2 THESALONICA-TE

¹ Paul, Silvanus le Timothy‑te in i Pa Pasian le Topa Zeisu Khazih sunga om, Thessalonica khua pawlpi mite tungah lai kong khak uh hi. ² I Pa Pasian le Topa Zeisu Khazih kiang pana hehpihna thupha le lungnopna note tungah om tahen. ³ Sanggamte aw, na upna uh nakpitak in khang a, khat le khat na ki‑itna uh zong khang mahmah ahih manin note hangin Pasian tungah lungdam ka koh den ding uh a kiphamawh thu ahi hi. ⁴ Na thuak uh bawlsiatna le haksatna khempeuh sungah upna le thuakzawhna nei na hih manun Pasian pawlpite lakah note kong kisialhpih uh hi. ⁵ Hihte khempeuh in Pasian thukhenna a maan ahihna hong lak a, Pasian kumpigam aa dingin thuak na hih mah bangun tua kumpigam a luah dinga kilawmte na hihna uh zong hong lak hi. ⁶ No hong bawlsiate Pasian in gimna tawh a thuhkik ding pen a thuman ahi hi. ⁷ Topa Zeisu vantung pana a thahat ama vantungmite tawh hong kilat ciangin bawlsiatna a thuak note le kote tawldamna hong piakhawm ding hi. ⁸ Tua hun ciangin amah in Pasian a theilo mite le i Topa Zeisu Khazih lungdamna thu a umlo mite meikuang tawh a thukkik ding hi. ⁹ Tua mite pen Topa omna le a vangliatna huam sung panin kihawlkhia dinga, tawntung kisiatna daan a thuak ding uh hi. ¹⁰ Ama misiangthote hangin minthanna ngah ding le note laka ka teci panna uh a ki‑up manin thu‑um mite lakah pahtawina a ngah dingin tua Ni ciangin hong pai ding hi. ¹¹ Tua ahih manin ama hong sapna tawh a kilawm banga Pasian in hong ngaihsut theih nadingin na tup uh a hoih khempeuh le na upna uh hanga piang nasep khempeuh ama vangliatna tawh hong tangtunsak nadingin thu kong ngetsak den uh hi. ¹² I Pasian le Topa Zeisu Khazih hong hehpihna thupha tawh kizui in note sungah i Topa Zeisu Khazih kipahtawi a, ama sungah zong note hong kipahtawi theih nadingin thu kong ngetsak uh hi.

¹ Tu in, sanggamte aw, i Topa Zeisu Khazih hong pai nading thu le ama kianga i kikaihkhop nading thu tawh kisai a kong thum nopna uh hih bang ahi hi. ² Khazih ni hong tung khinzo hi ci a, thusuak genna, thuhilhna le kote gelh bang khata a kibawltawm laikhakte hangin na lungsim uh patausak kei unla buaipih kei un. ³ Thu khat peuhpeuh tawh kuamah kikhem zosak kei un. Banghang hiam cihleh a masa pen in mite in upna maan pan hong puk ding uh a, tua Ni khit ciangin mawhna a piangsakpa hong kilang ding hi. Amah pen siatna tapa ahi hi. ⁴ Amah in Pasian le Pasian biakna kici khempeuh langpan in tuate tungah amah hong kitawisang ding hi. Amah in Pasian biakinnpi sungah Pasian bangin tu in amah le amah Pasian kici hi. ⁵ Note kianga kong omlai in hih thute kong gen khit lam phawk nawnlo na hi uh hiam? ⁶ Tua pa a hun a tun ciang beka hong kilatkhiat theih nadingin tu laitak in bangin khaktan hiam cih na thei uh hi. ⁷ Banghang hiam cihleh a kiselsim siatna in na a sem khinzo hi. Tua a khaktanpa a lakkhiat khit mateng amah in khaktan phot dinga, ⁸ tua khit ciangin siatna bawlpa hong kilangkhia pan ding hi. Topa hong pai ciangin ama kamsung pana pusuak a huu tawh tua siatna bawlpa sumang in ama hong kilatna vangtang tawh a susia ding hi. ⁹ Satan nasepna tawh kizui in tua siatna bawlpa hong kilangkhia dinga, ama vangliatna namkim tawh a maanlo limlamdangte le nalamdang lianpite piangsak in, ¹⁰ siatna a thuak ding mite in hotkhiatna a ngah theih nadingun thuman thutak deihna neilo uh ahih manin thumanlo khemna namkim a thuak ding uh hi. ¹¹ Tua ahih manin amaute in zuauthu a up theih nadingun Pasian in amaute tungah khemna lianpi a tungsak ding hi. ¹² Tua in thuman thutak um nuamlo a, thumanlohna ah nuam a sa, tua mite khempeuh tungah Pasian in thu a khen theih nading ahi hi. ¹³ Ahi zongin Topa hong it sanggamte aw, Kha in a hong siansuahna le thuman thutak na upna uh tungtawn in hotkhiatna a ngah dingin Pasian in a kipatcil a kipan note hong teel ahih manin note hangin Pasian tungah lungdam ka koh tawntung ding uh a phamawh ahi hi. ¹⁴ Note in i Topa Zeisu Khazih minthanna na ngah theih nadingun kong hilh uh lungdamna thu tungtawn in amah in note a hong samzo hi. ¹⁵ Tua ahih manin sanggamte aw, kiptak in ding unla kam tawh ahi a, laikhak tawh ahi zongin kong piak uh thuhilhnate na lenkip un. ¹⁶ Tu in i Topa Zeisu Khazih mahmah le eite hong it a, a hehpihna thupha tawh a tawntung hehnepna le lametna pha hong pia i Pa Pasian in, ¹⁷ na lungsim uh hong hehnem henla kampau le gamtatpha namkim ah hong kipsak tahen.

