JAMES

JAMES

¹ Pasian le Topa Zeisu Khazih sila khat ahi keimah James in gam tuamtuam a kithehthang Israel nam sawm le nam nihte kong hopih hi. ² Ka sanggamte aw, haksatna tuamtuam na tuah uh ciangin lungdam nadingin la zaw un. ³ Banghang hiam cihleh na upna uh hong kize‑et ciangin thuakzawhna a piangsak hi. ⁴ Bangmah kitangsam loin hoihna namkim tawh kidim a, na picin nadingun thuakzawhna in nasep hoih sem hen. ⁵ Note lakah pilna a kisam mi in Pasian kiangah ngen hen. Amah in kuamah taii loin cinghtak in a piapa ahih manin a pia ding hi. ⁶ Ahi zongin lunghiang loin upna tawh ngen hen. A lunghiang mi in huih mutna peuh ah a tai kawikawi tuihual tawh kibang hi. ⁷ Tua bang mi in Topa kiang panin bangmah a ngah dingin kilamen kei hen. ⁸ A lungka mi in a sepna khempeuh ah a kiplo mi ahi hi. ⁹ A nuntakna a niam sanggampa in tawisanna a ngah manin angtang hen. ¹⁰ A hau sanggampa in zong niamkhiatna a ngah manin angtang hen. Banghang hiam cihleh amah in gamlak a po pak bangin a mangthang ding hi. ¹¹ Banghang hiam cihleh ni hong suak a, nisa in a kap ciangin a kung hong vul in a pak zong pulh a, a etlawmna teng a bei hi. Tuamah bangin mihaupa zong a hanciamna khempeuh pak bangin vulmang ding hi. ¹² Ze‑etna a thuak keikai zo mi in mihampha ahi hi. Banghang hiam cihleh tua bangin a thuak zo hi cih a kilat ciangin Topa in amah a it mite a piak dinga a kamciamsa nuntakna lukhu a ngah ding hi. ¹³ Mi khatpeuh in ze‑etna a thuak ciangin, “Pasian in kei hong ze‑et hi,” ci kei hen. Banghang hiam cihleh siatna tawh Pasian kize‑et theilo a, tuamah bangin Pasian in zong siatna tawh kuamah a ze‑et kei hi. ¹⁴ Ahi zongin mi khatpeuh a hoihlo lunggulhna in kai in a zol ciangin ze‑etna a thuak hi. ¹⁵ Tua ciangin a hoihlo lunggulhna hong gaai in mawhna a suakkhiasak hi. Mawhna a kicin ciangin sihna a piangsak hi. ¹⁶ Kong it sanggamte aw, mi khemsa in om kei un. ¹⁷ A hoih le a cingtak letsong peuhmah tunglam a om i Pa kiang panin a hong pai hi a, amah in khuavakte Pa ahi hi. Amah in nilim kihei bangin a kikhel themthum kei hi. ¹⁸ Ama piansakte lakah a gah masate i suah theih nadingin ama deihna bangin thuman thutak tawh eite a hong piangsak zo hi. ¹⁹ Tua ahih manin kong it sanggamte aw, hih thu na ciamteh un. Kuama peuh in thungaih ding kin henla, ahi zongin kam manlang loin hehbaih kei hen. ²⁰ Banghang hiam cihleh mihingte hehna in Pasian dikna a piangsak kei hi. ²¹ Tua ahih manin a nin a kihhuai le a sia na khempeuh paikhia un. Na nuntakna uh hong hon thei note sunga hong kituhsa thu lungnemtak in sang un. ²² No le no a kikhem, thu a zate bek hilo in thu banga a gamtate na hi un. ²³ Banghang hiam cihleh mi khatin thu za napi in tua thu banga a gamtat kei leh, limlang sunga a maitang a en mi tawh kibang hi. ²⁴ Amah a ki‑et khit ciangin paikhia in a mel bangci bang ahi hiam cih a mangngilh pah hi. ²⁵ Ahih hangin a kicing suahtakna hong pia thu entel a a zuisuak mi in thu a zak ciangin mangngilh pah loin zui ahih manin a sepna khempeuh ah thupha a ngah ding hi. ²⁶ Note lakah mi khatpeuh in biakna hahkat mahmah a kisak hangin a leii a ukzawh kei leh, amah le amah a kikhem hi a, a biakna hahkatna zong a mawknapi ahi hi. ²⁷ Pa Pasian mai‑a a siangtho le a buahbanglo biakna in meigong tagahte haksatna huhna le a hong ninsak thei leitung vaite tawh kisukkhak lohna ahi hi.

