2 TIMOTHY

¹ Khazih Zeisu sunga om a hong kikamciam nuntakna tawh kizui in Pasian deihna tawh Zeisu Khazih sawltak khat a suak keimah Paul in, ² kong it ka tapa Timothy lai kong khak hi. I Pa Pasian le i Topa Khazih Zeisu kiang pana hehpihna, hehpihna thupha le lungnopnate nang tungah om tahen. ³ Sun le zanin ka thungetna ah nang kong phawk den hi. Tua banga kong phawkna ah lungsim tawngah kisuanna om hetlo ka pu ka pate mah bangin a na ka sepsak Pasian tungah lungdam thu ka ko hi. ⁴ Na khitui luannate ka phawk a, ka lung a nop theih nadingin nang kong mu nuam mahmah hi. ⁵ Nang sungah upna maan a om lam ka thei hi. Tua upna na pi Lois le na nu Eunice‑te in nei masa a, nang zong tua bang upna mah na neih lam ka thei hi. ⁶ Tua ahih manin nang tunga ka khutngakna tawh na ngah Pasian hong piak letsong na satsuah nadingin kong phawksak hi. ⁷ Banghang hiam cihleh Pasian in launa lungsim hong pia hilo in hanna, itna, ki‑ukzawhna hong guan hi. ⁸ Tua ahih manin i Topa thu teci na pan ding maizum kei inla, ama hanga ka thongkiatna zong hong maizumpih kei in. Lungdamna thu hanga ka thuaknate Pasian thahatna tawh hong thuakpih zaw in. ⁹ Tua Pasian in eite hong honkhia a, a siangtho sapna tawh hong sam hi. Amah in eite gamtatna hang hilo in ama ngimna le a hong hehpihna thupha hangin hong sam ahi hi. Amah in leitung a pianma pekin tua hehpihna Khazih Zeisu sunga a hong piak khitsa ahi hi. ¹⁰ Ahi zongin tu in i Honpa Zeisu Khazih hong kilatna tawh tua thu a hong kitheisak zo hi. Tua Zeisu Khazih in sihna beisak a, lungdamna thu tungtawn in nuntakna le sih theihlohna thu khuavak bangin hong tangsak zo hi. ¹¹ Tua lungdamna thu Gentile‑te tungah a tangkopa, sawltakpa le thuhilh siapa a suak dingin Pasian in kei hong sehzo hi. ¹² Hih thu hangin hih gimnate ka thuak a, ahih hangin ka maizum kei hi. Banghang hiam cihleh ka uppa ka thei a, amah ka piak khitsate, tua Ni dongin kem zo ding hi cih ka theitel hi. ¹³ Kei tung pana na zaksa a maan thuhilhnate Khazih Zeisu sunga om upna le itna tawh lenkip in. ¹⁴ Nang tunga hong kipiaksa na hoih, eite sunga a teeng Kha Siangtho tha tawh na kem in. ¹⁵ Asia gama om mi khempeuh in kei hong nusia khin uh hi cih na thei hi. Tuate lakah Phygellus le Hermogenes‑te zong a kihel uh hi. ¹⁶ Topa in Onesiphorus‑te innkuan thupha pia tahen. Banghang hiam cihleh amah in tam veipi tha hong guan a, mat le hen ka thuakna zong, a hong maizumpih kei hi. ¹⁷ Amah in Rome khuapi a hong tun ciangin kuhkaltak in kei hong zonga, hong mukhia hi. ¹⁸ Topa in tua Ni ciangin amah hehpihna pia tahen. Amah in Ephesus khua ah lam tuamtuam tawh kei hong huh mahmah hi cih na thei hi.

