2 CORINTH-TE

2 CORINTH-TE

¹ Pasian deihna hanga Zeisu Khazih sawltak a suak, keimah Paul le i sanggampa Timothy‑te in Corinth khua‑a om Pasian pawlpi le Achaia gama om misiangthote khempeuh kong hopih uh hi. ² I Pa Pasian le Topa Zeisu Khazih kiang pana hehpihna thupha le lungmuanna note tungah om tahen. ³ Hehpihna hong pia i Pa le hehnepna khempeuh hong pia Pasian, i Topa Zeisu Khazih ii Pa le Pasian tungah phatna om tahen. ⁴ Tua Pasian in eite hong hehnepna mah bangin tua tawh eite in zong haksatna a thuak midangte i hehnep theih nadingin i thuak gimna khempeuh ah a hong hehnem hi. ⁵ Khazih hanga gimna tampi i thuak mah bangin Khazih tungtawn in hehnepna zong tampi i ngah hi. ⁶ Tu in, kote in gimna ka thuak uh leh note in hehnepna le hotkhiatna na ngah nading uh ahi hi. Tua in kote thuak gimnate mah zong note in a kibang in na thuak tentan zawh nading uh ahi hi. Kote in hehnepna ka ngah uh leh note aa dingin hehnepna le hotkhiatna ahi hi. ⁷ Tua ahih ciangin note aa dingin ka lametna uh a kip hi. Banghang hiam cihleh note zong kote mah bangin gimna a thuakte na hihna uh ka thei uh a, tua mah bangin note in zong hehnepna a ngah na hi uh hi. ⁸ Sanggamte aw, Asia gam sunga ka thuak uh haksatnate thei loin na om ding uh ka deih kei hi. Thuak zawh ding zahval in gen zawhloh haksatna ka thuak uh a, a nungta zolo ding zahin ka lungneu mahmah uh hi. ⁹ Hi hi, a si dinga thukhenna a thuak i hi ta hi ka kici uh hi. Ahi zongin tua in ko le ko kimuang loin misite a thokiksak Pasian ka muan nading uh ahi hi. ¹⁰ Tua Pasian in a lauhuai sih theihna panin hong honkhia zo a, kote hong honkhia in amah muang ka hih manun hong honkhia lai ding hi. ¹¹ Mi tampi in thu hong ngetsak uh a, kote tangin mi tampi in lungdam a koh theih nadingun thungetna tawh kote nong panpih uh hi. ¹² Kote kisialhna in hih thu ahi hi. Ci le sa pilna a hilo Pasian hehpihna thupha hangin lungsim siangtho le cihtakna tawh leitung ah ka gamta uh a, a diakdiak in note mai ah lungsim kisuanna om loin teci ka pang uh hi. ¹³ Note kiangah thudang gelh loin na sim theih na tel theih ding uh thu bek kong gelh uh hi. Tu in note in a tawp dongin a thei dingin kong um uh hi. ¹⁴ Note in kote thu a cingin na thei nai kei uh hi. Topa Zeisu Ni ciangin note kisaktheihpih ding mi ka hih mah bangun note zong kote kisaktheihpih ding mite na hi uh hi. ¹⁵ Hih bang lungmuanna nei ka hih manin khatvei phattuamna na ngahkik theih nadingun note kiangah hawh ding ka ngaihsun hi. ¹⁶ Kong hawh ciangin Macedonia gam ka pai masa dinga, tua gam pan kong kilehkik ciangin note kiangah kong bang ding hi. Tua panin note in Judea gamah nong kha ding uh hi. ¹⁷ Tua ahih manin hih banga ka gelna a mawkgel ka hi hiam? Ci le sa deihna zui a, hi mah e, hi kei e, ci themthum in a gel ka hi hiam? ¹⁸ Ahih hangin Pasian pen a citak ahihna tawh kizui in note kiangah thu kong gen uh ciangin hi mah hi, hilo hi ka ci themthum kei uh hi. ¹⁹ Banghang hiam cihleh Silvanus, Timothy‑te le keimah in kong hilh uh Pasian Tapa Zeisu Khazih in hi mah, hi kei cih themthum hilo in ama sungah, ahi mah hi tawntung hi. ²⁰ Pasian hong kamciamte khempeuh in ama sungah, hi mah vive hi a, kote hangin Pasian min a kiphat theih nadingin Amen ahi hi. ²¹ Tu in Khazih sungah kote le note hong kipsak a, sathau hong nilhpa in Pasian ahi hi. ²² Amah in eite tungah ciaptehna hong khen zo a, kipsakna in i lungsim sungah Kha hong pia zo hi. ²³ Tua thamlo in note hong dawm nuam ka hih manin Corinth khua ah hong pai nawnlo ka hihna Pasian in hong theihpih hi. ²⁴ Hih bang ka cih ciangun note upna hong ukcip hilo in note lungdam nadinga note tawh a semkhawm ka hi zaw uh hi. Banghang hiam cihleh upna tawh a dingkip na hi uh hi.

