Eleetalayi étinaalayi yan Fool akiicumuu Tímote
Wahawu wáamimuu li eleetalayi
Tímote an ata ésukayi yaaneyimuu Lisit li etaamayi yata Likawoni (Bakaanelabu 14:6). Etaamayi inyu yata Likawoni yo yooneyimuu muñeˈe Túluki. Atuubaawu ata Tímote an áfulumulo li etaamayi yata Gilees. Jaawool okila asuwif. Nan Fool awaalemuu Hulimahu Hásuumaahu hata Yéesu li ésukayi Lisit, Tímote buko li jaawool Oónis, li jaawool ahaan Lóyis, li kusen buloŋiil Yéesu. Nan Fool alaañumuu búl̥ubut boot li ésukayi yata Lisit áliiŋ, li aŋa’ Tímote min alambenool li bulokabu bata Amaaŋenawu (Bakaanelabu 16:1-3).
Li eleetalayi inye lujukaale kaanaku Fool li ésukayi yata Efées lájowume boot li etaamayi yata Aasi alo li yata Maseduwaan. Nan alakomuu li ajow, li akat li ésukayi yata Efées Tímote boot min áhi’ bukanabuku kaliikenemuu ésukayi wah wata émalimiñ (Hútijahu 1:3). Fool lakikkiic eleetalayi inye boot kawankulen Tímote li kasaabool mata bulokabu ban akaanemuu li Ejanguwayi.
Li Hútijahu 1, li 4 li foof 6, Fool lalollob mata bukanabuku kaliikenemuu ésukayi wah wata émalimiñ, min kukat bo baliikenelabu bata mal̥egenamu. Baliikenelabu umbu bammuu émalimiñ, bulollob mata eluwaayi yata Ateemit li mata káyinenaku li Yéesu. Li Hútijahu 2, Fool lansaan ekelecenayi kunaak kul̥aw ban li aliikeniil mata kal̥aw. Li Hútijahu 3, li alob buu kunahaanaku kata Ejanguwayi kóotimuu kuloŋ eeno. Li Hútijahu (4:6-6:2), Fool li awankulen Tímote mata min akaan bulokabu bata Ateemit. Li akittenool buu lammuu li akaan min alok boot li bukanabuku feh kábutoomuu kammuu Ejanguwayi, loon aloka ajake ata Yéesu Kilisita áatimuu akaan.
Li húbanumahu hata eleetalayi, Fool li awankulen Tímote mata min ataj bútajabu bata káyinenaku.
1Kasaafoo
1Injé Fool ammuu afootal ata Yéesu Kilisita li búlobum bata Ateemit humumool, ammuu Afakenaawu oololaal li Yéesu Kilisita an úkangumaalumuu li akila, 2ínje ikiiculo eleetalayi inye boot li awu Tímote, ammuu añoolom ata mal̥egen li káyinenaku: Ateemit atuubaawu li Yéesu Kilisita ammuu Amaaŋenawu oololaal, kujow kuseni káji, kabonket li kásuumaay.
Jakum jijanten bukanabuku káwaaleyeliitumuu hulimahu hata Ateemit col
3Lifañe min ulako li ésukayi yata Efées loon ilobimuu nan ilakomuu li ijow boot Maseduwaan. Baj to bukan kaliikene ésukayi kulim kanaboolut li káyinenaku koololaal. Oon bukanabuku umbuku kukat. 4Ulobiil min kukat elob mata ukoŋawu unwu, li elob mata uland waakut húwuñenum. Wahawu unwu búwonnoo babajut jáliŋ bale úŋalewul, bale ulambenut bukanabuku li káyinenaku kooliil, min kuhaas wahawu wan Ateemit ammuu li kakaan. 5Wahawu wájimuu li ilobi loon muñaˈa wo wommuu min baj húbooli habilumulo li buyinum bajake, buyinum babahe li káyinen kata mal̥egen. 6Kukee kukaakat bo buloŋabu umbu bacolumuu min kulo li búwonnoo babajut jáliŋ bakaaniilumuu kújim. 7Li kufañ kulako kuliikena káamak kata eluwaayi yata Ateemit, bale kúnaanumut kulimaku kooliil humum ko, li wahawu wan kulobemuu mata wo li kákangum ló káamak.
