NASEPTE

NASEPTE

¹ Theophilus aw, Zeisu in a kilaktoh ni donga a sep le a hilh thu khempeuh kong laikhak masa sungah ka gelh khinzo hi. ² Amah in a teelsa sawltakte kiangah Kha Siangtho tungtawn in thu tampi vaikhak a, tua khit ciangin vantung ah a kilato hi. ³ Sihna a thuak khit ciangin hih mite kiangah kilak a, nungta takpi ahihna thu a kician mahmah kipsakna thu tampi a pia hi. Amaute muhin ni 40 sung om a, Pasian kumpigam thute a gen hi. ⁴ Sawltakte tawh a omkhopna khatah Zeisu in amaute thupia a, “Jerusalem khuapi pan paikhia loin, keima tung pan na zaksa uh, Pa kamciam na ngak un. ⁵ Banghang hiam cihleh John in mite tui tawh a phum hi. Ahi zongin tu a kipan a sawtlo in note Kha Siangtho tawh hong kiphum ding hi,” a ci hi. ⁶ Tua ahih manin amaute hong paikhawm uha ama kiangah, “Topa aw, tu hunin Israel mite tungah kumpigam piakik ta ding na hi hiam?” ci in a dong uh hi. ⁷ Amah in, “Pa in ama thuneihna tawh a seh khitsa hun le nite note theih ding ahi kei hi. ⁸ Ahi zongin note tungah Kha Siangtho a hong tun ciangin vangliatna na ngah ding uha Jerusalem khuapi a kipan Judea gam khempeuh, Samaria gam khempeuh le leimong dongah ka teci na hi ding uh hi,” a ci hi. ⁹ Tu in hih thuteng a gen khit ciangin amaute muhtang mahin amah kilato a, meiilum khatin liah ahih manin a muthei nawn kei uh hi. ¹⁰ Vantung ah Zeisu a kahtoh a limet mahmah laitak un thakhat in amaute kiangah puanpak silh mi nih a ding uh hi. ¹¹ Amaute in, “Galilee mite aw, banghang in dinsa in vantung lam en gega na hi uh hiam? Note kiang pana vantung ah a kilato hih Zeisu mah tu‑a a paitoh na muh bang tektek un a hong paikik ding hi,” a ci uh hi. ¹² Tua khit ciangin amaute Tanluan mual panin Jerusalem khuapi ah a ciahkik uh hi. Tanluan mual pen Jerusalem khuapi panin Sabbath ni khat lam ahi hi. ¹³ Inn a tun uh ciangin amaute tunna inndei tungnung ah a kahto uh hi. Tua mite in Peter, James, John, Andrew, Philip le Thomas, Bartholomew le Mate, Alphaeus tapa James le Zealot pawl Simon, James tapa Judas‑te ahi uh hi. ¹⁴ Amaute in numeite, Zeisu nu Mary, le Zeisu sanggamte tawh lungsim kikhat in thungetna le thumna a nei den uh hi. ¹⁵ Tualai a a kikhawm nungzuite 120 bang a pha uh hi. Amaute laizang ah Peter dingto in thu gen a, ¹⁶ “Sanggamte aw, Zeisu a mante a hong makaih ahi Judas tawh kisai thu Kha Siangtho in David tungtawn in a genkholhna Lai Siangtho a tangtun loh a phamawh ahi hi. ¹⁷ Tua Judas in eite tawh a kisimkhawm mi khat hi a, hih nasepna ah zong a kihel mi khat ahi hi,” a ci hi. ¹⁸ Tua hi napi hih mipa in a mawhna thaman tawh lo khat lei a, tualai ah bungbu kiat in a gilpi kitam a, a sungkua khempeuh a buakhia hi. ¹⁹ Tua thu Jerusalem khuapi a teeng mi khempeuh in a thei uh hi. Tua logam pen amau pau in “Akel Dama” ci uh a, “Sisan Lo” a cihna ahi hi. ²⁰ Tua banah, “Late Lai Siangtho sungah, ‘Ama teenna mun gamkhing suak henla, Tua munah kuamah teeng nawn kei hen. Midang khatin ama za luah hen,’ ci in a kigelh hi. ²¹ “Tua ahih manin Topa Zeisu eite lakah sungtum pusuak in a omsung, ²² John in tui a phum a kipan eite kiang panin a kilaktoh ni dong, eite tawh a kipawlkhawm mite lak panin mi khat i teel ding kisam hi. Banghang hiam cihleh tua pa in eite tawh Zeisu Khazih thawhkikna thu teci a pangkhawm mi ahih ding kisam hi,” a ci hi. ²³ Tua ciangin amaute in mi nih Barsabas a kici Joseph (Justus zong kici) le Matthias a teelkhia uh hi. ²⁴ Amaute in, “Nang, mi khempeuh lungsim a thei Topa aw, Judas ahih leh ama muna pai dingin mawhna bawl in a za pan a kia zo hi. ²⁵ Tua ahih manin hih mi nihte lakah sawltak a suak ding le hih nasep a sem dinga na teelpa hong lak in,” ci in thu a ngen uh hi. ²⁶ Tua khit ciangin lai‑ai san uh a, Matthias tungah tu ahih manin sawltak sawm le khatte tawh a kisimkhawm hi.

¹ Pentecost ni a hong tun ciangin amaute khempeuh lungsim kikhat in munkhat ah a omkhawm uh hi. ² Tua laitak in huihpi nung tawh a kibang awging khat vantung pan thakhat in hong ging a, amaute tutna innsung khempeuh hong dim hi. ³ Tua khit ciangin meikuang tawh a kibang leiite hong kilang in kithehzak a, amaute tung ciat ah a tu hi. ⁴ Tua ciangin amaute khempeuh Kha Siangtho tawh kidim uh a, Kha in a lawhkhiatsak bangbang in pau nam tuamtuam tawh thu a gen uh hi. ⁵ Van nuai‑a om minam khempeuh lak panin Pasian a zahtak Judah mite tua laitak in Jerusalem khuapi ah a om uh hi. ⁶ Tua aw a hong gin ciangin mihonpi hong pai uha tua mite thugen amau pau ciat tawh a zak manun a lungmang uh hi. ⁷ Lamdangsa lua uh ahih manin lungmang uh a, “En un, hih mite in Galilee pau in a paute vive hilo ahi uh hiam? ⁸ I pianpih pau ciat tawh i zak theihpen a bangci ahi hiam? ⁹ Parthia mi, Media mi, Elam mite le Mesopotamia gama teeng mite, Judea gam, Cappadocia gam, Pontus gam, Asia gam, ¹⁰ Phrygia gam, Pamphylia gam, Egypt gam, le Cyrene khua kiang Libya gama teeng mite, Rome khuapi pana hong zin Judah mite le Judah mi a kisuaksakte, ¹¹ Crete mi le Arab mi ahi eite in amaute thugen eima pau ciat tawh i zak theih pen Pasian nasep hi a, lamdang mahmah hi,” a kici uh hi. ¹² Tua hi a, amaute khempeuh in lamdangsa in lungmang uh a, “Bangci bang thu hi peuhmah ahi hiam?” a kici uh hi. ¹³ Midangte in ahih leh, “Lenggahzu cil a kham uh hi ding hi,” ci in a zahko uh hi. ¹⁴ Ahih hangin sawm le khatte tawh Peter dingkhawm a, a aw sangkhan in a gen in ah, “Judah mite le Jerusalem khuapi a teeng mite khempeuh aw, hih thu kong theisak nuam hi ka thugen na ngai un. ¹⁵ Note upmawh bangin hih mite zukham hilo uh hi. Banghang hiam cihleh nai thum sat pan hi. ¹⁶ Hih thu kamsangpa Joel in a gensa ahi hi. ¹⁷ Amah in, ‘A nunung nite ciangin, Mi khempeuh tungah ka Kha ka bua dinga, Na tapa na tanute un kamsang in thu a gen ding uh hi. Na tangvalte un mang mu ding uh a, Na putekte un mang a man ding uh hi. ¹⁸ Tua hun ciangin, ka sila numei le pasalte tungah Ka Kha ka bua dinga, Amaute in kamsang in thu a gen ding uh hi. ¹⁹ Tunglam vanah nalamdang lianpi pite ka lak dinga, Nuai‑a leitung ah sisan, meikuang le meikhu tawh, Limlamdangte ka lak ding hi. ²⁰ A lauhuai le a lian mahmah Topa ni, A hong tunma in ni hong mial dinga, Kha in sisan hong suak ding hi. ²¹ Tua ciangin, Topa min tawh Huhna a ngen mi khempeuh in, Hotkhiatna a ngah ding uh hi, Pasian in ci hi,’ ci in a gen hi. ²² “Israel mite aw, hih thute za un. Na theihsa mah bangun Pasian in Nazareth khua mi Zeisu tungtawn in note lakah nalamdangte, nalamdang lianpite le limlamdangte a bawlna tawh amah a sanna thu teci a pangzo hi. ²³ Pasian in a khentat khitsa ama ngimna le a theihkholhna tawh kizui in note tungah amah hong ap a, note in migilote khut tawh manin singkhuam tungah na khailum uh hi. ²⁴ Ahih hangin, sihna in amah lencip zolo ahih manin sihna panin Pasian in khahkhia in a thosak zo hi. ²⁵ David in ama thu tawh kisai in a genna ah, ‘Ka mai ah Topa ka mu tawntung hi. Banghang hiam cihleh ka kilin loh nadingin, Ka taklam ah amah a om hi. ²⁶ Tua ahih manin ka lungsim kipak a, Lungdamtak in thu ka gen hi. Tua thamlo in ka pumpi zong, Lametna tawh a tawlnga ding hi. ²⁷ Banghang hiam cihleh nangmah in Hadesɠ ah ka kha na nusia kei dinga, Na Misiangthopa zong na muatsak kei ding hi. ²⁸ Nuntakna lampi nong theisak zo a, Nangma omna munah, Lungdamna tawh nong kidimsak ding hi,’ a ci hi. ²⁹ “Sanggamte aw, i pupi David thu teltak in hong gensak un. Amah si in kivui khin a, a han zong tuni dongin a omlai hi. ³⁰ Pasian in ci le sa lama ama suan sung pan Khazih piangsak in ama tokhom tungah tusak dingin kiciam a, tua kamciamna David in kamsang khat ahihna tawh a thei hi. ³¹ Amah in hih thu mukhol ahih manin ama pumpi muat loin, a kha zong Hadesɠ ah a kinusia kei ding hi ci in Khazih a thawhkik nading thu a gen hi. ³² Pasian in hih Zeisu thokiksak khinzo hi cih thu kote khempeuh in teci ka hi uh hi. ³³ Tua ahih manin Pasian in ama taklam ah amah lamsang khinzo a, Pa kiang panin Kha Siangtho kamciam zong a sang khinzo hi. Tu in ama hong buakkhiat tua Kha Siangtho mu in na zazo uh hi. ³⁴ “David in vantung ah kahto lo napi in, ‘Topa in ka Topa kiangah, ³⁵ “Na galte na khengakna ka suahsak khit mateng in, Ka taklam ah na tu in,” ci hi,’ ci in a gen hi. ³⁶ “Tua ahih manin na khailup uh tua Zeisu, Pasian in Topa le Khazih a suaksak zo hi cih thu Israel mi khempeuh in teltak in theita un,” ci in a gen hi. ³⁷ Amaute in hih thu a zak uh ciangin a lungtang uh vut a, Peter le sawltak dangte kiangah, “Sanggamte aw, bang hih ding ka hi uh hiam?” a ci uh hi. ³⁸ Tua ciangin Peter in amaute kiangah, “Na mawhna uh kisikkik unla Zeisu Khazih min tawh tui kiphum un. Tua hi leh Pasian in na mawhnate uh hong maisak in Kha Siangtho letsong na ngah ding uh hi. ³⁹ Banghang hiam cihleh tua kamciamna in note aa ding hi a, na suan na khakte uh le Topa i Pasian in a saplai ding gamlapi a om mite khempeuh aa ding zong ahi hi,” a ci hi. ⁴⁰ Peter in thudang tampi tawh teci pangin amaute hanthawn a, “Hih a gilo tulai khang mite lak panin kihemkhia un,” a ci hi. ⁴¹ Ama thugen lungdamtak in a sang mite tui kiphum uh a, tua ni in mi 3,000 bang a kibehlap hi. ⁴² Amaute in sawltakte hilh upna thu le kikholhkhopna, anlum balkhapna le thungetnate ah kuhkaltak in a omsuak uh hi. ⁴³ Pasian in sawltakte tungtawn in nalamdang lianpite le limlamdang tampite bawl uha, mi khempeuh in lamdang a sa mahmah uh hi. ⁴⁴ Thu‑um mi khempeuh omkhawm in na khempeuh a neikhawm uh hi. ⁴⁵ A neih a lamte uh le a vante uh zuak in amaute kisapna zui in a hawm uh hi. ⁴⁶ Nisim in lungsim kikhat in biakinnpi huang sungah kikhawm uh a, inn khat khit inn khatah anlum balkham in, lungdamtak le lungsim siangthotak in an a nekhawm uh hi. ⁴⁷ Pasian min phat uh a, mi khempeuh maipha zong a ngah uh hi. Topa in hotkhiatna a ngah mite nisim in pawlpi sungah a kibehlapsak hi.

¹ Tu in thunget hun ahi nai kua ciangin Peter le John‑te biakinnpi huangah a paito uh hi. ² Biakinnpi huang sunga a lut mite kiangah huhna a nget theih nadingin a nu gil sung panin a khebaisa a suak mi khat kipua in Hoih kici biakinnpi kongpi gei ah nisim in a kikoih zel hi. ³ Tua pa in biakinnpi huang sungah lut dingin a kithawi Peter le John a muh ciangin huhna a ngen hi. ⁴ John tawh a paikhawm Peter in tua pa tangtak in en a, “Hong en in,” a ci hi. ⁵ Tua pa in amaute kiang pan na khatpeuh a ngah ding kisa in a limet mahmah hi. ⁶ Tua ciangin Peter in, “Kham le ngun ka nei kei hi. Ahi zongin ka neihpen kong pia ding hi. Nazareth khua mi Zeisu Khazih min tawh dingto inla lampai in,” a ci hi. ⁷ Peter in tua pa a khut taklam ah lenin a kaihtoh ciangin a khepek le a siakmit guhte thakhat in a thahat hi. ⁸ Tua pa diangto in dinga, lam a pai hi. Lampai in diangin Pasian min phat kawmsa in biakinnpi huang sungah amaute tawh a lutkhawm hi. ⁹ Mi khempeuh in amah lam paithei in Pasian min phata a om a mu uh hi. ¹⁰ Hoih kici biakinnpi kongpi gei ah tu‑a huhna a ngen denpa ahihlam a theih uh ciangin ama tunga thupiang hangin lungmang in lamdang a sa uh hi. ¹¹ Tu in damna a ngah khebaipa in Peter le John‑te meilet pah cinten in a om laitak in mi khempeuh in lamdangsa mahmah uh a, amaute omna Solomon buukah a tai ngeingai uh hi. ¹² Peter in a muh ciangin, “Israel mite aw, banghang in hih thu lamdangsa na hi uh hiam? Kote vangliatna le biakna mi hihna tawh hihpa lam a paisak bangin banghang in hong en gega na hi uh hiam? ¹³ Abraham, Isaac le Jacob‑te Pasian ahi, i pu i pate Pasian in a nasempa Zeisu min a thangsak zo hi. Pilate in amah khah a sawm hangin Pilate mai‑ah amah na nial uh a, thah dingin na piakhia uh hi. ¹⁴ A Dikpa le a Siangthopa na nial uha mi thatpa khat a hong khahsak zawk nadingin na ngen uh hi. ¹⁵ Nuntakna a Piangsakpa na that uh a, ahih hangin Pasian in misite lak panin amah a thokiksak zo hi. Tua thu ah kote in teci ka hi uh hi. ¹⁶ Na muh na theih uh hihpa in Zeisu min um ahih manin tua min in amah a thakhauhsak zo hi. Hi hi, Zeisu tungtawn a hong pai upna in note muhtang mahmah in amah a damsiangsak zo hi. ¹⁷ “Tu in ahih leh sanggamte aw, na makaite uh mah bangin note in zong na theih loh manun tua banga ahih kha na hi uh hi cih kong thei hi. ¹⁸ Ahih hangin Khazih in gimna thuak ding hi ci a, Pasian in ama kamsang khempeuh kam tawh a genkholhsa tua thute hih bangin a tangtungsak zo hi. ¹⁹ Tua ahih manin na mawhnate uh a kiphiatsiang theih nadingin kisikkik unla kikhel un. Tua hi leh Topa kiang panin thamalhkikna hun a hong tung ding hi. ²⁰ A beisa hunin note tunga hong kihilh, Zeisu Khazih zong amah in note kiangah hong sawl ding hi. ²¹ Pasian in na khempeuh a bawlthakkik mateng vantung ah Zeisu om phot ding hi. Pasian in tanglai peka kipan a siangtho ama kamsangte khempeuh kam tawh hih thu a gen khitsa ahi hi. ²² Moses in i pu i pate kiangah, ‘Topa na Pasian un na sanggamte uh lak panin kei tawh a kibang kamsang khat hong piangsak ding hi. Note tunga ama hong gen thu khempeuh na mang ding uh hi. ²³ Tua kamsangpa thu a manglo mi peuhmah a mipihte sung panin kisusia ding hi,’ ci in a gen hi. ²⁴ Hi hi, Samuel a kipan ama khit a thu a gen kamsang khempeuh in tulai a a piang ding thute a genkhol uh hi. ²⁵ Note in kamsangte suan le khakte na hi uh hi. Pasian in Abraham tungah, ‘Na suan na khak tungtawn in leitung mite khempeuh thupha ka pia ding hi,’ ci in i pu i pate tawh a bawl thuciamna tawh a kizom mite na hi uh hi. ²⁶ Note khempeuh na gamtat khialhna panun hong kiheisak in thupha hong pia dingin Pasian in a nasempa Zeisu a thawhkiksak khit ciangin note kiangah hong sawl masa hi,” ci in a gen hi.

¹ Tu in amaute in mite tungah thu a gen laitak un siampite, biakinn cingte a ukpa le Sadducee pawlte a hong tung uh hi. ² Sawltakte in mite thu hilhin Zeisu hangin misite thawhkikna thu tangko uh ahih manin tua mite in nawngkaisa mahmah uh hi. ³ Tua ahih manin Peter le John man uha nitak hita ahih manin zingsang dongin thong sungah a khum uh hi. ⁴ Ahih hangin amaute thugen a za mi tampi in thu um uha pasal bekbek zong 5,000 bang a pha uh hi. ⁵ A zingciang in gam ukte, makaite, thukhamhilh siate, ⁶ Siampi Ukpa Annas, Caiaphas, John, Alexander le Siampi Ukpa innkuanpihte, Jerusalem khuapi ah a hong kikhawm uh hi. ⁷ Amaute laizang ah Peter le John a koih khit uh ciangin amaute gel kiangah, “Bang vangliatna ahih keileh bang min tawh hihpa damsak na hi uh hiam?” ci in a dong uh hi. ⁸ Tua ciangin Peter in Kha Siangtho tawh kidim a, amaute kiangah, “Mipi ukte le Israel makaite aw, ⁹ hih mizawngkhal khat tungah thupha ka bawl manun tuni in thu hong sit na hih uh leh, ¹⁰ note in singkhuam tungah khailum in Pasian in misite lak pan a thawhkiksakpa, Nazareth khua mi Zeisu Khazih min tawh hihpa damin note khempeuh mai ah dinga om ahi hi cih thu note khempeuh le Israel mi khempeuh in theita un. ¹¹ Tua Zeisu in, ‘Inn a lam note in na nilkhiat uh suang hi a, Innkiu suang bulpi a suakpa ahi hi.’ ¹² “Tua mi simloh midang tungah hotkhiatna a om kei hi. Banghang hiam cihleh hotkhiatna i ngah nadingin hong kipia, min dang khat beek vannuai mite lakah a om kei hi,” ci in a gen hi. ¹³ Tu in amaute in Peter le John‑te hansanna mu uh a, pilna neilo sinna nei ngeilo mite ahihlam uh a theih uh ciangin lamdang a sa mahmah uh hi. Tua ciangin Zeisu tawh kithuah ngei uh ahihlam a phawkkik uh hi. ¹⁴ Damna a ngah mipa in amaute tawh dingkhawm a om mu uh ahih manin bangmah a nial thei nawn kei uh hi. ¹⁵ Ahih hangin thukhenteɠ kiang pan amaute a paikhiat nadingun thu a piak khit uh ciangin thu a kikum uh hi. ¹⁶ Amaute in, “Hih mite bang cih ding i hi hiam? Amaute tungtawn in a kilang mahmah nalamdang khat piang khin a, Jerusalem khua mi khempeuh in mu khinzo uh ahih manin i nial thei kei hi. ¹⁷ Ahih hangin mite lakah a kizelh nawnloh nadingin, ‘Tu a kipan in kuama tungah hihpa min tawh thu gen nawn kei un,’ ci in khauhtak in tawnggawp ni,” a kici uh hi. ¹⁸ Tua khit ciangin amaute gel sam uh a, Zeisu min tawh thugen in, thu a hilh nawn peuhmah loh nadingun thu a pia uh hi. ¹⁹ Ahih hangin Peter le John in amaute kiangah, “Pasian thu sangin note thu kong man zawk ding uh Pasian mai ah maan hiam maanlo hiam note mah in khen zaw un. ²⁰ Banghang hiam cihleh kote ka hih uh leh ka muhsa ka zaksa uh thute gen loin ka om thei kei uh hi,” a ci uh hi. ²¹ Hih nasepna hangin mi khempeuh in Pasian min a phat uh hi. Tua ahih manin tua mite hangin Peter le John‑te bangci bangin daanpia ding cih thei zolo uha khauhtak in tawngin a khah uh hi. ²² Banghang hiam cihleh lamdangtak in a kidamsakpa in kum 40 val a phazo hi. ²³ Amaute gel a kikhah khit ciangin a lawmte uh kiangah pai in siampi liante le makaite thugenteng a gen uh hi. ²⁴ Amaute in tua thu a zak uh ciangin lungsim kituak in Pasian tungah kiko uh a, “Topa aw, nang in vantung le leitung, tuipi le a sunga om na khempeuh a piangsak Pasian na hi hi. ²⁵ Na nasempa David kam tawh na gen inah, ‘Banghang in minam dangte heh uh a, Mite in kimanna neilo thute vaihawmsim uh ahi hiam? ²⁶ Topa le a Sathau‑nilhpa a do dingin, Leitung kumpite kithawi uh a, Gam ukte a kikaikhawm uh hi,’ na ci hi. ²⁷ “Herod le Pontius Pilate in Gentile mite le Israel mipite tawh kipawl in sathau na nilhpa, a siangtho na Nasempa Zeisu langpan in, ²⁸ nangma vangliatna le na deihna tawh sep dinga na gelsa teng mah a sem uh ahi hi. ²⁹ Tu in, Topa aw, amaute hong tawnna za in. Na nasemte in na thu a genngam nadingun hansanna pia in. ³⁰ A siangtho na Nasempa Zeisu min tawh limlamdangte le nalamdang lianpite a bawl theih nading le cinate in damna a ngah nadingin na khut hong zan in,” ci in thu a ngen uh hi. ³¹ Thu a nget khit uh ciangin amaute kikhopna mun a kiling hi. Amaute khempeuh Kha Siangtho tawh kidim uh a, hangtak in Pasian thu a gen uh hi. ³² Tu in thu‑um mihonpite a lungsim, a ngaihsutna uh kituak a, a neihsa khempeuh uh kuama aituam ci loin a neikhawm uh hi. ³³ Sawltakte in Topa Zeisu thawhkikna thu vangliatna tawh teci pang uh a, amaute khempeuh tungah Pasian hehpihna thupha lianpi a tung hi. ³⁴ Inn mun logam a nei khempeuh in zuak in a sumte uh hong tawiciat uh hi. ³⁵ Tua ciangin sawltakte khephung ah hong koih uh a, sawltakte in mi khempeuh a kisapna zui in hawmsak uh ahih manin kisapna a nei kuamah a om kei hi. ³⁶ Sawltakte in Barnabas (a khiatna in “Hehnepna Tapa”) a cih uh, Cyprus gam mi, Levi suan, Joses a kici mi khat a om hi. ³⁷ Tua pa in a logam a zuak khit ciangin a sumteng paipih in sawltakte khephung ah a va koih hi.

