LUKE

LUKE

¹ A zahtakhuai mahmah Theophilus aw, eite lakah a piangsa thute mitampi in kiciantak in a gelh khinzo uh hi. ² Amaute in tua thute a kipatcil a kipan mittang tawh mu in tua thu tawh kisai na a sem mite hong gensawnna banga a gelh uh ahi hi. ³ Kei zong tua thupiang khempeuh a kipat a kipan limtak kantel khinzo ka hih manin nang aa dingin hih thu a kizom in kong gelhkhiat ding hoih ka sa hi. ⁴ Hih in nang a hong kihilh khinsa thute maan takpi hi ci a, na theih nading ka deihna ahi hi. ⁵ Herod in Judea gamah kumpi a sep laitak in Abijah pawl sungah Zacharias kici siampipa khat a om hi. A zi pen Aaron suante khat hi a, a min Elizabeth ahi hi. ⁶ A nupa un Pasian muhna ah midik hi uha Topa thupiakte le thukhunte khempeuh kawkbang loin a zuite ahi uh hi. ⁷ Elizabeth tasel ahih manin ta neilo uha a kum uh zong tam khin mahmah hi. ⁸ Khatvei, Zacharias in Pasian mai ah siampi na a sep laitak, ⁹ siampite ngeina zui in nasep ding a hawmna uhah paknamtui hal ding nasep a ngah hi. Amah Topa biakinnpi sungah lut in, ¹⁰ paknamtui hal a a om laitak in mipite khempeuh in a pualam ah thu a ngen uh hi. ¹¹ Tua laitak in Topa vantungmi khat ama kiangah hong kilang a, paknamtui halna biaknatau taklam ah a ding hi. ¹² Zacharias in vantungmi a muh ciangin dipkua in a lau mahmah hi. ¹³ Tua ciangin vantungmi in ama kiangah, “Zacharias aw, lau kei in na thungetna Pasian in hong zazo hi. Na zi Elizabeth in tapa khat nei dinga, a min John na phuak ding hi. ¹⁴ Amah hong pian ciangin lungdam in na nuam dinga, mitampi zong a kipak ding uh hi. ¹⁵ Banghang hiam cihleh Topa muhna ah amah mi thupi a suak ding hi. Lenggahzu a kipan khamtheih guihtheihte ne lo dinga, a nu gil sung pan mahin Kha Siangtho tawh a kidim ding hi. ¹⁶ Israel Pasian ahi Topa lamah amaute a kiheisak ding hi. ¹⁷ Elijah lungsim le vangliatna nei in Topa mai ah a pai ding hi. ‘Pate lungtang a tate lamah kiheisak in,’ thumanglo mite in midikte lungpilna a neih nadingin a heisak ding hi. Tua bangin Topa aa dingin minam khat puahkhol in a kigingsa in a koih ding hi,” a ci hi. ¹⁸ Tua ciangin Zacharias in vantungmi kiangah, “Hih thu bangci theih ding ka hi hiam? Kei lah tekta ing a, ka zi zong kum tam mahmah khin ta hi,” a ci hi. ¹⁹ Vantungmi in dawngin ama kiangah, “Pasian mai‑a a ding Gabriel ka hi hi. Nang hong hopih in hih lungdamna thute hong puak dinga hong kisawl ahi hi. ²⁰ En in, a hun a tun cianga a hong piang ding thu kong gente um lo na hih manin hih thute a hong pian mateng in na pauthei kei ding hi,” a ci hi. ²¹ Biakinnpi sungah Zacharias sawtvei omlua ahih manin amah a ngak mipite in lamdang a sa uh hi. ²² A hong pusuah ciangin mipite hopih theilo ahih manin biakinnpi sungah mangmu hi ding hi ci in a thei uh hi. Banghang hiam cihleh amah pau theilo in om a, a khut bek tawh a lak hi. ²³ Tua bangin a siampi nasep hun a bei phetin a inn ah a ciah hi. ²⁴ Tua khit ciangin a zi Elizabeth in naupaai a, kha nga sung inn sungah a omcip hi. ²⁵ Amah in, “Tu in Topa in kei hong angvan a, mi lak a ka maizumna teng hong lakkhiatsak hi,” a ci hi. ²⁶ Tu in Elizabeth in nau a paai zawh kha guk a phak ciangin Galilee gam Nazareth a kici khua‑a om, ²⁷ David suan, Joseph tawh kiteeng dinga zuthawl piaksa nungak siangtho Mary kiangah Pasian in vantungmi Gabriel a sawl hi. ²⁸ Mary kiangah vantungmi va pai a, “Maipha a ngah mahmah numei aw, nopna ngahta in. Topa in nang hong ompih a, numeite lakah thupha ngahnu na hi hi,” a ci hi. ²⁹ Ahi zongin Mary in amah mu in a thugen a zak ciangin patau a, “Banghang in hih bangin hong hopih hi ding ahi hiam?” ci in a ngaihsun hi. ³⁰ Tua ciangin vantungmi in, “Mary aw, lau kei in. Pasian maipha na ngah zo hi. ³¹ En in, naupaai in tapa khat na nei dinga, a min ZEISU na phuak ding hi. ³² Amah mi thupi suak dinga, Sangpenpa Tapa kici ding hi. Topa Pasian in a pa David tokhom tungah amah a tusak ding hi. ³³ Amah in Jacob innkuante uk tawntung dinga, ama kumpigam a bei ngei kei ding hi,” a ci hi. ³⁴ Tua ciangin Mary in vantungmi kiangah, “Pasal tawh lumkhawm ngeilo ka hih manin hih thu bangci bangin piangthei ding ahi hiam?” a ci hi. ³⁵ Vantungmi in ama kiangah, “Kha Siangtho nang tungah hong tung dinga, Sangpenpa vangliatna in nang a hong tuam ding hi. Tua ahih manin nang sung pan a suakkhia ding Siangthopa pen Pasian Tapa kici ding hi. ³⁶ En in, na tanaunu Elizabeth in zong a tek nungin tapa khat a paaizo hi. Taselnu a kici amah in naupaai a, kha guk a phazo hi. ³⁷ Banghang hiam cihleh Pasian aa dingin a piang theilo na khat beek a om kei hi,” a ci hi. ³⁸ Tua ciangin Mary in, “En in, Topa nasemnu ka hi hi! Na gen bangin kei tungah hong piang tahen,” a ci hi. Tua khit ciangin ama kiang panin vantungmi a paikhia hi. ³⁹ Tua khit ciangin Mary kithawi a, Judah gam mualtung khua khatah a pai pah hi. ⁴⁰ Amah Zacharias inn sungah lutin Elizabeth a hopih hi. ⁴¹ Elizabeth in Mary hopihna a zak ciangin a gil sunga naungek diang a, Elizabeth zong Kha Siangtho tawh a kidim hi. ⁴² Tua ciangin amah in aw ngaihtak in kiko a, “Numeite lakah thupha ngahnu na hi a, nang sunga naungek zong thupha ngah ahi hi! ⁴³ Ka Topa nu kei kiangah a hong hawh theih nadingin hih bang hamphatna koipan ngah kha ka hi hiam? ⁴⁴ En in, nong hopihna awging ka bil ah hong lut phetin ka gil sunga naungek kipak in a diang hi. ⁴⁵ Topa in a gensa thute tangtungsak ding hi ci a, a um numei in thupha ngah ahi hi,” a ci hi. ⁴⁶ Tua ciangin Mary in, “Ka lungsim in Topa pahtawi a, ⁴⁷ Ka kha in zong hong Honpa Pasian sungah a lungdam hi. ⁴⁸ Banghang hiam cihleh, Amah in a nasemnu dinmun niamna hong mu zo hi. En un, tu a kipan a khang a khang in, Thupha ngahnu hong ci ding uh hi. ⁴⁹ Banghang hiam cihleh, Vanglianpa in kei aa dingin, Na lianpi hong sepsak zo a, Ama minin Siangtho ahi hi. ⁵⁰ Amah in amah a zahtak mite, A khang a khang in a hehpih hi. ⁵¹ A khut tawh thahatna lak a, Kiliatsakna lungsim a neite a thehthang hi. ⁵² Gam ukte a kumpi tokhom panun khiasuk a, A kinengniamte a lamsang hi. ⁵³ A gilkial mite na hoih tampi guan a, Mihaute ahih leh a hawmpi in a paikhiasak hi. ⁵⁴ Amah in a hehpihna phawk tawntung ahih manin, A nasem Israel a huh hi. ⁵⁵ Tua in i pu i pate, Abraham le a suan a khakte tungah, A tawntung in a gensa bang ahi hi,” a ci hi. ⁵⁶ Mary in Elizabeth kiangah kha thum bang a taam khit ciangin a inn ah a ciah hi. ⁵⁷ Tu in Elizabeth a suah hun hong tung a, tapa khat a nei hi. ⁵⁸ Topa in Elizabeth tungah hehpihna lianpi lak hi cih a innvengte le a tanaute in a zak uh ciangin a lungdampih uh hi. ⁵⁹ Naungek ni giat a phak ciangin a vunat dingin pai uh a, a min dingin a pa min zui in Zacharias phuah a sawm uh hi. ⁶⁰ Ahih hangin a nu in, “Hilo hi, John phuah ding hi zaw hi,” a ci hi. ⁶¹ Amaute in, “No beh sungah tua bang min om lo hi,” a ci uh hi. ⁶² Tua ciangin a pa in bang phuak nuam hiam cih a theih nadingun khut tawh lakin a dong uh hi. ⁶³ Amah in laigelh nading khat ngen a, “Ama min John ahi hi,” ci in a gelh hi. Tua ciangin amaute khempeuh in lamdang a sa mahmah uh hi. ⁶⁴ Tua ciangin thakhat in Zecharias kam a kihong hi. A leii kilok in pauthei a, Pasian a phat hi. ⁶⁵ Tua ciangin a veng a pam khempeuh lauthawng uh a, Judea mualtung gam khempeuh ah hih thute bek genin a kinei hi. ⁶⁶ Hih thu a za mi khempeuh in amaute lungsim sungah, “Hih naungek bangci bang mi a hong suak ding hiam?” ci in a ngaihsun uh hi. Topa khutin amah tawh a omkhawm hi. ⁶⁷ Tu in a pa Zacharias in Kha Siangtho tawh kidim in hih bangin kamsanna a gen hi, ⁶⁸ Amah in, “Israelte Topa Pasian in thupha ngah tahen. Banghang hiam cihleh, amah in a mite hong vehin hong tankhia zo hi. ⁶⁹ A nasempa David suan pan, Pasian in eite aa dingin, Hotkhiatna kii khat, Hong pokhiasak zo hi. ⁷⁰ Tua thu in lei piancil a kipan, A siangtho ama kamsangte kam tawh, A gensa ahi hi. ⁷¹ Hih in i galte le, Hong mudah khempeuhte khut pan a, Hong hotkhiatna ahi hi. ⁷² I pu i pate tunga a kamciamsa, Hehpihna hong tungsak a, A siangtho ama thuciamna, A mangngilh kei hi. ⁷³ I pupi Abraham tung a, A kiciamsa bangin, ⁷⁴ I galte khut sung pan hong honkhia a, ⁷⁵ I nuntak laiteng in, Ama mai ah sianthona le dikna tawh, Lau hetlo in ama na i sep theih nading ahi hi. ⁷⁶ “Bawi aw, Sangpenpa kamsangpa hong kici ding hi. Banghang hiam cihleh, Topa lampi a sial dingin, Ama mai ah na pai ding hi. ⁷⁷ A mite in mawh kimaisakna tungtawn in, Hotkhiatna a ngah lam uh na theisak ding hi. ⁷⁸ Eite Pasian hong hehpihna tungtawn in, Phalvak in eite hong veh zo a, ⁷⁹ Khuamial sung le, Sihna lim sunga om mite tungah khuavak a tan nading, Nopna lampi ah eite a hong khak nading ahi hi,” a ci hi. ⁸⁰ Tua bangin naupang hong khangin a lungsim zong hong picing semsem hi. Israel mite tunga a kilah khiat hun mateng in gamlak ah a teeng hi.

¹ Tua hun lai in Caesar Augustus in a gam sunga mipha zah a kisim nadingin thu a pia hi. ² Quirinius in Syria gam uk ahih laitak in hih mipha zah kisimna a masa pen ahi hi. ³ Mi khempeuh in a min uh khumsak dingin amau pianna khua ciatah a pai uh hi. ⁴ Joseph zong David phung sunga piang David suan ahih manin Galilee gam Nazareth khua panin Judea gam David khua Bethlehem ah min khumsak dingin a paito hi. ⁵ A zi dinga zuthawl a piaksa Mary tawh paikhawm uh a, Mary nausuak kuan ahih manin, ⁶ tua khua ah a om sungun a suah hun hong tung hi. ⁷ Amah in a tacil ahi tapa nei a, naupuan tawh a tun hi. Zintun inn sungah amaute aa dingin inndei om lo ahih manin bawng ankuang sungah nau a sial hi. ⁸ Tua gamah tuucingte in gamlak ah giak uh a, zanin tuute a vil uh hi. ⁹ En in, Topa vantungmi khat amaute mai ah hong dinga, Topa vangin amaute kim le pamteng tan ahih manin a lau mahmah uh hi. ¹⁰ Tua ciangin vantungmi in amaute kiangah, “Lau kei un. Mi khempeuh aa ding a nuamhuai mahmah lungdamna thu kong puak hi. ¹¹ Banghang hiam cihleh tuni in Topa Khazih ahi Honpa in note aa dingin David khua ah a suakzo hi. ¹² Amah na theih nading uh hih bang ahi hi. Naungek khat naupuan tawh kitun in bawng ankuang sungah kisial a om na mu ding uh hi,” a ci hi. ¹³ Tua ciangin thakhat in vantungmi honpite tua vantungmi tawh hong om uh a, ¹⁴ amaute in, “A sangpen muna om Pasian minthang tahen. Leitung ah kilemna om henla, Leitung mite tungah nopna om tahen!” ci in Pasian a phat uh hi. ¹⁵ Vantungmite vanah a ciah khit uh ciangin tuucingte kiho uh a, “Bethlehem khua ah pai in, Topa hong gensa hih thupiang va en ni,” a kici uh hi. ¹⁶ Amaute pai pah vingveng uh a, Mary, Joseph le bawng ankuang sunga kisial naungek a mu uh hi. ¹⁷ Amah a muh khit uh ciangin amaute tunga kigensa hih naungek thute mun khempeuh ah a gen kawikawi uh hi. ¹⁸ Tuucingte thugen a za mi khempeuh in lamdang a sa uh hi. ¹⁹ Mary ahih leh hih thu khempeuh a lungsim ah ciamteh in a ngaihsunsun hi. ²⁰ Tua ciangin tuucingte in amaute tunga kigen bangin, a zaksa a muhsa uh thu khempeuh hangin Pasian pahtawi le phat kawmsa in a ciahkik uh hi. ²¹ Tua ciangin naungek vunat ding hun ni giat a cin ciangin a nu in a gil sungah nau a paaima a vantungmi in a gensa bangin a min ZEISU a phuak uh hi. ²² Moses thukham tawh kizui in Mary a kisiansuahna hun a cin khit ciangin, Topa tungah naungek a ap dingin Jerusalem khuapi ah a hong paipih uh hi. ²³ Hih in, “Naubu a hong masa tapa khempeuh Topa aa dingin sehtuam ahi hi,” ci in Topa thukham sunga kigelh thu bangin a zui uh ahi hi. ²⁴ Topa thukham sungah, “Vakhu kopkhat, ahih keileh kawl vakhuno nih pia ding,” cih tawh kizui in biakna pia dinga pai zong ahi uh hi. ²⁵ En in, Simeon a kici a thuman, Pasian a zahtak mahmah mi khat Jerusalem khuapi ah a om hi. Israelte kihehnepna a lamen mi khat hi a, Kha Siangtho ama tungah a om hi. ²⁶ Topa Sathau‑nilhpa a muh mateng si lo ding hi, ci in Kha Siangtho in a theihsaksa ahi hi. ²⁷ Kha makaihna tawh biakinnpi huang sungah Simeon a lut hi. A nu le a pate in thukham ngeina bangin naungek Zeisu ap dingin a hong lutpih uh ciangin, ²⁸ Simeon in ama ang ah naungek tawi in Pasian phat a, ²⁹ amah in, “Topa aw, na silapa tunga nong gensa bangin, Lungnuamtak in hong paisakta in. ³⁰ Banghang hiam cihleh, Na hotkhiatna ka mit tawh ka mu zo hi. ³¹ Nang in tua hotkhiatna, Minam khempeuh muh dingin na bawl khinzo a, ³² Gentile‑te tunga kilakna a puak ding khuavak le, Na mi Israelte minthan nading ahi hi,” a ci hi. ³³ Simeon in naungek tawh kisai a gen thute Joseph le a nu in lamdang a sa uh hi. ³⁴ Tua khit ciangin Simeon in amaute thupha pia a, a nu Mary kiangah, “En in, Israel mitampite kipuk nading le thawh nadingin hih naungek a kiseh zo hi. ³⁵ Mitampite lungsim tawng a kilatkhiat nadingin amaute in a gensiat uh Pasian kiang pana limlamdang khat zong ahi hi. Hi hi, na lungsim zong namsau khatin hong dawtlet ding hi,” a ci hi. ³⁶ Tua laitak in Anna kici kamsangnu khat om a, Asher phung sunga piang Phanuel tanu ahi hi. Amah khangham khin mahmah ta hi. A nungak lai‑a a kiteenpih a pasal tawh kum sagih sung bek damkhawm uh hi. ³⁷ Tua khit ciangin meigong a, tu in 84 phazo hi. Amah in biakinnpi huang lawi ngeilo a, antang in thungen in sun le zanin Pasian a bia hi. ³⁸ Tua laitak in amah hong lut a, Topa tungah lungdam a ko hi. Jerusalem khuapi a hotkhiat ding a lamen mi khempeuh tungah naungek thu a gen hi. ³⁹ Amaute in Topa thukham banga na khempeuh ahih khit uh ciangin Galilee gama om a khua uh ahi Nazareth ah a ciahkik uh hi. ⁴⁰ Naupang hong khangin a lungsim hong picing a, lungpilna tawh kidim in Pasian hehpihna thupha ama tungah a om hi. ⁴¹ A nu le a pate Paisan Pawi sim dingin Jerusalem khuapi ah kumsim in a pai den uh hi. ⁴² Zeisu kum sawm le kum nih a phak ciangin pawi ngeina bangin Jerusalem khuapi ah pawisim dingin a paito uh hi. ⁴³ Pawi a ven ciangin a nu le a pate ciah uh a, Naupang Zeisu ahih leh Jerusalem khuapi ah a omlai hi. Tua thu Joseph le a nu in a thei kei uh hi. ⁴⁴ Amaute in mihonpi lakah Zeisu a omom mah a sa uh hi. Ni khat lam a pai khit uh ciangin tanaute le meltheihte lak a zong uh hi. ⁴⁵ A muh loh uh ciangin Jerusalem khuapi ah kilehkik in a va zong uh hi. ⁴⁶ Ni thum khit ciangin biakinnpi huang sungah siapite thugen ngai in thu dongin amaute laizang ah tu‑a om a mu uh hi. ⁴⁷ Ama thugen a za mi khempeuh in a thutheihna le a dawnkiknate lamdang a sa mahmah uh hi. ⁴⁸ A nu le a pa in amah a muh uh ciangin lamdangsa uha a nu in, “Ka ta aw, banghang in hong hi ci bawl peuhmah na hi hiam? En in, na pa tawh lunghimawh mahmah in kong zong uh hi,” a ci hi. ⁴⁹ Tua ciangin amah in amaute gel kiangah, “Banghang in hong zong na hi uh hiam? Ka Pa na a sem ding ka hih lam thei lo na hi uh hiam?” a ci hi. ⁵⁰ Ahih hangin ama gennop thu a thei kei uh hi. ⁵¹ Zeisu in amaute tawh Nazareth khua ah ciahsuk khawm a, amaute thu a mang hi. A nu Mary in hih thu khempeuh a lungsim sungah a ciamteh hi. ⁵² Zeisu a lungpilna le a pumpi khang semsem a, Pasian maipha le mite maipha a ngah hi.

¹ Tu in Tiberius Caesar a maan zawh kum sawm le kum nga a cin kumin Pontius Pilate in Judea gam mangpipa ahi hi. Herod in Galilee gam uk mangpa hi a, a naupa Philip in Iturea gam le Trachonitis gam uk mangpa hi in, Lysanias in Abilene gam uk mangpa ahi hi. ² Annas le Caiaphas in Siampi Ukte ahih laitak un gamlak a om Zacharias tapa John tungah Pasian thu a tung hi. ³ Jordan gun kuam mun khempeuh ah John vak kawikawi a, mawhmai nadingin kisikkikna tawh kisai tui kiphumna thu a hilh hi. ⁴ Hih in kamsangpa Isaiah laibu sunga kigelhsa thu ahi hi. Tualai ah, “Gamlak a kikopa awging in, ‘Topa pai nading lam na sial unla, A lampite na tangsak un. ⁵ Muallian mualneu khempeuh kitamsak in, Mualkuam khempeuh kivuk dim ding hi. A komna munte kivukdim in, Lamkawite kitangsak dinga, ⁶ Mi khempeuh in Pasian hotkhiatna a mu ding uh hi,’ ” ci in a kigelh hi. ⁷ Tua ciangin John in tui kiphumsak dingin ama kianga hong pai mihonpite kiangah, “A gupha gul suante aw! A hong tung ding hehna pan a taikhia dingin kua in hong hilhkhol ahi hiam? ⁸ Tua ahih manin kisikkikna tawh a kituak gah na gah un. Note lungsim sungah, ‘Abraham ka pa uh hi,’ ci in suang kei un. Ken kong cih in ah Pasian in hih suangte nangawn Abraham tate a suaksak thei hi. ⁹ Tu mahmah in zong singphung tengah hei kinga zo hi. Tua ahih manin gahhoih a gahlo singkung khempeuh kiphuk in meikuang sungah kikhul ding hi,” a ci hi. ¹⁰ Tua ciangin mihonpite in ama kiangah, “Tua ahih leh bangci gamtat ding ka hi uh hiam?” ci in a dong uh hi. ¹¹ Amah in amaute kiangah, “Puanak nih a nei mi in a neilote hawm hen. Annek ding a nei mi in a neilo mi hawm hen,” a ci hi. ¹² Tua ciangin siahdongte zong tui kiphumsak dingin hong pai uh a, “Sia aw, bangci gamtat ding ka hi uh hiam?” ci in a dong uh hi. ¹³ Amah in amaute kiangah, “Na don ding zahval uh siah dong kei un,” a ci hi. ¹⁴ Tua mah bangin galkapte in zong ama kiangah, “Kote zong bangci gamtat ding ka hi uh hiam?” ci in a dong uh hi. Amah in amaute kiangah, “Zawhthawh thu tawh kuama neihsa laksak kei un. A maanlopi in kuamah mawhsak kei un. Khasum na ngah zah uh tawh lungkim un,” a ci hi. ¹⁵ Tu in mipite in John pen Khazih ahi kha ding hiam ci in a ngaihsut laitak un, ¹⁶ John in amaute khempeuh kiangah, “Ken note tui tawh kong phum hi. Ahih hangin kei sanga a vanglian zaw Khat a hong pai ding hi. Ama khedapkhau sut ding nangawn in ka kilawm kei hi. Amah in Kha Siangtho le mei tawh note hong phum ding hi. ¹⁷ Amah in buhcilna phuala anhumte a hahsiang sitset dingin a khutah ansi zapna a tawizo hi. Antak teng ama ansal sungah sungin ansite ahih leh a mit ngeilo meikuang sungah a khul ding hi,” a ci hi. ¹⁸ Thu dang tampi tawh zong mite hanthawn in thu a hilh hi. ¹⁹ Gam uk mangpa Herod in a sanggampa Philip zi Herodias a suhna le a gamtat siatna teng hangin John in amah a taii hi. ²⁰ Herod in hih mawhna teng a bawl banah John zong thong sungah a khum lai hi. ²¹ Tu in John in mi khempeuh tui a phum khit ciangin Zeisu zong tui a phum hi. Zeisu in thu a nget laitak in van kihong a, ²² Kha Siangtho in vakhu tawh a kibang pumpi tawh ama tungah hong kumsuk hi. Tua ciangin vantung panin aw khat hong ging a, “Nang in ka lung hong damsak mahmah ka it ka Tapa na hi hi,” a ci hi. ²³ Tu in Zeisu kum 30 bang a phak ciangin nasep a kipan hi. Mite in amah Joseph tapa hi a ci uh hi. Joseph in Heli tapa, ²⁴ Heli in Matthat tapa, Matthat in Levi tapa, Levi in Melchi tapa, Melchi in Janna tapa, Janna in Joseph tapa, ²⁵ Joseph in Mattathiah tapa, Mattathiah in Amos tapa, Amos in Nahum tapa, Nahum in Esli tapa, Esli in Naggai tapa, ²⁶ Naggai in Maath tapa, Maath in Mattathiah tapa, Mattathiah in Semei tapa, Semei in Joseph tapa, Joseph in Judah tapa, ²⁷ Judah in Joannas tapa, Joannas in Rhesa tapa, Rhesa in Zerubbabel tapa, Zerubbabel in Shealtiel tapa, Shealtiel in Neri tapa, ²⁸ Neri in Melchi tapa, Melchi in Addi tapa, Addi in Cosam tapa, Cosam in Elmodam tapa, Elmodam in Er tapa, ²⁹ Er in Jose tapa, Jose in Eliezer tapa, Eliezer in Jorim tapa, Jorim in Matthat tapa, Matthat in Levi tapa, ³⁰ Levi in Simeon tapa, Simeon in Judah tapa, Judah in Joseph tapa, Joseph in Jonan tapa, Jonan in Eliakim tapa, ³¹ Eliakim in Melea tapa, Melea in Menan tapa, Menan in Mattathah tapa, Mattathah in Nathan tapa, Nathan in David tapa, ³² David in Jesse tapa, Jesse in Obed tapa, Obed in Boaz tapa, Boaz in Salmon tapa, Salmon in Nahshon tapa, ³³ Nahshon in Amminadab tapa, Amminadab in Ram tapa, Ram in Hezron tapa, Hezron in Perez tapa, Perez in Judah tapa, ³⁴ Judah in Jacob tapa, Jacob in Isaac tapa, Isaac in Abraham tapa, Abraham in Terah tapa, Terah in Nahor tapa, ³⁵ Nahor in Serug tapa, Serug in Reu tapa, Reu in Peleg tapa, Peleg in Eber tapa, Eber in Shelah tapa, ³⁶ Shelah in Cainan tapa, Cainan in Arphaxad tapa, Arphaxad in Shem tapa, Shem in Noah tapa, Noah in Lamech tapa, ³⁷ Lamech in Methuselah tapa, Methuselah in Enoch tapa, Enoch in Jared tapa, Jared in Mahalalel tapa, Mahalalel in Cainan tapa, ³⁸ Cainan in Enosh tapa, Enosh in Seth tapa, Seth in Adam tapa, Adam in Pasian tapa ahi hi.

