ROM

ROM

¹ Khrih Jesuh kah tuihyoeihthlaang, Pathen lawng Awlthang Theen phawng hamla n’tuek tih n’khue celtuih Kai Pawl lawng ca kavan pat. ² Te Awlthang Theen tah yan veng kalawng Pathen lawngah tawngha thli rang oen awl a kam tih Caciim dawngah a thut tangte te ni. ³ Te tah Pathen Capa mami kah Bawi Jesuh Khrih kawng te ni. Thlaanghing pumsa ben atah ahih he Devid cadil la awm. ⁴ Pathen la a awmna oen ciimna ben atah huham tharana oen duekna kalawng a thawhna rang oen ah Pathen Capa la a awm te a tueng sak. ⁵ Ahih rang oen Pathen lawng celtuih la awmna m’peek tih thlaangphun boeih lawng oengna oen awlngaaina a khueh thaina ham oen ah mawt ham kai he n’tuih. ⁶ Te kah Rom khawpui ah aka awm nangmi khaw Jesuh Khrih kah a koe la awm ham Pathen kah khuena ah na thuum u van.

⁷ Tedawngah Pathen lawng a lungna tih a thlaang la coengg ham a ceel Rom khawpui ah aka awm nangmi boeih tengah he ca he kavan pat. Pathen oen Bawipa Jesuh Khrih kah lungvatna oen ngaimawngna tah nangmi tengah awm hawn seh.

⁸ Dilai pum ah nangmi kah oengna kawng te a yaak boeih u poen dawngah Jesuh Khrih rang oen Pathen tengah lamhacuekla awmngaih ciil ka thui. ⁹ A Capa kawng Awlthang Theen te ka thinkaw lungbui boeih oen ka thui tih a bii ka bi he soeng tila Pathen tah kai kah sausi la awm. Ka thangthui roekk ah nangmi kan poek yoeyah te Pathen lawng a ming. ¹⁰ Pathen kawngaihna a awm atah vai at mai khaw nangmi tengla law ham Pathen tengah ka bih. ¹¹ Metihtiah nangmi oen muithla ben yotheenna te veel haih tih tharana awm sak ham ka ngaih dawngah nangmi te huh ham ka ngaih tangkiik. ¹² Ka thuingaihna tah kai kah oengna lawng nangmi te bawm ham tih nangmi kah oengna lawng kai he bawm patoeng ham ni.

¹³ Ka maya manau boeih, he he van ming u lah, nangmi tengla law ham ka kamthlah taitu poen de thaihu pakhat khat lawng n’kang poepa. Atloe Gental thlaang tim ah kawthawna ka khueh sak angla nangmi tim ah khaw kawthawna aka khueh awm sak ham ka ngaih tangkiik. ¹⁴ Metihtiah thlaangphun boeih tengah laiba ka khueh; Thlaang cuih oen thlaang cuih nawh tengah khaw, cathoem oen cathoem nawh tengah khaw bii bi ham laiba ka khueh. ¹⁵ Tedawngah ni Rom khawpui ah aka awm nangmi tengah khaw Awlthang Theen phawng ham ka ngaih tangkiik.

¹⁶ Awlthang Theen tah ka uepna rapsaat; aka tangna thlaang boeih thlawnna hamla Pathen kah tharana ni. Lamhacuekla Judah thlaangphun ham tih tecoengah Gental thlaangphun hamla khaw awm. ¹⁷ Pathen lawng thlaanghing he metila thlaangdoeng la a khueh tite Awlthang Theen lawng a tueng sak. “Pathen lawng thlaangdoeng la a khueh thlaang te lawngtah oengna oen hing ai.” tila Caciim lawng a thui angla te doengna tah acuekca veng kalawng aboet toe oengna rang oen ni.

¹⁸ Pathen kah thinsana lawngtah thlaanghing boeih kah athe-arana oen thawlhna boeih te a oel tih vaan kalawng va tueng poen. Te athe-arana lawng awltak te yaakming thai nawh ham a kang khoep. ¹⁹ Thlaanghing lawng Pathen he ming thai koei la awm ti he aciimla a tueng poen dawngah Pathen lawng ahimi te dan a peek; metihtiah Pathen amah roe lawng a tueng sak ni. ²⁰ Pathen lawngah dilai a suen cuek veng kalawng huh thai nawh la aka awm dungyan a tharana oen dungyan Pathen la a awmna tah aciimphanla tueng poen. Pathen kah thaihu sai dawngah ahimi lawng a huh thai. Tedawngah thlaanghing lawng a thawlhna te thuh phah thai manawh. ²¹ Ahimi lawng Pathen te a ming u de thangpawm koeila thangpawm u nawh, awmngaih ciil khaw thui u nawh. Ahimi kah poekna boeih tah apoeila coengg, a lung mong sut u tih yiinna oen betoet. ²² Ahimi lawng te ka cuih ti u, tede ahimi tah cuih u nawh. ²³ Dungyan aka hing Pathen te bok ohla aka duek thai koei thlaanghing, va oen ramsa oen ah aka cawlh thaihu hing oen aka lo u kutsai mueime te lat a bok u.

²⁴ Tedawngah Pathen lawng te ang thlaang hue te amami kawngaih tuiileh kap thaihu sai ham a peek tih khat oen khat sawah yahpawh koei thaihu a sai u. ²⁵ Ahimi lawng Pathen kawng awltak te thailatna awl oen a thaw u. Saikung Pathen te bok ohla a sai thaihu te a bok u tih bii a bi pe u. Saikung Pathen te ni thangpawm yoeyah ham a awm: Amen.

²⁶ Tedawngah Pathen lawng thlaang-hing he yarau pawh koeila aka awm pumsa cuk-halhna dawngah a thlah phaam sut. Hutaa hue lawng pateng khaw asoeng akam awmna ham koei hutaa phung te asoeng nawh la a hawna u tih khat oen khat thawlhna a sai u. ²⁷ Tih van toengtoengla tawngpa hue lawngkhaw asoeng akam la hutaa oen pawlneengna te a hoett tih pumsa cuk-halhna dawngah tawngpa lawng khat oen khat yahna koei thaihu the thawlhna a sai u dawngah thaihu the a sai phu te ahimi lawng a dang u van.

²⁸ Pathen kawng cuihna taktak te thlaanghing lawng a thinkaw khuiah khueh ham a ngaih u nawh dawngah aciimcaih nawh thinkaw lungbui khueh ham Pathen lawng a thlahphaam. Tedawngah sai koei nawh athe thaihu a sai u. ²⁹ Ahimi tah soeprep athe-arana athe thaihu cungkuem, apueh ngaihna, thawlhna oen betoet u tih uett-eena, thlaang ngawnna, tawhsina, thailatna, kawnehna oen be u. ³⁰ Rengse kawkhah phukhue awl thuina, khat oen khat thuitheetna, Pathen thina, thekhana, oekthloenna, halangna, athe sai ham poekna thli oen ah nu apa awl khaw ngaai u nawh. ³¹ Khawboe ramlang theen u nawh, awlkaa cak u nawh, thlaangtloe sawah reenna, lungna khueh u nawh. ³² He tila aka hing thlaang thli tah duek ham awm tila Pathen phungawl lawng a thui te a ming u. Tede he ang thaihu amami kah sai bueng ohla thlaangtloe lawng a sai u te khaw a kawtlaak puei u.

¹ Tedawngah ka paya, a-u nang khaw thlaangtloe sawah awl na cek vengah namah oen namah te na thlipdah u thai nawh. Metihtiah thlaangtloe awl na cek vengah ahimi angla nang lawngkhaw thawlhna na sai van dawngah namah oen namah ni awl na cek u. ² He tila thaihu the aka sai thli Pathen lawng awl a cek vengah asoeng thaihu a sai tite na ming u. ³ Tede ka puei, thlaang lawng thaihu the a sai tih awl na cek vengah nang lawng awl na cek thlaangtloe angla namah khaw na awm van. Pathen kah awlcekna kalawng ka loeih ai tila na poek aw? ⁴ Tihnawhtah Pathen kah alentloe reenna, khawdawp ngaaina, kawdawna thli te tula khaw na sak u nawh aw? Pathen kah lungvatna te thawlh yutna ham lawngpui nuehkung ni tite ataktangla na ming u. ⁵ Tede nangmi tah na thin thah u tih thawlh na yut u nawh: tedawngah Pathen kah thinsana oen aka doeng awlcekna Khawhin a pha vengah namami kah dantatna abo tare ham ni na sai khoeng u. ⁶ Pathen lawng thlaang boeih te amami kah a sai taring ah kutdo a peek ai. ⁷ Thlaang khatsut lawng thaihu theen te a sai u tih ruep-awmna, hinyahna oen dungyan hingna te a tlap u; ahimi te Pathen lawng dungyan hingna te a peek ai. ⁸ Thlaang khatsut lawngtah amami ham bueng a poek u tih asoeng thaihu te a hoett, thaihu the saina te a vai u; Pathen lawng thinsana oen thinlingna te ahimi sawah a hok pe ai. ⁹ Athe-arana aka sai boeih lawng khawdeng lungmana oen patang tlawhna te a dang u ai, Lamhacuekla Judah thli lawng a dang vetih Gental thli lawngkhaw a dang van ai. ¹⁰ Tede thaihu theen aka sai boeih tengah Pathen lawng ruep-awmna hinyahna oen ngaimawngna a peek ai. Lamhacuekla Judah thlaang hue lawng a dang vetih Gental hue lawngkhaw a dang van ai. ¹¹ Pathen lawngtah thlaang boeih avanpila awl a cek ai.

¹² Gental hue lawng Mosi kah Phungawl khueh u nawh; a thawlh u atah phungawl ohla ha-ata u. Judah hue lawng Phungawl a khueh; A thawlh u atah Phungawl angla awlcekna a dang u. ¹³ Thlaanghing he Pathen haiah thlaangdoeng la a awmna tah Phungawl te yaakna rang oen nawh tih Phungawl lawng sai a ti te saina rang oen ni. ¹⁴ Gental hue lawng Phungawl khueh u nawh; Tede Phungawl khueh u nawh mai cakhaw Phungawl lawng sai a ti te lungbui cuihna oen a sai veng roekk-ah ahimi ham Phungawl la awm. ¹⁵ Phungawl lawng sai a tite a thinkaw ah thut la awm poen tila amami kah khawboe ramlang lawngah a tueng sak. Amami kah poekna lawngah meveng ah nuem tah ahimi te a pai puei vengah soeng tila amami kah athetheen pekbona thinkaw oen a tueng sak. ¹⁶ Tedawngah Awlthang Theen ka phawng angla awlcekna Hin ah Pathen lawng Jesuh Khrih rang oen thlaanghing boeih kah ahuepla poekna thli te awl a cek ai.

¹⁷ Tetih atah nangmi Judah hue metila? Judah thlaangphun la ka awm tila namah oen namah na ti u; nangmi tah phungawl te na uepna u tih Pathen te na oekthloenna; ¹⁸ Pathen lawng nangmi sai sak ham a ngaih te na ming u tih aka soeng te tuek ham khaw Phungawl dawngkah na cang u poen; ¹⁹ Mikpum thli te lawngpui nuehkung, yiinna khuikah thlaang thli ham aangna la ka awm na ti u; ²⁰ Thlaang halang thli thuituenkung oen n’tu khaw aka ming nawh thlaang thli cangpueikung la ka awm na ti u; Phungawl dawngkah aka soep cuihna oen awltak te aka khueh la na ngaai u. ²¹ Thlaangtloe tah na cang puei u, n’tu kawngah namah oen namah tah na thuituen u nawh? “Huen boel” tila phung tah na thui u; namami tah na huen u aw? ²² “Samphaih boel” na ti u; namami tah na samphaih u? Kutsai pathen tah na tuii na leh u? tede kutsai pathen bok-im kah thaihu te na rot mangkhak u? ²³ Pathen kah phungawl ka khueh na ti u tih na oekk u van, tede phungawl na phe u tih Pathen te yah na bai u? ²⁴ Caciim lawngah, “Nangmi Judah thlaang thli kawng dawngah Gental thlaang lawng Pathen te thaang athe sak,” tila a thut.

