SÚD

Eleetalayi yan Súd akiicumuu

Wahawu wáamimuu li eleetalayi

Súd buko li Saak Amaaŋenawu oololaal Yéesu Kilisita alaheliil (Máciya 13:55, Maak 6:3). Uhaasutaal ejangu yay Súd aboñe eleetalayi inye yan akiicumuu. Wahawu wan alobumuu li eleetalayi inye ebat wo wanolawu li wammuu li eleetalayi él̥ubutayi yata Fiyeel li Hútijahu 2. Wahawu walobimuu li eleetalayi, lakolako babbaj bukan kaliikene ésukayi wah wata émalimiñ li sijanguwasu boot kayiis sijanguwasu li baliikenelabu booliil bata émalimiñayi. Bakaanelabu booliil bújumuu Súd li akiic eleetalayi inye min aan ekelecenayi étuk lit, ban li etaj boot mata káyinenaku kooliil.

Kasaafoo

¹Injé Súd ammuu aloka ata Yéesu Kilisita li atuy ata Saak ikiiculo eleetalayi inye.

Likikkiic yo boot li bukuluul kan Ateemit Atuubaawu ahooñumuu, li bukuluul kan afañumuu ban li afooyuul boot bil li Yéesu Kilisita.

²Ateemit anaak abonketuul, li akatuul li kásuumaay ban li ábooliwuul ŋáa’.

Jíkaanum káliikeneliitumuu Hulimahu hata Ateemit col

³Kufaalom kan iboolaat, lifañeene ŋáa’ min ikiiculuul mata kafakaku kammuu koololaal foofolaal feh. Bale muñeˈe lijuke een leete ikiiculuul kayitee li iwankulenuul min jitaj boot li káyinenaku kan Ateemit asenumuu bukanabuku koola ñano boot nanoonan. ⁴Mata babbaj bukan kákoliwut Ateemit kabuuyulo kúluul̥owolaal. Bukanabuku umbuku Bakiicelabu bulollob mata katekaku kooliil nan fiyo. Fan kunaak kutiigul hulimahu halobumuu mata kájiyaku kata Ateemit oololaal, min kújowum tó kukooŋen kákaanikoolaku kooliil, ban li kuceeŋ kaanaku Yéesu Kilisita balewool ammuu Anahaanawu li Amaaŋenawu oololaal.

⁵Wahawu wan emmuu li ilobuul jihaas wo feh jak, bale boot min iwayil̥enuul buu Amaaŋenawu abile afakenumuu kata Isilayeel li humiikeeleto li etaamayi yata Ejíf, ban nan fú’ tómuu li aniilen bukanabuku feh káyinenutumuu li akila. ⁶Jiwayil̥o foof kumalakaaku kátijutumuu li huhaanaahu han Ateemit aseniilumuu, min kúkatul bó bukinabu bammuu booliil. Ateemit li ajokiil ajenk boot nanoonan akat li élimayi, min kunaak Hunakahu háamakuhu hata batiibabu. ⁷Jiwayil̥o foof bukanabuku kata Sodom, li kata Gomool li kata sísuk saasu sakooj somuu, kunaake kúkaanikoomuu foof loon kumalakaabuku umbuku. Kunaanaak kúfulo bó muñaˈa, yok loon ánayine li uhinten afaalool ánayine. Kubaje katek li sambunasu sáhokoweliitumuu, min lako búhiisenum boot li alolaal foofolaal feh.

