2 JOHN
11 Thuman thutak sunga kong it, teelna a ngah, a zahtakhuai numei le na tate tungah makaipa in lai kong khak hi. Kei bek hilo in thuman thutak a thei mi khempeuh in zong hong it uh hi. 2 Banghang hiam cihleh eite sunga a teeng le a hong ompih tawntung ding tua thuman thutak hangin ka hong it hi. 3 Pa Pasian le Pa Tapa, Topa Zeisu Khazih kiang panin hehpihna thupha, hehpihna, le lungnopna in thuman thutak le itna sungah note hong ompih tahen. 4 Pa kiang panin i ngah thupiakna bangin na tate pawlkhat in thuman thutak a zuih uh ka muh ciangin ka lungdam mahmah hi. 5 A zahtakhuai numei aw, tu in kong gen in ah thupiakna thak kong gelh tuan kei a, a cil a pat a kipan i ngahsa ahi khat le khat ki‑it ni cih thu kong gelhkik hi. 6 Ama thupiakte banga zuihna in itna ahi hi. Hih in a kipat cil a na zaksa uh na zuih ding uh thupiak ahi hi. 7 Banghang hiam cihleh Zeisu Khazih in mihing bangin hong piang hi cih thu a sanglo zuauthu a gen mi tampi leitung ah a hong piangzo hi. Tua banga a gen mi in mikhem hi a, anti‑khazih ahi hi. 8 I sepsate tan loin thaman kimtak in i ngah theih nadingin na kikem un. 9 Khazih thuhilhna ah kip loin a palsat mi peuhmah in Pasian neilo ahi hi. Khazih thuhilhna ah a kip mi in, Pa le Tapa a nei ahi hi. 10 Hih thuhilhna a lenlo mi khatpeuh note kiangah a hong pai leh inn ah na tungsak kei unla, na hopih kei un. 11 Banghang hiam cihleh tua bang mi khat a hopih mi in tua mipa siatna ah a kihel ahi hi. 12 Thu tampi kong gelhnop hangin laidal le laitui tawh ka gelh nuam kei hi. I lungdamna a kicin nadingin note kiangah hong hawhin maitang kituah in i kiho ding ka lamen hi. 13 Teelna a ngah na sanggamnu tate in note hong hopih uh hi. Amen.