Ebëre

Kayëte soŋe vë-ebëre

Wade yehëhna hnë iŋi kayëte

Iŋi kayëte wasëwif vële hwëtahnëka Yesu Këris herëhnik. Ale herëk a ƴëtina, ɓare njëtëk ɗus Vikerëh va kaɓi nësahnëk ɗus Vikerëh vi soŋe nkabahn bi mo ye Këris. Iŋi kayëte kerik yëbëlan bëhn wafëhw imbëɗ g’iryaw̃ gë bëhn wafëhw imbëɗ gë wahnah g’imbëɗ (60 gë 95) ga ndëcëk hnagi Yesu ỹa.

Vële ryënkwëko kwëtahnëni va mbërehnëniho hafo njëkëlehnëni cow̃ani. Soŋe rac kerëhnanëkëhni aỹi ahnë iŋi kayëte ɗanko gante kamënahnëɗëni nko njaw̃ënani, antë tavëni nkaw̃ ikwëtahn ŋa.

Wati vacërakëlo va, W̃ënu ŋa ntik ikwëtëla gë ɓulunda lëw̃u ỹa. Tëhnakëhni vësëna wasaɗëha do tëƴëk wasaɗëha. Antehnëkëhni ge ahnë ntik uw̃eh, tëfëka njëɗahn intaw̃ soŋe saɗëha ỹa, do W̃ënu ŋa tavëhnëɗëha ahnë arac. Iŋi kayëte nësëk paŋare ikwëtëla kasëk ŋa nte ntik W̃ën gë vahnë vële hwëtahnëka Aju va. Ntëbëk ndënkwëryënkw ŋa. Kaɓi ile ntinëhnëkëhni Yesu Këris vahnë va had Ajë W̃ën, ntëbëk ile ntini vëhni Moyis, gë vacërakëlo vëỹëntaw̃ va. Yesu ye fape W̃ën fa ale sënaỹik soŋe fop wameh vahnë ŋa. Umë ye fëna asëna wasaɗëha asankaf ale rënkëk hnë waỹëw̃a wasëvah w̃a ambin hna. Ale-wo-le hwëtahnëk ỹa ɓokëna mbala cënana ntaw̃ saɗëha soŋe wameh wadëw̃u. W̃ënu ŋa tavëhnëɗëha wameh wadëw̃u ŋa.

Wëlin wanës wakwëhn nafa hn’iŋi kayëte: W̃ën, saɗëha, wameh, Këris, Asëna wasaɗëha asankaf, wanës, kwëtëla, sariya, Ahwëhn, Abëraham, ɗoku, ikwëry, Ajë, ikwëtahn, waỹëw̃a wasëvah w̃a.

Wëlin gante nke kayëte ka:

W̃ënu ŋa nësëhnëkëfu paɓ g’Aju (1.1-4)

Yesu cëpëkëhni wamëleka ŋa gë Moyis (1.5–3.6)

W̃ënu ŋa njinëgend ɓulunda lëw̃u ỹa (3.7–4.13)

Yesu, Asëna Wasaɗëha Asankaf a (4.14–8.13)

Kwëtëla cër gë kasëk (9–12)

Nkeya nte nëŋëɗëha W̃ën (13.1-19)

Iƴëfa gë simpaỹi (13.20-25)

W̃ënu ŋa nësëhnëkëfu paɓ g’Aju

¹ Koɓëri ŋa, W̃ënu ŋa nësëhnëkëhniwo wahwënta wayaɓah gë sifa gë wasifa vacërakëlo va paɓ gë wakila ŋa. ² Ɓare gaki, hnë wafac warëkwa li, gë fere Aju nësëhnëkëfu. Gë fere umë W̃ënu ŋa ntik ɗuniỹa ỹi, do umë tëhnak W̃ënu ŋa kwëhn viỹë vi fop. ³ Aỹi Ajë ye idanc cëmb W̃ënu ŋa do hnë fop viỹë hna tufahnëɗ paryi ile nke W̃ënu ŋa. Pëlaɗ ɗuniỹa ỹi ɗus gë fanka uhnës lëw̃u w̃a. Ante ntinënëkëhni vahnë va saɗëha soŋe tavëhnahnini wameh ŋa, ntañak mbin hna farëhw W̃ën hwëhn fanka hna.

Aju ỹa cëpëkëhni wamëleka

⁴ Koyëna W̃ënu ŋa ntik Aju cëpëhni wamëleka ŋa, had w̃ac le njëɗaka ỹa cëpëk walëw̃ hni w̃a.

⁵ Gena bi W̃ënu ŋa dehnëlahna la mëleka ryampo:

«Ajë mën yeru. Pëgw dol Rëm hu yeɓu.» + 1.5: Wahnëw̃ 2.7

Dehnëlahna fëna la mëleka ryampo:

«Rëm yenëhnëɗëfuha do Ajë yenëhnëɗëho.» + 1.5: 2 Samiyel 7.14

⁶ Ɓare nte paƴika W̃ënu ŋa ɗuniỹa li aryënkwik nagi ỹa, ntehnëk:

«Fop wamëleka W̃ënu ŋa tëfëka cëmbëniha.» + 1.6: Ɗivëta Sariya 32.43

⁷ Soŋe wamëleka ŋa W̃ënu ŋa ntehnëk:

«Ntiɗëfuhëhni wamëleka ŋa sëla,

ha, wale ryokuŋëhnëɗëho w̃a humpen hwëɗëh.» + 1.7: Wahnëw̃ 104.4

⁸ Ɓare soŋe Aju ỹa ntehnëk:

«W̃ën, ucankaf hu ŋa mbiỹëɗ kwëlëkwël.

Anaw̃ëhnëɗuhëhni ɓulunda hu ỹa g’ucatah,

⁹ aŋahnëru ile satëk ỹa, añew̃ëru w̃eh w̃a.

Soŋe umë ye W̃ënu ŋa, W̃ën hu ha,

tëhnaki do natëndanëki ante turëki wagu ŋa nkaf li.

Pecehnëka gë wëjë gë vërëfal hu va.» + 1.9: Wahnëw̃ 45.7-8

¹⁰ W̃ënu ŋa ntehnëk fëna:

«Wapëgwalahna, wëjë, Ahwëhn, ỹahanëk nkal ŋa,

wëɓák hu ŋa lik mbin ŋa.

¹¹ Vëỹin fop mbëvëɗ, ɓare wëjë, nkontëɗeru kwëlëkwël.

Ambin ŋa g’inkal iŋa përëkaɗ had viỹi vësër,

¹² apiỹëɗuhëhni had cuɗ cankaf;

ha, ankwëcëtëɗeni had vëỹi.

Ɓare wëjë, nkontëɗeru kwëlëkwël arac fo,

do uwám hu w̃a puɗina.» + 1.12: Wahnëw̃ 102.26-28

¹³ W̃ënu ŋa dehnëlahna la mëleka ryampo:

«Ƴij alaña g’irëhw mën,

hafo hale këfëɗëfuhëhni vële ỹew̃ëki va haryënkw hu.» + 1.13: Wahnëw̃ 110.1

¹⁴ Wamëleka ŋa wayena bi fop wayir wale yohalëɗëha W̃ënu ŋa? W̃ënu ŋa faƴëkëhni ndemanihëhni vële rëfëka nuỹani ipeh ŋa had ntëw̃.

Wanës wante hoɗ pehëtëfu

¹ Soŋe umë ye tëfëka kwëtin hakili gë haw̃ary hnë wanës wante wëryinëk ŋa ɗanko antë kërënanden toƴe toƴe. ² Wanës wante njëɗahnik W̃ënu ŋa paɓ gë wamëleka ŋa tufëhnak toña. Vële wok vëlënënëna do wok vëw̃aw̃ëhnëna va nuỹaɗëni ile rëfëkëhni ỹa fop. ³ Awa, fuhnë, hak tëfëka kehaỹin iỹi horot age ŋwëyinëk iŋi peh cankaf? Iŋi peh, Ahwëhn a ryënkwëk pëƴahn. Tac vële wëryëk ga nësëɗe va tufënihëfu paryi toña ye. ⁴ W̃ënu ŋa nkwënëk cedeya ntëw̃ hni ŋa gë wëdahëse, fop wasifa vifëmpëhnahnah, do gë wayëɗ Iƴir Ipacah wante cahëɗëhëhni vahnë had gante ñaɗ ka.

Ale yiryeryëɗëhëfu g’ipeh

⁵ Soŋe ɗuniỹa le yejëk ỹi hnësëɗëfun. Gena wamëleka njëɗak W̃ënu ŋa ucankaf hnë ɗuniỹa rac. ⁶ Sëñ ryampo hnë Vikerëh hna ahnë yëɗahnëk uŋi ceɗeya:

«Ye nke ahn’a soŋe aryënkwëtahna?

Ma ajë ahn’a soŋe afaɓahna?

⁷ Kwëtëruha gëɗ wamëleka hna wati ryoƴ ryampo,

cankëruha icëmb g’untënah,

⁸ kwëtëru fop gëɗ wakwer wadëw̃u hna.» + 2.8: Wahnëw̃ 8.5-7

Gante kwëtëɗ fop W̃ënu ŋa gëɗ ucankaf ahnë hna, rac fëhnëtanëk ñoñ tavëna ile wok gena gëɗ ucankaf ntëw̃u hna. Ɓare fuhnë nuyinëhna ten fop maw̃ëhnëka. ⁹ Ɓare kamahnëɓun waŋi: Yesu kwëtiko gëɗ wamëleka hna wati ryoƴ ryampo, ɓare gaki, acankik icëmb g’untënah kaɓi korotëk hafo cëm. Aki paɓ g’ipërëna W̃ënu ŋa, cëmëk soŋe vahnë va fop.

