1 Timote

Kayëte ndënkwëryënkw mba Pol nte kerëhnëka Timote

Wade yehëhna hnë iŋi kayëte

Afaƴik Pol kerëhnëka Timote vëkayëte vaki do aŋi ye ndënkwëryënkw ŋa. Pol kerëk iŋi kayëte mpëdara hnë bëhn wafëhw mbëɗ g’iryaw̃ g’imbëɗ (65) ga ndëcëk hnagi Yesu ỹa, Masedëwan hna.

Timote asan ale hwëtahnëka Yesu Këris yeho. Hnëmu ỹa Gërek yeho do rëmu ỹa sëwif yeho. Matiko hnë nkol Lisëter hna (Vantiyehn 16.1) do nke lawo paryi Pol hnë ɗoku lëw̃u vacery sali hna. Atëko njasëndëni gë Pol do Pol macëɗëha aju hn’ikwëtahn hna. Umë wogëko gë Pol ɓare Pol tamahnëkawo ɗus. Pol tavëka Timote Efes hna soŋe karaŋëhni vëvë cery sali va.

Soŋe ile kerëhnanëka iŋi kayëte ŋa umë ye, kaɓi nkeni vëryampo vële haraŋëɗëhëhni vile wok gena toña va. Anahaɗëni viỹë vile ye ɗuniỹa vi mek do koɗena njiyi g’ambin afo gë uyët ile sow̃ik do g’ikeha iñëlël gë virokëtok viryampo. Pol ntehnëk, fop vile ntik W̃ën va nkwamëk do ndënkwëtehnëɗëha Timote karaŋëndëhni watac vacery sali va.

Kayëte ntëw̃u ŋa nësëɗ viỹë vërar: wahnira vële hwëtahnëk va, vëvë haryënkw vële hwëtahnëk va gë Timote dënk.

Wëlin wanës wakwëhn nafa hn’iŋi kayëte: ikwëtahn, cery sali, ɗuniỹa, ikaraŋ, Sintani, ɗoku, vësëval, vësan, toña.

Wëlin gante nke kayëte ka:

Simpaỹi (1.1-2)

Kwëtëryin hakili gë vële haraŋëɗëhëhni vahnë wamër va (1.3-20)

Ikaraŋ soŋe iƴëfa do vëvë haryënkw cery sali (2.1–4.16)

Ile rëfëka ntini vële hwëtahnëk va (5.1–6.2)

Uw̃ët fërën (6.3-19)

Simpaỹi rëkwa (6.20-21)

¹ Timote, ami Pol herëhnëryiɗëhi. W̃ënu ŋa Afehët fu ỹa gë Yesu Këris itamahn dëw̃ fu ŋa vëhni lehnëko yewu afaƴik Yesu Këris ỹa do wëjë ye fatah mën paryi hnë ikwëtahn hna. Araɓi W̃ën Rëm ỹa gë Yesu Këris Ahwëhn fu ỹa njëɗënihi ipërëna, ikaỹëhnahn gë ƴam ỹa!

Kwëtëryin hakili gë vële haraŋëɗëhëhni vahnë wamër va

³ Gory Efes hna, had gante ntehnëmino ani gë yihahnëryindu gë Masedëwan ka, kaɓi nkeni hnam vële haraŋëɗëhëhni vahnë wamër ŋa; dehnëryihni tavëni. ⁴ Dehnëryihni tavëni itëfëta wëhnantul wahwëhn nafa këm g’iɗëkw vimbaỹ vacërakëlo vële wok vëfuɗina. Umë gwajëtël fo njojëɗ, ƴiryeryëɗina gë ikaraŋ W̃ën ile liyaɗ hn’ikwëtahn hna. ⁵ Ge ntehnëmi ali koyëna soŋe naỹëni iña nte w̃atik hnë sakahn facah hna gë inahan ipërën do g’ikwëtahn paryi ye. ⁶ Vëryampo tavëni nkaw̃ tac do tëfëni vankwajëla vakwëhn nafa këm. ⁷ Vëharaŋ sariya W̃ën ñaɗëni nkeni, ɓare vëyëtëna ile nësëɗëni ỹa, vëyëtëna fëna iñë ile njaw̃ënëni paryi ỹi.