¹ Tua ciangin Zeisu in Kha Siangtho tawh kidimsa in Jordan gun pan hong ciahkik a, Kha in amah gamlak ah a paipih hi. ² Dawimangpa in ni 40 sung amah ze‑et a, tua sungin bangmah ne lo ahih manin ni 40 a cin ciangin a gil a kial hi. ³ Dawimangpa in ama kiangah, “Pasian Tapa na hih leh hih suangte anlum a suah nadingin thupia in,” a ci hi. ⁴ Zeisu in ama kiangah, “ ‘Mihing in an bek tawh a nungta hilo in Pasian kam panin a pusuak thu khempeuh tawh a nuntak ding ahi hi,’ ci in Lai Siangtho sungah a kigelh hi,” a ci hi. ⁵ Tua ciangin Dawimangpa in amah mualsang khat tungah paipih a, leitung gam khempeuh thakhat in a lak hi. ⁶ Tua ciangin Dawimangpa in ama kiangah, “Hih gamte tunga thuneihna le hih gamte thupina khempeuh nang kong pia ding hi. Banghang hiam cihleh hite khempeuh kei hong kipia khin ahih manin ka piak nop peuhpeuh ka pia thei hi. ⁷ Tua ahih manin bokin hong bia leteh hiteng khempeuh nangma aa a suak ding hi,” a ci hi. ⁸ Tua ciangin Zeisu in ama kiangah, “Satan aw, ka nungah kihemkhia in! ‘Topa na Pasian na bia dinga ama na bek na sem ding hi,’ ci in Lai Siangtho sungah kigelh hi,” ci in a dawng hi. ⁹ Tua ciangin Dawimangpa in Jerusalem khuapi ah amah paipih in biakinnpi khumdawn ah koih a, “Pasian Tapa na hih leh hih panin tuaksuk in. ¹⁰ Banghang hiam cihleh, ‘Amah in nang hong kem dingin, Ama vantungmite thupia dinga, ¹¹ Na khe le suang a kitah khakloh nadingin, A khut uh tawh nang a hong dom ding uh hi,’ ci in Lai Siangtho sungah kigelh hi,” a ci hi. ¹² Zeisu in, “ ‘Topa na Pasian na ze‑et kei ding hi,’ ci in kigen hi,”ci in a dawng hi. ¹³ Tu in Dawimangpa in a ze‑et nading khempeuh a zawh khit ciangin hun hoih dang ngakin a paikhiat san hi. ¹⁴ Tua ciangin Kha vangliatna tawh Galilee gamah Zeisu ciahkik a, tua gamkuam khempeuh ah ama thu a thang hi. ¹⁵ Amah in amaute kikhopna innte ah thuhilh a, mi khempeuh in amah a phat uh hi. ¹⁶ Tua khit ciangin ama khankhiatna Nazareth khua ah Zeisu a pai hi. Ama zatngei bangin Sabbath ni in kikhopna inn ah lut a, Lai Siangtho sim dingin a dingto hi. ¹⁷ Tua ciangin kamsangpa Isaiah laibu a pia uh hi. Amah in laibu a lem ciangin hih bangin a kigelhna mun a mu hi. ¹⁸ “Topa Kha in keima tungah a om hi. Banghang hiam cihleh, Mizawngte tungah lungdamna thu a tangko dingin, Amah in sathau hong nilhzo hi. Lungsim kitamkhamte a damsak ding, A kiman mite a kikhahkhiatna thu a hilh ding, Mittawte khua a musak ding, Netcipna a thuakte a suaktasak ding le ¹⁹ Topa hong san hun hong tungta hi cih thu a tangko dingin Amah in kei a hong sawlzo hi,” a ci hi. ²⁰ Tua khit ciangin amah in laibu khup in kikhopna inn ukpa a piak khit ciangin a tukik hi. Kikhopna inn sunga om mite mittang khempeuh in ama tungah a tu hi. ²¹ Amah in amaute kiangah, “Hih Lai Siangtho in a gen thu, tuni in note zak mahmah in a tangtung zo hi,” a ci hi. ²² Mi khempeuh in amah phat uha ama kam sung pana a gingkhia thute zong khum mahmah ahih manin lamdang a sa uh hi. Ahi zongin, “Hihpa in Joseph tapa hilo ahi hiam?” a ci uh hi. ²³ Tua ciangin amah in amaute kiangah, “Note in, ‘Siavuanpa aw, nang le nang kidamsak in,’ cih paunak tawh hong kapin, ‘Capernaum khua‑a na sepsa thu ka zak bangbang un, nangma khua hi lai ah zong tua bangin hong sem in,’ nong ci ding uh hi,” a ci hi. ²⁴ Tua ciangin amah in, “Aman takpi kong cih in ah, ama khua‑a kisang kamsang khat beek a om kei hi. ²⁵ Aman takpi kong cih in ah, Elijah hun lai in kum thum le a lang sung guahzu loin gam sung khempeuh ah kialpi a tun laitak in Israel mite lakah meigong tampi a om hangin, ²⁶ Sidon gam Zarephath khua‑a om meigongnu simloh meigong dangte kiangah Elijah a kisawl kei hi. ²⁷ Kamsangpa Elisha hun lai in zong Israel mite lakah miphak tampi a om hangin Syria gam mi Naaman simloh phak natna a kidamsak khat beek a om kei hi,” a ci hi. ²⁸ Kikhopna inn sunga om mi khempeuh in hih thute a zak uh ciangin a heh mahmah uh hi. ²⁹ Amaute dingkhia in khua pua lamah Zeisu kaikhia uha tua khuapi kilamna mualtung kensang dawn panin sawnkhiat ding a sawm uh hi. ³⁰ Ahih hangin amaute lak panin amah a gelkhia hi. ³¹ Tua khit ciangin Galilee gam Capernaum khua ah paisuk a, Sabbath ni in thu a hilh hi. ³² Amah in thuneihna tawh thuhilh ahih manin amaute in lamdang a sa mahmah uh hi. ³³ Tua kikhopna inn sungah dawigilo a lut mi khat a om hi. ³⁴ Tua pa in, “Nazareth khua mi Zeisu aw, kote hong hi ci omsak lel in! Nang tawh bang kisai ka hi uh hiam? Kote a susia dinga hong pai na hi hiam? Kua na hi hiam cih kong thei uha Pasian mi Siangthopa na hi hi,” ci in nakpi in a kiko hi. ³⁵ Ahih hangin Zeisu in, “Pau kei inla, ama sung pan paikhia in,” ci in a taii hi. Tua dawi in mite laizang ah tua pa sawnpai a, liamsak loin a paikhia hi. ³⁶ Tua ciangin amaute khempeuh in lamdangsa mahmah uh a, “Hih kammal in bangci bang ahi hiam? Thuneihna le vangliatna tawh dawigilote thu a piak ciangin a paikhia hi,” a kici uh hi. ³⁷ Ama thu tua kima om gam khempeuh ah a thang hi. ³⁸ Tu in kikhopna inn panin Zeisu paikhia a, Simon inn ah a lut hi. Simon sunghnu nattun in a cisa a, gim mahmah ahih manin a damsak nadingin a ngen uh hi. ³⁹ Tua nu gei ah Zeisu dingin cisa natna a taii ciangin a natna a dam hi. Tua ciangin amah thokhia pahin amaute zin a do hi. ⁴⁰ Nitum khit ciangin natna tuamtuam a vei cina khempeuh ama kiangah hong puak uh a, amaute khatciat tungah a khut nga in a damsak hi. ⁴¹ Dawite in zong, “Pasian Tapa Khazih na hi hi!” ci in kiko in mi tampi sung pan a paikhia uh hi. Dawite in Khazih ahihlam thei uh ahih manin amah in amaute taii in kam khat beek a pausak kei hi. ⁴² Khua a vak ciangin amah tua mun panin gamdaihna mun khatah a pai hi. Mihonpite in amah zong uha a kiang a tun uh ciangin amaute a paisan loh nadingin a kho uh hi. ⁴³ Ahih hangin amah in amaute kiangah, “Pasian kumpigam thu khuadangte ah zong ka tangko loh phamawh hi. Banghang hiam cihleh tua na a sem dingin a hong kisawl ahi hi,” a ci hi. ⁴⁴ Tua bangin Galilee gam sunga kikhopna innteng ah thu a hilh kawikawi hi.

¹ Gennesaret tuili gei ah Zeisu a din laitak in Pasian thu ngai dinga hong kikhawm mihonpi in amah a nehcip gawp uh hi. ² Amah in ngabengte ngen sawp dinga a paikal un tuili gei‑a om gunkuang nih a mu hi. ³ Tua gunkuang nihte lak panin Simon gunkuang ah amah kah in lei tawh tawmkha gunkuang a kihalsak nadingin a ngen hi. Tua khit ciangin gunkuang tungah tu in mihonpite thu a hilh hi. ⁴ Thu a gen khit ciangin Simon kiangah, “Tui thukna lamah gunkuang khin inla na ngen khuh in,” a ci hi. ⁵ Ahih hangin Simon in, “Sia aw, zan thapai hanciamtak in ka khuh uh hangin khat beek ka man kei uh hi. Ahi zongin na cih bangin ka khuh ding hi,” ci in a dawng hi. ⁶ Tua bangin ngen a khuh uh leh ngasa tampi khuh kha uh a, a ngen uh a kikek hi. ⁷ Tua ciangin gunkuang dang khat a om a lawmte hong pai in a huh nading uh khutvan in sam uh a, a lawmte zong hong pai uh hi. Gunkuang nih a dim tuakin ngasa guang uh ahih manin gunkuangte a tum dektak hi. ⁸ Simon Peter in hih thupiang a muh ciangin Zeisu khephung ah kunsuk a, “Topa aw, mawhnei mi ka hih manin ka kiang panin kihemkhia in!” a ci hi. ⁹ Banghang hiam cihleh amah le a lawmte khempeuh in a ngasa mat uh lamdang a sa mahmah uh hi. ¹⁰ Simon lawmte ahi Zebedee tate James le John in zong lamdang a sa mahmah uh hi. Tua ciangin Zeisu in Simon kiangah, “Lau kei in. Tu a kipan in mite na man ta ding hi,” a ci hi. ¹¹ A gunkuangte uh tuigei a tut khit uh ciangin na khempeuh nusia in ama nung a zui uh hi. ¹² Khua khatah Zeisu a om laitak in a pumtang a phak mi khatin amah a muh ciangin boksuk a, “Topa aw, hong damsak nuam lecin nong damsak thei hi,” ci in nakpitak in a thum hi. ¹³ Tua ciangin, Zeisu in a khut zanin amah lawng a, “Kong damsak nuam hi, damta in,” ci in thu a pia hi. Tua ciangin tua pa phaknatna a dam pah hi. ¹⁴ Tua ciangin Zeisu in tua thu kuama kiangah a gen loh nadingin thupia a, “Siampipa kiangah va kilak inla, na damna hangin Moses thupiak bangin biakpiakna va nei in. Tua in amau aa dingin teci ahi ding hi,” a ci hi. ¹⁵ Ahih hangin, ama thu kizel semsem a, a thugen ngai ding le a natnate uh ama damsak ding ut in mihonpi a hong kikhawm uh hi. ¹⁶ Amah ahih leh gamlak ah paikhia in thu a ngen zelzel hi. ¹⁷ Ni khat Zeisu thuhilh a a om laitak in Jerusalem khuapi a kipan Galilee gam le Judea gam khempeuh panin a hong kisutuah Pharisee pawlte le thukhamhilh siate ama kiangah a tu uh hi. Amaute a cidam nadingun tualai ah Topa vangliatna a om hi. ¹⁸ Tua ciangin en in, mi pawlkhat in pumzaw pasal khat a lupna tawh zawng in a hong paipih uh hi. Inn sungah lutpih in Zeisu mai ah a ngakh theih nadingun a hanciam uh hi. ¹⁹ Mihonpi in a pai nading uh lamkhak ahih manin lutpih theilo uh a, innkhum tungah a kahto uh hi. Innkhum dawn vangsak in tua pa a lupna tawh khaisuk uh a, mihonpi laizang Zeisu mai ah a nga uh hi. ²⁰ Zeisu in amaute upna a muh ciangin cinapa kiangah, “Lawm aw, na mawhnate kimaisak zo hi,” a ci hi. ²¹ Tua ciangin thukhamhilh siate le Pharisee pawlte in, “Pasian tunga a pausia hihpa kua ahi hiam? Pasian longal kua in mawhna maisak thei ahi hiam?” ci in a ngaihsun uh hi. ²² Ahih hangin Zeisu in amaute ngaihsutna thei ahih manin, “Banghang in tua bangin ngaihsun na hi uh hiam? ²³ ‘Na mawhnate kimaisak zo hi,’ cih ding le, ‘Tho inla lampai in,’ cih ding koi baih zaw ahi hiam? ²⁴ Ahi zongin Mihing Tapa in leitung ah mawhna maisak theihna thuneihna a neih lam na theih nadingun,” a cih khit ciangin pumzawpa kiangah, “Tho in, na lupna pua inla na inn ah ciah in kong ci hi,” a ci hi. ²⁵ Amaute mai ah tua pa tho pah a, a lupna pua in Pasian phat kawmsa in a inn ah a ciah hi. ²⁶ Amaute khempeuh in lamdangsa mahmah uh a, Pasian a phat uh hi. Amaute lau mahmah uh a, “Tuni‑a i muh nate lamdang thei mahmah hi,” a ci uh hi. ²⁷ Hih thuteng khit ciangin Zeisu paikhia a, siahdonna buukah tu a om Levi kici siahdongpa khat a muh ciangin tuapa kiangah, “Hong zui in,” a ci hi. ²⁸ Amah dingkhia a, a na khempeuh nusia in Zeisu a zui hi. ²⁹ Tua ciangin Levi in a inn ah Zeisu annekpihna thupitak in a bawl hi. Siahdongte honpi khat le midangte in zong amaute tawh ankuang a umkhawm uh hi. ³⁰ Ahih hangin thukhamhilh siate le Pharisee pawlte in, “Banghang in siahdongte le mimawhte tawh nekhawm dawnkhawm na hi uh hiam?” ci in nungzuite a phunsan uh hi. ³¹ Zeisu in amaute kiangah, “Cidamte aa dingin siavuan kisam lo a, cinate aa ding bekin a kisam hi. ³² Midikte sam dinga hong pai hilo in mimawhte a kisikkik nadingun a sam dinga hong pai ka hi hi,” ci in a dawng hi. ³³ Tua ciangin amaute in Zeisu kiangah, “John nungzuite in antang in thu a ngen zelzel uh hi. Pharisee pawlte nungzuite in zong tua bangmah in ahih uh hi. Banghang in na nungzuite in nene dawndawn uh ahi hiam?” a ci uh hi. ³⁴ Tua ciangin amah in amaute kiangah, “Zineipa in mopawi sim a lawmte a ompih laitak in, amaute antangsak thei ding ahi hiam? ³⁵ Ahih hangin amaute kiang pan zineipa a kilakkhiat hun hong tung dinga, tua hun ciangin an a tang ding uh hi,” a ci hi. ³⁶ Tua khit ciangin Zeisu in thugentehna khat a gen in ah, “Kuamah in puan thak tawh puan lui a phop kei hi. Tua bangin kiphop leh puan thak in puan lui a kaikek ding hi. Puan thak le puan lui a kituak thei kei hi. ³⁷ Kuamah in savun um lui sungah lenggahtui thak a thun kei hi. Kithun leh lenggahtui thak in savun um phukham in lenggahtui teng luangkhia dinga, savun um zong a kitam ding hi. ³⁸ Ahih hangin lenggahtui thak pen savun um thak sung mah ah thun ding ahi hi. Tua hi leh a nihin a bitkhawm ding hi. ³⁹ Lenggahtui khauh a dawn khin mi peuhmah in lenggahtui thak a dawn pah nuam kei hi. Banghang hiam cihleh amah in, ‘Lenggahtui a khauhpen lim a sa zaw hi,’ ci hi,” a ci hi.

¹ Sabbath masa pen khit a nihna Sabbath ni in buhlei khat kantan a Zeisu a pai laitak in a nungzuite in buhvuite zut uha a khut sungah nuai in a bak uh hi. ² Pharisee pawlte pawlkhat in amaute kiangah, “Sabbath ni in sep dinga thukham in a phalloh nasep banghang in sem na hi uh hiam?” a ci uh hi. ³ Tua ciangin Zeisu in, “David in a pawlte tawh a gilkial laitak un, ⁴ Pasian inn sungah lutin siampite longal midang in a nek theih ding a hilo Ompihna Anlumte la in ne a, a pawlte zong pia hi cih thu sim ngeilo na hi uh hiam?” a ci hi. ⁵ Tua khit ciangin Zeisu in amaute kiangah, “Mihing Tapa in Sabbath a Ukpa zong ahi hi,” a ci hi. ⁶ A dang Sabbath ni khat in kikhopna inn sungah Zeisu lutin thu a hilh hi. Tualai ah a taklam khut a keugaw pasal khat a om hi. ⁷ Thukhamhilh siate le Pharisee pawlte in Sabbath ni peuhmah a Zeisu in cina a damsak leh a mawhmat dingin a encik gige uh hi. ⁸ Ahih hangin Zeisu in amaute ngaihsutna thei ahih manin a khut a sipa kiangah, “Tho inla, a laizang ah hong ding in,” a cih ciangin amah tho in a ding hi. ⁹ Tua khit ciangin Zeisu in amaute kiangah, “Thu khat kong dong ding hi Sabbath ni in a pha bawl ding le a sia bawl ding, nuntakna gup ding le thah ding koi pen thukham tawh kituak zaw ahi hiam?” a ci hi. ¹⁰ Amah in amaute khempeuh a gualet khit ciangin tua pa kiangah, “Na khut zankhia in,” a ci hi. Tua pa in a khut a zan leh a lang khat lam mah bangin dam a, a ngeina a bangkik hi. ¹¹ Ahih hangin amaute hehlua uh ahih manin, “Zeisu bang cih ding i hi hiam?” ci in a kikum uh hi. ¹² Tua hun lai ni khat, Zeisu thungen dingin mual tungah kahto a, zan tawntung Pasian kiangah thu a ngen hi. ¹³ Khua a vak ciangin amah in a nungzuite a kiangah sam a, amaute lak panin sawm le nih teelkhia in sawltakte ci in min a pia hi. ¹⁴ Tua sawm le nihte in Peter ci a, min a phuahsakpa Simon le a sanggampa Andrew, James le John, Philip le Bartholomew, ¹⁵ Matthew le Thomas, Alphaeus tapa James le Zealot a kici Simon, ¹⁶ James tapa Judah le a lehhekpa a suak Judas Iscariot‑te ahi uh hi. ¹⁷ Tua khit ciangin a nungzuite tawh Zeisu kumsuk in munzang khatah a ding uh hi. Tualai ah a nungzui honkhat Judea gam khempeuh le Jerusalem khuapi a kipan tuipi gei Tyre le Sidon gamte panin ama thugen ngai ding le damna ngah nuam in a hong pai mihonpite a na om uh hi. ¹⁸ Dawigilote in a bawlsiat mite zong hong paipih uh a, amah in a damsak hi. ¹⁹ Ama tung panin a vangliatna paikhia in cina khempeuh damsak ahih manin mihonpi in amah a lawnkhak nading a hanciam uh hi. ²⁰ Tua ciangin amah in a nungzuite en in a gen inah, “A genthei note in mihampha na hi uh hi. Banghang hiam cihleh Pasian kumpigam in note aa ahi hi. ²¹ Tu laitak a a gilkial note in mihampha na hi uh hi. Banghang hiam cihleh na gil uh a vah ding hi. Tu laitak a a kap note in mihampha na hi uh hi. Banghang hiam cihleh na nui ding uh hi. ²² Mihing Tapa hangin mite in, Note hong mudah in a hong hawlkhiat uh ciangin, Hong simmawh a migilote bangin a hong gensiat uh ciangin, mihampha na hi uh hi. ²³ Tua bang hun ciangin lungdam unla, Kipak in diang un. Banghang hiam cihleh vantung ah thaman tampi na ngah ding uh hi. A pu a pate un zong tua mah bangin kamsangte a bawl uh hi. ²⁴ No mihaute in gimna na thuak ding uh hi! Banghang hiam cihleh nopsakna na ngah khinzo uh hi. ²⁵ No a gilvahte in gimna na thuak ding uh hi! Banghang hiam cihleh na gil uh a kial ding hi. Tu laitak a a nui note in gimna na thuak ding uh hi! Banghang hiam cihleh kapin na tau ding uh hi. ²⁶ Mi khempeuh in a hong phat uh ciangin gimna na thuak ding uh hi! Banghang hiam cihleh a pu a pate un zong kamsangzuaute tua mah bangin a phat uh hi. ²⁷ “Ahih hangin ka thugen a za note kianga kong gen in ah na galte uh na it un. Hong mudahte tungah thupha na bawl un. ²⁸ Hong samsiate thupha na pia un. Hong khelbawl mite aa dingin thu na ngetsak un. ²⁹ Na pang langkhat a hong kibetsak leh a langlam zong na dawh lai un. Na puantungsilh a hong kilaksak leh na puansungsilh zong na it kei un. ³⁰ A hong ngen mi peuhpeuh na pia un. Na vante uh hong kilaksak leh ngenkik kei un. ³¹ Note tunga hong kibawl ding na deih bangun midangte tungah na bawl un. ³² “No a hong it mite bek it le uh teh bang phattuamna ngah ding na hi uh hiam? Banghang hiam cihleh mimawhte in zong amau a itte a it uh hi. ³³ Thupha hong bawl mite tung bekah thupha bawl le uh teh bang phattuamna ngah ding na hi uh hiam? Banghang hiam cihleh mimawhte in zong tua bangin ahih uh hi. ³⁴ Hong lohkik zo dinga na up mite bek uh leitawi pia le uh teh bang phattuamna ngah ding na hi uh hiam? Banghang hiam cihleh mimawhte in zong khat le khat a piak zahzah mah uh ngahkik ding lamen in a kileitawisak uh hi. ³⁵ Note na hih uh leh na galte uh it unla, amaute tungah thupha bawl un. Ngahkik ding lamen loin leitawisak un. Tua hi leh thaman tampi na ngah ding uh a, Sangpenpa tate na hi ding uh hi. Banghang hiam cihleh lungdamna a theilo mite le migilote tungah amah a migi hi. ³⁶ Tua ahih ciangin na Pa un hehpihna a neih bangin note in zong hehpihna na nei un. ³⁷ “Midangte tungah thu na khen kei un. Tua hi leh midangte in zong note tungah thu a hong khen kei ding uh hi. Midangte na mawhsak kei un. Tua hi leh note zong kuamah in a hong mawhsak kei ding hi. Midangte mawhna na maisak un. Tua hi leh note mawhna zong a hong kimaisak ding hi. ³⁸ Pia un. Tua hi leh limtak a a kiteh, a kihenhen, a kitattat, a dimlet in note ang sungah hong kisung ding hi. Banghang hiam cihleh note zat tehna tektek mah tawh note aa ding a hong kitehsakkik ding hi,” a ci hi. ³⁹ Tua khit ciangin gentehna dang khat a gen in ah, “Mittaw in mittaw lam hilh thei ding ahi hiam? A nihun guam sungah kiakhawm ding uh hilo ahi hiam? ⁴⁰ Nungzuipa in a siapa sangin lian zawlo hi. Ahi zongin hoihtak a a kipantah khin mi peuhmah a siapa tawh a kibang ding hi. ⁴¹ “Nangma mita singluang phawk lopi in na lawmpa mita ninthem banghang in muhsak na hi hiam? ⁴² Nangma mita singluangpi mu loin banghang in na lawmpa kiangah, ‘Lawm aw, na mita ninthem kong lakkhiatsak ding hi,’ ci na hi hiam? A kineihkhempa aw, nangma mita singluang lakhia masa leteh na lawmpa mita ninthem telmuh in na lakkhiatsak thei pan ding hi. ⁴³ “Banghang hiam cihleh singkung hoih in a gah hoihlo a gah kei hi. Singkung hoihlo in zong gah hoih a gah kei hi. ⁴⁴ Singkung peuhmah a gah panin a kithei hi. Lingkung ah theigah a kilo kei hi. Thangling kung panin lenggah a kilo kei hi. ⁴⁵ Mihoih in a lungsim sungah thuhoih khol a, thuhoih mah a genkhia hi. Migilo in a lungsim sungah thusia khol a, thusia mah a genkhia hi. Banghang hiam cihleh lungsim sunga a dimlet thute kam tawh a kigenkhia ahi hi. ⁴⁶ “Kong gen thute zui lopi in banghang in, ‘Topa aw, Topa aw,’ hong ci na hi uh hiam? ⁴⁷ Ka kiangah hong pai in ka thugente za a, a zui mi in bang tawh kibang hiam cih kong lak ding hi. ⁴⁸ Amah in lei thukpi to in suangpi tungah khuambul phut a, inn a lam mipa tawh a kibang hi. Tui hong khangin tuihual in khauhtak in tua inn a nawk hangin suangpi tungah kilam ahih manin a lok zo kei hi. ⁴⁹ Ahih hangin ka thugente za napi in a zuilo mi ahih leh bulkip om lo leitham tunga inn lampa tawh a kibang hi. Tuihual in khauhtak in tua inn a nawk ciangin puk pah a, a kisia zan ngingei hi,” a ci hi.

