1 SAŊ

Eleetalayi étinaalayi yan Saŋ akiicumuu

Wahawu wáamimuu li eleetalayi

Bukanabuku konsoon Saŋ ammuu afootal ata Yéesu, lajowujow akin li ésukayi yata Efées. Fool ayitene sijanguwasu sata ésukayi inyu. Nan Saŋ áliiŋ bomuu, li alako anahaanawu ata sijanguwasu unsu. Wahawu unwu újimuu li anaak ahooñ ekelecenayi yata sijanguwasu unsu «kuñoolom».

Saŋ sileetal síhaaji lakiice. Etínaalayi akiicut yo boot li ejangu yano, mantee foof boot li an ano, bale lakikkiic eleetalayi inyu boot min ejangayi li sijanguwasu feh. Li eleetalayi wah úl̥uba lakiic ló. Wahawu útinaalawu, wo wommuu lansaan ekelecenayi kunab li bútinabu bacolaabu. Hulimahu unhu ho hommuu koote kúyinen li Amaaŋenawu oololaal Yéesu, ban li kufañoo. Wahawu úl̥ubutawu, wo wommuu koote kujuke to bukanabuku kaliikenemuu ésukayi wah wata émalimiñ. (Hútijahu 2:18-29; 4:1-6).

Bañiilabu bata Ateemit kúyinenyinen kaanaku li mal̥egenamu Yéesu Kilisita ál̥ahukowan laam. Bukanabuku káhoogulumuu kulimaku unku buko kommuu kulatoolaaku kata Kilisita. Káyinenumuu li Yéesu koote kukaan li mal̥egenamu loon hulimahu han kujamumuu hulobumuu yaan no li húkitumahu. Hulimahu unhu hoone: ufañ Ateemit, yo yommuu hufañ bukan kaabuku, mata Ateemit húbooli laam (Hútijahu 4:8). Buloŋabu bata ekelecenayi boote bunaboo li wahawu wan kúyinenumuu lí wó.

Hulimahu hata buloŋabu

¹Jikiiculuukiic boot min jilobuul mata anawu ammuu Hulimahu hata buloŋabu. Hulimahu unhu hubabbaj yaan no li húkitumahu. Lujamaajam Hulimahu, ban li ujukaal ho li kúkilolaal. Li ulasowaal ho, ban li ugolaal ho li kuŋenolaal. ²Anawu ummu ammuu buloŋabu láfuluufulul, ban lujukaaloojuk. Wahawu unwu újimuu li joonowuul li elob moola, ban li jilobuul mata buloŋabu bábaneliitumuu balakomuu li Atuubaawu, báfululumuu ujukaal. ³Wahawu wan áloli jijukumuu ban li jijam wo, wo jommuu foof li kahebuul, mantee bukuluul li áloli li ujokoolaal min ulakowaal an ano. Hujamoolahu hoololaal ho hommuu hujamoo li Atuubaawu li Añoolool Yéesu Kilisita. ⁴Jikiiculuukiic kulimaku unke mantee ésuumansuumayi yóololi1:4 Yóololi: Li síliibal sakee li sihaanasu, “yooluul” yóomi ló li ehaŋ maluuk boot to.

Ateemit mawuŋe

⁵Ateemit mawuŋe. Bajut élim yanooyan li akila. Hulimahu unhu áloli jíjamummuu li Yéesu Kilisita, han jóomimuu li elobuul. ⁶Nokoomuu loon loonaasoon lujamoolaajamoo li Ateemit ban li uloŋaal buloŋ bata élim1:6 …ban li uloŋaal buloŋ bata élim: Kukee “…ban li újowumaal li élim” kukaane, lúmalaamal. Ukaanutaal loon mal̥egenamu mulobumuu. ⁷Bale nokoomuu loon luloŋaaloŋ buloŋ bata li mawuŋe loon Ateemit humumool ammuu li mawuŋe, muñeˈe no unnu lujamoolaajamoo ban húsimahu hata Añoolool Yéesu, fan hufos uhoofoolawu woololaal feh.