¹ Ka sanggamte aw, minthang Topa ahi Topa Zeisu Khazih a umte na hih manun mi angvantuam nei kei un. ² Note kikhopna ah kham khutbuh bulh a, puanhoih a silh mi khat le puansia a silh mizawng khat hong paikhop leh, ³ puanhoih a silhpa zahtak bawl in, “Hihlai a tutna nuam ah hong tu in,” ci in, mizawngpa kiangah, “Hualai ah na ding in,” ahih keileh, “Ka khengakna gei, hihlai ah hong tu in,” na ci thei kha ding uh hi. ⁴ Tua bang na cih uh ciangin note khat le khat kideidan in ngaihsutna hoihlo tawh thukhente suak hilo na hi uh hiam? ⁵ Kong it sanggamte aw, ngai dih un. Pasian in hih leitung mitmuh in upna lama a hau ding le amah a it mite tunga a kamciamsa kumpigam a luah dingin mizawngte teel khinzo hilo ahi hiam? ⁶ Ahi zongin note in mizawngte na simmawh uh hi. Note hong zothawh in zum ah a hong khiate, mihaute hilo ahi uh hiam? ⁷ Note hong kisapna min manpha a hong kosiatsakte, mihaute mah hilo ahi uh hiam? ⁸ “Nang le nang na ki‑it bangin na vengpa na it in,” ci in Lai Siangtho sunga hong kipia thupiak lianpi zui le uh teh, a dik in a gamta na hi ding hi. ⁹ Ahi zongin angvan tuam na neih leh mawhna bawl na hi a, thukham in thu palsat mi hong ci hi. ¹⁰ Banghang hiam cihleh thukham dang khempeuh na zuih khit hangin khat na palsat leh thukham khempeuh a palsat na hi hi. ¹¹ Banghang hiam cihleh, “Angkawm kei in,” hong ci Pasian in, “Mi that kei in,” zong hong ci hi. Ang na kawm loh hangin mi na thah leh thukham a palsat na hi hi. ¹² Suahtakna a hong pia thukham tawh thukhenna a thuak dingte bangin kampau unla, gamta un. ¹³ Banghang hiam cihleh hehpihna a neilo mite, hehpihna om loin thu kikhen ding hi. Hehpihna na neih leh thu hong kikhen ciangin hehpihna na ngah ding hi. ¹⁴ Ka sanggamte aw, mi khatpeuh in upna ka nei hi a cih hangin sepna in a zuih kei leh bang phattuamna om ding ahi hiam? Tua upna in amah hon thei ding ahi hiam? ¹⁵ Na sanggampa ahi a, sanggamnu ahi zongin puansilh ding le nisim annek ding a neih kei leh, ¹⁶ note laka mi khatpeuh in, “Nuamtak in ciah in. Na khualum henla, na gilvah hen,” na cih uh hangin ama pumpi aa dingin a kitangsamte pia kei le uh teh bang phattuamna om ding ahi hiam? ¹⁷ Tua mah bangin upna zong amah kia bek om henla, sepna in a zuih kei leh a si ahi hi. ¹⁸ Ahi zongin mi khatpeuh in, “Nangmah in upna na nei a, keimah in sepkhiatna ka nei hi,” hong ci kha ding hi. Sepkhiatna tawh a kilanglo na upna hong lak in. Ken ka sepkhiatna tawh ka upna kong lak ding hi. ¹⁹ Pasian khat bek om hi cih na um hi. Pha hi, dawigilote in zong tua thu um in a ling uh hi! ²⁰ Mihaipa aw, sepkhiatna in a zuihloh upna a si ahihlam na thei nuam hiam? ²¹ Eite pupi Abraham in biaknatau tungah a tapa Isaac a piak ciangin a sepkhiatna hangin diktansakna ngah hilo ahi hiam? ²² Sepkhiatna in ama upna zui a, tua sepkhiatna in a upna kicingsak hi cih theilo na hi hiam? ²³ Tua ahih