¹ Tu in Zeisu in tua mite zakin hih thuteng a gen khit ciangin Capernaum khua ah a lut hi. ² Tu in galkap 100 ukpa in a it mahmah a nasempa khat cina in si dektak in a om hi. ³ Amah in Zeisu thu a zak ciangin Zeisu kiangah Judah mite makaite sawlin hong pai a, a nasempa a damsak nading a ngetsak hi. ⁴ Amaute in Zeisu kianga tun uh ciangin nakpitak in thum in, “Hih mipa tungah na bawl ding a kilawm hi. ⁵ Banghang hiam cihleh amah in i minam hong it in kikhopna inn khat hong lamsak hi,” a ci uh hi. ⁶ Tua ciangin Zeisu in amaute tawh paikhawm a, galkap 100 ukpa inn a tunkuan uh ciangin amah in Zeisu kiangah a lawmte sawl a, hih bangin a gensak hi, “Topa aw, ka inn sunga nong lut ding kilawm lo ka hih manin hong kigimsak dah in. ⁷ Nangma kianga kong pai ding zong kilawm ka kisa tuan kei hi. Na kam tawh thu pia leteh ka nasempa a dam ding hi. ⁸ Banghang hiam cihleh kei zong mi khutnuai‑a om khat ka hi a, ka khutnuai ah zong galkapte a om uh hi. Amaute khat kiangah, ‘Pai in,’ ka cih ciangin pai a, a dang khat kiangah, ‘Hong pai in,’ ka cih ciangin a hong pai hi. Ka nasempa kiangah, ‘Hih sem in,’ ka cih ciangin a sem hi,” a cisak hi. ⁹ Zeisu in hih thu a zak ciangin lamdangsa a, a kinunghei khit ciangin amah a zui mihonpite kiangah, “Ken kong cih in ah Israel mite sung nangawn ah hi zah a a lian upna ka mu kei hi,” a ci hi. ¹⁰ A kisawl mite inn a tunkik uh ciangin a cina nasempa cidam in a om a mu uh hi. ¹¹ A zingciang in Nain kici khua khatah Zeisu pai a, a nungzuite tampi le mihonpite in a zui uh hi. ¹² Tua khua kulh kongpi a tunkuan uh ciangin misi khat a hong kizawngkhia hi. Tua misipa nu meigong hi a, amah bek tapa a neih ahi hi. Khuasung mi tampi in tua nu a zui uh hi. ¹³ Topa in tua nu a muh ciangin hehpihhuai sa a, ama kiangah, “Kap kei in,” a ci hi. ¹⁴ Amah in misi zawnna tal va naih a, a lawn ciangin misi zawngte a dinsa in a khawl uh hi. Amah in, “Tangvalpa aw, tho in kong ci hi,” a ci hi. ¹⁵ Tua ciangin misipa hong tho in a pau hi. Zeisu in tua pa a nu khutah a ap hi. ¹⁶ Tua ciangin mi khempeuh lau mahmah uh a, “Eite lakah kamsang lian mahmah khat hong piang zo a, Pasian in a mite hong veh zo hi,” ci in Pasian a phat uh hi. ¹⁷ Ama thu Judea gam khempeuh le a kim a pam gamteng ah a kizel hi. ¹⁸ Tua ciangin John nungzuite in hih thu khempeuh ama kiangah a ko uh hi. ¹⁹ John in a nungzuite nih a kiangah samin Zeisu kiangah paisak a, “Hong pai ding pa mah na hi hiam? Ahih keileh a dang khat ka lamen lai ding uh hiam va ci un,” ci in a sawl hi. ²⁰ Amaute Zeisu kianga tun uh ciangin, “Tuiphumpa John in, ‘Hong pai ding pa mah na hi hiam? Ahih keileh a dang khat ka lamen lai ding uh hiam?’ ci in hong dongsak hi,” a ci uh hi. ²¹ Tua hun pen Zeisu in a zawngkhal mi tampi, natna nei mi tampi le dawilut mi tampi damsak in mittaw tampi zong khua a muhsak laitak ahi hi. ²² Zeisu in tua mi nihte kiangah, “Pai unla, na muhsa na zaksa teng uh John kiangah va gen un. Mittawte in khuamu in khebaite lam a pai uh hi. Miphakte dam uh a, bengngongte in khua a za uh hi. Misite thokik in mizawngte tungah lungdamna thu kitangko hi. ²³ Keima hanga a puklo mi in mihampha ahi hi,” ci in a dawng hi. ²⁴ John kamtaite a ciah khit uh ciangin, Zeisu in mihonpite kiangah John thu a gen in ah, “Gamlak ah bang en dinga pai na hi uh hiam? Huih in a mut cianga a kihuang diamdiam pumpeng kung peuh a en dinga pai na hi uh hiam? ²⁵ Ahih keileh puannel niknek a silh mi khat a en dinga pai na hi uh hiam? En un, puanhoih a silh minuamsate kumpi inn sungah a teengte ahi uh hi. ²⁶ Tua ahih leh bang en dinga pai na hi uh hiam? Kamsangpa khat a en dinga pai na hi uh hiam? Hi mah hi. Ken kong cih in ah, kamsang khat sangin a lianzawpa ahi hi. ²⁷ Lai Siangtho ah a kigelh mah bangin, ‘En in, nangma lampi a sialkhol dingin, Na mai ah ka kamtaipa ka sawl hi,’ ci a, a kigelhpa in amah ahi hi. ²⁸ “Banghang hiam cihleh ken kong cih in ah numei sung pana a suak mite lakah Tuiphumpa John sanga a lianzaw kamsang khat beek a om kei hi. Ahih hangin Pasian kumpigam sunga a om a neupenpa in John sangin a lianzaw hi,” a ci hi. ²⁹ Zeisu thugen a za mi khempeuh le siahdongte nangawn in Pasian a thuman hi ci in a sang uh hi. Banghang hiam cihleh amaute in John tuiphumna tawh tui a kiphumsate ahi uh hi. ³⁰ Ahih hangin Pharisee pawlte le thukhamhilh siate in amaute aa dinga Pasian gelna nial in John khutah tui a kiphum nuam kei uh hi. ³¹ Tua ciangin Topa in, “Tulai khang mite bang tawh hong genteh ding ka hi hiam? Amaute bang tawh kibang uh ahi hiam? ³² Sumbuuk ah tu in, ‘Tamngai ka tumtum uh hangin, Na lam tuan kei uh a, Ka tam lawhlawh uh hangin, Na kap nuam kei uh hi,’ ci in khat le khat a kigal awtsan naupangte tawh na kibang uh hi. ³³ “Tuiphumpa John in an nelo, lenggahzu dawn loin a hong pai ciangin, ‘Dawilawm nei hi,’ na ci uh hi. ³⁴ Mihing Tapa hong pai a, anne tuidawn in a om ciangin, ‘En un, anhaipa, zuhaipa, siahdongte le mimawhte lawmpa hi,’ na ci zel uh hi. ³⁵ Ahih hangin ciimna pen gamtatna khempeuh panin a hong kilangkhia hi,” a ci hi. ³⁶ Tua khit ciangin Pharisee pawlte laka khatin an ne dingin Zeisu sam a, amah zong Pharisee pa inn ah pai in ankuang a um hi. ³⁷ Tua laitak in tua khuasung a numei paktat khatin Pharisee pa inn ah Zeisu an ne in om hi cih a theih ciangin sathau namtui suangkang thawl khat tawi in a hong pai hi. ³⁸ Zeisu nunglam a khe kiangah amah dingin kap a, a khitui tawh Zeisu khe a kawtsak hi. A sam tawh a khe nulsak in nam a, sathau namtui tawh a zut hi. ³⁹ Zeisu a sam Pharisee pa in a muh ciangin, “Hihpa in kamsang taktak hi leh amah a lawng hih numei kua hi a, bangci bang mi hiam cih a thei ding hi. Banghang hiam cihleh hih numei in mawhnei mi ahi hi,” ci in a lungsim sungah a ngaihsun hi. ⁴⁰ Tua ciangin Zeisu in Simon kiangah, “Simon aw, thu khat kong gen nuam hi,” a cih ciangin Simon in, “Sia aw, hong gen in,” a ci hi. ⁴¹ Zeisu in, “Mihaupa khat tungah mi nih in sum a ba uh hi. Khatin denariusɠ 500 ba a, a dang khatin 50 a ba hi. ⁴² Ahih hangin a loh nading neilo uh ahih manin a nihtuak un a maisak hi. Amaute gel kua penin sum neipa it zaw ding ahi hiam hong gen in,” a ci hi. ⁴³ Simon in, “A tam zaw a kimaisakpa in it zaw dingin ka um hi,” a cih ciangin Zeisu in, “Na muhna a maan mahmah hi,” a ci hi. ⁴⁴ Tua khit ciangin numeinu lamah kihei in Simon kiangah, “Hih numei na mu hiam? Na inn sungah kong lut a, ahi zongin ka khe sil nading tui nong lui kei hi. Hih numei in ahih leh a khitui tawh ka khe hong silsak a, a sam tawh hong nulsak hi. ⁴⁵ Nang na hih leh nong nam kei hi. Hih numei in ahih leh kong lut khit a kipan ka khe a nam den hi. ⁴⁶ Ka lu sathau nong nilhsak kei hi. Hih numei in ahih leh ka khe sathau namtui a hong nuhsak hi. ⁴⁷ Tua ahih manin ken kong cih in ah, hih numei a mawhna tampi ka maisak manin hong it mahmah hi. A mawhna tawmkha a kimaisak mi in itna tawm bek a nei hi,” a ci hi. ⁴⁸ Tua khit ciangin numeinu kiangah, “Na mawhnate kong maisak zo hi,” a ci hi. ⁴⁹ Tua ciangin ankuang a umpih mite in amaute lungsim sungah, “Mawhna nangawn a maisak hihpa kua hi peuhmah ahi hiam?” a ci uh hi. ⁵⁰ Tua khit ciangin amah in numeinu kiangah, “Na upna in nang hong honzo hi. Lungnuamtak in ciah in,” a ci hi.

¹ Tua khit ciangin Zeisu in Pasian kumpigam tawh kipawl lungdamna thu a tangko ding le a hilh dingin khuapi khuaneu khempeuh ah zin kawikawi a, sawm le nihte in zong a zui uh hi. ² Dawigilote bawlsiatna pan le natna panin damna a ngah numeite in zong a zui uh hi. Tuate lakah dawi sagih a paikhiatna Magdala khua mi Mary zong a kihel hi. ³ Tua thamlo in Herod inn sunga nasemte a ukpa Chuza zi Joanna, Susanna le numei dang tampite in zong a zui uh hi. Hih numeite in amaute neihsa tawh Zeisu a panpihte ahi uh hi. ⁴ Khua khempeuh pana hong pai mihonpite a hong kisuktuah khop uh ciangin Zeisu in thugentehna khat a gen inah, ⁵ “Khaici vawhpa khat khaici vawh dingin a kuankhia hi. Khaici a vawh ciangin pawlkhat lampi ah tu ahih manin mite in tuangawp uh a, vana leng vasate in a nemang uh hi. ⁶ Pawlkhatte suang tungah tu a, leinom om lo ahih manin a po phetin a keutum pah hi. ⁷ Pawlkhatte ling lakah tu a, lingkungte tawh hong khangkhawm uh ahih manin lingkung in a depgawp hi. ⁸ Ahih hangin pawlkhatte leihoihna ah tu a, tuate a hong po ciangin a zah 100 a gah uh hi,” a ci hi. Hih thute a gen khit ciangin, “Zak nading bil a nei mi in za tahen!” ci in a kiko hi. ⁹ Tua ciangin a nungzuite in ama kiangah, “Hih thugentehna a khiatna bang ahi hiam?” ci in a dong uh hi. ¹⁰ Zeisu in, “Pasian kumpigam thusimte note kong theihsak hangin midangte tungah thugentehna tawh thu ka hilh hi. Hih thu in, ‘Amaute in a etet uh hangin mu loin, A zakzak uh hangin a theih loh nading uh ahi hi.’ ¹¹ “Tu in thugentehna a khiatna in hih bang ahi hi. Khaici in Pasian thu ahi hi. ¹² Lampi a a kia khaicite in thu a zak khit uh ciangin um a, hotkhiatna a ngah loh nadingun Dawimangpa pai in amaute lungsim sunga om thute a lakkhiatsak mite ahi uh hi. ¹³ Suang laka a tu khaicite in thu a zak uh ciangin lungdamtak in a san uh hangin zungkha lo uh ahih manin tawlkhat sung bek um uh a, ze‑etna a tun ciangin a pukkik mite ahi uh hi. ¹⁴ Tu in ling laka a tu khaicite in thu a zak khit uh hunkhat khit ciangin nuntak nading lunghihmawhna, hauhnopna le noptat nopnate in depgawp a, picing zo loin a gahlo mite ahi uh hi. ¹⁵ Ahih hangin leihoihna muna a tu khaicite in lungsim gina le lungsim hoih a nei mite ahi uh hi. Amaute in thu a zak uh ciangin lenkip in thuakzawhhatna tawh gah a gahkhia mite ahi uh hi. ¹⁶ “Meivak a kivak ciangin kuamah in seeng a khuh ngei kei hi. Lupna nuai ah zong a koih ngei kei hi. Inn sunga a lut mi khempeuh in meitang a muh theih nadingun meivak tunna tungah a vak uh hi. ¹⁷ Banghang hiam cihleh a kipholak lo ding thusim bangmah om lo a, khuavak in tanin a kithei lo dinga a kiselsim thei bangmah a om kei hi. ¹⁸ Tua ahih manin na zaksa uh thu hoihtak in ngaihsun un. Banghang hiam cihleh a nei mi kipiak beh dinga, a neilo mi tung panin a neih sunsun nangawn a kilakkhiatsak ding hi,” a ci hi. ¹⁹ Tua laitak in a nu le a sanggamte amah tawh kimu nuamin hong pai uh a, mihonpi om ahih manin ama kiangah a pai thei kei uh hi. ²⁰ Tua ciangin mi pawlkhat in, “Na nu le na sanggamte nang tawh kimu nuamin a pualam ah ding uh hi,” a ci uh hi. ²¹ Ahi hangin amah in amaute kiangah, “Pasian thu za a, a zui mi peuhmah ka nu le ka sanggamte ahi uh hi,” ci in a dawng hi. ²² Ni khat, Zeisu in a nungzuite tawh gunkuang khatah tuangin, “Galkhat lamah galkah ni,” ci in a paikhia uh hi. ²³ A pai laitak un Zeisu a ihmu hi. Tua laitak in tuilipi tungah huihpi hong nung a, gunkuang sungah tui dim dekdek ahih manin a lauhuai mahmah hi. ²⁴ Tua ciangin a nungzuite pai in amah phong uh a, “Sia aw, Sia aw, a simang khin ding ka hita uh hi!” a ci uh hi. Amah tho in huihpi le tuihual a taii ciangin tuate khawl in a dai pah dide hi. ²⁵ Tua ciangin amah in amaute kiangah, “Na upna uh koi ah om ahi hiam?” a ci hi. Amaute in lamdangsa in lau mahmah uh a, “Bangci bang mi ahi hiam? Thu a piak ciangin huihpi le tuihual nangawn in a thu a mang uh hi!” a kici uh hi. ²⁶ Tua ciangin Galilee tuilipi gal khat a om Gadara mite teenna kuam lamah gunkuang tuangin a galkah uh hi. ²⁷ Gunkuang tung pan Zeisu a kum khit phetin dawi a lutzawh a sawt khinzo tua khua mi khatin a na dawntuah hi. Tua pa in puan silh loin inn ah zong om lo a, han lak peuh ah a teeng hi. ²⁸ Amah in Zeisu a muh ciangin a mai ah bok a, a aw neih zah tawh kiko in, “A Sangbel Pasian Tapa Zeisu aw, nang tawh ka kisaina bang om ahi hiam? Nong bawlsiat loh nadingin kong thum hi!” a ci hi. ²⁹ Banghang hiam cihleh tua pa sung panin tua dawigilo a taikhiat nading Zeisu in thu a pia zo hi. Tua dawigilo in tua pa man pahpah ahih manin sikkhau tawh khih uh a, a khekol bulh in a cin uh hangin tua a kikhihnate peksat in dawi in gamlak ah a hawlkhia pahpah hi. ³⁰ Zeisu in, “Na min bang ahi hiam?” ci in a dot ciangin, amah in ama sungah dawi tampi om ahih manin, “Legionɠ,” a ci hi. ³¹ Tua dawite in mong neilo kuahawmpi sungah pai dingin thu a piak loh nadingin Zeisu kiangah a thum uh hi. ³² Tua laitak in mual tungah vokhonpi khat gamta in a om hi. Dawite in tua vokte sungah amaute a lutsak nadingin Zeisu kiangah ngen uh a, Zeisu in a phal hi. ³³ Tua ciangin dawite zong tua pa sung panin paikhia in, vokte sungah a lut uh ciangin vokhonpite ken lakah taikeksuk uh a, tuili sung kidenna in a si khin uh hi. ³⁴ Vokcingte in tua thupiang teng a muh uh ciangin tai uh a, khuasung le gam sungteng ah a va gen uh hi. ³⁵ Tua ciangin thupiang teng en dingin khuasung mite hong pai uha Zeisu kianga tun uh ciangin dawite a taikhiatna pa in puansilh in lungsim ngeina pua in Zeisu khe phungah tu‑a a om a muh uh ciangin a lau uh hi. ³⁶ Dawite a lutna pa a damsak dan a mu mite in tua khua mite kiangah a gensawn uh hi. ³⁷ Tua ciangin Gadara kuam kima teeng mite khempeuh lau mahmah uh ahih manin amaute kiang pan Zeisu a paikhiat nadingin a ngen uh hi. Tua ciangin amah gunkuang tungah kah in a ciahkik hi. ³⁸ Tu in dawite a taikhiatna pa in Zeisu zui nuamin a kun hi. Ahih hangin Zeisu in ama kiangah, ³⁹ “Na inn ah ciah inla, Pasian in nang aa dinga hong bawlsak nalianpite va gen in,” a ci hi. Tua pa ciahin Zeisu in ama aa dinga a bawl nalianpite khua sungteng ah a tangko hi. ⁴⁰ Mi khempeuh in Zeisu a tunkik ding ngaklah mahmah uh a, a tun ciangin a dawn uh hi. ⁴¹ Tua laitak in Jairus kici kikhopna inn ukpa khat hong pai a, Zeisu khe phungah bokin a inn ah a hawh nadingin a thum hi. ⁴² Banghang hiam cihleh kum sawm le kum nih a pha a tanu neihsun si dektak in a om hi. Zeisu a pai laitak in mihonpite in amah a phugawp uh hi. ⁴³ Tu in kum sawm le kum nih sung siluang natna a vei numei khat zong a om hi. Amah in a kivak nading teng nangawn siavuante guaihna in a zat khit hangin kuamah in a damsak zo kei hi. ⁴⁴ Tua nu in Zeisu nunglam panin zuana a puanmongtep a va lawn ciangin a siluang lai thakhat in a kang hi. ⁴⁵ Zeisu in, “Kua in hong lawng ahi hiam?” a ci hi. Mi khempeuh in a nial uh ciangin Peter le a lawmte in, “Sia aw, mihonpi hi zah ta in hong suknawk hong tonawk kimlai banghang in, ‘Kua in hong lawng hiam?’ cimawk na hi hiam?” a ci uh hi. ⁴⁶ Ahih hangin Zeisu in, “Mi khatin hong lawng mah hi. Banghang hiam cihleh ka sung pan vangliatna a paikhiat lam ka thei hi,” a ci hi. ⁴⁷ Tua nu in kisel zolo ding ahihlam a theih ciangin lingkawmsa in Zeisu mai ah va bok a, amah a lawnna a hang le a lawn cianga a dam pahna thu mi khempeuh mai ah a gen hi. ⁴⁸ Tua ciangin Zeisu in ama kiangah, “Ka tanu aw, lungnuam in. Na upna in hong damsak zo hi. Lungnuamtak in ciah in,” a ci hi. ⁴⁹ Tua banga Zeisu a paupau laitak in kikhopna inn ukpa inn panin mi khat hong tung a, Jairus kiangah, “Na tanu sizo hi. Siapa buaisak nawn kei in,” a ci hi. ⁵⁰ Tua thu Zeisu in a zak ciangin ama kiangah, “Patau kei in. Um peuh leteh amah a hingkik ding hi,” a ci hi. ⁵¹ Kikhopna inn ukpa inn ah Zeisu a tun ciangin Peter, James, John, le numeino nu le pate bek inn sungah a lutsak hi. ⁵² Tu in mi khempeuh in numeino nu sihna hangin kap le mau in a om ngeingai uh hi. Ahih hangin amah in, “Kap kei un, amah a si hilo in a ihmu ahi hi,” a ci hi. ⁵³ Amaute in numeino a sih khitlam thei uh ahih manin Zeisu zahpih in a nuihsan uh hi. ⁵⁴ Amah in amaute khempeuh pusuaksak a, tua khit ciangin numeino a khut ah len in, “Numeino aw, tho in,” ci in a sam hi. ⁵⁵ Tua ciangin numeino a kha hong ciahkik a, thakhat in a tho hi. Tua ciangin nek theih khatpeuh a piak nadingun thu a pia hi. ⁵⁶ A nu le a pa in lamdangsa mahmah uh a, ahi zongin Zeisu in kuama kiangah a gen loh nadingun thu a pia hi.

