COLOSSE-TE

COLOSSE-TE

¹ Pasian deihna hanga Zeisu Khazih sawltak keimah Paul le i sanggampa Timothy in, ² Colosse khua‑a om, Khazih sunga misiangthote le a citak sanggamte lai kong khak uh hi. I Pa Pasian le i Topa Zeisu Khazih kiang panin hehpihna thupha le lungnopna note tungah hong om tahen. ³ Kote in i Topa Zeisu Khazih Pa, Pasian tungah note aa dingin thu kong ngetsak sim un lungdam ka ko den uh hi. ⁴ Khazih Zeisu na upna uh le misiangthote khempeuh na itna uh thu ka zak man uh ahi hi. ⁵ Pasian in note aa dingin vantung ah lametna hong koihsak zo a, thuman thutak ahi lungdamna thu panin tua thu na zazo uh hi. ⁶ Tua lungdamna thu leitung mun khempeuh ah hong gahkhia in a khan mah bangin Pasian hehpihna thupha maantak za in na theih ni uh a kipan note kiangah zong a hong tungzo hi. ⁷ Kote naseppih ka it mahmah uh Epaphras tung panin tua thu na zazo uh hi. Amah in note septang in Khazih nasem mi muanhuai ahi hi. ⁸ Amah in Kha sunga na ki‑itna uh kote tungah a hong gen hi. ⁹ Hih thu hangin ama deihna theitel in khalam pilna le khalam thutheihna khempeuh tawh na kidim nadingun hih thu ka zak ni uh a kipan tatsat loin thu ka hong ngetsak uh hi. ¹⁰ Topa tawh a kilawm gamtatna nei in na khempeuh ah amah lungdamsak in, nasep hoih khempeuh ah gahsuah in Pasian theihna ah na khan semsem nadingun thu kong ngetsak uh hi. ¹¹ Lungduai in kipak a na thuak zawh nadingun, a vanglian ama thahatna tawh kizui in vangliatna khempeuh tawh note hong kithakhauhsak hen. ¹² Khuavak sunga om mi siangthote luah ding, a ngah dinga kilawm mi a hong suaksak, i Pa tungah lungdam ka ko uh hi. ¹³ Amah in khuamial ukcipna panin eite hong honkhia in, a it a Tapa kumpigam sungah a hong tunzo hi. ¹⁴ Ama sisan hanga tatkhiatna ahi mawh maisakna, tua Tapa sungah i ngah hi. ¹⁵ Tua Tapa in a kimu theilo Pasian lim le mel hi a, a kipiangsak khempeuh lak pan a masa pen ahi hi. ¹⁶ Vantung le leitung a om, a kimu thei le a kimu theilo, kumpi tokhomte ahi a, uknate ahi a, zaliatnate le thuneihnate ahi zongin tua Tapa tungtawn in a kipiangsak ahi hi. Na khempeuh in ama tungtawn le ama aa dingin a kipiangsak ahi hi. ¹⁷ Na khempeuh a omma in amah om a, ama sungah na khempeuh a om hi. ¹⁸ Amah in pumpi, pawlpi Lutang ahi hi. Amah na khempeuh ah a lianpen ahih nadingin a kipatna le a bul hi a, misite lak panin a thokik masa pen ahi hi. ¹⁹ Banghang hiam cihleh Pasian in ama kicinna khempeuh Tapa sunga a om ding le, ²⁰ Tapa tungtawn in leitung le vantung a om na khempeuh, amahmah tawh a kilemkik ding a deih hi. Tua ahih manin ama singlamteh tung pana hong luangkhia a sisan tungtawn in na khempeuh tawh kilemna a bawl zo hi. ²¹ Khatvei lai in Pasian tawh na kikhen uh a, note sep gitlohnate hangin na lungsim sung uhah Pasian galte na hi uh hi. Ahi zongin tu in amah in hong kilemkiksak zo hi. ²² Tua in Khazih in pumpi sihna a thuakna hang hi a, Pasian mai ah mawhsak nading omlo, a kawkbanglo, a siangtho in note a hong piak theih nading ahi hi. ²³ Tua bang a hih theih nadingin upna ah kip in, zung kha in, kiptak in ding unla, na zaksa na lamet uh lungdamna thu panin kihei kei un. Tua lungdamna thu in van nuai‑a om khempeuh tungah a kihilh thu hi a, keimah Paul zong tua thu a gen nasem mi khat ka hi hi. ²⁴ Tu in, note aa dingin gimna ka thuak manin ka lungdam hi. Tua banah Khazih in a thuak khitloh a kisam lai gimnate ka pumpi tawh thuaka ka kicinsak theih manin ka nuam hi. Tua ka thuakna in Khazih pumpi