1 PETER

¹ Zeisu Khazih sawltak khat ahi keimah Peter in Pontus gam, Galatia gam, Cappadocia gam, Asia gam le Bithynia gam‑te ah a kithehthang pemtate lai kong khak hi. ² Pa Pasian in ama theihkholhna tawh kizui in hong teel in Zeisu Khazih thu a mang ding le ama sisan tawh thehna a ngah dinga Kha tawh a hong sianthosak mite na hi uh hi. Note tungah hehpihna thupha le lungnopna khang semsem tahen. ³ Amah in misite lak pan Zeisu Khazih a thawhkiksakna tungtawn in a nungta lametna a nei dingin ama hong hehpihna lianpi tawh eite hong suakthaksak zo hi. Tua i Topa Zeisu Khazih ii Pa, Pasian tungah phatna om tahen. ⁴ Amah in a kisia theilo, a nin theilo, a mual theilo, na gamhluah ding khat uh vantung ah hong koihsak zo hi. ⁵ Pasian in hun nunung cianga hong lahkhiat dingin a baihsa in a koih tua hotkhiatna hong tun mateng Pasian vangliatna in na upna uh tungtawn in hong kembit hi. ⁶ Tu laitak in tawlkhat sung haksatna namkim ah dahna na thuak uh hangin hih hotkhiatna thu in note hong lungdamsak mahmah hi. ⁷ Kham in mei tawh sittelna a thuak zawh hangin a kisia thei hi. Kham sangin a manpha zaw note upna a taktak ahihna kilang a, Zeisu Khazih a hong kilat ciangin phatna, pahtawina leh minthanna na ngah theih nadingun sittelna a thuak na hi uh hi. ⁸ Tua Zeisu Khazih na muh loh uh hangin na it uh hi. Tu in na muh lohpi mah uh um na hih manun minthanna tawh kipawl a kigen zolo lungdamna lianpi tawh na kidim uh hi. ⁹ Banghang hiam cihleh note upna in a ngim bulpi ahi, kha hotkhiatna na ngah man uh ahi hi. ¹⁰ Note tunga hong tung ding hehpihna thupha a genkhol kamsangte in tua hotkhiatna thu phatak in a kantel uh hi. ¹¹ Khazih thuak gimnate le tua khit cianga a ngah ding minthanna thu, tua kamsangte sunga om Khazih Kha in a genkholh lai in bang hun ciangin bangci bangin hong tung ding hiam cih thei nuam in a zongtel uh hi. ¹² Note tunga lungdamna thu hong gen mite in tua thu vantung pana hong kisawl Kha Siangtho tawh a hong gen uh ahi hi. Tua thu kamsangte in a genkholh lai un amaute aa ding hilo in note aa ding ahihlam zong amaute tungah a kihilh hi. Vantungmite nangawn in hih thute muhkhiat ding a lunggulh mahmah uh hi. ¹³ Tua ahih manin lungsim kigingsa in omden unla, pumpi kikhalna nei un. Zeisu Khazih a hong kilat ciangin note a hong piak ding hehpihna thupha tungah na lametna khempeuh uh koih un. ¹⁴ Awlmawhlohna tawh nidang lai a na lunggulhnate uh zui in gamta loin tu in a thumang tate bangin na gamta un. ¹⁵ Note a hong sampa a siantho mah bangin note zong na gamtatna khempeuh uhah na siangtho un. ¹⁶ Banghang hiam cihleh Lai Siangtho sungah, “Kei ka siantho bangin note zong na siangtho un,” a ci hi. ¹⁷ Kuamah deidan nei loin mi khempeuh amau gamtatna tawh kizui in thu a khen i Pa min a lote na hih manun leitung ah na om sungun khualzin mi bangin na gamta un. ¹⁸ Na pu na pate uh tung panin na luahsuk uh kimanna a neilo gamtatna panin a kisiathei kham le ngun tawh note a hong kitankhia ahi kei hi. ¹⁹ Ahi zongin a kawkbanglo, a ninbanglo, tuuno sisan tawh a kibang Khazih sisan manpha tawh hong kitankhia hi cih na thei uh hi. ²⁰ Khazih in leitung pian mapek in a kisehkholsa hi a, ahi zongin hih hun nunung ah note aa dingin hong kilang in, ²¹ Pasian sungah upna le lametna na neih theih nadingun misite lak panin amah thokiksak in a minthangsak Pasian na um uh hi. ²² Kha tungtawn in thuman thutak zui in na lungsim uh na siangsak khin uh a, na sanggamte uh zong na it takpi uh hi. Tua ahih manin lungsim takpi tawh khat le khat na ki‑it mahmah un. ²³ Banghang hiam cihleh note in a kisiathei khaici tawh hilo a kisiatheilo khaici ahi, a nungta, a kip tawntung Pasian thu tawh a suakthakte na hi uh hi. ²⁴ Banghang hiam cihleh, “Mi khempeuh pen lopa kung tawh kibang a, A thupitna khempeuh zong, Lopa pak tawh kibang hi. Lopa vul in a pakte pulh mang a, ²⁵ Ahih hangin Topa thu ahih leh a kip tawntung hi.” Tu in note tunga hong kihilh lungdamna thu in hih thu ahi hi.

