1 TIMOTHY
11 Eite hong Honpa Pasian le i lamet Topa Zeisu Khazih hong thupiakna hangin Zeisu Khazih sawltak ahi keimah Paul in, 2 upna lama ka tapa taktak Timothy tungah lai kong khak hi. I Pa Pasian le i Topa Zeisu Khazih kiang pana hong pai hehpihna thupha, hehpihna, le lungnopnate nangma tungah om tahen. 3 Macedonia gam ka pailai a kong vaikhak mah bangin Ephesus khua ah na omlai inla, mi pawlkhatte in upna maanlo thute hilh loin, 4 phuahtawm tangthute le a bei theilo khangthu sutnate a buaipih nawnloh nading uh na hilh in. Tua thute in upna thu ah Pasian deihna banga kilamkipna piangsak loin kinialna piangsak zaw hi. 5 Tu in hih banga thu kong piakna in lungsim siangtho le lungsim tawnga kisuanna a omlo upna taktak panin a hong piang itna na neih theih nading ahi hi. 6 Mi pawlkhatte hih thu panin lampial uh a, thu ginalo teng genin a om uh hi. 7 A kampaute uh le hangtak a a gen uh thute bang hiam cih nangawn a theilopi mahin thukham hilh siate a suak nuam uh hi. 8 Ahi zongin thukham pen ahi ding bangin kizang leh a hoih hi ci in i thei hi. 9 Thukham in midikte aa dingin a kibawl ahi kei hi. Ahih hangin thukham a palsatte le a lehdote, Pasian a thusimlote le mawhneite, a siangtholote le a kihhuaite, a nu ahi a, a pa ahi zongin a thatte le tual thatte, 10 numei pasal mawhna a bawlte le pasal le pasal a mawhte, mihing gu‑a a zuakte, zuaugente le a maanlopi a kiciamte a kipan thu upna maan tawh kilehbulh a a gamta mite aa dingin a kibawl ahi hi. 11 Tua upna maanin kei tunga hong ki‑ap a phattak Pasian neihsa a thupi mahmah lungdamna thu tawh kituak ahi hi. 12 Hih nasep a sem dingin muanhuai sa in hong seh a, sep zawh nading tha hong guan i Topa Khazih Zeisu tungah ka lungdam hi. 13 Nidang in Zeisu a kosiapa, pawlpi a bawlsiapa le a gamhtatpa ka hi ngei a, ahi zongin uplohna le theihlohna tawh ka hih ahih manin, Pasian hehpihna thupha ka ngah veve hi. 14 I Topa hehpihna thupha kei tungah a dimlet in hong kisung a, Khazih Zeisu sunga om upna le itna zong hong neisak hi. 15 Khazih Zeisu in mawhneite honkhia dingin leitung ah hong pai hi cih thu a muanhuai le a sanhuai thu ahi hi. Tua mawhnei mite lakah keimah in a mawh penpa ka hi hi. 16 Tua hi a, hih thu hangin Zeisu Khazih in amah uma nuntak tawntungna a nei ding mite etteh ka suah theih nadingin keimah hong hehpih a, a masa pen in kei tungah lungduaina namkim a hong lakzo hi. 17 Tu in tawntung Kumpipa, a si theilo, a kimu theilo, amah bek a pil Pasian in pahtawina le minthanna ngah tawntung tahen. Amen. 18 Ka tapa Timothy aw, khatvei lai in nang tawh kisai genkholhna a kigente tawh kizui in a pha galdona na do theih nading le, 19 upna lenkip in lungsim tawng kisuanna om lo a na om theih nadingin hih thute hilhin kong pia hi. Mi pawlkhatte in tua thute nial uh ahih manin a upna uh tembaw kisia tawh a kibangsak uh hi. 20 Tua mite lakah Hymenaeus le Alexander‑te a kihel uh hi. Pasian kosiatna thu a hoihlohna a theih nadingun amaute Satan khut ah ka piakhia hi.
