Vëvë Filip

Kayëte nte kerëhnëkëhni Pol vëvë Filip

Wade yehëhna hnë iŋi kayëte

Filip nkol nte hwëhnak nafa mbë Masedëwan ye. Afaƴik Pol njiko hnam wati nte njasëɗëho nkaw̃ ntëw̃u kigëna ŋa. Apëƴahnëk Wanës Wakasëk ŋa nkol tac hafo vahnë va kwëtahnëni do cery sali ŋa ntiyak. Njëkëryin Kayëte Vantiyehn Vefaƴik hna 16.11-40.

Pol, gë Timote ɗarël lëw̃u, kerëhnëkëhni vële hw̃ëtahnëk vëvë Filip va wati nte nkeho hnë kaso mbë Sesare (yëbëlan bëhn wafëhw imbëɗ gë warar gë bëhn wafëhw imbëɗ g’imbëɗ gë warar (53 gë 58) ga ndëcëk hnagi Yesu ỹa) ma hnë kaso mbë Rom (yëbëlan bëhn wafëhw imbëɗ gë ryaw̃ ma bëhn wafëhw imbëɗ gë ryaw̃ gë wahi (60 gë 62) ga ndëcëk hnagi Yesu ỹa). Vahnë vëvë nkol Filip va mbarëniho wayëɗ do njëɗaniha aryampo hnë vëhni, Epafërodi, soŋe njëɗahna Pol. Awa, Pol kerëhnëkëhni soŋe camehnëhni do kamënaỹehnëhni. Apacëhnëhnëkëhni gante nke ka do natëka hnë Këris hna mama nkehahnëk hnë kaso. Añaɗ kamëỹehnëhni tëfëtalahnëniha Këris do natëhni hnë fop.

Wëlin wanës wakwëhn nafa hn’iŋi kayëte: itama, nahan, ikwëtahn, uhnatah, Këris, uhorot.

Wëlin gante nke kayëte ka:

Simpaỹi, Icamehn gë iƴëfa (1.1-11)

Soŋe ye natëka Pol mama cëɗahnik (1.12-30)

Geryin had Këris (2.1-18)

Vëhni mo ye Timote gë Epafërodi (2.19-30)

Usatah paryi w̃a W̃ën hna matik (3.1–4.1)

Wanira watëkwa (4.2-9)

Pol camehnëɗëhëhni vëvë Filip va (4.10-20)

Simpaỹi rëkwa (4.21-23)

Simpaỹi

¹ Ami Pol, gë Timote, vëryokuŋëhn Yesu Këris , herëhnëryiɗëhu, w̃uhnë fop vëfacah Yesu Këris vële ye hnë nkol nte w̃acik Filip ŋa, vëvë haryënkw hnë cery sali do gë vëyohal va: ² Araɓi W̃ënu ŋa, Rëm fu ỹa g’Ahwëhn a Yesu Këris ndëwanihu do njëɗënihu ƴam ỹa!

Iƴëfa Pol soŋe vëvë Filip

³ Camehnëɗëfuha W̃ënu ŋa nte-wo-nte nahadëmu ŋa. ⁴ Fop wawati wale yëfanëhnëɗëmu w̃a w̃uhnë fop, ntiɗëfu kwëlëkwël g’uhnatah, ⁵ kaɓi ndënkwëtaɗëfu cape nte hnufërun ŋa hnë pëƴahn Wanës Wakasëk hna koɓëri fac ryënkwëryënkw hna hafo iỹi wati; ⁶ apacahnëko dënk, ale fëgwëk hnë w̃uhnë aŋi ntiyen nëfak tëfalëɗ gante padënëɗ fac ile njihahniɗ Yesu Këris ỹa.

⁷ Catanëko gante kwëhnahnëɓu vinahan vitac soŋe hun ki, kaɓi kwëtamu ntaw̃ary mën li. W̃uhnë fop nkentahnirun hnë ufërën W̃ën hna g’ami dënk lakënde yewu kaso hna ma lëkwanduw̃ëhni vële ỹew̃ëɗ Wanës Wakasëk ŋa, tufëɗëfuhëhni waŋi wanës toña ye. ⁸ Ha, W̃ënu ŋa ye seɗe mën: ŋahnëmu ɗus w̃uhnë fop g’iŋahn nte w̃atik hnë Yesu Këris ŋa.