¹ Ananias a kici pa le a zi Sapphira‑te in zong a logam uh a zuak uh hi. ² Tua ciangin a pasal in a sumte pawlkhat sit in a dangteng paipih a, sawltakte khephung ah a va koih hi. A sumte pawlkhat a sit lam a zi in zong a thei hi. ³ Peter in, “Ananias aw, Kha Siangtho a khem ding le na logam man sum pawlkhat a sit dingin banghang in na lungsim Satan uksak na hi hiam? ⁴ Tua logam na zuakma in nangma aa hi a, na zuak khit ciangin zong nangma thuthu hilo ahi hiam? Banghang in tua bang lungsim nei na hi hiam? Mihing a khem hilo in Pasian a khem na hi hi,” a ci hi. ⁵ Tua ciangin Ananias in hih thu a zak ciangin puksuk in a si hi. Tua thu a za mi khempeuh a lau mahmah uh hi. ⁶ Tangvalte dingkhia in puan tawh a luang a tun khit uh ciangin puakhia in a vui uh hi. ⁷ Tua khit nai thum bang ciangin a zi zong thu piangteng theilopi in a hong lut hi. ⁸ Peter in ama kiangah, “Na logam uh hih zah maha na zuak uh ahi hiam, hong gen in,” a ci hi. Amah in, “Hih zah maha ka zuak uh ahi hi,” a ci hi. ⁹ Tua ciangin Peter in ama kiangah, “Topa Kha a ze‑et dingin banghang in kithukim na hi uh hiam? En in, na pasal a vuite kongbiang ah hong tungta hi, nang zong hong puakhia ding uh hi,” a ci hi. ¹⁰ Tua ciangin tua nu Peter khephung ah thakhat in puksuk in a si hi. Tangvalte hong lut uh ciangin tua nu a sisa in mu uha puakhia in a pasal gei ah a vui uh hi. ¹¹ Pawlpi buppi le hih thu a za mi khempeuh a lau mahmah uh hi. ¹² Sawltakte tungtawn in mite lakah limlamdangte le nalamdang lian tampite a piang hi. Thu‑um mi khempeuh lungsim kikhat in Solomon buukah a omkhawm uh hi. ¹³ Midangte khat beekin amaute pawlpih ngamlo uh a, ahi zongin thupi a sa mahmah uh hi. ¹⁴ Topa a um numei pasal a honhon in kibehlap a, thu‑um mi a tam semsem hi. ¹⁵ Mite in cinate kongzing ah puakhia uh a, Peter hong pai ciangin a lim beekin a nawk khak theih nadingin lupna le tal tungah a sial uh hi. ¹⁶ Jerusalem khuapi kima om khuate panin zong mihonpi hong kikaikhawm uha dawigilote in a bawlsiatte le cinate hong paipih in amaute khempeuh in damna a ngah uh hi. ¹⁷ Tua ciangin Siampi Ukpa le amah tawh a omkhawm Sadducee pawlte heh mahmah uh a, ¹⁸ sawltakte manin thong sungah a khum uh hi. ¹⁹ Ahih hangin Topa vantungmi khatin zan laitak in thong kongkhak hong in amaute khahkhia a, ²⁰ “Pai unla, biakinnpi huang sungah dingin hih nuntakna thu mite va hilh un,” a ci hi. ²¹ Amaute in hih thu a zak uh ciangin zingsang tungin biakinnpi huang sungah lutin thu a hilh uh hi. Tua hun sung mahin Siampi Ukpa le a lawmte hong pai uh a, thukhenteɠ le Israel upa khempeuh samkhawm in sawltakte a lakhia dingin thonginn ah mi a sawl uh hi. ²² Ahih hangin biakinn cingte a tun uh ciangin thong sungah sawltakte mu lo uh ahih manin kilehkik in thu zasak uh a, ²³ “Thonginn bittak in kikalh a, thong cingte zong kongkhak mai ah a ding uh hi. Ahih hangin kong ka hon uh ciangin a sungah kuamah ka mu kei uh hi!” a ci uh hi. ²⁴ Tu in Siampi Ukpa, biakinn cingte a ukpa le siampi liante in tua thu a zak uh ciangin, “Bang thuteng hong pianglai ding hiam?” ci in a lungmang uh hi. ²⁵ Tua laitak in mi khat hong pai in amaute kiangah, “En in, thong sunga na mi khumte un biakinnpi huang sungah thu hilh in a om uh hi!” ci in a ko hi. ²⁶ Tua ciangin biakinn cingte a ukpa le biakinn cingte va pai uha mite in suang tawh a denkhak ding lau uh ahih manin thu‑ol tawh sawltakte a la uh hi. ²⁷ A hong tunpih khit uh ciangin thukhenteɠ mai ah koih uh a, Siampi Ukpa in thu a dong hi. ²⁸ Amah in, “Hih min tawh thu na hilh nawnloh nadingun khauhtak in thu hong pia khin hilo ka hi hiam? Ahih hangin en un, Jerusalem khua sungteng note thuhilhna zelsak in hih mipa sisan kote tungah hong tun nuam na hi uh hi!” a ci hi. ²⁹ Tua ciangin Peter le sawltak dangte in, “Mite thu sangin Pasian thu ka man ding uh kilawm zaw hi. ³⁰ I pu i pate Pasian in singkhuam tungah khai a na thahpa uh Zeisu a thokiksak zo hi. ³¹ Israel mite a mawhna uh kisikkiksak in mawhmaina a piak theih nadingin Pasian in amah Kumpi le Honpa suaksak in a taklam ah a lamsang khinzo hi. ³² Hih thu ah kote in ama teci ka hi uh hi. Pasian in ama thu a mang mite a piak Kha Siangtho zong ama teci ahi hi,” ci in a dawng uh hi. ³³ Amaute in hih thu a zak uh ciangin heh mahmah uha sawltakte thah dingin a vaihawm uh hi. ³⁴ Tua ciangin thukhente lak panin mi khempeuh in a zahtak thukhamhilh siapa ahi Gamaliel a kici Pharisee pa khat hong dingto in tawmvei sung sawltakte a pusuahsak nadingun thu a pia hi. ³⁵ Tua khit ciangin amah in, “Israel mite aw, hih mite tunga na sepsawm uh thu hoihtak in ngaihsun pha un. ³⁶ Banghang hiam cihleh tu ma lam in zong mi thupi khat ka hi a kici Theudas hong khang a, mi 400 bangin amah a pawl uh hi. Tua pa a kithah ciangin a nungzui khempeuh kithehthang in bangmah a suak kei uh hi. ³⁷ Tua pa khit mi kisim hun sungin zong Galilee mi Judas hong khang leuleu a, nungzui tampi mah a ngah hi. Tua pa zong si a, ama thu a zui mi khempeuh a kithehthang uh hi. ³⁸ Tu in zong note kianga kong cih in ah hih mite bangmah cih loin, hi ci omsak lel un. Banghang hiam cihleh hih gelna le nasepna mihing pana hong piang ahih leh hong beilel ding hi. ³⁹ Ahi zongin Pasian pana hong piang ahih leh na beisak zo kei ding uh a, Pasian a lehdo na suak zawsop ding uh hi,” a ci hi. ⁴⁰ Amaute in ama thu gen hoihsa uh ahih manin sawltakte samin sat uha Zeisu min tawh thu a gen nawnloh nadingun thu a piak khit uh ciangin a khah uh hi. ⁴¹ Tua ciangin sawltakte zong, Zeisu min hanga maizumna a thuak dingin Pasian in kilawm hong sa hi ci in lungdam mahmah uh a, thukhenteɠ kiang panin a paikhia uh hi. ⁴² Zeisu in Khazih ahi hi cih thu amaute in nisim in biakinnpi huang sung le innteng ah tatsat loin hilhin a tangko uh hi.

¹ Tua hun sungin nungzuite hong tam semsem uh ciangin nisim annek hawmna ah Greek dan a zui Judah meigongte ki‑awlmawh lo ahih manin tuate in Hebrew kam a zang Judah mite tungah a phun uh hi. ² Tua ahih manin sawm le nihte in nungzui honpite kaikhawm in amaute kiangah, “Kote in Pasian thu hilh manlo lianga nek le dawn kong buaipih ding uh kilawm lo hi. ³ Tua ahih manin sanggamte aw, note lak panin na pahtak uh Kha Siangtho le lungpilna tawh a kidim pasal sagih hong teelkhia un. Hih nek le dawn a vaihawm dingin amaute ka seh ding uh hi. ⁴ Kote ka hih uh leh thungetna le thuhilhna nasep kong zomsuak ding uh hi,” a ci uh hi. ⁵ Hih thu mipi in hoihsa ahih manin thu upna le Kha Siangtho tawh a kidim Stephen, Philip, Prochorus, Nicanor, Timon, Parmenas le Antioch khua mi Judah mi a suak Nicolas‑te a teelkhia uh hi. ⁶ Sawltakte mai ah amaute koih uha sawltakte in tua mite tungah khut nga in thu a ngetsak uh hi. ⁷ Tua ciangin Pasian thu hong kizel semsem a, Jerusalem ah nungzuite nasiatak in a pung uh hi. Siampi tampite in zong thu a um uh hi. ⁸ Stephen in upna le vangliatna tawh kidim a, nalamdang lianpite le limlamdangte mite muhin a bawl hi. ⁹ Tua ciangin Sal suaktate kikhopna sunga kihel Cyrene khua pana hong paite, Alexandria khua pana hong paite, Cilicia gam le Asia gam pana hong pai mite in Stephen tawh thu a kinial uh hi. ¹⁰ Stephen in lungpilna le Kha tawh a gen thute amaute in a nial thei kei uh hi. ¹¹ Tua ciangin amaute in mi pawlkhat cialsim uh a, “Hihpa Moses le Pasian tungah a pausiatna ka zazo uh hi,” ci in a gensak uh hi. ¹² Amaute in mipite, makaite le thukhamhilh siate hansuah in Stephen omna ah hong pai in man uh a, thukhenteɠ kiangah a paipih uh hi. ¹³ Zuau gen ding teci seh uh a, “Hih mun siangtho le thukham tungah hihpa pausia den a, ¹⁴ hih Nazareth khua mi Zeisu in hih mun susia in Moses in kote hong piak ngeinate khel ding hi ci a, a genna ka za uh hi,” a ci uh hi. ¹⁵ Thukhenteɠ kikhopna sunga a tu mi khempeuh in Stephen maitang a telet uh ciangin vantungmi maitang tawh kibang in a mu uh hi.

¹ Tua ciangin Siampi Ukpa in, “Hih thute a maan mah ahi hiam?” a ci hi. ² Stephen in, “Pate le sanggamte aw, ka thugen na ngai un. Haran khua ah i pu Abraham a teenma Mesopotamia gamah a om laitak in ama kiangah a vanglian Pasian kilang a, ³ ‘Na gam le na beh na phungte kiang pan paikhia inla, kong lah ding gamah pai in,’ a ci hi. ⁴ Tua ciangin Chaldea mite gam pan amah paikhia in Haran khua ah a teeng hi. A pa a sih khit ciangin tua mun panin tu laitak a na teenna uh leitang ah a lal hi. ⁵ Tua gamah Pasian in ama luah dingin a khepek ngakh nading nangawn leitang a pia kei hi. Ahi zongin Abraham nunga a suan a khakte luah dingin hih gam a piak ding thu, ta a neihma in a kamciam zo hi. ⁶ Ahih hangin Pasian in ama kiangah, na suan na khakte gamdang khatah va pem ding uh a, tua gam mite in kum 400 sung sal in nei in a bawlsia ding uh hi. ⁷ ‘Ahih hangin amaute salin a kai tua minam tungah thu ka khen dinga, tua khit ciangin amaute hong paikhia in hih munah keimah a hong bia ding uh hi,’ a ci hi. ⁸ Tua ciangin Pasian in Abraham tungah vunatna tawh kipawl thuciamna zong a pia hi. A tapa Isaac a neih ciangin a ni giat ni in vun a atsak hi. Isaac tapa Jacob hi a, Jacob in i pupi sawm le nihte pa ahi hi. ⁹ “Tua i pupite in Joseph haza in Egypt gamah a zuak uh hangin Pasian in amah ompih a, ¹⁰ a gentheihna khempeuh panin honkhia in Egypt kumpipa Pharaoh mai ah maipha le lungpilna a pia hi. Pharaoh in Egypt gam le ama inn sung khempeuh Joseph a uksak hi. ¹¹ Tua hun in Egypt gam le Canaan gam bup ah kialpi tunga haksatna lianpi om ahih manin i pu i pate in nek le dawn ding a nei kei uh hi. ¹² Ahih hangin Jacob in Egypt gamah an om hi cih thu a zak ciangin i pu i pate a paisak masa hi. ¹³ A nihveina a hawh uh ciangin a sanggamte kiangah Joseph kipulak a, tua ciangin Pharaoh in Joseph innkuanpihte a thei hi. ¹⁴ Tua nung ciangin Joseph in mi sawlin a pa Jacob le a innkuanpih khempeuh lasak a, mi 75 a pha uh hi. ¹⁵ Tua hi a, Jacob zong Egypt gamah paisuk in tua gamah si a, i pu i pate zong tua gam mahah a si uh hi. ¹⁶ Amaute luanghawmte Shechem khua ah pua uh a, Abraham in Shechem khua mi Hamor tate kiang panin sum tawh a leisa hanah a vui uh hi. Moses in Israelte Makaih ¹⁷ “Pasian in Abraham tunga a ciamsa kamciamna a tunkuan ciangin Egypt gamah amaute khangin pung mahmah uh a, ¹⁸ Joseph a theilo kumpi dang khat hong khan dong tua bangin a pung uh hi. ¹⁹ Tua pa in i minamte khembawl a, i pu i pate bawlsia in, a tangekte uh a nungta lo dingin a paihsak hi. ²⁰ Tua hun mahin Moses hong suak a, tua in Pasian lungkimsak mahmah hi. Tua hi a, a pa inn sungah kha thum sung amah kikem hi. ²¹ Ahih hangin a kikoihkhiat ciangin Pharaoh tanu in na la a, ama tapa banglian in a pantah hi. ²² Tua ciangin Moses in Egypt gam pilna khempeuh sin a, kampau le sepna bawlna ah a siam mahmah hi. ²³ “Tu in Moses kum 40 a phak ciangin a sanggam Israel tate kiangah hawh nopna lungsim a nei hi. ²⁴ Egypt mipa khatin ama mite khat a thuman lopi a a bawl a muh ciangin a kibawlsia mipa va guma Egypt mipa a satlum hi. ²⁵ Banghang hiam cihleh Pasian in ama khut zangin amaute a hotkhiat ding lam a sanggamte in a thei ding sa a, ahih hangin amaute in a thei kei uh hi. ²⁶ A zingciang in Israel mi nih a kilai laitak uh va tuak kha a, ‘Lawmte aw, unau khat na hi uh hi, banghang in kilai na hi uh hiam?’ ci in a kilem nadingun a kho hi. ²⁷ “Ahih hangin a lawmpa tunga a mawh zaw pa in Moses sawnkhia in a gen in ah, ‘Kote a hong uk ding le thu a hong khen dingin kua in nang hong seh ahi hiam? ²⁸ Zanni a Egypt mipa na thah bangin kei zong hong that nuam na hi hiam?’ a ci hi. ²⁹ “Hih thu hangin Moses taimang in Midian gamah teenga tualai ah tapa nih a nei hi. ³⁰ “Kum 40 a cin ciangin Sinai mual gamlak ah sawlbawk kuang sung panin Topa vantungmi khat Moses kiangah a kilang hi. ³¹ Moses in a muh ciangin lamdangsa mahmah a, a telet dinga a va naih ciangin Topa hopihna aw hong ginga, ³² amah in, ‘Keimah in na pu na pate Pasian, Abraham Pasian, Isaac Pasian, Jacob Pasian ka hi hi,’ a ci hi. Tua ciangin Moses a ciling gawpin a telet ngam nawn kei hi. ³³ “‘Tua ciangin Topa in ama kiangah, “Na dinna mun leitang siangtho ahih manin na khedap suahkhia in. ³⁴ Egypt gam sunga om ka mite a kibawlsiatna ka mu khinzo hi. Amaute thumna zong ka zazo a, a honkhia dingin kong paisuk hi. Tu in hong pai in, Egypt gamah kong sawl ding hi,” a ci hi.’ ³⁵ “Tua Moses in, ‘Kote hong uk ding le thu hong khen dingin kua in nang hong seh ahi hiam?’ ci a, a nialpa uh ahi hi. Pasian in tua Moses mah amaute a uk ding pa le a honkhia ding pa in sawlbawk a kilang vantungmi tungtawn in a sawl hi. ³⁶ Tua bangin Moses in Egypt gam, San Tuipi le gamlak ah kum 40 sung nalamdang lianpite le limlamdangte bawl in amaute a paikhiatpih hi. ³⁷ “‘Topa na Pasian un, na sanggamte uh lak panin kei tawh a kibang Kamsang khat note aa dingin hong piangsak dinga, ama thu na ngaih ding uh ahi hi,’ ci a, Israel tate tunga a genpa in hih Moses ahi hi. ³⁸ “Hihpa in Sinai muala amah a hopih Vantungmi tawh ahi a, i pu i pate tawh ahi a, gamlak a om mihonpite tawh ahi zongin a omkhawmpa hi a, eite hong piak dingin Pasian in a kam tawh hong gen a nungta thute a sangsawnpa ahi hi. ³⁹ “Ahih hangin i pute i pate in ama thu mang nuamlo in nial uh a, Egypt gam lamah a lungsim uh a heikik uh hi. ⁴⁰ Amaute in Aaron kiangah, ‘Egypt gam pana hong paikhiatpihpa Moses bang suakta hiam cih thei lo ka hih manun kote mai‑a a pai ding pasiante hong bawlsak in,’ a ci uh hi. ⁴¹ Tua ciangin tua hun sungin bawngno limkhat bawl uh a, tua lim tungah gangawh biakna pia in amau khut tawh a bawltawm uh tua nate mah tawh a kipak uh hi. ⁴² Tua ciangin Pasian in amaute nungngatsan in vantung a om nate a bia dingin a khahkhong ta hi. Tua thu Kamsangte laibu sunga kigelhsa mah bangin, ‘Israel innkuante aw, Gamlak ah kum 40 sung tawntung gan go in, Nong piak uh gangawh biaknate, Keimah nong piak takpi mah uh ahi hiam? ⁴³ Hi hi, Moloch biakbuuk, Na pasian uh Remphan aksi le, Biak dinga na bawltawm uh milimte na pua uh hi. Tua ahih manin Babylon gam lam pekah, Note kong puak ding hi,’ ci in a gen hi. ⁴⁴ “A muhsa bang tektek in a lam nadingin Pasian in Moses a sawlna tawh kizui in a kilam teci panna biakbuuk, i pu i pate in gamlak ah a nei uh hi. ⁴⁵ Tua biakbuuk a sangsawn i pute i pate le Joshua in amaute mai pana Pasian in a hawlkhiatsak Gentile‑te leitang ah tua biakbuuk lutpih uh a, tua gamah David hun dongin a om hi. ⁴⁶ David in Pasian maipha ngah a, Jacob Pasian teen nading biakbuuk khat a lam theih nadingin Pasian kiangah a ngen hi. ⁴⁷ Ahih hangin Pasian biakinn pen Solomon in a lam zaw hi. ⁴⁸ “Ahi zongin, kamsangpa gensa bangin Sangbel Pasian in khut tawh kibawl biakinn sunga teeng ahi kei a, ⁴⁹ ‘Topa in, vantung ka tokhom hi a, Leitung ka khengakna ahi hi. Keima aa dingin bang inn hong lamsak in, Koi munah tawlnga ding ka hi hiam? ⁵⁰ Hih na khempeuh ka khut tawh ka bawlsa hilo ahi hiam?’ a ci hi. Israelte in Kha Siangtho Nial ⁵¹ “Lungsim le bilvun ki‑atlo, ngawng khauh mite aw! Na pute na pate mah bangin note in zong Kha Siangtho na langpan den uh hi. ⁵² Na pute na pate un a bawlsiatloh kamsang kua om ahi hiam? Amaute in a Dikpa a hong pai nading thu a genkhol mite a that uh hi. Tu in note in tua a Dikpa a lehhekte le a thatte na suakzo uh hi. ⁵³ Note in vantungmite tungtawn a hong kipia thukham ngah napi in na zui kei uh hi,” ci in a gen hi. ⁵⁴ Amaute in hih thute a zak uh ciangin a lung uh so a, a ha uh a gawisan uh hi. ⁵⁵ Ahih hangin Stephen in Kha Siangtho tawh kidim in vantung a ettoh leh Pasian vangliatna le Pasian taklam a a ding Zeisu a mu hi. ⁵⁶ Amah in, “En un! Vantung kihong a, Pasian taklam ah Mihing Tapa dinga om ka mu hi!” a ci hi. ⁵⁷ Tua ciangin amaute nakpi in kiko uh a, a bil uh humkawm in ama lamah lungsim kituak in a hong tai uh hi. ⁵⁸ Khua nawlah amah kaikhia in suang tawh a denglum uh hi. Tua a denglum mite in Saul a kici tangval khat khephung ah a puante uh a koih uh hi. ⁵⁹ Suang tawh a den laitak un Stephen in, “Topa Zeisu aw, ka kha hong la in,” ci in Pasian kiangah thu a ngen hi. ⁶⁰ Tua khit ciangin amah khukdin a, “Topa aw, hih mawhna amaute tungah na suan kei in,” ci in nakpitak in a kiko khit ciangin a si hi.

