1 CORINTH-TE

1 CORINTH-TE

¹ Pasian deihna banga Zeisu Khazih sawltak dinga hong kisam keimah Paul le i sanggampa Sosthenes in, ² Khazih Zeisu sunga a kisiangthosak, misiangthote ci a, kisam Corinth khua‑a om Pasian pawlpi le mun khempeuh a om i Topa Zeisu Khazih min a belte kiangah lai kong khak uh hi. Tua Topa Zeisu Khazih in amaute le eite Topa ahi hi. ³ I Pa Pasian le Topa Zeisu Khazih kiang pana hehpihna thupha le lungnopna note tungah om tahen. ⁴ Pasian hehpihna thupha note tungah Khazih Zeisu tungtawn in hong kipia zo ahih manin note hangin Pasian tungah ka lungdam tawntung hi. ⁵ Banghang hiam cihleh thugen siamna le thutheihna a kipan na khempeuh ah note hong kicingsak zo hi. ⁶ Tua in, Khazih thu teci ka panna uh note sungah a kikipsakna ahi hi. ⁷ Tua ahih manin Topa Zeisu Khazih hong kilat ding lawptak a na ngak sungun kha letsong khat zong na tasam kei uh hi. ⁸ I Topa Zeisu Khazih ni ciangin kawkbanna na neih loh nadingun amah in a tawp dongin hong kipsak ding hi. ⁹ Ama Tapa, i Topa Zeisu Khazih tawh a kipawlkhawm dinga note hong sampa in a citak Pasian ahi hi. ¹⁰ Sanggamte aw, tu in i Topa Zeisu Khazih min a kong thumnop in ah note sungah pawl kikhenna a om loh nadingin na vekpi un kithu khatin thugen un. Lungsim kibang, ngaihsutna kibang in hoihtak in kipumkhat un. ¹¹ Sanggamte aw, note lakah kilemlohna om hi ci in Chloe innkuanpihte in hong gen uh hi. ¹² Tu in kong gen in ah, note lakah mi khat in, “Kei Paul pawl ka hi hi,” ci in, a dang khat in, “Kei Apollos pawl ka hi hi,” na ci uh hi. A dang khat in, “Kei Cephas pawl ka hi hi,” ci in, a dang khat in, “Kei Khazih pawl ka hi hi,” na ci uh hi. ¹³ Khazih kiphelkhap thei ahi hiam? Note aa dingin Paul kikhailum ahi hiam? Ahih keileh Paul min tawh tui kiphum na hi uh hiam? ¹⁴ Crispus le Gaius longal note lakah khat beek tui kong phum loh manin Pasian tungah ka lungdam hi. ¹⁵ Banghang hiam cihleh note lakah khatpeuh in, Paul min tawh tuiphumna ka ngah hi ci a, na gen khakloh nading uh ahi hi. ¹⁶ Hi hi, Stephanas‑te innkuan zong ka tuiphum a, tualo midang ka tuiphum lam ka thei kei hi. ¹⁷ Banghang hiam cihleh Khazih in tuiphum dingin kei hong sawl lo a, lungdamna thu a tangko ding bekin hong sawl ahi hi. Khazih singlamteh vangliatna a mawkna a suah loh nadingin lungdamna thu ka tangko ciangin mihing pilna kammalte zangin ka gen kei hi. ¹⁸ Banghang hiam cihleh singlamteh thu in thu‑umlo mite aa dingin a haihuai thu ahi hi. Ahi zongin hotkhiatna a ngah eite aa dingin Pasian vangliatna ahi hi. ¹⁹ Lai Siangtho sungah, “Mipilte pilna ka susia dinga, Miteite thutheihna bangmah lo ka suah ding hi,” ci in a kigelh hi. ²⁰ Mipil koi ah om ahi hiam? Thukhamhilh sia koi ah om ahi hiam? Hih leitung ah thuthuk thei koi ah om ahi hiam? Pasian in hih leitung pilna teng haina suaksak khin hilo ahi hiam? ²¹ Leitung mite in amaute pilna tawh Pasian a thei zo kei uh hi. Tua ahih manin Pasian in ama pilna tawh kizui in a haihuai thuhilhna tungtawn in a um mite in hotkhiatna a ngah ding pen Pasian lungkimna ahi hi. ²² Judah mite in nalamdang kal uh a, Greek mite in pilna a zong uh hi. ²³ Ahih hangin kote in a kikhailum Khazih thu ka hilh uh hi. Amah in Judah mite aa dingin kipalkhakna suak a, Greek mite aa dingin haina a suak hi. ²⁴ Ahih hangin Judah mi ahi a, Greek mi ahi zongin Pasian in a sapsa mite aa dingin Khazih in Pasian vangliatna le Pasian pilna ahi hi. ²⁵ Banghang hiam cihleh Pasian haina in mihingte pil penna sangin pil zaw lai a, ama thanemna zong mihing hat penna sangin a hat zaw hi. ²⁶ Sanggamte aw, Pasian in note hong saplai a na omzia uh na lungngai un. Mite muhna ah a pil, mite tunga thunei le mi thupi tampi na om kei uh hi. ²⁷ Ahih hangin Pasian in mipilte a maizumsak nadingin leitung a a haihuai nate a teel hi. Pasian in a thahatte a maizumsak nadingin a thanem leitung nate a teel hi. ²⁸ Leitung in thupi a sakte a suksiat nadingin a kineumuh le a kisimmawh hih leitung nate Pasian in a teel hi. ²⁹ Tua in, Pasian mai ah kuamah a kisialh theihloh nading ahi hi. ³⁰ Ama hangin Khazih Zeisu sungah om na hih manun amah in eite aa dingin Pasian hong piak pilna, dikna, sianthona le tatkhiatna a hong suakzo hi. ³¹ Tua hi a, Lai Siangtho sungah, “A kisial mi in Topa hang bekin kisial tahen,” ci in a kigelh hi.

¹ Sanggamte aw, Pasian teci panna thu tangko a note kiangah kong pailai in thugen siamna ahi a, pilna ahi zongin ka suang kei hi. ² Note laka kong om sungin a kikhailum Zeisu Khazih longal thudang bangmah a thei lo dingin ka lungsim ka khentat a, ³ thanemna, launa le patauhna tawh ka om hi. ⁴ Ka thuhilh, ka thugennate ah zong mihing pilna tawh kuamah ka zol kei hi. Ahih hangin Kha le vangliatna a kilatkhiat nadingin ka gen hi. ⁵ Tua hi a, note upna in mihingte pilna ah kinga loin Pasian vangliatna ah a kingak theih nading ahi hi. ⁶ Ahih hangin a picingsa mite tungah thu ka gen uh ciangin pilna tawh ka gen uh hi. Tua nangawn zong a maimang ding tulai mite pilna le tulai makaite pilnate ahi kei hi. ⁷ Kote ka hih uh leh eite minthan nadinga Pasian in leitung pianma in a sehkholhsa, a ki‑iimcip Pasian pilna thuthukpi a gen ka hi uh hi. ⁸ Tulai makaite khat beekin tua pilna a thei kei uh hi. Thei uh hi leh minthang Topa a khailum kei ding uh hi. ⁹ Lai Siangtho sungah, “Pasian in amah a it mite aa dingin A bawlkholhsa nate in Mittang tawh kimu ngeilo, Bil tawh zong a kiza ngeilo, Mihingte lungsim sungah zong, A om ngeilote ahi hi,” ci in a kigelh hi. ¹⁰ Ahih hangin Pasian in ama Kha tungtawn in tua nate eite hong lakzo hi. Kha in na khempeuh zongtel a, Pasian thu thukpite nangawn hong telsak hi. ¹¹ Mi khat sunga om ama lungsim longal tua mi lungsim a thei kua om ahi hiam? Tuamah bangin Pasian Kha simloh Pasian lungsim a thei kua om ahi hiam? ¹² Tu in Pasian in a khawnkhong a hong piakte i theih theih nadingin leitung kha a ngah i hi kei a, Pasian hong piak Kha a ngah i hi hi. ¹³ Hih thute ka gen uh ciangin mihing pilna tawh ka gen kei uh hi. Kha Siangtho in hong hilh bang bekin ka gen uh a, Khalam thute kha thu mah tawh ka hilhcian uh hi. ¹⁴ Ahi zongin leitung lungsim a nei mi in Pasian Kha thute haihuaisa ahih manin a sang kei hi. Tua thute kha bek tawh kikhentel thei ahih manin amah in a theitel zo kei hi. ¹⁵ Ahih hangin a khami pa in na khempeuh khentel thei a, amah ahih leh kuamah in a khentel thei kei hi. ¹⁶ Banghang hiam cihleh, “kua in Topa lungsim thei a, kua in amah thuhilh thei ding ahi hiam?” Eite in Khazih lungsim i nei hi.