¹ Tua ahih manin note lungsim nasak ding bekin kong zin nawnloh nading ka lungsim ka khentat hi. ² Note hong dahsak leng kei hong lungdamsak ding kua hi nawn ding ahi hiam? Kong dahsak note mah kei hong lungdamsak dingte hilo na hi uh hiam? ³ Kong pai ciangin kei hong lungdamsak ding ahi note in kei nong dahsak khakloh nadingun hih laikhak hong gelh ka hi hi. Note khempeuh kei tawh lungdam khawm dingin kong muang hi. ⁴ Tua ahih manin haksatna lianpi le lunggim mahmah kawmsa in khitui naptui tawh lai kong khak hi. Note kong dahsak nopman hilo in kong it mahmah lam na theih nadingun lai hong khak ka hi zaw hi. ⁵ Ahi zongin mi khatpeuh in dah nading thukhat a piansak ciangin ka uang genna hilo in kei hong dahsakna sangin note hong dahsakna nasia zaw lai ding hi. ⁶ Mipi a tam zaw in tua bang mipa tunga gimna a piakteng uh kicing zo hi. ⁷ A taktak in ci lehang tua pa mawhna maisak a, tha na piak ding uh hi zaw hi. Tua hi kei leh khasialua in siatlawh zaw kha ding hi. ⁸ Tua ahih manin amah na it takpi lamuh na lahkik nadingun kong hanthawn hi. ⁹ Na khempeuh ah thu na mang takpi uh hiam cih kong ettelnop manin lai‑a hong khak ka hi hi. ¹⁰ Tu in mi khatpeuh a mawhna na maisak uh leh keimah in zong ka maisak hi. Banghang hiam cihleh mi khatpeuh a mawhna maisak ding om a, ka maisak leh note kong khualna tawh Khazih hanga ka maisak ahi hi. ¹¹ Mawhna kimaisak kei lehang Satan in noptak hong sa ding ahih manin a kimaisak i hi hi. Banghang hiam cihleh ama tup le ngimziate a theilo i hi kei hi. ¹² Tua banah, Khazih lungdamna thu hilh dinga Troas khua ka pailai in Topa in kei aa dingin kong hong honsak hi. ¹³ Tua khua ah ka sanggampa Titus ka muh loh ciangin, ka lungnuam theilo ahih manin amaute mangpha khakin Macedonia gamah ka pai hi. ¹⁴ Tu in Khazih hangin gualzawhna hong ngahsak den a, kote tungtawn in mun khempeuh ah Khazih theihna gim namtui a kizelsak Pasian tungah lungdamna thu tung tahen. ¹⁵ Banghang hiam cihleh kote in hotkhiatna a ngah mite le a mangthang mite lakah Pasian aa dingin Khazih gimnamtui tawh a kibang ka hi uh hi. ¹⁶ Mi pawlkhat aa dingin sihna a piangsak sihna gimnamtui tawh ka kibang uh a, a dang pawlkhatte aa dingin ahih leh nuntakna a piangsak nuntakna gimnamtui tawh ka kibang uh hi. Tua ahih manin hih bang nasep a sem zo ding kua kilawm ahi hiam? ¹⁷ Banghang hiam cihleh midang tampite bang hilo in kote in Pasian thu summet bawlna in ka zang kei uh hi. Khazih sungah Pasian kiang pana kisawl mite bangin Pasian mai ah cihtakna tawh thu ka gen uh hi.

¹ Tua bang ka cih ciangin ko le ko hong kiphatkik zel ka hi uh hiam? Mi pawlkhatte bangin thukimpihna lai note tunga lah ding ahi zongin note kiang pana thukimpihna lai lak ding ahi zongin kisam ding ka hi uh hiam? ² Note pen mi khempeuh in sima a theih uh kote lungtang tunga kigelh kote laikhak na hi uh hi. ³ Laitui tawh kigelh hilo in a nungta Pasian Kha tawh a kigelh kote nasepna gah Khazih laikhak na hi uh hi cih teltak in a kilang zo hi. Suangpek tunga kigelh hilo in lungtang satak tunga kigelh laikhak na hi uh hi. ⁴ Kote in Khazih hangin Pasian mai‑a ka khamuanna uh tua bang ahi hi. ⁵ Ko le ko hi ka kisak nadingun ko sungah kicinna ka neihman uh hilo in kote kicinna in Pasian kiang pan ahi hi. ⁶ Amah in thuciam thak tawh kisai nasem dingin kote hong bawl zo hi. Hih in thukham laimal hang hilo in Kha hang ahi hi. Banghang hiam cihleh thukham laimal in sihna piangsak a, Kha in nuntakna a piangsak hi. ⁷ Suangpek tungah kikhuak in a kigelh sihna a piangsak nasepna vanglian mahmah a, Moses maitang tangsak ahih manin Israel mite in Moses maitang a en zo kei uh hi. Ahi zongin tua a vang tang damdam in a mual hi. ⁸ Tua ahih leh Kha nasepna vanglian zaw loin om ding ahi hiam? ⁹ Mawhsakna a piangsak nasepna tua zahin vanglian ahih leh dikna a piangsak nasepna vanglian zawtham lai ding hi. ¹⁰ Hih a lianzaw vangliatna tawh tehna in a masa tua vangliatna a cihtak peuhmah kei hi. ¹¹ Damdam in a mual pen vanglian ahih leh a kip tawntung pen vanglian zawtham ding hi. ¹² Tua hi a, tua bang lametna nei ka hih manun hangtak in thu ka gen uh hi. ¹³ Israel mite in damdam in a mual Moses maitang a vangtang en zolo uh ahih manin Moses in a maitang a khuh bangin, kote in ka khuh kei uh hi. ¹⁴ Ahih hangin amaute a lungsim uh kimialsak ahih manin tuni dongin Thuciam Lui a sim uh ciangin tua maikhuhna in a liahlai hi. Banghang hiam cihleh tua maikhuhna Khazih hangin kilakhia khinzo hi. ¹⁵ Ahih hangin tuni dongin Moses laibu a sim uh ciangin tua maikhuhna in a lungsim uh a liahlai hi. ¹⁶ Ahi zongin, Topa lamah mi khatpeuh a kihei ciangin tua maikhuhna a kilakhia hi. ¹⁷ Tu in Topa in Kha ahi hi. Topa Kha omna munah suahtakna a om hi. ¹⁸ Eite khempeuh in maitang kikhuh nawnlo in limlang a ki‑et bangin Topa vangliatna i mu hi. Topa Kha in vangliatna ah ama lim le mel sun dingin hong khel a, minthanna khat panin minthanna sang zaw ah hong omsak hi.

