1 JOHN

1 JOHN

¹ A kipat cil a kipan in a om khinsa kote in ka zak uh, mit tawh en in ka muh uh le, khut tawh ka lawn uh tua nuntakna Thu tawh kisai note kiangah kong tangko uh hi. ² Tua nuntakna hong kilang in kote in ka mu uh a, teci pangin note kiangah kong gen uh hi. Tua nuntak tawntungna in Pa tawh a omkhawm hi a, tu in ahih leh kote kiangah a hong kilang zo hi. ³ Kote in Pa le a Tapa Zeisu tawh ka kipawlkhop takpi mah bangun note zong kote tawh nong kipawlkhop theih nadingun ka muhsa ka zaksa uh tua thu note kiangah kong pulakkhia uh hi. ⁴ Na lungdamna uh a kicin nadingin hih thute kong gelh uh hi. ⁵ Ama tung pan ka zak khit uh ciangin note tungah kong pulakkhiat uh thu in Pasian in khuavak hi a, ama sungah khuamial a om kei hi cih thu ahi hi. ⁶ Amah tawh ka kipawlkhawm hi ci napi in khuamial sungah i gamtat leh zuau thugen i hi a, thuman thutak a zui lo i hi hi. ⁷ Ahi zongin amah khuavak sungah a om mah bangin eite zong khuavak sungah i kalsuan leh, khat le khat a kipawlkhawm i hi a, a Tapa Zeisu Khazih sisan in i mawhna khempeuh panin a hong sawpsiang hi. ⁸ Mawhna ka nei kei hi i cihleh ei le ei a kikhem i hi a, eite sungah thuman thutak a om kei hi. ⁹ I mawhnate pulak lehang i mawhnate hong maisak in i diktatlohna khempeuh pan hong sawpsiang dingin amah muanhuai in a dik hi. ¹⁰ Mawhna ka bawl kei hi i cihleh amah zuaugen i suaksak a, eite sungah ama thu a om kei hi.

¹ Ka taneute aw, mawhna na bawl khakloh nadingun hih thute kong gelh hi. Ahi zongin mi khatpeuh in mawhna a bawl leh Pa tawh a omkhawm Sitni khat i nei a, amah in midikpa Zeisu Khazih ahi hi. ² Amah in eite aa ding bek hilo in, leitung mi khempeuh mawhna aa dingin zong amahmah thoihdamna a hong hi hi. ³ Tu in ama hong thupiakte i zuih leh amah a theitel i hi hi. ⁴ “Amah ka thei hi,” ci napi in a thupiakte a zuilo mi in zuaugen hi a, ama sungah thuman thutak a om kei hi. ⁵ Ahih hangin ama thu a zui mi sungah Pasian itna a kicing in a om hi. Hih thu tawh ama sungah i om lam i thei hi. ⁶ Ama sungah ka om hi a ci mi peuhmah in ama gamtat bangin a gamta ding hi. ⁷ Sanggamte aw, note kiangah thupiak thak kong gelh kei a, a cil a kipan na ngahsa uh thupiak lui mah kong gelh hi. Tua thupiak lui pen a cil a kipan na zak khitsa uh ahi hi. ⁸ Thupiak thak khat note tungah kong gelhkik hi. Tua thu in ama sung le note sungah a om takpi thu ahi hi. Banghang hiam cihleh khuamial hong bei in khuavak taktak a hong tangzo hi. ⁹ Khuavak sungah ka om hi ci napi in a sanggam a mudah mi in khuamial sungah a omlai ahi hi. ¹⁰ A sanggam a it mi in khuavak sungah om ahih manin a puk nading thu a om kei hi. ¹¹ Ahi zongin a sanggam a mudah mi ahih leh khuamial sungah omin khuamial sunga lampai ahi hi. Khuamial in a mittawsak ahih manin