hiam? Aman takpi kong cih in ah, suang khat tungah suang khat nangawn kiciang nawnlo in kiphelkhia ding hi,” a ci hi. ³ Tanluan mualtung ah Zeisu a tut laitak in, a nungzuite kia hong pai uh a, “Hih thute cik ciangin hong piang dinga, nong pai nading le hun bei nading theihsakna bang lim tawh hong kilang ding ahi hiam hong gen in,” a ci uh hi. ⁴ Tua ciangin Zeisu in, “Kuamah in a hong khem loh nadingin na kidawm un. ⁵ Keima minin mi tampi hong pai dinga, ‘Keimah in Khazih ka hi hi,’ ci in mi tampi a khem ding uh hi. ⁶ Gal kidona thu le gal hong tung ding hi cih thuthangte na za ding uh hi. Tua ciangin patau kei un. Banghang hiam cihleh hih thu khempeuh a pian loh a phamawh hi a, ahi zongin beina a tung nai kei ding hi. ⁷ Minam khat le minam khat, kumpigam khat le kumpigam khat hong kido ding uh hi. Kialpi le pulnatnate hong tung ding hi. Mun tuamtuam ah zin hong ling ding hi. ⁸ Hihte khempeuh in nausuah kuana natna tawh a kibang haksatna kipatna ahi hi. ⁹ “Tua ciangin bawlsiatna thuak dingin note hong ap ding uh a, hong that ding uh hi. Keima min hangin minam khempeuh in note hong mudah ding uh hi. ¹⁰ Tua ciangin mi tampi lungkia ding uh a, khat le khat kilehhek in a kimudah ding uh hi. ¹¹ Kamsangzuau tampi hong piang dinga, mi tampi a khem ding uh hi. ¹² Siatna hong khang dinga, mi tampi in ki‑itna a nei nawn kei ding uh hi. ¹³ Ahi zongin a tawp donga a kipte in hotkhiatna a ngah ding uh hi. ¹⁴ Minam khempeuh tungah teci ahi dingin Pasian kumpigam lungdamna thu leitung khempeuh ah kitangko dinga, tua khit ciangin beina a tung ding hi. ¹⁵ “Kamsangpa Daniel in, ‘a lipkhaphuai siatna,’ thu tawh kisai gen khin hi. Tua mipa in biakinnpi a Mun Siangtho ah a din hun na muh uh ciangin (a sim mi in thei tahen), ¹⁶ Judea gam sunga om mite mualtung ah tai uh hen. ¹⁷ Innkhum zanga om mite zong na khatpeuh a la dingin inn sungah kumsuk kei uh hen. ¹⁸ Lokuante zong puan la dingin inn ah ciahkik kei uh hen. ¹⁹ Tua hun ciangin naupaaite le nawine lai naungek a nei nupite a genthei mahmah ding uh hi! ²⁰ Na tai hun uh phalbi laitak le Sabbath ni ahih khakloh nadingin thungen un. ²¹ Banghang hiam cihleh leitung piancil a kipan tudong in a piang ngei nailo tunung ciangin zong a piang ngei nawnlo ding gimna lianpi tua hun ciangin a piang ding hi. ²² Pasian in tua nite a tomsak kei leh kuamah a suakta zo kei ding hi. Ahih hangin a teelsa mite a khualna in tua nite a tomsak ding hi. ²³ Tua hun ciangin mi khatpeuh in, ‘En in, hihlai ah Khazih a om hi. Hualai ah Khazih a om hi,’ a hong cih uh hangin um kei un. ²⁴ Banghang hiam cihleh Khazih maanlote le kamsangzuaute a hong piang ding hi. Amaute in hi thei hi leh a teelsa mite nangawn a khem zawh nadingun limlamdang le nalamdang lianpite a piangsak ding uh hi. ²⁵ Theita un, a hun hong tunma in kong genkhol zo hi. ²⁶ “Amaute in, ‘En un, amah gamlak ah om hi!’ a hong cih uh hangin zui kei un. ‘En un, amah inndeite sungah om hi!’ a hong cih uh hangin um kei un. ²⁷ Banghang hiam cihleh nisuahna lam panin khua hong phia a, nitumna dong a tansuak bangin Mihing Tapa hong pai ciangin tua bangin a piang ding hi. ²⁸ Misi luang omna peuh ah musanete a kikhawm ding uh hi. ²⁹ “Tua gimna lianpi hun a bei khit phetin, Ni hong mial dinga, Kha a tang nawn kei ding hi. Van panin aksite hong kia dinga, Vantung nate kiling ding hi. ³⁰ “Tua laitak in vantung ah Mihing Tapa tawh kisai limlamdang hong kilang dinga, leitung minam khempeuh a kap ding uh hi. Mihing Tapa vantung panin vangliatna le minthanna lianpi tawh meiitung tuanga hong pai a mu ding uh hi. ³¹ Amah in a ngaih mahmah pengkul aw tawh ama vantungmite sawl dinga, amaute in lei kiuli le van mong khat pan mong khat donga om a teelsa mite a kaikhawm ding uh hi. ³² “Theikung tawh kong gentehna panin hih thu na thei un. Theikung a hiangte dawn a, a tehte hong sel ciangin khuakhal hong naita hi ci in na thei uh hi. ³³ Tuamah bangin hih thu khempeuh a hong piang na muh uh ciangin tua hun nai mahmah ta‑a kongbiang dong a hong tungta hi ci in na thei un. ³⁴ Aman takpi kong cih in ah, tulai khang mite a beima teitei in hih thu khempeuh a hong piang ding hi. ³⁵ Van le lei mangthang dinga, ahi zongin ka thute a mangthang peuhmah kei ding hi. ³⁶ “A ni le a nai ding kuamah in a thei kei hi. Vana om vantungmite in zong a thei kei uh hi. Ka Pa bekin a thei hi. ³⁷ Noah hun lai bangin Mihing Tapa hong pai ciangin zong tua bang hi ding hi. ³⁸ Tuiciin tunma a mite in Noah tembaw sungah a lut ni ciangdong, zukham ankham, kipi kiteeng in a om uh hi. ³⁹ Tuiciin tunga amaute khempeuh a tupmang dongin khuaphawk loin a om uh hi. Mihing Tapa a hong pai ciangin zong tuamah bangin a piang ding hi. ⁴⁰ Tua hun ciangin lokuan mi nih khat kila in khat kinusia ding hi. ⁴¹ An sukhawm numei nih khat kila in khat kinusia ding hi. ⁴² “Na Topa uh hong pai ding hun thei lo na hih manun kiging den un. ⁴³ Inn neipa in gutapa hong pai ding hun thei leh na pangkhol dinga, a inn luhsak lo ding hi cih thei un. ⁴⁴ Tua ahih ciangin na lamet loh laitak un Mihing Tapa hong pai ding ahih manin note zong kigingsa in om un. ⁴⁵ “Innsung vai khempeuh hawm a, annek huna innsung mite an manman in a pia dinga a topa in a koih, a muanhuai le a pil nasem kua ahi hiam? ⁴⁶ A topa hong pai ciangin nasem in a om a muh tua nasempa in thupha ngah ahi hi. ⁴⁷ Aman takpi kong cih in ah, amah in a neihsa khempeuh tua nasempa a uksak ding hi. ⁴⁸ Ahih hangin a hoihlo nasempa in a lungsim sungah, ‘Ka topa hong zekai lai ding hi,’ ci in ngaihsun henla, ⁴⁹ a naseppih a lawmte satgawp in, zukhamte tawh nekhawm dawnkhawm in na om leh, ⁵⁰ a lametloh ni le a theihloh kalin a topa hong tung vat ding hi. ⁵¹ A topa in amah tumnih suahin a kineihkhem mite tawh a thuakkhawmsak ding hi. Tualai ah kahna le hagawina a om ding hi,” a ci hi.

¹ “Tua banah, vantung kumpigam in zipipa dawn dinga a kuankhia meivak a tawi nungak siangtho sawmte tawh kibang hi. ² Tuate lakah ngate pil uh a, a dang ngate a hai uh hi. ³ A hai ngate in meivak a ken uh hangin meitui a keng kei uh hi. ⁴ A pil ngate in ahih leh meivak a ken mah bangun meitui zong thawl sungah a keng uh hi. ⁵ Ahih hangin zipipa hong tung hak ahih manin amaute khempeuh lusu in a ihmu uh hi. ⁶ “Zankim laitak in kikona aw khat hong ging a, ‘Ngai un, zipipa hong paikhia ta hi. Amah dawn dingin hong pai un,’ a ci hi. ⁷ “Tua ciangin tua nungak siangthote a vekpi un tho in a meivak ciat uh vak dingin a kipan uh hi. ⁸ A haite in a pilte kiangah, ‘Ka meitui uh bei ahih manin na meitui uh hong hawm un,’ a ci uh hi. ⁹ “A pilte in, ‘Kong hawm zo kei ding uh hi. Ko aa ding le no aa ding kicing lo ding ahih manin meitui zuakte kiangah pai in va lei un,’ a ci uh hi. ¹⁰ “Amaute meitui lei dingin a pai kal un zipipa hong tung hi. Kigingsa a om mite zipipa tawh mopawi bawlna sungah lutkhawm uha tua ciangin kong a kikhak hi. ¹¹ “Tua khit ciangin nungak siangtho dangteng hong tungkik uh a, ‘Topa aw, Topa aw, kong hong hon in,’ a ci uh hi. ¹² Ahih hangin amah in, ‘Aman takpi kong cih in ah, note kong thei kei hi,’ a ci hi. ¹³ “Tua ahih ciangin, Mihing Tapa hong pai ding a ni le a nai thei lo na hih manun kigingkhol tawntung un,” a ci hi. ¹⁴ Zeisu in, “Vantung kumpigam in a nasemte sama a neihsa teng a ap khit ciangin khual gamlapi ah a zinkhia mipa tawh kibang hi. ¹⁵ Amah in amaute siamna zui in khatpa talentɠ nga, khatpa talent nih, a dang khatpa talent khat a piak khit ciangin a zinkhia hi. ¹⁶ Talentɠ nga a sangpa in a metbawl ciangin a met talent nga a ngah hi. ¹⁷ Tuamah bangin talentɠ nih a sangpa in zong a met talent nih a ngah hi. ¹⁸ Ahih hangin talentɠ khat a sangpa in leito in a topa sum a phum hi. ¹⁹ “Hun sawtpi khit ciangin tua nasemte topa hong ciah a, a sum sazian a sit hi. ²⁰ Talentɠ nga a sangpa in a dang talent nga hong tawi