FILIPI

FILIPI

¹ Khrih Jesuh kah tuihyoeihthlaang Pawl oen Timote lawng, Khrih Jesuh ah pumkhat la aka awm Filipi khaaw kah Pathen thlaang boeih khrihcabu mawtkung hue oen bawmkung boeih tengah ca kavan pat. ² Mami kah Pathen oen Bawipa Jesuh Khrih lawng lungvatna, ngaimawngna te m’pe hawn seh.

³ Nangmi kan poek vengah nangmi ham awmngaih awl ka thui poepa; ⁴ nangmi boeih ham ka thangthui vengah awmngaihna oen ka thangthui, ⁵ Metihtiah awlthang theen bii bina ah a tong cuek kalawng tahe toe nangmi lawng nan bawm u dawngah ni. ⁶ Tedawngah nangmi tim ah he ang bii theen aka tongkung Pathen lawng Khrih Jesuh Khawhin a pha toe he bii he a bi poe ai tila ka tangna. ⁷ Nangmi he kan thintlawhna ni! He tila nangmi tengah thinkaw ka khueh he khueh ham tueng roe ni. Metihtiah kai he nangmi lawng nan lungduetna tih tahe thong ka tlaak vengah khaw, awlthang theen te yalpawla ka pai puei tih acakna ham bii ka bi vengah khaw Pathen kah peek bii dawngah he nangmi boeih khaw na thuum u van. ⁸ Khrih Jesuh lungbui dawngkah aka law boeih oen nangmi he kan thintlawhna ka ti vengah he awltak ka thui tih Pathen tah mingpueikung la awm. ⁹ Nangmi lawng atheen koek te na tuek thaina ham, nangmi kah lungna lawng cuihhoena tangtang oen ah nuemnai thaina oen haih a roeng tare hamla ka thangthui. ¹⁰ Te dengah ni Khrih Khawhin ah ciimna nawh boeih oen thawlhpeelna boeih kalawng na loeih u ai. ¹¹ Pathen thangpawmna ham oen a ruep-awmna a tuengna ham Jesuh Khrih bueng lawngah peek thai la aka awm moeiboe theenna tangtang oen nangmi kah hingna te betoet ai.

¹² Maya manau thli, ka tengah aka thoeng thaihu he awlthang theen a puungna ham aka bawmcem tangtang la coengg ti he nangmi ming sak ka ngaih. ¹³ He kawngah he, sengpahrang impui aka toet raalkapbu boeih oen he kah thlaangtloe boeih lawngah, Khrih kah tuihyoeihthlaang la ka awm dawngah thong ka tlaak he a ming u. ¹⁴ Tecoengah thong ka tlaakna lawngah he maya manau yahawh ngaai kah Bawipa a uepna te tare acak pe sak, tedawngah ahimi lawng a raal theen tare u tih rih ohla awlthang theen te a thui u.

¹⁵ Thlaang khatsut lawng atah uet-eena thinkaw oen, khatsut lawngtah tawhthaam ngaihna kawpoek oen Khrih awlthang theen te a thui u tangtang, tede khatsut lawngtah thinkaw ciim oen a thui u. ¹⁶ Ahimi lawngtah lungna oen a thui u, metihtiah awlthang theen paipueina bii he Pathen lawng kai m’peek te a ming u dawngah ni. ¹⁷ Thlaangtloe hue lawng atah lungna tangtang oen Khrih kawng te thui u nawh tih amami ham ngaihna kawpoek oen a thui u; ahimi lawng atah thong ah kai ka awm vengah he kai ham raina te sai tare hamla te a poek u.

¹⁸ Tete awlpui nawh ni! Ka awmngaih tangkiik mai ta; asoeng nawh kawpoek oen khaw, asoeng poekna oen khaw, me tih benla khawseh, Khrih kawng te a thui u mak atah ka awmngaih poepa ai. ¹⁹ Metihtiah nangmi kah thangthuina rang oen Jesuh Khrih kah Muithla dawng kalawng aka law bawmna oen ka loeih ngai ai tila ka ming dawngah ni. ²⁰ Ka ngaihna oen ka ngaiuepna tah bii ka bi he meveng khaw tlawlh nawh ham ni, tede me ang atue atang ah khaw, tahe vengah khaw raltheenna oen betoet tih ka duek ka hing ah khaw, Khrih hinyahna hamla ka pum oen ka hingna boeih peek ham he ni. ²¹ Hingna he n’tu nuem? Kai ham tah hingna he Khrih ni. Tedawngah kai ham tah duekna he tharana ni. ²² Tede kai lawng ka hingna rang oen aphu aka awm bii te ka bi thai koei atah ame ang nuem ka tuek lah ai ka ngaai hang sut. ²³ He pahih lawngah kai he n’doek. He hingna he ceh taak tih Khrih oen awm haih ka ngaih tangkiik, te tah atheen ngaai thaihu ni; ²⁴ tede ka hing hun kawinih awlpuila nangmi ham tare theen. ²⁵ He kawngah he ka uep u, ka hing hun ai tila ka ming. Nangmi lawng oengna dawngah na roengna ham awmngaihna te tawm athap hamla nangmi boeih te kan hing puei hun ai, ²⁶ tedawngah nangmi tengah ka awm koep veng atah Khrih Jesuh ah nangmi kah hingna pumkhatla a awm dawngah kai rang oen ah nangmi lawng mik-hai theenna na khueh u tare ai.

