JOHN

JOHN

¹ A kipatcil in Thu a om hi. Thu in Pasian tawh a omkhawm hi. Tua Thu in Pasian ahi hi. ² A kipatcil in amah in Pasian tawh a omkhawm hi. ³ Na khempeuh ama tungtawn a kibawl hi a, a kibawl nate amah lo tawh a kibawl khat beek a om kei hi. ⁴ Ama sungah nuntakna om a, tua nuntakna in mihingte aa dingin khuavak ahi hi. ⁵ Tua khuavak in khuamial lakah tang a, khuamial in amah a zo kei hi. ⁶ Pasian hong sawl mi khat om a, tua pa minin John ahi hi. ⁷ Mi khempeuh in ama tungtawn in a up theih nadingun amah in Khuavak tawh kisai teci pang dingin a hong paipa ahi hi. ⁸ Amah, tua Khuavak hilo a, tua Khuavak thu teci a pang ding beka hong kisawl ahi hi. ⁹ Tua Khuavak in leitunga piang mi khempeuh a taankim Khuavak taktak ahi hi. ¹⁰ Amah leitung ah hong om a, ama tungtawn in leitung a kibawl hi napi leitung in amah a thei kei hi. ¹¹ Amah a mite kianga hong pai hi napi a mite in amah a sang kei uh hi. ¹² Ahih hangin amah sang a, ama min a um mi khempeuh Pasian tate suah theihna thu a pia hi. ¹³ Tua suahna pen sisan tawh hilo, ci le sa deihna zong hilo, mihing deihna hang zong hilo in Pasian deihna hanga suahna ahi hi. ¹⁴ Tua ciangin Thu in mihing hong suak a, eite lakah hong teengin eite in ama minthanna i mu hi. Tua in, Pa in khat bek a neih a Tapa a piak minthanna hi a, hehpihna le thuman thutak tawh a kidim hi. ¹⁵ Ama thu John in teci pang a, “ ‘Ka nunga hong paipa in kei pianma in om khinzo ahih manin kei sangin a lianzaw hi,’ kong cihpa in amah ahi hi,” ci in a kiko hi. ¹⁶ Eite khempeuh in ama kicinna sung panin hehpihna khat khit khat i ngah hi. ¹⁷ Banghang hiam cihleh Moses tungtawn in thukham hong kipia a, ahih hangin Zeisu Khazih tungtawn in hehpihna le thuman thutak hong pia hi. ¹⁸ Cikmah hunin kuamah in Pasian a mu ngei kei hi. Ahih hangin Pa ang sunga om Tapa khat bekin Pasian hong pulakkhia hi. ¹⁹ Hih in John teci panna ahi hi. Judah mite in John kiangah, “Nang kua na hi hiam?” ci a, a dong dingin Jerusalem khuapi panin siampi liante le Levi mite a sawl uh hi. ²⁰ Tua ciangin John in, “Keimah in Khazih ka hi kei hi,” ci in ki‑iim loin siangtak in a kigen hi. ²¹ Amaute in, “Tua ahih leh nang kua na hi hiam? Elijah na hi hiam?” ci in a dong uh hi. Tua ciangin amah in, “Ka hi kei hi,” a ci hi. “Tua ahih leh Kamsangpa na hi hiam?” a cih uh ciangin amah in, “Ka hi kei hi,” ci in a dawng hi. ²² Tua ciangin amaute in, “Kua na hi hiam? Ko hong sawlte kiangah ka genkik theih nadingun nang kua kici na hi hiam hong gen in,” a ci uh hi. ²³ Amah in, “Kamsangpa Isaiah gen bangin, ‘ “Topa lampi na tangsak un,” Ci a, gamlak a kiko awging,’ ka hi hi,” a ci hi. ²⁴ Tu in, amaute in Pharisee pawlte sawl mite ahi uh hi. ²⁵ Amaute in, “Nang Khazih hilo, Elijah hilo, Kamsangpa lah hilo na hih leh banghang in mite tuiphum na hi hiam?” ci in a dong uh hi. ²⁶ John in, “Mite tui tawh ka phum mah hi. Ahih hangin na theihloh uh mi khat note lakah a om hi. ²⁷ Ka nunga hong paipa in kei sangin vanglian zaw a, ama khedapkhau sut ding nangawn in ka kilawm kei hi kong cihpa in amah ahi hi,” a ci hi. ²⁸ Hih thute in John tuiphumna mun Jordan gungal khat a om Bethabara khua‑a a piang thute ahi hi. ²⁹ A zingciang in John in ama kianglam manawh a hong pai Zeisu mu a, “En un! Leitung mite mawhna a puakhia Pasian Tuuno! ³⁰ ‘Kei omma in amah om khin ahih manin kei sangin lianzaw a, kei nungah hong pai ding hi,’ kong cihpa in hihpa ahi hi. ³¹ Keimah in amah ka theih loh hangin tuiphum dinga kong paina in Israel mite lakah amah a kilatkhiat theih nading ahi hi,” a ci hi. ³² Tua banah, John in teci panga a gen in ah, “Vantung panin vakhu bangin Kha hong kumsuk a ama tungah a khawl ka mu hi. ³³ Keimah in amah ka theih loh hangin tuiphum dinga hong sawlpa in, ‘Kha hong kumsuk a, a tungah a khawl na muh leh tua pa in Kha Siangtho tawh a phum ding pa ahi hi,’ hong ci hi. ³⁴ Tua bangin ama tungah hong piang mu khin ka hih manin hihpa in Pasian Tapa ahi hi ci in teci ka pang hi,” a ci hi. ³⁵ A zingciang in John le a nungzui nihte, a dinkhop laitak un, ³⁶ Zeisu hong pai mu uh a, John in, “En un, Pasian Tuuno!” a ci hi. ³⁷ A nungzui nihte in John thugen a zak uh ciangin Zeisu nung a zui uh hi. ³⁸ Tua ciangin Zeisu kihei a, amaute gel in a zuih uh a muh ciangin, “Bang zong na hi uh hiam?” a ci hi. Amaute in, “Rabbi aw, na omna koilai ahi hiam?” a ci uh hi. (Rabbi a khiatna in “siapa” cihna ahi hi.) ³⁹ Zeisu in amaute kiangah, “Hong pai unla hong en un,” a ci hi. Amaute pai uh a, a omna mun a mu uh hi. Tua hun in nai sawm pawl hita ahih manin amah tawh tua ni a tamkhawm uh hi. ⁴⁰ John thugen za a, Zeisu nung a zui nihte lakah khatin Simon Peter sanggampa Andrew ahi hi. ⁴¹ Andrew in a sanggampa Simon va zong masa a, “Messiah ka mu zo uh hi,” a ci hi. (Messiah a khiatna in “Pasian Sathau‑nilhpa” cihna ahi hi.) ⁴² Andrew in Zeisu kiangah a sanggampa a paipih hi. Zeisu in amah en a, “Nang Jonah tapa Simon na hi hi. Cephas hong kici ding hi,” a ci hi. (Cephas a khiatna in “suang” cihna ahi hi.) ⁴³ A zingciang in Galilee ah Zeisu paisawm a, Philip a muh ciangin, “Hong zui in,” a ci hi. ⁴⁴ Philip zong Bethsaida khua pan mah hi a, Andrew le Peter‑te khuapih ahi hi. ⁴⁵ Philip in Nathanael a muh ciangin, “Moses in Thukham laibu sunga a gelh le Kamsangte in laibu sunga a gelh uh Joseph tapa, Nazareth khua mi Zeisu ka mu zo uh hi,” a ci hi. ⁴⁶ Nathanael in, “Nazareth khua panin a hoih na khat peuhpeuh piang thei zawzen ding ahi hiam?” a ci hi. Tua ciangin Philip in, “Hong pai inla hong en in,” a ci hi. ⁴⁷ Zeisu in Nathanael ama kianglam zuana hong pai a muh ciangin, “En un, hihpa in a lungsim ah zuauthu a omlo Israel mi taktak ahi hi!” a ci hi. ⁴⁸ Nathanael in, “Kei hong bangci theih na hi hiam?” a ci hi. Tua ciangin Zeisu in, “Philip in nang hong sapma, theikung nuai‑a na om laitak in kong mu zo hi,” a ci hi. ⁴⁹ Nathanael in, “Rabbi aw, nang in Pasian Tapa na hi a, Israel mite Kumpipa zong na hi hi!” ci in a dawng hi. ⁵⁰ Zeisu in, “ ‘Theikung nuai‑a na omlai pekin kong mu zo hi,’ ka cih manin hong um na hi hiam? Hihte sanga a lianzaw nate na mulai ding hi,” a ci hi. ⁵¹ Zeisu in ama kiangah, “Aman takpi kong cih in ah, tunung ciangin van kihong in Mihing Tapa tungah Pasian vantungmite a kumsuk le a kahto a om na mu ding hi,” a ci hi.

¹ A ni thumna ni in Galilee gam Cana khua ah mopawi khat om a, Zeisu nu in zong a va sim hi. ² Zeisu le a nungzuite zong tua mopawi sim dingin a kisam hi. ³ Lenggahzu a bei ciangin a nu in Zeisu kiangah, “Amaute in lenggahzu nei nawnlo uh hi,” ci in a ko hi. ⁴ Zeisu in, “Numei aw, banghang in na lung hihmawhna hong ko zenzen na hi hiam? Ka hun a tung nai kei hi,” a ci hi. ⁵ A nu in nasemte kiangah, “Ama hong cih bangbang in na hih un,” a ci hi. ⁶ Tualai ah Judah mite kisiansuahna a kizang, khat sungah tui gallon 20 gallon 30 bang a ta thei, thambel guk a om hi. ⁷ Zeisu in amaute kiangah, “Hih bel teng tui dim un,” a ci hi. Tua ciangin amaute in belgong dong dimin tui a sung uh hi. ⁸ Zeisu in, “Tu in, pawlkhat suak unla, pawi ukpa va pia un,” a ci hi. Amaute in zong suakin a pia uh hi. ⁹ Pawi ukpa in lenggahzu a kisuaksak tua tui a ciam hi. Tua lenggahzu koi pan kingah hiam cih tuitawi nasemte in a theih uh hangin amah in thei lo ahih manin mopipa sam a, ¹⁰ “Midangte in lenggahzu a ciilteng hawm masa in a kikham khit ciangin a pengteng hawm pan uh hi. Banghang in tu dongin a ciilteng sit lai na hi hiam?” a ci hi. ¹¹ Zeisu in Galilee gam Cana khua ah a masapen hih nalamdang bawl in ama vangliatna a kilangsak hi. Tua ciangin a nungzuite in amah a um uh hi. ¹² Tua khit ciangin Zeisu in a nu, a sanggamte le a nungzuite tawh Capernaum khua ah paisuk uh a, tualai ah tawmvei sung a taam uh hi. ¹³ Tu in Judah mite Paisan Pawi hong naita ahih manin Jerusalem khuapi ah Zeisu a paito hi. ¹⁴ Biakinnpi huang sungah bawng zuak, tuu zuak, vakhu zuakte le sumkhek in summet bawla a omte a mu hi. ¹⁵ Amah in khautep khat bawl in tuute, bawngte le mi khempeuh biakinnpi huang sung panin a hawlkhia hi. Sumkhekteɠ sumteng buakkhiatsak in sabuaite zong a lumlet hi. ¹⁶ Vakhu zuakte kiangah, “Hihte lakhia un! Ka Pa inn sumlei sumzuakna inn suaksak kei un!” a ci hi. ¹⁷ Tua ciangin a nungzuite in, “Na inn ka khualna in kei hong netum hi,” ci a, kigelhsa thu a phawk uh hi. ¹⁸ Judah mite in, “Hih bang na hih theih nadingin thuneihna na neih lam bang lim tawh hong lak ding na hi hiam?” a ci uh hi. ¹⁹ Zeisu in amaute kiangah, “Hih biakinnpi susia le uh cin ni thum sungin ka lamkik ding hi,” ci in a dawng hi. ²⁰ Tua ciangin Judah mite in, “Hih biakinnpi kum 46 sung vilvel a kilam ahi hi. Nang ni thum sungin dingkiksak zo zawzen ding na hi hiam?” a ci uh hi. ²¹ Ahih hangin Zeisu in biakinnpi a cih ciangin ama pumpi a genna ahi hi. ²² Tua hi a, misite lak pan amah a kithawhkiksak khit ciangin a nungzuite in amaute kiangah hih thu a gen khit lam phawkkik uh a, Lai Siangtho le Zeisu thugente a um uh hi. ²³ Tu in Jerusalem khuapi ah Paisan Pawi hun sungin Zeisu a om hi. Tua pawi sunga a bawl nalamdangte a muh uh ciangin mitampi in ama min a um uh hi. ²⁴ Ahih hangin amah in mi khempeuh thei ahih manin amaute tungah a mah ki‑ap lo hi. ²⁵ Amah in mihing lungsim sungah bang om cih thei khin ahih manin mi khat thu midang khatin a gen ding a kisam kei hi.

¹ Nicodemus kici Judah mite upa vaihawm Pharisee pawlte khat a om hi. ² Hihpa in zan laitak in Zeisu kiangah va pai a, “Rabbi aw, Pasian in amah a ompih kei leh kuama peuhin na bawl nalamdangte bawl theilo ding ahih manin Pasian kiang panin hong pai siapa khat na hih lam kong thei uh hi,” a ci hi. ³ Zeisu in, “Aman takpi kong cih in ah, mi khat a suahkik kei leh Pasian kumpigam sungah a lut thei kei ding hi,” a ci hi. ⁴ Nicodemus in, “Mi khat a tek khit ciangin bangci suahkik theih ding ahi hiam? A nu gil sungah khatvei lutkik in suak thei ding ahi hiam?” a ci hi. ⁵ Zeisu in, “Aman takpi kong cih in ah, tui le Kha tawh a suakkiklo mi peuhmah Pasian kumpigam sungah a lut thei kei ding hi. ⁶ Ci le sa pana suakte ci le sa mah hi a, Kha pana suakte zong kha mah ahi hi. ⁷ ‘Na suahkik loh phamawh hi,’ kong cih pen lamdangsa kei in. ⁸ Huih in a utna peuh ah nung a, a huging na zak hangin koi lampan hong nung a, koilam manawh hiam cih na thei kei hi. Kha tawh a suak mi khempeuh zong tua bang ahi hi,” ci in a dawng hi. ⁹ Nicodemus in, “Hih thute koici pian theih ding ahi hiam?” a ci hi. ¹⁰ Zeisu in, “Nang Israel mite siapa khat hi napi in hih thute thei lo zawzen na hi hiam? ¹¹ Aman takpi kong cih in ah, kote in ka theih uh thu genin ka muh uh thu teci ka pang uh hi. Ahih hangin note in kote teci panna na sang kei uh hi. ¹² Leitung thu kong gente um lo na hih uh leh vantung thute hong genleng, bangci up theih ding na hi uh hiam? ¹³ Vantung ah omin vantung pana hong kumsuk Mihing Tapa longal vantung ah a kahto kuamah a om kei hi. ¹⁴ Moses in gamlak ah gul a khai bangin Mihing Tapa kikhai ding hi. ¹⁵ Amah a um mi khempeuh in kisialo a nuntak tawntungna a neih nading ahi hi. ¹⁶ “Banghang hiam cihleh Pasian in leitung mite hong it mahmah ahih manin khat bek a neihsun a Tapa a hong pia hi. Tua Tapa a um mi khempeuh in kisialo a nuntak tawntungna a ngah nading ahi hi. ¹⁷ “Banghang hiam cihleh leitung mite mawhsak dingin Pasian in a Tapa leitung ah hong sawl hilo in leitung mite in ama tungtawn a hotkhiatna a ngah theih nadingin hong sawl ahi hi. ¹⁸ Amah a um mi in thukhenna a thuak kei hi. Ahih hangin a umlo mi ahih leh Pasian in khat bek a neihsun a Tapa min um lo ahih manin tu mahmah in thukhenna a thuakzo hi. ¹⁹ Hih thukhenna in leitung ah khuavak hong tung khin napi mite a gamtatna uh hoih lo ahih manin khuavak sangin khuamial a deih zaw uh hi. ²⁰ Siatna a bawl mi peuhmah in khuavak mudah a, khuavak a zuan kei uh hi. Banghang hiam cihleh a gamtatnate uh kipholak kha ding ahih man ahi hi. ²¹ Ahi zongin thuman in a gamta mi in ama gamtatnate Pasian deihna tawh kituak hi cih a kitelmuh nadingin khuavak a zuan hi,” a ci hi. ²² Hih thuteng khit ciangin Zeisu in a nungzuite tawh Judea gamah pai in tualai ah amaute tawh omkhawm a, mite tui a phum hi. ²³ Tu in John in zong Salim khua tawh kinai Aenon ah tuiphum in a om hi. Banghang hiam cihleh tualai ah tui tampi a om hi. Mite hong pai in tui a kiphumsak uh hi. ²⁴ Banghang hiam cihleh John thong sungah a kikhum nai kei hi. ²⁵ Tua ciangin kisiansuahna thu tawh kisai in John nungzuite le Judah mite a kisel uh hi. ²⁶ Amaute John kiangah pai uh a, “Rabbi aw, Jordan gungal khatah nangmah tawh a omkhawm ngei ama thu teci na panpa in mite tui a phum hi. En in, mi khempeuh in ama nung a zui khin ta uh hi!” a ci uh hi. ²⁷ Tua ciangin John in, “Vantung panin a kipiak kei leh kuamah in bangmah a bawlthei kei ding hi. ²⁸ ‘Kei Khazih hilo in ama mai‑a kisawlpa ka hi hi,’ ci a, kong genna ah no mahmah ka teci na hi uh hi. ²⁹ A kipi monu in zineipa aa ahi hi. Zineipa kianga a ding bawmtapa in zineipa aw a zak ciangin a lungdam mahmah hi. Keima lungdamna zong tua banglian mah hi a, tu in ka lungdamna kicing zo hi. ³⁰ Amah lian semsem dinga kei ka hih leh ka neu semsem ding hi. ³¹ “Tung lam pana hong paipa in na khempeuh tungah a lianpenpa ahi hi. Leitung pana a piang mi in leitung mi hi a, leitung thu a gen hi. Vantung pana hong paipa ahih leh na khempeuh tungah a lianpenpa ahi hi. ³² Amah in a muhsa le a zaksa thu teci hong pan hangin kuamah in ama teci panna a sang kei uh hi. ³³ Ama teci panna a sang mi in Pasian a thuman hi cih a kipsak ahi hi. ³⁴ Pasian sawlpa in Pasian thu a gen hi. Banghang hiam cihleh Pasian in ama tungah ciangtan om loin Kha a pia hi. ³⁵ Pa in a Tapa it a, ama khut sungah na khempeuh a pia hi. ³⁶ Tapa a um mi in nuntak tawntungna a nei hi. Ahih hangin Tapa a umlo mi in nuntakna neilo dinga, Pasian hehna ama tungah a om hi,” a ci hi.