²⁵ Nangmi lawng Phungawl na vai u atah yahhuivuen na reet u te aphu awm tang tang, tede Phungawl te na vai u nawh atah yahhuivuen aka reet nawh oen na lo u. ²⁶ Yahhuivuen aka reet nawh Gental thlaang lawng Phungawl lawng a kuek te a vai atah Pathen lawng yahhuivuen a reet angtoekla poek nawh ai aw? ²⁷ Tedawngah Judah thlaang thli, Phungawl khaw thut tangte la na khueh u tih yahhuivuen khaw na reet u poen de Phungawl te na phe u dawngah Gental thlaang thli tah pumsa ben ah yahhuivuen reet nawh mai cakhaw Phungawl te a vai u dawngah ahimi lawng nangmi te thawlh n’peel u poen ai. ²⁸ Ataktang atah a-u nuem Judah thlaang taktak tih yahhuivuen aka reet tangtang? Ahan atah Judah thlaang la awm tih yahhuivuen reetna te pumsa ah sai la a awm atah Judah thlaang tangtang nawh ni. ²⁹ Akhuiben ah Judah thlaang la awm tih thinkaw khuiah yahhuivuen aka reet te ni Judah thlaang tangtang a miingna. Te ngoen tah kut oen thut Phungawl kah bii saina nawh tih Pathen Muithla kah bii bina ni. Te ang thlaang te tah thlaanghing ben kah nawh tih Pathen benkah thangtheenna aka dang thlaang ni.

¹ Tetih atah Judah thlaang lawng Gental thlaang lak ah a hoeikhangna awm bet aw? Yahhuivuen reetna te pakhat mai khaw aphu awm aw? ² Asoep arepla hoeikhangna awm. Lamhacuek ah Pathen lawng awlthang theen Judah thlaang thli a kuem sak. ³ Tede Judah thlaang thli khatsut hue lawng uep-awm nawh la a awm atah metila a awm ai? Pathen khaw ahimi tengah uep-awm nawh la awm van ai aw? ⁴ Tih nawh ni, Thlaang boeih lawng hoem awl thui mai cakhaw Pathen tah soeng tih uep-awm la awm toeng toeng. Caciim lawng, “Awl na thui vengah na awlthui te soeng tila na tueng sak vetih awlcek la na awm vengah taya cawina te na taa ai, ” tila a thui.

⁵ Tede nangmi kah thaihu the saina dawngah Pathen kah thaihu sai a soeng te a tueng sak atah metila a awm ai? Pathen lawng mami te thawlh m’ peel tih dan n’tat atah Pathen he soeng nawh n’ti ai aw? (Thlaanghing poekna oen thui atah). ⁶ Tetih nawh ni; Pathen he doeng nawh kawinih metila dilai awl a cek thai ai?

⁷ Tede kai kah doengna nawh lawng Pathen kah doengna te aciimla a tueng sak rang oen Pathen te ruep-awmna a peek tare atah metila kai he thawlh peel la ka awm khak ai? ⁸ Tedawngah, “thaihu theen a tuengna hamla thaihu the sai u sih” n’ti u nawh kai? Tetih roe la awl na thui tite khatsut hue lawng thawlh n’peel u tih ka thaang a the sak u. Te ang thlaang hue te thawlh peel tuueng la a awm dawngah thawlh peel la awm ai.

⁹ Tetih atah mami Judah thlaang ta Gental thlaang lak ah bet atheenna n’tu aka awm? Atheen tloe moenih! Aciimphanla ka tueng sak tangte angla Judah thlaang oen Gental thlaang khaw avan at la thawlhna tharana huiah boeih awm u. ¹⁰ Caciim lawng tila a thui, “Thlaangdoeng a-u khat khaw awm nawh; ¹¹ thlaangcuih pakhat khaw awm nawh, Pathen aka tlap khat khaw awm nawh. ¹² Thlaang boeih lawng Pathen te a mangthawng taak; ahimi boeih tah lawngpui a hang u poen; doengna aka sai khat khaw awm nawh, pakhatca khaw awm roe nawh. ¹³ Ahimi kah awl tah duekna koei thailatna oen betoet; a laai dawng kalawng athe hoem awl thoeng; ahimi kah huikaa khui lawng rih koei saringrup awl ruul sue angla va thoeng; ¹⁴ ahimi kah awlthui tah kawsi awlkha runkhuen pansi awl oen be. ¹⁵ Ahimi tah thlaang nganbawh yaak sak ham oen ngawn tih thip hamla tah a tat loe thakbat u; ¹⁶ a cehna roekk-ah rawkna oen patang raina a thoeng sak u. ¹⁷ Ahimi lawng ngaimawngna lawngpui te ming u nawh. ¹⁸ Pathen rih ham roe te ahimi lawng ming u nawh” ti.

¹⁹ Phungawl khuiah aka awm awl soeprep he Phungawl huiah aka awm thlaang boeih sawah hawna ham ni tite tahe ah m’ming u, te tila a awm te tah thlaang boeih lawng peelnangna te a toeng tih dilai pum he Pathen kah awlcekna huiah a phana ham ni. ²⁰ Phungawl vaina rang oen Pathen haiah a-u khat khaw thlaangdoeng la awm nawh. Phungawl kah bii sai tah thlaang lawng thawlhna a sai te ming sak ham mai ni.

²¹ Tede, tahe ah Pathen lawng thlaanghing he amah oen haih thlaangdoeng la a khuehna lawngpui tah a tueng sak poen. Te kah doengna te Mosi kah Phungawl oen tawngha thli lawng sausi a deng u de phungawl oen tuhkai u nawh. ²² Jesuh Khrih te oengna rang oen Pathen lawng thlaangdoeng la a khueh. Khrih aka tangna boeih hamla doengna te Pathen lawng a sai dawngah a-u tengah khaw alangna roe awm nawh: ²³ thlaanghing boeih lawng thawlhna a sai u dawngah Pathen teng kalawng athlathloeila awm u poen. ²⁴ Tede, Pathen kah ayoe peek reenna kutdo Jesuh Khrih mami boeih loeihsakkung rang oen thlaang boeih he thlaangdoeng la a khueh. ²⁵ Pathen lawng Jesuh Khrih he a thisen rang oen thawlh khawdawp ngaaina saikung la a khueh tih te khawdawp ngaaina tah Jesuh Khrih oengna rang oen ni. Pathen lawng he tila thawlh khawdawp ngaaina a sai he tah a doengna te tueng sak a ngaih dawngah ni. Yan veng atah a kaw daw tih thlaanghing thawlhna te hu nawh angla awm; ²⁶ tede, tahe tue veng atah amah kah doengna te a tuengna ham thlaanghing thawlhna te a pho sak. He-tila Pathen lawng amah thlaangdoeng la a awmna a tueng sak tih Jesuh aka oeng boeih tah thlaangdoeng la a khueh.

²⁷ Tedawngah he kawng dawngah oekthloenna koei awm aw? Awm roeroe nawh? N’tu kawngah? Phung-awl n’vai u dawngah aw? Nawh ni! Mami lawng n’tangna dawngah ni. ²⁸ Thlaanghing he Pathen lawng thlaangdoeng la a khueh he phungawl vaina rang oen nawh tih oengna rang oen ni. ²⁹ Pathen he Judah thlaang thli bueng kah Pathen la awm aw? Gental thlaang thli kah Pathen la tah awm nawh aw? Gental thlaang thli kah Pathen la khaw awm. ³⁰ Pathen tah pakhat ni, Judah thlaang khaw a oengna rang oen thlaangdoeng la a khueh tih Gental thlaang khaw a oengna rang oen thlaangdoeng la a khueh. ³¹ Tetih atah, oengna oen Phungawl he hoett la awm ti ngaihna aw? N’hoett moenih, Phungawl te n’cak sak dai ni.

¹ Tetih atah mami kah patuer Abraham kawng he metila n’thui lah ai? ahih lawng n’tu nuem a tawng? ² Thaihu theen saina rang oen Pathen haiah doengna dang kawinih oekthloen ham koei la awm suide, tede Pathen haiah oekthloenna koei n’tu khaw awm nawh. ³ Caciim lawngah, “Abraham lawng Pathen te a tangna tih a oengna rang oen Pathen lawng ahih te thlaangdoeng la a khueh” tila a thui. ⁴ Bii aka bi tah thapang a dang, te thapang te kutdo tila poek ham awm nawh. A thatlawh phu ni a dang. ⁵ Tede biibina ohla a oengna dawngah pangtung tih thlaangthawlh te thlaangthawlh nawh la aka toehkung Pathen te aka tangna tah a oengna te Pathen lawng doengna la a khueh pe. ⁶ Biibina khat khaw thuum muehla Pathen lawng thlaangdoeng la a pawm thlaang pakhat kah awmngaihna te Devid lawng a thui vengah a thui-ngaihna tah he tila awm: ⁷ “Athe saina te khawdawp a ngaai pe tih thawlhthlahna aka dang tah yotheen aka dawng ni. ⁸ “Bawipa lawng a thawlhna te thawlhna la a toeh pe nawh thlaang tah yotheen aka dawng ni.

⁹ Devid lawng a thui yotheenna he yahhuivuen aka reet hue ham bueng aw? Moenih ta! Yahhuivuen aka reet nawh hue hamla khaw awm. Caciim n’thui tangte angla, “Abraham lawng Pathen te a oeng tih a oengna rang oen ahih te Pathen lawng thlaangdoeng la a pawm.” ¹⁰ Te tila Pathen lawng Abraham thlaangdoeng la a pawm te Abraham lawng yahhuivuen a reet coengah aw? a reet thlan ah aw? Yahhuivuen a reet coengah nawh tih a reet thlan ah ni. ¹¹ Abraham lawng thlaangdoeng la a awm coengah yahhuivuen a reet, ahih kah yahhuivuen reet he tah a oengna rang oen Pathen lawng thlaangdoeng la a pawm te a tuengna ham miknoek ni. Tedawngah yahhuivuen reetna ohla Pathen a oengna rang oen Pathen lawng thlaangdoeng la a pawm thlaang boeih kah Muithla ben ah Abraham tah Pahaam la awm. ¹² Ahih tah yahhuivuen aka reet hue kah Pahaam la khaw awm toengtoeng, metihtiah yahhuivuen reet bueng ohla Abraham lawng yahhuivuen a reet thlan vengah oengna oen a hing angla ahimi lawng oengna oen ah a hing u van dawngah ni.

¹³ Pathen lawng Abraham oen a cadil thli tengah dilai he nang kah koeva la awm ai, tila awl a kam vengah Abraham lawngah Phungawl a vai dawngah moenih ta, tede ahih lawng a tangna tih Pathen lawng thlaangdoeng la a pawm dawngah ni. ¹⁴ Pathen awlkam he Phungawl aka vai hue lawng paang thai kawinih thlaanghing kah oengna he a hong la awm vetih Pathen kah awlkam tah apoeioep la ni a awm ai. ¹⁵ Phungawl lawngtah Pathen thinsana avan khuen, phungawl a awmna nawh huen atah phungawl eekna khaw awm van nawh.