¹ Tua ahih ciangin kote in hehpihna ka ngahna uh tawh kizui in hih nasep ngah ka hih manun ka lungkia kei uh hi. ² Tua hi a, a zumhuai simtham tatnate ka nusia uh hi. Thukawi tawh khemna ka zang kei uh a, Pasian thu ka kawikaih kei uh hi. Thuman thutak teltak in ka hilh uh a, mikim lungsim in a san theih dingun Pasian mai ah maantak in ka om uh hi. ³ Kote hilh lungdamna thu a kiliah ahih leh zong siatna a thuak ding mite aa ding bekin a kiliah ahi hi. ⁴ Pasian lim le mel Khazih vangliatna lungdamna thu khuavak a muh theihloh nadingun hih leitung pasian in a umlo mite lungsim a mialsak hi. ⁵ Kote in komau thu a hilh hilo in Khazih Zeisu in Topa ahi hi cih thu le Zeisu hangin note sila ka hihna uh ka hilh uh hi. ⁶ Banghang hiam cihleh khuamial sung panin khuavak tangkhia hen ci a, thu a piapa in Pasian ahi hi. Tua Pasian in Zeisu Khazih maitang a om Pasian vangliatna hong theisak in kote lungsim sungah khuavak bangin hong tangsak zo hi. ⁷ Ahih hangin tua a lian mahmah vangliatna in kote aa hilo in Pasian aa ahihlam a kilat nadingin leibel tawh a kibang kote pumpi sungah a manpha mahmah tua vangliatna ka nei uh hi. ⁸ Mun tuamtuam panin netcipna ka thuak uh hangin ka kisia kei uh hi. Ka lungman uh hangin ka lungsim uh a bei kei hi. ⁹ Hong kibawlsiat hangin hong kinusia kei hi. Hong kisattuk hangin hong kisusia zo kei hi. ¹⁰ Kote pumpi ah Zeisu nuntakna a kilatkhiat theih nadingin Topa Zeisu sihna kote pumpi ah ka pua kawikawi uh hi. ¹¹ Banghang hiam cihleh a sithei kote pumpi ah Zeisu nuntakna a kilatkhiat theih nadingin Zeisu hangin sihna ah a nungta kote a kipia ngitnget ka hi uh hi. ¹² Tua ahih manin sihna in kote sungah na sem a, note sungah ahih leh nuntakna in na a sem hi. ¹³ Lai Siangtho sungah a kigelh, “Um ka hih manin ka gen hi,” a cih bangin upna nei ka hih manun um in ka gen uh hi. ¹⁴ Topa Zeisu a thokiksakpa in kote zong tua Zeisu tawh hong thokik khawmsak in note tawh ama kiang hong tunkhawm ding hi cih ka thei uh hi. ¹⁵ Banghang hiam cihleh na khempeuh note phattuam nading ahi hi. Tua in mi tampi tungah a kicing hehpihna thupha a kizelh ciangin Pasian minthan nadingin lungdamkohna zong a dimlet nading ahi hi. ¹⁶ Tua ahih ciangin ka lungkia kei uh hi. Ka pualam mi uh a kiam semsem hangin ka sunglam mi uh ni khat khit ni khat a thaksuak den hi. ¹⁷ Tawlkhat sung bek ka thuak uh a genthamlo haksatna in kote aa dingin a thupi zawtham tawntung vangliatna a piangsak hi. ¹⁸ A kimuthei nate mitsuan loin a kimu theilo nate ka mitsuan uh hi. Banghang hiam cihleh a kimuthei nate tomkal sung bek om dinga, a kimu theilo nate ahih leh a om tawntung ding hi.

¹ Eite teenna lei inn ahi hih buuk a kisuksiat leh mihing khut tawh a kibawl lo, Pasian kiang pan tawntung inn khat vantung ah i nei hi cih i thei hi. ² Tua ahih manin vantung pana hong pai ding tua inn puan bangin hong kisilhsak ding hun ngaklah in hih leibuuk sungah khuisa in i om hi. ³ Tua banga hong kisilhsak ciangin guaktang a om tawh i kibang kei ding hi. ⁴ Banghang hiam cihleh hih leibuuk sungah i teen sungin vangik pua bangin khuisa in i om hi. Eite in guaktang a om nuam hilo in nuntakna in sihna a valhtum theih nadingin tua buuk hong kisilhsak ding i utman hi zaw hi. ⁵ Hih bang ahi ding maha eite hong bawl pen Pasian hi a, amah in kipsak nading Kha a hong piapa zong ahi hi. ⁶ Tua ahih manin lungmuangtak in i om tawntung hi. Hih pumpi sunga i om laiteng Topa tawh a omkhawm nailo hi hang cih i thei hi. ⁷ Banghang hiam cihleh muhna tawh kalsuan loin upna tawh i kalsuan hi. ⁸ Lungmuangtak in i om hi ka ci hi. Hi takpi hi. Pumpi tawh kikhen in Topa tawh omkhop ding i ut zaw hi. ⁹ Tua ahih manin hih leibuuk ah i om a, i om kei zongin Pasian lungdamsak ding i tupna ahi hi. ¹⁰ Banghang hiam cihleh Khazih thukhenna tokhom mai ah eite khempeuh i ding dinga, khat ciatin i pumpi a i bawl a sia a pha tawh kituak in thaman i sang ding hi. ¹¹ Topa a kihtakhuaina bang hiam cih kote in thei ka hih manun mite a zol ka hi uh hi. Pasian in kote hihna hong tel bangin note lungsim ah kote hong tel dingin zong ka hong um hi. ¹² Note mai‑a hong kiphatkik zel ka hi kei uh a, kote nong kisialhpih theih nading uh hunhoih hong bawlsak ka hi zaw uh hi. Lungsim sung hilo in a tungtham teng a kisialhpih mite na dawnkik theih nading uh ahi hi. ¹³ Kote ka hai uh leh Pasian aa ding hi in, ka pil uh leh note aa ding ahi hi. ¹⁴ Mi khempeuh tangin mi khat si khinzo ahih manin, mi khempeuh zong a si ahi hi cih ka um taktak uh hi. Khazih itna in kote hong tawsawn hi. ¹⁵ Mi khempeuh tangin amah si khinzo ahih manin, a nungta mite in amau aa dingin nungta loin amaute tangin si a, a thokikpa aa dingin a nuntak ding uh ahi hi. ¹⁶ Tua hi a, tu a kipan in ci le sa tawh kuamah ka en nawn kei uh hi. Khazih zong ci le sa tawh ka theih ngei uh hangin, tu in tua bangin ka thei nawn kei uh hi. ¹⁷ Tua ahih manin mi khatin Khazih sungah a om leh mi thak a suak hi. En in, a lui nate bei in na khempeuh a thak a suakzo hi. ¹⁸ Tu in hih thu khempeuh Pasian kiang pan hi a, amah in Zeisu Khazih tungtawn in amah le eite hong kilemkiksak pa ahi hi. Amah in tua kilemkikna nasep kote hong pia hi. ¹⁹ Tua kilemkikna thu in hih bang ahi hi. Pasian in leitung mite thu palsatnate ciamteh loin Khazih hangin amah tawh hong kilemkiksak a, tua kilemkikna thu kote hong pia hi. ²⁰ Tua ahih manin tu in kote in Khazih tangmite ka hi uh a, Pasian in kote tungtawn in note hong thum ahi hi. Tuamah bangin kote in zong Pasian tawh kilemkik un ci in Khazih tangin kong thum uh hi. ²¹ Eite in Khazih sungah Pasian dikna i tanhtheih nadingin Pasian in mawhna a theilo Khazih eite tangin mawhna a suaksak hi.