¹ Sanggamte aw, kha mite tunga thugen bangin note tungah thu kong gen thei kei hi. Ahi zongin Khazih sungah naungek tawh a kibang, sa mite tunga thugen bangin kong gen hi. ² Banghang hiam cihleh note in sa mi na hih manun anham na ne zo nai kei uh a, nawizu tawh kong vak hi. Banghang hiam cihleh tu ciangdong anham na hai zo nai kei uh a, tu nangawn in zong na ne zo kei uh hi. ³ Tua ahih manin note lakah kihazatna, kitot kiselna le kipawl khenna a om laiteng sa mite bangin a gamta hilo na hi uh hiam? ⁴ Note lakah mi khat in, “Paul pawl ka hi hi,” ci in, a dang khat in, “Apollos pawl ka hi hi,” na cih uh ciangin a sa mi lai hilo na hi uh hiam? ⁵ Tua ahih ciangin Paul kua hi a, Apollos kua ahi hiam? Note in amaute tungtawn in na up theih nadingun Topa in mi khat ciat tunga a sehsak bangin nasemte hilo ahi uh hiam? ⁶ Keimah in ka suan a, Apollos in tui buakin Pasian in a khangsak hi. ⁷ Tua ahih manin a suanpa ahi a, tuibuakpa ahi zongin bangmah a thupi hilo in a khangsakpa ahi Pasian bek a thupi ahi hi. ⁸ Tu in a suanpa le tui a buakpa in pumkhat ahi uh hi. Mi khatpeuh in ama sepna tawh kizui in thaman a ngah ding hi. ⁹ Kote in Pasian tawh ma a pangkhawmte ka hi uh a, note in Pasian huan le Pasian inn na hi uh hi. ¹⁰ Pasian hong piak hehpihna thupha tawh kizui in innlam siampa bangin khuambul ka phut khinzo a, midangte in tua tungah a lam uh hi. Ahi zongin a lam mi peuhpeuh in bangci lam ahi hiam cih limtak in ngaihsun hen. ¹¹ A kiphut khinsa khuambul ahi Zeisu Khazih longal khuambul dang kuamah in a phut thei kei hi. ¹² Tu in mi khatpeuh in tua khuambul tungah kham ahi a, ngun ahi a, suangmanpha ahi a, sing ahi a, lopa ahi a, buhtu ahi zongin a lam leh, ¹³ amaute nasepna ciat hong kilangkhia ding hi. Banghang hiam cihleh tua Ni ciangin amaute nasepna ciat meikuang tawh kilangsak dinga, mi khat ciat nasepna bangci nam hiam cih meikuang tawh a kisittel ding hi. ¹⁴ Mi khatin tua khuambul tunga a lamsa a sepna a kattum kei leh sepna thaman a ngah ding hi. ¹⁵ Mi khat nasepna a kattum leh thaman tan dinga, amah ahih leh meikuang tawh kipelh in hotkhiatna a ngah ding hi. ¹⁶ Note in Pasian biakinnpi na hi uh a, note sungah Pasian Kha a teen lam thei lo na hi uh hiam? ¹⁷ Mi khatpeuh in Pasian biakinnpi a nitsak leh Pasian in tua mi a susia ding hi. Banghang hiam cihleh Pasian biakinnpi siangtho a, note in tua biakinnpi na hi uh hi. ¹⁸ Mi khatpeuh amah le amah kikhem kei hen. Hih leitung a om mi khatpeuh in note lakah pil a kisak leh, a piltakpi ahih theih nadingin mihai suakphot hen. ¹⁹ Leitung pilna in Pasian aa dingin haina ahi hi. Lai Siangtho sungah, “Pasian in mipilte amau zuausiamna mah tawh a man hi,” ci in kigelh hi. ²⁰ Tua thamlo in, “Topa in mipilte ngaihsutna thei a, tuate a mawknapi ahihlam a thei hi,” ci in kigelh hi. ²¹ Tua ahih ciangin kuamah in mihingte hangin kiphasak kei hen. Banghang hiam cihleh na khempeuh note aa ahi hi. ²² Paul a kipan Apollos le Cephas‑te, leitung ahi a, nuntakna le sihna ahi a, tu laitak a om nate, a hong pianglai ding nate ahi zongin na khempeuh note aa ahi hi. ²³ Note in Khazih aa na hi uh a, Khazih in Pasian aa ahi hi.

¹ Tua ahih manin mite in kote Khazih nasemte le Pasian thusim a kemte bangin hong ngaihsun uh hen. ² Tua hi a, neihsa kemte in mi muanhuai ahih ding uh kisam hi. ³ Note na hi uh a, leitung thukhente ahi zongin kei tungah thu na hong khen ding uh kei aa dingin thu neuno khat ahi hi. A taktak in cileng kei le kei nangawn thu ka kikhen kei hi. ⁴ Ka lungsim tawngah bangmah kisuanna ka thei kei hi. Ahi zongin tua in kei dik hong tangsak ahi kei hi. Kei tunga thu hong khenpa in Topa ahi hi. ⁵ Tua ahih ciangin a hun a tunma in bangmah thu khen kei unla, Topa hong pai dong ngak un. Amah in khuamial sunga a kisel nate le mihingte lungsim sunga a tup a gelte uh a lakkhia ding hi. Tua hun ciangin mi khat ciatin Pasian kiang panin phatna a ngah ding uh hi. ⁶ Sanggamte aw, tu in note phattuam nadingin hih thute Apollos le keima tungah kibulh in hong genteh ka hi hi. Tua in a kigelh zah valkan in na ngaihsut loh nadingun ko tung panin na sin theih nading uh ahi hi. Tua hi leh mi khat hangin kisathei in midang khatpeuh na simmawh kha kei ding uh hi. ⁷ Midangte tawh hong kilamdangsak kua ahi hiam? Hong kipia lopi a na ngah uh bang om ahi hiam? Tu in hong pia a om man bekin na ngah uh hi napi banghang in a ngah lo bangin kisathei na hi uh hiam? ⁸ Tu in na deih khempeuh uh na nei khin uh a, na hau khin uh hi! Kote tawh loin kumpite bangin na maang khin uh hi. Kote zong note tawh ka maankhop theih nadingun note kumpi bangin a maang taktak na hih ding uh kong deihsak hi! ⁹ Pasian in ko sawltakte pen thah dinga thu kikhen khinsa mite lak panin a kithat nunung pen dingin a kikoihte tawh hong kibangsak hi. Banghang hiam cihleh vantungmite le mihingte in leitung ah pawi‑et banga hong et dingun hong kibawl zo hi ci in ka ngaihsun hi. ¹⁰ Kote in Khazih aa dingin mihai ka suah uh hangin note Khazih sungah mipil na suak uh hi! Kote ka thanem uh hangin note na thakhauh uh hi! Note hong kipahtawi hangin kote hong kisimmawh hi! ¹¹ Tudong mahin gilkial dangtak in ka om uh a, puansilh gina zong ka nei kei uh hi. Mite vuak ka thuak uh a, teen nading inn takpi zong ka nei kei uh hi. ¹² Komau khut tawh nakpi in na ka sem uh hi. A hong kizahko ciangin thupha ka pia uh a, a hong kibawlsiat ciangin ka thuak keikai uh hi. ¹³ A hong kigensiat ciangin kamkhum tawh ka thuk uh hi. Leitung nin bangin kote hong kibawl a, tuni ciangdong mun khempeuh pana kikhawm nin lompi bangin a hong kibawl hi. ¹⁴ Hih thute note maizum nadingin a hong gelh ka hi kei hi. Ka it ka tate banga thu hong hilh ka hi zaw hi. ¹⁵ Khazih thu hong hilh ding sia 10,000 bang na nei uh zongin pa tampi na nei kei uh hi. Lungdamna thu hangin Khazih Zeisu sungah note pa ka suakzo hi. ¹⁶ Tua ahih manin keima gamtat bangin gamta un ci in kong hanthawn hi. ¹⁷ Hih thu hangin Topa sunga a muanhuai ka it ka tapa Timothy kong paisak hi. Pawlpi omna mun khempeuh ah ka gen bangin Khazih sunga keima nuntakzia teng amah in a hong phawksakkik ding hi. ¹⁸ Tu in note kiangah kei hong pai lo ding sa in mi pawlkhat na kiphasak uh hi. ¹⁹ Topa in hong awi leh a sawtlo in kong pai dinga, tua a kiphasak mite thugente bek hilo in bang hihtheihna nei uh hiam cih zong ka theikhia ding hi. ²⁰ Banghang hiam cihleh Pasian kumpigam in a thu bek hilo in vangliatna hi zaw hi. ²¹ Ciangduai tawh kong pai ding le itna le lungnemna tawh kong pai ding koi ut zaw na hi uh hiam?

¹ Note lakah numei pasal thangtatna om bekthamlo in Gentile‑te lak nangawn ah a kiza ngeilo a pa zi a teenpih mi bang na om tazen uh hi, ci in hong kigen hi. ² Tua bang mawhna a bawl mipa khasiat pipi mahin note lak pan na hawlkhiat ding uh hi napi na kisialhpih zawsop uh hi. ³ Ka pumpi tawh note lakah kong om loh hangin ka kha tawh kong om veve hi. Tua ahih manin ka pumpi a hong om mah bangin mawhna a bawl tua pa tungah hih bangin thu ka khen hi. ⁴ I Topa Zeisu Khazih minin na kikhop uh ciangin i Topa Zeisu Khazih vangliatna le keima kha in note hong ompih hi. ⁵ Tua mipa pumpi a kisiat nadingin Satan khutah na pia un. Tua hi leh Topa Zeisu Ni ciangin a kha in hotkhiatna a ngah kha ding hi. ⁶ Na kisialhna uh a hoih kei hi. Silngo tawmno khatin annel lompi tawk thei hi cih thu thei lo na hi uh hiam? ⁷ Silngo sawhloh annel thak na hih manun silngo lui teng paikhia un. Banghang hiam cihleh eite Paisan Tuuno ahi Khazih in eite tangin a kigo zo hi. ⁸ Tua ahih ciangin siatna le gitlohna ahi silngo lui tawh Paisan Pawi bawl loin, silngo sawhloh anlum lungsim takpi le thutak tawh pawi bawl ni. ⁹ Numei pasal vai ah a thangtat mite tawh na kikhawl kei un, ci in lai kong khakzo hi. ¹⁰ Tua bang ka cih ciangin hih leitung a numei pasal thangtatte, a huaihamte, mi neihsa a sutte, milim a biate tawh kikhawl kei un kong cihna hilo hi. Tua bang hi leh leitung panin na paikhiat uh a kul ding hi. ¹¹ Tu‑a kong gelh pen thu‑um mi khat kici napi numei pasal mawhna a bawl mi ahi a, a huaiham mi ahi a, milim a bia mi ahi a, midang a gensia mi ahi a, zukham mi ahi a, mi neihsa a sut mi tawh ahi zongin kikhawl kei unla, an nangawn nekhawm kei un a ci ka hi zaw hi. ¹² Pawlpi pualam mite tunga thukhen ding pen kei tawh bang kisai ahi hiam? Pawlpi sunga mite tungah thu a khen ding note hilo na hi uh hiam? ¹³ A pualam mite tungah Pasian in thu a khen ding hi. Tua ahih ciangin “tua a gamtatsia mipa note lak panin hawlkhia un.”