⁹ Wëlin uyëfa mën w̃a: Araɓi iŋahn hun ŋa naỹ gë haw̃ary pëɓa uyët do gë hakili, ¹⁰ gante koɗun ahëncëtëlehnahnu ile fecek ỹa. Aki pacëɗun do kwëhnaɗiluhna ile heyanderun soŋe fac ile njihahniɗ Këris ỹa, ¹¹ do pëɓu vantëw̃el usatah ule w̃atik hnë Yesu Këris, soŋe icëmb do wahnëw̃ W̃ënu ŋa.

Pol kaso hna do iƴi haryënkw Wanës Wakasëk

¹² Vëyënta mën, ñaɗëfu ayëtu ile rëkiko ỹa ŋaỹëtëna iƴi haryënkw Wanës Wakasëk ŋa ɓare ankwënëk. ¹³ Koyëna fop vële yëkaɗëho hnë tere asankaf hna, do hn’ile-wo-le hna, njëtëni acëɗiɓu soŋe ile ryokuŋëhnëɗëfuha Këris ỹa. ¹⁴ Vëyaɓah fagant vëỹënta fu va, gante nuɗëniho kaso ka, nuỹani tama hnë Ahwëhn hna: tac nkwënakëhni kamëna soŋe pëƴahnëhni wanës W̃ënu ŋa hara dakëlëlihna.

¹⁵ Toña ye vëryampo fagant lëw̃ hni pëƴahnëɗëniha Këris ỹa g’iñew̃ary do gë dobël, ɓare vëryampo pëƴahnëɗëniha Këris ỹa gë nahan përën. ¹⁶ Vëhni, ile ntiɗëni ỹa, hn’iŋahn hna matiɗ, njëtëni nkeɓu ani soŋe rufahnu Wanës Wakasëk ŋa toña ye, ¹⁷ vëỹëntaw̃ va pëƴahnëɗëniha Këris ỹa gë hakili dobël, vinahan vindëw̃ hni va pacëna; nahaɗëni nkwënëhnëniho idën vankënca mën va.

¹⁸ Mena! Vinahan vidëw̃ hni va koɗ cat ma tumpa, gante-wo ka Këris ỹa pëƴahnik, do natëko. Nkoɗ natënɗo fëna, ¹⁹ kaɓi njëtëɓu wapuyalahna pehëɗëfu, gë wayëfa hun w̃a do gë uryema Iƴir mba Yesu Këris ŋa. ²⁰ Napëɗëfu ɗus do pacahnëko ñoñ cëfëhnëɗilohna, ɓare g’itama fop, dol had kwëlëkwël, uwám mën hna ma cëm mën hna tufahnëɗëfu inaỹ Këris ŋa mbahn mën hna. ²¹ Soŋe mën a, uwám w̃a Këris ye do cëm hna nuỹaɗëfu ntëbi. ²² Ɓare ge nkoɓu ɗuniỹa li koɗëfu liwu ɗoku ile yëɗanëɗ vantëw̃el vapërën. Ƴëtëla ile rëhnaɗëfu. ²³ Andoỹiɓu vacape vaki: ñaɗëfu hërënaw̃u iỹi uwám soŋe yefu gë Këris, do rac fecekëndëho ɗus; ²⁴ ɓare soŋe hun ỹa, apecek wow̃u mbahn hna. ²⁵ Kaɓi apacahnëko rac, njëtëɓu nkoɗëfu. Nkontëɗeɓu gë w̃uhnë fop ayihahnu haryënkw do ahwëtahnu g’uhnatah. ²⁶ Aki ɓoka mën ŋa fagant hun liɗ nëŋu g’ahaw̃ary gë Yesu Këris soŋe mën.

²⁷ Gante-wo nke ka, ƴasëryin gante tëƴëk Wanës Wakasëk woɓa Këris ka. Koyëna, age njiryiɓu yëkiwu ma ge ƴiryila wëryu nkorun ahahnëndawu hnë iƴir ndampo fo, do mëtaryëɗun ndampo fo gë ntaw̃ary tac fo soŋe ikwëtahn nte w̃atik hnë Wanës Wakasëk. ²⁸ Antë aravu vëw̃ëtary hun ntakënanihu hnë ñoñ: nkehnëhnëɗëhëhni dahëse ile rufahnëɗ mbëvëɗëni, g’ile rufahnëɗ w̃uhnë pehëtëɗerun; do watac matiɗ hnë W̃ën hna. ²⁹ Soŋe Këris ỹa, njëɗaku w̃uhnë gena bi ahwëtahnuna fo ɓare fëna ahorotu soŋe lëw̃u. ³⁰ Ha, dolëma, had gante njëtërun ki, nkentahnirun uw̃ët rac ule hnurunëho w̃ëtaryëɗëfuho koɓëri ŋa do woɓu w̃ëtahnëndu w̃i.

