Eleetalayi éhaajutayi yan Saŋ akiicumuu
Wahawu wáamimuu li eleetalayi
Saŋ ammuu afootal ata Yéesu okila akiice eleetalayi inye aboñ Gáyiyis. Gáyiyis ágoom laam ata Yéesu Kilisita. Uhaasutaal wah wafame li okila, ban uhaasutaal foof li ejangu yay lanaake ajow kajanga, bale li eleetalayi lujukaale kaanaku lanaanaak ayab jak bukanabuku kan Saŋ anaake aboñ bomuu. Li mal̥egenamu, Saŋ lanaanaak aboñ bukan káami li ejanguwayi yoola boot kayiiŋen Hulimahu hata Ateemit. Bale li ejanguwayi yooliil, babbaj ánayine akee an kunaake koon Jotulef. Lalakolako akee li kunahaanaku. Okila anaakut ayab bukanabuku kan Saŋ anaake aboñumuu, ban li anaak alob kulim kajakut aya li Saŋ ammuu anahaanawu ata Ejanguwayi.
Saŋ lakikkiic jileetalaju inju aboñ Gáyiyis min asalool, ban li aanool jakum aliikoo li Jotulef. Li alob Gáyiyis aanool ayab jak anawu ájowetummuu eleetalayi. Anáyinaawu ummu ájowetummuu eleetalayi kajawool Démetiliyus. Okila foof laloolok boot li Amaaŋenawu. Eleetalayi éhiisolaahiis kaanaku bukanabuku feh kammuu li bulok boot li Amaaŋenawu, lootaale uyabaaliil boololaal li húbooli ló.
1Kasaafoo
1Atuyom Gáyiyis an iboolaatumuu, ínje anahaanawu ikiiculi, awu an íboolimuu li mal̥egen.
2Atuyom an iboolaat, lil̥awe Ateemit min wahi feh ujak, ban awu humumi li ubaj kásuumaay li eniili loon foof yaali ebajumuu kásuumaay. 3Libabbaj ésuumansuum yáamak nan kutuyolaal kukee kubilumuu min kulobom kaanaku mal̥egenamu mujukijuk li buloŋabu booli, ban mal̥egen buloŋabu booli bunannab li mal̥egenamu ummu. 4Bajut wah wahaŋ másuumom bajam kaanaku bañoolom kumbuku li buloŋ nab li mal̥egenamu.
Baloŋelabu bata Gáyiyis
5Atuyom an iboolaat, wahawu feh wan ukaanemuu boot li kutuyolaal, lukaanekaan wo li mal̥egen, maayeet wan ukaanemuu boot li ejawoola. 6Kulollob mata húbooliyahu hooli hákil ejanguwayi feh. Fan jak ŋáa’ awu balambeneliil li kañaahoolaku kooliil, kalamben kásuume Ateemit. 7Elob mata Kilisita éjimuu li kujow, ban kufañut kuyab wahoowah li kuŋen kata bukanabuku kákaanumutumuu li Ateemit balewool. 8Mó mújimuu alolaal lootaale uyabaal bukan loon umbuku, mantee li ulambenaaliil li bulokabu ban kommuu li kakaanaku min mal̥egenamu muhaasi.
Jakum jiliikoo li bukanabuku kakaanemuu majakut
9Likiiculokiic kulim boot li ejanguwayi, bale Jotulef afañemuu min okila alako anahaanawu ooliil, afañut min ájantenoli. 10Mó mújimuu nan emmuu li ibil, fan ilobuul majakutamu feh man akaanumuu, li kulimaku kajakutumuu kan alobumuu aya li alolaal. Bale wahawu unwu feh ufitutool: li ahoy bayab kutuyolaal kabilumuu, ban kafañeenumuu kuyabiil li amit áhiliil kúyabumiil, min akesooliil kúfu’ li ejanguwayi.
11Atuyom an iboolaat, jakum uliikoo li wah wajakut, bale uliikoo li wah wajake. An akaane majake, Ateemit akilool, bale an akaane majakut, ahaasut Ateemit.
12Bale Démetiliyus ésukayi feh elollob majake eya li akila, ban mal̥egenamu mammuu li akila mujukijuk li buloŋabu boola. Alóli húmumoli foof jilollob majake jiya li akila, ban luhaase oon áloli wahawu wan jilobemuu mal̥egen.
Kasaafoo kúbanum
13Libaje wah wameeŋe kalobi, bale ifañut min ilobi wo li eleetal. 14Lenseen let fiyo ujukooluma min uloba bújooŋoo.
15Kásuumaay kulako li awu! Kufaali kúsaafuli. Usaaf anoowan li kufaalolaal.