AWLPHAWNG

AWLPHAWNG

¹ He cabu he tah Jesuh Khrih lawng a phawng thaihu kawng thutna ni. He awlphawng tah aka thoeng yue ham koei te a tuihyoeihthlaang thli tengah tueng sak ham Pathen lawng a peek. Khrih lawngah he thaihu thli he a tuihyoeihthlaang Johan te ming sak hamla vanthlaang te a tuih tih, ² Johan lawng a huh thaihu boeih te a thui. Pathen tengkah awlthang oen Jesuh Khrih lawng a phawng awltak tah he ni. ³ He cabu aka tae thli tah a kam awm phoeih tih tawngha kah awlthang awl aka hutung thli oen he cabu khuiah a thut he aka vai tah yotheen a dawng u. Metihtiah he thaihu boeih a thoengna ham atue tah yoeii tengkek poen.

⁴ Johan teng kalawng, Asia ram khuiah aka awm Khrihcabu pasarih tengah: Aka awm lii, aka awm poen tih aka awm poe ham koei Pathen teng kalawng amah ngawlhcoen hai kah Muithla pasarih teng kalawng, ⁵ duekna kalawng lamhacuekla aka tho, thincak sausi la aka awm, dilai sengpahrang boeih ukkung la aka awm Jesuh Khrih teng kalawng lungvatna oen ngaimawngna tah nangmi tengah awm hawn seh. Mami n’lungna tih a duekna oen mami he thawlhna kalawng aka loeih sak tih, ⁶ ana Pa oen Pathen kah bii te bi thai ham mami he sengpahrang la khawseh Khawsoeih la khaw seh aka saikung Jesuh Khrih tengah ruep-awmna oen huham tharana tah dungyan toe awm yoeyah hawn seh! Amen. ⁷ Bueh lah! ahih tah muui dawng kalawng va rum thuk! thlaang boeih lawng a huh ai,amah te cai oen aka thun hue lawngkhaw a huh u ai, Dilai sawkah thlaang boeih lawng rungrap u ai. Te tila awm roe hawn seh. ⁸ “Kai tah lamhacuek, oen hukhuengkoek ni tila aka awm lii,aka awm coeng poen tih aka awm poe ham koei Thara koek Bawipa Pathen lawng a thui.

⁹ Kai tah nangmi kah maya Johan ni. Jesuh kah hubang la ka awm van angla a Ram khuiah aka awm hue kah patang khangna aka ming haih na puei na paw van ni. Pathen kah awl oen awltak, Jesuh lawng a phawng te ka thui dawngah Kai he Patmos tuisanglak ah n’khueh. ¹⁰ Bawipa Hin ah Muithla lawng ka sawah n’tlaak thil tih pengsara awl angla angaihhlangla aka riing awl te ka hu ben ah ka yaak. ¹¹ Te awl lawng, “Na huh thli he ca oen thut lang na thut cabu te he kah khawpui pasarih Efesa, Samarna, Perkamum, Tiatira, Sardis, Filadelfia oen Laudisia ah aka awm Khrihcabu hue tengah pat peh, "tila a thui. ¹² Te tila awl aka thui te huh hamla ket ka maang tih ka bueh vengah sui haivangna pasarih ka huh. ¹³ Te haivangna pasarih laklaw ah thlaanghing oen aka lo u pakhat pai, a khowsai toe aka pha baidung te a bai tih a raang dawngah sui cihin oen yeen u. ¹⁴ Ahih kah sam tah tuumul angla rawsawng angla bawk tih a mik tah hai angla alh; ¹⁵ a khow rawi tah hai dawng a thloei ruhum tuicii, a thuut heet angla thlupthlup pang tih a awl tah liksaituitlaak tuenn awl angla riing. ¹⁶ Ahih lawng a bantang kut ah aisi pasarih a pawm tih a kaa dawng kalawng voeivaang aka hatt samsen va thoeng. A mik-hai tah hingthun khawmik angla aang. ¹⁷ Ahih te ka huh vengah thlaangduek angla a khowkung ah ka tlim. A bantang kut te ka sawah a tloeng tih, “Rih boel! Kai tah lamhacuek oen hukhuengkoek la ka awm: ¹⁸ Kai tah aka hing ni!Kai tah ka duek, tede tahe ah kai tah dungyan toe yoeyahla ka hing poen. Kai lawng duekna oen thlaangduek khaaw celkhui sawah ukna aana ka khueh. ¹⁹ Tedawngah nang lawng na huh thaihu boeih tahe ah aka awmlii thaihu thli oen hai ben ah aka thoeng ham koei thaihu thli pahih bok la thut lah. ²⁰ Ka bantang kut dawngah na huh aisi pasarih oen sui haivangna pasarih kah thuingaihna awlhuep tah he tila awm: aisi pasarih hue he tah Khrihcabu thli pasarih kah vanthlaang tih haivangna pasarih tah Khrihcabu pasarih ni.

¹ “Efesa khaaw, Khrihcabu tengah he tila thut lah: A bantang kut ah aisi pasarih aka pawm tih sui haivangna pasarih tim ah aka yingyawi kah awl te tah he tila ni. ² Kai lawng na sai boeih te ka ming; Metila thatlawh boep la bii na bi tih kawdaw oen na awm te khaw ka ming. Nangmi lawng thlaangthe sawah Khawdawp na ngaai thai nawh te ka ming tih celtuih la awm nawh de celtuih la ka awm aka ti te na noek na dak u tih, thlaangthaipalat ni tila na huh u te ka ming. ³ Nang tah na kaw daw,kai kawngah nang lawng patang na khang te na kaw boet nawh. ⁴ Tede ka kaw a lawna nawh pakhat awm:nang lawngah acuekca kah nan lungna angla tahe ah nan lungna tlaih nawh poen. ⁵ Metihtlukla adangla na tlaak thuk te poek lah!Na thawlhna te yut u lang acuekca kah na sai angla te sai lah. Nangmi lawng na thawlhna te na yut u nawh atah Nangmi tengla ka law vetih nangmi kah haivangna te huen tloe la kavan pawng poen ai. ⁶ Tede koeh ham pakhat tah awm:Nikolas hubang hue lawng a sai u te kai lawng ka thina van angla nangmi lawngkhaw na thina u van.

⁷ “Tedawngah yaakna haa aka khueh lawngtah Muithla lawng Khrihcabu hue tengah a thui he ya hawn seh! “Taakung la aka awm thli tah Pathen dum khuikah hingna thingthaih te caak thaina nawl ka peek ai” ti.

⁸ “Smarna khaaw Khrihcabu kah vanthlaang tengah he tila thut lah: “Lamhacuek oen hukhueng koek la aka awm; duek tih aka tho koep kah awl uen tah he tila awm. ⁹ Patang raina na tawng te ka ming;na khawdeng te khaw ka ming, tede nang tah kuirang tangtang! Judah thlaang nawh de, Judah thlaang la ka awm aka ti hue lawng na thaang a the sak u te ka ming; Ahimi tah Seitan kah thlaang ni! ¹⁰ Nang lawng patang khang ham koei me ang khaw rih boel. Hutung lah! Seitan lawng nangmi noekdakna ham thlaangvaang te thong ah a thlaak ai; nangmi kah patang khangna te hin ha khuiah boet ai. Duek toela kai ham uep-awm la awm lah; taana kutdo la hingna kan pe ai.

¹¹ “Yaakna haa aka khueh lawng atah Muithla lawngah Khrihcabu thli tengah a thui awl he ya hawn seh! “Taakung la aka awm thli tah voeihih duekna kalawng loeih poen ai,” ti.

¹² Perkamum khaaw Khrihcabu kah vanthlaang tengah he tila thut lah:

¹³ Ame huen ah na awm tite ka ming; Seitan lawng a bawi ngawlhcoen a khuehna huen ni. Ka sawah uep-awm la na awm dawngah kai hamla uep-awm sausi la aka awm Antipas te Seitan a awmna huen ah a ngawn u vengah pateng kai nan oengna te na hoett nawh. ¹⁴ Tede na sawah ka kaw a lawna nawh thaihu ayawlca awm: te tah nangmi tim ah Balaam kah cangpueina aka vai thlaang khatsut awm; Israel thlaangphun te thawlhna khuila mawt ham kutsai-muei thawthuengna caak awkk te caak ham hutaa tawngpa thawlhna oen ah thawlh hamla Balaam lawngah Balak te a cang puei. ¹⁵ Tetih van angla Nikolas kah cangpueina aka vai thlaang khatsut nangmi tim ah awm. ¹⁶ Tedawngah tahe ah thawlhna yut u loeih! Thawlhna na yut u nawh atah nang tengah ka law yue vetih te thlaang hue te ka kaa khui kalawng aka thoeng samsen oen ka tloek ai. ¹⁷ “Yaakna haa aka khueh lawngtah Khrihcabu thli tengah Muithla lawng a thui awl he ya hawn seh! “Taakung la aka awm thli tah thuh elh la aka awm manna takawi te ka peek ai.

¹⁸ Tiatira khaaw Khrihcabu kah van-thlaang tengah he tila thut lah!

¹⁹ Kai lawng na sai boeih te ka ming. Lungna na khueh te ka ming. Acuek vengkah lak ah atlawh ngaaila tahe ah na bi te khaw ka ming. ²⁰ Tede na sawah ka kaw a lawna nawh tah he ni:amah oen amah Pathen kah celtuih la ka awm aka ti hutaa Jezebel te nang lawng na thlahphaam sut te ni. Ahih lawng a cangpueina rang oen ka thlaang thli te hutaa tawngpa thawlhna oen kutsaimuei thli thawthuengna caak awkk te caak hamla a mawt thawlh. ²¹ A thawlhna yut ham atue ka peek, tede ahih lawngah hutaa tawngpa thawlhna kalawng thawlh yut ham ngaih nawh. ²² Tedawngah ahih te ihkhun dawngah ka voeih sut vetih te ah te ahih oen samphaih haih thlaang thli te anat ngaaila patang a khang ai. Ahimi lawngah te hutaa oen athe thaihu a sai te a yut u nawh atah tahe roe ah patang ka khang sak ai. ²³ Ahih kah a hubang hue te khaw ka ngawn boeih vetih tevengah kai tah thlaang boeih kah poekna oen kawngaihna mingkung tila Khrihcabu boeih lawng a ming ai. Nangmi pakhat rip he na saina taring ah kan thung ai.

²⁴ “Tede Tiatira khaaw kah thlaang-tloe hue lawngtah athe cangpueina te na vai u nawh tih thlaangtloe hue lawngah Seitan kah awlhuep dung a ti u te khaw na cang u nawh. Nangmi te atloe thalrih khatca khaw phueih sak ham ka ngaih nawh. ²⁵ Tede na khueh u tangte te kai ka law toe acakla phoeih uh. ²⁶ - ²⁸ Taakung la aka awm thlaang oen ka kaw ngaihna aboet toe aka sai thlaang tah a Pa teng kah ka dang saithaina aana te ka peek van ai, thlaangphun tloe sawah thiicungpoelh oen uk ham oen ah ahimi te dilai am angla adiik anuui la de ham ah ukna aana te khaw ka peek ai. Aisi tumpa khaw ahimi te ka peek ai.

²⁹ “Yaakna haa aka khueh lawngtah Khrihcabu tengah Muithla lawng a thui awl te ya hawn seh.” a tina.

¹ Sardis khaaw Khrihcabu kah van-thlaang tengah he tila thut lah:

² Tedawngah hinghang langtah na khueh hun thaihu thli te a duek boeih taktak thlan ah na tha thlue sak koep uh. Nang lawng na sai thaihu te ka Pathen haiah soep thlan hun tite ka ming. ³ Tedawngah nang n’cang puei tangte thli oen na yaak tangte thli te hilh boel;te thli te vai langtah na thawlhna yut loeih. Nang lawng na hinghang nawh atah thlaanghuuen angla na teng ka law vetih ka lawna atue pateng na ming manawh. ⁴ Tede Sardis khaaw ah aka awm thlaang ayawl lawngtah na himbai te aciimcala na khueh u hun. Himbai bawk bai oen kai oen ah n’yingyawi haih u ai. ⁵ Taakung la aka awm hue lawngtah he ang himbai bawk a bai u vetih ka thlaang ni ka tina ai.

⁶ “Yaakna haa aka khueh lawngtah Khrihcabu thli tengah Muithla lawng a thui awl he ya hawn seh!