a paina mel a thei kei hi. ¹² Ka taneute aw, Pasian in ama min hangin na mawhnate uh hong maisak ahih manin lai kong khak hi. ¹³ Pate aw, a kipat cil a kipan a ompa thei na hih manun lai kong khak hi. Khangnote aw, gilopa zo khin na hih manun lai kong khak hi. Ka taneute aw, Pa thei khin na hih manun lai kong khak hi. ¹⁴ Pate aw, a kipat cil a kipan a ompa thei khinzo na hih manun lai kong khak hi. Khangnote aw, na thahat uha Pasian thu note sungah om in gilopa zo khin na hih manun lai kong khak hi. ¹⁵ Leitung ahi a, leitunga om na khat peuhpeuh ahi zongin iplah kei un. Mi khatpeuh in leitung a iplah leh Pa itna ama sungah a om lo ahi hi. ¹⁶ Banghang hiam cihleh leitunga om nate in, ci le sa lunggulhna, mittang iplahna le nuntak kiphatsak pihnate hi a, tuate in Pa kiang pana hong pai hilo in leitung pan hong pai ahi hi. ¹⁷ Leitung le leitunga om lunggulhnate a beibei hita a, ahi zongin Pasian deihna a zui mite a om tawntung ding hi. ¹⁸ Ka taneute aw, tuhun in hun nunung ahi hi. Anti‑khazih hong piang ding hi ci a, na zaksa bangun tu in zong anti‑khazih tampi hong piangzo hi. Tua ahih manin tuhun in hun nunung ahi hi cih i thei hi. ¹⁹ Amaute in eite tawh kipawl hilo uh ahih manin eite kiang panin a paikhia uh hi. Banghang hiam cihleh eite tawh kipawl hi le uh eite tawh a omkhawm suak ding uh hi. Ahih hangin amaute khat beek eite tawh hong kipawllohna uh a kilat nadingin eite kiang panin a paikhia uh ahi hi. ²⁰ Ahi zongin Siangthopa in note sathau hong nilh khinzo ahih manin na khempeuh na thei uh hi. ²¹ Note in thuman thutak na theih loh manun lai hong khak ka hi kei hi. Thuman thutak na theih man uh leh thuman thutak panin zuauthu piang lo ahih manin lai hong khak ka hi zaw hi. ²² Zuaugen mi kua ahi hiam? Zeisu pen Khazih hi cih thu a nial mi hilo ahi hiam? Pa le Tapa a nial mi in anti‑khazih ahi hi. ²³ Tapa a nial mi peuhmah in Pa zong a nei kei hi. Tapa a sang mi in Pa zong a nei hi. ²⁴ Tua ahih manin a cil a kipan na zaksa uh thu note sungah omsak un. A cil a kipan na zaksa uh thu note sungah a om leh Pa le Tapa sungah note zong na om ding uh hi. ²⁵ Ama hong kamciamsa thu in nuntak tawntungna ahi hi. ²⁶ Note hong khem nuam mite tawh kisai in hih thute kong gelh hi. ²⁷ Pasian sathau nilhna note sungah om khin ahih manin kuama thuhilh ding na kisam kei uh hi. Tua sathau nilhna in thu khempeuh hong hilh hi. Tua sathau nilhna pen zuauthu hilo in thuman thutak ahih manin hong hilh bangbang in ama sungah omsuak un. ²⁸ Tu in, ka taneute aw, ama sungah omsuak un. Tua hi leh amah a hong kilat ciangin i lungmuang dinga, a hong pai ciangin zong ama mai ah i maizum kei ding hi. ²⁹ Amah dik hi ci in na theih uh leh a dika gamta mi peuhmah zong ama sung panin a piang ahi hi cih na thei uh hi.

