GALATIA-TE

GALATIA-TE

¹ Mihingte kiang pan le mihing tungtawn in a kisawl hilo, Zeisu Khazih le misite lak pan amah a thokiksak Pa Pasian hanga sawltak a suak keimah sawltak Paul le, ² ka ompih sanggamte khempeuh in Galatia gama om pawlpite lai kong khak uh hi. ³ Pa Pasian le i Topa Zeisu Khazih kiang pana hong pai hehpihna thupha le lungmuanna in note tungah om tahen. ⁴ Tua Zeisu in Pa Pasian deihna tawh kizui in a gilo tuhun khang panin eite hong hotkhiat nadingin i mawhnate hangin amahmah a kipia hi. ⁵ I Pa Pasian tungah minthanna om tawntung tahen. Amen. ⁶ Khazih hehpihna thupha sunga hong sampa taisan in lungdamna thu tuamdang khatah hun tomkal sungin na kiheikhiat uh lamdang kong sa hi. ⁷ Tua lungdamna thu tuamdang khatin lungdamna thu taktak hilo in Khazih lungdamna thu a siasak nuam mi pawlkhat in note hong buaisakna uh ahi hi. ⁸ Ahih hangin kote mahmah ka hi uh a, vantung pana hong pai vantungmi khat ahi zongin kote hong hilhsa lungdamna thu a hilo, lungdamna thu tuamdang khat peuhpeuh hong hilh a om leh, tua mi in hamsiatna thuak tahen. ⁹ Na sansa uh lungdamna thu a hilo lungdamna thu tuamdang khat hong hilh a om leh tua mi in hamsiatna thuak tahen kong cih khitsa bangun tu in ka cikik hi. ¹⁰ Hih bangin mite maipha a zong ka hi hiam? Ahih keileh Pasian maipha a zong ka hi zaw hiam? Mite lungdam nading a zong ka hi hiam? Mite lungdam nading a zong ka hih leh Khazih sila ka hi kei ding hi. ¹¹ Ahih hangin sanggamte aw, note kong hilh lungdamna thu pen mihing phuahtawm hilo hi cih kong theisak hi. ¹² Banghang hiam cihleh hih kong hilh lungdamna thu mihing tung pana ka ngah hilo in, mihing hong hilh zong hilo a, Zeisu Khazih hong kilakna tungtawn a ka ngah ahi hi. ¹³ Judah biakna ka zuih lai a ka gamtatzia le gen zawhloh zah dongin Pasian pawlpi bawlsia in suksiat ding ka hanciamna thute na zazo uh hi. ¹⁴ Ka mipihte lak ka khangualte sung panin zong Judah biakna tawh kisai in a madawkpen khat ka hi a, tanglai ka pu ka pate ngeinate gumin ka naklet mahmah hi. ¹⁵ Ahih hangin Pasian in pha a sak hunin ka nu gil sunga ka omlai in hong teeltuam khinzo in, ama hehpihna thupha tawh a hong sam a, ¹⁶ ama Tapa thu Gentile‑te ka hilh theih nadingin keima sungah a Tapa hong kilangsak hi. Tua ciangin kei zong kuamah tawh kikum loin, ¹⁷ keima hun ma‑a sawltak a suak khinsa mite omna Jerusalem ah zong pai tuanlo in Arabia gamah ka pai hi. Tua panin Damascus khua ah ka ciahkik hi. ¹⁸ Tua zawh kum thum khit ciangin Peter tawh kimu dingin Jerusalem khuapi ah ka paito a, amah tawh ni sawm le ni nga sung ka omkhawm hi. ¹⁹ Ahih hangin Topa sanggampa James longal sawltak dangte khat beek tualai ah ka mu kei hi. ²⁰ Tu in, hih kong thugelhte zuauthu hi peuhmah lo hi cih Pasian in hong theihpih hi. ²¹ Tua khit ciangin Syria gam le Cilicia gamah ka pai hi. ²² Khazih sunga om Judea gam pawlpi mite in ka melin hong thei lo uh hi. ²³ Ahi zongin, “Nidang lai‑a eite hong bawlsia ngeipa in khatvei lai‑a suksiat a sawm upna thu tu in hilhta hi,” cih bek a na za uh hi. ²⁴ Tua ahih manin keima hangin Pasian min a phat uh hi.