a, ‘Topa aw, sum talent nga nong ap hi. En in, a met talent nga ka ngah hi,’ a ci hi. ²¹ “A topa in, ‘Hoih mahmah hi. A muanhuai nasem hoihpa aw, a tawmno khat tungah citak na hih manin na tampi kong uksak ding hi. Na topa tawh hong lungdamkhawm in,’ a ci hi. ²² “Talentɠ nih a sangpa zong hong pai a, ‘Topa aw, sum talent nih nong ap hi. En in, a met talent nih ka ngah hi,’ a ci hi. ²³ “A topa in, ‘Hoih mahmah hi. A muanhuai nasem hoihpa aw, a tawmno khat tungah citak na hih manin na tampi kong uksak ding hi. Na topa tawh hong lungdamkhawm in,’ a ci hi. ²⁴ “Tua khit ciangin talentɠ khat a sangpa hong pai a, ‘Topa aw, khaici na tuh lohna munah an na la a, khaici na theh lohna munah an a kaikhawm, migenhak na hih lam kong thei hi. ²⁵ Tua ahih manin kong kihta a, lei sungah na sum ka phum hi. En in, na sum hihlai ah a om hi,’ a ci hi. ²⁶ “A topa in, ‘A gilo le a thadah nasempa aw, khaici ka tuh lohna munah an la in, ka theh lohna munah an ka kaihkhop lam hong thei na hih leh, ²⁷ summet bawlte kiangah ka sum na ap beek leteh kong tun ciangin ka sum le a met ka ngahkhawm thei ding hi. ²⁸ ‘Tua ahih ciangin ama tunga om talentɠ khat pen la unla talent sawm a neipa pia un. ²⁹ Banghang hiam cihleh a neite kipiak beh dinga, kicingtak in a nei ding uh hi. A neilote ahih leh a neih sunsun nangawn uh a kilakkhiatsak ding hi. ³⁰ Tua ahih manin kimanna a neilo tua nasempa a pualam khuamial sungah paikhia un. Tualai ah kahna le hagawina om ding hi,’ a ci hi. ³¹ “Mihing Tapa in a minthanna le ama vantungmi siangthote khempeuh tawh hong pai ciangin ama minthanna kumpi tokhom tungah a hong tu ding hi. ³² Tua ciangin ama mai ah minam khempeuh kikhawmsak dinga, tuucingpa in tuu le kel a khen bangin amaute a khen ding hi. ³³ Tuute a taklam ah kelte a veilam ah a koih ding hi. ³⁴ “Tua khit ciangin Kumpipa in a taklam a omte kiangah, ‘Ka Pa thupha piakte aw, hong pai unla leitung piancil a kipan note aa dingin a kibawlkholsa kumpigam hong luah un. ³⁵ Banghang hiam cihleh ka gilkial lai in an nong pia uh hi. Ka dangtak lai in ka dawn ding tui nong pia uh a, khualzin mi ka hihlai in zin nong do uh hi. ³⁶ Puan neilo a ka omlai in puansilh nong pia uh hi. Ka cinat lai in nong veh uha thong ka kiat lai in nong hawh uh hi,’ a ci ding hi. ³⁷ “Tua ciangin midikte in, ‘Topa aw, na gilkial lam cik in hong mu a, an hong pia ka hi uh hiam? Na dangtak lam cik in hong mu a, na dawn ding tui hong pia ka hi uh hiam? ³⁸ Khualzin mi na hih lam cik in hong mu a, zin hong do ka hi uh hiam? Puan na neih loh lam cik in hong mu a, puansilh hong pia ka hi uh hiam? ³⁹ Na cinat, na thongkiat cik in hong mu a, hong veh ka hi uh hiam?’ ci in a dawng ding uh hi. ⁴⁰ “Tua ciangin Kumpipa in, ‘Aman takpi kong cih in ah, hih ka sanggamte a neupen khat tunga na bawl peuhmah uh kei tunga hong bawl na hi uh hi,’ ci in a dawng ding hi. ⁴¹ “Tua khit ciangin a veilam a omte kiangah, ‘Samsiatna a ngah mite aw, ka kiang panin paikhia un. Dawimangpa le a pawlte aa dingin a kibawlkholsa, a kuang tawntung meilipi sungah pai un. ⁴² Banghang hiam cihleh ka gilkial lai in an nong pia kei uha ka dangtak lai in dawn ding tui nong pia kei uh hi. ⁴³ Khualzin mi ka hihlai in zin nong do kei uha, puan neilo a ka omlai in puansilh nong pia kei uh hi. Ka cinat lai le thong ka kiat lai in zong nong veh kei uh hi,’ a ci ding hi. ⁴⁴ “Tua ciangin amaute in, ‘Topa aw, na gilkial lai, na dangtak lai, khualzin mi na hihlai, puan neilo a na omlai, na cinat lai le na thongkiat laitak cik in hong mu a, hong don kha lo ka hi uh hiam?’ a ci ding uh hi. ⁴⁵ “Tua ciangin Kumpipa in, ‘Aman takpi kong cih in ah, hih mite a neupen khat tungah na bawlloh khempeuh uh, kei tungah zong a hong bawl lo na hi uh hi,’ ci in a dawng ding hi. ⁴⁶ “Tua ciangin a tawntung daantatna a thuak dingin amaute paikhia ding uha midikte ahih leh nuntak tawntungna munah a pai ding uh hi,” a ci hi.