¹ Tua khit ciangin Zeisu in a nungzui sawm le nihte khawm a, dawi khempeuh hawlkhiat theih nading le natna damsak theih nading vangliatna le thuneihna a piak khitteh, ² Pasian kumpigam thu a hilh ding le cinate a damsak dingin amaute a sawlkhia hi. ³ Amaute kiangah, “Lampi a na zat ding uh ciangkhut, thungip, nek theih le sum le pai a kipan bangmah keng kei un. Puanak silh nih kengthuah kei un. ⁴ Na zin tunna peuhpeuh uhah tua khuapan na paikhiat masiah uh tamsuak un. ⁵ Zin hong tungsaklo mi a om leh tua khuapan na paikhiat uh ciangin note khepek tunga leivuite singkhia un. Tua in amaute langkhat ah teci a suak ding hi,” a ci hi. ⁶ Tua ciangin nungzuite kuankhia in khua khempeuh pha uh a, mun khempeuh ah lungdamna thu tangko in cinate a damsak uh hi. ⁷ Tu in gam uk mangpa Herod in, Zeisu nasep teng za a, a lungmang mahmah hi. Banghang hiam cihleh pawlkhat in, “Misite lak pan John hong thokik hi,” a ci uh hi. ⁸ A dang pawlkhat in, “Elijah hong kilang hi,” ci uh a, a dang pawlkhat in, “Tanglai kamsangte khat hong thokik hi,” a ci uh hi. ⁹ Herod in, “John lah a ngawng ka tansa hi a, hih bang thute ka zak mipa kua hi peuhmah ding hiam?” ci in Zeisu a mu nuam mahmah hi. ¹⁰ Sawltakte a hong tunkik uh ciangin a sepna teng uh Zeisu kiangah a gen uh hi. Amah in amaute a tuamin samkhia a, Bethsaida khuahuam gamlak ah a paipih hi. ¹¹ Mihonpite in a theih uh ciangin va zuan uh a, amah in amaute na sang a, Pasian kumpigam thu hilhin damna kisamte a damsak hi. ¹² Ni tumkuan ciangin sawm le nihte ama kiangah hong pai in, “Giah nading le annek ding a zong dingin mihonpite hih kima om khuapi khuaneute ah sawlkhia in. Banghang hiam cihleh eite i omna in gamlak ahi hi,” a ci uh hi. ¹³ Ahih hangin Zeisu in amaute kiangah, “A nek ding uh khat peuhpeuh pia un,” a ci hi. Amaute in, “Hih mite khempeuh nek ding va lei ding ka hih kei uh leh anlum nga le ngasa nih bek ka nei uh hi,” a ci uh hi. ¹⁴ Banghang hiam cihleh a picingsa pasal bekbek zong 5,000 bang a pha uh hi. Amah in a nungzuite kiangah, “50 ta in tusak un,” a ci hi. ¹⁵ Amaute in zong tua bangin mi khempeuh a tusak uh hi. ¹⁶ Tua khit ciangin amah in anlum nga le ngasa nihte la a, vantung ento in thupha a pia hi. Tua khit ciangin balkham a, mihonpite mai ah lui dingin nungzuite a pia hi. ¹⁷ Tua ciangin a vekpi un a kham phitphet in a ne uh hi. A kikhamval a themneng teng a khop uh ciangin lawh sawm le lawh nih dim a ngah uh hi. ¹⁸ Khatvei Zeisu bek thungen a a om laitak in a nungzuite in va pawl uh hi. Amah in amaute kiangah, “Mite in kei kua hi hong ci uh hiam?” ci in a dong hi. ¹⁹ Tua ciangin amaute in, “Pawlkhat in Tuiphumpa John hi hong ci uh hi. A dang pawlkhat in Elijah hi hong ci uh hi. A dang pawlkhat in tanglai kamsangte khat hong thokik hi hong ci uh hi,” ci in a dawng uh hi. ²⁰ Tua ciangin amah in, “Tua ahih leh note in kei kua hi nong ci uh hiam?” a ci hi. Peter in, “Pasian Sathau‑nilhpa na hi hi,” ci in a dawng hi. ²¹ Amah in hih thu kuama kiangah a gen loh nadingun khauhtak in kham a, ²² “Mihing Tapa in gimna tampi thuak dinga, makaite, siampi liante le thukhamhilh siate in a nial ding uh hi. Amah kithat dinga a ni thum ni in a kithosakkik ding hi,” a ci hi. ²³ Tua khit ciangin amaute khempeuh kiangah, “Mi khatpeuh in kei hong zuihnop leh ama pumpi nial henla nisim in a singlamteh pua in ka nung hong zui hen. ²⁴ Banghang hiam cihleh ama nuntakna a hu nuam mi in a nuntakna a tan ding hi. Keima hanga a nuntakna a tan mi in ama nuntakna hu ahi ding hi. ²⁵ Mi khatin leitung buppi a ngah hangin a nuntakna mangthang in kisia leh bang phattuamna om ding ahi hiam? ²⁶ Keimah le ka thu a hong maizumpih mi peuhmah Mihing Tapa in ama vangliatna, a Pa vangliatna le a siangtho vantungmite vangliatna tawh hong pai ciangin a maizumpih ding hi. ²⁷ Ahih hangin a maan takpi kong cih in ah hihlai a a ding mi pawlkhat in Pasian kumpigam a muh mateng un a si kei ding uh hi,” a ci hi. ²⁸ Hih thute a genzawh ni giat khit bang ciangin Peter, John le James‑te tonpih in thungen dingin mualtung ah a kahto uh hi. ²⁹ Thu a nget laitak in ama mel kikhel a, a puan zong pakin a tee deldel hi. ³⁰ Tua ciangin en in, amah mi nih tawh kiho a, tua mi nihte in Moses le Elijah ahi uh hi. ³¹ Amaute gel zong a vang uh tangin hong kilang uh a, a sawtlo in Jerusalem ah Zeisu sih nading thu a kikum uh hi. ³² Ahi zongin Peter le a lawmte a ihmut uh suak mahmah ahih manin a lusu uh hi. A khanlawh uh ciangin Zeisu vangtang le amah tawh a dingkhawm mi nihte a mu uh hi. ³³ Tua mi nihte Zeisu kiang pan a paikhiat khit uh ciangin Peter in Zeisu kiangah, “Sia aw, hih muna om nuam ka sa uh hi. Nang aa ding buuk khat, Moses aa ding buuk khat, Elijah aa ding buuk khat, buuk thum kong lamsak ding uh hi,” ci in a gen thu bangmah theilopi in a pau hi. ³⁴ Tuateng a gen laitak mahin meii lompi khat hong kai in amaute tuama meii lakah a om uh ciangin a lau uh hi. ³⁵ Tua ciangin meii lak pan aw khat hong ging a, “Hihpa in ka it ka Tapa ahi hi. Ama thu na mang un,” a ci hi. ³⁶ Tua awging a khawl ciangin Zeisu bek a mu uh hi. Amaute in tua huna a muhte uh kuama kiangah gen loin a iimcip uh hi. ³⁷ A zingciang in amaute mualtung pan kumsuk uh a, mihonpi in amah a na dawn uh hi. ³⁸ Tua ciangin mihonpite lak panin thakhat thu in pasal khat hong kikokhia a, “Sia aw, ka tapa nong etsak nadingin kong thum hi. Banghang hiam cihleh amah in ka ta neihsun ahi hi. ³⁹ En in, dawi in amah a mat ciangin thakhat in kikokhia a, a cilphuan kai in a kongkawgawp pahpah hi. A mat khit nak leh khahpak nawnlo ahih manin a tha a zaw dikdek hi. ⁴⁰ Tua hi a, tua dawigilo hawlkhia dingin na nungzuite ka kut hangin a hawlkhia zo kei uh hi,” a ci hi. ⁴¹ Tua ciangin Zeisu in, “Upna a neilo, a lehtat khang mite aw, bang tanvei hong ompih dinga, bang tanvei hong thuak ding ka hi hiam? Na tapa hi lai ah hong paipih in,” a ci hi. ⁴² Tua pasalno Zeisu kiangah a hong pai laitak in dawi in sawnpai in a kongkawsak hi. Zeisu in tua dawigilo taii in pasalno damsak a, a pa kiangah a pia hi. ⁴³ Mi khempeuh in Pasian vangliatna lamdang a sa mahmah uh hi. Amaute in Zeisu bawl nate lamdangsa a a om laitak un amah in a nungzuite kiangah, ⁴⁴ “Mihing Tapa mite khutah hong kipiakhia ta ding ahih manin hih ka thugente note bil ah lutsak in ciamteh un,” a ci hi. ⁴⁵ Ahi zongin a thugente amaute in a tel zawhloh nadingun ki‑iim ahih manin tel zolo uh a, ahih hangin a dongkik ngam kei uh hi. ⁴⁶ Tua ciangin amaute lakah kua lianpen ding cih thu a kisel uh hi. ⁴⁷ Zeisu in amaute lungsim ngaihsutna thei ahih manin naupangno khat samin a kiangah a dingsak hi. ⁴⁸ Tua khit ciangin amaute kiangah, “Keima min tawh hih naupangno a sang mi in kei hong sang ahi hi. Kei hong sang mi in kei hong sawlpa zong a sang ahi hi. Banghang hiam cihleh note khempeuh laka a neupenpa in a lianpenpa a suak ding hi,” a ci hi. ⁴⁹ Tua ciangin John in, “Sia aw, nangma min tawh dawite a hawlkhia mi khat ka mu uh a, amah in eite hong zui lo ahih manin ka kham uh hi,” a ci hi. ⁵⁰ Zeisu in, “Kham kei un. Eite a hong langpanlo mi in eite lamah a pang ahi hi,” a ci hi. ⁵¹ Zeisu a kilaktoh ding hun a nai ciangin Jerusalem khuapi ah paitoh ding tuppen in a nei hi. ⁵² Amah in kamtaite sawlkhol a, tua mite zong pai in ama aa ding mun bawl dingin Samaria khua khatah a lut uh hi. ⁵³ Ama tuppen in Jerusalem khuapi ah paitoh ding ahih manin Samaria khua mite in a sang kei uh hi. ⁵⁴ A nungzui James le John‑te in tua thu a theih uh ciangin, “Topa aw, Elijah in ahih bangin vantung pan meikuang samin amaute kangtumsak le ung nong awi hiam?” a ci uh hi. ⁵⁵ Zeisu kihei in amaute taii a, “Bang lungsim nei na hi uh hiam cih na thei kei uh hi. ⁵⁶ Mihing Tapa in mite nuntakna susia dinga hong pai hilo in a hon dinga hong pai ahi hi,” a cih khit ciangin khua dang khatah a pai uh hi. ⁵⁷ Lampi ah a pai laitak un mi khatin ama kiangah, “Topa aw, na paina peuh ah kong zui ding hi,” a ci hi. ⁵⁸ Zeisu in ama kiangah, “Ngiate in kua nei uh a, vana leng vasate in zong bu a nei uh hi. Ahih hangin Mihing Tapa in a lutang ngakh nading mun a nei kei hi,” a ci hi. ⁵⁹ Tua ciangin amah in midang khat kiangah, “Hong zui in,” a ci hi. Ahih hangin tua pa in, “Topa aw, ka pa vui dingin hong paisak masa phot in,” a ci hi. ⁶⁰ Zeisu in, “Misi pen misite mahin na vui uh hen. Nang na hih leh pai inla, Pasian kumpigam thu va tangko in,” a ci hi. ⁶¹ Tua ciangin midang khatin zong, “Topa aw, kong zui ding hi. Ahi zongin ka innkuanpihte mangpha hong khak masa sak in,” a ci hi. ⁶² Zeisu in, “Lo kaihna letsan lenkawm sa a, a nunglam a en mi peuhmah Pasian kumpigam tawh kituak lo hi,” a ci hi.

¹ Hih thuteng khit ciangin Topa in a dang mi 70 sehkhia in a sawtlo a ama zin nading khuapi khuaneu khempeuh ah nihta nihta in a paikholsak hi. ² Amah in amaute kiangah, “An lak ding tam mahmah a, ahih hangin nasem ding mi a tawm hi. Tua ahih manin an nei Topa in ama an la dingin nasemte hong sawl nading thungen un. ³ Note va kuankhia un. En un, ngiate laka kikhah tuunote bangin note kong khah hi. ⁴ Sumbawm, thungip, khedapte keng kei un. Lampi ah na pai laitak un kuamah hopih kei un. ⁵ “Inn khatpeuh ah na lut uh ciangin, ‘Hih inn ah nopna om tahen,’ ci masa un. ⁶ Tua inn ah nopna ngah dinga kilawm mi a om leh note piak nopna tua inn ah tung dinga, a om kei leh note kiangah hong kilehkik ding hi. ⁷ Inn khatah omsuak unla, zintunna khel kawikawi kei un. Na a sem mi in thaman a ngah ding kilawm ahih manin annek tuidawn hong kipia bangbang ne un. ⁸ “Khua khatpeuh ah na lut uh ciangin zin a hong tunsak uh leh note mai a hong kilui peuhpeuh ne un. ⁹ Tua khua sunga cinate damsak un. ‘Pasian kumpigam note kiang hong tung dekta hi,’ ci in gen un. ¹⁰ Ahih hangin khua khatpeuh ah na lut uh ciangin tua khua mite in a hong nolh uh leh khua sung kongzing lakah pai unla, ¹¹ ‘Kote tunga hong bang na khua leivuite uh note a hong langpan dingin ka nulkhia uh hi. Ahi zongin Pasian kumpigam note kiang hong tung dekta hi cih theita un,’ ci in gen un. ¹² Ken kong cih in ah tua Ni ciangin tua khua in Sodom khuapi sangin gimna a thuak zaw ding hi. ¹³ “Chorazin khua aw, gimna na thuak ding hi! Bethsaida khua aw, gimna na thuak ding hi! Banghang hiam cihleh note sunga kibawl nalamdangte, Tyre le Sidon khua ah kibawl hileh, amaute sawtpi lai in a mawhna uh kisikkik in tukawm in ippi puan silhin vut a kibuak ding uh hi. ¹⁴ Ahih hangin Pasian in thu a khen ni ciangin note in Tyre le Sidon khuapite sangin gimna na thuak zaw ding uh hi. ¹⁵ Pasian in vantung donga hong lapsang Capernaum khua aw, Hadesɠ dongah hong kikhiasuk ding hi. ¹⁶ “Note thu a hong ngai mi in keima thu a hong ngai ahi hi. Note a hong nial mi in kei hong nial ahi hi. Kei a hong nial mi in kei hong sawlpa zong a nial ahi hi,” a ci hi. ¹⁷ Tua ciangin 70te lungdamtak in hong ciahkik uh a, “Topa aw, nangma min hangin dawite nangawn in kote thu hong mang uh hi,” a ci uh hi. ¹⁸ Tua ciangin Zeisu in amaute kiangah, “Satan in vantung panin khuaphialep banga hong tuaksuk ka mu hi. ¹⁹ En un, gulte le aikamte na tuatcil nading uh le galpa vangliatna khempeuh na zawh nadingun thuneihna kong pia hi. Note bangmah in hong siasak theilo ding hi. ²⁰ Ahi zongin, dawite in na thu uh hong man manin lungdam kei unla, vantung ah na min uh a kigelh manin lungdam zaw un,” a ci hi. ²¹ Tua laitak in Kha sungah Zeisu a lungkim mahmah a, “Vantung le leitung Topa ahi ka Pa aw, mipil misiamte tungah hih thute iim in naungekte tungah na lah manin nang kong phat hi. Hi mah hi. Pa aw, hih in nangma lungkimna ahi hi. ²² “Ka Pa in na khempeuh kei a hong ap khinzo hi. Tapa kua hiam cih Pa longal in thei lo a, Pa kua hiam cih zong Tapa le, Tapa in a theihsak nop mite bekin a thei uh hi,” a ci hi. ²³ Tua khit ciangin a nungzuite lamah kihei in a gensim in ah, “Note in hih nate mu na hih manun na mit uh a hampha hi. ²⁴ Banghang hiam cihleh kamsangte le kumpi tampite in na muh uh hih nate a muhnop uh hangin a mu kha kei uh hi. Na zak uh hih thute a zaknop uh hangin, a za kha kei uh hi,” a ci hi. ²⁵ Tua ciangin, en in, thukhamhilh siapa khat Zeisu ze‑et nuamin hong dingto a, “Sia aw, bang hihleng nuntak tawntungna luah thei ding ka hi hiam?” a ci hi. ²⁶ Amah in, “Thukham sungah bang kigelh a, nang bangci bangin thei na hi hiam?” a ci hi. ²⁷ Amah in, “ ‘Na lungsim khempeuh, na nuntakna khempeuh, na hatna khempeuh le na ngaihsutna khempeuh tawh Topa na Pasian it in. Nang le nang na ki‑it bangin na vengpa na it in,’ ci in kigelh hi,” a ci hi. ²⁸ Zeisu in, “Nong dawnna a maan hi. Tua bangin hih lecin na nungta ding hi,” a ci hi. ²⁹ Ahih hangin tua pa in amah le amah kidiksak nuam ahih manin, Zeisu kiangah, “Tua ahih leh ka vengpa kua ahi hiam?” a ci hi. ³⁰ Zeisu in, “Mi khat, Jerusalem khuapi panin Jericho khua ah a paisuk leh lampi ah misuamte a tuak kha hi. Amaute in a puan suahkhiatsak uh a, satliam in, a silo bekin nusia in a paisan uh hi. ³¹ Tua laitak in siampipa khat tualam tawnin hong pai a, tua pa a muh ciangin lamnawl ah pelin a paisan hi. ³² Tuamah bangin Levi mipa khat zong hong pai a, tua mun a tun ciangin tua pa en in lamnawl ah pelin a paisan leuleu hi. ³³ Ahih hangin Samaria mi khualzin khat hong pai in, tua pa kianga tun ciangin mu a, hehpihhuai a sa hi. ³⁴ Amah tua pa kiangah va pai a, a liammate sathau le lenggahzu nuhsak in puan tawh a tun hi. Tua khit ciangin ama laa tungah pua in zintun buuk khatah paipih a, tualai ah a khoi hi. ³⁵ A zingciang in sumtang denariusɠ nih lakhia in zintun buuk neipa pia a, ‘Hihpa na khoisak in. Hihteng bana na zat khempeuh kong paikik ciangin kong loh ding hi,’ ci in a paikhia hi. ³⁶ “Tua mi thumte sung panin kua pen a kisuam mipa vengpa hi dingin na ngaihsun hiam?” a ci hi. ³⁷ Thukhamhilh siapa in, “Amah a hehpihpa ahi hi,” a ci hi. Zeisu in ama kiangah, “Pai inla, nang zong tua bangin hih in,” a ci hi. ³⁸ Zeisu le a nungzuite a pai kawmkawm un khua khatah amah lut a, Martha kici numei khatin a inn ah Zeisu a tungsak hi. ³⁹ Martha in Mary kici sanggam numei khat nei a, tua nu Zeisu khephung ah tu in a thugente a ngai hi. ⁴⁰ Martha pen annek bawl in manlah ahih manin, Zeisu kiangah va pai a, “Topa aw, ka sanggamnu in annek bawl ding kei bek hong khiat awi na hi hiam? Hong huh nadingin sawl dih in,” a ci hi. ⁴¹ Zeisu in Martha kiangah, “Martha, Martha aw, lung hih mawhna na hau a, na lung a gim hi. ⁴² Ahi zongin a kisam na khat bek om a, Mary in a hoih zaw tua na teel khin ahih manin a kilakkhiatsak kei ding hi,” a ci hi.

¹ Khatvei munkhat ah Zeisu in thungen a, a thunget a man ciangin a nungzuite khat in, “Topa aw, John in a nungzuite a hilh bangin ko zong thungetzia hong hilh in,” a ci hi. ² Tua ciangin amah in amaute kiangah, “Thu na nget uh ciangin hih bangin ngen un. Vantung a om kote Pa aw, Na min siangtho kizahtak hen. Na kumpigam hong tung tahen. Vantung ah na deihna a kisep mah bangin, Leitung ah zong kisem tahen. ³ Nisim a ka khamkhop ding uh, An hong pia in. ⁴ Ko tung a hong mawhte, Ka maisak mah bangun, Kote mawhna zong hong maisak ta in. Ze‑etna sungah hong lutsak kei in, Gilopa vangliatna pan hong honkhia in, ci in na ngen un,” a ci hi. ⁵ Tua khit ciangin amah in, “Note lakah mi khatin lawmkhat nei in tua a lawmpa kiangah zankimpi in va pai in, ‘Lawm aw, anlum thum hong leitawisak in. ⁶ Ka lawmpa khat khualzin hong tung a, amah ka lui ding bangmah ka nei kei hi,’ a va ci hi. ⁷ “Tua ciangin a lawmpa in a innsung panin, ‘Hong nawngkaisak kei in. Kong kikalh khinzo a, ka tate tawh zong lum khinzo ka hih manin hong tho in bangmah kong pia zo kei ding hi,’ a ci hi. ⁸ Ken kong cih in ah a lawmpa ahihna tawh tho‑a a piak loh hangin kisuang theilo in a nget teitei manin amah tho in a deih zahzah a pia ding hi. ⁹ “Tua hi a, note kianga kong gen in ah ngen un, hong kipia ding hi. Zong un, na mu ding uh hi. Kongkhak kiu un, hong kihon ding hi. ¹⁰ Banghang hiam cihleh a ngen khempeuh in a ngah hi. A zong mi in a mu hi. Kong a kiu mi a kihon hi. ¹¹ “Note lakah a tapa in a pa kiangah anlum ngen leh suangtum a pia ding, ngasa ngen leh ngasa tangin gul a pia ding kua om na hi uh hiam? ¹² Aaktui ngen leh aikam peuh pia ding ahi hiam? ¹³ Mihoihlo ahi note nangawn in na tate uh na hoih piak ding thei na hih uh leh vana om na Pa un a ngen mite Kha Siangtho hong pia zawkan ding hilo ahi hiam!” a ci hi. ¹⁴ Tua khit ciangin Zeisu in a pau theilo dawi khat, mi khat sung panin hawlkhia a, dawi a paikhiat khit phetin tua a pautheilopa pauthei ahih manin mite in lamdang a sa mahmah uh hi. ¹⁵ Ahih hangin amaute pawlkhat in, “Amah in dawi mangpipa Beelzebubɠ min suanga dawite a hawlkhia ahi hi,” a cihsan uh hi. ¹⁶ Pawlkhatte in amah a ze‑etna un van pan limlamdang khat a piansak nadingin a ngen uh hi. ¹⁷ Ahi zongin Zeisu in a ngaihsutna uh thei ahih manin amaute kiangah, “Kumpigam khat peuhpeuh a kiphelkhap leh hawmsuak dinga, a kilemlo innkuan peuhmah a khuasuak kei ding hi. ¹⁸ Beelzebubɠ min suangin dawite hawlkhia hi nong cih uh Satan zong amah le amah kilangneih leh ama kumpigam bangci in kip thei ding ahi hiam? ¹⁹ Ken Beelzebubɠ min suanga dawite hawlkhia ka hih leh na tate un kua min suangin hawlkhia uh ahi hiam? Tua ahih ciangin amaute in note tungah thu a hong khente a suak ding uh hi. ²⁰ Ahi zongin Pasian vangliatna tawh dawite hawlkhia ka hih manin note kiangah Pasian kumpigam hong tungzo hi. ²¹ “Mi thahatpa in galvan kimtak tawh a inn a cin laiteng a neihsate a bit hi. ²² Ahih hangin amah sanga a thahat zaw khat hong pai in a zawhgawp ciangin a muan mahmah a galvan teng laksak in a van dangteng zong a hawmthang uh hi. ²³ “Kei lam a panglo peuhmah kei hong langpan mi hi a, kei a hong kaihkhoppih lo peuhmah a thehthang mi ahi hi. ²⁴ “Dawigilo khatin mihing sung pan a paikhiat khit ciangin tui om lohna leikeu tengah vak kawikawi in tawlngak nading mun a zong hi. A muh loh ciangin, ‘Ka paikhiatna inn mahah ciahkik ning,’ a ci hi. ²⁵ A tun ciangin tua inn kiphiat, kipuah sinsen a om a mu hi. ²⁶ Tua ciangin amah va pai in amah sanga a gilo zaw a dang dawi sagih va sam a, tua inn ah lutpih in a teeng uh hi. Tua mi dinmun in a masa dinmun sangin a sia zaw hi,” a ci hi. ²⁷ Amah in hih thute a gen laitak in mihonpite lak panin numei khat hong kiko a, “A gil sungah nang hong pai a, a nawi na tep numei in thupha ngah ahi hi,” a ci hi. ²⁸ Ahih hangin Zeisu in, “Hi mah hi, tua sangin Pasian thu za a, a zuite in thupha a ngah zawlai uh hi,” a ci hi. ²⁹ Mi tampi a hon a hon in a hong kikhop uh ciangin Zeisu in, “Tulai khangin khang gilo ahi hi. Nalamdang a kalh uh hangin kamsangpa Jonah tunga a piang limlamdang longal a dang kipia lo ding hi. ³⁰ Banghang hiam cihleh Jonah in Nineveh khua mite aa dingin theihsakna lim a suah bangin Mihing Tapa in zong tulai khang mite aa dingin theihsakna lim a suak ding hi. ³¹ Thukhen ni ciangin Leitaw lam kumpinu hong dingin tulai khang mite a mawhsak ding hi. Banghang hiam cihleh Solomon pilna ngai dingin leimong khat panin amah a hong pai hi. En un, Solomon sanga a lianzawpa hi lai ah a om hi. ³² Thukhen ni ciangin Nineveh khua mite hong dingto ding uh a, tulai khang mite a mawhsak ding uh hi. Banghang hiam cihleh Jonah tangkona hangin amaute mawhna a kisikkik uh hi. En un, Jonah sanga a lianzawpa hi lai ah a om hi. ³³ “Kuamah in mei a vak ciangin a kawmbu lak peuh, lawhnuai peuh ah a koih kei uh hi. Inn sunga a lut mite in meitang a muh theih nadingun meivak tunna tungah a koih uh hi. ³⁴ Mittang in pumpi aa dingin meivak ahi hi. Tua ahih manin na mit a ciim leh na pumpi bup tang dinga, na mit a siat leh na pumpi bup a mial ding hi. ³⁵ Tua ahih manin na sunga om khuavak a mial loh nadingin kingaihsun in. ³⁶ Na pumpi bup tangin a mialna mun a om kei leh meivak tang in khuavak a piak bangin na pum tung khempeuh a vak ding hi,” a ci hi. ³⁷ Tua banga thu a gen laitak in Pharisee pawlte lak panin khatin amah an ne dingin sam ahih manin inn sungah lutin ankuang a um hi. ³⁸ Zeisu in an a nekma in a khutsil masa lo ahih manin, tua Pharisee pa in a muh ciangin lamdang a sa hi. ³⁹ Tua ciangin Topa in ama kiangah, “No, Pharisee pawlte in hai le kuangte a pualam na siangsak uh hi. Ahih hangin note sungah duhhop huaihamna le gitlohna a dim hi. ⁴⁰ No, mihaite aw, a pualam a bawlpa in a sunglam zong bawl hilo ahi hiam? ⁴¹ Tua ahih manin na neih bangbang uh mizawngte huh zaw le uh teh note aa dingin na khempeuh a siang ding hi. ⁴² “No, Pharisee pawlte aw, gimna na thuak ding uh hi! Banghang hiam cihleh lengmasel, masala le anteh nam khempeuh sawm a khat na pia uh hi. Ahih hangin thuman le Pasian it nading thute na thudon kei uh hi. Hihte khempeuh na hih ding uh hi a, paihkhiat na neih ding uh hilo hi. ⁴³ “No, Pharisee pawlte aw, gimna na thuak ding uh hi! Banghang hiam cihleh kikhopna innte ah tutna thupi tata na deih uh a, sumbuuk ah hong kizahtak bawl ding na ut uh hi. ⁴⁴ “A kineihkhem thukhamhilh siate le Pharisee pawlte aw, gimna na thuak ding uh hi! Banghang hiam cihleh a kilanglo hankhuk tawh na kibang uh hi. Tua hante tungah mite a paipai uh hangin hankhuk ahihlam a thei kei uh hi,” a ci hi. ⁴⁵ Tua ciangin thukhamhilh siate khatin ama kiangah, “Sia aw, hih bang na cih ciangin kote zong a hong selpho na hi hi,” a ci hi. ⁴⁶ Tua ciangin Zeisu in, “Thukhamhilh siate aw, note in zong gimna na thuak ding uh hi! Banghang hiam cihleh van gikpite midangte na suan uh a, note in lah na khutme dawn nangawn uh tawh na lawng nuam kei uh hi. ⁴⁷ “Note in gimna na thuak ding uh hi! Banghang hiam cihleh kamsangte han ding na bawl uh a, na pu na pate un amaute a that uh hi. ⁴⁸ Na pu na pate un a thah kamsangte hante na bawl uh ciangin na pu na pate uh gamtatna teng a thukimpih na hihna uh teci a pang na hi uh hi. ⁴⁹ Tua ahih ciangin Pasian in ama pilna tawh a gen in ah, ‘Amaute kiangah kamsangte le sawltakte ka sawl dinga, amaute in pawlkhat thatin pawlkhat a bawlsia ding uh hi.’ ⁵⁰ Tua ahih manin leitung piancil a kipan a luansak uh kamsang khempeuhte sisan, ⁵¹ Abel sisan a kipan biaknatau le biakbuuk kikal a a thah uh Zechariah sisan dongin tulai khang mite tungah a kisikkik ding hi. Hi hi, ken kong cih in ah tua sisante tulai khang mite tungah a kisik ding hi. ⁵² “Thukhamhilh siate aw, gimna na thuak ding uh hi! Banghang hiam cihleh thu theihna kong tawhtang nei napi in na kemcip uh hi. Note lah lut loin a lut nuam mite lah na khaktan uh hi,” a ci hi. ⁵³ Amah in hih thute a gen khit ciangin thukhamhilh siate le Pharisee pawlte in nakpitak in amah langpan uh a, thu tampi a leh lamlam in a dong huan uh hi. ⁵⁴ Ama kampauna tawh man a, a mawhmat theih nadingun a pangsim gige uh hi.