¹ Note khat le khat thu na kineih uh ciangin misiangthote mai ah kitun loin thumanlote zumah kitun ngam tazen na hi uh hiam? ² Misiangthote in leitung mite tungah thukhen ding ahihlam thei lo na hi uh hiam? Leitung mite tunga thukhen dingte na hih uh leh thuneupente khen theilo zawzen na hi uh hiam? ³ Eite in vantungmite tungah thu a khen ding i hihlam thei lo na hi uh hiam? Tua ahih manin hih leitung nuntakna tawh kipawl thute i khen ding kilawm zawtham hilo ahi hiam? ⁴ Hih leitung nuntakna tawh kisai thute khen ding na neih uh ciangin pawlpi sunga a kineumuh tatate seh zawsop ding na hi uh hiam? ⁵ Na maizum nadingun hih banga kong cih ahi hi. Note lakah mipil om lo na hi uh hiam? A sanggamte kikal thu a khensak thei ding mipil khat beek om lo na hi uh hiam? ⁶ Tu in sanggam khat le khat thu kinei in thu‑umlo mite mai ah na kikhia tazen uh hi! ⁷ Tua banga khat le khat na kikhiatna uh zong guallelhna ahi khinzo hi. Banghang in a khial tang zaw loin supna thuak zaw mailo na hi uh hiam? ⁸ Na tua cih uh cih thadah sanggam khat le khat a hilopi in kibawl in na neihsa uh na kilaksak tazen uh hi! ⁹ Mi thumanlote in Pasian kumpigam luah theilo ding ahihlam thei lo na hi uh hiam? Mite khemsa in om kei un. Numei pasal mawhna a bawlte, milim a biate, angkawmte, pasal le pasal a mawhte, numei le numei a mawhte, ¹⁰ gutate, a huaihamte, zukhamte, mi a gensiate, mi neihsa a sutte in Pasian kumpigam a luah kei ding uh hi. ¹¹ Nidang lai in note pawlkhat tua bang mi na hi uh a, ahi zongin tu in Pasian in hong sawpsiang in hong siansuah zo a, Topa Zeisu min le i Pasian Kha hangin dik hong tangsak zo hi. ¹² Na khempeuh hih theih nading thu ka ngah hangin na khempeuh in phattuamna hong pia lo hi. Na khempeuh ka hih theih hangin tuate khatpeuh sila ka kisuaksak kei ding hi. ¹³ An in gilpi aa ding hi a, gilpi zong an aa ding ahih hangin Pasian in tuate a nihin a susia ding hi. Tu in pumpi in numei pasal thangtat nading hilo in Topa aa ding hi a, Topa zong pumpi aa ding ahi hi. ¹⁴ Pasian in misite lak panin Topa thokiksak zo a, eite zong ama vangliatna tawh hong thokiksak ding hi. ¹⁵ Note in Khazih pumpi nate na hih lam uh kithei lo na hi uh hiam? Khazih pumpi nate la in numei kizuakte pumpi tawh pumkhat suaksak ding ka hi hiam? Ka suaksak peuhmah kei ding hi! ¹⁶ Numei kizuak tawh a mawh mi in tua numei tawh pumkhat sakhat a suah lam thei lo na hi uh hiam? Banghang hiam cihleh amah in, “Amaute gel pumkhat sakhat a suak ding uh hi,” a ci hi. ¹⁷ Ahih hangin Topa tawh a kizom mi in Topa tawh lungsim khat a suakkhawm hi. ¹⁸ Numei pasal thangtatna na taisan un. Mi khatin a bawl a dang mawhna khempeuh ama pumpi pualam hi a, ahi zongin numei pasal thangtatna a bawl mi in ama pumpi tungah a mawh ahi hi. ¹⁹ Note pumpi in note sunga om Pasian hong piak Kha Siangtho teenna biakinnpi hi a, note aa ahih loh lam thei lo na hi uh hiam? ²⁰ Note in man tawh a kilei khinsa na hih manun Pasian aa ahi na pumpi uh le na kha uh tawh Pasian min thangsak un.

¹ Tu in nong laikhak uh tawh kisai thute kong gen ding hi. Pasal in zi a neih loh ding a hoihpen ahi hi. ² Ahi zongin numei pasal thangtatna a pian loh nadingin pasal khatin zi khat bek nei henla, numei khatin zong pasal khat bek mah nei zaw hen. ³ Pasal in nupa hihna tawh a zi tungah a bawl ding bangin bawl henla, zi in zong a pasal tungah tuamah bangin bawl tahen. ⁴ Zi in ama pumpi a ut bangin a zat ding hilo in a pasal zat ding ahi hi. Tuamah bangin pasal in zong ama pumpi a ut bangin a zat ding hilo in a zi zat ding ahi hi. ⁵ Antanna le thungetna nei dingin hun tomkal sung kithukim a na kitan lohngal uh nupa omkhop ding na kinial kei un. Pumpi na ki‑uk zawh loh manun Satan in mawhna ah hong zol kha ding ahih manin lumkhawmkik un. ⁶ Ahi zongin hih thute thupiak hilo in keima hoihsak thu a hong gen ka hi hi. ⁷ Banghang hiam cihleh mi khempeuh keima om bangin om le uh ka deih pen hi. Ahi zongin Pasian in hihzawhna letsong a tuamciat hong piak hi a, khat le khat kibang lo hi. ⁸ Ahih hangin kiteenpih a nei nailote le meigongte tunga kong gen in ah keimah bangin om le uh cin note aa dingin a hoih zaw hi. ⁹ Ahi zongin a pumpi uh a ki‑uk zawh kei ding uh leh kiteenpih nei uh hen. Banghang hiam cihleh pumpi ki‑uk zolo in a om uh sangin kiteenpih a neih ding uh a hoih zaw hi. ¹⁰ Tu in, kiteenpih a nei khinsate tawh kisai in keima hong thupiak hilo Topa hong thupiakna in, zi in a pasal ciahsan kei hen. ¹¹ A ciahsan leh zong pasal dang nei nawn kei hen. Ahih keileh a pasal tawh kilemkik hen. Pasal in zong a zi ma kei hen. ¹² Ahih hangin Topa ahi lo, ken a dangte tunga kong gen in ah sanggampa khatin thu‑umlo zi a neiha, a zi in amah tawh teenkhop ding a ut nak leh ma kei hen. ¹³ Tuamah bangin numei khatin thu‑umlo pasal a neiha, a pasal in amah tawh teenkhop ding a ut nak leh ma kei hen. ¹⁴ Banghang hiam cihleh a zi hangin thu‑umlo a pasal siangtho a, a pasal hangin thu‑umlo a zi zong a siangtho veve hi. Tua bang hi kei leh na tate uh siangtholo dinga, ahi zongin tu in ahih leh amaute a siangtho uh hi. ¹⁵ Ahi zongin thu‑umlo pen a paikhiat nop leh paikhia hen. Hih thu hangin thu‑um sanggampa ahi a, sanggamnu ahi zongin, bangmah in a khih kei hi. Ahih hangin Pasian in eite a kilem dinga hong sap ahi hi. ¹⁶ Zi aw, na pasal na hot theih ding le na hot theihloh ding bang thei na hi hiam? Pasal aw, na zi na hot theih ding le na hot theihloh ding bang thei na hi hiam? ¹⁷ Ahih hangin Pasian in mi khat ciat tungah a hong piakna le Topa in a hong sapna bang ciatin gamta uh hen. Hih bangin pawlpi khempeuh in a zuih dingin hih thu ka pia hi. ¹⁸ Pasian in vunat mi ahih laitak a a sap ahih leh vunatloh mi suak kei hen. Vunatlo mi ahih laitak a a sap ahih leh vunat mi suak kei hen. ¹⁹ Vunatna le atlohna a thupi hilo in Pasian thupiakte zuihna bek a thupi ahi hi. ²⁰ Pasian in a hong sap laitak a na om bangbang un omciat un. ²¹ Sila na hih laitak in Pasian in hong sam ahi hiam? Hih thu patauhna in nei kei in. Ahih hangin suahtakna na ngah theih leh na suahtakna zatsiam in. ²² Banghang hiam cihleh mi khat sila ahih laitak in Topa in a sap leh Topa aa dingin a suakta mi ahi hi. Tuamah bangin mi suakta ahih laitak a sapna a ngah mi in Khazih sila ahi hi. ²³ Note in man tawh a kilei khinsa na hih manun mihingte silate suak kei un. ²⁴ Sanggamte aw, Pasian in hong sap laitak a na om bangbang un omsuak un. ²⁵ Tu in kitenpih a neilote tawh kisai in Topa thupiakna ka ngah kei hi. Ahi zongin Topa hong hehpihna tawh mi muanhuai khat ka hihna tawh kizui in thukhenna kong pia hi. ²⁶ Tua ahih manin tuhun haksatna hangin pasal in ama om bangbang in a omsuak ding hoih ka sazaw hi. ²⁷ Zi nei khin na hih leh zi neilo a om ding sawm kei in. Zi nei nailo na hih leh zi zong kei in. ²⁸ Ahi zongin zi na neih leh mawhna hilo a, nungak in zong pasal a neih leh mawhna ahi kei hi. Ahi zongin zi nei pasal neite in pumpi haksatna tampi thuak ding uh ahih manin tuate tawh na kipelh ding uh kong deihsak zaw hi. ²⁹ Ahi zongin sanggamte aw, a hun tom ahih manin tu a kipan in zi neite in zi neilo bangin, ³⁰ a kapte a kaplo bangin, a lungdamte a lungdamlo bangin, van a leite zong bangmah a neilo bangin om uh henla, ³¹ hih leitung nate a zang mi in zangkhial kei hen. Banghang hiam cihleh hih leitung nate a beibeita ahi hi. ³² Ahi zongin lung hihmawhna a tamluat ding kong deihsak kei hi. Zi a neilo mi in Topa a lungdamsak nadingin Topa tawh kisai nate bek a buaipih hi. ³³ Ahih hangin zi a nei mi in a zi lungdamsak nuam ahih manin leitung nate a buaipih hi. ³⁴ Pasal a nei numei le nungak in a kilamdang hi. Pasal a neilo numei in ama pumpi le a lungsim siangthosak in Topa tawh kisai nate bek a buaipih hi. Ahih hangin pasal a nei numei in a pasal lungdamsak nuam ahih manin leitung nate a buaipih hi. ³⁵ Hih thute note phattuam nadingin kong gen hi a, kong thangsiahna hilo hi. A hong lehkaih bangmah om loin Topa na nasep theih nadingun a hoih ding thu a hong gen ka hi hi. ³⁶ Mi khatin a tanu nungakpi in a omsak ding khial kisa a, a teenpih nuam mi a om leh ama hoihsak bangin hih hen. Bangmah khialhna a om kei hi. Kiteengsak hen. ³⁷ Ahi zongin lungsimkip nei a, kul salo in a hihnop bang a hih theih nading thu nei a, ama tanu limtak in kemzo ning ci in a lungsim sungah khentatna a nei mi in a hoih a gamta ahi hi. ³⁸ Tua ahih manin, a ta nungak siangtho mi zi dingin a piakhiapa in thuhoih a bawl hi a, a teengsak lopa in thuhoih zaw a bawl ahi hi. ³⁹ Numei khat a pasal a nuntak laiteng thukham in a pasal tawh a khihkhawm hi. Ahih hangin a pasal a sih leh ama hoihsak pasal dang khat tawh kiteenkik theih nading suahtakna a nei hi a, Topa sunga om mi bek tawh kiteeng hen. ⁴⁰ Ahi zongin keima ngaihsutna ah a ngei bangin tua ci om leh lungdam zaw dingin ka um a, Pasian Kha ngaihsutna mah zong hi in ka um hi.