⁷ “Filadelfia khaaw Khrihcabu kah vanthlaang tengah he tila thut lah: “He awl he tah aka ciim tih ataktang la aka awm tengkah awl ni. Ahih tah Devid kah caabi tukung la awm tih,ahih lawng thawhka a awng veng atah a-u lawngkhaw khai khoep thai nawh vetih ahih lawng thawhka a khaih khoep atah,a-u lawngkhaw awng thai manawh. ⁸ Nang lawng na sai te ka ming;nang lawng tha-awm tharana yoehca ni na khueh de kai lawng kan cang puei te na vai tih uep-awm la kai ham na awm te kan ming. Na haiah thawhka pakhat kavan awng poen, te tah a-u lawngkhaw khai khoep thai manawh. ⁹ Hutung lah! Judah thlaang la ka awm ti u tih Judah thlaang tak nawh hoem thui hue te tah Seitan kah thlaang thli te nangmi haiah kavan law sak vetih na khow kungah ka buekuep sak ai. Nang kan lungna te ahimi boeih lawng a ming ai. ¹⁰ Thinsan kawdaw oen ueh hamla awl kan peek te na vai u dawngah, dilai sawkah thlaang boeih noekdakna hamla dilai dawngah aka law ham koei patang raina atue ah kan loeih sak ai. ¹¹ Kai tah ka law yue ai. Nang kah taana kutdo te a-u lawngkhaw avan rot nawh ham na khueh thaihu te atheenla kuemkawl uh. ¹² Taakung la aka awm tah ka Pathen kah tempal bok-im tuung la ka liing vetih ahih lawng tempal bok-im te metuek vengah khaw thoeih taak manawh. Vaan kah ka Pathen teng kalawng aka law, Jerusalem thaai ka Pathen kah khawpui miing thaai oen ah ka Pathen kah a miing te ahih pum dawngah ka thut ai. Ahih pum dawngah ka miing a thai te khaw ka thut baal ai.

¹³ “Yaakna haa aka khueh lawngtah Khrihcabu thli tengah Muithla lawng a thui he ya hawn seh!

¹⁴ “Laudisia khaaw Khrihcabu kah vanthlaang tengah he tila thut lah: “Pathen lawng a suen thaihu boeih kah akungcuek la aka awm tih uep-awm oen ah ataktang sausi la aka awm Amen teng kah awl uenna tah he tila awm. ¹⁵ Nang lawng na sai boeih te ka ming;Nang tah ading khaw na ding nge nawh tih aling khaw na ling nge nawh te kan ming. Nang he ading tihnawhtah aling pakhat khat la na awm ham ka ngaih! ¹⁶ Tede nang tah aling khaw na ling nge nawh,ading khaw na ding nge nawh tih pawl-oep la na awm dawngah nang tah ka kaa khui kalawng kan tha poen ai! ¹⁷ Nang lawngah, “Kai tah ka bawi ka len tih ka voetna awm nawh; ka ngoe boeih te ka khueh’, na ti. Tede nang tah metihtlukla na khawdeng tih reen kap la na awm te na ming nawh! Nang tah na khawdeng, atliing ayaal la na awm tih na mik pum de lah koen. ¹⁸ Tedawngah bawilen kuirang taktang la na awmna ham kai teng kah sui tuiciil te lai hamla poekna theen kan peek. Atliing ayaal yaraula na awm te khukdahna ham oen ah na buen ham khaw, na mik a tuengna ham miksii te khaw lai baal. ¹⁹ Kai lawngtah ka lungna thlaang boeih te ka toel ka thaam tih dan ka tat. Tedawngah na tha thlue sak lang na thawlhna yut lah. ²⁰ Hutung lah! Thawhka ah ka pai tih ka khooek; a-u lawngkhaw ka awl a yaak tih thawh a awng atah, a im khuila ka kuun vetih ahih oen buh ka caak haih vetih ahih khaw kai oen ah buh a caak haih van ai. ²¹ Kai tah taakung la ka awm tih tahe ah a Pa kah a bawingawlhcoen tengah ka ngawlh van angla, taakung la aka awm thli te ka bawingawlhcoen sawah kai oen haih ngawlhna nawl te ka peek ai. ²² “Yaakna haa aka khueh lawngtah Khrihcabu thli tengah Muithla lawng a thui awl he ya hawn seh!”

¹ He coengah atloe huhthlaam ka huh tih vaan ah thawhka aka awng u pakhat te ka huh. Acuek vengkah ka yaak tih awl akavan thui pengsara awl tuen angla aka riing awl lawngah, “He la he law hang lah, he coengah aka thoeng ham koei te kan huh sak ai.” tila a thui. ² Kawlkalh ah Muithla lawng pahoei ng’awm puei tih vaan ah bawi ngawlhcoen pakhat awm, te ngawlhcoen dawngah thlaang pakhat ngawl. ³ Ahih kah mik-hai tah lungto phutlo jaspa oen karnelian angla aang tih bawi-ngawlhcoen tengvaai ah te emaral lungto araawng angla aka awm malpacung te awm. ⁴ Te kah bawingawlhcoen te atloe bawi ngawlhcoen pakul palii lawng a veel, te kah bawingawlhcoen dawngah himbai bawk a bai tih suilumuek aka muek ahaamca pakul palii ngawl u. ⁵ Bawi-ngawlhcoen dawng kalawng khaw thlappha tih khawhumm awl oen rekk tlaak awl va thoeng. Bawingawlhcoen haiah haithoei pasarih aka vang te awm tih te haithoei tah Pathen Muithla pasa-rih ni. ⁶ Bawingawlhcoen haiah tuikhal angla ciil tih thlalang tuilii oen aka lo u te awm. Te kah bawingawlhcoen a teng avai ah ramsa hing palii lawng a veel khoep tih te ramsa hing tah a hu a haiah a mik hooeng la awm. ⁷ Ramsa hing lamhacuek pakhatna te tah sathueng oen lo u, apahihna tah vaitaw oen lo u tih a pathumna te tah thlaanghing mik-hai oen aka lo u mik-hai a khueh tih apaliina te tah aka sawng lii tuhuum oen lo u. ⁸ Ramsa hing palii boeih lawngah phe paruk rip a khueh u tih akhui oen adau ah mik hooeng la betoet. Ahimi lawngah yiin oen daai toeng tlaih ohla: “Aciim, aciim, aciim tah Bawilen koek Bawipa Pathen ni, Ahih tah aka awm poen, aka awm lii oen aka awm poe ham koei ni,” tila laa a sak u. ⁹ Ramsa hing palii lawng bawingawlhcoen dawngah aka ngawl tih dungyan dungyan toe aka hing te ruep-awmna, hinyahna oen awmngaihna oen ah a thangpawm u. ¹⁰ Te tila a thangpawm u vengah ahaamca pakul palii lawng bawingawlhcoen dawngah aka ngawl haih te buekuep u tih dungyan dungyan toe aka hing te a bok u. A suilumuek thli te bawi-ngawlhcoen haiah a tloeng u tih, ¹¹ “Kaimi kah Bawipa oen Pathen! Nang lawngah ruep-awmna, hinyahna oen huham tharana te dang hamla tuueng ta-ngak, Metihtiah soeprep thaihu he nang lawng na sai tih na kawngaih angla, te thli te na awm sak tih na hing sak,” tila a thui u.

¹ Bawingawlhcoen dawngah aka ngawl lawng a bantang kut ah cayaawl pakhat a pawm te ka huh. Te cayaawl tah khatben khatbang ah ca a thut boeih tih tacik pasarih oen a heen. ² Tecoengah tha aka ra tangkiik vanthlaang pakhat ka huh tih te vanthlaang lawng, “A-u nuem he thawhcang heen aka phe tih cayaawl thlam ham aka tuueng?” tila angaihhlangla a paang awl te ka yaak. ³ Tede te cayaawl te thlam tih akhuiben bueh ham koei vaan ah khaw, dilai dawngkhaw, dilai dangah khaw a-u khatca khaw awm nawh, ⁴ Te cayaawl te aka thlam ham oen akhuiben aka bueh ham khatca khaw a huh u nawh dawngah thloekthloek ka rap. ⁵ Tevengah ahaamca pakhat lawng, “Rap boel, Bueh lah! Judah phun khuikah Sathueng, Devid cadil aka lenduet lawngah taana a khueh poen tih thawhcang pasarih te a phe thai tih cayaawl te a thlam thai.” tila avan thui. ⁶ Tecoengah tuuca pakhat bawingawlhcoen alungkir ah pai tih ramsa hing palii oen ahaamca thli lawng a veel khoep te ka huh. Te tuuca tah ngawn tangte angla awm. Te tuuca lawng ki pasarih oen mik pasarih a khueh tih; te mik pasarih tah dilai pum ah tuih la aka awm Pathen Muithla pasarih te ni. ⁷ Tuuca lawng cet tih bawingawlhcoen dawng aka ngawl kah bantang ben kut ah a pawm cayaawl te a lawh. ⁸ Te tila a lawh vengah te ramsa hing palii hue oen ahaamca hue pakul palii tah tuuca haiah buekuep u. Pakhat rip lawngah tingtoeng pakhat rip a khueh u tih riimtuui oen ah aka bepir sui boengloeng pakhat rip a pawm u, te riimtuui tah Pathen thlaang thli kah thangthuina ni. ⁹ Ahimi lawng, “Nang tah cayaawl te lawh ham oen tacik te phe tih thlam hamla na tuueng roe. Metihtiah n’ngawn u tih nang kah Luciik duekna oen thlaangphun soeprep, awlcawm awlcee, ram tawm oen namtawm te Pathen ham na lai poen. ¹⁰ Nang lawng ahimi te mami kah Pathen bii aka bi ham khawsoeih la khaw sengpahrang la khaw na sai poen dawngah ahimi lawng dilai he a uk u poen ai,” tila laa thaai te a sak u.

¹¹ Tecoeng ka bueh koep vengah vanthlaang toeklek toekna nawh kah awl te ka yaak! Ahimi lawngah bawingawlhcoen te khaw, ramsa hing palii oen ah ahaamca hue te a veel tih pai u, ¹² angaihhlangla laa a sak u tih: “A ngawn u Tuuca lawngah Huham tharana oen kuirangna, Cuihna oen tharana, hinyahna oen ruep-awmna oen ah thangpawmna tah dang hamla tuueng ta-ngak,” ti u. ¹³ Tecoengah vaan ah aka awm boeih oen dilai dawngah khaw, dilai dangkah aka awm boeih, tuitunlii ah aka awm boeih oen Khawhipuempa kah aka hing boeih lawng: “Bawingawlhcoen dawngah aka ngawl tuuca tengah thaangtheenna oen hinyahna, ruep-awmna oen tharana tah yoeyahla dungyan toe awm hawn seh,” tila laa a sak te ka yaak. ¹⁴ Ramsa hing palii hue lawngah te, “Amen!” tila a thui u tih ahaamca hue lawng buekuep u tih a bok u.