Geryin had Yesu

¹ Iɓëmënkël hun gë Këris ŋa kamënaỹehnëɗëhu bi? Iŋahn dëw̃u ŋa njaw̃ënëɗëhu bi? Nkentahnirun bi g’Iƴir Ipacah ŋa? Kwëhnarun bi wasakahn wafërën do kayehnahnëɗëhu bi gë vëỹëntaw̃ va? ² Ge paryi nke, awa padënëryin uhnatah mën w̃a: kwëhnaryin nkwëryëla përën, kwëhnaryin iŋahn ndampo fo, ntaw̃ary ndampo fo, nahan ndampo fo. ³ Antë aliwu iñë gë hakili dobël ma gë ɓëntary; ɓare diryin gë ɓana, pëlaryinëhni vëỹënta hun va had vële lëbëku. ⁴ Ale-wo-ale antë njëka umë fo ɓare njëkëhni vëỹëntaw̃ va fëna.

⁵ Kwëhnaryin nahan fagant hun gë mba Yesu Këris ka:

⁶ Ile nke W̃ënu ŋa Yesu Këris rac nke,

ƴëkëlehnëna nko këñëlahnëni gë W̃ënu ŋa.

⁷ Ɓare, akoỹahnëk umë dënk hnë fop vële kwëhnako va

do nufëk ankeya aryokuŋ.

Antiyak ahnë, njavëtik had ahnë;

⁸ umë dënk vanak, maw̃ëhnëka W̃ënu ŋa hafo cëm,

cëm kërëwa hna.

⁹ Soŋe umë ye W̃ënu ŋa kaƴëndëka ƴaŋ ỹëw̃a yihnah ɗus

do njëɗahna uw̃ac ule lëbëk fop wamac

¹⁰ ɗanko, gë w̃ac Yesu ỹa, fop waho w̃a ndëkwëhn,

mbin hna, nkal li do gë gëɗ nkal li,

¹¹ do fop waryëw̃ w̃a nës

Yesu Këris ye Ahwëhn a; koyëna cëmbëɗe W̃ënu ŋa Rëm ỹa.

Dancëryin had humpen ɗuniỹa li

¹² Aki, vëỹahnik mën, w̃uhnë vële w̃aw̃ëhnëk kwëlëkwël tase mën, gwënëryin hamëhni mën; ɗokuŋëryin g’untakah do g’untënah soŋe ayasaryu g’afërën ipeh hun ŋa. ¹³ Ha, W̃ënu ŋa liɗ hnë w̃uhnë mbalu do aliwu ile nëŋëɗëha ỹa.

¹⁴ Diryin fop hara ñakëñakëluhna, hara gwajëlëluhna, ¹⁵ soŋe antë ahwëhnawu ile heyanderun do antë ayentahniw̃u hnë wameh, vutah W̃ën vunte wok vëhwëhnana dahëse w̃eh fagant ɓulunda vëw̃en do vërumpak. Antancërun fagant lëw̃ hni had wahaƴalin humpen hnë ɗuniỹa li, ¹⁶ w̃uhnë vële hwëhnak Wanës uwám va. Ge koyëna ntirun, toña hwëhnaɗëfu sëkwaw̃u hnë fac ile mbokahniɗ Këris , kaɓi ɗokuŋëla do korotëla aki fo. ¹⁷ Do lakënde sat mën ỹa tëfëka ndehëti ntapëhnahn ikwëtahn hun ŋa had saɗëha ile sënandunëha W̃ënu ŋa, umë ye ɗoku ikwëtahn hun ŋa, natëko do nkoɗ natëndo ndampo fo gë w̃uhnë. ¹⁸ Koyëna fëna w̃uhnë, nëŋëryiwu do natëryiwu ndampo fo g’ami.

