EPHESA-TE
11 Pasian deihna hanga Zeisu Khazih sawltak keimah Paul in Ephesus khua‑a om Khazih Zeisu sunga thu‑um mi, misiangthote kiangah lai kong khak hi. 2 I Pa Pasian le Topa Zeisu Khazih kiang panin a hehpihna thupha le lungnopna note tungah om tahen. 3 Khazih sunga om vantung khalam thupha khempeuh eite a hong pia i Topa Zeisu Khazih Pa, Pasian kiphat tahen. 4 Ama mai ah a siangtho le mawhsakna om lo dingin leitung pianma in ama sungah eite a hong teel zo hi. 5 Tuamah bangin ama lungkimna le ama deihna tawh kizui in Zeisu Khazih tungtawn in ama tate a suak dingin itna tawh eite hong sehkhol khinzo hi. 6 Tua in a vanglian ama hehpihna a kiphat theih nading hi a, tua hehpihna hangin ama Itpa sungah eite a hong sang zo hi. 7 A kicing mahmah ama hehpihna thupha tawh kizui in ama sisan hanga tatkhiatna ahi mawh maisakna ama sungah i ngah hi. 8 Amah in tua hehpihna thupha ahi ciimna le pilvanna namkim eite tungah kicingtak in hong pia zo hi. 9 Ama lungkimna bangin amahmah in a ngimsa ama deihna thusim eite a hong theisak zo hi. 10 Tua in a gelsa hunte a kicin ciangin vantung le leitung a om nate khempeuh Khazih nuai ah koih theih nading ahi hi. 11 Ama deihna le a ngimna zui in na khempeuh a sempa in ama ngimna tawh kizui in eite hong sehkhol khin ahih manin tua Khazih sungah gamhluahna i ngah zo hi. 12 Tua in Khazih a um masa kote hangin ama minthanna a kiphat theih nading ahi hi. 13 Note in zong note hotkhiatna lungdamna thu ahi thuman thutak na zak khit uh ciangin amah na up manun hong kamciamsa Kha Siangtho tawh ciaptehna a hong khen hi. 14 Pasian neihsa eite a hong kitatkhiat mateng tua Kha Siangtho in eite luahna kipsakna malep ahi hi. Tua in ama minthanna kiphat theih nading ahi hi. 15 Tua ahih manin Topa Zeisu na upna uh le misiangthote khempeuh na itna uh ka zak ni a kipan, 16 ka thungetna ah na min uh loin note aa dingin lungdam ka ko den hi. 17 Eite Topa Zeisu Khazih Pasian, a vanglian Pa in amah na theihtel nadingun khalam lungpilna le kilakna a hong piak nadingin thu ka ngen hi. 18 Na lungsim mit uh hong kivaksak a, note a hong sapna hanga lametna in bang hi a, misiangthote sunga ama neihsa kicing zihziahte bang hiam cih na theih nading uh leh, 19 a thahat mahmah ama vangliatna tawh na a sep bangin a um eite aa dingin ama vangliatna bangzah in khauh hiam cih na theih nading uh zong thu kong ngetsak hi. 20 Amah in tua vangliatna tawh Khazih sungah nasem in misite lak pan a thawhkiksak khit ciangin vantung ama taklam ah a tusak hi. 21 A zalianpente, thuneite, vangliatna neite, ukna a neite khempeuh le tuhun bek hilo in a hong tung ding hunah a kiphuak lai ding min khempeuh sangin a lianzaw thamin a koih hi. 22 Na khempeuh ama khenuai ah koihin pawlpi aa dingin amah na khempeuhte lutang a suaksak hi. 23 Pawlpi in ama pumpi hi a, na khempeuhte na khempeuh mah tawh a kidimsakpa kicinna ahi hi.