8Luhaasaale oonaal eluwaayi yata Móyiis ejaajak, yo baŋaleli min kaan loon elobumuu. 9Uhaasaal wahawu unwe: eluwaayi ekaanuti boot li bukan kakaane majake, bale ekaanikaan to boot li kákaanikoolemuu li kákaaneliitumuu loon elobumuu. Ekaanikaan to boot li kákoliwutumuu Ateemit li kuhoofoolaaku, boot li bukanabuku kaluukenutumuu Ateemit li wahawu wanabaawu. Ekaanikaan to foof boot li kamukemuu situubayiil mantee foof sijaawiil, boot li kumuka bukan. 10Eluwaayi ekaanikaan to boot li bukanabuku kahintowemuu li bukan kan kuyabowut, boot li kánayinaabuku kahintenemuu kufaaliil kánayine, boot li bukanabuku kájulayemuu emiikeelayi. Ekaanikaan to foof boot li kámalemuu li bukanabuku kanuulemuu ban let kukaan loon kunuulumuu, boot foof li bukanabuku káhoogulemuu baliikenelabu bata mal̥egen. 11Baliikenelabu umbe bumbu li Hulimahu Hásuumaahu hata máyiineniyamu mata Ateemit ata kásooniyen. Ateemit humumool asenom homuu.
Fool li asal Kilisita
12Lisale Amaaŋenawu, min ajukumuu kaanaku litottook min aŋalom min ilok boot li okila, ban li asenom sembe min ikaan bulokabu boola, 13maayeet min ilob nomuu kulim kajakut iya li akila, li ílaamenool ban li ikaanool majakut. Bale Ateemit láyiyenonyiyen mata ibajeenut káyinen li akila, ban ihaasut wahawu wan ilakomuu kakaan. 14Bale Amaaŋenawu oololaal li áhiisom másuumamu moola ŋáa’, ban li asenom káyinen li húbooliyahu hammuu li Yéesu Kilisita. 15Hulim unhe hata mal̥egen hatooke min ésukayi feh eyab ho: Yéesu Kilisita labiibil li adunaayi boot kafaken kuhoofoola. Ban ínje humumom emmuu átinaa li kuhoofoolaabuku umbuku feh. 16Bale wahawu unwe újimuu Ateemit li áyiyenom: lafanfañ min Yéesu Kilisita áhiisum lí ínje, ammuu átinaa li kuhoofoolaabuku feh, húmuñahu hoola háamakahu, min lako bukittenoolum boot li bukanabuku kammuu li kubil kúyinen li akila, min kubaj buloŋabu bábaneliitumuu.
17Awu ammuu Ayíi boot nanoonan,
Awu áketeliitumuu ban újukeliiti,
Awu bale ommuu Ateemit,
kábinkenaku li máyiineniyamu,
mujow mulako mooli
boot nanoonan! Aameen.
18Añoolom Tímote, kulimaku unke lifañumuu min iseni. Kunaboonaboo li kan kufulofetaku kulob nomuu kuya li awu. Ujówum li kulimaku unku min utaj bútajabu bajakaabu, 19li káyinenaku ló ban li buyinum babahe. Bukan kukee kuhoohoy kujanten uyinumawu wooliil, mó lí múji káyinenaku kooliil li kújim. 20Li bukanabuku umbuku, Himene buko li Alekusandul kumbuku ló. Liŋaliiŋa’ ibet li kuŋen kata Sayitaane mantee li kuhaas koon kukat kúgel Ateemit.
2Ayi jóotimuu jinaak jil̥aw boot li okila?