¹ Tecoengah tuuca lawng tacik deng pasarih khuikah lamhacuek tacik deng a awng te ka huh tih ramsa hing palii khuikah pakhat lawng khawhumm awl angla aka humm awl oen “Law lah” a ti awl te ka yaak. ² Ka bueh vengah marang bawk pakhat ka huh. Te marang aka cit lawngah li pakhat a pawm, ahih te bawilumuek pakhat a peek u. Taakung la aka awm lawng taa hamla aka cet angla te cet. ³ Tecoengah tuuca lawng tacik deng pahihna te a awng tih ramsa hing pahihna lawng, “Law lah” a ti awl te ka yaak. ⁴ Tecoengah atloe marang seen pakhat va thoeng. Marang aka cit tengah te thlaanghing pakhat oen khat ngawn u the ham, dilai ah raal thawh sakna aana te khaw a peek. Ahih te samsen bo hlang a peek. ⁵ Tuuca lawngah tacik deng pathumna te a awng vengah ramsa hing pathumna lawng, “Law lah” a ti awl te ka yaak. Ka bueh vengah marang muuem pakhat ka huh. Marang aka cit lawng te a kut dawngah cawi a pawm. ⁶ Ramsahing palii tim kalawng awl aka thoeng pakhat ka yaak tih, “Hin at kah thapang phu ah sangvut tah suum at, balii tah suum thum peek la awm. Tede olif thingkung oen misur dum thli tah phe boel ti. ⁷ Tecoengah Tuuca lawng tacik deng apaliina te a phe tih a awng, ramsa hing apaliina lawng, “Law lah” a ti awl te ka yaak. ⁸ Ka bueh vengah marang pawlvawkk pakhat te ka huh. Te marang aka cit te Duekna a miingna tih a hu ah Hell lawng a vai tawkkhak. Ahimi te dilai thloep lii ah thloep at te raalpui oen khaw, khawkha oen khaw, tlawhnatna oen khaw, ngawn hamla ukna aana a peek. ⁹ Tecoengah Tuuca lawng apa-ngaana tacik deng te a awng. Pathen awl a phawng u tih uep-awm sausi la a awm dawngah a ngawn u thlaang thli kah Muithla thli te bokna-thaang huiah ka huh. ¹⁰ Ahimi lawng angaihhlangla pang u tih, “Aka ciim tih aka doeng Thara koek Bawipa! Kaimi aka ngawn dilai thlaang thli he awlcek nawh tih dan tat ohla metuek toe nuem na awm hun ai” ti u. ¹¹ Ahimi te baidung bawk pakhat rip a peek tih, ahimi angla ngawn ham aka awm biibipuei thli oen maya manau thli asoep thlantoe kawlkalh ah duem hamla a thui pe u. ¹² Tecoengah Tuuca lawng tacik deng parukna te a awng te ka huh. Likluei angaih-hlangla hinghuen tih khawmik khaw himbai pawn amuuem angla muuem tih thla khaw apum boeih la thisen angla ling. ¹³ Thlipui lawng a hinghoek tih thaidut thaih munkang a thing dawngkah a rul angla vaan kah aisi thli khaw dilai la tla. ¹⁴ Vaan khaw cayaawl angla yaawl u tih ha-ata boeih oen tuisanglak boeih khaw a awmna huen kalawng thoeih boeih u. ¹⁵ Tecoengah dilai han sengpahrang boeih ukkung thli boeih oen raalbawi boeih, kuirang thlaanglen thli oen huham tharana boeih oen ah thlaangtloe boeih, saltamnaa oen thlaangcuem boeih lawngah tlaang kah lungnu thlip oen lungkaw khuiah thuh u boeih. ¹⁶ Ahimi lawngah tlaang oen lungnu nala te “kaimi he n’naam langtah bawingawlhcoen dawng aka ngawl kah mik huh oen Tuuca kah thinsana kalawng ng’thlip u lah! ¹⁷ Ahimi kah thinsana rih awm khawhin tah avan pha poen, a-u lawng a ueh thai ai?” tila paang u.

¹ Tecoengah dilai akil palii ah aka pai vanthlaang palii te ka huh. Ahimi lawng dilai saw oen tuitunlii ah khaw, thingkung thlii dawngah khaw, khaw-athli nawh ham dilai a kil palii kah yilh te khak a tuuk u. ² Tecoeng ah aka hing Pathen kah tacik deng aka pawm vanthlaang pakhat lawng khawcuuk ben kalawng a law hang te ka huh. Ahih lawng dilai oen tuitunlii sawah patang khang sak thaina aka khueh vanthlaang palii hue te angaihhlangla paang tih a khue. ³ Te kah vanthlaang lawng, “Ka Pathen kah tuihyoeihthlaang thli kah a tal ah thawhcang ka heen thlan ah nangmi lawng dilai oen tuitunlii oen ah thingkung thli sawah raina pha sak u boel de,” tila a thui. ⁴ Tecoengah Pathen kah thawhcang oen a heen thlaangmi tah thong yakhat coeng thong sawmlii coengah thong lii a awm te avan thui. Te thli tah Israel thlaangphun paha thlaihih khuikah tih, ⁵ - ⁸ Judah phun, Riubin phun, Kad phun, Asher phun, Naptali phun, Manasseh phun, Simeon phun, Levi phun, Issakar phun, Zebulun phun, Josep phun, oen Benjamin phun, ni. Phun khat dawngkah thlaang thongha thlaihih te thawhcang heen la awm.

⁹ Tecoeng atah ka bueh vengah a-u lawngkhaw a toek lek nawh thlaangping te ka huh. Ahimi tah awlcawm awlcee aka thui nam tawm oen phun soeprep peng tawm ram tawm kah aka law boeih tih Ahimi lawng himbai bawk bai oen samtoe a pawm u tih bawingawlhcoen oen Tuuca haiah pai u. ¹⁰ Ahimi lawng, “Thlawnna tah bawingawlh-coen dawng aka ngawl Pathen oen Tuuca teng kalawng ni a law” tila paang u. ¹¹ Vanthlaang boeih lawng bawingawlhcoen oen ahaamca hue oen ah ramsahing palii te a veel khoep tih pai u. Tecoengah bawingawlhcoen haiah buekuep u tih Pathen te a bok u tih, ¹² “Amen! Thaangtheenna, ruep-awmna, cuihna, awmngaihkoehna, hinyahna, huham tharana oen tha-awmna tah Pathen kah koeva la dungyan dungyan toe awm hawn seh! Amen!” tila a thui u. ¹³ Ahaamca thli tim kah pakhat lawngah, “Himbai bawk aka bai hue he a-u hue kai? ahimi he ame kalawng a law u?” tila kai te n’doet. ¹⁴ Kai lawng, “Ka ming nawh, Bawipa, Nang lawng ni na ming,” ka tina. Ahih lawngah, “He kah thlaang hue he tah mueirihtamyiin heemtekna kalawng aka loeih thli ni, Ahimi lawng Tuuca thisen oen a himbai te a suk u tih aciim sak u poen. ¹⁵ Tedawngah ahimi lawng Pathen kah bawingawlhcoen haiah pai u tih yiin oen daai tempal bok-im ah bii te a bi pe u. Bawingawlhcoen dawng aka ngawl lawngah ahimi te a awm puei vetih a thlip adah poen ai. ¹⁶ Ahimi lawngtah buhpawng tuihalh khaw ming koep u tlaih manawh; ahimi te khawling lawngkhaw kaang nawh vetih aling a-alh lawngkhaw daw yet tlaih manawh. ¹⁷ Metihtiah bawingawlhcoen alungkir ah aka awm Tuuca te tah ahimi doenkung tuudoen la awm vetih hingna tuibaap la te a ceh puei ai. Pathen lawngah ahimi kah mikphitui boeih te a huih pe poen ai,” tila avan thui.

¹ Tuuca lawng tacik deng pasa-rihna te a awng vengah vaan ah khawnoek tentan yunyan dipsiditla awm. ² Tecoengah Pathen haiah aka pai vanthlaang pasarih te ka huh tih pengsara pasarih te a peek u. ³ Atloe vanthlaang pakhat riimtuui huihthlutna pakhat aka pawm te law tih bokna-thaang tengah te pai. Bawingawlhcoen haiah aka awm sui oen a sai bokna-thaang dawngah Pathen thlaang boeih kah thangthuina oen nawn haih ham riimtuui yahawh hlang ahih te a peek. ⁴ Huihthlutna haikhu tah Pathen haiah aka pai vanthlaang kut dawng kalawng Pathen thlaang thli kah thangthuina oen ah asawla luui haih. ⁵ Tecoengah vanthlaang lawngah riimtuui beeldung te a lawh tih bokna-thaang dawngkah haialh te akhuila a sang coengah dilai la a voeih. Khaw humm tih rekk tla, khaw thlappha tih likluei hinghuen. ⁶ Tecoengah vanthlaang pasarih lawng pengsara pasarih tum hamla kamthlah u. ⁷ Lamhacuek vanthlaang lawng pengsara te a tum vengah thisen oen aka thoekk u hai oen reel te dilai la tla. Dilai thloep thum ah thloep at, thingkung thloep thum ah thloep at oen ramtliim khaw ung boeih. ⁸ Vanthlaang pahihna lawng pengsara te a tum vengah tlaang angla aka bo thaihu pakhat te tih hai angla aka alh te tuitunlii khuila tla. Tuitunlii thloep thum ah thloep at te thisen la coengg boeih tih, ⁹ tuitunlii khuiah aka hing boeih thloep thum ah thloep at te duek boeih tih tuisangphaw thloep thum ah thloep at te rawk boeih. ¹⁰ Tecoengah vanthlaang pathumna lawng pengsara a tum vengah haithoei hairawng angla aka alh aisi pakhat vaan kalawng tuiva oen sawkca thloep thum thloep at dawngah tla. ¹¹ (Te aisi tah “Khahiik” a miingna) Tui thloep thum ah thloep at tah tuikha la coeng boeih tih, te tila khahiik aih dawngah tui aka aw thlaang boehoengla duek. ¹² Tecoengah vanthlaang apaliina lawng pengsara a tum vengah khawmik thloep thum ah thloep at tah see tlaih nawh tih thla khaw thloep thum ah thloep at, aisi thloep thum ah thloep at vaang tlaih nawh. A aangna thloep thum ah thloep at auh boeih. Yiin thloep thum ah thloep at, daai thloep thum ah thloep at ah aangna te awm tlaih nawh.

¹³ Tecoeng ka bueh vengah vaan asanghlang khawhi ah aka sawng tuhuum pakhat lawng angaihhlangla, “khawmap! khawmap! vanthlaang atloe pathum hue lawng pengsara a tum veng atah dilai thlaang boeih hamla metihtlukla khaw amap ai” tila a paang awl te ka yaak.

¹ Tecoengah vanthlaang pa-ngaana lawng pengsara a tum vengah vaan kalawng dilai la aisi pakhat a tlaak thuk te ka huh, te kah aisi tengah aka boet nawh ungrawmdung awngna caabi te a peek. ² Ungrawmdung te aisi lawng a awng vengah haikhu te vahhai haikhu angla thoeng hang. Te haikhu lawng khawmik oen yilh te a yiin sak khoep. ³ Te kah haikhu khui kalawng khaurang thli va thoeng tih dilai la rum thuk, te kah khaurang thli te celkhui ta-ai angla tharana te a peek. ⁴ Te kah khaurang thli te dilai han kah ramtliim khaw thingkung rawkung oen atloe thingkung khaw, phe ham awl pe nawh tih a tal ah Pathen kah tacik deng aka awm nawh thlaang thli bueng ni te thli lawng a phe thai ai. ⁵ thlaang thli he ngawn hamla tah khaurang thli te awl pe nawh. Tede thla ngaa khuiah ngan bawh tah a peek vetih celkhui ta-ai kah atah tlawh angla tlo ai. ⁶ Te kah thla ngaa khuiah thlaang thli lawng duekna te a tlap u ai, tede duekna te dang u manawh; duek ham a ngaih u suide ahimi te duekna lawng a reel ai. ⁷ Te khaurang thli tah raal kah ham, kamthlah oepsoeh marang oen lo u; te thli tah a luu dawngah suilumuek oen aka lo u te a muek tih a mik-hai thli tah thlaanghing mik-hai angla awm. ⁸ Te thli kah a sam tah hutaa kah sam oen lo u tih a naw thli tah sathueng naw oen lo u. ⁹ A raang dawngah thii-rangphaw oen aka lo u te a daan tih a phe humm awl tah raaltukna ah aka cet marang-lengg thli kah tuenpau awl oen lo u. ¹⁰ Te kah khaurang thli lawng celkhui ta-ai kah a mai angla aka sum pikyik te a khueh tih thla ngaa khuiah thlaang nganbawh yaak sak thaina a sue awm. ¹¹ Ahimi lawng ukkung sengpahrang a khueh u tih te ukkung tah boet nawh ungrawmdung ukkung vanthlaang te ni. A miing tah Hebru awl la Abaddon a miingna tih Krik awl la tah Apollion a miingna. (thui ngaihna tah “phekung” tina ni.) ¹² Lamhacuek kah mueirihtamyiin pakhatna tah boeih poen; He coengah mueirihtamyiin pahihna law hun ai. ¹³ Tecoengah aparukna vanthlaang lawng pengsara te a tum vengah Pathen haiah aka awm sui oen a sai bokna-thaang kah akil palii kalawng awl pakhat aka law te ka yaak. ¹⁴ Te awl lawngah pengsara aka tum vanthlaang aparukna te, “Yufratis tuivapui ah a khawh mangkhak vanthlaang palii hue te thlah loeih,” a tina. ¹⁵ Vanthlaang palii hue te a thlah u. Ahimi te he kum, he thla, he khawhin kah atue atang roe ah dilaipum kah thlaangmi thloep thum ah thloep at te ngawn hamla aka awm oepsoeh thlaang hue poen ni. ¹⁶ Marang aka cit raalkap tah apum boeih la millian yahnih awm tila avan thui. ¹⁷ Huhthlaam ka huhna dawngah marang thli oen marang aka cit thli lawng hai angla a lingduuk, safaiar lungto phutlo khawcil angla a hiing, kat angla engpawn la aka awm rangphaw a khueh u te ka huh. Marang luu thli tah sathueng luu oen ah lo u tih te thli kah a kaa khui kalawng hairawng, haikhu oen kat haialh va thoeng. ¹⁸ Marang thli kah kaa khui kalawng aka thoeng hai, haikhu oen kat haialh tlawhtahaw pathum lawngah thlaanghing thloep thum ah thloep at te a ngawn boeih. ¹⁹ Marang thli kah huham tharana tah a kaa oen a mai dawngah awm. A mai thli tah ruul angla a luu awm tih te a mai te thlaang nganbawh peekna ham a hawna. ²⁰ He kah tlawhtahaw ah aka duek nawh tih aka deem thlaang hue lawngah amami kah sai cawplap thaihu te hoett u nawh. Ahimi lawng raaithe a bok te khaw toeng nawh tih mik aka tueng nawh, haa aka pang, aka tatvuet thai nawh sui, ngun, ruhum, lungto, thing oen a sai kutsaimuei a bok te khaw toeng u nawh. ²¹ Ahimi lawngah thlaang ngawnna, mu-uih caakna, hutaa tawngpa thawlhna oen huencaanna te khaw yut u nawh.

