1 Vëvë Tesalonik

Kayëte ndënkwëryënkw mba Pol nte kerëhnëkëhni vëvë Tesalonik

Wade yehëhna hnë iŋi kayëte

Afaƴik Pol, gë Silas do gë Timote, Korent hna kerëni aŋi kayëte mpëdara yëbëlan bëhn wafëhw wahnah gë imbëɗ gë wahnah gë bëhn wafëhw imbëɗ gë wahi (49 gë 52) ga ndëcëk hnagi Yesu ỹa.

Pol yankëtahnëk Tesalonik wati yas higëna lëw̃u ỹa. Nkol ŋa Masedëwan hna nke nte kwëhnëko naw̃ mbë Rom ŋa, tëfary wov, nkol gwafa. Ɓulunda wasëwif w̃a njaɓëniho. Wasëwif wayaɓah vëw̃aw̃ëlohna karaŋ Pol ŋa do antaniha nkol hna (Vantiyehn 17.1-9). Ɓare Cery Sali ŋa pëlëk vënkahn va do njaw̃ënak. Timote njankëtahnëkëhni vële hwëtahnëk va, mbarëpëla vële wok vëyena wasëwif do gë wasëwif wale hnëmpëtak nkeni vële hwëtahnëka Këris.

Timote wadëw̃ hni ŋa njonëhnika Pol Korent hna do hnam kerëhnënihëhni aŋi kayëte. Hnë aŋi kayëte Pol njëtëndanëkëhni hnatah lëw̃u soŋe ikahnënda nte tufahnëni vële hwëtahnëk Tesalonik va hnë njasa ntëw hni gë Këris. W̃ëlakënde horot hna nkok njaw̃ëni.

Pol kamënaỹehnëɗëhëhni. Atac ikaraŋ njëɗand paŋare vësëm do iɓoka Këris ŋa (4.13–5.11). Njëɗahnëɗ simpaỹi do wahnira watëkwa.

Wëlin wanës wakwëhn nafa hn’iŋi kayëte: wanës, ikwëtahn, iŋahn, uhorot, fac, vëỹënta, vësëm, ƴam.

Wëlin gante nke kayëte ka:

Simpaỹi (1.1)

Gante kwëtahnëni vëvë Tesalonik va (1.2–3.13)

Ankeya nte ñaɗ W̃ën (4.1-12)

Iɓëhn vësëm gë fac Ahwëhn a (4.13–5.11)

Siyab rëkwa gë simpaỹi (5.12-28)

Simpaỹi

¹ Ami Pol gë Silas do gë Timote herëhnëryiɗëhu, w̃uhnë vëvë cery sali vë Tesalonik le kwëhnëk W̃ën Rëm ỹa do gë Ahwëhn a Yesu Këris : Araɓi ipërëna gë ƴam ỹa nke gë w̃uhnë.