²⁷ Tahe ah awlpui tah Khrih kah awlthang lawngah a kuek angla nangmi lawng na hing u ham awm, nangmi tengla ka law thai tih kan huh u vengah khawseh, ka law thai nawh tih kan huh u nawh vengah khawseh, mengtengna pakhat oen acakla na pai u tih awlthang theen oengna dawngah kawngaihna pakhat oen thik at la raal na teek u tite yaak ka ngaih. ²⁸ Nangmi lawng na raal te rih u boel; na thin cak sak uh, te lawngah te ahimi a sung sak vetih nangmi lawng na taa u te a ming sak ai, metihtiah nangmi taana te pekung tah Pathen ni. ²⁹ Tedawngah amah te oeng doek ham bueng nawh tih ahih hamla patang khang ham khaw Khrih kah bii te nangmi m’peek u poen. ³⁰ Tahe ah nangmi tah raal kahna huen ah kai oen bawngyawng haih thai poen. N’cui vengah kai lawng raal ka teek na huh u te ang te, nangmi lawng na yaak u angla tahe toe ah raal ka teek khiing hun.

¹ Nangmi Khrih ah na hingna lawng tha a ra sak tih a lungna lawng nangmi kaw te a reem ahaal sak. Nangmi lawng Muithla oen pawlneengna na khueh u tih pakhat oen khat sawah lungna oen reenna te na khueh u. ² Tedawngah nangmi te he tila kan uen, poekna pakhat la khuehna, pakhat oen khat lungna, thinkaw lungbui khat la khuehna oen ah ka awmngaihna te soep sak u lah. ³ Nangmi lawngah mah ham bueng poekna, oekthloen ngaihna mai oen ah thaihu khat khaw sai boel, thlaangtloe he nangmi lak ah theen ngaai tila poek poepa langtah pakhat oen khat boe-ngai uh. ⁴ Namami ham bueng te huh thai ohla thlaangtloe ham theenna khaw huh thai van ham awm. ⁵ Khrih lawng a khueh kawpoek te nangmi lawngkhaw khueh ham awm. ⁶ Ahih tah Pathen pumsa oen soep yoeyah, tede Pathen oen avan at la awm ham te yawm mangkhak ham poek nawh. ⁷ He lak atah a khueh boeih te amah kawthawhna oen a hoett tih tuihyoeihthlaang la awmna te a lawh Ahih tah thlaanghing angla coengg tih thlaanghing muei-asam la va tueng. ⁸ Ahih tah boe-ngaai tih duek toela awlngaaina lawngpui te a vai tih thinglam dawngah te duek. ⁹ Tedawngah Pathen lawng ahih te asaw sang koek huen ah a pawmsang tih miing tloe boeih lak ah miing luekoek a peek. ¹⁰ Tedawngah Jesuh miing hinyah peekna la vaan ah aka awm boeih, lai han ah aka awm oen dilai dangah aka awm boeih lawngah khuklu oen cuengkueng boeih u vetih, ¹¹ Pa Pathen ruep-awmna ham Jesuh Khrih tah Bawipa ni tila boeih a phawng u ai.