⁸ Ha, njëtëɓun sariya ỹa përënak, ge ntiyinëk gante tëfëka ka. ⁹ Tëfëka njëti iỹin: sariya ỹa gena vësatah linëhnik. Soŋe vële wok vëw̃aw̃ëhnëɗina gë vële wok vëlënënëɗina sariya ỹa, vële wok vëhwëhnana ikwëtahn gë vële w̃enëɗ va, vële wok vëlënënëɗilahna W̃ën gë vile facëk va, vële ryaw̃ëɗëhëhni warëm hni ma wahnëm hni, vëryaw̃ vahnë vëhaw̃ary fëna, ¹⁰ vële liɗ ndakëntal nte ñew̃ëk W̃ën gë vësan vële ryakëɗ gë vësanëntahni, vële wafëɗëhëhni vëramp, vële w̃ërëɗ, vële ye waseɗe hnë wamër do gë fop vële hwëhnak nkeya meh, vile hnëmpëlëk gë ikaraŋ catah ŋa linëhnik. ¹¹ Ikaraŋ tac tëfëlëk gë Wanës Wakasëk wante hwëtehnaniɓu, wante w̃atik hnë W̃ën hunte lënënik, hunte sëmbik.

Icamehn soŋe ipërëna W̃ën

¹² Camehnëɓuha Yesu Këris Ahwëhn fu ỹa, umë ale yëɗako fanka fa: ha, Ahwëhn a nuko kahnëndaɓu, umë tëhnako liwu ɗoku lëw̃u ỹa, ¹³ mama nkehahnëɓuho koɓëri ŋa aỹew̃ alëw̃u, ahorotehn do ayapah. Ɓare kaỹëhnahnëkawo g’ami, kaɓi kwëtahnëlëwawohna do ƴëtëlëwohna ile liɗëfuho ỹa. ¹⁴ Ha, ipërëna Ahwëhn fu ŋa njaɓëkowo, nuỹaɓuho ikwëtahn ŋa do gë iŋahn nte hwëhnayinëk, vankinëk gë Yesu Këris.

¹⁵ Wëlin wanës toña wante rëfëka kacahnini vahnë fop: Yesu Këris njijëk ɗuniỹa li soŋe pehëtëhni vëw̃en. Do ami aw̃en asankaf yeɓu. ¹⁶ Ɓare wëli soŋe ile kaỹëhnahnëka g’ami: Yesu Këris w̃aw̃ëk tufahn hn’ami, aw̃en asankaf a, iɗuñëna ipadah idëw̃u ŋa. Koyëna dahëse iɗuñëna dëw̃u yeɓu soŋe vële hwëtahnëɗëha va, gante nuỹahnëɗëni uwám usër w̃a.

¹⁷ Araɓi untënah gë icëmb

nke g’ahnaw̃ avë kantëm, gë W̃ën hunte wok cëmëɗina,

hunte wok nuɗena, hunte wok mëntëlëntina,

dol gë kantëm! Amina.

¹⁸ Timote, ajë mën, ntehnëmi ali fop wanës watac wante hwëtehnahnëmi, rëfëlëk gë wanës wante fëƴahniko koɓëri ŋa soŋe lëw̃ hu ỹa. Waŋi wanës njaw̃ënëɗëhi do koɗu aw̃ët uw̃ët fërën w̃a; ¹⁹ kwëtary ikwëtahn hu ŋa do g’inahan ipërën hu ŋa. Vëryampo tavëni watac do koyëna përëkanëni ikwëtahn dëw̃ hni ŋa. ²⁰ Hnë vahnë vërac nkentiniho Imene gë Alekësandër; vëhni njëɗahnëɓuhëhni gë Sintani . Koyëna, ñëŋaɗëni antë mbok njew̃ëniha W̃ënu ŋa.

Ikaraŋ soŋe iƴëfa

¹ Awa ryënkwëryënkw ỹa ten, ntehnëmu aw̃untanduna W̃ënu ŋa, ayëfanduna, ahëlanduna soŋe vëỹënta hun va do asamehnënduna soŋe vahnë va fop. ² Tëfëka ayëfanëhnënduni vële hnaw̃ëk gë fop vësankaf va gante nkohahnëɗen ƴam, tana këm, kahnëndahnin hnë W̃ën gë njasa ntënah. ³ Irac ye ile fërënak do hnëŋëɗëha W̃ënu ŋa, Afehët fu, ⁴ ale ỹaɗ vahnë va fop pehëtini do njëtëntini toña ỹa.