¹ Tua ahih manin kisiatsak nopna, zuautatna, kineihkhemna, ki‑eenna le kigensiatna khempeuh paikhia un. ² Na khantoh theih nadingun naungek suaktungte bangin Pasian thu nawizu siangtho na lunggulh un. ³ Banghang hiam cihleh Topa hoih hi ci in na ciam khinzo uh hi. ⁴ Mite in a nawlkhin uh hangin Pasian in a teel a manpha mahmah a nungta suangpi ahi Topa kiang na tung zo uh hi. ⁵ Tua ahih manin note zong a nungta suangte bangin, kha inn in a kilamte na hi uh a, Zeisu Khazih tungtawn in Pasian in a santheih khalam biakpiakna a pia ding, a siangtho siampi na hi khin ta uh hi. ⁶ Tua ahih ciangin Lai Siangtho sungah zong, “En un, a kiteelsa a manpha mahmah innkiusuang khat, Zion ah ka phut a, Amah a um mite maizumna kithuaksak ngeilo ding hi,” ci in a kigelh hi. ⁷ Tua ahih manin thu‑um note aa dingin amah a manpha mahmah hi. A umlo mite aa dingin ahih leh, “Innlamte in a nilkhiat uh suang, Innkiu suang bulpi a suak hi.” ⁸ Tua suang in, “Palkhak suang ahi, Pukna suangpi ahi hi,” a kici thu a tangtung hi. Amaute in Pasian thu mang lo uh ahih manun kipalkha uh a, tua bang ding maha a kisehsate ahi uh hi. ⁹ Note na hi uh leh khuamial sung panin a lamdang ama khuavak sungah a hong samkhiapa, amah phatnate a tangkokhia dingin Pasian in a hong teel minam, kumpi za a ngah siampi nam, a siangtho minam le Pasian tuamneih mite na hi uh hi. ¹⁰ Nidang lai in hehpihna na ngah loh uh hangin tu in hehpihna na ngah uh hi. Nidang lai in ama mite na hih loh uh hangin tu in Pasian mite na hi uh hi. ¹¹ Kong itte aw, kha tawh a kido ci le sa lunggulhnate na tang un ci in khualzin mi le pemtate tawh a kibang note kong hanthawn hi. ¹² Gentile‑te in siatna a bawl mite bangin a hong kosiat uh hangin amaute lakah a pahtakhuai in na gamta un. Tua hi leh note gamtatna phate mu in thukhen ni ciangin Pasian a phat thei ding uh hi. ¹³ Tua ahih ciangin i Topa min na khualna un hong uk mite thu na mang un. ¹⁴ Thuneihna sangpen a nei kumpipa ahi a, a tatsia mite daanpia in a hoih in a gamtate a pahtawi dingin ama koih gam uk mangpite thu zong na mang un. ¹⁵ Banghang hiam cihleh thu thei loin a mawk paupaute, na gamtatpha uh tawh na daihsak ding uh Pasian deihna ahi hi. ¹⁶ A suakta mi bangin nungta unla, ahi zongin na suahtakna uh gitloh selna in zang kei un. Pasian silate bangin gamta un. ¹⁷ Mi khempeuh zahtak unla, thu‑um sanggamte it un. Pasian kihta unla, kumpipa pahtawi un. ¹⁸ Silate aw, na tote uh thu zahtakna tawh na mang un. A hoih, a thukhual tote bek hilo in, a gilo, a gamhtat tote ukna zong na mang un. ¹⁹ Banghang hiam cihleh mi khatin Pasian a theih manin a thumanlopi bawlsiatna khat a thuak zawh leh a pahtakhuai ahi hi. ²⁰ Ahi zongin na khialhna hangin satna na thuak leh na pahtakhuaina bang om ding ahi hiam a pha na bawl manin gimna thuak a, na thuak zawh leh Pasian mai ah a pahtakhuai na hi hi. ²¹ Banghang hiam cihleh tua bang ding mahin Pasian in hong sap mite na hi uh hi. Khazih in