⁸Mo emmuu bukanabuku umbuku kákoliwutumuu Ateemit kukankaan mo manolamu. Kubabbaj uyinoo wabunteyiilumuu wakaaneyiilumuu kuhoofoo li siniilasu sooliil. Li kubes huhaanaahu hata Ateemit, ban li kugel kumalakaaku káyiineniyaaku kata li emitayi. ⁹Bale, maayeet Miseel humumool ammuu anahaanawu ata kumalakaaku, akaanut loon bukanabuku umbuku. Nan kúmuyumuu buko li Sayitaane min kulako búñakoo ehuluŋayi yata Móyiis, Miseel akaañenut agel Sayitaane. Lanoosaan bale: «Amaaŋenawu ajow ateki!» ¹⁰Bale bukanabuku umbuku kátuulutumuu Ateemit buko fan kugel wahawu wan kuhaasutumuu. Wahawu wan kuhine kuhaasumuu, kuhahhaas wo bale loon sínuukuleŋasu saakutumuu uyinum sihaasemuu wah. Ban wahawu unwu humum wo, wo wommuu li újimeniil. ¹¹Katek kujow kulako li buko, mata kunannab li bakaanelabu bata Kayeŋ. Kuliimooliimoo mata sídalam síji, loon Balam akaanumuu. Kuhoohoy Ateemit loon kata Koole kuhoyumuu Móyiis, ban loon kata Koole kuniilomuu mo foof kommuu li kuniilo. ¹²Bukanabuku umbuku busik koom li kúbaññaatiyaku kooluul kan kumaatemuu. Fan kutiñ kujow kufooñ gik, ban kúsuuliit miñ. Buko mooliil bale kuyinoole. Kunokoonokoo li ufaal waakut mal, wan élusayi etebemuu ewujetum. Li kunokoo foof li unuunuken wábukeliit mutiñaay, maayeet taŋayi nan ubukemuu báliiŋe. Kunokoonokoo li unuunuken wan kuhaalaku kata wo kúkululowe min usay jalab. ¹³Bakaanelabu booliil basuuneniyaabu bunokoonokoo li ñikon ñan kulambaj kata hal hatiñe kúbetenulo. Li kunokoo foof li siwuutasu sammuu li emitayi saliijoole bomuu muñaˈa. Ateemit lacookoole tan sommuu silako akat to li élimayi yáamakayi boot nanoonan.

¹⁴Buko Enok, ammuu anawu atoken li ál̥ubutawu kábilum Adam, alobumuu mooliil ákibben nan aanumuu: «Jijanten: Amaaŋenawu ummu li ebil li búsuk báamak bata kumalakaaku koola kanabaaku, ¹⁵boot batiib bukanabuku feh, min akaan bukanabuku feh kátuulutumuu Ateemit kúnaanum kaanaku fan kúbajum katek li bújakaatiyabu booliil li wahawu feh wajakutumuu wan kukaanumuu, li kulimaku feh kajakutumuu kan kuhoofoolaabuku umbuku kátuulutumuu Ateemit kulobumuu kuya li akila.» ¹⁶Bukanabuku umbuku kúkatoliit kámummunoo, ban wahoowahiil feh ufitutiil. Fan kunaak kuloŋ loon súumiilumuu, ban li kunaak kulob kulim kata katebenoolo. Li kunaak kúmammalen bukanabuku min kúbajum li buko wah.

Kulim kata kasaab káyinenumuu li Yéesu

¹⁷Bale bukuluul jammuu kufaalom kan iboolaat, jiwayil̥o kulimaku kan kufootalaku, kulob nomuu kúkibben. ¹⁸Koonuusoon: «Li húbanumahu hata taŋayi, fan baj bukan kacencengene, ban li kunaak kuloŋ loon súumiilumuu ban kúkoliwut Ateemit.» ¹⁹Bukanabuku umbuku kátuulutumuu Ateemit bukomuu! Buko kutiiloolemuu bukanabuku. Li uyinoolawu wooliil bale kunabemuu, ban Buyinumabu bata Ateemit bulet li buko. ²⁰Bale bukuluul jammuu kufaalom kan iboolaat, jiwankulenoo li káyinenaku kooluul kanabaaku. Jíl̥awum li Buyinumabu Banabaabu. ²¹Jilako li húbooliyahu hata Ateemit min jikob hunakahu nan Amaaŋenawu oololaal Yéesu Kilisita ammuu ásenuul buloŋabu bábaneliitumuu, mata kabonketaku koola kúji.

²²Jíyiyen bukanabuku káwettoolemuu. ²³Jílamul kukee li buko li sambunasu min jifakeniil. Kaabuku li jíyiyeniil, bale li ekole ló, ban li jíkaanum jakum bil jigo wañawu wooliil wan bakaanelabu booliil bajakutumuu, bubojenumuu.

Kasal kúbanum

²⁴Kasalaku kujow kulako kata Ateemit ayilimuu afooyuul jakum jibil jilo li kahoofoo, ban li ájowetumuul maakut butila banooban li ésuumansuum ló, boot to li máyiineniyamu moola. ²⁵Máyiineniyamu li húyiiyetowahu, sembaasu li huhaanaahu, wahawu unwu feh ujow ulako li Ateemit anolawu, áfakenumolaamuu li Yéesu Kilisita ammuu Amaaŋenawu.