TITAS

¹ Pathen kah tuihyoeihthlaang oen Jesuh Khrih kah celtuih kai Pawl lawng ca kavan pat. Pathen lawng a tuek thlaang thli kah oengna cak sak ham oen mami kah bokna oen awltak cangna ah ahimi te mawt hamla tuek la ka awm tih n’tuih. ² Mami kah bokna tah dungyan hingna ngaiuepna dawngah kung a sut. Hoem awl aka thui nawh, Pathen lawng dilai a suen thlan veng kalawng he hingna he mami peek ham awl a kam poen tih; ³ atue akhoek tluep vengah te dungyan hingna te amah lawng awlthang dawngah avan tueng sak. Kai he ng’uepna dawngah bii he m’peek tih mami thlawnkung Pathen kah awlpeek angla kai lawng ka phawng.

⁴ Mami cuutna u oengna dawngah ka ca taktakla aka awm Titas, nang tengah ca kavan pat. Pa Pathen oen mami thlawnkung Jesuh Khrih lawngah lungvatna, ngaimawngna te m’pe hawn seh.

⁵ Krit tuisanglak ah kan ceh taak he tahe toe sai ham angoe thaihu thli te sai ham oen khaaw roekk ah khrihcabu ahaamca khueh sak ham ni. Awl kan uen te hilh boel. ⁶ Ahaamca tah cawtbauh aka awm nawh thlaang seh; ahih tah a yu khat bueng aka khueh thlaang, a ca thli khaw Pathen aka oeng thlaang la awm u vetih cingpoh halang oen awl ngaaina nawh ben ah miing aka tueng nawh thlaang la awm seh. ⁷ Metihtiah Khrihcabu mawtkung tah Pathen kah biitungpui khuehkung la a awm dawngah cawttbauh aka kap nawh thlaang seh. Ahih tah amah oen amah thoemthai koek la aka ngaai u nawh, thin aka toi nawh, yuu aka aw nawh, khawpaw rang-au la aka awm nawh, tangka ngaihmoekna aka khueh nawh thlaang seh. ⁸ Ahih tah kamyin aka lungna oen thaihu theen aka ngaih thlaang seh. Ahih tah amah oen amah kuemsuem thai, thlaangdoeng, thlaangciim oen khawboe aka theen thlaang seh. ⁹ Oengnakungpui oen avai u la ueppang koei, awlthang te acakla aka phoeih thlaang seh. Teah ni ahih lawng aka soeng cangpueina oen tha a peek thai vetih asoeng cangpueina aka oelhtaih thli kah thawlhpalhna khaw a tueng sak thai ai.

¹⁰ Metihtiah, awlpuila Judah bokna kalawng Khrihca la aka kuun thli tim ah awlhong awlhii oen thlaangtloe te a oelh ataih tih thlaang aka thailatna yahawh ngaai awm. ¹¹ Te ang thlaang thli te awlthui toeng sak ham angoe; metihtiah, ahimi lawng cang puei koei nawh te a cang puei dawngah imkhuikaw boeih te a thek u, te tila a cang puei boeih te yaraula aka awm tangka dang ngaih maiah ni. ¹² Amah Krit thlaang, amami kah tawngha thli khuikah pakhat awltak aka thui lawng a thui vengah “Krit thlaang thli tah hoem aka thui poepa athe satluung oen thayong thlaang, caruutpui thli ni” ¹³ tila a thui he soeng tangtang. Tedawngah, he kawng ah he ahimi te atlawh ngaaila toelthaam lah, tetih atah ahimi lawng sa aka ding oengna te a khueh u vetih, ¹⁴ Judah thli kah ciil awl mailai oen awltak aka hoett thli tengah aka thoeng thlaanghing awlpeek thli te pawm u tlaih manawh. ¹⁵ Thlaangciim hamla tah soeprep boeih he ciim, tede tuiilehkap thlaang thli oen oeng nawh thlaang thli hamla tah a lungbui oen athe atheen mingna thinkaw tuiilehkap lawngah te n’tu khaw ciim sak nawh. ¹⁶ Amami lawngtah Pathen ka ming ti u de a saina oen a hoett u, thaihu theen khat khaw sai ham aka koeih tlaih nawh thlaang thli poen ni.

¹ Tede nang lawngtah asoeng oengna-kungpui oen avai u la cang puei. ² Tawngpa kum haam hue te amah oen amah kuemsuem uh, asoeng oengna dawngah awm uh, lungna oen uehthaina khueh uh, tila te thuituen. ³ Tetih van la te kum haam nunu thli te khaw hutaa kah awm ih phung angla aciim hingna oen aka awm hutaa la awm ham thuituen. Ahimi lawng thlaang theetkung oen yuu kah saltamnaa la awm u boel seh. Ahimi lawng thaihu theen te cang puei seh, ⁴ hutaa kum no nunu thli te a vaa a ca thli te a lungna ham, ⁵ amah oen amah kuemsuem u ham oen aciim acaihla awm ham, a vaa thli kah awl aka ngaai, imkhuikaw khuutcemkung thai hutaa theen thli la a awm u thai ham thuituen. Teahtah Pathen tengkah aka law awlthang te a-u lawngkhaw athela thui manawh.