¹ Tu in milim biakna a kipia nate tawh kisai thu kong gen ding hi. Eite khempeuh thu thei vive i hih lam ka thei hi. Thu theihna in kiphatsakna piangsak a, itna in hong kilamkipsak hi. ² Na khatpeuh thei‑a a kingaihsun mi in a theih dinga kilawm zah a thei nailo ahi hi. ³ Ahih hangin Pasian in amah a it mite a thei hi. ⁴ Tua ahih ciangin milim biakna a kipia nate tawh kisai kong gen in ah leitung ah milim bangmah hilo a, Pasian khat bek longal Pasian dang a om kei hi cih i thei hi. ⁵ Leitung vantung ah pasian a kicite om hi mah ta leh (pasian tam om in topa tampi om hi), ⁶ eite aa dingin Pa ahi Pasian khat bek a om hi. Ama sung panin na khempeuh piang a, eite in ama aa i hi hi. Topa Zeisu Khazih khat bek om a, na khempeuh ama piansak hi in ama tungtawn in eite a nungta i hi hi. ⁷ Ahih hangin mi khempeuh in tua thu a theikim kei uh hi. Mi pawlkhat in tudong in milim biakna a kipia na a nek uh ciangin milim phawk kawmsa in ne uh a, amaute lungsim kisuangsak ahih manin tua in amaute a ninsak hi. ⁸ Ahih hangin annek in Pasian maipha a hong ngahsak kei hi. I nek manin mi hoih zaw i hi kei a, i nek loh manin misia zaw zong i hi tuan kei hi. ⁹ Ahi zongin nangma suahtakna in a thanem mite palkhak a suah loh nadingin kidawm in. ¹⁰ Banghang hiam cihleh thu a thei nangmah in an ne dingin milim biakna inn ah na tut laitak in a thanem mi khatin hong mu leh kisuangsa pi mahin milim biakna a kipia nate ne ngamsak ding hilo ahi hiam? ¹¹ Tua a thanem na sanggampa tangin Khazih si khinzo napi na thutheihna tawh amah kisiasak ding na hi hiam? ¹² Tua bangin na sanggamte uh tungah mawhin a thanem amaute lungsim na liamsak uh ciangin Khazih tungah a mawh na hi uh hi. ¹³ Tua ahih manin ka annek in ka sanggam khat puksak ahih leh amah ka puksak khakloh nadingin sa ka ne ngei nawn kei ding hi.

¹ Sawltak khat hilo ka hi hiam? A suakta mi khat hilo ka hi hiam? I Topa Zeisu Khazih a mu khin hilo ka hi hiam? Note in Topa sunga ka nasepna gah hilo na hi uh hiam? ² Midangte in sawltak in a hong sim kei uh zongin note aa dingin sawltak ka hi mahmah hi. Banghang hiam cihleh Topa sunga sawltak ka hihna ciaptehna in note na hi uh hi. ³ Kei hong dongtel mite kiang pan ka kihutna in hih bang ahi hi. ⁴ Annek tuidawn nading thuneihna neilo ka hi uh hiam? ⁵ Sawltak dangte, Topa sanggamte le Cephas‑te bangin thu‑um zi khat tonpih theih nading thu nei lo ka hi uh hiam? ⁶ Tua ahih keileh Barnabas le keimah in zong khut tawh na sem loin om theih nading thunei hilo ka hi uh hiam? ⁷ Kua in ama sum zangin galdo in kuan ahi hiam? Lenggah kung suan a, a gah a nelo kua om ahi hiam? Ahih keileh gankhawi in a nawi a nelo kua om ahi hiam? ⁸ Hih thute mihing muhna pan beka kong gen ahi hiam? Thukham in zong hih bangmah in gen hilo ahi hiam? ⁹ Moses thukham sungah, “Bawngtal in buh a cil laitak in a muuk hencipsak kei in,” ci in a kigelh hi. Pasian in hih thu ah bawngte a cih nopna ahi hiam? ¹⁰ Ahih keileh eite hong gennopna ahi hiam? A taktak in eite aa dingin a kigelh ahi hi. Lokhopa in lametna tawh lokho a, lametna tawh buh a cilpa in zong a lamet pen a ngah theih nadingin buh a cil ahi hi. ¹¹ Note aa dingin khalam thu khaicite hong vawh khin ka hih manun note tung panin leitung nate ka ngah uh hangin lianlua ding ahi hiam? ¹² Midangte in note tungah hih bang thuneihna nei uh ahih leh kote in nei zaw thamlo ding ka hi uh hiam? Ahih hangin Khazih lungdamna thu a khaktan ka suah loh nadingun ka thuneihna uh zang loin na khat peuhpeuh ka thuak tentan uh hi. ¹³ Biakinnpi sunga a siangtho nate tawh kisai in na a semte in tua nate mah ne uh a, biaknatau a nasemte in zong tua biaknatau tunga kipia nate mah a ne uh hi cih theilo na hi uh hiam? ¹⁴ Tuamah bangin lungdamna thu a tangkote in lungdamna thu mah kivakna in nei uh hen ci in Topa in thu hong pia zo hi. ¹⁵ Ahih hangin hih thuneihnate khat beek ka zang kei a, kei tungah hih bangin hong bawl un ci in zong lai kong khak ngei kei hi. Hih keima angtanna mi khatpeuh in a mawkna a suahsak sangin si leng kei aa dingin a hoih zaw hi. ¹⁶ Banghang hiam cihleh lungdamna thu ka tangko ciangin kisialh nading bangmah ka nei kei hi. A hangin tua thu ka hilh loh a phamawh ahi hi. Hi takpi hi. Lungdamna thu ka hilh loh ciangin gimna ka thuak hi! ¹⁷ Hih nasep keima utthu tawh a sem ka hih leh thaman ka ngah ding hi. Ahi zongin keima ut lohpi a a sem ka hih leh kei tunga a hong kipia nasep a sem ka hi hi. ¹⁸ Tua ahih leh ka thaman bang ahi hiam? Lungdamna thu ka hilh ciangin tua lungdamna thu hanga ka thuneihna zangkhial loin Khazih lungdamna thu manngenlo a mite ka piak pen mah ka thaman hi pah hi. ¹⁹ Mi khatpeuh nasem ka hih loh hangin mi a tam theithei ka ngah zawh nadingin mi khempeuh nasem ka kisuaksak hi. ²⁰ Judah mite ka ngah zawh nadingin Judah mite lakah Judah mi bangin ka om hi. Thukham nuai‑a om mite ka ngah theih nadingin thukham nuai‑a om mite lakah thukham nuai‑a om mi bangin ka om hi. ²¹ Thukham a neilo mite ka ngah theih nadingin thukham a neilo mite lakah thukham a neilo mi bangin, Pasian thukham a nial hilo in Khazih thukham nuai ah ka om hi. ²² A thanem mite ka ngah theih nadingin a thanem mite lakah a thanem mi bangin ka om hi. Mi pawlkhat lam khat peuhpeuh tawh ka hotkhiat theih khak leh ci in mi khempeuh tungah na khempeuh ka suak hi. ²³ Tu in hi bang ka sepna in lungdamna thu hang hi a, tua lungdamna thupha note tawh ka ngahkhop theih nading ahi hi. ²⁴ Tai kidem mite a vekpi un a tai uh hangin mi khat bekin pahtawina a ngah lam theilo na hi uh hiam? Note in zong pahtawina na ngah theih nadingun tai un. ²⁵ Tai kidemna a a kihel khempeuh in a siathei lukhu a ngah nadingun na khempeuh ah amaute pumpi a ki‑uk uh hi. Tu in amaute in a siathei lukhu ngah nadingin tai uh a, eite i hih leh a siatheilo lukhu i ngah nadingin i pumpi a ki‑uk i hi hi. ²⁶ Tua ahih manin ngimna kician neilopi a, a mawktai hilo in huih lak a mawktup zong ka hi kei hi. ²⁷ Ahi hangin midangte tungah lungdamna thu ka hilh khit ciangin a san thamlo mi ka suah loh nadingin ka pumpi sekin thu ka mangsak hi.