⁵ Ha, W̃ën huɗampo fo ye,

do fëna aryampo fo ye yëbëlan W̃ënu ŋa gë

vahnë va:

asan ye, Yesu Këris ,

⁶ umë ale yëɗahnëk ntaw̃ary dëw̃u had icos soŋe pehëtëhni vahnë va fop.

Rac ye uceɗeya nte liyiko wati le pëhnayiko hna ⁷ do soŋe rac, W̃ënu ŋa hahnëndëko had afëƴahn gë afaƴik haraŋëndëw̃uhni, vële wok vëyena wasëwif, ikwëtahn ŋa gë toña ỹa. Toña ỹa nësëɗëfu, mërëɗa.

⁸ Awa ñaɗëfu vësan va fop njëfandëni gante-wo-gante, njelëndëni wëɓák wapacah g’ambin, ntavah këm gë sonko këm.

Ikaraŋ soŋe vësëval hnë cery sali

⁹ Koyëna soŋe vësëval va fëna, ñaɗëfu cuɗandëni gante caŋëk ka, hara vëryëcëtahnëna, tëfëlahna ntiyandëni viỹi soŋe tufëhnahnëndëni. Antë ndaỹëndeni vandaỹa vantakah, do antë kayëtandëni gë sanu, ma wanjere, ma viỹi vile hambëka ntaw̃. ¹⁰ Ɓare tëfëka tufahnëndëni iƴiv dëw̃ hni ŋa hnë vantiyehn vapërën gante caŋëkëhni vësëval vële lehnëɗ W̃ën tëfalëɗëni.

¹¹ Asëval a tëfëka ñëŋand ƴam fo do gë imaw̃ëhn padah. ¹² Maw̃ëryanëlëw̃ahna asëval karaŋa, ma mëka asan; tëfëka ñëw̃ ƴam. ¹³ Kaɓi Adam ryënkwiko ñahani, tac Ev. ¹⁴ Do fëna gena Adam tokako Sintani, ɓare asëval a yeho, afo nti ile mbañëko W̃ënu ŋa. ¹⁵ Ɓare pehëtëɗe hn’uhnag hna, ge njaw̃ënëk ikwëtahn ŋa, gë iña ŋa, g’ufacah w̃a, ge ntiɗ g’useryah.

Vësankaf cery sali

¹ Wëlin wanës toña: ge ahnë njëkëlehnëɗ nke avë karyënkw cery sali, ɗoku fërën ye ile njëkëlehnëɗ ỹi. ² Awa umë tëfëka nke ahnë asatah, nke asan asëval aryampo fo, ale fëlak nkaf ntëw̃u do seryëk, ale lënënëɗe, holëk kaca vahnë do hoɗ karaŋëhni vahnë. ³ Tëfëlahna nke aryëw̃ ma ale w̃ëtëntëɗe ɓare tëfëka nke ale nkukëk sakahn do wok ƴëkëlehnëɗina sonko; antë ŋahn ɗëcët koryi. ⁴ Tëfëka nke ale holëk mënkw tere lëw̃u ỹa do mënkwëhni vutah vuntëw̃u hn’imaw̃ëhn, g’untënah fop. ⁵ Age ahnë a koɗina mënkw tere lëw̃u ỹa dënk, hak koɗ paɓ cery sali W̃ënu ŋa? ⁶ Tëfëlahna nke ale hwëtahnëk takan, soŋe antë pëɓa inaỹëna do njo hn’ikitiŋ tac fo gë Sintani . ⁷ Tëfëka kwëhna untënah gë vële wok vëyentina cery sali soŋe antë njafini do antë njoni hnë warënd Sintani hna.

Vëyohal cery sali

⁸ Vëyohal hnë cery sali va fëna tëfëkëhni nkeni vësan vële lënënik do wok vëhwëhnana wanës waki. Tëfëlëhnihna ɗëcëtandëni uñen ŋa ma njëkëlehnëndëni koryi gë wafere waw̃eh w̃a fop. ⁹ Tëfëkëhni vahnë vërac kwëtani, gë hakili facah, toña le yëtëndanik hn’ikwëtahn hna. ¹⁰ Tëfëka pëcëtayi fëna wapacëk soŋe njëtahni bi vëhwëhnana ile nirandeni, tac koɗëni nkeni vëyohal cery sali.