¹⁰ W̃ënu ŋa lik ɗuniỹa ỹi, do fop umë hwëhnëk. Ñak vërahu vëyaɓah nkentahnini hnë icëmb ntëw̃u hna. Caŋahnëka padëna paɓ gë uhorot w̃a, umë rëfëka piɗëtëhnëhni vutah vuntëw̃u va nkaw̃ ipeh ŋa. ¹¹ Yesu facënëɗëhëhni vahnë va wameh wadëw̃ hni hna do vële facëhnik va fop Rëm ryampo nkeni g’umë. Soŋe umë ye Yesu cëfëhnëlahna macëhni vëheryu gë vicëru. ¹² Ntehnëk:

«Pëƴaɗëfuhëhni vëhery mën va w̃ac hu w̃a;

fagant vële hwëtahnëk hna cëmbëɗëmi.» + 2.12: Wahnëw̃ 22.23

¹³ Do fëna:

«Kwëtëɗëfu tama mën ŋa hnë W̃ën hna.»

Do kat:

«Ɓëlihëfu, ami gë vutah vunte njëɗakow̃ëhni W̃ënu ŋa.» + 2.13: Esayi 8.18

¹⁴ Kaɓi vutah vutac iỹin kwëhnani ndampo fo —mbahn gë sat— Yesu, umë fëna, ntiyak ahnë had vëhni. Koyëna, g’icëm dëw̃u ŋa, mëk përëkan fanka Sintani fa, umë ale w̃ënkwëk fanka icëm ŋa, ¹⁵ do mëk pehëtëhni vële yeho vëramp hnë uwám lëw̃ hni hna fop kaɓi ntakëkëhniwo g’icëm ŋa. ¹⁶ Ha, pacëk gena wamëleka ndemaɗ, ɓare vutah Abëraham gë vërah hni. ¹⁷ Soŋe rac ye tëfëkawo mëntëlënti gë vëheryu va hnë fop, ɗanko nkehahn asëna wasaɗëha asankaf ale pëɓëk kaỹëhnahn do hahnëndak ɗoku W̃ën hna, do koɗ njëɗahn saɗëha le tavëhnahnëɗeni ɓulunda ỹa wameh wadëw̃ hni. ¹⁸ Ha, kaɓi Yesu korotëk umë dënk ƴëkëhnahn hna, koɗ ndemahni vële yëkëhnahnik va.

Yesu ntëbëka Moyis

¹ Awa, vëỹënta mën vëfacah, ƴëkëryina Yesu, w̃uhnë vële macëk W̃ën. Umë ye ale paƴik W̃ën do ye asëna wasaɗëha asankaf hn’ikwëtahn nte fëƴahnëɗen. ² W̃ënu ŋa tëhnaka soŋe iỹi ɗoku do kahnëndako, had gante nkeho Moyis hnë cery W̃ën hna fop. + 3.2: Vaker 12.7 ³ Ale yëryëk cery ntënënik ntëbi cery ŋa dënk. Aki Yesu rëfëka nuỹa untënah ntëba Moyis. ⁴ Cery-wo-cery ahnë yëryëk, ɓare W̃ënu ŋa ye ale yëryëk fop ỹa. ⁵ Moyis, cape ntëw̃u ŋa, kahnëndako hnë fop cery W̃ën hna, gante nkeho aryokuŋ ale hwëtehnahnik ceɗeyahn ile ntehnëɗ W̃ënu ŋa hnë wati le yejëk. ⁶ Ɓare Këris , cape ntëw̃u ŋa, kahnëndak hnë cery W̃ën hna, gante nke Ajë ale hwëtik nkaf. Do cery ntëw̃u ŋa yeyinëk, ge kwëtayinëk iɗëkëna dëw̃ fu ŋa do mbëntaryin itama fu ŋa.

W̃ënu ŋa njinëgehnëɗ ɓulunda lëw̃u

⁷ Soŋe umë ye, had gante ntehnëk Iƴir Ipacah ka:

«Dol, ge nkwëryërun kopa W̃ënu ŋa,

⁸ antë afiɗu sakahn hun ha,

had koɓëri ka ante ntancëntirunëho ŋa,

wati rac, wula hna, njëkëhnahnërunëhawo.» + 3.8: Wahnëw̃ 95.7-8

⁹ Do W̃ënu ŋa nkok ntehnënd:

«Hnam njëkëhnahnëniho vacërakëlo hun va

do nuni ile liɓuho ỹa ¹⁰ hnë wabëhn wafëhw wanah hna (40).

Soŋe rac ntavëko gë vëhni do ntehnëɓu:

“Ntaw̃ary ntëw̃ hni ŋa pitaɗ g’ami kwëlëkwël.

Vëyëtëna nkaw̃ mën ŋa.”

¹¹ Hnë ntavah mën hna, akwëryëɓu:

“Vëyëtëɗina muk ƴinëga mën ŋa!” + 3.11: Wahnëw̃ 95.7-11 »

¹² Vëỹënta mën, kwëtëryin hakili fagant hun ahnë ntë kwëhna ntaw̃ary meh nte wok kwëtahn hna, nte liyehnëɗëha tav a W̃ën hunte wok cëmëɗina. ¹³ Ɓare, fac-wo-fac, kamënaỹehnëlëryin wati le nkok mbiỹëɗ ile macëk Vikerëh vi «dol», ɗanko ahnë-wo-ahnë antë piɗ sakahn lëw̃u kaɓi tavëk wameh ŋa tokahna. ¹⁴ Ha, vërëfal Këris yeyinëk ge kwëtayinëk paryi hafo wapuyala hna tama nte hwëhnayinëko wapëgwalahna. ¹⁵ Had gante ntehnik ki:

«Dol, ge nkwëryërun kopa W̃ënu ŋa,

antë afiɗu sakahn hun ha,

had koɓëri ka ante ndáncëntirunëho ŋa.» + 3.15: Wahnëw̃ 95.7-8

¹⁶ Mo w̃ëryëk do ryáncëntik? Vële canëko Moyis Esipët va ye. ¹⁷ Mo lavëndanëka W̃ënu ŋa wabëhn wafëhw wanah (40)? Vële w̃enëk va do sëmëk hnë wula hna ye. ¹⁸ W̃ënu ŋa nkwëryëk: «Vëyëtëɗina muk ƴinëga ntëw̃u ŋa.» Vëhni mo kwëryëhnëk? Vële ŋwëỹëhnëkawo va ye. ¹⁹ Tac kamahnëɓun vëỹin: vëw̃ëkëna njëtëni ƴinëga W̃ënu ŋa kaɓi vëhwëtahnëna.

¹ Awa, kwëtëryin hakili, hnë wati le koɗen njëtin ƴinëga nte njëɗëɗëhëfu W̃ënu ŋa, ahnë antë tak! ² Pëƴayinëkëfu uw̃i hnës hasëk ƴinëga nte pëhwëtanëhnëkëfu W̃ënu ŋa, had gante pëƴayiniho vacërakëlo fu va. Ɓare uhnës ule nkwëryëni w̃a nëfalihna kaɓi vëvëmënkëlëna hn’ikwëtahn gë vële hnëpak va. ³ Fuhnë vële hwëtahninëk va njëtëɗen ƴinëga ŋa, had gante ntehnëk W̃ën ka:

«Kwëryëɓu hnë ntavah mën hna:

“Vëyëtëɗina muk ƴinëga mën ŋa!”» + 4.3: Wahnëw̃ 95.11

Aki nësëk W̃ënu ŋa ayëkat puhnako ɗoku lew̃u ỹa koɓëri wapëgwala ɗuniỹa hna, ⁴ kaɓi nësik hnë Vikerëh hna soŋe fac hwëhn mbëɗ gë wahi ỹa: «Awa hnë fac hwëhn mbëɗ gë wahi hna W̃ënu ŋa tiw̃ako.» + 4.4: Wapëgwala 2.2 ⁵ Do ani fëna nësëk kat: «Vëyëtëɗina muk ƴinëga mën ŋa.» + 4.5: Wahnëw̃ 95.11

⁶ Awa, nkoyik maw̃ëryanini vëryampo njëtëni ƴinëga ŋa do vële ryënkwëk hnuỹak Wanës Wakasëk w̃a vëyëtëna ƴinëga ŋa kaɓi vëw̃aw̃ëhnëna. ⁷ Soŋe umë ye W̃ënu ŋa mbok kwëtëhnëhni fac, do macëka «Dol». Ga mbiỹëk ɗus, nësëk rac gë w̃ës David ỹa, had gante rëk kerik ki:

«Dol, ge nkwëryërun kopa W̃ënu ŋa,

antë afiɗu sakahn hun ha.» + 4.7: Wahnëw̃ 95.7-8

⁸ Paryi, ge Yosuwe njokëndëhëhniwo ɓulunda ỹa hnë iŋi ƴinëga, W̃ënu ŋa nësakëndilohna soŋe fac haw̃ary kamëhni rac. ⁹ Awa, umë fëhnëtanëk tiw̃a ɓulunda W̃ënu ŋa nkok. ¹⁰ Ale yëtëk ƴinëga nte pëhwëtanëhnëkëfu W̃ënu ŋa, njinëgak umë fëna ɗoku lëw̃u hna had gante njinëgak W̃ënu ka hnë ɗoku lëw̃u. ¹¹ Kamënanëfu njëtin ƴinëga tac ɗanko ahnë antë njo soŋe iŋwëỹ maw̃ëhn had vacërakëlo fu ka.

¹² Ha, Wanës W̃ënu ŋa kwëhnak uwám w̃a do pëɓëka fanka fa. Ntëpëtëɗ ntëbi sëlame hwëhn waŋëkan wahi. Tënkëɗëhëfu hafo pitëndëlehn ntaw̃ary ŋa gë ƴir iŋa, wasokël w̃a gë sevul waỹëc w̃a. Kitiŋëɗ vinahan gë viña wasakahn fu w̃a. ¹³ W̃ënu ŋa nuɗ fop. Fop vile ntik va cow̃ëtak haryënkw lëw̃u, umë rëfëka pëƴayin fop ile liyinëk ỹa.