¹ John sangin Zeisu in mi tam tuiphum zaw in nungzui tam a ngah zawk lam Pharisee pawlte in a zak uh Topa in a thei hi. ² (Zeisu tektek in tui a phum loh hangin a nungzuite in tui a phum ahi hi.) ³ Tua ciangin amah in Judea gam nusia in Galilee gamah a paikik hi. ⁴ Tua banga a pai ciangin Samaria gam a nawk kul hi. ⁵ Tua ciangin Jacob in a tapa Joseph a piak logam tawh kinai, Samaria gam Sychar kici khua a hong tung hi. ⁶ Tu in tua munah Jacob tuikhuk a om hi. Zeisu a lampaina gim ahih manin tua tuikhuk gei ah a tu hi. Tua hun in nai guk pawl ahi hi. ⁷ Tua laitak in Samaria numei khat tuitawi dingin hong pai a, Zeisu in ama kiangah, “Ka dawn ding tui hong pia in,” a ci hi. ⁸ Banghang hiam cihleh a nungzuite khua sungah an lei dingin a paikhia uh hi. ⁹ Tua ciangin Samaria numei in ama kiangah, “Nang Judah mi hi napi in banghang in Samaria numei keima kiangah tui hong ngen na hi hiam?” a ci hi. Banghang hiam cihleh Judah mite le Samaria mite a kipawl thei kei uh hi. ¹⁰ Zeisu in, “Pasian hong piak letsong thei in, ‘Ka dawn ding tui hong pia in,’ a cipa kua hiam cih thei lecin ama kiangah tui na ngen khinzo dinga, amah in nuntakna tui nang a hong pia khinzo ding hi,” a ci hi. ¹¹ Numei in, “Sia aw, tui khai nading bangmah na nei kei a, tuikhuk lah thuk ahih manin tua nuntakna tui koi pan ngah ding na hi hiam? ¹² Hih tuikhuk hong piapa, ka pupi uh Jacob sangin lianzaw na hi hiam? Amah a kipan a tate le a ganhingte in hih tuikhuk tui a nek uh ahi hi,” a ci hi. ¹³ Zeisu in tua nu kiangah, “Hih tui a dawn mi peuhmah a dangtakkik ding hi. ¹⁴ Ahih hangin ken ka piak tui a dawn mi peuhmah in a dangtak ngei nawn kei ding hi. Ka piak ding tui in tua mi sungah tuikhuk suak dinga, tua tuikhuk panin nuntak tawntungna tui a phul ding hi,” ci in a dawng hi. ¹⁵ Numei in, “Sia aw, ka dangtak nawnloh nading le hih munah tuitawi a ka paikik nawnloh nadingin tua tui hong pia in,” ci in a ngen hi. ¹⁶ Zeisu in, “Pai inla na pasal va sam in. Tua khit ciangin hong paikik un,” a ci hi. ¹⁷ Numei in, “Pasal ka nei kei hi,” a cih ciangin, Zeisu in, “ ‘Pasal ka nei kei hi,’ na cih pen a maan hi. ¹⁸ Banghang hiam cihleh pasal nga na nei khinzo a, tu‑a na neih pen zong na pasal hilo ahih manin thuman na gen hi,” a ci hi. ¹⁹ Numei in, “Sia aw, kamsang khat na hih lam kong thei hi. ²⁰ Ka pute ka pate un hih mualtung ah Pasian a bia uh hi. No Judah mite in Jerusalem khuapi bekah Pasian kibia ding hi na ci uh hi,” a ci hi. ²¹ Zeisu in, “Numei aw, ka thu gen hong um in. Hih mualtung ah ahi a, Jerusalem khuapi ah ahi zongin Pa a kibiakloh hun hong tung ding hi. ²² Note in na theih lohpi uh na bia uh hi. Kote in ka theih uh ka bia uh hi. Banghang hiam cihleh Judah mite tung panin hotkhiatna hong piang hi. ²³ Ahih hangin a bia taktakte in kha le thuman thutak tawh Pasian a biak ding hun uh tu in hong tung zota hi. Banghang hiam cihleh tua banga amah a bia ding mite Pa in a zong hi. ²⁴ Pasian in Kha ahi hi. Amah a biate in lungsim le thuman thutak tawh a bia ding uh hi,” a ci hi. ²⁵ Numei in ama kiangah, “Khazih kici Messiah hong pai ding hi cih ka thei hi. Amah a hong tun ciangin na khempeuh a hong hilhcian ding hi,” a ci hi. ²⁶ Zeisu in, “Nangmah tawh a kiho keimah in tua Messiah ka hi hi,” a ci hi. ²⁷ Tua laitak in a nungzuite hong tungkik uh a, tua numei tawh a kihona lamdang a sa uh hi. Ahi zongin, “Bang na deihna ahi hiam?” cih ahi a, “Banghang in tua nu hopih na hi hiam?” cih ahi zongin kuamah in a dong ngam kei uh hi. ²⁸ Tua khit ciangin numei in a tuibel nusia in khua sungah tai a, a khuapihte kiangah, ²⁹ “Hong pai unla, ka gamtatna khempeuh hong genpa hong en un. Amah Khazih hilo ding ahi hiam?” a ci hi. ³⁰ Tua ciangin amaute khua sung panin Zeisu kiangah a hong pai uh hi. ³¹ Amaute hong tunma in a nungzuite in, “Rabbi aw, an ne in,” a ci uh hi. ³² Ahih hangin Zeisu in, “Note theihloh nek ding an khat ka nei hi,” a ci hi. ³³ Tua ciangin a nungzuite in, “Mi khatpeuh in nek theih ding khatpeuh puak khin ahi kha ding hiam?” a kici uh hi. ³⁴ Zeisu in amaute kiangah, “Kei hong sawlpa deihna bang sem a, ama hong piak nasep ka zawhna in ka annek ahi hi. ³⁵ ‘Tu zawh kha li khit ciangin an kila ding hi,’ ci hilo na hi uh hiam? Ken kong cih in ah khuadak unla lote en un. Ante min khin a, anlak hun hong tungzo hi! ³⁶ A vawhpa le anlapa a lungdam khop theih nadingun anlapa in thaman sangin nuntak tawntungna gah zong a kaikhawm ding hi. ³⁷ Tua ahih manin mi khatin vawh a, midang khatin a at hi a kici thu a maan hi. ³⁸ Note khawhlohna lo ah an la dingin kong sawl hi. Midangte in na kho uh a, note in amaute sepsa a la ding na hi uh hi,” a ci hi. ³⁹ “Ka gamtatna khempeuh hong gen hi,” a ci tua numeinu teci panna hangin Samaria khua mi tampi in Zeisu a um uh hi. ⁴⁰ Samaria khua mite Zeisu kianga tun uh ciangin amau khua ah a taam dingin kho uh a, tua khua ah ni nih a taam hi. ⁴¹ Ama thugenna hangin thu‑um mi tampi a kibehlap hi. ⁴² Tua khit ciangin amaute in numeinu kiangah, “Nang nong gen hang beka um ka hi nawn kei uh hi. Kote mahmah in ama thugen za in, amah in leitung mite a Honpa Khazih taktak hi cih ka theih manun a um ka hi uh hi,” a ci uh hi. ⁴³ Ni nih khit ciangin tua khua panin Zeisu paikhia a, Galilee gam a tung hi. ⁴⁴ Zeisu in, “Kamsang khat ama pianna gamah kipahtawi lo hi,” a ci hi. ⁴⁵ Galilee gam a tun ciangin Galilee mite in amah a sang uh hi. Banghang hiam cihleh amaute in Jerusalem khuapi ah pawisim in a pai lai un Zeisu nasep khempeuh a mu khinzo uh hi. ⁴⁶ Tuisik lenggahzu a suahsakna Galilee gam Cana khua ah Zeisu a paikik hi. Tua laitak in Capernaum khua‑a om kumpi nasem ulian khatpa tapa cina in a om hi. ⁴⁷ Tua pa in Judea gam panin Galilee gamah Zeisu hong tung cih thu a zak ciangin a kiangah va pai a, “Ka tapa cina in a si ding hita hi. Hong pai inla, hong damsak in,” ci in a thum hi. ⁴⁸ Tua ciangin Zeisu in ama kiangah, “Note in limlamdangte le nalamdang lianpite na muh kei ngal uh leh na um peuhmah kei ding uh hi,” a ci hi. ⁴⁹ Ulianpa in, “Sia aw, ka tapa a sihma in hong paisuk tapeuh in!” a ci hi. ⁵⁰ Zeisu in, “Ciah in na tapa a damzo hi,” a ci hi. Tua pa in Zeisu thugen um ahih manin a ciah pah hi. ⁵¹ Amah a paisuk laitak in a nasemte in na dawntuah uh a, “Na tapa a damzo hi!” ci in a ko uh hi. ⁵² Amah in a tapa dam hun a dot ciangin amaute in, “Zan ni nai sagih hunin a cisa natna hong dam hi,” a ci uh hi. ⁵³ Zeisu in, “Na tapa a damzo hi,” a cih hun lian mahin a dam lam a pa in a theih ciangin amah le a innkuanpih khempeuh in Zeisu a um uh hi. ⁵⁴ Hih in Judea gam pan Galilee gamah Zeisu a tun khit nalamdang a bawl a nihveina ahi hi.

¹ Tua khit ciangin Judah mite pawikhat hong tung a, Jerusalem khuapi ah Zeisu a hawhto hi. ² Tu in, Jerusalem khuapi a Tuu Kongpi kiangah Hebrew pau in Bethesda a kici bual khat om a, tua bual kimkot ah buuk nga a om hi. ³ Tua buukte sungah mittaw, khebai, khutzaw, khezaw a kipan cina tampi tui kilok ding ngakin a lum uh hi. ⁴ Banghang hiam cihleh a hun khat ciangin tua bual ah vantungmi khat hong kumsuk in tui a lok hi. Tui a kilawh laitak tui sunga a kidiah masa penpen a natna khempeuh a damsiang pahpah hi. ⁵ Tua munah kum 38 sung a kumzawn mi khat a om hi. ⁶ Tua pa a lupsa a om Zeisu in mu a, a nat zawh sawt khinzo hi cih thei ahih manin, “Na dam nuam hiam?” ci in a dong hi. ⁷ Cinapa in, “Sia aw, tui a kilawh laitak bual ah hong paipih ding mi ka neih loh banah kei thu a ka pai ciangin ka mai ah midang khat ta na tung khin pahpah hi,” ci in a dawng hi. ⁸ Zeisu in ama kiangah, “Tho in na lupna pua inla pai in,” a ci hi. ⁹ Tua ciangin tua pa dam pah a, a lupna pua in lam a pai hi. Tua ni in Sabbath ni ahi hi. ¹⁰ Tua ciangin Judah mite in damna a ngahpa kiangah, “Sabbath ni, tuni in na lupna na puak thukham tawh kituak lo hi,” a ci uh hi. ¹¹ Tua ciangin amah in, “Kei hong damsakpa in, ‘Na lupna pua inla, pai in,’ hong ci hi,” ci in a dawng hi. ¹² Tua ciangin amaute in, “ ‘Na lupna pua inla pai in,’ hong cipa kua ahi hiam?” ci in a dong uh hi. ¹³ Tua muna om mihonpite lak panin Zeisu kihemkhia ahih manin damna a ngahpa in amah a damsakpa a thei kei hi. ¹⁴ Tua nung ciangin Zeisu in biakinnpi huang sungah tua cinapa mukik a, ama kiangah, “En in, tu in damta na hih manin nang tungah a siahuai zaw khatpeuh a hong tun loh nadingin mawhna na bawl nawn kei in,” a ci hi. ¹⁵ Tua pa paikhia a, amah a damsakpa Zeisu ahihlam Judah mite kiangah a gen hi. ¹⁶ Zeisu in hih nate Sabbath ni in bawl ahih manin Judah mite in amah bawlsia a a thah theih nading uh lampi a zong uh hi. ¹⁷ Ahih hangin Zeisu in, “Ka Pa in tu dongin nasem ahih manin ken zong ka sem hi,” ci in a dawng hi. ¹⁸ Tua hi a, Zeisu in Sabbath ni a tan loh banah Pasian nangawn ka Pa hi ci in Pasian tawh a kikim in kikoih ahih manin Judah mite in amah a that nuam semsem uh hi. ¹⁹ Tua khit ciangin Zeisu in, “Aman takpi kong cih in ah, Tapa in Pa nasep a muh banga a sep lohngal ama thu in bangmah a semthei kei hi. Banghang hiam cihleh Pa sep bangbang Tapa in zong a sem ahi hi. ²⁰ Pa in Tapa it ahih manin ama nasep khempeuh a lak hi. Tua ahih manin hihte sanga nasep thupi zawte, amah laklai dinga, note in lamdang na sa mahmah ding uh hi. ²¹ Pa in misite thosak a, nuntakna a piak bangin Tapa in zong a piak nop mite tungah nuntakna a pia hi. ²² Pa in kuama tungah thukhen lo a, thukhenna khempeuh Tapa khut sungah a ap khinzo hi. ²³ Banghang hiam cihleh mi khempeuh in Pa a pahtawi bangin Tapa zong a pahtawi theih nading uh ahi hi. Tapa a pahtawilo mi in Pa in a sawlpa zong a pahtawi lo ahi hi. ²⁴ “Aman takpi kong cih in ah, keima thu za a, kei hong sawlpa a um mi in nuntak tawntungna neizo ahih manin thukhenna a thuak kei ding hi. Sihna pan paikhia in nuntakna a tungzo hi. ²⁵ Aman takpi kong cih in ah, misite in Pasian Tapa aw a zak ding hun hong tung ding hi. Tu in hong tungzo a, tua aw a za mite a nungta ding uh hi. ²⁶ Banghang hiam cihleh Pa in ama sungah nuntakna a neih bangin Tapa in zong ama sungah nuntakna a neih nadingin Pa in thu a piazo hi. ²⁷ Amah Mihing Tapa ahih manin thukhen theih nading thuneihna zong a pia hi. ²⁸ “Hih thu lamdangsa kei un, han sunga om mite khempeuh in ama aw za in, ²⁹ a hong pusuah hun uh hong tung dinga, a pha in a gamtate in a nungta dingin hong thokik ding uh a, a sia in a gamtate in mawhsakna a thuak dingin hong thokik ding uh hi. ³⁰ Keima ut thu in bangmah ka hih kei hi. Ka zak bang beka thu a khen ka hi hi. Keima deihna zui loin kei hong sawlpa ka Pa deihna bang zui ka hih manin ka thukhenna a maan hi. ³¹ “Kei le kei teci a kipang hi leng, ka teci panna a maan kei ding hi. ³² Kei aa dingin teci pang a dang khat om a, ama teci panna in thuman hi cih ka thei hi. ³³ “Note in John kiangah thudong dingin mi na sawl uh a, amah in thuman thutak teci a pangzo hi. ³⁴ Tua ka cih ciangin mihing teci panna a kisam ka hi kei a, note hong kihotkhiat theih nadingin hih thute a hong gen ka hi hi. ³⁵ Amah in meivak bangin kuangin tang a, note in ama khuavak sungah tawlkhat sung nopsak ding na ut uh hi. ³⁶ “Ahih hangin John teci panna sanga a lianzaw teci khat ka nei hi. Banghang hiam cihleh Pa in ka zawh dinga hong piak nasepte ka sem a, Pa in kei a hong sawl lam tua nasepte in teci a pang uh hi. ³⁷ Kei hong sawlpa ka Pa mahmah in kei aa dingin teci a pangzo hi. Note in cikmah hunin ama aw na za ngei kei uh a, a mel zong na mu ngei kei uh hi. ³⁸ Ahih hangin ama hong sawlpa um lo na hih manun note sungah ama thu a teeng kei hi. ³⁹ Nuntak tawntungna ngah theih nading lametna tawh, Lai Siangtho na limsim mahmah uh a, tua na sim uh Lai Siangtho in keima thu mah genin teci pang napi, ⁴⁰ nuntakna na neih nadingun keima kiangah nong pai nuam kei uh hi. ⁴¹ “Keimah in mite pahtawi dingin thu ka gen kei hi. ⁴² Ahih hangin note in Pasian na it loh lam uh kong thei hi. ⁴³ Ka Pa minin kong pai a, nong sang kei uh hi. Midang khatpeuh ama minin hong pai leh na sang ding uh hi. ⁴⁴ Pasian khat bek kiang pana a hong pai pahtawina zong loin khat le khat kipahtawi thuk ding a ut zaw note in bangci in um thei ding na hi uh hiam? ⁴⁵ “Ahi zongin Pa mai ah note hong mawhsak dingin hong ngaihsun kei un. Note hong mawhsak dingpen na muanpa uh Moses ahi hi. ⁴⁶ Banghang hiam cihleh Moses in keima thu gelh ahih manin amah um taktak le uh teh kei zong nong um ding uh hi. ⁴⁷ Ahih hangin ama laigelhte um lo na hih manun kong gen thute bangci up theih ding na hi uh hiam?” a ci hi.