zong eite tangin na thuak khinzo a, ama khekhap na zuih theih nadingun limpha hong nusiat zo hi. ²² “Amah in mawhna bawl lo a, A kam panin zong zuauthu kiza lo hi.” ²³ Kosiatna a thuak lai in amah in a thukkik kei hi. Bawlsiatna a thuak lai in zong a bawlsiate tawnbawl loin maantak in thu a khenpa tungah a kipum ap hi. ²⁴ Mawhna sihsan in dikna ah i nuntak theih nadingin amah in i mawhnate a pumpi in singkhuam tungah a puazo hi. Ama liammate hangin damna na ngah zo uh hi. ²⁵ Banghang hiam cihleh tuu bangin lam na pial khin uh a, ahi zongin na kha uh hong Cingpa le hong Kempa kiangah tu in na tungkik zo uh hi.

¹ Tuamah bangin zite aw, na pasalte uh thu na mang un. Tua hi leh thu‑umlo pasal khatpeuh a om leh note gamtatna le amaute na zahtakna uh a hong muh uh ciangin, ² kam khat beek pau kul loin a zite gamtatna hangin hong kikhel thei ding uh hi. ³ Na kizepnate uh sam bawlziate, kham le ngun le nikteen puansilh hoihte tawh a pualam kizepna hi sak kei un. ⁴ Pasian muhna ah a manpha mahmah ahi, a kisia theilo lungnemna le lungduaina lungsim, a kimu theilo lungsim sung kizepna hi tahen. ⁵ Banghang hiam cihleh tanglai a Pasian a muang numei siangthote in zong a pasalte uh thu mangin, tua bangin a etlawm in a kizem uh hi. ⁶ Sarah in zong Abraham thu mang a, topa a cih bangin note in zong launa tawh hilo in a hoih in na gamtat uh leh Sarah tanute na hi uh hi. ⁷ Tuamah bangin pasalte aw, na zite uh tawh kitheihsiam in om un. Amaute a thanem zaw ahihna uh le hehpihna thupha tawh hong kipia nuntakna a luahkhawm dingte na hih manun na zite uh pahtawi un. Tua hi leh na thungetna uh hong kikhaktan lo ding hi. ⁸ A tawpna a kong gennop thu in khat le khat kithutuaktak in na om un. Kilainatna, sanggam bang a ki‑itna, kihehpihna le kiniamkhiatna lungsimte na nei un. ⁹ Thusiate thusia tawh thukkik kei unla, hong kosiate kosiakik kei un. Pasian in thupha a luah dinga hong sap mite na hihlam uh thei unla, thupha tawh thukkik zaw un. ¹⁰ Banghang hiam cihleh, “A nuntakna it a, Hunhoih hunnuam tampi a munuam mi in, A leii tawh thusia gen kei henla, A muk tawh zuauthu gen kei hen. ¹¹ Thusia pan kiheikhia in a pha bawl henla, Kilemna deihin a ngah mateng hanciam hen. ¹² Banghang hiam cihleh, Topa mit in midikte en a, A bil in amaute thungetnate a ngai hi. Thusia a bawlte ahih leh Topa in a nungngat hi.” ¹³ A hoih in gamta le uh teh kua in no tungah siatna hong bawl ding ahi hiam? ¹⁴ Ahi zongin thuman hangin na thuak uh leh thupha na ngah ding uh hi. “Amaute hong tawnbawlnate hangin lau kei unla patau kei un.” ¹⁵ Ahi zongin note lungsim sungah a tuamin Topa Pasian koih unla, note lametna thu hong dong mi khatpeuh lungnemna le zahtakna tawh na dawnkik theih nadingun a kigingsa in omden un. ¹⁶ Amaute in nasep hoihlo sem banga hong mindaisak uh ciangin lungsim hoih nei le uh cin, Khazih sunga na gamtatna hoih uh hong gensia mite in maizum lawh ding uh hi. ¹⁷ Banghang hiam cihleh Pasian