⁸Oonaamuu ubajutaal kahoofoo, lubuntoolowaale ololaal humumolaal, ban mal̥egenamu mulet li alolaal. ⁹Bale uhebaalumuu Ateemit uhoofoolawu woololaal, fan abonketolaal wo ban li áfulen majakut manooman máami li ololaal, mata lal̥egenl̥egen ban li acol. ¹⁰Li bil oonaal ubajutaal kahoofoo, Ateemit lujokaale ámalamiñ, ban hulimahu hoola hulet li ololaal.

Kilisita labiibil boot kalambenolaal

¹Kuñoolom, likiicuukiic kulimaku unke jakum bil jihoofoo. Bale nokoomuu loon akee li bukuluul ahoofoole, lubajaale akooŋena hákil Atuubaawu: Okila ammuu Yéesu Kilisita, acolumuu. ²Mata Yéesu lasenoolosenoolo min aket boot kabonket uhoofoolawu woololaal, ban inti boot li uhoofoolawu woololaal bale, bale foof boot li uhoofoolawu wata adunaayi feh.

³Ukaanumuu loon siluwaasu soola silobumuu, tó lóotumaalumuu uhaasaal kaanaku luhaasaaloohaas. ⁴An aanumuu: «Lihaasool», ban akaanut loon siluwaasu soola silobumuu, anawu ummu ámalamiñ, ban mal̥egenamu mulet li akila. ⁵Bale an akaanumuu loon hulimahu hoola holobumuu, anawu ummu láhiisunhiisum tó kaanaku húbooliyahu hata Ateemit hunhu li akila boot to. Muñowu lóotumaalumuu uhaasaal oonaal lujamoolaajamoo li akila. ⁶An aanumuu li Yéesu lajoke, anawu ummu laate aloŋ akila humumool loon Yéesu aloŋumuu.

Eluwaayi yawunkulayi

⁷Kufaalom, inti eluwa ewunkul likiicuul, bale eluwa ehaan yan jiyabumuu yaan no li húkitumahu. Eluwaayi unyu ehaanayi yo yommuu hulimahu han jijamumuu. ⁸Bale maayeet mo, eluwa ewunkul likiiculuul, ban mal̥egenamu mata yo mujukijuk li Kilisita li bukuluul foof. Mata élimayi inyu li ejow, ban mawuŋaamu mata mal̥egen muyaane mútoŋ muwuŋen.

⁹An aanumuu li mawuŋaamu laam ban li alat atuyool, anawu ummu laloŋe li élimayi boot muñeˈe. ¹⁰An áboolimuu atuyool, anawu ummu, ummu nanoonan li mawuŋaamu, ban bajut wah li akila waate újiwool li alo li kahoofoo. ¹¹Bale an alatumuu atuyool, anawu ummu ummu li élim. Ummu li buloŋ li élimayi, ban ahaasut bay lajowe boot, mata élimayi éfuumenoofuumen.

¹²Kuñoolom, likiiculuukiic min íhiisuul kaanaku uhoofoolawu wooluul ubonketibonket humum hata kajawaku kata Kilisita. ¹³Kunahaan, likiiculuukiic min íhiisuul kaanaku jihaase anawu afimmuu min áami tó yaan no li húkitumahu. Báfulabe, likiiculuukiic, min íhiisuul kaanaku jiheeheek Sayitaane.

¹⁴Bañoolom, ilaañen ikiiculuul min íhiisuul kaanaku jihaase Atuubaawu. Kunahaan, ilaañen ikiiculuul min íhiisuul kaanaku jihaase anawu afimmuu min áami tó yaan no li húkitumahu. Báfulabe, ilaañen ikiiculuul min íhiisuul kaanaku jibabbaj sembe. Hulimahu hata Ateemit hunhu nanoonan li bukuluul, ban jiheeheek Sayitaane.

