1 Piyer

Kayëte ndënkwëryënkw mba Piyer

Wade yehëhna kayëte Piyer

Piyer afaƴik Yesu Këris yeho. Yesu macëkawo wati nte pëlaɗëhëhniw̃o wëỹis ŋa. (Lik 5.1-11; Matiye 4.18-22) Wati rac Simo macëɗeho. Ahwëhn a Yesu nkwëcëtëkawo w̃ac ỹa Simo maca Sefas (San 1.42), umë fëhnëtanëk taka (gë watëvav ŋa, «pierre»).

Wati nte ndokuŋëɗëho Yesu ŋa, Piyer ɗarël lëw̃u nkeho kwëlëkwël. Mama nkehahnëko rac, anjahëtakawo Ahwëhn a wahwënta warar, gante ntehnëkawo Yesu ka ani gë pëlahnënde ỹa. Ankentahniko hnë viyary vëryënkwëryënkw g’iƴag nte pëƴayiniho iɓëhn Yesu ŋa do, ga ndëcëk watac, nkoko kahnënda hnë pëƴahn Wanës Wakasëk hna.

Ntiyahnëkëfu paryi Piyer Rom hna nkeho ga cëmëk Afaƴik Pol hnë bëhn wafëhw imbëɗ g’iryaw̃ gë warar ma bëhn wafëhw imbëɗ gë ryaw̃ gë wahnah (63 gë 64) ga ndëcëk hnagi Yesu ỹa.

Piyer kerëhnëkëhniwo kayëte ntëw̃u ŋa vële hwëtahnëk ye hnë vankol imbëɗ vambë Asi Toƴ hn’ile macik gaki Tirëki hna. Andënkwëtehnëɗëhëhni waƴëhw nuỹani hnë Këris hna do kamënaỹehnëhni fëna maw̃ëhnëniha W̃ënu ŋa paɓ gë wahorot do iɓërehn soŋe ikwëtahn ntëw̃ hni Këris ŋa.

Piyer tëƴëɗëhëhni fëna ntënënëlëni: ale-wo-ale paɓ gë vësankaf va, vëryonkuŋ va paɓ gë vële hwëhnëkëhni, vësëval va paɓ gë vësan hni, do vësan va paɓ gë vësëval hni.

Wëlin wanës wakwëhn nafa hn’iŋi kayëte: uhorot, imaw̃ëhn, wameh, iƴir.

Wëlin gante nke kayëte ka:

Simpaỹi (1.1-2)

Itama g’imac njasa pacah (1.3–2.3)

Itaka nte yënëɗ gë ɓulunda le rëhnayik (2.4-12)

Imaw̃ëhn (2.13–3.7)

Uhorot lakënde alind ufërën (3.8-22)

Itav wameh do ɗemal (4.1-11)

Mbetani vële horotëɗ had Këris (4.12-19)

Vicër gë vële hahnëndak va (5.1-11)

Simpaỹi rëkwa (5.12-14)

Simpaỹi

¹ Ami Piyer , afaƴik Yesu Këris ỹa, herëhnëryiɗëhu w̃uhnë vële tëhnak do ye vëhneh sampëk hnë wayal Pon gë Galasi gë Kapaɗos gë Asi do gë Bitini vi. ² W̃ënu ŋa Rëm ỹa tëhnaku had gante njëtëko koɓëri ka; gë Iƴir Ipacah ŋa pitirun soŋe lëw̃u. Ha, tëhnaku ɗanko aw̃aw̃ëhnahnuna Yesu Këris do pacënahnu g’icëlëvahn sat lëw̃u ỹa.

Araɓi ipërëna ŋa gë ƴam ỹa nkwënawu ɗus!