Ikwëtahn vëvë Tesalonik

² Kwëlëkwël camehnëɗëfunëha W̃ënu ŋa soŋe hun fop ỹa do njëfanëɗerun nte-wo-nte njëfaɗëfun ŋa. ³ Ndënkwëtaɗëfun kwëlëkwël haryënkw W̃ënu Rëm fu hna vantiyehn vante w̃atik hn’ikwëtahn hna, waɗoku wante w̃atik hn’iŋahn hna do gë iɗuñëna nte w̃atik hn’itamahn hun paɓ g’Ahwëhn fu Yesu Këris . ⁴ Vëỹënta mën, vële ŋahnëk W̃ën, njëtinëk W̃ënu ŋa rëhnaku ⁵ kaɓi Wanës Wakasëk ŋa pëƴayiluhna gë wanës ŋi fo, ɓare gë fanka fa, g’Iƴir Ipacah ŋa do g’ikwëtahn ipadah ŋa. Njëtërun gante nkeho vankeya fu va fagant hun hna; soŋe ufërën hun yeho. ⁶ W̃uhnë vërëfëtalahn fu yerun do gë vërëfëtalahn Ahwëhn a yerun; nuỹarun wanës ŋa hnë wati horot hna, gë uhnatah ule w̃atik hn’Iƴir Ipacah hna. ⁷ Koyëna nkerun vële tëfëtalahnëɗëni vahnë vële hwëtahnëka Këris va Masedëwan hna gë Akayi hna. ⁸ Ỹal hun hna wanës Ahwëhn a campik gena Masedëwan hna gë Akayi hna fo, ɓare ikwëtahn hun W̃ënu ŋa njëtik gante-wo-gante. Awa, ɓalëlëfuhna hnësëfu watac. ⁹ Vahnë va fop tëfëtaɗëni gante kacarunëhëfuno ka ante njiryiɓunëho ỹal hun hna do gante tavërunëho waravahn aryokuŋëhnënduna umë ale ye W̃ën paryi, ¹⁰ do ahnapënduna Aju ale w̃atiɗ g’ambin ỹa. Ajë arac, umë ye, Yesu nte mbëhnëndanëk W̃ën hnë vësëm hna, do fehëtëkëfu hn’ikitiŋ W̃ën nte yejëk ŋi.

Ɗoku Pol Tesalonik hna

¹ Vëỹënta mën, njëtërun, w̃uhnë dënk, ante njiryiɓunëho ỹal hun hna gelohna uhnëfak këm! ² Njëtërun, Filip hna korotehniɓunëho ten do njew̃ëɗeɓunëho rëkahnindëfu ỹal hun hna. Ɓare W̃ënu ŋa njaw̃ënëkëfuno wasakahn w̃a soŋe ahnësëhnahniwu Wanës Wakasëk ŋa mama mëtaryandeɓunëho ɗus. ³ W̃ac ule w̃acëɓunëhëhni vahnë va matina hn’idënt, ma hnë vinahan vide wok pacëna, do ƴëkëlehnëɗilëfuhna rokafuna ahnë! ⁴ Hali! Gante ñaɗ W̃ën ka nësëɗëfun. W̃ënu ŋa catahnëka gë fuhnë, umë hwëtehnahnëkëfu fëƴahnëfu Wanës Wakasëk ŋa. Ƴëkëlehnëlëfuhna vahnë nëŋahnëhni gë fuhnë, W̃ënu ŋa nëŋa gë fuhnë ỹaɗëfun, umë ale fëcëtaɗ walaw̃ary fu w̃a. ⁵ Njëtërun koɓëri dehnëlëfuhna wanës wapërën ahnëŋënahniw̃u, do iŋahn fu ŋa gelohna soŋe hnuỹahnëfu hnapul, W̃ënu ŋa seɗe ye. ⁶ Ƴëkëlehnëlëfuhna icëkwary ahnë, icëkwary hun ma icëkwary vëỹëntaw̃. ⁷ Kokëndëɓunëho arufiw̃u ucankaf fu ŋa, fuhnë vëfaƴik Këris va, ɓare nëŋënaɓunëho fagant hun, had hnëm nte faɓëkëhni vutah vuntëw̃u. ⁸ Soŋe iŋahn nte hwëhnaɓun ỹal hun hna, kahnëndaɓunëho, gena ayëɗayiwu Wanës Wakasëk W̃ënu ŋa fo, ayëɗayiwu fëna vintaw̃ary fu va. Ha, iŋahn dëw̃ fu soŋe hun ŋa nkwënako ɗus!