¹ Tua zawh kum sawm le kum li khit ciangin Barnabas tawh Jerusalem ah ka paitokik a, Titus zong ka tonpih hi. ² Pasian hong kilakna tawh kizui in a paito ka hi hi. Ahi zongin ka sepsa teng le ka seplai dingte a mawkna a suah loh nadingin Gentile‑te tunga ka hilh lungdamna thu gentelna khat a makai zawdeuhte kiangah a tuamin ka neihpih hi. ³ Tua ahih manin ka tonpih Titus zong Greek mi hi napi vunat dingin a hahsawl nawn kei uh hi. ⁴ Ahih hangin eite laka hong lutsim sanggam kineih mi pawlkhat in vunat ding a hahbawl uh hi. Amaute in Khazih Zeisu sunga i neihsa suahtakna paikhia in, sila hong suaksakkik nuamin a hong lutsim uh ahi hi. ⁵ Thuman thutak lungdamna thu note sungah a kip tawntung theih nadingin amaute thu nai khat sung nangawn ka mang kei uh hi. ⁶ Ahih hangin mi thupi a kingaihsunte zong bangbang ahi uh zongin kei aa dingin a kilamdanna om lo hi. Pasian in maitang zahtak tuam a nei kei hi. Tua mi thupite in kei thugen valkan bangmah a gen tuan kei uh hi. ⁷ Tua sangsik in vunat mite tungah lungdamna thu gen nading thu Peter tungah a kipiak mah bangin vunatlo mite tungah lungdamna thu gen nading thu kei tungah a hong kipia hi. ⁸ Banghang hiam cihleh vunat mite sawltak ahi Peter tungah khauhtak a na a sempa mahin Gentile‑te sawltak keima tungah zong na a hong sem hi. ⁹ Khuampi bang ahi James, Cephas le John‑te in kei hong kipia hehpihna thupha a theih uh ciangin vunat mite kiangah amaute pai in Gentile‑te kiangah Barnabas le kei a pai dingin kilawmtakna taklam khut hong khakin ka kilen uh hi. ¹⁰ Mizawngte na phawk un cih thu khat bek hong vaikhak uh a, kei zong tua thu mah ka tuppen ahi hi. ¹¹ Tu in Antioch khua ah Peter a hong pai ciangin mawhsak nading thu khat om ahih manin ama mai mahmah ah ka taii hi. ¹² Banghang hiam cihleh James kiang panin a hong pai mi pawlkhat hong tunma un Peter in Gentile‑te tawh an a nekhawm hi. Ahi zongin tua mite hong tun uh ciangin vunat mite a kihtak manin Peter kihemkhia in a tuam om hi. ¹³ A dang Judah mite in zong Peter cingtaklohna zui uh a, Barnabas nangawn a kihel kha hi. ¹⁴ Ahi zongin amaute in lungdamna thu tawh kipawl thuman thutak tangtak in a zuihlohna uh ka muh ciangin amaute khempeuh mai ah Peter ka taii a, “Nang Judah mi hi napi Judah mite ngeina zui loin Gentile‑te ngeina zui na hih leh Gentile‑te in Judah mite ngeina a zuih nadingun banghang in hahbawl na hi hiam? ¹⁵ I pianna panin Judah mi ahi Gentile mikhialte a hilo eite in, ¹⁶ thukham zuihna tawh diktansakna kingah lo a, Zeisu Khazih upna bek tawh kingah hi cih thu i thei hi. Tua ahih manin thukham zuihna tawh hilo in Khazih upna tawh diktansakna i ngah nadingin Khazih