¹² Tedawngah ka lungna ka paya thli, nangmi oen haih ka awm vengah ka awl na ngaai u poepa angla te tahe athla hlang la ka awm vengah khaw, ka awl he na ngaai u ham awlpui koek la awm. Nangmi kah thlawnna asoepna ham birih haitawk oen bii te bi yoeyah uh, ¹³ metihtiah amah kah mengtengna te vai thai ham oen vai ngaihna thinkaw khueh ham Pathen lawng na kaw khuiah bii a bi poepa. ¹⁴ Soeprep boeih te caitoek ohla, oelhtaih u muehla sai uh, ¹⁵ te tila te he dilai dawngah aka awm thlaangthe thli oen thlaangthawlh thli lakli ah Pathen kah thlaangsoep ca anau angla thawlhna aka awm nawh, aciim acaih thlaang la nangmi tah na awm u ai, hingna awl te ahimi na peek vengah te ahimi tim ah vaan ah aka vaang aisi angla aang u lah. ¹⁶ Te tila na sai u atah Khrih khawhin ah nangmi rang oen mik-hai theen ka dang ai, metihtiah kai lawng ka yawmna boeih oen ka bi boeih te apoei-oep nawh ni tite na tueng sak ni. ¹⁷ Nangmi lawng oengna oen na nawn thaihu angla Pathen tengah na nawn u luciik dawngah ka hingna thisen he duei mai cakhaw ka awmngaih vetih nangmi boeih oen haih ka awmngaih ai. ¹⁸ Tetih van la te nangmi khaw na awmngaih u vetih kai oen haih na awmngaih u van ai.

¹⁹ Nangmi kawng awlthang te yaakna oen ka tha a thluena ham Bawipa lawng a kawngaih atah nangmi tengla Timote he kavan tuih yue ai tila ka poek. ²⁰ Ahih bueng oen ah ka kawpoek cah ahih tih nangmi tengah a ngaai huett tangtang. ²¹ Tlaang tloe hue tah amami kah bii bueng te a khuituuk u, Jesuh Khrih kah bii te bi u nawh. ²² Ahih lawngtah bii te a palki tih kai oen Paca angla awlthang theen ham bii ka bi hih te nangmi lawng na ming u. ²³ Tedawngah kamah kah kawng alam he metila a awm tite ka ming pahoei coeng atah ahih te nangmi tengla kavan tuih ai tila ka ngaiuep. ²⁴ Bawipa uepna oen kamah khaw nangmi tengla ka law yue ai tila ka ngaiuep.

²⁵ Mami kah manau Epafroditas he nangmi tengla tuih ham angoe tila ka poek, ahih tah kai oen biibipuei, ceem raal aka tloek haih van tih kai he bawmkung la nangmi lawng na van tuih laipai ni. ²⁶ Ahih lawng nangmi te n’ngaai tangkiik u tih a sa ding nawh tila na yaak u dawngah te a kaw hoe nawh. ²⁷ Ahih tah duek dalh toela tlo tangtang. Tede Pathen lawng a reen, ahih bueng nawh tih kai khaw n’reen van tih ka tengah kawthena bohlang aka law ham koei dawng kalawng ka sa avan sueng sak. ²⁸ Tedawngah ni a hih he nangmi tengla tuih ham ka ngaih tangkiik tih, na huh u vengah na awmngaih u vetih kai kah kawthe khaw dip ai. ²⁹ Tedawngah nangmi lawng ahih te Bawipa ah boenhui pakhat angla awmngaih oen van do uh. Ahih angla aka awm thlaang boeih te van hinyah uh, ³⁰ metihtiah nangmi lawng nan peek thai nawh bawmcemna te ahih lawng peek hamla, Khrih kah bii dawngah duek khaw maa ohla duek dalh toela bii a bi.