ahi pawlpi aa ding ahi hi. ²⁵ Pasian in tua pawlpi aa dingin neihsa kem za hong piakna tawh kizui in, nasem khatin hong koihzo a, Pasian thu a bukim in kong hilh theih nading ahi hi. ²⁶ Tua thusim khang tampi le hun sawtpi sung kiselcip a, ahi zongin tu in ama misiangthote tungah a hong lakkhia ta hi. ²⁷ Hih thu kiselsim vangliatna kicinna in bang hiam cih Gentile‑te lakah a kitheih nadingin Pasian in a deih hi. Tua a kiselsim thu in Khazih note sunga om, vanglian lametna pen ahi hi. ²⁸ Khazih Zeisu sungah mi khempeuh a picing a suah theih nadingun pilna namkim tawh mi khempeuh thu ka hilh uh a, kidophuai thute zong theisak in Khazih thu ka tangko uh hi. ²⁹ Tua bang a pian theih nadingin amah in keima sungah thakhauhtak in na a hong sep mah bangin kei zong nakpitak in na ka sem hi.

¹ Note le Laodicea khua mite a kipan ka mel a hong mu ngeilo mi khempeuh aa dingin ka hanciam tentanna na theih ding uh ka deih hi. ² Na lungsim uh thahat in, itna tawh khat le khat kikhihkhawm in, thu theitel in, Pa le Khazih tawh kisai a kisel Pasian thusimte cingtak a, na theih sinsen nading uh ka tupna ahi hi. ³ Tua Khazih sungah a manpha pilna le theihna khempeuh kisel in a om hi. ⁴ Tu in kuamah in kamsiam tawh note a hong khem zawhloh nadingin hih thu kong gen hi. ⁵ Banghang hiam cihleh note lakah ka pumpi tawh kong om theihloh hangin ka lungsim tawh kong om a, hoihtak a na omzia uh le Khazih na upzia uh a kipna ka muh manin ka lungdam mahmah hi. ⁶ Tua ahih manin Topa Khazih Zeisu na san khit mah bangun ama deihna bangin gamta un. ⁷ Ama sungah zung kha in kilamkip un. Hong kihilhna sa a om bangin upna ah kip unla, lungdamkohna na hat semsem un. ⁸ Mite ngeina le leitung tawh kipawl thuguipite in Khazih hong hilh thute tawh kituak lo ahih manin mihing ngaihsut pilna le kimanna omlo thu tawh kuamah in a hong khem zawhloh nadingin na kikem un. ⁹ Banghang hiam cihleh Pasian pianzia khempeuh Khazih pumpi sungah hong om hi. ¹⁰ Note in zaliatna le thuneihna khempeuhte lutang ahi tua Khazih sungah kicing in na om uh hi. ¹¹ Khazih hong vunatna hangin ci le sa mawhna pumpi paikhia in khut tawh a ki‑atlo vunatna tawh ama sungah vun ki‑atte na hi uh hi. ¹² Tuiphumna ah amah tawh kivuikhawm in misite lak pan amah a thokiksak Pasian vangliatna, na upna uh tungtawn in amah tawh na thokik zo uh hi. ¹³ Note in mawhna sungah si in ci le sa a vunatlote na hih laitak un Pasian in amah tawh hong hing khawmsak zo a, na mawhna khempeuh uh hong maisak zo hi. ¹⁴ Amah in eite a hong langpan a hong lehdo, khut tawh a kigelh thukhunte phiatmai in lakhia a, singlamteh ah a kilhcip khinzo hi. ¹⁵ Amah in zaliatnate le thuneihnate susia in tuate tungah a gualzawhna mipi muhin singlamteh tungah a lakkhia hi. ¹⁶ Tua ahih manin annek tuidawn a kipan, biakna pawi, khadet pawi le sabbath nite tawh kisai in note tungah kuamah thu kikhensak kei un. ¹⁷ Tuate in a hong pianglai ding nate lim hi a, a taktak pen Khazih ahi hi. ¹⁸ Kiniamkhiatna maanlo nuam a sate, vantungmi a biate, a muh ngeilohpi uh a mawk gengente, ci le sa lungsim tawh a kisathei mite, na thaman uh kisutkhiasak kei un. ¹⁹ Tua mite in Lutang ahi Khazih tawh a kizom kei uh hi. Tua Lutang panin pumpi buppi in guh le tangte le thaguite tawh kizomkhawm in thahatna ngah a, Pasian in a khansak bangbang in a khangto hi. ²⁰ Tua ahih manin note in leitung thuguipite na zuihna panun Khazih tawh sikhawm khinzo na hih uh leh banghang in leitung ah a nungta laite bangin, ²¹ “Lawng kei in, ciam kei in, len kei in,” ²² cih thukhunte banghang in zui lailai na hi uh hiam? Tuate in mihingte thukham le thuhilhna bek hi a, tuate zuihna in sihna a piangsak hi. ²³ Tuate in pilna maan tawh a kibat hangin phuahtawm biakna ahi hi. Kiniamkhiatna maanlo le pumpi gawtna hi a, ci le sa deihna kham nadingin kimanna a nei kei hi.