21 Tua ahih manin a masa pen a kong hanthot nop thu in deihngetna, thungetna, thumsakna le lungdamkohnate mi khempeuh aa dingin, 2 Pasian mi hihna le cihtakna tawh nungta in nuamtak le lungmuangtak a i om theih nadingin kumpite le thuneite khempeuh aa dingin zong thu na ngetsak in. 3 Tua bang hihna pen thu hoih hi a, eite hong Honpa Pasian santheih thu ahi hi. 4 Tua Pasian in mi khempeuh in hotkhiatna ngahin thuman thutak a theih ding uh a deih hi. 5 Banghang hiam cihleh Pasian khat bek om a, Pasian le mite kikal ah Palai khat bek a om hi. Tua pa in mihing ahi Khazih Zeisu ahi hi. 6 Tua Khazih Zeisu in mi khempeuh tat nadingin amahmah a kipia zo hi. Hih in a hun a cin cianga hong kipia teci panna ahi hi. 7 Tua teci panna thu a tangko ding le sawltak khat dingin kei hong kiseh zo hi. Zuauthu gen loin Khazih sungah thuman kong gen in ah Gentile‑te tungah upna le thuman a hilh dingin a kisehpa ka hi hi. 8 Tua ahih ciangin mun khempeuh a om pasalte in hehna le lunghianna om loin a khut siangthote uh lamto in thu a nget ding uh ka deih hi. 9 Tuamah bangin numeite zong nikteen puansilh a kilawm a kituak in kizem uh hen. A khelkhel sam bawldan tawh ahi a, kham le ngun, kep manphate le nikteen puansilh manpha pipite tawh ahi zongin kizem kei uh hen. 10 Pasian ka zahtak hi a ci numeite aa dingin a kilawm penpen kizepna in gamtat hoihna ahi hi. 11 Numeite in na khempeuh ah kiniamkhiatna tawh dai hithiat in thuman ding kisin uh hen. 12 Numeite in pasalte tungah thu hilh ding ahi a, thu a neih ding uh ahi zongin ka phal kei hi. Tua ahih ciangin pau loin om uh hen. 13 Banghang hiam cihleh Pasian in Adam bawl masa a, tua khit ciangin Eve a bawl hi. 14 Tua ciangin khemna a thuakpen Adam hilo in numei hi a, thukham a palsat hi. 15 Ahi zongin numei in upna, itna le a kilawm nuntakna tawh sianthona a neih leh nausuahna ah hutna a ngah ding hi.
31 Mi khatpeuh in pawlpi kem sia a lunggulh leh nasep hoih a deih ahi hi cih thu in thuman thutak ahi hi. 2 Pawlpi kem siapa in kawkban nading a omlo mi, zi khat bek a nei mi, pumpi ki‑uk zo mi, lungsim ciimna a nei mi, a zahtakhuai mi, zindo a siam mi, thu a hilh thei mi hi ding hi. 3 Zu a dawnlo mi, lungtomlo mi, nunnem mi, kitot a hatlo mi, sum iplahlo mi, hazatna lungsim a neilo mi hi ding hi. 4 A tate in zahtakna le kiniamkhiatna tawh a thu a man, a innkuan sung hoihtak in a uk zo mi hi ding hi. 5 Banghang hiam cihleh mi khatin a innkuan sung a ukzia ding a theih kei leh bangci bangin Pasian pawlpi kem thei ding ahi hiam? 6 Thu‑um thak mi zong hilo ding hi. Tua hi kei leh kiliansak in Dawimangpa bangin thukhenna a thuak kha ding hi. 7 Tua thamlo in a kigensiat loh nading le Dawimangpa thangah a awk loh nadingin a pualam mite in a thupisim mi hi ding hi. 8 Tuamah bangin pawlpi upa dingte zong a zahtakhuai mi, thu a lehgen kawikawilo mi, lenggah zu a khamlo mi, sum a iplahlo mi, 9 upna thugilte lungsim siangthotak in a lenkip mi hi ding uh hi. 10 Ahih hangin pawlpi upa dingte kisinsak masa inla, mawhsak nading a om kei leh pawlpi upa sem pan uh hen. 11 Tuamah bangin a zite uh zong zahtakna a ngah mi, mi a gensialo mi, a lungsim a uk zo mi, na khempeuh ah a muanhuai mi hi ding uh hi. 12 Pawlpi upate in zi khat bek a nei mi, a tate le a innkuan sung hoihtak in a ukzo mi hi ding hi. 13 Banghang hiam cihleh pawlpi nasep hoihtak in a sem upate in minphatna le Khazih Zeisu sunga om upna ah hansanna a ngah uh hi. 14 Nang kiangah a sawtlo in kong pai ding ka lamen a, ahi zongin hih thute kong gelh veve hi. 15 Ahi zongin kong zekai khak zenzen leh Pasian inn sunga na gamtatzia ding teng na theih dingin lai kong khak hi. Tua Pasian inn in thuman thutak khuampi le bulpi ahi, a nungta Pasian pawlpi ahi hi. 16 Nial nading a omlo Pasian mi hihna thuthuk lianpi in, Pasian mahmah pumpi tawh hong kilang a, Kha in amah diktangsak in, Vantungmite in amah mu a, Gentile‑te lakah ama thu kihilh in, Leitung mite in ama thu uma, Thupitak in amah kilato hi, cih thu ahi hi.