⁹ Vëỹënta mën, ndënkwëtaɗun ɗoku ỹakah fu ỹa gë ambër fu ŋa. Ndokuŋëɗëfunëho g’umëɗ gë g’anent, soŋe antë yefu warib hun ga karaŋëɗerunëho Wanës Wakasëk W̃ënu ŋa. ¹⁰ Nkeya catah do caŋah hwëhnaɓunëho hnë w̃uhnë vële hwëtahnëk hna. Ñoñ gena ile hoɗeɓun hnirayifu, waseɗe warac yerun do W̃ënu ŋa fëna seɗe ye. ¹¹ Njëtërun fëna, (ale-wo-le hnë w̃uhnë) ntiyirunëho ndampo fo gante nkeɗ rëm gë vutah vuntëw̃u ka. ¹² Kamënaỹehnirun do njaw̃ënaỹehnirun, tëƴirun gë fanka ayewu gante ñaɗ W̃ën ka umë ale w̃acëɗëhu hn’Inaw̃ dëw̃u do gë hnë icëmb dëw̃u hna.

¹³ Do fëna, soŋe rac samehnëɗëfunëha W̃ënu ŋa kwëlëkwël soŋe iyin: ante karaŋiɗerunëho wanës W̃ënu ŋa, nëpaɗunëho do had wanës W̃ën mawërunëho; mawëlunohna had wanës vahnë. Ha, paryi nke W̃ën hna matik do ndokuŋëɗ hnë w̃uhnë, vële hwëtahnëk vi. ¹⁴ Ha, vëỹënta mën, tëfëtalahnërunëhëhni vëvë vacery sali Yuɗe va, vële kwëhnëk W̃ën hwëtahnëka Yesu Këris va. Vahnë vëvë nkal hun va korotehnënihu, had gante korotehnënihëhni wasëwif w̃a vëvë vacery sali vatac. ¹⁵ Wasëwif w̃i ryaw̃ëka Ahwëhn a Yesu gë wakila ŋa, do fuhnë korotehnënihëfu. Vëliɗina ile hnëŋëɗëha W̃ënu ŋa do vëỹew̃ vahnë va fop nkeni, ¹⁶ kaɓi memaỹehnëɗënihëfu antë hnësëhnëfuni vële wok vëyena wasëwif va wante fehëtëɗëhëhni ŋa. Koyëna padënëŋa padënëɗëni wameh wante ntiɗëniho koɓëri ŋa. Ɓare ntavah W̃ënu ŋa tëk njohahnëhni.

Iña Pol mbok nuhni vëvë Tesalonik

¹⁷ Vëỹënta mën, ge fuhnë ye, tëfëkawo aravëtayiwu fampëd; paryi nke goyilënëhna nulënden, ɓare wasakahn fu hna tavëlilënëhna! Përëkëfu ɗus gë w̃uhnë do ntiɓun fop soŋe avok ahnuhahniwu. ¹⁸ Awa pëhnaɓunëho yiryifu ayëkijiwu, do ami dënk Pol, pëhnaɓuho wahwënta wayaɓah, ɓare Sintani memaỹehnëkëfu. ¹⁹ Ye ye itamahn fu ŋa, uhnatah fu w̃a, dahëse imëk idëw̃ fu ŋa ge gena w̃uhnë? Do soŋe hun ỹa cëkwaɗëfun haryënkw Ahwëhn fu Yesu ge mbokajëk. ²⁰ Ha, w̃uhnë ye icëmb fu ŋa g’uhnatah fu w̃a.

¹ Soŋe rac ye, kaɓi cilëtaɓunëho napi ŋa, umë caŋahnëkëfu wofu fuhnë fo Aten hna, ² do cañëtëryiɓunëha Timote, aỹënta fu ỹa do ye aryokuŋënta W̃ën hn’ikaraŋ vahnë Wanës Wakasëk Këris ŋa. Paƴëryiɓunëha soŋe njaw̃ënaỹehnu do kamënaỹehnu hn’ikwëtahn hun hna, ³ soŋe antë ahnë cilëta horot ile liɗerun ỹa. Njëtërun w̃uhnë dënk, iỹi sifa horot tëfëka nkefu. ⁴ Ante nkeɓunëho ỹal hun ŋa pëƴayirunëho nuỹaɗen wahorot wasankaf, do umë yehu, njëtërun ɗus. ⁵ Soŋe rac faƴëryiɓuha Timote, kaɓi cilëtaɓuho nap iŋa, njiryi pëcëtaj soŋe ikwëtahn hun ŋa. Ntakëkow̃o Sintani njëkëhnahnu do ɗoku sankaf fu ỹa fop nke nafa këm.