¹⁶ Tedawngah te kah awlkamna tah oengna dawngah akung asut tih Abraham cadil boeih tengah Pathen kah ayoe peek kutdo la awm, phungawl aka vai hue ham bueng nawh tih Abraham angla aka oeng thli boeih khaw awm van. Metihtiah Abraham tah Muithla ben ah mami boeih kah Pahaam la a awm dawngah ni. ¹⁷ Caciim lawng, “Nang tah nam tawm thlaangphun kah Pahaam la kan sai poen” tila a thui angla awm. Tedawngah he awlkam he tah Pathen haiah theen tih Abraham lawng a oeng Pathen tah thlaangduek thawhsakkung oen awm nawh te awmsakkung ni. ¹⁸ Abraham lawng ngaiuep ham n’tu khaw a awm nawh maiah pateng a oeng tih a ngaiuep dawngah “Nam tawm thlaangphun kah Pahaam la coeng,” Caciim lawng, “Na cadil aisi yoeh la yahawh ai,” tila a thui. ¹⁹ Abraham tah a kum yakhat cup tawmca poen tih thlaangduek angla a pumsa a awmna oen Sarah khaw ca-anau cuun thai tlaih nawh koeila a awm kawng te a poek khuep vengah a oengna tah yok roeroe nawh. ²⁰ A oengna te hoett sut nawh tih Pathen kah awlkam te khaw uepvoet baal nawh; a oengna tah tharana oen be tih Pathen te a thangpawm. ²¹ Ahih lawngtah Pathen lawng awl a kam coengthloeih te a sai ngaikhoek ai tila a tangna mangkhak. ²² Tedawngah Abraham tah a oengna rang oen Pathen lawng thlaangdoeng la a pawm. ²³ “Ahih tah thlaangdoeng la a pawm” ti he Abraham bueng ham a thut tila awm nawh. ²⁴ Jesuh Khrih mami Bawipa duekna kalawng koep aka thawhsakkung te oengna rang oen thlaangdoeng la a pawm mami ham khaw a thut van. ²⁵ Mami kah thawlhna phu ah ahih tah duek tih Pathen oen mami roeproeina ham a thawh sak koep.

¹ Tahe ah tah oengna rang oen mami tah Pathen lawng thlaangdoeng la n’khueh u poen tih mami kah Bawipa Jesuh Khrih rang oen Pathen oen ah n’roep u poen. ² Ahih lawngtah oengna rang oen mami he Pathen kah lungvatna khuila n’ kuun puei u poen, te lungvatna khuiah tahe n’awm u. Tedawngah Pathen bawilenna n’bur haih u ai tila ngaiuepna oen n’tha thlue u. ³ Raina n’tawng vengah khaw tha n’thlue sak u, metihtiah raina lawngah uehthaina m’peek tila m’ming u tih, ⁴ uehthaina lawngah Pathen kaw tawngna oen Pathen kaw tawngna lawngah ngaiuepna a thoeng sak tite m’ming u. ⁵ Pathen lawng a lungna te mami thinkaw khuiah Pathen amah kah kutdo Ciim Muithla oen ah avan toi poen dawngah he ngaiuepna lawng mami he kawpoek boet sak nawh.

⁶ Mami lawng n’tu khaw n’sai thai nawh vengah Pathen lawng atue atang a nuen tih mami thlaangthawlh hamla Khrih Jesuh tah duek. ⁷ Thlaangdoeng pakhat hamla thlaang pakhat duek ham rai tangkiik. Thlaang theen ham tah aka duek ngam khaw awm mai ai. ⁸ Tede, thlaangthawlh la n’awm vengah Khrih tah mami ham a duekna oen Pathen lawng mami he metila n’lungna tite a tueng sak poen. ⁹ Amah kah thisen oen tahe atah mami he Pathen oen ah n’roep u poen. Ahih rang oen Pathen kah thinsana kalawng metihtlukla n’thlawn tare ai! ¹⁰ Mami tah Pathen kah raal la ni n’awm u, tede a Capa duekna rang oen mami he paya laikoei la n’sai poen. Tahe atah Pathen kah paya laikoei la n’awm u poen dawngah Khrih hingna lawng mami he metihtlukla n’thlawn tare ai. ¹¹ Te bueng nawh tih tahe ah Pathen kah paya laikoei la mami saikung mami kah Bawipa Jesuh Khrih rang oen Pathen kah thaihu sai dawngah n’awmngaih u.

¹² Thawlhna tah thlaang pakhat rang oen he dilai ah law tih ahih kah thawlhna lawng duekna avan khuen. Metihtiah thlaang boeih tah a thawlh dawngah thawlhna phu ah thlaangphun boeih te duekna lawng a khuk. ¹³ Phungawl a awm thlan ah dilai dawng thawlhna awm poen; tede phungawl a awmna nawh huen ah thawlhna te thawlh la toeh pe nawh. ¹⁴ Tede Adam dung veng kalawng Mosi dung toe ah duekna lawng thlaanghing boeih te a uk, Adam lawng Pathen kah awlpeek te vai nawh tih a thawlh angla aka thawlh nawh thlaang thli khaw duekna lawng a uk boeih. Adam tah aka law ham koei thlaang pakhat te huhsakna ni. ¹⁵ Tede thlaang pahih te vai ahih nawh; metihtiah Pathen kah ayoe peek kutdo tah Adam kah thawlhna oen lo u nawh, te thlaang pakhat kah thawlhna dawng maiah thlaang yahawh duek ti he tah soeng ta-ngak. Tede Pathen kah lungvatna tah, te thlaang kah athe-arana lak ah apueh ngaaila bo tih tetih van toengtoengla thlaang pakhat Jesuh Khrih lungvatna rang oen thlaang yahawh ham aka thoeng Pathen kutdo tah bo tare ai. ¹⁶ Pathen kah ayoe peek kutdo oen thlaang pakhat kah thawlhna tah lo u nawh. Thlaang pakhat a thawlh coengah awltloekna tah “Na thawlh” ti he ni; tede thawlhna yahawh sawah atingtawkk nawh kutdo aka law tah “Na thawlh nawh!” tila awltloekna he ni. ¹⁷ Thlaang pakhat kah thawlhna rang oen duekna lawng uk ham akung a tongnan ti he soeng tangtang. Te cakhaw thlaang pakhat Jesuh Khrih kah sai tah metihtlukla a bo ngaai. Pathen kah asoepbir lungvatna aka dang thlaang boeih tah ayoela amah oen roeproei u tih Khrih rang oen a hing khuiah taana oen hing u ai.

¹⁸ Tedawngah thlaang pakhat kah thawlhna dawngah thlaang boeih tah thlaangthawlh la awm, tetih van angla thlaang pakhat kah adoeng saina rang oen thlaang boeih a loeih sak tih ahimi te hingna a peek. ¹⁹ Thlaang pakhat kah awlngaaina nawh lawng thlaang boeih te thlaangthawlh la a coeng sak, tetih van angla thlaang pakhat kah awlngaaina rang oen thlaang boeih te Pathen lawng thlaangdoeng la a khueh ai. ²⁰ Phungawl he tah thawlhpalhna a puungna ham ni, tede thawlhna apuungna huen ah Pathen kah lungvatna khaw puung tare. ²¹ Tedawngah thawlhna lawngtah duekna te a hawna tih a uk, tetih van angla doengna lawngtah Pathen kah lungvatna oen a uk tih mami kah Jesuh Khrih rang oen mami te dungyan hingna benla n’ceh puei u.

¹ Tetih atah metila n’ti u lah ai? Pathen kah lungvatna apuungna tare ham thawlhna te n’sai poepa ai aw? ² Te tih moenih! Thawlhna ah n’duek u poen, metila thawlhna dawngah n’awm khuep thai ai? ³ Khrih Jesuh oen pumkhatla awmna dawngah mami baptisma n’dang vengah te a duekna ah baptisma n’dang haih poen tite ataktangla na ming u. ⁴ Tecoengah mami baptisma n’dang vengah mami tah ahih oen up haih la awm tih a duekna ah n’duek haih u, Khrih tah Pa kah ruep-awmna huham lawng duekna kalawng a thawh sak koep angla mami khaw hingna athaai oen hingna van ham ni.

⁵ A duekna ah amah oen n’duek haih atah a thawhna ah amah oen n’tho haih van ai. ⁶ Mami kah hing ruem te Jesuh Khrih oen thinglam dawngah khiing haih la awm poen tite m’ming u. Te tila a khiing haih he tah thawlhna oen aka be pumsa hing ruem te phe boeih tih thawlhna sal la awm tlaih nawh ham ni. ⁷ Metihtiah mami n’duek vengah thawlh tharana khui kalawng n’loeih u. ⁸ Khrih oen mami n’duek haih veng kalawng mami khaw amah oen n’hing haih van ai tila n’tang na. ⁹ Khrih tah duekna kalawng tho koep poen tih duek koep tlaih manawh tite m’ming u, duekna lawng a sawah ukna aana khueh roe tlaih manawh. ¹⁰ Te tila Khrih tah a duek poen dawngah thawlhna lawng a sawah huham khueh tlaih nawh; Tahe a hingna he tah Pathen oen pawlneengna ah hing poen. ¹¹ Tetih van angla nangmi lawngkhaw thawlhna ah thlaang duek la ka awm u tih Khrih Jesuh rang oen ah Pathen oen pawlneengna khuiah ka hing u poen tila poek uh.

¹² Nangmi lawng na pumsa ngaihna te vai hamla aka duek thai nangmi pum te thawlhna lawng uk tlaih boel seh. ¹³ Tecoengah na pumvaang ame ang mai te khaw thaihu the saina ah hawna hamla thawlhna ah pe u tlaih boel. Te lak atah duekna kalawng hingna ah n’thawh sak koep angla doengna sai ham na pum boeih te Pathen te pe u hawn. ¹⁴ Thawlhna he nangmi kah bawi la awm tlaih boel seh; metihtiah nangmi tah phungawl khuiah na awm u tlaih nawh tih Pathen lungvatna khuiah na awm u poen.

¹⁵ Tetih atah mami he phungawl huiah n’awm tlaih nawh tih Pathen lungvatna huiah n’awm u dawngah thawlhna n’sai ai aw? N’sai manawh! ¹⁶ Thlaang pakhat khat kah awl te ngaai pe ham na pum na peek vengah te a awl na ngaai pe bawi kah sal la na awm tite ataktangla na ming u, tetih angla thawlhna awl te na ngaai u atah thawlhna sal la na awm u tih thawlhna phu tah duekna ni; tetih van toengtoeng la Pathen awl na ngaai u atah, te awlngaaina phu tah nangmi te thlaangdoeng la n’khueh ai. ¹⁷ Tede Pathen te uem u lah! Anoekbuet atah nangmi he thawlhna sal la na awm u de, tahe tah cangpueina dawngah na huh awltak na dang u te na thinkaw lungbui tak oen na vai u poen. ¹⁸ Nangmi tah thawlhna kalawng na loeih u poen tih doengna sal la na awm u poen. ¹⁹ (Nangmi lawng yaakmingna pumsa ben ah na khueh u nawh dawngah yaakming thai koei tihinhang kah awl ka hawna) N’cui veng atah nangmi lawng athe sai hamla aciimcaih nawh oen athe-arana ah na pum te sal la na peek u rapcaat. Tetih van la tahe tah aciimcaih saina hamla na pum te doengna sal la pe u rapcaat loeih.

²⁰ Nangmi tah thawlhna sal la na awm u vengah te doengna khui kalawng na loeih u. ²¹ Tahe ah nangmi lawng na yah puei thaihu na sai u te hoeikhangna awm aw? Te thaihu thli kah aphu tah duekna ni! ²² Tede tahe tah nangmi he thawlhna kalawng na loeih u poen tih Pathen kah sal la ni na awm u poen, Nang kah hoeikhangna tah na hingna te amah tengah na peek biit tih aphu tah dungyan hingna te ni. ²³ Thawlh phu tah duekna ni. Tede Pathen kah ayoe peek kutdo tah mami Bawipa Jesuh Khrih oen pumkhatla awmna dawngah dungyan hingna te ni.