¹ Tu in Stephen a kithahna thu ah Saul zong a thukim hi. Tua hunin Jerusalem khuapi a om pawlpi nasiatak in kibawlsia ahih manin sawltakte simloh thu‑um dang khempeuh Judea gam le Samaria gamah a kithehthang uh hi. ² Pasian a zahtakte in Stephen luang puakhia in vui uh a, nakpi in a kah uh hi. ³ Saul ahih leh pawlpi bawlsiat ding hanciam in inn simah lut a, numei pasal kaikhia in thongah a puak hi. ⁴ Tua ahih ciangin a kithehthang mite pai kawikawi in lungdamna thu a tangko uh hi. ⁵ Philip zong Samaria gam khua khatah paisuk in Khazih thu a tangko hi. ⁶ Mihonpi in Philip thugennate za in nalamdang a bawlte mu uh a, lungsim kikhat in ama thugen a ngai uh hi. ⁷ Dawigilote nakpitak kiko in mi tampi sung panin a taikhia uh hi. A pumzaw mitampi le khebai mitampi in zong damna a ngah uh hi. ⁸ Tua khua ah lungdamna lianpi a piang hi. ⁹ Tua khua ah amah le amah mi thupi khat a kingaihsun Simon kici mi khat a om hi. Amah in nidang in hih khua sungah mitphial lak a, Samaria khua mite in lamdang a sa mahmah uh hi. ¹⁰ “Hihpa in Pasian vangliatna nei hi,” ci in a neupen pan a lianpen dongin a thu a ngai uh hi. ¹¹ Amaute in ama bawl mitphialte lamdang a sak uh sawt khinzo ahih manin ama gen bangbang a ngai uh hi. ¹² Ahih hangin Philip in Pasian kumpigam tawh kipawl lungdamna thu le Zeisu Khazih min a tangko ciangin um uh a, numei pasal tui a kiphum uh hi. ¹³ Tua ciangin Simon in zong um ahih manin tui a kiphum khit ciangin Philip paina peuh ah a zui kawikawi hi. Philip in a bawl nalamdangte le limlamdangte a muh ciangin lamdang a sa mahmah hi. ¹⁴ Tu in Samaria mite in Pasian thu a up lam uh Jerusalem khuapi a om sawltakte in a zak uh ciangin amaute kiangah Peter le John a paisak uh hi. ¹⁵ Amaute a tun uh ciangin tua mite in Kha Siangtho a ngah nadingun thu a ngetsak uh hi. ¹⁶ Banghang hiam cihleh Topa Zeisu mina tui a kiphum khit uh hangin amaute khat beek tungah Kha Siangtho a tung nai kei hi. ¹⁷ Tua hi a, sawltakte in tua mite tungah khut a ngak uh ciangin amaute in Kha Siangtho a ngah uh hi. ¹⁸ Tua mite in sawltakte khut ngakna tawh Kha Siangtho a ngah uh Simon in a muh ciangin Peter le John‑te mai ah sum lui a, ¹⁹ “Mi khatpeuh tungah ka khut ka ngakh ciangin, Kha Siangtho a ngah theih nading thuneihna hong pia un,” a ci hi. ²⁰ Ahih hangin Peter in ama kiangah, “Pasian letsong sum tawh a kilei thei ding sa na hih manin na sum tawh kisiakhawm in! ²¹ Pasian mai ah na lungsim maanlo ahih manin hih thu tawh na kisai kha kei a, na ngah ding zong bangmah a om kei hi. ²² Tua ahih manin na hoih lohna kisikkik inla, Pasian tungah thum in. Tua hi leh amah in na lungsim ngaihsutna a hong maisak kha ding hi. ²³ Banghang hiam cihleh lungsim siatna tawh na kidim a, hoih lohna in hong hencip hi cih kong thei hi,” a ci hi. ²⁴ Tua ciangin Simon in, “Tu‑a na gensa thute khat beek ka tungah a hong tun loh nadingin Topa tungah thu hong ngetsak in,” a ci hi. ²⁵ Amaute in Samaria mite teenna khua tampi ah lungdamna thu tangko in Topa thu hilhin teci a pan khit uh ciangin Jerusalem khuapi ah a ciahkik uh hi. ²⁶ Tu in Topa vantungmi khatin Philip kiangah, “Ding inla, Jerusalem khuapi pan Gaza khua paisukna lampi tawnin va pai in,” a ci hi. Hih munin leitaw lam sehnel gam ahi hi. ²⁷ Tua ciangin Philip zong dingkhia in a pai pah hi. Tualai ah Ethiopia kumpinu Candace neihsa khempeuh a uk, thu a nei mahmah a kiget Ethiopia mipa khat a na om hi. Amah in Pasian bia in Jerusalem khuapi pan a hong ciahkik hi. ²⁸ Amah in a sakolleng tungah a tuankawm in kamsangpa Isaiah laibu a sim hi. ²⁹ Tua ciangin Kha in Philip kiangah, “Sakolleng kiangah va naih inla, va pawl in,” a ci hi. ³⁰ Tua ciangin Philip zong tua pa kiangah va tai a, kamsangpa Isaiah laibu a sim a zak ciangin, “Na laisim a thu na theitel hiam?” ci in a dong hi. ³¹ Tua pa in, “Hong hilh khat a om kei leh bangci theih ding ka hi hiam?” a ci hi. Tua ciangin amah tawh leng tungah tuangkhawm dingin Philip a sam hi. ³² Tua pa Lai Siangtho simna in, “A kigo ding tuu bangin amah a kipaipih hi. Tuuno in a mulmetpa mai ah a ham loh bangin, Amah zong a pau kei hi. ³³ Simmawh nuaisiahna thuakin, Ama tungah thuman thukhenna a kizang kei hi. Ama nuntakna leitung pan kilakhia ahih manin, A suan a khakte thu, Kua in gen nawn ding ahi hiam?” a cihna mun ahi hi. ³⁴ Tua ciangin Ethiopia mangpa in Philip kiangah, “Hih kamsangpa in kua thu gen ahi hiam? Ama thu gen ahi hiam? Ahih keileh midang khat thu gen ahi hiam?” ci in a dong hi. ³⁵ Tua ciangin Philip in tua Lai Siangtho mun pansan in Zeisu thu a hilh hi. ³⁶ Tu in, amaute paisuk uh a, tui omna munkhat a tun uh ciangin Ethiopia mangpa in, “En in, hihlai ah tui a om hi. Tui ka kiphum ding bangin hong khaktan ahi hiam?” a ci hi. ³⁷ Tua ciangin Philip in, “Na lungsim khempeuh tawh na up leh na kiphum thei hi,” a ci hi. Amah in, “Zeisu Khazih in Pasian Tapa ahi hi cih ka um hi,” a ci hi. ³⁸ Tua ahih manin amah in a sakolleng khawlsak a, Philip le Ethiopia mangpa tui sungah paisuk in Philip in amah tui a phum hi. ³⁹ Tui sung pan a hong paikhiat uh ciangin Topa Kha in Philip lakhia ahih manin Ethiopia mangpa in amah mu nawnlo a, ahi zongin lungdamtak in a paisuak hi. ⁴⁰ Philip ahih leh Azotus khua ah a kimukik hi. Amah zin kawikawi a, Caesarea khua dongin khua khempeuh ah lungdamna thu a tangko hi.

¹ Hih hun sungin Saul in Topa nungzuite thah dingin a sawm hi. ² Tua ahih manin hih Lampi thu a um numei pasal a muh peuhpeuh manin Jerusalem khuapi ah a puak theih nadingin Siampi Ukpa kiangah pai in, Damascus khuapi a kikhopna inn ukte a lah ding phalna lai a ngen hi. ³ Amah hong kuankhia a Damascus khuapi a tunkuan in thakhat in vantung pan khuavak khat ama kimkot ah a tang hi. ⁴ Tua ciangin amah lei ah puksuk a, “Saul aw, Saul aw, banghang in hong bawlsia na hi hiam?” ci a, hopihna awging khat a za hi. ⁵ Tua ciangin amah in, “Topa aw, nang kua na hi hiam?” a ci hi. Topa in, “Na hong bawlsiat Zeisu ka hi hi. Ciangzum sui lecin nang aa dingin na mahmah ding hi,” a ci hi. ⁶ Tua ciangin amah in lamdangsa mahmah in a ciling a, “Topa aw, bang hih dinga hong deih na hi hiam?” a ci hi. Tua ciangin Topa in ama kiangah, “Tho inla khua sungah lut in. Na hih ding teng hong kigen ding hi,” a ci hi. ⁷ Saul tawh a zinkhawm mite in tua awging a zak uh hangin kuamah mu lo uh ahih manin gen ding mel thei loin a dingcip uh hi. ⁸ Saul zong leilak pan tho in a khuadak hangin kuamah a muthei kei hi. Amaute in a khutah lenin Damascus khuapi sungah a lutpih uh hi. ⁹ Amah in khuamu lo, an nelo, tui dawn loin ni thum sung a om hi. ¹⁰ Tu in Damascus khuapi sungah Ananias a kici nungzuipa khat om a, a mangmuhna sungah Topa in, “Ananias aw,” ci in a sam hi. Tua ciangin amah in, “Hihlai ah ka om hi, Topa aw,” ci in a dawng hi. ¹¹ Topa in, “Dingkhia inla, ‘Tang,’ a kici kongzing ah va pai in. Judas inn ah Tarsus khua mi Saul a kici pa va kankhia in. En in, amah thungen in a om hi. ¹² Thu a nget laitak in mang mu a, Ananias a kici mi khat ama kiangah hong pai in khua a muhkik theih nadingin ama tungah a khut hong nga ding hi cih thu a mu zo hi,” a ci hi. ¹³ Tua ciangin Ananias in, “Topa aw, hihpa in Jerusalem khuapi a om nangma misiangthote bawlsia mahmah hi cih mi tampi tung panin ka zazo hi. ¹⁴ Hih khua ah zong nangma min a suang khempeuh a mat theih nadingin siampi liante kiang panin phalna a ngah khinzo hi,” a ci hi. ¹⁵ Ahih hangin Topa in, “Va pai in. Gentile‑te, kumpite le Israel tate mai ah ka min a genkhia dinga ka teel, keima vanzat khat ahi hi. ¹⁶ Keima min hangin a thuak ding gimna tampi ka laklai ding hi,” a ci hi. ¹⁷ Ananias zong pai in tua inn sungah va lut a, Saul tungah a khut nga in, “Ka sanggampa Saul aw, khua na muhkik nading le Kha Siangtho tawh na kidim nadingin nong paina lampi a hong kilang Topa Zeisu in kei hong sawl hi,” a ci hi. ¹⁸ Tua ciangin Saul mit panin ngalip tawh a kibang na khat thakhat in kia a, khua a muthei pah hi. Tua ciangin amah tho in tui a kiphum hi. ¹⁹ An a nek khit ciangin a tha a dimkik hi. Tua khit ciangin Damascus khuapi a om nungzuite tawh tawmvei sung Saul a omkhawm hi. ²⁰ Kikhopna inn ah Saul pai a, “Zeisu in Pasian Tapa ahi hi,” ci in Khazih thu a hilh pah hi. ²¹ Ama thugen a za khempeuh in lamdangsa mahmah uh a, “Hihpa in Jerusalem khuapi sunga Zeisu min a suangte a bawlsiapa hilo ahi hiam? Hih khua ah zong tua mite manin, siampi liante kiangah a puak dinga hong pai hilo ahi hiam?” a ci uh hi. ²² Ahih hangin Saul thakhauh semsem a, Zeisu in Khazih ahi hi ci in teltak in lak ahih manin Damascus khuapi a teeng Judah mite lungsim a patausak mahmah hi. ²³ Ni tampi khit ciangin Judah mite in Saul thah dingin a vaihawm uh hi. ²⁴ Ahih hangin Saul in amaute vaihawmna a thei hi. Amaute in amah a thah theih nadingun kongpi ah sun le zan in a pang uh hi. ²⁵ Tua ahih manin nungzuite in zan laitak in Saul paipih uh a, bawmpi sungah koihin kulhpi pua lamah a khaisuk uh hi. ²⁶ Jerusalem khuapi ah Saul a tun ciangin nungzuite tawh kipawl ding a hanciam hangin amah nungzui suak khin cih thu um zolo uh ahih manin a vekpi un a kihta uh hi. ²⁷ Ahih hangin Barnabas in sawltakte kiangah amah paipih a, lampi ah Topa a muhna, Topa in amah a hopihna le Damascus khuapi sungah Zeisu min tawh hangtak a thu a hilhnate a gen hi. ²⁸ Tua ciangin Saul in Jerusalem ah amaute tawh kikhawl a, sungtum pusuak in a om hi. ²⁹ Amah in Topa Zeisu min tawh hangtak in thu a gen hi. Greek dan a zui Judah mite tawh thu kinial uh a, amaute in amah thah a sawm uh hi. ³⁰ Sanggamte in hihthu a theih uh ciangin Caesarea khua ah amah kha uh a, tua panin Tarsus khua ah a paisak uh hi. ³¹ Tua hun in Judea gam a kipan Galilee gam le Samaria gam khempeuh a om pawlpite lungmuangtak in om uh a, tha a ngah uh hi. Topa kihtakna le Kha Siangtho thapiakna tawh kalsuan uh a, a pung semsem uh hi. ³² Tu in Peter khualzin kawikawi a, Lydda khua‑a a teeng misiangthote kiangah a hong tung hi. ³³ Tua khua ah Aeneas a kici mipa khat a om hi. Amah a pumzaw ahih manin kum giat sung lupna tung ngakin a om khat ahi hi. ³⁴ Peter in ama kiangah, “Aeneas aw, Zeisu Khazih in nang hong damsak zo hi. Tho inla, na lupna zial in,” a ci hi. Amah zong thakhat in a tho pah hi. ³⁵ Tua hi a, Lydda khua le Sharon zanglei a teeng mi khempeuh in tua pa a muh uh ciangin Topa lamah a kikhel uh hi. ³⁶ Tu in Joppa khua ah Tabitha, Greek pau in Dorcas a kici nungzui numei khat a om hi. Tua nu in mizawngte huhin thupha a bawl tawntung numei khat ahi hi. ³⁷ Tua laitak in amah cina in a si hi. A luang a sil khit uh ciangin inndei tungnung ah a sial uh hi. ³⁸ Joppa khua le Lydda khua kinai ahih manin tua khua ah Peter om hi cih thu nungzuite in a zak khitsa uh ahi hi. Peter sam dingin mi nih sawl uh a, thakhat in a hong pai pah nadingin a thumsak uh hi. ³⁹ Peter zong dingin amaute tawh a paikhawm hi. A tun ciangin inndei tungnung ah a kahtohpih uh hi. Meigong khempeuh Peter kiangah dingin kap uh a, Dorcas in a nuntak lai‑a a khuisak nikteen puansilhte a lak uh hi. ⁴⁰ Peter in amaute khempeuh a pusuahsak khit ciangin khukdin in thu a ngen hi. Tua khit ciangin misi luang lamah kihei in, “Tabitha aw, tho in,” a ci hi. Tua ciangin tua nu a mit hong hak a, Peter a muh ciangin a tho hi. ⁴¹ Tua ciangin Peter in a khut khakin dingsak a, misiangthote le meigongte samin a nungtakik Dorcas a pia hi. ⁴² Joppa khua sungteng ah tua thu kizel a, mi tampi in Topa a um uh hi. ⁴³ Joppa khua ah Peter ni tampi taam a, savun khuipa Simon inn ah a kinga hi.

¹ Caesarea khua ah Cornelius kici mi khat om a, Italy galkaphonɠ sungah galkap 100 ukpa khat ahi hi. ² A innkuanpih khempeuh tawh Pasian thu hahkat in Pasian a kihta mi khat ahi hi. Mizawngte tungah cinghtak in huhna pia a, Pasian kiangah thu a ngen tawntung mi khat zong ahi hi. ³ Ni khat, nai kua pawlin mang mu a, “Cornelius aw!” ci in a hopih Pasian vantungmi khat teltak in a mu hi. ⁴ Amah in vantungmi limtak in a et ciangin lau a, “Bang ahi hiam, topa aw?” a ci hi. Vantungmi in ama kiangah, “Na thungetna le mizawngte na huhna Pasian in hong thei khinzo hi. ⁵ Tu in Joppa khua ah mi sawl inla, Peter a kici Simon samsak in. ⁶ Amah in tuipi gei‑a a teeng savun khuipa Simon inn ah a om hi. Amah in na hih ding teng a hong hilh ding hi,” a ci hi. ⁷ Amah a hopih vantungmi a paikhiat khit ciangin Cornelius in a innsung nasemte nih le a kisapna teng a sepsak den Pasian thu a hahkat galkap khat a sam hi. ⁸ A thuteng a hilhcian khit ciangin Joppa khua ah amaute a paisak hi. ⁹ A zingciang in amaute zinkhia uh a, Joppa khua a tunkuan uh nai guk hun pawlin Peter zong thungen dingin innkhumzang ah a kahto hi. ¹⁰ Amah a gilkial mahmah a, an a lunggulh hi. Ahi zongin ankuang a bawl laitak un Peter in mangmu a, ¹¹ van kihong in puanzapi tawh a kibang kiuli a nei, a kiu ciat ah a kikhihsa in vantung pan a kikhai, ama lamah hong kiasuk a mu hi. ¹² Tua sungah leitung a om khe li nei ganhing namkimte, gamsate, a bokvak ganhingte le vana leng vasate a om hi. ¹³ Tua laitak in aw khat hong ging a, “Peter aw, tho in, tuate go inla ne in,” a ci hi. ¹⁴ Ahih hangin Peter in, “Topa aw, ka ne peuhmah kei ding hi! Banghang hiam cihleh a nekhuailo le a sianglo na khat beek ka ne ngei kei hi,” a ci hi. ¹⁵ Tua ciangin awging khatin a nihveina hopihkik a, “Pasian in siang hi a cihte nekhuailo hi ci kei in,” a ci hi. ¹⁶ Hih bangin thumvei a cih khit ciangin tua hong kikhaisuk na vantung ah a kilatokik hi. ¹⁷ Peter in a mangmuhna a khiatna bang hi ding hiam ci a, lungmang in a om laitak in Simon inn a zongzong Cornelius sawltakte kongpi mai ah a ding uh hi. ¹⁸ Amaute in, “Hihlai ah Peter a kici Simon hong tung kha hiam?” ci in a galdot uh hi. ¹⁹ Peter in a mangmuhna ngaihsun in a om laitak in Kha in ama kiangah, “En in, mi thum in nang hong zong uh hi. ²⁰ Tua mite keima hong sawl ahi hi. Tua ahih manin ding inla, kumsuk in. Lunghianglo tak in amaute zui in,” a ci hi. ²¹ Tua ciangin Cornelius in a hong sawl mite kiangah Peter paisuk a, “Hong en un, na mi zon uh keimah ka hi hi. Bang thu a hong pai na hi uh hiam?” a ci hi. ²² Amaute in, “Galkap 100 ukpa Cornelius in a inn ah nang hong sap nading le na thugen a ngaih nadingin Pasian in a siangtho vantungmi khat tungtawn in amah thu a pia zo hi. Amah in Pasian a kihta, a thuman mi khat hi a, Judah minam buppi in a zahtak uh mi khat ahi hi,” a ci uh hi. ²³ Tua ciangin Peter in inn sungah amaute samin a giaksak hi. A zingciang in tua mite tawh Peter dingkhia a, Joppa khua‑a sanggamte pawlkhat in zong a zui uh hi. ²⁴ A zingciang in Caesarea khua a tung uh hi. Tu in Cornelius in a tanaute le a lawm itteng kaikhawm in amaute a ngak hi. ²⁵ Inn sungah Peter a lut ciangin Cornelius in dawn a, a khe phungah bokin a bia hi. ²⁶ Ahih hangin Peter in amah phongto a, “Ding in, kei zong mihing mah ka hi hi,” a ci hi. ²⁷ Peter in amah a hopih kawmin inn sungah a lut ciangin mi tampi kikhawm in a om a mu hi. ²⁸ Tua ciangin Peter in amaute kiangah, “Judah mi khat minam dangte tawh a kikholh ding le a kianga a hawh ding thukham tawh kituak lo hi cih thu na thei uh hi. Ahih hangin Pasian in mi khatpeuh santaklo, sianglo hi ka cih khakloh nadingin a hong lakzo hi. ²⁹ Tua ahih manin nong sap phetun nial loin kong pai pah hi. Bang thu a hong sam na hi uh hiam?” a ci hi. ³⁰ Tua ciangin Cornelius in, “Tuma ni li lai, tubang hun, nai kua pawlin ka inn sungah antang in thu ka ngen hi. Tua ciangin puanpak a silh mi khat ka mai ah hong dinga, ³¹ ‘Cornelius aw, na thungetnate Pasian in hong zazo a, mizawngte na huhna zong a hong ciaptehsak zo hi. ³² Tua ahih manin Joppa khua ah mi sawl inla, Peter a kici Simon samsak in. Amah in tuipi gei‑a a teeng savun bawlpa Simon inn ah zintung in a om hi. Amah hong tun ciangin thu hong gen ding hi,’ a hong ci hi. ³³ Tua ahih manin nang hong sam ding mi kong sawl pah a, tu in hong paithei na hih manin hoih mahmah hi. Tua ahih manin na gen dinga Pasian in hong piak thu khempeuh a ngai dingin tu in Pasian mai ah koteng ka om uh hi,” a ci hi. ³⁴ Tua ciangin Peter zong thugen kipan a, “Pasian in kuamah a deidan loh lam ka thei taktak hi. ³⁵ Minam khempeuh lakah amah kihta in a dik a gamta mite amah in a sang hi. ³⁶ Pasian in Israel mite tunga a puak lungdamna thu in mi khempeuh Topa, Zeisu Khazih tungtawn in a kihilh kilemna thu ahi hi. ³⁷ Tua thu Judea gam khempeuh ah kitangko khinzo a, John in tuiphumna thu a tangko khit ciangin Galilee gam pana hong kipankhia thu ahi hi, cih thu zong na thei uh hi. ³⁸ Pasian in Nazareth khua mi Zeisu, Kha Siangtho le vangliatna tawh nilh a, amah in thupha bawl in a vak kawikawi hi. Pasian in ompih ahih manin Dawimangpa bawlsiat mi khempeuh a damsak hi cih thu zong na thei uh hi. ³⁹ “Singkhuam tunga a khailuppa uh tua Zeisu in Judah mite gam sung le Jerusalem khuapi sunga a bawl na khempeuh ah a teci ka hi uh hi. ⁴⁰ A ni thum ni in Pasian in amah a thawhkiksakna thu kilangtak in a lak hi. ⁴¹ Ahih hangin mi khempeuh muhin lak lo a, Pasian in a teel kholhsa teci ahi kote muh ding bekin hong lak hi. Misite lak pan a thawhkik khit ciangin amah tawh anne tuidawn in ka omkhawm uh hi. ⁴² Zeisu in a nungta lai mite le a sisa mite tungah thukhen dinga Pasian in a sehpa ahi hi cih thu mite tungah a tangko ding le teci a pang dingin amah in kote thu hong pia zo hi. ⁴³ Amah a um mi khempeuh in ama min hangin mawhmaisakna a ngah ding uh hi ci in kamsang khempeuh in zong ama thu teci a pangzo uh hi,” ci in a hilh hi. ⁴⁴ Peter in hih thute a gen laitak mahin ama thugen a za mi khempeuh tungah Kha Siangtho a tung hi. ⁴⁵ Pasian in Gentile‑te tung nangawn ah Kha Siangtho letsong a piakna thu, Peter tawh a paikhawm vun ki‑at thu‑um mite in a muh uh ciangin lamdang a sa mahmah uh hi. ⁴⁶ Banghang hiam cihleh tua mite in paunam tuamtuam tawh pau in, Pasian min a phatna uh amaute in a za uh hi. ⁴⁷ Tua ciangin Peter in, “Eite mah bangin Kha Siangtho a ngah hih mite tui sungah a kiphum ding uh kua in khamthei ding ahi hiam?” a ci hi. ⁴⁸ Tua ciangin Topa minin tui a kiphum nadingun Peter in amaute thu a pia hi. Tua khit ciangin amaute in ni tawmvei sung Peter a tambeh nadingin a kho uh hi.

