SALMOS

SALMOS

Ɨ tɨ jɨꞌréꞌcan jɨmeꞌ tyámuaꞌviꞌraꞌaj puéꞌeen

¹Cheꞌ huatóotyamuaꞌveꞌen aꞌɨ́jna ɨ tyáatɨꞌ

tɨquee aꞌɨ́ɨjma namuaj jeꞌej maj tyihuáꞌixaatyeꞌ ɨ maj jeꞌej puaꞌaj tyityetyúuchaꞌɨj,

ajta quee ɨ juyéj jitze huaméj ɨ maj jitzán ucáajuꞌ ɨ maj tyiꞌijxánaꞌcɨraꞌ,

capu ajta huaꞌantyáanaꞌaxcaj ɨ maj jeꞌej puaꞌaj tyáꞌxaj ɨ Dios,

²sulu aꞌɨ́j pu jitze jutyamuaꞌveꞌ ɨ nyúucariaꞌraꞌ ɨ Tavástaraꞌ

ajta aꞌɨ́j jitze tyúuꞌiteerityeꞌ tújca ajta tɨ́caꞌ.

³Aꞌɨ́jna ɨ tyáatɨꞌ aꞌyaa pu een tɨꞌɨj ɨ ítyeɨꞌrij

tɨ aꞌáa véjriꞌ jaꞌtyáhuastiꞌ ɨ játyaꞌnaj jitze,

tɨ ajta tajcaa tɨꞌɨjta aꞌájna atyojoꞌréꞌnyej aꞌnáj tɨ huatatácaꞌan

ajta quee aꞌnáj cávesij ɨ xámueꞌraꞌ.

¡Néijmiꞌi tyiꞌtɨ́j tɨ jɨn jeꞌej rɨcɨj, tyámuaꞌ pu atyojoꞌréꞌnyinyii!

⁴Ajta aꞌɨ́ɨjma jimi ɨ maj jeꞌej puaꞌaj tyityetyúuchaꞌɨj capu aꞌyan tyéꞌyiꞌij,

jiꞌnye aꞌyaa mu een tɨꞌɨj ɨ xɨéerij áacaj tɨ yoꞌcuíꞌnaj.

⁵Aꞌɨ́j mu jɨn ɨ maj jeꞌej puaꞌaj tyityetyúuchaꞌɨj Dios pu aꞌɨ́ɨjma puéjtzij huoꞌtaꞌsij

ajta quee tyiꞌtɨ́j huáꞌcɨꞌtyij aꞌáa tɨ tyejéꞌsejreꞌ aꞌɨ́ɨjma jimi ɨ maj tyámuaꞌ tyityetyúuchaꞌɨj.

⁶Tavástaraꞌ pu huáꞌchaꞌɨj huaꞌ juyéj jitze aꞌɨ́ɨjma ɨ maj tyámuaꞌ tyityetyúuchaꞌɨj,

ajta ɨ huaꞌ juyéj ɨ maj jeꞌej puaꞌaj rɨcɨj aꞌáa pu jóꞌnyee joꞌmaj jóꞌvesij.

Muáaj paj nyinyóoj puéꞌeen

¹¿Jiꞌnye mej mij juꞌɨtziityeꞌ a chájtaꞌ joꞌmaj joꞌcháatɨmee ɨ maj quee tyáꞌtzaahuatyeꞌ?

¿Jiꞌnye mej mij chaꞌmanaꞌaj tyámuaꞌ juꞌuurej?

²Ɨ maj rey jɨn tyityetyuꞌuj majta tajtúhuan jɨmeꞌ aꞌɨ́jcɨ japua ɨ chuéj

camu tyáꞌastej, majta néijmiꞌi tyiꞌtɨ́j jɨn avíitzij jeꞌej rɨcɨj

aꞌɨ́jcɨ jimi ɨ Tavástaraꞌ majta aꞌɨ́jcɨ jimi ɨ tɨ antyíhuaviihuacaꞌ.

³Majta jeꞌen aꞌyan tyíꞌtyejijhuaj tɨjɨn:

“¡Tyicheꞌ tyíꞌijtzaanaxɨꞌɨn ɨ cadéenaj!

¡Tyej tyij quee cheꞌ jɨꞌquiꞌhuaj tyataꞌaj taxáahuaj huacɨ́ꞌcaꞌan!”

⁴Aꞌɨ́jna ɨ Tavástaraꞌ, tajapuá tɨ tyejéꞌijtaj,

aꞌɨ́ɨ pu huaꞌaꞌtzej aꞌɨ́ɨjma,

⁵aj puꞌij téꞌej, nyuꞌcamuɨꞌɨj, tyihuoꞌtyámuarityeꞌsij,

huápuɨꞌɨj puꞌij nyuꞌcamuɨꞌɨj aꞌyan tyuꞌtaxájtaj tɨjɨn:

⁶—Nuꞌríj tyámuaꞌ jáaruuj aꞌɨ́jcɨ ɨ nyaj rey jɨn tyeꞌentyárujtyeꞌej aꞌájna a Sión, joꞌtɨj tyámuaꞌ tyejéꞌeen.

⁷Nyaataxájta jeꞌej tɨ arí tyaaxáꞌpuɨꞌɨntarej ɨ Tavástaraꞌ,

aꞌɨ́ɨ pu aꞌyan tyinaatéꞌexaaj tɨjɨn: “Muáaj paj nyiyóoj puéꞌeen;

ijíij nu nyáaj nyeríj aꞌ táataj puéꞌeen.

⁸Naatáhuaviij nyaj aꞌɨ́ɨjma muaatáviꞌtɨsteꞌen aꞌyan maj séejreꞌ mej mij muéetzij muaꞌ aꞌrij muáꞌraꞌnyij

ajta aꞌáa maj jáꞌsejreꞌ joꞌtɨj ɨ chuéj jóoꞌasej aꞌɨ́ɨ mu majta a jitze ajtyamaꞌcáantaj muáꞌjuꞌun,

nyáaj nu nyij tyimuaatáꞌsij.

⁹Néijmiꞌcaa paj antyipuáꞌrityeꞌsij ɨ maj rey jɨn tyityatatyíj aꞌɨ́jcɨ jɨmeꞌ ɨ itzɨ́j,

¡pajta aꞌyan huáꞌuurej tɨꞌɨj xáꞌrij paj huatyátaaraxɨꞌɨn!”

¹⁰Muaꞌaj mu siaj rey jɨn tyitatatyíj siajta muaꞌaj tajtúhuaanyij, aꞌíj xu joꞌitéej xáꞌraꞌnyij,

¡tyámuaꞌ xu naa aꞌíjcɨ tyiꞌhuóoꞌiteerityeꞌen!

^11-12Siataꞌaj huatyényuunyij ɨ Tavástaraꞌ jimi xuutyámuaꞌveꞌej siajta jéehua tzáahuatyiꞌraꞌaj jɨmeꞌ,

siajta jimi ecóotutaxɨꞌɨn xuuviváaj,

tɨꞌij quee aꞌɨ́ɨn tyinyúꞌcaj,

siajta jeꞌen sij muaꞌaj huácuiꞌnyij ɨ juyéj jitze,

jiꞌnye ɨ tɨ jɨn nyúꞌcamuɨꞌ jiyeꞌtzín pu huataséjreꞌej.

¡Micheꞌ huatóotyamuaꞌveꞌen aꞌɨ́ɨmaj ɨ maj aꞌɨ́j jitze jahuoo maj huatyóohuɨɨreꞌen!

Jeꞌej tɨ tyuꞌtyényuunyij tɨꞌij jaatáhuoonyij tɨ ɨ Tavástaraꞌ jaatyáhuɨɨreꞌen

Chuíicarij David tɨ joꞌyúꞌxacaꞌ, tɨꞌɨj juꞌuunacaꞌaj aꞌɨ́jcɨ jimi ɨ juyój Absalón

¹Nyavástaraꞌ,

jéehua mu ɨ maj quee tyámuaꞌ nyojoꞌmuaꞌraj,

jéehua mu aꞌɨ́ɨmaj ɨ maj meríj nyéetzij nyéjchaꞌɨɨreꞌ,

²¡jéehua mu ɨ maj aꞌyan tyíꞌnyaxaj tɨjɨn:

“Capu ɨ Dios japuan huatányuusij”!

³Pajta muáaj, nyavástaraꞌ,

aꞌɨ́ɨ paj puéꞌeen ɨ tɨ nyacánasij tɨꞌij naatyáhuɨɨreꞌen,

aꞌɨ́ɨ paj puéꞌeen ɨ nyaj jɨn naa huaséꞌrin,

aꞌɨ́ɨ paj puéꞌeen ɨ caꞌnyíjraꞌaj tɨ nyatáꞌcaa.

⁴Nyejíihuaj nu aꞌyan tyáꞌhuoo tɨꞌij ɨ Tavástaraꞌ naatyáhuɨɨreꞌen

aꞌɨ́ɨ puꞌij nyanamuajran aꞌájna joꞌtɨj tyámuaꞌ tyejéꞌeen joꞌtɨj aꞌɨ́ɨn jáꞌsejreꞌ.

⁵Naatyáhuiꞌsij nyajta huatácusij, nyatɨꞌɨj nyij nyajtáhuaꞌaj huatájɨsij,

jiꞌnye aꞌɨ́ɨ pu ɨ Tavástaraꞌ naatyáhuɨɨreꞌej.

⁶Canu huáꞌtzɨɨnyeꞌ aꞌɨ́ɨjma ɨ maj muiꞌij ɨ maj nyoꞌsii

ɨ maj meríj nyajná mej mij naatyényoꞌsiꞌtyeꞌen.

⁷¡Ájchesij, Tavástaraꞌ!

¡Pataꞌaj nyaj japua huatányuunyij, nyaj Dios!

Muáaj paj huaꞌ nyéerimij jitze huaꞌrávaxɨꞌɨj ɨ maj nyéjchaꞌɨɨreꞌ,

¡pajta huaꞌ tamej eecátaaraxɨꞌɨj ɨ maj jeꞌej puaꞌaj tyityetyúuchaꞌɨj!

⁸Muáaj, Tavástaraꞌ, aꞌɨ́ɨ paj puéꞌeen ɨ tɨ tajapuá huatányuusij,

¡pataꞌaj tyámuaꞌ tyihuoꞌtyátoonyij, aꞌɨ́ɨjma ɨ maj aꞌáa joꞌcháatɨmee aꞌchájtaꞌnaj jitze!

Tyaj néijmiꞌi jɨn jitzán tyúꞌcaꞌnyej ɨ Tavástaraꞌ

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj, aꞌɨ́jcɨ jitze ɨ maj jitzán tyíꞌcuiꞌnacaa tɨ tyeꞌejvivin. Chuíicarij David tɨ joꞌyúꞌxacaꞌ

¹Dios nyéetzij paj naatyáhuɨɨreꞌej,

¡pataꞌaj naatájeevej nyatɨꞌɨjta aꞌ jimi huatyényuunyij!

Muáaj paj tyináahuaj nyatɨꞌɨj jeꞌej tyéꞌnyamuaꞌajcaa,

náꞌancuꞌvaxɨꞌ nyéetzij pajta jáanamuaj ɨ nyaj a jimi huatyéenyuj.

²Muaꞌaj, mu siaj aꞌɨ́j jɨn óotzaahuatyeꞌ ɨ siaj vaꞌcán jɨn tyityatatyíj,

¿aꞌnajnyí siaatapuáꞌcɨtaj ɨ siaj jɨn náꞌxaahuataj?,

¿aꞌnajnyí siaatapuáꞌcɨtaj siaj aꞌɨ́j xɨeꞌveꞌ siajta aꞌɨ́j huoo

ɨ tɨquee jeꞌej huatóomuaꞌaj,

tɨ ajta hueꞌtzij naꞌaj puéꞌeen?

³Siataꞌaj jáamuaꞌreej tɨ ɨ Tavástaraꞌ aꞌɨ́j xɨeꞌveꞌ ɨ tyáatɨꞌ tɨ tyámuaꞌ jimi tyiꞌtyúuchaꞌɨj;

siataꞌaj jáamuaꞌreej tɨ ɨ Tavástaraꞌ nyanamuaj nyatɨꞌɨjta jaatájeevej.

⁴¡Siataꞌaj tyíꞌtzɨɨnyeꞌej siajta quee cheꞌ tyíꞌxanaꞌcɨreꞌej!

Siatɨꞌɨjtá huatyéejin, siatɨꞌɨj quee cheꞌ jeꞌej tyahuáasimeꞌej

aj xu sij tyámuaꞌ tyityoꞌhuóomuaꞌtzɨj jeꞌej siaj tyíꞌmuaꞌtzej,

⁵aj xu sij tzáahuatyiꞌraꞌaj jɨn tyuꞌtámuꞌvejritaj

siajta jitzán tyuꞌtyácaꞌnyej ɨ Tavástaraꞌ.

⁶Mueꞌtɨ́j mu aꞌyan tyíꞌxaj tɨjɨn: “¿Aꞌtanyíj taataséjratyeꞌsij ɨ tyaj jɨn huátatyamuaꞌveꞌen?”

¡Tavástaraꞌ, tyámuaꞌ paj naa tyiꞌtaxɨéꞌveꞌej pataaséj!

⁷Muáaj paj jéehua naatáꞌ ɨ nyaxɨéjnyuꞌcaa tzajtaꞌ ɨ nyaj jɨn nyetyamuaꞌveꞌ

pequee aꞌyan aꞌɨ́ɨjma jimi ɨ maj jéehua ɨ tyeríicuj tyíchaꞌɨj majta jéehua ɨ nahuáj.

⁸Nyáaj nu nyij nyaxáahuaj huatyáhuiꞌsij nyajta jeꞌen huatácusij,

jiꞌnye muáaj paj, Tavástaraꞌ, nyatáꞌcaa nyej nyij nyaxáahuaj yéchajcaj.

Tyaj ɨ Dios jamuán séjreꞌej tɨꞌɨjta eeréꞌnyej ɨ xɨcáj

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj, aꞌɨ́jcɨ jitze ɨ cɨꞌsítyeꞌrij. Chuíicarij David tɨ joꞌyúꞌxacaꞌ

^1-2Tavástaraꞌ, muáaj paj nyaj Rey puéꞌeen pajta nyaj Dios,

huánamuaj jeꞌej nyaj tyíꞌxaj,

pataꞌaj aꞌyan huárɨnyij jeꞌej nyaj xájtariꞌ aꞌ jimi tyuꞌtyényuusij,

huánamuaj jeꞌej nyaj jéehua a jimi tyíꞌnyuu,

jiꞌnye muéetzij nu jimi huatyényuusij.

³Tɨꞌɨjta jéꞌtaꞌ huatyamáꞌcaj ɨ xɨcáj muáaj paj nyanamuajran,

tɨꞌɨj ooj huápuɨꞌɨj huaꞌíyaꞌcaj muéetzij nu jimi jaataxájtaj tyiꞌtɨ́j tɨ jeꞌej rɨcɨj nye jimi,

nyajta jeꞌen tyíꞌchoꞌveꞌen jeꞌej paj tyinaatéꞌexaatyeꞌej.

⁴Capáj muáaj aꞌɨ́ɨn puéꞌeen ɨ Dios tɨ naa jaꞌsejratyeꞌ ɨ tɨ jeꞌej puaꞌaj een,

capu jeꞌej tyíɨꞌrij maj aꞌɨ́ɨmaj ɨ maj jeꞌej puaꞌaj tyityetyúuchaꞌɨj a jamuán ajaꞌchej,

⁵aꞌájna joꞌpaj muáaj jáꞌsejreꞌ camu aꞌɨ́ɨmaj áꞌvej ɨ maj óotzaahuatyeꞌ.

Capáj muáaj huaꞌxɨeꞌveꞌ aꞌɨ́ɨjma ɨ maj jeꞌej puaꞌaj tyíꞌuurej,

⁶pahuaꞌantyipuáꞌrityeꞌsij ɨ maj tyíꞌhueꞌtacaa pajta quee huoꞌtaxɨéꞌveꞌej ɨ maj avíitzij jɨn jeꞌej puaꞌaj rɨcɨj majta tyíꞌtyacuiꞌcaa.

⁷Nyajta nyáaj, aꞌɨ́jcɨ jɨmeꞌ ɨ paj vaꞌcán jɨn nyaxɨeꞌveꞌ,

nyáaj nu utyárutyij aꞌ tyeyúuj tzajtaꞌ;

¡ɨꞌríj nyaj a jimi huatyényuunyij jéehua tzáahuatyiꞌraꞌaj jɨmeꞌ,

nyajta jaséeraj aꞌɨ́jcɨ aꞌ tyeyúuj tɨ naa een!

⁸Tavástaraꞌ, mej mij quee aꞌɨ́ɨmaj naatyámueꞌtɨn ɨ maj nyéjchaꞌɨɨreꞌ

aꞌáa paj nyojooviꞌtɨj joꞌtɨj tyámuaꞌ tyejéꞌeen,

aꞌɨ́j paj jitze nuꞌcájuyetyej ɨ tɨ naa een.

⁹Camu aꞌɨ́ɨmaj aꞌnáj jɨꞌréꞌcan jɨmeꞌ tyíꞌxaj;

¡aꞌɨ́ɨ mu huápuɨꞌɨj jeꞌej puaꞌaj een ɨ jutzájtaꞌ!

Ɨ maj jɨn tyíꞌxaj aꞌyaa pu tyaarɨeꞌej tɨꞌɨj joꞌmaj muɨꞌchíj jaꞌváꞌnaj majta huaꞌantyícuunaxɨj,

¡huápuɨꞌɨj pu tyíꞌhueꞌtacaa ɨ huaꞌ nyanúu!

¹⁰¡Nyaj Dios, puéjtzij paj huoꞌtáꞌan aꞌɨ́ɨjma!

¡Muáaj paj aꞌyan tyúꞌuurej tɨꞌij quee aꞌyan tyáꞌraꞌnyij jeꞌej maj aꞌɨ́ɨmaj hueꞌtzij jɨn tyíꞌxaj!

Capáj huoꞌtaxɨéꞌveꞌen aꞌɨ́jcɨ maj jéehua tyiꞌijxánaꞌcɨraꞌ,

jiꞌnye aꞌɨ́ɨ mu muéetzij muaatyáhueꞌtacaꞌ.

¹¹Micheꞌ huatóotyamuaꞌveꞌen aꞌɨ́ɨmaj ɨ maj jahuoo pej pij muáaj huoꞌtyáhuɨɨreꞌen,

aꞌnáj tɨnaꞌaj xu jutyamuaꞌveꞌej tyíꞌchuiicaj;

jiꞌnye muáaj paj huáꞌchaꞌɨj.

Aꞌɨ́ɨmaj ɨ maj muaxɨeꞌveꞌ, aꞌɨ́ɨ mu aꞌ jitze maꞌcan jutyamuaꞌveꞌ,

¹²jiꞌnye muáaj, Tavástaraꞌ, aꞌɨ́j paj tyámuaꞌ tyuꞌtyátoosij ɨ tɨ tyámuaꞌ tyiꞌtyúuchaꞌɨj;

muáaj paj aꞌɨ́jna jɨn jacánasij ɨ paj jɨn jaxɨeꞌveꞌ.

Jeꞌej tɨ sɨ́ɨj tyuꞌtyényuunyij tɨꞌɨjta jeꞌej tyóomuaꞌajcaj

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj, aꞌɨ́jcɨ jitze ɨ maj jitzán tyíꞌcuiꞌnacaa tɨ arahuéeicaj tyeꞌejvivin. Chuíicarij David tɨ joꞌyúꞌxacaꞌ

¹Tavástaraꞌ,

capáj aꞌɨ́jna jɨn nyetyaꞌxɨꞌɨj ɨ paj jɨn nyúꞌcamuɨꞌ,

capáj puéjtzij nyataꞌcareꞌen aꞌɨ́jcɨ jɨmeꞌ ɨ paj jɨn huápuɨꞌɨj nyúꞌcamuɨꞌ.

²Tavástaraꞌ, náꞌancuꞌvaxɨꞌ nyéetzij,

jiꞌnye aꞌyaa pu nyaꞌasej nyaj quee uhuájcaꞌnyej.

Tavástaraꞌ, tyináahuaatyeꞌ,

jiꞌnye néijmiꞌqueꞌ nu ɨ nye tyévij jitze nyevivej.

³¡Nyetyényeviveesij aꞌɨ́jcɨ jɨmeꞌ ɨ nyaj tyíꞌtzɨɨnyeꞌ!

Pajta muáaj, Tavástaraꞌ, ¿aꞌnajnyí puꞌvéꞌnyesij?

⁴Mujoꞌtéꞌyiꞌij, Tavástaraꞌ, ¡pataꞌaj nyajapuáj huatányuunyij!,

¡aꞌɨ́j paj jɨn nyajapuáj huatányuunyij ɨ paj jɨn nyaxɨeꞌveꞌ!

⁵Capu ɨꞌríj tɨ aꞌtɨ́j tɨ arí huamuɨ́ꞌ muéetzij moꞌtámuaꞌree,

¿aꞌtanyíj tyimuaatatyójtziꞌreꞌej aꞌájna joꞌmaj yaꞌváꞌnaj?

⁶Nuꞌríj tácuaꞌnaxɨj nyaj nyeyiin.

Tɨꞌɨj púnaꞌaj tɨ́caꞌrij jitze jéehua nu nyeyiin

aꞌɨ́j pu jɨn ɨ nyamuꞌtzij arí huatyáruꞌnacaꞌ aꞌɨ́jcɨ jɨmeꞌ ɨ nyajaꞌraꞌ.

⁷Canu cheꞌ tyámuaꞌ metyóonyeej aꞌɨ́jcɨ jɨmeꞌ ɨ tɨ tyinyetyáacuiꞌ,

¡canu cheꞌ tyámuaꞌ metyóonyeej aꞌɨ́ɨ mej mij puéꞌeenyeꞌ ɨ maj nyéjchaꞌɨɨreꞌ!

⁸¡Xaꞌajtácɨɨnyij nye jimi, mu siaj jeꞌej puaꞌaj tyityetyúuchaꞌɨj,

jiꞌnye ɨ Tavástaraꞌ pu arí jáanamuajriꞌ ɨ nyaj nyeyiin!

⁹Tavástaraꞌ pu arí jáanamuajriꞌ ɨ nyaj jéehua jahuaviij,

¡ɨ Tavástaraꞌ pu arí jaꞌancuriáaꞌ ɨ nyaj jimi huatyéenyuj!

¹⁰Aꞌɨ́ɨmaj ɨ maj nyéjchaꞌɨɨreꞌ, matɨꞌɨj huácuiꞌnyij aꞌɨ́jcɨ jɨmeꞌ ɨ maj tyíꞌtzɨɨnyeꞌ,

aꞌɨ́ɨ mu mij tyéviꞌsiꞌ huataséjreꞌsij,

¡aꞌɨ́ɨ mu jiyeꞌtzín huatóoꞌuunaj muutyéviꞌraꞌaj!

Tavástaraꞌ pu aꞌɨ́ɨn puéꞌeen ɨ juées tɨ tyámuaꞌ naa tyáꞌxaꞌpuɨꞌɨntareꞌ

Tɨꞌɨj huóoyiinyacaꞌ aꞌɨ́jna ɨ David, aꞌájna tɨꞌɨj tyuꞌtáchuiicacaꞌ ɨ Tavástaraꞌ jimi, aꞌyájna tɨꞌɨj tyaataꞌíjtacaꞌ aꞌɨ́jna ɨ Cus, aꞌɨ́j tɨ jitze eerámaꞌcan ɨ Benjamín

^1-2Tavástaraꞌ, nyaj Dios, muéetzij jimi nu jahuoo pej pij naatyáhuɨɨreꞌen;

¡pataꞌaj nyajapuáj huatányuunyij néijmiꞌcaa jimi ɨ maj quee nyeséejracuj!

¡Naatyáhuɨɨreꞌ, jiꞌnye aꞌyaa mu aꞌɨ́ɨmaj een matɨꞌɨj ɨ muajyéj,

mej mij quee aꞌɨ́ɨmaj naatyátzaanaxɨꞌɨn

ajta jeꞌen quee ajaꞌ aꞌtɨ́ɨtan tɨꞌij nyajapuáj huatányuunyij!

³Tavástaraꞌ, nyaj Dios,

¿tyiꞌtanyí jitze nye quee tyámuaꞌ huarɨ́j?

¿Nyiquij aꞌtɨ́j naajéꞌcaj?

⁴¿Caꞌ séej ɨ nyaꞌ amíincuj tyiꞌtɨ́j jɨn jeꞌej puaꞌaj nyetyaanájchij?

¿Caꞌ tyiꞌtɨ́j jitzán naapuáꞌrityej ɨ tɨ nyéjchaꞌɨɨreꞌ ɨ tɨ quee aꞌyan tyiꞌjaꞌyájnatacaꞌaj?

⁵Tɨpuaꞌaj aꞌyan tyiꞌjaꞌyájnatan, cheꞌ aꞌɨ́ɨn naatamuárityeꞌen ɨ tɨ nyéjchaꞌɨɨreꞌ,

cheꞌ naatáaꞌsej ajta jeꞌen chóotaꞌ naatyásaꞌrɨeechej,

ajta jeꞌen aꞌɨ́jna jɨn naatyáxaahuataj.

⁶¡Pataꞌaj nyuꞌcamuɨꞌɨj ájchenyij, Tavástaraꞌ!

¡Nyuꞌcamuɨꞌɨj paj huatáꞌsejrataj aꞌɨ́ɨjma jimi ɨ maj nyéjchaꞌɨɨreꞌ!

Muáaj, mu paj aꞌyan tyuꞌtaxájtacaꞌ paj tyámuaꞌ tyíꞌuuren,

nyajamuan paj yésejriaꞌaj.

⁷Micheꞌ mueꞌtɨ́j ɨ tyeɨ́tyee a jitze atahuíistɨraꞌnyij

pajta acáyixɨꞌɨn aꞌ ɨpuáaj jitze, huaꞌ japua aꞌɨ́ɨjma.

⁸Tavástaraꞌ, muáaj paj huáꞌxɨjtyeꞌen ɨ tyeɨ́tyee,

aꞌɨ́j paj jɨn noꞌxɨ́jtyeꞌen jeꞌej tɨ nye jitze tyiꞌtyéevijtɨj,

aꞌɨ́j paj jɨn noꞌxɨ́jtyeꞌen tyiꞌtɨ́j nyaj quee muaꞌreeriacaꞌaj nyajta aꞌɨ́jna jɨn aꞌyan huarɨ́j.

⁹Dios paj quee tyiꞌtɨ́j jɨn áꞌɨtzeereꞌ,

pajta jamuaꞌreej jeꞌej tɨ sɨ́ɨj tyíꞌmuaꞌtzej,

ajta jeꞌej tɨ sɨ́ɨj tyétyeꞌ ɨmuáj jutzájtaꞌ tyíꞌmuaꞌtzej,

¡antyipuáꞌrityeꞌ ɨ maj jɨn jeꞌej puaꞌaj ɨ rɨcɨj ɨ maj quee tyámuaꞌ tyityetyúuchaꞌɨj,

pajta tyámuaꞌ tyeetyéchaꞌɨɨn aꞌɨ́jcɨ ɨ tyáataj tɨ quee tyiꞌtɨ́j jɨn áꞌɨtzeereꞌ!

¹⁰Aꞌɨ́jna ɨ tɨ naatyáhuɨɨreꞌej aꞌɨ́ɨ pu aꞌɨ́ɨn puéꞌeen ɨ Dios jútyeꞌ ɨmuáj tɨ jáꞌsejreꞌ,

aꞌɨ́ɨjma tɨ japua huatányuusij ɨ maj tyámuaꞌ een ɨ juxɨéjnyuꞌcaa tzajtaꞌ.

¹¹Dios pu juées puéꞌeen tɨ tyámuaꞌ naa tyáꞌxaꞌpuɨꞌɨntareꞌ

tɨquee aꞌnáj jitzán huataséjreꞌsij ɨ tɨ jeꞌej puaꞌaj een.

¹²Tɨpuaꞌaj ɨ tyáatɨꞌ quee tyáꞌantzaahuatyeꞌen ɨ Dios jimi,

Dios pu tyámuaꞌ jaꞌuuren ɨ juchúun;

puꞌríj tyámuaꞌ tyaꞌajcájtyej ɨ jutuꞌnamuaꞌ,

¹³puꞌríj tyámuaꞌ tyúꞌruuj ɨ tyúuꞌɨꞌrɨj tɨ tyeꞌentyitáatɨmee,

¡puꞌríj tyámuaꞌ tyúꞌruuj ɨ tɨ jɨn huatyényoꞌseꞌen!

¹⁴Xaaséj aꞌɨ́jcɨ ɨ tɨ jeꞌej puaꞌaj tyiꞌtyúuchaꞌɨ

puꞌríj joꞌtacuíꞌnyacaꞌ tɨꞌɨj ɨ tɨ tyiyóoj jaꞌmej,

aꞌɨ́j pu jɨn jutzaꞌ ɨ tɨ jeꞌej puaꞌaj een

ajta jeꞌen aꞌɨ́j tyiyóoj jaꞌmej ɨ tɨ hueꞌtzij puéꞌeen.

¹⁵Ajta arí tyeꞌtyáacuj tyétyeꞌ ɨmuáj huápuɨꞌɨj joꞌcacúunyican,

aꞌáa puꞌij jaꞌtyévesij joꞌtɨj jusɨ́ɨj tyejeꞌtyáacuj.

¹⁶¡Aꞌɨ́jna ɨ tɨ jɨn jeꞌej puaꞌaj rɨcɨj ajta ɨ tɨ jɨn nyoꞌseꞌ

aꞌɨ́ɨ pu jitzán tyiꞌráꞌeexaj!

¹⁷Nyetyaatatyójtziꞌreꞌej ɨ Tavástaraꞌ jiꞌnye aꞌɨ́ɨ pu quee tyiꞌtɨ́j jɨn áꞌɨtzeereꞌ,

nyetyuꞌtáchuiicaj aꞌɨ́jcɨ jitze maꞌcan ɨ Tavástaraꞌ,

aꞌɨ́jcɨ jitze maꞌcan jeꞌej tɨ ántyapuaj ɨ tajapuá tɨ jáꞌsejreꞌ.

Aꞌɨ́jna ɨ tɨ jɨn ɨ Dios naa huaséꞌrin ajta tyiꞌtɨ́j tɨ tyámuaꞌ een ɨ tyáataj jimi

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj, aꞌɨ́jcɨ jitze ɨ canárij Gat tɨ jaꞌaꞌrij. Chuíicarij David tɨ joꞌyúꞌxacaꞌ

¹Tavástaraꞌ, muáaj paj aꞌɨ́ɨn puéꞌeen ɨ tɨ jéetzeꞌ vaꞌcán jɨn tyiꞌtyéjvee tajimí,

¡aꞌɨ́jna ɨ paj jɨn ántyapuaj aꞌɨ́ɨ pu néijmiꞌqueꞌ tyíꞌijta ɨ cháanacaj japua!,

¡ajta ɨ paj jɨn naa huaséꞌrin jéetzeꞌ pu ajcaꞌhuáye jóoꞌasej aꞌɨ́jcɨ jitze ɨ tajapuá tɨ séejreꞌ!

²Aꞌɨ́ɨmaj mu tyuꞌtáchuiicaj ɨ maj cɨ́leꞌen,

aꞌɨ́ɨmaj ɨ tɨꞌríij ɨ maj móoj tzaꞌcaa,

aꞌɨ́ɨjma paj jɨn períj huatyáꞌcaꞌan,

aꞌɨ́ɨ mu mij puéꞌeenyeꞌ ɨ maj muájchaꞌɨɨreꞌ,

pej pij huaꞌantyipuáꞌrityeꞌen ɨ maj quee tyuꞌnamuaj pajta ɨ maj muanyoꞌsiꞌtyeꞌ.

³Nyatɨꞌɨjta jaaséj ɨ tajapuá tɨ séejreꞌ muáaj paj jaatyátaahuacaꞌ

nyajta ɨ máxcɨrɨeꞌ nyajta ɨ xúꞌraꞌvetyee ɨ paj jitzán huoꞌriaꞌraꞌtzacaꞌ,

⁴aꞌyaa nu tyiꞌriáꞌmuaꞌsij tɨjɨn:

¿Aꞌtanyíj puéꞌeen ɨ tyáatɨꞌ?

¿Aꞌtyaanyíj maj puéꞌeen ɨ tyeɨ́tyee?

¿Jiꞌnye pej pij jaꞌtamuáꞌreꞌrii pajta aꞌɨ́j jitze tyiꞌamuaꞌtziityeꞌ?

⁵Jiꞌnye aꞌyaa paj tɨn jáaruuj tɨꞌɨj dios,

pajta jaatáꞌ mej mij jaatyátzaahuatyeꞌen tɨꞌij aꞌɨ́jna jɨn tyámuaꞌ tyíꞌsejriaꞌaj,

⁶pajta jaatáꞌ tɨꞌij aꞌɨ́ɨn tyuꞌtaꞌíjtaj néijmiꞌi jitze muáaj paj tyúꞌtaahuacaꞌ,

aꞌyaa paj tyaatáꞌ tɨꞌij aꞌɨ́ɨn néijmiꞌqueꞌ antyúumuaꞌreeriaj,

⁷aꞌɨ́ɨjma jimi ɨ cányaꞌxɨɨ ajta ɨ túuruꞌuj, ajta aꞌɨ́ɨjma jimi ɨ tyiꞌtyán simuáruunyij,

⁸ajta aꞌɨ́ɨjma jimi ɨ pínaꞌsee ɨ maj ráꞌrɨee ɨ jútyeꞌ,

aꞌɨ́ɨjma jimi ɨ hueꞌtyée jájritzeꞌ maj jaꞌchej,

¡ajta néijmiꞌcaa aꞌɨ́ɨjma jimi ɨ jájritzeꞌ maj tyityáꞌxoo!

⁹Tavástaraꞌ, muáaj paj aꞌɨ́ɨn puéꞌeen ɨ tɨ jéetzeꞌ vaꞌcán jɨn tyiꞌtyéjvee tajimí,

¡aꞌɨ́jna ɨ paj jɨn ántyapuaj aꞌɨ́ɨ pu néijmiꞌqueꞌ tyíꞌijta ɨ cháanacaj japua!

Chuíicarij aꞌɨ́j tɨ jitze maꞌcan ɨ Dios tɨ tyámuaꞌ naa tyíꞌuurej

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj, aꞌɨ́jcɨ jitze ɨ cɨꞌsítyeꞌrij majta ɨ canárij jitze. Chuíicarij David tɨ joꞌyúꞌxacaꞌ

¹Tavástaraꞌ,

nyáaxɨeꞌveꞌ nyaj tyimuaatatyójtziꞌreꞌen néijmiꞌi ɨ nyaxɨéjnyuꞌcaa jɨmeꞌ

nyajta tyuꞌtaxáj ɨ tɨ jéehua a jitze tyíꞌsejreꞌ ɨ tɨ naa tyuꞌséꞌrin.

²Muáaj jútyeꞌ ɨmuáj paj jáꞌsejreꞌ,

a jitze maꞌcan nu jaxɨeꞌveꞌ nyaj huajíjhua nyenyetyámuaꞌvaꞌaj,

¡nyáaxɨeꞌveꞌ nyaj aꞌɨ́j jitze maꞌcan tyuꞌtáchuiicaj jeꞌej paj ántyapuaj!

³Aꞌɨ́ɨmaj ɨ maj nyéjchaꞌɨɨreꞌ aꞌɨ́ɨ mu muéetzij jimi huatóoꞌuunaj;

mueꞌtávatzɨj majta jeꞌen cuiꞌnyij.

⁴Muáaj paj juées puéꞌeen ɨ tɨ quee tyiꞌtɨ́j jɨn áꞌɨtzeereꞌ,

papuꞌríj acáayixɨj aꞌ ɨpuáaj jitze, pej pij tyámuaꞌ tyinoꞌxáꞌpuɨꞌɨntariꞌtzeꞌen.

⁵Papuꞌríj huaꞌajtyáꞌxɨj aꞌɨ́ɨjma ɨ maj quee tyáꞌtzaahuatyeꞌ,

pajta huaꞌantyipuaꞌrij aꞌɨ́ɨjma ɨ maj jeꞌej puaꞌaj tyityetyúuchaꞌɨj,

¡papuꞌríj jusén jɨmeꞌ joꞌriuꞌuj ɨ maj jɨn huaꞌtamuáꞌreꞌrihuaꞌaj!

⁶Aꞌɨ́jna ɨ tɨ quee tyámuaꞌ tyihuojóꞌmuaꞌraj puꞌríj huamuɨ́ꞌ,

majta jamuán huácuij ɨ maj aꞌáa joꞌcháatɨmaꞌcaa ɨ chájtaꞌnaj jitze joꞌtɨj aꞌɨ́ɨn tyejéꞌijtaj,

muáaj paj huaꞌantyipuaꞌrityej,

capu cheꞌ huaꞌ jimi séejreꞌ ɨ maj jɨn huoꞌtámuaꞌree.

⁷Ajta ɨ Tavástaraꞌ aꞌɨ́ɨ pu Rey jɨn tyiꞌtyéjvee jusén jɨmeꞌ,

aꞌɨ́ɨ pu arí tyámuaꞌ jáaruuj ɨ juꞌɨpuáa tɨꞌij huoꞌxaꞌpuɨꞌɨntariꞌtzeꞌen,

⁸néijmiꞌcaa pu áꞌxɨjtyeꞌen ɨ maj yan huacháatɨmee ɨ cháanacaj japua,

aꞌɨ́ɨ pu tyámuaꞌ naa tyihuoꞌtaꞌíjtyeꞌsij tɨꞌɨj naꞌaj tyiꞌchájtaꞌnajmee.

⁹Tavástaraꞌ pu tyámuaꞌ naa tyihuáꞌchaꞌɨj aꞌɨ́ɨjma ɨ maj quee cheꞌ jeꞌej jájtyoovej;

aꞌɨ́ɨ pu tyámuaꞌ tyihuáꞌchaꞌɨj matɨꞌɨjta jeꞌej tyityóomuajtyaj.

¹⁰Tavástaraꞌ,

ɨ maj muamuaꞌtyej, muéetzij mu jitze tyíꞌcaꞌnyej,

jiꞌnye capáj aꞌnáj mahuóohuaꞌxɨj aꞌɨ́ɨjma ɨ maj muahuoo.

¹¹Setyuꞌtáchuiicaj ɨ Tavástaraꞌ jimi, ɨ tɨ aꞌáa tyejéꞌijtaj aꞌájna a Sión;

siahuoꞌréꞌixaatyeꞌ néijmiꞌqueꞌ ɨ chájtaꞌnaj jitze jeꞌej tɨ aꞌɨ́ɨn tyiꞌtɨ́j huáruuj.

¹²Dios pu huaꞌtamuáꞌreꞌrii aꞌɨ́ɨjma ɨ maj jeꞌej tyityóomuajtyej

ajta quee yóꞌhuaꞌnaj ɨ maj juyiin;

puéjtzij pu huoꞌtaꞌsij aꞌɨ́ɨjma ɨ maj huaꞌnyoꞌsiꞌtyeꞌ.

¹³Tavástaraꞌ, náꞌancuꞌvaxɨꞌ nyéetzij,

cásɨꞌ jeꞌej mu puaꞌaj nyaꞌuurej ɨ maj nyaxanaꞌveꞌ,

¡pataꞌaj nyaj japua huatányuunyij nyej nyij quee huámuɨꞌnyij!

¹⁴Aꞌyaa nu nyij, aꞌájna joꞌtɨj jaꞌpueertaj a Jerusalén,

aꞌyaa nu tyihuoꞌtéꞌexaatyeꞌej néijmiꞌcaa aꞌyan maj huacháatɨmee ɨ cháanacaj japua tɨ muéetzij jimi xáꞌpuɨꞌ mej mij tyuꞌtáchuiicaj,

nyej nyajta nyetyamuaꞌveꞌ jiꞌnye muáaj paj nyajapuáj huatanyúj.

¹⁵Aꞌɨ́ɨmaj ɨ maj quee tyáꞌtzaahuatyeꞌ aꞌɨ́ɨ mu jujɨ́ɨmuaꞌaj jeꞌej puaꞌaj juꞌuurej,

aꞌɨ́ɨ mu jujɨ́ɨmuaꞌaj eetávitzej

aꞌɨ́jcɨ jitze ɨ tápiꞌnarij aꞌɨ́ɨmaj maj tyuꞌtyáꞌavaatacaꞌ mej mij séecan huavíviꞌ.

¹⁶Tavástaraꞌ pu arí tyuꞌtáꞌ mej mij jáamuaꞌtyij,

aꞌɨ́ɨ pu arí néijmiꞌi tyoꞌxáꞌpuɨꞌɨntarej.

Aꞌɨ́j mu huatyéviꞌraj ɨ tɨ jeꞌej puaꞌaj tyiꞌtyúuchaꞌɨj

aꞌɨ́jcɨ jɨmeꞌ ɨ tyiꞌtɨ́j aꞌɨ́ɨn tɨ tyámuaꞌ jáaruuj tɨꞌij séej huatyéeviꞌ.

¹⁷Aꞌɨ́ɨmaj ɨ maj jeꞌej puaꞌaj tyityetyúuchaꞌɨj majta ɨ maj quee tyáꞌtzaahuatyeꞌ,

majta ɨ maj yoꞌhuáꞌxɨj ɨ Dios,

aꞌáa mu joꞌtyáꞌɨtzeereꞌej joꞌmaj ɨ muɨꞌchítyee jáꞌavaꞌtacaa,

¹⁸jiꞌnye camu aꞌnáj huojoꞌhuáꞌxɨj ɨ maj quee jeꞌej tyéejviicueꞌ,

capu ajta jusén jɨmeꞌ jóꞌvesij ɨ maj jitzán tyiꞌijchóꞌveꞌ.

¹⁹Ájchesij, Tavástaraꞌ,

capáj tyámuaꞌ tyeetyéjeevej aꞌɨ́jcɨ ɨ tyáatɨꞌ tɨ óotzaahuatyeꞌ,

pataꞌaj aꞌáa huoꞌxɨ́jtyeꞌen joꞌpaj muáaj jáꞌsejreꞌ aꞌɨ́ɨjma ɨ maj quee tyáꞌtzaahuatyeꞌ.

²⁰Aꞌyaa paj huóꞌuurej mej mij tyuꞌtátzɨɨnyeꞌen, Tavástaraꞌ,

¡huoꞌtaꞌ mej mij uhuóomuaꞌtzɨj maj tyétyecaa manaꞌaj puéꞌeen!

Jeꞌej tɨ tyuꞌtyényuunyij tɨꞌij jaatáhuoonyij tɨ ɨ Dios jaatyáhuɨɨreꞌen

¹Tavástaraꞌ, ¿jiꞌnye pej pij aꞌ ɨmuáj jáꞌsejreꞌ?,

¿jiꞌnye pej pij jaꞌavaaj tɨꞌɨjta jeꞌej puaꞌaj tyíꞌrɨjcaa?

²Jéehua pu ootzáahuatyeꞌ, aꞌɨ́jna ɨ tɨ jeꞌej puaꞌaj tyiꞌtyúuchaꞌɨj,

ajta huápuɨꞌɨj nyuꞌcamuɨꞌɨj jamuarityeꞌ aꞌɨ́jcɨ ɨ tɨ tyóoxaahuaj,

ajta aꞌɨ́ɨ pu huatyéviꞌriꞌhuaj

aꞌɨ́jcɨ jɨmeꞌ aꞌɨ́ɨn tɨ tyámuaꞌ jáaruuj tɨꞌij aꞌɨ́ɨn séecan huavíviꞌ.

³Aꞌɨ́jna ɨ tɨ jeꞌej puaꞌaj tyiꞌtyúuchaꞌɨj aꞌɨ́j pu jɨn óotzaahuatyeꞌ jeꞌej tɨ jusɨ́ɨj tyiꞌtɨ́j tyíꞌxɨeꞌveꞌ;

aꞌɨ́ɨ pu jeꞌej puaꞌaj tyíꞌxaxaꞌaj ɨ tɨ jéehua tyíꞌnyacuaꞌaj ajta majúujɨpuaj ɨ Tavástaraꞌ.

⁴Aꞌɨ́jna ɨ tɨ jeꞌej puaꞌaj tyiꞌtyúuchaꞌɨj aꞌɨ́ɨ pu huápuɨꞌɨj óotzaahuatyeꞌ, ajta aꞌyan tyíꞌxaj tɨjɨn:

“Capu Dios séejreꞌ. Capu maꞌ aꞌtɨ́j tɨ nyéetzij tyiꞌtɨ́j jɨn náꞌxɨjtyeꞌej.”

Aꞌíi pu néijmiꞌi aꞌɨ́ɨn tyiꞌpuéꞌeen ɨ tɨ jitzán tyíꞌmuaꞌtzej.

⁵Aꞌnáj tɨ naꞌaj pu tyámuaꞌ tyéꞌyiꞌij jeꞌej tɨ tyiꞌtɨ́j jɨn rɨcɨj.

Aꞌɨ́jcɨ jimi, capu séejreꞌ ɨ puéjtzij muáaj paj jaatáꞌan,

capu aꞌ véjriꞌ jáꞌsejreꞌ tɨꞌij aꞌɨ́ɨn jaaséj.

Aꞌɨ́ɨ pu huaꞌaꞌtzej ɨ maj jájchaꞌɨɨreꞌ,

⁶ajta aꞌyan tyíꞌmuaꞌtzej tɨquee aꞌtɨ́j jeꞌej jaꞌuuren,

tɨ ajta quee aꞌnáj tyiꞌtɨ́j jeꞌej puaꞌaj rɨnyij jimi.

⁷Tyényiꞌtzeꞌ pu jéehua éejnyinyii ɨ tɨ jeꞌej puaꞌaj huánamuajrii,

tɨ hueꞌtzij puéꞌeen ajta tɨꞌij séej jeꞌej puaꞌaj tyuꞌtájeevej,

nyúucariaꞌraꞌ pu jaꞌavaaj ɨ tɨ quee jatáꞌcaa tɨ juxáahuaj séjreꞌej ajta ɨ tɨ jeꞌej puaꞌaj een.

⁸Aꞌɨ́ɨ pu huaꞌeeveꞌ, aꞌájna joꞌmaj joꞌcháatɨmee,

ajta avíitzij jɨn jajeꞌcatan aꞌɨ́jcɨ ɨ tɨ quee tyiꞌtɨ́j jɨn áꞌɨtzeereꞌ.

Tyámuaꞌ pu naa tyéꞌsej aꞌɨ́jcɨ ɨ tɨquee pújoorej tɨ huatyóonaj:

⁹aꞌyaa pu een tɨꞌɨj ɨ muájyej tɨ aꞌaj jeꞌráacaꞌaj joꞌtɨj jáꞌtyastaꞌ,

aꞌaj puꞌij jeꞌraqueꞌtɨj jaꞌeeveꞌ aꞌɨ́jcɨ ɨ tɨquee jeꞌej tyéejviicueꞌ,

aꞌyan tyeꞌejchóꞌveꞌej aꞌtzáaj tɨ japuan rájtzunaj,

ajta tɨꞌɨj jaatyéeviꞌ, aj puꞌij jaatyásaꞌrɨeechij ɨ tápiꞌnarij tzajtaꞌ.

¹⁰Aꞌyaa mu mij tyihuoꞌtyáxaahuataj ɨ maj quee pújoorej maj huatyóonaj,

matɨꞌɨj aꞌɨ́ɨmaj tyihuoꞌtaꞌíjtyeꞌen ɨ maj jeꞌej puaꞌaj tyityetyúuchaꞌɨj.

¹¹Aꞌɨ́jna ɨ tɨ jeꞌej puaꞌaj tyiꞌtyúuchaꞌɨj aꞌyaa pu tyíꞌmuaꞌtzej tɨ ɨ Dios tyojoꞌhuaꞌnaj,

tɨ ajta aróonamuaj ajta quee aꞌnáj tyiꞌtɨ́j huaséj.

¹²¡Ájchesij, Tavástaraꞌ, pajta ajméjcaꞌtaj!

¡Capáj huojoꞌhuaꞌnan ɨ maj quee jeꞌej jájtyoovej!

¹³¿Jiꞌnye mej mij, nyaj Dios, aꞌɨ́ɨmaj ɨ maj jeꞌej puaꞌaj tyityetyúuchaꞌɨj tyíꞌtyanaꞌnaj,

aꞌyan metyiꞌmuaꞌastɨj paj muáaj quee huáꞌxɨjtyeꞌen?

¹⁴Muáaj paj asɨ́ɨj períj huoꞌséj maj huápuɨꞌɨj jeꞌej puaꞌaj tyityetyúuchaꞌɨj;

¡papuꞌríj huoꞌséj, pajta aꞌyan huaꞌ jimi tyáꞌxaꞌpuɨꞌɨntareꞌen tɨꞌɨj tyihuaꞌtyévijtyeꞌ!

Muéetzij mu jimi jucaꞌnyej aꞌɨ́ɨmaj ɨ maj quee pújoorej maj huatyóonaj,

muáaj paj huoꞌtyáhuɨɨreꞌsij aꞌɨ́ɨjma ɨ maj xáꞌrɨcaanyij.

¹⁵¡Antyínaꞌxɨj ɨ huaꞌ muácaꞌ aꞌɨ́ɨjma ɨ maj jeꞌej puaꞌaj tyityetyúuchaꞌɨj!

¡Pajta huoꞌxɨ́jtyeꞌen aꞌɨ́jcɨ jɨmeꞌ ɨ maj jeꞌej puaꞌaj rɨcɨj

ꞌasta naꞌaj quee cheꞌ tyiꞌtɨ́j huaꞌ jimi áꞌɨtzeeriaꞌaj!

¹⁶Tavástaraꞌ pu Rey jɨn tyiꞌtyéjvee jusén jɨmeꞌ;

¡aꞌɨ́ɨmaj mu eeráꞌityiꞌhuaj joꞌmaj jaꞌchej ɨ maj quee tyáꞌtzaahuatyeꞌ!

¹⁷Tavástaraꞌ, muáaj paj janamuaj jeꞌej maj muéetzij jimi tyáꞌhuoo ɨ maj tyóoxaahuaj,

muáaj paj caꞌnyíjraꞌaj huaꞌtáꞌcaa pajta huáꞌnamuaj.

¹⁸Tyámuaꞌ paj tyoꞌxáꞌpuɨꞌɨntariꞌtzeꞌen aꞌɨ́jcɨ ɨ tɨ xáꞌrɨcan pajta aꞌɨ́jcɨ ɨ tɨ quee jeꞌej jájtyoovej:

¡cheꞌ aꞌɨ́jna ɨ tyáatɨꞌ, chuéj tɨ jɨn huatyátaavijhuacaꞌ,

quee cheꞌ tyiꞌtɨ́j jɨn jeꞌej puaꞌaj tyíꞌuurej!

Tyaj néijmiꞌi jɨn jitzán tyúꞌcaꞌnyej ɨ Tavástaraꞌ

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Chuíicarij David tɨ joꞌyúꞌxacaꞌ

¹Nyáaj nu jahuoo tɨꞌij ɨ Tavástaraꞌ naatyáhuɨɨreꞌ.

Ajta jiꞌnye mej mij aꞌyan tyíꞌnyeꞌixaatyeꞌ tɨjɨn:

“Huatáꞌuunaj aꞌájna joꞌtɨj ɨ jɨríj joꞌquéetɨmee, aꞌyájna matɨꞌɨj ɨ pínaꞌsee.

²Huoꞌséj aꞌɨ́ɨjma ɨ maj jeꞌej puaꞌaj tyityetyúuchaꞌɨj:

aꞌɨ́ɨ mu tyámuaꞌ jaꞌuurej ɨ ɨꞌrɨ́j aꞌɨ́jcɨ jitze ɨ túꞌnamuaꞌaj,

majta tyámuaꞌ tyaꞌajcájtyeꞌsij ɨ tɨ tyeꞌejvíi ɨ túꞌnamuaꞌaj jitze

majta jeꞌen, aꞌájna joꞌmaj jóoꞌavaaj,

aꞌáa mu jooꞌaváataj mahuáꞌcuꞌraj ɨ tyétyacaa maj tyámuaꞌ tyíꞌtyetyeɨtyee.

³Ajta tɨpuaꞌaj ɨ maj tyíꞌijta mequee tyámuaꞌ tyityetyúuchaꞌɨɨj,

¿tyiꞌtanyí jɨn jeꞌej rɨnyij aꞌɨ́jna ɨ tyáatɨꞌ tɨ tyámuaꞌ tyíꞌtyevij?”

⁴Tavástaraꞌ pu aꞌúu jáꞌsejreꞌ ɨ ju tyeyúuj tzajtaꞌ tɨ tyámuaꞌ een.

Ajta aꞌɨ́jna ɨ ɨpuariáaraꞌan ɨ Tavástaraꞌ tajapuá pu jáꞌsejreꞌ,

ajta tyámuaꞌ naa tyaꞌtányeerij

tyámuaꞌ puꞌij naa tyihuáꞌsej aꞌɨ́ɨjma ɨ tyeɨ́tyee.

⁵Tavástaraꞌ pu huaꞌsej ɨ maj quee tyiꞌtɨ́j jɨn áꞌɨtzeereꞌ ajta ɨ maj jeꞌej puaꞌaj tyityetyúuchaꞌɨj,

ajta jéehua huápuɨꞌɨj huaꞌxanaꞌveꞌ

aꞌɨ́ɨjma ɨ tɨ huaꞌráanajchi maj huatyényoꞌseꞌen.

⁶Tavástaraꞌ pu tyuꞌtáꞌsij maj huatyéviiyej aꞌɨ́ɨjma japua ɨ maj jeꞌej puaꞌaj rɨcɨj,

aꞌɨ́j mu jɨn huatyéviiyij ɨ tɨꞌɨxcuáa, ɨ tɨéj ajta ɨ tyiꞌtɨ́j maj aꞌyan jatamuáꞌmuaj tɨjɨn asúufrej,

ajta tyuꞌtáꞌsij tɨ huatáꞌaacarej aꞌɨ́j puꞌij jɨn néijmiꞌi tyuꞌriáꞌtaasij.

¡Tavástaraꞌ pu aꞌyan tyáꞌxaꞌpuɨꞌɨntareꞌen jeꞌej tɨ huaꞌ jimi tyiꞌtyéevijtɨj!

⁷Aꞌɨ́jna ɨ Tavástaraꞌ capu tyiꞌtɨ́j jɨn áꞌɨtzeereꞌ

ajta aꞌɨ́j xɨeꞌveꞌ ɨ tɨ tyámuaꞌ een;

¡aꞌɨ́j mu mij jɨn nyéerimaꞌraꞌ séjran aꞌɨ́ɨmaj ɨ maj tyámuaꞌ tyíꞌtyesejreꞌ!

Jeꞌej tɨ tyuꞌtyényuunyij tɨꞌij jaatáhuoonyij tɨ ɨ Dios jaatyáhuɨɨreꞌen

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj, aꞌɨ́jcɨ jitze ɨ canárij arahuéeicaj tɨ tyeꞌejvivin. Chuíicarij David tɨ joꞌyúꞌxacaꞌ

¹Taatyáhuɨɨreꞌ, Tavástaraꞌ, jiꞌnye camu cheꞌ séejreꞌ ɨ maj muéetzij jimi tyáꞌtzaahuatyeꞌ majta tyámuaꞌ tyíꞌtyesejreꞌej,

camu cheꞌ séejreꞌ ɨ tyétyacaa maj tyámuaꞌ metyityoomuámuaꞌreꞌ.

²Aꞌɨ́ɨ mu jucuanamuaj séej jamuán majta séej;

jeꞌej mu puaꞌaj tyíꞌjepeꞌ majta quee huatoojéꞌyacan jɨn tyíꞌxaj.

³Tavástaraꞌ, pataꞌaj jeꞌejcuuxɨj ɨ huaꞌnaanaꞌ

aꞌɨ́ɨjma ɨ maj jeꞌej puaꞌaj tyíꞌjepeꞌ majta óotzaahuatyeꞌ,

⁴ɨ maj aꞌyan tyíꞌxaj tɨjɨn:

“Aꞌɨ́ɨ puꞌuj tajitzé juxɨeꞌveꞌ ɨ tatyényij,

tanyanúu pu tajapuá huatányuusij.

¿Aꞌtanyíj óocaꞌnyej tɨꞌij tyitaataꞌíjtyeꞌen?”

⁵Aꞌyaa pu tyuꞌtaxájtacaꞌ ɨ Tavástaraꞌ tɨjɨn:

“Aꞌɨ́ɨmaj ɨ maj quee jeꞌej tyéejviicueꞌ majta ɨ maj quee jucaꞌnyej

aꞌɨ́ɨjma mu jeꞌej puaꞌaj uurej majta puéjtzij huaꞌtáꞌcaa.

Aꞌɨ́j nu jɨn ijíij ájchesij,

nyajta aꞌyan tyihuoꞌtyáhuɨɨreꞌsij matɨꞌɨj aꞌɨ́ɨmaj jéehua tyáꞌxɨeꞌveꞌ.”

⁶Aꞌɨ́jna ɨ Tavástaraꞌ tɨ jɨn tyaꞌtóorasij aꞌɨ́ɨ pu jumuaꞌtɨj;

¡aꞌyaa pu een tɨꞌɨj ɨ pláataj tɨ huápuɨꞌɨj jumuaꞌtɨj,

maj tyámuaꞌ tyeetyáatɨej ɨ oornaj jitze aráahuaꞌpuaj puaꞌmáj!

⁷Muáaj paj Tavástaraꞌ, tachaꞌɨɨj puáꞌmej,

¡aꞌnáj tɨnaꞌaj paj tachaꞌɨɨj puáꞌmej aꞌɨ́ɨjma jimi ɨ tyeɨ́tyee maj jeꞌej puaꞌaj rɨcɨj!

⁸Aꞌɨ́ɨmaj ɨ maj jeꞌej puaꞌaj tyityetyúuchaꞌɨj joꞌtɨj naꞌaj mu séejreꞌ

majta néijmiꞌqueꞌ ɨ cháanacaj japua jaxɨeꞌveꞌ ɨ tɨ jeꞌej puaꞌaj een.

Jeꞌej tɨ tyuꞌtyényuunyij tɨꞌij jáahuɨɨreꞌen

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Chuíicarij David tɨ joꞌyúꞌxacaꞌ

¹Tavástaraꞌ,

¿Aꞌnajnyí panoꞌtámuaꞌreerij?

¿Nyi jusén jɨmeꞌ penyojoꞌhuaꞌxɨj?

¿Aꞌnajnyí pequee cheꞌ nye jimi huatyáꞌavaataj?

²¿Aꞌnajnyí quee cheꞌ ɨ nyaj júuricamej ajta ɨ nyaxɨéjnyuꞌcaa

jajpuéetzij jaꞌmej ajta mej mij quee cheꞌ aꞌnáj tɨnaꞌaj juxaamuɨjrityaꞌaj?

¿Aꞌnajnyí nye quee cheꞌ aꞌɨ́j jimi tyiꞌhuɨ́ɨreꞌej naꞌmej ɨ tɨ nyéjchaꞌɨɨreꞌ?

³Tavástaraꞌ, nyaj Dios,

¡naaséj, pajta naatájeevej, tyámuaꞌ tyinaꞌtányeerityeꞌ ɨ nyajɨ́ɨseꞌ!

¡Nyej nyij quee nyáaj huámuɨꞌnyij!

⁴¡Cheꞌ quee aꞌyan tyíꞌxajtaj ɨ tɨ nyéjchaꞌɨɨreꞌ yee: “Nuꞌríj jaatyáamueꞌtɨj”!

¡Cheꞌ quee jutyamuaꞌveꞌej tɨpuaꞌaj nyáaj nɨeꞌráꞌɨtzen!

⁵Nyáaj nu aꞌɨ́j jitze tyíꞌcaꞌnyej ɨ paj jɨn nyaxɨeꞌveꞌ,

nyaxɨéjnyuꞌcaa pu jutyamuaꞌveꞌ jiꞌnye muáaj paj nyajapuáj huatányuusij.

⁶¡Nyetyuꞌtáchuiicaj aꞌɨ́jcɨ jimi ɨ Tavástaraꞌ aꞌɨ́jcɨ jɨmeꞌ tɨ tyámuaꞌ nye jimi tyúꞌruuj!

Tyiꞌtɨ́j tɨ jeꞌej puaꞌaj jaꞌuurej aꞌɨ́jcɨ ɨ tyáatɨꞌ

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. David tɨ jitze ajtyámaꞌcan

¹Aꞌɨ́ɨmaj ɨ maj quee maꞌumuámuaꞌreꞌ aꞌyaa mu tyíꞌmuaꞌtzej tɨ quee ɨ Dios séejreꞌ,

néijmiꞌi mu meríj jeꞌej puaꞌaj huarɨ́j,

tyiꞌtɨ́j mu jɨn huápuɨꞌɨj jeꞌej puaꞌaj huarɨ́j,

¡capu sɨ́ɨj séejreꞌ tɨ tyámuaꞌ tyiꞌtyúuchaꞌɨɨj!

²Tajapuá pu ɨmuáj ɨ Tavástaraꞌ huaꞌsej aꞌɨ́ɨjma ɨ tyeɨ́tyee

tɨꞌij huoꞌséj tɨpuaꞌaj sɨ́ɨj séjreꞌej tɨ tyihuojóꞌitej,

aꞌtɨ́j tɨ ɨ Dios huoocaj.

³Ajta néijmiꞌi mu meríj aꞌɨ́j jitze ucájrupij ɨ juyéj tɨ jeꞌej puaꞌaj een,

néijmiꞌi mu juxaꞌaj tyiꞌtɨ́j jɨn meríj jeꞌej puaꞌaj huarɨ́j.

¡Capu cheꞌ sɨ́ɨj séejreꞌ tɨ tyámuaꞌ tyiꞌtyúuchaꞌɨɨcaj!

¡Capu naꞌaj sɨ́ɨj maꞌ jáꞌsejreꞌ!

⁴Camu tyihuojóꞌitej aꞌɨ́ɨmaj ɨ maj jeꞌej puaꞌaj tyityetyúuchaꞌɨj,

aꞌɨ́ɨmaj mu huaꞌcɨꞌɨn ɨ nyetyeɨ́ɨtyeristyamuaꞌ tɨꞌɨj aꞌtɨ́j tɨ páan huácuaꞌnyij,

aꞌɨ́ɨmaj ɨ maj quee jahuoo jitzán maꞌcan ɨ Tavástaraꞌ.

⁵Aꞌɨ́ɨ mu juviváaj muáꞌjuꞌun metyiꞌtzɨ́ɨnyaꞌaj,

jiꞌnye Dios pu aꞌɨ́ɨjma jimi séejreꞌ ɨ maj jaꞌtzaahuatyeꞌ.

⁶Aꞌɨ́ɨmaj mu huaꞌxaahuaj jeꞌej maj tyáꞌxɨeꞌveꞌ ɨ maj tyóoxaahuaj,

ajta ɨ Tavástaraꞌ pu tyámuaꞌ tyihuáꞌchaꞌɨj.

⁷¡Aꞌtzúj cuj aꞌájna a tɨ aꞌyan tyajaꞌrájtyapuaj tɨjɨn Sión

aꞌáa jeꞌréꞌnyej ɨ tɨ huaꞌ japua huatányuusij aꞌɨ́ɨjma ɨ maj Israel jitze ajtyámaꞌcan!

Tɨꞌɨj ɨ Tavástaraꞌ seequéj tyihuoꞌtyátoonyij aꞌɨ́ɨjma ɨ maj jitzán ajtyámaꞌcan,

aꞌɨ́ɨmaj mu huatóotyamuaꞌveꞌsij ɨ Jacob maj jitze eerámaꞌcan,

majta néijmiꞌi ɨ maj Israel jitze ajtyámaꞌcan.

Tyiꞌtɨ́j tɨ ɨ Dios tyicho ꞌveꞌ aꞌɨ́jcɨ jimi ɨ tyáatɨꞌ

Chuíicarij David tɨ joꞌyúꞌxacaꞌ

¹Tavástaraꞌ,

¿aꞌtanyíj pújoorej tɨꞌij aꞌáa joꞌquéej jáꞌraꞌnyij joꞌpaj muáaj jáꞌsejreꞌ?,

¿aꞌtanyíj pújoorej tɨꞌɨj aꞌáa jaꞌcháaj jáꞌraꞌnyij joꞌtɨj néijmiꞌi tyámuaꞌ tyejéꞌeen tɨ ajta aꞌ jitze ajtyámaꞌcan?

²Aꞌɨ́ɨ puꞌuj ɨ tɨ quee tyiꞌtɨ́j jɨn áꞌɨtzeereꞌ ajta tyámuaꞌ tyiꞌtyúuchaꞌɨj séecan jamuán,

ajta aꞌɨ́jna jɨn tyíꞌxaj ɨ tɨ jɨꞌréꞌcan jɨmeꞌ néijmiꞌi jɨmeꞌ ɨ juxɨéjnyuꞌcaa,

³aꞌɨ́jna ɨ tɨ quee aꞌtɨ́j jeꞌej puaꞌaj tyíꞌxaj,

aꞌɨ́jna ɨ tɨ quee jeꞌej puaꞌaj jaꞌuurej ɨ juꞌ amíincuj,

ajta quee jeꞌej puaꞌaj tyihuáꞌxaj ɨ maj jimi avéjriꞌ joꞌcháatɨmee,

⁴aꞌɨ́jna ɨ tɨ huaꞌxanaꞌveꞌ aꞌɨ́ɨjma ɨ maj huápuɨꞌɨj jeꞌej puaꞌaj tyityetyúuchaꞌɨj,

ajta tzáahuatyiꞌraꞌaj tyíchaꞌɨj aꞌɨ́jcɨ jimi ɨ tɨ tyáꞌtzaahuatyeꞌ ɨ Tavástaraꞌ jimi,

aꞌɨ́jna ɨ tɨ aróoꞌastee jeꞌej tɨ tyiꞌtɨ́j jɨn tyaꞌtóorasij tyij ajta quee tyámuaꞌ tyéꞌyiꞌcan jimi,

⁵aꞌɨ́jna ɨ tɨ huaꞌnyijtyeꞌ ɨ jutúmii ajta quee huáꞌhuavii mej mij jéetzeꞌ tyaanájchityeꞌen,

aꞌɨ́jna ɨ tɨquee jaxɨeꞌveꞌ tɨ tyiꞌtɨ́j ancuriáan avíitzij jɨmeꞌ aꞌɨ́jcɨ jimi ɨ tɨquee tyiꞌtɨ́j jɨn áꞌɨtzeereꞌ.

Aꞌɨ́jna ɨ tɨ aꞌyan tyiꞌtyúuchaꞌɨj, capu aꞌnáj tyiꞌtɨ́j jɨn ootyáꞌɨtzeereꞌej.

Capu tyiꞌtɨ́j ajtáhuaꞌaj séejreꞌ tɨ jéetzeꞌ tyámuaꞌ een tyej tyij jaꞌancuriáꞌan

Jeꞌej tɨ tyiꞌriáꞌmuaꞌaj jutzájtaꞌ aꞌɨ́jna ɨ David

¹¡Nyéetzij náachaꞌɨj, Dios, jiꞌnye muéetzij nu jimi jahuoo pej pij naatyáhuɨɨreꞌen!

²Nyáaj nu aꞌyan tyimuaatéꞌexaaj tɨjɨn:

“Muáaj paj nyavástaraꞌ puéꞌeen, ɨ tɨ néijmiꞌi nye jimi tyámuaꞌ tyíꞌuurej,

capu tyiꞌtɨ́j ajtáhuaꞌaj séejreꞌ tɨ aꞌyan een patɨꞌɨj muáaj.”

³Aꞌɨ́ɨmaj ɨ huaꞌ dioosijtyamuaꞌ jéehua mu uhuájcaꞌnyej,

aꞌyaa mu tyíꞌxaj aꞌɨ́ɨmaj ɨ maj huaꞌ jimi tyáꞌtzaahuatyeꞌ,

⁴aꞌɨ́ɨmaj ɨ maj huaꞌ muiꞌrej ɨ jusáanturistyamuaꞌ

majta jéehua huaꞌ jitze tyíꞌcaꞌnyej.

¡Canu aꞌnáj tyiꞌtɨ́j aꞌyan uuren matɨꞌɨj aꞌɨ́ɨmaj rɨcɨj ɨ xúureꞌej jɨmeꞌ!

¡Canu aꞌnáj huoꞌtaxájta jeꞌej maj aꞌɨ́ɨmaj ántyaꞌruj!

⁵Muáaj, Tavástaraꞌ, muéetzij jimi nu néijmiꞌi tyíꞌijchaꞌɨj,

muáaj paj néijmiꞌi jɨn tyámuaꞌ tyinaatyátoosij,

nyajúuricamej nu muéetzij jimi jaatyátoosij.

⁶Aꞌɨ́j nu tyuꞌmuéꞌtɨj aꞌáa tɨ tyejéꞌsejreꞌ joꞌtɨj huápuɨꞌɨj naa tyojoꞌséꞌrin,

¡naa pu tyuꞌséꞌrin aꞌɨ́jna ɨ nyéetzij tɨ tyinaacɨ́ꞌɨj!

⁷Nyetyaatatyójtziꞌreꞌej ɨ Tavástaraꞌ, jiꞌnye aꞌɨ́ɨ pu tyámuaꞌ tyinuꞌcájuyetyej,

ajta néijmiꞌqueꞌ ɨ nyatzájtaꞌ aꞌɨ́ɨ pu tɨ́caꞌ tyámuaꞌ tyinuꞌcámuaꞌriityee.

⁸Aꞌnáj tɨnaꞌaj nu tyámuaꞌ tyáꞌmuaꞌreej tɨ ɨ Tavástaraꞌ nye jimi yésejreꞌ,

aꞌɨ́ɨ pu nyamuácaꞌtaꞌ pujmuaꞌ séejreꞌ, canu nyij tyiꞌtɨ́j jɨn ootyáꞌɨtzeereꞌej.

⁹Aꞌɨ́j pu jɨn, ɨ nyatzájtaꞌ,

jéehua pu ɨ nyaxɨéjnyuꞌcaa jutyamuaꞌveꞌ.

Néijmiꞌi pu ɨ nye tyévij juxáahuaj séeriaꞌaj jaꞌmej,

¹⁰jiꞌnye capáj tyuꞌtáꞌsij nyaj aꞌáa jaꞌséeriaꞌaj náꞌraꞌnyij joꞌmaj tyityajáꞌavaꞌtacaa,

¡capáj tyuꞌtáꞌsij tɨ aꞌɨ́jna ɨ tɨ tyámuaꞌ aꞌ jimi tyíꞌsejreꞌ huatyéjpetyej joꞌtɨj jaꞌtyácun!

¹¹Panaataséjratyeꞌsij ɨ juyéj tɨ jitzán séejreꞌ ɨ júuricamej.

Jéehua pu tyámuaꞌviꞌraꞌaj séejreꞌ aꞌájna joꞌpaj muáaj jáꞌsejreꞌ,

tyámuaꞌ pu jusén jɨmeꞌ tyíꞌeen muéetzij jimi.

Jeꞌej tɨ tyuꞌtyényuunyij tɨꞌij jimi tyámuaꞌ tyáꞌraꞌnyij

Jeꞌej tɨ tyuꞌtyéenyuj aꞌɨ́jna ɨ David

¹Tavástaraꞌ, huánamuaj nyaj quee tyiꞌtɨ́j jɨn áꞌɨtzeereꞌ,

pajta aꞌyan huárɨnyij jeꞌej nyaj tyíꞌmuahuaviij,

tyámuaꞌ tyuꞌnamuaj jeꞌej nyaj aꞌ jimi tyáꞌhuoo,

jiꞌnye capu tyenyij jitze éejnyinyii tɨ tyíꞌhueꞌtacaa.

²¡Cheꞌ muéetzij jimi joꞌvéꞌmeꞌen ɨ maj jɨn náꞌxɨjtyeꞌen

jiꞌnye muáaj paj jamuaꞌreej jeꞌej tɨ tyíꞌxaꞌpuɨꞌɨn!

³Muáaj paj períj jamuaꞌreej jeꞌej nyaj tyíꞌmuaꞌtzej,

tɨ́caꞌ paj mujoꞌvéꞌmej pej pij náachaꞌɨɨn,

tyámuaꞌ paj períj huápuɨꞌɨj naa tyinaatyéesej,

pajta quee tyiꞌtɨ́j huátyoj tɨ jeꞌej puaꞌaj een.

Canu tyiꞌtɨ́j huataxájtacaꞌ tɨ quee aꞌyan tyiꞌjaꞌyájnatacaꞌaj,

⁴aꞌyájna matɨꞌɨj ɨ séecan rɨcɨj,

nuꞌríj ajtáraa aꞌɨ́ɨjma jimi ɨ maj jéehua junyoꞌsiꞌtyeꞌ,

aꞌyájna patɨꞌɨj muáaj tyuꞌtaꞌíjtacaꞌ aꞌnyúucaa jitze.

⁵Tyámuaꞌ nu naa tyuꞌméj aꞌ juyéj jitze,

canu aꞌnáj ajtáraa aꞌɨ́jcɨ jitze aꞌnyúucaa ɨ paj jɨn tyuꞌtaꞌíjtacaꞌ.

⁶Dios, muéetzij nu jimi huatyényuusij,

jiꞌnye muáaj paj nyanamuaj,

pataꞌaj náanamuaj, huánamuaj jeꞌej nyaj tyíꞌxaj.

⁷Tyámuaꞌ paj naa tyinaataséjratyeꞌen ɨ paj jɨn nyaxɨeꞌveꞌ,

muáaj, ɨ paj huaꞌ japua huatányuusij aꞌɨ́ɨjma jimi ɨ maj huaꞌajchaꞌɨɨreꞌ

aꞌɨ́ɨmaj ɨ maj jahuoo paj aꞌɨ́jna jɨn huoꞌtyáhuɨɨreꞌen ɨ paj néijmiꞌi jɨn putyíꞌuurej.

⁸Aꞌyaa paj tyináachaꞌɨɨn tɨꞌɨj aꞌyóoj paj huápuɨꞌɨj jaxɨeꞌveꞌ,

micheꞌ aꞌɨ́ɨmaj tyámuaꞌ tyináachaꞌɨɨn ɨ maj aꞌ jimi tyíꞌhuɨɨreꞌ

⁹aꞌɨ́ɨjma jimi ɨ maj nyéetzij nyenyoꞌsiꞌtyeꞌej,

¡ɨ maj nyéjchaꞌɨɨreꞌ majta tyíꞌtyacuiꞌcaa aꞌɨ́ɨ mu meríj nyajná!

¹⁰Aꞌɨ́ɨ mu óotzaahuatyeꞌ, majta tyíꞌxaj mahuaꞌxáahuataj ɨ séecan,

¹¹aꞌɨ́ɨ mu véjriꞌ nyacújtaꞌ naavájraj

aꞌyaa mu tyeꞌejchóꞌveꞌ mej mij nɨeꞌtárɨeenyij aꞌ chóotaꞌ.

¹²Aꞌyaa mu huaséꞌrin matɨꞌɨj ɨ muajyéj, muajyéj maj huápuɨꞌɨj nyinyuꞌcacuj

aꞌáa mu mij tyámuaꞌ jéꞌeen joꞌmaj jóoꞌavaꞌtacaa

majta huápuɨꞌɨj aꞌɨ́jna jɨn tyiꞌijchóꞌveꞌ mej mij ootátzunaxɨꞌɨn.

¹³Ájchesij, Tavástaraꞌ, ¡pataꞌaj huoꞌtanyóꞌsiꞌtyeꞌen aꞌɨ́ɨjma!

¡Aꞌyaa paj huóꞌuurej mej mij tyítunutaxɨꞌɨn!

Aꞌ chúun jɨmeꞌ, aꞌɨ́j paj jɨn nyajapuáj huatányuunyij aꞌɨ́jcɨ jimi ɨ tɨ jeꞌej puaꞌaj tyiꞌtyúuchaꞌɨj,

¹⁴aꞌɨ́jna ɨ paj jɨn néijmiꞌi putyíꞌuurej, Tavástaraꞌ, aꞌɨ́j paj jɨn nyajapuáj huatányuunyij,

¡huiꞌrájhuaꞌxɨj aꞌíjcɨ jitze ɨ cháanacaj,

ɨ maj jitzán jahuoo ɨ tɨ tyihuáꞌcɨꞌtyij!

Tyuꞌtáꞌ mej mij aꞌɨ́ɨmaj huoochíjtyaanyiꞌtaj,

mej mij ɨ huaꞌyojmuaꞌ tyúꞌcuaꞌnyij ꞌasta manaꞌaj quee jóꞌvetyij,

ajta tɨꞌij aꞌyan ajta tyáꞌraꞌnyij aꞌɨ́ɨjma jimi ɨ huaꞌ yaaxújmuaꞌ.

¹⁵Ajta aꞌyan tyiꞌjɨꞌréꞌcan jɨmeꞌ, nyej nyáaj nyaxáahuaj séeriaꞌaj naꞌmej

aꞌɨ́jcɨ jɨmeꞌ nyaj aꞌ nyéerimij huaséj,

¡nyaj muéetzij jimi séjreꞌej nyatɨꞌɨjta huájɨstij!

Jeꞌej maj tyuꞌtáchuiicaj matɨꞌɨj tyuꞌtyámueꞌtɨn

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. David tɨ jitze ajtyámaꞌcan, Tavástaraꞌ tɨ jimi tyíꞌhuɨɨreꞌ, ɨ tɨ aꞌíjcɨ ɨ chuíicarij huatáchuicacaꞌaj tɨꞌɨj ɨ Tavástaraꞌ japuan huatanyúj aꞌɨ́jcɨ jimi ɨ Saúl ajta néijmiꞌcaa jimi ɨ maj jájchaꞌɨɨriaꞌcaꞌaj. Aꞌɨ́ɨ pu aꞌyan tyuꞌtaxájtacaꞌ tɨjɨn:

¹Muáaj, Tavástaraꞌ, aꞌɨ́ɨ paj puéꞌeen ɨ nyaj jɨn uhuájcaꞌnyej;

¡nyáaj nu muaxɨeꞌveꞌ!

²Muáaj paj naatyáhuɨɨreꞌej,

aꞌɨ́ɨ paj puéꞌeen ɨ tɨ nɨeꞌcánasij,

ɨ tɨ nyajapuáj huatányuusij,

nyaj Dios,

ɨ tyetyéj tɨ nyéetzij naatyánasij,

ɨ nyaj jɨn huatyényanaj,

ɨ tɨ néijmiꞌi putyíꞌuurej tɨꞌij nyajapuáj huatányuunyij,

ajta ɨ tɨ jitzán ɨꞌríj nyaj huatyényaꞌavaaj jútyeꞌ ɨmuáj.

³Muáaj, Tavástaraꞌ, aꞌyaa pu a jimi tyiꞌtyéevijtɨj mej mij tyuꞌtáchuiicaj,

nyatɨꞌɨjta muaatájeevej, aj paj nyaj japua huatányuusij aꞌɨ́ɨjma jimi ɨ maj nyéjchaꞌɨɨreꞌ.

⁴Aꞌɨ́jna ɨ tɨ tyeꞌentyípuaapuaꞌrityee pu naatyáajɨꞌquej

nyetyuꞌtátzɨn aꞌɨ́jcɨ jimi ɨ tɨ néijmiꞌi tyeꞌentyiꞌúꞌnaj.

⁵Aꞌɨ́jna ɨ tɨ tyeꞌentyípuaapuaꞌrityee pu nyojoꞌrɨej,

¡aꞌɨ́ɨ pu naatyáajɨꞌquej tɨꞌij naajéꞌcaj!

⁶Nyatɨꞌɨj jeꞌej tyéꞌnyamuaꞌajcaa Tavástaraꞌ nu jimi huatyéenyuj,

naatyéenyuj tɨꞌij ɨ Dios naatyáhuɨɨreꞌen,

aꞌɨ́ɨ puꞌij náanamuajriꞌ ɨ ju tyeyúuj tzajtaꞌ,

¡aꞌɨ́ɨ pu jáanamuajriꞌ ɨ nyaj huajíjhuacaꞌ!

⁷Aj puꞌij huápuɨꞌɨj caꞌnyíin jɨn huatóocaꞌtzɨj ɨ chuéj,

aꞌɨ́ɨ pu néijmiꞌqueꞌ tyuꞌtóocaꞌtzɨj ɨ jɨríj,

aꞌɨ́j pu jɨn tyuꞌtáhuaaxɨj ɨ Tavástaraꞌ tɨ nyúꞌcamuɨꞌ,

⁸Tzúꞌritaꞌ pu cɨtzíj iráanyej,

ajta ɨ tyényiꞌtzeꞌ ɨ tɨéj tɨ néijmiꞌi tyeꞌentyiꞌúꞌnaj,

¡jutyényij jitze pu tɨꞌɨxcuáa éejhuaꞌnaa tɨ aꞌtáatɨmee!

⁹Aꞌɨ́ɨ pu tyaꞌantacúj ɨ tajapuá, tɨꞌquij yavaꞌcáanyej.

¡Ajta jityán ɨ ɨcájraꞌan jitze jéehua pu jéetɨrij séjriaꞌcaꞌaj tɨ xúꞌmuaa!

¹⁰Aꞌɨ́j pu séej japua avéꞌyixɨj ɨ tajapuá maj tyíꞌhuɨɨreꞌ, tɨꞌquij huataráꞌraj

aꞌɨ́ɨ pu jaatátajchacaꞌ ɨ áacaj.

¹¹Aꞌɨ́j pu jɨn huatyóoꞌavaatacaꞌ,

ajta aꞌɨ́jna jɨn ahuóonaj,

ɨ jéetɨrij tɨ xúꞌmuaa tɨ jéehua séjriaꞌcaꞌaj

ajta aꞌɨ́jna jitze ɨ jéetɨrij tɨ xúꞌmuaa jéehua pu jájtyij séjriaꞌcaꞌaj.

¹²Aj puꞌij tatzárij áan jeꞌráanyej joꞌtɨj jeꞌej jéꞌeenyeꞌej tɨ aꞌyan huaséꞌrihuaꞌaj tɨꞌɨj maj huatyóonaꞌaxcavaꞌxɨꞌɨn ɨ víityee,

aj mu mij ɨ jéetɨrij tzajtaꞌ tyéetyee ajeꞌcáavatzɨj ajta tɨꞌɨxcuáa tɨ aꞌtáatɨmee.

¹³Aꞌɨ́jna ɨ Tavástaraꞌ, jútyeꞌ ɨmuáj tɨ jáꞌsejreꞌ,

aꞌyaa pu jútyeꞌ ɨmuáj ɨ nyúucariaꞌraꞌ tyuꞌtánamuajrej tɨꞌɨj víityee maj huatányuunyij,

tyéetyee jamuán ajta tɨꞌɨxcuáa tɨ aꞌtáatɨmee.

¹⁴Aꞌyaa mu ɨ víityee tyityetyóonaꞌaxcavaꞌraj tɨꞌɨj ɨꞌrɨ́j tɨ jɨn tyuꞌtámuɨɨnyij,

chaꞌ muꞌuj mij huatóoꞌuj aꞌɨ́ɨmaj ɨ maj nyéjchaꞌɨɨreꞌ.

¹⁵Ajta pu huataséjre ɨ tɨ quee séjriaꞌcaꞌaj tyétyeꞌ ɨmuáj ɨ jájritzeꞌ,

ajta ɨ cháanacaj tɨ japua aróocaꞌnyej aꞌɨ́ɨ pu ajta huataséjre

aꞌɨ́jna jɨmeꞌ tɨ tzɨ́ɨnyiꞌreꞌ huatánamuajre ɨ nyúucariaꞌraꞌ ɨ Tavástaraꞌ,

ajta aꞌɨ́jna jɨmeꞌ ɨ tɨ caꞌnyíin jɨn tyuꞌtajɨ́ꞌtzej.

¹⁶Dios pu jumuácaꞌ jɨn naꞌajriáj jútyeꞌ ɨmuáj joꞌtɨj aꞌɨ́ɨn jáꞌsejreꞌ,

jumuácaꞌ puꞌij ajta jɨn naꞌajriáj aꞌɨ́jcɨ jitze ɨ jájritzeꞌ tɨ jéehua ootɨ́ꞌ.

¹⁷Nyajapuáj pu huatanyúj aꞌɨ́ɨjma jimi ɨ maj huápuɨꞌɨj uhuácacaꞌnyeꞌ maj nyéjchaꞌɨɨreꞌ.

Ɨ maj nyaxanaꞌvaꞌcaꞌaj majta jéetzeꞌ uhuácacaꞌnyeꞌ nye quee nyáaj.

¹⁸Aꞌaj mu naatanyóꞌsiꞌtyej nyatɨꞌɨj quee jeꞌej tyéejviicueꞌracaꞌaj,

ajta ɨ Tavástaraꞌ pu naatyáhuɨɨ,

¹⁹aꞌɨ́ɨ pu nɨiꞌrájtoo jóꞌnyej nyaxáahuaj jáꞌsejriaꞌaj,

¡nyajapuáj pu huatanyúj aꞌɨ́jcɨ jɨmeꞌ ɨ tɨ nyaxɨeꞌvaꞌcaꞌaj!

²⁰Ɨ Tavástaraꞌ pu naatáꞌ ɨ nyaj jaamuéꞌtɨj

aꞌɨ́jna ɨ tɨ nyacɨꞌpuáatacaj aꞌɨ́jcɨ jɨmeꞌ nyej tyámuaꞌ tyiꞌtyínyechaꞌɨj,

²¹jiꞌnye nyáaj nu aꞌɨ́j jitze ucáamej ɨ juyáaraꞌ ɨ Tavástaraꞌ,

¡canu aꞌnáj jaatyáhueꞌtacaꞌ ɨ nyaj Dios!

²²Nyáaj nu aꞌnáj tɨnaꞌaj jamuaꞌreej jeꞌej tɨ aꞌɨ́ɨn tyuꞌtaꞌíjtacaꞌ,

canu aꞌnáj jaatyáxaahuatacaꞌ jeꞌej tɨ aꞌɨ́ɨn junyúucaa jɨn tyuꞌtaꞌíjtacaꞌ.

²³Canu tyiꞌtɨ́j jɨn aꞌɨtzéeriaꞌaj naaméj aꞌɨ́jcɨ jimi,

nuꞌríj ajtáraa aꞌɨ́jcɨ jitze ɨ tɨ jeꞌej puaꞌaj een.

²⁴Tavástaraꞌ pu tyinaatáꞌ tyiꞌtɨ́j nyaj huamueꞌtɨj

aꞌɨ́jcɨ jɨmeꞌ nyaj néijmiꞌi jɨn tyámuaꞌ huarɨ́j joꞌtɨj aꞌɨ́ɨn jáꞌsejreꞌ.

²⁵Muáaj, Tavástaraꞌ, tyámuaꞌ paj éenyeꞌej séejreꞌ aꞌɨ́jcɨ jimi ɨ tɨ tyámuaꞌ tyíꞌsejreꞌ,

ajta jɨꞌréenyeꞌej séejreꞌ aꞌɨ́jcɨ jimi ɨ tɨquee tyiꞌtɨ́j áꞌɨtzeereꞌ,

²⁶pajta quee hueꞌtzij jɨn séejreꞌ aꞌɨ́jcɨ jimi ɨ tɨ quee tyíꞌhueꞌtacaa,

pajta huápuɨꞌɨj jariaꞌmuaꞌreej aꞌɨ́jcɨ jimi ɨ tuꞌcájmuaꞌrej.

²⁷Muáaj paj huaꞌ japua huatányuusij aꞌɨ́ɨjma ɨ maj quee óotzaahuatyeꞌ,

pajta jéehua huoꞌtyáxaahuataj aꞌɨ́ɨjma ɨ maj óotzaahuatyeꞌ.

²⁸Muáaj, Tavástaraꞌ, muáaj paj naatyátatzaviꞌtyeꞌej,

muáaj, nyaj Dios, muáaj paj naatyátatzaviꞌtyeꞌej aꞌájna joꞌtɨj joꞌtɨ́caꞌ.

²⁹Muáaj paj naatáhuɨɨreꞌsij aꞌɨ́j nu jɨn jaatyánasij aꞌɨ́jcɨ ɨ tɨ nyéjchaꞌɨɨreꞌ,

ajta quee naatyánasij ɨ tɨ jɨn curiaꞌnámiꞌhuajmee ɨ huaꞌ chájtaꞌnaj.

³⁰Aꞌɨ́jna ɨ juyáaraꞌ ɨ Dios néijmiꞌi pu jɨn tyámuaꞌ een,

ajta ɨ tɨ jɨn tyaꞌtóoratziiriꞌ ɨ Dios aꞌɨ́j pu jitze ɨꞌríj tyaj jitzán tyúꞌcaꞌnyej,

¡Dios pu huoꞌtyéchaꞌɨɨsij néijmiꞌcaa aꞌɨ́ɨjma ɨ maj jitzán tyíꞌcaꞌnyej!

³¹¿Aꞌtanyíj Dios puéꞌeen, tɨ quee Tavástaraꞌ jitze séejreꞌ?

¿Tyiꞌtanyí dios raꞌ ajtáhuaꞌaj sɨ́ɨj séejreꞌ tɨꞌij taatyéchaꞌɨɨn?

³²Dios pu aꞌɨ́ɨn puéꞌeen ɨ tɨ caꞌnyíjraꞌaj nyatáꞌcaa,

aꞌɨ́ɨ pu tyámuaꞌ jaꞌuurej jeꞌej nyej nyáaj tyiꞌtyínyechaꞌɨj,

³³aꞌɨ́ɨ pu tyiꞌtáꞌcaa tɨquee aꞌchu tyíjetyej ɨ nye chapuáaj, aꞌyájna tɨꞌɨj ɨ muaxáj,

ajta nyatáꞌcaa nyej nyij tyámuaꞌ eenyeꞌ séejreꞌ jútyeꞌ ɨmuáj,

³⁴aꞌɨ́ɨ pu tyámuaꞌ nyaꞌuurej nyej nyij huatyényoꞌseꞌen,

caꞌnyíjraꞌaj pu nyatáꞌcaa nyej nyij jaꞌantyítutaj ɨ túꞌnamuaꞌaj tyapúustiꞌ tɨ jɨn taavijhua.

³⁵Muáaj paj nyechaꞌɨj pajta nyajapuáj huatányuusij,

pajta tyámuaꞌ naa tyíꞌnyeviꞌ aꞌmuácaꞌtaꞌ jɨmeꞌ,

puꞌríj tyámuaꞌ tyinaatyáhuɨɨ aꞌɨ́jna muáaj paj tyinaatáꞌ.

³⁶Tyámuaꞌ paj tyúꞌruuj ɨ nyajuyéj jitze tɨꞌij quee tyiꞌtɨ́j nyetyesiꞌhuarityeꞌ,

canu nyij tyiꞌtɨ́j jitze éejcataj ɨ nyaꞌ ɨ́ɨcaj jɨmeꞌ.

³⁷Nyahuoꞌtaven ɨ maj nyéjchaꞌɨɨreꞌ nyajta jeꞌen huoꞌtáaꞌsacaꞌ,

aj nu nyij tányij huariáꞌraa nyatɨꞌɨj huaꞌantyipuaꞌrityaꞌaj.

³⁸Nyahuoꞌtyátzaanaxɨj. Camu cheꞌ ájhuiixɨj.

Aꞌɨ́ɨ mu eetavátzɨj jóꞌnyaj jaꞌraꞌɨ́ɨcajmee.

³⁹Muáaj paj caꞌnyíjraꞌaj naatáꞌ nyatɨꞌɨj huatyéenyoꞌsej,

muáaj paj aꞌyan huóꞌruuj maj aꞌɨ́ɨmaj nye jimi ecóotutaxɨꞌɨn ɨ maj quee tyuꞌnamuaj,

⁴⁰ajta mej mij nye jimi huatóoꞌuunaj aꞌɨ́ɨmaj ɨ maj nyéjchaꞌɨɨreꞌ.

Aꞌyaa nu nyij tyihuaꞌantyipuáꞌrij aꞌɨ́ɨjma ɨ maj nyaxanaꞌvaꞌcaꞌaj.

⁴¹Aꞌɨ́ɨ mu jahuoocaꞌaj maj huoꞌtáhuɨɨreꞌen, ajta capu aꞌtɨ́j huoꞌtáhuɨɨrej,

Tavástaraꞌ mu majta huatajé, ajta aꞌɨ́ɨn quee huóꞌnamuajriꞌ.

⁴²¡Aꞌyaa nu huóꞌruuj tɨꞌɨj chuéj tɨ muɨɨnyíj áacaj tɨ jajcuiꞌnaj!

¡Nyajta aꞌyan atyihuojóoraxɨj tɨꞌɨj xɨéerij a cáayej jitze!

⁴³Nyajapuáj paj huatanyúj aꞌɨ́ɨjma jimi ɨ tyeɨ́tyee maj quee tyihuojóꞌitej,

pajta naatáꞌ nyej nyij néijmiꞌqueꞌ tyuꞌtaꞌíjtaj

majta tyeɨ́tyee nyahuɨɨreꞌ ɨ nyej nyáaj quee huáꞌmuajtyajcaꞌaj.

⁴⁴Matɨꞌɨjta náanamuaj, aꞌɨ́ɨ mu naꞌráꞌastijreꞌej,

tyeɨ́tyee mu tyámuaꞌ tyíꞌnyaxaj ɨ maj séej chuéj japua joꞌcháatɨmee,

⁴⁵majta séecan ɨ tyeɨ́tyee ɨ maj majta séej chuéj japua joꞌcháatɨmee aꞌɨ́ɨ mu quee cheꞌ jeꞌej jájtyoovej

majta juviváaj iiráajuꞌ joꞌmaj jóoꞌavaatacaꞌaj.

⁴⁶¡Cheꞌ jusén jɨn séjreꞌej ɨ Tavástara!

¡Cheꞌ tyámuaꞌ eenyeꞌ ɨ tɨ nyechaꞌɨj!

¡Nyicheꞌ vaꞌcán jɨn tyámuaꞌ tyeetyátoonyij ɨ Dios tɨ nyaj japua huatányuusij!

⁴⁷Aꞌɨ́ɨ pu Dios puéꞌeen ɨ tɨ puéjtzij huoꞌtaꞌsij aꞌɨ́ɨjma ɨ maj jeꞌej puaꞌaj nyoorej

ajta naatáꞌ nyej nyáaj tyihuoꞌtaꞌíjtyeꞌen ɨ tɨ chájtaꞌnajmee jitze.

⁴⁸Aꞌɨ́ɨ pu nyajapuáj huatányuusij ɨ maj jɨn nyajaaxɨejviꞌ ɨ maj nyéjchaꞌɨɨreꞌ,

ajta aꞌɨ́ɨjma jimi ɨ maj quee tyihuojóꞌitej ɨ maj nyeyoꞌsiꞌtyaꞌcuj.

¡Muáaj, Tavástaraꞌ, muáaj paj nyaj japua huatányuusij aꞌɨ́ɨjma jimi ɨ tyétyacaa maj tyoꞌcájaaxɨejveꞌ!

⁴⁹Aꞌɨ́j nu jɨn tyíꞌmuatyojtziꞌreꞌ huaꞌ tzajtaꞌ ɨ tyeɨ́tyee,

nyajta tyuꞌtáchuiicaj aꞌɨ́jcɨ jitze ɨ paj jɨn ántyapuaj.

⁵⁰Muáaj paj tyiꞌtáꞌcaa tɨ tyuꞌtyámueꞌtɨj aꞌɨ́jna ɨ paj rey jɨn jaꞌantyíhuoj,

aꞌnáj tɨnaꞌaj paj tyámuaꞌ tyeetyátoosij aꞌɨ́jcɨ ɨ David pajta ɨ maj jitzán eerámaꞌcan.

Ɨ tɨ jɨn ɨ Dios naa huaséꞌrin aꞌɨ́jcɨ jitze ɨ tɨ tyúꞌtaahuacaꞌ

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Chuíicarij David tɨ joꞌyúꞌxacaꞌ

¹Ɨ tajapuá tɨ séejreꞌ pu jaxaj ɨ tɨ jɨn ɨ Dios naa huaséꞌrin,

ajta ɨ tɨ tyúꞌtaahuacaꞌ pu jɨn ámiteereꞌ tɨ aꞌɨ́ɨn jéehua tyuꞌyíꞌtɨn.

²Aꞌnáj tɨnaꞌaj mu jatyáxajta,

majta ɨ tɨ́caꞌ néijmiꞌqueꞌ jamuaꞌreeren.

³Tyij ajta quee namuajreꞌ ɨ maj tyiꞌtyáxajta

capu sɨ́ɨj nyúucarij namuajreꞌ,

⁴ajta ɨ nyúucariaꞌraꞌ pu néijmiꞌqueꞌ muaꞌreeriꞌhuan ɨ cháanacaj japua,

aꞌáa pu jáꞌmuaꞌreeriꞌhuan joꞌtɨj ɨ cháanacaj jooꞌástɨmee.

Aꞌáa pu Dios tyámuaꞌ tyojoꞌruuj tɨꞌij ɨ xɨcáj aꞌáa jaꞌséeriaꞌaj jáꞌraꞌnyij,

⁵ajta aꞌyan tyiꞌráamej tyámuaꞌ éenyeꞌej tɨꞌɨj ɨ tɨ huatyényeɨɨchij,

aꞌyaa pu tyuꞌtóotyamuaꞌveꞌsij tɨꞌɨj ɨ tɨ tɨeꞌchacaa tɨꞌij tyuꞌmuéꞌtɨn.

⁶Aꞌyaa pu ɨ xɨcáj utyejeꞌejnyésij jitzán ɨ jútyeꞌ tɨ séejreꞌ,

ajta jeꞌen ujaꞌancárutyij yu pujmuaꞌ aꞌɨ́jcɨ jitze ɨ tajapuá tɨ séejreꞌ,

ajta quee huatáɨꞌriitarij tɨ tyiꞌtɨ́j huatyóoꞌavaaj tɨꞌij quee jatyátɨeexɨꞌrasimeꞌen.

⁷Néijmiꞌi pu jɨn tyámuaꞌ een ɨ Tavástaraꞌ tɨ jɨn tyíꞌmuaꞌtaj,

jiꞌnye aꞌɨ́ɨ pu jájcuacan tyuꞌtáꞌcaa ɨ júuricamej.

Tyámuaꞌ pu een ɨ Tavástaraꞌ tɨ jɨn tyuꞌtaꞌíjtacaꞌ,

jiꞌnye tyámuaꞌ pu tyuꞌcámuaꞌriityej aꞌɨ́jcɨ ɨ tyáataj tɨ quee óotzaahuatyeꞌ.

⁸Ɨ Tavástaraꞌ tɨ jɨn tyuꞌtaꞌíjtacaꞌ tyámuaꞌ pu tyíꞌeen,

jiꞌnye tyámuaꞌviꞌraꞌaj pu tatáꞌcaa ɨ taxɨéjnyuꞌcaa tzajtaꞌ.

Ɨ nyúucarij tɨ jɨn tyuꞌtaꞌíjtacaꞌ ɨ Tavástaraꞌ aꞌɨ́ɨ pu jumuaꞌtɨj

ajta tyámuaꞌ tyitaꞌtanyéjnyeꞌrityee ɨ tajɨꞌɨj jitze.