deihna hi peuh leh, a pha bawl mana gimthuakna in a sia bawl mana gimthuakna sangin a hoih zaw hi. ¹⁸ Banghang hiam cihleh Khazih in zong Pasian kiangah eite hong tunpih theih nadingin midik amah in a diklo eite mawhna tangin khatvei sihna a thuak hi. A pumpi a sih hangin Kha in a nungtasak hi. ¹⁹ Tua kha tawh thong sunga om khate kiangah pai in thu a tangko zo hi. ²⁰ Tua khate pen Noah in tembaw a bawl lai a Pasian in lungduaitak in a ngak, thu a manglo mite khate ahi hi. Tua tembaw sunga om mihing tawmno khat ahi mi giatte in tua tui sung panin hotkhiatna a ngah uh hi. ²¹ Hih tui in Zeisu Khazih thawhkikna hanga hotkhiatna i ngahna, baptizena thu a kawk ahi hi. (Hih baptizena in pumpi tunga cininte hong kisilna hilo in lungsim siangtho tawh Pasian lam i ngatna ahi hi.) ²² Tua Zeisu Khazih vantung ah kahto khinzo in Pasian taklam ah om a, vantungmite a kipan ukna a neite le vangliatna khempeuh ama khut nuai ah a koih hi.

¹ Tua ahih manin Khazih in eite tangin pumpi gimna a thuak mah bangin note in zong tua lungsimpuak mah galhiam bangin na nei un. Banghang hiam cihleh pumpi a gimna a thuak mi in mawhna tawh a kipaikan nawn kei hi. ² Tua bang mi in a nuntaklai teng ci le sa deihna tawh mihing lunggulhna hoihlote zui in a nungta nawn kei a, Pasian deihna zui in a nungta hi. ³ A beisa hunin Gentile‑te gamtatna mah bangin numei pasal paktatna, a hoihlo lunggulhna, zukhamna, gualnop pawibawlna, zunek pawikhamnate le a kihhuai milim biakna sunga i kidiahnate in a simphat khin mahmah hi. ⁴ Tu in tua noptatnate sungah amaute banga na bual loh uh ciangin lamdangsa in hong gensia uh hi. ⁵ Ahih hangin amaute in a nungta le a si mite tungah thukhen dingin a om gigepa tungah amaute thu ciat a puak ding uh hi. ⁶ Tua thu hang mahin misisate tungah lungdamna thu a kitangko khin hi. Tua in amaute a leitung pumpi uh thu kikhen in, Pasian deihna bangin a kha uh a nuntak theih nading uh ahi hi. ⁷ Na khempeuh a bei ding hun hong nai zo hi. Tua ahih manin thu na nget theih nadingun na pumpi uh hoihtak uk unla, na pilvang un. ⁸ A dang khempeuh sangin khat le khat na ki‑it mahmah un. Banghang hiam cihleh itna in mawhna tampi a sel hi. ⁹ Phun loin khat le khat zin na kido un. ¹⁰ Pasian hehpihna thupha tampi a kem neihsa kemsiamte bangin kha letsong na ngah bang uh zangtek unla khat le khat tha kipia un. ¹¹ Minthanna le ukzawhna a nei tawntung Zeisu Khazih tungtawn in na khempeuh ah Pasian min a than theih nadingin thugen mi peuhmah in Pasian kammal tektek mah bangin gen henla, nasem mi peuhmah in Pasian in a piak a hih theihna zah tawh sem hen. Amen. ¹² Kong itte aw, meikuang bangin a sa ze‑etna haksa na thuak uh ciangin thu lamdangpi khat hong tung bangin ngaihsun in lamdangsa kei un. ¹³ Ahi zongin ama minthanna hong kilat ciangin nuamna lianpi tawh na kipah theih nadingun Khazih thuakna a thuakpih na hih manun lungdam un. ¹⁴ Khazih min hangin zahkona na thuak uh leh mihampha