2 PETER

¹ Zeisu Khazih sila le sawltak khat ahi keimah Simon Peter in i Pasian le Honpa Zeisu Khazih dikna hanga kote tawh a manpha mahmah upna a ngahkhawm mite lai kong khak hi. ² Pasian le i Topa Zeisu na theihna uh tungtawn in note tungah hehpihna thupha le lungnopna hong khang semsem tahen. ³ Ama vangliatna le ama hoihna tawh eite hong sampa i theihna tungtawn in nuntakna le Pasian sutna tawh kisai na khempeuh Pasian ahihna vangliatna tawh eite hong pia zo hi. ⁴ Amah in a thupi mahmah le a manpha mahmah kamciamnate tua vangliatna mah tawh hong pia zo hi. Tua kamciamte tungtawn in a hoihlo lunggulhnate hanga a piang hih leitung siatna tawh kipelh in Pasian pianzia na ngah theih nading uh ahi hi. ⁵ Hih thu hang mahin upna tungah hoihna, hoihna tungah thutheihna, ⁶ thutheihna tungah pumpi deihna khamna, pumpi deihna khamna tungah thuakzawhna, thuakzawhna tungah Pasian sutna, ⁷ Pasian sutna tungah sanggam banga kikhualna, sanggam banga kikhualna tungah itna a neihthuah dingin na hanciam un. ⁸ Banghang hiam cihleh hihte nei in khangsak le uh teh Topa Zeisu Khazih theihtelna ah kimanna neilo le gahsuah loin na om kei ding uh hi. ⁹ Ahi zongin hihte a neilo mi ahih leh a mit mangin naicik bek muthei a, a mawhna luiteng kisilsiangsak khinzo ahihlam zong a mangngilh mi ahi hi. ¹⁰ Tua ahih manin sanggamte aw, note a hong kisapna le a hong kiteelna a kiciat sinsen nadingin hanciam semsem un. Tua hi leh na puk ngei kei ding uh a, ¹¹ i Topa le Honpa Zeisu Khazih tawntung kumpigam sung luttheihna thu note a kicing in hong kipia ding hi. ¹² Hih thuman thutak thei in a kip khinsa na hi uh zongin hih thute mah kong phawksakkik nuam lai hi. ¹³ Hi hi, hih buuk sungah ka teen laiteng hih thute kong phawksak ding hoih ka sa hi. ¹⁴ Banghang hiam cihleh i Topa Zeisu Khazih in a hong lahsa mah bangin hih ka buuk ka suahkhia baihta ding hi ci in ka thei hi. ¹⁵ Tua thamlo in ka sih khit ciangin zong hih thute na phawk tawntung theih nadingun ka hanciam nuam hi. ¹⁶ I Topa Zeisu Khazih hong paina thu le ama vangliatna thu kong gen uh ciangin pilna tawh a kiphuak tawm tangthu a hong gen ka hi kei uh a, mittang mahmah tawh ka muhsa uh ama thupina hong gen ka hi zaw uh hi. ¹⁷ Banghang hiam cihleh a thupi mahmah vanglian kiang panin, “Hihpa in hong lungdamsak mahmah ka it ka Tapa ahi hi,” a ci aw khat ama tungah a hong ginkhiat in amah in Pa Pasian pahtawina le vangliatna a ngah hi. ¹⁸ Amah tawh mual siangtho tunga ka omkhop laitak un vantung panin a hong ging hih aw kote in ka za uh hi. ¹⁹ Tua banah a kip a kho zaw kamsangte thugente i nei hi. Note lungsim sungah, zingsang khua hong vak in zingsol hong suah mateng khuamial laka meitang bangin hih thute lim ngaihsut le uh teh note aa dingin a hoih mahmah hi. ²⁰ Nadang khempeuh sangin hih thu na thei masa un. Lai Siangtho sunga om genkholhna thute khat beek kamsangpa theih tawmna tawh a hong piang ahi kei hi. ²¹ Banghang hiam cihleh genkholhna thute in mihing deihna banga hong piang hilo in Pasian misiangthote in Kha Siangtho sawl bangbang in a gen uh ahi hi.