21 Nidanglai in note in thupalsatnate le mawhnate sungah a si na hi uh hi. 2 Tu laitak a thu a manglo mite sungah na a sem kha huihlak a thuneipa deihna bangin hih leitung paizia zui in na nungta ngei uh hi. 3 Eite khempeuh zong a beisa hunin tua mite bangmah in ci le sa lunggulhna le ngaihsutnate zui in, ci le sa lunggulhnate i tangtungsak hi. Midangte mah bangin i pianlim in hehna tate i hi hi. 4 Ahih hangin hehpihna kicing a nei Pasian in itna lianpi tawh eite a hong it hi. 5 Tua ahih manin mawhna sungah si a, i om laitak nangawn in Khazih tawh hong hing khawmsak a (hehpihna thupha hangin hotkhiatna na ngah uh hi), 6 Pasian in amah tawh hong tho khawmsak in Khazih Zeisu sungah vantung ah amah tawh a hong tu khawmsak hi. 7 Tua in Khazih Zeisu sunga ama migitna tawh a hong lahkhiat gen zawhloh a kicing ama hehpihna thupha a hong tung ding hunte ah a hong lah theih nading ahi hi. 8 Banghang hiam cihleh hehpihna thupha hangin upna tawh hotkhiatna na ngah uh hi. Note thu in hotkhiatna a ngah na hi kei uh hi. Hih in Pasian letsong ahi hi. 9 Kuamah a kisialh khakloh nadingin sepnate hang hilo hi. 10 Banghang hiam cihleh Pasian in eite sep dinga a koihsa na hoihte a sem dingin Khazih Zeisu sunga hong piansak ama bawlsate i hi hi. 11 Tua ahih manin nidanglai in ci le sa lamah Gentile‑te na hih lam uh le a pumpi vuntep uh a khut tawh a tan mite in vunatloh mi a hong cih mite na hih lam uh kiphawk un. 12 Tua hun lai in note in Khazih na nei kei uh a, Israel mipawl na hi kei uh hi. Kamciam tawh kipawl thuciamnate in hong huam kha loin, leitung ah lamet bei in Pasian nei loin na om uh hi. 13 Ahih hangin nidanglai in a gamlapi a om note tu in Khazih Zeisu sungah na om uh a, Khazih sisan in a naina munah hong tunzo hi. 14 Banghang hiam cihleh Khazih in eite kilemna ahi hi. Amah in minam nihte kikal a a hong khen kidalna kawm phelkhia in minam khat a hong suaksak hi. 15 Amah in ei minam nihte ama sungah mi thak khat a hong suahsak nadingin eite a hong kigalbawlsak thukham sunga om thupiakte le thukhunte ama pumpi tawh paikhia in kilemna a hong bawlsak hi. 16 Tua ciangin tua minam nihte pumpi khat sungah Pasian tawh a hong kilemkiksak theih nadingin Khazih singlamteh tungtawn in tua kigalbawlna a sisak hi. 17 Gamlapi a om note le a nai‑a om amaute kiangah amah hong pai in kilemna thu a hong hilh khinzo hi. 18 Tua ahih manin ei minam nihte in ama tungtawn in Kha khat bek tawh Pa kiang i naih theita hi. 19 Tua ahih manin tu in khualmi le gamdang mi na hi nawn kei uh hi. Misiangthote tawh gam mi khat hikhawm in Pasian innkuanpihte na hi uh hi. 20 Tua innkhuam bulpi ahi sawltakte le kamsangte tungah note hong kilam a, innkiusuang in Zeisu Khazih ahi hi. 21 Tua inn buppi Khazih sungah kilemkhawm in khangto a, Topa sunga a siangthopen biakinnpi ahi hi. 22 Kha tungtawn a Pasian teenna a suak dingin note zong tua Topa sungah a kilamkhawm na hi uh hi.