41 Tu in Kha in teltak a hong gen in ah hun nunung lam ciangin mi pawlkhatte in thu‑upna pan pialkhia ding uha zuau thei khate khemna le dawite thuhilhna a zui ding uh a, 2 a lungsim uh siksa a bik tawh a kibang kineihkhemna tawh zuauthu gen in, 3 kipi kiteen ding kham uh a, an pawlkhatte zong nek loh dingin thu a pia uh hi. Tua ante pen thu‑umte le thuman a thei mite in lungdam ko in a nek dingun Pasian in a bawl ahi hi. 4 Banghang hiam cihleh Pasian piansak na khempeuh a hoih vive hi a, lungdamkohna tawh kisang peuh leh nial ding khat beek a om kei hi. 5 Banghang hiam cihleh Pasian kammal le thungetna in tuate a siangsak hi. 6 Hih thute sanggamte tungah na hilh leh pilvangtak in na zuihsa upna le thuhilhna maan tawh a kipantah Zeisu Khazih nasem hoih khat na suak ding hi. 7 Ahih hangin Pasian thu tawh kituaklo, pitekte gen theih phuahtawm tangthute nial inla, biakna mi na hih theih nadingin kisin in. 8 Banghang hiam cihleh pumpi kisek a kisinna ah phattuamna tawmkha a om hi. Ahi zongin biakna mi hihna in na khempeuh aa dingin phattuamna piangsak a, tua in tu laitak nuntakna le hong tung ding nuntakna aa dingin a kipsak hi. 9 Hih in thuman thutak le a sanhuai thu ahi hi. 10 Banghang hiam cihleh a nungta Pasian sungah lametna nei i hih manin nakpi in na i sem a, zahkona zong tampi i thuak hi. Tua Pasian in mi khempeuh Honpa hi a, a diakdiak in a um mite aa ding ahi hi. 11 Hih thute a zuih nadingun sawl inla hilh in. 12 Khangno na hihna kuamah kisimmawhsak kei in. Kampauna, gamtatna, itna, lungsim ngaihsutna, upna le sianthonate ah thu‑um mite etteh dingin om in. 13 Kong pai mateng Lai Siangtho simna, hanthotna le thuhilhnate na hahkat in. 14 Pawlpi makaite khutngakna le kamsangte thugenna tawh nang hong kipia na sunga om letsong thudon loin om kei in. 15 Mi khempeuh in na khantohna a hong muh theih nadingin hih thute hoihtak in lungngai inla, limtak in zui in. 16 Na gamtatna le thu‑upna thupi ngaihsut in. Tua bangin hihsuak leteh nang bekthamlo in na thugen a za mite zong na honkhia ding hi.