¹ Maya manau thli, awlcuina ah thui ka ngaih tah Bawipa oen pumkhat la awmna dawngah awmngaih u lah. Acuek ah kavan thut tangte te thut koep he n’tu la ka poei sak mai nawh, he tila kavan thut koep he tah nangmi na deemna ham ni. ² Athe thaihu aka sai thli, pumsa yahhuivuen reetna aka thui mangkhak thlaang thli ui hue te ngaithuen uh. ³ Asoeng akam taktak yahhuivuen aka reet tah ahimi nawh tih mami he ni, metihtiah mami lawngtah amah kah Muithla oen ah Pathen n’bok u tih Khrih Jesuh ah pumkhatla awmna hingna dawngah te n’awmngaih u. Mami lawngtah asaw ahan kah saina dawngah uepna n’khueh u nawh. ⁴ Atak tang atah te ang thaihu thli te kai lawngkhaw ka uepna thai van ta. Asaw ahan kah saina te ka uepna thai tila thlaang pakhat khat lawng a poek atah te tila poek ham koei la kai lawng akawng alam yahawh ngaai ka khueh. ⁵ Kai tah hin reetna khawhin ah yahhuivuen reet la ka awm, thlaangphun ben ah Israel thlaang, Benjamin phun, Hebru thlaangciim la ka awm. Judah hue kah Phungawl vaina ben ah Farasi la ka awm, ⁶ Kai tah ka tha thlue akcak tih khrihcabu te ka heem ka tek. Phungawl dawngkah awlpeek thli te vaina rang oen thlaangdoeng la awmna ben ah kai tah thawlhna roe awm nawh. ⁷ Tede he thaihu boeih he kai ham thaawnna ni tila ka poek koei te tahe tah sungna ni tila Khrih rang oen ah ka poek poen. ⁸ Te thaihu thli bueng nawh tih; ka Bawipa Khrih Jesuh kah cuihhoena aphu aka awm ngaai rang oen soeprep cungkuem te sungna ni tila ka poek boeih poen. Amah rang oen ah soeprep boeih te ka hoett kang poen; te ang thli boeih te tah kaw-hnot vaiking la ni ka poek mai poen, Khrih ah ka thawnna ham oen ah, ⁹ amah oen pumkhatla awmna ham ni. Tahe ah kai lawng Phungawl vaina rang oen thaawnna kamah kah doengna te ka khueh tlaih nawh. Tahe tah Khrih oengna rang oen m’peek doengna, oengna dawngah akung asut Pathen tengkah aka law doengna ni ka khueh poen. ¹⁰ Kai lawng ka ngaih tah Khrih te ming ham oen ah amah thawhkoepna huham tharana te ming van ham amah kah patang khang te khang van ham oen ah amah angla duek van ham ni. ¹¹ Te tila te kamah roe he duekna kalawng hingna ah thawh koep van ham ka ngaiuep.

¹² He ang thli dawngah he taana ka khueh poen, thlaangsoep la ka awm poen tina nawh ni. Khrih Jesuh lawng amah hamla kai he n’tuuk khak poen tih kai hamla avan khueh kutdo te dang hamla tha ka huer. ¹³ Maya manau thli, kai lawng te ang thli boeih te ka dang poen tila khaw ka poek nawh; tede kai lawng ka sai pakhat tah ka hu benkah thaihu te hilh tih ka hai ben ah aka awm te pha hamla ka yawm. ¹⁴ Tedawngah kutdo dang hamla lansak benla te adoengla poe ka heng, te kutdo tah sawben hingna ah Khrih Jesuh rang oen Pathen kah khuena te ni.

¹⁵ Mami boeih muithla ben ah kawpoek soep la aka awm lawngtah he ang kawpoek he khueh roe hamla awm, tede nangmi timkah thlaang khatsut lawng poekna tloe na khueh u atah te poekna te Pathen lawng nangmi tengah aciimphanla avan tueng sak ai. ¹⁶ Me tih khawseh, mami lawng tahetoe ah n’vai u phung alam angla te hai benla cet u lah sih.

¹⁷ Maya manau thli, ka hingna he nangmi lawng oett u lah. Kai lawng nangmi ham kavan khueh oett koei theenna aka vai thlaang thli te dan u lah. ¹⁸ He kawng he n’hu vengah khaw kavan thui poepa u poen de, tahe ah mikphi oen kavan thui koep: Thinglam dawngah Khrih kah duekna te a hingna oen ah aka raalna thlaang yahawh awm. ¹⁹ Ahimi tah hell ah a lawngpui boet ai, metihtiah ahimi kah pathen tah amami kah pumsa ngaihna te ni. Ahimi lawngah yahna koei thaihu dawngah te oekthloen u tih dilai thaihu koeva thli bueng he a poek u. ²⁰ Tede mami tah vaan ram thlaang la n’awm u tih mami Thlawnkung Bawipa Jesuh Khrih vaan kalawng a law thuk te huerh n’lamtoen u. ²¹ Amah lawngtah mami kah tha aka awm nawh, aka duek thai pum he avan thaw vetih amah kah ruep-awm pum angla avan sai ai, te tila a sai vengah te thaihu soeprep boeih amah ukna huiah aka pha sak huham tharana te a hawna ai.

¹ Tedawngah ka lungna maya manau thli, kan lungduetna u tih kan ngaai u tangkiik! Nangmi kawngah ka kaw hoe tih ka awmngaih tangkiik! Ka lungna maya manau thli, Bawipa dawng na hingna ah te acakla pai uh. ² Eodia oen Sintikhe, reenna kavan bih, Bawipa ah boeinau la na awm hih van angla thinkaw thik-at ham yawm hih. ³ Tecoengah, uep-awm biibipuei, thli nangmi lawngkhaw, he hutaa rawi he na bawm u hamla ka ngaih; metihtiah Klimen oen atloe biibipuei haih, Pathen kah hingna cabu khuiah a miing aka thuum thli boeih oen awlthang theen a puungna ham kai oen haih tha a huer hih tih bii aka bi rawi ni.

