JUDE

JUDE

¹ Zeisu Khazih sila khat le James sanggampa ahi keimah Judah in Pa Pasian in a hong sap, a hong sianthosak le Zeisu Khazih sunga a hong kep note lai kong khak hi. ² Note tungah hehpihna, lungnopna le itna‑te khang semsem tahen. ³ Kong itte aw, a kibang a i ngahkhop hotkhiatna thu tawh kisai thute gelhin lai kong khak ding ka hanciam mahmah laitak in a kimang suak dingin misiangthote tunga khatvei bek a hong kipia upna hu a, nakpi in a pang dingin hanthotna lai kong gelh ding kisam ka sa hi. ⁴ Banghang hiam cihleh mawhsakna thuak dingin tanglai peka ciaptehna a ngah khinsa mi pawlkhat note lakah hong lutsim khin uh hi. Amaute in Pasian thusim loin i Pasian hehpihna thupha numei pasal paktat theih nading suaksak uh a, khat bek i neih hong Neipa Pasian le eite Topa Zeisu Khazih a nial mite ahi uh hi. ⁵ Topa in Israel mite Egypt gam pan a hotkhiat khit ciangin a umlo mite a nungah susia hi cih thu na theih khitsa uh ahih hangin tu in kong phawkkiksak nuam hi. ⁶ Tua banah amaute dinmun masa kemsuak loin a teenna munuh a nusia vantungmite zong tawntung sikkhau tawh khih in ni thupi ni a thukhen dingin khuamial sungah a khumcip hi. ⁷ Tua mah bangin Sodom, Gomorrah khuate le a kimnai a khua mite zong numei pasal thangtat in a khelkhel in ci le sa deihna zui in gamta uh ahih manin tawntung meikuangpi tawh gawtna a thuak ding mite hilhkholhna a suaksak hi. ⁸ Tua mah bangin hih lungsim zaulen mite in amaute pumpi ninsak in ukna thu nialin tunglam thuneite a gensia uh hi. ⁹ Ahih hangin vantungmite laka a lianpen Michael nangawn in Dawimangpa tawh Moses luanghawm a kituh lai un zahko in mawhsak ngamlo a, “Topa in nang hong taii tahen!” a ci bek hi. ¹⁰ Tua hi napi in hih mite in amaute theihtelloh thute a gensia uh hi. A theih sunsunte uh zong ganhingte bangin pianpih theih tawm teng bek hi a, tuate mah in amaute a leh suksiat hi. ¹¹ Amaute in gimna thuakta uh hen! Banghang hiam cihleh amaute in Cain lampi a zui uh hi. Metna ngah nadingin huaihamtak in Balaam khialhna zui in delh uh a, Korah bangin langpanna tawh a kisia uh hi. ¹² Amaute in note ki‑itna ankuangte hong um uh ciangin zumna mel nei loin amaute gilvah nading bek a ngaihsun uh hi. Amaute in huih in a mut kawikawi, guahtui kihello meii, tuk hun bei donga a gahlo singkung, nihvei a si, a kibulkalh singkung tawh a kibang, ¹³ tuipi tunga kihot tuihualpite, amaute zumhuaina teng mah a pulak khiakhia, a leng kawikawi aksite tawh kibang in amaute aa dingin a mial bikbek tawntung khuamial a kikoihkhol zo hi. ¹⁴ Tu in Adam panin a khang sagihnapa Enoch in zong tua mite thu hih bangin a genkhol hi. “En un, mi khempeuh tungah thu a khen dingin ama misiangtho tulsawm tampite tawh Topa hong pai hi. ¹⁵ Mi khempeuh tungah thukhen ding le amaute laka om Pasian a thusimlo mite in Pasian thusimlo sa in a gamtatnate uh le a bawl uh mawhnate ahi a, Pasian a thusimlo tua mite in amah langpan a kamkhauh a pauna khempeuh uh ahi zongin amah in a pholak ding hi,” a ci hi. ¹⁶ Tua mite in a phunhatte, lungkimna a nei theilote, amaute lunggulhna zui in a gamtate ahi uh hi. Kisaktheihna kamte pau in amaute met nadingin midangte a maitang phat thei uh hi. ¹⁷ Ahi zongin kong itte aw, i Topa Zeisu Khazih sawltakte in nidang in a hong gen uh thute phawkkik un. ¹⁸ Amaute in hun nunung ciangin Pasian deihna tawh a kituaklo, amaute lunggulhna zui a, midangte a zahko mite hong piang ding uh hi ci in a gen uh hi. ¹⁹ Tua mite in ci le sa deihna a zuite, kikhenna a piangsakte le Kha a neilo mite ahi uh hi. ²⁰ Ahi zongin kong itte aw, note na hih uh leh a siangtho mahmah note upna tungah kilam unla Kha Siangtho sungah thungen un. ²¹ Nuntak tawntungna hong puak ding i Topa Zeisu Khazih hehpihna na ngakkawm un Pasian hong itna sungah kikem un. ²² Lungheinei mite na hehpih un. ²³ Ahi zongin mi pawlkhatte meikuang sung pan dokkhia un. Ci le sa gamtatna hangin a kihhuai a puansilhte nangawn uh muh thadahhuai sa unla lauthawng kawm in honkhia un. ²⁴ Tu in na puk loh nadingun a hong kem zopa le mawhsak nading om lo a, lungdamna lianpi tawh ama vangliatna mai ah note a hong tunzopa, ²⁵ amah bek a pil i Honpa Pasian tungah minthanna, thupina, ukzawhna, vangliatna‑te tu le a tawntung in om tawntung tahen. Amen.