¹ Tua hi a, na sansa uh Pasian hehpihna thupha a mawkna na suahsak khakloh nadingun Pasian tawh na a semkhawm ka hihna uh tawh kizui in kong thum uh hi. ² Amah in, “San theihna hunin nang kong dawng a, Hotkhiatna ni in nang kong huh hi,” a ci hi. En un, tu hunin san theihna hun hi a, tu hunin hotkhiatna ni ahi hi. ³ Kote nasepna kuamah in hong gensiat loh nadingin puk theih nading bangmah ka hih kei uh hi. ⁴ Pasian nasemte ka hihna uh lam tuamtuam panin lakin thuak keikaina, haksatna, kitangsapna, gentheihna, ⁵ vuak le satna, thongkiatna, khutlum thuakna, haksapi a nasepna, ihmut kipelhna, anngolhna, ⁶ sianthona, thu theihna, lungduaina, migitna, Kha Siangtho huhna, itna maan, ⁷ thuman thutak genna, Pasian vangliatna, vei le takah dikna galhiam tawina, ⁸ hong kipahtawi ciang le hong kiselpho ciangin, hong kiphat ciang le hong kigensiat ciangin zong Pasian nasemte ka hihna uh thuman gen kimlai mi khemte ci a, hong kingawhna ah, ⁹ mi tampi theih hi napi kuama theih loh banga hong kibawlnate ah, si dekphial napi ka hin teitei nate uh, hong kisat hong kivua napi thahna ka thuak lohnate uh, ¹⁰ dah napi ka lungdam tawntungna uh, zawng napi ka hauhnate uh, bangmah neilo napi na khempeuh ka neihnate uh ah, Pasian nasemte ka hihna uh ka kilangsak uh hi. ¹¹ Corinth mite aw! Note tungah siangtak in thu kong gen uh a, note aa dingin ka lungsim uh zaitak in ka hong uh hi. ¹² Note tungah sit nei loin kong it uh a, note in na lungsim khempeuh uh tawh kote nong it kei uh hi. ¹³ Tu in, tate tunga thugen banga kong gen inah, kong itna uh nong thuhkik theih nadingun note in zong na lungsim uh kote aa dingin hong hon un. ¹⁴ Thu‑umlo mite tawh a kituaklo hakkol puakhawm kei un. Dikna le gitlohna kikhawl khawm thei ahi hiam? Khuavak le khuamial kipawl thei ahi hiam? ¹⁵ Khazih le Belial kithuhual thei ahi hiam? Thu‑um mi in thu‑umlo mi tawh bang neikhawm thei ahi hiam? ¹⁶ Pasian biakinnpi le milimte kithutuak thei ahi hiam? Banghang hiam cihleh note in a nungta Pasian biakinnpi na hi uh hi. Pasian in a gensa mah bangin, “Amaute sungah teengin Amaute lakah ka vak kawikawi ding hi. Amaute Pasian ka hi dinga, Amaute in keima mite ahi ding uh hi.” ¹⁷ Tua ahih manin, Topa in, “Amaute lak pan paikhia in, A tuam in om unla, A siangtholo nate lawng kei un, Tua ciangin note kong sang ding hi,” ci hi. ¹⁸ Vanglianpen Topa in, “Note Pa ka hi dinga, Note zong ka tanu ka tapate, Na hi ding uh hi,” a ci hi.

¹ Tua ahih ciangin kong itte aw, hih kamciamnate ngah khin i hih manin pumpi le lungsim a ninsak nate pan kisiansuah in sianthona tawh a kipawl Pasian kihtakna ah picing in om ni. ² Kote hong sang un. Kuama tungah ka gamta khial kei uh a, kuamah ka siasak kei uh hi. Khemna tawh kuama neihsa ka laksak kei uh hi. ³ Hih bang ka cih ciangin note hong mawhsak ka hi kei hi. A beisa a kong genngei mah bangin note tawh sikhawm hingkhawm nuam zahin kote lungsim ah na om uh hi. ⁴ Note tunga thugen ding ka hang mahmah a, note hanga ka kisialhna zong a lian mahmah hi. Hehnepna tawh ka kidim a, kote haksatnate sung mahah zong ka lungdamna kigen zolo hi. ⁵ Macedonia gam ka tun uh ciangin ka kiheina peuh uhah bawlsiatna tuak ka hih manun ka pumpi uh a tawldam man kei hi. A pualam ah kidona omin a sunglam ah launa a om hi. ⁶ Ahi zongin a lungkia mite tha a guan Pasian in Titus hong paisakna tawh tha hong guan hi. ⁷ Ama hong paina hang bek hilo in note hanga ama tha ngahna in zong tha hong guan hi. Kei nong itna uh kei hanga na dahnate uh kei nong khual mahmah nate uh zong hong gen a, ka lungdam semsem hi. ⁸ Kong laikhak in note hong dahsak kha ngei ahih manin ka kisik ngei a, ahi zongin tu in ka kisik nawn kei hi. Banghang hiam cihleh tua laikhak in tawmvei sung bek hong dahsak hi cih ka thei hi. ⁹ Tu in, note kong dahsak mana lungdam hilo in tua dahna in hong kisiksak ahih manin a lungdam ka hi zaw hi. Banghang hiam cihleh, Pasian deihna tawh kituak in a dah na hi uh a, kote hangin supna na nei kei uh hi. ¹⁰ Banghang hiam cihleh Pasian deihna tawh a kituak dahna in kisikkikna piangsak a, tua kisikkikna in hotkhiatna a hong tun hi. Hotkhiatna a ngah mite kisik ngeilo ding uh hi. Ahi zongin, leitung vai‑a dahna in sihna a piangsak hi. ¹¹ Pasian deihna tawh kituak a dahna in note sungah bang teng piangsak hiam cih en dih un. Tua in, kihahsiang nopna, hehna, lau theihna, lunggulh luatna, thalawpna le, khialhnate daanpiakna tawh puahphat nopna lungsim hong neisak hi. Hih thu ah note in na khempeuh tungah paubanna na neihlohna uh na lak khinzo uh hi. ¹² Tua ahih ciangin lai kong khak hangin khialhna a bawlpa aa ding le a thuakpa aa dingin hong gelh ka hi kei hi. Note kong khualna uh Pasian mai ah a kilat theih nadingin kong gelh uh hi zaw hi. ¹³ Tua ahih manin note in tha na ngah uh ciangin kote in zong tha ka ngah uh hi. Note khempeuh in Titus lungsim thakhauhsak na hih manun amah lungdam mahmah a, tua in kote hong lungdamsak sawnsawn hi. ¹⁴ Ama tunga note kong kisialhpihna zong nong maizumsak kei uh hi. Thu khempeuh ahi bangbang a kong gen mah bangun Titus tunga note kong kisialhpihna uh zong a maan mah ahi hi. ¹⁵ Note khempeuh in thu mangin launa le linna tawh amah na sanna uh a ngaihsutkik ciangin note a hong itna lian semsem hi. ¹⁶ Tua ahih ciangin na khat peuhpeuh ah note kong muan theih manin ka lungdam hi.

