HEBREW

HEBREW

¹ Pasian in tanglai in kamsangte zangin hun tuamtuam ah lam tuamtuam tawh i pu i pate tungah thu a genzo hi. ² Ahih hangin hih a nunung pen hunah a Tapa tungtawn in hong hopih hi. Tua a Tapa pen na khempeuh a luah dingin a sehsa hi a, van le lei zong a Tapa tungtawn mahin a bawl ahi hi. ³ Tapa in Pasian vangliatna a tankhiatna le Pasian lim le mel taktak kilah khiatna ahi hi. Amah in a vanglian ama kammal tawh na khempeuh a lenkip hi. I mawhnate amahmah in a sawpsiang khit ciangin a sangpen muna om Vanglianpenpa taklam ah a tu hi. ⁴ Vantungmite min sanga min thupi zaw a luah zah khat in amaute sangin a lianzaw thampa zong ahi pah hi. ⁵ Banghang hiam cihleh Pasian in vantungmite kua pen kiangah, “Nangmah in ka Tapa na hi hi, Tuni in nang kong piangsak zo hi,” ci ngei ahi hiam? Tua banah, “Keimah in ama Pa ka hi dinga, Amah in ka Tapa ahi ding hi,” ci ngei ahi hiam? ⁶ Tua banah, a ta masa pen leitung ah hong paisak ciangin, “Pasian vantungmi khempeuh in amah bia uh hen,” a ci hi. ⁷ Vantungmite tawh kisai in amah in, “Ama vantungmite kha bangin bawl a, Ama nasemte meikuang bangin a bawl hi,” a ci hi. ⁸ Ahih hangin a Tapa tungah, “Pasian aw, na kumpi tokhom kip tawntung a, Na ukna ciangkhut in dikna ciangkhut ahi hi. ⁹ Thumanna na deih a, siatna na mudah hi. Tua ahih manin, Pasian, nangma Pasian in, Na kithuahpihte sangin a tam zaw, Lungnopna sathau nang a hong nilhzo hi,” a ci hi. ¹⁰ Tua banah, amah in a Tapa tungah, “Topa aw, a kipatcil in leitung bulpi na phut a, Vantungte zong na khut tawh na bawlsa ahi hi. ¹¹ Tuate kisiamang ding uh a, Nang na hih leh na om tawntung ding hi. Tuate khempeuh puan bangin a lui ding uh hi. ¹² Nang in tuate khempeuh, Puan bangin zialin na laih ding hi. Nang na hih leh na kikhel ngei kei a, Na kumte zong bei hun a nei ngei kei ding hi,” a ci hi. ¹³ Ahih hangin vantungmi kua pen kiangah, “Na galte na khengakna ka suahsak khit mateng in, Ka taklam ah na tu in,” ci ngei ahi hiam? ¹⁴ Vantungmite in hotkhiatna a luah ding mite nasem dinga a kisawlkhia khate hilo ahi uh hiam?

¹ Tua ahih manin i tolhmang khakloh nadingin i zaksa thute i thudon phat mahmah ding ahi hi. ² Banghang hiam cihleh vantungmite tungtawn a a kigen thute kipsak a, tua thute mang loin a palsat mi peuhmah a kituak in daan thuaksak ahih leh, ³ a lian mahmah hotkhiatna thudon loin om lehang bangci bangin suakta thei ding i hi hiam? Tua hotkhiatna Topa in phuangkhia masa a, ama tung panin a za mite in eite tungah a hong kipsak uh ahi hi. ⁴ Pasian in zong limlamdangte, nalamdang lianpi pite, nalamdangte le ama deihna banga a hawmsak Kha Siangtho letsongte tawh teci a pang hi. ⁵ Pasian in kote gen, a hong pianglai ding leitung, vantungmite ukna nuai ah a koih kei hi. ⁶ Ahih hangin munkhat ah mi khatin hih bangin teci a pang khinzo hi. Amah in, “Na ngaihsuttham dingin mihing in bang hi peuhmah a, Na thudontham dingin mihing tapa in bang hi peuhmah ahi hiam? ⁷ Vantungmite sangin a niam zawdeuh in na bawl a, Minthanna le pahtawina na khusak hi. Na khut tawh na bawlsa nate a uk dingin na koiha, ⁸ Na khempeuh ama khenuai ah koihin na uksak hi,” a ci hi. Na khempeuh ama ukna nuai ah koih ahih manin ama ukna nuai‑a omlo na khat beek a om kei hi. Ahih hangin tu in na khempeuh ama khe nuai‑a a kikoih i mu nai kei hi. ⁹ Ahi zongin Pasian hehpihna thupha tawh mi khempeuh tangin sihna a thuak theih nadingin vantungmite sanga a niam zaw in hong kikoih Zeisu i mu hi. Amah in sihna a thuak manin tu in minthanna le pahtawina a kikhusak hi. ¹⁰ Na khempeuh ama tungtawn le ama aa dingin a piangsakpa Pasian muhna ah ta tampite in minthanna a ngah theih nadingun amaute aa dingin hotkhiatna a piangsakpa in gimthuakna tungtawn in a picin ding a kilawm hi. ¹¹ Banghang hiam cihleh a Siangthosakpa le a sianthosak mite innkuan khat ahih manun Zeisu in amaute ka sanggamte a cih ding a maizumpih kei hi. ¹² Tua ahih manin amah in, “Ka sanggamte tungah na min ka tangko dinga, A kikhawm mihonpi lakah nangmah phatna la ka sa ding hi,” a ci hi. ¹³ Amah in, “Amah ka muang ding hi,” a cih banah, “En un, Pasian hong piaksa tate tawh ka omkhawm hi,” a cikik hi. ¹⁴ Tate in si le sa a neih mah bangun amah in zong si le sa a nei hi. Tua in sihna a uk Dawimangpa tungah sihna mah tawh gualzo in, ¹⁵ a khantawn un sih ding kihtakna sila a suak mite a khahkhiat theih nading ahi hi. ¹⁶ Banghang hiam cihleh ama huh mite in vantungmite hilo in Abraham suante ahi hi. ¹⁷ Tua ahih manin na khempeuh ah a sanggamte tawh a kibat ding a kul hi. Tua in a hehpih thei Pasian nasepna ah a muanhuai Siampi Ukpa a suah theih nading le mite mawhna hanga thoihdamna a bawl theih nading ahi hi. ¹⁸ Banghang hiam cihleh amahmah in zong ze‑etna le gimna thuak ngei ahih manin ze‑etna a thuakte a huh thei hi.