31 Hih thu hangin keimah Paul in Khazih Zeisu hangin no Gentile‑te aa dingin thongkia ka hi hi. 2 Pasian in ama hehpihna thupha tawh kipawl nasepna note aa dingin kei a hong piakna thu na zaksa uh, 3 Pasian in tua thusim ka tungah pulak in hong theihsakna tawh kizui in (nunglam a lai tomno khat kong gelh mah bangin, 4 tua lai na sim uh ciangin Khazih tawh kisai tua thusim ka theihtel lam na thei ding uh hi), 5 tua thusim in a siangtho ama sawltakte le kamsangte tungah Kha tawh tu‑a a pulak bangin hundang a mihing tate tungah a kipulak ngei kei hi. 6 Tua thusim in Gentile‑te in Israelte tawh gamh luahkhawm in pumpi khat suakkhawm uh a, Pasian in Khazih sunga a kamciam lungdamna thu tungtawn in a ngahkhawmte ahih nading uh ahi hi. 7 Ama vangliatna tungtawn in a tuam vilvel a Pasian in ama hehpihna thupha letsong kei hong piakna tawh kizui in tua lungdamna thu a gen nasempa khat ka suak hi. 8 Misiangtho khempeuh laka a neupen sanga a neuzaw lai keima tungah Pasian in hih hehpihna thupha hong pia zo hi. Tua in a kimukhia zolo Khazih hauhna thu Gentile‑te ka hilh theih nading ahi hi. 9 Tua banah ama gelna thusim bang hiam cih mi khempeuh ka theihsak nading zong ahi hi. Tua thusim pen a kipatcil a kipan na khempeuh Zeisu Khazih tungtawn in a piangsakpa Pasian sungah a kiselsuak ahi hi. 10 Vantung lama om a zalianpente le a vangliante tungah tu huna Pasian pilna tampite, pawlpi in a theihsak theih nading deihna ahi hi. 11 Hih in i Topa Khazih Zeisu sunga Pasian in a zawhsa, a tawntung a ama ngimna bangin a piang ahi hi. 12 Amah upna tungtawn in eite in hangtak le lungmuangtak in Pasian kiang i zuan thei hi. 13 Tua ahih manin note minthanna ahi note aa dingin ka thuak gimnate ah na lungkiat loh nadingun kong thum hi. 14 Hih thu hangin i Topa Zeisu Khazih Pa kiangah khukdin in thu ka ngen hi. 15 Ama tungtawn in leitung le vantung a om innkuan buppi min kipia a, 16 ama vangliatna tawh kizui hauhna hong piak theih nading ama Kha tungtawn in note sunglam mi thahatna tawh hong thakhauhsak nading, 17 upna tungtawn in note lungsim sungah Khazih hong teengin, itna ah note zung hong khasak a, hong kiphuhkip nading, 18 ama hong itna a zaizia, a sauzia, a thukzia, le a sanziate, misiangtho khempeuh in a theih banga na theihtel nading uh le, 19 a kithei khin zolo Khazih hong itna thei in Pasian kicinna khempeuh tawh na kidim nadingun thu kong ngetsak hi. 20 Tu in eite sunga nasem ama vangliatna tawh kizui in i ngetna le i ngaihsutna sangin a zah tampi a semthei pa tungah 21 minthanna, pawlpi sungah Khazih Zeisu hangin a khang a khang in om tawntung tahen. Amen.