1Boot min ijand iwankulenuul min jinaak jil̥aw Ateemit boot li bukanabuku feh, li jiyaakoolool ban li jilobool wah wan jokuul li wo, li jinaak foof jisalool. 2Joote jil̥aw boot li kúyiiyaku li kunahaanaku kata ésukayi feh, mantee li ubajaal buloŋ bata kabeben li bata kásuumaay, min útuulaal Ateemit ban li uloŋaal buloŋ batooke kasal. 3Wahawu unwu ujakumuu ban li úsuum Ateemit ammuu afakenaawu ololaal, 4afañumuu min bukanabuku feh kufak ban li kuhaas mal̥egenamu. 5Li mal̥egenamu, Ateemit ano bale abaje, ban foof an ano bale li áami li tutoo Ateemit li bukanabuku. Anawu ummu okila ammuu Yéesu Kilisita, 6asenumuu buloŋool humum bo min acaam boot kafaken bukanabuku feh. Wahawu unwu Kilisita akaanumuu min áhiis, nan taŋayi yan Ateemit ajokumuu yommuu li éliiŋ, kaanaku Ateemit lafanfañ min bukanabuku feh kufak. 7Mó mújimuu Ateemit li al̥usom min akaanom ayiiŋena li afootal, boot kaliiken bukanabuku kaletumuu kusuwif mata káyinenaku li Yéesu Kilisita li mal̥egenamu. Imálut, mal̥egen lilobe.
8Lifañe kama tanootan feh, kánayinaabuku li kuteb kuŋeniil kanabe min kul̥aw, ban jakum kukaan mo li etindihuuñ ló mantee foof li búñakoo kulim ló.
Buloŋ bata anaale áyinene li Yéesu
9Lifañe foof min kaalaabuku kunaak kukoko búkoko bal̥uule, balewoo to ban li kawalenoolo ló. Jakum kúsangenoolum buhec batiineniye ŋáa’, mantee éwulus li usis, mantee foof wañ waseele. 10Bale kukaan majake, loon kanaalaabuku feh kaanumuu kútuttuul Ateemit kóotimuu kukaan. 11Anaale laate anaak alu min ajanten bawaaleyelabu, li kawalenoolo ló. 12Ifañut min anaale awaale, mantee foof li ágoben ánayine. Bale laate alu. 13Li mal̥egenamu, Ateemit Adam lajande áwuwen, ban kit Eewa. 14Ban inti Adam kubuntumuu, bale anaalaawu kubuntumuu min alo li kahoofoo. 15Bale anaalaawu kabukoolaku2:15 Húkitumahu 3:15: Síliibal sakee sikaane, anaalaawu okila babaje añiil. Kabukoolaku ko kommuu Yéesu Kilisita koola fan kújiwool li afak, nokoomuu loon látuutuk lit káyinenaku li húbooliyahu, li abaj buloŋ banabe, ban li awalenoolo.
3Kunahaanaku kata Ejanguwayi
1Hulimahu unhe hulim hata mal̥egen: An li bukuluul afañumuu min alako anahaan li Ejanguwayi, anawu ummu lafañe bulok bajake. 2Anahaan ata Ejangu laate alako an, an an aatut ajuk majakut manooman li akila. Laate abaj anaale ano. Aatut awuuhen li wahoowah. Laate alako an abaje buyinum, ban li abaj buloŋ bajake. Laate foof alako an ayabe boola bukan jak ban li ayili awaale hulimahu hata Ateemit. 3Jakum alako an ákaliyenoole mantee foof an ámuyitene bukan, bale laate akaan an ájoobiye buyinum ban li alako an abebene. Jakum lako an afañe sídalam ŋáa’. 4Laate alako an ajoke butoŋool jak, ban li akaan manooman min bañoolool bútuulool li wahoowah feh. 5Li mal̥egenamu, nokoomuu loon an ayilaat aaken butoŋool, buu laate ayili ajok jak Ejanguwayi yata Ateemit? 6Jakum anahaan ata ejangu alako an akite li áyinen li Yéesu, letumuu mo, fan abil ateben ubandool min abaj katek loon kata Sayitaane. 7Laate foof alako an, an bukanabuku káyinenutumuu li Yéesu kulobe majake kuya li akila, jakum bil ésukayi ebesool, mantee foof li alo li embaalayi yata Sayitaane.