Jíkaanum makaanelamu mata kata adunaayi

¹⁵Jakum jifañ adunaayi li wahawu wata yo. Mata an afañumuu adunaayi, abajut húbooli hata Atuubaawu. ¹⁶Wahawu feh wammuu li adunaayi: kásiibo kajakut kan an abaje, kásiibo wah wan ujuke, li katebenoolo mata hubaj, wahawu unwu ubilumut li Atuubaawu bale li adunaayi. ¹⁷Adunaayi fan eban boot li wahawu wan bukanabuku kúsiibowemuu, bale anawu akaanumuu wahawu wan Ateemit afañumuu fan aloŋ boot nanoonan.

Alatoolaawu ata Yéesu Kilisita

¹⁸Kuñoolom, taŋayi ébanumayi ékoojulo! Jijanjam kaanaku Alatoola ata Kilisita fan abil. Ban muñeˈe baje kulatoola kameeŋe kata Kilisita. Wahawu unwu újimuu luhaasaale oonaal taŋayi ébanumayi éliiŋe. ¹⁹Kulatoolaabuku umbuku kata Kilisita li alolaal kúfulume, bale kufinut min kulakowe koololaal. Mata li mal̥egenamu kulakoweenumuu bukan koololaal, fan kulakoween nanoonan li alolaal. Bale kúfuffu’ li alolaal min híis kaanaku anoowan li buko alakowut li mal̥egen an oololaal.

²⁰Bale bukuluul jiyayyab Buyinumabu Banabaabu ban Kilisita akaanumuu li bukuluul. Mó mújimuu bukuluul foofuul feh jihaase mal̥egenamu. ²¹Min ikiiculuumuu inti eeniseen jihaasut mal̥egenamu, bale jihaas mo. Ban jihaase foof joon émalimiñ eyilaat ebilumul li mal̥egen. ²²Kama ayimaa ammuu ámalamiñawu? Inti anawu aceeŋumuu kaanaku Yéesu ammuu Kilisita? Anawu ummu okila ammuu alatoolaawu ata Kilisita; ban li aceeŋ aan Ateemit ammuu Atuubaawu, Yéesu li áami Añiilawu. ²³An aceeŋumuu aan Yéesu ammuu Añiilawu, anawu ummu ahaasut foof Atuubaawu. An li aan Yéesu ammuu Añiilawu, anawu ummu foof lahaase Atuubaawu.

²⁴Mó mújimuu, jiŋa’ kulimaku kan jijam nomuu yaan li húkitumahu, jikaan li uyinumuul. Nokoomuu loon kulimaku kan jijam nomuu yaan li húkitumahu kunku nanoonan li uyinumuul, fan foof jijamoo li Añiilawu li Atuubaawu. ²⁵Ban wahawu wan Kilisita alobumuu kasenolaal, wo wommuu buloŋ bábaneliit.

²⁶Bukanabuku kafañumuu kabuntuul kújimuu li ikiiculuul wahawu unwu. ²⁷Bale bukuluul, Kilisita laŋaŋŋa’ Buyinumabu boola akaan li bukuluul. Emmuu Buyinumabu bumbu nanoonan li bukuluul, jokutuul min akee abil aliikenuul, mata Buyinumabu fan buliikenuul wahoowah feh. Ban wahawu wan bommuu li buliikenuul wah wata mal̥egen, let wah wata émalimiñ. Wahawu unwu újimuu jikaan loon Buyinumabu buliikenuumuu, min jibaj hujamoo halite li Kilisita.

²⁸Kuñoolom, muñeˈe jítuk hujamoolahu hooluul li Kilisita lit, bilum eeno nan ammuu li abil li ubajaal kákangum, ban let ubajaal ñisuu hákilool li hunakahu nan ammuu li álaañul. ²⁹Nokoomuu loon jihaase kaanaku Kilisita lakankaan an acole, joote jihaas foof kaanaku an anaakumuu akaan wah wacole, anawu ummu añoolool laam.