Itama nte wok cëmëɗina

³ Cëmbënëfuna ale ye W̃ën gë Rëm Ahwëhn fu ỹa Yesu Këris : hnë ikaỹëhnahn cankaf ntëw̃u hna, anagëkëfu g’ahaw̃ary g’imat Yesu Këris fagant vësëm, soŋe nuỹayin itama nte wok cëmëɗina, ⁴ do soŋe nuỹayin intëw̃ inte wok ɓëvëɗina muk, tonkëɗina, do igwam ntëw̃u ŋa cëvëɗina. Irac kwëtëhnëku mbin hna, ⁵ w̃uhnë vële keryëɗ gë fanka falëw̃u fa, gë fere ikwëtahn soŋe ipeh nte fëhwëtak tufëhna wati rëkwa hna. ⁶ Soŋe umë pëɓëryiw̃u uhnatah w̃a, lakënde soŋe wati roƴ tëfëka ahoroteyehniw̃u gë fop wasifa wayëkëhnahn. ⁷ Iỹi horot tufahnëɗ ikwëtahn hun ŋa paryi nke. Sanu ỹa koɗe përëkani, ɓare hwëɗëh hna nuɗe bi nkwamëk. Aki fëna ikwëtahn hun ŋa le ỹak hnëfak gë sanu ỹi njëkëhnahnik hnë fop wasifa wahorot hna, soŋe njëtahni njaw̃ëk. Tac fac le mbokajëɗ Yesu Këris ỹa, gë fere ikwëtahn hun ŋa nkeɗ iɗëwan, icëmb do idënën. ⁸ Ŋahnërunëha hara nulunahna, gaki kwëtahnërunëha hara nulunahna, do uhnatah hun w̃a camëk hafo le nkoyik koɗena tëfëtayi gë wanës, ⁹ kaɓi tëkën ŋa rëkënëɗun ile njëkëlehnëɗ ikwëtahn hun ŋa: umë ye ipeh walaw̃ary hun w̃a.

¹⁰ Koɓëri ŋa, wakila W̃ënu ŋa njëkëlehnëni paryi nuni hak W̃ënu ŋa pehëtëɗëhëhni vahnë va. Apëƴahnëniho soŋe iŋi peh nte njëɗaɗëhu W̃ën. ¹¹ Wakila watac njëkëlehnëni njëtëni guve do hak ntiyaɗ irac. Iƴir Këris ŋa hnë vëhni nkeho, do pëƴahnëko koɓëri ŋa wahorot wale rëfëkawo nuỹa Këris ŋa do g’icëmb inte rëfiɗëha ŋa. ¹² W̃ënu ŋa njëtëndanëkëhni waŋi wanës gena soŋe lëw̃ hni dënk, ɓare soŋe hun yëɗahnik. Doliỹi vëfëƴahn Wanës Wakasëk ŋa nësëhnënihu watac gë Iƴir Ipacah nte yëɗahnijik ambin ŋa. Do wamëleka ŋa dënk ñaɗëni ɗus njëtëni rac.

Imac njasa pacah

¹³ Soŋe umë ye, naharyin ile rëfëka aliwu ỹa, nëgaryin do kwëtëryin fop tama hun ŋa hnë uyëɗ ipeh nte yëɗaɗerun fac le mbokajëɗ Yesu Këris ỹa. ¹⁴ Maw̃ëhnëryina W̃ënu ŋa had vutah vupërën: Ant’arëfu viña vimeh waɓë koɓëri ŋa, wati nte nkorunëho ƴëtëluhna toña ŋa. ¹⁵ Ɓare had gante pacëk ale w̃acëku ka, w̃uhnë fëna geryin vëfacah hnë fop vankeya hun hna, ¹⁶ kaɓi kerik: «Geryin vëfacah, kaɓi ami pacëɓu.» + 1.16: Soŋe Walevi 19.2

¹⁷ Hnë wayëfa hun hna, macëɗunëha «Apa» ale hitiŋëɗ ale-wo-le ile ntik ỹa hara dëbëndëlehnëlihëhnihna vahnë va. Soŋe rac ye, geryin vëlënën W̃ën, wati le yehahnërun nkal li. ¹⁸ Ankeya nte hnuỹarun gë vacërakëlo hun vi ƴiryeryëɗina karyënkw. Ɓare njëtërun, W̃ënu ŋa cosahnëk icos cankaf soŋe pehëtahnu hnë aŋi sifa nkeya. Dinahna gë viỹë vile fërëkaɗ, had sanu ma kori. ¹⁹ Ɓare pehëtëku gë sat fërën Këris ỹa, umë ale ye had fape fante wok kwëhnana dahëse w̃eh do ñoñ nuɗena ile wek. ²⁰ W̃ënu ŋa tëhnakawo ani gë ntihahnënd ɗuniỹa ỹi, atufahnëka gaki hnë waỹi wawati wale ye warëkwa, soŋe hun. ²¹ W̃uhnë, paɓ gë Këris kwëtahnërunëha W̃ënu ŋa, umë ale vëhnëndanëka fagant vësëm do yëɗaka icëmb ; aki kwëtëɗun ikwëtahn hun ŋa do itama hun ŋa W̃ën hna.