Yesu, Asëna Wasaɗëha Asankaf

¹⁴ Koyëna, kaɓi kwëhnayinëka asëna wasaɗëha asankaf ale ryëcëtak vambin va, Yesu, Aju W̃ënu ŋa, ƴaw̃ënënëfu ile hwëtahnënik ỹa. ¹⁵ Asëna wasaɗëha asankaf ale hwëhnayinëk a njëtëk ɗus kihn dëw̃ fu ŋa. Njëkëhnahnik had fuhnë, hnë fop viỹë vi, ɓare umë menëna. ¹⁶ Pëŋanëfu g’iɗëkëna tinki W̃ën hn’ile nke ipërëna ŋa ɗanko nuỹahnin kohnëcan do tëkatin ipërëna nte ryemaɗëhëfu wati nte mbalëɗëhëfu ŋa.

¹ Asëna wasaɗëha asankaf-wo tëhnayik fagant vahnë va, akwëtehnahnik nëmpëtëhni vahnë va haryënkw W̃ënu ŋa. Njëɗahnëɗ wayëɗ walëw̃ hni w̃a gë wasaɗëha walew̃ hni w̃a soŋe wameh ŋa. ² Kaɓi kihnëk umë dënk koɗ tufëhni iguk sakahn vële wok vëyëtëna ñoñ do sëvëɗ. ³ Soŋe ikihn tac, tëfëka cëna wasaɗëha soŋe wameh wadëw̃u ŋa ndampo fo gë wameh ɓulunda ŋa.

⁴ Ahnë koɗina njëɗëhna untënah nke asëna wasaɗëha asankaf. W̃ënu ŋa w̃acëɗ soŋe rac, had gante macëka Aron . ⁵ Ndampo fo nke soŋe Këris ỹa. Gena umë yëɗëhnak untënah nke asëna wasaɗëha asankaf. Nuỹak gë W̃ënu ŋa ale lehnëk:

«Ajë mën yeru.

Pëgw dol Rëmuh yeɓu.» + 5.5: Wahnëw̃ 2.7

⁶ Ntehnëk señ ryaw̃:

«Asëna wasaɗëha yeru soŋe kantëm,

had Melëkiseɗek.» + 5.6: Wahnëw̃ 110.4

⁷ Hnë wati nte nkeho nkal li, gë kopa sankaf do gë wankwën Yesu njëɗaka ale hoɗ pehëta icëm ŋa wayëfa do waw̃unta. W̃ënu ŋa nkwëryëhnëka soŋe maw̃ëhn ntëw̃u ŋa. ⁸ Ajë W̃ënu ŋa ye, toña ye, ɓare hnë wahorot walëw̃u hna fop mëkëk njët maw̃ëhn ŋa. ⁹ Do aki, ante tëkëk fadah hna nkenëhnëkëhni vële w̃aw̃ëhnëka va haƴalin ipeh kantëm. ¹⁰ Ha, W̃ënu ŋa w̃acëka nke asëna wasaɗëha asankaf had Melëkiseɗek.

Kehanëfu antë tavin ikwëtahn fu ŋa

¹¹ Kwëhnayinëk yaɓah ile hnësëɗen soŋe rac, ɓare ntakëk nkabahni, kaɓi nkwëryëɗiluhna ñap. ¹² Wati ỹa gwërënkehuno ile yehahnakëndunëho vëharaŋ! Ɓare doliỹi, mbalëku aharaŋiwu g’ahaw̃ary karëŋa ndënkwëryënkw Wanës W̃ënu ŋa. Koɗiluhna aroku roka yaw̃ah, wambël valëku. ¹³ Ale wok seɗ wambël fo nke had fanul. Ƴëtëna ten ile satëk hn’uwám hna. ¹⁴ Vicër va roka yaw̃ah tokëɗëni, njëtëni këncëtëlehn ile yivëk g’ile w̃ek kaɓi ntiɗëni rac kwëlëkwël.

¹ Aki, antë nkohahnin karëŋa nte ryënkwihnëk ỹëŋayinëk soŋe Këris : rac ye ikwëtahn W̃ënu ŋa do itav nkeya nte yoɗ g’icëm; karëŋa wayaryi gë tind wëɓák ŋa; iɓëhn vësëm gë kiti W̃ën le wok puɗina. Ha, antë mbokahnin iŋi karëŋa ndënkwëryënkw, ɓare ƴinëfu cape g’ikarëŋa nte rëfëka acër. ³ Wëlin ile liden ỹa, age W̃ënu ŋa maw̃ëryanëkëfu.

⁴ Gena bi koɗena mbok njoyini g’igwëcët higëna nkeya ntëw̃ hni, vële hnuỹak fac ryampo humpen W̃ën ha, do ryahëk uyëɗ ambin, hnuỹak sah hnë Iƴir Ipacah, rëkatëk gante njivëk Wanës W̃ën do yëtëk fëna fanka ɗuniỹa le yejëk ỹi, ɓare mbokanëni nkeya cër ntëw̃ hni ŋa? Nke had, soŋe lëw̃ hni dënk, mbokaryëɗëniha Ajë W̃ënu ŋa kërëwa hna do cëfëhnaỹehnëniha ɓulunda hna.

⁷ Ante cek nkal iŋa w̃ënka rëv le rëk rëvëɗëha ỹa do pëhnëndan wanëɗa wante nëfaɗëhëhni vëyam va, nuỹaɗ ɗëwara W̃ënu ŋa. ⁸ Ɓare ge pëhnëndanëk wadëmpëhn do dël meh, kitiŋik kwëhnana nafa, këbënanik ɗëwara w̃eh, do patand gë hwëɗëh.

⁹ Ɓare w̃uhnë, vëyahnik mën, age nësëɓun aki, apacahnëkëfu gë cape përën nkerun, rac ye ipeh ŋa. ¹⁰ W̃ënu ŋa catëk; ɗënkwëɗina vantiyehn hun va do iŋahn nte rufahnërun cape w̃ac lëw̃u ga ndokuŋëhnëɗunëhëhniwo koɓëri ŋa vëfacah va, do iỹi wati fëna. ¹¹ Ñaɗëfun paryi ale-wo-le tufahn ikamëna tac fo hafo pu ɗanko fop itamahn hun ŋa ntiya. ¹² Ñaɗilëfuna ayewu vëhëmak, ɓare tëfëtalahnëryinëhni vële hnuỹaɗ, g’ikwëtahn do g’iɗuñëna, had ntëw̃ ile ntehnëk W̃ën njëɗaɗëhëhni ỹa.

Ile ntehnëk W̃ënu ŋa njëɗaɗëhëhni vahnë va tokaɗilëhnihna

¹³ Ante ntehnëko W̃ënu ŋa iñë ntinëhnëɗëha Abëraham, kwëhnalaw̃ohna ahnë ale ỹak naỹëk ale kwëryahnëɗ, awa, më kwëryahnëk umë dënk ¹⁴ ntehn: «Ha, pëɓënëɗëmi iɗëwara do njaɓënëɗëmi.» + 6.14: Wapëgwala 22.16-17 ¹⁵ Abëraham nduñënako nap do nuỹako ile ntehnëkawo W̃ënu ŋa.

¹⁶ Vahnë va kwëryahnëɗëni w̃ac ale lëbëkëhni vëhni dënk. Kwëry ŋa tëkwenëɗ gwajëtël ŋa fop. ¹⁷ Fëna W̃ënu ŋa, pacënëhnëkëhni g’ikwëry vële lëw̃ëɗ ile ntehnëkëhniwo ỹa; ñak tufëhni ipëhna tac gwëcëtaɗina muk. ¹⁸ Aki, gë vantiyehn vaki vatac vante wok gwëcëtaɗina nkok koɗina mër W̃ënu ŋa, njonëhnikëfu kamënaỹehn camah, fuhnë vële rënkayinëka va, soŋe pëlahnin ɗus tamahn nte ye haryënkw fu. ¹⁹ Tamahn tac nkenëhnëkëfu had nkahn uwám lëw̃ fu; njaw̃ek ɗus, koɗena nkëci, do tamahn tac ndëcëk pand ɗëndah + 6.19: Soŋe Walevi 16.2;Lik 23.45 mbë rënka ŋa hafo hn’ile cëvak hna, ²⁰ hn’ile ndënkwëhnëkëfu Yesu hna, umë ale ye gaki asëna wasaɗëha asankaf soŋe kantëm had Melëkiseɗek.

Melëkiseɗek, Ahnaw̃ do Asëna Wasaɗëha

¹ Aỹi Melëkiseɗek, ahnaw̃ avë nkol Salem do asëna wasaɗëha W̃ën Hunte Sëpëk Fop ỹa ye. Njik pankëlëni gë Abëraham, nte mënciɗëho gë w̃ët le mbëvehnëkëhniw̃o vënaw̃, do Melëkiseɗek ndëwaka. ² Do fëna, Abëraham më njëɗaka ryampo hnë pëhw fop ile nuỹako w̃ët hna. Melëkiseɗek fëhnëtanëk «ahnaw̃ usatah», do fëna ahnaw̃ Salem yeho, umë fëhnëtanëk «ahnaw̃ ƴam». ³ Kwëhnana rëm, kwëhnana hnëm, kwëhnana hnënk, kwëhnana wapëgwala soŋe wafac walëw̃u, kwëhnana puyala soŋe uwám lëw̃u. Had Aju W̃ënu ŋa, nkoɗ asëna wasaɗëha soŋe kantëm. + 7.3: Wapëgwala 14.18-20

⁴ Ƴëkëryin inaỹ Melëkiseɗek ŋa! Lakënde Abëraham acërakëlo alëw̃ fu ỹa, njëɗaka ryampo hnë ipëhw ile nuỹako w̃ët hna. ⁵ Sariya Moyis ỹa ntehnëkëhni vële ye vësëna wasaɗëha va hnënk Levi hna teɓani ryampo hnë ipëhw vile nuỹaɗëni vëỹënta hni va, vële yentahnik hnënk Abëraham hna fëna. ⁶ Ɓare Melëkiseɗek, ale wok gentahnina hnë hnënk Levi hna, nuỹak vák Abëraham hna ryampo hn’ipëhw ile nuỹak ỹa do ndëwaka Abëraham, ale ntehnëko W̃ën njëɗaɗ iñë. + 7.6: Wapëgwala 12.2-3 ⁷ Do nkwajëla këm, ale hnaỹëk a ryëwaɗëha ale vak a. ⁸ Cape ndampo, vutah Levi vële hnuỹaɗ ryampo hn’ipëhw viỹë va, vële sëmëɗ ye; cape ñëntaw̃ ŋa, Melëkiseɗek, ale hnuỹak sah rac ỹa, cëmëna, had gante ceɗeyahnik ki. ⁹ Gena bi Levi mbahn Abëraham hna nkoko, wati nte pankëlëniho Abëraham gë Melëkiseɗek ŋa? Awa, koɗe nësi, lakënde Levi, ale hnuỹaɗ ryampo hn’ipëhw hna, njëɗaka Melëkiseɗek ryampo hn’ipëhw hna.