¹ Tecoengah tha aka ra vanthlaang atloe pakhat vaan kalawng a rum thuk te ka huh. Ahih lawngah muui oen yaawl u tih a luu te malpacung oen a yeen; A mik-hai tah khawmik oen lo u tih a khow rawi tah aka alh hai tuung angla awm. ² A kut dawngah cayaawl ayiit pakhat a dai phak tih a pawm. A bantang khow oen tuitunlii te a caawt tih a voei khow oen dilai te a caawt, ³ Sathueng kaawk awl angla angaihhlangla te paang. Te tila a paang coengah khawhumm awl pasarih lawng avan roei. ⁴ Khawhumm pasarih kah awlthui te thut hamla ka kamthlah vengah vaan kah awl lawngah “khawhumm pasarih kah awl te awlhuep la khueh, thut boel de!” a ti te ka yaak. ⁵ Tecoengah tuitunlii oen dilai dawngah aka pai vanthlaang ka huh te lawngah a bantang kut te vaan benla a phawh tih, dungyan, dungyan toe aka hing tih vaan, dilai oen tuitunlii oen ah soeprep thaihu saikung, ⁶ Pathen miing oen ah awlkamna a sai. Vanthlaang lawngah, “Diw aih tlaih manawh! ⁷ Pathen lawng amah kah tuihyoeih tawngha hue tengah a thuisut angla Vanthlaang pasarih lawng pengsara a tum vengah a kamthlahna awlhuep te soep badai” tila a thui. ⁸ Tecoengah vaan kah awl ka yaak pakhat lawngah avan thui koep baal tih “Cet langtah dilai oen tuitunlii sawah aka pai vanthlaang kut dawngkah cayaawl a dai phak te lo lah” n’tina.

⁹ Vanthlaang tengla te ka cet tih, cayaawl yiitca te m’peekna ham ka bih. Vanthlaang lawng, “lo langtah ca lah; na bung khui atah khahiik vetih na kaa dawng tah khawitui angla didip ai” ti.

¹⁰ A kut dawngkah cayaawl yiitca te ka lawh tih ka caak, ka kaa dawngah khawitui angla didip tih ka bung khui atah khahiik sut. ¹¹ Tecoengah van-thlaang lawng “Pathen lawng peng tawm ram tawm thlaangphun boeihboeih awlcawm awlcee oen ah sengpahrang thli kawng a thui awl te nang lawngah na thui pe koep ham awm,” tila avan thui.

¹ Tecoengah tahna cungkui angla aka awm caapu thing pakhat te kai m’peek tih, “Cet lang Pathen kah tempal bok-im oen bokna-thaang te tah lah, tempal bok-im khuiah Pathen aka bok thli te khaw toek lah. ² Tede tempal bok-im adauben kah talawng te hooep de, tah boel, metihtiah te huen te thlaangphun tloe thli a peek tih, ahimi lawng Aciim Khawpui te thla sawmlii thla hih khui a khow oen a caawt u ai. ³ Kai lawng sausi la thlaang pahih ka tuih ai, ahih rawi lawng tlamhi te a bai hih vetih khawhin thongkhat yahnih sawmruk khui Pathen awl te a phawng hih ai.” tila a thui.

⁴ Te sausi pahih te tah dilai Bawipa haiah aka pai olif thing pahih oen haiim pahih te ni. ⁵ A-u lawngkhaw te sausi pahih te nganbawh peek ham aka ngaih tah ahih rawi kah kaa khui kalawng aka thoeng hai oen a raal thli te boeih a ngawn; a-u lawngkhaw te rawi te nganbawh peek ham aka yawm boeih te tah he tila a ngawn boeih ai. ⁶ Ahih rawi lawngah Pathen awl a phawng vengkah atue atang khuiah khawtlan nawh ham ah vaan te khaihkhoep ham aana a khueh. Ahih rawi lawng sawkca tuiva tui khaw thisen la coengg sak ham aana a khueh; Te rawi lawngah amah ngaih vengah dilai he tlawhtahaw phun soeprep oen tlawh sak ham aana a khueh baal. ⁷ Te rawi lawng Pathen kah awlthang te a phawng hih coeng atah aka boet nawh ungrawmdung khui kalawng satluung te thoeng hang vetih te rawi te a teek ai. Te rawi te a taa vetih a ngawn ai. ⁸ ahih rawi kah a rawkk te a bawipa a ngawnna khawpui kah noekna a miing tah Sodom, tih-nawhtah Iyipt tila awm. ⁹ Ram boeih, thlaangphun boeih, awlcawm awlcee aka cal oen nam tawm lawngah hin thum coeng hin vaang toe ah ahih rawi kah a rawkk te a bueh u vetih up hamla a khang khak u ai. ¹⁰ He tawngha pahih lawng thlaanghing sawah patang khangna broela a thoeng sak dawngah, he tawngha pahih a duek dawngah dilai thlaang thli tah awmngaih u ai, pakhat oen khat kutdo pe u the vetih taana poei a sai u ai. ¹¹ Khawhin hin thum coeng hin vaang adiw coengah Pathen tengkah hingna hill law tih te rawi kah a kaw khuiah kuun, te rawi lawng tho tih pai hih. Te rawi te aka hu boeih tah a phuu hluih tho tih caalla a rih u. ¹² Tecoengah tawngha rawi lawng, “He la va luui hang!” tila angaihhlangla a tina awl te a yaak hih. A raal thli kah mik huh roe maiah muui dawngah te vaan la luui hang. ¹³ Teveng tue roe ah te likluei angaihhlangla hinghuen tih khawpui thloep ha ah thloep at tah rawk boeih tih thlaang thongsarih duek. Aka awm hun thlaang thli lawng lakueng u tih vaan ah aka awm Pathen kah alenna te a thangpawm u. ¹⁴ Mueirihtamyiin pahihna tah boeih poen; Tede apathumna mueirihtamyiin, te va thoeng yue ai.

¹⁵ Tecoengah pasarihna vanthlaang lawng pengsara a tum tih angaihhlangla aka humm vaan kah awl lawng, “Dilai ukna huham tharana tah mami kah Bawipa oen amah kah Messiah tengah tahe ah awm poen tih dungyan toela a uk poen ai!” tila a thui. ¹⁶ Tevengah bawingawlhcoen dawngah aka ngawl ahaamca pakul palii hue lawngah buekuep u tih Pathen te a bok u, ¹⁷ “Thara koek Bawipa Pathen, Nang tah tahe ah aka awm lii oen aka awm coeng la na awm! Na bawilenna huham thara te na hawna tih uk hamla na tong poen dawngah kan uem tangkiik! ¹⁸ Tahe kah atue he tah na thinsa a lawna atue tih thlaangduek thli awlcekna atue la a awm dawngah, Pathen a ka bok nawh thli tah a thinsa tangkiik. Tahe kah atue he tah na tuihyoeih tawngha thli oen na thlaang thli boeih, nang aka hinyah ayiit abo boeih kutdo peekna atue ni. Dilai aka phekung thli phena ham atue tah avan pha poen!” tila a thui.

¹⁹ Tevengah vaan ah aka awm Pathen tempal bok-im te awng u tih Tempal bok-im khuikah Awlkam Kong te tueng. Tecoengah khaw thlappha tih rekk tla, khaw humm, likluei hinghuen tih reelnu thoei.

¹ Tecoengah vaan dawngah kawpoekrai noekna bohlang pakhat va tueng. Hutaa pakhat lawng khawmik te himbai la a bai, thla te a khow oen a caawt tih aisi paha thlaihih aka awm bawilumuek te a muek. ² Camoe awm tawm-alel tih ca awm tlawh oen paang. ³ Vaan ah atloe kawpoekrai noekna pakhat va tueng. Ruultluung bohlang alingduuk pakhat, luu pasarih oen ki paha thlaihih a khueh tih a luu dawngah bawilumuek pakhat rip a muek. ⁴ Ahih lawngah vaan kah aisi thloep thum ah thloep at te a mai oen ah a khawl tih dilai la a voeih. Ruultluung lawngah camoe te a awm atah doelh pahoei hamla a ca awm tawm-alel hutaa haiah te pai. ⁵ Tecoengah thlaangphun boeih te thii cungpoelh oen uk hamla a capa te hutaa lawng a cuun. Tede camoe te a rot pe tih Pathen oen a bawingawlhcoen tengla a khuen. ⁶ Te hutaa tah Pathen lawng aroek abah pe sut ramhum huhang la te viil u vik. Te huen ah ahih te khawhin thongkhat yahnih sawmruk khui a cawm acah u. ⁷ Tecoengah vaan ah raalpui tho. Maikal oen a vanthlaang thli lawng Ruultluung te a teek u tih ruultluung lawngah khaw, ahimi te a vanthlaang thli oen a teek u van; ⁸ Tede ruultluung tah sung tih amah oen a vanthlaang thli lawng vaan ah awm ham dang u tlaih nawh. ⁹ Dilai pum thailatnakung Seitan, tihnawhtah Raaibawi aka miingna suenyan kah ruultluung bohlang te a vanthlaang thli oen dilai la avan thlaak haih.

¹⁰ Tecoengah vaan ah angaihhlang paang awl te ka yaak tih, “Pathen kah thlawnna tah tahe ah law poen! Pathen lawng sengpahrang angla amah huham tharana te a tueng sak poen! Tahe tah Messiah lawng amah aana te a tueng sak poen! Metihtiah Pathen haiah pai tih yiin, daai ah mami kah maya manau thli thawlh aka peelkung te vaan adaubenla a voeih poen. ¹¹ Mami kah maya manau thli lawng Tuuca kah thisen rang oen amami lawng a thui awltak oen khaw Seitan te a taa poen; ahimi lawng a hingna peek tih duek ham toe a hep u poen. ¹² Tedawngah nangmi vaan oen vaan ah aka awm boeih lawng awmngaih u lah! tecakhaw dilai oen tuitunlii hamla tah khawmap tangkiik mah aw! Metihtiah Raaibawi tah nang hih tengla va law thuk tih atue soetca bueng ni a awm tite a ming vengah a thin so sut poen.” tila a thui. ¹³ Ruultluung lawng, kai he dilai la dawng thuk la ka awm poen tila a ming vengah, a ca tawngpa aka cuun hutaa te a hu ah khek a vai. ¹⁴ Te hutaa lawng a awmna ramhum huhang la a sawng thaina ham tuhuum bohlang kah a phe pahih te a peek, ruultluung lawng a teek thai nawh ham te huen ah te kumthum coeng kum vaang doencang la awm. ¹⁵ Tecoengah ruultluung lawngah hutaa te tui yawh sak ham a kaa khui kalawng tuiliw te nawl a tha. ¹⁶ Tede dilai lawngah a kaa angg tih ruultluung kaa khuikah aka law tuiliw te a doelh boeih tih hutaa te a bawm. ¹⁷ Ruultluung tah hutaa sawah te a thin sa soeh tih hutaa kah cadil aka deem hue, Pathen kah awlpeek boeih aka vai oen Jesuh lawng a phawng awltak acakla aka phoeih boeih te teek hamla cet. ¹⁸ Ruultluung tah tuitunliikeeng ah te pai.

