2 Vëvë Tesalonik

Kayëte kigëna mba Pol nte kerëhnëkëhni vëvë Tesalonik

Wade yehëhna hnë iŋi kayëte

Kayëte kigëna mba vëvë Tesalonik va nëmpëlëna ɗus gë ndënkwërënkw ŋa. Iŋi kayëte fëna vëhni Pol gë Silas do gë Timote matik wati nte nkeniho Korent hna mpëdara yëbëlan bëhn wafëhw wahnah g’imbëɗ gë wahnah gë bëhn wafëhw imbëɗ gë wahi (49 gë 52). Pol camehnëɗëha W̃ënu ŋa soŋe ile nkoni kahnëndani harënkw wahorot hna. Kamënaỹehnëɗëhëhni tëfëni nkaw̃ nte tëhnani hnë Këris ŋa do kamënaỹehnëɗëhëhni ntini fop vantiyehn vante w̃atik hn’ikwëtahn hna.

Vële hwëtahnëk va fop ɓoka Ahwëhn a napëɗëni do Pol pacëhnëndëhëhni iỹin diyana ten. Pol ndëkwëtehnëɗëhëhni wëdahëse wante ryënkwëhniɗ iɓoka Këris ŋa. Ani g’umë, had fuhnë, macinëkëfu nufin nkaf ɗoku hnë ɗuniỹa li.

Wëlin wanës wakwëhn nafa hn’iŋi kayëte: aỹënta, Pol, iɓoka, kayëte, ƴam, ikwëtahn, fanka, satah, Ayapah, ɗoku.

Wëlin gante nke kayëte ka:

Simpaỹi (1.1-2)

Ahwëhn a njijëɗ kitiŋ ɗuniỹa ỹi (1.3-12)

Ile ryënkwëhniɗëha mbokahnind Ahwëhn a (2.1-12)

Iƴaw̃ hn’ikwëtahn (2.13-17)

Pol tëƴëɗ wayëfa (3.1-5)

Imac ɗokuŋa had Pol (3.6-15)

Iƴëfa gë simpaỹi (3.16-18)

Simpaỹi

¹ Ami Pol gë Silëve + 1.1 Silëve: Ale w̃acik Silëve ỹa w̃acik fëna Silas hnë kayëte 1 Vëvë Tesalonik hna. do gë Timote herëhnëryiɗëhu, w̃uhnë vëvë cery sali vë Tesalonik le kwëhnëk W̃ën Rëm fu ỹa do gë Ahwëhn a Yesu Këris . ² Araɓi W̃ënu ŋa Rëm fu ỹa do gë Ahwëhn a Yesu Këris njëɗënihu ipërëna gë ƴam ỹa!

Ahwëhn a njijëɗ kitiŋ ɗuniỹa ỹi

³ Vëỹënta fu, tëfëkëfu samehnëndëfuna kwëlëkwël W̃ënu ŋa soŋe hun. Umë saŋah ye, kaɓi ikwëtahn hun ŋa nayiŋa nayëɗ, do iŋahnël nte hwëhnarun ŋa gwëna ŋa nkwënaɗ. ⁴ Soŋe rac, cëkwaryëɗerun hnë vacery sali vakaw̃ary vëmba W̃ën hna. Ha, njaw̃ënërun do kwëtarun ikwëtahn hun ŋa la gante korotehnëɗerun ki do ɗuñënaɗun hnë vambër vasiyamah. ⁵ Vëyin fop fëhnëtanëɗ kiti W̃ënu ŋa satah ye, gante nuhanderun had vële tëfëk Inaw̃ W̃ënu ŋa, soŋe rac horotahnëɗun.

⁶ Paryi nke, W̃ënu ŋa catëk: horot cosëɗëhëhni vële horotehnëɗëhu va ⁷ do njinëgehnëɗëhu w̃uhnë vële horotëɗ vi, do fuhnë fëna. Watac nkeɗ ge Ahwëhn a Yesu matini g’ambin gë wamëleka wadëw̃u wakwëhn fanka ŋa; ⁸ hnë fagant hwëɗëh hucankaf njijëɗ, do piniŋëɗëhëhni vële wok vëyëtëɗilahna W̃ën va do wok vëw̃aw̃ëhnëɗina Wanës Wakasëk Ahwëhn fu Yesu ŋa. ⁹ Iɓëv kwëlëkwël ŋa yeɗ icos dëw̃ hni ŋa gë ŋaw̃ëta Ahwëhn ŋa do gë ŋaw̃ëta icëmb fanka falëw̃u fa, ¹⁰ ge njijëk hnë fac rac soŋe cëmbëniha do naỹënëniha vële kwëhnëk do hwëtahnëka umë va. W̃uhnë dënk gë vëhni nkentëɗerun, kaɓi kwëtahnërun wante rëfëtanëhnirun ŋa.