Kujaakulaku kata Ejanguwayi
8Kujaakulaku foof koote kulako bukan, kan ésukayi esuuwe ban jakum kulako bukan káhoolowe. Jakum kulako bukan kákaliyenoole, mantee foof bukan kaweelowe li sídalam. 9Koote kujok jak mal̥egenamu man Ateemit áhiisumuu ban li úyinenaal li mó li buyinum bajake. 10Koote kujand kuyoobi, ban nokoomuu loon bajut wah wajakut wajuki li buko, li kukit kuyili kulako kujaakul. 11Li manolamu, kanaalaabuku foof kammuu kujaakul koote kulako kanaale kan ésukayi esuuwe, ban jakum kunaak kúloboo bukan. Kootut foof kuwuuhen li wahoowah, ban li kulako bukan kabajut búhoolo banooban.
12Ajaak anoowan laate abaj anaale ano, ban laate foof ayili ajok bañoolool li butoŋool jak. 13Kujaakulaku kakaanemuu bulokabu booliil jak anoowan laluukeniiluuken, ban kuyilo kulob li kabaneyiil feh mata káyinenaku kan ubajaalumuu li Yéesu Kilisita.
Mahaaseenutimuu li mulaañ muhaasi
14Tímote, likiiculikiic kulimaku unke li kákangum ló kaanaku fan ibil ínabenuli, ban let fiyo. 15Bale nokoomuu loon íbilaaliwut, kulimaku unke fan kújiyi li uhaas buu lommuu uloŋ eeno li butoŋabu bata Ateemit, bammuu Ejanguwayi yata Ateemit aloŋumuu, yammuu yiilayi li ekuŋayi yakegumuu mal̥egenamu.
16Mal̥egen, ban an ayilaat aceeŋ,
Mahaasutimuu mata káyinenaku koololaal mululluuk!
Kilisita láfuluufulul ajuki loon an,
Buyinumabu Banabaabu búhihhiis kaanaku lacoccol,
ban Kumalakaaku kujukoojuk.
Li kulob foof moola bata kaletumuu kusuwif,
li kúyinen li akila li adunaayi feh,
ban li ájowetumi boot li emitayi li máyiineni ló.
4Baliikene balet mal̥egen
1Buyinumabu bulollob buhant boon, li kunakaku kúbanumaku bukan kameeŋe fan kukat bo káyinenaku kooliil, min kujow kunab li uyinum wabunte, li baliikene bata uyinum wajakut. 2Fan kukat bukan kámale ban li kúhoolo min kújimeniil, bukan kan uyinumawu wooliil ukete loon eenimuu mañ máwake kuŋale min kúsu’ wó. 3Bukanabuku umbuku kúhilehi’ ésukayi éyabowum, ban li kúhiliil foof kutiñum mutiñaay mukee. Ban Ateemit láwuwenwuwen mutiñaayamu ummu, mantee káyinenumuu li akila, kahaasumuu mal̥egenamu, li kul̥awool ban li kusalool min kutiñ mo. 4Li mal̥egenamu, wahoowah feh wan Ateemit áwuwene ujaajak. Bajut wah waate uhoyi, samin ulakomuu li utiñ wo li ujand ul̥aw ban li usal Ateemit. 5Mata hulimahu hata Ateemit li kal̥awaku, fan kúji wahawu unwu li ulako wah wata Ateemit.
Aloka ajake ata Yéesu Kilisita
6Ukittenumuu wahawu unwu feh kutuyi, fan ulako aloka ajake ata Yéesu Kilisita. Fan úhiis kaanaku li kulimaku kasenemuu káyinen li baliikenelabu bata mal̥egenamu ban unabumuu li bo jak, lúkuumenumi. 7Uhoy ukoŋawu wákaaneliitumuu bukan kúyinen li Yéesu Kilisita, wammuu wata siñaakanasu saalaasu. Ukankaanoo min unaak útuul Ateemit. 8Kakaan min eniilayi elako li kásuumaay kubabbaj jáliŋ li wah watit, bale kátuul Ateemit kubabbaj jáliŋ li wahawu feh, mata kúŋaluleŋalul kásooniyen boot li buloŋabu umbe li boot li buloŋabu babilemaa. 9Hulimahu unhe hulim hata mal̥egen, hatooke min bukanabuku feh kuyab ho. 10Li mal̥egenamu, loonowaasoono li bulok súf li bútaj, mata lúkangumaakangum li Ateemit aloŋumuu, ammuu afakenaawu ata bukanabuku feh, háŋum káyinenumuu li akila.