¹ Tua thamlo in sanggamte aw, ka pu ka pate khempeuh in meiipi nuai ah a vekpi un tuipi a kantanna uh ah, ² amaute in tua meiipi le tuipi ah a vekpi un Moses sungah a kibaptize na uh, ³ a vekpi un a kibang kha an a nekna uh le ⁴ a vekpi un a kibang khalam tui a dawnnate uh na theih loh ding uh ka deih kei hi. Tua tui pen amaute a zui kha Suangpi pana a dawn uh hi a, tua Suangpi in Khazih ahi hi. ⁵ Ahih hangin a tam zawte tungah Pasian lungkim lo ahih manin gamlak ah amaute luanghawm a thehthang hi. ⁶ Tu in amaute in thusia a lunggulh bangun eite in i lunggulh loh nadingin hih thute pen eite etteh ding ahi hi. ⁷ Amaute pawlkhat bangin milim bia kei un. Lai Siangtho sungah, “A ne a dawn dingin amaute tusuk uh a, tua khit ciangin a phengtat dingin a dingto uh hi,” ci in a kigelh hi. ⁸ Amaute pawlkhat in numei pasal mawhna a bawl manun ni khat sungin 23,000 a si uh hi. Eite in tua mite bangin numei pasal mawhna bawl kei ni. ⁹ Amaute pawlkhat in Khazih a ze‑et bangun eite in ze‑et kei ni. Tua mawhna hangin gul in amaute tulum hi. ¹⁰ Amaute pawlkhat bangin phun kei ni. A phun manun a susia vantungmi in amaute a that hi. ¹¹ Tu in hih thute in eite etteh dingin a piang hi a, hun nunung a om eite hong kihilhkholh nadingin a kigelh ahi hi. ¹² Tua ahih manin kip a kisa mi in a puk loh nadingin kidawm hen. ¹³ Mihing thuakngei ze‑etna a val note tungah a hong tung kei hi. Ahi zongin Pasian in a muanhuai ciampellopa ahih manin note thuak zawh ding zah val a hong kize‑et ding a phal kei hi. Tua bang ze‑etna na thuak uh ciangin zong na thuak zawh nadingun suahtak nading lampi a hong bawlsak ding hi. ¹⁴ Tua ahih manin kong itte aw, milim biakna nusia un. ¹⁵ Mipilte tunga thugen bangin kong gen ding hi. Ka thugen bang hiam cih nomau mahin na khentel un. ¹⁶ Eite in hehpihna i phatna thupha hai in Khazih sisan tawh i kizopna hilo ahi hiam? I balkhap anlum in Khazih pumpi tawh i kizopna hilo ahi hiam? ¹⁷ Eite khempeuh in anlum khat nekhawm i hih manin mi tampi i hih hangin anlum khat le pumpi khat i hi hi. ¹⁸ Ci le sa lamsang ah Israel mite ngaihsun dih un. Gangawh biakna sa a nete in tua biaknatau tawh kizom uh hilo ahi hiam? ¹⁹ Tua ahih leh bang gen nuam ka hi hiam? Milim thupi hi a ci ka hi hiam? Ahih keileh milim a kipia biakpiakna thupi hi a ci ka hi hiam? ²⁰ Ka hi kei hi. Gentile‑te biakpiakna pen Pasian a piak uh hilo in dawite a piak uh ahih manin dawite tawh na kikholh ding uh ka deih kei hi. ²¹ Topa hai le dawite hai na dawnkhawm thei kei ding uh hi. Topa ankuang le dawite ankuang na sawkkhawm thei kei ding uh hi. ²² Topa a heh nadingin phin ding i hi hiam? Topa sangin thahat zaw i hi hiam? ²³ Na khempeuh hihtheih nading thu ka ngah hangin na khempeuh in phattuamna a hong pia kei hi. Na khempeuh hihtheih nading thu ka ngah hangin na khempeuh in a hong kipsak kei hi. ²⁴ Kuamah in ama phattuam nading zong loin midangte phatuam nading zong hen. ²⁵ Sa zuakna muna kizuak sa khatpeuh dongtel loin lei unla ne un. Tua hi leh na lungsim uh kisuang lo ding hi. ²⁶ Banghang hiam cihleh “leitung le a sunga om khempeuh Topa aa ahi hi.” ²⁷ Thu‑umlo mi khatin an ne dingin a hong sap ciangin na pai nop leh na paithei hi. Ahi zongin na mai‑a hong kilui khempeuh dongtel loin ne in. Tua hi leh na lungsim kisuang lo ding hi. ²⁸ Ahih hangin mi khatpeuh in, “Hih in milim biakna a kipia khinsa ahi hi,” hong cih leh tua pa na khualna le lungsim kisuanna a om loh nadingin ne kei in. Banghang hiam cihleh “leitung le a sunga om khempeuh Topa aa ahi hi.” ²⁹ Lungsim kisuanna, ka cih ciangin nang lungsim a gen hilo in tua bang hong ci mipa lungsim a gen ka hi zaw hi. Midang khat lungsim kisuanna ka khualna in banghang in kei suahtakna tungah thu hong khen ding ahi hiam? ³⁰ Lungdam ko a, ka nek ciangin lungdam ka kohna tua an hangin banghang in hong kimawhsak ding ahi hiam? ³¹ Tua ahih manin nekna dawnna a kipan na khat peuhpeuh na hih uh ciangin Pasian minthan nadingin na hih un. ³² Judah mite hi ta leh, Greek mite hi ta leh, Pasian pawlpi hi ta leh kuamah puksak kha kei un. ³³ Mite in hotkhiatna a ngah theih nadingun keima phattuam nading zong loin mi tampite phattuam nading ka zonga, na khempeuh ah mi khempeuh ka lungdamsak hi.

¹ Khazih ka etteh bangin note in zong kei hong etteh un. ² Tu in sanggamte aw, na khempeuh ah kei hong phawkin kong hilh thute zui na hih manun kong pakta hi. ³ Ahi zongin pasal khempeuh lutang in Khazih hi a, numei lutang in pasal hi in Khazih lutang in Pasian ahi hi cih thute kong theisak nuam hi. ⁴ Pasal peuhmah in thu a nget laitak ahi a, kamsang a thu a hilh laitak ahi zongin a lu a khuh leh a lutang a selpho ahi hi. ⁵ Numei peuhmah in thu a nget laitak ahi a, kamsang a thu a hilh laitak ahi zongin a lu a khuh kei leh a lutang a selpho hi a, a sam mettol mah bangin a zumhuai hi. ⁶ Banghang hiam cihleh numei in a lu a khuhnop kei leh a sam met hen. Sam met ding ahi a, mettol ding ahi zongin zumhuai a sak leh a lu khuh hen. ⁷ Pasal in Pasian lim le a minthanna ahih manin a lu a khuh hetloh ding ahi hi. Ahi zongin numei ahih leh pasal minthanna ahi hi. ⁸ Banghang hiam cihleh numei panin pasal piang hilo in pasal panin numei a piang ahi hi. ⁹ Numei aa dingin pasal kipiangsak hilo in pasal aa dingin numei a kipiangsak ahi hi. ¹⁰ Hih thu hang le vantungmite hangin numei in ukna nuai ah a om ahihna a lak lim khat peuhmah a lu tungah a khuk ding ahi hi. ¹¹ Ahi zongin Topa sungah numei loin pasal kia tangdin theilo a, pasal loin numei kia zong tangdin thei tuanlo hi. ¹² Pasal pana numei piang ahih mah bangin pasal zong numei sung pan a piang ahi hi. Ahih hangin na khempeuh Pasian pan a piang ahi hi. ¹³ Numei in a lu khuhlosa in Pasian kiangah thu a nget ding kilawm hiam, kilawmlo hiam nomau mah in khentel un. ¹⁴ Pasal in a sam a sausak leh zumhuai hi cih thu leitung ngeina nangawn in hong hilh hilo ahi hiam? ¹⁵ Ahih hangin numei in a sam a sausak leh ama minthanna hi a, ama kikhuh nadinga Pasian in a piak ahi hi. ¹⁶ Ahih hangin mi khatpeuh in hih thu a nialnop leh kote ka hi uh a Pasian pawlpite ahi zongin tua simloh ngeina dang kinei lo hi. ¹⁷ Na kikhop uh ciangin na hoih zawk nading uh hilo in na siatzawk nading uh suaksak na hih manun hih thu ah note kong pakta kei hi. Tua ahih manin tu in hih thute kong pia hi. ¹⁸ A thu masapen in pawlpi bangin na kikhop uh ciangin na kituambawlna thu uh ka za a, maan kha thei dingin zong ka um hi. ¹⁹ Note lak pan Pasian san mite kua hiam cih a kilat nadingin kithutuah lohna zong a omthei ding mah ahi hi. ²⁰ Tua ahih manin munkhat ah na kikhop uh ciangin Topa Nitak An nekna na suaksak nawn kei uh hi. ²¹ Banghang hiam cihleh na nek uh ciangin kingak cih om loin nomau an ciat na ne masa uh a, a gilvah zolo tawh a khamlua tawh na om uh hi. ²² A bangci na hi uh hiam! Annek tuidawn nading inn neilo na hi uh hiam? Ahih keileh Pasian pawlpi simmawh in bangmah a neilote a maizumsak nuam na hi uh hiam? Bang hong gen ding ka hi hiam? Hih thu ah kong pakta ding hiam? Kong pakta kei hi. ²³ Note tunga kong piak thu pen Topa tung pana ka ngah ahi hi. Amah a kilehhek ni nitak in Topa Zeisu in anlum la in, ²⁴ lungdamna a koh khit ciangin balkham a, “La unla, ne un. Hih in note aa dingin a kibalkham ka pumpi ahi hi. Kei nong phawk nadingun hih bangin na bawl un,” a ci hi. ²⁵ A nek khit uh ciangin tuamah bangin hai zong la a, “Hih hai in ka sisan a thuciamna thak ahi hi. Na dawn sim un kei nong phawk nadingun hih bangin na bawl un,” a ci hi. ²⁶ Hih anlum ne in, hih hai na dawn sim un, Topa hong pai mateng Topa sihna thu a tangko na hi uh hi. ²⁷ Tua ahih manin mi khatpeuh in a kilawm lopi in hih anlum ne a, hih hai a dawn leh tua mi in Topa pumpi le ama sisan tungah a mawh ahi hi. ²⁸ Ahi zongin mi khatin amah le amah a kisittel khit ciangin anlum ne in hai panin dawn tahen. ²⁹ A kilawmlopi in a ne a dawn mi in Topa pumpi a theitel lo ahih manin ama tungah thukhenna a tun nadingin a ne a dawn ahi hi. ³⁰ Hih thu hangin note lakah a thanem le a cina tampi na om uh a, a ihmu zong tampi na om khin uh hi. ³¹ Ahih hangin eimah le eimah i kisittel leh Pasian in thu hong khen lo ding hi. ³² Topa in thu hong khen leh zong leitung mite banga mawhsakna i thuak loh nading a hong thuhilhna ahi hi. ³³ Tua ahih manin sanggamte aw, an ne dingin na kikhop uh ciangin khat le khat na kingak un. ³⁴ A gilkialte in ama inn ah an ne hen. Tua hi leh na kikhopna hangun thukhenna na thuak nawn kei ding uh hi. Kong pai ciangin thu dangdangte kong hilhcian ding hi.

