1 THESALONICA-TE

¹ Paul, Silvanus, le Timothy‑te in Pa Pasian le Topa Zeisu Khazih sunga om Thessalonica khua pawlpi mite lai kong khak uh hi. I Pa Pasian le Topa Zeisu Khazih kiang pana hong pai hehpihna thupha le lungnopna note tungah om tahen. ² Thu ka nget uh ciangin na min uh loin note khempeuh hangin Pasian tungah lungdam ka ko den uh hi. ³ Upna tawh na nasepna uh, itna tawh na hanciamna uh le i Topa Zeisu Khazih sungah lametna hangin lungduaitak a na thuak keikainate uh i Pa Pasian mai ah kong phawk tawntung uh hi. ⁴ Kong it sanggamte aw, amah in note hong teel hi cih ka thei uh hi. ⁵ Banghang hiam cihleh note kianga ka omlai un note aa dinga ka nuntakzia uh na theihsa uh hi a, kong puak uh lungdamna thu zong a thu bek hilo in vangliatna, theihtel sinsenna le Kha Siangtho tawh na ngah uh ahi hi. ⁶ Haksatna tampi thuakin Topa thu na sang uh a, Kha Siangtho hong piak lungnopna nei in kote le Topa a hong ettehte na hi uh hi. ⁷ Tua ahih manin Macedonia gam le Achaia gam sunga om thu‑um mi khempeuhte etteh ding na suak uh hi. ⁸ Note tung panin Topa thu kizelkhia a, Macedonia gam le Achaia gamte bek hilo in mun khempeuh ah zong a kizel hi. Pasian na upna uh mun khempeuh ah thang khinzo ahih manin kong gen ding uh a kisam bangmah a om kei hi. ⁹ Banghang hiam cihleh note kiang kong tunzia uh ahi zongin, na milimte uh nusia in a nungta le a maan Pasian bia dingin ama lama na kiheizia uh ahi zongin, ¹⁰ misite lak pana Pasian in a thawhkiksak ama Tapa vantung pan hong pai ding ngaka na omziate uh amaute in a hong gengen uh hi. Tua Tapa in hong tung ding Pasian hehna panin eite hong honkhiapa Zeisu ahi hi.

¹ Sanggamte aw, note kianga kong paina uh a mawkna suak lo hi cih na thei uh hi. ² Ahih hangin na theihsa uh bangin kote in Philippi khua ah gentheihna ka thuak uh a, a zumhuaipi in hong kibawlsiat khit nangawn in hong kilehdona tampi kawmkal panin note kiangah Pasian lungdamna thu kote Pasian sungah hangtak in kong gen veve uh hi. ³ Banghang hiam cihleh thumanlo, lungsim maanlo, le khembawlna tawh ahi zongin note a hong hansuah ka hi kei uh hi. ⁴ Ahi zongin Pasian in ama hoihsakna bangin, lungdamna thu hong apna tawh kizui in thu ka gen uh a, mihingte lungkim nading a gen hilo in ka lungsim uh hong sittel Pasian lungkim nadingin ka gen uh hi. ⁵ Banghang hiam cihleh nong theihsa bangun kimaitang phatna kamte ka zang kei uh a, a simtham huaihamna ka neih loh lam uh zong Pasian in kote teci ahi hi. ⁶ Khazih sawltakte ka hihna uh tawh note tungah huhna kong nget theih uh hangin note kiang pan ahi a, midang khatpeuh kiang pan ahi zongin phatna le pahtawina ka zong kei uh hi. ⁷ Ahi zongin nute in a tanote hoihtak a a kep a khoi bangin note lakah lungnemtak in kong om uh hi. ⁸ Tua hi a, hong it hong ngai ka hih manun Pasian lungdamna thu bek hilo in note in zong kote hong it na hih manun, ka nuntakna nangawn uh piak ding kote lungkimna ahi hi. ⁹ Banghang hiam cihleh sanggamte aw, nakpitak in nasem a ka hanciamna uh na thei uh hi. Pasian lungdamna thu kong hilh manun note khatpeuh aa dingin vangik ka suah loh nadingun sun le zanin nakpi in na ka sem uh hi. ¹⁰ Thu‑um note lakah ka nuntakna uh siangtho in, dik in, kawkban nading a om loh lam ka teci uh note le Pasian ahi hi. ¹¹ Pate in a tate uh thu a hilh bangun note hong hanthawn in tha hong pia in thu kong hilh uh hi cih na thei uh hi. ¹² Tua in ama kumpigam le a minthanna sunga note hong sam Pasian tawh kilawm kituak in na gamtat theih