⁹Tyámuaꞌ pu een ɨ Tavástaraꞌ tyaj jɨn huátzaahuatyeꞌen

ajta jusén jɨmeꞌ séejreꞌ.

Jɨꞌréꞌcan jɨmeꞌ pu séejreꞌ ɨ nyúucarij Tavástaraꞌ tɨ jɨn tyuꞌtaꞌíjtacaꞌ,

néijmiꞌi puꞌij aꞌɨ́ɨn tyámuaꞌ tyíꞌeen,

¹⁰¡jéetzeꞌ pu tyáꞌnajchij quee ɨ ooroj tɨ jumuaꞌtɨj!,

¡jéetzeꞌ pu áncacaj mequee ɨ sarátyee maj jumuaꞌtɨj!

¹¹Aꞌíi pu aꞌɨ́ɨn puéꞌeen ɨ tɨ jachaꞌɨj aꞌɨ́jcɨ ɨ tɨ muéetzij muahuɨɨreꞌ,

ajta tyámuaꞌ jimi tyeꞌmej tɨpuaꞌaj jaꞌráꞌastijreꞌen.

¹²¿Aꞌtanyíj jusɨ́ɨj jamuaꞌreeren tyiꞌtɨ́j tɨ jɨn quee xáꞌpuɨꞌ huarɨ́j?

¡Tyinaatúꞌuunyiꞌ, Tavástaraꞌ, ɨ nyaj jɨn quee xáꞌpuɨꞌ huarɨ́j avíitzij jɨmeꞌ!

¹³Capáj tyiꞌtáꞌcareꞌen tɨ óotzaahuatyeꞌej aꞌɨ́jna ɨ tɨ muahuɨɨreꞌ,

capáj tyiꞌtáꞌcareꞌen tɨ aꞌɨ́ɨn tyinaataꞌíjtyeꞌen ɨ nyaj jɨn áꞌnyatzaahuatyeꞌ.

Aꞌyaa nu nyij tyáatɨꞌ tyiꞌ pueꞌéenyeꞌej naꞌmej tɨ quee tyiꞌtɨ́j jɨn áꞌɨtzeereꞌ,

aꞌyaa nu nyij quee cheꞌ vaꞌcán jɨn tyiꞌijxánaꞌcɨraꞌaj naꞌmej.

¹⁴Cheꞌ tyámuaꞌ eenyeꞌ muéetzij jimi

ɨ nyenyúucaa ajta jeꞌej nyaj tyíꞌmuaꞌtzej,

Nyavástaraꞌ, muáaj paj nyahuɨɨreꞌ pajta nyajapuáj huatányuusij.

Jeꞌej tyaj tyityeetyényuunyij tyej tyij tyuꞌtyámueꞌtɨn

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Chuíicarij David tɨ joꞌyúꞌxacaꞌ

¹Cheꞌ ɨ Tavástaraꞌ muáanamuaj tɨpuaꞌaj jeꞌej petyaꞌamuaꞌajcaj,

cheꞌ ɨ Dios raꞌ aꞌɨ́jcɨ ɨ Jacob aꞌ japua huatányuunyij.

²Cheꞌ aꞌɨ́ɨn uyoꞌtaꞌítyej ɨ paj jɨn huatyáꞌhuɨɨreꞌen

aꞌáa pu ɨmuáj yoꞌtaꞌítyij aꞌ tɨ aꞌyan tyajaꞌrájtyapuaj tɨjɨn Sión.

³Cheꞌ néijmiꞌi tyoꞌtámuaꞌreej ɨ paj jimi tyuꞌtámuꞌvejritacaꞌ

ajta tyámuaꞌ tyihuaꞌancuriaꞌan ɨ yaꞌmuáatyee paj jimi huoꞌtámuꞌvejritacaꞌ.

⁴Cheꞌ néijmiꞌi jɨn aꞌyan huárɨnyij jeꞌej paj tyáꞌxɨeꞌveꞌ

ajta jeꞌen aꞌyan huárɨnyij jeꞌej paj períj tyaataxájtacaꞌ.

⁵Aꞌyaa tu tyij aꞌɨ́jna jɨn tyíꞌyeꞌesten ɨ paj jɨn tyuꞌtyámueꞌtɨj,

tyajta jeꞌen jútyeꞌ ajméjcaꞌtaxɨꞌɨj

nyúucaritzeꞌ aꞌɨ́jcɨ ɨ taj Dios.

¡Cheꞌ ɨ Tavástaraꞌ néijmiꞌi jɨn aꞌyan huárɨnyij jeꞌej paj tyaatáhuaviiraj!

⁶Tyámuaꞌ nu naa tyáꞌmuaꞌreej tɨ ɨ Tavástaraꞌ

jaatáꞌsij tɨ tyuꞌtyámueꞌtɨn aꞌɨ́jna ɨ rey aꞌɨ́ɨn tɨ jaꞌantyíhuoj,

ajta janamuajran aꞌájna a tajapuá joꞌtɨj tyámuaꞌ tyejéꞌeen,

aꞌɨ́ɨ pu jaatáꞌsij ɨ tɨ néijmiꞌi jɨn putyíꞌuurej tɨꞌij vaꞌcán jɨn tyuꞌtyámueꞌtɨn.

⁷Séecan mu aꞌɨ́ɨjma huaꞌajchaꞌɨj ɨ cariáataꞌ ɨ maj jitzán huanyoꞌseꞌen

majta séecan ɨ cahuáayuꞌuj huáyaꞌmuaj,

tyajta ityáj aꞌɨ́j tu jitze ajtyuꞌuj ɨ Tavástaraꞌ taj Dios.

⁸Aꞌɨ́ɨ mu tyítunutaxɨj, matɨꞌɨj mij eetávatzɨj,

tyajta ityáj tyóocheꞌ tu tyámuaꞌ een tyajta huatyuꞌuj.

⁹Tavástaraꞌ, ¡huatáꞌ tɨ tyuꞌtyámueꞌtɨn aꞌɨ́jna ɨ tɨ rey jɨn tyiꞌtyéjvee!

¡Pajta táanamuaj tyatɨꞌɨjtá muaatájeevej!

Jeꞌej tyaj tyuꞌtáchuiicaj tyatɨꞌɨj tyuꞌtyámueꞌtɨn

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Chuíicarij David tɨ joꞌyúꞌxacaꞌ

¹Tavástaraꞌ, aꞌɨ́ɨ pu jutyamuaꞌveꞌ ɨ tɨ rey jɨn tyiꞌtyéjvee jiꞌnye caꞌnyíjraꞌaj paj jaatáꞌ,

¡jéehua pu huápuɨꞌɨj jutyamuaꞌveꞌ jiꞌnye muáaj paj jaatáꞌ tɨ tyuꞌtyámueꞌtɨn!

²Aꞌyaa paj huarɨ́j jeꞌej tɨ aꞌɨ́ɨn tyáꞌxɨeꞌvaꞌcaꞌaj,

capáj tyiꞌtɨ́j jɨn quee aꞌyan huarɨ́j jeꞌej tɨ aꞌɨ́ɨn tyimuaatáhuaviiriꞌ.

³Muáaj paj jaataxɨéꞌvej pajta vaꞌcán jɨn tyámuaꞌ tyeetyájtoo

pajta cúruun juꞌcárujtyiꞌriꞌ ooroj tɨ puéꞌeen.

⁴Júuricamej pu muaatáhuaviiriꞌ, muáaj pej pij jaatáꞌ,

júuricamej tɨ áꞌtyeeren ajta quee tyiꞌtɨ́j jɨn jeꞌej rɨnyij.

⁵Tyíꞌmuatyojtziꞌreꞌ aꞌɨ́jcɨ jɨmeꞌ paj jaatáhuɨɨ, ijíij pu vaꞌcán jɨn putyiꞌuurejve,

muáaj paj jaatáꞌ mej mij jaatyátzaahuatyeꞌen ajta jeꞌen jɨꞌréenyeꞌej séejreꞌ.

⁶Jusén jɨmeꞌ paj tyámuaꞌ tyeetyájtoo,

jéehua pu jutyamuaꞌveꞌ aꞌɨ́jcɨ jɨmeꞌ paj jitzán séejreꞌ.

⁷Muáaj, rey paj puéꞌeen, capu aꞌnáj antyipuaꞌrij ɨ paj jɨn tyiꞌtyéjvee, jiꞌnye Tavástaraꞌ paj jitze tyíꞌcaꞌnyej,

¡aꞌɨ́j paj jitze tyíꞌcaꞌnyej ɨ tɨ jɨn muaxɨeꞌveꞌ aꞌɨ́jna ɨ tɨ jútyeꞌ ɨmuáj jáꞌsejreꞌ!

⁸Aꞌɨ́jna ɨ paj néijmiꞌi jɨn putyíꞌuurej aꞌɨ́ɨ pu néijmiꞌcaa huataꞌsij ɨ maj muájchaꞌɨɨreꞌ,

jaꞌmuácaꞌtaꞌ paj jɨn huoꞌtáaꞌsij ɨ maj muaxanaꞌveꞌ,

⁹aꞌúu paj huojoꞌtyátoosij ɨ oornaj tzajtaꞌ tɨ úꞌtaa

patɨꞌɨj aꞌɨ́j jɨn huatáꞌsejrataj pej pij huoꞌxɨ́jtyeꞌen.

Aꞌɨ́jna ɨ Tavástaraꞌ, tɨ jɨn nyúꞌcamuɨꞌ,

aꞌɨ́j pu jɨn huaꞌantyipuaꞌrityeꞌsij ɨ tɨéj jɨmeꞌ tɨ néijmiꞌi tyeꞌentyípuaapuaꞌrityee.

¹⁰Pajta huoꞌrioꞌuunaj íiyan cháanacaj japua pajta huaꞌ tzajtaꞌ ɨ tyeɨ́tyee

aꞌɨ́ɨjma ɨ huaꞌyojmuaꞌ pajta ɨ maj huaꞌ jitze eerányesij.

¹¹Tyij majta jaxɨeꞌvaꞌaj maj jeꞌej puaꞌaj muáaꞌuurej

majta jaxajta jeꞌej maj huárɨnyij aꞌ jimi

capu aꞌyan tyeꞌmej jeꞌej maj aꞌɨ́ɨmaj tyáꞌxɨeꞌveꞌ,

¹²jiꞌnye muáaj paj huoꞌtamuárityeꞌsij,

aꞌ túꞌnamuaꞌ paj jɨn aꞌɨ́ɨjma huatyámueꞌtɨj.

¹³¡Ájchesij Tavástaraꞌ, aꞌɨ́jcɨ jɨmeꞌ ɨ paj néijmiꞌi jɨn putyíꞌuurej!

¡Tyetyíꞌyeꞌestej tyajta tyuꞌtáchuiicaj aꞌɨ́jcɨ jɨmeꞌ paj tyuꞌtyáamueꞌtɨj!

Jeꞌej tɨ tyíꞌjijhuaj ɨ tɨquee jeꞌej jájtyoovej ajta ɨ chuíicarij maj jɨn tyaatatyójtziꞌreꞌen

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj, aꞌɨ́jcɨ jɨmeꞌ ɨ cuíinarij tɨ aꞌyan ántyapuaj tɨjɨn “Ɨ muaxáj tɨ séejreꞌ tɨꞌɨjta ɨ xɨcáj eeréꞌnyej”. Chuíicarij David tɨ joꞌyúꞌxacaꞌ

¹Muáaj paj nyaj Dios, muáaj paj nyaj Dios,

¿jiꞌnye pej pij manúurɨej?,

¿jiꞌnye pej pij quee paj mujoꞌvéꞌmeꞌen pajta jeꞌen nyajapuáj huatányuunyij?,

¿jiꞌnye pej pij quee nyanamuaj nyatɨꞌɨjta nyeyiinyej aꞌ jimi huatyényuunyij?

²Muáaj paj nyaj Dios,

tújca nyajta tɨ́caꞌ nu aꞌjimi jahuoo, ajta capáj nyanamuaj,

¡capu jeꞌej tyíɨꞌrij nyej nyij huányasoꞌpeꞌen!

³Pajta muáaj néijmiꞌi jɨn tyámuaꞌ een,

muáaj paj tyíꞌijta, néijmiꞌi mu tyíꞌmuatyojtziꞌreꞌ ɨ maj Israel jitze ajtyámaꞌcan.

⁴Aꞌɨ́ɨmaj ɨ tahuásimuaꞌcɨꞌɨj mu aꞌ jitze tyuꞌcáꞌan,

aꞌ jitze mu tyiꞌcaꞌnyajcaꞌaj, muáaj pej pij huiꞌrájtoj,

⁵mamuaatáhuaviiriꞌ paj huoꞌtáhuɨɨreꞌen, aj pej pij huoꞌtaꞌ maj juxáahuaj séjreꞌej,

aꞌ jitze mu tyuꞌcáꞌan, ajta capáj muáaj huoꞌtyáxaahuatacaꞌ.

⁶Ajta canu nyáaj tyáatɨꞌ puéꞌeen, sulu chuiꞌnuj nu puéꞌeen,

¡aꞌɨ́ɨ nu puéꞌeen ɨ tyeɨ́tyee maj néijmiꞌi jatyáꞌaatzej!

⁷Aꞌɨ́ɨmaj ɨ maj nyeséj, aꞌɨ́ɨ mu nyéetzij nyaꞌaꞌtzej,

jéehua mu náꞌxaahuaj, majta nye jimi naa tyityeꞌcámuꞌvajra

⁸majta aꞌyan tyiꞌxáataj tɨjɨn:

“Aꞌmúu pu ɨ Tavástaraꞌ jitze tyíꞌcaꞌnyej,

cheꞌ aꞌɨ́ɨn ɨ Tavástaraꞌ jiꞌrátoonyij.

Aꞌɨ́jcɨ jɨmeꞌ ɨ tɨ huápuɨꞌɨj jaxɨeꞌveꞌ, cheꞌ aꞌɨ́ɨn japuan huatányuunyij.”

⁹Aꞌyaa puꞌij tyíꞌeen:

muáaj paj tyuꞌtáꞌ nyej nyij huanɨeꞌhuaj ɨ jucáaraꞌ jitze ɨ náanaj,

pajta tyuꞌtáꞌ nyej nyij jitzán huányasoꞌpeꞌen.

¹⁰Nyatɨꞌɨj quee xu nyáaj huanɨeꞌhuacaj,

muáaj paj aꞌɨ́ɨn puéꞌeenyeꞌej ɨ paj nyaj jɨmeꞌ antyíamuaꞌreeriacaꞌaj,

nyatɨꞌɨj nyanaꞌaj tyíꞌsejriaꞌcaꞌaj ɨ jucáaraꞌ jitze ɨ náanaj,

muáaj paj nyaj Dios puéꞌeen.

¹¹Capáj nye jimi ajtáyiꞌcan,

jiꞌnye véjriꞌ pu yetyíꞌsejreꞌ ɨ tɨ jeꞌej puaꞌaj tyíꞌnyaꞌuurej,

ajta quee aꞌtɨ́j nyaj jamuán yésejreꞌ tɨꞌij naatáhuɨɨreꞌen.

¹²Aꞌyaa mu meríj tyinyajná matɨꞌɨj ɨ túuruꞌuj aꞌɨ́ɨmaj ɨ maj nyéjchaꞌɨɨreꞌ,

aꞌyaa mu huaséꞌrin matɨꞌɨj ɨ túuruꞌuj aꞌáa maj jáꞌmaꞌcan aꞌájna a Basán,

¹³aꞌyaa mu tyíꞌtyacɨꞌxɨj matɨꞌɨj ɨ muajyéj ɨ maj huápuɨꞌɨj nyinyuꞌcacuj,

aꞌɨ́ɨ mu jacácuaxaꞌvaꞌraj majta jeꞌen nyéetzij nyatacheꞌvej.

¹⁴Aꞌyaa nu een tɨ ɨ jájtyij tɨ tyixɨ́rej,

ajta ɨ nyacaríj arí néijmiꞌi eerácuuxɨj.

Ajta ɨ nyaxɨéjnyuꞌcaa aꞌyaa pu een tɨꞌɨj ɨ xɨ́ɨjca

aꞌɨ́ɨ pu arí ij tyáxɨsij ɨ nyaj tzajtaꞌ.

¹⁵Aꞌyaa pu arí tyuꞌtyáahuaj ɨ nye tyenyij tɨꞌɨj ɨ xaríj tɨ huatyáteeriꞌhuacaꞌ,

ajta ɨ nyenyanúu arí aráviꞌtaxɨj yujtyí pujmuaꞌ.

¡Chuéj tɨ muɨɨnyíj paj jɨn naꞌváꞌnaj cuxáa nyaj nyeríj huamuɨ́ꞌ!

¹⁶Aꞌyaa mu cuxáa tzɨꞌcɨ́ɨj, jéehua mu ɨ maj jeꞌej puaꞌaj tyityetyúuchaꞌɨj

aꞌɨ́ɨ mu meríj néijmiꞌqueꞌ nyeriaꞌnaj,

majta meríj tyinaapuéj ɨ nyamuácaꞌ jitze majta nyaꞌ ɨ́ɨcaj jitze.

¹⁷Ɨꞌríj nyaj jaatyéꞌiten ɨ nyacaríj.

Aꞌnáj tɨnaꞌaj mu naꞌráasej aꞌɨ́ɨmaj ɨ maj nyéjchaꞌɨɨreꞌ,

¹⁸aꞌɨ́ɨ mu meríj tyuꞌrióotuiꞌij ɨ tyíꞌnyacaanaa,

majta aꞌɨ́jcɨ jɨn jumueꞌtɨj.

¹⁹Pajta muáaj, Tavástaraꞌ, ɨ paj aꞌɨ́ɨn puéꞌeen ɨ nyaj jɨn uhuájcaꞌnyej,

¡capáj nye jimi ajtáyiꞌcan!, ¡jiyeꞌtzín paj mujoꞌvéꞌmeꞌen pej pij naatáhuɨɨreꞌen!

²⁰Pataꞌaj nyaj japua huatányuunyij nyej nyij quee huámuɨꞌnyij aꞌɨ́jcɨ jɨmeꞌ ɨ chúun,

capáj tyiꞌtáꞌcareꞌen mej mij naajéꞌcaj aꞌɨ́ɨmaj ɨ tzɨꞌcɨ́ɨj,

²¹Pataꞌaj nyaj japua huatányuunyij mej mij quee naatyájcɨꞌmej ɨ muajyéj,

¡pajta tyuꞌtyáanaj tɨꞌij quee jeꞌej nyaꞌuurej ɨ huaꞌahuaj ɨ túuruꞌuj!

²²Nyáaj nu aꞌ jitze maꞌcan tyihuoꞌtéꞌexaatyeꞌej ɨ nyeꞌihuáamuaꞌ,

nyajta tyimuaatatyójtziꞌreꞌej aꞌájna joꞌmaj aꞌɨ́ɨmaj jóosɨꞌrii.

²³Muaꞌaj, mu siaj tzáahuatyiꞌraꞌaj jimi tyíchaꞌɨj ɨ Tavástaraꞌ, ¡setyuꞌtatyójtziꞌreꞌ!

¡Micheꞌ néijmiꞌi tyámuaꞌ tyeetyátoonyij aꞌɨ́ɨmaj ɨ maj Jacob jitze eerámaꞌcan!

¡Micheꞌ néijmiꞌi jaatyáanajche ɨ maj Jacob jitze eerámaꞌcan!

²⁴Jiꞌnye capu aꞌɨ́ɨn séej huatyáxaahuataj capu ajta séej quee namuajran

aꞌɨ́ɨmaj ɨ maj quee jeꞌej tyéejviicueꞌ maj jɨn japuéjtzitarej,

capu ajta aꞌɨ́ɨjma jimi huatyóoꞌavaataj.

¡Aꞌɨ́ɨ pu huáꞌnamuaj matɨꞌɨjta jimi jahuoocaj tɨꞌij huoꞌtyáhuɨɨreꞌen!

²⁵Huaꞌ tzajtaꞌ aꞌtyéɨtyeristyamuaꞌ ɨ maj jéehua aráꞌasej

nyetyimuatatyójtziꞌreꞌej aꞌɨ́jcɨ jɨmeꞌ ɨ paj tyámuaꞌ een,

huaꞌ jimi ɨ maj tzáahuatyiꞌraꞌaj aꞌ jimi tyíchaꞌɨj

nyamuaꞌraꞌastijreꞌej tyiꞌtɨ́j nyaj jɨn atányarasij.

²⁶Setyúꞌcuaꞌ, muaꞌaj mu siaj quee jeꞌej jájtyoovej,

ꞌasta sianaꞌaj quee tyámuaꞌ tyityaatajúꞌxaj,

setyuꞌtatyójtziꞌreꞌ ɨ Tavástaraꞌ, muaꞌaj mu siaj jahuoo,

siataꞌaj sij jéehua áꞌtyeeviꞌin siaj aꞌyan huacháatɨmeꞌnyij.

²⁷Néijmiꞌi ɨ maj séej chuéj japua joꞌcháatɨmee majta ɨ maj séej nyúucarij jɨn tyíꞌxaj,

aꞌɨ́ɨmaj ɨ tyeɨ́tyee maj aꞌáa joꞌcháatɨmee joꞌtɨj ɨ chuéj jooꞌástɨmee,

xoꞌtámuaꞌreej ɨ Tavástaraꞌ, siajta jeꞌen jimi mujoꞌváꞌjuꞌun,

aꞌɨ́j xu jimi tyítunutaxɨꞌɨn.

²⁸Jiꞌnye aꞌɨ́ɨ pu aꞌɨ́ɨn puéꞌeen ɨ Tavástaraꞌ ɨ tɨ Rey jɨn tyíꞌijta,

ajta néijmiꞌcaa tyíꞌijtyeꞌ ɨ maj aꞌyan huacháatɨmee ɨ cháanacaj japua.

²⁹Jimi xu ecóotutaxɨꞌɨn siajta aꞌɨ́j sianaꞌaj huatyáanajchej,

néijmiꞌi ɨ maj jéehua tyúꞌchaꞌɨj,

néijmiꞌi ɨ maj chuéj tɨ muɨɨnyíj huatyóotaahuaj,

jiꞌnye camu aꞌɨ́ɨmaj jujɨ́ɨmuaꞌaj júurij.

³⁰Ɨ maj nyej jitze eerányesij aꞌɨ́ɨ mu jaatyánajchij ɨ Tavástaraꞌ

majta jusén jɨmeꞌ jitzán maꞌcan tyiꞌxáataj muáꞌjuꞌun,

³¹ajta ɨ maj majcaꞌhuáyee nanɨeꞌhuan, aꞌɨ́ɨ mu huoꞌtéꞌexaatyeꞌej

ɨ paj jɨn tyámuaꞌ tyáꞌxaꞌpuɨꞌɨntareꞌ ajta jeꞌej paj tyíꞌmuarɨeꞌ.

Aꞌɨ́jna ɨ Tavástaraꞌ aꞌɨ́ɨ pu aꞌɨ́ɨn puéꞌeen ɨ tɨ nyechaꞌɨj

Chuíicarij David tɨ joꞌyúꞌxacaꞌ

¹Aꞌɨ́jna ɨ Tavástaraꞌ aꞌɨ́ɨ pu aꞌɨ́ɨn puéꞌeen ɨ tɨ nyechaꞌɨj,

capu tyiꞌtɨ́j náꞌɨtziityeꞌ.

²Aꞌáa pu nyajaꞌtaꞌcaa nyej nyij huányasoꞌpeꞌen aꞌájna joꞌtɨj naa tyojoꞌhuáꞌraa,

ajta aꞌáa nyojooviꞌtɨj joꞌtɨj quee caꞌnyíin jáꞌmuɨꞌyej,

³caꞌnyíjraꞌaj tɨ jájcuaj pu nyatáꞌcaa

ajta juyéj jitze náaviꞌtɨj tɨ huatóojeꞌyej,

aꞌɨ́j pu jɨn tyámuaꞌ tyeetyátoosij jeꞌej tɨ aꞌɨ́ɨn ántyapuaj.

⁴Tyij nyajta aꞌáa jooméꞌen joꞌtɨj jéetzeꞌ joꞌtɨ́caꞌ tɨ tyúꞌuu tzajtaꞌ,

canu tyiꞌtɨ́j jɨn tyiꞌtzɨ́ɨnyeꞌej naꞌmej,

jiꞌnye muáaj paj Tavástaraꞌ, nyaj jamuán yésejreꞌ.

⁵Tyámuaꞌ paj nye jimi tyíꞌuurej

huaꞌjɨɨsapuaj aꞌɨ́ɨjma ɨ maj nyéjchaꞌɨɨreꞌ,

pajta nyaj muꞌuj jitze naꞌváꞌhuaaj aꞌɨ́jcɨ ɨ tɨ naa tyaarɨeꞌej,

ajta jéehua nye jitze tyíꞌsejreꞌ aꞌɨ́jna ɨ tɨ naa tyíꞌeen muáaj paj tyinyatáꞌcaa.

⁶Aꞌɨ́jna muáaj paj tyinaatapuéjvej ajta ɨ paj jɨn nyaxɨeꞌveꞌ aꞌɨ́ɨ mu nyaj jamuán yésejreꞌ

nyatɨꞌɨj nyanaꞌaj puaꞌan xɨcáj áꞌtyeeren,

ajta aꞌájna joꞌpaj jaꞌchej, Tavástaraꞌ, aꞌáa nu jusén jɨmeꞌ jaꞌcháaj naꞌmej.

Aꞌɨ́jna ɨ Rey tɨ jɨn tyiꞌtyéjvee tɨ naa huaséꞌrin

Chuíicarij David tɨ joꞌyúꞌxacaꞌ

¹Tavástaraꞌ pu jaꞌaꞌrij néijmiꞌi ɨ cháanacaj,

ajta néijmiꞌi ɨ tɨ jitzán tyíꞌsejreꞌ,

majta néijmiꞌi ɨ maj jitzán ajoꞌcháatɨmee.

²Jiꞌnye Tavástaraꞌ pu tyámuaꞌ jáaruuj ɨ tɨ jitzán aróocaꞌnyej ɨ chuéj

ajta tyámuaꞌ jáaruuj ɨ jájritzeꞌ ajta ɨ játyaꞌnaj jitze.

³¿Aꞌtanyíj pújoorej tɨꞌij aꞌáa joꞌréꞌnyej joꞌtɨj jeꞌej jeꞌen ɨ Tavástaraꞌ?

¿Aꞌtanyíj pújoorej tɨꞌij aꞌáa jaꞌséeriaꞌaj jáꞌraꞌnyij ɨ tyeyúujraꞌ tzajtaꞌ tɨ naa een?

⁴Aꞌɨ́jna ɨ tɨ tyámuaꞌ een ɨ jumuácaꞌ jitze ɨ jumuaꞌtzíiraꞌaj jitze

ajta quee tyiꞌtɨ́j jɨn tyiꞌijxánaꞌcɨraꞌaj

aꞌɨ́jna ɨ tɨ quee sáanturij naꞌmichej

ajta quee hueꞌtzij jɨn tyaꞌtóoratziꞌracaa.

⁵Aꞌɨ́jna ɨ Tavástaraꞌ, ajta ɨ Dios tɨ japuan huatányuusij,

aꞌɨ́ɨ pu tyámuaꞌ tyeetyátoosij ajta tyámuaꞌ naa tyáꞌxaꞌpuɨꞌɨntariꞌtzeꞌen.

⁶Aꞌyaa pu tyúuxɨeꞌveꞌ maj aꞌyan eenyeꞌ aꞌɨ́ɨmaj ɨ maj jahuoo ɨ Tavástaraꞌ,

aꞌɨ́ɨmaj ɨ maj jahuoo maj jaaséj joꞌtɨj jáꞌsejreꞌ ɨ Dios raꞌ aꞌɨ́jcɨ ɨ Jacob.

⁷¡Cheꞌ antácuunyiꞌhuaxɨꞌɨn ɨ puéertaj tɨ jusén jɨn séejreꞌ!

¡Cheꞌ antacúunyiꞌhuaj táꞌraꞌnyij tyahuaꞌpuajmaꞌaj,

aꞌɨ́ɨ puꞌij utyárutyij aꞌɨ́jna ɨ tɨ naa huaséꞌrin ɨ tɨ Rey jɨn tyiꞌtyéjvee!

⁸¿Aꞌtanyíj aꞌɨ́ɨn puéꞌeen ɨ tɨ naa huaséꞌrin ɨ tɨ Rey jɨn tyiꞌtyéjvee?

¡Aꞌɨ́ɨ pu aꞌɨ́ɨn puéꞌeen ɨ Tavástaraꞌ, ɨ tɨ uhuájcaꞌnyej ajta jéehua jaayíꞌtɨn tɨ huatyényoꞌseꞌen!

¡Aꞌɨ́ɨ pu aꞌɨ́ɨn puéꞌeen ɨ Tavástaraꞌ, ɨ tɨ jaayíꞌtɨn tɨ tyuꞌtyámueꞌtɨn aꞌájna joꞌmaj jáꞌnyoꞌseꞌ!

⁹¡Cheꞌ antácuunyiꞌhuaxɨꞌɨn ɨ puéertaj tɨ jusén jɨn séejreꞌ!

¡Cheꞌ antacúunyiꞌhuaj táꞌraꞌnyij tyahuaꞌpuajmaꞌaj,

aꞌɨ́ɨ puꞌij utyárutyij aꞌɨ́jna ɨ tɨ naa huaséꞌrin ɨ tɨ Rey jɨn tyiꞌtyéjvee!

¹⁰¿Aꞌtanyíj aꞌɨ́ɨn puéꞌeen ɨ tɨ naa huaséꞌrin ɨ tɨ Rey jɨn tyiꞌtyéjvee?

¡Aꞌɨ́ɨ pu aꞌɨ́ɨn puéꞌeen ɨ Tavástaraꞌ ɨ tɨ néijmiꞌi putyíꞌuurej!

¡Aꞌɨ́ɨ pu aꞌɨ́ɨn puéꞌeen ɨ tɨ Rey jɨn tyiꞌtyéjvee tɨ ajta naa huaséꞌrin!

Jeꞌej tɨ sɨ́ɨj tyuꞌtyényuunyij tɨꞌij jaatáhuoonyij tɨ ɨ Dios tyámuaꞌ tyuꞌcájuyetyej

David tɨ jaꞌaꞌrij

¹Tavástaraꞌ, muéetzij jimi nu huatyényuusij;

²nyaj Dios, muéetzij jimi nu tyíꞌcaꞌnyej:

capáj tyiꞌtáꞌcareꞌen nyej nyij tyéviꞌsiꞌ huataséjreꞌen.

¡Micheꞌ quee nyaꞌaꞌtzej aꞌɨ́ɨmaj ɨ maj nyéjchaꞌɨɨreꞌ!

³¡Cheꞌ quee aꞌnáj tyéviꞌsiꞌ huataséjreꞌen

sɨ́ɨj tɨ muéetzij jitze tyíꞌcaꞌnyej!

¡Micheꞌ aꞌɨ́ɨmaj huatóotyeviꞌraꞌastaj

aꞌɨ́ɨmaj ɨ maj chaꞌmanaꞌaj tyiꞌtɨ́j jɨn jeꞌej puaꞌaj tyíꞌmuaxaj!

⁴Tavástaraꞌ,

naataséjratyeꞌ aꞌ juyéj,

pataꞌaj aꞌɨ́j jitze tyámuaꞌ tyináaviꞌtɨsimeꞌen,

⁵náꞌanviꞌtɨchij, nuꞌcájuyetyej aꞌɨ́jcɨ jitze ɨ tɨ jɨꞌréꞌcan jɨmeꞌ,

jiꞌnye muáaj paj nyaj Dios puéꞌeen pajta ɨ tɨ nyaj japua huatányuusij.

Aꞌnáj tɨnaꞌaj nu muéetzij jitze tyíꞌcaꞌnyej.

⁶Tavástaraꞌ,

ootámuaꞌreej ɨ paj jɨn taxɨeꞌveꞌ ɨ paj jɨn táꞌcuꞌvej

ɨ paj aꞌnáj tɨnaꞌaj tasejratyeꞌ,

⁷ajta capáj jaꞌtamuáꞌreꞌrihuaꞌan tyiꞌtɨ́j nyaj jɨn ootyáꞌɨtzee

nusu tyiꞌtɨ́j nyaj jɨn jeꞌej puaꞌaj huarɨ́j nyatɨꞌɨj nyooj tyamueestacaꞌaj.

Tavástaraꞌ, nyéetzij paj noꞌtámuaꞌreej,

aꞌɨ́jcɨ jɨmeꞌ paj vaꞌcán jɨn nyaxɨeꞌveꞌ pajta ɨ paj jéehua tyinaatapuéjvej.

⁸Tavástaraꞌ pu tyámuaꞌ een ajta quee tyiꞌtɨ́j jɨn áꞌɨtzeereꞌ,

aꞌɨ́ɨ pu tyámuaꞌ huáꞌuurej jeꞌej maj tyityetyúuchaꞌɨj ɨ maj tyiꞌijxánaꞌcɨraꞌ

⁹ajta tyámuaꞌ tyihuoꞌcájuyetyej aꞌɨ́ɨjma ɨ maj quee óotzaahuatyeꞌ,

¡aꞌɨ́ɨ pu tyámuaꞌ huáꞌuurej mej mij quee tyiꞌtɨ́j jɨn áꞌɨtzeeriaꞌaj!

¹⁰Aꞌɨ́ɨ pu aꞌnáj tɨnaꞌaj tyámuaꞌ huáꞌuurej huaꞌxɨeꞌveꞌej ajta quee tyiꞌtɨ́j jɨn aꞌɨtzéeriaꞌaj,

aꞌɨ́ɨjma ɨ maj jaꞌráꞌastej tyiꞌtɨ́j tɨ jɨn tyihuaꞌtáratziiriꞌ,

ajta jeꞌej tɨ tyiꞌtɨ́j jɨn tyuꞌtaꞌíjtacaꞌ.

¹¹Tavástaraꞌ, vaꞌcán nu jɨn ootyáꞌɨtzee,

tyinaatúꞌuunyiꞌriꞌ, tyámuaꞌ paj tyeetyátoonyij ɨ paj jɨn ántyapuaj.

¹²Aꞌɨ́jcɨ ɨ tyáatɨꞌ tɨ tzáahuatyiꞌraꞌaj jimi tyíchaꞌɨj ɨ Tavástaraꞌ,

aꞌɨ́j pu huataséjratyeꞌsij tyiꞌtɨ́j tɨ juyáaraꞌ jitze ucájrutyej,

¹³aꞌɨ́ɨ pu néijmiꞌi tyámuaꞌ jimi tyíꞌuurej

ajta ɨ chuéj huoꞌtaꞌsij aꞌɨ́ɨjma ɨ maj huaꞌ jitze eerányesij.

¹⁴Tavástaraꞌ pu huaꞌ amíincuj puéꞌeen aꞌɨ́ɨjma ɨ maj tzáahuatyiꞌraꞌaj jimi tyíchaꞌɨj,

ajta huoꞌtaꞌsij maj jáamuaꞌreej tyiꞌtɨ́j tɨ jɨn tyaꞌtóoratziiriꞌ.

¹⁵Aꞌnáj tɨnaꞌaj nu aꞌɨ́j jitze rányeej ɨ Tavástaraꞌ,

jiꞌnye aꞌɨ́ɨ pu néijmiꞌi jɨn tyámuaꞌ tyíꞌnyechaꞌɨj.

¹⁶Naaséj, Tavástaraꞌ, náꞌancuꞌvaxɨꞌ nyéetzij,

jiꞌnye nyasɨ́ɨj nu yésejreꞌ nyajta quee jeꞌej jájtyoovej.

¹⁷Ɨ nyaxɨéjnyuꞌcaa pu jeꞌej puaꞌaj tyóomuaꞌtzej,

pataꞌaj nyaj japua huatányuunyij ɨ nyaj jeꞌej puaꞌaj tyéꞌnyamuaꞌtzej.

¹⁸Huaséj ɨ nyaj jɨn jajpuéjtzij ajta ɨ nyaj jɨn áꞌviicueꞌreꞌ,

pajta tyinaatúꞌuunyiꞌ ɨ nyaj jɨn áꞌɨtzeereꞌ.

¹⁹Cásɨꞌ huoꞌséj aꞌchu maj aráꞌasej ɨ maj nyéjchaꞌɨɨreꞌ

aꞌɨ́ɨmaj ɨ maj nyejeꞌcatamuɨꞌ aꞌɨ́jcɨ jɨmeꞌ ɨ maj jéehua nyaxanaꞌveꞌej.

²⁰¡Náachaꞌɨj, pajta japuan huatányuunyij ɨ nyajúuricamej!

Capáj tyiꞌtáꞌcareꞌen nyej nyij tyéviꞌsiꞌ huataséjreꞌen,

jiꞌnye muéetzij nu jimi jahuoo pej pij naatyáhuɨɨreꞌen.

²¹Cheꞌ aꞌɨ́ɨn naatyáhuɨɨreꞌen ɨ nyaj tyámuaꞌ een nyajta quee jeꞌej puaꞌaj tyíꞌmuaꞌtzej,

jiꞌnye muéetzij jimi nu nyeríj tyíꞌcaꞌnyej.

²²¡Muáaj paj nyaj Dios,

pataꞌaj néijmiꞌi jɨn huaꞌ japua huatányuunyij tyiꞌtɨ́j maj jɨn jeꞌej tyityóomuaꞌtzej aꞌɨ́ɨmaj ɨ maj Israel jitze ajtyámaꞌcan!

Tyiꞌtɨ́j tɨ jitze jucaꞌnyej aꞌɨ́jna ɨ júuricamej tɨ tyámuaꞌ een

Ɨ David tɨ jaꞌaꞌrij

¹Tavástaraꞌ, pataꞌaj tyámuaꞌ tyinoꞌxáꞌpuɨꞌɨntariꞌtzeꞌen,

jiꞌnye tyámuaꞌ nu tyiꞌtyínyechaꞌɨj canu tyiꞌtɨ́j jɨn áꞌɨtzeereꞌ.

Muéetzij nu jimi Tavástaraꞌ, tyámuaꞌ naa tyíꞌcaꞌnyej,

²tyámuaꞌ paj naa tyinaaséj, pajta aꞌnáj tɨnaꞌaj nyeséejra,

¡pajta jaatyéesej jeꞌej nyaj tyíꞌmuaꞌtzej

pajta aꞌɨ́j huaséj jeꞌej tɨ een tyétyeꞌ ɨmuáj ɨ nyamuaꞌtzíiraꞌaj!

³Aꞌnáj tɨnaꞌaj pu nye jitze séejreꞌ ɨ paj jɨn nyaxɨeꞌveꞌ

nyajta quee tyiꞌtɨ́j jɨn áꞌɨtzeereꞌ aꞌ jimi,

⁴canu aꞌnáj huaꞌ jamuán tyuꞌxájtacaꞌ ɨ maj tyíꞌhueꞌtacaa

canu nyajta huaꞌantyánaxcacaꞌ aꞌɨ́ɨjma ɨ maj quee maꞌumuámuaꞌreꞌ.

⁵Capu naꞌráanajchij maj jusɨꞌrihuaꞌan aꞌɨ́ɨmaj ɨ maj jeꞌej puaꞌaj tyityetyúuchaꞌɨj,

canu aꞌnáj huaꞌ jamuán tyuꞌyéꞌestej ɨ maj jeꞌej puaꞌaj rɨcɨj.

⁶Nuꞌríj tyámuaꞌ naa tyaꞌnányamuejtyej nyajta quee cheꞌ tyiꞌtɨ́j jɨn tyiꞌijxánaꞌcɨraꞌ,

Tavástaraꞌ aꞌyaa nu tyáꞌxɨeꞌveꞌ nyaj ajtyáxɨɨrej joꞌtɨj joꞌtyéjvee ɨ nyaj japuan muatyáanajche,

⁷nyajta jeꞌen muéetzij jimi tyuꞌtáchuiicaj,

nyajta aꞌɨ́j huataxáj ɨ tɨ jéehua naa tyuꞌséꞌrin muéetzij jimi.

⁸Tavástaraꞌ nyáaj nu jaxɨeꞌveꞌ, aꞌɨ́jcɨ ɨ tyeyúuj ɨ paj tzajtaꞌ séejreꞌ,

joꞌtɨj jáꞌsejreꞌ aꞌɨ́jna ɨ paj jɨn huápuɨꞌɨj naa huaséꞌrin.

⁹Capáj náaꞌriꞌracareꞌen ɨ nyajúuricamej huaꞌ jamuán ɨ maj tyiꞌijxánaꞌcɨraꞌ,

capáj tyiꞌtáꞌcareꞌen tɨ nye jimi aꞌyan tyéꞌyiꞌcan tɨꞌɨj tyihuáꞌuurej aꞌɨ́ɨjma ɨ maj tyíꞌtyacuiꞌcaa,

¹⁰aꞌɨ́ɨjma ɨ tɨ huaꞌ muácaꞌ jitze séejreꞌ

ɨ maj jɨn jeꞌej puaꞌaj tyityetyúuchaꞌɨj ajta tyiꞌtɨ́j maj jɨn tyeɨ́tyee cuanamuaj.

¹¹Nyajta nyáaj canu tyiꞌtɨ́j jɨn áꞌɨtzeereꞌ

¡pataꞌaj nyajapuáj huatányuunyij, náꞌancuꞌvaxɨꞌ nyéetzij!

¹²Tyámuaꞌ nu naa tyaꞌrányacaꞌnyej ɨ nyaꞌ ɨ́ɨcaj jɨmeꞌ,

tyámuaꞌ nu tyeetyátoosij ɨ Tavástaraꞌ metyiꞌséeracaj ɨ tyeɨ́tyeristyamuaꞌmeꞌen!

Tavástaraꞌ pu aꞌɨ́ɨn puéꞌeen ɨ tɨ nyatatzaviꞌtyeꞌ ajta ɨ tɨ nyaj japua huatányuusij

Ɨ David tɨ jaꞌaꞌrij

¹Tavástaraꞌ pu aꞌɨ́ɨn puéꞌeen ɨ tɨ nyatatzaviꞌtyeꞌ ajta ɨ tɨ nyaj japua huatányuusij,

¿aꞌtajnyíj jimi nyetyiꞌtzɨɨnyaꞌaj naꞌmej?

Tavástaraꞌ pu japuan huatányuusij ɨ nyajúuricamej,

¿aꞌtajnyíj nyij tzɨɨnyeꞌej naꞌmej?

²Aꞌɨ́ɨmaj ɨ maj jeꞌej puaꞌaj tyityetyúuchaꞌɨj, ɨ maj nyéjchaꞌɨɨreꞌ,

aꞌɨ́ɨ mu tyúusɨꞌrii mej mij nyajná majta jeꞌen naꞌantyipuáꞌrityeꞌen,

majta aꞌɨ́ɨmaj mu jujɨ́ɨmuaꞌaj ejcáꞌcataꞌaj majta eetávitzej.

³Tyij majta mueꞌtɨ́j aꞌɨ́ɨmaj nyeriaꞌnaj,

capu tyiꞌtzɨ́ɨnyeꞌej taꞌmej ɨ nyaxɨéjnyuꞌcaa,

tyij majta tyámuaꞌ juꞌuurej mej mij naatyényoꞌsiꞌtyeꞌen,

nyáaj nu nyaxáahuaj séeriaꞌaj naꞌmej.

⁴Séej nuꞌuj tyiꞌtɨ́j jaatáhuaviiriꞌ ɨ Tavástaraꞌ,

sɨ́ɨj puꞌuj ɨ tɨ nye jitze juxɨeꞌveꞌ,

aꞌɨ́ɨ pu aꞌɨ́ɨn puéꞌeen nyej nyij aꞌáa jaꞌséeriaꞌaj náꞌraꞌnyij ɨ tyeyúuj tzajtaꞌ Tavástaraꞌ tɨ jaꞌaꞌrij

aꞌnáj tɨnaꞌaj tújcaꞌrij tzajtaꞌ nyatɨꞌɨj nyanaꞌaj áꞌtyeeren

nyej nyij ɨ tyeyúujraꞌ tzajtaꞌ jaatyáanajche

nyajta jeꞌen aꞌɨ́j huaséj ɨ tɨ jɨn huápuɨꞌɨj naa huaséꞌrin.

⁵Tɨꞌɨj aꞌájna atyojoꞌréꞌnyej ɨ xɨcáaraꞌ tɨ jitzán jeꞌej puaꞌaj tyiꞌéenyeꞌej jaꞌmej,

aꞌɨ́ɨ pu ɨ Tavástaraꞌ nyechaꞌɨɨj jaꞌmej ɨ ju tyeyúuj tzajtaꞌ,

nyáaj nu jityán jaꞌséeriaꞌaj naꞌmej.

¡Ajta tyiꞌtɨ́j jitze tɨ ájtyeej tyámuaꞌ tyiꞌnyechaꞌɨ́ɨj jaꞌmej!

⁶Aj puꞌij naatáɨꞌriityeꞌsij nyej nyij ájnyeerej

huaꞌ japua aꞌɨ́ɨjma ɨ maj nyéjchaꞌɨɨreꞌ,

aj nu nyij jimi tyuꞌtámuꞌvejritaj ɨ tyeyúuj tzajtaꞌ,

nyajta jeꞌen jijhuan nyenyetyámuaꞌvaꞌaj, nyajta jimi tyuꞌtáchuiicaj ɨ Tavástaraꞌ.

⁷Muéetzij jimi nu huatyényuusij, Tavástaraꞌ: náanamuajriꞌ.

Náꞌancuꞌvaxɨꞌ nyéetzij, ¡pajta naatájeevej!

⁸Nyaxɨéjnyuꞌcaa pu aꞌyan tyíꞌnyeꞌixaatyeꞌ tɨjɨn:

“Pataꞌaj jáahuoonyij joꞌtɨj ɨ Tavástaraꞌ jáꞌsejreꞌ.”

Nyajta nyáaj, Tavástaraꞌ, nyámuahuoo joꞌpaj muáaj jáꞌsejreꞌ.

⁹¡Capáj jaꞌavaataj nye jimi!

¡Capáj aꞌɨ́jcɨ jɨn manúujɨpuan ɨ paj jɨn nyúꞌcamuɨꞌ!

¡Muáaj paj puꞌuj aꞌɨ́ɨn puéꞌeen ɨ paj naatyáhuɨɨreꞌej!

Capáj juséentacan manúujɨpuan pajta quee tyiꞌtɨ́j naataꞌan nyaj jɨn huatyényahuɨɨreꞌen,

jiꞌnye muáaj paj nyaj Dios puéꞌeen pajta ɨ tɨ nyaj japua huatányuusij.

¹⁰Tyij ajta ɨ táataj manúurɨeenyij nusu ɨ náanaj manúurɨej,

muáaj, Tavástaraꞌ, muáaj paj nyaj jɨmeꞌ antyíaꞌmuaꞌreeriaj puáꞌmej.

¹¹Tavástaraꞌ, naataséjratyeꞌ aꞌ juyéj,

pajta aꞌɨ́j jitze nuꞌcájuyetyej ɨ tɨ naa een

jiꞌnye aꞌɨ́ɨmaj mu nyeꞌeeveꞌ ɨ maj nyéjchaꞌɨɨreꞌ,

¹²capáj tyiꞌtáꞌcareꞌen mej mij nye jimi aꞌyan huárɨnyij jeꞌej maj aꞌɨ́ɨmaj tyáꞌxɨeꞌveꞌ,

jiꞌnye mueꞌtɨ́j mu meríj aꞌɨ́ɨmaj jeꞌej puaꞌaj tyinaaxájtacaꞌ

aꞌɨ́ɨmaj ɨ maj jéehua tyíꞌhueꞌtacaa majta junyoꞌseꞌveꞌej.

¹³Ajta nyáaj nu tyámuaꞌ naa tyáꞌmuaꞌreej

nyej nyáaj jaséjran aꞌɨ́jcɨ ɨ tɨ jɨn ɨ Tavástaraꞌ tyámuaꞌ tyinaatyátoosij

nyatɨꞌɨj nyanaꞌaj áꞌtyeeren nyaj júurij.

¹⁴¡Tavástaraꞌ paj jitze tyúꞌcaꞌnyej!

¡Huatyáꞌcaꞌnyej, capáj táꞌxaꞌhuataꞌan!

¡Aꞌyaa pu tyiꞌjaꞌyájna, Tavástaraꞌ paj jitze tyúꞌcaꞌnyej!

Tavástaraꞌ pu janamuaj jeꞌej tyaj jimi tyityeetyényuusij

Ɨ David tɨ jaꞌaꞌrij

¹Tavástaraꞌ, muáaj paj tyámuaꞌ tyíꞌnyechaꞌɨj,

muéetzij nu jimi huatyényuusij.

Pataꞌaj naatájeevej nyatɨꞌɨj muéetzij jimi huatyényuunyij.

Jiꞌnye tɨpuaꞌaj pequee náanamuaj,

puꞌríj nyej nyij aꞌɨ́ɨjma jimi huatyényeꞌiteen ɨ muɨꞌchítyee.

²Huánamuajriꞌ nyej jíihuaj muéetzij jimi jahuoo paj naatyáhuɨɨreꞌen,

nyatɨꞌɨjta ajméjcaꞌtaxɨꞌɨn aꞌájna joꞌtɨj jáꞌsejreꞌ aꞌ tyeyúuj tɨ tyámuaꞌ een.

³Capáj anyojóojɨpuan huaꞌ jamuán ɨ maj jeꞌej puaꞌaj tyityetyúuchaꞌɨj,

capáj tyiꞌtáꞌcareꞌen tɨꞌij aꞌyan chaꞌtánaꞌaj tyíꞌnyoorej tɨꞌɨj aꞌɨ́ɨjma ɨ maj jeꞌej puaꞌaj rɨcɨj,

ɨ maj jéjristaꞌ aꞌyan tyúusejrataj cuxáa maj tyámuaꞌ tyíꞌtyetyeɨtyee

ajta huaꞌ tzajtaꞌ pu jéehua séejreꞌ ɨ maj jɨn jeꞌej puaꞌaj tyíꞌuurej.

⁴Pataꞌaj aꞌyan tyihuoꞌtáꞌan jeꞌej tɨ aꞌɨ́ɨjma tyiꞌtyévijtyeꞌ,

néijmiꞌi jɨmeꞌ tyiꞌtɨ́j maj jɨn jeꞌej puaꞌaj huarɨ́j,

aꞌyaa paj huóꞌuurej jeꞌej maj aꞌɨ́ɨmaj tyiꞌtɨ́j jɨn huarɨ́j,

aꞌyájna matɨꞌɨj aꞌɨ́ɨmaj tyiꞌtɨ́j jɨn jeꞌej puaꞌaj huarɨ́j.

⁵Jiꞌnye camu aꞌɨ́ɨmaj joꞌtámuaꞌreeriꞌ,

jeꞌej tɨ tyiꞌtɨ́j jɨn huarɨ́j ɨ Tavástaraꞌ,

¡cheꞌ aꞌɨ́ɨn huaꞌantyipuáꞌrityeꞌen ajta jeꞌen quee cheꞌ huaꞌajriáꞌpuanaꞌan!

⁶¡Cheꞌ tyámuaꞌ éenyeꞌej séjreꞌej ɨ Tavástaraꞌ, ɨ tɨ náanamuajriꞌ jeꞌej nyaj jimi tyuꞌtyéenyuj!

⁷Aꞌɨ́jna ɨ Tavástaraꞌ aꞌɨ́ɨ pu nyechaꞌɨj aꞌɨ́jcɨ jɨmeꞌ ɨ tɨ néijmiꞌi jɨn putyíꞌuurej,

aꞌɨ́j nu jitze néijmiꞌi jɨn tyuꞌcáꞌan, aꞌɨ́ɨ puꞌij naatyáhuɨɨ.

Ɨ nyaxɨéjnyuꞌcaa pu jutyamuaꞌveꞌ,

nyetyuꞌtáchuiicaj nyajta tyaatatyójtziꞌreꞌej ɨ Tavástaraꞌ.

⁸Tavástaraꞌ pu aꞌɨ́ɨn puéꞌeen ɨ maj jɨn uhuácacaꞌnyeꞌ ɨ tyeɨ́tyeristyamuaꞌmeꞌen,

aꞌɨ́ɨ pu ajta jaatyáhuɨɨreꞌej aꞌɨ́jcɨ ɨ rey aꞌɨ́ɨn tɨ jaꞌantyíhuoj.

⁹Tavástaraꞌ, pataꞌaj huaꞌ japua huatányuunyij aꞌtyéɨtyeristyamuaꞌ,

pajta tyámuaꞌ tyihuoꞌtyátoonyij ɨ maj muéetzij jitze ajtyámaꞌcan.

Aꞌyaa paj tyihuóꞌchaꞌɨɨn tɨꞌɨj ɨ cányaꞌxɨɨ tɨ sɨɨreꞌ,

¡aꞌnáj tɨnaꞌaj paj néijmiꞌcaa tyámuaꞌ tyíꞌviꞌraj!

Ɨ nyúucariaꞌraꞌ ɨ Tavástaraꞌ ɨ tɨ néijmiꞌi jɨn putyíꞌuurej

Chuíicarij David tɨ joꞌyúꞌxacaꞌ

¹Siataꞌaj néijmiꞌi tyaatatyójtziꞌreꞌen ɨ Tavástaraꞌ, mu siaj yójmuaꞌmuaꞌ puéꞌeen ɨ Dios,

setyuꞌtatyójtziꞌreꞌ ɨ tɨ néijmiꞌi jɨn putyíꞌuurej siajta ɨ tɨ jɨn naa huaséꞌrin ɨ Tavástaraꞌ,

²setyuꞌtatyójtziꞌreꞌ ɨ tɨ naa huaséꞌrin ɨ tɨ jɨn ántyapuaj ɨ Tavástaraꞌ,

siajta jaatyáanajche ɨ Tavástaraꞌ aꞌájna joꞌtɨj naa tyejéꞌeen joꞌtɨj aꞌɨ́ɨn jáꞌsejreꞌ.

³Ɨ nyúucariaꞌraꞌ ɨ Tavástaraꞌ aꞌɨ́ɨ pu caꞌnyíin jɨn tányuuvej ɨ jájritzeꞌ,

aꞌɨ́jna ɨ Dios tɨ jɨn naa huaséꞌrin aꞌɨ́ɨ pu caꞌnyíin jɨn namuajreꞌ,

Tavástaraꞌ pu aꞌáa jáꞌsejreꞌ ɨ jájritzeꞌ tɨ caꞌnyíin jáꞌxɨreꞌ.

⁴Caꞌnyíin pu jɨn namuajreꞌ ɨ nyúucariaꞌraꞌ ɨ Tavástaraꞌ tɨꞌɨj víityee maj tyényuuveꞌen,

ajta quee aꞌtɨ́j pújoorej tɨ jaatyápuaꞌrityeꞌen ɨ nyúucariaꞌraꞌ ɨ Tavástaraꞌ,

⁵aꞌɨ́ɨ pu ɨ nyúucariaꞌraꞌ ɨ Tavástaraꞌ jaꞌcátaaraxɨj ɨ jucúj tɨ tyuꞌuj.

¡Tavástaraꞌ pu jaꞌcátaaraxɨj ɨ jucúj aꞌáa tɨ joꞌváatɨmee a Líbano!

⁶Ajta jaatácaꞌtzɨj ɨ jɨríj aꞌáa tɨ joꞌquéetɨmee a Líbano ajta aꞌájna a Sirión,

¡ajta tyuꞌtáꞌsij maj tyítzunaxɨꞌɨn matɨꞌɨj ɨ túuruꞌuj majta ɨ visáaruꞌuj!

⁷Ɨ nyúucariaꞌraꞌ ɨ Tavástaraꞌ aꞌyaa pu een tɨꞌɨj ɨ maj tyóonaꞌaxcavaꞌraꞌan,

⁸aꞌɨ́jna ɨ nyúucariaꞌraꞌ ɨ Tavástaraꞌ aꞌɨ́ɨ pu jaatácaꞌtzɨj ɨ chuéj tɨ quee tyiꞌtɨ́j japuan séejreꞌ,

¡Tavástaraꞌ pu jaatácaꞌtzɨj ɨ chuéj tɨ quee tyiꞌtɨ́j japuan séejreꞌ aꞌáa tɨ jáꞌsejreꞌ a Cadés!

⁹Ɨ nyúucariaꞌraꞌ ɨ Tavástaraꞌ aꞌɨ́ɨ pu jaatácaꞌtzɨj ɨ suꞌuj tɨ huaꞌuj

ajta néijmiꞌi tyuꞌriáꞌnaꞌcaj ɨ tɨ viváajmaꞌaj tyuꞌuj.

Néijmiꞌi mu jaatyátzaahuatyeꞌsij, aꞌájna joꞌtɨj ɨ tyeyúujraꞌ joꞌtyéjvee.

¹⁰Tavástaraꞌ pu tyihuáꞌijtyeꞌ ɨ víityee,

¡Tavástaraꞌ pu rey jɨn tyíꞌijta jusén jɨmeꞌ!

¹¹Tavástaraꞌ pu caꞌnyíjraꞌaj huoꞌtaꞌsij ɨ jutyéɨtyeristyamuaꞌ,

Tavástaraꞌ pu tyámuaꞌ tyihuoꞌtyátoosij ajta tyámuaꞌ naa tyihuoꞌtyéjeevij ɨ maj jitzán ajtyámaꞌcan.

Chuíicarij tyaj jɨn tyaatatyójtziꞌreꞌen ɨ Tavástaraꞌ

Chuíicarij. Jeꞌej maj tyuꞌtáchuiicaj matɨꞌɨj tyámuaꞌ tyeetyátoonyij ɨ tyeyúuj. David tɨ jaꞌaꞌrij

¹Tavástaraꞌ, nyáaj nu muéetzij tyíꞌmuatzojtziꞌreꞌ

jiꞌnye muáaj paj naatáꞌ nyej nyij nyaxáahuaj séjreꞌej,

jiꞌnye muáaj paj quee tyuꞌtáꞌ

mej mij aꞌɨ́ɨmaj naatyáxaahuataj ɨ maj nyéjchaꞌɨɨreꞌ.

²Tavástaraꞌ, nyaj Dios,

muéetzij nu muaatáhuaviiriꞌ paj naatáhuɨɨreꞌen, muáaj pej pij tyináahuaj,

³muáaj, Tavástaraꞌ, muáaj paj náahuɨɨ nyej nyij quee huámuɨꞌnyij,

júuricamej paj naatáꞌ, pajta nyajapuáj huatanyúj nyej nyij quee huámuɨꞌnyij.

⁴Muaꞌaj, mu siaj tyámuaꞌ een ɨ Tavástaraꞌ jimi, ¡siataꞌaj jimi tyuꞌtáchuiicaj!,

¡siajta tyaatatyójtziꞌreꞌen ɨ tɨ naa een ɨ tɨ jɨn ántyapuaj!

⁵Jiꞌnye capu aꞌchu áꞌtyeeren ɨ tɨ jɨn nyúꞌcamuɨꞌ,

ajta ɨ tɨ jɨn tyámuaꞌ naa tyaꞌajxɨéꞌviꞌraꞌ, jusén pu jɨn séejreꞌ.

Tɨpuaꞌaj tɨ́caꞌ tyátayiinyaꞌaj,

íiyaꞌ tu tyijtá tatyámuaꞌveꞌej táꞌjuꞌun.

⁶Aꞌyaa pu nyéetzij nyaꞌaxcaj tɨquee tyiꞌtɨ́j jeꞌej nyoorej, nyajta aꞌyan tyiꞌriáꞌmuaꞌaj tɨjɨn:

“Capu cheꞌ aꞌnáj tyiꞌtɨ́j jeꞌej nyaꞌuurej.”

⁷Pajta muáaj, Tavástaraꞌ, aꞌɨ́jna ɨ paj jɨn tyámuaꞌ tyitatáꞌcaa

muáaj paj períj tyámuaꞌ náaꞌuuriajcaꞌaj aꞌájna joꞌtɨj tyámuaꞌ tyejéꞌeen,

ajta patɨꞌɨj quee cheꞌ nyahuɨɨriaꞌcaꞌaj

aꞌɨ́jna ɨ tɨ tzɨ́ɨnyiꞌreꞌ pu nyojoꞌrɨej.

⁸Tavástaraꞌ, muéetzij jimi nu huatyényuusij,

Tavástaraꞌ, muéetzij jimi nu jéehua jahuoo.

⁹¿Tyiꞌtanyí jeꞌej tyúumueꞌtɨj tɨpuaꞌaj nyáaj náamuɨꞌnyij,

nusu tɨpuaꞌaj nyéetzij manaꞌváꞌnaj?

¡Capu ɨꞌríj tɨ ɨ chuéj tɨ muɨɨnyíj tyimuaatatyójtziꞌreꞌen

nusu tɨ jaataxáj ɨ paj jɨn naa een!

¹⁰Tavástaraꞌ, náanamuaj pajta nyéetzij náꞌancuꞌvaxɨꞌ,

Tavástaraꞌ, ¡naatáhuɨɨreꞌ!

¹¹Paj puꞌríj naatáꞌ nyaj aꞌɨ́jna jɨn huatányetyamuaꞌveꞌen ɨ nyaj jɨn nyaxaamuɨjrityaꞌcaꞌaj;

papuꞌríj néijmiꞌi tyinyacáaꞌriꞌriꞌ ɨ nyaj jɨn nyaxaamujrityeꞌ

pajta aꞌɨ́j tyinatyéechejtye ɨ nyaj jɨn tyúꞌyeꞌesten.

¹²Aꞌɨ́j nu jɨn Tavástaraꞌ nyaj Dios,

capu ɨꞌríj nyaj quee aveꞌnyuucaꞌan,

¡aꞌ jimi nu tyuꞌtáchuiicaj

nyajta aꞌnáj tɨnaꞌaj tyimuaatatyójtziꞌreꞌej!

Jeꞌej tyej tyámuaꞌ naa ɨ Tavástaraꞌ jitze tyúꞌcaꞌnyej

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Chuíicarij David tɨ joꞌyúꞌxacaꞌ

¹Tavástaraꞌ, muéetzij jimi nu jahuoo paj naatyáhuɨɨreꞌen;

¡capáj aꞌnáj tyiꞌtáꞌcareꞌen nyej nyij tyéviꞌsiꞌ huataséjreꞌen!

¡Tyámuaꞌ paj tyinaatyáhuɨɨreꞌen, jiꞌnye muáaj paj quee tyiꞌtɨ́j jɨn áꞌɨtzeereꞌ!

²Tyámuaꞌ paj tyináanamuaj;

¡pataꞌaj huatáꞌcaꞌnyej, pajta jeꞌen nyaj japua huatányuunyij!

Pataꞌaj muáaj aꞌɨ́ɨn puéꞌeenyeꞌ ɨ nyaj jitzán huatyényacaꞌnyej,

¡muáaj paj aꞌɨ́ɨn puéꞌeenyeꞌ ɨ tɨ nyahuɨɨreꞌ ajta ɨ tɨ nyaj japua huatányuusij!

³¡Muáaj paj aꞌɨ́ɨn puéꞌeen ɨ nyaj jitzán nyacaꞌnyej ajta ɨ nyaj jitzán huatyényahuɨɨreꞌen!

¡Tyámuaꞌ paj tyináaviꞌtɨsimeꞌen pajta náachaꞌɨɨn, tyámuaꞌ paj tyeetyátoonyij ɨ paj jɨn ántyapuaj!

⁴¡Naatyáhuɨɨreꞌ mej mij quee jeꞌej nyoorej ɨ maj nyeꞌeeveꞌ,

jiꞌnye muáaj paj aꞌɨ́ɨn puéꞌeen ɨ tɨ nyechaꞌɨj!

⁵Muéetzij nu muaatátuiireꞌsij ɨ nyajúuricamej,

¡pataꞌaj nɨiꞌrátoonyij, Tavástaraꞌ, Dios paj jɨꞌréꞌcan jɨmeꞌ puéꞌeen!

⁶Nyahuaꞌxanaꞌveꞌ aꞌɨ́ɨjma ɨ maj huaꞌnajchej ɨ sáanturij maj quee tyiꞌtɨ́j huɨɨreꞌ.

Nuꞌríj néijmiꞌi jɨn aꞌɨ́j jitze tyíꞌcaꞌnyej ɨ Tavástaraꞌ.

⁷Aꞌɨ́jna ɨ paj jɨn nyaxɨeꞌveꞌ pu nyatáꞌcaa nyej nyij huányetyamuaꞌveꞌen.

Muáaj paj períj jaaséj ɨ nyaj jɨn nyaxaamujrityeꞌ,

pajta jamuaꞌreej ɨ nyaj jɨn jeꞌej tyéꞌnyamuaꞌtzej,

⁸capáj tyiꞌtáꞌcareꞌen tɨ aꞌɨ́ɨn naatyéeviꞌ ɨ tɨ nyéjchaꞌɨɨreꞌ,

¡muáaj paj aꞌáa nyojoꞌtyéjche joꞌtɨj quee tyiꞌtɨ́j jeꞌej nyajaꞌuurej!

⁹Tavástaraꞌ, nyéetzij náꞌancuꞌvaxɨꞌ,

jiꞌnye jéehua pu jeꞌej puaꞌaj tyíꞌnyaꞌuurej.

Aꞌɨ́jna ɨ tɨ nyacuiꞌ aꞌɨ́j pu jɨn nyacuaꞌnyej ɨ nyajɨꞌɨj jitze,

ɨ nye tyévij jitze, ¡ajta néijmiꞌqueꞌ tyinyetyáacuiꞌ!

¹⁰¡Aꞌɨ́jna ɨ tɨ nyacuiꞌ ajta ɨ nyaj nyeyiin

aꞌɨ́ɨ pu quee naatáꞌsij nyej nyij áꞌtyeeviꞌin nyajúurij!

Canu cheꞌ nyacaꞌnyej aꞌɨ́jcɨ jɨmeꞌ nyej nyaxaamujrityeꞌ,

¡néijmiꞌqueꞌ nu nyeríj ɨ nye tyévij jitze quee cheꞌ nyacaꞌnyej!

¹¹Nyáaj nu aꞌɨ́ɨn puéꞌeen ɨ maj néijmiꞌi jaꞌaꞌtzej aꞌɨ́ɨmaj ɨ maj nyéjchaꞌɨɨreꞌ

aꞌɨ́ɨmaj mu majta nyaꞌaꞌtzej ɨ maj nye jimi avéjriꞌ huacháatɨmee,

majta néijmiꞌi nyatzɨɨnyeꞌ aꞌɨ́ɨmaj ɨ maj nyamuaꞌtyej.

¡Aꞌɨ́ɨmaj mu nye jimi huatóoꞌuunaj aꞌájna aꞌ cáayej jitze matɨꞌɨjta naaséj!

¹²Néijmiꞌi mu meríj nyojoꞌhuaꞌxɨj,

cuxáa nyaj nyeríj huamuɨ́ꞌ.

Aꞌyaa nu een tɨꞌɨj ɨ xáꞌrij tɨ arí huatyátaarixɨj.

¹³Jéehua nu tyíꞌnamuaj maj ɨ tyeɨ́tyee jeꞌej puaꞌaj tyinyetyáxajta:

“Jéehua pu tyúꞌtzɨɨnyiꞌreꞌ néijmiꞌqueꞌ.”

Aꞌɨ́ɨmaj ɨ maj nyéjchaꞌɨɨreꞌ, aꞌɨ́ɨ mu tyámuaꞌ juꞌuurej mej mij jeꞌej puaꞌaj náaꞌuurej,

¡tyámuaꞌ mu juꞌuurej mej mij naajéꞌcaj!

¹⁴Nyajta nyáaj, Tavástaraꞌ, muéetzij nu jimi tyíꞌcaꞌnyej,

nyáaj nu aꞌyan tyuꞌtaxájtacaꞌ tɨjɨn: “¡Muáaj paj nyaj Dios puéꞌeen!”

¹⁵Muáaj paj aꞌmuácaꞌ jitze jiꞌtyáaꞌ ɨ nyajúuricamej,

¡pataꞌaj nyaj japua huatányuunyij aꞌɨ́ɨjma jimi ɨ maj nyéjchaꞌɨɨreꞌ, majta nyamuarityeꞌ!

¹⁶Pataꞌaj jaataxɨéꞌveꞌen aꞌíjna ɨ tɨ muéetzij muahuɨɨreꞌ,

pajta nyaj japua huatányuunyij, aꞌɨ́jcɨ jɨmeꞌ ɨ paj nyaxɨeꞌveꞌ.

¹⁷Tavástaraꞌ, muéetzij jimi nu huatyényuusij,

¡capáj tyiꞌtáꞌcareꞌen nyej nyij tyéviꞌsiꞌ huataséjreꞌen!

¡Pataꞌaj aꞌɨ́ɨjma huatatyéviꞌraꞌastaj ɨ maj jeꞌej puaꞌaj tyityetyúuchaꞌɨj,

pataꞌaj aꞌáa huajaꞌváꞌnaj joꞌmaj tyityajáꞌavaꞌtacaa tɨꞌij quee aꞌtɨ́j huoꞌnamuaj!

¹⁸Cheꞌ quee namuajriaꞌaj jeꞌej maj tyíꞌxaj aꞌɨ́ɨmaj ɨ maj tyíꞌhueꞌtacaa,

ɨ maj tyáꞌxaahuataj metyíꞌxaj majta tyúꞌxanaꞌveꞌ,

majta jeꞌej puaꞌaj tyáꞌxaj aꞌɨ́jcɨ ɨ tyáataj tɨ quee tyiꞌtɨ́j jɨn áꞌɨtzeereꞌ.

¹⁹¡Huápuɨꞌɨj paj muáaj naa huojoꞌmuaꞌraj aꞌɨ́ɨjma ɨ maj tzáahuatyiꞌraꞌaj aꞌ jimi tyíchaꞌɨj!

Aꞌyaa paj tyéꞌchaꞌɨj tɨꞌɨj tyiꞌtɨ́j tɨ huápuɨꞌɨj tyáꞌnajchij

pajta, huaꞌjɨɨsaꞌ aꞌɨ́ɨjma ɨ tyétyacaa,

aꞌɨ́ɨjma paj tyuꞌtáꞌsij ɨ maj muéetzij jimi tyíꞌcaꞌnyej.

²⁰Huaꞌ jamuán paj séeriaꞌaj puáꞌmej pajta tyámuaꞌ tyihuoꞌtyéchaꞌɨɨsij

pajta quee tyuꞌtáꞌsij tɨꞌij aꞌyan tyáꞌraꞌnyij jeꞌej maj aꞌɨ́ɨmaj tyáꞌxɨeꞌveꞌ ɨ tyétyacaa ɨ maj jeꞌej puaꞌaj tyityetyúuchaꞌɨj;

muáaj paj huaꞌchaꞌɨ́ɨj puáꞌmej aꞌájna joꞌpaj muáaj jáꞌsejreꞌ

mej mij quee jeꞌej puaꞌaj tyihuáꞌjeevej aꞌɨ́ɨmaj ɨ maj huaꞌajchaꞌɨɨreꞌ.

²¹Cheꞌ jɨꞌréenyaꞌaj séjreꞌej ɨ Tavástaraꞌ, tɨ aꞌɨ́jna jɨmeꞌ ɨ tɨ jɨn taxɨeꞌveꞌ

jéehua tyámuaꞌ tyúꞌruuj nye jimi

aꞌájna nyatɨꞌɨj quee jeꞌej jájtyooveꞌej.

²²Nyatɨꞌɨj jéehua tyihuányamuaꞌtziityej aꞌyaa nu tyiꞌriáꞌmuaꞌaj tɨjɨn

paj períj aꞌɨmuáj nyojóoriej joꞌpaj muáaj quee jáꞌsejreꞌ,

ajta nyatɨꞌɨj muaatáhuaviiriꞌ paj naatáhuɨɨreꞌen,

muáaj paj náanamuajriꞌ ɨ nyaj jijhuacaꞌaj.

²³Siataꞌaj jaaxɨéꞌveꞌen ɨ Tavástaraꞌ, néijmiꞌi ɨ maj quee tyiꞌtɨ́j jɨn áꞌɨtzeereꞌ.

Tavástaraꞌ pu tyámuaꞌ tyihuáꞌchaꞌɨj aꞌɨ́ɨjma ɨ maj quee tyíꞌhueꞌtacaa,

ajta aꞌɨ́ɨjma ɨ maj jéehua óotzaahuatyeꞌ

aꞌyaa pu puéjtzij tyihuoꞌtáꞌsij jeꞌej tɨ tyihuáꞌcɨꞌpuaj.

²⁴Xatyóocaꞌnyej siajta caꞌnyíjraꞌaj huatóoaꞌan ɨ juxɨéjnyuꞌcaa tzajtaꞌ

néijmiꞌi ɨ maj Tavástaraꞌ jitze tyíꞌcaꞌnyej.

Tyaj jaataxáj tyiꞌtɨ́j tyaj jɨn ootyáꞌɨtzee tyajta jeꞌen tyuꞌtátaꞌuunyiꞌ

Jeꞌej tɨ tyihuoꞌmuáꞌtyej aꞌɨ́jna ɨ David

¹Cheꞌ huatóotyamuaꞌveꞌen aꞌɨ́jna ɨ tyáatɨꞌ ɨ maj meríj néijmiꞌi jɨn tyaatúꞌuunyiꞌriꞌ

tyiꞌtɨ́j maj jitzán puaꞌrityeꞌ ajta tyiꞌtɨ́j tɨ jɨn huóoxanaꞌcɨrej.

²Cheꞌ huatóotyamuaꞌveꞌen aꞌɨ́jna ɨ tyáatɨꞌ tɨ quee tyiꞌtɨ́j jɨn avíitzij jeꞌej puaꞌaj rɨcɨj

tɨ ajta quee ɨ Tavástaraꞌ tyiꞌtɨ́j jitzán puaꞌrityeꞌej.

³Nyatɨꞌɨj quee xu jaxáatacaj tyiꞌtɨ́j nyaj jɨn tyiꞌijxánaꞌcɨraꞌcaꞌaj,

nye tyéviraꞌ pu áꞌpuaꞌrisimeꞌej

aꞌɨ́jna jɨmeꞌ nyaj aꞌnáj tɨnaꞌaj nyeyiinyacaꞌaj,

⁴jiꞌnye tújca ajta tɨ́caꞌ

jaꞌmuácaꞌ tɨ néijmiꞌi tyámuaꞌ tyíꞌuurej aꞌɨ́ɨ pu nye jitze séjriaꞌcaꞌaj.

Aꞌyájna tɨꞌɨj ɨ xúuxuꞌuj tyuꞌtyáhuasij ɨ xɨ́jcataꞌ,

aꞌyaa pu nyaꞌaxcaj nyaj quee cheꞌ jeꞌej rɨnyij.

⁵Ajta néijmiꞌi nu muéetzij tyimuaatéꞌexaaj

tyiꞌtɨ́j nyaj jɨn tyiꞌijxánaꞌcɨraꞌcaꞌaj ajta ɨ nyaj jɨn jeꞌej puaꞌaj huarɨ́j,

aꞌyaa nu tyaataxɨeꞌvej nyaj muéetzij tyimuaatéꞌexaatyeꞌen ɨ nyaj tyiꞌijxánaꞌcɨraꞌcaꞌaj,

pajta muáaj, Tavástaraꞌ, muáaj paj tyinaatúꞌuunyiꞌriꞌ.

⁶Aꞌɨ́j pu jɨn, tɨꞌɨjta jeꞌej puaꞌaj tyíꞌrɨjcaj

aꞌɨ́ɨmaj ɨ maj tyámuaꞌ een aꞌɨ́ɨ mu muéetzij jimi huatyényuusij,

tyij ajta ɨ jájtyij caꞌnyíin jɨn huatámuɨꞌyej

capu aꞌɨ́ɨjma jitze ajtyáꞌastij.

⁷Muáaj paj aꞌɨ́ɨn puéꞌeen ɨ paj naatyáhuɨɨreꞌej:

muáaj paj nyechaꞌɨj tɨꞌij quee tyiꞌtɨ́j jeꞌej nyoorej,

muáaj paj aꞌɨ́jna jɨn nɨeꞌcánasij ɨ chuíicarij ɨ paj jɨn tyuꞌtyámueꞌtɨj.

⁸Ɨ Tavástaraꞌ pu aꞌyan tyíꞌxaj tɨjɨn:

“Nyajɨꞌɨj nu jɨn tyámuaꞌ naa tyíꞌmuasej.

Nyáaj nu muaatéꞌexaatyeꞌsij jeꞌej paj huárɨnyij,

tyámuaꞌ nu tyimuꞌcámuaꞌriityeꞌej,

nyajta nu muaataséjratyeꞌsij ɨ juyéj paj jitzán huameꞌen.

⁹Capáj aꞌyan eenyeꞌ tɨꞌɨj ɨ muáatzuj nusu tɨꞌɨj ɨ cahuáayuꞌ,

ɨ tɨquee huáɨꞌriityeꞌ mej mij tyihuojoꞌitéej muáꞌraꞌnyij

aꞌyaa puꞌij tyúuxɨeꞌveꞌ tyaj huaꞌriaꞌcaꞌnyihuaꞌan

aꞌɨ́jcɨ jɨmeꞌ ɨ píriin ajta ɨ tɨ jɨn antyájɨꞌquiꞌ

jiꞌnye capu seequéj ajtáhuaꞌaj jeꞌej tyíɨꞌrij mej mij aꞌ jimi ajtyáxɨɨrej.”

¹⁰Jéehua mu tyíꞌcucuiꞌ aꞌɨ́ɨmaj ɨ maj jeꞌej puaꞌaj tyityetyúuchaꞌɨj,

ajta aꞌɨ́jna ɨ tɨ jɨn tyúꞌxɨeꞌveꞌ ɨ Tavástaraꞌ

aꞌɨ́j pu jɨn néijmiꞌcaa eeriáꞌnasij aꞌɨ́ɨjma ɨ maj jitzán tyíꞌcaꞌnyej.

¹¹Siataꞌaj huatóotyamuaꞌveꞌen ɨ Tavástaraꞌ jimi,

tyétyacaa siaj tyámuaꞌ een siajta quee tyiꞌtɨ́j jɨn áꞌɨtzeereꞌ

¡siataꞌaj huatóotyamuaꞌveꞌen siajta, jutyamuaꞌveꞌej huajíjhua!

Chuíicarij ajta ɨ tyaj jɨn tyaatatyójtziꞌreꞌen ɨ Tavástaraꞌ

¹Siataꞌaj jimi tyuꞌtáchuiicaj ɨ Tavástaraꞌ, tyétyacaa siaj tyámuaꞌ een,

huaꞌ tyenyij jitze aꞌɨ́ɨjma ɨ maj tyámuaꞌ een, naa pu huánamuajrii ɨ chuíicarij.

²Setyuꞌtatyójtziꞌreꞌ ɨ Tavástaraꞌ aꞌɨ́jcɨ jɨmeꞌ ɨ áarpaj,

siajta jimi tyuꞌtáchuiicaj aꞌɨ́jcɨ jɨmeꞌ ɨ canárij,

³siataꞌaj chuíicarij tɨ jájcuaj huatáchuiicaj,

¡siajta jutyamuaꞌveꞌej tyámuaꞌ naa jimi setyuꞌtácuiinaj!

⁴Aꞌɨ́jna ɨ nyúucariaꞌraꞌ ɨ Tavástaraꞌ jɨꞌréꞌcan jɨmeꞌ pu séejreꞌ,

aꞌɨ́j pu jɨn séejreꞌ tyiꞌtɨ́j tɨ aꞌɨ́ɨn tyúꞌtaahuacaꞌ.

⁵Tavástaraꞌ pu aꞌɨ́j xɨeꞌveꞌ ɨ tɨ quee tyiꞌtɨ́j jɨn áꞌɨtzeereꞌ tɨ ajta tyámuaꞌ een,

¡aꞌɨ́jna ɨ tɨ jɨn taaxɨéꞌvej aꞌɨ́ɨ pu arí orióonajchacaꞌ néijmiꞌqueꞌ ɨ cháanacaj japua!

⁶Aꞌɨ́jcɨ jɨmeꞌ ɨ nyúucariaꞌraꞌ ɨ Tavástaraꞌ

aꞌɨ́j pu jɨn huatyátaavijhuacaꞌ ɨ tajapuá tɨ séejreꞌ,

ajta tɨꞌɨj tyuꞌtajɨ́ꞌtzej ɨ jutyényij jɨmeꞌ

aj mu mij néijmiꞌi ɨ xúꞌraꞌvetyee huataséjre.

⁷Aꞌɨ́ɨ pu jasɨɨreꞌ ajta tyámuaꞌ jaꞌuurej

aꞌɨ́jcɨ ɨ jájtyij aꞌájna joꞌtɨj huápuɨꞌɨj jaꞌtyáatɨꞌ.

⁸Siataꞌaj néijmiꞌqueꞌ ɨ chuéj japua jaatyátzaahuatyeꞌen ɨ Tavástaraꞌ,

¡néijmiꞌi xu jaatyátzaahuatyeꞌen mu siaj aꞌyan huacháatɨmee ɨ cháanacaj japua!

⁹Jiꞌnye aꞌɨ́ɨ pu tyuꞌtaxájtacaꞌ, ajta jeꞌen néijmiꞌi tyúꞌtaavijhuacaꞌ,

aꞌɨ́ɨ pu tyuꞌtaꞌíjtacaꞌ, ajta jeꞌen néijmiꞌi tyámuaꞌ tyiꞌéenyeꞌej jaꞌraa.

¹⁰Tavástaraꞌ pu néijmiꞌi huaꞌantyíꞌuunyiꞌraj tyiꞌtɨ́j maj muarɨeꞌ

aꞌɨ́ɨmaj ɨ maj quee tyáꞌtzaahuatyeꞌ,

¹¹ajta jeꞌej tyiꞌtɨ́j jɨn ɨ Tavástaraꞌ tyíꞌmuarɨeꞌ

aꞌnáj tɨnaꞌaj pu tyámuaꞌ éenyeꞌej jaꞌmej.

¹²Micheꞌ huatóotyamuaꞌveꞌen ɨ tyeɨ́tyee ɨ tɨ huaꞌ Dios aꞌɨ́ɨn puéꞌeen ɨ Tavástaraꞌ,

chájtaꞌnaj aꞌɨ́ɨn tɨ jaꞌantyíhuoj ajta huatyóoaꞌrij.

¹³Tavástaraꞌ pu taséj jútyeꞌ ɨmuáj

ajta néijmiꞌcaa tyámuaꞌ tyíꞌsej ɨ tyeɨ́tyee,

¹⁴aꞌájna ɨmuáj joꞌtɨj aꞌɨ́ɨn jaꞌchej

aꞌɨ́ɨ pu néijmiꞌcaa tyámuaꞌ tyíꞌsej ɨ cháanacaj japua maj huacháatɨmee,

¹⁵aꞌɨ́ɨ pu aꞌɨ́ɨn puéꞌeen ɨ tɨ jaatyátaahuacaꞌ ɨ huaꞌxɨéjnyuꞌcaa

aꞌɨ́ɨ pu ajta néijmiꞌi tyíꞌsej tyiꞌtɨ́j maj jɨn jeꞌej rɨcɨj.

¹⁶Capu sɨ́ɨj ɨ tɨ rey jɨn tyiꞌtyéjvee jujapuá huatányuusij aꞌɨ́ɨjma jɨmeꞌ ɨ maj mueꞌtɨ́j ɨ xantáaruꞌuj jimi tyíꞌhuɨɨreꞌ,

camu majta aꞌɨ́ɨmaj jujapuá huatányuusij ɨ maj jéehua jaayíꞌtɨn maj huatyényoꞌseꞌen majta jéehua uhuácacaꞌnyeꞌ,

¹⁷camu tyiꞌtɨ́j huɨɨreꞌ ɨ cahuáayuꞌuj mej mij séej japuan huatányuunyij,

tyij majta jéehua uhuácacaꞌnyeꞌej, camu huaꞌ japua huatányuusij.

¹⁸Ajta ɨ Tavástaraꞌ aꞌnáj tɨnaꞌaj pu huáꞌchaꞌɨj

aꞌɨ́ɨjma ɨ maj tzáahuatyiꞌraꞌaj jimi tyíchaꞌɨj majta aꞌɨ́j jitze tyíꞌcaꞌnyej ɨ tɨ jɨn huaꞌxɨeꞌveꞌ,

¹⁹aꞌɨ́ɨ pu huaꞌ japua huatányuusij mej mij quee huácuiꞌnyij

ajta júuricamej huoꞌtaꞌsij tɨꞌɨjta huatújriꞌhuaj.

²⁰Ityáj tu aꞌɨ́j jitze tyíꞌcaꞌnyej ɨ Tavástaraꞌ,

¡aꞌɨ́ɨ pu tahuɨɨreꞌ ajta tyámuaꞌ tyíꞌtachaꞌɨj!

²¹Ɨ taxɨéjnyuꞌcaa pu jutyamuaꞌveꞌ ɨ Tavástaraꞌ jimi,

aꞌɨ́j tu jitze tyíꞌcaꞌnyej ɨ tɨ jɨn ántyapuaj tɨ naa een.

²²¡Tavástaraꞌ, cheꞌ aꞌɨ́jna ɨ paj jɨn taxɨeꞌveꞌ, aꞌnáj tɨnaꞌaj tajamuán séjreꞌej,

aꞌyájna tyatɨꞌɨj muéetzij tyimuajchoꞌveꞌ!

Jeꞌej tyaj tyuꞌtáchuiicaj tyej tyij tyaatatyójtziꞌreꞌen ɨ Tavástaraꞌ

David tɨ joꞌtyéyuꞌxacaꞌaj, tɨꞌɨj tyíchee aꞌɨ́jcɨ jimi ɨ Abimélec, ɨ tɨ jimi hueꞌtzij jɨn aꞌyan tyuꞌtóosejratacaꞌ tɨjɨn huatyóotɨmueꞌriꞌ

¹Aꞌnáj tɨnaꞌaj nu tyeꞌtyóotziꞌreꞌej naꞌmej ɨ Tavástaraꞌ,

nye tyenyij nu jɨn aꞌnáj tɨnaꞌaj jimi tyiꞌchuíicaj naꞌmej.

²Nyáaj nu áꞌnyatzaahuatyeꞌ ɨ Tavástaraꞌ jimi,

¡xáanamuajriꞌ siajta huatóotyamuaꞌveꞌen, tyétyacaa siaj quee óotzaahuatyeꞌ!

³Tyicheꞌ néijmiꞌi jimi tyuꞌtáchuiicaj tyajta séej tyanaꞌaj aꞌhuatanyúucarityeꞌen

aꞌɨ́jcɨ jɨmeꞌ ɨ tɨ vaꞌcán jɨn tyiꞌtyéjvee ɨ tɨ jɨn ántyapuaj ɨ Tavástaraꞌ.

⁴Tavástaraꞌ nu jimi jaatáhuoj tɨꞌij naatáhuɨɨreꞌen, aꞌɨ́ɨ puꞌij náanamuajriꞌ,

ajta jeꞌen nyaj japua huatanyúj aꞌɨ́jcɨ jɨmeꞌ nyej nyáaj tyíꞌtzɨɨnyaꞌcaꞌaj,

⁵Aꞌɨ́ɨmaj ɨ maj jahuoo ɨ Tavástaraꞌ jimi

aꞌɨ́ɨ mu nyéeriꞌisteꞌ séeriaꞌaj muáꞌjuꞌun aꞌɨ́jcɨ jɨmeꞌ ɨ maj jutyamuaꞌveꞌ

majta jeꞌen quee aꞌnáj huatóotyeviꞌraꞌastaj.

⁶Aꞌíi pu huajíjhuacaꞌ ɨ tɨ quee jeꞌej tyéejviicueꞌ, Tavástaraꞌ puꞌij jáanamuajriꞌ

ajta néijmiꞌi jɨn japuan huatanyúj ɨ tɨ jɨn jeꞌej tyóomuaꞌajcaa.

⁷Aꞌɨ́jna ɨ tajapuá tɨ tyíꞌhuɨɨreꞌ ɨ Tavástaraꞌ jimi aꞌɨ́ɨ pu huáꞌchaꞌɨj ajta huaꞌ japua huatányuusij

aꞌɨ́ɨjma ɨ maj tzáahuatyiꞌraꞌaj jimi tyíchaꞌɨj ɨ Tavástaraꞌ.

⁸Siataꞌaj jaatyéesej, siajta jeꞌen jáamuaꞌreej tɨ néijmiꞌi jɨn tyámuaꞌ een ɨ Tavástaraꞌ.

¡Cheꞌ huatóotyamuaꞌveꞌen aꞌɨ́jna ɨ tyáatɨꞌ tɨ aꞌɨ́j jitze tyíꞌcaꞌnyej!

⁹Siataꞌaj jaatyátzaahuatyeꞌen ɨ Tavástaraꞌ, néijmiꞌi ɨ maj jimi tyámuaꞌ een,

jiꞌnye capu tyiꞌtɨ́j huoꞌtyaꞌɨtziityeꞌej aꞌɨ́ɨjma ɨ maj tzáahuatyiꞌraꞌaj jimi tyíchaꞌɨj.

¹⁰Aꞌɨ́ɨmaj ɨ chíjtyaanyiꞌij aꞌɨ́ɨ mu pueꞌéenyeꞌej muáꞌjuꞌun ɨ maj quee jeꞌej tyéejviicueꞌ, majta jajpuéetzij muáꞌjuꞌun matɨꞌɨj huatatájcun,

majta aꞌɨ́ɨmaj ɨ maj jahuoo ɨ Tavástaraꞌ jimi capu aꞌnáj tyiꞌtɨ́j huáꞌɨtziityaꞌaj jaꞌmej.

¹¹Musioꞌváꞌjuꞌ, nyiyóojmuaꞌ, siataꞌaj náanamuaj:

aꞌɨ́j nu jáꞌmuamuaꞌtyen siaj sij tzáahuatyiꞌraꞌaj jimi tyíchaꞌɨj ɨ Tavástaraꞌ.

¹²¿Nyi páaxɨeꞌveꞌ paj jéehua áꞌtyeeviꞌin?

¿Nyi páaxɨeꞌveꞌ paj jaxáahuaj chajca?

¹³Pataꞌaj jaatapuáꞌcɨtaj tɨꞌij muaꞌ nyanúu quee jeꞌej puaꞌaj tyíꞌxaxaꞌtaꞌan,

ajta tɨꞌij muaꞌ tyenyij quee aꞌnáj tyíꞌhueꞌtaj.

¹⁴Ajtáraꞌ aꞌɨ́jcɨ jitze ɨ tɨ jeꞌej puaꞌaj een, pajta jeꞌen tyámuaꞌ huárɨnyij,

aꞌɨ́j paj huáhuoonyij ɨ tɨ naa muaꞌaxcaj, pajta jeꞌen aꞌɨ́j jitze ucájrutyej.

¹⁵Tavástaraꞌ pu huáꞌchaꞌɨj aꞌɨ́ɨjma ɨ tyétyacaa maj tyámuaꞌ een

ajta huáꞌnamuaj jeꞌej maj aꞌɨ́ɨmaj tyityeetyényuusij.

¹⁶Tavástaraꞌ pu huaꞌajchaꞌɨɨreꞌ aꞌɨ́ɨjma ɨ maj jeꞌej puaꞌaj tyityetyúuchaꞌɨj,

aꞌɨ́j pu jɨn huaꞌantyipuaꞌrityeꞌsij mej mij quee cheꞌ huaꞌtamuáꞌreꞌrihuaꞌan ɨ cháanacaj japua.

¹⁷Tavástaraꞌ pu janamuaj aꞌɨ́jcɨ ɨ tyáataj tɨ tyámuaꞌ tyiꞌtyúuchaꞌɨj,

ajta néijmiꞌi jɨn japuan huatányuusij tyiꞌtɨ́j tɨ jɨn jeꞌej tyóomuaꞌajcaj.

¹⁸Tavástaraꞌ pu véjriꞌ séejreꞌ, tɨꞌij huaꞌ japua huatányuunyij aꞌɨ́ɨjma ɨ maj quee jeꞌej tyéejtyoovej ɨ juxɨéjnyuꞌcaa tzajtaꞌ

majta meríj yoꞌrɨej ɨ maj jitzán tyiꞌijchóꞌvaꞌcaꞌaj.

¹⁹Aꞌɨ́jna ɨ tyáatɨꞌ tɨ tyámuaꞌ tyiꞌtyúuchaꞌɨj jéehua pu tyiꞌtɨ́j jɨn japuéjtzitaren,

ajta aꞌɨ́jna ɨ Tavástaraꞌ aꞌɨ́ɨ pu néijmiꞌi jɨn japuan huatányuusij.

²⁰Aꞌɨ́ɨ pu néijmiꞌi ɨ caríiraꞌ chaꞌɨj,

camu mij séej antyínaꞌcaj.

²¹Aꞌɨ́ɨmaj ɨ maj jeꞌej puaꞌaj tyityetyúuchaꞌɨj aꞌɨ́j mu jɨn cuiꞌnyij ɨ maj jɨn jeꞌej puaꞌaj rɨcɨj,

majta aꞌɨ́ɨmaj mu japuéjtzitaren ɨ maj jájchaꞌɨɨreꞌ aꞌɨ́jcɨ ɨ tyáataj tɨ tyámuaꞌ tyiꞌtyúuchaꞌɨj.

²²Ajta aꞌɨ́jna ɨ Tavástaraꞌ aꞌɨ́ɨ pu huaꞌ japua huatányuusij aꞌɨ́ɨjma ɨ maj jimi tyíꞌhuɨɨreꞌ,

¡camu aꞌyan tyaꞌajpuéjtzij muáꞌjuꞌun aꞌɨ́ɨmaj ɨ maj jitzán tyíꞌcaꞌnyej!

Jeꞌej tyej tyaatáhuoonyij tɨꞌij ɨ Tavástaraꞌ taatáhuɨɨreꞌen

David tɨ jaꞌaꞌrij

¹Tavástaraꞌ, pataꞌaj huaꞌajchaꞌɨɨreꞌej aꞌɨ́ɨjma ɨ maj nyéetzij nyéjchaꞌɨɨreꞌ;

pajta huoꞌtanyóꞌsiꞌtyeꞌen aꞌɨ́ɨjma ɨ maj nyéetzij nyenyoꞌsiꞌtyeꞌej.

²Pataꞌaj tyámuaꞌ jáaꞌuurej ɨ paj jɨn huatyényoꞌseꞌen pajta jeꞌen naatáhuɨɨreꞌen,

³pataꞌaj jáꞌajchueenyij aꞌ chúun pej pij huoꞌtanyóꞌsiꞌtyeꞌen aꞌɨ́ɨjma ɨ maj nyamuarityeꞌ,

¡naatéꞌexaatyeꞌ paj muáaj aꞌɨ́ɨn puéꞌeen ɨ tɨ nyajapuáj huatányuusij!

⁴Micheꞌ jutyéviꞌraꞌaj muatóoꞌuunaj

aꞌɨ́ɨmaj ɨ maj jaxɨeꞌveꞌ maj naajéꞌcaj;

micheꞌ jutyéviꞌraꞌaj muatóoꞌuunaj

aꞌɨ́ɨmaj ɨ maj jaxɨeꞌveꞌ maj tyinaapuéjtyeꞌen;

⁵¡micheꞌ aꞌyan huárɨnyij tɨꞌɨj ɨ xɨéerij áacaj tɨ yoꞌcuíꞌnaj!

aꞌɨ́jna ɨ tɨ tajapuá tyíꞌhuɨɨreꞌ ɨ Tavástaraꞌ jimi aꞌɨ́ɨ pu ahuojóohuaꞌxɨj.

⁶¡Cheꞌ huatyátɨcaꞌrej ɨ huaꞌ juyéj jitze ajta huapuɨ́tyiꞌcɨj,

cheꞌ aꞌɨ́ɨn huoꞌtamuárityeꞌen ɨ tajapuá tɨ tyíꞌhuɨɨreꞌ ɨ Tavástaraꞌ jimi!

⁷Canu jeꞌej huaꞌuuriáacaj matɨꞌɨj aꞌɨ́ɨmaj avíitzij jɨn jaxɨeꞌvaꞌcaꞌaj maj naatyéeviꞌ;

canu nyajta jeꞌej huaꞌuuriáacaj matɨꞌɨj aꞌɨ́ɨmaj jaꞌtyáacuj

nyej nyij nyáaj aꞌáa jaꞌtyéjvetyij.

⁸¡Cheꞌ jeꞌej puaꞌaj tyúꞌrɨnyij huaꞌ jimi!

¡Micheꞌ jujɨ́ɨmuaꞌaj jeꞌej puaꞌaj huóoꞌuurej!

¡Cheꞌ jeꞌej puaꞌaj tyáꞌraꞌnyij huaꞌ jimi!

⁹Aj nu nyij huatányetyamuaꞌveꞌsij ɨ Tavástaraꞌ jimi,

jiꞌnye aꞌɨ́ɨ pu nyajapuáj huatányuusij.

¹⁰Nyaxɨéjnyuꞌcaa nu jɨn aꞌyan tyuꞌtaxájtaj tɨjɨn:

“¿Aꞌtanyíj ajtáhuaꞌaj séejreꞌ tɨ aꞌyan een patɨꞌɨj muáaj Tavástaraꞌ?

Muáaj paj huaꞌ japua huatányuusij aꞌɨ́ɨjma ɨ maj quee jeꞌej tyéejviicueꞌ

aꞌɨ́ɨjma jimi ɨ maj jéetzeꞌ uhuácacaꞌnyeꞌ mequee aꞌɨ́ɨmaj,

ɨ maj majta jeꞌej puaꞌaj huáꞌuurej.”

¹¹Aꞌɨ́ɨmaj mu nye jitze tyíꞌpuaꞌrityeꞌ ɨ maj jeꞌej puaꞌaj tyityetyúuchaꞌɨj

majta aꞌɨ́j tyíꞌnyeꞌihuoꞌ tyiꞌtɨ́j nyej nyáaj quee muaꞌreej.

¹²Nyáaj nu tyámuaꞌ tyíꞌuurej huaꞌ jimi majta aꞌɨ́ɨmaj mu jeꞌej puaꞌaj nyaꞌuurej,

aꞌíi puꞌij jéehua nyaxaamujrityeꞌ,

¹³jiꞌnye matɨꞌɨj aꞌɨ́ɨmaj tyíꞌcucuiꞌcaꞌaj

nyáaj nu huaꞌ jɨmeꞌ jeꞌej tyéꞌnyamuaꞌajcaa,

nyáaj nu chaꞌ nyanaꞌaj tyiꞌtyényecheꞌtyahuaꞌaj nyajta nye ítziꞌvaꞌcaꞌaj,

nyajta nyatzájtaꞌ aꞌnáj tɨnaꞌaj jahuoocaꞌaj.

¹⁴Nyáaj nu nyaxaamujrityaꞌcaꞌaj nyajta jeꞌej tyéꞌnyamuaꞌajcaa,

cuxáa nyaj aꞌɨ́jna jɨn nyaxaamujrityaꞌaj tɨꞌɨj náanaj tɨ huámuɨꞌnyij,

nusu aꞌɨ́jna ɨ tyaj néemiꞌij áꞌtajaahuatyeꞌ caꞌ ɨ nyeꞌihuáaraꞌ.