Zeisu i umzo hi. Banghang hiam cihleh thukham zuihna hangin kuamah in diktansakna a ngah kei ding hi. ¹⁷ “Khazih sunga diktansakna i zon laitak in mawhnei i hih lam hong kilangkhia ahih leh Khazih pen mawhna tha a piapa a lehsuah ding hiam? Suak peuhmah lo ding hi! ¹⁸ Banghang hiam cihleh ka suksiatsa tua nate ka lamkik leh, kei le kei thupalsatpa a suak ka hi hi. ¹⁹ Tua ahih ciangin Pasian lamah ka nuntak theih nadingin thukham tungtawn in thukham ka sihsan khin hi. ²⁰ Khazih tawh kikhailum khawm khin ka hih manin kei a nungta hi nawnlo in kei sungah Khazih a nungta ahi hi. Pumpi sunga om tulaitak a ka nuntakna in kei hong it in keima tanga amahmah a hong kipia Pasian Tapa ka upna tungtawn in a nungta ka hi hi. ²¹ Pasian hong hehpihna thupha ka pampaih kei hi. Banghang hiam cihleh thukham zuihna tawh dikna kingah hi leh, Khazih sihna in a mawkna a suak ding hi,” ka ci hi.

¹ Galatia mihaite aw! Zeisu Khazih note muh mahmah a hong kikhailum bangin na tel theih nadingun kong hilh khitsa hi napi tua thuman thutak na up loh nadingun kua in hong bumhai ahi hiam? ² Thukham zuihna hanga Kha a ngah na hi uh hiam? Ahih keileh upna thu zakna hanga a ngah na hi zaw uh hiam cih thu khat bek note kiang pan ka thei nuam hi. ³ Hi zahtak in hai lawmlawm ding na hi uh hiam? Kha tawh kipan khin napi in tu in ci le sa tawh picin sawm na hi uh hiam? ⁴ Haksatna tampi na thuaksate uh a mawkna suaksak ding na hi uh hiam? A mawkna suak zawzen ding ahi hiam? ⁵ Tua ahih manin Kha hong pia in note lakah nalamdangte hong sempa in thukham na zuih manun hong sem ahi hiam? Ahih keileh upna thu na zak manun hong sem ahi hiam? ⁶ Abraham ngaihsun un. “Amah in Pasian um a, tua a upna pen ama dikna in a kisimsak hi.” ⁷ Tua ahih manin upna a nei mite bek Abraham tate ahi hi cih thu na thei un. ⁸ Upna tungtawn in Pasian in Gentile‑te diktangsak nuam hi cih thu Lai Siangtho in a mukhol hi. Tua ahih manin Abraham kiangah, “Nangma hangin minam khempeuh in thupha a ngah ding uh hi,” ci in lungdamna thu a hilhkhol hi. ⁹ Tua ahih manin upna a nei mite in thu‑um Abraham tawh thupha a ngahkhawm uh hi. ¹⁰ Thukham zuihna a suang mi khempeuh in hamsiatna nuai‑a om ahi uh hi. Banghang hiam cihleh, “Thukham laibu sunga kigelh thute a vekpi in a zuisuaklo mi in hamsiatna a thuak ahi hi,” ci in Lai Siangtho sungah a kigelh hi. ¹¹ “Midik in upna tawh a nungta ding hi,” ci in Lai Siangtho sungah kigelh manin thukham zuihna tawh kuamah in Pasian mai ah diktansakna ngah lo hi cih teltak in a kimu hi. ¹² “Thukham a zuimi in tua thukham zuihna hangin a nungta ding hi,” ci in kigelh ahih manin thukham le upna a kisai kha kei hi. ¹³ Khazih