¹ Tua banah sanggamte aw, Pasian in Macedonia gam pawlpite tunga a piak hehpihna thupha na theih ding uh ka deih hi. ² Amaute in haksatna lianpi thuakkawmsa in lungdam mahmah uh a, a zawn mahmah uh hangin a piaknopna uh lian mahmah hi. ³ Banghang hiam cihleh amaute in a piakzawh zah ciang uh a piak ban ah a piakzawh zah uh sangin a tam zaw pia nuam uh hi cih ka thei hi. ⁴ Misiangthote huhna piakna ah amaute zong a kihel khak nadingun hong thum ngetngut uh hi. ⁵ Kote upmawh bang hilo in, Topa tungah kipia masa uh a, tua khit ciangin Pasian deihna tawh kituak in kote tungah hong kipia uh hi. ⁶ Tua ahih manin hih piakkhiat nasepna Titus in a patkhiat ahih mah bangin note lakah zong a hong sepsuak nadingin amah ka hanthawn uh hi. ⁷ Note in upna, thugenna, thutheihna, hahkatna, le kote nong itna uh a kipan na khempeuh ah na kicin mah bangun hih piakkhiatna lamah zong cinghtak in na pia un. ⁸ Hih bang ka cih ciangin a hong thatang sawl hilo in itna na nei taktak uh hiam cih midangte lawpna tawh hong ze‑et nuam ka hi zaw hi. ⁹ Banghang hiam cihleh amah hau napi note hangin mizawng hong suak i Topa Zeisu Khazih hong hehpihna thupha na thei uh hi. Tua in ama zawnna hangin note na hauh theih nading uh ahi hi. ¹⁰ Tu in note aa ding ngaihsutna khat kong pia nuam hi. Tu ma kum khat lai in piaknopna lungsim a nei masa le a pia masa pen na hihna uh in note hamphatna ahi hi. ¹¹ Tua ahih ciangin tu in na piaknopna lungsim uh le na piakkhiat taktakna uh a kikim dingin tangtungsak unla, na hihzawh zahzah un pia un. ¹² Banghang hiam cihleh mi khatin a neih nailoh sung pan hilo in a neih khitsa sung pan piaknopna lungsim tawh a piak bangbang a kisang ahi hi. ¹³ Hihteng kong gen ciangin midangte van zangsak a, note vangik hong suatsawm ka hi kei uh hi. ¹⁴ Tu laitak a note neihna in amaute kisapna huhin, amaute in zong a neih uh ciangin note kisapna hong huhkik in, na kihuhtuah diamdiam theih nading uh ahi hi. ¹⁵ Hih in, “Tampi a kaikhawmpa aa vallo a, tawmkhat a kaikhawmpa aa zong kisam lo hi,” ci in Lai Siangtho sunga a kigelh bang ahi hi. ¹⁶ Ahih hangin kong khual bangun a hong khual dingin Pasian in Titus zong khualna lungsim a guat manin Pasian tungah ka lungdam hi. ¹⁷ Banghang hiam cihleh kote sawlna hang bek hilo in ama utna tawh lawptak in a hong pai ahi hi. ¹⁸ Lungdamna thugenna ah pawlpi khempeuh in a phat mahmah uh sanggampa khat amah tawh kong sawl uh hi. ¹⁹ Tua sanggampa pen hih huhna letsong puakna ah kote tawh a zinkhawm dinga pawlpite in a teelkhiatpa ahi hi. Topa mahmah minthan nading le midangte na huhnopna uh a kilatkhiat nadingin hih huhna piak ding vai a hawmkhia ka hi uh hi. ²⁰ Hih ka vaihawmna uh ahi citpiakna tawh kisai in paubanna ka neih khakloh nadingun ka kidawm uh hi. ²¹ Topa muhna bekah hilo in mihingte muhna mahmah ah zong a pahtakhuai in na ka sem uh hi. ²² Na khat peuhpeuh ah citak mahmah hi ci a, ka muh den uh sanggampa khat zong amaute tawh kong sawl uh hi. Amah in note hong muang mahmah ahih manin a citak semsem hi. ²³ Titus tawh kisai mi khatpeuh in hong dot khak leh amah pen ka kikholhpihpa le note aa dinga ka naseppihpa ahi hi. A dang i sanggamte thu hong kidot le amaute in Khazih minthanna ahi pawlpite kamtaite ahi uh hi. ²⁴ Tua ahih manin itna na neih takpi lam uh le note kong kisialhpihnate a maan takpi ahihlam amaute le pawlpite mai ah na lak un.