¹¹ Soŋe rac ye, ƴinëgaɗilëfuhna iƴëfan hun ŋa. Njëfaɗëfunëha W̃ën fu ŋa gante ntihandëhu vële tëfëk uw̃ac lëw̃u w̃a ile macëku. Njëfaɗëfunëha araɓi, gë fanka falëw̃u fa, ndemawu aliwu fop iña përën ŋa gë fop ntiyehn nte w̃atik hn’ikwëtahn hna. ¹² Koyëna, uw̃ac Ahwëhn fu ỹa Yesu ntënënëɗe soŋe hun ỹa do w̃uhnë ntënënëɗerun soŋe lëw̃u ỹa gante nke ipërëna W̃ën fu gë Ahwëhn a Yesu Këris .

Ile ryënkwëhniɗëha iɓoka Ahwëhn a

¹ Awa, vëỹënta fu, soŋe iɓoka Ahwëhn fu ỹa Yesu Këris , g’ibarël fu ɗarël lëw̃u, muntaɗerun: ² ge ahnë ntehnëku fac Ahwëhn a tëkik, nt’aw̃aw̃u ahnë mpaỹëmpaỹehn wahakili hun w̃a ma ntakënawu gë wante w̃atik hn’iƴir ma hnë wanës ma hnë kayëte, lakënde ntehnëhni ỹal fu matik. ³ Antë aw̃aw̃u ahnë tokawu gë sifa wamër-wo; kaɓi ani gë tëkahnind ỹa afo iƴahëta cankaf W̃ënu ŋa nke ten do Ayapah a tufëhnaɗ, Ajë iɓëv ŋa, ⁴ ale humaɗ ntehn umë lëɓëk fop ile w̃acik w̃ën ỹa ma sëmbëɗe ỹa. Ndëkënaɗ dënk umë ntaña hnë Acery W̃ën Cankaf hna mëca ntehn umë ye W̃ënu ŋa. ⁵ Ɗënkwëtaɗiluhna bi nësëhnëmuno waŋi ante nkoɓuho hnë w̃uhnë ŋa? ⁶ Do tame njëtërun ɗus ile w̃emaỹehnëka gante nkoɗ tufëhnana hafo ge tëkëk wati le hahnëndik ỹa. ⁷ Fanka Ayapah le sow̃ak ỹa ɗoku ỹa nkehahnëk; ɓare ale w̃emaỹehnëka ỹa nkoɗ memaỹehn hafo ge cáhëtik. ⁸ Awa, Ayapah a tufëhnaɗ, umë ale ndaw̃ëɗ Ahwëhn a Yesu gë sël w̃ës lëw̃u ỹa, g’icëmb nte lapëhnajëka itëk dëw̃u ŋa. ⁹ Fanka Sintani fa yiyehniɗëha Ayapah a Mbëvehnëɗëha; tufahnëɗ vantiya vante-wo-vante vakwëhn fanka, viỹë vifëmpëhnahnah gë wëdahëse soŋe tokahnëhni vahnë va. ¹⁰ Gë sifa vankeya vameh va fop, tokaɗëhëhni vële sëvëɗ va. Cëvëɗëni kaɓi vëhacana iŋahn toña le fehëtakëndëhëhni ỹa. ¹¹ Soŋe rac, W̃ënu ŋa njëɗanahnikëhni fanka fale rokaɗ, umë feñëɗëhëhni kwëtahnëni wamër ŋa. ¹² Awa, fop vële wok vëhwëtahnëna toña va, ɓare ỹaɗ wameh va, kitiŋëɗeni menëni.

Iƴaw̃ hn’ikwëtahn

¹³ Vëỹënta fu, ge fuhnë ye, tëfëkëfu samehnëndëfuna kwëlëkwël W̃ënu ŋa soŋe hun ỹa, w̃uhnë vële ŋahnëk Ahwëhn. W̃ënu ŋa tëhnaku ayewu vëryënkwëryënkw vële fehëtëɗe gë Iƴir nte facënëɗ do gë ikwëtahn hnë toña hna. ¹⁴ W̃ënu ŋa macëku hn’iŋi peh gë Wanës Wakasëk wante haraŋirun ŋa; soŋe ahnuỹahnu icëmb Ahwëhn fu Yesu Këris . ¹⁵ Awa, vëỹënta fu, ƴaw̃ënaryin do kwëtaryin ikaraŋ nte haraŋirun gë wanës ŋa ma gë wante herëhnirun ŋa. ¹⁶ Araɓi Ahwëhn fu ỹa Yesu Këris umë dënk do gë W̃ënu ŋa Rëm fu ỹa ale ỹahnëkëfu do yëɗakëfu g’ipërëna dëw̃u ŋa, ikamënaỹehn nte wok puɗina do g’itamahn gwamah soŋe ile përënak, ¹⁷ njaw̃ënayehn wasakahn w̃a do njëɗawu fanka aholahnu alindu do ahnësëndu kwëlëkwël ile nëfak.