¹¹ Vësëval va + 3.11 Vësëval va: Koɗe nkwëryi fëna «vësëval hni va» ye. fëna tëfëkëhni nkeni vële lënënik do tëfëlahna nëw̃ëndënihëhni viỹëntahni, vële yëtëk nkaf ntëw̃ hni do hahnëndak hn’ile-wo-le hna.

¹² Vëyohal cery sali va tëfëkëhni ale-wo-le nke asan asëval aryampo fo do tëfëkëhni nkeni vële holëk mënkw vutah vuntëw̃ hni va gë tere lëw̃ hni ỹa. ¹³ Vële liɗ g’afërën ɗoku lëw̃ hni hnë cery sali hna ntënënëɗeni do nuỹaɗëni itama cankaf hn’ikwëtahn nte ye hnë Yesu Këris .

Gante naỹëk ikwëtahn ka

¹⁴ Kerëndiɗëmi waŋi, mama nahandëɓu yiryiwu yëkiyi hara ɓiỹëna. ¹⁵ Koyëna, ge ƴinkaryila, njëtëɗu gante tëfëka nke njasa hu ŋa hnë tere W̃ën hna. Iỹi tere, cery sali mba W̃ën paryi ye nte hagëtëɗ do famëtëɗ toña ỹa. ¹⁶ Ha, pacëk, ufëmpëhnah ile yëtik hn’ikwëtahn hna naỹëk:

Tufëhnako hn’imbahn,

tufëhnako asatah g’Iƴir,

nuniha wamëleka ŋa,

pëƴahniko hnë vële wok vëyena wasëwif,

kwëtahniko ɗuniỹa li,

do kaƴëndiko ƴaŋ gë icëmb .

Vëharaŋ wamër

¹ Iƴir ŋa nësëk wapacëk: hnë vampëd vatëkwa hna, vëryampo tavëɗëni ikwëtahn ŋa. Waƴine wade rokaɗëhëhni tëfëɗëni gë ikaraŋ nte w̃atik hnë Sintani. ² Vahnë vële huruɓak, vëw̃ër, vële yëtëɗu vintaw̃ary vidëw̃ hni va gona këncëtëlehnënd yivah gë w̃eh, w̃enehnëɗëhëhni gë wanës wadëw̃ hni ŋa. ³ Mbañëndënihëhni vahnë va antë ñëlëlëndëni, do antë tokëndëni viỹë viryampo. Ɓare W̃ënu ŋa ye ale lik a vëỹin fop soŋe vële hwëtahnëk, yëtëk toña va, tokëɗëni camehnatëndëniha W̃ënu ŋa. ⁴ Ha, fop ile ntik W̃ën ỹa përënak do ñoñ gena ile sanëɗe ge teɓaɗen camehnatëndenëhna. ⁵ Wanës W̃ënu ŋa gë wayëfa w̃a pacënëɗ vëỹin fop.

Ayohal afërën

⁶ Karaŋëryindëhni waŋi fop vële hwëtahnëk va. Koyëna nkeɗu ayohal afërën ava Yesu Këris ale ryavik gë wanës ikwëtahn do gë ikaraŋ catah nte rëfëru gë ikahnënda. ⁷ Ɓare cañëtary wëhnantul wakwëhn toña këm, wale hnëmpëlëk g’ikwëtahn. Ñëŋary awo ale hahnëndak hn’ikwëtahn W̃ën hna. ⁸ Ƴakën imbahn nëfak ɓare gena hnë vile-wo-vile; ɓare ikahnënda hn’ikwëtahn W̃ënu ŋa nëfak soŋe fop. Kaɓi hnam nke ile ntehnëk W̃ën ntinëndëhëfu ỹa hnë iỹi ɗuniỹa gë ile yejëk per.

⁹ Wëlin wanës toña wante rëfëka kacani vahnë fop: ¹⁰ Ndokuŋëɗen ɗus do mëtëɗen, kaɓi ale ye W̃ënu paryi ŋa ramahninëk, umë ale ye Afehët vahnë fop ỹa, do kas vële hwëtahnëka va.

¹¹ Iỹin ye ile rëfëka aharaŋëndëhni do alehnëhni vahnë va ntindëni.