¹ Tua ahih ciangin Pasian in Khazih tawh note hong thosak khinzo ahih leh Pasian taklam, Khazih tutna mun ahi tunglam a om nate na zong un. ² Tunglam a om nate lunggulh unla, leitung a om nate lunggulh kei un. ³ Banghang hiam cihleh a si khin na hi uh a, note nuntakna in Pasian sungah Khazih tawh kiselkhawm in a om hi. ⁴ I nuntakna ahi Khazih hong kilat ciangin, note zong amah tawh minthang in na kilangkhawm ding uh hi. ⁵ Tua ahih manin leitung pumpi deihna ahi numei pasal thangtatna, a siangtholo gamtatna, iiplahna, a hoihlo lunggulhna le huaihamnate ahi milim biaknate sisak un. ⁶ Banghang hiam cihleh tua mawhnate hangin a thumanglo mite tungah Pasian hehna a tung hi. ⁷ Note zong nidanglai in tua mawhnate sungah bual in na nungta ngei uh hi. ⁸ Ahih hangin tu in hehna, thangpaihna, midangte siatsak nopna, gensiatna le a kihhuai kampaunate paikhia un. ⁹ Khat le khat na kikhem kei un. Banghang hiam cihleh note in mi lui le mi lui gamtatna teng na paikhia khin uh a, ¹⁰ mi thak a piangsakpa in ama lim le mel tawh kituak in theihna lamah a kithaksuaksak mi thak na silh khin uh hi. ¹¹ Tua bawlthakna sungah Greek mi, Judah mi, vunat mi, vunatloh mi, Greek mi a hilo, Scythia mi, sila mi, silalo mi cih a om kei hi. Khazih in na khempeuh hi a, na khempeuh sungah a om hi. ¹² Tua ahih manin Pasian teel mite, a siangtho le itna a ngah mite na hih manun hehpihna, migitna, kiniamkhiatna, lungnemna le lungduainate na silh un. ¹³ Khat le khat kithuak zo unla, mawhna kimaisak un. Kilungkim lohna na neih uh leh Khazih in note mawhna a hong maisak bangin na kimaisak un. ¹⁴ Tuate khempeuh banah note pumkhat a hong suaksak ki‑itna na silhthuah un. ¹⁵ Pasian kiang pana hong pai lungnopna in na lungsim uh hong uk tahen. Pasian in tua bang dingin pumpi khat sungah a hong sap mite na hih manun na lungdam un. ¹⁶ Khazih thu in note sungah pilna namkim tawh dimtak in hong teeng henla, phatna late a kipan, biakna late, kha tawh kipawl late tawh khat le khat thu kihilh tha kipia in na lungsim uhah lungdamtak in Topa na phat un. ¹⁷ Na kampauna uh ahi a, na gamtatna uh ahi zongin nasep na bawl khempeuh uh Topa Zeisu minin sem unla, ama tungtawn in Pa Pasian tungah lungdam na ko un. ¹⁸ Zite aw, na pasalte uh thu na mang un. Tua in Topa sungah a kilawm thu ahi hi. ¹⁹ Pasalte aw, na zite uh it unla, amaute tungah gamhtat kei un. ²⁰ Tate aw, na khempeuh ah nu le pa thu na mang un. Banghang hiam cihleh hih in Topa a lungkimsak hi. ²¹ Pate aw, na tate uh phin kei un. Amaute lungkia kha ding uh hi. ²² Silate aw, na khempeuh ah ci le sa a na tote uh thu na mang un. Maipha ngahpak nadingin amaute hong muh sung bek a thumangte hilo in Pasian kihta in lungsim takpi tawh thu na mang un. ²³ Mihingte nasem bangin kingaihsun kei unla, Topa nasem bangin kingaihsun in na sep peuhpeuh uh lungsim takpi tawh sem un. ²⁴ Topa Khazih nasem na hih manun, ama tung pan pahtawina in gamhluahna na ngah ding uh hi cih thei un. ²⁵ Ahih hangin amah in khialhna a bawl khempeuh kuamah deidan tuam nei loin a khialhna tawh kituak in a thukkik ding hi.