¹⁵Ajta tɨꞌɨj nye jimi jeꞌej puaꞌaj tyuꞌrɨ́j,

néijmiꞌi mu aꞌɨ́ɨmaj naatyáꞌaꞌtzacaꞌ;

cuxáa maj tyeɨ́tyee puéꞌeenyeꞌ maj quee nyamuaꞌtyej,

majta jéehua huápuɨꞌɨj jeꞌej puaꞌaj náaruj.

¹⁶Aꞌɨ́ɨ mu jeꞌej puaꞌaj tyíꞌnyaxaj, majta nyaꞌaꞌtzej,

majta naꞌráasej aꞌɨ́jcɨ jɨmeꞌ maj jéehua nyaxanaꞌveꞌej.

¹⁷Tavástaraꞌ, ¿aꞌchunyéj pooj áꞌtyeeren paj huaꞌraséeraj puáꞌmej?

¡Pataꞌaj nyaj japua huatányuunyij, jiꞌnye aꞌíj nu jɨn júurij,

aꞌɨ́ɨjma jimi ɨ maj aꞌyan tyíꞌtyacɨꞌxɨj matɨꞌɨj ɨ muajyéj!

¹⁸Nyetyimuatatyójtziꞌreꞌej huaꞌ tzajtaꞌ aꞌtyéɨtyeristyamuaꞌ maj jéehua aráꞌasej;

¡menyeséeracaj mu aꞌɨ́ɨmaj nyatɨꞌɨj tyámuaꞌ tyimuaatyátoosij!

¹⁹Micheꞌ quee nyéetzij jɨn jutyamuaꞌveꞌej aꞌɨ́ɨmaj ɨ maj nyéjchaꞌɨɨreꞌ,

micheꞌ quee jutyamuaꞌveꞌej aꞌɨ́jcɨ jɨmeꞌ nyej nyáaj nyaxaamujrityeꞌ aꞌɨ́ɨmaj ɨ maj chaꞌmanaꞌaj tyiꞌtɨ́j jɨn nyajaaxɨejviꞌ.

²⁰Jiꞌnye camu aꞌɨ́ɨmaj jahuoo maj juxáahuaj séjreꞌej,

sulu aꞌɨ́ɨ mu avíitzij jɨn tyámuaꞌ juꞌuurej mej mij tyiꞌtɨ́j jeꞌej puaꞌaj huáꞌuurej

aꞌɨ́ɨjma jimi ɨ tyeɨ́tyee maj tyámuaꞌ naa tyityeecháatɨmee,

²¹aꞌɨ́ɨ mu acácuaxaꞌvaꞌraj nye jimi, mej mij hueꞌtzij jɨn aꞌyan tyinaataxáj tɨjɨn:

“¡Cásɨꞌ tajɨꞌɨj tu jɨn tyeríj jaaséj!”

²²¡Muáaj paj huaꞌsej, Tavástaraꞌ!

¡Capáj aꞌyan eenyeꞌ tɨꞌɨj ɨ tɨ quee atányuuvej!

¡Capáj nye jimi ajtáyiꞌcan!

²³Ájchesij, Tavástaraꞌ nyaj Dios, ¡huájɨsij!

Pataꞌaj noꞌxáꞌpuɨꞌɨntariꞌtzeꞌen, nyajamuan paj séjreꞌej.

²⁴Tavástaraꞌ nyaj Dios, pataꞌaj noꞌxɨ́jtyeꞌen,

aꞌɨ́jcɨ jɨmeꞌ ɨ paj muáaj jɨn tyámuaꞌ naa tyáꞌxaꞌpuɨꞌɨntareꞌ.

¡Micheꞌ quee aꞌɨ́ɨmaj nyaꞌaꞌtzej!

²⁵Micheꞌ quee aꞌyan tyíꞌxajtaj nusu maj aꞌyan tyíꞌmuaꞌajcaj yee:

“¡Aꞌyaa tu tyáꞌxɨeꞌvaꞌcaꞌaj!

¡Tuꞌríj néijmiꞌi jɨn jaꞌantyipuáꞌrij!”

²⁶Micheꞌ huápuɨꞌɨj huatóotyeviꞌraꞌastaj

aꞌɨ́ɨmaj ɨ maj nyaꞌaꞌtzej aꞌɨ́jcɨ jɨmeꞌ tɨ quee tyámuaꞌ tyíꞌnyaꞌuurej,

micheꞌ jéehua huápuɨꞌɨj huatóotyeviꞌraꞌastaj

aꞌɨ́ɨmaj ɨ maj jéehua nye jimi óotzaahuatyeꞌ.

²⁷Ajta micheꞌ huatóotyamuaꞌveꞌen majta huajíjhua muutyámuaꞌvaꞌaj

aꞌɨ́ɨmaj ɨ maj nyeséejracuj nyaj tyuꞌtyámueꞌtɨ;

micheꞌ aꞌnáj tɨnaꞌaj aꞌyan tyíꞌxajtaj tɨjɨn:

“¡Vaꞌcán pu jɨn tyíꞌijta ɨ Tavástaraꞌ,

ajta jaꞌráanajchi tɨ tyámuaꞌ tyíꞌeenyeꞌ aꞌɨ́jcɨ jimi ɨ tɨ jahuɨɨreꞌ!”

²⁸Nyenyanúu nu jɨn jaataxájtaj ɨ paj jɨn tyámuaꞌ tyíꞌuurej;

¡néijmiꞌi tújcaꞌrij tzajtaꞌ nu tyimuaatatyójtziꞌreꞌej!

Tyiꞌtɨ́j tɨ ɨ tyáatɨꞌ jɨn jeꞌej puaꞌaj tyiꞌtyúuchaꞌɨj ajta ɨ Dios tɨ tyúꞌpuejveꞌ

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. David tɨ jaꞌaꞌrij, Tavástaraꞌ tɨ jimi tyíꞌhuɨɨreꞌ

¹Aꞌɨ́jna ɨ tɨ jeꞌej puaꞌaj een aꞌɨ́j pu tyíꞌixaatyeꞌ ɨ tɨ jeꞌej puaꞌaj tyiꞌtyúuchaꞌɨj

tyétyeꞌ ɨmuáj ɨ xɨéjnyuꞌcariaꞌraꞌ tzajtaꞌ.

Capu aꞌnáj tzajtaꞌ séejreꞌ

tɨꞌij tzáahuatyiꞌraꞌaj jimi tyíchaꞌɨɨj ɨ Dios.

²Aꞌyaa pu tyóomuaꞌtzej maj néijmiꞌi tyámuaꞌ tyáꞌxaj,

capu ij jaxanaꞌveꞌ ɨ tɨ jɨn jeꞌej puaꞌaj tyiꞌtyúuchaꞌɨj.

³Jeꞌej pu puaꞌaj tyíꞌxaxaꞌaj ajta tyíꞌhueꞌtacaa,

aꞌɨ́ɨ pu yoꞌrɨej ɨ tɨ xáꞌpuɨꞌ, ajta jaatapuáꞌcɨtacaꞌ ɨ tɨ tyámuaꞌ een.

⁴Huaqueꞌtɨ́j pu aꞌájna joꞌtɨj jáꞌhuiꞌcaa, aꞌɨ́j pu curiaꞌmuaꞌsij tyiꞌtɨ́j tɨ jɨn jeꞌej puaꞌaj huárɨnyij,

huápuɨꞌɨj pu aꞌɨ́j jitze jucaꞌnyej ɨ tɨ jɨn jeꞌej puaꞌaj rɨcɨj

capu ij jaxɨeꞌveꞌ tɨ jaatapuáꞌcɨtaj ɨ tɨ jeꞌej puaꞌaj een.

⁵Ajta ɨ paj jɨn taxɨeꞌveꞌ, Tavástaraꞌ, tajapuá pu ɨmuáj jaꞌráꞌasej;

ajta ɨ paj jɨn tyámuaꞌ een aꞌáa pu jaꞌráꞌasej ɨ tɨ huáꞌraa jitze tajapuá tɨ séejreꞌ.

⁶Aꞌɨ́jna ɨ paj muáaj jɨn tyíꞌxaꞌpuɨꞌɨntareꞌ aꞌyaa pu een tɨꞌɨj ɨ jɨríj tɨ jéetzeꞌ ajtɨ́tɨꞌɨjmee;

ajta ɨ paj jɨn tyíꞌijta aꞌyaa pu een tɨꞌɨj ɨ jájtyij tɨ veꞌéj tɨ ajta huápuɨꞌɨj atyáatɨꞌ.

Muáaj, Tavástaraꞌ, muáaj paj huáꞌchaꞌɨj ɨ tyeɨ́tyee pajta ɨ tyiꞌtyán maj tyityaacɨ́ꞌɨj.

⁷¡Dios, huápuɨꞌɨj pu naa huaséꞌrin ɨ paj jɨn taxɨeꞌveꞌ!

Muéetzij mu jimi jahuoo, aꞌɨ́ɨmaj ɨ tyeɨ́tyee mej mij huatyóohuɨɨreꞌen.

⁸Tyámuaꞌ mu naa tyityaatajúꞌxaj

aꞌɨ́jcɨ jɨmeꞌ ɨ tɨ jéehua ɨ cueꞌráj tyíꞌsejreꞌ aꞌájna joꞌpaj jaꞌchej,

muáaj paj huaꞌtáꞌcaa mej mij huayeꞌen aꞌɨ́jcɨ jitze ɨ játyaꞌnaj tɨ naa éenyeꞌej muɨꞌyej,

⁹jiꞌnye muéetzij jitze pu séejreꞌ ɨ júuricamej

ajta muéetzij jimi ɨꞌríj tyej tyij maꞌunyéjnyeꞌrej.

¹⁰Pataꞌaj aꞌnáj tɨ naꞌaj huaꞌtáꞌcareꞌen ɨ paj jɨn taxɨeꞌveꞌ pajta ɨ paj jɨn tyámuaꞌ een

aꞌɨ́ɨjma ɨ maj muéetzij muamuaꞌtyej,

aꞌɨ́ɨjma ɨ tyeɨ́tyee maj quee tyiꞌtɨ́j jɨn áꞌɨtzeereꞌ.

¹¹Capáj tyiꞌtáꞌcareꞌen maj naatzíinajyiꞌcan aꞌɨ́ɨmaj ɨ maj óotzaahuatyeꞌ

nusu maj aꞌɨ́ɨmaj nyenyoꞌsiꞌtyaꞌaj ɨ maj jeꞌej puaꞌaj tyityetyúuchaꞌɨj.

¹²¡Cásɨꞌ aꞌɨ́ɨmaj mu eetávitzej ɨ maj jeꞌej puaꞌaj tyityetyúuchaꞌɨj!

¡Aꞌɨ́ɨ mu eetávitzej mej mij quee cheꞌ ájhuiixɨꞌɨn!

Tavástaraꞌ paj jitze tyúꞌcaꞌnyej

David tɨ jaꞌaꞌrij

¹Capáj nyuꞌcamuɨꞌɨj tyij majta aꞌɨ́ɨn puéꞌeenyeꞌ ɨ maj jeꞌej puaꞌaj tyityetyúuchaꞌɨj,

capáj pajta huáꞌxanaꞌveꞌej aꞌɨ́ɨjma ɨ maj jeꞌej puaꞌaj rɨcɨj,

²jiꞌnye jiyeꞌtzín mu huatyáhuasij, aꞌyájna tɨꞌɨj ɨ ɨxáj;

¡aꞌyaa mu tyityeeriáꞌhuasij tɨꞌɨj ɨ tuꞌpíj!

³Tavástaraꞌ paj jitze tyúꞌcaꞌnyej pajta tyámuaꞌ tyiꞌtyíaꞌchaꞌɨj,

aꞌyan paj chajca ɨ cháanacaj japua pequee tyiꞌtɨ́j jɨn aꞌɨtzéeriaꞌaj.

⁴Tyámuaꞌ paj naa tyáaxɨeꞌveꞌen ɨ Tavástaraꞌ,

aꞌɨ́ɨ pu néijmiꞌi tyimuaatáꞌsij tyiꞌtɨ́j paj jéetzeꞌ xɨeꞌveꞌ.

⁵Pajta aꞌ júuricamej jaatáꞌan ɨ Tavástaraꞌ,

aꞌɨ́j paj jitze tyúꞌcaꞌnyej, aꞌɨ́ɨ puꞌij muaatyáhuɨɨreꞌej.

⁶Aꞌɨ́ɨ pu muaatáꞌsij paj aꞌyan huaséꞌrihuaꞌan tɨꞌɨj ɨ tatzárij aꞌɨ́jcɨ jɨmeꞌ paj tyámuaꞌ tyiꞌtyíaꞌchaꞌɨj

aꞌyájna tɨꞌɨj ɨ xɨcáj tyaꞌtaa aꞌtzáaj tacuaríixpuaj.

⁷Capáj jeꞌej tyíꞌnyuucaꞌan ɨ Tavástaraꞌ jimi,

naa paj tyuꞌtaꞌcuaꞌnyéej petyuꞌchóꞌveꞌen tɨꞌij aꞌɨ́ɨn muaatáhuɨɨreꞌen.

Capáj jajaaxɨejviꞌraj aꞌɨ́jcɨ ɨ tɨ tyuꞌtyáamueꞌtɨj,

nusu aꞌɨ́jcɨ jimi ɨ tɨ avíitzij jɨn jeꞌej puaꞌaj rɨcɨj.

⁸Huatapuáꞌcɨtaj ɨ paj jɨn nyúꞌcamuɨꞌ, jóꞌhuaꞌxɨj tyiꞌtɨ́j paj jɨn nyúꞌcamuɨꞌ;

capáj nyuꞌcaj, jiꞌnye jéetzeꞌ pu jeꞌej puaꞌaj tyeꞌmej.

⁹Jiꞌnye ɨ maj jeꞌej puaꞌaj tyityetyúuchaꞌɨj aa mu ɨmuáj huojóohuaꞌxɨj ɨ chuéj japua,

majta ɨ maj jitzán tyíꞌcaꞌnyej ɨ Tavástaraꞌ

aꞌɨ́ɨmaj mu aꞌyan huochéetyaꞌajraꞌsij.

¹⁰Capu cheꞌ aꞌchu áꞌtyeeren matɨꞌɨj quee cheꞌ maꞌhuáꞌtaj muáꞌjuꞌun ɨ maj jeꞌej puaꞌaj rɨcɨj;

tyij pajta jéehua huaꞌhuoocaj, capáj cheꞌ huaꞌtyoonyij.

¹¹Majta ɨ maj quee óotzaahuatyeꞌ aꞌɨ́ɨjma pu aꞌrij jaꞌmej ɨ cháanacaj

majta juxáahuaj huacháatɨmaꞌaj muáꞌjuꞌun.

¹²Aꞌɨ́jna ɨ tɨ jeꞌej puaꞌaj tyiꞌtyúuchaꞌɨj aꞌɨ́ɨ pu tyámuaꞌ juꞌuurej tɨꞌij jeꞌej puaꞌaj jáaꞌuurej ɨ tyáataj tɨ tyámuaꞌ tyiꞌtyúuchaꞌɨj,

ajta jéehua huápuɨꞌɨj jaxánaꞌveꞌej jaꞌráasej.

¹³Ajta ɨ Tavástaraꞌ pu huaꞌaꞌtzej, jiꞌnye aꞌɨ́ɨ pu jamuaꞌreej

tɨ arí tyaꞌráꞌiixaj aꞌɨ́jcɨ jimi ɨ tɨ jeꞌej puaꞌaj tyiꞌtyúuchaꞌɨj.

¹⁴Aꞌɨ́ɨmaj mu tyíꞌijcunaj ɨ tyúuchun ɨ maj jeꞌej puaꞌaj tyityetyúuchaꞌɨj majta tyámuaꞌ tyíꞌuurej ɨ túꞌnamuaꞌaj,

mej mij huaꞌantyipuáꞌrityeꞌen ɨ maj quee jeꞌej tyéejviicueꞌ majta ɨ maj quee óotzaahuatyeꞌ,

ajta mej mij huóꞌcuiꞌnyij ɨ maj tyámuaꞌ tyityetyúuchaꞌɨj.

¹⁵Ajta aꞌɨ́ɨ pu ɨ tyihuáꞌchuun huaꞌantyétzesij ɨ huaꞌxɨéjnyuꞌcaa jitze,

ajta ɨ tyihuáꞌtuꞌnamuaꞌ tyuꞌtyánaꞌxɨj.

¹⁶Tyiꞌtɨ́j tɨ cɨ́ɨ naꞌaj caa tyíꞌijchaꞌɨj aꞌɨ́jna ɨ tyáatɨꞌ tɨ tyámuaꞌ tyiꞌtyúuchaꞌɨj

jéetzeꞌ pu tyámuaꞌ een quee tyiꞌtɨ́j maj jéehua tyíchaꞌɨj ɨ maj jeꞌej puaꞌaj tyíꞌtyetyeɨtyee.

¹⁷Jiꞌnye Tavástaraꞌ pu huaꞌantyipuaꞌrityeꞌsij aꞌɨ́ɨmaj ɨ maj jeꞌej puaꞌaj rɨcɨj,

ajta huaꞌchaꞌɨ́ɨj jaꞌmej ɨ maj tyámuaꞌ tyityetyúuchaꞌɨj.

¹⁸Tavástaraꞌ pu huáꞌchaꞌɨj aꞌɨ́ɨjma ɨ maj quee tyiꞌtɨ́j jɨn áꞌɨtzeereꞌ,

ajta jusén jɨn séeriaꞌaj jaꞌmej tyiꞌtɨ́j maj aꞌɨ́ɨmaj ancuriáaꞌsij.

¹⁹Tɨꞌɨj jeꞌej puaꞌaj tyíꞌrɨjcaa, tɨꞌɨjta huatújriꞌhuaj,

camu tyéviꞌsiꞌ séeriaꞌaj muáꞌjuꞌun, jiꞌnye jéehua mu tyiꞌijchaꞌɨ́ɨj muáꞌjuꞌun ɨ maj tyúꞌcuaꞌnyij.

²⁰Aꞌɨ́ɨmaj ɨ maj jeꞌej puaꞌaj rɨcɨj aꞌyaa mu tyityeetyátaasij tɨꞌɨj tuꞌpíj tɨ huáchij,

majta ɨ maj jájchaꞌɨɨreꞌ ɨ Tavástaraꞌ aꞌyaa mu tyityajaꞌhuóopuaꞌrixɨꞌɨj tɨꞌɨj ɨ cɨtzíj.

²¹Aꞌɨ́jna ɨ tɨ jeꞌej puaꞌaj tyiꞌtyúuchaꞌɨj aꞌɨ́ɨ pu tyúunyejviꞌ ajta capu tyíꞌnaꞌchitaj,

ajta aꞌɨ́jna ɨ tyáatɨꞌ tɨ tyámuaꞌ tyíꞌtyevij aꞌɨ́ɨ pu naa tyihuojóꞌmuaꞌraj ajta tyúꞌpuejveꞌ.

²²Aꞌɨ́ɨjma ɨ Tavástaraꞌ tɨ tyámuaꞌ tyihuoꞌtyátoosij aꞌɨ́ɨ mu jaꞌancuriáaꞌsij ɨ chuéj,

ajta aꞌɨ́ɨn tɨ jeꞌej puaꞌaj huáꞌuurej aꞌɨ́ɨ mu antyipuaꞌrij.

²³Tavástaraꞌ pu tyámuaꞌ naa tyéeviꞌtɨj aꞌɨ́jcɨ ɨ tyáataj

ajta aꞌɨ́j jitze jáaviꞌtɨj ɨ juyéj aꞌɨ́j tɨ aráanajchi,

²⁴ajta tɨpuaꞌaj eetávetyij, capu aꞌyan éenyeꞌej jaꞌmej,

jiꞌnye ɨ Tavástaraꞌ pu javiꞌ ɨ muácaꞌraꞌan jitze.

²⁵Nyáaj nu huátyamueestariacaꞌ, nyajta nyeríj vastacɨrɨeꞌ,

ajta canu aꞌnáj jaaséj aꞌɨ́jcɨ ɨ tyáataj tɨ tyámuaꞌ tyiꞌtyúuchaꞌɨj tɨ tyiꞌtɨ́j jɨn japuéjtzitarej

canu nyajta aꞌnáj huoꞌséj ɨ yójmuaꞌmuaꞌ maj tyiꞌtɨ́j huóotɨveenyij.

²⁶Aꞌnáj tɨnaꞌaj pu tyihuaꞌcuꞌvej, ajta tyúꞌnyijtyeꞌ,

majta ɨ yójmuaꞌmuaꞌ tyámuaꞌ mu naa tyityeetyátuiihuaj.

²⁷Ajtáraꞌ aꞌɨ́jcɨ jitze ɨ tɨ jeꞌej puaꞌaj een pajta jeꞌen tyámuaꞌ tyiꞌtyíaꞌchaꞌɨɨj,

aꞌyaa paj aꞌnáj tɨnaꞌaj tyeꞌejchaꞌɨ́ɨj puáꞌmej joꞌpaj jaꞌhuáꞌchejtyeꞌen.

²⁸Jiꞌnye Tavástaraꞌ pu jaxɨeꞌveꞌ aꞌɨ́jcɨ ɨ tɨ tyámuaꞌ tyiꞌtyúuchaꞌɨj

ajta quee huojoꞌhuaꞌnaj aꞌɨ́ɨjma ɨ maj quee tyiꞌtɨ́j jɨn áꞌɨtzeereꞌ,

ajta huaꞌantyipuaꞌrityeꞌsij aꞌɨ́ɨjma ɨ maj jeꞌej puaꞌaj rɨcɨj

capu ajta huoꞌtaꞌsij maj séecan huaꞌ jitze eeráanyej.

²⁹Aꞌɨ́ɨmaj ɨ maj tyámuaꞌ tyíꞌtyetyeɨtyee aꞌɨ́ɨ mu jaꞌancuriáaꞌsij ɨ chuéj

majta jusén jɨmeꞌ aꞌɨ́jcɨ japua huacháatɨmaꞌaj muáꞌjuꞌun.

³⁰Aꞌɨ́jna ɨ tyáatɨꞌ tɨ tyámuaꞌ tyiꞌtyúuchaꞌɨj jaꞌhuooꞌitéerican pu jɨn tyíꞌxaj,

aꞌɨ́jna ɨ tyáatɨꞌ tɨ tyámuaꞌ tyiꞌtyúuchaꞌɨj aꞌɨ́j pu tyíꞌxaj ɨ tɨ tyíꞌxaꞌpuɨꞌ.

³¹Ajta ɨ xɨéjnyuꞌcariaꞌraꞌ tzajtaꞌ úꞌsejreꞌ jeꞌej tɨ ɨ Dios raꞌ tyíꞌmuaꞌtaj,

ajta quee aꞌnáj antyípuɨtyij ɨ juꞌɨ́ɨcaj jɨmeꞌ.

³²Aꞌɨ́jna ɨ tɨ jeꞌej puaꞌaj rɨcɨj aꞌɨ́j pu avíitzij jɨn eeveꞌ ɨ tyáatɨꞌ tɨ tyámuaꞌ tyiꞌtyúuchaꞌɨj,

aꞌɨ́jcɨ jɨmeꞌ tɨ aꞌyan tyáꞌxɨeꞌveꞌ tɨ jaajéꞌcaj;

³³ajta ɨ Tavástaraꞌ capu tyuꞌtáꞌsij tɨ tyiꞌtɨ́j jeꞌej puaꞌaj jaꞌuurej,

capu ajta tyuꞌtáꞌsij mej mij tyiꞌtɨ́j jitzán puaꞌrityeꞌej.

³⁴Muáaj, Tavástaraꞌ paj jitze tyúꞌcaꞌnyej, pajta jaꞌráꞌastijreꞌen,

aꞌɨ́ɨ puꞌij tyámuaꞌ tyimuaatyátoosij ajta muaatáꞌsij paj muáaj jaꞌancuriáꞌan ɨ chuéj.

Muaꞌ jɨꞌɨj paj jɨn huaꞌsejran matɨꞌɨj antyipuaꞌrej ɨ maj jeꞌej puaꞌaj rɨcɨj.

³⁵Nuꞌríj jaaséj aꞌɨ́jcɨ ɨ tɨ jeꞌej puaꞌaj rɨcɨj, jéehua pu óotzaahuatyeꞌ,

aꞌyaa pu jéehua tyiꞌtyáxamueꞌ tɨꞌɨj ɨ cɨyéj tɨ aꞌáa jaꞌtávej joꞌtɨj joꞌjɨ́ꞌreꞌen,

³⁶ajta jeꞌej pu huárupij, capu cheꞌ maꞌ jáꞌsejreꞌ,

nyáaj nu jáahuoj, ajta canu jáatyoj.

³⁷Pataꞌaj jaaséj aꞌɨ́jcɨ ɨ tyáataj tɨ tyámuaꞌ een ajta quee tyiꞌtɨ́j jɨn áꞌɨtzeereꞌ,

juxáahuaj pu naa atyejeꞌchaaj jaꞌmej aꞌɨ́jna ɨ tyáatɨꞌ.

³⁸Majta ɨ maj quee tyihuojóꞌitej aꞌɨ́ɨjma mu néijmiꞌcaa antyipuáꞌrityeꞌsij,

aꞌyaa mu mij majta tyityeꞌentyipuáꞌrij aꞌɨ́ɨmaj ɨ maj jeꞌej puaꞌaj rɨcɨj.

³⁹Aꞌɨ́jna ɨ tɨ huáꞌhuɨɨreꞌ ɨ tyeɨ́tyee maj tyámuaꞌ een Tavástaraꞌ pu jimi jáꞌmaꞌcan,

aꞌɨ́ɨ puꞌij huoꞌtyáhuɨɨreꞌsij tɨꞌɨjta tyiꞌtɨ́j jéehua huaꞌtyesiꞌhuarityeꞌej.

⁴⁰Tavástaraꞌ pu huoꞌtáhuɨɨreꞌej mej mij huatóoꞌuunaj.

Aꞌɨ́ɨ pu tyuꞌtáꞌsij mej mij huatóoꞌuunaj aꞌɨ́ɨmaj jimi ɨ maj jeꞌej puaꞌaj rɨcɨj, ajta huaꞌ japua huatányuusij,

jiꞌnye aꞌɨ́j mu jimi jáahuoj tɨꞌij aꞌɨ́ɨn huóꞌchaꞌɨɨn.

Jeꞌej tɨ tyuꞌtyényuunyij tɨꞌij jaatáhuoonyij tɨ ɨ Dios jaatáhuɨɨreꞌen

Chuíicarij David tɨ joꞌtyéyuꞌxacaꞌaj, mej mij aꞌɨ́jna jɨn néijmiꞌi tyoꞌtámuaꞌreej ɨ muꞌvéjrij

¹Tavástaraꞌ, capáj nyetyaꞌxɨꞌɨj aꞌɨ́jcɨ jɨmeꞌ ɨ paj jɨn nyúꞌcamuɨꞌ

capáj pajta puéjtzij nyataꞌcareꞌen patɨꞌɨjta nyuꞌcamuɨꞌɨj.

²Jiꞌnye puꞌríj nye jitze ráꞌaj aꞌɨ́jna ɨ paj jɨn puéjtzij naatáꞌ;

¡aꞌɨ́j paj jɨn puéjtzij naatáꞌ aꞌchu paj uhuájcaꞌnyej!

³Aꞌɨ́jna ɨ paj jɨn nyúꞌcamuɨꞌ aꞌɨ́jcɨ jɨmeꞌ nyej nyáaj tyiꞌijxánaꞌcɨraꞌ,

néijmiꞌqueꞌ nu ɨ nye tyévij jitze tyíꞌcuiꞌ,

¡capu sɨ́ɨj tyámuaꞌ een ɨ nyacaríj!

⁴Canu cheꞌ jeꞌej jájtyoovej aꞌɨ́jcɨ jɨmeꞌ nyaj jéehua jeꞌej puaꞌaj huarɨ́j,

jéehua pu tyíꞌnyetyesiꞌhuarityeꞌ canu nyij cheꞌ tyéꞌviicueꞌ.

⁵Aꞌɨ́jcɨ jɨmeꞌ nyaj quee tyiꞌtɨ́j jóꞌitej,

puꞌríj tyépetyij ɨ nyaj jɨn tyíꞌpuejtyiꞌ ajta jeꞌej puaꞌaj tyaarɨeꞌej.

⁶Aꞌnáj tɨnaꞌaj nu nyaxamúurityaꞌaj menyoꞌchaꞌcan,

naꞌcanyamuaꞌastɨj nyajta quee jeꞌej tyéejtyoovej.

⁷Nyahuárij pu nyacuiꞌ aꞌɨ́jcɨ jɨmeꞌ ɨ nyaj puɨstaj,

¡néijmiꞌqueꞌ nu tyíꞌcuiꞌ ɨ nye tyéviraꞌ jitze!

⁸Huápuɨꞌɨj nu tyíꞌcuiꞌ nyajta quee cheꞌ nyacaꞌnyej,

¡aꞌɨ́jna ɨ nyaj jɨn nyeyiin nyaxɨéjnyuꞌcaa nu jɨn nyeyiin!

⁹Tavástaraꞌ, muáaj paj jamuaꞌreej jeꞌej nyej nyáaj tyáꞌxɨeꞌveꞌ,

ajta ɨ nyaj jɨn ucayáatɨyiꞌij muáaj paj asɨ́ɨj tyámuaꞌ naa tyáꞌmuaꞌreej.

¹⁰Nyaxɨéjnyuꞌcaa pu caꞌnyíin jɨn úꞌtzunaj,

capu cheꞌ maꞌ jáꞌsejreꞌ ɨ nyaj jɨn uhuájcaꞌnyej,

¡canu nyajta cheꞌ tyámuaꞌ metyóonyeej!

¹¹Aꞌɨ́ɨmaj ɨ maj tyámuaꞌ naa tyiꞌnyaꞌamíincustyamuaꞌ,

majta ɨ maj jeꞌej nyamuarimuaj,

aa mu ɨmuáj joꞌtyúꞌuj, mej mij quee jaaséj ɨ nyaj jɨn tyíꞌcuiꞌ.

¹²Aꞌɨ́ɨmaj ɨ maj nyejeꞌcatamuɨꞌ, tyiꞌtɨ́j mu jɨn avíitzij jeꞌej nyaꞌuurej,

ɨ maj jaxɨeꞌveꞌ tɨꞌij jeꞌej puaꞌaj tyíꞌnyaꞌuurej, aꞌɨ́ɨ mu jaxaj jeꞌej maj tyinaꞌantyipuáꞌrityeꞌen

majta aꞌnáj tɨnaꞌaj jaaxáꞌpuɨꞌɨntarej mej mij avíitzij jɨn jeꞌej puaꞌaj náaꞌuurej.

¹³Nyajta nyáaj aꞌyaa nu rɨcɨj tɨꞌɨj ɨ tɨ quee iityánamuaj,

cuxáa nyaj quee huáꞌnamuajraj;

cuxáa nyaj quee atányuuveꞌen, canu acácuaxaꞌvaꞌraj.

¹⁴Aꞌyaa nu een tɨꞌɨj ɨ tɨ quee iityánamuaj

ajta quee nyuuvej tɨꞌij jujapuá huatányuunyij.

¹⁵Nyáaj nu muéetzij jimi tyiꞌijchóꞌveꞌ,

Tavástaraꞌ pajta nyaj Dios paj puéꞌeen,

aꞌyaa nu tyáꞌxɨeꞌveꞌ paj muáaj nyaj jɨmeꞌ huatányuunyij.

¹⁶Aꞌɨ́j nuꞌuj muahuavii mej mij quee nyéetzij nyaꞌaꞌtzej,

mej mij quee jutyamuaꞌveꞌej nyatɨꞌɨjta tyiꞌtɨ́j jɨn ootyáꞌɨtzeereꞌen.

¹⁷Aꞌyaa pu tyiꞌjɨꞌréꞌcan jɨmeꞌ, nuꞌríj tɨn eetávesij,

ajta quee tyápuaapuaꞌrej ɨ tɨ tyinyetyáacuiꞌ.

¹⁸Nyaataxájta tyiꞌtɨ́j nyaj jɨn ootyáꞌɨtzeerej,

jiꞌnye capu naa nyaꞌasej ɨ nyaj jéehua tyiꞌtɨ́j jɨn ootyáꞌɨtzee.

¹⁹Muꞌríj jéetzeꞌ huatámuiꞌriacaꞌ ɨ maj nyéjchaꞌɨɨreꞌ;

jéehua mu ɨ maj chaꞌmanaꞌaj tyiꞌtɨ́j jɨn nyéjchaꞌɨɨreꞌ.

²⁰Jeꞌej mu puaꞌaj nyaꞌuurej aꞌɨ́jcɨ jɨmeꞌ nyej nyáaj tyámuaꞌ naa huaꞌ jimi tyíꞌuurej;

jiꞌnye nyáaxɨeꞌveꞌ nyej tyámuaꞌ rɨjcaj aꞌɨ́ɨ mu mij jɨn nyéjchaꞌɨɨreꞌ.

²¹Tavástaraꞌ, ¡capáj juséentacan manúujɨpuan!

Nyaj Dios, ¡capáj nye jimi ajtáyiꞌcan!

²²Nyaj Dios pajta nyaj vástaraꞌ, ¡jiyeꞌtzín paj mujoꞌvéꞌmeꞌen pej pij naatáhuɨɨreꞌen!

Capu áꞌtyeeren ɨ tyaj jɨn júurij

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Aꞌɨ́ɨn tɨ joꞌyúꞌxacaꞌ ɨ Jedutún. Chuíicarij David tɨ joꞌyúꞌxacaꞌ

¹Nyáaj nu aꞌyan tyaꞌtányarajcaa nyej tyámuaꞌ tyiꞌtyínyechaꞌɨɨcaj,

nyaj quee jeꞌej puaꞌaj tyíꞌxajtaj,

nyaj quee jeꞌej puaꞌaj tyíꞌnyuucaꞌan

matɨꞌɨj móoj yevéjriꞌ huatyúꞌuucaj ɨ maj jeꞌej puaꞌaj tyityetyúuchaꞌɨj.

²Nyajta aꞌyan rɨjcaj tɨꞌɨj ɨ tɨ quee atányuuvej, canu tyiꞌtɨ́j xajtacaꞌaj.

¡Canu nyanaꞌaj nyajta aꞌɨ́j xajtacaꞌaj ɨ tɨ xáꞌpuɨꞌ!

Ajta puꞌríj jéetzeꞌ tyinyetyácuiꞌcaꞌaj;

³¡ajta ɨ nyaxɨéjnyuꞌcaa tzajtaꞌ pu núꞌtɨeexɨꞌracaꞌaj!

Aꞌɨ́j nu jitze tyiꞌriaꞌmuaꞌsímaꞌcaj, tɨꞌɨj nyatzájtaꞌ tɨéj huataséjre,

aj nu nyij caꞌnyíin jɨn aꞌyan tyuꞌtaxájtacaꞌ tɨjɨn:

⁴“Tavástaraꞌ, naatéꞌexaatyeꞌ nyej nyij jáamuaꞌreej jeꞌej tɨ nye jimi tyeꞌmej

ajta aꞌchunyéj naꞌtyéeren nyaj júurij naꞌmej,

nyej nyij jáamuaꞌreej nyej quee aꞌchu áꞌtyeeren nyajúurij.

⁵Muáaj paj naatáꞌ nyej nyij cɨ́ɨ nyanaꞌaj áꞌtyeeviꞌin nyaj júurij,

capu tyiꞌtɨ́j puéꞌeen muéetzij jimi ɨ nyajúuricamej.

¡Néijmiꞌi mu ɨ tyeɨ́tyee aꞌyan áꞌtɨjtɨꞌ tɨꞌɨj séej tɨ ucayáatɨraꞌnyij!

⁶¡Néijmiꞌi mu ɨ tyeɨ́tyee aꞌyan een tɨꞌɨj ɨ quéenyiꞌistarij!

Capu tyiꞌtɨ́j jeꞌej tyeetyáhuɨɨreꞌej tɨpuaꞌaj jéehua tyíꞌijsɨɨreꞌen ɨ tɨ tyáꞌnajchij,

jiꞌnye capu jamuaꞌreej aꞌtɨ́j tɨ tyíꞌcɨꞌtyij ɨ tɨ tyíꞌijsɨɨreꞌsij.

⁷Ajta tɨpuaꞌaj aꞌyan tyíꞌeenyeꞌ, Tavástaraꞌ, ¿tyiꞌtanyí jɨn nyetyiꞌchoꞌveꞌ?

¡Muéetzij nu jimi tyiꞌijchóꞌveꞌ!

⁸Pataꞌaj nyajapuáj huatányuunyij aꞌɨ́jcɨ jɨmeꞌ nyaj tyiꞌijxánaꞌcɨraꞌ;

capáj tyiꞌtáꞌcareꞌen mej mij aꞌɨ́ɨmaj jeꞌej nyojoꞌmuaꞌraj ɨ maj quee maꞌumuámuaꞌreꞌ.

⁹’Aꞌyaa nu huarɨ́j tɨꞌɨj ɨ tɨ quee atányuuvej nyajta quee acácuaxaꞌtacaꞌ,

jiꞌnye muáaj paj aꞌɨ́ɨn puéꞌeen ɨ tɨ néijmiꞌi jɨn aꞌyan rɨnyij.

¹⁰Ajta capáj cheꞌ puéjtzij nyatáꞌcareꞌen,

jiꞌnye nuꞌríj huápuɨꞌɨj aꞌɨ́jcɨ jɨn japuéjtzitarej.

¹¹Muáaj paj tyámuaꞌ jaꞌuurej aꞌɨ́jcɨ ɨ tyévij puéjtzij paatáꞌcariaꞌaj aꞌɨ́jcɨ jɨmeꞌ ɨ tɨ jɨn quee xáꞌpuɨꞌ huarɨ́j,

pajta aꞌyan jaꞌuurej tɨꞌɨj ɨ chuéj tɨ muɨɨnyíj tyiꞌtɨ́j tɨ aꞌɨ́ɨn jéetzeꞌ xɨeꞌveꞌ.

¡Néijmiꞌi mu ɨ tyeɨ́tyee aꞌyan een tɨꞌɨj séej tɨ ucayáatɨraꞌnyij!

¹²’Tavástaraꞌ, huánamuaj jeꞌej nyaj aꞌjimi tyuꞌtyényuusij,

¡pataꞌaj tyámuaꞌ tyáanamuaj jeꞌej nyaj tyíꞌnyeyiin!,

¡capáj quee aveꞌnyuucaꞌan nyatɨꞌɨjta eetajaꞌraꞌtajyiꞌcan!

Aꞌyaa nu aꞌ jimi een tɨꞌɨj ɨ tɨ séej chuéj japua jáꞌmaꞌcan,

tɨꞌɨj ɨ pínaꞌaj tɨ huayiꞌij naꞌaj, aꞌyájna matɨꞌɨj ɨ nyahuásimuaꞌcɨꞌɨj.

¹³Capáj cheꞌ nyeséejra, cɨ́ɨ tyinaatáꞌ nyej nyij ucayáatɨraꞌnyij,

ijíij nyej nyooj yésejreꞌ nyajta quee xu huamuɨ́ꞌ.”

Naꞌráanajchij nyaj aꞌyan huárɨnyij jeꞌej paj muáaj tyáꞌxɨeꞌveꞌ, nyaj Dios

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Chuíicarij David tɨ joꞌyúꞌxacaꞌ

¹Tavástaraꞌ nu jimi jaatyájtoo ɨ nyaj jɨn tyiꞌijchóꞌveꞌ,

aꞌɨ́ɨ puꞌij ecóotutacaꞌ tɨꞌij jáanamuaj jeꞌej nyaj jimi tyáꞌhuoo,

²nyajapuáj pu huatanyúj nyej nyij quee huámuɨꞌnyij aꞌájna joꞌtɨj jaꞌtyácun,

capu tyuꞌtáꞌ nyej nyij atyájcataj joꞌtɨj jéehua joꞌjéxaj.

Aꞌáa pu nyajaꞌráꞌɨɨcatyej joꞌtɨj tyámuaꞌ naa tyojoꞌtoonyij,

tyámuaꞌ pu tyíꞌuurej jóꞌnyaj jooméj.

³Aꞌɨ́ɨ pu naatáꞌ nyej nyij jájcuacan tyuꞌtáchuiicaj,

aꞌɨ́jcɨ ɨ chuíicarij ɨ nyaj jɨn tyámuaꞌ tyaatáꞌan ɨ Dios.

Mamueꞌtɨ́j mu, matɨꞌɨj aꞌíj huaséj, aj mu mij tyuꞌtyátzaahuatyej

matɨꞌɨj mij aꞌɨ́j jitze tyuꞌtyáacaꞌan ɨ Tavástaraꞌ.

⁴¡Cheꞌ huatóotyamuaꞌveꞌen aꞌɨ́jna ɨ tyáatɨꞌ tɨ ɨ Tavástaraꞌ jitze tyíꞌcaꞌnyej

ajta quee aꞌɨ́ɨjma jitze tyíꞌcaꞌnyej ɨ maj óotzaahuatyeꞌ

nusu aꞌɨ́ɨjma ɨ maj sáanturij najchej!

⁵Nyavástaraꞌ ajta nyaj Dios,

jéehua pu tyíꞌsejreꞌ ɨ tɨ naa tyuꞌséꞌrin muáaj paj tyúꞌtaahuacaꞌ

ajta jeꞌej paj jéehua ityájma tyitáꞌcuꞌvej.

¡Capu tyiꞌtɨ́j séejreꞌ tɨ aꞌyan huaséꞌrihuaꞌan patɨꞌɨj muáaj!

Nyáaxɨeꞌveꞌ nyaj huoꞌréꞌixaatyeꞌen, nyaj aꞌɨ́j tyuꞌtaxáj,

ajta canu pújoorej nyej nyij néijmiꞌi tyuꞌtaxáj.

⁶Capáj muáaj aꞌɨ́jna jɨn atyamuaꞌveꞌ maj aꞌ jimi tyuꞌtámuꞌvejritaj

nusu maj jatzíj tyimuaatámuꞌvejrityeꞌen,

capáj pajta jahuoo mej mij yaꞌmuáatyee aꞌ jimi huatámuꞌvejritaj

nusu maj tyiꞌtɨ́j tyuꞌtáꞌan a jimi pej pij aꞌɨ́jna jɨn tyihuoꞌtúꞌuunyiꞌ.

Sulu aꞌyaa paj huarɨ́j, muáaj paj naatáꞌ nyej nyij iityánamuajra.

⁷Aꞌɨ́j nu jɨn aꞌyan tyuꞌtaxájtacaꞌ tɨjɨn: Yáꞌnyaj huatyéjve,

aꞌyájna tɨꞌɨj nyaj jɨmeꞌ tyéꞌyuꞌsiꞌ ɨ yuꞌxarij jitze.

⁸Nyaj Dios, nyéetzij pu naꞌráanajchij nyaj aꞌyan huárɨnyij jeꞌej paj muáaj tyáꞌxɨeꞌveꞌ,

nyaxɨéjnyuꞌcaa tzajtaꞌ pu séejreꞌ jeꞌej paj muáaj tyíꞌnyamuaꞌtyej.

⁹Aꞌɨ́ɨmaj mu mueꞌtɨ́j tyiꞌséeracaj aꞌtyéɨtyeristyamuaꞌ

nyatɨꞌɨj huoꞌtaséjra tyiꞌtɨ́j tɨ xáꞌpuɨꞌ.

¡Muáaj paj tyámuaꞌ naa tyáꞌmuaꞌreej, Tavástaraꞌ, nyaj quee aꞌnáj huatyápuaꞌriacaꞌ!

¹⁰Canu aꞌnáj quee jaataxájtacaꞌ aꞌɨ́jcɨ ɨ paj jɨn tyámuaꞌ tyíꞌuurej,

nuꞌríj jaataxájtacaꞌ paj quee tyiꞌtɨ́j jɨn áꞌɨtzeereꞌ nyajta ɨ paj jɨn tahuɨɨreꞌ.

Canu aꞌnáj jaatyáꞌavaatacaꞌ ɨ paj jɨn taxɨeꞌveꞌ ajta ɨ tɨ jɨꞌréꞌcan jɨmeꞌ muéetzij jimi

aꞌɨ́ɨjma jimi aꞌtyéɨtyeristyamuaꞌ ɨ maj jéehua aráꞌasej.

¹¹Pajta muáaj, Tavástaraꞌ, capáj nyaꞌaviitzeꞌej ɨ paj jɨn tyámuaꞌ nyojoꞌmuaꞌraj.

Aꞌnáj tɨnaꞌaj paj nyechaꞌɨɨj aꞌɨ́jcɨ jɨmeꞌ ɨ paj jɨn nyaxɨeꞌveꞌ ajta ɨ paj jɨn tyámuaꞌ een.

¹²Jiꞌnye jéehua pu jeꞌej puaꞌaj tyíꞌnyaꞌuurej

ajta quee ɨꞌríj nyaj jaatyéꞌiten aꞌchu tɨ arí puaꞌmáj jeꞌej puaꞌaj tyináaruuj.

Aꞌɨ́ɨ pu arí nyeriaꞌnaj ɨ nyaj jɨn jeꞌej puaꞌaj huarɨ́j,

canu nyij nyajta cheꞌ tyámuaꞌ metyóonyeej.

Puꞌríj jéetzeꞌ aráꞌasej quee ɨ nyaj cɨpuáj,

capu ij ajta cheꞌ nyacaꞌnyistiꞌ.

¹³Tavástaraꞌ, pataꞌaj cuiꞌ mujoꞌvéꞌmeꞌen pej pij nyajapuáj huatányuunyij.

Tavástaraꞌ, caꞌnácan paj mujoꞌvéꞌmeꞌen pej pij naatáhuɨɨreꞌen.

¹⁴¡Micheꞌ néijmiꞌi jɨn huápuɨꞌɨj tyéviꞌsiꞌ huataséjreꞌen

aꞌɨ́ɨmaj ɨ maj jaxɨeꞌveꞌ maj naꞌantyipuáꞌrityeꞌen!

¡Micheꞌ tyéviꞌsiꞌ séeriaꞌaj huatóoꞌuunaj

aꞌɨ́ɨmaj ɨ maj jeꞌej puaꞌaj nyaꞌuuriajmuɨꞌ!

¹⁵¡Micheꞌ jutyéviꞌraꞌaj muatóoꞌuunaj

aꞌɨ́ɨmaj ɨ maj jeꞌej puaꞌaj nyojoꞌmuaꞌraj!

¹⁶Majta néijmiꞌi aꞌɨ́ɨmaj ɨ maj muéetzij muahuoo

micheꞌ aꞌɨ́ɨmaj jéehua huatóotyamuaꞌveꞌen,

majta ɨ maj jaxɨeꞌveꞌ paj huaꞌ japua huatányuunyij

micheꞌ aꞌnáj tɨnaꞌaj aꞌyan tyíꞌxajtaj tɨjɨn: “¡Vaꞌcán pu jɨn antyúumuaꞌreej ɨ Tavástaraꞌ!”

¹⁷Ajta nyaj jɨmeꞌ, nyaj quee jeꞌej tyéejviicueꞌ nyajta quee jeꞌej tyéejtyoovej,

capáj nyojoꞌhuaꞌnan, Tavástaraꞌ.

Muáaj paj aꞌɨ́ɨn puéꞌeen ɨ tɨ nyahuɨɨreꞌ ajta nyajapuáj huatányuusij,

¡capáj áꞌtyeeviꞌin, nyaj Dios!

Jeꞌej tɨ tyuꞌtyéenyuj ɨ aꞌtɨ́j tɨ tyíꞌcuiꞌ

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Chuíicarij David tɨ joꞌyúꞌxacaꞌ

¹Cheꞌ huatóotyamuaꞌveꞌen aꞌɨ́jna ɨ tɨ aꞌɨ́j jitze tyíꞌmuaꞌtzej ɨ tɨ quee jucaꞌnyej ajta quee jeꞌej tyéejviicueꞌ,

Tavástaraꞌ pu japuan huatányuusij tɨꞌɨjta jeꞌej puaꞌaj tyíꞌrɨjcaa.

²Tavástaraꞌ pu jachaꞌɨɨj jaꞌmej,

júuricamej pu jaatáꞌsij ajta tɨꞌij huatóotyamuaꞌveꞌen ɨ chuéj japua,

ajta quee tyuꞌtáꞌsij tɨꞌij aꞌyan atyojoꞌréꞌnyej jeꞌej maj tyáꞌxɨeꞌveꞌ ɨ maj jájchaꞌɨɨreꞌ.

³Tavástaraꞌ pu caꞌnyíjraꞌaj jaatáꞌsij tɨꞌɨj quee cheꞌ tyéꞌviicueꞌraj,

ajta tyámuaꞌ jaꞌuurej aꞌɨ́jcɨ ɨ tɨ jɨn tyíꞌcuiꞌ.

⁴Nyáaj nu aꞌyan tyuꞌtaxájtacaꞌ tɨjɨn:

“Tavástaraꞌ, náꞌancuꞌvaxɨꞌ,

tyináahuaatyeꞌ, tyij nyajta muéetzij jimi ootyáꞌɨtzeerej.”

⁵Aꞌɨ́ɨmaj ɨ maj nyéjchaꞌɨɨreꞌ aꞌyaa mu tyáꞌxɨeꞌveꞌ tɨꞌij jeꞌej puaꞌaj tyíꞌnyaꞌuurej, aꞌyaa mu tyíꞌxaj tɨjɨn:

“¿Aꞌnajnyí muɨꞌnyij tyej tyij quee cheꞌ jaꞌtamuáꞌreꞌrihuaꞌan?”

⁶Ya mu nyetyésiseꞌ, majta quee tzáahuatyiꞌraꞌaj jɨn aꞌyan rɨcɨj,

huaꞌmuaꞌtziiraꞌaj jitze pu séejreꞌ néijmiꞌi ɨ tɨ jeꞌej puaꞌaj een,

aꞌaj pu ámiteereꞌ matɨꞌɨjta cáayej jitze ajoojuꞌun.

⁷Aꞌɨ́ɨ mu jusɨɨreꞌ ɨ maj nyéjchaꞌɨɨreꞌ mej mij nyéetzij naaxáj,

aꞌyaa mu tyíꞌmuaꞌtzej nyej nyasɨ́ɨj puéꞌeenyeꞌ ɨ nyaj jɨn japuéjtzitarej

⁸majta aꞌyan tyíꞌxaj tɨjɨn:

“Tyiyáaruꞌ pu jimi joꞌvéꞌmej ɨ tɨ jɨn tyíꞌcuiꞌ,

aꞌɨ́j pu jɨn huacaꞌaj joꞌtɨj jáꞌhuiꞌcaa ajta jeꞌen quee cheꞌ ájchesij.”

⁹Ajta aꞌɨ́jna ɨ tɨ tyámuaꞌ naa tyiꞌnyaꞌamíincuj, nyáaj nyej jitzán tyiꞌcaꞌnyajcaꞌaj,

ɨ tɨ nyaj jamuán tyíꞌcuaꞌcariaꞌaj, aꞌɨ́ɨ pu arí ajta nyéjchaꞌɨɨreꞌ.

¹⁰Pajta muáaj, Tavástaraꞌ, náꞌancuꞌvaxɨꞌ,

naatáꞌ nyaj ájchenyij nyajta jeꞌen aꞌyan huóꞌuurej jeꞌej tɨ aꞌɨ́ɨjma jimi tyiꞌtyéevijtɨj.

¹¹Aꞌyaa nu nyij tyáꞌmuaꞌreeren nyaj aꞌyan rɨcɨj jeꞌej tɨ muéetzij tyimuaꞌráanajchi,

tɨ quee nyéetzij jɨmeꞌ jutyamuaꞌveꞌej aꞌɨ́jna ɨ tɨ nyéjchaꞌɨɨreꞌ.

¹²Ajta nyéetzij jɨmeꞌ, nyaj tyámuaꞌ tyiꞌtyínyechaꞌɨj nyajta quee tyiꞌtɨ́j jɨn áꞌɨtzeereꞌ,

tyámuaꞌ paj tyíꞌnyeviꞌraj muaꞌ muácaꞌ jɨmeꞌ,

nyej nyij aꞌnáj tɨnaꞌaj ajamuán ajaꞌ séjreꞌej.

¹³¡Cheꞌ tyámuaꞌ éenyeꞌej séjreꞌej ɨ Tavástaraꞌ, huaꞌ Dios ɨ maj Israel jitze ajtyámaꞌcan,

ijíij ajta jusén jɨmeꞌ!

¡Cheꞌ aꞌyan tyáꞌraꞌnyij!

Ɨ nyaj jɨn tyiꞌijchóꞌveꞌ Dios pu jimi jáꞌmaꞌcan

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Ɨ nyúucarij tɨ naa huánamuajrii aꞌɨ́ɨmaj maj huóomuaꞌtziityej ɨ yójmuaꞌmuaꞌ aꞌɨ́jcɨ ɨ Coré

¹Aꞌyájna tɨꞌɨj ɨ muaxáj tyáꞌhuoo ɨ játyaꞌnaj tɨꞌij huayeꞌen,

aꞌyaa nu nyaj Dios, nyáaj muéetzij tyíꞌmuahuoo.

²Aꞌyaa pu ɨ Dios nye jitze tyúuxɨeꞌveꞌ tɨꞌɨj ɨ jájtyij, aꞌɨ́jna ɨ Dios júuricamej tɨ puéꞌeen.

¿Aꞌnajnyí nyajtáhuaꞌaj huatányesejrataj ɨ Dios jimi?

³Tújca nyajta tɨ́caꞌ, aꞌɨ́j nu jɨn júurij ɨ nyaj eetajaꞌraꞌtajyiꞌij,

meentyij móoj aꞌnáj tɨnaꞌaj aꞌyan tyíꞌnyeꞌihuoꞌ tɨjɨn:

“¿Joꞌnyij jeꞌej jeꞌen aꞌ Dios?”

⁴Nyatɨꞌɨjta aꞌíjcɨ jitze tyiꞌriáꞌmuaꞌsimeꞌen,

aj nu nyij tyiꞌtáꞌcaa tɨꞌij jéehua jeꞌej puaꞌaj nye jimi tyíꞌrɨjcaa.

Nyaꞌtamuaꞌreꞌrii nyatɨꞌɨj huaꞌ jamuán ɨ tyeɨ́tyee ajoomaꞌcaj,

nyáaj nu ahuojóoviꞌtɨsimaꞌaj joꞌtɨj joꞌtyéjvee ɨ tyeyúujraꞌ ɨ Dios

tyejíihuaj aꞌɨ́jcɨ jɨmeꞌ tyaj tatyamuaꞌveꞌ tyajta tyiꞌmuatyóotziꞌreꞌej.

¡Vaꞌcán tu jɨn tyámuaꞌ naa tyíꞌyeꞌestyahuaꞌaj!

⁵¿Jiꞌnye nyij tyiꞌtɨ́j jɨn tyíꞌnyaxaahuataj?

¿Jiꞌnye nyij tyiꞌtɨ́j jɨn jeꞌej tyéꞌnyamuaꞌastɨj naꞌmej?

Nyáaj nu nyeríj ɨ Dios jitze tyíꞌcaꞌnyej,

aꞌɨ́jcɨ ɨ nyej nyooj tyeꞌtyóotziꞌreꞌej naꞌmej.

¡Aꞌɨ́ɨ pu nyaj Dios puéꞌeen ajta ɨ tɨ nyaj japua huatányuusij!

⁶Jéehua pu quee núꞌcaꞌnyistiꞌ.

Aꞌɨ́j nu jɨn huápuɨꞌɨj muéetzij jitze tyiꞌriáꞌmuaꞌsij

tɨꞌɨj naꞌaj aꞌájna ɨ játyaꞌnaj jitze Jordán tɨ ántyapuaj,

tɨꞌɨj naꞌaj aꞌájna a jɨríj tɨ joꞌquéetɨmee aꞌ tɨ aꞌyan tyajaꞌrájtyapuaj tɨjɨn Hermón ajta a Misar.

⁷Aꞌáa pu jáꞌnamuajreꞌ joꞌtɨj jeꞌcacúunyijmee

aꞌɨ́jna ɨ tɨ caꞌnyíin jɨn tyáhuaasij ɨ taꞌancáamuɨꞌyej;

aꞌɨ́jna ɨ jájtyij paj jéehua muáaj muyaꞌtaꞌítyacaa

aꞌɨ́ɨ puꞌij arí nyajapuáj ucámuɨꞌyacaꞌ.

⁸Tújca pu ɨ Tavástaraꞌ uyaꞌtaꞌítyacaa ɨ tɨ jɨn nyaxɨeꞌveꞌ,

ajta tɨ́caꞌ canu jaꞌantyipuáꞌrityeꞌsij ɨ nyaj tyiꞌtyéchuiicaj

capu ajta ɨ nyaj tyényuusij ɨ Dios jimi júuricamej tɨ nyatáꞌcaa.

⁹Aꞌyaa nu tyéꞌixaatyeꞌ ɨ nyaj Dios, aꞌɨ́jna ɨ tɨ nyaj japua huatányuusij tɨjɨn:

“¿Jiꞌnye pej pij nyojoꞌhuaꞌxɨj?

¿Jiꞌnye nyej nyij nyaxamúurityaꞌaj menyoꞌchaꞌcan

nyajta huaꞌtzɨ́ɨnyeꞌej aꞌɨ́ɨjma ɨ maj nyéjchaꞌɨɨreꞌ?”

¹⁰Ɨ nyacaríj pu ajta nyacuiꞌ

aꞌɨ́jcɨ jɨmeꞌ maj jeꞌej puaꞌaj tyíꞌnyaxaj ɨ maj nyéjchaꞌɨɨreꞌ,

ɨ maj aꞌnáj tɨnaꞌaj aꞌyan tyíꞌnyeꞌihuoꞌ tɨjɨn:

“¿Joꞌnyij jeꞌej jéꞌeen aꞌ Dios?”

¹¹¿Jiꞌnye nyij tyiꞌtɨ́j jɨn tyíꞌnyaxaahuataj?

¿Jiꞌnye nyij tyiꞌtɨ́j jɨn jeꞌej tyéꞌnyamuaꞌastɨj naꞌmej?

Nyáaj nu nyeríj ɨ Dios jitze tyíꞌcaꞌnyej,

aꞌɨ́jcɨ ɨ nyej nyooj tyeꞌtyóotziꞌreꞌej naꞌmej.

¡Aꞌɨ́ɨ pu nyaj Dios puéꞌeen ajta ɨ tɨ nyaj japua huatányuusij!

¹Nyaj Dios, tyámuaꞌ paj tyinoꞌxáꞌpuɨꞌɨntariꞌtzeꞌen;

¡pataꞌaj naatyáhuɨɨreꞌen aꞌɨ́ɨjma jimi ɨ tyeɨ́tyee ɨ maj quee tyáꞌtzaahuatyeꞌ!

¡Pataꞌaj nyaj japua huatányuunyij aꞌɨ́jcɨ jimi ɨ tɨ tyíꞌhueꞌtacaa ajta ɨ tɨ jeꞌej puaꞌaj rɨcɨj,

²jiꞌnye muáaj paj nyaj Dios puéꞌeen pajta ɨ tɨ naatyáhuɨɨreꞌe!

¿Jiꞌnye pej pij quee nyatáꞌcaa nyaj aꞌ jimi séjreꞌej?

¿Jiꞌnye nyej nyij nyaxamúurityaꞌaj menyoꞌchaꞌcan

nyajta huaꞌtzɨ́ɨnyeꞌej aꞌɨ́ɨjma ɨ maj nyéjchaꞌɨɨreꞌ?

³Mujoꞌtaꞌítyij ɨ nyaj jɨn atányeerej ajta ɨ tɨ jɨꞌréꞌcan jɨmeꞌ,

tɨꞌij aꞌɨ́ɨn naataséjratyeꞌen ɨ juyéj

ɨ tɨ aꞌáa jóꞌnyee joꞌtɨj néijmiꞌi tyámuaꞌ tyejéꞌeen,

aꞌájna joꞌpaj muáaj jaꞌchej.

⁴Aj nu nyij aꞌáa jaꞌráꞌastij joꞌtɨj joꞌtyéjvee ɨ maj japuan muanaꞌmichej, nyaj Dios,

aꞌáa nu nyij tyimuaatatyójtziꞌreꞌej nyetyiꞌchuíicaj aꞌɨ́jcɨ jitze ɨ canárij,

jiꞌnye muáaj, nyaj Dios, muáaj paj néijmiꞌi ɨ nyajúuricamej jitze nyetyamuaꞌvisteꞌej.

⁵¿Jiꞌnye nyij tyiꞌtɨ́j jɨn tyíꞌnyaxaahuataj?

¿Jiꞌnye nyij tyiꞌtɨ́j jɨn jeꞌej tyéꞌnyamuaꞌastɨj naꞌmej?

Nyáaj nu nyeríj ɨ Dios jitze tyíꞌcaꞌnyej,

aꞌɨ́jcɨ ɨ nyej nyooj tyeꞌtyóotziꞌreꞌej naꞌmej.

¡Aꞌɨ́ɨ pu nyaj Dios puéꞌeen ajta ɨ tɨ nyaj japua huatányuusij!

Jeꞌej tyaj tyityeetyényuunyij tɨꞌij ɨ Dios taatáhuɨɨreꞌen

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Ɨ nyúucarij tɨ naa huánamuajrii aꞌɨ́ɨmaj maj huóomuaꞌtziityej ɨ yójmuaꞌmuaꞌ aꞌɨ́jcɨ ɨ Coré

¹Taj Dios, tuꞌríj jáanamuajriꞌ ɨ tyaj jɨn iityanamuáarajmee,

majta ɨ tahuásimuaꞌ muꞌríj majta táaꞌixaaj

jeꞌej paj muáaj tyiꞌtɨ́j huáruuj matɨꞌɨj móoj aꞌɨ́ɨmaj júuricaj

jeꞌej tɨ tyiꞌtɨ́j huarɨ́j tɨꞌɨj aꞌájna ɨmuáj putyíꞌrɨjcaa.

²Muaꞌ muácaꞌ paj jɨmeꞌ

huiꞌráahuaꞌxɨj aꞌɨ́ɨjma ɨ maj quee tyáꞌtzaahuatyeꞌ,

puéjtzij paj huoꞌtaꞌ aꞌɨ́ɨjma ɨ maj séej chuéj japua joꞌcháatɨmee

pajta jeꞌen huoꞌtaꞌ mej mij aꞌáa joꞌcháatɨmeꞌnyij ɨ tahuásimuaꞌcɨꞌɨj.

³Jiꞌnye capu ɨ huaꞌ muácaꞌ huoꞌtaꞌ capu ajta ɨ tyihuáꞌchuun huoꞌtaꞌ

mej mij aꞌɨ́ɨmaj tyuꞌtyámueꞌtɨn,

camu aꞌɨ́ɨmaj jaamuéꞌtɨj aꞌɨ́jcɨ ɨ chuéj.

Sulu aꞌɨ́jna ɨ paj néijmiꞌi jɨn putyíꞌuurej ajta ɨ paj jɨn uhuájcaꞌnyej.

Ajta aꞌɨ́jna ɨ tɨ jéehua huanyéeriꞌcɨriajraa aꞌɨ́jcɨ jɨmeꞌ paj muáaj aꞌáa joꞌtyávaacaꞌaj,

jiꞌnye muáaj paj jéehua huaꞌxɨeꞌvaꞌcaꞌaj.

⁴¡Muáaj paj nyaj Rey!, ¡pajta nyaj Dios!

Muáaj paj huoꞌtaꞌ mej mij tyuꞌtyámueꞌtɨn aꞌɨ́ɨmaj ɨ maj aꞌtyéɨtyeristyamuaꞌ puéꞌeen;

⁵muéetzij tu jitze maꞌcan huoꞌmuéꞌtɨj aꞌɨ́ɨjma ɨ maj tájchaꞌɨɨreꞌ,

¡aꞌ jitze maꞌcan tu huoꞌtzíinajraa aꞌɨ́ɨjma ɨ maj tanyoꞌsiꞌtyaꞌcaꞌaj!

⁶Jiꞌnye canu nyáaj aꞌɨ́j jitze tyíꞌcaꞌnyej ɨ nyaj túꞌnamuaꞌ,

capu ajta ɨ nye chúun naatáꞌsij nyej nyij tyuꞌtyámueꞌtɨn,

⁷muáaj paj aꞌɨ́ɨn puéꞌeen ɨ tɨ taatáꞌ tyej tyij huoꞌmuéꞌtɨn aꞌɨ́ɨjma ɨ maj tájchaꞌɨɨreꞌ,

ajta tyéviꞌsiꞌ huoꞌtaséjratacaꞌ aꞌɨ́ɨjma ɨ maj taxanaꞌvaꞌcaꞌaj.

⁸Aꞌnáj tɨnaꞌaj tu aꞌtatzáahuatyeꞌej táꞌjuꞌun muéetzij jimi, taj Dios,

tyajta aꞌnáj tɨnaꞌaj tyiꞌmuatyóotziꞌreꞌej táꞌjuꞌun.

⁹Ajta papuꞌríj matuuhuaꞌxɨj,

pajta períj tyéviꞌsiꞌ taataséjratacaꞌ,

capáj cheꞌ huaꞌ jamuán séejreꞌ ɨ taxantáaruꞌustyamuaꞌ.

¹⁰Muáaj paj tyuꞌtáꞌ tyej tyij huáꞌtzɨɨnyeꞌej aꞌɨ́ɨjma ɨ maj tájchaꞌɨɨreꞌ,

aꞌɨ́ɨ mu tyíꞌtanahueꞌ ɨ maj taxanaꞌveꞌ

majta tyitáaꞌriꞌracaa jeꞌej maj aꞌɨ́ɨmaj tyáꞌxɨeꞌveꞌ.

¹¹Muáaj paj aꞌáa tojóotoj

cuxáa tyaj cányaꞌxɨɨ puéꞌeenyeꞌ mej mij táacuiꞌnyij,

pajta tyuꞌtáꞌ tyej tyij maꞌúrutyej huaꞌ tzajtaꞌ ɨ maj quee tyáꞌtzaahuatyeꞌ,

¹²muáaj paj huápuɨꞌɨj jáahuaj huoꞌtoj aꞌtyéɨtyeristyamuaꞌ,

pajta quee tyiꞌtɨ́j huamueꞌtɨj aꞌɨ́jcɨ jɨmeꞌ ɨ paj huoꞌtoj.

¹³Muáaj paj aꞌyan táaruuj mej mij jeꞌej puaꞌaj tyíꞌtaxajtaj,

aꞌɨ́ɨmaj ɨ maj a véjriꞌ huacháatɨmee tajimí aꞌɨ́ɨ mu jeꞌej puaꞌaj tyíꞌtaxaj majta tyéviꞌsiꞌ taꞌuurej,

¹⁴Muáaj paj tyuꞌtáꞌ mej mij jeꞌej puaꞌaj tyíꞌtaxajta ɨ maj quee tyáꞌtzaahuatyeꞌ,

matɨꞌɨjta taaséj, aꞌɨ́ɨ mu tajimí eecámuꞌvajra.

¹⁵Camu aꞌnáj jatapuáꞌcɨtacaa maj náꞌxaahuaj,

jéehua nu nyetyeviꞌraꞌ ɨ nye nyéerimij jitze

¹⁶aꞌɨ́ɨn tɨꞌij puéꞌeenyeꞌ ɨ tɨ nyéjchaꞌɨɨreꞌ, ɨ tɨ aꞌyan tyáꞌxɨeꞌveꞌ tɨ tyoꞌrióorɨeeraj

ajta jeꞌej puaꞌaj tyíꞌnyaxaj ajta hueꞌtzij jɨn nye jitze tyíꞌpuaꞌrityeꞌ.

¹⁷Aꞌyaa puꞌij tyíꞌtaꞌuurej

ajta quee aꞌɨ́jna jɨmeꞌ tyaj mojoꞌhuáꞌxɨj.

¡Catu aꞌnáj tyiꞌtɨ́j jɨn ootyáꞌɨtzeerej aꞌɨ́jcɨ jitze ɨ nyúucarij ɨ paj jɨn tyitaataꞌíj!

¹⁸Catu aꞌyan tyíꞌmuaꞌtzej tyej tyij mamúurɨenyij

catu tyajta ajtacɨ́j aꞌ juyéj jitze.

¹⁹Ajta aꞌyájna, muáaj paj períj tatzíinajraa

aꞌájna joꞌmaj tyiꞌtyán jóꞌcɨꞌɨj maj tyíꞌtyacɨꞌmacaa.

Aꞌɨ́j paj jɨn tɨeꞌcáanaj ɨ tɨ́caꞌrij.

²⁰Tɨpuaꞌaj tyamojoꞌhuaꞌxɨɨnyijcheꞌ, taj Dios,

tyajta jeꞌen séej huatyáanajchej ɨ dios tyaj quee jamuaꞌtyej,

²¹muáaj paj jamuaꞌréerejcheꞌen,

jiꞌnye muáaj paj jamuaꞌreej jeꞌej tɨ tyiꞌtɨ́j een ɨ tamuaꞌtzíiraꞌaj jitze.

²²Tyajta muéetzij tu jitze maꞌcan aꞌnáj tɨnaꞌaj

aꞌyan tyáꞌtacaꞌnyej tyej tyij huácuiꞌnyij,

aꞌyaa mu taꞌuurej matɨꞌɨj ɨ cányaꞌxɨɨ ɨ maj huáꞌcuiꞌnyij.

²³¿Jiꞌnye pej pij tyácusij, Tavástaraꞌ?

¡Huájɨsij, huájɨsij!

¡Capáj jusén jɨmeꞌ matúujɨpuan!

²⁴¿Jiꞌnye pej pij jaꞌavaaj?

¿Jiꞌnye pej pij ityájma tojóꞌhuaꞌnaj,

ɨ tyaj jéehua japuéjtzitarej?

²⁵Catu cheꞌ tyéꞌviicueꞌ majta meríj taatyáxaahuatacaꞌ,

aꞌɨ́jcɨ jɨmeꞌ maj taatyásaꞌrɨeechacaꞌ a chóotaꞌ.

²⁶¡Ájchesij,

pataꞌaj mujoꞌvéꞌmeꞌen pej pij taatáhuɨɨreꞌen

pajta tajapuá huatányuunyij aꞌɨ́jcɨ jɨmeꞌ ɨ paj vaꞌcán jɨn taxɨeꞌveꞌ!

Tyiꞌtɨ́j maj tyámuaꞌ naa tyuꞌtaxáj tɨꞌɨj huatyényeɨɨchej ɨ rey tɨ jɨn tyiꞌtyéjvee

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj, aꞌɨ́jcɨ ɨ cuíinarij tɨ aꞌyan ántyapuaj tɨjɨn: “Ɨ tzuhuáaꞌ.” Ɨ nyúucarij tɨ naa huánamuajrii aꞌɨ́ɨmaj maj huóomuaꞌtziityej ɨ yójmuaꞌmuaꞌ aꞌɨ́jcɨ ɨ Coré. Chuíicarij maj jɨn huóoxɨeꞌveꞌen. Jéehua pu ɨ nyúucarij tɨ naa huánamuajrii nyamuaꞌtzíiraꞌaj tzajtaꞌ séejreꞌ

¹Nyatzájtaꞌ pu nyúucarij tásiseerii tɨ naa huánamuajrii,

ajta ɨ nyenyanúu pu aꞌyan een tɨꞌɨj ɨ tɨ jɨn tyéꞌyuꞌxaj aꞌɨ́jna ɨ tɨ tyámuaꞌ naa tyíꞌyuꞌxacaa.

¡Aꞌɨ́j nu nyij tyámuaꞌ naa tyuꞌtaxájtaj aꞌɨ́jcɨ jimi ɨ tɨ rey jɨn tyiꞌtyéjvee!

²¡Muáaj paj aꞌɨ́ɨn puéꞌeen ɨ tɨ jéetzeꞌ naa huaséꞌrin huaꞌ tzajtaꞌ ɨ tyétyacaa!

¡Muaꞌ tyenyij jitze pu séejreꞌ ɨ nyúucarij tɨ huápuɨꞌɨj naa huánamuajrii!

Aꞌɨ́j pu jɨn ɨ Dios tyámuaꞌ naa tyimuatyájtoo jusén jɨmeꞌ.

³¡Pataꞌaj tyámuaꞌ jáaꞌuurej aꞌ chúun aꞌɨ́jcɨ jitze ɨ paj jɨn aváꞌjɨꞌqueꞌ, muáaj paj jaayíꞌtɨn paj huanyoꞌseꞌen!

¡Aꞌɨ́j paj jɨn naa huápuɨꞌɨj huaséꞌrin!

⁴Ajta ɨ paj jɨn naa huaséꞌrin aꞌɨ́j pu jitze séejreꞌ paj tyiꞌmuéꞌtɨj puaaméj,

pajta nyoꞌseꞌ aꞌɨ́jcɨ jitze maꞌcan ɨ tɨ jɨꞌréꞌcan jɨmeꞌ

pajta tyámuaꞌ tyihuaꞌxaꞌpuɨꞌɨntariꞌtzeꞌ aꞌɨ́ɨjma ɨ maj quee óotzaahuatyeꞌ.

¡Aꞌmuácaꞌ paj jɨn tyámuaꞌ tyíꞌuurej mej mij néijmiꞌi tyámuaꞌ tyoꞌtaséj!

⁵Ɨ maj huacháatɨmee ɨ chájtaꞌnaj jitze aꞌɨ́ɨ mu eetávitzej joꞌpaj jaꞌraꞌɨ́ɨcajmee, taj rey,

aꞌɨ́jna ɨ tyiáꞌɨꞌrɨj huápuɨꞌɨj pu tyeꞌentyipityíijmee aꞌɨ́j pu jɨn tyíꞌrutyijve

huaꞌxɨéjnyuꞌcaa jitze aꞌɨ́ɨjma ɨ maj muájchaꞌɨɨreꞌ.

⁶Ɨ paj jɨn tyíꞌijta, taj Dios, jusén pu jɨn séejreꞌ,

ajta aꞌɨ́ɨn puéꞌeen ɨ tɨ tyámuaꞌ naa tyíꞌijta.

⁷Aꞌɨ́j paj xɨeꞌveꞌ ɨ tɨ xáꞌpuɨꞌ pajta jaxanaꞌveꞌ aꞌɨ́jcɨ ɨ tɨ jeꞌej puaꞌaj een.

Aꞌɨ́j pu jɨn ɨ Dios muaꞌantyíhuoo, aꞌ Dios,

ajta muaatáꞌ pej pij huatáꞌtyamuaꞌveꞌen

ajta muéetzij jéetzeꞌ tyámuaꞌ tyimuaatáꞌ quee ɨ séecan ɨ maj ajamuán ajaꞌseejreꞌ.

⁸Néijmiꞌi ɨ tyiꞌacáanaa aꞌyaa pu tyiꞌtyáarɨeꞌ tɨꞌɨj aꞌɨ́jna ɨ ɨ́ɨjcua, tɨꞌɨj ɨ áloes ajta tɨꞌɨj ɨ canéelaj,

ajta ɨ cuíinarij a jitze séejreꞌ canárij tɨ jitze maꞌcan

pajta atyamuaꞌveꞌ aꞌájna joꞌmaj jeꞌráatyij ɨ maj vaꞌcán jɨn tyityetyuꞌuj.

⁹Huaꞌ tzajtaꞌ ɨ úucaa ɨ maj aꞌjimi tyíꞌhuɨɨreꞌ aꞌɨ́ɨ mu majta séejreꞌ ɨ maj huápuɨꞌɨj naa huaséꞌrin,

aꞌmuácaꞌtaꞌ pujmuaꞌ aꞌɨ́jcɨ jitze ɨ paj jitzán acájca aꞌáa pu jáꞌsejreꞌ ɨ íitɨꞌ tɨ vaꞌcán jɨn tyiꞌtyéjvee,

ajta aꞌɨ́jna jɨn tyámuaꞌ huóoruuj ɨ ooroj tɨ jéetzeꞌ tyámuaꞌ een.

¹⁰Náanamuajriꞌ, nyiyóoj paj íitɨꞌ,

tyámuaꞌ paj naa tyáanamuaj jeꞌej nyaj tyimuaatéꞌexaatyeꞌej,

huojoꞌhuáꞌxɨj aꞌtyéɨtyeristyamuaꞌ pajta ɨ maj tyámuaꞌ naa tyíꞌmuamuaꞌtyej,

¹¹jiꞌnye aꞌɨ́jna ɨ tɨ rey jɨn tyiꞌtyéjvee aꞌɨ́j pu séjramuꞌ ɨ paj jɨn naa huaséꞌrin,

aꞌɨ́ɨ pu aꞌ vástaraꞌ puéꞌeen, aꞌyaa puꞌij tyúuxɨeꞌveꞌ paj jaꞌráꞌastijreꞌen.

¹²Íitɨꞌ vaꞌcán paj jɨn tyiꞌtyéjvee aꞌájna a Tiro,

aꞌɨ́ɨmaj ɨ chíjtyaanyiꞌij chájtaꞌ maj jaꞌchej

aꞌyaa mu tyáꞌxɨeꞌveꞌ maj tyiꞌtɨ́j tyimuaatapuéjveꞌen mej mij tyámuaꞌ aꞌjimi tyíꞌtyesejreꞌej.

¹³¡Aꞌyun pu iityárutyij ɨ íitɨꞌ vaꞌcán tɨ jɨn tyiꞌtyéjvee, huápuɨꞌɨj naa huaséꞌrihuaꞌaj!

¡Ajta aꞌyaa eenyeꞌ tyiꞌtyéechan tɨꞌɨj ɨ ooroj!

¹⁴Tyámuaꞌ mu naa eenyeꞌ tyetyechéetyeꞌen matɨꞌɨj mij jáꞌviꞌtɨn aꞌɨ́jcɨ jimi ɨ rey,

majta jamuán ɨ úucaa maj jahuɨɨreꞌ,

ɨ maj majta séecan jamuán antyúunajchi.

¹⁵Aꞌɨ́ɨ mu huajuꞌ jéehua muutyámuaꞌvaꞌaj,

aꞌyaa mu mij tyuutyámuaꞌveꞌej matɨꞌɨj aꞌúun joꞌtyárutyij joꞌtɨj jeꞌrájcaj aꞌɨ́jna ɨ rey.

¹⁶Aꞌyóojmuaꞌ, taj rey,

aꞌɨ́ɨ mu huatyáraꞌsij joꞌmaj tyejéꞌijtacaꞌaj ɨ jaꞌhuásimuaꞌcɨꞌɨj,

pajta jeꞌen tyuꞌtáꞌsij mej mij néijmiꞌqueꞌ tyuꞌtaꞌíjtaj ɨ chuéj japua joꞌmaj joꞌcháatɨmee.

¹⁷Nyáaj nu aꞌyan rɨnyij mej mij joꞌtámuaꞌreej jeꞌej paj ántyapuaj

ɨ maj huaꞌ jitze eerányesij,

ajta mej mij jusén jɨmeꞌ tyimuaatatyójtziꞌreꞌen ɨ maj huacháatɨmee ɨ chájtaꞌnaj jitze.

Tavástaraꞌ pu tajamuán yésejreꞌ

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Chuíicarij mej mij cɨꞌsítyeꞌrij jitze jaatáchuiicaj aꞌɨ́ɨmaj ɨ Coré tyíꞌyojmuaꞌ

¹Dios pu taatyáhuɨɨreꞌej ajta aꞌɨ́ɨn puéꞌeen ɨ tyaj jɨn uhuájcaꞌnyej,

aꞌaj pu taatyáhuɨɨreꞌej tyatɨꞌɨjtá quee jeꞌej jájtyooveꞌen.

²Aꞌɨ́j tu jɨn quee tyiꞌtzɨ́ɨnyeꞌej táꞌjuꞌun,

tyij ajta huatáxɨjtye ɨ cháanacaj,

tyij ajta ɨ jɨríj atyojoꞌcájrutyej tyétyeꞌ ɨmuáj ɨ jájritzeꞌ,

³tyij ajta tyájujhuaꞌnasimeꞌen ɨ jájtyij ajta jéehua áꞌxɨreꞌej,

tyij ajta tyuꞌtóocaꞌtzɨn ɨ jɨríj aꞌɨ́jcɨ jɨmeꞌ ɨ tɨ huápuɨꞌɨj nyúꞌcamuɨꞌ.

⁴Aꞌɨ́jna ɨ játyaꞌnaj tɨ muiꞌcaquéj huatámuɨꞌyacaꞌ aꞌɨ́ɨ pu tyámuaꞌviꞌraꞌaj jaatáꞌsij ɨ chájtaꞌnaj Dios tɨ jitze ajtyámaꞌcan,

aꞌɨ́jna ɨ chájtaꞌnaj tɨ jéetzeꞌ tyámuaꞌ een tɨ ajta tajapuá jáꞌsejreꞌ.

⁵Dios pu aꞌáa jéꞌtaꞌ jáꞌsejreꞌ, ajta tyámuaꞌ tyéꞌchaꞌɨj,

Dios pu jaatyáhuɨɨreꞌej tɨꞌɨjta ɨ xɨcáj eeréꞌnyej.

⁶Ɨ maj séej chuéj japua joꞌcháatɨmee mu juꞌɨtziityeꞌ, majta ɨ maj tyíꞌijta mu juvivej,

¡ajta ɨ chuéj pu huatáxɨjtyij tɨꞌɨj ɨ Tavástaraꞌ tyuꞌtáꞌan maj jáanamuaj ɨ nyúucariaꞌraꞌ!

⁷¡Aꞌɨ́jna ɨ Tavástaraꞌ tɨ néijmiꞌi jɨn antyúumuaꞌreej aꞌɨ́ɨ pu tajamuán yésejreꞌ!

¡Aꞌɨ́jna ɨ Dios raꞌ aꞌɨ́jcɨ ɨ Jacob aꞌɨ́ɨ pu taatyáhuɨɨreꞌej!

⁸Musioꞌváꞌjuꞌ siataꞌaj tyuꞌséj ɨ tɨ huápuɨꞌɨj naa tyuꞌséꞌrin

aꞌɨ́jna ɨ Tavástaraꞌ tɨ tyúꞌtaahuacaꞌ ɨ cháanacaj japua,

⁹puꞌríj jaꞌantyipuáꞌrij ɨ maj junyoꞌsiꞌtyaꞌcaꞌaj

néijmiꞌqueꞌ joꞌtɨj jooꞌástɨmee ɨ cháanacaj,

puꞌríj tyuꞌtyáanaꞌxɨj ɨ túꞌnamuaꞌaj,

puꞌríj tyiꞌijnáꞌxɨj ɨ tyapúustiꞌij tɨ tyeꞌentyipityíijmee ɨ maj jɨn nyoꞌsii,

¡ajta tyuꞌtyáatɨej ɨ cariáataꞌ ɨ maj jitzán nyoꞌsii!

¹⁰“¡Siataꞌaj jaatapuáꞌcɨtaj! ¡Xuꞌhuóomuaꞌtzɨj nyej nyáaj aꞌɨ́ɨn puéꞌeen ɨ Dios!

¡Nyáaj nu huaꞌ japua séejreꞌ néijmiꞌcaa jimi ɨ maj séej chuéj japua joꞌcháatɨmee!

¡Nyáaj nu japuan séejreꞌ néijmiꞌqueꞌ ɨ cháanacaj!”

¹¹¡Aꞌɨ́jna ɨ Tavástaraꞌ tɨ néijmiꞌi jɨn antyúumuaꞌreej aꞌɨ́ɨ pu tajamuán yésejreꞌ!

¡Aꞌɨ́jna ɨ Dios raꞌ aꞌɨ́jcɨ ɨ Jacob aꞌɨ́ɨ pu taatyáhuɨɨreꞌej!

Dios pu aꞌɨ́ɨn puéꞌeen ɨ tɨ Rey jɨn tyiꞌtyéjvee néijmiꞌqueꞌ ɨ cháanacaj japua

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Chuíicarij aꞌɨ́ɨmaj maj joꞌyúꞌxacaꞌ ɨ yójmuaꞌmuaꞌ aꞌɨ́jcɨ ɨ Coré

¹¡Siahuóotyamuaꞌveꞌ, néijmiꞌqueꞌ tɨꞌɨj naꞌaj tyiꞌchájtaꞌnajmee!

¡Siajta huatyényuunyij ɨ Dios jimi siajíihuaj aꞌɨ́jcɨ jɨmeꞌ siaj jutyamuaꞌveꞌ!

²Jiꞌnye aꞌɨ́jna ɨ Tavástaraꞌ, jútyeꞌ ɨmuáj tɨ jáꞌsejreꞌ, huápuɨꞌɨj pu tzɨ́ɨnyiꞌreꞌ,

aꞌɨ́ɨ pu aꞌɨ́ɨn puéꞌeen ɨ tɨ vaꞌcán Rey jɨmeꞌ tyiꞌtyéjvee néijmiꞌqueꞌ ɨ cháanacaj japua.

³Huaꞌajtaviꞌtɨj ɨ maj chájtaꞌ joꞌcháatɨmee ajta aꞌɨ́ɨjma ɨ maj séej chuéj japua jáꞌmaꞌcan

ajta jeꞌen huoꞌtaꞌíj mej mij ityájma taꞌráꞌastijreꞌen.

⁴Puꞌríj jaꞌantyíhuoj aꞌɨ́jna ɨ tɨ ityájma tyíꞌtacɨꞌtyij,

aꞌɨ́ɨn tɨꞌij puéꞌeen ɨ Jacob tɨ jɨn óotzaahuatyeꞌ, aꞌɨ́jcɨ ɨ tɨ jéehua jaataxɨéꞌvej.

⁵Dios ɨ Tavástaraꞌ puꞌríj huatyéeyixɨj ɨ juꞌɨpuáa jitze

huaꞌ tzajtaꞌ ɨ maj jutyamuaꞌveꞌej mejijhuaj majta ɨ trompéetaj maj jitze tyíꞌcɨꞌsityeꞌ.

⁶Setyuꞌtáchuiicaj, setyuꞌtáchuiicaj ɨ Dios jimi.

Setyuꞌtáchuiicaj, setyuꞌtáchuiicaj aꞌɨ́jcɨ jimi ɨ tɨ Rey jɨn tyiꞌtyéjvee tajimí.

⁷Aꞌɨ́j xu huatáchuiicaj ɨ tɨ naa huánamuajrii ɨ Dios jimi,

jiꞌnye aꞌɨ́ɨ pu aꞌɨ́ɨn puéꞌeen ɨ tɨ Rey jɨn tyiꞌtyéjvee néijmiꞌqueꞌ ɨ cháanacaj japua.

⁸¡Dios pu aꞌɨ́ɨn puéꞌeen ɨ tɨ Rey jɨn tyiꞌtyéjvee aꞌɨ́ɨjma jimi ɨ maj séej chuéj japua joꞌcháatɨmee!

¡Dios pu arí acáayixɨj ɨ juꞌɨpuáa jitze tɨ naa een!

⁹Aꞌɨ́ɨmaj ɨ tyétyacaa maj jéetzeꞌ juxɨeꞌveꞌ aꞌájna joꞌmaj joꞌcháatɨmee

aꞌɨ́ɨ mu huaꞌ jitze ajtyáhuiixɨꞌɨj ɨ tyeɨ́tyeristyamuaꞌmeꞌen ɨ Dios raꞌ aꞌɨ́jcɨ ɨ Abraham,

¹⁰jiꞌnye ɨ Dios pu jimi jeꞌrámaꞌcan ɨ maj jɨn putyíꞌuurej ɨ cháanacaj japua.

¡Aꞌɨ́ɨ pu néijmiꞌcaa japua tyíꞌijta!

Aꞌɨ́jna ɨ Sión tɨ jɨn naa huaséꞌrin, chájtaꞌnaj tɨ puéꞌeen Dios tɨ jitze ajtyámaꞌcan

Chuíicarij. Chuíicarij aꞌɨ́ɨmaj maj joꞌyúꞌxacaꞌ ɨ yójmuaꞌmuaꞌ aꞌɨ́jcɨ ɨ Coré

¹¡Vaꞌcán pu jɨn tyiꞌtyéjvee ɨ Tavástaraꞌ!

¡Aꞌɨ́jna ɨ taj Dios tyámuaꞌ pu een tyej tyij jimi tyuꞌtáchuiicaj

ɨ chájtaꞌnaj tɨ jitzán ajtyámaꞌcan ajta aꞌájna joꞌtɨj néijmiꞌi tyámuaꞌ tyejéꞌeen ɨ jɨríj jitze!

²¡Naa pu huaséꞌrin aꞌɨ́jna ɨ jɨríj tɨ ájtyeej ɨ tɨ aꞌyan ántyapuaj tɨjɨn Sión,

aꞌájna pujmuaꞌ, joꞌtɨj joꞌtáꞌasej ajtyapuáj ɨmuáj tɨ séejreꞌ!

¡Aꞌɨ́ɨ pu tyámuaꞌviꞌraꞌaj puéꞌeen néijmiꞌqueꞌ ɨ chuéj japua!

¡Aꞌɨ́ɨ pu puéꞌeen ɨ chájtaꞌnaj tɨ veꞌéj aꞌɨ́ɨn tɨ jaꞌaꞌrij ɨ Rey tɨ jɨn tyiꞌtyéjvee!

³Dios pu aꞌáa jáꞌsejreꞌ a Jerusalén aꞌájna joꞌmaj jeꞌráatyij ɨ maj tyíꞌijta;

Dios pu aꞌyan tyuꞌtóosejratacaꞌ tɨꞌɨj joꞌtɨj jáaɨꞌrij tɨꞌij tyámuaꞌ tyihuoꞌtyáhuɨɨreꞌen.

⁴Jiꞌnye aꞌɨ́ɨmaj mu tyúusɨɨj ɨ maj rey jɨn tyityetyuꞌuj

aj mu mij néemiꞌij aꞌɨ́j jimi huatajeꞌyacaꞌ;

⁵ajta matɨꞌɨj jaaséj ɨ chájtaꞌnaj jeꞌej mu tyoꞌtaséj,

majta quee cheꞌ jeꞌej jájtyoovaꞌaj aj mu mij huatóoꞌuj.

⁶Aꞌɨ́ɨ pu huaꞌ jimi huatyáꞌɨtzee ɨ maj jɨn tyuꞌtátzɨɨnyeꞌen:

huápuɨꞌɨj pu huaꞌcuiꞌcaꞌaj, aꞌyájna tɨꞌɨj íitaj tɨ ootacuíꞌnyej tɨꞌɨj tyiyóoj jaꞌmej;

⁷pahuaꞌantyipuáꞌrij ɨ maj tyíꞌijta aꞌyájna tɨꞌɨj ɨ áacaj aꞌáa tɨ pujmuaꞌ jeꞌréꞌnyinyii joꞌtɨj ɨ xɨcáj jéꞌejnyinyiij, ɨ tɨ huoꞌtyáanaꞌxɨj ɨ báarcuj aꞌáa maj jáꞌsejreꞌ aꞌ tɨ aꞌyan tyajaꞌrájtyapuaj tɨjɨn Tarsis.

⁸Aꞌájna a chájtaꞌnaj jitze taj Dios tɨ jaꞌaꞌrij,

ɨ Tavástaraꞌ ɨ tɨ néijmiꞌi jɨn antyúumuaꞌreej,

aꞌɨ́j tu tyeríj huaséj ɨ tajɨꞌɨj jɨmeꞌ

aꞌyájna matɨꞌɨj meríj tyitáaꞌixaatyaꞌcaꞌaj,

¡Dios pu jusén jɨmeꞌ tyámuaꞌ tyeꞌchaꞌɨ́ɨj jaꞌmej ɨ chájtaꞌnaj Jerusalén!

⁹Taj Dios, aꞌájna jéꞌtaꞌ aꞌ tyeyúuj tzajtaꞌ

aꞌáa tu aꞌɨ́j jitze tyíꞌmuaꞌtzej ɨ paj vaꞌcán jɨn taxɨeꞌveꞌ.

¹⁰Taj Dios, néijmiꞌqueꞌ mu ɨ cháanacaj japua tyámuaꞌ tyimuatáꞌcaa

aꞌyájna tɨꞌɨj tyaꞌráanajchi aꞌɨ́jcɨ jitze jeꞌej paj ántyapuaj.

Aꞌɨ́jna ɨ paj néijmiꞌi jɨn putyíꞌuurej aꞌɨ́j paj jɨn tyámuaꞌ naa tyáꞌxaꞌpuɨꞌɨntareꞌ.

¹¹¡Micheꞌ néijmiꞌi huatóotyamuaꞌveꞌen aꞌájna a tɨ aꞌyan tyajaꞌrájtyapuaj tɨjɨn Sión!

¡Micheꞌ tyítzunaxɨꞌɨn muutyámuaꞌvaꞌaj ɨ chájtaꞌnaj jitze aꞌáa tɨ tyejeꞌejtyámaꞌcan a Judá

aꞌɨ́jcɨ jɨmeꞌ jeꞌej paj tyámuaꞌ naa tyaaxáꞌpuɨꞌɨntarej!

¹²Siataꞌaj eetyácɨɨnyej aꞌájna a Sión

siajta jeꞌen jaatyéꞌiten aꞌchu tɨ aráꞌasej ɨ chiꞌij tɨ ajtɨ́tɨꞌɨjmee;

¹³xaaséj ɨ tɨ atátaavijhuaj ajta joꞌmaj jeꞌráatyij aꞌɨ́ɨmaj ɨ maj tyíꞌijta,

tɨꞌij ɨꞌríitan siaj huoꞌtéꞌexaatyeꞌen

aꞌɨ́ɨjma ɨ maj jaꞌmua jitze eerányesij

¹⁴tɨ aꞌyan een ɨ taj Dios

tɨꞌɨj naꞌaj yu tɨ joꞌcaꞌaj ajta jusén jɨmeꞌ.

¡Aꞌɨ́ɨ pu aꞌɨ́ɨn puéꞌeen ɨ tɨ táaviꞌtɨj ijíij ajta jusén jɨmeꞌ!

Aꞌɨ́jna ɨ túmii capu néijmiꞌi putyíꞌuurej

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Chuíicarij aꞌɨ́ɨmaj maj joꞌyúꞌxacaꞌ ɨ yójmuaꞌmuaꞌ aꞌɨ́jcɨ ɨ Coré

¹Tyámuaꞌ xu naa aꞌíj tyuꞌnamuaj,

chájtaꞌnaj siajta néijmiꞌi ɨ siaj aꞌyan huacháatɨmee ɨ cháanacaj japua,

²aꞌyaa puꞌuj tánaꞌaj tyihuáꞌixaatyeꞌ ɨ maj chíjtyaanyiꞌij ajta aꞌɨ́ɨjma ɨ maj quee jeꞌej tyéejviicueꞌ,

tɨꞌɨj ajta aꞌɨ́ɨjma ɨ maj uhuácacaꞌnyeꞌ ajta aꞌɨ́ɨjma ɨ maj tyóoxaahuaj.

³Aꞌyaa nu tyuꞌtaxájtaj tɨꞌɨj ɨ tɨ jéehua tyojóꞌitej

nyajta aꞌɨ́j huataxájta tyiꞌtɨ́j tɨ úꞌsejreꞌ ɨ nyatzájtaꞌ,

⁴tyámuaꞌ nu tyáꞌnamuajran jeꞌej maj tyíꞌxaj ɨ maj jéehua tyojóꞌitej,

nyajta ɨ canárij jitze jaataxájtaj tyiꞌtɨ́j nyaj avaatacaꞌaj ɨ nyatzájtaꞌ.

⁵¿Jiꞌnye nyej nyij tyíꞌtzɨɨnyeꞌej naꞌmej

tɨꞌɨj aꞌájna atyojoꞌréꞌnyej aꞌɨ́jcɨ ɨ xɨcáaraꞌ tɨ jitzán jeꞌej puaꞌaj tyiꞌéenyeꞌej taꞌmej,

nyatɨꞌɨj aꞌɨ́jna jɨn curiáꞌnamiꞌhuaj

ɨ maj jɨn jeꞌej puaꞌaj rɨcɨj ɨ maj nyéjchaꞌɨɨreꞌ?

⁶Aꞌɨ́ɨmaj mu aꞌɨ́j jitze tyíꞌcaꞌnyej ɨ maj jéehua tyíꞌijchaꞌɨj

majta aꞌɨ́j jɨn óotzaahuatyeꞌ tyiꞌtɨ́j maj jéehua tyúꞌchaꞌɨj,

⁷ajta capu aꞌtɨ́j pújoorej tɨ jusɨ́ɨj jujapuá huatányuunyij

nusu tɨ tyaanájchityeꞌen ɨ Dios tɨꞌij japuan huatányuunyij ɨ júuricamaꞌraꞌ.

⁸¡Capu túmii séejreꞌ ɨ tɨ jɨn ɨꞌríj tɨꞌij aꞌtɨ́j jáananan ɨ júuricamaꞌraꞌ ɨ tyévij,

⁹tɨꞌij jusén jɨn júurij jáꞌraꞌnyij ajta jeꞌen jáahuɨɨreꞌen tɨꞌij quee huámuɨꞌnyij!

¹⁰Jiꞌnye aꞌyaa pu tyíꞌsejreꞌ maj néijmiꞌi juxaꞌaj manaꞌaj tyíꞌtyacuꞌvacaa,

aꞌɨ́ɨmaj ɨ maj tyojóꞌitej ajta aꞌyan chaꞌtánaꞌaj tyihuáꞌuurej ɨ maj quee tyojóꞌitej,

ajta jeꞌen séecan tyíꞌcɨꞌtyij ɨ maj jéehua tyíꞌijchaꞌɨɨcaꞌaj.

¹¹Tyij majta tyámuaꞌ naa tyoꞌtyéyuꞌxacaꞌ joꞌmaj tyajaꞌtachuéj,

aꞌáa mu jusén jɨn jaꞌséeriaꞌaj muáꞌjuꞌun joꞌmaj tyityajáꞌavaꞌtacaa,

¡aꞌáa mu jusén jɨmeꞌ joꞌtyáꞌɨtzeereꞌej!

¹²Capu jusén jɨmeꞌ séejreꞌ ɨ tyévij, tyij ajta huápuɨꞌɨj chíjtyaanyiꞌ puéꞌeenyeꞌ,

aꞌyaa pu chaꞌtánaꞌaj tyíꞌmuɨꞌnyij matɨꞌɨj ɨ tyiꞌtyán maj tyityaacɨ́ꞌɨj.

¹³Aꞌyaa mu tyityeꞌentyipuáꞌrij aꞌɨ́ɨmaj ɨ maj jujɨ́ɨmuaꞌaj jujitzé tyíꞌcaꞌnyej,

aꞌyaa mu tyityeꞌentyipuáꞌrij aꞌɨ́ɨmaj ɨ maj jujɨ́ɨmuaꞌaj tyámuaꞌ tyúuxaj.

¹⁴Aꞌɨ́ɨjma ɨ tyeɨ́tyee, aꞌɨ́ɨ pu huaꞌajséejra ɨ tɨ tyeꞌentyípuaapuaꞌrityee

aꞌáa puꞌij huojóoviꞌtɨj joꞌmaj tyityajáꞌavaꞌtacaa

aꞌyaa pu cuxáa maj cányaꞌxɨɨ puéꞌeenyeꞌ.

Tɨꞌɨj eeréꞌnyej ɨ xɨcáj,

aꞌɨ́ɨmaj mu huaꞌ jimi tyuꞌtyámueꞌtɨj ɨ maj tyámuaꞌ tyityetyúuchaꞌɨj,

majta aꞌɨ́ɨmaj camu cheꞌ uhuácacaꞌnyeꞌej muáꞌjuꞌun

aꞌáa mu mij joꞌtyáꞌɨtzeereꞌej joꞌmaj tyityajáꞌavaꞌtacaa.