²² Maw̃ëhnërun toña ỹa do koyëna pacënërun vintaw̃ary hun va, alihahnu iŋahnël catah vëỹënta hun. Ŋahnëlëryin ɗus gë vëỹënta hun gë ntaw̃ary hun fop. ²³ Nagirun hnë uwám hasëk, ule wok matina hnë uhnëɗa ule fuɗ ɓare ule w̃atik hnë uhnëɗa ule wok cëmëɗina: Wanës W̃ën waɓë kantëm. ²⁴ Kaɓi,

«Mbahn ŋi nke had dël,

do fop icëmb dëwu ŋa had ufëtel dël;

dël ŋa kankëɗ do ufëtel ulëw̃u w̃a njoɗ;

²⁵ ɓare unës Ahwëhn a nkoɗ kantëm.» + 1.25: Esayi 40.6-8

Uw̃i nës, Wanës Wakasëk wante fëƴayirun ye.

¹ Doliỹi cañëtaryin fop ile w̃ek; antë arokaw̃una ahnë, antë ayewu vëhuruɓak, antë ayewu vëỹew̃ary, antë ahnësu wameh vëỹëntaw̃u. ² Had fanul, ɓalëryiw̃u wambël wapacah wante ryavëɗ ntaw̃ary ɗanko, g’umë, ahnaỹëntiw̃u hn’ipeh hna, ³ kaɓi, had gante nësëk vikerëh ka: «andahërun gante nëŋëk Ahwëhn ka.» + 2.3: Wahnëw̃ 34.9

Itaka nte yënëɗ gë ɓulunda le rëhnayik

⁴ Pëharyina Ahwëhn a Yesu. Umë ye itaka inte yënëɗ. Vahnë va cañëtaniha, ɓare W̃ënu ŋa tëhnaka, do nkwamahnëkawo. ⁵ W̃uhnë fëna, nkerun had wëraka wale yënëɗ wale yëryahnik cery nte nkehahnëk Iƴir Ipacah, soŋe ayehahnu ɓulunda facah vësëna wasaɗëha, soŋe asënahnu wasaɗëha gante ntehnëku Iƴir ka, do W̃ënu ŋa teɓaɗ soŋe Yesu Këris . ⁶ Ha, ntehnik hnë Vikerëh hna:

«Wëli, atëhnaɓu itaka nte hnëfak

do kwëtëɓu hn’inaw̃ Siỹo hna taka ndënkwëryënkw.

Ale hwëtëk ikwëtahn ntëw̃u ŋa hnë ỹalu

ƴëtëɗinahna muk usëfëhnah.» + 2.6: Esayi 28.16

⁷ Soŋe w̃uhnë vële hwëtahnëk, untënah. Ɓare soŋe vële wok vëhwëtahnëna va,

«Itaka inte cañëtaniho vëvëry vacery ŋa

vacak ye tame inte mbëryahnëk W̃ënu ŋa cery ntëw̃u ŋa fop.» + 2.7: Wahnëw̃ 118.22

⁸ Do fëna ntehnik:

«Taka nte nkëw̃ëɗëni vahnë,

taka nte hëfëɗ.» + 2.8: Esayi 8.14

Nkëw̃ëɗëni vahnë vërac kaɓi vëw̃aw̃ëhnëna wanës W̃ënu ŋa do koyëna nuỹaɗëni ile pëhwëtaniniho ỹa.

⁹ Ɓare w̃uhnë, ɓulunda ile rëhnayik yerun, vësëna wasaɗëha ahnaw̃, ɓulunda facah, vahnë vële kwëhnëk W̃ën. Atëhnaku soŋe afëƴahnu vantiyehn vacamah vante ntik, umë ale w̃acëku asahnu mëhwëry hna, arënku humpen hucamah hudëw̃u. ¹⁰ Koɓëri ŋa, gelunohna ɓulunda, ɓare gaki ɓulunda W̃ën yerun; koɓëri ŋa ƴëtëlunohna ikaỹëhnahn W̃ën, ɓare gaki nuỹarun ikaỹëhnahn ntëw̃u. + 2.10: Ose 1.6,9;2.1,23,25

¹¹ Vëỹënta mën, w̃uhnë vële ỹahnëɓu ɗus, w̃uhnë vële ye vëhneh nkal li, vële ryëcalëɗ, nkaỹëtamu, tavëryin viña vimeh mbahn vinte w̃ëtaryëɗ ntaw̃ary hun. ¹² Kwëhnaryin njasa përën fagant vële wok vëhwëtahnëlahna Këris; koyëna, lakënde mërahnëndënihu, ntehnëndëni vëw̃en yerun, afo njavëtëni vantiyehn vapërën hun va do cëmbëɗëniha W̃ënu ŋa fac le njijëɗ hna.