¹ Hih thuteng khit ciangin Tiberias tuipi kici Galilee tuili gal khat ah Zeisu a galkah hi. ² Tua ciangin cinate tunga a bawl nalamdangte mihonpite in mu khin uh ahih manin ama nung a zui uh hi. ³ Mualtung ah Zeisu kahto in tualai ah a nungzuite tawh a tukhawm hi. ⁴ Tu in Judah mite Paisan Pawi a naita hi. ⁵ Tua ciangin Zeisu khuadak a, ama kianga hong zuan mihonpite a muh ciangin Philip kiangah, “Hih mite nek ding anlum koi pan lei ding i hi hiam?” a ci hi. ⁶ A sep ding teng a theih khitsa hi napi, Philip lungsim a ze‑et nop manin tua bangin a dong ahi hi. ⁷ Philip in amah dawng a, “Denariusɠ 200 man anlum i lei zongin bangmah thamin kihil zolo dinga, mikim in tawmkhat tekin kitang ding hi,” a ci hi. ⁸ Simon Peter sanggampa Andrew kici a nungzuite khatin ama kiangah, ⁹ “Hihlai ah mangbuh anlum nga le ngasaneu tawn nih a nei naupangno khat om hi. Ahih hangin mihon hi zahta nek dingin bangmah tham hilo hi,” a ci hi. ¹⁰ Tua ciangin Zeisu in, “Mite tusak un,” ci in a sawl hi. Tua munah lopa tampi po ahih manin mite tu uh a, pasal 5,000 bang a pha hi. ¹¹ Zeisu in anlum la in lungdam a koh khit ciangin nungzuite pia a, nungzuite in tua a tu mipite lakah a hawmsawn uh hi. Tuamah bangin ngasa zong a deih zahzah un a hawmsawn uh hi. ¹² An a kham khit uh ciangin Zeisu in a nungzuite kiangah, “A kikhamval themneng teng thelthangsak loin kaikhawm un,” a ci hi. ¹³ Amaute in a kaihkhop uh ciangin anlum nga panin a kikhamval a themneng lawh sawm le lawh nih dim a ngah uh hi. ¹⁴ Tua mite in Zeisu bawl nalamdang a muh uh ciangin, “Hihpa in leitung a hong pai ding kamsangpa taktak ahi hi,” a ci uh hi. ¹⁵ Tua ciangin tua mite in amah kumpi dingin thatang koihsawm uh hi cih thu Zeisu in a theih ciangin amah guak mual tungah a kihemkhiakik hi. ¹⁶ Tu in nitak lam hong hita a, a nungzuite tuili ah paisuk in, ¹⁷ gunkuang ah tuang uh a, Capernaum khua zuanin a pai uh hi. Khua hong mialta a, Zeisu lah amau kiang tung nailo hi. ¹⁸ Tua bangin a pai laitak un huihpi nung ahih manin tuihual hong kilok hi. ¹⁹ Tai thum tai li bang a pai khit uh ciangin gunkuang lam zuanin tui tunga hong pai Zeisu mu uh a, a lau uh hi. ²⁰ Ahih hangin Zeisu in, “Keimah ka hi hi. Lau kei un,” a ci hi. ²¹ Amaute in lungdamtak in gunkuang tungah Zeisu tuangsak in a pai nading mun uh a tung pah uh hi. ²² A zingciang in tuili gal khat a om mihonpite in a nungzuite tuanna gunkuang neu khat longal gunkuang dang mu lo uh hi. Tua banah Zeisu le a nungzuite gunkuang tuangkhawm loin a nungzuite bek paikhia uh ahihlam zong a phawk uh hi. ²³ Ahi zongin Tiberias panin gunkuang tawh midangte hong pai uh a, Topa in lungdam a koh khit cianga anlum a nekna mun a tung uh hi. ²⁴ Tualai ah Zeisu le a nungzuite a om loh lam mihonpite in a theih uh ciangin Zeisu zong dingin gunkuang tuangin Capernaum khua ah a pai uh hi. ²⁵ Tuipi gal khat ah Zeisu a muh uh ciangin, “Rabbi aw, bang hunin hihlai na tung na hi hiam?” ci in a dong uh hi. ²⁶ Zeisu in, “Aman takpi kong cih in ah, nalamdangte na muh manun hong zong na hi kei uh hi. Gilvahtak in anlum na nek manun hong zong na hi zaw uh hi. ²⁷ A siathei an ngah nadingin hanciam kei un. Mihing Tapa in hong piak ding nuntak tawntungna an na ngah nadingun hanciam zaw un. Banghang hiam cihleh nuntak tawntungna an a pia dingin Pasian in a Tapa tungah ciaptehna a khen zo hi,” a ci hi. ²⁸ Tua ciangin amaute in, “Pasian nasepte ka sep theih nadingun bang ka hih ding uh hiam?” a ci uh hi. ²⁹ Zeisu in amaute kiangah, “Pasian hong sawlpa upna in Pasian deihna sepna ahi hi,” a ci hi. ³⁰ Tua ciangin amaute in, “Tua ahih leh kote in mu in nang kong up theih nadingun bang limlamdang hong lakin bang hong bawl ding na hi hiam? ³¹ ‘Amah in amaute nek dingin vantung pan anlum a pia hi,’ ci a, a kigelh mah bangin ka pute ka pate un gamlak ah manna a ne uh hi,” a ci uh hi. ³² Tua ciangin Zeisu in amaute kiangah, “Aman takpi kong cih in ah, vantung panin note anlum hong piapa in Moses hilo a, vantung panin note anlum taktak hong piapa in ka Pa hi zaw hi. ³³ Pasian anlum taktak in vantung pan hong paisuk in leitung mite ama nuntakna a piapa ahi hi,” a ci hi. ³⁴ Tua ciangin amaute in ama kiangah, “Topa aw, tua anlum kote hong pia den in,” a ci uh hi. ³⁵ Zeisu in amaute kiangah, “Keimah in nuntakna anlum ka hi hi. Ka kiangah hong pai mi in gilkial ngei nawnlo dinga, kei hong um mi in dangtak ngei nawnlo ding hi. ³⁶ Ahih hangin ken kong cih in ah note in kei hong mu khin napi uh cin nong um kei veve uh hi. ³⁷ Pa in a hong piak mi khempeuh ka kiangah hong pai ding uh a, ka kianga hong pai mite lah ka hawlkhia peuhmah kei ding hi. ³⁸ Banghang hiam cihleh keima deihna a sem dingin vantung panin hong paisuk ka hi kei hi. Kei hong sawlpa deihna a sem dingin hong pai ka hi hi. ³⁹ Amah in kei a hong piak mi khempeuh lakah khat beek mansuah loin nitawp ni ciangin ka thokiksak ding hi. Tua in kei hong sawlpa deihna ahi hi. ⁴⁰ Tapa mu a, a um mi peuhmah in nuntak tawntungna nei dinga, nitawp ni ciangin amah ka thokiksak ding hi. Tua in kei hong sawlpa deihna ahi hi,” a ci hi. ⁴¹ “Vantung pana hong kumsuk anlum ka hi hi,” a cih manin, Judah mite in amah phunsan uh hi. ⁴² Amaute in, “Hihpa a nu le a pa i theihluat Joseph tapa Zeisu hilo ahi hiam? Tua hi napi banghang in, ‘Vantung panin hong paisuk ka hi hi,’ ci tazen ahi hiam?” a ci uh hi. ⁴³ Tua ciangin Zeisu in dawngin amaute kiangah, “Phunphun nawn kei un. ⁴⁴ Kei hong sawl ka Pa in a huai kei leh kuamah in kei kiang hong zuan theilo hi. Keima kiang hong zuan mi nitawp ni ciangin ka thokiksak ding hi. ⁴⁵ Kamsangte laibu sunga a kigelh mah bangin, ‘Pasian in amaute khempeuh thu hilh ding hi.’ Tua hi a, Pa thu za a, a thei mi khempeuh in keima kiang hong zuan uh hi. ⁴⁶ Pasian kiang pana hong paipa longal kuamah in Pa a mu ngei kei hi. Tua pa bekin Pa a mu khinzo hi. ⁴⁷ Aman takpi kong cih in ah, kei hong um mi in nuntak tawntungna a neizo hi. ⁴⁸ Keimah in nuntakna anlum ka hi hi. ⁴⁹ Na pute na pate un gamlak ah manna a nek uh hangin a si veve uh hi. ⁵⁰ Vantung panin a hong pai hih anlum a ne mi a si kei ding hi. ⁵¹ Keimah in vantung panin hong pai nuntakna anlum ka hi hi. Hih anlum a ne mi a nungta tawntung ding hi. Leitung mite nuntak nadingin ka piak ding anlum in hih ka pumpi ahi hi,” a ci hi. ⁵² Tua ciangin Judah mite in, “Hihpa in eite nek dingin ama pumpi hong bangci piak theih ding ahi hiam?” ci in a kinial uh hi. ⁵³ Tua ciangin Zeisu in, “Aman takpi kong cih in ah, Mihing Tapa pumpi ne a, a si na dawn kei uh leh nuntakna na ngah kei ding uh hi. ⁵⁴ Ka pumpi ne a, ka si a dawn mi kuama peuh in nuntak tawntungna a nei hi. Nitawp ni ciangin tua mi ka thokiksak ding hi. ⁵⁵ Banghang hiam cihleh ka pumpi in an taktak hi a, ka si in dawn ding taktak ahi hi. ⁵⁶ Ka pumpi ne a, ka si a dawn mi in keima sungah teeng a, ama sungah kei ka teeng hi. ⁵⁷ A nungta ka Pa in kei hong sawl a, Pa hanga ka nuntak mah bangin keima sa a ne mi in keima hangin a nungta ding hi. ⁵⁸ Hih anlum in vantung pana hong paisuk ahi hi. Na pu na pate un manna ne a, a sih veve uh bang hilo in hih anlum a ne mi a nungta tawntung ding hi,” a ci hi. ⁵⁹ Hih thute Capernaum khua kikhopna inn sunga a hilh ahi hi. ⁶⁰ Tua hi a, a nungzui tampite in tua thuhilhna a zak uh ciangin, “Hih thu in thuhaksa ahi hi. Kua in theitel zo ding ahi hiam?” a ci uh hi. ⁶¹ Nungzuite in hih thu hangin a phunna Zeisu in a theih ciangin amaute kiangah, “Hih thu in note hong lungkiasak ahi hiam? ⁶² Tua ahih leh Mihing Tapa a masa a a omna munah a kahto mu le uh teh bangci ding na hi uh hiam? ⁶³ Kha in nuntakna pia a, ci le sa in phattuamna bangmah a pia kei hi. Note kianga kong gen thu in kha thu hi a, tua in nuntakna ahi hi. ⁶⁴ Ahih hangin note lakah a umlo pawlkhat na om uh hi,” a ci hi. Banghang hiam cihleh kuateng in umlo a, kua in amah lehhek ding cih Zeisu in a kipat a kipan in a thei khin zo hi. ⁶⁵ Tua ciangin amah in, “Ka Pa in a phal kei nak leh ka kiangah kuamah hong pai thei kei hi kong ci hi,” a ci hi. ⁶⁶ Tua huna kipan in a nungzuite tampi ciahkik uh a, amah a zui nawn kei uh hi. ⁶⁷ Tua ciangin Zeisu in sawm le nihte kiangah, “Note zong paikhia nuam na hi uh hiam?” a ci hi. ⁶⁸ Simon Peter in, “Topa aw, kua kiangah paituan ding ka hi uh hiam? Nangmah in nuntak tawntungna thu na nei hi. ⁶⁹ A nungta Pasian Tapa Khazih na hih lam kote in thei in kong um uh hi,” a ci hi. ⁷⁰ Zeisu in, “No sawm le nihte keima kong teel hi a, note sung panin khatin dawi hilo ahi hiam?” a ci hi. ⁷¹ Tua bang a cih ciangin sawm le nihte lakah amah a lehhek ding Simon tapa Judas Iscariot a cihna ahi hi.

¹ Hih thuteng khit ciangin Galilee gam sungah Zeisu a zin kawikawi hi. Banghang hiam cihleh Judah mite in amah thahsawm uh ahih manin Judea gam sungah a zin nuam kei hi. ² Tu in Judah mite Buuk Pawi hong naita hi. ³ Tua ahih ciangin a sanggamte in ama kiangah, “Na nungzuite in zong na bawl na nasepte a muh theih nadingun hih mun pan paikhia inla, Judea gamah va pai in. ⁴ Mite theih ding a ut mite in a simtham in na sem lo uh hi. Hih nate na sepsep ding leh leitung buppi muh dingin va kilakkhia in,” a ci uh hi. ⁵ Banghang hiam cihleh a sanggamte nangawn in amah a um kei uh hi. ⁶ Tua ciangin Zeisu in amaute kiangah, “Ka hun a tung nai kei hi. Note aa dingin bel hunhoih hi tawntung hi. ⁷ Leitung mite in note hong mudah thei kei uh hi. Ahih hangin ken ka hih leh amaute gamtatna hoihlote pholak ka hih manin hong mudah uh hi. ⁸ Pawi sim dingin no na paito un. Kei ka hih leh ka hun tung nailo ahih manin kong pai nai kei ding hi,” a ci hi. ⁹ Amaute kiangah hih thuteng a gen khit ciangin Galilee gamah a taamlai hi. ¹⁰ Ahih hangin a sanggamte pawi sim dingin a paitoh khit uh ciangin Zeisu zong a kilanglo in pawi ah a paisim hi. ¹¹ Tua ciangin Judah mite in, “Amah koilai ah om ahi hiam?” ci in pawi sungah a zong uh hi. ¹² Ama hangin mihonpite a kisel uh hi. Pawlkhat in, “Amah mihoih hi,” a ci uh hi. Ahih hangin pawlkhatte in, “Hilo hi. Mipite a khempa hi zaw hi,” a ci uh hi. ¹³ Ahih hangin Judah mite kihta uh ahih manin a kilang in ama thu a genngam kei uh hi. ¹⁴ Pawi hun a lang bang a bei khit ciangin, biakinnpi huang sungah Zeisu lutin thu a hilh hi. ¹⁵ Judah mite in, “Hihpa in lai sin ngeilo napi banghang in hih zahta in laithei ahi hiam?” ci in lamdang a sa uh hi. ¹⁶ Zeisu in amaute kiangah, “Ka thuhilhte kei aa hilo in kei hong sawlpa aa ahi hi. ¹⁷ Mi khatpeuh in Pasian deihna a sepnop taktak leh ka thuhilhna Pasian kiang pan hiam ahih keileh keima utthu in a gen ka hi hiam cih a thei ding hi. ¹⁸ Ama utthu in thu a gen mi in ama minthan nading a zong ahi hi. Ahih hangin a sawlpa minthan nading a zong mi ahih leh thuman a, ama sungah zuauthu a om kei hi. ¹⁹ Moses in thukham hong pia khin napi banghang in khat beekin zui lo na hi uh hiam? Banghang in kei thah dingin hong sawm na hi uh hiam?” a ci hi. ²⁰ Mihonpite in, “Nang dawilawm nei na hi hi. Kua in nang thah hong sawm ahi hiam?” a ci uh hi. ²¹ Tua ciangin Zeisu in amaute kiangah, “Nalamdang khat ka bawl a, na vekpi un lamdang na sa uh hi. ²² Moses in vunatna thu note hong pia a, Sabbath ni in vun na at uh hi. (Moses kiang pan hilo in i pu i pate kiang pan hi zaw hi.) ²³ Moses thukham na palsat loh nadingun Sabbath ni in vun ki‑at thei ahih leh Sabbath ni in mi khat ka damsak manin banghang in kei tungah heh na hi uh hiam? ²⁴ A puatham bek bulphuh in thu khen kei unla, a kilawm a kituak in thukhen un,” a ci hi. ²⁵ Tua ciangin Jerusalem khua mi pawlkhatte in, “Thah a sawmsawm pa uh hihpa hilo ahi hiam? ²⁶ Ahih hangin en un, hangtak in thu gen napi bangmah a cih kei uh hi. Gam ukte in amah Khazih sa takpi uh ahi hiam? ²⁷ Tua dingin lah ama piankhiatna i thei hi. Ahih hangin Khazih hong pai ciangin kuamah in ama piankhiatna a thei kei ding hi,” a ci uh hi. ²⁸ Tua ciangin Zeisu in biakinnpi huang sungah kiko in thu hilh a, “Note in kei nong thei uh a, ka piankhiatna zong na thei uh hi. Keima utthu a hong pai ka hi kei hi. Kei hong sawlpa thuman a, ahi zongin note in amah na thei kei uh hi. ²⁹ Ahih hangin ama kiang pan ka hi a, ama hong sawl ka hih manin amah ka thei hi,” a ci hi. ³⁰ Tua ahih manin amaute in amah matsawm uh a, ahi zongin a hun tung nailo ahih manin kuamah in a man kei hi. ³¹ Mihonpi lak pan mitampi in amah um uh a, “Khazih hong pai ciangin zong hihpa bawl sangin a tam zaw nalamdang hong bawl tuan ding ahi hiam?” a ci uh hi. ³² Ama hanga mite a kihona uh Pharisee pawlte in a zak uh ciangin siampi liante tawh kikum in amah man dingin biakinn cingte a sawl uh hi. ³³ Tua ciangin Zeisu in amaute kiangah, “Note tawh tawmvei sung ka omlai dinga, tua khit ciangin kei hong sawlpa kiangah ka ciah ding hi. ³⁴ Nong zon uh hangin nong mu kei ding uh a, ka omna munah zong nong pai thei kei ding uh hi,” a ci hi. ³⁵ Tua ciangin Judah mite in, “I muh zawhloh dingin amah koi ah pai sawm ahi hiam? Greek mite laka a kithehthang i mipihte kiangah pai in, Greek mite thu va hilh sawm ahi hiam? ³⁶ ‘Nong zong ding uh a, nong mu kei ding uh hi. Ka omna munah zong nong pai thei kei ding uh hi,’ a cih pen bang a cihnopna hi ding hiam?” ci in a kidong uh hi. ³⁷ Pawikham sunga ni thupipen ni ahi pawi ven ding ni in Zeisu dingto a, “Mi khatpeuh a dang a tak leh ka kiangah hong pai in tui hong dawn tahen. ³⁸ Lai Siangtho in a gen mah bangin kei hong um mi sung panin nuntakna guntui a luangkhia ding hi,” ci in a kiko hi. ³⁹ Tua bang a cih ciangin amah a um mite ngah ding Kha a genna ahi hi. Banghang hiam cihleh Zeisu in minthanna ngah nailo ahih manin Kha Siangtho hong kipiakhia nailo hi. ⁴⁰ Tua hi a, mihonpite in hih thu a zak uh ciangin, “Hihpa in Kamsangpa taktak ahi hi,” a ci uh hi. ⁴¹ A dangte in, “Hihpa in Khazih ahi hi,” a ci uh hi. Ahih hangin pawlkhat in, “Galilee gam panin Khazih hong piang ding ahi hiam? ⁴² ‘Khazih in David suan sung pan hong piang dinga, David pianna Bethlehem khua ah hong suak ding hi,’ ci in Lai Siangtho in gen khin hilo ahi hiam?” a ci uh hi. ⁴³ Tua ahih manin ama hangin mihonpite a pawlpawl in kikhen uh hi. ⁴⁴ Amaute pawlkhat in a mat nop uh hangin kuamah in a man kei uh hi. ⁴⁵ Biakinn cingte a hong tunkik uh ciangin siampi liante le Pharisee pawlte in, “Banghang in amah hong paipih lo na hi uh hiam?” a ci uh hi. ⁴⁶ Biakinn cingte in, “Hihpa banga thugen kuamah om ngeilo hi!” a ci uh hi. ⁴⁷ Tua ciangin Pharisee pawlte in, “Note zong hong khem zota ahi hiam? ⁴⁸ Upa vaihawmte ahih keileh Pharisee pawlte sungah amah a um om ahi hiam? ⁴⁹ Thukham theilo hih mihonpite in hamsiatna a thuak uh hita hi,” a ci uh hi. ⁵⁰ Tua thukhente lakah zan laitak a Zeisu kianga a va paipa Nicodemus zong kihel a, amah in, ⁵¹ “Mi khat, ama kam za photin aman bang teng sem hiam cih theitel masa lopi in i thukham in thukhen ngei peuhmah ahi hiam?” a ci hi. ⁵² Tua ciangin amaute in ama kiangah, “Nang zong Galilee mi na hi hiam? Lai Siangtho encian lecin Galilee gam panin kamsang khat beek piang ngeilo hi cih na thei ding hi,” a ci uh hi. ⁵³ Tua khit ciangin amau inn ciat ah a ciah uh hi.