¹ Zeisu in hih thute khempeuh a gen khit ciangin, a nungzuite kiangah, ² “Ni nih khit ciangin Paisan Pawi hong tung ding hi cih na thei uh hi. Tua ni ciangin khailup dingin Mihing Tapa a kipia ding hi,” a ci hi. ³ Tua ciangin siampi liante, thukhamhilh siate le Judah mite makaite, Siampi Ukpa Caiaphas inntual ah a kikhawm uh hi. ⁴ Amaute in thukawi, thuzuau tawh Zeisu manin thah ding a sawm uh hi. ⁵ Ahi zongin, “Mihonpi hong lungso kha ding uh ahih manin pawi hun sungin hih kei ni,” a kici uh hi. ⁶ Tu in, Bethany khua‑a teeng Simon miphakpa a kici pa inn ah Zeisu an ne in a tut laitak, ⁷ numei khatin a manpha mahmah sathau namtui suangkang thawl khat tawi in hong pai a, Zeisu lutung ah a buak hi. ⁸ Ahih hangin a nungzuite in a muh uh ciangin lungkim lo uh a, “Banghang in hih sathau namtui tuaci thangbawl ahi hiam? ⁹ Sum tampi tawh zuak in mizawngte kipia zaw leh,” a ci uh hi. ¹⁰ Ahih hangin Zeisu in tua thu a theih ciangin amaute kiangah, “Numeinu bang nopmawh laizang na hi uh hiam? Amah in kei tungah na hoih khat hong bawl khin hi. ¹¹ Mizawngte note tawh omden uh a, kei ka hih leh note tawh ka omkhawm den kei ding hi. ¹² Amah in ka pumpi hih sathau namtui hong buah pen a kivui ding ka pumpi hong puahkhol ahi hi. ¹³ Aman takpi kong cih in ah, hih lungdamna thu a kitangkona leitung mun khempeuh ah hih numeinu a kiphawk nadingin kei tungah a hong bawlna zong a kigen ding hi,” a ci hi. ¹⁴ Tua khit ciangin sawltak sawm le nihte lakah Judas Iscariot kici pa siampi liante kiangah va pai a, ¹⁵ “Note khutah amah hong pia hi leng kei bang hong pia ding na hi uh hiam?” a ci hi. Amaute in nguntang 30 piak dingin a kithukim uh hi. ¹⁶ Tua huna kipan in Judas in Zeisu a lehhek nading hun hoih a zong hi. ¹⁷ Silngo Sawhloh Anlum Pawi a kipat ni in nungzuite Zeisu kiangah hong pai uh a, “Paisan Pawi an na nek nading koilai ah hong bawlkholhsak le ung na ut hiam?” a ci uh hi. ¹⁸ Amah in, “Khua sungah va pai unla, kong gensa mipa kiangah, ‘Siapa in, “Ka hun hong naita ahih manin ka nungzuite tawh na inn ah Paisan Pawi ka bawl ding hi,” ci hi,’ va ci un,” a ci hi. ¹⁹ Nungzuite in Zeisu cih bangin hih uha Paisan Pawi an a baihsa in a koih uh hi. ²⁰ Nitak hong tun ciangin sawm le nihte tawh Zeisu a tukhawm hi. ²¹ Amaute in an a nek laitak un amah in, “Aman takpi kong cih in ah, note lakah khatin kei nong lehhek ding uh hi,” a ci hi. ²² Amaute dah mahmah uh a, ama kiangah, “Topa aw, kei ka hi hiam?” ci in a dong ciat uh hi. ²³ Zeisu in, “Ankuang ka sawkkhoppih pa in kei a hong lehhek ding hi. ²⁴ Lai Siangtho sungah ama thu a kigelhsa bangin Mihing Tapa a pai ding mah ahi hi. Ahi zongin Mihing Tapa a lehhekpa in gimna a thuak ding hi! Tua pa mihing in a piangkhia lo hivet leh ama aa dingin hoih zaw ding hi,” a ci hi. ²⁵ Amah a lehhekpa Judas in, “Rabbi aw, kei ka hi hiam?” a cih ciangin amah in, “Na cih bangin na hi hi,” a ci hi. ²⁶ Amaute in an a nek laitak un, Zeisu in anlum la a, lungdam a koh khit ciangin balkham in, “La unla, ne un. Hih in ka pumpi ahi hi,” ci in nungzuite a pia hi. ²⁷ Hai zong la a, lungdam a koh khit ciangin, “Na vekpi un dawn un. ²⁸ Hih in mi tampi mawhna a mai nadinga a luangkhia, kiciamna thak ka sisan ahi hi. ²⁹ Note kong gen in ah ka Pa kumpigam sungah note tawh lenggahtui a thak ka dawn ni mateng in tu a kipan ka dawn nawn kei ding hi,” ci in a pia hi. ³⁰ Amaute in la khat a sak khit uh ciangin Tanluan mual zuanin a paikhia uh hi. ³¹ Tua khit ciangin Zeisu in amaute kiangah, “Tu zan ciangin keima hangin na vekpi un na puk ding uh hi. Banghang hiam cihleh Lai Siangtho sungah, ‘Tuucingpa ka satlum dinga, Tuuhonte a kithehthang ding uh hi,’ ci in a kigelh hi. ³² “Ahih hangin ka thawhkik khit ciangin Galilee gamah note ma in ka na paikhol ding hi,” a ci hi. ³³ Peter in, “Nangma hangin mi khempeuh a puk zongin kei ka puk ngei kei ding hi,” a ci hi. ³⁴ Tua ciangin Zeisu in, “Aman takpi kong cih in ah, tuzan aak a khuanma in thumvei nong nial ding hi,” a ci hi. ³⁵ Peter in, “Nang tawh sihkhawm nading ahi zongin kong nial peuhmah kei ding hi,” a ci hi. Nungzui khempeuh