¹ Sanggamte aw, Khalam letsongte tawh kisai in awlmawhlo in na om ding uh ka deih kei hi. ² Gentile‑te na hihlai un a pau theilo milimte kiang hong kitun in lam hong kipialsak ahihna na thei uh hi. ³ Tua ahih manin Pasian Kha tawh thugen mi peuhmah in Zeisu samsiat in om hen ci ngeilo a, Kha Siangtho tawh loin kuamah in Zeisu in Topa ahi hi, ci theilo hi cih thu kong theisak hi. ⁴ Letsong a tuamtuam a om hangin, Kha khat bek ahi hi. ⁵ Nasepna a tuamtuam a om hangin Topa khat bek ahi hi. ⁶ Sepna bawlna a tuamtuam a om hangin mi khempeuh sungah na khempeuh a sem Pasian khat bek ahi hi. ⁷ Ahih hangin mikim i kiphat tuampih theih nadingin Kha kilatkhiatna hong kipia ciat hi. ⁸ Pasian in Kha tungtawn in mi khat tungah ciimna pia a, tua Kha tungtawn mahin a dang khat tungah thutheihna a pia hi. ⁹ Tua Kha tungtawn mahin a dang khat tungah upna pia a, tua Kha tungtawn mahin a dang khat tungah cina damsak theihna letsong a pia hi. ¹⁰ A dang khat tungah nalamdang bawl theihna pia a, a dang khat tungah kamsang in thuhilh theihna a pia hi. A dang khat tungah khate khentel theihna a pia hi. A dang khat tungah pau nam tuamtuam pau theihna pia a, a dang khat tungah pau nam tuamtuamte a khiatna gentheihna a pia hi. ¹¹ Hihte khempeuh Kha khat bekin sem a, ama deihna bangin mi khat ciat aa dingin a hawmsak hi. ¹² Pumpi khat bek ahih hangin pumpi tung nate tampi a om hi. Tua pumpi tung nate tampi ahih uh hangin a vekpi un pumpi khat ahih bangin Khazih zong tuamah bang ahi hi. ¹³ Eite khempeuh in Judah mi i hi a, Greek mi i hi zongin, sila i hi a, a suakta mi i hi zongin i vekpi in pumpi khat sungah Kha khat bek tawh phumna i ngah hi. Kha khat sung panin hong kidawnkhawmsak hi. ¹⁴ Pumpi in pumpi tung nate khat bek nei loin tampi a nei hi. ¹⁵ Khe in, “Khut hilo ka hih manin, pumpi tawh ka kisai kei hi,” ci leh a kisai lo takpi ahi ding hiam? ¹⁶ Bil in, “Mittang hilo ka hih manin pumpi tawh ka kisai kei hi,” ci leh a kisai lo takpi ahi ding hiam? ¹⁷ Pumpi buppi mittang hi khin leh bangci bangin khuaza thei dinga, pumpi buppi bil hi khin leh bangci bangin a gimnam zathei ding ahi hiam? ¹⁸ Tua ahih manin Pasian in ama hoihsak bangin pumpi tung nate amau munciat ah a koih hi. ¹⁹ Tuate khempeuh pumpi tung na khat bek hi khin leh pumpi omthei ding ahi hiam? ²⁰ Tu in ahih leh pumpi tung nate tampi a om hangin pumpi khat bek a om hi. ²¹ Mittang in khut kiangah, “Kei aa dingin nang na kisam kei hi,” ci theilo hi. Lutang in zong khe kiangah, “Kei aa dingin nang na kisam kei hi,” ci theilo hi. ²² Tua bangci theilo bekthamlo in a thanem zaw tawh a kibang pumpi nate a kisam zawteng ahi uh hi. ²³ A thupi suahlo i pumpi nate pawlkhat i limkep pente hi zaw hi. Zumhuai i sakteng mah a kilawm zaw thamteng ahi uh hi. ²⁴ Kilawm i sakzawk i pumpi nate, limbawl tuam a kisam loteng na hi zaw uh hi. Ahih hangin Pasian in hoihtak in pumpi lemkhawm a, a ginalo nate a pahtawihuai zaw in a koih hi. ²⁵ Banghang hiam cihleh pumpi sungah kikhenna om loin pumpi tung nate khat le khat a kikeptuah ciat theih nading uh ahi hi. ²⁶ Pumpi tung nate khatin gimna a thuak leh a dangteng in zong thuakpih uh a, khatin pahtawina a ngah leh a vekpi un a lungdamkhawm uh hi. ²⁷ Tu in note in Khazih pumpi na hi uh a, mi khat ciatin pumpi tung nate na hi ciat uh hi. ²⁸ Pasian in pawlpi sungah a masapen in sawltakte, a nihna ah kamsang a thu a hilhte, a thumna ah siate a koih hi. Tua khit ciangin nalamdang a bawltheite le cina damsak theihna letsong a ngahte, tua khit ciangin midang a huh theite, a uk theite le pau nam tuamtuam a pau theite a koih hi. ²⁹ Tuate a vekpi un sawltakpite hi khin uh ahi hiam? A vekpi un kamsang a thuhilhte hi khin uh ahi hiam? A vekpi un siate hi khin uh ahi hiam? A vekpi un nalamdang a bawltheite hi khin uh ahi hiam? ³⁰ A vekpi un cina damsak theihna letsong a ngahte hi khin uh ahi hiam? A vekpi un pau nam tuamtuam a paute, a vekpi un pau nam tuamtuamte a khiatna a gentheite hi khin uh ahi hiam? ³¹ Ahi zongin a hoih penpen letsongte mah na deih zaw un. A hoih zawlai thukhat kong gen ding hi.

¹ Mihingte pau le vantungmite pau tawh ka pauthei phial zongin, itna ka neih kei leh dakging le daltuah ging tawh a kibanglel ka hi ding hi. ² Kamsang in thuhilh theihna letsong nei a, thuthuk khempeuh le na khempeuh thei in mualte kinsak zawh nading upna ka nei zongin itna ka neih kei leh a mawkna ka hi veve ding hi. ³ Ka neihsa khempeuh mizawngte nek dingin pia in ka pumpi zong mei‑a khultum dingin ka pia zongin itna ka neih kei leh kei aa dingin phattuamna a om tuan kei hi. ⁴ Itna in lungduai in a migi hi. Itna in kuamah a haza kei hi. Itna in kisial loin a kiphasak kei hi. ⁵ A kilawmlo in a gamta kei hi. Ama angsung ding bek a khual kei hi. A hehbaih kei hi. Midangte siatna a ciamteh kei hi. ⁶ Thumanlote lungdampih loin thuman thutak ah a lungdam hi. ⁷ Na khempeuh a hu hi. Na khempeuh a um hi. Na khempeuh a lamen hi. Na khempeuh a thuakzo hi. ⁸ Itna a kip tawntung hi. Ahi zongin, kamsang a thuhilhnate kibeisak dinga, paunam tuamtuam pau theihnate a bei hun om ding hi. Thu theihna a om leh zong beimang ding hi. ⁹ Banghang hiam cihleh i thu theihna kimkhat bek hi a, kamsang in thu i hilhna zong kimkhat bek mah ahi hi. ¹⁰ Ahi zongin kicinna hong tun ciangin a kicinglo khempeuh a mangthang ding hi. ¹¹ Naupang ka hihlai in naupang bangin ka pau hi. Naupang bangin thu ka thei a, naupang bangin thu ka ngaihsun hi. Ahih hangin ka picin ciangin naupang vai khempeuh ka paikhia hi. ¹² Tu laitak in limlang tawh ki‑et bangin ahi milmial bekin i mu hi. Ahi zongin tunung ciangin kimaituah in i mu ding hi. Tu laitak in kimkhat bek ka thei a, tunung ciangin Pasian in kei hong theih bangin a kicing in amah ka thei ding hi. ¹³ Tu laitak in upna, lametna le itna, hihteng thum om a, tuateng lakah itna a thupipen ahi hi.