¹ Zeisu ahih leh Tanluan mualtung ah a kahto hi. ² Zingsang phalvak tungin biakinnpi huang sungah Zeisu a paikik hi. Mi khempeuh ama kiangah hong pai uh a, amah in a tutsa in thu a hilh hi. ³ Tua khit ciangin thukhamhilh siate le Pharisee pawlte in pasal khat tawh a mawh laitak in a kiman numei khat hong paipih uh a, amaute laizang ah a koih uh hi. ⁴ Amaute in Zeisu kiangah, “Sia aw, hih nu in pasal tawh a mawh laitak in a kiman ahi hi. ⁵ Moses in hih bang mite suang tawh denlup dingin thukham hong pia hi. Ahi zongin nang bang na ci ngaihsut hiam?” a ci uh hi. ⁶ Hih bangin a dot uh pen Zeisu mawhmat nuama a ze‑et uh ahi hi. Ahih hangin bangmah a zalo bangin Zeisu kunsuk a, a khutme tawh leilak ah lai a gelh hi. ⁷ Amaute in a dot phatphat uh ciangin amah dakto a, “Note lakah mawh neilopen in hih numeinu suang tawh deng masa hen,” a ci hi. ⁸ Tua khit ciangin kunsukkik in leilak ah lai a gelh hi. ⁹ Hih thu a zak uh ciangin mawhnei ahihlam uh amaute lungsim tawngah kiphawk ciat uh a, a upapen pan a neupen dong khatkhat in a gelkhia uh hi. Tua ciangin Zeisu le amaute laizang a om numeinu bek a omlai hi. ¹⁰ Zeisu dakto a numeinu longal midang kuamah a muh loh ciangin, “Numei aw, nang hong mawhmat mite koi ah om uh ahi hiam? Kuamah in thu hong khen lo ahi hiam?” a ci hi. ¹¹ Numeinu in, “Topa aw, kuamah in thu hong khen lo hi,” a ci hi. Tua ciangin Zeisu in, “Ken zong thu kong khen kei hi. Ciah inla, mawhna bawl nawn kei in,” a ci hi. ¹² Tua ciangin Zeisu in amaute kiangah, “Keimah in leitung mite aa dingin khuavak ka hi hi. Ka nung hong zui mite khuamial lakah pai loin nuntakna khuavak a nei ding uh hi,” a ci hi. ¹³ Tua ciangin Pharisee pawlte in ama kiangah, “Nang le nang teci kipang tawm na hih manin na teci panna a maan kei hi,” a ci uh hi. ¹⁴ Zeisu in amaute dawng a, “Kei koi pan hong pai a, koi ah pai ding ka hi hiam cih thei ka hih manin, kei le kei teci ka kipan leh zong ka teci panna a maan hi. Ahih hangin note in kei koipan hong pai a, koi lai ah pai ding ka hi hiam cih na thei kei uh hi. ¹⁵ Note in mihing thukhen bangin thu na khen uh hi. Ahih hangin keimah in kuama tungah thu ka khen kei hi. ¹⁶ Thu ka khen leh zong a maanin ka khen hi. Banghang hiam cihleh kei guak om loin kei hong sawl ka Pa tawh ka omkhawm hi. ¹⁷ Mi nih in thukhat a maan hi ci in teci a pankhop leh tua teci panna a maan ahi hi, ci in note thukham sung mahmah ah zong kigelh hi. ¹⁸ Keima thu keimah in teci ka pang a, tua banah kei hong sawl ka Pa in zong a pang hi,” a ci hi. ¹⁹ Tua ciangin amaute in, “Na Pa koi ah om ahi hiam?” a ci uh hi. Zeisu in, “Kei ka hi a, ka Pa ahi zongin na thei kei uh hi. Kei hong thei hi le uhcin, ka Pa zong na thei ding uh hi,” ci in a dawng hi. ²⁰ Hih thute Zeisu in biakinnpi huang sunga a gen mah bangin sumkholna inndei sungah a gen ahi hi. A hun tung nailo ahih manin kuamah in amah a man kei uh hi. ²¹ Tua ciangin Zeisu in Pharisee pawlte kiangah, “Kei ka pai nading ah pai ding ka hih manin kei nong zong ding uh a, note in na mawhna uh na sihpih ding uh hi. Ka paina munah nong pai thei kei ding uh hi,” a cikik hi. ²² Tua ciangin Judah mite in, “ ‘Ka paina munah nong pai thei kei ding uh hi,’ ci ahih manin amah le amah kithah sawm ahi hiam?” a ci uh hi. ²³ Tua ciangin amah in, “Note in nuailam pan na hi uh a, kei ka hih leh tunglam pan ka hi hi. Note leitung aa na hi uh a, kei ka hih leh leitung aa ka hi kei hi. ²⁴ Tua ahih manin na mawhnate uh hangin na si ding uh hi kong ci hi. Banghang hiam cihleh keimah in tua pa ka hih lam nong up kei uh leh na mawhnate uh hangin na si ding uh hi,” a ci hi. ²⁵ Tua ciangin amaute in, “Nang kua na hi hiam?” a ci uh hi. Zeisu in, “Tua thu a kipat cil a kipan kong gengensa ahi hi. ²⁶ Note kong hilh ding thu le kong mawhsak nading thu tampi a om hi. Ahi zongin kei hong sawlpa thuman ahih manin ama kiang pana ka zaksa thute leitung mite tungah a gen ka hi hi,” a ci hi. ²⁷ Amah in Pa thu a gengen ahihlam amaute in a tel zo kei uh hi. ²⁸ Tua ciangin Zeisu in amaute kiangah, “Mihing Tapa na khaitoh uh ciangin kei pen tua pa ka hih lam nong thei pan ding uh hi. Keima utthu in bangmah sem loin ka Pa in hong hilh banga hih thute a gen ka hih lam na theitel ding uh hi. ²⁹ Kei hong sawlpa in kei hong ompih hi. Pa lungdam nading na sem den ka hih manin amah in kei guak a hong nusia kei hi,” a ci hi. ³⁰ Hih thute a gen ciangin mi tampi in amah a um uh hi. ³¹ Tua ciangin Zeisu in amah a um Judah mite kiangah, “Ka thu ah na kipsuak uh leh ka nungzuite taktak na hi ding uh hi. ³² Thuman thutak zong na thei ding uh a, tua thuman thutak in note hong suaktasak ding hi,” a ci hi. ³³ Amaute in ama kiangah, “Ko Abraham suante ka hi uh a, kuama sila in ka om ngei kei uh hi. Banghang in, ‘Na suakta ding uh hi,’ hong ci thei na hi hiam?” a ci uh hi. ³⁴ Zeisu in amaute dawngkik a, “Aman takpi kong cih in ah, mawhna a bawl mi peuhmah mawhna sila ahi hi. ³⁵ Silapa in inn sungah teeng tawntung lo a, tapa ahih leh inn sungah a teeng tawntung hi. ³⁶ Tua ahih manin Tapa in hong suahtaksak leh a suaktate taktak na hi ding uh hi. ³⁷ Abraham suante na hih lam uh kong thei hi. Ahih hangin note sungah ka thu om lo ahih manin thah nong sawm uh hi. ³⁸ Ken ka Pa kianga ka muh bangin thu ka gen a, note zong na pa uh tung pana na muh bangun na gamta uh hi,” a ci hi. ³⁹ Tua ciangin amaute in ama kiangah, “Abraham ka pa uh ahi hi,” ci in a dawng uh hi. Zeisu in, “Abraham suante hi le uh cin Abraham gamtat bangin na gamta ding uh hi. ⁴⁰ Pasian kiang pana ka zaksa thuman thutak kong gen manin tu in thah nong sawm uh hi. Tua bangin Abraham gamta lo hi. ⁴¹ Note in na pa uh gamtat bangin a gamta na hi uh hi,” a ci hi. Tua ciangin amaute in, “Zawlta ka hi kei uh hi. Pa khat bek ka nei uh a, tua in Pasian ahi hi,” a ci uh hi. ⁴² Zeisu in amaute kiangah, “Na Pa uh Pasian hi taktak leh kei nong it ding uh hi. Banghang hiam cihleh Pasian kiang panin hong pai ka hi hi. Keima utthu a hong pai hilo in ama hong sawlpa ka hi hi. ⁴³ Banghang in ka thugente tel theilo na hi uh hiam? Ka thugente na zak theihloh man uh ahi hi. ⁴⁴ Note in na pa uh Dawimangpa suan na hi uh a, ama deihna bangin na gamta nuam uh hi. Amah in a kipat cil a kipan mithatpa hi a, ama sungah thuman thutak om lo ahih manin thuman thutak a zui kei hi. Amah zuauphuakpa hi a, zuauphuakte pa zong ahih manin zuauthu a gen niloh ding mah ahi hi. ⁴⁵ Tua ahih manin thuman thutak ka gen hangin kei nong um kei uh hi. ⁴⁶ Note lakah ka mawhna hong kawkkhia thei kua om na hi uh hiam? Thuman thutak gen napi banghang in hong um lo na hi uh hiam? ⁴⁷ Pasian tawh a kipawlte in Pasian thugente a zathei hi. Pasian tawh kipawl lo na hih manun Pasian thugente na zathei kei uh hi,” a ci hi. ⁴⁸ Tua ciangin Judah mite in ama kiangah, “Nang Samaria mi, dawilawm nei kong cih uh a maan mah hilo ahi hiam?” a ci uh hi. ⁴⁹ Zeisu in, “Dawilawm nei ka hi kei a, ka Pa a pahtawi ka hi hi. Ahih hangin note in kei nong pahtawi kei uh hi. ⁵⁰ Ka minthan nading ka zong kei hi. Ka minthan nading a zong khat om a, amah in thu zong a khen hi. ⁵¹ Aman takpi kong cih in ah, mi khatpeuh in ka thugente a zuih leh a si ngei kei ding hi,” ci in a dawng hi. ⁵² Tua ciangin Judah mite in ama kiangah, “Tu in, dawilawm nei na hih lam kong theitel taktak uh hi! Abraham le kamsangte zong si khinzo napi, ‘Mi khatpeuh in ka thu a zuih leh a si ngei kei ding hi,’ na ci hi. ⁵³ A sisa ka pa uh Abraham sangin lianzaw na hi hiam? Kamsang khempeuh zong a si khinzo uh hi. Nang bang mi kisa na hi hiam?” a ci uh hi. ⁵⁴ Zeisu in, “Kei le kei a kipahtawi hi leng tua kipahtawina in khiatna neilo hi. Kei hong pahtawipa in ka Pa hi a, kote Pasian hi na cihpa uh ahi hi. ⁵⁵ Ahih hangin note in amah na thei kei uh hi. Ken ka hih leh ka thei hi. Amah ka thei kei hi cileng, note mah banga zuaugen ka hi ding hi. Ken amah ka thei a, ama thugente ka zui hi. ⁵⁶ Na pa uh Abraham in ka ni a muh ding lawp mahmah a, a muh ciangin zong a lungdam mahmah hi,” ci in a dawng hi. ⁵⁷ Tua ciangin Judah mite in, “Nang kum 50 zong pha nailo napi in Abraham mu ngei na hi hiam?” a ci uh hi. ⁵⁸ Zeisu in amaute kiangah, “Aman takpi kong cih in ah, Abraham a om ma in KEI KA OM HI,” a ci hi. ⁵⁹ Tua ciangin amaute in amah a den nadingin suang a tawm uh hi. Ahih hangin Zeisu in amaute lak nawkin biakinnpi huang sung panin a gelkhia hi.

¹ Tua bangin Zeisu a paikhiat laitak in mittawsa a suak mi khat a mu hi. ² A nungzuite in, “Rabbi aw, kua mawhna hanga hihpa mittawsa in suak ahi hiam? Ama mawhna hang ahi mawhna hang ahi hiam?” ci in a dong uh hi. ³ Zeisu in, “Ama mawhna hang hilo hi! A nu a pate mawhna hang zong hilo hi. Pasian nasepnate ama tung pan a kilat theih nading ahi hi. ⁴ Sun khua a vak laiteng kei hong sawlpa na ka sem ding hi. Kuamah in na a sep theihloh zan hun hong tung ding hi. ⁵ Leitung a ka omlai teng leitung mite aa dingin khuavak ka hi hi,” ci in a dawng hi. ⁶ Tua banga a gen khit ciangin, lei lakah cilsia in a cil tawh buan bawl a, mittawpa mit a nuhsak hi. ⁷ Tua khit ciangin ama kiangah, “Pai inla, Siloam bual ah va sil in,” a ci hi. (Siloam a khiatna in, Kisawl hi, cihna ahi hi.) Tua ahih manin amah pai in va sil a, khua mutheisa in a hong ciahkik hi. ⁸ Tua ciangin amah mittaw ahihlam a mu ngeite le a innvengte in, “Hihpa khutdawh ngena a tupa hilo ahi hiam?” a ci uh hi. ⁹ Mi pawlkhat in, “Hi mah hi,” a ci uh hi. A dang pawlkhat in, “A mel a kisun hilel hi,” a ci uh hi. Amah in, “Kei tua pa ka hi hi,” a ci hi. ¹⁰ Tua ahih manin amaute in, “Bang na cih leh na mit hong vak hiam?” a ci uh hi. ¹¹ Amah in, “Zeisu kici mi khatin buan bawl in ka mit hong nuhsak khit ciangin, ‘Siloam bual ah pai inla va sil in,’ hong ci hi. Tua ciangin kei zong pai in ka sil leh khua ka muthei hi,” ci in a dawng hi. ¹² Tua ciangin amaute in ama kiangah, “Tua pa koi ah om ahi hiam?” a cih uh ciangin amah in, “Ka thei kei hi,” a ci hi. ¹³ Amaute in tua mittaw ngeipa Pharisee pawlte kiangah a puak uh hi. ¹⁴ Tu in, Zeisu in buan bawla a mit a vaksak ni pen Sabbath ni ahi hi. ¹⁵ Pharisee pawlte in a mitvakzia a dotkik uh ciangin amah in, “Ka mit buan hong nuhsak a, ka sil leh khua ka muthei hi,” a ci hi. ¹⁶ Tua ahih manin Pharisee pawlte pawlkhat in, “Amah in Sabbath ni tang lo ahih manin Pasian kiang pana hong pai hilo hi,” a ci uh hi. A dang pawlkhat in, “Mawhnei mi khatin hih bang nalamdangte bawlthei ding ahi hiam?” ci uh a, khat le khat a kithutuak kei uh hi. ¹⁷ Amaute in mittawpa kiangah, “Na mit hong vaksak zo cileng amah bangci bang mi dingin na ngaihsun hiam?” ci in a dongkik uh hi. Amah in, “Kamsangpa khat ahi hi,” a ci hi. ¹⁸ Ahih hangin Judah mite in amah mittaw ngei khat, tu a khua a muthei pan ahihna thu a nu a pate a dot khit mateng un a um tuan kei uh hi. ¹⁹ Tua ahih manin amaute in a pa kiangah, “Hihpa mittawsa in a suak ka tapa uh hi na cih penpa mah uh ahi hiam? Tua ahih leh tu in bangci bangin khua mukik thei ahi hiam?” ci in a dong uh hi. ²⁰ A nu le a pa in, “Hihpa mittawsa in a suak ka tapa uh hi cih ka thei uh hi. ²¹ Ahih hangin kua in a mit vaksak a, bangci bangin khua mukik thei hiam cih ka thei kei uh hi. Amah zong a kum cingta ahih manin amah dong un. Ama tunga thupiang a maan hong gen thei ding hi,” ci in a dawng uh hi. ²² A nu le a pate in Judah mite a kihtak manun tua banga a ci uh ahi hi. Banghang hiam cihleh Zeisu pen Khazih hi, ci in a sang mi peuhmah kikhopna inn pan hawlkhia ding ci in Judah mite a kithukim khinzo uh hi. ²³ Tua ahih manin a nu le a pa in, “Amah a kum cingta ahih manin amah dong un,” a ci uh ahi hi. ²⁴ Tua khit ciangin amaute in mittawpa samsakkik uh a, “Minthanna Pasian pia in! Tua mipa pen mawhnei mi khat hi cih ka thei uh hi,” a ci uh hi. ²⁵ Amah in, “Amah mawhnei mi khat ahih leh ahih loh ken ka thei kei hi. Ahi zongin ka theih khat om hi. Ni dangin mittaw ka hi a, tu in khua ka muta hi,” ci in a dawng hi. ²⁶ Tua ciangin amaute in, “Amah in nang bang hong ci bawl hiam? Na mit bangci bangin hong vaksak ahi hiam?” ci in a dongkik uh hi. ²⁷ Amah in, “Kong gen khinzo a, na um kei uh hi. Banghang in za kikkik nuam na hi uh hiam? Note zong ama nungzui suak nuam na hi uh hiam?” ci in a dawng hi. ²⁸ Tua ciangin amaute in, “Nang in ama nungzui na hi zaw hi. Ko ka hih uh leh Moses nungzui ka hi uh hi. ²⁹ Pasian in Moses tungah thu gen hi cih ka thei uh hi. Hihpa zenzen koi pan hong piang hiam cih ka thei kei uh hi,” ci in a zahko uh hi. ³⁰ Tua pa in amaute kiangah, “Amah in ka mit nangawn hong vaksak khin napi koi pan hong piang hiam cih na theih loh uh lamdang mahmah hi! ³¹ Tu in Pasian in mawhneite thu a ngaih loh hangin amah bia a, a deihna banga a gamtate thu a ngai hi cih i thei hi. ³² Mi khatin pianpih mittaw khat khua a muhkiksak lam lei piancil a kipan kiza ngeilo hi. ³³ Hihpa in Pasian kiang pan hong pai hi kei leh bangmah ahih thei kei ding hi,” ci in a dawng hi. ³⁴ Tua ciangin amaute in ama kiangah, “Mawhna tawh kidim a a suakkhia nangmah in, kote thu hong lehhilh ding na hi hiam?” ci in a hawlkhia uh hi. ³⁵ Amaute in tua pa a hawlkhiatna thu Zeisu in a za hi. Amah in tua pa a muh ciangin, “Nangmah in Pasian Tapa na um hiam?” a ci hi. ³⁶ Tua pa in dawngkik a, “Topa aw, amah ka up theih nadingin amah kua ahi hiam?” a ci hi. ³⁷ Zeisu in, “Amah na mu khinzo a, tu‑a na kihopihpa keimah in amah ka hi hi,” a ci hi. ³⁸ Tua ciangin tua pa in, “Topa aw, kong um hi!” ci in a bia hi. ³⁹ Zeisu in, “Khuamu lote in khua a muh theih nading ahi zongin khua mutheite in khua a muh loh nading ahi zongin thukhen dingin leitung ah a hong pai ka hi hi,” a ci hi. ⁴⁰ Tua hi a, amah tawh a omkhawm Pharisee‑te pawlkhat in hihthu a zak uh ciangin, “Kote zong mittaw ka hi uh hiam?” a ci uh hi. ⁴¹ Zeisu in amaute kiangah, “Na mit uh a taw hi leh mawhna na nei kei ding uh hi. Tu in, ‘Khuamu ung,’ ci na hih manun na mawhna uh a omlai hi,” a ci hi.