Bañiilabu bata Ateemit bootut bubaj buloŋ bata kahoofoo

¹Jijuke buu Atuubaawu afañoolaalumuu ŋáa’! Hufañahu han afañolaalumuu huluuluuk gay li uhooñaali bañiil bata Ateemit. (Ban mal̥egen bañiil Ateemit loomaal.) Bukanabuku kata adunaayi kuhaasut Ateemit, wahawu unwu újimuu kuhaasutolaal. ²Kutuyom kan iboolaat, muñeˈe alolaal bañiil bata Ateemit loomaal; bale wahawu wan oomaalumuu li ubil ulakowaal, uhaasolutaal wo jak. Bale luhaasaale oonaal nan Kilisita ammuu li abil, fan unokoolaal loon akila, mata fan ujukaalool loon aanomuu. ³Anoowan feh abaje li Kilisita kákangum loon unku, laate akaanoolo an anabe loon Kilisita humumool akaanumuu an anabe.

⁴Anoowan feh akaane kahoofoo, lahuusuuhuusul foof eluwaayi yata Ateemit, mata kakaan kahoofoo yo yommuu kahuusul eluwaayi yata Ateemit. ⁵Imban jihaase joon Yéesu labiibil boot káfulen uhoofoolawu, ban akila humumool abajut kahoofoo. ⁶Mó mújimuu, an átukumuu lit li Yéesu, laate akat kahoofoo. Bale an aloŋumuu li akaan kahoofoo, anawu ummu ajukutool ban ahaasutool.

⁷Kuñoolom, jíkaanum, jakum an abuntuul. An akaane wah wacole, lakankaan an acole loon Kilisita humumool akaanumuu an acole. ⁸An aloŋumuu li akaan kahoofoo, anawu ummu an ata Sayitaane. Mata Sayitaane yaan no li húkitumahu lahoofoole. Añiilawu ata Ateemit li abil boot kakajen bulokabu bata Sayitaane.

⁹An áami añiil ata Ateemit akat kahoofoo, mata buloŋabu babilumulomuu li Ateemit li anawu ummu bul̥uki loon sígul. Anawu ummu ayilaat anaak akaan kahoofoo, mata Ateemit ammuu Atuubawool. ¹⁰An anaakutumuu akaan col, mantee foof afañut atuyool, anawu ummu alet añiil ata Ateemit. Muñowu lóotumaalumuu uhaasaal bukay kommuu bañiilabu bata Ateemit, li bukay kommuu bañiilabu bata Sayitaane.

Bukanabuku koote kúbooliwoo

¹¹Li mal̥egenamu, hulimahu unhe jijamumuu yaan no li húkitumahu: Ubóoliwoolaal. ¹²Ootut ukaanaal loon Kayeŋ alakomuu añiil ata Majakutamu, ban li amuk atuyool. Wáa újimuu li amukool? Mata bakaanelabu bata Kayeŋ bujakut, bale bata atuyool bucoccol.

¹³Kutuyom, bukanabuku kata adunaayi kulatuulumuu, jakum jisego. ¹⁴Luhaasaale oonaal li eketayi lúfulumulaale ubil oonowaal li buloŋabu, mata lufañaafañ kutuyolaal. An afañutumuu atuyool, anawu ummu laloŋe li eketayi. ¹⁵An alatumuu atuyool, anawu ummu amukabukan. Ban jihaase joon amukabukan abajut buloŋabu bábaneliitumuu li akila. ¹⁶Yéesu Kilisita lasensen buloŋool boot li alolaal. Muñowu lúhaasumaamuu waa wommuu húbooli. Mó mújimuu lootaale foof usenaal buloŋolaal boot li kutuyolaal. ¹⁷Bale nokoomuu loon an akaane usaanum ajuke aan atuyool jokoojok li wah, imban li ásiibool li wó, buu anawu ummu ammuu usaanum ayilo aan húbooliyahu hata Ateemit hunhu li akila? ¹⁸Kuñoolom, jakum húbooliyahu hoololaal hulako hin kulim bale mantee hin elob li butum bale, bale húbooliyahu hoololaal hoote hujukumi li bakaanelolaal bajake ban li mal̥egen.