¹⁵Ajta ɨ Dios pu nyajapuáj huatányuusij nyej nyij quee huámuɨꞌnyij,

jiꞌnye aꞌɨ́ɨ pu náꞌviꞌtɨn joꞌtɨj aꞌɨ́ɨn jáꞌsejreꞌ.

¹⁶Capáj jeꞌej tyáꞌmuaꞌajcaj tɨpuaꞌaj aꞌtɨ́j huatyoochíjtyaanyiꞌtaj;

ajta arí jéetzeꞌ naa huaséꞌrihuaꞌan ɨ chiꞌraꞌan,

¹⁷jiꞌnye tɨꞌɨj huámuɨꞌnyij capu tyiꞌtɨ́j áꞌtɨnyij,

capu ajta ɨ tɨ jɨn naa huaséꞌrihuaꞌaj jamuán aꞌáa joꞌtyáꞌɨtzeereꞌej joꞌmaj yoꞌtyáꞌavaataj.

¹⁸Tyij ajta jutyamuaꞌveꞌej tɨꞌɨj ooj ajáꞌchajcaj,

majta ɨ tyeɨ́tyee tyámuaꞌ naa tyáꞌxajta aꞌɨ́jcɨ jɨmeꞌ tɨ chíjtyaanyiꞌ puéꞌeen,

¹⁹aꞌnáj pu atyojoꞌréꞌnyesij ɨ xɨcáaraꞌ tɨ jitzán muɨꞌnyij,

aꞌaj puꞌij quee cheꞌ jaséjran ɨ tɨ jɨn huányeeriꞌij.

²⁰Capu jusén jɨmeꞌ séejreꞌ ɨ tyévij, tyij ajta huápuɨꞌɨj chíjtyaanyiꞌ puéꞌeenyeꞌ,

aꞌyaa pu chaꞌtánaꞌaj tyíꞌmuɨꞌnyij matɨꞌɨj ɨ tyiꞌtyán maj tyityaacɨ́ꞌɨj.

Dios pu aꞌɨ́ɨn puéꞌeen ɨ tɨ néijmiꞌi tyámuaꞌ naa tyáꞌxaꞌpuɨꞌɨntareꞌ

Chuíicarij aꞌɨ́ɨn tɨ jaꞌaꞌrij ɨ Asaf

¹Ɨ Tavástaraꞌ, aꞌɨ́jna ɨ Dios tɨ tyihuáꞌijtyeꞌ séecan ɨ dioosij, aꞌɨ́ɨ pu arí tyuꞌtaxájtacaꞌ,

aꞌɨ́ɨjma pu huatajé ɨ maj aꞌyan huacháatɨmee ɨ cháanacaj japua

tɨꞌɨj naꞌaj joꞌtɨj jéꞌejnyinyiij ɨ xɨcáj ajta joꞌtɨj jaꞌancáruꞌpij.

²Dios pu jɨn huányeeriꞌij aꞌájna a Sión,

aꞌɨ́jna ɨ chájtaꞌnaj tɨ tyámuaꞌ een ajta naa huaséꞌrin.

³Aꞌɨ́jna ɨ taj Dios pu ajeꞌcáamej, ajta capu xájtariꞌ

tɨéj tɨ néijmiꞌi tyojóꞌjɨpuaj pu anaquéej jimi huaméj,

majta caꞌnyíin jɨn tyéviiyij aꞌɨ́jcɨ jimi.

⁴Jútyeꞌ ɨmuáj, Dios pu aꞌɨ́j huatajé ɨ tajapuá tɨ séejreꞌ ajta aꞌɨ́jcɨ ɨ cháanacaj

mej mij jaaséj jeꞌej tɨ tyaꞌajpuéetzij jaꞌmej ɨ chájtaꞌnaj aꞌɨ́j tɨ jitze ajtyámaꞌcan.

⁵“Siahuaꞌajsɨɨreꞌ aꞌɨ́ɨjma ɨ maj tyámuaꞌ nyéetzij tyináꞌastijreꞌ,

aꞌɨ́ɨmaj ɨ maj nye jimi tyiꞌtɨ́j jɨn tyaꞌtóoraj

aꞌɨ́jcɨ jɨmeꞌ maj nye jimi tyuꞌtámuꞌvejritacaꞌ.”

⁶Ajta ɨ tajapuá tɨ séejreꞌ pu jatyáxajta tɨ ɨ Dios tyámuaꞌ éenyeꞌej séejreꞌ.

⁷“Setyúꞌnamuaj, Israel siaj jitze ajtyámaꞌcan, chájtaꞌnaj nye jitze siaj ajtyámaꞌcan,

néijmiꞌi nu tyámuaꞌ naa aꞌ jimi tyuꞌtaséjrataj.

¡Nyáaj nu Dios puéꞌeen! ¡Nyáaj nu jaꞌmua Dios puéꞌeen!

⁸Canu aꞌɨ́jna jɨn quee muasej mu paj nye jimi tyíꞌmuꞌvejritaj

ajta ɨ yaꞌmuáatyee paj huáꞌteeraj pej pij naatyátzaahuatyeꞌen.

⁹Canu ɨ visáaruꞌuj muahuavii ɨ paj huaꞌaj yaꞌmuaj

canu nyajta ɨ túuruꞌuj ɨ maj iiraꞌuj aꞌ cúraaritaꞌ,

¹⁰jiꞌnye nyéetzij mu nyaꞌaꞌrij néijmiꞌi ɨ tyiꞌtyán maj tyityaacɨ́ꞌɨj,

aꞌyájna matɨꞌɨj majta ɨ maj huoꞌyaꞌmuaj joꞌmaj joꞌcháatɨmee,

¹¹nyéetzij mu nyaꞌaꞌrij ɨ pínaꞌsee maj huacɨ́j ɨ jɨríj jitze

majta néijmiꞌi matɨꞌɨj manaꞌaj puaꞌmáj tyityáaxoo aꞌɨtzitáj.

¹²Tɨpuaꞌaj nyáaj nye íꞌcuataj, canu muéetzij muateꞌexáatyeꞌnyijcheꞌen,

jiꞌnye ɨ cháanacaj pu nyéetzij nyaꞌaꞌrij, ajta néijmiꞌi tyiꞌtɨ́j tɨ jitzán tyíꞌsejreꞌ.

¹³¿Caꞌ aꞌɨ́j nyacuaꞌcaa ɨ huáꞌhueꞌraꞌ ɨ túuruꞌuj

nusu aꞌɨ́j nyeyaꞌcaa ɨ huaꞌ xuureꞌ ɨ chíutyee maj túuruꞌuj?

¹⁴¡Cheꞌ aꞌɨ́jna ɨ paj jɨn tyéꞌtyojtziꞌreꞌ aꞌɨ́ɨn puéꞌeenyeꞌ ɨ paj jaatámuꞌvejrityeꞌsij ɨ Dios,

pajta aꞌyan huárɨnyij jeꞌej paj tyaꞌtáꞌratziiriꞌ aꞌɨ́jcɨ jimi ɨ tɨ jútyeꞌ ɨmuáj jáꞌsejreꞌ!

¹⁵Pataꞌaj nye jimi huatyényuunyij patɨꞌɨjta quee jeꞌej tyéejtyooveꞌen,

nyáaj nu ajapua huatányuusij, pajta jeꞌen muáaj naatyátzaahuatyeꞌsij.”

¹⁶Ajta aꞌɨ́jcɨ ɨ tɨ jeꞌej puaꞌaj rɨcɨj Dios pu aꞌyan tyéꞌixaatyeꞌ tɨjɨn:

“¿Tyiꞌtanyí jɨn puaatáꞌcɨꞌpuaj pej pij aꞌɨ́j áꞌmuaꞌtyej ɨ nyenyúucaa

nusu paj jaxajta tyiꞌtɨ́j nyaj jɨn tyaꞌtányaratziiriꞌ,

¹⁷tɨpuaꞌaj quee muaꞌránajchij nyej nyáaj tyámuaꞌ muaꞌuurej

pajta quee tzáahuatyiꞌraꞌaj jimi tyíchaꞌɨj ɨ nyenyúucaa?

¹⁸Aꞌɨ́j paj tyámuaꞌ naa tyuꞌtyéjeevij ɨ tɨ tyíꞌnahuaꞌ,

¡pajta huáꞌjaahuatyeꞌ ɨ tyeɨ́tyee maj jéehua tyíꞌxanaꞌcɨreꞌ!

¹⁹Aꞌɨ́jcɨ jimi ɨ tɨ jeꞌej puaꞌaj een ajta ɨ maj hueꞌtzij huáꞌtaavijreꞌ

aꞌɨ́j pu jɨn tyámuaꞌ een muaꞌ nyanúu ajta muaꞌ tyenyij.

²⁰Hueꞌtzij paj jɨn jeꞌej puaꞌaj tyáꞌxaj aꞌihuáaraꞌ,

¡aꞌɨ́j paj jeꞌej puaꞌaj uurej aꞌihuáaraꞌ!

²¹Aꞌíj paj néijmiꞌi jɨn aꞌyan huarɨ́j, nyajta nyáaj canu huatanyúj,

aꞌyaa paj tyiꞌriáꞌmuaꞌaj nyej nyáaj nyajta aꞌyan tyiꞌtyínyechaꞌɨɨcaꞌaj patɨꞌɨj muáaj.

Ajta aꞌyaa nu tyimuaꞌrájeevij aꞌjɨ́ɨsaꞌpuaj,

¡tyámuaꞌ nu tyimuáꞌxaꞌpuɨꞌɨntariꞌtzeꞌen!

²²’Aꞌíj xu tyámuaꞌ tyojoꞌitéej xáꞌraꞌnyij, muaꞌaj mu siaj yóꞌhuaꞌnaj ɨ Dios,

nyej nyij quee nyáaj huatyényechenyij nyaj jamuaꞌantyipuáꞌrityeꞌen

ajta jeꞌen quee majaꞌ aꞌtɨ́ɨtan tɨꞌij jaꞌmua japua huatányuunyij.

²³Aꞌɨ́jna ɨ tɨ aꞌɨ́j naatámuꞌvejrityeꞌen ɨ tɨ tyinaatatyójtziꞌreꞌen, aꞌɨ́ɨ pu naatyátzaahuatyeꞌsij.

¡Nyáaj nu aꞌɨ́j japua huatányuusij ɨ tɨ tyámuaꞌ tyuꞌméj ɨ nyaj juyéj jitze!”

Nyaj Dios, náꞌancuꞌvaxɨꞌ nyéetzij

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Chuíicarij David tɨ jaꞌaꞌrij, tɨꞌɨj ɨ Natán Dios tɨ jitze maꞌcan tyíꞌxaj jajtyáꞌxɨj aꞌɨ́jcɨ jɨmeꞌ tɨ huóoxanaꞌcɨrej aꞌɨ́jcɨ jamuán ɨ íitaj Betsabé tɨ ántyapuaj

¹Aꞌɨ́jcɨ jɨmeꞌ ɨ paj jɨn taxɨeꞌveꞌ, nyaj Dios, náꞌancuꞌvaxɨꞌ nyéetzij;

aꞌɨ́jcɨ jɨmeꞌ ɨ paj tyámuaꞌ naa tyíꞌnyaxɨeꞌveꞌ, oorióꞌuunaj tyiꞌtɨ́j nyaj jɨn ootyáꞌɨtzee.

²¡Nyacájoꞌsin aꞌɨ́jcɨ jɨmeꞌ ɨ nyaj quee tyámuaꞌ huarɨ́j!

¡Tyinaatúꞌuunyiꞌriꞌ tyiꞌtɨ́j nyaj jɨn tyiꞌijxánaꞌcɨraꞌ!

³Nyáamuaꞌree nyaj quee tyihuojóꞌiteecaꞌaj,

capu ɨꞌríj ɨ nyamuaꞌtzíiraꞌaj jitze nyej nyij joꞌrioꞌuunaj tyiꞌtɨ́j nyaj jɨn tyiꞌijxánaꞌcɨraꞌ.

⁴Muéetzij jimi nu ootyáꞌɨtzee, muéetzij nuꞌuj jimi ootyáꞌɨtzee,

jeꞌej puaꞌaj nyetyiꞌtyinyechaꞌɨɨj, aꞌɨ́jcɨ jɨmeꞌ ɨ tɨ quee xáꞌpuɨꞌ muéetzij jimi.

Aꞌɨ́j pu jɨn aꞌyan tyíꞌxaꞌpuɨꞌ paj tyámuaꞌ tyinoꞌxáꞌpuɨꞌɨntariꞌtzeꞌen;

ajta quee tyiꞌtɨ́j jɨn áꞌɨtzeereꞌ jeꞌej paj muáaj tyihuáꞌxɨjtyeꞌen.

⁵Aꞌyaa pu tyiꞌjɨꞌréꞌcan jɨmeꞌ, nyaj jeꞌej puaꞌaj tyiꞌtyévistaj nyatɨꞌɨj huanɨeꞌhuacaꞌ;

jéehua nu tyiꞌijxánaꞌcɨraꞌcaꞌaj tɨꞌɨj naꞌaj ɨ náanaj tyinaaxáꞌpueeriꞌ.

⁶Aꞌyaa pu tyiꞌjaꞌyájna, paj muáaj jaxɨeꞌveꞌ aꞌɨ́jcɨ ɨ xɨéjnyuꞌcarij tɨ tyámuaꞌ tyoꞌcájmuaꞌrej,

pajta ɨ nyamuaꞌtzíiraꞌaj jitze períj tyámuaꞌ tyinuꞌcámuaꞌriityej.

⁷Pataꞌaj naajájcuareꞌen hisoopoj xamueꞌ jɨmeꞌ, aj nu nyij tyámuaꞌ éenyeꞌej naꞌmej;

nyacájoꞌsin, aj nu nyij jéetzeꞌ huatyácueenarij quee ɨ séerij.

⁸Pajta jéehua naataꞌan ɨ nyaj jɨn huatányetyamuaꞌveꞌen

jájcuan paj naatatyámuaꞌvisteꞌen, tyij pajta períj puéjtzij naatáꞌ.

⁹Capáj cheꞌ jaꞌsejra tyiꞌtɨ́j nyaj jɨn áꞌɨtzeereꞌ

pajta néijmiꞌi oorióꞌuunaj ɨ nyaj jɨn jeꞌej puaꞌaj huarɨ́j.

¹⁰Nyaj Dios, ¡séej nuꞌcáxɨejnyuꞌcarityeꞌ tɨquee tyiꞌtɨ́j jɨn áꞌɨtzeereꞌ!,

¡pajta júuricamej naataꞌan tɨ jájcuaj tɨ ajta tyámuaꞌ tyiꞌtyúuchaꞌɨj!

¹¹Capáj aꞌáa nyojóojɨpuan joꞌpaj quee jáꞌsejreꞌ

capáj pajta náariꞌracareꞌen aꞌjúuricamej tɨ tyámuaꞌ een.

¹²Naatáꞌ nyaj jájcuan jɨn huatányetyamuaꞌveꞌen aꞌɨ́jcɨ jɨmeꞌ paj nyajapuáj huatányuusij;

tyámuaꞌ paj tyíꞌnyeviꞌraj aꞌɨ́jcɨ jɨmeꞌ aꞌjúuricamej tɨ jéehua tyihuaꞌcuꞌvej,

¹³nyej nyij nyáaj huoꞌmuaꞌtyej aꞌjuyéj aꞌɨ́ɨjma ɨ maj quee tyihuojóꞌitej

mej mij majta aꞌɨ́ɨmaj muáꞌantzaahuatyeꞌen ɨ maj tyiꞌijxánaꞌcɨraꞌ.

¹⁴Nyajapuáj huatányuuchij nyej nyij quee cheꞌ tyíꞌtyacuiꞌijca,

nyaj Dios, muáaj paj aꞌɨ́ɨn puéꞌeen ɨ Dios tɨ nyajapuáj huatányuusij,

aj nu nyij aꞌɨ́j huatáchuiicaj paj muáaj tyámuaꞌ éenyeꞌej séejreꞌ.

¹⁵Tavástaraꞌ, naatáꞌ nyej nyij tyuꞌtaxáj,

aj nu nyij nye tyenyij jɨn muéetzij jimi tyuꞌtáchuiicaj.

¹⁶Jiꞌnye capáj jaxɨeꞌveꞌ maj tyíꞌmuamuꞌvejrityeꞌej nusu maj yaꞌmuáatyee tɨeeraj aꞌ jitze maꞌcan,

ɨꞌríj nyej nyáaj aꞌɨ́j tyimuaatáꞌan, ajta capu aꞌɨ́ɨn tyimuaꞌráanajchi.

¹⁷Aꞌɨ́jna ɨ muꞌvéjrij ɨ Dios jimi aꞌɨ́ɨ pu aꞌɨ́ɨn puéꞌeen ɨ júuricamej tɨ japuéjtzitarej,

¡capáj muáaj jaatyáxaahuataj, nyaj Dios, ɨ xɨéjnyuꞌcarij tɨ jéehua japuéjtzitarej!

¹⁸Axɨeꞌviꞌraꞌ paj jɨn tyámuaꞌ tyeetyátoosij ɨ Sión;

ajtáhuaꞌaj atátaahuaj ɨ tɨ jɨn curiáꞌnamiꞌ ɨ Jerusalén.

¹⁹Aj pej pij jaꞌancuriáꞌan jeꞌej tɨ tyiꞌtɨ́j muéetzij jimi tyúuxɨeꞌveꞌ,

aꞌɨ́jna ɨ muꞌvéjrij ajta ɨ yaꞌmuáatyee maj huaꞌteꞌracaa;

aj mu mij visáaruꞌuj huatámuꞌvejritaj aꞌɨ́jcɨ japua ɨ maj jitzán muanaꞌmichej.

Capu tyiꞌtɨ́j huɨɨreꞌ ɨ tɨ jɨn óotzaahuatyeꞌ aꞌɨ́jna ɨ tɨ jeꞌej puaꞌaj rɨcɨj

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Jeꞌej tɨ tyihuoꞌmuáꞌtyej aꞌɨ́jna ɨ David, tɨꞌɨj ɨ Doeg Edom tɨ jáꞌmaꞌcan Saúl jimi ujóꞌmej tɨꞌij jaatéꞌexaatyeꞌen tɨ ɨ David aꞌáa joꞌtyávaacaꞌaj joꞌtɨj ɨ Abimélec jaꞌchej

¹¿Jiꞌnye pej pij aꞌɨ́jna jɨn áꞌatzaahuatyeꞌ ɨ paj jɨn jeꞌej puaꞌaj rɨcɨj, mu paj néijmiꞌi putyíꞌuurej?

¡Aꞌɨ́ɨ pu jusén jɨmeꞌ séejreꞌ ɨ Dios tɨ jɨn taxɨeꞌveꞌ!

²Aꞌɨ́j papuꞌuj curiaꞌmuaꞌsij pej pij jeꞌej puaꞌaj huárɨnyij,

muaꞌ nyanúu pu jeꞌej puaꞌaj tyíꞌuurej aꞌyájna tɨꞌɨj ɨ náhuaaj tɨ tyíꞌɨtzɨj.

³Aꞌɨ́ɨ pu jéetzeꞌ muaꞌráanajchij ɨ tɨ jeꞌej puaꞌaj een quee ɨ tɨ xáꞌpuɨꞌ,

aꞌɨ́j paj jéetzeꞌ xɨeꞌveꞌ ɨ tɨ hueꞌtzij pequee aꞌɨ́jcɨ ɨ tɨ jɨꞌréꞌcan jɨmeꞌ.

⁴Nyanúrij tɨ tyíꞌhueꞌtacaa,

aꞌɨ́j paj xɨeꞌveꞌ ɨ nyúucarij tɨ tyeꞌentyípuaapuaꞌrityee,

⁵aꞌyaa puꞌij ajta ɨ Dios tyimuaꞌantyipuáꞌrityeꞌsij jusén jɨmeꞌ,

aꞌɨ́ɨ pu muaatyéviꞌraj ajta jeꞌen muiꞌrárɨesij aꞌchiꞌtáj, ajta muáariꞌraj aꞌjúuricamej.

⁶Aꞌɨ́ɨmaj ɨ maj jáꞌastijreꞌ ɨ Dios, aꞌíj mu séjran majta jeꞌen tyuꞌtátzɨɨnyeꞌej;

majta aꞌɨ́j mu huatyáxaahuataj ɨ tyáataj, aꞌyan metyiꞌxáataj tɨjɨn:

⁷“Cásɨꞌ aꞌɨ́jna ɨ tɨ quee jahuoo tɨꞌij ɨ Dios jaatyáhuɨɨreꞌen,

ɨ tɨ aꞌɨ́j jitze tyíꞌcaꞌnyej ɨ tɨ jéehua tyíꞌijchaꞌɨj

ajta quee jatapuáꞌcɨtacaa tɨ jeꞌej puaꞌaj rɨjcaj.”

⁸Nyajta nyáaj aꞌyaa nu een tɨꞌɨj ɨ ítyeɨꞌrij tɨ naa tyiꞌhuaꞌraa

aꞌájna joꞌtɨj joꞌtyéjvee ɨ tyeyúujraꞌ ɨ Dios;

¡aꞌnáj tɨnaꞌaj nu aꞌɨ́j jitze tyíꞌcaꞌnyej ɨ tɨ jɨn taxɨeꞌveꞌ!

⁹Nyaj Dios, aꞌnáj tɨnaꞌaj nu tyimuaatatyójtziꞌreꞌej aꞌɨ́jcɨ jɨmeꞌ jeꞌej paj tyiꞌtɨ́j huáruuj;

muéetzij nu jimi tyiꞌijchóꞌveꞌej huaꞌ jamuán ɨ maj tyámuaꞌ een aꞌ jimi,

jiꞌnye muáaj paj néijmiꞌi jɨn tyámuaꞌ een.

Tyiꞌtɨ́j tɨ jɨn jeꞌej puaꞌaj huarɨ́j ɨ tyévij

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj, mej mij jaatáchuiicaj tɨꞌɨjta sɨ́ɨj tyíꞌcuiꞌij. Jeꞌej tɨ tyihuoꞌmuáꞌtyej aꞌɨ́jna ɨ David

¹Aꞌɨ́ɨmaj ɨ maj quee maꞌumuámuaꞌreꞌ aꞌyaa mu tyíꞌmuaꞌtzej tɨquee ɨ Dios maꞌ jáꞌsejreꞌ

néijmiꞌi mu meríj jeꞌej puaꞌaj tyityoꞌcájrupij,

néijmiꞌi mu meríj tyiꞌtɨ́j jɨn jeꞌej puaꞌaj huarɨ́j,

¡capu sɨ́ɨj séejreꞌ tɨ tyámuaꞌ tyiꞌtyúuchaꞌɨɨj!

²Tajapuá ɨmuáj, aꞌɨ́ɨ pu ɨ Dios huaꞌsej aꞌɨ́ɨjma ɨ tyeɨ́tyee

tɨꞌij huoꞌséj tɨpuaꞌaj sɨ́ɨj séjreꞌej tɨ tyojóꞌitej,

aꞌtɨ́j tɨ ɨ Dios huoocaj.

³Majta néijmiꞌi mu meríj yaa pujmuaꞌ huárupij,

néijmiꞌi mu juxaꞌaj tyiꞌtɨ́j jɨn meríj jeꞌej puaꞌaj huarɨ́j.

¡Capu cheꞌ sɨ́ɨj séejreꞌ tɨ tyámuaꞌ tyiꞌtyúuchaꞌɨɨcaj!

¡Capu naꞌaj sɨ́ɨj maꞌ jáꞌsejreꞌ!

⁴Camu tyojóꞌitej aꞌɨ́ɨmaj ɨ maj jeꞌej puaꞌaj tyityetyúuchaꞌɨj,

aꞌɨ́ɨmaj mu huaꞌcɨꞌɨn ɨ nyetyeɨ́ɨtyeristyamuaꞌ tɨꞌɨj aꞌtɨ́j tɨ páan huácuaꞌnyij,

aꞌɨ́ɨmaj ɨ maj quee jahuoo ɨ Dios jimi.

⁵Tyij ajta quee mejeꞌtyiꞌtɨɨtan mej mij aꞌɨ́ɨmaj juvivej,

aꞌɨ́ɨ mu juviváaj muáꞌjuꞌun aꞌɨ́jcɨ jɨmeꞌ ɨ maj tyíꞌtzɨɨnyeꞌ,

jiꞌnye Dios pu tyojoꞌcuíxɨꞌɨj ɨ tyihuáꞌcarij aꞌɨ́ɨjma ɨ maj jájchaꞌɨɨreꞌ.

Aꞌɨ́ɨ mu tyéviꞌsiꞌ huataséjreꞌej, jiꞌnye Dios pu mahuóohuaꞌxɨj.

⁶¡Aꞌtzúj cuj aꞌájna a tɨ aꞌyan tyajaꞌrájtyapuaj tɨjɨn Sión

aꞌáa jeꞌréꞌnyej ɨ tɨ huaꞌ japua huatányuusij ɨ maj Israel jitze ajtyámaꞌcan!

Tɨꞌɨj ɨ Dios ajtáhuaꞌaj tyámuaꞌ tyihuoꞌtyátoonyij ɨ jutyéɨtyeristyamuaꞌ,

aꞌɨ́ɨmaj mu huatóotyamuaꞌveꞌsij ɨ Jacob maj jitze eerámaꞌcan,

majta néijmiꞌi ɨ maj Israel jitze ajtyámaꞌcan.

Jeꞌej maj tyityeetyényuunyij mej mij jaatáhuoonyij tɨꞌɨj ɨ Dios huoꞌtyáhuɨɨreꞌen

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj, aꞌɨ́jcɨ jitze ɨ maj jitzán tyíꞌcuiꞌnacaa tɨ tyeꞌejvivin. Jeꞌej tɨ tyihuoꞌmuáꞌtyej aꞌɨ́jna ɨ David, matɨꞌɨj aꞌɨ́ɨmaj ɨ maj Zif jaꞌchej ujóꞌjuꞌ mej mij ɨ Saúl aꞌyan tyuꞌtéꞌexaatyeꞌen tɨjɨn: “¿Nyiquee tatzájtaꞌ huatyóoꞌavaatacaꞌ aꞌɨ́jna ɨ David?”

¹¡Pataꞌaj nyajapuáj huatányuunyij, nyaj Dios, aꞌɨ́jcɨ jɨmeꞌ ɨ paj jɨn ántyapuaj!

¡Pataꞌaj nyajapuáj huatányuunyij aꞌɨ́jcɨ jɨmeꞌ ɨ paj néijmiꞌi jɨn putyíꞌuurej!

²Huánamuaj, nyaj Dios, jeꞌej nyaj muéetzij jimi tyiꞌtyényuusij;

tyámuaꞌ paj tyáanamuaj ɨ nyenyúucaa,

³jiꞌnye tyeɨ́tyee maj óotzaahuatyeꞌ majta ɨ maj jeꞌej puaꞌaj tyúꞌriacaa

aꞌɨ́ɨ mu nyéjchaꞌɨɨreꞌ majta jaxɨeꞌveꞌ maj naajéꞌcaj.

¡Capu ɨ Dios aꞌɨ́ɨjma jimi séejreꞌ!

⁴Ajta aꞌyájna, Dios pu nyahuɨɨreꞌ,

Tavástaraꞌ pu naatáꞌsij nyej nyij júurij huatyáꞌɨtzeereꞌen.

^5-6Aꞌɨ́ɨ pu aꞌyan jaꞌuurej tɨ aꞌɨ́jna ɨ maj jɨn jeꞌej puaꞌaj rɨcɨj ɨ maj nyéjchaꞌɨɨreꞌ

aꞌɨ́ɨ pu aꞌɨ́ɨjma tánaꞌaj jimi huatyáꞌɨtzeereꞌej.

¡Pataꞌaj huaꞌantyipuáꞌrityeꞌen, Tavástaraꞌ, jiꞌnye muáaj paj quee tyiꞌtɨ́j jɨn áꞌɨtzeereꞌ!

Nyáaj nu nyaxɨeꞌviꞌraꞌ jɨn tyimuaatámuꞌvejrityeꞌej

nyajta tyimuaatatyójtziꞌreꞌej, jiꞌnye muáaj paj tyámuaꞌ een,

⁷jiꞌnye néijmiꞌi paj jɨn nyajapuáj huatanyúj nyatɨꞌɨj quee cheꞌ jeꞌej jájtyoovaꞌaj

nyajta huoꞌséj maj huamuéꞌtɨchej ɨ maj nyéjchaꞌɨɨreꞌ.

Jeꞌej tɨ tyuꞌtyéenyuj aꞌɨ́jna ɨ maj jaatamuárij

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj, aꞌɨ́jcɨ jitze ɨ maj jitzán tyíꞌcuiꞌnacaa tɨ tyeꞌejvivin. Jeꞌej tɨ tyihuoꞌmuáꞌtyej aꞌɨ́jna ɨ David

¹Nyaj Dios, huánamuaj jeꞌej nyaj muéetzij jimi tyiꞌtyényuusij;

capáj yóꞌhuaꞌnan jeꞌej nyaj tyíꞌmuahuaviij.

^2-3Náanamuaj, naatájee,

muéetzij nu jimi huatyényuusij nyatɨꞌɨjta quee jeꞌej jájtyooveꞌen.

Aꞌɨ́ɨ mu nyamuarityeꞌ jeꞌej maj tyíꞌxaj ɨ maj nyéjchaꞌɨɨreꞌ

ajta jeꞌej maj tyíꞌtyejijhuaj ɨ maj jeꞌej puaꞌaj rɨcɨj.

Jéehua mu jeꞌej puaꞌaj tyiꞌnyamuarɨeꞌristeꞌ,

majta nyenyoꞌsiꞌtyeꞌej jéehua menyínyuꞌcacuj.

⁴Caꞌnyíin pu huápuɨꞌɨj úꞌtzunaj ɨ nyaxɨéjnyuꞌcaa ɨ nyatzájtaꞌ,

aꞌɨ́ɨ pu nye jitze ráꞌaj ɨ tzɨ́ɨnyiꞌraꞌaj nyej nyij quee jaxɨeꞌvaꞌaj nyaj huámuɨꞌnyij.

⁵Huápuɨꞌɨj nu tyíꞌtzɨɨnyeꞌ yunyatzájtaꞌ,

nyetyényeviveesij aꞌɨ́jcɨ jɨmeꞌ nyaj tyíꞌtzɨɨnyeꞌ.

⁶Aꞌyaa nu nyij tyíꞌxaj tɨjɨn:

“Aꞌtzúj cuj nyáaj aꞌyan nyetyaꞌajtaꞌ anájmeꞌnyij tɨꞌɨj ɨ jáamuiꞌ,

aj nu nyij huataraꞌranyijcheꞌen nyej nyij huányasoꞌpeꞌen.

⁷Naaráꞌrɨeꞌsimaꞌaj nu nyij ɨmuáj jeꞌej huarutyéecheꞌen,

aꞌáa nu jaꞌhuanyechéetyeꞌnyijcheꞌen joꞌtɨj quee jáꞌtyiꞌtɨj.

⁸Aj nu nyij huatanyaꞌuunajcheꞌen tɨꞌij náahuɨɨreꞌen

aꞌɨ́jcɨ jɨmeꞌ tɨ caꞌnyíin jɨn huáꞌaacaj majta caꞌnyíin jɨn viiyej.”

⁹Huaꞌantyipuaꞌrityeꞌ, Tavástaraꞌ, huojoꞌrɨéj huáꞌnyuucaa jɨmeꞌ,

jiꞌnye aꞌɨ́j nu séj maj jucuꞌraj majta jutyaꞌxɨꞌɨj,

¹⁰tújca majta tɨ́caꞌ aꞌáa mu jaꞌtacɨꞌɨj ɨ chájtaꞌnaj jitze.

Aꞌɨ́j mu jitze séejreꞌ ɨ maj jeꞌej puaꞌaj rɨcɨj majta ɨ maj avíitzij jɨn jeꞌej puaꞌaj tyúuxaj,

jéehua mu néijmiꞌi huápuɨꞌɨj jeꞌej puaꞌaj tyityetyúuchaꞌɨj,

¹¹aꞌáa pu ɨ cáayej jitze séejreꞌ maj jucuꞌraj majta jucuanamuaj.

¹²Capu aꞌɨ́ɨn jeꞌej puaꞌaj tyinaataxájtacaꞌ ɨ tɨ nyéjchaꞌɨɨreꞌ,

tyiꞌtɨ́j nyej nyáaj aꞌyan tyéꞌviicueꞌ,

capu ajta naatanyóꞌsiꞌtyej aꞌɨ́jna ɨ tɨ nyaxanaꞌveꞌ,

nyej nyajta jimi pújoorej nyej nyij huatyényaꞌavaaj.

¹³¡Ajta muáaj paj aꞌɨ́ɨn puéꞌeen, ɨ tyaj tyámuaꞌ naa tyíꞌtamuajtyej,

pajta muáaj huápuɨꞌɨj tyámuaꞌ naa tyíꞌnyamuaꞌtyej,

¹⁴ɨ tyaj néemiꞌij aꞌáa jáꞌtasɨꞌrihuaꞌaj ɨ tyeyúujraꞌ tzajtaꞌ ɨ Dios

tyej tyij tyámuaꞌ naa tyiꞌhuátaꞌixaatyeꞌen,

tyajta tu néemiꞌij cɨɨnyacaꞌaj huaꞌ tzajtaꞌ ɨ tyeɨ́tyee!

¹⁵¡Micheꞌ jiyeꞌtzín huácuiꞌnyij ɨ maj nyéjchaꞌɨɨreꞌ!

Micheꞌ júurican avaꞌnaj,

jiꞌnye huaꞌxɨéjnyuꞌcaa tzajtaꞌ pu séejreꞌ ɨ tɨ jeꞌej puaꞌaj een.

¹⁶Nyajta nyáaj nu ɨ Dios jimi huatyényuusij,

aꞌɨ́ɨ pu ɨ Tavástaraꞌ nyajapuáj huatányuusij.

¹⁷Nyáaj nu nyenyuusteꞌen nyajta nyeyiinyen

íiyaꞌ, chúmuaꞌ nyajta tɨ́caꞌ,

aꞌɨ́ɨ puꞌij nyanamuajran.

¹⁸Nyajapuáj pu huatányuusij nyatɨꞌɨj huatyényoꞌseꞌen,

japuan pu huatányuusij ɨ nyajúuricamej,

tyij majta jéehua aráꞌaxcaj ɨ maj nyéjchaꞌɨɨreꞌ.

¹⁹Aꞌɨ́jna ɨ Dios, ɨ tɨ jusén jɨmeꞌ tyíꞌijta,

aꞌɨ́ɨ pu nyanamuajran ajta jeꞌen huoꞌtyáxaahuataj,

jiꞌnye camu aꞌɨ́ɨmaj jatapuáꞌcɨtacaa ɨ maj jɨn jeꞌej puaꞌaj tyityetyúuchaꞌɨj

camu majta jatzɨɨnyeꞌ ɨ Dios.

²⁰Aꞌɨ́ɨ mu jumuácaꞌ jɨn jeꞌej puaꞌaj huáꞌuurej ɨ juꞌ amíincustyamuaꞌ,

majta quee jaꞌráꞌastee jeꞌej maj tyityaꞌtóorasij aꞌɨ́ɨjma jimi ɨ maj huáꞌmuajtyej.

²¹Majta huápuɨꞌɨj naa huatoocuaꞌnyéej metyíꞌxaj,

ajta ɨ huaꞌmuaꞌtziiraꞌaj pu tzajtaꞌ séejreꞌ ɨ maj jɨn nyoꞌseꞌ.

Ajta ɨ huáꞌnyuucaa jéetzeꞌ pu cuaꞌtyij quee ɨ aséityij,

ajta capu aꞌyan een sulu chúun pu puéꞌeen tɨ huápuɨꞌɨj tyíꞌɨtzɨj.

²²Tavástaraꞌ paj jitze tyuꞌtyátoonyij ɨ paj jɨn jeꞌej tyáꞌmuaꞌtzej,

aꞌɨ́ɨ puꞌij tyámuaꞌ tyiꞌmuachaꞌɨ́ɨj jaꞌmej;

capu aꞌnáj tyuꞌtáꞌsij tɨꞌij eetávetyij

aꞌɨ́jna ɨ tyáatɨꞌ tɨ tzáahuatyiꞌraꞌaj jimi tyíꞌchaꞌɨj.

²³Nyaj Dios, ɨ maj tyíꞌtyacuiꞌcaa majta ɨ maj tyíꞌhueꞌtacaa camu júurij muáꞌjuꞌun

camu manaꞌaj jéꞌtaꞌ úhuiixɨꞌɨj aꞌchu maj áꞌtɨjtɨꞌrej maj júurij,

muáaj paj aꞌáa huajaꞌtyáhuaꞌxɨj joꞌmaj tyityajáꞌavaꞌtacaa,

nyajta nyáaj nu aꞌ jitze tyíꞌcaꞌnyej.

Dios jitze nu tyíꞌcaꞌnyej nyajta tyéꞌtyojtziꞌreꞌ ɨ nyúucariaꞌraꞌ

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj, aꞌɨ́jcɨ jɨmeꞌ ɨ chuíicarij tɨ aꞌyan ántyapuaj tɨjɨn: “Ɨ huaꞌ jáamuiꞌ aꞌɨ́ɨjma ɨ dioosij ɨ maj aꞌ ɨmuáj jáꞌsejreꞌ.” Ɨ nyúucarij tɨ naa huánamuajrii aꞌɨ́ɨn tɨ jariaꞌmuaꞌaj aꞌɨ́jna ɨ David, matɨꞌɨj aꞌɨ́ɨmaj ɨ filisteos jaatyéeviꞌ aꞌájna a Gat

¹Nyaj Dios, náꞌancuꞌvaxɨꞌ nyéetzij,

jiꞌnye tyeɨ́tyee mu séejreꞌ maj nyamuarityeꞌ,

aꞌnáj tɨnaꞌaj mu nyenyoꞌsiꞌtyeꞌej majta jeꞌej puaꞌaj nyoorej.

²Aꞌnáj tɨnaꞌaj mu nyamuarityeꞌ aꞌɨ́ɨmaj ɨ maj nyéjchaꞌɨɨreꞌ,

jéehua mu ɨ maj ootzáahuatyeꞌej nyenyoꞌsiꞌtyeꞌej.

³Nyatɨꞌɨjta tyíꞌtzɨɨnyeꞌej, muéetzij jimi nu tyíꞌcaꞌnyej.

⁴Dios jitze nu tyíꞌcaꞌnyej nyajta ɨ nyúucariaꞌraꞌ tyíꞌtyojtziꞌreꞌ,

Dios jitze nu tyíꞌcaꞌnyej aꞌɨ́j nu jɨn quee tyíꞌtzɨɨnyeꞌ.

¿Tyiꞌtanyí jɨn jeꞌej puaꞌaj nyaꞌuurej ɨ tyáatɨꞌ?

⁵Aꞌnáj tɨnaꞌaj mu tyíꞌnyapuejtyeꞌ aꞌɨ́jcɨ jɨmeꞌ jeꞌej maj tyíꞌnyejee,

aꞌɨ́j muꞌuj curiaꞌmuaꞌsij mej mij jeꞌej puaꞌaj náaꞌuurej.

⁶Aꞌyaa mu juꞌ avaaj majta ajcaꞌhuáye,

aꞌɨ́ɨ mu nyacújtaꞌ curiaꞌjuꞌ,

aꞌyaa mu mij tyiꞌijchóꞌveꞌ aꞌtzáaj maj naajéꞌcaj.

⁷¿Nyiquij huaꞌ huɨɨreꞌen aꞌɨ́jcɨ jimi ɨ maj jɨn jeꞌej puaꞌaj rɨcɨj?

Nyaj Dios, huoꞌtyáxaahuataj aꞌɨ́jcɨ jɨmeꞌ ɨ paj jɨn nyúꞌcamuɨꞌ aꞌɨ́ɨjma ɨ tyeɨ́tyee.

⁸Muáaj paj jamuaꞌreej aꞌchu nyaj nyeríj puaꞌmáj huatányaꞌuj,

muáaj paj jasɨɨreꞌ pajta jamuaꞌreej nyatɨꞌɨjta eetajaꞌraꞌtajyiꞌcan.

¿Caꞌ quee áꞌyuꞌsiꞌij aꞌyuꞌxaa jitze?

⁹Aꞌɨ́ɨmaj ɨ maj nyéjchaꞌɨɨreꞌ aꞌɨ́ɨ mu nye jimi huatóoꞌuunaj

nyatɨꞌɨj nyáaj muaatáhuavii paj naatáhuɨɨreꞌen.

Nyáaj nu tyámuaꞌ naa tyáꞌmuaꞌreej tɨ ɨ Dios naatyáhuɨɨreꞌej.

¹⁰Dios jitze nu tyíꞌcaꞌnyej nyajta ɨ nyúucariaꞌraꞌ tyíꞌtyojtziꞌreꞌ,

nyáaj nu Tavástaraꞌ jitze tyíꞌcaꞌnyej nyajta ɨ nyúucariaꞌraꞌ tyíꞌtyojtziꞌreꞌ,

¹¹Dios nu jitze tyíꞌcaꞌnyej aꞌɨ́j nu jɨn quee tyíꞌtzɨɨnyeꞌ.

¿Tyiꞌtanyí jɨn jeꞌej puaꞌaj nyaꞌuurej ɨ tyáatɨꞌ?

¹²Tyiꞌtɨ́j nyaj jɨn muéetzij jimi tyaꞌtányaratziiriꞌ, nyaj Dios,

aꞌyaa nu tyimuaꞌráꞌastijreꞌej nyetyiꞌchuíicaj,

¹³jiꞌnye nyajapuáj paj huatanyúj nyej nyij quee huámuɨꞌnyij,

jiꞌnye capáj tyuꞌtáꞌ nyej nyij tyiꞌtɨ́j jɨn ootyáꞌɨtzeereꞌen,

nyej nyij nyáaj aꞌáa jáꞌsejriaꞌaj joꞌtɨj jóꞌnyeeriꞌij ajta ɨ júuricamej aꞌáa jáꞌsejreꞌ,

aꞌájna joꞌtɨj ɨ Dios jáꞌsejreꞌ.

Jeꞌej tyaj tyityeetyényuunyij tɨꞌij aꞌɨ́ɨn taatyáhuɨɨreꞌen ɨ tajapuá tɨ jáꞌmaꞌcan

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj: “Capáj tyiꞌtɨ́j antyíuꞌnaꞌan.” Nyúucarij tɨ naa huánamuajrii aꞌɨ́ɨn tɨ jariaꞌmuaꞌaj aꞌɨ́jna ɨ David, tɨꞌɨj huatóoꞌuj aꞌɨ́jcɨ jimi ɨ Saúl ajta jeꞌen aꞌáa joꞌtyóoꞌavaatacaꞌaj joꞌtɨj jáꞌtyastaꞌ

¹Náꞌancuꞌvaxɨꞌ nyéetzij, nyaj Dios, náꞌancuꞌvaxɨꞌ nyéetzij,

jiꞌnye muéetzij jimi nu jahuoo pej pij naatyáhuɨɨreꞌen.

Aꞌyaa nu tyáꞌxɨeꞌveꞌ nyaj aꞌ anáj jityej huatyényaꞌavaaj,

ꞌasta naꞌaj quee néijmiꞌi mutyojoꞌmeꞌen.

²Aꞌɨ́j nu jimi huatyényuusij ɨ Dios jútyeꞌ ɨmuáj tɨ jáꞌsejreꞌ,

aꞌɨ́jcɨ jimi ɨ Dios ɨ tɨ néijmiꞌi jɨn nyahuɨɨreꞌ.

³Aꞌɨ́ɨ pu jútyeꞌ ɨmuáj uyoꞌtaꞌítyij ɨ tɨ jɨn taxɨeꞌveꞌ ajta ɨ tɨ jimi jɨꞌréꞌcan jɨmeꞌ,

aꞌɨ́ɨ puꞌij nyajapuáj huatányuusij aꞌɨ́ɨjma jimi ɨ maj huápuɨꞌɨj jeꞌej puaꞌaj nyaꞌuurej.

⁴Aꞌáa nu nyáaj chóotaꞌ joꞌriáꞌcaꞌaj,

huaꞌtzajtaꞌ ɨ muájyej tyeɨ́tyee maj cɨꞌmacaa,

huaꞌ tamej pu aꞌyan een tɨꞌɨj ɨ tyapúustiꞌ tɨ antyípityij ajta tɨꞌɨj ɨꞌrɨ́j,

ajta ɨ huaꞌ nyanuu tɨꞌɨj chúun tɨ tyíꞌɨtzɨj.

⁵Nyaj Dios, muáaj paj japuan jáꞌsejreꞌ ɨ tajapuá tɨ séejreꞌ.

Aꞌɨ́jna ɨ paj jɨn naa huaséꞌrin pu néijmiꞌqueꞌ aꞌyan séejreꞌ ɨ cháanacaj japua.

⁶Aꞌɨ́ɨmaj ɨ maj nyéjchaꞌɨɨreꞌ aꞌɨ́ɨ mu tyiꞌtɨ́j tyámuaꞌ huáruuj mej mij naatyéeviꞌ

tɨꞌij quee cheꞌ nyacaꞌnyistiꞌraj,

aꞌɨ́ɨ mu mij jaꞌtyáacuj jóꞌnyaj joꞌréꞌnyinyiij,

majta aꞌɨ́ɨmaj mu jujɨ́ɨmuaꞌaj aꞌáa jaꞌtyáavatzɨj.

⁷Ɨ nyaj xɨéjnyuꞌcaa pu néijmiꞌi jɨn óocaꞌnyej, nyaj Dios,

ɨ nyaxɨéjnyuꞌcaa pu tyámuaꞌ een tɨꞌij aꞌjimi tyuꞌtáchuiicaj.

⁸Nyajúuricamej, pataꞌaj huájɨstij,

xaatájɨsij, canárij ɨ maj jitzán tyíꞌcuiꞌnacaa,

tyámuaꞌ xu huóoꞌuurej tɨꞌɨj quee eexúj ɨ xɨcáj eeréꞌnyej.

⁹Chuíicarij nu jɨn tyimuaatatyójtziꞌreꞌej, Tavástaraꞌ,

jéꞌtaꞌ aꞌájna joꞌmaj jáꞌsejreꞌ aꞌtyéɨtyeristyamuaꞌ majta ɨ maj séej chuéj japua jáꞌmaꞌcan.

¹⁰Jiꞌnye ɨ paj jɨn taxɨeꞌveꞌ tajapuá pu ɨmuáj jaꞌráꞌasej,

ajta ɨ paj jɨn tyámuaꞌ een aꞌáa pu jaꞌráꞌasej ɨ tɨ huáꞌraa jitze tajapuá tɨ séejreꞌ.

¹¹Nyaj Dios, muáaj paj japuan jáꞌsejreꞌ ɨ tajapuá tɨ séejreꞌ.

¡Aꞌɨ́jna ɨ paj jɨn naa huaséꞌrin aꞌɨ́ɨ pu néijmiꞌqueꞌ oorióonajchi ɨ cháanacaj japua!

Jeꞌej maj tyaatáhuoonyij mej mij tyámuaꞌ naa tyihuoꞌxáꞌpuɨꞌɨntariꞌtzeꞌen

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Capáj tyiꞌtɨ́j antyíuꞌnaꞌan. Nyúucarij tɨ naa huánamuajrii aꞌɨ́ɨn tɨ jariaꞌmuaꞌaj ɨ David

¹Muaꞌaj, mu siaj huápuɨꞌɨj uhuácacaꞌnyeꞌej,

¿nyi jɨꞌréꞌcan jɨmeꞌ tyámuaꞌ naa néijmiꞌi setyaꞌxaꞌpuɨꞌɨntareꞌ

nyi siajta tyámuaꞌ naa tyihuáꞌxɨjtyeꞌ ɨ tyeɨ́tyee?

²Ajta aꞌyájna, aꞌyaa xu rɨcɨj jeꞌej puaꞌaj setyáꞌxɨeꞌveꞌej,

muaꞌaj xu tyiꞌtáꞌcaa mej mij junyoꞌsiꞌtyeꞌej aꞌɨ́jcɨ japua ɨ chuéj joꞌmaj joꞌcháatɨmee.

³Ɨ maj jeꞌej puaꞌaj tyityetyúuchaꞌɨj aꞌɨ́ɨ mu jeꞌej puaꞌaj huarɨ́j matɨꞌɨj móoj huaꞌjucáatzeꞌ aꞌséeriaꞌcaj ɨ junáanastyamuaꞌ,

ɨ maj tyíꞌhueꞌtacaa mu jeꞌej puaꞌaj tyityoꞌcárutyij aꞌájna matɨꞌɨj quee xu nanɨeꞌhuaj.

⁴Jéehua pu huáꞌveꞌrij huaꞌ jitze séejreꞌ aꞌyájna matɨꞌɨj ɨ cúꞌcuꞌsee;

aꞌyaa mu een tɨꞌɨj ɨ cúꞌcuꞌuj tɨ tyúꞌchaꞌvacaa

ɨ tɨ aꞌyan juꞌuurej tɨꞌɨj ɨ tɨquee iityánamuaj, ajta ityóonamuaj ɨ junaxɨéetaꞌ

⁵tɨꞌij quee jáanamuaj ɨ tɨ tyiꞌtyácuiinaj aꞌɨ́jna ɨ tɨ támuaꞌrej,

ɨ tɨ jaayíꞌtɨn tɨ huojoꞌpuaꞌrityeꞌen.

⁶Nyaj Dios, ¡antatáarajraꞌ ɨ huaꞌ tamej!

Tavástaraꞌ, ¡antatáarajraꞌ ɨ huaꞌ tamej aꞌɨ́ɨjma ɨ muajyéj!

⁷Micheꞌ aꞌhuóopuaꞌrixɨꞌɨn, tɨꞌɨj ɨ jájtyij tɨ tyixɨ́reꞌen,

micheꞌ huariaꞌhuaj, aꞌyájna tɨꞌɨj ɨ tuꞌpíj juyéj jitze tɨ tyuꞌuj,

⁸micheꞌ huatóopuaꞌrej, tɨꞌɨj ɨ xɨ́ꞌpuꞌuj aꞌɨ́jcɨ jitze ɨ juꞌɨ́ꞌriqueꞌ,

¡tɨꞌɨj ɨ páꞌrɨꞌɨj tɨ arájvej ajta quee aꞌnáj jaaséj ɨ tɨ jɨn huányeeriꞌij!,

⁹micheꞌ huatyátaanyij tɨꞌɨj ɨ tzícareꞌej matɨꞌɨj quee eexúj jamuaꞌréeriacaj,

micheꞌ caꞌnyíin jɨn hueꞌejcuuxɨj, tɨꞌɨj tuꞌpíj tɨ huáꞌraa.

¹⁰Aꞌɨ́jna ɨ tɨquee tyiꞌtɨ́j jɨn áꞌɨtzeereꞌ aꞌɨ́ɨ pu huatóotyamuaꞌveꞌsij tɨꞌɨj Dios puéjtzij aꞌɨ́jcɨ jɨmeꞌ ɨ maj jɨn jeꞌej puaꞌaj huarɨ́j;

¡aꞌáa pu joꞌréꞌnyesij joꞌtɨj joꞌxúuriajraa aꞌɨ́jna ɨ tɨ jeꞌej puaꞌaj tyiꞌtyúuchaꞌɨj!

¹¹Aj mu mij aꞌyan tyuꞌtaxájtaj tɨjɨn:

“¡Jéehua pu tyíꞌhuɨɨreꞌ nyej tyámuaꞌ tyiꞌtyínyechaꞌɨɨj!

¡Dios pu séejreꞌ ɨ tɨ huáꞌxɨjtyeꞌen ɨ maj aꞌyan huacháatɨmee ɨ cháanacaj japua!”

Tavástaraꞌ pu aꞌɨ́ɨn puéꞌeen ɨ tɨ tachaꞌɨj

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. “Capáj tyiꞌtɨ́j antyíuꞌnaꞌan.” Nyúucarij tɨ naa huánamuajrii David tɨ jariaꞌmuaꞌaj, tɨꞌɨj Saúl tyuꞌtaꞌíjtacaꞌ maj jáachaꞌɨɨn ɨ chiꞌraꞌan aꞌɨ́jcɨ ɨ David mej mij jaajéꞌcaj

¹Nyaj Dios, pataꞌaj nyaj japua huatányuunyij aꞌɨ́ɨjma jimi ɨ maj nyéjchaꞌɨɨreꞌ;

pajta naatyéchaꞌɨɨn aꞌɨ́ɨjma jimi ɨ maj jeꞌej puaꞌaj nyaꞌuurej.

²Nyajapuáj paj huatányuunyij aꞌɨ́ɨjma jimi ɨ maj jeꞌej puaꞌaj tyíꞌuurej,

nyajapuáj paj huatányuunyij aꞌɨ́ɨjma jimi ɨ maj tyíꞌtyacuiꞌcaa,

³jiꞌnye tyétyacaa mu séejreꞌ maj uhuácacaꞌnyeꞌ

majta aꞌɨ́j manaꞌaj tyichoꞌveꞌej aꞌtzáaj maj naajéꞌcaj.

Tavástaraꞌ, canu aꞌɨ́ɨn puéꞌeen ɨ tɨ quee tyihuojóꞌitej canu nyajta huányaxanaꞌcɨrej;

⁴canu tyiꞌtɨ́j jɨn jeꞌej puaꞌaj huarɨ́j,

ajta, aꞌyaa pu tyíꞌeen, aꞌɨ́ɨ mu tyámuaꞌ juꞌuurej mej mij naatyényoꞌsiꞌtyeꞌen.

¡Huájɨsij!

¡Pajta mujoꞌvéꞌmeꞌen pej pij naꞌantyinájche pajta jeꞌen naaséj!

⁵Muáaj, Tavástaraꞌ, Dios mu paj néijmiꞌi putyíꞌuurej, pajta huaꞌ Dios aꞌɨ́ɨjma ɨ maj Israel jitze ajtyámaꞌcan,

huájɨsij pajta puéjtzij huoꞌtáꞌan aꞌɨ́ɨjma ɨ maj quee tyáꞌtzaahuatyeꞌ,

capáj huaꞌcuꞌvej aꞌɨ́ɨjma ɨ maj jeꞌej puaꞌaj tyityetyúuchaꞌɨj.

⁶Tɨ́caꞌ mu ajeꞌréꞌnyinyii, aꞌyan metyiꞌtyáꞌxɨꞌɨj matɨꞌɨj ɨ tzɨꞌcɨ́ɨj,

aꞌáa mu mij jaꞌtacɨꞌɨj joꞌtɨj jaꞌchajtaꞌ.

⁷Majta ejcuéemuxaꞌaj ɨ jutyényij jitze,

aꞌyaa mu mij tyúuꞌixaatyeꞌ mej mij tyiꞌtɨ́j jeꞌej puaꞌaj huáꞌuurej aꞌyaa mu tɨjɨn:

“¡Capu maꞌ aꞌtɨ́j tɨꞌij táanamuaj!”

⁸Pajta muáaj, Tavástaraꞌ, muáaj paj huaꞌaꞌtzej aꞌɨ́ɨjma;

muáaj paj huaꞌxaahuariꞌ aꞌɨ́ɨjma ɨ maj quee tyáꞌtzaahuatyeꞌ.

⁹Muéetzij jimi nu tyámuaꞌ éenyeꞌej naꞌmej, nyaj Dios,

jiꞌnye muáaj paj aꞌɨ́ɨn puéꞌeen ɨ tɨ caꞌnyíjraꞌaj nyatáꞌcaa ajta ɨ tɨ nyechaꞌɨj.

¹⁰Aꞌɨ́jna ɨ Dios ɨ tɨ nyaxɨeꞌveꞌ aꞌɨ́ɨ pu mujoꞌvaꞌmaꞌaj taꞌmej tɨꞌij naꞌantyinájche;

aꞌɨ́ɨ pu naatáꞌsij nyej nyij huoꞌséj matɨꞌɨj huatyámueꞌtɨcheꞌen ɨ maj nyéjchaꞌɨɨreꞌ.

¹¹Capáj huaꞌcuꞌvej aꞌɨ́ɨjma,

mataꞌaj mij aꞌɨ́ɨmaj aꞌnáj tɨnaꞌaj jamuaꞌreeriaj ɨ maj nye chájtaꞌnaj puéꞌeen;

huoꞌtamuárityeꞌ aꞌɨ́jcɨ jɨmeꞌ ɨ paj néijmiꞌi jɨn putyíꞌuurej, pajta huoꞌtyáxaahuataj.

¡Tavástaraꞌ pu aꞌɨ́ɨn puéꞌeen ɨ tɨ tyámuaꞌ naa tyíꞌtachaꞌɨj!

¹²Aꞌɨ́j mu jɨn atyáꞌɨtzeꞌrii néijmiꞌi jɨmeꞌ jeꞌej maj tyíꞌxaj;

¡micheꞌ aꞌɨ́jna jɨn huavíviꞌriꞌhuaj tyiꞌtɨ́j maj jujɨ́ɨmuaꞌaj jɨn óotzaahuatyeꞌ

majta tyiꞌtɨ́j maj hueꞌtzij jɨn tyaꞌtóoratziꞌraj!

¹³¡Huaꞌantyipuaꞌrityeꞌ, huaꞌantyipuaꞌrityeꞌ aꞌɨ́jcɨ jɨmeꞌ ɨ paj jɨn nyúꞌcamuɨꞌ!

¡Micheꞌ quee cheꞌ maꞌ jáꞌsejriaꞌaj!

¡Cheꞌ huamuaꞌreerijhuaj tɨ ɨ Dios aꞌɨ́ɨn puéꞌeen ɨ tɨ Rey jɨn tyiꞌtyéjvee

aꞌɨ́jcɨ jimi ɨ Jacob ajta aꞌájna ɨmuáj joꞌtɨj ɨ chuéj jóoꞌasej!

^14-15Matɨꞌɨjta tɨ́caꞌ ajeꞌréꞌnyej aꞌyan metyiꞌtyáꞌxɨꞌɨj matɨꞌɨj ɨ tzɨꞌcɨ́ɨj,

majta jeꞌen aꞌáa jaꞌtacɨ́ꞌcaꞌan joꞌtɨj jaꞌchajtaꞌ cueꞌráj metyiꞌhuooj,

aꞌɨ́ɨ mu mij tyiꞌtyáꞌxɨꞌɨj muáꞌjuꞌun matɨꞌɨj quee jéehua ɨ cueꞌráj tyúꞌtyoonyij.

¹⁶Ajta nyéetzij jɨmeꞌ, íiyaꞌ nu muéetzij jimi tyuꞌtáchuiicaj;

caꞌnyíin nu jɨn jaataxájtaj ɨ paj jɨn taxɨeꞌveꞌ nyajta ɨ paj jɨn néijmiꞌi putyíꞌuurej.

Jiꞌnye muáaj paj aꞌɨ́ɨn puéꞌeen ɨ tɨ tyámuaꞌ tyíꞌnyechaꞌɨj,

ɨ tɨ nyahuɨɨreꞌ nyatɨꞌɨjta quee jeꞌej jájtyooveꞌen.

¹⁷Muéetzij jimi nu tyuꞌtáchuiicaj, nyaj Dios,

jiꞌnye muáaj paj aꞌɨ́ɨn puéꞌeen ɨ tɨ caꞌnyíjraꞌaj nyatáꞌcaa ajta ɨ tɨ tyámuaꞌ tyíꞌnyechaꞌɨj,

¡muáaj paj aꞌɨ́ɨn puéꞌeen ɨ Dios tɨ nyaxɨeꞌveꞌ!

Jeꞌej maj tyaatáhuoonyij tɨꞌij aꞌɨ́ɨn huoꞌtyáhuɨɨreꞌen ɨ tajapuá tɨ jáꞌmaꞌcan

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj, aꞌɨ́jcɨ jɨmeꞌ ɨ cuíinarij tɨ aꞌyan huatóomuaꞌaj tɨjɨn: “Ɨ tzuhuáa tɨ jɨn séejreꞌ jeꞌej maj tyityetyúuchaꞌɨj.” Nyúucarij tɨ naa huánamuajrii David tɨ jɨn tyihuoꞌmuáꞌtyej, tɨꞌɨj eerájraa tɨꞌij huatyényoꞌseꞌen aꞌɨ́ɨjma jimi ɨ maj aꞌyan huaꞌtamuáꞌmuaj tɨjɨn arameos aꞌáa maj jaꞌchej a Naharaim majta aꞌájna a Sobá, ajta aꞌɨ́jna ɨ Joab, tɨꞌɨj huariáꞌraa, tamuáamuataꞌ japuan huaꞌpuaj víꞌraꞌaj puaꞌmuácaa pu ɨ tyétyecaa antyimueꞌtɨj aꞌáa maj jáꞌmaꞌcan a Edom tɨꞌɨj aꞌáa joꞌtyéenyoꞌsej a tɨ aꞌyan tyajaꞌrájtyapuaj tɨjɨn Valle de la Sal

¹Aꞌɨ́jcɨ ɨ paj jɨn nyúꞌcamuɨꞌ, nyaj Dios, aꞌɨ́j paj jɨn períj matuuhuaꞌxɨj,

pajta taꞌantyipuáꞌrij;

¡taatáꞌ ijíij tyej tyij tyajtáhuaꞌaj huatyátacaꞌnyej!

²Muáaj paj tyuꞌtáꞌ tɨꞌij ɨ cháanacaj huatóocaꞌtzɨj ajta ootátziꞌtyej;

¡pataꞌaj ijíij tyámuaꞌ jáaꞌuurej joꞌtɨj joꞌtátaariacaꞌ, jiꞌnye aꞌɨ́ɨ pu huatyámuɨɨrixɨꞌsij!

³Jéehua paj huápuɨꞌɨj puéjtzij huoꞌtaꞌ ɨ maj aꞌchájtaꞌnaj jitze ajtyámaꞌcan,

aꞌɨ́j paj taatáꞌ ɨ nahuáj tɨ tyúꞌtɨmueꞌrasteꞌ.

⁴Muáaj paj tyiꞌtɨ́j huoꞌtaséjratyej aꞌɨ́ɨjma ɨ maj tzáahuatyiꞌraꞌaj aꞌjimi tyíchaꞌɨj

mej mij jáamuaꞌreej aꞌtzáaj maj huatóoꞌuunaj tɨꞌij quee ɨ ɨꞌrɨ́j tyihuoꞌpuéjtyeꞌen.

⁵¡Taatájee, pajta tajapuá huatányuunyij aꞌɨ́jcɨ jɨmeꞌ ɨ paj néijmiꞌi jɨn putyíꞌuurej!

¡Pajta huaꞌ japua huatányuunyij aꞌɨ́ɨjma ɨ paj huaꞌxɨeꞌveꞌ!

⁶Dios pu aꞌyan tyuꞌtaxájtacaꞌ aꞌájna a tɨ aꞌɨ́ɨn jáꞌsejreꞌ tɨjɨn:

“¡Nyenyetyámuaꞌvaꞌaj nu muiꞌcaquéj jariáꞌnaxɨꞌɨj ɨ chájtaꞌnaj Siquem

nyajta aꞌɨ́j néijmiꞌi huoꞌriáaꞌsij aꞌáa tɨ huatacaꞌaj a Sucot!

⁷Aꞌɨ́jna ɨ Galaad ajta ɨ Manasés aꞌɨ́ɨ mu nye jitze ajtyámaꞌcan;

Ajta ɨ Efraín pu aꞌɨ́ɨn puéꞌeen ɨ tɨ naꞌváꞌnaa ɨ nyamuꞌuj jitze,

ajta ɨ Judá pu aꞌɨ́ɨn puéꞌeen ɨ nye tyáxuꞌuj ɨ nyaj jɨn tyíꞌijta,

⁸Moab pu aꞌɨ́ɨn puéꞌeen ɨ tɨ aꞌyan tyíꞌhuɨɨreꞌ tɨꞌɨj ɨ nyaj jitzán anányamuejtyeꞌen,

nyajta ɨ nyaj caꞌquéj aꞌɨ́j nu japua jarárɨesij ɨ Edom,

¡nyajta jijhuan nyatɨꞌɨj tyuꞌtyámueꞌtɨj aꞌɨ́ɨjma jimi ɨ filisteos!”

⁹¿Aꞌtanyíj náꞌviꞌtɨn tɨꞌij aꞌáa nyojoꞌreꞌnyijtyeꞌen joꞌtɨj jáꞌsejreꞌ ɨ chájtaꞌnaj tɨ curiáꞌnamiꞌ?

¿Aꞌtanyíj náꞌviꞌtɨn aꞌájna ɨmuáj a tɨ aꞌyan tyajaꞌrájtyapuaj tɨjɨn Edom?

¹⁰Jiꞌnye muáaj, nyaj Dios, muáaj paj matuuhuaꞌxɨj,

¡capáj cheꞌ huaꞌ jamuán huaméj ɨ tyétyacaa maj tajɨ́meꞌ nyoꞌsii!

¹¹Taatáhuɨɨreꞌ aꞌɨ́jcɨ jimi ɨ tɨ tájchaꞌɨɨreꞌ,

jiꞌnye capu tyiꞌtɨ́j huɨɨreꞌ ɨ tyévij tɨ jɨn tyíꞌchaꞌɨj.

¹²Vaꞌcán tu jɨn tyuꞌtyámueꞌtɨj aꞌɨ́jcɨ jɨmeꞌ ɨ Dios tɨ jɨn taatyáhuɨɨreꞌej,

¡aꞌɨ́ɨ pu huoꞌtzíinajraꞌaj aꞌɨ́ɨjma ɨ maj tájchaꞌɨɨreꞌ!

Tyicheꞌ aꞌɨ́j jitze tyúꞌcaꞌnyej ɨ Dios tɨ jɨn taatyáhuɨɨreꞌej

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj, aꞌɨ́jcɨ jitze ɨ maj jitzán tyíꞌcuiꞌnacaa tɨ tyeꞌejvivin. David tɨ jaꞌaꞌrij

¹Nyaj Dios, huánamuajriꞌ jeꞌej nyaj tyíꞌnyeyiin aꞌɨ́jcɨ jɨmeꞌ ɨ tɨ nyacuiꞌ,

¡pajta aꞌyan huárɨnyij jeꞌej nyaj aꞌjimi tyáꞌhuoo!

²Muéetzij jimi nu huatyéenyuj aꞌájna ɨmuáj joꞌtɨj ɨ chuéj jóoꞌasej,

jiꞌnye ɨ nyaxɨéjnyuꞌcaa pu quee cheꞌ jucaꞌnyej.

Aꞌáa paj tyámuaꞌ tyinyojóꞌchaꞌɨɨn joꞌpaj muáaj jáꞌsejreꞌ,

³jiꞌnye muáaj paj aꞌɨ́ɨn puéꞌeen ɨ tɨ naatyáhuɨɨreꞌej.

¡Aꞌyaa paj een tɨꞌɨj tyiꞌtɨ́j tɨ ájtaavijhuacaꞌ tɨ ajta tyámuaꞌ tyúucaꞌnyej

muáaj pej pij nyajapuáj huatányuusij aꞌɨ́jcɨ jimi ɨ tɨ nyéjchaꞌɨɨreꞌ!

⁴Nyáaxɨeꞌveꞌ nyaj jusén jɨn aꞌáa joꞌquéej náꞌraꞌnyij joꞌpaj muáaj jaꞌchej,

tyámuaꞌ nyetyiꞌchaꞌɨɨriꞌhuaj aꞌ anáj jityej muéetzij.

⁵Muáaj, nyaj Dios, papuꞌríj jáanamuajriꞌ jeꞌej nyaj tyaꞌtányaratziiriꞌ,

pajta naatáꞌ aꞌɨ́jna ɨ tɨ nyéetzij nyacɨꞌpuaj

ɨ paj tyámuaꞌ jáaruuj aꞌɨ́ɨjma jimi ɨ maj muéetzij muaꞌtzaahuatyeꞌ.

⁶Huatáꞌ tɨꞌij áꞌtyeeviꞌin aꞌɨ́jna ɨ rey tɨ jɨn tyiꞌtyéjvee;

cheꞌ jéehua áꞌtyeeviꞌin, mueꞌtɨj nyinyiꞌraꞌaj jɨmeꞌ,

⁷ajta aꞌɨ́jna jɨn tyuꞌtaꞌíjtaj ɨ paj jɨn muáaj tyámuaꞌ tyaꞌtáꞌcaa.

Tyámuaꞌ paj tyéechaꞌɨɨn aꞌɨ́jcɨ jɨmeꞌ ɨ paj taxɨeꞌveꞌ pajta ɨ paj jɨn tyámuaꞌ een,

⁸aꞌyaa nu aꞌnáj tɨnaꞌaj muéetzij jimi tyiꞌchuíicaj naꞌmej

nyajta aꞌnáj tɨnaꞌaj arányaꞌastesij jeꞌej nyaj tyiꞌtɨ́j jɨn tyaꞌtányaratziiraj.

Aꞌɨ́ɨ puꞌuj ɨ Dios aꞌɨ́ɨn puéꞌeen ɨ tɨ taatyáhuɨɨreꞌej

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Jedutún tɨ jaꞌaꞌrij. Chuíicarij David tɨ joꞌyúꞌxacaꞌ

¹Aꞌɨ́j nuꞌuj ɨ Dios jimi jatyoovej nyej nyij huányasoꞌpeꞌen;;

aꞌɨ́j pu jimi joꞌvéꞌmej ɨ tɨ nyajapuáj huatányuusij.

²Aꞌɨ́ɨ puꞌuj naatyáhuɨɨreꞌej ajta tyámuaꞌ tyíꞌnyechaꞌɨj.

Canu tyiꞌtɨ́j jɨn ootyáꞌɨtzeereꞌej, jiꞌnye aꞌɨ́ɨ pu aꞌɨ́ɨn puéꞌeen ɨ tɨ naatyáhuɨɨreꞌej.

³¿Aꞌnáj nyij muaꞌaj siatapuáꞌcɨtaj siaj sij quee cheꞌ nyenyoꞌsiꞌtyaꞌaj

ajta ɨ siaj jaxɨeꞌveꞌ siaj jɨn náꞌxaahuataj,

cuxáa nyaj jáxuꞌuj puéꞌeenyeꞌ ɨ maj jaꞌajtaahuacaꞌ ajta arí áꞌvesij

nusu tɨꞌɨj ɨ cúraaj tɨ ajta arí tɨn huatyuꞌuunyij?

⁴Aꞌɨ́j muꞌuj curiaꞌmuaꞌsij jeꞌej maj tyinaꞌantyipuáꞌrityeꞌen,

ajta aꞌɨ́ɨn huápuɨꞌɨj naa huaꞌasej ɨ tɨ hueꞌtzij puéꞌeen.

Jutyényij mu jɨn tyámuaꞌ naa tyíꞌnyaxaj,

majta ɨ jumuaꞌtzíiraꞌaj mu jɨn jeꞌej puaꞌaj tyíꞌnyaxaj.

⁵Aꞌɨ́j nuꞌuj ɨ Dios jimi jatyoovej nyej nyij huányasoꞌpeꞌen,

jiꞌnye aꞌɨ́j pu jimi joꞌvéꞌmej ɨ nyaj jɨn tyiꞌijchóꞌveꞌej.

⁶Aꞌɨ́ɨ puꞌuj naatyáhuɨɨreꞌej ajta tyámuaꞌ tyíꞌnyechaꞌɨj.

Canu tyiꞌtɨ́j jɨn ootyáꞌɨtzeereꞌej, jiꞌnye aꞌɨ́ɨ pu aꞌɨ́ɨn puéꞌeen ɨ tɨ nyahuɨɨreꞌ.

⁷Dios pu jimi jáꞌmaꞌcan ɨ tɨ nyahuɨɨreꞌ ajta ɨ nyaj jɨn nyáaj tyámuaꞌ een;

aꞌɨ́ɨ pu aꞌɨ́ɨn puéꞌeen ɨ tɨ tyámuaꞌ tyíꞌnyechaꞌɨj ajta ɨ tɨ naatyáhuɨɨreꞌej.

⁸¡Nye chájtaꞌnaj siaj jitze ajtyámaꞌcan, aꞌnáj tɨnaꞌaj xu aꞌɨ́j jitze tyúꞌcaꞌnyej!

¡Siajta jimi huatyényuunyij tyámuaꞌ naa jitzán setyiꞌcaꞌnyéej!

¡Dios pu aꞌɨ́ɨn puéꞌeen ɨ tɨ taatyáhuɨɨreꞌej!

⁹Capu ɨ tyévij tyiꞌtɨ́j jɨn jeꞌej aꞌyaa puꞌuj tɨꞌɨj séej tɨ ucayáatɨraꞌnyij,

tɨpuaꞌaj ɨ tɨquee jeꞌej tyéejviicueꞌ nusu ɨ tɨ chíjtyaanyiꞌ puéꞌeen;

tɨpuaꞌaj néijmiꞌcaa tyiꞌtɨ́j jitze mahuaꞌcáꞌiteen

aꞌyaa puꞌuj cuxáa tɨquee tyiꞌtɨ́j aráacaj.

¹⁰Capáj aꞌɨ́j jitze tyíꞌcaꞌnyej ɨ paj jɨn jeꞌej puaꞌaj tyiꞌtyíaꞌchaꞌɨj,

¡capáj pajta aꞌɨ́j jitze tyiꞌijchóꞌveꞌej ɨ paj tyíꞌnahuaꞌ!

Ajta tɨpuaꞌaj siahuoochíjtyaanyiꞌtaj,

caxu aꞌɨ́j jitze tyíꞌcaꞌnyej ɨ túmii.

^11-12Nuꞌríj mueꞌtɨ́j aꞌyan tyáanamuajriꞌ

aꞌíjna ɨ Dios tɨ aꞌyan tyaataxájtacaꞌ tɨjɨn:

aꞌɨ́jna ɨ tɨ néijmiꞌi putyíꞌuurej ajta ɨ tɨ jɨn taxɨeꞌveꞌ aꞌɨ́ɨ pu jaꞌaꞌrij,

tɨ ajta aꞌɨ́ɨn aꞌyan tyihuáꞌnajchityeꞌen séej ajta séej

jeꞌej tɨ sɨ́ɨj tyiꞌtɨ́j jɨn huarɨ́j.

Dios pu aꞌɨ́ɨn puéꞌeen ɨ tɨ jɨn naa jaꞌasej aꞌɨ́jcɨ ɨ tyévij

Chuíicarij David tɨ joꞌyúꞌxacaꞌ, tɨꞌɨj aꞌáa joꞌtyávaacaꞌaj joꞌtɨj quee jáꞌtyiꞌtɨj aꞌáa tɨ jaꞌajtyámaꞌcan a Judá

¹¡Nyaj Dios, muáaj paj aꞌɨ́ɨn puéꞌeen ɨ nyaj Dios!

Jéehua nu muaxɨeꞌveꞌ nyámuahuoo, jiꞌnye muáaj paj aꞌɨ́ɨn puéꞌeen ɨ jájtyij tɨ nyejitzé juxɨeꞌveꞌ;

néijmiꞌi pu ɨ nye tyévij muéetzij muaxɨeꞌveꞌ,

aꞌyájna tɨꞌɨj joꞌtɨj joꞌhuáchij, joꞌtɨj jéehua ɨ jájtyij jóoxɨeꞌveꞌ.

²¡Nyámuaseejramuꞌ aꞌájna joꞌtɨj tyámuaꞌ tyejéꞌeen,

nyajta jeꞌen jaaséj ɨ paj néijmiꞌi jɨn putyíꞌuurej ajta ɨ paj jɨn naa huaséꞌrin,

³jiꞌnye ɨ paj jɨn nyaxɨeꞌveꞌ jéetzeꞌ pu tyíꞌhuɨɨreꞌ quee ɨ nyaj jɨn júurij!

Nye tyenyij nu jɨn tyimuaatatyójtziꞌreꞌej,

⁴néijmiꞌi nu ɨ nyajúuricamej jɨn tyiꞌmuatyóotziꞌreꞌej naꞌmej,

muéetzij jimi nu ajméjcaꞌtaxɨꞌɨj nyatɨꞌɨjta huatyényuunyij.

⁵Huápuɨꞌɨj pu naa naatáꞌastij,

aꞌyájna tɨꞌɨj ɨ tɨ tyíꞌcuaꞌ aꞌájna joꞌmaj naa eenyeꞌ tyajáꞌcueꞌraataj,

nye tyenyij nu jɨn tyimuaatatyójtziꞌreꞌej nyenyetyámuaꞌvaꞌaj.

⁶Tɨꞌɨjta tɨ́caꞌ, nyatɨꞌɨjta huaqueꞌtɨ́j,

muéetzij nu muaꞌtamuáꞌreꞌrii nyajta muéetzij jitze tyíꞌmuaꞌtzej,

⁷jiꞌnye muáaj paj aꞌɨ́ɨn puéꞌeen ɨ tɨ nyahuɨɨreꞌ.

¡Aꞌ anáj jityej nu nyetyamuaꞌveꞌ!

⁸Néijmiꞌi pu ɨ nyajúuricamej muéetzij jitze séejreꞌ,

pajta aꞌmuácaꞌtaꞌ jɨn quee nyatatoꞌraj.

⁹Aꞌɨ́ɨmaj ɨ maj aꞌyan tyáꞌxɨeꞌveꞌ maj naajéꞌcaj

aꞌáa mu jaꞌtyávatzɨj joꞌtɨj jaꞌtyácun majta jeꞌen antyipuaꞌrij,

¹⁰¡aꞌɨ́ɨ mu cuiꞌiihuan aꞌɨ́jcɨ jɨmeꞌ ɨ chúun

majta jeꞌen ɨ ɨ́ɨraꞌvetyee huaꞌcɨꞌmen!

¹¹Ajta aꞌɨ́jna ɨ tɨ rey jɨn tyiꞌtyéjvee aꞌɨ́ɨ pu huatóotyamuaꞌveꞌsij ɨ Dios jimi,

aꞌɨ́ɨ mu tyuꞌtáchuiicaj aꞌɨ́ɨmaj ɨ maj jimi tyaꞌtóoratziiriꞌ,

majta ɨ maj tyíꞌhueꞌtacaa aꞌɨ́ɨ mu quee cheꞌ atanyúuvaꞌaj muáꞌjuꞌun.

Jeꞌej maj tyityeetyényuunyij tɨꞌij ɨ Dios huóꞌchaꞌɨɨn

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Chuíicarij David tɨ joꞌyúꞌxacaꞌ

¹Nyaj Dios, huánamuaj jeꞌej nyaj tyíꞌnyenyuusteꞌ;

huáchaꞌɨj ɨ nyajúuricamej aꞌɨ́ɨjma jimi ɨ maj huápuɨꞌɨj nyéjchaꞌɨɨreꞌ.

²Naatyáꞌavaaj aꞌɨ́ɨjma jimi ɨ maj jeꞌej puaꞌaj tyityetyúuchaꞌɨj

ajta jeꞌej maj avíitzij tyiꞌtɨ́j jɨn rɨcɨj;

pajta nyajapuáj huatányuunyij tyiꞌtɨ́j maj jɨn tyámuaꞌ juꞌuurej ɨ maj jeꞌej puaꞌaj rɨcɨj,

³aꞌɨ́ɨ mu jacaachej ɨ junyanúu cuxáa tɨ chúun puéꞌeenyeꞌ

ajta ɨ maj jɨn tyíꞌxaj aꞌyaa pu een tɨꞌɨj ɨ ɨꞌrɨ́j tɨ tyuꞌjéꞌcaj.

⁴Aꞌáa mu ɨmuáj joꞌtyaꞌúuj joꞌmaj jóoꞌavaaj jeꞌej puaꞌaj mahuaꞌuurej aꞌɨ́ɨjma ɨ maj quee tyiꞌtɨ́j jɨn áꞌɨtzeereꞌ,

aꞌɨ́ɨ mu mij huaꞌcuꞌraj matɨꞌɨj quee putyámuamuaꞌreꞌej. Camu aꞌɨ́ɨmaj tyíꞌtzɨɨnyeꞌej.

⁵Aꞌɨ́ɨ mu jujɨ́ɨmuaꞌaj caꞌnyíjraꞌaj tóoaꞌcaa mej mij jeꞌej puaꞌaj huárɨnyij;

aꞌɨ́ɨ mu avíitzij jɨn tyámuaꞌ jaꞌuurej ɨ maj jɨn huáꞌviiviꞌ

majta aꞌyan tyíꞌmuaꞌtzej tɨ quee aꞌtɨ́j huaꞌsejran,

⁶tɨ quee aꞌtɨ́j jaatyésejra tyiꞌtɨ́j maj jɨn jeꞌej puaꞌaj rɨcɨj.

Ajta aꞌɨ́jna ɨ tɨ jaayíꞌtɨn tɨ jáamuaꞌreej

jeꞌej tɨ avíitzij jɨn tyíꞌmuaꞌtzej aꞌɨ́jna ɨ tyévij,

aꞌɨ́ɨ pu tyámuaꞌ tyeetyésejra.

⁷Dios pu tyihuáꞌpuejtyeꞌen aꞌɨ́jcɨ jɨmeꞌ ɨ tyihuaꞌ ɨꞌrɨ́j,

aꞌɨ́ɨ pu tyihuáꞌpuejtyeꞌen matɨꞌɨj puaꞌaj quee putyámuamuaꞌreꞌej,

⁸aꞌɨ́ɨ mu jujɨ́ɨmuaꞌaj puéjtzij huatóoaꞌsij aꞌɨ́jcɨ jɨmeꞌ jeꞌej maj tyíꞌxaj;

ajta aꞌtyán maj huaꞌsejran aꞌɨ́ɨ mu huoꞌtyáxaahuataj.

⁹Aj mu mij néijmiꞌi tzáahuatyiꞌraꞌaj tyichaꞌɨ́ɨj muáꞌjuꞌun ɨ Dios

majta jaataxájtaj jeꞌej tɨ tyiꞌtɨ́j jɨn rɨcɨj,

majta aꞌɨ́j jitze tyúumuaꞌtziityeꞌen jeꞌej tɨ aꞌɨ́ɨn tyiꞌtɨ́j huáruuj.

¹⁰Aꞌɨ́jna ɨ tyévij tɨ tyámuaꞌ tyiꞌtyúuchaꞌɨj aꞌɨ́ɨ pu huatóotyamuaꞌveꞌsij ɨ Tavástaraꞌ jimi

ajta aꞌɨ́j jimi jahuoonyij tɨꞌij jaatyáhuɨɨreꞌen,

majta néijmiꞌi ɨ tyeɨ́tyee maj tyámuaꞌ tyityetyúuchaꞌɨj

aꞌɨ́ɨjma pu tyámuaꞌ huataꞌeexaj.

Dios pu jimi tyéevijtɨj tyej tyuꞌtáchuiicaj

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Chuíicarij maj jɨn tyaatatyójtziꞌreꞌen ajta chuíicarij maj jɨn jaatyáanajche David tɨ tyoꞌyúꞌxacaꞌ

¹Huaꞌ Dios aꞌɨ́ɨjma ɨ maj Sión jáꞌmaꞌcan,

¡muéetzij pu jimi tyéevijtɨj tyej tyuꞌtáchuiicaj!,

¡muéetzij pu jimi aꞌyan tyúuxɨeꞌveꞌ tyaj jaꞌráꞌastej jeꞌej tyaj tyaꞌtátaratziiriꞌ,

²jiꞌnye páanamuaj jeꞌej tyaj aꞌjimi tyityeetyényuusij!

Néijmiꞌi mu aꞌjimi ajtyáxɨɨrij ɨ maj aꞌyan ɨ cháanacaj japua huacháatɨmee.

³Aꞌɨ́ɨ pu tyíꞌtaꞌijtyeꞌ ɨ tyaj jɨn jeꞌej puaꞌaj rɨcɨj,

ajta muáaj paj tyitaatúꞌuunyiꞌraj ɨ tyaj jɨn ootyáꞌɨtzee.

⁴Jutyamuaꞌveꞌej aꞌɨ́jna ɨ tyáatɨꞌ muáaj paj jaꞌantyíhuoj

pajta jaatáꞌsij tɨ aꞌáa jaꞌséeriaꞌaj jáꞌraꞌnyij véjriꞌ aꞌjimi,

aꞌújna a chiꞌtáj ɨ tyeyúuj tzajtaꞌ.

¡Tyicheꞌ aꞌɨ́jna tyaꞌancuriáan ɨ tɨ jéetzeꞌ tyiꞌjɨ́ꞌreꞌen aꞌchéj tɨ tyejéꞌsejreꞌ,

ajta ɨ tɨ jɨn tyámuaꞌ tyíꞌeen aꞌ tyeyúuj tzajtaꞌ!

⁵Dios ajta Tavástaraꞌ paj tajapuá huatányuusij,

muáaj paj tanamuaj

aꞌɨ́jcɨ jɨmeꞌ paj vaꞌcán jɨn tyámuaꞌ tajimí tyíꞌuurej;

néijmiꞌqueꞌ ɨ chuéj japua muéetzij mu jitze tyíꞌcaꞌnyej,

ajta aꞌɨ́jna ɨ jájtyij tɨ veꞌéj a tɨ ɨmuáj jáꞌsejreꞌ;

⁶muáaj paj tyámuaꞌ naa tyíꞌchaꞌɨj ɨ jɨríj

aꞌɨ́jcɨ jɨmeꞌ ɨ paj néijmiꞌi jɨn putyíꞌuurej ajta ɨ paj jɨn uhuájcaꞌnyej.

⁷Muáaj paj japuaꞌrityeꞌ aꞌɨ́jcɨ ɨ jájtyij tɨ caꞌnyíin jɨn áꞌxɨreꞌej

pajta jaatyápuaꞌrityeꞌsij tyiꞌtɨ́j maj jɨn junyoꞌsiꞌtyeꞌ ɨ chájtaꞌnaj jitze;

⁸majta aꞌɨ́ɨmaj ɨ maj aꞌ ɨmuáj joꞌcháatɨmee séej ɨ chuéj japua

aꞌɨ́ɨ mu naa tyojoꞌsej muáaj paj tyúꞌtaahuacaꞌ,

muéetzij mu jɨn tyéjijhuaj muutyámuaꞌvaꞌaj

tɨꞌɨj naꞌaj joꞌtɨj ɨ xɨcáj jéꞌejnyinyiij ajta joꞌtɨj jaꞌancáruꞌpij.

⁹Muáaj paj tyámuaꞌ naa tyéꞌchaꞌɨj ɨ cháanacaj,

petyiꞌtáꞌcaa mej mij japuan huatyéviiyej ajta jeꞌen tyúꞌcɨɨrej,

muáaj paj tyiꞌtáꞌcaa tɨ camuɨꞌyéjmeꞌnyij ɨ aꞌchíꞌij jitze

tɨꞌij aꞌɨ́jna jɨn huácɨɨrej ɨ tyeríicuj.

¡Aꞌyaa pej pij tyámuaꞌ jaꞌuurej aꞌájna joꞌmaj tyajáꞌhuastee!

¹⁰Muáaj paj jaatyáruꞌnyej ɨ chuéj maj japuan huátasaahuacaꞌ

pajta néijmiꞌqueꞌ tyámuaꞌ naa tyoꞌréꞌjeꞌyityeꞌsij,

muáaj paj jéehua ɨ víityee mujoꞌtaꞌítyij tɨꞌij quee huátoonyiꞌin ɨ chuéj japua

pajta tyámuaꞌ tyuꞌtyátoosij ɨ tɨ tyíꞌcɨɨren.

¹¹Tɨꞌɨj púnaꞌaj juꞌsíj muáaj paj néijmiꞌi tyámuaꞌ tyuꞌtyátoosij,

aꞌ jéetɨrij jitze mu jéehua huatyéviiyij;

¹²ɨxáj pu huahuaꞌraa aꞌájna joꞌtɨj quee jáꞌtyiꞌtɨj

ajta aꞌájna aꞌ ɨtzitáj néijmiꞌi pu huápuɨꞌɨj naa tyuꞌséꞌrin;

¹³jéehua mu tyíꞌtyasɨɨreꞌ aꞌájna joꞌtɨj jóꞌyacuarej,

ajta ɨ tyeríicuj jéehua pu cɨɨren joꞌmaj tyajáꞌhuastee,

¡néijmiꞌi mu tyíꞌchuiicaj majta jíihuaj aꞌɨ́jcɨ jɨmeꞌ ɨ maj jutyamuaꞌveꞌej!

Naa pu tyuꞌséꞌrin muáaj paj tyúꞌtaahuacaꞌ

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Chuíicarij maj jɨn tyaatatyójtziꞌreꞌen, chuíicarij maj jɨn jaatyáanajche

¹Setyuꞌtáchuiicaj ɨ Dios jimi xuutyámuaꞌveꞌej,

mu siaj aꞌyan huacháatɨmee néijmiꞌqueꞌ ɨ cháanacaj japua;

²setyuꞌtáchuiicaj aꞌɨ́jcɨ jitze ɨ tɨ naa huánamuajrii ɨ tɨ jɨn ántyapuaj;

chuíicarij xu jimi tyuꞌtáchuiicaj tɨ naa tyúꞌnamuajrii.

³Aꞌyaa xu tyaatéꞌexaatyeꞌen ɨ Dios tɨjɨn:

“Naa pu tyihuáꞌsejratyeꞌ muáaj paj tyúꞌtaahuacaꞌ.

Aꞌɨ́jcɨ jɨmeꞌ ɨ paj néijmiꞌi jɨn putyíꞌuurej

aꞌɨ́ɨ mu muéetzij jimi eetávitzej metyiꞌtzɨ́ɨnyeꞌej ɨ maj muájchaꞌɨɨreꞌ,

⁴néijmiꞌi mu muanajche ɨ maj aꞌyan huacháatɨmee ɨ cháanacaj japua

majta muéetzij jitze maꞌcan tyíꞌchuiicaj.”

⁵Musioꞌváꞌjuꞌ siajta jaaséj jeꞌej tɨ ɨ Dios tyíꞌmuarɨeꞌ,

jeꞌej tɨ tyámuaꞌ tyúꞌruuj aꞌɨ́jna jɨmeꞌ ɨ tɨ naa tyihuáꞌsejratyeꞌ aꞌɨ́ɨjma jimi ɨ tyeɨ́tyee,

⁶aꞌyaa pu jáaruuj ɨ jájtyij tɨꞌɨj chuéj tɨ huáchij,

majta aꞌɨ́ɨmaj ɨ tahuásimuaꞌcɨꞌɨj aꞌɨ́ɨ mu juɨꞌɨcán antacɨ́j ɨ játyaꞌnaj jitze,

tyicheꞌ huátatyamuaꞌveꞌen ɨ Dios jimi.

⁷Aꞌɨ́jcɨ jɨmeꞌ ɨ tɨ néijmiꞌi jɨn putyíꞌuurej, aꞌɨ́j pu jusén jɨn tyíꞌijta,

tyámuaꞌ pu naa tyihuáꞌsej ɨ maj séej chuéj japua joꞌcháatɨmee,

mataꞌaj mij aꞌɨ́ɨmaj ɨ maj quee tyihuojóꞌitej

tyámuaꞌ juꞌuuriaj mej mij jaatyényoꞌsiꞌtyeꞌen.

⁸¡Mu siaj séej chuéj japua joꞌcháatɨmee, tyámuaꞌ xu tyeetyátoonyij ɨ Dios,

cheꞌ huánamuajreꞌen ɨ siaj jimi tyiꞌtyéchuiicaj!

⁹Jiꞌnye aꞌɨ́ɨ pu taatáꞌ tyej tyij júurij huatyáꞌɨtzeereꞌen,

capu tyuꞌtáꞌ tyej tyij huatyámueꞌtɨcheꞌen.

¹⁰Aꞌɨ́jna ɨ taj Dios, aꞌɨ́ɨ pu taatyéesej tyej tyij tyámuaꞌ eenyeꞌ,

tyámuaꞌ pu táaruuj tɨꞌɨj aꞌɨ́jna ɨ pláataj tɨ jumuaꞌtɨj.

¹¹Muáaj paj tyuꞌtáꞌ tyej tyij huavíviꞌriꞌhuaj,

pajta jeꞌen tyijetyáacan tyitaatyéꞌijcatyej.

¹²Muáaj paj tyuꞌtáꞌ tɨ chaꞌnaꞌaj aꞌtɨ́j taatzíinajraꞌnyij,

tuꞌríj jaapuéjtzitariacaꞌ jájtyij jɨmeꞌ tyajta tɨéj jɨmeꞌ,

ajta muáaj paj períj taatáꞌ tyej tyij ucayáatɨraꞌnyij.

¹³Aꞌúu nu joꞌtyárutyij aꞌ tyeyúuj tzajtaꞌ nyajta jeꞌen yaꞌmuáatyee huatyáteeraj aꞌ jitze maꞌcan,

aꞌyaa nu nyij tyaꞌrányaꞌastesij jeꞌej nyaj muéetzij jimi tyaꞌtányaraj,

¹⁴aꞌɨ́jna ɨ nyaj muéetzij jimi tyaꞌtányaratziiriꞌ

nyatɨꞌɨj jéehua huápuɨꞌɨj japuéjtzitariacaꞌaj.

¹⁵Yaꞌmuáatyee maj puꞌtyij nu muéetzij jitze maꞌcan huatyáteeraj,

túuruꞌuj nu aꞌ jimi tyuꞌtátuiireꞌej nyajta chíutyee maj túuruꞌuj,

nyajta nu cányaꞌxɨɨ aꞌ jimi huatámuꞌvejritaj.

¹⁶¡Siataꞌaj néijmiꞌi muaꞌaj mujoꞌváꞌjuꞌun,

mu siaj tzáahuatyiꞌraꞌaj jimi tyíchaꞌɨj ɨ Dios!

¡Xáanamuajriꞌ, ɨ nyaj jamuaatéꞌexaatyeꞌsij

aꞌɨ́jcɨ jɨmeꞌ jeꞌej tɨ tyiꞌtɨ́j huáruuj nye jimi!

¹⁷Nye tyenyij nyajta ɨ nyenyanúu jɨmeꞌ

nu jaatajé nyajta tyaatatyójtziꞌrej.

¹⁸Tɨpuaꞌaj nyáaj jeꞌej puaꞌaj nyetyiꞌriaꞌmuaꞌsimeꞌen,

capu ɨ Tavástaraꞌ nyanamuáarajcheꞌen,

¹⁹¡ajta aꞌɨ́ɨ pu náanamuajriꞌ ajta aꞌyan huarɨ́j jeꞌej nyaj tyaatáhuaviiriꞌ!

²⁰¡Cheꞌ tyámuaꞌ eenyeꞌ ɨ Dios,

ɨ tɨ jáanamuajriꞌ jeꞌej nyaj jimi tyuꞌtyéenyuj

ajta quee jaatapuáꞌcɨtacaꞌ tɨ nyaxɨeꞌveꞌ!

Micheꞌ néijmiꞌi ɨ tyeɨ́tyee tyimuaatatyójtziꞌreꞌen

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj, aꞌɨ́jcɨ jitze ɨ maj jɨn tyíꞌcuiꞌnacaa tɨ tyeꞌejvivin. Chuíicarij maj jɨn tyaatatyójtziꞌreꞌen ajta chuíicarij maj jɨn jaatyáanajche

¹Cheꞌ ɨ Tavástaraꞌ táꞌancuꞌvaxɨꞌɨn ajta tyámuaꞌ tyitaatyátoonyij,

cheꞌ tyámuaꞌ tojoꞌsejra,

²mej mij néijmiꞌi ɨ maj aꞌyan huacháatɨmee ɨ cháanacaj japua

jáamuaꞌreej jeꞌej tɨ aꞌɨ́ɨn tyaꞌajxɨéꞌviꞌraꞌ ajta ɨ tɨ jɨn tajapuá huatányuusij.

³Taj Dios, micheꞌ ɨ tyeɨ́tyee maj huachéj ɨ chájtaꞌnaj jitze tyimuaatatyójtziꞌreꞌen;

¡micheꞌ néijmiꞌqueꞌ tɨꞌɨj naꞌaj tyiꞌchájtaꞌnajmee tyimuaatatyójtziꞌreꞌen!

⁴Micheꞌ jutyamuaꞌveꞌej muaajíjhuaj ɨ maj séej chuéj japua joꞌcháatɨmee,

jiꞌnye muáaj paj tyámuaꞌ naa tyíꞌijta tɨꞌɨj naꞌaj tyiꞌchájtaꞌnajmee,

¡muáaj paj tyihuáꞌijtyeꞌ néijmiꞌcaa ɨ maj aꞌyan huacháatɨmee ɨ cháanacaj japua!

⁵Taj Dios, micheꞌ ɨ tyeɨ́tyee maj huachéj ɨ chájtaꞌnaj jitze tyimuaatatyójtziꞌreꞌen,

¡micheꞌ néijmiꞌqueꞌ tɨꞌɨj naꞌaj tyiꞌchájtaꞌnajmee tyimuaatatyójtziꞌreꞌen!

⁶Puꞌríj tyúꞌcɨɨriacaꞌ ɨ chuéj japua;

¡aꞌɨ́jna ɨ taj Dios pu tyámuaꞌ tyitaatyájtoo!

⁷¡Cheꞌ ɨ Dios tyámuaꞌ tyitaatyátoonyij!

¡Micheꞌ néijmiꞌqueꞌ ɨ cháanacaj japua jaatyátzaahuatyeꞌen!

Matɨꞌɨj tyuꞌtyáamueꞌtɨj majta jeꞌen eetyáacɨj ɨ maj Israel jitze ajtyámaꞌcan

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Chuíicarij maj jɨn tyaatatyójtziꞌreꞌen ajta chuíicarij maj jɨn jaatyáanajche David tɨ tyoꞌyúꞌxacaꞌ

¹Tɨꞌɨjta ɨ Dios ájchenyij,

aꞌɨ́ɨmaj mu huatóoꞌuunaj ɨ maj jájchaꞌɨɨreꞌ;

majta ɨ maj jaxanaꞌveꞌ aꞌɨ́ɨ mu huatóoꞌuunaj joꞌtɨj jáꞌsejreꞌ;

²aꞌyaa mu tyityajaꞌhuóopuaꞌrixɨꞌɨj tɨꞌɨj ɨ cɨtzíj ɨ áacaj tzajtaꞌ,

aꞌyaa mu tyityatóotuiꞌsij tɨꞌɨj ɨ xɨ́ɨjca ɨ tɨéj jitze;

ɨ Dios jimi mu joꞌvátzɨj néijmiꞌi ɨ maj jeꞌej puaꞌaj rɨcɨj.

³Majta aꞌɨ́ɨ mu huatóotyamuaꞌveꞌsij ɨ maj tyámuaꞌ tyityetyúuchaꞌɨj,

ɨ Dios jimi mu jéehua jutyamuaꞌveꞌ,

¡majta tyítzunaxɨꞌɨj muutyámuaꞌveꞌej!

⁴Muaꞌaj xu ɨ Dios jimi tyuꞌtáchuiicaj,

setyuꞌtáchuiicaj aꞌɨ́jcɨ jitze maꞌcan ɨ tɨ jɨn ántyapuaj;

setyuꞌtatyójtziꞌreꞌ aꞌɨ́jcɨ ɨ tɨ aveꞌquéej aꞌáa jaꞌyiꞌvej ɨ jéetɨrij japua.