¹² Ahnë tëfëlahna njafi kaɓi fatah woru; ɓare wëjë gery ale tëfëtalandëni vële hwëtahnëk, gë wanës hu ŋa, gë nkeya hu ŋa, gë iŋahn hu ŋa, gë ikwëtahn hu ŋa do gë ufacah hu w̃a. ¹³ Rëkahnëryindu ỹa, paɓëry ikaraŋ Wanës W̃ënu ŋa hnë ɓulunda hna, ahamënaỹehnëndëhni do aharaŋëndëhni. ¹⁴ Antë aryënkw avalëtahn uyëɗ va Iƴir Ipacah le ye hnë wëjë hna. Nuỹaruho rac ante nësëniho wakila do tindënihino vicër wëɓák ŋa.

¹⁵ Ƴaw̃ënëry iỹin fop, paɓëry gë fanka hu fa fop iỹi ɗoku gante koɗëni vahnë va fop nuni unji karyënkw hu ŋa. ¹⁶ Keryëry nkaf hu do g’ile haraŋëɗuhëhni vahnë ỹa. Kahnëndary hnë vëỹin fop. Ge koyëna ntiru, pehëtaɗu wëjë dënk gë vële hnëpaɗëhi per.

¹ Antë ahnirahna g’iŋañëna acër. Gabëryinda had rëmuh, vëjar va had vëhery hu, ² vanëm va had wahnëmuh, vucëval va fëna had vëhery hu, g’ipacëna padah.

Vësëval vële cëmaryëk vësan

³ Paɓëryihni g’untënah vële cëmaryëk vësan, vële ye paryi vëhni fo va. ⁴ Ge ale cëmaryëk asan a kwëhnakëhni vutah ma vutah vunte nagëni vërahu, tëfëkëhni vutah vutac ñëŋani gante tufahnëɗëni ten ikwëtahn dëw̃ hni ŋa hnë watere wadëw̃ hni hna, cosënihëhni vële hnagëkëhni va, kaɓi umë ye ile hnëŋëɗëha W̃ënu ŋa. ⁵ Ale cëmaryëk asan a, ale ye minu fo ỹa, W̃ën hna kwëtëk itama dëw̃u ŋa fop; hnë iƴëfa gë ikëla hna nkeɗ, g’umëɗ gë g’anent. ⁶ Ɓare ale cëmaryëk asan a ale yëkëlend ile hnëŋëɗëha fo asëm ale wok yasëɗ ye. ⁷ Waŋi fëna tëfëka aharaŋëndëhni soŋe ahnë antë kwëhna ile niraɗëhëhni. ⁸ Age ahnë paɓëlëhnihna hnënk lëw̃u ỹa, do kas vëvë tere lëw̃u va, njahëtak ikwëtahn ŋa. Ahnë arac mek ntëbi dënk ale wok kwëtahnëna.

⁹ Maw̃ëry ahera asëval ale cëmaryëk asan a hnë kayëte vësay hna ge tëkëka wabëhn wafëhw imbëɗ gë ryaw̃ (60) do ỹëliko hwënta ryampo fo. ¹⁰ Tëfëka njëtëhni vifërën vile ntiɗ va: kwëɗa përën nte kwëɗëkëhniwo vutah vuntëw̃u, kaca ntënah nte kacaɗëhëhniw̃o vëhneh, igwiyët wakwër wante nkwiyëtëɗëhëhniwo vële hwëtahnëk, iɗema nte ndemaɗëhëhniwo vële yiw̃ëhnëk do liɗëho gë uyoh fop vantiyehn vapërën va.

¹¹ Ɓare antë aherëhni vësëval vële cëmaryëk vësan, vële wok vëryag fo va; kaɓi ge iña dëw̃ hni ŋa kumpëtëkëhni g’ile kwëtëlëntiniho gë Këris , rëkëɗëni ñandëni ñëlini. ¹² Awa koyëna kitiŋëɗeni menëni, kaɓi vëyaw̃ënëna wante ntehnënihawo Këris ŋa. ¹³ Do kat, ñëŋaɗëni nkeni vëhëmak, njasëɗëni tere gë tere. Gena vëhëmak fo nkeni ɓare nësënkëni do paɓëɗëni ile wok gena wadëw̃ hni; vëhoɗina pëlani waw̃ës walëw̃ hni. ¹⁴ Soŋe rac ñaɗëfu mbok ñëlini vësay vëryag va, nagënihëhni vutah, paɓëni watere wadëw̃ hni ŋa soŋe vëỹew̃ fu va antë nuỹani wameh wante ntehnëɗënihëfu. ¹⁵ Kaɓi vësay vëryampo tavëni nkaw̃ catah tëfëniha Sintani .