¹ Zeisu in, “Aman takpi kong cih in ah, tuukhumna kongpi tawn loin mundang pan kahto a a lut mi in guta le misuam ahi hi. ² Ahi zongin kongpi tawna a lut mi in tuucingpa ahi hi. ³ Kong cingpa in amah kong hon a, tuute in ama aw a thei uh hi. Amah in a tuute a minin samin a pusuahpih hi. ⁴ Amah in a tuute khahkhia in amaute mai ah amah pai a, tuute in ama aw thei uh ahih manin a nung a zui uh hi. ⁵ Midang mawkmawk khat a pai hangin tua pa aw thei lo uh ahih manin zui loin a taisan ding uh hi,” a ci hi. ⁶ Zeisu in hih thugentehna tawh thu a gen hangin amaute in bang thu gen hiam cih a thei zo kei uh hi. ⁷ Tua ahih manin Zeisu in amaute kiangah, “Aman takpi kong cih in ah, keimah in tuute aa dingin kongpi ka hi hi. ⁸ Ka mai‑a hong paite khempeuh, guta le misuam ahih manun tuute in amaute aw a thei kei uh hi. ⁹ Keimah in kongpi ka hi hi. Kei hong tawna a lut mi peuhmah khamuang dinga, sungtum pusuak in lonona mun a mu ding hi. ¹⁰ Gutapa in a gu ding, a that ding le a susia ding bekin a hong pai hi. Kei ka hih leh tuute in nuntakna a neih nading le nuntakna kicingtak a a neih nadingun kong pai hi. ¹¹ “Keimah in tuucing hoih ka hi hi. Tuucing hoihpa in a tuute aa dingin a nuntakna a pia hi. ¹² Ahi zongin a kicialtawm tuucingpa in tuunei tuucingpa ahi kei hi. Tua bang mi in ngia hong pai a muh ciangin tuute nusia in a taisan hi. Tua ciangin ngia in tuute manin tuute a kithehthang hi. ¹³ A kicialtawm tuucingpa in a kicialtawm ahih manin tuute khual loin a taisan hi. ¹⁴ “Keimah in tuucing hoih ka hi hi. Ka tuute ka thei a, ka tuute in zong kei hong thei uh hi. ¹⁵ Pa in kei hong theih mah bangin keimah in zong Pa ka thei hi. Keimah in tuute aa dingin ka nuntakna ka pia hi. ¹⁶ Hih tuukhumna sungah a om lo tuudang neilai ka hih manin tuate zong ka khum hamtang dinga, amaute in ka thu a ngai ding uh hi. Tua ciangin tuuhon khat le tuucing khat bek a om ding hi. ¹⁷ Ka nuntakna ka lakkik theih dingin pia ka hih manin ka Pa in kei hong it hi. ¹⁸ Kuamah in ka nuntakna a hong lakkhiatsak kei hi. Keima thu a ka piakkhiat ahi hi. Ka nuntakna piakkhiat theih nading le lakkik theih nading thuneihna ka nei hi. Hih thu ka Pa kiang pana ka ngah ahi hi,” a ci hi. ¹⁹ Hih banga thu a gen manin Judah mite sungah kipawlkhenna a omkik hi. ²⁰ Amaute lakah mi tampi in, “Amah dawilawm nei mihaipi ahi hi. Banghang in ama thugen ngai na hi uh hiam?” a ci uh hi. ²¹ Pawlkhatte in, “Hih thute in dawilawm nei khat thugen hilo hi. Dawi in mittawte khuamusak thei ding ahi hiam?” a ci uh hi. ²² Tu in Jerusalem khua ah Biakinnpi Siansuahna Pawi hun hong tung a, phalbi laitak ahi hi. ²³ Biakinnpi huang sunga om Solomon buuk a kicihna munah Zeisu a pai kawikawi hi. ²⁴ Tua ciangin Judah mite ama kimkot ah hong kikhawm uh a, “Kote bang tanvei hong lungkasak ding na hi hiam? Khazih na hih leh siangtak in hong gen in,” a ci uh hi. ²⁵ Zeisu in amaute kiangah, “Hih thu note kiangah kong gen khinzo a, nong um kei uh hi. Ka Pa min tawh ka bawl nate in kei aa dingin teci a pang khinzo hi. 10:22 Biakinnpi Siansuahna Pawi: A nunga Judah Mite Pawite nuai ah en in. ²⁶ Note tungah kong gensa bangin ka tuute hilo na hih manun nong um kei uh hi. ²⁷ Ka tuute in ka aw hong ngai uh hi. Ken amaute ka thei a, amaute in ka nung a hong zui uh hi. ²⁸ Amaute nuntak tawntungna ka pia a, a kisia ngei kei ding uh hi. Ka khut sung panin zong kuamah in amaute hong sutkhia zo kei ding hi. ²⁹ Amaute hong pia ka Pa in na khempeuh sangin lianzaw ahih manin ka Pa khut sung panin kuamah in a hong sutkhia zo kei ding hi. ³⁰ Kei le ka Pa in pumkhat ka hi uh hi,” ci in a dawng hi. ³¹ Tua ciangin Judah mite in amah den nadingin suang a tawmkik uh hi. ³² Zeisu in amaute kiangah, “Ka Pa kiang panin a hoih ka sep na tampi note kong lak khinzo hi. Tua ka septe lakah a koipen paulam in suang tawh den hong sawm na hi uh hiam?” a ci hi. ³³ Judah mite in ama kiangah, “Nasep hoih na sep mana suang tawh hong densawm ka hi kei uh hi. Nang mihing kimlai Pasian bangin kibawl in Pasian tungah pausia na hih manin suang tawh hong densawm ka hi zaw uh hi,” ci in a dawng uh hi. ³⁴ Zeisu in amaute kiangah, “ ‘Note in pasiante na hi uh hi kong ci hi,’ ci in note thukham sungah kigelh hilo ahi hiam? ³⁵ Pasian thu a sang mihingte nangawn pasiante kici ahih leh (Lai Siangtho khial ngeilo ahih manin), ³⁶ Pa in hong siangthosak a, leitung ah a hong sawl keimah in, ‘Pasian Tapa ka hi hi,’ ka cih manin banghang in, ‘Pasian tungah pausia hi,’ hong ci na hi uh hiam? ³⁷ Ka Pa nate ka sep kei leh hong um kei un. ³⁸ Ahi zongin ka Pa nate ka sep leh kei nong um kei uh zongin ka nasepte um un. Tua hi leh Pa in keima sungah om a, ama sungah kei ka om lam thei in na um ding uh hi,” ci in a dawng hi. ³⁹ Hih thuteng hangin amaute in amah mat sawmkik uh a, ahi zongin amaute khut sung panin amah a suakta hi. ⁴⁰ Tua khit ciangin John in tui a phum cilna mun Jordan gungal khatah Zeisu paikik a, tualai ah a taam hi. ⁴¹ Ama kiangah mi tampi hong pai uh a, “John in nalamdang a bawl loh hangin hih mipa tawh kisai thu a gen khempeuh a maan hi,” a ci uh hi. ⁴² Tua munah mi tampi in amah a um uh hi.

¹ Tu in Lazarus kici mi khat cina in a om hi. Amah in Mary le a sanggamnu Martha teenna Bethany khua mi ahi hi. ² Tua Mary in sathau namtui tawh Topa nilhin a sam tawh a khe a nulsaknu hi a, a cinapa Lazarus in tua nu sanggampa ahi hi. ³ Tua ahih manin a sanggam numeite in Zeisu kiangah mi sawl uh a, “En in, Topa aw, na itpa a ci a na hi,” ci in a kosak uh hi. ⁴ Zeisu in a zak ciangin, “Hih natna in sih nading natna hilo hi. Pasian vangliatna a kilat nading le Pasian Tapa in minthanna a ngah nading ahi hi,” a ci hi. ⁵ Tu in Zeisu in Martha le a sanggamnu le Lazarus‑te a it hi. ⁶ Ahi zongin, amah cina hi cih a zak ciangin a omna munah ni nih a tambeh lai hi. ⁷ Tua khit ciangin a nungzuite kiangah, “Judea gamah paikik ni,” a ci hi. ⁸ A nungzuite in, “Rabbi aw, tu madeuh in Judah mite in suang tawh hong den sawm uh hilo ahi hiam tua lamah paikik veve ding na hi hiam?” a ci uh hi. ⁹ Zeisu in, “Sun hun sung nai sawm le nai nih hilo ahi hiam? Mi khatpeuh in sun laitak in lam a pai leh hih leitung khuavak ngah ahih manin a kisui kha kei hi. ¹⁰ Ahih hangin mi khatpeuh in khuamialpi sungah lam a pai leh khuavak om lo ahih manin a kisui kha hi,” ci in a dawng hi. ¹¹ Amah in hih thute a gen khit ciangin, “I lawmpa Lazarus ihmu ahih manin a phong dingin ka pai ding hi,” a ci hi. ¹² Tua ciangin a nungzuite in, “Topa aw, ihmu ahih leh a damta hi ding hi,” a ci uh hi. ¹³ Zeisu in Lazarus sihna thu a gen hi napi amaute in Lazarus ihmu in tawlnga hi a cihna sa uh hi. ¹⁴ Tua ciangin Zeisu in, “Lazarus sizo hi,” ci in siangtak in a gen hi. ¹⁵ Tua banah amah in, “Tua muna ka om khakloh pen note up theih nading suak ahih manin note aa dingin ka lungdam hi. Ahi zongin ama kiangah va pai ni,” a ci hi. ¹⁶ Tua ciangin Thomas, Didymus a kici pa in, a lawm nungzuite kiangah, “Amah tawh a sikhawm dingin eite zong va pai ni,” a ci hi. ¹⁷ Zeisu tua mun a tun ciangin Lazarus a kivui zawh ni li phazo hi cih a thei hi. ¹⁸ Bethany khua pen Jerusalem khuapi tawh kinai a, tai nih bang bek a gamla hi. ¹⁹ A sanggampa uh hangin Martha le Mary hehnem in a tutpih numeite le Judah mite tampi na om uh hi. ²⁰ Martha in Zeisu hong pai hi cih thu a zak phetin dingkhia a, amah a va dawn hi. Mary ahih leh inn sungah tu in a om hi. ²¹ Tua ciangin Martha in Zeisu kiangah, “Topa aw, hihlai ah om hi lecin ka sanggampa a si kei ding hi! ²² Ahi zongin tu nangawn in Pasian kiangah na nget peuhpeuh Pasian in hong pia ding hi cih ka thei hi,” a ci hi. ²³ Zeisu in Martha kiangah, “Na sanggampa a thokik ding hi,” a ci hi. ²⁴ Martha in, “Nitawp ni‑a thawhkik ni ciangin amah hong thokik ding hi cih ka thei hi,” a ci hi. ²⁵ Zeisu in, “Keimah in thawhkikna le nuntakna ka hi hi. Kei hong um mi in a sih hangin a nungta ding hi. ²⁶ Kei hong um a, a nungta mi peuhmah a si ngei kei ding hi. Hih thu na um hiam?” a ci hi. ²⁷ Martha in, “Topa aw, ka um hi. Leitung a hong pai ding Pasian Tapa Khazih na hi hi ci in kong um hi,” a ci hi. ²⁸ Martha in hih thute a gen khit ciangin paikhia a, a sanggamnu samsim in, “Siapa hong tungta a, nang hong kan hi,” ci in a ko hi. ²⁹ Tua thu a zak ciangin Mary thakhat in dingkhia a, Zeisu a va dawn hi. ³⁰ Tua laitak in Zeisu khua sungah lut nailo a, Martha in a na dawntuahna mun mahah a omlai hi. ³¹ Mary hehnem in inn sunga om Judah mite in thakhat a Mary a dinkhiat a muh uh ciangin hanah a kap dingin a pai sa in a zuikhia uh hi. ³² Zeisu omna munah Mary hong tung a, amah a muh ciangin a khe phungah bokin, “Topa aw, hihlai ah om hi lecin ka sanggampa a si kei ding hi,” a ci hi. ³³ Zeisu in Mary a kipan amah tawh hong tonkhawm Judah mite khempeuh kapin a om uh a muh ciangin a lungsim sungah khuisa in na a sa hi. ³⁴ Amah in, “Koilai ah vui na hi uh hiam?” a ci hi. Amaute in, “Topa aw, hong pai inla hong en in,” a ci uh hi. ³⁵ Zeisu a kap hi. ³⁶ Tua ciangin Judah mite in, “En un, Zeisu in Lazarus nak it zen si e!” a ci uh hi. ³⁷ Amaute pawlkhat in, “Mittawte khua a musak thei hihpa in, Lazarus a sih loh nadingin bawl theilo ahi hiam?” a ci uh hi. ³⁸ Tua ciangin Zeisu a lungsim ah khuisakik in hanah a pai hi. Tua han leihawm hi a, suangpekpi tawh kisin hi. ³⁹ Zeisu in, “A suang lakhia un,” a ci hi. Misipa sanggamnu Martha in, “Topa aw, a sihzawh ni li phazo ahih manin uih khin ta ding hi,” a ci hi. ⁴⁰ Zeisu in, “Na up leh Pasian vangliatna na mu ding hi hong ci zo hilo ka hi hiam?” a ci hi. ⁴¹ Tua khit ciangin amaute in hankong khakna suang a likkhia uh hi. Zeisu in vantung lam ento a, “Pa aw, kong thumna hong za khinzo na hih manin ka lungdam hi. ⁴² Kong thumna nong zak tawntung lam ka thei hi. Ahih hangin kei nong sawl ka hih lam hih muna ding mihonpite in a up theih nadingun hih thu ka gen hi,” a ci hi. ⁴³ Tua bang a cih khit ciangin, “Lazarus aw, hong paikhia in!” ci in nakpitak in a kiko hi. ⁴⁴ Tua ciangin misipa zong a khut le a khete hanpuan tawh kitunsa le a maitang zong dial tawh kitunsa in hong paikhia hi. Zeisu in amaute kiangah, “A kitunna phelkhia unla ciahsak un,” a ci hi. ⁴⁵ Tua ciangin Mary kianga hong pai Judah mi tampite in Zeisu in a bawl nate a muh uh ciangin a um uh hi. ⁴⁶ Ahih hangin amaute pawlkhat Pharisee‑te kiangah va pai uh a, Zeisu sepsa teng a gen uh hi. ⁴⁷ Tua khit ciangin siampi liante le Pharisee pawlte in thukhenteɠ kikhawmsak uh a, “Hihpa in nalamdang tampi bawl ahih manin amah bang cih ding i hi hiam? ⁴⁸ Amah hih bangin khahkhong lehang mi khempeuh in amah um ding uh a, Rome mite hong pai in i gam i lei le i minam bupin hong susia ding uh hi,” a ci uh hi. ⁴⁹ Amaute sung panin tua kuma Siampi Ukpa ahi Caiaphas in, “Bangmah na thei peuhmah kei uh hi. ⁵⁰ I minam buppi a i manthan sangin mipi tangin mi khat a sih ding eite aa dingin hoih zawtham hi cih zong na phawk kha peuhmah kei uh hi,” a ci hi. ⁵¹ Amah in hih thute ama thu tawh a mawkgen hilo hi. Tua kuma Siampi Ukpa ahihna tawh Judah mite tanga Zeisu a sih nading thu a genkhol ahi hi. ⁵² Zeisu sihna in tua minamte aa ding bek zong hilo in mun khempeuh a a kithehthang Pasian tate kaikhawm in pumkhat a suahsak nading zong ahi hi. ⁵³ Tua hi a, amaute in tua ni a kipan in Zeisu thah nading a vaihawm uh hi. ⁵⁴ Tua ahih manin Judah mite lakah a kilang in Zeisu a vakkhia nawn kei hi. Tua mun pan paikhia a, gamlak tawh a kinai Ephraim kici khuaneu khatah a nungzuite tawh a om uh hi. ⁵⁵ Tu in Judah mite Paisan Pawi hong naita a, tua Paisan Pawi a tunma in a kisiansuah dingin mi tampi Jerusalem khuapi ah a paito uh hi. ⁵⁶ Tua ciangin Zeisu zong uh a, “Amah pawi ah hong pai lo ding ahi kha ding hiam?” ci in dinsa in biakinn huang sungah khat le khat a kidong uh hi. ⁵⁷ Siampi liante le Pharisee pawlte in amah a mat theih nadingun ama omna mun a thei peuhpeuh in amau kiangah a zaksak nading mihonpite thu a piak khitsa uh ahi hi.

¹ Tu in Paisan Pawi bawl nading ni guk in a sap laitak in misite lak pan a thawhkiksak pa Lazarus teenna Bethany khua ah Zeisu a pai hi. ² Amaute in tualai ah Zeisu nitak an a vak uh hi. Martha in ankuang lui a, Lazarus ahih leh Zeisu tawh ankuang a umkhawm mite lakah a tu hi. ³ Tua laitak in Mary in a manpha mahmah bangmah tawh a kihel lo, sathau namtui thawl khat va la a, Zeisu khe nuhin a sam tawh a nulsak hi. Tua sathau gim namtui in inn sungteng a zel hi. ⁴ Tua ciangin a nungzuite sung panin amah a lehhek ding pa Simon tapa Judas Iscariot in, ⁵ “Hih sathau namtui denariusɠ 300 tawh zuak in mizawngte kipia leh hoih zawlo ding ahi hiam?” a ci hi. ⁶ Hih bang a cih ciangin mizawngte a khualna ahi kei hi. Amah gutapa hi a, sumkempa zong ahihna tawh sumbawm sunga sumte sawk thei zel ahih man hi zaw hi. ⁷ Tua ciangin Zeisu in, “Ama ut bangin hihsak un. Hong kivui ni cianga a zat dingin a kepkep ahi hi. ⁸ Mizawngte note tawh om tawntung dinga, kei ka hih leh note tawh ka omkhawm tawntung kei ding hi,” a ci hi. ⁹ Tu in tua khua ah Zeisu a om lam Judah mi tampite in a theih uh ciangin Zeisu lah mu nuamin misite lak panin a thawhkiksak pa Lazarus zong mu nuam uh ahih manin a hong pai uh hi. ¹⁰ Ahih hangin siampi liante in Lazarus zong thah dingin a vaihawm uh hi. ¹¹ Lazarus hangin Judah mi tampi in a makaite uh nusia in Zeisu a um uh hi. ¹² A zingciang in pawi sim dinga hong pai mi tampi in Jerusalem khuapi ah Zeisu hong pai ding hi cih thu a za uh hi. ¹³ Amah dawn dingin nisuh hiang tawi in kuankhia uh a, “Hosannaɠ! Topa min tawh a hong pai Israel Kumpipa in, Thupha ngah tahen!” ci in a kiko uh hi. ¹⁴ Tua ciangin Zeisu in laano khat mu a, a tungah a tuang hi. Lai Siangtho sunga om bangin, ¹⁵ “Zion tanu aw, lau kei in. Laano tungah tuanga hong pai, Na Kumpipa en in,” ci in kigelh hi. ¹⁶ A nungzuite in a cilin hih thute a thei kei uh hi. Zeisu in minthanna a ngah khit ciangin ama thu tua banga a kigelh ahihlam leh a kigelhna banga ama tungah a bawl uh ahihlam a phawkkik san uh hi. ¹⁷ Han sung pan Lazarus samkhia in misite lak pan a thawhkiksak laitak in ama kianga om mihonpite in zong tua thu teci a pang uh hi. ¹⁸ Amah in tua nalamdang a bawlna thu mihonpi in za uh ahih manin amah dawn dingin hong pai uh ahi hi. ¹⁹ Tua ciangin Pharisee pawlte in, “Bangmah na cih theih lohlam uh na thei uh hi. En un, leitung mi khempeuh in ama nung zui khin ta uh hi!” a kici uh hi. ²⁰ Tu in Pasian bia dingin pawi sim a hong pai mite lakah Greek mite pawlkhat a kihel uh hi. ²¹ Galilee gam Bethsaida khua mi Philip kiangah tua mite hong pai uh a, “Sia aw, Zeisu ka mu nuam uh hi,” ci in a ngen uh hi. ²² Philip zong Andrew kiangah pai in tua thu va gen a, Andrew le Philip in Zeisu kiangah a gensawn uh hi. ²³ Zeisu in amaute kiangah, “Mihing Tapa in minthanna a ngah hun hong tungta hi. ²⁴ Aman takpi kong cih in ah, buhhum tang khat lei lakah kia‑a a muat phot kei leh amah kia om den ding hi. Ahi zongin, a muat leh buhtang tampi a gah hi. ²⁵ Ama nuntakna a it mi in a nuntakna tan dinga, a leitung nuntakna a itlo mi in nuntak tawntungna a nei ding hi. ²⁶ Mi khatpeuh in ka na a sep leh ka nung hong zui tahen. Tua hi leh kei omna ah ka nasempa zong a om ding hi. Mi khatpeuh in ka na a sep leh ka Pa in amah a pahtawi ding hi. ²⁷ “Tu in ka lunggim hi. Bang cih ding ka hi hiam? ‘Pa aw, hih hun panin hong honkhia in,’ ci ding ka hi hiam? Ahi zongin hih mah a thuak dinga hong pai ka hi hi. ²⁸ Pa aw, na min hong thangsak in,” a ci hi. Tua ciangin van panin aw khat hong ging a, “Ka thangsak zo a, ka thangsak lai ding hi,” a ci hi. ²⁹ A kianga ding mite in tua awging a zak uh ciangin, “Vanging ahi hi,” a ci uh hi. Pawlkhat in, “Vantungmi khatin amah hopih hi,” a ci uh hi. ³⁰ Zeisu in, “Hih aw in kei aa dinga hong ging hilo in note aa dinga hong ging ahi hi. ³¹ Tu in hih leitung in thukhenna a thuak hi. Tu in hih leitung a ukpa a kihawlkhia ding hi. ³² Leitung panin a hong kikhaitoh ciangin ka kiangah mi khempeuh ka lato ding hi,” a ci hi. ³³ Hih bangin a gen ciangin a sawtlo in amah bangci bangin si ding cih a genna ahi hi. ³⁴ Mihonpite in, “Khazih om tawntung ding hi ci in thukham panin kote in ka za uh hi. Banghang in, ‘Mihing Tapa kikhaito ding hi,’ ci na hi hiam? Mihing Tapa na cih kua ahi hiam?” a ci uh hi. ³⁵ Tua ciangin Zeisu in amaute kiangah, “Khuavak in note tawmvei sung bek hong ompih lai ding hi. Khuavak na neih sungun kalsuan un. Tua hi kei leh khuamial in hong lap ding hi. Khuamial lakah a pai mi in a pai nading a thei kei hi. ³⁶ Khuavak tate na suah theih nadingun khuavak a omlai in khuavak um un,” a ci hi. Zeisu in hih thute a gen khit ciangin amaute kiang pan kihemkhia in a kisel hi. ³⁷ Amah in amaute muhin nalamdang tampi a bawl hangin a um tuan kei uh hi. ³⁸ Tua in kamsangpa Isaiah gensa thu a tangtun nading ahi hi. Isaiah in, “Topa aw, kote tangkona kua in um ahi hiam? Kua tungah Topa vangliatna kilang ahi hiam?” a ci hi. ³⁹ Tua banah amaute in um theilo uh ahih manin Isaiah in a gen inah, ⁴⁰ “Amah in amaute mittawsak in, A lungtang uh a khauhsak hi. Tua hi kei leh a mit uh tawh mu in, A lungsim uh tawh thei ding uh a, Amaute hong kiheikik in, Ka damsak ding hi,” ci in a genkik hi. ⁴¹ Isaiah in Topa vangliatna a muhlai in tua banga a gen ahi hi. ⁴² Upa vaihawm tampi in zong amah a up uh hangin Pharisee pawlte in kikhopna inn pana a hawlkhiat ding lau uh ahih manin a upna uh a pulakkhia ngam kei uh hi. ⁴³ Banghang hiam cihleh Pasian pahtak ding sangin mite pahtak ding a ut zaw uh hi. ⁴⁴ Tua ciangin Zeisu kiko a, “Kei hong um mi in kei bek hong um hilo in kei hong sawlpa zong a um ahi hi. ⁴⁵ Kei hong mu mi in kei hong sawlpa zong a mu ahi hi. ⁴⁶ Kei hong um mi peuhmah khuamial sungah a om nawnloh nadingin leitung ah khuavak bangin kong pai hi. ⁴⁷ “Mi khatpeuh in ka thugen za napi in a up kei leh ama tungah thu ka khen kei hi. Banghang hiam cihleh leitung mite thukhen dingin a hong pai ka hi kei a, leitung mite a hon dinga hong pai ka hi hi. ⁴⁸ Mi khatpeuh in kei hong nial a, ka thugente a san kei leh ama tungah thu a khen ding khat a om hi. Ka gen thu in nitawp ni ciangin tua mi tungah thu a khen ding hi. ⁴⁹ Banghang hiam cihleh keima thuneihna tawh ka gen kei hi. Kei hong sawl ka Pa in ka cih ding le ka gen dinga hong piak thu bek a gen ka hi hi. ⁵⁰ Ama hong piak thu in nuntak tawntungna ahi hi cih ka thei hi. Tua ahih manin ka gen khat peuhpeuh Pa in a hong gen bangin a gen ka hi hi,” a ci hi.