¹ Tu in Gentile‑te in zong Pasian thu sangta uh hi cih thu Judea gama om sawltakpite le sanggamte in a za uh hi. ² Jerusalem ah Peter a paitoh ciangin vunat mite in ama kiangah, ³ “Vunatlo mite kiangah va pai in an na nekhawm hi!” ci in a mawhsak uh hi. ⁴ Ahih hangin Peter in a kipat a kipan a bantak in hih bangin a hilhcian hi. ⁵ Amah in, “Joppa khua ah thungen a ka om laitak in mang ka mu a, puanzapi tawh a kibang na khat, kiu li nei, a kiu ciat ah kikhihsa in vantung pan hong kikhaisuk, ka kiangah hong tung hi. ⁶ Tua sung limtak ka et ciangin leitung a khe li nei ganhingte, gamsate, a bokvak ganhingte, vana leng vasate ka mu hi. ⁷ Tua ciangin, ‘Peter aw, tho in tuate go inla ne in,’ a hong ci awging khat ka za hi. ⁸ “Kei zong, ‘Topa aw, ka ne peuhmah kei ding hi! Banghang hiam cihleh a nekhuailo le a siangtholo na khat beek ka kamsung ka tun ngei kei hi,’ ka ci hi. ⁹ “Ahih hangin tua awging mahin vantung panin hong dawngkik a, ‘Pasian in siang hi a cihte nekhuailo hi ci kei in,’ a hong ci hi. ¹⁰ Hih bangin thumvei a hong cih khit ciangin, a vekpi in vantung ah a kikhaitokik hi. ¹¹ “Tua hun mahin Caesarea khua panin ka kianga hong kisawl mi thumte, ka omna inn mai ah hong ding uh hi. ¹² Tua ciangin lunghianglo taka amaute ka zuih nadingin Kha in a hong gen hi. Tua thamloh in hih sanggamte guk in zong kei hong zui uh a, a hong samsakpa inn ah ka lut uh hi. ¹³ Tua pa in, Vantungmi khat ka inn sungah hong ding ka mu a, ‘Joppa khua ah mi sawl inla, Peter a kici Simon samsak in. ¹⁴ Amah in nangmah le na inn sunga om mi khempeuh in hotkhiatna na ngah nadingun thu hong hilh ding hi hong ci hi,’ ci in a hong gen hi. ¹⁵ “Tua banga thugen ka kipat laitak in a kipat cillai‑a eite tunga a hong tun banglianin amaute tungah Kha Siangtho a hong tung hi. ¹⁶ Tua ciangin, ‘John in mite a tuiphum hi note na hih uh le Kha Siangtho tawh hong kiphum ding hi,’ ci a, Topa hong gensa thu ka phawkkik hi. ¹⁷ Tua ahih manin eite in Topa Zeisu Khazih i up cianga Pasian in hong piak Kha Siangtho letsong mah amaute zong pia ahih leh Pasian a langpan dingin kei leltak kua ka hi hiam?” a ci hi. ¹⁸ Amaute in hih thute a zak uh ciangin bangmah gen nawnlo in Pasian phat uh a, “Tua ahih leh Pasian in Gentile‑te tungah zong nuntakna ngah nadingin mawhna kisik kikna thu a pia zo hi,” a ci uh hi. ¹⁹ Tu in Stephen a kibawlsiatna hangin a kithehthang mite Phoenicia gam, Cyprus tuikulh le Antioch khua dong tung uh a, kuamah dang tungah thuhilh loin Judah mite tung bekah a hilh uh hi. ²⁰ Ahi zongin Cyprus gam mite le Cyrene khua mite pawlkhat, Antioch khua ah va pai in Greek ngeina a zui Judah mite kiangah Topa Zeisu thu a va hilh uh hi. ²¹ Topa vangliatna in amaute ompih a, mi tampi in thu um in Topa lamah a kihei uh hi. ²² Jerusalem khuapi a om pawlpi mite in hih thute a zak uh ciangin Antioch khuapi dong a pai dingin Barnabas a sawl uh hi. ²³ Tua khua ah Barnabas tungin Pasian hehpihna a muh ciangin a lungdam a, a vekpi un lungsim takpi tawh Topa sungah a kipsuak nadingun a hanthawn hi. ²⁴ Banghang hiam cihleh amah in mihoih khat hi a, Kha Siangtho le thu upna tawh a kidim mi hi a, Topa kiangah mi tampi a tun hi. ²⁵ Tua khit ciangin Saul a zong dingin Tarsus khua ah Barnabas a pai hi. ²⁶ A muh ciangin Antioch khua ah a paipih hi. Tua khua ah kum khat sung pawlpite tawh omkhawm uh a, mi tampi kiangah Pasian thu a hilh uh hi. Thu‑um mite pen Christian ci in min a kiphuah masakna mun in Antioch khua ahi hi. ²⁷ Tua hun sungin Jerusalem khuapi panin Antioch khua ah kamsangte a hong paisuk uh hi. ²⁸ Tuate lakah Agabus a kici pa dingto a, “Claudius Caesar kumpipa hun lai‑a a tun bangin leitung bup ah kialpi hong tung ding hi,” ci in Kha theihsakna bangin a gen hi. ²⁹ Tua ciangin nungzuite in zong amaute hihzawh zah ciat tawh, Judea gama om sanggamte huhna sum khak dingin a khentat uh hi. ³⁰ A khentat bangun semtakpi uh a, Barnabas le Saul khut tungtawn in upate kiangah a khak uh hi.

¹ Tua hun sungin Herod kumpipa in pawlpi mite pawlkhat bawlsiat dingin a man hi. ² Amah in John sanggampa James namsau tawh a thatsak hi. ³ Tua thu in Judah mite lungdamsak hi cih a muh ciangin Peter zong mat dingin a sawm leuleu hi. Tua hunin Silngo Sawhloh Anlum Pawi sung ahi hi. ⁴ Amah in Peter a mat khit ciangin thongah khum a, Paisan Pawi a ven ciangin mihonpi mai ah a lahkhiat dingin galkap li ta in a om pawl lite cin dingin a ap hi. ⁵ Tua ahih manin thong sungah Peter kikhum a, ahi zongin pawlpi in ama aa dingin tatsat loin Pasian kiangah thu a ngetsak uh hi. ⁶ Herod in Peter a lahkhiat sawm ni zanin sikkhau nih tawh amah kikhih a, galkap nihte kikal ah a ihmu hi. Thongcingte zong kongkhak mai ah amah cingin a om uh hi. ⁷ Tu in en in, Topa vantungmi khat Peter kiangah thakhat in hong dinga, thong inn sung khempeuh ah khuavak a tang hi. Vantungmi in Peter a pang khoih in, “Tho mengmeng in!” ci in a phong hi. Tua ciangin Peter khut a sikkhaute a kitolkhia hi. ⁸ Tua ciangin vantungmi in, “Na kawng gak inla, na khedap bulh in,” a cih ciangin Peter in zong tua bangin a hih hi. Tua ciangin vantungmi in, “Na puan silh inla hong zui in,” a ci hi. ⁹ Tua ciangin Peter paikhia in vantungmi nung a zui hi. Ahi zongin vantungmi nasep teng a taktak ahihlam thei loin mangmu a kisa hi. ¹⁰ A cingte vilna mun a khatna le a nihna a khen uh ciangin khuapi sung lutna sikkongpi a tung uh hi. Tua kongpi ama thu in kihong a, amaute gel zong a pusuakkhia uh hi. Kongzing khat a zuih khit uh ciangin vantungmi in thakhat in amah a nusia hi. ¹¹ Peter in khua a phawkkik ciangin, “Tu in Topa in a vantungmi hong sawlin, Herod khut sung pan le Judah mite hong thah nading panin hong honkhia khinzo hi cih thu teltak in ka thei hi,” a ci hi. ¹² Peter in hih thu a phawk khit ciangin Mark a kici John nu Mary inn ah va pai a, tualai ah mi tampi thungen in a kikhawm uh hi. ¹³ Peter in kong a kiuh ciangin Rhoda kici numeino khat kong a hon dingin a pai hi. ¹⁴ Tua nu in Peter aw ahihlam a theih ciangin lungdamlua a, kongpi hon nai loin inn sungah lehtaikik a, kongpi mai ah Peter a dinlam a va ko hi. ¹⁵ Ahih hangin amaute in, “A hai hi ni teh!” a ci uh hi. Ahih hangin amah in, “Ahi taktak mah hi,” ci in a gen teitei ciangin amaute in, “Ama vantungmi hi in teh,” a ci lai uh hi. ¹⁶ Tu in, Peter in kong kiukiu lai ahih manin hon uh a, amah a muh uh ciangin lamdang a sa mahmah uh hi. ¹⁷ Ahih hangin amah in daitak in a om nadingun a khut tawh lak a, Topa in thong sung pan a lakkhiatna thuteng a gen hi. Amah in, “James le i sanggamte kiangah hih thu va gen un,” a cih khit ciangin mun dang khatah a pai hi. ¹⁸ Khuavak phetin Peter bangci ahi hiam ci in galkapte sungah buaina lianpi a om hi. ¹⁹ Herod in Peter limtak in a zonsak hangin a mu zo kei uh hi. Tua ciangin a cingte thu sit a, amaute thah dingin thu a pia hi. ²⁰ Tu in Tyre khua le Sidon khua mite tungah Herod a heh mahmah hi. Tua ahih manin kumpi innsung vaihawmpipa Blastus a pawlmat khit uh ciangin Herod kiangah amaute hong paikhawm uh a, kilem nading a thum uh hi. Banghang hiam cihleh amaute in hih kumpipa kiang panin a annek ding uh a ngah uh hi. ²¹ A kisehkholh ni a tun ciangin kumpi puan tawh Herod kizem in a kumpi tokhom tungah tu a, mipi tungah thu a gen hi. ²² Mipite in, “Ama awging in mihing aw hilo in pasian awging ahi hi!” ci in a kiko uh hi. ²³ Herod in minthanna Pasian pia lo ahih manin Topa vantungmi khatin thakhat in amah vattuk a, than in ne in a si hi. ²⁴ Ahih hangin Pasian thu ahih leh khangin a pung semsem hi. ²⁵ Barnabas le Saul in a sep ding teng uh a zawh khit uh ciangin Jerusalem khuapi pan ciahkik uh a, Mark a kici John a tonpih uh hi.

¹ Tu in Antioch khua pawlpi sungah kamsangte le sia pawlkhat a om uh hi. Amaute in Barnabas, Niger kici Simeon, Cyrene khua mi Lucius, gam uk mangpa Herod tawh a khangkhawm Manaen le Saul‑te ahi uh hi. ² Amaute in antang in Topa nasem in a om laitak un, Kha Siangtho in, “Ka piaksa nasep a sem dingin Barnabas le Saul hong khenkhia un,” a ci hi. ³ Antang a thu a nget khit uh ciangin amaute tungah khut nga in a sawlkhia uh hi. ⁴ Kha Siangtho in a sawlkhiat amaute, Seleucia khua ah paisuk uh a, tua panin tembaw tawh Cyprus tuikulh ah a pai uh hi. ⁵ Salamis khua a tun uh ciangin Judah mite kikhopna inn sungah Pasian thu hilh uh a, John in zong amaute nasep a huh hi. ⁶ Tua tuikulh ah zin kawikawi uh a, Paphos khua a tun uh ciangin Bar‑Jesus kici Judah minam, dawi thu a siam, kamsangzuau khat a mu uh hi. ⁷ Amah in mipil mangpipa Sergius Paulus nasemte khat ahi hi. Mangpipa in Pasian thu za nuam ahih manin Barnabas le Saul a samsak hi. ⁸ Ahih hangin mangpipa in thu a up loh nadingin dawi thu a siam Elymas a kici pa in hamciam in amaute a langpan hi. ⁹ Ahih hangin Paul a kici Saul pen Kha Siangtho tawh kidim in, Elymas en gega a, ¹⁰ “Khemna le zuauthu bekbek tawh a kidim, Dawimangpa tapa, thuman khempeuh a galbawlpa aw, Topa lampi tangte na kawikaih den pen khawl lo ding na hi hiam? ¹¹ Tu in en in, Topa khut nang tungah hong tung dinga, na mittaw in tawlkhat sung khua na mu kei ding hi,” a ci hi. Thakhat in tua pa tungah khuamial hong tung ahih manin a khut lena a paipih ding mi zongin a zawt kawikawi hi. ¹² Mangpipa in tua thu piang a muh ciangin amaute in Topa tawh kisai thu a hilhte uh lamdang sa mahmah in a um hi. ¹³ Tu in, Paul le a lawmte Paphos khua pan tembaw tuangin Pamphylia gam Perga khua tung uh a, tua panin John in amaute nusia in Jerusalem khuapi ah a ciah hi. ¹⁴ Perga khua panin paikhia uh a, Pisidia gam Antioch khua a tung uh hi. Sabbath ni ciangin kikhopna inn sungah lutin a tu uh hi. ¹⁵ Thukham le Kamsangte laibu‑te a kisim khit ciangin kikhopna inn ukte in amaute samsak uh a, “Sanggamte aw, mipite hanthot nop na neih uh leh gen un,” a ci uh hi. ¹⁶ Tua ciangin Paul dingto in a khut vana thu a hilh in ah, “Israel mite le Pasian a kihta mite aw, na ngai un. ¹⁷ Hih Israelte Pasian in i pute i pate na teel a, Egypt gamah mikhual bangin a om laitak un amaute lamsang in, tua gam panin a thahat ama khut tawh a paikhiatpih hi. ¹⁸ Sehnel gam sunga tua mite gamtatna teng kum 40 sung a thuak keikai hi. ¹⁹ Amah in Canaan gam sunga minam sagihte a suksiat khit ciangin amaute aa dingin tua gam a hawmsak hi. ²⁰ “Tua khit ciangin Pasian in kamsangpa Samuel hun dong kum 450 sung amaute aa dingin thukhen mangte a pia hi. ²¹ Tua ciangin amaute in kumpi khat ngen uh a, Pasian in Benjamin suante khat ahi Kish tapa Saul pia a, tua pa in kum 40 sung a uk hi. ²² Tua khit ciangin amah in Saul hemkhia in, amaute kumpi dingin David a lamto hi. Pasian in David thu a genna ah, ‘Keima deihna khempeuh a sem ding ka lungsim puak bang a nei Jesse tapa David ka mu zo hi,’ a ci hi. ²³ Pasian in ama kamciamna tawh kizui in hih mipa suan pan Israel mite aa dingin Honpa Zeisu a piangsak hi. ²⁴ Zeisu hong paima in John in Israel mi khempeuh a mawhna uh kisikkik a tui a kiphum nadingun thu a hilh masa hi. ²⁵ John in a nasep a zawh ciangin, ‘Kei kua hi, ci in nong ngaihsun uh hiam? Kei, amah ka hi kei hi. Ahih hangin en un, kei khit ciangin a dang khat hong pai dinga, ama khedapkhau sut dingin zong ka kilawm kei hi,’ a ci hi. ²⁶ “Abraham suan ka sanggamte le note laka om Pasian a kihtate aw, Pasian in hih hotkhiatna thu note kiangah hong puakzo hi. ²⁷ Jerusalem khuapi a teengte le gam ukte in Zeisu a thei kei uh hi. Sabbath ni sima a kisim den kamsangte thugente zong theilo uh ahih manin Zeisu tungah thu khen in tua thu kigente a tangtungsak uh hi. ²⁸ Sihkhop nading zah thu khat beek mu lo napi in, Pilate in amah a thah nadingin a ngen uh hi. ²⁹ Lai Siangtho sunga kigelhsa amah tawh kisai thu khempeuh tua bangin a tangtunsak khit uh ciangin singkhuam tung pan amah lakhia in han sungah a vui uh hi. ³⁰ Ahih hangin Pasian in misite lak panin amah a thokiksak hi. ³¹ Galilee gam panin Jerusalem khuapi ah amah tawh paitokhawm mite in ni tampi sung amah mu uh a, tua mite in ama aa dingin mipi tungah teci a pang uh hi. ³² “Tua ahih manin Pasian in i pute i pate tunga a kamciamsa lungdamna thu note tungah a hong tangko ka hi uh hi. ³³ Late nihna sungah, ‘Nangmah in ka Tapa na hi hi, Tuni in nang kong piangsak zo hi,’ ci a, a kigelh mah bangin Pasian in misite lak panin Zeisu thokiksak a, i pute i pate suan le khak ahi eite tungah tua kamciamna hong tungsak zo hi. ³⁴ ‘David tunga ka kamciam a siangtho le, A muanhuai hehpihna note tungah kong tungsak ding hi,’ a cih mah bangin a muatlo dingin misite lak panin Zeisu a thosak zo hi. ³⁵ “Tua ahih manin amah in Late laibu mundang khatah zong, ‘Na Misiangthopa, Na muatsak kei ding hi,’ a ci hi. ³⁶ “David ahih leh Pasian deihna bangin ama khang aa dingin na a sep khit ciangin si a, a pute a pate tawh kivuikhawm in a muat hi. ³⁷ Ahih hangin Pasian in a thawhkiksak pa a muat kei hi. ³⁸ “Tua ahih manin sanggamte aw, Pasian in hih mipa tungtawn in mawhna hong maisakna thu a hong tangko ka hi uh hi cih thu theita un. ³⁹ Moses thukham tawh dik na tan zawh lohna khempeuh panun, Pasian in Zeisu a um khempeuh dik hong tangsak hi. ⁴⁰ Tua ahih manin Kamsangte gensa thu note tungah hong tun loh nadingin kidawm un. ⁴¹ “Kamsangte in, ‘No, mi a neumuhte aw, en un, Lamdangsa unla kisiamang un. Banghang hiam cihleh note kiangah a hong kitangko hangin, Na up theih hetloh ding uh nasep khat, Note khang sungin ka sem ding hi,’ a ci hi,” ci in a hilh uh hi. ⁴² Kikhopna inn pan Judah mite a paikhiat uh ciangin, Gentile‑te in amaute kiangah Sabbath ni kik ciangin hih thute mah a genkik nadingun a thum uh hi. ⁴³ Kikhop a man uh ciangin Judah mi tampi le Judah mi a kisuaksak biakna mi tampi in Paul le Barnabas nung a zui uh hi. Amaute in zong Pasian hehpihna sungah a omsuak nadingun tua mite a hanthawn uh hi. ⁴⁴ Sabbath ni kik ciangin Pasian thu ngai dingin khuazang phialin a hong kikhawm uh hi. ⁴⁵ Judah mite in mihonpi a muh uh ciangin haza mahmah uh ahih manin Paul thugente lehgen in kosia in a langpan uh hi. ⁴⁶ Tua ciangin Paul le Barnabas hang semsem uh a, “Pasian thu note tunga kong hilh masak ding uh a kul ahi hi. Ahih hangin note in tua thu nolhin nuntak tawntungna a ngah dingin no le no kilawm kisalo na hih manun en un, Gentile‑te kiangah ka pai ding uh hi. ⁴⁷ Banghang hiam cihleh, ‘Hotkhiatna thu leimong dongah puakin, Gentile‑te khuavak a suak dingin, Note kong seh hi,’ ci in Topa in thu a hong pia zo hi,” ci in a gen uh hi. ⁴⁸ Gentile‑te in hih thu a zak uh ciangin lungdam mahmah uh a, a kigen Topa thu a phat uh hi. Nuntak tawntungna ngah dingin a kisehsa mite in a um uh hi. ⁴⁹ Tua gam buppi ah Topa thu a kizel hi. ⁵⁰ Ahih hangin Judah mite in Pasian thu a hahkat, a kithupi muh numei makaite le khuapi uliante holhthawh uh a, Paul le Barnabas‑te bawlsia in amau gam panin a hawlkhia uh hi. ⁵¹ Ahih hangin Paul le Barnabas in amaute khe a leivuite singkhia in Iconium khua ah a pai uh hi. ⁵² Nungzuite ahih leh lungnopna le Kha Siangtho tawh a kidim uh hi.

¹ Iconium khua a tun uh ciangin Paul le Barnabas in Judah mite kikhopna inn sungah lutin mihonpi thu hilh uh a, Judah mite le Greek mite tampi in a um uh hi. ² Ahi zongin Gentile‑te in sanggamte tungah lungsim hoihlo a neih nadingun thu‑umlo Judah mite in a holhthawh uh hi. ³ Tua ahih ciangin tua khua ah Paul le Barnabas‑te sawtpi taam uh a, Topa thu hangtak in a gen uh hi. Pasian in amaute tungtawn in limlamdangte le nalamdang lianpite piangsak in ama hehpihna thu teci a pang hi. ⁴ Ahih hangin khuasung mite kipawlkhen uh a, pawlkhat in Judah mite pawlin a dangte in sawltakte a pawl uh hi. ⁵ Gentile‑te le Judah mite in a makaite uh tawh kikop in thagum tawh sawltakte bawlsia in suang tawh denlup ding a hanciam uh hi. ⁶ Sawltakte in tua thu a theih uh ciangin Lycaonia gama om Lystra le Derbe khua‑a kipan tua kim khuate ah tai in, ⁷ lungdamna thu a tangko uh hi. ⁸ A suah tunga kipan a khezaw in lam a pai ngeilo pasal khat Lystra khua ah a om hi. ⁹ Amah in Paul thugen a ngai hi. Paul in tua pa limtak in en a, dam theih nading upna a neih lam a muh ciangin, ¹⁰ “Na khe tawh dingtang in!” ci in nakpitak kiko in thu a piak leh tua pa diangin lam a pai hi. ¹¹ Tu in mihonpite in Paul nasep a muh uh ciangin, “Pasiante mihing bangin hong paisuk ahi hi!” ci in Lycaonia pau tawh nakpi in a kiko uh hi. ¹² Barnabas pen Zeus ci uh a, Paul pen thugenpipa ahih manin Hermes a ci uh hi. ¹³ Tua ciangin khuanawl a om Zeus biakna innpi a siampipa in bawngtalte le pakkualte kongpi ah hong paipih in mipite tawh biakna pia dingin hong kithawi uh hi. ¹⁴ Ahih hangin sawltak Barnabas le Paul in tua thu a zak uh ciangin a puan uh balkek in mihonpi lakah lut uh a, ¹⁵ “Lawmte aw, banghang in hih bangin hih na hi uh hiam? Kote zong note mah tawh a kibang mihing ka hi uh hi. Kimanna a omlo hih nate nusia in leitung le vantung, tuipi le tuate sunga om na khempeuh a bawlpa, a nungta Pasian lamah na kihei nadingun lungdamna thu a hong hilh ka hi bek uh hi. ¹⁶ Tua Pasian in a beisa khangte ah minamte khempeuh amau ut bangbang in nungta dingin a phal hi. ¹⁷ Ahi zongin ama teci ding om loin a koih kei hi. Eite aa dingin a hoih nate hong bawlsak in vana guahtui le khaici a gahsak khuahunte hong pia a, an ne tui dawnin lungdam kipahna tawh a hong kidimsak hi,” ci in kiko in a gen uh hi. ¹⁸ Hih thute a gen uh hangin mihonpi in gangawh biakna tawh amaute biakna piaksawm veve uh a, khamlah dektak in a om uh hi. ¹⁹ Tua ciangin Antioch khua le Iconium khua pana Judah mite tua munah hong pai uh a, mihonpi holhthawh in suang tawh Paul a deng uh hi. Amah a si khinzo sa uh ahih manin khuapua lamah a kaikhia uh hi. ²⁰ Ahi zongin ama kimah nungzuite a din laitak un amah tho in khua sungah a lut hi. A zingciang in Barnabas tawh Derbe khua ah a pai uh hi. ²¹ Tua khua ah lungdamna thu tangko in mi tampi nungzui a suahsak khit uh ciangin Lystra, Iconium, le Antioch khua lamah a kilehkik uh hi. ²² Nungzuite lungsim hanthawn in thu upna a zopsuak nadingun thapia uh a, “Haksatna tampi thuakin Pasian kumpigam sungah a lut ding i hi hi,” ci in a hilh uh hi. ²³ Pawlpi khempeuh ah makaite a koih khit uh ciangin antan thungetna tawh a uppa uh Topa khut sungah a ap uh hi. ²⁴ Pisidia gam kantan in Pamphylia gam hong tung uh a, ²⁵ Perga khua ah thu a hilh khit uh ciangin Attalia khua ah a paisuk uh hi. ²⁶ A zawh khitsa uh nasepna teng a sem dingin Pasian hehpihna sungah amaute a ki‑apna mun Antioch khua zuan dingin tua mun panin tembaw tawh a pai uh hi. ²⁷ Tua lai a hong tun uh ciangin pawlpite kaikhawm uh a, amaute tungtawn a Pasian nasepnate genin Pasian in Gentile‑te tungah thu upna kong a honsakna thu a zasak uh hi. ²⁸ Tua khua ah nungzuite tawh amaute sawt veipi a omkhawm uh hi.