manin Lai Siangtho in, “Abraham in Pasian um a, tua a upna pen ama dikna in kisimsak hi,” a cihna thu a tangtung hi. Amah pen Pasian lawmpa kici hi. ²⁴ Tua ahih manin, mi khatin upna bek tawh hilo in sepkhiatna tawh diktansakna ngah hi cih thu na thei uh hi. ²⁵ Tua mah bangin numei kizuaknu Rahab in zong thukante zintungsak in lampi dang khat ah a ciahsak ciangin ama sepkhiatna tawh diktansakna ngah hilo ahi hiam? ²⁶ Kha a omlo pumpi a si ahih mah bangin sepkhiatna omlo upna zong a si ahi hi.

¹ Ka sanggamte aw, siate in thukhenna a khauhzaw thuak ding ahihlam thei unla, mi tampi in sia na sem nuam dah un. ² I vekpi mahin thu tampi ah i khialtek hi. A kampauna tawh a khiallo mi a picing hi a, a pumpi bup zong a uk zo mi ahi hi. ³ En un, sakol in i thu hong man nadingin kamkaih bulhin tua tawh a pumpi bup i hei kawikawi thei hi. ⁴ Tembawte zong ngaihsun un, lian mahmah uh a, huihkhauhte mutna tawh a kihawl hangin a hawlpa in a neu mahmah a heina pekno khat tawh a utna lamlam ah a kiheisak hi. ⁵ Tuamah bangin leii in zong i pumpi tung nate lakah a neu mahmah khat ahih hangin kisialh a hat mahmah hi. Meikuang neucik khatin gam zapi a kattum theih lam phawk un. ⁶ Leii in meikuang hi a, siatna namkim tawh kidim hi. I pumpi tung nate khat ahi leii in i pumpi bup ninsak a, i nuntakna buppi zong kuangsak thei hi. Leii a kuangsak mei in hellɠ ahi hi. ⁷ Mihingte in gamsate, vasate, a bokvak ganhingte le tuisung a om ganhing khempeuh pantah in a zualsak thei uh hi. ⁸ Ahi zongin leii ahih leh a gilo, a omkhong theilo na khat hi a, sihtheihna gu tawh kidim in kuamah in a zualsak zo kei hi. ⁹ Leii tawh i Pa Pasian i phat a, tua leii mah tawh Pasian in ama lim le melsun in a bawl mite i samsia zel hi. ¹⁰ Kam sung khat bek panin phatna le samsiatna i paikhia khawmsak hi. Ka sanggamte aw, tua bang ding ahi kei hi. ¹¹ Tuinak khat panin tui lim le tui kha phulkhawm thei ahi hiam? ¹² Ka sanggamte aw, theikung ah tanluan gah thei ahi hiam? Lenggui tungah thei gah thei ahi hiam? Tua mah bangin tuinak khat panin tui‑al le tui lim a phulkhawm thei kei hi. ¹³ Note lakah a pil le a thuthei kua ahi hiam? A sep a bawl peuhpeuh thunem pilna tawh sem henla, a pil le thuthei ahihna gamtatpha tawh lak hen. ¹⁴ Ahih hangin kihazatna le angsungkhualna lungsim na neih uh leh kisialhpih kha peuhmah kei un. Tua bang na hih uh leh thutak nialin zuaugen na hi uh hi. ¹⁵ Tua bang pilna in tunglam pana hong kipiasuk hilo in leitung pilna, ci le sa pilna le dawite pilna ahi hi. ¹⁶ Deihgawhna le angsungkhualna a om ciangin buaina le siatna namkim a piangsak hi. ¹⁷ Ahi zongin tunglam pana hong kipia pilna in a masa pen in a siangtho hi. Tua banah kilemna, migitna, thusan theihna, hehpihna le gahphate tawh kidim a, mi deidanna le kineih nate a om kei hi. ¹⁸ Tu in kilemna a bawl mite in dikna khaici, kilemna tawh a tuh uh ahi hi.