41 Pasian hong sap mite na hih manun tua sapna tawh a kilawm a kituak in na gamtat nadingun Topa hanga thongkiapa ahi keimah in kong thum hi. 2 Na khempeuh ah kiniamkhiat un. Thunem in lungduai unla, itna tawh khat leh khat kithuak keikai un. 3 Kilemna tawh Kha hanga kipumkhatna na letkip nadingun na hanciam un. 4 Lametna khat bek sunga hong kisam na hih manun pumpi khat, Kha khat, 5 Topa khat, upna khat, tuiphumna khat bek a om hi. 6 Na khempeuh tunga a om, na khempeuh a zel a tawk, note khempeuh sunga a om, mi khempeuh Pa, Pasian khat bek a om hi. 7 Khazih hong hawmsak letsong tawh kizui in eite khat ciat tungah hehpihna thupha hong kipia zo hi. 8 Tua ahih manin amah in, “A sang munah a kahtoh ciangin Sal honpi paipih a, Mite tungah letsongte a pia hi,” a ci hi. 9 (Amah kahto hi a cih ciangin leinuai tawngah kumsuk masa hi a cihna hilo ahi hiam? 10 A kumsukpa in na khempeuh a kicingsak dingin vantungte khenga a kahtopa mah ahi hi.) 11 Tua hi a, amah in mi pawlkhatte sawltak ding, mi pawlkhatte kamsang a thu a hilh ding, mi pawlkhatte lungdamna thu a tangko ding, mi pawlkhatte pawlpi sia le thuhilh sia dingin a suaksak hi. 12 Pasian na a sep theih nadingun misiangthote kigingkholsak in Khazih pumpi a lamkip theih nading uh ahi hi. 13 Eite khempeuh in upna le Pasian Tapa theihtelna ah pumkhat suakin picing a, Khazih kicinna zah i tun mateng, 14 mite in khemna tawh lam hong khialhsak theih nadingin khelpilna tawh a gel uh thuhilhnate in huih bangin a sukmut a tomut theih naupangte bang i hi nawn kei ding hi. 15 Tua ahih ciangin lutang ahi Khazih sungah na khempeuh ah i khantoh nadingin ki‑itna tawh thuman thutak gen ni. 16 Tua lutang panin pumpi na a tuamtuamte in kituaktak in kizom a, amaute limtak in a kizop dimdiamna hangin pumpi pen pumkhat a suak thei hi. Pumpi na a tuamtuamte in amau sep ding ciat a sep uh ciangin ki‑itna ah pumpi khangin a cingtak a suak thei hi. 17 Tua ahih manin Topa mina kong gen le kong thum thu in Gentile‑te in a haihuai amau lungsim ngaihsutna uh zui in a gamtat bangun note na gamta nawn kei un. 18 Amaute lungsim mialcipna le amaute awlmawhlohna hangin Pasian hong piak nuntakna tawh kikhen uh a, amaute theihtheihna a mialcip hi. 19 Amaute in zumtheihna nei nawnlo uh a, a kihhuai namkim tawh kidiah in numei pasal thangtatna lamah a uang semsem dingin a kipumpiak uh hi. 20 Ahih hangin note in Khazih na theihzia uh tua bang ahi kei hi. 21 Zeisu sunga a om thuman thutak hong kihilhsa le na zaksa uh mah bangin, 22 khemna tawh kidim lunggulhna hanga kisia, nidang a na mi lui gamtatnate uh suahkhia in, 23 na lungsim uh thaksak unla, 24 Pasian in dikna le sianthona taktak tawh amah banga a piansak mi thak na silh un. 25 Tua ahih manin zuauthu gen loin “i veng i pamte tungah thuman gen ciat ni.” Banghang hiam cihleh pumpi tunga om nate i hi ciat hi. 26 “Na heh uh zongin khial kha kei un.” Na hehna uh dam loin, ni tumsak kei unla, 27 Dawimangpa mun na pia kei un. 28 A guta mi in gu nawnlo in kisapna a nei mite a piakzawh nadingin nasep hoih khatpeuh a khut tawh semin hanciam hen. 29 Note kam sung panin kam hoihlo pusuaksak kei unla, a za mite a phatuamsak ding amaute kilamkipna a piangsak ding thuhoih bek gen un. 30 Tatkhiatna ni dong note a hong kiciaptehna ahi Pasian Kha Siangtho na dahsak kei un. 31 Kilungsim neihna, thangpaihna, hehna, kitot kiselna, kigensiatna le kisiatsak nopna lungsim khempeuh paikhia un. 32 Khat le khat na kihehpih un, lungnemna tawh na kiho unla, Pasian in Khazih hanga note mawhna a hong maisak bangin note zong khat le khat mawhna na kimaisak un.