⁶ Tame Timote mbokajëk, tëfëtanëkëfu wanës wakasëk wanëŋah soŋe ikwëtahn hun ŋa g’iŋahn hun ŋa. Ntehnëkëfu wapërën ryënkwëtaɗunëhëfu do përëku gë fuhnë had gante përëkëfu gë w̃uhnë ka. ⁷ Soŋe rac ye, vëỹënta fu, hnë uryëñah fu hna fop gë horot fu w̃a, ikwëtahn hun ŋa kamënaỹehnëkëfu. ⁸ Tame tisëkëfu kaɓi nkorun ahambënawu Ahwëhn hna. ⁹ Hak ga tëfëkëfu samehnëfuna W̃ënu ŋa, soŋe uhnatah sankaf ule yëɗaɗunëhëfu haryënkw lëw̃u ỹi? ¹⁰ G’umëɗ gë g’anent njëfaɗëfunëha gë iɗëñan soŋe maw̃ëryanëfu mbok nulin do fadënëfu ile wojëk hn’ikwëtahn hun hna.

¹¹ Araɓi W̃ënu ŋa umë dënk, Rëm fu ỹa, gë Ahwëhn fu Yesu piɗëtëhnënihëfu nkaw̃ ŋa paɓ gë ỹal hun! ¹² Araɓi Ahwëhn a nkwënëndu iŋahnël hun ŋa hafo kob do g’iŋahn vahnë fop ŋa, gante nke iŋahn nte hwëhnaɓun soŋe hun ŋa. ¹³ Araɓi njaw̃ën koyëna wasakahn hun w̃a hnë icat nte wok kwëhnana ile hniraɗerun haryënkw W̃ën Rëm fu ỹa, hnë fac le mbokahniɗ Ahwëhn fu ỹa Yesu gë fop vëlëw̃u va!

Ankeya nte ñaɗ W̃ën

¹ Awa koyëna, vëỹënta fu, ñëŋarun hnë fuhnë ankeya nte rëfëka ahwëhnawu nëŋahna W̃ënu ŋa gë w̃uhnë. Do tac dënk hwëhnarun. Ɓare tëƴëɗerun do nkabëɗerun, g’uw̃ac Ahwëhn a Yesu, ƴiryin haryënkw fo! ² Kaɓi njëtërun siyab ule yabirun Ahwëhn Yesu hna matik.

³ Ile ñaɗ W̃ën ỹa, rac ye: ayehahnu vëfacah do ahehawu fop ndakëntal meh ŋa. ⁴ Ale-wo-le hnë w̃uhnë njët mënkw mbahn dëw̃u ŋa hn’ufacah, do hn’untënah. + 4.4 Ale-wo-le hnë w̃uhnë njët mënkw mbahn dëw̃u ŋa hn’ufacah, do hn’untënah. Koɗe nkwëryi fëna ñëŋa ñëw̃ëlahn gë asëvalu ma ñëŋa had gante ntiɗe ahnuỹahn asëval. ⁵ Ant’aw̃aw̃u iña meh ŋa mëku, had vële wok vëyëtëlahna W̃ën vi. ⁶ Hnë waŋi, ahnë tëfëlahna nti ile w̃enëɗëha aỹëntaw̃u ale hwëtahnëka W̃ën, ma tokahna. Tëkëɓun ahnësëhniwu do pëƴayirun g’afërën: Ahwëhn a korotehnëɗëhëhni vële liɗ rac va. ⁷ W̃ënu ŋa macëlëfuhna soŋe ndëkarënden g’ale-wo-ale, ɓare soŋe nkeyin vëfacah macëkëfu. ⁸ Soŋe rac ye, ale w̃ëỹëk iŋi gab ŋa, gena ahnë ŋwëỹëhnëk, W̃ënu ŋa ŋwëỹëhnëk, umë ale yëɗaɗëhu Iƴir Ipacah ŋa.