Imaw̃ëhn vësankaf

¹³ Soŋe Ahwëhn a, maw̃ëhnëryina asankaf-wo-asankaf: ahnaw̃ ale ye nkaf vësankaf fop, ¹⁴ do waguverëner vële paƴëk va soŋe korotehnëhni vële w̃enëɗ va do cëkwaryënihëhni vële liɗ ufërën va. ¹⁵ Kaɓi ile ñaɗ W̃ënu ŋa ye, vantiyehn hun vapërën va remënayehnëkëhni vëhnënkwah vële wok vëyëtëna iñë. ¹⁶ Geryin vahnë vële ye afaya, ɓare paya hun ŋa antë cow̃ wameh wante liɗun ŋa; geryin vëramp W̃ën. ¹⁷ Dënënëryinëhni vahnë va fop, ŋahnëryinëhni vëỹënta hun hn’ikwëtahn hna, maw̃ëhnëryina W̃ënu ŋa, dënënëryina ahnaw̃ a.

Imaw̃ëhn vëryokuŋ

¹⁸ Vëryokuŋ, maw̃ëhnëryinëhni vahnë vële ryokuŋehnëɗëhu, do dënënëryinëhni, gena vële fërënak do ryuñënanëɗëhu fo, ɓare gë vële fërëkak per. ¹⁹ Toña ye, ge mëkarun wahorot wale wok tëfëluhna, do ryuñënarun soŋe idënën W̃ën, rac ye nëfak paryi ỹa. ²⁰ Iŋëhne cëmb yehëhna ge ɗuñënarun ɗaf soŋe ile w̃enërun ya? Ɓare ge ɗuñënarun waɗaf ŋa soŋe ufërën ile lirun ỹa, nëfak paryi ye haryënkw W̃ën hna. ²¹ Gena bi rac macëku W̃ënu ŋa? Kaɓi Këris fëna korotëk soŋe hun; atufëku nkaw̃ ŋa ɗanko arëfu vacëɓëtel vantëw̃u va.

²² «Umë dina la uw̃eh ryampo,

wëla hwënta ryampo tokana ahnë.» + 2.22: Esayi 53.9

²³ Umë ale ỹew̃ik, maw̃ëna njew̃ëg, hnë horot lëw̃u hna nësëna ntini w̃eh, ɓare kwëtëk tama ntëw̃u ŋa hnë Ahitiŋ asatah hna; ²⁴ umë ale, hnë mbahn dëw̃u hna, ndiɓëk wameh wadëw̃ fu ŋa kërëwa hna, ɗanko tavahnin wameh fu ŋa, do nkehahnin hnë uwám satah; umë ye ale sërehnik soŋe njërahnin. ²⁵ Akwëyërunëho had wape, ɓare gaki mbokajërun gë cape aheryëherya, ayaw̃ walaw̃ary hun.

Vësëval va gë vësan va

¹ W̃uhnë vësëval va fëna, tëfëka aw̃aw̃ëhnënduni vësan hun. Ge ntirun koyëna, vëryampo hnë vëhni, lakënde vëhwëtahnëna Wanës W̃ënu ŋa, ge njëkëni vankeya hun va, akwëtahnëɗëni. Do fop iỹin wëla nësëluhna, ² kaɓi nuɗëni gante pacëk vankeya hun ka do tufahnëɗ untënah. ³ Ant’aryëñu igwamëna mbahn, had ryaỹ mul, ma liya wëkayët sanu, do cuɗa viỹi vëhambah ntaw̃i. ⁴ Hali, gwam hun ŋa tëfëka nke mbë ɓambery ntaw̃ary hun hna, mbë hakili hnëŋah do hwëhn ƴam. Iỹi sifa gwam përëkaɗina muk, do kwëhnak vëhni W̃ën hna nafa sankaf. ⁵ Koɓëri ŋa aki kayëtaɗëniho vësëval vëfacah vële hwëtëko tama dëw̃ hni ŋa W̃ën hna: ntënënëɗënihëhniwo vësan hni. ⁶ Aki nkeho Sara. Ntënënëkawo Abëraham; macëɗëhawo Ahwëhnu. W̃uhnë fëna nkeɗun had Sara ge ntirun ufërën hara ñoñ dakëluhna.