Yesu had Melëkiseɗek

¹¹ Sariya le njëɗayik ɓulunda ỹa pëlalëk gë ɗoku saɗëha mba hnënk Levi ỹa. Age ufadah w̃a ntikënde gë ɗoku hnënk Levi ỹa, iỹihne uval yekënd fëna ntiyi asëna wasaɗëha ahaw̃ary hnë hnënk Melëkiseɗek hna, hara gena hnënk Aron ỹa? ¹² Do ge sifa ile nke asëna wasaɗëha ỹa nkwëcëtak sariya ỹa fëna tëfëka nkwëcëti. ¹³ Kaɓi Ahwëhn fu ỹa, ale hnësahnik waŋi ŋa, hnënk haw̃ary nkentahnik, do ahnë hnë hnënk rac ɗokuŋëna muk had asëna wasaɗëha. ¹⁴ Njëtinëk fuhnë fop, Ahwëhn fu ỹa hnënk Yuɗa matik, do muk Moyis dehnëna asëna wasaɗëha nkeɗ hnë iỹi hnënk. ¹⁵ Wëlin ile facënëk wante rëk hnësihnëk ŋi: asëna wasaɗëha ale yijëk ỹi mëntëlëni gë Melëkiseɗek. ¹⁶ Gena asëna wasaɗëha had gante ntehnëk sariya ỹa soŋe vutah Levi ɓare kaɓi kwëhnak fanka uwám ule wok koɗena mbëvehni. ¹⁷ Uŋi ceɗeya mbësayik:

«Nkeru asëna wasaɗëha soŋe kantëm,

had Melëkiseɗek.» + 7.17: Wahnëw̃ 110.4

¹⁸ Cape ndampo, sariya sër ỹa ntihëtik kaɓi kwëhnalohna fanka do koɗilohna ntinënëfu ile valëkëfu ¹⁹ kaɓi sariya ỹa ñoñ ƴona hnë ufadah hna. Gë cape ñëntaw̃, tufinëkëfu tamahn nte fecehnëka ñëntaw̃, nte fëŋahnëɗenëha W̃ënu ŋa.

²⁰ Ntëbi umë, nkehëhna ikwëry. Vëyëntaw̃ va nkeni vësëna wasaɗëha ikwëry këm. ²¹ Ɓare ale hnësahnëɗen ỹa ye asëna wasaɗëha g’ikwëry kaɓi W̃ënu ŋa ntehnëka:

«Ahwëhn a W̃ënu ŋa nkwëryëk,

do gwëcëtëɗina nahan ntëw̃u ŋa:

“Nkeru asëna wasaɗëha

soŋe kantëm.”» + 7.21: Wahnëw̃ 110.4

²² Soŋe rac, Yesu ye ale lik kwëtëla nte ye fagant W̃ënu ŋa gë fuhnë; tac fecek gë ñëntaw̃.

²³ Njaɓëniho vësëna wasaɗëha va kaɓi cëm iŋa memaỹehnëkëhni nkohahnëni ɗoku lëw̃ hni hna; ²⁴ ɓare Yesu, kaɓi nkoɗ soŋe kantëm, nke asëna wasaɗëha avë kantëm. ²⁵ Soŋe umë ye koɗ pehëtëhni dol gë kantëm vële fëŋaɗëha W̃ënu ŋa paɓ g’umë. Kaɓi uwám lew̃u w̃a puɗina, nkoɗ soŋe kantëm njëfanëhni.

²⁶ Aki Yesu ye asëna wasaɗëha ale rëfëkëfu ỹa: afacah, dënt këm, ale wok menëna, ale fitik gë vëw̃en va, ale haƴëndik ƴaŋ cëp ambin. ²⁷ Ɓalëlahna njëɗahn fac-wo-fac wasaɗëha, had vësankaf vësëna wasaɗëha vëỹëntaw̃ ka, ten soŋe wameh wadëw̃u, tac soŋe wameh ɓulunda ỹa ntik rac hwënta ryampo fo gë ƴëɗëhna dëw̃u ŋa dënk do rac gwër nke soŋe kantëm. ²⁸ Sariya ỹa tëhnakëhni vësankaf vësëna wasaɗëha fagant vahnë vële hihnëk; ɓare ale ntik W̃ën asëna wasaɗëha asankaf g’ikwëry nte rëfiɗëha sariya ỹa, Aju ỹa dënk ye, apadënik soŋe kantëm.

Yesu, asankaf vësëna wasaɗëha fu

¹ Wëlin ile ỹak nëfak ỹa hn’ile ỹaɗëfun hnësëfu ỹa: iỹi sifa asëna wasaɗëha asankaf hwëhnayinek. Ntañak mbin hna, farëhw tinki W̃ën hwëhn fanka hna. ² Ntiɗ ɗoku lëw̃u ỹa hn’ile cëvak hna, hn’usank paryi nte kahnëndëk Ahwëhn a, gena gë wëɓák vahnë.

³ Asëna wasaɗëha asankaf-wo tëhnayik soŋe njëɗahnënd wayëɗ w̃a gë wasaɗëha vahnë; afo alëw̃ fu ỹa fëna kwëhna ile njëɗahnëɗ. ⁴ Age Këris nkal hna nkokënd, gekëndina asëna wasaɗëha, kaɓi nkeni vësëna vële yëɗahnëɗ wayëɗ had gante tëƴëk sariya Moyis ka. ⁵ Usank le ndokuŋëhnëɗëni ỹa iw̃ëntëlënta do cën usank vë ambin ỹa ye. Ante ñaɗëho Moyis pëgw ƴëry sank w̃a, W̃ënu ŋa pëƴaka: «Ƴëkëry, ntiɗu fop had gante nke sifa vile rufiru kuŋ vi.» + 8.5: Icahn 25.40 ⁶ Ɓare gaki, ɗoku le nuỹak Yesu ỹa cëpëk ɗoku lëw̃ hni ỹa, kaɓi umë ye arëkëtëlehn kwëtëla nte lëbëk ɗus ñëntaw̃ ŋa, nte hahnëndik hnë ile ntëhnëkëhniwo W̃ën ntiɗ ỹa kaɓi rac lëbëk fop. Ɓare gaki, ile ntehnëk W̃ën ntiɗ ỹa fecek. Rac lik ɗoku asëna wasaɗëha le nuỹak Këris ỹa cëpëk fop waỹëntaw̃ w̃a had gante nke ikwëtëla, le nke Këris arëkëtëlehn hna, nte lëbëk ndënkwëryënkw ŋa.

⁷ Age kwëtëla ndënkwëryënkw ŋa kwëhnakëndina ile keyande, ɓalakëndilëfuhna nëmpëti gë haw̃ary. ⁸ Ɓare soŋe walënt ɓulunda lëw̃u ỹa keyahnëɗëhëhni W̃ënu ŋa do ntehn: «Ami Ahwëhn a ntehnëɓu:

«Wafac w̃a nkejëk hn’ile ntiɗëfu kwëtëla kasëk

gë ɓulunda Isërayel ỹa

do gë ɓulunda Yuɗa ỹa.

⁹ Geɗina had kwëtëla

nte liɓuho ŋa gë warëm hni

fac le hnufiɓuhëhniwo ỹa

yiryeryëw̃ëhni ŋaw̃ët nkal mbë Esipët ŋa.

Kaɓi vëlënëna

kwëtëla mën ŋa,

ami fëna tavëɓuhëhni.»

¹⁰ Ahwëhn a nkwënëk:

«Wëlin kwëtëla nte hwëtëlahnëɗëfun

gë ɓulunda Isërayel ỹa

ga ndëcëk wafac warac;

kwëtëɗëfu sariya mën ỹa

hnë vinahan vidëw̃ hni hna

do kerëɗëfu hnë vintaw̃ary vidëw̃ hni hna.

Nkeɗëfu W̃ën hudëw̃ hni,

do nkeɗëni ɓulunda mën.

¹¹ Ahnë ɓokëɗina karaŋ a avë yalëntaw̃

ma aỹëntaw̃u, ntehn: “Ƴëtëryehna Ahwëhn a!”

kaɓi fop njëtëɗëniho,

pëgw vutoƴ hafo vëhnaỹah.

¹² Tavëhnëɗëfuhëhni ile ntiɗëni wok catëna ỹa

do ɓokëɗa ryënkwëtaw̃ wameh wadëw̃ hni ŋa.» + 8.12: Seremi 31.31-34

¹³ Ante macëɗ W̃ënu ŋa iŋi kwëtëla «kasëk», ntik ndënkwëryënkw ŋa goryeryëna nafa. Do ile sërëk ỹa do wok goryeryëna nafa ỹa, goɗina.