Timote gë Epafërodi

¹⁹ Atamaɓu hnë Ahwëhn fu Yesu, paƴëryiɗëfuha ɓiỹëɗina Timote, gante kamënaỹehnahnëɗëho ami fëna wakasëk wante wëryëɗëfu soŋe hun ŋa. ²⁰ Umë fo ye ale yeɓun nahan ndampo do ale ryëñëk paryi soŋe hun. ²¹ Vëỹëntaw̃ va fop wadëw̃ hni fo nuɗëni, gena wëɓa Yesu Këris ŋa. ²² Ɓare umë, njëtërun tufëhnak ahahnëndak: andokuŋëk g’ami had fatah ɗarël rëmu soŋe Wanës Wakasëk ŋa. ²³ Awa, umë hnahaɓu faƴëryiwa ge nuɓu wapacëk. ²⁴ Pacahnëko Ahwëhn hna ami fëna njiryiɗëfu ɓiỹëɗina ỹal hun hna.

²⁵ Ɓare ntiyahnëko tëfëka faƴëgëryiwa Epafërodi aỹënta mën, arëfëlënta mën hnë ɗoku do hnë w̃ët, ale faƴirun ỹa soŋe ndokuŋëhnëndo kaɓi hnë uval hna nkeɓu. ²⁶ Përëka mbok hnuw̃u w̃uhnë fop do ndëñëko kaɓi njëtarun ures lëw̃u w̃a. ²⁷ Toña ye atesëko, do pëŋako g’icëm; ɓare W̃ënu ŋa kaỹëhnahnëka g’umë, do gena g’umë fo, ɓare gë ami fëna, soŋe antë nkwënawo ỹiw̃ëhnah. ²⁸ Awa paƴëryiɗëfuha g’uñakahnah yaɓah soŋe natahnu ge nurunëha do ŋaỹëtawo ỹiw̃ëhnah w̃a. ²⁹ Ƴotoyenëryina hnë Ahwëhn hna g’uhnatah padah; dënënëryinëhni iỹi sifa vahnë, ³⁰ kaɓi soŋe ɗoku Këris ỹa ñaɗëho cëmahn; këbëhnako njëɗahn uwám lëw̃u w̃a soŋe nëmpëtu hnë ɗoku ile worun koɗiluhna alinëhnuno w̃uhnë dënk.

Usatah paryi va W̃ën

¹ Fuhnahnu, vëỹënta mën, natëryiwu soŋe ɓëmënkël hun gë Ahwëhn a. Memaɗilohna vok herëhnëryiwu ile rëkëɓu herëhnu ỹa, soŋe hun ỹa umë fecek kaɓi keryëɗëhu. ² Keharyinëhni vële liɗ wameh ŋa, waŋi waɓe, vële fërëkahnëɗ mbahn va gë háci! ³ Ha, fuhnë yeyinëk vëhácik paryi, fuhnë vële sëmbëɗëha W̃ënu ŋa g’uryema Iƴir ntëw̃u ŋa, ambetaɗen soŋe Yesu Këris do kwëtilënëhna tama ntëw̃ fu ŋa hnë vantiyehn mbahn.

⁴ Paryi nke, ami, kwëhnaɓu toña ramahnu hnë vantiyehn mbahn mën hna fëna; ge ahnë haw̃ary ntiyanëka koɗ tama hnë vantiyehn mbahn hna, ami, kwëhnaɓu toña lëbëwa: ⁵ káciɓu hnë fac hwëhn mbëɗ gë warar hna, avë hnënk Isërayel yeɓu, avë ncëma Besame yeɓu, Ebëre yeɓu, nagëniho Wa-ebëre; sariya hna, Farise yeɓuho; ⁶ kahnënda cankaf mën hna, ale vërehnëɗëho cery sali yeɓuho; hnë uwám usatah ule rëkatëɗe sariya hna, ale wok kwëhnana ile keyande yeɓuho. ⁷ Antiyahnëkowo nuỹaɓu, ɓare gaki, soŋe Këris ỹa, tëkatëɓu inamb ye. ⁸ Ntëbi rac, tëkatëɓu fop had inamb ɗarël ile ỹak nëfak, rac ye iƴët Yesu Këris ŋa, Ahwëhn mën a. Soŋe lëw̃u ỹa, maw̃ëɓu nambu fop do tëkatëɓu fop had ronk, ɗanko hnuỹaw̃uw̃a Këris ỹa ⁹ do rëkatiwu hnë iɓëmënkël gë Këris. Usatah ule hwëhnaɓu karyënkw W̃ën hna matina hnë ile liɓuho ami dënk kaɓi ntënënëɓu sariya ỹa, ɓare hn’ikwëtahn Këris hna matik. Usatah urac W̃ën hna matik gë fere ikwëtahn ŋa.