¹ Tua ahih manin van lam pana sapna a ngah a siangtho sanggamte aw, eite upna thu tawh kisai a Sawltak le Siampi Ukpa ahi Khazih Zeisu na lungngai un. ² Pasian innkuan sung khempeuh ah Moses a muanhuai mah bangin Zeisu zong amah a sehpa tungah a muanhuai hi. ³ Banghang hiam cihleh inn sangin innlampa a kipahtawi zawk mah bangin amah in Moses sangin pahtawina a lianzaw a ngah dingin a kilawmpa ahi hi. ⁴ Inn khempeuh a lam mi omciat a, ahih hangin na khempeuh a bawlpa in Pasian ahi hi. ⁵ Moses in a nung cianga kigen ding thute ah teci a suah nadingin nasem khat ahihna tawh Pasian innkuan buppi tungah a muanhuai hi. ⁶ Ahih hangin Khazih in Tapa ahihna ah Pasian innkuan tungah a muanhuai hi. I lungmuanna le i kisialhpih lametna i letkipsuak le ama innkuanpihte i hi hi. ⁷ Tua ahih manin Kha Siangtho in a gen inah, “Tuni in ama aw na zak uh leh, ⁸ Na lungtang uh khauhsak kei un. Pasian in gamlak ah amaute a ze‑et lai a, Amah a langpan bangun langpan kei un. ⁹ Tualai in na pu na pate un, Kei hong ze‑et in, hong sit uh a, Kum 40 sung tawntung ka nasepte a mu uh hi. ¹⁰ Tua ahih manin tua khang mite tungah ka heha, ‘Amaute a lungsim uh pial tawntung a, Ka lampite a theithei kei uh hi,’ ka ci hi. ¹¹ ‘Tua ahih manin ka tawlngakna sungah, Amaute a lut kei ding uh hi,’ ci in, Hehsa in ka kiciam hi,” a ci hi. ¹² Sanggamte aw, a nungta Pasian nusia in a umlo lungsim gilo a nei mi khatpeuh na om khakloh nadingun kidawm un. ¹³ Mawhna in hong khemin a lungkhauh mi khatpeuh na om khakloh nadingun, “Tuni,” a kicih laiteng khat le khat tha kipia un. ¹⁴ Banghang hiam cihleh a kipatcil a i lungmuanna a tawp dongin i letkip leh Khazih tawh a kizomte i hi hi. ¹⁵ Hi bangin a kigen hi, “Tuni in ama aw na zak uh leh, Pasian na lehdo lai bangun, Na lungtang uh khauhsak kei un.” ¹⁶ Thu za khin napi in a lehdo lai veve kuate ahi uh hiam? Moses makaihna tawh Egypt gam panin a paikhia tua mite mah hilo ahi uh hiam? ¹⁷ Kuate tungah kum 40 sung tawntung Pasian heh ahi hiam? Mawhna a bawl manun gamlak ah pukin sihna a thuak tua mite mah hilo ahi uh hiam? ¹⁸ Ka tawlngakna sungah a lut kei ding uh hi ci a, Pasian a kiciamna zong thu a manglo tua mite tung mah hilo ahi hiam? ¹⁹ Tua ahih manin a up loh manun amaute a lut zo kei uh hi cih i thei hi.

¹ Tua ahih manin Pasian tawlngakna sungah lut theih nading kamciamna omlai napi a lut zolo khatpeuh na om khakloh nadingun lauthawng in om ni. ² Banghang hiam cihleh eite tungah lungdamna thu a hong kihilh mah bangin amaute tungah zong a kihilh hi. Ahih hangin a thu zak uh upna tawh thuah lo uh ahih manin amaute aa dingin phattuamna bangmah a piangsak kei hi. ³ Ahi zongin a um eite i hih leh tua tawlngakna sungah i lut hi. Pasian in leitung a piansak khit a kipan a nasep a zawh khitsa hi napi, “ ‘Ka tawlngakna sungah Amaute a lut kei ding uh hi,’ ci in Hehsa in ka kiciam hi,” a ci hi. ⁴ Amah in ni sagih ni tawh kisai in munkhat ah hih bangin a gen hi. “Pasian in a nasep khempeuh zo in ni sagih ni in a tawlnga hi,” a ci hi. ⁵ Tua hi napi tua mun mah ah, “Ka tawlngakna sungah Amaute a lut kei ding uh hi,” a cikik hi. ⁶ Tua ahih manin tua tawlngakna sungah a lut ding mi pawlkhat omlai hi, cih thu le lungdamna thu a kihilh masakna mite in a up loh manun lut kha lo uh hi, cih thu a kitel hi. ⁷ Tua ciangin, “Tuni in ama aw na zak uh leh, Na lungtang uh khauhsak kei un,” ci a, a gen zawh a sawtpi khit ciangin David tungtawn in, “Tuni,” ci in nidang khat a sehkik hi. ⁸ Banghang hiam cihleh, Joshua in amaute tawlngakna pia khin hi leh Pasian in tua nung ciangin nidang khat thu a genkik nawn kei ding hi. ⁹ Tua ahih manin Pasian mite aa dingin Sabbath tawlngakna khat a omlai hi cih a kilang hi. ¹⁰ Pasian in a nasep zo a, a tawlngak mah bangin ama tawlngakna sungah a lut mite zong a nasep uh zo in a tawlnga uh hi. ¹¹ Tua ahih manin amaute bangin uplohna hanga a puk mi i om khak loh nadingin tua tawlngakna sungah i lut theih nading hanciam ni. ¹² Banghang hiam cihleh Pasian thu in nungta in vanglian a, langnih a hiam namsau sangin a hiamzaw hi. Lungsim le kha, guh le tang le guhngekte pailet in khentel a, lungsim ngaihsutna le tupna ngimnate zong a theitel hi. ¹³ A kipiangsak na khempeuh lakah Pasian muh loh dinga kisel thei na khat beek a om kei hi. Tua thamlo in eima thu ciat i puak nading pa muhna ah na khempeuh a liah om loin a kilang hi. ¹⁴ Vantung ah a kah khin a lian Siampi Ukpa ahi Pasian Tapa Zeisu nei i hih manin i pulaksa upna kiptak in len ni. ¹⁵ Banghang hiam cihleh i neih Siampi Ukpa in eite thanemnate hong thuakpih theilo ahi kei hi. Amah in eite mah bangin ze‑etna namkim thuak a, ahih hangin amah in mawhna a nei kei hi. ¹⁶ Tua ahih manin i kisap hunin a hong huh ding hehpihna thupha mu in hehpihna i ngah theih nadingin hehpihna tokhom hangtak in zuan ni.

¹ Siampi Ukpa pen mite lak panin a kisehkhia ahi hi. Amah in Pasian tawh kisai thute ah mipite tangin a ding dingin a kisehpa hi a, Pasian tunga kipia nate le mawhmai nading gangawh biakpiaknate a pia ding pa ahi hi. ² Amah zong a thanem thei mi ahih manin bangmah a theilo mite le lam a khial mite a lainat thei hi. ³ Tua ahih manin amah in mite aa hilo in ama aa dingin zong mawhmai nading gangawh biakpiakna a piak ding kul hi. ⁴ Kuamah in ama thu tawh hih dinmun thupi a ngahtawm theih hilo a, Pasian in Aaron a sap bangin a sap mite bekin a ngah theih ahi hi. ⁵ Tuamah bangin Khazih in zong Siampi Ukpa a suah theih nadingin amah le amah a kipia tawm ahi kei hi. Pasian in ama kiangah, “Nangmah in ka Tapa na hi hi, Tuni in nang kong piangsak zo hi,” a ci hi. ⁶ Mundang khatah zong amah in, “Nang in Melchizedek gui zui in, A tawntung in siampipa na hi hi,” a ci hi. ⁷ Zeisu in leitung mi banga hong omlai in sihna panin a honkhia theipa kiangah khitui luangin nakpitak kiko in thungen a, thumna a nei hi. Pasian kihtak zahtakna tawh ngen ahih manin a thungetna a ngah hi. ⁸ Tapa ahih hangin a thuak gimnate tawh thumanna a sin hi. ⁹ A kicin khit ciangin ama thu a mang mi khempeuh aa dingin tawntung hotkhiatna a piangsakpa hong suaka, ¹⁰ Pasian in Melchizedek gui zui in Siampi Ukpa cih min a pia hi. ¹¹ Tua Khazih thu i gen ding tampi a om hangin thu tel zo mengmeng lo na hih manun kong telgen ding a haksa hi. ¹² A taktak in sia a suak khinzo dingin na kilawmta uh hi. Tua hi napi Pasian thu tawh kisai in a kipatna thubulte mah hilh kikkik ding na kullai uh hi. Antak kisam loin nawizu mah na kisam lai uh hi. ¹³ Nawizu bek a nete naungek ahih manun dikna thu a theisiam nai kei uh hi. ¹⁴ Ahi zongin antak in a theih theihnate uh zangin a sia a pha a khentel thei khin a picingsa mite aa ding ahi hi.