11Ulob bukanabuku feh kulimaku unku ban li uliikeniil ko. 12Jakum ukat an min abesi mata min ommuu áfu’, bale ulako bukittenoolum boot li káyinenumuu, li malobelamu mooli, li makaanelamu mooli, li húbooliyahu hooli, li káyinenaku kooli li manabamu mooli. 13Ujuke to min ujanga Bakiicelabu hákil ésukayi feh, uwankuleniil ban li uliikeniil bo tówum ibil. 14Jakum ubet to kájiyaku kan Buyinumabu busenimuu, kan uyabumuu nan kufulofetaku kulobumuu mooli, li nan kunahaanaku kuŋalumuu kuŋeniil kuwalen li awu. 15Ujooŋoo to min ukaan wahawu unwu feh. Usenoolo foofi feh boot li bulokabu umbu. Mo lommuu ukaan, bukanabuku feh li kujuk bulokabu ban ukaanumuu. 16Ujuke to li awu humumi li baliikenelabu booli. Uhanken to jaj. Li mal̥egenamu, ukaanumuu loon muñaˈa, fan ufakenoolo awu humumi li bukanabuku kajanteneyimuu foof.
5Wahawu wan kátuulumuu Ateemit kommuu kukaan
1Jakum uwataten ánayine ahallene li sembe, bale uwankulenool loon atuubayi laam. Ujok bukanabuku kañiilomuu loon kutuyi. 2Kaalaabuku kahallenumuu, ujokiil loon sijaawi. Kanaalaabuku kañiilomuu li ujokiil loon kúliini. Uloŋ buloŋ banabe hákiliil.
3Ucookoo kanaalaabuku kahokumuu kúyiniil, kabajutumuu li mal̥egen kulambena. 4Nokoomuu loon anaale ahoke áyinool abaje kuñiil mantee kuñool kuñoolool, buko umbuku koote kujand kuliiken kútuul Ateemit li butoŋabu booliil humum bo, min kuyili kulaañen sibukoolayiil li sibukoolayiil sihaan wahawu wan kookiilumuu. Mata wahawu unwu Ateemit afañumuu. 5Anaale ahoke áyinool ban abajut an áami li acookoolool, li Ateemit lákangume. Let akat kal̥awool li kayaakoolool etihunaka aban ehuka min alambenool. 6Bale Anaale ahoke áyinool ban kayinoolool feh huŋes másuume, lakeeket maayeet min kite eenimuu ummu li buloŋ. 7Wahawu unwe lóotimuu ulobiil jakum bil an awatateniil li wahoowah. 8Nokoomuu loon an acookoolut bukanool, háŋum bukanabuku kata butoŋabu boola, anawu ummu lakaakat bo káyinenaku koola, ban lahaŋe májakaati an áyinenut.
9Boot min anaale ahoke áyinool acobi li kanaalaabuku kahokumuu kúyiniil, anaalaawu ummu laate abaj simit kúyii kúhaaji, ban li alako anaale ayabowe li ánayine ano bale. 10Laate áhaasumi li bakaanelool bajake: ágoocul bañoolool jak, li ayab ejawoola boola jak, li afos kootaku kata káyinenumuu li Yéesu, li alamben bukanabuku kammuu li sílaam ban li ahanken li kakaan wahoowah feh wajake.