¹ Maya manau thli, nangmi lawng yuvaa la awmna phung he acek aneh la na ming u poen dawngah nangmi tengah ka thui ham koei he khaw na ming u badai. Thlaanghing he a hing khui bueng ni yuvaa la awmna phung lawng a uk. ² Thuina maiah, vaa aka sa hutaa pakhat he a vaa a hing khui bueng ni yuvaa la awmna phung lawng a piin. A vaa te a duek atah yuvaa la a awmna hih phung kah piinna kalawng loeih poen. ³ Tedawngah te hutaa lawng a vaa a hing hun maiah thlaangtloe vaana kawinih te hutaa te samphaih n’ti ai. Tede a vaa te a duek coeng atah te hutaa tah thlaanghoeng la a awm poen dawngah vaa a sak atah samphaih miingna tlaih nawh. ⁴ Maya manau thli, nangmi khaw te tila na awm u van. Nangmi tah Khrih kah pum vaang la na awm u poen dawngah Phungawl kah ukna khuiah hingna te na hoett u poen. Mami he Pathen kah biibina ah aphu aka awm la coeng ham tahe atah duekna kalawng aka tho koep Khrih kah thlaang la na awm u poen. ⁵ Thlaanghing pumsa ngaihna oen n’hing u vengah Phungawl lawng a bawnghorh dawngah thawlh sai ngaihna lawng mami pum khuiah bii a bi tih mami te n’duek sak. ⁶ Tede tahe tah Phungawl kah piinna thong khuiah te n’duek u poen dawngah Phungawl dawng kalawng n’loeih u poen. Tahe atah ca oen a thut phungawl lawngpui ruem ah bii m’bi u tlaih nawh tih Muithla ben kah lawngpui thaai ah ni bii m’bi u poen.

⁷ Tetih atah Phungawl amah roe he thawlh n’ti u thai ai aw? Thawlh n’ti thai manawh! Tede thawlhna he aka mingsakkung tah Phungawl ni. Phungawl lawng, “Thlaang kah thaihu naai boel,” tila van thui nawh kawinih thaihu naaina ti he ka ming manawh. ⁸ Tede he tila thawlhna lawngtah awlpeek dawngah bii a bi tih ka pumsa dawngah ngaihna soeprep te a bawnghorh, Phungawl a awmna nawh atah thawlhna he aka duek thaihu ni. ⁹ Kai kamah roe he n’cui vengah Phungawl ohla khaw ka sak, tede awlpeek te a law vengah tah thawlhna lawng hing tih kai tah ka duek. ¹⁰ Hingna aka pe ham koei awlpeek lawng he duekna avan thoeng puei lat. ¹¹ Thawlhna lawng atue theen a dang tih awlpeek te a hawna vetkat tih n’thai n’latna; te awlpeek oen kai te ng’ngawn.

¹² Tedawngah Phungawl tah ciim tih awlpeek khaw ciim, doeng tih theen. ¹³ Tetih atah athe thaihu lawng Kai ham duekna avan thoeng sak ti ngaihna aw? Tetih moenih. Te tila aka thoeng sak te tah thawlhna ni; Thawlhna lawng thawlhna tangtang la a awmna te a tuengna ham atheen thaihu te a hawna tih kai ham duekna te avan khuen. Tedawngah thawlhna he mueirihtamyiin thawlhna ni tila awlpeek rang oen tueng tare.

¹⁴ Phungawl he muithla ben thaihu ni tite mami lawng m’ming u; tede kai tah thawlhna tengla sal angla a yoeih thlaang ni. ¹⁵ Kai lawng ka sai he ka yaakming nawh; sai ham ka ngaih te ka sai nawh tih ka ngaih nawh dai te ka sai lat. ¹⁶ Sai ham ka ngaih nawh te ka sai vengah Phungawl te soeng tila ka kawtlaak puei van. ¹⁷ Tedawngah he thaihu aka sai tangtang he kai nawh tih ka khuiah aka awm thawlhna te ni. ¹⁸ Ka khuiah he thlaanghing la ka coenggna ah atheen awm nawh tila ka ming. Ka khuiah atheen sai ngaihna awm mai cakhaw atheen te ka sai thai nawh. ¹⁹ Sai ham ka ngaih atheen te ka sai nawh; sai hamla ka ngaih nawh athe te lat ka sai. ²⁰ Kai lawng sai ham ka ngaih nawh te ka sai atah, te aka saikung tah kai tlaih nawh tih ka khuiah aka awm thawlhna lawng ni a sai tite thui ka ngaih.

²¹ Tedawngah he phungawl lawng bii a bi tila ka ming: atheen sai ham ka ngaih vengah kai lawngtah athe bueng te ka tuek. ²² Ka khui benkah thlaanghing lawngtah Pathen kah phungawl dawngah te awmngaih. ²³ Tede ka pum khuikah phungawl tloe lawng bii a bi he ka ming, te phungawl te tah ka thinkaw lawng a ngaih phungawl te aka oel mangkhak awm. Te phungawl lawngah ka pum khuiah bii aka bi thawlhna phungawl khuiah thongtla angla te n’sai. ²⁴ Ngaihang khawbing la ka awm mah aw! Duekna la aka ceh puei he kah ka pum dawng kalawng a-u lawng n’thlawn lah ai? ²⁵ Mami Bawipa Jesuh Khrih rang oen thlawnna saikung Pathen te uem u lah! Tedawngah ka coenggna tangtang tah he ni: Kamah ben atah ka thlaanghing coenggna lawngah thawlhna phungawl te a vai vengah ka kawpoek bueng oen Pathen phungawl te ka vai thai.

¹ Tahe tah Khrih Jesuh oen pumkhatla aka awm thli ham tah thawlh awlcekna awm tlaih nawh. ² Metihtiah Khrih Jesuh oen pumkhatla hingna ah mami aka ceh puei Muithla kah phungawl lawng duekna oen thawlhna phungawl khui kalawng mami te n’loeih sak poen. ³ Thlaanghing pumsa a tha ayoek dawngah Phungawl lawng a sai thai nawh te Pathen lawng a sai. Thlaanghing pumsa ah aka awm thawlhna te a Capa avan tuihna rang oen a phe poen. Thawlhna taa hamla thlaanghing kah thawlhna pumsa angla va law. ⁴ Pathen lawng he tila a sai he tah thlaanghing pumsa ngaihna angla nawh tih Muithla ngaihna angla aka hing mami pum dawngah Phungawl lawng akuek doengna te asoepna ham ni. ⁵ Amami kah pumsa ngaihna angla aka hing thlaang tah pumsa ngaihna lawng a thinkaw te a uk. Muithla kah ngaihna angla aka hing thlaang tah Muithla ngaihna lawng a thinkaw te a uk. ⁶ Pumsa ngaihna ah khawsak phu tah duekna ni. Muithla ngaihna ah khawsak phu tah hingna oen ngaimawngna ni. ⁷ Tedawngah thlaanghing lawng amami pumsa ngaihna angla a awm a tah Pathen raal la awm; ahimi lawng Pathen kah phungawl te vai nawh, ahimi lawngah vai khaw vai thai roe nawh. ⁸ Amami kah pumsa ngaihna aka vai thli lawngtah Pathen te a kaw hoe sak thai nawh.

⁹ Tede nangmi tah thlaanghing pumsa ngaihna ah na awm u nawh, Pathen Muithla nangmi khuiah ataktangla a awm atah Muithla kawngaih angla na awm u. A-u khaw Khrih Muithla aka khueh nawh tah Khrih amah koe la awm nawh. ¹⁰ Tede Khrih te nangmi khuiah a awm atah thawlhna dawngah na pum te duek mai cakhaw nangmi tah Pathen oen na roep u poen dawngah nangmi kah muithla tah hing. ¹¹ Jesuh te duekna kalawng aka thawh sak Pathen Muithla te nangmi khuiah a awm atah, Khrih te duekna kalawng aka thawh sak Pathen Muithla nangmi khuiah a awm dawngah nangmi kah aka duek ham koei pum te hingna a peek van ai.

¹² Tedawngah maya manau hue, mami lawng sai ham koei n’khueh u, tede mami kah thlaanghing pumsa ngaihna angla hing ham awm nawh. ¹³ Nangmi lawng thlaanghing pumsa ngaihna angla na hing u atah na duek u ai; tede nangmi lawng thawlhna na sai thli te Muithla oen na ngawn atah na hing u ai. ¹⁴ Pathen Muithla lawng a mawt thlaang thli tah Pathen kah ca-anau la awm. ¹⁵ Metihtiah Pathen lawng m’peek u Muithla tah nangmi te sal la coengg sak ham oen ah birih ngaihuet sak ham nawh tih; te Muithla lawngtah nangmi te Pathen kah ca-anau la sai ham ni. Te Muithla kah tharana rang oen Pathen te, “A Pa! a Pa!” tila n’khue thai. ¹⁶ Mami he Pathen amah kah ca-anau la n’awm tite thui ham Pathen kah Muithla amah roe te mami kah muithla oen tuhkai haih hih. ¹⁷ Mami tah amah kah ca-anau la n’awm u veng kalawng a thlaang hue ham a khueh pe kam-awm yotheenna te n’dang van ai. Pathen lawng Khrih ham a khueh pe te mami lawngkhaw m’paang van ai; metihtiah Khrih kah patangraina te n’cuut u atah, mami lawng amah kah ruep-awmna te khaw m’paang van ai.

¹⁸ Tahe veng mami kah patang palai khangna he hai benkah mami tengah aka thoeng ham koei ruep-awmna oen ah nuehtah koei nawh ni tila ka poek. ¹⁹ Pathen lawng a ca-anau thli tengah a tueng sak ham koei te a thaihu suen boeih lawng ngaiuep tangkiik oen a lamtoen u. ²⁰ Pathen lawng a thaihu suen boeih te apoei apit la awm ham dan a peek. Te tila a awm he thaihu suen thli amami kah kawngaih dawngah nawh tih Pathen amah kawngaih ni. Tede ngai-uepna tah awm hun. ²¹ Te ngaiuepna tah hin at vengah ngoen a thaihu suen boeih lawngah rawkna koei sal piinna kalawng loeih vetih Pathen ca thli kah loeihna ruep-awm te a dang u van ai. ²² Tecoengah a suen thaihu lawng tahe tue toe ah camoe awm tawm vengkah a tlawh angla tlawhna oen kopaang u tite mami lawng m’ming u. ²³ Te tila a suen thaihu bueng lawngah kopaang u nawh, Muithla te lamhacuek Pathen kutdo la aka dang mami pum he loeih sak ham aka ring mami boeih khaw kawdaang ah ng’kopaang u van. ²⁴ Metihtiah ngaiuepna oen thlawn la n’awm u. Tede mami lawng n’ngaiuep u te n’huh atah tete ngaiuepna tangtang moenih. Mik huh tangte te a-u lawng a ngaiuep nooek kai? ²⁵ Tede mik huh nawh te n’ngaiuep u atah mami lawng kawdaw oen n’ring u.

²⁶ Te tila mami tha a yoek dawngah mami bawmcem hamla Muithla tah va law. Mami lawng metila thangthui ham koei ti khaw m’ming u nawh dawngah awl oen thui thai nawh kopaangna oen Muithla lawng mami ham Pathen tengah avan bih. ²⁷ Mami kah thinkaw aka ming Pathen lawng Muithla kah kawpoek te khaw a ming; metihtiah Muithla lawngtah Pathen amah kah kawngaih angla a thlaang thli yuengah a bih pe dawngah ni.

²⁸ Pathen lawngtah amah aka lungna thli ham oen amah lawng a kamthlahna angla a khue thlaang thli lawng atheenna ham thaihu boeih he a sai pe tila m’ming u. ²⁹ Pathen lawng a tuek tangte thlaang thli te amah Capa angla a coenggna ham a thloekcala a thloeng, te tila a sai he tah amah aka oeng thlaang yahawh tim ah a Capa te ahaamkoek camiing awmthang la awm sak ham ni. ³⁰ Tedawngah Pathen lawng athloekla a thloeng thlaang thli te a khue; te tila a khue thlaang thli te amah oen a roep u sak tih a ruep-awmna te khaw a paang sak.