¹ Tua ahih manin Khazih tawh kisai a kipatna thuhilhnate nusia photin picinna lamah manawt ni. Kimanna neilo sepna bawlnate panin kisikkikna, Pasian upna, ² tuiphumna, khutngakna, misite thawhkikna le tawntung thukhenna tawh kipawl thuhilhnate bulsut kikkik nawn kei ni. ³ Pasian in hong phal leh picinna lamah ma i nawt ding hi. ⁴ Banghang hiam cihleh amaute khuavak in khatvei tan khin a, vantung lam letsong zong a ciam ngei khin, Kha Siangtho tawh zong a kizom ngei, ⁵ Pasian thu a limna le a hong tung ding huna vangliatnate zong a ciam khin mite, ⁶ Pasian Tapa khailumkik in, a selphokik suak uh ahih manin a puk uh leh a kisikkik nadingun a kibawlpha thei nawn kei hi. ⁷ A hunhun a guahtui a dawl, lokhopa aa dingin kimanna a nei gah le teh a piangsak leitang in Pasian thupha ngah ahi hi. ⁸ Ahih hangin tua leitang ah lingkung le thangling kungte a po leh kimanna neilo a, hamsiatna thuakin a tawpna ah mei tawh a kihal ding hi. ⁹ Tua ahih ciangin kong itte aw, hih bangin thu kong gen uh hangin note in bel a hoih zaw hotkhiatna thu tawh kipawl nate na neihna uhah lungmuang in ka om uh hi. ¹⁰ Banghang hiam cihleh note in misiangthote huh ngei bekthamlo in tu in zong na huh lai uh a, tua banga na nasepna uh le ama min aa dingin itna tawh na hanciamnate uh a mangngilh dingin Pasian in a thumanlopa ahi kei hi. ¹¹ Note khat ciatin na lametna uh na kiciatsak sinsen nadingun a tawp dongin thanuamtak in na om ding uh ka deih uh hi. ¹² Thadah loin upna le thuakzawhna tungtawn a Pasian kamciamna a luahte na etteh ding uh ka deih zaw uh hi. ¹³ Pasian in Abraham tunga kamciam a piaklai in amah sanga a lianzaw a kiciampih ding omlo ahih manin amah le amah kiciam in, ¹⁴ “Thupha hong pia taktak in kong pungsak taktak ding hi,” a ci hi. ¹⁵ Abraham in lungduaitak in a ngak khit ciangin tua kamciamna a ngah hi. ¹⁶ Mihingte in amaute sanga a lianzawte min loin kiciam uh a, tua kiciamna in thute kipsak in kinialna khempeuh a beisak hi. ¹⁷ Tuamah bangin Pasian in zong a tup a gelsa thute a kikhelkik theilo ahihna tua kamciamna a luah ding mite theitelsak nuam ahih manin kiciamna khat tawh kipsak a, ¹⁸ tua in Pasian zuau theih lohna a kikhel theilo thu nihte tungah kinga in, buk nading zuanin a tai khin eite in i mai‑a hong kikoihsa lametna letkipna tungtawn in hehnepna lianpi i ngah theih nading ahi hi. ¹⁹ Tua lametna in tembaw khawlsakna sikkawipiɠ bangin i lungsim kipsak a, puan tawh kideina nunglam a sungtawng ah a lut hi. ²⁰ Tua munah Zeisu in eite aa dingin na lut masa khinzo a, amah in Melchizedek gui zui in a tawntung in Siampi Ukpa a suak hi.

¹ Hih Melchizedek in Salem kumpipa hi a, a Sangbel Pasian siampipa zong ahi hi. Amah in kumpite zo a, a hong ciahkik Abraham na dawntuah in thupha a pia hi. ² Abraham in gal sunga a ngah nate sung panin sawm a khat Melchizedek a pia hi. Ama min a khiatna masapen “dikna kumpipa,” cihna hi a, Salem kumpipa cihna zong hi‑in tua in “kilemna kumpipa,” a cihna ahi hi. ³ Amah in nu le pa ahi a, pugui pagui ahi a, nuntak kipat hun le bei hun ahi zongin a nei kei hi. Pasian Tapa bangin siampi ahi tawntung hi. ⁴ Tu in i pupi Abraham nangawn in gal sunga a ngah nate sung panin sawma khat a piak hih mipa a thupizia ngaihsun dih un. ⁵ Siampi za a ngah Levi suante in Abraham suante mah ahi, a sanggamte uh tung panin thukham tawh kizui in sawma khat a san theih nading uh thupiakna a ngah uh hi. ⁶ Ahih hangin Levi suan a hilo Melchizedek in Abraham tung panin sawma khat ngahin, kamciamna a ngahpa Abraham zong thupha a pia lai hi. ⁷ Tu in a lianzawpa in a neuzawpa thupha pia hi cih nial theih ding thu hilo hi. ⁸ Hihlai ah a sithei mite in sawma khat a ngah uh hi. Ahih hangin tualai in nungta hi ci a, teci panna a ngahpa in sawma khat a sang hi. ⁹ Sawma khat a ngah Levi in tualai in Abraham tungtawn in sawma khat pia khinzo hi, cih theih ahi hi. ¹⁰ Banghang hiam cihleh Melchizedek in Abraham a dawntuah lai in Levi in a pupi sungah a om khinzo hi. ¹¹ Levi siampi nasepna tungtawn in mite in thukham a ngah uh hi. Tua ahih ciangin tua Levi siampi nasepna in picinna piangsak thei hileh, Aaron bang a hilo, Melchizedek gui zui in siampi khat hong pian ding kisam lai ding ahi hiam? ¹² Tu in siampi hihna a kikhel mah bangin thukham zong a kikhel ding hong kul hi. ¹³ Banghang hiam cihleh hih thute gen mipa in biaknatau a na a sem ngeilo beh dang khat panin a hong piang ahi hi. ¹⁴ I Topa pen Judah beh panin a hong piang ahihna kitel mahmah a, tua beh thu ah siampite thu tawh kisai Moses in bangmah a gen kha kei hi. ¹⁵ Melchizedek tawh a kibang a dang siampi khat hong pian ciangin hih thu a hong kician mahmah hi. ¹⁶ Hihpa pen ci le sa a thupiakna tawh kizui in siampi a suak hilo a, a bei theilo nuntakna tawh kipawl vangliatna hanga siampi a suak ahi hi. ¹⁷ Banghang hiam cihleh amah in, “Nang in Melchizedek gui zui in, A tawntung in siampipa na hi hi,” ci in teci a pang hi. ¹⁸ Thu dang khat in genleng, a masa thupiakna thanem in, kimanna neilo ahih manin a kibeisak hi. ¹⁹ Banghang hiam cihleh thukham in kuamah picingsak zolo a, a hoih zaw lametna tawh kilaih in, tua tungtawn in Pasian kiang i zuan thei hi. ²⁰ Hih siampipa in kiciamna omlopi a siampi suak ahi kei hi. ²¹ Banghang hiam cihleh siampi dangte in kiciamna omlopi in siampi a suak ahi uh hi. Ahih hangin Zeisu ahih leh, ama tunga Pasian kiciamna tawh siampi a suak ahi hi. Tua kiciamna in, “ ‘Nang in Melchizedek gui zui in, A tawntung in siampipa na hi hi,’ ci in, Topa kiciam khinzo ahih manin, A khelkik nawn kei ding hi,” a ci hi. ²² Hih kiciamna hangin Zeisu in a hoih zaw thuciam kipsakna a hong suak hi. ²³ Siampi dangte si in nasep zomsuak theilo uh ahih manin, siampi tampi om uh a, ²⁴ ahi zongin, amah om tawntung ahih manin a kikhel theilo siampi za a ngah hi. ²⁵ Amah nungta tawntung ahih manin, ama tungtawn in Pasian a naih mite aa ding thumsak in a tawntung in a hon thei hi. ²⁶ A siangtho, siatna a neilo, a buahbanglo, mawh neite tawh a kisawh kha lo, vantungte tunga a kitawisang, tua bang Siampi Ukpa in eite aa dingin a hoih mahmah hi. ²⁷ Amah ahih leh Siampi Uk dangte bangin nisim in ama mawhna mai nadingin biakpiakna pia masa a, tua khit ciangin mipite mawhna a mai nadingin gangawh biakna a piak ding a kisam kei hi. Banghang hiam cihleh amah in a kimang tawntung dingin ama pumpi mahmah khatvei a piaksa ahi hi. ²⁸ Banghang hiam cihleh thukham in a thanem mihingte mah Siampi Ukte dingin seh a, ahi zongin thukham nunga hong piang kamciamna in a kimang tawntung dingin Tapa a seh hi.

¹ Tu in i gen khitsa thute sung panin i gennop bulpi in hih thu ahi hi. Eite in vantung a Vanglianpa tokhom taklam ah a tu, tua bang Siampi Ukpa i nei hi. ² Amah in mihing lam a hilo Topa mahmah in a lam biakbuuk taktak sunga Siangthopen Mun ah siampi nasep a sempa ahi hi. ³ Pasian tunga kipia nate le gangawh biakpiaknate a pia dingin Siampi Uk peuhmah a kiseh ahi hi. Tua ahih manin hih Siampi Ukpa in zong a piak ding na khatpeuh a neih ding kisam hi. ⁴ Thukham tawh kizui in a kipia nate a pia dingin siampite om khinzo ahih manin amah leitung ah a omlai hi leh siampi a suak kei ding hi. ⁵ Tua siampite nasepna in vantung a om nate lim le a lim bek ahi hi. Biakbuuk lam dinga Moses a kithawi lai in Pasian in ama kiangah, “Mualtung a kong lahsa lim banglian in na khempeuh bawl in,” ci in thu a pia hi. ⁶ Ahih hangin tu in Zeisu in a hoih zaw kamciamnate tawh a kikipsak a hoih zaw thuciamna Palai hi a, a thupi zaw siampi nasep a ngah hi. ⁷ Banghang hiam cihleh thuciamna masa a kawkbang lo hi leh thuciamna nihna zon ding a kul kei ding hi. ⁸ Ahi zongin Topa in tua mite a mawhsak nading mu ahih manin, “En un, Israel innkuan le Judah innkuan tawh thuciam thak khat ka bawl hun a hong tung ding hi. ⁹ Tua thuciamna in Egypt gam panin amaute bantang kaih in ka paikhiatpih lai in a pu a pate uh tawh ka bawl thuciamna tawh a kibang kei ding hi. Banghang hiam cihleh ka thuciamna ah amaute kip lo uh ahih manin amaute ka thudon kei hi, Topa in ci hi. ¹⁰ “Tua hun khit ciangin Israel innkuan tawh ka bawl ding thuciamna in hih bang ahi hi, Topa in ci hi: ka thukhamte amaute lungtang sungah koihin amaute lungsim ah ka gelhsak ding hi. Amaute Pasian ka hi dinga, amaute in keima mite ahi ding uh hi. ¹¹ Amaute in a innvengpa ahi a, a sanggampa ahi zongin thu hilh nawnlo ding uh a, ‘Topa thei in,’ a kici nawn kei ding uh hi. Banghang hiam cihleh a neupen a kipan a lianpen dongin a vekpi un kei a hong theita ding uh hi. ¹² Banghang hiam cihleh amaute mawhna khialhnate ah ka hehpih dinga, amau mawhnate le thukham tawh a kituaklo a gamtatnate uh zong phawkin ka nei nawn kei ding hi,” a ci hi. ¹³ Amah in, “Thuciam thak,” a cih ciangin thuciamna masa pen a luisak a hita hi. Tu in a lui khinsa le zat theih nawnloh pen a beimang ding mah ahi hi.