51 Tua ahih manin it tate bangin Pasian tatzia etteh un. 2 Khazih in eite a hong it manin eite aa dingin amahmah a kipiak bangin itna tawh gamta un. Eite aa dingin namtui biakpiak nading amahmah biakpiakna le gangawh biakpiakna in Pasian tungah a kipia hi. 3 Numei pasal mawhna, a siangtholo na khat peuhpeuh ahi a, huaihamnate ahi zongin misiangthote tawh kituak lo ahih manin note sungah genin zong nei kei un. 4 A kilawmlo kampau, a haihuai kampau, ciamnuih thanghuaite ahi zongin zat ding kilawm lo ahih manin zang loin lungdamkohna kamte na zang zaw un. 5 Banghang hiam cihleh numei pasal mawhna a bawl mi, a siangtholo a a gamta mi, milim bia ahi, a huaiham mipa khat beekin Khazih le Pasian kumpigam sungah bangmah a luah kei ding uh hi cih na thei uh hi. 6 Thu ginalo tawh mi khemsa in om kei un. Banghang hiam cihleh tua bang thute hangin thu a manglo mite tungah Pasian hehna a tung hi. 7 Tua ahih manin tua bang mite tawh na kipawl kei un. 8 Nidanglai in khuamial sungah na om uh hangin tu in khuavak sungah na om uh hi. Tua ahih manin khuavak tate bangin gamta un. 9 (Banghang hiam cihleh Kha gahin hoihna, dikna le thuman khempeuh ahi hi.) 10 Topa lungkimna in bang ahi hiam ci in zong un. 11 Phattuamna a om lo khuamial gamtatnate tawh kipawl loin tua gamtatnate a hoihlohna na pholakkhia zaw un. 12 Banghang hiam cihleh a simtham in a gamtatnate uh kam a gen ding nangawn in zong a zumhuai hi. 13 A kilangkhia khempeuh khuavak in a kilatsak ahih mah bangin a kipholak khempeuh zong khuavak in a pholak ahi hi. 14 Tua ahih manin amah in, “A ihmu mi aw, khanglo inla, Misite lak pan thokhia in. Tua hi leh nang tungah Khazih hong tang ding hi,” a ci hi. 15 Mihai bangin gamta kei unla, mipil bangin pilvangtak in gamta un. 16 Hun le nite sialua ahih manin hun hoihte khahsuah kei un. 17 Tua ahih ciangin mihai bangin om kei unla, Topa deihna bang ahi hiam ci in theitel un. 18 Hong uangtatsak thei lenggahzu kham kei unla, Kha tawh kidim zaw un. 19 Pasian phatna late, biakna late le khalam late tawh khat le khat na kipaih unla, note lungsim sungah Topa phatin lasa un. 20 Na khempeuh ah i Topa Zeisu Khazih min tawh Pa Pasian tungah lungdam na ko tawntung un. 21 Pasian kihtakna lungsim tawh khat le khat thu na kimang un. 22 Zite aw, Topa thu na man mah bangun na pasalte uh thu na mang un. 23 Banghang hiam cihleh Khazih in pawlpi lutang hi a, pumpi a Honpa ahih mah bangin pasal zong a zi lutang ahi hi. 24 Tua ahih ciangin pawlpi in Khazih thu a man bangin zite in zong thu khempeuh ah a pasalte uh thu a man ding uh ahi hi. 25 Pasalte aw, Khazih in pawlpi it a, pawlpi aa dingin amahmah a kipumpiak bangin note in zong na zite uh na it un. 26 Thu tawh tui a sawp bangin Khazih in pawlpi sawpsiang a, a sianthosak theih nadingin, 27 kawkbanglo, hemna le hoihlohnate khat beek a omlo, a siangtho le mawhsakna omlo, a minthang pawlpi, amah le amah a kipiak theih nading ahi hi. 28 Tua ahih manin pasalte in amau pumpi banglianin a zite uh it uh hen. A zi a it mi in amahmah a ki‑it ahi hi. 29 Banghang hiam cihleh kuamah in ama pumpi a mudah ngei kei hi. Topa in pawlpi vakin a kep a huai bangin mihing in zong ama pumpi vakin a kem hi. 30 Eite in ama pumpi nate ama sa le a guh a tangte i hi hi. 31 “Hih thu hangin pasal in a nu le a pa nusia in a zi tawh kigawm dinga, Amaute gel pumkhat sakhat a suak ding uh hi.” 32 Hih in thusim lianpi hi a, Khazih le pawlpi tawh kisai a gen ka hi hi. 33 Ahi zongin note khatpeuh in amah le amah a ki‑it bangin a zi it henla, a zi in zong a pasal zahtak hen.