in eite tangin hamsiatna a suahna tawh thukham hamsiatna panin eite hong tankhia zo hi. Banghang hiam cihleh, “Singkhuam tunga kikhai mi peuhmah in hamsiatna a thuak ahi hi,” ci in Lai Siangtho sungah kigelh hi. ¹⁴ Eite khempeuh in upna tungtawn in hong kikamciamsa Kha i ngah theih nading le Gentile‑te in Abraham ngah thuphate Khazih Zeisu sungah a ngah nadingun amah in eite a hong tankhia hi. ¹⁵ Sanggamte aw, mihingte thugen banga kong gen in ah mihing khat thuciamna nangawn a kikipsak khit ciangin kuamah in phiat theilo in, zong behlap theilo hi. ¹⁶ Tu in Abraham le ama suanpa tungah kamciam kipia zo hi. “Na suan na khakte,” ci in mi tampi gen loin, “Na suanpa tungah,” ci in mi khat bekin a gen hi. Tua mi in Khazih ahi hi. ¹⁷ Ken kong cih in ah Pasian in Khazih sunga a kipsaksa kamciamna pen tua zawh kum 430 khit ciangin a kipia thukham in a susia thei nawn kei hi. Tua bang hi leh kamciamna a mawkna a suak ding hi. ¹⁸ Banghang hiam cihleh gamhluahna le thukham kisai hi leh, kamciamna tawh kisai nawnlo ding hi. Ahih hangin Pasian in Abraham tungah kamciamna tawh tua gamhluahna a pia zo hi. ¹⁹ Tua ahih leh bang dinga thukham hong kipia ahi hiam? Thupalsatna a om manin hong kipiakthuah ahi hi. Pasian in thukham pen Abraham Suanpa hong tun masiah a kimang dingin vantungmite tungtawn in palai khat tungtawn in hong piak ahi hi. ²⁰ Tu in palai nasepna a langkhat bek tawh kisem theilo ahih mah bangin Pasian in a langkhat ahi hi. ²¹ Tua ahih leh thukham in Pasian hong kamciamte langpan ahi hiam? Langpan peuhmah lo hi! Banghang hiam cihleh nuntakna hong ngahsak thei dinga thukham hong kipia hi leh diktansakna zong thukham zuih zawhna tawh kingah thei ding hi. ²² Ahi zongin Zeisu Khazih upna tungtawn a kibawl kamciamna a um mite in a ngah theih nadingin Lai Siangtho in mawhna sungah mi khempeuh a khumcip hi. ²³ Ahi zongin upna thu hong tun mateng thukham tawh thongkia bangin hong kicing a, a nungciang a hong kilang ding upna i neih theih nadingin a hong kikhumcip hi. ²⁴ Tua ahih manin upna tawh diktansakna i ngah theih nadingin thukham in Khazih kiangah hong kha naucingpa bang ahi hi. ²⁵ Ahih hangin upna thu hong tun ciangin tua naucingpa khut nuai ah i om nawn kei hi. ²⁶ Banghang hiam cihleh note khempeuh in Khazih Zeisu na up manun Pasian tate na hi uh hi. ²⁷ Banghang hiam cihleh Khazih sunga phumna a ngah note khempeuh in Khazih na silh uh hi. ²⁸ Note khempeuh in Khazih Zeisu sungah pumkhat na hih manun Judah mi, Greek mi, sila le silalo, numei le pasal cih zong na om kei uh hi. ²⁹ Khazih aa na hih uh leh Abraham suan le khakte na hi uh a, hong kamciamna bangin innluahte na hi uh hi.