51 A khangham papite taii giapgiap kei inla, pa bangin ngaihsun in hanthawn zaw in. A khangno lai pasalte, sanggamte bangin ngaihsun in. 2 A khangham numeite nute bangin ngaihsun in. A khangno lai numeite lungsim siangtho tawh sanggamte bangin ngaihsun in. 3 Meigong taktakte na zahtak in. 4 Ahih hangin tu le ta a nei meigongte ahih leh a tu a tate in Pasian a zahtakna uh a innkuan sungah a lah theih nading sin masa in nu le pa, pi le pute itna thukkik uh hen. Tua in Pasian mai ah a hoih le a sanhuai thu ahi hi. 5 Meigong taktakte in amau kia bek omin Pasian muang uh a, thumna le thungetna sun le zanin a nei dente ahi uh hi. 6 A paktat meigongte ahih leh a nuntak uh hangin a si ahi uh hi. 7 Tua bang meigongte in kawkbanna a neih loh nadingin thuhilh in. 8 Mi khatpeuh in ama tanaute a diakdiak in ama innkuanpihte a vak nop kei leh amah in upna thu a nial hi a, thu‑umlote sangin a sia zaw lai hi. 9 Kum 60 a pha nailo le, pasal khat sanga a tam zaw a nei ngei meigongte meigong sazian sungah na khum kei in. 10 Gamtat hoih hi ci a, pahtakna a ngah mi, a tate hoihtak in a kem mi, zindo a siam mi, misiangthote khe a silsak mi, micimawhte a huh mi, gamtat hoih khempeuh ahih zawh zahin a hanciam mi ahih leh meigong sazian ah na khum in. 11 A khanglai meigongte sazian sungah khum kei in. Banghang hiam cihleh amaute ci le sa lunggulhna in Khazih tunga a kipiakna uh a zawh ciangin pasal a neikik nuam uh hi. 12 Amaute in a kiciamna masa uh palsat uh ahih manin mawhsakna a thuak uh hi. 13 Tua thamlo in amaute thadah uh a, inn khat khit inn khatah a kawi vakvak uh hi. Tua bek zong hilo in mi gensiat hatin midangte thuteng ah kitaklah uh a, gen dingin a kilawmlo thute a gen kawikawi uh hi. 14 Tua ahih manin a khanglai meigongte in pasal neikik in tanu tapa nei in innsung makaih in galpa in a gensiat theih nadingin hunhoih bangmah pia kei le uh ka deih hi. 15 Banghang hiam cihleh a khanglai meigong pawlkhatte lampial in Satan nung a zui khin uh hi. 16 Pasal ahi a, numei ahi zongin thu‑um mi khatin a inn ah meigong a neih leh, amau mahin kem uh henla, pawlpi tungah vangik suan kei uh hen. Tua hi leh pawlpi in meigong taktakte a kem thei ding hi. 17 Hoihtak a pawlpi a makaih makaite, a diakdiak in thugen le thuhilh nasep hanciamtak in a semte in pahtawina a zah nih a ngah ding uh a kilawm hi. 18 Banghang hiam cihleh Lai Siangtho in, “Bawngtal in buh a cil laitak in a muuk hencipsak kei in. Na a sem mi in thaman a ngah ding kilawm hi,” a ci hi. 19 Pawlpi makai khat a kimawhmat ciangin teci nih bang thum bang a om kei leh sang kei in. 20 Midangte in zong a lau theih nadingun mawhna a bawl mite mipi mai ah na taii in. 21 Hih thute ah teeltuam, paihtuam, angvantuam nei loin na zuih nadingin Pasian mai, Topa Zeisu Khazih mai le a kiteel vantungmite mai ah thu kong pia hi. 22 Mi khatpeuh tungah na khut nga mengmeng kei in. Mi dangte mawhna tawh kisawh kha kei in. Siangthotak in na kikem in. 23 Na gilpi hang le na cinat theih zelzelna hangin tuisiang bek dawn loin lenggahtui zong tawmtawm na zang in. 24 Mi pawlkhatte a mawhna uh teltak in kilang pah a, thu a kikhenma nangawn in kithei hi. Ahih hangin mi pawlkhatte thu a kikhen khit ciang bekin a mawhna uh kilangpan hi. 25 Tuamah bangin mi pawlkhatte a gamtat hoihna uh teltak in kilang pah a, teltak in a kilangkhia pahlo gamtat hoihte zong a kiselcip zo kei hi.