in zong tua bangin a ci ciat uh hi. ³⁶ Gethsemane kici munkhat ah Zeisu a tun ciangin a nungzuite kiangah, “Hua pam lamah thu ka va nget sungin hihlai ah na tu un,” a ci hi. ³⁷ Amah in Peter le Zebedee tapa nihte tonpih a, nakpitak a dahna le lunggim a hong kipan hi. ³⁸ Tua khit ciangin amaute kiangah, “A si zo ding zahin ka lunggim lua mahmah hi. Hihlai ah om unla kei hong ngak un,” a ci hi. ³⁹ Amah a gamla zawdeuh ah pai in boksuk a, “Ka Pa aw, hih hai tawh ka kipelh theih ding leh hong kipelhsak in. Ahi zongin, kei deihna bang hilo in, nang deihna bang hizaw tahen,” ci in thu a ngen hi. ⁴⁰ Nungzuite kiangah a va pai ciangin amaute ihmu a om a mu hi. Amah in Peter kiangah, “Nai khat sung nangawn hong ngak zolo na hi uh hiam? ⁴¹ Ze‑etna sungah na lut khakloh nadingun thungen unla kiging un. Lungsim a ut mahmah hangin pumpi a thanem hi,” a ci hi. ⁴² Tua ciangin a nihveina thungen dingin va paikhiakik a, “Pa aw, hih hai kei tawh kipelh theilo a, ka dawn loh a phamawh ahih leh nangma deihna bang hi tahen,” a ci hi. ⁴³ Amah a hong paikik ciangin nungzuite hak zo mahmah lo uh ahih manin ihmu in a om uh a mukik hi. ⁴⁴ Tua ciangin amaute nusia in va paikhiakik a, a nget ngeiteng mah a thumveina a va ngen leuleu hi. ⁴⁵ Tua khit ciangin a nungzuite kiangah hong pai a, “Note ihmumu lai, tawlnganga lai na hi uh hiam? En in, Mihing Tapa mawhneite khut sungah a kipiak ding hun hong tungta hi. ⁴⁶ Tho unla pai ni. En un, kei hong lehhekpa a hong nai mahmah ta hi,” a ci hi. ⁴⁷ Tua banga a gengen laitak in sawm le nihte lakah khat ahi Judas in siampi liante le Judah mite makaite in a sawl mihonkhat hong tonpih a, tua mite in namsau le molhtumte a tawi uh hi. ⁴⁸ Amah a lehhekpa in mihonte kiangah, “Ka nap penpa amah ahi hi man pah un,” ci in a theihsak kholhsa ahi hi. ⁴⁹ Amah in thakhat in Zeisu kiang hong naih a, “Rabbi aw, na dam hiam!” ci in a nam hi. ⁵⁰ Zeisu in ama kiangah, “Lawm aw, bang hih dinga hong pai na hi hiam?” a ci hi. Tua khit ciangin mihonpi hong pai uha Zeisu manin a paipih uh hi. ⁵¹ Tua ciangin Zeisu tawh a omkhawmte khatin thakhat in a namsau dokin Siampi Ukpa nasempa a sat leh a bil a satkhia hi. ⁵² Tua ciangin Zeisu in tua pa kiangah, “Na namsau a paai ah siatkik in. Namsau tawi peuhmah namsau mah tawh a si ding uh hi. ⁵³ Tu mahmah in ka Pa kiangah a ngen theilo hong sa na hi uh hiam? Ngen leng vantungmi legionɠ sawm le nih sanga a tam zaw hong pia pah ding hi. ⁵⁴ Tua bangin a ngen hi leng hih banga a piang dingin Lai Siangtho sunga kigensa thute koici tangtun thei ding ahi hiam?” a ci hi. ⁵⁵ Tua hun mahin Zeisu in mihonpite kiangah, “Guta buluh khat man ding bangin namsau le molhtum tawi in kei man dingin hong kuan na hi uh hiam? Biakinnpi huang sungah thuhilh in nisim in note tawh ka omkhawm a, ahih hangin nong man kei uh hi. ⁵⁶ Ahi zongin kamsangte gelhsa Lai Siangtho a tangtun nadingin hihte khempeuh a sem na hi uh hi,” a ci hi. Tua khit ciangin nungzuite khempeuh in amah nusia in a taikek uh hi. ⁵⁷ Zeisu a mante in thukhamhilh siate le makaite kituahkhopna Siampi Ukpa Caiaphas kiangah amah a paipih uh hi. ⁵⁸ Peter in Siampi Ukpa inntual dong a galzuih khit ciangin bang thu hong piang peuhmah hiam cih a en dingin huang sungah va lutin biakinn cingte tawh a tukhawm hi. ⁵⁹ Siampi liante, makaite le thukhenteɠ khempeuh in Zeisu a thah theih nadingun zuauthu tawh thu a kawi zonzon uh hangin a mu zo kei uh hi. ⁶⁰ A maanlo tecipang mitampi a hong pai uh hangin amah thah theih nading thu kician a mu zo kei uh hi. A tawpna ah a maanlo teci a pang mi nih hong pai uh a, ⁶¹ “Hihpa in, ‘Pasian biakinnpi susia in ni thum sungin ka lamkik zo ding hi,’ ci hi,” a ci uh hi. ⁶² Tua ciangin Siampi Ukpa dingto in Zeisu kiangah, “Bangmah dawng lo ding na hi hiam? Hih mite in nang hong mawhsak uh a, na langah hi zahta a teci a panna uh bang thu ahi hiam?” a ci hi. ⁶³ Ahih hangin Zeisu a pau tuan kei hi. Siampi Ukpa in ama kiangah, “Pasian Tapa Khazih na hih leh na hih loh nong gen nadingin a nungta Pasian min tawh kong sawl hi!” a ci hi. ⁶⁴ Zeisu in, “Na gen bangin ka hi hi. Ahi