¹⁰ Ha, fop ile ỹaɗëfu ỹa, yëtëw̃a Këris ỹa ye, gë fanka iɓëhn dëw̃u ŋa, gë gentahn hnë wahorot walëw̃u hna, do yewu had umë hnë cëm ntëw̃u hna, ¹¹ aki koɗëfu ramahnu nkentëɗeɓu fagant vëvëhn.

Igaryëhn ile rëfëka tëkënin

¹² Dehnëla tëkënëɓu iỹin fop ma padëɓu, ɓare atëfëlehnëɗëfu fëlaw̃u irac, kaɓi soŋe rac ye Yesu Këris pëlako ami dënk. Age Yesu Këris pëlako, soŋe rëfëlehnahnu hafo fëlaw̃u ami dënk ile fadëk. ¹³ Vëyënta mën, nahala tëkënëɓu. Ɓare ryampo fo ye ile liɗëfu ỹa: ndënkwëɗëfu ile ye kamëhni ỹa do hamënawu rëkënu ile ye haryënkw mën ỹa, ¹⁴ do nkaryëɗëfu cape g’ile yëkëlehnëɗëfu ka soŋe hnuỹahnu cos nte macaryëɗëhëfu W̃ënu ŋa hnë Yesu Këris tebayin ƴaŋ.

¹⁵ Age nkeyinëk vahnë vëlafah kwëtahn hna, iŋi nahan rëfëka kwëhnayin; do ge vëryampo hnë w̃uhnë nahaɗun minëmin, W̃ënu ŋa pacënëhnëɗëhu fëna soŋe rac. ¹⁶ Gante-wo ka, hnë yëb ile tëkinëk hna, ƴasënëfu hnë nkeya tac fo.

¹⁷ Vëỹënta mën, tëfëtalahnëryino, w̃uhnë fop. Pëcëtaryinëhni vële rëfëtalahnëk nkeya ntëw̃ fu ŋa. ¹⁸ Anësëhnëɗëmu kantëm, ɓare gaki mbokëɗëfu hnësu gë wako: nkeni vëyabah vële liyaɗ vëỹew̃ kërëwa Këris g’ile pëhnëtanëk ỹa. ¹⁹ Wapuyala wadëw̃ hni ŋa, iɓëv iŋa ye, w̃ën hudëw̃ hni ha ɗonk dëw̃ hni ŋa ye, mbëntaryëɗëni ile rëfëka cëfëhnayehnëhni ỹa, vëhni vële hwëhnak hnë vintaw̃ary vidëw̃ hni hna viỹë vëvë nkal. ²⁰ Ɓare, vëvë naw̃ ambin yeyinëk, do napëɗenëha afehët avë hnam, Ahwëhn a Yesu Këris. ²¹ Umë vacëɗ vimbahn vikaỹëhnah vidëw̃ fu soŋe mëntëndëlehnahn gë mbahn cëmbik ntëw̃u ŋa. Antiɗ rac gë fere fanka fale w̃ëkëɗahnëɗëha fëna kwët fop hnë cankaf ntëw̃u hna.

¹ Vëỹënta mën, w̃uhnë vële ỹahnëɓu ɗus, ñaɗëfu vok hnuw̃u! Uhnatah mën w̃a do ipënkw imëk mën ŋa yerun! Vëỹahnik mën, koyëna tëfëka ahahnëndawu hn’iɓëmënkël hun gë Ahwëhn a.

Wanira watëkwa

² Këlaɗëfuha Evodi, do këlaɗëfuha Sintik nkwëryëlëni ɗus hn’iɓëmënkël dëw̃ hni gë Ahwëhn a. ³ Do wëjë, arëfëlënta paryi, tëƴëɗëmi, ƴij aryemahni nkwëryëlëni vëỹi vësëval, kaɓi gë ami ndokuŋëlahnëɓun soŋe Wanës Wakasëk ŋa, ndampo fo gë Këlema do fop vëryokuŋëntal mën va, vële herik w̃ac hnë kayëte uwám + 4.3 Kayëte uwám: Rac ye hn’ile kerini wamac vële hnuỹaɗ uwám usër w̃a. hna.