61 Sila suahna hakkol nuai‑a omte khempeuh in Pasian min le thuhilhnate a kigensiat loh nadingin a tote uh a kilawm a kituak in zahtak uh hen. 2 A tote uh thu‑um mi ahih leh sanggam khat hilel hang ci in zahtak bawl lo tuan kei uh hen. Banghang hiam cihleh amaute nasepna hanga phattuamna a ngah a tote un thu‑um mi le a ki‑itpihte uh ahih manin hanciam zawkan in na a sep ding uh ahi hi. Hih thute hilh inla hanthawn in. 3 Biakna paizia tawh a kituaklo thuhilhna le i Topa Zeisu Khazih thuhilhna maan taktak tawh a kituaklo thuhilhna mi khatpeuh in a hong hilh leh, 4 a kiphasak, bangmah theilo, thu kheldot le kam kinial ding bek ut mi ahi hi. Tua bang thute in ki‑eenna, kitot kiselna, kigensiatna, kimuanmawhna le, 5 lungsimsia pana hong piang kimanna neilo kampau, thuman thutak thei theilo in Pasian biakna pen hauh theih nading lampi in a ngaihsunte ahi uh hi. Tua bang mite kiang panin na kihemkhia in. 6 Tu in, lungkimtak a Pasian mi hihna in hauhna lianpi ahi hi. 7 Banghang hiam cihleh leitung ah bangmah keng loin i suak a, bangmah keng loin i paikhia ding hi cih i theitel hi. 8 Tua ahih manin annek ding, puansilh ding i neih zahzah tawh lungkim ni. 9 Ahih hangin a hau nuam mite in ze‑etna thang sungah awk uh a, a haihuai le a lauhuai lunggulhna tampite sungah a awk uh hi. Tuate in siatna le manthanna sungah amaute a tumsuksak hi. 10 Banghang hiam cihleh sum deihluatna in siatna nam khempeuhte bulpi khat ahi hi. Sum deihluatna hangin mi pawlkhatte upna panin lampial uh a, lunggimna tampi a kisuan uh ahi hi. 11 Ahih hangin Pasian mipa aw, nang na hih leh tuate taisan in. Diktatna, Pasian deihna banga nuntakna, upna, itna, thuakzawhna le lungnemnate na delh in. 12 Upna thu tawh kipawl a pha galdona na do in. Nang zong teci tampite mai ah hoihtak a na pulak khitsa ahi Pasian hong sapna tawh na ngah nuntak tawntungna na lenkip in. 13 Pontius Pilate mai ah hoihtak in teci a pang Khazih Zeisu le, na khempeuh nuntakna a pia Pasian mai ah thu kong piak inah, 14 i Topa Zeisu Khazih hong kilat mateng ninbanglo, kawkbanglo dingin hih kong thupiak na zui in. 15 Ama hun a tun ciangin amah hong kilang ding hi. Tua Pasian in thupha a ngah amah bek a lianbel Ukpa, kumpite Kumpipa le tote Topa ahi hi. 16 Amah bek a si theilo hi a, a kineh theilo khuavak sungah a teengpa ahi hi. Kuamah in a muhngeiloh, kuamah in a muhtheihloh, tua Topa tungah pahtawina le a tawntung vangliatna om tahen. Amen. 17 Tu laitak a mihaute tungah hih thute hilh in. Amaute kiphasak kei uh hen. A kiplo hauhna muang loin nuamtak a i zat ding, na khempeuh kicingtak in a hong pia, a nungta Pasian muang zaw uh hen. 18 Na sep hoih tampi a neih theih nadingun na hoih sem uh hen. Cingh uh henla, piakkhiat nopna lungsim nei in, 19 a hong tung ding hunah bulkip muanhuai ahi dingin amaute aa ding khol uh hen. Tua hi leh nuntak tawntungna a lenkipte ahi ding uh hi. 20 Timothy aw! Na kep dinga hong kipia thute hoihtak in kem in. A kihhuai, mawk paupaunate le, pilna takpi a kisa kha thu kinialnate pel in. 21 Mi pawlkhatte in tua bangte zui kha uh ahih manin upna panin a pial uh hi. Hehpihna thupha nang tungah hong om tahen. Amen.