¹ Ahi zongin Israel mite lakah kamsangzuaute a om ngei mah bangin note lakah zong thuzuau hilhte a hong om ding hi. Amaute in a hong siasak thei upna maanlote hong lutpih sim ding uh a, amaute a lei Topa nangawn nial uh ahih manin amaute tung mahah siatna tung pah ding hi. ² Mi tampi in tua mite siatna lampite zui ding uh a, amaute hangin thuman thutak lampi a zahko ding uh hi. ³ Amaute duhhop huaiham mahmah uh ahih manin zuauthu tawh note nek zonna in hong nei ding uh hi. Tanglai a kipan in Pasian in amaute thukhen zo a, a sawtlo in kisiatna a thuak ding uh hi. ⁴ Banghang hiam cihleh mawhna a bawl vantungmite nangawn Pasian in koihkhong loin hell sungah khia a, thukhenna thuak dingin khuamial sungah sikkhau tawh a khihcip hi. ⁵ Tanglai leitung mite zong koihkhong loin Pasian a thusimlo tua mite tungah tuiciin tungsak a, dikna thu a hilh Noah tawh a kisim mihing giatte a honkhia hi. ⁶ A nung ciangin Pasian a thusimlo mite tungah a piang ding thu a lahna in Sodom le Gomorrah khuate thukhen in susia a, vut le vai a suaksak hi. ⁷ Ahih hangin migilote kihhuai gamtatnate hangin lunggimna a thuak midikpa Lot a honkhia hi. ⁸ (Banghang hiam cihleh amaute laka a teeng tua midikpa in amaute tatsiatna teng nisim in mu in a kampau tenguh zaza ahih manin a dik ama lungsim a gimsak mahmah hi.) ⁹ Tua hi a, Pasian a kihta mite ze‑etna pan a hotkhiat zia ding le thukhen ni cianga daanpiak dingin migilote a koihzia, ¹⁰ a diakdiak in a kihhuai lunggulhna tawh ci le sa deihna a zui mite le ukna a thusimlo mite daan a piak dingzia Topa in a thei hi. Tua mite haihan in amau thu bek thusa uh a, tunglam a thuneite nangawn a gensia ngam uh hi. ¹¹ Ahih hangin amaute sanga a vanglian zaw le a thahat zaw vantungmite nangawn in Topa mai ah tuate zahko loin zong a mawhsak kei uh hi. ¹² Hih mite in amaute theihloh peuhpeuh gensia uh a, ngaihsutna a neilo thah ding le suksiat ding bek a ngak ganhing gilo tawh a kibang uh hi. Ganhing gilote mah bangin amaute zong a mangthang ding uh hi. ¹³ Amaute in diktatlohna thaman a sang ding uh hi. Amaute nopsakna in sun tangpi in noptat a omna ahi hi. Note tawh ankuang hong um uh ciangin a tatsialo bangin a kigualnop bawl uh hangin a nin le a kawkbang a suak uh hi. ¹⁴ Angkawm nopna lungsim tawh a mit hah uh kidim a, mawhna bawl loin om theilo uh ahih manin lungsim palau mite a zol uh hi. Huaihamna lamah siam mahmah uh a, hamsiatna a ngah mite ahi uh hi. ¹⁵ Amaute in lampi maan nusia in lampial khin uh a, Beor tapa Balaam lampi a zui uh hi. Tua Balaam in thumanlohna thaman a deihpa ahi hi. ¹⁶ A pau theilo laa khat mihing bangin pau in tua kamsangpa gamtatna maanlo taii a, kamsangpa haitatna a kham hi. ¹⁷ Tua mite in tui omlo tuikhuk le huihpi mut mang meiilum tawh a kibang uh hi. Amaute aa dingin a mial bikbek tawntung khuamial a kikoihkhol zo hi. ¹⁸ Amaute in kimanna neilo kiphatsakna kam pau uh a, khialhna sunga a om mite lak panin a suakta mite, ci le sa lunggulhna zui in a paktat dingin a zol uh hi. ¹⁹ Ka hong suaktasak ding uh hi ci in midangte kamciam a piak uh hangin amaute mahmah siatna sila ahi uh hi. Banghang hiam cihleh na khatpeuh in mi khat a thuzawh leh, tua mipa in tua sila ahi hi. ²⁰ Topa le Honpa ahi Zeisu Khazih thei in, a thanghuai leitung nuntakna pan a suahtak khit uh ciangin tua thanghuai leitung nuntakna sungah awkkik a, a guallelh uh leh, tua mite pianzia in a patna sangin a tawpna a sia zaw hi. ²¹ Amaute in a kipia a siangtho thupiakna thei khin uh a, a nungngatsan uh sangin tua thuman lampi a thei kha lo uh hi leh amaute aa dingin a hoih zaw hi. ²² Ahih hangin, “Ui in a luak a nekik hi. Vok in a kisil khit ciangin buan lakah a bualkik hi,” a kici paunak bang tektek in amaute tungah a piang hi.