11Bale kanaalaabuku kañiilomuu ban li kuhok kúyiniil, jakum ukaaniil ló, mata nan kásiibowaku kooliil kommuu kújiyiil li kufañ min kulaañen kuyabo, li kukat bo Kilisita. 12Muñowu kóotummuu kúŋalul batiib boot li buko, mata kúhooguuhoogul hulimahu han kulob nomuu kakaan hákil Kilisita. 13Ban foof, kubajutumuu bulok kakaan, li kunaak kunoonoo siluufasu. Bale wahawu wahaŋumuu májakaati, inti mata min kubajumuu bulok kakaan, bale élobulayi yameeŋaayi, elob waleewalet, ban li kunaak kulob silob satookutiil. 14Mó mújimuu, lifañe min kanaalaabuku kañiilomuu ban li kuhok kúyiniil kulaañ kuyabo min kubaj bañiil, ban li kooken siluufasu sooliil jak. Jakum kusen bútin alatoolaawu oololaal min alob majakut aya li ololaal. 15Li mal̥egenamu, baje kukee li kaalaabuku kahokumuu kúyiniil kayaane kújim min kujow kunab li Sayitaane. 16Nokoomuu loon anaale áyinene li Yéesu abaje li bukanool kanaale kahoke kúyiniil, laate alambeniil jakum bil akatiil min kulako búteb boot li Ejanguwayi, mantee Ejanguwayi li eyili elamben kanaalaabuku kahokumuu kúyiniil ban li kóomi li mal̥egen liwooniil.
17Kunahaanaku kajokumuu Ejanguwayi jak, háŋum kaakumuu bútebabu bata kawaale li kaliiken bukanabuku Hulimahu, tooke min kuyab bacaam baleˈe ñál̥uba li bacaamabu ban kubajemuu. 18Li mal̥egenamu, Bakiicelabu bonsoon: «Jootut jikok butum bata húmuuna ho li etoboj edenfeteŋ5:18 Dótelonom 25:4», ban li boon foof: «Aloka laate ayab bacaamool5:18 Lík 10:7.» 19Jakum an al̥oof anahaan ata Ejangu, li oon éehe’ li mo, mantee ló balakowe bukan kúl̥uba mantee foof kúhaaji kamaate buko baane mal̥egen. 20An akaanumuu kahoofoo, uwatatenool hákil ésukayi feh mantee kaabuku li kúkoli kakaan kahoofoo5:20 An akaanumuu kahoofoo…: Unte iyilo lako akee li kunahaanaku kata ejanguwayi. Mó mújimuu li síliibal sakee kukaane: Anahaan ata ejangu akaanumuu kahoofoo, uwatatenool hákil ésukayi feh mantee kaabuku li kúkoli kakaan kahoofoo.
21Fan ilobi hákil Ateemit li Yéesu Kilisita, li foof hákil kumalakaaku kal̥usimuu eeni: ukaan loon kulimaku unku kulobumuu ban jakum ulaañ bata anoowan, jakum ujuke li buul. 22Jakum usommen uŋa’ kuŋeni uwalen li an, jakum uŋa’ butumi ukaan li kahoofoo kata an. Ukaan awu humumi min ulako an anabe.
23Jakum unaak uhob mal bale, bale unaak uhob bunuk jatit mata halahu huya húji li kásontoolaku kuya.
24Kukee uhoofoolawu wooliil ujukeyijuk tówum kutiibi, bale kaabuku wooliil búsol ujukeyi. 25Li manolamu, bakaane bajake bujukeyijuk jak, bale maayeet bayilaatimuu juk jak, buyilaat buyoli kale.
6Buloŋ bata amiikeel
1Bukanabuku feh kammuu li humiikeeleto koote kujok kunahaanaku kooliil bukan katooke min kuluukeni, jakum bil an alob majakut aya li kajawaku kata Ateemit li Baliikenelabu foof boololaal. 2Emiikeelayi yabajumuu kunahaan káyinene li Yéesu, jakum kubes kunahaanaku kooliil mata waa kutuyiil koom. Bale koote kuhaŋ malok jak boot li buko, mata kunahaanaku kooliil kammuu li kúbajum wah li bulokabu booliil, bukan káyinene li Yéesu koom, ban Yéesu lafañiifañ ŋáa’.
Káyinen kata mal̥egen
Wahawu unwu lommuu li uliiken bukanabuku ban li ulobiil min kukaan wo. 3Nokoomuu loon an akee aliikene wah wábuto, min akat bo kulimaku kata mal̥egen kata Amaaŋenawu kammuu baliikenelabu bakaanemuu bukanabuku kútuul Ateemit, 4anawu ummu an atebenoolowe laam ban ahaasut wahoowah. Lásomuusomut li búceeŋoo ban li anaak ámuy mata kulim. To untu batahaayabu bubilumulemuu, li úmuyawu, li kúgelaku, li eyindiyoonayi yajakutumuu, 5búceeŋoolabu bábaneliitumuu bata bukanabuku kata uyinumawu wacolutumuu, kahaasutumuu mal̥egen. Kuyinooyinoo li koon kátuul Ateemit senesen hubaj.