¡Xatóotyamuaꞌveꞌ ɨ Tavástaraꞌ jimi!

¡Xatóotyamuaꞌveꞌ joꞌtɨj aꞌɨ́ɨn jáꞌsejreꞌ!

⁵Dios, ɨ tɨ aꞌáa jáꞌsejreꞌ ɨ ju tyeyúuj tzajtaꞌ tɨ tyámuaꞌ een,

aꞌɨ́ɨ pu huaꞌ táataj ɨ maj xáꞌrɨcaanyij

ajta huaꞌ japua huatányuusij ɨ úucaa maj antyúujɨɨmuaꞌastariacaꞌ;

⁶Dios pu huoꞌtaꞌsij joꞌmaj joꞌtyeꞌen ɨ maj quee jeꞌej tyímuarimuaj,

huiꞌrátoosij ɨ maj eetyánamiꞌ ajta tyámuaꞌ tyihuoꞌtyátoosij;

majta ɨ maj quee tyihuojóꞌitej aꞌáa mu jaꞌcháaj muáꞌjuꞌun joꞌtɨj quee tyiꞌtɨ́j jáꞌcɨjcɨꞌrej.

⁷Nyaj Dios, patɨꞌɨj anaquéej huamaꞌcaꞌaj aꞌɨ́ɨjma jimi aꞌtyéɨtyeristyamuaꞌ

matɨꞌɨj ajoojuꞌcaj aꞌájna joꞌtɨj quee jáꞌtyiꞌtɨj,

⁸ɨ chuéj pu huatóocaꞌtzɨj,

majta jeꞌen jéehua huatyéviiyacaꞌ,

aꞌɨ́jna ɨ jɨríj Sinaí tɨ ántyapuaj aꞌɨ́ɨ pu huatóocaꞌtzɨj ɨ Dios jimi,

jimi ɨ huaꞌ Dios ɨ maj Israel jitze ajtyámaꞌcan.

⁹Nyaj Dios, muáaj paj tyuꞌtáꞌ mej mij jéehua huatyéviiyej,

aꞌɨ́ɨmaj aꞌtyéɨtyeristyamuaꞌ mu huácuaꞌnaxɨj, ajta muáaj paj caꞌnyíjraꞌaj huoꞌtaꞌ.

¹⁰Aꞌɨ́ɨmaj aꞌtyéɨtyeristyamuaꞌ mu aꞌáa jaꞌhuóochejtye

pajta muáaj, nyaj Dios, aꞌɨ́jcɨ jɨmeꞌ ɨ paj jɨn taxɨeꞌveꞌ,

muáaj paj tyaatáꞌ tyiꞌtɨ́j tɨ jaꞌɨtziityaꞌcaꞌaj aꞌɨ́jcɨ ɨ tɨ quee jeꞌej tyéejviicueꞌ.

¹¹Tavástaraꞌ pu nyúucarij huatyájto;

mueꞌtɨ́j mu mij ɨ úucaa jaxajtacaꞌaj:

¹²“¡Aꞌɨ́ɨmaj mu meríj huatóoꞌuj ɨ maj rey jɨn tyityetyuꞌuj majta ɨ huaꞌ xantáaruꞌustyamuaꞌ huaꞌ jamuán!”

Ajta joꞌmaj joꞌcháatɨmee, aꞌɨ́ɨmaj mu ɨ úucaa tyuꞌrióoaꞌcaa

tyiꞌtɨ́j maj tyihuáaꞌriꞌriꞌ aꞌɨ́ɨjma ɨ maj huaꞌajchaꞌɨɨreꞌ,

¹³siajta muaꞌaj aꞌáa xu joꞌtyáꞌɨtzee joꞌsiaj joꞌcháatɨmee.

¡Aꞌɨ́jna ɨ jáamuiꞌ anáj pláataj pu jɨn canámiꞌhuajmee!

¡Ajta ɨ júꞌxaꞌraꞌ ooroj jɨmeꞌ tɨ huápuɨꞌɨj jumuaꞌtɨj!

¹⁴Tɨꞌɨj aꞌɨ́jna ɨ tɨ néijmiꞌi jɨn antyúumuaꞌreej huoꞌtamuárij aꞌɨ́ɨjma ɨ maj rey jɨn tyityatatyíj,

aꞌyaa pu huaséꞌrihuaꞌaj cuxáa séerij huatyácatyii aꞌɨ́jcɨ japua ɨ jɨríj ɨ maj aꞌyan jatamuáꞌmuaj tɨjɨn Salmón.

¹⁵¡Huápuɨꞌɨj pu ajtɨ́tɨꞌɨjmee ɨ jɨríj aꞌáa tɨ joꞌquéetɨmee aꞌájna a Basán,

ajta ɨ tɨ caviꞌyetzeꞌejmee aꞌɨ́ɨ pu ajta ajtɨ́tɨꞌɨjmee!

¹⁶Muaꞌaj, mu siaj jɨríj puéꞌeen tɨ huápuɨꞌɨj ajtɨ́tɨꞌɨjmee,

¿jiꞌnye siaj sij jaꞌráasej siaaxánaꞌveꞌej

aꞌɨ́jcɨ ɨ jɨríj ɨ Dios tɨ jaaxɨeꞌveꞌ tɨꞌij aꞌáa jaꞌhuóochejtyeꞌen?

¡Aꞌɨ́jna ɨ Tavástaraꞌ aꞌɨ́ɨ pu aꞌáa jusén jɨmeꞌ jaꞌcháaj jaꞌmej!

¹⁷Dios pu jéehua huaꞌajchaꞌɨj ɨ cariáataꞌ ɨ tɨ jitzán huatyényoꞌseꞌen;

aꞌáa pu jaꞌrájraa aꞌájna a Sinaí tɨꞌij aꞌáa jaꞌráꞌastij joꞌtɨj ɨ tyeyúujraꞌ joꞌtyéjvee.

¹⁸Nyaj Dios, jútyeꞌ ɨmuáj paj tyíraa pajta huaꞌantyiviꞌtɨ́j aꞌɨ́ɨjma ɨ paj huaꞌantyimueꞌtɨj;

aꞌɨ́ɨmaj mu ɨ tyétyacaa tyimuaatapuéjve ɨ tɨ jéehua tyáꞌnajchij

Tavástaraꞌ, aꞌɨ́ɨmaj mu majta tyámuaꞌ tyimuatyájtoo ɨ maj quee tyihuojóꞌiteecaꞌaj.

¹⁹¡Cheꞌ jɨꞌréenyaꞌaj séjreꞌej ɨ Tavástaraꞌ, ɨ taj Dios ajta ɨ tɨ tajapuá huatányuusij,

ɨ tɨ aꞌnáj tɨnaꞌaj aꞌɨ́j jimi tyiꞌtyáꞌɨtzeꞌrii ɨ tyíꞌtaꞌijca!

²⁰Aꞌɨ́jna ɨ taj Dios, Dios pu puéꞌeen tɨ tajapuá huatányuusij

ajta pújoorej tɨ tajapuá huatányuunyij tyej tyij quee huácuiꞌnyij.

²¹Dios pu joꞌtátaaraxɨꞌɨj ɨ huaꞌ muꞌuj aꞌɨ́ɨjma ɨ maj jájchaꞌɨɨreꞌ,

huaꞌ muꞌuj aꞌɨ́ɨjma ɨ maj aꞌyaa manaꞌaj tyúuxanaꞌcɨreꞌ.

²²Tavástaraꞌ pu arí aꞌyan tyuꞌtaxájtacaꞌ tɨjɨn:

“Nyáaj nu muaatáꞌsij paj huariaꞌraꞌnyij aꞌájna a Basán;

nyajta nu muaatáꞌsij paj eetáraꞌnyij aꞌájna a jájritzeꞌ tɨ huápuɨꞌɨj atyáatɨꞌ,

²³pej pij anáꞌjoꞌsixɨꞌɨn muaꞌ ɨ́ɨcaj jitze

aꞌɨ́jcɨ jɨmeꞌ ɨ huaꞌ xuureꞌ ɨ maj muájchaꞌɨɨreꞌ

ajta mej mij aꞌyaꞌmuáj tzɨꞌcɨ́ɨj jaayéꞌen ɨ huaꞌ xuureꞌ.”

²⁴Taj Dios, nyaj Dios ajta nyaj Rey,

aꞌ tyeyúuj tzajtaꞌ pu séejreꞌ maj tyámuaꞌ juꞌuurej

mej mij aꞌ jitze maꞌcan tyuꞌyéꞌestej.

²⁵Aꞌɨ́ɨmaj mu anáatyij ɨ maj tyíꞌchuicacaa

majta ɨ maj tyíꞌcuiꞌnacaa huaꞌcujta mu huajuꞌ

majta jéꞌtaꞌ ɨ íimuaa

aꞌɨ́ɨ mu majta quéetzarij jitze tyúꞌcuiinaj.

²⁶¡Néijmiꞌi xu tyámuaꞌ tyeetyátoonyij ɨ Dios ɨ tɨ Tavástaraꞌ puéꞌeen!

Néijmiꞌi xu tyámuaꞌ tyeetyátoonyij mu siaj Israel jitze ajtyámaꞌcan.

²⁷Aꞌɨ́ɨjma jimi pu anaquéej huaméj ɨ Benjamín, ɨ tɨ cɨ́leen,

majta mueꞌtɨ́j ɨ maj tyíꞌijta aꞌɨ́jcɨ jimi ɨ Judá,

majta aꞌɨ́jcɨ jimi ɨ Zabulón majta ɨ Neftalí jimi.

²⁸Nyaj Dios, huataséjrataj ɨ paj jɨn néijmiꞌi putyíꞌuurej,

¡pajta tyámuaꞌ jáaꞌuurej tyiꞌtɨ́j paj jeꞌej huáruuj ityájma jimi!

²⁹Aꞌájna ɨmuáj joꞌtɨj aꞌ tyeyúuj jáꞌsejreꞌ tɨ ájtyeej, aꞌájna a Jerusalén,

joꞌmaj aꞌɨ́ɨmaj ɨ maj rey jɨn tyityetyuꞌuj tyimojoꞌtapuéjve,

³⁰aꞌáa paj jajtyáꞌxɨꞌɨn ɨ Egipto, ɨ tɨ jeꞌej puaꞌaj huaséꞌrin aꞌáa tɨ jáꞌsejreꞌ véjriꞌ ɨ játyaꞌnaj jitze,

túuruꞌuj majta visáaruꞌuj maj tyúꞌmaꞌcuj aꞌáa maj jaꞌtávee

maj aꞌɨ́jna jɨmeꞌ huaꞌxaahuaj ɨ tyeɨ́tyee aꞌɨ́jcɨ jɨmeꞌ ɨ maj jéehua tyíꞌijchaꞌɨj,

¡pataꞌaj huojoꞌcuíxɨꞌɨn ɨ tyeɨ́tyee maj jaxɨeꞌveꞌ maj huanyoꞌseꞌen!

³¹Aꞌáa mu a Egipto jaꞌrácɨɨnyij ɨ maj tyámuaꞌ tyimuaatyátoosij,

majta ɨ maj Etiopía jáꞌmaꞌcan aꞌɨ́ɨ mu ajméjcaꞌtaxɨꞌɨj ɨ Dios jimi.

³²¡Setyuꞌtáchuiicaj ɨ Dios jimi, mu siaj tyíꞌijta ɨ cháanacaj japua,

siataꞌaj tyuꞌtáchuiicaj ɨ Tavástaraꞌ jimi,

³³aꞌɨ́jna ɨ tɨ aveꞌquéej aꞌáa jaꞌyiꞌvej a tajapuá,

aꞌɨ́jna ɨ tajapuá tɨ jusén jɨmeꞌ séejreꞌ!

Xáanamuajriꞌ jeꞌej tɨ huánamuajrii ɨ tɨ jɨn tyíꞌxaj,

ɨ nyúucariaꞌraꞌ tɨ néijmiꞌi putyíꞌuurej.

³⁴Xaatyátzaahuatyeꞌ aꞌɨ́jcɨ ɨ Dios tɨ néijmiꞌi jɨn putyíꞌuurej,

aꞌɨ́jna ɨ tɨ jɨn tyíꞌijta aꞌɨ́ɨ pu néijmiꞌqueꞌ séejreꞌ aꞌájna a Israel,

ajta ɨ tɨ néijmiꞌi jɨn putyíꞌuurej aꞌáa pu jaꞌráꞌasej ɨ tajapuá tɨ séejreꞌ jitze ɨ tɨ huáꞌraa.

³⁵Huápuɨꞌɨj pu naa huaséꞌrin ɨ Dios aꞌújna ɨ ju tyeyúuj tzajtaꞌ,

aꞌɨ́jna ɨ huaꞌ Dios ɨ maj Israel jitze ajtyámaꞌcan aꞌɨ́ɨ pu huaꞌtáꞌcaa mej mij néijmiꞌi putyíꞌuurej ajta caꞌnyíjraꞌaj huaꞌtáꞌcaa ɨ jutyéɨtyeristyamuaꞌ.

¡Cheꞌ jɨꞌréenyaꞌaj séjreꞌej ɨ Dios!

Jeꞌej tɨ tyíꞌjijhuaj aꞌɨ́jna ɨ tɨ jeꞌej tyóomuaꞌtzej

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj, aꞌɨ́jcɨ jɨmeꞌ ɨ cuíinarij tɨ aꞌyan huatóomuaꞌaj tɨjɨn: “Tzuhuáa.” David tɨ jaꞌaꞌrij.

¹Pataꞌaj huatányuunyij, nyaj Dios,

jiꞌnye nuꞌríj tɨn atyámuɨꞌsij a jáataꞌ;

²nuꞌríj ajoꞌcárutyij aꞌájna joꞌtɨj vaꞌtɨ́j jaꞌajréxaj

ajta quee jeꞌej tyíɨꞌrij jóꞌnyaj jaꞌrányacaꞌnyej.

Aꞌáa nuꞌríj jaꞌráꞌaj joꞌtɨj jéetzeꞌ jaꞌtyáatɨꞌ

ajta arí tɨn nɨeꞌtarɨésij ɨ tɨ caꞌnyíin jɨn muɨꞌyej.

³Capu cheꞌ nyaɨꞌriityeꞌ nyaj caꞌnyíin jɨn huajíjhua,

jéehua puꞌríj huápuɨꞌɨj naꞌantyáacuiꞌ,

ɨ nyajɨꞌɨj nu nyajta nyeríj jɨn huácuaꞌnaxɨj

aꞌɨ́jcɨ jɨmeꞌ nyaj jéehua nyeríj áꞌtyeej nyaj tyiꞌijchóꞌveꞌ ɨ Dios jimi.

⁴Muꞌríj jéetzeꞌ huatámuiꞌriacaꞌ ɨ maj chaꞌmanaꞌaj tyiꞌtɨ́j jɨn nyaxanaꞌveꞌej

quee aꞌchu nyaj puaꞌmácan cájcɨpuaj ɨ nyamuꞌuj jitze,

muꞌríj huatámuiꞌriacaꞌ ɨ maj nyéjchaꞌɨɨreꞌ,

ɨ maj chaꞌmanaꞌaj naꞌantyipuáꞌrityaꞌmuꞌ

majta nyahuavii nyaj huoꞌtátuiireꞌen tyiꞌtɨ́j nyaj quee huanáhuaj.

⁵Nyaj Dios, muáaj paj jamuaꞌreej nyaj huápuɨꞌɨj quee tyúꞌnamuajracaꞌaj;

capu jeꞌej tyíɨꞌrij nyaj jaatyáꞌavaaj tyiꞌtɨ́j nyaj jɨn ootyáꞌɨtzee.

⁶Tavástaraꞌ, Dios mu paj néijmiꞌi putyíꞌuurej pajta néijmiꞌi jɨn antyíaꞌmuaꞌreej,

micheꞌ quee tyéviꞌsiꞌ huataséjreꞌen nyáaj nyej nyij puéꞌeenyeꞌ,

aꞌɨ́ɨmaj ɨ maj muéetzij jitze tyíꞌcaꞌnyej,

huaꞌ Dios aꞌɨ́ɨjma ɨ maj Israel jitze ajtyámaꞌcan,

micheꞌ quee jeꞌej tyityóomuaꞌajcaj nye jitze maꞌcan

aꞌɨ́ɨmaj ɨ maj jéehua muéetzij muahuoo.

⁷Aꞌ jitze maꞌcan nu nyeríj néijmiꞌi tyoꞌtáviicueꞌriꞌ ɨ maj jeꞌej puaꞌaj tyíꞌnyaxaj,

nye nyéerimij pu arí jitze séejreꞌ ɨ tɨ tyéviꞌsiꞌ huaséꞌrin,

⁸aꞌyaa nu een tɨꞌɨj ɨ tɨ seequéj huaséꞌrin majta quee nyamuaꞌtyej

aꞌɨ́ɨmaj ɨ maj nyeꞌihuáamuaꞌ puéꞌeen.

⁹Jéehua nu huápuɨꞌɨj jaxɨeꞌveꞌ aꞌɨ́jcɨ aꞌ tyeyúuj,

nye jitze pu arí tyiꞌráꞌaj aꞌɨ́jna ɨ tɨ jeꞌej puaꞌaj tyíꞌeen

aꞌɨ́jcɨ jɨmeꞌ maj muéetzij jeꞌej puaꞌaj tyíꞌmuaxaj.

¹⁰Nyatɨꞌɨjta nyeyiinyej nyajta nye ítziꞌveꞌej, aꞌɨ́ɨmaj mu jeꞌej tyíꞌnyaxaj;

¹¹tɨpuaꞌaj nyényaxaamujrityaꞌaj, néijmiꞌi mu aꞌɨ́ɨmaj naatyáꞌaꞌtzij.

¹²Néijmiꞌi mu nyéetzij nyetyáxajta,

majta ɨ maj taꞌruj aꞌɨ́ɨmaj mu nyéetzij nyetyéchuiicaj.

¹³Nyajta nyáaj, Tavástaraꞌ, nyáaj nu muéetzij jimi huatyényuusij.

Nyaj Dios, ¡pataꞌaj ijíij naatáhuɨɨreꞌen!

Aꞌɨ́jcɨ jɨmeꞌ ɨ paj jéehua nyaxɨeꞌveꞌ, ¡ijíij paj naatájeevej!

Aꞌɨ́jcɨ jɨmeꞌ paj jɨn tyámuaꞌ een, ¡nyajapuáj paj huatányuunyij!

¹⁴¡Capáj tyiꞌtáꞌcareꞌen nyej nyij atyájrutyej joꞌtɨj joꞌjáxuꞌtaꞌ!

¡Nyajapuáj paj huatányuunyij aꞌɨ́ɨjma jimi ɨ maj nyaxanaꞌveꞌ

pajta aꞌájna joꞌtɨj ɨ jájtyij jaꞌtyáatɨꞌ!

¹⁵¡Capáj tyiꞌtáꞌcareꞌen tɨ nɨeꞌtárɨeenyij ɨ tɨ caꞌnyíin jɨn muɨꞌyej!

¡Capáj tyiꞌtáꞌcareꞌen tɨ ɨ jájtyij tɨ viváajmaꞌaj atyúutaꞌhuaj

anyojoꞌcárujtyeꞌen ajta jeꞌen naꞌváꞌnaj!

¹⁶Tavástaraꞌ, pataꞌaj naatájeevej;

¡muáaj paj néijmiꞌi jɨn tyámuaꞌ een pajta jéehua taxɨeꞌveꞌ!

Aꞌɨ́jcɨ jɨmeꞌ ɨ paj jéehua tyámuaꞌ tyihuojóꞌmuaꞌraj, nyejitzé paj rányeerej;

¹⁷¡capáj manúujɨpuan nyéetzij ɨ nyaj muahuɨɨreꞌ!

¡Caꞌnácan paj naatájeevej, jiꞌnye jeꞌej pu puaꞌaj tyíꞌnyaꞌuurej!

¹⁸Nyejitzé paj ajtyáxɨɨrej, pajta jeꞌen nyajapuáj huatányuunyij;

¡nyajapuáj paj huatányuunyij aꞌɨ́ɨjma jimi ɨ maj nyéjchaꞌɨɨreꞌ!

¹⁹Muáaj paj jamuaꞌreej maj jeꞌej puaꞌaj tyíꞌnyaxaj,

nyajta japuéjtzitarej aꞌɨ́jcɨ jɨmeꞌ ɨ tɨ tyúꞌtyeviꞌrasteꞌ nyajta ɨ maj jɨn náꞌxaahuaj,

muáaj paj huáꞌmuajtyej aꞌtyán maj aꞌɨ́ɨn puéꞌeen ɨ maj nyéjchaꞌɨɨreꞌ.

²⁰Puꞌríj nyatzájtaꞌ jeꞌej puaꞌaj náaruj ɨ maj jeꞌej puaꞌaj tyíꞌnyaxaj,

¡capu núꞌcaꞌnyistiꞌ nyajta quee cheꞌ nyacaꞌnyej!

Chaꞌnaꞌaj nuꞌuj jahuoo

aꞌɨ́jcɨ ɨ tɨ tyámuaꞌ tyinaatyéjeevej ajta náꞌancuꞌvaxɨꞌ.

²¹Huáꞌveꞌrij mu atyájraj ɨ nyacueꞌraj jitze,

ajta nyatɨꞌɨj huataíꞌimuj nahuáj mu naatáꞌ tɨ ántzinaj.

²²¡Cheꞌ aꞌɨ́jna ɨ huaꞌ méesaj joꞌmaj tyajáꞌcuaꞌcaa huaꞌ jamuán ɨ juꞌ amíincustyamuaꞌ

cheꞌ aꞌɨ́ɨn tyiꞌpueꞌéenyeꞌej jáꞌraꞌnyij ɨ maj jɨn huavíviꞌriꞌhuaj!

²³¡Pataꞌaj huoꞌtáꞌan mej mij aracúcuꞌnyij muáꞌraꞌnyij

ajta mej mij aꞌnáj tɨnaꞌaj juviváaj ɨ jutɨ́jchij jitze!

²⁴Huaꞌ jitze paj jarárɨeenyij ɨ paj jɨn nyúꞌcamuɨꞌ;

¡pajta aꞌɨ́jna jɨn huoꞌtyátɨeeraj ɨ paj jɨn nyúꞌcamuɨꞌ!

²⁵Cheꞌ quee cheꞌ ajaꞌtyiꞌtɨ́ɨtaj aꞌájna joꞌmaj tyojoꞌtyáꞌɨnaamuaa,

ajta quee cheꞌ aꞌtɨ́j aꞌáa jaꞌchajca joꞌmaj aꞌɨ́ɨmaj joꞌcháatɨmaꞌcaa;

²⁶jiꞌnye aꞌɨ́ɨmaj mu jamuarityeꞌ aꞌɨ́jcɨ ɨ paj muáaj puéjtzij jaatáꞌ,

majta jáꞌxaahuaj ɨ tɨ jatyácuiꞌnyij aꞌɨ́jcɨ ɨ paj muáaj tyaapuéj.

²⁷Aꞌɨ́j paj pajta huoꞌriaꞌrɨeeraj ɨ tɨ jeꞌej puaꞌaj een;

¡cheꞌ quee huoꞌcɨꞌtyij pej pij tyihuoꞌtúꞌuunyiꞌ!

²⁸¡Huoꞌrioꞌuunaj jeꞌej maj ántyaꞌruj aꞌɨ́jcɨ jitze ɨ yuꞌxarij júuricamej tɨ jitzán séejreꞌ!

¡Capáj huáꞌyuꞌxaj joꞌmaj jaꞌyuꞌsiꞌ ɨ maj quee tyiꞌtɨ́j jɨn áꞌɨtzeereꞌ!

²⁹Pajta nyéetzij, ɨ nyaj tyíꞌcuiꞌ nyajta jeꞌej tyéꞌnyamuaꞌtzej,

naꞌajriáj, nyaj Dios, pajta nyajapuáj huatányuunyij.

³⁰Nyetyatatyójtziꞌreꞌej nyetyiꞌchuíicaj ɨ Dios,

jimi nu tyuꞌtáchuiicaj nyetyaatatyójtziꞌreꞌej,

³¹Tavástaraꞌ puꞌij jéetzeꞌ tyámuaꞌ tyoꞌtóomuaꞌsij

quee tɨpuaꞌaj túuruꞌ jimi naatámuꞌvejritaj

naꞌríij visáaruꞌ tɨ avaꞌahuájmee ajta anacáarɨeꞌejmee.

³²Matɨꞌɨj aꞌíj huaséj, aꞌɨ́ɨmaj mu huatóotyamuaꞌveꞌsij ɨ maj jeꞌej tyityóomuaꞌtzej

ajta caꞌnyíjraꞌaj huataséjreꞌsij aꞌɨ́ɨjma jimi ɨ maj jahuoo ɨ Dios;

³³jiꞌnye ɨ Tavástaraꞌ pu huáꞌnamuaj aꞌɨ́ɨjma ɨ maj quee jeꞌej tyéejviicueꞌ

ajta quee huaꞌxanaꞌveꞌ aꞌɨ́ɨjma ɨ maj eetyánamiꞌ ɨ maj jitzán ajtyámaꞌcan.

³⁴¡Setyuꞌtatyójtziꞌreꞌ ɨ Tavástaraꞌ tajapuá tɨ séejreꞌ, ɨ cháanacaj ajta ɨ jájrij,

majta néijmiꞌi aꞌɨ́j maj jitze tyíꞌtyesejreꞌ!

^35-36Jiꞌnye Dios pu aꞌɨ́j japua huatányuusij ɨ Sión

ajta tyámuaꞌ jaꞌuurej ɨ chájtaꞌnaj aꞌáa tɨ tyejeꞌejtyámaꞌcan a Judá.

Huaꞌyojmuaꞌ ɨ maj tyíꞌhuɨɨreꞌ aꞌɨ́ɨjma pu aꞌrij jaꞌmej ɨ chájtaꞌnaj Sión tɨ ántyapuaj,

aꞌáa mu mij jaꞌcháaj muáꞌjuꞌun majta néijmiꞌi tyuꞌtyóoaꞌrityeꞌsij,

aꞌɨ́ɨmaj ɨ maj jaxɨeꞌveꞌ ɨ tɨ jɨn ántyapuaj aꞌɨ́ɨ mu aꞌáa joꞌcháatɨmaꞌaj muáꞌjuꞌun.

Caꞌnácan paj mujoꞌvéꞌmeꞌen pej pij naatáhuɨɨreꞌen

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. David tɨ jaꞌaꞌrij, mej mij aꞌɨ́jna jɨn uhuóomuaꞌtzɨj

¹Nyaj Dios, ¡pataꞌaj mujoꞌvéꞌmeꞌen pej pij nyajapuáj huatányuunyij!

Tavástaraꞌ, ¡caꞌnácan paj mujoꞌvéꞌmeꞌen pej pij naatáhuɨɨreꞌen!

²¡Micheꞌ huápuɨꞌɨj tyéviꞌsiꞌ huataséjreꞌen

aꞌɨ́ɨmaj ɨ maj aꞌyan tyáꞌhuoo mej mij naajéꞌcaj!

¡Micheꞌ tyéviꞌsiꞌ huaséꞌrihuaꞌaj muatóoꞌuunaj

aꞌɨ́ɨmaj ɨ maj jaxɨeꞌveꞌ mej mij tyinaapuéjtyeꞌen!

³¡Micheꞌ jutyéviꞌraꞌaj muatóoꞌuunaj

aꞌɨ́ɨmaj ɨ maj nyéetzij náꞌxaahuaj!

⁴Ajta micheꞌ néijmiꞌi ɨ maj muahuoo

jéehua huatóotyamuaꞌveꞌen,

ajta ɨ maj jaxɨeꞌveꞌ paj huaꞌ japua huatányuunyij

micheꞌ jusén jɨmeꞌ aꞌyan tyíꞌxajtaj tɨjɨn: “¡Dios pu vaꞌcán jɨn antyúumuaꞌreej!”

⁵Ajta nyaj jɨmeꞌ, nyaj quee jeꞌej tyéejviicueꞌ nyajta jeꞌej tyéꞌnyamuaꞌtzej,

nyaj Dios, ¡caꞌnácan paj mujoꞌvéꞌmeꞌen pej pij naatáhuɨɨreꞌen!

Muáaj paj aꞌɨ́ɨn puéꞌeen ɨ tɨ naatáhuɨɨreꞌsij ajta nyajapuáj huatányuusij;

¡capáj muꞌ jáꞌtyeeviꞌin, Tavástaraꞌ!

Jeꞌej tɨ tyuꞌtyéenyuj aꞌɨ́jna ɨ aꞌtɨ́j tɨ arí vástɨꞌ

¹Tavástaraꞌ, muéetzij jimi nu jahuoo pej pij naatyáhuɨɨreꞌen;

¡capáj aꞌnáj tyiꞌtáꞌcareꞌen nyej nyij aꞌ jimi jeꞌej puaꞌaj tyoꞌtányamuaꞌtyij!

²¡Pataꞌaj nyajapuáj huatányuunyij, pajta jeꞌen tyámuaꞌ tyinaatyéchaꞌɨɨn,

jiꞌnye muáaj paj néijmiꞌi jɨn tyámuaꞌ een!

Aꞌtzúj cuiꞌ náanamuaj, pajta nyajapuáj huatányuunyij.

³Muáaj paj aꞌɨ́ɨn puéꞌeenyeꞌ ɨ nyaj jitzán arányacaꞌnyej,

¡muáaj paj aꞌɨ́ɨn puéꞌeenyeꞌ ɨ tɨ jitzán ɨꞌríj tɨꞌij náahuɨɨreꞌen pajta ɨ tɨ nyajapuáj huatányuunyij!

¡Muáaj paj aꞌɨ́ɨn puéꞌeen ɨ nyaj jitzán arányacaꞌnyej ajta tɨꞌij náahuɨɨreꞌen!

⁴Nyaj Dios,

nyajapuáj paj huatányuunyij aꞌɨ́jcɨ jimi ɨ tɨ jeꞌej puaꞌaj tyiꞌtyúuchaꞌɨj,

aꞌɨ́jcɨ jimi ɨ tɨ tyíꞌtyacuiꞌcaa pajta ɨ tɨ jaꞌráanajchi tɨ huanyoꞌseꞌen,

⁵jiꞌnye muáaj, Tavástaraꞌ, nyatɨꞌɨj nyanaꞌaj tyíꞌtyamuestacaꞌaj

muáaj paj aꞌɨ́ɨn puéꞌeen ɨ nyaj jitzán tyiꞌijchóꞌveꞌ pajta tyámuaꞌ tyíꞌnyechaꞌɨj.

⁶Nyóocheꞌ nu nyáaj aꞌáa jaꞌséeriaꞌcaj ɨ jucáaraꞌ jitze ɨ náanaj,

nyajta nyeríj muéetzij jitze arányacaꞌnyajcaꞌaj.

¡Muáaj paj tyuꞌtáꞌ nyej nyij huanɨeꞌhuaj!

¡Nyáaj nu aꞌnáj tɨnaꞌaj tyiꞌmuatyóotziꞌreꞌej naꞌmej!

⁷Mueꞌtɨ́j mu meríj nyéetzij tyámuaꞌ nyojoꞌsej,

ajta muáaj paj aꞌɨ́ɨn puéꞌeen ɨ tɨ nyahuɨɨreꞌ.

⁸Aꞌnáj tɨnaꞌaj pu ɨ nye tyenyij jitze séejreꞌ

nyej nyij aꞌɨ́j huatáchuiicaj ɨ paj jɨn naa huaséꞌrin,

⁹capáj nyaxanaꞌvaꞌaj tɨpuaꞌaj nyeríj vastacɨrɨeꞌej,

capáj manúujɨpuan tɨpuaꞌaj nye quee cheꞌ nyacaꞌnyej.

¹⁰Aꞌɨ́ɨmaj ɨ maj nyéjchaꞌɨɨreꞌ, ɨ maj jaxɨeꞌveꞌ maj naajéꞌcaj,

aꞌɨ́ɨmaj mu meríj antyóosɨɨj majta tyámuaꞌ juꞌuurej mej mij jeꞌej náaꞌuurej.

¹¹Aꞌyaa mu tyíꞌxaj tɨjɨn: “¡Siataꞌaj jaataváj siajta jeꞌen jaatyéeviꞌ,

jiꞌnye Dios pu arí majúurɨej

capu ij aꞌtɨ́j japuan huatányuusij!”

¹²Capáj nye jimi ajtáyiꞌcan, nyaj Dios;

¡caꞌnácan paj mujoꞌvéꞌmeꞌen pej pij naatáhuɨɨreꞌen!

¹³¡Micheꞌ tyéviꞌsiꞌ huataséjreꞌen majta jeꞌej huaꞌantyipuáꞌrityeꞌen

aꞌɨ́ɨmaj ɨ maj nyéetzij nyéjchaꞌɨɨreꞌ!

¡Micheꞌ huápuɨꞌɨj huatóotyeviꞌraꞌastaj

ɨ maj aꞌyan tyáꞌxɨeꞌveꞌ tɨꞌij nyéetzij jeꞌej puaꞌaj tyíꞌnyaꞌuurej!

¹⁴Ajta nyáaj nu aꞌnáj tɨnaꞌaj aꞌjimi tyiꞌijchóꞌveꞌej naꞌmej,

nyajta jéetzeꞌ nyajtáhuaꞌaj jéetzeꞌ nu tyimuaatatyójtziꞌreꞌej,

¹⁵aꞌnáj tɨnaꞌaj nu muéetzij muaxáataj naꞌmej ɨ nye tyenyij jɨmeꞌ

paj muáaj tajapuá huatanyúj pajta néijmiꞌi jɨn tyámuaꞌ tyitoꞌxáꞌpuɨꞌɨntariꞌtzej.

¡Aꞌíi pu aꞌɨ́ɨ puéꞌeen ɨ tɨ quee nyaɨꞌriityeꞌ nyej nyij yoꞌitéej náꞌraꞌnyij!

¹⁶Nyaataxájta jeꞌej paj muáaj tyiꞌtɨ́j vaꞌcán jɨn tyíꞌmuarɨeꞌ, Tavástaraꞌ.

¡Nyáaj nu jaataxájtaj paj muáaj panaꞌaj aꞌɨ́ɨn puéꞌeen ɨ tɨ quee tyiꞌtɨ́j jɨn áꞌɨtzeereꞌ!

¹⁷Nyaj Dios,

muáaj paj néijmiꞌi tyinaamuáꞌtyej nyatɨꞌɨj nyanaꞌaj tyuꞌcɨ́leenyiꞌtariacaꞌ,

ajta nyóocheꞌ nu jaxáataj naꞌmej ɨ paj vaꞌcán jɨn tyíꞌmuarɨeꞌ.

¹⁸Nyaj Dios, capáj manúujɨpuan

tyij nyajta nyeríj nyáaj vastacɨrɨeꞌej nyajta avaꞌcueenaviꞌij,

jiꞌnye nyóocheꞌ nu huaꞌixáatyaꞌaj naꞌmej paj muáaj néijmiꞌi putyíꞌuurej

aꞌɨ́ɨjma ijíij maj huátyeɨtyee ajta majcaꞌhuáyee maj huataséjreꞌsij.

¹⁹Aꞌɨ́jna ɨ paj jɨn tyáꞌxaꞌpuɨꞌɨntareꞌ, nyaj Dios, tajapuá pu ɨmuáj jaꞌráꞌasej,

muáaj paj vaꞌcán jɨn tyíꞌmuarɨeꞌ,

¡capu sɨ́ɨj ajtáhuaꞌaj séejreꞌ tɨ aꞌyan een patɨꞌɨj muáaj!

²⁰Tyij pajta períj naatáꞌ nyej nyij jaaséj

ɨ tɨ jéehua jeꞌej puaꞌaj tyíꞌrɨcɨj ajta jéehua ɨ xaamújriraꞌaj,

pajtáhuaꞌaj paj naatáꞌsij nyej nyij júurij náꞌraꞌnyij,

pajtáhuaꞌaj paj naꞌajriásij tyétyeꞌ ɨmuáj ɨ chuéj tzajtaꞌ,

²¹vaꞌcán paj jɨn tyámuaꞌ tyinaatyátoosij

pajta jeꞌen tyámuaꞌ tyinaatyéjeevij.

²²Nyajta nyáaj, nyaj jɨmeꞌ,

nyetyuꞌtáchuiicaj nyajta tyimuaatatyójtziꞌreꞌej aꞌɨ́jcɨ jɨmeꞌ ɨ paj tyámuaꞌ een

aꞌɨ́jcɨ jitze ɨ áarpaj nyajta ɨ canárij jitze,

nyaj Dios, muáaj paj tyámuaꞌ een aꞌɨ́ɨjma jimi ɨ maj Israel jitze ajtyámaꞌcan.

²³Nye tyenyij pu huatóotyamuaꞌveꞌsij tɨꞌɨj muéetzij muaatáchuiicaj,

aꞌyájna tɨꞌɨj ajta néijmiꞌi ɨ nye tyévij, ɨ paj muáaj japuan huatanyúj.

²⁴Aꞌyaa puꞌuj tánaꞌaj ɨ nyenyanúu tyiꞌxáataj jaꞌmej aꞌnáj tɨnaꞌaj

paj muáaj jɨꞌréenyeꞌej séejreꞌ,

jiꞌnye aꞌɨ́ɨmaj ɨ maj jaxɨeꞌvaꞌcaꞌaj tɨꞌij nye jimi jeꞌej puaꞌaj tyáꞌraꞌnyij

aꞌɨ́ɨjma pu arí aꞌɨ́ɨn huaꞌcáanaj ɨ tɨ tyéviꞌsiꞌ huaséꞌrin.

Jeꞌej maj tyityeetyényuunyij aꞌɨ́jcɨ jɨmeꞌ ɨ rey

Salomón tɨ jaꞌaꞌrij.

¹Pataꞌaj jaatáꞌan, nyaj Dios, aꞌɨ́jcɨ ɨ rey,

aꞌɨ́jcɨ ɨ paj muáaj jɨn tyáꞌxaꞌpuɨꞌɨntareꞌ pajta ɨ paj jɨn tyámuaꞌ een,

²taꞌaj ij aꞌɨ́jcɨ jɨmeꞌ ɨ paj jɨn tyámuaꞌ een ajta ɨ paj jɨn tyáꞌxaꞌpuɨꞌɨntareꞌ

aꞌɨ́jcɨ jɨn tyuꞌtaꞌíjtaj aꞌájna a chájtaꞌnaj jitze ajta aꞌɨ́ɨjma jimi ɨ maj a jimi quee jeꞌej tyéejviicueꞌ.

³Cheꞌ ɨ jɨríj jitze huataséjreꞌen ajta ɨ tɨ caviꞌyetzeꞌejmee jitze

ɨ tɨ tyámuaꞌ tyíꞌeen ajta ɨ maj tyámuaꞌ tyíꞌtyesejreꞌej aꞌ chájtaꞌ.

⁴¡Cheꞌ aꞌɨ́jna ɨ rey tyámuaꞌ tyihuoꞌxáꞌpuɨꞌɨntariꞌtzeꞌen aꞌɨ́ɨjma ɨ maj quee jeꞌej tyéejviicueꞌ!

¡Cheꞌ huaꞌ japua huatányuunyij huaꞌ yojmuaꞌ ɨ maj jajpuéjtzij

ajta huoꞌtzíinajraꞌnyij aꞌɨ́ɨjma ɨ maj jeꞌej puaꞌaj huáꞌuurej!

⁵¡Cheꞌ ɨ rey aꞌnáj tɨnaꞌaj muéetzij jimi tzáahuatyiꞌraꞌaj tyíchaꞌɨɨj,

tɨꞌɨj ooj ɨ xɨcáj ajta ɨ máxcɨrɨeꞌ séjreꞌej!

⁶¡Cheꞌ aꞌyan eenyeꞌ matɨꞌɨj ɨ víityee ajta ɨ japúutzarij

maj tyíꞌipuaj ɨ chuéj japua majta ɨ ɨxáj!

⁷¡Cheꞌ jéehua séjreꞌej ɨ tɨ tyámuaꞌ een ajta ɨ tɨ huatóojeꞌyej

aꞌɨ́jcɨ xɨcáaraꞌ jitze tɨꞌɨj aꞌɨ́ɨn tyuꞌtaꞌíjtaj,

ꞌasta naꞌaj quee cheꞌ máꞌhuaꞌtan ɨ máxcɨrɨeꞌ!

⁸¡Cheꞌ néijmiꞌqueꞌ tyuꞌtaꞌíjtaj tɨꞌɨj naꞌaj joꞌtɨj sɨ́ɨj ɨ jájrij jaꞌváꞌasej ajtáhuaꞌaj ɨ sɨ́ɨj,

tɨꞌɨj naꞌaj aꞌájna ɨ játyaꞌnaj jitze Éufrates ꞌasta joꞌtɨj ɨ chuéj jóoꞌasej!

⁹¡Micheꞌ ɨ maj jájchaꞌɨɨreꞌ, ɨ maj aꞌáa joꞌcháatɨmee joꞌtɨj quee jáꞌtyiꞌtɨj,

micheꞌ aꞌɨ́ɨmaj jimi huatóotonyij!

¹⁰¡Micheꞌ tyiꞌtɨ́j tyaatapuéjveꞌen majta jaatyátzaahuatyeꞌen

ɨ maj rey jɨn tyityetyuꞌuj aꞌájna a Tarsis majta joꞌtɨj jaꞌrahuáchijmee ɨ jájritzeꞌ,

ɨ maj rey jɨn tyityetyuꞌuj aꞌájna a Sabá majta a Sebá!

¹¹¡Micheꞌ néijmiꞌi ɨ maj rey jɨn tyityetyuꞌuj jimi tyítunutaxɨꞌɨn!

¡Majta néijmiꞌi jaatyáhuɨɨreꞌen ɨ maj séej chuéj japua joꞌcháatɨmee!

¹²Jiꞌnye aꞌɨ́ɨ pu japuan huatányuusij jeꞌej tɨ tyáꞌhuoo aꞌɨ́jna ɨ tɨ quee jeꞌej tyéejviicueꞌ

ajta aꞌɨ́jcɨ ɨ tɨ jajpuéjtzij ɨ tɨ quee aꞌtɨ́j jahuɨɨreꞌ.

¹³Aꞌɨ́ɨ pu huaꞌancuꞌvajxɨꞌɨj aꞌɨ́ɨjma ɨ maj quee óotzaahuatyeꞌ

ajta japuan huatányuusij ɨ huáꞌjuuricamej aꞌɨ́ɨjma ɨ maj quee jeꞌej tyéejviicueꞌ.

¹⁴Huaꞌ japua pu huatányuusij ɨ tɨ jéehua tyihuáꞌtyesiꞌhuarityeꞌ ajta ɨ tɨ jeꞌej puaꞌaj tyihuáꞌuurej,

jiꞌnye ɨ huáꞌjuuricamej pu jéehua jimi juxɨeꞌveꞌ.

¹⁵¡Cheꞌ jusén jɨmeꞌ júurij ɨ rey!

¡Micheꞌ ooroj jaatáꞌan aꞌáa tɨ jáꞌmaꞌcan a Sabá!

¡Micheꞌ aꞌnáj tɨnaꞌaj jahuoocaj ɨ Dios jimi aꞌɨ́jcɨ jɨmeꞌ!

¡Cheꞌ ɨ Dios aꞌnáj tɨnaꞌaj tyámuaꞌ tyeetyátoonyij!

¹⁶¡Cheꞌ jéehua ɨ tyeríicuj huáxooviꞌin aꞌájna joꞌtɨj aꞌɨ́ɨn jáꞌmaꞌcan

ajta jeꞌen jéehua séjreꞌej ɨ tɨ caviꞌyetzeꞌejmee jitze ɨ jɨríj!

¡Cheꞌ jéehua ɨ jatzíj huataséjreꞌen aꞌyájna tɨꞌɨj aꞌájna a Líbano

ajta jeꞌen jéehua íjmueeyaꞌxɨꞌɨn tɨꞌɨj ɨ ɨxáj ɨtzitáj tɨ jáꞌsejreꞌ!

¹⁷¡Cheꞌ jusén jɨmeꞌ séjreꞌej jeꞌej tɨ ántyapuaj aꞌɨ́jna ɨ rey,

ajta jeꞌen aꞌyan áꞌtyeeviꞌin tɨꞌɨj ɨ xɨcáj áꞌtyeeren!

¡Micheꞌ néijmiꞌi ɨ maj aꞌyan huacháatɨmee ɨ cháanacaj japua

aꞌɨ́j jitze maꞌcan tyaꞌancuriáan ɨ maj jɨn tyámuaꞌ tyityeetyátuiihuaj!

¡Majta jeꞌen néijmiꞌi ɨ maj séej chuéj japua joꞌcháatɨmee jimi huatóotyamuaꞌveꞌen!

¹⁸Cheꞌ tyámuaꞌ éenyeꞌej séjreꞌej ɨ Dios, huaꞌ vástaraꞌ ajta huaꞌ Dios ɨ maj Israel jitze ajtyámaꞌcan,

ɨ tɨ aꞌɨ́ɨ naꞌaj aꞌɨ́ɨn puéꞌeen ɨ tɨ vaꞌcán jɨn tyíꞌmuarɨeꞌ;

¹⁹cheꞌ jusén jɨmeꞌ tyámuaꞌ tyíꞌsejriaꞌaj ɨ tɨ jɨn ántyapuaj ajta huápuɨꞌɨj naa huánamuajrii.

¡Cheꞌ néijmiꞌqueꞌ ɨ cháanacaj japua huataséjreꞌen ɨ tɨ jɨn naa huaséꞌrin!

¡Cheꞌ aꞌyan tyáꞌraꞌnyij!

²⁰Aꞌyaa pu antyipuáꞌriacaꞌ jeꞌej tɨ tyuꞌtyéenyuj aꞌɨ́jna ɨ David, yójraꞌ aꞌɨ́jcɨ ɨ Jesé.

Tyiꞌtɨ́j tɨ ɨ Dios tyúꞌpuejveꞌ

Chuíicarij Asaf tɨ jaꞌaꞌrij

¹¡Tyámuaꞌ pu ɨ Dios huojoꞌmuaꞌraj aꞌɨ́ɨjma ɨ maj Israel jitze ajtyámaꞌcan,

aꞌɨ́ɨjma jimi ɨ maj tyámuaꞌ een ɨ juxɨéjnyuꞌcaa tzajtaꞌ!

²Tɨpuaꞌaj jéetzeꞌ áꞌtyeeviꞌcajcheꞌ, nyáaj nu eetavetyíicheꞌen,

tɨ́muaꞌ nu antyípuɨtyacaꞌ ɨ nyaj ɨ́ɨcaj jɨmeꞌ.

³Jiꞌnye nyahuaꞌanchueerej tɨꞌɨj tyámuaꞌ tyíꞌrɨjcaa

aꞌɨ́ɨjma jimi ɨ maj óotzaahuatyeꞌ ajta aꞌɨ́ɨjma jimi ɨ maj jeꞌej puaꞌaj tyityetyúuchaꞌɨj.

⁴Capu aꞌɨ́ɨjma huaꞌ jitze juxɨeꞌveꞌ tɨpuaꞌaj muáacuiꞌnyij,

jiꞌnye camu aꞌɨ́ɨmaj tyiꞌtɨ́j jɨn tyíꞌcucuiꞌ,

⁵capu tyiꞌtɨ́j huáꞌɨtziityeꞌ tɨꞌɨj ɨ séecan ɨ tyeɨ́tyee

capu ajta tyiꞌtɨ́j jeꞌej puaꞌaj rɨcɨj aꞌɨ́ɨjma jimi tɨꞌɨj tyihuáꞌuurej ɨ séecan.

⁶Aꞌɨ́j mu jɨn aꞌɨ́j acájtɨcɨj ɨ maj jɨn óotzaahuatyeꞌ

majta aꞌɨ́j tyiꞌtyóocheꞌtyee ɨ maj jɨn junyoꞌsiꞌtyeꞌ;

⁷huápuɨꞌɨj mu juxáahuaj tyíꞌcuaꞌ aꞌɨ́j pu jɨn quee tyiꞌtɨ́j huaꞌ jitze juxɨeꞌveꞌ,

majta mu jaxɨeꞌveꞌ maj jéehua tyiꞌtɨ́j jɨn jeꞌej puaꞌaj huárɨnyij.

⁸Jeꞌej mu puaꞌaj tyiꞌxáataj, mootzáahuatyaꞌaj majta quee tyiꞌtɨ́j áꞌtyaseꞌej

aꞌɨ́ɨ mu huaꞌnyeechej mej mij jeꞌej puaꞌaj huárɨnyij majta huaꞌnyoꞌsiꞌtyeꞌ,

⁹majta jeꞌej puaꞌaj tyáꞌxaj ɨ tajapuá tɨ séejreꞌ

majta junyanúu jɨn jeꞌej puaꞌaj tyíꞌuurej ɨ cháanacaj japua.

¹⁰Aꞌɨ́j mu jɨn ɨ tyeɨ́tyee tyámuaꞌ tyihuáꞌxaj

majta quee pújoorej mej mij jáamuaꞌreej tyiꞌtɨ́j maj jɨn jeꞌej puaꞌaj rɨcɨj.

¹¹Aꞌyaa mu tyíꞌihuoꞌ tɨjɨn: “¿Nyiquij ɨ Dios jamuaꞌreeren?

¿Nyiquij jamuaꞌreeren aꞌɨ́jna ɨ tɨ jútyeꞌ ɨmuáj jáꞌsejreꞌ?”

¹²¡Siahuoꞌséj aꞌɨ́ɨjma ɨ maj jeꞌej puaꞌaj tyityetyúuchaꞌɨj!

Juxáahuaj mu naa meríj jéetzeꞌ tyityetyoochíjtyaanyiꞌtaj.

¹³¡Capu tyiꞌtɨ́j jeꞌej tyíꞌhuɨɨreꞌ nyej nyij tyámuaꞌ eenyeꞌ ɨ nyaxɨéjnyuꞌcaa tzajtaꞌ

nusu nyaj tyiꞌcányaꞌaꞌriꞌ néijmiꞌi ɨ tɨ jeꞌej puaꞌaj tyíꞌeen!

¹⁴Jiꞌnye aꞌnáj tɨnaꞌaj mu nyetyáavaꞌraj,

majta tɨꞌɨj púnaꞌaj ariáꞌpuaꞌaj puéjtzij mu nyatáꞌcaa.

¹⁵Tɨpuaꞌaj nyáaj aꞌyan nyetyuꞌmuaꞌtyiicheꞌen matɨꞌɨj aꞌɨ́ɨmaj,

jeꞌen nu puaꞌaj huaꞌuréenyijcheꞌ aꞌɨ́ɨjma aꞌyóojmuaꞌ.

¹⁶Aꞌyaa nu tyáꞌxɨeꞌvaꞌcaꞌaj nyej nyij yoꞌitéej náꞌraꞌnyiicheꞌ,

ajta canu pujáaruj jiꞌnye huápuɨꞌɨj pu naatatyésiꞌhuarityej.

¹⁷Aꞌaj nuꞌuj nyatɨꞌɨj aꞌúun joꞌtyájrupij u tyeyúujraꞌ tzajtaꞌ ɨ Dios

aj nu nyij jáamuaꞌreeriꞌ joꞌmaj aꞌɨ́ɨmaj jóohuiixɨꞌɨj,

¹⁸aꞌáa paj huojoꞌtyáhuii joꞌtɨj joꞌpuɨ́tyiꞌij

pajta aꞌáa huojóotajchi joꞌtɨj jeꞌej puaꞌaj tyejéꞌeen.

¹⁹¡Cɨ́ɨ muꞌuj mij áꞌtyeeren matɨꞌɨj mij antyipuaꞌrij!

Aꞌɨ́jna ɨ tɨ tzɨ́ɨnyiꞌreꞌ pu huaꞌantyipuaꞌrityeꞌsij.

²⁰Patɨꞌɨj muáaj, Tavástaraꞌ, ájchenyij,

aꞌyájna tɨꞌɨj sɨ́ɨj tɨ huájɨj tɨ tyácusimaꞌaj,

pahuoꞌtyáxaahuataj ɨ maj hueꞌtzij jɨn jusejrataj.

²¹Nyáaj nu huápuɨꞌɨj nyuꞌcamuɨꞌcaꞌaj

ajta ɨ nyaxɨéjnyuꞌcaa tzajtaꞌ núꞌcuiꞌcaꞌaj,

²²jiꞌnye aꞌɨ́ɨ nu puéꞌeenyeꞌej ɨ tɨ quee tyihuojóꞌitej nyajta quee tyiꞌtɨ́j huayíꞌtɨhuaꞌaj,

¡aꞌyaa nu aꞌjimi éenyeꞌej tɨ tyiꞌtɨ́j tɨ simuárun tɨ quee tyihuojóꞌitej!

²³Ajta aꞌyájna, aꞌnáj tɨnaꞌaj nu muéetzij jimi séjriaꞌcaꞌaj.

Nyamuácaꞌ paj tyivíꞌ nyamuácaꞌtaꞌ tɨ pujmuaꞌ,

²⁴tyámuaꞌ paj tyinuꞌcájuyetyej aꞌɨ́jcɨ jɨmeꞌ jeꞌej paj tyináaꞌixaaj

ajta tɨꞌɨj néijmiꞌi tyeꞌentyipuáꞌrej tyámuaꞌ paj naa tyinaataxɨéꞌveꞌej.

²⁵¿Atajnyí nyamuaꞌtyej u tajapuá?

¡Muéetzij nuꞌuj!

Tɨpuaꞌaj muéetzij jamuán anyoꞌtyávaacaj canu tyiꞌtɨ́j xɨeꞌveꞌ cháanacaj japua tɨ jáꞌmaꞌcan.

²⁶Néijmiꞌi pu ɨ nye tyéviraꞌ áꞌpuaꞌrej,

ajta ɨ Dios pu aꞌɨ́ɨn puéꞌeen ɨ nyaj jitzán séeriaꞌaj naꞌmej jusén jɨmeꞌ,

ajta tyámuaꞌ tyeꞌchaꞌɨ́ɨj jaꞌmej ɨ nyaxɨéjnyuꞌcaa.

²⁷Aꞌɨ́ɨmaj ɨ maj muéetzij jimi ajtácɨɨnyej, aꞌɨ́ɨ mu cuiꞌnyij;

jiꞌnye muáaj huaꞌantyipuaꞌrityeꞌsij aꞌɨ́ɨjma ɨ maj tɨ muéetzij jimi ajtacɨ́ꞌɨj.

²⁸Ajta nyáaj nu ajtyáxɨɨrij ɨ Dios jimi,

jiꞌnye aꞌɨ́ɨ pu nye jimi jéetzeꞌ tyámuaꞌ een.

Muáaj, Tavástaraꞌ nyaj Dios, aꞌɨ́ɨ paj puéꞌeen ɨ tɨ naatyáhuɨɨreꞌej,

nyáaj nu nyij néijmiꞌi huataxájta tyiꞌtɨ́j paj jeꞌej huáruuj.

Jeꞌej tyaj tyityeetyényuunyij tɨꞌij huóꞌhuɨɨreꞌen chájtaꞌ maj joꞌcháatɨmee

Nyúucarij tɨ naa huánamuajrii aꞌɨ́ɨn tɨ jaꞌaꞌrij ɨ Asaf

¹Taj Dios, ¿jiꞌnye pej pij jusén jɨn matuuhuaꞌxɨj?

¿Jiꞌnye pej pij huápuɨꞌɨj tyiꞌijnyúꞌcacaꞌ

aꞌɨ́ɨjma jimi ɨ cányaꞌxɨɨ muéetzij maj ayaꞌmuaj?

²Huoꞌtámuaꞌreeriꞌ aꞌɨ́ɨjma ɨ maj aꞌchájtaꞌnaj puéꞌeen,

aꞌɨ́ɨjma ɨ paj huaꞌantyíhuoj tɨꞌɨj néijmiꞌi tyoꞌhuatyóochej,

aꞌɨ́ɨjma ɨ paj huaꞌ japua huatanyúj mej mij aꞌtyéɨtyeristyamuaꞌ puéꞌeenyeꞌej muáꞌraꞌnyij.

Ootámuaꞌreeriꞌ aꞌɨ́jcɨ ɨ jɨríj Sión tɨ ántyapuaj, aꞌájna joꞌpaj jaꞌchej.

³Mupoꞌvéꞌmeꞌ pej pij jaaséj aꞌíjcɨ ɨ tɨ quee jeꞌej huaséꞌrin;

aꞌɨ́jna ɨ tɨ tájchaꞌɨɨreꞌ pu arí néijmiꞌi tyuꞌtyáꞌuj aꞌ tyeyúuj tzajtaꞌ.

⁴Aꞌɨ́ɨmaj ɨ maj muájchaꞌɨɨreꞌ aꞌɨ́ɨ mu tyíꞌchuiicaj aꞌ tyeyúuj tzajtaꞌ aꞌɨ́jcɨ jɨmeꞌ maj tyuꞌtyáamueꞌtɨj;

¡majta tyiꞌtɨ́j atyojoꞌhuíityaꞌajraa ɨ tɨ jɨn ámiteereꞌ maj aꞌɨ́ɨmaj tyuꞌtyáamueꞌtɨj

⁵aꞌájna aꞌ tɨ joꞌtyényinyiꞌij ɨ tyeyúuj!

Aꞌyaa mu rɨcɨj matɨꞌɨj ɨ cɨyéj maj tyiꞌtavéjchij

aꞌájna joꞌtɨj huápuɨꞌɨj joꞌɨtzitaj,

⁶aꞌɨ́j mu jɨn ɨ tyapuéj majta ɨ martíiyuj

tyuꞌtyúꞌuj ɨ cɨyéj tɨ jɨn tyíꞌtaavijhuacaꞌaj.

⁷Majta mu jaatyáatɨej aꞌɨ́jcɨ aꞌ tyeyúuj,

meetyáxaahuatacaꞌ aꞌ tyeyúuj;

matɨꞌɨj néijmiꞌi huatyuꞌuj ajta jeꞌen aꞌ chóotaꞌ jaꞌajquéej jaꞌraa.

⁸Aꞌyaa mu tyaaxáꞌpuɨꞌɨntarej maj néijmiꞌi tyeꞌentyipuáꞌrityeꞌen,

néijmiꞌqueꞌ mu tyuꞌtɨéerajraa ɨ chuéj japua

joꞌtyaj jáꞌtasɨꞌrihuaꞌaj tyej tyij muatyáanajche.

⁹Capu cheꞌ séejreꞌ aꞌájna joꞌtɨj tyámuaꞌ tyejéꞌeenyeꞌej;

capu cheꞌ sɨ́ɨj séejreꞌ tɨ aꞌ jitze maꞌcan tyíꞌxaxaꞌaj,

catu tyanaꞌaj jamuaꞌreej aꞌchu tɨ aꞌíjna áꞌtyeeren.

¹⁰Taj Dios,

¿aꞌchunyéj ooj áꞌtyeeren tɨ jeꞌej puaꞌaj tyiꞌtaxáataj jaꞌmej aꞌɨ́jna ɨ tɨ tájchaꞌɨɨreꞌ?

¿Aꞌchunyéj ooj áꞌtyeeren tɨ muéetzij jeꞌej puaꞌaj tyiꞌmuaxáataj jaꞌmej?

¹¹¿Jiꞌnye pej pij jaꞌavaaj aꞌmuácaꞌ ɨ tɨ néijmiꞌi putyíꞌuurej?

¿Jiꞌnye pej pij curiaꞌtúꞌtuꞌujmee?

¹²Tɨꞌɨj naꞌaj jájcuaj ɨmuáj, muáaj paj Rey jɨn tyiꞌtyéjvee.

Muáaj, taj Dios, mueꞌtɨ́j paj tyuꞌtyáamueꞌtɨj

aꞌɨ́jcɨ japua ɨ cháanacaj:

¹³muáaj paj uyaꞌráxɨɨraxɨj ɨ jájrij aꞌɨ́jcɨ jɨmeꞌ ɨ paj néijmiꞌi jɨn putyíꞌuurej,

pajta huaꞌ muꞌuj íjveechixɨj ɨ tyiꞌtyán maj viváajmaꞌaj tyityeꞌsejriacaꞌaj a jáataꞌ,

¹⁴pajta jaꞌvéꞌtzij ɨ muꞌúuraꞌ aꞌɨ́jcɨ ɨ tɨ jeꞌej puaꞌaj huaséꞌrin tɨ aꞌyan ántyapuaj tɨjɨn Leviatán

pajta jeꞌen aꞌɨ́ɨjma huatáꞌan mej mij jaatyájcɨꞌmej ɨ tyiꞌtyán aꞌáa maj tyityejéꞌsejreꞌ joꞌtɨj quee jáꞌtyiꞌtɨj.

¹⁵Muáaj paj tyuꞌtáꞌ tɨ huatámuɨꞌyej ɨ játyaꞌnaj jitze ajta joꞌtɨj jaꞌaj jéexaviꞌijmee

pajta tyuꞌtáꞌ tɨ atyájxɨꞌnyij ɨ játyaꞌnaj tɨ aꞌnáj tɨnaꞌaj muɨꞌyacaꞌaj.

¹⁶Muéetzij pu muaꞌ aꞌrij ɨ tújcaꞌrij ajta ɨ tɨ́caꞌrij;

muáaj paj tyámuaꞌ jáaruuj ɨ máxcɨrɨeꞌ pajta ɨ xɨcáj;

¹⁷muáaj paj jaatyéꞌitej joꞌtɨj jooꞌástɨmee ɨ cháanacaj;

muáaj paj tyuꞌtáꞌ tɨꞌij huáxɨcaj ajta tɨꞌij huáseeviꞌin.

¹⁸Muáaj paj jamuaꞌréerej, Tavástaraꞌ, tɨ aꞌɨ́jna ɨ tɨ tájchaꞌɨɨreꞌ muéetzij jeꞌej puaꞌaj tyíꞌmuaxaj,

majta ɨ tyeɨ́tyee ɨ maj quee maꞌumuámuaꞌreꞌ aꞌɨ́ɨ mu majta jeꞌej puaꞌaj tyíꞌmuaxaj.

¹⁹¡Capáj jusén jɨmeꞌ huápuɨꞌɨj tojóꞌhuaꞌnan!

Aꞌyaa tu een tɨꞌɨj ɨ jáamuiꞌ catu uhuácacaꞌnyeꞌ,

¡capáj tatatóꞌraꞌan aꞌɨ́ɨjma jimi ɨ maj tyíꞌtyacɨꞌmacaa!

²⁰¡Pataꞌaj joꞌtámuaꞌreej tyiꞌtɨ́j paj jɨn tyaꞌtáꞌratziiriꞌ,

jiꞌnye néijmiꞌqueꞌ mu ɨ chuéj japua jucuꞌraj

aꞌyaa puꞌujtánaꞌaj tyíꞌrɨcɨj joꞌtɨj ɨ chuéj jooꞌástɨmee!

²¹Capáj tyiꞌtáꞌcareꞌen maj jáꞌxaahuataj aꞌɨ́jcɨ ɨ tɨ quee jeꞌej tyéejtyoovej,

¡tyuꞌtáꞌ mej mij tyimuaatatyójtziꞌreꞌen aꞌɨ́jna ɨ tɨquee jeꞌej tyéejviicueꞌ ajta ɨ tɨquee óotzaahuatyeꞌ!

²²¡Ájchesij, taj Dios! ¡Pajta aꞌ japua huatányuunyij!

¡Ootámuaꞌreej maj quee jaꞌantyápuaꞌcɨtacaa maj jeꞌej puaꞌaj tyíꞌmuaxajta aꞌɨ́ɨmaj ɨ maj quee maꞌumuámuaꞌreꞌ!

²³Capáj yóꞌhuaꞌnan jeꞌej maj tyíꞌtyejijhuaj aꞌɨ́ɨmaj ɨ maj muájchaꞌɨɨreꞌ,

jeꞌej maj meríj jéetzeꞌ tyíꞌtyejijhuaj aꞌɨ́ɨmaj ɨ maj quee tyihuojóꞌitej.

Dios, ɨ tɨ Juées jɨn tyiꞌtyéjvee

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Capáj tyiꞌtɨ́j antyíuꞌnaꞌan. Chuíicarij maj jɨn tyaatatyójtziꞌreꞌen maj jɨn jaatyáanajche Asaf tɨ jaꞌaꞌrij

¹Muéetzij tu tyíꞌmuatyojtziꞌreꞌ, taj Dios,

muéetzij tu tyíꞌmuatyojtziꞌreꞌ,

aꞌyaa tu jéehua tyáꞌhuoo aꞌ jitze maꞌcan tyajta aꞌɨ́j tyíꞌchuiicaj ɨ tɨ naa tyuꞌséꞌrin muáaj paj tyúꞌtaahuacaꞌ.

²Tavástaraꞌ pu aꞌyan tyíꞌxaj tɨjɨn:

“Aꞌájna aꞌnáj nyej nyáaj aꞌyan tyaataxájta,

nyáaj nu néijmiꞌcaa tyámuaꞌ tyáꞌxɨjtyeꞌen.

³Tɨꞌɨjta huatóocaꞌtzɨj ɨ chuéj, majta néijmiꞌi ɨ maj japuan huacháatɨmee,

nyáaj nu aꞌɨ́ɨn puéꞌeen ɨ tɨ tyámuaꞌ tyéꞌchaꞌɨj ɨ tɨ japuan róocaꞌnyej.”

⁴Ajta aꞌɨ́ɨjma ɨ maj óotzaahuatyeꞌ ajta ɨ maj jeꞌej puaꞌaj rɨcɨj aꞌyaa nu tyihuáꞌixaatyeꞌ tɨjɨn:

“Caxu junyoꞌsiꞌtyeꞌej caxu siajta óotzaahuatyeꞌej;

⁵caxu aꞌɨ́j jitze tyíꞌcaꞌnyej tyiꞌtɨ́j siaj huayíꞌtɨn

caxu huápuɨꞌɨj óotzaahuatyeꞌej tɨpuaꞌaj tyiꞌtɨ́j setyáxajtasimeꞌen.”

⁶Jiꞌnye capu ɨ puéjtzij aꞌáa jeꞌréꞌnyesij

aꞌájna joꞌtɨj ɨ xɨcáj jéꞌejnyinyiij nusu joꞌtɨj jaꞌancáruꞌpij,

capu ajta aꞌájna joꞌtɨj quee jáꞌtyiꞌtɨj nusu a jɨríj tzajtaꞌ,

⁷sulu aꞌɨ́ɨ pu ɨ Dios Juées tɨ jɨn tyiꞌtyéjvee:

aꞌɨ́ɨ pu séecan huatyáxaahuataj ajta séecan tyámuaꞌ tyuꞌtyátoosij.

⁸Tavástaraꞌ pu jiꞌtyáaja ɨ jumuácaꞌ jitze ɨ tɨ jitzán uhuáaꞌ ɨ tɨ jɨn nyúꞌcamuɨꞌ,

nahuáj pu áꞌnaxcaj ajta arí újmueꞌriacaꞌ.

Tɨꞌɨj jajxɨ́reꞌen aꞌɨ́jcɨ ɨ nahuáj,

néijmiꞌi ɨ maj jeꞌej puaꞌaj rɨcɨj ɨ cháanacaj japua

aꞌɨ́ɨ mu néijmiꞌi juquéiꞌsij.

⁹Nyáaj nu aꞌnáj tɨnaꞌaj jaxáataj naꞌmej ɨ Dios raꞌ aꞌɨ́jcɨ ɨ Jacob

nyajta jimi tyuꞌtáchuiicaj;

¹⁰jiꞌnye aꞌɨ́ɨ pu jaꞌantyipuáꞌrityeꞌsij ɨ maj jɨn óotzaahuatyeꞌ aꞌɨ́ɨmaj ɨ maj jeꞌej puaꞌaj rɨcɨj;

ajta jéetzeꞌ pu tyámuaꞌ tyeetyátoosij aꞌɨ́jcɨ ɨ tyáataj tɨ tyámuaꞌ tyíꞌtyevij.

Dios, ɨ tɨ néijmiꞌi jɨn tyuꞌtyáamueꞌtɨj

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj, aꞌɨ́jcɨ jitze ɨ maj jɨn tyíꞌcuiꞌnacaa tɨ tyeꞌejvivin. Chuíicarij maj jɨn tyaatatyójtziꞌreꞌen maj jɨn jaatyáanajche Asaf tɨ jaꞌaꞌrij

¹Dios mu néijmiꞌqueꞌ jamuaꞌtyej aꞌájna a Judá;

néijmiꞌqueꞌ pu namuajreꞌ aꞌájna a Israel jeꞌej tɨ aꞌɨ́ɨn ántyapuaj.

²Ɨ tyeyúujraꞌ aꞌáa pu jáꞌsejreꞌ ɨ jɨríj japua tɨ aꞌyan ántyapuaj tɨjɨn Sión,

aꞌáa tɨ jáꞌsejreꞌ a Jerusalén;

³aꞌáa pu tyuꞌtyáanaꞌxɨj ɨ tyapúustiꞌij ɨ maj jɨn junyoꞌsiꞌtyaꞌcaꞌaj,

ɨ maj jɨn huatyóonaj, chúun, túꞌnamuaꞌaj ajta ɨꞌrɨ́j.

⁴¡Muáaj paj huápuɨꞌɨj naa huaséꞌrin, taj Dios!

¡Jéetzeꞌ paj vaꞌtɨ́j séejreꞌ quee ɨ jɨríj tɨ jusén jɨn séejreꞌ!

⁵Aꞌɨ́ɨjma mu néijmiꞌi tyoꞌhuáariꞌriꞌ ɨ maj jéetzeꞌ jaayíꞌtɨn maj huatyényoꞌseꞌen,

majta quee jeꞌej huarɨ́j aꞌɨ́ɨmaj ɨ maj jéetzeꞌ uhuácacaꞌnyeꞌej,

aꞌɨ́ɨmaj mu tajɨ́ɨsaꞌpuaj huatácuꞌtzucaꞌ matɨꞌɨj mij huácuij.

⁶Camu majta cheꞌ pújoorej mej mij huatáhuaaxɨꞌɨn ɨ cariáataꞌ majta ɨ cahuáayuꞌuj

patɨꞌɨj muáaj, Dios raꞌ ɨ Jacob huoꞌtányeechej.

⁷¡Muáaj paj huápuɨꞌɨj áꞌtzaahuatyiꞌreꞌ!

¿Aꞌtanyíj pújoorej tɨꞌij aꞌjimi ajoꞌtyávaacaj

tɨꞌɨjta huataséjreꞌen ɨ paj jɨn nyúꞌcamuɨꞌ?

⁸Tajapuá pu ɨmuáj séejreꞌ ɨ puéjtzij paj taatáꞌsij,

ajta ɨ cháanacaj pu tyíꞌtzɨɨnyeꞌ aꞌɨ́j pu jɨn quee cheꞌ táhuan,

⁹taj Dios,

patɨꞌɨjta ájchenyij pej pij tyoꞌxáꞌpuɨꞌɨntareꞌen

ajta pej pij huaꞌ japua huatányuunyij aꞌɨ́ɨjma ɨ maj japuéjtzitarej ɨ cháanacaj japua.

¹⁰Aꞌɨ́jna ɨ tɨ jɨn nyúꞌcamuɨꞌ ɨ tyévij aꞌɨ́ɨ pu puéꞌeenyeꞌej jaꞌmej ɨ tɨ jɨn tyimuaatatyójtziꞌreꞌej,

¡tyij ajta cɨ́ɨ naꞌaj tyiꞌijnyúꞌcaj aꞌɨ́ɨ pu puéꞌeenyeꞌej jaꞌmej aꞌ cúruun!

¹¹Siataꞌaj muaꞌaj jimi tyaꞌtóoratziij aꞌɨ́jcɨ ɨ Tavástaraꞌ, siajta ɨ Dios jimi,

siajta jeꞌen néijmiꞌi jɨn aróoꞌastej.

Muaꞌaj, mu siaj ataváatɨmee aꞌɨ́jcɨ jimi ɨ tɨ aꞌyan tyúuxɨeꞌveꞌ tyaj tzáahuatyiꞌraꞌaj jimi tyíchaꞌɨɨj,

¡siataꞌaj jimi tyuꞌtámuꞌvejritaj!

¹²Jiꞌnye aꞌɨ́ɨ pu huáariꞌraj ɨ huáꞌjuuricamej aꞌɨ́ɨjma ɨ maj tyíꞌijta

ajta tyuꞌtáꞌsij mej mij tyuꞌtátzɨɨnyeꞌen ɨ maj tyíꞌijta ɨ cháanacaj japua.

Tyicheꞌ jitzán tyúꞌmuaꞌtyij ɨ tɨ jɨn ɨ Dios tyíꞌmuarɨeꞌ

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Aꞌɨ́ɨn tɨ jaꞌaꞌrij ɨ Jedutún. Chuíicarij Asaf tɨ jaꞌaꞌrij

¹Aꞌɨ́jcɨ jimi nu ɨ Dios caꞌnyíin jɨn huatyényuusij

taꞌaj ij aꞌɨ́ɨn náanamuaj.

²Tɨpuaꞌaj séej xɨcáj jitze nyényaxaamujrityaꞌaj aꞌɨ́j nu huoonyij ɨ Tavástaraꞌ,

nyajta quee jaatapuáꞌcɨtaj nyaj ajméjcaꞌtaxɨꞌɨn

nyatɨꞌɨjta tɨ́caꞌ tyényuusimeꞌen.

Capu ɨꞌríj tɨ huóosoꞌpeꞌen ɨ nyajúuricamej.

³Aꞌɨ́j nu ootámuaꞌreerij ɨ Dios, nyajta jeꞌen nyeyiinyen,

nyajta jeꞌen uhuányamuaꞌtzɨj, aj nu nyij tányij huatányaxaahuataj.

⁴Muáaj, Tavástaraꞌ, capáj nyatáꞌcaa nyej nyij ootyájcutyij;

¡canu cheꞌ jeꞌej jájtyoovej, ajta quee cheꞌ nyaɨꞌriityeꞌ nyaj tyuꞌtaxáj!

⁵Aꞌɨ́j nu jitze tyiꞌriáꞌmuaꞌsij ɨ xɨcáj nyajta ɨ nyinyiꞌraꞌaj yatɨj jeꞌréꞌnyej,

⁶nyaꞌtamuaꞌreꞌrii nyaj tɨ́caꞌ tyiꞌchuicacariaꞌaj.

Nyatzájtaꞌ nu aꞌyan tyiꞌriáꞌmuaꞌsij, nyajta jeꞌen aꞌyan tyuꞌtaꞌíhuoꞌsij tɨjɨn:

⁷¿Nyiquij jusén jɨmeꞌ nyuꞌcamuɨꞌɨj jaꞌmej ɨ Tavástaraꞌ?

¿Nyiquij quee cheꞌ tyámuaꞌ tojoꞌmuaꞌráaj jaꞌmej?

⁸¿Nyiquij arí huatyápuaꞌriacaꞌ ɨ tɨ jɨn taxɨeꞌvaꞌcaꞌaj?

¿Nyiquij arí jusén jɨmeꞌ huatyápuaꞌriacaꞌ ɨ tɨ jɨn tyaꞌtóoratziiriꞌ?

⁹¿Nyiquij arí ɨ Dios yoꞌhuáꞌxɨj ɨ tɨ jɨn tyámuaꞌ tyíꞌtyevistacaꞌaj?

¿Nyi arí huápuɨꞌɨj tyinyúꞌcacaꞌ, ajta jeꞌen quee cheꞌ táꞌcuꞌvej?

¹⁰Ajta ɨ tɨ jéetzeꞌ jeꞌej puaꞌaj nyaꞌasej aꞌɨ́ɨ pu aꞌɨ́ɨn puéꞌeen ɨ nyaj aꞌyan tyíꞌmuaꞌajcaj

tɨ aꞌɨ́jna ɨ tɨ tajapuá jáꞌsejreꞌ quee cheꞌ aꞌɨ́ɨn puéꞌeen ityájma jimi.

¹¹Aꞌɨ́j nu tyoꞌtámuaꞌreerij ɨ tɨ naa tyihuáꞌsejratyeꞌ

ɨ tɨ anaquéej tyíꞌsejriaꞌcaꞌaj ɨ Tavástaraꞌ jimi,

¹²aꞌɨ́j nu néijmiꞌi tyoꞌtámuaꞌreerij ɨ tɨ aꞌɨ́ɨn tyúꞌtaahuacaꞌ.

¹³Taj Dios, muáaj paj néijmiꞌi jɨn tyámuaꞌ rɨcɨj jeꞌej paj tyiꞌtɨ́j uurej;

¿nyiquij ajtáhuaꞌaj sɨ́ɨj séejreꞌ ɨ dios tɨ aꞌyan een patɨꞌɨj muáaj?

¹⁴¡Muáaj paj aꞌɨ́ɨn puéꞌeen ɨ Dios ɨ tɨ aꞌɨ́j tyíꞌtaahuaj ɨ tɨ naa tyuꞌséꞌrin!

¡Muáaj paj huoꞌtaséjratyej néijmiꞌcaa ɨ tyeɨ́tyee ɨ paj néijmiꞌi jɨn putyíꞌuurej!

¹⁵Pajta ɨ paj néijmiꞌi jɨn putyíꞌuurej aꞌɨ́j paj jɨn huaꞌ japua huatanyúj aꞌ tyeɨ́tyeristyamuaꞌ,

yójmuaꞌmuaꞌ aꞌɨ́jcɨ ɨ Jacob pajta aꞌɨ́j tyíꞌyojmuaꞌ ɨ José.

¹⁶Taj Dios, tɨꞌɨj ɨ jájrij muaaséj, aꞌɨ́ɨ pu tyuꞌtátzɨɨn,

ajta huatóocaꞌtzɨj ɨ jájtyij tyétyeꞌ ɨmuáj tɨ jáꞌsejreꞌ,

¹⁷majta ɨ jéetɨrij tyuꞌtáꞌ mej mij huatyéviiyej,

majta mu tyényuuveꞌej u tajapuá

majta néijmiꞌqueꞌ tyóonaꞌaxcavaꞌraꞌaj.

¹⁸Ajta huatánamuajre maj tyényuuveꞌej aꞌájna joꞌtɨj jóꞌaacaj,

néijmiꞌqueꞌ pu ɨ cháanacaj japua huanyéeriꞌcɨriajraa aꞌɨ́jcɨ jɨmeꞌ ɨ maj tyánaꞌaxcavaꞌraꞌaj

ajta néijmiꞌi ɨ chuéj caꞌnyíin jɨn huatóocaꞌtzɨj.

¹⁹Pajta tyuꞌtáꞌ maj antácɨɨnyej ɨ jájritzeꞌ,

muáaj paj antáraa ɨ jájtyij jitze,

ajta capu aꞌtɨ́j jáamuaꞌreeriꞌ joꞌpaj joꞌréꞌnyej.

²⁰Pahuóꞌviꞌtɨsimeꞌej aꞌtyéɨtyeristyamuaꞌ aꞌyájna matɨꞌɨj aꞌyaꞌmuáj,

aꞌɨ́ɨjma jitze maꞌcan ɨ Moisés ajta ɨ Aarón.

Jeꞌej tɨ ɨ Dios tyámuaꞌ tyíꞌuurej aꞌɨ́ɨjma jimi ɨ jutyéɨtyeristyamuaꞌ

Nyúucarij tɨ naa huánamuajrii Asaf tɨ jɨn tyihuoꞌmuáꞌtyej

¹Muaꞌaj mu siaj nyetyeɨ́ɨtyeristyamuaꞌ puéꞌeen, aꞌyaa xu huárɨnyij jeꞌej nyaj tyajaꞌmuamuaꞌtyej;

¡siataꞌaj ecóotutaxɨꞌɨn siaj sij tyámuaꞌ tyáanamuaj jeꞌej nyaj tyajáꞌmuaꞌixaatyeꞌ!

²Séej nu nyúucarij jɨn tyajamuaatéꞌexaatyeꞌsij,

aꞌɨ́j nu tyuꞌtaxájtaj tyiꞌtɨ́j tɨ aviitziꞌhuacaꞌaj

tɨꞌɨj naꞌaj jájcuaj ɨmuáj yatɨj jeꞌréꞌnyej.

³Tyiꞌtɨ́j tyaj huánamuajriꞌ tyajta jamuaꞌreej

majta ɨ tahuásimuaꞌcɨꞌɨj maj táaꞌixaaj,

⁴catu huoꞌtyáꞌaviitzeꞌej aꞌɨ́ɨjma ɨ tayójmuaꞌ.

Aꞌɨ́ɨjma jitze maꞌcan ɨ maj tajitzé eerányesij aꞌɨ́ɨjma tu jɨn tyaatatyójtziꞌreꞌej ɨ Tavástaraꞌ

tyajta jaataxájtaj ɨ tɨ néijmiꞌi jɨn putyíꞌuurej ajta ɨ tɨ jɨn naa huaséꞌrin.

⁵Dios pu nyúucarij huatyájto aꞌɨ́jcɨ jimi ɨ Jacob;

ajta tyiꞌtɨ́j jɨn tyuꞌtaꞌíjtacaꞌ aꞌájna a Israel,

ajta aꞌɨ́j jɨn tyihuoꞌtaꞌíj ɨ tahuásimuaꞌcɨꞌɨj

mej mij aꞌɨ́ɨmaj huoꞌmuaꞌtyej ɨ maj huaꞌ jitze eerányesij,

⁶mej mij jáamuaꞌtyij ɨ maj majcaꞌhuáyee huaꞌ jitze eerányesij,

huaꞌ yojmuaꞌ ɨ maj nanɨeꞌhuan,

majta jeꞌen aꞌɨ́ɨmaj, aꞌɨ́ɨjma mu mijta muaꞌtyen ɨ juyójmuaꞌ,

⁷mataꞌaj mij ɨ Dios jitze tyúꞌcaꞌnyej

majta jeꞌen quee yoꞌhuáꞌxɨj jeꞌej tɨ aꞌɨ́ɨn tyúꞌruuj,

ajta mej mij aꞌyan huárɨnyij jeꞌej tɨ tyiꞌtɨ́j jɨn tyuꞌtaꞌíjtacaꞌ

⁸mej mij quee aꞌyan huárɨnyij matɨꞌɨj ɨ huaꞌ huásimuaꞌcɨꞌɨj,

ɨ maj quee tyihuojóꞌitej majta quee maꞌumuámuaꞌreꞌ,

majta quee tyámuaꞌ een ɨ juxɨéjnyuꞌcaa tzajtaꞌ nusu ɨ ju júuricamej jitze,

¡tyeɨ́tyee maj quee tyámuaꞌ tyityetyúuchaꞌɨɨcaꞌaj ɨ Dios jimi!

⁹Aꞌɨ́ɨmaj ɨ tyeɨ́tyeristyamuaꞌmeꞌen aꞌɨ́jcɨ ɨ Efraín,

ɨ maj tyámuaꞌ eenyeꞌ aꞌɨ́jcɨ jɨmeꞌ ɨ túꞌnamuaꞌaj majta ɨꞌrɨ́j

aꞌɨ́ɨ mu huatóoꞌuj aꞌɨ́jcɨ xɨcáaraꞌ jitze matɨꞌɨj huatyéenyoꞌsej,

¹⁰camu jaatyátzaahuatyej ɨ Dios tɨ jɨn tyaꞌtóoratziiriꞌ

camu majta jaataxɨéꞌvej maj jaꞌráꞌastej jeꞌej tɨ aꞌɨ́ɨn tyíꞌmuaꞌtaj.

¹¹Aꞌɨ́ɨ mu yoꞌhuáꞌxɨj jeꞌej tɨ aꞌɨ́ɨn huaꞌ jimi tyuꞌmuárɨej,

ajta ɨ tɨ naa tyuꞌséꞌrin aꞌɨ́ɨn tɨ tyihuoꞌtaséjratyej.

¹²Dios pu tyihuoꞌtaséjratyej ɨ tɨ naa tyuꞌséꞌrin aꞌɨ́ɨjma ɨ jáꞌmuahuasimuaꞌcɨꞌɨj

aꞌáa tɨ huatacaꞌaj a Soan, aꞌáa tɨ jáꞌsejreꞌ a Egipto:

¹³ajta huaꞌpuaquéj jájsɨɨrej ɨ jájrij, tɨꞌquij huoꞌtaꞌ maj antácɨɨnyej,

ajta aꞌɨ́ɨ pu juxaꞌaj aꞌyan jáaruuj tɨꞌɨj jáxuꞌuj tɨ ájtaavijhuacaꞌ.

¹⁴Tújca pu jéetɨrij jɨn huoꞌviꞌtɨsimeꞌej,

ajta ɨ tɨ́caꞌ tɨéj pu jɨn huoꞌtátzaviꞌtyeꞌsimaꞌaj.

¹⁵Ajta aꞌájna joꞌtɨj quee jáꞌtyiꞌtɨj aꞌɨ́ɨ pu tyetyéj tɨ veꞌéj jéꞌtaꞌ ootátaaracaꞌ,

ajta jeꞌen muiꞌcaa ɨ jájtyij huoꞌtaꞌ.

¹⁶¡Dios pu tyuꞌtáꞌ tɨ ɨ jájtyij eeráanyej aꞌɨ́jcɨ jitze ɨ tyetyéj

aꞌɨ́j puꞌij jɨn vaꞌtɨ́j ɨ jájtyij huatámuɨꞌyacaꞌ!

¹⁷Majta aꞌɨ́ɨmaj móocheꞌ mu atyáꞌɨtzeꞌrihuaꞌaj ɨ Dios jimi,

camu jaatyátzaahuatyej aꞌɨ́jcɨ ɨ tajapuá tɨ jáꞌsejreꞌ matɨꞌɨj aꞌáa joꞌtyúꞌuucaꞌaj joꞌtɨj quee jáꞌtyiꞌtɨj.

¹⁸Aꞌyaa mu tyáꞌxɨeꞌvaꞌcaꞌaj maj jaatyéesej

cueꞌráj metyiꞌhuooj aꞌɨ́ɨjma tɨ tyaꞌránajchicaꞌaj.

¹⁹Jitzán mu rányuucaꞌaj, aꞌyan metyiꞌxáataj tɨjɨn:

“¿Nyi ɨ Dios mujoꞌvaꞌmaꞌaj jaꞌmej tɨꞌij méesaj japua tyitáacueꞌtyej aꞌyájna joꞌtɨj quee jáꞌtyiꞌtɨj?

²⁰Aꞌyaa pu tyiꞌjaꞌyájna tɨ ɨ Dios jaꞌcátaaracaꞌ ɨ tyetyéj,

ajta jeꞌen aꞌɨ́j jitze jájtyij eeráanyej tɨꞌɨj játyaꞌnaj,

aꞌɨ́j pu jɨn ɨ chuéj ajoꞌcájrupij,

ajta, ¿nyiquij páan ajta taatáꞌsij?

¿Nyiquij ajta hueꞌraꞌaj huoꞌtaꞌsij ɨ jutyéɨtyeristyamuaꞌ?”

²¹Tɨꞌɨj ɨ Tavástaraꞌ aꞌíj huánamuajriꞌ, aꞌɨ́ɨ pu tyinyúꞌcacaꞌ;

¡ɨ tɨ jɨn nyúꞌcamuɨꞌ, aꞌyaa pu een tɨꞌɨj ɨ tɨéj,

aꞌɨ́j pu jimi tyinyúꞌcacaꞌ ɨ Jacob!

²²Jiꞌnye camu ɨ Dios jitze tyuꞌcáꞌan

camu majta tyáꞌantzaahuaj tɨ aꞌɨ́ɨn huoꞌtyáhuɨɨrej.

²³Ajta aꞌyájna, Dios pu tyihuoꞌtaꞌíj ɨ jéetɨrij

ajta jaꞌantacúj ɨ tɨ jɨn eetyánamiꞌ u tajapuá,

²⁴¡ajta jeꞌen tyuꞌtáꞌ tɨ ajeꞌcáanyej ɨ cueꞌráj tɨ aꞌyan huatóomuaꞌaj tɨjɨn maná,

tɨ aꞌyan éenyeꞌej tɨꞌɨj tyeríicuj tajapuá tɨ jáꞌmaꞌcan, mej mij aꞌɨ́ɨmaj tyúꞌcuaꞌnyij!

²⁵¡Aꞌɨ́ɨ pu tyévij jáacuaj ɨ tajapuá maj tyíꞌhuɨɨreꞌ maj jacuaꞌcaa!

¡Dios pu jéehua tyámuaꞌ naa tyihuoꞌcueꞌej!

²⁶Aꞌɨ́jna ɨ áacaj aꞌáa tɨ jeꞌréꞌnyej joꞌtɨj ɨ xɨcáj jéꞌejnyinyiij ajta áatyej pujmuaꞌ tɨ jeꞌtányinyii

aꞌɨ́ɨ mu tajapuá huatáꞌaacariacaꞌ,

¡Dios pu aꞌyan tyúꞌruuj aꞌɨ́jcɨ jɨmeꞌ ɨ tɨ néijmiꞌi jɨn putyíꞌuurej!

²⁷Ajta tyuꞌtáꞌ tɨ hueꞌraꞌaj huáviiyej huaꞌ japua ɨ jutyéɨtyeristyamuaꞌ;

aꞌɨ́jna jɨmeꞌ maj pínaꞌsee mueꞌtɨ́j ajeꞌcáanyej aꞌyájna tɨꞌɨj ɨ séj jájritzeꞌ tɨ séejreꞌ.

²⁸Dios pu tyuꞌtáꞌ maj aꞌáa jéꞌtaꞌ jaꞌrávatzɨj joꞌmaj aꞌɨ́ɨmaj tyojoꞌtyáꞌɨnaamuacaꞌaj

ajta joꞌtɨj tyojooꞌástɨmee ɨ tyihuaꞌ ɨnáamuaj.

²⁹Aꞌɨ́ɨ mu mij tyúꞌcuaa ꞌasta manaꞌaj quee tyámuaꞌ tyityaatajúꞌxaj,

aꞌyaa puꞌij ɨ Dios tyaꞌróoꞌastej tɨꞌij aꞌyan tyáꞌraꞌnyij jeꞌej maj aꞌɨ́ɨmaj tyaaxɨéꞌvaꞌcaꞌaj.

³⁰Ajta capu eexúj huatyápuaꞌriacaꞌaj jeꞌej maj aꞌɨ́ɨmaj tyáꞌxɨeꞌvaꞌcaꞌaj,

óocheꞌ pu huaꞌ tyenyij jitze séjriaꞌcaꞌaj ɨ cueꞌráj,

³¹tɨꞌɨj ɨ Dios tɨ jɨn nyúꞌcamuɨꞌ huaꞌ japua rájve

ajta jeꞌen aꞌɨ́ɨjma huácuij ɨ tyétyacaa maj jéetzeꞌ uhuácacaꞌnyeꞌ.

¡Huoꞌcuij aꞌɨ́ɨjma ɨ tyétyacaa maj jéetzeꞌ tyámuaꞌ een Israel maj jitze ajtyámaꞌcan!

³²Tɨꞌɨj aꞌyan tyaꞌnáaraꞌaj, majtáhuaꞌaj mu huóoxanaꞌcɨrej;

camu tyáꞌantzaahuaj aꞌɨ́jcɨ jitze ɨ tɨ naa tyuꞌséꞌrin ɨ Dios jimi.

³³Aꞌɨ́j pu jɨn ɨ Dios jaꞌantyipuáꞌrij ɨ huáꞌjuuricamej

cuxáa maj séej manaꞌaj jɨn ucayáatɨraꞌnyij

aꞌɨ́jcɨ jitze ɨ tɨ huápuɨꞌɨj tzɨ́ɨnyiꞌsiꞌ huaséꞌrin.

³⁴Tɨpuaꞌaj ɨ Dios huaꞌcuiꞌijcaj, aj mu mij jahuoonyij;

majta jimi tyaꞌantzáꞌhuatyahuaꞌaj majta quee juxaahuataj jahuoocaꞌaj,

³⁵aj mumij jaꞌtamuáꞌreꞌrihuaꞌaj ɨ Dios tajapuá tɨ jáꞌsejreꞌ

ɨ tɨ huaꞌchaꞌɨɨcaꞌaj ajta huaꞌ japua nyuucaꞌaj.

³⁶Majta ɨ jutyényij jɨmeꞌ majta ɨ junyanúu jɨmeꞌ

jéehua mu huápuɨꞌɨj jacuanamuajcaꞌaj,

³⁷jiꞌnye camu aꞌnáj tzáahuatyiꞌraꞌaj jɨn jaatyátzaahuatyej

camu majta jɨꞌréꞌnyeꞌej séjriaꞌcaꞌaj aꞌɨ́jcɨ jitze ɨ tɨ jɨn tyaꞌtóoratziiriꞌ.

³⁸Ajta ɨ Dios pu huaꞌcuꞌvajcaꞌaj,

ajta tyihuáꞌuunyiꞌracaꞌaj ɨ maj jɨn jeꞌej puaꞌaj rɨjcaa ajta quee huaꞌantyipuaꞌrityahuaꞌaj,

mueꞌtɨ́j pu quee jaataxɨéꞌvej tɨ huaꞌ jimi tyinyúꞌcaj

ajta quee tyuꞌtáꞌ tɨ aꞌɨ́ɨn jaatyámueꞌtɨn ɨ tɨ jɨn nyúꞌcamuɨꞌ.

³⁹Dios pu joꞌtámuaꞌreeriꞌ maj tyeɨ́tyee manaꞌaj puéꞌeenyeꞌej;

maj aꞌyan een tɨꞌɨj ɨ áacaj, tɨ yujoꞌmej ajta quee cheꞌ pu ájvesij.

⁴⁰¡Aꞌchunyéj puaꞌmáj mequee jáanamuajriꞌ ɨ Dios

majta jimi jeꞌej puaꞌaj huarɨ́j aꞌájna joꞌtɨj quee jáꞌtyiꞌtɨj!

⁴¹Majta móocheꞌ mu jaxɨeꞌvaꞌcaꞌaj maj tyiꞌtɨ́j jɨn jaatyéesej;

aꞌɨ́ɨ mu jaxaamuɨjrityaꞌcaꞌaj aꞌɨ́jna ɨ tɨ jɨꞌréenyeꞌej séejreꞌ aꞌájna a Israel.

⁴²Camu joꞌtámuaꞌreeriꞌ aꞌɨ́jcɨ xɨcáaraꞌ

tɨꞌɨj ɨ Dios, aꞌɨ́jcɨ jɨmeꞌ ɨ tɨ néijmiꞌi jɨn putyíꞌuurej, huaꞌ japua huatanyúj aꞌɨ́ɨjma jimi ɨ maj huaꞌajchaꞌɨɨreꞌ;

⁴³tɨꞌɨj aꞌájna a Soan, aꞌáa tɨ jaꞌajtyámaꞌcan a Egipto,

vaꞌcán jɨn tyuꞌmuárɨej ajta ɨ maj jɨn jeꞌej tyoꞌtaséj,

⁴⁴tɨꞌɨj tyuꞌtáꞌ tɨ ɨ játyaꞌnaj xúureꞌej huatyóotaahuaj,

ajta jeꞌen quee cheꞌ huatáɨꞌriitariacaꞌ maj jaayéꞌen aꞌɨ́ɨmaj ɨ maj Egipto jáꞌmaꞌcan.

⁴⁵Ajta xɨeꞌrúj maj tyúꞌchaꞌvacaa aꞌɨ́ɨjma jimi huataꞌítyacaꞌ ajta taachuísee,

maj néijmiꞌi tyuꞌriáꞌxɨhuaaj majta tyojóꞌjɨpuaj,

⁴⁶ajta aꞌɨ́ɨjma ɨ vítziꞌcɨɨ huatáꞌ ɨ tɨ tyúꞌcɨɨriacaꞌ

aꞌɨ́ɨmaj maj tyuꞌmuárɨeꞌcaꞌaj.

⁴⁷Ajta tyéetyee jɨmeꞌ ajta séerij

aꞌɨ́j pu jɨn jaꞌantyipuáꞌrij ɨ xápuaꞌ maj jahuastyaꞌcaꞌaj ajta ɨ úuvaj.

⁴⁸Majta ɨ huáꞌyaꞌmuaj ɨ huáacasij majta ɨ cányaꞌxɨɨ aꞌɨ́ɨ mu huácuij

aꞌɨ́jcɨ jɨmeꞌ maj tyéetyee huavátzɨj majta ɨ víityee maj huoꞌcájtzej.

⁴⁹Dios pu aꞌɨ́ɨjma jimi uyoꞌtaꞌítyacaꞌ ɨ tɨ jɨn huápuɨꞌɨj nyúꞌcamuɨꞌ:

ɨ tɨ jɨn nyúꞌcamuɨꞌ, puéjtzij ajta ɨ maj jɨn jeꞌej tyityoꞌtóomuaꞌtyij,

aꞌyájna tɨꞌɨj ɨ maj jitzán jáamuaꞌreej tɨ jeꞌej puaꞌaj tyeꞌmej.

⁵⁰¡Aꞌɨ́ɨ pu tyuꞌtáꞌ tɨ huataséjreꞌen ɨ tɨ jɨn nyúꞌcamuɨꞌ!

Capu tyaatúꞌuunyiꞌriꞌ ɨ huaꞌ júuricamej,

sulu aꞌɨ́ɨ pu tyuꞌtáꞌ mej mij huácuiꞌnyij,

⁵¹¡aꞌáa puꞌuj tánaꞌaj huojoꞌcuii aꞌájna a Egipto

aꞌɨ́ɨjma ɨ huaꞌyojmuaꞌ ɨ maj tyétyacaa maj anáatyaꞌaj huanánɨeꞌhuacaꞌ majta aꞌáa jaꞌajtyámaꞌcantacaꞌaj a Egipto!

⁵²Ajta aꞌɨ́ɨjma eeráaviꞌtɨj ɨ Israel maj jitze ajtyámaꞌcan tɨꞌɨj cányaꞌxɨɨ maj puéꞌeenyeꞌ;

aꞌɨ́ɨ puꞌij tyámuaꞌ tyihuóꞌviꞌtɨsimeꞌej aꞌájna joꞌtɨj quee jáꞌtyiꞌtɨj.

⁵³Tyámuaꞌ pu tyihuaꞌchaꞌɨ́ɨj huoꞌviꞌtɨsimeꞌej,

mej mij aꞌɨ́ɨmaj quee tyíꞌtzɨɨnyeꞌej,

ajta aꞌɨ́ɨjma ɨ maj huaꞌajchaꞌɨɨreꞌ aꞌáa mu jaꞌtyájcuii a jájritzeꞌ.

⁵⁴Dios pu huojoꞌvíꞌtɨj ɨ jutyéɨtyeristyamuaꞌ aꞌájna a chuéj japua aꞌɨ́ɨn tɨ jaꞌantyíhuoj,

¡ajta ɨ jɨríj aꞌɨ́ɨn tɨ jaamuéꞌtɨj mej mij ɨ tyeɨ́tyeristyamuaꞌmeꞌen jaꞌancuriáꞌan!

⁵⁵Huaꞌantyipuaꞌrij ɨ maj quee tyáꞌtzaahuatyeꞌ aꞌɨ́ɨmaj metyiꞌséeracaj ɨ Israel maj jitze ajtyámaꞌcan,

ajta ɨ chuéj aꞌɨ́ɨjma pu huatátuii ɨ jutyéɨtyeristyamuaꞌ,

ajta huoꞌtaꞌ mej mij aꞌáa joꞌcháatɨmeꞌnyij ɨ tyihuaꞌ ɨnáamuaj tzajtaꞌ.