¹ Tua laitak in sim zawhloh dinga a tam mihonpite hong kikaikhawm uh a, khat le khat kisik kha zah dongin om ngeingai uh hi. Zeisu in a nungzuite thu hilh masa a, “Pharisee pawlte kineihkhemna silngo na kidawm un. ² Banghang hiam cihleh a kilang lo dingin a kisincip, a kithei lo dinga kiselsim thei bangmah a om kei hi. ³ Tua ahih manin khuamial sunga na genteng uh khuavak sungah a kiza ding hi. Innsung tawnga na kigensim thute uh innkhumzang ah a kitangko khia ding hi. ⁴ “Lawmte aw, ken kong gen in ah pumpi a thah theih hangin a dang bangmah a cih thei nawnlote kihta kei un. ⁵ Ahi zongin na kihtak ding uh kua ahi hiam cih kong gen ding hi. Pumpi a thah khit ciangin hellɠ sungah khiat theihna thu a neipa na kihta un. Hi hi, ken kong cih in ah na kihtak ding uh tua pa ahi hi! ⁶ Kawlgit nga ciangin dangkasanɠ nih tawh kizuak hilo ahi hiam? Pasian in tua kawlgitte khat nangawn a mangngilh kei hi. ⁷ Note luzang a samzang omteng a vekpi in a kisim khinzo hi. Tua ahih manin lau kei un. Kawlgit tampi sangin na manpha zaw uh hi. ⁸ “Ken kong cih in ah mite mai‑a kei hong pulak mi peuhmah Mihing Tapa in zong Pasian vantungmite mai ah a pulak ding hi. ⁹ Mite mai‑a kei a hong nial peuhmah Pasian vantungmite mai ah ka nial ding hi. ¹⁰ Tua hi a, Mihing Tapa langpan in a gensiate peuhmah a kimaisak ding hi. Ahi zongin Kha Siangtho tunga a pausia mi peuhmah a kimaisak kei ding hi. ¹¹ “Tu in kikhopna innte ah ahi a, makaite le thuneite mai ah ahi zongin note a hong paipih uh ciangin bang thu genin bangci gen ding ka hi uh hiam cih lungkham kei un. ¹² Banghang hiam cihleh tua hun ciangin Kha Siangtho in na gen ding uh thu a hong hilh ding hi,” a ci hi. ¹³ Tua laitak in mihonpi lak pan khatin, “Sia aw, ka sanggampa in ama gamh hong hop nading hong gensak in,” a ci hi. ¹⁴ Ahih hangin Zeisu in ama kiangah, “Mipa aw, note tunga thukhen ding le note gamh hawm dingin kua in kei hong seh ahi hiam?” a ci hi. ¹⁵ Tua ciangin amah in amaute kiangah, “Deihgawhna lungsim na neih khakloh nadingun hoihtak in kidawm un. Banghang hiam cihleh mihing nuntakna in neih le lam a bucin manin a kicing ahi kei hi,” a ci hi. ¹⁶ Tua khit ciangin amah in thugentehna khat gen a, “Mihaupa khat lo panin an tampi a piang hi. ¹⁷ Tua ciangin amah in, ‘Ka an khol nading om nawnlo ahih manin bang cih leng hoih ding hiam?’ ci in a ngaihsun hi. ¹⁸ “Tua ciangin amah in, ‘Hih bangin ka hih ding hi. Ka ansalte phelkhia in a lianzaw in ka lam dinga, ka an khempeuh le ka vanteng ka koih ding hi. ¹⁹ Tua ciangin ka kha kiangah, “Ka kha aw, kum tampi na khom dingin na tampi kong kholsak zo hi. Om hithiat inla, nene dawndawn in, a nuam theithei in om in,” ka ci ding hi, ’ a ci hi. ²⁰ “Ahih hangin Pasian in ama kiangah, ‘Mi haipa aw! Tuzan ciangin na kha kila ding hi. Na kholsa tua nate kua in ngah ding ahi hiam?’ a ci hi. ²¹ “Tua ahih manin ama aa ding bekin neihsa khol a, Pasian mai ah a khollo mi in tua pa tawh a kibang ding hi,” a ci hi. ²² Tua khit ciangin amah in a nungzuite kiangah, “Tua hi a, note kianga kong gen in ah bang ka ne ding hiam, ci in nuntak nading lungkham kei un. Bang silh dinga bang teeng ding ka hi hiam, ci in pumpi aa dingin lungkham kei un. ²³ Nek le dawn sangin nuntakna thupi zaw a, silh le teen sangin pumpi a thupi zaw hi. ²⁴ Va‑aakte na lungngai un. Amaute in khaici tuh lo, an zong la loin, bem le sal zong a nei kei uh hi. Ahi zongin, Pasian in amaute an a vak hi. Vasate sangin note manpha zawtham hilo na hi uh hiam? ²⁵ Na lungkham manun na tun sanna uh tong khat nangawn a khan thei kua om na hi uh hiam? ²⁶ Hih bang thu neupen khat nangawn hih theilo na hih uh leh banghang in a dangte lungkham pih na hi uh hiam? ²⁷ “Unok pakte khanzia ngaihsun dih un. Amaute in na sem loim khau zong a khek kei uh hi. Ahi zongin ken kong cih in ah Solomon in a minthanna puan tawh kizem a a om laitak nangawn in hih pakte khat zahin hoih zolo hi. ²⁸ Upna neu mite aw, tuni in lo lai ah po in, zingciang in mei‑a a kikhultum ding lopate nangawn Pasian in tua bangin zem ahih leh note hong zem zawkan lo ding ahi hiam? ²⁹ Tua ahih manin na nek na dawn ding uh zong masa kei unla, lunghimawh kei un. ³⁰ Banghang hiam cihleh leitung mite in tua nate zon masak in a nei uh hi. Hih nate na kisap lam uh na Pa un a hong thei hi. ³¹ Pasian kumpigam zong masa le uh teh hih nate a hong piakthuah ding hi. ³² “Tuuhonte aw, lau kei un. Banghang hiam cihleh na Pa un note tungah kumpigam a hong piak ding pen ama lungkimna ahi hi. ³³ Na neihsate uh zuak unla mizawngte huhna in zang un. Tua bangin a luitheilo sumbawm bawl unla a bei theilo dingin vantung ah sum na khol un. Tualai ah gutate in gu theilo in ngetin zong a ne thei kei hi. ³⁴ Banghang hiam cihleh na sum omna munah na lungsim zong a om ding hi. ³⁵ “Na kawng uh gak unla, na meivak uh vaksa in koih un. ³⁶ A topa uh mopawi panin a hong ciahkik a hong tun ciangin, kong hong kiu dinga a hon thei pah dingin a ngak mite bangin na om un. ³⁷ A topa uh hong ciah ciangin a na ngaka om a muh nasemte in mihampha ahi uh hi. Aman takpi kong cih in ah, amah in a kawnggak in a nasemte an ne dingin a tusak hi. Tua ciangin amah hong pai in an a lui hi. ³⁸ Amah zanvil nihna hunin hong tung ta leh, zanvil thumna hunin hong tung ta leh tua banga a om a muh nasemte in mihampha ahi uh hi. ³⁹ Ahi zongin hih thu thei un. Inn neipa in gutapa pai ding hun theikhol hi leh pang gige in a inn a luhsak kei ding hi. ⁴⁰ Tua ahih ciangin na upmawh loh laitak un Mihing Tapa hong pai ding ahih manin note zong kigingsa in om un,” a ci hi. ⁴¹ Tua ciangin Peter in ama kiangah, “Topa aw, hih thugentehna kote aa ding beka nong gen ahi hiam? Ahih keileh mi khempeuh aa dinga na gen ahi hiam?” a ci hi. ⁴² Tua ciangin Topa in, “A hun a tun ciangin a innkuanpihte annek tuidawn ding a vaihawmsak dinga a topa in a koih, a muanhuai le a lungpil neihsa kempa kua ahi hiam? ⁴³ A topa hong tun ciangin tua banga om nasem a muh nasempa in mihampha ahi hi. ⁴⁴ Aman takpi kong cih in ah, amah in a neihsa khempeuh tua nasempa a uksak ding hi. ⁴⁵ Ahih hangin tua nasempa in a lungsim sungah, ‘Ka topa hong tungbaih nailo ding hi,’ ci in, a topa nasemte, numei pasal ci loin satin vua henla, anne tuidawn, zukham ankham in om leh, ⁴⁶ a lametloh ni le a theihloh kalin a topa hong tungvat dinga, a topa in tua nasempa tumnih suahin thu‑umlote tawh a thuakkhawmsak ding hi. ⁴⁷ “A topa deihna thei napi in kiging lo a, a topa deihna banga a semlo nasempa in tamveipi satna a thuak ding hi. ⁴⁸ Ahi zongin a topa deihna a theih loh manin a sathuai nasep a sem kha nasempa in a tawm zaw satna a thuak ding hi. Banghang hiam cihleh tampi a kipia mi tung panin a tam zaw kisikkik dinga, tampi a ki‑apte tung panin a tam zaw a kingenkik ding hi. ⁴⁹ “Leitung ah meikuang khah dinga hong pai ka hi a, tua mei a kuang khin hi leh ka ut hi. ⁵⁰ Ahi zongin ka thuak ding baptize na khat om a, tua ka zawh mateng ka lung a gim mahmah hi. ⁵¹ Leitung ah kilemna piangsak dinga hong pai hong sa na hi uh hiam? Hi peuhmah lo hi. Kikhenna a piangsak dinga hong pai ka hi zaw hi cih thu kong gen hi. ⁵² Banghang hiam cihleh tu a kipan inn khat sungah mi nga a om leh kilangkhenna om dinga, thumte in nih langah nihte in thum langah a pang ding uh hi. ⁵³ “A pa in a tapa langpan dinga, a ta in a pa a langpan ding hi. A nu in a tanu langpan dinga, a tanu in a nu a langpan ding hi. A teknu in a monu langpan dinga, a monu in a teknu a langpan ding hi,” a ci hi. ⁵⁴ Tua khit ciangin amah in mihonpite kiangah, “Nitumna lam pan meii hong kai ciangin, ‘Guahzu ding hi,’ na ci uh a, guah hong zu takpi hi. ⁵⁵ Leitaw lam pan huih hong nun ciangin, ‘Khualum ding hi,’ na ci uh a, khua a hong lum takpi hi. ⁵⁶ A kineihkhem mite aw, van le lei omzia khentel thei napi uh cin banghang in tuhun omzia khentel theilo na hi uh hiam? ⁵⁷ “Hi hi, banghang in no le no in thu a maan bangin khen theilo na hi uh hiam? ⁵⁸ Na langpa tawh thukhen zum zuana na pai laitak in amah tawh na kilemkik theihtheih nadingin lamkal ah na hih theihtawp in hanciam in. Tua banga na hih kei leh amah in thukhenpa mai ah hong tun dinga, thukhenpa in palik bupa tungah hong piakhia in palik bupa in thongah hong khum ding hi. ⁵⁹ Ken kong cih in ah na liausum dangka na piak khit mateng in thong pan na suakta kei ding hi,” a ci hi.

¹ Tua laitak in Zeisu tawh a omkhawm mi pawlkhat in, Galilee mi pawlkhatte sisan le amaute biakna gan sisante Pilate in a helna thu ama kiangah a ko uh hi. ² Tua ciangin Zeisu in amaute kiangah, “Hih Galilee mite in tua banga a thuak manun a dang Galilee mi khempeuh sangin a mawh zaw uh hi, ci in ngaihsun na hi uh hiam? ³ A mawh zaw kei uh hi, ci in kong gen hi. Note zong na mawhna uh na kisikkik kei uh leh tua bangin na si ding uh hi. ⁴ Siloam tausang kipuk lai a a delhlup mi sawm le giatte zong Jerusalem khuapi sunga om mi khempeuh sangin mawh zaw uh hi, ci in ngaihsun na hi uh hiam? ⁵ A mawh zaw kei uh hi, ci in kong gen hi. Note zong mawhna na kisikkik kei uh leh tua bangin na si ding uh hi,” a ci hi. ⁶ Amah in hih thugentehna zong gen a, “Mi khatin a lenggah huanah theikung khat suan a, a gah lo dingin a pai ciangin a gah khat beek a mu kei hi. ⁷ Tua ciangin lenggah lokhopa kiangah, ‘En in, theigah lo dingin kum thum sung kong vil hangin a gah khat beek ka mu kei hi. Phuk in. Banghang in hih theikung in leitang pengsak lel ding ahi hiam?’ a ci hi. ⁸ “Tua ciangin lenggah lokhopa in ama kiangah, ‘Topa aw, tukum sung hi ci omsak lai in. A phung kimkot to in eklei ka piaphot ding hi. ⁹ A hong gah leh pha hi. A hong gah tuan kei leh tua ciangin phuk in,’ ci in a dawng hi,” a ci hi. ¹⁰ Tu in Zeisu in Sabbath ni in kikhopna inn khat ah thu a hilh hi. ¹¹ Tua ciangin en in, kum sawm le kum giat sung dawivei a a zawngkhal numei khat tualai ah a om hi. Amah a nungkul ahih manin ama thu in a dingtang thei kei hi. ¹² Zeisu in tua nu a muh ciangin sam a, “Numei aw, na zawngkhalna panin kong suaktasak hi,” a ci hi. ¹³ Tua khit ciangin tua nu tungah a khut nga a, thakhat in tua nu dingtang in Pasian a phat hi. ¹⁴ Zeisu in Sabbath ni in cina damsak ahih manin kikhopna inn ukpa heh mahmah a, mihonpite kiangah, “Na sep theih nading hun ni guk tak om hi. Tua hun sungin hong pai unla, kidamsak un. Sabbath ni in hong pai kei un,” a ci hi. ¹⁵ Tua ciangin Topa in ama kiangah, “Nang a kineihkhempa aw! Note in zong Sabbath ni in na bawng na laate uh ganbuuk panin kaikhia in tui pia dingin paipih hilo na hi uh hiam? ¹⁶ Tua ahih manin Satan in kum sawm le kum giat sung a hencip hih Abraham tanu zong, Sabbath ni in suahtaksak huai hilo ahi hiam?” a ci hi. ¹⁷ Hih thute a gen ciangin a langpang mite khempeuh a maizum uh hi. Mipite ahih leh ama bawlsa a thupi na tampite hangin kipak in a om uh hi. ¹⁸ Tua khit ciangin Zeisu in, “Pasian kumpigam bang tawh kibang a, bang tawh genteh ding ka hi hiam? ¹⁹ Mi khatin a huan sunga a vawh ankam tang tawh a kibang hi. Tua ankam tang hong khangin a kung lianpi khat hong suak a, vana leng vasate in a hiangte tungah buu a tom uh hi,” a ci hi. ²⁰ Zeisu in a genkik in ah, “Pasian kumpigam bang tawh genteh ding ka hi hiam? ²¹ Numei khatin lawhbeuɠ thum bang a pha annel, a tawk dinga a sawh silngo tawh kibang hi,” a ci hi. ²² Tua khit ciangin amah in Jerusalem zuanin a paikawm in khuapi khuaneute ah pai in thu a hilh hi. ²³ Tua ciangin mi khatin ama kiangah, “Topa aw, mi tawmkhat bekin hotkhiatna ngah ding ahi hiam?” a ci hi. ²⁴ Zeisu in amaute kiangah, “Kong kawcik ah lut dingin hanciam un. Ken kong cih in ah mi tampi in kong kawcik ah lut nuamin a zon uh hangin a mu zo kei ding uh hi. ²⁵ Ni khat ni ciangin inn tekpa tho in kong a khak ding hi. Tua khit ciangin inn pua lamah note dingin, ‘Topa, Topa aw, kong hong hon in,’ ci a, kong na kiuh uh hangin amah in, ‘Koi pana hong pai na hi uh hiam? Note kong thei kei hi,’ a hong ci ding hi. ²⁶ “Tua ciangin note in, ‘Nang tawh an nekhawm tui dawnkhawm in i omngei a, kote kongzing ah zong thu nong hilhngei hi,’ na ci ding uh hi. ²⁷ “Ahih hangin amah in, ‘Koi pana hong pai na hi uh hiam? Note kong thei kei hi hong ci hilo ka hi hiam? No, siatna a bawlte aw, na vekpi un ka kiang panin paikhia un,’ a hong ci ding hi. ²⁸ “Note in Abraham, Isaac, Jacob le kamsangte khempeuh Pasian kumpigam sunga om na muh uh ciangin note hong kihawlkhia dinga, tualai ah kahna le hagawina a om ding hi. ²⁹ Amaute in nisuahna, nitumna, leilu le leitaw panin hong pai ding uh a, Pasian kumpigam sungah a hong tu ding uh hi. ³⁰ En un, a nunun hangin a masa ding mi le a masak hangin a nunung ding mi a om hi,” a ci hi. ³¹ Tua ni mahin Pharisee‑te pawlkhat ama kiangah hong pai uh a, “Herod in hong that nuam ahih manin hih mun panin paikhia in,” a ci uh hi. ³² Amah in amaute kiangah, “Pai unla, tua ngia kiangah, ‘En in, tuni le zingciang in dawite hawlkhia in cina ka damsak dinga, a ni thumna ni in ka nasep ka zo ding hi,’ ci hi ci in va gen un. ³³ Ahi zongin kamsang khatin Jerusalem khuapi longal, khuadang ah a sih ding hi theilo ahih manin tuni, zingciang le thaiciang ka zinsuak lai ding hi. ³⁴ “Kamsangte thatin na kianga hong kisawl mite suang tawh a denglum Jerusalem khuapi, Jerusalem khuapi aw! Aakpi in a note a khanuai ah a huai bangin na tate tamveipi ka huainop hangin na ut kei hi! ³⁵ En in! Na teenna mun a hawmpi in kinusia ding hi. Aman takpi kong cih in ah, ‘Topa min tawh a hong paipa in thupha ngah tahen!’ na cih hun hong tun mateng in kei nong mu kei ding uh hi,” a ci hi.

¹ Sabbath ni khatin Pharisee pawlte laka makai khatpa inn ah an ne dingin Zeisu pai a, amaute in Zeisu a encik uh hi. ² En in, cibawk natna a nei pasal khat ama mai ah a om hi. ³ Zeisu in thukhamhilh siate le Pharisee pawlte kiangah, “Sabbath ni‑a cina damsak ding thukham tawh a kituak hiam?” ci in a dong hi. ⁴ Ahih hangin amaute pau loin a om uh hi. Tua ciangin amah in cinapa samin damsak a, a ciahsak hi. ⁵ Tua khit ciangin amaute kiangah, “Na laa khat uh, ahih keileh na bawng khat uh Sabbath ni in guam sungah kia leh a lakhia pah lo ding kua om na hi uh hiam?” a ci hi. ⁶ Amaute in hih thute a dawngkik thei kei uh hi. ⁷ Zeisu in an ne dinga a kisam mi pawlkhatte in munhoih tata a teel uh a muh ciangin, amaute kiangah thugentehna khat gen a, ⁸ “Mi khatin mopawi ah a hong kisap ciangin mun hoihpen ah tu kei un. Nang sanga a zahtakhuai zaw mi khat na kisam henla, ⁹ a sampa le tua pa hong pai in, ‘Na tutna hihpa na awn in,’ hong ci leh maizum in a niampen munah na tu ding hi. ¹⁰ Mopawi ah a hong kisap ciangin a niampen munah tu leteh hong sampa hong pai ciangin, ‘Lawm aw, a sangah tuto in,’ hong ci dinga, na ankuang umpihte mai ah na mai tang ding hi. ¹¹ Banghang hiam cihleh amah le amah a kilamsang mi peuhmah kiniamkhiat dinga, amah le amah a kiniamkhiat mi kilamsang ding hi,” a ci hi. ¹² Tua khit ciangin Zeisu in a sampa kiangah zong, “Sun an ne ding ahi zongin nitak an ne ding ahi zongin mi na sap ciangin na lawmte, na sanggamte, na tanaute, na innveng mihaute khawng sam kei in. Tua mite sam leteh amaute in zong nang hong samkik in hong thukkik ding uh hi. ¹³ Ahi zongin pawi na bawl ciangin mizawng, mipoi, khebai le mittawte sam in. ¹⁴ Amaute in hong thukkik zolo ding uh ahih manin thupha na ngah dinga, midikte thawhkik ni ciangin Pasian in a hong thukkik ding hi,” a ci hi. ¹⁵ Tu in amah tawh ankuang a umkhawm mi khatin hih thu a zak ciangin ama kiangah, “Pasian kumpigam sunga an a ne kha ding mi in mihampha ahi hi,” a ci hi. ¹⁶ Tua ciangin Zeisu in ama kiangah, “Mi khatin pawi lianpi khat bawla mitampi a sam hi. ¹⁷ Annek hun ciangin a khohsa mite kiangah a nasempa sawl a, ‘Na khempeuh a baihsa in om hi. Hong paita un,’ ci in a gensak hi. ¹⁸ “Ahih hangin amaute khempeuh in paulap zong ciat uh a, a masapenpa in, ‘Lo khat lei khin ka hih manin pai in ka va et kul ding hi, hong theisiam in,’ a ci hi. ¹⁹ “A dang khatpa in, ‘Bawngtal kap nga ka lei khin a, ka va sin kul ding hi hong theisiam in,’ a ci leuleu hi. ²⁰ “A dang khatpa in zong, ‘Zi nei khin phet ka hih manin kong paithei kei ding hi,’ a ci hi. ²¹ “Tua ciangin tua nasempa hong ciahkik in a topa kiangah tua thuteng a gen hi. Tua ciangin inntekpa heh a, a nasempa kiangah, ‘Khua sung lampite le kongzingte ah va pai mengmeng inla, mizawngte, mipoite, khebaite le mittawte hong paipih in,’ a ci hi. ²² “Tua ciangin a nasempa in, ‘Topa aw, nong thupiak bangin ka hih khin a, ahi zongin mun a awnglai hi,’ a ci hi. ²³ “Tua ciangin a topa in nasempa kiangah, ‘Lam lianpi a kipan khuanawl dongah va pai inla, ka inn a dim dongin amaute hong paisak hamtang in. ²⁴ Banghang hiam cihleh ken kong cih in ah ka khohsa tua mite khat beekin ka pawi an a ne kha kei ding uh hi,’ a ci hi.” ²⁵ Tu in, amah tawh a tonkhawm mihonpite lamah Zeisu kihei in, ²⁶ “Ka kianga hong pai mi in a nu, a pa, a zi, a tate, a sanggampate, a sanggamnute thamlo in ama nuntakna nangawn kei sanga a it zawk leh ka nungzui a suakthei kei ding hi. ²⁷ Ama singlamteh pua loin ka nung a hong zui peuhmah ka nungzui a suakthei kei ding hi. ²⁸ “Banghang hiam cihleh note lakah mi khatin inn sangpi khat lamsawm napi a zawhsiang nading sum a kicing in a neih leh a neih loh tuat masa loin om ding ahi hiam? ²⁹ Tua bangin hih kei leh a bul a phuh khit ciangin zom zo nawnlo dinga, a mu mi khempeuh in amah zahko in, ³⁰ ‘Hih pa inn lam dingin kipan khin napi a zom zo nawn kei hi,’ a ci ding uh hi. ³¹ “Ahih keileh, galkap 10,000 a nei kumpi khat, galkap 20,000 a nei kumpi dang khatin amah tawh kido ding hileh, ka zo taktak ding hiam ci in, tuat masa loin om ding ahi hiam? ³² A zawhngap kei leh tua kumpipa gamlapi ah a omlai in tangmi sawlin kilemna a bawlsak ding hi. ³³ Tuamah bangin note khatpeuh in zong a neihsa khempeuh a nusiat kei leh ka nungzui a suak thei kei ding hi. ³⁴ “Ci pen lim mah hi. Ahih hangin al nawn kei leh bangci bangin ki‑alkiksak thei ding ahi hiam? ³⁵ Leitang aa ding ahi a, leihoihza ding ahi zongin kizang theilo ahih manin a kipaikhia ding hi. Zak nading bil a nei mi in za tahen!” a ci hi.