³¹ Tetih atah he kawngah he n’tu nuem mami lawng n’thui thai ai? Pathen lawng mami he m’pai puei atah a-u lawng mami he n’raalna ai? ³² Pathen lawng a Capa khueh duen pateng haih ohla mami ham m’peek! Mami hamla a Capa pekung lawng soeprep boeih he ayoela mami peek muehla awm ai aw? ³³ Pathen lawng a tuek thlaang te a-u lawng thawlh a peel thai ai? Pathen amah lawngah na thawlh nawh a tina poen. ³⁴ Tedawngah ahimi te a-u lawng thawlh a peel thai ai? Khrih Jesuh lawngkhaw thawlh peel manawh; Ahih tah duek, tede tho koep, Pathen bantang ben ah ngawl tih mami hamla reenna avan bih. ³⁵ Tedawngah a-u lawng mami he Khrih kah lungna dawng kalawng m’pekbo thai ai? Raina, heemtekna, khawkhana, khawdengna, mueirihtamyiin duekna lawngah m’pek thai ai aw? ³⁶ Caciim lawngah, “Nangmi kawngah kaimi tah mueirihtamyiin duekna oen ah saringrupla khawyungkhun ka awm u; Ngawn ham a teeng mangkhak tuu angla kaimi he ka awm u” tila a thui angla awm tangtang. ³⁷ N’tu lawngkhaw, pek thai manawh, he ang raina thaihu thli boeih he mami aka lungnakung rang oen mami lawng n’taa boeih ai. ³⁸ Metihtiah n’tu thaihu lawngkhaw amah kah lungna dawng kalawng m’pekbo thai manawh tite aciimphanla ka ming: duekna oen hingna lawngkhaw, vanthlaang thli oen vaan kah ukkung thli tha-awm tharana lawngkhaw, tahe kah atue atang oen hailam ben atue-atang lawngkhaw, ³⁹ dilai sawah aka awm thaihu, dilai dangah aka awm thaihu lawngkhaw mami kah Bawipa Jesuh Khrih rang oen Pathen kah lungna dawng kalawng, a thaihu suen boeih khuikah me ang lawngkhaw m’pek thai roe manawh.

¹ Awltak tang ka thui; Khrih kah thlaang la ka awm tih hoem awl ka thui nawh. Ciim Muithla lawng a uk athe atheen ka mingna lawngkhaw hoem awl ka thui nawh te a ming. ² Ka thlaangphun ka thi ka sa la aka awm thli hamla ka kaw the tangkiik tih ka thinphatna lawng boet nawh. ³ Ahimi hamla atheen koei atah kai lawng Pathen kawsi yawkk tih Khrih oen pek u ham pateng ka ngaih ngaai. ⁴ Ahimi tah Pathen thlaangtuek ni: a ca la a khueh tih ahimi tengah a ruep-awmna te a tueng sak. Ahimi tengah awlkamna te a sai tih Phungawl thli te a peek u, ahimi lawng aka soeng bokna te a khueh u, Pathen kah awlkamna te a huh u, ⁵ Ahimi tah Hebru thlaangphun cuunkung patuer miingthang thli kah cadil la awm u, thlaanghing ben atah Khrih pateng ahimi kah a phun ni. Soeprep boeih ukkung Pathen tah yoeyahla a thaang theen hawn seh! Amen.

⁶ Israel thlaang thli he apumboeihla Pathen thlaangtuek la a awm aih nawh dawngah Pathen awlkam tah apoei-oep poen ni tila ka thui ngaihna nawh ni. Metihtiah Israel thlaang boeih he khaw Pathen kah thlaang boeih aih nawh ni. ⁷ Abraham cadil hue khaw apumboeihla Pathen cadil la awm boeih aih nawh. Pathen lawng Abraham te, “Kai lawng awl ka kam cadil nauha te Isak rang oen ah na khueh ai,” a tina. ⁸ A thuingaihna tah thlaanghing phung mailai oen cuun la aka awm ca-anau boeih he Pathen kah ca-anau la awm luem nawh. Pathen awlkam heet angla a cuun ca-anau te ni cadil nauha taktak la a khueh. ⁹ Pathen lawng awl a kam tah, “Atue atang a tluep vengah kava meel koep vetih Sarah lawng capa a cuun ai,” a tina te ni.

¹⁰ Tecoengah, he bueng nawh hun, Rebekka capa rawi lawngkhaw mami kah patuer Isak te ni anna pa na hih van. ¹¹ - ¹² Tede capa pakhat a tuek te tah amah kah mengtengna te asoepna ham ni; tedawngah Pathen lawng Rebekka te, “Ahaamca lawng anoca kah bii a bi pe ai,” a tina. He awl he tah ahih rawi boeinau te a cuun thlan vengah a thui ni, ahih rawi lawng athe atheen n’tu khat khaw a sai hih thlan ah ni a thui; tedawngah Pathen kah tuekna he tah amah kah khuena dawngah akung asut tih ahih rawi boeinau kah saina dawngah nawh ni. ¹³ Caciim lawng, “Jakob tah ka lungna tih Esau tah ka thina,” a ti angla ni.

¹⁴ Tetih atah Pathen he tuueng-aleng roe nawh n’ti thai ai aw? N’ti manawh. ¹⁵ Metihtiah Mosi tengah, “Kamah lawng ka ngaih te ka reen vetih; kamah lawng ka ngaih te tah ka thintlawhna ai,” tila a thui. ¹⁶ Tedawngah soeprep he mami thlaanghing kawngaih oen saina dawng nawh tih Pathen kah reenna rang oen ni. ¹⁷ Pathen lawng Iyipt sengpahrang nala, “Kai kah tharana huham oen ah dilai pum ah ka miing aka thang sak ham roe la nang tah sengpahrang la kan khueh,” tila caciim lawng a thui. ¹⁸ Tedawngah Pathen lawng amah ngaih te tah a reen tih amah lawng a ngaih te tah a thin a haam sak mai poen.

¹⁹ Tede nangmi tim kah thlaang pakhat mai lawngah, “He tila a awm oh atah a-u lawngah Pathen kawngaih te a oelh ataih thai ai,” na ti u mai ai. ²⁰ Ka paya, nang ta a-u la na awm aih tih Pathen te awl na thung ngam? Dilai am lawng ambawpkung te, “N’tu ah he tila nan sai,” tila doet nawh. ²¹ Ambawpkung lawngah amlai te a lawh tih amah ngaih angla a sai thai tih amlaiboeng pakhat te am pahih la a sai tih pakhat te tah awmthoet ah hawna am mailai oen ah pakhat te tah tuisii-am la a sai.

²² Tetih van la te Pathen thaihu sai khaw awm. A thinsana oen a tharana te tueng sak ham a ngaih, tede ahih kah thinsana a yawkk dawngah rawk tih phe ham koeila aka awm thli sawah thinsan kawdawna a khueh. ²³ Tecoengah amah kah aka soep ruep-awmna te tueng sak a ngaih tih amah kah reenna aka dang mami sawah a ruep-awmna te avan toi, mami he a ruep-awmna dang hamla a roek a bah tangte poen ni. ²⁴ Mami tah a thlaangkhue la ng’awm u, Judah thlaangphun timkah bueng nawh tih Gental thlaangphun timkah khaw a khue. ²⁵ He tah Hosi cabu khuiah a thui te ni: “Ka thlaang la ka awm nawh thli te ‘Ka thlaang,’ ka tina ai. Ka lungna nawh thlaangphun te, ‘Ka lungna thlaangphun,’ ka tina ai. ²⁶ ‘Nangmi tah ka thlaang la na awm u nawh’ a tina huen roe ah nangmi tah aka hing Pathen kah ca-anau thli ni a tina ai,” tila a thui. ²⁷ Israel thlaangphun kawngah Isaiah lawng, “Israel thlaangphun he tuitunlii keengkah divinlai yoeh maila pateng yahawh cakhaw ahimi timkah thlaang a yawlca bueng lawng ni thlawnna a dang ai; ²⁸ Metihtiah, dilai he amah kah athe atheenna angla Bawipa lawng awl a cek yue ai,” tila a thui. ²⁹ He veng thlan ah Isaiah lawng, “Tharakoek Bawipa lawng mami kah cadil nauha khatsut te thlung nawh kawinih mami he Sodom angla n’coengg vetih, Gomorrah angla ni ng’ awm poen ai” tila a thui oepsoeh poen.

³⁰ Tedawngah kaimi lawng ka thui tah Pathen oen roeproei ham aka yawm nawh Gental thlaangphun lawngah oengna rang oen ah Pathen oen roeproei u poen; ³¹ Tede Pathen oen roeproeina hamla phungawl aka tlap khiing Pathen kah thlaangphun lawngah roepna te dang u nawh. ³² N’tu ah a dang u nawh? Ahimi lawng oengna dawngah pangtung nawh tih amami kah saina te a uep apaangna dawngah ni. Te tila “Ploengna lungto dawngah ploeng u tih, ³³ Caciim lawngah, “Bueh lah! Zaion ah lungto pakhat ka khueh, te lungto lawng thlaang thli te a ploeng sak vetih, te lunghiim lawngah ahimi te a tlim sak ai. Tede a-u khaw ahih te a tangna atah yaraula awm tlaih manawh,” tila a thui.

¹ Maya manau thli, ka thlaangphun lawng thlawnna dang u seh tila thinkaw tak oen ka ngaih tangkiik! Ahimi ham metihtlukla Pathen tengah ka thangthui. ² Ahimi lawng a thinkaw te Pathen a peek tangtang tila nangmi tengah ka thui rapcaat thai; tede ahimi kah thinkaw a peek he cuihna taktak dawngah kung asut moenih. ³ Pathen lawng thlaang he me ang along a-im oen amah oen ah a roep u sak ti he ahimi lawng ming u nawh, amami kah lawngpui te sai ham a yawm u dai, tedawngah Pathen lawng amah oen thlaanghing roepna a sai lawngpui te paang u nawh. ⁴ Jesuh Khrih lawng Phungawl te aboet sak poen dawngah a-u khaw aka tangna thlaang boeih tah Pathen oen roeproeina a dang poen.

⁵ Mosi lawngtah Phungawl vaina rang oen Pathen oen ah roepna kawng te a thut: “A-u khaw Phungawl lawng sai a tite aka sai boeih tah hing ai,” ti. ⁶ Tede Caciim lawng, oengna rang oen Pathen oen ah roeproeina kawng a thui tah tila ni: “Nang lawngah, a-u nuem vaan la aka luui hang ai?’ tila namah oen namah te doet u boel,” (te tah Khrih te aka rum puei ham tila thuingaihna ni.) ⁷ “A-u nuem celkhui khaw la aka cet thuk ai? tila khaw ti boel?. (te tah Khrih te duekna kalawng thawh sak ham tila thuingaihna ni.) ⁸ A thui awl lawngtah, “Pathen awl tah na tengah awm, na huui na kaa dawngah na thinkaw khuiah awm” a tite tah kaimi lawng ka phawng u oengna awlthang he ni. ⁹ Jesuh tah Bawipa ni tila na phawng u tih Pathen lawngah ahih te duekna kalawng a thawh sak koep tila thinkaw oen na tangna u atah thlawn la na awm ai. ¹⁰ Metihtiah mami lawng oengna rang oen Pathen oen ah roeproeina n’huh; kaa oen m’phawng tih thlawnna n’dang u. ¹¹ Caciim lawng, “A-u khaw amah aka tangna boeih tah yarau yahdengla awm manawh” ti. ¹² Metihtiah Judah oen Gental thlaangphun pekthlena a awm tlaih nawh dawngah thlaang boeih thuum poen; Pathen tah thlaang boeih kah Bawipa la awm tih amah te aka khue boeih tah yotheen kawthawina yahawh hlang a lun thil. ¹³ Caciim lawng, “A-u lawngkhaw bawmna a ngaih dawngah Bawipa te a khue atah thlawnna a dang ai,” tila a thui angla te awm tangtang.