⁵⁶Ajta aꞌɨ́ɨmaj mu jaatyéesej aꞌɨ́jcɨ ɨ Dios tajapuá tɨ jáꞌsejreꞌ

aꞌɨ́jcɨ jɨmeꞌ maj quee jaatyátzaahuatyej

majta quee aꞌyan huarɨ́j jeꞌej tɨ aꞌɨ́ɨn tyuꞌtaꞌíjtacaꞌ,

⁵⁷jiꞌnye, aꞌyájna matɨꞌɨj ɨ huaꞌ huásimuaꞌ

aꞌɨ́ɨ mu majta jimi ajtacɨ́j majta jeꞌej puaꞌaj huarɨ́j,

¡aꞌɨ́ɨ mu majta antyúutuuxɨj tɨꞌɨj ɨ túꞌnamuaꞌaj tɨ quee tyámuaꞌ tyíꞌtaavijhua!

⁵⁸Aꞌɨ́ɨ mu jajaaxɨejtyeꞌ aꞌɨ́jcɨ jɨmeꞌ maj tyiꞌtɨ́j ájtaahuaxɨj,

mej mij aꞌɨ́j japua sáanturij huatyáanajchej, aꞌyaa mu mij tyuꞌtáꞌ tɨ aꞌɨ́ɨn huáꞌanchueereꞌen.

⁵⁹Dios puꞌij tyinyúꞌcacaꞌ tɨꞌɨj aꞌɨ́j huaséj,

ajta néijmiꞌcaa huareꞌityacaꞌ ɨ Israel maj jitze ajtyámaꞌcan,

⁶⁰ajta ayoorɨej ɨ tyeyúuj aꞌáa tɨ jáꞌsejriaꞌcaꞌaj aꞌájna chájtaꞌ Siló,

ɨ tɨ chiꞌraꞌan puéꞌeenyeꞌ ɨ tyeɨ́tyee tzajtaꞌ.

⁶¹Tyuꞌtáꞌ mej mij aꞌɨ́ɨmaj ɨ maj jájchaꞌɨɨreꞌ jaatyéeviꞌ

aꞌɨ́jcɨ ɨ tɨ jɨn naa huaséꞌrin ajta ɨ tɨ néijmiꞌi jɨn putyíꞌuurej.

⁶²Huápuɨꞌɨj pu nyuꞌcamuɨꞌcaꞌaj aꞌɨ́ɨjma jimi ɨ jutyéɨtyeristyamuaꞌ,

aꞌɨ́j pu jɨn tyuꞌtáꞌ maj chúun jɨn huóꞌcuiꞌnyij aꞌɨ́ɨmaj ɨ maj huaꞌajchaꞌɨɨreꞌ.

⁶³Ɨ tyáamua mu huácuij matɨéeriꞌhuaj,

camu cheꞌ tyuꞌtáchuiicacaꞌ mej mij ɨ íimuaa huáhuɨɨchej.

⁶⁴Aꞌɨ́ɨmaj mu ɨ puaaríij huácuiꞌiihuacaꞌ ɨ chúun jɨmeꞌ,

majta ɨ úucaa ɨ maj antyúujɨɨmuaꞌastariacaꞌ camu huoꞌyiinyacaꞌ.

⁶⁵Ajta ɨ Tavástaraꞌ pu huájɨj, tɨꞌɨj ɨ tɨ tyiꞌtyámaarasimaꞌaj,

tɨꞌɨj ɨ tɨ nyoꞌsii tɨ huatyájtahue ajta jeꞌen arí otóomuaꞌreeriꞌ,

⁶⁶ajta jeꞌen huaꞌantyimueꞌtɨj ɨ maj jájchaꞌɨɨreꞌ, huoꞌtaꞌ mej mij huatóoꞌuunaj,

¡ajta tyéviꞌsiꞌ huoꞌtaꞌséjratacaꞌ jusén jɨmeꞌ!

⁶⁷Ajta ahuojóohuaꞌxɨj ɨ José maj jamuán ajáꞌchajcaꞌaj,

ajta quee aꞌɨ́ɨjma antyíhuo ɨ Efraín maj jitze ajtyámaꞌcan;

⁶⁸sulu aꞌɨ́ɨjma pu antyíhuo ɨ Judá maj jitze ajtyámaꞌcan,

ajta aꞌɨ́jcɨ ɨ jɨríj tɨ jéehua jaxɨeꞌveꞌ Sión tɨ ántyapuaj.

⁶⁹Ajta tyeyúuj ájtaahuacaꞌ, aꞌyan ajtyéeviꞌcan tɨꞌɨj tajapuá tɨ séejreꞌ,

ajta jusén jɨmeꞌ tyámuaꞌ tyeetyájtoo, aꞌyájna tɨꞌɨj ɨ cháanacaj.

⁷⁰Aꞌɨ́j pu antyíhuo ɨ David tɨ aꞌɨ́ɨn puéꞌeen ɨ tɨ jahuɨɨreꞌ,

aꞌɨ́jna ɨ cányaꞌxɨɨ tɨ sɨɨriaꞌcaꞌaj,

⁷¹capu cheꞌ jaatáꞌ tɨ cányaꞌxɨɨ sɨɨreꞌej,

sulu tɨꞌij ɨ tyeɨ́tyeristyamuaꞌmeꞌen huáchaꞌɨɨn,

tɨꞌij aꞌɨ́ɨn huaꞌajséejra ɨ Israel maj jitze ajtyámaꞌcan.

⁷²David puꞌij tyámuaꞌ tyihuóꞌchaꞌɨj ɨ tyeɨ́tyeristyamuaꞌmeꞌen ɨ Dios,

aꞌɨ́ɨ pu huóꞌchaꞌɨj ajta tyámuaꞌ tyihuoꞌcájuyetyej

jumuácaꞌ jɨn tyámuaꞌ tyiꞌuuriáaj ajta juxɨéjnyuꞌcaa tzajtaꞌ tyámuaꞌ éenyeꞌej.

Matɨꞌɨj huatóoxaamujrityej aꞌɨ́jcɨ jɨmeꞌ tɨ ɨ Jerusalén huatyuꞌuunyiꞌhuacaꞌ

Chuíicarij Asaf tɨ jaꞌaꞌrij

¹¡Taj Dios, aꞌɨ́ɨmaj ɨ maj quee tyáꞌtzaahuatyeꞌ aꞌɨ́ɨ mu tyeꞌentyipuáꞌrityej muéetzij tyíꞌmuaꞌaꞌrij!

¡Majta aꞌúun joꞌtyájrupij aꞌ tyeyúuj joꞌtɨj néijmiꞌi tyámuaꞌ tyejéꞌeen

ajta néijmiꞌi huatyuꞌuunyiꞌhuacaꞌ ɨ chájtaꞌnaj Jerusalén!

²¡Aa mu huajaꞌajtoo ɨ huaꞌ tyéviraꞌ ɨ maj muahuɨɨriaꞌcaꞌaj,

ɨ maj muéetzij jimi tyámuaꞌ tyityetyúuchaꞌɨɨcaꞌaj,

mej mij aꞌyan tyuꞌtyáhuɨɨreꞌen tɨꞌɨj cueꞌráj

aꞌɨ́ɨjma jimi ɨ muáꞌrɨeꞌcajtzij ajta tyiꞌtyán simuáruunyij jimi!

³Aꞌyaa mu tyaꞌajxɨ́rej ɨ huaꞌ xuureꞌ tɨꞌɨj jájtyij tɨ puéꞌeenyeꞌ

néijmiꞌqueꞌ aꞌájna a Jerusalén,

ajta quee ajaꞌ aꞌtɨ́j tɨꞌij tyityáaꞌavaataj.

⁴Aꞌtzísiꞌ tu séejreꞌ aꞌɨ́ɨjma jimi ɨ maj avéjriꞌ antacháatɨmee,

néijmiꞌi mu jeꞌej puaꞌaj tyíꞌtaxaj aꞌchu maj puaꞌmáj atacháatɨmee.

⁵Muáaj Tavástaraꞌ,

¿aꞌchunyéj ooj áꞌtyeeren ɨ paj jɨn nyúꞌcamuɨꞌ?

¿Nyi jusén jɨmeꞌ aꞌtáaj jaꞌmej ɨ paj jɨn nyúꞌcamuɨꞌ tɨꞌɨj ɨ tɨéj?

⁶¡Cheꞌ ɨ paj jɨn nyúꞌcamuɨꞌ aꞌɨ́ɨjma japua rájvetyij ɨ maj quee tyáꞌtzaahuatyeꞌ

ɨ maj quee muamuaꞌtyej majta quee muéetzij jimi jahuoo!

⁷Jiꞌnye aꞌɨ́ɨmaj mu jeꞌej puaꞌaj jáaruuj aꞌɨ́jcɨ ɨ Jacob

majta néijmiꞌi huatyuꞌuj ɨ chuéj joꞌtɨj aꞌɨ́ɨn jáꞌchajcaꞌaj.

⁸Capáj tyiꞌtáꞌcareꞌen tyej tyij ityáj huaꞌ jɨmeꞌ tyuꞌnájchitaj

tyiꞌtɨ́j maj jɨn jeꞌej puaꞌaj huarɨ́j aꞌɨ́ɨmaj ɨ tahuásimuaꞌcɨꞌɨj,

¡cheꞌ caꞌnácan mujoꞌvéꞌmeꞌen aꞌɨ́jna ɨ paj jɨn taxɨeꞌveꞌ,

jiꞌnye catu cheꞌ jeꞌej jájtyoovej jeꞌej tyaj huárɨnyij!

⁹Taj Dios, muáaj paj aꞌɨ́ɨn puéꞌeen ɨ tɨ tajapuá huatányuusij,

taatáhuɨɨreꞌ, tajapuá huatányuuchij pajta tyitaatúꞌuunyiꞌ,

aꞌɨ́jcɨ jitze maꞌcan ɨ tɨ naa huánamuajrii ɨ paj jɨn ántyapuaj.

¹⁰Capu juxɨeꞌveꞌ maj aꞌyan tyíꞌxajtaj ɨ maj quee tyáꞌtzaahuatyeꞌ yee:

“¿Joꞌnyij jeꞌej jeꞌen ɨ huaꞌ Dios?”

¡Taatáꞌ tyej tyij jaaséj ɨ paj jɨn tyoꞌriáꞌrɨeeraj aꞌɨ́jcɨ jɨmeꞌ maj huoꞌcuij ɨ maj muéetzij muahuɨɨreꞌ!

¡Micheꞌ aꞌɨ́ɨmaj majta jáamuaꞌreej ɨ maj quee tyáꞌtzaahuatyeꞌ!

¹¹Huoꞌnamuaj jeꞌej maj tyíꞌxaj aꞌɨ́ɨmaj ɨ maj námiꞌ,

pajta huaꞌ japua huatányuunyij aꞌɨ́jcɨ jɨmeꞌ ɨ paj néijmiꞌi jɨn putyíꞌuurej

aꞌɨ́ɨjma ɨ maj meríj aꞌyan tyihuoꞌtaxájtacaꞌ mej mij huóꞌcuiꞌnyij.

¹²Muáaj Tavástaraꞌ, aráahuaꞌpuaj puaꞌmáj paj tyoꞌriáꞌrɨeeraj aꞌɨ́ɨjma jimi ɨ maj tajimí avéjriꞌ joꞌcháatɨmee

aꞌɨ́jcɨ jɨmeꞌ maj jeꞌej puaꞌaj tyimuaaxájtacaꞌ,

¹³tyajta ityáj, ɨ tyaj aꞌtyéɨtyeristyamuaꞌ puéꞌeen,

tyaj aꞌáa jáꞌsejreꞌ tɨꞌɨj cányaꞌxɨɨ tyaj puéꞌeenyeꞌ aꞌájna joꞌpaj muáaj tyámuaꞌ tyojoꞌruuj,

aꞌnáj tɨnaꞌaj tu tyiꞌmuatyóotziꞌreꞌej táꞌjuꞌun,

¡tyajta muéetzij jimi jusén jɨmeꞌ tyiꞌchuíicaj táꞌjuꞌun!

Tyámuaꞌ paj tojoꞌsejra

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj, aꞌɨ́jcɨ jɨmeꞌ ɨ chuíicarij tɨ aꞌyan huatóomuaꞌaj tɨjɨn “Ɨ tzuhuáa”. Jeꞌej tɨ tyiꞌtyúuchaꞌɨɨcaꞌaj ajta chuíicariaꞌraꞌ aꞌɨ́jcɨ ɨ Asaf

¹Muáaj mu paj jachaꞌɨj ɨ Israel,

pajta tyámuaꞌ tyihuáꞌjuyetyej aꞌɨ́ɨjma ɨ maj José jitze eerámaꞌcan aꞌyájna tɨꞌɨj ɨ yaꞌmuáatyee tɨ sɨɨreꞌ,

majta aꞌɨ́ɨmaj tyámuaꞌ tyíꞌmuachaꞌɨj ɨ tajapuá maj tyíꞌhuɨɨreꞌ,

¡huánamuaj!

¡Tyámuaꞌ paj yóꞌsejraj aꞌɨ́jcɨ ɨ Efraín,

²ɨ Benjamín pajta aꞌɨ́jcɨ ɨ Manasés!

Huájɨsij pajta mujoꞌvéꞌmeꞌen pej pij tajapuá huatányuunyij aꞌɨ́jcɨ jɨmeꞌ ɨ paj néijmiꞌi jɨn putyíꞌuurej.

³Taj Dios, pajtáhuaꞌaj paj aꞌyan tyitaatyátoonyij tyatɨꞌɨj éenyeꞌej.

Tyámuaꞌ paj tojoꞌsejra aj puꞌij tahuɨɨreꞌen.

⁴Tavástaraꞌ, Dios mu paj néijmiꞌi jɨn antyíaꞌmuaꞌreej,

¿aꞌchunyéj pooj áꞌtyeeren penyuꞌcamuꞌuj

aꞌɨ́jcɨ jɨmeꞌ jeꞌej maj aꞌ jimi tyáꞌhuoo aꞌtyéɨtyeristyamuaꞌ?

⁵Muáaj paj taatáꞌ tyaj eetajaꞌraꞌtaxɨꞌɨn capáj cueꞌráj tyitaatáꞌ,

ajta tyej tyij aꞌɨ́j huayeꞌen, ɨ tyaj jéehua eetajaꞌraꞌtaxɨj.

⁶Aꞌyaa paj tyuꞌtáꞌ mej mij aꞌɨ́ɨmaj taatyáꞌaꞌtzej ɨ maj tajimí véjriꞌ antacháatɨmee,

aꞌɨ́ɨmaj mu majta taꞌaꞌtzej ɨ maj tájchaꞌɨɨreꞌ.

⁷Dios mu paj néijmiꞌi jɨn antyíaꞌmuaꞌreej,

¡pajtáhuaꞌaj paj aꞌyan tyitaatyátoonyij tyatɨꞌɨj éenyeꞌej!

¡Tyámuaꞌ paj tojoꞌsejra aj puꞌij tahuɨɨreꞌen!

⁸Aꞌáa paj a Egipto úuvaj ítyɨꞌriraꞌ jaꞌráapij,

pajta huiꞌráahuaꞌxɨj ɨ maj quee tyáꞌtzaahuatyeꞌ pej pij aꞌɨ́j atyáhuasteꞌen.

⁹Tyámuaꞌ paj jáaꞌuurijtze ɨ chuéj,

aꞌɨ́ɨ puꞌij aróonaanaꞌtyej ajta jeꞌen neíjmiꞌqueꞌ ɨ chuéj japua oorióonajchacaꞌ.

¹⁰Ajta ɨ juquéenyiꞌistaa jɨn tyaꞌváꞌnaj ɨ jɨríj,

ajta ɨ juxámueꞌ jɨmeꞌ ɨ tɨ tyuꞌuj tɨ jéetzeꞌ tyoꞌhuatɨ́tɨꞌɨjmee.

¹¹Ajta ɨ xámueꞌraꞌ aꞌáa pu ɨ jájrij jitze ɨmuáj jaꞌráꞌaj,

ajta ɨ tɨ jitzán ajtanyáxɨj aꞌáa pu jaꞌráꞌaj ɨ játyaꞌnaj jitze tɨ aꞌyan ántyapuaj tɨjɨn Éufrates.

¹²¿Jiꞌnye pej pij jaatyúꞌuj ɨ tɨ jɨn curiáꞌnamiꞌ,

pajta tyuꞌtáꞌ mej mij jáajuuraj ɨ maj mu jóꞌcɨꞌɨj ɨ juyéj jitze?

¹³Aꞌɨ́ɨ pu ɨ tuíixuj yójve tyojóꞌjɨpuaj,

¡majta ɨ tyiꞌtyán simuáruunyij jimi jeꞌej puaꞌaj tyíꞌuurej!

¹⁴Dios mu paj néijmiꞌi jɨn antyíaꞌmuaꞌreej, pataꞌaj cuiꞌ huariaꞌraꞌnyij,

tyámuaꞌ paj naa tyitaaséj aꞌájna ɨmuáj u tajapuá

pajta huaꞌ jimi tyúꞌmuaꞌtyij aꞌtyéɨtyeristyamuaꞌ,

¹⁵aꞌɨ́jcɨ ɨ ítyɨꞌrij muáaj paj pajta jaꞌtyáhuiij,

pajta tyámuaꞌ jáaruuj ɨ tɨ jitzan eeréꞌnyej.

¹⁶Pataꞌaj aꞌɨ́jna jɨn huaꞌantyipuáꞌrityeꞌen ɨ paj jɨn nyúꞌcamuɨꞌ

aꞌɨ́ɨjma ɨ maj jaꞌantyiveꞌchej majta jeꞌen jatɨeeraj,

¹⁷pajta jaatyáhuɨɨreꞌen aꞌɨ́jcɨ ɨ tyévij muáaj paj jaꞌantyíhuoj,

aꞌɨ́jna ɨ tɨ eeráanyej aꞌɨ́jcɨ jitze ɨ tyévij muáaj paj tyámuaꞌ tyeetyájtoo,

¹⁸tyataꞌaj tyij quee cheꞌ aꞌnáj aꞌ jimi ajtacɨ́ꞌcaꞌan.

¡Júuricamej paj taatáꞌan, aj tu tyij muéetzij tyanaꞌaj tyij muaatyánajchij!

¹⁹Muáaj Tavástaraꞌ, Dios mu paj néijmiꞌi jɨn antyíaꞌmuaꞌreej,

¡pajtáhuaꞌaj paj aꞌyan tyitaatyátoonyij tyatɨꞌɨj éenyeꞌej!

¡Tyámuaꞌ paj tojoꞌsejra aj puꞌij tahuɨɨreꞌen!

Tyiꞌtɨ́j tɨ jɨn ɨ Dios tyámuaꞌ tyihuojóꞌmuaꞌraj ajta ɨ Israel tɨ jɨn jeꞌej puaꞌaj huarɨ́j

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj, aꞌɨ́jcɨ jitze tyíꞌcanaa ɨ Gat. Aꞌɨ́ɨn tɨ jaꞌaꞌrij ɨ Asaf

¹¡Siataꞌaj jutyamuaꞌveꞌej ɨ Dios jimi setyuꞌtáchuiicaj, jiꞌnye aꞌɨ́j tu jɨn uhuájcaꞌnyej!

¡Siajta jíihuaj setyaatatyójtziꞌreꞌen aꞌɨ́jcɨ ɨ Dios raꞌ ɨ Jacob!

²Setyuꞌtáchuiicaj aꞌɨ́j setyiꞌhuáaristyaꞌaj ɨ quéetzarij,

siajta aꞌɨ́jcɨ jitze ɨ áarpaj siajta ɨ canárij jitze.

³Siajta tyuꞌtácɨꞌsityeꞌen ɨ trompéetaj jitze tɨꞌɨj ɨ máxcɨrɨeꞌ jájcuan jɨn huataséjreꞌen,

siajta jeꞌen tɨꞌɨjta néijmiꞌi huataséjreꞌen ɨ máxcɨrɨeꞌ,

jiꞌnye aꞌyaa pu tyúuxɨeꞌveꞌ siaj aꞌɨ́jcɨ xɨcáaraꞌ jitze vaꞌcán jɨn tyuꞌyéꞌestej.

⁴Jiꞌnye aꞌíi pu aꞌɨ́ɨn puéꞌeen ɨ tɨ jɨn tyuꞌtaꞌíjtacaꞌ

ɨ Dios raꞌ aꞌɨ́jcɨ ɨ Jacob aꞌájna a Israel,

⁵aꞌɨ́ɨ pu aꞌɨ́ɨn puéꞌeen jeꞌej maj tyaataꞌíj aꞌɨ́jcɨ ɨ José

tɨꞌɨj ɨ Dios huoꞌtanyóꞌsiꞌtyej aꞌɨ́ɨjma ɨ maj Egipto jáꞌmaꞌcan.

Nyúucarij nu huánamuajriꞌ nyaj quee jamuaꞌajcaa aꞌtɨ́j tɨ puéꞌeenyeꞌej, tɨ aꞌyan tɨjɨn:

⁶“Nuꞌríj tyimuꞌhuatyátɨchiiriꞌ ɨ paj tyoꞌhuatyátɨjcaa,

nuꞌríj tyámuaꞌ tyúꞌruuj aꞌ jimi pej pij quee cheꞌ caꞌnyíin jɨn tyíꞌmuarɨeꞌej.

⁷Patɨꞌɨj quee cheꞌ jeꞌej jájtyoovaꞌaj nye jimi paj huatyéenyuj, nyáaj nu nyij aꞌ japua huatanyúj,

aꞌɨ́j nu jitze muaatajé ɨ jéetɨrij tɨ tyényuuveꞌej,

nyajta jeꞌen muatyéesej véjriꞌ aꞌájna aꞌ tɨ jaꞌrájmuaa aꞌ tɨ aꞌyan tyajaꞌrájtyapuaj tɨjɨn Meribá.

⁸Setyúꞌnamuaj, nyetyeɨ́ɨtyeristyamuaꞌ, jeꞌej nyaj tyajáꞌmuaꞌixaatyeꞌ,

¡aꞌyaa nu tyáꞌxɨeꞌveꞌ siaj náanamuaj, muaꞌaj mu siaj Israel jitze ajtyámaꞌcan!

⁹Capáj sáanturij tyíchaꞌɨɨj maj séej chuéj japua jáꞌmaꞌcan;

capáj pajta séecan dioosij najchej ɨ paj quee huáꞌmuajtyej.

¹⁰Nyáaj nu aꞌ vástaraꞌ puéꞌeen, nyajta aꞌ Dios,

ɨ nyaj muiꞌrájtoo aꞌɨ́jcɨ japua ɨ chuéj Egipto tɨ tyajaꞌrájtyapuaj,

tyámuaꞌ paj naa tyaꞌcácuaxaꞌtaj, nyáaj nu nyij muaatájuxɨeetyeꞌsij.

¹¹’Majta ɨ nyetyeɨ́ɨtyeristyamuaꞌ camu nyanamuájracucaꞌaj,

¡camu aꞌyan huarɨ́j jeꞌej nyaj tyihuóꞌixaaj aꞌɨ́ɨmaj ɨ maj Israel jitze ajtyámaꞌcan!

¹²Aꞌɨ́j nu jɨn huoꞌtaꞌ mej mij aꞌyan huárɨnyij jeꞌej maj aꞌɨ́ɨmaj tyáꞌxɨeꞌveꞌ,

aꞌyaa mu mij atyityejeꞌcháaj muáꞌraa jeꞌej tɨ jéetzeꞌ tyihuaꞌránajchacaꞌ.

¹³¡Tɨpuaꞌaj aꞌɨ́ɨmaj ɨ nyetyeɨ́ɨtyeristyamuaꞌ manáanamuajrajcheꞌen!

¡Tɨpuaꞌaj ɨ Israel maj jitze ajtyámaꞌcan aꞌyan metyityaajúꞌcajcheꞌen jeꞌej nyaj tyihuoꞌcájuyetyej,

¹⁴aꞌyaa puꞌij tɨꞌɨj séej maj ootyásaꞌcɨvaꞌxɨꞌɨn

nyatɨꞌɨj nyáaj huoꞌtyaxáahuatajcheꞌen aꞌɨ́ɨjma ɨ maj huaꞌajchaꞌɨɨreꞌ

nyajta puéjtzij huoꞌtáꞌnyijcheꞌ ɨ maj quee naa huojoꞌmuaꞌraj!

¹⁵’Aꞌɨ́ɨmaj ɨ maj jaxanaꞌveꞌ ɨ Tavástaraꞌ aꞌɨ́ɨ mu huápuɨꞌɨj tyuꞌtátzɨɨnyeꞌej,

majta jeꞌen jusén jɨmeꞌ jajpuéetzij muáꞌjuꞌun.

¹⁶¡Dios pu ɨ tyeríicuj tɨ jéetzeꞌ jɨ́ꞌreꞌen huaꞌcueꞌtyej ɨ jutyéɨtyeristyamuaꞌ,

ajta sarátyee huáiꞌtyeꞌen ɨtzitáj maj huáxoo!”

Dios pu aꞌɨ́ɨn puéꞌeen ɨ Juées tɨ jéetzeꞌ vaꞌcán jɨn tyiꞌtyéjvee

Chuíicarij aꞌɨ́ɨn tɨ jaꞌaꞌrij ɨ Asaf

¹Dios pu tyámuaꞌ naa tyuꞌtóosejrataj aꞌájna joꞌmaj jóosɨɨreꞌ

ajta tyámuaꞌ tyáꞌxaꞌpuɨꞌɨntareꞌ u tajapuá joꞌmaj jáꞌsejreꞌ ɨ maj jimi tyíꞌhuɨɨreꞌ.

²“¿Aꞌnajnyí muaꞌaj siaatapuáꞌcɨtaj siaj jeꞌej puaꞌaj tyáꞌxaꞌpuɨꞌɨntareꞌ

ajta siaj huaꞌ jamuán ajtyáꞌuj xáꞌjuꞌun aꞌɨ́ɨjma ɨ maj jeꞌej puaꞌaj tyityetyúuchaꞌɨj?

³¡Tyámuaꞌ xu tyoꞌxáꞌpuɨꞌɨntariꞌtzeꞌen aꞌɨ́jcɨ ɨ tɨ quee jucaꞌnyej siajta ɨ xáꞌrɨcan!

¡Tyámuaꞌ xu tyoꞌxáꞌpuɨꞌɨntariꞌtzeꞌen ɨ tɨ quee jeꞌej tyéejviicueꞌ siajta ɨ tɨ jajpuéjtzij!

⁴¡Siataꞌaj huiꞌrátoonyij aꞌɨ́ɨjma ɨ maj quee jucaꞌnyej siajta ɨ maj quee jeꞌej tyéejviicueꞌ,

siajta huaꞌ japua huatányuunyij aꞌɨ́ɨjma jimi ɨ maj jeꞌej puaꞌaj tyityetyúuchaꞌɨj!

⁵’Siajta muaꞌaj caxu jamuaꞌreej, caxu tyihuojóꞌitej,

tɨ́caꞌrij tzajtaꞌ xu cɨɨnyej.

Aꞌɨ́ɨ pu tóocatzej ɨ chuéj tɨ japuan róocaꞌnyej.

⁶Aꞌyaa nu nyáaj tyuꞌtaxájtacaꞌ siaj muaꞌaj dioosij puéꞌeen;

siajta néijmiꞌi yójmuaꞌmuaꞌ puéꞌeen aꞌɨ́jcɨ ɨ tajapuá tɨ jáꞌsejreꞌ.

⁷Ajta aꞌyájna, aꞌyaa xu néijmiꞌi tyíꞌtyacuiꞌnyij matɨꞌɨj ɨ tyeɨ́tyee,

¡siajta aꞌyan tyityeꞌentyipuáꞌrij tɨꞌɨj ɨ tɨ tyiꞌtɨ́j jɨn antyúumuaꞌreej!”

⁸¡Taj Dios, pataꞌaj huatyeꞌchenyij paj joꞌxɨ́jtyeꞌen ɨ cháanacaj,

jiꞌnye muáaj paj antyíaꞌmuaꞌreej néijmiꞌcaa jimi ɨ tyeɨ́tyee ɨ maj séej chuéj japua joꞌcháatɨmee!

Jeꞌej tyaj tyityeetyényuunyij tɨꞌij ɨ Dios tajɨ́meꞌ pu huárɨnyij

Cuíinarij ajta chuíicarij Asaf tɨ jaꞌaꞌrij

¹Taj Dios, ¡capáj quee aveꞌnyuucaꞌan!

¡Capáj pajta quee táhuaanyeꞌen nusu paj quee cheꞌ tyíꞌxajtaj!

²Huoꞌséj ɨ maj muájchaꞌɨɨreꞌ, aꞌɨ́ɨjma ɨ maj muaxanaꞌveꞌ:

aꞌɨ́ɨ mu huápuɨꞌɨj juꞌɨtziityeꞌ majta muéetzij jeꞌej puaꞌaj tyíꞌmuaxaj.

³Aꞌɨ́ɨ mu meríj tyiꞌtɨ́j jeꞌej puaꞌaj tyuꞌxáꞌpuɨꞌɨntarej

aꞌɨ́ɨjma jimi aꞌtyéɨtyeristyamuaꞌ,

¡majta aꞌɨ́ɨjma jimi ɨ paj tyámuaꞌ tyihuáꞌchaꞌɨj!

⁴Aꞌyaa mu meríj tyaaxájtacaꞌ maj mujoꞌváꞌjuꞌun mej mij taꞌantyipuáꞌrityeꞌen

mej mij quee cheꞌ yajáꞌhuaꞌtan ɨ tatyeɨ́tyeristyamuaꞌ,

mej mij quee cheꞌ jamuaꞌreeriaj ɨ tɨ jɨn ántyapuaj ɨ Israel.

⁵Tyiꞌtɨ́j mu meríj jɨn muéetzij jimi tyaꞌtóoraj,

aꞌyaa mu meríj huóoruuj tɨꞌɨj tɨ sɨ́ɨj naꞌaj ɨ tyévij puéꞌeenyeꞌ,

⁶aꞌɨ́ɨmaj ɨ maj aꞌáa joꞌcháatɨmee joꞌtɨj ɨ Edom tyojoꞌtyáꞌɨnaamuaa ajta ɨ Ismael,

aꞌɨ́ɨjma maj jitze eerámaꞌcan ɨ Agar majta ɨ Moab,

⁷ɨ Guebal, ɨ Amón majta ɨ Amalec,

aꞌɨ́ɨmaj ɨ filisteos, majta aꞌáa maj joꞌcháatɨmee a Tiro,

⁸majta jeꞌen aꞌɨ́ɨmaj ɨ asirios aꞌɨ́ɨ mu majta huaꞌ jitze ajtyuꞌuj,

aꞌɨ́ɨ mu mij aꞌɨ́ɨn puéꞌeen ɨ maj jɨn uhuácacaꞌnyeꞌ ɨ Lot tyíꞌyojmuaꞌ.

⁹Aꞌyaa paj huóꞌuurej aꞌɨ́ɨjma patɨꞌɨj huóꞌruuj ɨ Madián maj jitze ajtyámaꞌcantacaꞌaj,

aꞌyájna patɨꞌɨj jáaruuj aꞌɨ́jcɨ ɨ Sísara,

aꞌyájna patɨꞌɨj jáaruuj aꞌɨ́jcɨ ɨ Jabín aꞌájna ɨ áchij jitze tɨ aꞌyan tyajaꞌrájtyapuaj tɨjɨn Quisón,

¹⁰ɨ maj antyipuáꞌriacaꞌ aꞌájna a Endor,

¡majta aꞌyan tyuꞌtyáhuɨɨ tɨꞌɨj ɨ chuéj japua tɨ tyiꞌjɨ́ꞌreꞌnyiꞌtareꞌ!

¹¹Aꞌyaa paj huóꞌuurej aꞌɨ́ɨjma ɨ tyétyacaa maj jéetzeꞌ juxɨeꞌveꞌ

patɨꞌɨj huóꞌruuj aꞌɨ́jcɨ ɨ Oreb pajta aꞌɨ́jcɨ ɨ Zeeb;

aꞌyaa paj néijmiꞌcaa huáꞌuurej ɨ maj huaꞌ jimi tyíꞌijta

aꞌyájna patɨꞌɨj huóꞌruuj aꞌɨ́jcɨ ɨ Zébah pajta aꞌɨ́jcɨ ɨ Salmuná,

¹²ɨ maj aꞌyan tyáꞌxɨeꞌvaꞌcaꞌaj maj tyuꞌtyóoaꞌrityeꞌen aꞌɨ́jcɨ ɨ Dios tɨ tyiꞌtachuéj.

¹³Nyaj Dios, aꞌyaa paj huóꞌuurej tɨꞌɨj tuꞌpíj tɨ viváajmaꞌaj tatyéꞌtyeꞌ ɨ maj jaaréꞌvejchacaꞌ,

tɨꞌɨj xamuáj tɨ huáchij áacaj tɨ yoꞌcuíxɨj;

¹⁴aꞌyájna tɨꞌɨj ɨ tɨéj tyuꞌriáꞌtɨeeraj aꞌ ɨtzitáj

ajta jeꞌen néijmiꞌi tyeꞌentyipuáꞌrityeꞌsij aꞌáa tɨ tyejéꞌsejreꞌ aꞌ ɨtzitáj,

¹⁵¡aꞌyaa pej pij muáaj tyihuoꞌtaváj

pajta huoꞌtamuárityeꞌen jeꞌej puaꞌaj petyiꞌuuriáj huaꞌ jimi víityee pajta áacaj jɨmeꞌ!

¹⁶¡Tavástaraꞌ, pataꞌaj tyéviꞌsiꞌ huoꞌtaséjrataj,

mataꞌaj mij muéetzij moꞌtámuaꞌree!

¹⁷Micheꞌ jusén jɨmeꞌ jutyéviꞌraꞌaj muáꞌraꞌnyij,

¡micheꞌ huatootyéviꞌraꞌastan majta jeꞌen huácuiꞌnyij!

¹⁸¡Micheꞌ jáamuaꞌreej paj muáaj panaꞌaj aꞌɨ́ɨn puéꞌeen ɨ Tavástaraꞌ,

paj muáaj panaꞌaj aꞌɨ́ɨn puéꞌeen ɨ tajapuá tɨ jáꞌsejreꞌ

ajta quee sɨ́ɨj ajtáhuaꞌaj yajáꞌhuaꞌ íiyan ɨ cháanacaj japua!

Ɨ tyaj jɨn jaxɨeꞌveꞌ ɨ chiꞌraꞌan ɨ Dios

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj, aꞌɨ́jcɨ jitze tyíꞌcanaa ɨ Gat. Yójmuaꞌmuaꞌ aꞌɨ́jcɨ ɨ Coré. Chuíicarij

¹¡Naa pu huápuɨꞌɨj huaséꞌrin aꞌ tyeyúuj,

Tavástaraꞌ muáaj paj néijmiꞌi putyíꞌuurej!

²¡Aꞌyaa nu jéehua tyáꞌxɨeꞌveꞌ nyajta aꞌyan tyáꞌhuoo

nyej nyij aꞌáa joꞌtyávaacaj a tɨ joꞌtyényinyiꞌij aꞌ tyeyúuj!

¡Néijmiꞌi jɨmeꞌ ɨ nyaxɨéjnyuꞌcaa

nyetyiꞌchuíicaj nyenyetyámuaꞌvaꞌaj aꞌɨ́jcɨ jimi ɨ Dios júuricamej tɨ jitzán séejreꞌ!

³Majta ɨ pínaꞌsee majta ɨ jeevíj

aꞌɨ́ɨ mu jatyoonyij joꞌmaj tyámuaꞌ jéꞌeenyeꞌ aꞌchíꞌij jitze

ajta joꞌmaj tyihuojoꞌtyéꞌitoꞌrityeꞌen ɨ juyójmuaꞌ,

muáaj paj Tavástaraꞌ néijmiꞌi putyíꞌuurej,

nyaj rey paj puéꞌeen pajta nyaj Dios.

⁴¡Múutyamuaꞌveꞌ aꞌɨ́ɨmaj ɨ maj aꞌúu jaꞌchej aꞌ tyeyúuj tzajtaꞌ

majta jeꞌen aꞌnáj tɨnaꞌaj tyíꞌmuatyojtziꞌreꞌ!

⁵¡Múutyamuaꞌveꞌ ɨ maj muéetzij jimi jatyoovej pej pij huoꞌtyáhuɨɨreꞌen,

ɨ maj aꞌyan tyáꞌxɨeꞌveꞌ maj juɨꞌɨcán aꞌáa joꞌréꞌnyej joꞌmaj mojoꞌtyáanajche!

⁶Matɨꞌɨj aꞌáa joojúꞌun joꞌtɨj ɨ cɨyéj joꞌváatɨmee bálsamo maj jatamuáꞌmuaj

aꞌyaa mu jaꞌuuren tɨꞌɨj joꞌtɨj jaꞌrájmuaa,

majta ɨ víityee mu majta tyámuaꞌ tyeetyátoosij;

⁷aꞌɨ́ɨ mu mij jéetzeꞌ huatyóocaꞌnyesij,

majta aꞌájna a Sión aꞌáa mu jaséjran ɨ Dios tɨ néijmiꞌi jɨn antyúumuaꞌreej.

⁸Tavástaraꞌ, Dios mu paj néijmiꞌi putyíꞌuurej pajta néijmiꞌi jɨn antyíaꞌmuaꞌreej,

Dios raꞌ aꞌɨ́jcɨ ɨ Jacob,

¡huánamuaj jeꞌej nyaj aꞌ jimi tyiꞌtyényuusij!

⁹Cásɨꞌ, nyaj Dios, tyámuaꞌ paj naa tyeeséj

aꞌɨ́jna ɨ tɨ aꞌɨ́ɨn puéꞌeen ɨ tɨ taatyáhuɨɨreꞌej

aꞌɨ́jna muáaj paj jaꞌantyíhuoj tɨꞌij rey puéꞌeenyeꞌ.

¹⁰¡Jéetzeꞌ pu nyaj séej xɨcáj aꞌáa joꞌtyávaacaj joꞌpaj muáaj jáꞌsejreꞌ,

quee nyaj séej víꞌraꞌaj xɨcáj aꞌ ɨmuáj jáꞌsejriaꞌaj!

Jéetzeꞌ nu jaxɨeꞌveꞌ nyaj aꞌáa tyajaꞌajmuárɨeꞌrij aꞌ tɨ joꞌtyényinyiꞌij ɨ tyeyúujraꞌ ɨ nyaj Dios

quee nyaj aꞌáa jaꞌchajca joꞌmaj jeꞌej puaꞌaj tyityejeꞌtyúuchaꞌɨj.

¹¹Jiꞌnye aꞌɨ́jna ɨ Dios ɨ tɨ Tavástaraꞌ puéꞌeen aꞌɨ́ɨ pu tatatzaviꞌtyeꞌ ajta tyámuaꞌ tyíꞌtaꞌchaꞌɨj,

Tavástaraꞌ pu huaꞌxɨeꞌveꞌ ajta huoꞌtyátzaahuatyeꞌsij aꞌɨ́ɨjma ɨ maj quee tyiꞌtɨ́j jɨn áꞌɨtzeereꞌ,

ajta néijmiꞌi tyihuoꞌtáꞌsij ɨ tɨ tyámuaꞌ tyíꞌeen.

¹²Tavástaraꞌ mu paj néijmiꞌi putyíꞌuurej pajta néijmiꞌi jɨn antyíaꞌmuaꞌreej,

¡micheꞌ huatóotyamuaꞌveꞌen aꞌɨ́ɨmaj ɨ maj muéetzij jitze tyíꞌcaꞌnyej!

Pajtáhuaꞌaj paj tajapuá huatányuunyij

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Chuíicarij aꞌɨ́ɨmaj maj joꞌyúꞌxacaꞌ ɨ yójmuaꞌmuaꞌ aꞌɨ́jcɨ ɨ Coré

¹Tavástaraꞌ, muáaj paj tyámuaꞌ naa huojoꞌmuaꞌraj aꞌyaa maj huacháatɨmee aꞌ chuéj japua;

pajta jájcuan jɨn tyámuaꞌ tyeetyájtoo aꞌɨ́jcɨ ɨ Jacob,

²pajta tyihuoꞌtúꞌuunyiꞌriꞌ tyiꞌtɨ́j maj jɨn jeꞌej puaꞌaj huarɨ́j aꞌtyéɨtyeristyamuaꞌ

pajta néijmiꞌi ɨ maj jɨn tyiꞌijxánaꞌcɨraꞌcaꞌaj;

³néijmiꞌi pu arí jɨn huatyápuaꞌriacaꞌ

ɨ paj jɨn nyuꞌcamuɨꞌcaꞌaj ajta ɨ tɨ muajaaxɨejtyaꞌcaꞌaj.

⁴Taj Dios pajta aꞌɨ́ɨn puéꞌeen ɨ tɨ tajapuá huatányuusij,

¡pataꞌaj ijíij tajapuá huatányuunyij

pajta jeꞌen quee cheꞌ ityájma tajaaxɨejviꞌraj!

⁵¿Caꞌ jusén jɨmeꞌ aꞌyan tyiꞌséereꞌej jaꞌmej

ɨ paj jɨn tajimí nyúꞌcamuɨꞌ?

⁶¿Nyi pequee cheꞌ júuricamej taatáꞌsij

mej mij aꞌtyéɨtyeristyamuaꞌ aꞌ jimi huatóotyamuaꞌveꞌen?

⁷Muáaj paj Tavástaraꞌ,

¡taataséjratyeꞌ ɨ paj jɨn taxɨeꞌveꞌ, pajta tajapuá huatányuunyij!

⁸Nyáanamuajran jeꞌej tɨ ɨ Tavástaraꞌ tyuꞌtaxájtaj;

jiꞌnye aꞌɨ́ɨ pu tyámuaꞌ naa tyihuoꞌtyéjeevij ɨ jutyéɨtyeristyamuaꞌ,

aꞌɨ́ɨjma ɨ maj jimi tyámuaꞌ een,

mej mij quee cheꞌ jeꞌej puaꞌaj tyityajaꞌhuóotɨmueꞌraj.

⁹Aꞌyaa pu tyiꞌjɨꞌréꞌcan jɨmeꞌ, Dios pu huápuɨꞌɨj yevéjriꞌ séejreꞌ,

tɨꞌij huaꞌ japua huatányuunyij aꞌɨ́ɨjma ɨ maj tzáahuatyiꞌraꞌaj jimi tyíchaꞌɨj,

aꞌɨ́jna ɨ tɨ jɨn naa huaséꞌrin pu tajamuán yeséeriaꞌaj jaꞌmej ɨ cháanacaj japua.

¹⁰Aꞌɨ́jna ɨ tɨ jɨn taxɨeꞌveꞌ ajta ɨ tɨ jɨꞌréꞌcan jɨmeꞌ aꞌɨ́ɨ mu aꞌ jóosejran,

ajta ɨ tɨ naa tyúꞌasej ajta ɨ tɨ tyámuaꞌ tyáꞌxaꞌpuɨꞌɨntareꞌ aꞌɨ́ɨ mu iityóopuɨꞌtzeꞌsij,

¹¹ɨ tɨ jɨꞌréꞌcan jɨmeꞌ pu chóotaꞌ ajnyésij

ajta ɨ tɨ tyámuaꞌ tyíꞌxaꞌpuɨꞌɨntareꞌ aꞌɨ́ɨ pu tajapuá ɨmuáj taséeraj jaꞌmej.

¹²Aꞌɨ́ɨ pu ɨ Tavástaraꞌ tyuꞌtáꞌsij mej mij huatyéviiyej,

ajta jeꞌen ɨ cháanacaj japua tyíꞌcɨɨren.

¹³Aꞌɨ́ɨ pu anaquéej huamaꞌaj jaꞌmej ɨ tɨ tyámuaꞌ tyáꞌxaꞌpuɨꞌɨntareꞌ,

ajta jeꞌen tyámuaꞌ tyíꞌuuren ɨ juyáaraꞌ jitze.

Muáaj papuꞌuj Dios puéꞌeen

Jeꞌej tɨ tyuꞌtyéenyuj aꞌɨ́jna ɨ David

¹Tavástaraꞌ, aꞌtzúj cuiꞌ náanamuaj,

jiꞌnye huápuɨꞌɨj nu nyaxaamujrityeꞌ nyajta quee jeꞌej tyéejviicueꞌ;

²tyámuaꞌ paj tyináachaꞌɨɨn, jiꞌnye tyámuaꞌ nu eenyeꞌ aꞌ jimi séejreꞌ.

Muáaj paj nyaj Dios puéꞌeen;

¡pataꞌaj japuan huatányuunyij aꞌíjcɨ ɨ tɨ muéetzij muahuɨɨreꞌ ajta aꞌ jitze tyíꞌcaꞌnyej!

³Tavástaraꞌ, nyéetzij náꞌancuꞌvaxɨꞌ

ɨ nyaj muéetzij jimi aꞌnáj tɨnaꞌaj jahuoo.

⁴Tavástaraꞌ, pataꞌaj caꞌnyíjraꞌaj jaatáꞌan aꞌɨ́jcɨ ɨ tɨ muéetzij muahuɨɨreꞌ,

jiꞌnye aꞌ jitze maꞌcan nu huatyényuusij.

⁵Jiꞌnye muáaj, Tavástaraꞌ, tyámuaꞌ paj tyihuojóꞌmuaꞌraj pajta tyúꞌuunyiꞌ;

néijmiꞌi paj jɨn huaꞌxɨeꞌveꞌ aꞌɨ́ɨjma ɨ maj muéetzij jimi jahuoo.

⁶Tavástaraꞌ, huánamuaj jeꞌej nyaj aꞌ jimi tyáꞌhuoo

¡pajta aꞌyan huárɨnyij jeꞌej nyaj tyíꞌmuahuaviij!

⁷Muéetzij jimi nu huatyényuusij nyatɨꞌɨjta quee jeꞌej jájtyooveꞌen,

jiꞌnye muáaj paj naatájeevij.

⁸¡Capu sɨ́ɨj ajtáhuaꞌaj séejreꞌ tɨ aꞌyan eenyeꞌ patɨꞌɨj muáaj, Tavástaraꞌ!

¡Capu sɨ́ɨj ajtáhuaꞌaj jaayíꞌtɨn tɨ aꞌyan tyuꞌmuárɨeꞌen patɨꞌɨj muáaj!

⁹Muáaj paj Tavástaraꞌ,

muáaj paj néijmiꞌcaa huátahuaacaꞌ ɨ tyeɨ́tyee,

aꞌɨ́ɨ mu mij mujoꞌváꞌjuꞌuj muáꞌjuꞌun mej mij muatyáanajche,

ajta mej mij tyámuaꞌ tyeetyátoonyij ɨ paj jɨn ántyapuaj.

¹⁰Jiꞌnye muáaj papuꞌuj Dios puéꞌeen,

¡muáaj paj vaꞌcán jɨn tyíꞌmuarɨeꞌ ajta naa tyihuaꞌséjratyeꞌ aꞌ jitze tɨ tyíꞌsejreꞌ!

¹¹Nyavástaraꞌ, naataséjratyeꞌ aꞌ juyéj,

nyej nyij nyáaj jɨꞌréenyaꞌaj aꞌɨ́j jitze ucájrutyej.

Tyámuaꞌ paj jáaꞌuurej ɨ nyaj xɨéjnyuꞌcaa taꞌaj ij muaatyátzaahuatyeꞌen.

¹²Nyavástaraꞌ pajta nyaj Dios,

néijmiꞌi nu ɨ nyaxɨéjnyuꞌcaa jɨn tyimuaatatyójtziꞌreꞌej

nyajta aꞌnáj tɨnaꞌaj tyámuaꞌ tyaataxájta ɨ paj jɨn ántyapuaj.

¹³¡Vaꞌtɨ́j pu nye jitze séejreꞌ ɨ paj jɨn nyaxɨeꞌveꞌ!

¡Nyaj japua paj huatanyúj nyej nyij quee aꞌáa joꞌtyáꞌɨtzeereꞌen joꞌmaj tyityajáꞌavaꞌtacaa!

¹⁴Nyaj Dios, mueꞌtɨ́j mu ɨ maj axáa tyíꞌjepeꞌ majta ɨ tɨ huaꞌráanajchi maj junyoꞌsiꞌtyeꞌej

ɨ maj quee muéetzij muamuaꞌtyej,

aꞌɨ́ɨ mu nyéetzij nyéjchaꞌɨɨreꞌ majta jaxɨeꞌveꞌ maj naajéꞌcaj.

¹⁵Pajta muáaj, Tavástaraꞌ,

Dios paj puéꞌeen tɨ tyámuaꞌ tyihuojóꞌmuaꞌraj pajta tyihuaꞌcuꞌvej,

pajta quee jiyeꞌtzín tyinyúꞌcacaa, muáaj paj jɨꞌréꞌcan jɨn taxɨeꞌveꞌ.

¹⁶Naaséj, nyéetzij náꞌancuꞌvaxɨꞌ.

¡Pataꞌaj japuan huatányuunyij aꞌɨ́jcɨ ɨ tɨ muahuɨɨreꞌ!

¡Caꞌnyíjraꞌaj paj jaatáꞌan!

¹⁷Tyámuaꞌ paj naa tyinaataséjratyeꞌen ɨ paj jɨn tyámuaꞌ tyíꞌtyevij,

mataꞌaj mij huatóotyeviꞌraꞌastaj matɨꞌɨj jaaséj aꞌɨ́ɨmaj ɨ maj nyaxanaꞌveꞌ.

¡Muáaj, Tavástaraꞌ, muáaj paj nyahuɨɨreꞌ pajta tyámuaꞌ tyinaatyéjeevij!

Chuíicariaꞌraꞌ ɨ chájtaꞌnaj Dios tɨ jitze ajtyámaꞌcan

Chuíicarij ajta cuíinarij aꞌɨ́ɨmaj maj joꞌyúꞌxacaꞌ ɨ yójmuaꞌmuaꞌ aꞌɨ́jcɨ ɨ Coré

¹Aꞌɨ́jna ɨ tɨ jitzán ájtaavijhuacaꞌ ɨ chájtaꞌnaj Dios tɨ jaꞌaꞌrij

aꞌɨ́j pu jitze séejreꞌ ɨ jɨríj tɨ naa een.

²Ɨ Tavástaraꞌ pu jaxɨeꞌveꞌ ɨ puéertaj aꞌáa tɨ jɨn tyejeꞌtyánamiꞌ a Sión

ajta quee aꞌyan tyiꞌtɨ́j séej ajtáhuaꞌaj aꞌɨ́jcɨ tyíaꞌrij ɨ Jacob.

³Chájtaꞌnaj Dios tɨ jaꞌaꞌrij,

jéehua mu tyámuaꞌ naa muéetzij tyíꞌmuaxaj:

⁴“Huaꞌ tzajtaꞌ ɨ chájtaꞌnaj ɨ maj nyamuaꞌtyej

ɨꞌríj nyaj aꞌɨ́j huataxáj ɨ Egipto nyajta ɨ Babilonia,

aꞌɨ́jcɨ ɨ Filistea, Tiro nyajta ɨ Etiopía,

néijmiꞌi mu aꞌɨ́ɨmaj a jitze eeráanyej.”

⁵Aꞌyaa mu tyuꞌtaxájtaj aꞌájna chájtaꞌ Sión tɨ tyajaꞌrájtyapuaj tɨjɨn:

“Aꞌíjna ajta aꞌáa tɨ séejreꞌ aꞌɨ́j mu jitze eeráanyej ɨ Sión.”

Aꞌɨ́jna ɨ tajapuá tɨ ɨmuáj jáꞌsejreꞌ pu aꞌyan tyaataxájtacaꞌ.

⁶Tavástaraꞌ pu aꞌyan tyéꞌyuꞌxaj ɨ yuꞌxarij jitze

aꞌɨ́jcɨ ɨ chájtaꞌnaj tɨ jimi aꞌyan tyiꞌtyéevijtɨj tɨ tyámuaꞌ een aꞌyaa pu tyéꞌyuꞌxaj tɨjɨn:

“Aꞌíi pu aꞌɨ́j jitze eerámaꞌcan.”

⁷Majta ɨ maj tyíꞌchuiicaj majta ɨ maj tyíꞌnyeꞌ aꞌyaa mu tyíꞌxaj tɨjɨn:

“Ɨ nye chiꞌij muéetzij pu jitze séejreꞌ.”

Tavástaraꞌ ¿jiꞌnye pej pij manúujɨpuaj?

Chuíicarij aꞌɨ́ɨmaj maj jaꞌaꞌrij ɨ Coré tyíꞌyojmuaꞌ. Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj, mej mij jaatáchuiicaj tɨꞌɨjta sɨ́ɨj tyíꞌcuiꞌij. Jeꞌej tɨ tyihuoꞌmuáꞌtyej aꞌɨ́jna ɨ Hemán, aꞌɨ́ɨjma tɨ jitze ajtyámaꞌcan ɨ ezrahitas, mataꞌaj mij jaatáchuiicaj

¹Tavástaraꞌ, nyaj Dios ajta ɨ tɨ nyajapuáj huatányuusij,

tújca nyajta tɨ́caꞌ muéetzij nu muahuavii pej pij naatáhuɨɨreꞌen,

²¡ancuriáaꞌ jeꞌej nyaj aꞌ jimi tyáꞌhuoo!,

¡pajta aꞌyan huárɨnyij jeꞌej nyaj tyíꞌmuahuaviij!

³Jéehua pu ɨ tɨ jeꞌej puaꞌaj een nye jitze tɨ arí huatyáꞌɨtzee,

aꞌɨ́j nu jɨn nyeríj tɨn huatámuɨꞌsij,

⁴¡puꞌríj ɨꞌríj maj naatyéꞌiten aꞌɨ́ɨjma jamuán ɨ muɨꞌchítyee,

jiꞌnye canu cheꞌ uhuájcaꞌnyej!

⁵Aꞌáa mu meríj nyojóorɨej huaꞌ tzajtaꞌ ɨ maj meríj huácuij;

aꞌyaa nu een matɨꞌɨj ɨ maj huácuij matɨꞌɨj huatyéenyoꞌsej

majta jeꞌen meríj huoꞌtyáꞌavaatacaꞌ;

aꞌyájna matɨꞌɨj ɨ maj meríj yoꞌrɨej muáaj paj jɨn huoꞌtyáhuɨɨreꞌen

pajta jeꞌen muáaj períj huojoꞌhuáꞌxɨj.

⁶Muáaj paj aꞌáa nyejeꞌtyájrɨee a tɨ jéetzeꞌ tyétyeꞌ ɨmuáj joꞌcácun,

aꞌájna joꞌtɨj joꞌtɨ́caꞌ ajta jeꞌej puaꞌaj éenyeꞌqueꞌ.

⁷Nyejitzé pu ráꞌaj ɨ paj jɨn nyúꞌcamuɨꞌ,

¡pajta anyojoꞌcáarujtye tɨꞌɨj jáataꞌ aꞌɨ́jcɨ jitze ɨ tɨ huápuɨꞌɨj tyúꞌtyesiꞌhuarityeꞌ!

⁸Muáaj paj tyuꞌtáꞌ mej mij manúurɨeenyij ɨ nyaꞌamíincustyamuaꞌ,

pajta tyuꞌtáꞌ mej mij aꞌɨ́ɨmaj quee nyaxɨeꞌveꞌ.

¡Aꞌyaa nu een tɨꞌɨj ɨ tɨ námiꞌ tɨ quee pújoorej tɨꞌij huatóoꞌuunaj!

⁹Nyajta quee cheꞌ tyámuaꞌ tyaꞌtányeej aꞌɨ́jcɨ jɨmeꞌ nyaj huápuɨꞌɨj nyeyiin.

¡Aꞌnáj tɨnaꞌaj nu muéetzij jimi jahuoo, Tavástaraꞌ,

nyajta muéetzij jimi ajméjcaꞌtaxɨꞌɨj!

¹⁰¿Nyi tyiꞌtɨ́j jɨn jeꞌej parɨnyij aꞌɨ́ɨjma jimi ɨ maj meríj huácuij tyej tyij jeꞌej tyoꞌtaséj?

¿Nyi jeꞌej tyíɨꞌrij mej mij aꞌɨ́ɨmaj tyimuaatatyójtziꞌreꞌen ɨ muɨꞌchítyee?

¹¹¿Nyi aꞌɨ́j muaataxájta ɨ tɨ jɨꞌréꞌcan jɨmeꞌ majta ɨ paj jɨn taxɨeꞌveꞌ

aꞌájna joꞌmaj tyityajáꞌavaꞌtacaa, joꞌtɨj aꞌɨ́ɨn tyejéꞌijtaj ɨ tɨ tyeꞌentyípuaapuaꞌrityee?

¹²Aꞌájna joꞌtɨj jáꞌsejreꞌ ɨ tɨ tyeꞌentyípuaapuaꞌrityee, majta néijmiꞌcaa jóꞌhuaꞌnaj,

¿nyi sɨ́ɨj séeriaꞌaj jaꞌmej tɨ jáamuaꞌtyij paj tyámuaꞌ tyíꞌuurej ajta ɨ paj jɨn vaꞌcán jɨn néijmiꞌi putyíꞌuurej?

¹³Nyajta nyáaj, Tavástaraꞌ, muéetzij nu jimi jahuoo,

tɨꞌɨjta ariáꞌpuaꞌaj muéetzij jimi nu huatyényuusij.

¹⁴¿Jiꞌnye pej pij manúujɨpuaj, Tavástaraꞌ?

¿Jiꞌnye pej pij nye jimi jaꞌavaaj?

¹⁵Nyatɨꞌɨj nyanaꞌaj tyúꞌtyamueestariacaꞌ

jeꞌej nu tyéꞌnyamuaꞌtzej nyajta áꞌviicueꞌreꞌ nyej nyij quee huámuɨꞌnyij,

nyetyoꞌviicueꞌriꞌ ɨ tɨ jéehua tyíꞌtyesiꞌ muéetzij tɨ jimi tyojoꞌvéꞌmej,

canu nyij cheꞌ tyéꞌviicueꞌ.

¹⁶Nye jitze pu arí yan huatyéenyej ɨ paj jɨn nyúꞌcamuɨꞌ,

ajta jeꞌen naꞌantyimuéꞌtɨj;

¹⁷aꞌɨ́ɨ pu aꞌnáj tɨnaꞌaj néijmiꞌqueꞌ nyeriaꞌnaa,

aꞌyájna tɨꞌɨj tɨpuaꞌaj jáataꞌ anyoꞌcájrutyej.

¹⁸Camu cheꞌ nye jimi yajáꞌhuaꞌ ɨ nyaꞌ amíincustyamuaꞌ nusu ɨ maj nyamuaꞌtyej,

aꞌɨ́ɨ puꞌquij ɨ tɨ́caꞌrij nyajamuan yésejreꞌ.

Tyiꞌtɨ́j tɨ jɨn ɨ Dios tyaꞌtóoratziiriꞌ aꞌɨ́jcɨ jimi ɨ David

Jeꞌej tɨ tyihuoꞌmuáꞌtyej aꞌɨ́jna ɨ Etán ɨ tɨ aꞌɨ́ɨmaj jitze ajtyámaꞌcan ɨ ezrahíta

¹Tavástaraꞌ, aꞌnáj tɨnaꞌaj nu jaataxájtaj nyatɨꞌɨjta tyíꞌchuiicaj

paj muáaj tyámuaꞌ naa tyihuojóꞌmuaꞌraj;

tɨꞌɨj púnaꞌaj nu jaxáataj naꞌmej

paj muáaj quee tyiꞌtɨ́j jɨn áꞌɨtzeereꞌ.

²Nyaataxájta tɨ jusén jɨmeꞌ séejreꞌ ɨ paj jɨn taxɨeꞌveꞌ;

ajta ɨ paj jɨn tyámuaꞌ een quee seequéj juꞌuurej,

aꞌyájna tɨꞌɨj quee seequéj tyúuꞌuurej ɨ tajapuá tɨ séejreꞌ.

³Tyiꞌtɨ́j paj jɨn tyaꞌtáꞌratziiriꞌ aꞌɨ́jcɨ jimi ɨ David;

aꞌyaa paj tyaꞌtáratziiriꞌ aꞌɨ́jcɨ ɨ paj jaꞌantyíhuoj tɨjɨn:

⁴“Nyetyuꞌtaꞌsij mej mij ɨ maj aꞌ jitze eerámaꞌcan

jusén jɨmeꞌ aꞌ jitze maꞌcan tyuꞌtaꞌíjtaj.”

⁵Muáaj paj Tavástaraꞌ puéꞌeen,

néijmiꞌi ɨ maj tajapuá jáꞌsejreꞌ

aꞌɨ́ɨ mu tyíꞌmuatyojtziꞌreꞌ aꞌɨ́jcɨ jɨmeꞌ paj tyámuaꞌ een pajta tyámuaꞌ tyíꞌuurej.

⁶¡Capu sɨ́ɨj dios ajtáhuaꞌaj séejreꞌ, aꞌújna u tajapuá

tɨꞌij aꞌyan eenyeꞌ patɨꞌɨj muáaj, Tavástaraꞌ!

⁷Dios paj vaꞌcán jɨn antyíaꞌmuaꞌreej pajta áꞌtyesiꞌreꞌ,

aꞌɨ́ɨmaj mu muéetzij jimi ataváatɨmee ɨ maj muahuɨɨreꞌ.

⁸Tavástaraꞌ, Dios mu paj néijmiꞌi putyíꞌuurej pajta néijmiꞌi jɨn antyíaꞌmuaꞌreej.

Néijmiꞌi pu muéetzij muaꞌ aꞌrij ɨ paj jɨn putyíꞌuurej pajta aꞌɨ́j jɨn cánamiꞌ ɨ tɨ jɨꞌréꞌcan jɨmeꞌ;

¡capu sɨ́ɨj ajtáhuaꞌaj séejreꞌ aꞌyájna patɨꞌɨj muáaj!

⁹Muáaj paj pújoorej paj jaatyápuaꞌrityeꞌen ɨ jájrij tɨ áꞌxɨreꞌej caꞌnyíin jɨmeꞌ

pajta jaatyápuaꞌrityeꞌsij ɨ tɨ jéehua atyúutaꞌhuaꞌaj,

¹⁰pajta jaꞌvéꞌtzij aꞌɨ́jcɨ ɨ tɨ tzɨ́ɨnyiꞌreꞌ aꞌájna a jájritzeꞌ

aꞌyájna tɨꞌɨj muɨꞌchíj tɨ puéꞌeenyeꞌ,

pajta huojoꞌcuíxɨj aꞌɨ́ɨjma ɨ maj muájchaꞌɨɨreꞌ

aꞌɨ́jcɨ jɨmeꞌ ɨ paj jɨn uhuájcaꞌnyej aꞌmuácaꞌ jɨmeꞌ.

¹¹Aꞌɨ́jna ɨ tajapuá tɨ séejreꞌ ajta ɨ cháanacaj muéetzij pu tyíꞌmuaꞌaꞌrij;

muáaj paj jaatyátaahuacaꞌ ɨ cháanacaj pajta néijmiꞌi aꞌɨ́j tɨ jitze tyíꞌsejreꞌ.

¹²Muáaj paj jaatyátaahuacaꞌ ajtyapuáj tɨ ɨmuáj jáꞌsejreꞌ pajta áatyej tɨ pujmuaꞌ séejreꞌ,

aꞌɨ́jna ɨ jɨríj Tahor tɨ ántyapuaj ajta ɨ Hermón aꞌɨ́ɨ mu jutyamuaꞌveꞌej aꞌ jimi tyíꞌchuiicaj.

¹³Muaꞌ muácaꞌ pu néijmiꞌi putyíꞌuurej,

pajta amuácaꞌtaꞌ jéehua uhuájcaꞌnyej pajta néijmiꞌi jɨn tyuꞌtyámueꞌtɨj.

¹⁴Aꞌ ɨpuáaj pu tyámuaꞌ een aꞌɨ́jcɨ jitze ɨ paj jɨn tyáꞌxaꞌpuɨꞌɨntareꞌ ajta aꞌɨ́jcɨ jitze ɨ tɨ huatóojeꞌyej,

aꞌɨ́jna ɨ paj jɨn taxɨeꞌveꞌ ajta ɨ paj jɨn tyámuaꞌ een aꞌɨ́ɨ mu muaꞌantyinájchij.

¹⁵Muáaj paj Tavástaraꞌ, micheꞌ huatóotyamuaꞌveꞌen aꞌɨ́ɨmaj ɨ maj jutyamuaꞌveꞌej metyíꞌmuatyojtziꞌreꞌ

majta tyámuaꞌ naa tyityaajúꞌ aꞌɨ́jcɨ jɨmeꞌ muáaj paj huáꞌtatzaviꞌtyeꞌ,

¹⁶majta aꞌ jitze maꞌcan aꞌnáj tɨnaꞌaj jutyamuaꞌveꞌ

ajta tyámuaꞌ huaꞌasej paj muáaj jɨꞌréenyeꞌej séejreꞌ.

¹⁷Aꞌyaa pu tyiꞌjɨꞌréꞌcan jɨmeꞌ, muáaj paj aꞌɨ́ɨn puéꞌeen ɨ maj jɨn uhuájcaꞌnyej ajta ɨ maj jɨn naa huaséꞌrin;

tyajta tyeríj jéetzeꞌ néijmiꞌi putyíꞌuurej aꞌɨ́jcɨ jɨmeꞌ paj muáaj tyámuaꞌ tyaꞌajxɨéꞌviꞌraꞌ tajimí.

¹⁸¡Aꞌɨ́ɨ pu ɨ Tavástaraꞌ aꞌɨ́ɨn puéꞌeen ɨ tɨ taatyáhuɨɨreꞌej!

¡Aꞌɨ́jna ɨ tɨ rey jɨn tyiꞌtyéjvee tajimí aꞌɨ́ɨ pu aꞌɨ́ɨn puéꞌeen ɨ tɨ jɨꞌréenyeꞌej séejreꞌ a Israel!

¹⁹Aꞌnáj ɨmuáj paj aꞌyan tyuꞌtaxájtacaꞌ aꞌɨ́jcɨ jitze ɨ tɨquee jeꞌej ámiteereꞌ ɨ tɨ aꞌyáanaꞌaj cuxáa tɨ tyiꞌtyámaarasimeꞌen,

aꞌyaa pej pij tyihuoꞌtéꞌexaaj aꞌɨ́ɨjma ɨ maj tyámuaꞌ een a jimi tɨjɨn:

“Séej nu nyeríj antyíhuo aꞌɨ́ɨjma jimi ɨ nyetyeɨ́ɨtyeristyamuaꞌ,

nuꞌríj vaꞌcán jɨn tyeꞌentyáarujtyej nyajta jaatyáhuɨɨ.

²⁰¡Aꞌɨ́j nu nyeríj huátyoj ɨ David ɨ tɨ nyahuɨɨreꞌ!

Aꞌɨ́j nu nyeríj jaꞌváꞌhuaaj ɨ aséityij nyajta jeꞌen rey jɨn tyeꞌentyáarujtyej,

²¹nyajta jeꞌen aꞌnáj tɨnaꞌaj jaatyáhuɨɨreꞌej.

Aꞌɨ́j nu jɨn ɨ nyaj néijmiꞌi jɨn putyíꞌuurej jaatáꞌsij tɨꞌij huatyóocaꞌnyej,

²²camu mij jaatanyoꞌsiꞌtyeꞌej ɨ maj jájchaꞌɨɨreꞌ

camu majta jaꞌantyimuéꞌtɨj ɨ maj jeꞌej puaꞌaj tyityetyúuchaꞌɨj.

²³Nyahuoꞌtzíinajraꞌaj aꞌɨ́ɨjma ɨ maj jájchaꞌɨɨreꞌ,

¡mej mij quee cheꞌ ajaꞌhuaꞌtan aꞌjɨ́ɨsaꞌpuaj!

¡Nyahuaꞌantyipuaꞌrityeꞌsij aꞌɨ́ɨjma ɨ maj jájchaꞌɨɨreꞌ!

²⁴Aꞌɨ́j pu jitze séeriaꞌaj jaꞌmej ɨ nyaj jɨn jaxɨeꞌveꞌ ajta ɨ nyaj jɨn tyámuaꞌ tyiꞌtyínyechaꞌɨj,

ajta jeꞌen nyaj jɨmeꞌ huatámuiꞌrij ɨ tɨ jɨn néijmiꞌi putyíꞌuurej.

²⁵Tyámuaꞌ nu jaꞌuuren aꞌɨ́jcɨ ɨ tɨ néijmiꞌi jɨn putyíꞌuurej ajta ɨ tɨ jɨn tyíꞌijta

tɨꞌɨj naꞌaj aꞌájna a Mediterráneo ajta aꞌájna ɨmuáj a Éufrates.

²⁶Aꞌɨ́ɨ pu aꞌyan tyinaatéꞌexaatyeꞌsij tɨjɨn: Muáaj paj nyavástaraꞌ puéꞌeen;

muáaj paj nyaj Dios puéꞌeen, ɨ tɨ nyajapuáj huatányuusij ajta naatyéchaꞌɨɨsij.”

²⁷Nyáaj nu nyij aꞌɨ́j tyaataꞌsij aꞌɨ́j tɨ tyíꞌcɨꞌpuaj ɨ tɨ anaquéej huanɨeꞌhuacaꞌ,

quee tyiꞌtɨ́j maj tyíchaꞌɨj íiyan cháanacaj japua maj tyíꞌijta.

²⁸Ɨ nyaj jɨn jaxɨeꞌveꞌ pu jusén jɨmeꞌ jimi séeriaꞌaj jaꞌmej,

ajta jimi tyámuaꞌ éenyeꞌej jaꞌmej ɨ nyaj jɨn tyaꞌtányaratziiriꞌ.

²⁹Aꞌɨ́ɨ mu jitzán maꞌcan jusén jɨmeꞌ tyuꞌtaꞌíjtaj ɨ maj jitzán eerányesij,

tɨꞌɨj ooj séjreꞌej ɨ tajapuá tɨ séejreꞌ.

³⁰’Ajta tɨpuaꞌaj aꞌɨ́ɨmaj meyoꞌhuaꞌxɨj jeꞌej nyaj tyihuoꞌmuáꞌtyej

majta quee aꞌyan tyíꞌtyechajcaj jeꞌej nyej nyáaj tyuꞌtaꞌíjtacaꞌ,

³¹tɨpuaꞌaj muáꞌɨtzeeriaꞌaj ɨ nyenyúucaa jitze

majta quee jáꞌastijriaꞌaj ɨ nyaj jɨn tyuꞌtaꞌíjtacaꞌ,

³²puéjtzij nu huoꞌtaꞌsij aꞌɨ́jcɨ jɨmeꞌ maj quee nyanamuaj majta jeꞌej puaꞌaj tyityetyúuꞌchaꞌɨɨj

aꞌɨ́j nu jɨn puéjtzij huoꞌtaꞌsij ɨ nyacɨyéj,

³³ajta canu jaatapuáꞌcɨtaj nyaj jaxɨeꞌveꞌ aꞌɨ́jcɨ ɨ David,

nyajta quee tyiꞌtɨ́j jɨn ootyáꞌɨtzeereꞌsij ɨ nyaj jɨn jimi tyámuaꞌ een.

³⁴Canu jaatáxaahuataj tyiꞌtɨ́j nyaj jɨn tyaꞌtányaratziiriꞌ

canu nyajta ootyáꞌɨtzeereꞌej aꞌɨ́jcɨ jitze ɨ nyenyúucaa.

³⁵Séej nuꞌuj jimi tyaꞌtányaratziiriꞌ aꞌɨ́jcɨ jɨmeꞌ nyaj tyámuaꞌ een

canu nyij jacuanamuan:

³⁶aꞌɨ́ɨ mu jitzán maꞌcan jusén jɨmeꞌ tyuꞌtaꞌíjtaj ɨ maj jitzán eerányesij,

tɨꞌɨj ooj ɨ xɨcáj séjreꞌej.

³⁷¡Aꞌnáj tɨnaꞌaj mu tyámuaꞌ éenyeꞌej muáꞌjuꞌun, aꞌyájna tɨꞌɨj ɨ máxcɨrɨeꞌ!

¡Aꞌnáj tɨnaꞌaj mu tyámuaꞌ éenyeꞌej muáꞌjuꞌun, tɨꞌɨj ooj séjreꞌej ɨ tajapuá tɨ séejreꞌ!”

³⁸Ajta aꞌyájna, papuꞌríj majúurɨej pajta jaataxánaꞌvej

aꞌɨ́jcɨ ɨ rey muáaj paj jaꞌantyíhuoj,

¡pajta jimi tyinyúꞌcacaꞌ!

³⁹Papuꞌríj jaatyúꞌuj ɨ paj jɨn tyaꞌtáratziiriꞌ aꞌɨ́jcɨ ɨ tɨ muahuɨɨreꞌ;

pajta aꞌchóotaꞌ yaꞌrájrɨee ɨ cúruun aꞌɨ́ɨn tɨ jaꞌaꞌrij.

⁴⁰Muáaj paj muiꞌcaquej jarácuunaxɨj ɨ tɨ jɨn curiáꞌnamiꞌ;

¡pajta néijmiꞌi huatyuꞌuj ɨ chájtaꞌnaj!

⁴¹Néijmiꞌi mu ɨ maj mu jóꞌcɨꞌɨj tyíꞌnahuaꞌ tyiꞌtɨ́j maj aꞌyan tyíꞌxɨeꞌveꞌ,

aꞌɨ́ɨmaj mu jeꞌej puaꞌaj tyáꞌxaj ɨ maj a véjriꞌ huacháatɨmee.

⁴²Aꞌyaa paj tyuꞌtáꞌ mej mij ɨ maj jájchaꞌɨɨreꞌ

ajméjcaꞌtaxɨꞌɨn muutyámuaꞌvaꞌaj aꞌɨ́jcɨ jɨmeꞌ maj tyuꞌtyáamueꞌtɨj.

⁴³Pajta juꞌtyaxɨ́ɨtyaꞌajraa ɨ tɨ jɨn tyíꞌɨtzɨj ɨ chuumájraꞌ

capáj pajta jáachaꞌɨj tɨꞌɨj huatyéenyoꞌsej.

⁴⁴Papuꞌríj huáariꞌriꞌ ɨ maj jɨn naa huaséꞌrin,

pajta atyojoꞌhuaꞌastɨ́raa a chóotaꞌ ɨ tyihuáꞌ ɨpuáaj maj jitzan acáatyaꞌaj muáꞌcɨꞌɨj,

⁴⁵pajta quee cheꞌ jaatáꞌ tɨꞌij jéehua nyinyiꞌraꞌaj áꞌtyeeviꞌin

pajta jeꞌen huápuɨꞌɨj tyéviꞌsiꞌ jaataséjratacaꞌ.

⁴⁶Muáaj paj Tavástaraꞌ puéꞌeen,

¿aꞌchunyéj pooj áꞌtyeeren puaꞌaváataj?

¿Nyi jusén jɨmeꞌ aꞌtáaj jaꞌmej ɨ paj jɨn nyúꞌcamuɨꞌ, aꞌyájna tɨꞌɨj ɨ tɨéj?

⁴⁷Tavástaraꞌ, ootámuaꞌreej nyaj quee aꞌchu áꞌtyeeren nyaj júurij;

tɨ aꞌɨ́jna ɨ tyévij, muáaj paj jaatyátaahuacaꞌ, quee aꞌchu áꞌtyeeren.

⁴⁸¡Capu aꞌtɨ́j pújoorej tɨ júurij ajta jeꞌen quee aꞌnáj huámuɨꞌnyij!

¡Capu aꞌtɨ́j pújoorej tɨꞌij quee huámuɨꞌnyij!

⁴⁹Tavástaraꞌ, ¿joꞌnyij jeꞌen aꞌɨ́jna ɨ paj anaquéej jɨn taaxɨéꞌvej,

ɨ paj jaꞌtáratziiriꞌ ɨ David aꞌɨ́jcɨ jɨmeꞌ ɨ paj jɨn tyámuaꞌ een?

⁵⁰Tavástaraꞌ, huoꞌtámuaꞌree aꞌɨ́ɨjma ɨ maj muahuɨɨreꞌ

maj jéehua ɨ tyeɨ́tyee jeꞌej puaꞌaj tyihuáꞌxaj;

tɨ nye jitze séejreꞌ aꞌɨ́jna ɨ maj jɨn jeꞌej puaꞌaj tyihuáꞌxaj.

⁵¹Muáaj paj Tavástaraꞌ puéꞌeen,

¡aꞌyaa mu jeꞌej puaꞌaj tyíꞌtaxaj ɨ maj muájchaꞌɨɨreꞌ!

¡Aꞌyaa mu aꞌnáj tɨnaꞌaj jeꞌej puaꞌaj tyáꞌxaj aꞌɨ́jcɨ ɨ paj jaꞌantyíhuoj!

⁵²Cheꞌ jusén jɨmeꞌ tyámuaꞌ éenyeꞌej séjreꞌej ɨ Tavástaraꞌ.

¡Cheꞌ aꞌyan tyáꞌraꞌnyij!

Ɨ Dios tɨ jusén jɨmeꞌ séejreꞌ ajta ɨ tyévij tɨ quee aꞌchu jucaꞌnyej

Jeꞌej tɨ tyuꞌtyéenyuj aꞌɨ́jna ɨ Moisés, tyévij Dios tɨ jitze ajtyámaꞌcan

¹Tavástaraꞌ, muáaj paj aꞌɨ́ɨn puéꞌeen ɨ tɨ tahuɨɨreꞌ

tyatɨꞌɨj tyanaꞌaj áꞌtɨjtɨꞌrej tyajúurij.

²Tɨꞌɨj quee eexúj majaꞌhuáꞌtacaj ɨ jɨríj

ajta quee majaꞌhuáꞌtacaj ɨ chuéj ajta cháanacaj,

tɨꞌɨj naꞌaj ajcaꞌhuáꞌ ɨmuáj tɨ putyajáꞌrɨjcaa,

ajta jeꞌej tɨ ooj yetyojooméj,

muáaj paj Dios puéꞌeen.

³Aꞌyaa paj jaꞌuurej ɨ tyévij tɨꞌij ajtáhuaꞌaj chuéj huatyóotaahuaj

patɨꞌɨjta aꞌyan tyuꞌtaxáj tɨjɨn: “Siajtáhuaꞌaj xu chuéj huatyóotaahuaj, muaꞌaj tyeɨ́tyee.”

⁴Aꞌyaa pu tyiꞌjaꞌyájna, séej víꞌraꞌaj nyinyiꞌraꞌaj, muéetzij jimi,

aꞌyaa pu tɨꞌɨj tajquíj tɨ putyiꞌrɨjcáj, tɨ oochán yujoꞌmej.

¡Aꞌyaa pu aꞌchu tɨ arí caa tyooméj ɨ tɨ́caꞌrij!

⁵Pajta huoꞌtyásaꞌrɨeechij aꞌɨ́ɨjma ɨ tyeɨ́tyee caꞌnyíin jɨmeꞌ,

mej mij jiyeꞌtzín jóꞌvetyij tɨꞌɨj ɨ tɨ tyúꞌmaaracaꞌ,

⁶aꞌyaa mu een tɨꞌɨj ɨ tuꞌpíj, tɨ ájnyinyiij ajta íiyaꞌ huataxútɨeꞌsij,

ajta tɨꞌɨjta chúmuaꞌ aj pu huatyáhuasij ajta jeꞌen muɨꞌnyij.

⁷Aꞌyaa pu tyiꞌjaꞌyájna, aꞌɨ́j paj jɨn taꞌantyipuáꞌrityeꞌsij ɨ paj jɨn nyúꞌcamuɨꞌ,

¡ajta jeꞌen jeꞌej puaꞌaj tyitojoꞌhuaꞌnaj!

⁸Aꞌɨ́jna ɨ tyíꞌtaxanaꞌcɨraꞌ ajta ɨ tyaj jɨn jeꞌej puaꞌaj rɨcɨj

aꞌɨ́ɨ pu tyámuaꞌ naa tyuꞌtaséjreꞌsij muéetzij jimi.

⁹Aꞌyaa pu tyiꞌjaꞌyájna, néijmiꞌi ɨ tajúuricamej

aꞌɨ́j pu jɨn antyipuaꞌrij ɨ paj jɨn nyúꞌcamuɨꞌ;

ajta ɨ nyinyiꞌraꞌaj ɨ tyaj jitzán júurij aꞌyaa pu tyajaꞌhuóopuaꞌrixɨj tɨꞌɨj séej nyaj ucayáatɨraꞌnyij.

¹⁰Huéeicatyej japuan tamuáamuataꞌ nyinyiꞌraꞌaj tu áꞌtɨjtɨꞌ tyajúurij,

ajta ɨ maj jéetzeꞌ uhuácacaꞌnyeꞌej muáacuatyej nyinyiꞌraꞌaj mu áꞌtɨjtɨꞌ,

ajta capu tyiꞌtɨ́j huɨɨreꞌ maj aꞌɨ́jna jɨn óotzaahuatyeꞌej maj jéehua áꞌtyeeviꞌin

aꞌyaa puꞌuj tyíꞌhuɨɨreꞌ mej mij jaapuéjtzitarej ajta muárɨeꞌrij mej mij huóochaꞌɨɨn.

¡Jiyeꞌtzín pu mu jóꞌyiꞌij ɨ nyinyiꞌraꞌaj, aꞌyájna tyatɨꞌɨj tyajta ityáj!

¹¹¿Aꞌtanyíj jamuaꞌreej jeꞌej tɨ een ɨ paj jɨn nyúꞌcamuɨꞌ?

¿Aꞌtanyíj jamuaꞌreej tyiꞌtɨ́j tɨ muajaaxɨejtyeꞌ?

¹²Táamuaꞌtyej tyej tyij tyámuaꞌ tyéeꞌiten aꞌchu tyaj áꞌtyeeren,

tyej tyij tyámuaꞌ tyojoꞌitéej táꞌraꞌnyij aꞌɨ́jcɨ jɨmeꞌ ɨ tyaj jɨn maꞌumuámuaꞌreꞌ.

¹³¡Tavástaraꞌ, huariáꞌraꞌ ityájma jimi!

¿Aꞌchunyéj pooj muꞌ áꞌtyeeren?

¡Huaꞌancuꞌvajxɨꞌ aꞌíijma ɨ maj muéetzij muahuɨɨreꞌ!

¹⁴Aꞌɨ́j paj taatáꞌan ɨ paj jɨn taxɨeꞌveꞌ tɨꞌɨj eeréꞌnyej ɨ xɨcáj,

tyatatyámuaꞌveꞌej tu tyij tyíꞌchuiicaj táꞌjuꞌun tyaꞌtɨꞌɨj tyanaꞌaj áꞌtyeeren tyajúurij.

¹⁵Taatáꞌ tyaj jéehua áꞌtyeeviꞌin tyatatyámuaꞌveꞌej

aꞌyájna tyatɨꞌɨj tyeríj áꞌtyeej tyaj jeꞌej tyáꞌtamuajtyej.

¹⁶¡Tyuꞌtáꞌ mej mij ɨ maj muahuɨɨreꞌ majta ɨ maj huaꞌ jitze eeráanyej

jaaséj muáaj paj jɨn tyíꞌmuarɨeꞌ ajta ɨ paj jɨn naa huaséꞌrin!

¹⁷Cheꞌ aꞌɨ́jna ɨ tɨ jɨn naa tyihuojóꞌmuaꞌraj ɨ Tavástaraꞌ, aꞌɨ́jna ɨ taj Dios,

cheꞌ aꞌɨ́ɨn tajitzé séjreꞌej.

¡Tyámuaꞌ paj jáaꞌuurej, Tavástaraꞌ, aꞌɨ́jna ɨ tyaj jɨn tyíꞌmuarɨeꞌ!

¡Tyámuaꞌ paj jáaꞌuurej, jee, aꞌɨ́jna ɨ tyaj jɨn tyíꞌmuarɨeꞌ!

Aꞌɨ́jna ɨ Tavástaraꞌ aꞌɨ́ɨ pu aꞌɨ́ɨn puéꞌeen ɨ tɨ tahuɨɨreꞌ

¹Aꞌɨ́jna ɨ tɨ jitzán séejreꞌ ɨ tɨ tyámuaꞌ tyéꞌchaꞌɨj

aꞌɨ́j tɨ jimi jáꞌmaꞌcan ɨ jútyeꞌ ɨmuáj tɨ jáꞌsejreꞌ ɨ tɨ néijmiꞌi putyíꞌuurej ajta néijmiꞌi jɨn antyúumuaꞌreej,

²aꞌyaa pu tyéꞌixaatyeꞌ ɨ Tavástaraꞌ tɨjɨn: “Muáaj paj nyechaꞌɨj,

ɨ nyaj jitzán nyacaꞌnyej, nyaj Dios, ɨ nyaj jitzán tyíꞌcaꞌnyej.”

³Aꞌɨ́ɨ puꞌuj pújoorej tɨꞌij aꞌ japua huatányuunyij

aꞌɨ́jcɨ jimi ɨ tɨ avíitzij jɨn tyuꞌjéꞌcaj ajta aꞌɨ́jcɨ jimi ɨ tɨ jeꞌej puaꞌaj tyúꞌuurej,

⁴jiꞌnye aꞌɨ́ɨ pu tyámuaꞌ naa tyimueꞌcánasij,

jityán pej pij tyámuaꞌ tyíꞌchaꞌɨɨriꞌhuaj puáꞌmej.

¡Aꞌɨ́j pu jɨn muacánasij ɨ tɨ jɨn tyámuaꞌ een!

⁵Capáj tyíꞌtzɨɨnyeꞌej tyiꞌtɨ́j tɨ jeꞌej rɨcɨj ɨ tɨ́caꞌ,

nusu ɨ tújca tɨ ajta jéehua jeꞌej puaꞌaj tyíꞌrɨcɨj,

⁶nusu tyiꞌtɨ́j tɨ jeꞌej tyuꞌmaꞌaj taꞌmej ɨ tɨ́caꞌrij jitze,

nusu ɨ tɨ tyeꞌentyípuaapuaꞌrityee tɨꞌɨj huányeeriꞌcɨj ɨ xɨcáj jɨmeꞌ;

⁷jiꞌnye séej víꞌraꞌaj mu cuiꞌnyij aꞌ útataꞌ pujmuaꞌ

majta tamuáamuataꞌ víꞌraꞌaj aꞌmuácaꞌtaꞌ pujmuaꞌ,

ajta muéetzij capu tyiꞌtɨ́j jeꞌej muaꞌuuren.

⁸Muáaj papuꞌuj huaꞌraséeraj puáꞌmej,

pahuaꞌséeraj paj puáꞌmej tɨꞌɨj aꞌyan tyáꞌraꞌnyij aꞌɨ́ɨjma jimi ɨ maj jeꞌej puaꞌaj rɨcɨj jeꞌej tɨ aꞌɨ́ɨjma jimi tyiꞌtyéevijtɨj.

⁹Jiꞌnye papuꞌríj aꞌyan jáaruuj tɨꞌij ɨ Tavástaraꞌ muaatyáhuɨɨreꞌen,

ajta aꞌɨ́ɨn muachaꞌɨ́ɨj jaꞌmej ɨ tajapuá tɨ jáꞌsejreꞌ,

¹⁰capu tyiꞌtɨ́j aꞌ jimi huataséjreꞌsij tɨ jeꞌej puaꞌaj een

capu ajta ɨ cuiꞌnyiꞌraꞌaj aꞌchéj jaꞌráꞌiixaj;

¹¹jiꞌnye aꞌɨ́ɨ pu uhuojoꞌtaꞌítyij ɨ maj jimi tyíꞌhuɨɨreꞌ

mej mij muáachaꞌɨɨn joꞌpaj jeꞌej tyojoomaꞌaj puáꞌmej.

¹²Aꞌɨ́ɨ mu jumuácaꞌ jɨn muaꞌajriásij

pej pij quee tyiꞌtɨ́j jitze eejcaꞌcataꞌan.

¹³Ɨꞌríitaj pu áꞌmej paj muajyéj tzajtaꞌ ajaꞌtameꞌen,

huaꞌ tzajtaꞌ ɨ maj tzɨ́ɨnyiꞌreꞌ pajta ɨ cúꞌcuꞌsee tzajtaꞌ.

¹⁴“Nyáaj nu japuan huatányuusij,

tɨꞌij quee tyiꞌtɨ́j jeꞌej puaꞌaj jaꞌuurej,

jiꞌnye aꞌɨ́ɨ pu nyaxɨeꞌveꞌ ajta nyamuaꞌtyej.

¹⁵Tɨꞌɨj naatájeevej, nyáaj nu nyajta jaatájeevij;

¡nyáaj nu jamuán ajoꞌtyaváaj naꞌmej!

Nyajta japuan huatányuusij tɨꞌij quee jeꞌej tyóomuaꞌajcaj

nyajta jeꞌen tyámuaꞌ tyaataséjrataj séecan jimi;

¹⁶nyaatáꞌsij tɨꞌij tyámuaꞌ naa tyiꞌhuóotyamuaꞌveꞌen ajta áꞌtyeeviꞌin júurij:

¡nyajta jaatáꞌsij tɨꞌij huóotyamuaꞌveꞌen aꞌɨ́jcɨ jɨmeꞌ nyej nyáaj japuan huatányuusij!”

Chuíicarij tyaj jɨn tyaatatyójtziꞌreꞌen

Chuíicarij ajta cuíinarij mej mij sáahuaj tyuꞌtáchuiicaj

¹Tavástaraꞌ tajapuá paj jáꞌsejreꞌ,

¡tyámuaꞌ pu naa tyíꞌxaꞌpuɨꞌ tyaj tyimuaatatyójtziꞌreꞌen

tyajta aꞌ jitze maꞌcan tyuꞌtáchuiicaj ɨ tyaj jɨn muaatyátzaahuatyeꞌen!

²Tyaj íiyaꞌ jaataxáj tyajta tɨꞌɨjta huariáꞌtɨcaꞌrej

aꞌɨ́jcɨ ɨ muáaj paj jɨn taxɨeꞌveꞌ ajta paj jɨn tyámuaꞌ een,

³cheꞌ huatánamuajreꞌen ɨ canárij jitze tɨ tyeꞌejvivin,

xájtariꞌ naa ɨ cuíinarij aꞌɨ́jcɨ jitze ɨ áarpaj ajta ɨ canárij.

⁴Muáaj paj Tavástaraꞌ puéꞌeen,

¡muáaj paj tyámuaꞌ naa tyinaatyájtoo aꞌɨ́jcɨ jɨmeꞌ jeꞌej paj huarɨ́j!

¡Jéehua nu nyetyamuaꞌveꞌ aꞌɨ́jcɨ jɨmeꞌ jeꞌej paj tyíꞌmuarɨeꞌ!

⁵Muáaj paj Tavástaraꞌ puéꞌeen,

¡vaꞌcán paj jɨn tyíꞌmuarɨeꞌ!,

¡pajta huápuɨꞌɨj jaayíꞌtɨn jeꞌej paj yeꞌej tyámuaꞌ tyúꞌmuaꞌtyij!

⁶¡Aꞌɨ́ɨ mu ɨ maj quee tyiꞌtɨ́j huayíꞌtɨn quee pújoorej mej mij yoꞌitéej muáꞌraꞌnyij!

⁷Tɨpuaꞌaj ɨ maj jeꞌej puaꞌaj tyityetyúuchaꞌɨj majta ɨ maj jeꞌej puaꞌaj tyíꞌuurej

aꞌyan metyiꞌtyahuoseꞌ tɨꞌɨj ɨ tuꞌpíj, ajta tyámuaꞌ tyéꞌyiꞌcan huaꞌ jimi,

aꞌyaa puꞌuj tyuꞌtyáhuɨɨreꞌsij mej mij jusén jɨmeꞌ jóꞌvetyij.

⁸Pajta muáaj, Tavástaraꞌ, jusén jɨmeꞌ paj jútyeꞌ ɨmuáj jáꞌsejreꞌ.

⁹Ajta tyiꞌtɨ́j pu sɨ́ɨj aꞌyan tyiꞌjaꞌyájna, Tavástaraꞌ:

maj aꞌɨ́ɨmaj antyipuaꞌrij ɨ maj muájchaꞌɨɨreꞌ;

majta ɨ maj jeꞌej puaꞌaj tyíꞌuurej joꞌxɨ́sij.

¹⁰Muáaj paj tyiꞌtáꞌcaa nyej nyij jéetzeꞌ huatyényacaꞌnyej

aꞌyájna tɨꞌɨj ɨ túuruꞌ tyoꞌhuájcaꞌnyej,

pajta nyamuꞌuutzeꞌ naꞌváꞌhuaatyeꞌsij aꞌɨ́jcɨ ɨ tɨ naa tyaarɨeꞌej.

¹¹Nyáaj nu nyij huaꞌsejran matɨꞌɨj eetávatzɨj aꞌɨ́ɨmaj ɨ maj nyéjchaꞌɨɨreꞌ;

¡nyajta nu huáꞌnamuajran jeꞌej maj tyúunyusteꞌ ɨ maj jeꞌej puaꞌaj tyityetyúuchaꞌɨj!

¹²Aꞌɨ́ɨmaj ɨ maj tyámuaꞌ tyíꞌtyetyeɨtyee aꞌyaa mu tyityaataxútɨeꞌsij tɨꞌɨj ɨ tacɨ́j

majta aꞌyan tyíꞌcɨɨren tɨꞌɨj ɨ jucúj aꞌáa tɨ jóꞌuuj a Líbano.

¹³Aꞌáa mu jaꞌhuastiꞌ aꞌɨ́jcɨ jitze ɨ tyeyúujraꞌ ɨ Tavástaraꞌ;

majta huataxútɨeꞌsij aꞌájna joꞌtɨj ɨ Dios jáꞌsejreꞌ.

¹⁴Tyij majta meríj huásij puéꞌeenyeꞌ, móocheꞌ mu huatatáqueꞌsij;

aꞌnáj tɨnaꞌaj mu jucaꞌnyáaj muáꞌjuꞌun majta tyámuaꞌ éenyeꞌej muaꞌmej,

¹⁵majta jeꞌen jaariáꞌxajta tɨ ɨ Tavástaraꞌ, aꞌɨ́jna ɨ tɨ nyechaꞌɨj,

tyámuaꞌ pu éenyeꞌej séejreꞌ ajta quee tyiꞌtɨ́j jitzán séejreꞌ tɨ jeꞌej puaꞌaj een.

Tavástaraꞌ pu Rey puéꞌeen

¹¡Tavástaraꞌ pu Rey puéꞌeen!

¡Tavástaraꞌ pu arí aꞌɨ́j tyuꞌtyóochejtyej ɨ tɨ naa tyuꞌséꞌrin

ajta aꞌɨ́jna jɨn curioonaj ɨ tɨ néijmiꞌi jɨn putyíꞌuurej!

Aꞌɨ́ɨ pu tyámuaꞌ jáaruuj ɨ cháanacaj, tɨꞌij quee táhuaanyeꞌen.

²Aꞌyaa puꞌij ooj tyíꞌeen, Tavástaraꞌ, tyámuaꞌ pu een aꞌɨ́jna ɨ paj jitzán huatyájcaj.

¡Muáaj paj jusén jɨmeꞌ séejreꞌ!

³Muáaj paj Tavástaraꞌ puéꞌeen,

ɨ játyaꞌnaj pu tɨꞌrájna ajta jéehua áꞌxɨreꞌej;

⁴ajta muáaj, Tavástaraꞌ, jútyeꞌ ɨmuáj paj jáꞌsejreꞌ,

jéetzeꞌ paj uhuájcaꞌnyej quee ɨ jájtyij tɨ áꞌxɨreꞌej

nusu ɨ japúutzarij tɨ atyúutaꞌhuaj ɨ jájritzeꞌ.

⁵Muáaj paj Tavástaraꞌ puéꞌeen,

tyámuaꞌ pu een aꞌɨ́jna ɨ paj jɨn tyuꞌtaꞌíjtacaꞌ.

¡Ajta ɨ paj jɨn tyámuaꞌ een aꞌɨ́j pu jɨn jusén jɨmeꞌ naa huaséꞌrin aꞌ tyeyúuj!

Aꞌɨ́jna ɨ Tavástaraꞌ aꞌɨ́ɨ pu juées puéꞌeen íiyan ɨ cháanacaj japua

¹¡Huatáꞌsejrataj, Tavástaraꞌ, Dios paj aꞌɨ́jna jɨn antyíaꞌmuaꞌreej paj tyámuaꞌ tyoꞌxáꞌpuɨꞌɨntareꞌen!

²Muáaj paj aꞌɨ́ɨn puéꞌeen ɨ juées paj jɨn tyiꞌtyéjvee íiyan ɨ cháanacaj japua;

¡ájchesij aꞌɨ́ɨjma jimi ɨ maj óotzaahuatyeꞌ

aꞌyaa paj tyihuoꞌxáꞌpuɨꞌɨntariꞌtzeꞌen jeꞌej tɨ huaꞌ jimi tyiꞌtyéevijtɨj!

³¿Aꞌchunyéj móoj áꞌtyeeren, Tavástaraꞌ,

aꞌchunyéj móoj áꞌtyeeren muutyámuaꞌvaꞌaj aꞌɨ́ɨmaj ɨ maj jeꞌej puaꞌaj tyityetyúuchaꞌɨj?

⁴Néijmiꞌi mu jeꞌej puaꞌaj tyityetyúuchaꞌɨj

axáa mu tyíꞌjepeꞌ majta jéehua óotzaahuatyeꞌ;

¡aꞌɨ́ɨ mu jeꞌej tɨn huóoxaxaꞌaj!

⁵Muáaj paj Tavástaraꞌ puéꞌeen,

aꞌɨ́ɨ mu jeꞌej puaꞌaj huáꞌuurej aꞌtyéɨtyeristyamuaꞌ;

mahuaꞌxaahuataj ɨ maj aꞌ jitze ajtyámaꞌcan.

⁶Mahuáꞌcuꞌraj ɨ úucaa maj antyúujɨɨmuaꞌastariacaꞌ majta ɨ maj séej chuéj japua jáꞌmaꞌcan,

majta mu huaꞌcuꞌraj ɨ maj xáꞌrɨcaanyij.

⁷Aꞌyaa mu tyíꞌxaj tɨ ɨ Tavástaraꞌ quee atányeej,

tɨ ɨ Dios raꞌ ɨ Jacob quee tyiꞌtɨ́j jeꞌej tyíꞌmuaꞌreej.

⁸¡Siataꞌaj tyihuojoꞌitéej xáꞌraꞌnyij, tyeɨ́tyee siaj quee tyiꞌtɨ́j huayíꞌtɨn siajta quee tyojóꞌitej!

¿Aꞌnajnyí sij tyiꞌtɨ́j jeꞌej tyuꞌtyátzaahuatyeꞌsij?

⁹¿Nyiquij quee iityánamuaj

aꞌɨ́jna ɨ tɨ jaatyátaahuacaꞌ ɨ tyaj jɨn iityanamuáarajmee?

¿Nyiquij quee ajta aꞌtányeej

aꞌɨ́jna ɨ tɨ jaatyátaahuacaꞌ ɨ jɨꞌsíj?

¹⁰¿Nyiquij quee puéjtzij huoꞌtáꞌsij

aꞌɨ́jna ɨ tɨ tyámuaꞌ huáꞌuurej ɨ tyeɨ́tyee séej chuéj japua maj jáꞌmaꞌcan?