¹ Itna neih ding na hanciam un. Kha letsongte na lunggulh unla, kamsang in thugen theihna na lunggulh deuh un. ² Banghang hiam cihleh paunam tuamtuam tawh a pau mi in mihingte tunga thugen hilo in Pasian tunga thugen ahi hi. Kuamah in a thugen theilo a, kha tawh thuthuk a gen ahi hi. ³ Ahih hangin kamsang in thu a hilh mi in kilamkip nading thute hansuah nading thute le thapiak nading thute mite tungah a gen hi. ⁴ Paunam tuamtuam tawh a pau mi in amah le amah a kikipsak hi a, ahi zongin kamsang a thuhilh mi in pawlpi a kipsak hi. ⁵ Na vekpi un paunam tuamtuam in na pau ding uh ka deih hangin kamsang a thu na hilh ding uh ka deih zawlai hi. Banghang hiam cihleh paunam tuamtuam tawh thu a gen mi in pawlpi a kilamkip theih nadingin a khiatna a gen kei leh amah sangin kamsang a thu a hilhpa a thupi zaw hi. ⁶ Tu in sanggamte aw, note kiangah hong pai in kilakna thu tawh ahi zongin thu theihna tawh ahi zongin kamsang a thuhilhna tawh ahi zongin hilhcianna tawh ahi zongin khat peuhpeuh tawh hong gen loin paunam tuamtuam khatpeuh tawh hong genleng, note aa dingin bang phattuamna om ding ahi hiam? ⁷ Nuntakna a neilo nate ahi tamngai le gawsemte nangawn a aw maantak in ging kei leh bang aw kitum hiam cih kua in theithei ding ahi hiam? ⁸ Pengkul zong a aw mantak in ging kei leh galsim dingin kua kithawi thei ding ahi hiam? ⁹ Tuamah bangin a kitheitel kampau tawh thu gen kei le uh cin kua in na thugen uh theithei ding ahi hiam? Tua in huih lakah a pau tawh na kibang ding uh hi. ¹⁰ Leitung ah kampau nam tampi om a, khiatna a neiciat uh hi. ¹¹ Mi khat thugen a khiatna ka mat theih kei leh tua pa aa dingin minam dang ka suak a, amah zong kei aa dingin minam dang mah a suak lel hi. ¹² Note zong tuamah bang na hi uh hi. Kha letsongte deih mahmah na hih manun pawlpi kilamkip nading letsongte tampi na neih nadingun hanciam un. ¹³ Tua ahih manin paunam tuamtuam tawh a gen mi in a khiatna a gen theih nadingin ngen hen. ¹⁴ Banghang hiam cihleh paunam tuamtuam tawh thu ka nget leh ka kha in thu a nget hangin ka theihtelna a khang tuan kei hi. ¹⁵ Tua ahih leh bang cih ding ka hi hiam? Kha tawh thu ka ngen dinga, ka theihtelna tawh zong ka ngen ding hi. Kha tawh la ka sa dinga, ka theihtelna tawh zong ka sa ding hi. ¹⁶ Tua ahih keileh kha tawh Pasian na phat laitak in tua inn sunga hong om, bangmah a theilo mi khatin na thugente thei kei leh bangci bangin, “Amen,” ci thei ding ahi hiam? ¹⁷ Lungdamna na limkoh mahmah hangin midangte aa dingin kipna a piang kei hi. ¹⁸ Note khempeuh sangin paunam tuamtuam tawh ka pau theih zawk manin ka Pasian tungah ka lung a dam hi. ¹⁹ Ahi zongin pawlpi sungah paunam tuamtuam tawh kammal 10,000 ka gen sangin midangte zong thu ka hilhcian theih nadingin a kitheitel sinsen kammal nga tawh thu ka gen nuamzaw hi. ²⁰ Sanggamte aw, thu theihna lamah naupangte bang loin a khang khinsa mite bang unla, gitlohna lamah naungekte bang un. ²¹ Thukham laibu sungah, “Gamdang mite kam le muk zangin Hih mite tungah thu ka gen ding hi. Ahih hangin amaute in Ka thugente a ngai tuan kei ding uh hi,” Topa in ci hi, ci in a kigelh hi. ²² Tua ahih manin paunam tuamtuam in theihsakna lim hi a, thu‑um mite aa ding hilo in thu‑umlo mite aa ding ahi hi. Kamsang a thuhilhna ahih leh thu‑um mite aa ding hi a, thu‑umlo mite aa ding ahi kei hi. ²³ Tua ahih manin mun khatah pawlpi buppi in na kikhop uh ciangin paunam tuamtuam tawh pautek le uh cin bangmah a theilo mite ahi zongin, thu‑umlo mite ahi zongin hong pai leh, mihaihon hi hong ci ding uh hilo ahi hiam? ²⁴ Ahih hangin na vekpi un kamsanna tawh thu na hilh laitak un, a umlo mi khat ahi zongin bangmah a theilo mi khat ahi zongin hong lut leh tua pa a mawhna teng kiphawksak in thu a khen na hi ding uh hi. ²⁵ Tua ciangin a lungsim sunga a selsim khempeuh hong kipholak ding hi. Amah boksuk in Pasian bia dinga, note lakah Pasian om taktak hi ci in hong pulak ding hi. ²⁶ Tua ahih leh sanggamte aw, a koici bang ding ahi hiam? Na kikhop uh ciangin mi khatin phatna lasakna, a dang khatin thu hilhna, a dang khatin paunam tuamtuam a pauna, a dang khatin Pasian kiang pana kilakna, a dang khatin a khiatna gen theihna na ngah ciat uh hi. Tuate khempeuh kilamkipna a pian nadingin na zang un. ²⁷ Paunam tuamtuam tawh thu a kigen leh nih bang a tampen in thum ciangin gen hen. Khat khit khat a banban in gen uh henla, khatin a khiatna gen hen. ²⁸ Ahih hangin a khiatna gen ding a om kei leh pawlpi kikhopna ah paunam tuamtuam tawh a pau ding pa pau loin om henla, ama thu in Pasian tawh kiho hen. ²⁹ Kamsang a thuhilhte nih ahih keileh thum in thugen uh henla, a dangteng in saikak uh hen. ³⁰ Ahi zongin a kianga a tu midang khat tungah na khat peuhpeuh a hong kilah leh a gen masapa khawlphot hen. ³¹ Mi khempeuh in thu kihilhcian a tha a ngahkim theih nadingun na vekpi un a banban in kamsang in thu na hilh ciat thei uh hi. ³² Kamsangte lungsim kamsangte ukna nuai ah a om hi. ³³ Banghang hiam cihleh misiangthote pawlpi khempeuh ah a kimuh mah bangin Pasian in buaina a piangsak Pasian hilo in kilemna a piangsak Pasian ahi hi. ³⁴ Pawlpi sungah na numeite uh pau loin om uh hen. Banghang hiam cihleh amaute in thu a hilh ding uh kiphal lo hi. Ahi zongin thukham in a gen mah bangin amaute in thumang uh hen. ³⁵ Tua hi a, a theihnop uh a om leh inn ah a pasal ciat uh dong uh hen. Banghang hiam cihleh numeite in pawlpi sungah thu a hilh ding uh zumhuai hi. ³⁶ Pasian thu note kiang pana hong kipankhia ahi hiam? Ahih keileh note tung bekah hong tung ahi hiam? ³⁷ Kamsang a kingaihsun mi khat ahi a, khami a a kingaihsun mi khat ahi zongin hih kong gelh thute Topa hong thupiakte ahihna thei tahen. ³⁸ Ahi zongin hih ka thugente a thudon lo a om leh amah zong kithudon kei tahen. ³⁹ Tua ahih ciangin sanggamte aw, kamsang a thuhilh theih ding deih mahmah unla, paunam tuamtuam tawh thu gen ding zong na kham kei un. ⁴⁰ Na khempeuh a kilawm a kituak in hih un.