⁹ Soŋe iŋahnël ŋa vëỹënta mën, ɓalëluhna aherëhniwu, kaɓi W̃ënu ŋa ñaŋëndëku gante ŋahnëlëɗun ka. ¹⁰ Ha, iŋahn tac ye nte rufahnëɗun hnë vëvë Masedëwan va fop, vële hwëtahnëka W̃ën. Ɓare vëỹënta fu, kamënaỹehnëɗerun aliwu ntëbi koyëna. ¹¹ Ƴëkëlehnëryindën ayewu ƴam, paɓëryin wadëw̃un fo do arokëndu ŋacëŋac hun ŋa fo, had gante ntehnirunëho ka. ¹² Koyëna vële wok vëhwëtahnëlahna W̃ën va ntënënëɗëni nkeya hun ŋa, do kat antë aramahnuni vëỹënta hun.

Iɓëhn vësëm gë fac Ahwëhn a

¹³ Vëỹënta fu, ñaɗëfun ayëtu toña ỹa soŋe vële sëmëk va, soŋe antë ahwëhnawu yiw̃ëhnah gë vëỹëntaw̃ ki vële wok vëramahnëna vi. ¹⁴ Age kwëtahnëɓun Yesu cëmëko do mbëhn, kwëtahnëɓun fëna W̃ënu ŋa mbarëɗëhëhni gë Yesu fop vële hwëtahnëɗëha do cëmatëni va. ¹⁵ Wëlin wante fëƴaɗerun ye wanës wante karaŋëkëhniwo Ahwëhn ŋa vahnë va: vële yeyinëk vi woɗ vësëmëna mbokahnind Ahwëhn a, vëryënkwëhnëɗilëhnihna vële sëmëk va. ¹⁶ Fac rac, cëliɗ Ahwëhn a umë ndënkw g’ambin, gë kopa le w̃acëɗ, gë kopa asankaf wamëleka, do gë kopa lënkw W̃ën ỹa. Vële sëmëk g’ikwëtahn Këris va ryënkwëɗ mbëhnëni. ¹⁷ Tac fuhnë vële woyinëk cëmilënëhna wati rac va, nufëɗenëhëfu gë vëhni hnë vëŋar njiyin pankëlin g’Ahwëhn a g’ambin, do koyëna g’Ahwëhn a nkeɗen kwëlëkwël. ¹⁸ Awa ale-wo-le kamënaỹehna aỹëntaw̃u ỹa gë waŋi wanës.

Ikwët hakili hn’inap Ahwëhn hna

¹ Vëỹënta fu, soŋe ƴamani ỹa gë wati ỹa, ɓalëluhna aherëhniwu. ² Njëtërun wapacëk w̃uhnë dënk fac Ahwëhn a tëkiɗ had gante tëkiɗ ale ỹa g’umëɗ. ³ Ge vahnë va ntehnëɗëni: «Fop ƴam fo ye, ntakah gena!» Awa hnë wati rac ile vëvehnëɗëhëhni ỹa naŋëtëɗëhëhni had lav ɗonk hnag asëval, do la aryampo koɗina peh. ⁴ Ɓare w̃uhnë, vëỹënta mën, geluhna hn’umëhwëry hna, do iỹi fac koɗina naŋëtu had ale. ⁵ W̃uhnë fop vutah humpen yerun, vutah fac. Gena umëɗ hwëhnëkëfu, ma umëhwëry. ⁶ Awa antë ndakin wakwëɗ had gë vëỹëntaw̃ ki, ɓare ŋesënëfu do kwëtin hakili. ⁷ Vële ryakëɗ wakwëɗ va, g’umëɗ ga ndakëɗëni do vële ryëw̃ëɗ va, g’umëɗ ga ndëw̃ëɗëni. ⁸ Ɓare fuhnë, vëvë g’anent vi, kwëtënëfu hakili: cuɗanëfu g’ikwëtahn ŋa do g’iŋahn ŋa had gë viỹi viw̃ëta, do g’apënkw mëta nte ye itamahn ipeh iŋa.