¹ Judea gam panin a hong paisuk mi pawlkhat in, “Moses hong piak ngeina zui in vun na at kei uh leh hotkhiatna na ngahthei kei ding uh hi,” ci in sanggamte a hilh uh hi. ² Tua ahih manin Paul le Barnabas in tua mite tawh nakpitak in kinial uh a, thu tampi a kisel uh hi. Tua ahih manin hih thu tawh kisai in Jerusalem khuapi a om sawltakte le makaite kiangah Paul, Barnabas le a dang mi pawlkhat paisak dingin a khentat uh hi. ³ Pawlpi mite in amaute kha uha Phoenicia gam le Samaria gam kantan in a pai uh hi. Gentile‑te a kikhelna thu zasak kawikawi uha, sanggamte khempeuh a kipak mahmah uh hi. ⁴ Jerusalem khuapi a tun uh ciangin pawlpi mite, sawltakte le makaite in amaute na dawn uha amaute tungtawn in Pasian nasepnate khempeuh a zasak uh hi. ⁵ Ahi zongin Pharisee pawlte lak panin thu‑um mi pawlkhat hong ding uh a, “Tua mite in vunat in Moses thukham a zuih nadingun thu i piak ding kisam hi,” a ci uh hi. ⁶ Tua ahih manin tu in hih thu a ngaihsun dingin sawltakpite le makaite a kikhawm uh hi. ⁷ Nakpitak in a kisel khit uh ciangin Peter dingto a, “Sanggamte aw, Gentile‑te in keima kam panin lungdamna thu za a, a up theih nadingun a sawtvei simlai in Pasian in eite lak panin kei hong teel hi cih na thei uh hi. ⁸ Tua hi a, lungsim a thei Pasian in eite mah bangin Kha Siangtho a piakna tawh amaute a san lam a kilangsak zo hi. ⁹ Upna tawh a lungsim uh hahsiangsak in amaute le eite kikal ah kilamdanna a omsak kei hi. ¹⁰ Tua ahih manin tu in, i pute i pate le eite mahmah in i puak zawh loh hakkol banghang in thu‑um mite tungah suanin Pasian ze‑et na hi uh hiam? ¹¹ Amaute mah bangin eite in zong Topa Zeisu Khazih hehpihna tungtawn in hotkhiatna i ngah ding hi cih i um hi,” ci in a gen hi. ¹² Tua khit ciangin Pasian in amaute tungtawn in Gentile‑te laka a bawl limlamdangte le nalamdang lianpite Paul le Barnabas in a zaksak uh ciangin mihonpite in dai khipkhep in a ngai uh hi. ¹³ Amaute a daih khipkhep khit uh ciangin James in, “Ute naute aw, na ngai un. ¹⁴ Pasian in ama min dingin Gentile‑te lak panin mi honkhat lakhia dingin a hawhcilna thu Simon in hong gen khinzo hi. ¹⁵ Hih in kamsangte gensa thu tawh kituak hi. Kamsangte in, ¹⁶ ‘Tua hun khit ciangin kong paikik ding hi. A puk khinsa David biakbuuk ka lamkik dinga, A kicimsa teng puahpha in ka dingkiksak ding hi. ¹⁷ Tua hi leh a kiplai mite le, Keima min a suang Gentile‑te khempeuh nangawn in Topa a zong ding uh hi. Hih na khempeuh a bawl Topa in a gen ahi hi,’ ci in Lai Siangtho sungah a kigelh hi,” a ci uh hi. ¹⁸ “Pasian in ama sep ding khempeuh a kipatcil a kipan a theih khitsa vive ahi hi. ¹⁹ Tua ahih manin Pasian lama hong kihei Gentile‑te buaisak kei ni. ²⁰ Ahi zongin amaute in milim biakna a kizang an, numei pasal mawhna, gawlmek a kithat ganhing sa le sisan a tan nadingun laikhak i gelh ding hoih ka sa hi. ²¹ Banghang hiam cihleh tanglai peka kipan khua khempeuh ah Moses laibu sunga om thute kihilh a, Sabbath ni sialin kikhopna innteng ah a kisim den hi,” a ci hi. ²² Sawltakpite, makaite le pawlpi buppi in tua thu hoih a sa uh hi. Antioch khua ah Paul le Barnabas tawh a paikhawm dingin sanggamte laka a makaite sung panin Barsabas a kici Judas le Silas‑te a teel uh hi. ²³ Amaute in hih bangin laikhak gelhin a puasak uh hi. Sawltakpite, makaite le sanggamte in Antioch khua, Syria gam le Cilicia gama om Gentile mi ahi sanggamte kong hopih uh hi. ²⁴ Kote kiang panin a hong pai mi pawlkhat in, “Vunat in, thukham na zuih ding uh ahi hi,” ci in a thugenna uh tawh note hong buaisak in na lungsim uh hong siatsak lam ka na za uh hi. Kote in tua bang dingin amaute tungah thu ka pia kei uh hi. ²⁵ Tua ahih manin lungsim kituak in ka kikhawm uh a, mi pawlkhat teelkhia in i it Barnabas le Paul tawh note kiangah kong paisak ding uh hoih ka sa uh hi. ²⁶ Amaute in i Topa Zeisu Khazih min hangin a nuntakna uh a pia ngamte ahi uh hi. ²⁷ Tua ahih manin hih thute amau kam mahmah tawh zong hong genkawm dingin Judas le Silas kong paisak uh hi. ²⁸ Banghang hiam cihleh hih a kisam thute lobuang note tungah vangik zaw hong suan lo dingin Kha Siangtho le kote in hoih ka sa uh hi. ²⁹ Tuate in, milim biakna a kizang an, sisan, gawlmek a kithat ganhing sa le numei pasal thangtatnate na tan nading uh ahi hi. Tuate tang le uh cin note aa dingin a hoih ding hi. Na ci damta un. Mangpha, ci in lai a khak uh hi. ³⁰ Tua bangin amaute sawlkhia uh a, Antioch khua a tung uh hi. Tualai ah mihonpi kikhawmsak in tua laikhak a pia uh hi. ³¹ Tua laikhak a sim khit uh ciangin tua thapiakna thu hangin a lungdam mahmah uh hi. ³² Tu in Judas le Silas‑te in zong kamsang ahihna uh tawh thu tampi gen uh a, sanggamte thapia in a thakhauhsak uh hi. ³³ Sawtkhop a taam khit uh ciangin sawltakpite kiangah lungnuamtak in a ciahkiksak uh hi. ³⁴ Ahih hangin Silas in amah tualai ah a taamlai ding hoih a sa hi. ³⁵ Paul le Barnabas zong Antioch khua ah taamlai uh a, midang tampi tawh Topa thu hilhin lungdamna thu a tangko khawm uh hi. ³⁶ Tawlkhat khit ciangin Paul in Barnabas kiangah, “Topa thu i hilh khitna khuate ah paikik in i sanggamte bangci uh ahi hiam cih a en dingin va hawh ni,” a ci hi. ³⁷ Tu in Barnabas in Mark kici John tonpih dingin a sawm hi. ³⁸ Ahih hangin Mark in Pamphylia gam panin amaute ciahsan in amaute nasepna ah zuisuak lo ahih manin Paul in amah tonpih loh dingin a gen hi. ³⁹ Kinak sellua uh ahih manin kikhen uh a, Barnabas in Mark tonpih in Cyprus tuikulh ah tembaw tawh a pai uh hi. ⁴⁰ Ahi zongin Paul in Silas teel a, sanggamte in Pasian hehpihna sungah amaute a ap khit uh ciangin a kuankhia uh hi. ⁴¹ Syria gam le Cilicia gamah Paul zin kawikawi in pawlpite tha a pia hi.

¹ Tua ciangin Derbe le Lystra khua ah Paul a tung hi. En in, tua khua ah Timothy kici nungzui khat a om hi. Amah Judah minam, thu‑um numei khat tapa hi a, a pa ahih leh Greek mi ahi hi. ² Amah pen Lystra khua le Iconium khua‑a om sanggamte in a pahtak mahmah uh mi khat ahi hi. ³ Paul in amah tonpih nuam ahih manin sam a, tua kima om Judah mi khempeuh in a pa Greek mi ahihlam thei uh ahih manin vun a atsak hi. ⁴ Khuapi tengah zin kawikawi uh a, Jerusalem khuapi ah sawltakpite le makaite in zuih dingin a khun uh thute a theisak kawikawi uh hi. ⁵ Tua ahih manin pawlpite upna ah kip in nisim in mimal a khang hi. ⁶ Tu in Phrygia gam le Galatia gamah a zin khit uh ciangin Asia gam sungah Pasian thu a gen ding uh Kha Siangtho in a kham hi. ⁷ Mysia gam a tun khit uh ciangin Bithynia gam zinsawm uh a, ahi zongin Kha in a phal kei hi. ⁸ Tua ciangin Mysia gam kantan in, Troas khua ah a paisuk uh hi. ⁹ A zan ciangin Paul in mang mu a, Macedonia mi khat ama kiangah hong dingin, “Macedonia gam lamah hong galkah inla, kote hong huh in,” ci in a thum hi. ¹⁰ Paul in mang a muh khit ciangin Topa in tua mite kiangah lungdamna thu a tangko dingin hong samzo hi cih thei in Macedonia gam pai dingin ka sawm pah uh hi. ¹¹ Tua ahih manin Troas khua panin tembaw tuangin Samothrace tuikulh ah tangtak in ka pai uh a, a zingciang in Neapolis khua ka tung uh hi. ¹² Tualai panin Macedonia gam sunga khua lianpen khat ahi Rome mite teenna Philippi khua ka tung uh a, tua khua ah nitam simsim ka taam uh hi. ¹³ Sabbath ni in khuapua lamah paikhia in thu kingetna mun gungei ah ka pai uh hi. Tualai ah ka tu uh a, kikhawm a om numeite kiangah thu ka gen uh hi. ¹⁴ Tu in ka thugen uh a zate lakah Lydia a kici Pasian a bia numei khat a om hi. Amah Thyatira khua mi hi a, puan dupsan zuakte khat ahi hi. Tua nu in Paul thugen a up theih nadingin Topa in a lungsim a honsak hi. ¹⁵ Amah le a innkuanpihte tui kiphum uh a, amah in, “Topa tungah a citak mi khatin nong ngaihsut uh leh hong pai unla ka inn ah hong tung un,” ci in hong samin a hong kho tentan hi. ¹⁶ Khatvei, thungen dinga ka pai laitak un mailam thu genkholhna tawh a tote aa ding sum tampi a ngahsak, dawilut sila numei khatin kote hong dawntuah hi. ¹⁷ Tua numei in Paul le kote hong zui a, “Hih mite in hotkhiatna lampi a hong hilh, Sangbel Pasian nasemte ahi uh hi,” ci in a kiko hi. ¹⁸ Tua numei in ni tampi sung tua bangin a hih den hi. Tua ciangin Paul in nopmawhsa mahmah ahih manin tua dawi lamah kihei a, “Ama sung pan na paikhiat nadingin Zeisu Khazih min tawh thu kong pia hi,” a cih ciangin tua hun lian mah in tua dawi a paikhia hi. ¹⁹ A tote in a sum ngah nading uh lametna om nawnlo hi cih a theih uh ciangin Paul le Silas‑te man uh a, thuneite omna sumbuuk lamah a kai uh hi. ²⁰ Thukhen vaihawmte kiangah puak in, “Hih Judah mite in ka khuasung uh nakpi in hong buaisak uh hi. ²¹ Ei Rome mite san theihloh ding le zuih theihloh ding ngeinate hong hilh uh hi,” a ci uh hi. ²² Tua ciangin mihonpite in Paul le Silas langpan huan uh a, thukhen vaihawmte in amaute puan suahkhiatsak in ciangpum tawh sat dingin thu a pia uh hi. ²³ Tam veipi a sat khit uh ciangin thonginn ukpa in hoihtak a cin nadingin thupia a, thongah a khum uh hi. ²⁴ Thonginn ukpa in tua bang thupiakna ngah ahih manin thongsung tawngnung pen ah amaute khum in a khe uh kol a bulh hi. ²⁵ Ahih hangin zankim laitak in Paul le Silas in thungen in Pasian phatna la sa uh a, thongkiate in a ngai uh hi. ²⁶ Tua laitak in nakpitak in zinling a, thonginn bulpi nangawn a kilok hi. Thong kongkhak khempeuh thakhat in kihong a, thongkiate a kikhihna sikkhau khempeuh zong a kitolkhia hi. ²⁷ Thonginn ukpa a khanlawh ciangin thonginn kongkhakte honsa a om mu a, thongkia teng a taimang khin sa ahih manin a namsau dokin amah le amah a kithahsawm hi. ²⁸ Ahih hangin Paul nakpi in kiko a, “Ka vekpi un hihlai ah ka om uh hi. Nang le nang bangmah kicih kei in,” a ci hi. ²⁹ Thonginn ukpa in meivak a nget khit ciangin taikawm in thong sungah lut a, a cilingsa in Paul le Silas mai ah a bok hi. ³⁰ Tua khit ciangin amaute gel paikhiatpih a, “Siate aw, hotkhiatna ka ngah nadingin bang ka hih ding hiam?” ci in a dong hi. ³¹ Amaute in, “Topa Zeisu Khazih um in. Tua hi leh nang le na innkuanpihte in hotkhiatna na ngah ding uh hi,” a ci uh hi. ³² Tua khit ciangin amah le inn sunga om mi khempeuh tungah Topa thu a hilh uh hi. ³³ Amah in tua zan tua hun mahin Paul le Silas‑te lakhia in a liammate uh a sawpsak hi. Amah le a innkuanpih khempeuh tui a kiphum pah uh hi. ³⁴ Thonginn ukpa in a inn sungah amaute lutpih in an a pia hi. A innkuan buppi un Pasian um uh ahih manin a lungdam mahmah hi. ³⁵ A zingciang in thukhen vaihawmte in palikte sawlin, “Tua mite khahkhia un,” ci in a gensak uh hi. ³⁶ Thonginn ukpa in Paul kiangah, “Note kong khah nadingin thukhen vaihawmte in thu hong zasak uh hi. Tua ahih manin tu in nuamtak in ciahta un,” a ci hi. ³⁷ Ahih hangin Paul in amaute kiangah, “Rome gam mi ahi kote thusit lopi in mipi mai ah hong satin thong hong khia uh hi. Tu in a simtham in hong sawlkhia ziau thei ding uh ahi hiam? Hi thei peuhmah lo ding hi! Amaute mahmah hong pai in hong lakhia uh hen,” a ci hi. ³⁸ Palikte in thukhen vaihawmte kiangah tua thu a zasak uh hi. Amaute Rome gam mi ahihlam a zak uh ciangin a patau uh hi. ³⁹ Tua ciangin amaute pai in va thum uh a, a lakkhiat khit uh ciangin khuasung pan a paikhiat nadingun a sawl uh hi. ⁴⁰ Amaute gel zong thonginn sung pan paikhia in Lydia inn ah a lut uh hi. Tualai ah sanggamte tawh kimu in amaute tha a piak khit uh ciangin a dingkhia uh hi.

¹ Tu in amaute in Amphipolis le Apollonia khuate a nawk khit uh ciangin Thessalonica khua a tung uh hi. Tua khua ah Judah mite kikhopna inn khat a om hi. ² Tua ciangin Paul in ahih ngei bangin kikhopna inn ah lut a, amaute tawh nipi thum sung Lai Siangtho kikum in a om hi. ³ Khazih in gimna a thuak khit ciangin misite lak panin a thokik ding mah ahihna thu teltak in lak a, “Note kianga kong hilh uh hih Zeisu in Khazih ahi hi,” ci in a hilh hi. ⁴ Amaute pawlkhat in tua thu um uh a, Pasian thu a hahkat Greek mi honkhat le numei makai tampi in Paul le Silas‑te a pawl uh hi. ⁵ Ahih hangin a umlo Judah mite in haza uh ahih manin sumbuuk phual panin migilo pawlkhat a va zawnkhia uh hi. Mi honkhat ngah uh a, tuate tawh khuasung teng a so ngeingaisak uh hi. Paul le Silas‑te mihonpi mai ah kaikhia nuamin Jason inn a busim uh hi. ⁶ A muh loh uh ciangin Jason le sanggamte pawlkhat khuapi ukte kiangah kai uh a, “Leitung a lumlet mite hih mundong hong tungta uh a, ⁷ Jason in zin a tungsak hi. Hih mite in, ‘Zeisu a kici kumpi dang khat om hi,’ ci in Caesar kumpipa thukhunna tawh a kilehbulh vive in a gamta uh hi,” ci in a kiko uh hi. ⁸ Mihonpite le khua‑ukte in hih thu a zak uh ciangin a lungmang uh hi. ⁹ Amaute in Jason le a dangte kitansak in a khah uh hi. ¹⁰ Tua ciangin sanggamte in a zan a zanin Berea khua ah Paul le Silas paisak pah uh a, tua khua a tun uh ciangin Judah mite kikhopna inn ah a lut uh hi. ¹¹ Thessalonica khua mite sangin hih khua mite a lungsim uh gina zaw ahih manin lawpna takpi tawh thu ngai uh a, a maan le a maanlo a theih nadingun nisim in Lai Siangtho tawh a sittel uh hi. ¹² Tua ahih manin Judah mitampi in thu um uh a, Greek mite lak panin zong a zahtak uh numei pasal tampi in a um uh hi. ¹³ Ahih hangin Paul in Berea khua ah Pasian thu a hilh lam a theih uh ciangin Thessalonica khua‑a Judah mite va pai in mihonpi a va holhthawh uh hi. ¹⁴ Tua ciangin sanggamte in tuipi lam tawnin Paul paikhiasak pah uh a, Silas le Timothy ahih leh Berea khua ah a taamlai uh hi. ¹⁵ Paul a kha mite in Athens khuapi dong a zui uh hi. Silas le Timothy‑te a manlang theithei a hong pai nadingin Paul vaikhakna thu pua in a ciahkik uh hi. ¹⁶ Tu in Paul in Athens khuapi ah amaute ngakin a om sungin khuapi sungah milim tawh kidim in a om a muh ciangin a lungsim sungah na a sa mahmah hi. ¹⁷ Tua ahih manin kikhopna inn ah lutin Judah mite le Pasian thu a hahkat Gentile‑te tawh thu kikum in sumbuuk phuala a kimuh khakpih mite tawh zong nisim in a kikum hi. ¹⁸ Tua khit ciangin Epicurus nungzuite le Stoic mipilte pawlkhat in amah nialin, “Hih a mawk ciakciakpa gennop bang thu ahi hiam?” a ci uh hi. Paul in Zeisu thu le a thawhkikna thu hilh ahih manin a dang pawlkhatte in, “Gamdang pasiante thu a gen hi leh kilawm hi,” a ci uh hi. ¹⁹ Tua khit ciangin amah samin Ares mualvumɠ tungah paipih uh a, “Na gengen hih thuhilhna thak nong hilh thei ding hiam? ²⁰ Ka zak ngeiloh uh thu pawlkhat hong gen na hih manin bangci dan hiam cih ka thei nuam uh hi,” a ci uh hi. ²¹ Banghang hiam cihleh Athens khua mi khempeuh le tua khua‑a om gamdang mite in a hun uh thudang mahmah in zang lo uh a, thuthak khat peuhpeuh gen nading le ngaih nading bekin a zang uh hi. ²² Tua ciangin Ares mualvumɠ tunga mite lakah Paul dingin thu a gen in ah, “Athens khua mite aw, na khempeuh ah na biakna mi mahmah lam uh kong thei hi. ²³ Banghang hiam cihleh khuasung ka vak kawikawina ah biakna a na piak uh nate ka telet mahmah a, biaknatau khat tungah, ‘A KITHEILO PASIAN AA DING,’ ci a, a kigelh lai khat ka mu hi. Tua ahih manin theilopi a na biak pa uh thu note kiangah hong tangko ka hi hi. ²⁴ “Leitung le a sunga om na khempeuh a piangsakpa tua Pasian in leitung le vantung a uk Topa hi a, khut tawh kibawl biakinn sungah a teeng kei hi. ²⁵ Amah in mi khempeuh tungah nuntakna le naksuk naktoh a kipan na khempeuh hong piapa ahih manin kitangsapna a nei bangin mihingte khut tawh ama aa ding sepsak bawlsak a kul kei hi. ²⁶ Amah in leitung maitang khempeuh a a teeng dingin minam khempeuh sisan khat panin bawl a, tua minamte hun ding le amaute teen nading mun a sehkholhsak hi. ²⁷ Hih pen mite in Topa zongin a khut uh tawh zam a a muh theih nading uh a deihna ahi hi. Tua bang i cih hangin amah in eite tawh a kigamla ahi kei hi. ²⁸ Banghang hiam cihleh note laka laphuakte in zong, ‘Eite zong ama suan le khakte i hi hi,’ ci a, a gen bangin eite in ama sungah nungta in gamta in i om hi. ²⁹ Tua hi a, Pasian suan le khakte i hih manin Pasian pen mihingte gelna le khutsiamna tawh a kibawl kham lim peuh, ngun lim peuh, suangtum lim peuh tawh a kibang a i ngaihsut ding ahi kei hi. ³⁰ A taktak in cileng nidanglai in Pasian in tua bang theih lohnate a kimuhmawh bawl hangin tu in ahih leh mun khempeuh a om mi khempeuh mawhna a kisikkik nadingin thu a pia zo hi. ³¹ Banghang hiam cihleh amah in a sehsa mipa tungtawn in leitung mite tungah maantak a thu a khen ding hun khat a sehkhol zo hi. Amah in tua a sehsa mipa, misite lak pan thokiksak a, tua thu maantakpi ahihna mi khempeuh tungah teci a lakzo hi,” a ci hi. ³² Misite thawhkikna thu a zak uh ciangin pawlkhat in, “Hih thu ka zakik nuam uh hi,” ci uh a, a dangte in a zahpih uh hi. ³³ Tua ahih manin amaute lak panin Paul a paikhia hi. ³⁴ Ahi zongin tuate lak panin Ares mualvumɠ a thu vaihawm pawlte laka Dionysius, Damaris a kici numei khat le amaute tawh a omkhawm midangte in um uh a, Paul lamah a pang uh hi.

¹ Hihteng khit ciangin Athens khuapi pan Paul paikhia in Corinth khua a tung hi. ² Caesar kumpipa Claudius in Judah mi khempeuh Rome khuapi panin a paikhia dingin thu pia ahih manin Pontus gam mi Aquila a kici Judah mipa khat le a zi Priscilla‑te Italy gam panin a tun zawh a sawt nai kei hi. Paul in a muh ciangin amaute kiangah a va hawh hi. ³ Amaute puanbuuk khuimi hi uh a, a nasep uh kibang ahih manin amaute tawh Paul omkhawm in na a sem hi. ⁴ Paul in Sabbath ni simin kikhopna inn ah thu kikuppih in Judah mite le Greek mite a zol hi. ⁵ Silas le Timothy‑te Macedonia gam panin a hong tun uh ciangin Kha in Paul thahatsak a, Zeisu in Khazih ahi hi ci in Judah mite tungah teci a pang hi. ⁶ Judah mite in langpan in a kosiat uh ciangin Paul in a puan sing in, “Note sisan nomau tungah hong tu tahen kei ka siang hi. Tu a kipan in Gentile‑te kiangah ka paita ding hi,” a ci hi. ⁷ Tua kikhopna inn panin amah paikhia a, Pasian bia khat ahi Justus kici pa inn ah a pai hi. Tua pa inn pen kikhopna inn tawh a kizom pah ahi hi. ⁸ Tua ciangin kikhopna inn ukpa Crispus in a innkuanpih khempeuh tawh Topa a um uh hi. Paul thugen a za Corinth khua mi tampi in zong um in tui a kiphum uh hi. ⁹ Zankhat a mangmuhna sungah Topa in Paul hopih a, “Lau kei in pau loin om kei inla gen in. ¹⁰ Banghang hiam cihleh hong ompih ka hih manin kuamah in nang hong do lo dinga, bangmah hong cih lo ding uh hi. Hih khua ah mi tampi ka nei hi,” a ci hi. ¹¹ Tua khua ah kum khat le a lang sung tamsuak in Pasian thu a hilh hi. ¹² Gallio in Achaia gamah mangpi a suah ciangin Judah mite in kithukhat in Paul langpan uh a, thukhen zumah puak in, ¹³ “Hih mipa in thukham tawh kilehbulh in Pasian a bia dingin mite a zol hi,” a ci uh hi. ¹⁴ Thugen dinga Paul a kithawi laitak in Gallio in Judah mite kiangah, “Judah mite aw, hih thu in khialhna le tatsiatna thu ahih leh kong ngaihsutsak bek ding hi. ¹⁵ Ahi zongin thu kinialnate, minte le na thukham uh tawh kisai thute peuh ahih leh nomau mahin thei un. Tua bang thute ka khen nuam kei hi,” a ci hi. ¹⁶ Tua khit ciangin thukhen zum panin amaute a hawlkhia hi. ¹⁷ Tua ciangin Greek mite in kikhopna inn ukpa Sosthenes manin thukhen zum mai ah a sat uh hi. Ahih hangin Gallio in tua thute a awlmawh kei hi. ¹⁸ Paul in tawlpi khat a taam khit ciangin sanggamte mangpha khak a, a kiciamna sa bangin Cenchrea khua ah a sam a met khit ciangin Priscilla le Aquila‑te tawh tembaw tuangin Syria gamah a pai uh hi. ¹⁹ Ephesus khua a tun uh ciangin tua khua ah amaute a nusia hi. Amah ahih leh kikhopna inn ah lutin Judah mite tawh thu a kikum hi. ²⁰ Amaute kiangah sawtkhop khat taam dingin a khoh uh hangin mang zo loin, ²¹ mangpha khak a, “Mai‑a hong tung ding pawi, Jerusalem khuapi ah ka zat loh phamawh hi. Ahi zongin Pasian in hong awi leh note kiangah kong paikik ding hi,” ci in Ephesus khua pan tembaw tuangin a dingkhia hi. ²² Caesarea khua a tun ciangin khua sungah paito in pawlpi mite hopih a, tua khit ciangin Antioch khua ah a paisuk hi. ²³ Antioch khua ah tawlkhat a taam khit ciangin zinkhia a, Galatia gam le Phrygia gamteng ah zin kawikawi in nungzui khempeuh tha a pia hi. ²⁴ Tu in Apollos a kici Judah mi khat Ephesus khua a hong tung hi. Amah Alexandria khuapi a a suak mi khat hi a, thugen a siam banah Lai Siangtho zong a thei mahmah khat ahi hi. ²⁵ Amah in Topa lampi thu a sin khinsa mi khat hi a, lawptak le maantak in Topa thu gen in a hilh hi. Ahi zongin John tuiphumna thu bek a thei hi. ²⁶ Amah in kikhopna inn sungah hangtak in thu a gen hi. Priscilla le Aquila in ama thugen a zak uh ciangin samkhia uh a, Pasian lampi a kicing zaw in a hilhcian uh hi. ²⁷ Achaia gamah Apollos in zin a sawm ciangin sanggamte in amah hanthawn uh a, a paina ah hoihtak in a na kisan nadingin zong lai khat a puasak uh hi. Amah a tun ciangin hehpihna tungtawn a thu‑um mite nakpitak in a huh hi. ²⁸ Banghang hiam cihleh Judah mite upkhialhna teng mihonpi mai ah khauhtak in lakkhia a, Zeisu in Khazih hi cih Lai Siangtho panin a lak hi.