Kwëtëla cër gë kasëk

¹ Kwëtëla ndënkwëryënkw ŋa kwëhnako wasariya gante tëfëka njëfaniha W̃ënu ŋa do kwëhnako fëna hn’ile ñak cëvak nkal li. ² Usank w̃a pëhwëtiko ɓambery; cape ndënkwëryënkw ŋa w̃acik Ỹëw̃a Sëvah, hn’ile nkeho iƴul walampu, taɓali ỹa gë vamburu hwëhn saɗëha ỹa per. ³ Tac, hamëhni ipand ɗëndah kigëna hna nke cape higëna nte w̃acëɗe Ỹëw̃a le Ỹak Sëvak, ⁴ ile hwëhnako taɓali hn’ile pëɗëɗe iɗuɗ iŋa do ipër iŋa sanu fo yehaw̃o gë kwëni kwëtëla nte yehawo ipër iŋa sanu ŋa; hnë umë peƴa sanu nte hwëtahnik mburu nte w̃acik man , gë ryoko Aron nte hnëpëɗëho ŋa do wëraka hn’ile kerik kwëtëla ŋa. + 9.4: Icahn 16.13-15,31 ⁵ Ƴaŋ kwëni hna nkeniho wamëleka wante w̃acik waseruben wante rufahnëɗ W̃ënu ŋa hnam nke. Kuvëniho g’icën vampaw̃ vantëw̃ hni va hn’ile tavëhnëɗeho wameh hna. Ɓare gena gaki tëfëka nkabahni.

⁶ Ga pëhwëtik fop, vësëna wasaɗëha va tënkëɗëniho kwëlëkwël hnë cape ndënkwëryënkw hna soŋe padënahnëni ɗoku lëw̃ hni ỹa. ⁷ Ɓare, hnë cape higëna hna, asëna wasaɗëha asankaf a fo rënkëɗ hnam hwënta ryampo fo bëhn hna. Afo njo sat ntaw̃ cënahn saɗëha soŋe wadënt wadëw̃u ŋa gë wadënt ɓulunda ỹa wante ntini hara vëyëtëna. ⁸ Iƴir Ipacah ŋa tufahnëk aki nkaw̃ nte rënkahnëɗe waỹëw̃a wasëvah hna tufahnina, wati le nkok dihëtina usank ryënkwëryënkw w̃a. ⁹ Virac rufahnëɗ ile ryëcëtaɗ gaki ỹi. Wayëɗ gë wasaɗëha wale njëɗaɗëniha W̃ën koɗina pacën hakili vële yijëɗ cëmbëniha koyëna va. ¹⁰ Wasariya soŋe mbahn fo ye: virokëtok, visece, do igwiyëta wëɓák ge wakwer. Vëỹin fop nkoɗ hafo W̃ënu ŋa nkwëcët.

Saɗëha Këris ỹa

¹¹ Ɓare Këris njijëk had asëna wasaɗëha asankaf viyivah vile rëk yijëk vi. Njijëk paɓ g’usank ile ỹak fadëk do lëbëka nafa ỹëntaw̃ ŋa do le nkok dina vák ahnë. Umë fëhnëtanëk kwëhnëna ɗuniỹa le liyik ỹi. ¹² Gena gë sat va wahotohn gë vuñihni, ɓare gë sat lëw̃u w̃a dënk tënkahnëk hwënta ryampo fo hnë waỹëw̃a wasëvah hna, do nuỹahnëkëfu ipeh soŋe kantëm. ¹³ Kaɓi ge sat wahotohn w̃a, wëɗahni ŋa nte cëlëvini vahnë va ma iɓëhn yank nte pihini vële ronkëk va pacënëɗëhëhni vimbahn va, ¹⁴ wahwënta wayëhw ga sat Këris ỹa ntëbëk rac! Këris, paɓ g’Iƴir kwëhn kantëm ŋa, njëɗëhnak umë dënk gë W̃ën had saɗëha le wok kwëhnana dahëse w̃eh, pacënëɗ hakili lëw̃ fu ỹa ɗanko vantiyehn fu antë njofu g’icëm soŋe njohalahninëhna W̃ën hunte wok cëmëɗina.

¹⁵ Wëlin ile nkehahnëk Këris, umë fo, arëkëtëlehn fagant fu gë kwëtëla kasëk ŋa, ɗanko vële macëk W̃ën va nuỹani ntëw̃ vë kantëm nte ntehnëk njëɗadëhëhni vëlëw̃u va. Icëm ile valëkëfu ỹa ntiyak. Icëm ntëw̃u ŋa pehëtëkëhni vahnë va wameh wante ntini wati kwëtëla ndënkwëryënkw ŋa.

¹⁶ Hn’ile-wo-le nke wanës watëkwa hna tëfëka tufahni ale liyehnëk a cëmëk. ¹⁷ Wanës watëkwa ŋa maw̃ik-wo hara icëm liyak; kwëhnana fanka age ahwëhnu ỹa cëmëna. ¹⁸ Tac fëna akwëtëla ndënkwëryënkw ŋa dënk cëɓilohna bi hara turina gë sat. ¹⁹ Moyis pëƴakëhniw̃o ten fop ɓulunda ỹa vakwëɗa va fop hnë sariya hna. Tac nufëk sat vuni va gë wahotohn w̃a, gë w̃ënka, gë fani atëh nte w̃acik isop, gë w̃uñahn ife wante vëntënik. Cëlëvëk kayëte sariya ŋa do fop ɓulunda ỹa ²⁰ do ntehnatënd: «Iỹin ye sat kwëtëla nte ntehnëku W̃ënu ŋa alënënu.» + 9.20: Icahn 24.8 ²¹ Moyis cëlëvëko fëna gë sat sank w̃a do fop viỹë vile valëtahnik soŋe wasaɗëha gë wayëfa vahnë. ²² Gante nke sariya ka, viỹë viyaɓah gë sat pacënëɗe, do wameh ŋa tavëhnëɗe afo ge sat rurayik. ²³ Koyëna tëfëka pacëni viw̃ëntëlënta vile ye ambin va gë wasaɗëha ɓare tëfëka vile ye ambin va dënk pacëni gë wasaɗëha wale ỹak fecek.

Itënk Këris g’ambin

²⁴ Këris tënkëna hnë waỹëw̃a wasëvah wale ntini vahnë, wale ye w̃ëntëlënta wavë paryi w̃a. Hnë mbin hna dënk tënkëk, hn’ile tufëhnak gaki haryënkw W̃ënu ŋa soŋe lëw̃ fu. ²⁵ Do tënkëna njëɗëhna umë dënk wahwënta wayaɓah, had asëna wasaɗëha asankaf ale rënkëɗ bëhn-w̃o-bëhn hnë Ỹëw̃a le Ñak Cëvak hna gë sat le wok gena lëw̃u. ²⁶ Ge gena umë, tëfakëndëha korot wahwënta wayaɓah koɓëri wapëgwala ɗuniỹa hna. Toña ỹa, gaki karyëtajëk hwënta ryampo fo, wapuya wati hna, soŋe tëkwehn wameh ŋa gë ƴëɗëhna dëw̃u ŋa had saɗëha. ²⁷ Fop vahnë vi tëfëkëhni cëmëni hwënta ryampo fo, do kitiŋëhni W̃ënu ŋa. ²⁸ Koyëna fëna, Këris ỹa njëɗahnik saɗëha hwënta ryampo fo soŋe ntihët wameh vahnë. Mbokëɗ karyëtaj higëna, gena mbok ntihët wameh, ɓare pehëtëhni vële hnapëɗëha g’iɗuñëna këm.

Saɗëha ryamboli le fehëtëɗ

¹ Sariya Moyis ỹa cën vifërën vile yejëk vi fo ye; gena paryi viỹë virac. Soŋe rac wasaɗëha wale yëɗahnëɗe bëhn-wo-bëhn w̃a, wale ye kwëlëkwël warac fo w̃a, mëkëɗina padën ipacën vële fëŋaɗëha W̃ën va. ² Age vële yëɗaɗëha iỹi sifa wasaɗëha W̃ënu ŋa pacënakëndeni soŋe kantëm wameh wadëw̃ hni ŋa, vëvokakëndina ndëñëni soŋe wameh wadëw̃ hni ŋa, do vëvokakëndina cënani saɗëha soŋe wameh ŋa. ³ Ɓare bëhn-wo-bëhn, waỹi wasaɗëha ryënkwëtehnëɗëhëhni vahnë va wameh wadëw̃ hni ŋa, ⁴ kaɓi sat wëɗahni ŋa gë wahotohn w̃a koɗina ntihët wameh ŋa.

⁵ Soŋe rac, ante tënkëk Këris ɗuniỹa hna, ntehnëk:

«Ñalihna wasaɗëha do wayëɗ,

ɓare ntinëhnëruho mbahn.

⁶ Nëŋahnëlihna saɗëha wulaw̃ wale fëɗik cëna saɗëha hna

do wasaɗëha soŋe wameh ŋa.

⁷ Tac ntehnëɓu: “Wëli, W̃ën mën, njijëɓu ami dënk,

soŋe liwu iña hu ŋa, gante kerik ka paŋare mën ỹa

hnë Kayëte Pacah hna.” + 10.7: Wahnëw̃ 40.7-9 »

⁸ Më ntehnëk ten: «Ñalihna do nëŋahnëlihna wasaɗëha, la wayëɗ, la wulaw̃ wale fëɗik cëna saɗëha hna, la saɗëha soŋe wameh ŋa.» Ɓare waỹi wasaɗëha cënayik gante ntehnëk sariya ka. ⁹ Do mbok nkwën: «Wëli, W̃ën mën, njijëɓu ami dënk, liwu ile ỹaɗu ỹa.» Ntihëtëk ryënkwëryënkw ỹa soŋe kahnëndahn higëna ỹa. ¹⁰ Yesu Këris ntik iña W̃ënu ŋa; njëɗahnëk mbahn dëw̃u ŋa hwënta ryampo soŋe fop, do aki pacëninëkëfu wameh ŋa.