¹ Pasian tate cihna i ngah theih nadingin Pa in eite tunga hong piak itna bangzahtak in lian ahi hiam! Leitung mite in amah thei lo uh ahih manin eite zong a hong thei kei uh hi. ² Kong itte aw, tu in Pasian tate i hi hi. Tua hi a, tunung cianga i omzia ding ahih leh a kilang nai kei hi. Ahi zongin amah a hong kilat ciangin amah tawh i kibang ding hi cih i thei hi. Banghang hiam cihleh ahihna bangbang in amah i mu ding hi. ³ Hih bang lametna a nei mi khempeuh in Pasian a siantho bangin amah le amah a kisiangthosak ahi hi. ⁴ Mawhna a bawl mi in thukham neilo banga gamta mi ahi hi. Banghang hiam cihleh thukham neilo banga gamtatna in mawhna ahi hi. ⁵ I mawhnate a lakhia dingin Zeisu hong kilang hi cih thu na thei uh hi. Ama sungah mawhna kici a om kei hi. ⁶ Ama sunga a om mi in mawhna a bawl kei hi. Mawhna a bawl mi peuhmah in amah a mu nailo a thei nailo ahi hi. ⁷ Ka taneute aw, kuamah kikhemsak kei un. A dika gamta mi in Khazih a dik mah bangin midik a suak hi. ⁸ Mawhna a bawl mi in Dawimangpa kiang pan ahi hi. Banghang hiam cihleh Dawimangpa in a kipat cil mahin mawhna a bawlpa ahi hi. Tua ahih manin Dawimangpa nasepte a susia dingin Pasian Tapa hong kilang zo hi. ⁹ Pasian panin a piang mi peuhmah ama sungah Pasian khaici om ahih manin mawhna a bawl kei hi. Amah Pasian panin a piang mi ahih manin mawhna a bawlthei kei hi. ¹⁰ A dika a gamtalo mi le, a sanggam a itlo mi peuhmah Pasian mi ahi kei hi. Hih bangin Pasian tate le Dawimangpa tate a kikhentel thei hi. ¹¹ Banghang hiam cihleh khat le khat ki‑it ni cihna thu in a kipat cil a kipan na zak khitsa uh thu ahi hi. ¹² Cain bangin om kei ni. Amah mi gilopa mi hi a, a sanggampa a thatpa zong ahi hi. Banghang in a sanggampa that ahi hiam? Ama gamtatna sia in a sanggampa gamtatna a dik hang ahi hi. ¹³ Sanggamte aw, leitung mite in note hong muhdah uh leh lamdangsa kei un. ¹⁴ Sihna pan nuntakna ah galkah khinzo i hihna thu i sanggamte i itna panin i theithei hi. A sanggam a itlo mi in sihna sungah a omlai ahi hi. ¹⁵ A sanggam a mudah mi in mithat hi a, mi thatpa sungah nuntak tawntungna a om kei hi cih na thei uh hi. ¹⁶ Zeisu Khazih in eite aa dingin ama nuntakna hong piakna hangin itna in bang ahi hiam cih i thei hi. Eite in zong i sanggamte aa dingin nuntakna i piak ding a kilawm hi. ¹⁷ Ahi zongin leitung neih le lam a hau mi khatin a sanggampa khat kitangsapna mu napi in a hehpih nop kei leh bangci bangin ama sungah Pasian itna om thei ding ahi hiam? ¹⁸ Ka taneute aw, a thu bekin ki‑it kei ni. Kam le muk bek tawh zong ki‑it kei ni. Sepkhiat bawlkhiatna le thuman thutak tawh ki‑it ni. ¹⁹ Hih thu hangin thuman thutak tawh a kipawl i hihna thei in, ama mai ah lungmuang in i om ding hi. ²⁰ Banghang hiam cihleh i lungsim in hong mawhsak leh i lungsim sangin Pasian lianzaw a, amah in na khempeuh a thei hi. ²¹ Kong itte aw, i lungsim in hong mawhsak kei leh Pasian mai ah lungmuanna i nei hi. ²² Ama hong thupiakte zui in ama mai ah ama lungdam nading i sep leh ama tung pan i nget peuhpeuh i ngah ding hi. ²³ Ama hong thupiak in hih ahi hi. Ama hong thupiak mah bangin ama Tapa Zeisu Khazih min i up ding le khat le khat i ki‑it ding thu ahi hi. ²⁴ Tu in ama hong thupiakte a zui mi in ama sungah oma amah zong tua mi sungah a om hi. Amah in eite sungah hong om hi cih thu ama hong piak Kha hangin i thei hi.