¹⁴ Tede ahimi lawng a tangna nawh atah bawmna dang ham metila a miing te a khue thai ai? Ahimi lawng awlthang te a yaak nawh atah metila a tangna thai ai? Awlthang te a thui nawh atah metila ahimi lawng a yaak thai ai? ¹⁵ A thuikung laipai te tuih la a awm nawh atah metila awlthang te a phawng ai? Caciim lawng, “Awlthang Theen van khuenkung laipai thli kah a khow tah theen tangkiik hlang mah aw!” tila a thui angla awm tangtang. ¹⁶ Tede thlaang boeih lawng Awlthang Theen te do u nawh. Isaiah amah lawngkhaw, “Bawipa, kaimi lawng ka phawng u awlthang he a-u lawng a tangna?” tila a thui. ¹⁷ Tedawngah oengna tah awlthang yaakna dawng kalawng va law tih awlthang tah Khrih te thuina dawng kalawng va law.

¹⁸ Tede awldoet ka ngaih tah: ahimi lawng awlthang he ya u nawh tangtang aw? A yaak u ta; Metihtiah Caciim lawng, “Ahimi kah paang awl lawng dilai pum ah thaang khok tih ahimi awl tah dilai boetna toe kheng a pha,” tila a thui. ¹⁹ Koep kan doet lah ai: Israel thlaang-thli lawng yaakming u nawh aw? Lamhacuekla awl aka thung ham tah Mosi amah ni. Ahih lawng, “Ka thlaangphun te uett-ee hamla, thlaangphun la toeksam nawh te ka hawna vetih, thlaang ngau paathuu phun rang oen ka thlaangphun te a thin ka sa sak ai,” tila a thui. ²⁰ Tong-aa ohla Isaiah lawng thincakla a thui tah, “Kai aka tlap nawh thlaang thli lawng ng’huh u; Kai he aka thoel-alang nawh thlaang thli tengah ka phumpho pe,” tila a thui. ²¹ Tede Israel thlaangphun kawng oen tuhkaila tah, “Awl ngaai nawh tih ceem raal la aka tho thlaang thli te do hamla khawyungkhun kut ka son,” tila a thui.

¹ Tetih atah Pathen lawng a thlaang thli te a hoett poen aw? Hoett roe roe nawh! Kai kamah khaw Israel thlaang, Abraham cadil, Benjamin phun ni. ² Pathen lawng acuekca kalawng a tuek tangte a thlaang thli te hoett sut nawh. Caciim dawngkah awl, Elijah lawngah Israelca thli sawah a kaw a lawna nawh Pathen tengah a thui te nangmi lawng na ming u: ³ Elijah lawng, “Bawipa, nang kah tawngha thli te a ngawn u tih nang kah bokna-thaang khaw a phe boeih u; kai bueng he ka deem de, kai khaw ngawn ham n’teeng u” a tina. ⁴ Pathen lawng n’tu awl a thui pe? “Baal pathen rawlrap aka bok nawh thlaang thong sarih kamah hamla ka paih hun” a tina. ⁵ Tetih toeng la ni tahe khaw a awm: Pathen lawng a lungvatna dawngah a tuek tangte ayawl tah awm van hun. ⁶ Pathen kah tuekna tah ahimi kah saina dawngah nawh tih amah kah lungvatna dawngah ni kung asut. Pathen kah tuekna he thlaanghing kah saina dawngah kung asut atah ahih kah lungvatna te lungvatna tangtang la awm manawh.

⁷ Tetih atah metila a awm? Israel hue lawng a tlap te hu u nawh. Pathen lawng a tuek ayawlca bueng lawng ni a huh; atloe hue tah a haa pang malhtalh tih Pathen kah khuena awl te ya nawh. ⁸ Caciim lawngah, “Pathen lawng ahimi kah thinkaw oen lungbui te a mong sak; tihin toe ah ahimi lawng hu thai nawh tih ya thai u nawh,” tila a thui angla awm tangtang. ⁹ Tecoengah Devid lawng, “Amami kah poei khuiah tu selang dong dawngah man u seh; Ahimi te ploeng u selang dan tat u seh!. ¹⁰ Ahimi lawng a huh thaina nawh ham a mik thli te pum sak selang; patang raina thalrih phueih uett ah a uen te khun roepsoet u seh,” tila a thui.

¹¹ Tetih atah awl kan doet u lah ai: Judah thlaang thli lawng a tlim u vengah rawk poe taktak poen aw? A rawk tang aih moenih. Ahimi lawng a thawlh u dawngah Gental thlaang thli tengah thlawnna te va law. Tedawngah Judah thlaang thli lawng uett-eena ahimi sawah a khueh u. ¹² Judah thlaang thli kah thawlhna lawng dilai ah yotheen kam-awmna yahawh avan khuen tih ahimi kah sung-adeuhna lawng Gental hue hamla yotheen kam-awmna yahawh hlang avan khuen. Tecoengah Judah thlaang yahawh lawng asoepcala a thuum u van veng atah yotheen kam-awmna te metihtlukla asoep tare ai!

¹³ Tahe tah Gental thlaang thli nangmi tengah awl kavan thui. Gental hue nangmi tengah celtuih la ka awm khui roekk tah bii ka bina dawngah ka thangpawm u ai. ¹⁴ Ka thlaangphun thli te uett-eena thinkaw a khueh sak he tah thlaangvaang mai khaw thlawn thaina ham ni. ¹⁵ Metihtiah ahimi te hoett sut la a awm vengah thlaangtloe boeih te Pathen kah raal la awmna kalawng a paya laikoei la a sai. Tedawngah ahimi Judah thlaangphun te a do koep veng atah metila a awm tare ai? Thlaangduek thli ham hingna la coengg ai.

¹⁶ Takawi lamhacuek la thluem at te Pathen teng a nawn atah takawi boeih amah koe la awm poen; tecoengah thingkung ayung te Pathen tengah na nawn poen atah a beek-athleeng boeih te ahih kah akoe la awm poen. ¹⁷ Olif thingkung a liing u a beek thli khatsut te a tloek u tih te kah thingngaw dawngah te olif thingkung rawlrap a beek thli te oen a cong u. Te tila nangmi Gental thlaangphun khaw olif thing rawlrap angla na awm u tih, tahe tah Judah thlaangphun thli kah muithla ben hingna tharana te na bawn u van poen. ¹⁸ Tedawngah olif thingbeek tloek poet angla aka awm thli te huhsit u boel. Metila nangmi lawng na oekthloen thai lauh? Nangmi tah a beek mai ni; nangmi lawng akungpui te na cawm na cah moenih, nangmi te ni akungpui lawng n’cawm u.

¹⁹ Tede nangmi lawng, “Kaimi awmna hamla ni a beek thli te a tloek” na ti u mai ai. ²⁰ Te ngoen tah soeng tangtang. Ahimi lawng a oeng u nawh dawngah a tloek tangtang, nangmi tah na oeng u dawngah na awmna huen ah te na awm u. Tede he kawngah oekthloen u boel lang rih lat u hawn. ²¹ Thingkung kah a beek tangtang la aka awm Judah hue pateng Pathen lawng a thlung nawh atah nangmi te n’thlung ai tila na poek aw? ²² He ah he Pathen kah thlaang reenna kaw a poekna oen rih koei la a awm te n’huh u. Aka tlim thli ham tah rih awm tangkiik tede nangmi te tah n’reen u, nangmi lawng a reenna khuiah na awm u poe atah reenna kaw avan poek ai, tede na awm u nawh atah nangmi khaw tloek poet la na awm u van ai. ²³ Judah thlaangphun lawng a oengna nawh paihuen te a ceh taak u atah acuek kah a awmna paihuen ah te a khueh koep ai, Pathen lawngtah khueh koep thaina nawl a khueh. ²⁴ Nangmi Gental thlaang thli tah, ramhum ah amah poek aka po olif thingkung dawngkah a beek thli a tloek poet tih olif thingkung tang dawngah a cong tlap oen na lo u. Judah thlaang thli tah olif thingkung tang oen lo u tih olif thingkung tang dawng-kah a tloek poet a beek thli te akungpui tang dawngah cong koep hamla Pathen ham tah yoeica mai.

²⁵ Ka maya manau thli, nangmi lawng ka cuih ka hoe heet poen tila na poek u nawh ham nangmi te ming sak ka ngaih awlhuep pakhat awm. Te awlhuep tah he ni. Israel thlaang thli a thin a haam khaklal he aboet toe ham nawh ni, Gental thlaang thli Pathen tengah asoepcala apha thlan khui ham bueng ni. ²⁶ Tecoengah Israel thlaang boeih thlawn la a awm na ham tah he tila ni. Caciim lawng, “Zaion kalawng Thlawnkung tah law vetih Jakob cadil thli kah athe arana boeih te a voeih ai. ²⁷ Ahimi kah thawlhna te ka lawh pe boeih vengah he awlkamna he ahimi oen ka sai ai,” tila a thui. ²⁸ Awlthang Theen a hoett u dawngah Judah hue tah Pathen kah raal la awm u. Te tah nangmi Gental thlaang thli theenna ham ni. Tede Pathen kah tuekna ben atah ahimi tah amami kah patuer thli rang oen Pathen kah paya laikoei la awm u. ²⁹ Pathen lawngtah a tuek thlaang thli oen yotheen kam-awm a peek thlaang thli kawngah a kawpoek thloet nawh. ³⁰ Nangmi Gental thli lawng anoekbuet atah Pathen awl te na ngaai u nawh, tede tahe ah Judah thlaang thli lawng a awl a ngaai pe u nawh dawngah nangmi lawng Pathen reenna te na dang u. ³¹ Tetih van angla nangmi lawng na dang u reenna te ahimi lawngkhaw Pathen reenna te tahe ah a dangna u van ham Judah thli lawng tahe toe ah Pathen awl te ngaai pe u nawh. ³² Pathen lawng thlaang boeih he awl ngaai nawh thongtla thlaang la a sai he tah ahimi boeih tengah a reenna te tueng sak ham a ngaih dawngah ni.

³³ Pathen tah len kueng tangkiik mah aw! A cuihna oen a mingna tah dung tangkiik mah aw! A awltloekna he a-u lawng a thuicaih thai ai? A thaihu sai along a-im he a-u lawng a yaakming thai lek ai? ³⁴ Caciim lawng, “Bawipa kah thinkaw te a-u lawng a ming? a-u lawngah poekna a peek thai? ³⁵ Ahih lawng sah koep hamla a-u lawngah thaihu a peek?” tila a thui angla te awm. ³⁶ Thaihu boeih he amah lawng a sai, thaihu boeih amah rang oen awm tih amah ham ni. Pathen tengah ayoeyahla ruep-awmna awm hawn seh! Amen.

¹ Tedawngah maya manau thli, Pathen lawng mami he n’reen tangkiik dawngah amah bii bina ah amah kah kawtlaak la aka hing luciik angla na pum te Pathen tengah nawn uh tila nangmi te kan ceel u. He tah aka soeng bokna tih nangmi lawng na peek ham koei bokna te ni. ² He dilai khawsak siing angla khaw sa u tlaih boel, tede Pathen lawng nangmi thinkaw a khui ben te asoepbirla van thaw pan hawn seh. Te atah aka theen thaihu, aka soep thaihu oen amah kawtlaak te nangmi lawng na ming u thai ai, he tah Pathen amah kawngaih ni.

³ Pathen kah lungvatna kutdo ka dangna rang oen he awl he nangmi boeih tengah ka thui: Namah oen namah te atuueng aleng lak ah asang la poek u aih boel. Te lak atah Pathen lawng oengna m’peek taring ah namah oen namah te nainawng u lah. ⁴ Mami lawng pum pakhat dawngah abeek yahawh n’khueh u tih, he a beek thli lawng bii atloe tloe rip a khueh u. ⁵ Tetih van la mami khaw thlaang yahawh mai de Khrih ah pumkhatla awmna rang oen pumkhatla n’coengg tih pum dawngkah abeek tloe tloe he pakhat oen pakhat a tuhkai u van angla mami khaw khat oen khat m’pha u boeih. ⁶ Tedawngah kutdo aphun tloetloe n’dang rip u tah Pathen kah peek lungvatna kutdo n’dang taring ah hawna u sih. Pathen kah awl te thui thaina kutdo te n’dang u atah oengna n’khueh taring ah hawna ham awm; ⁷ thlaangtloe ham bii bi koei atah bi ham awm; cang puei koei atah cang puei ham awm; ⁸ Thlaang te thapeek koei atah tha peek ham awm; khuehtoen thaihu te thlaangtloe rekra koei atah moeihoeihna oen rekra ham awm. Saithaina aana te n’dang atah bii yawm ham awm; thlaangtloe tengah thintlawhna tueng sak ham koei atah reenna oen tueng sak ham awm.