¹ Tu in ken kong cih in ah innluahpa in na khempeuh a neipa ahih hangin naupang ahih laiteng sila tawh kilamdang lo hi. ² A pa in a seh hun a tun mateng a cingte le neihsa kemte khut nuai ah a om hi. ³ Tuamah bangin eite zong naupang i hihlai in leitung thumawlte nuai ah saltang in i om hi. ⁴ Ahih hangin a hun a cin ciangin numei sung panin thukham nuai‑a hong suak dingin Pasian in ama Tapa hong paisak hi. ⁵ Eite in tapa za i luah theih nadingin thukham nuai‑a om eite hong tankhia dingin a Tapa hong paisak ahi hi. ⁶ Tapate na hih manun Pasian in a Tapa Kha note lungsim sungah hong sawl a, “Abbaɠ, Pa aw!” na ci uh hi. ⁷ Tua ahih manin sila hi nawnlo in tapa na hih leh Khazih tungtawn in Pasian innluahpa na hi hi. ⁸ Ahih hangin Pasian na theihma un a pianlim in pasian a hilo nate na bia uh hi. ⁹ Ahi zongin tu in Pasian na thei khin uh a, Pasian in zong note a hong thei khinzo hi. Tua khit nungin a thazawm kimanna a neilo thumawlte lamah kiheikik in tuate sila suakkik nuam na hi uh hiam? ¹⁰ Note in nite, khate, khuahunte le kumte peuh na tang uh hi. ¹¹ Note aa dingin gimpi a ka sepna teng a mawkna a suahkhak ding ka lauthawng hi. ¹² Sanggamte aw, note banga kong om bangin note zong kei bangin hong om un ci in kong thum hi. Kei tungah gamtat khialhna bangmah na nei peuhmah kei uh hi. ¹³ A masa lai in pumpi cidam lopi in note kiangah lungdamna thu kong hilhlam na thei uh hi. ¹⁴ Ka pumpi damlohnate simmawhna le nialna in nong nei tuan kei uh a, ahi zongin Pasian vantungmite khat zah le Khazih Zeisu mahmah bangin nong sang uh hi. ¹⁵ Tualai a na lungdamna teng uh tu in bang suak peuhmah ahi hiam? Hi thei hi leh na mittang nangawn uh khelkhia in nong piak nop lamtak uh ka thei hi. ¹⁶ Tua hi a, thuman thutak kong gen manin note gal hong suak zawsop ka hi hiam? ¹⁷ Amaute in note a hong itbawl uh hangin, a hoihlam ahi kei hi. Hi hi, note in amaute na it nadingun note a hong khenkhiat sawm uh ahi hi. ¹⁸ Keimah in note tawh ka oma ka om kei zongin na hoih khat peuhpeuh ah na thalawp ding uh a hoih hi. ¹⁹ Ka taneute aw, note sung pan Khazih lim hong piankhiat theih mateng in nausuak ding bangin gimna ka thuak hi. ²⁰ Note hong lunghimawh mahmah ka hih manin tu laitak note kiangah hong omin ka kampauzia hong khel leng ka ut hi. ²¹ Thukham nuai‑a a omkik nuam mite aw, thukham in bang gen hiam cih thei lo na hi uh hiam hong gen dih un. ²² Abraham in tapa nih a nei hi. Khat pen a sila numei tawh a neih hi a, a dang khat pen sila a hilo numei tawh a neih ahi hi ci in kigelh hi. ²³ Sila numei tawh a neih a tapa pen ci le sa hanga piang hi a, sila a hilo numei tawh a neih a tapa in kamciamna hanga piang ahi hi. ²⁴ Tua nihte in genteh nadingin a piang hi a, thuciamna nihte a lak uh hi. Hagar in Sinai muala hong kipia sila suahna thu ahi hi. ²⁵ Hih Hagar in Arabia gama om Sinai mual hi a, a tate tawh sila a suak tu laitak a om Jerusalem khuapi tawh a kibang hi. ²⁶ Ahih hangin tunglam a om Jerusalem khuapi in eite khempeuh nu ahi sila a hilo numei ahi hi. ²⁷ Banghang hiam cih leh, “Nang, a tasel numei aw, Lungdam in! Nausuak gimna a thuak ngeilo numei aw, Awng inla kiko in! Banghang hiam cihleh pasal a nei numei sangin Kuama deihloh numei in ta a hau zaw hi,” ci in a kigelh hi. ²⁸ Tu in sanggamte aw, eite in Isaac bangin kamciamna tate i hi hi. ²⁹ Ahih hangin ci le sa hanga piang tapa in Kha hanga piang tapa tua hun lai a a bawlsiat mah bangin tu in zong a bawlsia hi. ³⁰ Ahi zongin Lai Siangtho in bang gen ahi hiam? “Sila numei le a tapa hawlkhia in. Banghang hiam cihleh silanu tapa in sila a hilo numei tapa tawh gamh luahkhawm theilo ding hi,” a ci hi. ³¹ Tua bangin sanggamte aw, eite in silanu tate hilo in sila a hilo numei tate i hi hi.