¹ Tecoengah tuitunlii khuikah sa-tluung aka thoeng hang te ka huh. Te satluung lawngah ki paha oen luu pasarih a khueh tih ki pakhat dawngah bawilumuek pakhat rip a muek u tih a luu dawngah Pathen asal aphaamna miing pakhat rip awm. ² Te satluung tah kaithleng oen lo u, a khow thli tah vawm khow oen lo u tih a kaa tah sathueng kaa oen lo u. Ruultluung lawngah kaithleng te amah kah tharana, a bawingawlhcoen oen aka bo koek ukna aana te a peek. ³ Satluung kah a luu pakhat tah duek puei koei boengha a caak angla awm de a boengha te hoeih koep poen. Dilai thlaang boeih tah a kawpoek rai u tih satluung hu ah bang u. ⁴ Ruultluung tah amah kah aana te satluung tengah pekung la a awm dawngah thlaang boeih lawng ruultluung te a bok u. Ahimi lawngah, “Satluung oen a-u nuem aka lo u? A-u lawng nuem ahih te a teek thai ai?” ti u tih satluung te khaw a bok u. ⁵ Te satluung lawng oekthloenna oen Pathen salphaam ham khaw, thla sawmlii coeng thla hih khui aana khueh ham te a dang. ⁶ Ahih lawngah Pathen oen Pathen miing te khaw, a awmna ahuen amawl oen vaan ah aka awm hue te khaw a tap avoep. ⁷ Pathen kah thlaang thli te teek ham oen ahimi te taa hamla khaw, thlaangphun boeih, ram tawm boeih, awlcawm awlcee oen namtawm sawah ukna aana te khaw a peek. ⁸ Dilai a suen thlan ah miing thut la aka awm tih ngawn la aka awm tuuca kah hingna cabu khuiah a miing aka thuum nawh dilai thlaang boeih lawngah satluung te a bok u ai.

⁹ Yaakna haa aka khueh lawngtah ya hawn seh! ¹⁰ A-u khaw sal la khuen ham aka awm te tah a khuen ngaikhoek ai; a-u khaw samsen oen ngawn hamla aka awm te tah a ngawn ngaikhoek ai. He vengah Pathen kah thlaang thli lawng ueh thaina khueh tih uep-awm la awm ham angoe.

¹¹ Tecoengah atloe satluung dilai khui kalawng a thoeng hang te ka huh. Te lawngtah tuu ki oen aka lo u ki pahih a khueh tih ruultluung angla awl a thui. ¹² Ahih lawng lamhacuek satluung kah ukna aana boeih te amah hai roe ah te a hawna. Duek puei koei boengha a caak tih aka hoeih koep lamhacuek kah satluung te amangkhakla dilai thlaang thli te a bok sak. ¹³ Satluung pahihna lawngah kawpoekraina alentloe te a sai. Thlaang boeih kah mik huh roe ah vaan kalawng dilai la hai a tlaak sak. ¹⁴ Ahih lawngah lamhacuek kah satluung haiah sai sak ham a peek kawpoekraina te a saina rang oen dilai han thlaang boeih te athai alatna. Samsen oen tloek la awm tih boengha a caak de aka hing lamhacuek satluung te hinyah peekna la ahih kah kutsaimuei pakhat dilai thlaang thli te a sai sak. ¹⁵ Kutsaimuei lawng awl a thui thaina ham oen amah te aka bok nawh thli a duek sak thaina ham ah apahihna satluung lawng lamhacuek satluung kah kutsaimuei te hill sang thaina te a peek. ¹⁶ Te satluung lawngah thlaangyiit oen thlaangbo khaw, kuirang thlaanglen oen khawdeng harah khaw, saltamnaa oen thlaangcuem khaw, thlaang boeih te a tal ah, tihnawhtah a bantang kut ah noekna te amangkhakla a khueh sak. ¹⁷ Te noekna te aka khueh nawh tah a-u khaw thaihu te lai thai nawh tih yoeih thai la khaw awm nawh. Te noekna tah satluung miing tihnawhtah satluung miing yuengla a hawna nambar ni. ¹⁸ He dawngah he cuihna hawna ham angoe. Cuihna aka khueh thli lawngtah satluung nambar kah thuingaihna te a toek asam thai ai. Te nambar tah thlaang pakhat kah miing yuengla a hawna tih te nambar te tah yaruk sawmruk paruk ni.

¹ Tecoengah ka dan hang vengah Zaion Tlaang ah tuuca aka pai te ka huh; ahih kah miing oen ana Pa kah miing a tal ah aka thut thlaang thong yakhat coeng thong sawmlii palii hue tah tuuca oen awm haih u. ² Khawhumm awl angla liksaituitlaak awl angla aka riing, vaan kah awl pakhat te ka yaak. Te awl tah tingtoeng aka tum thai thli kah tingtoeng awlding oen lo u. ³ Te kah thlaang ting yakhat coeng thong sawmlii palii hue lawngah bawingawlhcoen haiah khaw, ramsa hing palii oen ahaamca thli haiah te pai u tih ahimi lawng laa thaai te a sak u. Thlaang boeih timkah tlang tangte la aka awm thlaang bueng nawh atah te kah laa thaai te thlaang tloe a-u lawngkhaw sa thai nawh. ⁴ Te thli tah amah oen amah kuemsuem u tih hutaa tawngpa thawlhna aka sai nawh cadawng cuem la awm u tih tuuca a cehna roekk ah a vai u. Ahimi te tah thlaang boeih tim kah tlang tangte la awm u tih Pathen oen Tuuca tengah a nawn lamhacuek ni. ⁵ Ahimi tah hoem awl thui vai nawh; cawttbauh roe kap nawh.

⁶ Vaan alaklung ah atloe vanthlaang pakhat aka sawng te ka huh. Ahih lawngah dilai thlaang boeih nam tawm boeih oen thlaangphun boeih, awlcawm awlcee oen ram tawm boeihboeih ah phawng hamla dungyan awlthang theen a phueih tih, ⁷ Ahih lawngah angaih-hlangla, “Pathen te hinyah lang a alenna te koeh uh! metihtiah ahih lawng thlaangphun boeihboeih awlcekna atue tah a pha poen. Vaan oen dilai, tuitunlii oen ah sawkca tuiva saikung te bok uh! tila a thui.

⁸ Vanthlaang pakhatna te a pahihna vanthlaang lawng avan thoei tih, “Hutaa te tlim poen! Aka lentloe Babilon khawpui te tlim poen! cuk-halhna misur yuusang te thlaang boeih a tuul poen! tila a thui.

⁹ Tecoengah atloe vanthlaang pathumna lawng acuek kah pahih rawi te avan thoei tih, “A-u khaw satluung oen ahih kah kutsaimuei te aka bok tih a kut dawngah tihnawhtah a tal ah noekna aka khueh tah, ¹⁰ Pathen kah thinsana misuryuu, a thinsana boengloeng khuiah tharana abepirla a thloen misuryuu te a awkk ai! Aka aw boeih te tah aciim vanthlaang thli oen tuuca haiah kat haialh dawngah a heem atek ai. ¹¹ Te heemtekna haikhu tah boet ohla asaw la luui hang. Satluung oen ahih kah kutsaimuei aka bok tih satluung kah noekna miing aka khueh boeih ham tah khawyiin khawdaai aphoengna roe awm manawh.” tila angaihhlangla a thui. ¹² Pathen kah awlpeek aka vai thli oen Jesuh tengah uep-awm la aka awm Pathen thlaang thli lawngah tahe vengah ueh thaina khueh angoe. ¹³ Tecoengah vaan kah awl pakhat ka yaak tih, “He he thut lah! tahe kalawng atong vetih Bawipa kah bii te a bi dawngah aka duek tah yotheen aka dawng thlaang ni” tila a thui. Muithla lawngkhaw, “Oeih, soeng tang tang! Bii rai bina kalawng duem u poen ai. Metihtiah a biibi phu tah ahimi oen awm haih poen ai,” tila a thui.

¹⁴ Tecoengah ka dan vengah muui bawk aka yaal te ka huh, te muui sawah thlaanghing oen aka lo u te ngawl, a luu dawngah suilumuek te a muek tih a kut dawngah vin hatt te a pawm. ¹⁵ Tecoeng atah atloe vanthlaang pakhat tempal bok-im khui kalawng va thoeng tih muui dawngah aka ngawl tengah te “Na pawm vin hatt te hawna lang caang te aat loeih; dilai dawngkah caang hiin boeih poen!” tila angaihhlangla a thui. ¹⁶ Tecoengah mui sawah aka ngawl lawngah a pawm vin hatt te dilai dawngah a vawkveek tih caang te a ah. ¹⁷ Tecoengah atloe vanthlaang pakhat vaan kah tempal bok-im khuikah law tih ahih lawngkhaw vin hatt a pawm te ka huh. ¹⁸ Tecoengah hai aka ukkung atloe vanthlaang pakhat bokna-thaang ben kalawng va law. Ahih lawngah vin hatt aka pawm vanthlaang nala te “Na vin hatt te hawna lang dilai dawngkah misur dum khuiah aka awm misur te aat loeih, metihtiah misur thaih tah mun boeih poen!” tila angaihhlangla te a tina. ¹⁹ Tedawngah vanthlaang lawng a pawm vin hatt te dilai sawah a vawkveek tih misurdum khuikah misur thaih te a ah tih Pathen kah thinsana misurtui suina khuiah a sang. ²⁰ Misur thaih te khawpui adauben kah misurtui suina ah a neet tih misurtui suina khui kalawng thisen va thoeng, meng yahnih toela laawng tih pe ngaa yunyan dung.

¹ Tecoengah vaan ah atloe kawpoek rai noekna bohlang tlawhtahaw pasarih te vanthlaang pasarih lawng avan khuen te ka huh. Te kah tlawhtahaw tah hukhuengna poen tih Pathen kah thinsana aboetkoek a tuengna poen ni. ² Tecoengah hai oen aka thoekk u tih thlalang tuitunlii oen aka lo u thaihu te ka huh. Satluung oen ahih kah kutsaimuei oen ah a miing yuengah nambar aka khueh boeih aka taakung thli te ka huh. Ahimi tah thlalang tuitunlii tengah pai u tih Pathen lawng a peek tingtoeng te a pawm u. ³ Ahimi lawngah Tuuca kah laa oen Pathen kah tuihyoeihthlaang Mosi kah laa te a sak u: “Bawipa Pathen Thara koek, metihtlukla na Lenduet tih na thaihu sai he kawpoek rai la a awm, Thlaangphun boeih kah sengpahrang, nang kah lawngpui tah metihtlukla asoeng tih adoeng! ⁴ Bawipa, nang te rih ohla a-u nuem aka awm tang ai! Na lenna te phawng hamla a-u lawng nuem a thana tang ai? Nang bueng ni na ciim, Na sai boeih tah doeng tih thlaang boeih lawng a huh dawngah thlaangphun boeih na haiah law vetih nang te m’bok u ai.” tila Laa a sak u.

⁵ Tecoengah vaan ah tempal bok-im awng u tih a khuiah Pathen awlkamna aka awm Riim-im te ka huh. ⁶ Vanthlaang pasarih, tlawhtahaw pasarih a pawm tih tempal bok-im khui kalawng va law, ahimi lawngah aciimbiitla aka awm thling thling aka aang himbai te a bai tih a raang te sui cihin oen a yeen u. ⁷ Tecoengah ramsahing palii khuikah pakhat lawngah dungyan aka hing Pathen kah thinsana oen aka be suibeeldung pasarih te vanthlaang pasarih te a peek. ⁸ Tempal bok-im tah Pathen kah ruep-awmna oen huham tharana haikhu oen betoet tih vanthlaang pasarih lawng avan khuen tlawhtahaw pasarih te aboeih thlantoe a-u khaw tempal bok-im khuila te kuun thai nawh.