Buu lóotumaalumuu ubajaal kákangum hákil Ateemit

¹⁹Muñowu lóotumaalumuu uhaasaal kaanaku li mal̥egenamu lúfulumulaale, muñowu foof uyinumolaal wóotummu ubah hákil Ateemit. ²⁰Mata nokoomuu loon buyinumabu boololaal boonolaal ukaanutaal jak, Ateemit lahaŋe buyinumabu boololaal ban lahaase wahawu feh. ²¹Kufaalom, li bil nokoo loon buyinumabu boololaal boonutolaal ukaanutaal jak, li ubajaal kákangum hákil Ateemit. ²²Ateemit fan asenolaal wahawu feh wan ommuu ul̥awaalool, mata lukaanaakaan loon siluwaasu soola silobumuu, ban li ukaanaal wahawu wásuumoolumuu. ²³Ban eluwaayi yoola muñeˈe elobe: lootaale úyinenaal li kajawaku3:23 Kajawaku kata Yéesu Kilisita: kajawaku koola, yo yommuu huhaanaahu hoola kata Añoolool Yéesu Kilisita, ban li úbooliwoolaal loon akila humumool alobolaalumuu. ²⁴An akaanumuu loon siluwaasu sata Ateemit silobumuu, anawu ummu li Ateemit laam nanoonan ban Ateemit ummu nanoonan foof li akila. Buyinumabu Banabaabu ban asenolaalumuu bó bújimuu li uhaasaal oonaal Ateemit ummu li alolaal.

Buu jóotimuu jikaan min jihaas buyinum babilumulo li Ateemit li babilumulo li Sayitaane

¹Kutuyom kan iboolaat, jíkaanum jakum jíyinen bukanabuku feh kaanemuu Buyinumabu bata Ateemit kooke. Bale jinaak jiyoob bukanabuku umbuku min jijuk mantee buyinumabu ban kookumuu li Ateemit bubilumulo. Mata bukan kameeŋe kámale koon kufulofet koom, kúfululo muñeˈe kóomi tanootan li adunaayi. ²Wahawu wayilimuu úhiis kaanaku Buyinumabu bata Ateemit bumbu li an, wo wommuu unwe: an aanumuu Yéesu Kilisita labiibil min alako li mal̥egen an, anawu ummu lababbaj Buyinumabu babilummuu li Ateemit. ³Bale an alobutumuu loon muñaˈa mata Yéesu, anawu ummu abajut Buyinumabu babilummuu li Ateemit. Buyinumabu ban anawu ummu abajumuu, bo bommuu buyinumabu bata Alatoolaawu ata Kilisita. Buyinumabu umbu jijamumuu kaanaku fan bubil, ban muñeˈe buyaane bóomi li adunaayi.

⁴Kuñoolom, bukuluul bukan kata Ateemit joom ban jiheeheek kámalumuu koon kufulofet koom; mata Buyinumabu bata Ateemit bammuu li bukuluul buhaŋe sembe buyinumabu bata Alatoolaawu ata Kilisita bammuu li adunaayi. ⁵Buko bukan kata adunaayi koom, wahawu unwu újimuu li kunaak kulob loon kata adunaayi kulobemuu, ban adunaayi li ejanteniil. ⁶Bale alolaal bukan kata Ateemit loomaal. An ahaasumuu Ateemit fan ajantenolaal. An aletumuu ata Ateemit let ajantenolaal. Muñowu lóotumaalumuu uhaasaal Buyinum bay bulobemuu mal̥egen li bay bommuu buyinumabu bámalemuu.