¹ Tu in Paisan Pawi hong tung dekta a, Zeisu in leitung nusia in a Pa kiangah a ciah ding hun hong tungta hi cih a thei hi. Amah in leitung a om ama mite it mahmah a, it tawp loin a it hi. ² Nitak an a nek khit uh ciangin Dawimangpa in Simon tapa Judas Iscariot sungah Zeisu lehhek nading lungsim a guan hi. ³ Zeisu in Pa in ama khut sungah na khempeuh a ap khitna thu le amah Pasian kiang pan hong pai in Pasian kiangah ciahkik ding ahihna thu a thei hi. ⁴ Tua ciangin ankuang pan amah dingto a, a puantualpi suahkhia in dial khat la in a teeng hi. ⁵ Tua khit ciangin kuang sungah tui sung a, a nungzuite khe a silsak khit ciangin, a teen dial tawh a nulsak hi. ⁶ Simon Peter kianga tun ciangin Peter in, “Topa aw, nangmah in ka khe hong silsak ding na hi hiam?” a ci hi. ⁷ Zeisu in, “Tu a ka bawl thu tu in na theih loh hangin tu nung ciangin na thei ding hi,” ci in a dawng hi. ⁸ Peter in, “Nangmah in ka khe nong silsak ngei kei ding hi,” a ci hi. Zeisu in, “Kong silsak kei leh kei tawh na kipawl thei kei ding hi,” a ci hi. ⁹ Tua ciangin Simon Peter in, “Topa aw, ka khe bek hilo in ka khut le ka lu zong hong silsak lai in,” a ci hi. ¹⁰ Zeisu in, “A kisil khinsate, a khe longal sil kul nawnlo hi. A pumpi bupin siang khinzo hi. Note na siangtho uh hi. Ahi zongin, na vekpi un na siang kim kei uh hi,” a ci hi. ¹¹ Banghang hiam cihleh kua in amah lehhek ding cih thei ahih manin, “Na vekpi un na siangkim kei uh hi,” a ci ahi hi. ¹² Hih bangin amaute khe a silsak khit ciangin, a puan silhin, tukik a, amaute kiangah, “Note tunga ka sep thu na thei uh hiam? ¹³ Siapa le Topa nong cih uh a maan hi a, na cih bangun ka hi hi. ¹⁴ Note Topa le Siapa ahi keimah in na khe uh hong silsak ka hih leh note zong khat le khat na kisilsak ding uh hi. ¹⁵ Banghang hiam cihleh note tunga kong hih bangin note in zong na hih theih nadingun na etteh ding uh hong lak ka hi hi. ¹⁶ Aman takpi kong cih in ah, nasem khatin a topa sangin a lianzaw kei hi. A kisawlpa zong a sawlpa sangin a lianzaw kei hi. ¹⁷ Hih thute thei in na zuih uh leh thupha na ngah ding uh hi. ¹⁸ “Note khempeuh huamin thu kong gen kei hi. Ka teelsa mite ka thei hi. Ahih hangin Lai Siangtho in, ‘Kei tawh an a nekhawmpa in kei hong langpan in a khetul tawh hong pek hi,’ a cihna thu a tangtun nading ahi hi. ¹⁹ “Hih thute a hong pian ciangin kei kua ka hih lam nong theih nadingun a hun hong tunma in kong genkhol hi. ²⁰ Aman takpi kong cih in ah, ka sawl mipa a sang mi peuhmah in kei zong hong sang ahi hi. Kei hong sang mi in kei hong sawlpa zong a sang ahi hi,” a ci hi. ²¹ Tua bang a gen khit ciangin Zeisu lunggim mahmah a, “Aman takpi kong cih in ah, note lakah khatin kei nong lehhek ding uh hi,” ci in a gentel hi. ²² Tua ciangin a nungzuite khat le khat ki‑en uh a, kua pen gen nuam ahi ding hiam ci in a lungsim uh a buai hi. ²³ Tu in nungzuite khatin Zeisu ang ah kingam in a om hi. Tua pa in Zeisu itpa ahi hi. ²⁴ Simon Peter in tua pa a mithek tawh lak a, Zeisu in kua gen nuam ahi hiam cih thu a dong dingin a sawl hi. ²⁵ Tua ciangin Zeisu anga a kingampa in, “Topa aw, kua pen cinuam na hi hiam?” ci in a dong hi. ²⁶ Zeisu in, “Anlum themkhat diaha ka piakpa ahi hi,” a cih khit ciangin anlum themkhat diahin Simon tapa Judas Iscariot a pia hi. ²⁷ Judah in tua anlum them a san khit phetin ama sungah Satan a lut pah hi. Tua ciangin Zeisu in, “Na hih ding khatpeuh hih mengmeng in,” a ci hi. ²⁸ Banghang in Zeisu in tua bangin ci ahi hiam cih ankuang a umte kuamah in a thei kei uh hi. ²⁹ Banghang hiam cihleh Judas in sumkempa ahih manin, “Pawi‑a kisam ding na pawlkhat va lei in,” a ci ahi ding hiam ahih keileh mizawngte bang khat peuhpeuh pia dingin a sawl ahi ding hiam, ci in a ngaihsun uh hi. ³⁰ Judah in tua anlum them a san khit ciangin a paikhia pah hi. Tua hun in zan laitak ahi hi. ³¹ Judas a paikhiat khit ciangin Zeisu in, “Tu in Mihing Tapa in minthanna ngahta a, Pasian in zong ama hangin minthanna ngah zo hi. ³² Ama hangin Pasian in minthanna ngah zo ahih leh Pasian in zong ama hangin tomkha sungin Mihing Tapa a minthangsak ding hi. ³³ “Ka taneute aw, note tawh tawmvei sung kong omlai ding hi. Na hong zong ding uh a, ahih hangin, ‘Ka paina munah nong pai thei kei ding uh hi,’ ci a, Judah mite kiangah ka gen bangin note kiangah zong tu in kong gen hi. ³⁴ “Khat le khat na ki‑it un cih thupiak thak kong pia hi. Note kong it bangin note zong khat le khat na ki‑it un. ³⁵ Note khat le khat na ki‑it uh leh ka nungzuite na hihna uh mi khempeuh in a hong thei ding uh hi,” a ci hi. ³⁶ Simon Peter in, “Topa aw, koi lai ah pai ding na hi hiam?” ci in a dong hi. Tua ciangin Zeisu in, “Tu in ka pai nading munah nong zui thei kei ding hi. Ahih hangin tunung ciangin nong zui ding hi,” ci in a dawng hi. ³⁷ Peter in, “Topa aw, banghang in tu in hong zui theilo ding ka hi hiam? Nang aa dingin ka nuntakna ka pia ding hi,” a ci hi. ³⁸ Zeisu in dawngkik a, “Kei aa dingin na nuntakna pia ding na hi hiam? Aman takpi kong cih in ah, thumvei nong nial khit mateng in aak a khuang kei ding hi,” a ci hi.

¹ Zeisu in, “Note na lungkham kei un. Pasian um unla, kei zong hong um un. ² Ka Pa inn sungah om nading mun tampi a om hi. A om lo hi leh kong gen khinzo ding hi. Note om nading mun bawlkhol dingin ka va pai ding hi. ³ Va pai in note aa ding mun ka bawl khit ciangin kong paikik dinga ka omna munah note zong na om theih nadingun ka kiangah kong la ding hi. ⁴ Ka pai nading mun na thei uh a, a lampi zong na thei uh hi,” a ci hi. ⁵ Thomas in ama kiangah, “Topa aw, na pai nading mun theilo ka hih manun a lampi bangci theih ding ka hi uh hiam?” a ci hi. ⁶ Zeisu in ama kiangah, “Keimah in lampi, thuman thutak le nuntakna ka hi hi. Kei tungtawn loin kuamah in Pa kiang a tung thei kei ding hi. ⁷ Kei nong theih khit uh leh ka Pa zong na theikhin ding uh hi. Tu a kipan amah na thei uh a, na mu zo uh hi,” a ci hi. ⁸ Philip in ama kiangah, “Topa aw, Pa hong lak lecin ka lungkim ding uh hi,” a ci hi. ⁹ Zeisu in ama kiangah, “Philip aw, note tawh hih tanvei hong omkhawm khinzo napi ing in kei hong thei lo lailai na hi hiam? Kei hong mu mi in ka Pa mu khinzo ahih manin, banghang in, ‘Pa hong lak in,’ ci lailai na hi hiam? ¹⁰ Pa sungah kei om in kei sungah Pa om hi cih thu um lo na hi hiam? Note kianga kong gen thute keima ut thu a kong gentawm hilo in ka sunga a teeng ka Pa in na a sem ahi hi. ¹¹ Pa sungah kei ka om a, kei sungah Pa a om hi ka cih thu hong um in. Ahih keileh zong ka bawl nate hangin hong um in. ¹² Aman takpi kong cih in ah, kei hong um mi in keima nasep teng mah a sem ding hi. Ka Pa kiangah ciah ding ka hih manin, keima septe sanga a lianzaw zong a sem ding hi. ¹³ Keima min suanga na nget khempeuh uh Tapa tungtawn in Pa min a than theih nadingin kong pia ding hi. ¹⁴ Keima min suanga na khat peuhpeuh na nget uh leh kong pia ding hi. ¹⁵ “Kei nong it uh leh kong thupiakte na zui un. ¹⁶ Ka Pa kiangah ka ngen dinga, amah in note tawh hong omkhawm tawntung dingin a dang Huhpa khat hong pia ding hi. ¹⁷ Tua Huhpa in thuman thutak Kha ahi hi. Leitung mite in amah mu lo in thei lo uh ahih manin a sang thei kei ding uh hi. Ahi zongin amah in note tawh hong teengkhawm in note sungah hong om ding ahih manin amah na thei ding uh hi. ¹⁸ Tagah bangin note kong nusia kei dinga, note kiangah kong paikik ding hi. ¹⁹ Tawmvei khit ciangin leitung mite in a hong mu nawn kei ding uh hi. Ahi zongin note in nong mu ding uh hi. Banghang hiam cihleh kei ka nuntak manin note zong na nungta ding uh hi. ²⁰ Pa sungah kei ka om a, kei sungah note om in note sungah zong kei ka om lam tua ni ciangin na thei ding uh hi. ²¹ Keima thupiakte nei a, a zui mi peuhmah in kei hong it mi ahi hi. Kei hong it mi ka Pa in zong it dinga, ken zong amah it in ama tungah ka kilang ding hi,” a ci hi. ²² Iscariot a hilo Judas dang khatpen in ama kiangah, “Topa aw, leitung mite tungah kilang loin kote tung bekah hong kilang ning na cih koici bang thu ahi hiam?” ci in a dong hi. ²³ Zeisu in dawngkik in, “Mi khatpeuh in kei a hong it leh ka thu a zui ding hi. Ka Pa in amah it in ama kiangah ka pai ding uh a, amah tawh ka teengkhawm ding uh hi. ²⁴ Kei hong itlo mi in ka thugente a zui kei hi. Na zak uh ka thugente keima thu hilo in kei hong sawlpa ka Pa thu ahi hi. ²⁵ “Note tawh kong omkhop sungin hih thute kong genzo hi. ²⁶ Ahi zongin Pa in kei minin a hong sawl ding Huhpa Kha Siangtho in thu khempeuh hong hilh dinga note kianga kong gensa thu khempeuh a hong phawkkiksak ding hi. ²⁷ Lungmuanna kong nusiat hi. Keima lungmuanna note kong pia a, leitung hong piak bangin ka hong pia kei hi. Lungkham kei unla, lau kei un. ²⁸ “‘Ka va ciah dinga, note kiangah kong paikik ding hi,’ kong cihna thu na zazo uh hi. Kei na hong it uh leh, ‘Pa kiangah ka pai ding hi,’ ka cih manin na nuam ding uh hi. Banghang hiam cihleh kei sangin ka Pa a lianzaw hi. ²⁹ Hih thu a hong pian ciangin na up theih nadingun tu in a hong genkhol ka hi hi. ³⁰ Note kiangah thu tampi kong gen nawn kei ding hi. Banghang hiam cihleh hih leitung a ukpa hong tung dekta hi. Ahi zongin amah in kei tungah thu a nei kei hi. ³¹ Ahih hangin Pa ka it lam leitung mite in a hong theih nadingun Pa hong thupiak bangbang in na ka sem hi. Ding un. Hih mun panin paikhia ni,” a ci hi.

¹ Zeisu in, “Keimah in lenggui maan taktak ka hi a, ka Pa in lenggui lo neipa ahi hi. ² Kei tungah om napi a gahlo hiang khempeuh amah in sattan dinga, a gah hiang khempeuh a gah semsem nadingin a heuhsiang ding hi. ³ Note tunga kong gensa thu hangin tu in na siangta uh hi. ⁴ Kei sungah om tawntung un. Kei zong note sungah ka om tawntung ding hi. A hiangin a gui tawh kipeh kei leh a gah theihloh mah bangin note zong keima sungah na om tawntung kei uh leh na gah thei kei ding uh hi. ⁵ “Keimah in lenggui ka hi a, note in a hiangte na hi uh hi. Mi khatpeuh in keima sungah om tawntung a, ama sungah kei ka om tawntung leh tua mi in gah tampi a gah ding hi. Banghang hiam cihleh kei loin bangmah na hih thei kei ding uh hi. ⁶ Keima sunga a omlo mi in lenggui hiang keu bangin a kipaikhia ding hi. Mite in tuate khawmin meikuang sungah khul ding uh a, a kangtum ding hi. ⁷ Keima sungah note om tawntung in, ka thu in note sungah a om tawntung leh na nget nop khempeuh uh na ngen ding uh a, a hong kipia ding hi. ⁸ Note in gah tampi na gah uh ciangin ka Pa min a thang hi. Tua in ka nungzuite taktak na hihna uh a hong kilangsak hi. ⁹ “Pa in kei hong it bangin ken zong note kong it hi. Ka itna sungah om tawntung un. ¹⁰ Ka Pa hong thupiakte zui in ama itna sungah ka om tawntung mah bangin note in zong kong thupiakte na zuih uh leh ka itna sungah a om tawntung na hi ding uh hi. ¹¹ Ka lungdamna note sungah a om nading le note lungdamna a kicin nadingin hih thute kong genzo hi. ¹² Note kong it bangin note zong khat le khat na ki‑it un, ci in thu kong pia hi. ¹³ A lawmte aa dingin a nuntakna a pia itna sangin a lianzaw itna kuamah in a nei kei hi. ¹⁴ Kong thupiak bangbang na zuih uh leh ka lawmte na hi uh hi. ¹⁵ Nasempa in a topa septe a theih khakloh hangin keimah in ka Pa kiang pana ka zaksa thu khempeuh note kong theisak zo hi. Tua ahih manin nasemte hong ci nawnlo in lawmte kong ci hi. ¹⁶ Note in kei nong teel kei uh a, ahih hangin keimah in note kong teel hi. Note pai in gah na gah uh ciangin na gah tawntung nadingun note kong koih hi. Tua hi a, keima min tawh na nget peuhpeuh uh Pa in hong piak theih nading ahi hi. ¹⁷ Note khat le khat na ki‑it nadingun hih thute kong pia hi. ¹⁸ “Leitung mite in note a hong muhdah uh leh kei hong mudah masa zaw uh ahi hi cih thu na thei un. ¹⁹ Leitung mite tawh kipawl hi le uh cin leitung in hong it ding hi. Ahih hangin leitung panin note kong telkhia a, leitung tawh kipawl lo na hih manun leitung in note hong mudah hi. ²⁰ ‘Nasempa in a topa sangin lian zawlo hi,’ ci a, kong gensa thu na phawk un. Amaute in kei hong bawlsia uh ahih leh note zong a hong bawlsia ding uh hi. Ka thugente zui le uh note thugente zong a zui ding uh hi. ²¹ Ahi zongin amaute in kei hong sawlpa thei lo uh ahih manin keima min hangin note tua bangin a hong bawl ding uh hi. ²² Kei hong pai loin amaute tungah thu a hilh lo hi leng amaute a mawh kei ding uh hi. Ahih hangin tu in mawhna tawh a kipelh thei nawn kei ding uh hi. ²³ Kei hong mudah mi in ka Pa zong a mudah ahi hi. ²⁴ Kuamah in a bawl ngeiloh nate amaute lakah a bawl lo hi leng amaute a mawh kei ding uh hi. Ahi zongin tu in amaute in tua nalamdangte mu khin napi uh kei le ka Pa a hong mudah uh hi. ²⁵ Hih in, ‘A thu omlopi in kei hong mudah uh hi,’ ci a, amaute thukham sunga a kigelhsa thu a tangtun nading ahi hi. ²⁶ “Ahih hangin Pa kiang pana kong sawl ding Huhpa a hong tun ciangin keima thu teci a pang ding hi. Amah in Pa kiang pana hong pai thuman thutak Kha ahi hi. ²⁷ Note in zong a kipat cil a kipan kei tawh omkhawm na hih manun teci na pang ding uh hi.