¹ Tu in misiangthote huhna tawh kisai in lai kong khak hangin a valkhong hilel ding hi. ² Banghang hiam cihleh huh nopna lungsim na neih lam uh ka thei hi. Tua hi a, Macedonia gam mite kiangah, Achaia gam mite zong tu ma kum khat laipek in a kiging khinzo uh hi, ci in note kong kisialhpih hi. Tua ciangin note lawpna in mi tampi a thalawpsak hi. ³ Ahi zongin hi banga kong kisialhpihna uh a mawkna a suah loh nadingin kong gensa mah bangin na kiginkholh theih nadingun sanggamte kong sawl hi. ⁴ Macedonia mite khatpeuh in kei hong zui henla, note a kigingsa in hong mu kei le uh (note cih thadah) ko mahmah zong muangtak a kong kisialhpihna teng uh hangin ka maizum ding uh hi. ⁵ Tua ahih manin tu ma‑a na kamciamsa uh huhnate a kaikhawmkhol dingin sanggamte hong paikholh ding uh genpihhuai ka sa hi. Piak dinga na kamciamsa bangun a baihsa in na om le uh cin it pipi a sawl zawh thu tawh na piak uh hilo in phaltak a na piak uh ahihlam hong kilang ding hi. ⁶ Tu in kong cih in ah khaici tawmkha a vawh mi in tawmkha bek at dinga, tampi a vawh mi in tampi a at ding hi. ⁷ Mi khatpeuh in a lungsim sunga piak dingin a sehsa bangin pia tahen. It pipi le piak loh phamawh hi cihna tawh pia kei hen. Banghang hiam cihleh Pasian in lungkimtak a a pia mite bek a pakta hi. ⁸ Note in na khempeuh kicingtak in nei tawntung in nasep hoih khempeuh nasep zawh nadingun hehpihna thupha khempeuh dimtak in a hong pia theipa in Pasian ahi hi. ⁹ Tua in, “Amah in hawmkhia in, Mizawngte pia a, Ama dikna a kip tawntung hi,” ci in Lai Siangtho sungah a kigelh hi. ¹⁰ Tu in, khaici vawhpa tungah a vawh ding khaici a piak banah a nek ding an a piapa in na vawhsa khaici hong piak khit banah hong pungsak dinga, note dikna gah zong a khangsak ding hi. ¹¹ Lungkimtak in na piakzawh nadingun na khempeuh hong neisak a, tua in kote tungtawn in Pasian tungah lungdamkohna a piangsak hi. ¹² Hih na citpiakna un misiangthote kisapna teng a huh banah Pasian tungah lungdamkohna zong tampi a piangsak hi. ¹³ Khazih lungdamna thu mangin na zuihna uh ahi zongin amaute le midang khempeuh tunga na cit na siamna uh ahi zongin hih huhna tawh na lahkhiat uh ciangin amaute in Pasian min a phat uh hi. ¹⁴ Tua ahih manin Pasian in note hong piak a kicing hehpihna thupha hangin amaute in note hong ngai uh a, thu hong ngetsak uh hi. ¹⁵ Kam tawh a kigen zolo Pasian letsong hangin ama tungah phatna om tahen!

¹ Note kianga kong om ciangin kiniamkhiat in kong omkhop loh ciangin a hangpa keimah Paul in tu in Khazih lungnemna le nunnemna tawh kong thum hi. ² Ci le sa tawh a kalsuan banga hong ngawh mi pawlkhatte tungah han ka sawm bangin note tawh kong om ciangin han a kul loh nadingin kong thum hi. ³ Banghang hiam cihleh kote in ci le sa tawh ka nuntak uh hangin ci le sa tawh gal ka do kei uh hi. ⁴ Banghang hiam cihleh kote galhiamte in ci le sa galhiamte hilo in kulhpite a cimgawpsak a vanglian Pasian galhiamte ahi hi. ⁵ Pasian theihna tawh a kilehbulh ngaihsutna le kipilsakna khempeuh tua galhiamte tawh ka phukpai uh a, lungsim gelna khempeuh zong Khazih thumang dingin salkaih bangin ka kai uh hi. ⁶ Note khempeuh in thu na man khit uh ciangin, thu a manglo mite khempeuh daan a pia dingin a kigingsa in ka om uh hi. ⁷ Na khat peuhpeuh a puatham bek en na hi uh hiam? Mi khatpeuh in Khazih mi ka hi hi a cih leh amah bangmah in kote zong Khazih mi ka hih lam uh phawk hen. ⁸ Banghang hiam cihleh note kisiat nading hilo in na kip nadingun Topa in thuneihna hong pia a, tua thuneihna tawm bang ka kisialhpih khak leh zong ka kisuang tuan kei ding hi. ⁹ Kong laikhakte tawh note hong lauthawngsak ka suah ding ka ut kei hi. ¹⁰ Mi pawlkhatte in, “A laikhakte thuthuk in bun mahmah napi amah taktak a hong om ciangin a zawngkhalpi hi a, a thugente zong bangmah pi hilo hi,” hong ci uh hi. ¹¹ Ko mau pumpi kong om loh uh ciangin laikhak sunga kong gen bangbang un komau pumpi ka hong om uh ciangin hong gamta takpi ding ka hihna uh tua mite in theita uh hen. ¹² Amau le amau a kiphat mite tawh kipawl khat ding le kitehkak ding ka ut kei uh hi. Amau le amau khat le khat kiteh in a ki‑etkakte in mi pillo ahi uh hi. ¹³ Ahi zongin, kote in a khengval in kisial loin Pasian hong ciangtansakna sung bekah ka kisial ding uh hi. Tua ciangtanna in note zong hong huam phadeuh hi. ¹⁴ Note omna ciangdong hong banlo bangin, kote in khengin a sem ka hi kei uh hi. Banghang hiam cihleh Khazih lungdamna thu hilh dingin note omna dongin kong tung zo uh hi. ¹⁵ A khengval in kisial loin midangte sepsa peuh zong ka kisialhpih kei uh hi. Note upna a khanna tawh kizui in, kote nasepna huang zong nakpi in khangin tangzai ding hi cih ka lamen uh hi. ¹⁶ Tua hi leh note gam khengin lungdamna thu ka tangko thei ding uh hi. Midangte huang sunga a sepsa teng uh ka kisialhpih kei ding uh hi. ¹⁷ Ahih hangin “a kisial mi in Topa hang bekin kisial tahen.” ¹⁸ Banghang hiam cihleh amah le amah a kiphat mite kisang lo a, Topa in a phat mite bek a kisang hi.