¹ A taktak in ci lehang thuciamna masa pen in zong Pasian biakna tawh kisai thukhunte le leitung a om Mun Siangtho a nei hi. ² Biakbuuk khat kilam a, a dei masa pen Siangtho Mun kici hi. Tua sungah meivak tunna, sabuai le Ompihna Anlumte a om hi. ³ Puan tawh a kidal dei nihna ah Siangthopen Mun kici dei khat a om hi. ⁴ Tua sungah kham tawh a kibawl paknamtui halna tau a om hi. Kham tawh a kizut thuciamna singkuang zong om a, tua sungah manna a kikoihna kham bel, a teh a sel Aaron ciangkhut le thuciamna suangpekte a om hi. ⁵ Tua singkuang tungah a vanglian cherub vantungmite lim om a, a kha uh tawh hehpihna tokhom a zakkhum uh hi. Tu in tuate thu a cingin i gen khinzo kei ding hi. ⁶ Tu in na khempeuh hih banga a kibawl khit dimdiam ciangin biakbuuk dei masa sungah siampite lut denin siampi na a sem uh hi. ⁷ Ahih hangin dei nihna sungah Siampi Ukpa bek a lutthei hi. Amah kum khat in khatvei lut a, ama mawhna le mipite in a theihlohna uh tawh a bawlkhak mawhnate a mai nadingin sisan tawh biakna a pia hi. ⁸ Biakbuuk dei masa a omlai teng Siangthopen Mun lutna lampi a kilang nai kei hi cih thu Kha Siangtho in hong theisak hi. ⁹ Banghang hiam cihleh a kipia nate le biakpiaknate in a pia mite lungsim a siangsak zo kei hi cih thu tu huna eite a hong lahna ahi hi. ¹⁰ Banghang hiam cihleh tuate in nek le dawn ngeinate, silsiangna ngeina tuamtuamte le pumpi tawh kisai thukhunte hi a, bawlthakna hun a tun mateng zat dingin a kikoih nate ahi hi. ¹¹ A hong tung ding a hoih nate tawh kisai Siampi Ukpa hihna tawh Khazih a hong tungzo hi. Amah in leitung nate le khut tawh kibawl a hilo, a lianzaw le a cingtak zaw biakbuuk sungah a lut hi. ¹² Amah in tua sungah kelte le bawngnote sisan lutpih lo a, a kimang tawntung dingin ama sisan mahmah tawh Siangthopen Mun ah khatvei lutin tawntung tatkhiatna a hong ngahsak hi. ¹³ A buahbang mite tunga a kitheh bawngtal sisan, keltal sisan le bawngla a kihalna vutte in amaute pumpi siangsak zo ahih leh, ¹⁴ a si nasepna panin a nungta Pasian na sem dingin Pasian tungah paubanna om loin tawntung Kha tawh amah le amah a kipiapa ahi Khazih sisan in na lungsim uh hong siangsak zawkan lo ding ahi hiam? ¹⁵ Hih thu hangin Khazih in thuciamna thak Palaipa hong suak hi. Pasian sapna a ngah mite in a kamciamsa tawntung gamhluahna a ngah theih nadingun Khazih in thuciamna masa hun sunga thupalsat mite ama sihna tawh a tankhia hi. ¹⁶ Luahna tawh kisai in sih thu vaikhakna lai‑a kizat theih nadingin thu vaikhakpa a sihphot kul ding hi. ¹⁷ Banghang hiam cihleh thu vaikhakna lai‑a bawlpa a nuntak laiteng luahna tawh kisai thu vaikhakna in thu nei theilo in a sih khit ciang bekin thu a nei thei pan hi. ¹⁸ Tua ahih manin thuciamna masa zong sisan tawh kibawl ahi hi. ¹⁹ Moses in thukham sunga thupiakte khempeuh mipi mai ah a gen khit ciangin bawngno sisan, keltal sisan le tuisiangte a lakhawm hi. Tua khit ciangin a sungah tuumul san le puknah hiangte diahin thukham laibu le mipite tungah a theh hi. ²⁰ Amah in, “Hih in Pasian hong piak thuciamna sisan ahi hi,” a ci hi. ²¹ Tua khit ciangin biakbuuk le biakpiakna a kizang van khempeuh zong tuamah bangin sisan a theh hi. ²² Thukham kalhna tawh kizui in na khempeuh phial sisan tawh a kisiansuah ahi hi. Sisan kibua loin mawh maisakna a om kei hi. ²³ Tua ahih manin vantung a om nate lim la in a kibawl vante pen hih bangin a kisiansuah ding mah ahi hi. Vantung na taktakte ahih leh tuate sanga a hoih zaw gangawh biakna tawh siansuah ding a kisam hi. ²⁴ Banghang hiam cihleh siangtho mun taktak lim ahi khut tawh a kibawl Siangthopen Mun sungah Khazih lut loin eite tangin Pasian mai ah a va kilang dingin vantung mahmah ah a lut hi. ²⁵ Tua bangin Siampi Ukpa in ganhingte sisan tawh Siangthopen Mun ah kum simin a lut thithe bangin amahmah a kipia kikkik dingin a lut kei hi. ²⁶ Tua bang a kipiak thakthak ding a kisam hi leh leitung piancil a kipan tamveipi a si khinzo ding hi. Ahi zongin tu hun ciangin Khazih amahmah gangawh biakna banga a kipumpiakna tawh mawhna a lakhia dingin khatvei hong kilang zo hi. ²⁷ Mihingte khatvei a sih ding sehsa hi a, tua khit ciangin thukhenna a thuak ding uh hi. ²⁸ Tua ahih manin Khazih in mi tampite mawhnate a puakhia dingin khatvei a kipia khinzo hi. Mawhna tawh kisai hi nawnlo in lawptak in amah a ngakte a honkhia dingin a nihveina a hong kilang lai ding hi.

¹ Thukham in hong tung ding na hoihte lim taktak hilo in a lim bek ahi hi. Tua ahih manin a kibang veve tua gangawh biaknate kumsim a piak thuahthuahna tawh Pasian a bia mite a kicingsak zo kei hi. ² Tuate in hong siangsak zo hi leh gangawh biakpiakna khempeuh kibeisak ding hilo ahi hiam? Banghang hiam cihleh tua a pia mite in khatvei biakpiakna tawh siangtho tawntung in mawhna kisuantakna a beimang ding hi. ³ Ahih hangin tua gangawh biaknate in a mawhnate uh kumsim in a phawk kikkiksak hi. ⁴ Banghang hiam cihleh bawngtal sisan le keltal sisante in mawhnate a lakhia thei kei hi. ⁵ Tua ahih manin Khazih leitung ah hong pailai in amah in, “Gangawh biakpiakna le, Nate tawh biakna na deih kei hi. Ahi zongin keima aa dingin, Pumpi khat nong bawlkholhsak zo hi. ⁶ Haltum biakpiaknate le, Mawhmai nading biakpiaknate ah, Nang na lungdam kei hi. ⁷ Tua ciangin, keimah in, ‘En in, keima thu laizial laibu sunga A kigelhna bangin kei hiah om ing. Nangma deihna a sem dingin kong paita hi, Pasian aw,’ Ka ci hi,” a ci hi. ⁸ A tunga a gensa mah bangin amah in, “Gangawh biakpiakna, nate tawh biakpiakna, haltum biakpiakna le mawhmai nading biakpiaknate na deih kei a, tuate ah na lungkim kei hi,” a ci hi. (Hite pen thukham kalh biakpiaknate ahi hi.) ⁹ Tua khit ciangin, “En in, nangma deihna a sem dingin kong paita hi, Pasian aw,” a ci