nading uh ahi hi. ¹³ Hih thu hangin Pasian tungah tatsat loin kote in zong lungdam ka ko den uh hi. Banghang hiam cihleh kote hong gen Pasian thu na zak uh ciangin mihing hong gen banglel in sang loin Pasian hong gen taktak bangin na sang uh hi. Tua thu in thu‑um note sungah muibuntak in na hong sem hi. ¹⁴ Banghang hiam cihleh Khazih Zeisu a um Judea gama Pasian pawlpite in Judah mite bawlsiatna a thuak bangun sanggamte aw, note in zong nomau mipihte bawlsiatna thuak na hih manun amaute tawh kibang in a gamtate na hi uh hi. ¹⁵ Tua Judah mite in Topa Zeisu le amaute kamsangte that uh a, kote zong hong bawlsia uh hi. Amaute in Pasian lungdamsak lo uh a, mi khempeuh zong a langbawl uh hi. ¹⁶ Gentile‑te in hotkhiatna a ngah theih nadingun thu ka hilh ding uh amaute in hong kham tawntung uh hi. Amaute in tua bangin a mawhnate uh behlap tawntung uh ahih manin tu in amaute tungah Pasian thangpaihna a buuk a bek in a tungzo hi. ¹⁷ Sanggamte aw, ka pumpi uh note tawh tawmvei sung a kikhen hangin ka lungsim uh note tawh a omkhawm hi. Note kong mu nuam mahmah uh a, kong muh theih nadingun nakpitak in ka hanciam uh hi. ¹⁸ Tua ahih manin note kiangah kong pai nuam mahmah uh a, keimah Paul tektek zong nihveitak pai kong sawm hangin Satan in kote hong khaktan den hi. ¹⁹ Tua ahih leh kote lamet ding, nuam nading, lungdamna lukhu in bang ahi hiam? I Topa Zeisu Khazih hong pai ciangin ama mai‑a ka angtanpih ding uh note hilo na hi uh hiam? ²⁰ Banghang hiam cihleh note in kote angtanna le lungdamna na hi uh hi.

¹ Tua hi a, lung himawhna hong lian ahih manin ko guak bek Athens khuapi ah omsuak ding hoih ka sa uh hi. ² Upna ah note tha hong pia a, a hong kipsak dingin Khazih lungdamna thu tangkona ah Pasian nasem kote naseppih, i sanggampa Timothy note kiangah kong sawl uh hi. ³ Kote pen hih haksatnate a thuak ding maha hong kisehsa ahihlam na theihsa uh ahih manin hih gimna thuaknate hangin kuamah na patauh loh nadingun amah in note tha hong pia ding hi. ⁴ Banghang hiam cihleh note kianga kong omlai un a sawtlo in gimna ka thuak ding uh hi ci a, kong gensa bangun a piantakpi lam tu in na thei uh hi. ⁵ Hih thu hangin hong ze‑etpa in lam khatpeuh tawh note hong ze‑et in ka sepsa khempeuh uh a mawkna a suah ding lunghimawh in om muangthei nawnlo ka hih manun na upna uh a thei dingin amah kong sawl hi. ⁶ Tu in note kiang panin Timothy hong tungkik zo hi. Upna le itna na neihna uh tawh kisai in a lungdamhuai thu hong puak hi. Kote nong phawk mahmahna uh ahi zongin note kong muhnop mahmah bangun note in zong nong muhnop mahmah nate uh hong gen hi. ⁷ Tua ahih manin sanggamte aw, gimthuakna le cihmawhna ka thuak laitak un note upna in kote hong thakhauhsak hi. ⁸ Banghang hiam cihleh Topa sungah kiptak in ding na hih manun tu in ka nungta uh hi. ⁹ Kote Pasian mai ah note hanga ka lungdamnate uh Pasian tungah lungdamkoh khit zawh ding hilo hi. ¹⁰ Na maitang uh kong muhkik nading uh le upna thu ah na kisapnate uh kong kicinsak theih nadingun sun le zanin nakpitak in thu ka ngen uh hi. ¹¹ Tu in i Pa Pasian mahmah le i Topa Zeisu Khazih in note kiangah kong pai theih nading uh lampi hong honsak tahen. ¹² Kote in note kong it mah bangun Topa in zong note khat le khat hong ki‑itsak semsem henla, mi khempeuh zong hong it theisak semsem tahen. ¹³ Topa Zeisu Khazih in ama misiangthote khempeuh tawh a hong pai ciangin i Pa Pasian mai ah sianthona ah kawkban nading om loin amah in na lungsim uh hong kipsak tahen.

