3 JOHN
11 Thuman thutak sunga kong it Gaius tungah makaipa in lai ka hong khak hi. 2 Kong it aw, khalam thu ah na daupai mah bangin na pumpi zong dam a, na khempeuh ah na daupai nadingin thu kong ngetsak hi. 3 Banghang hiam cihleh nang kianga hong zin sanggamte in na sungah thuman thutak a omna le, thuman thutak na zuihna hong gen uh ciangin ka lungdam mahmah hi. 4 Ka tate in thuman thutak zui uh hi cih thu ka zak ciangin hih thu sangin a lianzaw lungdamna ka nei kei hi. 5 Kong it aw, sanggamte na theih ngeiloh mi vive ahih uh hangin na limbawl mahmah hi. 6 Itna tawh na bawlnate amaute in pawlpite mai ah teci a pang uh hi. Amaute khualzinna ah Pasian deihna tawh kilawm kituak in na huh leh, nasep hoih a sem na hi ding hi. 7 Banghang hiam cihleh amaute in Pasian min hangin kuankhia uh a, Gentile‑te kiang panin bangmah a la kei uh hi. 8 Tua ahih ciangin thuman thutak aa dingin nasem khawmte i suah theih nadingin tua bang mite i san ding a kilawm hi. 9 Pawlpi ah lai ka khak hangin amaute laka a lianpen a utpa Diotrephes in kote hong sang kei hi. 10 Tua ahih manin kong pai ciangin ama gamtatna teng ka phawkkiksak ding hi. Amah in kote siat nading deihin thusia tampi a gen hi. Tua tawh zong lungkim zo nai loin sanggamte na sang lo a, a sang nuam midangte zong kham in pawlpi pan a hawlkhia hi. 11 Kong it aw, thusiate ciing kei inla, thuhoihte na ciing in. A hoih a gamtate Pasian aa hi a, a sia in gamtate ahih leh Pasian a mu ngei nailote ahi uh hi. 12 Demetrius pen mi khempeuh in phat uh a, thuman thutak in zong tua thu teci a pang hi. Kote in zong tua mah bangin teci ka pang uh a, kote teci panna maan hi cih na thei uh hi. 13 Thu tampi kong gelhnop hangin laikung le laidal tawh kong gelh nuam kei hi. 14 A sawtlo in nang tawh kimu dingin ka kilamen a, tua ciangin maitang kituah in i kiho ding hi. Nangma tungah nopna hong tung tahen. Hihlai a om sanggamte in nang hong hopih uh hi. Tualai a om i lawmte zong a mimal in na hopihsak in.