na hi uh hi. Banghang hiam cihleh minthanna Kha le Pasian Kha note tungah hong om ahi hi. Amaute in Khazih a kosiat uh hangin note in na pahtawi uh hi. ¹⁵ Note, kuamah in mithahna, guktakna, tatsiatna, midangte thu ah kitaklahna thute hangin bangmah thuaklawh kei un. ¹⁶ Ahi zongin mi khatpeuh in Christian ahih manin gimna a thuak leh maizum kei henla, tua min a puak manin Pasian phat zaw hen. ¹⁷ Banghang hiam cihleh Pasian innkuan sung panin thukhenna a kipat ding hun hong tungzo hi. Eite in thukhenna thuak masa ding i hih leh Pasian lungdamna thu a sanglo mite a tawpna ah bang suak ding uh ahi hiam? ¹⁸ Tu in, “Midikte nangawn in hotkhiatna a ngah ding uh haksa ahih leh, Pasian a thusim lote le mimawhte bangci ding uh ahi hiam?” ¹⁹ Tua ahih manin Pasian deihna tawh kizui in gimna a thuakte in gamtat hoih zomsuak uh henla, a muanhuai a Piangsakpa tungah a nuntakna uh ap hen.

¹ Note bangmah a makai khat ka hih banah Khazih thuak gimnate teci a pangpa khat ka hihna le a hong kilang ding vangliatna a ngahpa khat ka hihna tawh kizui in, ² note laka om makaite kong hanthot nop thu in note laka om Pasian tuuhonte vak unla cing un. Sep loh phamawh hi cihna tawh hilo zaw in sepnopna lungsim tawh sem un. A maanlo a sum ngahnopna tawh hilo in lawpnatak tawh sem un. ³ Pasian in note hong ap tuuhonte tungah ukcip gawp kei unla, amaute hong etteh theih dingin om zaw un. ⁴ Tua hi leh Tuucing Mangpa hong kilat ciangin a tul theilo minthanna lukhu na ngah ding uh hi. ⁵ Tuamah bangin khangnote aw, makaite thu mang un. Note khat le khat thu kimang unla, kiniamkhiatna silh un. Banghang hiam cihleh, “Pasian in a kiphasakte langpan a, A kiniamkhiatte hehpihna thupha a pia hi.” ⁶ Tua ahih manin Pasian in a hun a tun ciangin a hong lapsang theih nadingin a thahat Pasian khut nuai ah kiniamkhiat un. ⁷ Amah in note hong lung himawh ahih manin na lung hihmawhna khempeuh uh amah suan un. ⁸ Na galpa uh Dawimangpa in a valhtum ding mi zong in humpi nelkai hawk bangin a vak kawikawi hi. Tua ahih manin pumpi ki‑uk unla, kigingsa in omden un. ⁹ Leitung mun tuamtuam a om na sanggamte un zong tua bangin thuak uh hi cih thei unla, Dawimangpa dal in upna tawh dingkip un. ¹⁰ Khazih Zeisu sunga tawntung minthanna sungah eite hong sampa in hehpihna thupha khempeuh a neipa Pasian ahi hi. Note in tawmvei sung gimna na thuak khit uh ciangin amah in hong picingsak in hong kipsak henla, hong thakhauhsak in hong phutkip tahen. ¹¹ Tua Pasian in minthanna le ukzawhna nei tawntung tahen. Amen. ¹² A tomno a kong gelh hih laikhak, a muanhuai i sanggampa Silvanus kong puasak hi. Hih thute Pasian hong hehpihna thupha taktak hi cih teci pangin kong hanthawn hi. Hih thute ah na kip un. ¹³ Note mah tawh teelna a ngahkhawm Babylon khuapi a om numei in note hong hopih hi. Ka tapa Mark in zong hong hopih hi. ¹⁴ Itna kinapna tawh khat le khat kihopih un. Khazih Zeisu sunga om note khempeuh tungah nopna om tahen. Amen.