Eleetalayi yan Fool akiicumuu Filemoŋ
Wahawu wáamimuu li eleetalayi
Fool li hukul̥ lalakowe min akiic eleetalayi inye boot li Filemoŋ. No unnu, Filemoŋ akila li ésukayi yata Kolos, ban li alako an ata Ejanguwayi yata bo. Li eluufayi yoola ekelecenayi yata ésukayi yata Kolos enaake ewoog min el̥aw. Fool okila ájimuu Filemoŋ li áyinen li Kilisita.
Filemoŋ lababbaj no amiikeel an koone Onéesim. Onéesim, yo yommuu «an abaje jáliŋ». Onéesim ammuu amiikeel, li atey bata Filemoŋ akiloolumuu, min ajow atook Fool li hukul̥ahu. Nan Onéesim alohumuu Fool, li áyinen li Yéesu Kilisita ban li alamben Fool ŋáa’. Bale emmuu Fool abukewool Filemoŋ ban li áwooluwool ŋáa’, muñeˈe li ajok kaanaku boot min akaan Onéesim alaañ boot bata Filemoŋ, mata li eluwaayi kikkiic ló kaanaku amiikeel anoowan ateye bata anahaanool fan abaj katek káamak. Mó mújimuu, Fool li akiic eleetal boot li Filemoŋ. Li eleetalayi inyu, Fool lal̥awul̥aw ló Filemoŋ kabonket, ban li alobool min ayab Onéesim boola, loon atuyool humum hata Kilisita, bale inti loon amiikeel.
1Kasaafoo
1Injé Fool akul̥imuu mata Yéesu Kilisita áji, ikiice eleetalayi inye íginnoo ló atuyolaal Tímote.
Awu Filemoŋ likiiculo yo, ammuu ábukewoli li áfaaloli ata bulok. 2Likikkiic yo foof boot li áliinolaal Afiya, li boot li afaalolaal Alisif an oomaalumuu li bútajabu banolabu. Eleetalayi inye likikkiic yo foof boot li ejanguwayi yammuu li eluufayi yooli. 3Ateemit Atuubawolaal li Amaaŋenawu Yéesu Kilisita kujow kusenuul káji li kásuumaay.
Fool li asal Ateemit mata Filemoŋ áji
4Atuyom Filemoŋ, nanoonan nan ilakowe kal̥aw, fan íl̥imeni ban li isal Ateemit úmbaam. 5Mata lijame bukanabuku li kulob mata húbooliyahu han úboolimuu bukanabuku feh kammuu kata Ateemit, li káyinenaku kan ubajumuu li Amaaŋenawu Yéesu. 6Lil̥awe Ateemit mantee káyinenaku unku kanolaku kan ubajaalumuu awu li áloli, li kubaj jáliŋ. Mó mújimuu úhiis majakaamu feh man uyilimuu ukaanaal boot li Kilisita. 7Atuyom, húbooliyahu hooli hújiwonji li ibaj ésuumansuum yáamak li kawankulen, mata lújiji uyinumawu wata bukanabuku kata Ateemit li ubah.
Fool li al̥aw Filemoŋ min ayab Onéesim li kásuumaay
8Wahawu unwu újimuu, maayeet min ibajumuu kakaañen kabilumulo li Kilisita min ilobi waa lóotimuu ukaan, 9bale haŋ majak il̥awi wah li kajawaku kata húbooliyahu, ínje humumom Fool ahallenumee, háŋum muñeˈe nan emmee foof li hukul̥ mata Yéesu Kilisita áji. 10Lifañe min il̥awi wah boot li Onéesim1:10 Onéesim: yo yommuu «kabaj jáliŋ.», ammuu muñeˈe añoolom li káyinenaku láale li hukul̥ahe. 11Naanaŋ Onéesim ájaliŋuti maayeet, bale muñeˈe lájaliŋolajaliŋ, awu lí ínje.
12Muñeˈe boot min ílaañenuliwool, okila ammuu bugeb bata ínje humumom. 13Lifañeene min ítukool eeken téetiwom, min akaanom wahawu wan awu ooteenumuu ukaanom, láale dán emmee li hukul̥ mata Hulimahu Hásuumaahu húji. 14Bale ifañut min ikaan wah awu balobutom kayinooli. Ifañut min ituuŋi ukaanom majakaamu ummu, bale lifañe min awu humumi unong min ukaan mo.
15Nakee Onéesim lafanfan áfu’ booli kunak, bájum li abil álaañul li uyabool booli boot nanoonan. 16Ban jakum uyabool loon amiikeel laam, bale uyabool jak haŋ ŋáa’ amiikeel: loon atuyi an uboolaat. Injé humumom, Onéesim atuyom an iboolaat laam, háŋum awu jan emmuu ani laam ban li áami foof atuyi li Amaaŋenawu.
17Nokoomuu loon lujokonjok loon ínje afaali, uyab Onéesim booli loon óotimuu uyabom booli. 18Nokoomuu foof loon latittil li awu mantee foof laakisaak, li uŋa’ wahawu unwu feh ukaan li kajawaku kúmbaam. 19Injé Fool humumom ítuke li kaŋenom min ikiiculi kulimaku unke. Injé Fool humumom, fan ilaañeni. (Bale ilet li ijowi kawayil̥en kaanaku awu humumi lookonsook buloŋabu buya humum bo.) 20Atuyom, liyaaki, ulambenom li wahawu unwe li kajaw kata Amaaŋenawu: Ukaanom súum li buyinum, ínje jammuu atuyi li Kilisita.
21Likiiculikiic eleetalayi inye mata líyinenyinen kaanaku fan ukaan loon ilobimuu. Ban foof lihaase een fan ukaan haŋ to. 22Ufalewom li manolamu foof káfit ukat to, mata libabbaj kákangum kaanaku Ateemit fan ásooniyen ul̥awawu wooluul min álaañenulom boot booluul, ban let fiyo.
Kasaafoo kúbanum
23Efafulaas ammee li hukul̥ahe lí ínje mata Yéesu Kilisita áji, lásaafuli. 24Maak li Alisitaak, li Demaas li Lík kammuu kufaalom kata bulok, kúsaafuli foof.
25Kájiyaku kata Amaaŋenawu kujow kulako li bukuluul.