¹ Corinth khua ah Apollos a om sungin Paul in saklam gam nawkin pai a, Ephesus khua a tung hi. Tua khua ah nungzuite pawlkhat a muh ciangin ² amaute kiangah, “Note in na up hun mah un Kha Siangtho na ngah pah uh hiam?” ci in a dong hi. Amaute in, “Kha Siangtho kici a om lam nangawn ka za ngei kei uh hi,” a ci uh hi. ³ Tua ciangin Paul in, “Bangci bang tuiphumna tawh kiphum na hi uh hiam?” a cih ciangin, amaute in, “John tuiphumna tawh ka kiphum uh hi,” a ci uh hi. ⁴ Tua ciangin Paul in amaute kiangah, “John in ama khit cianga hong pai ding pa Zeisu Khazih a up nadingun hilh a, kisikkikna tawh kipawl tuiphumna a pia hi,” ci in a gen hi. ⁵ Amaute in hih thu a zak uh ciangin Topa Zeisu minin tui a kiphum uh hi. ⁶ Paul in amaute tungah a khut a ngak ciangin amau tungah Kha Siangtho hong tung a, pau nam tuamtuam tawh pau in kamsang in thu a gen uh hi. ⁷ Tua mite a vekpi un pasal sawm le nih ahi uh hi. ⁸ Kikhopna inn ah Paul pai zel in kha thum sung hangtak in thu gena Pasian kumpigam thute kikuppih in amaute a zol hi. ⁹ Ahih hangin mi pawlkhatte lungkhauh in um lo uh a, mihonpi mai ah tua Lampi thu a gensia uh hi. Tua ciangin Paul in amaute paikhiatsan a, a nungzuite a sapkhiat khit ciangin Tyrannus sanginnpi sungah nisim in thu a kikuppih hi. ¹⁰ Hih bangin kum nihsung a sepsuak ciangin Asia gam sunga a teeng Judah mite le Greek mi khempeuh in Topa Zeisu thu a za uh hi. ¹¹ Tua ciangin Pasian in Paul khut zangin a tuampian nalamdangte a bawl hi. ¹² Paul pumpi tawh a kisu kha khinsa puan ahi zongin dial khatpeuh ahi zongin cinate tawh a kisukkhaksak ciangin, a natna uh damin amaute sunga om dawigilote zong a paikhia hi. ¹³ Tua ciangin phuisamna tawh kha gilote hawlkhia a a kawi vakvak Judah mite pawlkhat in dawigilo a lutna mite tungah Topa Zeisu min zangin, “Paul genpa Zeisu min tawh na paikhiat nading thu kong pia uh hi,” a ci uh hi. ¹⁴ Sceva a kici Judah mite siampi lianpa tapa sagihte in zong tua bangin a hih uh hi. ¹⁵ Tua ciangin dawigilo in, “Zeisu lah thei ing, Paul lah thei ing, note banglak mi na hi uh hiam?” a ci hi. ¹⁶ Tua ciangin amaute tungah dawiveipa dianggawp in zogawp ngingei ahih manin si le nai tawh a guaktang un tua inn panin a taikhia uh hi. ¹⁷ Tua thu Ephesus khua‑a teeng Judah mite le Greek mi khempeuh in a theih uh ciangin lau mahmah uh hi. Tua ciangin Topa Zeisu min nakpitak in a phat uh hi. ¹⁸ Thu‑um mi tampi hong pai uh a, a gamtat siatna teng uh genkhia in a pulak uh hi. ¹⁹ Mitphial bawl mi tampi in zong a laibute uh hong paipih in mi khempeuh mai ah a haltum uh hi. Tua laibute a man a kiseh ciangin nguntang 50,000 man ahi hi. ²⁰ Hih bangin Topa thu nasiatak in hong khangin hong kizel semsem hi. ²¹ Hihteng a sep khit ciangin Paul in Macedonia gam le Achaia gamah a zin hi. Tua khit ciangin Jerusalem khuapi a pai dingin Kha in theisak a, “Tua khuapi ka tun khit ciangin Rome khuapi zong ka phak kul ding hi,” a ci hi. ²² Tua ahih manin amah a huh mi nihte ahi Timothy le Erastus‑te Macedonia gamah paisak a, amah ahih leh Asia gamah tawlkhat sung a taamlai hi. ²³ Tua hun lai mahin Lampi thu tawh kisai buaina lianpi khat a hong piang hi. ²⁴ Demetrius a kici nguntui sungpa khatin Diana a kici nusian biakinn limte ngun tawh bawl a, a nasem khutsiamte in sum tampi a ngah uh hi. ²⁵ Amah in tua bang nasepna a sem khempeuh samkhawm in, “Lawmte aw, hih nasepna panin sum tampi i ngah lamtak na thei uh hi. ²⁶ Tu in hih Paul in, ‘Khut tawh a kibawl peuhmah pasian hilo hi,’ ci in Ephesus khua bekthamlo in Asia gam buppi phial ah mi tampi a zol khinzo hi cih thu za in na mu uh hi. ²⁷ Tua ahih manin i nasepna a minsiat ding banah a lian nusian Diana‡ biakinnpi zong a kisimmawh khak ding lauhuai hi. Tua thamlo in Asia gam buppi le leitung buppi a kibia hih nusian thupina a bei ding zong lauhuai lai hi,” a ci hi. ²⁸ Tu in amaute in tua thu a zak uh ciangin heh mahmah uh a, “Ephesus khua mite Diana§ thupi mahmah hi!” ci in a kiko uh hi. ²⁹ Khua sung khempeuh ah tua buaina a hong kizelh ciangin Paul tawh khual a zinkhawm Macedonia gam mi Gaius le Aristarchus‑te manin pawilahna innpi sungah lungsim kikhat in a lut uh hi. ³⁰ Mihonpi lakah Paul pai dingin a kithawi ciangin nungzuite in a phal kei uh hi. ³¹ Paul lawmte ahi Asia gam uliante pawlkhat in zong pawilahna innpi sungah a pai teitei loh nadingin mi sawlin a gensak uh hi. ³² A kikhawm mite buaigawp in amau tumciat in awng zelzul uh a, tua hangin mipite buai in mi a tam zaw in a kikhopna uh a hang nangawn a thei kei uh hi. ³³ Mihonpi lak panin Judah mite pawlkhat in Alexander kaikhia uh a, mipi mai ah a koih uh hi. Alexander in a kihutna thu mipite tungah gen nuamin a khut tawh a lak hi. ³⁴ Ahih hangin amah Judah mi ahihlam a theih uh ciangin, “Ephesus khua mite nusian Diana thupi mahmah hi!” ci in aw kituak in nai nihsung bang a awng uh hi. ³⁵ Khuapi lai‑atpa in mihonpi a daihsak khit ciangin, “Ephesus khua mite aw, Ephesus khua mite pen a lian nusian Diana biakinnpi le Zeus pasian pana hong kiasuk tua nusian lim a cingte na hih lam uh a theilo kua om ahi hiam? ³⁶ Hih thute kuama nial theih ding hilo ahih manin daitak in om unla pheng gamtat kei un. ³⁷ Hih mite in nusian biakna innpi hong luhsak uh lah hilo, na nusian uh a hong kosiatsak uh zong hilo napi hih mun nong tun uh hi. ³⁸ Tua ahih manin Demetrius le a seppih khutsiamte in mi khatpeuh tungah lungkim lohna a neih uh leh thukhen zum om a, thukhen mangte zong a om uh hi. Tualai ah kikhia uh hen. ³⁹ Hihteng banah thudang kantelnop na neih uh leh thukhenna ngeina tawh a kituak kikhopna ah kikhen ding hi. ⁴⁰ Banghang hiam cihleh tuni‑a thu piangteng in mipi so gawpsak hi ci in hong kingawh ding lauhuai hi. Hih bangin mipi so ziazua na a hang kician om lo ahih manin i gen ding zong bangmah a om kei hi,” a ci hi. ⁴¹ Hih bang teng a gen khit ciangin mihonpi a ciahsak hi.

¹ Tua thubuai a ven khit ciangin Paul in nungzuite samsak a, mangpha a khak khit ciangin Macedonia gamah a pai hi. ² Tua gamah Paul zin kawikawi a, thu tampi tawh amaute tha a piak khit ciangin Greek gam tung a, ³ tua gamah kha thum sung a taam hi. Syria gamah tembaw tawh a paikuan ciangin Judah mite in amah thahsim sawm uh ahih manin Macedonia gam lam tawnin a pai dingin a khentat hi. ⁴ Asia gama Paul a zinna ah Berea khua mi Sopater, Thessalonica khua mi Aristarchus le Secundus, Derbe khua mi Gaius le Timothy, Asia gam mi Tychicus le Trophimus‑te in a zui uh hi. ⁵ Amauteng na pai masa uh a, Troas khua ah kote hong ngak uh hi. ⁶ Silngo Sawhloh Anlum Pawi a ven khit ciangin kote zong Philippi khua panin tembaw tuangin ka dingkhia uh hi. Ni nga khit ciangin amaute omna Troas khua ka tung uh a, tua khua ah ni sagih ka taam uh hi. ⁷ Nipi kal sunga ni masapen ni in anlum balnen dingin nungzuite a kikhawm uh hi. A zingciang in Paul paisawm ahih manin zankim dongin thu a gen hi. ⁸ A kikhopna uh inndei tungah meivak tampi a kivak hi. ⁹ Eutychus a kici tangvalno khat padenpauh ah tu a, Paul in thu sawtpi a gen sungin ihmu kha ahih manin inn dawl thumna panin kiasuk a, a va top uh ciangin a na si khinzo hi. ¹⁰ Ahih hangin Paul kumsuk in tangvalpa tungah bok a, kawi in, “Lunghimawh kei un. A nuntakna omlai hi,” a ci hi. ¹¹ Tua khit ciangin kahtokik a, anlum balnen in a ne uh hi. Khuavak dongin sawtveipi holim uh a, tua khit ciangin Paul a dingkhia hi. ¹² Amaute in tangvalpa a nungtasa in inn sungah paipih uh a, a lungdam mahmah uh hi. ¹³ Paul in Assos khua ciangdong khe in paisawm a, tua khua ah amah tawh kituah dingin ka gel uh hi. Tua ahih manin kote in tembaw tuangin Assos khua ah ka paikhol uh hi. ¹⁴ Amah tawh Assos khua ah ka kimuh uh ciangin Paul in tembaw tungah hong tuangin Mitylene khua ah ka paisuak uh hi. ¹⁵ A zingciang in tua khua pan ka paikhia uh a, Chios tuikulh gal ka tung uh hi. A thaiciang in Samos tuikulh ka tung uh a, Trogyllium khua ah taam in a zingciang in Miletus khua ka tung uh hi. ¹⁶ Paul in a hun neihteng Asia gamah a bei loh nadingin Ephesus khua ah taam loin paisuak dingin a khentat hi. Banghang hiam cihleh ahih theih leh Pentecost ni in Jerusalem khuapi ah a om theih nadingin a kinawh nuam ahi hi. ¹⁷ Miletus khua a tun ciangin Ephesus khua pawlpi makaite a sam dingin mi a sawl hi. ¹⁸ Amaute a hong tun uh ciangin Paul in amaute kiangah, “Asia gam sung kong lutcil ni‑a kipan in note laka ka nuntakzia na thei uh hi. ¹⁹ Kiniamkhiat mahmahna le khitui tampi tawh Topa na ka sem a, Judah mite in thah a hong sawm manun gimna tampi ka thuak hi. ²⁰ Note phattuam nading bangmah sit loin, mihonpi kikhopna ah ahi zongin inn khat khit inn khat ah ahi zongin lungdamna thu tangko in kong hilh khinzo hi. ²¹ Pasian tunga mawhna kisikkikna le i Topa Zeisu Khazih upna thu, Judah mite le Greek mite tungah teci ka pangzo hi. ²² Tu in en un, Jerusalem khuapi ah bang tuak ding cih ka theih loh hangin tua khua ah a pai teitei dingin ka lungsim in hong phu hi. ²³ Matna henna le haksatna in hong ngak hi cih bekbek Kha Siangtho in khua khempeuh ah hong theisak hi. ²⁴ Ahi zongin tuate khat beekin a hong linglawngsak zo kei hi. Pasian hehpihna tawh kisai lungdamna thu teci pang in Topa Zeisu tung pana ka ngah nasep lungdamtak a ka matut theih nadingin ka nuntakna zong pammaih ka sa kei hi. ²⁵ Tu in ngai un. Pasian kumpigam thu gena ka vak kawikawi na mite in ka maitang nong mu nawn kei ding uh hi cih ka thei hi. ²⁶ Tua ahih manin mi khempeuh sisan panin kei ka siang hi cih thu tuni in note tungah teci kong pang hi. ²⁷ Banghang hiam cihleh Pasian gelna khempeuh sit loin note kong hilh khinzo hi. ²⁸ Pasian in ama sisan tawh a leisa ama pawlpi tuucin banga a cing dingin Kha Siangtho in note hong koih ahi hi. Tua ahih manin no le no kikem unla, tuuhon khempeuh zong na kem un. ²⁹ Banghang hiam cihleh ka ciah khit ciangin note lakah keivom hangsante hong lut ding uh a, tuuhonte a hong koihkhong kei ding uh hi. ³⁰ Note sung panin thuman thutak lehkaih a, amaute lamah nungzuite a kaimang nuam mi pawlkhat a hong piang ding hi. ³¹ Tua ahih manin na pilvang un. Kum thum tawntung sun le zan tatsat loin khitui tawh note khempeuh tunga kong hilh thute na phawk un. ³² “Tu in sanggamte aw, Pasian tung le ama hehpihna thu ah note kong ap hi. Ama hehpihna thu in note hong kipsak in a sianthosak mi khempeuh tawh luahna a hong ngahkhawmsak ding hi. ³³ Kham le ngun, nikteen puansilh kuama a ka deihgawh ngei kei hi. ³⁴ Hi hi, keimah le ka lawmte kisapna teng hih ka khut in hong guan hi cih no mahmah in zong na thei uh hi. ³⁵ Na khempeuh ah hih bangin nasep hahkat in a zawngkhal mite na huh nadingun kong lak khinzo hi. ‘Ngahna sangin piakkhiatna ah thupha om zaw hi,’ ci a, Topa Zeisu thugente na phawk un,” a ci hi. ³⁶ Hih thuteng a gen khit ciangin khukdin in amaute khempeuh tawh thu a ngenkhawm hi. ³⁷ Tua ciangin a vekpi un nakpitak in kap uha Paul ngawngkawi in a nam uh hi. ³⁸ Ka maitang nong mu nawn kei ding uh hi a cihna thu in amaute a dahsak phadiak hi. Tua khit ciangin tembaw tungah amah a kha uh hi.

¹ Tu in amaute tawh ka kikhen khit uh ciangin tembaw tawh tangtak pai in Cos tuikulh ka tung uh hi. A zingciang in Rhodes tuikulh ka tung uh a, tua panin Patara khua ka tung uh hi. ² Tua khua ah Phoenicia gama pai ding tembaw khat ka muh uh ciangin tuangin ka zui uh hi. ³ Cyprus tuikulh ka muh uh ciangin taklam zuanin ka paisuak uh a, Syria gamah pai in Tyre khua ka tung uh hi. Tualai ah tembaw vanteng kisuahkhia ding ahih manin ka kumkhia uh hi. ⁴ Tua khua ah thu‑um mite ka muh uh ciangin ni sagih ka taam uh hi. Amaute in Jerusalem khuapi ah Paul a pai loh nadingin Kha theihsakna tawh a gen uh hi. ⁵ Ni sagih a cin ciangin tua khua pan dingkhia in ka khualzinna uh ka zom uh hi. Thu‑um mite in a zi a tate uh tawh khuanawl dong hong kha uh a, tuipi gei ah khukdin in thu ka ngen uh hi. ⁶ Mangpha ka kikhak khit uh ciangin tembaw tungah ka kah uh a, amaute zong a ciah uh hi. ⁷ Tyre khua pan tuitung khualzinna ka man khit uh ciangin Ptolemais khua ka tung uh a, sanggamte tawh kimu in ni khat ka taam uh hi. ⁸ A zingciang in Paul le ko a kithuahpih teng tua khuapan dingkhia in Caesarea khua ka tung uh hi. Upa sagihte lakah khatpa ahi lungdamna thu puakpa Philip inn ah tungin ka taam uh hi. ⁹ Tu in amah in kamsanna tawh thu a gen ta nungak siangtho li a nei hi. ¹⁰ Tualai ah ni tampi ka taam hun sungun Judea gam panin Agabus kici kamsangpa khat hong paisuk hi. ¹¹ Kote kiangah amah a hong tun ciangin Paul kawnggak la in tua kawnggak tawh amah le amah a khut le a khe a kihen hi. Tua khit ciangin amah in, “ ‘Jerusalem khuapi a Judah mite in hih kawnggak neipa hih bangin hen ding uha Gentile‑te khutah a pia ding uh hi,’ ci in Kha Siangtho in a hong gen hi,” a ci hi. ¹² Hih thu ka zak uh ciangin kote le tua muna om mite in Jerusalem khuapi ah Paul a pai loh nadingin ka kho uh hi. ¹³ Ahih hangin Paul in, “Banghang in kapin ka lungsim hong kitamsak na hi uh hiam? Banghang hiam cihleh Topa Zeisu min hangin Jerusalem ah matna henna thuak bekthamlo in a si ding dongin ka kigingkhol zo hi,” ci in a dawng hi. ¹⁴ Ka khoh zawhloh uh ciangin bangmah gen nawnlo in, “Topa deihna bang hi tahen,” ka ci uh hi. ¹⁵ Ni tawmkha ka taam khit uh ciangin kithawi in Jerusalem khuapi ah ka paito uh hi. ¹⁶ Caesarea khua‑a nungzuite pawlkhat in zong hong zui uha ka zin tun nading uh Cyprus mi Mnason a kici pa inn ah hong kha uh hi. Amah pen nungzui a suak masate khat ahi hi. ¹⁷ Jerusalem khuapi ka tun uh ciangin sanggamte in lungdamtak in hong dawn uh hi. ¹⁸ A zingciang in Paul le koteng James kiangah ka va hawh uh a, pawlpi makaite khempeuh zong a na om uh hi. ¹⁹ Paul in amaute a hopih khit ciangin ama nasepna tungtawn in Pasian in Gentile‑te laka a nasepnate kicingtak in a gen hi. ²⁰ Amaute in tua thute a zak uh ciangin Topa min phat uha Paul kiangah, “Sanggam aw, Judah mite lakah thu‑um mi tul tampi om a, thukham zuih ding a hahkat mahmah uh hi cih na thei hi. ²¹ Ahih hangin mi pawlkhat in nangma thu amaute tungah puak uh a, ‘Gentile‑te laka a teeng Judah mite in a tate uh vunat loin khanglui thuhilhnate zong a zuih loh nadingun Paul in gen a, Moses thu a nusiat nadingun thu a hilh hi,’ a ci uh hi. ²² Bangcih ding i hi hiam? Nang hong tungzo cih thu za khin ding uh ahih manin mihonpi hong kisutuah pelmawh ding uh hi. ²³ Tua ahih manin kong gen bangun hih in. A kiciam khinsa mihing li ka nei uh hi. ²⁴ Hih mite paipih inla amaute tawh kisiansuah khawmin a sammet man uh piaksak in. Tua hi leh nangma thu a kipuakte maanlo hi cih mi khempeuh in thei ding uh a, thukham zui in thumaan in a gamta na hihlam zong hong thei ding uh hi. ²⁵ Ahi zongin thu‑um Gentile‑te in milim biakna sa, sisan le gawlmek a kithat ganhing sa ne loin numei pasal mawhna bawl lo ding uh hi cih thu lobuang a dang tua bang nate a tan loh nadingun khentatna lai ka khak khinzo uh hi,” a ci uh hi. ²⁶ Tua hi a, a zingciang in Paul in tua mite tonpih in amaute tawh a kisiansuah khit uh ciangin, kisiansuahna hunte bei ni ding le mi khat ciat in biakpiakna a kipiak ding hun uh cingta hi cih a theisak dingin biakinnpi huang sungah a lut uh hi. ²⁷ Tu in ni sagih beikuanta in Asia gam pana hong pai Judah mite in biakinnpi huang sungah Paul a muh uh ciangin mihonpite holhthawh in amah man uh a, ²⁸ “Israel mite aw, hong huh un! Hihpa in i minam, i thukham le hih mun langpan in mun khempeuh a om mite khempeuh tungah thu a hilhpa ahi hi. Tua thamlo in biakinnpi huang sungah Greek mite hong lutpih in hih mun siangtho a ninsak hi,” ci in a kiko uh hi. ²⁹ Banghang hiam cihleh tu madeuh in Ephesus khua mi Trophimus kici pa Paul tawh khuapi sungah a omkhawm mu uh ahih manin biakinnpi huang sungah tua pa lutpih ngelngel ding hi ci in a ummawh uh hi. ³⁰ Hih thu hangin khuapi sung khempeuh hong buai a, mun khempeuh panin mihonpite tai in hong kikhawm uha Paul a man uh hi. Biakinnpi huang pualam ah a kaihkhiat khit uh ciangin kongpite thakhat in a khak uh hi. ³¹ Amaute in Paul thah a sawm laitak un Jerusalem khua buppi buai hi ci in galkaphonɠ a uk galkap mangpaɠ kiangah thu a tung hi. ³² Tua ciangin amah in galkapte le galkap 100 ukte sam pah a, mihonpi omna munah a taisuk uh hi. Amaute in galkap mangpaɠ le galkapte a muh uh ciangin Paul a sat nawn kei uh hi. ³³ Tua khit ciangin Paul kiangah galkap mangpaɠ hong pai in a man hi. Tua ciangin sikkhau nih tawh khihsak a, amah kua hi a, bang teng bawl ahi hiam ci in thu a dong hi. ³⁴ Ahih hangin mihonpite lakah pawlkhat in thu khat genin a dangte in thu tuampi khat genin a ciak ngeingai uh hi. Gamlumlua uh ahih manin galkap mangpaɠ in a thu uh theitel zolo a, galkap lenah Paul a paipih nadingun thu a pia hi. ³⁵ Kahlei bul ah Paul a tun ciangin mihonpi hong ngongtatlua uh ahih manin galkapte in Paul a puakhia uh hi. ³⁶ Banghang hiam cihleh mihonpi in nungzuih uh a, “Amah that un!” ci in a kiko uh hi. ³⁷ Galkap len sung a lutpih ding uh ciangin Paul in galkap mangpaɠ kiangah, “Thu tawm kong gen thei ding hiam?” a ci hi. Amah in, “Greek pauthei na hi hiam? ³⁸ Nang, tuma lam a kumpi langpanna khat piangsak in misuam 4,000te gam sungah a taikhiatpih Egypt mipa hilo na hi hiam?” a ci hi. ³⁹ Ahih hangin Paul in, “Cilicia gam khua thupi khat ahi Tarsus khua‑a a suak Judah mi ka hi hi. Nong hehpihna in hih mite tungah thu hong gensak in,” a ci hi. ⁴⁰ Galkap mangpa in phalna a piak ciangin kahlei tungah Paul dingin mipite lamah a khut a van hi. Mihonpite a daih khipkhep ciangin amah in Hebrew pau tawh thu a gen hi.