⁹ Nangmi kah lungna te thinkaw tak oen na lung u ham awm. Athe te thina uh, atheen te phoeih mangkhak uh. ¹⁰ Pakhat oen khat Khrihca maya manau angla lung u the lang thinkaw tak oen ah pakhat oen khat hinyahna te tueng sak uh. ¹¹ Na tha rang sak uh, tha-ngak la awm u boel. Bawipa bii te na thinkaw tak oen bi uh; ¹² Na ngaiuepna na khuehna dawng teah na tha thlue sak uh; raina na tawng u vengah thinsan kawdaw oen awm u lang thangthui yoeyah uh. ¹³ Khrihca na puei na paw thli kah a voetna ah te dodan u lang na im ah kamyin te pah sak uh.

¹⁴ Nangmi heemtekkung thli ham Pathen tengah kam-awm yotheenna bih pe uh; Oe, yotheen kam-awmna bih pe uh; tapvoep u boel. ¹⁵ Awmngaih thlaang thli tengah awmngaih u van. Rungrah oen aka awm thlaang thli tengah rap u van. ¹⁶ Pakhat oen pakhat roeproei patoeng uh. Oekthloen u boel; tede huhsit koei bii te khaw bi uh. Namah oen namah te thlaangcuih la poek u boel.

¹⁷ Nangmi sawah thlaang lawng athe a sai atah ahih te athe oen thung u boel. Thlaang boeih lawng theen tila a poek te sai hamla yawm. ¹⁸ Thlaang boeih oen roeproeicala awm ham soeprep boeih te acoengg thai khui sai u lah. ¹⁹ Ka puei thli mevengah khaw luu lo u boel, te lak atah Pathen thinsana lawng sai ngoen seh. Caciim lawngah, “Kai lawng luu ka lo ai, kai lawngah kut ka thung ai, Bawipa lawng ti,” tila a thui. ²⁰ Te tih atah, “Na raal te a bung a pawng atah buh van cah, tui a halh atah tui van awkk sak; he tila na saina oen ah nang lawng ahih te yah na bai poen ni” tila caciim lawng a thui angla te sai uh. ²¹ Nangmi te athe lawng n’taa boel seh; Atheen saina oen athe te taa hamla yawm uh.

¹ Thlaang boeih lawngah ram ukbawi thli te hinyah uh, metihtiah Pathen kah hatlaakna a awm nawh atah ukkung bawi khaw awm nawh tih tahe vengkah ukkung thli khaw Pathen lawng a khueh ukkung hue ni. ² A-u khaw tahe vengkah ukkung thli aka oel khak tah Pathen kah awlthlaw te aka oelkung ni, a-u khaw te tila aka sai te tah amah sawah awlcekna a thoeng sak ai. ³ Theenna aka sai hue lawngtah ukkung bawi thli he rih hamla awm nawh, tede athe aka sai thli lawng ni rih ham a awm. Nang lawng aana khuehkung thli te rih ohla awm ham na ngaih atah theenna te sai lah, nang te ahih lawng n’koeh ai. ⁴ Metihtiah ahih tah Pathen kah tuihyoeih-thlaang tih nang ham theenna aka sai hamla ni. Tede nang lawng athe te na sai atah ahih te rih hawn, Metihtiah dantat thaina aana te a khueh tangtang. Ahih tah Pathen kah tuihyoeih-thlaang la awm tih athe-arana aka sai boeih sawah Pathen yuengah dantatna aka thoengsakkung ni. ⁵ He kah akawng alam dawngah nang lawng ukkung thli kah awl te ngaai peh, Pathen kah dantatna na rih u dawngah a awl ngaai pe mai ohla athe atheen pekbona kawpoek theen oen a awl ngaai pe uh.

⁶ Mangmu na peek u khaw he kawngah ni, metihtiah ukkung thli lawng bii a bi u te Pathen ham ni a bi. ⁷ Tedawngah ahimi na peek ham koei te tah pe uh; namah kah pumpakla peek ham koei mangmu oen kaawn-ava phu mangmu te khaw pe u langtah ahimi boeih te mik-hai yahna lang hinyah uh.

⁸ A-u tengah khaw laiba khueh u boel, nang lawng laiba na khueh tah khat oen khat lung u ham he ni. A-u khaw a thlaangpuei te a lungna atah Phungawl te a vai poen. ⁹ Phungawl lawngah, “Samphaih boel, thlaang ngawn boel, huuen boel, thlaang kah thaihu naai boel,” a ti boeih oen ah he thloei kah atloe awlpeek boeih tah, namah oen namah te na lungna u van angla na imbe te lungnah,” a tina dawngah te cui boeih poen. ¹⁰ Thlaang pakhat te na lungna atah meveng khaw a sawah athe te na sai roe manawh; tedawngah Phungawl boeih asoepla vaina he tah lungna ni.

¹¹ Nangmi lawng he tah na sai u ham awm, metihtiah nangmi ham na ihduhna kalawng hinghang hamla atue avan pha poen tila na ming u. Metihtiah mami he thlawn la awmna ham atue atang tah mami lawng oengna n’khueh cuek vengkah lak ah tahe ah yoeii tare poen. ¹² Yiinna tah boet tawm poen, khaw daai hang poen ai. Yiinna thaihu sai te toeng u poen silang tah aangna khuiah raal kahna awva te lo u sih. ¹³ Hingthun khawse ah aka awm thlaang thli angla mami lawng akoeih avaihla hing u sih, khawpaw rang au la awm u boel, yuuruui buh hah oen awm tlaih u boel, hutaa tawngpa thawlhna, boethe halangna awm boel seh, tawhsina oen uett-eena awm boel seh. ¹⁴ Bawipa Jesuh Khrih kah awva te lo uh, na pumsa kah thawlh sai ngaihna oen thawlhna kah kawkhuekna te toeng u loeih.

¹ Oengna ben ah tha aka yoek thlaang thli te van do u lah, tede ahimi kah pumpakla a poek akawng alam dawngah ahimi oen oelhtaih u boel. ² Thlaang pakhat lawngtah a oengna oen me ang khaw a caak boeih, tede oengna tha aka ra nawh lawngtah tawi-an bueng te a caak. ³ Soeprep aka ca thlaang lawngah te tila aka ca nawh te huhsit hamla awm nawh; soeprep aka ca thlaang te khaw tawi-an bueng aka ca thlaang lawngkhaw huhsit van boel seh. Metihtiah Pathen lawng ahih te a do poen. ⁴ Nang ta a-u la na awm aih tih thlaangtloe kah tuihyoeihthlaang te awl na cek thai? Te tuihyoeihthlaang lawng a bi thai, bi thai nawh tila awl-khuengkung tah amah kah Bawipa te ni. Ahih lawng a bi thai ai, metihtiah Bawipa lawng a bi sak thai ai.

⁵ Thlaang khatsut lawng atloe khawhin boeih lak ah khawhin hin at te awlpui bet la a poek, atloe pakhat lawngtah khawhin boeih he vai u tila a poek. Pakhat rip lawng a thinkaw ah a soengna te khueh seh. ⁶ A-u khaw, khawhin hin at te alue koek la a poek atah Bawipa te a hinyahna ni. A-u lawngkhaw soeprep boeih a caak atah Bawipa te a hinyahna ni. Metihtiah ahih lawng caak awkk dawngah te Bawipa tengah awmngaih ciil a thui. Caak awkk te aka yeh khatsut lawngkhaw Bawipa te hinyahna la a yeh van tih Bawipa tengah awmngaih ciil a thui. ⁷ Mami tim ah he a-u khaw mah ham bueng n’hing nawh tih mah ham bueng la n’duek nawh baal. ⁸ Mami lawng hing atah Bawipa ham n’hing u tih, duek ah khaw Bawipa ham ni duek u. Tedawngah mami tah n’duek ah khaw seh, hing ah khaw seh Bawipa kah thlaang ni. ⁹ Metihtiah thlaang duek oen thlaanghing boeih kah Bawipa la awm ham Khrih tah duek tih tho koep poen. ¹⁰ Tedawngah nangmi tawi-an bueng aka ca thli lawng n’tu hamla na maya manau te na coel khuep u? Tetih atah nangmi acungkuem aka ca lawng n’tu ah na maya manau te na hep na hap u? Mami boeih he Pathen haiah m’pai vetih amah lawng awl n’cek ai. ¹¹ Metihtiah Caciim dawngah, “Kai tah aka hing Pathen la ka awm tangtang van angla Thlaang boeih lawng ka haiah khuklu oen cuengkueng ai, Kai he Pathen ni tila a phawng u ai, tila Bawipa lawng ti,” tila a thui. ¹² Tedawngah mami boeih lawngah mah kah saina boeih te Pathen haiah m’phawng ai.

¹³ Tedawngah pakhat oen pakhat coelna he toeng u poen sih. Te lak atah, na maya manau a tlimna ham oen thawlhna khuiah a tlaakna koei te metuek khaw sai nawh ham tha huer uh. ¹⁴ Bawipa Jesuh oen pumkhatla awmna lawngah aciimphanla m’ming sak tah amah poek ah aciimcaih nawh caak awkk he a awm moenih ti he ni; tede thlaang pakhat lawngah khatsut caak awkk te caih nawh tila a poek atah te caak awkk tah ahih ham ciim-acaih nawh. ¹⁵ Nang lawng caak awkk pakhat khat oen na maya manau te a kaw na hoe sak nawh atah, te tah lungna dawngkah aka thoeng saina tlaih nawh ni. Ahih hamla Khrih tah a duek dawngah nang kah caak awkk oen ahih te tlim sak boel. ¹⁶ Nangmi lawng theen na ti u te miing the dangna hamla coeng sak boel. ¹⁷ Metihtiah Pathen kah Ram tah caak awkk dawng awm nawh tih Ciim Muithla kah peek doengna, ngaimawngna oen awmngaihna dawngah ni a awm. ¹⁸ He tila Khrih kah bii te aka bi lawngtah Pathen te a awmngaih sak tih thlaang lawngkhaw a koeh.

¹⁹ Tedawngah ngaimawngna taktak aka thoeng sak thaihu thli oen khat oen khat thara sak koei bawmcemna te mami lawng mengteng yoeyah ham awm. ²⁰ Caak awkk dawng maiah Pathen kah sai tangte te phe u boel. Caak awkk boeih he caak koei ni, tede thlaang pakhat khat thawlhna ah aka tlim sak koei caak awkk he tah thawlhna ni. ²¹ Asoeng thaihu sai ham tah, na maya manau aka tlim sak thaihu saina, meh caakna, misuryuu awkkna te na kuemsuem u ham awm. ²² He kawng tah namah lawng na tangna angla te awm selang tah Pathen oen namah laklaw kah tuhkaina la khueh hawn. A-u khaw soeng a ti angla pakhat khat te a sai tih thinkaw a ciim atah yotheen aka dawng ni! ²³ Tede caak awkk te a caak vengah ngaithliwhna a khueh atah Pathen lawng ahih te dan a tat ai. Metihtiah ahih lawng a sai te oengna dawngah akung a sut nawh dawngah ni. Thaihu boeih he oengna dawngah akung a sut nawh atah thawlhna ni.