⁹ W̃ënu ŋa tëhnalëfuhna nuỹayin ntavah ntëw̃u ŋa, ɓare nuỹayin ipeh iŋa gë Ahwëhn fu ỹa Yesu Këris . ¹⁰ Soŋe fu ỹa cëmëk Këris nkehahnin gë umë, sëminëk cëmilënëhna. ¹¹ Awa, kamënaỹehnëlëryindën do ƴaw̃ënëlëryin hn’ikwëtahn hna, had gante rëkërun alindu ki dënk.

Siyab rëkwa gë simpaỹi

¹² Vëỹënta fu, tëƴëɗerun waŋi: dënënëryinëhni vële ryokuŋëɗ, vële vëraɗ ɗus soŋe hun, vële yëkaɗëhu do yabëɗëhu hn’iɓëmënkël hun g’Ahwëhn. ¹³ Dënënëryinëhni ɗus do aỹanduni ɗus soŋe ɗoku le ntiɗëni ỹa. Geryin ƴam yëbëlan hun.

¹⁴ Vëỹënta fu, mbokëɗerun aw̃untayiwu iỹin: niraryindënëhni vële hëmak va. Kamënaỹehnëryindënëhni vële yamëk va, ɗemaryindënëhni vële nkok ƴaɓëna fanka hn’ikwëtahn va, ɗuñënanëhnëryindënëhni vahnë va fop. ¹⁵ Kwëtëryin hakili, antë ahnë nkwëcaga ale lika uw̃eh! Ƴëkëlehnëryindën kwëlëkwël alindu fërën, yëbëlan hun do gë vahnë va fop.

¹⁶ Geryin kwëlëkwël hn’uhnatah hna. ¹⁷ Ƴëfaryindëna W̃ënu ŋa kwëlëkwël. ¹⁸ Camehnëryindëna fale-wo-fale fa. Rac ye le napëɗ hnë w̃uhnë vële vëmënkëlëk hnë Yesu Këris va.

¹⁹ Ant’aw̃emaỹehnuna Iƴir Ipacah ɗoku lëw̃u hna; ²⁰ ant’ayafu wanës wakila ŋa. ²¹ Pëcëtaryin fop watac do kwëtaryin ile fërënak ỹa; ²² keharyin w̃eh-wo-w̃eh.

²³ Araɓi W̃ënu hwëhn ƴam ỹa nti ayewu vële padëk ufacah; araɓi hakili hun ỹa gë ntaw̃ary hun ŋa do gë vimbahn hun va nko pad, hara kwëhnana ile nirande hafo hnë fac le njijëɗ Ahwëhn fu Yesu Këris hna. ²⁴ W̃ën le w̃acëku ỹa kahnëndak: ntiɗ rac.

²⁵ Vëỹënta fu, w̃uhnë fëna ƴëfanëhnëryindënëfu. ²⁶ Gaỹëryinëhni vële hwëtahnëka Yesu va g’iŋahn nte rufande vëỹënta hna.

²⁷ Tëƴëɗëmu g’uw̃ac Ahwëhn a, araɓi aŋi kayëte karaŋëhnini fop vëỹënta fu va.

²⁸ Araɓi ipërëna Ahwëhn fu Yesu Këris ŋa nke gë w̃uhnë!