Eleetalayi él̥ubutayi yan Fool akiicumuu kata Tesalonik
Wahawu wáamimuu li eleetalayi
Li eleetalayi inye él̥ubutayi, loon foof li étinaalayi yan Fool akiicumuu ekelecenayi yata Tesalonik, lasassal Ateemit humum hata ekelecenayi yata Tesalonik mata kubabbaj káyinen maayeet min kite eenimuu kúlaamenilaamen, ban li kufañoofañoo foof. Fool lakikkiic eleetalayi inye min awankuleniil, ban li alambeniil li wahawu wayokeniilumuu li ejanguwayi.
Li Hútijahu 1, Fool lawankulenwankulen ló ekelecenayi yata Tesalonik yan kulakomuu kálaamenaku, ban li awayil̥eniil aaniil Amaaŋenawu Yéesu fan álaañul min afakeniil, ban li atek bukanabuku kálaamenemuu li buko. Li Hútijahu 2:1-12, Fool li alaañen alob mata élaañulayi yata Amaaŋenawu. Baje bukan kaane ekelecenayi Yéesu lálaañulo aban, min kukaaniil kúyeko. Fool li alob set kaanaku bala Yéesu álaañul, fan jand baj an áamak ál̥afute áami li álaŋul. Anawu ummu lababbaj sembaasu sata Majakutamu, ban fan atiiken Ateemit. Bale Amaaŋenawu Yéesu fan amukool. Li Hútijahu 2:13-3:15, Fool li aan ekelecenayi kútuk lit li káyinenaku kooliil ban li kunaak kul̥aw. Nan Fool alakomuu li aban eleetalayi inye, li alob mata wah wagole Ejanguwayi yooliil. Wahawu unwu wo wommuu lajanjam kaanaku baje kukee li Ejanguwayi yata Tesalonik, kafañut bulok. Fool li aan kulobiil kukat to, mata baloŋelabu booliil umbu bunaboolut li kulimaku kan aliikeniilumuu (Hútijahu 3:6-15). Fool li ásooniyeniil li húbanumahu hata eleetalayi.
1Kasaafoo
1Injé Fool, famen to Silibeŋ. 2Ateemit Atuubawoolaal li Amaaŋenawu Yéesu Kilisita kujow kúsooniyenuul ban li kusenuul kásuumaay.
Amaaŋenawu fan álaañul abil atiib adunaayi
3Kutuyom, óloli joote jisal nanoonan Ateemit mata bukuluul jíji. Jaajak min óloli jikaan mo, mata káyinenaku kooluul li Yéesu Kilisita kunku min kuhaŋemuu malit, ban húbooliyahu han anoowan li bukuluul abajumuu li kaabuku hunhu foof min huhaŋemuu maluuk. 4Mó mújimuu, áloli húmumoli li jinaak jisaloolo mooluul li sijanguwasu sata Ateemit, mata min bukuluul jítukumuu lit ban li jiloŋ li jíyinen li Yéesu, maayeet min bukanabuku kúlaamenuulumuu ban li kuyokenuul ŋáa’.
5Wahawu unwu feh úhihhiis kaanaku batiibabu bata Ateemit bucoccol. Sílaamasu san jílaamemuu li so, so sommuu lí síjiwuul li jilako bukan katooke kalako li Jáyiiyaju jata Ateemit jájimuu li jóomi li sílaamasu unsu. 6Li mal̥egenamu, Ateemit lakankaan Ateemit acole: fan akaan bukanabuku kálaamenuulumuu kúlaam sílaamasu san kukaanuulumuu, 7ban bukuluul jammuu li sílaam fan asenuul kayool̥o, li áloli foof. Fan akaan wahawu unwu nan Amaaŋenawu koola ló kata sembe. 8Yéesu fan abilum li húlaañaañ hata sambun, boot katek bukanabuku kahaasutumuu Ateemit ban li kuhoy bakaan loon Hulimahu Hásuumaahu hata Amaaŋenawu oololaal Yéesu hulobumuu. 9Katekaku kan bukanabuku umbu kommuu li kubaj, ko kommuu sílaam1:9 Lík 16:19-31 boot nanoonan, lóyi Amaaŋenawu li sembaasu soola sáyiineniyaasu. 10Li hunakahu unhu nan ammuu li abil, bukanabuku koola fan kúbinkenool, ban káyinenumuu li akila feh li kúgaalenool. Bukuluul humumuul fan jilako li bukanabuku umbu, mata jíyinenyinen li hulimahu han áloli jiwaalewuulumuu.