¹ Ka haina tawmno khat hong thuak zo le uh teh ka ut a, zong nong thuak zo khin uh hi. ² Banghang hiam cihleh Pasian tawh kipawl hazatna tawh kei zong note kong haza hi. Nungak siangtho khat bangin Khazih tungah kong piak theih nadingin pasal khat tawh a kiteeng dingin kong kham zo hi. ³ Gulpi in zuauthu tawh Eve a khem bangin lam khatpeuh tawh note zong hong khem a, Khazih sunga na neih uh a citak le a siangtho na lungsim uh hong suksiatsak khak ding ka lauthawng hi. ⁴ Banghang hiam cihleh mi khatpeuh hong pai in kote in kong hilhsa uh a hilo a tuamdang Zeisu khat hong hilh henla, na ngahsa uh a hilo kha dang khat ngahin na san ngeisa uh a hilo, a dang lungdamna thu khatpeuh sang le uh teh phamawh na saktuak kei uh hi! ⁵ Ahih hangin sawltak lianpite sangin a neuzaw in ka kingaihsun peuhmah kei hi. ⁶ Thugen ka siam loh hangin theihna lamah tua bang ka hi kei hi. Hih thu note lakah ka sepsa khempeuh uh tawh siangtak in kong lak khinzo uh hi. ⁷ Note kong lapsang theih nadingin keimah kiniamkhiat in Pasian lungdamna thu a khawnkhong in kong hilh hi. Tua banga ka hihna a khial ka hi hiam? ⁸ Note lakah na kong sep theih nadingin pawlpi dangte kiang pan thaman la ka hih manin amaute sum a sut ka suak hi. ⁹ Note kianga ka omlai in kisapna pawlkhat ka neih hangin kuama tungah vangik kong suan kei hi. Macedonia gam pana hong pai sanggamte in ka kisapna teng hong sik uh hi. Na khatpeuh ah note aa ding vangik ka suah loh nadingin ka kidawm a, ka kidawm lai ding hi. ¹⁰ Ka sungah Khazih thuman thutak a om mah bangin Achaia gam sunga ka kisialhna uh kuamah in a hong kham zo kei ding hi. ¹¹ Banghang ahi hiam? Note kong it loh man ahi hiam? Pasian in thei hi! ¹² Thu nei nuam mite in thuneihna a ngah loh nading ahi zongin amaute in kote banga nasem hi ci a,, a kisaktheih loh nadingin tu a ka hih bangin ka hihlai ding hi. ¹³ Banghang hiam cihleh tua bang mite in a manlo sawltakte hi uh a, Khazih sawltak banga a kibawltawm mi a khem nasemte ahi uh hi. ¹⁴ Hih thu a lamdang hilo hi! Banghang hiam cihleh Satan nangawn khuavak vantungmi bangin kibawltawm thei hi. ¹⁵ Tua ahih manin ama nasemte zong dikna nasemte bangin a kibawltawm uh ciangin a lamdang hilo hi. Amaute in a gamtatna bangun a thuak ding uh hi. ¹⁶ Khatvei kong cihkik in ah, kuamah in mihai bangin hong ngaihsun kei hen. Tua banga hong ngaihsun teitei a om leh tawm ka kisialh beh theih nadingin mihai bangin hong sang hen. ¹⁷ Hih bang ka cih ciangin Topa thugen bangin a gen hilo in, mihai bangin kimuangtak in a hong kisial ka hi hi. ¹⁸ Mi tampi in ci le sa a ahihna kisialhpih uh ahih leh kei zong kong kisial ding hi. ¹⁹ Note mipil na hih manun mihaite lungdamtak in na thuakzo uh hi. ²⁰ Sila bangin hong kibawl in hong kinetum a, na neihsa uh hong kilaksak ciangin, mi khatpeuh amah le amah hong kithupisak in na pang uh a hong kibet ciangin na thuakzo uh hi. ²¹ Kote ka hih uh leh tua bang hi zolo ka hih manun ka maizum uh hi! Ahih hangin mihai banga kong gen in ah mi khat a hanna ah kei zong ka hang hi. ²² Amaute Hebrew mi ahi uh hiam? Kei zong ka hi hi. Amaute Israel minam ahi uh hiam? Kei zong ka hi hi. Amaute Abraham suante ahi uh hiam? Kei zong ka hi hi. ²³ Amaute Khazih nasemte ahi uh hiam? Mihai banga kong gen in ah kei ka hi zawkan hi. Amaute sangin nakpi in na ka sem zaw hi. Sim zawhloh ding zahin hong kisat hi. Thong sungah hong kikhiamun mahmah hi. Sih theih nading tamveipi ka thuak hi. ²⁴ Jew mite satna 40 pana khat a kiam ngavei ka thuak hi. ²⁵ Ciangpum tawh thumvei hong kisat in suang tawh khatvei hong kideng hi. Tembaw siatna thumvei ka tuaka, tui tungah sun khat le zan khat ka omngei hi. ²⁶ Khual ka zinmun mahmah hi. Tui tunga sih theihna, misuamte hanga sih theihna, keima mipihte hanga sih theihna, Gentile‑te hanga sih theihna, khuapi sung le gamlak a sih theihna, tuipi tunga sih theihna, sanggam banga kibawl mite hanga sih theihnate ka tuak hi. ²⁷ Nakpitak na semin ka gim mahmah hi. Ka ihmut theihloh hun a tam mahmah hi. Gilkialna le dangtakna ka thuakngei hi. An ka ngawlmun mahmah hi. Silh ding nei loin khuadam ka thuak hi. ²⁸ Hihteng banah pawlpi khempeuh aa dinga ka lung hihmawhna lianpi in nisim in hong vukcip hi. ²⁹ Mi khat a thanem ciangin thanempih hilo ka hi hiam? Mi khat a kipuk ciangin dahin na sakpih hilo ka hi hiam? ³⁰ Kisialh loh phamawh ahih leh ka ginatlohna teng mah ka kisialhpih ding hi. ³¹ Zuaugen ka hih lohna phatna a ngah tawntung i Topa Zeisu Khazih Pa le Pasian in a hong thei hi. ³² Kumpipa Aretas khutnuai‑a Damascus gam ukpa in kei a hong mat nop manin galkap honkhat Damascus khuapi a cingsak hi. ³³ Ahi zongin bawm khat tawh kulhpi vang panin a pua lamah hong khaisuk uh a, ama khut pan ka suakta hi.