¹ Tecoengah tempal bok-im khuikah awl lawngah vanthlaang pasarih nala te, “Cet langtah Pathen kah thinsana beeldung pasarih te dilai dawngah hok thuk!” a tina te ka yaak. ² Tecoeng atah lamhacuek vanthlaang lawng cet tih amah kah beeldung te dilai dawngah a hok. Satluung kah noekna tacik deng aka khueh thli oen ahih kah kutsaimuei aka bok tengah rih awm tangkiik buthlut tlawh la thoeng. ³ Apahihna vanthlaang lawngah amah kah beeldung te tuitunlii sawah a hok. Tui te thlaangduek kah thisen angla coengg tih tuitunlii ah aka hing boeih te duek. ⁴ Apathumna vanthlaang lawngah amah kah beeldung te tuiva boeih oen sawksipp boeih ah a hok tih thisen la boeih coengg. ⁵ Tui ukkung vanthlaang lawngah, “Aka awm lii oen aka awm poen, Aw, Aciim Pathen, nang kah awlcekna tah doeng!” tila a thui te ka yaak. ⁶ Ahimi lawngah Pathen thlaang thli oen tawngha thli kah thisen a laawng sak, tedawngah ahimi lawng a awkk hamla thisen te na peek poen. Ahimi lawng a dang ham koei te ni a dang u van!” tila a thui. ⁷ Tecoengah bokna-thaang dawngkah awl lawngah, “Bawipa Pathen Tharakoek! Nang kah awlcekna boeih he tah soeng tih doeng!” tila a thui te ka yaak. ⁸ Apaliina vanthlaang lawng amah kah beeldung te khawmik sawah a hok tih khawmik lawng thlaang thli te alingna oen ung sak thaina te a dang. ⁹ Khawmik lawng alingsona oen ahimi te a ung sak tih ahimi lawng he ang tlawhtahaw sawah aana khuehkung Pathen miing te a tap avoep u. Tede ahimi lawng thawlhna te yut u nawh tih Pathen bawilenna te koeh u nawh. ¹⁰ Tecoengah pa-ngaana vanthlaang lawng amah kah beeldung te satluung kah bawingawlhcoen dawngah a hok. Satluung kah ram pum te yiinna lawng a khuk muelh tih te ram kah thlaang thli lawng patang a khang uett ah a lai te a kueh u. ¹¹ Ahimi lawng patang a khang, buthlut a tlawh u dawngah Pathen miing te a tap avoep u. Tede ahimi lawngah athe lawngpui te hoett u nawh. ¹² Tecoengah aparukna vanthlaang lawng amah kah beeldung te Yufratis tuivapui dawngah te a hok. Tuivapui te kak rup tih khawcuuk ben kalawng aka law sengpahrang thli ham lawngpui a awng pe. ¹³ Tecoengah aciim nawh muithla ukong oen aka lo u pathum te ka huh. Te thli tah ruultluung kaa khui kalawng, satluung kaa khui kalawng, tawngha rawlrap kaa khui kalawng ah va thoeng. ¹⁴ Te thli tah raaithe kah muithla la awm u tih kawpoekraina te a sai u. He kah muithla pathum hue tah Thara koek Pathen Khawhin pui ah thik at la raal tuk ham, dilai pum kah sengpahrang boeih tengla ceemphawh hamla cet. ¹⁵ “Hutung lah! Kai tah thlaanghuuen angla ka law ai! Thlaangtim paalak ah yah pawh nawh ham oen atliing ayaalla a yingyawina nawh ham ahuertuela awm tih a hinaak himbai te aka kuem tah yotheen aka dawng ni. ¹⁶ Tecoengah muithla hue lawng sengpahrang thli te thikat la a tun sak tih te huen te Hebru awl la tah Amekidon ti u. ¹⁷ Apasarihna vanthlaang lawng amah kah beeldung te yilh dawngah a hok. Tempal bok-im khui, bawingawlhcoen dawngkah angaihhlangla awl pakhat va thoeng tih, “Boeih poen!” tila a thui. ¹⁸ Tecoeng atah khaw thlappha tih, khaw humm, rekk tla tih likluei angaihhlangla hinghuen. Thlaanghing sai cuek veng kalawng he ang likluei he hinghuen nooek nawh; he ngoen tah likluei boeih lak ah aka tlo koek ni! ¹⁹ Aka bo koek khawpui te thloep thum la rek tih ram boeihboeih kah khawpui thli tah rawk kang poen. Pathen lawng Babilon khawpui te a hilh dam tih amah boengloeng dawngkah misuryuu, a thinsana misuryuu te a awkk sak poen. ²⁰ Tuisanglak boeih tah auh tih tlaang boeih khaw ha-ata boeih poen. ²¹ Vaan dawng kalawng cawi yakhat tluk aka rih reel bohlang lawngah thlaanghing sawah te tla. Rih-awm tangkiik tlawhtahaw reelnu a tlaak dawngah Pathen te thlaanghing lawngah a tap avoep u.

¹ Tecoengah beeldung pasarih aka pawm vanthlaang pasarih timkah pakhat te ka tengla law tih, “Law lah, tuivapui tengah a sak, aka lentloe khawpui miingthang thlaanghalhnu te metihtlukla dantat la a awm ai ti te kan huh sak ai. ² Dilai dawngkah sengpahrang thli lawng ahih oen samphaih u tih dilai thlaang boeih lawng ahih kah cuk-halhna misuryuu te a awkk u” tila a thui. ³ Muithla rang oen vanthlaang lawngah kai te ramhum huhang la n’ceh puei. Te huen ah satluung seen awrh dawng aka ngawl hutaa te ka huh. Satluung kah a pum tawm ah Pathen asal aphaamna ca te a thut. Te satluung lawngah luu pasarih oen ki paha a khueh. ⁴ Te hutaa lawngah alingdiik oen alinghuih himbai te a bai a naak tih sui, ngun, lungto phutlo, latha oen thoekcau u. A kut dawngah hutaa tawngpa thawlhna phu tuiilehkap thaihu oen samphaih raamna oen ah aka bepir sui boengloeng te a pawm. ⁵ A tal ah, “Dilai dawngkah thawlh tuiileh-kap oen thlaanghalhnu boeih kah a manu, Babilon Khawpui,” tila thuingaihna awlhuep miing te a thut. ⁶ Te hutaa lawng Pathen thlaang thli kah thisen oen Jesuh ah thincakla a awm dawngah ngawn la aka awm hue kah thisen a ruui u te ka huh. Te hutaa te ka huh vengah kawpoek la rai tangkiik. ⁷ Vanthlaang lawngah, “N’tu ah na kawpoek a rai? Te hutaa oen hutaa lawng a cit luu pasarih oen ki paha aka awm satluung thuingaihna awlhuep te kavan thui ai. ⁸ Nang lawng na huh satluung te n’cui atah hing de, tahe tah hing tlaih nawh; Ahih tah boetna aka awm nawh ungrawm khui kalawng thoeng hang vetih ngawn la awm ai. Dilai he a suen thlan veng kalawng hingna cabu khuiah miing aka thuum nawh dilai han thlaang thli lawng, n’hu vengah hing de tahe ah aka hing tlaih nawh tih aka hing koep ham koei satluung te a huh u vengah a kawpoek rai u ai. ⁹ He dawngah cuihna oen ming thaina angoe. Luu pasarih he tah hutaa lawng a ngawlhna tlaang pasarih ni. Sengpahrang pasarih te khaw a thuingaihna ni. ¹⁰ Ahimi khuikah pa-ngaa tah tlim poen, tahe ah pakhat lawng a uk tih atloe pakhat te tah va law thlan; ahih te law cakhaw kawlkalh ni a uk ai. ¹¹ N’hu vengah hing tih tahe aka hing tlaih nawh satluung tah apareetna sengpahrang la awm. Sengpahrang pasarih khuiah thuum van tih ahih tah duek hamla te va thoeng.

¹² Nang lawng na huh ki paha he tah ukna aka khueh thlan sengpahrang paha ni; tede ahimi tah satluung oen thik at la khawnoek pakhat khuiah uk rip van hamla aana aka dang thlaang thli ni. ¹³ He kah sengpahrang paha boeih lawng mengtengna khat bueng kang a khueh u tih ahimi lawng satluung tengah amami kah tharana huham oen aana te a peek u. ¹⁴ Ahimi lawngah Tuuca te a teek u ai, tede tuuca oen amah lawng a khue tih a tuek thlaang thli oen uep-awm hubang thlaang thli lawngah ahimi te a taa ai, metihtiah ahih tah bawi boeih kah Bawipa oen sengpahrang boeih kah Sengpahrang la awm,” tila te a thui.

¹⁵ Vanthlaang lawngah, “kai tengah Thlaanghalhnu lawng a ngawlhna tui he tah pengram boeih, thlaang boeih, thlaangphun boeih oen awlcawm awlcee ni. ¹⁶ Nang lawng na huh satluung oen ki paha lawngah thlaanghalhnu te a thina u ai; Ahimi lawngah thlaanghalhnu kah a khuen boeih te a rot pe u vetih atliing ayaalla a ceh taak u ai; ahih kah a thi asa te a caak u vetih hai dawngah a tih ai. ¹⁷ Metihtiah Pathen kah awl asoep thlantoe tah, ahimi lawng amami kah thara huham ukna te satluung tengah kaw at la a peekna u thai ham Pathen lawng ahimi kah thinkaw khuiah amah kah kawngaihna te a khueh pe.

¹⁸ Nang lawngah hutaa na huh te tah dilai sengpahrang boeih ukkung alentloe khawpui ni,” tila a thui.

¹ He coengah atloe vanthlaang pakhat vaan kalawng a rum thuk te ka huh. Ahih lawng saithaina aana bo hlang a khueh tih a aangna lawng dilai pum a thue rawngtheng. ² Ahih lawng angaihhlangla paang tih: “Hutaa te tlim poen! Babilon khawpui tah tlim poen! Te khawpui tah raaithe thli oen muithla ciimcaih nawh thli awmna ahuen la tahe tah coeng poen; tuiilehkap oen thina koei va phun soeprep a khuiah awm u. ³ Metihtiah thlaangphun boeih lawng ahih kah misuryuu te a awkk u poen, ahih kah cuk-halhna misuryuusang te a awkk u poen. Dilai dawngkah sengpahrang thli lawng ahih oen ah cuk-halh samphaihna a sai u tih a kuemsuem u thai nawh apueh ngaihna lawng dilai dawngkah thaihu yoeikung thli te a len sak poen,” tila a thui.

⁴ Tecoengah vaan kah awl tloe ka yaak, “Law uh, ka thlaang thli aw! Ahih teng kalawng law u loeih! Ahih kah thawlhna dawngah baawl u boel; Ahih kah yawkk ham koei dantatna dawngah thuum u boel!

⁵ Metihtiah ahih kah thawlhna tah khat sawah khat tlingtloen u tih vaan angla sang; Ahih kah tharana te Pathen lawng a poek khuep. ⁶ Ahih lawng nangmi thekhana angla ahih te thekhana u van; A saina boeih dawngah arepla thung pe uh. Nangmi lawng na awkk ham te athiipla a sai van angla ahih lawng a awkk ham boengloeng te khuibok ah athiipla sai pe u van. ⁷ Amah oen amah thangpawm u tih a awmtheenna taring ah patang raina oen kopaangna te pe u van. Metihtiah a kaw dang oen ah, ‘Sengpahrang bawinu la ka ngawl, Kai tah huhainu nawh ni Kawthena mevengah khaw ka ming roe manawh,’ ti.