11Mó mújimuu, áloli jikatut kal̥aw boot li bukuluul. Jil̥awel̥aw Ateemit oololaal mantee li akaanuul jilako bukan katooke buloŋabu ban ahooñuulumuu boot. Jil̥awool̥aw mantee li alambenuul li sembaasu soola, min jikaan majakaamu feh man jifañumuu min jikaan, ban li akaan min baloŋelabu booluul búhiis kaanaku jibabbaj káyinen. 12Muñowu bukuluul jommuu li jíji kajawaku kata Amaaŋenawu oololaal Yéesu li kúbinkeni, ban okila humumool foof li ábinkenuul. Wahawu unwu feh ubilumbilum li kájiyaku kata Ateemit oololaal li kata Amaaŋenawu Yéesu Kilisita.
2Wahawu wammuu li ujand ubaj tówum Amaaŋenawu álaañul
1Muñeˈe mata élaañulayi yata Amaaŋenawu li mata huwoogahu hoololaal li akila, kutuyom, wah wano jil̥awuul: 2Jijamumuu an li aanuul hunakahu hata élaañulayi yata Amaaŋenawu húliiŋulo, jakum jiyaan jihi li kaliiwo, jakum foof jíkoli. Nakee an fan alobuul mo min lako búlobum Ateemit, nakee li bawaaleye, mantee foof li lako áloli jikiiculuul kulimaku unku li eleetal. 3Jakum jikat an min abuntuul li makaane manooman. Li mal̥egenamu hunakahu unhu let húliiŋ búsukabu bajandut buhoy Ateemit, min Anawu átuulutumuu Ateemit áfulul, áami tómuu abilum aniileni. 4Fan áhi’ bukanabuku kúmanenum wahoowah feh wan kumanenemuu, li ahoy foof wahawu wan kujokumuu loon ateemit. Fan ajokoolo ahaŋ wahawu unwu feh, ban fan akaañen ajow abah li eluufayi yata Ateemit, min aan akila humumool ammuu Ateemit.
5Jiwayil̥owut kaanaku lilobuulob mo nan ilakomuu li bukuluul? 6Ban bukuluul humumuul jihaase waa ujokumuu anawu átuulutumuu Ateemit, wájimuu áfululolut boot muñeˈe. Bale nan taŋayi yommuu li éliiŋ, Anawu ummu átuulutumuu Ateemit fan áfulul. 7Mata sembaasu sata anawu ummu átuulutumuu Ateemit sítoŋe kakaan bulok ban an ayilaat ajuk jak. Bale anawu ummu átuulutumuu Ateemit let áfulul boot yok nan anawu ajokoolumuu ammuu li ayinneni li bútinabu. 8Muñeˈe, anawu ummu átuulutumuu Ateemit fan áfulul, ban Amaaŋenawu Yéesu fan amukumool li huhuufenahu hata butumabu boola, ban li aniilenumool li máyiineniyamu moola nan ammuu li álaañul. 9Nan anawu ummu átuulutumuu Ateemit ammuu li abil li sembaasu sata Sayitaane, fan akaan wah wabaje sembe, li wah wájaahaleniye li búhiisenum banooban bájaahaleniye bata jabunt bukan. 10Fan aŋa’ makaane manooman majakut min abunt bukanabuku kammuu lí kújim. Wahawu wájimuu li kóoti kújim, wo wommuu min kufañutumuu kuyab mal̥egenamu maateenumuu mufakeniil. 11Wahawu unwu újimuu Ateemit lí áboñuliil sembe sata jabunt min sikaaniil kúyinen li wah wata émalimiñ. 12Mó mújimuu Ateemit fan atek bukanabuku feh káyinenutumuu li mal̥egenamu, ban li kunaak kubaj ésuumansuum li kakaan majakut.