¹ Mami oengna tha aka ra hue lawngah amami kah thalrih phueih ham tha aka yoek thli te talawng takai ham awm. Mami lawng mah bueng kah ngaikhuekna te sai ham awm nawh. ² Te lak ah, mami kah maya manau lawngah theenna koei, oengna ah a roengna koei te mami boeih lawng sai ham awm. ³ Metihtiah Khrih lawngkhaw amah kah ngaikhuekna te sai nawh. Te lak ah, Caciim lawng, “Nang salphaamna awl te ka sawah tla poen,” a ti angla te awm. ⁴ Caciim dawngah a thut soeprep boeih tah mami he cangpueina ham oen toelthaamna ham ni. Te tila a thut te tah, Caciim lawng mami m’peek uehthaina oen thincakna rang oen ah mami lawng ngaiuepna te khueh ham ni. ⁵ Khrih Jesuh kah lawngpui huh sakna te na vaina rang oen thinkaw khat la khueh thai ham ueh-thaina oen thincakna kungmah Pathen lawngah nangmi te n’bawmcem hawn seh. ⁶ Te atah nangmi boeih lawng thik at la awlkaa pakhat la te mami Bawipa Jesuh Khrih kah ana Pa oen Pathen te na thangpawm thai ai.

⁷ Khrih lawngah nangmi n’do van angla Pathen kah ruep-awmna a tuengna ham nangmi khat oen khat do u van lah. ⁸ Tedawngah nangmi tengah kavan thui tah Judah thlaang thli yuengla Khrih tah tuihyoeihthlaang la coengg, Te tah Pathen lawng ahimi kah patuer thli tengah awl a kam te asoepna ham oen ah Pathen tah uep-awm ni tite tueng sak ham tih, ⁹ Gental thlaangphun lawng-khaw Pathen amah kah reenna te a thangpawmna thai ham ni. Caciim lawngah, “Tedawngah Gental thlaangphun tim ah nang te kan thangpawm ai, Nang koehna laa ka sa ai” tila a thui. ¹⁰ A thui koep baal tih, “Gental thlaangphun Pathen kah thlaang thli oen awmngaih u lah.” ¹¹ Koekthoek ah, “Gental thlaang boeih lawng Bawipa te thangpawm uh; thlaang boeih lawng Bawipa te thangpawm uh,” tila a thui. ¹² Tecoengah Isaiah lawng, “Jesi kah cadil pakhat law ai; ahih tah Gental thlaangphun uk hamla law vetih ahimi lawng ahih dawngah ngaiuepna a khueh u ai,” tila a thui.

¹³ Ciim Muithla tharana oen nangmi kah ngaiuepna te roep poepa ham ngaiuepna kungpui, Pathen lawngah amah te na oengna rang oen awm-ngaihna oen ngaimawngna boeih oen ah nangmi te abetoetla n’toi hawn seh.

¹⁴ Maya manau thli: Nangmi tah theenna oen na be u, Cuihhoena na khueh u tih pakhat oen pakhat na cang puei patoeng u thai tite kamah roe lawng atheenla ka ming. ¹⁵ Tecakhaw, he capat dawngah kan ming sak koep ham ka ngaih akawng alam khatsut te raltheenla oen ka thut. Ka raltheenna tah Pathen lawng Gental thlaangphun ham bii aka bi la, ¹⁶ Khrih Jesuh kah tuihyoeihthlaang la awmna te m’peek dawngah ni. Gental thlaangphun lawngah Pathen kah do koei luciik la a awmna ham oen ah Ciim Muithla rang oen Pathen tengah nawn koei thaihu la awmna ham Pathen tengkah, Awlthang Theen ka phawng vengah he khawsoeih angla bii ka bi. ¹⁷ Tedawngah Khrih Jesuh oen pumkhat-la awmna rang oen Pathen bii ka bi he ka pawmsang u. ¹⁸ Gental thlaangphun te mawt ham oen Pathen awl te a ngaaina u ham awlkaa oen khawseh, saina oen khawseh, ¹⁹ kawpoek rai saina oen khawseh, kawpoek rai tharana oen khawseh, Pathen Muithla tharana oen khawseh, Khrih kah a sai bueng te ni raltheenla ka thui ai. ²⁰ Ka kamthlahna poepa tah Khrih kawng a yaakna nawh ahuen amawl ah Awlthang Theen phawng ham he ni, thlaangtloe lawngah imtuung a sut tangte sawah im sak ham nawh ni. ²¹ Caciim lawngah, “Ahih kah akawng te aka thui noek nawh hue lawng a huh u vetih aka ya noek nawh thli lawng a yaakming u ai,” tila a thui angla te awm.

²² He dawngah ni nangmi tengah law heem te kanghalh la ka awm poepa. ²³ Tede, tahe atah he peng yunyan ah bii ka coeng poen tih nangmi tengah law hamla kum yahawh hlang ka cai puet angla, ²⁴ tahe tah nangmi tengah ka law thai poen ai tila ka ngaiuep. Sping ram la yin ka ceh vengah nangmi oen huh u ham ka ngaih tih nangmi tengah kawlkalh ka cam coengah tela te ceh ham tah nan bawm u ham ka ngaih. ²⁵ Tede tahe tah kawlkalh ah Jerusalem khawpui la ka cet de silang te kah Pathen thlaang thli ham bii ka bi pe de ai. ²⁶ Macidonia ram oen Akhaia ram kah Khrihcabu lawng Jerusalem ah aka awm Pathen thlaang thli timkah khawdeng lungma thli te kawthawh oen bawm hamla awl a tloek u tih thaihu peek a khueh u. ²⁷ Te tila awltloekna a khueh u te tah amami kah kawthawh oen ni; tede ataktang atah ahimi lawng-khaw, khawdeng thli bawm ham te a sai koei bii van ni. Judah thlaangphun lawng Muithla ben kah yotheenna te Gental hue tengah arek ara van angla Gental hue lawngkhaw amami kah thaihu thaiha yotheenna a dang te oen Judah thlaangphun te a bawm van ham awm. ²⁸ He bii he ka coeng tih ahimi ham a cawi pe tangka boeih te ahimi kut ah ka tloeng pe boeih coengah Sping ram la ka cet vetih nangmi tengah ka law pahoei ai. ²⁹ Nangmi tengla ka law vengah Khrih kah yotheenna asoepbir oen ka law ai tila ka ming.

³⁰ Maya manau thli, mami Bawipa Jesuh Khrih oen Muithla kah peek lungna oen ah kai hamla kamah oen haih Pathen tengah thinkaw thluembuekcala thangthui ham kan ceel u. ³¹ Judia ram kah aka oeng nawh hue teng kalawng ading asuekla ka awmna ham oen Jerusalem ah bii ka bi te, te kah aka awm Pathen thlaang thli lawng awmngaih oen a do thaina ham thangthui u lah. ³² Tedawngah Pathen kawngaih atah awmngaih oen nangmi teng ka law vetih nangmi tengah kamyin la ka law he kawhoena oen thadueng thaai dangna la awm ai. ³³ Mami ngaimawngna kungpui Pathen tah nangmi boeih tengah awm hawn seh. Amen.

¹ Kenkhria khaaw kah Khrihcabu ah bii aka bi mami kah ngannu Fibi te nangmi tengah ming sak ham ka ngaih. ² Pathen thlaang thli tah pakhat oen khat na do tueng van angla Bawipa miing oen ah ahih te do u lang angoe boeih te nangmi lawng van bawm uh; ahih tah thlaang yahawh ham paya theen la awm tih kai hamla khaw awm van.

³ Khrih Jesuh kah bii bina dawngah bii bi haih Priscilla oen Akuila te kavan toei. ⁴ Ahih rawi lawng kai hamla duek ngam hih. Ahih rawi te ka uem tangkiik, kai bueng nawh tih Gental Khrihcabu boeih lawngkhaw a uem u. ⁵ Ahih rawi im ah aka pum Khrihcabu te khaw kan toei u.

⁶ Nangmi ham bii aka yawm Meri khaw ka toei. ⁷ Andronikas oen Junias te khaw ka toei, ahih rawi tah kai oen thong aka tla haih Judah thlaangphun ni. Ahih rawi te celtuih thli lawngkhaw atheenla a ming u. Kai lak ah lamhala Khrihca la aka awm hih ni.

⁸ Bawipa oen pawlneengna ah ka lungna paya theen Ampliatas khaw kan toei. ⁹ Khrih kah bii dawngah biibipuei Urbanas oen ka lungna paya Stakhis khaw kan toei hih. ¹⁰ Khrih ah uep-awm Apellis khaw kan toei. Aristobulas imkhuikaw khaw kan toei u. ¹¹ Kamah kah Judah thlaangphun Herodion oen Nasisas imkhuikaw Khrihca maya manau khaw kan toei u.

¹² Bawipa bii aka bi Traifina oen Traifosa khaw kan toei hih tih, Bawipa ham bii yahawh ngaai aka bi ka lungna ka paya Persis khaw kan toei. ¹³ Bawipa kah bii dawngah tha aka huer Rutas oen kai he a ca angla dodankung a manu te khaw kan toei hih. ¹⁴ Asinkritas, Flekon, Harmis, Patrobas, Harmas, ahimi oen ah aka awm haih atloe Khrihca maya manau boeih te kan toei u. ¹⁵ Filolokas oen Julia, Nirias oen a ngannu Olimpas oen ah ahimi oen aka awm haih Pathen kah thlaang boeih te kan toei u.

¹⁶ Nangmi pakhat oen khat maya manau angla toei u lah. Khrih kah Khrihcabu boeih lawng nangmi te n’toei u.

¹⁷ Maya manau thli: pekbona aka thoeng sak thli oen oengna te aka thumhang sak oen ah nangmi lawng na cang u tangte cangpueina aka oelh-taih thli te ngaithuen ham kan uen u: Ahimi teng kalawng thloeng uh. ¹⁸ Metihtiah te ang thaihu aka sai hue te tah mami Bawipa Khrih kah bii aka bi nawh ni, amami kawngaih ni a sai u. Ahimi lawngah awlding awltheen oen koehna awl oen ah tu khaw aka ming nawh thlaang-thli te athai alatna u. ¹⁹ Nangmi lawng awlthang theen dawngah ueppang koeila na awm u te thlaang boeih lawng a yaak u, tedawngah he kawngah he nangmi sawah ka kaw hoe tangkiik. Nangmi te theenna ben atah thlaangcuih la awm ham, tede athe ben atah tu khaw aka ming nawh angla awm sak ham ka ngaih. ²⁰ Mami kah ngaimawngna kungpui Pathen lawngah Seitan te nangmi kah khowtang ah a neet yue poen ai. Mami Bawipa Jesuh kah lungvatna tah nangmi tengah awm hawn seh.

²¹ Kai oen biibipuei Timote lawng nangmi te n’toei u; Judah phun ka paya Lucias, Jason oen Sosipater mi khaw kan toei u. ²² He capat aka thut pe kai Tertias lawngkhaw nangmi te Khrihca thli kah toeina angla kan toei. ²³ Kai dodankung oen ka pahna imkung Kaias khaw nangmi te Khrihca thli kah toeina angla kan toei. ²⁴ Mami Bawipa Jesuh Khrih kah lungvatna tah nangmi boeih sawah awm hawn seh. Amen.

²⁵ Pathen te thangtheen sak u sih! Awlthang Theen dawngkah angla, kai lawng ka phawng Jesuh Khrih kawng oen yan veng san broela a thuh a elh awltak awlhuep avan phawng te oen ah Pathen lawng nangmi te na oengna dawngah acakla m’pai sak thai ai. ²⁶ Tede, tahe ah te kah awl tah tawngha thli kah cathut rang oen avan pha sak poen; thlaang boeih lawng awltak te a oeng tih a vai thaina ham dungyan Pathen kah awlpeek rang oen thlaangphun boeih tengah a phawng poen.

²⁷ Pakhat bueng la aka awm tih cuihna boeih oen aka soep Pathen tah Jesuh Khrih rang oen dungyan toe ruep-awmna awm hawn seh! Amen.