¹¹ Asëna wasaɗëha-wo kahnëɗ fac-wo-fac soŋe ɗoku lëw̃u ya; njëɗahnëɗ kwëlëkwël wasaɗëha warac fo, wante wok koɗina ntihët muk wameh ŋa. ¹² Ɓare Këris njëɗahnëk saɗëha ryampo fo soŋe wameh ŋa, do rac soŋe kantëm, tac ntañak farëhw W̃ën hna. ¹³ Koɓëri wati rac, napëɗ W̃ënu ŋa këfëhni vëỹew̃ vëlëw̃u va haryënkw lëw̃u. + 10.13: Wahnëw̃ 110.1 ¹⁴ Gë saɗëha ryampo ntik nkeni vahnë vëfadah soŋe kantëm vële ye nkaw̃ pacën.

¹⁵ Rac ye ile ceɗeyahnëɗëhëfu Iƴir Ipacah ŋa, umë fëna. Ntehnëk ten:

¹⁶ «Ahwëhn a pëƴahnëk: “Wëlin akwëtëla nte hwëtëlahnëɗëfun gë vëhni

hnë wafac wale yejëk,

kwëtëɗëfu wasariya mën

hnë wasakahn walëw̃ hni hna

do kerëɗëfu vinahan vidëw̃ hni hna.”»

¹⁷ Nkwënëk fëna:

«Ɓokëɗa ryënkwëtawu wameh wadëw̃ hni ŋa

g’ile nkoni vëlënënëna sariya ỹa.» + 10.17: Seremi 31.33-34

¹⁸ Age itavëhn wameh ŋa nkehëhna ɓokëɗena ntiyi saɗëha soŋe wameh.

Pëŋanëfuna W̃ënu ŋa

¹⁹ Vëỹënta mën, aki, gë sat Yesu ỹa koɗen tënkin g’iɗëkëna hnë waỹëw̃a wasëvah hna. ²⁰ Piɗëtëhnëkëfu nkaw̃ kasëk nte yiryeryëɗ g’uwám paɓ g’ipand ɗëndah nte ye rënka hna, rac ye mbahn ntëw̃u ŋa dënk. ²¹ Kwëhnayinëka asëna wasaɗëha asankaf ale hwëtik nkaf cery W̃ën hna. ²² Awa, pëŋanëfuna W̃ënu ŋa gë ntaw̃ary catah do g’ikwëtahn padah, g’iɗëñ soŋe wameh wadëw̃ fu ŋa pacënik do g’imbahn nte yaryik gë w̃ënka wapacah. ²³ Njaw̃ënënëfu ɗus tama nte seɗeyanden ŋa, kaɓi W̃ënu ŋa nkok kahnënda hnë ile ntehnëkëfu hna. ²⁴ Ƴëkënëfu ɗus hak tëfëka kamënaỹehnëlin ɗanko tufahnin iŋahn do ntiyin ufërën. ²⁵ Antë tavin vambara vantëw̃ fu va had gante tëk ntindëni vëryampo. Hali! Kamënaỹehnëlënëfu do fëna gë haw̃ary ante nuɗun pëŋajëɗ Fac Ahwëhn a.

²⁶ Ge nkoyihnëk menënden wakwëhna mpër njëtaten toña ỹa, saɗëha ile hoɗ ntihët wameh watac goɗina. ²⁷ Ile wojëɗëhëfu ỹa napin g’untakah kiti W̃ënu ŋa do hwëɗëh hucankaf hunte vëvend vëỹew̃ vëlëw̃u va. ²⁸ Ale wok maw̃ëhnëna sariya Moyis ỹa ndaw̃ik kayëhnahn këm ge nkeni vëhi ma vërar vële seɗeyahnëk idënt ntëw̃u ŋa. + 10.28: Ɗivëta Sariya 19.15 ²⁹ Ale yafëka Aju W̃ënu ŋa tëfëka uhorot ule hambëk ntëbi ryënkwëryënkw ỹi, umë ale yafëk sat kwëtëla nte pacënahnik ŋa, do yew̃ëk Iƴir nte ye haƴalin ipërëna. ³⁰ Anjëtinëka ale lehnëk a: «Ami hwëhnëk igwëcan ŋa! Ami sosëɗ», do lehnëk kat: «Ahwëhn a hitiŋëɗ ɓulunda lëw̃u ỹa». + 10.30: Ɗivëta Sariya 32.35-36 ³¹ Age W̃ën hukantëm ŋa pëlaka ahnë, antakëmak ɗus!

³² Ɗënkwëtaryin wafac waryënkwëryënkw w̃a, nte nuỹarunëho humpen W̃ën hunte fehnëkuno ha: akorotërunëho ɗus, mëkarunëho w̃ët hambah. ³³ Mpëd ampëd njew̃ëɗerunëho do ntiyirunëho këm fo tase ɓulunda fop, mpëd ampëd ankentahnirun uhorot ale liyiko koyëna ỹa. ³⁴ Korotëntirun had cëɗarirun w̃uhnë fëna do, wati nte teɓirun viỹë hun va maw̃ërun gë hnatah, kaɓi njëtërun kwëhnarun hnapul le fecek do vëỹëɗ kwëlëkwël. ³⁵ Awa, antë aravu itama hun ŋa: kwëhnak ɓuña sankaf. ³⁶ Iɗuñëna valëku ɗanko alihahnu ile ñaɗ W̃ënu ŋa tac nuỹaɗun ile ntehnëku ỹa. ³⁷ Ha, akerik hnë Vikerëh hna:

«Hnë wati ryoƴ,

ale yijëɗ ỹa ani nkeɗ, ɓiỹëɗina.

³⁸ Ale satëk g’ikwëtahn nkoɗ kwëlëkwël,

ɓare ge mbokak kamëhni, nëŋëɗilohna g’umë.» + 10.38: Abakuk 2.3-4

³⁹ Geỹilënëhna vële vokaɗ hamëhni do vëvehnëɗe. Vële hwëtahnëk yeyihnëk, do pehëtëɗenëhëfu.

Antiỹehn Ikwëtahn

¹ Ye ga ye ikwëtahn ŋa? Umë fëhnëtanëɗ tamarun nuỹaɗun ile hnapëɗun ỹa, tamahnërun paryi ile worun nuɗiluhna. ² Soŋe ikwëtahn vacërakëlo va, W̃ënu ŋa nësëk wapërën paŋare lëw̃ hni.

³ G’ikwëtahn ŋa, njëtinëk W̃ënu ŋa, gë wanës wadëw̃u ŋa, ntik ɗuniỹa ỹi, aki vile hnuɗen vi w̃atik hnë vile woyik nuɗena.

⁴ G’ikwëtahn ŋa, Abel cënaka W̃ënu ŋa saɗëha fërën ile lëbëk va Kaỹe ỹa. Soŋe rac, nuỹak uceɗeya nte lehnëk acatëk, do W̃ënu ŋa nësëk wapërën paŋare uyëɗ lëw̃u w̃a. G’ikwëtahn ŋa, Abel nkok nësënd lakënde gante cëmëk ki. + 11.4: Wapëgwala 4.3-10

⁵ G’ikwëtahn ŋa, Enok nufik antë njët cëm iŋa do ɓokina nuyi, kaɓi W̃ënu ŋa nufëka; ani gë nufahnënda ỹa, nuỹako uceɗeya W̃ënu ŋa nëŋahnëka g’umë. + 11.5: Wapëgwala 5.24 ⁶ Do ahnë koɗina nëŋahna gë W̃ënu ŋa ge kwëhnana ikwëtahn. Ale fëŋaɗëha W̃ënu ŋa tëfëka kwëtahn iỹin: W̃ënu ŋa nke do mbuñaɗëhëhni vële yëkëlehnëɗëha va.

⁷ G’ikwëtahn ŋa, Nowe ntik sisikulu ỹa soŋe pehëtahn tere lëw̃u ỹa. Ntakëkawo gë W̃ën ŋa ante njëtëndanëkawo ile woko nuyina ten ỹa. Koyëna Nowe tufahnëk ɗuniỹa ỹa tëfëka mbëv do tac umë ye ale lëw̃ëɗ usatah ule hnuỹaɗe soŋe ikwëtahn. + 11.7: Wapëgwala 6.13-22

⁸ G’ikwëtahn ŋa, Abëraham maw̃ëhnëk imac iŋa do njik cape nkal nte rëfëka nuỹa had ntëw̃ ŋa, do njiko hara ƴëtëna bi ne njiɗ. ⁹ G’ikwëtahn ŋa, ñëw̃ëko had ahneh hnë nkal nte ntehnëkawo W̃ën njëɗaɗëha. Ntëɗëniho hnë wasank, umë gë Isak gë Sakob , vëhni vële ntehnëko W̃ën njëɗaɗëhëhni ile njëɗaɗëha Abëraham ỹa. ¹⁰ Kaɓi Abëraham napëɗëho nkol nte yëryik hn’ile njaw̃ëk ɗus, nte njëryëk W̃ënu ŋa dënk had gante ñaɗ ka. + 11.10: Wapëgwala 12.1-5;23.4;35.12,27

¹¹ G’ikwëtahn ŋa Abëraham g’asëvalu Sara mëkëniho nuỹaniha fatah, mama ndëcahnëkëhniwo wabëhn ŋa do Sara mëkëna nag. Apacahnëkawo W̃ënu ŋa ntiɗ ile ntehnëkawo ỹa. + 11.11: Wapëgwala 18.11-14;21.2 ¹² Aki pëgw asan aryampo fo, ale rëk tëkëk cëm iŋa, nagëhni kore wahnënk had wahol hnë ambin, ma had nkërëƴal mbë tëfary wov. + 11.12: Wapëgwala 22.17

¹³ Hnë ikwëtahn hna, acëmëni vëhni fop, hara vëhnuỹana ile ntehnëkëhniwo W̃ënu ŋa njëɗaɗëhëhni ỹa, ɓare nuni ŋaw̃ët do natëkëhniwo, pëƴahnëni vëhni dënk vëhneh do vëyas nkeni hnë ɗuniỹa li. ¹⁴ Vële hnësëɗ koyëna va tufahnëni wapacëk nkal njëkëlehnaɗëni soŋe lëw̃ hni. ¹⁵ Age rëkakëndëniho nahandëni hn’ile matiniho hna, nuỹakëndëniho wati le mbokahnëɗëni hnam. ¹⁶ Ɓare, nkal nte yak nëfak njëkëlehnëɗëniho, nkal mbë g’ambin. Soŋe umë ye W̃ënu ŋa cëfëhnëlahna maci W̃ën hudëw̃ hni; akëbënanëkëhni nkol.