Ateemit húbooli laam

⁷Kutuyom kan iboolaat, úbooliwoolaal mata húbooliyahu li Ateemit hubilumulo. An abajumuu húbooli, añool Ateemit laam ban lahaase Ateemit. ⁸An abajutumuu húbooli, ahaasut Ateemit mata Ateemit húbooli laam. ⁹Ateemit láboñuuboñul Añoolool anolawu li adunaayi bánum li úloŋumaal li akila. Muñowu Ateemit áhiisumolaalumuu buu lábooliwolaalumuu eeno. ¹⁰Húbooliyahu ho hommuu unhe: inti ololaal úbooliyaale Ateemit, bale akila humumool ábooliwolaal, ban li áboñul Añoolool abil asen buloŋool bulako kasila min uhoofoolawu woololaal ubonketi.

¹¹Kutuyom kan iboolaat, nokoomuu loon Ateemit muñowu lábooliwolaalumuu ŋáa’, kama ololaal foof lootaale úbooliwoolaal. ¹²Bajut an abile ajuk Ateemit. Bale úbooliwoolaalumuu, Ateemit fan alako nanoonan li alolaal ban húbooliyahu han ábooliwolaalumuu fan hujow boot to.

¹³Ateemit lasenolaasen Buyinumabu boola. Muñowu lúhaasumaamuu oonaal alolaal ummuwaal nanoonan li Ateemit ban okila ummu nanoonan li alolaal. ¹⁴Alóli húmumoli jijuke li kúkiloli, ban li jilob bukanabuku kaanaku Atuubaawu láboñuuboñul Añoolool abil alako Afakenaawu ata adunaayi. ¹⁵An aanumuu Yéesu ammuu Añiilawu ata Ateemit, Ateemit ummu nanoonan li anawu ummu, ban akila foof ummu nanoonan li Ateemit. ¹⁶Ban ololaal luhaasaahaas húbooliyahu han Ateemit abajumuu li ololaal, ban lúyinenaayinen lí hó.

Ateemit húbooli laam. An áamimuu nanoonan li húbooliyahu, anawu ummu, ummu nanoonan li Ateemit ban Ateemit ummu nanoonan li akila foof. ¹⁷Húbooliyahu háamimuu li alolaal hoote hujow boot to, mantee li ubajaal kákangum li hunakahu hata batiibabu. Fan ubajaal kákangum mata buloŋabu boololaal li adunaayi inye, bunokoonokoo li bata Yéesu Kilisita. ¹⁸Ekole elet li húbooli. Bale húbooli hata mal̥egen húfulenefulen ekole. Mó mújimuu, húbooli hata mal̥egen hulet li an abaje ekole, mata ekole lanaboolenaboo li katek.

¹⁹Alolaal lúbooliyaabooli mata Ateemit ajande ábooliwolaal. ²⁰An aanumuu: «Líboolibooli Ateemit» ban li alat atuyool, anawu ummu ámalamiñ. Mata anawu ummu ábooliwutumuu atuyool an ajukemuu, let ábooli Ateemit an ájukeliitumuu. ²¹Eluwaayi inye Yéesu Kilisita asenolaalumuu: an áboolimuu Ateemit laate ábooli foof atuyool.

An áyinenumuu kaanaku Yéesu ammuu Kilisita anawu ummu añiil ata Ateemit

¹An áyinenumuu kaanaku Yéesu ammuu Kilisita, anawu ummu añiil ata Ateemit laam. Ban an áboolimuu Ateemit Atuubaawu, anawu ummu fan ábooli foof bañiilabu bata Ateemit. ²Ubóoliyaalumuu Ateemit, ban li ukaanaal loon siluwaasu soola silobumuu, li úhiisumaal tó kaanaku lúbooliyaabooli bañiilabu bata Ateemit. ³Mata húbooli Ateemit, ho hommuu kakaan loon siluwaasu soola silobumuu. Ban kakaan loon siluwaasu soola silobumuu, séngiwut. ⁴Mata añiil anoowan ata Ateemit laheeheek adunaayi. Li káyinenaku koololaal lúheekumaalumuu adunaayi. ⁵Ayi aheekumuu adunaayi? Anawu áyinenumuu kaanaku Yéesu ammuu Añiilawu ata Ateemit, okila bale aheekumuu adunaayi.