¹ Ka kisialh hangin phattuamna om lo hi ta leh kong kisial lai dinga, Topa hong lah mangmuhna le kilakna kong genbeh ding hi. ² Khazih sunga om ka theih mi khat tuma kum sawm le kum li lai in vantung thuap thumna ah a kilato hi. A pumpi tawh ahi hiam hilo ahi hiam ka thei kei hi. Pasian in a thei hi. ³ Ahi zongin tua pa ken ka thei hi. A pumpi tawh kilato hiam, kilato lo hiam ka thei kei hi. Pasian bekin a thei hi. ⁴ Amah Paradise ah kilato a, mihingte genkhiat theihloh le genkhiat dinga zong a kiphallo thute a za hi. ⁵ Tua bang mipa ka kisialhpih dinga, kei ka hih leh ka ginat lohna teng lobuang ka kisialhpih kei ding hi. ⁶ A kisial nuam hi leng thuman a gen ka hih manin mihai ka suak tuan kei ding hi. Ahi zongin mi khatpeuh in kei hong muhna le keima thu a zakna zah sangin a thupi zaw in a hong ngaihsut khakloh nadingin kisial loin ka om zaw hi. ⁷ A thupi mahmah Topa hong kilaknate hangin a khengval a ka kisaktheih loh nadingin ka pumpi tungah ling khat a hong kipia hi. Tua lingin kei hong sun niloh Satan sawltak ahi hi. ⁸ Tua ling hong lakkhiatsak nadingin Topa tungah thumvei ka thum hi. ⁹ Ahih hangin amah in, “Ka hehpihna thupha in nang aa dingin a kicing hi. Banghang hiam cihleh keima thahatna in thanem ciangin thahatna a piangsak hi,” hong ci hi. Tua ahih manin ka tungah Khazih vangliatna a om tawntung theih nadingin ka ginat lohna teng lungdamtak in ka kisialhpih zaw ding hi. ¹⁰ Tua ahih ciangin Khazih hangin zawngkhalna, simmawhna kitangsapna, bawlsiatna le haksatnate ka thuak ciangin ka lungdam zaw hi. Banghang hiam cihleh ka thanem ciangin ka tha a hat hi. ¹¹ Kisial lo theilo dingin hong bawl na hih manun kisialhna tawh mihai ka suak hi. Bang mahpi ka hih loh hangin sawltak lianpente ka phak lohna om tuanlo ahih manin nong phat ding uh ka kilawm hi. ¹² Sawltak khat ka hih lam na theih nadingun thuakzawhna limlamdangte, nalamdangte le nalamdang lianpite tawh kiteltak in kong lak khinzo hi. ¹³ Banghang hiam cihleh note aa dingin vangik kong suahlohna simloh pawlpi dangte sanga na neu zawkna uh bang om ahi hiam? Hih ka khialh khakna pen hong maisak un! ¹⁴ Tu in note kiangah a thumveina hong hawh dingin ka kithawi zo hi. Note neihsa a deih hilo in note mahmah hong deih ka hih manin note aa dingin vangik kong suak kei ding hi. Banghang hiam cihleh tate in nu le pa aa dingin neih le lam a kholsak ding hilo a, nu le pa in tate aa dingin a kholsak ding uh hi zaw hi. ¹⁵ Note kong itna a liat semsem ciangin kei nong itna uh neu semsem phial ta leh ka neih bangbang note aa dingin lungdamtak ka zang dinga, kei mahmah zong kong kizang lai ding hi. ¹⁶ Ahi zongin vangik kong suan kei hi. Bangbang ahi zongin in kei pen ngiankawi zangin note a hong manin nong ngaihsun uh hi! ¹⁷ Kong paisak mite khatpeuh tungtawn in note tungah a met a hong zong ka hi hiam? ¹⁸ Note kiangah hong pai ding Titus ka hanthawn a, i sanggampa khat zong kong zuisak hi. Titus in note tungah a met hong zong ngei ahi hiam? Lungsim kikhat a kalsuan hilo ka hi uh hiam? Kalsuan kibang in a paikhawm hilo ka hi uh hiam? ¹⁹ Ko le ko a kiphelhphelh hong sa na hi uh hiam? Kong itte aw, Khazih hangin Pasian mai ah thu ka gen uh a, ka sep khempeuh uh note kilamkip nading bek ahi hi. ²⁰ Banghang hiam cihleh ka hong tun ciangin note in keima lungsim bang hilo in kei zong note lungsim bang kong hih loh khak ding ka lauthawng hi. Note sungah kiselna, kihazatna, kihehsuahna, angsungkhualna, kigensiatna, kisuktuahna, kiphatsakna le buainate a om khak ding ka lauthawng hi. ²¹ A kihhuai gamtatna, numei pasal mawhna bawl in a paktatnate uh pan a kisikkiklo mi a om khak ding ka patau hi. Kong paikik ciangin tua mite hangin ka Pasian in note mai ah kei hong maizumsak in amaute hanga ka khitui a luan khak ding ka lauthawng hi.

¹ Tu‑a kong hawh ding pen a thumvei nading hita hi. “Mi nih bang thum bang teci panna kam tawh thu khempeuh kikipsak ding hi.” ² Tuma in kong genkhol khinzo a, tu in zong note tawh ka omkhop loh hangin a nihveina a omkhawm lai mah bangin ka kingaihsun a, mawhna a bawl mite le a dang khempeuhte zong kong paikik ciangin kong koihkhong kei ding hi ci in laikhak tawh a hong gen ka hi hi. ³ Note tungah thanemlo in a thahat Khazih in kei tungtawn in thu gen hi cih kipsak nading nong kal lailai uh hi. ⁴ Banghang hiam cihleh tua Khazih in thanemtak in khailupna a thuak hangin Pasian vangliatna tawh a nungta hi. Tua hi a, kote zong ama sungah ka thanem uh hangin Pasian vangliatna tawh note aa dingin amah tawh ka nungta khawm ding uh hi. ⁵ Thu upna sungah a omtakpi mah na hi uh hiam no le no ki‑entel unla, kisittel un. Note sungah Zeisu Khazih a om lam no le no kithei lo na hi uh hiam? Santak a cing zolo na hih kei uh leh na kithei ding uh hi. ⁶ Kote ka hih uh leh santak cinglo ka hih loh lam uh hong thei dingin kong lamen hi. ⁷ Tu in siatna khatpeuh na bawl khakloh nadingun kote hong sanna thu mite mai ah a kilat nading hilo in kote santak ka cing kei uh zongin note in hoihtak in na gamtat theih nadingun Pasian kiangah thu a ngen ka hi uh hi. ⁸ Thuman thutak tawh a kilehbulh bangmah sem theilo ka hih manun thuman thutak bek ka sem uh hi. ⁹ Banghang hiam cihleh kote thanem in note na thahat uh ciangin ka kipak uh hi. Na picin nadingun zong thu kong ngetsak uh hi. ¹⁰ Tua ahih ciangin note siat nading hilo in na kilamkip theih nadingun Topa in thuneihna kei hong pia hi. Tua ahih manin ka pumpi tawh kong om ciangin thu kong khauh gen khakloh nadingin kong om loh sungin hih thute lai‑a hong khak ka hi hi. ¹¹ Sanggamte aw, a tawpkhakna a kong gennop in ah na ci damta un. Picing unla, lungmuangtak in om un. Lungsim kituak in, kilem in om un. Tua hi leh itna le lungmuanna a hong pia Pasian in note hong ompih ding hi. ¹² A siangtho kinapna tawh khat le khat na kihopih un. ¹³ Mi siangthote khempeuh in note hong hopih uh hi. ¹⁴ Topa Zeisu Khazih hong hehpihna thupha, Pasian hong itna le Kha Siangtho tawh kilawmtakna in note khempeuh hong ompih tahen. Amen.