¹⁷ G’ikwëtahn ŋa, Abëraham, këbënako njëɗahna aju Isak saɗëha nte njëkëhnahnëkawo W̃ënu ŋa. Abëraham, ale ntehnëk W̃ën njëɗaɗ iñë, këbënako njëɗahna aju ryamboli ỹa. ¹⁸ Soŋe lëw̃u ỹa ntehnëka W̃ënu ŋa: «Gë Isak nuỹaɗuhëhni vutah vunte lehnëmi yëɗaɗëmini va.» + 11.18: Wapëgwala 21.12 ¹⁹ Ɓare nahaɗëho, lakënde aju cëm, W̃ënu ŋa mëkëɗ mbëhnëndana; W̃ënu ŋa mbësaka aju ỹa, had ale vëhnik do rac ye dahëse ile yijëɗ ỹi. + 11.19: Wapëgwala 22.1-10

²⁰ G’ikwëtahn ŋa, Isak ndëwakëhni Sakob gë Esawu soŋe ile yijëɗ ỹa. + 11.20: Wapëgwala 27.27-29

²¹ G’ikwëtahn ŋa, Sakob, nte ñaɗëho cëm ŋa, ndëwakëhni fop vutah Yosef va. Ryoko lëw̃u ỹa ñaƴëlahnëko do cëmba W̃ënu ŋa. + 11.21: Wapëgwala 27.39-40

²² G’ikwëtahn ŋa, Yosef, ga pëŋako g’icëm, nësëko soŋe icahn ɓulunda Isërayel ỹa Esipët hna do nkabahn paŋare waỹëc walëw̃u w̃a. + 11.22: Wapëgwala 50.24-25;Icahn 13.19

²³ G’ikwëtahn ŋa, rëmu gë hnëmu Moyis cow̃ënihawo wadepera watar nte nagiko ŋa, kaɓi nuniho igwam fatah fa do dakëlëliw̃ohna gë sariya ahnaw̃ a. + 11.23: Icahn 2.1-2

²⁴ G’ikwëtahn ŋa, Moyis, ga nayëk, koỹahnëko antë nko macënde fatah aryagu Faraw̃o ỹa. ²⁵ Atëhnako korotënti ndampo fo gë ɓulunda W̃ënu ŋa g’ile nkeɗ hnë uhnatah wameh ile wok ɓiỹëɗina. + 11.25: Icahn 2.11-15 ²⁶ Nahaɗëho ge ñew̃ik had Këris , rac fecek gë hnapul Esipët ỹa fop, kaɓi vinkër vidëw̃u va ile mbuñaɗe ỹa fo nuɗëho. ²⁷ G’ikwëtahn ŋa, kërënako Esipët hna hara dakëlana g’intavah ahnaw̃ a do nkoko kahnënda had asan ale hnuɗëha W̃ën hunte wok nuɗena ỹa. ²⁸ G’ikwëtahn ŋa, ntiỹehnëk Pak ỹa do cëlëven sat ỹa warënka vacery hna ɗanko Avëvehn a antë ñakëhni vutah vucan vundënkwëryënkw vëva Isërayel va. + 11.28: Icahn 12.1-42

²⁹ G’ikwëtahn ŋa, ɓulunda Isërayel ỹa ndanëtako wov vëntah ỹa had nkal kankah; vëvë Esipët va, nte njëbajëniho ŋa, kohnëkëhniwo w̃ënka ŋa. + 11.29: Icahn 14.21-31

³⁰ G’ikwëtahn ŋa, vëva Isërayel va nkwayaniho wafac mbëɗ gë wahi kece Seriko ỹa do njoko. + 11.30: Yosuwe 6.1-20

³¹ G’ikwëtahn ŋa, Rahab ale wafaɗ a, cëmëntina gë vële w̃ëỹëhnëkawo W̃ën va, kaɓi njotoỹehnëkëhniwo ƴam fo vëyëkëtehna vëva Isërayel va. + 11.31: Yosuwe 2.1-23

³² Do ye hoɗëfu hnësu kat? Wati ỹa nkojëɗëho soŋe hnësahnu woɓa Sedëw̃o gë Barak gë Samëson gë Sefëte gë David gë Samiyel do gë wakila wakaw̃ary. ³³ G’ikwëtahn ŋa, vëhni mëkëni wahnaw̃ w̃a, ntiỹehnëni usatah, nuỹani ile ntehnëko W̃ënu ŋa ntiɗ, ñabëni waw̃ës waɓësëhn, ³⁴ ndipehnëni fanka hwëɗëh fa, pehëni yëkan sëlame ỹa, kihnëniho ɓare njaw̃ënini, ntakëmaniho w̃ët hna, ntanihëhni wasoɗaɗe wahneh w̃a.

³⁵ G’ikwëtahn ŋa, vësëval va mbësayinihëhni vësëm vëlëw̃ hni va paɓ g’iɓëhn ŋa. Vëryampo koroteỹehniniho hafo cëm hna, aŋwëỹëni pehët ŋa ɗanko tëkëntahnini hnë ɓëhn nte fecek hna. ³⁶ Vëryampo fëna mëkani waryas do iɗaf gë wus, vëỹëntaw̃ va ñabiniho do ntoŋëni gë kaso. ³⁷ Andaw̃ini gë wëraka, acapini gë haha; acëmëni gë wataw̃ wasëlame; njasarëɗëniho cuɗatëni vacuɗ waƴand wape gë wahnankal, akaỹëhnëniho, koroteyehniniho, ntiyiniho këm fo; ³⁸ ɗuniỹa ỹa tëfëlana iỹi sifa vahnë! Anjasarëɗëniho gë wula do gë wahuŋ, hnë wakary do vankëɗ vambë nkal.

³⁹ Vëhni fop, mama nuỹani uceɗeya përën soŋe ikwëtahn dëw̃ hni ŋa, vëhnuỹana ile ntehniniho nuỹaɗëni ỹa. ⁴⁰ Kaɓi W̃ënu ŋa këbënanëkëfu ile ỹak fecek, tëfakilahna padëhnini hamehni fu.

W̃ënu ŋa Rëm fu ỹa

¹ Aki, kaɓi iỹi kore waseɗe wasankaf kwërënihëfu, dihëtanëfu, fuhnë fëna, fop vile lënëk vi do wameh wante w̃emaỹehnëɗëhëfu njihahnin haryënkw ŋi! Kamënanëfu nkaryin igary nte hwëtëhninëkëfu ŋa. ² Ƴëkëndënëfuna Yesu, umë ale ye haƴalin ikwëtahn ŋa do fadënëɗ rac. Nduñënak korot kërëwa hna hara ƴëkëna usëfëhnah soŋe uhnatah ule kwëtëhniko w̃a, do gaki, ntañak farëhw W̃ën hna. ³ Ha, naharyëndëna Yesu ɗanko imbër ŋa g’icilëta ŋa antë mëku. Vëw̃en va ñew̃ënihawo, ɓare nduñënak hnë fop.

⁴ Hnë imëtary hun wameh hna, cëvehnëluhna ten sat lëw̃ hun. ⁵ Ndënkwërun bi uhnira ule njëɗaku W̃ënu ŋa had vutah vuntëw̃u:

«Ajë mën, age Ahwëhn a kwëɗëki, kwëtëry hakili!

antë asilëta age curëɗëhi!

⁶ Kaɓi Ahwëhn a kwëɗëɗëha ale ŋahnëk a,

ndafëɗëha ale njavëtëk had aju.» + 12.6: Wanira 3.11-12

⁷ Soŋe ahwëɗahniwu tëfëka aryuñënawu hnë wahorot hna. W̃ënu ŋa paɓëɗëhu had vijë. Nke bi ajë ale nkok kwëɗëɗina rëm ỹa? ⁸ Age kwëɗiluhna had gante kwëɗini fop vutah vuntëw̃u va, vutah inca yerun gena vijë paryi. ⁹ Nuỹayinëkëhni warëm nkal li soŋe kwëɗënihëfu, do ntënëninëkëhni. Tëfëlëfuhna bi maw̃ëhninëhna g’ahaw̃ary Rëm wayir w̃a nuỹahnin uwám w̃a? ¹⁰ Warëm fu soŋe wati kwëɗënihëfu, gante nke vinahan vidëw̃ hni ka. Ɓare W̃ënu ŋa, soŋe uhnëfak lëw̃ fu ỹa, kwëɗëɗëhëfu ɗanko nketahninëfu fuhnë fëna hnë ufacah lëw̃u hna. ¹¹ Paryi, wati nte kwëɗëɗeru ŋa, nëŋëɗilihna, ɓare njiw̃ëhnëɗu. Ɓare ge ndëcëk rac, vële hnuỹaɗ uw̃i sifa kwëɗa do liɗ gante tëfëka ka nuỹaɗëni usatah gë ƴam ỹa.

¹² Soŋe rac, njaw̃ënëryin wëɓák hun wante vërak ŋi do waho hun wale valëɗ w̃i! ¹³ «Soŋe wakwër hun ŋa, ndiryin vankaw̃ vacatah,» + 12.13: Wanira 4.26 ɗanko vëreyah va antë teyëni g’ahaw̃ary ɓare njërëni.