¹ Kong itte aw, tu‑a kong laikhak a nihveina ahi hi. (Hih laikhak nihte in ngaihsutna gina na neihna uh kong phawkkiksakna ahi hi.) ² A siangtho kamsangte in nidang a a gen uh thute Topa le Honpa in sawltakte tungtawn a hong piak thute na phawkkik ding uh ka deih hi. ³ A masa pen in hih thu na thei un. Hun nunung ciangin amaute lunggulhna hoihlo zui in a gamta, mi a zahko thei mite hong piang ding uh hi. ⁴ Amaute in, “Ama hong paikik nading kamciamna koi ah omta hiam? I pu i pate si zota uh a, na khempeuh a kipiansak cil a bangbang in omlai hi,” ci in a gen ding uh hi. ⁵ Ahih hangin tanglai in Pasian in a kammal tawh vantung nate piangsak in leitung zong tui in a tup pawl le tui tunga a dawkkhia pawl a omsak thu thei gige napi a kitheihmawh bawl uh hi. ⁶ Tua hun lai a om leitung zong tui in tummang in kisia hi cih thute amaute in a kimangngilh bawl uh hi. ⁷ Tua thamlo in Pasian in a kammal mah tawh tu laitak a a om vantung nate le leitung zong thukhen ni le Pasian a thusimlo mite a kisuksiat ni cianga meikuang tawh haltum dingin a kikoih khol ahi hi. ⁸ Ahi zongin kong itte aw, Topa aa dingin ni khat in kum 1,000 bang hi a, kum 1,000 zong ni khat mah bang ahi hi cih thu mangngilh kei un. ⁹ Mi pawlkhat in zekai hi a cih bangun Topa in ama kamciamna a tangtunsak nadingin a zekai kei hi. Eite khat zong kisialo in i vekpi in mawhna i kisikkik ding hong deih manin lungduaitak in hong ngak ahi hi. ¹⁰ Ahi zongin Topa Ni in zan laitak a hong pai guta bangin hong tung ding hi. Tua ni ciangin vantung nate ginngaih mahmahsa in a mangthang ding uh a, a sunga om nate zong salua in a tuimang ding hi. Leitung le a sunga om na khempeuh zong a kangtum ding hi. ¹¹ Tua bangin na khempeuh tuimang ding ahih manin note bangci bang mi hi dingin kilawm cih ngaihsun un. Pasian sutna le siangtho nuntakna ah gamta unla, ¹² Pasian Ni hong tun ding kal ngaklah in lametna tawh na om ding uh kilawm hilo ahi hiam? Banghang hiam cihleh tua ni ciangin vantung kuangin tuisuak dinga, a sunga om na khempeuh zong salua in a tuimang ding hi. ¹³ Ahih hangin eite in ama hong kamciamna bangin midikte a teenna van thak le lei thak i lamen hi. ¹⁴ Tua ahih manin kong itte aw, tuate lamen na hih manun ama mai ah lungmuangtak in na om theih nadingun a ninbanglo, mawhsakna a omlo dingin om un. ¹⁵ I it mahmah i sanggampa Paul in zong amah a kipia pilna tawh kizui in lai sunga hong gelh mah bangin lungduaitak a Topa hong ngakna in hotkhiatna ngah theih nading ahi hi ci in na ciamteh un. ¹⁶ Amah in a laikhak dang khempeuh ah zong tua thute mah a gen hi. Tua laikhakte sungah a telhak thu pawlkhat om a, bangmah theilo mite le lungsim kiplo mite in tua thute a lehkaih uh hi. Lai Siangtho sunga om a dang thute zong tuamah bangin lehkaih uh ahih manin siatna a thuaklawh uh hi. ¹⁷ Tua hi a, kong itte aw, hih thute theikhol khin na hih manun migilote in lammaanlo ah hong pialkhiatpih in na dinna uh munkip pan na puk khakloh nadingun kikem un. ¹⁸ I Topa le Honpa Zeisu Khazih hehpihna thupha le amah theihtelna ah na khangto un. Tua Topa tungah tu le a tawntung in minthanna om tahen. Amen.