¹ Tua ahih ciangin ka tapa aw, Khazih Zeisu sunga om hehpihna thupha hangin thahat in om in. ² Teci tampite mai‑a ka thugen na zaksa thute, midangte zong a hilhsawn thei dingin mi muanhuaite tungah na pia in. ³ Zeisu Khazih galkap hoih bangin haksatnate na thuak keikai in. ⁴ Galkap a sem mi peuhmah in amah galkap a suaksakpa a lungdamsak nadingin ama nuntak nading vaite tawh a kikai‑awksak kei hi. ⁵ Tai kidemna ah a tai mite in zuih ding ngeinate zui in a tai kei uh leh pahtawina lukhu a ngah kei ding uh hi. ⁶ Hahkattak in lo a khopa in lo panin a piang a gahte a ngah masak ding kilawm hi. ⁷ Hih kong gen thute ngaihsun inla, Topa in a vekpi in hong theitelsak tahen. ⁸ Ka hilh lungdamna thu in misite lak panin a kithokiksak, David suan Zeisu Khazih thu hi a, ⁹ tua lungdamna thu hangin gimna ka thuak a, migilo khat bangin sikkhau kikhih zah dongin ka om hi. Ahi zongin Pasian thu ahih leh sikkhau a kikhih thei kei hi. ¹⁰ Tua ahih manin Pasian teelsa mite in hotkhiatna ahi Khazih Zeisu sunga om, tawntung minthanna a ngah theih nadingun gimna namkim ka thuak hi. ¹¹ Hih thu in thuman thutak ahi hi. Amah tawh i sihkhop leh, Amah tawh i nungta khawm ding hi. ¹² Gimna i thuak leh, Amah tawh i mangkhawm ding hi. Amah i nial leh, Amah in zong eite hong nial ding hi. ¹³ Eite in i cihtak loh hangin, Amah citak veve hi. Amah le amah kinial theilo hi. ¹⁴ Kam kinialna in phattuamna piangsak lo a, a za mite siasak zaw ahih manin kam a kinial loh nadingun Topa mai ah thupia inla phawksakkik in. ¹⁵ Maizum nading a omlo thuman thutak a khentel siam Pasian in a san theih nasempa na suah theih nadingin hanciam in. ¹⁶ A kihhuai le kimanna neilo thute pel in. Banghang hiam cihleh tua bang thute in biaknamisak lo semsem hi. ¹⁷ Amau thugente in cancer bangin kizel ding hi. Hymenaeus le Philetus‑te zong tua bang mite lakah a kihel uh hi. ¹⁸ Amaute thuman thutak pan pialkhia uh a, thawhkikna pen a beisa thu hi ci uh ahih manin mi pawlkhatte upna a siasak uh hi. ¹⁹ Ahi zongin Pasian khuambulpi in kiptak in dinga, a tungah hih bangin a kiciamteh hi. “Topa in ama mite a thei hi,” cihleh “Khazih min a lo mi peuhmah siatna panin kiheikhia tahen,” cih thu ahi hi. ²⁰ Ahih hangin inn lianpi khat sunga vanzat ahi um le bel‑te, kham le ngun bek tawh kibawl hi khin lo hi. Sing le lei tawh kibawl um le bel zong a om hi. Pawlkhatte thupi a, pawlkhatte thupilo hi. ²¹ Tua ahih manin mi khatin a thupilo nate panin a kisiansuah leh a kizatna a thupi, a kisianthosak le a Neipa in a zat theih ding na hoih khat peuhpeuh a sem dinga a kizang thei vanzat a suak ding hi. ²² Khangno lunggulhna hoihlote taisan in. Lungsim siangthotak a Topa min a lote tawh diktatna, upna, itna le kilemnate delh in. ²³ A haihuai le theitel lopi a kiselnate in kitotna piangsak hi cih thei na hih manin na pel in. ²⁴ Topa nasempa in kuamah tawh kitawng lo dinga, mi khempeuh tungah thudik in thu zong hilh thei dinga, thuakzawhhatna zong nei in, ²⁵ amah a langpan mite lungnemtak in thu a hilh ding hi. Pasian in amaute lungsim kikhelsak leh amaute in thuman thutak thei ding uh a, ²⁶ tua ciangin amaute in hong phawkin Dawimangpa thang panin a hong suakta ding uh hi. Banghang hiam cihleh amaute in ama deih bangbang in a sawl theih dingin a mat mite ahi uh hi.

¹ Ahih hangin hih thu ciamteh in. Ni nunung ni ciangin hun haksa hong tung ding hi. ² Banghang hiam cihleh mite in amau le amau bek a ki‑it, sum a duh, a kisial, a kiphasak, mi kosiat hat, nu le pate thu a manglo, a lungdam theilo, a siangtholo, ³ itna a neilo, mi dangte mawhna a maisak nuamlo, mi a gensia, amau pumpi ki‑uklo, a gamhtat, thuhoih a deihlo, ⁴ thuciamna a palsat, lungtang a khauh, a kihisak, Pasian it ding sangin noptat ding ut zaw ding uh a, ⁵ Pasian mi bangin kibawl in, ahi zongin a vangliatna nial ding uh hi. Tua bang mite na pel in! ⁶ Tua mite in midangte inn ah va lut khiankhian uh a, lunggulhna tuamtuam zui in, mawhna tawh a kidim numei ginalote a thuzawh ding uh hi. ⁷ Tua bang mite pen thu a kihilhhilh hangin thuman a thei zo ngeilote ahi uh hi. ⁸ Tu in Jannes le Jambres‑te in Moses a langpan bangun tua mite in zong thuman thutak a langpan uh hi. Amaute lungsim in kisia khin a, upna thu ah a kipampaihte ahi uh hi. ⁹ Tua hi a, amaute a ma uh a pai kei ding hi. Banghang hiam cihleh, Jannes le Jambres‑te mah bangin amaute haina zong kilangkhia ding hi. ¹⁰ Nangmah in ka thuhilhna, ka nuntakzia, ka tup ka ngimna, ka lungduaina, ka neih itna le ka thuakzawhnate na thei khinzo hi. ¹¹ Antioch khua, Iconium khua le Lystra khuate a ka thuak bawlsiatna le gimnate na thei hi. Ahih hangin tuate khempeuh panin Topa in kei hong honkhia hi. ¹² Hi mah hi. Khazih Zeisu sungah Pasian deihna banga a nungta nuam mi khempeuh in bawlsiatna a thuak ding uh hi. ¹³ Ahih hangin migilote le mi kineihtawmte siahuai semsem ding uh a, midangte a khem bangun amaute in zong khemna a thuak ding uh hi. ¹⁴ Nangmah in na sin khitsa, na theihtel khitsa thute zuisuak in. Tua thute kua tung pana na sin ahi hiam cih zong na thei hi. ¹⁵ Khazih Zeisu upna tungtawn a hotkhiatna ngah nadingin pilna a hong piathei Lai Siangtho na neutung a kipan na theihsa ahi hi. ¹⁶ Lai Siangtho buppi in Pasian humuapna tawh hong kipia hi a, thuhilh nading, mawhna kiphawksak nading, kibawlphat nading, le dikna thu ah kipattah nadingin a manpha hi. ¹⁷ Tua in Pasian mipa picing a na hoih khempeuh tawh a kigingkhol mi ahih theih nading ahi hi.