Uhnira vële wok vëhwëtahnëna

¹⁴ Ƴëkëlehnëryin ayewu ƴam gë vahnë va fop, do ayewu vëfacah; ufacah këm ahnë nuɗilahna W̃ënu ŋa. ¹⁵ Kwëtëryin hakili, ahnë antë tak ipërëna W̃ënu ŋa, antë pëhn nkahn gunkah nte waỹëmpaỹehnëɗ ɓulunda ỹa gë wanto wadëw̃u ŋa. ¹⁶ Antë nkeni vële liɗ ndakëntal meh ma vële yafëk ile sëvak ỹa, had Esawu, umë ale, soŋe hnëhët ryampo fo, wafëk carani ntëw̃u ŋa. ¹⁷ Njëtërun ɗus, ga ndëcëk rac, ante ñaɗëho nuỹa ɗëwara le rëfëkawo nuỹa vëhni rëmu hna, acañëtayiko. Nuỹalohna fere nkwëcëtahn ile ntiko ỹa, lakënde gante njëkëlehnëko gë wako ki. + 12.17: Wapëgwala 25.29-34;27.30-40

¹⁸ Pëŋaluhna kuŋ nte hoɗe ñaki had ɓulunda Isërayel. Nuni hnam, Kuŋ Sinayi, hwëɗëh hunte hëvëɗ, umëhwëry ucamah, viŋar vëmëhwëryah, gë sël sankaf. ¹⁹ Nkwëryëni kopa lënkw, do kopa wanës. Ɓulunda Isërayel le wëryëko iỹi kopa ỹa muntani antë mbok nësëhnëhni iỹi kopa. ²⁰ Vëw̃ëkana iỹi sariya: «Ale ỹakëk iŋi kuŋ, lakënde nke intaw̃, ndaw̃ëɗe gë wëraka.» + 12.20: Icahn 19.12-13 ²¹ Ile hnuɗeho ỹa ntakëmako hafo Moyis ntehn: «Antakëko do mbalëɗëfu.» + 12.21: Ɗivëta Sariya 9.19

²² Ɓare Kuŋ Siỹo + 12.22 Siỹo fakuŋ ye Yerusalem hna hn’ile nke Cery W̃ën Cankaf hna. ŋa fëŋarun do gë nkol W̃ën hunte wok cëmëɗina, Yerusalem mbë ambin gë mbara wawuli wamëleka wadëw̃u wale natëk. ²³ Pëŋarun hn’ile mbarëpëlëni vutah W̃ën vële ryënkwik hnagik do herik wamac ambin hna. Pëŋarunëha W̃ënu ŋa, ale hitiŋëɗ ɗuniỹa ỹi fop. Pëŋarunëhëhni wayir vahnë vësatah vële fadënik. ²⁴ Pëŋarunëha Yesu, ale ye arëkëtëlehn yëbëlan W̃ënu ŋa gë fuhnë soŋe cëɓahn kwëtëla kasëk, do pëŋarun sat le sëlëvik ỹa nësëɗ ile fecek g’iva Abel ỹa + 12.24: Wapëgwala 4.10 .

²⁵ Kwëtëryin hakili soŋe antë aw̃ëỹu ahnëpaw̃una ale hnësëɗ a! Nirakëhniw̃o ɓulunda Isërayel ỹa, ɓare ŋwëyëni vëhnëpaɗilahna, vëfehëlohna uhorot ule rëfëkëhni w̃a. Do fuhnë, pehëɗelënëhna g’ahaw̃ary ge niyahnihnëka ale hniraɗëhëfu ambin hna. ²⁶ Koɓëri ŋa, kopa lëw̃u ỹa mbalehnëko nkal iŋi. Dol, ntehnëkëfu waŋi: «Hwënta ryampo kat mbokëɗëfu valehnu gena nkal iŋi fo ɓare ambin ŋi fëna.» + 12.26: Ase 2.6 ²⁷ Waŋi wanës «hwënta ryampo kat» fëhnëtanëk viỹë vile ỹahanik vi, hoɗe mbalehni vi goɗina ɗanko nkohahn viỹë vile wok koɗena mbalehni vi.

²⁸ Koyëna, kaɓi nuỹaɗen inaw̃ nte wok koɗena mbalehni, camehnënëfuna W̃ënu ŋa do ɗokuŋëhnënëfuna gante nëŋëɗëha ka, g’untënah do g’untakah. ²⁹ Kaɓi W̃ën fu ha hwëɗëh hunte vëvehnëɗ ye.

Nkeya nte nëŋëɗëha W̃ën

¹ Goryin aỹahnëlu gë vëỹënta hun va. ² Antë aryënkwu ƴotoyehn vëhneh va, kaɓi vëryampo, ge ntini rac, njotoỹehnënihëhni wamëleka ŋa hara vëyëtëna. ³ Ɗënkwëtaryinëhni vële sëɗik va, had w̃uhnë fëna cëɗaryirun gë vëhni, do gë vële horotëntëɗe va fëna, kaɓi w̃uhnë fëna, kwëhnarun mbahn.

⁴ Vahnë va fop tëfëkëhni ntënëni iñël ŋa do ipad vële yëlëlëk va fëna pac. W̃ënu ŋa kitiŋëɗëhëhni vële liɗ ndakëntal meh gë vësan vëyëlah ma vësëval vëyëlik vële yëkëlehnëɗëhëhni vëhaw̃ary.

⁵ Antë iŋahn koryi ŋa ndënkwary vanjasa hun va; natëryiw̃u g’ile hwëhnarun ỹa, kaɓi W̃ënu ŋa ntehnëk umë dënk:

«Hali, tavëɗila,

ɗënkwëɗila!» + 13.5: Yosuwe 1.5;Ɗivëta Sariya 31.6,8

⁶ Soŋe umë ye koɗen nësin gë tama:

«Ahwëhn a yijëɗ ndemaw̃o, ñoñ dakëɗilohna.

Ye koɗëni ntiniho vahnë va?» + 13.6: Wahnëw̃ 118.6

⁷ Ɗënkwëtaryinëhni vële yenëhnëkuno haryënkw va, fëƴakuno wanës W̃ënu ŋa. Naharyin gante nkeniho ka do vile w̃atik hnë uwám lëw̃ hni hna do tëfëtalehnëryin ikwëtahn ntëw̃ hni ŋa. ⁸ Yesu Këris arac fo ye yëhno gë dol, do nkoɗ koyëna kantëm.

⁹ Antë aravu arokayiwu gë fop wasifa vakarëŋa vanëmpëlah. Njivëk vambery va njaw̃ëninëfu g’ipërëna W̃ënu ŋa; ɓare sariya soŋe uryav w̃a ndemaɗilihna vële rëfëɗëha va. ¹⁰ Kwëhnaỹihnëk hn’ile cënaɗe saɗëha , do vësëna vële ryokuŋëɗ sank hna tëfëlihna tokëni ile w̃atik hnam ỹa.

¹¹ Ani, asëna wasaɗëha asankaf yojëɗ sat wulaw̃ hnë waỹëw̃a wasëvah hna soŋe tavëhn wameh ŋa, do vimbahn wulaw̃ warac pëɗëɗe kamëhni ryaha hna. ¹² Soŋe rac ye Yesu fëna cëmëk kamëhni nkol hna, ɗanko pacënahn ɓulunda ỹa gë sat lëw̃u ỹa dënk. ¹³ Awa, cahnënëfu pankëlin g’umë hamëhni ryaha hna, do ɗiɓënëfu usëfënahnah ryampo fo g’umë. ¹⁴ Kaɓi kwëhnayilënëhna gëɗ ani nkol nte viỹëɗ kwëlëkwël; nte yijëɗ ŋa yëkëlehnëɗen.

¹⁵ Paɓ gë Yesu, ƴëɗanëfuna W̃ënu ŋa kwëlëkwël icëmb had saɗëha, umë fëhnëtanëk wanës vële yavëtëɗeha g’Ahwëhn. ¹⁶ Antë aryënkwu idi ufërën w̃a gë cahël ile hwëhnarun ỹa, wëli saɗëha le hnëŋëɗëha W̃ënu ŋa. ¹⁷ Maw̃ëhnëryinëhni vëvë haryënkw hun va do dënënëryinëhni. Njëkaɗëni vintaw̃ary hun nketëni vahnë vële rëfëka tëfëtanëniha W̃ënu ŋa ɗoku lew̃ hni ỹa. Tac, age maw̃ëhnërunëhëhni, ntiɗëni ɗoku lëw̃ hni ỹa g’uhnatah, genëhnëɗilihna iɗiɓ, rac ɗemaɗiluhna.

¹⁸ Ƴëfaryindëna W̃ënu ŋa soŋe fu. Apacahnëkëfu ñoñ kwëhnalëfuhna ile heỹandeɓun. Njëkëlehnëɗëfun lifu fop g’afërën. ¹⁹ Ile rëƴëɗëmu ntëbi ỹa ayëfaw̃u ɗanko yiju ñap ỹal hun.

Iƴëfa gë simpaỹi

²⁰ W̃ën hwëhn ƴam ỹa kaƴëndëka fagant vësëm hna Ahwëhn fu ỹa Yesu Këris, umë ale ye aheryëherya asankaf wape ŋa. Do sat saɗëha lëw̃u ỹa nuỹanëkëfu kwëtëla nte viỹëɗ soŋe kantëm. ²¹ Araɓi uŋi W̃ën nti mëkin ntiyin fop ile fërënak ɗanko padënin iña dëw̃u ŋa! Araɓi nti hnë fuhnë, paɓ gë Yesu Këris , ile hnëŋëɗëha ỹa! Cëmb iŋa nke gë Yesu Këris soŋe kantëm! Amina!

²² Vëỹënta mën, tëƴëɗëmu, maw̃eryin g’iɗuñëna waŋi wanës wante hamënaỹehnëɗ; ƴaɓena.

²³ Ƴëtëryin, aỹënta fu ỹa Timote tavik. Age njijek ñap, njiryiɗëfun gë ami ayëkijiwu.

²⁴ Gaỹëryinëhni vëvë haryënkw hun va gë vëfacah va fop. Vëyënta fu vëvë Itali va nkaỹënihu.

²⁵ Araɓi ipërëna W̃ënu ŋa nke gë w̃uhnë fop!