¹ Sanggamte aw, a tawpna a kong gennop in ah, note laka hong tun mah bangin Topa thu kizel mengmeng in a kipahtawi theih nading kote aa dingin thu hong ngetsak un. ² Mihoihlote le migilote khut sung panin hong kihotkhiat theih nadingin zong thu na ngen un. Banghang hiam cihleh mi khempeuh thu‑um mi ahi khin kei uh hi. ³ Ahi zongin Topa in citak ahih manin gilopa vangliatna pan hong kemin hong kipsak ding hi. ⁴ Kong thupiakte uh tu‑a na zuih mah bangun a zuisuak dingin i Topa sungah kong muang uh hi. ⁵ Tu in, Pasian na it nading uh le Khazih banga na thuakzawh nadingun Topa in note lungsim sungah lam hong lak tahen. ⁶ Sanggamte aw, kote kiang pana na ngah uh thuhilhna a zui nuamlo a thadah sanggamte tawh na kithuah kei un, ci in i Topa Zeisu Khazih minin thu kong pia uh hi. ⁷ Banghang hiam cihleh note kianga ka omlai un thadah loin note etteh theih dingin ka om lamtak uh na thei uh hi. ⁸ Kuama an a mawkna in ka ne kei uh a, note khatpeuh aa dingin vangik ka suah khakloh nadingun sun le zanin hanciam in na ka sem uh hi. ⁹ Note tung pan huhna ngah theih nading thu ka neih loh man uh hilo in note zuih ding limpha kong lahna uh hi zaw hi. ¹⁰ Note kianga ka omlai nangawn un nasem nuamlo mi in an zong ne kei hen ci in thu kong pia zo uh hi. ¹¹ Nasep thadah in sepmel neilo a, midangte vaiteng tawh a kitaklah mi pawlkhat note lakah om hi cih thu ka za uh hi. ¹² Tu in tua bang mite in na sem tangtang in amau sepsa mah a nek nadingun i Topa Zeisu Khazih minin hanthawn in thu kong pia uh hi. ¹³ Sanggamte aw, note na hih uh leh a pha bawl ding cimtak kei un. ¹⁴ Hih laikhak sunga kong thupiakte uh a manglo mi a om leh ciamteh unla a maizum theih nadingin na kithuahpih kei un. ¹⁵ Ahi zongin gal bangin na ngaihsun kei unla, sanggam bangin thu na hilh un. ¹⁶ Tu in nopna hong pia Topa in nopna namkim hong pia tawntung tahen. Topa in note khempeuh hong ompih tahen. ¹⁷ Keimah Paul in hih a nunung hopihna keima khut mahmah tawh kong gelh ahi hi. Ka laikhak khempeuh sungah hih bangin keima khut lam tawh gelhin ciaptehna ka nei hi. ¹⁸ I Topa Zeisu Khazih hong hehpihna thupha in note khempeuh tawh hong om tahen. Amen.