¹ Tua khit ciangin siahdong khempeuh le mimawhte in Zeisu thugen ngai dingin ama kianga zuan uh hi. ² Pharisee pawlte le thukhamhilh siate phun uh a, “Hihpa mimawhte tawh kikhawl in an a nekhawm hi,” a ci uh hi. ³ Tua ahih manin amah in amaute kiangah hih thugentehna a gen hi. ⁴ “Tuu 100 a neih lak panin khat mansuah leh 99teng gamlak ah nusia photin a mang pen a muh mateng a zong lo ding note lakah kua om na hi uh hiam? ⁵ A muh ciangin lungdam mahmah a, a liangko ah a pua hi. ⁶ Inn a tun ciangin a lawmte le a innvengte sam a, ‘A mangsa ka tuu mukik ka hih manin hong lungdampih un,’ a ci hi. ⁷ Ken kong cih in ah tuamah bangin mawhna kisikkik ding a kisamlo midik 99 sangin mawhna a kisikkik mimawh khat hangin vantung ah lungdamna a lianzaw hi. ⁸ “Ahih kei leh numei khatin nguntang tang sawm a neih lak panin tang khat mansuah leh meivak in inn phiatin, a muh mateng hoihtak in zong ding hilo ahi hiam? ⁹ A muh ciangin a lawmte le a innvengte sam a, ‘Ka mansuahsa nguntang mukik zo ka hih manin hong lungdampih un,’ a ci hi. ¹⁰ Ken kong cih in ah tuamah bangin mawhna a kisikkik mimawh khat hangin Pasian vantungmite omna munah lungdamna a om hi,” a ci hi. ¹¹ Tua khit ciangin Zeisu in hih thu a gen hi. “Mi khatin tapa nih a nei hi. ¹² A nauzawpa in a pa kiangah, ‘Pa aw, kei tan ding neih le lam teng hong pia in,’ a ci hi. Tua ahih manin a pa in a neihsa teng a tate nih a hawmsak hi. ¹³ “Tua zawh a sawtlo in a nauzawpa in ama tan ding neih le lam teng kaikhawm in khual gamlapi khatah a zinkhia hi. Tua gamah a om sungin gualnopna lamah uangtat mahmah a, a neihsa teng a thangzat hi. ¹⁴ A neihsa teng a zatmang khit ciangin tua gamah kialpi nasiatak in hong tung a, cimawh in a om hi. ¹⁵ Tua ciangin tua gam mi khat va bel a, tua pa in vokcing dingin a lo ah a sawl hi. ¹⁶ Amah in vokte nek gamlak beegapte nangawn duhgawh mahmah ta a, ahih hangin kuamah in amah bangmah a pia kei hi. ¹⁷ “Ahih hangin amah le amah hong kiphawkkik in, ‘Ka pa cial nasemte in annek ding khamkhop cih thadah, khamval zong tampi a neih laitak un kei a puksi ding ka hita hi! ¹⁸ Kei tho in ka pa kiangah ka ciah dinga, “Pa aw, Pasian tung le nangma tungah ka khial zo hi. ¹⁹ Na tapa cih dingin zong ka kilawm nawn kei hi. Na cial nasemte khat bangin hong koih in,” ka ci ding hi,’ a ci hi. ²⁰ Tua ciangin amah tho in a pa kiangah a ciah hi. “Amah gamlapi a a omlai mahin a pa in galmuh a, hehpihhuai sa ahih manin delhin ngawngkawi in a nam hi. ²¹ “Tua ciangin a tapa in, ‘Pa aw, Pasian tung le nangma tungah ka khial zo a, na tapa cih dingin zong ka kilawm nawn kei hi,’ a ci hi. ²² “Ahih hangin a pa in a nasemte kiangah, ‘Puan hoih penpen hong la unla silhsak un. A khutah zungbuh bulhsak unla, khedap zong bulhsak un. ²³ I bawngno thau kaikhia in go unla, an ne in nuamsa ni. ²⁴ Banghang hiam cihleh hih ka tapa a sisa hi a, a hong nungtakik hi. A mangsa hi a, a kimukik hi,’ a ci hi. Tua ciangin amaute in lungdamna pawi a bawl uh hi. ²⁵ “Tu in a tapa uzawpen a lokuanna panin vai hong ciah a, inn gei a hong tun ciangin khuang le zam gingte za in, a lam a tawnte a mu hi. ²⁶ Tua ahih manin nasemte khat sam a, bang thu om hiam ci in a dong hi. ²⁷ Nasempa in, ‘Na naupa hong ciahkik hi. Na pa in amah cidam ludam in a tunkik lam a muhkik manin i bawngno thau a gawh hi,’ a ci hi. ²⁸ “Ahih hangin amah heh a, inn sungah lut nuamlo ahih manin a pa hong paikhia in a zol hi. ²⁹ Amah in a pa kiangah, ‘En in, kum hi zahtak nangma na ka sem a, khatvei beek na thupiak ka palsat ngei kei hi. Ka lawmte tawh ka gualnop nadingin kelno khat nangawn nong pia ngei kei hi. ³⁰ Ahih hangin na neih na lam teng numei kizuakte tungah a beisak, hih na tapa hong tun phetin bawngno thaupen na gawh hi,’ a ci hi. ³¹ “A pa in, ‘Ka ta aw, nangmah in kei tawh a omkhawm tawntung na hi a, ka neihsa khempeuh nangma neihsa ahi hi. ³² Na naupa ahih leh a si khinsa hong nungtakik a, a mangthangsa i mukik hi. Tua ahih manin lungdam a pawi i bawl ding ahi hi,’ a ci hi,” ci in a gen hi.

¹ Tua banah, Zeisu in a nungzuite kiangah, “Mihau khatin neihsa kempa khat a nei hi. Tua neihsa kempa in a topa neihsate thangzatgawp hi ci in a topa tungah a kikhia hi. ² Tua ciangin amah in a neihsa kempa sam a, ‘Na thu ka zakte bangci bang ahi hiam? Ka neihsa kempa hi thei nawnlo ding na hih manin na sum zatna sazian hong pia in,’ a ci hi. ³ “Tua ciangin neihsa kempa in, ‘Ka topa in neihsa kem za panin hong tawpsak ding hita ahih manin bang cih ding ka hiam? Lei tawh ding lah ka ngap kei a, khutdawh nget ding lah ka maizum hi. ⁴ Neihsa kem za pan ka zakiat ciangin mite in amau inn a hong tunsak nop nadingun ka hih dingzia ka thei hi,’ ci in a lungsim sungah a ngaihsun hi. ⁵ “Tua ciangin a topa tunga leiba a nei khempeuhte sam a, a khatna pa kiangah, ‘Ka topa tungah bangzah ba na hi hiam?’ a ci hi. ⁶ Tua pa in, ‘Sathau bung 100 ka ba hi,’ a ci hi. Tua ciangin amah in tua pa kiangah, ‘Na leiba ciaptehna lai la inla tu pakin 50 in gelh mengmeng in,’ a ci hi. ⁷ “Tua khit ciangin a dang khatpa kiangah, ‘Nang bangzah na ba hiam?’ a cih ciangin, ‘Mangbuh bem 100 ka ba hi,’ a ci hi. Amah in, ‘Na leiba ciaptehna lai la inla, 80 in gelh in,’ a ci hi. ⁸ “Tua hi a, a thumanlo neihsa kempa in, khelpilna tawh a sep manin a topa in a phat hi. Banghang hiam cihleh tulai khang mite in amaute khanpih khuavak tate sangin a khelpil zaw uh hi. ⁹ “Ken kong cih in ah hih leitung sum le pai tawh lawm le gual na zong un. Tua hi leh bangmah na neih nawnloh uh ciangin amaute in a tawntung in nang hong sang ding uh hi. ¹⁰ “Thuneupen tungah a muanhuai mi in thuliante tungah zong a muanhuai hi. Thuneupen tunga diktatlo mi in thuliante tungah zong a diktat kei hi. ¹¹ Tua ahih manin leitung sum le pai tungah muanhuai kei le uhteh, kua in sum taktak hong ap ngam ding ahi hiam? ¹² Midang khat neihsa tungah muanhuai kei le uh teh kua in a neihsa uh note hong pia ding ahi hiam? ¹³ “Nasem khatin to nih na semkhawm theilo hi. Banghang hiam cihleh khat mudah in khat a it ding hi. Ahih keileh khat thupi simin khat a simmawh ding hi. Pasian na le leitung na na semkhawm thei kei ding uh hi,” a ci hi. ¹⁴ Tu in sumduh Pharisee pawlte in hih thu khempeuh a zak uh ciangin amah zahpih in a nuihsan uh hi. ¹⁵ Tua ciangin amah in amaute kiangah, “Mite mai ah no le no na kidiksak uh hangin Pasian in na lungsim uh a thei hi. Mihing in a thupi ngaihsut mahmahte Pasian in kihhuai a sa hi. ¹⁶ “Thukham le Kamsangte thuhilhnate John hun dongin a kihilh hi. John huna kipan Pasian kumpigam thu kitangko a, mi khempeuh in thagum hatna suangin a lut uh hi. ¹⁷ Thukham sunga laimal neupen khat a manthan ding sangin van le lei a manthan ding a baih zaw hi. ¹⁸ “A zi ma a, numei dang khat a teenpih mi in angkawm ahi hi. A kimasa numei a teenpih mi zong angkawm ahi hi. ¹⁹ “Khatvei lai in mihaupa khat om a, amah in puan dupsan le puanpak silhin nisim in leitung nopsakna tawh a om hi. ²⁰ Ahi zongin a inn kongpi gei ah a pumtang in meima a vei Lazarus kici khutdawh ngenpa khat a kikoih hi. ²¹ Amah in mihaupa ankuang pana anneng kiate duhgawh mahmah in a om laitak in uite hong pai in a meimate a liak uh hi. ²² “Tua nung ciangin khutdawh ngenpa si a, vantungmite in amah Abraham ang sungah a tun uh hi. Mihaupa zong si in a kivui hi. ²³ Amah in Hadesɠ ah bawlsiatna thuakin a om laitak in a khuadak leh gamlapi a om Abraham le a ang sunga om Lazarus a mu hi. ²⁴ Tua ciangin amah in, ‘Pa Abraham aw, kei hong hehpih in. Lazarus hong paisak inla, a khutme dawn tui ah diahin ka lei hong votsak hen. Banghang hiam cihleh hih meikuang sungah bawlsiatna ka thuak hi,’ ci in a kiko hi. ²⁵ “Ahih hangin Abraham in, ‘Ka ta aw, leitung na nuntak sungin nopsakna namkim na ngah a, Lazarus ahih leh gentheihna namkim a ngah hi cih phawkkik in. Tu in amah in hehnepna ngah a, nangmah in bawlsiatna na thuak hi. ²⁶ Tua thamlo in, no le ko kikal ah guam thukpi khat om a, hihlam panin no kiangah a galkah nuamte in galkah theilo in tualam panin zong ko kiangah kuamah hong galkah theilo hi,’ a ci hi. ²⁷ “Tua ciangin amah in, ‘Tua ahih leh pa aw, ka pa inn ah amah nong sawlsak nadingin kong thum hi. ²⁸ Banghang hiam cihleh keimah in sanggam pasal nga ka nei hi. Amaute zong hih gawtmun a hong tun khakloh nadingun amaute tungah teci va pangsak in,’ a ci hi. ²⁹ Abraham in ama kiangah, ‘Amaute in Moses le Kamsangte a nei uh hi. Tuate thu na ngai uh hen,’ a ci hi. ³⁰ Tua ciangin amah in, ‘Hilo hi pa Abraham aw, a sisa mi khat amaute kiangah va pai leh a mawhna uh kisikkik ding uh hi,’ a ci hi. ³¹ “Ahih hangin Abraham in ama kiangah, ‘Amaute in Moses le Kamsangte thuhilhnate a up kei uh leh misite lak panin a thokik mi khatin thu a gen hangin a um tuan kei ding uh hi,’ a ci hi,” ci in a gen hi.

¹ Tua ciangin Zeisu in a nungzuite kiangah, “Pukna a hong tun loh a phamawh thu hi a, ahi zongin tua pukna a piangsakpa in gimna a thuak ding hi! ² Mi khatin hih naupangnote khat a puksak sangin a ngawngah angawina suangtum khat khai in tuipi sungah kikhia leh ama aa dingin hoih zaw ding hi. ³ Tua ahih ciangin kikepsiam un. Nang tungah na sanggampa a hong khialh leh thuhilh in taii in. A kisikkik leh maisak in. ⁴ Ni khat sungin sagihvei hong khial a, sagihvei mah na kiangah hong pai in, ‘Ka kisikkik hi,’ hong cihleh a khialhna maisak in,” a ci hi. ⁵ Tua ciangin sawltakte in Topa kiangah, “Ka upna uh hong khangsak in,” a ci uh hi. ⁶ Tua ciangin Topa in, “Upna ankamtang cia nei le uh teh hih bokthok kung kiangah, ‘Kizunglot inla, tuipi sungah va kisuan in,’ ci le uh teh na cih bangun hong mang ding hi. ⁷ “Na lo a kho, ahih keileh na gan a cing na nasempa vai hong tun phet in, ‘Hong pai inla na an ne pah in,’ a ci ding note lakah kua om na hi uh hiam? ⁸ Tua bang na cih sangsik un, ‘Kithawi inla, ka annek ding hong lui phot in. Ka nek ka dawn sung hong ngak inla, tua khit ciangin na an ne panin,’ ci zaw ding hilo na hi uh hiam? ⁹ Nasempa in a topa thupiak teng a sep manin a topa in nasempa tungah lungdam ko ding ahi hiam? Ko peuhmah lo ding hi. ¹⁰ Tuamah bangin note in zong a hong kisawl teng nasep khit uh ciangin, ‘I sep ding teng mah a sem i hi a, a cingtaklo nasemte i hi zawlai hi,’ ci un,” a ci hi. ¹¹ Tu in, Samaria le Galilee gamgidung tawnin Jerusalem khuapi ah Zeisu a paitoh laitak in thu khat hong piang hi. ¹² Amah khuaneu khat lut dinga a pai laitak in miphak sawm in amah a na dawntuah uh hi. ¹³ Amaute in a gamlapi panin, “Zeisu aw, Siapa aw, kote hong hehpih in,” ci in nakpi in a kiko uh hi. ¹⁴ Zeisu in amaute a muh ciangin, “Pai unla, siampite kiangah va kilak un,” a ci hi. Amaute a pai laitak mahun a dam uh hi. ¹⁵ Amaute laka khatin a dam lam a kimuh ciangin hong kilehkik a, aw lianpi tawh Pasian a phat hi. ¹⁶ Amah Zeisu khephung ah boksuk in lungdam a ko hi. Tua pa pen Samaria mi ahi hi. ¹⁷ Tua ciangin Zeisu in, “A kidamsak mi sawm hilo ahi hiam? A dang kuate koi ah om uh ahi hiam? ¹⁸ Hih gamdang mipa simloh hong kilehkik a Pasian min a phat ding khat beek om lo ahi hiam?” a ci hi. ¹⁹ Tua khit ciangin tua pa kiangah, “Ding inla ciah in. Na upna in hong damsak zo hi,” a ci hi. ²⁰ Khatvei, Pharisee pawlte in Pasian kumpigam cik ciangin hong piang ding hiam ci in dong uh a, Zeisu in, “Pasian kumpigam in muh theihin hong piang ding ahi kei hi. ²¹ ‘Hihlai ah,’ om hi, ‘Hualai ah,’ om hi kici theilo hi. Banghang hiam cihleh Pasian kumpigam in note sungah a om takpi hi,” a ci hi. ²² Tua khit ciangin nungzuite kiangah, “Mihing Tapa nite lakah khat na muhnop hun uh hong tung dinga, ahi zongin na mu kei ding uh hi. ²³ Amaute in, ‘Hihlai ah om hi hualai ah om hi,’ hong cih uh hangin zui kei unla, nungdelh kei un. ²⁴ Khuaphialep in vanmong khat pan phia a, vanmong khat dongah a tanzal bangin Mihing Tapa zong ama ni ciangin tua bang ahi ding hi. ²⁵ Ahih hangin amah in gimna tampi thuak masa dinga, tulai khang mite in amah a nial ding uh hi. ²⁶ “Noah hun lai bangin Mihing Tapa ni ciangin zong tua bang hi ding hi. ²⁷ Tembaw sungah Noah a lut ni dongin mite anne tuidawn le kipi kiteeng in a om uh hi. Tua khit ciangin tuiciin hong tunga amaute khempeuh a susia mang hi. ²⁸ “Tuamah bangin Lot hun lai in zong anne tuidawn, sumbawl paibawl, lokho singpua, innbawl lobawl in a om uh hi. ²⁹ Ahih hangin Sodom khua pan Lot a paikhiat ni in, vantung panin kaat le meikuang guah bangin zu a, a vekpi un a susia hi. ³⁰ “Mihing Tapa hong kilat ni ciangin zong tuamah bangin hi ding hi. ³¹ Tua ni ciangin innkhum zanga omte in inn sunga om nate la dingin kumsuk nawn kei uh hen. Tuamah bangin lokuante zong inn ah ciahkik nawn kei uh hen. ³² Lot zi na ngaihsun un. ³³ A nuntakna a hu nuam mi in a nuntakna tan dinga, a nuntakna a tan mi in a nuntakna a hu ding hi. ³⁴ Ken kong cih in ah tua zan ciangin lupna khat tunga a lumkhawm mi nih, khat kila in khat kinusia ding hi. ³⁵ An sukhawm numei nih, khat kila in khat kinusia ding hi. ³⁶ Lolai a om mi nih, khat kila in khat kinusia ding hi,” a ci hi. ³⁷ Tua ciangin amaute in, “Topa aw, hih thute koi lai ah hong piang ding hiam?” a ci uh hi. Amah in, “Misi luang omna peuh ah musanete hong kikhawm ding uh hi,” a ci hi.

¹ Tua khit ciangin lungkialo a thu a nget tawntung nadingun Zeisu in thugentehna khat tawh amaute thu hilh a, ² “Khua khatah Pasian a kihta lo, mi zong a thusimlo thukhenpa khat a om hi. ³ Tu in tua khua mahah meigongnu khat zong a om hi. Tua nu thukhenpa kiangah va pai pahpah a, ‘Thu ka neihpih ka langpa tungah maantak in thu hong khensak in,’ a ci hi. ⁴ “Amah in tawlkhat sung a khensak pah nuam kei hi. Ahi zongin a tawpna ah hi bangin ngaihsun a, ‘Pasian kihta loin mi zong ka thusim loh hangin, ⁵ hih meigongnu in hong nawngkaisak den ding ahih manin a thu maantak in ka khensak ding hi. Tua hi keileh amah hong pai thithe in hong nawngkaisak ding hi,’ ci hi,” a ci hi. ⁶ Tua ciangin Topa in, “A thumanlo tua thukhenpa kampauna ngaihsun un. ⁷ Pasian teelsa mite sun le zanin kiko le uh Pasian in a thu uh khensak loin sawtpi kingaksak ding ahi hiam? ⁸ Ken kong cih in ah manlangtak in a khensak pah ding hi. Ahi zongin Mihing Tapa hong pai ciangin leitung ah upna a mu ding hiam?” a ci hi. ⁹ Tua ciangin amau le amau midik in a kingaihsun midang khempeuh a neumuh mi pawlkhat tungah thugentehna tawh thu a hilh inah, ¹⁰ “Mi nih thungen dingin biakinnpi huangah a paito uh hi. Khatpa Pharisee hi a, a dang khatin siahdongpa ahi hi. ¹¹ Pharisee pa dingto in amah le amah kiphat in thungen a, ‘Pasian aw, midangte neihsa a sutte, a thumanlote, angkawmte le hi lai a siahdongpa bang ka hih loh manin, na tungah ka lungdam hi. ¹² Nipi kal khatin nihvei an ka tang a, ka neihsa khempeuh panin sawm a khat ka pia hi,’ a ci hi. ¹³ “Siahdongpa ahih leh gamlapi ah dingin vantung lam nangawn en ngamlo in a awm beng a, ‘Pasian aw, mimawh keimah hong hehpih in,’ a ci hi. ¹⁴ “Ken kong cih in ah, hihpa in a khatpa sangin Pasian kiang pan diktansakna ngahsa in a inn ah a ciah hi. Amah le amah a kilamsang mi in niamkhiatna thuak dinga, amah le amah a kiniamkhiat mi, a kilamsang ding hi,” a ci hi. ¹⁵ Tu in Zeisu lawn ding deihin mite in a naungekte a hong paipih uh nungzuite in a muh uh ciangin a taiigawp uh hi. ¹⁶ Ahih hangin Zeisu in amaute sam a, “Naupangnote ka kiangah hong pai ding kham kei un. Banghang hiam cihleh Pasian kumpigam in naupang a bang mite aa ding ahi hi. ¹⁷ Aman takpi kong cih in ah, naupangnote san banga Pasian kumpigam a sanglo mi peuhmah tua kumpigam sungah a lutthei kei ding hi,” a ci hi. ¹⁸ Tua ciangin milian khatin, “Sia hoih aw, nuntak tawntungna ka ngah nadingin bang hih ding ka hi hiam?” ci in a dong hi. ¹⁹ Zeisu in, “Banghang in mihoih hong ci na hi hiam? Pasian longal mihoih kuamah a om kei hi. ²⁰ ‘Angkawm kei in. Mi that kei in. Guta kei in. Thumanlo in teci pang kei in. Na nu na pa zahtak in,’ cih thupiakte na thei hi,” a ci hi. ²¹ Tua ciangin amah in, “Tuate khempeuh ka neutung a kipan ka zuihsa ahi hi,” a ci hi. ²² Zeisu in tua thu a zak ciangin ama kiangah, “Na kisap khat a omlai hi. Na neihsa khempeuh zuak inla mizawngte hawmsak leteh vantung ah na hau ding hi. Tua khit ciangin hong pai inla ka nung hong zui in,” a ci hi. ²³ Tua pa hau mahmah ahih manin hih thu a zak ciangin a dah mahmah hi. ²⁴ Tua pa a dah mahmah lam Zeisu in a muh ciangin, “Mihaute Pasian kumpigam sungah a lut ding uh haksa mahmah hi. ²⁵ Mihau khat Pasian kumpigam sungah a lut ding sangin kala‑oh khat phimbilvang sunga khum ding a baih zaw hi,” a ci hi. ²⁶ Tua thu a za mite in, “Tua bang ahih leh kua in hotkhiatna ngah zo ding ahi hiam?” a ci uh hi. ²⁷ Ahih hangin amah in, “Mihingte aa dingin a piang theilote Pasian aa dingin piang thei hi,” a ci hi. ²⁸ Tua ciangin Peter in, “En in, kote in na khempeuh nusia in nang kong zui uh hi,” a ci hi. ²⁹ Tua ciangin amah in amaute kiangah, “Aman takpi kong cih in ah, Pasian kumpigam thu hangin a inn, a nu a pa, a sanggamte, a zi a tate a nusia mi peuhmah in, ³⁰ hih leitung a nuntak sungin a zah tampi ngah dinga, hong tung ding hunah zong nuntak tawntungna ngah loin a om kei ding hi,” a ci hi. ³¹ Tua ciangin amah in sawm le nihte tuam sapkhiat in amaute kiangah, “En un, Jerusalem khuapi ah i paito dinga, Mihing Tapa tawh kisai kamsangte gelhsa thu khempeuh a tangtung ding hi. ³² Gentile‑te khutah amah pia ding uh a, amaute in zahko in simmawh bawl in a cilphih ding uh hi. ³³ Amah satin that ding uh a, a ni thum ni in a thokik ding hi,” a ci hi. ³⁴ Ahih hangin a nungzuite in hih thute a tel zo kei uh hi. Hih thute amaute tungah ki‑iimcip ahih manin bang thu gen hiam cih a thei kei uh hi. ³⁵ Tua ciangin Zeisu Jericho khua a tunkuan in mittaw khat lamgei ah khutdawh ngenin a tu hi. ³⁶ Mihonpite in tua mun nawka hong paina husa a zak ciangin bang thu hiam ci in amah in a dong hi. ³⁷ Tua ciangin amaute in, “Nazareth khua mi Zeisu hong pai hi,” a ci uh hi. ³⁸ Tua ciangin amah in, “David Tapa, Zeisu aw, kei hong hehpih in,” ci in a kiko hi. ³⁹ Tua pa a daih nadingin a mai‑a pai mite in a taiihuan uh hangin amah in, “David Tapa aw, kei hong hehpih in,” ci in a kiko semsem hi. ⁴⁰ Tua ciangin Zeisu khawl a, tua pa ama kiangah a paipih nadingun thu a pia hi. Tua pa ama kianga tun ciangin Zeisu in, ⁴¹ “Nang aa dingin bang kong hihsak ding deih na hi hiam?” a ci hi. Tua ciangin amah in, “Topa aw, khua ka mu nuam hi,” a ci hi. ⁴² Tua ciangin Zeisu in, “Khua muta in, na upna in nang hong damsak zo hi,” a ci hi. ⁴³ Tua ciangin tua pa in thakhat in khua mu a, Pasian min phatin Zeisu nung a zui hi. A mu mi khempeuh in zong Pasian a phat uh hi.