⁴ Bawipa oen pumkhatla na awm u dawngah awmngaih poepa u lah. Koep ka thui; awmngaih u lah!

⁵ Thlaang boeih tengah nangmi kah kawdawna te tueng sak uh. Bawipa tah law yue poen ai. ⁶ Me ang thaihu kawngah khaw lakueng u boel, na thangthui veng roekk ah na ngoe boeih te Pathen tengah bih uh; amah tengah uemna thinkaw tang oen bih yoeyah uh. ⁷ Te tila na bih atah thlaanghing kah yaakmingna voel ah aka awm Pathen ngaimawngna lawng Khrih Jesuh oen pumkhat la awmna rang oen ah nangmi kah thinkaw oen lungbui te ading-apuek la avan khueh ai.

⁸ Aboetna ah ka boenhui thli, nangmi lawng na thinkaw te aka theen tih thangpawm koei ataktang thaihu, aphu aka awm thaihu, aka soeng tih aciim thaihu, lungna koei thaihu, hinyah koei thaihu oen be sak uh. ⁹ Kai tengkah na cang u tih na dang u te ka awlthui dawngkah khawseh, ka saina dawngkah khaw pahih bokla sai u van. teahtah mami ngaimawngna pekung Pathen te nangmi oen haih awm ai.

¹⁰ Atue san hlang a awm coengah nangmi lawng kai he nan do nan dan koep u tih bawipa oen ah pumkhatla awmna rang oen ka awmngaih tangkiik. Nangmi lawng kai nan dodanna te na toeng pak u ka ti ngaihna nawh ni, nangmi lawng dodanna te tueng sak ham atue theen na dang u nawh ka ti ngaihna ni. ¹¹ Nangmi lawng kai he nan ngaai nan laakna tlaih nawh tila ka poek dawngah he tila ka thui moenih, metihtiah kai tah ka khueh duen oen ka ngaai atluepna thai ham ka cang poen dawngah ni. ¹² Voetna oen awm khawseh, acoeihpokla khueh toen khawseh me ang nuem tite ka ming poen. Tedawngah ame huen ah khaw, metuek vengah khaw, ka bung ahah ah khawseh, buh mueh la ka awm ah khaw seh, yahawh hlang ka khueh ah khaw, ayawlca ka khueh ah khaw ngaikhuek la awm thai ham he ang ahuep ahel he ka cang poen. ¹³ Khrih kah peek huham tharana oen me ang thaihu khaw taana hamla tharana ka khueh poen.

¹⁴ Tede raina ka tawng vengah nan bawm u he nangmi kah theenna ni. ¹⁵ Nangmi Filipi khaaw kah thlaang thli lawng atheencala na ming u, Macidonia kalawng ka cet tih Awlthang Theen ka thui cuek vengah te nangmi khrihcabu bueng lawng ni bawmna nan peek u, nangmi bueng lawng ni ka thawnna oen ka sungna khaw nan talawng u. ¹⁶ Tesalon khaaw ka awm vengah bawmna ka ngoe vengah te te vaikhat bueng nawh mai bawmna te navan pat u. ¹⁷ Kai lawng kutdo dang ngaih bueng maiah nawh tih; nangmi kah cayin cabu dawngah khaw athawnna, apuung ataaina te huh hamla ka ngaih. ¹⁸ Tecoengah nangmi kah thaihu pat boeih tite kavan thut tih akhoek anoen lak ah yahawh ngaaila navan pat u! Nangmi kah kutdo boeih te Epafroditas lawng avan khuen tih tahe atah ka ngoe boeih te ka khueh poen. Te ang thli boeih te Pathen lawng a ngaih tih a do luciik, Pathen tengah nawn la aka awm riimtuui angla awm. ¹⁹ Kai kah Pathen lawng amah kah bawilen kuirangna oen nangmi kah ngoena boeih te Khrih Jesuh rang oen ah m’peek ai. ²⁰ Mami kah Pa oen Pathen tengah ruep-awmna tah dungyan toe awm hawn seh! Amen.

²¹ Khrih Jesuh kah a koe la aka awm, Pathen kah thlaang nangmi pakhat rip te kan toei u. He ah he kai oen aka awm haih boenhui hue lawngkhaw nangmi te n’toei u, ²² He ah aka awm Pathen kah thlaang boeih lawng n’toei u tih awlpuila Sengpahrang sangluel impui ah aka awm thli lawngkhaw n’toei u.

²³ Bawipa Jesuh Khrih kah lungvatna tah nangmi boeih sawah awm hawn seh.