¹ Kong itte aw, kha khempeuh um kei un. Khate in Pasian kiang pan ahi hiam ahi kei hiam sittel un. Banghang hiam cihleh zuaugen kamsang tampi leitung ah hong paikhia khinzo hi. ² Pasian Kha na theih nading uh hih bang ahi hi. Zeisu Khazih mihing in hong piang hi ci in a pulak kha khempeuh Pasian kha hi a, ³ a pulaklo kha khempeuh Pasian kha ahi kei hi. Tua kha in hong piang ding hi ci a, na zak khitsa bangun tu in leitung ah a om khinzo anti‑khazih kha ahi hi. ⁴ Ka taneute aw, note in Pasian mite na hi uh a, tua khate na zozo uh hi. Banghang hiam cihleh note sunga a ompa in leitung a a ompa sangin a lianzaw hi. ⁵ Amaute in leitung mi ahih manun leitung thu gen uh a, leitung mite in zong amaute thu a ngai uh hi. ⁶ Eite in Pasian mi i hi hi. Pasian a thei mite in eite thugen ngai uh a, Pasian mi a hilote in eite thugen a ngai kei uh hi. Hih bangin a maan kha le a maanlo kha i khentel thei hi. ⁷ Kong itte aw, khat le khat ki‑it ni. Banghang hiam cihleh ki‑itna in Pasian kiang pan ahi hi. Itna a nei mi in Pasian kiang pana piang hi a, amah in Pasian a thei hi. ⁸ Itna a neilo mi in Pasian a thei kei hi. Banghang hiam cihleh Pasian in ki‑itna ahi hi. ⁹ Ama hangin i nuntak theih nadingin Pasian in khat bek a neih a Tapa leitung ah a hong sawlna tawh Pasian in eite hong itna a hong lakzo hi. ¹⁰ Eite in Pasian i it man hilo in Pasian in eite hong it manin i mawhnate thoihdam nadingin a Tapa hong sawlna in a hong itna ahi hi. ¹¹ Kong itte aw, Pasian in hihzahtak in eite hong it ahih leh eite zong khat le khat i ki‑it ding a kilawm hi. ¹² Kuamah in Pasian a mu ngei kei hi. Ahi zongin eite khat le khat i ki‑it leh eite sungah Pasian hong omin, eite sungah ama itna a hong picingsak hi. ¹³ Ama Kha eite hong pia khinzo ahih manin ama sungah eite i om a, eite sungah amah a hong om hi cih thu i thei hi. ¹⁴ Pa in leitung mite Honpa dinga a hong sawl a Tapa ka mu zo uh a, ama thu teci ka pang uh hi. ¹⁵ Zeisu in Pasian Tapa hi ci in a pulak mi peuhmah sungah Pasian om a, tua mi zong Pasian sungah a om hi. ¹⁶ Pasian in eite hong itna eite in thei in i umzo hi. Pasian in itna ahi hi. Itna sunga a om mi in Pasian sungah a om hi a, Pasian zong tua mi sungah a om hi. ¹⁷ Leitung ah amah bangin nungta in thukhen ni ciangin hangtak a i om theih nadingin amah in itna sungah eite hong picingsak hi. ¹⁸ Itna sungah launa a om kei hi. A cingtak itna in launa a beisak hi. Banghang hiam cihleh launa in gawt ding kihtakna hi a, a lau mi in itna cingtak a neilo ahi hi. ¹⁹ Amah in eite hong it masa ahih manin eite in amah i it hi. ²⁰ Mi khatpeuh in, “Pasian ka it hi,” a cih hangin a sanggampa a muhdah leh zuaugen ahi hi. Banghang hiam cihleh a muh theih a sanggampa a itlo mi in a muh theihloh Pasian bangci it theih ding ahi hiam? ²¹ Pasian a it mi in a sanggampa zong a it hi cih thupiakna ama tung panin i ngah hi.