¿Nyiquij quee ajta tyiꞌtɨ́j muaꞌreej

aꞌɨ́jna ɨ tɨ juꞌcámuaꞌriityej tɨꞌij tyuꞌyíꞌtɨhuaꞌan ɨ tyévij?

¹¹Tavástaraꞌ pu jamuaꞌreej tɨ ɨ tyáatɨꞌ

aꞌɨ́j naꞌaj tyiꞌriáꞌmuaꞌsij ɨ tɨ quee tyiꞌtɨ́j huɨɨreꞌ.

¹²Muáaj paj Tavástaraꞌ puéꞌeen,

cheꞌ huatóotyamuaꞌveꞌen aꞌɨ́jna ɨ paj muáaj tyámuaꞌ joorej

pajta muáaj aꞌɨ́j tyámuaꞌ naa tyíꞌitɨɨj

¹³taꞌaj ij quee tyiꞌtɨ́j jɨn jeꞌej tyóomuaꞌajcaj

tɨꞌɨjta jeꞌej puaꞌaj atyojoomeꞌen,

ajta aꞌɨ́jcɨ jimi ɨ tɨ jeꞌej puaꞌaj tyiꞌtyúuchaꞌɨj

aꞌɨ́j pu jimi tyámuaꞌ een joꞌtɨj jaꞌtyévesij.

¹⁴Ɨ Tavástaraꞌ capu mahuóohuaꞌxɨj ɨ jutyéɨtyeristyamuaꞌ,

capu ajta jujɨ́ɨmuaꞌastacan ajóohuaꞌxɨj ɨ maj jimi tyáꞌtzaahuatyeꞌ.

¹⁵Majtáhuaꞌaj mu tyámuaꞌ naa tyáꞌxaꞌpuɨꞌɨntareꞌen aꞌájna joꞌmaj jóosɨꞌrii,

majta néijmiꞌi ɨ maj tyámuaꞌ tyityetyúuchaꞌɨj aꞌyaa mu tyityoꞌcárutyij.

¹⁶¿Aꞌtanyíj nyaj japua huatányuusij

aꞌɨ́ɨjma jimi ɨ maj jeꞌej puaꞌaj rɨcɨj majta jeꞌej puaꞌaj tyíꞌuurej?

¹⁷Tɨpuaꞌaj ɨ Tavástaraꞌ quee naatáhuɨɨreꞌnyijcheꞌen,

nyáaj nu nyij nyeríj aꞌáa jaꞌséeriaꞌcajcheꞌ joꞌmaj tyityajáꞌavaꞌtacaa.

¹⁸Nyatɨꞌɨj aꞌyan tyuꞌtaxájtacaꞌ tɨjɨn: “Nyaꞌ ɨ́ɨcaj pu antyípuɨnyej”,

aꞌɨ́jna ɨ paj jɨn nyaxɨeꞌveꞌ, Tavástaraꞌ, aꞌɨ́ɨ pu mujoꞌvéꞌmej tɨꞌij naatáhuɨɨreꞌen.

¹⁹Aꞌɨ́jna ɨ nyaj jɨn jeꞌej tyéꞌnyamuaꞌtzej

tɨ jitzán tásiseerii ɨ nyamuaꞌtzíiraꞌaj,

muáaj paj tyámuaꞌ tyinaatyéeje nyej nyij huatányetyamuaꞌveꞌen.

²⁰Capáj muáaj huáꞌjaahuatyeꞌ aꞌɨ́ɨjma ɨ juéesij ɨ maj quee tyámuaꞌ tyáꞌxaꞌpuɨꞌɨntareꞌ;

majta quee tyámuaꞌ rɨcɨj aꞌɨ́jcɨ jitze aꞌ nyuucaaj,

²¹ɨ maj avíitzij jɨn jeꞌej puaꞌaj jaꞌuurej aꞌɨ́jcɨ ɨ tɨ quee tyiꞌtɨ́j jɨn áꞌɨtzeereꞌ ajta tyámuaꞌ tyiꞌtyúuchaꞌɨj,

majta jeꞌen tyuꞌtáꞌsij mej mij jaajéꞌcaj.

²²Ajta ɨ Tavástaraꞌ pu aꞌɨ́ɨn puéꞌeen ɨ tɨ naatyáhuɨɨreꞌej,

aꞌɨ́jna ɨ nyaj Dios pu aꞌɨ́ɨn puéꞌeen ɨ tyetyéj ɨ nyaj jitzan huatyényaꞌavaaj.

²³Tavástaraꞌ pu tyuꞌtáꞌsij mej mij ɨ maj jeꞌej puaꞌaj tyityetyúuchaꞌɨj

aꞌɨ́jna jɨn antyipuaꞌrej ɨ maj jɨn jujɨ́ɨmuaꞌaj jeꞌej puaꞌaj tyityetyúuchaꞌɨj.

¡Aꞌɨ́jna ɨ taj Dios pu huaꞌantyipuaꞌrityeꞌsij!

Tyicheꞌ tatyámuaꞌveꞌej tyetyuꞌtáchuiicaj ɨ Tavástaraꞌ jimi

¹Musioꞌváꞌjuꞌ, tyicheꞌ tatyámuaꞌveꞌej tyetyuꞌtáchuiicaj ɨ Tavástaraꞌ jimi;

tyicheꞌ tyuꞌtáchuiicaj aꞌɨ́jcɨ jimi ɨ tɨ tachaꞌɨj ajta tajapuá huatányuusij.

²Tyicheꞌ tyeꞌtyóotziꞌreꞌej aꞌúun tyoꞌtyájrutyej joꞌtɨj aꞌɨ́ɨn jáꞌsejreꞌ,

tyajta jeꞌen jitzán maꞌcan tyuꞌtáchuiicaj.

³Jiꞌnye aꞌɨ́jna ɨ Tavástaraꞌ ɨ Dios vaꞌcán pu jɨn séejreꞌ,

aꞌɨ́jna ɨ tɨ Rey jɨn tyiꞌtyéjvee néijmiꞌcaa jimi ɨ tajapuá maj tyíꞌhuɨɨreꞌ.

⁴Aꞌɨ́ɨ pu ɨ jumuácaꞌ jitze jiꞌtyáaꞌ

néijmiꞌi ɨ cháanacaj ajta néijmiꞌi ɨ tɨ jitzán tyíꞌsejreꞌ,

aꞌɨ́ɨ pu jaꞌaꞌrij ɨ jɨríj tɨ jéetzeꞌ ajtɨ́tɨꞌɨjmee.

⁵Aꞌɨ́ɨ pu ajta jaꞌaꞌrij ɨ jájrij, jiꞌnye aꞌɨ́ɨ pu jaatyátaahuacaꞌ,

jumuácaꞌ pu jɨn jaatyátaahuacaꞌ aꞌɨ́jcɨ ɨ chuéj tɨ huáchij.

⁶Musioꞌváꞌjuꞌ, tyicheꞌ tyítunutaxɨꞌɨn tyajta jeꞌen jaatyáanajche,

tyicheꞌ tyítunutaxɨꞌɨn aꞌɨ́jcɨ jimi ɨ Tavástaraꞌ,

jiꞌnye aꞌɨ́ɨ pu táataahuacaꞌ.

⁷Aꞌɨ́ɨ pu taj Dios puéꞌeen, tyajta ityáj tu tyeɨ́tyeristyamuaꞌmeꞌen puéꞌeen;

ityáj tu cányaꞌxɨɨ puéꞌeen tyaj aꞌáa jaꞌtávee joꞌtɨj aꞌɨ́ɨn tyajaꞌtachuéj.

Xáanamuajriꞌ ijíij jeꞌej tɨ aꞌɨ́ɨn tyíꞌxaj tɨ aꞌyan tɨjɨn:

⁸“Caxu tyóonaamuan ɨ juxɨéjnyuꞌcaa tzajtaꞌ siatɨꞌɨj huarɨ́j aꞌájna a Meribá,

siatɨꞌɨj séej xɨcáaraꞌ jitze huarɨ́j aꞌájna a Masá, aꞌájna joꞌtɨj quee jáꞌtyiꞌtɨj,

⁹matɨꞌɨj naatáhuaviiriꞌ nyaj tyiꞌtɨ́j jɨn aꞌyan huárɨnyij aꞌɨ́ɨmaj ɨ jáꞌmuahuasimuaꞌcɨꞌɨj,

tyij majta meríj tyíꞌsejracaꞌaj jeꞌej nyaj tyíꞌmuarɨeꞌcaꞌaj.

¹⁰Huáꞌpuatyej nyinyiꞌraꞌaj nu áꞌtyeej nyaj nyúꞌcamuɨꞌ

aꞌɨ́ɨjma jimi ɨ tyeɨ́tyee,

nyajta aꞌyan tyuꞌtaxájtacaꞌ tɨjɨn: Aꞌíimaj ɨ tyeɨ́tyee huápuɨꞌɨj mu jeꞌej puaꞌaj tyityaajúꞌ,

¡camu jaꞌastej ɨ nyúucarij ɨ nyaj jɨn tyuꞌtaꞌíjtacaꞌ!”

¹¹Aꞌɨ́j nu jɨn nyenyuꞌcamuꞌuj aꞌyan nyetyaꞌtányaratziiriꞌ

maj quee aꞌáa joꞌtyáꞌɨtzeereꞌej joꞌmaj nye jimi jaꞌhuóosoꞌpeꞌen.”

Chuíicarij tɨ jájcuaj ɨ Tavástaraꞌ jimi

¹Jájcuacan setyuꞌtáchuiicaj aꞌɨ́jcɨ jimi ɨ Tavástaraꞌ;

setyuꞌtáchuiicaj ɨ Tavástaraꞌ jimi, aꞌyan siaj huacháatɨmee néijmiꞌqueꞌ ɨ cháanacaj japua;

²setyuꞌtáchuiicaj ɨ Tavástaraꞌ jimi, tyámuaꞌ xu tyeetyátoonyij ɨ tɨ jɨn ántyapuaj;

aꞌnáj tɨnaꞌaj xu jaxajta ɨ tɨ jɨn tajapuá huatányuusij.

³Xaataxáj ɨ tɨ jɨn naa huaséꞌrin ajta ɨ tɨ jɨn tyámuaꞌ naa tyíꞌuurej

huaꞌ tzajtaꞌ ɨ tyeɨ́tyee siajta aꞌɨ́ɨjma jimi ɨ maj séej chuéj japua joꞌcháatɨmee,

⁴jiꞌnye vaꞌcán pu jɨn tyiꞌtyéjvee aꞌɨ́jna ɨ Tavástaraꞌ

ajta jimi aꞌyan tyiꞌtyéevijtɨj tyej tyij tyuꞌtáchuiicaj:

¡ajta aꞌɨ́ɨn puéꞌeen ɨ tɨ jéetzeꞌ áꞌtyesiꞌreꞌ!

⁵Camu tyiꞌtɨ́j huɨɨreꞌ ɨ huaꞌ dioosijtyamuaꞌ ɨ séecan,

jiꞌnye ɨ Tavástaraꞌ pu jaatyátaahuacaꞌ ɨ tajapuá tɨ séejreꞌ.

⁶¡Tyámuaꞌ pu naa tyíꞌeen joꞌtɨj aꞌɨ́ɨn jáꞌsejreꞌ!

¡Aꞌɨ́ɨ pu séejreꞌ ɨ tɨ néijmiꞌi jɨn putyíꞌuurej ajta ɨ tɨ jɨn naa huaséꞌrin ɨ tyeyúujraꞌ!

⁷Siataꞌaj huatóotonyij ɨ Tavástaraꞌ jimi, tyeɨ́tyee siaj huacháatɨmee ɨ chájtaꞌnaj jitze;

siajta jáamuaꞌtyij ɨ tɨ jɨn néijmiꞌi putyíꞌuurej ajta ɨ tɨ jɨn naa huaséꞌrin,

⁸siataꞌaj jaatyátzaahuatyeꞌen ɨ Tavástaraꞌ aꞌyájna tɨꞌɨj jimi tyúuxɨeꞌveꞌ,

siajta tyuꞌtámuꞌvejritaj ɨ tyeyúujraꞌ tzajtaꞌ,

⁹siataꞌaj jaatyáanajche ɨ Tavástaraꞌ ɨ tyeyúujraꞌ tzajtaꞌ tɨ naa huaséꞌrin.

¡Micheꞌ néijmiꞌi ɨ tyeɨ́tyee ɨ maj aꞌyan huacháatɨmee ɨ cháanacaj japua jimi juviveej!

¹⁰Aꞌyaa xu tyihuoꞌtéꞌexaatyeꞌen tɨjɨn: “¡Aꞌɨ́jna ɨ Tavástaraꞌ pu Rey puéꞌeen!”

Aꞌɨ́ɨ pu tyámuaꞌ jáaruuj ɨ cháanacaj, tɨꞌij quee táhuaanyeꞌen,

aꞌɨ́ɨ pu néijmiꞌcaa ɨ tyeɨ́tyee juxaꞌaj naꞌaj tyíꞌijtyeꞌ.

¹¹¡Micheꞌ huatóotyamuaꞌveꞌen ɨ tajapuá ajta ɨ cháanacaj!

¡Cheꞌ huatyahuáatɨraꞌnyij ɨ jájrij ajta néijmiꞌi aꞌɨ́j tɨ jitze tyíꞌsejreꞌ!

¹²¡Cheꞌ huatóotyamuaꞌveꞌen ɨ ɨtzitáj ajta néijmiꞌi ɨ tɨ jitzán tyíꞌsejreꞌ!

¡Micheꞌ jutyamuaꞌveꞌej huajíjhua ɨ cɨyéj tɨ tyúꞌuu,

¹³aꞌɨ́jcɨ jimi ɨ Tavástaraꞌ, tɨ yajaꞌvéꞌmej!

¡Jee, aꞌɨ́ɨ pu yajaꞌvéꞌmej tɨꞌij tyuꞌtaꞌíjtaj ɨ cháanacaj japua,

ajta tyuꞌtaꞌíjtaj ɨ chájtaꞌnaj jitze yan tɨ séejreꞌ ɨ cháanacaj japua

aꞌɨ́jcɨ jɨmeꞌ ɨ tɨ xáꞌpuɨꞌ ajta ɨ tɨ jɨꞌréꞌcan jɨmeꞌ!

Tavástaraꞌ pu Rey puéꞌeen

¹¡Siataꞌaj néijmiꞌqueꞌ huatóotyamuaꞌveꞌen ɨ cháanacaj japua!

¡Siajta huatóotyamuaꞌveꞌen joꞌtɨj jaꞌrahuáchijmee ɨ jájritzeꞌ!

¡Tavástaraꞌ pu Rey puéꞌeen!

²Ajta jéetɨrij jariáꞌnaj tɨquee tzajtaꞌ nyéeriꞌij;

ajta ɨ ɨpuariáaraꞌan aꞌɨ́j pu jitze jucaꞌnyej ɨ tɨ tyámuaꞌ een ajta huatóojeꞌyej;

³ajta ɨ tɨéj anájcaj aꞌɨ́jcɨ jimi

aꞌɨ́ɨ puꞌij huáꞌteeraj aꞌɨ́ɨjma ɨ maj jájchaꞌɨɨreꞌ.

⁴Aꞌɨ́jna ɨ tɨ tyánaꞌaxcavaꞌraꞌaj aꞌɨ́j pu jɨn huányeeriꞌij ɨ cháanacaj japua,

¡ajta ɨ cháanacaj pu huatóocaꞌtzɨj tɨꞌɨjta aꞌɨ́ɨjma huaséj!

⁵Ajta ɨ jɨríj aꞌyaa pu tyuꞌtóotuiꞌsij tɨꞌɨj ɨ xɨ́ɨjca

aꞌɨ́jcɨ jimi ɨ Tavástaraꞌ, aꞌɨ́jcɨ jimi ɨ tɨ néijmiꞌi jaꞌaꞌrij ɨ cháanacaj.

⁶Ajta ɨ tajapuá tɨ séejreꞌ pu jaxajta ɨ tɨ jɨn tyámuaꞌ naa tyáꞌxaꞌpuɨꞌɨntareꞌ;

néijmiꞌi mu ɨ tyeɨ́tyee jaaséj ɨ tɨ jɨn naa huaséꞌrin.

⁷Mahuoꞌtyáxaahuatacaꞌ aꞌɨ́ɨjma ɨ maj sáanturij najchej,

aꞌɨ́ɨmaj ɨ maj aꞌɨ́ɨjma jimi óotzaahuatyeꞌ.

Néijmiꞌi mu ɨ maj tajapuá tyíꞌhuɨɨreꞌ jimi ecóotutaxɨj.

⁸Muáaj paj Tavástaraꞌ puéꞌeen,

Aꞌɨ́jna ɨ chájtaꞌnaj Sión ajta séecan ɨ chájtaꞌnaj Judá tɨ jitze ajtyámaꞌcan

aꞌɨ́ɨ mu aꞌɨ́j jɨn jutyamuaꞌveꞌ jeꞌej paj muáaj tyuꞌtaꞌíjtacaꞌ,

⁹jiꞌnye muáaj, Tavástaraꞌ jútyeꞌ ɨmuáj paj jáꞌsejreꞌ,

muáaj paj néijmiꞌi japuan séejreꞌ ɨ cháanacaj

pajta jéetzeꞌ huaꞌ japua ɨmuáj séejreꞌ ɨ maj a jimi tyíꞌhuɨɨreꞌ.

¹⁰Tavástaraꞌ pu huaꞌxɨeꞌveꞌ aꞌɨ́ɨjma ɨ tɨ quee huaꞌráanajchi ɨ tɨ jeꞌej puaꞌaj een;

ajta tyámuaꞌ tyéꞌchaꞌɨj ɨ huaꞌ júuricamej ɨ maj jimi tyámuaꞌ een;

huaꞌ japua pu huatányuusij mej mij quee jeꞌej huáꞌuurej ɨ maj jeꞌej puaꞌaj tyityetyúuchaꞌɨj.

¹¹Tatzárij pu huataséjreꞌsij aꞌɨ́jcɨ jimi ɨ tyévij tɨ tyámuaꞌ tyiꞌtyúuchaꞌɨj;

majta huatóotyamuaꞌveꞌsij ɨ tyeɨ́tyee maj quee tyiꞌtɨ́j jɨn áꞌɨtzeereꞌ.

¹²¡Siataꞌaj huatóotyamuaꞌveꞌen ɨ Tavástaraꞌ jimi, tyeɨ́tyee siaj tyámuaꞌ tyityetyúuchaꞌɨj,

siajta tyaatatyójtziꞌreꞌen ɨ tɨ jɨn ántyapuaj tɨ ajta tyámuaꞌ een!

Tavástaraꞌ pu arí jatáaꞌsacaꞌ ɨ tɨ jɨn tyuꞌtyámueꞌtɨn

Chuíicarij

¹¡Siataꞌaj jájcuacan tyuꞌtáchuiicaj ɨ Tavástaraꞌ jimi,

jiꞌnye tyámuaꞌ pu vaꞌcán jɨn tyúꞌruuj tajimí ɨ tyaj jɨn jeꞌej tyoꞌtaséj!

¡Puꞌríj jatáaꞌsacaꞌ ɨ tɨ jɨn tyuꞌtyámueꞌtɨn

aꞌɨ́jcɨ jɨmeꞌ ɨ tɨ néijmiꞌi jɨn putyíꞌuurej, ajta ɨ jumuácaꞌ jɨmeꞌ tɨ tyámuaꞌ een!

²Ɨ Tavástaraꞌ pu arí jaataxájtacaꞌ ɨ tɨ jɨn tyuꞌtyáamueꞌtɨj,

ajta arí jaataséjratacaꞌ ɨ tɨ jɨn tyámuaꞌ tyáꞌxaꞌpuɨꞌɨntareꞌ

aꞌɨ́ɨmaj mu mij jaaséj ɨ maj aꞌyan huacháatɨmee ɨ cháanacaj japua,

³aꞌnáj tɨnaꞌaj pu jitzán séejreꞌ ɨ tɨ jɨn tyúꞌxɨeꞌveꞌ ajta ɨ tɨ jɨn tyámuaꞌ tyíꞌtyevij

aꞌɨ́ɨjma jimi ɨ tyeɨ́tyee ɨ maj Israel jitze ajtyámaꞌcan.

¡Majta meríj néijmiꞌi jaaséj aꞌájna ɨmuáj joꞌtɨj ɨ cháanacaj jooꞌástɨmee

aꞌɨ́jcɨ ɨ taj Dios tɨ jɨn tyuꞌtyáamueꞌtɨj!

⁴Xuutyámuaꞌveꞌej xu setyuꞌtáchuiicaj ɨ Dios jimi,

mu siaj yan huacháatɨmee néijmiꞌqueꞌ ɨ cháanacaj japua;

jéehua xu naa tyityatóotyamuaꞌveꞌen

siajta jimi tyuꞌtáchuiicaj.

⁵Setyuꞌtáchuiicaj ɨ Tavástaraꞌ jimi aꞌɨ́jcɨ jitze setyiꞌcuíinaj ɨ arpaj,

siajta aꞌɨ́jcɨ jitze canárij tɨ tyeꞌejvivin.

⁶Siataꞌaj jutyamuaꞌveꞌej setyuꞌtáchuiicaj aꞌɨ́jcɨ jimi ɨ Tavástaraꞌ, ɨ tɨ Rey puéꞌeen,

siajta néijmiꞌi aꞌɨ́jcɨ jitze ɨ cɨꞌsítyeꞌrij tɨ tyíꞌsejreꞌ.

⁷Cheꞌ huatánamuajreꞌen ɨ jájrij ajta néijmiꞌi aꞌɨ́j tɨ jitze tyíꞌsejreꞌ,

ɨ cháanacaj majta ɨ maj japuan huacháatɨmee;

⁸cheꞌ ajta huatánamuajreꞌen ɨ játyaꞌnaj;

micheꞌ antyóosɨɨreꞌen ɨ jɨríj mej mij huajíjhua muutyámuaꞌvaꞌaj

⁹aꞌɨ́jcɨ jimi ɨ Tavástaraꞌ,

ɨ tɨ mujoꞌvéꞌmej tɨꞌij tyuꞌtaꞌíjtaj ɨ cháanacaj japua.

Aꞌɨ́ɨ pu tyuꞌtaꞌíjtaj tɨꞌɨj naꞌaj tyiꞌchájtaꞌnajmee íiyan ɨ cháanacaj japua

tyámuaꞌ tyuꞌtoojéꞌyacan jɨmeꞌ ajta juxaꞌaj naꞌaj tyihuoꞌtaꞌíjtyeꞌsij.

Ɨ Tavástaraꞌ pu Rey jɨn tyiꞌtyéjvee tɨ jéetzeꞌ vaꞌcán jɨn antyúumuaꞌreej

¹¡Tavástaraꞌ pu Rey puéꞌeen!

¡Ɨ maj tajapuá tyíꞌhuɨɨreꞌ mu tyámuaꞌ tyéꞌchaꞌɨj aꞌɨ́jcɨ ɨ tɨ jitzán acájca!

Aꞌɨ́ɨmaj mu ɨ tyeɨ́tyee juvivej, ajta néijmiꞌi ɨ cháanacaj.

²Tavástaraꞌ pu vaꞌcán jɨn tyiꞌtyéjvee aꞌájna a Sión;

Tavástaraꞌ pu néijmiꞌcaa japua séejreꞌ.

³Cheꞌ tyámuaꞌ eenyeꞌ ɨ tɨ jɨn ántyapuaj, vaꞌcán pu jɨn séejreꞌ ajta tzáahuatyiꞌreꞌ;

¡Dios pu néijmiꞌi jɨn tyámuaꞌ een!

⁴Muáaj paj Rey puéꞌeen ɨ tɨ néijmiꞌi putyíꞌuurej ajta aꞌɨ́j xɨeꞌveꞌ ɨ tɨ xáꞌpuɨꞌ;

muáaj paj néijmiꞌcaa juxaꞌaj panaꞌaj tyuꞌtyájtoo.

Pajta tyámuaꞌ naa tyihuóꞌixaaj ɨ yójmuaꞌmuaꞌ aꞌɨ́jcɨ ɨ Jacob

aꞌɨ́jcɨ ɨ tɨ xáꞌpuɨꞌ ajta ɨ tɨ huatóojeꞌyej.

⁵¡Setyuꞌtatyójtziꞌreꞌ ɨ Tavástaraꞌ, aꞌɨ́jcɨ ɨ taj Dios,

siajta tyítunutaxɨꞌɨn joꞌtɨj aꞌɨ́ɨn jaꞌraꞌɨ́ɨcajmee!

¡Dios pu néijmiꞌi jɨn tyámuaꞌ een!

⁶Aꞌɨ́jna ɨ Moisés ajta ɨ Aarón aꞌɨ́ɨ mu puaríij jɨn tyityetyuꞌuj;

Samuel pu ajta huaꞌ tzajtaꞌ ajoꞌtyávaacaꞌaj ɨ maj tyaatatyójtziꞌrej.

Tavástaraꞌ pu huoꞌtyáhuɨɨ aꞌɨ́ɨjma

matɨꞌɨj aꞌɨ́ɨmaj jaatáhuaviiriꞌ tɨ huoꞌtáhuɨɨreꞌen.

⁷Dios pu huaꞌ jamuán tyuꞌxájtacaꞌ

aꞌɨ́jcɨ jitze ɨ jéetɨrij tɨ huaꞌ japua ajaꞌcávaꞌcaꞌaj,

majta aꞌɨ́ɨmaj aꞌyaa mu huarɨ́j tɨꞌɨj tyihuoꞌtaꞌíj

majta mu jaꞌráꞌastej ɨ nyúucarij tɨ huaꞌ jimi jaatyájtoo.

⁸Tavástaraꞌ, taj Dios, ¡muáaj paj tyihuáꞌixaatyaꞌcaꞌaj!

Muáaj paj huaꞌ jimi aꞌɨ́ɨn puéꞌeenyeꞌej ɨ Dios tɨ tyúꞌuunyiꞌ,

ajta aꞌyaa paj chaꞌtaj panaꞌaj puéjtzij tyihuoꞌtáꞌ tyiꞌtɨ́j maj jɨn jeꞌej puaꞌaj huarɨ́j.

⁹Setyuꞌtatyójtziꞌreꞌ ɨ Tavástaraꞌ taj Dios,

¡siajta jimi tyítunutaxɨꞌɨn aꞌájna ɨ jɨríj jitze tɨ tyámuaꞌ een!

¡Aꞌɨ́jna ɨ taj Dios, ajta Tavástaraꞌ, néijmiꞌi pu jɨn tyámuaꞌ een!

Tavástaraꞌ pu táataahuacaꞌ jitzán tu tyij ajtyámaꞌcan

Chuíicarij maj jɨn tyaatatyójtziꞌreꞌen.

¹¡Setyuꞌtáchuiicaj xuutyámuaꞌveꞌej ɨ Tavástaraꞌ jimi,

mu siaj aꞌyan huacháatɨmee néijmiꞌqueꞌ ɨ cháanacaj japua!

²Xuutyámuaꞌveꞌej xu jaatyáanajche ɨ Tavástaraꞌ;

¡xaꞌantyijíihuaj xu siajta jutyamuaꞌveꞌej musioꞌváꞌjuꞌ aꞌɨ́jcɨ jimi!

³Siataꞌaj jáamuaꞌtyij tɨ ɨ Tavástaraꞌ Dios puéꞌeen;

aꞌɨ́ɨ pu táataahuacaꞌ ityáj tu tyij jitzán ajtyámaꞌcan;

¡chájtaꞌnaj tu puéꞌeen aꞌɨ́j tyaj jitze ajtyámaꞌcan tyajta cányaꞌxɨɨ aꞌáa tyaj jaꞌtávee joꞌtɨj aꞌɨ́ɨn tyajaꞌtachuéj!

⁴Musioꞌváꞌjuꞌ joꞌtɨj jaꞌpueertaj aꞌájna joꞌtɨj jaꞌrájtaꞌcuaj ɨ tyeyúujraꞌ tzajtaꞌ

aꞌɨ́j setyiꞌchuíicaj ɨ siaj jɨn tyaatatyójtziꞌreꞌen.

¡Setyuꞌtatyójtziꞌreꞌ, siajta tyámuaꞌ tyeetyátoonyij ɨ tɨ jɨn ántyapuaj!

⁵Jiꞌnye ɨ Tavástaraꞌ pu tyámuaꞌ tojoꞌmuaꞌraj;

ajta jusén jɨmeꞌ séejreꞌ ɨ tɨ jɨn taxɨeꞌveꞌ

ajta ɨ tɨ quee tyiꞌtɨ́j jɨn áꞌɨtzeereꞌ capu aꞌnáj antyipuaꞌrij.

Tyiꞌtɨ́j tɨ jɨn ɨ rey tyaꞌtóoratziiriꞌ ɨ Dios jimi

Chuíicarij David tɨ jaꞌaꞌrij

¹Nyáaxɨeꞌveꞌ nyaj tyaatatyójtziꞌreꞌen ɨ tɨ jɨn taxɨeꞌveꞌ ajta ɨ tɨ jimi tyámuaꞌ een;

nyáaxɨeꞌveꞌ, Tavástaraꞌ, nyaj muéetzij jimi tyuꞌtáchuiicaj;

²nyáaxɨeꞌveꞌ nyaj tyámuaꞌ naa tyíꞌchajca.

¿Aꞌnajnyí nye jimi mupoꞌvaꞌmaꞌaj puáꞌmej?

Canu tyiꞌtɨ́j jɨn aꞌɨtzéeriaꞌaj naꞌmej

canu nyajta tyiꞌtɨ́j jɨn ootyáꞌɨtzeereꞌej jóꞌnyaj jaꞌchej,

³canu cheꞌ aꞌnáj jaꞌraséeraj naꞌmej

nyej nyij tyiꞌtɨ́j jɨn jeꞌej puaꞌaj tyaꞌtányaratyij.

Nyahuaꞌxanaꞌveꞌ aꞌɨ́ɨjma ɨ maj quee jaꞌastej ɨ Dios;

¡canu aꞌnáj tyuꞌtáꞌsij mej mij nye jimi ajtyáxɨɨrej!

⁴Canu aꞌɨ́j jitze tyiꞌriaꞌmuaꞌsímeꞌej naꞌmej ɨ tɨ tyihuojóꞌjɨpuaj:

¡canu jaxɨeꞌveꞌ nyej nyij tyiꞌtɨ́j jɨn jeꞌej puaꞌaj rɨjcaj!

⁵Canu huoꞌtaꞌsij mej mij tyíꞌxajtaj

maj xájtariꞌ jeꞌej puaꞌaj tyihuáꞌxajtaj ɨ juxaꞌaj tyeɨ́tyee;

¡canu huáꞌjaahuatyeꞌ ɨ maj óotzaahuatyeꞌ nusu ɨ maj aꞌyan tyúuxaj maj jéetzeꞌ tyámuaꞌ een mequée ɨ séecan!

⁶Aꞌɨ́ɨjma nu jaahuatyeꞌen ɨ tyeɨ́tyee maj tyámuaꞌ tyityetyúuchaꞌɨj,

mej mij véjriꞌ nye jimi ajoꞌcháatɨmeꞌnyij;

aꞌɨ́ɨ puꞌuj nye jitze ajtyámaꞌcantaj jaꞌmej

ɨ tɨ tyámuaꞌ naa atyejeꞌchej.

⁷Ajta quee jeꞌej tyiɨꞌríitaj jaꞌmej tɨ sɨ́ɨj nyaj jamuán ajaꞌséejriaꞌaj ɨ tɨ tyúꞌcuanamuaj;

capu sɨ́ɨj tɨ tyíꞌhueꞌtacaa nyej jimi ajaꞌ séeriaꞌaj jaꞌmej.

⁸Aꞌnáj tɨnaꞌaj nu huoꞌtyápuaꞌrityeꞌsij mej mij quee jeꞌej tyáhuaasimeꞌen

néijmiꞌi aꞌɨ́ɨmaj ɨ maj jeꞌej puaꞌaj tyityetyúuchaꞌɨj;

¡nyajta huiꞌráhuaꞌxɨj aꞌájna a chájtaꞌnaj jitze Tavástaraꞌ tɨ jitze ajtyámaꞌcan

néijmiꞌcaa aꞌɨ́ɨjma ɨ maj tyiꞌtɨ́j jɨn jeꞌej puaꞌaj rɨcɨj!

Jeꞌej tɨ tyuꞌtyéenyuj aꞌɨ́jna ɨ tɨ quee jeꞌej jájtyoovej

Jeꞌej tɨ tyáꞌhuoo aꞌɨ́jna ɨ tɨquee cheꞌ jeꞌej jaꞌtyoovej ajta tɨꞌɨj quee cheꞌ jamuaꞌreej jeꞌej tɨ huárɨnyij jéehua puꞌij junyuusteꞌ ɨ Tavástaraꞌ jimi

¹Tavástaraꞌ, huánamuaj jeꞌej nyaj tyiꞌtyényuusij,

¡tyuꞌtáꞌ tɨꞌij muéetzij jimi jaꞌráꞌastij jeꞌej nyaj tyíꞌjijhuaj!

²Capáj nye jimi jaꞌavaataj muaꞌ nyéerimij

nyatɨꞌɨjta quee jeꞌej jájtyooveꞌen;

¡tyámuaꞌ paj tyináanamuaj!,

¡caꞌnácan paj huatányuunyij nyatɨꞌɨjta muaatájeevej!

³Jiꞌnye ɨ nyajúuricamej pu jaꞌhuóopuaꞌrixɨꞌɨj aꞌyájna tɨꞌɨj ɨ cɨtzíj,

ajta ɨ nyacaríj aꞌyaa pu tyaꞌtaa tɨꞌɨj ɨ tɨꞌɨxcuáa,

⁴capu cheꞌ jucaꞌnyej ɨ nyaxɨéjnyuꞌcaa

aꞌyaa pu een tɨꞌɨj ɨ tuꞌpíj tɨ huatyáahuaj;

¡capu ajta cheꞌ nyacaꞌnyistiꞌ nyej nyij tyúꞌcuaꞌnyij!

⁵Ɨ nyahueꞌraꞌ pu arí cáviꞌtaxɨj ɨ nyacaríj jitze

aꞌɨ́jcɨ jɨmeꞌ nyaj huápuɨꞌɨj nyeyiin.

⁶Aꞌyaa nu een tɨꞌɨj ɨ síihuaꞌaj aꞌáa tɨ jáꞌsejreꞌ joꞌtɨj quee jáꞌtyiꞌtɨj,

tɨꞌɨj ɨ muacɨríj tɨ aꞌáa jáꞌsejreꞌ joꞌtɨj quee jooyiꞌrij.

⁷Canu cheꞌ cutzuj.

Aꞌyaa nu een tɨꞌɨj ɨ pínaꞌaj tɨ jusɨ́ɨj huayiꞌij.

⁸Majta quee aꞌnáj jaatapuáꞌcɨtacaꞌ maj jeꞌej puaꞌaj tyíꞌnyaxaj ɨ maj nyéjchaꞌɨɨreꞌ

majta jeꞌej puaꞌaj tyáꞌxaj ɨ nyaj jɨn ántyapuaj.

⁹Nyajta quee cheꞌ páan cuaꞌ, sulu aꞌɨ́j nuꞌuj nyij ɨ nasíj;

ajta ɨ nyaj jaꞌantyíyeꞌej aꞌɨ́ɨ pu jáꞌnaxcaj ɨ nyaj eetajaꞌraꞌtajyiꞌij,

¹⁰aꞌɨ́jcɨ jɨmeꞌ paj nyúꞌcamuɨꞌ ajta ɨ tɨ muajaaxɨejtyeꞌ,

jiꞌnye muáaj paj naꞌajriáj pej pij majcaꞌhuáyee naꞌantyipuáꞌrityeꞌen.

¹¹Ɨ nyaj jɨn júurij aꞌyaa pu mutyojoꞌyiꞌij tɨꞌɨj quéenyiꞌistarij;

aꞌyaa nu tyiꞌtyáhuasij tɨꞌɨj ɨ tuꞌpíj.

¹²Pajta muáaj, Tavástaraꞌ, jusén jɨmeꞌ paj tyíꞌijta;

¡aꞌnáj tɨnaꞌaj mu jamuaꞌreeriaj muáꞌjuꞌun jeꞌej paj ántyapuaj!

¹³Ájchesij, pajta jaꞌancuꞌvaxɨꞌɨn ɨ Sión,

jiꞌnye puꞌríj tyaꞌráꞌaj aꞌnáj tɨ aꞌyan tyaꞌtácatyiij;

¡puꞌríj huaꞌxaꞌpuɨꞌɨn paj tyaatúꞌuunyiꞌ!

¹⁴Aꞌɨ́ɨmaj ɨ maj a jimi tyáꞌtzaahuatyeꞌ mu jaxɨeꞌveꞌ aꞌ tyetyéj;

ajta quee tyámuaꞌ huaꞌasej aꞌɨ́jcɨ jɨmeꞌ tɨ huatyuꞌuunyiꞌhuacaꞌ.

¹⁵Néijmiꞌi ɨ tyeɨ́tyee majta ɨ maj tyíꞌijta ɨ cháanacaj japua

aꞌɨ́ɨ mu jaatyátzaahuatyeꞌsij ɨ tɨ jɨn ántyapuaj ɨ Tavástaraꞌ majta ɨ tɨ jɨn naa huaséꞌrin

¹⁶tɨꞌɨj aꞌɨ́ɨn ajtáhuaꞌaj jaatyátaahuaj ɨ Sión

ajta jeꞌen huataséjreꞌen ɨ tɨ jɨn naa huaséꞌrin,

¹⁷tɨꞌɨj jáanamuaj jeꞌej tɨ tyuꞌtyéenyuj aꞌɨ́jna ɨ tɨ quee jeꞌej jájtyoovej

ajta jeꞌen néijmiꞌi jɨn aꞌyan huárɨnyij jeꞌej tɨ jéehua tyáꞌhuaviij.

¹⁸Cheꞌ aꞌíjna ooyúꞌsiꞌhuaj

mej mij jáamuaꞌreej ɨ maj majcaꞌhuáyee huataséjreꞌsij,

mej mij majta aꞌɨ́ɨmaj tyaatatyójtziꞌreꞌen ɨ Tavástaraꞌ

aꞌɨ́ɨmaj ɨ maj majcaꞌhuáyee nanɨeꞌhuan.

¹⁹Tavástaraꞌ pu jaaséj ɨ cháanacaj aꞌájna ɨmuáj a jútyeꞌ,

jútyeꞌ ɨmuáj joꞌtɨj tyámuaꞌ tyejéꞌeen,

²⁰tɨꞌij huoꞌnamuaj ɨ maj juyiin aꞌɨ́jcɨ jɨmeꞌ maj námiꞌ

ajta huaꞌ japua huatányuunyij aꞌɨ́ɨjma ɨ maj meríj aꞌyan tyihuoꞌtaxájtacaꞌ maj huóꞌcuiꞌnyij,

²¹taꞌaj ij aꞌájna a Sión, ajta a Jerusalén,

huatánamuajreꞌen maj jaataxáj majta tyaatatyójtziꞌreꞌen ɨ Tavástaraꞌ

²²matɨꞌɨj néijmiꞌi ɨ tyeɨ́tyee ɨ maj aꞌyan huacháatɨmee ɨ cháanacaj japua

tyúusɨɨreꞌen mej mij tyaatatyójtziꞌreꞌen.

²³Aꞌɨ́ɨ pu náariꞌriꞌ ɨ nyaj jɨn uhuájcaꞌnyej nyatɨꞌɨj nyooj huamaꞌcaj ɨ juyéj jitzeꞌ;

ajta jeꞌen quee cheꞌ naatáꞌ nyej nyij jéetzeꞌ áꞌtyeeviꞌin.

²⁴Nyáaj nu aꞌyan tyaatéꞌexaa tɨjɨn: “Nyaj Dios,

capáj náꞌviꞌtɨɨcareꞌen tɨꞌɨj ooj jéꞌtaꞌ náꞌɨtziityaꞌaj nyaj aꞌyan séjreꞌej.”

¡Capu aꞌnáj antyipuaꞌrij ɨ nyinyiꞌraꞌaj muéetzij jimi!

²⁵Tyámuaꞌ paj jáaruuj ɨ cháanacaj tɨꞌɨj néijmiꞌi tyoꞌhuatyóochej;

muáaj paj pajta jaatyátaahuacaꞌ ɨ tajapuá tɨ séejreꞌ.

²⁶Ajta néijmiꞌi pu aꞌɨ́jna tyeꞌentyipuáꞌrij,

ajta muáaj paj tyámuaꞌ éenyeꞌej jusén jɨn séejreꞌ.

Néijmiꞌi pu aꞌɨ́jna tyuꞌtyápaꞌnaj, aꞌyájna tɨꞌɨj ɨ cáanarij;

¡muáaj paj seequéj jaꞌuuren tɨꞌquij seequéj éenyeꞌej jaꞌmej!

aꞌyájna tɨꞌɨj aꞌtɨ́j tɨ seequéj eenyeꞌ tyuꞌtyóochejtyeꞌen.

²⁷Pajta muáaj aꞌɨ́ɨn panaꞌaj puéꞌeen;

capu aꞌnáj antyipuaꞌrij ɨ nyinyiꞌraꞌaj muéetzij jimi.

²⁸Tyámuaꞌ paj tyihuaꞌchaꞌɨ́ɨj puáꞌmej aꞌɨ́ɨjma ɨ maj huaꞌ jitze eerányesij ɨ maj muahuɨɨreꞌ;

tyámuaꞌ paj huáꞌuuren aꞌájna joꞌpaj muáaj jáꞌsejreꞌ.

Tyámuaꞌ nu tyeetyátoosij ɨ Tavástaraꞌ

David tɨ jaꞌaꞌrij

¹Néijmiꞌi nu ɨ nyamuaꞌtzíiraꞌaj jɨn tyámuaꞌ tyeetyátoosij ɨ Tavástaraꞌ;

néijmiꞌi nu ɨ nye tyéviraꞌ jɨn tyámuaꞌ tyeetyátoosij aꞌɨ́jcɨ ɨ tɨ tyámuaꞌ een ɨ tɨ jɨn ántyapuaj.

²Néijmiꞌi nu ɨ nyamuaꞌtzíiraꞌaj jɨmeꞌ tyámuaꞌ tyeetyátoosij ɨ Tavástaraꞌ,

nyajta quee séej jóꞌhuaꞌxɨj ɨ tɨ jɨn tyámuaꞌ nyej jimi tyúꞌruuj.

³Aꞌɨ́ɨ pu aꞌɨ́ɨn puéꞌeen ɨ tɨ néijmiꞌi tyinaatúꞌuunyiꞌraj ɨ nyaj jɨn quee xáꞌpuɨꞌ huarɨ́j,

ajta néijmiꞌi jɨn tyíꞌnyahuaatyeꞌen tyiꞌtɨ́j nyaj jɨn tyíꞌcuiꞌ,

⁴aꞌɨ́ɨ pu nyaj japua huatányuusij nyej nyij quee huámuɨꞌnyij,

ajta nɨeꞌcánasij aꞌɨ́jcɨ jɨmeꞌ ɨ tɨ jɨn nyaxɨeꞌveꞌ tyámuaꞌ naa tyuꞌtoocuaꞌnyéej,

⁵ajta néijmiꞌi tyinaatáꞌsij ɨ tɨ jéetzeꞌ tyiꞌjɨ́ꞌreꞌen

ajta nyajajcuareꞌen aꞌyájna tɨꞌɨj ɨ cuéꞌraꞌvej.

⁶Tavástaraꞌ pu aꞌɨ́j jɨn huáꞌxɨjtyeꞌen ɨ tɨ jɨꞌréꞌcan jɨmeꞌ tyámuaꞌ naa tyáꞌxaꞌpuɨꞌɨntareꞌ

aꞌɨ́ɨjma ɨ maj jájpuejtzij aꞌɨ́jcɨ jɨmeꞌ maj jeꞌej puaꞌaj huáꞌuurej.

⁷Aꞌɨ́j pu jaataséjra ɨ ju juyéj ajta jeꞌej tɨ tyuꞌmuárɨej

aꞌɨ́jcɨ ɨ Moisés ajta aꞌɨ́ɨjma ɨ Israel maj jitze ajtyámaꞌcan.

⁸Tyámuaꞌ pu naa tyihuojóꞌmuaꞌraj ɨ Tavástaraꞌ ajta tyihuaꞌcuꞌvejꞌ

ajta quee jiyeꞌtzín tyinyúꞌcaj jiꞌnye aꞌɨ́ɨ pu taxɨeꞌveꞌ.

⁹Capu aꞌnáj tɨnaꞌaj tatyaꞌxɨꞌ capu ajta jusén jɨmeꞌ nyúꞌcamuɨꞌ;

¹⁰capu aꞌyan tyitaatáꞌ tɨꞌɨj tyiꞌtacɨꞌpuáatacaj

aꞌɨ́jcɨ jɨmeꞌ tyaj jeꞌej puaꞌaj huarɨ́j ajta tyiꞌtɨ́j tyaj jɨn tyiꞌijxánaꞌcɨraꞌ,

¹¹ajta quee ɨꞌríj tɨ huatyeꞌiteehuaj ɨ tɨ jɨn huaꞌxɨeꞌveꞌ aꞌɨ́ɨjma ɨ maj jaꞌtzaahuatyeꞌ

aꞌyájna tɨꞌɨj quee tyíɨꞌrij tɨ huatyeꞌiteehuaj tɨꞌɨj naꞌaj ɨ tajapuá ɨmuáj ajta iiyeꞌej cháanacaj japua.

¹²Puꞌríj aꞌɨmuáj tyojoohuáꞌxɨj ɨ tyaj jɨn tyiꞌijxánaꞌcɨraꞌcaꞌaj,

aꞌyájna tɨꞌɨj aꞌɨmuáj tyejéꞌsejreꞌ joꞌtɨj ɨ xɨcáj jéꞌejnyinyiij ajta joꞌtɨj jaꞌancáruꞌpij.

¹³Aꞌyaa pu een ɨ Tavástaraꞌ, aꞌɨ́ɨjma jimi ɨ maj jaꞌtzaahuatyeꞌ,

tyámuaꞌ pu naa tyihuáꞌxɨeꞌveꞌ tɨꞌɨj ɨ huaꞌ táataj ɨ tɨꞌríij,

¹⁴jiꞌnye aꞌɨ́ɨ pu jamuaꞌreej jeꞌej tɨ yeꞌej tyitáataahuacaꞌ,

tyámuaꞌ pu naa tyáꞌmuaꞌreej tyaj chuéj tyanaꞌaj puéꞌeen.

¹⁵Aꞌɨ́jna ɨ júuricamaꞌraꞌ ɨ tyévij aꞌyaa pu een tɨꞌɨj ɨ tuꞌpíj:

aꞌyaa pu tyeꞌejnyésij tɨꞌɨj ɨ xúuxuꞌuj aꞌájna aꞌɨtzitáj,

¹⁶jiyeꞌtzín pu ɨ áacaj jaariáꞌtuuxɨj, tɨꞌquij quee cheꞌ ajaꞌhuaꞌtaj jaꞌmej,

ajta jeꞌen quee cheꞌ aꞌtɨ́j jamuaꞌreeriaj jaꞌmej jeꞌej tɨ tyiꞌtɨ́j jáaruuj.

¹⁷Ajta ɨ Tavástaraꞌ tɨ jɨn taxɨeꞌveꞌ aꞌɨ́ɨ pu jusén jɨmeꞌ séejreꞌ

aꞌɨ́ɨjma jimi ɨ maj jaꞌtzaahuatyeꞌ,

capu aꞌnáj huatyápuaꞌrij ɨ tɨ jɨn tyámuaꞌ tyáꞌxaꞌpuɨꞌɨntareꞌ

aꞌyaa pu jusén jɨmeꞌ tyiꞌséereꞌej jaꞌmej ɨ tyeɨ́tyee jimi,

¹⁸ajta aꞌɨ́ɨmaj jimi ɨ maj jaꞌráꞌastej jeꞌej tɨ aꞌɨ́ɨn tyaꞌtóoraj

majta quee yóꞌhuaꞌnaj maj aꞌyan rɨjcaj tɨꞌɨj aꞌɨ́ɨn tyuꞌtaꞌíjtacaꞌ.

¹⁹Tavástaraꞌ pu arí ɨ juꞌɨpuáa tyámuaꞌ huáruuj aꞌájna u tajapuá,

ajta ɨ tɨ jɨn tyíꞌijta pu néijmiꞌqueꞌ antyúumuaꞌreej.

²⁰¡Tyámuaꞌ xu tyeetyátoonyij ɨ Tavástaraꞌ, tajapuá siaj néijmiꞌi putyíꞌuurej!

Muaꞌaj, mu siaj aꞌyan rɨcɨj jeꞌej tɨ aꞌɨ́ɨn tyíꞌijta,

siaj tyámuaꞌ tyáꞌnamuaj siajta aꞌyan rɨcɨj tɨꞌɨj aꞌɨ́ɨn tyíꞌijta.

²¹¡Tyámuaꞌ xu tyeetyátoonyij ɨ Tavástaraꞌ muaꞌaj siaj xantáaruꞌustyamuaꞌmuaꞌ puéꞌeen,

ɨ maj jahuɨɨreꞌ majta aꞌyan rɨcɨj jeꞌej tɨ aꞌɨ́ɨn tyaꞌajxɨéꞌviꞌraꞌ!

²²¡Cheꞌ néijmiꞌi jitzán tyámuaꞌ tyíꞌsejriaꞌaj ɨ Tavástaraꞌ tyiꞌtɨ́j tɨ aꞌɨ́ɨn tyúꞌtaahuacaꞌ,

néijmiꞌqueꞌ joꞌtɨj aꞌɨ́ɨn tyejéꞌijtaj!

¡Tyámuaꞌ nu tyeetyátoosij ɨ Tavástaraꞌ néijmiꞌi jɨmeꞌ ɨ nyajúuricamej!

Jeꞌej tyej tyaatatyójtziꞌreꞌen ɨ tɨ néijmiꞌi tyúꞌtaahuacaꞌ

¹¡Tyámuaꞌ nu tyeetyátoosij ɨ Tavástaraꞌ néijmiꞌi ɨ nyajúuricamej jɨmeꞌ!

¡Vaꞌcán paj jɨn séejreꞌ, Tavástaraꞌ pajta nyaj Dios!

Aꞌɨ́j paj períj tyuꞌtyéꞌchejtyej ɨ tɨ naa tyuꞌséꞌrin ajta tyaꞌtátaavej;

²aꞌɨ́j paj períj jɨn eecáꞌnaj ɨ tatzárij.

¡Muáaj paj jaatajíyoꞌrej ɨ tajapuá tɨ séejreꞌ tɨꞌɨj cáanarij tɨ nyéeriꞌij!

³¡Muáaj paj tyámuaꞌ jáaruuj ɨ jájtyij japua

ɨ tɨ japuan róocaꞌnyej aꞌchíꞌij, pajta aꞌyan chaꞌtaj jáaruuj ɨ jútyeꞌ ɨmuáj!

Pajta aꞌɨ́j japua yiꞌcacaa ɨ jéetɨrij,

aꞌɨ́j paj jitze huataráꞌrɨeꞌsij ɨ áacaj.

⁴Aꞌɨ́ɨ pu ɨ áacaj muéetzij jimi tyíꞌhuɨɨreꞌ tɨꞌij tyihuoꞌtéꞌexaatyeꞌen,

ajta ɨ tɨéj tɨ atyúumemej pu ajta muahuɨɨreꞌ.

⁵Pajta tyámuaꞌ naa tyeetyácajtyeꞌen ɨ cháanacaj

taꞌaj ij quee aꞌnáj táhuaanyeꞌen aꞌájna joꞌpaj muáaj tyámuaꞌ yóꞌruuj.

⁶Aꞌɨ́jna ɨ jájrij pu jaꞌváꞌnajcaꞌaj ɨ chuéj

aꞌyájna tɨꞌɨj cuxáa cáanariaꞌraꞌan tɨ puéꞌeenyeꞌ.

Ɨ jájtyij pu tyaꞌváꞌnajcaꞌaj ɨ jɨríj.

⁷Ajta muáaj paj jajtyáꞌxɨj, aj puꞌij tyíchee;

jiyeꞌtzín pu huatóoꞌuj tɨꞌɨj caꞌnyíin jɨn huatánamuajre aꞌnyúucaa.

⁸Ajta huataséjre ɨ jɨríj

ajta joꞌtɨj jaꞌcacúunyijmee,

néijmiꞌi pu aꞌyan tyuꞌrɨ́j jeꞌej paj muáaj tyuꞌtaꞌíjtacaꞌ,

⁹aꞌájna joꞌpaj muáaj tyojoꞌtáꞌ tɨꞌij aꞌáa jóoꞌastij,

tɨꞌij quee cheꞌ jaꞌváꞌnajca ɨ chuéj.

¹⁰Muáaj paj uyaꞌtaꞌítyacaa ɨ jájtyij aꞌájna joꞌtɨj jaꞌajmuɨꞌyéjmee

tɨꞌij ajtyáꞌastij ɨ játyaꞌnaj jitze tɨ canyáatɨmee ɨ jɨríj jitze.

¹¹Aꞌɨ́j mu mij ɨ jájtyij yaꞌcaa ɨ tyiꞌtyán simuáruunyij maj tyityaacɨ́ꞌɨj;

aꞌɨ́j mu majta jɨn tyámuaꞌ naa tyíꞌtyeyaꞌcaa ɨ púuruꞌuj maj huacɨꞌɨj.

¹²Aꞌájna joꞌtɨj jooꞌástɨmee ɨ játyaꞌnaj

aꞌáa mu tyojóoꞌitoꞌrityee ɨ pínaꞌsee jútyeꞌ maj ráꞌrɨee,

¡aꞌɨ́ɨ mu cɨꞌxɨcaa, aꞌɨ́jcɨ jitze ɨ tɨ tyiꞌtyáxamueꞌ ɨ cɨyéj!

¹³Muáaj paj aꞌɨ́ɨn puéꞌeen ɨ tɨ tyíꞌipuaj aꞌ ɨtzitáj

aꞌájna joꞌpaj muáaj jaꞌchej, jútyeꞌ ɨmuáj u tajapuá;

matɨꞌɨjta caꞌnyíin jɨn huatyéviiyej aꞌɨ́j paj jɨn tyámuaꞌ tyeetyátoosij ɨ chuéj.

¹⁴Petyiꞌtáꞌcaa tɨ ajnyéj ɨ ɨxáj mej mij ɨ tyiꞌtyán jáacuaꞌnyij,

ajta ɨ ítyeɨꞌrij tyeɨ́tyee maj tyíꞌhuastee

mej mij tyoꞌtácuaꞌnyij ɨ cháanacaj japua,

¹⁵aꞌɨ́jna ɨ cueꞌráj caꞌnyíjraꞌaj tɨ huaꞌtáꞌcaa,

ɨ nahuáj, mej mij aꞌɨ́jna jɨn huatóotyamuaꞌveꞌen

ajta tyámuaꞌ naa jéetzeꞌ tyuꞌtaséjreꞌsij ɨ huaꞌ nyéerimij quee ɨ aséityij jɨmeꞌ.

¹⁶Ajta tyámuaꞌ naa tyíꞌhuoseꞌen ɨ tɨ tyúꞌuu,

ɨ jucúj aꞌáa tɨ joꞌváatɨmee a Líbano Tavástaraꞌ tɨ jaahuástej.

¹⁷Aꞌɨ́j mu jitze tyúuꞌitoꞌrityee ɨ pínaꞌsee maj jéetzeꞌ cɨ́leꞌen,

majta ɨ cuaxúuj aꞌáa mu jóocheꞌtyee ɨ jucúj jitze.

¹⁸Ajta aꞌɨ́jcɨ jitze ɨ jɨríj tɨ ajtɨ́tɨꞌɨjmee aꞌáa mu jóꞌcɨꞌɨj ɨ chíutyee simuáruunyij,

ajta ɨ tyetyéj tzajtaꞌ mu jóoꞌavaꞌtacaa ɨ jejtzɨ́ɨj.

¹⁹Pajta ɨ máxcɨrɨeꞌ huatyátaahuacaꞌ tyej tyij jáamuaꞌreej aꞌnáj tɨ putyíꞌrɨcɨ;

ɨ xɨcáj pu ajta jamuaꞌreej aꞌtzáaj tɨ ancájrutyej.

²⁰Ajta ɨ tɨ́caꞌrij huataséjreꞌsij tɨꞌɨjta huatyéchumuaꞌrej,

aj mu mij huataséjreꞌsij ɨ tyiꞌtyán ɨtzitáj maj tyityaacɨ́ꞌɨj.

²¹Ɨ muajyéj mu cɨꞌxɨcaa mej mij tyiꞌtɨ́j huatyéeviꞌ,

aꞌyaa mu tyáꞌhuaviij ɨ Dios tɨꞌij tyiꞌtɨ́j huoꞌtáꞌan maj jáacuaꞌnyij.

²²Ajta tɨꞌɨjta ɨ xɨcáj eeréꞌnyej, aj mu mijta joꞌjúꞌun

majta jeꞌen huatyéjisij joꞌtɨj jaꞌtyástaꞌnajmee.

²³Aj puꞌij téꞌej ɨ tyáatɨꞌ eeráamej tɨꞌij aꞌáa jóꞌmeꞌen joꞌtɨj tyajáꞌmuarɨeꞌ

ajta jeꞌen tyíꞌmuarɨeꞌen ꞌasta naꞌaj quee huaréꞌchumuaꞌrej.

²⁴¡Jéehua paj tyúꞌtaahuacaꞌ, Tavástaraꞌ!

Aꞌɨ́j paj jɨn tyúꞌtaahuacaꞌ ɨ paj jɨn jéehua tyuꞌyíꞌtɨn;

¡ɨ cháanacaj japua pu tyíꞌsejreꞌ néijmiꞌi paj muáaj tyúꞌtaahuacaꞌ!

²⁵Aꞌáa pu jáꞌsejreꞌ ɨ jájrij, antayóoj ajta huápuɨꞌɨj vaꞌtɨ́j séejreꞌ,

joꞌmaj jéehua ɨ tyiꞌtyán tyityajaꞌxoo,

maj vivéejmee ajta ɨ maj cɨ́leꞌen;

²⁶aꞌáa mu majta ɨ báarcuj jáꞌcɨɨnyej, aꞌáa mu majta jáꞌsejreꞌ ɨ tyiꞌtyán maj tzɨ́ɨnyiꞌreꞌ,

aꞌɨ́jna ɨ tɨ tzɨ́ɨnyiꞌreꞌ muáaj paj jaatyátaahuacaꞌ pej pij aꞌɨ́j jɨn huáhuajca.

²⁷Néijmiꞌi mu aꞌɨ́ɨmaj muéetzij jimi tyiꞌijchóꞌveꞌ

pej pij tyihuoꞌtáꞌan ɨ maj tyúꞌcuaꞌnyij aꞌtzáaj tɨ aꞌyan huaꞌ jimi tyaꞌtácaj.

²⁸Muáaj paj tyihuoꞌtáꞌsij, aꞌɨ́ɨ mu mij tyaꞌancuriáaꞌsij;

aꞌmuácaꞌ paj jɨn tyihuoꞌtáꞌsij, majta jeꞌen aꞌɨ́ɨmaj tyámuaꞌ naa tyityaatajúꞌxaj;

²⁹tɨpuaꞌaj puaatyáꞌavaaj huaꞌ jimi, metyuꞌtátzɨɨnyeꞌej;

tɨpuaꞌaj pequee cheꞌ huoꞌtáꞌan maj ucayáatɨyiꞌcan, aꞌɨ́ɨ mu cuiꞌnyij

majta jeꞌen majtáhuaꞌaj chuéj huatyóotaahuaj.

³⁰Ajta tɨpuaꞌaj aꞌjúuricamej upahuojoꞌtaꞌítyiꞌreꞌen, aꞌɨ́ɨ mu huoseꞌen,

aꞌyaa pej pij tyáꞌjajcuareꞌen tɨꞌij naa huaséꞌrihuaꞌan ɨ cháanacaj.

³¹¡Jusén pu jɨn séejreꞌ aꞌɨ́jna ɨ Tavástaraꞌ tɨ jɨn naa huaséꞌrin!

¡Tavástaraꞌ pu jutyamuaꞌveꞌ jeꞌej tɨ tyiꞌtɨ́j tyuꞌtyátaahuacaꞌ!

³²Ɨ cháanacaj pu juvivej tɨꞌɨjta aꞌɨ́ɨn jaaséj,

¡ajta ájcɨtzujtarij ɨ jɨríj tɨpuaꞌaj aꞌɨ́ɨn jaꞌajtamuárɨeꞌen!

³³Nyatɨꞌɨj nyáaj nyooj séjreꞌej nyajta júurij,

nyetyuꞌtáchuiicaj ɨ Tavástaraꞌ jimi nyaj Dios.

³⁴Aꞌyaa nu tyáꞌxɨeꞌveꞌ tɨ jaꞌráanajche ɨ Tavástaraꞌ jeꞌej nyaj tyiꞌriáꞌmuaꞌsij,

jiꞌnye aꞌɨ́j nu jimi jatyoovej ɨ nyaj jɨn huatányetyamuaꞌveꞌen.

³⁵¡Micheꞌ huariaꞌxɨj ɨ cháanacaj japua ɨ maj tyíꞌxanaꞌcɨreꞌ!

¡Micheꞌ antyipuaꞌrej ɨ maj jeꞌej puaꞌaj tyityetyúuchaꞌɨj!

¡Tyámuaꞌ nu tyeetyátoosij ɨ Tavástaraꞌ néijmiꞌi ɨ nyajúuricamej jɨmeꞌ!

¡Alelúuyaj!

Jeꞌej tɨ ɨ Dios tyuꞌmuárɨej aꞌɨ́ɨjma jimi ɨ maj Israel jitze ajtyámaꞌcan

¹¡Setyuꞌtatyójtziꞌreꞌ ɨ Tavástaraꞌ!

¡Siajta jaariáꞌxaj jeꞌej tɨ aꞌɨ́ɨn ántyapuaj!

Siahuoꞌréꞌixaatyeꞌ ɨ chájtaꞌnaj jitze jeꞌej tɨ aꞌɨ́ɨn tyíꞌmuarɨeꞌ.

²Siajta tyuꞌtáchuiicaj aꞌɨ́j jitze maꞌcan.

¡Xaataxáj jeꞌej tɨ aꞌɨ́ɨn vaꞌcán jɨn tyíꞌmuarɨeꞌ!

³Siajta aꞌɨ́jna jɨn ahuóotzaahuatyeꞌen ɨ tɨ tyámuaꞌ een ɨ tɨ jɨn ántyapuaj.

¡Cheꞌ jutyamuaꞌveꞌej ɨ huaꞌxɨéjnyuꞌcaa

aꞌɨ́ɨjma ɨ maj jahuoo ɨ Tavástaraꞌ!

⁴Aꞌɨ́j xu jitze huatyóocaꞌnyej ɨ Tavástaraꞌ, siajta aꞌɨ́jcɨ jitze ɨ tɨ jɨn néijmiꞌi putyíꞌuurej;

Tavástaraꞌ xu jitze aꞌnáj tɨnaꞌaj tyíꞌcaꞌnyej.

⁵Xoꞌtámuaꞌreej tɨ aꞌɨ́ɨn vaꞌcán jɨn tyíꞌmuarɨeꞌ ajta naa tyuꞌséꞌrin,

ajta jeꞌej tɨ aꞌɨ́ɨn tyaataxájtacaꞌ ɨ tɨ jɨn tyuꞌtaꞌíjtacaꞌ,

⁶muaꞌaj, ɨ siaj aꞌɨ́j jitze eerámaꞌcan ɨ Abraham ɨ tɨ jahuɨɨreꞌ,

muaꞌaj, yójmuaꞌmuaꞌ aꞌɨ́jcɨ ɨ Jacob, aꞌɨ́ɨn tɨ jamuaꞌantyíhuoo.

⁷Aꞌɨ́ɨ pu aꞌɨ́ɨn puéꞌeen ɨ Tavástaraꞌ, taj Dios;

¡aꞌɨ́ɨ pu néijmiꞌqueꞌ tyíꞌijta ɨ cháanacaj japua!

⁸Tyij ajta mueꞌtɨ́j séej víꞌraꞌaj nyinyiꞌraꞌaj mutyojoꞌmeꞌen

capu aꞌnáj yoꞌhuáꞌxɨj tyiꞌtɨ́j tɨ jɨn tyaꞌtóoraj ɨ junyúucaa jitze,

⁹aꞌɨ́jcɨ ɨ tɨ jɨn tyaꞌtáratziiriꞌ ɨ Abraham,

ajta tyiꞌtɨ́j tɨ jɨn tyaꞌtóoraj aꞌɨ́jcɨ jimi ɨ Isaac

¹⁰aꞌyaa pu ajta tyeetyájtoo tɨꞌɨj nyúucarij maj jɨn tyuꞌtaꞌíjtaj aꞌɨ́jcɨ jimi ɨ Jacob,

ajta aꞌɨ́jna jɨn jusén jɨmeꞌ tyaꞌtácaj aꞌɨ́ɨjma jimi ɨ Israel maj jitze ajtyámaꞌcan,

¹¹tɨꞌɨj aꞌyan tyuꞌtaxájtacaꞌ tɨjɨn:

“Aꞌɨ́j nu ɨ chuéj muaatáꞌsij aꞌáa tɨ jaꞌajtyámaꞌcan a Canaán

aꞌyájna tɨꞌɨj muéetzij tɨ muáacɨꞌtyij pataꞌaj pij jaꞌancuriáꞌan.”

¹²Aꞌɨ́ɨmaj ɨ maj cɨ́ɨ manaꞌaj aráꞌaxcaa,

majta jeꞌcáj ɨ maj séej chuéj japua jáꞌmaꞌcan,

¹³aꞌyaa mu mij aꞌɨ́ɨmaj tyityajúꞌcaꞌaj séej chuéj japua majtáhuaꞌaj séej chuéj japua

joꞌmaj séecan tyejéꞌijtaj majtáhuaꞌaj joꞌmaj séecan tyejéꞌijtaj,

¹⁴Dios pu quee tyuꞌtáꞌ tɨꞌij tyiꞌtɨ́j jeꞌej puaꞌaj huóꞌuurej,

ajta tyámuaꞌ tyihuoꞌtéꞌexaaj aꞌɨ́ɨjma ɨ maj tyíꞌijtacaꞌaj aꞌyan tɨjɨn:

¹⁵“Jeꞌej huáꞌuurej aꞌɨ́ɨjma ɨ nyaj huaꞌantyíhuoj

caxu siajta jeꞌej puaꞌaj huáꞌuurej aꞌɨ́ɨjma ɨ maj nye jitze maꞌcan tyíꞌxaxaꞌaj.”

¹⁶Ajta tyuꞌtáꞌ mej mij huatatájcun aꞌɨ́jcɨ chuéjraꞌ japua,

ajta néijmiꞌi tyihuáaꞌriꞌriꞌ ɨ tɨ tyíꞌcueꞌriꞌ.

¹⁷Ajta aꞌɨ́ɨjma jimi pu anaquéej huataꞌítyacaꞌ aꞌɨ́jcɨ ɨ José,

aꞌɨ́jcɨ ɨ maj aꞌyan tyáatoocaꞌaj tɨꞌɨj ɨ tɨ caꞌnyéjrij jɨn tyíꞌhuɨɨreꞌ.

¹⁸Majta cadéenaj jɨn tyaapuéj ɨ ɨcájraꞌan jitze;

¡majta aꞌúun yeꞌtyáanaj joꞌtɨj tyapúustiꞌ jɨn tyejeꞌtyánamiꞌ!

¹⁹Aꞌɨ́jna ɨ nyúucariaꞌraꞌ ɨ Tavástaraꞌ pu jaatyéesej aꞌɨ́jcɨ ɨ José,

ꞌasta naꞌaj quee aꞌyan tyaꞌróoꞌastej jeꞌej tɨ ɨ José tyuꞌtaxájtacaꞌ.

²⁰Aꞌɨ́jna ɨ rey, ɨ tɨ muiꞌcaa tyíꞌijtyaꞌcaꞌaj ɨ tyeɨ́tyee,

aꞌɨ́ɨ pu aꞌyan tyuꞌtaꞌíjtacaꞌ mej mij jiꞌrátoonyij joꞌtɨj jeꞌtyánamiꞌhuacaꞌaj,

²¹ajta jaꞌantyíhuoj tɨꞌij tyuꞌtaꞌíjtaj ajta néijmiꞌi jɨn antyúumuaꞌreeriaj joꞌtɨj aꞌɨ́ɨn jaꞌchej,

néijmiꞌi jɨmeꞌ tyiꞌtɨ́j tɨ aꞌɨ́ɨn tyíchaꞌɨɨcaꞌaj,

²²tɨꞌij tyihuóꞌmuaꞌtyen ajta tyámuaꞌ tyihuoꞌcámuaꞌriityeꞌen

aꞌɨ́ɨjma ɨ maj tyíꞌijta ajta aꞌɨ́ɨjma ɨ huáasij.

²³Aj puꞌij téꞌej aꞌɨ́ɨn mujoꞌvéꞌmej ɨ Israel, aꞌɨ́ɨn tɨꞌij puéꞌeen ɨ Jacob,

aꞌyaa puꞌij aꞌáa tyejéꞌchajcaꞌaj a Egipto tɨꞌɨj ɨ tɨ séej chuéj japua jáꞌmaꞌcan,

aꞌɨ́jcɨ japua ɨ chuéj tɨ aꞌyan tyajaꞌrájtyapuaj tɨjɨn Cam.

²⁴Dios puꞌij tyuꞌtáꞌ mej mij huápuɨꞌɨj huatámuiꞌrej ɨ tyeɨ́tyeristyamuaꞌmeꞌen,

majta jeꞌen jéetzeꞌ huatyóocaꞌan mequee aꞌɨ́ɨmaj ɨ maj Egipto jáꞌmaꞌcan.

²⁵Ajta aꞌyaa pu huóꞌruuj mej mij ɨ maj Egipto jáꞌmaꞌcan

huáꞌanchueereꞌen aꞌɨ́ɨjma ɨ tyeɨ́tyeristyamuaꞌmeꞌen

ajta mej mij huoꞌcuanamuan ɨ Dios maj huɨɨreꞌ.

²⁶Aj puꞌij Dios Moisés ujoꞌtaꞌítyacaꞌ ɨ tɨ jimi tyíꞌhuɨɨreꞌ,

ajta aꞌɨ́jcɨ ɨ Aarón, ɨ tɨ ajta arí jaꞌantyíhuoocaꞌaj,

²⁷aꞌɨ́ɨ mu mij aꞌyan huarɨ́j ɨ maj jɨn tyámuaꞌ tyoꞌtaséj ɨ Dios jimi aꞌájna joꞌtɨj quee jáꞌtyiꞌtɨj:

¡majta jéehua tyuꞌséj aꞌɨ́jcɨ japua ɨ chuéj Cam tɨ tyajaꞌrájtyapuaj!

²⁸Dios pu tɨ́caꞌrij ujoꞌtaꞌítyacaꞌ ɨ tɨ jɨn néijmiꞌi tyaꞌváꞌnaj,

majta ɨ Egipto maj jáꞌmaꞌcan camu jaꞌráꞌastijrej ɨ nyúucariaꞌraꞌ.

²⁹Ajta tyuꞌtáꞌ tɨꞌij xúureꞌej huatyóotaahuaj ɨ jájtyij tɨ muɨꞌyej ɨ játyaꞌnaj jitze,

ajta néijmiꞌcaa huácuij ɨ hueꞌtyée;

³⁰jéehua pu ajta taachuísee ujoꞌtaꞌítyacaꞌ aꞌɨ́jcɨ chuéjraꞌ japua,

aꞌáa mu mij majta jaꞌráꞌaj joꞌtɨj ɨ rey jáꞌhuiꞌcareꞌej.

³¹Dios pu tyuꞌtaxájtacaꞌ, matɨꞌɨj mij jéehua ɨ xɨeꞌrúj huataséjre maj cɨ́leꞌen ajta maj vivéejmee

néijmiꞌqueꞌ mu mij oorióonajchacaꞌ ɨ chuéj japua aꞌáa tɨ jaꞌajtyámaꞌcan a Egipto.

³²Ajta quee víityee ujoꞌtaꞌítyacaꞌ, sulu aꞌɨ́ɨj puꞌuj ɨ tyéetyee

ajta tɨéj aꞌɨ́jcɨ japua ɨ chuéj aꞌáa tɨ huatacaꞌaj.

³³Ajta yoꞌrɨej ɨ úuvaj maj jahuastyaꞌcaꞌaj ajta aꞌɨ́jcɨ ɨ xápuaꞌ maj jataꞌítyɨꞌricaꞌaj;

¡tyeꞌentyipuáꞌrij ɨ tɨ tyúꞌuucaꞌaj aꞌájna a Egipto!

³⁴Dios pu tyuꞌtaxájtacaꞌ, majta jeꞌen ɨ vítziꞌcɨɨ huataséjre;

¡majta jéehua huápuɨꞌɨj aráꞌaxcaa, capu ij ɨꞌriitacaꞌaj maj huoꞌtyéꞌiten!

³⁵¡Majta néijmiꞌi tyuꞌriáꞌxɨj ɨ tuꞌpíj ɨtzitáj tɨ tyúꞌuucaꞌaj

majta néijmiꞌi ɨ chuéj japua tɨ tyeꞌejnyájcaꞌaj!

³⁶¡Ajta huoꞌcuij, aꞌájna a Egipto,

aꞌɨ́ɨjma ɨ huaꞌyojmuaꞌ maj anáatyaꞌaj huanánɨeꞌhuacaꞌ aꞌáa maj jáꞌmaꞌcan!

³⁷Aj puꞌij téꞌej ɨ Dios hueꞌráaviꞌtɨj ɨ jutyéɨtyeristyamuaꞌ aꞌájna

majta aꞌɨ́jna joꞌtɨɨ ɨ ooroj majta ɨ pláataj,

ajta quee sɨ́ɨj tɨ huaꞌ jitze ajtyámaꞌcan tyiꞌtɨ́j jɨn tyuꞌpuéjtyiꞌhuacaꞌ.

³⁸Aꞌɨ́ɨmaj ɨ Egipto maj jáꞌmaꞌcan mu huatóotyamuaꞌvej matɨꞌɨj huoꞌséj maj joꞌcɨ́j,

jiꞌnye huápuɨꞌɨj mu tyíꞌtzɨɨnyaꞌcaꞌaj.

³⁹Dios pu jéetɨrij ujoꞌtaꞌítyacaꞌ tɨꞌij huaꞌváꞌnaj

ajta tɨéj tɨꞌij tɨ́caꞌ huoꞌtyátatzaviꞌtyeꞌen.

⁴⁰Majta aꞌɨ́j tyuꞌtáhuoo ɨ maj tyúꞌcuaꞌnyij, aj puꞌij soꞌríj ujoꞌtaꞌítyacaꞌ,

majta aꞌɨ́j jɨn tyámuaꞌ naa tyityaatajúꞌxaj ɨ páan jútyeꞌ tɨ jeꞌcáanyej.

⁴¹Ajta ɨ tyetyéj tɨ tyétyee pu ajtyátaaracaꞌ, aj puꞌij jájtyij aꞌɨ́j jitze eerámuɨꞌyacaꞌ

aꞌɨ́ɨ puꞌij huatámuɨꞌyacaꞌ aꞌájna joꞌtɨj quee jáꞌtyiꞌtɨj aꞌyájna tɨꞌɨj játyaꞌnaj.

⁴²Jiꞌnye aꞌɨ́j pu ootámuaꞌreeriꞌ ɨ tɨ tyámuaꞌ een ɨ tɨ jɨn tyaꞌtóoratziiriꞌ

aꞌɨ́j tɨ aꞌyan tyaꞌtáratziiriꞌ ɨ Abraham ɨ tɨ jahuɨɨreꞌ.

⁴³Aꞌyaa puꞌij ɨ Dios tyihueꞌráaviꞌtɨj ɨ jutyéɨtyeristyamuaꞌ ɨ tɨ arí huaꞌantyíhuoocaꞌaj,

muaꞌantyijíihuaj aꞌɨ́jcɨ jɨmeꞌ maj huatóotyamuaꞌvej,

⁴⁴ajta jeꞌen aꞌɨ́j huoꞌtaꞌ ɨ chuéj séecan tɨ jimi ajtyámaꞌcan tacaꞌaj

ajta aꞌɨ́jcɨ ɨ tɨ tyúꞌcɨɨriacaꞌ aꞌɨ́ɨmaj maj tyuꞌmuárɨej ɨ séej maj chájtaꞌnaj jitze ajaꞌchej,

⁴⁵mej mij tyuꞌtyátzaahuatyeꞌen majta jeꞌen aꞌyan huárɨnyij

jeꞌej tɨ tyíꞌijta ɨ nyúucariaꞌraꞌ ajta jeꞌej tɨ tyíꞌmuaꞌtaj ɨ Tavástaraꞌ.

¡Alelúuyaj!

Tyiꞌtɨ́j maj jɨn aꞌnáj tɨnaꞌaj atyáꞌɨtzeꞌrihuaꞌaj ɨ maj Israel jitze ajtyámaꞌcan

¹¡Alelúuyaj!

Setyuꞌtatyójtziꞌreꞌ ɨ Tavástaraꞌ, jiꞌnye aꞌɨ́ɨ pu tyámuaꞌ tyihuojóꞌmuaꞌraj,

ajta ɨ tɨ jɨn taxɨeꞌveꞌ jusén jɨmeꞌ pu séejreꞌ.

²¿Aꞌtanyíj pújoorej tɨꞌij joꞌtyéeyuꞌxaj ɨ tɨ jɨn tyuꞌtyáamueꞌtɨj ɨ Tavástaraꞌ?

¿Aꞌtanyíj pújoorej tɨꞌij aꞌyan tyaatatyójtziꞌreꞌen tɨꞌɨj jimi tyiꞌtyéevijtɨj?

³Micheꞌ huatóotyamuaꞌveꞌen ɨ maj tyámuaꞌ tyityetyúuchaꞌɨj

majta aꞌnáj tɨnaꞌaj tyámuaꞌ rɨcɨj.

⁴Panoꞌtámuaꞌreej nyéetzij, Tavástaraꞌ, patɨꞌɨj tyámuaꞌ tyihuoꞌtyátoonyij aꞌtyéɨtyeristyamuaꞌ;

nyéetzij paj nyamuaꞌreeriaj patɨꞌɨj mujoꞌvéꞌmeꞌen pej pij huaꞌ japua huatányuunyij,

⁵nyataꞌaj nyij nyáaj jaaséj ɨ maj jɨn huatóotyamuaꞌveꞌsij aꞌɨ́ɨmaj ɨ paj huaꞌantyíhuoj,

nyataꞌaj nyij huatányetyamuaꞌveꞌen nyajta ootányatzaahuatyeꞌen

aꞌɨ́ɨjma jamuán ɨ maj aꞌ jitze ajtyámaꞌcan.

⁶Aꞌyaa tu chaꞌtaj tyanaꞌaj tyityoꞌtyáꞌɨtzeerej matɨꞌɨj ɨ tahuásimuaꞌcɨꞌɨj;

tuꞌríj jeꞌej puaꞌaj tyityoꞌcájrupij, tyajta tyeríj jeꞌej puaꞌaj huarɨ́j.

⁷Aꞌɨ́ɨmaj ɨ tahuásimuaꞌcɨꞌɨj, aꞌájna a Egipto,

camu tyuꞌtyátzaahuatyej jeꞌej paj muáaj huaꞌ jimi vaꞌcán jɨn tyuꞌmuárɨej,

majta mu yoꞌhuáꞌxɨj aꞌɨ́jcɨ ɨ paj muáaj jɨn huaꞌxɨeꞌveꞌ,

camu majta muáanamuajriꞌ véjriꞌ aꞌájna jájritzeꞌ tɨ poꞌvij.

⁸Ajta ɨ Dios pu huaꞌ japua huatanyúj, ajta huoꞌtaꞌ mej mij jáamuaꞌtyij ɨ tɨ jɨn néijmiꞌi putyíꞌuurej

aꞌyaa pu huarɨ́j tɨꞌij tyámuaꞌ tyuꞌtyáꞌɨtzeereꞌen ɨ tɨ jɨn ántyapuaj.

⁹Ajta jajtyáꞌxɨj aꞌɨ́jcɨ ɨ jájrij tɨ poꞌvij aꞌɨ́ɨ puꞌij ariaꞌhuaxɨj.

Aꞌyaa mu mij huáchisteꞌ tyityaꞌantacɨ́j aꞌɨ́jcɨ jitze ɨ jájrij

aꞌyájna tɨꞌɨj joꞌtɨj quee jáꞌtyiꞌtɨj.

¹⁰Aꞌyaa puꞌij huaꞌ japua tyuꞌtanyúj aꞌɨ́ɨjma jimi ɨ maj huaꞌajchaꞌɨɨreꞌ,

ajta aꞌɨ́ɨjma jimi ɨ maj huaꞌxanaꞌvaꞌcaꞌaj.

¹¹Ɨ jájtyij pu huaꞌváꞌnaj aꞌɨ́ɨjma ɨ maj quee huaꞌséjramuꞌcaꞌaj

ajta quee sɨ́ɨj júurij huatyáꞌɨtzeerej.

¹²Aj mu mij tyáꞌantzaahuaj aꞌɨ́jcɨ jitze ɨ Dios tɨ tyihuaꞌtáratziiriꞌ

majta jeꞌen jimi tyuꞌtáchuiicacaꞌ.

¹³Majta jiyeꞌtzín mu yoꞌhuáꞌxɨj jeꞌej tɨ ɨ Dios tyiꞌtɨ́j huaꞌ jimi huáruuj,

majta quee tyuꞌchóꞌvej mej mij jáamuaꞌtyij jeꞌej tɨ tyiꞌtɨ́j huaꞌ jimi tyaꞌtácatyiij.

¹⁴Aꞌájna, joꞌmaj jujɨ́ɨmuaꞌaj jáꞌsejriaꞌcaꞌaj joꞌtɨj quee jáꞌtyiꞌtɨj,

aꞌáa mu quee tyámuaꞌ huarɨ́j aꞌɨ́jcɨ jimi ɨ Dios

aꞌyaa mu tyáꞌxɨeꞌvaꞌcaꞌaj tɨ aꞌɨ́ɨn aꞌyan huárɨnyiicheꞌ jeꞌej maj aꞌɨ́ɨmaj tyáꞌxɨeꞌvaꞌcaꞌaj.

¹⁵Ajta ɨ Dios pu aꞌyan tyihuoꞌtáꞌ jeꞌej maj aꞌɨ́ɨmaj tyaatáhuaviiriꞌ,

ajta aꞌɨ́j pu uhuojoꞌtaꞌítyiꞌriꞌ ɨ cuiꞌnyiꞌraꞌaj maj jɨn huácuiꞌnyij.

¹⁶Aꞌájna joꞌmaj tyojoꞌtyáꞌɨnaamuacaꞌaj aꞌáa mu jaꞌanchueerej aꞌɨ́jcɨ ɨ Moisés,

majta aꞌɨ́jcɨ ɨ Aarón, aꞌɨ́jna ɨ tɨ tyámuaꞌ tyáꞌhuɨɨriaꞌcaꞌaj ɨ Tavástaraꞌ.

¹⁷Aj puꞌij ɨ chuéj atyátaariacaꞌ aꞌɨ́ɨ puꞌij ajoꞌcájrupij ɨ Datán,

majta jeꞌen aꞌɨ́ɨjma ɨ Abiram maj jitze ajtyámaꞌcantacaꞌaj.

¹⁸¡Ajta ɨ tɨéj ájtaa aꞌɨ́ɨjma jimi!

¡Aꞌɨ́ɨ puꞌij ɨ tɨéj huoꞌtyáatɨej ɨ maj jeꞌej puaꞌaj tyityetyúuchaꞌɨɨcaꞌaj!

¹⁹Majta aꞌájna ɨ jɨríj japua Horeb tɨ tyajaꞌrájtyapuaj aꞌáa mu visáaruꞌ huatyátaahuacaꞌ,

tyiꞌtɨ́j ooroj maj jɨn jaatyátaahuacaꞌ, aꞌɨ́j mu mij huatyánajchacaꞌ:

²⁰¡aꞌɨ́j mu seequéj huáruuj ɨ Dios tɨ naa huaséꞌrin

aꞌɨ́jcɨ jɨmeꞌ ɨ tyiꞌtɨ́j tɨ aꞌyan huaséꞌrin tɨꞌɨj túuruꞌ ɨxáj tɨ cuaꞌcaa!

²¹Meyoꞌhuaꞌxɨj ɨ Dios, ɨ tɨ huaꞌ japua huatanyúj,

ɨ tɨ vaꞌcán jɨn tyuꞌmuárɨej aꞌájna a Egipto,

²²ajta jéehua tyámuaꞌ tyúꞌruuj ɨ tɨ naa tyuꞌséꞌrin aꞌɨ́jcɨ japua ɨ chuéj tɨ aꞌyan tyajaꞌrájtyapuaj tɨjɨn Cam

ajta ɨ maj jɨn jeꞌen tyoꞌtaséj aꞌájna a jájritzeꞌ tɨ poꞌvij.

²³Dios pu aꞌyan tyuꞌtaxájtacaꞌ tɨ huaꞌantyipuaꞌrityeꞌsij;

ajta aꞌɨ́jna ɨ Moisés, aꞌɨ́ɨn tɨ jaꞌantyíhuoj, aꞌɨ́ɨ pu huaꞌ jimi ajoꞌtyéechaxɨ

ajta jeꞌen jaatyápuaꞌrij ɨ Dios tɨ jɨn nyuꞌcamuɨꞌcaꞌaj,

aꞌɨ́ɨ puꞌij quee tyuꞌtáꞌ tɨꞌij huaꞌantyipuáꞌrityeꞌen.

²⁴Aꞌyaa mu mij majcaꞌhuáyee quee tyaataxɨeꞌvej ɨ chuéj tɨ naa huaséꞌrin,

majta quee tyáꞌantzaahuaj jeꞌej tɨ ɨ Dios tyihuaꞌtáratziiriꞌ,

²⁵majta ɨ juꞌɨnáamua tzajtaꞌ jeꞌej puaꞌaj tyaataxájtacaꞌ ɨ Tavástaraꞌ,

camu majta jaꞌráꞌastej jeꞌej tɨ aꞌɨ́ɨn tyuꞌtaꞌíjtacaꞌ.

²⁶Aj puꞌij aꞌɨ́ɨn ajméjcaꞌtacaꞌ tɨꞌquij aꞌyan tyaꞌtóoratziiriꞌ

tɨ tyuꞌtáꞌsij mej mij huácuiꞌnyij aꞌájna joꞌtɨj quee jáꞌtyiꞌtɨj,

²⁷tɨ aꞌyan ajta tyihuáꞌcuiꞌnyij aꞌɨ́ɨjma ɨ maj huaꞌ jitze eerányesij

ajta jeꞌen huojoꞌcuíxɨꞌɨj aꞌɨ́ɨjma tzajtaꞌ ɨ maj quee tyáꞌtzaahuatyeꞌ.

²⁸Majta jeꞌen caꞌnyéjrij jɨn tyuꞌtyáhuɨɨ aꞌɨ́jcɨ jimi ɨ Baal-peor,

aꞌɨ́j mu majta tyúꞌcuaa ɨ tɨ tyuꞌtámuꞌvejrityiꞌhuacaꞌ aꞌɨ́ɨjma jimi ɨ dioosij maj quee júurij.

²⁹Majta jájriaaxɨej ɨ Dios aꞌɨ́jcɨ jɨmeꞌ ɨ maj jɨn jeꞌej puaꞌaj huarɨ́j,

aj puꞌij jéehua cuiꞌnyiꞌraꞌaj huaꞌ jimi huataséjre.

³⁰Ajta aꞌɨ́ɨ pu ájchej ɨ Finees tɨꞌquij jaajéꞌcaj aꞌtɨ́j tɨ puéꞌeenyeꞌ,

aꞌyaa puꞌij tyuꞌtyápuaꞌriacaꞌ ɨ maj jɨn tyíꞌcucuiꞌcaꞌaj,

³¹Dios puꞌij tyámuaꞌ joꞌtaséj jeꞌej tɨ tyiꞌtɨ́j jɨn tyámuaꞌ huarɨ́j,

mej mij jusén jɨmeꞌ jaxájta ɨ huaꞌ huásimuaꞌ jimi ajta aꞌɨ́ɨjma jimi ɨ huaꞌyojmuaꞌ.

³²Aꞌyaa mu majta huarɨ́j tɨꞌij ɨ Dios tyinyúꞌcaj

véjriꞌ aꞌájna joꞌtɨj jaꞌrájmuaa aꞌ tɨ aꞌyan tyajaꞌrájtyapuaj tɨjɨn Meribá,

aꞌɨ́ɨ mu mij puéꞌeenyeꞌ

tɨꞌij ɨ Moisés jimi jeꞌej puaꞌaj atyojoꞌréꞌnyej,

³³jiꞌnye aꞌɨ́ɨ mu quee caꞌnyíjraꞌaj jaatáꞌ

aꞌɨ́j pu jɨn chaꞌnaꞌaj tyíꞌxajtacaꞌaj ajta quee jamuaꞌreeriacaꞌaj jeꞌej tɨ tyiꞌtyáxajtasimaꞌaj.

³⁴Camu huaꞌantyipuaꞌrityej aꞌáa maj joꞌcháatɨmaꞌcaa

joꞌtɨj ɨ Tavástaraꞌ aꞌyan tyihuojoꞌtaꞌíjtyaꞌcaꞌaj mej mij huaꞌantyipuáꞌrityeꞌen.

³⁵Sulu aꞌyaa mu huarɨ́j,

aꞌɨ́ɨjma mu antyánaxcacaꞌ ɨ maj quee tyáꞌtzaahuatyeꞌ

majta jeꞌen aꞌyan tyaarɨꞌrej jeꞌej maj aꞌɨ́ɨmaj tyityaajúꞌcaꞌaj,

³⁶aꞌɨ́ɨjma mu ɨ sáanturij huatyánajchacaꞌ,

aꞌɨ́ɨ mu mij puéꞌeenyeꞌ mej mij aꞌɨ́ɨmaj jeꞌej puaꞌaj tyityojoꞌvej,

³⁷jiꞌnye aꞌɨ́ɨmaj mu huoꞌtámuꞌvejritacaꞌ ɨ juyójmuaꞌ maj tyétyacaa ajta ɨ maj úucaa

aꞌyan metyihuoꞌcuiꞌij aꞌɨ́ɨjma jitze maꞌcan ɨ tyiyáaruꞌuj.

³⁸Majta aꞌɨ́ɨjma huácuij ɨ maj quee tyiꞌtɨ́j jɨn áꞌɨtzeeriaꞌcaꞌaj,

huaꞌ xuureꞌ ɨ huaꞌyojmuaꞌ maj úucaa ajta maj tyétyacaa,

aꞌɨ́ɨjma mu mij huatámuꞌvejrityej ɨ dioosij Canaán maj jáꞌmaꞌcan.

Ɨ chuéj pu jeꞌej puaꞌaj huarɨ́j aꞌɨ́jcɨ jɨmeꞌ ɨ huaꞌ xúureꞌej,

³⁹aꞌɨ́ɨ mu mij majta jeꞌej puaꞌaj huarɨ́j majta huóoxanaꞌcɨrej

néijmiꞌi jɨmeꞌ ɨ maj jɨn huápuɨꞌɨj jeꞌej puaꞌaj tyityoꞌcájrupij.

⁴⁰Tavástaraꞌ pu huápuɨꞌɨj tyinyúꞌcacaꞌ aꞌɨ́ɨjma jimi ɨ jutyéɨtyeristyamuaꞌ,

ajta huoꞌtaxánaꞌvej, aꞌɨ́ɨjma ɨ maj jitzan ajtyámaꞌcan tacaꞌaj;

⁴¹ajta ahuojóohuaꞌxɨj aꞌɨ́ɨjma jimi ɨ maj quee tyáꞌtzaahuatyeꞌ,

aꞌɨ́ɨ mu mij huaꞌ jimi tyuꞌtaꞌíjtacaꞌ ɨ maj huaꞌajchaꞌɨɨreꞌ;

⁴²aꞌɨ́ɨmaj mu huoꞌtzíinajraa ɨ maj huaꞌajchaꞌɨɨreꞌ,

majta huoꞌtyáxaahuatacaꞌ jeꞌej maj aꞌɨ́ɨmaj tyihuoꞌtaꞌíj.

⁴³Dios pu mueꞌtɨ́j huaꞌ japua huatanyúj,

majta aꞌɨ́ɨmaj camu aꞌyan huarɨ́j jeꞌej tɨ aꞌɨ́ɨn tyihuoꞌxáꞌpuɨꞌɨntariꞌtzej

aꞌɨ́ɨ mu mij jóꞌvej tyiꞌtɨ́j maj jujɨ́ɨmuaꞌaj jɨn jeꞌej puaꞌaj huarɨ́j.

⁴⁴Ajta aꞌyájna, tɨꞌɨj huoꞌséj maj quee jeꞌej jájtyooveꞌej

ajta huóꞌnamuajriꞌ maj juyiinyacaꞌaj,

⁴⁵aj pu joꞌtámuaꞌreeriꞌ jeꞌej tɨ huaꞌ jimi tyaꞌtóoratziiriꞌ

aj puꞌij seequéj huóoruuj,

jiꞌnye huápuɨꞌɨj pu vaꞌcán jɨn taxɨeꞌveꞌ,

⁴⁶¡aꞌyaa puꞌij tyuꞌtáꞌ mej mij ɨ maj jeꞌej puaꞌaj huáꞌuuriajcaꞌaj

tyámuaꞌ naa metyihuaꞌajchaꞌɨ́ɨj muáꞌraꞌnyij!

⁴⁷¡Tajapuá paj huatányuunyij, Tavástaraꞌ taj Dios!

¡Pajta tɨiꞌrátoonyij huaꞌ tzajtaꞌ ɨ maj séej chuéj japua joꞌcháatɨmee

tyej tyij tyimuaatatyójtziꞌreꞌen aꞌɨ́jcɨ jitze maꞌcan jeꞌej paj ántyapuaj,

tyataꞌaj tyij tatyámuaꞌveꞌej tyetyimuaatatyójtziꞌreꞌen!

⁴⁸¡Cheꞌ tyámuaꞌ tyíꞌsejriaꞌaj ɨ Tavástaraꞌ, huaꞌ Dios ɨ maj Israel jitze ajtyámaꞌcan,

cheꞌ aꞌyan tyíꞌsejriaꞌaj jusén jɨmeꞌ!

¡Micheꞌ néijmiꞌi aꞌyan tyuꞌtaxáj tɨjɨn: “Cheꞌ aꞌyan tyáꞌraꞌnyij”!

¡Alelúuyaj!

Jeꞌej tɨ aꞌnáj tɨnaꞌaj tyíꞌtaxɨeꞌveꞌ ɨ Tavástaraꞌ

¹Setyuꞌtatyójtziꞌreꞌ ɨ Tavástaraꞌ, jiꞌnye aꞌɨ́ɨ pu tyámuaꞌ tyihuojóꞌmuaꞌraj,

jiꞌnye jusén jɨmeꞌ pu séejreꞌ ɨ tɨ jɨn taxɨeꞌveꞌ.

²Micheꞌ aꞌyan tyaataxáj aꞌɨ́ɨmaj ɨ tɨ Tavástaraꞌ huaꞌ japua huatanyúj,

tɨ huaꞌ japua huatanyúj aꞌɨ́ɨjma jimi ɨ maj huaꞌajchaꞌɨɨreꞌ,

³ɨ tɨ huaꞌajsɨɨ huaꞌ tzajtaꞌ ɨ maj séej chuéj japua jáꞌmaꞌcan

ajtyapuáj pujmuaꞌ maj jáꞌsejriaꞌcaꞌaj majta áatyej pujmuaꞌ,

aꞌáa maj jáꞌsejriaꞌcaꞌaj joꞌtɨj ɨ xɨcáj jéꞌejnyinyiij majta joꞌtɨj jaꞌancáruꞌpij.

⁴Aꞌáa mu mij joꞌvátzɨj joꞌtɨj quee jáꞌtyiꞌtɨj ajta jéehua jóꞌsaataꞌ,

camu mij jatyoovaꞌaj ɨ juyéj chájtaꞌ tɨ jóꞌnyee mej mij aꞌáa jaꞌhuóochejtyeꞌen,

⁵matájcucaꞌaj majta íꞌcucaꞌaj,

¡majta meríj áꞌcuiꞌiihuacaꞌaj!

⁶Ajta matɨꞌɨj quee cheꞌ jeꞌej jájtyooveꞌej Tavástaraꞌ mu jimi huatyéenyuj,

aꞌɨ́ɨ puꞌij huaꞌ japua huatanyúj matɨꞌɨj jeꞌej tyityóomuajtyajcaꞌaj.

⁷Aj puꞌij téꞌej tyámuaꞌ naa tyihuoꞌcájuyetyej

mej mij chájtaꞌ jaꞌráꞌastij majta jeꞌen aꞌáa jaꞌhuóochejtyeꞌen.

⁸Setyuꞌtatyójtziꞌreꞌ ɨ Tavástaraꞌ aꞌɨ́jcɨ jɨmeꞌ ɨ tɨ taxɨeꞌveꞌ,

¡ajta jeꞌej tɨ tyámuaꞌ vaꞌcán jɨn tyíꞌuurej ɨ tyeɨ́tyee tzajtaꞌ!

⁹Jiꞌnye aꞌɨ́ɨ pu jaatáꞌsij tɨ huayeꞌen aꞌɨ́jna ɨ tɨ íꞌmuꞌuj

ajta jéehua tyaataꞌsij ɨ tɨ tyíꞌcueꞌriꞌ aꞌɨ́jcɨ ɨ tɨ iꞌcuaj.

¹⁰Huápuɨꞌɨj pu huatɨ́caꞌcaꞌaj aꞌájna joꞌmaj jáꞌchajcaꞌaj,

aꞌɨ́ɨ pu huaꞌtyánaamuaj ɨ maj jɨn juxaamuɨjrityaꞌcaꞌaj ajta ɨ cadéenaj,

¹¹aꞌɨ́jcɨ jɨmeꞌ maj quee aꞌyan huarɨ́j jeꞌej tɨ ɨ Tavástaraꞌ tyuꞌtaꞌíjtacaꞌ,

majta jaatyáxaahuatacaꞌ jeꞌej tɨ tyihuoꞌxáꞌpuɨꞌɨntariꞌtzej ɨ tajapuá tɨ jáꞌsejreꞌ.

¹²Dios pu aꞌɨ́j huoꞌtaꞌ ɨ tɨ huápuɨꞌɨj muárɨeꞌrij;

mueꞌtávitzaaj, ajta quee aꞌtɨ́j huáꞌhuɨɨriaꞌcaꞌaj.

¹³Ajta matɨꞌɨj quee cheꞌ jeꞌej jájtyooveꞌej aj mu mij Tavástaraꞌ jimi huatyéenyuj,

aꞌɨ́ɨ puꞌij huaꞌ japua huatanyúj matɨꞌɨj jeꞌej tyityóomuajtyajcaꞌaj;

¹⁴ajta huiꞌrájtoj aꞌájna joꞌtɨj huápuɨꞌɨj joꞌtɨ́caꞌ

ajta huaꞌ japua huatanyúj mataꞌaj mij quee cheꞌ jɨꞌquiꞌhuaj ɨ cadéenaj jɨmeꞌ.