⁴ Natëryiw̃u hn’iɓëmënkël hun g’Ahwëhn a wati-wo-wati; ndivëtaɗëfu, natëryiw̃u. ⁵ Araɓi vahnë va fop njavëtëni iguk sakahn hun ŋa. Ahwëhn a pëŋajëk. ⁶ Antë pëmpëhnahnu ñoñ; ɓare, gante-wo ka, gë wayëfa w̃a, g’ikëla ŋa do gë camehn W̃ënu ŋa, ƴëtëndanëryina fop W̃ënu ŋa. ⁷ Do ƴam W̃ënu ŋa, nte lëbëk fop ile koɗ njët hakili, keryehnëɗ vintaw̃ary hun do vinahan hun hn’iɓëmënkël hun gë Yesu Këris .

⁸ Ile wojëk ỹa, vëỹënta mën, wëlin ile rëfëka afaɓëndahnu ỹa: fop ile ye toña ỹa, fop ile rëfëka ntënëni ỹa, ile satëk ỹa, ile facëk ỹa, ile rëfëka ŋahni ỹa, ile rëfëka cëmbi ỹa. Ha, ge nke iñë ile hnëfak do ge nke iñë ile rëfëka cëkwëni vahnë naharyin rac. ⁹ Ndiryin fop ile ỹëŋarun ỹal mën hna, hnuỹarun ỹal mën hna, wëryërun ỹal mën hna, hnurun ỹal mën hna, do W̃ën le yëɗaɗëhu ƴam ỹa nkeɗ gë w̃uhnë.

Icamehn Pol vëvë nkol Filip

¹⁰ Anuỹaɓu uhnatah cankaf hn’iɓëmënkël mën gë Ahwëhn a kaɓi tame mbokërun afaɓuno. Ha, ñaɗunëho afaɓuno ɓare kwëhnalunohna fere arufuno. ¹¹ Gena uval hnësendëho; hali, ñëŋaɓu ỹew̃u uhnatah hna hwëhnaɓu ma kwëhnala. ¹² Njëtëɓu gante nkoɗëfu hnë uval hna ma ƴaɓ hna. Hnë fop do gante-wo-gante, ñëŋaɓu yewu afihnah ma ale njok inte, yewu ale njaɓëk ma ale mbalëk. ¹³ Mëkëɗëfu fop hn’iɓëmënkël mën gë Këris umë ale yëɗaɗëho fanka falëw̃u fa.

¹⁴ Ɓare caŋëndanërun ayentahniw̃u cape uhorot mën w̃i. ¹⁵ W̃uhnë vëvë nkol Filip, njëtërun, ante kërënaɓu Masedëwan hna, hnë mpëd nte pëgwëɓu fëƴahnëndu Wanës Wakasëk ŋa, cery sali-wo ɗemalohna gë wayëɗ, ge gena w̃uhnë fo, ¹⁶ w̃uhnë vële yëɗanahnikowo, ntëb hwënta ryampo, ile valëkowo ỹa wati nte nkeɓuho Tesalonik hna dënk. ¹⁷ Gena bi wayëɗ yëkëlehnëɗëfu hnuỹawu; ɓare njëkëlehnëɗëfu W̃ënu ŋa ndëwawu g’ahaw̃ary soŋe uyëɗ hun w̃a. ¹⁸ Ƴëtëryin nuỹaɓu fop vële yëɗanahnëryirunëho va do hnë ƴaɓ hna nkeɓu; apëɓëko, koɓëri ga teɓaɓu uyëɗ ule yëɗajërunëha Epafërodi w̃a, saɗëha ile maw̃ëk W̃ënu ŋa do nëŋëɗëha ỹa, had ɗatikola ile nëŋëka rehërya. ¹⁹ W̃ën mën ŋa kwëhnak uvetak samah. Hnë Yesu Këris hna ntihëtëɗ waɓal hun ŋa.

²⁰ Cëmbënëfuna W̃ënu ŋa Rëm fu ỹa dol do gë kantëm! Amina.

Simpaỹi rëkwa

²¹ Gaỹëryinëhni vëfacah hnë Yesu Këris va. Vëỹënta fu vële ye g’ami va gaỹënihu. ²² Fop vëfacah va gaỹënihu, kas vëvë tere Sesar va. ²³ Araɓi ipërëna Ahwëhn fu Yesu Këris ŋa nke gë vintaw̃ary hun va!