⁸ He tila a ti dawngah hin at maiah ahih te tlawhtahaw lawng a tlaak thil ai, tlawhnatna, kawthe rungrahna oen khawkhana lawng a tlaak thil ai. Ahih awlcekkung Bawipa Pathen tha aka ra lawng ahih te hai dawng a tih ai.” ti. ⁹ Dilai dawngkah sengpahrang thli, ahih oen hutaa tawngpa thawlhna oen ah cuk-halhna dawngah aka baawlneeng haih hue lawng ahih a ungna hairawng dawngkah haikhu te a huh u vengah, te khawpui te a rah u ai. ¹⁰ Ahih kah patang khangna te ahimi lawng a rih u dawngah athlahlangla pai u. Ahimi lawng, “Khawmap tangkiik! Rih awm tangkiik mah aw! Aka lenkoek oen tha aka ra koek Babilon khawpui! khawnoek pakhat khui maiah dantat la na awm poen!” ti u. ¹¹ Dilai saw kah thaihu yoeikung thli lawngkhaw ahih te a rah u tih lungnat a yaak u, metihtiah ahimi kah thaihu te a-u khatca lawngkhaw lai tlaih nawh. ¹² Ahimi kah, sui, ngun, lungto phutlo oen latha; hisa haldoel oen kut tah hi-acuu himbai hinguih, pu hisa oen himbai lingdiik; thingcang phutlo phun soeprep, vueinaw oen a sai thaihu cungkuem oen ah thingphutlo, ruhum, thii oen ah lungto abawk oen a sai thaihu, ¹³ Thingsa thing, brue, huihthlutna riimtuui, mura oen farankinsen; misuryuu oen olifsitui, sangvutvaai, vaitaw, panaa oen tuu, marang oen ranglengg thli, saltamnaa oen thlaanghing khaw lai u thai nawh. ¹⁴ Thaihu yoeikung thli lawng ahih nala te, “Nang lawng khuehtoen ham na ngaih kaawn theen boeih tah ha-ata kang poen tih na bawina oen awmtheenna boeih tah khum poen, meveng khaw te ang kaawn theen te na dang koep tlaih manawh!” a tina u. ¹⁵ Te khawpui khuiah tangthung tangleng tih kuirang la aka coeng thaihu yoeikung thli lawng ahih kah patang khang te a rih u vetih athlahlangla pai u ai. ¹⁶ Ahimi lawng rap u vetih lungphit laithai ruila, “Khawmap tangkiik! Aka lentloe khawpui, Nang ham rih awm tangkiik mah aw! Hisa haldoel himbai hinguih oen himbai lingdiik na bai na naak tih sui awi-anaak, lungto phutlo awi-anaak oen latha oen ah na thoek na cau u! ¹⁷ Tede khawnoek khat khui maiah na bawi na rengna tah ha-ata boeih poen!” tila rap ai. Tuisangphaw boeih uktemkung thli oen khawlawng cet thli tuisangphaw dawngah bii aka bi boeih tuitunlii ah biibina oen bungpui riilcang aka khuut boeih lawng a thlahlangla pai u tih, ¹⁸ te khawpui a ungna hai-alh haikhu te a huh u vengah, “He ang alentloe khawpui angla atloe khawpui awm nooek nawh!” ti u. ¹⁹ Ahimi lawng a luu dawngah laivaai oen phull u tih rungrah oen lungphit laithai ruila, “Khawmap mai poen! He khawpui ham rih awm tangkiik mah aw! Tuitunlii ah tuisangphaw oen thaihu aka yooei boeih lawng ahih kah bawina oen kuirang la coengg u! tede khawnoek pakhat khui maiah a bawi a rengna a auh boeih mai,” ti u. ²⁰ Vaan nang, te khawpui rawk dawngah awmngaih lah! Pathen kah thlaang thli oen celtuih thli oen ah tawngha thli awmngaih u lah! Nangmi sawah a saina boeih dawngah Pathen lawng ahih te awl a cek poen!

²¹ Tecoengah thara tangkiik van-thlaang pakhat lawng caang a neetna lungto sumngawl teh van aka bohlang lungto pakhat te a lawh tih tuitunlii khuila a dawng thuk, “He tila Babilon khawpui tah dawng thuk la awm vetih meveng khaw huh koep la awm tlaih manawh. ²² Riingding tingtoeng awlding oen laa sak awl theen, a tum phiviit awlding oen ah pengsara tum awl te meveng khaw yaak la awm tlaih manawh! ²³ Hai-im dawngkah haivang te metuek khaw na khuiah hu u koep tlaih manawh; Cadawng yulokung oen tuemnu hulaa vaa sak awmtheen awl meveng khaw na khuiah ya tlaih roe manawh. Nang kah tangthung tangleng thli tah dilai pum ah huham thara aka awm koek ni, aka soeng nawh miklet thoemna oen dilai pum ah huham tharana aka awm koek ni, aka soeng nawh miklet thoemna oen dilai thlaang boeih na thai na latna poen. ²⁴ Tawngha thli oen Pathen thlaang thli oen ah dilai dawngah a ngawn thlaang boeih kah thisen te khawpui khuiah a huh u dawngah Babilon tah dan a tat poen.

¹ Tecoengah vaan ah thlaangping kah vupaang awl angla ka yaak tih, “Pathen tah koeh u lah! Thlawnna, ruep-awmna oen tharana tah mami kah Pathen amah koe ni. ² Ahih kah awlcek tah doeng tih soeng. Dilai he cuk-halhna oen aka phekung thlaanghalhnu te ahih lawng dan a tat poen. Pathen kah tuihyoeihthlaang boeih te a ngawn dawngah ahih te dan a tat poen,” tila vupaang u. ³ Ahimi lawng paang u koep tih, “Pathen tah koeh u lah! Khawpui a ungna hairawng dawngkah haikhu tah ayoeyahla dungdung tho hang,” ti u. ⁴ Ahaamca kulpalii hue oen ramsa hing palii hue lawng buekuep u tih bawingawlhcoen dawng aka ngawl Pathen te a bok u. Ahimi lawng, “Amen! Pathen tah koeh u lah!” ti u.

⁵ Tecoengah te kah bawingawlhcoen dawng kalawng awl pakhat va law tih, “Amah kah tuihyoeihthlaang thli oen a thlaang boeih ayiit abo, amah aka hinyah thlaang boeih, mami kah Pathen te koeh u lah!” ti. ⁶ Tecoengah thlaangping kah paang awl angla liksaituitlaak awl angla, khawhumm rekk tlaak awl angla ka yaak. “Bawipa tah koeh u lah! Mami kah Bawipa, Thara Pathen tah Sengpahrang la a awm dawngah koeh u lah! ⁷ Awmngaih u silang tah awmtheen boenn u lah sih; alenna te koeh u lah sih! Tuuca kah yului poei atue tah khoek poen, a lawh ham koei tuemnu hulaa lawngkhaw coekroekla thloeihthlam u poen. ⁸ Ahih lawng a buen anaak ham thlipthlip aka aang hisa haldoel te khaw a peek poen,” ti u. (Hisa-haldoel ti he tah Pathen thlaang thli kah thaihu theen a sai te ni)

⁹ Tecoengah vanthlaang lawng ka tengah, “He he thut lah; Tuuca yului poei kah a ceel thlaang hue tah yotheen aka dawng thlaang ni,” n’tina. ¹⁰ Ahih te bok ham a khow kungah ka buekuep, tede ahih lawng, “He tila sai boel! Kai tah nang oen atloe aka oeng hue oen ah Jesuh lawng a phawng awltak aka phoeih rapsaat hue angla tuihyoeihthlaang pakhat van ni. Pathen mah bok lah!” n’tina. Jesuh lawng a phawng awltak lawng ni tawngha thli kawthawhna a peek.

¹¹ Tecoengah vaan aka awng u te ka huh tih, te ah te marang bawk pakhat awm. Te marang bawk aka cit te tah Uep-awm oen Awltak a miingna; doengna oen awl a cek tih ceemraal khaw a tloek. ¹² Amik rawi tah haialh oen lo hih tih a luu dawngah bawi-lumuek yahawh hlang te a muek. Amah bueng lawng a ming doek tih thlaangtloe a-u lawngkhaw thuingaihna a ming nawh miing te a pum dawngah a thut. ¹³ Ahih lawng thisen oen a nok baidung te a bai. A miing tah “Pathen Awl” a miingna. ¹⁴ Vaan raalkap thli lawng hisa haldoel aciimbiit abawk te a bai u tih, marang bawk te a cit u tih a hu ah a vai u. ¹⁵ A kaa dawng kalawng samsen aka hatt pakhat va thoeng, te oen ah ram boeihboeih te a taa ai. Ahih lawngah thii cungpoelh oen ahimi te a uk vetih Bawilen Pathen thinsana misur neetna khuiah misur te a neet ai. ¹⁶ A himbaidung oen a phai dawngah: “sengpahrang boeih kah Sengpahrang oen bawi boeih kah Bawi,” tila a thut. ¹⁷ Tecoengah vanthlaang pakhat khawmik dawngah aka pai te ka huh. Ahih lawng khawhi ah aka sawng va boeihboeih te, “Law u lah, Pathen kah bawilen buhlawi veel hamla va tun u lah! ¹⁸ Law u langtah sengpahrang thli, raalbawi thli oen raalkap thli kah thiasa te ca u lah, marang thli oen marang aka cit thli kah thiasa oen ah thlaang boeih kah thiasa, saltamnaa oen thlaangcuem thli kah thiasa, thlaang yiit thlaang bo boeih kah thiasa te ca u lah!” tila angaihhlangla paang. ¹⁹ Tecoengah marang aka cit thlaang oen ah a raalkap thli te teek hamla satluung oen dilai dawngkah sengpahrang thli oen ah a raalkap thli a tun kueng te ka huh. ²⁰ Satluung oen ah ahih kah haiah kawpoekraina aka sai tawngha rawlrap te a tuuk haih tih thong ah a thlaak u. (Te kah tawngha rawlrap tah satluung miknoekna aka khueh thli oen satluung kah kutsaimuei aka bok thli te kawpoekrai saina oen aka thailatnakung te ni) Satluung oen tawngha rawlrap te pahih bokla kat hai-alh khuiah a hing sailapla a dawng. ²¹ Marang aka cit thlaang kah a kaa dawng kalawng aka thoeng samsen oen ahimi kah raalkap boeih te a ngawn; Va boeih lawng ahimi kah thiasa te ahahla a caak u.

¹ Tecoengah vanthlaang pakhat lawng boetna aka awm nawh ungrawm dung te awngna caabi oen thiirui arih hlang a kut dawng a pawm tih a rum thuk te ka huh. ² Ahih lawng-ah suenyan kah ruultluung Raaibawi tihnawhtah Seitan te a tuuk tih kum thong khat khui khawh hamla thiirui oen a piin. ³ Vanthlaang lawngah ruultluung te aboetna aka awm nawh ungrawm khuila a voeih tih ungrawm te a khaih khoep, kum thongkhat aboeih thlan atah nam tawm thlaang thli te thailatna tlaih nawh ham tacik a deng rap poen. Tecoeng atah kawlkalhca a thlah koep ai. ⁴ Tecoengah bawingawlhcoen thli te ka huh tih, te bawingawlhcoen dawngah aka ngawl hue tah awlcekna aana a peek te ka huh. Jesuh lawng a phawng awltak oen Pathen awl te a thui u dawngah a ngawn thlaang thli kah muithla boeih khaw ka huh. Ahimi lawngah satluung oen satluung kah kutsaimuei te khaw bok u nawh tih a tal ah khaw, akut dawngah khaw satluung kah miknoekna te khueh u nawh. Ahimi tah hing koep u tih Khrih oen sengpahrang angla kum thongkhat khui a uk u. ⁵ (Atloe thlaangduek thli tah kum thongkhat a boeih thlan khui tah hing u nawh hun). He tah thlaangduek thawhna lamhacuek ni. ⁶ He kah thlaangduek thawhna lamhacuek ah aka thuum thli tah awmngaih u tih yotheen aka dawng tangkiik ni. A pabe duekna lawng ahimi sawah n’tu aana tehca khaw khueh tlaih nawh; Ahimi tah Pathen oen Khrih kah khawsoeih la awm u vetih Khrih oen kum thongkhat khuiah ukkung la awm haih poen ai.

⁷ Kum thongkhat te a boeih coengah, Seitan te thong khui kalawng a thlah u ai, ⁸ dilai pum khawboet ram boet ah aka darh u thlaangphun boeih te thailatna ham cet ai, te tah Gog oen Magog te ni. Seitan lawngah ahimi te apum boeih la ceem thawh sak ham a cawi vetih te thli tah tuitunlii keeng kah divin lai yoeh la yahawh. ⁹ Ahimi tah dilai pum ah darh khonghak tih Pathen thlaang thli a awmna huen oen Pathen lawng a lungna khawpui te a veel khoep u. Tede vaan kalawng hai tla thuk tih ahimi tah ung thloep. ¹⁰ Tecoengah ahimi aka thailatna Raaibawi te satluung oen tawngha rawlrap thli a voeihna huen kat hai-alh khuila a dawng; te huen ah ahimi tah dungyan toela yiin oen daai patang a khang ai.