zongin, nang tungah kong genin Mihing Tapa in Vangliatna taklam ah tukawmsa in vana meii tungah a hong pai tunung ciangin na mu ding hi,” a ci hi. ⁶⁵ Tua ciangin Siampi Ukpa in a puan balkek a, “Hihpa Pasian tungah a pausia zo hi! Teci dang kisam lai ahi hiam? En un, Pasian tunga a pausiatna na za zo uh hi. ⁶⁶ Bangci ngaihsut na hi uh hiam?” a ci hi. Amaute in, “A si dingin a kilawm hi,” ci in a dawng uh hi. ⁶⁷ Tua khit ciangin a maitang cilphih in a tumgawp uh hi. A dangte in a khutpek uh tawh a pang beng uh a, ⁶⁸ “Tu‑a hong beng kua ahi hiam? Kamsanna tawh hong gen dih in, Khazih aw!” a ci uh hi. ⁶⁹ Tua laitak in a pualam inntual ah Peter tu in a om hi. Nasem numeino khat ama kiangah va pai a, “Nang zong Galilee mi Zeisu tawh a kithuahpa na hi hi,” a ci hi. ⁷⁰ Ahih hangin Peter in, “Na thugen ka thei kei hi,” ci in amaute khempeuh mai ah a nial hi. ⁷¹ Amah paikhia in innlim ah a om laitak numeino dang khatin mu a, tualai a om mite kiangah, “Hihpa zong Nazareth khua mi Zeisu tawh a kithuah khat ahi hi,” a ci hi. ⁷² Amah in, “Tua pa ka thei kei hi!” ci in kiciam kawmin a nialkik hi. ⁷³ Tawlkhat khit ciangin a gei‑a ding mite Peter kiangah hong pai in, “Nang zong amaute khat hingel teh, na awkaih in kithei hi,” a ci uh hi. ⁷⁴ Tua ciangin Peter in, “Tua pa ka theih ngeitak leh!” ci in kihamsiat in a kiciam hi. Tua khit phetin aak a khuang hi. ⁷⁵ Tua ciangin Peter in, “Aak a khuanma in thumvei nong nial ding hi,” ci a, Zeisu in ama kianga a gensa thu phawkkik a, a pua lamah paikhia in nakpitak in a kap hi.

¹ A zingsang ciangin siampi liante le Judah mite makaite khempeuh in Zeisu a thah theih nadingun a vaihawm uh hi. ² Tua ciangin amah henin paikhiatpih uha mangpipa Pontius Pilate khutah a piakhia uh hi. ³ Tua ciangin a lehhekpa Judas in sihna daan thuak dingin Zeisu tungah thu kikhen zo hi cih a theih ciangin khial kisa mahmah a, siampi liante le makaite kiangah nguntang 30 a va piakik hi. ⁴ Amah in, “Mawhneilopa lehhek kha ka hih manin ka khial zo hi,” a ci hi. Amaute in, “Tua thu le ko bang kisai nawn ka hi uh hiam? Na suah nop peuh suah in,” a cihsan uh hi. ⁵ Tua ciangin Judas in a nguntang teng biakinnpi sungah pai a, paikhia in a gui‑awk hi. ⁶ Siampi liante in tua nguntang teng la uh a, “Hih sum sisan man ahih ciangin sumpi laka hel dingin kilawm lo hi,” a ci uh hi. ⁷ Tua banga a kikup khit uh ciangin khualmite a kivui nading belsekpa leitang leina in a nei uh hi. ⁸ Tua ahih manin tua leitang pen tuni dongin Sisan Leitang, kici hi. ⁹ Hih in kamsangpa Jeremiah in a gensa thu a tangtunna ahi hi. Amah in, “Israel mite in ama man ding seh uha nguntang 30 a mansak uh hi. ¹⁰ Amaute in tua sum la uha Topa in kei hong lamlahna bangin belsekpa leitang man dingin a pia uh hi,” a ci hi. ¹¹ Tua ciangin Pilate mangpipa mai ah Zeisu dinga, mangpipa in, “Nang Judah mite Kumpipa na hi hiam?” ci in a dong hi. Zeisu in, “Na cih bangin ka hi hi,” a ci hi. ¹² Siampi liante le makaite in amah a mawhmatna thu a gengen uh hangin kam khat beek a dawng kei hi. ¹³ Tua ciangin Pilate in ama kiangah, “Hih zahta in nang hong langpan a a hong mawhmatna uh za lo na hi hiam?” a ci hi. ¹⁴ Zeisu in kam khat beek a dawn loh ciangin mangpipa in lamdang a sa mahmah hi. ¹⁵ Paisan Pawi a tun sialin mangpipa in mipi deih thongkia khat peuhpeuh a khahkhiat zel pen ngeina khat ahi hi. ¹⁶ Tua laitak in Barabbas kici a gilo a minthang thongkiapa khat a om hi. ¹⁷ Tua ahih manin amaute a kikhop laitak un Pilate in amaute kiangah, “Barabbas le Khazih a kici Zeisu, kua zaw kong khahkhiat ding na deih uh hiam?” ci in a dong hi. ¹⁸ Banghang hiam cihleh amaute in a hazat manun amah a piakkhiat uh ahihlam Pilate in a thei gige hi. ¹⁹ Thukhenna tokhom tungah Pilate a tut laitak in a zi in ama kiangah mi khat sawl a, “Tua midikpa tawh bangmah kisawh kha kei in. Tuzan ka mang sungah tua pa hangin gimna nakpi in ka thuak hi,” ci in a zasak hi. ²⁰ Tu in siampi liante le makaite in Barabbas khah a Zeisu a kithah nading a ngen dingin mihonpi a holhthawh uh hi. ²¹ Mangpipa in, “Hih mi nihte kuapen hong khahsak leng na ut uh