Wahawu walobimuu mata Yéesu mal̥egen

⁶Yéesu Kilisita okila ammuu anawu abilummuu li mal li húsim5:6 Li mal li húsim: Li sibiibul sakee, li malamu mata kábatiisaaku, li húsimahu hata eketayi labilume. Inti li mal bale labilume, bale li mal li húsim labilume. Ban Buyinumabu li bulob min búhiis kaanaku mal̥egen, mata Buyinumabu bommuu mal̥egenamu. ⁷Mata baje wah úhaaji wáhiise kaanaku mal̥egen. ⁸Wo wommuu Buyinumabu, malamu li húsimahu. Wahawu unwu úhaaji ujamoojamoo. ⁹Lúyinenaaleyinen li kulimaku kata bukanabuku, ban kulimaku kan Ateemit alobumuu mata Añoolool kuhaŋe kata bukanabuku ŋáa’. ¹⁰An áyinenumuu li Añiilawu ata Ateemit, anawu ummu láyinenyinen li hulimahu unhu. An áyinenutumuu li Ateemit, anawu ummu lajoojok Ateemit ámalamiñ, mata áyinenut li kulimaku kan Ateemit alobumuu mata Añoolool. ¹¹Kulimaku unku ko kommuu unke: Ateemit lasenolaasen buloŋabu bábaneliitumuu, ban buloŋabu umbu bumbu li Añoolool. ¹²An ayabumuu Añiilawu, buloŋabu layabe. An ayabutumuu Añiilawu, buloŋabu layabut.

Yéesu Kilisita ammuu buloŋabu bábaneliitumuu

¹³Likiicuukiic kulimaku unku bukuluul jáyinenumuu li kajawaku kata Añiilawu ata Ateemit, mantee li jihaas kaanaku jibabbaj buloŋabu bábaneliitumuu. ¹⁴Kákangumaku unke lubajaalumuu hákil Ateemit: ul̥awaaloolumuu wah wanaboole li húnongumahu hoola, fan ajantenolaal. ¹⁵Ban uhaasaalumuu oonaal Ateemit lajantenewolaajanten nan ul̥awaalemuu, luhaasale foof oonaal fan asenolaal wahawu wan ul̥awaaloolumuu.

¹⁶An ajukumuu atuyool okila li kakaan kahoofoo kaatut kújiwool li aket, laate al̥aw, ban Ateemit fan asen atuyool ummu buloŋ. Ilobut bukanabuku kakaanumuu uhoofoo waate újiyiil li kuket. Mata baje kahoofoo kájiye an li aket. Inti kahoofoo loon unku leenuul jil̥aw boot li ko. ¹⁷Bakaane banooban banabut li hulimahu hata Ateemit, kahoofoo. Bale foof inti kahoofoo kanookan kumuke.

¹⁸Luhaasaale oonaal an áami añiil ata Ateemit let anaak akaan kahoofoo, mata Añiilawu ata Ateemit lafooyoofooy, ban Sayitaane let ayili li akila wahoowah.

¹⁹Luhaasaale oonaal alolaal Ateemit akilolaal, ban adunaayi feh yo inyu li kuŋenaku kata Sayitaane.

²⁰Luhaasaale oonaal Añiilawu ata Ateemit labiibil, ban li asenolaal butuuko min uhaasaal Ateemit ata mal̥egen. Li Añoolool Yéesu Kilisita lúbajumaamuu hujamoo li Ateemit ata mal̥egen. Añiilawu ummu akila humumool ammuu Ateemitawu ata mal̥egenamu, akila ammuu buloŋabu bábanelitumuu.

²¹Kuñoolom, jíkaanum kuteemitaku kaletumuu mal̥egen.