Jilako bukan kal̥egene lí káyinenaku kooliil
13Kutuyom, óloli joote jisal nanoonan Ateemit mata bukuluul jíji, jan Amaaŋenawu afañumuu. Mata Ateemit lal̥usuul̥us yaan no li húkitumahu min áfakenumuul li Buyinumabu Banabaabu bakaanuulumuu jilako bukan kata Ateemit, jówum foof min jíyinenumuu li mal̥egenamu. 14Wahawu unwu Ateemit áhooñumuluumuu li Hulimahu Hásuumaahu han jiwaalewuulumuu, mantee li jibaj jooluul li máyiineniyamu mata Amaaŋenawu oololaal Yéesu Kilisita. 15Kutuyom, mó mújimuu jítuk lit ban li jijok wahawu wan jiliikenumuulumuu li útumoli mantee foof li eleetalayi yóololi.
16Amaaŋenawu ololaal Yéesu Kilisita humumool, li Ateemit Atuubawolaal, ábooliwolaamuu ban li awankulenolaal kawankulen kata boot nanoonan, ban lí ájowum li kájiyaku koola min asenolaal húkangum habaje sembe, 17kujow kuwankulenuul ŋáa’, ban li kusenuul sembe mantee wahoowah feh wan jikaane li wan jilobe, li ujak.
3Jil̥aw boot li áloli
1Kutuyom, muñeˈe jil̥aw boot li áloli mantee Hulimahu hata Amaaŋenawu li hunaak huhaŋ majamo ŋáa’ ban li huluukeni tanootan loon huluukenimuu foof booluul. 2Jil̥aw foof mantee Ateemit li áfakenoli li bukanabuku kajakutumuu ban li kúl̥afut. Mata inti bukanabuku feh kufañe min kúyinen Hulimahu.
3Bale Amaaŋenawu alobumuu kakaan wah, fan akaan wo, fan asenuul sembe ban li afooyuul li Majakutamu. 4Amaaŋenawu lákaanolikaan jibaj húkangum li bukuluul kaanaku bukuluul jumbuku li kakaan wahawu wan jilobuulumuu ban let jikat kakaan wo.
5Amaaŋenawu ajow akaan min jíbooli Ateemit li uyinumuul, ban li akatuul húmuñahu han Kilisita asenemuu.
Joote jilok loon áloli
6Kutuyom, wahawu unwe jil̥awuul li kajaw kata Amaaŋenawu: jitey an li bukuluul afañut bulok, ban li ahoy baloŋ nab li makaanelamu man jiliikeniilumuu. 7Bukuluul humumuul jihaase buu jommuu li jikaan loon áloli jikaanemuu. Mata áloli jikaanut bukan káfal̥e nan jilakumuu booluul. 8Alóli jikatut an min ákuumenoli maayiiñ, bale jiloolok etihunaka jiban ehuka li buyok li sílaam ló, jakum bil akee li bukuluul ákiloli hutiñ. 9Imban, tookeene min áloli jíyabum li bukuluul wah wata kalamben, bale jikaanut mo mantee li jilako bukittenoolum bajake boot li bukuluul. 10Li mal̥egenamu, nan jilakomuu booluul jilobuulob kaanaku: «An afañutumuu min alok, jakum foof atiñ.»
11Alóli jilobuulob mo mata jijanjam kaanaku kukee li bukuluul kufañut bulok, min laññiil li kanoken li silob satookutiil. 12Bukanabuku umbuku áloli jumbuku li kal̥awiil ban li jiwankuleniil li kajaw kata Amaaŋenawu oololaal Yéesu Kilisita, min kubeben min kulok min kúbajum to buko humumiil wahawu wan kóotummuu kutiñ.
13Kutuyom, bukuluul jakum jikat kakaan majake. 14Nokoomuu loon an li bukuluul akaanut loon jilobuulumuu li eleetalayi inye, jílangumaasowool ban jakum an li bukuluul akoojool, mantee li asuu. 15Bale jakum jiŋalool jikaan alatooluul. Jisaabool loon atuyaay asaabeyimuu.
Kásooniyen li kasaaf
16Amaaŋenawu asenemuu kásuumaay, ajow asenuul akila humumool kásuumaay kanookan ban nanoonan. Amaaŋenawu ajow alako li bukuluul foofuul feh.
17Injé Fool humumom ítuke li kaŋenom min ikiiculuul kulimaku unke min isaafuluul. Li kuŋenom humum ko likiicume kulimaku unke. Muñowu lílangumaasoyemuu sileetalasu súmbaam feh, muñaˈa foof likiicemuu eeno.
18Kájiyaku kata Amaaŋenawu oololaal Yéesu Kilisita kujow kulako li bukuluul foofuul feh.