¹⁶ Age asëval ale hwëtahnëk kwëhnakëhni vële cëmaryëk vësan tere lëw̃u hna, tëfëka ndemandëhni antë nkeni ɗiɓ cery sali ŋa. Koyëna cery sali ŋa koɗ ndemandëhni vële ye paryi minëhni va.

Vële ye haryënkw cery sali

¹⁷ Vële ye haryënkw cery sali do w̃ënkwëɗ g’afërën ɗoku lëw̃ hni ỹa, tëfëkëhni wasos wahi, do kas vële hwëhnak waɗoku wadënah hn’ipëƴahn wanës gë ikaraŋ vëỹënta hni. ¹⁸ Kaɓi Vikerëh va më lehnëk: «Ge yihni ỹa ndokuŋëɗ ant’arëmpuna w̃ës ỹa soŋe antë tokënd roka ỹa.» + 5.18: Ɗivëta Sariya 25.4 Do kat: «Aryokuŋ a tëfëka cosi.» + 5.18: Lik 10.7 ¹⁹ Antë aw̃aw̃ëhn ahnë nësënd wameh soŋe ale ye ankaf cery sali, ge vëhi ma vërar vëyena waseɗe soŋe watac. ²⁰ Niraryehna tase vahnë fop ale w̃enëɗ a soŋe vëỹëntaw̃ va ntakahnëhni antë ntigëni koyëna.

²¹ Wëlin ile w̃untaɗëmi ỹa haryënkw W̃ën hna gë Yesu Këris do gë haryënkw wamëleka W̃ënu ŋa: maw̃ëhnëry waŋi fop, diryihni fop ndampo fo hara dëbëndëlendilihëhnihna vahnë va.

²² Antë ñankahni arinda ahnë wëɓák ŋa, alihna avë haryënkw cery sali. Antë ayentahni wameh vëỹëntaw̃ ŋa. Gory afacah.

²³ Tavëry ice w̃ënka fo ɓare ceryind fëna uñen toƴe soŋe lav ɗonk hu ỹi do gë itesënk hu ŋi.

²⁴ Wameh vëryampo nuɗe wapacëk ani gë kitiŋahnëndeni ỹa dënk; wëɓa vëỹëntaw̃ ŋa nuɗe ge kitiŋini. ²⁵ Do fëna, vantiyehn vapërën va nuɗe wapacëk, do vante wok nuyina taŋ va koɗina nko cow̃a.

Vëramp

¹ Vële ye hn’utamp va, tëfëkëhni njëɗanihëhni ntënah padah vële hwëhnëkëhni va, soŋe antë ahnë njew̃ uw̃ac W̃ënu ŋa g’ile haraŋëɗenëhëhni vahnë ỹa. ² Vële hwëhnakëhni vësankaf vële kwëtahnëka W̃ënu ŋa, vahnë vërac tëfëlëhnihna njafëni cankaf ntëw̃ hni ŋa kaɓi vëỹënta hni ye. Ɓare tëfëkëhni ndokuŋëhnëndënihëhni ntëbi kaɓi vële hnuỹaɗ ufërën w̃a hnë ɗoku lëw̃ hni vële hwëtahnëk ye do vëỹahnik W̃ënu ŋa. Watac rëfëka aharaŋëndëhni vahnë va do alehnëndëhni ntindëni.

³ Age ahnë karaŋëɗëhëhni vahnë wakaw̃ary, ge maw̃ëna wanës wapacah wëɓa Ahwëhn fu Yesu Këris ŋa do ge maw̃ëna ikaraŋ nte rëfëlëk gë ikwëtahn ŋa, ⁴ ahnë arac inaỹëna ŋa fëɓëka, ñoñ ƴëtëna. Iña ŋa kobëka gwajëtël gë sonko soŋe wanës. Hnam matiɗëha iñew̃ary gë wasonko do gë nës wameh soŋe vëỹëntaw̃, vikamahna vimeh, ⁵ wasonko wale wok puɗina yëbëlan vahnë vële tumpak wahakili, wok vëyëtëna toña. Ntiyahnëkëhni ikwëtahn W̃ënu ŋa fere fale hnuỹahnëɗe hnapul ye.