¹ Tua ahih ciangin Topa Zeisu Khazih in a nungta laite le a sisate thukhen ding pa hi a, ama hong kilat ding le ama kumpigam thu ngaihsun kawmin Pasian mai le ama mai ah thu kong piak inah, ² Pasian thu hilh in! Hun a hoih a, a hoih kei zongin a gen dingin kigingkhol den in. Lungduaitak le kiciantak in mawhna phawksak in taii bawl inla tha pia in. ³ Banghang hiam cihleh mite in thuhilhna maan a cimtak hun uh hong tung ding hi. A bil uh thakin amaute zaknop bangbang a gen dingin thuhilhsiate a kaikhawm ding uh hi. ⁴ Amaute in thuman thutak ngai nuam nawnlo ding uh a, phuahtawm tangthu peuh a ngai nuam zaw ding uh hi. ⁵ Nangmah in na khempeuh ah pilvang inla, haksatna hong tun ciangin thuak keikai in. Lungdamna thuhilh nasep sem inla, na nasep tangtun in. ⁶ Kei ka hih leh tuibuah biakpiakna a a kibua bangin hong kibuakhia ta a, ka paikhiat ding hun a hong nai zo hi. ⁷ Galdona pha ka do zo hi. Tai kidemna ah a mong dongin ka taizo hi. Upna ka lencip zo hi. ⁸ Tua hi a, tua Ni ciangin a dik Thukhenpa ahi Topa in kei hong piak ding dikna lukhu kei aa dingin hong koihkholhsak zo hi. Kei bek hilo in ama hong kilat ding a lunggulh mi khempeuh zong a pia ding hi. ⁹ A manlang theithei in nong pai theih nading hong hanciam in. ¹⁰ Banghang hiam cihleh Demas in hih leitung nate iplah ahih manin, kei hong nusia a, Thessalonica khua ah a paizo hi. Crescens zong Galatia gamah pai a, Titus zong Dalmatia gamah a paizo hi. ¹¹ Luke bek kei kiangah a omlai hi. Nong pai ciangin Mark hong zawn inla hong tonpih in. Amah in ka nasepna ah phatuam mahmah hi. ¹² Tychicus, Ephesus khua ah ka paisak hi. ¹³ Nong pai ciangin Troas khua ah Carpus kianga ka nusiat ka puantualpi le ka laibute, a diakdiak in savun laizialte hong pua in. ¹⁴ Sumsan sekpa Alexander in nakpi in kei hong bawlsia hi. Topa in ama gamtatna bangin thukkik tahen. ¹⁵ Amah in i thugente nasiatak in hong langpan ahih manin nang zong hoihtak in kikem in. ¹⁶ Thukhen zumah ka kihutna thu ka gen masak lai in kuamah in hong dinpih loin mi khempeuh in hong taisan khin uh hi. Amaute kimawhsak kei tahen. ¹⁷ Ahih hangin keima tung pan lungdamna thu a kicing in kihilh a, Gentile‑te in a zak theih nadingun Topa in kei hong dinpih in hong thakhauhsak hi. Amah in humpi nelkai kam sung panin kei hong honkhia hi. ¹⁸ Topa in thusia tawh hong kidona khempeuh panin hong honkhia lai dinga, ama vantung kumpigam sung a hong tunpih ding hi. Tua Topa tungah minthanna om tawntung tahen. Amen. ¹⁹ Prisca le Aquila, le Onesiphorus innkuanpihte na hopihsak in. ²⁰ Erastus pen Corinth khua ah a taamlai hi. Ahih hangin Trophimus pen a cina ahih manin Miletus khua ah ka nusia hi. ²¹ Phalbi ma in nong tun theih nadingin hong hanciam in. Eubulus in nang hong hopih hi. Pudens, Linus, Claudia le sanggamte khempeuh in zong nang hong hopih uh hi. ²² Topa Zeisu Khazih in na kha hong ompih tahen. Pasian hehpihna thupha in nang hong ompih tahen. Amen.