¹ Tua khit ciangin Zeisu Jericho khuasung tawnin a pai hi. ² Tua khua ah, en in, Zacchaeus kici a hau mahmah siahdong mangpa khat a om hi. ³ Tua pa in Zeisu kua hiam cih a muhnop hangin a tun tom ahih manin mihonpi lak panin a mu zo kei hi. ⁴ Tua ahih manin Zeisu pai nading lampi ah na matai in amah a muh theih nadingin theithek kung khatah a kah hi. ⁵ Zeisu tua mun a tun ciangin dakto a, amah a muh ciangin, “Zacchaeus aw, hong kum mengmeng in. Tuni in na inn ah kong taam ding hi,” a ci hi. ⁶ Zacchaeus zong kumsuk pah a, lungdamtak in a inn ah Zeisu a tungsak hi. ⁷ Hih thu a mu mi khempeuh in Zeisu phunsan uh a, “Mimawhpa inn ah zintung dingin a pai tazen hi,” a ci uh hi. ⁸ Tua ciangin Zacchaeus dingto in Topa kiangah, “Topa aw, en in, ka neihsa a lang mizawngte ka pia dinga, mi khatpeuh neihsa zawhthawh thu tawh ka laksak a om leh a zah li in ka loh ding hi,” a ci hi. ⁹ Tua ciangin Zeisu in, “Amah zong Abraham tapa khat ahih manin tuni in hih inn ah hotkhiatna a tung hi. ¹⁰ Banghang hiam cihleh Mihing Tapa in a mangthang mite zong ding le honkhia dinga hong pai ahi hi,” a ci hi. ¹¹ Amaute in Zeisu thugen khempeuh a ngai uh hi. Zeisu Jerusalem khuapi hong tung dekta ahihna leh mipite in Pasian kumpigam a phut pah ding sa uh ahih manin Zeisu in gentehna dang khat tawh thu a gen inah, ¹² “Kumpi za sang ding le tua khit cianga hong ciahkik dingin ulian khatin gamlapi gamdang khatah a zin hi. ¹³ Amah in a nasem sawmte samin sumtang minaɠ khat ciat pia a, ‘Kong tunkik mateng na met bawl un,’ ci in a vaikhak hi. ¹⁴ “Ahih hangin a gam mite in amah mudah uh ahih manin a nungah tangmi sawl uh a, ‘Hih mipa ka kumpi dingun ka deih kei uh hi,’ ci in a gensak uh hi. ¹⁵ “Tua gamah kumpi za a ngah khit ciangin amah hong ciahkik a, sum a apsa nasemte in bangzah ciat metsak uh hiam cih thei nuam in a samsak hi. ¹⁶ Tua ciangin a khatna pa hong pai in, ‘Topa aw, na sum minaɠ khat panin a met mina sawm ka ngah hi,’ a ci hi. ¹⁷ Tua ciangin amah in tua pa kiangah, ‘Nasem hoihpa aw, na nasepna hoih mahmah hi. Thuneu khat tungah muanhuai na hih manin khuapi sawm na uk in,’ a ci hi. ¹⁸ “Tua ciangin a nihna pa hong pai in, ‘Topa aw, na sum minaɠ khat panin a met mina nga ka ngah hi,’ a ci hi. ¹⁹ Amah in hihpa zong tuamah bangin phat a, ‘Nang zong khuapi nga na uk in,’ a ci hi. ²⁰ “Tua ciangin a dang khatpa hong pai in, ‘Topa aw, na sum dial tawh tun in hihlai ah ka kem khinkhian hi. ²¹ Mi genhakpa na hih manin kong kihta hi. Banghang hiam cihleh sum khol lopi sum ngah nuamin khaici tuh lopi an na la nuam hi,’ a ci hi. ²² “Tua ciangin amah in tua nasempa kiangah, ‘A ginalo nasempa aw, na kampauna zui in thu kong khen ding hi. Sum khol lopi in sum ngah nuam, khaici tuh lopi in an a la nuam, mi genhakpa ka hihlam hong thei na hih leh, ²³ kong ciahkik ciangin a met tawh ka ngahkhop theih nadingin banghang in ka sumte sumkholna ah na koih lo na hi hiam?’ a ci hi. ²⁴ “Tua khit ciangin a kianga a ding mite kiangah, ‘Ama tunga om sum minaɠ khat la unla, mina sawm a neipa pia un,’ a ci hi. ²⁵ Tua mite in, ‘Topa aw, amah in minaɠ sawm nei khinzo hi,’ a ci uh hi. ²⁶ “Amah in, ‘Ken kong cih in ah, a neite kipiak beh dinga, a neilote tung panin a neihsa nangawn kilakkhiatsak ding hi. ²⁷ Keima uk ding a utlo tua ka galte hong paipih unla, ka muhtang mahmah in that un,’ a ci hi,” ci in a gen hi. ²⁸ Hih thute a gen khit ciangin, amah masa in Jerusalem khuapi ah a paito uh hi. ²⁹ Tanluan muala om Bethphage le Bethany khuate a tunkuan uh ciangin a nungzuite nih sawl a, ³⁰ “Mai‑a khua ah na paikhol un. Khuasung na lut uh ciangin kuama tuan ngei nailoh laano khat kikhih a om na mu ding uh hi. Suut unla hong kai un. ³¹ Tua ciangin mi khatpeuh in, ‘Banghang in suut na hi uh hiam?’ a hong cih leh, ‘Topa in deih hi,’ ci un,” a ci hi. ³² Tua a sawl mite pai uh a, a gensa bangbang in a mu uh hi. ³³ Ahi zongin amaute in laano a suut laitak un a neite in, “Banghang in tua laano sut na hi uh hiam?” a ci uh hi. ³⁴ Amaute in, “Topa in deih hi,” a ci uh hi. ³⁵ Tua ciangin amaute in Zeisu kiangah laano hong paipih uh a, a tungah puan a phah khit uh ciangin Zeisu a tuangsak uh hi. ³⁶ Amah a pai ciangin mipite in lampi ah a puante uh a phah uh hi. ³⁷ A muhsa uh nalamdang khempeuhte hangin a nungzui mihonpite lungdam in a kipak uh hi. Tua ahih manin Tanluan mual panga lampi paisuk ah Zeisu a hong tun ciangin mihonpite nakpi in kiko in Pasian phat uh a, ³⁸ amaute in, “Topa min tawh hong pai Kumpipa in thupha ngah tahen! Vantung ah nopna om henla, A sangbel munah minthanna om tahen!” a ci uh hi. ³⁹ Mihonpite lak panin Pharisee‑te pawlkhat in, “Sia aw, na nungzuite taii in,” a ci uh hi. ⁴⁰ Ahih hangin amah in, “Ken kong cih in ah hih mite dai le uh, suangte hong kiko pah ding uh hi,” ci in a dawng hi. ⁴¹ Tu in, Jerusalem khuapi hong tung dekta a, khuapi a galmuh ciangin kah a ⁴² a gen in ah, “Nopna na ngah nading thute tuni beekin thei hi leteh maw! Ahi zongin tu in tua thute na muh khakloh nadingin nang kiang panin kiselta hi. ⁴³ Na galte in na kimkot ah kulh hong ciangin hong umcih ding uh a, a munmun panin hong khaktan hun uh hong tung ding hi. ⁴⁴ Nang le na sunga om na tate leitang hong den nading uh a, nang sunga om suang kiciangte zong a kithuap khat beek a omsak kei ding uh hi. Banghang hiam cihleh na kiangah a hong kihawh hun na thei kei hi,” a ci hi. ⁴⁵ Tua khit ciangin Zeisu biakinnpi huang sungah lut a, vanlei vanzuak a om mite hawlkhia in, ⁴⁶ amaute kiangah, “ ‘Ka inn in thungetna inn ahi hi,’ ci in Lai Siangtho ah kigelh napi in note in ‘gutate phualpi’ na suaksak tazen uh hi” a ci hi. ⁴⁷ Zeisu in ni simin biakinnpi huang sungah thu a hilh hi. Ahih hangin siampi liante, thukhamhilh siate le mipi makaite in amah thah theih nading lampi a zong uh hi. ⁴⁸ Ahi zongin mi khempeuh in ama thugen limngaih mahmah uh ahih manin bangmah a cih thei kei uh hi.

¹ Ni khat, Zeisu in biakinnpi huang sungah thu hilhin lungdamna thu tangko in a om laitak in siampi liante, thukhamhilh siate le maikaite ama kiangah hong pai uh a, ² “Bang thuneihna tawh hih nate hih na hi hiam? Hih thuneihna kua in hong pia ahi hiam hong gen in,” a ci uh hi. ³ Ahih hangin amah in amaute kiangah, “Ken zong thu khat kong dong ding hi hong dawng un. ⁴ John tuiphumna thu vantung pan ahi hiam ahih keileh mihing kiang pan ahi hiam?” a ci hi. ⁵ Amaute kikum uh a, “ ‘Vantung pan hi,’ ci lehang, ‘Banghang in amah um lo na hi uh hiam?’ hong ci ding hi. ⁶ ‘Mihing kiang pan hi,’ ci lehang lah mite in John pen kamsang khatin um uh ahih manin mi khempeuh in suang tawh hong deng ding uh hi,” a kici uh hi. ⁷ Tua ahih manin, “Koi pan hiam cih ka thei kei uh hi,” ci in a dawng uh hi. ⁸ Zeisu in amaute kiangah, “Ken zong hih nate bang thuneihna tawh hih ka hi hiam cih kong gen kei ding hi,” a ci hi. ⁹ Tua khit ciangin amah in hih thugentehna mipite tungah gen a, “Mi khatin lenggah huan khat bawl in lokhote a khawhlawhsak hi. Tua khit ciangin gamlapi ah khualzin in sawtpi a taam hi. ¹⁰ Lenggah lawh hun a tun ciangin lo khawhlawhte in huan panin a piang lenggah pawlkhat a na piak theih nadingun a nasemte khat a sawl hi. Ahih hangin lo khawhlawhte in amah vuagawp in a khutguak in a ciahsak uh hi. ¹¹ Amah in a dang nasem khat sawlkik a, tua pa zong vuagawp in a zumhuaipi in bawl uh a, a khutguak mahin a ciahsak uh hi. ¹² Tua ciangin a thumveina ah, a nasemte khat sawlkik a, tua pa zong liamsak gawpin a nawhkhia uh hi. ¹³ “Tua ciangin huan neipa in, ‘Bang cih leng hoih ding ahi hiam? Ka it ka tapa sawl leng, na mu le uh zahtak khabuang ding uh hi,’ a ci hi. ¹⁴ Ahih hangin lo khawhlawhte in amah a muh uh ciangin, ‘Hihpa in a innluah ding pa ahi hi. Ama luah ding teng ei aa a suah theih nadingin hong pai un amah that ni,’ a kici uh hi. ¹⁵ “Tua khit ciangin lenggah huan pualam ah kaikhia in a that uh hi. Tua ahih leh lenggah huan neipa in amaute bang a cih ding hiam? ¹⁶ Amah hong pai in lo khawhlawhte that dinga, lenggah huan zong midangte a khosak ding hi,” a ci hi. Amaute in tua thu a zak uh ciangin, “Tua bangin piang kei tahen!” a ci uh hi. ¹⁷ Zeisu in amaute en a, “Tua ahih leh, ‘Innlamte in a nilkhiat suang, Innkiusuang bulpi a suakzo hi,’ ci in Lai Siangtho sunga a kigelh thu bang a cihnopna ahi hiam? ¹⁸ Hih suang tunga a kia mi peuhmah kitamkham dinga, hih suangin mi khatpeuh a den leh tua mi a zanciim ding hi,” a ci hi. ¹⁹ Siampi liante le thukhamhilh siate in hih thugentehnate in amaute a kawkna ahihlam a thei uh hi. Tua ahih manin tua hun mahin amah matsawm uh a, ahi zongin mihonpite a kihta zel uh hi. ²⁰ Amaute in mangpipa ukna le thuneihna sungah Zeisu a piak theih nadingun ama kammal mah tawh a lehmat dingin mihoih banga a kineih thukante sawlin a enciksak uh hi. ²¹ Tua ciangin tua mite in, “Sia aw, thu a maan bangin genin thu na hilh a, zahtak tuam nei loin Pasian lampi maantak in na hilh hi cih kong thei uh hi. ²² Caesar kumpipa, siah piak ding thukham tawh kituak hiam kituak lo hiam?” ci in a dong uh hi. ²³ Ahih hangin amah in amaute lungsim kawina thei ahih manin, “Banghang in hong ze‑et na hi uh hiam? ²⁴ Denariusɠ sum tangkhat hong lak un. Kua lim le kua min tuang ahi hiam?” a ci hi. Amaute in, “Caesar kumpipa,” a ci uh hi. ²⁵ Tua ciangin amah in amaute kiangah, “Caesar kumpipa neihsate Caesar kumpipa pia unla, Pasian neihsate Pasian pia un,” a ci hi. ²⁶ Amaute in mipite mai ah ama kammal tawh a man zo kei uh hi. Amaute in ama dawnkikna lamdangsa in a dai khipkhep uh hi. ²⁷ Tua khit ciangin misite thawhkikna thu a nial Sadducee pawlte pawlkhat hong pai in thu a dong uh hi. ²⁸ Amaute in, “Sia aw, Moses in kote aa dingin a hong gelhsak thu in pasal khatin ta nei man loin a zi a sihsan leh a naupa in tua meigong teenpih henla, a upa aa dingin suan le khak tawisak hen a ci hi. ²⁹ Khatvei lai in sanggam pasal sagih om uh a, a upapen in zi a neih khit ciangin ta nei loin a si hi. ³⁰ Tua ciangin a nihnapa in tua nu teenpih a, ta neilo mahin a si hi. ³¹ Tua ciangin a thumna pa in tua nu a teenpih hi. Tua bangin a sagihna dongin teenpih suksuk uh a, ta neilo vive in a si uh hi. ³² A nunung penin tua numei zong a si hi. ³³ Tua hi a, thawhkik ni ciangin tua numei in kuapen zi in om ding ahi hiam? Banghang hiam cihleh a sagih un tua numei a teenpih uh hi,” a ci uh hi. ³⁴ Zeisu in amaute kiangah, “Tulai khang mite kipi kiteeng in a om uh hi. ³⁵ Ahi zongin tua huna kihel dingin a kilawm mite le misite lak panin a thokik mite in kipi kiteeng in a om nawn kei ding uh hi. ³⁶ A thokik mite ahih manun sithei nawnlo ding uh a, vantungmite tawh kibang in Pasian tate a hita uh hi. ³⁷ Moses in sawlbawk kuang gei ah Topa a hopih lai in, ‘Abraham Pasian, Isaac Pasian, Jacob Pasian,’ a cihna thu in misite kithokiksak ding hi cih a lak ahi hi. ³⁸ Banghang hiam cihleh Pasian muhna ah mi khempeuh nungta ahih manin amah misite Pasian hilo in a nungtate Pasian ahi hi,” a ci hi. ³⁹ Tua ciangin thukhamhilh siate pawlkhat in, “Sia aw, na thugen maan mahmah hi,” a ci uh hi. ⁴⁰ Tua huna kipan in bangmah a dong ngam nawn kei uh hi. ⁴¹ Tua ciangin amah in, “Amaute in banghang in Khazih pen David Tapa hi ci thei uh ahi hiam? ⁴² David mahmah in Late Bu sungah, ‘Topa in ka Topa kiangah, ⁴³ “Na galte na khengakna ka suahsak khit mateng in, Ka taklam ah na tu in,” ci hi,’ a ci hi. ⁴⁴ Tua ahih ciangin David in amah pen ‘Topa’ ci ahih leh bangci bangin ama tapa hi thei ding ahi hiam?” a ci hi. ⁴⁵ Tua khit ciangin Zeisu in mipite khempeuh zak dingin a nungzuite kiangah, ⁴⁶ “Thukhamhilh siate tawh kisai in na kidawm un. Amaute in puantualpi silhin vak nuam uh a, sumbuuk phual ah zahtakna tawh a kihopih ding a ut uh hi. Kikhopna innte le pawikhamna innte ah mun hoih tata a deih uh hi. ⁴⁷ Meigongte neihsa teng nek mangsak uh a, kineihna tawh thu sawtpipi a ngen uh hi. Tua bang mite in a nasia zaw mawhna thukhenna a thuak ding uh hi,” a ci hi.

¹ Zeisu a khuadak leh mihaute in a sumpi uh bung sungah a khiat uh mu a, ² a zawng meigongnu khatin zong sumnenɠ tang nih a khiat a mu hi. ³ Tua ciangin amah in, “Aman takpi kong cih in ah, hih a zawng meigongnu in midang khempeuh sangin tam a khia zaw hi. ⁴ Banghang hiam cihleh midang khempeuh in a vum a leta a neihna sung panun Pasian sumpi ding a pia uh hi. Hihnu in ahih leh a zawnsa pipi in a kivak nading a neihsun teng a khia ahi hi,” a ci hi. ⁵ Tua ciangin mi pawlkhat in biakinnpi zepna suangte a hoihzia le Pasian a kipia na manpha pipite thu a gen uh ciangin Zeisu in, ⁶ “Hih na muh uh suangte khat tungah khat zong kiciang loin, a kiphelkhiat hun hong tung ding hi,” a ci hi. ⁷ Tua ciangin amaute in, “Sia aw, hih thute cik ciangin hong piang ding ahi hiam? Hih thute hong tun ding ciangin theihsakna lim bang hong piang ding ahi hiam?” a ci uh hi. ⁸ Amah in, “Kuamah in hong khem zawhloh nadingin kikem un. Banghang hiam cihleh, ‘Keimah in Khazih ka hi hi,’ ahih keileh, ‘A hun hong nai zo hi,’ ci in keima min tawh mi tampi hong pai in hong gen ding uh hi. Ahih hangin zui kei un. ⁹ Gal kidona thute za in gam sung buaina hong pian ciangin patau kei un. Hih thute a piang masa ding mah hi a, ahi zongin hun bei nading hi nailo hi,” a ci hi. ¹⁰ Tua ciangin amah in amaute kiangah, “Minam khat le minam khat, kumpigam khat le kumpigam khat hong kido ding uh hi. ¹¹ Mun tuamtuam ah nakpi in zin hong ling dinga, kialpi le pul natnate hong tung ding hi. Vantung ah a dipkuathuai nate na mu ding uh a, limlamdang pipi zong hong piang ding hi. ¹² “Ahih hangin hih thu khempeuh a pianma in note tungah a khut uh nga in hong bawlsia ding uh a, kikhopna innte le thong innte sungah hong ap ding uh hi. Keima min hangin kumpite le mangpite mai ah note hong kitun ding hi. ¹³ Ahi zongin tuate in note tecipan nadingin hun hoih a hong suak ding hi. ¹⁴ Tua hi a, na dawnkik nading uh na lunghimawh kholhloh nadingun khentatsa in nei un. ¹⁵ Banghang hiam cihleh na galte khempeuh in a hong langpan zawhloh nading le a hong nial zawhloh nadingun thugen siamna le lungpilna kong pia ding hi. ¹⁶ Na nu na pate, na sanggamte, na tanaute le na lawm na gualte in note hong lehhek ding uh a, thah ding dongin note pawlkhat hong tun ding uh hi. ¹⁷ Keima min hangin mi khempeuh in note hong mudah ding uh hi. ¹⁸ Ahi zongin note luzang a samzang khat nangawn a mangthang kei ding hi. ¹⁹ Thuak keikaina tawh na nuntakna uh na hu un. ²⁰ “Galkap honpi in Jerusalem khuapi a umcih na muh uh ciangin tua khua a hawmsuak ding hita hi cih thei un. ²¹ Tua hun ciangin Judea gama om mite mualtung ah tai uh hen. Khuapi sunga om mite in khuapi nusia in gam sung a om mite khuapi sungah lut nawn kei uh hen. ²² Banghang hiam cihleh tua hun in Lai Siangtho sunga kigelhsa thu khempeuh a tangtun nadingin Pasian phulakna hun ahi hi. ²³ Tua hun ciangin naupaaite le nawine lai naungek a nei nupite a genthei mahmah ding uh hi! Banghang hiam cihleh hih gam sungah gentheihna lianpi tung dinga, hih mite tungah Pasian thangpaihna a tung ding hi. ²⁴ Namsau in si ding uh a, minamte khempeuh lakah amaute salin kikai ding hi. Gentile‑te in amau hun a kicin mateng Jerusalem khuapi a tuancil ding uh hi. ²⁵ “Tua hun ciangin ni, kha le aksite ah limlamdangte a hong piang ding hi. Tuipi tuihualte nakpi in kilok dinga, leitung a om minamte lungzing in a amkham ding uh hi. ²⁶ Vantung nate kiling dinga, mite in leitung a hong piang ding nate mukhol in lau in a sibup ding uh hi. ²⁷ Tua ciangin vangliatna le minthanna lianpi tawh meiitung tuanga hong pai Mihing Tapa a mu ding uh hi. ²⁸ Hih thute piang dingin a hong kipat ciangin na lu uh phong unla khuadak un. Banghang hiam cihleh note a hong kitatkhiat nading hun hong naita hi,” a ci hi. ²⁹ Tua khit ciangin thugentehna khat gen a, “Theikung le singkung dang khempeuh na en un. ³⁰ A teh a hong sel ciangin khuakhal dekta hi cih mu in na thei uh hi. ³¹ Tuamah bangin hih thute hong piang na muh uh ciangin Pasian kumpigam hong piang dekta hi cih na thei un. ³² “Aman takpi kong cih in ah, tulai khang mite a beima teitei in hih thu khempeuh a piang ding hi. ³³ Van le lei a mangthang ding hi. Ahih hangin ka thute a mangthang peuhmah kei ding hi. ³⁴ “Kigingsa in om un. Tua hi kei leh zukham pengnawngsa, leitung nuntak nading lungkham le lungkia in na om ding uh a, na upmawh loh laitak un tua Ni a hong tung ding hi. ³⁵ Banghang hiam cihleh leitung bupa a teeng mi khempeuh tungah tua Ni in thang kisai bangin a hong tung ding hi. ³⁶ Tua ahih manin hong tung ding hih thu khempeuh pan suakta in Mihing Tapa mai ah a ding dinga kilawm mite na suah theih nadingun pilvang unla thungen tawntung un,” a ci hi. ³⁷ Amah in sunhun tengin biakinnpi huang sungah thu hilh a, zan ciangin paikhia in Tanluan mualah a om hi. ³⁸ Tua ciangin zingsang tungin mi khempeuh ama thugen ngai dingin biakinnpi huangah hong pai uh hi.