hiam?” ci in a dotkik ciangin amaute in, “Barabbas!” a ci uh hi. ²² Tua ciangin Pilate in, “Tua ahih leh Khazih a kici Zeisu bang ka cih ding hiam?” a cih ciangin amaute khempeuh in, “Singlamteh ah khailum in!” a ci uh hi. ²³ Tua ciangin mangpipa in, “Amah in bang siatna bawl ahi hiam?” a ci hi. Ahih hangin amaute in, “Singlamteh ah khailum in!” ci in nakpi in a kiko semsem uh hi. ²⁴ Pilate in ama deihna lah tangtung lo, mipite zong hong so zaw semsem cih a muh ciangin tui la in mipi mai ah a khut sil a, “Hih midikpa sisan tungah kei ka siang hi. Na suahnop peuh uh suah un,” a ci hi. ²⁵ Tua ciangin mi khempeuh in, “Ama sisan phu ko le ka tu ka tate uh tungah hong tung tahen,” ci in a dawng uh hi. ²⁶ Tua khit ciangin Pilate in Barabbas khahsak a, Zeisu ahih leh a satsak khit ciangin khailup dingin a piakhia hi. ²⁷ Tua ciangin galkapte in mangpipa inn ah Zeisu paipih uha galkaphonɠ teng zong ama kiangah a kikhawm uh hi. ²⁸ Amaute in Zeisu puan a suahsak khit uh ciangin puantual san khat a silhsak uh hi. ²⁹ A kumpi lukhu dingin linglukhu bawl in khusak uh a, a taklam khutah pumpeng ciang khat a tawisak uh hi. Tua khit ciangin ama mai ah khukdin in, “Judah mite Kumpipa aw, na ci dam tahen!” ci in a zahko uh hi. ³⁰ Tua ciangin cilphih uh a, a pumpeng tawi la in a lutang a sat uh hi. ³¹ A zahko khit uh ciangin a puantual suahkhiatsak in ama puante a silhsakkik uh hi. Tua khit ciangin khailup dingin a paikhiatpih uh hi. ³² Tua banga a paikhiat laitak un Simon kici Cyrene khua mi khat tawh kituak uha zawhthawh thu tawh Zeisu singlamteh a puasak uh hi. ³³ Lutangguh Mun cih khiatna nei, Golgotha kici mun a tun uh ciangin, ³⁴ a dawn dingin tuikha a kihel lenggahtui thuk a pia uh hi. Amah in tawm ciam a ahih hangin a dawn nuam kei hi. ³⁵ Tua ciangin amaute in singlamteh tungah khai uh a, lai‑aisan in a puante a hawm uh hi. Tua in, “Amaute in ka puante hawm uha, Ka puansilh a ngah nadingun lai‑ai a san uh hi,” ci a, kamsangpa gensa thu a tangtun nading ahi hi. ³⁶ Amaute in tua munah tusuk in Zeisu a en uh hi. ³⁷ A lu tungah, “HIHPA IN JUDAH MITE KUMPIPA ZEISU AHI HI,” ci in mawhmatna lai khat a suang uh hi. ³⁸ Misuamte nih zong a taklam ah khat, a veilam ah khat amah tawh a kikhaikhawm hi. ³⁹ Tua mun tawna a pai mite in amah zahko in a lu uh peisan in, ⁴⁰ “Biakinnpi susia a, ni thum sunga a lamkik ding pa aw, nang le nang kihonkhia in! Pasian Tapa na hih leh singlamteh tung panin hong kumkhia in,” a ci uh hi. ⁴¹ Siampi liante, thukhamhilh siate le makaite in zong tuamah bangin a zahko uh hi. ⁴² Amaute in, “Amah in midangte hon zo napi amah le amah a kihonkhia zo kei hi. Israelte Kumpipa ahih takpi leh singlamteh tung panin tu in hong kumkhia hen. Tua hi leh amah i um ding hi. ⁴³ Amah in Pasian muang in, ‘Pasian Tapa ka hi hi,’ ci ahih manin Pasian in a hotkhiat nop leh tu in honkhia tahen,” a ci uh hi. ⁴⁴ Amah tawh a kikhaikhawm misuamte in zong tuamah bangin a zahko uh hi. ⁴⁵ Tu in, nai guk a kipan nai kua ciangdong leitung bup ah khimpi a zing hi. ⁴⁶ Nai kua pawlin Zeisu nakpi in kiko a, “Eli, Eli, lama sabachthani,” a ci hi. Tua in, “Ka Pasian, ka Pasian aw, banghang in hong nusia na hi hiam?” a cihna ahi hi. ⁴⁷ Tua muna a ding mi pawlkhat in a zak uh ciangin, “Hihpa in Elijah sam hi!” a ci uh hi. ⁴⁸ Amaute lak panin thakhat in mi khat va tai a, tuihupna khat la in lenggahtui thuk sungah a diah khit ciangin pumpeng dawn ah suangin a dawn dingin a tahto hi. ⁴⁹ A dangte in, “Hi ci omsak phot dih un. Amah hon dingin Elijah hong pai hiam en dih ni,” a ci uh hi. ⁵⁰ Nakpitak in Zeisu a kikokik khit ciangin a huu tawpna a sangkhia hi. ⁵¹ Tua ciangin, en in, biakinnpi sunga kideina puan a lu pan a taw dong kikek in phelnih a kisuah hi. Zin zong lingin suangtumte kitam a, ⁵² hante zong kihong in a ihmu khinsa misiangtho tampite kithokiksak hi. ⁵³ Zeisu a thawhkik khit ciangin amaute han sung pan hong pusuakkhia uha khuapi siangtho sungah lutin mi tampi kiangah a kilang uh hi. ⁵⁴ Tua ciangin Zeisu a cing galkap 100 ukpa le a lawmte in zinling le thupiang teng a muh uh ciangin lau mahmah uh