¹ Note laka om kilangdona le kitotnate koi pan hong piang ahi hiam? Note pumpi nate sung panin a hong phuphu noptat nopna lungsim panin a hong piang hilo ahi hiam? ² Na lunggulh mahmah uh a, ahih hangin na ngah kei uh hi. Tua ciangin mi na that uh hi. Na deihgawh leuleu uh a, na ngah loh uh ciangin kitawng in na kido uh hi. Na ngah kei uh hi. Banghang hiam cihleh Pasian kiangah na ngen kei uh hi. ³ Na nget uh ciangin ngimna maanlo tawh note noptatna a zat ding bekin ngen na hih manun na ngah kei uh hi. ⁴ A thangtat numei pasalte aw! Leitung tawh kipawlna in Pasian langpanna ahihlam theilo na hi uh hiam? Tua ahih manin leitung tawh a kipawl mi peuhmah, amah le amah Pasian gal a kisuaksak ahi hi. ⁵ Ahih keileh, “Eite sunga a teeng Kha in eite hong lunggulh mahmah hi,” ci in Lai Siangtho sunga a kigelh thu a kimawk gelh in ngaihsun na hi uh hiam? ⁶ Amah in hehpihna thupha tampi hong pia hi. Tua ahih manin amah in, “Pasian in a kiphasakte langpan a, A kiniamkhiatte hehpihna thupha a pia hi,” a ci hi. ⁷ Tua ahih manin Pasian thu na mang unla, Dawimangpa na kham un. Tua hi leh note kiang panin a taikhia ding hi. ⁸ Pasian naii un. Tua hi leh amah in note hong naii ding hi. Mawhneite aw, na khut uh siangsak un. A lungka mite aw, na lungsim uh siangthosak un. ⁹ Dah in thum unla, kap un! Na nuihna uh kahna suaksak unla, na nuamna uh maigumna suaksak un. ¹⁰ Topa mai ah kiniamkhiat un. Tua hi leh amah in note hong lamsang ding hi. ¹¹ Sanggamte aw, khat le khat kigensia kei un. A sanggam gensia in a sanggam tunga thu a khen mi in thukham a gensia le thukham tunga thu a khen ahi hi. Thukham tunga thu na khen leh thukham a zui hilo in thu a khen na hi hi. ¹² Hong hon thei le hong that thei ding thukham hong piapa khat a om hi. Midangte tunga thu a khen dingin nang kua na hi hiam? ¹³ “Tuni hiam, zingciang hiam in hih khua ah ahih keileh tua khua ah va pai in, kum khat sung tamin vanlei vanzuak in summet va bawl ni,” a ci mite aw, ngai un, zingciang in bang thu piang ding cih na thei kei uh hi. ¹⁴ Na nuntakna uh bang tawh kibang ahi hiam? Tawlkhat sung hong kilat khit ciangin a thengmangkik pah meiilum tawh a kibang hi. ¹⁵ “Topa in hong awi leh, i dam lai dinga, tua bangin, hi bangin i hih ding hi,” na cih ding uh hi zaw hi. ¹⁶ Tu in na kiphatsakna tenguh na kisialhpih zawsop uh hi. Tua bang kisialhnate a hoih kei hi. ¹⁷ Tua ahih manin a pha bawl ding thei napi a bawllo mi aa dingin tua in mawhna ahi hi.