¹ Paul in, “Pate le sanggamte aw, tu in ka kihutna thu hong gen ding ka hih manin hong ngaihsak un,” a ci hi. ² Amaute in Hebrew pau† tawh a gen a zak uh ciangin a gamdai semsem uh hi. ³ Tua ciangin amah in, “Cilicia gam Tarsus khua‑a piang Judah mi taktak ka hi hi. Ahi zongin, Gamaliel pattahna tawh hih khuapi ah a khangkhia ka hi hi. Amah in i pute i pate thukham tawh kituak in limtak in hong sinsak a, tuni‑a note khempeuh mah bangin Pasian thu ka hahkat mahmah hi. ⁴ “Hih Lampi thu a um numei pasalte manin thong sungah ka khia a, tua Lampi thu suksiat ding ka hanciam hi. ⁵ Siampi Ukpa le makaite khempeuh in a theih ding mah bangin amaute kiang panin laikhak khat Damascus a om sanggamte muh dingin ka pua a, amaute Jerusalem ah a kibawlsiat theih nadingin kolbulh in a kai dingin ka kuan hi. ⁶ “Tu in Damascus khuapi ka tunkuan uh, sunkim pawlin a tang pha mahmah khuavak khat vantung panin ka kimah thakhat in a hong tang hi. ⁷ Tua ciangin lei ah ka puksuk a, ‘Saul aw, Saul aw, banghang in hong bawlsia na hi hiam?’ hong ci awging khat ka za hi. ⁸ “Tua ciangin, ‘Topa aw, nang kua na hi hiam?’ ka ci hi. “Amah in, ‘Nong bawlsiat Nazareth khua mi Zeisu ka hi hi,’ a hong ci hi. ⁹ Ka tonpih ka lawmte in tua khuavak a muh uh ciangin a lau uh hi. Ahi zongin kei hong kihopihna awging a tel thei kei uh hi. ¹⁰ “Tua ciangin keimah in, ‘Topa aw, bang hih ding ka hi hiam?’ ka ci hi. “Topa in, ‘Tho inla, Damascus khuapi sungah lut in. Nangma sep dinga ka gelsate tualai ah kong hilh ding hi,’ a hong ci hi. ¹¹ Tua khuavak khauhlua a, khua mu theilo ka hih manin ka lawmte in hong bankaih uh a, Damascus khuapi ka tung hi. ¹² “Tualai ah thukham tawh kituak in Pasian a bia, Ananias kici mi khat om a, tua khua‑a teeng Judah mi khempeuh in a zahtak mahmah khat uh ahi hi. ¹³ Amah ka kiangah hong pai in ka gei ah hong dinga, ‘Sanggampa Saul aw, khua muta in,’ a hong cih ciangin tua hun lian mahin amah ka mu thei pah hi. ¹⁴ Tua ciangin amah in, ‘Pasian deihna a thei ding, Midikpa a mu ding le ama thu genna aw a za dingin i pute i pate Pasian in nang hong teel zo hi. ¹⁵ Na muh khitsa le na zak khitsa thute mi khempeuh tungah na gen dinga, ama aa dingin teci na pang ding hi. ¹⁶ Tu in zong bang ngak na hi hiam? Tho inla tui kiphum in. Topa minin thungen inla, na mawhnate silsiang in,’ a hong ci hi. ¹⁷ “Tua khit ciangin Jerusalem khuapi ah ciahkik in biakinnpi huang sungah thungen a ka om laitak in mang ka mu hi. ¹⁸ Tua ka mangmuhna sungah Topa ka mu a, amah in, ‘Kinawh inla Jerusalem khuapi pan paikhia mengmeng in. Banghang hiam cihleh keima thu teci na panna amaute in hong sang lo ding uh hi,’ a hong ci hi. ¹⁹ “Tua ciangin keimah in, ‘Topa aw, kikhopna inn sungah lutin nang hong um mite satin thongah ka khiatna thu amaute in a hong thei uh hi. ²⁰ Nangma thu hanga thahna a thuak Stephen sisan a luansak laitak un ama sih nading thukim in amaute kiangah ka dinga, amah a that mite puan zong ka kepsak hi,’ ka ci hi. ²¹ “Tua ciangin amah in, ‘Hih mun pan paikhia in. Gamlapi a om Gentile‑te kiangah kong sawl ding hi,’ a hong ci hi,” ci in a gen hi. ²² Amaute in Paul thugen hih ciangciang a ngai uh hi. Tua khit ciangin a aw uh sangsak in, “Hih bang mipa leitung panin hemkhia un a nungta dingin kilawm lo hi!” ci in a kiko uh hi. ²³ A kiko kawmun a puante uh suahkhia in vantung lamah leivui a thehto uh hi. ²⁴ Galkapte in galkap lenah Paul a paipih nadingun galkap mangpaɠ in thu a pia hi. Banghang in mihonpi in amah langpan in hi bangin kiko uh hi ding hiam cih a theih nadingin amah sata thu a sit nadingun a sawl hi. ²⁵ Amaute in savun khau tawh amah a hen laitak un Paul in ama kianga a ding galkap 100 ukpa kiangah, “Rome gam mi khat mawh hi ci a, thukhenna om nailopi a sat ding pen thukhenna ngeina tawh a kituak mah ahi hiam?” a ci hi. ²⁶ Galkap 100 ukpa in hih thu a zak ciangin galkap mangpaɠ kiangah pai in, “Hihpa Rome gam mi ahi hi na hihsawm thu kidawm in,” a ci hi. ²⁷ Tua ciangin Paul kiangah galkap mangpaɠ pai in, “Nang, Rome gam mi na hi hiam hong gen in,” a ci hi. Paul in, “Ka hi hi,” a ci hi. ²⁸ Tua ciangin galkap mangpaɠ in, “Ken Rome gam mi ka suah nadingin sum tampi ka pia hi,” a ci hi. Paul in, “Kei ka suahpih ahi hi,” a ci hi. ²⁹ Tua ciangin thu a sitsawm mite ama kiang panin a kihemkhia pah uh hi. Galkap mangpaɠ in Paul na hen kha khinzo ahih manin Rome gam mi ahihlam a theih ciangin a lau hi. ³⁰ Banghang in Judah mite in Paul mawhmat uh hiam cih thu galkap mangpa in theitel nuam ahih manin a zingciang in Paul a kihennate a phelsak hi. Siampi liante le thukhenteɠ khempeuh kikhawmsak a, Paul zong paipih in amaute mai ah a koih nadingun thu a pia hi.

¹ Tua ciangin Paul in thukhenteɠ limtak in a etkawm in, “Ute naute aw, tuni dongin Pasian mai ah kisuang hetlo in ka nungta hi,” a ci hi. ² Tua ciangin Siampi Ukpa Ananias in Paul kianga a ding mite kiangah Paul muk a satsak nadingun thu a pia hi. ³ Tua ciangin Paul in ama kiangah, “Leikang kizut suangcian tawh a kibang pa aw, Pasian in nang hong sat ding hi! Banghang hiam cihleh thukham tawh kituak in thu hong khen dingin a tu kimlai banghang in thukham tawh kilehbulh in kei hong satsak na hi hiam?” a ci hi. ⁴ Tua kima a ding mite in, “Pasian Siampi Ukpa zahko vial ding na hi hiam?” a ci uh hi. ⁵ Tua ciangin Paul in, “Sanggamte aw, amah Siampi Ukpa ahihlam ka thei kei hi. Lai Siangtho in, ‘Na mite a ukpa gensia kei in ci mah hi,’ ” a ci hi. ⁶ Amaute pawlkhat Sadducee pawlte hi uh a, a dangte Pharisee pawlte ahihlam uh Paul in a theih ciangin thukhenteɠ mai ah kiko a, “Ute naute aw, Pharisee mipa khat tapa Pharisee pawlte khat ka hi hi. Misite thawhkikna thu tawh kisai lametna hangin thusitna a thuak ka hi hi!” a ci hi. ⁷ Tua bang a cih ciangin Pharisee pawlte le Sadducee pawlte kisel uh a, mihonpi pawl nih a suak uh hi. ⁸ Banghang hiam cihleh Sadducee pawlte in misite thokik lo hi, vantungmi om lo hi, kha zong om lo hi a ci uh hi. Ahih hangin Pharisee pawlte in a nih in om hi ci in a um uh hi. ⁹ Tua ciangin amaute nakpi in a kiko uh hi. Pharisee pawlte sunga thukhamhilh siate hong ding uh a, “Hihpa tungah thusia ka mu kei uh hi. Vantungmi khat ahih keileh kha khatpeuh in hopih ahih leh Pasian langpan in i do kei ding hi,” a ci uh hi. ¹⁰ Tu in kipawlkhenna le kitotna nasialua ahih manin Paul a tum a tel a suahkhak ding uh galkap mangpaɠ a patau hi. Tua ahih ciangin galkapte paisuksak in mihonpite lak panin thatanghat suangin Paul kaikhia a, galkap lenah a paipih nadingun thu a pia hi. ¹¹ A zingciang zanin Paul kiangah Topa dinga, “Paul aw, lungkia kei in. Keima aa dingin Jerusalem khuapi ah teci na pan bangin Rome khuapi ah zong na panglai ding hi,” a ci hi. ¹² Khua a vak ciangin Judah mite pawlkhat kituah uh a, Paul a thah khit mateng un an ne lo tui dawn lo dingin a kiciam uh hi. ¹³ Tu in Paul a thahsawm mite 40 val a pha uh hi. ¹⁴ Siampi liante le makai vaihawmte kiangah amaute va pai uh a, “Paul ka thah khit mateng un bangmah ne lo dingin ka kiciam khinzo uh hi. ¹⁵ Tua ahih manin note le thukhenteɠ in Paul thu a kicing zaw in a sit nuam bang khatin zingciang in a hong paipih nadingun galkap mangpaɠ kiangah va gen un. Note kianga hong tunpihma un a that dingin kigingsa in ka na om ding uh hi,” a ci uh hi. ¹⁶ Ahih hangin Paul sanggamnu tapa in tua mite suamsim nading thu a zak ciangin galkap lenah va lutin Paul kiangah a va ko hi. ¹⁷ Tua ciangin Paul in galkap 100 ukte khat sam a, “Hih tangvalpa in galkap mangpaɠ kiangah gennop khat nei ahih manin ama kiangah va puak in,” a ci hi. ¹⁸ Tua pa in galkap mangpaɠ kiangah amah a paipih hi. Tua ciangin amah in, “Thongkiapa Paul in kei hong sam a, hih tangvalpa nang kianga kong paipih ding hong ngen hi. Tangvalpa in nang kiangah gennop khat hong nei hi,” a ci hi. ¹⁹ Tua ciangin galkap mangpaɠ in a khut tawh kai in paikhiatpih a, “Nong gennop thu bang ahi hiam?” ci in a dongsim hi. ²⁰ Tangvalpa in, “Judah mite in a kicing zaw a Paul thu a sit nuam bang khatin zingciang in thukhenteɠ kiangah amah na paisak nading hong ngen dingin a kithukim khinzo uh hi. ²¹ Amaute thu mang kei in. Banghang hiam cihleh Paul a thah khit mateng un an ne lo tui dawn lo dingin a kiciam khinsa mihing 40 val in amah a pangsim uh hi. Tu in amaute in na kamciam piak ding bek ngakin kigingsa in a om uh hi,” a ci hi. ²² Tua ciangin galkap mangpaɠ in tangvalpa ciahsak a, “Hih thute kei nong hilh lam kuama kiangah gen kei in,” ci in thu a pia hi. ²³ Tua ciangin amah in galkap 100 ukte nih sam a, “Zan nai thum ciangin Caesarea khua donga a pai dingin galkap 200, sakol galkap 70 le teipi a tawi galkap 200 kithawisak un. ²⁴ Paul a tuan nading khat zong keng unla, mangpipa Felix kiangah hoihtak in va puak un,” ci in thu a pia hi. ²⁵ Amah in hih bangin laikhak khat a gelh hi. ²⁶ Keimah Claudius Lysias in a lian mahmah mangpipa Felix kong hopih hi. ²⁷ Judah mite in hihpa manin thah a sawm uh hi. Amah Rome gam mi khat ahihlam ka theih ciangin galkapte tawh pai in ka va honkhia hi. ²⁸ Amah a mawhmatna uh thei nuam ka hih manin amaute thukhenteɠ kiangah ka puak hi. ²⁹ Amaute thukham tawh kisai kinialna hangin a mawhmat uh hi a, sih nading le thongkiat nading zah dong ama mawhna ka mu kei hi. ³⁰ Judah mite in amah pangsim uh hi cih thu a hong kigen ciangin nang kiangah kong puak pah hi. A mawhmat mite in a mawhmatna uh nangma mai ah hong sun nadingun thu ka pia zo hi. Mangpha, ci in lai a khak hi. ³¹ Tua ciangin galkapte in a thu ngahna uh tawh kizui in Paul lakhia uh a, Antipatris khua ah a zan a zan in a paipih uh hi. ³² A zingciang in Paul tawh a paikhawm dingin sakol galkap teng omlai uh a, galkap dangteng galkap lenah a ciahkik uh hi. ³³ Caesarea khua a tun uh ciangin mangpipa khutah laikhak pia uh a, Paul zong ama khutah a ap uh hi. ³⁴ Mangpipa in laikhak a sim khit ciangin Paul kiangah, “Bang gam mi na hi hiam?” ci in a dong hi. Cilicia gam mi ahihlam a theih ciangin, ³⁵ “Nang hong mawhmat mite a hong tun uh ciangin na thu kong sit ding hi,” a ci hi. Tua khit ciangin Herod inn ah Paul a kep nadingun thu a pia hi.

¹ Ni nga khit ciangin Siampi Ukpa Ananias, makaite le Tertullus a kici thugen siampa tawh hong paisuk uh a, Paul a kimawhmatna thu a maan takpi mah hi ci in mangpipa mai ah thu a sung uh hi. ² Paul a sap khit uh ciangin Tertullus in Paul a mawhmatna thu gen a, “A lian mahmah Felix aw, nangma hang bekin nuamtak in sawtpi a om thei ka hi uh hi. ³ Hih minam in na vaihawm siamna tawh a munmun ah khantohna tuamtuam ngah den ahih manin nakpitak in ka lungdam uh hi. ⁴ Bangbang ahi zongin hong cimtak loin nong hehpihna tawh ka thugen tawmkha nong ngaihsak nadingin kong thum hi. ⁵ Banghang hiam cihleh hihpa thusia bawl mi khat ahihlam ka mu uh hi. Amah in leitung mun khempeuh a om Judah mite lakah langpanna a piangsakpa le Nazareth pawlte makaipipa ahi hi. ⁶ Biakinnpi huang zong nitsak sawm ahih manin ka man uh a, kote thukham tawh kituak in ama tungah thu ka khen sawm uh hi. ⁷ Ahih hangin galkap mangpa Lysias hong pai in kote khut panin thagum tawh amah lakhia a, ⁸ Paul a mawhmat mite nang kiangah hong pai nadingun thu a pia hi. Nang mahmah in thusit lecin ka mawhmatna khempeuh uh a maan lamtak na tel ding hi,” a ci hi. ⁹ Judah mite zong panghuan uh a, “Hih thute a maan takpi mah ahi hi,” a ci uh hi. ¹⁰ Tua ciangin Paul in thu a gen nadingin mangpipa in a khut tawh a lah ciangin Paul in, “Hih minam kum tampi sung thu a khenpa na hihlam thei ka hih manin ka kihutna thu nuamtak in kong gen ding hi. ¹¹ Pasian bia dingin Jerusalem khuapi ah ka paitoh zawh ni sawm le ni nih val a phak nai loh lam na thei uh hi. ¹² Biakinnpi huang sungah mi tawh ka kiniallam, kikhopna inn le khuapi sungah mipi ka buaisak lam amaute in a hong mu kei uh hi. ¹³ Tu a kei hong mawhmatna uh a maan takpi ahihna zong hong lakthei tuanlo ding uh hi. ¹⁴ Ahi zongin nang tunga kong pulaknop thu in, upna maanlo hi hong cihsan uh hih Lampi thu tawh kituak in ka pute ka pate Pasian ka bia a, Thukham laibu le Kamsangte laibu sunga kigelh thu khempeuh ka um hi. ¹⁵ Misi peuhmah mihoih ahi a, mi hoihlo ahi zongin a vekpi un thokik ding hi cih thu amaute in um uh a, kei zong tuamah bangin Pasian sungah lemetna ka nei hi. ¹⁶ Tua ahih manin Pasian tung le mihingte tungah lungsim kisuanna ka neih loh nadingin ka hanciam den hi. ¹⁷ “Tu in kum tampi khit ciangin ka minam mizawngte huhna a pia ding le biakna a pia dingin kong pai hi. ¹⁸ Asia gam pana hong pai Judah mite pawlkhat in biakinnpi huangah kisiansuah a ka om hong mu uh hi. Tualai ah mihonpi om loin buaina zong bangmah a om kei hi. ¹⁹ Kei hong mawhmat nading uh thu khatpeuh a neih uh leh hihlai ah na mai mahmah ah hong sung le uh hi ding hi. ²⁰ Ahih keileh zong thukhenteɠ mai ah ka din laitak in, ²¹ ‘Misite thawhkikna thu hangin tu in thusitna ka thuak hi,’ ci a, ka kiko lohngal khialhna dang khatpeuh ka bawl lam hihlai a om mite in a theih uh leh hong gen uh hen,” a ci hi. ²² Felix in hih thute za in tua Lampi thu a kician zaw in a theih ciangin, “Galkap mangpaɠ Lysias hong tunsuk ciangin, na thu kong khensak ding hi,” ci in a hun a sotto hi. ²³ Paul kemin a ut bangbang in a omsak nadingun Felix in galkap 100 ukte khat thu pia a, a huh nuam le a veh nuam a meltheihte zong a kham loh nadingun a vaikhak hi. ²⁴ Tua nung a sawtlo in Felix le Judah mi ahi, a zi Drusilla hong pai in Paul samkhiasak a, Khazih upna thu a ngai hi. ²⁵ Paul in dikna thu, pumpi kidekna thu le a hong tung ding thukhenna thute a gen ciangin Felix lau a, “Na paikhia phot in. Hun hoih ka ngah ciangin kong samsak ding hi,” a ci hi. ²⁶ Tua hun sungin Paul in amah a kikhah theih nadingin sum hong pia kha ding hi ci in Felix in a lamen hi. Tua ahih manin samkhiasak thithe in a hopih pahpah hi. ²⁷ Ahih hangin kum nih a cin khit ciangin Porcius Festus in Felix za a laih hi. Felix in Judah mite lungdamsak nuam ahih manin thong sungah Paul a koihsuak hi.

¹ Tu in Festus tua gam a tun zawh ni thum ciangin Caesarea khua panin Jerusalem khuapi ah a hawhto hi. ² Tua ciangin Siampi Ukpa le Judah mi makaite in Paul thu a sia lam in a ko uh hi. ³ Amaute in lamkal ah Paul pangin a thah theih nadingun Jerusalem khuapi ah Paul a paisak nadingin Festus mai‑et in a kun uh hi. ⁴ Ahih hangin Festus in Caesarea khua mahah Paul kepsuak nading le amah zong a sawtlo in tua khua ah a pai nading thu gen hi. ⁵ “Tua ahih manin na makaite un hong zuisuk uh hen. Hih mipa in khialhna a neih le a neih loh ka theih nadingin amaute mawhmatna thu tualai ah hong sung uh hen,” a ci hi. ⁶ Amaute kiangah ni sawmval a taam khit ciangin Caesarea khua ah a paisuk hi. A zingciang in thukhenna tokhom ah amah tu in a kiangah Paul a paipih nadingun thu a pia hi. ⁷ Paul hong tun ciangin Jerusalem pana hong paisuk Judah mite ama kimah dingin Paul mawhsakna thulian pipite a gen uh hi. Ahi zongin, a teci dingin bangmah a lak thei kei uh hi. ⁸ Tua ciangin Paul in, “Judah mite thukham tungah ahi zongin biakinnpi tungah ahi zongin Caesar kumpipa tungah ahi zongin khialhna bangmah ka bawl kei hi,” a ci hi. ⁹ Ahih hangin Festus in Judah mite lungkimsak nuam ahih manin Paul kiangah, “Jerusalem ah paito in tualai ah na thu hong kikhensak leh na ut hiam?” ci in a dong hi. ¹⁰ Tua ciangin Paul in, “Tu a ka dinna mun in ka thu hong kikhensak nading Caesar kumpipa thukhenna tokhom mai ahi hi. Hoihtak a na theih mah bangin Judah mite tungah khialhna bangmah ka nei kei hi. ¹¹ Mikhial ka hi a, sih nadingin a kilawm mawhna a bawl ka hih leh sih ding ka nial kei hi. Ahih hangin hih mite hong mawhmatna a maanlopi ahih leh amaute khutah kuamah in hong pia thei kei ding hi. Caesar kumpipa mai ah ka thu ka tunto ding hi,” a ci hi. ¹² Tua ciangin Festus in upa vaihawmte tawh a kikup khit uh ciangin Paul kiangah, “Caesar kumpipa mai ah ka thu ka tunto ding hi ci na hih manin Caesar kumpipa kiangah na paikul ding hi!” a ci hi. ¹³ Tua nung a sawtlo in Festus kianga hawh dingin kumpipa Agrippa le Bernice‑te Caesarea khua ah hong paisuk uh hi. ¹⁴ Ni tampi sung a taam khit uh ciangin Festus in Paul thu kumpipa Agrippa tungah ko a, “Felix in thongah a nusiat mi khat a om hi. ¹⁵ Jerusalem khuapi a ka om sungin siampi liante le Judah mite makaite in ama thu hong zasak uh a, ama tunga thu ka khen ding a hong ngen uh hi. ¹⁶ Amaute kiangah, ‘A kimawhmatpa le a mawhmat mite kimaituah ding uh a, a kimawhmatpa in ama tunga kisuan mawhmatna tawh kisai in amah le amah kihu masa ding hi. Tua lopi in mi khat thah dinga piakkhiat theih nading Rome mite ngeina om lo hi,’ ci in ka dawng hi. ¹⁷ Tua ahih manin amaute hih munah hong kikaihkhop uh ciangin khinkhin nawnlo in a zingciang mahin thukhenna tokhom ah tu in tua pa ka samsak hi. ¹⁸ A mawhmat mite hong din uh ciangin ka upmawh thute khat beek tawh a mawhmat kha kei uh hi. ¹⁹ Amaute biakna tawh kisai kinialna thute le Paul in amah nungta hi a cihpa, a si khinsa Zeisu thu bek a gen uh hi. ²⁰ Tua bang kinialna thute theitel lo ka hih manin Jerusalem ah pai in tualai ah na thu hong kikhensak leh na ut hiam, ci in ka dong hi. ²¹ Ahih hangin Paul in a thu Caesar kumpipa Augustus khen dingin a kikoihsak nading hong nget ciangin Caesar kumpipa kiang ka puak theih mateng amah a kikep nadingin thu ka pia hi,” a ci hi. ²² Tua ciangin Agrippa in Festus kiangah, “Kei zong tua pa thu ka za nuam hi,” a cihleh Festus in, “Zingciang in ama thugen na za ding hi,” a ci hi. ²³ A zingciang in Agrippa le Bernice‑te thupitak in hong pai uh a, galkap mangteɠ le khuapi uliante tawh thugenna innpi sungah a hong lut uh hi. Festus in thu a piak ciangin Paul zong hong lutpih uh hi. ²⁴ Tua ciangin Festus in, “Kumpipa Agrippa le hihlai a om mite khempeuh aw, hihpa en un. Amah pen Jerusalem ah ahi a, hi lai ah ahi zongin Judah mi bupin a nungta dingin kilawm lo hi ci a, hong ngetpa uh ahi hi. ²⁵ Ahih hangin hihpa in sih nading zahin a lian mawhna a bawl loh lam ka mu hi. Caesar kumpipa Augustus tungah a thu puakto nuam ahih manin paisak dingin ka khentat hi. ²⁶ Ka topa ahi kumpipa tungah hih mipa thu lai tawh gelhin ka zaksak theih ding thu kician khat beek ka nei kei hi. Tua ahih manin note mai ah kong puak hi. A diakdiak in kumpipa Agrippa aw, thu na dot khit ciangin ka gelh ding thu kician pawlkhat ka ngah theih nadingin na mai ah kong puak hi. ²⁷ Banghang hiam cihleh thongkia mi khat a kimawhmatna thu kician omlopi in ka puak ding hi theilo hi,” a ci hi.