⁷ W̃uhnë vësan va fëna, paɓëryinëhni ɗus vësëval hun va do geryin ndampo fo, ɗënkwëtaryindën fanka hun fa këñëlahnëna gë fanka falëw̃ hni fa. Dënënëryinëhni, nuỹaɗëni had w̃uhnë uwám sër le njëɗand W̃ën. Diryin koyëna ɗanko wayëfa hun w̃a antë mbok memaỹehni.

Uhorot lakënde alind ufërën

⁸ Wëlin uhnës rëkwa lëmën: kwëhnaryin fop nahan ndampo fo, do gwëryëlëryin fëna. Ŋahnëlëryin ntëw̃ëlëw̃un had vahnë hun; geryin vahnë vëhnëŋah, do ɓanaryin haryënkw vëỹënta hun va. ⁹ Ge ahnë ntiku uw̃eh, antë aliguna uw̃eh; ge ahnë njew̃ëku antë ayew̃ëguna. Ɗëwanëhnëryindëna kwëlëkwël, kaɓi soŋe rac macahnëku W̃ënu ŋa, ɗanko ndëwahnu.

¹⁰ «Ale ỹaɗ ŋahn uwám

do nuỹa wafac wafërën

tëfëka mëk ryëw̃ lëw̃u hnë inës wameh

do w̃ës lëw̃u gë wanës wante rokaɗ,

¹¹ ndarënd uw̃eh w̃a do ntind ufërën,

njëkëlehn ƴam ỹa do tëfëlehn g’intaw̃ary ntëw̃u fop.

¹² Ahwëhn a keryëɗëhëhni vësatah va,

do vanëf vantëw̃u va hnëpaɗ wayëfa walëw̃ hni w̃a;

ɓare yëka Ahwëhn a niỹahnëkëhni vële liɗ w̃eh soŋe antë nke aỹew̃ alëw̃ hni.» + 3.12: Wahnëw̃ 34.13-17

¹³ Mo liɗëhu uw̃eh ge kahnëndarun idi ufërën w̃a? ¹⁴ Lakënde ahnuỹawu wahorot kaɓi ufërën liɗun, mbetaɗun. Antë ntaku gë ahnë, do antë pëmpëhnahnu. ¹⁵ Ɓare ntënënëryina hnë wasakahn hun hna Këris had Ahwëhn a. Ge ahnë tëƴëku, këbënaryin ayabahnu itamahn nte hwëhnarun ŋa. ¹⁶ Ɓare diryin wajira fo do g’untënah, g’ikwëhna nahan përën, ɗanko vële hnësëɗ uw̃eh soŋe nkeya përën hun gë Këris ŋa cëfëhnëhni soŋe ile njew̃ënihu ỹa. ¹⁷ Ha, ge W̃ënu ŋa ñaɗ, apecek ahorot hnë wapërën wante liɗu ŋa g’ile horotëɗu hnë wameh wante liɗu ŋa. ¹⁸ Këris umë dënk korotëk hafo cëm hwënta ryampo fo soŋe wameh ŋa fop; umë ale wok menëna, acëmëk soŋe vahnë vëw̃en va. Ntiko koyëna ɗanko njiryeryahnu gë W̃ën. Paɓ g’imbahn ntëw̃u ŋa ndaw̃iko ɓare paɓ g’iƴir ŋa mbokaryijik wám hna. ¹⁹ Do njiko had iƴir pëƴahni imëk ntëw̃u ŋa wayir wale sëɗiko kaso hna, ²⁰ vële woko vëw̃aw̃ëhnëlahna W̃ënu ŋa koɓëri ŋa, ante tufahnëɗëho ɗuñëna ntëw̃u ŋa wati nte ntiɗëho Nowe sisikulu ŋa. Vahnë vële fehëntiko w̃ënka va vëyaɓëlohna, mbëɗ gë vërar fo nkeniho. ²¹ Waŋi w̃ënka yeho had yarya le fehëtëɗëhu gaki ỹa. Iỹi yarya, gena iɗag ronk mbahn. Hali, dahëse ye le rufahnëɗ mëta imac W̃ën g’inahan përën. Rac fop ntiyaɗ gë fere ɓëhn Yesu Këris, ²² umë ale haƴëk ambin do lañak farëhw W̃ën hna. Wamëleka ŋa, gë vësankaf va, gë fop vëỹi vëỹëntaw̃ vile hwëhnak fanka ambin hna maw̃ëhnëniha.