hi. Amah in a nihna a kipsak nadingin a masa pen a lakhia hi. ¹⁰ Tua bang deihna hangin Zeisu Khazih in a kimang tawntung dingin ama pumpi khatvei a kipiakna tawh eite a hong siangthosak hi. ¹¹ Siampi peuhmah in siampi nasep sem dingin nisim in dinga mawhna a maisak thei ngeilo, a kibang gangawh biakpiaknate a pia kikkik hi. ¹² Ahi zongin, hih siampipa in tawntung mawhmai nading biakpiakna in ama pumpi khatvei a kipiak khit ciangin Pasian taklam ah a tu hi. ¹³ Tua huna kipan in a galte ama khengakna a kisuahsak ding hun ngakin a om hi. ¹⁴ Banghang hiam cihleh amah in khatvei biakpiakna tawh a sianthosak mite a tawntung in a picingsak hi. ¹⁵ Kha Siangtho in zong hih thute eite tungah teci a hong panna in, ¹⁶ “Tua hun khit ciangin amaute tawh ka bawl ding thuciamna in hih bang ahi hi, Topa in ci hi: ka thukhamte amaute lungsim sungah koihin amaute lungtang ah ka gelhsak ding hi,” ci in a gen khit ciangin, ¹⁷ khatvei, “Amau mawhnate le thukham tawh a kituaklo a gamtatnate uh phawkin ka nei nawn kei ding hi,” ci in Kha Siangtho in a genbeh hi. ¹⁸ Tu in, mawhna a kimaisak khit ciangin mawhmai nading biakpiakna a kisam nawn kei hi. ¹⁹ Tua ahih ciangin sanggamte aw, Zeisu sisan suangin hangtak in Siangthopen Mun ah i lut thei hi. ²⁰ Amah in a pumpi ahi deina puan kantan in nuntakna le lampi thak hong honsak zo hi. ²¹ Tua banah Pasian innkuan a uk tua Siampi Ukpa i nei hi. ²² Tua ahih manin i lungtang sunga om kisuanna lungsim siansuah in i pumpi zong tui siangtho tawh silin upna thu ah kitheician sinsensa in lungsim maantak tawh ama kiang naih ni. ²³ Kamciamna a hong piapa muanhuai ahih manin i kam tawh i pulak khitsa lametna thu hoi loin lenkip ni. ²⁴ Itna le gamtat hoih a nei ding le khat le khat a kilawpsuah dingte i hih lam phawk ni. ²⁵ Mi pawlkhatte bangin biakpiak kikhopnate tawpsan kei ni. Topa Ni hong naita hi cih thei na hih manun khat le khat tha na kipia semsem un. ²⁶ Banghang hiam cihleh thuman thutak i theih khit ciangin eima ut thu in mawhna i bawlbawl lai leh mawhmaisak nading gangawh biakna a om nawn kei hi. ²⁷ Thuak loh a phamawh a lauhuai thukhenna le Pasian galte a haltum ding hehna meikuangpi bek a omlai hi. ²⁸ Teci nih bang thum bang a om nak leh Moses thukham a nial mi in hehpihna ngah loin a si hi. ²⁹ Tua ahih leh a khe tawh Pasian Tapa tuancil in, amah a siangthosak thuciamna sisan neu ngaihsut in, hehpihna thupha a pia Kha a zahko mi in bangzah in a lianzaw daantatna thuak ding cih na ngaihsun uh hiam? ³⁰ Banghang hiam cihleh, “Phulakna in keima aa ahi hi. Keimah in ka thukkik ding hi,” ci in Topa in gen hi. Tua banah, “Topa in a mite tungah thu a khen ding hi,” a cipa i thei hi. ³¹ A nungta Pasian thukhenna khut i thuak khak ding mulkimhuai pha mahmah hi. ³² Ahi zongin khuavak na muh tung lai uh haksatnate nakpitak do in na thuakzawh lai uh hunte phawk gige un. ³³ Khat veivei zahkona le bawlsiatna thuakin mipite et huan dingin hong kibawl hi. Khat veivei tua banga a kibawl mite na thuakpih uh hi. ³⁴ Banghang hiam cihleh mat le hen ka thuakna zong nong khasiatpih uh hi. A hoih zaw a kip tawntung neihsa khat vantung ah na neih lam uh thei na hih manun na neihsate uh a hong kithatangsuh hangin zong na lungdam veve uh hi. ³⁵ Tua ahih manin na lungmuanna uh khahsuah kei un. Tua lungmuanna hangin thaman tampi na ngah ding uh hi. ³⁶ Banghang hiam cihleh Pasian deihna banga na nasep khit uh ciangin ama hong kamciamna na ngah nadingun thuakzawhna na kisam uh hi. ³⁷ Banghang hiam cihleh amah in, “A hong pai dingpa, Tomkha kal sungin hong pai dinga, A hong zekai nawn kei ding hi. ³⁸ Ahi zongin tu in, Midik in upna tawh a nungta ding hi. A nungtolh mi a om leh, Tua mi tungah ka lungkim kei ding hi,” a ci hi. ³⁹ Ahi zongin eite in nungtolh in a kisia mite hilo in uma hotkhiatna a ngahte i hi zaw hi.

¹ Tu in upna in i lamet nate tungah lungmuanna le a kimunailo nate telcianna ahi hi. ² Hih bang upna hangin tanglai mite in phatna a ngah uh hi. ³ Pasian thupiakna tawh van le lei a kibawl hi a, tu a a kimu nate zong a kimuthei nate pana kibawl hilo hi ci in upna tawh i thei hi. ⁴ Abel in Cain piak biakna sanga a hoih zaw biakna Pasian tungah upna tawh a pia hi. Tua upna tungtawn in amah in midik hi ci in teci panna ngah a, a biakpiakna zong Pasian in a sansak hi. Amah a sih khit hangin upna tawh thu a gengen lai hi. ⁵ Upna hangin Enoch kilato a, sihna tawh a kipelh hi. Pasian in lato ahih manin amah a kimu nawn kei hi. Amah a kilaktoh ma in Pasian lungdamsak hi cih teci panna a ngah hi. ⁶ Tua ahih ciangin upna lo tawh Pasian kilungdamsak zolo hi. Banghang hiam cihleh Pasian kianga naih mi peuhmah in Pasian om taktak hi cihleh kuhkaltak a amah a zong mite thaman a piapa hi cih a up loh phamawh hi. ⁷ Noah in a muh nailoh nate tawh kisai Pasian thupiak kholhna a ngah ciangin Pasian kihtak zahtakna nei a, a innkuanpihte a hotkhiat nadingin upna tawh tembaw a lam hi. Tua upna hangin leitung mite mawhtangsak a, upna hanga kingah dikna a luahpa zong a suak hi. ⁸ Abraham in a nung ciangin a luah ding munah pai dinga sapna a ngah lai in a pai nading mun theilopi mahin upna tawh thumang in a paikhia hi. ⁹ Amah in kamciamna gamah upna tawh gamdang ah pemta bangin a va teeng hi. Amah in tua kamciamna a luahpih Isaac le Jacob‑te tawh puanbuuk sungah a teeng hi. ¹⁰ Banghang hiam cihleh bulkip a nei khuapi khat a lamen hi a, tua khuapi a gelpa le a lampa in Pasian ahi hi. ¹¹ Sarah in zong naupaai zawh nading upna tawh thahatna a ngah hi. Kamciamna a piapa muang ahih manin ta neih theih hun kheng khin hi napi ta khat a nei hi. ¹² Tua ahih manin misi tawh a kibang khin lel mi khat sung panin vana aksi zah le tuipi gei‑a sehnel zah a a tam suan le khak a piang