¹⁵Setyuꞌtatyójtziꞌreꞌ ɨ Tavástaraꞌ aꞌɨ́jcɨ jɨmeꞌ ɨ tɨ taxɨeꞌveꞌ,

¡ajta jeꞌej tɨ vaꞌcán jɨn tyámuaꞌ tyíꞌuurej ɨ tyeɨ́tyee jimi!

¹⁶¡Aꞌɨ́ɨ pu tyuꞌtyátaaraxɨj ɨ puéertaj broonce tɨ jɨn tyíꞌtaavijhuacaꞌaj!

¡Ajta tyiꞌijnáꞌxɨj tyiꞌtɨ́j tɨ tyapúustiꞌ jɨn tyíꞌtaavijhuacaꞌaj!

¹⁷Ɨ maj tyíꞌcucuiꞌ majta ɨ maj jeꞌej tyityóomuajtyej

aꞌɨ́jcɨ jɨmeꞌ maj jeꞌej puaꞌaj huarɨ́j majta tyiꞌijxánaꞌcɨraꞌcaꞌaj,

¹⁸camu cheꞌ pújooriajvaꞌaj maj tyiꞌtɨ́j huácuaꞌnyij;

¡muríj huápuɨꞌɨj áꞌcuiꞌiihuacaꞌaj!

¹⁹Ajta matɨꞌɨj quee cheꞌ jeꞌej jájtyooveꞌej aj mu mij huatyéenyuj ɨ Tavástaraꞌ jimi,

aꞌɨ́ɨ puꞌij huaꞌ japua huatanyúj matɨꞌɨj jeꞌej tyiꞌtyóomuajtyajcaꞌaj;

²⁰junyúucaa pu ujoꞌtaꞌítyacaꞌ, tɨꞌquij tyihuóꞌhuaa;

¡huaꞌ japua puꞌij huatanyúj mej mij quee huácuiꞌnyij!

²¹Setyuꞌtatyójtziꞌreꞌ ɨ Tavástaraꞌ aꞌɨ́jcɨ jɨmeꞌ tɨ aꞌɨ́ɨn taxɨeꞌveꞌ,

¡aꞌɨ́jcɨ jɨmeꞌ ɨ tɨ tyámuaꞌ vaꞌcán jɨn tyámuaꞌ tyíꞌuurej ɨ tyeɨ́tyee tzajtaꞌ!

²²Siajta jimi tyuꞌtámuꞌvejritaj siaj sij aꞌɨ́j jɨn tyaatatyójtziꞌreꞌen

siajta jutyamuaꞌveꞌej jaataxáj jeꞌej tɨ aꞌɨ́ɨj rɨcɨj.

²³Jájritzeꞌ mu ajoꞌréꞌnyej ɨ maj tyíꞌtoꞌracariaꞌaj.

Majta ɨ jájtyij ujaꞌráxɨriaꞌxɨj aꞌɨ́jcɨ jɨmeꞌ ɨ ju báarcuj,

²⁴aꞌáa mu mij, joꞌtɨj huápuɨꞌɨj jaꞌtyáatɨꞌ, aꞌáa mu jaaséj

ɨ tɨ jɨn naa huaséꞌrin ɨ Tavástaraꞌ tɨ tyúꞌtaahuacaꞌ.

²⁵Jéehua pu huatáꞌaacariacaꞌ tɨꞌɨj ɨ Tavástaraꞌ nyuucaaj huatánamuajre

aꞌɨ́j puꞌij jɨn viváajmaꞌaj tyúutaꞌhuaꞌaj ɨ jájtyij;

²⁶aj mu mij jútyeꞌ joꞌvátzɨj u tajapuá ɨmuáj

majta jeꞌen ajoꞌcájrupij tyétyeꞌ ɨmuáj ɨ jájritzeꞌ;

¡meyoꞌrɨej ɨ maj jɨn jucaꞌnyajcaꞌaj matɨꞌɨj tyuꞌtátzɨɨn!

²⁷Aꞌyaa mu tyityaꞌantávitzaaj matɨꞌɨj ɨ maj taꞌruj;

¡capu tyiꞌtɨ́j jeꞌej tyihuoꞌtyáhuɨɨ ɨ maj jɨn jéehua tyuꞌyíꞌtɨhuaꞌaj!

²⁸Ajta matɨꞌɨj quee cheꞌ jeꞌej jájtyooveꞌej aj mu mij Tavástaraꞌ jimi huatyéenyuj,

aꞌɨ́ɨ puꞌij huaꞌ japua huatanyúj matɨꞌɨj jeꞌej tyityóomuajtyajcaꞌaj,

²⁹ajta jeꞌen jéetɨrij huatyátaahuacaꞌ ɨ japúutzarij tɨ atyúutaꞌhuaꞌaj,

ajta huatyápuaꞌriacaꞌ ɨ jájtyij tɨ áꞌxɨriaꞌcaꞌaj.

³⁰Matɨꞌɨj jaaséj tɨ naa huaꞌéenyaꞌaj ɨ jájtyij japua, aꞌɨ́ɨ mu huatóotyamuaꞌvej,

Dios puꞌij aꞌáa huojóoviꞌtɨj joꞌmaj aꞌɨ́ɨmaj aꞌyan tyiyáꞌxɨeꞌvaꞌcaꞌaj.

³¹Setyuꞌtatyójtziꞌreꞌ ɨ Tavástaraꞌ aꞌɨ́jcɨ jɨmeꞌ tɨ aꞌɨ́ɨn taxɨeꞌveꞌ,

¡jeꞌej tɨ aꞌɨ́ɨn tyámuaꞌ naa tyíꞌuurej ɨ tyeɨ́tyee jimi!

³²¡Caꞌnyíin xu jɨn jaataxáj matɨꞌɨjta néijmiꞌi tyúusɨɨreꞌen!

¡Setyuꞌtatyójtziꞌreꞌ aꞌájna joꞌmaj ɨ huásij jóosɨɨreꞌ!

³³Tavástaraꞌ pu aꞌyan jaꞌuurej ɨ játyaꞌnaj ajta joꞌtɨj jaꞌajréxaj

tɨꞌɨj joꞌtɨj quee jáꞌtyiꞌtɨj ajta ɨ chuéj tɨ huáchij,

³⁴ajta aꞌɨ́jcɨ chuéj tɨ jɨ́ꞌreꞌen aꞌyaa pu jaꞌuurej tɨꞌɨj chuéj tɨ quee tyiꞌtɨ́j huɨɨreꞌ,

aꞌɨ́jcɨ jɨmeꞌ maj jeꞌej puaꞌaj tyityetyúuchaꞌɨj aꞌáa maj joꞌcháatɨmee;

³⁵ajta joꞌtɨj quee jáꞌtyiꞌtɨj aꞌyaa pu jaꞌuurej tɨꞌɨj joꞌtɨj jaꞌalaguun

ajta joꞌtɨj ɨ chuéj joꞌhuáchij tɨꞌɨj joꞌtɨj jaꞌrájmuaa;

³⁶aꞌáa pu tyámuaꞌ huajaꞌuurej aꞌɨ́ɨjma ɨ maj tajcuj,

aꞌɨ́ɨ mu mij chájtaꞌnaj huatyátaahuaj.

³⁷Aꞌɨ́ɨ mu tyíꞌhuasteꞌen, majta úuvaj huiityeꞌen

jéehua mu mij tyíꞌcɨɨtyej.

³⁸Aꞌɨ́ɨ puꞌij tyámuaꞌ tyihuoꞌtyátoosij, tyuꞌtáꞌsij mej mij huatámuiꞌrej

ajta mej mij majta huatámuiꞌrej ɨ huáꞌyaꞌmuaj.

³⁹Ajta tɨpuaꞌaj muáacuiꞌnyij majta quee cheꞌ aꞌchu aráꞌaxcaj

aꞌɨ́jcɨ jɨmeꞌ tɨ jeꞌej puaꞌaj tyihuáꞌuurej,

tɨ quee tyámuaꞌ tyéꞌyiꞌij huaꞌ jimi majta japuéjtzitarej,

⁴⁰Dios pu ahuóohuaꞌxɨj aꞌɨ́ɨjma ɨ maj jeꞌej puaꞌaj huáꞌuurej

ajta tyuꞌtáꞌsij mej mij jóꞌvetyij aꞌájna joꞌtɨj quee jáꞌtyiꞌtɨj ajta quee ajaꞌ juyéj.

⁴¹Aꞌɨ́ɨ pu huoꞌtyáhuɨɨreꞌsij ɨ maj quee jeꞌej tyéejviicueꞌ aꞌɨ́jcɨ jɨmeꞌ maj jajpuéjtzij;

¡huoꞌtaꞌsij mej mij huatámuiꞌrej ɨ tyeɨ́tyeristyamuaꞌmeꞌen aꞌyájna matɨꞌɨj ɨ yaꞌmuáatyee!

⁴²Matɨꞌɨj aꞌíj huaséj, aꞌɨ́ɨmaj mu huatóotyamuaꞌveꞌsij ɨ maj tyámuaꞌ tyíꞌtyetyeɨtyee,

majta aꞌɨ́ɨmaj quee cheꞌ huatányuusij ɨ maj jeꞌej puaꞌaj tyityetyúuchaꞌɨj.

⁴³Aꞌɨ́jna ɨ tɨ tyámuaꞌ metyóomuaꞌrej,

aꞌyaa pu jimi tyúuxɨeꞌveꞌ tɨ aꞌíj muaꞌreeriaj

ajta yoꞌitéej jáꞌraꞌnyij ɨ Tavástaraꞌ tɨ jɨn taxɨeꞌveꞌ.

Nyaxɨéjnyuꞌcaa pu néijmiꞌi jɨn putyaꞌajxɨeꞌviꞌraꞌaj

Cuíinarij ajta ɨ chuíicarij David jaꞌaꞌrij

¹Nyaxɨéjnyuꞌcaa pu néijmiꞌi jɨn putyaꞌajxɨeꞌviꞌraꞌaj, nyaj Dios,

¡aꞌyaa pu tyaꞌajxɨéꞌviꞌraꞌ tɨ muéetzij jimi tyuꞌtáchuiicaj!

Huájɨsij, nyajúuricamej;

²xaatájɨsij, áarpaj ajta canárij;

¡nyáajɨstej ɨ tɨ jájcuan huatapuáꞌrij!

³Chuíicarij nu jɨn tyimuaatatyójtziꞌreꞌej, Tavástaraꞌ,

huaꞌ tzajtaꞌ ɨ tyeɨ́tyee nyajta aꞌɨ́ɨjma jimi ɨ maj séej chuéj japua joꞌcháatɨmee.

⁴Jiꞌnye jéetzeꞌ paj vaꞌcán jɨn taxɨeꞌveꞌ quee ɨ tajapuá tɨ séejreꞌ.

¡Ɨ paj jɨn tyámuaꞌ een aꞌáa pu jaꞌráꞌasej ɨ tɨ huáꞌraa jitze tajapuá tɨ séejreꞌ!

⁵¡Nyaj Dios, muáaj paj japuan ajaꞌseejreꞌ ɨ tajapuá tɨ séejreꞌ;

ajta ɨ paj jɨn naa huaséꞌrin néijmiꞌqueꞌ pu orióonajchi ɨ cháanacaj japua!

⁶Aꞌɨ́j paj jɨn tajapuá huatányuunyij ɨ paj jɨn néijmiꞌi putyíꞌuurej,

taꞌaj ij huóꞌhuɨɨreꞌen aꞌɨ́ɨjma ɨ paj huaꞌxɨeꞌveꞌ.

¡Pataꞌaj taatájeevej!

⁷Dios pu tyuꞌtaxájtacaꞌ aꞌújna ɨ ju tyeyúuj tzajtaꞌ aꞌyan tɨjɨn:

“¡Nyenyetyámuaꞌvaꞌaj nu muiꞌcaquéj jariáꞌnaxɨꞌɨj ɨ chájtaꞌnaj Siquem

nyajta aꞌɨ́j huoꞌriáaꞌsij aꞌáa tɨ huatacaꞌaj a Sucot!

⁸Aꞌɨ́jna ɨ Galaad ajta ɨ Manasés aꞌɨ́ɨ mu nye jitze ajtyámaꞌcan;

Efraín pu aꞌɨ́ɨn puéꞌeen ɨ tɨ naꞌváꞌnaa ɨ nyamuꞌuj jitze;

ajta Judá pu aꞌɨ́ɨn puéꞌeen ɨ itzɨ́j nyaj jɨn tyíꞌijta;

⁹Moab pu aꞌɨ́ɨn puéꞌeen ɨ nyaj jitzán anányamuejtyeꞌen;

nyajta ɨ nyaj caꞌquéj aꞌɨ́j nu japua jarárɨesij ɨ Edom,

¡nyajta tyuꞌtáchuiicaj nyatɨꞌɨj tyuꞌtyámueꞌtɨn aꞌɨ́ɨjma jimi ɨ filisteos!”

¹⁰¿Aꞌtanyíj náꞌviꞌtɨn aꞌájna joꞌtɨj jáꞌsejreꞌ ɨ chájtaꞌnaj tɨ curiáꞌnamiꞌ?

¿Aꞌtanyíj nuꞌcájuyetyej aꞌájna a tɨ aꞌyan tyajaꞌrájtyapuaj tɨjɨn Edom?

¹¹Jiꞌnye muáaj, taj Dios, muáaj paj períj matuuhuaꞌxɨj,

¡capáj cheꞌ huaꞌ jamuán ujóꞌmej ɨ tyétyacaa maj tajɨ́meꞌ nyoꞌsii!

¹²Taatáhuɨɨreꞌ aꞌɨ́jcɨ jimi ɨ tɨ tájchaꞌɨɨreꞌ,

jiꞌnye capu tyiꞌtɨ́j huɨɨreꞌ ɨ tyévij tɨ jɨn tyíꞌhuɨɨreꞌ.

¹³Vaꞌcán tu jɨn tyíꞌmueꞌtɨn aꞌɨ́jcɨ jɨmeꞌ ɨ Dios tɨ taatyáhuɨɨreꞌej,

¡aꞌɨ́ɨ puꞌij huoꞌtzíinajraꞌaj aꞌɨ́ɨjma ɨ maj tájchaꞌɨɨreꞌ!

Ɨ tɨ tajapuá huatányuusij aꞌɨ́jcɨ jimi ɨ juées tɨ vaꞌcán jɨn tyiꞌtyéjvee

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Chuíicarij David tɨ jaꞌaꞌrij

¹Taj Dios, capáj quee aveꞌnyuucaꞌan nyatɨꞌɨj aꞌ jimi tyényuusimeꞌen,

²jiꞌnye ɨ huaꞌ tyenyij ɨ maj tyíꞌhueꞌtacaa ajta ɨ maj jeꞌej puaꞌaj tyityetyúuchaꞌɨj

aꞌɨ́ɨ mu nyéetzij jeꞌej puaꞌaj tyíꞌnyaxaj,

ajta quee aꞌyan tyiꞌjaꞌyájna matɨꞌɨj nyéetzij tyíꞌnyaxaj.

³Aꞌɨ́ɨ pu nyeriaꞌnaa ɨ maj jɨn nyaxanaꞌveꞌej jeꞌej puaꞌaj metyíꞌnyaxaj,

majta chaꞌmanaꞌaj jeꞌej puaꞌaj nyaꞌuurej.

⁴Nyáaj nu huaꞌxɨeꞌveꞌ, majta aꞌɨ́ɨmaj mu nyenyoꞌsiꞌtyeꞌej;

ajta nyáaj nu huatyényuusij.

⁵Aꞌɨ́ɨ mu jeꞌej puaꞌaj náaruj aꞌɨ́jcɨ jɨmeꞌ nyej nyáaj tyámuaꞌ tyihuáꞌajchaꞌɨj,

ajta aꞌɨ́jcɨ jɨmeꞌ nyej nyáaj huaꞌxɨeꞌveꞌ, aꞌɨ́ɨ mu nyaxanaꞌveꞌ.

⁶Aꞌɨ́j paj jimi juées ajoꞌtyéjchetyij tɨ jeꞌej puaꞌaj tyiꞌtyúuchaꞌɨj,

ajta jeꞌen aꞌɨ́ɨn jitzán tyoꞌojpuáꞌrityeꞌen ɨ tɨ japuan huatányuusij,

⁷micheꞌ néijmiꞌi jitzán tyoꞌojpuáꞌrityeꞌen aꞌájna joꞌmaj puéjtzij yoꞌtáꞌsij;

micheꞌ aꞌɨ́ɨmaj puéjtzij jaatáꞌan ɨ maj jahuɨɨreꞌ.

⁸¡Cheꞌ quee aꞌchu áꞌtyeeviꞌin júurij

ajta jeꞌen sɨ́ɨj tyaꞌancuriáan tyiꞌtɨ́j tɨ tyíꞌijchaꞌɨɨcaꞌaj!

⁹¡Micheꞌ ɨ yójmuaꞌmuaꞌ xáꞌrɨcaanyij puéꞌeenyeꞌ

ajta ɨ ɨ́ɨraꞌraꞌan antyúusɨɨjtare!

¹⁰¡Micheꞌ ɨ yójmuaꞌmuaꞌ ahuacɨ́ꞌcaꞌan túmii mahuaꞌhuavíiraj!

Majta ahuojóohuaꞌxɨj joꞌtɨj ɨ tyihuáꞌchiꞌij tyojoꞌtyúꞌuunyiꞌhuacaꞌ.

¹¹Ajta néijmiꞌi tyojóꞌtɨnyij ɨ túmii tɨ tyúꞌnyijtyeꞌ

tyiꞌtɨ́j tɨ jeꞌej aꞌɨ́ɨn tyíꞌijchaꞌɨɨcaꞌaj.

Majta tyeɨ́tyee maj quee huáꞌmuajtyej

micheꞌ aꞌɨ́ɨn tyihuoꞌnáhueꞌ tyiꞌtɨ́j maj huamueꞌtɨj aꞌɨ́jcɨ jɨmeꞌ maj tyuꞌmuárɨej.

¹²Cheꞌ quee aꞌtɨ́j séjreꞌej tɨꞌij aꞌɨ́j áancuꞌvaxɨꞌɨn

ajta ɨ yójmuaꞌmuaꞌ ɨ maj xáꞌrɨcaanyij puéꞌeen.

¹³Micheꞌ antyipuaꞌrej ɨ maj huaꞌ jitze eerámaꞌcan,

cheꞌ ajta jusén jɨmeꞌ jóꞌvetyij jeꞌej maj tyityeꞌentyímuꞌtacaa.

¹⁴Cheꞌ ɨ Tavástaraꞌ joꞌtámuaꞌreej tyiꞌtɨ́j tɨ jɨn quee xáꞌpuɨꞌ huarɨ́j ɨ táatajraꞌ

ajta quee aꞌnáj joꞌrioꞌuunaj ɨ náanajraꞌ tɨ jɨn huóoxanaꞌcɨrej;

¹⁵cheꞌ ɨ Tavástaraꞌ jusén jɨmeꞌ jamuaꞌreeriaj ɨ huaꞌxanaꞌcɨraꞌ

ajta joꞌrioꞌuunaj ɨ cháanacaj japua ɨ maj jɨn jamuaꞌreerej.

¹⁶Capu aꞌnáj aꞌyan tyiꞌriáꞌmuaꞌaj tɨꞌij tyihuaꞌcuꞌvej,

ɨ maj quee jeꞌej tyéejviicueꞌ ɨ maj quee óotzaahuatyeꞌ ajta ɨ maj jeꞌej tyityóomuajtyej

aꞌɨ́ɨjma pu huatavéen ꞌasta naꞌaj quee huoꞌcuij.

¹⁷Jiꞌnye aꞌɨ́ɨ pu jéetzeꞌ jaꞌránajchacaꞌ ɨ tɨ jeꞌej puaꞌaj een,

¡micheꞌ jeꞌej puaꞌaj jáaꞌuurej!

Capu jaataxɨéꞌvej maj tyámuaꞌ tyeetyátoonyij,

¡cheꞌ quee ij aꞌnáj tyámuaꞌ tyíꞌsejriaꞌaj!

¹⁸Cheꞌ aꞌɨ́jna jɨn cánamiꞌhuaj ɨ tɨ jeꞌej puaꞌaj een aꞌyájna tɨꞌɨj cáanarij jɨmeꞌ tɨ cóonaj;

cheꞌ ajta tzajtaꞌ utyéenyej jucáaraꞌ jitze ajta ɨ caríiraꞌ jitze

tɨꞌɨj jájtyij tɨ puéꞌeenyeꞌ nusu tɨꞌɨj aséityij,

¹⁹¡cheꞌ aꞌyan tyaꞌcáanaj tɨꞌɨj ɨ cáanarij

ajta jeꞌen aꞌyan tyeetyácajtyeꞌen tɨꞌɨj ɨ tɨ jɨn ahuóojɨꞌqueꞌ!

²⁰¡Cheꞌ aꞌyan tyihuoꞌnájchityeꞌen ɨ Tavástaraꞌ aꞌɨ́ɨjma ɨ maj nyéjchaꞌɨɨreꞌ

ajta aꞌɨ́ɨjma ɨ maj jeꞌej puaꞌaj tyíꞌnyaxaj!

²¹Pajta muáaj, Tavástaraꞌ, tyámuaꞌ paj tyeetyátoonyij ɨ paj jɨn ántyapuaj, pajta tyámuaꞌ tyinaatyéchaꞌɨɨn.

¡Nyajapuáj paj huatányuunyij, aꞌɨ́jcɨ jɨmeꞌ paj tyámuaꞌ tyihuojóꞌmuaꞌraj pajta taxɨeꞌveꞌ!

²²Huápuɨꞌɨj nu quee jeꞌej tyéejviicueꞌ nyajta quee jeꞌej jájtyoovej,

nyetyiꞌpuejtyiꞌ ɨ nyaxɨéjnyuꞌcaa jitze,

²³aꞌyaa nu tyajaꞌhuányapuaꞌrixɨꞌɨj tɨꞌɨj ɨ quéenyiꞌistarij,

¡ajta ɨ áacaj naatyásaꞌrɨeechij tɨꞌɨj aꞌɨ́jcɨ ɨ vítziꞌij!

²⁴Nyatunúj jitze nu tyényeviveesij aꞌɨ́jcɨ jɨmeꞌ nyaj quee cheꞌ tyíꞌcuaꞌ;

nyajta nyeríj tyáhuasij aꞌɨ́jcɨ jɨmeꞌ tɨ cueꞌráj tyináꞌɨtziityeꞌ.

²⁵¡Nyáaj nu aꞌɨ́ɨn puéꞌeen ɨ maj néijmiꞌi jaꞌaꞌtzej ɨ tyeɨ́tyee!

¡Matɨꞌɨjta naaséj, aꞌɨ́ɨ mu jeꞌej tyiꞌnyaxáataj nye jimi mueꞌcámuꞌvajra!

²⁶Naatáhuɨɨreꞌ, Tavástaraꞌ pajta nyaj Dios;

¡nyajapuáj paj huatányuunyij, aꞌɨ́jcɨ jɨmeꞌ ɨ paj nyaxɨeꞌveꞌ!

²⁷Micheꞌ aꞌyan tyáamuaꞌreej paj muáaj, Tavástaraꞌ,

aꞌíjcɨ jɨn aꞌyan huarɨ́j aꞌmuácaꞌ jɨmeꞌ.

²⁸Capu jeꞌej tyij majta jeꞌej puaꞌaj tyinaatyátoonyij,

jiꞌnye muáaj paj tyámuaꞌ tyinaatyátoosij.

Micheꞌ aꞌɨ́ɨmaj huatóotyeviꞌraꞌastaj

ajta jeꞌen aꞌɨ́ɨn huatóotyamuaꞌveꞌen muéetzij tɨ muahuɨɨreꞌ.

²⁹¡Micheꞌ ɨ maj nyéjchaꞌɨɨreꞌ huápuɨꞌɨj huatóotyeviꞌraꞌastaj!

¡Cheꞌ aꞌɨ́ɨn huaꞌcáanaj ɨ maj jɨn jutyeviꞌraꞌ aꞌyájna tɨꞌɨj ɨ máancaj!

³⁰Nye tyenyij nu jɨn tyeꞌtyóotziꞌreꞌej naꞌmej ɨ Tavástaraꞌ,

¡nyetyaatatyójtziꞌreꞌej huaꞌ tzajtaꞌ jéehua ɨ tyeɨ́tyee!

³¹Jiꞌnye aꞌɨ́ɨ pu japuan huatányuusij ɨ tɨ quee jeꞌej tyéejviicueꞌ

aꞌɨ́ɨ puꞌij jaatyáhuɨɨreꞌej aꞌɨ́ɨjma jimi ɨ maj jeꞌej puaꞌaj jaꞌuurej.

Tavástaraꞌ pu caꞌnyíjraꞌaj jaatáꞌsij aꞌɨ́jcɨ ɨ rey

Chuíicarij David tɨ jaꞌaꞌrij

¹Tavástaraꞌ pu aꞌyan tyaatéꞌexaa ɨ nyavástaraꞌ tɨjɨn:

“Huayíixɨꞌɨj iiyeꞌej nyamuácaꞌtaꞌ pujmuaꞌ,

ꞌasta nyanaꞌaj quee nyáaj huaꞌantyimueꞌtɨn ɨ maj muájchaꞌɨɨre

mej mij aꞌáa jaꞌséeriaꞌaj muáꞌraꞌnyij aꞌ ɨ́ɨcaj jityej.”

²Aꞌájna a Sión, aꞌɨ́jna ɨ Tavástaraꞌ pu muaatátuiireꞌsij

ɨ itzɨ́j, ɨ tɨ jɨn ámiteereꞌ paj muáaj tyuꞌtaꞌíjtaj.

¡Aꞌyaa pej pij tyihuoꞌtaꞌíjtyeꞌen, aꞌɨ́ɨjma ɨ maj muájchaꞌɨɨreꞌ!

³Aꞌɨ́ɨjma mu aꞌtyéɨtyeristyamuaꞌ muaatátuiireꞌej

aꞌɨ́jcɨ xɨcáaraꞌ jitze ɨ paj jitzán tyuꞌtyámueꞌtɨj.

Aꞌɨ́jcɨ japua ɨ jɨríj tɨ tyámuaꞌ een,

ajta aꞌyájna tɨꞌɨj ɨ tɨ huarɨéenajyiꞌij tɨꞌɨjta huatapuaꞌrej

aꞌɨ́j paj jɨn tɨꞌɨj pu panaꞌaj jajajcuareꞌ tɨꞌɨjta ɨ xɨcáj eeréꞌnyej.

⁴Tavástaraꞌ pu arí tyiꞌtɨ́j jɨn tyaꞌtóoratziiriꞌ,

ajta jeꞌen néijmiꞌi jɨn aꞌyan tyaꞌróoꞌastej:

“Muáaj paj puaaríj jɨn tyiꞌtyéjvee jusén jɨmeꞌ,

aꞌyájna tɨꞌɨj ajta ɨ Melquisedec tɨ jɨn tyiꞌtyávaacaꞌaj.”

⁵Tavástaraꞌ pu amuácaꞌtaꞌ jáꞌsejreꞌ;

aꞌɨ́jcɨ xɨcáaraꞌ tɨ jitzán tyinyúꞌcaj, aꞌɨ́ɨjma pu antyipuáꞌrityeꞌsij ɨ maj rey jɨn tyityetyuꞌuj;

⁶ajta puéjtzij huoꞌtaꞌsij aꞌɨ́ɨjma ɨ maj séej chuéj japua joꞌcháatɨmee,

muɨꞌchítyee puꞌij ajaꞌajsɨɨreꞌej;

¡huaꞌ muꞌuj pu tyaꞌrátaaraxɨꞌɨj néijmiꞌqueꞌ ɨ chuéj japua!

⁷Aꞌɨ́jcɨ ɨ juyéj jitze, aꞌáa pu jáꞌyeꞌen ɨ áchij jitze,

aꞌɨ́ɨ puꞌij ɨ jájtyij caꞌnyíjraꞌaj jaatáꞌsij tɨ jájcuaj.

Tyicheꞌ jaatáchuiicaj jeꞌej tɨ ɨ Dios tyíꞌmuarɨeꞌ

¹Alelúuyaj.

Néijmiꞌi nu ɨ nyaxɨéjnyuꞌcaa jɨn tyaatatyójtziꞌreꞌej ɨ Tavástaraꞌ

aꞌájna joꞌmaj ɨ tyeɨ́tyee jóosɨɨreꞌ maj tyámuaꞌ een,

aꞌájna joꞌmaj néijmiꞌi jóosɨɨreꞌ.

²Vaꞌcán pu jɨn tyíꞌmuarɨeꞌ ɨ Tavástaraꞌ,

majta ɨ maj jaxɨeꞌveꞌ, aꞌɨ́j mu jitze tyúumuaꞌtyej.

³Naa pu huaséꞌrin jeꞌej tɨ tyíꞌmuarɨeꞌ ajta huápuɨꞌɨj naa tyihuáꞌsejratyeꞌ,

ajta jusén jɨmeꞌ séejreꞌ ɨ tɨ jɨn tyámuaꞌ tyáꞌxaꞌpuɨꞌɨntareꞌ.

⁴Ajta aꞌyan jáaruuj tɨꞌij quee aꞌtɨ́j yóꞌhuaꞌnan ɨ tɨ jɨn naa huaséꞌrin.

Tavástaraꞌ pu naa tyihuojóꞌmuaꞌraj ajta quee jiyeꞌtzín tyinyúꞌcacaa;

⁵cueꞌráj pu tyihuoꞌtáꞌsij aꞌɨ́ɨjma ɨ maj tzáahuatyiꞌraꞌaj jimi tyíchaꞌɨj,

¡aꞌnáj tɨnaꞌaj pu jamuaꞌreej tyiꞌtɨ́j tɨ jɨn tyaꞌtóoratziiriꞌ!

⁶Huoꞌtaséjratyej ɨ tɨ néijmiꞌi jɨn putyíꞌuurej aꞌɨ́ɨjma ɨ jutyéɨtyeristyamuaꞌ,

aꞌyaa puꞌij aꞌɨ́ɨjma tyuꞌtáꞌ aꞌɨ́ɨjma tɨ tyíaꞌricaꞌaj ɨ maj quee tyáꞌtzaahuatyeꞌ.

⁷Jeꞌej tɨ aꞌɨ́ɨn rɨcɨj tyámuaꞌ pu een ajta aꞌyan tyiꞌjaꞌyájna;

aꞌyaa pu tyíɨꞌrij tyaj jitzán tyúꞌcaꞌnyej jeꞌej tɨ aꞌɨ́ɨn tyuꞌtaꞌíjtacaꞌ,

⁸jiꞌnye jusén jɨmeꞌ pu tyámuaꞌ éenyeꞌej tyíꞌsejreꞌ

ajta aꞌyan tyuꞌtyátaavijhuacaꞌ jɨꞌréꞌcan jɨmeꞌ ajta huatoojéꞌyacan jɨmeꞌ.

⁹Aꞌɨ́ɨjma pu iirájtoo ɨ jutyéɨtyeristyamuaꞌ

ajta jusén jɨmeꞌ tyámuaꞌ jáaruuj ɨ tɨ jɨn tyaꞌtóoratziiriꞌ.

Dios pu tyámuaꞌ een ajta áꞌtyesiꞌreꞌ.

¹⁰Ajta tyej tyij jéetzeꞌ tyámuaꞌ tyojoꞌitéej aꞌyaa pu tyúuxɨeꞌveꞌ tyaj jaatyátzaahuatyeꞌen ɨ Tavástaraꞌ;

aꞌɨ́ɨmaj ɨ maj tzáahuatyiꞌraꞌaj jimi tyíchaꞌɨj, tyámuaꞌ mu tyihuojoꞌitéej muaꞌjuꞌun aꞌɨ́ɨmaj.

¡Dios mu aꞌnáj tɨnaꞌaj tyiꞌtyóotziꞌreꞌej muáꞌjuꞌun!

Tyiꞌtɨ́j tɨ jɨn jutyamuaꞌveꞌ aꞌɨ́jna ɨ tyévij tɨ tyámuaꞌ tyiꞌtyúuchaꞌɨj

¹¡Alelúuyaj!

Cheꞌ huatóotyamuaꞌveꞌen ɨ tyévij tɨ tzáahuatyiꞌraꞌaj tyíchaꞌɨj ɨ Tavástaraꞌ jimi

ajta aꞌɨ́j jitze jutyamuaꞌveꞌ jeꞌej tɨ aꞌɨ́ɨn tyuꞌtaꞌíjtacaꞌ.

²Aꞌɨ́ɨmaj ɨ maj aꞌɨ́j jitze eerámaꞌcan ɨ tyévij tɨ tyámuaꞌ tyiꞌtyúuchaꞌɨj

tyámuaꞌ mu tyityeetyátuiihuaj majta tyuꞌtaꞌíjtaj ɨ cháanacaj japua.

³Aꞌájna joꞌtɨj aꞌɨ́ɨn jaꞌchej jéehua pu tyíꞌsejreꞌ aꞌɨ́ɨn tɨ tyíꞌijchaꞌɨj,

ajta aꞌnáj tɨnaꞌaj tyihuáꞌpuejveꞌ.

⁴Tatzárij pu séejreꞌ aꞌájna joꞌtɨj joꞌtɨ́caꞌ

tɨꞌij aꞌɨ́ɨjma huatyátatzaviꞌtyeꞌen ɨ tyeɨ́tyee maj tyámuaꞌ tyityetyúuchaꞌɨj,

ajta aꞌɨ́jcɨ ɨ tɨ tyihuaꞌcuꞌvej, ajta néijmiꞌi jɨn tyámuaꞌ tyiꞌtyúuchaꞌɨj.

⁵Aꞌɨ́jna ɨ tyévij tɨ tyámuaꞌ tyiꞌtyúuchaꞌɨj tyámuaꞌ pu naa tyíꞌtyevij ajta tyuꞌnyijtyeꞌ tyiꞌtɨ́j maj jaatáhuaviiraj,

tyámuaꞌ pu ajta naa tyeꞌchaꞌɨj jeꞌej tɨ tyiꞌtɨ́j tyíꞌmuarɨeꞌ,

⁶aꞌɨ́j pu jɨn quee aꞌnáj tyiꞌtɨ́j jɨn eeráꞌɨtzeesij.

¡Aꞌɨ́jna ɨ tyévij tɨ tyámuaꞌ tyiꞌtyúuchaꞌɨj aꞌɨ́j mu atamuaꞌreꞌrihuaꞌaj muáꞌjuꞌun!

⁷Capu tyíꞌtzɨɨnyeꞌ tɨpuaꞌaj tyiꞌtɨ́j jeꞌej puaꞌaj tyíꞌnamuajreꞌej;

xɨéjnyuꞌcariaꞌraꞌ pu tyámuaꞌ een, ajta ɨ Tavástaraꞌ jitze tyíꞌcaꞌnyej.

⁸Xɨéjnyuꞌcariaꞌraꞌ pu tyámuaꞌ een, capu tyíꞌtzɨɨnyeꞌ,

ajta pu huaꞌaꞌtzej huaꞌráasej aꞌɨ́ɨjma ɨ maj jájchaꞌɨɨreꞌ.

⁹Tyiꞌtɨ́j pu tyihuoꞌriáaꞌsij aꞌɨ́ɨjma ɨ maj quee jeꞌej tyéejviicueꞌ,

aꞌnáj tɨnaꞌaj pu tyámuaꞌ tyíꞌtyevij,

ajta tyámuaꞌ naa tyúusejrataj séecan jimi.

¹⁰Aꞌɨ́ɨ puꞌij tyinyúꞌcaj ɨ tɨ jeꞌej puaꞌaj tyiꞌtyúuchaꞌɨj tɨꞌɨjta jaaséj;

ajta tɨꞌɨj quee jeꞌej huárɨnyij aj puꞌij ancuriocɨꞌmáaj jaꞌmej ɨ jutaméj jɨmeꞌ.

Capu tyiꞌtɨ́j huatyáhuɨɨreꞌej jeꞌej maj tyáꞌxɨeꞌveꞌ ɨ maj jeꞌej puaꞌaj tyityetyúuchaꞌɨj.

Tyicheꞌ tyuꞌtáchuiicaj ɨ Tavástaraꞌ jimi ɨ tɨ tyámuaꞌ tyitájchaꞌɨj

¹¡Alelúuyaj!

Mu siaj jahuɨɨreꞌ ɨ Tavástaraꞌ, ¡setyuꞌtatyójtziꞌreꞌ ɨ tɨ jɨn ántyapuaj!

²¡Cheꞌ tyámuaꞌ eenyeꞌ ijíij ajta jusén jɨmeꞌ

ɨ tɨ jɨn ántyapuaj ɨ Tavástaraꞌ!

³¡Micheꞌ tyaatatyójtziꞌreꞌen ɨ tɨ jɨn ántyapuaj ɨ Tavástaraꞌ

aꞌájna joꞌtɨj ɨ xɨcáj jéꞌejnyinyiij ajta joꞌtɨj jaꞌancáruꞌpij!

⁴Tavástaraꞌ pu néijmiꞌcaa japua séejreꞌ ɨ tyeɨ́tyee;

ajta ɨ tɨ jɨn naa huaséꞌrin aꞌɨ́ɨ pu tajapuá jáꞌsejreꞌ.

⁵Capu aꞌtɨ́j aꞌyan ajtáhuaꞌaj een tɨꞌɨj ɨ Tavástaraꞌ taj Dios,

aꞌáa tɨ tyejéꞌijtaj jútyeꞌ ɨmuáj,

⁶ajta aꞌyan tyiꞌjaꞌyájna, tɨ aꞌɨ́ɨn ecóotutaj

tɨꞌij jaaséj ɨ tajapuá tɨ séejreꞌ ajta ɨ cháanacaj.

⁷Tavástaraꞌ pu chóotaꞌ jaꞌajriásij aꞌɨ́jcɨ ɨ tɨquee jeꞌej tyéejviicueꞌ,

ajta aꞌyan chaꞌtánaꞌaj tyeꞌejriásij aꞌɨ́jcɨ ɨ tɨquee tyiꞌtɨ́j tyíchaꞌɨj

⁸tɨꞌij jaꞌtyájratyij huaꞌ jamuán ɨ tyeɨ́tyee maj jéehua juxɨeꞌveꞌ,

huaꞌ tzajtaꞌ ɨ tyeɨ́tyee maj jéehua juxɨeꞌveꞌ aꞌájna joꞌtɨj aꞌɨ́ɨn jaꞌchej.

⁹Aꞌɨ́jcɨ ɨ íitaj tɨ quee tyiyóomuaꞌaj taꞌraa

jaatáꞌsij tɨꞌij huatóotyamuaꞌveꞌen aꞌɨ́jcɨ jɨmeꞌ tɨ arí tyiyójmuaꞌ

ajta tɨ arí jusɨ́ɨj huatyéechiꞌij.

¡Alelúuyaj!

Tyiꞌtɨ́j maj atamuaꞌreꞌrii matɨꞌɨj eeráacɨj aꞌájna a Egipto

¹Tɨꞌɨj ɨ Israel, chiꞌraꞌan aꞌɨ́jcɨ ɨ Jacob,

eerájraa aꞌájna a Egipto, aꞌɨ́jcɨ japua ɨ chuéj tɨ quee jamuaꞌtyej,

²Judá pu aꞌɨ́ɨn puéꞌeenyeꞌej jaꞌraa ɨ tyeyúujraꞌ aꞌɨ́jcɨ ɨ Tavástaraꞌ,

Israel pu ijta jimi tyuꞌtaꞌíjtacaꞌ.

³Tɨꞌɨj ɨ jájrij jaaséj aꞌɨ́jcɨ ɨ Israel, aꞌɨ́ɨ pu huatóoꞌuj,

ajta aꞌɨ́jna ɨ játyaꞌnaj Jordán tɨ ántyapuaj juhuáritaꞌ pu huariáꞌraa.

⁴¡Ɨ jɨríj tɨ cɨleꞌnyeꞌej séejreꞌ ajta tɨ ajtɨ́tɨꞌɨjmee

aꞌyaa mu tyityájtzunaxɨj matɨꞌɨj ɨ cányaꞌxɨɨ!

⁵¿Tyiꞌtanyí jeꞌej muáaruuj, jájrij, patɨꞌɨj pij huatáꞌuj?

¿Tyiꞌtanyí jeꞌej muáaruuj, Jordán, pej pij ahuáritaꞌ huariáꞌraa?

⁶¿Tyiꞌtanyí jeꞌej huarɨ́j, aꞌɨ́jcɨ jitze ɨ jɨríj tɨ cɨ́leꞌen ajta ɨ tɨ ajtɨ́tɨꞌɨjmee,

siaj sij aꞌyan tyityájtzunaxɨj matɨꞌɨj ɨ cányaꞌxɨɨ?

⁷¡Pataꞌaj huatyéꞌvivaaxɨꞌɨn muáaj, chuéj,

aꞌɨ́jcɨ jimi ɨ Tavástaraꞌ, Dios raꞌ aꞌɨ́jcɨ ɨ Jacob!

⁸¡Aꞌɨ́ɨ pu jaatyáꞌ alaguuntacaꞌ aꞌɨ́jcɨ ɨ apuéerij!

¡Ajta tyuꞌtáꞌ tɨꞌij arámuaacaj joꞌtɨj joꞌtyetyéj tzajtaꞌ!

Aꞌɨ́jna ɨ taj Dios tajapuá pu jáꞌsejreꞌ

¹Tavástaraꞌ, pataꞌaj asɨ́ɨj tyámuaꞌ tyuꞌtáꞌsejrataj, capáj ityájma;

¡tyámuaꞌ paj tyuꞌtyátoonyij, aꞌɨ́jcɨ jɨmeꞌ paj jɨꞌréꞌcan jɨmeꞌ taxɨeꞌveꞌ!

²¿Jiꞌnye mej mij aꞌyan tyíꞌihuoꞌ ɨ maj quee tyáꞌtzaahuatyeꞌ

yee joꞌnyij jeꞌej jeꞌen ɨ jaꞌmua Dios?

³Taj Dios pu tajapuá jáꞌsejreꞌ;

aꞌɨ́ɨ pu néijmiꞌi jɨn aꞌyan huarɨ́j jeꞌej tɨ tyiꞌtɨ́j tyíꞌxɨeꞌvaꞌcaꞌaj.

⁴Huaꞌ sáanturistyamuaꞌ ɨ maj quee tyáꞌtzaahuatyeꞌ ooroj mu jɨn taavijhua majta pláataj,

tyiꞌtɨ́j puꞌuj tyiꞌpuéꞌeen tyeɨ́tyee maj jumuácaꞌ jɨn tyúꞌtaahuacaꞌ:

⁵muaꞌancatyányijmee, ajta capu ɨꞌríj maj tyuꞌtaxáj,

muaꞌajrɨꞌɨjsíjmee, ajta camu atanyéjnyeꞌ,

⁶muaꞌajtanaxɨéejmee ajta camu iityanamuáarajmee;

majta mu ajtzuꞌrijmee, ajta camu tyiꞌtɨ́j ɨꞌchuej;

⁷muaꞌajtamuácaꞌajmee, ajta camu pújoorej maj tyiꞌtɨ́j tyivíꞌ;

muiꞌraꞌɨ́ɨcajmee, ajta camu rácɨjcɨꞌnyiveꞌ;

¡capu tyiꞌtɨ́j cɨ́ɨ tyíꞌnamuajreꞌ ɨ huaꞌ tyenyij jitze!

⁸Aꞌyaa mu chaꞌtaj manaꞌaj een matɨꞌɨj ɨ sáanturij

aꞌɨ́ɨmaj ɨ maj huaꞌtaꞌhuacaa

majta ɨ maj huaꞌ jimi tyáꞌtzaahuatyeꞌ.

⁹Muaꞌaj mu siaj Israel jitze ajtyámaꞌcan, ¡Tavástaraꞌ xu jitze tyúꞌcaꞌnyej!

Aꞌɨ́ɨ pu tahuɨɨreꞌ ajta tyámuaꞌ tyíꞌtachaꞌɨj.

¹⁰Siajta muaꞌaj puaaríij, ¡Tavástaraꞌ xu jitze tyúꞌcaꞌnyej!

Aꞌɨ́ɨ pu tahuɨɨreꞌ ajta tyámuaꞌ tyíꞌtachaꞌɨj.

¹¹Muaꞌaj mu siaj tzáahuatyiꞌraꞌaj jimi tyíchaꞌɨj ɨ Tavástaraꞌ,

¡aꞌɨ́j xu jitze tyúꞌcaꞌnyej!

Aꞌɨ́ɨ pu tahuɨɨreꞌ ajta tyámuaꞌ tyíꞌtachaꞌɨj.

¹²¡Tavástaraꞌ pu arí ityájma toꞌtámuaꞌreeriꞌ

tyámuaꞌ puꞌij tyitaatyátoosij!

Tyámuaꞌ pu tyihuoꞌtyátoosij aꞌɨ́ɨjma ɨ Israel maj jitze ajtyámaꞌcan,

tyámuaꞌ pu tyihuoꞌtyátoosij aꞌɨ́ɨjma ɨ puaaríij,

¹³tyámuaꞌ pu tyihuoꞌtyátoosij aꞌɨ́ɨjma ɨ maj tzáahuatyiꞌraꞌaj jimi tyíchaꞌɨj,

aꞌɨ́ɨjma ɨ maj óotzaahuatyeꞌ ajta ɨ maj tyóoxaahuaj.

¹⁴¡Cheꞌ ɨ Tavástaraꞌ huoꞌtámuiꞌrej ɨ maj jaꞌmua jitze eerányesij

muaꞌajmaj ajta ɨ jáꞌmuayojmuaꞌ!

¹⁵¡Cheꞌ ɨ Tavástaraꞌ, ɨ tɨ jaatyátaahuacaꞌ ɨ tajapuá tɨ séejreꞌ ajta ɨ cháanacaj,

aꞌɨ́ɨn tyámuaꞌ muaꞌajmaj tyajamuaatyátoonyij!

¹⁶Aꞌɨ́jna ɨ tajapuá tɨ séejreꞌ Tavástaraꞌ pu jitze ajtyámaꞌcan,

ajta ɨ cháanacaj aꞌɨ́j pu huatátuiirej ɨ tyévij.

¹⁷Aꞌɨ́ɨmaj ɨ maj meríj aꞌáa joꞌtyáꞌɨtzee joꞌmaj ɨ muɨꞌchítyee jáꞌavaꞌtacaa,

ɨ maj meríj huácuij, camu pújoorej mej mij tyaatatyójtziꞌreꞌen ɨ Tavástaraꞌ;

¹⁸ajta ityáj tu tyaatatyójtziꞌreꞌej

ijíij tyajta jusén jɨmeꞌ.

¡Alelúuyaj!

Jeꞌej tyaj jimi tyityeetyényuunyij tyej tyij tyaatatyójtziꞌreꞌen

¹Nyáaxɨeꞌveꞌ ɨ Tavástaraꞌ jiꞌnye aꞌɨ́ɨ pu náanamuajriꞌ nyatɨꞌɨj jimi huatyéenyuj,

²jiꞌnye aꞌɨ́ɨ pu tyámuaꞌ huóoruuj tɨꞌij náanamuaj.

¡Nyáaj nu nyij jimi aꞌyan tyáꞌhuoo naꞌmej nyatɨꞌɨj nyanaꞌaj áꞌtyeeren nyajúurij!

³Aꞌɨ́ɨ pu naatyáajɨꞌquej ɨ tɨ tyeꞌentyípuaapuaꞌrityee,

nyajta tɨn aꞌáa joꞌtyáꞌɨtzee joꞌmaj tyityajáꞌavaꞌtacaa nyatɨꞌɨj quee jeꞌej jájtyooveꞌej

aꞌɨ́ɨ pu ajta naatyáajɨꞌquej ɨ nyaj jɨn tyuꞌtátzɨɨn ajta ɨ tɨ nyetyácuiꞌnyisimeꞌej.

⁴Aj nu nyij huatyéenyuj aꞌɨ́jcɨ jitze maꞌcan ɨ Tavástaraꞌ

aꞌyaa nu nyij jéehua tyaatáhuaviiriꞌ tɨ aꞌɨ́ɨn japuan huatányuunyij ɨ nyajúuricamej.

⁵Tavástaraꞌ pu tyámuaꞌ tyáꞌxaꞌpuɨꞌɨntareꞌ ajta tyihuaꞌcuꞌvej;

taj Dios pu huápuɨꞌɨj naa tyihuojóꞌmuaꞌraj.

⁶Tavástaraꞌ pu huáꞌchaꞌɨj aꞌɨ́ɨjma ɨ maj quee óotzaahuatyeꞌ.

Tɨꞌɨj nyéetzij quee cheꞌ nyacaꞌnyistiꞌracaꞌaj, aꞌɨ́ɨ pu nyajapuáj huatanyúj.

⁷Ajta ijíij, aꞌyaa pu tyíꞌnyaɨꞌɨriityeꞌ nyej nyaxáahuaj séjreꞌej

jiꞌnye ɨ Tavástaraꞌ pu nye jimi tyámuaꞌ tyúꞌruuj,

⁸jiꞌnye aꞌɨ́ɨ pu nyajapuáj huatanyúj nyej nyij quee huámuɨꞌnyij,

jiꞌnye nyajapuáj pu huatanyúj nyej nyij quee cheꞌ nyeyiinyej nyajta quee cheꞌ eetahuɨꞌtzɨꞌɨn.

⁹Néijmiꞌi nu jɨn jaꞌráꞌastijreꞌej ɨ Tavástaraꞌ

nyatɨꞌɨj nyooj júurij íiyan ɨ cháanacaj japua.

¹⁰Nyáaj nu jitzán tyáꞌtzaahuatyaꞌcaꞌaj, tyij nyajta aꞌyan tyíꞌxajtacaꞌaj

nyaj huápuɨꞌɨj jéehua jeꞌej puaꞌaj tyéꞌnyamuaꞌajcaa.

¹¹Nyatɨꞌɨj quee cheꞌ jeꞌej jájtyoovaꞌaj, aꞌyaa nu tyuꞌtaxájtacaꞌ

maj néijmiꞌi ɨ tyeɨ́tyee tyíꞌhueꞌtacaa.

¹²¿Jiꞌnye nyij tyáꞌnajchityeꞌen ɨ Tavástaraꞌ

aꞌɨ́jcɨ jɨmeꞌ tɨ tyámuaꞌ naa tyúꞌruuj nye jimi?

¹³¡Nyeꞌejriásij aꞌɨ́jcɨ ɨ váasuj tɨ jɨn nyajapuáj huatanyúj

nyajta jeꞌen jitzán maꞌcan huatyényuusij!

¹⁴Naꞌrányaꞌastej tyiꞌtɨ́j nyaj jɨn tyaꞌtáratziiriꞌ ɨ Tavástaraꞌ

néijmiꞌi ɨ tyeɨ́tyeristyamuaꞌmeꞌen metyiꞌséeracaj.

¹⁵Jéehua pu tyajaꞌhuóojɨpuaj ɨ Tavástaraꞌ

tɨpuaꞌaj jaaséj tɨ sɨ́ɨj huámuɨꞌnyij ɨ maj jaxɨeꞌveꞌ.

¹⁶¡Muáaj paj Tavástaraꞌ, nyáaj nu muéetzij muahuɨɨreꞌ!

¡Nyáaj nu yójraꞌ pueꞌéen aꞌɨ́jcɨ ɨ tɨ muéetzij muahuɨɨreꞌ!

Muáaj paj períj jájtzaanaxɨj nyáaj nyej jɨn jɨꞌquiꞌhuacaꞌaj.

¹⁷Ajta nyej nyij tyimuaatatyójtziꞌreꞌen, a jimi nu tyuꞌtámuꞌvejritaj,

nyajta aꞌ jimi huatyényuusij, Tavástaraꞌ, aꞌɨ́jcɨ ɨ paj jɨn ántyapuaj.

¹⁸Naꞌrányaꞌastej tyiꞌtɨ́j nyaj jɨn tyaꞌtányaratziiriꞌ ɨ Tavástaraꞌ jimi

néijmiꞌi ɨ tyeɨ́tyeristyamuaꞌmeꞌen metyiꞌséeracaj,

¹⁹aꞌújna joꞌtɨj jaꞌrájtaꞌcuaj ɨ tyeyúujraꞌ ɨ Tavástaraꞌ,

¡jéꞌtaꞌ aꞌájna muéetzij jimi, Jerusalén!

¡Alelúuyaj!

Chuíicarij tyaj jimi jaatáchuiicaj ɨ Tavástaraꞌ

¹Mu siaj séej chuéj japua joꞌcháatɨmee siajta néijmiꞌqueꞌ tɨꞌɨj naꞌaj tyiꞌchájtaꞌnajmee,

néijmiꞌi xu tyaatatyójtziꞌreꞌen ɨ Tavástaraꞌ,

²jiꞌnye aꞌɨ́jna ɨ tɨ jɨn taxɨeꞌveꞌ vaꞌtɨ́j pu séejreꞌ,

¡aꞌɨ́jna ɨ tɨ jɨn tyámuaꞌ een ɨ Tavástaraꞌ jusén pu jɨn séejreꞌ!

¡Alelúuyaj!

Aꞌɨ́jna ɨ tɨ jɨn néijmiꞌi putyíꞌuurej ɨ Tavástaraꞌ néijmiꞌi pu jɨn tyámuaꞌ een

¹Setyuꞌtatyójtziꞌreꞌ ɨ Tavástaraꞌ, jiꞌnye aꞌɨ́ɨ pu tyámuaꞌ een,

jiꞌnye jusén pu jɨn séejreꞌ ɨ tɨ jɨn taxɨeꞌveꞌ.

²Micheꞌ aꞌyan tyuꞌtaxáj aꞌɨ́ɨmaj ɨ maj Israel jitze ajtyámaꞌcan tɨjɨn:

“Aꞌɨ́jna ɨ Tavástaraꞌ tɨ jɨn taxɨeꞌveꞌ aꞌɨ́ɨ pu jusén jɨmeꞌ séejreꞌ.”

³Micheꞌ aꞌyan tyuꞌtaxáj ɨ puaaríij tɨjɨn:

“Aꞌɨ́jna ɨ Tavástaraꞌ tɨ jɨn taxɨeꞌveꞌ aꞌɨ́ɨ pu jusén jɨmeꞌ séejreꞌ.”

⁴Micheꞌ aꞌyan tyuꞌtaxáj aꞌɨ́ɨmaj ɨ maj tzáahuatyiꞌraꞌaj jimi tyíchaꞌɨj ɨ Tavástaraꞌ tɨjɨn:

“Aꞌɨ́jna ɨ Tavástaraꞌ tɨ jɨn taxɨeꞌveꞌ aꞌɨ́ɨ pu jusén jɨmeꞌ séejreꞌ.”

⁵Nyatɨꞌɨj quee cheꞌ jeꞌej jájtyoovaꞌaj Tavástaraꞌ jimi nu huatyéenyuj;

aꞌɨ́ɨ puꞌij náanamuajriꞌ ajta jeꞌen nɨiꞌrájtoo.

⁶Tavástaraꞌ pu nyajamuan yésejreꞌ, canu nyij tyíꞌtzɨɨnyeꞌ.

¿Jiꞌnye nyaꞌuuren ɨ tyévij?

⁷Tavástaraꞌ pu nyajamuan yésejreꞌ, aꞌɨ́ɨ puꞌij nyahuɨɨreꞌ.

¡Nyáaj nu huaꞌsejran matɨꞌɨj huatyámueꞌtɨcheꞌen aꞌɨ́ɨmaj ɨ maj nyaxanaꞌveꞌ!

⁸Jéetzeꞌ pu tyíꞌhuɨɨreꞌ tyaj Tavástaraꞌ jitze tyúꞌcaꞌnyej

quee aꞌyan tɨpuaꞌaj ɨ tyévij jitze tyetyúꞌcaꞌnyej.

⁹Jéetzeꞌ pu tyíꞌhuɨɨreꞌ tyaj Tavástaraꞌ jitze tyúꞌcaꞌnyej

quee tɨpuaꞌaj tyeɨ́tyee jitze tyetyúꞌcaꞌnyej maj vaꞌcán jɨn tyityatatyíj.

¹⁰Néijmiꞌi mu aꞌɨ́ɨmaj nyeriaꞌnaj ɨ maj séej chuéj japua joꞌcháatɨmee,

ajta aꞌɨ́j nu jitze maꞌcan ɨ Tavástaraꞌ huaꞌantyimueꞌtɨj.

¹¹Néijmiꞌqueꞌ mu nye jimi atahuíistɨraa,

ajta nyáaj nu aꞌɨ́j jitze maꞌcan ɨ Tavástaraꞌ huaꞌantyimueꞌtɨj.

¹²Aꞌyaa mu tyinyeriáꞌnaj matɨꞌɨj ɨ tzíjcaꞌriisee,

ajta ɨ maj jɨn nyuꞌcamuɨꞌcaꞌaj aꞌyaa pu tyuꞌtyájtaa tɨꞌɨj ɨ tzícareꞌej,

¡nyáaj nu ɨ Tavástaraꞌ jitze maꞌcan huaꞌantyimueꞌtɨj!

¹³Caꞌnyíin mu jɨn naatátajchacaꞌ, nyej nyij eetávetyijcheꞌ,

ajta ɨ Tavástaraꞌ pu mujoꞌvéꞌmej tɨꞌij naatáhuɨɨreꞌen.

¹⁴Nyáaj nu tyuꞌtáchuiicaj ɨ Tavástaraꞌ jimi, ɨ tɨ caꞌnyíjraꞌaj nyatáꞌcaa.

¡Aꞌɨ́ɨ pu aꞌɨ́ɨn puéꞌeen ɨ tɨ nyajapuáj huatányuusij!

¹⁵Aꞌájna joꞌmaj jaꞌchej ɨ tyeɨ́tyee maj tyámuaꞌ tyityetyúuchaꞌɨj

aꞌáa mu jutyamuaꞌveꞌej metyiꞌchuíicaj aꞌɨ́jcɨ jɨmeꞌ maj tyuꞌtyáamueꞌtɨj.

“¡Aꞌɨ́jna ɨ Tavástaraꞌ tɨ néijmiꞌi jɨn putyíꞌuurej aꞌɨ́ɨ pu néijmiꞌi tyuꞌtyáamueꞌtɨj!

¹⁶¡Aꞌɨ́jna ɨ Tavástaraꞌ tɨ jɨn néijmiꞌi putyíꞌuurej néijmiꞌi pu jɨn tyámuaꞌ een!

¡Aꞌɨ́jna ɨ Tavástaraꞌ tɨ néijmiꞌi jɨn putyíꞌuurej aꞌɨ́ɨ pu néijmiꞌi tyuꞌtyáamueꞌtɨj!”

¹⁷¡Canu muɨꞌnyij, sulu nyajúurij nu naꞌmej

nyataꞌaj nyij jaataxáj tyiꞌtɨ́j tɨ jeꞌej huáruuj ɨ Tavástaraꞌ!

¹⁸Tavástaraꞌ pu jéehua huápuɨꞌɨj puéjtzij naatáꞌ,

ajta capu naatáꞌ nyej nyij huámuɨꞌnyij.

¹⁹¡Setyaꞌantácuunaxɨꞌ joꞌtɨj jaꞌpueertajmee ɨ tyeyúuj,

aꞌyaa nu tyáꞌxɨeꞌveꞌ nyaj utyájrutyej nyej nyij tyaatatyójtziꞌreꞌen ɨ Tavástaraꞌ!

²⁰Aꞌíi pu aꞌɨ́ɨn puéꞌeen ɨ puéertaraꞌ ɨ Tavástaraꞌ,

aꞌúu mu mij joꞌtyárutyij aꞌɨ́ɨmaj ɨ maj jɨꞌréꞌnyeꞌej jimi séejreꞌ.

²¹Nyetyiꞌmuatyojtziꞌreꞌ, Tavástaraꞌ, jiꞌnye muáaj paj náanamuajriꞌ

pajta jeꞌen aꞌɨ́ɨn puéꞌeen ɨ tɨ nyajapuáj huatányuusij.

²²Aꞌɨ́jna ɨ tyetyéj maj majúurɨej aꞌɨ́ɨmaj ɨ chiꞌij maj taꞌhuacaa

aꞌyaa pu tyeꞌrájraa tɨ aꞌɨ́ɨn puéꞌeenyeꞌej jaꞌraa ɨ tɨ jéetzeꞌ juxɨeꞌveꞌ.

²³Aꞌɨ́ɨ pu ɨ Tavástaraꞌ aꞌyan jáaruuj,

aꞌɨ́j tu tyij jɨn ityáj tyámuaꞌ tyoꞌtaséj.

²⁴Aꞌíi pu xɨcáaraꞌ aꞌɨ́ɨ puéꞌeen tɨꞌɨj ɨ Tavástaraꞌ aꞌyan huarɨ́j:

¡cheꞌ ijíij naa taꞌaxcaj tyataꞌaj tyij huátatyamuaꞌveꞌen!

²⁵Aꞌtzúj cuiꞌ, Tavástaraꞌ, ¡tajapuá huatányuuchij!

Aꞌtzúj cuiꞌ, Tavástaraꞌ, ¡tajimí tyámuaꞌ tyúꞌuurej taꞌaj ij tyámuaꞌ atyojoꞌréꞌnyej!

²⁶¡Cheꞌ tyámuaꞌ eenyeꞌ aꞌɨ́jna ɨ tɨ jitzán maꞌcan ɨ Tavástaraꞌ yejeꞌvéꞌmej!

Muaꞌajmaj tu tyámuaꞌ tyajamuaatyátoosij aꞌújna u tyeyúujraꞌ tzajtaꞌ ɨ Tavástaraꞌ.

²⁷Tavástaraꞌ pu aꞌɨ́ɨn puéꞌeen ɨ Dios, ¡aꞌɨ́ɨ pu tatatzaviꞌtyeꞌ!

Siataꞌaj huatyóohuiinyij siaj tyuꞌyéꞌestej xamuáj xaꞌantyipíij

siaj sij aꞌáa jaꞌráꞌastij joꞌtɨj joꞌtyéjvee ɨ siaj japuan tyuꞌtámuꞌvejritaj.

²⁸Nyetyiꞌmuatyojtziꞌreꞌ nyajta tyuꞌtáchuiicaj aꞌɨ́jcɨ jɨmeꞌ paj vaꞌcán jɨn tyiꞌtyéjvee,

jiꞌnye muáaj paj nyaj Dios puéꞌeen.

²⁹Setyuꞌtatyójtziꞌreꞌ ɨ Tavástaraꞌ, jiꞌnye aꞌɨ́ɨ pu tyámuaꞌ tojoꞌmuaꞌraj,

ajta jusén jɨmeꞌ séejreꞌ ɨ tɨ jɨn taxɨeꞌveꞌ.

Jeꞌej tyaj tyaatáchuiicaj aꞌɨ́jcɨ ɨ nyúucarij Dios tɨ jɨn tyíꞌijta

¹Micheꞌ huatóotyamuaꞌveꞌen aꞌɨ́ɨmaj ɨ maj jɨꞌréꞌnyeꞌej tyámuaꞌ tyityaajúꞌ

majta aꞌyan tyityaajúꞌ tɨꞌɨj ɨ Tavástaraꞌ tyitaamuáꞌtyej.

²Micheꞌ huatóotyamuaꞌveꞌen ɨ maj aꞌyan rɨcɨj jeꞌej tɨ aꞌɨ́ɨn tyuꞌtaꞌíjtacaꞌ

majta néijmiꞌi ɨ juxɨéjnyuꞌcaa jɨn jahuoo,

³aꞌɨ́ɨmaj ɨ maj quee tyiꞌtɨ́j jɨn jeꞌej puaꞌaj rɨcɨj,

aꞌɨ́ɨmaj ɨ maj jitzán huajuꞌ ɨ juyáaraꞌ ɨ Tavástaraꞌ.

⁴Muáaj paj aꞌyan tyuꞌtaꞌíjtacaꞌ mej mij aꞌnyúucaa

néijmiꞌi aráꞌastijreꞌen tzáahuatyiꞌraꞌaj jɨmeꞌ.

⁵¡Aꞌyaa nu nyáaj tyáꞌxɨeꞌveꞌ nyaj tyámuaꞌ tyíꞌsejriaꞌaj

aꞌɨ́jcɨ jɨmeꞌ nyaj jaꞌráꞌastej jeꞌej paj muáaj tyuꞌtaꞌíjtacaꞌ!

⁶Canu nyij tyiꞌtɨ́j jɨn nyetyeviꞌraꞌ naꞌmej

nyatɨꞌɨj néijmiꞌi aꞌráꞌastej jeꞌej paj muáaj tyuꞌtaꞌíjtacaꞌ.

⁷Tzáahuatyiꞌraꞌaj nu nyaj xɨéjnyuꞌcaa jɨn tyimuaatatyójtziꞌreꞌej

nyatɨꞌɨj jáarɨꞌrej jeꞌej paj muáaj tyámuaꞌ naa tyuꞌtaꞌíjtacaꞌ.

⁸¡Aꞌyaa nu tyáꞌxɨeꞌveꞌ nyaj jaꞌráꞌastijreꞌen aꞌnyúucaa!

¡Capáj aꞌnáj manúujɨpuan!

⁹¿Jiꞌnye tyíɨꞌrij tɨꞌij ɨ tyamuéej quee tyiꞌtɨ́j jɨn áꞌɨtzeeriaꞌaj?

¡Ajta jeꞌen aꞌyan tyiꞌtyúuchaꞌɨɨj jeꞌej paj muáaj tyaataxájtacaꞌ!

¹⁰Nyáaj nu néijmiꞌi ɨ nyaxɨéjnyuꞌcaa jɨn muahuoo;

capáj tyiꞌtáꞌcareꞌen nyej nyij ajtáyiꞌcan aꞌɨ́jcɨ jitze aꞌnyúucaa.

¹¹Nuꞌríj juꞌhuatyáꞌɨtzee aꞌnyúucaa ɨ nyaxɨéjnyuꞌcaa tzajtaꞌ

nyej nyij quee tyiꞌtɨ́j jɨn ootyáꞌɨtzeereꞌen muéetzij jimi.

¹²¡Néijmiꞌi paj jɨn tyámuaꞌ een, Tavástaraꞌ!

¡Náamuaꞌtyej ɨ nyúucarij paj jɨn tyíꞌijta!

¹³Nye tyenyij nu jɨn jaataxájtaj

néijmiꞌi tyiꞌtɨ́j paj muáaj aꞌyan tyuꞌtaxájtaj.

¹⁴Naatányetyamuaꞌveꞌsij nyatɨꞌɨj aꞌyan tyuꞌméꞌen jeꞌej paj muáaj tyuꞌtaꞌíjtacaꞌ,

nye quee aꞌyan aꞌɨ́jcɨ jitze jeꞌej nyaj jéehua tyiꞌtɨ́j tyíꞌijchaꞌɨj.

¹⁵Aꞌɨ́j nu jitze tyíꞌnyamuaꞌtziityeꞌen jeꞌej paj tyuꞌtaꞌíjtacaꞌ

nyajta aꞌjuyéj jitze tyámuaꞌ naa tyoꞌcárutyij.

¹⁶Aꞌɨ́j nu jɨn aꞌnyúucaa huatányetyamuaꞌveꞌsij

nyajta quee yoꞌhuáꞌxɨj aꞌnyúucaa.

¹⁷¡Pataꞌaj júuricamej jaatáꞌan aꞌíjcɨ ɨ tɨ muéetzij muahuɨɨreꞌ!

¡Nyaꞌraꞌastej aꞌnyúucaa!

¹⁸Naꞌtányeerityeꞌ ɨ nyajɨ́ɨseꞌ, nyataꞌaj nyij jaaséj

tɨ naa huaséꞌrin jeꞌej paj muáaj tyíꞌmuaꞌtaj.

¹⁹Aꞌyaa nu een iiyeꞌej ɨ chuéj japua tɨꞌɨj ɨ tɨ séej chuéj japua jáꞌmaꞌcan;

capáj nye jimi jaꞌavaataj aꞌɨ́jcɨ ɨ nyúucarij muáaj paj jɨn tyuꞌtaꞌíjtacaꞌ.

²⁰Aꞌnáj tɨnaꞌaj nu jeꞌej tyéꞌnyamuaꞌtzej

aꞌɨ́jcɨ jɨmeꞌ nyaj jaxɨeꞌveꞌ nyaj jáamuaꞌtyij jeꞌej paj muáaj tyuꞌtaꞌíjtacaꞌ.

²¹Muáaj paj huaꞌtyaxɨꞌ aꞌɨ́ɨjma ɨ maj jeꞌej puaꞌaj tyíꞌxaxaꞌaj majta jeꞌej puaꞌaj rɨcɨj

majta quee aꞌyan rɨcɨj patɨꞌɨj muáaj tyuꞌtaꞌíjtacaꞌ.

²²Capáj tyiꞌtáꞌcareꞌen maj jeꞌej puaꞌaj tyíꞌnyaxajta nusu men mij nyaxanaꞌveꞌej,

jiꞌnye nuꞌríj jaꞌráꞌastijrej aꞌɨ́jcɨ aꞌnyúucaa ɨ paj jɨn tyuꞌtaꞌíjtacaꞌ.

²³Tyij majta ɨ tyeɨ́tyee maj jéehua uhuácacaꞌnyeꞌ jahuoocaj mej mij jeꞌej puaꞌaj náaꞌuurej,

aꞌíjna ɨ tɨ muéetzij muahuɨɨreꞌ aꞌɨ́j pu jitze tyúumuaꞌtziityeꞌen aꞌnyúucaa.

²⁴Nyáaj nu nyetyamuaꞌveꞌ aꞌɨ́jcɨ jɨmeꞌ ɨ nyúucarij ɨ paj jɨn tyuꞌtaꞌíjtacaꞌ;

aꞌɨ́ɨ puꞌij aꞌɨ́ɨn puéꞌeen ɨ tɨ nyéetzij tyámuaꞌ tyíꞌnyeꞌixaatyeꞌ.

²⁵Nuꞌríj tɨn huatámuɨꞌsij,

¡júuricamej naatáꞌ, aꞌyájna patɨꞌɨj tyaꞌtáꞌratziiriꞌ!

²⁶Nuꞌríj muaatéꞌexaaj jeꞌej nyaj tyiꞌtyínyechaꞌɨj, muáaj pej pij naatajé.

¡Náamuaꞌtyej aꞌɨ́jcɨ ɨ nyúucarij muáaj paj jɨn tyíꞌijta!

²⁷Naatáꞌ nyej nyij yoꞌitéej náꞌraꞌnyij nyataꞌaj nyij aꞌyan tyuꞌméꞌen patɨꞌɨj tyuꞌtaꞌíjtacaꞌ,

jiꞌnye nyáaxɨeꞌveꞌ nyaj aꞌɨ́j jitze tyúꞌmuaꞌtyij ɨ tɨ naa huaséꞌrin muáaj paj tyúꞌtaahuacaꞌ.

²⁸Nyenyaxaamúurityaꞌaj nu huápuɨꞌɨj nyényeyiin;

¡caꞌnyíjraꞌaj naatáꞌ, aꞌyájna patɨꞌɨj tyaꞌtáꞌratziiriꞌ!

²⁹Capáj tyiꞌtáꞌcareꞌen nyej nyij aꞌɨ́j jitze ucájrutyej ɨ juyéj tɨ hueꞌtzij puéꞌeen

naatáꞌ nyej nyij tyámuaꞌ tyiyoꞌitéej náꞌraꞌnyij jeꞌej paj muáaj tyíꞌmuaꞌtaj.

³⁰Aꞌɨ́j nu nyeríj antyíhuo ɨ juyéj tɨ jɨꞌréꞌcan jɨmeꞌ

aꞌyaa nu tyáꞌxɨeꞌveꞌ nyaj jáamuaꞌtyij jeꞌej paj tyuꞌtaꞌíjtacaꞌ.

³¹Tavástaraꞌ, nuꞌríj aꞌɨ́j jitze tyuꞌtyáacaꞌan jeꞌej paj muáaj tyuꞌtaꞌíjtacaꞌ;

¡capáj tyiꞌtáꞌcareꞌen nyej nyij huatányetyeviꞌraꞌastaj!

³²Caꞌnácan nu jaꞌráꞌastej ɨ nyúucarij ɨ paj jɨn tyuꞌtaꞌíjtacaꞌ

jiꞌnye muáaj paj tyámuaꞌviꞌraꞌaj nyatáꞌcaa ɨ nyaxɨéjnyuꞌcaa tzajtaꞌ.

³³Tavástaraꞌ, náamuaꞌtyej nyej nyij aꞌjuyéj jitze ucájrutyej,

jiꞌnye aꞌyaa nu tyáꞌxɨeꞌveꞌ nyaj aꞌɨ́j jitze ucájrutyej ꞌasta joꞌtɨj jóoꞌasej.

³⁴Naatáꞌ ɨ nyaj jɨn tyojoꞌitéej náꞌraꞌnyij nyaj juꞌhuatyáꞌɨtzen jeꞌej paj muáaj tyíꞌmuaꞌtaj;

¡nyáaxɨeꞌveꞌ nyaj jaꞌráꞌastej néijmiꞌi ɨ nyaxɨéjnyuꞌcaa jɨmeꞌ!

³⁵Aꞌɨ́j paj jitze nuꞌcájuyetyej jeꞌej paj muáaj tyuꞌtaꞌíjtacaꞌ,

jiꞌnye aꞌɨ́j pu jitze séejreꞌ ɨ nyaj jɨn huatányetyamuaꞌveꞌen.

³⁶Tyuꞌtáꞌ tɨꞌij ɨ nyaxɨéjnyuꞌcaa aꞌɨ́j huátaxɨeꞌveꞌen muáaj paj jɨn tyuꞌtaꞌíjtacaꞌ

quee aꞌɨ́jcɨ ɨ tɨ avíitzij jɨn huamueꞌtɨchiꞌhuacaꞌ.

³⁷Capáj tyiꞌtáꞌcareꞌen nyej nyij aꞌɨ́ɨjma aráseejra ɨ maj hueꞌtzij jɨn jusejrataj;

¡júuricamej paj naataꞌan nyej nyij huameꞌen aꞌjuyéj jitze!

³⁸Tyámuaꞌ paj naa tyaatéꞌexaatyeꞌen aꞌíjcɨ ɨ tɨ muéetzij muahuɨɨreꞌ

jeꞌej paj tyihuaꞌtáratziiriꞌ aꞌɨ́ɨjma ɨ maj tzáahuatyiꞌraꞌaj aꞌjimi tyíchaꞌɨj.

³⁹Capáj tyiꞌtáꞌcareꞌen tɨ nye jitze ráꞌastij aꞌɨ́jcɨ ɨ nyaj jatzɨɨnyeꞌ,

jiꞌnye tyámuaꞌ pu een aꞌɨ́jna ɨ paj jɨn tyuꞌtaꞌíjtacaꞌ.

⁴⁰Aꞌyaa nu tyáꞌxɨeꞌveꞌ nyaj jaꞌráꞌastej aꞌɨ́jcɨ ɨ paj jɨn tyuꞌtaꞌíjtacaꞌ;

¡júuricamej paj naataꞌan, jiꞌnye muáaj paj néijmiꞌi tyámuaꞌ tyíꞌuurej!

⁴¹Naataséjratyeꞌ, Tavástaraꞌ, ɨ paj jɨn nyaxɨeꞌveꞌ ajta ɨ paj jɨn nyajapuáj huatányuusij,

aꞌyájna patɨꞌɨj tyaꞌtáꞌratziiriꞌ.

⁴²Aꞌaj nu nyij pújooren nyaj jaatájeevej aꞌɨ́jcɨ ɨ tɨ jeꞌej puaꞌaj tyinaatájeevej,

jiꞌnye aꞌɨ́j nu jitze aꞌnyúucaa tyíꞌcaꞌnyej.

⁴³Capáj tyiꞌtáꞌcareꞌen nyej nyij quee cheꞌ aꞌɨ́jna xajtaj ɨ nyúucarij tɨ jɨꞌréꞌcan jɨmeꞌ,

jiꞌnye aꞌɨ́j nu jitze tyiꞌijchóꞌveꞌ ɨ nyúucarij muáaj paj jɨn tyuꞌtaꞌíjtacaꞌ.

⁴⁴¡Nyáaxɨeꞌveꞌ nyaj aꞌyan huárɨnyij patɨꞌɨj tyitaamuáꞌtyej,

aꞌnáj tɨnaꞌaj, nyajta jusén jɨmeꞌ!

⁴⁵Aꞌyaa nu nyij nyaxáahuaj tyiꞌcháaj naꞌmej,

jiꞌnye aꞌyaa nu tyuꞌméj patɨꞌɨj tyuꞌtaꞌíjtacaꞌ.

⁴⁶Nyaataxájta jeꞌej paj muáaj tyuꞌtaꞌíjtacaꞌ aꞌɨ́ɨjma jimi ɨ maj rey jɨn tyityetyuꞌuj

nyajta quee nyetyeviꞌraꞌ naꞌmej.

⁴⁷Jiꞌnye nyáaxɨeꞌveꞌ aꞌɨ́jcɨ ɨ nyúucarij ɨ paj jɨn tyuꞌtaꞌíjtacaꞌ

nyajta aꞌɨ́jcɨ jɨn nyetyamuaꞌveꞌ.

⁴⁸Nyáaxɨeꞌveꞌ nyajta nyetyámuaꞌveꞌej nyaꞌancuriáasij ɨ nyúucarij ɨ paj jɨn tyuꞌtaꞌíjtacaꞌ,

nyajta jéehua aꞌɨ́j jitze tyíꞌmuaꞌtzej ɨ nyúucarij paj jɨn tyíꞌijta.

⁴⁹Ootámuaꞌreej ɨ nyúucarij paj jaatáꞌ aꞌíjcɨ ɨ tɨ muéetzij muahuɨɨreꞌ:

muáaj paj aꞌyan náaruj nyej nyij aꞌɨ́j jitze tyiꞌijchóꞌveꞌej.

⁵⁰Aꞌíi pu aꞌɨ́ɨn puéꞌeen ɨ tɨ tyámuaꞌ tyinaatyéjeevij nyatɨꞌɨjta nyaxaamujrityaꞌaj:

júuricamej paj nyatáꞌcaa aꞌɨ́jcɨ jɨmeꞌ ɨ paj jɨn tyinaꞌtáratziiriꞌ.

⁵¹Aꞌnáj tɨnaꞌaj mu jeꞌej puaꞌaj tyíꞌnyaxaj aꞌɨ́ɨmaj ɨ maj jeꞌej puaꞌaj tyíꞌjepeꞌ,

nyajta nyáaj canu ajtayiꞌij aꞌɨ́jcɨ jitze ɨ paj muáaj tyinaamuáꞌtyej.

⁵²Nyajta nu jamuaꞌreej jeꞌej paj jájcuaj ɨmuáj tyuꞌtaꞌíjtacaꞌ,

aꞌɨ́j nu nyij jitze, Tavástaraꞌ, nyáaj jatyoovej ɨ nyaj jɨn huatányetyamuaꞌveꞌen.

⁵³Ɨ maj jeꞌej puaꞌaj tyityetyúuchaꞌɨj majta majúujɨpuaj jeꞌej paj muáaj tyitaamuáꞌtyej

jéehua mu huápuɨꞌɨj nyéetzij nyajaaxɨejtyeꞌ.

⁵⁴Cuíinarij pu nye jimi puéꞌeen ɨ nyúucarij paj jɨn tyuꞌtaꞌíjtacaꞌ

aꞌíjcɨ japua ɨ chuéj jóꞌnyaj aꞌyan jeꞌen tɨꞌɨj ɨ séej chuéj japua tɨ jáꞌmaꞌcan.

⁵⁵Tavástaraꞌ, tɨꞌɨjta tɨ́caꞌ muéetzij nu muaꞌtamuáꞌreꞌrii,

aꞌyaa nu tyáꞌxɨeꞌveꞌ nyaj aꞌyan huárɨnyij patɨꞌɨj muáaj tyíꞌtamuaꞌtyej.

⁵⁶Aꞌíi pu aꞌɨ́ɨn puéꞌeen ɨ tɨ nyejitzé aꞌyan tyúuxɨeꞌveꞌ:

nyaj jaꞌráꞌastej ɨ nyúucarij muáaj paj jɨn tyuꞌtaꞌíjtacaꞌ.

⁵⁷Muáaj, Tavástaraꞌ, muáaj paj aꞌɨ́ɨn puéꞌeen ɨ tɨ nyejitzé séejreꞌ;

aꞌyaa nu tyaꞌtányaratziiriꞌ nyaj aꞌyan rɨnyij jeꞌej paj muáaj tyuꞌtaxájtacaꞌ.

⁵⁸Néijmiꞌi nu ɨ nyaxɨéjnyuꞌcaa jɨn aꞌyan tyaꞌtányaratziiriꞌ nyej nyij tyámuaꞌ eenyeꞌ muéetzij jimi;

tyámuaꞌ paj nyojoꞌmuaꞌraj, aꞌyájna patɨꞌɨj tyaꞌtáꞌratziiriꞌ.

⁵⁹Aꞌɨ́j nu jitze tyiꞌriáꞌmuaꞌaj jeꞌej nyaj tyiꞌtyínyechaꞌɨj,

aj nu nyij nyajtáhuaꞌaj jaꞌráꞌastej ɨ nyúucarij muáaj paj jɨn tyuꞌtaꞌíjtacaꞌ.

⁶⁰Caꞌnácan nu aꞌyan huarɨ́j, canu áꞌtyeej

nyatɨꞌɨj nyij aꞌyan huarɨ́j jeꞌej paj muáaj tyuꞌtaꞌíjtacaꞌ.

⁶¹Aꞌɨ́ɨ mu meríj avíitzij jɨn nyeriaꞌnaj ɨ maj jeꞌej puaꞌaj tyityetyúuchaꞌɨj,

ajta nyáaj canu yoꞌhuáꞌxɨj jeꞌej paj muáaj tyinaamuáꞌtyej.

⁶²Jéꞌtaꞌ tɨ́caꞌ nu ájchesij nyej nyij muéetzij tyimuaatatyójtziꞌreꞌen

aꞌɨ́jcɨ jɨmeꞌ tɨ tyámuaꞌ een ɨ nyúucarij muáaj paj jɨn tyíꞌijta.

⁶³Nyáaj nu huáꞌjaahuatyeꞌ aꞌɨ́ɨjma ɨ maj tzáahuatyiꞌraꞌaj aꞌjimi tyíchaꞌɨj

majta ɨ maj jaꞌráꞌastee jeꞌej paj muáaj tyuꞌtaꞌíjtacaꞌ.

⁶⁴Tavástaraꞌ, néijmiꞌqueꞌ pu ɨ cháanacaj japua séejreꞌ ɨ paj jɨn taxɨeꞌveꞌ,

náamuaꞌtyej aꞌɨ́jcɨ ɨ nyúucarij ɨ paj jɨn tyíꞌijta.

⁶⁵Tavástaraꞌ, muáaj paj tyámuaꞌ tyéejchaꞌɨɨj aꞌíjcɨ ɨ tɨ muéetzij muahuɨɨreꞌ,

aꞌyájna patɨꞌɨj tyaꞌtáꞌratziiriꞌ.

⁶⁶Náamuaꞌtyej nyej nyij tyámuaꞌ metyóomuaꞌreerej nyajta tyojóꞌiteej,

jiꞌnye aꞌɨ́j nu jitze tyíꞌcaꞌnyej ɨ nyúucarij muáaj paj jɨn tyuꞌtaꞌíjtacaꞌ.

⁶⁷Matɨꞌɨj quee eexúj naatyaxáahuatacaj jéehua nu jeꞌej puaꞌaj tyiꞌtyínyechaꞌɨɨcaꞌaj,

ajta ijíij nu aꞌnyúucaa jaꞌastej.

⁶⁸Muáaj paj tyámuaꞌ tyihuojóꞌmuaꞌraj, pajta tyámuaꞌ tyiꞌtyíaꞌchaꞌɨj,

náamuaꞌtyej ɨ nyúucarij paj jɨn tyíꞌijta.

⁶⁹Ɨ maj axáa tyíꞌjepeꞌ mu hueꞌtzij jɨn chaꞌmanaꞌaj náꞌxɨjtyeꞌ,

ajta nyáaj nu néijmiꞌi ɨ nyaxɨéjnyuꞌcaa jɨn jaꞌastej ɨ nyúucarij muáaj paj jɨn tyíꞌijta.

⁷⁰Aꞌɨ́ɨ mu jeꞌej puaꞌaj een ɨ jumuaꞌtzíiraꞌaj jitze,

ajta nyáaj nu nyetyamuaꞌveꞌ aꞌɨ́jcɨ jɨmeꞌ jeꞌej paj tyíꞌnyamuaꞌtyej.

⁷¹Tyámuaꞌ pu tyáꞌraa nye jimi aꞌɨ́jcɨ jɨmeꞌ maj naatyáxaahuatacaꞌ,

jiꞌnye aꞌyaa nu tyaarɨꞌrej aꞌɨ́jcɨ ɨ nyúucarij muáaj paj jɨn tyíꞌijta.

⁷²Nye jimi pu jéetzeꞌ juxɨeꞌveꞌ aꞌɨ́jna ɨ nyúucarij muáaj paj nyeꞌixaatyeꞌ,

quee séej víꞌraꞌaj tɨ aráꞌasej ɨ túmii ooroj tɨ puéꞌeen nusu pláataj.

⁷³Muáaj paj naatyátaahuacaꞌ aꞌyájna nyatɨꞌɨj huaséꞌrin;

¡naatáꞌ nyej nyij yóꞌitej náꞌraꞌnyij aꞌɨ́jcɨ ɨ nyúucarij muáaj paj jɨn tyuꞌtaꞌíjtacaꞌ!

⁷⁴Aꞌɨ́ɨmaj ɨ maj tzáahuatyiꞌraꞌaj aꞌjimi tyíchaꞌɨj aꞌɨ́ɨ mu huatóotyamuaꞌveꞌsij matɨꞌɨj naaséj,

jiꞌnye nyáaj nu aꞌnyúucaa jitze nyeríj tyiꞌijchóꞌveꞌ.

⁷⁵Tavástaraꞌ, nyáaj nu jamuaꞌreej tɨ tyámuaꞌ een ɨ nyúucarij muáaj paj jɨn tyuꞌtaꞌíjtacaꞌ

ajta aꞌyan tyíꞌxaꞌpuɨꞌ pej pij nyéetzij puéjtzij naataꞌan tɨpuaꞌaj nyequee jaꞌráꞌastej.

⁷⁶¡Cheꞌ aꞌɨ́ɨn tyámuaꞌ tyinaatyéjeevej ɨ paj jɨn nyaxɨeꞌveꞌ,

aꞌyájna patɨꞌɨj nyéetzij tyinaꞌtáratziiriꞌ!

⁷⁷Naataséjratyeꞌ ɨ paj jɨn nyaxɨeꞌveꞌ, pajta naataꞌan nyej nyij júurij náꞌraꞌnyij,

jiꞌnye aꞌɨ́j nu jitze nyetyamuaꞌveꞌ ɨ nyúucarij muáaj paj nyamuaꞌtyej.

⁷⁸Micheꞌ huatóotyeviꞌraꞌastaj ɨ maj axáa tyíꞌjepeꞌ

ɨ maj chaꞌmanaꞌaj tyiꞌtɨ́j jɨn jeꞌej puaꞌaj tyíꞌnyaxaj;

nyáaj nu jaxɨeꞌveꞌ nyaj aꞌnyúucaa jitze tyúꞌmuaꞌtyij.

⁷⁹Micheꞌ nyajamuan tyúusɨɨreꞌen aꞌɨ́ɨmaj ɨ maj tzáahuatyiꞌraꞌaj aꞌjimi tyíchaꞌɨj,

aꞌɨ́ɨmaj ɨ maj jamuaꞌtyej ɨ nyúucarij muáaj paj jɨn tyuꞌtaꞌíjtacaꞌ.

⁸⁰Cheꞌ ɨ nyaxɨéjnyuꞌcaa tyámuaꞌ eenyeꞌ aꞌɨ́jcɨ jitze ɨ nyúucarij muáaj paj jɨn tyuꞌtaꞌíjtacaꞌ,

nyej nyij quee tyiꞌtɨ́j jɨn nyetyeviꞌraꞌ.

⁸¹Aꞌyaa nu jéehua tyáꞌxɨeꞌveꞌ paj nyaj japua huatányuunyij,

¡aꞌɨ́j nu nyeríj jitze tyiꞌijchóꞌveꞌ aꞌnyúucaa!

⁸²Nyajɨꞌɨj pu arí huácuaꞌnaj nyaj atanyéerij nyetyiꞌijchoꞌveꞌ ɨ paj jɨn tyinaꞌtáratziiriꞌ,

aꞌyaa nu tyíꞌxaj tɨjɨn: “¿Aꞌnajnyí mupoꞌvaꞌmaꞌaj puáꞌmej pej pij tyámuaꞌ tyinaatyéjeevej?”

⁸³Tyij nyajta vastacɨrɨeꞌ puéꞌeen tɨquee tyiꞌtɨ́j huɨɨreꞌ majta meríj nyojoꞌhuaꞌxɨj,

canu yoꞌhuáꞌxɨj ɨ nyúucarij muáaj paj jɨn tyíꞌijta.

⁸⁴¿Aꞌchunyéj nyooj áꞌtyeeren nyetyiꞌchoꞌveꞌej?

¿Aꞌnajnyí puéjtzij pahuoꞌtáꞌsij aꞌɨ́ɨjma ɨ maj jeꞌej puaꞌaj nyaꞌuurej?

⁸⁵Tyeɨ́tyee maj axáa tyíꞌjepeꞌ maj quee aꞌyan tyityaajúꞌ patɨꞌɨj muáaj tyíꞌtamuaꞌtyej

aꞌɨ́ɨ mu meríj avíitzij jɨn tyámuaꞌ huóoruuj mej mij naatyéeviꞌ jóꞌnyaj jooméj.

⁸⁶¡Naatáhuɨɨreꞌ, jiꞌnye chaꞌnaꞌaj muꞌuj nyamuarityeꞌ!

¡Néijmiꞌi pu jɨꞌréꞌcan jɨmeꞌ ɨ nyúucarij muáaj paj tajimí jaatyájtoo!

⁸⁷Tɨ́muaꞌ mu naꞌantyipuáꞌrityej íiyan cháanacaj japua,

ajta canu nyáaj ajtáraa aꞌɨ́jcɨ jitze ɨ nyúucarij muáaj paj jɨn tyuꞌtaꞌíjtacaꞌ.

⁸⁸Júuricamej paj naataꞌan, aꞌɨ́jcɨ jɨmeꞌ ɨ paj nyaxɨeꞌveꞌ,

nyáaj nu nyij jaꞌráꞌastej aꞌɨ́jcɨ ɨ nyúucarij aꞌ tyenyij jitze tɨ eejnyéj.

⁸⁹Tavástaraꞌ, aꞌnyúucaa pu jusén jɨmeꞌ séejreꞌ;

¡tyámuaꞌ pu éenyeꞌej séejreꞌ u tajapuá!

⁹⁰Jusén jɨmeꞌ pu séejreꞌ aꞌɨ́jna ɨ paj jɨn tyámuaꞌ een;

muáaj paj tyámuaꞌ tyeetyáacajtyej ɨ chuéj, aꞌɨ́j pu jɨn tyámuaꞌ tyíꞌsejreꞌ.

⁹¹Néijmiꞌi pu óocheꞌ tyámuaꞌ tyíꞌeen, aꞌyájna patɨꞌɨj muáaj tyuꞌtyájtoo aꞌnyúucaa jɨmeꞌ,

jiꞌnye néijmiꞌi mu muéetzij aꞌjimi tyíꞌhuɨɨreꞌ.

⁹²Tɨpuaꞌaj quee nyetyamuaꞌvisteꞌej aꞌɨ́jcɨ ɨ paj muáaj nyamuaꞌtyej,

aꞌɨ́ɨ pu arí naꞌantyipuáꞌrityeꞌnyijcheꞌ ɨ xaamújriraꞌaj.

⁹³Canu aꞌnáj yoꞌhuáꞌxɨj aꞌɨ́jcɨ ɨ nyúucarij muáaj paj jɨn tyuꞌtaꞌíjtacaꞌ,

jiꞌnye aꞌɨ́j paj jitze maꞌcan júuricamej naatáꞌ.

⁹⁴¡Nyajapuáj paj huatányuunyij, jiꞌnye aꞌ jitze nu ajtyámaꞌcan

nyajta aꞌyan tyuꞌméj patɨꞌɨj muáaj tyuꞌtaꞌíjtacaꞌ!

⁹⁵Ɨ maj jeꞌej puaꞌaj tyityetyúuchaꞌɨj mu tyiꞌijchóꞌveꞌ aꞌtzáaj maj naꞌantyipuáꞌrityeꞌen,

ajta nyáaj nu quee jatatoꞌraj aꞌɨ́jcɨ ɨ nyúucarij muáaj paj jɨn tyíꞌijta.

⁹⁶Aꞌyaa nu nyeríj tyíꞌsej tɨ néijmiꞌi tyeꞌentyípuaapuaꞌrej,

ajta ɨ nyúucarij muáaj paj jɨn tyuꞌtaꞌíjtacaꞌ jusén jɨmeꞌ pu séejreꞌ.

⁹⁷¡Jéehua nu jaxɨeꞌveꞌ jeꞌej paj muáaj tyíꞌnyamuaꞌtyej!

¡Aꞌtzáaj tɨnaꞌaj nu aꞌɨ́j jitze tyiꞌriáꞌmuaꞌsij!

⁹⁸Aꞌɨ́jna ɨ nyúucarij paj jɨn tyuꞌtaꞌíjtacaꞌ nyéetzij pu nyaꞌaꞌrij jusén jɨmeꞌ;

aꞌɨ́ɨ pu naatáꞌ nyej nyij jéetzeꞌ tyojoꞌitéej náꞌraꞌnyij mequee aꞌɨ́ɨmaj ɨ maj nyéjchaꞌɨɨreꞌ.

⁹⁹Jéetzeꞌ nu tyojóꞌitej mequee aꞌɨ́ɨmaj ɨ maj tyíꞌnyamuaꞌtyej

jiꞌnye jéehua nu aꞌɨ́j jitze tyíꞌmuaꞌtzej ɨ nyúucarij muáaj paj jɨn tyuꞌtaꞌíjtacaꞌ.

¹⁰⁰Jéetzeꞌ nu tyojóꞌitej mequee ɨ huáasij

jiꞌnye nyáaj nu jaꞌtzaahuatyeꞌ ɨ nyúucarij paj jɨn tyuꞌtaꞌíjtacaꞌ.

¹⁰¹Nuꞌríj ajtáraa aꞌɨ́jcɨ ɨ juyéj jitze tɨ quee tyámuaꞌ een

nyej nyij aꞌnyúucaa aráꞌastej.

¹⁰²Canu ajtáraa aꞌɨ́jcɨ jitze ɨ nyúucarij muáaj paj jɨn tyuꞌtaꞌíjtacaꞌ

jiꞌnye muáaj paj aꞌɨ́ɨn puéꞌeen ɨ tɨ tyíꞌnyamuaꞌtyej.

¹⁰³Jéetzeꞌ pu áncacaj ɨ nye tyenyij jitze aꞌɨ́jna ɨ paj jɨn tyinaꞌtáratziiriꞌ

mequee ɨ sarátyee ɨ nye tyényiꞌtzeꞌ.

¹⁰⁴Aꞌɨ́j nu nyeríj jitze jeꞌraa ɨ nyúucarij muáaj paj jɨn tyuꞌtaꞌíjtacaꞌ nyej nyij tyojóꞌiteej,

aꞌɨ́j nu jɨn néijmiꞌi xanaꞌveꞌ jeꞌej maj hueꞌtzij jɨn tyityetyúuchaꞌɨj.

¹⁰⁵Aꞌnyúucaa pu tatzárij puéꞌeen jóꞌnyaj jaꞌraꞌɨ́ɨcajmee

ajta aꞌɨ́ɨn puéꞌeen ɨ tɨ jɨn huányeeriꞌij ɨ nyajuyéj jitze.

¹⁰⁶Tyiꞌtɨ́j nu jɨn tyaꞌtányaratziiriꞌ, aꞌɨ́j nu nyij jɨn arányaꞌastesij:

¡néijmiꞌi nu jɨn aꞌyan rɨnyij jeꞌej tɨ tyíꞌxaj ɨ nyúucarij tɨ tyámuaꞌ een muáaj paj jaatyájtoo!

¹⁰⁷Tavástaraꞌ, jeꞌej nu tyéꞌnyamuaꞌtzej;

¡júuricamej naatáꞌ, aꞌyájna patɨꞌɨj tyaꞌtáꞌratziiriꞌ!

¹⁰⁸Ancuriáaꞌ, Tavástaraꞌ, jeꞌej nyaj tyíꞌmuatyojtziꞌreꞌ ɨ nye tyenyij jɨmeꞌ,

pajta jeꞌen aꞌnyúucaa náamuaꞌtyej.

¹⁰⁹Aꞌnáj tɨnaꞌaj nu aꞌáa jáꞌsejreꞌ joꞌmaj tyityajáꞌcuiꞌcaa,

ajta canu yóꞌhuaꞌnaj jeꞌej paj muáaj tyinaamuáꞌtyej.

¹¹⁰Aꞌɨ́ɨmaj ɨ maj jeꞌej puaꞌaj tyityetyúuchaꞌɨj mu jaxɨeꞌveꞌ maj naatyéeviꞌ,

ajta nyáaj canu ajtayiꞌij aꞌɨ́jcɨ jitze ɨ nyúucarij muáaj paj jaatyájtoo.

¹¹¹Aꞌɨ́jna ɨ nyaj jusén jɨmeꞌ jajchaꞌɨ́ɨj naꞌmej aꞌɨ́ɨ pu aꞌɨ́ɨn puéꞌeen aꞌnyúucaa,

jiꞌnye aꞌɨ́j nu jɨn nyetyamuaꞌveꞌ ɨ nyaxɨéjnyuꞌcaa tzajtaꞌ.

¹¹²Nyaxɨéjnyuꞌcaa nu jɨn aꞌyan tyuꞌtányaxajtacaꞌ nyaj jaꞌráꞌastej ɨ nyúucarij muáaj paj jɨn tyíꞌijta,

aꞌyaa nu jusén jɨmeꞌ rɨnyij ꞌasta naꞌaj quee néijmiꞌi tyeꞌentyipuáꞌrej.

¹¹³Nyahuaꞌxanaꞌveꞌ ɨ tyeɨ́tyee maj quee aꞌyan rɨcɨj jeꞌej maj tyíꞌxaj,

ajta aꞌɨ́j nu xɨeꞌveꞌ jeꞌej paj tyíꞌnyamuaꞌtyej.

¹¹⁴Muáaj paj aꞌɨ́ɨn puéꞌeen ɨ tɨ nyajapuáj huatányuusij pajta nyechaꞌɨj;

aꞌɨ́j nu jitze tyiꞌijchóꞌveꞌ ɨ nyúucarij muáaj paj jaatyájtoo.

¹¹⁵¡Nye jimi xu ajtácɨɨnyej, mu siaj jeꞌej puaꞌaj tyityetyúuchaꞌɨj,