¹ Sanggamte aw a tawpkhakna a kong gennop in ah na nuntakzia ding uh le Pasian na lungdamsak zia ding uh kote kiang panin na thei khinzo uh hi. Tua bangin na khangto semsem un ci in Topa Zeisu sungah hong thumin kong hanthawn uh hi. ² Banghang hiam cihleh Topa Zeisu tungtawn a kong piak uh thupiakte note in na thei uh hi. ³ Banghang hiam cihleh na siantho nadingun numei pasal thangtatna na pelh un. Tua in Pasian deihna ahi hi. ⁴ Na pumpi uh a siangtho le a pahtawihuai dingin kemciat un. ⁵ Pasian a theilo Gentile‑te in numei le pasal kilunggulh luatna a neih bangun na om kei un. ⁶ Kong genkholh khitsa uh le kong theihsak khitsa bangun hih thute ah a khengval in kuamah gamta loin na sanggamte uh tungah gamta khial kei un. Topa in tua banga a gamta khempeuh a thukkikpa ahi hi. ⁷ Banghang hiam cihleh Pasian in a thangtat dinga hong sap hilo in a siangtho dinga hong sap ahi hi. ⁸ Tua ahih manin hih thu a nialte in mihing thu a nial hilo in ama Kha Siangtho hong pia Pasian thu a nial uh ahi hi. ⁹ Ahih hangin sanggam ki‑itna tawh kisai lai kong gelh ding na kisam kei uh hi. Banghang hiam cihleh khat le khat na ki‑it nadingun Pasian mahmah in note hong hilh khinzo hi. ¹⁰ Macedonia gam a sanggamte khempeuh zong na it takpi uh hi. Ahi zongin sanggamte aw, itna na neih semsem nadingun kong hanthawn uh hi. ¹¹ Thu kong piak khitsa uh bangin midangte tawh kilem in om hithiat unla, nomau vaiciat semtek un. Na khut uh tawh na semin hanciam un. ¹² Tua hi leh kisapna bangmah nei loin a pualam mite muhna ah zong a kilawm a kituak in na nungta thei ding uh hi. ¹³ Ahih hangin sanggamte aw, lametna a neilo mite a dah bangin na dah loh nadingun a ihmu khinsa mite thu thei lo a na om ding uh ka deih kei hi. ¹⁴ Banghang hiam cihleh Zeisu si in thokik hi ci in i up mah bangin ama sunga a ihmu khinsa mite Pasian in Zeisu tawh hong tonkhawmsak ding hi ci in i um hi. ¹⁵ Topa hong pai dongin a nungta lai eite in a ihmu khinsa mite i makhelh peuhmah kei ding hi, ci in Topa kammal tawh kizui in kong gen uh hi. ¹⁶ Banghang hiam cihleh Topa mahmah in vantung panin kikona tawh, vantungmi mangpa kikona tawh, Pasian pengkul ging tawh hong kumsuk ding hi. Tua ciangin Khazih sunga a sisa mite hong tho masa ding uh hi. ¹⁷ Tua khit ciangin a nungta lai eite in amaute tawh huihlak ah Topa dawn dingin meiipi tungah hong kilato ding hi. Tua ciangin Topa tawh i omkhawm tawntung ding hi. ¹⁸ Tua ahih manin hih thute tawh khat leh khat tha na kipia un.