⁶ Tetih van la te kum no tawngpa thli te khaw amah oen amah kuemsuem u thai ham thaphawh lah. ⁷ Soeprep boeih ah namah roeroe he khawboe ramlang theen ben ah oett koeila awm. Hinyah koei la awm lang na cangpueina dawngah ataktangla awm. ⁸ Oelhtaih thai nawh aka soeng awl te hawna lah, te tih atah mami kawng he athela thui ham khat khaw khueh nawh vetih na raal thli te yah-laat la awm ai.

⁹ Sal thli lawngah a bawipa thli kah awl ngaai pe selang soeprep boeih ah ahimi te a kaw hoe sak seh. Ahimi lawng a bawi thli kah awl te thung u boel seh, ¹⁰ a thaihu thli khaw huen pe u boel seh. Te lak atah ahimi lawng thlaang theen la a awmna, ueppang koeila a awm u te tueng sak u seh, teah ni ahimi kah saina boeih dawngah mami thlawnkung Pathen kawng cangpueina te a thangpawm u ai.

¹¹ Metihtiah, Pathen lawng thlaang boeih kah thlawnna hamla a lungvatna te avan tueng sak poen. ¹² Te lungvatna lawngtah Pathen tula sak ohla hingna, dilai thaihu ngaihmoekna te hoett ham, mah oen mah kuemsuemna, doengna oen he dilai dawngah Pathen kawngaih la hingna oen awm ham mami te n’thuituen. ¹³ Te tila te mami kah bawilen Pathen oen thlawnkung Jesuh Khrih kah ruep-awmna va tueng ngai ai tila n’ngaiuep awmngaihna Khawhin te n’ring u. ¹⁴ Mami he athe-arana boeih dawng kalawng thlawn ham oen mami he thlaang ciim la sai tih amah bueng kah koe la awm ham oen ah theenna te thinkaw thluembuek oen aka sai ham, amah kah hingna roe te mami hamla a peek.

¹⁵ He awlkaa thli he cang puei langtah na awlthui hutung thli te tha na peek tih na toelthaam vengah saithaina aana na khueh boeih te haw nah. Nang te a-u lawngkhaw dapsit la n’hu roe boel seh.

¹ Na thlaang thli lawng ukkung thli oen aana khuehkung thli kah awl a ngai u tih ahimi te a hinyahna u ham oen thaihu theen sai ben ah oepsoehla a awm poepa ham thui peh. ² Ahimi lawng a-u kah athe-arana khaw thui nawh ham, tede adingsuekla roeproeicala awm tih thlaang boeih tengah kawdawna te tueng sak poepa ham thui peh. ³ Metihtiah n’hu vengah mami khaw ng’ngau u tih awl ngaai nawh lawnghang la ng’awm u. Pumsa ngaihna oen awmtheenna soeprep kah sal la ng’awm u. Mami kah hingna he uett-eena oen thaihu naai ah mami lawng n’hawna; Mami te thlaang tloe lawng n’thina tih ahimi te mami lawng n’thina van. ⁴ Tede, mami thlawnkung Pathen kah lungna oen reenna te a tueng veng kalawng tah, ⁵ mami he ahih lawng n’thlawn poen. Te tah mami kah thaihu theen saina dawngah nawh tih a lungna oen ni mami he ahih lawng n’thlawn. Ciim Muithla rang oen athaaila cuunna oen athaaila hingna pekung lawng n’silh dawngah ni. ⁶ Pathen lawng mami thlawnkung Jesuh Khrih rang oen mami sawah acoeihpokla Ciim Muithla te avan toi tih, ⁷ a lungvatna rang oen Pathen oen mami roeproei ham oen ah mami kah ngaiuep dungyan hingna te khueh thaina ham ni. ⁸ He awl tah awltak ni. He kah awl he awlpuila na khueh ham ka ngaih, Pathen aka oeng thlaang thli lawngtah thlaang boeih boeih ham thaihu theen saina ben ah amami kah atue atang te a hawna ham awm, te tah aka theen tih aphu aka awm ni. ⁹ Tede tula aka coeng nawh awlpuungna patuer hue kah phunthoepna, tawhsina oen phungawl kawngah oelhtaihna te reel aram lah. Te ang thli te tula aka coeng nawh tih aphu aka awm nawh ni. ¹⁰ Pekbona aka sai thlaang te ayawlkoek ah voei hih ngaaithuenna pe lang tecoeng atah ngaaina tlaih boel. ¹¹ Te ang thlaang te tah thlaangthe ni tila na ming tih a thawlhna thli lawng ahimi kah asoeng nawh te a tueng sak.

¹² Artima nuem, nawhtah, Tikhikas nuem na tengla kavan tuih vengah Nikopolis khaw ah ka tengla va lawh. Te ah te sikca khui puet ah awm ham ka kamthlah. ¹³ Thlaangcal Zenas oen Apollos te khawlawng la a cehna hih ah atheenla bawm lang te rawi kah ngoena boeih te soepsa peh. ¹⁴ Mami kah thlaang thli te bii theen a bi tih angoe taktak dangna ham cang puei uh. Ahimi lawng poei-oepla awm mailai u boel seh.

¹⁵ Kai oen aka awm haih boeih lawng nang te n’toei u. Pathen kah lungvatna tah nangmi boeih tengah awm seh.