¹¹ Tecoengah bawingawlhcoen abawk bohlang oen te kah bawi-ngawlhcoen dawngah aka ngawl thlaang te ka huh. Dilai oen vaan tah ahih teng kalawng aloela thoeih nawng tih khum boeih poen. ¹² Tecoengah thlaangduek ayiit abo bawingawlhcoen haiah a pai u te ka huh. Cabu thli te a daih, tecoengah cabu tloe hingna cabu te a daih u. Te cabu dawngah amami kah saina khawboe ramlang a thut pe van angla thlaangduek thli te awl a cek u. ¹³ Tecoengah tuitunlii lawng amah khuiah aka duek te a peek. Duekna oen celkhui khaw lawngkhaw thlaangduek a tuuk te a peek. Thlaangduek boeih te amami kah a saina angla awl a cek. ¹⁴ Tecoengah duekna oen celkhui khaw te haialh khuila a voeih. (He kah haituilii tah apabe duekna ni.) ¹⁵ Hingna cabu dawngah a miing a thut nawh thlaang boeih te tah haituilii khuila a voeih u.

¹ Tecoengah vaan thaai oen dilai thaai ka huh, lamhacuek kah vaan oen dilai tah khum poen tih tuitunlii khaw awm tlaih nawh. ² Aciim khawpui Jerusalem thai tah a vaa oen huh u hamla roekbah u tih coekroekla aka thloeihthlam u tuemnu hulaa angla Pathen tengkah vaan kalawng a law thuk te ka huh. ³ Bawingawlhcoen dawng kalawng awl angaihhlangla a thui te ka yaak: “Tahe tah Pathen im te thlaanghing tengah awm poen! Pathen tah ahimi oen awm haih vetih ahimi tah Pathen kah thlaang la awm poen ai. Pathen amah roe te ahimi oen awm haih vetih ahimi kah Pathen la awm poen ai. ⁴ Ahimi kah mikphi boeih te Pathen lawng a huih pe poen ai. Te huen atah duekna roe awm tlaih nawh vetih kawthe lungnat yaakna, rungrahna oen tlawhnatna khaw awm tlaih manawh. Thaihu ruem boeih tah khum kang poen,” ti.

⁵ Tecoengah bawingawlhcoen dawng aka ngawl lawngah te, “Tahe tah thaihu cungkuem soeprep te athaaila ka sai pan boeih poen, he kah awl he thut lah, metihtiah he awl boeih he tah soeng tangtang tih uepna koei awl ni,” tila a thui. ⁶ Tecoengah ahih lawngah, “Bii ka coeng poen! Kai tah lamhacuek oen hukhueng koek, atongcuekna oen aboetna koek ni. A-u khaw tui aka hall tah hingna tuibaaptui te ayoela ka awkk sak ai. ⁷ Taakung la aka awm boeih lawngtah ka tengkah thaihu he a dang ai: Kai tah ahimi kah Pathen la ka awm vetih ahimi tah kai kah ca anau la awm ai. ⁸ Tede riyawp thlaang thli, paipi aka thleep thlaang thli, tuiilehkap thinkaw aka khueh thli, Thlaang aka ngawn thli, thlaanghalh paadak thli, Caamna oen mu-uih caakna aka hawna thli, kutsaimuei aka bok thli oen ah hoem awl aka thui boeih hamla ahuen amawl te tah kat hai-alh te ni, te tah apabe duekna ni,” tila a thui.

⁹ Vanthlaang pasarih timkah pakhat, tlawhtahaw aboetna koek pasarih oen aka bepir beeldung pasarih aka pawm te ka tengla law tih, “Law lah, Tuuca kah a yu, tuemnu hulaa te kan huh sak ai” n’tina. ¹⁰ Muithla rang oen ah vanthlaang lawng kai te tlaang sang cungcikdik la te n’ceh puei. Ahih lawngah Jerusalem Aciim Khawpui Pathen tengkah vaan kalawng aka law thuk, ¹¹ Pathen kah ruep-awmna oen aka aang te n’huh sak. Te khawpui tah lungto phutlo Jaspa angla aang tih Kristol angla ciil. ¹² Te khawpui tah thawhka paha thlaihih oen vawngkulh asanghlang awm tih thawhka toetkung vanthlaang paha thlaihih awm. Te thawhka dawngah te Israel thlaangphun paha thlaihih hue kah miing te a thut. ¹³ Te vawngkulh te khawcuuk ben ah thawhka pathum, aluen ben ah thawhka pathum, akaak ben ah thawhka pathum, khawtlaak ben ah thawhka pathum rip awm. ¹⁴ Khawpui kah vawngkulh te tah lungto paha thlaihih dawngah lungdang a suem tih Tuuca kah celtuih paha thlaihih kah miing te a thut. ¹⁵ Ka tengah awl aka thui vanthlaang lawng khawpui oen thawhka thli oen ah vawngkulh te tahna hamla, tahna sui cungkui pakhat a pawm. ¹⁶ Te khawpui tah ateng palii oen akil palii awm tih ayoei adang van-at la awm. Vanthlaang lawngtahna cungkui oen a tah vengah ayoei adang oen asang tah meng thongkhat ya-ngaa rip awm. ¹⁷ Vanthlaang lawng amah kah a pawm tahna oen vawngkulh te khaw a tah tih asang te pe yahnih thlairuk awm. ¹⁸ Vawngkulh te Jaspa lungto phutlo oen a sai, khawpui te tah suituicii oen a sai tih thlalang angla ciil. ¹⁹ Khawpui a thungna vawngkulh lungdangsuem lungto te tah lungto phutlo phun soeprep oen a thoek acau. Lamhacuek lungdangsuem lungto tah Jaspa lungto tih, apabena tah sapfaiar lungto; apathumna tah aakat lungto, apaliina tah imaral lungto; ²⁰ apa-ngaana tah onik lungto, aparukna tah karnelian lungto, pasarihna tah krisolaih lungto, pareetna tah beril lungto, pakuana tah topas lungto, pahana tah khalsidoni lungto, thlaikhatna tah tarta lungto, thlaihihna tah ametis lungto phutlo oen a sai. ²¹ Thawhka paha thlaihih te latha paha thlaihih oen a sai tih thawhka pakhat te latha pakhat oen a sai. Khawpui khuikah lawngpui tah suituicii oen a sai tih thlalang angla ciil.

²² Te khawpui khuiah tempal bok-im ka hu nawh, metihtiah Thara koek Bawipa Pathen oen Tuuca tah te kah tempal bok-im la awm poen. ²³ Te khawpui dawngah khawse oen thlavaang khaw ngoe tlaih nawh, metihtiah Pathen kah ruep-awmna te aang poen tih tuuca te haivang la awm poen. ²⁴ Dilai dawngkah thlaangphun boeih lawngah te aangna oen ah yingyawi u vetih dilai dawngkah sengpahrang thli lawng amami kah khawh-rang kaawn thli te khawpui khuila a khuen u ai. ²⁵ Khawpui kah thawhka thli te tah khawyungkhun a awng; te khawpui ah khawyiinna a awm tlaih nawh dawngah thawhka te khai manawh. ²⁶ Thlaangphun boeih lawngah a ruep-awmna oen a bawilenna boeih te khawpui khuila te a khuen u. ²⁷ Tede, te khawpui khuiah aka ciim nawh tah khatca khaw kuun thai manawh, yarau thaihu aka sai thli oen hoem awl aka thui boeih khaw kuun thai manawh. Tuuca kah hingna cabu khuiah miing aka thuum thli bueng khawpui khuiah kuun thai ai.

¹ Tecoengah vanthlaang lawng hingna tui a laawngna tuiva te khaw n’huh sak. Te tuiva tah thlalang angla ciilrikla awm tih Pathen oen Tuuca kah bawingawlhcoen dawng kalawng va laawng tih khawpui khui alaklung ah te laawng. ² Te tuiva keeng khatben khatbang ah hingna thingkung te awm, kum khat ah voei thlaihih thaih tih thla khat ah voei khat thaih poepa tih te thingkung kah aram te tah thlaangphun boeih kah hoeihna la awm. ³ Pathen lawngah a tap avoep thaihu khatca khaw te khawpui khuiah awm manawh. Pathen oen Tuuca kah bawingawlhcoen tah te khawpui khuiah awm tih amah kah a tuihyoeih-thlaang thli lawngah ahih te a bok u. ⁴ Ahimi lawngah Pathen mik-hai te a huh u vetih ahih kah miing te a tal ah a thut ai. ⁵ Khawyiin awm tlaih nawh tih ahimi lawngah hai-im khaw, khawse khaw ngoe tlaih nawh, metihtiah Bawipa Pathen te ahimi kah aangna la awm vetih ahimi tah sengpahrang angla dungyan dungyan toe ukkung la awm poen ai.

⁶ Tecoengah vanthlaang lawng ka tengah, “He awl tah awltak tih ueppangna koei awl ni. Tawngha thli te amah Muithla oen aka be sak Bawipa Pathen lawng adiw thlan ah aka thoeng koei thaihu te amah kah tuihyoeih-thlaang thli tengah aka thui hamla vanthlaang thli avan tuih poen,” tila a thui. ⁷ Jesuh lawng, “Hutung lah! Kai ka law yue poen ai: He cabu khuikah tawngha awl aka vai thli tah yotheen a dawng u!” tila a thui.

⁸ Kai Johan lawngah he thaihu boeih he ka yaak tih ka huh poen. Te thli te ka yaak tih ka huh coengah he thaihu boeih huhsakkung vanthlaang te bok hamla a khow kungah ka buekuep. ⁹ Tede ahih lawngah, “Te tila sai boel! Kai khaw nang oen nang kah maya manau tawngha thli oen ah he cabu khuikah awl aka vai thlaang boeih kah pueipaw van ni. Pathen te mah bok lah!” tila a thui. ¹⁰ Tecoengah ahih lawng, “He ang thli boeih he a thoengna ham atue ayoeica poen dawngah he cabu khuikah tawngha awl he ahuepla khueh boel. ¹¹ Thlaangthe lawngah therana te sai poe mai de selang tah tuiilehkap thlaang te tah kawlot-thahnai la awm poe mai de seh; Thlaangdoeng te tah doeng poe mai de selang tah, aka ciim thlaang te tah ciim poe mai de seh.” tila a thui.

¹² Jesuh lawng, “Hutung lah! Kai tah ka law yue poen ai! Thlaang boeih te a saina taring ah peek rip hamla Kai lawng kutdo kavan khuen ai. ¹³ Kai tah lamhacuek oen hukhueng koek, atongcuekna oen aboetna koek la ka awm,” tila a thui. ¹⁴ Amami kah himbai te aciimla aka suk tah yotheen a dawng u, ahimi tah hingna thingthaih te a caak thai vetih khawpui thawhka khuiah kuun thai u ai. ¹⁵ Te cakhaw cet thawlh lawnghang thli, caam oen mu-uih caakna aka hawna thli, hutaa tawngpa thawlhna aka sai thli, thlaang aka ngawn thli, kutsaimuei aka bok thli, saina oen khawseh, hoem awl thui oen khawseh thlaangthaipalat thli tah khawpui adauben ah awm u ai.

¹⁶ “Kai Jesuh lawng Khrihcabu khuiah aka awm nangmi tengah he thaihu boeih he aka hoe la kamah kah vanthlaang te kavan tuih poen. Kai tah Devid cadil tih aka aang tumpa ni.” tila a thui.

¹⁷ Muithla oen tuemnu hulaa lawng-ah, “Law lah!” tila a thui. A-u khaw he awl aka ya boeih lawngtah, “Law lah!” tila thui van seh. A-u khaw tui aka hall tah law uh;

¹⁸ He cabu dawngkah tawngha awl aka ya thlaang boeih te kai Johan lawng arapcatla ngaithuenna kan peek u: a-u lawngkhaw he cabu dawngkah tawngha awl he khatca khaw a tawm athap atah, he cabu khuiah a thui tlawhtahaw te Pathen lawng ahih sawah dantatna la a hawna ai. ¹⁹ A-u lawngkhaw he cabu dawngkah tawngha awl he khatca khaw a hoett atah he cabu khuiah a thui ahih kah dang ham koei hingna thingthaih caak thaina oen Aciim Khawpui khuiah kuun thaina te Pathen lawng a hoett pe van ai.

²⁰ He thaihu boeih sausi dengkung lawng, “Oe, Ataktang! Kai tah ka law yue poen ai!” tila a thui. Tetih mai hawn seh. Bawipa Jesuh, law mai hawn loeih!

²¹ Bawipa Jesuh Khrih kah lungvatna tah thlaang boeih sawah awm seh. Amen.