61 Tate aw, Topa sungah na nu na pate uh thu na mang un. Banghang hiam cihleh hih in thuman ahi hi. 2 “Na nu le na pa zahtak in,” cih thu in kamciam tawh a kithuahkhawm thupiak masa pen hi a, 3 “na nu na pa zahtak lecin leitung ah nuamsa in na khansau ding hi.” 4 Pate aw, na tate uh a heh nadingun phin kei un. Topa thu tawh hilhin pantah unla, khansuah un. 5 Silate aw, Khazih thu na man mah bangun ci le sa a na tote uh thu zong lau le ling kawmsa in lungsim takpi tawh na mang un. 6 Mihing mai‑et in amaute hong muh sung beka thumangte hilo in, lungsim takpi tawh Pasian deihna a zui Khazih silate bangin nasem un. 7 Mihingte nasem bang hilo in Topa nasem bangin deihsakna tawh na sem un. 8 Sila ahi a, silalo ahi zongin a hoih a sem mi khempeuh Topa in a hoih pia ding hi cih thu na thei uh hi. 9 Tote aw, note in zong na silate uh tungah tua bangin bawl un. Note Topa zong vantung ah om a, amah in kuamah deidan neilo hi cih thu thei unla, na silate uh lausak in tawnbawl kei un. 10 A nunungpen in sanggamte aw, Topa le a vanglian ama hatna sungah thakhauh un. 11 Dawimangpa hong sawmnate na nanzawh nadingun Pasian hong piak galvante a kimin na silh un. 12 Banghang hiam cihleh si le sa tawh kido i hi kei a, a zalianpente, a thuneite, tulai leitung khuamial a ukte le van lam a dawigilo honpite tawh a kido i hi hi. 13 Tua ahih manin hunsiate nang zo in na khempeuh zo a, na dinkip zawh nadingun Pasian hong piak galvante a kimin silh un. 14 Tua ahih manin thuman thutak kawnggak gak unla, dikna sik awmdal bulhin, 15 kilemna tawh kipawl lungdamna thu kiginkholhna khedap bulh unla, dingkip un. 16 Tua galvan khempeuh banah gilopa hong kapna meikuang thaltang khempeuh a mitsak zo ding upna lum na tawi un. 17 Hotkhiatna sik lukhu khu unla, Pasian kammal ahi Kha namsau tawi un. 18 Kha sungah a tawntung in thungetna nam khempeuh le deih ngetnate na ngen un. Hih bangin pilvangtak in omden unla, misiangthote khempeuh aa ding tatsat loin thungetsak un. 19 Kei aa dingin Pasian in ka gen ding thute hong pia a, a kiselcip ahi lungdamna thu hangtak a ka genngam nadingin thu hong ngetsak un. 20 Banghang hiam cihleh lungdamna thu hangin tangmi khat ka hihna hangin mat le hen ka thuak hi. Hih bangpi mah in ka gen dinga kilawm bangbang hangtak in ka gen theih nadingin thu hong ngetsak un. 21 Ka vai teng le ka nasepzia teng na theih nadingun Tychicus in hong gen ding hi. Amah pen Topa nasem muanhuai ka it sanggampa khat ahi hi. 22 Ka vai teng uh na theih nading uh le amah in note tha hong piak theih nading ngimna tawh amah kong paisak ahi hi. 23 Pa Pasian le Topa Zeisu Khazih in sanggamte tungah lungmuanna le upna tawh kipawl ki‑itna hong pia tahen. 24 Lungsim takpi tawh i Topa Zeisu Khazih a it mi khempeuh tungah hehpihna thupha hong tung tahen. Amen.