6Mal̥egen, kátuul Ateemit hubaj háamak boot li an, okila balewoole li wahawu wan abajumuu. 7Li mal̥egenamu, ubilutaal li wahoowah li adunaayi inye, ban let újowetumaal wahoowah nan ommuu úfulaal li yo. 8Mo emmuu, ubajaalumuu hutiñolaal li wañ, li uluukenaal. 9Bale bukanabuku kafañumuu min kulako kusaanum, fan kulo li jabunt. Jabuutoolaju jata kásiibo kameeŋe kata bul̥uuhoo ban kujakut, fan kujokiil. Kásiibowaku unku kuniilenemuu ban li kújimen bukanabuku umbuku. 10Li mal̥egenamu, efañ sídalam huhaa’ hata majakut manooman. Kukee síibiisiib kubaj sídalam bil gay, li kúloyi káyinenaku min kukaanoolo buko humumiil sílaam sameeŋe.
Utaj jakum bil káyinenaku kooli kufaki
11Bale awu, ammuu an ata Ateemit, utey wahawu unwu feh. Uŋes min ulako an acole, an átuke li Ateemit, an ata káyinen, an ata húbooli, an ayilo húmuñ li an ájoobiye buyinum. 12Utaj jakum bil káyinenaku kooli kufaki. Ujok buloŋabu bábaneliitumuu ban Ateemit ahooñimuu boot li bo, loon awu humumi ulob momuu li kulimaku kásuumaku kan ulobumuu mata káyinenaku kooli hákil bukan kameeŋe. 13Boot ilobi hákil Ateemit asenemuu buloŋ wahoowah feh, li hákil Yéesu Kilisita alobumuu kulim kásuume kata mal̥egen hákil Fons Filat, eeni: 14ukaan jak loon kulimaku kan uyabumuu kulobumuu. Jakum util li ko tanootan ban jakum foof an ayili alob majakut aya li awu boot yok nan Amaaŋenawu oololaal Yéesu Kilisita ammuu li álaŋul. 15Nan taŋayi yommuu li éliiŋ,
Ateemit fan akaanool álaŋul,
Ateemit ata kásooniyen,
okila ammuu Ayíi balewool,
Ayíiyawu ata kúyiiyaku,
Amaaŋenawu ata kumaaŋenaku.
16Akila bale ayilaatumuu aket,
akinumuu li mawuŋe dán an ayilaat ajow.
Bajut an abile ajukool,
ban an ayilaatool ajuk.
Kábinkenaku li sembaasu sijow silako soola boot nanoonan! Aameen.
17Ulob bukanabuku kammuu kusaanum li adunaayi unye ooniil jakum kutebenoolo, ban jakum foof kúkangum li hubajahu unhu haatutumuu hufiyo, bale kúkangum li Ateemit asenewolaalumuu wahoowah feh ŋáa’ mantee li úbajumaal li wo kásuumaay. 18Ulobiil ooniil kukaan majake, ban li kubaj wah wajake wameeŋe wan kukaane. Ooniil kukaan bukan kásuume ban kubajumuu wah, li kugaboo wo li kaabuku. 19Muñowu kommuu kukaan, li kuwoogen hubaj hajake ban li hulit boot kajom, mantee li kubaj buloŋabu bata mal̥egen.
Kasaafoo kúbanum
20Tímote, ujok jak wahawu wan Ateemit asenimuu ooken. Utey elobayi yameeŋaayi yákaaneliitumuu bukanabuku kútuul Ateemit, li búceeŋoo mata wahawu wan kukee kúmalumuu koon laalu ehaasemiñ6:20 Ehaasemiñ: Huŋes min haas wahawu wabajemuu li adunaayi (science). 21Kukee kakaanemuu loon kubabbaj ehaasemiñayi inyu, kúloyiloyi káyinenaku.
Kájiyaku kata Ateemit kulako li bukuluul!