¹ Tu in Paisan Pawi kici, Silngo Sawhloh Anlum Pawi hong tung dekta hi. ² Siampi liante le thukhamhilh siate in Zeisu a thah theih nadingzia gel uh a, ahih hangin mipite a kihta uh hi. ³ Tua hun mahin sawm le nihte laka Iscariot a kici Judas sungah Satan a lut hi. ⁴ Tua khit ciangin amah pai in Zeisu lehhek a, a apzia ding siampi liante le biakinn cing bute tawh a kikum uh hi. ⁵ Amaute zong lungdam in sum piak dingin a kithukim uh hi. ⁶ Judas in zong kamciam pia a, mihonpi om loh laitak in amaute khutah a apkhiat theih nading hunhoih a zong hi. ⁷ Tu in, Paisan tuuno a kigawh ni ahi Silngo Sawhloh Anlum Pawi ni hong tung hi. ⁸ Zeisu in Peter le John kiangah, “Va pai unla, Paisan Pawi an i nek nading mun va bawlkhol un,” ci in a sawl hi. ⁹ Amaute in, “Koi ah hong bawlsak le ung na ut hiam?” a ci uh hi. ¹⁰ Amah in, “En in, khuapi sung na lut uh ciangin tuibel a pua pasal khat tawh na kituak ding uh hi. Ama lutna inn ah lut unla, ¹¹ inntekpa kiangah, ‘Siapa in, “Ka nungzuite tawh Paisan Pawi an ka nek nading zintunna inndei koilai hiam?” ci in hong dongsak hi,’ va ci un. ¹² Tua ciangin amah in a kipuahsa, a za mahmah inndei tungnung khat hong lak ding hi. Tualai ah na bawl un,” a ci hi. ¹³ Amaute a pai uh ciangin ama gen bangin mu uh a, tualai ah Paisan Pawi an a bawl uh hi. ¹⁴ A hun a tun ciangin Zeisu in sawltak sawm le nihte tawh ankuang a umkhawm hi. ¹⁵ Amah in amaute kiangah, “Ka thuak ding hong tunma in note tawh hih Paisan Pawi an nekkhop ding ka lunggulh mahmah hi. ¹⁶ Banghang hiam cihleh ken kong cih in ah Pasian kumpigam sungah hih na a tangtun mateng ka nekik nawn kei ding hi,” a ci hi. ¹⁷ Tua ciangin hai la a, lungdam ko in, “Hih hai la unla, a banban in dawn un. ¹⁸ Banghang hiam cihleh ken kong cih in ah, Pasian kumpigam hong tun mateng lenggahzu ka dawn nawn kei ding hi,” a ci hi. ¹⁹ Tua khit ciangin anlum la in lungdam ko a, balkham in, “Hih in note aa dinga kipia ka pumpi ahi hi. Kei nong phawk nadingun hih bangin na bawl un,” ci in amaute a pia hi. ²⁰ Tuamah bangin nitak an a nek khit uh ciangin hai zong la a, “Hih hai in note aa dingin a luangkhia, ka sisan tawh a kibawl kiciamna thak ahi hi. ²¹ Ahih hangin en un, kei hong lehhekpa khutin kei tawh ankuang a sawkkhawm hi. ²² A kisehsa bangin Mihing Tapa a pai loh phamawh ahi hi. Ahi zongin amah a lehhekpa in gimna a thuak ding hi!” a ci hi. ²³ Tua ciangin amaute in tua banga a gamta ding kua pen i hi ding hiam, ci in a kidong uh hi. ²⁴ Amaute lak panin kua lianpen ding ahi hiam cih zong a kisel uh hi. ²⁵ Tua ciangin amah in amaute kiangah, “Gentile‑te kumpite in a mite uh ukcip in thu neihna zang uh a, amau le amau ‘deihsakna a neite’ a kici uh hi. ²⁶ Ahih hangin note lakah tua bang ding ahi kei hi. Tua bang hilo in note laka a lianpenpa in a neupenpa bangin om hen. A makaipa in nasempa bangin om hen. ²⁷ Sabuai tunga an a nepa le an a piapa kua lianzaw ahi hiam? An ne a tupa lianzaw hilo ahi hiam? Ahih hangin note lakah an a piapa bangin kong om hi. ²⁸ Ahi zongin, note in gimna ka thuak sungteng nong ompih uh hi. ²⁹ Ka Pa in kei tungah kumpigam hong piak mah bangin ken zong note tungah kong pia hi. ³⁰ Keima kumpigam sungah ka ankuang umin na ne na dawn ding uh a, kumpi tokhom tungah tu in Israel minam sawm le nihte tungah thu na khen ding uh hi,” a ci hi. ³¹ Tua ciangin Topa in, “Simon, Simon aw! En in, Satan in an sep bangin nang hong sepkhia nuamin hong sawm hi. ³² Ahih hangin na upna na khahsuah loh nading thu kong ngetsak zo hi. Kei lamah nong kilehkik ciangin na sanggamte na hanthawn in,” a ci hi. ³³ Ahih hangin Peter in ama kiangah, “Topa aw, nang tawh thong a kiakhawm ding ahi zongin, a sikhawm ding ahi zongin a kigingsa ka hi hi,” a ci hi. ³⁴ Tua ciangin Zeisu in, “Peter aw, ken kong cih in ah amah ka thei kei hi, ci a, thumvei nong nial khit mateng tuni in aak a khuang kei ding hi,” a ci hi. ³⁵ Amah in amaute kiangah, “Sumbawm, thungip le khedapte keng lo a kong paisak lai in na kisap uh a om hiam?” ci in a dong hi. Tua ciangin amaute in, “Kisap bangmah ka nei kei uh hi,” a ci uh hi. ³⁶ Tua ciangin amah in amaute kiangah, “Tu in sumbawm neite in keng un. Thungip neite in zong keng un. Namsau a neilote in na puan uh zuak in lei un. ³⁷ Ken kong cih in ah, ‘Thukham palsat mite tawh amah kisimkhawm hi,’ ci a, Lai Siangtho sunga a kigelhsa thu a tangtung ding hi. Banghang hiam cihleh keimah tawh kisai thu khempeuh a tangtung ding hi,” a ci hi. ³⁸ Tua ciangin amaute in, “Topa aw, en in, hihlai ah namsau nih a om hi,” a cih uh ciangin amah in, “Pha zo hi,” a ci hi. ³⁹ Tua ciangin amah paikhia in ahih ngei bangin Tanluan mual ah pai a, a nungzuite in zong a zui uh hi. ⁴⁰ Tua mun a tun ciangin a nungzuite kiangah, “Ze‑etna sungah na lut khakloh nadingun thungen un,” a ci hi. ⁴¹ Tua khit ciangin amaute kiang pan suanglot khat tan bang paibeh in khukdin in thungen a, ⁴² “Pa aw, na deihna ahih leh hih hai tawh hong kipelhsak in. Ahi zongin keima deihna bang hilo in nangma deihna bang hi hen,” a ci hi. ⁴³ Tua ciangin vantung panin vantungmi khat ama kiangah hong kilang in tha a pia hi. ⁴⁴ Amah lunggim mahmah ahih manin thu nak nget semsem a, a khua‑ulte sisan mal golpi bangin leilak ah a takkhia hi. ⁴⁵ Thu a nget khit ciangin dingkhia a, a nungzuite kiangah a pai ciangin amaute a dahna hangun gimin ihmu in a om a mu hi. ⁴⁶ Tua ciangin amah in amaute kiangah, “Banghang in ihmu na hi uh hiam? Ze‑etna sungah na lut khakloh nadingun tho unla thungen un,” a ci hi. ⁴⁷ Tuateng a gen laitak mahin, en in, mihon khat a hong tung uh hi. Sawm le nihte lakah khat ahi Judas a kici pa in amaute hong makaih a, Zeisu nam dingin a kiangah a va naih hi. ⁴⁸ Ahih hangin Zeisu in ama kiangah, “Judas aw, napna tawh Mihing Tapa lehhek ding na hi hiam?” a ci hi. ⁴⁹ Ama kima om mite in a piang ding thuteng a theih uh ciangin ama kiangah, “Topa aw, namsau tawh ka vat ding uh hiam?” a ci uh hi. ⁵⁰ Amaute khatin Siampi Ukpa nasempa a sat leh a taklam bil a satkhia hi. ⁵¹ Ahih hangin Zeisu in, “Tua zah phazo hi,” a ci hi. Tua ciangin amah in tua pa bil lawngin a damsak hi. ⁵² Tua ciangin Zeisu in amah man dinga hong pai siampi liante, biakinn cing bute le makaite kiangah, “Guta buluh khat man ding bangin namsau le molhtum tawh hong kuan na hi uh hiam? ⁵³ Biakinnpi huang sungah ni simin note tawh ka omlai in nong man kei uh hi. Ahi zongin tuhun in note hun hi a, khuamial in thu a neih hun ahi hi,” a ci hi. ⁵⁴ Amah manin paikhiatpih uh a, Siampi Ukpa inn ah a lutpih uh hi. Peter in a gamla sim panin a galzuih hi. ⁵⁵ Tu in amaute in inntual laizang ah meicih in awi uh a, Peter in zong amaute tawh mei‑awi in a tukhawm hi. ⁵⁶ Peter mei‑awi a a om laitak in nasem numeino khatin amah mu a, a ettel khit ciangin, “Hih mipa zong ama pawl ahi hi,” a ci hi. ⁵⁷ Ahih hangin Peter in, “Numei aw, amah ka thei kei hi,” a ci hi. ⁵⁸ Tawlkhat khit ciangin midang khatin amah mu a, “Nang zong amaute pawl na hi hi,” a ci hi. Ahih hangin Peter in, “Mipa aw, ka hi kei hi!” a ci hi. ⁵⁹ Nai khat khit bang ciangin midang khatin, “Hihpa zong ama pawl taktak ahi hi. Banghang hiam cihleh Galilee mi ahi hi,” ci in teltak in a gen hi. ⁶⁰ Ahih hangin Peter in, “Mipa aw, na thugen ka thei kei hi!” a ci hi. Ama pau laitak mahin aak a hong khuang pah hi. ⁶¹ Topa kihei in Peter a en hi. Tua ciangin Peter in, “Aak khuanma in thumvei nong nial ding hi,” ci a, Topa gensa thu phawkkik a, ⁶² pusuak in nakpitak in a kap hi. ⁶³ Tu in, Zeisu a mante in amah zahko in a sat uh hi. ⁶⁴ A mit a tuamsak khit uh ciangin a pang beng uh a, “Nang hong beng kua ahi hiam? Kamsanna tawh hong gen dih in!” a ci uh hi. ⁶⁵ Zahpihna thudang tampi tawh zong amah a kosia uh hi. ⁶⁶ Khua a vak phetin mipite makai vaihawmte, siampi liante le thukhamhilh siate hong kisutuah in thukhenteɠ kiangah amah paipih uh a, ⁶⁷ “Amaute in, Khazih na hih leh hong gen in,” a ci uh hi. Amah in, “Kong gen hangin na um kei ding uh hi. ⁶⁸ Thu hong dong leng zong nong dawng kei ding uh a, nong khah tuan kei ding uh hi. ⁶⁹ Tunung ciangin Mihing Tapa in a thahat Pasian taklam khutah a tu ding hi,” a ci hi. ⁷⁰ Tua ciangin a vekpi un, “Tua ahih leh Pasian Tapa na hi hiam?” a cih uh ciangin amah in, “Na cih bangun ka hi hi,” a ci hi. ⁷¹ Amaute in, “Ama kam tektek panin za khinzo i hih manin teci dang bang kisam nawn ding ahi hiam?” a ci uh hi.

¹ Tua khit ciangin mihonpite a vekpi un dingkhia uh a, Pilate kiangah Zeisu a paipih uh hi. ² Amaute in, “Hihpa in ka minam uh lam a khialsak hi. Amah le amah in Kumpi, Khazih ka hi hi ci in Caesar kumpipa tunga siah ka piak ding uh hong kham hi,” ci in a mawhmat uh hi. ³ Tua ciangin Pilate in ama kiangah, “Nang, Judahte Kumpipa na hi hiam?” a cih ciangin, “Na cih bangin ka hi hi,” ci in a dawng hi. ⁴ Tua ciangin Pilate in siampi liante le mipite kiangah, “Hihpa tungah khialhna ka mu kei hi,” a ci hi. ⁵ Ahih hangin amaute uang semsem uh a, “Amah in Galilee gama kipan hih mun dong, Judea gam buppi ah thu hilhin mite a buaisak hi,” a ci uh hi. ⁶ Pilate in Galilee cih kammal a zak ciangin amah Galilee mi ahih leh ahih loh a dong hi. ⁷ Pilate in amah Herod uk sung mi ahihlam a theih ciangin tua laitak a Jerusalem khuapi a om Herod kiangah a puak hi. ⁸ Herod in Zeisu a muhnop sawt mahmah ahih manin amah a muh ciangin a nuam mahmah hi. Banghang hiam cihleh Zeisu thu tampi za khinzo a, Zeisu bawl nalamdang khatpeuh zong a mu kha dingin a kilamen hi. ⁹ Tua hi a, amah in thu tampi a dot hangin Zeisu in kam khat beek a dawng kei hi. ¹⁰ Tua ciangin siampi liante le thukhamhilh siate dingto in nasiatak in amah a mawhmat uh hi. ¹¹ Herod le a galkapte in simmawh bawl in zahko uh a, puantualpi hoih mahmah khat a silhsak khit uh ciangin Pilate kiangah a puakkik uh hi. ¹² A beisa hunin Pilate le Herod khat le khat a kigalbawl den uh ahih hangin tua ni in lawmta a suak uh hi. ¹³ Tua ciangin Pilate in siampi liante, upa vaihawmte le mipite samkhawm in, ¹⁴ amaute kiangah, “Hihpa in mipi lamkhialsak hi ci in ka kiangah nong puak uh hi. En un, note mai mahmah ah thu ka sit khin a, na mawhmatnate uh tawh kisai in ama tungah khialhna ka mu kei hi. ¹⁵ Herod kiangah amah kong paipihsak a, amah in zong sih nading zah mawhna bangmah a mu tuan kei hi. ¹⁶ Tua ahih ciangin satin ka khah ding hi,” a ci hi. ¹⁷ Banghang hiam cihleh Pilate in tua pawi hun simin mi khat a khah khiatsak pen ngeina khat ahi hi. ¹⁸ Tua ciangin amaute thakhat in kiko uh a, “Hihpa that inla, Barabbas hong khahsak in,” a ci uh hi. ¹⁹ Barabbas in khuapi sunga thupiang kumpi langpanna le mithahna hanga thongkiapa ahi hi. ²⁰ Tua ahih manin Pilate in Zeisu khah nuamin amaute tungah thu a genkik hi. ²¹ Ahih hangin amaute in, “Amah khailum in, amah khailum in!” ci in a kiko uh hi. ²² Tua ciangin Pilate in amaute kiangah, “Banghang in amah khailum ding ka hi hiam? Siatna bang bawl ahi hiam? Sih nading mawhna ama tungah ka mu kei hi. Tua ahih ciangin satin ka khah ding hi,” ci in a thumveina a genkik hi. ²³ Ahih hangin amaute nakpitak in kiko uha amah khailup dingin a ngen teitei uh hi. Mipite le siampi liante awging in amah zothawh gawp ²⁴ ahih manin Pilate in amaute ngetna bangin thu a khen hi. ²⁵ Kumpi langpanna le mithahna hanga thong a kia amau ngetpa khahsak in Zeisu ahih leh amaute deih banga a bawl nadingun amaute tungah a piakhia hi. ²⁶ Tu in, amah a paikhiatpih laitak un khuano pana hong pai Cyrene gam mi Simon a lammat uh hi. Singlamteh suanin puasak uh a, Zeisu nungah a paisak uh hi. ²⁷ Mihonpi in amah zui uh a, tuate lakah Zeisu kah in a tamlo numeite pawlkhat zong a om uh hi. ²⁸ Ahih hangin amaute lamah Zeisu kihei a, “Jerusalem tanute aw, kei hong kah kei un. No le na tate uh aa dingin kap zaw un. ²⁹ Banghang hiam cihleh, ‘Ta a neilo numei, a gil in nau a paai ngeilo, a nawi a kitep ngeilo numeite mihampha ahi uh hi,’ a cih hunte uh hong tung ding hi. ³⁰ Tua hun ciangin amaute in, ‘Mual sangte aw, “Kote tungah hong cim un.” Mual niamte aw, “Kote hong vuk un,” ’ a ci ding uh hi. ³¹ “Banghang hiam cihleh amaute in singhing tungah hi ci bawl uh ahih leh singkeu tungah a bangci bawl ding uh ahi hiam?” a ci hi. ³² Migilo nih zong thah dingin amah tawh a paipih uh hi. ³³ Calvary a kici mun a tun uh ciangin tualai ah amah a khai uh hi. Migilo nihte zong a taklam ah khat, a veilam ah khat a khai uh hi. ³⁴ Tua khit ciangin Zeisu in, “Pa aw, amaute in bang hih uh cih theilo uh ahih manin a mawhna uh na maisak in,” a ci hi. Amaute in lai‑aisan in a puante a hawm uh hi. ³⁵ Mipite in dingin en uh a, upa vaihawmte zong amaute tawh a dingkhawm uh hi. Amaute in, “Amah in midangte honkhia hi. Pasian teelpa Khazih ahih leh amah le amah kihonkhia hen,” ci in a zahko uh hi. ³⁶ Galkapte zong hong pai in lenggahtui thuk pia uh a, ³⁷ “Judah mite Kumpipa na hih leh nang le nang kihonkhia in,” ci in a zahko uh hi. ³⁸ “HIH IN JUDAHTE KUMPIPA,” ci in Greek lai, Latin lai le Hebrew lai tawh gelhin a lutung sanah a suang uh hi. ³⁹ A kikhai migilote khat in, “Khazih na hih leh nang le nang kihonkhia inla kote zong hong honkhia in,” ci in a zahko hi. ⁴⁰ A dang khatpa in tua pa taiigawp in, “Mawhsakna a thuak na hih lam kithei loin, Pasian kihta lo na hi hiam? ⁴¹ Eite gel bel i gamtatna tawh kizui in a hong kithukkik hilel a, i thuakna a thuman ahi hi. Ahi zongin hihpa in khialhna bangmah a bawl kei hi,” a ci hi. ⁴² Tua khit ciangin Zeisu kiangah, “Topa aw, na kumpigam sung na tun ciangin kei hong phawk in,” a ci hi. ⁴³ Tua ciangin Zeisu in, “Aman takpi kong cih in ah, tuni in Paradise ah kei tawh na omkhawm ding hi,” a ci hi. ⁴⁴ Tua hun in nai guk pawl hi a, tua hun a kipan nai kua dong leitung bup ah khim a zing hi. ⁴⁵ Ni mialin biakinnpi sung kideina puan phelnih a kisuah hi. ⁴⁶ Tua ciangin Zeisu in, “Pa aw, ‘Na khut sungah ka kha kong ap hi,’ ” ci in nakpi in a kiko khit ciangin a hu tawpna a sangkhia hi. ⁴⁷ Galkap 100 ukpa in thupiang teng a muh ciangin, “Hihpa in midik taktak ahi hi,” ci in Pasian a phat hi. ⁴⁸ A en dinga hong pai mi khempeuh in thupiang teng a muh uh ciangin a awm uh bengin a ciah uh hi. ⁴⁹ Ahih hangin ama meltheih khempeuh le Galilee gam pan amah a zui numeite in gamlapi ah dingin, thupiang teng a galet uh hi. ⁵⁰ Tu in, en in, Joseph kici upa vaihawmte khat om a, amah mihoih midik khat ahi hi. ⁵¹ Amah in amaute vaihawmna le a sepnate uh a thukimpih kei hi. Amah in Judahte khua lian khat ahi Arimathea khua mi hi a, Pasian kumpigam a lamen mi khat zong ahi hi. ⁵² Pilate kiangah amah pai in Zeisu luang a va ngen hi. ⁵³ A ngah ciangin Zeisu luang lakhia in puanpak tawh a tun hi. Tua khit ciangin kuamah a kivui ngei nai lohna, suang kikhuak han sungah a sial hi. ⁵⁴ Tua ni in Kigin Niɠ hi a, Sabbath ni a kipan dekta hi. ⁵⁵ Galilee gam pana Zeisu hong zui numeite in hanah zui in a han le a luang kisial dan a en uh hi. ⁵⁶ Tua khit ciangin ciah uh a, paknamtui le sathau namtuite a baihsa in a koih uh hi. Tuateng khit ciangin thukham tawh kizui in Sabbath ni a tawlnga uh hi.

¹ Tu in nipi khat sunga ni masa pen ni, zingsang phalvak tungin tua numeite in a baihsa a a koih uh paknamtuite tawi in dai a hawh uh hi. Numei dangte pawlkhat in zong a zui uh hi. ² Amaute in han a suangtumpi kilikkhia sa a om mu uh a, ³ han sungah a lut uh leh Topa Zeisu luang a mu kei uh hi. ⁴ Tua banga lungmang in a om laitak un en in, puanpak tee dialdial a silh mi nih amaute kiangah a hong ding hi. ⁵ Numeite lau mahmah in leilak ah kunsuk a a om laitak un tua mite in, “Banghang in a nungta mi khat misite lakah zong na hi uh hiam? ⁶ Amah hihlai ah om nawnlo hi a thokik zo hi. Galilee gamah a omlai in a hong gensa thu phawk un. ⁷ ‘Mihing Tapa in mimawhte khutah kipiakhia in singlamteh ah khai ding uh a, a ni thum ni in a thokik ding hi,’ ci in,” a gen hi. ⁸ Tua ciangin numeite in ama gensa thute a phawkkik uh hi. ⁹ Han panin amaute ciah uh a, sawm le khatte le a dangte khempeuh kiangah tua thuteng a gen uh hi. ¹⁰ Sawltakte kiangah hih thu a gen mite in, Magdala khua mi Mary, Joanna, James nu Mary le amaute a zui numei dangte ahi uh hi. ¹¹ Numeite in hih thute a gen uh ciangin sawltakte in a mawkpau sa uh ahih manin a um kei uh hi. ¹² Ahih hangin Peter dingkhia in han lamah a va tai hi. Kunsuk in han sung a et leh puanpakte bek mu a, thupiang teng lamdangsa in a ciahkik hi. ¹³ Tua ciangin tua ni mahin amaute lakah mi nih Jerusalem khuapi pan tai sagih bang a gamla Emmaus kici khuaneu khat zuanin a pai uh hi. ¹⁴ A nih un tua thupiang teng a kikum uh hi. ¹⁵ Tua bangin holim in thu kikum in a om laitak un Zeisu in va naih a, amaute tawh a tonkhawm hi. ¹⁶ Ahih hangin amaute in Zeisu ahihlam a theih loh nadingun a mit uh a kimangsak hi. ¹⁷ Tua ciangin Zeisu in amaute kiangah, “Na lampai kawmun bang thu kikum a, banghang in maikhing na hi uh hiam?” a ci hi. ¹⁸ A min Cleopas kici pa in, “Jerusalem khuapi a a zinte lakah tu nai‑a tua khuapi sunga thupiangte a theilo nang bek hi ni teh maw?” ci in a dawng hi. ¹⁹ Tua ciangin amah in amaute kiangah, “Bang thu piang ahi hiam?” a ci hi. Amaute in, “A nasep le a thugente Pasian le mi khempeuh mai ah a vanglian mahmah Kamsangpa Nazareth khua mi Zeisu tawh kisai thu ahi hi. ²⁰ Tua bang hi napi siampi liante le upa vaihawmte in sihna thukhenna thuak dingin amah piakhia uh a, a kikhailum hi. ²¹ Ahi zongin ko bel amah Israelte a tankhia ding pa hi ci in ka lamen uh hi. Tua thamlo in hih thuteng a pianzawh tu in ni thum phata hi. ²² Tua hi a, zingsang tunga daihawh a pai ka lawm numei pawlkhatte thugente in zong hong lungmangsak mahmah hi. ²³ Amau hong kilehkik uh a, a luang a muh lohna thu le amah hingkik zo hi ci a, a gen vantungmite a muhna thute a hong gen uh hi. ²⁴ Ka lawmte uh pawlkhat zong hanah va pai in numeite gen bangmah in nadang teng na om a, ahi zongin amah a mu kei uh hi,” a ci uh hi. ²⁵ Tua ciangin amah in amaute kiangah, “Kamsangte gensa thu khempeuh a um khin theilo lungsimmawl le mihaite aw, ²⁶ Khazih in hihte khempeuh thuak masa dinga, tua khit ciangin minthanna a ngah ding mah hilo ahi hiam?” ci in, ²⁷ Moses le Kamsangte laibu khempeuh a kipan Lai Siangtho buppi sunga ama thu a kigenna teng a khiatna a hilh hi. ²⁸ Tua ciangin amaute a pai nading khua tung dekta uh a, Zeisu a paisuak ding bangin a kineih hi. ²⁹ Ahih hangin amaute in, “Ni zong tum dekta a khua zong mial ta ding ahih ciangin ko kiangah hong taam in,” ci in a kho uh hi. Tua ciangin amaute tawh a tamkhawm dingin inn sungah amah a lut hi. ³⁰ Amaute tawh an ne a a tut uh ciangin amah in anlum la in lungdam ko a, balkham in amaute a pia hi. ³¹ Tua laitak in amaute mit kihong a, Zeisu ahihlam a thei uh hi. Ahi zongin amah na mang khin a, a mu nawn kei uh hi. ³² Tua ciangin amaute in, “Lampi ah hong hopih a Lai Siangtho khiatna khawng a hong genlai in i lungsim hong su kha mahmah hi,” a kici uh hi. ³³ Tua hun mahin amaute dingkhia uh a, Jerusalem khuapi ah a ciahkik uh hi. Tualai ah sawm le khatte le amau lawmte na kikhawm uh a, ³⁴ “Topa thokik taktak in, Simon kiangah kilang hi,” a ci uh hi. ³⁵ Amaute gel in zong lampi a thupiang teng le anlum a balkhap laitak a amaute a kitheihsakna teng a genkik uh hi. ³⁶ Hih thute a gen laitak un amaute laizang ah Zeisu hong dinga, “Note tungah lungnopna om tahen,” a ci hi. ³⁷ Ahi zongin amaute in sikha a mu kisa uh ahih manin lau in a linggawp uh hi. ³⁸ Tua ciangin amah in, “Banghang in lau na hi uh hiam? Banghang in um zolo na hi uh hiam? ³⁹ Ka khut ka khete hong en un. Kei mahmah ka hi hi. Hong lawng unla thei un. Sikha in hih bangin satak le guh le tang neilo hi,” a ci hi. ⁴⁰ Hih banga a gen khit ciangin a khut le a khete a lak hi. ⁴¹ Ahih hangin amaute nuamlua in lamdangsa mahmah in um zo nai tuanlo uh ahih manin amah in amaute kiangah, “Nek theih khatpeuh na nei uh hiam?” a ci hi. ⁴² Tua ciangin amaute in ngasa hankeu khat le khuailuzu phelkhat a pia uh hi. ⁴³ Amah in sang a, amau muhin a ne hi. ⁴⁴ Tua khit ciangin amaute kiangah, “Moses Thukham laibu, Kamsangte laibu le Late laibu sunga keima thu a kigelh khempeuh a tangtung ding hi ci in note tawh kong omkhop lai a kong gen thute in hih thute ahi hi,” a ci hi. ⁴⁵ Tua khit ciangin Lai Siangtho a theih nadingun amaute lungsim a honsak hi. ⁴⁶ Tua ciangin amaute kiangah, “Lai Siangtho sunga a kigelh bangin Khazih in hih bangin gimna thuak dinga, a ni thum ni in misite lak pan a thokik ding mah ahi hi. ⁴⁷ Mawhna kisikkikna thu le mawhna maisakna thu Jerusalem khuapi pan kipan in minam khempeuh tungah ama min tawh a kitangko ding hi. ⁴⁸ Hih thute teci a pang ding note na hi uh hi. ⁴⁹ En un, ka Pa in note hong piak dinga a hong kamciamsa ahi Kha Siangtho kong sawl ding hi. Ahi zongin tunglam panin vangliatna in note a hong tuam khit mateng Jerusalem khuapi ah na ngak phot un,” a ci hi. ⁵⁰ Tua ciangin Bethany khua dongah amaute a paipih hi. Tua ciangin a khutte lamto in amaute thupha a pia hi. ⁵¹ Amaute thupha a piak laitak in amaute kiang pan amah kilakhia a, vantung ah a kilato hi. ⁵² Amaute in amah bia uh a, tua khit ciangin lungdamna lianpi tawh Jerusalem khuapi ah a ciahkik uh hi. ⁵³ Amaute in Pasian min phat kawmsa le lungdam ko in biakinnpi huang sungah a om tawntung uh hi. Amen.