¹ “Note na puk loh nadingun hih thute kong genzo hi. ² Kikhopna inn panin note hong hawlkhia ding uh hi. Hi hi, note hong that mi khatpeuh in Pasian nasem in a kingaihsut uh hun hong tung ding hi. ³ Amaute in Pa thei lo uh a, kei zong hong thei lo uh ahih manin tua bangin hong gamta ding uh hi. ⁴ Tua mite thu hong gen khinzo ka hih manin a hun hong tun ciangin na phawkkik theih nadingun hih thute kong gen hi. Note tawh omkhawm ka hih manin a kipat cillai in hih thute kong gen nai kei hi. ⁵ “Ahih hangin tu in kei hong sawlpa kiangah a pai ding ka hita a, note khat beek in, ‘Koi ah pai ding na hi hiam?’ ci in nong dong kei uh hi. ⁶ Ahi zongin hih thute kong gen manin na lungsim uh dahna tawh a kidim hi. ⁷ Ahi zongin a maantak in kong gen in ah kei ka pai kei leh note kiangah Huhpa hong pai theilo ding hi. Pai leng note kiangah amah hong sawl ding ka hih manin ka pai ding pen note aa dingin a hoih zaw hi. ⁸ Amah a hong tun ciangin mawhna thu, dikna thu le thukhenna thute leitung mite hong theitelsak ding hi. ⁹ Amaute in kei hong um lo uh ahih manin amah in mawhna thu hong theitelsak ding hi. ¹⁰ Ka Pa kiangah pai in kei hong mu kha nawnlo ding na hih manun amah in dikna thu hong theitelsak ding hi. ¹¹ Pasian in hih leitung a ukpa tungah thukhen zo ahih manin amah in thukhenna thu hong theitelsak ding hi. ¹² “Note kianga kong gen ding thu tampi a omlai hangin tu tadih in na thei zo nai kei ding uh hi. ¹³ Ahi zongin thuman thutak Kha a hong tun ciangin amah in thuman thutak khempeuh ah note lam hong lak ding hi. Banghang hiam cihleh amah in ama ut bangin thu hong gen lo ding hi. A zaksa thute bek hong gen dinga, hong pianglai ding thute zong hong hilh ding hi. ¹⁴ Amah in kei tung pana a ngah thute note tungah hong pulak ding ahih manin ka min a thangsak ding hi. ¹⁵ Ka Pa neihsa khempeuh kei aa ahi hi. Tua ahih manin kei tung pana a ngah thute note tungah hong pulak ding hi ci a, hong gen ka hi hi. ¹⁶ “Pa kiangah pai ding ka hih manin tawlkhat sung nong mu kei ding uh a, tawlkhat khit ciangin nong mukik ding uh hi,” a ci hi. ¹⁷ Tua ciangin a nungzuite pawlkhat in, “ ‘Pa kiangah ka pai ding hi,’ a cih pen le, ‘Tawlkhat sung nong mu kei ding uh a, tawlkhat khit ciangin nong mukik ding uh hi,’ a cih pen in bang a cihnopna hi ding ahi hiam?” a kici uh hi. ¹⁸ Tua ahih manin amaute in, “ ‘Tawlkhat sung’ a cih pen bang a cihnopna hi peuhmah ding ahi hiam? A thugen i thei zo peuhmah kei hi,” a ci uh hi. ¹⁹ Amaute in thu khat dongnuam uh hi cih Zeisu in a theih ciangin amaute kiangah, “ ‘Tawlkhat sung nong mu kei ding uh a, tawlkhat khit ciangin nong mukik ding uh hi,’ kong cih bang ka cihnopna hiam ci in khat le khat a kidong hingel uh teh maw? ²⁰ Aman takpi kong cih in ah, note kapin na tamlo ding uh a, leitung mite ahih leh a nuam ding uh hi. Na dah uh hangin na dahna teng uh nuamna hong suak ding hi. ²¹ Numei khat nau a suah ding ciangin lau‑a a dah hangin nau a suah khit phetin leitung ah mihing khat hong piang ahih manin lungdam in a Nausuah gimna khempeuh a phawk nawn kei hi. ²² Tuamah bangin tu in na dah mahmah uh hangin kong mukik dinga, tua hun ciangin na lungdam ding uh hi. Tua na lungdamna uh kuamah in hong sutkhia thei kei ding hi. ²³ Tua ni ciangin bangmah nong ngen nawn kei ding uh hi. Aman takpi kong cih in ah, keima min tawh Pa kianga na nget peuhpeuh uh amah in hong pia ding hi. ²⁴ Tu dongin keima minin bangmah na ngen nai kei uh hi. Ngen un. Na lungdamna uh a kicin nadingin na ngah ding uh hi. ²⁵ “Hih thute note kiangah gentehna tawh kong gen hi. Ahih hangin gentehna tawh hong gen nawnlo in Pa thu a teltak a kong gen ding hun hong tung ding hi. ²⁶ Tua ni ciangin keima min suangin thu na ngen ding uh hi. Note aa dingin Pa kiangah thu kong ngetsak ding hi a ci ka hi kei hi. ²⁷ Banghang hiam cihleh note in kei hong it in, Pasian kiang panin hong pai hi ci in hong um na hih manun, Pa mahmah in zong note hong it hi. ²⁸ Pa kiang panin leitung ah kong pai a, leitung nusia in Pa kiangah ka ciahkik ding hi,” ci in Zeisu in a gen hi. ²⁹ A nungzuite in ama kiangah, “En in, tu in gentehna zang loin kiteltak in thu nong genta hi. ³⁰ Na khempeuh na thei a, kuamah in thu hong sittel ding kul lo hi cih ka theita uh hi. Hih thu hang mahin Pasian kiang pana hong pai na hi hi ci in kong um uh hi,” a ci uh hi. ³¹ Zeisu in amaute kiangah, “Tu in hong um takpi na hi uh hiam? ³² En un, na inn ciat uh zuanin kithehthang a kei guak nong nusiat ding uh hun hong tung ding pen tu in hong tungzo hi. Ahih hangin kei guak ka om kei a, Pa in hong ompih hi. ³³ “Keima sungah lungmuanna na neih theih nadingun hih thute kong genzo hi. Leitung ah gimna na thuak ding uh hi. Ahih hangin lunghimawh kei un. Leitung ka zozo hi,” a ci hi.

¹ Zeisu in hih thute a gen khit ciangin vantung lam ento a, “Pa aw, a hun hong tungzo hi. Na Tapa in nang hong minthansak theih nadingin na Tapa zong minthangsak ta in. ² Nangmah in nong piak zahzah mite khempeuh keimah in nuntak tawntungna ka piak theih nadingin mi khempeuh tungah thuneihna kei nong pia zo hi. ³ Tua nuntak tawntungna in nangmah bek a maan Pasian na hihna le na sawlpa Zeisu Khazih a theih nading uh ahi hi. ⁴ Leitung ah na min ka thangsak zo a, sep dinga nong piak nasep ka zozo hi. ⁵ Tu in Pa aw, leitung a pianma a nang tawh ka neih minthanna tawh kei hong minthangsak in. ⁶ “Leitung mite lak pan a nong piaktuam hih mite tungah na min ka pulak zo hi. Amaute nang aa hi a, nangin kei nong pia zo hi. Amaute in zong na thu a zui uh hi. ⁷ Kei nong piak khempeuh nangma aa ahihlam amaute in tu in a theizo uh hi. ⁸ Banghang hiam cihleh gen dinga nong piak thute amaute tungah ka gen zo a, amaute in zong a sangzo uh hi. Nangma kiang panin a pai ka hihna thu hong theitel zo uh a, nangma sawlpa ka hihna zong a um uh hi. ⁹ “Leitung mite aa dingin thu kong ngen kei hi. Nong piaksa mite nangma aa ahih manin amaute aa ding bekin thu kong ngen hi. ¹⁰ Kei neihsa khempeuh nangma aa hi a, nang neihsa khempeuh zong kei aa ahih manin amaute hangin minthanna ka ngah hi. ¹¹ Tu in leitung ah om nawnlo in nang kiangah kong paita ding hi. Hih mite ahih leh leitung ah a omlai ding uh hi. A siangtho ka Pa aw, nang le kei pumkhat i hih mah bangin nong piaksa mite zong pumkhat a suah theih nadingun na min tawh amaute kem ta in. ¹² Amaute tawh leitung ah ka omkhop sungin na min in ka kem zo hi. Lai Siangtho a tangtun nadingin siatna tapa longal nong piaksa mite khat beek mansuah loin ka humbit zo hi. ¹³ “Tu in nangma kiangah kong paita ding hi. Amaute sungah keima lungdamna a kidim nadingin leitung ah ka om sungin hih thute ka genzo hi. ¹⁴ Amaute tungah na thu ka pia khinzo hi. Leitung tawh kei ka kipawl loh mah bangin amaute zong kipawl lo uh ahih manin, leitung mite in amaute a mudah uh hi. ¹⁵ Leitung panin amaute lakhia in ci in kong ngen kei hi. Gilopa tawh a kipelh nadingun thu kong ngen hi. ¹⁶ Leitung tawh kei ka kipawl loh mah bangin amaute zong a kipawl kei uh hi. ¹⁷ Na thuman thutak tawh amaute siangthosak in. Na thu in thuman thutak ahi hi. ¹⁸ Leitung ah kei nong sawl mah bangin ken zong amaute leitung ah ka sawl hi. ¹⁹ Thuman thutak tawh amaute a kisianthosak theih nadingin amaute ka khualna in kei mahmah zong ka kisiangthosak hi. ²⁰ “Hih mite aa ding bekin thu kong ngen kei hi. Amaute thuhilhna hanga kei hong um ding mite aa dingin zong thu kong ngetsak hi. ²¹ Pa aw, amaute pumkhat a suah nadingun thu kong ngen hi. Kei sungah nang omin nang sungah kei ka om bangin, amaute khempeuh zong eima sungah pumkhat suak a, tua hangin leitung mite in nangma sawlpa ka hih lam a theih nadingun thu kong ngen hi. ²² Nang le kei pumkhat i hih mah bangin amaute zong pumkhat a suah nadingun kei nong piak minthanna amaute ka pia zo hi. ²³ Amaute sungah kei ka om a, kei sungah nang na om hi. Amaute pumkhat suaka a picinna uh hangin nangma sawlpa ka hihna thu le kei nong it bangin amaute zong na itna thu leitung mite in a theih nading uh ahi hi. ²⁴ “Pa aw, nong piaksa mite keima omna mun mah ah om in kei nong it manin leitung pianma a nong piak minthannate amaute in zong mu le uh ka deih hi. ²⁵ “A dik ka Pa aw! Leitung mite in nang hong theih loh uh hangin ken kong thei hi. Nong sawlpa ka hih lam hih mite in zong a theizo uh hi. ²⁶ Kei nong itna bang itna amaute sungah om a, amaute sungah kei mahmah ka om theih nadingin amaute tungah na min ka pulak zo a, ka pulak lai ding hi,” ci in thu a ngen hi.

¹ Zeisu in hih bangin thu a nget khit ciangin a nungzuite tawh paikhia a, Kidron lui gal khat a om huan khat sungah a lut uh hi. ² Zeisu le a nungzuite tua munah paikhawm zel uh ahih manin amah a lehhekpa Judas in zong tua mun a thei hi. ³ Tua ciangin Judas in galkap honkhatɠ, siampi liante le Pharisee pawlte kiang pana kisawl biakinn cingte pawlkhat hong makaih in huan sungah a hong pai uh hi. Amaute in meivak, meilah le hiamte a tawi uh hi. ⁴ Zeisu in ama tunga piang ding teng thei ahih manin amaute kiangah va pai a, “Kua zong na hi uh hiam?” a ci hi. ⁵ Amaute in, “Nazareth khua mi Zeisu,” a ci uh hi. Zeisu in, “Keimah ka hi hi,” a ci hi. Amah a lehhekpa Judas zong amaute tawh a dingkhawm hi. ⁶ Zeisu in, “Keimah ka hi hi,” a cih khit phetin amaute nungkin in lei ah a puk uh hi. ⁷ Tua khit ciangin Zeisu in, “Kua zong na hi uh hiam?” ci in a dongkik hi. Amaute in, “Nazareth khua mi Zeisu,” a ci uh hi. ⁸ Zeisu in, “ ‘Keimah ka hi hi,’ kong ci zo hi. Tua ahih manin kei hong zong na hih uh leh hih mite ciahsak un,” a ci hi. ⁹ Hih in, “Keimah nong piaksa mite khat beek ka mansuah kei hi,” ci a, ama gensa thu a tangtunna ahi hi. ¹⁰ Tua ciangin Simon Peter in ama kuah namsau dokin Siampi Ukpa nasempa a sat leh a taklam bil a satkhia hi. Tua nasempa min in Malchus ahi hi. ¹¹ Zeisu in Peter kiangah, “Na namsau a paai ah siatkik in. Ka Pa in hong piak hai dawn loin om ding ka hi hiam?” a ci hi. ¹² Tua khit ciangin galkaphonɠ a kipan galkap mangpaɠ le biakinn cing Judah mite in Zeisu manin a hen uh hi. ¹³ Tua khit ciangin tua kuma Siampi Ukpa Caiaphas sunghpa Annas kiangah a paipih masa uh hi. ¹⁴ Tu in Caiaphas in mipi tangin mi khat a sih ding hoih zaw hi ci in Judah mite thu a hilhpa ahi hi. ¹⁵ Tu in Simon Peter le a dang nungzuite khatin Zeisu a zui uh hi. Tua nungzuipa pen Siampi Ukpa tawh kimeltheih ahih manin, Siampi Ukpa inntual ah Zeisu tawh a lutkhawm uh hi. ¹⁶ Peter ahih leh kongpi pualam ah dingin a om hi. Siampi Ukpa tawh a kithei a dang nungzuipa hong paikhia a, kongcing numeino a hopih khit ciangin Peter a lutpih hi. ¹⁷ Tua ciangin kongcing numeino in Peter kiangah, “Nang zong hihpa nungzuite khat hilo na hi hiam?” a ci hi. Peter in, “Ka hi kei hi,” a ci hi. ¹⁸ Tu in khuadam ahih manin, tua muna ding nasemte le biakinn cingte in meihol cih in a awi uh hi. Peter zong tua mite tawh dingkhawm in mei a awi hi. ¹⁹ Tu in Siampi Ukpa in Zeisu kiangah a nungzuite thu le a thuhilhna tawh kisai thute a dong hi. ²⁰ Zeisu in ama kiangah, “Leitung mite tungah a kilang in thu ka genzo hi. Judah mite a kimuhkhop zelna kikhopna innte le biakinnpi huang sungah thu ka hilh tawntung a, a simtham in thu ka gen ngei kei hi. ²¹ Banghang in kei hong dong na hi hiam? Ka thugen a za mite dong in. Bang thu gen ka hi hiam cih amaute in a thei uh hi,” ci in a dawng hi. ²² Zeisu in tua bang teng a gen khit ciangin a kianga ding biakinn cingte khatin amah beng a, “Siampi Ukpa hi bangin dawng vial ding na hi hiam?” a ci hi. ²³ Zeisu in, “Kampau khial ka hih leh ka khialhna hong lak in. Thuman a gen kimlai, banghang in hong beng laizang na hi hiam?” a ci hi. ²⁴ Tua khit ciangin Annas in Zeisu a kihensa in Siampi Ukpa Caiaphas kiangah a puak hi. ²⁵ Tu in Simon Peter in a dinsa in mei a awi hi. Tua laitak in amaute in ama kiangah, “Nang zong Zeisu nungzuite khat hilo na hi hiam?” a ci uh hi. Amah in, “Ka hi peuhmah kei hi,” ci in a nial hi. ²⁶ Peter in a bil a sat khiatsakpa tanau khat ahi Siampi Ukpa nasempa in Peter kiangah, “Huan sungah Zeisu tawh hong mukhawm hilo ka hi hiam?” a ci hi. ²⁷ Peter in nialkik leuleu a, tua ciangin aak a khuang pah hi. ²⁸ Tua khit ciangin Caiaphas inn panin mangpipa inn ah Zeisu a paipih uh hi. Tua hun in zingsang tung ahi hi. Amaute in Paisan Pawi an a nek theih nadingun kisiansuah nuam uh ahih manin mangpipa inn sungah a lut kei uh hi. ²⁹ Tua ahih manin amaute kiangah Pilate pai a, “Hih mipa na mawhmatna uh bang ahi hiam?” a ci hi. ³⁰ Amaute in, “Amah khialhna neilo mi hi kei leh nangma tungah kong piakhia kei ding uh hi,” ci in a dawng uh hi. ³¹ Pilate in amaute kiangah, “Amah paikhiatpih unla note thukham tawh kizui in thukhen un,” a cih ciangin Judah mite in, “Mi thah theih nading thu ka nei kei uh hi,” a ci uh hi. ³² Hih thu in Zeisu in ama sih dingzia a gensa thu a tangtun nading ahi hi. ³³ Tua ciangin Pilate in thu vaihawmna mun mangpipa inn ah lutkik in Zeisu sam a, “Nang Judah mite Kumpipa na hi hiam?” a ci hi. ³⁴ Zeisu in ama kiangah, “Nangma utthu tawh hi bangin thu hong dong na hi hiam? Ahih keileh midangte in keima thu nangma kiangah hong gen khinzo uh ahi hiam?” a ci hi. ³⁵ Pilate in, “Kei Judah mi hong sa na hi hiam? Na minamte le siampi liante in keima khut sungah nang hong piakhia uh hi. Bang sem kha na hi hiam?” ci in a dong hi. ³⁶ Zeisu in, “Ka kumpigam in hih leitung tawh kisai lo hi. Kisai hi leh Judah mite khut sungah hi bangin hong kipiakkhiat loh nadingin ka nasemte in a do ding uh hi. Ahih hangin ka kumpigam in hih leitung tawh kisai lo hi,” ci in a dawng hi. ³⁷ Tua ciangin Pilate in ama kiangah, “Tua ahih leh kumpipa na hi hiam?” ci in a dong hi. Zeisu in, “ ‘Kumpipa na hi hi,’ nong cih a maan hi. Thuman thutak teci a pang dingin hih leitung ah hong suakin kong paizo hi. Thuman thutak tawh a kipawl mite khempeuh in keima aw a ngai uh hi,” ci in a dawng hi. ³⁸ Pilate in, “Thuman thutak in bang ahi hiam?” a ci hi. Pilate in hih thuteng a gen khit ciangin Judah mite kiangah paikhiakik a, “Hih mipa tungah khialhna ka mu kei hi. ³⁹ Ahih hangin Paisan Pawi hun simin mi khat kong khahsak theih ding na ngeina uh ahih manin Judah mite Kumpipa hong khahsak leng na ut uh hiam?” a ci hi. ⁴⁰ Tua ciangin amaute in a vekpi un, “Hihpa khah kei in. Barabbas khah zaw in!” ci in a kikokik uh hi. Barabbas in mi suampa khat ahi hi.