¹ Tua khit ciangin Agrippa in Paul kiangah, “Na thu tawh kisai na gen theih nading hun kong pia hi,” a ci hi. Tua ciangin Paul in a khut zanin a kihutna thu gen a, ² “Kumpipa Agrippa aw, Judah mite hong mawhmatna thute tawh kisai in ka kihutna thu tuni in nangma mai ah hong gen thei ding ka hih manin hampha ka kisa hi. ³ Judah mite ngeina khempeuh le amaute kinialna thute thei mahmah na hih manin ka nuam phadiak hi. Tua ahih manin lungduaitak in nong ngaihsak nadingin kong thum hi. ⁴ “Ka khangno lai‑a kipan in Jerusalem a ka nuntakzia le ka khantohziate ka mipihte khempeuh in a hong theih uh ahi hi. ⁵ Kote biakna sunga a khauhpen Pharisee pawlte thu zui in ka nuntak lam a tung lai a kipan a hong theih khitsa uh ahih manin teci pang nuam uh hi leh pang thei ding uh hi. ⁶ Pasian in ka pu ka pate uh tunga a piak kamciamna ka lamet manin tu in thusitna thuakin ka ding hi. ⁷ Tua kamciamna a ngah dingin kilamen ka hih manun ko minam sawm le nihte in sun le zan tatsat loin Pasian ka bia uh hi. Kumpipa Agrippa aw, tua lametna thu hangin Judah mite in kei hong mawhmat uh ahi hi. ⁸ Pasian in misite thokiksak ding hi cih thu banghang in uptak salo na hi uh hiam? ⁹ “A taktak in ci lehang kei zong Nazareth khua mi Zeisu min langpan theih zah in langpan ding hi ci in ka ngaihsun ngei hi. ¹⁰ Tua bangin zong Jerusalem ah ka hih takpi a, siampi liante phalna tawh misiangtho tampite thong sungah ka khum hi. Amaute a kithah ciangin ka thukim hi. ¹¹ Kikhopna innteng ah amaute ka bawlsia kawikawi a, Zeisu min a kosiat theihtheih nadingun ka bawl hi. Amaute tungah hehlua ka hih manin gamdang khualiante nangawn ah pai in ka va bawlsia hi. ¹² “Tua banga ka hih sung mahin siampi liante thuneihna le sawlna tawh Damascus ah ka pai hi. ¹³ Kumpipa aw, ka pai laitak uh sunkim laitak in kei le ka khualzinpih mite kimah ni sangin a tang pha zaw khuavak khat vantung panin hong tang ka mu hi. ¹⁴ Ka vekpi un leilak ah ka puksuk uh a, tua laitak in, ‘Saul aw, Saul aw, banghang in kei hong bawlsia na hi hiam? Ciangzum sui leteh na mahmah ding hi,’ ci in Hebrew pau tawh hong hopih awging khat ka za hi. ¹⁵ “Tua ciangin, ‘Topa aw, nang kua na hi hiam?’ ka ci hi. “Amah in, ‘Nong bawlsiat Zeisu ka hi hi. ¹⁶ Ahi zongin tho inla, na khe tawh ding in. Na muh khitsa nate le kong hilh lai ding thute gen a, teci pang khat na suah theih nadingin nang tungah hong kilang ka hi hi. ¹⁷ Judah mite khut sung pan le Gentile‑te khut sung panin kong honkhia ding hi. ¹⁸ Gentile‑te mit honsak in khuamial pan khuavak ah a kiheisak ding le Satan thuneihna panin Pasian lama a kiheisak dingin nang kong sawl hi. Tua in amaute in mawhmaisakna ngahin keimah a hong up manun sianthona a ngah mite tawh go a luahkhop theih nading uh ahi hi,’ ci hi. ¹⁹ “Tua ahih manin kumpipa Agrippa aw, vantung panin ka ngah mangmuhna thu mang loin ka om thei kei hi. ²⁰ A masa pen in Damascus, Jerusalem le Judea gam sung khempeuh a om mite kiangah hih thu ka tangko a, tua khit ciangin Gentile‑te kiangah ka tangko hi. Amaute mawhna kisikkik in Pasian lamah a kihei nading uh le mawhna kisikkikna tawh kituak in a gamtat nadingun ka hilh hi. ²¹ Hih thute hangin Judah mite in biakinnpi huang sungah hong manin hong thahsawm uh hi. ²² Tua hi a, Pasian in hong huh in milian mineu tungah teci pangin tuni dong ka ding lai hi. Moses le Kamsangte in hong piang dinga a gen khitsa uh thute longal thu dang ka gen kei hi. ²³ Tua thu in, ‘Khazih in misite lak pan a thokik masa pen a suah theih nadingin gimna thuak dinga, Judah mite le Gentile‑te tungah khuavak a puak ding hi,’ cih thu ahi hi,” a ci hi. ²⁴ Paul in hih bangin ama kihutna thu a gengen laitak in Festus in aw lianpi tawh, “Paul aw, na haita hi! Thu tampi na sinna in hong haisak hi!” ci in a kiko hi. ²⁵ Ahih hangin Paul in, “A zahtakhuai Festus aw, ka hai kei hi. Thuman thutak mah hoihtak ngaihsun kawmsa a ka gen ahi hi. ²⁶ A mai‑a suakta taka thu ka genna pa kumpipa in zong hih thute a thei hi. Banghang hiam cihleh hih thu a simtham a kisem hilo ahih manin a theih khakloh khat beek om lo hi cih ka thei hi. ²⁷ Kumpipa Agrippa aw, Kamsangte thugente na um hiam? Na up lam ka thei hi,” a ci hi. ²⁸ Tua ciangin Agrippa in Paul kiangah, “Christian khat nong suaksak dektak hi,” a ci hi. ²⁹ Tua ciangin Paul in, “Nang bek hilo in tuni a ka thugen a zate khempeuh hih banga mat le hen ka thuakna simloh kei tawh kibang in Pasian in bawl leh ka ut hi,” a ci hi. ³⁰ Paul in hih thute a gen khit ciangin kumpipa dingkhia a mangpipa le Bernice tawh a tukhawm mite zong a dingkhia uh hi. ³¹ Amaute a paikhiat khit uh ciangin, “Hihpa in sih nading ahi a, mat le hen nading ahi zongin khialhna bangmah bawl lo hi,” ci in a kikum uh hi. ³² Tua ciangin Agrippa in Festus kiangah, “Hihpa in Caesar kumpipa tungah a thu tunto khin hi kei leh khahkhiat ding hi lel hi,” a ci hi.

¹ Italy gamah tembaw tawh kote hong puak dingin a kikhentat khit ciangin Paul le thongkia dang pawlkhatte Augustus galkaphon laka galkap 100 ukpa khat ahi Julius khutah a ap uh hi. ² Tua ahih manin Adramyttium khua panin a hong pai tembaw khat ka zui uh a, Asia gam tuipi dungteng tawn dingin ka dingkhia uh hi. Macedonia gam Thessalonica khua mi Aristarchus a kici pa zong kote tawh hong tuangkhawm hi. ³ A zingciang in Sidon khua ka tung uh hi. Paul tungah Julius thunuam mahmah a, a lawmte in huhna a piak theih nadingun amaute kiangah a va hawh ding a phal hi. ⁴ Tua khua panin tembaw tuangin ka dingkhia uh a, huih hong lehnun ahih manin Cyprus tuikulh bel in ka pai uh hi. ⁵ Tua ciangin Cilicia gam le Pamphylia gam lampang tuipidung zui in ka zin khit uh ciangin Lysia gam khua lian khat ahi Myra khua ka tung uh hi. ⁶ Tua khua ah galkap 100 ukpa in Italy gam a pai ding Alexandria tembaw khat mu a, tua tembaw ah kote a hong tuangsak hi. ⁷ Ni tampi sung damdam in ka pai khit uh ciangin, haksapitak in Cnidus khua ka tung uh hi. Huih nun hoihlo in mainawt theilo ka hih manun Crete tuikulh bel in ka pai uh a, Salmone kici leidawk ka tung uh hi. ⁸ Tuipi gei zui in haksapitak in ka pai uh a, Lasea khua tawh a kinai Khawlmun Nuam a kici mun ka tung uh hi. ⁹ Tu in ni tampi hong beita a, Antan Ni nangawn kheng khin ahih manin tembaw tawh khualzin ding a lauhuai hun hong hita hi. ¹⁰ Tua ahih manin Paul in amaute kiangah, “Lawmte aw, hih i khualzinna ah kituahsia mahmah dinga, tembaw le vante bek hilo in, i nuntakna nangawn a beikhak ding lauhuai hi cih ka thei hi,” a ci hi. ¹¹ Ahih hangin galkap 100 ukpa in Paul thu sangin tembaw hawlpa le tembaw neipa thu a mang zaw hi. ¹² Phalbi sung taam nadingin hih muna tembaw khawlna ginalo ahih manin hihlai pan Phoenix khua delh teitei in tualai ah phalbi sung taam zaw lehang ci in a tam zaw in ngaihsutna a pia uh hi. Tua khua in Crete tuikulh a tembaw khawlna mun khat hi a, nitumna khanglam le nitumna saklam a maingattuak hi. ¹³ Leitaw lam pan huih dam hong nun ciangin a tupna mun uh tung zo ding a kisa uh hi. Tua ahih manin tembaw khawlsakna sikkawipiɠ khaikhiato uha Crete tuikulh nehin a pai uh hi. ¹⁴ Ahih hangin a sawtlo in Euroclydon a kici pingpei tawh a kithuah huihpi khauh mahmah a hong nung hi. ¹⁵ Huihpi in tembaw a nawk khak ciangin phul zolo 27:9 Antan Ni: September ahih keileh October kha sunga tung Mawhkhuhna Ni (Yom Kippur) genna ahi hi. Tua hun in phalbi huih nun hun hi in tembaw tawh khualzin nadingin a lauhuai hun ahi hi. ahih manin huihpi mutna lamlam ah ka paisak uh hi. ¹⁶ Clauda a kici tuikulh bela ka pai laitak un tembaw tawh a kikhihkhawm gunkuang a siat loh nadingin haksapitak in ka kem zo uh hi. ¹⁷ Tua gunkuang tembaw sungah a koih khit uh ciangin khauhualpi tawh tembaw a gakcip uh hi. Syrtis muna sehnel lakah a awkkhak ding lau uh ahih manin tembaw puankhaite sutkhia in huihpi mutna lamlam ah a paisak uh hi. ¹⁸ Huihpi in hong nak nawklua ahih manin a zingciang in tembaw a zan nadingin vante a lawnkhia uh hi. ¹⁹ A ni thum ni ciangin tembaw vanzatte nangawn ka khut mahmah uh tawh ka lawnkhia uh hi. ²⁰ Tu in ni tampi sung ni mulo, kha mu loin ka om uh a, huihpi in hong nak nawklua ahih manin a suakta zo dingin ka kilamen nawn kei uh hi. ²¹ Sawtpitak an a kingolh khit ciangin amaute laizang ah Paul dinga, “Lawmte aw, ka thugen hong mangin Crete tuikulh pan paikhia lo hi le uh cin hih tuahsiatna teng na thuak kha kei ding uh hi. ²² Ahi zongin tu in lungnuam taka na om nadingun kong hansuah hi. Banghang hiam cihleh tembaw bek kisia dinga mi khat beek na si kei ding uh hi. ²³ Banghang hiam cihleh keimah a hong neipa le ama na ka sepsak ka Pasian in a hong sawl vantungmi khat tu zanin ka kiangah hong dinga, ²⁴ ‘Paul aw, lau kei in. Caesar kumpipa mai ah hong kitun pelmawh ding hi. En in, tembaw a na tuanpih mi khempeuh Pasian in na khut sungah hong pia zo hi,’ a hong ci hi. ²⁵ Tua ahih manin lawmte aw lungnuam un. Ka tunga hong kigen khinsa bangin hong piang taktak ding hi ci in Pasian ka um hi. ²⁶ Ahih hangin tuikulh tung khatah i awk ding hi,” a ci hi. ²⁷ Huihpi in Adriatic tuipi sungah hong sukmut hong tomut a, zan sawm le zan lina zankim pawl ciangin lei tawh kinai ta hi cih tembaw nasemte in a thei uh hi. ²⁸ Tui a teh uh ciangin lam 20 bang a thuk lam a thei uh hi. Tawlkhat a pai khit uh ciangin tehkik uha lam sawm le lam nga na thuk lai hi. ²⁹ Tua ciangin suang a phutkhak ding lau uh ahih manin tembaw khawlsakna sikkawipiɠ li tembaw nunglam ah khia uha thungen in khuavak ding a ngak uh hi. ³⁰ Tembaw nasemte in tembaw pan taikhiat ding sawm uh a, tembaw khawlsakna sikkawipiɠ tembaw mai lamah a khia ding kineih in gunkuang a khiasim uh hi. ³¹ Tua ciangin Paul in galkap 100 ukpa le galkapte kiangah, “Hih tembaw nasemte om kei le uh na suakta zo kei ding uh hi,” a ci hi. ³² Tua ciangin galkapte in gunkuang khau sattat in tui sungah a khia uh hi. ³³ Khua hong vakkuan ciangin Paul in amaute khempeuh an ne dingin hansuah a, “An ne lo a na om zawh uh ni sawm le ni li cingta in bangmah na ne kei uh hi. ³⁴ Tua ahih manin na thahat zawh nadingun an na nek ding uh kong hanthawn hi. Na samzang uh khat nangawn zong pulhkhia lo ding hi,” a ci hi. ³⁵ Hih thute a gen khit ciangin anlum khat la in amaute khempeuh mai ah Pasian hehpihna phat a, balkham in a ne hi. ³⁶ Tua ciangin amaute khempeuh in tha ngah uh a, an a ne ciat uh hi. ³⁷ Tembaw tunga tuang mi peuhmah ka vekpi un mi 276 ka pha uh hi. ³⁸ An a kham khit uh ciangin mangbuhte tui sungah khia in tembaw a zangsak uh hi. ³⁹ Khua hong vak ciangin a tunna uh bang gam hiam cih a thei kei uh hi. Ahi zongin sehnel tawh kidim leidawk khat mu uh a, ahih theih leh tua munah tembaw a kingaksak sawm uh hi. ⁴⁰ Tembaw khawlsakna sikkawipiteɠ a khau sattat in tuipi sungah a pai uh hi. Tembaw heina pekte a kikhihna khaute zong a phel uh hi. Puankhaipi pen huih dawh in khaito uh a, tuigei lam a zuan uh hi. ⁴¹ Ahi zongin tembaw in gunpi nih kituahna muna om sehnel vum khat phu kha ahih manin a lulam tumsuk a, tang thei nawnlo in a awkcip hi. A tawlam ahih leh tuihual in khauhtak in sat ahih manin a kitam hi. ⁴² Thongkiate in tuipek in a taikhiat loh nadingun galkapte in thongkia teng a thahsawm uh hi. ⁴³ Ahih hangin galkap 100 ukpa in Paul honkhia nuam ahih manin tua banga ahih loh nadingun kham a, tuipek theiteng tuakkhia masa in lei ah a kah nadingun thu a pia hi. ⁴⁴ A dangteng in singpek le tembaw kitam themte khatpeuh a mat nadingun a sawl hi. Tua ciangin a vekpi un suakta in leilak a tung uh hi.

¹ A suahtak khit uh ciangin Malta tuikulh ahihlam a thei uh hi. ² Tua gam mite thunuam mahmah uha limtak in zin a hong do uh hi. Guahzu in khuadam ahih manin mei cih in a hong awisak uh hi. ³ Paul in singkang lomkhat khawmin mei tungah a koih ciangin mei sa ahih manin a gupha gul khat hong paikhia a, a khutah a kivial hi. ⁴ Tua gam mite in tua gul Paul khut tungah a luai lam a muh uh ciangin, “Hihpa mithat hi ngelngel ding hi. Tuipi tung pana hong suahtak hangin a nungta dingin Thumaan in phal lo hi,” a kici uh hi. ⁵ Ahih hangin Paul in tua gul mei tungah singkhia a, amah ahih leh bangmah a ci kei hi. ⁶ Ahi zongin amaute in, “A ci hong bawkgawp ding hi, ahih keileh thakhat in thaltuk in hong si ding hi,” ci in a ummawh lai uh hi. Ahi zongin sawtpitak a etet uh hangin amah bangmah ci lo ahih manin, a lungsim uh khel uh a, “Amah pasian khat ahi hi,” a ci uh hi. ⁷ Tua mun tawh kigamlalo munkhat ah tuikulh hausapa Publius teenna huang a om hi. Amah in kote zin hong tungsak a, ni thum sung nuamtak in zin a hong do hi. ⁸ Publius ii pa in cisanat le gilsan natna thuahin a lum hi. Tua pa kiangah Paul va pai in a tungah a khut nga‑a thu a ngetsak ciangin a dam hi. ⁹ Hih thupiang hangin tuikulh tunga om cina khempeuh hong paipih uh a, damna a ngah uh hi. ¹⁰ Hong thupi bawl mahmah uh a, ka paikhiat uh ciangin kote kisapnate a hong guan uh hi. ¹¹ Kha thum khit ciangin Alexandria tembaw khat zui in ka pai uh hi. Tua tembaw in Unau peng lim a tuang khat hi a, hih tuikulh ah phalbi sung a khawl hi. ¹² Syracuse khua ka tun uh ciangin tualai ah ni thum sung ka taam uh hi. ¹³ Tua khua panin tembaw tuangin ka kualpai uh a, Rhegium khua ka tung uh hi. Ni khat khit ciangin leitaw lam huih hong nung a, a zingciang in Puteoli khua ka tung uh hi. ¹⁴ Tua khua ah sanggamte pawlkhat ka mu uh a, amaute kiangah ni sagih sung a taam dingin hong kho uh hi. Tua khit ciangin Rome zuanin ka pai uh hi. ¹⁵ Tua panin sanggamte in ko thu na za khin uh ahih manin hong dawn dingin Appii Sumbuuk phual le Giahbuuk Thum mun ciang dongah hong pai uh hi. Paul in amaute a muh ciangin Pasian hehpihna phatin tha a ngah hi. ¹⁶ Tu in Rome ka tun uh ciangin galkap 100 ukpa in kumpipa inncing galkap mangpa khutah thongkia teng a ap hi. Paul ahih leh amah a cing galkap khat tawh a ut bangbang in a omsak hi. ¹⁷ Tua hi a, ni thum khit ciangin Paul in Judah mi makaite samkhawm in amaute hong kikhop uh ciangin, “Sanggamte aw, i minam tungah ahi a, i pute i pate ngeina ah ahi zongin ka khial kei hi. Ahi zongin amaute in Jerusalem ah kei hong manin, Rome mite khutah hong piakhia uh hi. ¹⁸ Thu hong sit uh ciangin sihna ka thuak nading thu om lo ahih manin hong khahkhia nuam uh hi. ¹⁹ Ahih hangin Judah mite in tua thu a nial uh ciangin Caesar kumpipa tungah ka thu ka tuttoh ding a kul hi. Hih bang ka cih ciangin ka mipihte ka mawhsak nopna hilo hi. ²⁰ Tua ahih manin hih thu hangin note tawh kimu ding le a holimkhawm dinga kong sapsak ahi hi. Banghang hiam cihleh Israelte lametna thu hangin hih banga sikkhau hong kikhih ahi hi,” a ci hi. ²¹ Tua ciangin amaute in, “Judea gam panin nang tawh kisai laikhak ka ngah kei uh hi. Hihlai a hong pai sanggamte in zong nang tawh kisai thusia hong gen ngeilo uh hi. ²² Ahi zongin mun khempeuh ah hih biakna pawlte thu kigensia kawikawi hi cih thei ka hih manun tua thu nangma ngaihsutzia ka za nuam uh hi,” a ci uh hi. ²³ Tua ahih ciangin amaute in Paul tawh kimuh nadingin ni khat seh uh a, tua ni ciangin Paul tunna inn ah mi tampi a hong pai uh hi. Paul in hoihtak in thu hilhcian a, Pasian kumpigam thu nasiatak in teci a pang hi. Moses Thukham laibu le Kamsangte laibu‑te sunga om Zeisu tawh kisai thute tawh zing tunga kipan nitak dongin amaute a zol hi. ²⁴ Paul thugente mi pawlkhat in um uh a, pawlkhat in a um kei uh hi. ²⁵ Tua ciangin Paul in hih bangin a gen ciangin amaute kithutuak loin a paikhia uh hi. “Kha Siangtho in i pute i pate tungah kamsangpa Isaiah tungtawn in maantak in a gen inah, ²⁶ ‘Hih mite kiangah va pai inla hih bangin genin, “Note in zaza napi in na telthei kei ding uh hi. Mumu napi in na phawk thei kei ding uh hi. ²⁷ Banghang hiam cihleh hih mite a lungsim uh mawlin, A bil un khuaza hak mahmah a, A mit uh zong a sicip uh hi. Tua hi kei leh a mit un khuamu in, A bil un khua a za ding hi. A lungsim un theitel in, Hong kihei ding uh a, Amaute ka damsak ding hi,” a ci hi.’ ²⁸ “Tua ahih manin Pasian hong hotkhiatna thu Gentile‑te tungah kipuak zo a, amaute in tua thu a sang ding uh hi cih theita un,” a ci hi. ²⁹ Paul in hih thute a gen khit ciangin Judah mite paikhia uh a, nakpitak in a kinial uh hi. ³⁰ Tua ciangin Paul in inn khat sapin kum nih sung om a, ama kianga pai mi khempeuh hoihtak in a sang hi. ³¹ Amah in Pasian kumpigam thu genin Topa Zeisu Khazih tawh kisai thute hangtak in hilha kuamah in a kham kei hi.