¹ Ahi zongin sanggamte aw, a ni le a hun tawh kisai in note kiangah lai kong gelh ding a kisam kei hi. ² Banghang hiam cihleh gutate zankim a a hong pai bangin Topa Ni hong tung ding hi cih teltak in na thei uh hi. ³ Mite in, “Lungmuanna om hi Launa omlo hi!” a cih laitak un thakhat in suksiatna a thuak ding uh hi. Naupaai numeite tungah nausuah natna a tun vat bangin thakhat in siatna amaute tungah tung dinga, a suakta kei ding uh hi. ⁴ Ahih hangin sanggamte aw, note na hih uh leh khuamial sungah om lo na hih manun tua Ni in guta bangin hong bingphawn lo ding hi. ⁵ Note khempeuh in khuavak tate le sunlai tate na hi uh hi. Eite in zanlai tate le khuamial tate i hi kei hi. ⁶ Tua ahih manin midangte a ihmut bangin ihmu loin pilvangtak in omin pumpi kikhalna nei ni. ⁷ Banghang hiam cihleh a ihmu mite zan ciangin ihmu uh a, zukhamte zong zan ciangin a kham uh hi. ⁸ Ahi zongin sunlai tate ahi eite in pumpi kikhalna nei ni. Upna le itna sik awmdal bulh ni. Hotkhiatna lametna sik lukhu khu ni. ⁹ Banghang hiam cihleh Pasian in ama thangpaihna a thuak dinga hong koihte hilo in i Topa Zeisu Khazih hangin hotkhiatna a ngah dinga hong koihte ihi a, ¹⁰ amah in eite aa dingin a sipa ahi hi. Tua hi a, eite i si a, i hing zongin amah tawh i nuntakkhop theih nading ahi hi. ¹¹ Tua ahih ciangin tu laitak a na hihna bangmah un khat le khat tha kipia in na kikipsak un. ¹² Tu in, sanggamte aw, note lakah nasep a hahkatte le Topa sungah note hong makaih a, thu hong hilh mite na zahtak nadingun kong thum uh hi. ¹³ Amaute nasepna hangin itna tawh na thupi ngaihsut mahmah un. Note zong khat le khat na kilem un. ¹⁴ Tu in, sanggamte aw, a thumanglo mite thu na hilh un. A lungkiate tha na pia un. A thanemte na huh un. Mi khempeuh tungah thuakzawhna na nei un ci in kong hanthawn uh hi. ¹⁵ Thusiate thusia tawh thukkik kei un. Note aa ding le mi khempeuh aa dingin a hoih nate hanciam tawntung un. ¹⁶ Lungdam tawntung un. ¹⁷ Thungen tawntung un. ¹⁸ Na khempeuh ah lungdam na ko un. Banghang hiam cihleh hih in Khazih Zeisu sungah note aa dinga Pasian hong deihsak ahi hi. ¹⁹ Kha meikuang na mitsak kei un. ²⁰ Thuhilhnate na simmawh kei un. ²¹ Na khempeuh na sittel unla a hoihte na lenkip un. ²² A hoihlo a kici khempeuh na pel un. ²³ Tu in lungmuanna hong pia Pasian mahmah in na sung na pua uh hong siangthosak tahen. Na kha uh, na lungsim uh le na pumpi uh, i Topa Zeisu Khazih hong pai ni ciangin kawkbanna a om lo dingin amah in hong kembit tahen. ²⁴ Note hong sampa muanhuai ahih manin tua bangin hong sem ding hi. ²⁵ Sanggamte aw, kote aa dingin thu hong ngetsak un. ²⁶ A siangtho kinapna tawh sanggamte khempeuh na hopihsak un. ²⁷ Hih laikhak a siangtho sanggamte khempeuh zak dingin na sim un ci in Topa min in thu kong pia hi. ²⁸ I Topa Zeisu Khazih hong hehpihna thupha in note hong ompih tahen. Amen.