¹ Khazih in eite hong suaktasak khin ahih manin tua suahtakna ah kiptak in ding unla, sila suahna hakkol kisuankik nawn kei un. ² En un, keimah Paul in kong gen in ah vun na ki‑at uh leh Khazih in note aa dingin a mawkna a suak ding hi. ³ Vunat mi khatpeuh tunga teci kong pankik in ah thukham khempeuh zuih khit ding na leiba ahi hi. ⁴ Thukham zuihna hanga diksakna a ngah nuam mite aw, note in Khazih tawh kikhenkhia in hehpihna panin na puk khin uh hi. ⁵ Banghang hiam cihleh upna hanga thuman thutak tawh kipawl lametna thu Kha tungtawn in lawptak in i ngak hi. ⁶ Banghang hiam cihleh vunatna ahi a, vunatlohna ahi zongin, Khazih sungah kimanna nei loin itna hanga upna tawh nasepna in kimanna a nei hi. ⁷ Limtak in a tai khinsa na hi uh a, thuman thutak zuihna panin kua in hong khaktan ahi hiam? ⁸ Hi banga note a hong kizolna in note hong samkhiapa Pasian kiang pan ahi kei hi. ⁹ Silngo tawmcik in annel lomkhat a tawkzo hi. ¹⁰ Lungsim dang a neilo dingin Topa sungah note kong muang hi. Ahih hangin note hong buaisak mi peuhmah in thukhenna a thuak ding hi. ¹¹ Sanggamte aw, vunatna thu a hilh lai hi leng banghang in bawlsiatna thuak lai ding ka hi hiam? Tua hi leh singlamteh thu hanga buaina zong a om nawn kei ding hi. ¹² Note a hong buaisak mite in amau vunciat tankhia le uh ka ut hi. ¹³ Sanggamte aw, a suakta dingin a hong kisamkhia mite na hi uh hi. Ci le sa deihna zuih nadingin tua suahtakna zang kei unla, itna tawh khat le khat na kihuh un. ¹⁴ Banghang hiam cihleh, “Nang le nang na ki‑it bangin na vengpa na it in,” a cihna thukhat sungah thukham khempeuh a kicing khin hi. ¹⁵ Ahih hangin khat le khat kitawng kisel in na om uh leh na maimang khakloh nadingun na kidawm un. ¹⁶ Ken kong cih in ah Kha sungah na gamta un. Tua hi leh ci le sa lunggulhna na zui kei ding uh hi. ¹⁷ Banghang hiam cihleh ci le sa lunggulhna in Kha deihna tawh kituak lo a, Kha deihna in ci le sa lunggulhna tawh kituak lo hi. Na gamtat nop bangun na gamtat theihloh nadingun tua nihte khat le khat a kilehbulh den hi. ¹⁸ Ahi zongin Kha na kimakaihsak uh leh thukham nuai ah na om kei uh hi. ¹⁹ Tu in, ci le sa gamtatnate a kitel mahmah hi. Tuate in angkawmna, numei pasal mawhna, a kihhuai gamtatna, paktatna, ²⁰ milim biakna, dawi‑ai tawina, kimuhdahna, kitotna, kihazatna, kihehsuahna, angsungkhualna, kikhenna, upna maanlo neihna, ²¹ ki‑eenna, mithahna, zukhamna, gualnop uangtatnate a kipan tua bang namte ahi hi. Tua banga a gamtate in Pasian kumpigam a luah kei ding uh hi ci a, kong genngei bangin tu in zong kong genkik hi. ²² Ahih hangin Kha gahin ki‑itna, lungdamna, lungnopna, lungduaina, migitna, hoihna, cihtakna, ²³ lungnemna, pumpi ki‑ukzawhna cihte ahi hi. Tua thute tawh a kituaklo thukham a om kei hi. ²⁴ Khazih mite in ci le sa deihna le lunggulhna teng a khailum khinzo uh hi. ²⁵ Kha sunga nungta i hih leh Kha deihna bangin gamta ni. ²⁶ Kiphasak loin khat le khat kiphin loin ki‑eeng loin om ni.