Pol tëƴëɗ wayëfa

¹ Awa vëỹënta fu, watëkwala ŋa, ƴëfanëhnëryindënëfu, soŋe wanës Ahwëhn ŋa camp ñap do ntënëni, had gante nkeho hnë w̃uhnë ki. ² Ƴëfaryindëna fëna W̃ënu ŋa pehëtëfu gë vahnë vëw̃eh do gë viyapah va, kaɓi gena vahnë va fop w̃aw̃ëɗ kwëtahnëni. ³ Ɓare Ahwëhn a kahnëndak. Njaw̃ënëɗëhu do keryëɗëhuna Aw̃eh. ⁴ Wëlin itamahn nte hwëhnaɓun hn’Ahwëhn hna soŋe w̃uhnë: ntiɗun le lehnirun ỹa do nkorun alindu. ⁵ Araɓi Ahwëhn a paɓary wasakahn hun w̃a g’iŋahn W̃ënu ŋa do g’iɗuñëna nte njëɗahnëɗ Këris ŋa.

Imac ɗokuŋa had Pol

⁶ Vëỹënta fu, ntehnëɗerun, g’uw̃ac Ahwëhn fu ỹa Yesu Këris , ŋaw̃ëtaryinëhni fop vëỹënta fu vële hëmak va do hwëhnak nkeya nte wok tëfëlëna gë ikaraŋ nte haraŋëɓunëhëhni ŋa. ⁷ W̃uhnë njëtërun ɗus gante tëfëku arëfëtalahnunëfu ka: këmalëfunohna ante nkeɓunëho gë w̃uhnë ŋa; ⁸ ahnë-wo muntalëfunawohna ile rokëɗëfun, ɓare hnë horot hna do gë hn’ambër hna, g’umëɗ gë g’anent, ndokuŋëɓun soŋe antë yefu iɗiɓ ahnë hnë w̃uhnë. ⁹ Age ntiɓun waŋi, gena kaɓi tëfëlëfuhna aryemawunëfu, ɓare ntiɓun koyëna aharaŋahniwu nkeya nte rëfëku arëfëtalahnëndu. ¹⁰ Ha, ante nkeɓunëho ỹal hun ŋa, ntehnirunëho: «Ale wok ñaɗina ndokuŋ ỹa tëfëlahna tok fëna.»

¹¹ Ntehnëɗëfun waŋi kaɓi nkwëryëɗëfun ga nësëɗe, nkeni hnë w̃uhnë vëhëmak, ñoñ vëliɗina ge gena le wok gena wadëw̃ hni. ¹² Vële ye koyëna va, ntehnëɗëfunëhëhni do kamënaỹendëfunëhëhni g’uw̃ac Ahwëhn Yesu Këris: tëfëka ndokuŋëndëni ƴam do tokëndëni ŋacëŋac ntëw̃ hni ŋa. ¹³ Ɓare w̃uhnë, vëỹënta mën, antë njambu uli ufërën w̃a. ¹⁴ Age ahnë ŋwëỹëk wante herëɓun hn’aŋi kayëte ŋa, kamahnëryina do aỹaw̃ëtawuna, soŋe cëfëhnahna. ¹⁵ Antë aliwuna aỹew̃, ɓare ahnirawuna had aỹënta hun.

Iƴëfa gë simpaỹi

¹⁶ Araɓi Ahwëhn ƴam ỹa, njëɗëndu umë dënk ƴam ỹa kwëlëkwël do fale-wo-fale nke fa! Araɓi Ahwëhn a nke gë w̃uhnë fop! ¹⁷ Ami Pol, gë wëɓák mën ŋa dënk kerëhnëryiɗëmu iỹi simpaỹi. Aki kerëɗëfu w̃ac mën ge puhnaɓu vëkayëte mën va fop do aki nke kerëh mën. ¹⁸ Araɓi ipërëna Ahwëhn fu ỹa Yesu Këris nke gë w̃uhnë fop!