Itav wameh

¹ Atac, kaɓi Këris korotëk mbahn ntëw̃u hna, w̃uhnë fëna, kwëhnaryin nahan ndampo fo gë umë. Gena bi ale horotëk mbahn ntëw̃u hna ravëk wameh ŋa ² ɗanko, hnë wafac wale wojëka w̃a nkal li, uwám lëw̃u w̃a nke gante ñaɗ W̃ënu ka, do tav wëɓal wameh wëɓa vahnë? ³ Gwërënkehu wati idi had gante ñaɗëni ntini vahnë vële wok vëyëtëlahna Këris va: aki fo nkeyarëɗëni, tëfëɗëni wëɓal wameh, andëw̃ëɗëni, atokëɗëni ɗëcët do ceɗëni ɗëcët uñen ɓulunda hna, cëmbëɗëni waravahn wasëfëhnahnah. ⁴ Gaki, kaɓi goluhna arëfëlëndu, gë vële wok vëhwëtahnëna va, hnë vankeya vameh ɗëcët hna, apëmpëhnahnëkëhni, do anjew̃ëɗënihu. ⁵ Ɓare afo nkabahnëni haryënkw W̃ën hna wante ntini ŋa. Akëbënak kitiŋëhni vële wok gë vële sëmëk per. ⁶ Soŋe umë ye vësëm va fëna pëƴayini Wanës Wakasëk ŋa. Akitiŋini paɓ g’imbahn ŋa had vahnë va fop, ɓare gaki koɗëni nkeni paɓ g’Iƴir ŋa had W̃ënu ŋa.

Gante tëfëka ndemalëndëni vële hwëtahnëk va

⁷ Wapuya ɗuniỹa ŋa pëŋajëk! Soŋe rac, tëfëka ayewu vëseryah, do nëgëtëryin wahakili hun w̃a ɗanko aholu ayëfahnëndu. ⁸ Ile ỹak nëfak ỹa, ŋahnëlëryin ɗus, kaɓi iŋahn ŋa tavëhnëɗ wameh waƴaɓah. ⁹ Ƴotoyehnëlëryin hnë watere hun hna g’uhnatah. ¹⁰ W̃ënu ŋa njëɗaku wafere aryemalëndu gë vëỹënta hun va. Geryin had vëryokuŋ vëfërën vële hoɗ paɓëni wayëɗ wanëmpëlah W̃ën. ¹¹ Age ahnë nësëɗ, wanës wadëw̃u ŋa nke wëɓa W̃ën; ge ahnë ndemaɗëha aỹëntaw̃, uryema lëw̃u w̃a nke gë fop fanka fale njëɗaka W̃ën fa, ɗanko, paɓ gë Yesu Këris , W̃ënu ŋa cëmbi hnë fop, umë ale hwëhnëk icëmb do imëk soŋe kantëm. Nke koyëna!

Mbetani vële horotëɗ had Këris

¹² Vëỹahnik mën, antë pëmpëhnahnu gante njëkëhnahnëɗerun gë wahorot wahambah ki. Antë ahnahaw̃u waŋi tëfëlahna tëki. ¹³ Ɓare natëryiw̃u kaɓi nkentahnirun uhorot Këris hna, ɗanko fac le nuhandëni vahnë icëmb ntëw̃u ŋa natahnu paryi. ¹⁴ Mbetarun ge njew̃ëɗerun kaɓi vërëfal Këris yerun, kaɓi Iƴir icëmb, Iƴir W̃ënu ŋa, hnë w̃uhnë nke. ¹⁵ Ahnë-wo-ahnë hnë w̃uhnë antë korot kaɓi aryaw̃ vahnë, ale ma aw̃en ye, ma kaɓi ale yentahnik wëɓa vëỹëntaw̃ ye. ¹⁶ Ɓare ge ahnë korotëɗ kaɓi kwëtahnëka Këris, antë cëfëhna; hali, camehna W̃ënu ŋa fo had gante ntehnëɗëni vahnë ka ava Këris ye. + 4.16: Vantiyehn 11.26 ¹⁷ Wati kitiŋ ŋa tëkik, do pëgwëhnahnëkëhni vahnë W̃ën va. Do ge pëgwëhnahnëkëfu, hak puhnaɗëhëhni vële w̃ëỹëk vëhwëtahnëna Wanës Wakasëk W̃ënu ŋa? ¹⁸ Had gante nësëk Vikërëh ka:

«Ge ipeh vësatah va ntakëk,

hak nkeɗëhëhni vëyapah va

do vëw̃en va?» + 4.18: Wanira 11.31

¹⁹ Koyëna, vële horotëɗ kaɓi maw̃ëhnëni iña W̃ënu ŋa njëɗaniha aỹahan ahahnëndak a vintaw̃ary vidëw̃ hni va, do nkoɗ ntindëni ufërën w̃a.

Vicër gë vële hahnëndak

¹ Doliỹi vicër vile ye fagant hun va hnësëhnëɗëfu. Ami dënk acër yeɓu had w̃uhnë; seɗe yeɓu hnë wahorot Këris hna, do nkentahnëɗeɓu hnë icëmb nte rufande. Wëlin wante rëƴëɗëmu ŋa: ² Keryëryin ntega nte kwëtehnahnëku W̃ënu ŋa, ayëkanduni hara gena forosima, ɓare afaya fo, had gante ñaɗ W̃ënu ka, gena soŋe avetahnu, ɓare kaɓi ñaɗun paryi. ³ Antë aryëcëtahnuni ucankaf hun ŋa vahnë vële hwëtehnahnirunëhëhni va ɓare diryin gante tëfëtalahnëɗënihu ntega ka. ⁴ Do ge Asankaf vëheryëherya va karyëtajëk, njëɗaɗëhu pënkw ahnaw̃, nte wok përëkaɗina, soŋe imëk.

⁵ Koyëna fëna, vëjar, dënënëryinëhni vicër va. Do w̃uhnë fop, hnë nëŋëla hun hna, cuɗaryin iɓana, kaɓi Vikerëh va ntehnëk:

«W̃ënu ŋa ñew̃ëkëhni vële hnaỹënaɗ va, ɓare tufëɗëhëhni përëna dëw̃u ŋa vële vanaɗ va.» + 5.5: Wanira 3.34

⁶ Awa, ɓanaryin haryënkw fanka sankaf W̃ënu ŋa, ɗanko naỹënahnu hnë wati le tëhnak hna. ⁷ Do tavëryin gë umë fop wafëmpëhnahnah hun w̃a, kaɓi paɓëku.

⁸ Nëgaryin, do kwëtëryin hakili! Kaɓi aỹew̃ hun a, Sintani ỹa, yasëlehnëɗ had vësëhn ile ryekaɗ, yëkëlehnëɗ ale tokëɗ. ⁹ Kahnëndaryin, ƴaw̃ënaryin hnë ikwëtahn hna, kaɓi njëtërun vële hwëtahnëk nkal li fop va iỹi horot nuɗëni vëhni fëna.

¹⁰ Wahorot hun w̃a ɓiỹëɗina. W̃ën, ale hwëhnëk vifërën fop, macëku soŋe ayentahniw̃u hn’icëmb ntëw̃u kantëm hna kaɓi mbëmënkëlërun gë Yesu Këris. Umë dënk matëndëɗëhu, njaw̃ënëɗëhu, njëɗaɗëhu fanka fale hamëhnaỹehnëɗëhu fa do koɗeluhna ahëfiw̃u. ¹¹ Araɓi imëk iŋa nke gë umë soŋe kantëm! Nke koyëna.

Simpaỹi rëkwa

¹² Silëve + 5.12 Silëve w̃acik fëna Silas. ryemako herëhnëryiw̃u iŋi kayëte. Ge ami ye, aỹënta fu ahahnëndak ye. Kamënaỹehnëmu, do pëƴamu rac ye ipërëna paryi W̃ënu ŋa. Ƴaw̃ënaryin hnë iŋi përëna.

¹³ Vële hwëtahnëk ye Babilon va nkaỹëryinihu, W̃ënu ŋa tëhnakëhni had w̃uhnë. Ajë mën hnë kwëtahn hna Marëk nkaỹëryiku fëna. ¹⁴ Gaỹëryinëhni vële hwëtahnëka Yesu va g’iŋahn nte rufande vëỹënta hna. Nuỹaryin ƴam ỹa, w̃uhnë vële kwëhnëk Këris va fop!