¹ No, mihaute aw, ngai un. Note tunga hong tung ding gimna hangin kiko in kap un. ² Na neih na lam tenguh muatgawp in na puansilhte uh ngetin a gai khinzo hi. ³ Na kham na ngun tenguh a kekseu khin hi. Tuate kekseuna in note langah teci hong pangin meikuang bangin na sa uh a hong ne ding hi. Hun nunung aa dingin note in sum le pai na khol uh hi. ⁴ Ngai un, lo sunga an la dinga na cial uh nasemte khemin na piak khitloh uh a thamante hangin kiko uh a, vantung galkap honpite Topa in amaute kikona aw a zazo hi. ⁵ Hih leitung ah a nuam theithei dingin na ut bangbang in na om uh a, a kigo ding ganhingte bangin na kivakthau uh hi. ⁶ Note hong langpanlo midikte mawhsak in na that uh hi. ⁷ Tua ahih ciangin sanggamte aw, Topa hong paikik dongin na thuak keikai un. Lokhopa in leitang panin a piang ding gah ngak a, guah masa a kipan guah nunung a zuk dongin lungduaitak in a ngakzia na ngaihsun unla, ⁸ note in zong thuak keikai un. Topa hong pai ding naita ahih manin na lungsim uh kipsak un. ⁹ Sanggamte aw, khat le khat kiphunsan kei un. Na kiphunsan uh leh thukhenna na thuak ding uh hi. En un, Thukhen mangpa kongbiang ah hong dingta hi! ¹⁰ Ka sanggamte aw, Topa min tawh thu a gen kamsangte in lungduaitak in gimna a thuakziate uh na etteh un. ¹¹ En un, a thuakzote in thupha ngah uh hi cih i thei hi. Job in thuak keikai zo ahih manin a tawpna ah Topa in ama aa dingin bang hihsak ahi hiam cih na mu zo uh hi. Topa pen lainatna le hehpihna tawh kidim hi. ¹² Ka sanggamte aw, tuate khempeuh banah vantung tawh ahi a, leitung tawh ahi a, nadang khat peuhpeuh tawh ahi zongin kiciam kei un. “Hi,” na cihte uh “Hi,” ci unla, “Hilo,” na cihte uh “Hilo,” na ci un. Tua bangin na hih kei uh leh thukhenna na thuak ding uh hi. ¹³ Note lakah buaina le haksatna a thuak mi a om leh thungen hen. A lungdam mi a om leh phatna lasa hen. ¹⁴ A cina a om leh pawlpi makaite sam henla, amaute in Topa min tawh sathau nilhin thungetsak uh hen. ¹⁵ Upna tawh thungetna in cinapa damsak dinga, Topa in amah a thosak ding hi. Mawhna a bawlkhak leh zong a mawhna a kimaisak ding hi. ¹⁶ A hong kidamsak theih nadingin na khialhnate uh khat le khat kipulak unla, thu na kingetsak un. Midik thungetna in vanglian in muibun mahmah hi. ¹⁷ Elijah zong eite mah bangin mihing khat hi napi guahzuk loh nadingin nakpitak a thu a nget ciangin tua gamah kum thum le a lang sung guah a zu kei hi. ¹⁸ Thu a ngetkik ciangin vantung in guahtui pia a, leitang in gah le teh a piangsak hi. ¹⁹ Ka sanggamte aw, note lakah mi khatpeuh in thuman thutak pan lampial in a om laitak in a dang khatin a kiheikiksak leh hih thu phawk tahen. ²⁰ Mawhna a bawl mi khat a khialhna panin a kiheikiksak mi in sihna panin tua pa nuntakna a honkhia hi a, mawhna tampi zong a khuhsak ahi hi.