¹ Tua bekthamlo in sanggamte aw, note kianga kong hilhsa lungdamna thu kong phawkkiksak nuam hi. Tua lungdamna thu in na san khitsa uh le na dinkipna uh ahi hi. ² Kong hilh tua lungdamna thu lenkip na hih manun hotkhiatna a ngah na hi uh hi. Tua hi kei leh na upna uh a mawkna suak ding hi. ³ A masa pen in ka ngahsa lungdamna thu note tungah kong gensawn hi. Lai Siangtho in a gen mah bangin Khazih in eite mawhna hangin sihna thuak in, ⁴ amah kivui a, Lai Siangtho in a gen mah bangin a ni thum ni in a thokik hi. ⁵ Tua ciangin Cephas kiangah kilang a, tua khit ciangin sawm le nihte kiangah a kilang hi. ⁶ Tua nung ciangin sanggam 500 valte kiangah khatvei va kilang a, amaute a tam zaw a nungta lai uh hi. Pawlkhatte ahih leh a ihmu khinzo uh hi. ⁷ Tua nung ciangin James kiangah kilang a, tua khit ciangin sawltak khempeuh kiangah a kilang hi. ⁸ Tua khit ciangin a nunung pen in a hun cing lopi in a suak naungek tawh a kibang keima kiangah a hong kilang hi. ⁹ Sawltakpite lakah a neupen ka hi a, Pasian pawlpi a bawlsiapa ka hih manin sawltak cih dinga kilawm zong ka hi kei hi. ¹⁰ Ahi zongin Pasian hong hehpihna thupha hangin ka hihna bangbang in ka hi a, kei tunga ama hehpihna thupha a mawkna a suak kei hi. Tua thamlo in sawltak dang khempeuh sangin na ka nak sep zaw hi. Ahi zongin a sem taktak kei hilo in kei hong ompih Pasian hehpihna thupha in a sem ahi hi. ¹¹ Tua ahih manin kei ka hi a, amaute ahi zongun note tungah hih thu mah kong hilh uh a, note in zong tua mah bangin na um uh hi. ¹² Tu in, misite lak pan Khazih thokik zo hi ci a, kong hilh khitsa uh hi napi banghang in note pawlkhat in misite thokik lo ding hi ci na hi uh hiam? ¹³ Misite thokik lo ding hi leh Khazih zong a thokik lo hi ding hi. ¹⁴ Khazih thokik lo hi leh kote thugen a mawkna hi dinga, note upna zong a mawkna mah ahi ding hi. ¹⁵ Hi hi, Pasian in Khazih thokiksak zo hi cih thu kote in teci ka pang uh hi. Misite thokik loin Khazih zong Pasian in thokiksak lo hileh, Pasian teci zuaute ka hi ding uh hi. ¹⁶ Misite thokik lo hi leh Khazih zong a thokik lo ahi ding hi. ¹⁷ Khazih thokik lo hi leh na upna uh a mawkna hi dinga, na mawhnate uh sunga omlai na hi ding uh hi! ¹⁸ Khazih sunga a ihmu khinsa mite zong a mangthang uh hi ding hi. ¹⁹ Hih leitung nuntakna aa ding bekin Khazih sungah lametna a nei i hih leh mi khempeuh lakah a hehpihhuai pente i hi hi. ²⁰ Tu in ahih leh, misite lak panin Khazih thokik khinzo a, a ihmu khinsa mite lakah gah masa a suakzo hi. ²¹ Mi khat hanga sihna hong tun mah bangin misite thawhkikna zong mi khat hang mahin a hong tung ahi hi. ²² Banghang hiam cihleh Adam sungah mi khempeuh a sih bangin Khazih sungah mi khempeuh a kinungtasak ding hi. ²³ Ahih hangin mi khempeuh in amaute hun ciat a zui ding uh hi. Khazih in gah masa hi a, Khazih hong pai ciangin Khazih mite a thokik ding uh hi. ²⁴ Amah in ukna, thuneihna le vangliatna khempeuh a suksiat khit ciangin Pa Pasian tungah kumpigam ap dinga, tua khit ciangin beina a tung ding hi. ²⁵ Banghang hiam cihleh amah in a galte khempeuh ama khenuai ah a koih khit mateng a uk ding hi. ²⁶ A nunung pen in a suksiat ding galin sihna ahi hi. ²⁷ Banghang hiam cihleh, “Pasian in na khempeuh ama khenuai ah a koih hi.” Ahih hangin, “Na khempeuh ama khenuai ah a koih hi,” a cihna ah na khempeuh Khazih nuai‑a a koihpa Pasian kihel kha lo hi cih thu a kilang hi. ²⁸ Tu in Pasian in na khempeuh ah a lianpen ahihna a kilat nadingin Tapa nuai ah na khempeuh a koih ciangin Tapa in zong na khempeuh ama nuai ah a koihpa ukna a mang ding hi. ²⁹ Tua ahih manin misite thokik lo ding hi leh misite aa dinga kituiphumna in bang phattuamna om ding ahi hiam? Banghang in misite aa dingin mite kituiphum ding uh ahi hiam? ³⁰ Banghang in kote in zong tatsat loin lauhuaina thuakden nuam ding ka hi uh hiam? ³¹ I Topa Khazih Zeisu sungah note hong kisialhpih a ka gen in ah nisim in sihna ka thuak hi. ³² Misite a thokik lo ding hi in, mihing ngeina lel tawh Ephesus khua‑a gamsate tawh a kido hi leng, bang phattuamna om ding ahi hiam? Misite thokik lo ding hileh, “Zingciang maha a si ding i hih teh ne in dawn ni!” i cih lel ding ahi hi. ³³ Mite khemsa in om kei un. “Kholhpih hoihlo in gamtat hoih a susia hi.” ³⁴ Thuman thutak ah khanglo unla, mawhna bawl nawn kei un. Banghang hiam cihleh note pawlkhat in Pasian na thei kei uh hi. Hih thu in note maizum nadinga kong gen ahi hi. ³⁵ Ahih hangin mi pawlkhat in, “Misite koici bangin hong thokik ding uh a, bangci bang pumpi tawh hong tho ding uh ahi hiam?” na ci kha ding uh hi. ³⁶ Mihaipa aw, na tuh khaici muat masa loin a po thei kei ding hi. ³⁷ Khaici na tuh uh ciangin a hong po dingin a kung na tuh kei uh a, mangbuh tang ahi a, khaici dang khatpeuh ahi zongin a tang bek na tuh uh hi. ³⁸ Ahih hangin Pasian in ama hoihsak bangin khaici khempeuh sungah a kung ding a guan hi. ³⁹ Sa nam khempeuh a kibang kei hi. Mihingte sa nam khat, innsate sa a tuamkhat, ngasate sa a tuamkhat, vasate sa a tuamkhat ahi hi. ⁴⁰ Vantung pumpi a om mah bangin leitung pumpi zong a om hi. Ahih hangin vantung nate thupina nam khat hi a, leitung nate thupina a tuamkhat ahi hi. ⁴¹ Ni in thupina nam khat, kha in thupina a tuamkhat le aksite in zong thupina a tuamkhat a neiciat uh hi. Aksi khat le khat zong a thupina uh a kilamdang lai hi. ⁴² Misite thawhkikna zong tuamah bang ahi hi. A kituh pumpi a muatthei hi a, a muat theilo in kithosak hi. ⁴³ Vang nei loin kituh a, vangliatna tawh kithosak hi. Thanemna tawh kituh a, thahatna tawh kithosak hi. ⁴⁴ Leitung pumpi in kituh a, kha pumpi in kithokiksak hi. Leitung pumpi a om mah bangin kha pumpi zong a om hi. ⁴⁵ Lai Siangtho ah, “A masa Adam in a nungta mi khat a hong suak hi,” ci in a kigelh hi. A nunung Adam in nuntakna a pia kha ahi hi. ⁴⁶ Ahi zongin kha pumpi a om masa hilo a, leitung pumpi om masa in tua khit ciangin kha pumpi a om pan hi. ⁴⁷ A masa mi in leitung pana piang leivui tawh kibawl hi a, a nihna mi in vantung pana hong pai Topa ahi hi. ⁴⁸ Leivui pana kibawl mite in leivui pan a piang mipa tawh kibang uh a, vantung tawh kipawl mite in van pana hong pai mipa tawh a kibang uh hi. ⁴⁹ Eite in leivui pana piang mipa mel i puak mah bangin van pana hong pai mipa mel zong i pua ding hi. ⁵⁰ Tu in sanggamte aw, si le sa in Pasian kumpigam a luah thei kei hi. Tuamah bangin a muattheite in muattheihlohna a luah thei kei hi cih thu kong gen hi. ⁵¹ Ngai un, thusim khat kong gen ding hi. Eite khempeuh a ihmucip ding i hi kei a, i vekpi in i kikhel ding hi. ⁵² A nunung pengkul hong gin ciangin, mitphiat kal tomkha sungin i kikhel ding hi. Banghang hiam cihleh pengkul hong ging dinga, misite a muatthei nawnlo in kithosak ding uh a, eite zong i kikhel ding hi. ⁵³ Banghang hiam cihleh hih a muatthei pumpi in muattheihlohna silhin hih a sithei pumpi in sihtheihlohna a silh ding hi. ⁵⁴ Tua bangin hih a muatthei pumpi in muattheihlohna silh a, hih a sithei pumpi in sihtheihlohna a silh ciangin, “Zawhna sungah sihna a kivalhtum zo hi.” ⁵⁵ “Sihna aw, na gu koilai ah om ahi hiam? Hadesɠ aw, na gualzawhna koilai ah om ahi hiam?” ci a, Lai Siangtho sunga kigelhsa thu a tangtung ding hi. ⁵⁶ Sihna gu in mawhna hi a, mawhna thahatna in thukham ahi hi. ⁵⁷ Ahi zongin i Topa Zeisu Khazih tungtawn a gualzawhna hong pia Pasian tungah lungdam i ko hi. ⁵⁸ Tua ahih manin kong it ka sanggamte aw, Topa sunga hanciamtak in na nasepna uh a mawkna suak lo hi cih thei na hih manun kiptak in ding un. A kilok zolo dingin om unla, Topa nasepna ah hanciam tawntung un.

¹ Tu in misiangthote huh nading tawh kisai in Galatia gam pawlpite tunga ka thupiakte na zui un. ² Mi khempeuh in na ngahna uh tawh kizui in pawlkhat na khenkhia unla, nipi kal khat sunga ni masa pen ni in na koihkhawm un. Tua hi leh kong tun ciangin kaihkhop tawmtawm kul nawnlo ding hi. ³ Kong tun ciangin tua na citpiakte uh Jerusalem khuapi ah a puak dingin na muan uh mite sawlin lai tawh ka paisak ding hi. ⁴ Kei pai ding a kul leh amaute in keimah tawh a paikhawm ding uh hi. ⁵ Tu in Macedonia gam nawk in paisawm ka hih manin tua gam ka kantan khit ciangin, note kiangah kong pai ding hi. ⁶ Ka paina khat peuhpeuh ah nong khaksawn theih nadingun note kiangah tawlkhat tamin, phalbi sungteng bang kong omthei kha ding hi. ⁷ Tutung in note kiangah hong lambang pak a i kimuh ding ciang bek ka ut kei hi. Topa in a hong awi leh note tawh tawmvei sung a omkhawm dingin ka kilamen hi. ⁸ Ahi zongin Pentecost ni dong Ephesus khua ah ka taam ding hi. ⁹ Banghang hiam cihleh Pasian in lawhcingtak in na sep theih nading kongpi khat hong honsak zo a, hong langpan mi zong tampi a om hi. ¹⁰ Tu in note kiangah Timothy hong pai leh lauthawng lo a hong om theih nading na ngaihsun un. Banghang hiam cihleh amah in keimah bangin Topa nasem ahi hi. ¹¹ Tua ahih manin kuamah in amah neuhmuh kei un. Kei kianga nuamtak a hong ciahkik theih nadingin hong kha un. Amah i sanggam dangte tawh hong tonkhawm dingin ka na lamen ding hi. ¹² Tu in i sanggampa Apollos tawh kisai in amah note kiang hong pai ciangin a dang sanggamte tawh hong tonkhawm dingin nakpi in ka hanthawn hi. Amah in tu in hong pai noploh hangin hunlem a sak ciangin hong pai ding hi. ¹³ Pilvang unla, na upna uhah kiptak in ding un. Hang unla, thahat un. ¹⁴ Na sep na bawl khempeuh uh itna tawh a kisem hi tahen. ¹⁵ Sanggamte aw, Stephanas‑te innkuan pen Achaia gama thu‑um masapente hi uh a, misiangthote a huh dinga a kipiakna uh na thei uh hi. ¹⁶ Tua bang mite makaihna le kote hong huh a nasep a hahkat mite hong makaihnate na mang un ci in kong hanthawn hi. ¹⁷ Stephanas, Fortunatus le Achaicus‑te hong tun uh ciangin note kisapna tengah hong huh thei uh ahih manin ka lungdam hi. ¹⁸ Amaute in keimah le note lungsim hong tawldamsak uh hi. Tua ahih manin tua bang mite na pahtawi un. ¹⁹ Asia gama om pawlpi mite in note hong hopih uh hi. Aquila le Priscilla‑te in zong amau inn sunga om pawlpi tawh Topa minin lungsim takpi tawh hong hopih uh hi. ²⁰ Sanggamte khempeuh in zong note hong hopih uh hi. A siangtho kinapna tawh khat le khat kihopih un. ²¹ Keimah Paul in kong hopihna lai ka khut mahmah tawh ka gelh ahi hi. ²² Topa Zeisu Khazih a itlo mi a om leh hamsiatna thuak tahen. Topa aw, hong paita in! ²³ I Topa Zeisu Khazih hong hehpihna thupha in note hong ompih tahen. ²⁴ Kong itna in Khazih Zeisu sunga om note khempeuh tungah hong om tahen. Amen.