¹ Tua khit ciangin Pilate in ama kiangah Zeisu samin a satsak hi. ² Galkapte in linglukhu bawl in khusak uh a, puan dupsan khat a silhsak uh hi. ³ Tua khit ciangin, “Dam maw, Judah mite Kumpipa!” ci in a beng uh hi. ⁴ Pilate zong khatvei paikhiakik in amaute kiangah, “En un, hihpa tungah khialhna ka muh loh lam na theih nadingun note kiangah kong puakkik hi,” a ci hi. ⁵ Tua ciangin Zeisu in ling lukhu khusa le puan dupsan silhsa in a hong paikhia hi. Pilate in amaute kiangah, “Hih mipa en un!” a ci hi. ⁶ Tua ciangin siampi liante le biakinn cingte in amah mu uh a, “Khailum in, khailum in!” ci in a kiko uh hi. Pilate in amaute kiangah, “Ama tungah khialhna mu lo ka hih manin amah la unla, nomau mahmah in khailum un,” a ci hi. ⁷ Judah mite in ama kiangah, “Kote in thukham khat ka nei uh a, tua thukham tawh kizui in amah a sih ding kilawm hi. Banghang hiam cihleh amah le amah Pasian Tapa in kigen hi,” ci in a dawng uh hi. ⁸ Tua ciangin Pilate in tua thu a zak ciangin a lau semsem hi. ⁹ Tua ciangin mangpipa inn sungah amah lutkik in Zeisu kiangah, “Koi panin hong pai na hi hiam?” ci in a dong hi. Ahih hangin Zeisu in a dawng kei hi. ¹⁰ Tua ciangin Pilate in, “Hong dawng lo ding na hi hiam? Nang khailup theih nading le khahkhiat theih nading thuneihna ka neih lam thei lo na hi hiam?” a ci hi. ¹¹ Zeisu in, “Tunglam panin thu a hong kipiak kei leh, kei tungah thu na nei thei kei ding hi. Tua ahih manin na khut sunga kei hong piakhiapa in a mawhna a lianzaw hi,” ci in a dawng hi. ¹² Tua huna kipan Pilate in Zeisu a khahkhiat theih nading lampi a zong hi. Ahih hangin Judah mite in, “Hihpa na khah leh Caesar kumpipa lawm na hi kei ding hi. Kumpipa ka hi hi ci a, a kibawltawm mi peuhmah in Caesar kumpipa a langpan ahi hi,” ci in a kiko uh hi. ¹³ Pilate in tua thu a zak ciangin Zeisu hong paikhiatpih a, Hebrew pau in Gabbatha a kici Suangphah Mun a om thukhenna tokhom tungah a tu hi. ¹⁴ Tua hunin Paisan Pawi Kigin Niɠ, nai guk pawl hi a, Pilate in Judah mite kiangah, “Na Kumpipa uh en un!” a ci hi. ¹⁵ Ahih hangin amaute in, “That in, that in! Khailum in!” ci in a kiko uh hi. Pilate in amaute kiangah, “Na Kumpipa uh hong khailupsak ding ka hi hiam?” a ci hi. Siampi liante in, “Caesar longal kumpi dang ka nei kei uh hi!” ci in a dawng uh hi. ¹⁶ Tua khit ciangin amah in khailup dingin amaute khut sungah Zeisu piakhia a, amaute in amah la in a paikhiatpih uh hi. ¹⁷ Zeisu in ama singlamteh pua a, Hebrew pau in Golgotha a kici Lutangguh Mun zuanin a pai hi. ¹⁸ Amaute in tualai ah Zeisu a khai uh hi. Ama lang tuakah midang nih zong khai uh a, a laizang ah Zeisu a khai uh hi. ¹⁹ Tu in Pilate in, “JUDAH MITE KUMPIPA, NAZARETH KHUA MI ZEISU,” ci in lai gelh a, singlamteh tungah a suang hi. ²⁰ Zeisu a kikhaina mun pen Jerusalem khuapi tawh kinai ahih manin Judah mi tampi in tua lai kigelh a sim uh hi. Tua lai in Hebrew, Greek le Latin paute tawh a kigelh hi. ²¹ Tua ciangin Judahte siampi liante in Pilate kiangah, “ ‘Judah mite Kumpipa,’ ci in gelh kei inla, ‘ “Judah mite Kumpipa ka hi hi,” a kici pa,’ ci in gelh zaw in,” a ci uh hi. ²² Tua ciangin Pilate in, “Ka gelh khitsa, ka gelhsa hi,” ci in a dawng hi. ²³ Galkapte in Zeisu a khai khit uh ciangin a puante la in phel li suah uh a, mi khatin phel khat ciat a la uh hi. A puantualpi zong a la uh hi. Tua puantualpi kikhui loin a lu pan a taw dong a kigansuak ahi hi. ²⁴ Tua ahih manin amaute in, “Hih puantualpi phelsuah kei ni. Kua in ngah ding cih i theih nadingin aisan ni,” a kici uh hi. Tua pen Lai Siangtho sung a, “Amaute in ka puan hawm uh a, Ka puanak a ngah nadingun, Lai‑ai a san uh hi,” ci a, a kigelhsa thu a tangtun nadingin galkapte in hi bangin ahih uh ahi hi. ²⁵ Tu in Zeisu a kikhaina singlamteh kiangah a nu, a nu sanggamnu ahi Clopas zi Mary le Magdala khua mi Mary‑te a ding uh hi. ²⁶ Tua bangin Zeisu in a nu le ama it nungzuipa a muh ciangin a nu kiangah, “Numei aw, na tapa en in!” a ci hi. ²⁷ Tua khit ciangin a nungzuipa kiangah, “Na nu en in!” a ci hi. Tua huna kipan in tua nungzuipa in tua nu ama inn ah a kem hi. ²⁸ Tua khit ciangin Zeisu in tu in na khempeuh kizo khin ta hi cih thei a, Lai Siangtho a tangtun nadingin, “Ka dang a tak hi!” a ci hi. ²⁹ Tu in tua munah lenggahtui thuk a dima om bel khat a kitung hi. Amaute in lenggah tuithuk sungah puan diahin puknah ciangtawn dawn ah a suan khit uh ciangin a kam ah a tahto uh hi. ³⁰ Lenggah tuithuk Zeisu a piak khit uh ciangin amah in, “Kizo zo hi!” ci in a lu puksuk in a huu tawpna a sangkhia hi. ³¹ Tua ni in Kigin Niɠ hi a, a zingciang pen (a thupi diak Sabbath ni‡) ahi hi. Sabbath ni in singlamteh tungah misi luangte kikoih theilo ahih manin a khete uh kikuaitan in misi luangte a kilakkhiat nadingin Judah mite in Pilate kiangah a ngen uh hi. ³² Tua ciangin galkapte hong pai in, Zeisu tawh a kikhaikhawm a masapenpa khe a suktan khit uh ciangin a dang khatpa aa zong a sutan uh hi. ³³ Ahih hangin Zeisu kiang a tun uh ciangin amah na si khinzo ahih manin a khe a sutan nawn kei uh hi. ³⁴ Ahih hangin galkapte khatin teipi tawh a pangpi a dawt leh, thakhat in sisan le tui a luangkhia hi. ³⁵ Note in tua thu na up theih nadingun a mu mipa in a muh bangin teci pang ahih manin ama teci panna a maan hi cih amah in a thei hi. ³⁶ Banghang hiam cihleh, “A guh khat zong kitan lo ding hi,” ci in Lai Siangtho sunga a kigelhsa thu a tangtun nadingin hih thute a piang ahi hi. ³⁷ Lai Siangtho mundang khatah zong, “Amaute in a dawt uh mipa a en ding uh hi,” ci in a kigelh hi. ³⁸ Hih bang teng khit ciangin Judah mite a kihtak manin Zeisu nung a simzuih Arimathea khua mi Joseph in Zeisu luang a lakkhiat theih nadingin Pilate kiangah phalna a ngen hi. Pilate in phalna pia ahih manin Joseph zong pai in Zeisu luang a la hi. ³⁹ Zeisu kiangah zan laitak in a hawh ngeipa Nicodemus zong hong pai in paknamtui khaɠ le aloeɠ a kihel, tawi 30 bang a gik paknamtui a hong paipih hi. ⁴⁰ Tua khit ciangin amaute in Zeisu luang la uh a, Judah mite kivui ngeina bangin paknamtui 19:39 tawi 30 bang: Greek in “litra 100 bang a gik” hi. A nunga Vantehnate nuai ah “litra” en in. zutin puan tawh a tun uh hi. ⁴¹ Tu in amah a kikhailupna mun kiang mah ah huan khat om a, tua huan sungah kuamah a kivui ngeilohna han thak khat a om hi. ⁴² Tua ni pen Judah mite Kigin Niɠ ahih banah han tawh zong kinai ahih manin tualai ah Zeisu a vui uh hi.

¹ Nipi kalkhat sunga ni masapen ni khuavakma zing tungin Magdala khua mi Mary daihawh dingin a pai leh hankong khakna suang kilikkhia sa in a om a mu hi. ² Tua ciangin amah tai a, Simon Peter le Zeisu in a it a dang nungzuipa kiang a tung hi. Tua ciangin amah in, “Amaute in han sung panin Topa luang lakhia uh a, a koihna uh ka thei kei uh hi,” a ci hi. ³ Tua ahih manin Peter le a dang nungzuipa paikhia in han lamah a pai uh hi. ⁴ Amaute gel taikhawm uh a, a dang nungzuipa in Peter makhelh in hanah a na tung masa hi. ⁵ Amah kunsuk in han sung a et leh a kitunna puanpakte mu a, ahi zongin a sungah a lut kei hi. ⁶ Tua khit ciangin Simon Peter hong tung a, han sungah a lut ciangin tualai ah puanpak om hi cih a mu hi. ⁷ A lu tunna dial pen puanpak tawh kikoih khawm loin, a kikhepsa in a tuamin a om a mu hi. ⁸ Tua ciangin han a tung masa, a dang nungzuipa zong han sungah lut a, thu piangteng a muh ciangin a um hi. ⁹ Banghang hiam cihleh, “Misite lak panin amah a thokik ding hi,” ci a, Lai Siangtho in a gensa thu amaute in a thei nai kei uh hi. ¹⁰ Tua khit ciangin nungzuite amau inn ciat ah a ciah uh hi. ¹¹ Ahi zongin Mary ahih leh han pualam ah a dinsa in kap a, a kah kawmin kunsuk in han sung a en hi. ¹² Zeisu luang kisialna a lukhung lamah khat, a khekhuantaw lamah khat, puanpak silh in a tu vantungmi nih a mu hi. ¹³ Tua ciangin vantungmite in Mary kiangah, “Numei aw, banghang in kap na hi hiam?” ci in a dot uh ciangin, amah in, “Ka Topa lakhia uh a, a koihna uh ka thei kei hi,” a ci hi. ¹⁴ Tuateng a cih khit ciangin a nunglam a hei leh tualai ah Zeisu dingin a om a mu hi. Ahih hangin Zeisu ahihlam a thei kei hi. ¹⁵ Zeisu in, “Numei aw, banghang in kap na hi hiam? Kua zong na hi hiam?” a ci hi. Mary in huancingpa sa ahih manin ama kiangah, “Sia aw, amah puakhia na hih leh na koihna mun hong hilh in. Ken a luang ka la nuam hi,” a ci hi. ¹⁶ Zeisu in ama kiangah, “Mary aw!” a cih ciangin, Mary zong ama lamah kihei a, “Rabboni aw!” a ci hi. Rabboni a khiatna in “siapa” cihna ahi hi. 20:16 Rabboni: Aramaic pau hi in “ka siapa” ahih keileh “ka mangpa” cihna hi a, ki‑it kinaina a lak deuh kammal ahi hi. ¹⁷ Zeisu in, “Ka Pa kiangah kahto nailo ka hih manin hong len kei in. Tua sangin ka sanggamte kiangah va pai inla, ‘Keima Pa le note Pa, keima Pasian le note Pasian kiangah a kahto dekta ding ka hihna,’ va gen in,” a ci hi. ¹⁸ Magdala khua mi Mary zong ciah a, Topa a muhna le ama tunga Topa gensa thu khempeuh nungzuite a ko hi. ¹⁹ Tua ni pen nipikal khat sunga ni masa ni hi a, a nitak lam in nungzuite kikhawm uh a, Judah mite kihta uh ahih manin kong a khak uh hi. Tua laitak in Zeisu va pai a, amaute laizang ah dingin, “Note tungah lungnopna om tahen,” a ci hi. ²⁰ Hih thute a gen khit ciangin a khutte le a pangpi a lak hi. Nungzuite in Topa a muh uh ciangin a nuam mahmah uh hi. ²¹ Tua ciangin Zeisu in amaute kiangah, “Note tungah nopna om tahen. Pa in kei hong sawl bangin ken zong note kong sawl hi,” a cikik hi. ²² Hih thu a gen khit ciangin amaute tungah a huu mut a, “Kha Siangtho ngahta un. ²³ Mi khatpeuh, a mawhnate na maisak uh leh kimaisak dinga, mi khatpeuh a mawhnate na ciapteh uh leh a kiciamteh ding hi,” a ci hi. ²⁴ Ahih hangin Zeisu a pai laitak in sawm le nihte lakah khatpa, Didymus a kici Thomas a om kei hi. ²⁵ Tua ahih manin nungzui dangte in Thomas kiangah, “Topa ka mu zo uh hi,” a ci uh hi. Ahi zongin Thomas in amaute kiangah, “A khut sunga siktukkilh mate mu in tua a mate sungah ka khutmete guang a, ka khut tawh a pangpi ka lawn tektek mateng in ka um kei ding hi,” a ci hi. ²⁶ Tua nung ni giat khit ciangin inn sungah nungzuite kikhawmkik uh a, Thomas zong a om hi. Kongteng kikhak in a om laitak Zeisu hong pai a, amaute laizang ah dingin, “Note tungah nopna om tahen,” a ci hi. ²⁷ Tua khit ciangin Zeisu in Thomas kiangah, “Na khutme tawh hihlai lawng inla, ka khutte en in. Na khut zan inla, ka pangpi hong lawng in. Umlah nawn kei inla, umta in,” a ci hi. ²⁸ Tua ciangin Thomas in ama kiangah, “Ka Topa le ka Pasian aw!” ci in a dawng hi. ²⁹ Zeisu in, “Thomas aw, nong muh manin hong um na hi hi. Hong muh loh hangin a hong um mite in thupha ngah ahi uh hi,” a ci hi. ³⁰ Hih laibu sunga a kigelhlo nalamdang tampi zong Zeisu in a nungzuite muhna ah a bawl hi. ³¹ Ahih hangin Zeisu in Pasian Tapa Khazih ahihna thu na up theih nading uh leh tua upna hangin ama min tawh nuntakna na neih theih nadingun hih thute a kigelh ahi hi.

¹ Hih thuteng khit ciangin Tiberias tuilipi a om nungzuite kiangah Zeisu a kilakkik hi. A kilakzia hih bang ahi hi. ² Tualai ah Simon Peter, Didymus a kici Thomas, Galilee gam Cana khua mi Nathanael, Zebedee tate le a dang nungzui nihte a omkhawm uh hi. ³ Simon Peter in amaute kiangah, “Nga beng dingin kuan ning,” a ci hi. Amaute in, “Ko zong hong zui nung,” ci in paikhia uh a, gunkuang tungah a kah pah uh hi. Ahih hangin tua zan thapai ngasa khat beek a man kei uh hi. ⁴ A zingsang ciangin tuili gei ah Zeisu hong dinga, ahih hangin nungzuite in Zeisu ahihlam a thei kei uh hi. ⁵ Tua ciangin Zeisu in, “Ka taneute aw, nektheih ding khatpeuh na nei kha uh hiam?” a ci hi. Amaute in, “Ka nei kei uh hi,” ci in a dawng uh hi. ⁶ Tua ciangin Zeisu in amaute kiangah, “Na ngen uh gunkuang taklam ah paii le uh cin na man ding uh hi,” a ci hi. Amaute in zong tua bangin ngen a paih uh leh ngasa tampi khuh kha uh ahih manin a kaikhia zo kei uh hi. ⁷ Tua ciangin Zeisu it nungzuipa in Peter kiangah, “Topa ahi hi,” a ci hi. Simon Peter in Topa hi, cih a zak ciangin, a puantualpi silhin tui sungah a tuaksuk hi. Banghang hiam cihleh amah in a puantualpi silh lo hi. ⁸ Nungzui dangte in gunkuangneu tawh hong pai uh a, ngasa awkna ngenpi hong kaihpih uh hi. Banghang hiam cihleh amaute in tong 200 bek a kigamlatna mun tuipi gei ah a om uh hi. ⁹ Leilak a tun uh ciangin meihol‑am tunga ngasa ki‑em le anlum a mu uh hi. ¹⁰ Zeisu in amaute kiangah, “Na ngasa matte uh pawlkhat hong paipih un,” a ci hi. ¹¹ Simon Peter in gunkuang tungah kahto a, ngasa gol simsim 153 a awkna ngen, leilak ah a kaikhia hi. Ngasa tam mahmah napi a ngen a kikek kei hi. ¹² Zeisu in, “Hong pai unla, zing an ne un,” a ci hi. Nungzuite in Topa ahihlam thei uh ahih manin khat beek in, “Kua na hi hiam?” ci in a dong ngam kei uh hi. ¹³ Tua ciangin Zeisu hong pai a, anlum la in amaute a pia hi. Tuamah bangin ngasa zong a pia hi. ¹⁴ Hih in misite lak panin Zeisu a thawhkik zawh a nungzuite kiangah thumvei a kilakna ahi hi. ¹⁵ Zing an a nek khit uh ciangin, Zeisu in Simon Peter kiangah, “Jonah tapa, Simon aw, hihte sangin kei nong it zaw hiam?” ci in a dong hi. Amah in, “Hi hi, Topa aw, nang kong it lam na thei hi,” a cih ciangin Zeisu in, “Ka tuunote na vak in,” a ci hi. ¹⁶ Zeisu in, “Jonah tapa Simon aw, kei nong it hiam?” ci in a nihveina dongkik a, Simon Peter in zong, “Hi hi, Topa aw, nang kong it lam na thei hi,” a cih ciangin Zeisu in, “Ka tuute na cing in,” a ci hi. ¹⁷ Zeisu in, “Jonah tapa Simon aw, kei nong it hiam?” ci in a thumveina a dongkik hi. “Kei nong it hiam?” ci in Zeisu in thumvei tak a dot manin Peter a khasia hi. Tua ciangin amah in, “Topa aw, na khempeuh na thei a, nang kong it lam zong na thei hi,” a ci hi. Zeisu in, “Ka tuute na vak in. ¹⁸ Aman takpi kong cih in ah, na khangno lai in na kawng gakin na utna peuhpeuh ah na pai hi. Ahih hangin na upat ciangin na khut na zan dinga, midangte in na kawng hong hensak in na pai nop lohna munah hong paipih ding uh hi,” a ci hi. ¹⁹ Hih thu in, Peter in ama sihzia tawh Pasian minthangsak ding cih a gennopna ahi hi. Tua khit ciangin Zeisu in ama kiangah, “Hong zui in,” a ci hi. ²⁰ Tua ciangin Peter a kihei leh ama nungah Zeisu in a it nungzuipa in a zuih lam a mu hi. Tua pa pen nitak an a neklai un Zeisu ang ah a kingap kawmsa a, “Topa aw, nang hong lehhek ding kua pen ahi hiam?” ci in a dong pa ahi hi. ²¹ Peter in tua pa a muh ciangin Zeisu kiangah, “Topa aw, hihpa e leh, bangci ding a hia?” a ci hi. ²² Zeisu in ama kiangah, “Kong paikik dong hihpa ka nuntak suaksak nop leh bang phamawh sa na hi hiam? Nang na hih leh ka nung hong zui in,” a ci hi. ²³ Hih thu hangin tua nungzuipa si lo ding hi ci in nungzuite lakah a thang hi. Ahih hangin Zeisu in amah si lo ding hi a ci hilo a, “Kong paikik dong amah ka nuntak suaksak nop leh bang phamawh sa na hi hiam?” a ci bek ahi hi. ²⁴ Hih thu khempeuh teci panga a gelhpa in tua nungzuipa ahi hi. Ama teci panna a maan hi cih kote in ka thei uh hi. ²⁵ Zeisu in a bawl nalamdang tampi zong a omlai hi. Tuate a bantak in kigelh leh a kigelhna laibute leitung ah ta zo in ka um kei hi. Amen.