¹ Tote aw, note in zong vantung ah Topa khat na neih lam uh phawk unla, na silate uh thuman le a kilawm bangin bawl un. ² Lungdamna tawh kikem kawm in thunget hahkat tawntung un. ³ Sikkhau bulh ka thuaklawhna ahi, a kiselsim Khazih thuthukpi ka gen theih nadingin Pasian in kong hong honsak nading thu hong ngetsak un. ⁴ Gen dinga kilawm bangin teltak a thu ka lahkhiat theih nadingin zong thu hong ngetsak un. ⁵ A pualam mite tawh na kizop uh ciangin pilvangtak in gamta unla, hun hoihte khahsuah kei un. ⁶ Mi khatpeuh hong hopihnate maantak in na dawnkik theih nadingun note kampauna khempeuh ah ci bangin a al kamhoih na zang un. ⁷ Topa na ka sepkhoppih, a muanhuai nasempa ahi ka it sanggampa Tychicus in ka omzia khempeuh a hong gen ding hi. ⁸ Note omzia teng a thei ding le note lungsim tha a hong pia dingin amah kong paisak hi. ⁹ Note mipih khat ahi, a muanhuai le ka it sanggampa Onesimus zong amah tawh kong paikhawmsak hi. Hihlai a thupiang khempeuh amaute in hong gen ding uh hi. ¹⁰ Ka thongkiatpih Aristarchus le Barnabas tupa Mark in note hong hopih uh hi. Mark tawh kisai kong gensa thute thei khin na hih manun note kiangah a hong pai leh amah na sang un. ¹¹ Justus a kici Zeisu in zong note hong hopih hi. Pasian kumpigam aa dingin vunat mite sung pan na ka seppih le tha hong pia amauteng bek ahi hi. ¹² Note mipih ka lawmpa khat ahi Khazih sila Epaphras in zong hong hopih hi. Pasian deihna khempeuh zui in picingtak a na dinkip theih nadingun amah in hanciam in nakpitak in thu hong ngetsak den hi. ¹³ Banghang hiam cihleh note aa ding, Laodicea khua mite aa ding le Hierapolis khua mite aa dingin hanciamtak in na a sem hi cih thu keimah in ka theihpih hi. ¹⁴ Ka it mahmah siavuanpa Luke le Demas in zong note hong hopih uh hi. ¹⁵ Laodicea khua‑a sanggamte, Nymphas le a inn sunga kikhawm thu‑umte na hopihsak un. ¹⁶ Tu in hih laikhak na sim khit uh ciangin Laodicea khua pawlpite zong na simsak unla, tua mah bangin Laodicea khua pawlpite ka laikhak zong na sim un. ¹⁷ Archippus kiangah, “Topa hong piak nasep na tangtun zawh nadingin limtak ngaihsun in,” ci in na gensak un. ¹⁸ Keimah Paul in hih hopihna lai keima khut mahmah tawh ka gelh ahi hi. Kolbulh khaukhih ka thuakna thu na phawk un. Pasian hong hehpihna thupha in note hong ompih tahen. Amen.