hi. ¹³ Hih mite khempeuh in a kikamciamte ngah nai loin upna sungah a si uh hi. Ahi zongin tua kamciamte gamlapi panin mu khin uh a, a na dawn khinzo uh hi. Leitung ah mikhual le pemtate i hi hi a kici uh hi. ¹⁴ Hih bang thute a gen tua mite in amaute gam ding khat a zong uh ahihlam teltak in a kilangsak uh hi. ¹⁵ A nusiatsa uh gam lunggulhkik uh hi leh a kilehkik theih nading uh hun hoih a ngah mahmah ding uh hi. ¹⁶ Ahih hangin tu in amaute in a hoih zaw vantunggam a lunggulh uh hi. Tua ahih manin Pasian in amaute Pasian ka hi hi a kicih ding maizum lo hi. Tua hi a, amaute aa dingin khuapi khat a bawlkholhsak hi. ¹⁷ Pasian in Abraham a ze‑et lai in amah in upna tawh Isaac a pia hi. Kamciamna a ngahpa in a tapa neihsun biakpiakna in a pia hi. ¹⁸ Tua tapa tawh kisai in hi bangin, “Isaac panin a piangte bek nangma suan le khak kici ding hi,” ci in kigen hi napi, ¹⁹ Pasian in misite lak pan nangawn in amah thokiksak thei hi ci in Abraham in um a, a up mah bangin sihna pan Isaac ngahkik takpi hi cileng zong a kici thei hi. ²⁰ Isaac in Jacob le Esau‑te, amaute mailam ding tawh kisai in upna tawh thupha a pia hi. ²¹ Jacob in a sihkuan ciangin Joseph tapa nihte upna tawh thupha pia a, a ciangkhut tungah kingam in Pasian a bia hi. ²² Joseph in Israel mite paikhiat nading thu a sihkuan in upna tawh gen a, ama guhte tawh kisai in thu a vaikhak hi. ²³ Moses nu le pate in amah a suah ciangin a mel hoihna mu uh a, kumpipa thupiak nangawn lau loin kha thum sung upna tawh a selcip uh hi. ²⁴ Moses in a khan khit ciangin Pharaoh tanu ii tapa a suah theih nading thu upna tawh a nial hi. ²⁵ Hun tomkha sung mawhna tawh kipawl nopsakna sunga a bual ding sangin Pasian mite tawh gentheihna thuakkhawm dingin a teel zaw hi. ²⁶ A ngah ding thaman mitsuan gige ahih manin Egypt gam hauhna phatna khempeuh sangin Khazih hanga zahkona thuak ding thupi a sa zaw hi. ²⁷ Muhtheih lohpa mu ahih manin kumpipa a thangpaih ding nangawn lau loin upna tawh Egypt gam a nusia hi. ²⁸ Tacil teng a thatpa in amaute a thah loh nadingin upna tawh Paisan Pawi bawl in sisan a theh hi. ²⁹ Amaute in leikeu tunga lampai bangin upna tawh San Tuipi a kantan uh hi. Egypt mite in tua banga kantan a sawm uh ciangin tui in a tummang hi. ³⁰ Israelte in Jericho khuapi ni sagih sung a kimkot khit uh ciangin amaute upna hangin tua khua kulhpi a cim hi. ³¹ Numei kizuaknu Rahab in thukante nuamtak in zin a tunsak ciangin a upna hangin a umlo mite tawh a kisiakhawm kei hi. ³² Kua thu genlai ding ka hi hiam? Gideon, Barak, Samson, Jephthah, David, Samuel le kamsangte thu i gen nading hun a kicing kei hi. ³³ Hih mite in upna tawh kumpigamte la in diktak in thukhen uh a, kamciamnate a ngah uh hi. Amaute in humpi nelkai kam khakcip in, ³⁴ mei thahatna mitsak uh a, namsau hiamte panin a suakta uh hi. A thanemnate uh thakhauhna suakin galsimna ah hang mahmah uh a, gamdang galkapte a taikeksak uh hi. ³⁵ Numeite in a misite uh a nungta in a ngahkik uh hi. A dang pawlkhatte in a pha zaw thawhkikna a ngah theih nadingun khahkhiat ding teel loin bawlsiatna a thuak zaw uh hi. ³⁶ Hi hi, pawlkhatte in zahkona, khautep tawh sata thusitna, sikkhau tawh khih a thong khiatnate a thuak uh hi. ³⁷ Suangtum tawh denlupna, singat tawh attanna, namsau tawh thahnate a thuak uh hi. Tuuvun, kelvun peuh silhin vak kawikawi uh a, cimawh genthei in bawlsiatna le khelbawlna a thuak uh hi. ³⁸ Hih leitung in amaute aa dingin a kilawm kei hi. Sehnel gam sung le mualkawm guamkawm tengah vak kawikawi uh a, leihawm sung, suanghawm sung peuh ah a teeng uh hi. ³⁹ Hih mite khempeuh in upna hangin etteh hoih ngah uh a, ahi hangin a kikamciam thu a ngah nai kei uh hi. ⁴⁰ Pasian in eite aa dingin a hoih zaw hong gelsak ahih manin eite kihel loin amaute kia kicinna a pia kei hi.

¹ Hih zahin a tam tecite in i kim i pamah om ahih manin hong tuantualsak thei nate le olno taka hong awksak thei mawhna peuhmah paikhia in i mai‑a om kidemna ah kuhkaltak in tai ni. ² Eite upna a piangsakpa le a kicingsakpa Zeisu mitsuan gige ni. Amah in a mai‑a Pasian koihsak lungdamna thu hangin zumna awlmawh loin singlamteh sihna thuak a, tua khit ciangin Pasian tokhom taklam ah a tu hi. ³ Note bahcip a na lungkiat loh nadingun mawhnei mite langpanna tua zahtak in a thuak keikai zopa lungngai un. ⁴ Sisan luangzah dongin mawhna tawh na kido nai kei uh hi. ⁵ Tate banga Pasian in hong hanthotna na mangngilh khin ta uh hi. Amah in, “Ka ta aw, Topa hong thuhilhna, Neu ngaihsut kha kei in. Hong taii ciangin na lung kiasak kei in. ⁶ Banghang hiam cihleh, Topa in a itte thuhilh a, A sansa a tate a sat hi,” a ci hi. ⁷ Note in tawsatna na thuak uh leh Pasian in tate bangin a hong ngaihsun ahi hi. A pa in thu a hilhloh ta kua om ahi hiam? ⁸ Tate thu kihilh ahih manin thuhilhna na thuak ngei kei uh leh ta taktak hilo in zawlta na hi uh hi. ⁹ Tua thamlo in eite thu hong hilh leitung pate i nei ciata, amaute i zahtak hi. Tua ahih leh khalam a i Pa hong thuhilhna mangin i nuntak ding hi zawkan lo ding ahi hiam? ¹⁰ Banghang hiam cihleh i leitung pate in amaute hoihsak bangin hong hilh uh hi a, tomkha sung bek a kimang ding ahi hi. Pasian in ahih leh amah banga i siantho theih nading le eite phattuam nadingin a hong hilh ahi hi. ¹¹ Tu in thuhilhna peuhmah i thuak laitak in nuam loin na kisa hi. Ahi zongin thuhilhna tawh a kipantah mite in a nung ciangin a thuman lungmuanna gah a ngah uh hi. ¹² Tua ahih manin a thanem na khutte uh le a zaw na khukte uh khauhsak un. ¹³ A bai na khete uh kilawi loin a dam nadingin na lampi uh tangsak un. ¹⁴ Mi khempeuh tawh kilem ding le sianthona na delh un. Tualo in kuamah in Topa a mu kei ding hi. ¹⁵ Pasian hehpihna thupha a khahsuah kha na om loh nadingun