a, “Hihpa in Pasian Tapa taktak ahi hi,” a ci uh hi. ⁵⁵ Zeisu panpih in a zui Galilee gam pana numei tampite in zong amah a galet uh hi. ⁵⁶ Tuate lakah Magdala khua mi Mary, James le Joses‑te nu Mary a kipan Zebedee tate nu zong a om hi. ⁵⁷ Nitak lam ciangin Joseph a kici Arimathea khua‑a mihaupa khat a hong pai hi. Amah zong Zeisu nungzui khat ahi hi. ⁵⁸ Pilate kiangah amah va pai‑a Zeisu luang a ngen hi. Tua ciangin amah piak dingin Pilate in thu a pia hi. ⁵⁹ Joseph in Zeisu luang lakhia in puanpak siangtho tawh a tun hi. ⁶⁰ Tua khit ciangin suang a kikhuak ama bawlsa han thak sungah sial a, suangtumpi khat khuk in hankong a khak khit ciangin a ciah hi. ⁶¹ Magdala khua mi Mary le Mary a dang khat zong han lam nga in a tu uh hi. ⁶² A zingciang ahi Kigin Niɠ in siampi liante le Pharisee pawlte Pilate kiangah a va kikhawm uh hi. ⁶³ Amaute in, “Sia aw, tua zuau genpa in a nuntak lai in, ‘Ni thum khit ciangin ka thokik ding hi,’ ci a, a gen thu ka phawkkik uh hi. ⁶⁴ Tua ahih ciangin ni thum sung ama han a kicin nadingin thu pia in. Tua hi kei leh a nungzuite zanin hong pai in a luang gukhia ding uha mite kiangah, ‘Misite lak panin amah thokik zo hi,’ a ci ding uh hi. Tua hi leh a masa khemna sangin a nunung khemna suksia zaw ding hi,” a ci uh hi. ⁶⁵ Pilate in amaute kiangah, “A cing ding galkapte nei na hih uh ciangin pai unla na hih theih zahzah un a muanhuai theithei in bawl un,” a ci hi. ⁶⁶ Tua ciangin amaute pai in a muanhuai theithei in a han suangtumpi tungah ciaptehna khen uha a cing ding mi zong a koih uh hi.

¹ Tu in Sabbath ni a bei khit nipi kal sunga ni masa pen ni zingsang phalvak tungin Magdala khua mi Mary le Mary dang khat daihawh dingin a pai uh hi. ² Tua ciangin, en in, zin nakpi in hong ling hi. Banghang hiam cihleh Topa vantungmi khat vantung pan hong kumsuk a hankong hukna suangtumpi likkhia in a tungah a tu hi. ³ Ama mel khuaphialep tawh kibang in a puan vuk bangin a ngo hi. ⁴ Han cingte in amah kihta lua uh ahih manin linggawp uha misi tawh kibang uh hi. ⁵ Ahih hangin vantungmi in numeite kiangah, “Lau kei un. Singlamteh tunga a thah uh Zeisu a zong na hi uh hi cih kong thei hi. ⁶ A hong gensa bangin amah thokik zo ahih manin, hihlai ah om nawnlo hi. Hong pai unla, Topa luang kisialna mun hong en un. ⁷ Pai mengmeng unla a nungzuite kiangah, ‘Amah misite lak panin thokik zo hi. Galilee gamah amah na pai masa dinga, tualai ah na mu ding uh hi,’ ci in gen un. En un, hih thu note kiangah kong genzo hi,” a ci hi. ⁸ Tua ciangin numeite lau le lungdam kawmsa in han pan ciah pah vingveng uha nungzuite kiangah tua thu a ko dingin a tai uh hi. ⁹ A nungzuite kiangah thuko dingin a pai laitak un, Zeisu in amaute na dawntuah a, “Lungdam un!” a ci hi. Amaute in Zeisu khe va kawi in amah a bia uh hi. ¹⁰ Tua ciangin Zeisu in, “Lau kei un. Pai unla ka sanggamte kiangah, Galilee gamah hong pai le uh hong mu ding uh hi ci in va gen un,” a ci hi. ¹¹ Numeite a pai laitak un hancingte pawlkhat khuapi sungah pai in thupiang khempeuh siampi liante kiangah a va ko uh hi. ¹² Siampi liante in zong makaite kaikhawm in thu a kikup khit uh ciangin galkapte sum tampi pia uh a, ¹³ “ ‘Zan ka ihmut kal un a nungzuite hong pai in a luang na gukhia uh hi,’ ci in hong gen un. ¹⁴ Hih thu mangpipa in a zak leh zong amah ka na lungkimsak ding uha note kong sukhasak kei ding uh hi,” a ci uh hi. ¹⁵ Tua ciangin galkapte in zong a sumteng la in a kisawl bangin a gen uh hi. Amau thugen bangin hih thu Judah mite lakah tuni dongin a kigen lai hi. ¹⁶ Tua khit ciangin nungzui sawm le khatte Galilee gama Zeisu vaikhakna mualah pai uha ¹⁷ amah a muh uh ciangin a bia uh hi. Ahih hangin pawlkhatte a lunghiang lai uh hi. ¹⁸ Tua ciangin Zeisu hong pai in amaute kiangah, “Vantung le leitung a om thuneihna khempeuh kei a hong kipia zo hi. ¹⁹ Tua ahih ciangin note pai unla minam khempeuh ka nungzuite na suahsak khit uh ciangin Pa, Tapa le Kha Siangtho min tawh tui na phum un. ²⁰ Note kong piaksa thu khempeuh a zuih nadingun hilh un. En un, hun a bei dongin note kong ompih tawntung ding hi,” a ci hi. Amen.