¹ Sanggamte aw, mi khatpeuh mawhna sungah a pukkhak leh a khami note in lungnemna tawh na phong un. Ze‑etna sungah na puk khakloh nadingun kidawm un. ² Khat le khat van kipuakpih unla, tua bangin Khazih thukham na kicingsak un. ³ Banghang hiam cihleh mi khatpeuh bangmah hi hetlo napi a kithupi ngaihsut mawkmawk leh amah le amah a kikhem ahi hi. ⁴ Tua ahih manin a kuamah peuhin ama gamtatnate sittel hen. Tua hi leh midangte tawh kitehkak kul loin amah lungdam thei pah ding hi. ⁵ Banghang hiam cihleh kuamah peuhin ama van ciat mah a puak ding uh ahi hi. ⁶ Pasian thu a kihilh mipa in a hilh mipa tawh na hoih a neih khempeuh zangkhawm tahen. ⁷ Kuamah kikhemsak kei un. Pasian ciamnuih bawl theih ding hilo hi. Banghang hiam cihleh mi khatpeuh in ama vawh bangin a gah a at ding hi. ⁸ Ama ci le sa lunggulhna a vawh mi in ci le sa hanga muatna a at ding hi. Kha deihna a vawh mi in Kha hanga nuntak tawntungna a at ding hi. ⁹ Na hoih sep ding cimtak kei ni. Lungkia loin sem lehang a hun a tun ciangin a gah i at ding hi. ¹⁰ Tua ahih manin hun hoih i ngah simin mi khempeuh tung le a diakdiak in upna sunga i innkuanpihte tungah na hoih sem ni. ¹¹ Keima khut mahmah tawh note aa dinga kong gelh laimal golpipite en dih un! ¹² Amaute pumpi tawh kipawl minthanna a deih mite in Khazih singlamteh hangin bawlsiatna a thuak khakloh nading bek un note vunat dingin hong nak sawl ding uh hi. ¹³ Banghang hiam cihleh vunat ahi amaute nangawn in zong thukham zui lo napi in note vunatna a kisialhpih nop manun vunat ding a hong deih uh ahi hi. ¹⁴ Kei ka hih leh i Topa Zeisu Khazih singlamteh longal bangmah thu ah ka kisial kei ding hi. Tua Topa tungtawn in leitung in kei aa dingin kikhailum khin a, kei zong leitung aa dingin ka kikhailum khin hi. ¹⁵ Banghang hiam cihleh vunatna le vunatlohna in Khazih Zeisu sungah kimanna a nei kei hi. Mi thak suahna bekin kimanna a nei hi. ¹⁶ Hih thu bangin a gamta mite khempeuh tung le Pasian mi ahi Israel mite tungah lungmuanna le hehpihna thupha om tahen. ¹⁷ Ka pumpi ah Topa Zeisu hong ciaptehnate pua ka hih manin tu‑a kipan in kuamah in hong nawngkaisak nawn kei hen. ¹⁸ Sanggamte aw, i Topa Zeisu Khazih hong hehpihna thupha in note lungsim ah hong om tahen. Amen.