limtak in kisit un. Tua banah zungkha a nei singkung hong selin note sungah buaina piangsak a, mi tampi zong a buaisak loh nadingin zong kikem un. ¹⁶ Numei pasal mawhna a bawl mi a om loh nading le ankam khat tawh ama innluah za a zuak Esau banga Pasian a zahtaklo mi na om khakloh nadingun hoihtak in kisittel un. ¹⁷ Banghang hiam cihleh Esau in a nung ciangin thupha a ngahkik nop hangin kinolh khin a khitui luangin nakpi in a ngetkik hangin zong lungsim a kikhelsak zo nawn kei hi. ¹⁸ Banghang hiam cihleh khut tawh kilawng thei, meikuang, khuamial, lungzinna le huihpi, ¹⁹ Pengkul ging le thugenna awgingte kizakna, tua awging a za mite in tua banga thu a gen nawnloh nadingin a thumna mual, note a tung na hi kei uh hi. ²⁰ (Banghang hiam cihleh tua mun pen, “Ganhing khat nangawn in tua mual a sukkhak leh suang tawh denglum un, ahih keileh thaltang tawh kaplum un,” cih thupiak a kizatna mun hi a, amaute in a thuak zo kei uh hi. ²¹ Amaute muh tua nate lauhuai mahmah ahih manin Moses in, “Lau lua in ka ci a ling hi,” a ci hi.) ²² Ahi zongin note tunna mun in Zion mual, a nungta Pasian khuapi ahi vantung Jerusalem khuapi ahi hi. A kisim zolo vantungmi honpi kikhopna mun, ²³ vantung a min a kiciamteh ta masapente kikhopna le mi khempeuh tungah thu a Khenpa Pasian a omna mun ahi hi. Tua mun in picinna a ngah midikte khate a omna mun, ²⁴ thuciamna thak Palaipa ahi Zeisu a omna mun le Abel sisan in a gen thute sangin a hoih zaw thute a gen sisan a kithehna mun ahi hi. ²⁵ Note tunga thu hong genpa na nial khakloh nadingun kidawm un. Leitung ah thu a hong genpa a nialte suakta lo uh ahih leh vantung pana thu a hong genpa thugen ngai kei lehang i suakta kei sem ding hi. ²⁶ Tualai in vantung pan thu a genpa awging in leitung a lingsak hi. Ahih hangin tu in amah in, “Leitung bek lingsak loin vantung zong khatvei ka lingsakkik ding hi,” ci in a hong kamciam khinzo hi. ²⁷ Tu in, “Khatvei ka lingsakkik ding hi,” a cih ciangin a kipiangsakte sung pan a kiling theilo nate a kipsuak nadingin a kilingthei nate a hepkhiat nading cihna ahi hi. ²⁸ Tua ahih ciangin eite in a kiling theilo kumpigam ngah i hih manin lungdam mahmah ni. Ama san theih dingin zahtakna le launa tawh Pasian bia ni. ²⁹ Banghang hiam cihleh eite Pasian in a haltum meikuang ahi hi.

¹ Unau khat banga na ki‑itna uh zomsuak un. ² Zin le leng do ding mangngilh kei un. Banghang hiam cihleh mi pawlkhat in a theih lohkal un vantungmite nangawn zinin a do kha ngei uh hi. ³ Thongkiate na phawk unla amaute tawh sikkhau hong kikhihkhawm bangin kingaihsun un. Note zong pumpi mah tawh a nungta na hih manun bawlsiatna a thuak mite na phawk un. ⁴ Mi khempeuh in kiteenna pahtawi in thupi koih unla, nupa kal puannuai thu ah na siangtho un. Banghang hiam cihleh numei pasal mawhna a bawlte le angkawm mite tungah Pasian in thu a khen ding hi. ⁵ Sum duhlua kei unla na neih zahzah uh tawh lungkim un. Banghang hiam cihleh Pasian in, “Nang kong nusia ngei kei dinga, kong taisan peuhmah kei ding hi,” hong ci zo hi. ⁶ Tua ahih manin, “Topa in kei hong huhpa hi a, Ka lau kei ding hi. Mihing in bang hong cih thei ding ahi hiam?” ci in hangtak in i genngam hi. ⁷ Pasian thu hong hilh na makaite uh phawk tawntung un. Amaute nuntakzia ngaihsun in amau upna zui un. ⁸ Zeisu Khazih in zan ni, tuni le a tawntung in kibang den hi. ⁹ A tuamtuam le a lamdang thuhilhnate um kawikawi kei un. Banghang hiam cihleh a zui mite phattuamna a pialo nek le dawnte hangin lungkipna sangin hehpihna hangin lungkipna in a hoih zaw hi. ¹⁰ Biakbuuk sunga nasemte in a nek theihloh uh biaknatau khat eite in i nei hi. ¹¹ Banghang hiam cihleh Siampi Ukpa in mawhmai nadingin tua ganhing sisante Siangthopen Mun ah paipih a, ganhing pumpi ahih leh giahphual pualam ah a kihal hi. ¹² Tua ahih ciangin Zeisu in zong ama sisan tawh mite a sianthosak theih nadingin kongpi pualam ah sihna a thuak hi. ¹³ Tua ahih ciangin eite in zong ama kizahkona thuakpih in giahphual pualam ama kiangah naih ni. ¹⁴ Banghang hiam cihleh hihlai ah a kipsuak ding khuapi i nei kei a, hong tung ding khuapi i zong hi. ¹⁵ Tua ahih manin Pasian phatna biakpiakna Zeisu tungtawn in pia tawntung ni. Hih phatna in kam tawh ama min i pulakna gah ahi hi. ¹⁶ Tua banah a pha bawl ding le khat le khat neihsa kihop kipiak ding zong mangngilh kei un. Tuate in Pasian a lungdamsak mahmah biakpiakna ahi hi. ¹⁷ Na makaite uh thu na mang unla, amaute tungah na ki‑ap un. Banghang hiam cihleh amaute in note nuntakna hong cinsak in tua nasepna tawh Pasian tungah thu a pulak ding uh hi. Amaute in dahna tawh hih loin lungdamna tawh hih uh hen. Tua hi kei leh note aa dingin phattuamna a om kei ding hi. ¹⁸ Kote aa dingin thu hong ngetsak un. Ka lungsim uh siangtho hi ci in ka tel uh a, na khempeuh ah a pahtawihuai dingin ka nungta nuam uh hi. ¹⁹ Note kiangah a manlang theithei in a hong kipuak nadingin thu hong ngetsak un ci in a tuam vilvel in kong thum hi. ²⁰ Tu in kilemna Pasian in tawntung thuciamna sisan tungtawn in Tuucing Lianpa i Topa Zeisu misite lak pan a thokiksak zo hi. ²¹ Tua Pasian in Zeisu Khazih tungtawn in ama hoihsak nate note sungah hong sem henla ama deihna na sep theih nadingun na hoih khempeuh tawh hong kidimsak tahen. Tua Khazih in minthanna ngah tawntung tahen. Amen. ²² Sanggamte aw, kong laigelh pen sau lo ahih manin kong hanthotnate limtak in na ngaih nadingun kong thum hi. ²³ I sanggampa Timothy kikhah zo hi cih na theih ding uh ka ut hi. Amah hong tun baih leh note tawh kimu dingin amah tawh kong pai ding hi. ²⁴ Na makai khempeuh uh le misiangthote khempeuh na hopihsak un. Italy gama omteng in note a hong hopih uh hi. ²⁵ Pasian hehpihna thupha note khempeuh tawh hong omkhawm tahen. Amen.