¹ Zeisu in Khazih ahi hi, ci in a um mi peuhmah in Pasian kiang pana piang ahi hi. A Piangsakpa a it mi in a piansak mi zong a it hi. ² Pasian it in ama hong thupiakte i zuih ciangin Pasian tate a it i hihlam i kithei hi. ³ Banghang hiam cihleh Pasian in a hong it manin a thupiakte a zui i hi hi. Ama hong thupiakte zong a zuihhak ahi kei hi. ⁴ Pasian kiang pana piang mi peuhmah in leitung a zo khin ahi hi. Eite upna in leitung a zo gualzawhna ahi hi. ⁵ Zeisu in Pasian Tapa ahi hi, ci in a um mi simloh leitung a zo mi kua om ahi hiam? ⁶ Tui le sisan tawh a hong paipa in Zeisu Khazih ahi hi. Tui bek tawh hilo in tui le sisan tawh amah a hong pai hi. Hih thu teci a pangpa in Kha ahi hi. Banghang hiam cihleh Kha in thuman thutak ahi hi. ⁷ Banghang hiam cihleh vantung ah teci a pang thum om a, tuate in Pa, Thu, le Kha Siangtho ahi hi. Hih thumte in pumkhat ahi hi. ⁸ Leitung ah zong teci a pang thum mah a om hi. Tuate in Kha, tui, le sisan hi a, hih thumteng in thukhat in a luang uh hi. ⁹ Eite in mite teci panna sang i hih leh Pasian teci panna in a lianzawtham hi. Banghang hiam cihleh hih in Pasian in a Tapa thu teci a panna hang ahi hi. ¹⁰ Pasian Tapa a um mi in ama lungsim sungah tua teci panna a nei hi. Pasian a umlo mi in Pasian in a Tapa thu teci a panna um lo ahih manin Pasian zuaugen a suaksak hi. ¹¹ Tua teci panna in Pasian in nuntak tawntungna hong pia a, tua nuntakna in Tapa sungah a om hi. ¹² Tapa a nei mi in nuntakna a nei hi. Pasian Tapa a neilo mi in nuntakna a nei kei hi. ¹³ Pasian Tapa min a um note in nuntak tawntungna na neih lam uh na theih nading uh le Pasian Tapa min na upsuak theih nadingun hih thute kong gelhzo hi. ¹⁴ Tu in ama deihna tawh kituak in na khat peuhpeuh i nget leh amah in i ngetna hong za hi cih lungmuanna ama sungah i nei hi. ¹⁵ Amah in i nget peuhpeuh hong za hi cih i theih leh ama tung pana i nget peuhpeuh i ngah ding hi cih zong i thei hi. ¹⁶ A sanggam khatin sih nading a hilo mawhna khatpeuh bawl hi cih mi khatin a theih leh thungetsak hen. Sih nading a hilo mawhna a bawl mi, Pasian in a nungtasak ding hi. Sih nading mawhna a om hi. Tua bang mawhna a bawl mite aa dingin thungetsak hen hong ci ka hi kei hi. ¹⁷ Thumanlo gamtatna khempeuh in mawhna hi a, ahi zongin sih nading a hilo mawhna a om hi. ¹⁸ Pasian kiang panin a piang mi in mawhna a bawl kei hi cih i thei hi. Pasian kiang panin a piang mi in amah le amah kikem ahih manin gilopa in a khoih kei hi. ¹⁹ Eite in Pasian tate i hihlam i kithei a, leitung buppi ahih leh gilopa khutnuai‑a om ahihlam i thei hi. ²⁰ Pasian Tapa hong paizo a, Pasian taktak i theih nadingin pilna hong pia zo hi cih zong i thei hi. Eite in Pasian taktak ahi, ama Tapa Zeisu Khazih sungah i om hi. Zeisu Khazih in Pasian taktak le nuntak tawntungna ahi hi. ²¹ Ka taneute aw, milimte panin na kikem un. Amen.