Eleetalayi él̥ubutayi yan Saŋ akiicumuu
Wahawu wáamimuu li eleetalayi
Afootalawu Saŋ, ammuu anahaanawu ata ejanguwayi yata ésukayi yata Efées, lakikkiic aleetalawu umme aboñ ejangu. Ejanguwayi inyu yoonosoono li halaabahu hata ésukayi yata Efées. Saŋ li akittenoolum ejanguwayi inyu li anaale, bukanabuku kata ejanguwayi li ajokiil loon bañiilabu bata anaalaawu ummu. Mó mújimuu, li ahooñ ejanguwayi «aseekawu». Ejanguwayi dán ajowemuu kajanga li yoono «atuy» ata yaayu.
Saŋ li aan bukanabuku kata Ejanguwayi inyu kufañoo, ban li kujuke to bukanabuku kaliikenemuu ésukayi wah wata émalimiñ. Bukanabuku umbuku kubilumuu booliil jakum kuyabiil.
1Kasaafoo
1Injé Anahaanawu1:1 Anahaanawu: nan Saŋ akiicumuu kulimaku unku okila bahallene, ikiiculo boot li Anaalaawu1:1 Anaalaawu: unte yilo lako Saŋ ejangu lakiice eleetalayi inye ban li ahooñ yo anaale mata jálaatenaju jíji an Ateemit al̥usumuu, li boot li kuñoolool kan íboolimuu li mal̥egen. Inti ínje balewom íbooliwuul, bale bukanabuku feh kahaasumuu mal̥egenamu kúbooliwuubooli foof. 2Mata mal̥egenamu mummu li alolaal, ban fan mulako li alolaal boot nanoonan.
3Ateemit Atuubaawu li Yéesu Kilisita, ammuu Añiilawu ata Atuubaawu, kujow kusenolaal káji, kabonket li kásuumaay, min uyili uloŋaal li mal̥egenamu li húbooliyahu.
Jiloŋ buloŋ bata húbooli
4Súumonsuum ŋáa’ min ijukumuu kaanaku kukee li kuñooli, buloŋabu booliil bunannab li mal̥egenamu, loon Atuubaawu alobolaalumuu. 5Anaale, muñeˈe lil̥awi eeni: úbooliwoolaal. Inti eluwa ewunkul likiiculi, bale eluwaayi yan uyabaalumuu yaan no li húkitumahu. 6Húbooliyahu ho hommuu min uloŋaal loon siluwaasu sata Ateemit silobumuu. Li mal̥egenamu, eluwaayi yata Ateemit, loon jijam yomuu yaan no li húkitumahu, yo yommuu inye: jiloŋ buloŋ bata húbooli.
Jijuke to kámalemuu
7Kúmalamiñ kameeŋe kuyiisoole kujow koono tanootan li adunaayi. Kuhoohoy koon Yéesu Kilisita labiibil min alako mal̥egen an. An loon muñaˈa okila ammuu ámalamiñ. Okila ammuu Alatoolaawu ata Kilisita. 8Kama bukuluul humumuul joote jijuke to, jakum bil wahawu wan ulokaalumuu újim li bukuluul, bale min jiyab bacaam bálile.
9An anabutumuu nanoonan li baliikenelabu bata Kilisita, min átij to, anawu ummu ayabut Ateemit. An anabumuu nanoonan li baliikenelabu bata Kilisita, anawu ummu layayyab Atuubaawu li Añiilawu. 10Nokoomuu loon an abile atookuul ban aliikenutuul nab li baliikenelabu umbu bata Kilisita, jakum jiyabool booluul, ban jakum foof jisaafool. 11Mata an asaafoolumuu, anawu ummu, ummu ló li bakaanelabu boola bajakutumuu.
Hulimahu húbanumahu
12Libaje wah wameeŋe kalobuul, bale ifañut min ilobuul wo li eleetal. Lifañe min ibil boot booluul min ilob li bukuluul bújooŋoo, mantee li ubajaal ésuumansuum yáamak.
13Bañiilabu bata Atuyi, an Ateemit al̥usumuu foof, busaafuli.