⁶ Paryi nke, ikwëtahn W̃ënu ŋa hnapul sankaf ye ge nëŋëkëfu g’ile hwëhnayinëk ỹa. ⁷ Ñoñ ƴojilënëhna hnë iỹi ɗuniỹa, do fëna ñoñ koɗelënëhna njoyin. ⁸ Awa ge kwëhnayinëk ile rokëɗen gë viỹi vile liyaɗen, umë gwër nkeɗëhëfu. ⁹ Vële yëkëlend uvetak va njëkëhnahnëɗeni, warënd w̃a pëlaɗëhëhni, viña wanënkwah do waɗakëmak ntabëɗëhëhni vahnë gë iɓëv do janáma hna. ¹⁰ Ha, ankahn wameh waƴaɓah, iña ɗëcët koryi ŋa ye. Vëryampo njëkëlehnëni rac ɗëcët, soŋe rac ŋaw̃ëtani ikwëtahn ŋa do njoyajëni vëhni dënk wahorot wayaɓah.

Uw̃ët fërën

¹¹ Awa, wëjë ale kwëhnëk W̃ën, garyëry vëỹin fop. Ƴëkëlehnëry usatah, ikahnënda gë W̃ënu ŋa, ikwëtahn ŋa, iŋahn ŋa, iɗuñëna ŋa, do gë iguk sakahn. ¹² Mëtëry uw̃ët fërën ikwëtahn ŋa. Pëlary uwám usër ule w̃acahniru w̃a, ule yavëtëru hale ntiru ipëƴahn përën ikwëtahn hu ŋa tase waseɗe wayaɓah. ¹³ Tase W̃ën ale yëɗahnëɗ uwám hnë fop do gë tase Yesu Këris ale rufahnëko ucedeya g’ipëƴahn përën haryënkw Pos Pilat , kwëtehnahnëɗëmi: ¹⁴ ƴaw̃ënëry akwëɗa, nte hnuỹaru ŋa, g’ufacah, idënt këm, hafo mbokaj Ahwëhn fu Yesu Këris. ¹⁵ Mbokajëɗ hnë wati le kahnëndëk W̃ën hna,

ale lënënik,

ale w̃ëkëk fop,

Ahnaw̃ vëhnaw̃ ỹa do Ahwëhn vëhwëhn ỹa.

¹⁶ Umë fo ye ale wok cëmëɗina ỹa.

Hnë humpen hunte woyinëk tëkënëɗelënëhna ntëɗëk.

Ahnë nulahna do ahnë koɗina nuhna.

G’umë nke ntënah ŋa gë fanka fa kantëm! Amina.

Ile nkabini vëvetak

¹⁷ Awa wëɓa vëvetak hnë ɗuniỹa li, dehnëryihni antë naỹënandëni do antë kwëtëni itamahn dëw̃ hni ŋa hnë wavetak le fuɗ, ɓare hnë W̃ën hna, umë ale vetëndayehnëɗëhëfu hnë ile-wo-le ỹa, soŋe natahnëfu. ¹⁸ Kwëtehnahnëryihni ntindëni vantiyehn vapërën le yeɗ hnapul lëw̃ hni, kwëhnani nëf, cahëlëndëni gë vëỹënta hni ile kwëhnani ỹa. ¹⁹ Koyëna kwëtaɗëni hnapul fërën le viỹëɗ soŋe acahn lëw̃ hni gante koɗëni kwëhnani uwám paryi w̃a.

Simpaỹi rëkwa

²⁰ Awa, wëjë Timote, ƴaw̃ënëry ɗus ile hwëtehnahniru ỹa. Kehary fop wanës wakwëhn nafa këm do wok tëfëlëna g’ikwëtahn ŋa do gë wasonko wanënkwah wale w̃atik hn’ile macëɗëni vëryaw̃ «Uyët». ²¹ Vële hnahak kwëhnani uyët rac, tavëni nkaw̃ ikwëtahn ŋa.

Araɓi ipërëna W̃ënu ŋa nke gë w̃uhnë.